Efɛɛzɩ

Gõn-sɛka tɩ Apolɩ gʋlsɛ bɔ

Efɛɛzɩ dõma

Bilgre

Efɛɛzɩ de la Azi-minɛɛrɩ so’olʋm tẽŋa. Apolɩ sore sẽnnɛ bʋtã dãana tɩ a zĩ’ire mĩ yʋʋma atã mõolɛ, dee zãsʋm Azezi kõ-yẽlga (Tõoma 19:1—20:1). Wakat-sɛka tɩ a gʋlsɛ gõŋɔ wã la, a boe la yʋ’a deem.

Zãsŋɔ sɛba n boe gõŋɔ wã pʋam na dagɩ Efɛɛzɩ dõma mã’a ĩyã, la de la nẽrba wuu ĩyã.

A gʋlsɛ tɔgɛ yetɩ, lan dẽŋɛ Nawẽnnɛ n wʋn nãam dũnia, a põn looge yɛm mɛ tɩ a botɩ Azezi-krisi dɛna bõn-sɛba wuu n boe saazuum, la tẽŋa Zuudãana (Efɛɛzɩ 1:10).

Apolɩ pɔsɛ pa’alɛ la Nawẽnnɛ n looge a nẽrba, basɛ ba tõon-be’ero taalɛ, botɩ ba lebge a kɔma Azezi kũm na ĩyã. Tɩ nẽr-sɛba wuu n bɔ Azezi sɩra la lebge buuri ayɩla, Zifdõma, la bu-zãŋsɩ wuu (sapɩtrɩ 1-3).

A sose nẽr-sɛba wuu n wʋn karẽŋɛ gõŋɔ la mɛ yetɩ ba vɔa tɩ la masɛ wʋ vɔm paalga tɩ Nawẽnnɛ bɔ ba la, dee lagɩm taaba tara nõ-yẽnnɛ, vɔa la taaba Azezi doosgo la pʋam (sapɩtrɩ 4-6).

A dɩkɛ la bõnɔ batã makɛ pa’alɛ Azezi nẽrba n lebge ayɩla se’em.

A makɛ pa’alɛ tɩ Azezi nẽrba la ãn wʋ nẽra ĩyã, tɩ Azezi ãna wʋ zuugo la (1:22-23, 4:16).

Bʋyi, a makɛ pa’alɛ tɩ Azezi nẽrba la ãn wʋ deego, tɩ Azezi ãna wʋ kugre n botɩ deego la zɛ kãŋkãŋɛ (2:20-22).

Bʋtã, a makɛ pa’alɛ tɩ Azezi nẽrba la ãn wʋ pɔka, tɩ Azezi ãna wʋ sɩra (5:21-33).

¹Mam Apolɩ n de Azezi-krisi Tõntõnna wʋ Nawẽnnɛ n boorɩ se’em na, n gʋlsɛ gõn-ẽna wã bɔ’ɔra yãma Nawẽnnɛ nẽrba n boe Efɛɛzɩ dɛna sɩra dõma Azezi-krisi doosgo pʋam na. ²Tɩ Sɔ Nawẽnnɛ, la tɩ Zuudãana Azezi-krisi wʋn ẽŋɛ ya yel-sõnnɛ, dee bɔ ya sũ-mã’asʋm.

Nawẽnnɛ n ẽŋɛ tõma yel-sõnnɛ se’em Krisi ĩyã

³Tɩ pẽgɛ Nawẽnnɛ n de tɩ Zuudãana Azezi-krisi Sɔ la, ẽŋa n bɔ tɔ a Sɩa yel-sõnnɛ wuu n ze’ele saazuum, tõma n lagɩm na Krisi dɛna ayɩla la ĩyã. ⁴Nawẽnnɛ looge tõma la ẽŋa ĩyã, lan dẽŋɛ dũnia nãaŋɔ, tɩ tɩ welge to’ore dɛna a nẽrba, ka tara yelle a nẽŋam. ⁵A nõŋlʋm na ĩyã tɩ a dẽŋɛ looge tõma tɩ tɩ lebge a kɔma Azezi-krisi ĩyã, wʋ a mẽŋa yɛm n boorɩ se’em na. ⁶A ẽŋɛ bɛla tɩ tɩ pẽgɛ ẽ mɛ, a yel-sõnnɛ n zo’oge gãŋɛ tɩ a ẽŋɛ bɔ tɔ zãŋa, tõma n de ayɩla la a Dayɔ-nõŋrɛ la ĩyã. ⁷La de la Krisi n ki tɩ a zɩɩm yese la ĩyã tɩ Nawẽnnɛ basɛ tõma tõon-be’ero taalɛ, tɩ tõma yẽ fãarɛ, tɩ la masɛ wʋ Nawẽnnɛ yel-sõnnɛ n zo’oge pãɩ se’em na. ⁸Yel-sõnnɛ ẽŋa n zo’oge la bɔ tõma la yɛm wuu, la bãŋrɛ wuu. ⁹Nawẽnnɛ basɛ tɩ tõma bãŋɛ ẽn boorɩ tɩ a ẽŋɛ se’em n daan sʋgɛ tɩ a looge yɛm tɩ a ẽŋɛ Krisi ĩyã la mɛ. ¹⁰Wakatɛ la sãn wa paagɛ, Nawẽnnɛ wʋn ẽŋɛ ẽŋa n looge yɛm tɩ a ẽŋɛ se’em na mɛ, a wʋn lagsɛ sɛla wuu n boe saazuum, la dũnia zuo, tɩ ba sakɛ Zuudãana ayɩla n de Krisi.

