2 San Pedro
11 Jesucristonö wale lä shömöleno wei, ei camiyä Simón Pedro cä ya, ya nosie juabä ya e lä cui. Jesucristo yama a nofi mölabou lä culenaja, wama a nofi mölabou cuo mö lä fedule wamacö nija, ei ya tä a̦ oni shömaö lä cule. Bäma a bufiblabä, ö̦jö Jesucristo a waiquiwä, bämalecö lä jucäaö wei a lä cui. Bämalecö lä bayelibou wei tä nowa yai bluca dodijiwä. ¿Ö̦jö tawä? Jesucristo a cadejewä cudeenö, cafä wamacö ma cui, camiyä yamacö ma cui, bämalecö bufi bluca taamaö fe usucuwä, bäma a nofi mölabobä. ¿Ö̦jö tawä? Cama wama ecö mö feduwä yalo, cafä wamacö nija ei ya tä a̦ oni shömaö. 2 Bei. Yai Bada wama a daö yalo, Bada tä Jesús wama a ca̦i daö yalo, bä shino bayeliblamou da dodijio. Ö̦jö lä cäcöbönö wamacö nofi shino ojodaboböbä. Wamacö bufi shino ca̦i yanöcömaboböbä. 3 Yai Bada bäma a daö yalo, cama etä lojodenö bämalecö bufi showadi bayelibou. Eja dodijidawä bämalecö tamabou fe yadio, bäma a bufi yai doblamabobä. Cama a lä doblalenaja bämacö dodijidawä cuo mö feduobä, bämalecö nacalema. 4 Yai Bada a doblao cudeenö, a dodijidawä yalo, ¡bejedi lä bämalecö bayelibou! A wa̦ nö wäo ja bämalecö a̦fa bayeliblamou wäyäö lä balöono weinaja showawä. Bämalecö nia jo̦wa lä bayelibono wei tä a̦ nowa yai bluca fe balojowä. Tä a̦ liyäjäwä dodijiwä. Yanowamö täbä bufi showadi lä waiyou wei tänö bämacö wa̦lidiblou mlaobä, bämalecö nia bayelibou showaoma, cama a lä culenaja bämacö ca̦i cuo mö feduobä. 5 ¿Ö̦jö tawä? Wamacö nia jo̦wa lä bayelibono wei tä a̦fa wäa waiquiquema cudeenö, bä bufi nö da wa̦lojoicu. Jesucristo wama a nofi yai mölabolanö, bä yai da dodija. Wamacö dodijaö waiquilanö, bufi dao bä da cuo. 6 Bufi dao wamacö culanö, bä bufi ca̦i da wasöo. Wamacö bufi wasöolanö, bufi yanöcöwä bä ca̦i da cuo. Bufi yanöcöwä wamacö culanö, Yai Bada nija bufi shaliliwä bä ca̦i da cuicu. 7 Yai Bada nija bufi shaliliwä wamacö culanö, cama bä mashi nofimayou lä culenaja bä da taamayo. Inaja wamacö cuaaö waiquiwä ja, bei bä bufi yai da nofio. 8 Einaja wamacö yai cuaabä. ¿Ö̦jö tawä? Bada tä Jesucristo wama a yai daö ja, inaja wamacö bufi nia cuaaö lojodoo. Ö̦jö däjä wamacö doblou lä mlai tä ma läle ma cui wamacö nia doblou fe yadio. Wamacö ca̦i nia yai dodijaö. 9 Inaja bä cuaaö lä mlai bä lä cui, jai täbä möö blajabloimije bä cuwä. Jai bä jubäbö bä cuwä. Bä jaba lä cuaano wei tä ja, Yai Bada tänö bä aublaö ma waiquilayono wei ma cui, ö̦jö tä nofi mojodubou co̦o majöo dicooje. Ö̦jö ma cui cafä wamacö lä cui, inaja bä cuaa dijä. Dodijidawä tä shino yai da balamalöje. 