Filipi

Gõn-sɛka tɩ Apolɩ gʋlsɛ bɔ

Filipi dõma

Bilgre

Filipi de la Masedʋanɩ tẽŋa ayɩla, Rom dõma n yʋʋn soe ba. Filipi n de pɔspɔsɩ tẽŋa Erɔpɩ tɩ Apolɩ mõolɛ Azezi kõ-yẽlga, tɩ nẽrba bɔ sɩra (Tõoma 16:11-40).

Wakat-sɛka tɩ Apolɩ gʋlsɛ gõŋɔ wã la, a boe la yʋ’a deem.

Nawẽnnɛ nẽrba n boe Filipi n yʋʋn sõŋɛ ẽ, tɩ a pʋ’ʋsra Nawẽnnɛ ba ĩyã. Dee yele ba tɩ ba yẽ sũ-ke’eŋo, la bʋraanɛ, wʋ ẽŋa n yẽ toogo dee ze’ele kãŋkãŋɛ se’em na. Ba tara sik-m-mẽŋa tẽ’esgɔ, wʋ Azezi n sike a mẽŋa se’em na, ba da ɛɛra ba mẽŋa mã’a sõŋrɛ (sapɩtrɩ 1-2).

La Apolɩ tẽegɛ ba yetɩ ban masɛ Nawẽnnɛ zẽ’am na, la de la yel-sõnnɛ tɩ Nawẽnnɛ ẽŋɛ bɔ ba, ban bɔ Azezi sɩra la ĩyã, la dagɩ ban sakɛ Zifdõma lɔɔ la ĩyã. Dee kã’an ba yetɩ ba da sakɛ põmpɔrŋɔ karẽnsãandõma, ba ɩta ẽŋa n ɩtɩ se’em na, la ba ken mõrgɛ vɔa wʋ Azezi mẽŋa n yʋʋn vɔa se’em na (sapɩtrɩ 3).

La a pa’alɛ ba yetɩ nẽr-sɛba wuu n vɔa la Azezi la, Nawẽnnɛ bɔ’ɔrɩ ba la sũ-yẽlga, la sũ-mã’asʋm (sapɩtrɩ 4).

Gõŋɔ wã pa’alɛ mɛ tɩ Apolɩ nõŋɛ Filipi dõma mɛ zozo’e.

¹Mam Apolɩ la Atimõtɩ n de Azezi-krisi tõntõnɩba n gʋlsɛ gõŋɔ wã bɔ’ɔra yãma sɛba wuu n bɔ Azezi-krisi sɩra dɛna Nawẽnnɛ nẽrba, la ya nẽŋadõma, la ya yel-bɩsrɩba n boe Filipi. ²Tɩ Sɔ Nawẽnnɛ la tɩ Zuudãana Azezi-krisi wʋn ẽŋɛ ya yel-sõnnɛ, dee bɔ ya sũ-mã’asʋm.