¹¹Nawẽnnɛ n basɛ tɩ sɛla woo ɩta wʋ ẽn boorɩ se’em na, n dẽŋɛ looge tõma tɩ tɩ dɛna a nẽrba Krisi ĩyã. ¹²Tɩ tõma n dẽŋɛ tara pʋtẽ’erɛ la Krisi la, wʋn basɛ tɩ nẽrba pẽgɛ ẽ a na’am pãŋa la ĩyã.

¹³Yãma n mẽ wõm sɩra kõ-yẽlga la, n basɛ tɩ ya bɔ Krisi sɩra yẽ fãarɛ, ẽŋa ĩyã tɩ Nawẽnnɛ bɔ ya a Sɩa wʋ ẽn bĩŋe nõorɛ se’em na, Sɩa ẽŋa de la dãalgɔ pa’alɛ tɩ ya de la a nẽrba. ¹⁴A Sɩa la n de sɛla n pa’alɛ tɩ tɩ wʋn yẽ sɛla woo tɩ a bĩŋe nõorɛ tɩ a bɔ tɔ la, halɩ ka paagɛ wakat-sɛka tɩ a wʋn fãagɛ tõma wuu n de a nẽrba la ba’asɛ la, bõn-ẽŋa n wʋn basɛ tɩ tɩ pẽgɛ ẽ, a na’am pãŋa la ĩyã.

Apolɩ pʋ’ʋsrɩ Nawẽnnɛ Efɛɛzɩ dõma ĩyã

¹⁵Bɛla n soe tɩ mam n wõm yãma n bɔ tɩ Zuudãana Azezi sɩra, la yãma n tarɩ nõŋlʋm la Nawẽnnɛ nẽrba wuu se’em na, ¹⁶tɩ mam tẽra ya yelle m pʋ’ʋsgɔ pʋam, pʋ’ʋsra Nawẽnnɛ a yel-sõnnɛ ya ĩyã ka gɔ’ɔra. ¹⁷Mam sosrɩ la tɩ Zuudãana Azezi-krisi Sɔ n de Nawẽnnɛ n tarɩ na’am pãŋa la, tɩ a bɔ ya a yɛm Sɩa tɩ a vẽlgɛ ya yɛm, tɩ ya bãŋɛ ẽn ãn se’em. ¹⁸Mam ken sɔsra Nawẽnnɛ tɩ a botɩ ya pʋtẽ’era like tɩ ya bãŋɛ ẽn wi ya tɩ ya tara pʋtẽ’erɛ gu’ura sɛla, dee bãŋɛ bõn-sõma sɛba tɩ a bĩŋe nõorɛ tɩ a bɔ a nẽrba la n ba ãna sõŋa, dee zo’oge se’em. ¹⁹Mam ken sɔsra ẽ tɩ a botɩ ya bãŋɛ a pãŋa la n ãn kãtɛ gãŋɛ se’em tɩ a tarɩ tõnna la tõma n bɔ ẽ sɩra la lɛ, wʋ a na’am pãn-kãtɛ n tõnnɩ tõon-kãra se’em na. ²⁰Pãn-kãtɛ ẽŋa n bɛla tɩ a dɩkɛ vo’oge Krisi botɩ a zĩ’ire a zʋʋgɔ bɔba saazuum Nawẽnnɛ yire. ²¹A botɩ Krisi n gãnna na’adõma wuu, la pãnsɩ dõma wuu, la kɛ’ɛndõma wuu, la ke’eŋo buuri wuu, ẽŋa yʋ’ʋrɛ n gãnnɩ yʋ’ʋra wuu, la dagɩ dũnia ẽna pʋam mã’a, la ken dɛna la dũnia sɛka n wʋn wa’am na pʋam. ²²Nawẽnnɛ basɛ mɛ tɩ Krisi sɔna sɛla woo, dee botɩ a dɛna a nẽrba wuu Zuudãana sɛla woo pʋam. ²³Krisi nẽrba la ãn wʋ a mẽŋa ĩyã la, ẽŋa n vɔa ba pʋam, la ẽŋa n boe zẽ’a woo, botɩ sɛla woo bɔna.

Nawẽnnɛ yel-sõnnɛ ĩyã tɩ tɩ yẽ fãarɛ

¹Ya daan ãn wʋ ya ki mɛ Nawẽnnɛ zẽ’am, ya tõon-be’ero, la ya tuure la ĩyã. ²Yãma n daan ɩtɩ se’em na ãn wʋ dũnia nẽrba n ka mi Nawẽnnɛ n ɩtɩ se’em na, dɔla Asũtãana n de pãnsɩ dõma n boe saazuum naba la, ẽŋa n tõnnɩ na sɛba n sɩ’ɩsrɩ Nawẽnnɛ nõorɛ la. ³Tõma wuu daan lagɩm ãna wʋ bãma n ãn se’em na, tõma daan vɔa wʋ nẽrsaala yɛmleego n boorɩ se’em, ɩta tɩ ĩyã, la tɩ yɛm n boorɩ se’em n de be’em na. La tõma n daan ãn se’em na basɛ tɩ tɩ daan masɛ la Nawẽnnɛ sɩbgrɛ wʋ nẽrba basɛba la.