10 ¿Ö̦jö tawä, iba wamacö? Ö̦jö cudeenö wamacö yai dodijabä, bä bufi nö shino da wa̦lojoicu, Yai Bada tänö wamacö lä nacaleno wei wama tä dablamabä. Wamacö lä yaileno wei tä ca̦i. Cama wama ecö cuobä wamacö malä yaileno wei. Inaja wamacö cuaaö ja, wamacö dodijaö cuquei. Obi ma cui wamacö bufi nia shomiblou majöomi. 11 Ö̦jö däjä bufi doblalanö Yai Bada tänö wamacö nia waloamadayou. Bufi lämou mlai ja dodijidawä wamacö nia waloamadayou, Jesucristo a dodijidawä bälöa shi lä wa̦liladi jamö. Bämalecö yai lä jucäaö wei, ö̦jö Bada tä Jesucristo waiquiwä. 12 Ö̦jö cudeenö bejedi wama tä a̦ lä ji̦lileno wei, wama tä a̦ lojodobou ma waiquile ma cui, showadi ya tä a̦ nia wäaö mö yabao co̦o. Wama tä a̦ daö ma waiquio wei ma cui, showadi bämacö bufi nia jaducublamaö co̦o. 13 ¿Ö̦jö tawä? Ya demöo showao däjä, cafä wamacö nija ö̦jö showadi ya tä a̦ nia wäyädii, wamacö bufi dayäobä. “Inaja yai”, ya bufi cuu a lä cule. 14 Eja ya nia cudio malä mlai. Wale nia lä shäö wejei tä ajedewä malä waiquii, Bada tä Jesucristonö wale yömölaö ja wale nowa lä tano weinaja showawä. 15 Ö̦jö cudeenö, ya nomalayono wei ja wama tä a̦ nofi showadi jaducubou juo showaobä, ya nö wa̦lojaö showaa lä cule. 16 Cafä bämacö yömölaö däjä yamacö bejedimoma. Inaja wamalecö nofi tabobä ya wa̦. Yanowamö täbä mölamabeje täbä jole lä cuu weinaja yama bä a̦ owäblalanomi. Ma. “Bäma bä joleblamabä, abinaja bämacö yai cubä”, yamacö nowa ca̦i tayonomi. Bada tä Jesucristo lä cui, bejedi lä yama etä doblao dalalema. A waloo däjä, a nö yai wa̦lojayoluma, cafä wamacö nija yamacö da cubleinaja showawä. 17 Yai Bada tänö wawädowä a nö malä ö̦jöbömaleno wei. A wa̦fa doblao ca̦i wäyäma, bäma a nofi lä Fö̦ömaö wei a lä cuinö. A shino Bada doblaa lä ayaladi a lä cui, abinaja a cuma. Ijiluyä ya nofimaö lä dodijio wei, ei a. Cama nija ya bufi yai shino doblalou dodijiwä. Einaja a cuma. 18 Fedu jamö a culanö a wa̦ bada fa bädonö, yama a wa̦ ji̦lilema. Cama Yai Bada etä balöcö jamö yamalecö ca̦i malä cuodayono wei. 19 ¿Ö̦jö tawä? Tä a̦ yai bufiblamobä cä tä a̦. Yai Bada a wa̦no wäyälewä bä a̦ faö balöoma. Ö̦jö cudeenö, bei cä yamacö mamocunö yama tä dablaö däjä, yama bä a̦ bejedi yai bufibou dodijioma. Ö̦jö wama bä a̦ yai shino bejedi bufiblabä, ö̦jö lä, tä mö dödöo däjä, cowa wacöbä bufiblamou lä culenaja showawä. Inaja wama bä a̦ bufibou cuo showao däjä, Jesucristo a nia juu co̦imaö, tä mö jaluimaö däjä, shidicali a faö lä fenablao weinaja showawä. Ö̦jö däjä wamacö bufi nia yai wacacamabou. ¿Ö̦jö tawä? 20 Ei ya wa̦ lä cui wamale a̦ da ji̦lilä. Yai Bada a wa̦no wäyälewä bä lä cuinö, a wa̦no lä wäyäno wejei tä a̦ bluca ca̦i oniblaö showadalayomaje, Yai Bada a wa̦no oni jamö tä a̦ oni lä cule. Cama bä bufi cuu lä buono wei tä a̦mi. 21 Ma, Yai Bada a wa̦no lä wäyämono wei tä a̦ lä cui, yanowamö täbä bufi cuu lä bädao wei tä a̦ cuonomi. Yai Bada bei tä Bufinö cama bä nijamö tä a̦ wäyäö fa shalilionö, yanowamö täbä nija tä a̦no wäyäö shalilio nomöjöomaje.
