2 Tesaloniki

Gõŋɔ bʋyi dãana tɩ Apolɩ gʋlsɛ bɔ

Tesaloniki dõma

Bilgre

Gõn-ẽna wã pʋam Apolɩ ken tɔgra la Azezi lemŋo yelle. Se’ere n soe la, Azezi lemŋo la yelle, Tesaloniki dõma ken ka mina bãma n wʋn ẽŋɛ se’em tɩ la doose sore. Nẽrba basɛba daan tẽ’esɛ tɩ Azezi põn leme mɛ (2 Tesaloniki 2:2). Tɩ basɛba mẽ daan zagsɛ tɩ bãma kãn le tõm, tɩ Azezi lemŋo paagɛ ba’asɛ mɛ, dee zɛ gu’ura tɩ nẽrba basɛba bɔ ba sɛla. Bɛla n soe tɩ Apolɩ gʋlsɛ kã’an ba.

A dẽŋɛ yetɩ ẽŋa pʋ’ʋsrɩ la Nawẽnnɛ a yel-sõnnɛ ban bɔ Nawẽnnɛ sɩra, la ban nõŋɛ taaba la ĩyã. Dee yetɩ ẽŋa sosrɩ Nawẽnnɛ mɛ ba ĩyã tɩ a botɩ ba ze’ele kãŋkãŋɛ a tõoma la pʋam (sapɩtrɩ 1).

Bɛla poorʋm, a tɔgɛ ba la Azezi-krisi lemŋo la yelle, pa’alɛ ba yetɩ dẽnɩ tɩ sɛka n de tõon-be’ero dãana n wʋn sã’am na wa’am, dee tɩ Krisi yãŋa leme wa’am (2:1-12).

A ken kã’an Nawẽnnɛ nẽrba la yetɩ, baa tõon-be’ero sãn põn pa’asra zɔ’ɔra, ba mõrgɛ ze’ele kãŋkãŋɛ Nawẽnnɛ sore doosgo la pʋam, la ba da basɛ Nawẽnnɛ pʋ’ʋsgɔ (2:13—3:5).

Dee kã’an zẽyãgsɩ yetɩ ba tõnna bɩsra ba mẽŋa yelle, wʋ ẽŋa la nẽr-sɛba n doose taaba tõm Nawẽnnɛ tõoma la n ẽŋɛ se’em na (3:6-15).

Gõŋɔ la ba’asgɔ, a kã mɛ bɔ ba, dee pʋ’ʋsɛ ba (3:16-18).

¹Mam Apolɩ, la Asilvẽ, la Atimõtɩ n gʋlsɛ gõŋɔ wã bɔ’ɔra yãma sɛba n de tɩ Sɔ Nawẽnnɛ, la Zuudãana Azezi-krisi nẽrba n boe Tesaloniki. ²Tɩ Sɔ Nawẽnnɛ, la tɩ Zuudãana Azezi-krisi wʋn ẽŋɛ ya yel-sõnnɛ, dee bɔ ya sũ-mã’asʋm.

Tesaloniki dõma ze la kãŋkãŋɛ nãmsgɔ pʋam

³M sɔbiisi, tõma masɛ mɛ tɩ tɩ pʋ’ʋsra Nawẽnnɛ daarɛ woo a yel-sõnnɛ yãma ĩyã. La ãn sõŋa mɛ tɩ tõma ɩta bɛla, se’ere n soe la, yãma n bɔ Azezi sɩra la sẽnnɩ nẽŋa mɛ zozo’e, tɩ yãma nẽra woo nõŋlʋm taaba ĩyã pa’asra. ⁴Bɛla tɩ tõma tɔgra yãma yelle Nawẽnnɛ nẽrba lagsgɔ zẽ’a woo la sũ-yẽlga. Se’ere n soe la, yãma mõrgɛ mɛ zɛ kãŋkãŋɛ Azezi doosgo la pʋam ka basra, baa nẽrba n nãmsrɩ ya, la toogo n paarɩ ya la.