⁴La Nawẽnnɛ nõŋɛ tõma zo’oge mɛ, tɩ a zoe tõma ninbãalga zozo’e. ⁵Tɩ baa tõma n daan ãn wʋ tɩ ki mɛ tɩ tõon-be’ero ĩyã la, a basɛ tɩ tɩ lagɩm na Krisi yẽ vɔm. La de la Nawẽnnɛ yel-sõnnɛ ĩyã tɩ a fãagɛ ya. ⁶La de la tõma n lagɩm na Azezi-krisi dɛna ayɩla la ĩyã, tɩ Nawẽnnɛ lagɩm tõma la Krisi vo’oge, basɛ tɩ tɩ lagɩm na ẽŋa zĩ’ire Nawẽnnɛ yire. ⁷A ẽŋɛ tõma sõŋa Krisi ĩyã, tɩ a pa’alɛ la nẽrba wakatɛ n sẽm a yel-sõnnɛ n zo’oge gãŋɛ se’em. ⁸La de la Nawẽnnɛ yel-sõnnɛ la ĩyã tɩ ya yẽ fãarɛ, yan bɔ Krisi sɩra la ĩyã, la dagɩ ya mẽŋa pãŋa, la de la Nawẽnnɛ bɔ’a. ⁹La dagɩ ya tõoma ĩyã, tɩ ya nẽr-sɛka da pẽgɛ a mẽŋa. ¹⁰La de la Nawẽnnɛ n nãam tɔ, botɩ tɩ lagɩm na Azezi-krisi dɛna ayɩla, tõnna tõon-sõma tɩ a põn dẽŋɛ mãasʋm tɩ tɩ wa tõm na.

Krisi ĩyã tɩ lebge la buuri ayɩla

¹¹Tẽegɛ-ya yan daan ãn se’em na, ba ka dɔgɛ ya tɩ ya dɛna Zifdõma buuri, Zifdõma n wãtɩ la wi’iri ya tɩ a ka wãtɩ dõma. Ba yetɩ bãma de la Nawẽnnɛ nẽrba, bãma n wãtɩ la ĩyã, la bõn-ẽŋa de la sɛla tɩ nẽrba ɩtɩ ba ĩyã pʋam mã’a. ¹²Tẽegɛ-ya tɩ wakat-sɛka tɩ ya ka boe la Krisi la, ya daan de la sãama la Ɩsrayɛlɩ dõma, ka tara nõorɛ la bõn-sɛba tɩ Nawẽnnɛ yʋʋn bĩŋe nõorɛ la Ɩsrayɛlɩ dõma la. Ya daan vɔa la dũnia wã zuo ka mina Nawẽnnɛ, dee ka tara pʋtẽ’erɛ gu’ura sɛla. ¹³Ya daan zãagɛ la Nawẽnnɛ mɛ, la lɛɛlɛ wã, yãma n lagɩm na Azezi-krisi dɛna ayɩla la, a zɩɩm na n yese la basɛ tɩ ya yãŋa lɛm ẽ mɛ. ¹⁴La de la Krisi n botɩ tɩ tara sũ-mã’asʋm, ẽŋa n basɛ tɩ Zifdõma, la sɛba n dagɩ Zifdõma lebge buuri ayɩla. Ẽŋa n ki yese be’em n ãn wʋ lalga ¹⁵bɔna tɩ tẽŋasʋka welge to tɩ tɩ sisra taaba la, dee basɛ tɩ Amoyisi lɔɔ, la yel-sɛba tɩ a yetɩ ba ɩta la ka le tõnna, botɩ Zifdõma, la sɛba n dagɩ Zifdõma naagɛ taaba lagɩm na ẽŋa lebge buur-paalga ayɩla tara sũ-mã’asʋm la taaba. ¹⁶Krisi n ki kũm dɔ-puurŋa zuo la, a lagɩm ba tɩ ba lebge la buuri ayɩla naagɛ ba la Nawẽnnɛ botɩ ba ka le sisra taaba. ¹⁷Krisi wa’am wa mõolɛ la sũ-mã’asʋm kõ-yẽlga bɔ yãma sɛba n daan zãagɛ, la tõma sɛba n lɛm na. ¹⁸Krisi ĩyã tɩ tõma wuu tara sore wʋn lɛm tɩ Sɔ Nawẽnnɛ zẽ’am, Nawẽnnɛ Sɩa ayɩla n boe la tɩ wuu lɛ la ĩyã.

¹⁹Bɛla, ya ka le dɛna sãama, bɩɩ nẽrba n ze’ele zẽ’a ayẽma, ya de la buuri ayɩla la Nawẽnnɛ nẽrba, ya de la a yire nẽrba. ²⁰Yãma po bɔna la Nawẽnnɛ nẽr-kʋʋŋɔ la n ãn wʋ deego la mẽeŋa pʋam. Azezi Tõntõnɩba, la Nawẽnnɛ nõtɔ’ɔsrɩba n de deego la ẽbrɛ. Tɩ Azezi-krisi mẽŋa dɛna kugre n botɩ deego la tara pãŋa. ²¹Ẽŋa n basɛ tɩ deego la wuu zɛ kãŋkãŋɛ lɛbgra Wẽnde-kãtɛ ãna sõŋa bɔ Zuudãana. ²²Yãma n lagɩm na ẽ dɛna ayɩla la, ya mẽ po bɔna la Nawẽnnɛ deego la tɩ a boe mĩ mẽta la mẽeŋa pʋam, tɩ Nawẽnnɛ mẽŋa Sɩa kẽ’era mĩ.

