2 Corintios

¹ Jesucristonö wale lä shimöleno wei, ei Pablo cä ya, Yai Bada tänö wale ca̦i shimaö fa bufinö. Camiyä bämacö mashi Timoteo sho, yafäcö cua lä cule. Colido jamö Jesucristo wama ecö lä yododaö wei wamacö lija ya tä a̦ oni shimaö, Yai Bada wama ecö lä cui lija. Acaya jamö Yai Bada ebä jödödöwä lä bälöblai bä lija ca̦i. ² Bei. Fayä Yai Bada lija wamacö shi̦lo bayeliblamobä, Bada tä Jesucristo lija ca̦i. Wamacö nofi ojodaboböbä. Wamacö bufi ca̦i yanöcömaboböbä. ³ Bada tä Jesucristo bä Fö̦ö e nofi shi̦lo yai doablamobä, Jesús lija a lä bufiblamou wei a Bada lä cui. Inaja lä tä cuobä. Ö̦jö bäma a nofi lä Fö̦ömalenö, showadi bämalecö nofi shi̦lo ojodabou. Showadi bämalecö bufi shi̦lo lofotodamaö. ⁴ ¿Ö̦jö tawä? Bämacö nö lä bleaaö wei tä bluca ma cui ja, bämalecö bufi lofotodamaö. Cama lija bämacö lä bayeliblamou weinaja, inaja showawä ai bäma bä bufi taamaö mö feduobä. Bä bufi nö bleaaö lä bädao wei tä ma cui ja, camiyä bämalecö bufi lä lofotodamaö weinaja, inaja showawä ai bäma bä bufi ca̦i lofotodamaö cuo mö feduobä. ⁵ ¿Ö̦jö tawä? Cristo a nö bleaaö lä cuaano weinaja, bämacö nö bleaaö cuo mö feduo. Inaja showawä, ö̦jö lija bämacö yädäa yalo, cama a bufi bayeliblamou lä cuono weinaja, showadi bämacö bufi nia bluca bayeliblamou cuo mö feduo. ⁶ Camiyä yamacö nö bleaaö ja, cafä wamacö bufi bayeliblamobä yamacö nö li bleaaö. Camiyä yamacö bufi lä bayeliblamou wei tänö, cafä wamacö bufi bayeliblamou mö feduobä. ¿Ö̦jö tawä? Camiyä yamacö nö lä bleaaö weinaja wamacö nö bleaaö mö feduo ja, wamacö nö wa̦lojaö fe yadiobä. ⁷ Cafä wamacö lija yamacö bufi wedinajamobä tä cuami. “Bä nö nia wa̦lojaö fe yadio”, bämacö nofi tabou waiquiwä. Ei yama tä malä dale. Camiyä yamacö nö bleaaö däjä, yamacö bufi lä bayeliblamou weinaja, inaja showawä cafä wamacö nö ca̦i bleaaö däjä, wamacö bufi nia ca̦i bayeliblamou cuo mö feduo. ⁸ ¿Ö̦jö tawä, iba wamacö? Asia jamö wamalecö nö lä bleaamano wejei tä ja, bämacö mojodumabou bufiomi. Shädayai. Yamacö bufi nö beblalou dodijioma. “Yamacö demi cudio fe yadio weicätä”, yamacö bufi ca̦i cunomi dodijiwä. ⁹ Ma. “Fei däjä yamalecö nia shi̦lo yai shäö shalilioje”, yamacö bufi cuma. ¿Ö̦jö tawä? Yamacö bufi nö lä beblalono wei, ö̦jö Yai Bada bei tä mayo cuoma, camiyä yamacö nia lä fucäamou wei tä ja yamacö mölaö dicoo mlaobä. Cama Yai Bada lija yamacö shi̦lo yai mölaö showao fe yadiobä yamalecö inaja taamama, täbä demi lä jocädamaö wei a lä cui lija. ¹⁰ Yamalecö shäbeje tä cuo ma waiquiono wei ma cui, yamalecö bayeliblaö fe yadilayoma. Inaja showawä yamalecö nia bayeliblaö cuo co̦o. Ö̦jö yama a nofi yai mölabou waiquiwä, yamalecö bayeliblaö co̦obä. ¹¹ Cafä wamacö ma cuinö, Yai Bada lija wamalecö ca̦i da bayelima, bluca bänö yamalecö nö bayeli fa nacajenö yamacö bayeliblamobä. Yamacö lä bayeliblamou wei tä ja, Yai Bada lija bluca bä bufi a̦fa ca̦i doblalou wäyämou mö feduobä. Inaja lä yai. ¹² Yanowamö yama bä yabäcaimi yalo, yamacö a̦fa dodijaö tamou. Dodijidawä yamacö cua yalo bei yamacö bufi jamö ai tä läami. Bluca täbä lija yamacö dodijaö ma waiquii, cafä wamacö lija yamacö yai shi̦lo dodijaö. Camiyä yamacö bufi lä dao wei tänö mlai. Yai Bada tänö wamalecö nofi ojodabou yalo, jolemou mlai ja cama yama ecö yai bejedimou. ¹³ - ¹⁴ Cafä wamacö lija yama tä a̦ oni lä shimaö wei tä a̦ ja, wamacö bufi mlaabä tä cuami. Tä a̦ doamou si ijejewä, wamacö bufi jaducäblobä. ¿Ö̦jö tawä? Ijede wama tä a̦ ji̦lia walalaa lä taleno weinaja, bluca wama tä a̦ ji̦liaö walalao cuobä, ö̦jö lä. Wamacö bufi nia yai lä jaducäblou wei tä ja, yamacö mölaö showaa lä cule. Yamacö bufi lä cuaale, wamalecö wiisibö daö lä waiquilenaja, wamalecö yai daö shaliliobä. Bada tä Jesús a fuu co̦o däjä, camiyä yamacö nowa ja wamacö bufi yai doblalobä. Cafä wamacö nowa ja yamacö bufi nia doblalou mö lä feduo weinaja showawä. ¹⁵ “Inaja yamalecö nofi tabou waiquia lä culajei”, ya bufi cuma yalo, bämacö fe mili waloo bolacaoma. ¿Ö̦jö tawä? Moli bädawä mlai, bämacö bufi doblalamaö bolacao showadaobä. ¹⁶ Masedoniateli bä lijamö ya fuu däjä, bämacö fe nia waloo jayuama. Ya fuu co̦imaö däjä, bämacö fe nia waloo jayuaö co̦ojoloma, Judea jamö ya fuu co̦fälöö däjä wamale bayeliblabä. Inaja ya cuaaö bufi doblaoma ma cui. ¹⁷ Fei däjä ¿wedinaja wamale nofi tabou dodijia cule?Inaja ya nia jo̦wa lä cuaano wei, ¿ya bufi shalilou mlai ja ya cuu bädaoma daanö?Yanowamö showadi täbä bufi lä majöablalou weinaja, ¿inaja camiyä ya bufi ca̦i cuaabä ya daanö?Ma, inaja ya bufi cubä yami. “Ma”, ya bufi cuu waiquiwä ja, “Awei”, ya nia jole cuu bädaomi. ¹⁸ Yai Bada a wa̦ lä cadidou weinaja ya wa̦ cadidou cuwä mö feduwä. Cafä wamacö lija, “Ma”, ya bufi cuu waiquilanö, “Awei”, ya jole cuimi. ¹⁹ Yai Bada bei Ijilubö Jesucristo e lä cui a bufi majöablalono malä mlai. Sibano, Timoteo sho yamacö lä cuinö, cafä wamacö lija Jesucristo yama a wa̦fa lä wäyäle a lä cui a bufi yai shalilioma. “Awei”, a bufi cuu waiquilanö, “Ma”, a jole cunomi. ²⁰ Ma. Yai Bada tänö tä a̦fa bluca wäyäö lä balöono wei tä a̦ bejedi cublobä, “Awei, inaja lä tä cuobä”, a shi̦lo Jesucristo cuu. Ö̦jö cudeenö, Yai Bada lija bämacö nö bayeli nacao däjä, ö̦jö bäma a wa̦fa shi̦lo wädaö. “Jesucristo a wa̦nö ya wa̦ faö lä cule. Inaja lä tä cuobä”, bämacö shi̦lo malä cudou wei, Yai Bada a wa̦fa doblao wäyämobä. ²¹ ¿Ö̦jö tawä? Cristo lija Yai Bada tänö wamacö bufi lofotomabou, camiyä yamalecö bufi ca̦i lä lofotomabou weinaja showawä. Ö̦jö lä showawänö, bämalecö yaibou. ²² Cama bäma ecö nö ö̦jöböamobä, a Bufi jibämobema. Bei bämacö bufi jamö a lä bälöle tä ja, bämacö jaba dobämoa balölayoma, bämalecö nia lä dobädayou wei tä ja, bämacö mölaö showaobä. ²³ Cafä wamacö lija ei ya wa̦ nö lä wäole, ya wa̦ bejedi. Yai Bada tä malä cule. Ya jolemoa bädalayou ja, ya tä wayu daö. Cafä Colidoteli bämacö fe walou co̦o da mlaoblei, bämacö bufi nö bleaamaö co̦o bufio fa mlacunö ya li funomi. ²⁴ Camiyä yamacö lä cuinö bämacö bufi taamaö fe yadiobä yamacömi. Cafä wamacö ma cuinö, Jesucristo wama a nofi mölabou lofote malä waiquile. Bämacö bufi taamaö fe balojoo mlai, wamacö bufi doblalobä bämacö bufi shi̦lo yai lofotoamaö bufi doblao.

