Afilmõ

Gõn-sɛka tɩ Apolɩ gʋlsɛ bɔ

Afilmõ

Bilgre

Afilmõ yʋʋn de la nẽr-kãtɛ n bɔ Azezi sɩra bɔna Kolɔsɩ Wẽndeego la pʋam, a de la Apolɩ sɩrɛ. La de la Apolɩ n pa’alɛ ẽ Nawẽnnɛ sɩra, tɩ a sakɛ.

Afilmõ yʋʋn tarɩ la yamŋa yʋ’ʋrɛ n de A’onezim, tɩ a zoe fõrgɛ dee basɛ ẽ.

Apolɩ n boe yʋ’a deem wakat-sɛka la, tɩ A’onezim sẽŋɛ a zẽ’am. Tɩ Apolɩ tɔgɛ Nawẽnnɛ yetɔga bɔ ẽ, tɩ a bɔ Azezi sɩra. Bɛla poorʋm tɩ Apolɩ yele ẽ tɩ a lebe a zuudãana la zẽ’am.

Bɛla tɩ a gʋlsɛ gõŋɔ wã bɔ a sɩrɛ Afilmõ sose ẽ tɩ a basɛ sɛla wuu tɩ A’onezim ẽŋɛ la taalɛ. Se’ere n soe la, wakat-ẽŋa, yamŋa sãn zoe fõrgɛ, tɩ a zuudãana la le yẽ ẽ, a wʋn botɩ a yẽ la nãmsgɔ zozo’e. Bɛla tɩ Apolɩ sose Afilmõ tɩ a da le to’oge ẽ wʋ a yamŋa mã’a, a bɩsɛ ẽ wʋ a de la a sɔbia Azezi-krisi ĩyã.

¹Mam Apolɩ n boe yʋ’a deem Azezi-krisi yelle, la tɩ sɔbia Atimõtɩ n gʋlsɛ gõŋɔ wã bɔ’ɔra tɩ sɩr-sõŋɔ Afilmõ n de tɩ tõntõn-tadãana, ²la tɩ tã Apɩa, la Arsipi n lagɩm na tõma yẽ nãmsgɔ Azezi tõoma pʋam na, la Nawẽnnɛ nẽrba la n lagsrɩ fʋ yire pʋam na. ³Tɩ Sɔ Nawẽnnɛ, la tɩ Zuudãana Azezi-krisi wʋn ẽŋɛ ya yel-sõnnɛ, dee bɔ ya sũ-mã’asʋm.

⁴Mam pʋ’ʋsrɩ Nawẽnnɛ daarɛ woo a yel-sõnnɛ mɛ, dee tẽra fʋ yelle m pʋ’ʋsgɔ pʋam ka basra. ⁵Se’ere n soe la, mam wõm ban tɔgrɩ fõn bɔ tɩ Zuudãana Azezi sɩra se’em, la fõn tarɩ nõŋlʋm Nawẽnnɛ nẽrba la wuu ĩyã se’em. ⁶Mam sosrɩ Nawẽnnɛ tɩ fõn lagɩm na tõma bɔ Azezi-krisi sɩra la wʋn sẽnna nẽŋa, a wʋn basɛ tɩ fʋ bãŋɛ bõn-sõma sɛba wuu tɩ tɩ tarɩ Krisi doosgo pʋam. ⁷M sɔbia, fʋ nõŋlʋm na bɔ mam sũ-yẽlga zozo’e mɛ, dee bɔ mam bʋraanɛ, fõn botɩ Nawẽnnɛ nẽrba la wuu sũure mã’agɛ la ĩyã.