Apolɩ tõm bɔ sɛba n dagɩ Zifdõma

¹Bɛla tɩ mam Apolɩ pʋ’ʋsra Nawẽnnɛ. Mam boe la yʋ’a deem Azezi-krisi yelle, mam n mõolɛ a kõ-yẽlga bɔ yãma bu-zãŋsɩ la ĩyã. ²Mam tẽ’esɛ tɩ ya wõm tɩ Nawẽnnɛ dɩkɛ a yel-sõnnɛ kõ-yẽlga la ẽŋɛ la mam nu’usum tɩ m tɔgɛ bɔ yãma. ³Nawẽnnɛ puke a yelle n sʋgɛ la pa’alɛ mam mɛ, wʋ mam gʋlsɛ se’em fẽe bɔ ya la. ⁴Ya sãn karẽŋɛ mam n gʋlsɛ se’em na, ya wʋn yẽ mam n bãŋɛ Krisi yelle n daan sʋgɛ la võorɛ n ãn se’em. ⁵Nawẽnnɛ yʋʋn ka puke ẽ pa’alɛ kʋrʋm dõma, la lɛɛlɛ wã a botɩ a Sɩa la puke ẽ pa’alɛ la sɛba tɩ a tõm, la a nõtɔ’ɔsrɩba. ⁶Yel-ẽŋa n sʋgɛ la de la kõ-yẽlga mõolgɔ n botɩ bu-zãŋsɩ wuu lagɩm na Zifdõma tara pʋrɛ, lagɩm taaba dɛna ayɩla, dee lagɩm tɔ’ɔra sɛla tɩ Nawẽnnɛ bĩŋe nõorɛ Azezi-krisi ĩyã.

⁷La de la Nawẽnnɛ yel-sõnnɛ bɔ’a tɩ a botɩ mam dɛna a tõntõnna mõola a kõ-yẽlga la, la a pãŋa. ⁸Mam n de nẽra n pɔ’ɔgɛ Nawẽnnɛ nẽrba la wuu pʋam, la bɛla wuu Nawẽnnɛ ẽŋɛ la mam yel-sõn-ẽŋa tɩ m mõolɛ Krisi kõ-yẽlga la bɔ bu-zãŋsɩ tɩ ba bãŋɛ bõn-sõma n zo’oge gãŋɛ tɩ nẽrba ka tãna wʋn bãŋɛ ba’asɛ la, ⁹dee botɩ nẽrba bãŋɛ Nawẽnnɛ n yetɩ a ẽŋɛ se’em n daan sʋgɛ la. Ẽŋa n nãam sɛla woo la, sʋgɛ bõn-ẽŋa mɛ halɩ yʋʋma yʋʋma wa paam zĩna. ¹⁰La lɛɛlɛ wã, Azezi nẽrba la wʋn basɛ tɩ kɛ’ɛndõma, la pãnsɩ dõma n boe saazuum bãŋɛ Nawẽnnɛ yɛm n de to’oto’ore se’em wuu. ¹¹La doose la Zuudãana Azezi-krisi tɩ Nawẽnnɛ ẽŋɛ bɛla masɛ wʋ ẽn looge a yɛm se’em halɩ lan dẽŋɛ dũnia pĩ’iluŋo la. ¹²Tõma n bɔ Krisi sɩra lagɩm na ẽ dɛna ayɩla la, sore boe mɛ tɩ tõma tãna wʋn paagɛ Nawẽnnɛ zẽ’am tɩ dabeem ka tara tõma. ¹³Bɛla tɩ mam sɔsra ya tɩ ya da basɛ tɩ ya bʋraanɛ bo’oge mam nãmsrɩ ya yelle la ĩyã, mam nãmsgɔ la de la yãma zu-zẽkrɛ.

Krisi nõŋlʋm

¹⁴La de la bɛla ĩyã tɩ mam ka dũma tẽŋa tɩ Sɔ Nawẽnnɛ nẽŋam, ¹⁵ẽŋa n botɩ sɛla wuu n boe saazuum la tẽŋa zuo vɔa wʋn dɛna sɔdõma la ba yir-dõma wʋ Nawẽnnɛ n de Sɔ se’em na. ¹⁶Mam sosrɩ ẽ tɩ a Sɩa bɔ ya pãŋa ya sũure pʋam zozo’e wʋ a na’am pãn-kãtɛ la n zo’oge se’em na, ¹⁷tɩ Krisi wʋn bɔna ya sũure pʋam, yan bɔ sɩra la ĩyã, tɩ ya wʋn ze’ele kãŋkãŋɛ tara nõŋlʋm zozo’e. ¹⁸Tɩ yãma wʋn naagɛ la Nawẽnnɛ nẽrba wuu tã’agɛ bãŋɛ Krisi nõŋlʋm n zo’oge se’em, ẽn yalgɛ, la ẽn wɔgɛ, la ẽn ãn ko’ogo se’em, ¹⁹la ya bãŋɛ a nõŋlʋm na n gãŋɛ tɩ nẽrba ka tãna wʋn bãŋɛ ba’asɛ la. Tɩ bõn-sɛba wuu n ze’etɩ Nawẽnnɛ zẽ’am wʋn pɩrɛ ya.

²⁰Nawẽnnɛ n tã ɩta sɛla woo zo’oge gãnna tõma n sosrɩ se’em, bɩɩ tõma n tẽ’esrɩ se’em, ẽŋa pãŋa n tõnnɩ la tõma lɛ la, ²¹ẽŋa n masɛ tɩ a yẽta nã’asgɔ Krisi nẽrba la zẽ’am Azezi-krisi ĩyã zamãana woo zamãana wakatɛ n ka ba’asrɩ. Amina.

