Kolɔsɩ

Gõn-sɛka tɩ Apolɩ gʋlsɛ bɔ

Kolɔsɩ dõma

Bilgre

Kolɔsɩ de la Azi-minɛɛrɩ so’olʋm tẽŋa. Kolɔsɩ la Efɛɛzɩ zãagɛ la taaba masɛ wʋ kilomẽtrɩ kɔbsyi. La dagɩ Apolɩ mẽŋa n mõolɛ Azezi kõ-yẽlga bɔ ba, la de la A’epafrasɩ n de Kolɔsɩ nẽra n mõolɛ, tɩ ba bɔ Azezi-krisi sɩra (Kolɔsɩ 1:7 la 4:12).

Apolɩ yʋʋn boe la yʋ’a deem (Kolɔsɩ 4:3), tɩ A’epafrasɩ sẽŋɛ a zẽ’am ka yele ẽ tɩ nẽrba basɛba n tarɩ põmpɔrŋɔ zãsŋɔ sẽŋɛ Azezi nẽrba n boe Kolɔsɩ la zẽ’am. Põmpɔrŋɔ karẽnsãandõma bãma yetɩ, nẽra sãn bɔɔra tɩ a yẽ fãarɛ yese tõon-be’ero pʋam, dẽnɩ tɩ a nã’asra bõnɔ zozo’e, dee sakra ba nõorɛ. La nẽr-bãma ken yetɩ la de la pẽrgrɛ tɩ ba sakɛ malŋɔ basɛba n de wãaga, la dia yɛla, la bõn-yũula yɛla, la sisgo basɛba.

Bɛla ĩyã tɩ Apolɩ gʋlsɛ gõŋɔ wã bɔ ba tɩ a vẽlgɛ ba tɩ ba bãŋɛ sɩra, tɩ ba da sakɛ põmpɔrŋɔ karẽnsãandõma la.

Apolɩ vẽlgɛ ba yetɩ ban bɔ Azezi sɩra la, a fãagɛ ba mɛ, la dagɩ lɔɔ dɔlga n wʋn tã’agɛ fãagɛ ba. Dee yele ba tɩ la doose la Azezi tɩ Nawẽnnɛ nãam dũnia, Azezi n de sɛla woo nẽŋadãana, la de la ẽŋa ĩyã tɩ Nawẽnnɛ wʋn fãagɛ nẽrsaalba basɛ (sapɩtrɩ 1-2).

Bɛla poorʋm, Apolɩ pa’alɛ ba la ban wʋn vɔa se’em vɔm paalga tɩ Nawẽnnɛ bɔ ba Azezi-krisi ĩyã la pʋam, dee yele ba tɩ sɛla wuu tɩ ba ɩtɩ la, ba ɩta Zuudãana Azezi yʋ’ʋrɛ ĩyã (sapɩtrɩ 3-4).

Apolɩ dɩkɛ gõŋɔ la tõm na Atisiki, la A’onezim, tɩ ba tarɩ sẽŋɛ ka bɔ Kolɔsɩ dõma (4:7-9).

¹Mam Apolɩ n de Azezi-krisi Tõntõnna wʋ Nawẽnnɛ n boorɩ se’em, la tɩ sɔbia Atimõtɩ ²n gʋlsɛ gõŋɔ wã bɔ’ɔra yãma Nawẽnnɛ nẽrba n boe Kolɔsɩ, dɛna tɩ sɔbiisi n de sɩra dõma Krisi sore doosgo pʋam na. Tɩ Sɔ Nawẽnnɛ wʋn ẽŋɛ ya yel-sõnnɛ, dee bɔ ya sũ-mã’asʋm.

