1 Thessalonians

¹ Pablo cä ya. Sila sho, Timoteo sho, yamacö cua lä cule. Cafä Desalonicateli wamacö lija, camiyänö ya si oniblaö lä cule. Fayä Yai Bada wama ecö lä yododaö wei wamacö lija ya tä a̦ oni shimaö, Bada tä Jesucristo lija wamacö lä yädäle wamacö lä cui lija. Bei. Yai Bada tä lä cuinö, showadi wamacö bayeliblabä. Wamacö bufi shi̦lo yanöcömabobä. Wamacö nofi ca̦i shi̦lo ojodabobä. ² Cafä bämacö bufibolanö, Yai Bada lija showadi yamacö bufi a̦fa doblalou wäyämou talei. Ö̦jö lija yamacö a̦ faö däjä, bämacö a̦fa shi̦lo wäaö. ³ ¿Ö̦jö tawä? Fayä Yai Bada bäma a lä bufiblaö wei a lija, showadi bämacö nö bayeli nacaö. Jesucristo wama a nofi mölabolanö, wamacö lä dodijaö wei yama tä nofi jaducäbou. Wamacö ojodao talei. Wamacö bufi nofimolanö, ai wama bä bayeliblaö nö wa̦lojaö talei. Bada tä Jesucristo wama a nö dabou showalanö, showadi wamacö mölaö dodijio talei. ⁴ ¿Ö̦jö tawä, iba wamacö? Yai Bada tänö wamacö lä nofimaö wei wamacö. Cama wama ecö cuobä, wamacö lä yaileno wei yama tä daö yalo, yamacö bufi a̦fa doblalou wäyämou talei. ⁵ Jesucristo yama etä a̦ dodijidawä lä wäyäö wei tä a̦ lä cui, cafä wamacö lija tä a̦ lä waloqueyoluno wei däjä, bei tä a̦ ji̦lio bädaono malä mlai. Yai Bada tä Bufinö yamalecö bufi nö fa wa̦lojomabonö, etä lofote damoa mada wawädolalui. Yama tä a̦ nofi bejedi mölabou cadidilanö bämacö mada yömölablei. Cafä wamacö bayeliblobä, dodijidawä bämacö ca̦i cuoma. Wamale bejedimou mada dalalii. ⁶ Ö̦jö däjä, Bada tä Jesucristo wama a owämama. Camiyä wamale ca̦i owämama. Yai Bada wama a wa̦ däaö tä nowa ja wamacö nö ma bleaamano wejei ma cui, wamacö bufi ca̦i doblalou fe mada yadioblei. Yai Bada tä Bufinö wamacö bufi fa bayelibonö, wamacö bufi doblalou fe yadioma. ⁷ ¿Ö̦jö tawä? Wamacö dodijaö fe lä yadio wei tä fa dalalöjenö, Jesucristo a bejedi lä bufibou wejei bä bufi ca̦i lofotoblaliyoma. Masedoniateli bä ma cui, Acayateli bä ma cui, cafä wamacö lä cuaano weinaja bä ca̦i cuaaö bufi doblao mö feduoma. ⁸ Cafä wamacö lija Yai Bada tä a̦ jaba lä waloqueno wei, wama tä a̦ wäyäö fa cuaanö, tä a̦ ji̦limou malä blaucodi. Masedoniateli bä lija bädawä mlai, Acayateli bä lija bädawä mlai, Yai Bada wama a nofi lä mölabou wei wamacö a̦fa ji̦limou blajawä waiquiwä yalo, camiyä yamacö a̦ fabä tä cuami. ¡Inaja lä waiquiwä! ⁹ Cama cäbä showawä ma cuinö tä a̦fa malä wayoaö wejei. Cafä wamacönö dodijidawä yamalecö a̦ lä ji̦liano wei tä a̦fa wayoaöje. Nö ijidubö bä lija wamacö nö jaba bayeli ma nacaono wei ma cui, Yai Bada wama a nofi yai mölabobä, wama bä jo̦wa fujeblalema. Yai Bada tä demi cua shi lä wa̦lile, tä Yai Bada bejedi bufiblamobä tä lä cule, ö̦jö wama a nosie yai fuaö majöobä wamacö bufi mö jo̦wa yabajadaliyoma. ¹⁰ Fei däjä bä Ijilubö e lä culadi wama e nö ca̦i dabou. Ö̦jö Jesús a lä cui, a ma nomalayono wei a demi jocäa co̦malema. Yai Bada a nö waiteli lä quiliaö wei däjä bämalecö noshi nia umlabou.