¹ Ö̦jö cudeenö, bämacö bufi wa̦lidiblamaö co̦o bufiomi yalo, ya funomi majöwä. Bämacö fe da waloblei däjä bämacö bufi da taamableinaja bämacö bufi taamaö co̦o mlaobä, ya bufi cadidiblaliyoma. ² Abenaja ya bufi cuma. Cafä bämacö bufi wa̦lidiblamaö fa cunoja, ¿wedi bä lija ya bufi nö doblalou co̦obö wei? Wamale bufi doblalamabä, cafä wamacö waiquiwä malä cui. ³ Inaja ya bufi cuma yalo, ya fuu mlai ja, ya tä a̦ oni shimöa balölema. Wama tä a̦ oni möö fa balöonö, wamacö bufi doblalolanö, dodijidawä wamale waloamaö nomöjöobä. Bufi wa̦lidiwä wamacö culanö mlai. ¿Ö̦jö tawä? Wamale bufi doblalamabä, wamacö malä cui. Cafä wamacö lija ya mölaö showaoma. “Ya bufi doblalolanö ya waloo ja, inaja showawä, cama bä bufi ca̦i nia doblalou cuo mö feduo”, ya bufi cuma. ⁴ ¿Ö̦jö tawä? Ya bufi nö bleaalanö ya tä a̦ oniblalema, ya ö̦cölanö. Bämacö bufi wa̦lidiblamabä ya tä a̦ shimano malä mlai. Bämacö nofimaö fe lä balojole wama tä yai dablabä, ya tä a̦ yai shimölema. ⁵ Ö̦jö ma cui, abenaja ya cuu. Wale bufi yai lä wa̦lidiblamaleno wei a lä cuinö, camiyä wale bufi nö bleaamaö ayaonomi. Ö̦jö a lä cuaano wei tänö, cafä wamacö ma cui wamacö bufi ca̦i bluca wajäblou mö feduoma. Ö̦jö ma cui, ei tä a̦ lä cui ja, inaja ya nia cuu fe balojoomi. ⁶ Inaja lä waiquiwä. Ai wamacö bluca mö feduwä lä cuinö wama a wasöa malä waiquileno wei. ⁷ Fei däjä, ö̦jö wama etä nowa tabou mlai ja, a bufi shi̦lo yai yanöcöblamaö da co̦loje. A bufi wa̦lidiblou fa jödödölonö a docua dicolu. ⁸ ¿Ö̦jö tawä? Wawädowä a nofimaö da co̦oje, ö̦jö lä. ⁹ Bämacö nia bejedimou fa mönö, ya tä a̦ oni shimöa balölema, ya wa̦ nia ca̦i fuamamou fa mönö. ¹⁰ ¿Ö̦jö tawä? A doblono lä mlai a lä cui, wama etä nowa taboimi waiquiwä ja, inaja showawä, camiyä ma cuinö ya nofi ca̦i tabou mö feduo. Inaja Cristonö bämalecö taamaö bufi doblao malä cui. Tä nowa wa̦lidiwä cua bädaa ja, ya tä nowa mladamaö waiquilayoma, dodijidawä wamacö cuobä. ¹¹ Sadanasinö bämalecö bufi taamaö dicoo mlaobä. Bämalecö bufi wa̦lidiblamaö bufi lä doblao wei, bäma etä malä dale. ¹² Doasiteli bä lijamö, Cristo dodijidawä ya etä a̦ wäyäö mö lä funo wei däjä, ya tä a̦ wäyäbä Bada tänö dodijidawä tä tabou ma waiquiono wei ma cui, ¹³ u̦asimi Tito a walodalou fa mlacunö, ya bufi yanöcöblonomi. Ö̦jö cudeenö, ö̦jö ya bä fa dacöfälönö, äyämö Masedonia jamö ya cadidou showaoma. ¹⁴ Ö̦jö ma cui, Yai Bada lija, ¡bejedi lä ya bufi doblalou! Yamacö nö wa̦lojoablalobä Cristonö showadi yamacö lä lulubou wei, ö̦jö Yai Bada tä mayo waiquiwä. Jödödöwä täbä lä cublai täbä lijamö Jesucristo yama etä a̦ wäyäö cuaabä, yamalecö bayelibou. Cristo yama a dablamaö lä cuaaö wei, jai nö cle̦deli yama täbä nö u̦cucamaö cuaaö. ¹⁵ Yai Bada tä ma cuinö, ö̦jö täbä nö ca̦i cle̦deli u̦cucuadayou. Cristo yama a dablamaö ja, a bufi doblalou. ¿Ö̦jö tawä? Yama tä a̦ wäyäö lä cuaaö wei däjä, jai yama tä a̦ u̦cucuamaö yamacö cuaaö, bä nia lä fucäamou wei bä lija. Bä nia nomaö shi lä wa̦lijio wei bä lija ca̦i. ¹⁶ Bä nia nomaö shi lä wa̦lijio wei bä lija tä a̦ nö u̦cucamou wa̦li. Tä a̦ bejedi bufiimije yalo, bä malä nomaö wei. Bä nia lä ba̦limio wei bä lä cui bä lija tä a̦ nö shi̦lo u̦cucamou cle̦deli ayawä. Tä a̦ bejedi bufiije yalo bä malä ba̦limiblou wei. ¿Ö̦jö tawä? ¡Tä a̦ yai wayu! Tä a̦ fulimou buobä, tä a̦mi. ¹⁷ Ai bä bluca jole ojodamou lä cuaaö weinaja, yamacö cuaaö bädao malä mlai. Ö̦jö bä lä cui bä nia li fa dobämonö tä a̦ li wäblalaö bädaoje. Ma, camiyä yamacö yai bejedimou. Yai Bada lija yamacö shimamolayoma, Jesucristo lija yamacö yädälanö yama etä a̦ wäyäö cuaabä. Ö̦jönö yamalecö bejedi dablaö.

¹ “Cama bä nofi doablamou co̦a lä cule”, ¿bei wamalecö nofi tabou tawä? Inaja dicoo mlai. Ai bä lä cuaaö weinaja yamacö cuaaö malä mlai. Bä a̦fa wäyämamobä sibä oni dodobou cuaaöje, dodijidawä bä a̦ ji̦liabeje. Ma, cafä wamacö lijamö yama sibä oni ca̦i fubä yamacömi. Ai täbä lijamö ma cui, cafä wamacönö wamalecö a̦fa wäyäbä, yama sibä oni ca̦i nia fuimi. ² Yamacö a̦fa wäyämamobä si oni lä culenaja, inaja wamacö cafä cuwä waiquiwä. Oni täbä a̦ doamou lä culenaja, bluca bä lä cule bä lija wamacö bufi shomi dablamou wawädowä. ³ Oni yama si mömaö mlai ja, cafä bämacö yai jimaö talei. ¿Ö̦jö tawä? Jai Cristonö si oniblalema wamacö cuwä, yamacö lä ojodamou wei tä dodijidawä dablamou wawädoobä. Madofi anö sibä lä oniblaö wejei däjä täbä oni dablamou lä culenaja mlai, Yai Bada tä ba̦limi cua shi lä wa̦lile tä Bufinö, wamacö li dodijidawä dablamou. ¿Ö̦jö tawä? Maa macö ja tä a̦ oni jaba dablamou lä cuono weinaja mlai, bei wamacö bufi jamö Yai Bada tä mayo yai dablamou. ⁴ Cristo lija wamacö lä bayeliblamou wei yama tä möö cudeenö, “¡Bejedi lä Yai Badanö yamalecö shimölema, ö̦jamö lä!” yamacö bufi cuu talei. ⁵ Camiyä yamacö lä dodijiablalou wei tänö mlai. Inaja yamacö nö cubimi waiquiwä. Yai Bada tänö yamalecö bayelibou yalo tä li dodijidawä. ⁶ Yai Bada yama etä a̦ dude wäyäbä yamalecö nö wa̦lojomabou. ¿Ö̦jö tawä? Moisesi yama tä a̦ oni nabä shimaimi. Yai Bada tä Bufi nofi mölabobeje yama tä a̦ dude wäyäö lä cule. Moisesi tä a̦ oninö täbä nomaö malä cui. Ö̦jö ma cui, Yai Bada tä Bufinö täbä ba̦limiblou. ⁷ ¿Ö̦jö tawä? Moisesi etä a̦ lä cui, maa macö ja tä a̦ bluca oniblamolayoma. ¿Ö̦jö tawä? Yai Bada tänö tä a̦ ca̦i fa wawälönö, tä shi̦i wacalablou däjä, Moisesi a ma cui wäyäcu ca̦i mömou wacalamiblaliyoma. Inaja wäyäcu shi̦i cuo shi̦ wa̦liobä etä cuono ma mlai ma cui, etä shi̦i fa dalalöjenö Isaeli ebänö wäyäcu möö quilimaje. ¿Ö̦jö tawä? Täbä nia lä nomaö wei tä a̦ ma cui ja, tä shi̦i damoa waiquilaliyoma ja lä, ⁸ fei däjä Yai Bada tä Bufinö täbä nia yai lä bayeliblamou wei tä a̦ ja, bei tä shi̦i dablamou blaucublou yailayou. ¿Ya wa̦ jolemou daanö? ⁹ Täbä waimamobä tä a̦ jamö, tä shi̦i damoa waiquilaliyoma ja lä, Yai Bada lija täbä nia yai bejedi lä dablamou wei tä a̦ jamö, tä shi̦i nia shi̦lo yai dablamou fe balojoo malä cui. ¹⁰ ¿Ö̦jö tawä? Bejedi lä. Jesucristo tä a̦ cua lä nomöjöle tä a̦ dodijidawä fe balojowä yalo, tä a̦ jaba cuo lä balöono wei tä a̦ ji̦limamou doemi majöwä. ¹¹ Tä a̦ cudiobä lä mlai tä a̦nö, tä shi̦i ca̦i waloa waiquiquema ja lä, tä a̦ nia yai lä cudio wei tä a̦ nia shi̦lo yai dodijidawä dablamou malä cui. ¹² Ö̦jö tä a̦ ja yamacö mölaö yalo, wawädowä yamacö a̦ faö. ¹³ Moisesi buficö jo̦yao lä cuono weinaja yama tä a̦ jo̦yabou cuomi. Wäyäcu shi̦i lä wacalamiono wei däjä, shi̦i lä mlaafälöö wei tä dablaö mlaobeje buficö jo̦yaoma. ¹⁴ Ö̦jö ma cui, ö̦jö bä lä cui bä bufi jifua dicolayoma. Fei däjä ma cui, Yai Bada tänö tä a̦ jaba lä wäqueno wei tä a̦ ji̦liaöje däjä, etä läblawä malä showai, bä bufi jaducäblou mlaobä. Moisesi buficö jo̦yao däjä, a dablaö lä mlaono wejeinaja bä cuwä malä showai. Ö̦jö etä lä läblai, Cristo a bufiblamou däjä etä shi̦lo joyamou. ¹⁵ Awei, fei däjä ma cui, Moisesi etä a̦ doamobä jamö bä bufi jaducäblou mlaobä tä läa showaa. ¹⁶ Ö̦jö ma cui Bada tä lija bä mö yaidou ja, tä lä läle etä nia joyamou. ¹⁷ ¿Ö̦jö tawä? Ö̦jö Bada ya tä a̦fa lä wayoale, ö̦jö Yai Bada tä Bufi waiquiwä. Moisesi etä a̦ nö quiliaö ma cui, Yai Bada bäma a Bufi tabou lä waiquile däjä bämacö quilijobä tä cuami. ¹⁸ ¿Ö̦jö tawä? Bämacö quilii mlai ja, Bada tä lä doblale jamö bämacö mö yaidalou ja, cama a lä culenaja bämacö yanöcö nia cublou mö feduo. Bada tä Bufinö, inaja lä showadi bämalecö taamaö malä cui, Cristo a lä culenaja bämacö cublou mö feduobä.

