1 San Pedro
11 Jesucristonö wale lä shimöleno wei ei camiyä Pedro cä ya. Yai Bada wama ecö lä sheleleblai wamacö nija, ei ya tä a̦ oni shömaö lä cule, shomi täbä nijamö wamacö bälöa lä nomöjöaliyono wei wamacö lä cui nija. Bo̦do jamö ma cui, Calasia jamö ma cui, Cabadosia jamö ma cui, Asia jamö ma cui, Bidinia jamö ma cui, ö̦jamö wamacö bluca lä coyocole wamacö nija, ei ya tä a̦ oni shömaö lä cule. 2 Fayä Yai Bada tänö wamacö nia lä taamaö wei tä daö fa showadaonö, wamacö yailema. Cama wama ecö dodijidawä cuobä Yai Bada tä Bufinö wamacö yaimaquema. ¿Ö̦jö tawä? Jesucristo wama a wa̦ fa julänö, cama i̦yäbönö wamacö bufi aublobä wamacö yaia. Wamacö doblamabobä, ö̦jö Yai Bada cätä. Bei. Yai Bada nija wamacö shino yai bayeliblamou dodijiobä. Wamacö nofi shino ojodabobä. Wamacö bufi shino ca̦i yanöcömabobä. 3 Awei. No mlai ja Yai Bada tänö bämalecö nofi ojodabou fe balojooma yalo, bämacö bufi doblalobä bämacö. Bada tä Jesucristo bä Fö̦ö e nija, bämacö bufi a̦fa shino doblalou da wäyämo, Jesucristo nija a lä bufiblamou wei a showawä lä cui nija. ¿Ö̦jö tawä? Dude bämalecö bufi tablaö co̦layoma. Jesucristo a demi jocädou co̦layoma yalo, bämacö mölaö showalanö bämacö cua lä cule. 4 ¡Bämacö mölaö lä! Bämalecö dobädayobä täbä ca̦i malä taboladi, ba̦limi täbä lä cui. Täbä ca̦i wa̦lidiblou bädaomi. Täbä nia ca̦i mladou majöo lä mlai täbä ja bämalecö nia dobäö. 5 Ba̦limi bämacö cuobä, ya̦cumö bämalecö nia malä jucäaö wei. Yai Bada tänö täbä nia lä jömaö wei tä cublou däjä, tä nia wawäblou. Bämacö nia lä dobämou wei bämacö lä cui, Yai Bada bäma a nofi mölabou yalo, cama tä lojodenö bämalecö nowamaö showaa lä cule. Ö̦jö cudeenö bämacö bufi doblalou. 6 ¿Ö̦jö tawä? ¡Wamacö bufi yai doblalobä wamacö! Wamacö bufi wabamou ja, wa̦lidiwä tä bluca ma wawäblou wei ma cui, wanonowä wamacö nö bleaaö fa balöonö, doblao wamacö nia cuo majöodayou. 7 ¿Ö̦jö tawä? Olo bä lä cui, bä ba̦limi ma mlai ma cui, bä nö yai ö̦jöböamobä bä wabamou. Cowa wacönö bä fa wabajenö, “Awei, ei olo lä bä dodijiwä”, bä cuu majöo. Inaja lä showawä, Jesucristo bäma ecö ca̦i wabamou cuwä mö feduwä, bämacö lä bejedimou wei bämacö nö ö̦jöböamobä. Jesucristo bäma a nofi lä mölabou wei tä nowa yai bluca, olo bä nowa cua lä bädalenaja mlai. Camiyä bämacö yai wabamobä bämacö, Jesucristo bäma a nofi bejedi lä mölabou wei bäma tä dablamabä. Jesucristo a wawäblou däjä bämacö a̦fa ca̦i dodijidawä tamodayobä. Doblao bämalecö ca̦i cuo majöodayobä. Wawädowä bämalecö nofi ca̦i tabodayobä. Cama Jesucristo a wawäblou däjä, ö̦jö tä nia bluca cublou. 8 Jesucristo a wawäbloimi showawä. Wama a möimi. Wama a möö ma mlai ma cui, wama a nofimaö. Wama a möö ma mlai, wama a bejedi bufiblaö yalo wamacö bufi doblalou. Wamacö nia dodijidawä lä cuo wei tä ja, ¡bejedi lä wamacö bufi fejeleo! 9 Wama a nofi mölabou cudeenö wamacö nia malä jucäamou wei. 10 - 11 ¡Wamacö bufi doblalobä lä! Wamacö nia lä jucäamono wei, yedu jamö ma cui tä a̦ ji̦limou showaoma. Yai Bada tänö no mlai ja wamacö nofi nia lä ojodabono wei, cama a wa̦no wäyälewä bänö tä a̦fa wäyäö balöomaje. Cama bä nijamö Cristo a Bufi culanö, a nö nia lä bleaano wei a wa̦fa wäamou showaoma. Doblao a nia cuo lä majöodayono wei tä a̦ ca̦i. Tä a̦ fa ji̦liläjenö, ö̦jö Yai Bada a wa̦no wäyälewä bä lä cui bä bufi shino dayäodima. Showadi tä shino wa̦lidimaje. “¿Wedi bei a nö nia li bleaaö? ¿Wedi däjä ö̦jö bei tä nia yai wawäblou?”, bä bufi dayäo ca̦i cublalodima. 