¹ Iba wamacö. Yai Bada yama tä a̦ wäyäbä, bämacö fe walou nö bleaanomi. Cafä wamacö ma cuinö, ö̦jö wama tä malä dale. ² Cafä wamacö lija yamacö fuu mlao däjä, Filiboteli bä lijamö yamalecö nö ma bleaamano wejei ma cui, yamalecö nö ma waiblaö fe ma balojoono wejei ma cui, yamacö a̦ waiquidonomi. Wama tä malä dale. Yai Bada bäma a lä bufiblaö wei a lija yamacö bufi fa lofotoonö, cafä wamacö lija yama tä a̦ wäyäö mö fuu fe yadioma. Täbä a̦ ma läono wei, Yai Bada yama etä a̦ dodijidawä wäyäö fe blacäjoma. ³ Yai Bada etä a̦ ja yama bä bufi tamaö fe lä blacäjou wei, yamacö jolemolanö yama bä bufi taamaimi. Yamacö shominajaalanö mlai. Yama bä mölamaimi. ⁴ Yai Bada tänö yamalecö bejedimou fa dablanö, yama etä a̦ wäyäbä yamalecö shimölema. Etä a̦ wäyämaö lä bufio weinaja yama tä a̦ cadidiwä wäyäö showao. Yanowamö yama täbä bufi doblalamabä mlai, Yai Bada yama a bufi yai doblalamabä yama etä a̦ wäyäö. Ö̦jönö täbä bufi malä dablaö wei. ⁵ Jole jole yamacö nofimou bädaono malä mlai. Madofi bä ja yamacö nia fa dobämonö, yamacö jole jole nofimonomi. Yai Bada tänö bämalecö bufi malä dablale. ⁶ Cafä wamacö lija, ai täbä ma cui lija, yamacö nofi doablamobä yamacö funomi. Cafä wamacö lija yamacö nacobä yamacö ca̦i funomi. ¿Ö̦jö tawä? Cristonö yamalecö shimölema yalo, cafä wamacö lija yama tä bayeli nacabä yamacö cua ma waiquile ma cui, yamacö naconomi. ⁷ Cafä wamacö lija yamacö a̦ shi̦lo oquewä faö cuaama. Suwä anö, ijilu a ca̦i oshe dodijidawä lä cuo weinaja, bämacö ca̦i dodijidawä cuoma. ⁸ Bämacö nofimaö fe balojowä yalo, wamacö bayeliobä yamacö noshi ö̦jödaoma. Yai Bada yama etä a̦ dodijidawä wäyäö bufi doblaoma. Bämacö nofilema yalo, yamacö nö bleaaö nofi fo̦lionomi. ⁹ Iba wamacö lä cui, yamacö ojodamou nö wa̦lojaö fe lä yadiono wei wama tä daö. Yama täbä no nii co̦amabä, jalu däjä ma cui, didi däjä ma cui, yamacö ojodamou showaoma. Yai Bada tä a̦ ja bämacö lä yömölano wei däjä, cafä bämacö niibö yabäcaö mlaobä yamacö ojodamodima. ¹⁰ Cafä wamacönö yamalecö bejedimou malä daö wei. Yai Badanö yamalecö bejedimou ca̦i daö. Cafä Jesucristo bufilewä wamacö lija yamacö da cuoblei däjä, yamacö mada cadidoblei. Dodijidawä bämacö ca̦i cuoma. Yanowamö täbä lija yamacö a̦fa tamobä tä cuonomi. ¹¹ Ei wama tä malä dale. Bä fö̦ö enö, bä ijilubö ebä taamaö lä cuaaö weinaja, cafä bämacö ca̦i taamama. Wamacö moyawäobä bämacö yömölaö cuaama. Bämacö bufi lofotoamaö cuaama. Bämacö cadidamaö cuaama. ¹² Wamacö lä dodijaö wei tänö, Yai