¹ Yai Bada tänö yamalecö nofi ojodabolanö, Jesucristo yama a wa̦no wäyäö cuaabä wamalecö shimölema. Ö̦jö cudeenö, yamacö bufi ujudublou buomi. ² Wa̦lidiwä yama tä waia waiquilema yalo, yamacö quilibä tä ca̦i cuami. ¿Ö̦jö tawä? Yamacö jolemoimi, ö̦jö yama tä waia malä waiquileno wei. Yai Bada yama tä a̦ ca̦i shominajaablalaimi. Ma. Yama bä mölamaö mlai ja, bejedi dodijiwä, wawädowä yama tä a̦ wawämaö shalilou. Yai Bada tänö yamalecö bejedimou daö. ³ Yama tä a̦ dodijidawä lä wäyäle tä a̦ lä cui, tä a̦ nofi mojodubou fe yadioje ja, bä nomaö shi wa̦lijiobä bä li waiquiwä yalo tä a̦ nofi li mojodubouje. ⁴ Bita jamö Sadanasi a bada lä bufiblamou wei a lä cuinö, ö̦jönö bä bufi mojodumabou. Dodijidawä tä a̦nö bä bufi wacacablou mlaobä cama etä a̦ li lämaö. Tä a̦ bejedi bufii lä mlajei, showadi inaja bä li taamaö, Cristo a nö doblao ö̦jöböaö mlaobeje. ¿Ö̦jö tawä? Yai Bada a cuwä lä dodijiinaja, Cristo a cua mö fedua. ⁵ ¿Ö̦jö tawä? Camiyä yamacö a̦fa wäyämamou malä mlai. Camiyä yamacö mlai, Jesucristo a nofi shi̦lo yai badobobeje, ö̦jö yama etä a̦ yai wäyäö. Jesús wama ecö mö feduwä yalo, ö̦jö etä a̦ ja bämacö bayeliblabä yamacö. ⁶ Tä mö didiobä jamö, cama a wa̦nö tä jaba lä wacacadamaleno wei a lä cuinö, ö̦jö a showawänö, yamalecö bufi malä wacacamabole. Cristonö Yai Bada tä doblao lä damalaleno weinaja, inaja showawä yama tä dablamaö cuo mö feduobä. ¿Ö̦jö tawä? Tä mö ma dödöono wei ma cui, abenaja a jaba cuu malä balöono wei. Bei. Tä da wacacablalu. Einaja a cuma. ⁷ ¿Ö̦jö tawä? Yama tä a̦ lä tabole tä a̦ nowa yai bluca ma cui, mashita yamacö ma cuinö yama tä a̦ didibou. Cama tä nia lofote fa dablamonö, inaja tä li taö. Camiyä jai jaboca yamacö lä cule yamacö lä cui, yamacö lofote malä mlai. ⁸ ¿Ö̦jö tawä? Bluca yamalecö ma yabäcaö wejei ma cui, yamalecö ja̦amabou nö doblobimije. Yamacö bufi ma wedinajamou wei ma cui, yamacö bufi nö bleaaimi. ⁹ Yamalecö nö bleaamaö ma cujei, yamacö yami nö beblaloimi. Yamalecö blabou ma dao wejei ma cui, yamacö ubladou co̦o. ¹⁰ Jesús a shäö bufi lä doblaono wejeinaja, inaja showawä, showadi yamalecö shäö bufi ca̦i doblaoje. Yamacö ja̦amou lä mlai tänö, camiyä yamacö lija Jesús a ba̦limi lä cule tä dablamobä. ¹¹ ¿Ö̦jö tawä? Yamacö demöo showao däjä, yamacö shämobä showadi tä läa, Jesús a nowa ja. Camiyä yanowamö yamacö lä ujudi wei yamacönö, Jesús yama a ba̦limi lä tabole tä dablamobä. ¹² Yama tä a̦ wäyäö tä nowa ja, yamacö shämobä tä cua ma cule, cafä wamacö ba̦limi cuo mö feduobä yama tä a̦ wäyäö fe yadiblou. ¹³ Yai Bada etä a̦ oni jamö, abenaja ai anö tä a̦ oni tablalema. Ya tä a̦ bejedi bufii yalo, ya wa̦ cuoma. Einaja a cuma. Ö̦jönö tä a̦ bejedi bufii lä cuono weinaja, yama tä a̦ bejedi bufii ca̦i cuwä mö feduwä. Yama tä a̦ bejedi bufii yalo, camiyä yamacö ma cui, yamacö a̦ ca̦i faö. ¹⁴ ¿Ö̦jö tawä? Abenaja yamacö bufi cuolanö yamacö a̦ faö. Bada tä Jesús a demi jocädamaö lä co̦ono wei a lä cuinö, Jesús lija yamacö yädäa yalo, ö̦jönö yamalecö demi nia ca̦i jocädamaö co̦o. Cafä wamacö sho, Yai Bada tänö bämalecö nia bluca ublamabou. ¹⁵ Cafä wamacö dodijidawä cuo mö feduobä, ö̦jö lä tä bluca waiquiwä malä cui. Yai Bada tänö täbä nofi lä ojodabou wei tä ja, bä mölaö fa blaucublalunö, cama lija bä bufi a̦fa doblalou ca̦i wäyämou blaucublou mö feduobä. Yai Bada tä doblao dablamobä. ¹⁶ Ö̦jö cudeenö, yamacö bufi ujudubloimi. Bei yamacö sicö ma wa̦lidiaaö ma dodijio däjä ma cui, bei yamacö bufi shi̦lo dodijidawä balaö fe yadia lä cuimadi. ¹⁷ Yamacö nö lä bleaaö wei tä lä cui, tä cudio shi wa̦liobä tä malä mlai. Doblao yamacö cuo shi wa̦liodayobä, inaja lä yamacö cuaaö balöa lä cule. ¿Ö̦jö tawä? Yamacö nia lä doblaodayou wei tä jamö yamacö bufi daeo däjä, yamacö bufi fejeleo dodijio. ¹⁸ Täbä lä dablamou wei täbä lä cui, täbä nia jole jole cuo balöblao bädao malä cui. Täbä dablamou lä mlai, ö̦jö täbä nia shi̦lo yai cudio. Ö̦jö cudeenö, täbä lä dablamou wei täbä ja yamacö bufi daeomi. Täbä dablamou lä mlai yama täbä shi̦lo yai bufiblaö.

¹ Yanowamö bei bämacö lä cui, jai bei bämacö yafibö cuwä, bämacö bufi lä didile. ¿Ö̦jö tawä? Bämacö yafibö wa̦lioblou bädao ja, ai bämacö yafibö cua mö feduadayoa, Yai Bada tänö bämalecö yafibö lä taboladi. Ö̦jö lä bä yafi lä cui, yanowamö täbänö bä lä tablaö wejei mlai, ba̦limi bä yafi cuadayoa. ² Eja bämacö bälöo showao däjä, bämacö la̦amolanö, ö̦jö lä bäma bä yafi bufiblaö. ³ Bämacö didiobä bämacö lucäö bufi doblao lä culenaja, ö̦jö lä bä yafi jamö bämacö ca̦i lucäö bufi doblao, bämacö nö shi̦loco beblalou mlaobä. ⁴ ¿Ö̦jö tawä? Ei bämacö yafibö jamö bämacö cua lä showale däjä, bämacö nofi fo̦lijio ja bämacö a̦ nö bleo. Shi̦loco bämacö bälöo majöobä mlai, ai bämacö yafibö jamö dodijidawä bämacö yai lucäö majöodayobä. Tä cudio dao lä mlai, bäma tä tabi fa feicöfälönö, ba̦limi bämacö yai cuodayobä. ⁵ Ö̦jö bäma bä yafi bufijabä, cama Yai Bada tänö bämalecö taamaö. Bämalecö nia lä dobädayou wei bäma tä bufibobä, cama a Bufi li jibämoa balöbema. ⁶ Ö̦jö cudeenö yamacö bufi shi̦lo lofote li cuo fe yadio. Ei yamacö sicö ja yamacö cuo showao däjä, Bada tä lä bälöladi jamö culanö, yamacö bälöa blajawä. Ö̦jö yama tä daö. ⁷ Yama tä dablaö ma mlai ma cui, tä nia lä cuo wei tä ja yamacö mölaö showalanö, yamacö cudia lä cule. ⁸ Yamacö bufi lofote. Ei yamacö sicö lä cui, yamacö sicö yai daamamou bufi doblao. Bada tä lä culadi jamö yamacö yai co̦o bufi doblao. ⁹ ¿Ö̦jö tawä? Ö̦jö ma cui, Bada lijamö yamacö ma culadi ma cui, äyämö yamacö blajawä bälöa ma showale ma cui, ö̦jö yama tä bufi doblamabobä yama ecö li waiquiwä. ¹⁰ Cristonö täbä nia lä jimaö wei jamö, bämacö bluca nia malä icuo wei, bämacö lä cuaano wei tä jimabä. Ei bämacö sicö ja bämaco cuo däjä bäma tä lä tano wei tä nowa nia co̦amaö cadidio. Wa̦lidiwä bäma tä lä tano wei tä ma cui, dodijidawä bäma tä lä tano wei tä ma cui, tä nowa nia bluca co̦amaö. ¹¹ Bada tä nö quili tamobä a. Ö̦jö yama tä daö cudeenö yamacö a̦ fe blacäjou, ai bä lä cui bä bufi jaducäblou fe yadiobä. Yamacö lä cuaaö wei, Yai Bada tänö yamalecö daö. Cafä wamacö ma cuinö yamalecö ca̦i daö mö feduobä wamacö. ¹² “Dodijidawä yama a wa̦ ji̦liabä, Pablo a wa̦fa wäyämou co̦a lä cule”, wamale nofi tabou dicoo dijä. Camiyä yamacö lija wamacö bufi yai doblalobä yamacö a̦. ¿Ö̦jö tawä? Mijamö ai bä a̦ läo däjä wamalecö nofi bäyäbobä yamacö a̦. Miji bä lä cui, bä bufi nia lä cadidou wei tä ja bä bufi daeo mlai ja, ai täbä lija bä nofi nia lä doablamou wei tä ja, bä bufi shi̦lo yai doblalou talei. ¹³ Yamacö a̦ jo̦wa faö mojodi ja, Yai Bada tänö yamalecö bayeliblabä a malä cule. Ö̦jö ma cui, yamacö a̦ faö walalawä waiquiwä ja, walalawä yamalecö a̦ da ji̦lilä, ö̦jö lä. ¹⁴ Yai Bada tänö yamalecö nofimaö fe balojowä yalo, showadi ö̦jö yama a wa̦ fuabä tä malä cule. Abenaja yamacö bufi yai cuu dodijia lä cule. Yanowamö täbä nia bluca lä nomaö wei jamö Jesucristo a nomaa läa waiquilayoma cudeenö, ö̦jö lija täbä bluca nomaa yädäa waiquilayoma. ¹⁵ ¿Ö̦jö tawä? Täbä bluca bayeliblamobä a nomalayoma, cama bä cuaaö bufi lä doblao wei etä mladobä. Cristonö bä taamaö bufi lä doblao weinaja, bä shi̦lo yai cuaaö majöobä. Bä nomaö shi wa̦lijio mlaobä, ö̦jönö bä ca̦i fa nomalönö, bä ca̦i demi jocädou co̦oma. ¹⁶ Yanowamö täbänö täbä nofi lä tabou wejeinaja, fei däjä ya täbä nofi taboimi majöwä. Shädayai. Cristo a ma cui, a nofi tabou lä balöono wejeinaja camiyä ya ma cuinö ya nofi ca̦i jole tabou mö feduo balöoma. Inaja ya nofi jole tabou ma balöono wei ma cui, fei däjä inaja ya bufi cuimi. ¹⁷ Cristo lijamö bä lä yädäle, bä dude cublou majölayoma cäbä. Bä jaba lä cuaano weinaja fei däjä bä cuaaimi. Dude tä a̦ jamö bä cublou lä majölayono wei cäbä. ¹⁸ Inaja Yai Bada tänö täbä taamaö. Cama lija bämacö ajedeblobä, Cristo a shimölema. Fei däjä, ai täbä ajedeblamaö mö feduobä, yamalecö lämabou. ¹⁹ ¿Ö̦jö tawä? Yai Bada tänö yanowamö täbä ajedeblamabä, Cristo a shäa lämalema, täbä doblou lä mlai täbä lija etä nowa tabou mladobä. Ö̦jö yama tä a̦ wäyäö cuaabä, yamalecö lämabou. ²⁰ Cristo yama a wa̦no wäyäbä yamacö, Yai Bada tä lä nofi wei tä a̦ ji̦liabeje. Cristo yama a wa̦no talanö, yamacö a̦ fe blacäjou. Yai Bada lija bä nofio mö da feduo, ö̦jö lä. ²¹ Cristonö wa̦lidiwä tä dano ma mlai ma cui, camiyä bämacö bayeliblamobä, bäma tä wa̦lidiwä lä tano wei Cristo lija tä yädämaquema. Camiyä bämacö lija, Cristo dodijidawä etä lä cui etä yädäo mö feduobä. Cristo lija bämacö bufi fa cuicunö, Yai Bada lija bämacö dodijidawä dablamou fe yadiobä.

