Pukre

Pukre Gõŋɔ

Bilgre

Azã yʋʋn gʋlsɛ gõn-ẽna wã la wakat-sɛka tɩ Rom na-keko nãmsrɩ Azezi nẽrba zozo’e, ban yetɩ Azezi mã’a n de bãma Zuudãana, dee ka nã’asra na-keko la wʋ Nawẽnnɛ na ĩyã.

Wakat-sɛka tɩ Azã gʋlsɛ gõŋɔ wã la, tɩ a yʋʋn boe la Patmõsɩ, tẽŋa tɩ ko’om gilge. Ba yʋʋn yõkɛ ẽ mɛ sẽŋɛ ka basɛ bilam, ẽn mõolɛ Azezi kõ-yẽlga la ĩyã.

Azã gʋlsɛ tɩ a botɩ Azezi nẽrba n yẽ bʋraanɛ, la ba ken tara pʋtẽ’erɛ gu’ura sɛla tɩ Nawẽnnɛ wʋn bɔ ba, Azezi n yãŋɛ sɛla woo la ĩyã.

Gõn-ẽna pʋam, mãmsgɔ zozo’e n boe mĩ n ze’ele Nawẽnnɛ gõn-kɛka la pʋam. Nimõrɔdõma zozo’e n boe mĩ n de yɛla mãmsgɔ.

Azã yetɩ Azezi n dẽŋɛ puke a mẽŋa pa’alɛ ẽŋa, yetɩ ẽŋa gʋlsɛ gõnnɔ bɔ Wẽnde-sɛba n boe Azi-minɛɛrɩ tẽnsɩ bayopɔɩ pʋam (sapɩtrɩ 1-3).

Bɛla poorʋm, Nawẽnnɛ Sɩa tarɩ ẽŋa sẽŋɛ la Nawẽnnɛ yire ka pa’alɛ ẽŋa yɛla zozo’e:

- Ban nã’asrɩ Nawẽnnɛ, la Azezi se’em (sapɩtrɩ 4-5).

- Azezi n lakɛ gõŋɔ n tabɛ zẽ’esɩ bʋyopɔɩ (sapɩtrɩ 6-8).

- Malɛgsɩ n peebe benkɔma bayopɔɩ (sapɩtrɩ 8-11).

- Bõna bayopɔɩ n de dãalgɔ (sapɩtrɩ 12-15).

- Nawẽnnɛ sũ-isgre n pɩrɛ laasɩ bayopɔɩ (sapɩtrɩ 16).

- Babilɔnɩ n de tẽn-kãtɛ n sã’am, la ban sã’am Asũtãana la a poorʋm dõma (sapɩtrɩ 17-20).

- Nawẽnnɛ tẽn-paalga, la Azezi lemŋo (sapɩtrɩ 21-22).

Bõn-sɛba tɩ Azã yẽ la, de la bõna buuri to’oto’ore mãmsgɔ n kẽ’erɩ taaba pʋam. Nẽrba n wõnnɩ gõŋɔ wã bõndõma basɛba võorɛ se’em na, de la to’oto’ore.

Baa la bɛla, a yetɔg-zuugo la de la ayɩla. Azezi-krisi yãŋɛ sɛla woo mɛ. Asũtãana, la bõn-be’ero sɛba n ken bɔna lɛɛlɛ wã, Nawẽnnɛ wʋn sã’am ba ba’asɛ mɛ. La sɛba n bɔ Nawẽnnɛ sɩra yãŋɛ, wʋn yẽ sũ-yẽlga n ka ba’asrɩ.

Bõn-sɛba tɩ Azezi-krisi puke pa’alɛ Azã

¹Gõŋɔ wã tarɩ la sɛla tɩ Azezi-krisi puke pa’alɛ. Nawẽnnɛ n daan bɔ ẽ bõn-bãma tɩ a pa’alɛ a tõntõnɩba sɛla n wʋn ẽŋɛ wakatɛ fẽfẽe pʋam. Azezi-krisi daan tõm na a malɛka a tõntõnna Azã zẽ’am tɩ a pa’alɛ ẽ bõn-bãma. ²Azã n gʋlsɛ sɛla wuu tɩ a yẽ la pa’alɛ tɩ la de la Nawẽnnɛ yetɔga tɩ Azezi-krisi puke pa’alɛ ẽŋa. ³Nẽr-sɛka n karẽŋrɩ Nawẽnnɛ yetɔga tɩ a to’oge tɔgɛ wã, la sɛba n selsrɩ bõn-sɛba n gʋlsɛ gõn-ẽna wã pʋam dee sakra ba tarɩ zu-yẽlga. Wakatɛ la lɛm mɛ, tɩ bɛla wuu wʋn ẽŋɛ.

Azã pʋ’ʋsrɩ Nawẽnnɛ nẽrba n lagsrɩ tẽnsɩ bayopɔɩ

^4-5Mam Azã n gʋlsɛ gõŋɔ wã bɔ’ɔra tẽnsɩ bayopɔɩ n boe Azi so’olʋm pʋam na Wẽndeto nẽrba. Zuudãana Nawẽnnɛ n daan boe, n ken bɔna, dee wʋn bɔna wakatɛ wuu la, la sɩɩsɩ bayopɔɩ n boe a na’am bĩmbĩnne nẽŋam, la Azezi-krisi n tɔgrɩ Nawẽnnɛ yelle sɩra, ẽŋa n ki dee dɛna pɔspɔsɩ dãana n vo’oge, dɛna dũnia na’adõma naba la, wʋn ẽŋɛ ya yel-sõnnɛ, dee bɔ ya sũ-mã’asʋm.

Azezi-krisi nõŋɛ tõma mɛ, ki tɩ a zɩɩm fãagɛ tõma tõon-be’ero pʋam, ⁶botɩ tõma dɛna a so’olʋm kãabgɔ kẽma tõnna bɔ’ɔra Nawẽnnɛ n de a Sɔ la. Ẽŋa n soe nã’asgɔ, la pãŋa wakatɛ n ka ba’asrɩ. Amina.

⁷Bɩsɛ-ya, a boe la sawara pʋam sẽna. Nẽrsaalba wuu wʋn yẽ ẽ, baa la nẽr-sɛba n daan lʋ ẽ na. Buuri wuu nẽrba n boe dũnia wʋn kɛlla mɛ fabla a yelle. Ẽe, la de la bɛla. Amina.

⁸Zuudãana Nawẽnnɛ n de ke’eŋo wuu dãana la yetɩ: «Mam de la pĩ’iluŋo la ba’asgɔ, mam n daan boe, n ken bɔna, dee wʋn bɔna wakatɛ wuu.»

Azã yẽ Azezi-krisi wʋ zãasŋɔ la

⁹Mam de la Azã n de ya sɔbia n po nãmsra, lagɩm na yãma po tara pʋrɛ Nawẽnnɛ so’olʋm na pʋam, ken po lagɩm na yãma mõrgra sẽnna nẽŋa Azezi doosgo la pʋam. Mam daan tɔgɛ la Nawẽnnɛ yetɔga, la Azezi-krisi yelle, tɩ ba tarɩ mam sẽŋɛ tẽŋa tɩ ko’om gilge yʋ’ʋrɛ n de Patmõsɩ. ¹⁰Tɩ Zuudãana daarɛ n de Lasrɩ daarɛ la, tɩ Nawẽnnɛ Sɩa bɔna la mam, botɩ mam wõm kõa n tɔgɛ ke’enke’em mam poorʋm wʋ benkonne n peebe la, ¹¹yetɩ: «Gʋlsɛ sɛla tɩ fʋ wʋn yẽ la ẽŋɛ gõŋɔ pʋam, soolʋm bɔ tẽnsɩ bayopɔɩ la Wẽndeto nẽrba: Efɛɛzɩ, la Simirni, la Pɛrgamɩ, la Tiyatiiri, la Sardɩ, la Filadɛlfi, la Laodise.»

¹²Tɩ mam wẽrgɛ tɩ m bɩsɛ sɛka n tɔgrɩ la mam na, la mam n wẽrgɛ la, mam yẽ la sãlma fɩtladõma bayopɔɩ. ¹³La nẽra n boe fɩtladõma la tẽŋasʋka ãna wʋ nẽrsaala dayʋa la. A yɛ la fuugo n wɔgɛ sige paagɛ a nãma, dee dɩkɛ sãlma sẽbrɩga bobe a yõ’ogɔ. ¹⁴A zomto daan pelge mɛ ãna yɩlɩ yɩlɩ wʋ lɔnnɔ na, tɩ a nini ãna wʋ bugwitum na.

¹⁵A nãma daan yẽgrɩ wʋ zũuro tɩ ba zuge ba bugum pʋam na, dee tɩ a kõa la ãna wʋ ko-kãtɛ dãmŋɔ la. ¹⁶A daan zãlɩ la wõrbiɛ bayopɔɩ la a zʋʋgɔ nu’ugo. Tɩ sʋkɔbgɔ n saasɛ tara nõa ayi ze’ele a nõorʋm yɛsra. A nẽŋa daan yẽgrɩ wʋ wʋntɛɛŋa n ãn se’em na.

¹⁷Mam n daan yẽ ẽ na, mam lui la tẽŋa a nẽŋam ãna wʋ kũm na. Tɩ a dɩkɛ a zʋʋgɔ nu’ugo paglɛ mam zuo yetɩ: «Da zoe dabeem, tɩ mam n de pĩ’iluŋo, la ba’asgɔ. ¹⁸Mam de la sɛka n vɔɩ. Mam daan ki mɛ, la mam n wãna, mam vɔa mɛ wakatɛ wuu. Mam n tarɩ ke’eŋo sɔna kũm, la kɩ’ɩn-tẽŋa. ¹⁹Bɛla, gʋlsɛ bõn-sɛba tɩ fʋ yẽ, sɛla n boe lɛɛlɛ wã, la sɛla n wʋn wa ẽŋɛ poorʋm na. ²⁰Wõrbiɛ bayopɔɩ tɩ fʋ yẽ mam zʋʋgɔ nu’ugo pʋam, la sãlma fɩtladõma bayopɔɩ la võorɛ n wãna: Wõrbiɛ bayopɔɩ la de la tẽnsɩ bayopɔɩ la Wẽndeto la nẽrba gu’urba, la fɩtladõma bayopɔɩ la de la tẽnsɩ bayopɔɩ la Wẽndeto nẽrba.»

Krisi kõa tɩ a bɔ Efɛɛzɩ Wẽndeego nẽrba

¹Sɛka tɩ mam yẽ la, a ken yele mam yetɩ: «Gʋlsɛ bɔ Efɛɛzɩ Wẽndeego nẽrba la gu’ura yetɩ: Sɛka n zãlɩ wõrbiɛ bayopɔɩ a zʋʋgɔ nu’ugo pʋam, dee sẽnna sãlma fɩtladõma bayopɔɩ tẽŋasʋka la n yele se’em n wãna:

²‹Mam mi yãma n tõnnɩ se’em, yãma n nãmsrɩ dee mõrgra sẽnna nẽŋa se’em mɛ. Mam mi tɩ ya ka sakɛ basɛ tɩ nẽr-wẽensɩ tõnna la ya. Yãma makɛ nẽr-sɛba n yetɩ bãma de la Krisi Tõntõnɩba dee dagna bɛla la bɩsɛ mɛ, la yãma bãŋɛ mɛ tɩ ba de la põmpɔrndõma. ³Yãma mõrgɛ sẽnna nẽŋa mɛ, ya nãmsrɩ mam yʋ’ʋrɛ la ĩyã mɛ, dee ka basɛ tɩ ya bʋraanɛ bo’oge. ⁴La yel-sɛka tɩ mam tarɩ la yãma n wãna: Ya ka le nõŋɛ mam wʋ yãma n daan nõŋɛ mam se’em pɔspɔsɩ la. ⁵Tẽegɛ-ya yãma n daan ɩtɩ se’em dee basɛ la. Teege-ya yɛm basɛ tõon-be’ero, dee ɩta yãma n daan ɩtɩ se’em pɔspɔsɩ la. Sãn dagna bɛla, mam wʋn wa’am ya zẽ’am wa dɩkɛ ya fɩtla la a dɔglgɔ zẽ’am mɛ, ya sãn ka teege yɛm basɛ tõon-be’ero. ⁶La baa bɛla, ya ɩtɩ bõn-sõŋɔ mɛ. Yãma sise sɛla tɩ Nikolayiti nẽrba ɩtɩ la mɛ, wʋ mam n mẽ sise ba tõoma se’em na.

⁷Sɛka n wõm yetɔga wã, a selse Nawẽnnɛ Sɩa n yetɩ a nẽrba se’em na sõŋa sõŋa. Sɛka n yãŋɛ, mam wʋn bɔ ẽ nõorɛ tɩ a di vɔm tɩa n boe Nawẽnnɛ yire la biɛ.› »

Krisi kõa tɩ a bɔ Simirni Wẽndeego nẽrba

⁸«Gʋlsɛ bɔ Simirni Wẽndeego nẽrba la gu’ura yetɩ: Sɛka n de pĩ’iluŋo la ba’asgɔ, sɛka n daan ki dee vo’oge la n yele se’em n wãna:

⁹‹Mam mi ya nãmsgɔ la ya nõŋɔ la yelle mɛ, la baa bɛla, ya de la bõntatba. Mam mi be’em yetɔg-sɛba tɩ nẽr-sɛba n yetɩ bãma de la Zifdõma dee ka dɛna la tɔgɛ ya. Ba de la Asũtãana nẽrba. ¹⁰Da zoe-ya dabeem yãma n wʋn nãmsɛ la. Bɩsɛ-ya, Asũtãana wʋn makɛ ya bɩsɛ mɛ, botɩ ba kẽ’esɛ ya nẽrba basɛba yʋ’a deem, la ya wʋn yẽ nãmsgɔ mɛ dabsa pia. Bɔ-ya mam sɩra halɩ ka paagɛ ya kũm, tɩ mam wʋn bɔ ya bɔ’a n de vɔm.

¹¹Sɛka n wõm yetɔga wã, a selse Nawẽnnɛ Sɩa n yetɩ a nẽrba se’em na sõŋa sõŋa. Sɛka n yãŋɛ, kũm bʋyi dãana kãn ẽŋɛ ẽ sɛla.› »

Krisi kõa tɩ a bɔ Pɛrgamɩ Wẽndeego nẽrba

¹²«Gʋlsɛ bɔ Pɛrgamɩ Wẽndeego nẽrba la gu’ura yetɩ: Sɛka n tarɩ sʋkɔbgɔ n saasɛ tara nõa ayi la n yele se’em n wãna:

¹³‹Mam mi zẽ’e-sɛka tɩ yãma boe la mɛ, zẽ’e-ẽŋa tɩ Asũtãana na’am bĩmbĩnne boe. La ya dɩkɛ ya mẽŋa lablɛ la mam mɛ, ze’ele kãŋkãŋɛ bɔ mam sɩra ka basɛ, baa la wakatɛ sɛka tɩ ba daan kʋ A’ãntipasɩ n de sɩra dãana n tɔgɛ mam yelle ya zẽ’am, zẽ’e-sɛka tɩ Asũtãana boe la. ¹⁴La baa bɛla, mam tarɩ la yelle fẽe la ya. Yãma tarɩ la nẽrba n boe ya pʋam dɔla Abalaam zãsŋɔ. Abalaam yʋʋn zãsʋm na Abalakɩ ẽn wʋn ẽŋɛ se’em bẽrɛ Ɩsrayɛlɩ dõma botɩ ba obe baga nẽnnɔ, dee tõm yalsɩ tõoma. ¹⁵Yãma mẽ tarɩ la nẽrba basɛba n boe ya zẽ’am n dolɩ Nikolayiti dõma zãsŋɔ. ¹⁶Teege-ya yɛm basɛ tõon-be’ero. Sãn dagna bɛla, mam wʋn wa’am ya zẽ’am lɛɛlɛ wã, la mam wʋn zɛbɛ la nẽr-bãma la sʋkɔbgɔ n ze’ele m nõorʋm yɛsra la.

