1 Timoteo

¹ Jesucristo bäma a lä bufiblaö wei a lä cuinö wale lä shimöleno wei ei camiyä Pablo cä ya. Yai Bada tänö wale shimaö fa bufinö wale shimölema, bämalecö lä fucäaö wei a Yai Bada lä cuinö. ² U̦asi Timoteo, cafä lija ei ya si onimaö lä cule, Jesucristo lija wa bufi cuquema yalo, bä nofi ijilumaö lä cadidio wei wa lä cui lija. Bei. Fayä Yai Bada lija showadi wa bayeliblamobä, Bada tä Jesucristo lija ca̦i. Wa nofi shi̦lo ojodaboböbä. Showadi wa nofi ca̦i asiboböbä. Wa bufi shi̦lo ca̦i yanöcömaboböbä. ³ Masedonia tä ulufi jamö ya lä funo wei däjä, mijamö cafä Efesoteli bä lija bä jämaquefälöma. “Mijamö a cudia da balöicu”, bä nowa da tableinaja showawä. Yai Bada tä a̦ wäyämobä jamö, shomi tä a̦ jole lä wäyäö wejei wa bä a̦ wasöbä, bä jämaquefälöma. ⁴ Nö badabö tä a̦ ja bä yabäcäo mlaobä, bä da wasö. Bada täbä jaba lä bälöono wei tä a̦fa ca̦i wayoaö labaaö mlaofälöbeje. Ö̦jö bä a̦ lädou däjä, täbä bufi shi̦lo wedinajamou. Jesucristo a nofi yai lä mölabou wejei däjä, täbä bufi nia shi̦lo yai jaducäafälöö. ⁵ Shomi tä a̦ ja bä yabäcäo mlaobä, ya bä wasöö bufii lä cule. Yai Bada lija bä bufi cadidilanö, dodijidawä Jesucristo ebä yai nofimayobä. Bä bufi wacacalanö, bä bufi bejedimolanö, bä nofimayobä. ⁶ Ai bä lä cuinö, Yai Bada tä a̦ nofi jaba ma cadidibono wejei ma cui, bä a̦ fa shomianö bä a̦ yacläö majöa. Shomi tä a̦ ja bä nö bleaaö majöa. ⁷ Moisesi tä a̦ ja täbä damaö bufi ma doblao wejei ma cui, bufi jaducäa mlalanö bä a̦ faö. Bufi jaducäa mlalanö tä a̦ jole wäyäöje. ⁸ Ö̦jö Moisesi bäma etä a̦ dodijidawä daö waiquiwä. Bufi jaducälanö tä a̦ wäyämou däjä, tä a̦ malä doblale. ⁹ Ei tä lä cui bäma tä nofi jaducäbolanö bämacö bufi shi̦lo jaducäo. Moisesi tä a̦ ja, täbä lä dodijaö wei täbä nowa tamoimi. ¿Ö̦jö tawä? Täbä wasöo lä mlai, täbä fe lä blacäjou wei, ö̦jö täbä nowa shi̦lo li tamou. Yai Bada tä bufiblaö lä mlajei, täbä wa̦lidiwä talewä ca̦i. Tä a̦ lä waii wejei, tä a̦ noca ca̦i lä flecaö wejei bä lä cui, ö̦jö bä nowa li tamou. Bä fö̦ö bä lä shäö wejei bä ma cui, bä nöö bä lä shäö wejei bä ma cui, yanowamö täbä lä shäö wejei bä ma cui, ö̦jö bä ca̦i. ¹⁰ Täbä nofi lä jushublalou wei bä ca̦i, ai a wa̦lo mö feduwä sho cäcöbä lä cuaaö wei bä ca̦i. Täbä lä wayuaö wejei bä ma cui, täbä lä jolemou wei bä ma cui, ö̦jö bä nowa ca̦i bluca tamou. Täbä nofi lä wa̦limabou wejei bä ca̦i, Yai Bada tä a̦ ji̦liaö bufio lä mlajei bä ca̦i. ¹¹ Ö̦jö tä a̦ lä cui, Jesucristo dodijidawä etä a̦ lä doblale tä a̦ li showawä. Ö̦jö ya etä a̦ dodijidawä wäyäö cuaabä, Yai Bada tä nofi lä doablamou wei tänö wale shimölema. ¹² Bada tä Jesucristo lija ya bufi doblalou, ya ojodamobä wale nö lä wa̦lojomabole a lä cui lija. Wale shimabä wale cadidilema. “A doblou fe yadio wä”, wale nofi fa tadalönö, ya bufi ayäyaimou. ¹³ Ya tä nö jaba ma waiblano wei ma cui, ya ebä nö jaba ma bleaamano wei ma cui, ya wa̦fa jaba ma lafujano wei ma cui, wale nofi asiboma. “Bejedi lä a wa̦”, ya bufi jaba cuu fa mlacunö, ya mojodili cuaama yalo yale nofi asiblalema. ¹⁴ Bada tänö wale nofi ca̦i ojodadaö fe fa balojoonö, bejedi wale bayeliblalema. Jesucristo lija ya bufi fa cuicunö, bufi cadidiwä tä jibäbema, bufi