¹ Yai Bada lija yamacö ojodamou yädäa yalo, cafä wamacö lija yamacö a̦ fe blacäjou. ¿Ö̦jö tawä? Yai Bada tänö wamacö nofi lä ojodabou wei tä a̦ jole jole yubo dijejä. ² Yai Bada etä a̦ oni jamö, abenaja Yai Bada tä malä cuno wei. Bei. Bämacö bayeliblabä tä yai cuo lä shaliliono wei däjä, cafä wamacö lija ya yömöca daoma. Wamacö fucäamobä tä yai lä cublono wei däjä, bämacö bayeliblalema. ¿Ö̦jö tawä? Einaja Yai Bada a cuma. ¡Fei däjä wamacö bayeliblamobä jo̦wa! Fei däjä cafä wamacö nia lä bayeliblamou wei bei tä cua dodijia lä cule. Fei däjä showadawä wamacö fucäamobä. ³ Tä a̦ ji̦liaö mojio dicoo mlaobeje yamacö bufi shi̦lo moyawäablalou, Yai Bada yama tä a̦ lä wäyäö wei yamacö a̦fa tamou mlaobä. ⁴ Yamacö cuaaö lä bädao wei tä ma cui ja, showadi yamacö dodijaö, Yai Bada yama a wa̦ lä fuaö wei yamalecö a̦fa jole taö dicoo mlaobeje. Yamalecö nö ma bleaamaö wejei ma cui, yamacö ma yabäcamou wei ma cui, yamalecö doblamaö ma mlajei ma cui, yamacö bufi yanöcölanö yamacö nö wa̦lojaö fe yadio talei. ⁵ Ai däjä yamalecö si yowaöje. Ai däjä yamalecö fe labouje. Ai däjä yamalecö nabä läläoje. Yamacö ojodamou modaaö. Yamacö ca̦i majalishi waiyou. Yamalecö ca̦i ofämaö talajei. ⁶ Suwä bä lija yamacö yabäcäo lä mlai tänö yamacö bejedi dablamou. Yai Bada etä a̦ ja yamacö bufi lä jaducäi tänö ca̦i. Täbä doblou ma mlai ma cui yamacö a̦ faö si ijejeomi. Yama täbä nofi ojodabou. Yai Bada tä Bufi lija yamacö luluamou. Yamacö nofimou shaliliwä. ⁷ Yamacö a̦ faö ja yamacö bejedimou. ¿Ö̦jö tawä? Yai Bada tä lofotenö inaja yamacö cuaaö. Yamacö showadi lä bejedimou wei tänö yamacö nowamöo. ⁸ Wawädowä yamalecö nofi ma tabou wejei ma cui, yamalecö nofi ma wa̦libou wejei ma cui, yamacö bejedimou showao fe yadio. Yamalecö a̦fa ma taö wejei ma cui, yamalecö a̦fa dodijidawä ma wäyäö wejei ma cui, inaja showawä. “Bä jolemou”, yamalecö nofi ma tabouje däjä ma cui, yamacö jolemoimi. ⁹ Jesucristo yama a wa̦no wäyäbä yamacö ma cui, inaja ai bänö yamalecö nofi taboimije. Ai bä mö feduwänö, yamalecö a̦ shi̦lo ji̦liaö bufi doblao ayaoje. “Bä nia shäö cadidioje”, ai bänö yamalecö nofi ma tabou wejei ma cui, yamacö demi fuadalou showaa lä cule. Yamalecö nö ma bleaamaö wejei ma cui, yamacö nomaö mlai yamacö demi cua fe yadia. ¹⁰ Yamacö bufi wa̦lidiaö ma cui, yamacö bufi doblalou fe yadio showawä. Yamacö nö fo̦lili bleaaö ma cui, tä nowa yai lä bluca wei tä ja, bluca yama täbä dobäö. Yamacö nö madofibimi ma cui, tä jödödöwä bluca lä cublai, camiyä yamalecö befi li bluca waiquiwä. ¹¹ Colidoteli bä. Cafä wamacö lija yamacö a̦ jo̦yaami. Bämacö bufibou. ¹² Bufi läo mlai ja, dodijidawä bämacö yai nofimaö ma cui, cafä wamacönö wama tä lä tabole tänö, yamalecö dodijidawä nofimaö dobloimi dicowä. ¹³ Ijiluyä ya bä dodijidawä lä yömölaablalaö weinaja bämacö yömölaö lä cule. Camiyä yamacönö bämacö dodijidawä lä nofimalenaja, yamalecö nofimaö cuaaö mö da feduoje. ¹⁴ Jesucristo a bejedi bufii lä mlajei bä lä cui lija bä yädäo dijä. Cama bä bufi lä cuaaö weinaja etä shomia cudeenö, wamacö bufi nia cuaaö fe usucuo malä mlai. Tä lä dodijidai tä sho, tä lä wa̦lidi tä sho, ¿täcöbä nia coyocoo daanö? Ma. Didi tä sho, jalu tä sho, täcöbä nofi nia tamayou malä mlai. ¹⁵ Fecula bada a bufi lä cuaablalou weinaja, Cristo a bufi nia ca̦i cuaablalou mö feduomi. Ma, Jesucristo a bejedi lä bufii wei a lä cui sho, a bejedi bufii lä mlai sho cäcöbä nofi tamayobä tä malä mlai. ¹⁶ Täbä nö jole ijidubö lä bufiblamou wei täbä lä cui, Yai Bada etä yafi jamö ¿ö̦jö täbä nia dablamou daanö? ¿Ö̦jö tawä? Ja̦o. Camiyä bämacö lä cui, ¿Yai Bada bäma ecö yafibömi daanö? Yai Bada tä demi cua shi lä wa̦lile, ö̦jö bäma ecö yafibö malä cui. Yai Bada etä a̦ oni lä cuu weinaja showawä. Abenaja Yai Bada a cuma. Ö̦jö ya bä ca̦i nia bälöo. Ya bä nia ca̦i fuu. Cama bä lija showadi ya nia bufiblamodii. Iba bä nia yai cuo. ¹⁷ Einaja a cuma. Ö̦jö cudeenö, abenaja Bada tä ca̦i cuma. Ö̦jö wama bä fa dacönö bä da yaiicu. Ya täbä nofi lä shamibou wei täbä fuli dijejä. Ö̦jö däjä, bämacö nia shi̦lo dodijidawä blacämabou. ¹⁸ Camiyä wamale nofi nia ca̦i Fö̦ömaö. Inaja showawä, cafä wamacö lija ya nia ijilumou. Ijiluyä wamacö nia cuo, tääyä wamacö nia ca̦i cuo. Bada ya shi̦lo lofote lä ayai, inaja ya cuu waiquiwä. Einaja Bada a cuma.

¹ Camiyä bämacö lija, Yai Bada tänö ö̦jö täbä a̦fa bluca wäa waiquibema. ¿Ö̦jö tawä, bämacö lä nofimale wamacö? Ö̦jö cudeenö, bämalecö bufi nia lä shamiamaö wei täbä bluca lä cui, bäma täbä fulii da mlado, bei bämacö sicö bädawä mlai, bämacö bufi yai auobä. Yai Bada bäma a nö quili talanö, cama bäma ecö yai dodijidawä cuobä. ² Dodijidawä wamalecö yai da nofima. Moli ma cui bämacö yabäcanomi. Bämacö bufi wa̦lidiamanomi. Bämacö mölamanomi. ³ ¿Ö̦jö tawä? Bämacö a̦fa tabä ya wa̦mi. “Bämacö bufibou”, ya cuu malä waiquiono wei. Shominaja tä cublou bädao ma cui, bämacö nofimaö waiquiwä. ⁴ Bämacö yömölaö walalaobä wamacö. “Ei bä dodijaö”, bämacö nofi tabou. Wamacö dodijaö yalo ya bufi yai lofoteo. Showadi yamacö nö ma bleaaö wei ma cui, cafä wamacö nowa ja ya bufi doblalou fe yadio talei. ⁵ Eja Masedonia jamö yamacö waloo däjä, yamacö bälöo yanöcöblonomi. Yamacö cuaaö lä bädao wei tä ma cui ja, yamacö nö bleaadii showaoma. Yamalecö nofi lä wa̦libou wejei bänö showadi yamalecö yabäcadimaje. Yamacö nofi ca̦i jalujuo ja, yamacö nö bleaama. ⁶ Ö̦jö ma cui, täbä bufi lä jalujou wei, Yai Bada tänö täbä bufi shi̦lo bayeliblaö talei. Tito a lä waloqueyoluu wei tänö, yamacö bufi lofotoblou co̦layoma. ⁷ A lä waloqueyoluno wei tänö bädawä mlai. Cafä wamacö a̦fa lä wäyäjälono wei tä a̦nö, yamacö bufi yai doblaloma. ¿Ö̦jö tawä? Tito wama a bufi jo̦wa lä lofotoamano wei tä a̦ wäyäö fa co̦ojolonö, camiyä yamacö ma cui, yamacö bufi ca̦i lofotoblou mö fedua co̦layoma. Wamale möö bufi lä doblaono wei tä a̦fa ca̦i wäyäjäloma. Wamacö bufi lä shädayaimono wei tä a̦fa ca̦i. Wamale nofi bäyäbou bufi lä doblaono wei tä a̦fa ca̦i. Ö̦jö tä a̦fa blucanö ya bufi yai doblalodima. ⁸ ¿Ö̦jö tawä? Cafä wamacö lija ya tä a̦ oni lä shimöleno wei tä a̦nö, wamacö bufi ma fo̦liblaliyono wei ma cui, “Shädayai, ¿wedi tä tabä ya tä a̦ ca̦i li shimöblaa dicolema?”, ya bufi ca̦i cublaloimi. Jaba ya bufi shi̦lo cuma ma cui. Ö̦jö tä a̦ oninö wamacö bufi jo̦wa ma fo̦liblaliyono wei ma cui, nö dedejeblou mlai ja, wamacö bufi ononoblou co̦layoma. ⁹ Ma, ya bufi yai doblalou. Wamacö bufi lä fo̦liblaliyono wei tä ja mlai. Ö̦jö tänö wamacö bufi mö yai yabajadou co̦oma yalo, ya bufi yai li doblalou. Camiyä ya wa̦nö, Yai Bada tä showawänö wamacö bufi fo̦lijiblamalema, cama lija wamacö bayeliblamou co̦obä. Camiyä yamacö a̦nö wamacö nö bleaaö mlaobä. ¹⁰ ¿Ö̦jö tawä? Yai Bada tänö bä bufi fo̦liblamaö däjä, bä bufi mö yabajadou fa majöonö bä malä fucäamou wei. Ö̦jö tä ja, bä shädayaimobä etä cuami majöwä. Ö̦jö ma cui, yanowamö täbä lä cublai, täbä bufi lädou ma mlai ma cui, täbä bufi fo̦lijiblou bädao ja, Yai Bada tänö täbä fucäabä ö̦jö tämi. Täbä nomabä ö̦jö täbä li waiquiwä. ¹¹ ¿Ya jolemou daanö? Wamacö bufi lä fo̦liblaliyono wei, ö̦jö Yai Bada tä mayo li cuo waiquioma yalo, wamacö shi yai jalimou majöa. Fei däjä wamacö a̦ nö wäo bufi doblao. A nofi lä jushuano wei a lä cui, fei däjä, “Cuaaö buo”, wamacö cuu mlai ja, wamacö a̦ yai waiteliblou majöa lä cule. Tä lä wa̦lidii wama tä nö quili yai taö majöa. Fei däjä wamale nofi shi̦lo yai bejedi tabou. Mijamö a lä cuaale, ö̦jö wama etä cadejeblaö bufi doblao. Fei däjä ö̦jö wama tä yai fulii ja, wamacö a̦fa tamobä tä cuami waiquiwä. ¹² ¿Ö̦jö tawä? Cafä wamacö lija ya si oni lä shimöleno wei däjä, a doblono lä mlai ya wa̦fa wayoaö bädaobä ya tä a̦ tanomi. A lä yabäcano wei ya nofi bäyäbobä tä ca̦i mlai. Yai Bada tänö wamacö bufi jaducäblamabä ya tä a̦ li oniblalema. Wamale bejedi lä bufibou wei wama tä nö ca̦i ö̦jöböabä. ¹³ Ö̦jö cudeenö, fei däjä yamacö bufi ca̦i dodijidawä cua co̦a lä cule. Yamacö bufi ca̦i dodijidawä cuo co̦o waiquio däjä, cafä wamacö lija Tito a bufi yai lä doblalono wei tä ja, yamacö bufi yai doblalou fe balojooma. Cafä wamacö nofi jaba jalujuboma ma cui, wamacö dodijaö fa dalalönö, a bufi malä doblalono wei. ¹⁴ Tito lija, cafä bämacö a̦fa dodijidawä lä wäyäno wei tä ja, ya jolemonomi. ¿Ö̦jö tawä? Tito a ma cuinö wamacö dodijaö dalalema. Cafä wamacö lija yamacö a̦ faö ja, yamacö showadi lä bejedimou weinaja, Tito a ma cui lija yamacö bejedimolayoma. ¡Inaja yai! ¹⁵ Wamacö nofimaö ma waiquiono wei ma cui, wama a wa̦ lä fuano wei tä ja a bufi cuolanö, ¡bejedi lä wamacö yai nofimaö fe balojowä! Wamacö bufi quilijolanö wama a lä walomaqueno wei tä nofi ca̦i jaducäbou showaa yalo, wamacö yai nofimaö. ¹⁶ ¿Ö̦jö tawä? Cafä wamacö lijamö ya yai mölaö shaliliobä wamacö waiquiwä cudeenö, bejedi lä ya bufi doblalou.

