2 Thessalonians

¹ Pablo cä ya. Sila sho, Timoteo sho, yamacö cua lä cule. Desalonicateli wamacö lija ya si oni shimaö, Yai Bada wama ecö lä yododaö wei wama ecö lija. Fayä Yai Bada lija wamacö bufi lä cuqueno wei, Bada tä Jesucristo lija wamacö bufi ca̦i lä yädäqueno wei wamacö lä cui lija. ² Bei. Fayä Yai Bada lija wamacö shi̦lo bayeliblamobä, Bada tä Jesucristo lija ca̦i. Wamacö bufi shi̦lo yanöcömaboböbä. Wamacö nofi ca̦i shi̦lo ojodaboböbä. ³ Iba cä wamacö. Wamacö dodijaö yalo yamacö bufi doblalou. Yai Bada lija showadi yamacö bufi a̦fa doblalou wäyämobä lä, wamacö malä dodijaö wei. Jesucristo lija fei däjä wamacö mölaö malä balaimadi. Wamacö nofimayou ca̦i balaö lä cuimadi. ⁴ Inaja wamacö cuaaö yalo, Yai Bada ai ebä lä yododaö wei bä lija, camiyä yamacönö bämacö nofi dodijaö doablaö cuaaö. Wamacö nö ma bleaamaö wejei ma cui, wamacö bufi shominajablou mlai, wamacö nö wa̦lojaö fe yadio malä cui. Jesucristo lija wamacö mölaö fe malä yadio wei. ⁵ Wamacö bufi nö wa̦lojaö fe lä yadio wei, Yai Bada tä cadidou dablamobä cätä. Fei tä lä cui däjä, cama wama a nofi yaibou tä nowa ja wamacö nö lä bleaale, dodijidawä cama ebä ca̦i cuobä jamö wamacö nia ajedemabou wawädoo. ⁶ Fei däjä wamacö nö lä bleaamaö wejei, Yai Bada tänö cama bä nö bleaamaö nomöjöquei. Wamacö nö yuabä a malä cui. ⁷ Bada tä Jesús lä cuinö, cama a̦jele ebä nö ca̦i wa̦lojowä wawäblodayou däjä, cowa wacä bä bada lä wao waomou wei wacä bä ca̦i bada wawäblodayou wä. Ö̦jö däjä cafä wamacö nö lä bleaale wamacö sho, bämalecö bluca bälöa yanöcömaquedayou. ⁸ Yai Bada tä daö bufio lä mlajei bä nabä fa queicunö, a nö yuo cuquei. Bada tä Jesús etä a̦ dodijidawä ji̦liblaö lä mlajei bä nabä nia ca̦i queo. ⁹ Ö̦jö däjä bä nö nia bleaaö shi wa̦lii cuquei. Bä fa waimolunö, Bada tä Jesús a cuobä jamö bä nia icuomi. A nofi nia lofote lä doamou wei jamö bä nia cuomi. ¹⁰ Ö̦jö däjä, Jesucristo a yai nia itou lä cadidioyoluu wei däjä, cama ebä lija a nofi nia doablamou. A bejedi lä bufibou wejei bänö a noshi nia jaliwä queamaöje. Yama tä a̦ lä wäyäno wei wama tä a̦ bejedi bufiboma yalo, ö̦jamö wamacö ca̦i nia icuo. ¹¹ Jesucristo a nofi doablamodayobä jamö wamacö nia cuo yalo, Yai Bada bäma a lä bufiblaö wei tä lija showadi bämacö bayelimaö. Fei däjä ma cui, Yai Bada tänö wamacö cadidiwä tabou lä bufio weinaja wamacö cadidiwä yai tabobä, ya wa̦ faö talei. Cafä wamacö lä cui, wamacö ca̦i dodijaö bufi lä doblao weinaja showawä wamacö cuaabä. Cama wama a nofi mölabolanö, cama etä lofote showawänö dodijidawä wamacö ojodamobä. ¹² Inaja wamacö dodijidawä fa cuonö, bluca täbä lija cama Bada tä Jesucristo a nofi doblao doablamobä. Cama wama ecö yalo, inaja showawä, Yai Bada lija cafä wamacö nofi ca̦i doablamou mö feduobä. Yai Bada bäma a lä bufiblaö wei a lä cuinö, Bada tä Jesucristo a ca̦i lä cuinö, täbä nofi shi̦lo malä ojodaboböö wei.

