2 Timoteo
11 Jesucristonö wale lä shimöleno wei, ei camiyä Pablo cä ya, Yai Bada tänö wale ca̦i shimaö fa bufinö. Yai Bada tänö täbä a̦fa ba̦limi lä wäyäö wei ya tä a̦ wäyäö, Jesucristonö täbä lä ba̦limiblamaö wei tä a̦ lä cui. 2 Cafä Timoteo bä nofi lä ijilumale wa lä cui lija, ei ya tä a̦ oni shimaö, bä lä nofimale wa lä cui lija. Bei. Fayä Yai Bada lija wa shi̦lo bayeliblamobä, Bada tä Jesucristo lija ca̦i. Wa nofi shi̦lo ojodaboböbä. Showadi wa nofi ca̦i asiboböbä. Wa bufi shi̦lo ca̦i yanöcömaboböbä. 3 Cafä bä nö bayeli nacaö ja, Yai Bada ya wa̦ lä fuale lija ya bufi a̦fa doblalou wäyämou talei. Judio yamacö nö badabönö a wa̦ fuaö lä showaono wejei a lä cui lija. Bei ya bufi jamö ya tä wa̦lidiwä lämabou mlai ja, ö̦jö lijamö ya dodijidawä cua lä cule. 4 Wa da ö̦cöblei ya tä nofi jaducäbou yalo, didi däjä ma cui, jalu däjä ma cui, bä bufijaö. Bä wäyäcu dablaö co̦o däjä, ya bufi nia doblalou dodijio. 5 Bufi cadidilanö, Jesucristo wa nofi yai lä mölabou wei ya tä nofi ca̦i jaducäbou. Amiyäfä Loida a lä cuinö, ö̦jö a nofi mölabou balöoma, naafä Eunise a ca̦inö. Fei däjä cafä wa ma cuinö, wa nofi ca̦i lä mölabou wei ya tä ca̦i daö. 6 Bä nofi tabou waiquia cudeenö, bä bufi jaducäblamaö co̦a lä cule. Cafä lija ya imicö lä maqueono wei däjä, cama wa ebä bayeliblabä Yai Bada tänö wa dobäa cadidilema. A da ojodamo, ö̦jö lä. 7 Bämacö quilibä Yai Bada tä Bufi jibäamono malä mlai. Bämalecö nö yai wa̦lojomabobä a. Bämalecö bufi yai nofimabou. Bämacö wasöobä, bämalecö bufi yai taamaö. 8 Bada wa tä a̦fa nia lä wäyäö wei tä ja, a quili dijä, ö̦jö lä. Cristo tä a̦ nowa ja, wale fe ma labolajei ma cui, jai wale daimi a cublo dijä. Jesucristo yama tä a̦ dodijidawä wäyäö yalo, yamalecö nö ma bleaamalajei ma cui, a yädäo quili dijä. Yai Bada tä lofotenö a yai da yädäicu. 9 Ö̦jönö bämalecö fucälema. Cama bäma ecö dodijidawä yaiobä bämalecö nacalema. Bämacö fa dodijanö mlai. Ma, bämalecö cadidaö bufi fa doblaonö, bämalecö li cadidilema, bämalecö nofi ojodabobä. ¿Ö̦jö tawä? Mashita a tablaö showao mlao däjä, ö̦jö tä nabä cadidou showaoma. Bämacö nia lä bayeliblou wei, Jesucristo a nia shimaö showaoma. 10 Ya̦cumö tä bejedi fa wawäblalunö, bämalecö nia lä fucäaö wei a Jesucristo wawäblaliyoma. Ö̦jö a lä cuinö bämacö nia nomaö shi lä wa̦lijio wei tä joyalema. Jesucristo dodijidawä tä a̦ lä wäyämou wei tä a̦nö, dodijidawä bämacö nia yai lä cudio wei tä wawäa nomöjömalema. Bämacö nia ba̦limi lä cuo wei tä ca̦i. 11 Jesucristonö wale shimabä wale yailema. Cama etä a̦ lä dodijidai tä a̦ ja ya bä yömölabä, ya bä ca̦i damabä. 