Apolɩ pʋ’ʋsrɩ Nawẽnnɛ a yel-sõnnɛ

³Tõma pʋ’ʋsrɩ Nawẽnnɛ n de tɩ Zuudãana Azezi-krisi Sɔ a yel-sõnnɛ mɛ, tõma pʋ’ʋsrɩ ẽ mɛ yãma ĩyã wakatɛ wuu. ⁴Tõma wõm ban tɔgrɩ yãma n bɔ Azezi-krisi sɩra, dee nõŋɛ Nawẽnnɛ nẽrba wuu se’em, ⁵yãma n tarɩ pʋtẽ’erɛ gu’ura sɛla tɩ Nawẽnnɛ bĩŋe a yire gu’ura tɩ a bɔ ya la ĩyã. La de la yãma n dẽŋɛ wõm sɩra yetɔga n de Nawẽnnɛ kõ-yẽlga la, n botɩ yãma tara pʋtẽ’erɛ ẽŋa. ⁶Kõ-yẽlga ẽŋa paagɛ yãma zẽ’am mɛ, wʋ ẽn paagɛ dũnia zẽ’esɩ wuu se’em na, la a ɩtɩ nẽrba sõŋa mɛ, tɩ ba sakra zozo’e, tɩ ba kãllɛ pa’asra. A mẽ ɩtɩ la bɛla yãma zẽ’am lan sẽŋɛ la daar-sɛka tɩ yãma wõm, dee bãŋɛ Nawẽnnɛ yel-sõnnɛ sɩra sɩra la. ⁷Yãma zãsʋm bõn-ẽŋa la A’epafrasɩ n de tõma tõntõn-tadãana tɩ tõma nõŋɛ la zẽ’am. A de la Azezi-krisi tõntõnna n de sɩra dãana tõnna bɔ’ɔra yãma. ⁸Ẽŋa n yele tõma Nawẽnnɛ Sɩa n basɛ tɩ yãma tara nõŋlʋm se’em.

⁹Bɛla tɩ lan sẽŋɛ la daar-sɛka tɩ tõma wõm yãma yelle la, tɩ tõma pʋ’ʋsra Nawẽnnɛ yãma ĩyã wa paam lɛɛlɛ wã. Tõma sosrɩ ẽ tɩ a botɩ ya bãŋɛ ẽŋa n boorɩ se’em sõŋa sõŋa, la ya tara yɛm, la bãŋrɛ wuu tɩ Nawẽnnɛ Sɩa bɔ’ɔrɩ. ¹⁰Tɩ ya yel-ɩrɛ wʋn masɛ wʋ Zuudãana la n boorɩ se’em, tɩ la paagɛ a yɛm sɛla woo pʋam. Tɩ ya wʋn tõm tõon-sõma buuri wuu, dee bãŋɛ Nawẽnnɛ pa’asɛ. ¹¹Nawẽnnɛ wʋn bɔ ya pãŋa sɛla woo pʋam a na’am pãn-kãtɛ la ĩyã, tɩ ya wʋn wĩbe sɛla woo pʋam la sũ-mã’asʋm. ¹²Pʋ’ʋsra-ya tɩ Sɔ Nawẽnnɛ a yel-sõnnɛ la sũ-yẽlga, ẽŋa n basɛ tɩ ya tãna wʋn po to’oge bõn-sõma tɩ a bĩŋe tɩ a bɔ a nẽrba a so’olʋm n de peelem pʋam na. ¹³Nawẽnnɛ fãagɛ tɩ mɛ lika pãŋa pʋam, tarɩ tɩ sẽŋɛ a Bi-nõŋrɛ so’olʋm pʋam. ¹⁴Ẽŋa ĩyã tõma yẽ fãarɛ mɛ, tɩ Nawẽnnɛ basɛ tɩ tõon-be’ero taalɛ.