¹ Iba wamacö. Masedonia jamö, Jesucristo ebä lä yododoblai bä lä cuaaö wei tä ja, bämacö yömölaö ojode. Yai Bada tänö bä nofi lä ojodabou wei etä dablamou malä wawädoi. ² Bä yabäcamou ja bä nö yai bleaama ma cui, bä bufi doblalou fe balojoo fe fa yadionö, bejedi lä bä dodijaö. Bä nö fo̦li ma bleaalanö ma cui, täbä bayeliblaö bufi doblao fe yadiomaje. ³ Ya bä shi ö̦jöde dalalema. Blada bluca täbä jibäaö ma waiquilajenö ma cui, bä nö lä bleaale bä bayeliblaö bufi fa doblaojenö, ai bä bluca yädäamaö co̦omaje. ⁴ Camiyä yamacö lija bä bufi shalililanö, bä a̦ fe blacäjou dodijioma. Jelusale jamö Jesucristo ebä nö a̦fa bleaaö fa ji̦liläjenö, blada bä ja bä nia lä bayeliblaö wejei bä lija bä yädäblou bufi doblaoma. ⁵ ¿Ö̦jö tawä? Bä shi ö̦jödao fe balojooma, camiyä yamacö bufi cuu lä bädaono weinaja mlai. Bada tä Jesús lija bä noshi ö̦jöde waiquiwä yalo bä jibämoquema. Camiyä yamalecö a̦ ji̦liabeje, bä shi ca̦i ö̦jödaoma, Yai Bada tänö bä taamaö bufi lä doblao weinaja showawä. ⁶ Masedonia jamö bä lä bälöbiyei bänö, blada bä jibäö lä cuaaö wejeinaja, inaja showawä cafä wamacö cuaaö mö feduobä, Tito yama a nia shimaö co̦o, wamacö nowa jaba lä tano weinaja, wamacö nowa yai taö cadidiobä. Wamacö a̦ nö jaba lä wäono weinaja, Jelusaleteli wama bä yai bayeliblaö cuaabä. ⁷ ¿Ö̦jö tawä? Wamacö bufi yai lofote. Dodijidawä Yai Bada wama etä a̦ yai wäyäö. Wamacö bufi yai jaducäwä. Wamacö bufi nö yai wa̦lojoablalou. Wamalecö yai nofimaö. Ö̦jö cudeenö, ö̦jö lä tä ja wamacö lä dodijaö weinaja, blada bä ja wamacö shi nia lä ö̦jödao wei tä ma cui ja, bä ca̦i da dodija. ⁸ Inaja bämacö nowa ma tale ma cui, bämacö nia nosiemaimi. Wamacö nia yai lä cuaaö wei ya tä dablabä ya wa̦. Masedonia jamö bä lä bälöbiyei bä lä dodijaö weinaja, wamacö cuaaö mö feduo ja, wamacö bejedi lä nofimou wei ya tä nia möö. ⁹ Bada tä Jesucristo lä cuinö wamacö nofi lä ojodabou wei wama tä daö. Dodijidawä a ba̦limi cuodayoma ma cui, cafä wamacö bayeliblamobä, cama etä bluca fa dacönö a shi̦loco itolayoma. A fo̦liblou majölayoma. A lä fo̦liblaliyono wei tänö, cafä dodijidawä wamacö yai ba̦limi cuo majöodayobä. ¹⁰ ¿Ö̦jö tawä? Abenaja camiyä ya bufi cuu. Jesucristo wama ebä bayeliblaö bufi doblaoma yalo, lasha ai a cuo da balöoblei däjä, blada wama bä jo̦wa mada shimomablei. Wama tä taö jo̦wa bufi da doblaoblei, fei däjä tä yai da taje, ö̦jö lä. Tä nö yai dodijidaobö wei. ¹¹ Wamacö cuaaö bufi da doblaobleinaja, fei däjä, bufi doblalolanö wamacö yai cuaabä. Wama bä blada lä tabole tä ja, wama bä dobäbä. ¹² Wama tä lä tabole wama tä jibäaö bufi doblao ja, Yai Bada wama a bufi doblalamaö cuquei. Wama tä tabou lä mlale tä nia wa̦lii malä mlai. ¹³ Cama bä shi̦lo yai dodijidawä cuo majöo ayaobä ya wa̦ faimi, cafä wamacö nö fo̦lili bleaaö ayaobä mlai. ¹⁴ Abenaja ya bufi shi̦lo cuu yalo ya wa̦. Cafä wamacö fei däjä dodijidawä lä cule wamacönö, ai bä nö lä bleaale wama bä nofi ojodablalaö balöobä. Ai däjä nomöjöwä, cafä wamacö nö bleaaö nomöjöo däjä, inaja showawä cafä wamacö ca̦i taamamou nomöjöobä. Fe usucuwä bämacö bluca cuobä. ¹⁵ Tä a̦ oni lä cuu weinaja showawä. Abenaja tä a̦ cuu. Bluca täbä lä dolaleno wejei bä lä cuinö täbä feibou juonomije. Wiisibö täbä lä dolaleno wejei bä lija bä damonomi. Einaja tä a̦ cuu. ¹⁶ Camiyänö bämacö bufibou lä culenaja, Tito a ma cuinö wamacö bufibou mö fedua. Inaja Yai Bada tänö a bufi taamama yalo, ya bufi doblalou. ¹⁷ Cafä wamacö lija a fubä, yamacö a̦ fe lä blacäjono wei däjä, a wa̦ fuo showadaoma. A fuu bufi doblao waiquioma yalo, a nia fuu. ¹⁸ Camiyä bämacö mashi ai Jesucristo e lä cui, Tito lija ö̦jö yama e nia ca̦i shimaö. Jesucristo etä a̦ dodijidawä wäyäö ja, a wa̦ shalilou yalo a nofi showadi lä dobou wejei a lä cui. Jesucristo ebä lä yododoblai bänö a daö waiquiweje. ¹⁹ Jelusale jamö yamacö fuu lä nomöjöo wei däjä ma cui, ö̦jamö a nia ca̦i fuu. Yamalecö bayeliblabä, Jesucristo ebä lä yododoblai bänö, fei däjä ö̦jö a yaia shalililemaje. ¿Ö̦jö tawä? Fei däjä blada bä shimomaö lä cudujei. Jelusaleteli bä lijamö yama bä ca̦i fuu däjä, ö̦jö yama bä blada co̦waö cuaabä jamö, camiyä yamacö lija ö̦jö a nia nocaaö. Jesucristo ebä nö lä bleaale bäma bä bayeliablalaö ja, Yai Bada tä nia doblao dablamou. Camiyä bämacö ma cui, bäma bä bayeliblaö lä ojodao wei, tä nia ca̦i dablaöje. ²⁰ Jesucristo ebä nö lä bleaale bäma bä dobäbä, Jelusale jamö yama bä nia ca̦i blada fufälöö. Ö̦jö yama bä blada lä fulii wei tä ja yamacö a̦fa tamou mlaobä, yamacö moyawäablalou. ²¹ Yai Bada lija yamacö dodijaö dablamobä, yamacö bufi shi̦lo malä daeo wei. Yanowamö täbä lija ca̦i. ²² Cafä wamacö lija Tito, ai sho, yama cöbä shimabä jamö, camiyä bämacö mashi Jesucristo ai e ma cui, ö̦jö cäcöbä lija yama e nia ca̦i yädäamaö. Bluca yama a wabaö waiquiwä, yama a bejedimou möbä. Yama a lä shimöadalaö wei tä ma cui ja, a ojodamou bufi doblao talei. Cafä wamacö nofi mölabou dodijia cudeenö, fei däjä cafä wamacö lijamö a yai fuu shi jalimou lä cule. ²³ ¿Ö̦jö tawä? Tito a lä cui, camiyä sho yafäcö lä ojodamou wei a. Cafä bämacö bayeliblabä jamö, ö̦jö a yädäa. Ai cäcöbä lä cui, Jesucristo ebä lä yododoblai bänö cäcöbä shimölemaje. Cäcöbä lä cuaaö wei tänö, Cristo showadi a doblao dablamaböö waiquiwä. ²⁴ ¿Ö̦jö tawä? Ö̦jö bä waloo däjä, dodijidawä bä ca̦i da cuoje, ö̦jö lä. Jesucristo ebä lä yododoblai bänö wamacö a̦fa nofimou ji̦liabeje. Ei bä nia lä fuu wei bä lija, cafä bämacö nofi showadi lä dobou wei tä bejedi dablafälöbeje.