12 Ö̦jö däjä, Yai Bada tänö bä moyawäblamalema. Cama bä nia bayeliblamou lä showadaono wei tä a̦ cuonomi. Ma, cafä wamacö nia obi yai lä bayeliblamono wei tä a̦ yai jo̦wa cuoma. ¿Ö̦jö tawä? Inaja bä nowa tama. Bä nowa lä tano weinaja, inaja showawä tä bejedi cublaliyoma. Fedu jamö culanö Yai Bada tä Bufi fa shömöludunö, fei däjä ö̦jö tä lojodenö cafä wamacö nija tä a̦ yai wäyämaje. ¡Tä a̦ yai doblao! Yai Bada tänö bämalecö lä bayeliblaö wei tä a̦ lä cui ja, Yai Bada etäbä a̦jele lä culadi täbä ma cui täbä bufi ca̦i shino dayäodii. ¡Bämacö bufi doblalobä lä! 13 Awei, Jesucristo nija bämacö lä bayeliblamou wei tä a̦ yai doblao. Ö̦jö cudeenö bä da moyaweicu. Wamacö bufi shifilimou mlai ja, bä bufi yai da shaliliicu. Jesucristo a wawäblou däjä wamacö nia malä bayeliblamou wei. Ö̦jö tä a̦ nofi shino yai da mölaboje. 14 Yai Bada tä a̦ yai da juaje, bä fö̦ö ebä a̦ dodijidawä juaö lä culajeinaja showawä. Wamacö malä Fö̦ömou wei. Wamacö bufi mojoduo showao däjä, wamacö showadi cuaaö bufi lä doblaono weinaja bä cuaa dijä. 15 Inaja wamacö cuaabä wamacömi. Yai Bada dodijidawä wama ecö cuobä wamacö malä nacano wei. Ö̦jö cudeenö, dodijidawä tä jamö cama a yaia lä culenaja wamacö nia yaio cuo mö feduo. Wamacö cuaaö lä bädao wei tä ma cui ja, cama dodijidawä wama ecö yaiobä. 16 Inaja lä showawä Yai Bada tänö täbä nowa taö malä balöono wei. Abinaja tä a̦ oni cuu. Iba dodijidawä wamacö nia yaio. Camiyä dodijidawä tä jamö ya malä yaile. Inaja wamacö dodijidawä yaio cuo mö feduobä. ¿Ö̦jö tawä? Einaja tä a̦ oni cuu. 17 Wamacö dodijidawä cuobä wamacö. Wamacö nö bayeli nacao däjä, Yai Bada wamacö lä Fö̦ömou wei nija wamacö nacou. Täbä lä dodijaö wei täbä ma cui, täbä dodijaö lä mlai täbä ma cui, täbä jömaö ja a wa̦ cadidou showadao. ¿Ö̦jö tawä? A nö quili tamobä a. Ö̦jö cudeenö, eja wamacö bälöablalou showao däjä, wama a nö quili talanö wama ecö nia dodijidawä cuo. 18 Wamacö nö badabö bälöo doblou lä mlaono weinaja wamacö cuaaö dicoo mlai. Cama bä nö jaba bleaaö lä cuaano weinaja wamacö cuaaö fa nodionö, wamacö doblonomi waiquiwä. ¿Ö̦jö tawä? Wamacö doblou ma mlaono wei ma cui, Cristonö tä nowa co̦maquema. Wama tä daö. Täbä ba̦limi lä mlai täbänö wamacö nowa co̦amanomi. Blada bänö mlai, olo bä ca̦inö mlai. 19 Tä nowa yai lä bluca wei tänö wamacö nowa co̦molayoma, ö̦jö Cristo i̦yäbö showawänö. Jaba däjä yanowamö täbä doblou lä mlai etä nowa mladobä, oweja bä shämou läoma, moli etä wai wa̦lidiwä cuono lä mlai bä oweja lä cui. Inaja showawä, wa̦lidiwä etä cua mlai ja, Cristo a ma cui a shämoa läa majölayoma. 20 Yedu jamö ma cui, Yai Bada tänö tä daö showaoma. Bita a colo lojodomabou showao mlao däjä, inaja Cristo a nia taamaö showaoma. Ya̦cumö a yai wawäblaliyoma, Yai Bada tänö täbä nia lä jömaö wei tä ajedou yaio däjä. Fei däjä wamacö bayeliblamobä, ya̦cumö Cristo a wawäblaliyoma. 21 A fa wawäblalunö, cama nija wamacö bufi cuquema. Wamacö bufi fa cuicunö, Yai Bada wama a bufibou, a demi jocädamaö lä co̦layono wei a lä cui. Ö̦jönö a doblamaquedayoma. ¿Ö̦jö tawä? Yai Bada wama a nofi mölabobä inaja a taamama, showadi wama a bufiblabä. Wamacö bayelibou fe balojowä cudeenö, cafä dodijidawä wama ecö yai cuobä wamacö. 22 Jesucristo nija tä a̦ bejedi lä cule, wama tä a̦ julema. Wama tä a̦ lä juleno wei tänö wamacö bufi aublaliyoma, cama wama ebä nofimabä. ¿Ö̦jö tawä? Bufi cadidilanö bä da nofimayo, ö̦jö lä. 23 Wamacö nofiobä, dude wamacö tablamoa co̦layoma. Yanowamö täbä showadi lä tablamou weinaja mlai. Yai Bada tä a̦ lä ba̦limi wei tä a̦nö wamacö yai tablamoa co̦layoma, tä a̦ cua shi lä wa̦lile tä a̦nö. 24 Tä a̦ ba̦limi. Yai Bada cama tä showawänö tä a̦fa ba̦limi taö malä waiquii. Abinaja a cuu balöoma. Moimoima bä lä culenaja bä yanowamö bluca cuwä. Bä a̦fa dodijidawä ma tamou wei ma cui, ö̦jö bei cäcö jole cuwä lä bädainaja bä yanowamö li cuwä bäwä. Moimoima bä fa de̦anö, bä jole bläläö nomöjöo. 25 Ö̦jö ma cui Bada etä a̦ lä cui, tä a̦ mladou nomöjöo mlaicätä. Moimoima bä lä cublou weinaja mlai, ö̦jö tä a̦ nia shino yai cudio. ¿Ö̦jö tawä? Einaja Yai Bada a cuu balöoma. Ö̦jö tä a̦ lä cui ja wamacö yömölamou waiquiwä. Wama tä a̦ dodijidawä lä ji̦lileno wei, ö̦jö lä tä a̦ waiquiwä.
