1 Corintios
11 Pablo cä ya. Yai Bada tänö Jesucristo lija wale yaiamaö fa bufinö wale nacalema, wale shimabä. Camiyä ai bämacö mashi lä cui, Sodene a wa̦fa lä cule sho, yafä si oni shimaö bufi fa doblaonö, ya si oniblaö lä cule. 2 Colido jamö Yai Bada wama ecö lä yododaö wei wamacö lija yafä si oni shimaö, Jesucristo lija wamacö bufi cuobä, wamacö lä yaimolayono wei wamacö lija. Yai Bada wama ecö cuobä wamacö nacalema, ai täbä bluca taamaö mö feduwä lä showainaja. Bluca täbä lä bälöblai täbänö, Bada tä Jesucristo a lä bufiblaö wejei, cama lä ebä bluca. Camiyä bämacönö bäma a nosie fuaö lä cuaaö weinaja, a nosie fuaö cuaaö mö feduoje. 3 Bei. Fayä Yai Bada lija wamacö shi̦lo bayeliblamobä, Bada tä Jesucristo lija ca̦i. Wamacö bufi shi̦lo yanöcömaboböbä. Wamacö nofi ca̦i shi̦lo ojodaboböbä. 4 Jesucristo lija wamacö bufi fa cuicunö, Yai Bada tänö wamacö nofi ojodabou. Ö̦jö cudeenö Yai Bada lija ya bufi a̦fa doblalou wäyämou talei. 5 Cama lija wamacö bayeliblamou fe malä balojoo wei. Ö̦jönö wamacö a̦ nö shi̦lo yai wa̦lojomabou. Wamacö bufi ca̦i jaducämabou fe balojowä. 6 Cristo yama a wa̦fa lä wäyäno wei wama tä a̦ lofotobolanö, wamacö bayeliblamou. 7 Ö̦jö cudeenö Bada tä Jesucristo a nia lä bädou wei wama a noshi jali dabolanö, dodijidawä wamacö cua. Yai Bada tä Bufinö täbä lä jibädaö wei täbä ja wamacö fo̦limi. 8 Wama tä a̦ lofote fuwäbou showaobä, Jesucristonö wamacö nia bayeliblaö shi wa̦lii, Bada tä Jesucristo a bädou däjä wamacö a̦fa dobloimi tamou mlaobä. 9 Yai Bada wama a nofi mölabobä cätä. Ö̦jönö wamacö nacalema, bä Ijilubö Bada tä Jesucristo sho wamacö nofi tamayobä. 10 Iba wamacö. Bada tä Jesucristo a wa̦nö bämacö yömölaö. Moli tä a̦ showawä ja, bä bufi da shalilo. Wamacö a̦ fa majöablalonö, wamacö bufi shedecou mlai. Moli tä a̦ ja wamacö fa cadidonö, wamacö dodijabä. 11 ¿Ö̦jö tawä, iba wamacö? Wamacö lä cuaaö wei tä ja, wale yömölamaje, Cloemi ebä lä cuinö. Wamacö a̦fa jo̦wa lafumayou dicoo. 12 ¿Ö̦jö daanö? Abenaja wamacö jo̦wa cuadalou dicoo. “Pablo ya wa̦ shi̦lo yai ji̦liabä”, ai wamacö cuu. “Ma, Abolo ya wa̦ nia yai ji̦liaö”, ai wamacö cuu mö feduo. “Ma, Pedro a wa̦ yai”, ai wamacö jo̦wa cuu. “Ma, Jesucristo ya wa̦ yai ji̦liabä”, ai wamacö jo̦wa cuu mö feduwä showawä. Inaja wamacö jo̦wa bluca cuu majöablalou dicoo. 13 ¿Cristo a sheleleblamoa yailayo nowa tawä? Cafä wamacö bayeliblamobä, fii balitama tefi jamö, ¿camiyä Pablo wale lä shäleno wejei bei ya mada tawä? Wamacö möfe lä ojomamono wei, ¿camiyä Pablo lä ya wa̦nö wamacö möfe ojomamoma daanö? 14 Camiyänö bämaco möfe bluca ojomanomi. Clibo a lä cui, Cayo a ca̦i lä cui, ö̦jö ya cöbä möfe shi̦lo fa ojoblalönö, Yai Bada lija ya bufi doblalou, 15 camiyä ya wa̦nö wamacö möfe a̦fa ojomamou wäyämou mlaobä. 16 ¡Jai! Cama Edefana ya ebä möfe ca̦i ojoblamalema. Ai ya tä möfe ojoblamaö nofi jaducäboimi. 17 Ya bä möfe ojomabä, Jesucristonö wale shimano malä mlai. Cama dodijidawä ya etä a̦ wäyäbä, wale yai shimölema. Ö̦jö ma cui täbä a̦ faö fe lä difeliablalou wei tänö mlai. Ma, ya aca nofi jayu mölamobobä tämi. Fii balitama tefi ja, Cristo a lä shäleno wejei tä a̦ lä cui, cama tä a̦ nö wa̦lojaö waiquiwä. Cama tä a̦ lofote showawänö, täbä bufi li taamamou. Camiyä ya aca jayu nofi mölamobou fa cunoja, ya tä a̦ nö doblamabö mlai. 18 Shobali wacä jamö täbä cadidou lä showai täbä lija, fii balitama tefi ja Jesucristo a lä shäleno wejei tä a̦ ji̦limamou nofi mojodi talei. Cama bä lija tä a̦ ji̦limamou nofi ma mojodi wei ma cui, camiyä bämacö lä fucäamou wei bämacö lija tä a̦ ji̦limamou yai walalawä. Ö̦jö tä a̦nö Yai Bada tä lofote dablamou. 19 Abenaja tä a̦ oni cuu malä balöono wei. Täbä bufi a̦fa jaducäwä lä jilabou wejei, ya etä nia doblamaimi. Täbä bufi a̦fa dao lä jilabou wejei, ya etä shi nia wa̦liamaö. Einaja tä a̦ cuu. ¿Ö̦jö tawä? 20 Täbä bufi a̦fa jaducäwä ma jilabou wejei ma cui, Yai Bada tänö bä möfe nia bomabou. Moisesi tä a̦ oni lä daö wejei, bä a̦fa moyawe taö ma cujei, ö̦jö bä möfe nia ca̦i bomabou mö feduo. Ai täbä a̦ nö wa̦lojowä ma jimaö wejei ma cui, inaja showawä. Yanowamö täbänö tä a̦fa moyawe lä taö wejei, Yai Bada tänö etä a̦fa jole taö malä waiquii. 21 Yai Bada tä Bufi shi̦lo yai moyawe yalo, cama yanowamö täbä bufi moyawe anö a dablamou bufionomi. Cama Yai Bada yama etä a̦ lä wäyäö wei tä a̦ showawänö, täbä shi̦lo fucäaö bufi doblaoma. Ai täbä lija tä a̦ ji̦limamou nofi ma mojodi wei ma cui, ö̦jö tä a̦ bejedi lä bufibou wejei täbä shi̦lo yai fucäamou. 22 Täbä bufi taamamou si ijejewä malä mlai. Judio bä lä cuinö, Yai Bada tä mayo shi̦lo wawämaö bufiije. Judio bä lä mlai bänö bufi moyawe tä a̦ lä cui, tä a̦ shi̦lo dayäaöje. 23 Ö̦jö ma cui, fii balitama tefi jamö Cristo a lä shäleno wejei yama tä a̦ shi̦lo wäyäö. Judio bä lija tä a̦ ji̦limamou nofi jushuwä. Judio bä lä mlai bänö tä a̦ ji̦liaimije. 24 Ö̦jö ma cui Yai Bada tänö täbä bluca lä nacaö wei täbä lija, judio bä ma cui lija, judio bä lä mlai bä ma cui lija, tä a̦ ji̦limamou walalawä. Cristonö Yai Bada tä lofote dablamaö. A bufi ca̦i moyawe dablamaö. 25 Yai Bada tä a̦ nofi jo̦wa ji̦limamou mojodi ma cui, ö̦jö a bufi shi̦lo jaducäwä ayawä. A nö a̦fa wa̦lojaimi ma taö wejei ma cui, ö̦jö a shi̦lo lofote ayawä. 26 Iba wamacö. Bä bufi da jaducäicu. Yai Bada tä a̦ ja wamacö bufi jaba lä jaducäblaliyono wei däjä, yanowamö täbänö wamacö nofi tabobeje wamacö bluca cuonomi. Wamacö bufi a̦fa dao tanomije. Wamacö nosie fuabeje wamacö ca̦i cuonomi. Wamacö a̦fa bada wäyänomije. 27 Ö̦jö ma cui, täbä bufi a̦fa jaducäwä lä taö wejei bä lä cui, Yai Bada tänö ö̦jö bä bufi nia fa wedinajamomanö, bä bufi a̦fa jaducäwä taö lä mlajei bä li yailema. Täbä nö a̦fa wa̦lojaö lä taö wejei bä bufi nia fa wedinajamomanö, bä nö a̦fa wa̦lojaö taö lä mlajei bä lä cui, ö̦jö bä ca̦i yaia mö fedulema. 28 Täbä nofi tabou lä mlajei bä ma cui, täbä nofi ca̦i lä wa̦libou wejei bä ma cui, ö̦jö bä yaialalema, täbä nofi yai lä tabou wejei täbä dobloimi dablamobä. 29 ¿Ö̦jö tawä? Cama a lä cule jamö yanowamö a nofi doablamou mlaobä, inaja Yai Bada a cuaama. 30 Jesucristo lija wamacö bufi fa yädäicunö, Yai Bada tänö wamacö ba̦limibou lä cule. ¿Ö̦jö tawä? Cama bufi moyawe etä lä cuinö bämacö bufi li camiyä moyawäblaliyoma. Cama dodijidawä etänö, bämacö li dodijidablaliyoma. Yai Bada bäma ecö dodijidawä cuobä, Jesucristo lija bämacö yaimoa yädälayoma. Bämalecö nowa fa co̦macönö, Yai Bada lija bämalecö ajedea comaquema. 31 Ö̦jö cudeenö tä a̦ oni cuu lä balöono wei, bäma tä a̦ bejedi dablaö. Yanowamö a wa̦ shi doaö bufi doblao ja, cama a nofi doamolanö mlai, Bada tä nofi shi̦lo yai doabä. Einaja tä a̦ cuu.
21 Iba wamacö. Cafä wamacö lija Yai Bada ya tä a̦ wäyäö ja ya lä waloqueyoluno wei däjä, ya wa̦ fe difelimonomi. “Pablo a bufi nofi moyawe yai”, bämacö bufi tamaö bufionomi. 2 Cafä wamacö lija ya da bälöoblei däjä, ai ya tä a̦fa wäyäö coyocanomi. Jesucristo tä a̦ lä cui, fii balitama tefi ja a lä shäleno wejei tä a̦ dodijiwä lä cui, ö̦jö ya tä a̦ mada cadidablei. 3 Bämacö ca̦i da cuoblei däjä ya wa̦ faö fa quilinö, jai ya ujudi li blösö blösömoma ya cuaama. 4 Ya tä a̦ lä wäyäno wei däjä, camiyä bei ya wa̦ moyawe dablamou mlai ja, Yai Bada ya Bufi shi̦lo lofote dablamaö dodijioma. 5 Yanowamö täbä a̦ faö lä moyawe wei tä ja, wamacö mölaö mlaobä. Yai Bada tä nö lä wa̦lojaö wei wama tä nofi shi̦lo yai mölabobä. 6 Ö̦jö ma cui yama tä a̦ lä wäyäö wei, moyawe cä tä a̦. Yai Bada lija bä bufi lä jaducäafälöö wei bä lä cuinö tä a̦ nö moyawe ö̦jöböaöje. Culenaja yanowamö bämacö lä cule jamö bä lä nosiemou wei bä lä cuinö, bä mladou si lä ijejei bänö, yama tä a̦ lä wäyäö wei tä a̦ taboimije. 7 Moyawe yama tä a̦ lä wäyäö wei tä a̦ lä cui, Yai Bada tänö tä a̦ lä jo̦yabono wei tä a̦ li. Yanowamö täbä lija tä a̦ dablamono ma mlai ma cui, yedu jamö tä ulufi tablano mlai ja, tä a̦ tabou showaoma. Cama bäma ecö lä cui, bämalecö nia lä doblamabou wei tä a̦ yaibou ja̦too showaoma. 8 Ö̦jö tä a̦ ja, ei tä ulufi jamö bä bluca lä nosiemou wei bä bufi jaducäblonomi. Bä bufi jaducäblou fa cunoja, fii balitama tefi ja Bada tä nofi lä doablamou wei tä nö shäbö mlajei. 9 Abenaja Yai Bada etä a̦ oni cuu malä balöono wei. Yanowamö bei bä mamocunö tä dablaö balöono ma mlajei ma cui, bei bä yömöcacönö tä a̦ ji̦liaö balöono ma mlajei ma cui, bä befi cuo showaodayoma. “Inaja tä cuobä daanö”, bä bufi jaba cuno ma mlai ma cui, Yai Bada tä lä nofimaö wejei bä befi tabou showaoma. Ö̦jö bä befi lä tabou wei tä lä cui, 10 camiyä bämacö lija Yai Bada tä Bufinö tä wawäblamalema. Tä daö nö malä mlale. Yai Bada a bufi cuablalou lä ja̦too wei tä ma cui, tä ca̦i daö. ¿Ö̦jö tawä? Einaja tä a̦ cuu. 11 Shomi täbä lija täbä bufi dablamou ma mlai ma cui, cama täbä bufi li yai dablamou. Inaja lä showawä, Yai Bada tä Bufinö cama a bufi shi̦lo dablamou. 12 Ö̦jö bäma a Bufi li tabou. Yai Bada tänö bämalecö befi lä tabou wei tä ja bämalecö bufi moyawäblamabä, a Bufi jibämobema. Ö̦jö bäma a Bufi tabou yalo, yanowamö täbä bufi lä cuaablalou weinaja bämacö bufi cuaaimi. 13 Yama tä a̦ lä wäyäö wei, Yai Bada tä Bufi lija yama tä a̦ fa ji̦lilänö yama tä a̦ li wäyäö. Yanowamö täbä bufi a̦fa moyawe lä jilabou wejei täbä lija yama tä a̦ däano malä mlai. Yai Bada tä Bufi tabou mö lä fedule täbä lija yama tä a̦ bejedi wäyäö mö feduo. 14 Yai Bada tä Bufi tabou lä mlajei bä lä cuinö tä a̦ ji̦liaö möblaimije. Yai Bada lija bä bufi jaducäo fa mlacunö, tä a̦ ca̦i ji̦liaö bufiomije. Tä Bufi taboimije yalo, tä a̦ nö bejedi ö̦jöböblaimije. 15 Ö̦jö ma cui, Yai Bada tä Bufi lä tabou wejei bä mö feduwä lä cuinö, tä bluca lä cublou wei tä nö ö̦jöböaöje. Tä nö dodijidawä ö̦jöböaöje, tä nö ca̦i wa̦lidiwä ö̦jöböaöje. Cama bänö tä nö bluca ma ö̦jöböaö wejei ma cui, mojodi täbä lija cama bä bufi nö ö̦jöböamoimi. Yai Bada ebä lija bä lä mojodi wei bä bufi shi̦lo wedinajamou. 16 Abenaja Yai Bada etä a̦ oni cuu malä balöono wei. Bada tä bufi lä cuaablalou wei, ¿wedinö tä bufi yai daö? Ö̦jö a lä cui, ¿wedinö a li yömölabou? Einaja tä a̦ cuu. Ö̦jö ma cui, Yai Bada bäma a Bufi lä tabou wei bämacönö, Cristo a bufi lä cuaablalou wei bäma a bufi daö.