nofimou tä ca̦i. ¹⁵ Ei tä a̦ bejedi, tä a̦ nofi mölabobeje cä tä a̦. Wa̦lidiwä talewä täbä bayeliblabä, Jesucristo a yanowamöblaleyoluma. Wa̦lidiwä talewä bluca bä cua ma cule, camiyä ya nofi shi̦lo yai jushuaö dodijioma. ¹⁶ Ö̦jö ma cui, täbä bufi bluca nia fa jaducäblamanö, camiyä ya yai doblono lä mlai yale nofi asiboma. Täbä ba̦limiobä a bejedi nia obi lä bufibono wejei täbä lija, Jesucristo a bufi nia oquewä fa dablamonö, camiyä wale nofi asibou balöoma. “Ö̦jö a nö joyaa yailebö a ma cui, a nofi malä asibono wei”, bä bufi nia fa tadamanö. ¹⁷ ¿Ö̦jö tawä? Tä shi̦lo Bada nosiemou lä ayai, tä lofote cua shi lä wa̦lile a lä cui, ö̦jö tä a̦fa doblao tamou shi wa̦libä. Tä dablamou dao lä mlai, tä bufiblabeje tä Yai Bada cua lä ayale, tä a̦fa doblao tamou shi wa̦libä. Ö̦jö lä tä nofi yai doablamou shi wa̦libä. Inaja lä tä cuobä. ¹⁸ Ua̦si Timoteo, bä yömölaö a lä cule. Yai Bada tä a̦ lä wawämaö wejei bä lä cuinö, cafä wa wa̦fa lä jayumano wejei tä a̦ nofi da jaducälä. Yai Bada lija wa nö nia ojodamou lä wa̦lojano wei tä a̦fa wäaö malä balöono wejei. Ö̦jö wa tä a̦ nofi jaducäbolanö, täbä a̦ ma lämou wei ma cui, quilii mlai ja wa nö wa̦lojaö fe yadiobä. ¹⁹ Jesucristo lija a bufi bejedimou da dodijio. Wa bufi wacacalanö wa wasöobä. Ai täbä bufi wasöo fa mojionö, Jesucristo a nofi jaba ma mölabono wejei ma cui bä bufi yacläa fe balojolayoma. ²⁰ Imeneo, Alejado sho cäcöbä bufi wasöono malä mlai. Cäcöbä bufi wasöo fa mlacunö, fecula bada Sadanasi lija ya cöbä noshi ö̦jödaboma. Ö̦jönö cäcobö nö fa bleaamanö, cäcöbä bufi jaducäblou fe yadiobä ya cöbä jibäquema, Yai Bada tä nö waiblaböö co̦daaö mlaobä.

¹ Ö̦jö cudeenö, inaja tä yai tamobä. Yanowamö jödödöwä bä bayeliobä, Yai Bada lija wamacö nia nacou. Wama bä bayeli nacabä. Yanowamö wama bä bluca bayelimabä. Bä lä bayeliblamou wei däjä, Yai Bada lija wamacö bufi a̦fa ca̦i doblalou wäamobä. ² Bada jödödöwä täbä lä bälöblai, Yai Bada lija wama bä nia bayelimaö, bä bälöo yanöcöobä. Camiyä bämacö lä cui, bämacö quilijou mlai ja bämacö bälöo yanöcöo mö feduobä. Yai Bada lija bämacö bufi cadidilanö, tä tamaö lä bufii wei tä ja bämacö cadidobä. ³ Ö̦jö tä doblaa. Inaja wamacö cuaaö ja, Yai Bada wama a bufi nia doblalamaö, bämalecö lä fucäaö wei a lä cui. ⁴ Yai Bada a lä cuinö, Jesucristo lija yanowamö bluca täbä fucäamaö bufi doblao. Bejedi tä a̦ ja, täbä bufi ca̦i jaducäblamaö bufi doblao. ⁵ A bufiblamobä moli tä Yai Bada malä cule. Öjö lija bämalecö ajedamaö co̦obä, moli a ca̦i yanowamö malä cule, Jesucristo a lä cui. ⁶ Ö̦jönö bämalecö bluca co̦ablabä, cama a dodoo läoma. A shämou lä ojodaono wei tänö, täbä fucäaö bufi lä doblaono wei tä wawäblaliyoma. Tä nia wawämaö lä showadaono wei däjä, ö̦jö däjä showadawä, ya̦cumö tä wawämalema. ⁷ Täbä bluca fucäaö bufi doblao yalo wale cadidilema, ya etä a̦ wäyäbä. Jesucristonö wale shimölema. Ya jolemoimi, ya bejedimou. Judio bä lä mlai ya bä yömölabä wale shimölema. Tä a̦ nofi mölabobeje, bejedi ya tä a̦ wäyäö. ⁸ Ö̦jö cudeenö, abenaja ya tä tamaö bufii lä cule. Jesucristo ebä yododaö lä blaucodi jamö, wa̦lo bänö Yai Bada a nia wa̦liije. Dodijidawä bä bococu fa yaläjeicunö bä a̦ nia faö. Bufi cadidilanö, bä jushuo mlai ja, bä a̦fa tayou mlai ja, a nia wa̦liije. ⁹ Inaja showawä, suwä dodijidawä bä nia cuo mö feduo. Bä bufi waiyamabeje, bä nia baushimou fe balojoomi. ¿Ö̦jö tawä? Bä feta u̦cu lä liyäjäblamou wei tänö bä a̦fa dodijidawä tamobä mlai, dobä cäcö shi̦co lä jalebou wejei tänö mlai, bä didiobä sibä nowa lä bluca wei sibänö mlai. ¹⁰ Ma. Yai Bada tä lä daö wejei bä suwänö, dodijidawä tä lä taö wejei tänö, bä a̦fa dodijidawä yai tamobä. Yai Bada ebä a̦fa suwä lä jilou wei, inaja ebä dodijidawä cuobä bä malä cui. ¹¹ Yai Bada tä a̦ lä wäyäö wejei jamö, wamicai bä suwä yömöca daobä. Bä a̦ faö mlai ja, dodijidawä bä yömölamobä. ¹² Suwä bä lija, wa̦lo ya bä damaö bufiimi. Suwä bänö wa̦lo bä nia nosiemaimije. Wamicai bä cuobä. ¹³ Adana a tablamoa malä balölayono wei. Wa̦lo a nojamö, Ewa a cuo nomöjöoma. ¹⁴ Fecula bada lija Adana a mölanomi, bä suwäbö e yai fa mölalönö, e bufi wa̦lidiblaliyoma. Yai Bada a wa̦ fuaö mladaliyoma. ¹⁵ Ö̦jö ma cui, dodijidawä bä suwä cuo ja, ijilu bä ninibouje däjä bä bayeliblamou wä. Yai Bada a nofi mölabou showaoje ja, bä bufi nofimou showawä ja, Yai Bada lija bä cadidou showawä ja, bä nia bayeliblamou.

¹ Ei bejedi lä tä a̦. Yai Bada ebä ca̦i yododabä a bada cublou bufi doblao ja, inaja lä yai. Tä dodijidawä. A ojodamobä lä. ² Bä nia ca̦i lä yododaö wei a lä cui, abenaja a bada cuobä. A wa̦fa tamou dao lä mlai, bä suwäbö moli a lä bou wei, a wasöo lä dao wei a bada cuobä. A bufi lä dao wei, a lä dodijaö wei a cuobä. Fama bä bälömabou bufi lä doblao wei, dodijidawä Yai Bada etä a̦ ja bä bufi lä jaducäablalamaö wei a bada cuobä. ³ Shi wa̦limamodima ubä ja, cama a shi wa̦limamou lä mlai a cuobä. A waitelimou si ijejewä lä mlai, a wa̦ lä oquedio wei a yai cuobä. A wa̦ lafufou lä mlai, madofi bä ja a bufi mö blucao lä mlai a bada cuobä. ⁴ Cama ebä lä cadidamaö wei a cuobä. Bä ijilubö wamicai bä lä tabodii wei, dodijidawä bä ijilubö ebänö a wa̦ lä fuaö wejei a bada cuobä. ⁵ Ö̦jö malä cui. Cama ebä cadidamaö dobloimi waiquiwä ja, Yai Bada bei ebä cadidamaimi yaiquei. ⁶ Jesucristo a bufiblaö dudoo ja, Yai Bada ebä ca̦i lä yododaö wei a wa̦fa bada jilamou jaöo mlai. A ma dude wei ma cui, cama a bada cublou jaödao ja, cama a nofi doablamou ja̦toquei. Ö̦jö däjä, fecula bada a lija Yai Bada tänö tä nowa lä tabono weinaja, tä nowa ca̦i tabou majöquei. Fecula bada a lä cui, cama a nofi doo fa dicoonö a malä joyamolayono wei. ⁷ Abenaja ca̦i. Bada a nia lä cublou wei, Yai Bada ebä lä mlai bä ma cuinö, inaja showawä a nofi ca̦i tabobeje. A wa̦fa tamobä tä cua ja, fecula badanö a läa dicolei. ⁸ Inaja showawä, Jesucristo ebä bayeliblabeje bä bada lä cui, ö̦jö bä dodijidawä cuo mö feduobä. Bä a̦ cadidou showai bä cuobä, cama bä shi wa̦limamou lä mlai, madofi bä ja bä bufi waiyou lä mlai. ⁹ Ö̦jö bä bada lä cui, bä bufi fa walalaonö bä dodijabä. Cama bä lija tä a̦ lä wäyäno wejei tä a̦ nofi bejedi cadidibobeje. ¹⁰ Ai täbä lija bä bejedi damoa fa balölalunö, täbä a̦fa nö tamobimi ja, Yai Bada ebä lä bayeliblaö wejei bä a̦fa bada jilamou cuquei. Ö̦jö däjä, dodijidawä bä ojodamobä Jesucristo ebä nia bayeliblaöje. ¹¹ Bä suwäbö ebä