21 Ö̦jö wama tä a̦ dodijidawä ji̦lia waiquilema cudeenö, wa̦lidiwä tä bluca da blajamalöje. Wamacö nö lä nabämou wei tä ca̦i bluca. Wama täbä lä mölamaö wei tä bluca ca̦i. Wamacö lä jolemou wei tä ca̦i. Täbä dodijaö ayao ja wama täbä nofi lä wa̦libou wei tä ca̦i. Ai wama täbä a̦fa dobloimi lä wäyäö wei tä ca̦i bluca. ¿Ö̦jö tawä? Ö̦jö tä bluca da blajamalöje. 2 Inaja wamacö cuaaö mlai ja, Yai Bada etä a̦ shino yai da bufiboje, wamacö bufi lojodoobä. Ijilu oshe bä wai lä cuinö, suju lobe ubä bufiblaö mö yabaö lä cuo wejeinaja, inaja Yai Bada wama etä a̦ bufiablalaö cuaabä, wamacö bufi yai badafälöbä. 3 Ö̦jö tä a̦ shino yai da bufiboje, ö̦jö lä. Bada wama tä dodijidawä daö malä waiquii. ¿Ö̦jö tawä? Wa̦lidiwä wama tä bufijabä wamacömi. 4 Jesucristo nija bä da ajedeiquiyo. Ö̦jö nija wamacö ajedou däjä, maa ma lä ba̦limi wei ma wa̦fa lä jilabou wejei a nija wamacö yai ajedeblaliyo. Ö̦jö ma lä cui, ma yai demi. Täbä ca̦i demiblamaö. ¿Ö̦jö tawä? Yai Bada tänö ma yailema. Ma wa̦fa nowa bluca taö. Ö̦jö ma cui, yanowamö täbänö ma li wailemaje. 5 Cafä jai maa wamacö ma demi cuwä mö feduwä, ö̦jö nija wamacö bluca fa co̦cablalunö, cama wama ecö yafi yai cublobä. Yai Bada etä yafi jamö nofi bäyäalewä bä lä yailenaja, cafä inaja showawä wamacö ca̦i yaia mö fedua. Yai Bada tä lä cule ja ö̦jö bä lä ojodamou weinaja, inaja showawä wamacö ojodamou ajedeo cuo mö feduobä, Yai Bada wama a bufi doblamabobä. Jesucristo wama ecö yalo, wamacö lä ojodamou wei tä ja Yai Bada a bufi nia doblalou. 6 Yai Bada etä a̦ oni jamö, ö̦jö maa ma wa̦fa ca̦i wäyämamou showadao balöoma. Abinaja Yai Bada a cuma. ¡Tä da möje! Sionoteli bä shabonobö jamö, maa ya ma blaaö lä cule, a yafi nia colo lä lojodobou wei ma lä cui. Camiyänö ya ma yailema. Ma nowa bluca. Ö̦jö jai maa ma lä cule, a bejedi lä bufibou wejei bä lä cui bä nia mölaö buomi. Einaja Yai Bada a cuma. 7 Tä ca̦i bejedi cublaliyoma. Jesucristo wama a bejedi lä bufibou wei wamacö lä cuinö, ma nowa lä bluca wei wama ma nofi yai bejedi tabou. Ö̦jo ma cui, a bejedi bufibou lä mlajei bä lä cuinö, ma nofi taboimije. Ma yai waiije. Yai Bada tä a̦ lä cuu weinaja showawä. Abinaja tä a̦ cuu. Maa mabä ja a yafi nia lä i̦tamaö wejei bä lä cuinö, ma wailemaje. Ö̦jö ma cui, ma lä waileno wejei a yafi colo yai lojodoobä ma li cublaliyoma. Einaja tä a̦ cuu. 8 Abinaja ca̦i. Bä lä juu wei, maa ma jamö bä mamicö fa difequionö, bä yudubä ma nia blaaö läo. ¿Ö̦jö tawä? Täbä fa yudulunö täbä quebä, ma nia blao. Einaja tä a̦ ca̦i cuu balöo showaoma. Yai Bada tä a̦ juaimije ja, täbä yudulayou. Inaja bä taamamobä bä li cuo waiquioma cudeenö, bä li taamamou. 9 Ö̦jö ma cui, cafä wamacö nofi taboyobä wamacö yaia. Bada tä nija bä ojodamobä bä nofi bäyäalewä yaia lä culenaja wamacö cuwä mö feduwä. Cafä wamacö bluca lä cui, wamacö yaibou. Shomi mlai ja, cama Yai Bada wama ecö waiquiwä, a showadi lä dodijaö wei wama tä dablamabä. Tä mö didiobä jamö wamacö jaba ma cuono wei ma cui, cama etä shi̦i yai lä wacacai jamö wamacö tabou majöobä wamacö nacaa taa nomöjölema. 10 Jaba däjä wamacö nofi tabono ma mlai ma cui, fei däjä Yai Bada tänö wamacö nofi yai tabou majöa lä cule. Wamacö nofi jaba ojodabono ma mlai ma cui, fei däjä wamacö nofi yai ojodabou majöa. 