Apolɩ pʋ’ʋsrɩ Nawẽnnɛ Krisi nẽrba n boe Filipi ĩyã

³Mam pʋ’ʋsrɩ Nawẽnnɛ mɛ a yel-sõnnɛ ya ĩyã wakatɛ sɛka woo tɩ mam tẽegɛ ya yelle. ⁴Wakatɛ wuu tɩ mam pʋ’ʋsrɩ Nawẽnnɛ ya wuu ĩyã la, mam pʋ’ʋsrɩ la sũ-yẽlga, ⁵yãma n sõŋɛ mam la kõ-yẽlga la tõonɛ halɩ pɔspɔsɩ daarɛ wa paam zĩna la ĩyã. ⁶Mam mi sɩra sɩra tɩ Nawẽnnɛ n pɔsɛ tõon-sõŋɔ ẽŋa ya sũure pʋam na, wʋn ken tõm ẽ bɛla halɩ ka ba’asɛ Azezi-krisi lemŋo daarɛ. ⁷La masɛ mɛ tɩ mam tẽ’esɛ bɛla ya wuu ĩyã, se’ere n soe la, mam yɛm boe la ya lɛ mɛ. Bẽm ĩyã, la sãn dɛna mam n boe yʋ’a deem wã, bɩɩ mam n tɔgrɩ pa’ala nẽrba tɩ kõ-yẽlga la de la sɩra la, ya wuu lagɩm na mam mɛ yẽ Nawẽnnɛ yel-sõnnɛ. ⁸Nawẽnnɛ n de mam kaset-dãana tɩ mam yɛm boe la ya wuu mɛ, mam nõŋɛ ya la Azezi-krisi nõŋlʋm. ⁹La mam n sosrɩ Nawẽnnɛ bõn-sɛka de la ya nõŋlʋm wʋn pa’asra daarɛ woo, la bãŋrɛ, la yɛm vẽlgrɛ, ¹⁰tɩ ya wʋn bãŋɛ sɛla n ãn sõŋa, tɩ Krisi lemŋo daarɛ ya wʋn dɛna pʋpeelem dõma ka tara dõrga, ¹¹tɩ ya tõoma wʋn dɛna tõon-sõma n masɛ n ze’ele Azezi-krisi zẽ’am, tɩ la wʋn botɩ Nawẽnnɛ yẽ pẽka la nã’asgɔ.

Krisi ĩyã tɩ mam vɔa

¹²M sɔbiisi, mam boorɩ mɛ tɩ ya bãŋɛ tɩ sɛla n ẽŋɛ mam na basɛ mɛ tɩ kõ-yẽlga la mõolgɔ sẽŋɛ nẽŋa. ¹³La basɛ tɩ nayire sʋdaasɩ, la nẽrba basɛba la wuu bãŋɛ tɩ mam n boe yʋ’a deem na de la Krisi tõoma ĩyã. ¹⁴La tɩ sɔbiisi zozo’e yẽ bʋraanɛ mɛ Zuudãana doosgo la pʋam, mam n boe yʋ’a deem na ĩyã, tɩ ba sũure kɛŋra pa’asra, tɩ ba mõola Nawẽnnɛ kõ-yẽlga la ka zɔta dabeem.

¹⁵La de la sɩra tɩ nẽrba basɛba mõolɩ Krisi kõ-yẽlga la sũure ĩyã, la gẽelgɔ, la basɛba mõolɩ la pʋtẽ’e-sõŋɔ. ¹⁶Pʋtẽ’e-sõŋɔ dõma la mõolɩ ẽ na nõŋlʋm, ba mi tɩ Nawẽnnɛ n looge mam tɩ m tɔgɛ pa’alɛ tɩ kõ-yẽlga la de la sɩra. ¹⁷La basɛba la mõolɩ Krisi kõ-yẽlga la gẽelgɔ, la dagɩ la pʋpeelem. Ba tẽ’esrɩ tɩ bõn-ẽŋa wʋn pa’asɛ mam na nãmsgɔ, mam n boe yʋ’a deem na. ¹⁸La bɛla dagɩ yelle, la sãn dɛna la pʋtẽ’e-sõŋɔ bɩɩ pʋtẽ’e-be’ego, lan de se’em wuu, Krisi kõ-yẽlga la mõolɛ mɛ, bɛla mam ɩtɩ sũ-yẽlga mɛ.