¹ Jesucristo wama ebä bayeliblabä wama bä blada nia lä shimaö wei, ya tä a̦fa wayoabä tä cuami waiquiwä. ² Wama bä bayeliblaö bufi doblao malä waiquio wei. Bämacö daö. Masedonia jamö bä lä bälöbiyei bä lä cui lija bämacö nofi dobou talei. “Ai a lasha cuo lä balöofe a lasha ma cui ja, Acaya jamö bä lä bälöle bänö, bä blada shimomaö cuaaö waiquiomaje”, yamacö shi̦lo cuu talei. Cafä bämacö shi a̦fa jalimou fa wäyänö, cama ai bä bluca lä cui, bä shi jalimoa mö fedulayoma. ³ Ö̦jö ma cui, blada wama bä shimoa waiquimalema cudeenö, Tito sho, ei cäcöbä sho, yama bä shimaö balöa lä cule, wama bä blada lä tabole tä möblabeje. Wama bä blada ca̦i ajedebou showadaobä, bämacö a̦fa wäyäö ja ya lä cuno weinaja showawä. Bämacö nofi lä dobou wei tä ja, ya jolemou majöo mlaobä. ⁴ Mijamö camiyä ya fuu fa majöonö, Masedoniateli ai ya bä nocamabou bädawä ja, wamacö jolemou dablamou majöo mlaobä. Ya mölaö ma cadidio wei ma cui, bämacö jolemou fa dalalönö ya quilijou majöo mlaobä. Camiyä shi̦lo bädawä mlai, cafä wamacö ma cui wamacö yai quilijou mö feduo mlaobä ya wa̦. ⁵ ¿Ö̦jö tawä? Ö̦jö cudeenö, cafä wamacö lijamö Titonö cäcöbä ca̦i fuu balöobä, ya bä nowa tama. “Inaja yai”, ya bufi cuma. Ya waloo showao mlao däjä wama bä blada ajedebou showadaobä, wamacö a̦ nö lä wäono weinaja showawä. ¿Ö̦jö tawä? Wama bä ajedebolanö, camiyä yamacö a̦ faö mlai ja, bufi doblalolanö wama bä jibäa showadabebä. ⁶ Abenaja tä malä cule. Tä lä döaö wejei tä co̦aö cadidioje. Moli mo döamou ja, moli a nia co̦amamou. Bluca mobä döamou ja, bluca bä nia co̦amamou. ⁷ Wama bä nia blada lä jibäö wei wamacö lä cuinö, cafä wamacö bufi bluca lä shalilou weinaja, wama bä nia blada jibäö cuaaö. Wama bä blada jibäalanö wamacö bufi läblou majöo mlai. Bä da jibäcöje, täbä cudii tänö mlai. Bufi doblalolanö täbä lä jibäö wejei bä lä cuinö, Yai Bada tä Bufi yai doblalamaöje. ⁸ Cafä wamacö ma cui, wamacö nia yai lä bayeliblamou wei tä ja, Yai Bada tänö wamacö dobäö daö fe balojowä. Wamacö fo̦limou mlaobä. Bä bluca lä dodijaö wei wama bä ca̦i bayeliblaö mö feduobä. ⁹ ¿Ö̦jö tawä? Tä a̦ oni lä cuu weinaja showawä. Abenaja tä a̦ cuu. Bä lä fo̦li wei showadi bä bayeliblaö lä culadi. A nia dodijaö shi wa̦lii. ¹⁰ Bä lä ficalimou wei bä lija, mobä bluca jibäaö talei. Täbä ofäö mlaobä nii bä bluca ca̦i lalomaö. ¿Ö̦jö tawä? Ö̦jö a showawä lä cuinö, wama bä lä tabole bä nia balamaö. Bä nö lä bleaaö wei, wama bä nofi showadi ojodabobä, afä bä nia blucablamaö. ¹¹ Wamacö shi lä ö̦jöde wei tä nowa ja, wamacö bufi nia ca̦i bayeliblamou fe balojoo. Bä nö lä bleaale bä lija yama bä blada jibädayou däjä, cafä wamacö nowa ja, Yai Bada lija ö̦jö bä bufi nia a̦fa yai doblalou wäyämou. ¹² Jesucristo bäma ebä lä bayeliblaö wei tä ja, cama bä bayeliblamou bädao mlai ja, Yai Bada lija bluca bä bufi a̦fa ca̦i doblalou wäyämou fe malä balojoo wei. ¹³ Jesucristo wama ebä bayeliblaö bufi lä doblao wei tänö, wamacö lä bejedimou wei tä nia dablamou. Ö̦jö tänö Yai Bada a wa̦fa nia dodijaö wäamou. ¿Ö̦jö tawä? Cristo dodijidawä wama etä a̦ bejedi fa bufinö, wama tä a̦ fuaö cadidiwä. Bufi lämou mlai ja, Jelusale jamö Jesucristo ebä lä bälöle wama bä bayeliblaö bufi malä doblao wei. Shomi jamö bä lä bälöblai bä ma cui, ö̦jö wama bä bayeliblaö bufi ca̦i doblao. ¹⁴ Yai Bada tänö wamacö nofi lä ojodabole tä dablamou fe balojowä yalo, ö̦jö bä lä cuinö wamacö bufijaöje. Wamacö nö ca̦i bayeli nacaöje. ¹⁵ Camiyä bämalecö yai lä dobäleno wei a lija, bämacö bufi a̦fa yai doblalou da wäamo. Bufi lämou mlai ja, tä yai lä lofote wei tä ja, ¡bejedi lä Yai Bada tänö bämalecö dobälema!

¹ Cristo a wa̦ oquewä faö lä cuaano weinaja, camiyä Pablo ya wa̦ oquewä faö cuaaö mö fedua lä cule. Wamale a̦ ji̦liabä, ya wa̦ fe nia blacäjou. ¿Ö̦jö tawä? Ai wamacönö abenaja wamale nofi jo̦wa tabou. “Eja culanö a wa̦ Pablo faö ma quilii wei ma cui, blajai jamö a culanö, a wa̦ shi̦lo li faö waiteliblou.” ² Ja̦o. Mijamö ya waloo däjä ya wa̦ faö waiteliblou mlaojolobä, dodijidawä bä da cuicu, ö̦jö lä. Yanowamö täbä showadi lä cuaaö weinaja, ¿camiyä yamacö cuaaö mö feduo daanö? Inaja ai wamacö bufi nami cuablalou. Inaja wamalecö nofi tabou dicoo ja, bejedi lä ya wa̦ nia faö lofotoblojolou. ³ Bita jamö yamacö bälöa ma showale, yanowamö täbä showadi lä cuaaö weinaja yamacö cuaaö malä mlai. Cama bä lä ishou weinaja yamacö cuaaimi. Camiyä ya li ishobä, tä li shomi. ⁴ Täbä ishobä täbä ca̦i lä fuu wejei yama täbä bou malä mlai. Yai Bada etä lofote lä cui ö̦jö yama etä yai bufiblaö, fecula bada yama etä wa̦liabä. ⁵ Yai Bada etä a̦ ji̦liaö mlaobeje, ai bä a̦ shi̦lo lämodii ma cui, yama bä a̦ nö wa̦loblamaimi. Ala nacö badanö bä fe dadomabou lä culajeinaja, tä a̦ ji̦liaö mlaobeje tä lämabou ma cuo wejei ma cui, yama etä wa̦liaö cuaaö. Bä bufi ma shominajaablalou wei ma cui, Cristo a wa̦ dodijidawä fuabeje yama bä bufi li taamaö fe yadio. ⁶ ¿Ö̦jö tawä? Cristo wama a nosie yai fuaö lä daö wei däjä, wama a nosie fuaimi dicowä ja, bämacö nö nia bleaamaö. ⁷ Bä bufi yai da daeo. “Camiyä Cristo ya e”, wamacö nofi lä tamamou wei wamacö lä cui, bä bufi da jaducäicu. Cafä Cristo wama ecö lä culenaja, camiyä yamacö ma cui, yama ecö cua mö fedua. ⁸ Cafä bämacö bayeliblabä, Bada tänö yamalecö lämabou lä cule. Yamalecö a̦ ji̦liabä yamacö. Bämacö famimabä mlai, bämacö yai bayeliblabä yamalecö lämabou. ¿Ö̦jö tawä? Yamalecö a̦ ji̦liabä yamacö, ya cuu nofi jo̦wa ma jushuaö wei ma cui, ya wa̦fa nia bada wäamou quiliimi. ⁹ Bämacö quilimabä ya sibä oni shimaimi. Inaja wamale nofi tabou dicoo dijä, ¿ö̦jö tawä? ¹⁰ Cafä wamacö lijamö, abenaja ai bä jo̦wa malä cuu wei. “Pablo oni etä a̦ jamö, a wa̦ ji̦limamou lofote. A wa̦ ji̦limamou ca̦i waiteli. Ö̦jö ma cui, cama a yai lä dablou wei däjä, a dablamou quilii majöo. A wa̦ nö lofotoblobimi talei.” Wale a̦fa wayoaöje ja, inaja bä jo̦wa cuu. ¹¹ Inaja bä lä cuu wei bä lä cui lija abenaja ya cuu. “Ö̦jamö ya waloo däjä, oni tä a̦ jamö ya lä cuu weinaja, inaja showawä ya nia cuaaö shalilou.” ¹² Mijamö showadi bä dodijidawä lä jimöo wei, ¡wamicai bä li dodijidawä cuo ayaobä! Yai Bada lija bä nia dodijidawä lä dablamou wei tä ja, bä shalilou mlai ja, cama yanowamö bä lija bä nia dodijidawä fa dablamonö bä bufi shi̦lo cuaablalou dicoo. Inaja bä cuaaö dicoo ja bä bufi daomi waiquiwä. ¹³ Camiyä yamacö a̦fa dodijaö wäamobä tä cuami waiquiwä ja, yamacö a̦fa nia wäamou buomi. Yai Bada tänö yamalecö yai lä shimöleno wei jamö, yamacö lä ojodamou wei tä ja, yamacö a̦fa nia shi̦lo wäamou bädao. Camiyä yamacö lija, cafä wamacö ma cui, wamacö nabä ca̦i shimöquema. ¿Ö̦jö tawä? ¹⁴ Mijamö yamacö da ojodamoblei tä ja, yamacö a̦fa shi̦lo yai wäamou cuquei. Camiyä yamacönö, cafä wamacö lija Cristo yama etä a̦ mada wäyäyolublei. ¹⁵ Ai täbä ojodamou lä dodijaö wei tä ja, camiyä yamacö a̦fa nia wäamamoimi. Camiyä yamacönö yama tä tano malä mlai. Yamacö nia jimöo bashiblaomi. Ma, camiyä yamacö nia ojodamou lä majöo wei jamö, yamacö bufi shi̦lo yai shalilio waiquia lä cule. Ö̦jö tä ja, yamacö li mölaö waiquia. Jesucristo wama a nofi mölabou lofotoo däjä, wamacö fe bluca lä fa̦yole täbä lijamö yamacö nia ojodamou nomöjöo, ¹⁶ täbä bälöa fe lä dolejele jamö, yama tä a̦ dodijidawä wäyäö nomöjöobä, ai bänö tä a̦ wäyäö lä waiquiono wejei jamö mlai. Inaja yamacö nia cuaaö, shomi bä ojodamou mö lä feduono wei tä jamö, yamacö a̦fa jole wäamou bashiblao mlaobä. ¹⁷ Abenaja Yai Bada etä a̦ oni cuu. Yanowamö a wa̦ shi doaö bufi doblao ja, cama a nofi doamolanö mlai, Bada tä nofi shi̦lo yai doabä. Einaja tä a̦ cuu. ¹⁸ Cama bä a̦fa dodijaö lä wäyämou wei tänö, Yai Badanö bä nofi nia taboimi. Bada tänö bä a̦fa dodijaö lä taö wei däjä, ö̦jö däjä bä nofi nia shi̦lo tabou cuquei.

