2 Timõtɩ

Gõŋɔ bʋyi dãana tɩ Apolɩ gʋlsɛ bɔ

Atimõtɩ

Bilgre

Wakat-sɛka tɩ Apolɩ gʋlsɛ gõn-ẽna wã bɔ Atimõtɩ la, a boe la yʋ’a deem Rom. La daan tɔ mɛ zozo’e bɔ ẽ (2 Timõtɩ 2:9), la nẽra nẽra ka boe n wʋn sõŋɛ ẽ (2 Timõtɩ 4:16).

Apolɩ daan tẽ’esɛ tɩ ẽŋa vɔm lɛm na ba’asgɔ, bɛla tɩ a gʋlsɛ bɔ Atimõtɩ n de a tõntõn-tadãana tɩ a nõŋɛ wʋ a mẽŋa bia la, tɔgɛ a ba’asgɔ yetɔga bɔ ẽ.

Apolɩ dẽŋɛ pʋ’ʋsɛ la Nawẽnnɛ a yel-sõnnɛ Atimõtɩ ĩyã, dee kã’an ẽ yetɩ, baa nẽrba sãn nãmsra ẽ Nawẽnnɛ tõoma la ĩyã, a mõrgɛ zɛ kãŋkãŋɛ wʋ Azezi sʋda-sõŋɔ (1:1—2:13).

Apolɩ kã’an ẽ mɛ yetɩ a guuse a mẽŋa la nẽr-sɛba n wẽ’erɩ nõke’en-yooro la, tɩ la ka sõŋrɩ nẽrba Nawẽnnɛ doosgo pʋam. A ken yele Atimõtɩ tɩ a ɩta ẽŋa n ɩtɩ se’em na: A dɔla sɩra, la a bɔ sɩra, la a tara nõŋlʋm, la sũ-mã’arɛ, la a da yĩm zãsŋɔ sõŋɔ sɛka tɩ a to’oge la (2:14—4:5).

Gõŋɔ la ba’asgɔ, a pa’alɛ la ẽŋa n nãmsɛ se’em, la Nawẽnnɛ n sõŋɛ ẽŋa se’em (4:6-18).

¹Mam Apolɩ n de Azezi-krisi Tõntõnna wʋ Nawẽnnɛ n boorɩ se’em, tɩ m mõolɛ vɔm sɛka tɩ Nawẽnnɛ bĩŋe nõorɛ tɩ a bɔ tɔ Azezi-krisi ĩyã la yelle. ²Mam gʋlsrɩ bɔ’ɔra la Atimõtɩ n lebge mam bi-nõŋrɛ la. Tɩ Sɔ Nawẽnnɛ, la tɩ Zuudãana Azezi-krisi wʋn ẽŋɛ fɔ yel-sõnnɛ, dee zoe fʋ ninbãalga, dee bɔ fɔ sũ-mã’asʋm.

Apolɩ pʋ’ʋsrɩ Nawẽnnɛ a yel-sõnnɛ, dee bɔ Atimõtɩ bʋraanɛ

³Mam pʋ’ʋsrɩ Nawẽnnɛ a yel-sõnnɛ, mam tõnnɩ bɔ’ɔra ẽ mina m sũure pʋam tɩ la ãn sõŋa, wʋ mam yaabdõma n yʋʋn tõnnɩ bɔ’ɔra ẽ se’em na. Mam tẽrɩ fʋ yelle m pʋ’ʋsgɔ pʋam yʋ’ʋŋɔ la wʋntɛɛŋa ka basra. ⁴Mam tẽrɩ fõn daan kellɩ la mɛ, tɩ mam bɔɔra tɩ m le yẽ fɔ, tɩ m wʋn tara sũ-yẽlga zozo’e. ⁵Mam tẽrɩ fõn bɔ Azezi sɩra la fʋ sũure wuu, wʋ fʋ ma-keko Aloyiizi, la fʋ ma A’enisi n daan dẽŋɛ bɔ Azezi sɩra se’em na. Mam mi tɩ fʋ ken bɔ sɩra la bɛla. ⁶La de la bɛla tɩ mam tẽera fɔ tɩ fʋ dɩkɛ bɔ’a la tɩ mam daan dɩkɛ m nu’usi paglɛ fʋ zuo tɩ Nawẽnnɛ bɔ fɔ la, malɩn tõm gãŋɛ bɛla. ⁷Se’ere n soe la, Nawẽnnɛ n bɔ tɔ a Sɩa la ka botɩ tɩ tara dabeem, a botɩ tɩ tara la pãŋa, la nõŋlʋm, la yõk-m-mẽŋa.