ca̦i dodijidawä cuo mö feduobä, ai bä a̦fa lä wayoaö wejei mlai. Cama bä suwäbö wasöo lä dodijii, showadi bä lä bejedimou wei bä suwäbö ebä cuobä. ¹² Jesucristo ebä lä bayeliblaö wejei bä bada lä cui, moli bä suwäbö ebä cublamobä. Bä ijilubö ebä lä cui, dodijidawä bä fa wasöbojenö, dodijidawä bä fa yömölabojenö, bä dodijidawä ca̦i cuobeje. Inaja showawä, cama ebä ca̦i bluca lä cule, bä dodijidawä ca̦i cuobeje. ¹³ Yai Bada ebä lä bayeliblaö wejei bä lä cui, dodijidawä bä bada ojodamou ja, bä a̦fa dodijaö wäyämou. Bä bufi waiteliaö cuquei. Jesucristo a nofi lä mölabou wejei tä a̦ wäyäö quiliimi cuqueije. ¹⁴ Bä fe walou jaödao bufi ma doblao wei ma cui, ei ya si oni shimaö balöo, wa moyawäobä. ¹⁵ Ya fuu yabäcäo bädao ja, bufi wedinajamou mlai ja, Yai Bada wa ebä cadidamabä. Jesucristo a nofi mölabouje yalo, Yai Bada a demi cua shi̦ lä wa̦lile, ö̦jö ebä dodijiwä. Ö̦jö a wa̦no cadidibobeje ebä. Etä a̦ shominajablobä jamö bä a̦ läobä, bä bufi lofotomabou. A yafi wäcäblou mlaobä, a yafi lofotobou lä culajeinaja, inaja showawä Yai Bada tänö cama ebä lofote lämabou. ¹⁶ Yai Bada tä a̦ lä wawäblaliyono wei, bäma tä a̦fa bejedi wäyäö. Bejedi fe balojowä lä tä a̦. Abenaja tä a̦ cuu. Jesucristo a yanowamöblaleyoluma. Yai Bada tä Bufinö a bejedi jimöquema. A̦jele bä lä doblaladi bä lija a damolaliyoma. Bluca täbä caficö a̦ ja, a wa̦fa wäyämou cuaama. Yanowamö täbä lä bälöblai bänö a bejedi bufibomaje. Fedu tä lä doblale jamö a co̦molayoma. Ö̦jö lä bäma tä a̦ wäyäö.

¹ Ö̦jö tä a̦ bejedi ma cui, Yai Bada tä Bufi a̦ cadidou. Abenaja a cuu. Tä nö fa dedelönö, yai bä lä jolemou wei ai bä a̦ fa ji̦liajenö, fecula bä a̦ ja täbä nia jo̦wa mölaö. Ö̦jö fecula bä a̦nö bejedi tä a̦ nia jo̦wa joyaöje. ² Tä a̦ jole lä wäyäö wejei täbä a̦nö täbä nia mölalayou. ¿Ö̦jö tawä? Yai Bada tä a̦ ja, täbä jole jole ma yömölaö wejei ma cui, bä bejedimoimi. Bä wasöo fa mlacunö bä bufi baömöa co̦layou. Bä bufi fa baömölönö, tä lä dodijidai tä nö ö̦jöböaimije. Tä lä wa̦lidii, inaja showawä. ³ Ö̦jö bänö suwä bä doaö wasööje. Bä ca̦i iyaö wasööje. Tä a̦ bejedi lä bufibou wejei bä waiobä tä cua ma mlai ma cui, bä iyaö wasöö bädaoje. Tä a̦ lä daö wejei bä waiobä tä cua ma mlai ma cui. ¿Ö̦jö tawä? Bämacö iyabä lä bä nii malä tablaleno wei. Yai Bada lija bämacö bufi a̦fa doblalou wäyämou fa balöonö, bämacö iyabä. ⁴ Yai Bada tänö täbä lä tablaleno wei täbä bluca dodijidawä. Ö̦jö lija bämacö bufi ayäyaimolanö, bäma täbä däaö ja, bämacö waio majöobä tä cuami. ⁵ Yai Bada bäma a wa̦ nofi jaducäbolanö, ö̦jö lija bämacö bufi a̦fa doblalou wäyämolanö, bäma tä nii waiibä tä cua malä mlai. ⁶ Cafä lija ya tä a̦ lä wäyäle, Jesucristo ebä lija wa tä a̦ nia wäyäö fe dolemou. Wa tä a̦ wäyäö fe dolemolanö, Jesucristo dodijidawä wa nosie fuabä wa e nia cuo. Bejedi wa tä a̦ cadidibou ja, Yai Bada wa tä a̦ nofi jaducäbou ja, wa bufi bayeliblamou cuquei. ⁷ Nö badabö tä a̦ bluca da wailö. Yai Bada tä a̦ malä mlai. Täbä bayeliobä tä a̦ malä mlai. Showadi Yai Bada wa wa̦ yai fuaö dodijiobä, a bufi nö wa̦lojaö da wabäo. ⁸ Täbä lofote wabäo däjä täbä nö wa̦lojodou ma cui, Yai Bada a wa̦ fuabeje bä lä wabäo wei bä lä cui, ö̦jö bä