12 Inaja ya cuaaö cudeenö wale fe ma labou wejei ma cui, ya bufi quilijoimi. Ma. Ya bejedi lä bufibole a lä cui ya malä dale. Ya etä a̦ wäyäö cuaabä wale shimölema. Yai Bada tänö täbä jimabä etä cublou showao mlao däjä, cama etä lofotenö tä a̦ nia wäyämamou showao fe yadio. Ö̦jö ya tä daö. 13 Cafä lija ya tä a̦ lä wäyäno wei tä a̦ yai bejedi. Jesucristo wa nofi mölabolanö, wa bufi ca̦i nofilanö, tä a̦ nofi yai da cadidibo. 14 Ö̦jö tä a̦ lä bejedi wei tä a̦ ja, Yai Bada wa tä Bufi lä bälömabolenö wa dobäa waiquilema, wa tä a̦ wäyäbä. 15 Asia jamö bä Jesucristo bufilewä lä bälöblai bänö, wale waibou majöa lä culajei. Wa tä a̦ ji̦libole cätä. Fijelo a ma cuinö, Emojeni a ma cuinö wale waiböö majöa lä cule. 16 Onisifo a lä cuinö, showadi wale bufi shi̦lo lofotoamayoluu showao fe yadioma. Eja ya shi lä wa̦limabolajei jamö, duo shicö badanö wale ma o̦cabolajei ma cui, quilii mlai ja ö̦jönö wale fe waloo fe yadioyoluma. Inaja wale taamaö yalo, cama ebä ca̦i lä cui ya bä bluca bayelimaö talei, Yai Bada tänö bä nofi bluca ojodabobä. 17 ¿Ö̦jö tawä? Loma jamö a fa waloiquiyonö, wale dayäablalaö shi jalimoma. Ya̦cumö eja wale fe laa dalaleyoluma. 18 Efeso jamö wale showadi lä bayeliblano wei wa tä ca̦i daö waiquiwä. ¿Ö̦jö tawä? Ö̦jö cudeenö, Bada tä lija ö̦jö ya nö bayeli nacaö, Yai Bada tänö täbä jimabä etä cublou däjä, a nofi yai ojodabobä.
21 ¿Ö̦jö tawä, U̦asi? Jesucristo lija wa yädäa yalo, showadi wa nofi nia ojodabou. Ö̦jö cudeenö, a bufi shi̦lo da lofotoicu, ö̦jö lä. 2 Ya bä bluca da yömölablei däjä, cafänö wale a̦ mada ji̦liablei. Ö̦jö ya tä a̦ da wäyäblei, ai bä lija wa tä a̦ nia wäyäö fe dolemou, bä nia yai lä bejedimou wei bä lä cui bä lija. Tä a̦ wäyäö fe dolemou nomöjöobeje, bä yai lä cui bä lija. 3 Wayu bä fuu däjä bä nö bleaaö ma cui, bä fuu fe lä yadio weinaja, cafä a ca̦i da cuaa, camiyä yamacö lä cuaaö weinaja showawä. Jesucristo a showawänö wa ca̦i malä fuole. 4 Sodado bä wayu itou däjä, shomi tä jamö bä nia yabäcamou lä mlainaja, cafä wa ma cui wa nia cuaaö. ¿Ö̦jö tawä? Bä ca̦i lä fuu wei a bada lä cui, ö̦jö a bufi yai doblamabou bufi doblaoje yalo, shomi tä jamö bä yabäcamoimi. Inaja showawä, cafä wa ca̦i lä fuole wa bufi ca̦i doblamabou cuo mö feduobä. 5 Inaja showawä, bä lofote wabayobä jamö ma cui, “Ei a shi̦lo yai lofote”, bada bä nia cuu si ijejeomi. Tä nabä yai lä shimamou wei jamö a cadidoimi ja, a wa̦fa nia wäamoimi. Camiyä bämacö ma cui, bämacö cadidoimi ja bämacö nia dobämoimi. 