¹ Iba wamacö. Bada tä Jesucristo a nia lä itou wei tä ja, bämacö yömölaö lä cule. Bäma a mö baamadayobä, bämacö nia lä toujou wei tä ja bämacö yömölaö. Abenaja bämacö nowa taö. ² Wamacö bufi jalujou mlai. “Bada tä nia fuu lä co̦o wei, tä mö jalu cublou waiquilayou lä cufe”, bä bufi jole cuu dijä. Bä mölaö si ijejeo dijä. Inaja ai bä ma cuu wei ma cui, bä jolemou. Bei bä bufi jamö tä a̦fa wawäblou ma taö wejei ma cui, bä jolemou. Ei malä cui. “Pablo ebä ca̦i lä cuinö tä si oniblalemaje”, bä jole ma cuu wei ma cui, ö̦jö yama tä a̦ oniblanomi. ³ Yanowamö täbä lija wamacö mölaö dodijio mlai. Yai Bada a waibeje, yanowamö täbä a̦ nia bluca obi lofotoaö. Ö̦jö tä cublou showao mlao däjä, Jesucristo a nia fuu co̦o jaöomi. Yai Bada lija a nö yai lä nabämou wei a nia wawäö balöo, shobali wacä jamö a nia lä wa̦liablamou wei a lä cui. ⁴ Yai Bada a ma cui lija, täbä bluca lä bufiblamou wei täbä ma cui ja, a wa̦ nia lämou. “Camiyä wamale bufiblabä cä ya waiquiwä”, a nia cuu. Yai Bada etä yafi ma cui ja, a fa lucälönö, ö̦jamö lä a nia loo läo bashio. ⁵ Cafä wamacö lijamö ya da cuoblei däjä, ya tä a̦ mada wäyäblei. Wama tä a̦ daö showale cätä. ⁶ Ö̦jö a nö yai lä nabämou wei a wawäblou jaöo mlaobä, a ja̦amabou showaa lä cule. A lä ja̦amabole wama tä daö waiquiwä, Yai Bada tä Bufi lä cui. A nö yai lä nabämou wei a lä cui, obi, Yai Bada tänö a wawäblamaö bufio däjä a nia shi̦lo wawäblou. ⁷ Fei däjä a wawäblou showawä ma mlai ma cui, a cuaaö ja̦tomou waiquia, wa̦lidiwä tä balamabä. Ö̦jö ma cui, a lä ja̦amabole a co̦amamou däjä, ö̦jö däjä a nia ja̦o co̦daaimi. ⁸ Ö̦jö däjä a nö yai lä nabämou wei a nia wawäblou. Bada tä Jesús a waiteli ca̦i itoa fa co̦liyonö, bei fö̦shöacö lofotenö a lä wawäblole a nia shäö. Jesús a lä dablamole däjä, a nö lä quiliaö wei tänö a nia waicaö dodijio. ⁹ ¿Ö̦jö tawä? A nö yai lä nabämou wei a wawäblou däjä, Sadanasi a bufi fa lucälönö, a nö nia wa̦lojamaö nö quiliaö. Täbä joleblamabä, tä nö lä quilijii tä bluca fa wawämalönö, täbä bufi nia taamaö fe yadio. ¹⁰ Shobali wacä jamö bä nö nia lä bleaaö wei bä lä cui, ö̦jö bä nia mölamaö nö quiliaö. Yai Bada bejedi etä a̦ lä cui, etä a̦ bufibou fa mlacujenö, bä fucäamobä tä a̦ ji̦liaö fa mojiojenö, bä nia mölaa fe balojolayou. ¹¹ Ö̦jö bejedi tä a̦ lä cui tä a̦ fa wailöjenö, jole tä a̦ lä cui ja Yai Bada tänö bä nö