Atiti

Gõn-sɛka tɩ Apolɩ gʋlsɛ bɔ

Atiti

Bilgre

Atiti de la Azezi karẽnbia, a dagɩ Zifu. A daan dolɩ la Apolɩ tõnna Nawẽnnɛ tõoma. Wakat-sɛka tɩ Apolɩ gʋlsɛ gõŋɔ wã bɔ ẽ na, Atiti boe la Krɛtɩ bɩsra Azezi nẽrba yelle tɩ sɛla woo ãna sõŋa.

Apolɩ dẽŋɛ pa’alɛ la Azezi nẽrba nẽŋadõma n masɛ tɩ ba ãna se’em (sapɩtrɩ 1).

A ken pa’alɛ Atiti la ẽn wʋn zãsʋm nẽrba buuri to’oto’ore n boe Wẽndeego la pʋam se’em, la sãn dɛna bõnkɛgsɩ, la pɔg-yã’asɩ (tɩ bãma mẽ zãsʋm pɔg-paalsɩ), la a zãsʋm bõnbɩ’ɩsɩ, la yamsɩ wuu (sapɩtrɩ 2).

Dee pa’alɛ Azezi nẽrba n masɛ tɩ ba ɩta se’em, wʋn tã’agɛ kẽ’era la taaba la sũ-yẽlʋm, tɩ nõke’ene, la welgre da bɔna ba tẽŋasʋka (3:1-11).

Gõŋɔ la ba’asgɔ, a pa’alɛ Atiti la ẽŋa n boorɩ tɩ a ẽŋɛ se’em, dee pʋ’ʋsɛ ẽ (3:12-15).

¹Mam Apolɩ n gʋlsɛ gõŋɔ wã, mam de la Nawẽnnɛ yamŋa, la Azezi-krisi Tõntõnna tɩ a tõm tɩ m mõolɛ a kõ-yẽlga tɩ sɛba tɩ Nawẽnnɛ looge la bɔ sɩra, dee bãŋɛ Nawẽnnɛ sɩra n pa’alɩ ban wʋn dɔla Nawẽnnɛ sore se’em. ²Tɩ tarɩ pʋtẽ’erɛ tɩ tɩ wʋn yẽ la vɔm n ka ba’asrɩ, tɩ Nawẽnnɛ n dagɩ põmpɔrma la daan bĩŋe nõorɛ halɩ tɩ dũnia nãn ka nãam. ³La wakatɛ n paagɛ la, a puke bõn-ẽŋa mɛ pa’alɛ a yetɔga pʋam, a dɩkɛ a yetɔga la ẽŋɛ la mam nu’usum tɩ m mõolɛ bɔ nẽrba, wʋ Nawẽnnɛ n de tɩ Fãagra n bɔ nõorɛ se’em na. ⁴Mam n gʋlsɛ gõŋɔ wã bɔ’ɔra Atiti n lebge mam mẽŋa bia, tõma n lagɩm dɔla Azezi-krisi la ĩyã. Tɩ Sɔ Nawẽnnɛ, la tɩ Fãagra Azezi-krisi wʋn ẽŋɛ fɔ a yel-sõnnɛ, dee bɔ fɔ a sũ-mã’asʋm.