31 Iba wamacö. Yai Bada wama a Bufi tabou mö ma fedule ma cui, bämacö yömölaö da balöoblei däjä ya wa̦ doblonomi. Yanowamö täbä bufi showadi lä cuaablalou wei tä ja, wamacö cuaaö bufi fa doblaonö, wamale doblamanomi. Jai Jesucristo lija wamacö jabamou, wamacö cuaaö dicooma yalo, colo wiisibö tä a̦ lä cui ja bämacö shi̦lo yömölaö bädaoma. 2 Oshe dude täbä lija yalo bä jibäaimije. Bä shi̦lo shadimabouje. Yai Bada etä a̦ ja bämacö jaba lä yömöladaleno wei däjä, inaja showawä wamacö cuoma. Oshe täbä wainö bä nii waa doblaimi lä culajeinaja, inaja showawä Yai Bada etä a̦ ja wamacö dobloimi cuoma. Fei däjä ma cui wamacö dobloimi showawä. 3 Cafä wamacö bufi cuu lä bädao wei tä ja, wamacö cuaaö bufi doblao showao dicoo. Ai täbä dodijaö ayao ja, wamacö jushuo si malä ijejei. Ai wama täbä nofi malä wa̦libou wei. Inaja wamacö cuaaö dicoo ja, mojodi bä lä culenaja wamacö cuaaö mö feduwä malä showai. 4 “Pablo ya wa̦ yai ji̦lii dodijio”, ai wamacö cuu dicoo ja, “Abolo ya wa̦ yai ji̦liabä”, ai wamacö cuu mö feduo dicoo ja, showadi täbä yanowamö lä cuaaö weinaja wamacö cuaaö malä showai. 5 ¿Wedi bei a li Abolo, wama a wa̦fa jayumadii yaiobä? ¿Wedi bei ya li Pablo, wamale a̦fa jayumadii yaio mö feduobä? Yai Bada wama a bufiblabä yafälecö lä shimöleno wei yafäcö li bädawä malä cui. Yai Bada tänö tä lä jimöbeno wei tä ja yafäcö lä icuqueno wei yafäcö li, yafäcö ojodamobä. 6 Yai Bada ya wa̦ jaba lä wäyäno wei däjä, cafä wamacö bufi jamö jai ya mobä döaö ya cuaama. Abolonö tä a̦ wäyäö lä nomöjöono wei, jai mau ubänö mobä fe liyäyaö a li cuaaö nomöjöoma. Yai Bada tänö wamacö bufi lä jaducäblamaleno wei däjä, jai mobä caumalema tä li cuaaö nomöjöoma. 7 ¿Ö̦jö tawä? Mobä lä döaö wei a lä cuinö, mobä caumaö daomi. Mobä fe lä liyäyaö wei a ma cuinö, inaja showawä. Yai Bada tänö mobä shi̦lo badamaö daö ayawä. 8 Mobä lä döaö wei a ojodamou lä cuaaö weinaja, mobä fe lä liyäyaö wei a ma cui, inaja showawä a ojodamou cuaaö mö feduo. Ai a lä cui, dodijidawä a ojodamou ja, Yai Bada tänö a no ojode comaquei. Ai a dodijaö mö lä feduo wei lija, a no ca̦i ojode co̦a mö fedumaquei. 9 Yai Bada a lä cui jai a ficalimou a cuaaö. Cafä wamacö lä cui, jai Yai Bada ficali wama etäca cuwä. Cafä bei wamacö bufi jamö Yai Bada tä lä ojodamole jamö, ei camiyä yafäcö co̦caa. 10 Yai Bada tänö wale fa bayeliblalönö, ya tä a̦ lä wäyäno wei däjä, jai ya e yafi i̦tamama ya cuaama. Bä yafimou lä daö wei bä lä cuinö, dodafi bä i̦tamaö lä balöo wejeinaja, colo ya tä a̦ jaba wäyäö cuaaö balöoma. Ai a ojodamou nomöjöa lä cule. Bä ojodamou lä nomöjöo wei, bä bufi moyawälanö bä ojodamobä, ö̦jö lä. 11 Yano je̦fa a nofi lofote mölabou lä cuaaö wejeinaja, Jesucristo a nofi mölabobeje a lofote tablamaö malä waiquilayono wei. Täbä mölabä, ai tä nia cuo majöomi. 12 Jesucristo jai colo etä yano cuwä waiquiwä. Yai Bada lija bä lä ojodamou wei, jai etä yano ola tafälööje bä cuaaö. Dodijidawä Yai Bada tä nosie lä fuaö wejei däjä, jai e yano ola lofotoamaöje tä cuwä. Ai bä lä cuinö, jai maa mabä nofi lä yaibou wejei mabä yädämaöje bä cuaaö. Ai bä lä cuinö, jai mabä nowa lä bluca wei mabä yädämaöje bä cuaaö mö feduo. Ai bä lä cuinö, jai fii fibä yädämaö mö feduoje bä li cuaaö. Ai bä showawä lä cuinö, jai yaa jenabä yädämaöje bä cuaaö mö feduo. Ai bä mö feduwä showawä lä cuinö, jai bölösö bä yädämaöje bä cuaaö mö feduo. 13 Tä lä taö wejei tä nia dodijidawä wabamou. Yai Bada tänö täbä jimabä etä cublou däjä, cowa wacänö tä nia bluca lä wabamou wei däjä, tä nowa nia wawäblou. 14 Jai tä yafi ola taöje däjä täbä yädäo lä majöo wei, Yai Bada tänö bä no nia ojode co̦amaö. Cowa wacänö tä wa̦liaö lä mlai, tä no ojode co̦maquei. 15 Tä lä tano wei etä ö̦shölayou ja, tä nowa nia ojode co̦amaimi. A ojodamou nö nia bleaaö ma cui, cama a nia shi̦lo fucäamou. Cowa wacä jamö täbä fucäaö lä cuaaö wejeinaja, cama a nia shi̦lo fucäamou bädao. 16 “Yai Bada yama ecö yafibö”, ¿wamacö bufi cuimi tawä? ¿Yai Bada wama a Bufi tabou nofi mojodubou dicoo tawä? 17 Ai a lä cuinö, Yai Bada etä yafi wa̦liaö ja, a nofi nacao. Yai Bada tänö ö̦jö a wa̦lialei. Cama e yafi malä yaibole, cafä wama ecö lä cui. 18 Jole jole wamacö mölaö bädao mlai. Yanowamö täbä lija a bufi a̦fa jaducäwä tamou shi jalimo dijä. “Wa bufi nofi jaducäbloimi yai”, wa nowa taö fa cunoje ja, tä nö shi̦lo doblaobö wei. Ö̦jö däjä wa bufi shi̦lo yai moyawäblou dodijiobä. 19 Yanowamö täbänö a bufi a̦fa moyawe lä taö wejei, cama etä lä cui Yai Bada tänö etä nia wailei. Abenaja tä a̦ oni cuu. Yanowamö bänö etä a̦fa moyawe lä taö wejei, Yai Bada tänö etä mojodi fa jimanö, bä doblamaimi. Einaja tä a̦ cuu. 20 Abenaja tä a̦ oni ca̦i cuu. Bä bufi a̦fa moyawe lä wäyäö wejei, Yai Bada tänö bä bufi nö a̦fa bleaaö taö. Einaja tä a̦ cuu. 21 Cama yanowamö täbä nofi moyawe mölamobobä tä cuami waiquiwä yalo, bä bufi da jaduqueicu. Yai Bada lija yamacö lä ojodamou wei, yamalecö nofi dodijidawä yaibou mlai. Cafä wamacö bayeliblamobä yamacö li bluca. 22 Camiyä Pablo ya ma cui, Abolo a ma cui, Pedro a ma cui, wamacö bayeliblamobä yamacö bluca. Jödödöwä täbä lä cublai, cafä wamacö befi bluca. Wamacö lä demöo wei tä ma cui ja, wamacö lä mladou wei tä ma cui ja, Yai Bada tänö wamacö nia bayeliblaö shi wa̦lii. Fei däjä tä lä cule tä ma cui, tä nia obi lä cublou wei tä ma cui, cafä wamacö befi tä bluca showawä. 23 Cafä wamacö lä cui, Cristo wama ecö. Cristo a lä cui, Yai Bada e.
41 Abenaja yamalecö nofi shi̦lo tabobä. “Jesucristo a wa̦ lä fuaö wejei cäbä. Yai Bada lija bä lä ojodamou wei cäbä, etä a̦ wawäblamabeje.” Einaja yamalecö nofi shi̦lo yai tabobä. 2 ¿Ö̦jö tawä? Täbä lä ojodamou wei bä lä cui, bä dodijidawä ojodamobä bä li shimaöje, bada e a̦ fuabeje. 3 Jesucristo ya wa̦ lä fuaö wei ya lä cui, cafä wamacönö wamale dodijaö ma jimaö däjä ma cui, wamale ca̦i dobloimi ma jimaö däjä ma cui, bämacö a̦ fuaö mlaicätä. Bada täbänö wale a̦fa wayoabeje, täbä ca̦i ma yododaö däjä ma cui, ya nofi nia jaluomi. Yanowamö wamacö a̦ li bädawä. Camiyä ya ma cui, ya wa̦ fabä tä cuami. Ya wa̦fa dodijaö taomi. 4 “Yale a̦fa tabeje tä cuami waiquiwä”, ya bufi cuu ma cui, camiyä ya bufi cuu lä bädao wei tänö ya dodijidawä jimöomi. Yale nia dodijaö lä jimaö wei a lä cui, yale nia dobloimi ca̦i lä jimaö wei a lä cui, ö̦jö Yai Bada bei tä waiquiwä. 5 ¿Ö̦jö tawä? Ö̦jö cudeenö, täbä dobloimi jimaö shi jalimo dijejä. Bada tä Jesucristo a itou co̦oyoluu däjä, tä bluca nia wawäblou. Jai mö didi jamö tä ma jo̦yale ma cui, tä nia wawäblamaö. Täbä bufi cuaaö lä ja̦too wei tä ma cui, täbä bufi nia ca̦i wawädowä dablamaö. Ö̦jö däjä, täbä dodijaö jimamobä tä cua ja, cama Yai Bada a showawänö, täbä nia jimaö. 6 Iba wamacö. Bluca ya tä a̦fa lä wäyäfe, camiyä Pablo sho, Abolo sho yafäcö a̦fa wäyämou lä cufe. Wamacö bufi jaducäblobä einaja bei ya cublalou lä cufe. Tä a̦ oni cuu lä dodijio wei tä ja wamacö cadidobä. ¿Ö̦jö tawä? ¿Wedi tabä wama täbä nofi nia li yaibou majöablalou? 7 Cafä wamacö nofi doobä tä cuami. Yai Bada tänö wamacö dobäö mlao fa cunoja, wamacö nö doblou bädaobö mlai. Ö̦jö lija wa shi̦lo ma bayeliblamou wei ma cui, jai cafä wamacö dodijaö waiquiwä, ¿wamacö nofi nia li doo dicoo tawä? 8 Wamacö jolemou dicoo. Wamacö bufi fudädäwä ca̦i bälöo dodijio mlaicätä. Wamacö nö madofiböo dodijio mlaicätä. Jai blowäjäwä wamacö yamili bälöo dodijio mlaicätä. ¡Blowäjäwä wamacö bejedi bälöaö yaio nowa! Wamacö jo̦wa blowäjäwä bälöa lä dodijile jamö, yamacö bälöo naleobä. 9 Abenaja tä nofi cuwä. Jesucristonö yamalecö ma shimöleno wei ma cui, yanowamö täbä lija Yai Bada tänö yamalecö nö waiblamaö. Jai yamalecö shäö bädaobeje yamalecö nofi tabouje. Yanowamö täbä ma cuinö, a̦jele täbä lä doblaladi täbä ma cuinö yamalecö nö waiblaö dablaöje. 10 ¿Wedinaja tawä? Camiyä yamalecö lä taamaö wejeinaja, ¡cafä wamacö nofi taamaö mö feduo lä mlajei! Jesucristo a nowa ja, camiyä yamalecö bufi a̦fa daomi ma taö wejei ma cui, cafä wamacö bufi jo̦wa jaducäwä ayawä. Camiyä yamalecö a̦fa dobloimi ma taö wejei ma cui, cafä wamacö nö jo̦wa shi̦lo yai wa̦lojaö ayawä. Cafä wamacö nofimaö ma macocolajei ma cui, camiyä yamalecö nofi shi̦lo wa̦libouje. 11 Fei däjä showawä ma cui yamacö ofäö talei. Yamacö ca̦i amishaö talei. Yamacö didiobä yama sibä dodijidawä taboimi. Yamalecö si yafelimaöje. Yamacö bälöo yanöcöobä yamacö yafibö cuami. 12 Yamacö ojodamou fe balojoo talei. ¿Ö̦jö tawä? Yamalecö ma bäyäblaö wejei ma cui, Yai Bada lija yama täbä bayelimaö fe yadio showao. Yamalecö nö lä bleaamaö wejei däjä, wamicai yamacö nö bleaaö buo. 13 Camiyä yamalecö a̦fa ma wäyäö wejei ma cui, yamacö jushuo mlai ja, dodijidawä yama bä a̦ wayomaö showao. Yamalecö nofi wa̦libou dodijia lä culajei. Shami tä nö quili taö lä cuaaö wejeinaja, yamalecö nofi tabou dicooje. 14 Bämacö quilijamabä, ei ya si onimaimi. Bämacö nofi malä ijilumaö wei. Bä ijilubö bä lä nofimaö wejei bä wasöö lä cuaaö wejeinaja, bämacö malä taamale. 15 Jesucristo lija wamacö cadidobä, bluca bänö wamacö ma yömölaö wejei ma cui, ö̦jö wama bä nofi fö̦ömabä bämi. Camiyä ya wa̦ linö Jesucristo lija wamacö bufi jaba cuquema yalo, camiyä wamale nofi bluca fö̦ömabä ya malä cui. 16 Ö̦jö cudeenö, bämacö yömölaö lä cule. Bä fö̦ö täbä owäbou lä cuaaö wejeinaja, wamale da owälä. 17 Wamale owäbobä, ijiluyä Timoteo ya lä nofimaö wei, ya shimölema. Jesucristo lija a bufi cuquema yalo ya nofi ijilumaö. Yale a̦fa cadidibou yalo ya shimölema. Jesucristo lija ya lä cadidou wei tä a̦ ja wamacö bufi jaducäblamabä, ya shimölema. Ö̦jö tä a̦ showawä ja, Jesucristo ebä yododaö lä blaucodi jamö ya bä yömölaö cuaaö. 18 Aifä bänö wamale nö jo̦wa waiblaö dicowä. “A waloomi waiquiwä”, bä bufi fa cunö, bä a̦ waiteli faö ma cui, 19 Yai Bada tänö wale fumaö ojode ja, lobe bämacö fe walolei. Ö̦jö däjä, bä a̦ lä waitelimou wei ya bä nia bejedimou möö. Ya bä a̦ nia ji̦liaö buomi. Ya bä bufi nö nia wa̦lojaö möö. 20 Yai Bada tä nosie fuaö lä cadidio wejei ja, bä a̦ faö bädao malä mlai. Yai Bada tänö bä nö lä wa̦lojamaö wei tänö, bä shi̦lo bejedi dablamou. 21 Cafä wamacö lijamö ya waloo däjä, ¿wedinaja tä nia yai cuo? Ei si oni ja wamale a̦ ji̦liblaimi dicoo ja, i̦cali ya wa̦ nia fajalou. Ei ya wa̦ oni ja wamale a̦ shi̦lo ji̦liaö dodijidao ja, bämacö nia shi̦lo nofimajalou.
51 Wamacö a̦fa wayoaöje. Cafä wamacö lija ai a nofi jo̦wa jushublalou fe balojoa. Bä fö̦ö e suwäbö ma cui lija a jo̦wa yabäcäo dicoo. Yai Bada tä daö lä mlajei täbä ma cui, ¡inaja täbä nofi cuaaö lä mlai! 2 ¿Wedi tabä aifä a nö ma quiliaö däjä ma cui, wamacö a̦fa dodijaö tamou fe yadio dicoo? Wamacö yai ö̦cöö fa cunoja tä nö shi̦lo doblaobö wei. Inaja a lä cuaale, wama a coyocomabou fe yadio mlai, a waia da showadaalöje. 3 Cafä wamacö lijamö bei ya cua ajedeami ma cui, jai wamale möö wawädowä wamale nofi tabobä. Miji a lä yawelemou wei a lä cui, jai bei ya wa̦ yai faö, wawädowä ya jimaö waiquia lä cule. 4 Bada tä Jesús a wa̦nö, ya jimaö. Wamacö lä yododaö wei däjä, jai camiyä ya coyocoa, wamale nofi nia tabou. A lä yawelemou wei, Jesucristo a wa̦ lofotenö abenaja wama a nia taamaö. 5 Fecula bada a lija wama a nia jibäö, a wa̦liabä, Jesucristo a fuu lä co̦o wei däjä a bufi fucäamou fe yadiobä. 6 Cafä wamacö a̦fa dodijaö lä tao wei, tä dodijidawämi. ¿Wama tä daimi tawä? Nii täbä julumabeje, wiisibö tä wai ma coyocaö wejei ma cui, täbä malä juluoblou wei. 7 Täbä nofi lä jushuaö wei tä lä cui, jai nii julumamodima tä lä culenaja tä cuwä. Ö̦jö tä möcashi jotenö, tä mö comi fudäblaliyo. Cafä wamacö lijamö tä jode lä cule tä da joyalöje, bei wamacö bufi dude jamö tä jode coyocoo mladobä. Jode wama tä coyocobobä wamacö malä mlai. Yai Bada a waiteli lä jayuano wei a nofi co̦camoabeje, yalo oweja bä shäö lä cuaaö wejeinaja, Cristo a shämou malä waiquilayono wei. 8 Ö̦jö cudeenö, täbä bufi doblalou ca̦i lä iyaö weinaja bämacö bufi ca̦i doblalou da cuo. Nii ajamö, julumamodima tä coyocaö mlajei ja, täbä iyaö lä cuaaö weinaja showawä. Wa̦lidiwä tä lä cui, nofi wa̦liayou tä lä cui, bäma tä coyocobou mlai ja. Bämacö bufi lä cadidou wei tänö, bämacö ca̦i lä bejedimou wei tänö, bämacö bufi doblalou ca̦i cuo showaobä. 9 Cafä wamacö lijamö ya si jaba lä oniblaleno wei däjä, täbä nofi lä jushublalou wei, ya täbä lomabou wasöma. ¿Ö̦jö tawä? 10 Ya täbä lomabou lä wasöno wei däjä, Yai Bada tä daö lä mlajei ya täbä a̦fa tanomi. Mojodi täbä nofi lä jushublalou wei, madofi bä ja täbä bufi shi lä jalimou wei, täbä lä mölamaö wejei, nö ijidubö täbä lä bufiblaö wejei, ei tä ulufi jamö wamacö cua lä showale däjä, showadi täbä mojodi cuaadii cuquei malä cui. 11 Ö̦jö ya si lä oniblaleno wei däjä, Yai Bada ebä a̦fa lä jilou wei ya ebä a̦fa li tama. Yai Bada e a̦fa ma jilou wei ma cui, showadi a nofi jushublalou dicoo ja, madofi bä ja a bufi shi shi̦lo jalimou dicoo ja, ö̦jö wama a shi̦lo lomabou dodijio mlai. Nö ijidubö täbä shi̦lo bufiblaö dicoo ja, täbä a̦fa shi̦lo lafumaö dicoo ja, inaja showawä. Showadi cama a shi wa̦limamou dicoo ja, täbä shi̦lo mölamaö dicoo ja, inaja showawä a lomabo dijejä. Wamacö iyabä jamö ma cui, wama a nacaö mlai. 12 ¿Ö̦jö tawä? Yai Bada tä daö lä mlajei ya bä dobloimi jimabä ya malä mlai. Yai Bada ebä mö feduwä lä cui, bäma bä cadidamabä bämacö. 13 Mojodi täbä doblou lä mlai, Yai Bada camanö täbä dobloimi jimabä cätä. Abenaja tä a̦ oni malä cuu wei. Cafä wamacö lija tä coyocoo mlaobä, a doblou lä mlai a da blajamalöje. Einaja tä a̦ cuu.
