Pɔspɔsɩ gõŋɔ tɩ Apolɩ gʋlsɛ bɔ
Atimõtɩ
Bilgre
Atimõtɩ ma de la Zifu n bɔ Azezi sɩra, dee tɩ a sɔ dɛna Grɛkɩ. La de la Apolɩ sore sẽnnɛ bʋyi dãana tɩ a tʋ’ʋsɛ Atimõtɩ Listri (Tõoma gõŋɔ 16:1-3). La daan pɔsɛ la bilam tɩ Atimõtɩ dɔla Apolɩ tõnna Nawẽnnɛ tõoma (Tõoma gõŋɔ 17:14, 18:5, 19:22).
Apolɩ gʋlsɛ la gõnnɔ bayi bɔ Atimõtɩ. Gõn-bãma bayi, la Atiti gõŋɔ pʋam, a kã’anɩ la Azezi nẽrba nẽŋadõma.
Pɔspɔsɩ gõŋɔ tɩ a gʋlsɛ bɔ Atimõtɩ wã pʋam, a tɔgɛ la bõna batã yelle:
A kã’an na Azezi nẽrba yetɩ ba guuse ba mẽŋa la põmpɔrŋɔ zãsŋɔ. Põmpɔrŋɔ zãsŋɔ la pa’alɛ tɩ dũnia zuo bõna de la bõn-be’ero, nẽra ka tã wʋn yẽ fãarɛ tɩ la sãn dagna tɩ a dãana tarɩ la yɛla n sʋgɛ bãŋrɛ tɩ nẽrba basɛba ka mi. Ba ken yɛta nẽrba tɩ ba guuse ba mẽŋa da dita dia basɛba, la ba da dita pɔgsɩ. Bɛla de la põmpɔrŋɔ.
Bʋyi, a pa’alɛ la Azezi nẽrba la pʋ’ʋsgɔ sɔa n wʋn dɔla se’em, la Azezi nẽrba, la ba nẽŋadõma, la ba yel-bɩsrɩba n masɛ tɩ ba ãna se’em.
Bʋtã, a pa’alɛ la Atimõtɩ mẽŋa, ẽŋa n wʋn ẽŋɛ se’em tara nẽrba buuri to’oto’ore n boe Wẽndeego la pʋam, tɩ a wʋn tãna tõnna Nawẽnnɛ tõoma sõŋa.
11Mam Apolɩ n de Azezi-krisi Tõntõnna n gʋlsɛ gõŋɔ wã. La de la Nawẽnnɛ n de tɩ Fãagra, la Azezi-krisi tɩ tɩ tarɩ pʋtẽ’erɛ gu’ura la, n bɔ mam nõorɛ tɩ mam dɛna a Tõntõnna. 2Mam gʋlsɛ gõŋɔ wã bɔ’ɔra la Atimõtɩ n lebge mam mẽŋa bia Azezi-krisi doosgo la pʋam. Tɩ Sɔ Nawẽnnɛ, la tɩ Zuudãana Azezi-krisi wʋn ẽŋɛ fʋ yel-sõnnɛ, dee zoe fʋ ninbãalga, dee bɔ fɔ sũ-mã’asʋm.
Sɛba n zãsnɩ põmpɔrŋɔ zãsŋɔ
3Mam n daan we’esɩ Masedʋanɩ dee yele fʋ se’em na, ken weege Efɛɛzɩ tẽŋa yele nẽr-sɛba n zãsnɩ põmpɔrŋɔ zãsŋɔ la tɩ ba da zãsʋm. 4Yele ba tɩ ba basɛ kʋrʋm kʋrʋm dõma sɔlma, la yaabdõma deto kãalgɔ n ka tarɩ ba’asgɔ. Bõn-bãma tarɩ la nõke’ene sẽna, dee ka sõŋra tɩ Nawẽnnɛ tõoma sẽnna nẽŋa. Nẽrba n bɔ Nawẽnnɛ sɩra n botɩ a tõoma la sẽnna nẽŋa. 5Mam yetɩ fʋ yele ba bɛla, tɩ ba tara la pʋtẽ’erɛ n ãn sõŋa, dee bãŋɛ ba sũure pʋam tɩ ba ka tarɩ dõrga, dee bɔ Nawẽnnɛ sɩra la ba sũure wuu tɩ ba nõŋlʋm zo’oge. 6La nẽrba basɛba basɛ bõn-bãma mɛ, dee tɔgra yetɔg-yaalsɩ, 7bɔɔra tɩ ba dɛna Nawẽnnɛ lɔɔ karẽnsãandõma, dee ka wõnna ba mẽŋa n yetɩ se’em, bɩɩ yel-sɛba tɩ ba zãsnɩ na võorɛ.