11 Iba bämacö lä nofimaö wei wamacö. Ei cafä wamacö ulifibö mlai. Shomi täbä bälöblao cuo lä bädao weinaja wamacö cublao buobä wamacö. Ö̦jö cudeenö, cafä wamacö nija ya wa̦ fe blacäjou. Yanowamö showadi täbä cuaaö bufi lä doblao wei tä ma cule ma cui, ö̦jö tä ja bä noshi ö̦jödao dijä. Wamacö bufi wa̦lidiblou dicoo mlaobä. ¿Ö̦jö tawä? Shomi wamacö malä cui. 12 Yai Bada tä daö lä mlajei jamö wamacö cuo ja, showadi bä da dodija. Wamacö a̦fa dobloimi ma wäyäö wejei ma cui, wamacö lä dodijaö wei tä nö ö̦jöböaö fe yadiobeje. ¿Ö̦jö tawä? Ya̦cumö Yai Bada tänö täbä bluca jömaö däjä, bä bufi nia möblou. Yai Bada nija wamacö showadi lä bayeliblamono wei tä nia dablaöje. Ö̦jö däjä Yai Bada a wa̦fa nia doblao taöje. 13 ¿Ö̦jö tawä? Dodijidawä wamacö cuobä wamacö. Bada tä Jesucristo wama ecö malä cui. Ö̦jö wama ecö yalo, yanowamö jödödöwä bä bada lä läblai bä a̦ dodijidawä da ji̦liaje. ¿Ö̦jö tawä? Bada a bälöo lä dodijio wei wama a wa̦ nia yai juaö. 14 Bada anö bä lä yädämabou wei bä ma cui, ö̦jö wama bä a̦ nia juaö mö feduo. Bä doblou lä mlai bä nö bleaamabeje, cama a showawänö bä malä shömaö wei, bä lä dodijaö wei bä a̦fa ca̦i dodijaö wäyäbeje. ¿Ö̦jö tawä? Wama bä a̦ ji̦liabä, ö̦jö lä. 15 Inaja wamacö dodijidawä yai lä bälöo wei tänö, bä bufi dao lä mlai bä a̦ mojodi li ma faö däjä ma cui, wama bä a̦ nia famaimi majöo. Inaja Yai Bada tänö wamacö taamaö bufi doblao malä waiquio wei. 16 Ö̦jö bä bada lä cui bä nosie bada juamobä wamacö taboimije. Bejedi lä. Wamacö nosiemamou mlai ja, wamacö cuaaö bufi lä doblao weinaja wamacö cuaaö dao lä ma cui, bä da moyaweicu. Abinaja wamacö bufi cuu mlai. “Ja̦o. Ya cuaaö bufi lä doblao weinaja ya cuaabä lä ya waiquiwä cudeenö, ¿wedi tabä ya bä nosie li julei?”, bä bufi cu dijä. Yai Bada wama a nosie juabä wama ecö malä cui. ¿Ö̦jö tawä? Dodijidawä wamacö shino yai cuobä, ö̦jö lä. Yai Bada tänö bä a̦ bada juamaö bufii waiquiwä ja lä, wama bä a̦ nia juaö. 17 Yanowamö jödödöwä täbä lä cui, wama täbä nofi nia bluca tabou. Jesucristo ebä lä cui, ö̦jö wama ebä nia yai nofimaö. Yai Bada a lä cui, ö̦jö wama a nö nia yai quili taö. Bada a yai bälöo lä dodijio wei a lä cui, wawädowä wama a nofi nia tabou. Inaja wamacö nia shino yai cuaaö. 18 Bada bä nosie juamobä wama ecö lä cuinö, afä dodijidawä wama bä nofi tabolanö bä a̦ da juaje. Dodijidawä wamacö ca̦i lä cuo wejei bä shino bädawä mlai. Bufi oquewä bä ca̦i lä cuo wejei bä ca̦i bädawä mlai. Wamacö nö lä bleaamaö wejei bä ma cui, dodijidawä wama bä a̦ nia juaö fe yadio. 19 Dodijidawä wamacö ma cuo däjä ma cui, tä nowa cua mlai ja wamacö nö bleaamaö dicooje ja, bä bufi nö wa̦lojaö fe da yadio. Yai Bada wama a nofi jaducäbolanö wamacö inaja taamamou dicoo ja, bejedi lä wama a bufi nia yai doblamabou. 20 Ö̦jö ma cui, cafä wamacö mayo ja wamacö si yafelimamou dicoo däjä, wamacö wa̦fa nia dodijaö tamoimi. Wamacö jushudou ma mlai ma cui wamacö wa̦fa nia dodijidawä taimi showawä, cafä wamacö mayo malä cui. Ö̦jö ma cui, wamacö lä dodijaö wei tä nowa ja wamacö nö bleaamaöje däjä, wamacö jushudou mlai ja, wamacö bufi yanöcöwä cudio showao fe yadio ja, ö̦jö däjä Yai Bada wama a bufi nia shino yai doblamabou. 21 Inaja wamacö cuaabä wamacö. ¿Ö̦jö tawä? Inaja Yai Bada tänö wamacö taamaö bufi fa doblaonö, wamacö malä nacaleno wei. Cristo a ma cui, inaja cama a ca̦i cuaaö malä balöono wei. Cama a doblou lä mlaono wei tä nowa ja mlai, camiyä bämacö doblou lä mlaono wei tä nowa ja a nö yai bleaamamaje. ¿Ö̦jö tawä? Ö̦jö bäma a owämabä lä a waiquiwä, cama a bufi yanöcöwä ca̦i cuo fe lä yadiono weinaja bämacö cuaaö nodiablalobä. 22 Cristo a lä cuaano wei tä nofi mojodubo dijejä. Wa̦lidiwä tä tanomi dodijiwä. A wa̦ ca̦i wa̦lidiwä faö buonomi. 23 A wa̦fa lä tano wejei däjä, a wa̦ ca̦i lafuo mö feduonomi. A nö ma bleaamano wejei ma cui a wa̦ ca̦i waitelimonomi. Yai Bada a nofi mölabou showao fe yadioma, täbä jömaö lä cadidou wei a lä cui. Ö̦jö a nofi mölabou fe yadioma cudeenö, a nö yuonomi. 24 Cama mayo mlai ja, camiyä bämacö mayo ja a yai shämolayoma. Wa̦lidiwä bäma tä lä tano wei, cama nija tä bluca fa yädäblalunö, fii balitama defi jamö ö̦jö tä ca̦i bluca wa̦lidiwä yauoma. Wa̦lidiwä tä ja bämacö cuo co̦o mlaobä a li inaja cuaama. Nomawä bä yabäcäomi lä culenaja bämacö fa cuonö, tä lä dodijidai tä jamö bämacö shino yai cuo nomöjöobä. Cama a lä dusimalaleno wejei tänö, bämacö bufi malä jalolayono wei. 25 Oweja bä mojodi li mojoluu lä cuaaö weinaja, inaja showawä wamacö mojoluu cuaaö ma balöono wei ma cui, fei däjä wamacö malä co̦alaleno wei. Wamacö lä nowamaö wei a lä cui nija wamacö yai luluamobä, wamacö co̦molayoma.