Krisi n de sɛka

¹⁵Azezi-krisi de la Nawẽnnɛ tɩ ba ka yẽtɩ la wõnnɛ. Ẽŋa n de bõn-sɛba n nãam na wuu yiɛn dãana. ¹⁶La doose la ẽŋa tɩ Nawẽnnɛ nãam sɛla woo, bõn-sɛba n boe dũnia zuo la saazuum, bõn-sɛba tɩ ba yẽtɩ, la bõn-sɛba tɩ ba ka yẽtɩ, bõn-sɛba n tarɩ na’am, la zuudãandõma, la pãnsɩ dõma, la kɛ’ɛndõma wuu. La doose la ẽŋa tɩ Nawẽnnɛ nãam sɛla woo, tɩ la dɛna a bõnɔ. ¹⁷Ẽŋa n dẽŋɛ sɛla woo bɔna, la de la ẽŋa ĩyã tɩ sɛla woo ken bɔna a zẽ’am. ¹⁸Ẽŋa n de a nẽrba n de a ĩyã la zuudãana. Ẽŋa n de sɛla woo pɔspɔsɩ dãana, ẽŋa n de pɔspɔsɩ dãana n vo’oge dee basɛ kũm tɩ a dɛna sɛla woo nẽŋadãana. ¹⁹La paagɛ la Nawẽnnɛ yɛm tɩ a basɛ tɩ ẽŋa n ãn se’em na wuu, Azezi mẽ ãna bɛla. ²⁰Dee botɩ la doose la Azezi tɩ sɛla woo, la ẽŋa naagɛ taaba, la de la Azezi n ki kũm dɔ-puurŋa zuo tɩ a zɩɩm yese la ĩyã, n botɩ sũ-mã’asʋm bɔna sɛla n boe tẽŋa, la saazuum wuu, la Nawẽnnɛ tẽŋasʋka.

²¹La yãma mẽ daan zãagɛ mɛ la Nawẽnnɛ, ya daan de la bɛ’ɛba ya pʋtẽ’e-be’ero, la ya tõon-be’ero la ĩyã. ²²La lɛɛlɛ wã, Nawẽnnɛ naagɛ ya mɛ la ẽŋa, a Dayʋa n lebge nẽrsaala ki la ĩyã, tɩ a tarɩ ya sẽŋɛ ka ze’ele Nawẽnnɛ nẽŋam la pʋpeelem, tɩ ya ka tara yelle, tɩ dõrga kana. ²³Bɛla, dẽnɩ tɩ ya ken bɔ sɩra zɛ kãŋkãŋɛ, da basɛ tɩ sɛla zãagɛ ya la kõ-yẽlga la tɩ ya wõm tara pʋtẽ’erɛ gu’ura sɛla la. La de la kõ-yẽlga ẽŋa tɩ ba mõolɛ bɔ nẽrsaalba wuu n boe dũnia zuo la. Mam Apolɩ de Nawẽnnɛ tõntõnna tɩ m mõolɛ la kõ-yẽl-ẽŋa.

Apolɩ n tõm se’em bɔ Nawẽnnɛ nẽrba

²⁴Lɛɛlɛ wã, mam sũure ãn yẽlʋm mɛ, mam n nãmsrɩ bɔ’ɔra yãma la ĩyã. Mam n nãmsrɩ wã de la Krisi nãmsgɔ n deege dɛna mam nãmsɛ bɔ a nẽrba n de a ĩyã la. ²⁵Nawẽnnɛ n looge mam tɩ m dɛna Azezi nẽrba tõntõnna mõolɛ a yetɔga la wuu bɔ yãma. ²⁶Yetɔg-ẽŋa sʋgɛ mɛ yʋʋma yʋʋma, zamãana wuu wa paam zĩna, la lɛɛlɛ wã a yãŋa puke mɛ bɔ Nawẽnnɛ nẽrba. ²⁷Nawẽnnɛ n boorɩ tɩ a basɛ tɩ a nẽrba la bãŋɛ yel-ẽŋa n daan sʋgɛ la na’am pãŋa n ãn sõŋa zo’oge se’em bu-zãŋsɩ tẽŋasʋka. Yel-ẽŋa n sʋgɛ la de la Krisi boe la ya lɛ, botɩ ya wʋn yẽ na’am pãŋa tɩ ya tarɩ pʋtẽ’erɛ gu’ura la a zẽ’am. ²⁸La de la ẽŋa yelle tɩ tõma mõolɩ, kã’ana nẽra woo, dee zãsna nẽra woo la yɛm tɩ tɩ botɩ nẽra woo masɛ sɛla woo pʋam Krisi doosgo pʋam ka ze’ele Nawẽnnɛ nẽŋam. ²⁹La de la bɛla ĩyã tɩ mam tõnna dee mõrgra. La de la Krisi pãn-kãtɛ tɩ a bɔ mam zozo’e la n botɩ mam tõnna bɛla.