⁸Bɛla tɩ baa mam n tarɩ nɩ nõorɛ wʋn yele fo tɩ fʋ ẽŋɛ se’em Krisi ĩyã la, mam ka ẽŋɛ bɛla, ⁹mam sosrɩ fʋ la nõŋlʋm. La de la mam Apolɩ n de bʋra-yã’aŋa, mam boe la yʋ’a deem lɛɛlɛ wã Azezi-krisi yelle. ¹⁰Mam sosrɩ fʋ la A’onezim tɩ mam boe yʋ’a deem tɩ a sakɛ Azezi lebge mam bia la ĩyã. ¹¹Kʋrʋm, a daan ka tarɩ yõorɔ bɔ fɔ, la lɛɛlɛ wã a yãŋa tarɩ yõorɔ mɛ bɔ fõn na mam.

¹²Mam lebe tõnna ẽ na fõn zẽ’am, mam nõŋɛ ẽ na m sũure wuu. ¹³Mam boorɩ nɩ tɩ a bɔna la mam zẽ’am to’oge fõn zẽ’a sõŋra mam, mam n ken bɔna yʋ’a deem Nawẽnnɛ kõ-yẽlga la ĩyã la. ¹⁴La mam ka boorɩ tɩ m ẽŋɛ sɛla tɩ fõn sãn ka sakɛ, tɩ la da kãn dɛna mam mõrgɛ fʋ mɛ tɩ fʋ ẽŋɛ mam yel-sõnnɛ, la dɛna fʋ mẽŋa n boorɩ se’em.

¹⁵Tã tɩ A’onezim n daan basɛ fõn dee fõrgɛ wakatɛ fẽe la, la de la tɩ fʋ le to’oge ẽ tɩ a bɔna la fʋ wakatɛ wuu. ¹⁶La a ka le dɛna fʋ to’oge ẽ tɩ a dɛna fʋ yamŋa mã’a, a gãnnɩ yamŋa mɛ, a yãŋa de la sɔbi-nõŋrɛ. Mam nõŋɛ ẽ mɛ halɩ zozo’e, la fõn wʋn nõŋɛ ẽ gãnna, se’ere n soe la, a de la fʋ yamŋa dee ken dɛna fʋ sɔbia Zuudãana doosgo pʋam.

¹⁷Bɛla, fʋ sãn dɛna mam sɩrɛ, fʋ to’oge ẽ wʋ fõn wʋn to’oge mam mẽŋa se’em na.

¹⁸La a sãn ẽŋɛ fʋ tuuge, bɩɩ a sãn tara fʋ sãnnɛ, basɛ tɩ la dɛna mam sãnnɛ. ¹⁹Mam Apolɩ n gʋlsɛ wãna la mam mẽŋa nu’ugo yetɩ: Mam wʋn yɔ fɔ. Mam kãn tẽegɛ fɔ tɩ fʋ mẽŋa tarɩ mam sãnnɛ, la de la mam n sõŋɛ fɔ tɩ fʋ yẽ vɔm. ²⁰Ẽe, m sɔbia, ẽŋɛ yel-ẽna bɔ mam, Zuudãana la ĩyã. Botɩ m sũure mã’agɛ Krisi ĩyã. ²¹Mam n mi tɩ fʋ wʋn ẽŋɛ mam n boorɩ se’em na ĩyã tɩ mam gʋlsɛ bɔ fɔ, la mam mi tɩ fʋ wʋn põn ẽŋɛ gãŋɛ mam n yele fʋ se’em na mɛ.

²²La mam sosrɩ tɩ fʋ ken mãasʋm gã’argɔ zẽ’a bɔ ma, tɩ mam tarɩ pʋtẽ’erɛ tɩ yãma n pʋ’ʋsrɩ Nawẽnnɛ na ĩyã, ba wʋn basɛ mam tɩ m leme wa’am ya zẽ’am.

²³A’epafrasɩ n lagɩm na mam bɔna yʋ’a deem Azezi-krisi yelle la pʋ’ʋsrɩ fɔ. ²⁴La mam tõntõn-taaba, Aluki la Amarkɩ, la Aristarkɩ, la Ademasɩ mẽ pʋ’ʋsrɩ fɔ. ²⁵Tɩ Zuudãana Azezi-krisi yel-sõnnɛ wʋn bɔna la ya.