yai bayeliblamou malä dodijio wei. Inaja bä lä cuaaö wei, eja bä ma cuo däjä ma cui, fedu jamö bä ma obi cuo majöodayou däjä ma cui, bä bayelio shi wa̦libä cäbä. ⁹ Tä a̦ bejedi dodijiwä. Tä a̦ nofi mölabou fe balojoobeje tä a̦. ¹⁰ Yai Bada tä demi cua shi lä wa̦lile bäma a nofi mölabou yalo bämacö malä ojodamodii wei, bämacö nö malä wa̦lojadii wei. Ö̦jönö täbä bluca fucäabä a. Jesucristo bäma a bejedi lä bufibou wei bämalecö yai fucäabä a li. ¹¹ Ei ya tä a̦ lä wäyäle, Yai Bada ebä lija wa tä a̦ wäyäö fe dolemobä. Ei tä a̦ ja täbä da cadidama. ¹² Wa fiya ma cui wa nö waiblamou dodijio mlai. Jesucristo bufilewä bänö wa owämabeje a da dodija. Dodijidawä wa bä a̦ lä wayomaö wei, dodijidawä wa bä ca̦i lä bälöo wei, wa owämabeje. Wa bufi lä nofimou wei, Yai Bada wa nofi lä mölabou wei, suwä bä lija wa yabäcäo lä mlai, wa yai owämabeje. ¹³ Ya fuu mlao däjä wale nö dabolanö, Yai Bada ebä lä yododaö wei däjä, cama wa etä a̦ oni doaö wawädoobä. Ö̦jö tä a̦ ja wa bä yömölabä. Wa bä damabä. ¹⁴ Yai Bada tä Bufinö wa nö nia lä wa̦lojoblamaö wei wa tä nofi mojodublaö mlai. A nö shi̦lo da wa̦lojoicu. Jesucristo ebä ca̦i lä yododaö wejei bä bada fa co̦camolunö, wawädowä wa jimöa cadidiquemaje. Wa nia lä bayeliblamou wei wa wa̦fa wäyäö balöomaje. Bei bä imicö maquequeo däjä, Yai Bada tä nö bayeli jibämoquema, wa nö wa̦lojabä. ¹⁵ Ei bä lä yömölafe tä a̦ ja, wa bufi cadidia showalanö a da wabäo. Wa nia lä cadidou wei tä nofi yai da yaibo. Wa yai dodijaö lä balafälöö wei däjä, bluca bä lija wa dodijaö dablamobä. ¹⁶ Wa bejedimobä a da moyaweicu. Wa tä a̦ lä wäyäö wei tä a̦ da cadidilä. Inaja lä wa cuaaö anö, wa nowamöo cuquei. Wa wa̦ lä ji̦liaö wejei bä ma cui, ö̦jö wa bä ca̦i nowamaö mö feduquei.

¹ Wa wa̦ lafujou mlai, dodijidawä bada wa bä nia wasöö. Wa bä lä fö̦ömou wei wa bä oquewä wasöö lä cuaaö weinaja, wa bä a̦ nia oquewä wayomaö cuaaö. Aifä wa bä nofi lä tabou weinaja, fiya wa bä nofi tabou mö feduobä. ² Wa bä lä nöömou wei wa bä nofi lä tabou weinaja, badayoma wa bä nofi tabou mö feduobä. Wa yabäcäo mlai ja, yaöfä wa bä nofi lä tabou weinaja, suwä moco wa bä nofi tabou mö feduobä. ³ Yai Bada ebä lija bä suwä lä yamiblaliyono wei bä coyocowä ja, bä mashi cuami ja, Yai Bada ebä lija bä bayeliblamaö da bufi. ⁴ Culenaja cama bä suwä lä yami wei ebä cua ja, bä ijilubö ebä cua ja, bä fääshä ebä cua ja, ö̦jö bänö bä bayeliblabeje. Inaja Yai Bada tänö bä taamaö bufii. Bä osheo däjä, bä nöö lija bä jaba bayeliblamou lä balöono weinaja, bä nöö ebä taamaö nomöjöobeje. Inaja bä fa cuaanö, Yai Bada a bufi doblamabouje. ⁵ Bä suwä yami fe lä balojoi bä lä cuinö, bä mashi cua lä mlainö, Yai Bada a nofi mölabouje. Inaja bä lä cuwä wei, wama bä bayeliblamabä bä li. Jalu däjä ma cui, didi däjä ma cui, Yai Bada lija bä a̦ shi̦lo fadii. Bä nö bayeli shi̦lo nacao. ⁶ Ö̦jö ma cui, ai bä suwä lä yami wei bä lä cui, inaja bä cuaaimi. Bä bufi wasöomi. Cama bä cuaaö bufi lä doblao weinaja, bä shi̦lo cuaaö bufi doblao dicoo. Bei bä demi ma bei ma cui, bä bufi nomawä. ⁷ Ei bä nowa lä tafenaja, Jesucristo ebä taamaö da bufi, bä a̦fa dobloimi tamou mlaobä. ⁸ Yai Bada ebä a̦fa ma jilou wei ma cui, cama