Azakɩ

Gõn-sɛka tɩ

Azakɩ

gʋlsɛ

Bilgre

Nẽrba zozo’e tẽ’esɛ tɩ la de la Azakɩ n de Azezi yɩbga la n gʋlsɛ gõŋɔ wã. A gʋlsɛ bɔ la Nawẽnnɛ nẽrba wuu n wɩrgɛ bɔna dũnia zuo. A gʋlsɛ pa’alɛ ba la sɛla tɩ ba ɩtɩ tɩ la ka ãna sõŋa, pa’alɛ ba ban masɛ tɩ ba vɔa se’em wakatɛ wuu.

Azakɩ tɔgɛ la yɛla buuri to’oto’ore yelle:

A tɔgɛ la yɛm yelle, la bõntarsõm, la nõŋɔ yelle, la yelle sãn paagɛ tõma, la tõon-be’ero ɩrgɔ yelle. A yetɩ tõma sãn yetɩ tõma dolɩ la Nawẽnnɛ, la masɛ mɛ tɩ tɩ ɩta Nawẽnnɛ n yele se’em na (sapɩtrɩ 1).

A yetɩ la ka masɛ tɩ tɩ tũ’usra nẽrba, dee pa’alɛ tɩ bɔ sɩra, la tõon-sõma dolɩ la taaba (sapɩtrɩ 2).

A yetɩ tɩ guuse tɩ mẽŋa la tɩ nõorɛ yetɔga, dee pa’alɛ yɛm sɩra sɩra n de sɛka (sapɩtrɩ 3).

La a kã’an na sɛba n wẽ’erɩ nõke’ene, la nẽr-sɛba n nõŋɛ bõnɔ, la nẽr-sɛba n zɛrgrɩ taaba, la sɛba n de pa’al-m-mẽŋa dõma, la sɛba n de bõntatba (4:1—5:6).

Gõŋɔ la ba’asgɔ, a kã’an na Azezi nẽrba yetɩ ba tara sũ-mã’asʋm. Yelle sãn paagɛ ba, bɩɩ la sãn dɛna sũ-yẽlga, bɩɩ bã’asɩ, ba pʋ’ʋsɛ Nawẽnnɛ (5:7-20).

Azakɩ gõŋɔ wã pa’alɛ tɩ fʋ sãn bɔ Nawẽnnɛ sɩra, fʋ tõoma n wʋn pa’alɛ tɩ fʋ bɔ sɩra. Bɛla, nẽra sãn yetɩ ẽŋa bɔ Nawẽnnɛ sɩra, dee ka tõnna tõon-sõma, la de la zãŋa (2:26).

¹Mam Azakɩ n de Nawẽnnɛ, la tɩ Zuudãana Azezi-krisi tõntõnna n gʋlsɛ gõŋɔ wã pʋ’ʋsra Nawẽnnɛ nẽrba wuu n wɩrgɛ bɔna zẽ’a woo la.

Yelle sãn paagɛ nẽra

²M sɔbiisi, nãmsgɔ to’oto’ore sãn paagɛ ya Azezi sore la pʋam, ya dɩkɛ ba tɩ ba dɛna ya sũ-yẽlga zõnzõnnɔ, ³se’ere n soe la, ya mi tɩ nãmsgɔ sãn paagɛ ya, ya bɔ sɩra la pʋam, tɩ ya yãŋɛ wĩbe, la wʋn botɩ ya mõrgɛ ze’ele la kãŋkãŋɛ. ⁴La mõrgɛ-ya ze’ele kãŋkãŋɛ ka paagɛ a tɛka, tɩ ya wʋn masɛ sɛla woo pʋam, dɛna nẽrba n bɩ, tɩ sɛla ka pɔ’ɔgɛ ya.