Atiti n wʋn tõm se’em Krɛtɩ

⁵Mam n daan botɩ fʋ weege Krɛtɩ la, la de la fʋ malgɛ bõn-sɛba n deege dɛna ba malgɛ ba’asɛ la, la fʋ looge kẽma tẽŋa woo Nawẽnnɛ nẽrba pʋam wʋ mam n yele fʋ se’em na. ⁶Kẽema masɛ tɩ a dɛna la nẽra n ka tarɩ dõrga, la a dɛna pɔg-yẽŋa dãana, tɩ a kɔma bɔ Azezi-krisi sɩra, ka ɩta yooryooro, dee nanna nẽrba. ⁷Dẽnɩ tɩ nẽŋadãana n bɩsrɩ Nawẽnnɛ nẽrba yelle dɛna nẽra n ka tarɩ dõrga, la a da dɛna pa’al-m-mẽŋa dãana, bɩɩ sũ-isgre dãana, a da dɛna dã-yũura, bɩɩ zɛbzɛbra, bɩɩ nẽra n ɩtɩ sɛla n ka masɛ yẽta bõntarsõm. ⁸La masɛ mɛ tɩ a ɩta sãama sãanɔ, la a dɛna nẽra n nõŋɛ sɛla n ãn sõŋa ɩrgɔ, la a tara pʋtẽ’e-sõŋɔ, la a dɛna nẽra n masɛ sɛla woo pʋam, la a dɛna pʋpeelem dãana, la a tãna a mẽŋa yõkra. ⁹La masɛ tɩ a tara sɩra zãsŋɔ la kãŋkãŋɛ, wʋ ban zãsʋm ẽ se’em na, tɩ a wʋn tã’agɛ bɔ nẽrba bʋraanɛ tɩ ba dɔla sɩra zãsŋɔ la, dee tã’agɛ pa’alɛ sɩ’ɩsrɩba tɩ ba bãŋɛ ba koŋre.

¹⁰Se’ere n soe la, nẽrba zozo’e n boe dɛna sɩ’ɩsrɩba, la yetɔg-yooro dõma, dee pã’asra nẽrba. Lan gãnnɩ wuu, nẽr-bãma boe la Zifdõma n wãtɩ la pʋam. ¹¹La masɛ tɩ fʋ gu ba tɩ ba da tɔgra bɛla, tɩ ba zãsnɩ nẽrba la sɛla n ka masɛ, wã’ara nẽrba basɛba yiɛ, ba zãsnɩ sɛla n ka masɛ ɛɛra la bõntarsõm. ¹²Krɛtɩ dõma mẽŋa bãŋra ayɩla yʋʋn yetɩ: «Krɛtɩ dõma de la põmpɔrndõma wakatɛ wuu, la pʋtʋʋl-dõma ãna wʋ we-dũnsi la, ba de la zẽyãgsɩ dee tara pʋyã’anɛ.» ¹³Yel-ẽŋa de la sɩra, bɛla ĩyã, kã’an ba sõŋa sõŋa tɩ ba dɔla Nawẽnnɛ sɩra la sõŋa. ¹⁴Yele ba tɩ ba basɛ Zifdõma sɔlma, la bõn-sɛba tɩ nẽrba zagsɛ sɩra dee bɔ nõorɛ tɩ ba ɩta la. ¹⁵Sɛla woo ãn sõŋa mɛ bɔ nẽr-sɛka n de pʋpeelem dãana, la sɛka n de tõon-dẽgrɔ dãana ka sakra Nawẽnnɛ, sɛla sɛla ka boe n ãn sõŋa bɔ ẽ. Ẽŋa pʋtẽ’erɛ, la a yɛm wuu ki mɛ. ¹⁶Ba yetɩ bãma mi Nawẽnnɛ mɛ, la ba tõoma la pa’alɩ tɩ ba sɩ’ɩsrɩ Nawẽnnɛ mɛ. Ba de la nẽr-bɛ’ɛsɩ gãŋɛ, la ba ka sakrɩ Nawẽnnɛ nõorɛ, dee ka tãna wʋn tõm tõon-sõŋɔ.

Zãsʋm nẽrba sɩra

¹La fõn, zãsʋm nẽrba la bõn-sɛba n masɛ la sɩra zãsŋɔ la. ²Zãsʋm bʋra-yã’asɩ tɩ ba tara ba mẽŋa sõŋa, ba dɛna nẽrba tɩ ba nannɩ, ba tara pʋtẽ’e-sõŋɔ, la ba dɛna nẽrba n dolɩ Nawẽnnɛ sɩra la sõŋa, ba tara nõŋlʋm, dee dɛna nẽrba n mã’agɛ ba sũure sẽnna nẽŋa.