61 Jesucristo bufilewä bä mö feduwä lä cuinö, ai wamacö yabäcaöje däjä, ¿wedi tabä shomi wama täbä li nacaablaö dicoo? Yai Bada ebä lija ¿wamacö a̦ nö shi̦lo yai wäo mlai? Ö̦jö bänö tä bluca cadejabeje bä waiquiwä malä cui. 2 Jesucristo a itou co̦oyoluu däjä, Yai Bada bäma ecö lä cuinö, jödödöwä täbä lä cublai bäma täbä nia malä jimaö wei. Aifä cäcöbä a̦fa tayou bädao ja, tä cadejaö da showadaoje. 3 A̦jele bäma täbä nia lä jimaö wei, ¿bei wama tä daimi? Inaja bämacö nia jo̦wa cuaaö waiquiwä ja lä, yanowamö bä bädawä lä cui, ö̦jö bei bäma bä jimaö yaiquei. 4 Aifä cäcöbä a̦fa tayou ja, ¿Yai Bada tä daö lä mlajei täbä lija wama tä cadejamaö dicoo tawä? 5 Wamacö doblou lä mlai wamacö nö ö̦jöböamobä ya wa̦. Aifä cäcöbä a̦fa tayou dicoo ja, cafä Yai Bada wama ecö lijamö tä nia lä cadejaö wei, ¿a cuami tawä? A bufi lä moyawe wei, moli ma cui, ¿a cua bädaami daanö? 6 Ö̦jö ma cui Jesucristo wama ecö bluca ma cui, bä a̦fa lä tayou wei ja shomi wama täbä yädämaö dicoo. Jesucristo bufilewä bä ma mlai bä ma cui lija wama tä cadejamaö dicoo. 7 Wamacö a̦fa lä tayou wei däjä, shomi täbä lija wama tä cadidamaö dicoo ja, wamacö dobloimi waiquiwä. ¿Wedi tabä wamicai wamacö nö shi̦lo bleaaö bädaomi, ö̦jö lä? ¿Wedi tabä “Wale mölamaö bädao”, wamacö li cuimi, ö̦jö lä? 8 Öjö ma cui, cafä wamacö showawä ma cui, wamacö nofi jushuaö. Jesucristo moli wama ecö mashi ma cui, wamacö nö bleaamayou, wamacö ca̦i mölamayou. 9 ¿Wama tä daimi tawä? Yai Bada tänö cama ebä ca̦i cuobä jamö, bä doblou lä mlai bä ajedemabou mlaicätä. Bä möla dijä. Bä nofi beshili lä jushublalou wei bä ma cui, nö ijidubö täbä lä bufiblaö wejei bä ma cui, bä lä joleblalou wei bä ma cui, ai a wa̦lo mö feduwä sho cäcöbä nofi lä jushublalou wei bä ma cui, ai a suwä mö feduwä sho cäcöbä lä cuaaö wei bä ma cui, bä nia ajedemaboimi. 10 Bä lä tomömou wei bä ma cui, madofi täbä ja bä bufi lä waiyou wei bä ma cui, cama bä shi lä wa̦limamou wei bä ma cui, bä a̦fa lä lafumaö wejei bä ma cui, Yai Bada tänö dodijidawä cama ebä ca̦i cuobä jamö, ö̦jö bä ajedemabou mlaicätä. 11 Inaja ai wamacö ca̦i jaba cuaaö ma balöono wei ma cui, wamacö aublaliyoma. Yai Bada wama ecö cublaliyoma. Bada tä Jesucristo lä cuaano wei tänö, jai wamacö dodijaö waiquiwä wamacö nofi tabou majöa. Yai Bada tä Bufinö inaja wamacö taamama, bäma a lä bufiblaö wei a Yai Bada lä cuinö. 12 Abenaja ai bä cuu. “Ya cuaaö bufi lä doblao weinaja ya cuaabä lä. Tä a̦ läa malä mlai”, bä ma cuu wei ma cui, inaja bä lä cuaaö wei tänö bä nia bayeliblamoimi. “Ya cuaabä lä”, cama bä ma cuu wei ma cui, inaja camiyä ya bufi cuimi. Ya bufi luluamou mlaobä ya bufi yai wasöo. 13 Abenaja täbä ca̦i cuu. “Bei bämacö busi lä cui, nii bä befi”, täbä ca̦i ma cuu wei ma cui, Yai Bada tänö bei bämacö busi nia lä mladamaö weinaja, nii bä nia ca̦i mladamaö mö feduo. Bämacö iyabä bei bämalecö busi tablalema ma cui, bei bämacö yai lä cui, bämacö nofi jushublalobä bämalecö tablanomi. Bada tä lä culadi tä lija bei bämacö noshi yai ö̦jödaobä, bämalecö tablalema. Ö̦jönö bei bämalecö shi̦lo bayeliblaö talei. 14 Bei bämacö lä cui, Yai Bada tänö bämalecö nia demi ca̦i jocädamaö, cama a nö lä wa̦lojaö wei tänö. Bada tä demi lä jocädamaleno weinaja showawä. 15 ¿Bei wamacö bufi jaducäbloimi showawä? Jesucristo lija wamacö bufi fa yädäicunö, jai moli wamacö bayucuwä cuwä. ¿Ö̦jö tawä? Ai a lä cui, Jesucristo lija a ma yädäle, showadi a suwä lä dodoo wei a lija, ¿a nia joleblalou majöo daanö? ¿Ö̦jö sho cäcöbä moli cublobä a daanö? Mlaicätä. 16 Ö̦jö lija a wa̦lo joleblalou ja, moli cäcöbä mashi jo̦wa cublou malä cui. Abenaja tä a̦ oni cuu. Bolacabö cäcöbä ma cui, moli bä cublou majöo. Einaja tä a̦ cuu. 17 Ö̦jö ma cui, Bada tä lä culadi a lija a bufi lä yädäo wei a lä cui, Jesucristo sho cäcöbä bufi moliblaliyo. 18 Wamacö nofi beshili jushublalou dodijio mlai. Ai tä wa̦lidiwä bluca ma taö wejei, bei bä wa̦lidiamabä tämi. Ö̦jö ma cui bä nofi beshili lä jushuaö wei, bei bä nia li fa wa̦lidiblamonö bä li cuaaö. 19 ¿Wama tä daimi tawä? Cafä wamacö lija Yai Bada tä Bufi fa jibämoicunö wama a Bufi tabou. Ö̦jö wama ecö yafi. Ö̦jö wama ecö waiquiwä yalo, camanö tä tamaö lä bufio wei tä ja wamacö cadidobä wamacö. 20 Jesucristo cama a fa jibämoicunö, wamacö no comaquema. Cama wama ecö yalo, wamacö dodijidawä lä cuo wei tänö, ai täbä lija Yai Bada a doblao da dablamaje.
71 Oni si ja yamale lä wa̦lino wei tä ja, bämacö yömölaö majöa lä cule. Awei, suwä bä däaimije ja, tä dodijidawä waiquiwä. 2 Tä dodijidawä ma cui abenaja ya bufi cuu. Täbä nofi jushublalou mlaobä, wa̦lo bänö cama ebä nia suwä tabou cadidioje. Suwä bänö cama bä fe̦yalobö bä nia ca̦i cadidiwä tabou mö feduoje, ¿ö̦jö tawä? 3 Bä fe̦yalobö lija suwä a noshi ö̦jödaobä a. Bä suwäbö ma cui lija a noshi ca̦i wa̦lo ö̦jödao mö feduobä. 4 Cäcöbä malä doayolayono wei. Bä fe̦yalobö e li waiquiwä cudeenö, a noshi suwä umlaobä a malä mlai. Bä suwäbö e li waiquiwä cudeenö, a noshi wa̦lo umlaobä a ca̦i malä mlai. 5 Wamacö noshi umlao mlai. Cuwi, abenaja wamacö shi̦lo cuaaö dao. Yai Bada lija cäcöbä nö bayeli nacaodibä, cäcöbä yanöcöo bufi doblao ja, cäcöbä noshi moli umladobä. Ö̦jö ma cui cäcöbä nö dedeaö mlai ja cäcöbä yacao co̦obä, ai a lä beshi wei däjä fecula badanö a yaclämaö mlaobä. 6 ¿Ö̦jö tawä? Bämacö nosiemaö cadidiwä ma mlai ma cui, inaja wamacö cuaaö bufi doblao ja, “Inaja waiquiwä”, ya cudaliyo. 7 Camiyä ya shi̦loco lä culenaja täbä bluca cuo mö feduo fa cunoja, ya bufi nö yai doblaobö wei ma cui, Yai Bada tänö inaja bämalecö bluca taamaimi. Ö̦jö ma cui bämalecö bufi bluca bayeliblaö. Bä lä shi̦loco wei bä lä cui, dodijidawä bä cuobä bä bayeliblaö. Bä shi̦loco lä mlai, dodijidawä bä cuo mö feduobä bä ca̦i bayeliblaö mö feduo. 8 Täbä lä shi̦loco wei täbä lija, täbä lä yamiblaliyono wei täbä ca̦i lija, abenaja ya cuu talei. “Camiyä ya shi̦loco lä culenaja wamacö shi̦loco cuo mö feduo ja, tä yai dodijidawä”, ya cuu talei. 9 Ö̦jö ma cui täbä bufi wasöo daomi ja, bä suwäbö e däabeje, bä fe̦yalobö e däabeje. Shomi täbä lija täbä yabäcäo mlaobä bei ya wa̦. 10 Täbä suwäbö ca̦i lä cule, täbä fe̦yalobö ca̦i lä cule, ya täbä yömölaö nomöjöo. Bada tä Jesucristo ya tä a̦ fe dolemaö lä cule. Suwä anö bä fe̦yalobö e nia joyaimi. 11 Culenaja a joyaö fe yadio ja, shi̦loco a nia cuo. A shi̦loco cuo bufiomi ja, bä fe̦yalobö lija a nia cuo co̦o. Bä fe̦yalobö a ma cuinö, bä suwäbö a ca̦i nia joyaimi. 12 Ai wamacö lija ya wa̦ faö nomöjöa lä cule. Bada tä Jesucristo ya wa̦no wäyäö mlai, camiyä ya wa̦ li. Ai wa suwäbö lä cuinö, Jesucristo etä a̦ bejedi bufibou ma mlai ma cui, cafä lija a cuo bufi doblao ja wa joyaö mlai. 13 Ai wa fe̦yalobö lä cuinö, inaja showawä. Jesucristo bufilewä a ma mlai ma cui, cafä lija a cuo bufi doblao ja wa joyaö mlai. 14 Abenaja tä malä cule. Wa̦lo ai a lä cui, Jesucristo bufilewä a ma mlai ma cui, bä suwäbönö tä a̦ nofi shi̦lo bejedi tabou ayawä. Ö̦jö a suwä lä cui, Yai Bada e li yalo, bä fe̦yalobö a ca̦i yaibou mö fedua. Inaja showawä suwä a lä cuinö, Yai Bada etä a̦ bejedi bufibou ma mlai ma cui, bä fe̦yalobönö tä a̦ nofi shi̦lo bejedi tabou ayawä. Ö̦jö a wa̦lo lä cui, Yai Bada e li yalo, bä suwäbö a ca̦i yaibou mö fedua. Inaja tä cuo mlao fa cunoja, Yai Bada tänö ijilufä bä nö blajamabobö wei ma cui, täbä li yaibou mö fedua malä cui. 15 Ö̦jö ma cui Yai Bada etä a̦ bejedi bufibou lä mlai a cuo bufiomi ja, a lä bole a joyaö bufi doblao waiquiwä ja, a fubä. Inaja a cuaaö dicoo ja, a lä damole a wa̦ fe blacäjou mlai. Wamicai bämacö bälöobä Yai Bada tänö bämalecö malä nacano wei. 16 Ö̦jö ma cui, a ca̦i cuo fe yadio showao ja, suwä anö Jesucristo a nofi mölabou ma ayale ma cui, bä fe̦yalobö enö tä a̦ nofi obi bejedi tabou ja̦toquei. A fucäamou ja̦too fa cui. Wa̦lo anö Jesucristo a nofi ca̦i mölabou ma ayale ma cui, bä suwäbö enö tä a̦ nofi obi bejedi tabou ja̦toquei. Ö̦jö a ca̦i fucäamou ja̦too fa cui. 17 Ö̦jö ma cui, Jesucristo ebä lä yododoblai jamö, abenaja ya bä nowa bluca taö talei. Bada tänö bämalecö jaba tabou lä cuono weinaja bämacö yanöcöwä cudiobä. Bämalecö bufi lä jaducäblamaleno wei däjä, bämacö cuo lä waiquiono weinaja bämacö cudio showaobä. Inaja bämacö culanö, cama tä lija bämacö fa bayeliblamonö bämacö dodijabä. 18 Yai Bada tänö wa bufi lä jaducäblamaleno wei däjä, judio bä mosi sicö joyamou lä cuaaö weinaja wa taamamou waiquioma tä nowa ja, a bufi jalujo dijä. Inaja showawä, wa mosi sicö joyamonomi waiquiwä ja, sicö joyamou bufio dijä. 19 Täbä mosi sicö lä joyamou wei tänö täbä bayelibloimi. Sicö joyamou lä mlai tä ma cuinö, ö̦jö tänö täbä ca̦i bayelibloimi mö feduwä. Yai Bada a nosie lä fuaö wejei tänö täbä shi̦lo bayeliblou. 20 Yai Bada tänö täbä lä nacano wei däjä, täbä cuo lä waiquiono weinaja täbä cadidiwä cuo showaobä. 21 ¿Ö̦jö tawä? Wa lä nacano wei däjä wa bä nosie fuabä wa tabou waiquiomaje ja, a nofi fujeblamou fo̦lijio dijä. Ö̦jö ma cui, wa lä tabou wejei bä lä cuinö wa fujeblaö ojodaoje ja, a yai da fujeblamolu. 22 Bä nosie fuamobä wa lä tabou wejei wa lä cui, Bada tä lija wa bufi cuo ja, jai wa fujemoa waiquilayoma Bada tänö wa nofi tabou. Jesucristo lija wa bufi cuobä wa bufi malä fujeblamono wei. Inaja showawä, bä nosie fuamobä wa tabou lä mlajei wa lä cui, shomi täbä lija wa ojodamou ma mlai ma cui, Jesucristo lija wa bufi cuo ja, cama Jesucristo lija wa yai ojodamobä wa tabou malä cui. 23 Jesucristonö wamacö nowa co̦maquema. Ö̦jö cudeenö, yanowamö täbä a̦ fuamobä wamacö tabobeje wamacömi. Jesucristo wama a nosie shi̦lo yai fuabä wamacö waiquiwä. 24 ¿Ö̦jö tawä, iba wamacö? Wamacö lä nacano wei däjä wamacö cuo lä waiquiono weinaja, wamacö cuo showaobä. Yai Bada tänö wamacö ca̦i malä cule. 25 Bei. Täbä lä shi̦loco wei täbä ja, wamale lä wa̦lino wei tä ja, ya wa̦ faö nomöjöa lä cule. Bada tä Jesucristonö ei tä a̦fa cadidiwä tano ma mlai ma cui, wamale a̦ nofi mölabobä ya. Yai Bada tänö wale nofi ojodabou yalo, yale a̦ malä bayeliblaö wei. 26 Täbä lä shi̦loco wei, inaja täbä shi̦loco cuobä, ya bufi cuu. Bämalecö lä tamalajei tä cua yaia cudeenö, fei tä lä cui däjä, suwä bä doamobä tä malä mlai. 27 Suwä wa bou waiquiwä ja, a shi̦loco cuo co̦o bufio dijä. Wa shi̦loco waiquiwä ja, suwä a ajedamaö bufio dijä. 28 Ö̦jö ma cui, suwä wa däaö ja, tä wa̦lidiwämi. Inaja showawä, suwänö bä fe̦yalobö a däaö ja, tä ca̦i wa̦lidiwämi. Tä wa̦lidiwä ma mlai ma cui, täbä lä doayou wei showadi täbä shi̦lo yabäcäblou majöo dicoo. Bämacö yabäcäblou nofi jalujubou yalo ya wa̦. 29 ¿Ö̦jö tawä, iba wamacö? Abenaja ya cuu. Yai Bada lija bämacö ojodamobä tä nö nia dedejebloimi waiquiwä. Shi̦loco täbä yabäcou mlai ja, täbä ojodamou cadidiwä lä culenaja, täbä suwäbö lä cule täbä ca̦i cuaaö mö feduobä. 30 Inaja showawä, täbä bufi lä lofote wei täbä dodijidawä ojodamou lä cuaaö weinaja, ai täbä bufi ma ujudi wei ma cui täbä ca̦i ojodamou cuo mö feduobä. Täbä bufi shi jalijiwä lä mlai täbä dodijidawä ojodamou lä cuaaö weinaja, täbä shi ma jalimou wei ma cui täbä ca̦i ojodamou cuo mö feduobä. Madofi bä ja täbä yabäcou lä mlai täbä ojodamou dodijidawä lä culenaja, madofi täbä ma doaö wejei ma cui täbä ca̦i cuo mö feduobä. 31 Täbä ma cuaablalou wei ma cui, Yai Bada lija täbä bufi yai macocoo shalilio showaobä. Bluca tä lä cule tä malä mlaaimadi. 32 Wamacö yabäcou mlai ja, bämacö taamaö bufi doblaa lä cule. A wa̦lo lä shi̦loco wei, Bada a lija dodijidawä a ojodamou. Bada a bufi nia fa doblalamanö a cadidou ma cui, 33 bä suwäbö a ca̦i lä culenö, bä suwäbö a bufi doblalamabä a shi̦lo yabäcou, showadi bämacö lä yabäcäablalou weinaja showawä. 34 A bufi majöablalou. Suwä bä ma cui, inaja bä ca̦i cuaaö mö feduo. Suwä moco a ma cui, bada waiquiwä a ma cui, a shi̦loco cuo däjä, Bada tä bufi doblalamabä a noshi umlao. Bei bufi ma cui, bei a ma cui, a wasöo. Bä fe̦yalobö e ca̦i lä cui, inaja a cuaaimi. Bä fe̦yalobö e ca̦i lä cui, showadi täbä yanowamö lä yabäcäablalou wei tä ja, a yabäcou dicoo, bä fe̦yalobö e bufi nia fa doblalamanö. 35 Bämacö dodijamaö bufi doblao yalo ya wa̦. Bämacö yabäcamaö bufiomi. Wamacö bufi shedecou mlai ja, Bada tä lija doblao wamacö ojodamobä, bämacö yömölaö lä cule. 36 ¿Ö̦jö tawä? “Ya ma suwäbömou wei ma cui, ¿wedi tabä ya li shi̦loco taamabou dicoo?”, ai a bufi cuu ja, a däabä, ö̦jö lä. A bufi nö wasöobimi ja, bä suwäbö a däaö bufi doblao ja, a däabä. Cäcöbä doayou ja tä wa̦lidiwämi. 37 Ö̦jö ma cui, bufi cadidilanö a shi̦loco cuo bufi doblao waiquiwä ja, a bufi wasömou dao waiquiwä ja, a däa dijä. A casimabobä. Tä dodijidawä waiquiwä. 38 Ö̦jö tawä? Ai anö, bä suwäbö a ma däaö wei a dodijaö. Ai a mö feduwä lä cuinö, bä suwäbö a däaö ma mlai ma cui, a ca̦i dodijaö. Ö̦jö bei a yai dodijaö yaio. 39 Bä fe̦yalobö e demi showao däjä, ö̦ja bä suwäbö e shi̦lo cudiobä. Bä fe̦yalobö e mladou ja, ai a wa̦lo däaö bufi doblao ja, a däaö majöobä. Culenaja Bada tä lä daö wei a lija a shi̦lo ajedobä. 40 Ö̦jö ma cui, a yamiblou däjä a yami cudio ja, a bufi nia shi̦lo doblao, ya bufi cuu. Camiyänö Yai Bada ya Bufi ca̦i malä tabole.