⁵Yɛm sãn pɔ’ɔgɛ ya nẽr-sɛka, a sose Nawẽnnɛ n bɔ’ɔrɩ nẽrba wuu la yɛmleego dee ka mõŋra ba la, tɩ a wʋn bɔ ẽ. ⁶La a sãn sose ẽ, dẽnɩ tɩ a bɔ ẽ sɩra, da sẽ’ena baa fẽfẽe. Se’ere n soe la, nẽr-sɛka woo n sẽ’enɩ, a ãn wʋ ko-kãtɛ ko-mĩ’isi tɩ kʋsebgo vugri wẽ’era ba tɩ ba yɛgna se’em na. ⁷Nẽr-ẽŋa buuri da tara pʋtẽ’erɛ tɩ a wʋn to’oge sɛla Zuudãana la zẽ’am. ⁸A de la nẽra n de pʋtẽ’era bayi dãana, tɩ a yɛm yɔɔra ẽn ɩtɩ bõn-sɛba la wuu pʋam.

⁹La masɛ tɩ sɔbi-sɛka n de nasa ẽŋɛ sũ-yẽlga, tɩ Nawẽnnɛ zẽkrɩ ẽ mɛ. ¹⁰La bõntarsa mẽ ẽŋɛ sũ-yẽlga Nawẽnnɛ n sikri ẽ na, se’ere n soe la, a bõntarsõm na wʋn tole wʋ mõ-puuro la. ¹¹Wʋntɛɛŋa sãn wõŋɛ mõogɔ, a puuro la zẽkrɩ mɛ sʋʋra kʋta, tɩ ba dasãnnɛ na bɔta. Bõntarsa mẽ ãn na bɛla, a wʋn ki mɛ a bõntarsõm na tõoma pʋam.

¹²Nẽr-sɛka n wĩbri nãmsgɔ pʋam tarɩ zu-yẽlga. Se’ere n soe la, ẽn ze’ele kãŋkãŋɛ la, Nawẽnnɛ wʋn bɔ ẽ bɔ’a n de vɔm n ka ba’asrɩ tɩ a bĩŋe nõorɛ tɩ a bɔ sɛba n nõŋɛ ẽ na.

¹³Yelle sãn paagɛ nẽra botɩ a bɔɔra tɩ a ẽŋɛ be’em, a da yetɩ Nawẽnnɛ n basɛ tɩ ẽŋa bɔɔra tɩ a ẽŋɛ be’em. Sɛla ka tã wʋn botɩ Nawẽnnɛ ẽŋɛ be’em. La Nawẽnnɛ mẽ ka botɩ nẽra bɔɔra tɩ a ẽŋɛ be’em. ¹⁴La de la nẽra woo yɛmleego n de be’em n pã’asrɩ ẽ, botɩ a kẽ’era yɛla pʋam. ¹⁵La be’em yɛmleego sãn yõkɛ pʋʋrɛ, a dɔgrɩ la tõon-be’ero. La tõon-be’ero la sãn wa bɩ, a sẽm na kũm.

¹⁶M sɔbi-nõŋrɩsɩ, da pã’asɛ-ya ya mẽŋa. ¹⁷Bɔ’a wuu n ãn sõŋa, la bɔ’a n masɛ wuu ze’etɩ la saazuum, Nawẽnnɛ n de peelem dãana la zẽ’am. Ẽŋa n nãam bõn-sɛba wuu n boe saazuum nẽera peelem, tɩ ba tɛɛra, la ẽŋa ka teerɩ, a ka tarɩ lika. ¹⁸Ẽŋa mẽŋa n boorɩ tɩ a basɛ tɩ a sɩra yetɔga la bɔ tõma vɔm. A ẽŋɛ bɛla tɩ tõma dɛna la pɔspɔsɩ dõma bõn-sɛba wuu tɩ a nãam na pʋam.

Sɛlsra-ya, dee ɩta Nawẽnnɛ n yele se’em na

¹⁹M sɔbi-nõŋrɩsɩ, bãŋɛ-ya bõn-ẽna wã sõŋa, nẽra woo mõrgɛ sɛlsra sõŋa, la a mã’agɛ a mẽŋa tɔgra, la a da isgra sũure tɔtɔ. ²⁰Nẽrsaala sũure sãn isge, a ka ɩtɩ sɛla n masɛ Nawẽnnɛ zẽ’am. ²¹Bɛla, basɛ-ya sɛla n de tõon-dẽgrɔ buuri wuu, la sɛla n de pʋtʋʋlgɔ wuu, dee sike ya mẽŋa to’oge Nawẽnnɛ yetɔga la tɩ a dɩkɛ ẽŋɛ ya sũure pʋam, n tã wʋn fãagɛ ya la.