21 Awei, Isaeli ebä nijamö Yai Bada a wa̦no wäyälewä bä lä cuinö a wa̦no wäyäö cuaamaje. Ö̦jö ma cui Yai Bada a wa̦no jole lä wäyäö wejei bä ca̦i cublamou showadaoma. Yai Bada a wa̦no wäyäö mlajei, shomi tä a̦ li wäyäö läomaje, cafä wamacö nija ai bä nia lä cuaaö weinaja showawä. Showadi ö̦jö tä nia cublou dicoo. Tä a̦ lä wayu wei tä a̦ lä cui, cama bänö tä a̦ ca̦i juu fa ja̦toojenö tä a̦ nia bufiblamaöje. Bä doblou lä mlai bä nowa lä co̦maqueno wei a Bada lä cui, ö̦jö ma cui a nia ca̦i waiije. Inaja bä lä cuaaö wei lobe bä nofi nia nacao, bä shämou showadaobä. 2 Bä nofi beshili lä jushublalou wei tä ja, ai bä nia luluamou. Bä lä cuaaö wei tänö, Jesucristo tä a̦ lä bejedi wei tä a̦ nö nia waiblamaö dicooje. 3 Bä bufi waiyou dicoo yalo, jole jole wamacö nia yömölablalaö buoje, bä dobämobä. Tä a̦ bejedi lä mlai tä a̦ ja, wamacö nia mölamaöje. ¿Ö̦jö tawä? Ö̦jö bä nia lä jömaö wei a lä cui a nö daa waiquia. Yedu jamö ma cui bä nö nia bleaamaö showaoma. Bä nofi mojoduboimi. 4 Yai Bada a wa̦no wäyälewä bä a̦fa jole lä jilou wei bä lä cui, bä nö bleaamabä lä cäbä. Fei däjä bädao mlai, jaba däjä ma cui, showadi bä nö bleaamaö malä balöono wei. A̦jele bä doblono lä mlai bä ma cui, Yai Bada tänö bä nofi asibono malä mlai. Bä nia yai lä jömaö wei tä cublou showao mlao däjä, shobali wacö mö lä didibodi jamö bä shäyäa balöblaaquema. 5 Noewä däjä ma cui, täbä nofi ca̦i asibonomi. Mashita a fe bluca baoblamalema, a wa̦ juaö lä mlajei bä mishi bluca duoblobä. Noewä a shino nowamaö ayaoma, bejedi tä a̦ ja täbä lä yömölano wei a lä cui. Cama 7 ai ebä sho. 6 Sodomateli bä ma cui, Comolateli bä ma cui, ö̦jö bä shabonobö fa ö̦shömalönö, jai yubu ushibö tablamalema. Yai Bada tä daö lä mlajei bä quilibä, inaja bä li taamaö balöoma. 7 Sodomateli bä nija Lodo a ca̦i coyocooma, a lä cadidono wei a lä cui. A coyocooma ma cui, Yai Bada a ishou showao mlao däjä a co̦a balömalema, ö̦jö bä nö bleaabä jamö a nö bleaaö mö feduo mlaobä. ¿Ö̦jö tawä? Ö̦jö bä wa̦lidiwä talewä nofi beshili jushublaloma yalo, ¡bejedi lä Lodo a wajäwä nö beblalamamaje! 8 Ö̦jö a lä cadidono wei a lä cui, cama bä nija a bälöo coyocooma yalo, showadi bä a̦ malä ji̦liadino wei, showadi bä ca̦i malä mödino wei. Wa̦lidiwä tä ja bä cudioma cudeenö, a bufi nö yai bleaadima. Yai Bada tänö ö̦jö a nowamaö lä ayaono wei tä ja, 9 bämacö bufi da dayäo, bämacö bufi jaducublobä. Inaja showawä, fei däjä ma cui a bufi lä doblamabou wejei bä wabamou däjä, bä noshi ca̦i umabou daö dodijiwä. ¿Ö̦jö tawä? Bä cadidou lä mlai bä lä cui, ö̦jö