¹⁷Sɛka n wõm yetɔga wã, a selse Nawẽnnɛ Sɩa n yetɩ a nẽrba se’em na sõŋa sõŋa. Sɛka n yãŋɛ, mam wʋn bɔ ẽ dia n sʋgɛ yʋ’ʋrɛ n de mannɩ n ze’ele saazuum tɩ a di, la mam wʋn bɔ ẽ kug-pɛɛlga. Kug-ẽŋa zuo yʋ’ʋr-paalɛ n gʋlsɛ mĩ, tɩ nẽra nẽra ka mina ẽ, sãn dagna sɛka n to’oge ẽ na mã’a.› »

Krisi kõa tɩ a bɔ Tiyatiiri Wẽndeego nẽrba

¹⁸«Gʋlsɛ bɔ Tiyatiiri Wẽndeego nẽrba la gu’ura yetɩ: Nawẽnnɛ Dayʋa la nini n ãn wʋ bugwitum, tɩ a nãma yẽgra wʋ zũuro tɩ ba zuge bugum pʋam na n yele se’em n wãna:

¹⁹‹Mam bãŋɛ ya tõoma, la ya nõŋlʋm, la yan bɔ sɩra, la yan tõm bɔ nẽrba, la yan mõrgɛ sẽnna nẽŋa se’em mɛ. La mam mi tɩ ya tõnnɩ lɛɛlɛ wã zɔ’ɔra gãnna yan tõm se’em pɔspɔsɩ la mɛ. ²⁰La yel-sɛka tɩ mam tarɩ la yãma n wãna: La de la yan sakɛ basɛ Azezabɛlɩ n de pɔka n yetɩ ẽŋa de la Nawẽnnɛ nõtɔ’ɔsa, tɩ a zãsna nẽrba, pã’asra mam tõntõnɩba tɩ ba ɩta yalsɩ, dee ɔbra baga nẽnnɔ na. ²¹Mam bɔ ẽ na wakatɛ tɩ a teege yɛm basɛ tõon-be’ero, la a ka boorɩ tɩ a teege yɛm basɛ a yalsɩ tõoma la. ²²Bɛla, mam wʋn basɛ tɩ a gã’arɛ yẽ nãmsgɔ zozo’e. La sɛba n lagɩm na ẽ tõnna yalsɩ tõoma la wʋn yẽ toogo zozo’e, sãn dagna tɩ ba basɛ la tõon-be’e-sɛba tɩ a botɩ ba tõnna la. ²³Mam wʋn ken basɛ tɩ a kɔma ki, tɩ Wẽndeto nẽrba la wuu wʋn bãŋɛ tɩ mam de la sɛka n mi nẽrba tẽ’esgɔ, la ban boorɩ se’em. La mam wʋn yɔ ya nẽra woo masɛ wʋ ẽn tõnnɩ se’em. ²⁴La yãma Tiyatiiri nẽr-sɛba n ka sakrɩ zãsŋɔ bãma, dee ka mina sɛla tɩ ba wi’iri tɩ Asũtãana yɛla n sʋgɛ la, mam ka tarɩ sɛla wʋn yele ya pa’asɛ. ²⁵La gʋrɛ-ya sɛla tɩ ya tarɩ la kãŋkãŋɛ halɩ tɩ mam wa wa’am. ²⁶Nẽr-sɛka n yãŋɛ ẽŋɛ mam n boorɩ se’em ka paagɛ ba’asgɔ, mam wʋn botɩ a sɔna so’olʋm buuri wuu. ^27-28La de la pãn-sɛka tɩ mam to’oge m Sɔ Nawẽnnɛ zẽ’am na tɩ mam wʋn bɔ ẽ. A wʋn tara la kuto dasaarɛ sɔna ba wʋ ban wõtɩ lɔg-kɛgsɩ la. La mam wʋn ken bɔ ẽ bewã’arɛ.

²⁹Sɛka n wõm yetɔga wã, a selse Nawẽnnɛ Sɩa n yetɩ a nẽrba se’em na sõŋa sõŋa.› »

Krisi kõa tɩ a bɔ Sardɩ Wẽndeego nẽrba

¹«Gʋlsɛ bɔ Sardɩ Wẽndeego nẽrba la gu’ura yetɩ: Sɛka n tarɩ Nawẽnnɛ sɩɩsɩ bayopɔɩ, la wõrbiɛ bayopɔɩ la n yele se’em n wãna: ‹Mam mi ya tõoma mɛ, fʋ yʋ’ʋrɛ yese mɛ tɩ ba yetɩ ya vɔa mɛ, la, ya ki mɛ. ²Bɛla, guuse ya mẽŋa, tɩ sɛla n deege la a ki la, yãagɛ da ki ba’asɛ. Se’ere n soe la, mam bãŋɛ mɛ tɩ ya tõoma la ka paagɛ Nawẽnnɛ yɛm. ³Tẽegɛ-ya zãsŋɔ la tɩ ya daan wõm dee to’oge ẽ se’em na, sakɛ-ya ẽ teege yɛm basɛ tõon-be’ero. Ya sãn ka guuse, mam wʋn wa’am wa di’ige ya wʋ nayiga la, la ya kãn bãŋɛ wakat-sɛka tɩ mam wʋn wa’am ya zẽ’am. ⁴La nẽrba basɛba n boe yãma pʋam Sardɩ ka dẽgɛ ba futo. Bãma n wʋn yɛ fu-pɛɛlsɩ doose mam, bãma n masɛ la ĩyã. ⁵Nẽr-sɛka n yãŋɛ wʋn wa yɛ la fu-pɛɛlsɩ bɛla, la mam kãn saam a yʋ’ʋrɛ vɔm gõŋɔ la pʋam. La mam wʋn wi a yʋ’ʋrɛ mam Sɔ, la a malɛkadõma la nẽŋam yetɩ a de la mam nẽra.

⁶Sɛka n wõm yetɔga wã, a selse Nawẽnnɛ Sɩa n yetɩ a nẽrba se’em na sõŋa sõŋa.› »

Krisi kõa tɩ a bɔ Filadɛlfi Wẽndeego nẽrba

⁷«Gʋlsɛ bɔ Filadɛlfi Wẽndeego nẽrba la gu’ura yetɩ: Sɛka n de pʋpeelem dãana, la sɩra dãana n tarɩ naba Adavidi kʋlɩnbiɛ, sɛka n yʋ’ʋrɩ tɩ nẽra ka tãna yɔ’ɔra, dee yɔ’ɔra tɩ nẽra ka tãna yʋ’ʋra la n yele se’em n wãna:

⁸‹Mam mi ya tõoma mɛ, mam mi tɩ ya pãŋa ka zo’oge, la baa la bɛla, ya sakɛ mam yetɔga la mɛ, la ya ka sɩ’ɩsɛ tɩ yãma ka mi mam. Mam yo’oge la sore bɔ ya, la nẽra nẽra kãn yãŋɛ yʋ ẽ. ⁹Mam n wʋn ẽŋɛ nẽr-sɛba n dolɩ Asũtãana la se’em n wãna: Nẽr-bãma yetɩ bãma de la Zifdõma, la dagɩ bɛla, ba de la põmpɔrndõma. Mam wʋn basɛ mɛ tɩ ba wa’am wa ka dũma ya nẽŋam, la ba wʋn bãŋɛ tɩ mam nõŋɛ ya. ¹⁰Yãma n sakɛ mam yetɔga la mõrgɛ sẽŋɛ nẽŋa na ĩyã, mam mẽ wʋn gu’ura ya sõŋa tɩ toogo sɛka n sẽm dũnia wuu zuo, tɩ a makɛ nẽr-sɛba wuu n boe dũnia zuo la, da paagɛ ya. ¹¹Mam sẽm na lɛɛlɛ, gʋrɛ-ya sɛla tɩ ya tarɩ la kãŋkãŋɛ, tɩ nẽra da to’oge ya yɔɔrɔ. ¹²Nẽr-sɛka n yãŋɛ, mam wʋn botɩ a ãna wʋ zẽerɛ mam Sɔ Nawẽnnɛ yire pʋam, la ba kãn malɩn yese ẽ mĩ. La mam wʋn gʋlsɛ mam Sɔ Nawẽnnɛ yʋ’ʋrɛ, la a tẽŋa n de Zerizalɛm paalga n ze’ele saazuum Nawẽnnɛ zẽ’am signa la yʋ’ʋrɛ a zuo, la mam wʋn ken gʋlsɛ mam mẽŋa yʋ’ʋr-paalga la a zuo.

¹³Sɛka n wõm yetɔga wã, a selse Nawẽnnɛ Sɩa n yetɩ a nẽrba se’em na sõŋa sõŋa.› »

Krisi kõa tɩ a bɔ Laodise Wẽndeego nẽrba

¹⁴«Gʋlsɛ bɔ Laodise Wẽndeego nẽrba la gu’ura yetɩ: Sɛka n de Amina la, sɛka n de sɩra dãana, dee sɩrɩ tɔgra sɛla tɩ a nini yẽ, dee ken dɛna sɛka tɩ Nawẽnnɛ n nãam sɛla wuu ze’ele a zẽ’am n yele se’em n wãna:

¹⁵‹Mam mi ya tõoma mɛ, mam mi tɩ ya dagɩ mã’asga, ya mẽ dagɩ tʋʋlga. Mam boorɩ nɩ tɩ ya dɛna la mã’asga bɩɩ tʋʋlga. ¹⁶La yãma n ka de mã’asga bɩɩ tʋʋlga mam tõoma la pʋam, dee ãna wam na, mam wʋn ʋkɛ ya mɛ m nõorʋm basɛ.

¹⁷Ya yetɩ yãma de la bõntatba, yãma tarɩ sɛla woo mɛ tɩ sɛla ka pɔ’ɔgɛ yãma. La, ya ka mi tɩ ya de la ninbãal-dõma, la farɛ dõma. Ya de la nasdõma, la bɛɛla, la fɔɔsɩ. ¹⁸Bɛla ĩyã, mam kã’anɩ ya mɛ tɩ ya da sãlma mẽŋa mẽŋa tɩ ba zuge bugum pʋam yese ba mam zẽ’am, tɩ ya wʋn sɩrɩ dɛna bõntatba. La ya da fu-pɛɛlsɩ yɛ pĩ ya yãnnɛ na, dee da tɩɩm dõ ya nini yẽta. ¹⁹Mam sɩbgrɩ la sɛba wuu tɩ mam nõŋɛ, dee dɛmsra ba. Bɛla, nargɛ-ya pãŋa teege yɛm basɛ tõon-be’ero. ²⁰Bɩsɛ-ya, mam ze la kʋlɩŋa nõorʋm wẽ’era, nẽr-sɛka n wõm mam kõa yo’oge kʋlɩŋa bɔ mam, mam wʋn kẽ a zẽ’am lagɩm na ẽ di, tɩ a mẽ lagɩm na mam di. ²¹Nẽr-sɛka n yãŋɛ, mam wʋn botɩ a lagɩm na mam po zĩ’ire mam na’am bĩmbĩnne zuo, wʋ mam yãŋɛ po lagɩm na mam Sɔ Nawẽnnɛ zĩ’ire a na’am bĩmbĩnne zuo la.

²²Sɛka n wõm yetɔga wã, a selse Nawẽnnɛ Sɩa n yetɩ a nẽrba se’em na sõŋa sõŋa.› »

Ba nã’asrɩ Nawẽnnɛ saazuum

¹Bɛla poorʋm, mam bɩsɛ mɛ yẽ tɩ kʋlɩŋa n yo’oge Nawẽnnɛ yire. Tɩ kõa la tɩ mam wõm pɔspɔsɩ n tɔgɛ la mam wʋ benkonne n peebe la, yele mam yetɩ: «Zom wa’am kalam, tɩ mam wʋn pa’alɛ fʋ sɛla n wʋn wa ẽŋɛ.» ²Tɩ Nawẽnnɛ Sɩa darɛ bɔna la mam botɩ mam yẽ na’am bĩmbĩnne n boe Nawẽnnɛ yire, tɩ nẽra zẽa a zuo. ³Sɛka n zĩ bĩmbĩnne na zuo la nẽegɛ yẽgra wʋ kuga n tarɩ yõorɔ yʋ’ʋrɛ n de zaspɩ, la sardʋanɩ. La gõmatɩ-tãpɔ n yẽgrɩ ãna wʋ kugre yʋ’ʋrɛ n de emerɔdɩ n kaagɛ na’am bĩmbĩnne na. ⁴La na’am bĩmbĩna pisyi la anaasɩ n daan gilge na’am bĩmbĩn-ẽŋa, tɩ kẽma pisyi la anaasɩ n yɛ fu-pɛɛlsɩ vuge sãlma mũnsi zẽa ba zuto. ⁵Tɩ saaga ze’ele na’am bĩmbĩnnum na yẽgra, tãsra dee sũnna, la fɩtladõma bayopɔɩ n lasʋm dita na’am bĩmbĩnne na nẽŋam. Bãma de la Nawẽnnɛ sɩɩsɩ bayopɔɩ la. ⁶Na’am bĩmbĩnne na nẽŋam, bõnɔ n gãɩ ãna wʋ ko-kãtɛ yẽgra wʋ bɩsga.

La bõn-vɔɔsɩ banaasɩ n gilge na’am bĩmbĩnne na n boe tẽŋasʋka la, tɩ nini pɩrɛ ba nẽŋa, la poore. ⁷Pɔspɔsɩ bõn-vɔa la wõn na gɩgnɛ, tɩ bʋyi dãana la wõna lʋlla, tɩ bʋtã dãana la tara nẽŋa n wõn na nẽrsaala nẽŋa. La bõn-vɔa bʋnaasɩ dãana la wõn na tugfo n ẽgrɩ. ⁸Bõn-vɔɔsɩ banaasɩ la ayɩla woo tarɩ la kempagsɩ bayoobɩ tɩ nini pɩrɛ ba zẽ’a woo, tilum na zuum. Yʋ’ʋŋɔ la wʋntɛɛŋa, ba yõonɩ mɛ ka gɔ’ɔra yetɩ:

«Sõŋa, sõŋa, sõŋa,

Zuudãana Nawẽnnɛ n de ke’eŋo wuu dãana n ãn sõŋa.

Ẽŋa n daan boe, n ken bɔna, dee wʋn bɔna wakatɛ wuu.»

⁹Bõn-vɔɔsɩ banaasɩ la ẽn nã’asra sɛka n zĩ na’am bĩmbĩnne zuo n vɔa wakatɛ wuu la mɛ, pẽgra ẽ dee pʋ’ʋsra ẽ a yel-sõnnɛ. ¹⁰Ba sãn ẽn ẽŋɛ bɛla, kẽma pisyi la anaasɩ la ẽn ka la dũma sɛka n zĩ na’am bĩmbĩnne zuo n vɔa wakatɛ wuu la nẽŋam nã’asra ẽ, dee vugse ba mũnsi bĩŋe na’am bĩmbĩnne na nẽŋam, dee yɛta tɩ:

¹¹«Tɩ Zuudãana Nawẽnnɛ,

fõn masɛ fʋ to’oge na’am pãŋa,

la nã’asgɔ, la ke’eŋo,

la de la fõn nãam sɛla woo,

la de la fõn boorɩ ĩyã,

tɩ fõn nãam ba tɩ ba bɔna.»

Gõŋɔ n tabɛ zẽ’esɩ bayopɔɩ, la Azezi n de Pebila yelle

¹La mam yẽ la gõŋɔ n boe sɛka n zĩ na’am bĩmbĩnne zuo la zʋʋgɔ nu’ugo pʋam, tɩ a nẽŋa la a poore wuu gʋlsɛ, tɩ ba dɩkɛ bõnɔ n tabrɩ tabɛ ẽ zẽ’esɩ bayopɔɩ. ²Tɩ mam yẽ malɛka n tarɩ pãŋa n tɔgrɩ ke’enke’em yetɩ: «Ãne n masɛ wʋn lakɛ bõnɔ na n tabɛ la, dee lakɛ gõŋɔ la?» ³La nẽra nẽra daan ka boe Nawẽnnɛ yire, bɩɩ dũnia zuo, bɩɩ tẽŋa wã pʋam pʋam n tã wʋn lakɛ gõŋɔ la, dee bɩsɛ a pʋam. ⁴Tɩ mam daan kɛlla zozo’e, ban ka yẽ nẽra n masɛ n wʋn lakɛ gõŋɔ la, dee bɩsɛ a pʋam na ĩyã. ⁵Tɩ kẽma la nẽra ayɩla yele mam yetɩ: «Da kɛlla. Bɩsɛ, sɛka n de Azuda buuri gɩgnɛ n de naba Adavidi yɩɩŋa la yãŋɛ mɛ, ẽŋa n tã wʋn lakɛ bõnɔ na n tabɛ zẽ’esɩ bayopɔɩ la, dee lakɛ gõŋɔ la.» ⁶Tɩ mam yẽ Pebila n ze na’am bĩmbĩnne na tẽŋasʋka, tɩ bõn-vɔɔsɩ banaasɩ, la kẽma la gilge ẽ basɛ tẽŋasʋka. Pebila la ãn wʋ ba daan kʋ ẽ mɛ na. A tarɩ la ɩɩla bayopɔɩ, la nini bayopɔɩ n de Nawẽnnɛ sɩɩsɩ bayopɔɩ la tɩ a tõm dũnia wuu pʋam na. ⁷Tɩ Pebila la paagɛ to’oge gõŋɔ la sɛka n zĩ na’am bĩmbĩnne zuo la zʋʋgɔ pʋam. ⁸Ẽn to’oge gõŋɔ la, bõn-vɔɔsɩ banaasɩ la, la kẽma pisyi la anaasɩ la, ka la dũma a nẽŋam. Ba nẽra woo zãlɩ la kõlŋɔ, la sãlma laasɩ n pɩrɛ la tɩdarɛ n tarɩ yũuŋo n ãn yẽlʋm, n de Nawẽnnɛ nẽrba pʋ’ʋsgɔ. ⁹Ba daan yõonɩ la yõom-paalɛ yetɩ:

«Fõn masɛ tɩ fʋ to’oge gõŋɔ la lakɛ bõnɔ na n tabɛ la.

Se’ere n soe la, ba daan kʋ fõn mɛ,

tɩ fõn dɩkɛ fʋ zɩɩm na yɔ to’oge nẽrsaalba buuri wuu, la yetɔga buuri wuu, la tẽnsɩ wuu nẽrba, la so’olʋm wuu nẽrba bɔ Nawẽnnɛ.