8Tɩ mi tɩ Amoyisi lɔɔ ãn sõŋa, ba sãn dɩkɛ ẽ tõm wʋ lan masɛ se’em. 9Tõma mi tɩ lɔɔ la ka ẽŋɛ sɛba n masɛ la ĩyã, a ẽŋɛ la nẽr-sɛba n ka sakrɩ lɔɔ, la sɛba n ka sakrɩ nõorɛ la ĩyã, la sɛba toogo n ka boe la Nawẽnnɛ, la tõon-be’ero dõma, la nẽr-sɛba n pɔ’ɔrɩ Nawẽnnɛ dee ka nanna bõn-sɛba wuu n de Nawẽnnɛ bõnɔ, la sɛba n kʋʋrɩ ba sɔdõma, la ba madõma, la sɛba n de nẽr-kʋʋrba ĩyã, 10la sɛba n ɩtɩ yalsɩ, la bʋra-sɛba n gã la taaba, la pɔg-sɛba n gã la taaba, la sɛba n yõgrɩ nẽrba kɔɔsra, la põmpɔrndõma, la sɛba n pɔtɩ dee ka ɩta ban yele se’em na, la nẽr-sɛba n ɩtɩ sɛla woo n sɩ’ɩsrɩ sɩra kõ-yẽlga la ĩyã. 11Kõ-yẽlga ẽŋa ze’ele la sũ-yẽlga dãana Nawẽnnɛ n tarɩ na’am pãŋa la zẽ’am, ẽŋa n dɩkɛ ẽ ẽŋɛ mam nu’usum tɩ m mõolɛ.
Apolɩ pʋ’ʋsrɩ Nawẽnnɛ a yel-sõnnɛ
12Mam pʋ’ʋsrɩ tɩ Zuudãana Azezi-krisi n bɔ mam pãŋa, la ẽn bãŋɛ tɩ mam de sɩra dãana looge mam tɩ m tõm a tõonɛ wã. 13Baa mam n daan pɔ’ɔrɩ a yʋ’ʋrɛ, nãmsra a nẽrba, dee tʋʋra ẽ na, a zoe mam ninbãalga mɛ. Se’ere n soe la, mam daan ka bãŋɛ mam ɩtɩ sɛla, mam n daan ka bɔ Azezi sɩra la ĩyã tɩ mam ɩta bɛla. 14Tɩ Zuudãana Azezi-krisi la ẽŋɛ mam a yel-sõnnɛ mɛ zozo’e, botɩ mam bɔ ẽ sɩra, dee tara a nõŋlʋm. 15Yetɔg-sɛka tɩ mam yetɩ m tɔgɛ wã de la sɩra, la a masɛ mɛ tɩ nẽra woo to’oge ẽ sõŋa:
«Azezi-krisi wa’am dũnia zuo
wa fãagɛ la tõon-be’ero dõma.»
La mam n de tõon-be’ero dãana gãnna ba wuu. 16La ẽn zoe mam ninbãalga la, la de la Azezi-krisi n pa’alɛ a sũ-mã’arɛ zozo’e la mam n de tõon-be’ero dãana gãnna la, tɩ la wʋn dɛna makrɛ pa’alɛ nẽr-sɛba n wʋn wa bɔ ẽ sɩra la, tɩ a wʋn ẽŋɛ a sũ-mã’asʋm la ba, dee bɔ ba vɔm n ka ba’asrɩ.
17Nawẽnnɛ n de naba wakatɛ wuu, n ka kiiri, tɩ nini ka yẽta ẽ, ẽŋa ayɩla mã’a sɔna pẽka la nã’asgɔ wakatɛ n ka ba’asrɩ. Amina.