ebä bayeliblaimije ja, bä dobloimi waiquiwä. Cama ebä ca̦i lä cuo wejei bä bayeliblaimije ja, bä dobloimi fe balojowä. Yai Bada tä a̦ waii malä wawädoo wejei. Jesucristo a bejedi bufibou lä mlajei täbä doblou ma mlai lä ma cui, inaja bä lä cuaaö wei bei bä li dobloimi yaiwä. ⁹ Abenaja bä suwä yami cuwä, bä bayeliblamobä wa bä a̦fa nia onibou. Bä badayoma waiquiwä ja, lasha 60 a jayumaö waiquiweje ja, bä fe̦yalobö moli e cuoma ja, Yai Bada ebänö ö̦jö bä nia suwäbada bayeliblaöje. ¹⁰ Bä jo̦wa dodijama ja, bä bayeliblamobä. Dodijidawä bä ijilubö ebä ca̦i jo̦wa cuomaje ja, ebä bufi jo̦wa cadidamamaje ja, bä a̦fa nia onio. Fama bä jo̦wa iyamamaje ja, Yai Bada ebä jo̦wa bayeliblaö ojodaomaje ja, bä bayeliblamobä cäbä. Bä nö lä bleaaö wei bä nofi jo̦wa ojodabomaje ja, showadi bä jo̦wa dodijaö bufi doblaoma ja, inaja bä suwä yami cuwä, bä a̦fa nia onio. ¹¹ Ö̦jö ma cui, bä suwä yami moco showawä ja, Yai Bada ebä lija bä bayeliblamobä bä a̦fa onibo dijä. Cristo a nofi jaba ma yaibou wejei ma cui, bä shi jaliblalou dicoo ja, bä fe̦yalobö bä däaö bufi doblao majöoje. ¹² Yami bä nia fa cuonö bä a̦fa jaba ma onibou wejei ma cui, bä shominajaaö dicoo däjä, Yai Bada lija bä jolemou dablamou. ¹³ Abenaja ca̦i. Suwä moco bä lä yamiblou wei bä ca̦i mojiblou si ijejewä. Bä ojodamou mlai, bluca bä yafibö jamö bä mojodili loadalou. Inaja bädao mlai, wa̦no wa̦no bä a̦ ca̦i wäyäöje. Bä a̦ fabä tä ma mlai ma cui, bä a̦ nofi jushuaö diwalou. ¹⁴ Ö̦jö cudeenö, suwä yami bä moco lä cui, abenaja ya bä taamaö bufii. Bä fe̦yalobö ebä däaö co̦obeje. Bä ijilubö ebä taö co̦obeje. Dodijidawä cama ebä ca̦i bluca bälöobeje, Yai Bada tä daö lä mlajei bänö bämalecö nofi a̦fa jushublalou taö mlaobeje. ¹⁵ Ai bä suwä lä yamiblono wei bä shominajaaö fa dicoonö, fecula bada Sadanasi lija bä yaua malä waiquile. ¹⁶ Yai Bada a bejedi lä bufibou wei a suwä lä cuinö, e suwä mashi yamiblou ja, ö̦jönö e bayeliblabä, Yai Bada ebä blucanö mlai. ¿Wedi tabä, nii bä ja Yai Bada bäma ebä nö bluca li bleaamaö bädaquei? Yai Bada ebä lä cuinö, bä suwä yami lä dodijii bä yai bayeliblaö walalaobeje. ¹⁷ Yai Bada ebä ca̦i lä yododaö wejei bä bada lä cui, dodijidawä bä ojodamou ja, “Ei yama bä nia bayeliblaö”, wama bä nofi tabobä. “Ei yama bä a̦ nia fuaö”, wama bä nofi ca̦i tabobä. Yai Bada tä a̦ wäyäö nö lä wa̦lojaö wejei, bä ca̦i damaö nö lä wa̦lojaö wejei, wama bä yai bayeliblaö dodijiobä. ¹⁸ Yedu ja, ei tä a̦ oni cuo malä showaono wei. Yalo täbä bädawä ma cui, täbä nö yalo ofili bleaamaö mlaobeje, tä a̦ oniblamolayoma. Nii wa si̦cosi lo̦shiblamabä, yalo bä lija wa si̦cosi cablushamabä jamö bä iyaö mlaobä, wa bä fi̦yoca nia o̦caimi. Ei tä a̦ oni ca̦i cuo mö feduo showaoma. A lä ojodamou wei, a dobämobä a malä cui. ¿Ö̦jö tawä? Yai Bada lija bä lä ojodamou wei bä yai dobäbeje, tä a̦ li oni. ¹⁹ Jesucristo ebä ca̦i lä yododaö wejei ai a bada lä cui, moli anö a wa̦no wäyäö ja, wa wa̦ nia ji̦liimi. A wa̦no lä wäyäböö wei cäcöbä bolacaa ja, ö̦jö lä däjä, “Bejedi lä cäcöbä a̦”, wa bufi shi̦lo cuu cuquei. ²⁰ Ai bä bada wasömamoimi ja, Jesucristo ebä lä yododaö wei däjä bä wasöö da wawädoo, bä bluca quilibä. ²¹ Bä nowa taö cadidia