⁸Bɛla, da zoe yãnnɛ ka tɔgɛ tɩ Zuudãana Azezi yelle. La fʋ ken da zoe yãnnɛ mam n boe yʋ’a deem Azezi-krisi kõ-yẽlga ĩyã la, lagɩm na mam sakɛ nãmsgɔ kõ-yẽlga la ĩyã, tɩ Nawẽnnɛ wʋn bɔ fʋ pãŋa. ⁹Ẽŋa n fãagɛ tɔ, wi to tɩ tɩ dɛna a nẽrba, la dagɩ tɩn tõm tõon-sõma ĩyã, la de la a mẽŋa n boorɩ se’em, la a yel-sõnnɛ tɩ a ẽŋɛ bɔ tɔ Azezi-krisi ĩyã, halɩ lan dẽŋɛ dũnia pĩ’iluŋo. ¹⁰Yel-sõnnɛ ẽŋa yãŋa puke la Azezi-krisi wa’aŋɔ la ĩyã. Ẽŋa n fãagɛ tɔ, sã’am kũm pãŋa dee botɩ tɩ yẽ vɔm n ka ba’asrɩ a kõ-yẽlga la ĩyã.

¹¹Nawẽnnɛ n looge mam tɩ m dɛna Krisi Tõntõnna mõola a kõ-yẽlga, dee zãsna nẽrba. ¹²La de la kõ-yẽlga la ĩyã tɩ mam yẽta nãmsgɔ, la mam ka zotɩ yãnnɛ, se’ere n soe la, mam mi sɛka tɩ mam bɔ sɩra la mɛ, la mam mi m sũure pʋam tɩ a tarɩ pãŋa mɛ wʋn gu’ura sɛla tɩ a dɩkɛ ẽŋɛ mam nu’usum na sõŋa, halɩ ka paagɛ Nawẽnnɛ sarɩyadia daarɛ. ¹³Basɛ tɩ zãsŋɔ sɛka tɩ mam pa’alɛ fʋ la bɔna fʋ sũure pʋam tɩ fʋ bɩsra dɔla, ken bɔ Azezi-krisi sɩra tara nõŋlʋm a doosgo pʋam. ¹⁴Tara zãsŋɔ sõma sɛba tɩ Nawẽnnɛ dɩkɛ ẽŋɛ fʋ nu’usum na la Nawẽnnɛ Sɩa n boe la tɩ lɛ la pãŋa.

¹⁵Fõn põn mina tɩ Nawẽnnɛ nẽr-sɛba n boe Azi so’olʋm la wuu basɛ mam mɛ, Afizɛlɩ la Ahɛrmozɛnɩ boe la nẽr-bãma pʋam. ¹⁶Tɩ Zuudãana wʋn zoe A’onezifɔɔrɩ la a yir-dõma ninbãalga, se’ere n soe la, a ẽn bɔ’ɔra mam bʋraanɛ mɛ, dee ka zoe yãnnɛ la ban ba mam la bãnsɩ la. ¹⁷La ẽn wa’am Rom na, a mõ’ogɛ la nifo ɛ mam, halɩ wa yẽ mam. ¹⁸Sarɩyadia daarɛ, tɩ Zuudãana wʋn zoe a ninbãalga. La fõn ken mina sõŋa sõŋrɛ sɛka wuu tɩ a sõŋɛ mam Efɛɛzɩ.

Azezi-krisi tõntõn-sõŋɔ n ɩtɩ se’em

¹M bia, keŋe fʋ mẽŋa yel-sõnnɛ sɛka tɩ Azezi-krisi ẽŋɛ bɔ tɔ la pʋam. ²Mam n zãsʋm fʋ bõn-sɛba nẽrba zozo’e nẽŋam na, dɩkɛ ba zãsʋm nẽrba n de sɩra dõma n mẽ tã wʋn dɩkɛ ba zãsʋm nẽrba basɛba. ³Fõn de Azezi-krisi tõntõn-sõŋɔ la, fʋ mẽ sakɛ nãmsgɔ wʋ sʋda-sõŋɔ n sakrɩ nãmsgɔ se’em na. ⁴Sʋdaaga sãn bɔɔra tɩ a tõm tɩ a kɛ’ɛma sũure ẽŋɛ yẽlʋm, a ka kẽ’esrɩ a mẽŋa yel-sɛba n dagɩ sʋdaasɩ yɛla pʋam. ⁵La de’eŋo mẽ pʋam, nẽra ka tã wʋn zoe di to’oge bɔ’a tɩ a sãn ka doose zʋa la sɔa wuu. ⁶La de la kaara sɛka n tõm nãmsɛ n wʋn dẽŋɛ to’oge a bõnkɔɔla la yõorɔ. ⁷Wõm mam n yele se’em na võorɛ, tɩ Zuudãana wʋn basɛ tɩ fʋ bãŋɛ sɛla woo võorɛ.