6 Ficali ca jamö ma cui, ö̦jamö a yai lä ojodamou wei a lä cui, nii döano bä ja a iyaö balöobä a waiquiwä. A mojimo dijä, ö̦jö lä. 7 ¿Ö̦jö tawä, Timoteo? Ya lä cufe tä ja, a bufi yai da daeo. Wa bufi jaducämabou jödödöobä, Bada tä malä cule. 8 Jesucristo a nofi yai da jaducäbo. A demi jocädou co̦layoma, ¿ö̦jö tawä? David nodiwä ö̦jö a waiquiwä, ya etä a̦ dodijidawä wäyäö ja, ya lä cuu weinaja showawä. 9 Ö̦jö ya tä a̦ dodijidawä lä wäyäö wei tä nowa ja, wale nö bleaamaö lä culajei. Wale bococu o̦cabouje, bä nofi yai lä jushuaö wei bä bococu o̦cabou lä cuaaö wejeinaja showawä. Ö̦jö ma cui, Yai Bada etä a̦ o̦cao daomi. 10 Ö̦jö cudeenö, tä cublou ma bädale ma cui ja, Yai Bada tänö bä lä yaibole bä bayeliblamobä, ya nö wa̦lojaö fe yadio. Jesucristo lija bä fa fucäamonö, bä yai doblaodayobä. 11 Ei tä a̦ bejedi, tä a̦ nofi mölabobeje cä tä a̦. Ö̦jönö bämalecö ca̦i nomalayoma ja lä, ö̦jönö bämalecö nia ca̦i ba̦limi cuo. 12 Bämacö nö wa̦lojaö fe yadio ja, ö̦jö lä showawänö bämalecö nia ca̦i bada läo. Bäma a nofi mojodubou dicoo ja, camiyä bämacö ma cui, bämalecö nofi nia mojodubou mö feduo. 13 Bämacö ai däjä cadidou ma mlai ma cui, a wa̦ nia cadidou showao fe yadio. A wa̦ shominajaaö majöobä a malä mlai. 14 Ei ya wa̦ lä cui ja, bä bufi da jaducäblamalö. Bä a̦ wasöö da dodijio. Bada tänö wa ca̦i malä cule. ¿Ö̦jö tawä? Tä a̦ lä wäyämamou wei tä a̦ ja, bä a̦ lämou da wasö. Bä a̦ lä lämou wei bä a̦nö, täbä nia bayeliblamoimi. Täbä bufi nia shi̦lo yai wa̦lidiblou. 15 ¿Ö̦jö tawä, Timoteo? A nö da wa̦lojoicu, ö̦jö lä, Yai Bada lija wa icuo däjä wa wa̦fa dodijidawä tadayobä. Yai Bada lija dodijidawä wa nosiemamou ja, wa etä a̦ bejedi wäyäö shalilio ja, wa bufi quilijobä tä nia cuomi. 16 Ö̦jö bä a̦ lä lämou wei jamö a icuo dijä. Ö̦jö bä a̦nö, Yai Bada lija täbä ajedou mlai ja, täbä yai blajaö majöofälöö. 17 Walacasi tä wayunö täbä sicö jodei lä cuaaö weinaja, ö̦jö bä a̦nö täbä bufi wa̦lidiwä taamaö cuaafälööje. Ö̦jö bä a̦ shi̦lo lä lämou wei bä lija, Imeneo, Filedo sho cäcöbä coyocoblou dicoa lä cule. 18 Bejedi tä a̦ ja cäcöbä jaba ma cuono wei ma cui, cäcöbä a̦ shominajaaö majöa. Abenaja cäcöbä jo̦wa cuu majöa. “Ma, bämacö nia demi jocädou co̦omi. Ai bä demi jocädamaö co̦a lä waiquilayono wei, ö̦jö waiquiwä”, cäcöbä jo̦wa cuu dicoo. Einaja cäcöbä cuu fa dicoonö, ai bä lä cuinö, Jesucristo a nofi mölabou ma waiquiono wejei ma cui, a bufiblaimi majöweje. 