lä cule, Yai Bada tänö wale malä dablale. Jesucristo a ma cuinö, Yai Bada tänö täbä a̦jele lä yaiboladi täbä ma cuinö wale ca̦i dablaöje. Ya bä wasöö lä bufilenaja wa bä wasöö dodijio. Shomi wa täbä nia wasöö ayaomi. Afä bä cadidiwä ma cui, shomi bä ma cui, bä doblou lä mlai jamö, quilii mlai ja, wa bä nia bluca wasöö fe usucuo. ²² Bada wa bä tablamaö shi jalio mlai. ¿Ö̦jö tawä? Wa täbä bejedimou möö fa balöonö wa täbä yaiablabä. Ai a jolemou bädao ja, “¿Wedi tabä ei a ma jolemou wei a yaia dicolema?”, wa nofi tabou cuqueije. Cafä a bejedimou da dodijio. ²³ Fei däjä mau wa ubä shi̦lo coaö bädao mlai, nashiwä wiisibö toubä ca̦i da coa, wa amocu owäjäblobä. Wa shi̦lo malä jaliliaö wei. ²⁴ Ai täbä nofi lä jushuaö wei, bluca bä lija täbä dobloimi dablamou showadao. Yai Bada lija bä nofi nacao wawädoo. Ai bä nofi jushuaö lä ja̦too wei, obi etä li wawäblou cuquei. ²⁵ Inaja showawä, täbä lä dodijaö wei täbä ca̦i dodijaö damolaliyo. Täbä dodijaö dablou jaöo bädaomi ja, täbä ya̦cumö dodijaö wawäblaliyo.

¹ Yai Bada ebä lä cui, täbä nosie fuamobä bä lä tabou wejei bä lä cui, dodijidawä bä cuo fe yadiobä. Bä fujeblaö ma mlaoje däjä ma cui, bä dodijaö fe yadiobä. Bä dobloimi dicowä ja, Yai Bada a wa̦fa jayumaö dicoo mlaobeje. Yai Bada tä a̦ lä wäyämou wei tä a̦ ma cui, tä a̦fa wayoaö dicoo mlaobeje. ² Bä lä tabou wejei bänö Yai Bada tä bejedi ca̦i bufibou mö feduoje ja, bä nö waiblaö mlajei, bä a̦ yai fuaö dodijidaobeje. Bä lä bayeliblamou wei bä lä cuinö, Jesucristo a ca̦i bufiblaö mö malä feduo wejei. Yai Bada tänö, ö̦jö bä nofimaö mö malä feduo wei. ¿Ö̦jö tawä? Ei tä a̦ lä cui, wa tä a̦ wäyäö cadidiobä. “Ei tä a̦ da däleje”, wa bä nowa taö dodijio. ³ Yai Bada ebä yododabä jamö, ai anö tä a̦ shomitawä wäyäö ja, Bada tä Jesucristo dodijidawä etä a̦ owäboimi ja, a da moyaweicu. Yai Bada ebä dodijabä tä a̦no lä wäyämou wei tä a̦ cadidiboimi ja, a dobloimi waiquiwä. ⁴ Inaja a lä cuaaö wei a lä cui, cama a nofi li yaimamou waiquiwä cudeenö, tä a̦ li cadidiboimi. A nofi ma doo wei ma cui, a bufi mojodi. A wa̦ fabä tä ma mlai ma cui, a wa̦ shi̦lo läodii. Bä a̦ lulubou bufi doblao dicoo. Bä a̦ fa lulubonö, bä nofi wa̦liayou. Bä a̦fa lafujayou. Bä a̦fa tayou. Bei bä bufi jushuo fe balojafälöö. ⁵ Bä bufi wa̦lidiwä waiquiwä yalo, Yai Bada tä a̦ nofi mölabou fa mlacujenö bei bä a̦ shi̦lo jö̦shöcou. Abenaja bä bufi jole cuu. “Yai Bada ya bufi doblalamaö ja, ya shi fa ö̦jödamanö ya nö madofibölayou”, bä bufi jole cuu. ⁶ Yai Bada lija bämacö bufi nia lä bayeliblamou wei tä yai cua. Ö̦jö bäma a bufi doblalamaö ja, bämacö bufi ca̦i fa yanöcödalunö, bei bämacö bufi nia yai bayeliblamou dodijio. ⁷ Eja bämacö oshe lä wawäblaliyono wei däjä, madofi bäma bä ca̦i wawäblonomi. Bämacö lä mladou wei däjä ma cui, shomi jamö bämacö cua lä majöquei wei däjä, bäma bä nia ca̦i madofi yefiboimi. ⁸ Ei tä lä cui däjä bämacö iyabä tä cua ja, bämacö didiobä sibä cua ja, ö̦jö bä waiquiwä ja bämacö bufi yanöcöobä. ⁹ Ö̦jö ma cui, madofi bä ja bä bufi mö lä blucao wei bä yabäcamou fe balojoo. Bä bufi fa yabäcäblamonö, cama bä fujeblamou co̦obä tä cuami. Widicama ajamö yuli bä lucämaöje däjä, bä faö co̦o