³Yele pɔg-yã’asɩ tɩ ba yel-ɩrɛ pʋam ba dɛna pʋpeelem dõma, la ba da dɛna gõngõ’osrɩba, ba da dɛna nẽrba n dɩkɛ ba mẽŋa bɔ dãam. Ba pa’ala sɛla n ãn sõŋa, ⁴ba pa’ala pɔg-bɩ’ɩsɩ tɩ ba nõŋɛ ba sɩrba, la ba kɔma, ⁵tɩ ba tara pʋtẽ’e-sõŋɔ, tɩ ba da ɩta dẽgrɔ, tɩ ba dɛna pɔg-mẽnsɩ, la pɔg-sõma, tɩ ba sakra ba sɩrba, tɩ nẽrba da pɔ’ɔgɛ Nawẽnnɛ kõ-yẽlga la.

⁶Kã’an kɔmbɩ’ɩsɩ la mẽ tɩ ba tara ba mẽŋa sõŋa sɛla woo pʋam. ⁷Fõn mẽŋa botɩ fʋ yel-ɩrɛ wuu ãna sõŋa, pa’alɛ ba ban wʋn ãna se’em, la fʋ zãsʋm nẽrba Nawẽnnɛ yetɔga la sɩra, la ninmõ’orɛ. ⁸La fʋ tɔgra sɩra tɩ ba da tã’agɛ zɛrgɛ fɔ, tɩ yãnnɛ wʋn yõkɛ sɛba n sɩ’ɩsrɩ la, ban kãn yẽ sɛla n de be’em tɩ zẽ’am tɔgɛ la ĩyã.

⁹Yele yamsɩ tɩ ba sakra ba zuudãandõma sɛla woo pʋam, ɩta ba sũure yẽlʋm, ba da zagsɛ ba nõorɛ, ¹⁰la ba da zũura ba lɔgrɔ. Ba tõnna tõon-sõma pa’alɛ tɩ bãma de la sɩra dõma, bɛla tɩ Nawẽnnɛ n de tɩ Fãagra zãsŋɔ la wʋn yẽta pẽka sɛla woo pʋam.

¹¹Bẽm ĩyã, Nawẽnnɛ botɩ tɩ bãŋɛ a yel-sõnnɛ la n de fãarɛ bɔ nẽrsaalba wuu la mɛ. ¹²A zãsnɩ tõma tɩ tɩ basɛ la sɛla n ka dolɩ Nawẽnnɛ sore, la dũnia nẽrba n boorɩ sɛla la, dee vɔa dũnia wã zuo la pʋtẽ’e-sõŋɔ, la sɩra, dee dɔla Nawẽnnɛ sore sõŋa. ¹³Bɛla tɩ tɩ wʋn tara pʋtẽ’erɛ gu’ura sũ-yẽlga daarɛ la, daar-ẽŋa Azezi-krisi n wʋn leme wa’am la a na’am pãŋa. Ẽŋa n de tõma Nawẽnnɛ, la tɩ Fãagra. ¹⁴Ẽŋa n dɩkɛ a vɔm bɔ tõma ĩyã, tɩ a fãagɛ tɔ tõon-be’ero wuu pʋam, dee basɛ tɩ tɩ malgɛ ãna sõŋa dɛna a mẽŋa nẽrba, mõrgɛ tõnna tõon-sõma.

¹⁵La de la bɛla tɩ fʋ wʋn zãsʋm ba, bɔ ba bʋraanɛ, dee kã’an ba. Ẽŋɛ bɛla la nõorɛ sɛka tɩ fʋ tarɩ la. Da basɛ tɩ nẽra pɔ’ɔgɛ fɔ.

Nawẽnnɛ nẽrba yel-ɩrɛ n wʋn ãna se’em

¹Tẽegɛ ba wuu yetɩ la masɛ mɛ tɩ ba nanna tẽŋa la nẽŋadõma, la kɛ’ɛndõma dee sakra ba nõorɛ, dee tõnna tõon-sõma buuri wuu. ²Ba da tɔgra nẽrba be’em, ba da dɛna zɛbzɛbrɩba, la ba dɛna nẽrba n tarɩ sũ-mã’asʋm, dee ɩta sũ-bʋgsʋm la nẽrba wuu.