31 Bei. Inaja showawä, fei däjä wamacö fe̦yalobö ca̦i lä cuo wei bämacö nowa taö nomöjöa. Afä fe̦yalofä dodijidawä wama bä a̦ nia ji̦liaö. Ai bä lä cuinö, Jesucristo a wa̦ bejedi bufii ma mlajei ma cui, wama bä a̦ lä juaö wei tänö bä bufi tamamou fe yadiobä. Wama bä yömölaö ma mlai ma cui, 2 Yai Bada nija wamacö lä quilii wei wamacö fa möjenö, wamacö joleblalou lä mlai wamacö ca̦i fa möjenö, bä bufi jaducublobä. 3 ¿Ö̦jö tawä, suwä wamacö? Wamacö feta u̦cu lä liyäjäblamou wei tänö wamacö a̦fa liyäjäwä tamobä wamacömi. Wamacö lä baushimou wei tänö ca̦i mlai. Wamacö camishibö ca̦inö mlai. ¿Ö̦jö tawä? Olo bänö wamacö ma baushimou wei ma cui, camishi cäcö nowa lä bluca wei cäcö ja wamacö ma didio wei ma cui, ö̦jö tänö wamacö a̦fa dodijidawä nia tamoimi. 4 Ma, bei wamacö sibo mlai, bei wamacö bufi yai lä liyäjäo wei tänö, Yai Badanö wamacö a̦fa nia shino suwä liyäjäwä taö. Wamacö bufi ca̦i oquewä cuo ja, bufi yanöcöwä wamacö ca̦i cuo ja, inaja lä yai. Ö̦jö däjä Yai Bada wama a bufi nia yai doblamabou. Ö̦jö tä nowa a̦fa shino yai bluca taö. 5 Yai Bada ebä jaba lä cuono wei bä suwä lä cui, inaja bä jaba cuaaö malä balöono wei, Yai Bada tä nofi lä mölabono wejei bä suwä lä cui. Bä fe̦yalobö dodijidawä ebä a̦ juaö lä cadidiono wejei tänö, bei bä bufi yai baushiblamoma. 6 ¿Ö̦jö tawä? Sara a lä cuinö, inaja showawä bä fe̦yalobö Ablaamö a wa̦ juaö cuo balöoma. A nofi yai badaboma. Cama a lä cuaano weinaja wamacö suwä cuaaö nodio ja, quilii mlai ja fe̦yalofä wama bä a̦ dodijidawä juaö fe yadio ja, ö̦jö nija wamacö nia nöömou. 7 Bä fe̦yalobö wama ecö ma cui, cafä bämacö yömölaö majöa lä cule, wa̦lo wamacö dodijidawä ca̦i cuo mö feduobä. ¿Ö̦jö tawä? Dodijidawä suwäböfä bä ca̦i da cuoje. Bä da bayeliblaje. Cafä wamacö nö wa̦lojaö lä culenaja bä suwä cuwä malä mlai. Bä nofi ca̦i da taboje. Ba̦limi wamacö cuobä, Yai Bada tänö cafä no mlai ja wamacö dobäö lä cuo weinaja, inaja showawä, suwäböfä bä ma cui bä nia ca̦i dobäö cuo mö feduo malä cui. ¿Ö̦jö tawä? Dodijidawä bä ca̦i da cuoje, ö̦jö lä, wamacö bluca bayeliblamobä. Yai Bada nija wamacö nö bayeli nacao däjä, afä tä wa̦lidiwä läo dicoo mlaobä. 8 Bei. Fei däjä bluca wamacö nija ya wa̦ faö majöa lä cule. Wamacö bufi shedecou dicoo mlai, moli tä ja bä bufi bluca shino da shalilo, ö̦jö lä. Täbä nofi ca̦i da ojodaboje. Jesucristo ebä ca̦i bluca da nofimaje. Bä nofi ca̦i bluca da jo̦lijiboje. “Camiyä ya shino yai”, bä bufi ca̦i cuu dicoo dijä. 9 Wamacö nö bleaamaöje ja, bä taamaö mö feduo dijejä. Wamacö a̦fa taöje däjä, bä a̦ ca̦i juo dijä. Wama bä taamaö mö feduo mlai ja, Yai Bada nija wama bä shino yai bayelimabä, bä dodijidawä cuobä. ¿Ö̦jö tawä? Inaja wamacö cuaaö ja, cafä wamacö ma cui wamacö nia ca̦i bayeliblamou mö malä feduo wei. ¿Ya jolemou daanö? Wamacö bayeliblamobä Yai Bada tänö wamacö malä nacaleno wei. 10 ¿Ö̦jö tawä? Bämacö nia lä bayeliblamou wei, yedu ja ma cui Yai Bada tänö tä a̦fa wäyäö balöo showaoma. Abinaja a cuma. Dodijidawä wamacö nia cudio ja lä, wamacö bufi nia doblalou ja lä, wa̦lidiwä tä a̦ ja bä a̦ fa dijä. Bä caficö a̦ jolemo dijä. 11 Wa̦lidiwä tä ja bä mö da juluo. Dodijidawä tä shino yai da taje. Bufi yanöcöwä wamacö nia lä cuo wei tä shino yai da dayäaje. Ö̦jö tä nabä shino yai da cadidoje. 