²²Da pã’asɛ ya mẽŋa, dɛna-ya nẽrba n sakrɩ Nawẽnnɛ yetɔga, da dɛna-ya nẽrba n selsrɩ mã’a. ²³Nẽr-sɛka woo n selsrɩ yetɔga la, dee ka sakra ɩta lan yele se’em na, a dãana ãn wʋ nẽra n bɩsɛ bɩsga pʋam yẽ a mẽŋa n ãn se’em, ²⁴la ẽn bɩsɛ a mẽŋa kɩ’ɩlɩm dee fõrgɛ la, a darɛ yĩm ẽŋa n ãn se’em na mɛ. ²⁵La nẽr-sɛka n tarɩ Nawẽnnɛ lɔɔ n masɛ sõŋa n yolsrɩ nẽrba la, dee sakɛ ẽ sõŋa ɩta lan yele se’em na, ẽŋa dagɩ nẽra n selsrɩ dee yĩnna, ẽŋa dãana tarɩ la sũ-yẽlga ẽŋa n ɩtɩ sɛla la pʋam.

²⁶Nẽr-sɛka woo n tẽ’esrɩ tɩ ẽŋa de la nẽra n dolɩ Nawẽnnɛ, dee ka tãna a nõorɛ yõkra, a pã’asrɩ la a mẽŋa, nẽr-ẽŋa Nawẽnnɛ doosgo la de la zãŋa. ²⁷Tɩ Sɔ Nawẽnnɛ n boorɩ tɩ tɩ dɔla ẽ se’em tɩ la ãna sõŋa ka tara dẽgrɔ n wãna: La de la fʋ bɩsɛ kɩɩbsɩ la pɔkõpa yelle ba nãmsgɔ pʋam, la fʋ guuse fʋ mẽŋa la dũnia wã tõon-dẽgrɔ.

Da tũ’usra-ya nẽrba

¹M sɔbiisi, yãma n sakɛ tɩ Zuudãana Azezi-krisi n tarɩ na’am pãŋa la, da tũ’usra-ya nẽrba. ²Tɩ dɩkɛ makrɛ, wʋ yãma sãn lagsɛ taaba tɩ nẽra n pire sãlma nutʋa dee yɛ fu-sõma wa’am wa kẽ ya lagsgɔ la zẽ’a, tɩ nasa n mẽ yɛ fu-zõra kẽ, ³tɩ yãma sãn bɩsɛ nẽr-sɛka n yɛ fu-sõma la yele ẽ yetɩ: «Wa’am wa zĩ’ire kalam n de zẽ’e-sõŋɔ», dee yele nasa la yetɩ: «Zɛ saazuo, bɩɩ zĩ’ire tẽŋa mam nãma zẽ’am wã.» ⁴Yãma sãn ẽŋɛ wãna, yãma ka tũ’usri nẽrba sɩra? Bɛla, ya tarɩ la pʋtẽ’e-be’ero bɔkra nẽrba, yetɩ ayẽma n gãnnɩ ayẽma.

⁵M sɔbi-nõŋrɩsɩ, selse-ya. Nawẽnnɛ looge la nẽr-sɛba tɩ dũnia dõma bɩsrɩ tɩ ba de la nasdõma la, botɩ ba bɔ ẽ sɩra dɛna bõntatba, tɩ ba wʋn wa bɔna a so’olʋm tɩ a bĩŋe nõorɛ tɩ a bɔ sɛba n nõŋɛ ẽ na pʋam. ⁶La yãma pɔ’ɔrɩ la nasdõma. La dagɩ bõntatba n nãmsrɩ ya, dee yõgra ya sẽnna sarɩyaditba zẽ’am? ⁷La de la bãma n pɔ’ɔrɩ Krisi yʋ’ʋr-sõŋɔ sɛka tɩ ba bɔ ya la.