bä nö ca̦i bleaamaö daö. Bä nö bleaamabä, ö̦jö lä a waiquiwä. Inaja showadi bä nia taamaö. Täbä bluca jömabä etä cublou showao mlao däjä, fei däjä ma cui bä nö nia bleaamaö balöo. Ö̦jö däjä, bä nia lä jömadayou wei däjä bä nö nia yai bleaamaö shi wa̦lii. 10 ¿Ö̦jö tawä? Bä doblou lä mlai, Yai Bada tänö bä nö bleaamaö daö lä. Bä nofi showadi lä jushublalodii wei bä lä cui, ö̦jö bei bä nö bleaamaö yaio, bä lä joleblalou wei bä lä cui. Yai Bada tä a̦ juaö bufiomije. Bä fe yadiblou cudeenö, ö̦jö bä nö bleaamaö yaiquei. Mijamö tä a̦ jole lä wäyäö wejei bä lä cui, bä caficö a̦ ca̦i quilibloimi. Täbä lojode lä läladi täbä ma cui täbä nö ca̦i waiblaöje. Bä quiliimi dodijiwä. 11 ¿Ö̦jö tawä? A̦jele bä ma cui, ¡inaja bä nö nofi cubö lä mlai! A̦jele bä yai lojode ma cui, bä nö shino yai wa̦lojaö ma cui, obisai bä a̦ shino faö. Bada tä nija täbä a̦fa wäyäöje ja, täbä nö waiblaimije. Bä a̦ faö quilii. 12 Ö̦jö ma cui, mijamö tä a̦ jole lä wäyäö wejei bä lä cui, ö̦jö bä caficö a̦ jo̦wa quilibloimi dodijiwä. Tä daö ma mlalajei ma cui, tä a̦fa jole wayoaö bädaoje. ¿Ö̦jö tawä? Yalo bä bufi daomi lä culenaja bä cuwä. Bä shämobä cäbä. Bä cuaaö lä bufio weinaja, bä bufi dayäo balöo mlai ja bä cuaaö bädao. Bä lä wa̦lidiblou wei tänö, yalo bä mö watäblamou lä culenaja, cama bä ma cui bä mö nia ca̦i watäblamou cuo mö feduo. 13 Täbä nö bleaamaöje yalo, inaja showawä cama bä nö nia ca̦i bleaamaö nomöjöo. Bä nö bleaamabä lä. Bä bufi lämou mlai ja, wawädowä bä nofi jushublalou bufi doblao. Bä wa̦lidiwä. Bä ca̦i shami. Jesucristo wama ecö iyaö ca̦i co̦camobä jamö, ¡ö̦jö bä loo ajedeobä bä nofi lä mlai! Wa̦lidiwä tä ja bä quiliblou mlai ja, bä bufi shino yai doblalou dicoo. Bä dobloimi waiquiwä. 14 Suwä bä nijamö bä mamo beshili shino showablalou. Bä ca̦i ja̦amodoimi. Jesucristo ebä bufi lojode lä mlai bä fa lulubojenö bä bufi wa̦lidiblamaöje. Showadi bä bufi shino waiyodii. Inaja bä cuaaö yalo, Yai Bada nija bä wafämobä cäbä. 15 Miji bä lä jolemou wei bä lä cui, bä nia lä cadidou wei yo fa dacöjenö, ai yo jamö bä juu majöo. Beolo bä ijilubö Balaama a lä cui, ö̦jö a owämaö nodiablalou dicooje, Isaeli ebä wafäblabä a lä nacaano wejei a lä cui. Ö̦jö a lä cui, a nia lä dobämou wei tä ja a bufi mö blucao fa dicoonö, wa̦lidiwä tä taö ojodaoma. 16 Ö̦jö ma cui, a doblono lä mlai tä ja, Balaama a wasömamolayoma. Yalo a wa̦ faö dao lä mlai a bulo lä cuinö, yanowamö bämacö a̦ faö lä cuaaö weinaja a wa̦ fa cudalunö a wasölema, a shominajaaö mladobä. 17 Mijamö tä a̦ jole lä wäyäö wejei bä lä cui, tä mö didi lä sublabodi jamö bä taamabobä, Yai Bada tänö tä tabou waiquia. Mau u lo̦yoca wejediblou lä culenaja, ö̦jö bei bä cuwä. Täbä mölamaö bädaoje. Ölajashi bä lä cublou weinaja bä ca̦i cuwä. Wadoli anö ölajashi bä fa yalänö, maa a nö lä dabou wejei bä lä cui, bä uomodou nomöjöo. 