Bada wama a bufi doblalamabä bämacö cadidamama. Ö̦jönö wamacö yailema, cama a nofi doablamobä jamö wamacö ca̦i cuobä. ¹³ Dodijidawä wama tä a̦ ji̦liama yalo, showadi Yai Bada lija yamacö bufi a̦fa ca̦i doblalou wäamou. Yama tä a̦ da wäyäblei däjä, dodijidawä yamalecö a̦ ji̦lilema. Yanowamö wama täbä a̦ bufinomi. “Yai Bada etä a̦ waiquiwä”, wama tä a̦ nofi tabou yalo, wama tä a̦ ji̦liaö ojodao showaoma. Ö̦jö etä a̦ li malä cui. Ö̦jö tä a̦nö wamacö bufi malä taamamou wei, Jesucristo wama a bejedi lä bufibou wei wamacö lä cui. ¹⁴ Iba wamacö. Wamacö bufi shomi yalo, wamacö nö mada bleaamablejei. Judea tä ulufi jamö, Jesucristo ai ebä lä taamano wejeinaja showawä. Ö̦jamö Yai Bada ebä yododaö lä cuaaö wei, ebä nö malä bleaamano wejei. Jesucristo lija wamacö bufi mö blucao yalo, cafä ai wamacönö wamacö nö da bleaamablejeinaja, judio bänö cama ebä nö ca̦i jaba bleaamaö showaomaje. ¹⁵ Ö̦jö bä judio showawä lä cuinö, Yai Bada a wa̦no jaba lä wawämano wejei bä shi̦lo shäö cuaamaje. Bada tä Jesús a ma cui, a ca̦i shälemaje. Camiyä yamacö ma cui, yamalecö nö ca̦i bleaamaöje. Ö̦jö tä nowanö, Yai Bada tä jushuamaö fe balojooje. Judio bänö bluca täbä yabäcaöje. ¹⁶ Jesucristo lija judio bä lä mlai bä fucäamobä yama bä yömölaö ma cuaaö wei ma cui, ö̦jö bä judio lä cui, bä a̦ shi̦lo lämodii. Judio showadi bä nofi ma jushuano wei ma cui, fei däjä bä nofi yai jushuaö fe balojowä. Shomi täbä yömölamaö nofi lä wa̦libou wejei tänö, ya̦cumö Yai Bada tä jushuo lulubou lä culajei. Bejedi lä bä nofi nacao. ¹⁷ Ö̦jö ma cui, iba wamacö. Cafä wamacö lija yamalecö bälöamaö doblamaö dicoo fa mlacujenö, bämacö möö mablaliyoma. Ö̦jö ma cui, tä nö dedejeblou mlai ja bämacö nia möyou co̦o. Bämacö fei däjä möö ma mlai ma cui, bämacö bufibou showawä. ¿Ö̦jö tawä? Bämacö möö bufi doblao cudeenö, showadi yamacö wabäodii nosi blacäcou dodijioma. ¹⁸ Cafä wamacö lija yamacö fuu bufi malä doblaono wei. Camiyä Pablo ya lä cuinö bämacö fe nia walou fe fa yadionö, bolacadabö ya wabäoma ma cui, Sadanasinö yamalecö yabäcaö dicooma. ¹⁹ ¿Ö̦jö tawä? Bada tä Jesús a itou co̦oyoluu däjä, bämacö bufi doblalou ca̦i icuobä, cafä wamacö lija yamacö malä mölaö wei. Yamacö bufi ca̦i doblalobä, cafä bei wamacö. Yai Bada lija cafä wamacö bufi cuquema yalo, camiyä yamacö ma cui, yamacö nofi nia doablamou mö feduo malä cui. ²⁰ Cafä wamacö lä dodijaö wei tä nowa ja, Yai Bada lija yamacö nofi nia doablamou malä cui. Wamacö dodijaö yalo yamacö bufi nia doblalou.

