2 Zã

Gõŋɔ bʋyi dãana tɩ

Azã

gʋlsɛ

Bilgre

Gõn-ẽna pʋam Azã wi’iri a mẽŋa tɩ kẽema, ẽŋa n gʋlsɛ gõŋɔ wã bɔ Azezi nẽrba n boe zẽ’a ayɩla, tɩ a wi’ira ba tɩ zuudãan-pɔka la a kɔma.

A gʋlsɛ kã’an ba mɛ yetɩ ba ken vɔa sɩra pʋam, dee nõŋɛ taaba. Dee yele ba tɩ ba guuse ba mẽŋa la põmpɔrŋɔ karẽnsãandõma.

¹Mam n de kẽema la n gʋlsɛ bɔ’ɔra zuudãan-pɔka tɩ Nawẽnnɛ looge la, la a kɔma tɩ mam nõŋɛ sɩra sɩra la. La, la dagɩ mam mã’a, nẽr-sɛba wuu n bãŋɛ sɩra la nõŋɛ ba mɛ. ²Se’ere n soe la, sɩra la n boe la tɩ lɛ, dee wʋn ken bɔna la tɩ lɛ wakatɛ wuu.

³Tɩ Sɔ Nawẽnnɛ, la a Dayʋa Azezi-krisi wʋn ẽŋɛ tɩ yel-sõnnɛ, zoe tɩ ninbãalga, dee bɔ tɩ sũ-mã’asʋm, tɩ tɩ wʋn vɔa la sɩra, dee tara nõŋlʋm.

Sɩra, la nõŋlʋm

⁴Mam ɩtɩ sũ-yẽlga mɛ halɩ zozo’e, mam n yẽ tɩ fʋ kɔma la basɛba dolɩ la sɩra sore wʋ tɩ Sɔ Nawẽnnɛ n yele tɩ se’em na. ⁵Lɛɛlɛ wã, zuudãan-pɔka, mam n gʋlsɛ fʋ wã dagɩ nõor-paalga, la de la nõor-sɛka tɩ tɩ wõm halɩ pɔspɔsɩ la, mam sosrɩ fʋ mɛ tɩ tɩ nõŋɛ taaba. ⁶Nõŋlʋm n de sɛla n wãna: La de la tɩ ɩta wʋ Nawẽnnɛ nõorɛ n yele se’em na. Nõor-sɛka tɩ ya wõm halɩ pɔspɔsɩ la de la bɛla, la de la ya nõŋɛ taaba.

⁷Nẽrba zozo’e n saagɛ dũnia pã’asrɩ nẽrba tɩ ba tuura. Nẽr-bãma ka sakɛ tɩ Azezi lebge la nẽrsaala wa’am dũnia zuo. Nẽr-ẽŋa dãana n de põmpã’asʋm dãana, la Krisi sɩ’ɩsra. ⁸Guuse-ya ya mẽŋa, da kãn basɛ-ya tɩ tõma n tõm sɛla bɔ ya la bɔɩ, tɩ ya wʋn to’oge yɔɔrɔ wuu.

⁹Nẽr-sɛka n yõsgɛ tole nẽŋa ka bɔna Krisi zãsŋɔ la pʋam, Nawẽnnɛ ka boe la ẽ. La sɛka woo n boe a zãsŋɔ la pʋam, Sɔ Nawẽnnɛ, la a Dayʋa boe la ẽ mɛ. ¹⁰Nẽra sãn tarɩ zãsŋɔ ayẽma wa’am ya zẽ’am, ya da to’oge ẽ ya yire, la ya da pʋ’ʋsɛ ẽ. ¹¹Nẽr-sɛka n pʋ’ʋsɛ ẽ, lagɩm na ẽ mɛ a tõon-be’ero pʋam.

Ba’asgɔ yetɔga

¹²Mam tarɩ yɛla zozo’e mɛ tɩ m tɔgɛ bɔ ya, la mam ka boorɩ tɩ m gʋlsɛ ba gõŋɔ pʋam bɔ ya. La mam tarɩ pʋtẽ’erɛ mɛ tɩ mam wʋn wa’am ya zẽ’am, dee tɔgɛ m mẽŋa bɔ ya, tɩ tɩ sũ-yẽlga wʋn dɛna sũ-yẽlga zõnzõnnɔ. ¹³Fʋ sɔbi-pɔka tɩ Nawẽnnɛ looge la kɔma pʋ’ʋsrɩ fɔ.