¹Mam boorɩ tɩ ya bãŋɛ la mam n mõrgɛ tõnna se’em yãma ĩyã, la nẽr-sɛba n boe Laodise, la nẽr-sɛba wuu n nãn ka yẽ mam na nifo la ĩyã. ²Mam mõrgrɩ tɩ ya sũure n keŋe tɩ ya lagɩm taaba tara nõŋlʋm, dee tara yɛm zozo’e, tɩ ya bãŋɛ sɩra sõŋa sõŋa Nawẽnnɛ yelle n sʋgɛ n de Krisi la. ³La de la ẽŋa n tarɩ yɛm la bãŋrɛ wuu n sʋgɛ n tarɩ yõorɔ zozo’e.

⁴Mam yele ya wãna tɩ nẽra n da wa tɔgɛ nõ-yẽlʋm yetɔga pã’asɛ ya. ⁵Baa mam n zãagɛ la yãma la, mam yɛm boe la ya mɛ, mam sũure ãn yẽlʋm mɛ, mam yẽ tɩ ya yel-ɩrɛ dolɩ sore sõŋa sõŋa, la yan bɔ Krisi sɩra zɛ kãŋkãŋɛ la.

Tõma tarɩ vɔm mɛ Krisi zẽ’am

⁶Bɛla, yãma n sakɛ tɩ Azezi-krisi de la ya Zuudãana la, bɔna-ya la ẽ lɛ, ⁷zɛ kãŋkãŋɛ wʋ tɩa yẽga n kẽ tẽŋa zɛ kãŋkãŋɛ se’em na, ken bɔ-ya sɩra la ya sũure wuu wʋ ban zãsʋm ya se’em na, la ya pʋ’ʋsra Nawẽnnɛ a yel-sõnnɛ zozo’e.

⁸Guuse-ya tɩ nẽra da dɩkɛ bãŋrɛ zãsŋɔ la yɛm yooro n de nẽrsaalba sisgo, la dũnia wã yɛla pã’asɛ ya, ba ka ze’ele Krisi zẽ’am. ⁹Se’ere n soe la, Nawẽnnɛ n ãn se’em wuu la, Krisi mẽ ãn na bɛla mẽŋa. ¹⁰La yãma n lagɩm na ẽ na, ya tarɩ sɛla woo mɛ tɩ la seke. Ẽŋa n de kɛ’ɛndõma, la pãnsɩ dõma wuu Zuudãana. ¹¹Yãma n lagɩm na ẽ na, ya wã mɛ, la dagɩ wã-sɛka tɩ nẽrsaalba wãtɩ tɩ la pa’alɛ tɩ ba de Nawẽnnɛ nẽrba la. La de la Krisi n teege ya sũure tɩ ya lebge Nawẽnnɛ nẽrba, yese ya pʋtẽ’e-be’ero wuu. ¹²Ban daan mise ya ko’om pʋam na, la ãn wʋ ba lagɩm ya mɛ la Krisi laagɛ. La yãma mẽ lagɩm na ẽ mɛ vo’oge, yãma n bɔ Nawẽnnɛ pãŋa n botɩ Krisi vo’oge sɩra la ĩyã. ¹³Yãma daan ãn wʋ ya ki mɛ Nawẽnnɛ zẽ’am ya tõon-be’ero ĩyã, la ban ka dɔgɛ ya tɩ ya wãta dɛna Nawẽnnɛ nẽrba la ĩyã. La Nawẽnnɛ botɩ ya lagɩm na Krisi mɛ vɔa, basɛ ya tõon-be’ero wuu taalɛ. ¹⁴Tõma daan sɩ’ɩsɛ la Nawẽnnɛ lɔɔ, tõm tõon-be’ero n pa’alɛ tɩ tõma masɛ la sɩbgrɛ. La ban ka Krisi kũm dɔ-puurŋa zuo la, Nawẽnnɛ basɛ yel-ẽŋa taalɛ mɛ, tɩ a ka le bɔna tõma zuo. ¹⁵A botɩ pãnsɩ dõma wuu, la kɛ’ɛndõma wuu pãŋa sã’am mɛ, ẽŋɛ ba yãnnɛ nẽrba wuu nẽŋam pa’alɛ tɩ Krisi tã’agɛ ba mɛ kũm dɔ-puurŋa zuo.