Krisi nẽrba la ãn wʋ ĩyã la

¹Mam n boe yʋ’a deem Zuudãana doosgo yelle la, mam sosrɩ ya tɩ ya dɔla sorɔɔgɔ la sõŋa, wʋ lan masɛ Nawẽnnɛ n wi ya tɩ ya ãna se’em na. ²La masɛ mɛ tɩ ya sikra ya mẽŋa sɛla woo pʋam, tara sũ-bʋgsʋm, la sũ-mã’arɛ, la ya tara nõŋlʋm da isgra sũure la taaba. ³Mõrgɛ-ya tara nõ-yẽnnɛ n ze’etɩ Nawẽnnɛ Sɩa zẽ’am, naagɛ-ya taaba tɩ sũ-mã’asʋm bɔna ya tẽŋasʋka. ⁴Azezi nẽrba de la ĩyã ayɩla, tɩ Nawẽnnɛ Sɩa ayɩla mã’a bɔna, la Nawẽnnɛ n wi ya tɩ ya tara pʋtẽ’erɛ gu’ura bõn-sɛba la de la bõn-yẽnnɛ. ⁵La Zuudãana ayɩla n boe, la tõma n bɔ sɩra se’em na de la ayɩla, la ko’om misga de la ayɩla, ⁶la Nawẽnnɛ ayɩla n de tɩ wuu Sɔ n soe sɛla woo, tɩ a pãŋa tara sɛla woo tõnna, dee bɔna sɛla woo pʋam.

⁷La tõma nẽra woo to’oge yel-sõnnɛ bɔ’a masɛ wʋ Krisi n bɔ tɩ se’em. ⁸Bɛla tɩ la gʋlsɛ Nawẽnnɛ gõŋɔ pʋam yetɩ: «Ẽn daan zom saazuum na, a daan yãŋɛ a bɛ’ɛba mɛ yõgɛ ba, dee bɔ nẽrba bɔ’a.» ⁹Lan gʋlsɛ yetɩ: «A zom saazuum na», a võorɛ de la bẽm? La võorɛ de tɩ a daan dẽŋɛ sige mɛ halɩ ka paagɛ tẽŋa wã pʋam pʋam. ¹⁰Sɛka n daan sige la, la de la ẽŋa n ken zom saazuum-zuum tɩ a sɔna sɛla woo. ¹¹La de la ẽŋa n bɔ tɩ bɔ’a, botɩ sɛba dɛna a Tõntõnɩba, tɩ basɛba dɛna a nõtɔ’ɔsrɩba, tɩ basɛba mõola a kõ-yẽlga la bɔ’ɔra nẽrba, tɩ basɛba sɔna Nawẽnnɛ nẽrba bɩsra, bɩɩ dɛna karẽnsãandõma. ¹²A ẽŋɛ bɛla tɩ ba mãasʋm na Nawẽnnɛ nẽrba tɩ ba tõnna Nawẽnnɛ tõoma, tɩ Krisi nẽrba n de a ĩyã la bɩta dee pa’asra, ¹³halɩ tɩ tɩ wʋn wa lagɩm taaba bɔ sɩra dɛna ayɩla, bãŋɛ Nawẽnnɛ Dayʋa la, lebge nẽrba n bɩ ba’asɛ paagɛ wʋ Krisi n masɛ sɛla woo pʋam se’em na. ¹⁴Bɛla tɩ kãn le ãna wʋ kɔma tɩ nẽrba zãsnɩ zãsŋɔ buuri to’oto’ore pã’asra ba, ɩta yɛm tɩ ba botɩ ba tuuge, wʋ kʋsebgo, la ko-mĩ’isi n wẽ’erɩ õorŋɔ tɩ a yɛgna se’em na. ¹⁵La de la tɩn tɔgrɩ sɩra, la nõŋlʋm na ĩyã, tɩ tɩ bɩta sɛla woo pʋam wʋ ka paagɛ Krisi n de Zuudãana la. ¹⁶La de la ẽŋa n de zuugo la n botɩ a nẽrba n ãn wʋ ĩyã la lagɩm taaba tõnna, wʋ kõb-suglsi n botɩ ĩyã zẽ’esɩ to’oto’ore toŋe taaba, tɩ zẽ’a woo tõnna wʋ lan masɛ se’em, tɩ ĩyã la wuu bɩta sõŋa sõŋa la nõŋlʋm.

Vɔm paalga Krisi ĩyã

¹⁷Bɛla tɩ mam yɛta ya la ninmõ’orɛ la Zuudãana nõorɛ, tɩ ya da le ɩta wʋ sɛba n ka dolɩ Nawẽnnɛ n ɩtɩ se’em na, bãma n ɩtɩ se’em na, ãn wʋ ban tẽ’esrɩ se’em n ka tarɩ võorɛ la. ¹⁸Ba yɛm na boe la lika pʋam, la ba ka vɔa wʋ Nawẽnnɛ n boorɩ se’em, ban kɛ’ɛm ba sũure ka bɔɔra tɩ ba bãŋɛ la ĩyã. ¹⁹Ba zuugo ka zɛɛrɩ la tõon-be’ero ɩrgɔ, ba tõnnɩ la yalsɩ, la be’em buuri wuu, ba boorɩ la tõon-dẽgrɔ mã’a.