12 Bä lä cadidou wei bä nija, Bada tä mamo showaa, bä nowamabä. A yömöca ca̦i dao, bä nö bayeli nacao däjä bä a̦ ji̦liodayobä. Ö̦jö ma cui, wa̦lidiwä talewä bä nija, Bada tä mabucabö läo. Einaja Yai Bada a cuma. 13 Bä bufi da dayäo. Showadi wamacö dodijaö bufi doblao ja, ¿ö̦jö tä nowa ja wamacö nö nia bleaamaöje daanö? 14 Ja̦o. Ö̦jö ma cui, wamacö dodijaö tä nowa ja wamacö nö bleaamaö bädaoje ja, wamacö bufi nia doblao fe yadio. Wamacö nö lä bleaamaö wejei bä lä cui, bä nö quili ta dijejä. Bä bufi nofi ca̦i jushublao dijä. 15 Bei wamacö bufi jamö Cristo a nofi shino yai da taboje, afä wama a nofi lä Badabou wei wama a wa̦ yai juabä. Jesucristo wama a nofi lä mölabou wei tä wa̦liije ja, wawädowä bä a̦ nö wäo da showadao. Ö̦jö ma cui, Yai Bada wama a nofi tabolanö, oquewä wamacö a̦ nia faö. 16 Jesucristo wama ecö yalo, showadi wamacö a̦fa nia taöje. Ö̦jö ma cui, wamacö a̦fa ma taöje däjä ma cui, bä dodijaö fe da yadio. Bei wamacö bufi jamö, wa̦lidiwä tä lämabo dijejä, wamacö bufi yanöcöo fe yadiobä. Wamacö a̦fa lä taö wejei bä lä cui, ya̦cumö bä nö jolemou fa ö̦jöbömolunö, bä bufi nia quilijou majöo. 17 Wamacö dodijaö tä nowa ja wamacö nö bleaamaöje ja, tä dodijidawä waiquiwä. Inaja Yai Bada tänö wamacö taamaö ja, tä wa̦lidiwämi. Ö̦jö ma cui, wamacö doblou lä mlai tä nowa ja wamacö nö bleaamaöje ja, wamacö nö bleaamabeje lä wamacö waiquiwä. Cafä wamacö mayo. 18 Cristo a ma cui, nowa mlai ja a nö malä bleaamano wejei. Camiyä bämacö doblou lä mlai tä nowa ja, ö̦jö cä lä a moli shämoa malä showadalayono wei. A yai lä cadidou wei a lä cui, a shämoa lälayoma, bämacö cadidou lä mlai, Yai Bada nija bämalecö lulubobä. Bei a yai nomaa cadidilayoma ma cui, Yai Bada bei a Bufinö a demi jocädamaö co̦layoma. 19 Ö̦jö tä Bufi lojodenö, täbä lä nomaö wei täbä cuobä jamö Jesús a fa alufälönö, Yai Bada tänö täbä bufi shi lä wa̦limabole täbä ca̦i yömölacölöma. 20 Noewä däjä bä lä bälöono wei, ö̦jö bä bufi li cuoma. Canawä a lä tano wei däjä, ö̦jö lä bänö Yai Bada tä a̦ juanomije. Ö̦jö ma cui, canawä a tamaö showao däjä, Yai Bada tä yanöcöblao balöoma. A ishou jaöonomi. Ö̦jö däjä, canawä a jamö bolacadabö bä nofi shino yashulayoma, 8 bä lä cui. Modu u jamö bä befi ca̦i ca̦o däjä bä bayeliblamou fe yadioma. 21 Inaja showawä, fei däjä bämacö lä bayeliblamou wei, mau u jamö culanö bäma tä jömaö, bämacö fe lä ojomamou wei däjä. Bei bämacö sibo ya̦lömobä tämi. Bämacö fe ojomamou däjä, wa̦lidiwä bäma tä lämabou mlai ja, Yai Bada nijamö bämacö bufi mö lä yaiblou wei bäma tä shino yai jömaö. Jesucristo a demi jocädou co̦layoma yalo, bämacö bayeliblamou. 22 A demi jocädou fa co̦lonö, fedu jamö a co̦molayofälöma. Yai Bada jayu boco mashi jamö a cua lä culadi. A̦jele täbä ma cui, täbä bada lä läladi täbä ma cui, täbä ca̦i lojode lä culadi täbä ma cui, ö̦jö lä täbä bluca nija Jesucristo a Bada läadayoa.
41 Cristo a lä cui yanowamö a cuo däjä, a nö nini li bleaaö balöoma. Inaja a cuaaö ojodaoma yalo, cafä wamacö ma cui, inaja showawä bä nö ca̦i bleaaö ojodao cuo mö da feduo. Jesucristo a nowa ja bä nö bleaaö lä ojode wei bä lä cui, wa̦lidiwä tä ja bä yabäcamou si ijejeo malä mlai. 2 ¿Ö̦jö tawä? Eja wamacö demi cuo showao däjä, yanowamö täbä showadi lä cuaaö wei tä ja bä luluamo dijä, ö̦jö lä. Yai Bada tänö wamacö nosiemaö ja, a lä cuu weinaja etä shino yai da taje. 3 Yai Bada tä daö lä mlajei bä lä cuaaö weinaja wamacö jaba cuaaö mö feduoma. Wamacö nofi beshili jushuama. Wamacö bufi ca̦i waiyoma. Wamacö shi ca̦i walimamoma. Wamacö bufi nia jole jole fa dobladonö, showadi wamacö iyaö ca̦i co̦camoma. Nö idubö täbä bädawä ma cui, ö̦jö wama täbä ca̦i bufiblaö nofi jushuaö dicooma. Fei däjä inaja bä cuaaö co̦daa dijä. Wamacö jaba cuaaö lä waiquiono weinaja, inaja lä waiquiwä. 