¹⁶Bɛla, da basɛ-ya tɩ nẽra le bɔ ya sisgo la sɛla tɩ ya diti, bɩɩ sɛla tɩ ya yũuri, bɩɩ yʋʋnɛ yʋʋnɛ kibsa, bɩɩ wõr-paalsɩ de’eŋo, bɩɩ vo’osgo dabsa yelle. ¹⁷Bõn-bãma de la sɛla n sẽm na mãmsgɔ mã’a, la sɛla la mẽŋa de la Krisi. ¹⁸Da basɛ-ya tɩ nẽra n ɩtɩ a mẽŋa wʋ a de la sik-m-mẽŋa dãana dee pʋ’ʋsra malɛkadõma, pã’asɛ ya yetɩ yãma n ɩtɩ sɛla de la zãŋa. Nẽr-ẽŋa dãana yetɩ Nawẽnnɛ n puke sɛla pa’alɛ ẽŋa, la a pa’alɩ la a mẽŋa zãŋa, se’ere n soe la, la de la nẽrsaalba pʋtẽ’erɛ tɩ a tarɩ. ¹⁹A ka lagɩm na Krisi n de Zuudãana la. Krisi n de zuugo sõŋra ĩyã la wuu sɛla woo pʋam, tɩ kõb-suglsi, la zĩila botɩ ĩyã la zẽ’esɩ to’oto’ore toŋe taaba bɩta wʋ Nawẽnnɛ n boorɩ se’em.

Vɔm kɛka, la vɔm paalga yelle

²⁰Yãma lagɩm na Krisi ki mɛ, tɩ a botɩ dũnia yɛla ka le tara pãŋa la ya lɛ. Bẽm tɩ ya ɩta wʋ dũnia wã n ken sɔna ya, basɛ tɩ ba le mõrgra ya tɩ ya sakra sisgo bãna wã n yetɩ: ²¹«Da dɩkɛ, da leme, da kalʋm»? ²²Sisgo bãma de la bõn-sɛba n sã’anɩ la ĩyã. Ba de la nẽrsaalba sisgo la ba zãsŋɔ. ²³Sisgo la zãsŋɔ bãna ãn wʋ yɛm tõoma la, ba pa’alɩ la pʋ’ʋsgɔ sore n ɩtɩ la yɛmleego, la sik-m-mẽŋa n dagɩ sɩra, la ĩyã nãmsgɔ yelle. La ba ka tã wʋn sõŋɛ nẽra tɩ a yõkɛ a mẽŋa la nẽrsaala yɛm n boorɩ se’em n de be’em na.