18M bia Atimõtɩ, mam zãsŋɔ n wãna tɩ mam dɩkɛ ɩta fʋ nu’usum, wʋ ban daan to’oge Nawẽnnɛ yetɔga tɔgɛ fʋ yelle se’em na: Basɛ tɩ yetɔg-bãma bɔ fʋ pãŋa, tɩ fʋ zɛbɛ zɛbrɛ sõŋa, 19ken bɔ Nawẽnnɛ sɩra, dee ɩta sɛla tɩ fʋ mi fʋ sũure pʋam tɩ la ãn sõŋa. Nẽrba basɛba zagsɛ bɛla mɛ, tɩ bõn-ẽŋa basɛ tɩ ba ka le dɔla Azezi sore. 20Nẽr-bãma pʋam, Ahimẽnɩ, la Alɛgsãndrɩ n daan boe mĩ, tɩ mam daan basɛ ba la Asũtãana tɩ ba yõgɛ yɛm, da le pɔ’ɔra Nawẽnnɛ.
2Pʋ’ʋsgɔ nẽrba wuu ĩyã
1Mam yetɩ ya mɛ lan gãnnɩ wuu, tɩ ya sɔsra dee kã’ara Nawẽnnɛ, dee pʋ’ʋsra ẽ a yel-sõnnɛ nẽrba wuu ĩyã. 2Sɔsra-ya Nawẽnnɛ bɔ’ɔra na’adõma, la sɛba wuu n tarɩ ke’eŋo, tɩ tɩ tã’agɛ vɔa la laafɛ, tɩ dãaŋɔ da bɔna, tɩ tɩ tã’agɛ dɔla Nawẽnnɛ sore sõŋa, tɩ tɩ yel-ɩrɛ ãna sõŋa. 3Bõn-ẽna n ãn sõŋa bɔ Nawẽnnɛ n de tɩ Fãagra dee ãna a sũure yẽlʋm. 4Ẽŋa n boorɩ tɩ nẽrba wuu yẽ fãarɛ, dee bãŋɛ sɛla n de sɩra. 5Nawẽnnɛ ayɩla mã’a n boe, la nẽra ayɩla mã’a n mẽ boe nẽrba la Nawẽnnɛ tẽŋasʋka naara ba taaba, ẽŋa de la Azezi-krisi n lebge nẽrsaala la. 6La de la ẽŋa n dɩkɛ a vɔm yɔ to’oge nẽrba wuu basɛ, bɛla de la kaseto n pa’alɛ tɩ Nawẽnnɛ n boorɩ tɩ a fãagɛ nẽrba wuu, a pa’alɛ bɛla la wakat-sɛka tɩ a looge la. 7Bɛla tɩ Nawẽnnɛ daan looge mam tɩ m dɛna Azezi Tõntõnna dɩkɛ yel-ẽna wã mõolɛ, dee zãsʋm bu-zãŋsɩ Nawẽnnɛ sɩra tɩ ba bɔ ẽ sɩra. Mam tɔgrɩ la sɩra, mam ka parnɩ.
8Bɛla mam boorɩ tɩ zẽ’a woo bʋraasɩ pʋ’ʋsra Nawẽnnɛ, ba zẽkɛ ba nu’usi la pʋpeelem pʋ’ʋsra Nawẽnnɛ, ba da tara sũ-isgre bɩɩ nõke’ene. 9Pɔgsɩ mẽ yɛɛra futo wʋ lan masɛ, tɩ la da dɛna pa’al-m-mẽŋa bɩɩ yãnnɛ. Ba da ɛɛra tɩ ba nẽnnõm dɛna zuto lʋa, bɩɩ sãlma lɔgrɔ, bɩɩ kug-sõma lɔgrɔ, la futo ligri n zo’oge yɛa. 10Ba basɛ tɩ ba yel-ɩrɛ ãna sõŋa wʋ pɔgsɩ n nannɩ Nawẽnnɛ n masɛ tɩ ba ɩta se’em. 11La masɛ tɩ zãsŋɔ wakatɛ pɔgsɩ ãna sĩm, dee sakra nõorɛ. 12Mam ka bɔ pɔgsɩ nõorɛ tɩ ba zãsna, bɩɩ ba sɔna bʋraasɩ, ba ãna sĩm. 13La de la Adam tɩ Nawẽnnɛ daan dẽŋɛ nãam, dee yãŋa nãam Awa. 14La, la dagɩ Adam tɩ Asũtãana daan pã’asɛ, a daan pã’asɛ la Awa yãŋɛ, tɩ a sɩ’ɩsɛ Nawẽnnɛ nõorɛ. 15La baa pɔgsɩ n nãmsrɩ dee dɔgra la, ba tã wʋn yẽ fãarɛ, ba sãn mõrgɛ ze’ele kãŋkãŋɛ Nawẽnnɛ doosgo pʋam, tara nõŋlʋm la pʋpeelem, dee guusra ba mẽŋa.