²⁰La sãn dɛna yãma, ba ka zãsʋm ya Krisi yelle bɛla. ²¹Yãma n wõm Azezi-krisi yelle, dee tɩ ba zãsʋm yãma n de a nẽrba sɩra n ze’ele a zẽ’am na, ²²dẽnɩ tɩ ya basɛ yãma n daan vɔa se’em kʋrʋm na. Basɛ-ya vɔm kɛka, la a yɛmleego la n boorɩ sɛla n de be’em n wʋn pã’asɛ ya botɩ ya sã’am na. ²³Basɛ-ya tɩ Nawẽnnɛ Sɩa teege ya pʋtẽ’era tɩ ya lebge paalsɩ. ²⁴Vɔa-ya vɔm paalga wʋ Nawẽnnɛ n nãam ya tɩ ya ãna wʋ a mẽŋa n ãn se’em na. Vɔm ẽŋa de la sɛla n masɛ, la pʋpeelem n ze’ele sɩra pʋam.

²⁵Bɛla ĩyã, basɛ-ya põmpɔrŋɔ, tɩ ya nẽra woo tɔgra sɩra bɔ’ɔra a tadãana, tɩ tɩ wuu lagɩm dɛna la ĩyã ayɩla la taaba. ²⁶Ya sũure sãn isge, da tõm-ya tõon-be’ero, la ya da basɛ tɩ wẽnnɛ lui dee tɩ ya sũure la ka sige. ²⁷Da bɔ-ya Asũtãana folle. ²⁸Nẽr-sɛka n daan zũuri, a da le zũura, a mõrgɛ a mẽŋa tõnna sɛla n masɛ, tɩ a wʋn tara sɛla sõŋɛ sɛba n boorɩ sõŋrɛ. ²⁹Da basɛ-ya tɩ yetɔg-be’ero yese ya nõorʋm, tɔgra-ya yetɔg-sõma n bɔ’ɔrɩ nẽrba bʋraanɛ, tɩ la sõŋra nẽr-sɛba n selsrɩ la, dee ɩta ba sõŋa. ³⁰Da ẽŋɛ-ya sɛla sã’am Nawẽnnɛ Sɩa sũure, tɩ la de la ẽŋa tɩ Nawẽnnɛ dɩkɛ bɔ ya tɩ la dɛna dãalgɔ pa’alɛ tɩ daarɛ n sẽm tɩ ẽŋa wʋn fãagɛ ya fasɩ fasɩ. ³¹Basɛ-ya sũ-toogo, la sũ-yĩire, la sũ-isgre, la nõke’ene, la taaba tʋʋrɛ, la pʋtʋʋlgɔ wuu. ³²Ɩta-ya taaba sõŋa, la ya tara taaba zĩile, basra-ya taaba tõon-be’ero taalɛ, wʋ Nawẽnnɛ n basɛ ya tõon-be’ero taalɛ Krisi ĩyã la.

Nawẽnnɛ kɔma yel-ɩrɛ

¹Yãma n de Nawẽnnɛ kɔma tɩ a nõŋɛ la, ãna-ya wʋ ẽŋa n ãn se’em na. ²Ɩta-ya sɛla woo la nõŋlʋm wʋ Krisi n nõŋɛ tɩ se’em dɩkɛ a vɔm bɔ tõma ĩyã, tɩ la ãna wʋ kãabgɔ n tarɩ yũuŋ-sõŋɔ paara Nawẽnnɛ yɛm na.

³Yãma n de Nawẽnnɛ nẽrba la, la ka masɛ tɩ yalsɩ, la tõon-dẽgrɔ buuri wuu, la bõnɔ zozo’e yɛmleego yelle pʋrɛ ya tẽŋasʋka. ⁴La ken ka masɛ tɩ ya tɔgra yetɔg-yooro, la yetɔg-be’ero, la yetɔg-gãlsɩ, la de la ya pʋ’ʋsra Nawẽnnɛ a yel-sõnnɛ. ⁵Bãŋɛ-ya sõŋa, tɩ nẽra n ɩtɩ yalsɩ, bɩɩ tõon-dẽgrɔ dãana, bɩɩ nẽr-sɛka n nõŋɛ bõnɔ zozo’e kãn yẽ sɛla sɛla Krisi, la Nawẽnnɛ so’olʋm na pʋam. La sɛka n nõŋɛ bõnɔ zozo’e ãn wʋ nẽra n kãabrɩ baga dee basɛ Nawẽnnɛ pʋ’ʋsgɔ la.

⁶Da basɛ-ya tɩ nẽra pã’asɛ ya la yetɔg-yooro, tɩ la de la bõn-bãma n isgri Nawẽnnɛ sũure tɩ a sɩbgra sɛba n zagsɛ a nõorɛ la. ⁷Da lagɩm-ya la nẽr-bãma. ⁸Kʋrʋm, ya daan boe la lika pʋam, la lɛɛlɛ wã, yan lagɩm na Krisi dɛna ayɩla la ĩyã, ya boe la peelem pʋam. Bɛla, ɩta-ya wʋ nẽrba n boe peelem pʋam n ɩtɩ se’em na. ⁹Peelem tõoma de la sɛla woo n ãn sõŋa, la sɛla n masɛ, la sɩra. ¹⁰Bãŋɛ-ya sɛla n paarɩ Zuudãana yɛm bɔkɛ. ¹¹Da po tõnna-ya tõon-sɛba tɩ nẽrba tõnnɩ lika pʋam n ka tarɩ yõorɔ la, tõn pa’alɛ-ya tɩ ba ka ãn sõŋa. ¹²Nẽr-bãma n sʋgɛ ɩta sɛla la de la yãnnɛ halɩ, tɩ nẽra kãn saagɛ tɔgɛ a yelle. ¹³Ya sãn pa’alɛ tɩ ba ka ãn sõŋa, nẽrba wʋn yẽ tɩ sɛla woo de la vẽelga. ¹⁴Se’ere n soe la, bõn-sɛka woo n de vẽelga boe la peelem pʋam. Bɛla tɩ la gʋlsɛ yetɩ: «Fõn sɛka n gĩsri la, nẽegɛ, isge kũm na tẽŋasʋka tɩ Krisi peelem nẽegɛ fɔ, bɔ fʋ vɔm.»