¹ Ö̦jö cudeenö, ya̦cumö yamacö fa wajäanö, yamacö bufi nö bleaaö waiquio yalo, Adena jamö, Sila sho yafäcö yamili cuo juo fa ojodadalunö, ² mijamö Timoteo yafä a shimölema, camiyä bämacö ai a lä cui. Cristo etä a̦ dodijidawä wäyämobä, Yai Bada lija showadi a ojodamou. Wamacö bufi lofotoamabä yafä a shimölema, Jesucristo wama a nofi mölabou cadidiobä. Wamacö fa yömölalönö, wamacö moyawäobä. ³ Wamacö fa moyawäonö, wamacö bufi shominajaaö mlaobä. Wamacö nö ma bleaale, ai moli wamacö ma cui, wamacö bufi shominajablou dicoo mlaobä. Cafä wamacö ma cuinö, ei wama tä daö. Bämacö nö bleaabä lä bämacö waiquiwä. ⁴ Cafä wamacö lijamö yamacö cuo showao däjä, bämacö mada yömölablei. Bämacö nö nia lä bleaaö wei yama tä wawämaö mada balöoblei. Wamacö nö lä bleaale ö̦jö lä tä waiquiwä. ¿Ö̦jö tawä? Wama tä malä dale. ⁵ Ö̦jö cudeenö, ya bufi nö yanöcödobimi waiquia yalo, Timoteo ya shimölema, Yai Bada ya wa̦ nia bufibou showaa fa mönö. Mölamalewä lija bämacö bufi yabäcaö nofi fa jalujubonö, ya shimölema. Yamacö nö bleaaö nofi ca̦i fa jalujumobonö, bämacö bomaö bufima. ⁶ Ö̦jö ma cui, cafä wamacö lija Timoteo a fa cuonö, äyämö tä a̦ ca̦i dodijidawä waloa fa co̦iquiyonö, yamacö bufi owäjädou co̦layoma. Yai Bada wama a nofi jo̦wa mölabou showaa. Wamacö bufi jo̦wa nofimou showawä. Yamalecö lä bufibou wei tä a̦ ca̦i wäa co̦bejeloma, yamalecö möö bufi lä doblao wei tä a̦ ca̦i. Inaja showawä, camiyä yamacö ma cuinö bämacö ca̦i möö bufi doblao mö feduo. ⁷ Iba wamacö. Yai Bada wama a jo̦wa bufibou showawä ja, yamacö bufi dodijidadou co̦a lä cule. Eja Jesucristo tä a̦ nowa ja, yamacö nö bleaabä tä ma bluca wei ma cui, yamacö famibä tä ca̦i ma bluca wei ma cui, cafä bämacö a̦fa ji̦liaö ja, yamacö bufi lofotoblou co̦a fe yadia lä cule. ⁸ Bada tä lija wamacö bufi cadidou fe yadia yalo, dodijidawä fe balojowä yamacö cua lä cule. ⁹ Yai Bada lija bämacö bayelimaö däjä, ¡bejedi yamacö bufi a̦fa doblalou wäyämou! Yai Bada lija wamacö bufi lä bayeliblamou wei tä ja, yamacö bufi ayäyaimodii. ¹⁰ Didi däjä ma cui, jalu däjä ma cui, bufi cadidilanö Yai Bada lija yamacö a̦ fadii. Bämacö möyou co̦obä yamacö a̦ faö. Yama tä a̦ lä wäyäyoluu wei däjä, camiyä yamacö a̦nö Yai Bada lija wamacö bufi balafälöbä. ¹¹ Fayä Yai Bada bäma a lä bufiblaö wei a lija yamacö nacou, Bada tä Jesús a lija ca̦i, cafä wamacö lija yamacö waloo fe yadiobä. ¹² Wamacö nofimayou balafälöbä, Bada tä lija ya wa̦ ca̦i faö. ¡Bejedi lä wamacö nofimayou fe balojoobä! Inaja showawä, shomi täbä ma cui wama täbä nofimaö blaucobä. Cafä bämacö nofimaö fe balojoo lä culenaja, wamacö taamayobä. ¹³ Bada tä Jesucristo lä cuinö, inaja wamacö bufi cadidamaö fa cuaanö, cama ebä ca̦i bluca itoyoluu däjä wamacö dodijidawä icuo mö baobä. Fayä Yai Bada lija, quilii mlai ja wamacö icuamabä.