¹⁰Fõn botɩ ba dɛna la fʋ so’olʋm kãabgɔ kẽma tõnna bɔ’ɔra Nawẽnnɛ, dee wʋn di na’am dũnia zuo.»

¹¹Tɩ mam le bɩsɛ, wõm malɛkadõma kʋʋŋɔ kõa, ba daan de la tʋsa nõorɛ tʋsa tʋsa. Ba daan gilge la na’am bĩmbĩnne na, la bõn-vɔɔsɩ banaasɩ, la kẽma la. ¹²Ba daan yõonɩ mɛ ke’enke’em yetɩ:

«Pebila tɩ ba daan kʋ la n masɛ tɩ a to’oge ke’eŋo, la bõntarsõm, la yɛm, la pãŋa, la nã’asgɔ, la na’am pãŋa, la pẽka.»

¹³Tɩ mam wõm bõn-nãanɩsɩ wuu n boe Nawẽnnɛ yire, la tẽŋa zuo, la tẽŋa pʋam pʋam, la ko-kãtɛ pʋam, la bõn-nãanɩsɩ n boe zẽ’esɩ wuu n yetɩ:

«Sɛka n zĩ na’am bĩmbĩnne zuo, la Pebila la n soe pẽka, la nã’asgɔ, la na’am pãŋa, la ke’eŋo wakatɛ n ka ba’asrɩ.»

¹⁴Tɩ bõn-vɔɔsɩ banaasɩ la yetɩ: «Amina.» Tɩ kẽma la ka dũma tẽŋa nã’asra ẽ.

Bõnɔ n tabɛ zẽ’esɩ bayopɔɩ la, bayoobɩ lakrɛ

¹La mam yẽ mɛ tɩ Pebila la lakɛ bõnɔ na n tabɛ zẽ’esɩ bayopɔɩ la ayɩla. Tɩ mam wõm bõn-vɔɔsɩ banaasɩ la ayɩla n tɔgrɩ tɩ a kõa ãna wʋ saaga n tãsrɩ la yetɩ: «Wa’am!» ²Tɩ mam bɩsra, yẽ wemõa n de pɛɛlga. Tɩ nẽra bã ẽ zãla tãpɔ, tɩ ba bɔ ẽ mũŋa. Tɩ a dɛna nẽra n yãŋrɩ, sẽŋɛ tɩ a yãŋɛ.

³Tɩ Pebila la lakɛ bõnɔ bʋyi dãana n tabɛ la, tɩ mam wõm bõn-vɔa bʋyi dãana n yetɩ: «Wa’am!» ⁴Tɩ wemõa n de mõlga yese. Tɩ ba bɔ sɛka n bã ẽ na ke’eŋo tɩ a yese dũnia sũ-mã’asʋm tɩ nẽrba kʋʋra taaba, dee bɔ ẽ sʋkɔbgɔ n ãn kãtɛ.

⁵Tɩ Pebila la lakɛ bõnɔ bʋtã dãana n tabɛ la, tɩ mam wõm bõn-vɔa bʋtã dãana la n yetɩ: «Wa’am!» Tɩ mam bɩsra, yẽ wemõ-sabga. Tɩ sɛka n bã ẽ na zãla bõn-makrɩga a nu’ugo pʋam. ⁶Tɩ mam wõm dãmnɛ n ãn wʋ kõa n ze’ele bõn-vɔɔsɩ banaasɩ la tẽŋasʋka yetɩ: «Si ligri wʋn zo’oge mɛ, tɩ nẽra daarɛ ayɩla yɔɔrɔ wʋn da si wʋlla ayɩla, dee tɩ kamãana wʋlsɩ batã dɛna nẽra daarɛ ayɩla yɔɔrɔ. La, la sãn dɛna kaam la dãam, da pa’asɛ sɛla.»

⁷Tɩ Pebila la lakɛ bõnɔ bʋnaasɩ dãana n tabɛ la, tɩ mam wõm bõn-vɔa bʋnaasɩ dãana n yetɩ: «Wa’am!» ⁸Tɩ mam bɩsra, yẽ wemõa n de puka. Sɛka n bã ẽ na yʋ’ʋrɛ n de Akũm, tɩ kɩ’ɩn-tẽŋa dɔla a poore. Tɩ ba bɔ ba ke’eŋo tɩ ba kʋ dũnia nẽrba banaasɩ woo pʋam nẽra ayɩla. Sʋkɔbgɔ, la kɔm, la bã’asɩ, la we-dũnsi n wʋn kʋ ba.

⁹Tɩ Pebila la lakɛ bõnɔ bʋnuu dãana n tabɛ la, tɩ mam yẽ nẽr-sɛba tɩ ba daan kʋ ba, ban mõolɛ Nawẽnnɛ yetɔga la, dee vɔa wʋ yetɔga la n yele se’em na ĩyã, sɩɩsɩ n boe kãabgɔ bĩmbĩnne na tilum. ¹⁰Tɩ ba tɔgra ke’enke’em yetɩ: «Zuudãana n gãnnɩ wuu n ãn sõŋa, n de sɩra dãana, fõn wʋn yuuge paagɛ la wãne dee di dũnia nẽrba sarɩya sɩbgɛ ba, ban kʋ tõma la ĩyã?» ¹¹Tɩ ba bɔ ba nẽra woo fu-pɛɛlga, dee yele ba yetɩ ba gu fẽe, halɩ tɩ ba kʋ ba sɔbiisi n de ba tõntõn-taaba, n de ba kʋ ba wʋ bãma la, tɩ ba sõorɛ paagɛ.

¹²Tɩ Pebila la lakɛ bõnɔ bʋyoobɩ dãana n tabɛ la, tɩ tẽŋa mĩim zozo’e, tɩ wʋntɛɛŋa lebge lika wʋ tãn-sabga, dee tɩ wõrga lebge mõlga wʋ zɩɩm na. ¹³Tɩ wõrbiɛ ze’ele saazuum sʋʋgɛ tẽŋa, wʋ kẽnkãŋa tɩ kʋseb-kãtɛ mĩim tɩ kẽnkãma sʋʋgɛ la. ¹⁴Tɩ sagõŋɔ kilim wʋ sõŋɔ la bɔɩ. Tɩ tãnsɩ wuu, la tẽn-sɛba tɩ ko’om gilge la wuu ka le bɔna ba zẽ’esɩ. ¹⁵Tɩ dũnia na’adõma, la nẽr-kegro, la sʋdaasɩ kɛ’ɛndõma, la bõntatba, la pãnsɩ dõma, la yamsɩ, la burkĩndõma wuu sʋgra tãnsɩ bogro pʋam, la tãmpĩisi lɛma. ¹⁶Dee yɛta tãnsɩ, la tãmpĩisi la yetɩ: «Lui-ya tɩ zuto sʋgɛ tɔ, tɩ sɛka n zĩ na’am bĩmbĩnne zuo la da yẽta tɔ, tɩ Pebila la sũ-isgre da paagɛ tɔ. ¹⁷Se’ere n soe la, ba sũ-isgre daarɛ paagɛ mɛ, nẽra ka boe n wʋn yãŋɛ põsɛ.»

Nawẽnnɛ nẽrba dãalgɔ

¹Bɛla poorʋm, mam yẽ la malɛkadõma banaasɩ n ze dũnia sakʋgrɔ banaasɩ. Ba daan yõgɛ la dũnia kʋsebgo n ze’ele zẽ’esɩ banaasɩ la wuu, tɩ ba da vugra wẽ’erɩ tẽŋa, bɩɩ ko-kãtɛ, bɩɩ tɩa. ²La mam yẽ la malɛka ayẽma n ze’ele wẽntulle n doorɩ zẽ’a la zɔnna, a zãlɩ la vɔm dãana Nawẽnnɛ dãalgɔ bõnɔ. La a tɔgɛ la ke’enke’em yele malɛkadõma banaasɩ la tɩ Nawẽnnɛ bɔ ba nõorɛ tɩ ba sã’am tẽŋa, la ko-kãtɛ la yetɩ: ³«Nãn da sã’am-ya tẽŋa, bɩɩ ko-kãtɛ, bɩɩ tɩɩsɩ, basɛ-ya tɩ tɩ ẽŋɛ Nawẽnnɛ tõntõnɩba la dĩa dãalgɔ, dee tɩ ya sã’am.» ⁴Tɩ mam wõm sɛba tɩ ba ẽŋɛ ba Nawẽnnɛ dãalgɔ la sõorɛ. Ba de la nẽrba tʋskɔbga la tʋspinaasɩ la anaasɩ (144’000). Ba ze’ele la Ɩsrayɛlɩ buuri la wuu pʋam. ⁵Azuda buuri nẽrba tɩ ba dãalɛ de la tʋspia la ayi,

Arubã buuri nẽrba tʋspia la ayi,

Agadɩ buuri nẽrba tʋspia la ayi,

⁶Azɛɛrɩ buuri nẽrba tʋspia la ayi,

Aneftali buuri nẽrba tʋspia la ayi,

Amanase buuri nẽrba tʋspia la ayi,

⁷Asimeyõ buuri nẽrba tʋspia la ayi,

Alevi buuri nẽrba tʋspia la ayi,

A’isakaarɩ buuri nẽrba tʋspia la ayi,

⁸Azabilõ buuri nẽrba tʋspia la ayi,

Azozɛfʋ buuri nẽrba tʋspia la ayi,

Abẽnzamẽ buuri nẽrba tʋspia la ayi.

Nẽr-kʋʋŋɔ zozo’e n lagsɛ

⁹Bɛla poorʋm mam bɩsrɩ mɛ, yẽ nẽr-kʋʋŋɔ zozo’e tɩ nẽra nẽra ka tã wʋn kãalɛ. Ba de la so’olʋm wuu nẽrba, la buuri wuu nẽrba, la tẽnsɩ wuu nẽrba, la yetɔga buuri wuu nẽrba. Ba daan yɛ la fu-pɛɛlsɩ zãla karkɔŋa võorɔ ba nu’usum zɛ na’am bĩmbĩnne, la Pebila la nẽŋam. ¹⁰Ba tɔgrɩ la ke’enke’em yetɩ:

«Fãarɛ ze’etɩ la tõma Nawẽnnɛ n zĩ na’am bĩmbĩnne zuo, la Pebila la zẽ’am.»

¹¹Malɛkadõma la wuu daan ze gilge la na’am bĩmbĩnne, la kẽma, la bõn-vɔɔsɩ banaasɩ la. Ba daan ẽn ka la dũma dɩkɛ ba nẽnsɩ võglɛ tẽŋa na’am bĩmbĩnne na nẽŋam nã’asra Nawẽnnɛ ¹²yetɩ:

«Asɩra, Nawẽnnɛ n soe nã’asgɔ, la na’am pãŋa, la yɛm, la yel-sõnnɛ pʋ’ʋsgɔ, la pẽka, la ke’eŋo, la pãŋa wakatɛ n ka ba’asrɩ. Amina.»

¹³Tɩ kẽma la ayɩla soke mam yetɩ: «Ãndõma n de nẽr-bãma n yɛ fu-pɛɛlsɩ la, ba ze’ele la bɛ?» ¹⁴Tɩ mam lerge ẽ yetɩ: «M zuudãana, fõn mi.» Tɩ a yele mam yetɩ: «Ba de la nẽr-sɛba n ze’ele toog-kãtɛ pʋam na. Ba peege ba futo mɛ Pebila la zɩɩm pʋam tɩ ba pelge. ¹⁵Bɛla n soe tɩ ba zɛ Nawẽnnɛ na’am bĩmbĩnne na nẽŋam, tõnna bɔ’ɔra ẽ wʋntɛɛŋa la yʋ’ʋŋɔ a yire la pʋam. Sɛka n zĩ na’am bĩmbĩnne zuo la n wʋn gu’ura ba. ¹⁶Kɔm la koyũuro kãn le yõkɛ ba, wʋntɛɛŋa la a tʋʋlgɔ kãn le wõŋɛ ba. ¹⁷Se’ere n soe la, Pebila la n boe na’am bĩmbĩnne tẽŋasʋka la n wʋn bɩsra ba yelle, ẽŋa n wʋn tarɩ ba sẽŋɛ ko’om n bulli n bɔ’ɔrɩ vɔm zẽ’am. La Nawẽnnɛ n wʋn duuse ba nintãm wuu.»

Bõnɔ n tabɛ bayopɔɩ dãana la lakrɛ

¹Pebila la lakɛ la bõnɔ bayopɔɩ dãana n tabɛ la, tɩ la ãna yɩrɩrɩr Nawẽnnɛ yire wakatɛ fẽe paagɛ karf-ayɩla pʋsʋka. ²Tɩ mam yẽ malɛkadõma bayopɔɩ n ze Nawẽnnɛ nẽŋam, tɩ ba bɔ ba benkɔma bayopɔɩ.

³La malɛka ayẽma n wa’am wa ze’ele kãabgɔ bĩmbĩnne na zẽ’am. A daan tarɩ la sãlma laaga tɩ ba tarɩ yõ’ora tɩdarɛ. Tɩ ba bɔ ẽ tɩdarɛ pãɩ, tɩ a dɩkɛ ba lagɩm na Nawẽnnɛ nẽrba wuu pʋ’ʋsgɔ yõ sãlma kãabgɔ bĩmbĩnne n boe na’am bĩmbĩnne na nẽŋam na zuo bɔ Nawẽnnɛ. ⁴Tɩ tɩdarɛ la tɩ a yõ la bug-zũ’usi lagɩm na Nawẽnnɛ nẽrba la pʋ’ʋsgɔ, ze’ele malɛka la n ze Nawẽnnɛ nẽŋam na nu’usum zɔnna saazuum. ⁵Tɩ malɛka la dɩkɛ laaga la tɩ ba tarɩ yõ’ora tɩdarɛ la, pɩrɛ ẽ na tɩdarɛ bugum na n boe kãabgɔ bĩmbĩnne zuo la lobge ba tẽŋa zuo. Tɩ saaga tãsra, yãgra dee sũnna, tɩ tẽŋa mĩim.

Benkɔma peebgo

⁶Malɛkadõma bayopɔɩ la n zãlɩ benkɔma bayopɔɩ la, mãasʋm mɛ tɩ ba peebe ba.

⁷Tɩ pɔspɔsɩ malɛka la peebe benkonne. Tɩ sakuga la bugum n gaam na zɩɩm ka’agɛ dũnia zuo. Tɩ dũnia zẽ’esɩ batã pʋam, bugum di zẽ’a ayɩla, tɩ tɩɩsɩ zẽ’esɩ batã pʋam, bugum di zẽ’a ayɩla, tɩ mõ-mã’asa wuu di bugum.

⁸Tɩ malɛka bʋyi dãana peebe benkonne. Tɩ ba lobge sɛla ko-kãtɛ pʋam n ãn wʋ tãn-kãtɛ tɩ bugum diti. Tɩ ko’om na zẽ’esɩ batã pʋam, zẽ’a ayɩla lebge zɩɩm. ⁹Tɩ bõn-vɔɔsɩ sɛba n boe ko’om pʋam na batã pʋam woo ayɩla ki. Tɩ õornɔ batã pʋam woo ayɩla sã’am.

¹⁰Tɩ malɛka bʋtã dãana peebe benkonne. Tɩ wõrbi-kãtɛ n diti bug-zɩlɩŋa ze’ele saazuum lui mõga, la kʋlsɩ ko’om pʋam, a lui la ko’om na zẽ’esɩ batã ayɩla pʋam. ¹¹Wõrbiire la yʋ’ʋrɛ de la Azẽlõm. Tɩ ko’om na zẽ’esɩ batã pʋam, zẽ’a ayɩla lebge zẽlõm. La nẽrba zozo’e n yũ ko’om na ki, ko’om na n de zẽlõm na ĩyã.

¹²Tɩ malɛka bʋnaasɩ dãana peebe benkonne. Tɩ wẽntulle zẽ’esɩ batã pʋam zẽ’a ayɩla, la wõrga zẽ’esɩ batã pʋam zẽ’a ayɩla, la wõrbiɛ zẽ’esɩ batã pʋam zẽ’a ayɩla pãŋa ba’asɛ, tɩ ba wuu zẽ’esɩ batã pʋam, zẽ’a ayɩla lebge lika. Tɩ wʋntɛɛŋa zẽ’esɩ batã pʋam ayɩla ka le nẽera peelem, tɩ yʋ’ʋŋɔ mẽ bɛla.

¹³Tɩ mam yẽ sɩl-kãtɛ n ẽgrɩ saazuum-zuum, wõm ẽn tɔgrɩ ke’enke’em yetɩ: «Waɩ, waɩ! Nẽr-sɛba n boe tẽŋa wã zuo wʋn yẽ la toogo, malɛkadõma batã n weege la n wʋn peebe ba benkɔma, tɩ ba yẽ toogo.»