⁵Bɛla pa’alɛ tɩ Nawẽnnɛ diti sarɩya la sɩra. Se’ere n soe la, yãma n nãmsrɩ Nawẽnnɛ so’olʋm yelle se’em wã, Nawẽnnɛ wʋn yetɩ ya masɛ tɩ ya kẽ a so’olʋm na pʋam. ⁶Nawẽnnɛ wʋn ẽŋɛ sɛla n masɛ, a wʋn botɩ sɛba n nãmsrɩ yãma la yẽ nãmsgɔ, ⁷dee basɛ tɩ yãma sɛba n nãmsrɩ la, lagɩm na tõma vo’ose wakat-sɛka tɩ Zuudãana Azezi wʋn ze’ele Nawẽnnɛ yire wa’am, la a malɛkadõma n tarɩ pãn-kãtɛ, ⁸la bug-zɩlɩsɩ wa sɩbgɛ sɛba n zagsɛ Nawẽnnɛ dee ka sakɛ tɩ Zuudãana Azezi kõ-yẽlga la. ⁹Ba wʋn yẽ la sɩbgrɛ n de sã’aŋɔ n ka ba’asrɩ. La ba wʋn zãagɛ mɛ la Zuudãana kãn yẽ a na’am pãn-kãtɛ la, ¹⁰wakat-sɛka tɩ a wʋn wa’am na. Daar-ẽŋa, a wʋn wa’am mɛ wa to’oge pẽka la nã’asgɔ a mẽŋa nẽrba n bɔ ẽ sɩra la zẽ’am, la yãma po bɔna ba pʋam mɛ, yãma n sakɛ a kõ-yẽlga la tɩ tõma tɔgɛ bɔ ya la ĩyã.

¹¹Bɛla ĩyã tɩ tõma pʋ’ʋsra Nawẽnnɛ wakatɛ wuu ya ĩyã, tɩ a basɛ tɩ ya ãna sõŋa masɛ wʋ ẽŋa n wi ya tɩ ya ãna se’em na. La a wʋn bɔ ya pãŋa tɩ ya ɩta bõn-sõma sɛba wuu tɩ ya boorɩ tɩ ya ẽŋɛ, dee basɛ tɩ yãma n bɔ sɩra tõnna tõon-sɛba la tõm ba’asɛ. ¹²Bɛla tɩ tɩ Zuudãana Azezi yʋ’ʋrɛ wʋn yẽ nã’asgɔ ya zẽ’am, tɩ yãma mẽ yẽ nã’asgɔ a zẽ’am. Bɛla wuu de la Nawẽnnɛ, la tɩ Zuudãana Azezi-krisi yel-sõnnɛ.

Sɛla n wʋn ẽŋɛ dee tɩ Azezi wa’am

¹La sãn dɛna tɩ Zuudãana Azezi-krisi lemŋo, la tõma n wʋn wa lagsɛ taaba a zẽ’am na yelle, m sɔbiisi, tõma sosrɩ ya mɛ ²tɩ ya da basɛ tɩ ya yɛm yɔɔra tɩ dabeem tara ya, ya sãn wõm tɩ nẽrba yetɩ Zuudãana la lemŋo daarɛ paagɛ mɛ. Baa nẽra sãn yele ya yetɩ la de la Nawẽnnɛ Sɩa n pa’alɛ ẽŋa, bɩɩ a sãn yetɩ tõma n tɔgɛ, bɩɩ a sãn yetɩ tõma n gʋlsɛ gõŋɔ, da kãn sakɛ-ya. ³Da basɛ-ya tɩ nẽra pã’asɛ ya, baa lan de se’em wuu. Lan dẽŋɛ daar-ẽŋa n wʋn wa’am, dẽnɩ tɩ nẽrba zozo’e isge tulge zɛbra la Nawẽnnɛ, tɩ nẽr-sɛka n de tõon-be’ero dãana la wʋn wa’am wa puke a mẽŋa, ẽŋa n de nẽr-sɛka n wʋn sã’am. ⁴A wʋn sise bõn-sɛba wuu tɩ nẽrba nã’asrɩ, dee yetɩ ba de la wẽnnɛ, a wʋn zẽkɛ a mẽŋa mɛ gãnna bõn-bãma wuu. Halɩ, a wʋn põn sẽŋɛ ka kẽ la Nawẽnnɛ deego la pʋam zĩ’ire yetɩ ẽŋa de la Nawẽnnɛ.