4 Ö̦jö bä sho wamacö jaba lä cuono wei bä lä cui, fei däjä cafä wamacö nija bä bufi wedinajamou nomöjöa. Bä bufi lämou mlai ja, bä nofi showadi jushuabä jamö wamacö fei däjä yädäomi ja, wamacö nö waiblaö nomöjöoje. 5 Ö̦jö ma cui, Yai Bada tänö bä a̦ nö nia wäamaö, täbä jödödöwä nia lä jömaö wei a lä cuinö. Bä demi lä showai bä ma cui, bä lä nomaö wei bä ma cui, bä jödödöwä jömabä a läa waiquia. 6 ¿Ö̦jö tawä? Bä nomaa lä waiquilayono wei bä ma cui nija, Yai Bada dodijidawä etä a̦ wäyämamou balöoma. Yanowamö bämacö dobloimi tä nowa ja, bämacö bluca lä nomaö weinaja bä cublou ma cule, tä a̦ bejedi fa bufijenö, Yai Bada a ba̦limi lä culenaja bä bufi cuo mö feduobä. 7 Ei tä a̦ jamö, bä bufi mojoduo dijä. Yai Bada tänö täbä nia lä jömaö wei tä cublou ajedou waiquia. Ö̦jö cudeenö bä bufi da wasöo. Bä bufi ca̦i da moyaweicu, wamacö nö bayeli lä nacao wei tä ja wamacö jujeblou dicoo mlaobä. 8 Showadi bä ca̦i shino yai da nofimayo. Ö̦jö däjä ai a doblou ma mlai ma cui, wamacö bufi nofio cudeenö wama tä nowa nia taboimi. 9 Abinaja ca̦i. Bufi lämou mlai ja, dodijidawä bä iyaö ca̦i da loablalamayo. Ai bä waloquei däjä, dodijidawä bä ca̦i da bälömaboje. 10 Wamacö bayeliblayobä, Yai Bada tänö wamacö bluca dobäö cuaaö waiquiwä. ¿Ö̦jö tawä? Camanö wamacö nö bluca wa̦lojamaö yalo, dodijidawä bä da bayeliblayo. 11 Wama bä yömölabä wamacö waiquiwä ja, Yai Bada etä a̦ ja bä shino da yömölaje. Wama bä bayeliblabä wamacö waiquiwä ja, Yai Bada tänö wamacö nö lä wa̦lojomabou wei wama a bufibolanö, bä da bayeliblaje. Inaja Jesucristo wama ecö bluca cuaaö ja, wama tä taö lä bädao wei tä ma cui ja, Yai Bada tä nia doblao dablamou. Ö̦jö a wa̦fa doblao tamou shi wa̦libä a waiquiwä. A nia Bada läo shi wa̦lii. ¿Ö̦jö tawä? Inaja lä tä cuobä. 12 Iba bämacö lä nofimaö wei wamacö. Wamacö nö lä bleaamaö wejei tä ja, bä bufi shädayaimou fe balojoo dijä. Tä shomimi. Inaja bämacö taamamobä bämacö waiquiwä. Bämacö bufi wabamobä cätä. 13 ¿Ö̦jö tawä? Wamacö bufi cuaablalou mlai ja, wamacö bufi yai doblalobä. Cristo a ma cui a nö bleaamaö malä balöono wejei. Ö̦jö wama a owämaö yalo wamacö bufi yai doblalobä wamacö. Fei däjä wamacö bufi doblalou fe yadio yalo, obi wamacö bufi nia shino yai doblalou fe balojoo, Cristo a doblao dablamou däjä. 14 Cristo wama a bufibou yalo wamacö nö waiblaöje ja, wamacö bufi doblalobä wamacö waiquiwä. Yai Bada bei tä Bufi lä doblalenö wamacö malä bayelibou wei. 15 Ö̦jö ma cui abinaja ya cuu. Yanowamö wama a fa shälönö wamacö nö bleaamaöje ja, ö̦jö shomi tä li. Ö̦jö ya tä a̦fa taimi. Wamacö fa tomömonö wamacö taamaöje ja, cafä wamacö mayo. Wamacö doblou dicoo fa mlacunö wamacö taamamou ja, inaja showawä. Wamacö a̦ faö bashio bädao däjä wamacö taamamou ja, cafä wamacö mayo li. 16 Ö̦jö ma cui, Jesucristo bufilewä wamacö yalo wamacö nö bleaamaöje ja, bä bufi quilijo dijä. Wamacö bufi quilijou mlai ja, Cristo wama ecö a̦fa jilaöje yalo Yai Bada tä nofi shino yai da doablaje. 17 Yai Bada tänö täbä nia bluca lä jömaö wei tä cuaaö waiquia lä cuimadi. Cama bäma ecö lä cui, bämacö nia jömamou lä balöblao wei bämacö. Bämacö fei däjä lä wabamou wei, ö̦jö tä li waiquiwä. ¿Ö̦jö tawä? Camiyä bämacö jömamou balöblao ja lä, Jesucristo dodijidawä etä a̦ juaö lä mlajei bä lä cui, ö̦jö bei bä nia yai jömamou dodijio. 18 Yedu jamö abinaja Yai Bada tä a̦ cuu balöo showaoma. Bä lä cadidou wei bä lä cui, nö bleaaö mlai ja bä bayeliblamoimi waiquiwä yalo, Yai Bada tä daö lä mlajei bä lä cui, ¿wedinaja ö̦jö bei bä nia li taamamou dodijio, wa̦lidiwä talewä bä lä cui? Einaja tä a̦ cuu balöo showaoma. 19 ¿Ö̦jö tawä? Ö̦jö cudeenö, wamacö nö lä bleaamaö wejei wamacö lä cui, inaja Yai Bada tänö wamacö taamaö bufio waiquia ja, bä dodijaö fe da yadio. Wamacö lä tablaleno wei a lä cui a nofi shino yai da mölaboje, wamacö bufi bayelibobä. Öjö a wa̦ cadidou malä waiquii.