⁸Ya sãn sakɛ ɩta Nawẽnnɛ so’olʋm lɔɔ la n gʋlsɛ Nawẽnnɛ gõŋɔ pʋam yetɩ: «Nõŋɛ fʋ tadãana wʋ fʋ mẽŋa la», ya ẽŋɛ sõŋa. ⁹La ya sãn tũ’usra nẽrba, ya tõm na tõon-be’ego, la lɔɔ la pa’alɛ ya tɩ ya tõm na tõon-be’ego. ¹⁰Nẽr-sɛka sãn sakɛ lɔɔ la wuu, dee sɩ’ɩsɛ ayɩla tõm tõon-be’ego, a sɩ’ɩsɛ la ba wuu. ¹¹Nawẽnnɛ n yetɩ: «Da ẽŋɛ yalsɩ» la, ẽŋa n ken yetɩ: «Da kʋ nẽra». La fʋ sãn ka ẽŋɛ yalsɩ, dee kʋ nẽra, fʋ de la nẽra n sɩ’ɩsɛ lɔɔ la. ¹²Tɔgra-ya dee tõnna tɩ la masɛ la lɔɔ n yolsrɩ nẽrba la, mina tɩ Nawẽnnɛ wʋn dɩkɛ la ẽŋa di ya sarɩya. ¹³Nawẽnnɛ sãn wa dita sarɩya, a kãn zoe ninbãalga la nẽr-sɛka n ka zotɩ a taaba ninbãalga. Fʋ sãn zoe nẽrba ninbãalga, Nawẽnnɛ mẽ wʋn zoe fʋ ninbãalga.

Bɔ sɩra, la tõoma

¹⁴M sɔbiisi, nẽra sãn yetɩ, ẽŋa bɔ Nawẽnnɛ sɩra, dee ka tõnna tõoma n pa’alɩ bɛla, a yõorɔ de la bẽm? Bɔ sɩra ẽŋa tã wʋn fãagɛ ẽ mɛ bɩɩ? ¹⁵Tɩ dɩkɛ makrɛ, wʋ sɔbia n ka tarɩ fuugo yɛɛra, dee ka tara dita, ¹⁶tɩ yãma nẽra ayɩla sãn yele ẽ yetɩ: «Sẽŋɛ la sũ-mã’asʋm ka di tɩgɛ, dee yɛ fuugo tɩ ɔɔrɔ da tara fɔ» dee ka bɔ ẽ sõŋrɛ sɛka tɩ a boorɩ la, a yõorɔ de la bẽm? ¹⁷La mẽ de la bɛla la bɔ sɩra, ya sãn bɔ sɩra tɩ la ka lagɩm na tõoma, a de la zãŋa.

¹⁸La nẽr-sɛka tã mɛ yetɩ, ayẽma bɔ la sɩra, la ayẽma tõnnɩ la tõon-sõma. Mam wʋn yele ẽ yetɩ, pa’alɛ mam fʋ bɔ sɩra la n ka lagɩm na tõoma la, tɩ mam wʋn dɩkɛ m tõon-sõma la pa’alɛ tɩ mam bɔ sɩra. ¹⁹Fõn sakɛ mɛ tɩ Nawẽnnɛ ayɩla mã’a n boe. La ãn sõŋa. Kʋlkã’arsɩ mẽ sakɛ la bɛla, dee gõgra la dabeem. ²⁰A ka tarɩ yɛm dãana, fõn boorɩ mɛ tɩ m pa’alɛ fɔ tɩ fʋ sãn bɔ sɩra tɩ la ka lagɩm na tõoma, a ka tarɩ yõorɔ? ²¹Tɩ yaaba Abraham tɩ Nawẽnnɛ yʋʋn yetɩ a masɛ ya la, la de la a tõoma ĩyã, ẽn yʋʋn dɩkɛ a dayʋa A’izakɩ tɩ a kãabɛ bɔ Nawẽnnɛ na ĩyã. ²²Fʋ yẽ mɛ tɩ a bɔ sɩra, la a tõoma la lagɩm na taaba. A tõoma la ĩyã n botɩ a bɔ sɩra la masɛ sõŋa sõŋa. ²³Bɛla tɩ Nawẽnnɛ gõŋɔ n gʋlsɛ se’em na ẽŋɛ. La yetɩ: «Abraham bɔ la Nawẽnnɛ sɩra, tɩ Nawẽnnɛ bɩsɛ a bɔ sɩra la, yetɩ a masɛ mɛ ẽŋa zẽ’am.» Tɩ Nawẽnnɛ wi ẽ yetɩ a sɩrɛ. ²⁴Ya yẽ tɩ la de la nẽra tõoma n botɩ Nawẽnnɛ yetɩ a masɛ ya, la dagɩ a bɔ sɩra mã’a ĩyã.