⁸Tẽra Azezi-krisi n de naba Adavidi yɩɩŋa la yelle, a ki dee vo’oge, wʋ kõ-yẽlga la tɩ mam mõolɩ la n yetɩ se’em na. ⁹La de la kõ-yẽlga ẽŋa ĩyã tɩ mam nãmsra, halɩ tɩ ba ba mam na bãnsɩ, wʋ mam de la tõon-be’ero dãana la. La ba ka ba Nawẽnnɛ yetɔga la. ¹⁰Bɛla ĩyã tɩ mam mõrgɛ wĩbra sɛla woo pʋam Nawẽnnɛ nẽrba la tɩ a looge la ĩyã, tɩ ba mẽ yẽ fãarɛ Azezi-krisi ĩyã, dee po yẽ nã’asgɔ n ka ba’asrɩ. ¹¹Yetɔg-ẽna wã de la sɩra:

Tɩ sãn ki la ẽ,

tɩ wʋn lagɩm na ẽ vɔa.

¹²La tɩ sãn mõrgɛ ze’ele kãŋkãŋɛ,

tɩ wʋn lagɩm na ẽ di na’am.

Tɩ sãn zagsɛ yetɩ tõma ka mi ẽ,

a mẽ wʋn zagsɛ yetɩ ẽŋa ka mi to.

¹³Tɩ sãn ka bɔna tɩ sɩra pʋam,

ẽŋa ken dɛna la sɩra dãana,

se’ere n soe la, a ka malɩn viira a yetɔga.

Tõnna tɩ la paagɛ Nawẽnnɛ yɛm

¹⁴Tẽegɛ nẽrba la bõn-bãma, dee kã’an ba Nawẽnnɛ nẽŋam tɩ ba da wẽ’era nõkɛ’ɛma yetɔg-biɛ yɛla, tɩ ba ka tarɩ yõorɔ baa fẽfẽe, dee sã’ana sɛba n selsrɩ la. ¹⁵Nargɛ pãŋa dɛna nẽra n paagɛ Nawẽnnɛ yɛm, la fʋ dɛna tõntõnna n ka zotɩ yãnnɛ la a tõoma, dee mõola sɩra kõ-yẽlga la lan masɛ se’em. ¹⁶Zãagɛ fʋ mẽŋa la yetɔg-yooro n ka sõŋrɩ Nawẽnnɛ doosgo pʋam, nẽr-sɛba n tɔgrɩ yetɔg-bãma la zãarɩ mɛ la Nawẽnnɛ wɛ’ɛsa be’em pʋam. ¹⁷Ba yetɔga la ãn wʋ nõr-kɛka n diti ĩyã yãara se’em na. Ahimẽnɩ la Afilɛtɩ boe la nẽr-bãma pʋam. ¹⁸Bãma bʋrgɛ mɛ basɛ sɩra sore la, yetɩ kũm vo’ore la põn tole mɛ, ba ẽŋɛ bɛla basɛ tɩ nẽr-sɛba n bɔ sɩra la basɛba n lɛbra poorʋm. ¹⁹La baa bɛla, Nawẽnnɛ n looge sɛba la ken zɛ la kãŋkãŋɛ wʋ ẽbrɛ n tarɩ pãŋa la. Yetɔg-bãna n de dãalgɔ n pa’alɛ bɛla: «Zuudãana la mi sɛba n de a nẽrba mɛ», la «sɛba wuu n yetɩ bãma de la Nawẽnnɛ nẽrba la, dẽnɩ tɩ ba basɛ tõon-be’ero».