La mam wʋn ken ɩta sũ-yẽlga mɛ, ¹⁹se’ere n soe la, mam mi tɩ yãma pʋ’ʋsgɔ ĩyã, la Azezi-krisi Sɩa sõŋrɛ ĩyã, bõn-ẽŋa wʋn ba’asõm bɔ mam na fãarɛ. ²⁰Mam n boorɩ sɛla, dee tara pʋtẽ’erɛ gu’ura sɛla la, de la mam kãn ẽŋɛ sɛla baa ayɩla tɩ yãnnɛ yõkɛ mam. La de la mam tara bʋraanɛ lɛɛlɛ wã la wakatɛ wuu, basɛ tɩ Krisi yẽ nã’asgɔ mam ĩyã, la sãn dɛna mam vɔa mɛ, bɩɩ mam sãn ki mɛ. ²¹La sãn dɛna la mam, mam sãn vɔa, la de la Krisi ĩyã, la kũm de la yõorɔ bɔ mam. ²²La mam sãn ken vɔa, mam wʋn tõm na tõon-sõma sõŋɛ nẽrba. Bɛla, mam ka mi mam n wʋn looge sɛka. ²³Mam boe la yɛla bayi tẽŋasʋka, mam boorɩ tɩ m basɛ vɔm ẽna mɛ dee sẽŋɛ ka bɔna Krisi zẽ’am, bɛla n ãn sõŋa gãnna. ²⁴La yãma ĩyã, mam sãn ken vɔa n ãn sõŋa gãnna. ²⁵Mam mi tɩ bõn-ẽŋa de la sɩra. Bɛla, mam mi tɩ mam wʋn ken vɔa mɛ bɔna la ya wuu, sõŋɛ ya tɩ ya sẽŋɛ nẽŋa Azezi-krisi doosgo pʋam, tara sũ-yẽlga. ²⁶La mam sãn leme wa bɔna la ya lɛ, ya zuugo wʋn zẽkɛ pa’asɛ mam ĩyã Azezi-krisi doosgo la pʋam.

Mõrgra-ya Krisi kõ-yẽlga la ĩyã

²⁷La bõn-sɛka n gãnnɩ wuu, de la ya basɛ tɩ ya yel-ɩrɛ ãna wʋ Krisi kõ-yẽlga la n pa’alɩ se’em na. Tɩ mam sãn wa’am ya zẽ’am bɩɩ m sãn ka wa’am, m wʋn wõm tɩ ya ze la kãŋkãŋɛ, tara yɛm ayɩla, lagɩm taaba la pʋtẽ’erɛ ayɩla mõrgra tõnna tɩ nẽrba bɔ’ɔra kõ-yẽlga la sɩra. ²⁸Da basɛ-ya tɩ dabeem tara ya la bɛ’ɛba baa fẽfẽe, tɩ bɛla n wʋn pa’alɛ ba tɩ ba wʋn sã’am mɛ, la yãma wʋn yẽ la fãarɛ, bɛla ze’ele la Nawẽnnɛ zẽ’am. ²⁹Se’ere n soe la, Nawẽnnɛ n ẽŋɛ ya yel-sõnnɛ na, la dagɩ ya bɔ Krisi sɩra mã’a, la de la ya ken nãmsɛ a ĩyã. ³⁰Ya nãmsɛ wʋ yãma n yẽ mam n nãmsɛ se’em, dee wõnna tɩ mam ken nãmsra lɛɛlɛ wã.

Krisi sik-m-mẽŋa, la a na’am

¹Yãma n lagɩm na Krisi dɛna ayɩla la basɛ tɩ ya tara bʋraanɛ mɛ, tɩ a nõŋlʋm na bɛlsra ya. La yãma lagɩm na taaba la Nawẽnnɛ Sɩa, dee tara nõŋlʋm, la taaba zĩile. ²Lan de bɛla la, lagɩm-ya taaba la nõorɛ ayɩla tara nõŋlʋm, la yɛm ayɩla, la pʋtẽ’erɛ ayɩla, bɛla tɩ mam sũ-yẽlga wʋn zo’oge gãŋɛ. ³Da ɩta-ya sɛla sɛla gẽela taaba la pa’al-m-mẽŋa, sikra ya mẽŋa tẽ’esra tɩ nẽrba basɛba la gãnnɩ ya. ⁴Nẽra nẽra da tẽ’esra a mẽŋa mã’a sõŋrɛ yelle. Ɛɛra-ya ya taaba sõŋrɛ. ⁵Tara-ya pʋtẽ’e-sɛka tɩ Azezi-krisi daan tarɩ la.

⁶Azezi-krisi la Nawẽnnɛ n de ayɩla la,

a ka tẽ’esɛ tɩ ẽŋa n zõn na Nawẽnnɛ na,

de la sɛla tɩ ẽŋa wʋn gʋrɛ kãŋkãŋɛ.