¹Tɩ malɛka bʋnuu dãana peebe benkonne. Tɩ mam yẽ wõrbiire n ze’ele saazuum lui dũnia zuo. Tɩ ba bɔ ẽ bog-ko’ogo saafɩbiire. ²Tɩ wõrbiire la pakɛ bog-ko’ogo la, tɩ bug-zũ’usi ze’ele bog-ko’ogo la pʋam yɛsra wʋ bug-kãtɛ zũ’usi la, botɩ wʋntɛɛŋa, la sapebsʋm sobe. ³Tɩ tẽnta’aba ze’ele zũ’usi la pʋam yese saagɛ dũnia zuo. Tɩ ba bɔ ba toogo wʋ nãnsɩ toogo la. ⁴La ba yele ba yetɩ ba da ẽŋɛ mõorɔ, la bõn-sɛba wuu n yesrɩ tẽŋa, la tɩɩsɩ sɛla, ba pɔglʋm nẽr-sɛba n ka tarɩ Nawẽnnɛ dãalgɔ ba dĩa zuto la mã’a. ⁵Ba daan ka bɔ tẽnta’aba la nõorɛ tɩ ba kʋ nẽrba la, la de la ba nãmsɛ ba wõr-sɩnuu. Ban botɩ toog-sɛka nãmsra nẽrba la ãn wʋ nãŋa n ẽn dõn nẽra tɩ la dõnna se’em na. ⁶La dabsa bãma, nẽrsaalba wʋn ɛɛra kũm, la ba kãn yẽ ẽ. Ba wʋn bɔɔra tɩ ba ki, la kũm wʋn zoe dee basɛ ba.

⁷Tẽnta’aba la ãn wʋ wiiri n mãasʋm gu’ura zɛbrɛ, la sɛla n boe ba zuto ãna wʋ sãlma mũnsi, dee tɩ ba nẽnsɩ ãna wʋ nẽrba nẽnsɩ la. ⁸Ba tarɩ la zomto n ãn wʋ pɔgsɩ zomto la. Dee tɩ ba yẽna ãna wʋ gɩgma yẽna la. ⁹Ba dɩkɛ la bõnɔ n ãn wʋ kuto futo pĩ ba yõ’orɔ. La ba kempagsɩ la dãmnɛ ãn wʋ wiiri toto tɩ wiiri zozo’e ve’erɩ zɔta wɛ’ɛsa zɛbrɛ zẽ’a. ¹⁰Ba tarɩ la zɔa wʋ nãnsɩ zɔa la dõnna. Ba zɔa bãma n bɔ ba ke’eŋo tɩ ba nãmsɛ nẽrba wõr-sɩnuu. ¹¹Ba daan tarɩ la naba, a de la malɛk-sɛka n gu’uri bog-ko’ogo la. A yʋ’ʋrɛ la Ebre yetɔga de la «Abadõ», la Grɛkɩ yetɔga de la «Apoliyõ», n boorɩ tɩ la yetɩ «Sã’ama».

¹²Pɔspɔsɩ toogo la tole mɛ. La toogo bʋyi n wʋn ken wa’am.

¹³Tɩ malɛka bʋyoobɩ dãana peebe benkonne. Tɩ mam wõm kõa n ze’ele sãlma kãabgɔ bĩmbĩnne n boe Nawẽnnɛ nẽŋam kʋgra banaasɩ la zẽ’am. ¹⁴Kõa la yele malɛka bʋyoobɩ dãana n zãlɩ benkonne na yetɩ: «Lorge malɛkadõma banaasɩ tɩ ba lʋ ba, tɩ ba bɔna Efratɩ kʋl-kãtɛ zẽ’am na basɛ.» ¹⁵Tɩ a lorge malɛkadõma banaasɩ la basɛ. Ba daan mãasʋm malɛg-bãma gu’ura la wakatɛ ẽŋa, la dabsrɛ ẽŋa, la wõr-ẽŋa, la yʋʋn-ẽŋa, tɩ ba kʋ nẽrsaalba batã woo pʋam ayɩla. ¹⁶Tɩ ba pa’alɛ mam ba sʋdaasɩ n bã’arɩ wiiri kãllɛ, ba de la tʋsa kɔbsyi nõorɛ tʋsrɛ. ¹⁷Tɩ mam yẽ wiiri la, la ba wi-bã’arba n ãn se’em: Ba tarɩ la kuto futo n pĩ’iri yõ’orɔ, tɩ ba mõ’ogɛ ãna wʋ bugum, dee dɛna yõosnɛ, la dõbʋʋlʋm. Wiiri la zuto ãn wʋ gɩgma zuto la. Bugum, la bug-zũ’usi, la kidibre n ze’ele ba nõa pʋam yɛsra. ¹⁸Tɩ tooro bãma batã n de bugum, la bug-zũ’usi, la kidibre n ze’ele wiiri la nõa pʋam yɛsra la, kʋ nẽrsaalba batã pʋam woo ayɩla. ¹⁹Wiiri la ke’eŋo boe la ba nõa, la ba zɔa pʋam. Ba zɔa la ãn wʋ bõnsɛ’ɛdõma la, ba tarɩ la zuto bãma tɩ ba tarɩ ɩta nẽrba be’em sã’ana ba.

²⁰La nẽr-sɛba n weege tɩ tooro bãma ka kʋ ba la, ka teege yɛm basɛ ban ɩtɩ sɛla tɩ ba mẽŋa boorɩ la. Ba ken dɔla la kʋlkã’arsɩ, la baga tɩ ba dɩkɛ sãlma, la zũuro, la yõgõm, la kuga, la dɔɔrɔ mãalɛ, tɩ ba ka yẽta, ka wõnna, ka tãna sẽnna. ²¹Ba ken ka teege yɛm basɛ ba nẽr-kʋa, la ba tɩɩm tõoma, la ba yalsɩ tõoma, la ba nayigum na.

Malɛka n zãlɩ gõn-pɩka n lakɛ

¹Tɩ mam daan yẽ malɛka ayẽma n tarɩ pãŋa n ze’ele Nawẽnnɛ yire sigra. Tɩ sawara pile ẽ wʋ fuugo tɩ a yɛ, dee tɩ gõmatɩ-tãpɔ kɔkɛ a zuugo. A nẽŋa ãn wʋ wẽntulle, dee tɩ a nãma ãna wʋ bug-zɩlɩsɩ la. ²A zãlɩ la gõn-pɩka n lakɛ a nu’usum. A dɩkɛ a zʋʋgɔ nã’arɛ taglɛ la ko-kãtɛ zuo, dee dɩkɛ a gɔbga nã’arɛ taglɛ tẽŋa zuo. ³A daan tɔgɛ mɛ ke’enke’em wʋ gɩgnɛ n kaasɛ la. Ẽn daan tɔgɛ la, saaga n tãsɛ nõorɛ bʋyopɔɩ. ⁴Saaga la n tãsɛ tɔgɛ la, mam yetɩ m gʋlsɛ la ban yele se’em na. La mam wõm na kõa n ze’ele Nawẽnnɛ yire tɔgɛ mam yetɩ: «Sʋgɛ sɛla tɩ saaga tãsɛ bʋyopɔɩ tɔgɛ la, da gʋlsɛ ba.»

⁵Tɩ malɛk-sɛka tɩ mam daan yẽ tɩ a ze ko-kãtɛ la tẽŋa zuo la, n zẽkɛ a zʋʋgɔ nu’ugo saazuum, ⁶pɔɩ la Nawẽnnɛ n boe wakatɛ wuu, n nãam saazuum, la tẽŋa, la ko-kãtɛ, la sɛla wuu n boe ba pʋam na, yetɩ: «La kãn le yuuge. ⁷Malɛka bʋyopɔɩ dãana la sãn peebe benkonne, Nawẽnnɛ wʋn ẽŋɛ ẽn looge yɛm tɩ a ẽŋɛ se’em n sʋgɛ la mɛ, wʋ ẽn yʋʋn tɔgɛ la a nõtɔ’ɔsrɩba n de a tõntõnɩba se’em na.»

⁸Tɩ kõa la n ze’ele Nawẽnnɛ yire tɔgɛ tɩ mam wõm na, le yele mam yetɩ: «Sẽŋɛ ka to’oge gõn-pɩka la n lakɛ bɔna malɛka la n ze ko-kãtɛ la tẽŋa zuo la nu’um.» ⁹Tɩ mam sẽŋɛ malɛka la zẽ’am ka yele ẽ yetɩ: «Bɔ mam gõn-pɩka la.» Tɩ a yele mam yetɩ: «To’oge ẽ obe vole. A wʋn lebge la toogo fʋ pʋʋrʋm. La fʋ nõorʋm, a wʋn ãna yẽlʋm wʋ seero la.» ¹⁰Tɩ mam to’oge gõn-pɩka la a nu’um obe vole. Tɩ a ãna yẽlʋm wʋ seero mam nõorʋm. La mam n vole ẽ na, a lebge la toogo mam pʋʋrʋm.

¹¹Tɩ ba yele mam yetɩ: «Dẽnɩ tɩ fʋ le tɔgɛ Nawẽnnɛ yetɔga pa’alɛ la wʋn ẽŋɛ tẽnsɩ zozo’e nẽrba, la so’olʋm zozo’e nẽrba, la yetɔga buuri zozo’e nẽrba, la na’adõma zozo’e se’em.»

Kaset-dõma bayi

¹Tɩ ba daan bɔ mam mẽelŋɔ n ãn wʋ dibga tɩ ba tarɩ makra, dee yele mam yetɩ: «Isge makɛ Wẽnde-kãtɛ la, la kãabgɔ bĩmbĩnne na, dee kãalɛ nẽr-sɛba n pʋ’ʋsrɩ a pʋam na. ²La basɛ a zẽnzaka la, da makɛ ẽ, se’ere n soe la, ba dɩkɛ ẽ bɔ la bu-zãŋsɩ la, ba wʋn nẽ Nawẽnnɛ tẽŋa la mɛ wõrsɩ pinaasɩ la ayi sã’am.»

³«Mam wʋn tõm na nẽrba bayi n wʋn ze’ele mam poorʋm tɔgɛ mam yelle. Ba wʋn yɛ la bɔra futo to’ose mam yetɔga tɔgɛ bɔ nẽrba dabsa tʋsrɛ la kɔbsyi la pisyoobɩ.»

⁴Nẽr-bãma bayi de la Oliivi tɩɩsɩ bayi, dee ken dɛna fɩtladõma bayi n ze dũnia wuu Zuudãana nẽŋam na. ⁵Nẽra sãn ɛɛra tɩ a ẽŋɛ ba be’em, bugum n ze’etɩ ba nõa pʋam dita ba bɛ’ɛba la. Asɩra, nẽr-sɛka n eerɩ tɩ a ẽŋɛ ba be’em, dẽnɩ tɩ a ki bɛla. ⁶Ba tarɩ la ke’eŋo wʋn yõkɛ saaga tɩ a ka niira wakat-sɛba wuu tɩ ba to’osrɩ Nawẽnnɛ yetɔga tɔgra bɔ’ɔra nẽrba la. La ba ken tara ke’eŋo mɛ wʋn botɩ ko’om lebge zɩɩm, dee ken tara ke’eŋo wʋn botɩ tooro buuri wuu paagɛ dũnia nẽrba wakat-sɛka wuu tɩ ba boorɩ.

⁷Ba sãn wa tɔgɛ yetɔga la ba’asɛ, dũŋa n wʋn ze’ele bog-ko’ogo la pʋam yese zɛbɛ la ba, yãŋɛ kʋ ba. ⁸Tɩ ba kũm na wʋn gã peelem nẽŋam tẽn-kãtɛ la pʋam. Bilam tɩ ba daan ka ba Zuudãana dɔ-puurŋa zuo. Tẽŋa la yʋ’ʋrɛ n pa’alɛ ẽn ãn se’em de la Sodom, la Ezipti. ⁹Tẽnsɩ wuu nẽrba, la buuri wuu nẽrba, la yetɔga buuri wuu nẽrba, la so’olʋm wuu nẽrba wʋn bɩsra ba kũm na la dabsa atã la pʋsʋka, dee kãn sakɛ tɩ ba dɩkɛ ba kũm na laagɛ. ¹⁰Dũnia nẽrba sũure wʋn ẽŋɛ yẽlʋm mɛ, ban yẽ tɩ nẽrba bayi la ki la ĩyã. Tɩ ba wʋn ẽŋɛ sũ-yẽlga de’em, bɔ taaba bɔ’a, se’ere n soe la, nõtɔ’ɔsrɩba bayi la nãmsɛ nẽrba dũnia mɛ. ¹¹La dabsa atã la pʋsʋka la poorʋm, vo’osʋm n bɔ’ɔrɩ vɔm n wʋn ze’ele Nawẽnnɛ zẽ’am wa’am wa kẽ ba pʋam, tɩ ba vo’oge isge. Tɩ dabeem zozo’e wʋn yõkɛ sɛba n yẽ ba la. ¹²La nõtɔ’ɔsrɩba bayi la wʋn wõm na kõa n ze’ele Nawẽnnɛ yire yele ba yetɩ: «Zom-ya wa’am.» Tɩ ba kẽ sawara pʋam zɔnna wɛ’ɛsa Nawẽnnɛ yire, tɩ bɛ’ɛba la bɩsra ba. ¹³Wakatɛ ẽŋa mẽŋa, tẽŋa n wʋn mĩim halɩ zozo’e. Tɩ Zerizalɛm tẽŋa la zẽ’esɩ pia pʋam, zẽ’a ayɩla wʋn lui saam. Tɩ nẽrba tʋsa ayopɔɩ ki, tẽŋa la n mĩim na ĩyã. Tɩ dabeem wʋn yõkɛ nẽr-sɛba n weege la, tɩ ba bɔ Nawẽnnɛ n boe saazuum nã’asgɔ.

¹⁴Toogo bʋyi dãana tole mɛ. La toogo bʋtã dãana la dee la fẽe la a wa’am.

Benkonne bʋyopɔɩ dãana

¹⁵Tɩ malɛka bʋyopɔɩ dãana peebe benkonne, tɩ kõosɩ ze’ele Nawẽnnɛ yire tɔgɛ ke’enke’em yetɩ:

«Dũnia so’olʋm lebge la tõma Zuudãana, la Krisi tɩ a tõm na n soe, la a na’am na boe la wakatɛ n ka ba’asrɩ.»

¹⁶Tɩ kẽma pisyi la anaasɩ la n zĩ ba na’am bĩmbĩna zuto Nawẽnnɛ nẽŋam na, võglɛ nẽnsɩ tẽŋa nã’asra Nawẽnnɛ yetɩ:

¹⁷«Zuudãana Nawẽnnɛ n de ke’eŋo wuu dãana, n daan boe, n ken bɔna la,

tõma pʋ’ʋsrɩ la fõn fʋ yel-sõnnɛ, fõn dɩkɛ fʋ ke’eŋo n zo’oge vigle fʋ na’am na ĩyã.

¹⁸Bu-zãŋsɩ wuu nẽrba sũure isge mɛ,

la lɛɛlɛ wã fõn sũ-yĩire wakatɛ n paagɛ,

tɩ fõn wʋn di sɛba n ki la sarɩya,

la fõn wʋn yɔ fʋ tõntõnɩba la n de fʋ nõtɔ’ɔsrɩba, la fʋ nẽrba la n nã’asrɩ fõn, kɛ’ɛndõma la tarɩmdõma wuu mɛ.

La de la wakatɛ tɩ fõn wʋn sã’am nẽr-sɛba n sã’anɩ dũnia la.»

¹⁹Tɩ Wẽnde-kãtɛ n boe Nawẽnnɛ yire la yo’oge, tɩ nõor-bĩŋre daka la yẽta. Tɩ saaga yãgra, sũnna, tãsra, tɩ tẽŋa mĩim, tɩ sakuga zozo’e lui.

Pɔka, la pʋryõŋ-yãlma

¹Bõn-bãn-kãtɛ n puke saazuum. Pɔka n dɩkɛ wẽntulle pile wʋ fuugo la, tɩ wõrga bɔna a nãma tẽŋa, dee tɩ a vuge mũŋa n tarɩ wõrbiɛ pia la ayi. ²Pɔka la tarɩ la pʋʋrɛ virgra tɩ a dɔgɛ, wʋlsra kaasra, dɔka toogo n tarɩ ẽ na ĩyã. ³Tɩ bõn-bãnnɛ ayẽma puke saazuum: A de la pʋryõŋ-yãlma n ãn kãtɛ dɛna mõlga, a tarɩ la zuto bayopɔɩ, la ɩɩla pia, tɩ mũnsi vuge a zuto la wuu. ⁴Tɩ a zʋʋrɛ kã’asɛ wõrbiɛ batã pʋam ayɩla saazuum lobe basɛ tẽŋa zuo. Pʋryõŋ-yãlma la ze la pɔka la n yetɩ a dɔgɛ la nẽŋam gu’ura tɩ pɔka la dɔgɛ tɩ a yõkɛ a bia la obe. ⁵La pɔka la dɔgɛ la budibla n wʋn tara kuto dasaarɛ sɔna so’olʋm buuri wuu. Tɩ ba zɛ bia la tarɩ sẽŋɛ Nawẽnnɛ zẽ’am, a na’am bĩmbĩnne na zẽ’am. ⁶Tɩ pɔka la zoe sẽŋɛ weem, zẽ’e-sɛka tɩ Nawẽnnɛ mãasʋm a ĩyã la, bilam tɩ ba diise ẽ dabsa tʋsrɛ la kɔbsyi la pisyoobɩ.