²⁰Yi-kãtɛ pʋam, dagɩ sãlma bɩɩ zũuro laasɩ mã’a n boe mĩ, dɔɔrɔ la yɔgrɔ laasɩ mẽ boe mĩ mɛ, tɩ ba dɩkɛ sãlma la zũuro laasɩ la tɩ ba dɛna tʋʋlʋm lɔgrɔ, dee dɩkɛ basɛba la tɩ ba dɛna daarɛ woo tõoma lɔgrɔ. ²¹Bɛla mẽ, nẽra sãn zãagɛ a mẽŋa la tõon-be’ero sɛba tɩ mam pa’alɛ wã, a wʋn ãna wʋ tʋʋlʋm lɔkɔ n welge to’ore tara yõorɔ bɔ Zuudãana, dee tãna wʋn tõm tõon-sõma buuri wuu.

²²Zãagɛ fʋ mẽŋa la yel-yooro sɛba tɩ kɔmbɩ’ɩsɩ boorɩ tɩ ba ɩta n de be’em na, dee ɛ sɛla n masɛ, ken bɔ Nawẽnnɛ sɩra, ɛ nõŋlʋm, la sũ-mã’asʋm, dee lagɩm na nẽr-sɛba n pʋ’ʋsrɩ tɩ Zuudãana la pʋpeelem na. ²³Zãagɛ fʋ mẽŋa la nõke’en-yaalsɩ n ka tarɩ võorɛ la. Fõn mi tɩ ba tarɩ la zɛbrɛ sẽnna. ²⁴La Zuudãana tõntõnna ka masɛ tɩ a zɛbra. La masɛ mɛ tɩ a dɛna nẽra n nõŋɛ nẽrba, tãna wʋn zãsʋm nẽrba la sũ-mã’asʋm. ²⁵La masɛ tɩ a pa’ala nẽr-sɛba n ka sakrɩ la, la sũ-bʋgsʋm, tɩ Nawẽnnɛ tã wʋn basɛ tɩ ba teege yɛm mɛ bãŋɛ sɩra, ²⁶le yẽ yɛm sõŋɔ yese Asũtãana bẽrgɔ la pʋam, tɩ a daan tarɩ ba tɩ ba ɩta ẽŋa n boorɩ se’em na.

Guuse fʋ mẽŋa la dũnia ba’asgɔ wakatɛ yɛla

¹Bãŋɛ tɩ dũnia ba’asgɔ wakatɛ, la wʋn dɛna la toogo. ²Nẽrba wʋn dɛna la nõŋ-m-mẽŋa dõma, la lig-nõŋrɩba, ba wʋn dɛna la nẽrba n wẽ’erɩ ba yõ’orɔ, la pa’al-m-mẽŋa dõma, la nẽrba n tɔgrɩ sɛla n ka ãn sõŋa, la nẽrba n ka sakrɩ ba sɔdõma la ba madõma nõorɛ, la nẽrba n ka mi yel-sõnnɛ tɩ ba ẽŋɛ ba, la nẽrba toogo n ka boe la bõn-sɛba n de Nawẽnnɛ bõnɔ, ³la nẽrba n ka nõŋɛ taaba, la nẽrba n ka tarɩ nẽra zĩile, la gõngõ’osrɩba, la nẽrba n ka tarɩ ba mẽŋa sõŋa, la nẽr-tɔɔsɩ, la nẽrba n sisri sɛla n ãn sõŋa, ⁴la zãm dõma, la nẽrba n ka yõkrɩ ba mẽŋa ɩta sɛla n ka masɛ tɔtɔ, la uk-m-mẽŋa dõma, la nẽrba n nõŋɛ sɛla n ɩtɩ bãma mẽŋa sũure yẽlʋm gãnna Nawẽnnɛ. ⁵Ba ɩtɩ tɩ la ãna wʋ ba sakrɩ la Nawẽnnɛ, la ba ka sakrɩ a pãŋa la. Zãagɛ fʋ mẽŋa la nẽr-bãma buuri.

⁶Ba nẽrba basɛba kẽ’erɩ la yiɛ pʋam pã’asra pɔg-sɛba yɛm n ka boe zẽ’a ayɩla la. Pɔg-bãma tõm na tõon-be’ero tɩ la dɛna zeero bɔ ba, ban boorɩ se’em na n tarɩ ba yɛ’ɛna, ⁷tɩ ba zãsna wakatɛ wuu dee ka tãna wʋn bãŋɛ sɛla n de sɩra la. ⁸Nẽr-bãma ka sakrɩ sɩra, wʋ Azanɛsɩ la Azãmbrɛsɩ n yʋʋn ka sakɛ bɔ Amoyisi se’em na. Ba de la nẽrba yɛm n bʋrʋm, tɩ ba Nawẽnnɛ doosgo la lebge zãŋa. ⁹La ba kãn sẽŋɛ nẽŋa, se’ere n soe la, nẽrba wuu wʋn yẽ ba yalnɛ na mɛ, wʋ ban yʋʋn yẽ Azanɛsɩ la Azãmbrɛsɩ yelle se’em na.