nia yai bleaamaö. Jole tä a̦ ma cui, tä a̦ bejedi bufibobeje täbä bufi nia taamaö majöo, ¹² täbä bluca waimou showadaobä. Täbä waimobä täbä waiquiwä. Yai Bada etä a̦ bejedi bufibou fa mlacujenö, tä lä wasöö wei tä yai taö bufi malä doblao wejei. ¹³ Ö̦jö ma cui, cafä wamacö yai bayeliblamou yalo, Yai Bada lija yamacö bufi doblalou. Showadi yamacö bufi doblalobä tä malä cui. Iba wamacö. Bada tä lä cuinö wamacö nofimaö fe lä balojoo wei wama ecö. Wamacö fucäamobä, jaba däjä Yai Bada tänö wamacö yaia showadalema. Cama a Bufinö wamacö fa yailänö, bejedi wama tä a̦ nofi mölabou, wamacö fucäamobä. ¹⁴ Wamacö fucäamobä wamacö nacalema, Jesucristo yama tä a̦ dodijidawä lä wäyäno wei tä a̦nö. ¿Ö̦jö tawä? Bada tä Jesucristo wama ecö yalo, cama a lä doblale jamö wamacö doblao mö feduobä, wamacö nacalema. ¹⁵ ¿Ö̦jö tawä, iba wamacö? Bä bufi da cadidiicu. Bä bufi da lofotoicu. Cafä wamacö lijamö yama tä a̦ da wäyäblei, yama tä a̦ oni ca̦i da shimölii, wama tä a̦ nofi cadidibobä. ¹⁶ Bei. Bada tä Jesucristo lä cui, cama lija showadi wamacö bayeliblamobä, Fayä Yai Bada lija ca̦i, bämalecö nofimaö fe lä balojoo wei a lija. Bämalecö nofi fa ojodadalönö, bämalecö bufi nia lofotomabou shi wa̦lii. Bäma a nofi mölabobä, bämalecö bufi taamaö. ¹⁷ Ö̦jö cäcöbä lija wamacö bufi lofotoamamobä. Wamacö bufi lofotolanö wamacö dodijabä, dodijidawä wamacö a̦ ca̦i fabä.

¹ Iba wamacö, abenaja yamacö cuu majöo. Yai Bada lija yamalecö da bayelimaje. Bada etä a̦ wäyämou fa cuaafälönö, dodijidawä etä a̦ yai ji̦liamou blaucou cuaabä. Cafä wamacönö wama tä a̦ ji̦liaö bufi doblao fe da yadiobleinaja, ai täbänö tä a̦ ji̦liaö bufi doblao fe yadio mö feduobeje. ² Yamalecö da bayelimaje, täbä nofi jushuaö fe lä balojoo wei täbä lija, Yai Bada tänö yamalecö noshi umlabobä. Jesucristo a nofi bluca mölabou malä mlajei. ³ Ö̦jö ma cui, Bada tä lä cui wama a nofi mölabou cadidiobä cätä. Ö̦jö a lä cuinö wamacö bufi lofotoamaö wä. Sadanasi lija wamacö noshi ca̦i umlabou wä. ⁴ Bada tä Jesucristo wama ecö yalo, cafä bämacö nofi mölabou. “Fei däjä ma cui, obi ma cui, yama bä lä yömölaö wei tä ja, bä cadidole cätä”, yamacö bufi cuu ja yamacö mölaö. ⁵ Bada tä lä cuinö wamacö bufi yai cadidamabä, yamacö a̦ faö. Yai Bada tänö bejedi wamacö lä nofimaö wei wama tä dablabä. Bufi yanöcölanö Cristo wama a nö dabou fe yadiobä. ⁶ Iba