⁷Tɩ zɛbrɛ isge Nawẽnnɛ yire. Tɩ malɛkadõma kɛ’ɛma Amisɛlɩ, la a malɛkadõma zɛbra la pʋryõŋ-yãlma la, tɩ pʋryõŋ-yãlma la, la a malɛgsɩ mẽ zɛbra la ba. ⁸La ba koŋe pãŋa mɛ, tɩ sore ka le bɔna tɩ ba bɔna Nawẽnnɛ yire. ⁹Tɩ ba daan lobe pʋryõŋ-yãlma kãtɛ la basɛ. Ẽŋa n de bõnsɛla n yʋʋn boe, tɩ ba wi’ira ẽ tɩ «Dõta» bɩɩ «Asũtãana» n pã’asrɩ dũnia nẽrba wuu la. Ba lobe ẽ, la a malɛgsɩ basɛ la tẽŋa zuo. ¹⁰Tɩ mam wõm kõa n tɔgrɩ ke’enke’em Nawẽnnɛ yire yetɩ: «Nãnannɛ wã, Nawẽnnɛ fãarɛ daarɛ paagɛ mɛ, Nawẽnnɛ yãŋa pa’alɛ a pãŋa, la a na’am mɛ, dee pa’alɛ Krisi tɩ a tõm na ke’eŋo, se’ere n soe la, ba dige sɛka n wã’arɩ tɩ sɔbiisi Nawẽnnɛ zẽ’am wʋntɛɛŋa la yʋ’ʋŋɔ la mɛ. ¹¹La de la Pebila la zɩɩm ĩyã, la ban mõolɛ Nawẽnnɛ yetɔga la ĩyã, tɩ tɩ sɔbiisi la yãŋɛ ẽ. Ba ka zoe tɩ ba wʋn kʋ ba. ¹²Bɛla, Nawẽnnɛ yire, la yãma sɛba wuu n boe mĩ na, ẽŋɛ-ya sũ-yẽlga. La toogo n wʋn yẽ tẽŋa, la ko-kãtɛ, se’ere n soe la, Asũtãana sige ya zẽ’am la sũ-yĩire, ẽn mi tɩ a wakatɛ deege la fẽe la ĩyã.»

¹³Pʋryõŋ-yãlma la n yẽ tɩ ba lobe ẽ basɛ la tẽŋa zuo la, a babsɛ la pɔka la n dɔgɛ bia la. ¹⁴Tɩ ba bɔ pɔka la sɩl-kãtɛ kempagsɩ bayi tɩ a ẽkɛ sẽŋɛ weem, zẽ’e-sɛka tɩ ba wʋn diisra ẽ yʋʋma atã la pʋsʋka la, zãagɛ la bõnsɛla la. ¹⁵Tɩ bõnsɛla la ʋkɛ ko’om a nõorʋm wʋ mõgrɛ la pɔka la poorʋm tɩ ba pe’ege ẽ fõrgɛ. ¹⁶La tẽŋa sõŋɛ pɔka la mɛ, ya’agɛ nõorɛ fõogɛ ko’om na n ze’ele pʋryõŋ-yãlma la nõorʋm na. ¹⁷Tɩ pʋryõŋ-yãlma la sũure yĩige la pɔka la, tɩ a sẽŋɛ ka zɛbra la pɔka la yɩɩsɩ sɛba n weege ken sakra Nawẽnnɛ nõorɛ, dee tɔgra Azezi yelle bɔ’ɔra nẽrba la. ¹⁸Pʋryõŋ-yãlma la sẽŋɛ ka zɛ la ko-kãtɛ la nõorʋm.

Dũnsi bayi

¹Bɛla poorʋm, mam yẽ la dũŋa n ze’ele ko-kãtɛ pʋam dooge. A tarɩ la ɩɩla pia, la zuto bayopɔɩ, tɩ mũnsi pia vuge a ɩɩla la wuu. La yʋ’ʋra n pɔ’ɔrɩ Nawẽnnɛ yʋ’ʋrɛ n gʋlsɛ a zuto la zuo. ²Dũŋa la tɩ mam yẽ la wõn na webaaga. Tɩ a nã’a-tala ãna kãra, tara nã’a-ẽesɩ wʋ tẽŋambõŋa la. Dee tɩ a nõorɛ ãna wʋ gɩgnɛ nõorɛ la. Tɩ pʋryõŋ-yãlma la dɩkɛ a pãŋa, la a na’am bĩmbĩnne, la a ke’eŋo bɔ dũŋa la. ³Dũŋa la zuugo ayɩla daan pɔglʋm mɛ, ãna wʋ a ki mɛ na, la a pɔglʋŋɔ la daan bɔɩ mɛ. Tɩ la di’ige dũnia nẽrba wuu, tɩ ba dɔla dũŋa la. ⁴Tɩ nẽrba wuu nã’asra pʋryõŋ-yãlma la, ẽn bɔ dũŋa la a ke’eŋo la ĩyã. Dee nã’asra dũŋa la yetɩ: «Ãne n tarɩ ke’eŋo wʋ dũŋa la? La ãne n tã wʋn zɛbɛ la ẽ lɛ?»

⁵Tɩ ba bɔ dũŋa la nõorɛ tɩ a tɔgɛ tɩta’alʋm yetɔga, dee tʋ Nawẽnnɛ. A to’oge ke’eŋo tɩ a tõm na wõrsɩ pinaasɩ la ayi. ⁶Tɩ a pɔsɛ tɔgra pɔ’ɔra Nawẽnnɛ dee pɔ’ɔra a yʋ’ʋrɛ, la zẽ’e-sɛka tɩ a boe, la sɛba n boe Nawẽnnɛ yire la wuu. ⁷Tɩ ba bɔ ẽ nõorɛ tɩ a zɛbɛ la Nawẽnnɛ nẽrba yãŋɛ ba. Ba bɔ ẽ ke’eŋo tɩ a yãŋɛ la buuri wuu nẽrba, la tẽnsɩ wuu nẽrba, la yetɔga buuri wuu nẽrba, la so’olʋm wuu nẽrba. ⁸Nẽrba wuu n boe dũnia zuo wʋn nã’asɛ dũŋa la mɛ, sãn dagna sɛba yʋ’ʋra n gʋlsɛ Pebila tɩ ba daan kʋ la vɔm gõŋɔ pʋam na. Nẽr-bãma yʋ’ʋra daan põn gʋlsɛ vɔm gõŋɔ la pʋam na halɩ dũnia pĩ’iluŋo wakatɛ.

⁹Sɛka n wõm yetɔga wã, a selse sõŋa sõŋa. ¹⁰Nẽr-sɛka n de ba yõkɛ ẽ sẽŋɛ, ba wʋn yõkɛ ẽ sẽŋɛ. Nẽr-sɛka n de ba kʋ ẽ na sʋ’a, ba wʋn kʋ ẽ na sʋ’a. Bɛla, dẽnɩ tɩ Nawẽnnɛ nẽrba tara sũ-ke’eŋo, dee bɔ Nawẽnnɛ sɩra.

¹¹Bɛla poorʋm, mam yẽ la dũŋa ayẽma n ze’ele tẽŋa pʋam yese. A tarɩ la ɩɩla bayi n wõn na pebila ɩɩla, dee tɔgra wʋ pʋryõŋ-yãlma la. ¹²A tarɩ la pɔspɔsɩ dũŋa la ke’eŋo tõnna a nifum. A pẽrgɛ dũnia nẽrba wuu mɛ tɩ ba nã’asra pɔspɔsɩ dũŋa la n daan pɔglʋm ãna wʋ a ki mɛ, dee yeege la. ¹³Dũŋa bʋyi dãana la ẽŋɛ la bõn-yãlm-kãra, halɩ botɩ bugum zɛ’ɛta saazuum sigra dũnia, nẽrba nifum. ¹⁴Bõn-yãlma la tɩ a ẽŋɛ pɔspɔsɩ dũŋa la nifum na, botɩ a pã’asɛ dũnia nẽrba mɛ. A yele ba tɩ ba mãalɛ bõnɔ tɩ a ãna wʋ dũŋa la tɩ ba pɔglʋm na sʋ’a tɩ a vɔa la. ¹⁵Tɩ ba bɔ dũŋa bʋyi dãana la ke’eŋo tɩ a bɔ bõnɔ na tɩ ba mãalɛ tɩ a ãna wʋ pɔspɔsɩ dũŋa la vo’osʋm, tɩ a tãna tɔgra, dee kʋ sɛba wuu n ka nã’asrɩ ẽ na. ¹⁶La dũŋa la pẽrgɛ nẽrba wuu mɛ, tarɩmdõma la kɛ’ɛndõma, bõntatba la nasdõma, yamsɩ la burkĩndõma tɩ ba dãalɛ ba zʋʋgɔ nu’ugo bɩɩ ba dĩire. ¹⁷Tɩ nẽra nẽra ka tãna wʋn da bɩɩ koose sɛla, a sãn ka tara dũŋa la dãalgɔ, a yʋ’ʋrɛ, bɩɩ a yʋ’ʋrɛ la kãllɛ.

¹⁸Dẽnɩ tɩ fʋ tara yɛm: Nẽr-sɛka n tarɩ pʋtẽ’erɛ, ẽŋa n wʋn tã’agɛ bãŋɛ dũŋa la kãllɛ võorɛ. Se’ere n soe la, kãllɛ la võorɛ de la nẽrsaala kãllɛ. Kãllɛ la biɛ de la 666.

Pebila, la sɛba n boe la ẽ

¹Tɩ mam le bɩsɛ, yẽ Pebila la n ze Siyõ tãŋa zuo. Tɩ nẽrba tʋskɔbga la tʋspinaasɩ la anaasɩ (144’000) zɛ a zẽ’am, ba tarɩ la Pebila la yʋ’ʋrɛ, la a Sɔ yʋ’ʋrɛ n gʋlsɛ ba dĩa zuto. ²Tɩ mam wõm kõa n ze’ele Nawẽnnɛ yire tɩ a dãmnɛ ãna wʋ ko-kãtɛ dãmnɛ, dee ãna wʋ saaga n tãsrɩ sũnna, dee ãna wʋ kõl-wẽ’erba n wẽ’erɩ ba kõnnɔ. ³Nẽr-kʋʋŋɔ bãma ze la na’am bĩmbĩnne, la bõn-vɔɔsɩ banaasɩ, la kẽma la nẽŋam yõona yõom-paalɛ. Nẽra nẽra ka tã wʋn zãsʋm yõonɛ na, sãn dagna nẽrba tʋskɔbga la tʋspinaasɩ la anaasɩ la n yẽ fãarɛ dũnia zuo la mã’a. ⁴Nẽr-bãma ka dẽgɛ ba mẽŋa la pɔgsɩ, ba tarɩ ba mẽŋa sõŋa mɛ. Ba dolɩ la Pebila la zẽ’e-sɛka woo tɩ a we’esɩ. Ba yẽ fãarɛ nẽrsaalba pʋam tɩ ba dɛna la pɔspɔsɩ dõma bɔ Nawẽnnɛ, la Pebila la. ⁵Põmpɔrŋɔ yetɔga ka tole ze’ele ba nõorʋm, ba ka tarɩ tuure.

Malɛkadõma batã kõosɩ

⁶Tɩ mam yẽ malɛka ayẽma n ẽgrɩ saazuum-zuum, a tarɩ la Nawẽnnɛ kõ-yẽlga n boe wakatɛ wuu tɩ a mõolɛ bɔ nẽr-sɛba wuu n boe dũnia zuo, so’olʋm wuu nẽrba, la buuri wuu nẽrba, la yetɔga buuri wuu nẽrba, la tẽnsɩ wuu nẽrba. ⁷A daan tɔgrɩ mɛ ke’enke’em yetɩ: «Zoe-ya Nawẽnnɛ, la ya nã’asɛ ẽ, se’ere n soe la, wakatɛ paagɛ mɛ tɩ a wʋn di nẽrba sarɩya. Ka-ya dũma nã’asɛ Nawẽnnɛ n nãam saazuum, la tẽŋa, la ko-kãtɛ, la kʋlsɩ wuu n bulli la.»

⁸Tɩ malɛka bʋyi dãana dɔla pɔspɔsɩ dãana la poore yɛta tɩ: «A lui mɛ, a lui mɛ, Babilɔnɩ n de tẽn-kãtɛ la lui sã’am mɛ. Ẽŋa n botɩ so’olʋm wuu nẽrba tõm a yalsɩ tõoma zozo’e wʋ dãam tɩ a yũuse ba la.»

⁹Tɩ malɛka bʋtã dãana dɔla malɛkadõma bayi la tɔgra ke’enke’em yetɩ: «Nẽra sãn nã’asɛ dũŋa la, la a bõnɔ na tɩ ba mãalɛ la, la a sãn to’oge a dãalgɔ la a dĩire zuo bɩɩ a nu’ugo zuo, ¹⁰Nawẽnnɛ sũure wʋn yĩige la ẽ, tɩ a sɩbgɛ ẽ wʋ dã-ke’eŋo n ka pulum tɩ a pɩrɛ wannɛ bɔ ẽ tɩ a yũ. A wʋn nãmsɛ la kidibre n diti bugum pʋam, malɛg-sõma, la Pebila la nẽŋam. ¹¹Nẽr-bãma nãmsgɔ bug-zũ’usi zonnɩ la saazuum wakatɛ wuu. Nẽr-sɛba wuu n nã’asrɩ dũŋa la, la a bõnɔ na tɩ ba mãalɛ la, dee to’oge a yʋ’ʋrɛ dãalgɔ la, kãn malɩn yẽ vo’osgo wʋntɛɛŋa la yʋ’ʋŋɔ.»

¹²Bɛla, dẽnɩ tɩ Nawẽnnɛ nẽrba n sakra a nõorɛ dee bɔ Azezi sɩra la, tara sũ-ke’eŋo.

¹³Tɩ mam wõm kõa n ze’ele saazuum yele mam yetɩ: «Gʋlsɛ yetɩ: ‹Lan pɔsɛ lɛɛlɛ wã, nẽr-sɛba n kiiri Zuudãana doosgo pʋam na tarɩ zu-yẽlga.› Tɩ Nawẽnnɛ Sɩa yetɩ: ‹La de la sɩra, ba wʋn vo’ose la ba tõon-tooro, ba tõon-sõma la dolɩ ba mɛ.› »

Dũnia bõnkɔɔla lagsgɔ

¹⁴Tɩ mam bɩsra, yẽ sawatɛ n de pɛɛlga, tɩ nẽra n wõn na nẽrsaala dayʋa zɔa a zuo. A vuge la sãlma mũŋa, dee tarɩ geego n saasɛ tara nõorɛ a nu’um. ¹⁵Tɩ malɛka ayẽma ze’ele Wẽnde-kãtɛ la pʋam yese tɔgɛ la sɛka n zo sawatɛ zuo la ke’enke’em yetɩ: «Dɩkɛ geego la sɛɛra, tɩ lagsgɔ wakatɛ paagɛ mɛ, se’ere n soe la, tẽŋa zuo bõnkɔɔla bɩ mɛ seke lagsgɔ.» ¹⁶Tɩ sɛka n zĩ sawatɛ zuo la dɩkɛ a geego la doose tẽŋa zuo, sɛ tẽŋa bõnkɔɔla lagsɛ.

¹⁷Tɩ malɛka ayẽma ze’ele Wẽnde-kãtɛ n boe saazuum na pʋam yese, ẽŋa mẽ tarɩ la geego n saasɛ tara nõorɛ. ¹⁸Tɩ malɛka ayẽma n tarɩ ke’eŋo sɔna bugum ze’ele kãabgɔ bĩmbĩnne na zẽ’a yese tɔgɛ ke’enke’em la malɛk-sɛka n tarɩ geego n tarɩ nõorɛ la yetɩ: «Dɩkɛ fʋ geego la sɛ viinye tɩɩsɩ la biɛ n boe tẽŋa zuo la. Se’ere n soe la, ba biɛ la bɩ mɛ.» ¹⁹Tɩ malɛka la dɩkɛ a geego doose tẽŋa zuo sɛ viinye tɩɩsɩ la biɛ, dɩkɛ ba lobge bõn-kãtɛ tɩ ba wẽkrɩ viinye biɛ a pʋam n pa’alɩ Nawẽnnɛ sũ-yĩire la pʋam. ²⁰Tɩ ba wẽkɛ biɛ la wẽkrɛ bõnɔ na pʋam tẽŋa la kẽnkɛrŋa. Tɩ zɩɩm ze’ele wẽkrɛ bõnɔ na pʋam yese pɩrɛ tẽŋa zoe paagɛ kilomẽtrɩ kɔbstã. Tɩ wemõa sãn sige ba pʋam, la de ko’ogo paara la a garẽŋrɛ.

Malɛkadõma bayopɔɩ n zãlɩ ba’asgɔ tooro, la Pebila yõonɛ

¹Tɩ mam le yẽ bõn-bãnnɛ ayẽma saazuum n de yel-kãtɛ n ẽgrɩ palẽŋa. La de la malɛkadõma bayopɔɩ n zãlɩ tooro bayopɔɩ n de ba’asgɔ tooro. Se’ere n soe la, bãma n wʋn ẽŋɛ tɩ Nawẽnnɛ sũ-yĩire la ba’asɛ.