⁷A sike a mẽŋa mɛ,

basɛ ẽŋa n ãn se’em na,

dee lebge nẽrsaala,

ẽŋɛ a mẽŋa tõntõnna,

wa bɔna la nẽrsaalba lɛ.

⁸Ẽŋa n daan de nẽrsaala la,

a sike a mẽŋa mɛ,

sakɛ Nawẽnnɛ halɩ ki dɔ-puurŋa zuo.

⁹Bɛla ĩyã tɩ Nawẽnnɛ zẽkɛ ẽ halɩ,

bɔ ẽ yʋ’ʋrɛ n gãnnɩ yʋ’ʋra wuu.

¹⁰Tɩ Azezi ĩyã,

bõn-sɛba wuu n boe saazuum,

la tẽŋa zuo, la tẽŋa pʋam,

wʋn ka dũma tẽŋa a nẽŋam pẽgɛ ẽ, a yʋ’ʋrɛ la ĩyã.

¹¹Tɩ nẽra woo wʋn yetɩ,

Azezi-krisi n de Zuudãana,

tɩ la wʋn dɛna nã’asgɔ bɔ tɩ Sɔ Nawẽnnɛ.

Ãna-ya wʋ peelem dũnia wã pʋam

¹²Bɛla, m sɩr-nõŋrɩsɩ, mam n daan boe la ya lɛ la, ya daan sakrɩ mɛ wakatɛ wuu, la mam n ka boe ya zẽ’am wã, ken ɩta-ya gãnna bɛla. Tõnna-ya fãarɛ la tõoma sõŋa sõŋa la Nawẽnnɛ zʋa. ¹³Se’ere n soe la, Nawẽnnɛ n boe la ya lɛ tõnna, botɩ ya bɔɔra ẽŋa n boorɩ se’em, dee tãna ɩta ẽŋa n boorɩ se’em.

¹⁴Ɩta-ya sɛla woo tɩ yõŋa, la nõkɛ’ɛma wẽ’a da bɔna. ¹⁵Tɩ ya wʋn dɛna nẽrba n ka tarɩ yelle, ãna sõŋa ka tara dẽgrɔ. Tɩ ya wʋn dɛna Nawẽnnɛ kɔma n ka tarɩ dõrga n boe nẽr-bɛ’ɛsɩ la nẽr-yaalsɩ tẽŋasʋka, yẽgra wʋ peelem dũnia wã zuo, ¹⁶wʋn pa’alɛ nẽrba yetɔga n bɔ’ɔrɩ vɔm. Ya sãn ẽŋɛ bɛla, ya wʋn botɩ mam zuugo zẽkɛ Krisi lemŋo daarɛ, pa’alɛ tɩ mam tõoma, la mam n mõrgrɩ la wuu dagɩ zãŋa. ¹⁷Ba sãn kʋ mam, la wʋn ãna wʋ kãabgɔ pa’asɛ yãma n bɔ Nawẽnnɛ sɩra tɩ la ãna wʋ kãabgɔ bɔ ẽ na pʋam. Baa la sãn dɛna bɛla, mam sũure ãn yẽlʋm mɛ, la mam wʋn ẽŋɛ sũ-yẽlga la yãma wuu. ¹⁸Bɛla, ya mẽ tara sũ-yẽlga lagɩm na mam sɩrʋm.