81 Nö ijidubö täbä lija täbä yalo lä dodobou wejei tä ja, bämacö yömölaö majöo, wamale lä wa̦lino wei tä ja. Awei, ai täbänö ö̦jö bä yalo waö quilii ma mlajei ma cui, ai täbänö bä shi̦lo waö quilii ayaoje. Ö̦jö tä ja, bämacö bufi bluca dao waiquiwä. Ö̦jö ma cui, “Camiyä yamacö bufi shi̦lo dao ayawä”, wamacö bufi cuu dicoo ja, aifä bä lä quilijou wei wama bä nö bayeliblabimi waiquiwä. Wama bä yai nofimaö däjä, ö̦jö däjä wama bä bufi shi̦lo yai jaducäblamalei. 2 “Ya bufi dao lä”, a bufi jole lä cuablalou wei a bufi jaducäbloimi showawä. 3 Ö̦jö ma cui, Yai Bada tä lä bufibou wei a lä cui, Yai Bada tänö ö̦jö a nofi ibabou. 4 ¿Ö̦jö tawä? Nö ijidubö täbä lija täbä yalo fa dodobojenö, täbä yalo ma waö wejei ma cui, ei bäma tä daö. Täbä nö ijidubö lä bufiblamou wei täbä demimi. A bufiblamobä moli Yai Bada a cua ayaa. 5 Judu mösö jamö ma cui, bita jamö ma cui, täbä lä bufiblamou wei bluca täbä a̦fa jayumaöje. ¿Ö̦jö tawä? Bluca täbä ma bufiblaö wejei ma cui, bluca täbä nofi ma badabou wejei ma cui, 6 ¡ma! Camiyä bämacönö moli bäma tä a̦fa Yai Bada jayumaö, bämacö lä Fö̦ömole, bluca täbä lä tablaleno wei tä lä cui. Cama bäma ecö befi li. Moli tä shi̦lo Bada cua, Jesucristo a wa̦fa lä cule. Ö̦jö lija täbä bluca tablamolayoma. Ö̦jönö bämalecö fa co̦länö Yai Bada bäma ecö cua lä cule. 7 Ö̦jö ma cui, ai bänö ö̦jö tä daimije. Nö ijidubö täbä bufiblaö fa balöojenö, bä quilii showawä. Nii täbä bädawä ma cui ja, jai yai cätä shomitawä lija bä nii liyamoma bä bufi fa cuaanö, bä bufi shädayaimou. Bä bufi shädayaimolanö bä yalo waö fe fa yadiojenö, bä bufi wa̦lidiblaliyo. 8 Bäma bä lä waö wei, nii bei bä li bäwä. Nii bäma bä lä waö wei bänö bämacö bufi bayeliblamoimi. Nii bä ja, bämacö lä waiyou wei tä ma cuinö, inaja showawä. Yai Bada tänö bämalecö nofimaö waiquia. 9 ¿Ö̦jö tawä? Cafä wamacö bufi dao cudeenö, wamacö iyaö dao lä ma cui, bä bufi da jaduqueicu, a bufi lä quilijou wei wama a bufi wa̦lidiamaö mlaobä. 10 Nö ijidubö täbä lä bufiblaö wejei bä yododoobä jamö, cafä wa bufi lä dao wei wa iyaö fa dalalönö, a bufi wedinajamou cuquei. A bufi shedecou waiquiwä yalo, nö ijidubö täbä lija a bufi lulumou cuquei. A bufi lulumoa fa co̦lonö, ö̦jö täbä lija a mölalanö a iyaö dicoquei. 11 ¿Ö̦jö tawä? Ö̦jö däjä, cafä wa bufi lä dao wei wanö, a bufi lä shedequei wa yacläa fa dicomalönö, a waiyolayou. Jesucristo lija moli bämacö mashi ma cui, ö̦jö a befi Jesucristo a ca̦i nomaa ma lälayono wei ma cui, wa waia dicomalei. 12 Cafänö aifä wa bä bufi wedinajamomaö dicoo däjä, bä bufi lä shedecou wei wa bä bufi wa̦lidiamaö fa dicoonö, cama bä bädawä mlai, Jesucristo wa nö ca̦i waiblaö. 13 Ö̦jö cudeenö, abenaja camiyä ya bufi li cuu. “Ya lä iyaö wei tä bädawä ma cuinö, ö̦jö tänö aiyä ya bä bufi nia wa̦lidiamaö dicoo ja, yalo ya waö co̦daaö mlaicätä”, ya bufi cuu, ya bä bufi wa̦lidiamaö mlaobä.
91 Shomi täbä lija ya nosiemamobä yami. Jesucristonö wale lä shimöleno wei, ö̦jö ya. Camiyä bei ya mamocunö Bada tä Jesús ya malä möno wei. Camiyä bei ya wa̦nö, ö̦jö Bada wama tä malä bufiblaleno wei. 2 “Jesucristonö wa shimano mlaicätä”, ai täbänö wale nofi ma tabou wejei ma cui, cafä wamacö lä cuinö, inaja wamale nofi tabobä wamacömi. Jesucristo lija wamacö bufi cuquema yalo, ö̦jönö wale lä shimöleno wei wamale daö waiquiwä. 3 Ya lä cuaaö wei tä ja wale wa̦liije däjä, abenaja ya shi̦lo cuu talei. 4 “Yama täbä lä yömölaö wei täbä lija, ¿yamacö nö liyobä yamacömi daanö? 5 Camiyä yamacönö ¿suwä yama bä lulubobä tä cuaami daanö?”, ya cuu. Jesucristonö bä lä shimöleno wei ai bä mö feduwä lä cuinö, bä suwäbö bä ca̦i malä fuu wejei. Inaja showawä, Bada tä Jesucristo bä fääshä ebä ma cuinö, Pedro a ma cuinö, bä suwäbö bä ca̦i fuu mö malä feduo wejei. 6 Ai täbä no mlai ja ma iyamaö wejei ma cui, ¿wedi tabä Benabei sho yafäcö fa ojodamonö yafä täbä nii nowa co̦wa ayamaquei? 7 Täbä lä bulaö wejei, ¡täbä nofi lä iyamaö wejei! ¿Ö̦jö tawä? Täbä ficalimobä ja täbä lä yädäo wei täbä nö ca̦i malä liyamaö wejei. ¿Ö̦jö tawä? Oweja bä lä nowamaö wejei, ö̦jö täbä yalo showawä ja täbä ca̦i malä dodijou wei. 8 Yanowamö täbä a̦ bädawänö ya wa̦ faimi. Yedu ja Yai Bada etä a̦ oni cuo malä balöono wei. 9 Yalo bä lä ojodamomano wejei jamö, täbä nö yalo ofili bleaaö mlaobä, Moisesi lija tä a̦ oniblamalema. Abenaja tä a̦ oni cuu. Nii wa si̦cosi lo̦shiblamabä, yalo bä lija wa si̦cosi cablushamabä jamö bä iyaö mlaobä, wa bä fi̦yoca nia o̦caimi. Einaja tä a̦ cuu. Yalo bä lä ojodamomano wejei jamö bä nö yalo ofili bleaamaö mlaobeje, tä a̦ oniblamalema. Ö̦jö ma cui, ¿wedinaja wamacö bufi li cuu? ¿Yalo a nofi ofili jalubou fa ayaonö tä a̦ li cuoma daanö? 10 Mlaicätä. Camiyä bämacö befi tä a̦ malä cui. Ö̦jö tä a̦ ja bämacö bufi li yai jaducäblobä tä a̦ li. Ficali täca ja täbä jaba lä queo wei täbä ma cui, bä nii ya̦cumö lä taö wejei täbä ma cui, nii bä bufibolajenö täbä bluca ojodamobä lä tä a̦. 11 Inaja lä showawä, cafä wamacö lijamö yamacö ojodamoma yalo, cafä wamacö lija yamacö bayeliblamobä yamacö waiquiwä. Yai Bada etä a̦ ja bämacö bufi lä jaducäblamaleno wei tä nowa ja, yamalecö bayeliblaö mö feduobä. 12 Yai Bada etä a̦ ja, ai täbänö wamacö yömölaö mö walooje däjä, wama täbä bayeliblaö malä cui. ¿Ö̦jö tawä? Ö̦jö wama bä bayeliblaö lä cuaaö weinaja, camiyä yamacö lä cui yamacö bayeliblamobä bei yamacö yaiwä. ¿Ö̦jö tawä? Yamalecö bayeliblabä tä ma cule ma cui yamacö a̦ fanomi, wamacö fa jushudalunö wamalecö a̦ ji̦liaö mladou dicolo. Cristo yama tä a̦ wäyäö bufi fa doblaonö, dodijidawä wama etä a̦ ji̦liabä, wamicai yamacö nö bleaaö bädao. 13 ¿Wama tä daimi tawä? Judio bada täbä lä cui, Yai Bada etä yafi jamö täbä lä ojodamou wei, ö̦jamö lä showawä täbä nö malä liyo wei. Yalo bä lä dodobou wejei bä lä cui, ö̦jö bä yalo showawä ja täbä nö ca̦i malä liyo wei. 14 Bada tä Jesucristonö, inaja showawä täbä taamaö bufima. Cama dodijidawä etä a̦ lä wäyäö wejei täbä bayeliblamaö bufima. 15 Ö̦jö ma cui, yamale dobäbä tä cua ma cule, yamacö a̦ faimi. Ei ya wa̦ ma cui ya nacoimi. No mlai ja ya tä a̦ shi̦lo wäyäö bufi doblao. “Yai Bada etä a̦ lä wäyäno wei tä nowa nacaö dicooma”, bä cuu mlaobä ya nacoimi. Ya ofili ma nomaö wei ma cui ya nacou mlaicätä. 16 Jesucristo dodijidawä ya tä a̦ wäyäö tä nowa ja, ya dodijaö jimöobä tä cuami. Ya tä a̦ wäyäbä ya waiquiwä malä cui. Ya tä a̦ wäyäimi dicoo ja ya nö bleaaö cuquei. 17 Camiyänö ya täbä yömölaö bufi doblao fa buonö ya ojodamou fa cunoja, ya dobämou lä mlai tä ja, ya bufi nö ma jalujobö wei ma cui, inaja tä cuonomi. Jesucristo ya tä a̦ wäyäbä, Yai Bada lija ya yaimoa cadidilayoma. Wale yaia cadidilema cudeenö, ya dobämou ma mlai ma cui, ya noshi umlaobä tä cuami. Wale malä yaileno wei. 18 ¿Ö̦jö tawä? ¿Wedi tä ja ya tä a̦ li wäyäö bufi doblao? Wedi tä ja mlai. Ya bä lä yömölaö wei bä lija ya nacobä tä cua ma cule, no mlai ja Jesucristo ya tä a̦ dodijidawä lä däamaö wei tänö, ya bufi doblalou waiquiwä. 19 Yanowamö täbä lija ya nosiemamobä ya ma mlai lä ma cui, Yai Bada lija ya bä fucäamabä, wale taamaö bufi lä doblao wejei tä ja, bluca täbä lija ya ojodao talei. Inaja ya cuaaö talei. 20 Judio täbä lä cui ya täbä bufi jaducäblamabä, dodijidawä ya bä ca̦i cuoma. Ya bä jushuamaö mlaobä, cama judio showadi bä lä cuaaö weinaja ya cuaaö naleoma. Inaja showawä, Moisesi tä a̦ nofi lä yaibou wejei ya täbä bufi jaducäblamabä, dodijidawä ö̦jö ya bä ca̦i cuo mö feduoma. Moisesi tä a̦ ja ya nosiemamobä ya mlai ma cui, jai ya nosiemamobä ya ojodao cuoma. Dodijidawä wale a̦ ji̦liabeje, ya täbä jushuamaö bufionomi. 21 Judio bä lä mlai ya täbä bufi jaducäblamabä, dodijidawä ö̦jö ya bä ca̦i cuo mö feduoma. Judio showadi bä lä cuaaö weinaja ya cuaaö mlalaliyoma. Ö̦jö ma cui, Yai Bada ya wa̦ cadidibou showao fe yadioma. Cristo ya nosie fuaö dodijidaoma, Yai Bada etä a̦ ji̦liabeje. 22 Bä bufi lä quilijou wei ya bä bufi jaducäblamabä, dodijidawä ö̦jö ya bä ca̦i cuo mö feduoma. Cama bä bufi lä quilino wei tä ja, bei ya bufi ca̦i wasömou showaoma, ö̦jö ya bä bufi ca̦i jaducäblamabä. Yanowamö ya bä yömölaö bufi lä doblao wei däjä, cama bä lä cuaaö weinaja ya ca̦i cuaaö mö fa feduonö, dodijidawä tä a̦ ji̦liaöje. Inaja ya cuaaö lä majöablalou wei tänö, Jesucristo a nofi lä mölabou wejei däjä ai ya bä fucäamaö fe yadio wä. 23 Jesucristo dodijidawä tä a̦ ji̦limamou blaucofälöbä inaja ya cuaaö talei. Bä bufi fa jaducäblalunö, Yai Bada lija bä lä bayeliblamou wei tä ja, ya bufi ca̦i doblalou mö feduobä. 24 Täbä lobe lä wabayou wei wama tä daö. Täbä wabayou däjä, täbä bluca nö wa̦lojodou ma cui, ai moli a nö yai wa̦lojaö lä dodijio wei a nia dobämou ayao. A nö wa̦lojaö lä ayao wei a lija, a dodijaö jimabeje etä nia shi̦lo yojoqueije. Inaja showawä, Yai Bada tänö cama ebä lä dodijaö wei bä nia ca̦i dobäö. ¿Ö̦jö tawä? Ö̦jö lija wamacö dobämou mö feduobä, bä bufi nö ca̦i da wa̦lojolö. 25 Bä wabayou bufi lä doblao wei bä nö nia wa̦lojaö fa ayaonö, täbä lä ujudamaö wei tä ja, täbä noshi umlao si ijejewä. Yanowamö täbä lija bä nia fa dobämonö, bä noshi umlao. Tä nowa cudio ma mlai lä tä ma cui ja, bä fe nia fa yojoonö bä wasömou. Camiyä bämacö lä cui, Yai Bada lija ba̦limi tä ja bämacö dobämobä, bei bämacö yai wasömou yaiobä. 26 Ö̦jö lija ya wa̦fa nö wa̦lojaö tamobä, ya dodijaö macocafälöö. Yai Bada lija bejedi ya ojodamou. Jole jole täbä imicö bushi yalejedou bädao malä mlai. 27 Camiyä ya cuaaö bufi doblao lä bädao wei tä ja, ya cuaaö mlai ja, Yai Bada lija ya bufi taamamou cadidiobä. Ya noshi umlao, ai ya bä cadidamaö ma balöono wei ma cui, ya dobloimi majöa fa dicoicunö, Yai Bada tänö wale casöblamaö majöo mlaobä.