19 Ö̦jö ma cui, Yai Bada tänö cama ebä lofotomabou fe yadio, dodafi bänö yano bä lofotobou lä culajeinaja showawä. Abenaja etä a̦ oni cuu. Bada tänö cama ebä daö waiquiwä. Einaja tä a̦ cuu. Abenaja ca̦i. Bada ebä a̦fa lä jilou wei bänö, wa̦lidiwä tä taö mladobeje, ö̦jö bä li waiquiwä. 20 Einaja tä a̦ cuu. ¿Ö̦jö tawä? Bä nö lä madofibö wei bä lä cuinö, yafi dodijidawä bä tabouje. Ö̦jamö täbä didibobeje etäbä ca̦i madofi bluca cua. Olo bä ja ai täbä. Blada bä ja ai täbä. Fii fibä ja ai täbä. Jaboca shibä ja ai täbä. Bä nii babobeje, ai täbä dodijidawä tabouje. Canosi bä didiabeje, ai täbä ca̦i wa̦lidiwä tabou mö feduoje. 21 Cama e yafi a bada lä cui, ö̦jö a bayeliobä etäbä bluca. Cafä wa ma cui, wa̦lidiwä tä ja wa aumamou ja, jai Yai Bada etä madofi wa e nia dodijidawä cuo, cama etä yafi jamö. Wa e nia yaio. Cama e yafi a bada lä cui, ö̦jö a bayeliobä wa wa̦ nia fuaö. Dodijidawä tä ja, showadi wa e noshi nia shi̦lo ö̦jödao. 22 ¿Ö̦jö tawä? Fiya bä bufi waiyou si lä ijejei tä lä cui, tä da wailö. Wa nia lä bejedimou wei tä lä cui, ö̦jö tä nabä yai da cadido, Jesús wa nofi nia lä mölabou wei tä ca̦i. A bufi da nofio. Bufi yanöcöwä a da cuo. Bä bufi lä bejedimou wei bä lä cui, inaja bä cuaalanö Yai Bada tä lija bä nö bayeli malä nacao wei. 23 Täbä a̦ fabä tä cua ma mlai ma cui, täbä a̦ mojodi li faö bädao bashio ja, a wa̦ yädäo dijä. Täbä bayeliblamobä täbä a̦mi. Täbä a̦fa nia shi̦lo yai tayou. Wa tä malä dale. 24 Bada wa wa̦ nia lä fuaö wei wa lä cui, wa wa̦ läablalobä wami. Dodijidawä wa bä ca̦i bluca cuobä wa. Bufi moyawälanö wa bä bufi yai jaducäblamabä, ö̦jö wa. Wa bufi nofio fe yadiobä wa. 25 Cafä lija bä a̦ lä lämou wei bä lä cui, bufi oquelanö wa bä bufi nia cadidamaö. Cuwi. Yai Bada tänö bä bufi mö yabajadamaö co̦o ja, tä a̦ lä bejedi wei tä a̦ daa ja̦tolalei fa cujei. 26 Fecula bada a wa̦ nia fa fuamonö, bä ma fuwämamolayono wei ma cui, ö̦jö däjä bä fujeblamoa ja̦toa co̦layou fa cui.
31 Ö̦jö ma cui, Yai Bada tänö täbä nia lä jimaö wei tä cublou bufio däjä, täbä nia yai dobloimi. Wa tä dabä ya wa̦. 2 Ai täbä nofimaö mlajei ja, cama täbä nia nofimamou ayao. Blada bä nofi nia yaibouje. Cama bä a̦fa nia wäamou. “Camiyä yai”, bä bufi nia shi̦lo cama cuu. Täbä a̦fa nia taöje. Bä fö̦ö e ma cui, bä nöö e ma cui, bä a̦ nia fuaimije. Täbä bufi nia ca̦i dobladoimi. Yai Bada tä ma cui tä nö nia waiblaöje. 3 Nofimou tä lä cui tä nia ca̦i daimije. Bä bufi nia asiomi. Täbä a̦fa nia shi̦lo wayoaöje. Bä nia wasöomi. Bä nia waiteliblou. Dodijidawä tä lä cui tä nofi nia wa̦libouje. 