18 Inaja showawä, miji bä lä jolemou wei bä a̦nö täbä mölamaöje. Jesucristo nija bä dude lä cublou wei bä lä cui, ö̦jö bä yai mölamaöje. Täbä bufi lä yacläle täbä nija bä mili docuu ma waiquio wei ma cui, miji bä lä jolemou wei bänö bä jo̦wa yabäcadii dicoaje. Bä a̦ dobloimi. Cama bä a̦ ji̦limamou bufi fa doblaonö bä a̦ faablalou ma cui, bä a̦ shifilimoablalou bädao. Bä nofi cama lä jushuaö wei jamö bä luluaö nomöjöaje. 19 Abinaja bä ca̦i jole cuu. “Jesucristo wama a nofi mölabou malä waiquile. Ö̦jö wama a nofi mölabou waiquiwä yalo, ai täbä a̦ jamö wamacö nia nosiemamoimi. Fei däjä, wamacö cuaaö bufi lä doblao weinaja wamacö nia yai cuaaö”, bä cuu. Einaja bä ma cuu wei ma cui bä jolemou. ¿Ö̦jö tawä? Täbä nosiemamou ma wasöö wejei ma cui, cama bä ma cui bä nosiemamou fe balojoo. Wedi tä ja mlai. Cama wa̦lidiwä etä lä didile tä ja bä li nosiemamou. Wa̦lidiwä tänö täbä lojodobou däjä, täbä jujeblobä etä cua malä mlai. 20 ¿Ö̦jö tawä? Bada tä Jesucristo lä cuinö, ö̦jönö bämalecö shino yai bayelibou. Mijamö tä a̦ jole lä wäyäö wejei bä lä cuinö, Jesucristo etä a̦ daöje yalo, wa̦lidiwä tä ja bä docuu dao, yanowamö täbä showadi cuaaö bufi lä doblao wei tänö bä wa̦lidiblou mlaobä. Ö̦jö ma cui, tä a̦ ma daö wejei ma cui, ö̦jö tä julii mö yabaaö co̦o fa dicoojenö etä yai wayublaliyoma. ¿Ö̦jö tawä? Bä jaba doblono ma mlai ma cui, fei däjä bä shino yai dobloimi nomöjöwä. 21 Yai Bada tä daö mlaoje däjä bä mojodi li cuo lä balöono weinaja bä yai cuo showao fa cunoja, bä nofi nö nacao fe balojoobö mlai. Yai Bada nija bä ajedobä yo ma dano wejei ma cui, Yai Bada etä a̦ ja bä ca̦i ma damamono wei ma cui, tä a̦ waii majöo dicomaje yalo, fei däjä bä yai wa̦lidiwä cadidiwä. 22 Täbä showadi lä cuu weinaja, cama bä nija etä bejedi cublaliyoma. Abinaja täbä lä cuu wei. “Ji̦ima bänö, nii bä ma joblalei wejei ma cui, bä waö mö yabao malä co̦o wejei.” Einaja täbä cuu. Abinaja ca̦i. “Coshino bä ma aublou wei ma cui, a̦ji a̦ji bä jamö yedu bä jö̦löcou mö yabablao malä co̦o wei.” Einaja täbä malä cuu wei. ¿Ö̦jö tawä? Mijamö tä a̦ jole lä wäyäö wejei bä lä cui, inaja bä cuaaö fa dicoonö bä nö bleaamamobä bä li waiquiwä.