¹ Iba wamacö. Ei moli yamacö a̦ fe blacäjou co̦o. Wamacö moyawäobä bämacö yömölaö. Bada tä Jesucristo lä cuinö wamacö yömölaö nö lä cuobö weinaja showawä. Wamacö dodijabä yamacö a̦, Yai Bada wama a bufi doblamabobä. Bämacö da yömölableinaja showawä. Wamacö dodijaö lä waiquilenaja, wamacö dodijaö balafälöbä. ² Wamacö cadidobä Bada tä Jesús yama tä a̦ jaba da wäyäblei, wama tä a̦ malä dale. ³ Wamacö nofi beshili jushublalou mlai ja, wamacö yaiobä. Inaja Yai Bada tänö wamacö taamaö bufii. ⁴ Wamacö suwäbö däo fa cadidionö, dodijidawä wama bä ca̦i li cuobä, ⁵ Yai Bada tä daö lä mlajei bä beshili lä cuaaö weinaja mlai. ⁶ Aifä bä suwäbö lija wamacö fa yabäcäonö wama bä nö waiblaö dicoo mlai. Täbä nofi lä jushublalou wei bä lä cui, Bada tänö bä nö nia malä bleaamaö wei, bämacö da yömölableinaja showawä. Bämacö yömölaö mada dodijioblei. ⁷ Bämacö nofi jushublalobä Yai Bada tänö bämalecö nacano malä mlai. Cama bäma ecö dodijidawä yai cuobä bämalecö yailema. ⁸ ¿Ö̦jö tawä? Ei tä a̦ ja yamalecö a̦ ji̦liblaö lä mlai, camiyä yamalecö a̦ ji̦liblaimi bädawä mlai, Yai Bada wama a wa̦ yai ji̦liblaimi. Cafä wamacö lija a Bufi lä jibäamou wei wama a wa̦ li waii. ⁹ Aifä wama bä nofimabä, bämacö yömölabä tä cuami. Dodijidawä wamacö nofimayou malä waiquii. Wamacö nofimayobä, Yai Bada tänö wamacö damaö malä waiquii. ¹⁰ Masedonia tä ulufi jamö aifä bä lä bälöblai, bejedi wama bä malä nofimaö wei. Ö̦jö ma cui iba wamacö, bämacö moyawäblamabä yamacö a̦ faö. Wamacö cuaaö lä waiquilenaja wamacö cuaaö balafälöbä. ¹¹ Wamacö bälöo yanöcöobä, tä da yaileje. Wamacö a̦ fabä tä cuami ja, wamicai bä da cuicu. Wamacö a̦ faö bashiblao mlai. Wamacö mojimou mlai, bä da ojodamo, bämacö nowa da tableinaja showawä. ¹² Inaja wamacö cuaaö ja, Yai Bada ebä lä mlai wama bä bufi jaducäblamabä. “¡Ei bä bufi nofi dao yai!” wamacö nofi tabobeje. Ai täbä lija wamacö mölaö mlai ja, cafä wamacö showawä lä cui wamacö dodijidawä cuobä. ¹³ Iba wamacö. Bä lä mladaliyono wei bä ja, bämacö bufi mojodumabou bufiomi. Yai Bada a nofi mölabou lä mlajei bä bufi nö bleaaö lä cuaaö weinaja, wamacö bufi nö bleaaö mlaobä. ¹⁴ Jesús a fa nomalönö, a demi jocädamaö malä co̦layono wei. Ö̦jö bejedi bäma tä a̦ fa bufilänö bämacö mölaö. Jesús ebä ma mladou wei, Yai Bada tänö bä ca̦i demi jocädamaö mö feduo weicätä. Jesús lija bä yädäa yalo, ö̦jönö bä ca̦i bluca cuo shi wa̦lii wä. ¹⁵ Bada etä a̦ ja bämacö malä yömölale, Jesucristo ebä lä nomablono wei wama bä nofi jalujubou mlaobä. Bada tä itou co̦oyoluu däjä, camiyä