⁵Mam n daan ken bɔna yãma zẽ’am na, mam daan yele ya bɛla wuu mɛ. Yãma ka tẽrɩ? ⁶La yãma mi tɩ sɛla n boe gu’ura tɩ tõon-be’ero dãana la nãn ka puke, halɩ tɩ wakatɛ la wʋn wa paagɛ. ⁷Tõon-be’ero pãŋa n sʋgɛ põn tõnna mɛ. La sɛka n nãn gu’uri ẽ na, wʋn wa fõrgɛ mɛ dee basɛ folle. ⁸Bɛla tɩ tõon-be’ero dãana la yãŋa wʋn puke. La tõma Zuudãana Azezi n wʋn leme wa’am tɩ a nõorɛ sapebsʋm kʋ ẽ. La a lemŋo la na’am pãŋa wʋn sã’am a pãŋa fasɩ. ⁹La sãn dɛna tõon-be’ero dãana la n wʋn wa’am na, a wʋn tara la Asũtãana pãŋa ɩta bõn-yãlma la yel-kɩrsɩ, la yɛla buuri zozo’e n de pã’asgɔ. ¹⁰A wʋn tõm na be’em buuri to’oto’ore pã’asɛ nẽr-sɛba n wʋn yẽ sã’aŋɔ la, ban zagsɛ ka nõŋɛ sɩra to’oge ẽ wʋn yẽ fãarɛ la ĩyã. ¹¹Ban ka sakɛ sɩra la, tɩ Nawẽnnɛ basɛ tɩ ba pʋtẽ’era botɩ ba tuuge sakɛ põmpɔrŋɔ. ¹²Bɛla tɩ nẽr-sɛba wuu n ka sakɛ sɩra, dee bɔɔra tõon-be’ero la wʋn yẽ sarɩyadia n de sã’aŋɔ.

Nawẽnnɛ looge ya tɩ ya yẽ la fãarɛ

¹³La ãn sõŋa tɩ tõma pʋ’ʋsra Nawẽnnɛ a yel-sõnnɛ wakatɛ wuu yãma n de tɩ sɔbiisi tɩ tɩ Zuudãana nõŋɛ la ĩyã. Se’ere n soe la, Nawẽnnɛ looge ya la halɩ pɔspɔsɩ, tɩ a Sɩa botɩ ya dɛna a nẽrba tara pʋpeelem, dee sakɛ sɩra yẽ fãarɛ. ¹⁴La de la bɛla ĩyã tɩ Nawẽnnɛ doose la tõma kõ-yẽlga la wi ya tɩ ya po yẽ tɩ Zuudãana Azezi-krisi na’am pãŋa la. ¹⁵Bɛla, m sɔbiisi, mõrgɛ-ya zɛ kãŋkãŋɛ, tara yel-sɛba tɩ tõma zãsʋm ya, bɩɩ gʋlsɛ gõŋɔ bɔ ya la. ¹⁶Tõma pʋ’ʋsrɩ tɩ Zuudãana Azezi-krisi, la tɩ Sɔ Nawẽnnɛ n nõŋɛ tɔ dee ẽŋɛ tɩ yel-sõnnɛ bɔ tɔ bʋraanɛ n ka ba’asrɩ, dee botɩ tɩ tara pʋtẽ’erɛ gu’ura bõn-sõma sɛba tɩ tɩ sakɛ la. ¹⁷A wʋn keŋe ya sũure, dee bɔ ya pãŋa tɩ ya ẽŋɛ sɛla wuu n ãn sõŋa, la ya tɔgɛ sɛla n ãn sõŋa.

Pʋ’ʋsɛ-ya Nawẽnnɛ bɔ tɔ

¹Sɛla n deege, m sɔbiisi, sose-ya Nawẽnnɛ bɔ tɔ, tɩ tɩ Zuudãana kõ-yẽlga la ken saagɛ pa’asɛ dee tɩ nẽrba pẽgra ẽ, wʋ la ãn se’em yãma zẽ’am na. ²Ken sose-ya ẽ tɩ a fãagɛ tɔ la nẽr-wẽensɩ, la nẽr-bɛ’ɛsɩ, se’ere n soe la, la dagɩ nẽrba wuu n sakɛ Nawẽnnɛ kõ-yẽlga la.