²⁵La yʋʋn mẽ de la bɛla la Arahabɩ n de pɔka n ɩtɩ yalsɩ la. Zifdõma n yʋʋn tõm nẽrba la, tɩ a to’oge ba sʋgɛ a yire, botɩ ba doose sore ayẽma kule la, tõon-ẽŋa ĩyã tɩ a masɛ Nawẽnnɛ zẽ’am.

²⁶Nẽra sɩa sãn fõrgɛ deege ẽ, a ĩyã de la kũm. La mẽ de la bɛla, nẽra sãn bɔ sɩra tɩ la ka lagɩm na tõoma, la de la zãŋa.

Tara ya zɩlɩŋa sõŋa

¹M sɔbiisi, da kãn bɔɔra-ya tɩ ya wuu dɛna karẽnsãandõma. Se’ere n soe la, ya mi tɩ tõma sɛba n de karẽnsãandõma la sarɩyadia n wʋn dɛna toogo gãnna. ²Tõma wuu tuuri mɛ zozo’e. Nẽra sãn ka tuura a yetɔga pʋam, a de la nẽra n masɛ sɛla woo pʋam, tãna wʋn yõkra a mẽŋa sõŋa sõŋa. ³Tõma sãn ẽŋɛ wiiri nõorɛ salba tɩ ba sakɛ ɩta tɩn boorɩ se’em, ba ĩyã la wuu ɩtɩ la tõma n boorɩ se’em. ⁴Ken bɩsɛ-ya õornɔ n ãn se’em na, baa ban kãrgɛ se’em, dee tɩ kʋseb-kãra vugra zã’ara ba la, ba tarɩ la dɔ-pɩka wẽrgra ba, tɩ ba sẽnna wɛ’ɛsa zẽ’e-sɛka tɩ sɛka n tarɩ ba la boorɩ. ⁵Nẽrsaala zɩlɩŋa mẽ ãn na bɛla, a de la ĩyã zẽ’a ayɩla n ãn pɩka pɩka, dee tɔgra yel-kãra.

La de la bug-pɩka n tã wʋn di we-kãtɛ wuu. ⁶Zɩlɩŋa mẽ ãn wʋ bugum na. A boe la tɩ ĩyã la pʋam tõnna tõon-be’ero tɩ la taara tɩ ĩyã la wuu. A bugum na ze’etɩ la bug-tẽŋa sã’ana tɩ vɔm wuu. ⁷Nẽrsaala tã dũnsi buuri wuu, la bõn-ẽgla buuri wuu, la bõn-vuula buuri wuu, la sɛba n boe ko’om pʋam wuu mɛ, botɩ ba sakra ẽ. ⁸La nẽra ka boe n tã wʋn yãŋɛ a zɩlɩŋa. A pɩrɛ la yetɔg-be’ero tɔgra ka gɔ’ɔra, a tarɩ la yabga n kʋʋrɩ. ⁹Tɩ tarɩ la ẽŋa pʋ’ʋsra Zuudãana n de tɩ Sɔ la a yel-sõnnɛ, dee ken tara ẽ kã’ara be’em bɔ’ɔra nẽrba tɩ Nawẽnnɛ nãam tɩ ba ãna wʋ a mẽŋa la. ¹⁰Kã’a-be’ero, la kã’a-sõma ze’etɩ la nõ-ẽŋa ayɩla pʋam yɛsra. M sɔbiisi, la ka masɛ tɩ la dɛna bɛla. ¹¹Ko-sõma, la ko-be’ero tã wʋn bulla bulnifo ayɩla pʋam? M sɔbiisi, kẽnkãŋa tã wʋn wɔnna tã’ama? ¹²Bɩɩ sẽnsãabga tã wʋn wɔnna kẽnkãma? Bɛla, bulga n bulli ko-be’ero ka tã wʋn bulla ko-sõma.