¹ Bei. Miji bä showadi lä jimamou weinaja, ya wa̦ nia faö bashio ma cui, wamale a̦ ji̦lia fe da yadilä. ² ¿Ö̦jö tawä? Yai Bada tänö wamacö nofi lä jalujubou weinaja, camiyä ya ma cuinö bämacö nofi jalujubou mö feduo. Cama bä fe̦yalobö e lija, suwä bä moco fubaö dao lä mlajei bä dodijidawä jibäaö lä cuaaö wejeinaja, Cristo lija, inaja showawä cafä bämacö ca̦i jibäa mada taquii. ³ Ö̦jö ma cui, bämacö nofi fo̦lijibou. Mölamalewä cäcönö, Ewa a mölaa lä tamaleno weinaja wamacö cublou mlaobä. Cristo wama a shi̦lo yai bejedi nofimaö cadidiobä a ma cui, shomi tä a̦ ja wamacö bufi li majöblou dicoo mlaobä. ⁴ Ja̦o. Wamale a̦ da ji̦lilä, ö̦jö lä. Shomi tä a̦ lä wäyäö wejei, wama bä a̦ jo̦wa ji̦liaö ojode malä waiquii. Cafä wamacö lija Jesús yama a wa̦fa da wäyäblei, tä a̦ shomiblamaö ma waiquioje däjä ma cui, wama bä a̦ jo̦wa ji̦liaö bufi doblao dicoo. Yai Bada wama a Bufi tabou ma waiquile ma cui, shomi wama tä a̦ jo̦wa däaö bufi doblao majöblaa. Jesucristo wama etä a̦ dodijidawä tabou ma waiquile ma cui, shomi tä a̦ ja wamacö jo̦wa yömölamou bufi doblaa majöa. ⁵ Jesucristonö miji bä jo̦wa lä shimöleno wei, ¿miji bei bä shi̦lo dodijaö ayao daanö? Camiyänö ¿bei ya wa̦no wäyäö daimi tawä? Inaja camiyä ya nofi tamoboimi. ⁶ Wawädowä bämacö lä yömölaö wei jamö, wamale aca a̦fa jayu taö ma mlai ma cui, tä a̦ nia yai lä wäyämou wei tä a̦ lä cui, camiyänö ya tä a̦ yai li daö. Wamale daö malä waiquile. Yamacö cuaablalou lä bädao wei tä ma cui ja, yamacö bejedi dablamou. ⁷ Mijamö Yai Bada ya etä a̦ dodijidawä da wäyädiblei däjä, bämacö yabäcaö mlaobä, ya tä nowa nacanomi. Ya nacobä ya ma cui, “Ya bufi lofotoablalou fe yadio weicätä”, ya bufi cuma. Inaja ya da cuaablei, ¿tä wa̦lidioma daanö? ⁸ Cafä bämacö bayeliblabä, Jesucristo bufilewä ai bä lä yododoblai bä lija ya li bayeliblamolayoma. Ö̦jö bä lija ya dobämobä bä cuono ma mlai ma cui. ⁹ Cafä wamacö lijamö ya da cuoblei däjä, ya ma fo̦liono wei ma cui, nii bä ja bämacö yabäcanomi. Masedonia jamö culanö, Jesucristo ebä da waloicui bänö wale fa dobälöjenö, dodijidawä ya cuo fe yadioma. ¿Ö̦jö tawä? Nii bä ja bämacö yabäcaö mlaobä ya bufi läoma. Obi ma cui, bämacö nia yabäcaimi. ¹⁰ Bämacö yabäcaö da mlaoblei tä ja, “¡Inaja lä yai!”, ya bufi cuu. Acaya jamö wamacö lä bälöblai, ai wamacö a̦ ma läo däjä, ya wa̦fa nia ji̦limamou fe yadio. Ya jolemoimi. Ya nacono lä mlai, ya quilijou mlai ja ya wa̦fa nia wäyämamou. Cristo ya wa̦fa bejedi wäyäö lä culenaja, inaja showawä ya wa̦fa nia ca̦i bejedi wäyämou cuo mö feduo. ¹¹ ¿Bämacö nofi wa̦libou yalo, bämacö niibö nacaimi daanö? Bämacö lä nofimale, Yai Bada tänö tä daö. ¹² Inaja showadi ya nia cuaaö, bä lä jolemou wei bä lä cui ya bä a̦ si waidamabä. “Pablonö bä ca̦i lä cuaaö weinaja, camiyä yamacö ma cui yamacö cuaaö mö feduo”, bä jole lä cublalou wei bä lä cui. ¹³ Jesucristo lija bä a̦ shimamou wa̦fa ma wäyämou wei ma cui, bä jolemou. Jole jole bä ojodamou buo. Cristonö yamalecö yai lä shimöleno wei, yamalecö jole jole owäblalaö bädaoje, täbä mölamabeje. ¹⁴ ¿Ö̦jö tawä? Inaja bä nia jole lä cuaaö wei, öjö bä waiquiwä. Sadanasi a ma cuinö, a̦jele bä shi̦i lä wacalai bä ca̦i jole malä owäblalaö wei. ¹⁵ Cama ebä li inaja cuaaö mö feduobä, ö̦jö ebä waiquiwä. Ö̦jö a wa̦ fuamobä ebä lä cuinö, bä yai lä dodijaö wei bä jole jole owäbou daoje. Inaja bä cuaaö yalo, obi bä nö nia yai bleaamamou fe balojoo. ¹⁶ “A bufi daomi”, wamale a̦ nofi tabo dijä. Ya wa̦ faö malä waiquile. Ö̦jö ma cui, inaja wamale nofi tabou fe yadio ja, wamale a̦ ji̦lia fe da yadilä. Bä bufi dao lä mlainaja bä jole jimöo lä culenaja, ya ca̦i jole jimöo cuo mö feduobä. ¹⁷ Inaja ya cublalou bashiobä, Bada tänö tä nabä shimaimi. Miji bä lä jimöo wei, ya bä shi̦lo jole jole owämaö bädaa, wama tä a̦ nö wa̦lidiwä ö̦jöböabä. ¹⁸ Yanowamö täbä showadi jimöo bufi lä doblao weinaja, mijamö Jesucristo a wa̦no jole lä wäyäö wejei bä lä cui, bä ca̦i bluca cublalou dicoo. Ö̦jö cudeenö, ö̦jö bä lä cuaalenaja, camiyänö ya bä a̦ nia jole jole owäbou buo. ¹⁹ Bä bufi dao lä mlai, wama bä a̦ ji̦liaö bufi doblao malä waiquii. ¿Ö̦jö tawä? Wamacö bufi jaducäwämi dodijiwä. ²⁰ Cafä wamacö lija bä nosiemou ma bashio wei ma cui, wamacö ma blocoamaö wejei ma cui, wamacö ma mölamaö wejei ma cui, wama bä a̦ ji̦liaö ojode showawä dicowä. Cama bä jimöodii däjä ma cui, wamacö nö ma waiblaöje däjä ma cui, wamacö yömöca dablalou showao fe yadio. ²¹ Shädayai. Inaja yamacö nö cuaabömi lä yai däjä. Ö̦jö ma cui, cama bä lä cui bä jimöobä tä cua ja, camiyä ya jimöo mö feduobä, tä yai cua fe balojoa. Ya jimöobä ya ma mlai ma cui, jai ya bufi mojodi ya nia cuablalou buo. ²² Bei. Cama ebleo bä a̦fa jilou bufi lä doblao wei, ¿camiyä ebleo ö̦jö yami daanö? “Isaeli yama ecö”, bä lä cuu wei, ¿ö̦jö yami? Ablaamö bä ijilubö nodiwä jo̦wa. Camiyä ö̦jö ya ca̦i showawä. ²³ “Cristo yama a wa̦ lä fuaö wei yamacö”, bä ma cuu wei, ¡camiyä yai! Camiyänö ya wa̦ yai li fuaö dodijio. ¿Ö̦jö tawä? Ei ya wa̦ lä fale tänö, jai ya shi wa̦lii ya wa̦ ji̦limamou cuwä ma cui, ya wa̦ nia wabäo showao fe yadio. Bei. ¡Camiyä yai! Camiyä bei ya shi̦lo ojodamou yaio. Showadi wale fe lä lamaö wejei, camiyä ei bei ya yai. Wale si ca̦i shi̦lo yafelimaöje. Bluca bei ya mili nomaoblou cuaaö. ²⁴ Judio bänö 5 wale fuwämaö fa cuaajenö, wale si yafelimalajenö, 39 wale si yafelidaö cuaamaje. ²⁵ Lomateli bä mö feduwänö, 3 wale fuwämaö fa cuaajenö, fii fibänö wale si yafelia mö fedulalemaje. Ai däjä, maa mabänö wale ca̦i shäyälalemaje. Modu u jamö, 3 ya befi ca̦i wa̦lioblou cublou mö fedulayoma. Ai däjä, modu u jamö ya befi ca̦i fa löblalunö, ya ca̦a fe fa jalualunö, ya ca̦o showao däjä tä mö weyaa co̦layoma. ²⁶ Showadi ya blajawä fuu cuaadii. Mau u bada lä o̦coblai ubä jamö ya nö quilili bleaaö. Wale madofibö fucäablabeje wale nabä queoje. Iba judio bä mö feduwä lä cuinö wale nabä ca̦i läläoje. Judio bä lä mlai bä ma cuinö wale nabä ca̦i fuuje. Täbä shabonobö lä cublai jamö ma cui, tä ulufi lä blocoblai jamö ma cui, modu u jamö ma cui, ya shämobä showadi tä läblawä. Jesucristo ebä a̦fa jole lä jilou wei bänö, wale nö ca̦i bleaablalamaöje. ²⁷ Ya ojodamou ca̦i modaoblou. Ya nö ca̦i bleaaö. Ya ca̦i majalishi waiyoblou. Ya ca̦i ofäoblou. Ya ca̦i amishaoblou. Nii bä cua mlai ja ya cudio. Tä ulufi si lä ajii jamö, ya nö ca̦i wajadili beblalou. ²⁸ Inaja ya cuaaö ma waiquio däjä ma cui, Jesucristo ebä lä yododoblai, ya bä nofi bluca fo̦lijibou yalo, ö̦jö bä lija ya bufi ca̦i cuaablalou talei. ²⁹ Ai bä bufi ujuduaö dicoo ja, inaja showawä camiyä ma cui ya bufi ca̦i ujuduoblou mö feduo talei. Ai bä doblamaimije ja, ya bä nö ca̦i bäshölö taablaö talei. ³⁰ ¿Ö̦jö tawä? Ya jimamobä tä cua ja, ya nö ujudi lä bleaaö wei ya tä a̦fa nia shi̦lo wäaö. ³¹ Ya jolemoimi. Bada tä Jesús bä Fö̦ö e lä cuinö wale bejedimou daö, Jesús lija a lä bufiblamou wei a showawä lä cuinö. Ö̦jö a nofi yai doamou shi wa̦libä. ³² ¿Ö̦jö tawä? Aleda a wa̦fa bada lä cui a lä cuono wei däjä, Damaco jamö bada e lä lämabono wei e lä cuinö wale fuwäamaö bufima, cama wayu ebä lija. Wale fuwäabeje, ala nacö jamö yoca lä joleono wei jamö bä läo waiquioma. ³³ Ö̦jö ma cui, iba bä lä cuinö, ala nacö jamö wale ca̦i fa dubofälöjenö, jai yolofi a bada cuwä ja wale fa didibalöjenö, tocota cäcönö bei täca lä jolale jamö, wale befi ca̦i itoa ja̦tomalemaje. Inaja wale fa taamajenö, bada anö wale fuwäamaö ma bufiono wei ma cui, wale documalemaje.