Apolɩ yetɩ a tõm Atimõtɩ la A’epafroditi

¹⁹Mam tarɩ pʋtẽ’erɛ tɩ Zuudãana Azezi sãn sõŋɛ, la kãn yuuge dee tɩ mam tõm Atimõtɩ ya zẽ’am, tɩ m wʋn tã’agɛ bãŋɛ yãma n ãn se’em tɩ m sũure mã’agɛ. ²⁰Nẽra ka boe mam zẽ’am n tarɩ pʋtẽ’erɛ ayɩla la mam n fablɩ ya yelle, sãn dagna ẽŋa mã’a. ²¹Nẽra woo zɩgrɩ la a mẽŋa yelle, la dagɩ Azezi-krisi yelle. ²²Ya mi Atimõtɩ n pa’alɛ ẽŋa n masɛ se’em, lagɩm na mam wʋ bia n lagɩm na a sɔ la, tõm kõ-yẽlga la tõoma se’em. ²³Bɛla, mam tarɩ pʋtẽ’erɛ tɩ mam wʋn tõm na ẽŋa ya zẽ’am tɔtɔ, mam sãn wa bãŋɛ m yɛla la n wʋn ẽŋɛ se’em. ²⁴La mam tarɩ pʋtẽ’erɛ sɩra sɩra la Zuudãana tɩ la sãn ẽŋɛ fẽe, mam mẽŋa wʋn wa’am ya zẽ’am.

²⁵Mam tẽ’esɛ tɩ la ãn sõŋa tɩ mam tõm tɩ sɔbia A’epafroditi n de mam tõntõn-tadãana n lagɩm na mam nãmsɛ la, tɩ a leme wa’am ya zẽ’am, ẽŋa tɩ ya daan tõm, tɩ a tarɩ sõŋrɛ wa’am wa bɔ mam m nãmsgɔ la pʋam. ²⁶A boorɩ mɛ halɩ la a sũure wuu tɩ a yẽ ya wuu, a sũure sã’am mɛ halɩ, yãma n wõm a bã’asɩ la ĩyã. ²⁷Asɩra, a daan bẽ’erɩ mɛ deege la a ki. Tɩ Nawẽnnɛ zoe a ninbãalga, la, la dagɩ ẽŋa mã’a ninbãalga, la po dɛna la mam mẽ ĩyã, tɩ mam da le yẽ sũ-sã’aŋɔ pa’asɛ. ²⁸Bɛla tɩ mam tõm ẽ ya zẽ’am tɔtɔ, tɩ ya sãn yẽ ẽ, ya sũure wʋn le ẽŋɛ yẽlʋm, tɩ mam mẽ sũ-sã’aŋɔ wʋn bo’oge. ²⁹To’oge-ya ẽ la sũ-yẽlga wʋ lan masɛ, ẽn de tɩ sɔbia Zuudãana sore pʋam na. Nanna-ya nẽr-bãna taaba. ³⁰Se’ere n soe la, a daan deege la a ki Krisi tõoma ĩyã, a põsɛ a yõorɛ mɛ sõŋɛ mam la sõŋrɛ sɛka tɩ yãma ka tã’agɛ sõŋɛ mam na.

Dɩkɛ ya sɩra wuu bɔ Azezi

¹Sɛla n deege, m sɔbiisi, ɩta-ya sũ-yẽlga Zuudãana doosgo la pʋam. La ka nãmsrɩ mam tɩ m le gʋlsɛ bõn-bãna bɔ ya, se’ere n soe la, ba wʋn sõŋɛ ya mɛ tɩ sɛla da ẽŋɛ ya.

²Guuse-ya ya mẽŋa la nẽr-sɛba n ãn wʋ baasɩ la, nẽr-bãma n tõnnɩ tõon-be’ero, dee mõrgra nẽrba botɩ ba wãta ĩyã mã’a la. ³Tõma n pʋ’ʋsrɩ Nawẽnnɛ la a Sɩa pãŋa, dee ɩta sũ-yẽlga Azezi-krisi doosgo pʋam, ka te’ege nẽrsaalba n ɩtɩ sɛla la, tõma n de nẽrba n wã wãaga mẽŋa mẽŋa.