¹⁵Guuse ya mẽŋa sõŋa la yan vɔa se’em na. Da ɩta-ya wʋ nẽr-sɛba n ka tarɩ yɛm, ɩta-ya wʋ yɛm dõma la. ¹⁶Dɩkɛ-ya folle tɩ ya tarɩ la wuu tõm tõon-sõma, tɩ wakatɛ la de la tõon-be’ero wakatɛ. ¹⁷Bɛla ĩyã, da dɛna-ya geto, bãŋɛ-ya Zuudãana la n boorɩ se’em.

¹⁸Da yũura-ya dãam bugra, tɩ a sã’anɩ la nẽra. Basɛ-ya tɩ Nawẽnnɛ Sɩa sɔna ya, tõnna la ya lɛ sɛla woo pʋam. ¹⁹Naagɛ-ya taaba yõona Nawẽnnɛ yõoma, yõona-ya yõom-sõma buuri wuu tɩ Nawẽnnɛ Sɩa bɔ ya, nã’asra Zuudãana la ya sũure wuu. ²⁰Pʋ’ʋsra-ya tɩ Sɔ Nawẽnnɛ a yel-sõnnɛ sɛla woo pʋam wakatɛ wuu, la tɩ Zuudãana Azezi-krisi yʋ’ʋrɛ.

Pɔgsɩ la ba sɩrba sakra taaba

²¹Sakra-ya taaba, yãma n nã’asrɩ Krisi la ĩyã.

²²Pɔgsɩ, sakra-ya ya sɩrba wʋ yãma n sakrɩ Zuudãana se’em na. ²³Se’ere n soe la, sɩra n de pɔka la zuudãana, wʋ Krisi n de a nẽrba la Zuudãana la. Krisi nẽrba la de la a ĩyã, tɩ Krisi dɛna ba Fãagra. ²⁴Krisi nẽrba n sakrɩ ẽ se’em na, pɔgsɩ mẽ sakra ba sɩrba bɛla sɛla woo pʋam.

²⁵Sɩrba, nõŋɛ-ya ya pɔgba wʋ Krisi n nõŋɛ a nẽrba dɩkɛ a mẽŋa vɔm bɔ ba ĩyã la. ²⁶A ẽŋɛ bɛla tɩ a malgɛ ba la a yetɔga, tɩ ba ãna sõŋa wʋ ban sɔɔrɩ ĩyã la ko’om se’em na, botɩ ba welge to’ore dɛna Nawẽnnɛ nẽrba. ²⁷Tɩ ba da tara dẽgrɔ, la be’em, la sɛla n ka ãn sõŋa, ba tara pʋpeelem ka tara dõrga, tɩ a wʋn tarɩ ba sẽŋɛ a zẽ’am la nã’asgɔ. ²⁸Bɛla mẽ, dẽnɩ tɩ sɩrba nõŋɛ ba pɔgba wʋ ba mẽŋa ĩyã la. Sɛka n nõŋɛ a pɔga, nõŋɛ la a mẽŋa. ²⁹Nẽra ka boe n sisri a mẽŋa ĩyã, a diisri ẽ mɛ, bɩsra a yelle sõŋa wʋ Krisi n ɩtɩ se’em bɔ’ɔra a nẽrba la, ³⁰tõma n de a ĩyã zẽ’esɩ to’oto’ore la ĩyã. ³¹La gʋlsɛ Nawẽnnɛ gõŋɔ pʋam yetɩ: «Bʋraaga wʋn basɛ a sɔ, la a ma, dee lagɩm na a pɔga, tɩ bãma bayi lebge ĩyã ayɩla.» ³²Ẽna de la yel-kãtɛ n sʋgɛ yetɔg-bãna pʋam, mam n tɔgrɩ la de la Krisi, la a nẽrba la yelle. ³³La, la sãn dɛna yãma, nẽra woo nõŋɛ a pɔga wʋ a mẽŋa. Tɩ pɔka woo mẽ nanna a sɩra.

Kɔma, la ba dɔgrɩba yelle

¹Kɔma, sakra-ya ya dɔgrɩba nõorɛ Zuudãana la ĩyã, tɩ bɛla n masɛ. ²«Nanna fɔ sɔ la fʋ ma.» Nawẽnnɛ n bɔ a nõorɛ tɩ ba ɩta bõn-sɛba la wuu pʋam, ẽna n de pɔspɔsɩ bõnɔ n lagɩm na nõorɛ bĩŋre, ³a yetɩ: «Fʋ sãn ɩta bɛla, fʋ wʋn yẽ yel-sõnnɛ, la yõ-woko dũnia zuo.»

⁴La yãma n de sɔdõma la, da ɩta ya kɔma sɛla n wʋn botɩ ba sũure yĩige, uge-ya ba, kã’an ba, dee zãsʋm ba wʋ Zuudãana n boorɩ se’em.