¹Yãma lagɩm na Krisi vo’oge mɛ, bɛla ɛɛra-ya bõn-sɛba n boe Nawẽnnɛ yire, zẽ’e-sɛka tɩ Krisi zĩ Nawẽnnɛ zʋʋgɔ la. ²Basɛ-ya tɩ Nawẽnnɛ yire yelle pakɛ ya, da basɛ-ya tɩ dũnia yɛla pakɛ ya. ³Se’ere n soe la, ya ki mɛ, la ya vɔm boe la Krisi lɛ Nawẽnnɛ zẽ’am. ⁴La Krisi n de tɩ vɔm na sãn wa puke, ya wʋn po naagɛ la ẽ puke la a na’am pãŋa.

⁵Bɛla, basɛ-ya dũnia wã pʋtẽ’e-be’ero n de yalsɩ tõoma, la tõon-dẽgrɔ, la yalsɩ ɩrgɔ yɛmleego, la be’em yɛmleego, la nõŋɛ bõnɔ zozo’e. Nẽra n nõŋɛ bõnɔ zozo’e ãn wʋ nẽr-sɛba n kãabrɩ baga dee basɛ Nawẽnnɛ pʋ’ʋsgɔ la. ⁶La de la tõon-bãma n isgri Nawẽnnɛ sũure, tɩ a sɩbgra nẽr-sɛba n zagsrɩ a nõorɛ la. ⁷Yãma n daan vɔa tõon-be’ero pʋam na, ya mẽ daan ɩtɩ la bɛla. ⁸La lɛɛlɛ wã, basɛ-ya bõn-bãma wuu. Basɛ-ya sũ-isgre, la sũ-yĩire, la pʋtʋʋlgɔ, la taaba tʋʋrɛ, la yetɔg-yaalsɩ mẽ ka le masɛ tɩ ba yese ya nõorʋm. ⁹Da parna-ya bɔ’ɔra taaba. Yãma basɛ yãma n daan ãn se’em na mɛ la a yel-ɩrɛ, ¹⁰dee teege tara ãsʋm paalga. La de la Nawẽnnɛ n botɩ ya teege tara ãsʋm ẽŋa, dee malgra ẽ tɩ a ãna wʋ a mẽŋa la, tɩ ya wʋn tã’agɛ bãŋra ẽŋa sõŋa sõŋa pa’asra.

¹¹Nẽr-sɛba n tarɩ ãsʋm paalga wã, la sãn dɛna Zifdõma, bɩɩ bu-zãŋsɩ, bɩɩ sɛba n wã, la sɛba n ka wã, bɩɩ sɛba nini n ka pike, la weem nẽrba, bɩɩ yamsɩ, la sɛba n dagɩ yamsɩ, welgre ka le bɔna ba tẽŋasʋka. La de la Krisi mã’a n gãnnɩ sɛla woo, dee sɔna a nẽrba wuu.

¹²Yãma de la nẽr-sɛba tɩ Nawẽnnɛ looge, a nõŋɛ ya mɛ, welge ya to’ore tɩ ya dɛna a nẽrba. Bɛla, zɔta-ya taaba ninbãalga, ɩta taaba sõŋa, sikra ya mẽŋa, dee tara sũ-bʋgsʋm, la sũ-mã’arɛ. ¹³Da isgra ya sũure la taaba, nẽra sãn ẽŋɛ ya tuuge, basɛ-ya ẽ taalɛ wʋ Zuudãana n basɛ ya tõon-be’ero taalɛ se’em na. ¹⁴Lan gãnnɩ wuu, tara-ya nõŋlʋm, tɩ ẽŋa n wʋn botɩ ya lagɩm taaba tara nõ-yẽnnɛ sõŋa sõŋa. ¹⁵Basɛ-ya tɩ Krisi sũ-mã’asʋm la sɔna ya sũure, Nawẽnnɛ wi ya tɩ ya tara la sũ-mã’asʋm ẽŋa, lagɩm taaba dɛna ayɩla. Mina-ya yel-sõnnɛ pʋ’ʋsgɔ. ¹⁶Basɛ-ya tɩ Krisi yetɔga la bɔna la ya lɛ sõŋa sõŋa. Tɩ ya tara yɛm zozo’e zãsna taaba, dee kã’ana taaba. Yõona-ya Nawẽnnɛ yõoma, yõona-ya yõom-sõma buuri wuu tɩ Nawẽnnɛ Sɩa bɔ ya la ya sũure wuu, pʋ’ʋsra Nawẽnnɛ a yel-sõnnɛ. ¹⁷Bõn-sɛba wuu tɩ ya ɩtɩ, la sãn dɛna la tõoma bɩɩ yetɔga, ɩta-ya la Zuudãana Azezi-krisi yʋ’ʋrɛ, dee pʋ’ʋsra tɩ Sɔ Nawẽnnɛ a yel-sõnnɛ Azezi-krisi yʋ’ʋrɛ ĩyã.