4 Täbä nia ca̦i nomojolimou. Bä cuaaö bufi lä doblao wei tä ja, bä bufi daeo balöo mlai ja bä nia quedou showadao. Cama bä nofi nia doo. Cama bä cuaaö bufi lä doblao wei tä nofi shi̦lo yaibouje yalo, Yai Bada tä nia nofimaö dobloimije. 5 Yai Bada tä nia jo̦wa ma daö wejei ma cui, cama bä nofi lä jushuaö wei tänö, Yai Bada etä lofote nia dablamaimije. Ö̦jö bä lä culenaja bä lä cui, bä ajedemabo dijä, Timoteo. 6 ¿Ö̦jö tawä? Bä doblou malä mlai. Ö̦jö bä lä cui, abenaja ai bä li cuaaö. Ai täbä yafibö jamö bä waloo fe fa yadionö, suwä bä bufi dao lä mlai bä lä cui bä jole damaöje. Ö̦jö bä suwä lä cui, wa̦lidiwä tä lä taö wejei tänö, bä bufi nö doblobimi waiquiwä. Bä bufi taamamou si ijejewä. 7 Bä a̦ faö lä bädao wei bä ma cui, bä a̦ bluca ji̦liaö showadaoje. Ö̦jö ma cui, showadi bä a̦ bluca ma ji̦liablalaö wejei ma cui, tä a̦ bejedi dablaimi fe yadioje. 8 Bejedi tä a̦ cua ma cule, ö̦jö bä jole suwä lä damaö wejei bä lä cui, bä a̦ lämou. Moisesi däjä, ai cäcöbä a̦ läablalou lä balöono weinaja showawä. Jane ai a wa̦fa cuoma, Jable ai a wa̦fa cuo mö feduoma. ¿Ö̦jö tawä? Inaja miji bä lä cui bä cuaaö showawä. Wa̦lidiwä tä ja bä bufi shi̦lo cuo. Jesucristo bufilewä bä a̦fa ma jilou wei ma cui bä jolemou. 9 Ö̦jö ma cui, ö̦jö bä lija täbä nia mölaö nö dedeaimi. Bä lä jolemou wei tä lä cui, bluca täbä lija etä nia wawädoblou. Moisesi däjä ö̦jö cäcöbä jolemou lä damolaliyono weinaja showawä. 10 Cafänö wale daö waiquiwä, ¿ö̦jö tawä? Ya bä lä damaö wei tä ma cui, ya showadi lä cuaaö wei tä ma cui, ya tä nabä lä cadidou wei tä ma cui, wale daö. Ya bufi lä yanöcöo wei tä ma cui, ya bufi lä nofio wei tä ma cui, ya cadidou fe lä yadio wei tä ma cui, ö̦jö wa tä bluca daö. 11 Wale lä yabäcano wejei tä ma cui, wa tä ca̦i daö, ya nö lä bleaano wei. Adioquia jamö ma cui, Iconio jamö ma cui, Lita jamö ma cui, ¡bejedi lä wale nö bleaamamaje! Ö̦jö ma cui, Bada tänö showadi wale nowamaö cuaama. 12 ¿Ö̦jö tawä? Jesucristo lija bä bluca lä yädäo wei bä ma cui, inaja showawä bä nö nia bluca bleaamaö cuoje, Yai Bada a bufi doblamabou bufi lä doblao wejei bä lä cui. 13 Inaja bä taamalajenö, wa̦lidiwä tä lä taö wejei tä ja, bä bufi nia shi̦lo balaö. Jesucristo bufilewä bä a̦fa jole lä jilou wei bä ma cui, ö̦jö bä bufi ca̦i nia balaö mö feduo showao. Ö̦jö bä bluca lä cui, jolemou tä a̦ ja cama bä mölaö fa dicoonö, inaja showawä täbä nia ca̦i mölamaö cuo mö feduoje. 