Yɛm n ze’ele Nawẽnnɛ zẽ’am

¹³Ãne n boe ya pʋam tẽ’esɛ tɩ ẽŋa tarɩ yɛm, la bãŋrɛ? A ẽŋɛ yel-ɩr-sõŋɔ, dee sike a mẽŋa pa’alɛ tɩ a tarɩ yɛm. ¹⁴La, la sãn dɛna tɩ ya ɩtɩ la sũure, dee gẽela taaba, da wẽ-ya yõ’ogɔ tɩ ya de la yɛm dõma parɩm sɩ’ɩsɛ sɩra la. ¹⁵Yɛm ẽŋa dagɩ yɛm sɛka n ze’ele Nawẽnnɛ zẽ’am. A de la tẽŋa wã zuo bõnɔ, a de la nẽrsaala bõnɔ, a ze’ele la Asũtãana zẽ’am. ¹⁶Sũure la gẽelgɔ n boe zẽ’e-sɛka la, tõon-yooro, la tõon-be’ero buuri wuu boe la bilam. ¹⁷La yɛm n ze’ele Nawẽnnɛ zẽ’am ãn na sõŋa ka tara dẽgrɔ, dee botɩ nẽra tara sũ-mã’asʋm la a taaba, la sũ-bʋgsʋm, ɩta sugri, zɔta nẽrba ninbãalga zozo’e, tõnna tõon-sõma zozo’e, ka bɔkra nẽrba, dee ka dɛna pʋlibsum dãana. ¹⁸Sũ-mã’asʋm dõma n botɩ sũ-mã’asʋm bɔna nẽrba tẽŋasʋka la tõoma de la tõon-sõma n masɛ Nawẽnnɛ zẽ’am.

Da basɛ-ya tɩ dũnia yɛmleego sɔna ya

¹Zɛbrɛ la nõkɛ’ɛma n boe ya tẽŋasʋka la ze’ele la bɛ? La de la yan boorɩ se’em n de be’em n boe ya pʋam botɩ ya ɩta bɛla. ²Ya boorɩ la sɛla dee ka yẽta, bɔɔra tɩ ya kʋʋra nẽrba. Ya ɩtɩ la sũure la ya taaba bõnɔ dee ken ka yẽta, bɛla tɩ ya zɛbra dee wẽ’era nõkɛ’ɛma la taaba. Yan ka tarɩ la, la de la yãma n ka sose Nawẽnnɛ na ĩyã. ³La ya sãn sɔsra mɛ dee ka yẽta, yãma n sosrɩ se’em na ka ãn sõŋa. Ya sosrɩ tɩ ya ẽŋɛ la ya yɛm n boorɩ se’em. ⁴Yãma ka dolɩ Nawẽnnɛ la sɩra. Yãma ka mi tɩ sɛka n nõŋɛ dũnia wã lɔgrɔ, la de la be’em la Nawẽnnɛ? Bɛla, nẽr-sɛka woo n boorɩ tɩ a yõgɛ sɩtɔ la dũnia wã lɔgrɔ, a wʋn dɛna la Nawẽnnɛ bɛ. ⁵Bɩɩ yãma tẽ’esɛ tɩ lan gʋlsɛ se’em Nawẽnnɛ gõŋɔ pʋam na de la zãŋa? La yetɩ: «Nawẽnnɛ Sɩa la tɩ a ẽŋɛ tɩ pʋam na, boorɩ tɩ ẽŋa mã’a n sɔna tɔ.» ⁶La a ɩtɩ la yel-sõnnɛ n ãn sõŋa gãnna bɔ’ɔra tɔ, wʋ lan gʋlsɛ yetɩ: «Nawẽnnɛ zagsrɩ zẽk-m-mẽŋa dõma mɛ, dee ɩta sik-m-mẽŋa dõma yel-sõnnɛ.»

⁷Bɛla, dɩkɛ ya mẽŋa bɔ Nawẽnnɛ, dee sɩ’ɩsɛ Asũtãana, tɩ a wʋn zoe dee basɛ ya. ⁸Lɛm-ya Nawẽnnɛ, tɩ a mẽ wʋn lɛm ya. Tõon-be’ero dõma, peege ya nu’usi, pʋtẽ’era ayi dõma, peege ya sũure. ⁹Bãŋɛ-ya ya ninbãalga, kaasɛ-ya fablɛ la sũ-sã’aŋɔ. Basɛ-ya tɩ ya lɔ’ɔrɔ lebge kʋʋnɔ, tɩ ya sũ-yẽlga lebge sũ-sã’aŋɔ. ¹⁰Sike-ya ya mẽŋa Nawẽnnɛ nẽŋam, tɩ a wʋn zẽkɛ ya.