bämacö demi lä showai bämacö balöö mlaicätä. ¹⁶ Fedu jamö a culanö a lä itoyoluu wei däjä, abenaja tä nia malä cuo wei. A wa̦ i̦cali comöö fa ji̦limolonö, Bada tä a̦jele a wa̦ ca̦i nacli fa ji̦limolonö, Yai Bada etä madofi lä folamou wei etä a̦ ca̦i fa ji̦limolonö, cama Bada a Jesús lä cui, a nia itoyoluu. Ö̦jö däjä, Jesucristo ebä lä mladaliyono wei ebä demi jocädou fa balöonö, ¹⁷ camiyä bämacö demi lä showai, bämacö lä daamou wei bämacö lä cui, yedu bämacö ca̦i fucäa fa showaläfälönö, öjölashi ajamö bäma bä ca̦i cuodayou wä, fedu jamö Bada bäma tä mö baamadayobä. Ö̦jö tä fa cublalunö, Bada tänö bämalecö nia ca̦i cuo shi wa̦liodayou. ¹⁸ Inaja tä nia cublou yalo, ei tä a̦nö bä bufi da lofotoamayo.

¹ Iba wamacö. Bada tä no nia lä cublou weinaja, ya tä oniblaimi. Ö̦jö tä a̦ ja, wamacö nö yömölamou co̦obimi. Wamacö bufi dao waiquiwä. ² Bada tänö tä mö nofi jalu lä tabole däjä, a nia fuu co̦o. Ö̦jö wama tä malä dale. Didi däjä bä lä tomömou wei bä fuu ja̦too lä culenaja, a nia cublou. ³ “Fei däjä tä nö ulufi wayubimi. Fei däjä bämacö bälöa doblaa lä cule”, täbä nowa tayou däjä, täbä nö nia lä bleaaö wei, yedu tä nia bädoyoluu. Suwä a lä shibönabö wei, yedu a ninimodou lä cuaaö weinaja, täbä nia yedu taamayoluu. Täbä docubä tä nia cuomi. ⁴ Ö̦jö ma cui, iba wamacö. Jesús a nia lä bädou wei tä ja, wamacö nö mojoduobimi. Didi däjä a lä tomömou wei a wawäblou däjä bä lä quiliblou weinaja, wamacö quiliblobä wamacö malä mlai. ⁵ Mö jalu tä jamö, tä mö wacacaobä jamö, quilii mlai ja täbä lä cuaaö weinaja wamacö malä cui. Mö didi tä jamö, tä mö sublaobä jamö täbä lä cuaaö weinaja bämacö cuaabä bämacömi. ⁶ Ö̦jö cudeenö, bä mojodi mio lä bädao weinaja bämacö cuaaö da mlao. Ai bä moyawe lä la̦dio weinaja bämacö bufi fa cuaanö, bämacö bufi da wasöo. ⁷ Täbä lä mio wei, didi ja bei täbä mio. Shi wa̦limamodima ubä ja täbä shi lä wa̦limamou wei, täbä didi shi ca̦i wa̦limamou. ⁸ Ö̦jö ma cui, mö jalu tä lä cui bäma tä nofi yaibou waiquiwä yalo, bämacö bufi da wasöo. Täbä shäyobä jamö wayu bä nowamöo lä culenaja, bämacö bufi da cuo. Jesucristo bäma a nofi lä mölabou wei tänö, bämacö bufi ca̦i lä nofimou wei tänö, bämacö bufi nowamöobä. Bämacö fucäamobä bämacö mölaö lä cadidio wei tänö, bämacö bufi ca̦i nowamöobä. ⁹ Yai Bada tänö bämalecö nabä queobä bämalecö yaiano malä mlai. Bämalecö yai fucäabä bämalecö yailema. Bada tä Jesucristo lija bämacö fa yädäicunö, bämacö fucäamobä. ¹⁰ Bämalecö nowamabä, a Jesucristo nomaa lälayoma. A itou co̦oyoluu däjä, bämacö