14 Ö̦jö ma cui, Timoteo. Cafä lija yama tä a̦ lä wäyäno wei, wa tä a̦ bejedi lä bufibole tä a̦ lä cui, ö̦jö tä a̦ nofi shi̦lo yai da cadidibo. Yamalecö malä dale. Camiyä yamacö a̦nö wa bufi malä jaducäblaliyono wei. 15 Oshe wa cuo showao däjä ma cui, Yai Bada wa tä a̦ oni daö malä showadaono wei. ¿Ö̦jö tawä? Wa bufi jaducäblobä, ö̦jö täbä a̦ oni waiquiwä, Jesucristo wa nofi fa mölabonö wa fucäamobä. 16 Ö̦jö Yai Bada cä tä a̦ oni lä cui, bäma tä a̦ nofi mölabobä tä a̦. Yanowamö täbä a̦mi. Cama ebä lijamö cama Yai Bada tä Bufino bei tä a̦ bädamaö fa cuaanö, etä a̦ oniblamaö bufima. Bäma täbä damabä, ö̦jö tä a̦ waiquiwä. Bäma täbä wasöbä ma cui, bäma täbä cadidamabä ma cui, ö̦jö lä tä a̦ showawä. Täbä yai bejedimobä, bäma täbä bufi nia lä taamaö wei, ö̦jö tä a̦ showawä. 17 Yai Bada tä a̦ lä fuaö wejei bä lä cui, ebä bufi yai jaducäblobä. Dodijidawä tä bluca lä cui tä taö dablobeje.
41 Timoteo. Ei ya wa̦ lä fale, wale a̦ da ji̦lilä. Yai Bada tä ca̦i malä cule. Jesucristo a ca̦i. Cama ebä ca̦i dodijidawä cuobä, a nia bädou lä co̦oyoluu wei a lä cui. Bämacö demi lä showai bämacö ma cui, bä nomaa lä waiquilaliyono wei bä ma cui, bämalecö nia bluca lä jimaö wei, ö̦jö a. 2 ¿Ö̦jö tawä? Yai Bada etä a̦ da wäyä. Tä a̦ ji̦liaö bufi ma doblao wejei ma cui, tä a̦ ji̦liaö bufio ma mlajei ma cui, tä a̦ yai wäyäö fe da yadio. Bä bufi taamaö fe da yadio. Bä da wasö. Bä da cadidama. Wa bufi shi̦lo yanöcölanö, Yai Bada tä a̦ ja, bä damaö fe da yadio. 3 Tä a̦ nia ji̦limamou shi wa̦lii malä mlai. Täbä dodijidawä cuobä tä a̦ waiquiwä ma cui, obi tä a̦ nia ya̦cumö ji̦lii mojiblouje. Cama bä cuaaö bufi lä doblao wei tä ja, bä nia yai cuaaö fa cadidionö, shomi bä a̦ nia shi̦lo ji̦lii majöoje, bä a̦ ji̦lii bufi lä doblao wejei bä a̦ lä cui. 4 Ö̦jö däjä, bejedi tä a̦ lä cui, tä a̦ nia ji̦liaimi majöweje. Nö badabö tä a̦ nia shi̦lo ji̦liaö bashio majöoje. 5 Ö̦jö ma cui, cafä wa lä cui, wa bufi shominajaaö mlai, a bufi shi̦lo yai da shaliliicu. Wa nö bleaabä tä cua ma cule, a bufi cadidia fe da yadiicu. Jesucristo tä a̦ dodijidawä da wäyädu. Cafä lija Yai Bada tänö tä tamaö lä bufii wei tä taö da jödödöo. 6 Wale nia shäö jaödaoje. Yai Bada lija täbä dodobouje däjä, toubä liyäyamou lä culenaja, inaja showawä ya i̦yäbö nia liyäyamou cuo. Ya co̦a jaödalayou. 7 Yai Bada tänö camiyä lija tä nabä lä shimöbeno wei tä ja, ya nö wa̦lojoablaloma. Tä tamaö lä bufino wei, ya tä jödödöblalema. Ya tä a̦ bufibou showale ei ya. 8 Ö̦jö cudeenö, Bada tä lä cui, showadi ya bufi doblamabou yalo, wale nia lä dobädayou wei tä tabou waiquia lä culadi. Täbä jimaö lä cadidio wei, ö̦jö a. Yai Bada tänö täbä jimabä etä cublou däjä, wale nia dobädayou. Camiyä bädawä mlai, bufi shi jalimolanö a itou nö lä dabolajei bä bluca ma cui, ö̦jö bä nia ca̦i bluca dobäö mö feduo. 