¹¹M sɔbiisi, da tɔgra-ya taaba yelle be’em. Nẽr-sɛka n tɔgɛ a tadãana yelle be’em, bɩɩ zɛrgra ẽ, a tɔgrɩ la Nawẽnnɛ lɔɔ la be’em dee zɛrgra ẽ. La fʋ sãn zɛrgra lɔɔ la, fʋ ka sakrɩ lɔɔ la, fʋ lebge la lɔɔ la sarɩyadita. ¹²Nawẽnnɛ mã’a n bɔ’ɔrɩ lɔɔ, la ẽŋa mã’a n diti sarɩya, la ẽŋa mã’a n tã wʋn fãagɛ, bɩɩ sã’am. La fõn tẽ’esɛ tɩ fõn de la ãne, dita fʋ tadãana sarɩya?

Da wẽ’era-ya yõ’ogɔ

¹³Selse-ya! Yãma sɛba n yetɩ: «Zĩna bɩɩ beere, tõma wʋn sẽŋɛ la tẽn-ẽna ka ẽŋɛ yʋʋnɛ, leebe yẽ yõorɔ» la, ¹⁴ya ka mi ya vɔm n wʋn ãna se’em beere. Ya ãn wʋ pika n yʋ, tɩ la ẽŋɛ fẽe tɩ a pilge. ¹⁵La de nɩ na ya ẽn yetɩ: «Nawẽnnɛ sãn bɔɔra, tɩ tõma vɔa, tõma wʋn ẽŋɛ la wãna la wãna.» ¹⁶La yãma pa’alɩ la ya mẽŋa dee wẽ’era yõ’ogɔ yãma n boorɩ tɩ ya ẽŋɛ sɛla la pʋam. Pa’al-m-mẽŋa wãna buuri wuu de la be’em.

¹⁷Nẽr-sɛka woo n mi sɛla n ãn sõŋa, dee ka ɩta, a tõm na tõon-be’ero.

Bõntatba yelle

¹Bõntatba, selse-ya! Kaasra-ya dee fabla, se’ere n soe la, toogo n sẽm ya zuto. ²Ya bõntarsõm na wʋn põ’ogɛ mɛ. Bõn-mõgla n wʋn mõgɛ ya futo la. ³Tẽŋanzẽem n wʋn kẽ ya sãlma, la ya zũuro la. Tẽŋanzẽem na n wʋn pa’alɛ tɩ ya ka ẽŋɛ sõŋa, la a wʋn di ya wʋ bugum na. Yãma lagsrɩ la bõntarsõm bĩŋra dũnia ba’asgɔ wakatɛ. ⁴Tõntõnɩba n tõnnɩ ya vatɔ pʋam tɩ ya mõŋɛ ba yɔɔrɔ la kellɩ mɛ. Nẽr-sɛba n lagsɛ ya bõnkɔɔla la kellɩ mɛ, tɩ Zuudãana Nawẽnnɛ n de ke’eŋo wuu dãana la wõm. ⁵Dũnia zuo ya vɔa la na’am pʋam, ɩta ya yɛm n boorɩ se’em, dita tɩgra nõbra, ãna wʋ dũnsi la gu’ura kʋa daarɛ. ⁶Ya tɔgɛ la sɩra dãana yelle kʋ, yetɩ ya kʋ ẽ, tɩ a ka tãna wʋn sɩ’ɩsɛ ya tɩ ya kʋ ẽ.

Kã’aŋɔ

⁷M sɔbiisi, mã’ara ya sũure gu’ura Zuudãana la lemŋo. Bɩsɛ-ya kaara n mã’arɩ a sũure se’em gu’ura tɩ a va’am bõnkɔɔla biɛ wʋn wa bɩ sõŋa. A ẽn gu’ura mɛ tɩ sig-saaga wa ni, tɩ poorʋm saasɩ ni, tɩ bõnkɔɔla la biɛ bɩ sõŋa. ⁸Bɛla, yãma mẽ mõrgɛ mã’ara ya sũure, tara bʋraanɛ, tɩ Zuudãana la lemŋo lɛm mɛ.