demi lä showai bämacö ma cui, bä nomaa lä waiquilayono wei bä ma cui, cama lija bämacö bluca cuo shi wa̦libä, a nomaa lälayoma. ¹¹ Ö̦jö cudeenö, bä bufi da lofotoamayo. Bä da bayeliblayo. Wamacö lä cuaaö weinaja showawä. ¹² Iba wamacö. Bämacö moyawäblamabä yamacö a̦ fe blacäjou. Bada tä Jesucristo tä a̦ ja, wamacö lä cadidamaö wejei wama bä nö waiblaö mlai, dodijidawä wamacö yömölamobä. Ö̦jö bä bada lä cui, wama bä a̦ fuabä bä malä cui. Wamacö bufi jaducäblamabeje bä malä ojodamou wei. ¹³ Wama bä yai fa nofimanö, bufi dao täbä nosie fuamou lä cuaaö weinaja wama bä nofi tabobä. Wamacö malä bayeliblaö wejei. ¿Ö̦jö tawä? Cafä dodijidawä wamacö nofimayou yanöcöobä. ¹⁴ Iba wamacö. Bämacö nia fa moyawäblamanö yamacö a̦. Bä lä moji wei bä da wasöje. Bä bufi nö lä bleaaö wei bä bufi da lofotoamaje. Bä lä ujudi wei bä da bayeliblaje. ¿Ö̦jö tawä? Oquewä wama täbä a̦ bluca wayomabä. ¹⁵ Wamacö nö bleaamaö bädaoje däjä, bä taamaö mö feduo dijejä. Wamacö bayeliblayobä tä yai da cadidileje. Yanowamö bluca wama bä yai bayeliblabä. ¹⁶ Bä bufi shi̦lo da doblalo. ¹⁷ Wamacö a̦ waiquidou mlai ja, Yai Bada lija bä a̦ shi̦lo da fa. ¹⁸ Tä cublou lä bädao wei, tä ma dodijidao däjä, tä ma wa̦lidio däjä, Yai Bada lija bä bufi shi̦lo doblalou fe da yadio. Jesucristo lija wamacö lä yädäle, inaja Yai Bada tänö wamacö taamaö bufii. ¹⁹ Yai Bada tä Bufi a̦ waibo dijejä. ²⁰ Yai Bada a wa̦no lä wawämaö wejei bä a̦ nofi ca̦i wa̦libo dijejä. ²¹ Ö̦jö ma cui, wama bä a̦ bluca fa ji̦lianö bä a̦ bejediablalou da möje. Wama bä a̦ bejedi fa wabanö, tä a̦ lä dodijidai wama tä a̦ cadidibobä. ²² Wamacö bufi fa wasöonö, Yai Bada tänö tä taö lä wasöö wei, tä bluca waia da showadalöje. ²³ Cama Yai Bada a lä cuinö, bämalecö bufi lä yanöcödamaö wei a lä cuinö, wamacö dodijidawä fe balojowä tabobä ya wa̦ faö. Bei wamacö ma cui, bei wamacö bufi ma cui, wamacö comi dodijidawä tabobä. Inaja wamacö au cuo fa showaonö, Bada tä Jesucristo a itou co̦oyoluu däjä, wamacö dobloimi jimabä tä nia cuomi. ²⁴ Wamacö lä yaiaö wei a wa̦ nia shomiblou majöomi. Wamacö mölaö showaobä cätä. Dodijidawä wamacö nia lä tabou wei, wamacö dodijidawä tabou wä. A bejedimou weicätä. ²⁵ Iba wamacö. Yai Bada lija yamalecö da bayelimaje. ²⁶ Jesucristo ai wama ecö mö fedudayou ja, bä da nofimayo. ²⁷ Ei tä a̦ da däleje. Bada tä lä cuinö wale a̦ famaö lä cule. Jesucristo bluca ebä yömöca dao däjä tä a̦ doamobä, ei tä a̦ oni. ²⁸ Bei. Bada tä Jesucristo lä cuinö, showadi wamacö bayeliblabä. Wamacö nofi shi̦lo ojodabobä.