31 Iba bämacö lä nofimale wamacö. Cafä wamacö nijamö, ai ya tä a̦ oni shömöa balölema, fei däjä ei ya tä a̦ shömaö co̦a lä cule. Jaba ya tä a̦ oni da shömölii tä a̦ ma cui, ei ya tä a̦ oni shömaö lä cole tä a̦ ma cui, wama tä a̦ daö lä waiquile tä a̦. Ö̦jö tä a̦ showawä ja bämacö bufi jaducublamabä ya tä a̦ li shömaö. Wamacö lä bejedimou wei wamacö bufi yai dayäobä. 2 ¿Ö̦jö tawä? Yai Bada a wa̦no wäyälewä bä lä cuinö, tä a̦ wäyäö lä balöono wejei wama tä a̦ nofi mojodubou mlaobä, ya tä a̦ oni shömaö. Bada tä Jesucristonö täbä taamaö lä bufino wei tä a̦ ca̦i. Bämalecö lä jucäaö wei, ö̦jö a Bada waiquiwä. ¿Ö̦jö tawä? Cafä wamacö nija yama a wa̦no wäyäö cuaabä, yamalecö malä shömöleno wei. Ö̦jö wama tä a̦ nofi jaducubobä ya wa̦. 3 Bei. Ei ya wa̦ lä cui, wamale a̦ da ji̦lilä. Yai Bada tänö täbä nia lä jömaö wei tä cublou ajedou däjä, a nö nia lä waiblaö wejei täbä nia wawäblou. Cama bä cuaaö bufi lä doblao wei tä ja bä nia shino cadidou. 4 Abinaja bä nia cuu. —A wa̦fa juu co̦o lä wäyämono wei, ¿wedi jamö bei a li, ö̦jö lä? Bada bä jaba lä cuono wei bä nomaa ma waiquilaliyono wei ma cui, ulifi tä jaba cuo lä showadaono weinaja, ¡tä ulifi nofi cua lä showai! Einaja bä nia cuu. 5 Einaja bä mojodi cudalou bufi fa doblaonö bä li cuu. Tä a̦ lojode ma cui, tä a̦ nofi mojodubou bufi doblao dicooje. Bäma tä a̦ lojode daö waiquia, ¿ö̦jö tawä? Judu mösö ma cui, bita a ma cui, Yai Bada tä a̦nö täbä bluca bädaliyoma. Judu mösö fa lelemacödunö, mau ubä shedequeblamalema. Bäfätä jamö u lä cuono wei u fa co̦camomalönö, mashita wejediwä a wawäblamalema. 6 ¿Ö̦jö tawä? Ö̦jö däjä, Yai Bada tä a̦ lojodenö tä bluca wa̦lia majölema. Ö̦jö lä mau u showawänö, tä ulifi jaba lä cuono wei tä fe fa baoblamalönö, täbä mö bluca watäblamalema. 7 Fei däjä ma cui, Yai Bada tä a̦ lojode showawänö bämacö cua showaa lä cule. Judu mösö ma cui, bita a ma cui, Yai Bada tänö bä tabou balöa showaa. Täbä bluca jömabä etä cublou däjä, Yai Bada tä daö lä mlajei bä mö nia watäblaö. Ö̦jö lä däjä, cowa wacönö jödödöwä tä nia bluca ö̦shömaö. Tä a̦ lojode. Ö̦jö ma cui, tä a̦ nö lä waiblaö wejei bä lä cuinö, tä a̦ nofi mojodubou bufi doblaoje. 8 Ö̦jö ma cui, bämacö lä nofimale wamacö. Ei ya wa̦ lä cui tä a̦ nofi mojodubou dicoo dijejä. Camiyä yanowamö bämacö lä cuinö bäma tä nö a̦fa dedewä lä taö weinaja, inaja Yai Bada tänö tä nofi taboimi. Moli a fe nia ma didi wei ma cui, lasha 1.000 a nia ma faö wei ma cui, inaja showawä Yai Bada tänö tä nofi tabou fe usucuwä. 9 Bada tänö tä a̦fa lä wäqueno wei tä taö jaöomi ja, ai bä bufi ma uomodou wei ma cui, a bufi li asio cudeenö tä li taimi showawä. Wamacö nofi yai asibou. Täbä mö ca̦i watäblamaö bufiomi. Täbä bufi mö shino yai yabajadamaö bufi doblao cudeenö, tä li taimi showawä. 10 Ö̦jö ma cui, Bada tä juu co̦obä tä mö nofi jalu tabou waiquia. Bämacö bufi cuu mlao däjä tä nia juu co̦o, täbä lä tomömou wei täbä ja̦tomou lä cuaaö weinaja showawä. Ö̦jö däjä tä a̦ ca̦i nacli ji̦liamolanö, judu mösö nia mladou. Ö̦jamö bä bluca lä shadiladi bä ma cui, cowa wacönö bä mö nia jödödöwä watäblaö. Bita a ma cui, bluca täbä lä cublai täbä ma cui, täbä nia ca̦i jödödöwä ö̦shömaö. Täbä nia bluca mladou, a lä cuno weinaja showawä. 