⁹M sɔbiisi, da yõnna-ya taaba, tɩ Nawẽnnɛ da wa di ya sarɩya. Bɩsɛ-ya, sarɩyadita la ze la zanõrʋm. ¹⁰M sɔbiisi, Nawẽnnɛ nõtɔ’ɔsrɩba la n yʋʋn tɔgɛ a yetɔga, tɩ ba nãmsɛ ba, tɩ ba mã’agɛ ba sũure la, ya mẽ ẽŋɛ wʋ bãma n ẽŋɛ se’em na. ¹¹Tõma yetɩ mɛ tɩ sɛba n mõrgɛ ze’ele kãŋkãŋɛ Nawẽnnɛ sore pʋam na, de la zu-yẽlga dõma. Ya wõm ban tɔgɛ Azɔɔbɩ n ze’ele kãŋkãŋɛ se’em yelle, la ya yẽ ba’asgɔ Nawẽnnɛ n ẽŋɛ se’em bɔ ẽ. Se’ere n soe la, Nawẽnnɛ de la ninbãal-zɔta, dee tara nẽrba zĩile.

¹²M sɔbiisi, sɛla n gãnnɩ wuu de la ya da pɔɩ. Da pɔɩ saazuum, bɩɩ tẽŋa, bɩɩ sɛla ayẽma. Basɛ-ya tɩ ya «ẽe» dɛna «ẽe», tɩ ya «ayɛɩ» dɛna «ayɛɩ», tɩ Nawẽnnɛ da di ya sarɩya.

¹³Nẽra sãn bɔna ya pʋam nãmsra, a pʋ’ʋsɛ Nawẽnnɛ. Nẽr-sɛka sũure n ãn yẽlʋm, a yõom yõom-sõma pẽgɛ Nawẽnnɛ. ¹⁴Nẽra sãn bɔna ya pʋam bẽ’era, a wi Nawẽnnɛ nẽrba kẽma, tɩ ba ẽŋɛ kaam ẽŋɛ a zuugo la Zuudãana Azezi yʋ’ʋrɛ, pʋ’ʋsɛ Nawẽnnɛ bɔ ẽ. ¹⁵Ban bɔ Nawẽnnɛ sɩra pʋ’ʋsɛ la, la wʋn fãagɛ bã’ara la mɛ, Zuudãana la wʋn bɔ ẽ ĩmã’asʋm mɛ tɩ a isge. La a sãn tõm tõon-be’ero, a wʋn basɛ ẽ taalɛ. ¹⁶Bɛla, pelge ya pʋa tɔgɛ ya tõon-be’ero pa’alɛ taaba, pʋ’ʋsɛ bɔ taaba, tɩ ya wʋn yẽ ĩmã’asʋm. Nẽra n masɛ Nawẽnnɛ zẽ’am pʋ’ʋsgɔ tõnnɩ mɛ la pãŋa zozo’e. ¹⁷A’eli yʋʋn de la nẽrsaala wʋ tõma la, la a pʋ’ʋsɛ mɛ sose Nawẽnnɛ la a sũure wuu tɩ saaga da ni, tɩ saaga ka tɔkɛ tẽŋa yʋʋma atã la wõr-sɩyoobɩ. ¹⁸Tɩ a le pʋ’ʋsɛ, tɩ saaga ni, tɩ bõnkɔɔla wɔm biɛ.

¹⁹M sɔbiisi, ya nẽra ayɩla sãn bʋrgɛ dee basɛ sɩra sore, tɩ nẽra tarɩ ẽ leme wa’am, ²⁰ya bãŋɛ tɩ nẽr-sɛka woo n tarɩ tõon-be’ero dãana a tõon-be’ero sorɔɔgɔ zuo leme wa’am, a fãagɛ la tõon-be’ero dãana kũm pʋam, tɩ Nawẽnnɛ wʋn basɛ a tõon-be’ero zozo’e taalɛ.