101 Iba wamacö. Nö badabö bä jaba lä cuaano wei tä ja, bämacö mojodumabou bufiomi. Ö̦jölashi a feyacao däjä, täbä bluca nowamamofälöma. Modu Wacä u jamö, täbä wejediwä bucaduquefälöma. 2 Ö̦jölashi a nofi mojodi jamö Moisesinö bä ca̦i lä funo wei däjä, modu u bada co̦jomo jamö bä ca̦i lä funo wei däjä, jai bä möfe bluca ojomamoma bä cuaafälöma, Moisesi ebä li jimamobä. Moisesinö bä lä nocamabono wei jamö bä bayeliblamou mö fa feduonö, a wa̦ fuaaö ojodaomaje. 3 Yai Bada tä nö lä wa̦lojaö wei tänö, yai täbä niibö fa blälämalalönö, ö̦jö täbä ja Moisesinö bä ca̦i bluca iyama. 4 Maa ma ja, Yai Bada tä lofotenö mau ubä fa famalönö, täbä amishi bluca co̦oma. Ö̦jö yai ma ja, täbä bayeliblamou cuaafälöma. Ö̦jö maa ma lä nojaono wei, Cristo bei ma li cuo showaoma. 5 Ö̦jö ma cui, ai bluca täbä nofi jushuaö fa majöonö, Yai Bada a Bufi doblaonomi. Tä ulufi wa̦lidiobä jamö täbä nomawä bluca malä yabucuomobodayono wei. 6 ¿Ö̦jö tawä? Yai Bada tänö ö̦jö bä nö badabö taamaö lä cuaano wei tä a̦ ja, bämacö wasöobä tä a̦ li. Wa̦lidiwä tä lä cui ja, ö̦jö bä bufi yaimou lä cuaano weinaja bämacö bufi yaimou cuaaö mlaobä. 7 ¿Ö̦jö tawä? Nö ijidubö täbä bädawä ma cui, ai täbänö täbä nö ijidubö bufiblaö lä cuaano wejeinaja, bä cuaa dijä. Täbä nö ijidubö nofi doablaö fa dicoojenö, abenaja tä a̦ oni taa malä balöqueno wei. Täbä iyabä, toubä ca̦i coabeje, täbä loquema. Täbä i̦liyamobä, täbä jocäcälaliyoma. Einaja tä a̦ cuu. 8 Ai täbä nofi lä jushublalou weinaja bämacö ca̦i cuaaö mlai. Inaja bä cuaaö fa dicoonö, moli tä mö jalu ma cui ja, 23.000 bä nomaa showadalaliyoma. 9 Yai Bada bäma a jushuo ca̦i lulubou mlai. Inaja ai bä cuaaö fa dicoonö, olu bänö bä bluca waicama. 10 Bämacö ca̦i nacömou mlai. Inaja ai bä cuaaö fa dicoonö, Waicalewä a lä cuinö täbä bluca waicaö showadaoma. 11 Ai täbä mö feduwä lä cui täbä quiliblobä, inaja Yai Bada tänö täbä jaba taamama. Camiyä bämacö ma cui, bämacö ca̦i quiliblou nodiobä tä a̦ oniblamalema. Tä nia lä jödödöblou wei tä ajedou malä cui. 12 Tä nö nia dedeaimi waiquiwä yalo, bä bufi da moyaweicu. “Camiyä ya bufi li lofote waiquiwä”, wa bufi lä cuu wei, wa nia dobloimi majöo. 13 Wamacö bufi lä wabamou wei tä ja, wamacö bufi wedinajamou mlai. Showadi täbä yanowamö bufi wabamou lä cuaaö weinaja wamacö wabamou cuaaö showawä. Ö̦jö ma cui Yai Bada wama a nofi mölabou showaobä cätä. Wamacö nö bleaamaö mlaicätä. Wamacö bufi ma wabamou wei ma cui wamacö nia bayeliblaö showao, wamacö nö wa̦lojaö fe yadiobä. 14 Iba bämacö lä nofimaö wei wamacö lä cui. Yai Bada lija wamacö nia bayeliblamou waiquiwä yalo, nö ijidubö wama täbä bufiblaö dicoo mlai. Täbä waia da showadaalöje. 15 Wamacö bufi moyawe yalo bämacö yömölaö lä cule. Ei ya wa̦ lä fale tä ja, bä bufi da daeo. 16 Jesucristo a shämoa lä lälayono wei bäma tä nofi jaducäbobä, uba bäma toubä lä coaö wei toubä ja, Yai Bada lija bämacö bufi a̦fa doblalou wäyämou talei. Jesucristo i̦yäbö ja bämacö bufi bluca bayeliblamoma yalo, bäma i̦yäbö nö e̦le coaö. Nii bäma a lä cleaö wei bä ma cui ja, inaja showawä. A lä shämolayono wei tä ja, bämacö bufi ca̦i bluca bayeliblamoma yalo, bei bäma a nö e̦le ca̦i waö. 17 Nii moli cäcö cua, ¿ö̦jö tawä? Camiyä bämacö ma bluca wei ma cui, nii moli cäcö ja, bämacö iyaö. Nii moli cäcö ja, bämacö bluca iyalanö, Jesucristo lija bämacö lä moliblaliyono wei bäma tä jimaö. 18 Isaeli ebä lä cuaaö wei tä ja, bä bufi da daeo. Yai Bada lija a dodobobeje, yalo a shäöje. Ö̦jö tä yalo ja bä bluca lä iyaö wei, bä nofi tamayolanö bä iyaö. Yai Bada tä nofi mölabolajenö, bä yalo waö mö feduo showaoje. 19 ¿Ö̦jö tawä? Nö ijidubö täbä lija nii a lä dodobou wejei nii ja, wa caficö shamiaö mlaicätä. Nii a bädawä. Nii täbä shominajablabeje täbä nö ijidubö demi malä mlai. Nö ijidubö täbä li bädawä. 20 Ö̦jö ma cui, abenaja ya cuu. Bä bufi lä mojodi wei bä lä cuinö, bä nia fa bayeliblamonö bä nii dodobouje. Inaja bä cuaalanö, fecula bä nofi yai mölabouje, Yai Bada mlai. ¿Ö̦jö tawä? Fecula bä nofi lä mölabou wejei bä lija bämacö coyocomabou bufiomi. 21 Bada a nomaa lä lälayono wei wama a nofi jaducäbobä, uba nashiwä wama toubä coaö waiquia ja, fecula bä befi lä cui ja wamacö nö liyo mö feduo daomi. Bada wama tä nofi jaducäbobä nii wama täcö waö ja, fecula bä befi lä cui ja wamacö nö liyo mö feduo daomi. 22 Inaja bämacö cuaaö dicoo ja, Bada a lä culadi bäma a li jushuamaö cuquei. Fecula bä lija bämalecö nofi malä jalubou wei. ¿Ö̦jö tawä? Bäma a lä jushumalei wei däjä bämacö nö nia wa̦lojaimi. 23 Abenaja täbä cuu. “Ya cuaaö bufi lä doblao weinaja ya cuaabä lä. Tä a̦ läa malä mlai”, täbä ma cuu wei ma cui, inaja bä lä cuaaö wei tänö bä bayeliblamoimi. “Tä a̦ läa malä mlai”, bä ma cuu wei ma cui, inaja bä lä cuaaö wei tänö, täbä bufi lofotoblamaimije. 24 Cama cäbä dodijaö ayaobä bä shi shi̦lo jalimou mlai, ai bä mashi dodijamabä bä shi yai jalijobä. 25 Yalo bä lä lulaö wejei jamö wamacö bufi quilijou mlai, bä da däleje. Yalo bä ja wama bä wa̦lii mlai bä da walöje. 26 Abenaja tä a̦ oni cuu malä balöono wei. Bita tä lä cui, Bada etä. Ö̦jamö täbä bluca lä cublai täbä ma cui, cama etäbä showawä. Einaja tä a̦ cuu. 27 Jesucristo bufilewä lä mlai a lä cuinö wamacö nacaö däjä, wamacö fuu bufi doblao ja wamacö fubä. Wamacö lä dobämou wei tä ja wamacö iyabä. Yalo bä ja bä wa̦li dijejä, wamacö bufi quilijou ca̦i iyaö dicoo mlaobä. 28 Ö̦jö ma cui, ai a bufi lä quilijou wei a wa̦ faö ja, “Täbä nia fa bayeliblamonö nö ijidubö täbä lija, ei bä yalo dodobou dicoo lä cufajei”, a cuu ja, bä yalo wa dijejä, ö̦jö wama a bufi nö bleaamaö mlaobä. 29 ¿Ö̦jö tawä? Cafä wamacö bufi quilijou ma mlai ma cui, cama a bufi shi̦lo quilijou ayao ja, yalo wama bä nia waimi. Abenaja ai wa bufi cuu ja̦too fa cui, “Camiyä ya bufi lofotolanö ya bä nö walebö ma cui, ¿wedi tä tabä ai a bufi lä quilijou wei tänö, ya bä li waia dicolei? 30 Yai Bada lija ya bufi doblalanö ya bä nö walebö ma cui, ¿wedi tä tabä ya li wasömou majöquei?”, wa bufi cuu ja̦too fa cui. 31 Abenaja. Wamacö lä iyaö wei tä ma cui ja, wama toubä lä coaö wei tä ma cui ja, jödödöwä wama tä lä taö wei tä ma cui ja, Yai Bada wama a nofi dodijaö doablamabä wamacö. 32 Judio bä ma cui, judio bä lä mlai bä ma cui, bä bufi nö bleaama dijejä. Yai Bada ebä lä yododaö wei bä ma cui, inaja showawä. 33 Camiyänö ya täbä bufi shi̦lo bluca doblalamaö lä bufio weinaja, wama täbä bufi taamaö mö feduobä. ¿Ö̦jö tawä? Camiyä ya dodijabä ya shi jalimou mlai, ai ya bä dodijamabä ya shi lä jalijou weinaja wamacö cuaaö mö feduobä. Jesucristo a nofi mölabolajenö, täbä fucäamou fe yadiobä.
111 Cristo ya owämaö lä cuaaö weinaja, wamale owämaö cuaaö mö da feduo. 2 Wamacö dodijaö waiquiwä yalo, cafä wamacö lija ya bufi doblalou. Ya lä cuaaö wei wamale nofi jaducäbou yalo ya bufi doblao. Cafä wamacö lija ya tä a̦ wäyäö fe lä dolemono wei, wama tä a̦ nofi cadidibou ja, ya bufi ca̦i doblalou. 3 Ö̦jö ma cui, ei wama tä a̦ ca̦i däaö mö feduobä. Wa̦lo bä lä cui, Cristo a nosie fuabeje cäbä. Inaja showawä, suwä bänö bä fe̦yalobö ebä nosie fuaö mö feduobeje. Cristonö cama Yai Bada tä nosie fuabä, ö̦jö bei a. 4 Yai Bada wama ecö lä yododaö wei däjä, wa̦lo wamacö lä cuinö, Yai Bada lija wamacö nö bayeli nacao ja, fe yojolanö wamacö a̦ nia faimi. Inaja showawä, wama etä a̦ wäyäö ja, fe malocolanö wama tä a̦ nia wäyäö. Fe yojolanö wamacö nö bayeli nacao dicoo ja, fe yojolanö wama etä a̦ ca̦i wäyäö dicoo ja, tä doblaami. Jai Cristo wama a nö waiblaö tä cuwä dicoo. 5 Ö̦jö ma cui, inaja suwä bä nia cuaaimi. Wamacö lä yododoo wei jamö, fe yojoo mlalanö Yai Bada lija suwä bä nö bayeli nacao dicoo ja, fe yojoo mlalanö etä a̦ ca̦i wäyäö dicooje ja, tä doblaami. Jai bä fe̦yalobö bä nö waiblaöje tä cuwä. A fe suwä malocoshiblaöje däjä, a mömou nö quilijiwä lä culenaja tä cuwä. 6 ¿Ö̦jö tawä? Cama suwä bä fe yojoo bufiomi dicoo ja, bä feta u̦cu joyamou showaobä, ö̦jö lä. Ö̦jö ma cui bä fe malocoblamou quilii ja, bä fe yai yojoobä, ö̦jö lä. 7 Wa̦lo täbä fe yojoobä tä cuami. Yai Bada tänö cama a lä culenaja a wa̦lo tablaö malä cadidiono wei. Täbä fe yojoomi anö, Yai Bada tä nö lä wa̦lojaö wei tä jimaöje. Ö̦jö ma cui suwä bä fe nia shi̦lo yojoo. Bä fe yojoo anö, jai bä fe̦yalobö e a̦fa doblao taöje tä cuwä. 8 Suwä a ja, wa̦lo a tablano malä mlai. Wa̦lo a ja, suwä bei a tablalema. 9 Ei malä cui. Suwä a befi wa̦lo a tablanomi. Ma, wa̦lo a befi suwä bei a tablalema. 10 Ö̦jö cudeenö, suwä a fe nia shi̦lo yojoo. Bä fe̦yalobö e a̦fa bada taö ja, a fe yojoquei. A̦jele bä lä doblaladi bä mamo malä showale. 11 Inaja tä cua ma cule, Bada tä Jesucristo lija bämacö bufi lä cuo wei, bämacö nofi taboyobä bämacö. Wa̦lo bänö suwä bä bufiblaö lä cuaaö wejeinaja, suwä bä ma cuinö, wa̦lo bä ca̦i bufiblaö mö feduo showaoje. 12 Wa̦lo a ja, a suwä jaba ma tablaleno wei ma cui, fei däjä suwä lija wa̦lo bä cublou nomöjöo malä cui. Suwä wamacö ma cui, wa̦lo bämacö ma cui, Yai Bada tänö bämalecö bluca malä tablaö wei. 13 ¿Ei wama tä nö bejedi ö̦jöböaimi tawä? Wamacö lä yododaö wei jamö, fe yojoo mlalanö Yai Bada lija suwä bä nö bayeli nacao ja, ¿tä mömou nö quilijiwämi daanö? 14 Yedu ja ma cui, inaja Yai Bada tänö täbä bluca malä taamano wei. Wa̦lo täbä möcö labe malä mlai. Täbä feta u̦cu nofi labe jushuwä. 15 Ö̦jö ma cui suwä bä möcö lä labaö wei däjä, bä nofi liyäjäwä doablaöje. Jai bei feta u̦cu ja bä fe yojoo showaobä, bä feta u̦cu shi̦co malä jibämoqueno wei. 16 Inaja ya bä nowa shi̦lo ma taö wei ma cui, ai anö wale a̦ ji̦liaö bufiomi ja, abenaja ya cuu. Yama täbä lä yömölaö wei jamö, inaja yama täbä shi̦lo taamaö. Shominaja ya täbä taamaö majöobä tä cuami. Yai Bada lija täbä bluca lä yododaö wei, inaja täbä shi̦lo bluca cuaaö blaucou. 17 Ai tä ja wamacö ma dodijaö wei ma cui, ya tä a̦ nia wäyäö lä nomöjöo wei tä ja, bämacö a̦fa dodijaö taimi. Wamacö lä yododaö wei däjä wamacö dodijaimi. Wamacö bufi bayeliblayoimi, wamacö bufi shi̦lo wa̦lidiamayou dicoo. 18 ¿Ö̦jö tawä? Abenaja balöwä. Wamacö lä yododaö wei däjä wamacö a̦ jo̦wa ji̦liayoimi. Ai wama bä a̦ ji̦liaö mlai, wama bä nofi lä yaibou wei wama bä a̦ shi̦lo macocaö dicoo. Ö̦jö ya tä a̦ lä ji̦liaö wei däjä, “Tä a̦ bejedi ja̦toicätä”, ya bufi cuu. 19 Showadi inaja täbä malä cuaaö wei. Ai täbä shominajaaö mlao fa cunoja, täbä lä bejedimou wei täbä nö bejedi dablamobö mlai. 20 Wamacö bluca iyaö mö yododaö däjä, “Bada tänö tä lä jimöqueno wei, yama tä taö lä cule”, wamacö bufi jole cuu ma cui, wama etä taimi. 21 Abenaja ai bä malä cuaaö wei. Nii bä ca̦i waloqueije. Ai bä nö dabou mlajei bä balöö fa dicoonö, bä shi̦loco lä waloo wei bä daleije. Ai bä ofi nö bleaaö. Ai bänö nashiwä toubä bluca coaö fa ayaojenö, bä shi wa̦liblou. 22 ¿Wedinaja tawä? Wamacö iyabä, wama toubä coabä, ¿wamacö yafibö cuami tawä? Yai Bada ebä lä yaibole, ¿wama bä nö waiblaö dicoo tawä? Bä lä ofäö wei, ¿wama bä bufi quilijamaö dicoo tawä? ¿Wedinaja bämacö nowa li taö dodijiobä? ¿Bämacö nofi dodijaö doablabä daanö? Ma, ö̦jö tä ja bämacö nofi doablaimi. 23 Bada tä Jesucristo lija camiyänö ya tä a̦ lä däleno wei, cafä wamacö lija ya tä a̦ fe dolemaö waiquioma. Abenaja tä cuoma. Bä nö lä nabämono wei bä lija, Bada tä Jesús a jimaö fe jaluo lä bufiono wei däjä, nii a dälema. 24 Nii a ja, Yai Bada lija a bufi a̦fa doblalou fa wäyämonö, a joyolalema. Abenaja bä nowa tama. —Ei nii a lä cui, camiyä ei bei ya ya̦ji nö owä. Cafä wamacö bayeliblamobä, ya nia lä jiböo wei. Bämacö iyaö lä cuaalenaja bä cuaaö da juo, wamale nofi jaducäbobä, —bä nowa tama. 25 Inaja showawä, bä fa iyalönö, ji̦shöma a ja, nashiwä toubä befi ca̦i däa nomöjölema. Abenaja a cuu nomöjöoma. —Yai Bada tänö tä a̦fa lä wäqueno wei tä a̦ bejedi cublobä, ö̦jö bei lä ya i̦yäbö nö owä. Ö̦jö wama tä a̦ nofi dude jaducäbobä, ei a li ji̦shima. Wamacö yododoo juobä jamö, bämacö iyaö lä cuaalenaja bä cuaaö da juo, ei wama toubä coaö däjä showadi wamale nofi jaducäbou juobä. Einaja Jesús a cuma. 26 ¿Ö̦jö tawä? Nii ya wa̦fa lä tafe a ja wamacö lä iyaö wei däjä, Bada tä Jesucristo a lä nomalayono wei wama tä malä jimaö wei. Ya tä a̦fa ji̦shöma lä tafe tä ja wama toubä lä coaö wei däjä ma cui, inaja showawä. Wama a nö dabolanö, inaja wamacö nia shi̦lo cuaadii. 27 Ö̦jö cudeenö, Jesucristo a nö waiblalajenö täbä iyaö bädao dicoo ja, bei ya̦jicö lä cacablamolayono wei ya̦jicö nö shi̦lo yai waiblaöje. A nö waiblalajenö toubä coaö bädao dicooje ja, bei i̦yäbö lä falayono wei i̦yäbö nö shi̦lo yai waiblaöje. 28 Cama täbä bufi bejedimou mömou fa balöonö, nii a shi̦lo wabeje, toubä shi̦lo coabeje. 29 Jesucristo a nö waiblalajenö ya̦jicö nö owä waöje ja, bei i̦yäbö nö owä coaöje ja, Yai Bada tänö tä nowa malä tabou wei. 30 Ö̦jö tä nowa ja, ai wamacö bluca ujuduu, wamacö ca̦i jaliliaö, ai wamacö cuami malä waiquii. 31 Ö̦jö ma cui, camiyä bämacö bufi bejedi mömou fa balöonö, bufi jaducälanö bämacö iyaö ja, Cristonö bämalecö nia jimaimi. 32 Ö̦jö ma cui, Bada tä lä culadinö bämalecö dobloimi jimaö däjä bämalecö cadidamaö showawä, yanowamö täbä bluca waimou däjä, bämacö waimou naleo mlaobä. 33 ¿Ö̦jö tawä? Iba wamacö. Wamacö iyaö ca̦i lä yododaö wei däjä wamacö nö daboyobä, ö̦jö lä. 34 Ai a ofi bädawä ja, wamacö iyaö yododaö showao mlao däjä cama e yafi jamö a iyaö balöobä, wamacö lä cuaaö wei tä ja Yai Bada lija wamacö a̦fa tamou mlaobä. Bei. Wamale lä wa̦lino wei ai tä ja, cafä wamacö lija ya lä waloquei wei däjä bämacö yömölaö cadidio wä.