9 U̦asi. Eja wale fe walou fe da yadioyo. 10 Demanö wale daa dicoquema yalo ya wa̦. Bita jamö tä bluca lä cule tä shi̦lo bufijaö fa dicoonö, Desalonicateli bä lijamö a culayoma. Clesede a ma cui, Calasia jamö a aa mö fedulayoma. Tito a ma cui, Damasiateli bä lijamö a fua mö fedulayoma. 11 Lucanö wale shi̦lo ca̦i cua showaa lä cule. Marcos wa fa dayäanö, ö̦jö a ca̦i shi̦lo da fuima. Wale bayeliblaö ja, ö̦jö a malä dodijaö wei. 12 Efeso täbä lijamö Diquico ya ca̦i shimölema. 13 Ya didiobä sicö lä cui, Doasi jamö ya sicö daquema. Äyämö wa fuimaö däjä, sicö da boima. Cabonö sicö tabou jäa. Oni sibä ca̦i. Yalo sibä ja tä a̦ oni lä cule, ö̦jö ya sibä yai bufii. 14 Alejado a lä cuinö, ö̦jönö wale nö shi̦lo yai bleaamaö dicooma, boo shibä ja täbä madofi lä tablaö wei a lä cuinö. A cuaaö lä dicoono wei etä lä cui, Bada tänö etä nowa nia co̦amaö. 15 Cafä wa ma cui, ö̦jö lija a da moyaweicu. Bäma tä a̦ lä wäyäö wei tä a̦ lä cui ja, showadi a wa̦ läablalou. 16 Bada bänö wale nabä jaba co̦camoaöje däjä, täbä a̦ lä faö wei bä a̦ ji̦liaö fa balöojenö, ö̦jö däjä camiyä wale a̦ nö ca̦i wäamaö bufimaje. Ya nofi bäyäo däjä, moli ma cui a wa̦ yädäonomi. Wale bluca daa dicoquemaje. Wale daquema ma cujei, Yai Bada lija ya etä nowa tamabou bufiimi. 17 Ya icuobä jamö, Bada tänö wale ca̦i cuo showaoma. Ö̦jönö wale nö wa̦lojomaboma yalo, Jesucristo ya etä a̦ wäyäö jödödöo fe yadio showaoma, judio bä lä mlai bä blucanö tä a̦ yai ji̦liaö walalaobeje. ¿Ö̦jö tawä? Inaja tä fa cuonö, wale shäö showadaobeje tä ma cuono wei ma cui, Yai Bada tänö wale nowamaö fe yadioma. 18 Tä wa̦lidiblou lä bädao wei tä ma cui ja, showadi wale nia nowamaö. Cama ebä ca̦i dodijidawä bälöodayobä jamö, dodijidawä wale nia waloamadayou. Ö̦jö a nofi shi̦lo doblao dobou shi wa̦liibeje. Inaja lä tä cuobä. 19 Aquila lija wale a̦fa da wäyä, bä suwäbö Blisila lija ca̦i. Onisifonö cama ebä ca̦i lä cule bä lija ca̦i. 20 Elato a lä cui, Colido jamö a cua jäa showaa. Miledo jamö Dofimo ya shimölema. 21 Maa a quei showao mlao däjä, eja a waloo balöo fe da yadio. Eubulo a lä cui, cafä lija ö̦jö a wa̦fa wäamou bufi doblaa lä cule. Budede a ca̦i. Lino a ma cui, Claudia a ma cui, Jesucristo ai ebä bluca ma cui, bä a̦fa wäamou bufi doblao. 22 Bei, U̦asi. Bada tänö showadi wa bufi bayelibobä. Wamacö nofi bluca ojodabobä.