cäbä. Wamacö moyawäobä bämacö yömölaö a lä cule. Bada tä Jesucristo lä cuinö wamacö yömölaö nö lä cuobö weinaja showawä. Jesucristo ebä ma cui, ai bä ojodamou moji ja, bä nofi lobo dijeje. Wamacö dodijabä bämacö ma yömölano wei ma cui, ö̦jö bä lä cuinö yamalecö a̦ ji̦lianomi dicoweje. ⁷ Camiyä yamacö lä cuaaö weinaja wamacö cuaaö mö feduobä tä malä cule. ¿Ö̦jö tawä? Cafä wamacö lijamö yamacö lä cuono wei däjä, yamacö mojimono malä mlai. ⁸ No mlai ja yama täbä nii waö mada mlaoblei. No mlai ja yamacö bayeliblamou mada mlaoblei. Bämacö nö bleaamaö mlaobä, yamacö ojodamodii fe balojooma. ⁹ Yai Bada etä a̦ ja bämacö lä bayeliblaö wei tä nowa ja, yamacö nö liyobä tä cuoma ma cui, yamacö ojodamou fe yadioma. Camiyä yamacö ojodamou lä cuaano weinaja, wamacö ojodamou cuaaö mö feduobä. ¹⁰ Cafä bämacö ca̦i cuo da showaoblei däjä, bämacö yömölaö mada waiquioblei. Abenaja yamacö cuma. “Ai a ojodamoimi ja, a iyama dijejä”, yamacö cuma. ¹¹ Bämacö a̦fa dobloimi ji̦liaö waiquiwä. Ai wamacö jo̦wa mojimou fa dicoonö, wamacö jo̦wa mojodili loaadalou bädao. Ai wamacö lä cui, wamacö a̦ fabä tä ma mlai ma cui, wamacö a̦ jo̦wa faö si ijejewä dicowä. ¹² Inaja täbä lä cuaaö wei yama täbä yömölaö lä cule. Yamacö a̦ fe blacäjou. Bada tä Jesucristo lä cuinö täbä yömölaö nö lä cuobö weinaja showawä. ¡Wamicai wamacö li dodijidawä cuobä! Dodijidawä cafä wamacö li fa ojodamonö wamacö shi̦lo iyabä. Wamacö fo̦limou mlaobä bä da ojodamo. ¹³ Iba cä wamacö. Wamacö lä dodijaö wei tä ja bä modaa dijä. ¹⁴ Ei si oni ja bämacö lä yömölale, ai tänö yamalecö a̦ fuaimi bädawä ja, wama a dobloimi fa dalalönö a nofi lobou da mladaluje, a quilibä. ¹⁵ Wama a nofi wa̦libou cadidio mlai, jai aifä lija wamacö a̦ nö oquewä faö lä cuobö weinaja, bä a̦ da fa. ¹⁶ Bei. Bada tä lija showadi wamacö bayeliblamobä, täbä bufi lä yanöcödamaö wei a lä cui lija. Cama a showawänö wamacö bufi yanöcömabobä. Tä cublou lä bädao wei tä ma cui ja, wamacö bufi yanöcömabou fe yadiobä. Bada tänö wamacö ca̦i bluca cuobä. ¹⁷ Camiyä Pablo ya imicö cadidiwänö, bämacö lä nofimaö wei ya tä a̦fa oniblaö lä cule. Camiyänö ya sibä oni lä shimaö wei sibä ja, inaja täbä nia oni shi̦lo ola cuo. Wale imicö no ö̦jöböabä ei ya tä oniblaö lä cule. ¹⁸ Bada tä Jesucristo lija bämacö bayelimaö talei, wamacö nofi bluca ojodabobä. ¿Ö̦jö tawä? Inaja lä tä cuobä.