²Tɩ mam yẽ sɛla n ãn wʋ ko-kãtɛ n yẽgrɩ wʋ bɩsga n gaam na bugum. La mam yẽ la nẽr-sɛba n zɛbɛ yãŋɛ dũŋa, la a bõnɔ tɩ ba mãalɛ, dee ka sakɛ to’oge a yʋ’ʋrɛ la kãllɛ dãalgɔ la, n ze ko-kãtɛ n yẽgrɩ wʋ bɩsga la nõorʋm. Ba zãlɩ la kõnnɔ tɩ Nawẽnnɛ bɔ ba. ³Ba yõonɩ na Nawẽnnɛ tõntõnna Amoyisi yõonɛ, la Pebila la yõonɛ yetɩ:

«Zuudãana Nawẽnnɛ n de ke’eŋo wuu dãana,

fõn tõoma de la tõon-kãra, la tõon-yãlma.

So’olʋm buuri wuu Naba,

fõn yɛla la masɛ mɛ,

la ba de la sɩra.

⁴Zuudãana, ãne n kãn zoe fõn, nã’asɛ fõn yʋ’ʋrɛ la?

Se’ere n soe la, fõn mã’a n de pʋpeelem dãana.

So’olʋm wuu nẽrba wʋn wa’am wa ka dũma nã’asɛ fɔ,

se’ere n soe la, fõn tõoma n masɛ la puke mɛ tɩ ba yẽ.»

⁵Bɛla poorʋm mam bɩsɛ mɛ, yẽ tɩ Wẽnde-kãtɛ n boe Nawẽnnɛ yire la pʋam deego la yo’oge mɛ. ⁶Tɩ malɛkadõma bayopɔɩ la n zãlɩ tooro bayopɔɩ la ze’ele Wẽnde-kãtɛ la pʋam yese, ba yɛ la fu-pɛɛlsɩ n yẽgrɩ, dee dɩkɛ sãlma sẽbrɩsɩ bobe ba yõ’orɔ. ⁷Tɩ bõn-vɔɔsɩ banaasɩ la ayɩla bɔ malɛkadõma bayopɔɩ la sãlma laasɩ bayopɔɩ n pɩrɛ la Nawẽnnɛ n vɔa wakatɛ wuu la sũ-isgre. ⁸Tɩ Wẽnde-kãtɛ la pɩrɛ la bug-zũ’usi n pa’alɩ Nawẽnnɛ na’am pãŋa, la a ke’eŋo. Tɩ nẽra nẽra ka tãna wʋn kẽ Wẽnde-kãtɛ la pʋam, sãn dagna tɩ tooro bayopɔɩ la tɩ malɛkadõma bayopɔɩ la zãlɩ la n ba’asɛ.

Malɛkadõma ka’agɛ Nawẽnnɛ sũ-isgre bayopɔɩ dũnia zuo

¹Tɩ mam wõm kõa n ze’ele Wẽnde-kãtɛ la pʋam tɔgra ke’enke’em la malɛkadõma bayopɔɩ la yetɩ: «Sẽŋɛ-ya ka ka’agɛ Nawẽnnɛ sũ-isgre la n pɩrɛ laasɩ bayopɔɩ la basɛ dũnia zuo.»

²Tɩ pɔspɔsɩ malɛka sẽŋɛ ka ka’agɛ a laaga bõnɔ basɛ dũnia zuo. Tɩ nõrtãnkɛ’ɛ-tɔɔsɩ n dõnnɩ ĩyã yõgɛ nẽr-sɛba n tarɩ dũŋa la dãalgɔ, dee nã’asra a bõnɔ na tɩ ba mãalɛ la.

³Tɩ malɛka bʋyi dãana ka’agɛ a laaga bõnɔ basɛ ko-kãtɛ pʋam. Tɩ ko-kãtɛ la lebge wʋ nẽra n ki zɩɩm, tɩ bõn-vɔɔsɩ sɛba wuu n boe ko-kãtɛ la pʋam ki.

⁴Tɩ malɛka bʋtã dãana ka’agɛ a laaga bõnɔ basɛ mõga, la kʋlsɩ ko’om pʋam, tɩ ko’om na lebge zɩɩm. ⁵Tɩ mam wõm malɛka n bɩsrɩ ko’om yelle la n yele Nawẽnnɛ yetɩ:

«Fõn de la pʋpeelem dãana,

fõn daan boe mɛ, dee ken bɔna.

Fõn di sarɩya se’em na masɛ mɛ.

⁶Se’ere n soe la, ba kʋ la sɛba

n welge to’ore dɛna fõn nẽrba,

la fõn nõtɔ’ɔsrɩba tɩ ba zɩɩm yese,

bɛla tɩ fõn bɔ ba zɩɩm tɩ ba yũ.

Bɛla n masɛ la ba.»

⁷Tɩ mam wõm kõa n ze’ele kãabgɔ bĩmbĩnne na zẽ’am yetɩ:

«Asɩra, Zuudãana Nawẽnnɛ n de ke’eŋo wuu dãana, fõn sarɩyadia la masɛ mɛ, dɛna sɩra.»

⁸Tɩ malɛka bʋnaasɩ dãana ka’agɛ a laaga bõnɔ basɛ wẽntulle zuo tɩ a yõ’ogɛ nẽrba la a bugum. ⁹Tɩ tʋʋlg-kãtɛ yõ’ogɛ nẽrba, tɩ ba tʋʋra Nawẽnnɛ n de ke’eŋo wuu dãana n tara nõorɛ la tooro bãma la. La ba ka teege yɛm basɛ tõon-be’ero nã’asɛ Nawẽnnɛ.

¹⁰Tɩ malɛka bʋnuu dãana ka’agɛ a laaga bõnɔ basɛ dũŋa la na’am bĩmbĩnne na zuo. Tɩ dũŋa la so’olʋm wuu lebge lika. Tɩ toogo basɛ tɩ nẽrba ɔbra ba zɩlɩsɩ, ba ĩyã n dõnnɩ ĩyã. ¹¹Nõrtãnkɛ’ɛsɩ la tooro n tarɩ nẽrba la ĩyã, tɩ ba tʋʋra Nawẽnnɛ n boe saazuum na. La ba ka teege yɛm basɛ ba tõon-be’ero la.

¹²Tɩ malɛka bʋyoobɩ dãana ka’agɛ a laaga bõnɔ basɛ mõg-kãtɛ sɛka tɩ ba wi’iri tɩ Efratɩ la pʋam. Tɩ a ko’om kẽesɛ, lebge sore bɔ na’adõma sɛba n ze’ele wẽntulle doore bɔba la. ¹³Tɩ mam yẽ kʋlkã’arsɩ batã n ãn wʋ lonno n ze’ele pʋryõŋ-yãlma la nõorʋm, la dũŋa la nõorʋm, la põmpɔrŋɔ nõtɔ’ɔsa la nõorʋm yɛsra. ¹⁴Ba de la Asũtãana kʋlkã’arsɩ n ɩtɩ bõn-yãlma. Ba we’esɩ la dũnia na’adõma wuu zẽ’am tɩ ba lagsɛ ba, tɩ ba zɛbɛ la Nawẽnnɛ n de ke’eŋo wuu dãana, a dabs-kãtɛ la daarɛ.

¹⁵Tɩ Zuudãana yetɩ: «Bɩsɛ-ya, mam sẽm wʋ nayiga la. Nẽr-sɛka n ka gĩsri dee yɛ a futo tarɩ zu-yẽlga, bɛla tɩ a kãn sẽnna beele tɩ nẽrba yẽta a yãnnɛ.»

¹⁶Tɩ kʋlkã’arsɩ la lagsɛ na’adõma la zẽ’e-sɛka tɩ ba wi’iri la Ebre yetɔga tɩ «Armagedõ».

¹⁷Tɩ malɛka bʋyopɔɩ dãana ka’agɛ a laaga bõnɔ sapebsʋm pʋam. Tɩ kõa ze’ele na’am bĩmbĩnne n boe Wẽnde-kãtɛ la pʋam zẽ’am yetɩ: «La ẽŋɛ ba’asɛ.» ¹⁸Tɩ saaga yãgra, sũnna, tãsra, tɩ tẽŋa mĩim halɩ zozo’e. Nẽrsaalba n boe tẽŋa zuo tɛka, tẽŋa nãn ka mĩim be’em be’em wʋ bɛla. ¹⁹Tẽŋa la n mĩim na, tẽn-kãtɛ la pãrsɛ la zẽ’esɩ batã. Tɩ dũnia so’olʋm wuu tẽnsɩ lui. Nawẽnnɛ tẽegɛ Babilɔnɩ tẽn-kãtɛ la yelle mɛ, botɩ a yũ a sũ-isgre kãtɛ n ãn wʋ dãam n boe a wannɛ pʋam na. ²⁰Tɩ tẽn-sɛba wuu tɩ ko’om gilge, la tãnsɩ wuu bɔɩ, tɩ nẽra ka le yẽta ba. ²¹Tɩ sakug-kãra ze’ele saazuum lui nẽrba zuto. Sakugre ayɩla tɩbsɩgɔ paagɛ wʋ kilo pinaasɩ. Tɩ nẽrba tʋʋra Nawẽnnɛ, sakuga la toogo ĩyã. Se’ere n soe la, toogo la tarɩ la pãŋa tɩ la yõsgɛ gãŋɛ.

Pɔg-yalsɩ dãana n de tẽn-kãtɛ yelle

¹Tɩ malɛkadõma bayopɔɩ la n daan zãlɩ laasɩ bayopɔɩ la, ayɩla wa’am mam zẽ’am wa yele mam yetɩ: «Wa’am, tɩ mam wʋn pa’alɛ fɔ pɔg-yalsɩ dãana n de tẽn-kãtɛ n mẽ lɛm kʋlsɩ zozo’e nõorʋm na n wʋn yẽ sɩbgrɛ se’em. ²La de la ẽŋa tɩ dũnia na’adõma tõm yalsɩ tõoma la ẽ zozo’e. La dũnia nẽrba mẽ tõm na a yalsɩ tõoma wʋ dãam tɩ ba yũ buge la.»

³Tɩ Nawẽnnɛ Sɩa bɔna la mam, tɩ malɛka la tarɩ mam sẽŋɛ mõom. Tɩ mam yẽ pɔka n bã dũŋa n de mõlga tɩ yʋ’ʋra n tʋʋrɩ Nawẽnnɛ gʋlsɛ a ĩyã wuu. Dũŋa la daan tarɩ la zuto bayopɔɩ, la ɩɩla pia. ⁴Pɔka la daan yɛ la fu-mõlga n de gomusga, dee yɛ nẽnnõm lɔgrɔ n de sãlma, la kug-sõma buuri ligri n zo’oge. La a zãlɩ la sãlma laaga n pɩrɛ la bõn-be’ero n de a yalsɩ tõon-dẽgrɔ la. ⁵Yʋ’ʋrɛ n daan gʋlsɛ a dĩire zuo, tɩ ba ka mina a võorɛ. Yʋ’ʋrɛ la de la «Babilɔnɩ n de tẽn-kãtɛ la, a de la dũnia pɔg-yalsɩ dõma, la tõon-dẽgrɔ wuu ma». ⁶La mam yẽ tɩ pɔg-ẽŋa yũ la Nawẽnnɛ nẽrba zɩɩm buge, nẽr-sɛba n bɔ Azezi sɩra tɩ ba kʋ ba la zɩɩm.

Mam n yẽ ẽ na, la di’ige mam mɛ zozo’e. ⁷Tɩ malɛka la soke mam yetɩ: «Bẽm tɩ la dɛna di’ire bɔ fõn? Mam wʋn tɔgɛ pɔka la, la dũŋa la tɩ a bã n tarɩ zuto bayopɔɩ, la ɩɩla pia la võorɛ pa’alɛ fɔ. ⁸Dũŋa la tɩ fʋ yẽ la, kʋrʋm a vɔa mɛ, la a ka le bɔna, la a wʋn ze’ele la bog-ko’ogo la pʋam dooge, sẽŋɛ sã’aŋɔ zẽ’am. La dũnia nẽr-sɛba yʋ’ʋra n ka gʋlsɛ bɔna vɔm gõŋɔ la pʋam halɩ dũnia pĩ’iluŋo wakatɛ la sãn yẽ dũŋa la, la wʋn di’ige ba mɛ, dũŋa la n daan vɔa, ka le wa bɔna, dee le wa bɔna la ĩyã.

⁹Dẽnɩ tɩ fʋ tara yɛm, la pʋtẽ’erɛ. Zuto bayopɔɩ la de la tãnsɩ bayopɔɩ tɩ pɔka la zo ba zuto. ¹⁰La ba ken dɛna la na’adõma bayopɔɩ. Banuu bayopɔɩ la pʋam na’am ba’asɛ mɛ, la ayɩla n boe lɛɛlɛ wã, dee tɩ ayẽma nãn ka wa’am. La a sãn wa wa’am, a wʋn bɔna la wakatɛ fẽe. ¹¹La dũŋa la n daan vɔɩ dee ka le bɔna la, ẽŋa de la naba bʋnii dãana, la a ken dɛna la bayopɔɩ dõma la pʋam nẽra ayɩla. La a we’esɩ la sã’aŋɔ zẽ’a.

¹²Ɩɩla pia la tɩ fʋ yẽ la, de la na’adõma pia, la ba nãn ka to’oge na’am. La ba wʋn wa to’oge na’am lagɩm na dũŋa la di karf-ayɩla. ¹³Bãma pia la pʋtẽ’erɛ de la ayɩla, ba dɩkɛ ba pãŋa, la ba ke’eŋo la wuu bɔ la dũŋa la. ¹⁴Ba wʋn zɛbɛ la Pebila la mɛ, la Pebila la wʋn zɛbɛ yãŋɛ ba mɛ, ẽŋa n de zuudãandõma Zuudãana, la na’adõma Naba la ĩyã. Pebila la, la nẽr-sɛba tɩ a wi, looge ba tɩ ba dɛna sɩra dõma la, n wʋn zɛbɛ yãŋɛ ba.»

¹⁵Malɛka la le yele mam yetɩ: «Kʋlsɩ la tɩ fʋ yẽ, tɩ pɔg-yalsɩ dãana la zĩ ba nõorʋm na, de la nẽr-kʋʋŋɔ, tẽnsɩ wuu nẽrba, la so’olʋm to’oto’ore, la yetɔga buuri to’oto’ore nẽrba. ¹⁶Ɩɩla pia la tɩ fʋ yẽ la, la dũŋa la wʋn sise pɔg-yalsɩ dãana la mɛ, wʋn to’ose sɛla wuu tɩ a tarɩ la, dee basɛ ẽ beele. La ba wʋn obe a nẽnnɔ mɛ, dee yõ ẽ na bugum. ¹⁷Se’ere n soe la, Nawẽnnɛ n basɛ tɩ ba pʋtẽ’era tẽ’esra tɩ ba ẽŋɛ ẽŋa n boorɩ se’em. Tɩ ba wʋn lagɩm taaba la nõorɛ ayɩla dɩkɛ ba na’am ke’eŋo bɔ dũŋa la, halɩ ka paagɛ wakat-sɛka tɩ la wʋn ẽŋɛ wʋ Nawẽnnɛ yetɔga n yele se’em na ba’asɛ. ¹⁸Pɔka la tɩ fʋ yẽ la de la tẽn-kãtɛ n soe dũnia na’adõma wuu.»

Babilɔnɩ n de tẽn-kãtɛ la sã’aŋɔ

¹Bɛla poorʋm, mam le yẽ la malɛka n ze’ele Nawẽnnɛ yire sigra. A daan tarɩ la ke’eŋo zozo’e, tɩ a na’am pãŋa peelem nẽegɛ dũnia wuu. ²A tɔgɛ la ke’enke’em yetɩ: «A lui mɛ, a lui mɛ! Babilɔnɩ n de tẽn-kãtɛ la lui mɛ. A lebge la kʋlkã’arsɩ kẽ’a zẽ’a, a de la kʋlkã’ar-bɛ’ɛsɩ, la bõn-ẽgla n de bõn-dẽgrɔ tɩ nẽrba sisri sʋka zẽ’a. ³So’olʋm buuri wuu tõm na a yalsɩ tõoma wʋ dãam tɩ ba yũ la. Tɩ dũnia na’adõma lagɩm na ẽ tõm yalsɩ tõoma. Tɩ dũnia leebdõma doose a nẽnnõm lɔgrɔ n zo’oge la poorʋm yẽ bõntarsõm, bɛla tɩ a sã’am.»

⁴Tɩ mam wõm kõa ayẽma n ze’ele saazuum yetɩ: «M nẽrba, yese-ya a pʋam fõrgɛ, tɩ ya da kãn lagɩm na ẽ tõm a tõon-be’ero la, tɩ ya da lagɩm na ẽ yẽ tooro sɛba tɩ a wʋn yẽ la. ⁵Se’ere n soe la, a tõon-be’ero la zo’oge mɛ halɩ paagɛ saazuum. Nawẽnnɛ tẽrɩ a tõon-be’ero la wuu yelle mɛ. ⁶Ẽŋɛ-ya ẽ wʋ ẽŋa n ẽŋɛ basɛba se’em na, yɔ-ya ẽ ẽn ẽŋɛ se’em na nõorɛ ayi. Pɩrɛ-ya a wannɛ na la dã-ke’eŋo nõorɛ ayi bɔ ẽ, wʋ ẽn botɩ nẽrba basɛba yũ se’em na. ⁷Nãmsɛ-ya ẽ tɩ a yẽ toogo la sũ-sã’aŋɔ, wʋ ẽŋa n nã’asrɩ a mẽŋa la a nẽnnõm lɔgrɔ se’em na: A yetɩ a mẽŋa tɩ: ‹Mam zĩ dɛna la pɔg-naba, mam dagɩ pɔkõorɛ, la mam kãn yẽ nãmsgɔ, la sũ-sã’aŋɔ.› ⁸Bɛla ĩyã tooro wʋn wa’am a zuo la daarɛ ayɩla pʋam: La de la bã’asɩ n kʋʋrɩ, la sũ-sã’aŋɔ, la kɔm, la bugum n wʋn di ẽ, se’ere n soe la, Zuudãana Nawẽnnɛ n di a sarɩya la de la ke’eŋo dãana.»

