3 Zã

Gõŋɔ bʋtã dãana tɩ

Azã

gʋlsɛ

Bilgre

Azã n de kẽema la n gʋlsɛ gõŋɔ wã bɔ nẽra ayɩla yʋ’ʋrɛ n de Agayusi.

Agayusi de la nẽra n dolɩ Nawẽnnɛ sɩra, dee sõŋra Azezi nẽrba, tɩ a pẽgɛ ẽ.

Azã ken tɔgɛ la nẽra ayẽma yʋ’ʋrɛ n de Adiyotrɛfɩ yelle, yetɩ nẽr-ẽŋa ka ẽŋɛ sõŋa, a ka to’oge ẽŋa yetɔga, la a ka to’ose Azezi nẽrba.

Dee pẽgɛ nẽra ayẽma yʋ’ʋrɛ n de Ademetrisi, yetɩ a de la nẽr-sõŋɔ nẽrba wuu nifum.

Gõn-ẽna wã pa’alɛ tõma tɩ tɩ da pagsra sɛla n de be’em, tɩ dɔla Nawẽnnɛ sɩra, la tɩ tara nõŋlʋm, tɔ’ɔsra taaba sãanɛ.

¹Mam n de kẽema la, n gʋlsɛ bɔ’ɔra m sɩrɛ Agayusi tɩ mam nõŋɛ sɩra sɩra. ²M sɩr-nõŋrɛ, mam kã’arɩ Nawẽnnɛ tɩ sɛla woo ãna sõŋa bɔ fɔ, tɩ fʋ wʋn tara ĩmã’asʋm wʋ fõn dolɩ Nawẽnnɛ sõŋa se’em na.

³Tɩ sɔbiisi n wa’am kalam wa yele fõn dolɩ sɩra sore se’em, la fõn vɔa la sɩra se’em. Tɩ mam ẽŋɛ sũ-yẽlga zozo’e. ⁴Sɛla ka bɔ’ɔrɩ mam sũ-yẽlga gãnna mam n wõm tɩ ba yetɩ mam kɔma dolɩ sɩra la.

⁵M sɩr-nõŋrɛ, fõn ɩtɩ sɛla bɔ’ɔra sɔbiisi la, baa la sɛba n de sãama la, fʋ ɩtɩ la sɩra. ⁶Ba tɔgɛ fʋ nõŋlʋm na yelle mɛ Azezi nẽrba zẽ’am. Fʋ sãn sõŋɛ ba tɩ ba sẽŋɛ ba sore la wʋ Nawẽnnɛ n boorɩ se’em, fʋ ẽŋɛ sõŋa. ⁷Se’ere n soe la, Azezi-krisi tõoma yelle tɩ ba wɛ’ɛsa sore la, dee ka to’oge sɛla nẽr-sɛba n ka dolɩ Azezi la zẽ’am. ⁸Tõma de la tɩ sõŋɛ nẽr-bãma buuri pa’alɛ tɩ tõma naagɛ la ba mɛ dɛna sɩra kõ-yẽlga la tõntõnɩba.

⁹Mam daan gʋlsɛ gõŋɔ mɛ bɔ Azezi nẽrba, la Adiyotrɛfɩ n boorɩ tɩ a dɛna nẽŋadãana la ka to’oge mam n yele se’em na. ¹⁰Bɛla, mam sãn wa wa’am, mam wʋn pa’alɛ sɛla tɩ a ẽŋɛ, la ẽn parnɩ tɔgra tõma yetɔg-be’ero la. La, la dagɩ bɛla mã’a, a ken zagsra mɛ ka tɔ’ɔsra sɔbiisi, dee mẽ gu’ura nẽr-sɛba n boorɩ tɩ ba tɔ’ɔsra ba la, digra ba Azezi nẽrba la pʋam.

¹¹M sɩr-nõŋrɛ, da pagsɛ sɛla n de be’em, pagsra sɛla n ãn sõŋa. Nẽr-sɛka woo n ɩtɩ sɛla n ãn sõŋa de la Nawẽnnɛ nẽra. La nẽr-sɛka woo n ɩtɩ sɛla n de be’em ka mi Nawẽnnɛ.

¹²La sãn dɛna Ademetrisi, nẽrba wuu tɔgrɩ a yelle sõŋa mɛ, tɩ ẽn dolɩ sɩra se’em na mẽ pa’ala a yelle sõŋa. Tõma mẽ tɔgrɩ a yelle sõŋa mɛ. La fʋ mi tɩ tõma kaseto de la sɩra.

¹³Mam tarɩ yɛla zozo’e mɛ tɩ m tɔgɛ bɔ fɔ, la mam ka boorɩ tɩ m gʋlsɛ ba gõŋɔ pʋam. ¹⁴Mam tarɩ pʋtẽ’erɛ mɛ tɩ mam wʋn wa yẽ fɔ tɩ tɩ sõsɛ la taaba.

¹⁵Sũ-mã’asʋm wʋn bɔna la fɔ.

Fʋ sɩrdõma pʋ’ʋsrɩ fɔ. Pʋ’ʋsɛ tɩ sɩrdõma la wuu ayɩla ayɩla bɔ tɔ.