⁴Nẽrsaalba sisgo sãn tarɩ nɩ yõorɔ, mam mẽ tarɩ nõorɛ mɛ tɩ m dɩkɛ m mẽŋa te’ege ba. Nẽra sãn tẽ’esɛ tɩ ẽŋa tarɩ nõorɛ tɩ a te’ege nẽrsaalba sisgo, mam n tara nõorɛ gãnna. ⁵Ba dɔgɛ mam mɛ, dabsa anii daarɛ tɩ ba wã mam. Mam de la Ɩsrayɛlɩ nẽra, Abẽnzamẽ buuri, mam de la Ebre nẽra mẽŋa mẽŋa. La sãn dɛna Nawẽnnɛ lɔɔ la doosgo, mam de la Farisi nẽra. ⁶Mam daan mõ’ogɛ nifo mɛ lɔɔ la yelle halɩ daan nãmsɛ Azezi nẽrba. La sãn dɛna lɔɔ la sakrɛ, mam daan ka tarɩ dõrga.

⁷La bõn-sɛba wuu tɩ mam daan dɩkɛ tɩ la dɛna yõorɔ bɔ mam na, mam dɩkɛ ba wuu tɩ ba dɛna la zãŋa Krisi ĩyã. ⁸Mam n bãŋɛ Azezi-krisi n de m Zuudãana n ãn sõŋa gãnna wuu la, mam bɩsɛ bõn-bãma wuu wʋ sɛla n ka tarɩ yõorɔ. Krisi ĩyã mam basɛ bõn-bãma mɛ, bɩsɛ ba wʋ sɔgrɔ tɩ m tã’agɛ yẽ Krisi, ⁹lagɩm na ẽ dɛna ayɩla. Mam ka le yetɩ la de la lɔɔ la sakrɛ ĩyã tɩ mam masɛ Nawẽnnɛ zẽ’am, la de la mam n bɔ Krisi sɩra la ĩyã. Nawẽnnɛ n botɩ mam masɛ, mam n bɔ sɩra la ĩyã. ¹⁰Mam n boorɩ se’em wuu de la m bãŋɛ Krisi, la pãn-sɛka n basɛ tɩ a vo’oge la, la m lagɩm na ẽ nãmsɛ, ãna wʋ ẽn ãn se’em a kũm na pʋam, ¹¹tɩ m tara pʋtẽ’erɛ tɩ mam mẽ wʋn vo’oge.

¹²Mam ka yetɩ mam darɛ paagɛ bõn-sɛka tɩ mam boorɩ la mɛ, bɩɩ mam darɛ masɛ mɛ sɛla woo pʋam, mam ken mõrgra mɛ tɩ m paagɛ gʋrɛ ẽ, se’ere n soe la, Krisi dẽŋɛ gʋrɛ mam mɛ. ¹³M sɔbiisi, mam ka tẽ’esɛ tɩ mam darɛ yãŋɛ gʋrɛ ẽ. Mam ɩtɩ la sɛla ayɩla, mam yĩnni bõn-sɛba n boe mam poorʋm na mɛ, dee mõrgra tɩ m yẽ sɛla n boe nẽŋa na. ¹⁴Mam zotɩ wɛ’ɛsa la nẽŋa tɩ m paagɛ a tɛka to’oge bɔ’a la tɩ Nawẽnnɛ wi mam tɩ m to’oge a yire Azezi-krisi ĩyã la.

¹⁵Tõma sɛba wuu n bɩ Nawẽnnɛ sore doosgo pʋam na, tɩ tara-ya pʋtẽ’e-ẽna. La sɛla ayɩla yelle, ya sãn tara pʋtẽ’erɛ ayẽma, Nawẽnnɛ wʋn vẽlgɛ ya tɩ ya bãŋɛ ẽn de bõn-sɛka. ¹⁶La, lan de se’em wuu, tõma n sẽŋɛ paagɛ zẽ’e-sɛka wã, tɩ ken sẽnna wɛ’ɛsa zẽ’e-sɛka tɩ tɩ we’esɩ la.