¹⁰La fõn mi bõn-sɛba tɩ mam zãsʋm nẽrba mɛ, fʋ mi mam yel-ɩrɛ, la mam yɛm loore n ãn se’em mɛ, la fʋ mi mam n bɔ Nawẽnnɛ sɩra se’em, la mam sũ-mã’arɛ, la mam nõŋlʋm, la mam n ze’ele kãŋkãŋɛ se’em, ¹¹fʋ mi nẽrba n nãmsɛ mam se’em, la toog-sɛba wuu n paagɛ mam Antɩyɔsɩ, la Ikonim, la Listri tẽnsɩ pʋam Azezi ĩyã. Bẽm nãmsgɔ tɩ mam ka yẽ? La Zuudãana la fãagɛ mam bɛla wuu pʋam mɛ. ¹²La de la bɛla, nẽr-sɛba wuu n boorɩ tɩ ba vɔa wʋ Nawẽnnɛ n boorɩ se’em Azezi-krisi doosgo pʋam, ba wʋn nãmsɛ ba mɛ. ¹³La tõon-be’ero dõma, la sɛba n pã’asrɩ nẽrba wʋn ken kẽ’era la tõon-be’ero pʋam pa’asra wɛ’ɛsa, ba pã’asrɩ la nẽrba, dee pã’asra ba mẽŋa.

¹⁴La sãn dɛna fõn, tara bõn-sɛba tɩ fʋ zãsʋm dee sakɛ tɩ la de la sɩra la kãŋkãŋɛ, fʋ mi nẽr-sɛba zẽ’am tɩ fõn zãsʋm bõn-bãma. ¹⁵Fõn põn mina Nawẽnnɛ gõŋɔ la mɛ halɩ fʋ bõnbɩ’ɩlʋm, ẽŋa n tã wʋn bɔ fɔ yɛm, tɩ fʋ yẽ fãarɛ fõn bɔ Azezi-krisi sɩra la ĩyã. ¹⁶Nawẽnnɛ gõŋɔ la wuu de la Nawẽnnɛ n botɩ ba gʋlsɛ, a yõorɔ de la a zãsʋm nẽrba sɩra, la a botɩ nẽrba bãŋɛ ba koŋre, la a kã’an nẽrba, la a pa’alɛ nẽrba tɩ ba ɩta sɛla n masɛ ãna sõŋa, ¹⁷bɛla tɩ Nawẽnnɛ nẽra wʋn masɛ, mãasʋm tã’agɛ tõm tõon-sõma buuri wuu.

Apolɩ tɔgɛ a ba’asgɔ yetɔga bɔ Atimõtɩ

¹Mam bɔ’ɔrɩ fʋ nõorɛ Nawẽnnɛ, la Azezi-krisi n wʋn wa’am wa di nẽr-vɔɔsɩ, la nẽr-sɛba n ki sarɩya la nẽŋam, la ẽn wʋn wa di a na’am na ĩyã, ²tɩ fʋ mõolɛ Nawẽnnɛ yetɔga la. Nẽrba sãn sɛlsra, bɩɩ ba sãn ka sɛlsra, mõolɛ le malɩn mõolɛ wakatɛ wuu. Tɔgɛ pa’alɛ ba tɩ ba bãŋɛ ba koŋre, gi ba, dee bɔ ba bʋraanɛ tɩ ba ɩta sõŋa, ɩta bɛla wuu la sũ-mã’asʋm dee tara zãsŋɔ pʋtẽ’erɛ. ³Se’ere n soe la, wakatɛ n sẽm tɩ nẽrba kãn le bɔɔra tɩ ba selse sɩra zãsŋɔ la, ba wʋn dɔla la ba mẽŋa yɛm n boorɩ se’em, bɛla ba wʋn ɛɛra la karẽnsãandõma zozo’e n wʋn zãsʋm ba sɛla tɩ ba nõŋɛ tɩ ba selse mã’a. ⁴Ba wʋn lɩ ba tʋba mɛ kãn sɛlsra sɩra la, dee wẽrgɛ sɛlsra sɛla n de sɔlma. ⁵La fõn, tara fʋ mẽŋa sõŋa sɛla woo pʋam, sakɛ nãmsgɔ, mõolɛ Nawẽnnɛ kõ-yẽlga la, la fʋ tõm tõonɛ na tɩ Nawẽnnɛ dɩkɛ ẽŋɛ fʋ nu’usum na sõŋa.