³Tõma mẽ daan de la nẽrba n ka mi sɛla, la sɩ’ɩsrɩba, la nẽrba n bʋrgɛ ka dɔla sɩra sore, tɩ tõma yɛmleego, la bõn-yooro tɩ tõma boorɩ la sɔna tõma. Tõma daan vɔa la pʋtʋʋlgɔ pʋam, ɩta sũure la tɩ taaba bõnɔ, dee dɛna nẽrba tɩ ba ka nõŋɛ, dee sisra taaba.

⁴La Nawẽnnɛ n de tɩ Fãagra la n wa pa’alɛ nẽrsaalba a yel-sõnnɛ, la a nõŋlʋm na, ⁵a fãagɛ tɩ mɛ, la, la dagɩ tɩn tõm tõon-sõma ĩyã, la de la a mẽŋa ninbãal-zʋa ĩyã tɩ a fãagɛ tɔ. A botɩ a Sɩa la n peege tõma sũure dẽgrɔ botɩ tɩ lebge nẽr-paalsɩ tara vɔm paalga. ⁶La de la Azezi-krisi n de tɩ Fãagra la ĩyã, tɩ Nawẽnnɛ bɔ tɔ a Sɩa la sõŋa sõŋa, ⁷tɩ a yel-sõnnɛ na botɩ tõma masɛ a nẽŋam, lebge a kɔma wʋn yẽ vɔm n ka ba’asrɩ tɩ tõma tarɩ pʋtẽ’erɛ gu’ura la.

⁸Yetɔg-ẽna de la sɩra. Bɛla tɩ mam bɔɔra tɩ fʋ mõrgɛ pa’alɛ ba yel-bãma, tɩ nẽr-sɛba n bɔ Nawẽnnɛ sɩra la mõrgɛ tõnna tõon-sõma. Yel-bãma n ãn sõŋa dee tara yõorɔ bɔ’ɔra nẽrba. ⁹La sãn dɛna nõke’en-yooro, la yaabdõma deto kãalgɔ, la nõkɛ’ɛma wẽ’a Zifdõma lɔɔ la yɛla, zãagɛ fʋ mẽŋa la bõn-bãma, se’ere n soe la, ba ka tarɩ yõorɔ, ba de la zãŋa. ¹⁰Nẽra sãn tara welgre sẽnna, fʋ kã’an ẽ nõorɛ ayi, tɩ a sãn ken zagsɛ, fʋ basɛ ẽ, la ya da le tara yetɔga la ẽ. ¹¹Tɩ fʋ mi tɩ nẽr-ẽŋa buuri bʋrgɛ mɛ basɛ sɩra sore, dee tõnna tõon-be’ero n pa’alɩ tɩ a kãn yẽ bʋʋrɔ.

Ba’asgɔ yetɔga, la pʋ’ʋsgɔ

¹²Mam wʋn tõm na Artemasɩ bɩɩ Atisiki fʋ zẽ’am, a sãn wa’am, fʋ nargɛ pãŋa wa’am mam zẽ’am Nikopoli, tɩ mam looge yɛm tɩ m bɔna la bilam tɩ ɔɔrɔ wakatɛ tole. ¹³Mõrgɛ bɩsɛ Azenaasɩ n de yetɔg-mita, la Apolɔsɩ sore sẽnnɛ na yelle, tɩ sɛla da pɔ’ɔgɛ ba. ¹⁴Tõma nẽrba la masɛ mɛ tɩ ba zãsʋm tõnna tõon-sõma tɩ la sõŋɛ sɛba n boorɩ sõŋrɛ la, dee da vɔa vɔm n ka tarɩ yõorɔ.

¹⁵Nẽr-sɛba n boe la mam na wuu pʋ’ʋsrɩ fɔ. Pʋ’ʋsɛ nẽr-sɛba n bɔ Azezi sɩra nõŋɛ tõma la.

Nawẽnnɛ yel-sõnnɛ wʋn bɔna la ya wuu.