Yamsɩ, la ba zuudãandõma yelle

⁵Yamsɩ, sakra-ya sɛba n soe ya dũnia zuo wã la ya sũure wuu, nanna-ya ba dee zɔta ba, wʋ yan sakrɩ Krisi la. ⁶Da ɩta-ya bɛla ba nifum mã’a tɩ ba pẽgɛ ya. Yãma n de Krisi yamsɩ la, ɩta-ya Nawẽnnɛ n boorɩ se’em la ya sũure wuu. ⁷Tõnna-ya ba tõoma la bɔ’ɔra ba la yɛmleego, wʋ ya tõnnɩ bɔ’ɔra la Zuudãana la, la dagɩ nẽrsaalba ĩyã. ⁸La ya mina tɩ nẽra woo wʋn yẽ a tõonɛ yõorɔ Zuudãana Krisi zẽ’am masɛ wʋ tõon-sõŋɔ sɛka tɩ a tõm na, a sãn dɛna la nẽra yamŋa bɩɩ a sãn dagna nẽra yamŋa.

⁹La sãn dɛna yãma n de zuudãandõma la, yãma mẽ de la ya ɩta sõŋa bɔ’ɔra ya yamsɩ la, da gi’ira-ya ba, mina-ya tɩ yãma, la bãma wuu lagɩm tarɩ la Zuudãana ayɩla n boe saazuum n ka bɔkrɩ nẽrba.

Zɛbrɛ lɔg-sɛba tɩ Nawẽnnɛ bɔ’ɔrɩ

¹⁰Sɛla n deege, keŋe ya mẽŋa yẽ Zuudãana pãŋa ze’ele kãŋkãŋɛ a doosgo la pʋam, a pãn-kãtɛ la ĩyã. ¹¹Yɛ-ya Nawẽnnɛ zɛbrɛ lɔgrɔ wuu, tɩ ya wʋn tã’agɛ ze’ele kãŋkãŋɛ, tɩ Asũtãana da yãŋɛ pã’asɛ ya. ¹²Tõma zɛbrɛ ka boe la nẽrsaalba, tõma zɛbrɩ la Asũtãana kɛ’ɛndõma, la a pãnsɩ dõma, la dũnia lika tõon-be’ero na’adõma, la kʋlkã’arsɩ wuu n boe saazuum. ¹³Bɛla ĩyã, dɩkɛ-ya Nawẽnnɛ zɛbrɛ lɔgrɔ la wuu yɛ, tɩ ya wʋn tã’agɛ ze’ele zɛbɛ be’em wakatɛ. La zɛbrɛ la sãn wa ba’asɛ, ya wʋn ken zɛ kãŋkãŋɛ.

¹⁴Bɛla, mãasʋm-ya zɛ, tara-ya sɩra tɩ a ãna wʋ sagãnnɛ tɩ ya lʋ ya sɩa la, la ya ɩta sɛla n masɛ tɩ la ãna wʋ kuto fuugo tɩ ya yɛ pĩ ya yõ’ogɔ, ¹⁵tara-ya yɛmleego mõola sũ-mã’asʋm kõ-yẽlga la wʋ tagra tɩ ya piti sẽnna la. ¹⁶La ya bɔ Nawẽnnɛ sɩra sɛla woo pʋam tɩ la gu’ura ya la Asũtãana pɛɛma n ãn wʋ bugum na, tɩ ya tã’agɛ kĩŋe ba. ¹⁷Basɛ-ya tɩ fãarɛ tɩ ya tarɩ la ãna wʋ kuto zuu-wannɛ gu’ura ya, dee dɩkɛ Nawẽnnɛ yetɔga n ãn wʋ sʋkɔbgɔ tɩ Nawẽnnɛ Sɩa bɔ ya la zɛbɛ. ¹⁸Pʋ’ʋsra-ya Nawẽnnɛ sɛla woo pʋam, pʋ’ʋsra-ya dee sɔsra ẽ wakatɛ wuu la a Sɩa pãŋa. Nargɛ-ya pãŋa pʋ’ʋsra Nawẽnnɛ nẽrba wuu ĩyã da basɛ. ¹⁹La ya mẽ pʋ’ʋsra mam ĩyã tɩ m sãn yetɩ m tɔgɛ, a wʋn ẽŋɛ yetɔga m nõorʋm tɩ m tã’agɛ mõolɛ a kõ-yẽlga n sʋgɛ la, la bʋraanɛ tɩ nẽrba bãŋɛ a võorɛ. ²⁰La de la kõ-yẽlga ẽŋa tɩ Nawẽnnɛ tõm mam tɩ m mõolɛ, bɛla ĩyã tɩ mam bɔna yʋ’a deem. Pʋ’ʋsra-ya Nawẽnnɛ tɩ m wʋn tã’agɛ mõolɛ la bʋraanɛ wʋ lan masɛ se’em.

Ba’asgɔ yetɔga

²¹Mam boorɩ tɩ ya bãŋɛ la mam n ãn se’em, la mam n ɩtɩ se’em. Tɩ sɔbi-nõŋrɛ Atisiki n de Zuudãana tõntõnna n de sɩra dãana la, wʋn pa’alɛ ya mam yelle wuu. ²²Mam tõm ẽ ya zẽ’am na bɛla ĩyã, tɩ ya bãŋɛ tõma yɛla n ãn se’em, dee tɩ a wʋn keŋe ya sũure.

²³Nawẽnnɛ n de tɩ Sɔ, la tɩ Zuudãana Azezi-krisi wʋn bɔ tɩ sɔbiisi la wuu sũ-mã’asʋm, la nõŋlʋm, dee botɩ ya bɔ ẽ sɩra. ²⁴Nawẽnnɛ wʋn ẽŋɛ nẽr-sɛba wuu n nõŋɛ tɩ Zuudãana Azezi-krisi la nõŋlʋm n ka ba’asrɩ la yel-sõnnɛ.