⁶La sãn dɛna mam, mam vɔm ãn wʋ ko’om tɩ ba ka’agɛ bɔ Nawẽnnɛ, mam daarɛ paagɛ mɛ, tɩ mam wʋn fõrgɛ. ⁷Mam mẽ mẽerɛ sõŋa mɛ yãŋɛ, mam zoe paagɛ zʋa la tɛka mɛ, la mam bɔ Nawẽnnɛ sɩra mɛ ka basɛ. ⁸Lɛɛlɛ wã, tã’arɛ yɔɔrɔ gã mɛ gu’ura mam, tɩ Zuudãana n diti sarɩya wʋ lan masɛ la, wʋn dɩkɛ bɔ mam daarɛ ẽŋa daarɛ. La, la dagɩ mam mã’a, la de la nẽr-sɛba wuu n nõŋɛ ẽ bɔɔra tɩ a leme wa’am na.

Apolɩ soolʋm Atimõtɩ tɩ a wa’am

⁹Mõrgɛ wa’am mam zẽ’am tɔtɔ. ¹⁰Se’ere n soe la, Ademasɩ basɛ mam mɛ dee sẽŋɛ Tesaloniki, ẽn nõŋɛ dũnia wã bõn-yooro la ĩyã. La Akresãnsɩ sẽŋɛ la Galatɩ, tɩ Atiti mẽ sẽŋɛ Dalmatɩ, ¹¹Aluki mã’a n weege mam zẽ’am. Fʋ sãn sẽna, fʋ tarɩ Amarkɩ wa’am, tɩ a tarɩ sõŋrɛ mɛ bɔ mam tõonɛ na ĩyã. ¹²Mam tõm Atisiki la Efɛɛzɩ. ¹³Fʋ sãn sẽna, fʋ dɩkɛ m ɔɔrɔ fuugo la tɩ mam daan basɛ Trʋasɩ Akarpusi zẽ’am na tarɩ wa’am, la fʋ dɩkɛ gõnnɔ na pa’asɛ, lan gãnnɩ wuu gõn-sɛba tɩ ba gʋlsɛ la dũnsi gãna kilim na.

¹⁴Alɛgsãndrɩ n de kuta la ẽŋɛ mam na be’em halɩ zozo’e, Nawẽnnɛ wʋn yɔ ẽ ẽn ẽŋɛ se’em na. ¹⁵Fʋ mẽ guuse fʋ mẽŋa la ẽ, tɩ a sɩ’ɩsɛ tõma yetɔga la mɛ zozo’e.

¹⁶Mam n daan ze’ele sarɩyadia zẽ’am pɔspɔsɩ la, nẽra nẽra ka ze’ele mam poorʋm sõŋɛ mam, ba wuu basɛ mam mɛ. Nawẽnnɛ da geele ban ẽŋɛ se’em na. ¹⁷La Zuudãana la daan ze’ele mam poorʋm mɛ sõŋɛ mam, bɔ mam pãŋa halɩ tɩ mam mõolɛ kõ-yẽlga la sõŋa sõŋa, tɩ bu-zãŋsɩ zozo’e wõm. La mam daan yẽ fãarɛ mɛ gɩgnɛ nõorʋm. ¹⁸Zuudãana la n wʋn ken fãagɛ mam yese mam be’em wuu pʋam, kẽ’esɛ mam a so’olʋm na pʋam. Ẽŋa n soe nã’asgɔ wakatɛ n ka ba’asrɩ. Amina.

Pʋ’ʋsgɔ

¹⁹Pʋ’ʋsɛ Aprisili, la Akila, la A’onezifɔɔrɩ yir-dõma. ²⁰A’erastɩ weege la Korẽntɩ. La Atrofim bẽ’erɩ mɛ, tɩ mam basɛ ẽ Milɛtɩ. ²¹Mõrgɛ wa’am dee tɩ ɔɔrɔ wakatɛ paagɛ. A’ebulusi la Apudẽnsɩ, la Alinusi, la Aklodia, la tɩ sɔbiisi la wuu pʋ’ʋsrɩ fɔ.

²²Tɩ Zuudãana wʋn bɔna la fɔ. Nawẽnnɛ wʋn ẽŋɛ ya a yel-sõnnɛ.