¹⁷M sɔbiisi, lagɩm ɩta-ya mam n ɩtɩ se’em na, bɩsra-ya sɛba yel-ɩrɛ n ãn wʋ tõma n ɩtɩ se’em na, tɩ la dɛna mãmsgɔ bɔ ya. ¹⁸Mam daan dẽŋɛ yele ya mɛ nõorɛ faa, la mam le yɛta ya mɛ la nintãm, tɩ nẽrba zozo’e n boe tɩ ba yel-ɩrɛ pa’ala tɩ ba de la Azezi-krisi kũm dɔ-puurŋa la bɛ’ɛba. ¹⁹Nẽr-bãma n boorɩ se’em na n de ba wẽnnɛ, ba ba’asgɔ de la sã’aŋɔ. Ba dɩkrɩ la sɛla n de ba yãnnɛ wẽ’era ba yõ’orɔ, ba tẽ’esrɩ la sɛla n de dũnia bõnɔ mã’a yelle. ²⁰La sãn dɛna tõma, tõma de la Nawẽnnɛ yire nẽrba, tõma gu’uri la Zuudãana Azezi-krisi n de tɩ Fãagra tɩ a ze’ele bilam wa’am. ²¹A sãn wa’am, a wʋn teege tõma ĩyã wã n põ’orɩ la mɛ, tɩ a ãna wʋ a mẽŋa ĩyã n tarɩ nã’asgɔ la. A wʋn dɩkɛ la a pãn-kãtɛ sɛka tɩ a tarɩ botɩ sɛla woo sakra a nõorɛ la, ẽŋɛ bɛla.

Kã’aŋɔ

¹Bɛla, m sɔbiisi, mam nõŋɛ ya mɛ bɔɔra tɩ m le yẽ ya, yãma n botɩ mam tara sũ-yẽlga, dee wʋn botɩ mam yẽ nã’asgɔ la. M sɔbi-nõŋrɩsɩ, zɛ-ya kãŋkãŋɛ bɛla Zuudãana doosgo pʋam.

²Mam belnɩ A’evodi, la Asẽntiisi tɩ ba tara nõorɛ ayɩla Zuudãana doosgo la pʋam. ³La fõn mẽ, m tõntõn-tadãan-sõŋɔ, mam sosrɩ fʋ mɛ tɩ fʋ sõŋɛ pɔg-bãma. Ba daan lagɩm na mam mɛ, la Akelma, la mam tõntõn-taaba basɛba la, mõrgɛ tõm Krisi kõ-yẽlga la tõoma, tɩ ba wuu yʋ’ʋra gʋlsɛ vɔm gõŋɔ pʋam.

⁴Ɩta-ya sũ-yẽlga daarɛ woo Zuudãana doosgo la pʋam. Mam le yɛta ya mɛ ɩta-ya sũ-yẽlga. ⁵Basɛ-ya tɩ nẽrba wuu bãŋɛ ya sũ-bʋgsʋm yelle. Zuudãana la lemŋo lɛm mɛ. ⁶Da fabla-ya sɛla sɛla yelle, la sɛla woo pʋam pʋ’ʋsra-ya sɔsra Nawẽnnɛ, la ya pʋ’ʋsra ẽ a yel-sõnnɛ, pa’alɛ-ya ẽ yãma n boorɩ sɛla. ⁷Tɩ Nawẽnnɛ wʋn bɔ ya sũ-mã’asʋm n gãnnɩ nẽrsaalba bãŋrɛ wuu, tɩ a gu’ura ya sũure, la ya tẽ’esgɔ Azezi-krisi doosgo pʋam.

⁸M sɔbiisi, sɛla n deege, basɛ-ya tɩ ya pʋtẽ’era tẽ’esra sɛla woo n de sɩra, la sɛla woo n narɩ nã’asgɔ, la sɛla woo n masɛ, la sɛla woo n tarɩ pʋpeelem, la sɛla woo n ɩtɩ sũure yẽlʋm, la sɛla woo tɩ nẽrba yetɩ la ãn sõŋa, tẽ’esra-ya bõn-sɛba wuu n ãn sõŋa masɛ pẽka yelle. ⁹Ɩta-ya bõn-sɛba tɩ mam zãsʋm ya, tɩ ya to’oge, sɛla tɩ ya wõm dee yẽ mam zẽ’am na, tɩ Nawẽnnɛ n bɔ’ɔrɩ sũ-mã’asʋm na wʋn bɔna la ya lɛ.