121 Iba wamacö. Yai Bada tä Bufinö bämalecö bayeliblabä bämalecö dobäö talei. Bämacö nö wa̦lojabä täbä lä jibädaö wei täbä ja, bämacö mojodumabou bufiomi. 2 Yai Bada wama a dano mlai ja, wamacö bufi jaba yacläablaloma. Täbä a̦ nö ijidubö faö ma mlai ma cui, wama täbä bufiblaö dicooma. 3 Wamacö bufi jaba yacläma yalo bämacö cadidamaö lä cule, wamacö bufi wedinajamou mlaobä. ¿Ö̦jö tawä? Yai Bada tä Bufinö a wa̦ lä faö wei a lä cui, Jesús a wa̦fa nia wa̦lidiwä taimi. Inaja showawä, Yai Bada tä Bufi lija a bufi taamamou lä mlai a lä cui, “Jesús Bada cätä waiquiwä”, a nia cuimi. 4 Täbä nö bluca wa̦lojaö shedecobä, Yai Bada tänö täbä dobädaö. Täbä nö wa̦lojodamabä täbä lä jibäö wei täbä bluca shomiblawä ma cui, Yai Bada ö̦jö a Bufi showawänö, täbä bluca jibäö cuaaö. 5 Yai Bada lija täbä ojodamou shedecobä tä ma bluca wei ma cui, Yai Bada moli tä showawä lija täbä bluca ojodamou. 6 Täbä ojodamou shedecobä jamö täbä bluca dodijabä, Yai Bada tänö täbä nö bluca wa̦lojodamaö shedecou showao. 7 Yai Bada tänö täbä bufi bluca fa jaducäblamanö, tä Bufi läa nö ö̦jöböleije. Tä lä jibädaö wei tänö täbä nö fa wa̦lojodonö, Jesucristo ebä bluca bayeliblamou. 8 Yai Bada tä Bufinö, ai a wa̦ nö fa wa̦lojoblamanö, a wa̦ faö moyawäobä etä jibäö. Ai a wa̦ nö fa wa̦lojoblamanö, a wa̦ faö walalaobä etä jibäö mö feduo, ö̦jö tä Bufi showawänö. 9 Ai a bufi nö fa wa̦lojomabonö, ö̦jö tä Bufi showawänö Yai Bada tä nofi mölabobä etä jibäaö. Ö̦jö moli tä Bufi showawänö ai a bufi fa lofotomabonö, jalili bä jalomabä etä ca̦i jibäaö mö feduo. 10 Ai a nö wa̦lojoblamaö mö fa fedulonö, tä nö lä quilijii tä wawämabä etä li ca̦i jibäaö mö feduo. Ai a nö wa̦lojoblamaö mö fedua fa showadalonö, Jesucristo ebä lä yododaö wei jamö etä a̦ wäyäbä etä ca̦i li jibäaö. Ai a mö feduwä lä cui, a bufi moyawämabou yalo, tä a̦ lä wäyämou wei tä a̦ nö bejedi ö̦jöböamobä etä li ca̦i jibäaö mö feduo. Yai Bada tä Bufinö täbä bufi lä taamaö wei däjä, tä nö bejedi ö̦jöböaö showaobä. Fecula bä läo lä ja̦too wei, ö̦jö bä nö ö̦jöböaö mö feduo showaobä etä ca̦i jibäaö. Ai a mö feduwä lä cui a fa bayelibonö, a caficö a̦ shominajaalanö tä a̦ wäyäbä etä ca̦i jibäaö showadao. Ai a bufi fa bayeliblanö, a caficö a̦ lä shominajaaö wei tä a̦ ja a bufi jaducäblobä etä ca̦i jibäaö, tä a̦ fe dolemabä. 11 Yai Bada moli tä Bufi showawänö etäbä bluca jibädaö fa cuaanö, camanö täbä dobäö lä bufio weinaja, täbä dobäö cuaaö. 12 Yanowamö wa moli ma cui wa bayucuwä. Wa bayucuwä ma cule wa moli showawä. Cristo lija bämacö lä yädäo wei, inaja tä cuwä mö feduwä. 13 Yai Bada tä Bufinö, Cristo lija bämalecö bluca yädämaquema. Judio bä ma cui, judio bä lä mlai bä ma cui, täbä a̦ fuamobä bä lä tabou wejei bä ma cui, bä tabou lä mlajei bä ma cui, Cristo lija bämalecö bluca yädämaquema. Yai Bada tä Bufi ma moli wei ma cui, bluca bämacönö bäma a Bufi tabou. A bälöo shedequewä. 14 Wa lä bayucui wa tetewä. 15 Bei wa mamicö a̦ faö fa cunoja, “¿Wedi tabä bei ya imicö shi̦lo cuo mlai, ya mamicö li cua dicoquema?”, wa mamicö cuu fa cunoja, ¿wa mamicö bayucuwä mablou majölayou daanö? 16 Bei wa yömöcacö a̦ faö fa cunoja, “¿Wedi tabä bei ya mamocu shi̦lo cuo mlai, ya yömöcacö li cua dicoquema?”, wa yömöcacö cuu fa cunoja, ¿wa yömöcacö shadio mablou majölayou daanö? 17 Bei wa mamocu shi̦lo yami cuo fa cunoja, ¿wedi tänö wa tä a̦ nö li ji̦lilebö wei? Bei wa yömöcacö shi̦lo yami cuo fa cunoja, ¿wedi tänö wa tä nö li u̦cucabö wei? 18 Ö̦jö ma cui, inaja Yai Bada tänö bämalecö tablanomi. Bämalecö bayucamaö lä bufiono weinaja, inaja showawä bämalecö tablaö showalayoma. 19 Wa bayucuwä mlao fa cunoja yanowamö wa nö cuobö mlai. 20 ¿Ö̦jö tawä? Wa bayucuwä ma cui moli wa waiquiwä. 21 Bei wa mamocu ma cule ma cui, wa imicö bufiblamou. Bei wa fe ma cule ma cui, wa mamicö bufiblamou. 22 ¿Ö̦jö tawä? Ai wa lä bayucui tä bufiblamoimi ma cui, wa yai bayeliobä cätä. 23 Ai wa lä bayucui tä ma cui, tä mömou shi̦loco quilijio mlaobä wa tä baushiblaö. Wa tä wawädobou lä quilii wei wa tä lucämaö. 24 Wa tä wawädobou quilii lä mlai wa tä lucämaimi. Ö̦jö ma cui, Yai Bada tänö wa bayucublamaö lä cuaano wei tä ja, ai täbä nö bufiblamobö ma mlai ma cui täbä yai bufiblamou. 25 ¿Ö̦jö tawä? Ö̦jö cudeenö wa lä bayucui täbä nö nia bleaamayoimi, täbä nia yai bayeliblayou. 26 Ai wa mashi lä bayucui tä nini balaö däjä, wa nini jödödöblaliyo. Inaja showawä, ai wa mashi lä bayucui wa bayeliblou ja, bei wa comi ayäyaimou cuquei. 27 Jesucristo lija wamacö lä cule, jai moli wamacö bayucuwä cuwä. Jesucristo lija wamacö bluca yädäa. 28 Cama ebä lä yododaö wei bä bayeliblayobä, Yai Bada tänö bä nö bluca wa̦lojomabou. Jesucristonö yamalecö lä shimöleno wei ei yama ecö balöwä. Ö̦jö däjä, cama ebä yododabä jamö Yai Bada etä a̦ wäyäbeje ai bä ca̦i tablamaö nomöjöoma. Ö̦jö däjä, cama ebä damabeje ai cäbä. Ö̦jö däjä, tä nö lä quilijii tä wawämabeje, ö̦jö bä ca̦i mö feduwä. Ö̦jö däjä, jalili täbä jalomabeje, ö̦jö bä ca̦i. Täbä bayeliblabeje bä ca̦i. Täbä cadidamabeje bä ca̦i. Täbä caficö a̦ shominajaalanö etä a̦ wäyäbeje bä ca̦i. 29 ¿Ö̦jö tawä? A wa̦no wäyäö cuaabeje, Jesucristonö bluca jödödöwä täbä shimaimi. Cama ebä lä yododaö wei jamö Yai Bada etä a̦ wäyäbeje, täbä ca̦i bluca tablamaimi. Inaja showawä, Yai Bada etä a̦ ja täbä damabeje, täbä bluca cublou malä mlai. Tä nö lä quilijii tä wawämabeje, täbä nö bluca ca̦i wa̦lojamaimi. 30 Jalili täbä jalomabeje, täbä bluca dobäimi. Täbä caficö a̦ shominajaalanö täbä a̦ fabä, täbä ca̦i bluca cuomi. Ö̦jö bä caficö a̦ lä shominajaaö wei bä a̦ fe dolemabeje, täbä ca̦i bluca dobäimi. 31 Bamacö bayeliblayobä, Yai Bada tä Bufinö bluca täbä ja bämalecö dobäö ma shedecou wei ma cui, tä yai lä dodijidai tä da bufiblaje. ¿Ö̦jö tawä? Fei däjä, dodijidawä tä yai lä cui ya tä nia jimaö majöo.
131 Bluca täbä caficö a̦ ja, ya aca ma jayuaö wei ma cui, a̦jele ya bä caficö a̦ ca̦i ma daö wei ma cui, ya bufi nofio mlalanö ya wa̦ faö bädao ja, ya wa̦ jole jole nacli faö bädaquei. 2 Jesucristo ebä lä yododaö wei jamö ya etä a̦ wäyäbä, Yai Bada tä Bufinö yale nö ma wa̦lojoablalamaö wei ma cui, ya bufi jaducäa ma jödödöi ma cui, ya bufi dao fe ma balojoi ma cui, Yai Bada ya nofi mölabolanö jefu ya tä balöcö majöblamaö ma daö wei ma cui, ya bufi nofiomi ja, ya no ojode co̦amamobä tä cuami waiquiwä. 3 Täbä nö fo̦li lä bleaaö wei täbä lija, bluca ya täbä lä tabole ya täbä ma jibäaö wei ma cui, ya bufi nofio mlalanö ya täbä jibäaö dicoo ja, ya nö bleaaö bäa. Jesucristo a nowa ja wale demi yaabeje ya noshi ma ö̦jödao wei ma cui, ya bufi nofio mlalanö ya tä taö ja, ya nö bleaaö bäa. 4 Bä bufi lä nofio wei bä jushuo jaöomi. Täbä bayeliblaöje. Ai täbä dodijaö ma ayao wei ma cui, bä jushudoimi. Cama bä nofi doablamoimi. 5 Bä bufi lä nofio wei bä nofi jushuaimi. Bä joomodou si ijejewä. Bä jölaö si ijejewämi. Täbä nowa tabou nö dedeaimije. 6 Täbä doblou lä mlale jamö, bä bufi lä nofio wei bä bufi doblaloimi. Täbä lä dodijale jamö bä bufi shi̦lo yai doblalou. 7 Bä bufi lä nofio wei bä lä cui, bä waiquidoimi. Yai Bada etä a̦ bejedi bufibou showao fe yadioje. Bä mölaö fe yadio. Bä nö ma bleaaö wei ma cui, bä nö wa̦lojaö fe yadio. 8 Bufi nofio tä lä cui, tä mabloimi. Jesucristo ebä yododabä jamö ai täbänö Yai Bada etä a̦ ma wäyäö wejei ma cui, täbä a̦ nia obi mablou. Ai täbä mö feduwänö, täbä caficö a̦ shominajaalanö Yai Bada etä a̦ ma wäyäö wejei ma cui, täbä caficö a̦ nia obi shominajaaö mablou. Ai täbä mö feduwä lä cui, Yai Bada etä a̦ ja täbä bufi ma dao wei ma cui, bufi dao etä nia obi mablou. Ö̦jö tä bluca nia ma mablou wei ma cui, täbä bufi lä nofio wei tä nia shi̦lo mabloimi. Ö̦jö tä yai nia feiblou. 9 Yai Bada tänö bämalecö fa dobälönö, bämacö bufi ma dao wei ma cui, bämacö bufi walalawä bäwä. Jesucristo ebä yododabä jamö bäma etä a̦ wäyäbä, Yai Bada tänö bämalecö ma dobäö wei ma cui, ijede bäma tä shi̦lo daö bäwä. 10 Obi, bäma tä daö jödödöo däjä, ijede bäma tä daö lä bäle tä nia ca̦i mladou. Tä lä doblale tä nia cuo malä waiquii. 11 Ei malä cui. Ya osheo däjä, ya wa̦ faö osheoma. Ijilu bä bufi lä cuaablalou weinaja ya bufi cuaablaloma. Ijilu bä bufi daeo lä culenaja ya bufi ca̦i daeo cuaama. Ya fa badalönö, ijilu bä lä cuaaö weinaja ya cuaaö mlalayoma. 12 Möle mö shami ajamö bäma täbä manashi möö cuo lä bädao weinaja, Yai Bada bäma a manashi möö cua bädaa lä cule. Obi bäma tä dablaö walalao wä. Fei däjä, Yai Bada lija ya bufi ijede jaducäblou ma cule, ö̦jö däjä Yai Bada tänö camiyä wale daö walalawä lä culenaja, camiyänö ya nia daö walalao cuo mö feduo. 13 ¿Ö̦jö tawä? Bämacö nia cuaaö fujeblou lä mlai, abenaja tä cua. Bufi shalililanö Yai Bada bäma a nofi nia mölabou. Ö̦jö lija bämacö nia shi̦lo mölaö. Bämacö bufi nia ca̦i shi̦lo nofio. Inaja bämacö nia shi̦lo cuaadii ma cui, bämacö bufi lä nofio wei tä ja, bämacö bufi mö yai blucaobä. ¡Inaja lä yai!