³La Zuudãana la de la sɩra dãana, a wʋn botɩ ya ze’ele kãŋkãŋɛ, dee gu’ura ya tɩ be’em dãana la da yãŋɛ ya. ⁴Zuudãana la ĩyã tõma bɔ yãma sɩra mɛ, tõma mi tɩ ya ɩtɩ la tõma n yele ya se’em na, la ya wʋn ken ɩta la bɛla.

⁵Zuudãana la wʋn basɛ tɩ ya tara Nawẽnnɛ nõŋlʋm, dee mõrgɛ zɛ kãŋkãŋɛ wʋ Krisi la.

Kã’aŋɔ zẽyãgsɩ ĩyã

⁶M sɔbiisi, tõma yetɩ ya la Zuudãana Azezi-krisi yʋ’ʋrɛ tɩ ya zãagɛ ya mẽŋa la sɔbiisi sɛba wuu n de zẽyãgsɩ vɔa yooryooro ka dɔla pa’algɔ sɛba tɩ tõma pa’alɛ ya la. ⁷Yãma mẽŋa mi sõŋa tɩ la masɛ mɛ tɩ ya ɩta tõma n daan ɩtɩ se’em na. Tõma n daan boe ya zẽ’am na, tõma daan ka tarɩ zẽyãgrɛ, ⁸la tõma ka diti nẽra dia zãŋa, tõma daan tõnnɩ na wʋntɛɛŋa la yʋ’ʋŋɔ nãmsra zozo’e ka bɔɔra tɩ tõma dia yelle dɛna nãmsgɔ bɔ ya nẽra baa ayɩla. ⁹Tõma n daan ɩtɩ bɛla la, la dagɩ tɩ tõma ka tarɩ la sore tɩ tɩ sose sõŋrɛ ya zẽ’am, tõma daan tõnnɩ tɩ pa’alɛ ya, tɩ ya mẽ ɩta la bɛla. ¹⁰Tõma n daan boe ya zẽ’am na, tõma daan yele ya yetɩ: «Sɛka n ka boorɩ tɩ a tõm, a da di.» ¹¹La tõma wõm tɩ nẽrba basɛba n boe ya zẽ’am dɛna zẽyãgsɩ vɔa yooryooro, dee kẽ’era nẽrba yɛla pʋam. ¹²Tõma yetɩ nẽr-bãma mɛ, dee kã’ana ba la Zuudãana Azezi-krisi yʋ’ʋrɛ tɩ ba yõkɛ ba mẽŋa mõrgɛ tõm bɩsɛ ba mẽŋa yelle.

¹³La sãn dɛna yãma, m sɔbiisi, da kãn targɛ-ya la tõon-sõma ɩrgɔ.

¹⁴Nẽra sãn ka sakɛ bõn-sɛba tɩ tõma yele ya gõŋɔ wã pʋam na, ya bãŋɛ a dãana lɔkra ẽ, tɩ yãnnɛ yõkɛ ẽ. ¹⁵La ya da dɩkɛ ẽ tɩ a lebge ya bɛ, kã’an ya ẽ wʋ ya sɔbia.

Ba’asgɔ yetɔga

¹⁶Zuudãana mẽŋa n de sũ-mã’asʋm dãana la wʋn bɔ ya sũ-mã’asʋm wakatɛ woo la sɛla woo pʋam. Zuudãana wʋn bɔna la ya wuu.

¹⁷Mam Apolɩ n gʋlsɛ pʋ’ʋsgɔ wã la m mẽŋa nu’ugo, mam pʋ’ʋsrɩ ya. Mam gʋlsrɩ la wãna m gõnnɔ wuu pʋam, pa’ala tɩ la de la mam n gʋlsɛ.

¹⁸Tɩ Zuudãana Azezi-krisi yel-sõnnɛ wʋn bɔna la ya wuu.