51 Jesucristo wama ebä ca̦i lä yododaö wei wamacö lä cui nija ya wa̦ nia faö nomöjöo, camiyänö iba ya bä ca̦i yododaö mö lä feduo wei ya lä cui. Jesucristo ya nö bleaaö lä dalaleno wei cä ya. Fedu jamö a lä doblaladi tä wawäblou däjä, camiyä ma cui ya nia doblao cuo mö feduo. ¿Ö̦jö tawä? Ö̦jö lä ya lä cuinö, abinaja bämacö nowa taö lä cule. 2 Cama ebä nija Yai Bada tänö wamacö li lämabou, wama ebä yai nowamabä. Ebä da nowamaje, ö̦jö lä. Wamacö mojilanö mlai, bufi ojode wamacö culanö wama ebä yai nowamabä. Yanowamö täbä nija wamacö dobämou bufi lä doblao we tänö mlai, wama ebä nia lä nowamaö wei tä ja wamacö bufi yai shaliliobä. 3 ¿Ö̦jö tawä? Wama bä nosiemaö fe blacäjou mlai ja, dodijidawä wama bä yai nia lulubou. Wamacö dodijaö fa möjenö wamacö owämabeje wamacö yai cuobä. 4 Ö̦jö däjä, bämalecö yai lä nowamöbole a Bada bädou däjä, wamacö nia dobämodayou. ¿Ö̦jö tawä? Wamacö nö wa̦lojaö fe yadioma yalo, doblao tä yai lä cui ja wamacö nia dobädayou, ba̦limi tä ja. Einaja bada bämacö nowa taö lä cule. 5 Fiya wamacö lä cuinö, bada wama bä a̦ ca̦i nia juaö. ¿Ö̦jö tawä? Bluca wamacö ma cui, wamacö a̦ dodijidawä juayobä wamacö. Cafä wamacö jömöo mlai, ai wama bä a̦ shino ji̦liabä. Abinaja tä a̦ malä cuu wei. Cama bä lä jömöo wei bä lä cui nija, Yai Bada a bufi lämou. Ö̦jö ma cui, bä jömöo lä mlai bä lä cui bä nofi yai ojodabou. ¿Ö̦jö tawä? Einaja tä a̦ cuu. 6 Bä jömöo dijä, ö̦jö lä. Wamacö jömöo mlai ja, Yai Bada tä lojode lä ayai nija, bä bufi yai shino da ojodao. Wamacö jömöomi ja, wawädowä wamacö nofi nia obi tabou, cama a bufi lä cuu wei däjä. 7 Wamacö bufi lä jalujou wei, Yai Bada nija tä a̦ bluca ca̦i da wäaje. Wamacö nofi malä jalujubou wei. 8 Bä da moyaweicu, ö̦jö lä. Bä nö ca̦i da daicu. Wamacö nofi lä wa̦libou wei a fecula bada lä cuinö, wamacö nabä queobä wamacö nofi taö malä cuaaö wei, öla bä waiteli lämou lä cuaaö weinaja showawä. 9 Bä nö yai da wa̦lojoicu. Jesucristo wama a nofi lä mölabou wei tä ja, bufi lojode bä yai da cuicu. Sadanasinö Jesucristo ebä bluca lä yabäcaö wei wama tä daö malä waiquii, cafä wamacö shino ayawä mlai. Cafä wamacö nö bleaaö lä culenaja, aifä bä bluca lä bälöblai bä ma cui, ö̦jö bä nö bleaaö mö feduwä malä cui. 10 Fei däjä wamacö nö ma bleaaö wei ma cui, tä nö nia dedeaimi. Wanonowä wamacö nö bleaaö fa balöonö, cama Yai Bada tä showawänö dodijidawä wamacö nia tabou fe yadio. Wamacö bufi ca̦i nö nia wa̦lojomabou, wamacö bufi shominajablou si ijejeo mlaobä. Wamacö bufi ca̦i nia lojodomabou. ¿Ö̦jö tawä? Yedu ja ma cui bämalecö daö showadaoma. Cristo bäma ecö cuobä bämalecö nacalema, cama ba̦limi a doblao lä culadi jamö, ba̦limi bämacö doblao cuo mö feduodayobä. Showadi bämalecö bayelibou. No mlai ja bämalecö nofi bluca ojodabou talei. 11 Täbä nia bluca juwäbou shi lä wa̦lii wei, ö̦jö Yai Bada cätä waiquiwä. Inaja lä tä cuobä. 12 Ei ya tä a̦ wai jolodowä shömabä, Sibano nija ya tä a̦ oniblamaö lä cule, iba aiyä a lä cui nija. Jesucristo ya e cadidiwä nofi tabou. ¿Ö̦jö tawä? Cafä bämacö nowa tabä ya tä a̦ oniblaö lä cule. Yai Bada tänö, no mlai ja bämalecö nofi yai lä ojodabou wei wama tä a̦ bejedi dablabä, bämacö nowa taö. Ö̦jö wama tä a̦ nofi mölabolanö, bä bufi yai da lojodoicu. 13 Babiloniateliyoma a lä cui, Jesucristonö a yaia mö lä feduleno wei a suwä lä cui, cafä wamacö nija a wa̦fa wäyämamou bufi doblaa lä cule. U̦asimi Marcos a ca̦i. 14 Jesucristo wama ecö yalo, wamacö mö fedudayou ja bä yai da nofimayo. Bei. Cristo a lä cuinö, showadi wamacö bayeliblabä. Ö̦jö nija wamacö lä cule, wamacö bufi bluca yanöcömabobä.