11 Inaja täbä nia bluca mladamaö cuaaö cudeenö, bämacö yai da bejedimo. ¿Ö̦jö tawä? Täbä nia malä mladou wei. Yai Bada bäma ecö lä cui, dodijidawä bäma ecö shino yai cuobä. Bämalecö taamaö lä bufii wei tä ja, bämacö yai da cadido. 12 Yai Bada tänö täbä nia bluca obi lä waicaö wei tä lä cui, bämacö shi jalimolanö bäma tä nö dabobä. Bäma tä nö dabou bädao mlai, bäma tä yai wawäblamaö bufibä. Ö̦jö lä tä wawäblou däjä, judu mösö fa ö̦shölönö mösö nia mladou. Cowa wacönö bä bluca lä shadiladi bä fa ö̦shölönö, bä nia yo̦licou. 13 Ö̦jö ma cui, judu dude bäma mösö nö dabou, mashita a ca̦i, Yai Bada tä a̦ nö wäo ja a lä cuno weinaja showawä. Ö̦jamö lä täbä nia shino yai cadidou. 14 Ö̦jö cudeenö, bämacö lä nofimale wamacö. Ö̦jö wama tä nö dabou waiquia ja lä, bä bufi nö shino da wa̦lojoicu. Wamacö bufi nö shino fa wa̦lojoicunö, Yai Bada nija dodijidawä wamaco dablamobä. Wa̦lidiwä tä cua mlai ja, wamacö a̦fa ca̦i tamobä tä cua mlai ja, wamacö bufi ca̦i yanöcöwä cudiobä. 15 Bada tä bufi asia lä showale däjä, “Bämacö bluca jucäamobä a bufi asio malä cui”, a nofi shino yai da taboje. ¿Ö̦jö tawä? A jolemobä ami. Pablo a ma cui, bäma a yai lä nofimaö wei a lä cuinö, inaja showawä wamacö nowa ca̦i taö balöoma. Tanomi mlai. Pablo a ma cui, tä a̦ oni lä shömöleno wei däjä, inaja showawä a cama cuma. Yai Bada tänö, ö̦jö a bufi jaducublamaö yalo a wa̦ li cuoma. 16 Showadi ö̦jö tä a̦fa shino wäyäö mö feduo talei, tä a̦ oni lä shömaö wei sibä jamö. ¿Ö̦jö tawä? Pablo ai etä a̦ oni doamamou si ijejewä ma cui, ai etä a̦ jamö täbä bufi jaducublou si ijejeomi. Etä a̦ doamamou walalao showadao fa mlacunö, bä bufi lä mojodi wei bä lä cuinö tä a̦ shomiblamaö si ijejeweje. Showadi etä a̦ shomiamaöje, bä bufi shalilou lä mlai bä lä cuinö. ¿Ö̦jö tawä? Pablo etä a̦ oni bädawä mlai, Yai Bada ai etä a̦ oni mö feduwä ma cui, inaja showadi etä a̦ ca̦i taamaö mö feduoje, ö̦jö bänö. Etä a̦ shomiablalamaö majöo dicooje ja, bä mö nia watäblamou. 17 ¿Ö̦jö tawä, bämacö lä nofimale wamacö? Ö̦jö wama tä daö waiquiwä yalo bä da moyaweicu. Tä a̦ lä shomiamaö wejei bä a̦ ja wamacö mölaö fa dicoonö, ö̦jö wa̦lidiwä talewä bä nija wamacö luluamou dicoo mlaobä. Wamacö bufi shaliloimi majöa dicoicu. 18 Ö̦jö ma cui, Jesucristo nija wamacö bayeliblamou lä waiquio wei wama ecö lä cui, bä yai bayeliblamou fe da balojolu. Wama a daö lä waiquile wamacönö, a yai daö da shalilioje. Bada tänö bämalecö yai bayelibou. Ö̦jö cudeenö, fei däjä ma cui, obi ma cui, ö̦jö bäma a nofi shino yai da doabla. Inaja lä tä cuobä.