Krisi nẽrba n wʋn vɔa se’em ba yiɛ pʋam

¹⁸Pɔgsɩ, sakra-ya ya sɩrba wʋ lan masɛ tɩ la ãna se’em Zuudãana doosgo pʋam.

¹⁹Sɩrba, nõŋɛ-ya ya pɔgba, da tɔ-ya la ba.

²⁰Kɔma, sakra ya dɔgrɩba nõorɛ sɛla woo pʋam, tɩ la de la bɛla n ãn Zuudãana sũure yẽlʋm.

²¹Sɔdõma, da ɩta-ya sɛla n wʋn basɛ tɩ ya kɔma sũure yĩige, tɩ ba bʋraanɛ da bo’oge.

²²Yamsɩ, sakra-ya sɛba n soe ya dũnia wã zuo sɛla woo pʋam, da ɩta-ya bɛla ba nifum mã’a tɩ ba pẽgɛ ya. Tõnna-ya la ya sũure wuu yãma n nannɩ Zuudãana la ĩyã. ²³Sɛla woo tɩ ya ɩtɩ, ɩta-ya la ya sũure wuu, wʋ ya ɩtɩ bɔ’ɔra la Zuudãana la, la dagɩ nẽrsaalba ĩyã, ²⁴yãma n mi tɩ ya wʋn to’oge la yɔɔrɔ tɩ Zuudãana la bĩŋe tɩ a bɔ a nẽrba la ĩyã. La de la Krisi n de Zuudãana la tɩ ya tõnnɩ bɔ’ɔra. ²⁵Nẽr-sɛka n ɩtɩ sɛla n ka masɛ, a wʋn to’oge yel-ɩrɛ n ka masɛ yɔɔrɔ, se’ere n soe la, Nawẽnnɛ ka bɔkrɩ nẽrba.

¹La sãn dɛna yãma n de zuudãandõma la, ɩta-ya sɛla n ãn sõŋa, la sɛla n masɛ bɔ’ɔra ya yamsɩ la. Mina-ya tɩ yãma mẽ tarɩ la Zuudãana n boe saazuum.

Kã’aŋɔ, la ba’asgɔ yetɔga

²Pʋ’ʋsra-ya Nawẽnnɛ da basɛ, mõrgɛ-ya la pʋ’ʋsgɔ, pʋ’ʋsra-ya ẽ a yel-sõnnɛ. ³Pʋ’ʋsra-ya tõma mẽ ĩyã, tɩ Nawẽnnɛ bɔ tɔ sore tɩ tɩ mõolɛ a kõ-yẽlga la pa’alɛ nẽrba Krisi yelle n daan sʋgɛ la. La de la yel-ẽŋa ĩyã tɩ mam bɔna yʋ’a deem. ⁴Pʋ’ʋsra-ya Nawẽnnɛ tɩ m tã’agɛ tɔgɛ yel-ẽŋa vẽelga vẽelga wʋ lan masɛ tɩ m tɔgɛ se’em na.