¹ Camiyä ya wa̦fa wäamou lä bashile tä ja, wamacö bayeliblamobä tä cua ma mlai ma cui, ya jole jole jimamou co̦a bashiblaa lä cule. Bada tänö camiyä lija jai majali tä cuwä tä lä damalaleno wei, ya tä a̦fa nia wäaö majöo. Ai tä bluca lä wawämaleno wei tä ma cui. ² Bei. Fedu fe dole jamö, ai däjä ya bälamodayoma. Jai bei ya yai fuu dodijiodayoma tejemi. Cuwi, bei ya bufi bälao buodayoma fa cui. Ya tä daimi. Yai Bada tänö tä shi̦lo daö. Yedu jamö ö̦jö tä cublaliyoma, lasha 14 ya famaö waiquiwä. ³ Fedu fe dole jamö ya lä bälamodayono wei, ya tä shi̦lo daö, ya lä cufenaja showawä. Bei ya yai fudayoma fa cui. Ya tä daimi. Bei ya bufi shi̦lo bälao buodayoma fa cui. Yai Bada tänö ö̦jö tä shi̦lo daö. ⁴ Ö̦jamö ya culanö, tä a̦ wäyämamou dao lä mlai, ya tä a̦ yai bluca ji̦liledayoma. Yanowamö bämacö caficönö, bäma tä a̦ jayumaö dao lä mlai. ⁵ Yai Bada tänö wale inaja lä taamano wei tä ja, ya shi̦lo yai jimamou dao, camiyänö ya tä lä taö wei tä ja mlai. Ya lä dodijaö wei mlai, ya nö ujudi lä bleaaö wei ya wa̦fa nia shi̦lo yai wäamamou. ⁶ Ö̦jö ma cui, ya jimamou bufio fa cunoja, jai ya bufi daomi ya nö dablamobö mlai. Ya wa̦ nö bejediabö wei. Ö̦jö ma cui, camiyä ya lä cuaaö wei ya wa̦fa wäamamou bufiomi, wale nofi doablaö bashio buo wejei. ¿Ö̦jö tawä? Camiyä ya wa̦fa wäamamou ma mlai ma cui, ya lä cuaaö wei tä dablamou malä wawädoi. Ya bä lä yömölaö wei tä a̦ ca̦i ji̦liaö waiquioje. “Inaja waiquiwä”, ya bufi cuu. ⁷ Camiyä lija Yai Bada tänö tä bluca ma wawämadii wei ma cui, ö̦jö tä ja ya jimamou shi jalio mlaobä, ya nia lä wasöo wei tä ca̦i wai jibäbema. Sadanasi ai etä fa waloalunö, wale yabäcäbodii. “¡Camiyä yai!”, ya cuablalou fe balojoo mlaobä. ⁸ Tä casömabä, Bada tä lija 3 ya nö bayeli nacao cuoma ma cui, ⁹ abenaja wale nowa taö dicooma. —Ma. Bä nofi lä ojodabou wei, inaja lä waiquiwä. Wa ujuduo däjä, cafä lija ya lofote malä dablamou talei —wale nowa tama. Ö̦jö cudeenö ya lä ujuduo wei, bufi doblalolanö ya wa̦fa nia shi̦lo yai wäamamou fe yadio. Ya ujuduu däjä, Cristo etä lofotenö ya shi̦lo yai malä bayeliblou wei. ¹⁰ ¿Ö̦jö tawä? Cristo a nowa ja ya ma ujuduu däjä ma cui, “Inaja lä yai”, ya bufi cuu. Wale nö ma waiblaö wejei ma cui, wale ma yabäcaö wejei ma cui, ya nö ma bleaaö wei ma cui, ya bufi doblao fe yadio. Ya yai ujuduu lä dodijio wei däjä, wale nö yai wa̦lojomabou malä cui. ¹¹ Jai ya bufi daomi ya wa̦ cuaaö lä cufe. Cafä wamacö mayo ja. Camiyä ya wa̦fa wäamamobä mlai ja, cafä wamacönö wamale a̦fa yai wäyäbä wamacö yai ma cui, wamacö a̦ fanomi dicowä. Miji bä lä cui, “¡Jesucristonö bä lä shimöleno wei, fei bä yai!”, wama bä nofi jo̦wa ma tablalaö ma cule, camiyänö inaja ya bä nofi nö tabobimi. “Ö̦jö bä shi̦lo yai dodijaö”, camiyä ya bufi cuimi. Camiyä wamale nofi tabou ma mlale ma cui, bämacö nowa taö. ¹² Mijamö ya da cuoblei däjä, ya lä bejedimou wei tä dablou wawädooma. Jesucristonö bä lä shimöleno wei bä showadi lä cuaaö weinaja, ya mada cuaablei. Bufi yanöcöwä yanö, Yai Bada ya mayo dablamama. Tä nö lä quilijii ya tä ca̦i wawämaö fe balojooma. ¹³ Cafä bämacö bayeliblaö mlai, Jesucristo ai ebä lä yododoblai, ¿ya ebä shi̦lo bayeliblaö cuaaö ayaoma daanö, wamale nofi wa̦libobä? Ma, fe usucuwä bämacö bluca bayeliblaö malä cuaano wei. Moli tä bädawä ma cui ja, bämacö fe shi̦lo usucuwä taamanomi. Nii bä ja, ai ya bä lä yabäcano weinaja, cafä bämacö shi̦lo taamanomi. ¿Ö̦jö tawä? Nii bä ja bämacö yabäcano lä mlai, ¿ö̦jö bei wama tä nowa tabou da culanö? ¹⁴ Cafä bämacö fe waloo bolacao waiquiyoma. Ei däjä moli bämacö fe nia waloo co̦o. ¿Ö̦jö tawä? Nii bä ma cui ja, ai tä ma cui ja, inaja showawä bämacö nia yabäcaimi co̦wä. Ö̦jö ya täbä nabä fuu mlai ja, cafä bämacö nabä yai fublaaö, bämacö nofimaö yalo. Ijilu bä lija bada bä dobämou mlai ja, ijilu bä shi̦lo yai malä dobämou wei. Inaja showawä cafä wamacönö wamale dobäbä, ya fuimi. Cafä bämacö yai nia fa dobänö ya li fuu. ¹⁵ Cafä wamacö bufi yai bayeliobä tä cua ja, iba ya täbä bluca lä tabole, bufi lämou mlai ja ya täbä nö jibäquebö wei. Camiyä ya ma cui ya nö ca̦i jibämoquebö wei. Inaja cafä bämacö yai nofimaö cuwä ma dodijii ma cui, ¿camiyä wamale nia nofimaimi? ¹⁶ ¿Wedinaja wamale nofi yai tabou? Wedinaja mlai. “Nii bä ja yamalecö yabäcaö ma mlaono wei ma cui, yamacö moyawäo fa mlacunö, yamalecö nami mölamaö”, wamale nofi jo̦wa tabou dicoo. ¹⁷ Ma. Mijamö ya bä da shimölii bä ma cuinö wamacö mölamanomije. Wamacö mölamabeje ya bä ca̦i shimanomi. ¹⁸ Mijamö Tito ya shimölema, Jesucristo ai e ca̦i. ¿Ö̦jö tawä? Titonö wamacö mölamaö mada mlaoblei. Camiyä ya bufi lä cuu weinaja, Tito a bufi cuu mö feduo showaoma. Camiyä ya showadi lä cuaaö weinaja, a cuaaö shalilioma. ¹⁹ “Pablonö bä ca̦i lä cule, bä nofi bäyäobä a wa̦”, ¿wamale nofi tabou tawä? Ma, bämacö lä nofimale wamacö. Yamacö nofi bäyäobä ya wa̦mi. Bämacö bufi nia yai fa lofotomabonö, bämacö yömölaö, Cristonö wamacö yömölaö ja, a nö lä cubö weinaja showawä. Yai Bada tänö wamalecö a̦ bejedi daö. ²⁰ Bämacö nofi jalujubou yalo ya wa̦. Mijamö ya waloo däjä, dodijidawä bämacö dablaimi ja, “Shädayai”, ya bufi jalujolanö ya nia cuu. Ö̦jö däjä, camiyä ya wa̦ ja cafä wamacö ca̦i shädayaimou mö feduquei. ¿Ö̦jö tawä? “Täbä a̦fa tayou ja̦too fa cui”, ya bufi cuu fa cuicunö, ya bufi wa̦lidiwä. “Ai täbä dodijaö ayao ja, täbä nofi wa̦liayou ja̦too fa cui. Ai täbä jushuo ja̦too fa cui. Camiyä ya shi̦lo yai bayeliblamobä, ai täbä cuu ja̦too fa cui.” Inaja ya bufi cuu ja, ya nö yai bleaaö. “Ai täbä a̦fa wayoaö ja̦too fa cujei”, ya bufi cuu. “Täbä wanomou ja̦too buo fa cui. Cama ai täbä jimamou ja̦too fa cui. Täbä shifilimou bäa fa cule”, ya bufi cuu yalo, ya bufi nö bleaaö. ²¹ Shädayai. Cafä bämacö fe waloo däjä ai wamacö dobloimi showawä ja, wamacö nofi jushublalou showawä ja, wamacö nofi beshili jushuaö showawä ja, ö̦jö tä ja Yai Bada tänö wale bufi nia quiliblamaö. Wamacö bufi mö bluca yabajadaloimi showawä ja, ya mö ö̦cölanö ya wa̦ ca̦i nia loblalou.

¹ Cafä bämacö fe waloo bolacao waiquiyoma. Fei däjä moli bämacö fe nia waloo co̦o. ¿Ö̦jö tawä? Yanowamö täbä a̦fa dobloimi jimaöje ja, moli a wa̦nö täbä nia jimamoimi. Bolacabö cäcöbä ma cui, 3 bä ma cui, ö̦jö bä a̦ faö fe usucuwä ja, ö̦jö däjä bä nia shi̦lo dobloimi jimamou, tä a̦ lä cuu weinaja showawä. ² ¿Ö̦jö tawä? Miji bä jaba doblono lä mlai ya bä wasöö waiquioma. Bluca wamacö ma cui bämacö wasöma. Eja ya culanö, fei däjä ya wa̦ faö co̦a lä cule, mijamö ya cuo da co̦oblei däjä ya da cubleinaja showawä. Ya fuu co̦o däjä, bä dobloimi showawä ja, ya bä nö nia bleaamama. ³ Cristo ya wa̦no lä wäyäö wei, ya bejedi nia dablamou. Ö̦jönö wamacö taamaö däjä, ujudi wama a nia dablaimi. Wama a nia shi̦lo lofote dablaö. ⁴ A yanowamöblaliyoma yalo, bei a li ujuduo bädaoma. Fii balitama tefi ja a shälema ma cujei, fei däjä a ujudimi. Yai Bada tä lofotenö a demi cua lä cule. ¿Ö̦jö tawä? Cristo a ujudi lä cuono weinaja yamacö ujudi cublalou ma cule, mijamö bämacö ca̦i cuo däjä, ujudi yamalecö nia dablaimi. Yai Bada tä lofotenö, Cristo a demi lä culenaja yamacö cua mö fedua yalo, yamalecö nia lofote dablaö. ⁵ Cafä wamacö ma cui, bä bufi bejedi da mömo, ö̦jö lä, Jesucristo wama a nofi jo̦wa lä mölabou wei, wamacö bufi bejedi dablamobä. Wamacö jolemoimi ja, “Awei, camiyä lija Jesucristo a cua lä cule”, wamacö nia cudou. ⁶ Jesucristo cafä wama ecö nö lä ö̦jöböamou wei tänö, yamacö lä ojodamono wei wama tä nia bejedi dablaö. ¿Ö̦jö tawä? Cafä wamacö lija yamacö nia bejedimou lä dablamou wei tä ja, yamacö mölaö waiquia. ⁷ Wa̦lidiwä wama tä taö mlaobä, Yai Bada lija yamacö a̦ faö. Camiyä yamacö dodijidawä dablamobä mlai, cafä wamacö dodijidawä yai cuobä, yamacö a̦ faö. Camiyä yamalecö a̦fa dobloimi ma taöje däjä, cafä wamacö dodijaö fe yadiobä. ⁸ Tä a̦ bejedi lä waiquii tä a̦ ja, yamacö a̦ läo daomi. Yamacö a̦ nia lä bayelio wei, yamacö a̦ shi̦lo yädäblou dao. ⁹ Camiyä yamacö ujudi nö ma bleaaö wei ma cui, Jesucristo lija wamacö bufi lofotoblou ja, yamacö bufi nia doblalou fe yadio. Wamacö bufi yai dodijidablou co̦obä, bämacö nö bayeli nacaö. ¹⁰ Mijamö ya waloo showao mlao däjä, ei ya tä a̦ oni shimaö balöa lä cule. Ei tä a̦ ja wamacö bufi yai jaducäblou fa balöonö, dodijidawä bämacö dablajalobä. Bada ya läobä, Bada tänö wale ma tablamaleno wei ma cui, ya wa̦ faö ja ya wa̦ nö quiliblalou mlaobä ya wa̦. ¿Ö̦jö tawä? Bämacö nö bleaamabä mlai, bämacö yai bayeliblabä wale li lämabou. ¹¹ Bei. Iba wamacö. Inaja lä waiquiwä. Wamacö doblou lä mlai, dodijidawä bä da cuicu. Wamale a̦ da ji̦lilä. Bä bufi bluca da shaliliicu. Yanöcöwä bä da bälöicu. Yai Bada tänö bämalecö bufi lä nofimabou wei tä lä cuinö wamacö nia ca̦i cuo, bämalecö bufi lä yanöcömabou wei tä showawä lä cuinö. ¹² Jesucristo wama ecö mö fedudayou ja, bä da nofimayo. ¹³ Jesucristo eja ebä lä cule, cafä wamacö lija bä a̦fa wäyämamou bufi doblaa lä cule. ¹⁴ Bei. Yai Bada lija showadi wamacö bayeliblamobä. Bada tä Jesucristonö wamacö nofi shi̦lo ojodabobä. Yai Bada tänö showadi wamacö nofimabä. Yai Bada tä Bufi sho, wamacö nofi shi̦lo tamayobä.