⁹Dũnia na’adõma n tõnnɩ yalsɩ tõon-dẽgrɔ la tẽn-ẽŋa lɛ, dee yẽta nẽnnõm lɔgrɔ a zẽ’am na, sãn wa yẽ bugum n laŋɛ tẽŋa la dita tɩ zũ’usi gulla, ba wʋn kɛlla mɛ fabla a yelle. ¹⁰Ban zotɩ dabeem la a nãmsgɔ la, ba wʋn zɛ la zãazãarɛ dee yɛta yetɩ: «Waɩ, waɩ! Tẽn-kãtɛ la, Babilɔnɩ tẽŋa n tarɩ pãŋa la, karf-ayɩla pʋam tɩ fõn yẽ sɩbgrɛ wãna!»

¹¹Tɩ dũnia leebdõma mẽ wʋn kɛlla fabla a yelle, nẽra nẽra n ka le da’ara ba bõn-kɔɔsla la ĩyã. ¹²Ba bõn-kɔɔsla la de la sãlma, la zũuro, la kug-sõma buuri ligri n zo’oge, la tãn-sõma, la tãn-mõlsɩ n de gomusga, la tãn-saalsɩ n yẽgrɩ, la dɔɔrɔ buuri wuu n tarɩ yũuŋ-yẽlga, la lɔg-sɛba tɩ ba dɩkɛ wɔbgɔ yẽna mãalɛ, la lɔg-sɛba tɩ ba dɩkɛ dɔɔrɔ n tarɩ yõorɔ mãalɛ, la lɔg-sɛba tɩ ba dɩkɛ yõgõm, la kuto, la sãlm-kuga mãalɛ. ¹³La tɩɩsɩ pɔgrɔ n tarɩ yũuŋo, la bõnɔ n ãn wʋ kakadule, la tɩdarɛ kaam, la miiri, la tɩdarɛ tɩ ba yõ’orɩ, la dãam, la kaam, la zom, la bõnkɔɔla, la niigi, la piisi, la wiiri, la toto, la halɩ baa nẽrsaalba.

¹⁴Ba wʋn yele tẽŋa la yetɩ: «Bõn-sɛba wuu tɩ fʋ yɛm boorɩ la fõrgɛ dee basɛ fʋ mɛ. Fʋ bõntarsõm, la fʋ nẽnnõm lɔgrɔ la tole mɛ dee basɛ fɔ, tɩ nẽra nẽra kãn le malɩn yẽ ba.»

¹⁵Leebdõma n leebe lɔg-bãma yẽ bõntarsõm tẽn-ẽŋa pʋam na, wʋn zoe la dabeem la a nãmsgɔ la. Ba wʋn zɛ la zãazãarɛ kaasra dee fabla ¹⁶yetɩ: «Waɩ, waɩ! Tẽn-kãtɛ la n daan ãn wʋ pɔka n yɛɛrɩ fu-sõma, la fu-mõlsɩ n de gomusga, dee ɩta nẽnnõm la sãlma lɔgrɔ, la kug-sõma buuri ligri n zo’oge la. ¹⁷Karf-ayɩla pʋam tɩ a bõntarsõm na wuu darɛ sã’am.»

Õornɔ kɛ’ɛndõma, la nẽr-sɛba n kẽ’erɩ õornɔ sẽnna sore, la sɛba n tõnnɩ õornɔ na pʋam, la nẽr-sɛba n kẽ’erɩ õornɔ na ɛɛra lɛɛbra la ze la zãazãarɛ, ¹⁸la ban yẽtɩ tɩ bugum diti tẽŋa la tɩ zũ’usi gulla la, ba kaasrɩ mɛ yɛta tɩ: «Tẽŋa nãn ka boe n de tẽn-kãtɛ wʋ ẽna.»

¹⁹La ba vaarɩ la tẽntõnnɔ pukra ba zuto, kaasra, dee fabla yetɩ: «Waɩ, waɩ! Tẽn-kãtɛ ẽna bõntarsõm ĩyã tɩ nẽr-sɛba n tarɩ õornɔ ɛɛra ko-kãtɛ la pʋam lɛɛbra la lebge bõntatba. La karf-ayɩla pʋam tɩ a bõntarsõm na wuu darɛ sã’am.»

²⁰«Sɛba n boe Nawẽnnɛ yire, ẽŋɛ-ya sũ-yẽlga sɛla n paagɛ ẽ na ĩyã. Yãma n welge to’ore dɛna Nawẽnnɛ nẽrba, a Tõntõnɩba, la a nõtɔ’ɔsrɩba, ẽŋɛ-ya sũ-yẽlga. Se’ere n soe la, Nawẽnnɛ di tẽŋa la sarɩya sã’am ẽ mɛ, be’em sɛka tɩ a ẽŋɛ ya la ĩyã.»

²¹Tɩ malɛka n tarɩ pãŋa õbgɛ kug-kãtɛ n ãn wʋ nẽerɛ la lobge ko-kãtɛ la pʋam dee yetɩ: «Ba wʋn lobge Babilɔnɩ n de tẽn-kãtɛ la basɛ la bɛla la pãŋa, tɩ ba kãn le malɩn yẽ ẽ. ²²Ba kãn le wõm kõl-wẽ’erba wẽ’a, la yõonyõonɩba yõoma, la wɩɩsɩ, la benkɔma peebgo, la ba kãn le yẽ nẽra n tarɩ nu’ugo tõonɛ a pʋam, la ba kãn wõm nẽerɛ dãmnɛ mĩ. ²³Fɩtla bugum peelem kãn le nẽegɛ mĩ. Ba kãn le wõm pɔgdire kõa mĩ. Tẽŋa la leebdõma daan de la dũnia nẽrzuto. La tẽŋa la tɩɩm tõoma pã’asɛ so’olʋm buuri wuu nẽrba mɛ.»

²⁴La de la Babilɔnɩ tẽŋa la pʋam tɩ ba yẽ Nawẽnnɛ nõtɔ’ɔsrɩba, la Nawẽnnɛ nẽrba, la nẽr-sɛba tɩ ba daan kʋ dũnia wuu la zɩɩm.

¹Bɛla poorʋm, mam wõm na kõa n tɔgrɩ ke’enke’em Nawẽnnɛ yire wʋ nẽr-kʋʋŋɔ kõosɩ la yetɩ:

«Aleluya! Nã’asɛ-ya Nawẽnnɛ!

Fãarɛ, la nã’asgɔ, la ke’eŋo de la tõma Wẽnnaam n soe.

²Ẽŋa sarɩyadia la masɛ mɛ, dɛna sɩra.

Se’ere n soe la, a di pɔg-tutulga la n daan tõnnɩ yalsɩ tõoma zozo’e sã’ana dũnia la sarɩya mɛ sɩbgɛ ẽ, ẽn botɩ a tõntõnɩba ki la ĩyã.»

³Tɩ ba le yetɩ:

«Aleluya! Nã’asɛ-ya Nawẽnnɛ.

Tẽn-kãtɛ la tɩ bugum laŋɛ dita la bug-zũ’usi zonnɩ na saazuum wakatɛ wuu.»

⁴Tɩ kẽma pisyi la anaasɩ, la bõn-vɔɔsɩ banaasɩ la ka dũma tẽŋa nã’asra Nawẽnnɛ n zĩ a na’am bĩmbĩnne zuo la yetɩ:

«Amina. Aleluya! Nã’asɛ-ya Nawẽnnɛ.»

Pebila pɔgdire kibsa

⁵Tɩ kõa ze’ele na’am bĩmbĩnne na zẽ’am yetɩ:

«Yãma n de Nawẽnnɛ tõntõnɩba n zotɩ ẽ na, tarɩmdõma, la kɛ’ɛndõma, nã’asɛ-ya tɩ Nawẽnnɛ.»

⁶Tɩ mam le wõm kõa n ãn wʋ nẽr-kʋʋŋɔ zozo’e n tɔgrɩ, dee ãna wʋ ko-kãtɛ dãmnɛ, dee ãna wʋ saaga n tãsrɩ ke’enke’em yetɩ:

«Aleluya! Nã’asɛ-ya Nawẽnnɛ.

Zuudãana Nawẽnnɛ n de ke’eŋo dãana la n soe na’am.

⁷Basɛ-ya tɩ tɩ ẽŋɛ sũ-yẽlga sɩrʋm nã’asɛ Nawẽnnɛ,

se’ere n soe la,

Pebila la pɔgdire wakatɛ paagɛ mɛ,

tɩ pɔka la mẽ mãasʋm a mẽŋa ba’asɛ.

⁸Tɩ ba bɔ ẽ fu-sõŋɔ n yẽgrɩ ka tara dẽgrɔ, tɩ a yɛ.»

Fu-sõŋɔ la de la Nawẽnnɛ nẽrba tõon-sõma.

⁹Tɩ malɛka la yele mam yetɩ: «Gʋlsɛ yetɩ: Sɛba tɩ ba wi ba tɩ ba wa’am wa di Pebila la pɔgdire kibsa la tarɩ zu-yẽlga.» Dee le yetɩ: «Yetɔg-bãma de la Nawẽnnɛ yetɔga sɩra sɩra.» ¹⁰Tɩ mam ka dũma tẽŋa a nẽŋam tɩ m nã’asɛ ẽ, tɩ a yele mam yetɩ: «Da ẽŋɛ bɛla! Mam mẽ de la Nawẽnnɛ tõntõnna wʋ fõn, la fʋ sɔbiisi la n sakɛ sɩra tɩ Azezi pa’alɛ la. La de la Nawẽnnɛ n de fʋ nã’asɛ.»

Sɩra la tɩ Azezi puke pa’alɛ la n bɛla tɩ Nawẽnnɛ Sɩa botɩ a nõtɔ’ɔsrɩba tɔ’ɔsra tɔgra.

We-bã’ara n bã wemõ-pɛɛlga

¹¹La mam yẽ la Nawẽnnɛ yire n yo’oge, tɩ wemõ-pɛɛlga bɔna mĩ, tɩ sɛka n bã ẽ na yʋ’ʋrɛ dɛna Atẽntẽa, la Sɩra Dãana. A diti la sarɩya tɩ la masɛ, dee zɛbra zɛbrɛ tɩ la masɛ. ¹²A nini ãn wʋ bugwitum na, dee vuge mũnsi zozo’e a zuum. A tarɩ la yʋ’ʋrɛ n gʋlsɛ tɩ nẽra ka mina ẽ, sãn dagna a mẽŋa mã’a. ¹³La a yɛ la fu-woko n lʋsɛ zɩɩm pʋam. A yʋ’ʋrɛ de la Nawẽnnɛ yetɔga. ¹⁴Tɩ Nawẽnnɛ yire zɛbzɛbrɩba yɛ fu-pɛɛlsɩ n ãn sõŋa ka tara dẽgrɔ, bã wemõ-pɛɛlsɩ dɔla ẽ. ¹⁵Tɩ sʋkɔbgɔ n saasɛ tara nõorɛ ze’ele a nõorʋm yɛsra. A wʋn dɩkɛ la sʋ’a la zɛbɛ yãŋɛ so’olʋm buuri wuu. A wʋn tara la kuto dasaarɛ sɔna ba. A wʋn mẽrɛ ba la viinye biɛ wẽkrɛ bõnɔ n pa’alɩ ke’eŋo dãana Nawẽnnɛ sũ-isgre la pʋam. ¹⁶Yʋ’ʋrɛ n gʋlsɛ a fuugo zuo, la a gere zuo yetɩ: «Na’adõma Naba, la zuudãandõma Zuudãana.»

¹⁷Tɩ mam yẽ malɛka n ze wẽntulle pʋam n tɔgɛ ke’enke’em yele bõn-ẽgla wuu n ẽgrɩ saazuum yetɩ: «Wa’am-ya wa lagsɛ Nawẽnnɛ di-kãtɛ la zẽ’am. ¹⁸Ya wʋn di la na’adõma nẽnnɔ, la kɛ’ɛndõma, la sʋdaasɩ nẽnnɔ, la wiiri, la wi-bã’arba nẽnnɔ, la nẽrba wuu, burkĩndõma, la yamsɩ, la kɛ’ɛndõma, la tarɩmdõma wuu nẽnnɔ.»

¹⁹Tɩ mam yẽ dũŋa la, la dũnia na’adõma, la ba zɛbzɛbrɩba n lagsɛ taaba tɩ ba zɛbɛ la sɛka n bã wemõa, la a zɛbzɛbrɩba la. ²⁰Tɩ ba yõkɛ dũŋa la, la põmpɔrŋɔ nõtɔ’ɔsa la n daan ẽŋɛ bõn-yãlma dũŋa la nifum pã’asɛ sɛba n to’oge dũŋa la dãalgɔ, dee nã’asɛ a bõnɔ tɩ ba mãalɛ la. Ba lobe dũŋa, la põmpɔrŋɔ nõtɔ’ɔsa la wuu la vɔɔsɩ basɛ bugum mõgrɛ n diti kidibre pʋam. ²¹Tɩ sʋ’a la n ze’ele we-bã’ara la nõorʋm yɛsra la, kʋ sɛba n weege la. Tɩ bõn-ẽgla wuu di ba nẽnnɔ na tɩgɛ.

Yʋʋma tʋsrɛ na’am

¹Bɛla poorʋm, mam yẽ la malɛka n ze’ele Nawẽnnɛ yire sigra. A zãlɩ la bog-ko’ogo la saafɩbiire, la zɔrgɔ n ãn kãtɛ. ²A yõkɛ la pʋryõŋ-yãlma la n de kʋrʋm kʋrʋm bõnsɛla, n de dõta, n de Asũtãana la lʋ ẽ yʋʋma tʋsrɛ ĩyã. ³A lobe ẽ basɛ la bog-ko’ogo la pʋam yʋ, dee bɩ taasɛ, tɩ a da le yãŋɛ pã’asɛ dũnia so’olʋm nẽrba, gu’ura halɩ tɩ yʋʋma tʋsrɛ la wa paagɛ. Yʋʋma tʋsrɛ la poorʋm, dẽnɩ tɩ ba lorge ẽ basɛ wakatɛ fẽfẽe.

⁴Tɩ mam yẽ na’am bĩmbĩna, tɩ ba bɔ nẽr-sɛba n zĩ ba zuto la ke’eŋo tɩ ba di sarɩya. Tɩ mam yẽ nẽr-sɛba tɩ ba daan wige ba zuto, ban bɔ Azezi sɩra, dee mõolɛ Nawẽnnɛ yetɔga la sɩɩsɩ. Nẽr-bãma daan ka nã’asɛ dũŋa la, la a bõnɔ na tɩ ba mãalɛ la, la ba ka to’oge a dãalgɔ ba dĩa zuto bɩɩ ba nu’usi zuto. Ba vo’oge mɛ lagɩm na Krisi di na’am yʋʋma tʋsrɛ la pʋam. ⁵Ẽna de la pɔspɔsɩ kũm vo’ore. La kũm basɛba la ka vo’oge, sãn dagna yʋʋma tʋsrɛ la n wʋn wa tole. ⁶Nẽr-sɛba n wʋn po vo’oge pɔspɔsɩ kũm vo’ore la, tarɩ zu-yẽlga, bãma de la Nawẽnnɛ nẽrba. Kũm bʋyi dãana la ka tã wʋn ẽŋɛ ba sɛla. Bãma n wʋn dɛna Nawẽnnɛ la Krisi kãabgɔ kẽma, la ba wʋn lagɩm na Krisi di na’am yʋʋma tʋsrɛ.

Ba yãŋɛ Asũtãana

⁷Yʋʋma tʋsrɛ la sãn wa tole, ba wʋn yese Asũtãana yʋ’a zẽ’a na basɛ mɛ. ⁸Tɩ a yese pã’asɛ dũnia so’olʋm buuri wuu nẽrba, Gɔɔgɩ la Magɔɔgɩ. A wʋn lagsɛ ba mɛ tɩ ba zɛbɛ zɛbrɛ. Ba wʋn lagsɛ zo’oge wʋ tẽntõnbĩ’isgo n boe ko-kãtɛ nõorʋm se’em na. ⁹Ba wʋn yese mɛ dũnia wuu lagsɛ kaagɛ Nawẽnnɛ nẽrba n boe zẽ’e-sɛka, tẽn-sɛka tɩ Nawẽnnɛ nõŋɛ la. La bugum n wʋn ze’ele Nawẽnnɛ yire sige di ba. ¹⁰Tɩ ba wʋn yõkɛ Asũtãana n pã’asrɩ dũnia nẽrba la lobe basɛ bugum mõgrɛ n diti kidibre pʋam, zẽ’e-sɛka tɩ ba daan põn lobe dũŋa, la põmpɔrŋɔ nõtɔ’ɔsa la. Bilam ba wʋn nãmsra la wʋntɛɛŋa la yʋ’ʋŋɔ wakatɛ n ka ba’asrɩ.