141 Wamacö bufi nia lä nofio wei tä nabä shi̦lo da cadidoje. Yai Bada tä Bufinö täbä lä jibädaö wei täbä ca̦i da bufiblaje. Ö̦jö wama täbä bluca bufibou ma cui, Yai Bada wama ecö lä yododaö wei däjä, wama etä a̦ nia lä wäyäö wei, ö̦jö wama tä nofi shi̦lo yai macocobou dodijiobä. 2 Caficö a̦ shominajaalanö a wa̦ lä faö wei a lä cui, yanowamö täbä lija a wa̦ faimi. Yai Bada lija a wa̦ yai fadou. Yai Bada tä Bufinö tä a̦ fa jilanö tä a̦ ma wäyäö wei ma cui, yanowamö täbä lija a wa̦ ji̦liblou malä mlai. 3 Ö̦jö ma cui, Yai Bada ebä lä yododaö wei däjä etä a̦ lä wäyäö wei a lä cuinö, yanowamö täbä lija a wa̦ faö fa shalilionö täbä shi̦lo bayeliblaö, täbä cadidamaö, täbä bufi lofotoamaö. 4 Caficö a̦ shominajaalanö a wa̦ lä faö wei a lä cui, cama a bufi ma bayeliblamou wei ma cui, Yai Bada etä a̦ yai lä wawämaö wei a lä cuinö, Jesucristo ebä shi̦lo yai bayeliblaö. 5 Wamacö caficö a̦ shominajaalanö bämacö a̦ bluca famaö bufi ma doblao wei ma cui, Yai Bada wama ecö lä yododaö wei jamö wama tä a̦ yai wäyäö fa cunoja, ya bufi nö doblao fe balojoobö wei. Tä a̦ lä wäyäö wei a lä cuinö täbä bufi shi̦lo yai bayeliblaö dodijio. ¿Ö̦jö tawä? A wa̦ faö lä shomi wei a wa̦ ji̦libloimi yalo, täbä nia bayeliblamoimi. Yanowamö täbä caficö a̦ ja tä a̦ fe dolemaö showaoje ja, tä a̦ ji̦liaö fa walalaojenö täbä bufi nia shi̦lo bluca bayeliblamou. 6 Iba wamacö. Shomi täbä caficö a̦ ja bämacö yömölaö ja, ¿wamacö nia bayeliblamou daanö? Ma. Yai Bada tänö tä lä wawäblamaö wei ya tä a̦ yai wäyäö ja, wamacö nia shi̦lo yai bayeliblamou. Bämacö bufi jaducäblamabä ya tä a̦ wäyäö ja, inaja showawä. Bämacö yai damaö ja, inaja showawä. Wamale a̦ ji̦lia doblaimi ja, wamacö nia bayeliblamoimi. 7 Madofi bä bädawä ma cui, bä a̦ nö malä dabou wejei. Täbä amowamobä jamö, tä ca̦i madofi lä shäö wejei a wa̦ shalilibloimi ja, tä a̦ nö nia ö̦jöböaimije. 8 Täbä wayu itobä täbä madofi lä jolamou wei bä a̦ nö ca̦i dabouje. A wa̦ famaö shalilioimije ja, “Fei däjä dao”, täbä bufi nia cuimi. 9 Inaja showawä, wa caficö a̦ shominajaalanö wa wa̦ faö ja, tä a̦ ji̦liblaimije ja, bä bufi nia jaducäbloimi. Jai tä blocoobä jamö wa wa̦ faö bädao, wa wa̦ nia cuaaö. 10 Shomi täbä caficö a̦ bluca cublawä. Cama bä a̦ ma ji̦liayou wei ma cui, 11 camiyänö ya wa̦ ji̦lia doblaimi ja, ya bufi nia wedinajamou. Shomi täbä a̦ ji̦liayou lä mlainaja yafäcö a̦ nia ji̦liayoimi cuo. 12 Yai Bada tä Bufinö täbä lä jibädaö wei täbä ja, wamacö dobämou bufi doblao waiquiwä yalo, Jesucristo wama ebä bufi nia lä lofotoamaö wei, tä shi̦lo yai da bufiblaje. 13 Ö̦jö cudeenö, caficö a̦ shominajaalanö a wa̦ lä faö wei a lä cuinö, wawädowä tä a̦ wäyäö fe dolemou showaobä, Yai Bada lija a nacobä. 14 Ya caficö a̦ shominajaalanö Yai Bada lija ya nö bayeli nacao däjä, bei ya bufinö ya ma nacou wei ma cui, ya bufi jaducäa mlalanö ya wa̦ faö bädao. 15 ¿Wedinaja ya cuaabä, ö̦jö lä? Ya nö bayeli nacao däjä, bei ya bufinö ya nia nacou. Ya bufi jaducälanö ya wa̦ nia yai faö. Yai Bada tä jamö ya amowamou däjä, bei ya bufinö ya nia amowamou. Ya bufi jaducälanö ya wa̦ nia yai faö. 16 ¿Ö̦jö tawä? Wamacö caficö a̦ shominajaalanö Yai Bada wama a a̦fa doblao taö ja, shomi bä loo mö lä fedule bä bufi nia wedinajamou. Bei wamacö bufi jamö tä a̦ lä bädou wei däjä, bufi doblalanö Yai Bada wama a nofi ma doablaö wei ma cui, tä a̦ ji̦liblaimi dicooje ja, “Awei, inaja lä”, bä bufi nia cuu yauaimi. 17 Yai Bada dodijidawä wa shi ö̦jöde ma jimaö wei ma cui, tä a̦ ji̦libloimi ja, ai bä bufi nia bayelibloimi. 18 Cafä wamacö caficö a̦ shominajaalanö wamacö a̦ ma faö wei ma cui, camiyä ya wa̦ shi̦lo yai faö fe balojoo cudeenö Yai Bada lija ya bufi doblalou. 19 Ya caficö a̦ shominajaalanö ya wa̦ faö bufi ma doblao wei ma cui, Jesucristo ebä yododabä jamö, wawädowä ya täbä nia yai yömölaö. Ya bufi jaducälanö, jolodowä ya tä a̦ wädaö bädao ma cui, inaja yai. Ya caficö a̦ shominajaalanö ya tä a̦ labamaö fe ma balojoo wei ma cui, wale a̦ nia ji̦liblaö malä mlajei. 20 Iba wamacö. Ijilu oshe bä bufi mojodi lä culenaja wamacö bufi mojoduo mlai. Bä bufi yai da jaducäicu. Wa̦lidiwä tä ja wamacö shi̦lo yai mojoduobä, ijilu bä wai lä mojoduo weinaja showawä. 21 Yai Bada tä a̦ oni jamö, abenaja Isaia a cuma. Bada tä lä culadi, abenaja a cuu. “Shomi täbä caficö a̦ ja, ei ya bä nia yömölamaö. Shomi täbä lija ya bä nia ma yömölamaö wei ma cui, tä a̦ nia ji̦liblaimi showaweje.” Einaja tä a̦ cuu. 22 Ö̦jö malä cui. Täbä caficö a̦ shominajaalanö Yai Bada tänö bä a̦ famaö däjä, Jesucristo bufilewä bä bufi jaducäblobä bä a̦ famaimi. Tä a̦ bejedi bufibou lä mlajei bä bufi möblobä, bä a̦ li famaö. Inaja showawä, Jesucristo ebä yododabä jamö, Yai Bada etä a̦ wawämaöje däjä, tä a̦ bejedi bufibou lä mlajei täbä bufi lofotoobä, bä a̦ famaimi. Jesucristo bufilewä bä bayeliblamobä, bä a̦ li famaö. 23 ¿Ö̦jö tawä? Jesucristo wama ecö bluca yododaö däjä, wamacö a̦ bluca faö shominajablou dicoo ja, wamacö a̦ nia ji̦liblaimije. Shomi bä coyocoo bädao ja, Jesucristo bufilewä bä lä mlai bä coyocoo bädao ja, wamacö a̦fa shi nia wa̦lii taöje. 24 Ö̦jö ma cui wamacö a̦ bluca faö däjä, Yai Bada wama etä a̦ yai wawämaö ja, täbä bayeliblamolayou. Jesucristo bufilewä bä lä mlai bä ma coyocoo däjä, shomi bä ma coyocoo däjä, ö̦jö bä a̦ blucanö bä bufi shi̦lo shädayaimou cuquei. Bä quilii cuquei. 25 Bä bufi cuaablalou lä ja̦too wei, Yai Bada tä a̦nö tä wawädoblaliyo. Ö̦jö däjä, bä möfe bolanö Yai Bada a wa̦fa doblao taö cuqueije. Ö̦jönö wamacö ca̦i lä cule tä nö ö̦jöböaö cuqueije. 26 ¿Wedinaja dodijiwä tawä? Iba wamacö. Wamacö bluca lä yododaö wei däjä, wamacö bluca bayeliblayobä wamacö nia yododaö. Ai wamacö amowamobä. Ai wamacö mö feduwä lä cuinö, Yai Bada etä a̦ ja wama bä damabä. Ai wamacö showawänö, Yai Bada tänö tä lä wawämaö wei wama etä a̦ wäyäbä. Ai wamacö mö feduwä lä cuinö, wamacö caficö a̦ shominajaalanö wama tä a̦ wäyäbä. Ai wamacö showawänö, bä a̦ lä shominajaaö wei wama etä a̦ wawäblamabä. ¿Ö̦jö tawä? Wamacö cuaaö lä bädao wei tä ma cui ja, wamacö bayeliblamobä wamacö nia yai cuaaö. 27 Täbä caficö a̦ shominajaalanö täbä a̦ nia faö ja, bolacabö bä a̦ faö bädaobä. Bä a̦ faö fa yawäläodonö, ai anö tä a̦ wawämaö showadaobä. 28 Tä a̦ nia lä wawämaö wei a cuami ja, bä a̦ nia shominajawä faimi. Cama bei bufi jamö tä a̦ shi̦lo fa tabojenö, cama bä a̦ nia shi̦lo ji̦liamou. Yai Bada tänö bä a̦ nia shi̦lo ji̦liaö. 29 Ai bolacadabö bänö Yai Bada a wa̦no wäyäöje ja, täbä bufi nia bluca daeo. 30 A loa mö lä fedule a lija Yai Bada tänö ai etä wawämaö majöo ja, a wa̦ faö lä balöo wei a wa̦ si nia waiblou. 31 Bluca wamacönö wama tä a̦ wäyäö yawälädobä tä malä cule, wamacö bufi bluca jaducäblamayobä, wamacö bufi bluca lofotoamayobä. 32 Yai Bada tä Bufinö täbä bufi lä taamaö wei däjä, tä a̦ ma wäyäö wejei ma cui, cama bei bä a̦ si waidobä bä bufi nia wasöo. 33 Yai Bada tänö täbä bufi wedinajamomaö malä mlai. Täbä yanöcömabobä cätä. 34 Yai Bada ebä bluca lä yododoblai jamö, suwä wamicai bä nia yanöcöwä cuo. Bä a̦ nia wasömamou. Bä suwä nosiemobä bämi. Moisesi etä a̦ lä cuu weinaja showawä. 35 Tä a̦ lä wäyämou wei tä a̦ ja, suwä bä bufi wedinajamou ja, cama bä yafibö jamö bä fe̦yalobö bä wa̦lii co̦jolobeje. Jesucristo ebä yododabä jamö bä a̦ suwä faö dicoo ja, tä doemi. 36 ¿Ö̦jö daanö? Cafä wamacö lija ¿Yai Bada etä a̦ waloa balöblaquema daanö? ¿Cafä wamacö lija tä a̦ waloa ayaquema tawä, wama tä a̦ daö ayaobä? 37 Ai wamacö lä cui, “Yai Bada ya wa̦ wäyäbä ya”, wamacö bufi cuu ja, wamale a̦ nö bejedi ö̦jöböabä wamacö, ö̦jö lä. “Yai Bada ya Bufi malä tabole”, wamacö bufi cuu ja, inaja showawä. Ya tä a̦ lä onimale, Bada tänö wale fa nosiemanö ya tä a̦ onimaö malä cui. 38 Wamale a̦ nö bejedi ö̦jöböaimi dicowä ja, cafä wamacö ma cui wamacö a̦ nö ca̦i nia ö̦jöböamoimi. 39 ¿Ö̦jö tawä, iba wamacö? Wamacö yododaö däjä, Yai Bada wama tä a̦ wawämabä tä nofi da yaiboje. Bä caficö a̦ shominajaalanö bä a̦ lä faö wei, bä a̦ ca̦i wasö dijejä. 40 Ö̦jö ma cui, tä bluca lä tamou wei tä ma cui, dodijidawä tä tamobä. Yawäläwä wamacö a̦ fadobä.