Apolɩ pʋ’ʋsrɩ Filipi dõma ba sõŋrɛ ĩyã

¹⁰Mam ẽŋɛ sũ-yẽlga zozo’e mɛ Zuudãana doosgo pʋam, mam n yẽ tɩ yãma yãŋa le tẽegɛ mam yelle sõŋɛ mam na. Asɩra, mam mi tɩ yãma daan tẽ’esrɩ mam yelle mɛ, la ya daan ka yẽ la sore sõŋɛ mam. ¹¹La dagɩ tɩ mam boorɩ la sɛla ĩyã tɩ mam yele bɛla. Mam zãsʋm mɛ ɩta sũ-yẽlga sɛla woo pʋam la bõn-sɛka tɩ mam tarɩ la. ¹²Mam tã nõŋɔ pʋam vɔa mɛ, la mam ken tãna bõntarsõm pʋam vɔa mɛ. Sɛla woo pʋam, la zẽ’a woo mam zãsʋm mɛ, tɩ la sãn dɛna mam di tɩgɛ mɛ, bɩɩ kɔm, bɩɩ mam tarɩ mɛ tɩ la seke, bɩɩ mam ka tarɩ, mam mi mam wʋn ẽŋɛ se’em mɛ. ¹³Mam tã ɩta sɛla woo mɛ, Krisi n bɔ’ɔrɩ mam pãŋa la ĩyã.

¹⁴La baa bɛla, ya ẽŋɛ sõŋa, yãma n sõŋɛ mam m toogo la pʋam na. ¹⁵Yãma Filipi dõma, yãma mẽŋa mi tɩ mam n daan pɔsɛ mõolɛ kõ-yẽlga la bɔ ya, dee daan ze’ele Masedʋanɩ fõrgɛ la, mam ka to’oge sɛla Nawẽnnɛ nẽrba zẽ’am baa zẽ’a ayɩla, sãn dagna yãma mã’a zẽ’am. ¹⁶Se’ere n soe la, mam n daan boe Tesaloniki tẽŋa la, yãma daan tõm sõŋrɛ bɔ mam mɛ nõorɛ faa. ¹⁷La dagɩ tɩ mam eerɩ la bɔ’a, mam n boorɩ sɛla de la ya yẽ yɔɔrɔ zo’oge. ¹⁸Mam to’oge sɛla woo tɩ yãma bɔ mam na mɛ, la seke gãŋɛ mɛ. Mam n to’oge ya bɔ’a la tɩ A’epafroditi tarɩ wa’am na, mam tarɩ mɛ tɩ sɛla ka le pɔ’ɔgɛ mam. Bɔ’a bãma ãn wʋ sɛla yũuŋo n ãn yẽlʋm tɩ ya kãabɛ bɔ Nawẽnnɛ, tɩ a to’oge la sũ-yẽlga. ¹⁹Mam dãana Nawẽnnɛ n tarɩ bõn-sõma wuu tɩ la zo’oge gãŋɛ la, wʋn bɔ ya sɛla woo n wʋn sõŋɛ ya Azezi-krisi ĩyã. ²⁰Nawẽnnɛ n de tɩ Sɔ wʋn yẽ nã’asgɔ daarɛ woo wakatɛ n ka ba’asrɩ. Amina.

Pʋ’ʋsgɔ

²¹Pʋ’ʋsɛ-ya Nawẽnnɛ nẽrba la wuu n dolɩ Azezi-krisi la. Tɩ sɔbi-sɛba n boe la mam na pʋ’ʋsrɩ ya. ²²Nawẽnnɛ nẽrba la wuu pʋ’ʋsrɩ ya, lan gãnnɩ wuu nẽr-sɛba n boe na-keko yire la pʋ’ʋsrɩ ya.

²³Tɩ Zuudãana Azezi-krisi yel-sõnnɛ wʋn bɔna la ya.