Nawẽnnɛ di ba’asgɔ sarɩya

¹¹Tɩ mam le yẽ na’am bĩmbĩnne kãtɛ n de pɛɛlga, la sɛka n zĩ a zuo. Tɩ tẽŋa la saazuum zoe fõrgɛ a nẽŋam, tɩ ba ka le yẽ ba. ¹²Tɩ mam yẽ nẽr-sɛba n ki la, kɛ’ɛndõma, la tarɩmdõma n ze na’am bĩmbĩnne na nẽŋam. Tɩ ba lagsɛ gõnnɔ. La ba lakɛ la gõŋɔ ayẽma n de vɔm gõŋɔ. Tɩ ba di sɛba n ki la sarɩya masɛ wʋ ba tõoma n de se’em, wʋ lan gʋlsɛ gõnnɔ na pʋam se’em na. ¹³Tɩ ko-kãtɛ basɛ sɛba n ki a pʋam na, tɩ kũm, la kɩ’ɩn-tẽŋa mẽ basɛ nẽr-sɛba n ki bɔna ba zẽ’am na. La ba di ba wuu sarɩya masɛ wʋ ban tõm se’em na. ¹⁴Tɩ ba lobe kũm, la kɩ’ɩn-tẽŋa basɛ bugum mõgrɛ la pʋam. Bugum mõgrɛ la de la kũm bʋyi dãana. ¹⁵Sɛka yʋ’ʋrɛ n ka gʋlsɛ vɔm gõŋɔ la pʋam, ba wʋn lobe ẽ basɛ la bugum mõgrɛ la pʋam.

Saazuum paalga, la tẽn-paalga

¹Tɩ mam yẽ saazuum paalga, la tẽn-paalga. Pɔspɔsɩ saazuum, la pɔspɔsɩ tẽŋa la bɔɩ mɛ, la ko-kãtɛ mẽ ka le bɔna. ²La mam yẽ la Nawẽnnɛ tẽŋa n de Zerizalɛm paalga n ze’ele saazuum Nawẽnnɛ zẽ’am sigra. A malgɛ mɛ ãna sõŋa wʋ pɔka n yɛ nẽnnõm futo mãasʋm a mẽŋa tɩ a ele a sɩra. ³Tɩ mam wõm kõa n ze’ele na’am bĩmbĩnne na zẽ’am tɔgɛ ke’enke’em yetɩ: «Nawẽnnɛ kẽ’a zẽ’am boe la nẽrsaalba tẽŋasʋka. A wʋn kẽ’era la ba lɛ, tɩ ba dɛna a nẽrba. Nawẽnnɛ mẽŋa n wʋn bɔna la ba lɛ. ⁴A wʋn duuse ba nintãm wuu. La kũm kãn le bɔna, sũ-sã’aŋɔ la kaasga, bɩɩ toogo kãn le bɔna. Yel-kɛgsɩ la wuu tole mɛ.»

⁵Tɩ sɛka n zĩ na’am bĩmbĩnne zuo la yele yetɩ: «Bɩsɛ, mam ɩtɩ sɛla woo la paalsɩ.» Dee yele mam yetɩ: «Gʋlsɛ wãna, se’ere n soe la, mam yetɔga wã de la sɩra dee masɛ tɩ ba bɔ sɩra.»

⁶Dee le yele mam yetɩ: «La ẽŋɛ ba’asɛ mɛ. Mam de la Alfa, la Omega, sɛla woo pĩ’iluŋo, la ba’asgɔ. Koyũuro n tarɩ sɛka, mam wʋn bɔ ẽ ko’om n bulli n bɔ’ɔrɩ vɔm zãŋa tɩ a yũ. ⁷Nẽr-sɛka n yãŋɛ, a wʋn to’oge la bõn-bãma mam zẽ’am. Mam wʋn dɛna a Wẽnnaam, tɩ a mẽ dɛna mam bia. ⁸La sãn dɛna dabeto, la sɛba n ka bɔ sɩra, la sɛba n tõnnɩ tõon-dẽgrɔ, la nẽr-kʋʋrba, la yalsɩ dõma, la sɛba n tõnnɩ tɩɩm tõoma, la sɛba n nã’asrɩ bõndõma tɩ ba mãalɛ, la põmpɔrndõma la wuu, bãma zẽ’a de la bugum mõgrɛ n diti kidibre pʋam. Bɛla de la kũm bʋyi dãana.»

Zerizalɛm tẽn-paalga

⁹Tɩ malɛkadõma bayopɔɩ la n daan zãlɩ laasɩ bayopɔɩ n pɩrɛ la tooro bayopɔɩ n de ba’asgɔ tooro la, ayɩla wa’am wa yele mam yetɩ: «Wa’am tɩ mam wʋn pa’alɛ fʋ pɔka la n yetɩ a ele la, Pebila la pɔga la.»

¹⁰Tɩ Nawẽnnɛ Sɩa bɔna la mam, tɩ malɛka la tarɩ mam zom tãn-kãtɛ n wɔgɛ zuo. La a pa’alɛ mam na Nawẽnnɛ tẽŋa n de Zerizalɛm n ze’ele saazuum Nawẽnnɛ zẽ’am sigra, ¹¹n yẽgrɩ la Nawẽnnɛ na’am pãŋa. A sõŋa la yẽgrɩ wʋ kug-sõŋɔ n tarɩ yõorɔ, ãna wʋ kugre tɩ ba wi’iri tɩ zaspɩ, dee yẽgra wʋ bɩsga tɩ ba wi’iri kristalɩ. ¹²Tẽŋa la tarɩ la lal-kãtɛ n wɔgɛ gilge ẽ, tara nõa pia la ayi. Tɩ malɛkadõma pia la ayi gu’ura nõa la. Ɩsrayɛlɩ buuri pia la ayi la yʋ’ʋra n gʋlsɛ nõa la zuto. ¹³Nõa batã n boe lalga la dapoore bɔba, tɩ batã bɔna zʋʋgɔ bɔba, tɩ batã bɔna gɔbga bɔba, tɩ batã bɔna zanõa bɔba. ¹⁴Tẽŋa la lalga ẽebɛ la kuga pia la ayi zuto. Tɩ Azezi n de Pebila la Tõntõnɩba pia la ayi la yʋ’ʋra gʋlsɛ kug-bãma zuto.

¹⁵Malɛk-sɛka n daan tɔgɛ la mam na, tarɩ la sãlma dɔɔgɔ tɩ ba tarɩ makra, tɩ a makɛ tẽŋa la, la a nõa, la a lalga la. ¹⁶Tẽŋa la de la tẽn-wẽkɔ tɩ a lalsɩ banaasɩ la wuu zõna taaba. Tɩ malɛka la dɩkɛ dɔɔgɔ la makɛ tẽŋa la. Tɩ a yɔlŋɔ dɛna sɩtaadɩ tʋspia la ayi. A woglʋm la a yɔlŋɔ, la a saazuum woko zõn na taaba. ¹⁷La a makɛ lalga la mɛ, tɩ a woglʋm dɛna kãntɩɩsɩ kɔbga la pinaasɩ la anaasɩ. A kãntɩɩsɩ la de la bʋyɩla la nẽrsaala kãntɩɩsɩ.

¹⁸Ba dɩkɛ la kug-sõma yʋ’ʋrɛ n de zaspɩ mẽ lalga la. La tẽŋa la mẽŋa de la sãlma mẽŋa mẽŋa n yẽgrɩ ãna wʋ bɩsga la. ¹⁹Lalga la, ba dɩkɛ la kug-sõma buuri to’oto’ore n tarɩ yõorɔ ẽebɛ ẽ, tɩ a ãna sõŋa.

Ẽbrɛ la pɔspɔsɩ kugre la yʋ’ʋrɛ de la zaspɩ,

tɩ bʋyi dãana yʋ’ʋrɛ dɛna safɩɩrɩ,

tɩ bʋtã dãana dɛna kalsedʋanɩ,

tɩ bʋnaasɩ dãana dɛna emerɔdɩ.

²⁰Tɩ bʋnuu dãana dɛna sadonigsi,

tɩ bʋyoobɩ dãana dɛna sardʋanɩ,

tɩ bʋyopɔɩ dãana dɛna krizoliti,

tɩ bʋnii dãana dɛna berili,

tɩ bʋwɛɩ dãana dɛna topaazɩ,

tɩ pia dãana dɛna krizoprazɩ,

tɩ pia la ayɩla dãana dɛna yasẽntɩ,

tɩ pia la ayi dãana dɛna ametisti.

²¹Nõa pia la ayi la kʋlɩnsɩ, ba dɩkɛ la kug-sõma buuri n tarɩ yõorɔ yʋ’ʋrɛ n de pɛrlɩ pia la ayi ẽŋɛ ba. Ba dɩkɛ la pɛrlɩ ayɩla ẽŋɛ nõorɛ ayɩla woo kʋlɩŋa. Tẽŋa la pallɛ de la sãlma mẽŋa mẽŋa n yẽgrɩ wʋ bɩsga la.

²²Mam ka yẽ Wẽndeego tẽŋa la pʋam, se’ere n soe la, Zuudãana Nawẽnnɛ n de ke’eŋo wuu dãana, la Pebila la n boe mĩ. ²³Tẽŋa la ka boorɩ wẽntulle, bɩɩ wõrga tɩ ba nẽegɛ ẽ, se’ere n soe la, Nawẽnnɛ na’am pãŋa peelem n nẽerɩ ẽ, tɩ Pebila la dɛna a fɩtla. ²⁴Dũnia so’olʋm wuu nẽrba wʋn sẽnna la a peelem na pʋam. La dũnia na’adõma wʋn tara ba bõntarsõm sẽŋɛ mĩ. ²⁵Tẽŋa la nõa kãn malɩn yʋ, se’ere n soe la, yʋ’ʋŋɔ ka boe mĩ. ²⁶Ba wʋn tarɩ dũnia so’olʋm wuu nã’asgɔ, la ba bõntarsõm sẽŋɛ mĩ. ²⁷Sɛla n de bõn-dẽgrɔ wuu, bɩɩ nẽr-sɛka woo n tõnnɩ tõon-dẽgrɔ, la põmpɔrndõma kãn kẽ tẽŋa la pʋam. Nẽr-sɛba yʋ’ʋra n gʋlsɛ Pebila la vɔm gõŋɔ la pʋam mã’a n wʋn kẽ tẽŋa la pʋam.

¹Tɩ malɛka la pa’alɛ mam ko’om n bɔ’ɔrɩ vɔm kʋlaaga. Kʋlaaga la yẽgrɩ wʋ bɩsga la. A ze’ele la Nawẽnnɛ, la Pebila na’am bĩmbĩnne na zẽ’am ²zɔta tẽŋa la pʋam pallɛ tẽŋasʋka. Tɩa n bɔ’ɔrɩ vɔm n boe kʋlaaga la sakʋgrɔ bayi la wɔnna biɛ nõorɛ pia la ayi yʋʋnɛ pʋam. A wɔnnɩ na nõorɛ ayɩla wõrga woo pʋam. Tɩa la võorɔ bɔ’ɔrɩ la dũnia so’olʋm wuu ĩmã’asʋm. ³Sɛla tɩ Nawẽnnɛ kã be’em bɔ ẽ kãn le bɔna tẽŋa la pʋam. Nawẽnnɛ, la Pebila la na’am bĩmbĩnne n wʋn bɔna mĩ. Tɩ Nawẽnnɛ tõntõnɩba wʋn nã’asra ẽ. ⁴La ba wʋn yẽ a nẽŋa, la a yʋ’ʋrɛ wʋn gʋlsɛ ba dĩa zuto. ⁵Yʋ’ʋŋɔ kãn le bɔna. Nẽrba kãn bɔɔra tɩ fɩtla, bɩɩ wẽntulle nẽegɛ peelem, Zuudãana Nawẽnnɛ n wʋn nẽegɛ peelem bɔ ba. La ba wʋn di la na’am wakatɛ n ka ba’asrɩ.

Azezi lemŋo

⁶Tɩ malɛka la yele mam yetɩ: «Yetɔg-bãna wã wuu de la sɩra, masɛ tɩ ba bɔ sɩra. La de la Zuudãana Nawẽnnɛ mẽŋa n botɩ a nõtɔ’ɔsrɩba tɔ’ɔsra a yetɔga tɔgra la, n tõm a malɛka tɩ a wa’am wa pa’alɛ a tõntõnɩba sɛla n kãn yuuge dee ẽŋɛ.» ⁷Azezi yetɩ: «Selse-ya! La kãn yuuge dee tɩ mam wa’am. Sɛka n sakrɩ gõŋɔ wã yetɔga tɩ ba to’osrɩ Nawẽnnɛ zẽ’am tɔgra la tarɩ zu-yẽlga.»

⁸La de la mam Azã n wõm dee yẽ bõn-bãma. La mam n wõm dee yẽ ba la, mam ka la dũma tẽŋa malɛka la n pa’alɛ mam bõn-bãma la nẽŋam tɩ m nã’asɛ ẽ. ⁹Tɩ a yele mam yetɩ: «Da ẽŋɛ bɛla, tɩ mam mẽ de la tõntõnna wʋ fõn, la fʋ sɔbiisi n de nõtɔ’ɔsrɩba, la nẽr-sɛba wuu n sakrɩ gõn-ẽna wã yetɔga la. Nawẽnnɛ n de fʋ nã’asɛ.»

¹⁰A yele bɛla dee yele mam yetɩ: «Da sʋgɛ gõŋɔ wã yetɔga tɩ Nawẽnnɛ puke pa’alɛ fʋ la, se’ere n soe la, wakat-sɛka tɩ bõn-bãna wʋn ẽŋɛ la lɛm mɛ. ¹¹Sɛka n de tõon-be’ero dãana, a ken tõnna be’em. Sɛka n de tõon-dẽgrɔ dãana, a ken tõnna tõon-dẽgrɔ. La sɛka n ɩtɩ sɛla n masɛ, a ken ɩta sɛla n masɛ. Tɩ sɛka n de pʋpeelem dãana, ken sẽŋɛ nẽŋa la pʋpeelem.»

¹²Azezi yele yetɩ: «Selse-ya! La kãn yuuge dee tɩ mam wa’am. La mam tarɩ la yɔɔrɔ sẽna tɩ m yɔ nẽra woo masɛ wʋ ẽn tõm se’em. ¹³Mam de la Alfa, la Omega, pɔspɔsɩ dãana, la poorʋm dãana, sɛla woo pĩ’iluŋo, la ba’asgɔ.»

¹⁴Sɛba n peege ba futo tarɩ zu-yẽlga. Bãma n wʋn tara nõorɛ tɩ ba di vɔm tɩa la biɛ, la bãma n wʋn doose tẽŋa la nõa kẽ tẽŋa la pʋam. ¹⁵La nẽr-sɛba n tõnnɩ tõon-dẽgrɔ, la sɛba n tõnnɩ tɩɩm tõoma, la sɛba n tõnnɩ yalsɩ tõoma, la nẽr-kʋʋrba, la sɛba n nã’asrɩ bõndõma tɩ ba mãalɛ, la nẽr-sɛba wuu n nõŋɛ põmpɔrŋɔ dee parna la, wʋn weege la yẽŋa, ba kãn kẽ tẽŋa la pʋam.

¹⁶«Mam Azezi n tõm m malɛka tɩ a wa’am wa tɔgɛ bõn-bãma wuu pa’alɛ m nẽrba. Mam de la naba Adavidi yɩɩŋa, la bewã’arɛ n nẽerɩ.»

¹⁷Nawẽnnɛ Sɩa, la pɔka la n mãasʋm a mẽŋa tɩ a ele la yetɩ: «Wa’am!»

Sɛka n wõm bɛla, a mẽ yetɩ: «Wa’am!» Koyũuro n tarɩ sɛka, a wa’am, sɛka n boorɩ ko’om n bɔ’ɔrɩ vɔm, a wa’am wa to’oge zãŋa.

Ba’asgɔ yetɔga

¹⁸Nẽr-sɛka woo n wõm Nawẽnnɛ yetɔga wã n boe gõŋɔ wã pʋam, mam Azã kã’anɩ ẽ yetɩ, nẽr-sɛka sãn pa’asɛ sɛla yetɔga wã pʋam, Nawẽnnɛ wʋn botɩ a yẽ tooro sɛba n gʋlsɛ gõŋɔ wã pʋam na. ¹⁹La nẽr-sɛka sãn yese sɛla gõŋɔ wã yetɔga pʋam, Nawẽnnɛ wʋn yese a pʋrɛ tɩ a kãn po di vɔm tɩa la biɛ, la a kãn kẽ Nawẽnnɛ tẽŋa la pʋam wʋ lan pa’alɛ se’em gõŋɔ wã pʋam na.

²⁰Sɛka n tɔgɛ yetɔg-bãna bɔ la yetɩ la de la sɩra, a yetɩ: «Asɩra, la kãn yuuge dee tɩ mam wa’am.»

Amina! La dɛna bɛla. Zuudãana Azezi, wa’am.

²¹Tɩ Zuudãana Azezi yel-sõnnɛ bɔna la ya wuu.