151 Bei. Iba wamacö. Cafä wamacö lija Jesucristo dodijidawä ya etä a̦ lä wäyäno wei tä a̦ ja, bämacö bufi nia fa jaducäblamanö, ei cä ya wa̦. Ö̦jö wama tä a̦ bejedi fa dälänö, wamacö bufi lofotolanö, Jesucristo wama a nofi mölabou malä showai. 2 Ö̦jö wama tä a̦ nofi cadidibolanö wamacö fucäamou, wamacö mölaö buomi ja. 3 Tä a̦ yai lä lofote wei ya tä a̦ fa dälänö, cafä wamacö lija ya tä a̦ wäyäö fe dolemoma. Camiyä bämacö dobloimi tä nowa ja, Cristo a nomaa lä lälayono wei tä a̦. Yai Bada etä a̦ oni ja, yedu ja a wa̦fa nomaö lä wäyäno wejeinaja, inaja showawä a cublaliyoma. 4 Maa maca jamö a nomawä fe fa lacöjenö, bolacabö tä mö fa dödölönö, Yai Bada tänö a demi jocädamaö co̦layoma, tä a̦ oni lä cuno weinaja showawä. 5 Pedro lija a jaba fa damolalunö, cama ebä lä nocamabono wei bä bluca lija a damoa nomöjölaliyoma. 6 Tä fe fa weyadalunö, Yai Bada ai ebä lija a damoa majölaliyoma. Ö̦jö bä blucao dodijioma. 500 tä jamö bä jayuquema. Ö̦jö ai bä cuami ma cui, ai bä mö feduwä lä cui, bä demi bluca cua showawä. 7 Ö̦jö däjä, Santiago lija a damoa fa nomöjölalunö, bä lä shimöleno wei bä bluca lija a damoa majölaliyoma. 8 Ya̦cumö camiyä ya ma cui lija a damoa majölaliyoma. Ya doblobä ya cuono ma mlai ma cui, a damolaliyoma. 9 Jesucristonö bä lä shimöleno wei bä lija ya yädäobä, ya cuonomi. Ya etä a̦ wäyäbä ya ca̦i cuonomi. Yai Bada ebä lä yaiblai, ya bä nö malä bleaamano wei. 10 Yale bayeliblabä ya cuono ma mlai ma cui, yale nofi ojodadaö fe yadioma. Ö̦jö cudeenö ya nö wa̦lojoablalou. Jesucristonö bä lä shimöleno wei bä ma dodijaö wei ma cui, camiyä ya yai ojodamou fe balojoo. Ö̦jö ma cui, camiyä ya dodijaö tänö mlai, Yai Bada tänö yale bayeliblaö fa cuaanö, bei ya doblou fe yadio. 11 ¿Ö̦jö tawä? Camiyä ya ma cuinö, cama bä ma cuinö, ö̦jö lä yama tä a̦ bluca malä wäyäö wei. Ö̦jö wama tä a̦ bejedi lä bufileno wei lä tä a̦ showawä. 12 ¿Ö̦jö tawä? Cristo a demi lä jocädaliyono wei tä a̦ ma wäyämou wei ma cui, ¿wedi tabä ai wamacö jolemou dicoo? Täbä lä mladou wei täbä nia jo̦wa dablou co̦daaimi. 13 Inaja mlai. Täbä demi jocädou mlao fa cunoja, Cristo a ma cui a nö ca̦i demi jocädou co̦obö mlai. 14 Cristo a demi jocädamaö co̦o mlao fa cunoja, yama tä a̦ nö wäyäö nö bleaabö wei. Wama tä a̦ nofi nö ca̦i mölabou nö bleaaö buobö wei. 15 Cristo a demi jocädou mlao fa cunoja, Yai Bada yama tä a̦fa lä wayoaö wei ja, yamacö nö jolemobö wei. A demi lä jocädamaleno wei yama tä a̦fa ma wäyäö wei ma cui, täbä lä mladou wei täbä dablou co̦o mlao fa cunoja, Cristo a ma cui a nö jocädobö mlai. Yamacö nö jolemou bädaobö wei. 16 Täbä lä mladou wei täbä demi jocädamaö mlao fa cunoja, Cristo a ma cui a demi nö jocädou co̦obö mlai. 17 Cristo a demi jocädamaö mlao fa cunoja wamacö nö mölaö buobö wei. Wamacö doblou lä mlaono wei tä nowa lä cui, tä nowa nö cuo showaobö wei. 18 Tä nowa cuo showao fa cunoja, Jesucristo ebä nomaa lä waiquilayono wei bä ma cui, bä nö dablou co̦obö mlai, bä nö bleaaö shi wa̦libö wei. 19 ¿Ö̦jö tawä? Bämacö nia lä doblaodayou wei tä ja bämacö mölaö mlai ja, äyämö bämacö lä bälöale bämacö nia fa dobladionö Jesucristo bäma a nofi shi̦lo mölabou bädao fa cunoja, bämalecö nofi jalujubobeje bämacö nö cuo fe balojoobö wei. 20 Ö̦jö ma cui, Cristo bejedi lä a demi jocädou co̦layoma. Döano si ja nii cäcö jaba lalou lä culenaja, Jesucristo bei a demi jaba jocädaliyoma. 21 Yanowamö a jaba cuo lä balöono wei a lä cuinö, bämacö bluca lä nomaö wei tä bädamalema. ¿Ö̦jö tawä? Ö̦jö ma cui, ai a lä nodiblaliyono wei a lä cuinö, demi bämacö nia jocädou lä co̦o wei bei tä bädamaö nomöjölayoma. 22 Adana lija täbä yädäa yalo täbä bluca nomaö malä cui. Inaja showawä, Cristo lija täbä fa yädäicunö täbä demi nia cuo shi wa̦lii. 23 Tä bluca bädou malä nodimou wei. Nii cäcö jaba lalou lä culenaja, Cristo bei a jaba demi jocädaliyoma. Cama a lä bädoyoluu wei däjä, cama ebä nia ca̦i demi jocädou nomöjöo. 24 Ö̦jö däjä tä nia bluca waiquidou. Täbä nö lä nabämoladi täbä nabä fa queicunö, täbä jole jole lä nosiemou wei täbä ca̦i, täbä a̦fa jole jole lofote lä jilou wei täbä nö ca̦i bluca fa blemalalönö, bä Fö̦ö Yai Bada lija tä ulufi befi ca̦i nia co̦amaö. 25 Täbä nö lä nabämou wei bä lä cui, Cristo lija Yai Bada tänö bä bluca blamabou showao mlao däjä, Cristo a nia bälöo lofotomabou dodijio. 26 Täbä nö lä nabämou wei tä nia waicaö lä jödödöo wei tä lä cui, ö̦jö nomaö bei tä. 27 Abenaja tä a̦ oni cuu malä balöono wei. Cristo lija täbä bluca nosiemamobä, Yai Bada tänö Bada bei a tablamalema. Einaja tä a̦ cuu. Ö̦jö ma cui, Cristo lija täbä bluca nosiemamobä, tä a̦ oni lä cuu wei, Cristo Bada bei a lä tablamaleno wei tä a̦fa wayoamonomi. 28 Cristo lija täbä bluca lä nosiemamou wei däjä, Bada a lä tablamaleno wei a lija, bä Ijilubö Jesucristo a ma cui a nia nosiemamou mö feduo. Ö̦jö däjä Yai Bada tänö jödödöwä täbä lä cublai täbä nia lofote fuwäbou. 29 Täbä lä mladaliyono wei bä befi, ai bä möfe ojomamou. ¿Wedinaja bä bufi li fa cunö bä li inaja cuaaö?Yai Bada tänö täbä demi jocädamaö mlao fa cunoja, bä lä mladaliyono wei bä befi, bä möfe nö ojomamobä mlai. Täbä nia demi jocädou lä co̦o wei tä nofi mölabou waiquiaje yalo, bä li inaja cuaaö malä cui. 30 Täbä demi jocädou mlao fa cunoja, wamalecö nabä lämobä jamö yamacö nö ca̦i fudibö mlai. 31 Bejedi lä ya wa̦. Showadi ya shämobä tä läa showaa ma cule, Bada tä Jesucristo lija wamacö bufi cuquema yalo, bejedi lä ya bufi doblalou. 32 Efesoteli bä waitelimou fe balojooma. Yalo bänö täbä nabä queo nö lä quiliaö wejeinaja wale ma taamano wejei ma cui, ya tä a̦ wäyäö fe blacäjoma. ¿Wedi tä nowa ja ya fe li blacäjou? Yai Bada tänö wale demi jocädamaö mlao fa cunoja, ya nö shämou ojodaobö mlai. Ya demöo co̦obä tä cuo mlao fa cunoja, yanowamö täbä showadi lä cuu weinaja ya nö cubö wei. Abenaja. “Bämacö da showayo. Bämacö nomaö bädao ja, bämacö dodijaö co̦obä tä nia cuo malä mlai”, ya nö cubö wei. 33 Bä möla dijä. Ai bä ma dodijaö wei ma cui, täbä nofi lä jushuaö wei täbä lija bä nocaablalou lä dicoo wei, bä wa̦lidilalio. 34 Bä bufi da jaducäicu. Wa̦lidiwä wama tä taö dicoo mlai. “Yai Bada ya daö”, wamacö cuu ma cui, ai wamacö bejedimou malä mlai. Wamacö shädayaimobä ya wa̦. 35 Abenaja ai a cuu ja̦too fa cui. “Bä lä mladou wei, ¿wedinaja bä li demia taa co̦malei? ¿Wedinaja täbä cuwä, bei täbä li demi cua co̦quei?” Einaja a cuu ja̦too fa cui. 36 Einaja wa lä cuu wei wa lä cui, wa bufi jaducäami fe balojowä. Nii bei wa mo döaö däjä, mo wa̦ocoblou fa balölonö, dodijidawä tesi shi̦lo falayou. 37 Tä nia obi lä cublou wei bei wa tä döaimi. Wa mo döa lä dodijiquei wei mo nia faimi, bei mo li bädawä, yono mo ja̦towä, shomi tä mo ja̦towä. 38 Yai Bada tänö täbä nii shomitawä yaiblaö fa balöonö, bluca mobä shomi lä cublai tä mobä ja, nii shomitawä bä faö cuaaö malä showai. 39 Inaja showawä, täbä demi lä cublai täbä shomi mö malä fedui. Yanowamö bämacö ya̦jicö lä culenaja, yalo bä ya̦jicö cuwä mö feduwä malä mlai. Yalo bä lä yäö wei bä ya̦jicö ca̦i shomi mö feduwä malä cui. Yuli bä ya̦jicö ma cui, bä ya̦jicö ca̦i shomi mö feduwä. 40 Fedu jamö täbä bluca lä culadi, täbä ca̦i shomi mö feduwä, yanowamö bämacö lä culenaja mlai. Fedu jamö täbä bluca lä culadi, täbä liyäjäwä shomitawä. Eja täbä lä cule, täbä liyäjäwä shomitawä mö feduwä. 41 Judu mösö jamö täbä bluca lä culadi, täbä mömou shomiblawä ma cui, täbä mömou bluca liyäjäwä. Motoca a shi̦i jilajao. Belibo shi̦i wawädowä. Shidicali bä mamoca shi̦i mida midamou liyäjäwä. Ai bä mamoca shi̦i wacacawä, ai bä li shomitawä mö feduwä. 42 Inaja showawä, Yai Bada tänö täbä demi jocädamaö co̦o däjä, shomi tä liyäjäwänö, täbä nia liyäjäblou majöo. Yanowamö täbä lä cublai täbä mladou si ijejewä ma cui, täbä demi lä jocädou wei täbä ba̦limi. 43 Nomawä täbä wa̦lidiwä nö quilijiwä ma cui, täbä demi lä jocädamaö wei, liyäjäwä fe balojowä täbä jocädamaö. Nomawä täbä ujudi fe balojowä ma cui, lofote täbä jocädamalei. 44 Yanowamö bei täbä je̦le je̦lemou fa mladonö täbä nomaö ma cui, Yai Bada tä Bufinö täbä demimabou shi wa̦liobä, täbä nia malä jocädamaö wei. ¿Ö̦jö tawä? Yanowamö bei bämacö mladou si ma ijejei ma cui, Yai Bada tä Bufinö ba̦limi bämalecö nia tablamaö. 45 Abenaja tä a̦ oni cuu. Yanowamö a jaba cuo lä balöono wei, Adana a lä cui, a demi cublaliyoma. Einaja tä a̦ cuu. Yanowamö a cuo lä nodiono wei, Cristo a lä cui, täbä demi tamabou shi wa̦liobä bei a cublaliyoma. 46 Ba̦limi tä lä cui a balöbloimi. Tä mladou si lä ijejei a balöo. Ba̦limi tä lä cui a nojao. 47 Yanowamö a jaba lä cuono wei, mashita a ja a tablamolayoma. Coshi coshi bä ja a cuoma. A yanowamö lä nodiono wei, Cristo a lä cui, fedu jamö a li cuoma a. 48 Mashita a ja a lä tablamolayono wei a lä cui, a mladou si ijejewä lä cuono weinaja, eja bä bluca lä cublai bä ujudi cuwä nodiwä. Inaja showawä, fedu jamö a lä culadi a ba̦limi yai lä culenaja, cama ebä nia bluca ba̦limi cuo mö feduo. 49 Mashita a ja a lä tablamolayono wei bäma a ujudi nodibou lä culenaja, fedu jamö a lä culadi bäma a nia ca̦i lofote nodibou mö feduo. 50 Wamale a̦ da ji̦li, iba wamacö. Täbä sicö mladou si lä ijejei sicö tabou showalajenö, Yai Badanö cama ebä ca̦i lä cuo wei jamö bä walodayou mlaicätä. Täbä ba̦limi lä mlai bä lä cui, täbä ba̦limiobä jamö bä cuo daomi. 51 Wamale a̦ da ji̦li. Tä a̦ jaba lä jo̦yaono wei ya tä a̦ wawämaö lä cule. Ai bämacö nia nomaimi. Bämacö bluca nomaö ma mlai ma cui, bämacö nia bluca shomiblou. 52 Yedu täbä mamo casi midou lä culenaja, amowa fibä lä jolamou wei tä a̦ famaö jödödöo däjä, bämacö nia shomiblaliyo. Tä a̦ ji̦lio fa balöonö, täbä lä mladaliyono wei täbä lofote jocäblou fa co̦lonö, bämacö nia bluca shomiblou. 53 Bämacö mladou si lä ijejei, lofote tä lä cui tä ja bämacö nia lucäö. Bämacö cudio lä mlai, ba̦limi tä ja bämacö nia didio. 54 Bämacö mladou si lä ijejei, lofote tä ja bämacö nia didio. Bämacö cudio lä mlai, ba̦limi tä ja bämacö nia lucäö. Ö̦jö däjä, tä a̦ oni cuu lä balöono wei tä a̦ nia bejedi cublou. Abenaja tä a̦ oni cuu. Bämacö nia nomaö co̦daaimi. Nö wa̦lojou tä lä cuinö, nomaö tä blabou lä cule. Einaja tä a̦ cuu. Abenaja ca̦i. 55 Nomaö wa lä cui, ¿wedi jamö tänö wa nö wa̦lojaö co̦obä, ö̦jö lä? Nomaö wa lä cuinö, ¿wedi tänö yamalecö nö nia bleaamaö co̦o? Einaja tä a̦ cuu. 56 Täbä nö malä bleaamaö wei. Täbä doblou lä mlai Yai Bada tänö tä nowa nia yuaö yalo, täbä nomaö quilii. Täbä doblou lä mlai däjä, Moisesi tä a̦ nofi cadidiboimije yalo tä nowa yulei. 57 Ö̦jö ma cui, Yai Bada lija bämacö bufi doblalobä bämacö. Bada tä Jesucristo a shämou fa läonö tä nowa mladamalema, bämacö nö wa̦lojaö fe yadiobä, bämacö nomaö quilii mlaobä. 58 Ö̦jö cudeenö, iba bämacö lä nofimaö wei wamacö, bä bufi da lofotoicu. Wamacö mojiblou mlai, Yai Bada lija wamacö yai ojodamou balafälöbä. Bada tä lä culadi tä lija wamacö ojodamou ja, wamacö nö nia bleaaö malä mlai.
161 Judea jamö Yai Bada wama ebä nia lä bayeliblaö wei ya tä a̦fa nia wäyäö majöo. Wama bä bayeliblabä, blada wama bä nia shimomaö, Calasia jamö Jesucristo ebä lä yododaö wei ya bä taamaö lä bufino weinaja showawä. 2 Wama bä blada lä doaö wei bä ja, domingo däjä showadi ai wama bä mashi fa sheleleblalönö, wama bä shimomabä. Bluca wama bä doaö ja, bluca wama bä nia sheleleblaö. Wiisibö wama bä blada däaö ja, wiisibö wama bä nia sheleleblaö. Yanöcö wama bä fa shimomalönö, wama bä blada ajedebou waiquio däjä ya waloobä. 3 Jelusale jamö blada wama bä ca̦i nia lä shimaö wei wama bä fa yaialalönö, ya bä shimajalobä. Ya fa co̦bonö, ya tä fa oniblalöjolonö, ya si jibäa fa showadacönö, Jelusaleteli bä lija si oni jibäadayobeje. Si oni lä doadayou wejei ja, cafä wamacönö wama bä lä dobäö wei tä ja, täbä moyawädayobä. 4 Camiyänö ya bä ca̦i fubä tä cua ja, ya bä ca̦i fulayou. 5 Masedonia tä ulufi jamö ya jayua fa balöicunö, cafä bämacö fe walolei. Ö̦jamö ya nia jayuo balöofälöö. 6 Ö̦jö däjä, cafä wamacö lija ya bälödia ja̦toquei fa cui. Tä maaböo däjä, ö̦jamö ya cudio fa balöonö, wamale fa bayeliblanö, ya fuu lä bufio wei jamö, dodijidawä wamale shimaö co̦o majöobä. 7 Bämacö möö jayuaö bufio bädaomi. Obi, Yai Bada tänö wale fumaö lä dodijio wei ja, dodijidawä bämacö shi̦lo bälödiobä. 8 Eja, Efesoteli bä lija ya yanöcöa lä cule. Showadi nii bä jaba lalou däjä bä lä iyaö wei ya tä nö dabou balöo. 9 Eja walalawä ya etä a̦ wäyädibä, Yai Bada tänö tä tabou waiquia lä cule. Bluca täbänö wale a̦ ji̦liaö bufi doblaa lä culajei. Täbä a̦ lä lämou wei täbä ca̦i bluca mö feduwä. 10 Cafä wamacö lijamö Timoteo a waloo ja, dodijidawä a ca̦i da bälöicöje. Yai Bada lija camiyä ya ojodamou lä culenaja, a ojodamou cuwä mö malä fedui. 11 Ai täbä lija wama a nö waiblamaö mlai. Wama a fa bayeliblanö, camiyä lija a waloo co̦obä, a bufi yanöcöwä ca̦i shimöa da co̦luje. Timoteonö Jesucristo ai ebä ca̦i lä fuu wei, ya bä nö bluca dabou lä cule. 12 Ö̦jö ma cui, camiyä ai bämacö mashi Abolo a lä cui, fei däjä wamacö fe nia waloomi. Cafä wamacö lija Jesucristo ai ebä ca̦i fubä ya wa̦ fadaama ma cui, a fuu mojio fa waiquionö a funomi. Obi a fubä etä cuo co̦o däjä, a fuu cuquei. 13 Bä nö da daicu. Jesucristo a nofi mölabou da shalilioje. Wamacö bufi quilii mlai, bä bufi da lofotoicu. Bä bufi nö da wa̦lojoicu. 14 Wama tä bluca lä taö wei, wamacö bufi nofiolanö wama tä tabä. 15 Bei, iba wamacö. Edefana wama a daö, cama ebä ca̦i. Acaya jamö Jesucristo a nofi mölabou showao mlaoje däjä, ö̦jö bänö tä a̦ jaba däa balölemaje. Yai Bada ebä bayeliblabeje, täbä noshi shi̦lo ö̦jödao dodijio talei. 16 Einaja täbä dodijaö lä cuaaö wei, wama täbä a̦ yai fuabä. Ö̦jö bä lä bayeliblaö wejei bä ma cui, wama bä a̦ ca̦i bluca fuaö mö feduobä. 17 Eja Edefana a waloquema, Fodunado a ca̦i, Acaico a ca̦i. Ö̦jö bä waloquema yalo ya bufi doblalou. Cafä wamacönö wamale nö bayeliblaö lä cuobö weinaja wale bayeliblaö cuaaöje yalo, ya bufi doblalou. 18 Wale bufi lofotodamaö co̦layomaje, cafä wamacö bufi lofotodamaö lä culayojolono wejeinaja showawä. Einaja täbä dodijaö lä cuaaö wei, wama täbä a̦ yai ji̦liaö dodijiobä. 19 Asia jamö Jesucristo ebä lä yododoblai bä lä cui, cafä wamacö lija bä a̦fa wäamou bufi doblao. Aquila a ma cui, bä suwäbö Blisila e ma cui, cama e yafi jamö Jesucristo ebä lä yododaö wei bä ca̦i bluca ma cui, ö̦jö bä a̦fa ca̦i wäamou bufi doblao. Bada tä lija wamacö cua yalo, bä a̦fa wäamou bufi doblaa fe balojoa lä cule. 20 Jesucristo ebä bluca ma cui, cafä wamacö lija bä a̦fa wäamou bufi doblaa lä cule. Jesucristo wama ecö mö fedudayou ja, bä yai da nofimayo. 21 Camiyä Pablonö bämacö bluca nofimaö yalo, ei bei ya imicö cadidiwänö ya si oniblaö lä cule. 22 Bada a bufibou lä mlajei bä lä cui, Yai Bada lija bä waimobä. ¿Ö̦jö tawä? Inaja lä tä cuobä. ¡Bada tä Jesucristo a itou lobaaö co̦imabä! 23 Bei. Bada tä Jesucristonö, showadi wamacö bayeliblabä. Wamacö nofi shi̦lo ojodabobä. 24 Jesucristo wama ecö yalo, bämacö bluca nofimaö.