malä mlai. Bufi waiyou tänö bä bufi doblamaimi. Bä mojoduo bufi doblao fa waiquionö, bä bufi fa wa̦lidiafälönö bä wa̦liyoblou. ¹⁰ Showadi madofi bä jamö bä bufi mö lä blucao wei bä lija, wa̦lidiwä tä bädou. Wa̦lidiwä tä bluca lä tamou wei tä bädaliyo. Inaja ai täbä bufi yaimou fa cuaanö, Jesucristo a bufiblaö fa mlaafälööjenö, cama bä nö bleaamamou fe balojoo. ¹¹ Ö̦jö ma cui, cafä Yai Bada wa e lä cuinö, ö̦jö wa tä bluca waii showadaobä. Wa dodijabä a bufi shi̦lo da cadidiicu. Yai Bada tänö tä taamaö lä bufii wei tä ja, a bufi da macocoicu. Yai Bada wa tä a̦ nofi nia lä mölabou wei, wa bufi nia ca̦i lä nofio wei, ö̦jö tä da yailä. Wa bufi nia cadidio fe lä yadio wei, dodijidawä wa bä nia ca̦i lä cuo wei, ö̦jö tä da yailä. ¹² Täbä wayu fubä jamö täbä bufi nö wa̦lojoablalou lä culenaja, a bufi da cuicu, Yai Bada wa wa̦ yai fuaö shaliliobä. Wa nia lä ba̦limiblou wei tä a̦ da lofotolö. ¿Ö̦jö tawä? Wa ba̦limiobä, Yai Bada tänö wa nacalema. Jesucristo wa nofi a̦fa mölabou lä wäono wei däjä, bluca täbä yömöca mada daoblei. ¹³ Cafä bä yömölaö cadidia lä cule. Täbä bluca lä demidamaö wei Yai Bada tä malä cule. Jesucristo a ca̦i malä cule, tä a̦ bejedi wäyäö lä waiteliano wei. Bo̦sio Bilado a wa̦ nö bada ma quiliano wei ma cui, tä a̦ wäyäö quilino malä mlai. ¹⁴ Abenaja bä nowa taö. Bada tä Jesucristo a nia bädou co̦oyoluu. Ö̦jö a waloo showao mlao däjä, Yai Bada ya wa̦ lä wäyäle tä a̦ da cadidilä. Tä a̦ da ji̦lilä, wa wa̦fa dobloimi tamou mlaobä. ¹⁵ A bädou bufio däjä, Yai Bada tä lä doblalenö a bädamaö wä, Bada a yai lä läle a lä cuinö. Ö̦jö Bada cä tä ayawä. Bada täbä bluca lä cublai täbä nosiemaö. ¹⁶ Ö̦jö a shi̦lo ba̦limi cua ayaa. Tä shi̦i lä wacalamiladi jamö a cuadayoa. Bämacö icuo dao lä mlai jamö a cua, yanowamö täbä lija a dablamou lä mlai. A dablamoimi waiquiwä. ¡Ö̦jö a wa̦fa shi̦lo yai doblao tamobä! ¡Ö̦jö a yai shi̦lo Bada cuo dodijiobä! Inaja lä tä cuobä. ¹⁷ Täbä nö lä madofibö wei bä da cadidama. Madofi bä ja täbä bufi a̦fa jole doblao tao mlaobä, bä da wasö. Madofi bä mlaö si lä ijejei bä ja bä mölaö mlaobä. Yai Bada a nofi yai mölabou dodijiobeje. Ö̦jönö bluca täbä ja bämalecö dobäö fe balojowä, bämacö bufi doblalobä. ¹⁸ Dodijidawä bä cuobä wa bä nia yömölaö. Ai bänö madofi bä doaö shi jalimou lä cuaaö wejeinaja, dodijidawä tä ja bä bufi mö shi̦lo blucaobä. Bufi doblalanö ai täbä bayeliblaö ojodaobeje. Bufi lämou mlai ja bä shi ö̦jödaobä. ¹⁹ Inaja Yai Bada ebä shi ö̦jöde lä cuaaö wei, bä nia obi malä bayeliblamodayou wei. Bä nia lä dobädayou wei täbä ja, jai täbä shimomadayouje bei tä cuwä. Äyämö culanö bä lä dodijaö wei tänö, ö̦jamö lä bei täbä shimomaö balöadayoaje. Ö̦ja dodijidawä bä ca̦i obi ba̦limi bälöo shi wa̦liodayobä. ²⁰ Timoteo, U̦asi, cafä bä nowa taö dodijia lä cule. Cafä lija Yai Bada tä a̦ lä wäyämono wei, tä a̦ da lofotolä. Bä a̦ jole faö lä bädao wei bä lija a yömöca dao dijä. Bä bufi a̦fa jole moyawe lä jilaö wejei bä lija a yömöca dao dijä. ²¹ Ai bänö ö̦jö bä a̦ fa ji̦liläjenö, Jesucristo a nofi jaba ma mölabono wejei ma cui, bä bufi shominajaaö majöo dicoo. Bei. Yai Bada tänö showadi wamacö bayeliblabä. Wamacö nofi shi̦lo ojodabobä.