⁵Basɛ-ya tɩ ya yel-ɩrɛ ãna sõŋa nẽr-sɛba n ka dolɩ Azezi la tẽŋasʋka, dɩkɛ-ya fol-sɛka tɩ ya tarɩ la wuu tõm sõŋa. ⁶Basɛ-ya tɩ ya yetɔga ãna sõŋa wakatɛ wuu tara yẽlʋm wʋ yaarʋm na, dee bãŋɛ yan wʋn lerge nẽra woo se’em tɩ la masɛ.

⁷La sãn dɛna mam yelle, tɩ sɔbi-nõŋrɛ Atisiki n de Zuudãana tõntõnna n de sɩra dãana, n lagɩm na mam tõnna Zuudãana tõoma la, wʋn yele ya mam yelle wuu. ⁸Mam tõm ẽ ya zẽ’am na bɛla ĩyã, tɩ ya bãŋɛ tõma yɛla n ãn se’em, dee tɩ a wʋn keŋe ya sũure. ⁹Mam tõm na ẽŋa, la A’onezim n ze’ele yãma zẽ’am, a de la tɩ sɔbi-nõŋrɛ n de sɩra dãana. Ba wʋn yele ya bõn-sɛba wuu n ɩtɩ kalam.

¹⁰Aristarkɩ n lagɩm na mam bɔna yʋ’a deem na pʋ’ʋsrɩ ya. Amarkɩ n de Abarnabasɩ sõogɔ la mẽ pʋ’ʋsrɩ ya. Mam põn dẽŋɛ pa’alɛ yãma, yan wʋn ẽŋɛ se’em a ĩyã mɛ, a sãn wa’am ya zẽ’am, ya to’oge ẽ sõŋa. ¹¹Azezi sɛka tɩ ba wi’iri tɩ Azustusi la mẽ pʋ’ʋsrɩ ya. Nẽr-bãna mã’a n de Zifdõma n lagɩm na mam tõnna Nawẽnnɛ so’olʋm tõoma. Bãma n de nẽrba n bɔ mam bʋraanɛ.

¹²A’epafrasɩ n de ya nẽra la pʋ’ʋsra ya. Ẽŋa n de Azezi-krisi tõntõnna la mõrgrɩ mɛ pʋ’ʋsra Nawẽnnɛ ya yelle ka basra tɩ ya ze’ele kãŋkãŋɛ, dɛna nẽrba n bɩ sɛla woo pʋam sakɛ Nawẽnnɛ n boorɩ se’em wuu. ¹³Mam bɔ’ɔrɩ ya a kaseto tɩ a mõrgrɩ mɛ zozo’e yãma yelle, la Laodise dõma, la Hiyerapolisi dõma yelle. ¹⁴Tɩ sɔbi-nõŋrɛ Aluki n de logtore, la Ademasɩ pʋ’ʋsrɩ ya.

¹⁵Pʋ’ʋsɛ-ya tɩ sɔbiisi la n boe Laodise la, la Animfa, la Azezi nẽrba n lagsrɩ a yire la. ¹⁶Ya sãn karẽŋɛ gõŋɔ wã ba’asɛ, ya basɛ tɩ ba ken karẽŋɛ ẽ bɔ Azezi nẽrba n boe Laodise la. La yãma mẽ karẽŋɛ Laodise dõma n wʋn bɔ ya gõn-sɛka la. ¹⁷Yele-ya Arsipi tɩ a bɩsɛ tõon-sɛka tɩ Zuudãana bɔ ẽ na yelle sõŋa, a tõm ẽ sõŋa sõŋa ba’asɛ.

¹⁸Mam Apolɩ n gʋlsɛ pʋ’ʋsgɔ wã la m mẽŋa nu’ugo, mam pʋ’ʋsrɩ ya. Tẽra-ya mam n boe yʋ’a deem na yelle.

Nawẽnnɛ yel-sõnnɛ wʋn bɔna la ya.