3Sɛba n boe Nawẽnnɛ nẽrba nẽŋa n wʋn ãna se’em
1Yetɔg-ẽna tɩ mam yetɩ m tɔgɛ wã de la sɩra, nẽra sãn bɔɔra tɩ a dɛna Nawẽnnɛ nẽrba nẽŋadãana, la de la tõon-sõŋɔ tɩ a boorɩ tɩ a tõm. 2La dẽnɩ tɩ nẽŋadãana dɛna nẽra n ka tarɩ dõrga, la a dɛna pɔg-yẽŋa dãana, la a dɛna nẽra n tarɩ a mẽŋa sõŋa, dee tara pʋtẽ’e-sõŋɔ, a dɛna nẽra tɩ ba nannɩ, la a dɛna nẽra n ɩtɩ nẽrba sãanɔ, dee tãna wʋn zãsʋm nẽrba. 3A da dɛna nẽra n dɩkɛ a mẽŋa bɔ dãam, a da dɛna zɛbzɛbra, a dɛna sũ-bʋgsʋm dãana, da nõŋɛ girgiri, la a da nõŋɛ bõnɔ. 4A dɛna nẽra n bɩsrɩ a yir-dõma yelle sõŋa, tɩ a kɔma sakra a yetɔga, nã’asra ẽ sɛla woo pʋam. 5Nẽra sãn ka tãna bɩsra a mẽŋa yir-dõma yelle, a wʋn ẽŋɛ la wãne bɩsɛ Nawẽnnɛ nẽrba yelle? 6A da dɛna nẽr-paalga Azezi sore la pʋam, tɩ a da zẽkɛ a mẽŋa tɩ ba wa di a sarɩya wʋ Asũtãana la. 7La dẽnɩ tɩ nẽr-sɛba n ka dolɩ Nawẽnnɛ mẽ tɔgra a yelle yetɩ a de la nẽr-sõŋɔ. Tɩ ba da wa pɔ’ɔgɛ ẽ, tɩ yãnnɛ yõkɛ ẽ tɩ a lui Asũtãana bẽrgɔ pʋam.
8Yel-bɩsrɩba mẽ masɛ mɛ tɩ ba dɛna nẽrba tɩ ba nannɩ, ba da dɛna nẽrba n tarɩ nõgõla, ba da yũura dãam bugra, ba da dɛna nẽrba n ɩtɩ sɛla n ka masɛ yẽta bõntarsõm. 9Ba dɛna nẽrba n tarɩ Nawẽnnɛ sɩra n daan sʋgɛ, tɩ a puke pa’alɛ tɩ la, ɩta sɛla woo tɩ ba mi ba sũure pʋam tɩ la masɛ mɛ. 10Dẽnɩ tɩ ba dẽŋɛ makɛ ba bɩsɛ, ba sãn ka tara dõrga, tɩ ba yãŋa tõm yel-bɩsrɩba tõoma la.
11La ba pɔgba mẽ masɛ tɩ ba dɛna la nẽrba tɩ ba nannɩ, ba da dɛna nẽrba n tɔgrɩ nẽrba be’em, ba tara ba mẽŋa sõŋa, dee dɛna sɩra dõma sɛla woo pʋam.
12Dẽnɩ tɩ yel-bɩsra dɛna pɔg-yẽŋa dãana, dee tãna bɩsra a kɔma, la a yir-dõma yelle sõŋa. 13Yel-bɩsrɩba sɛba n tõnnɩ ba tõoma sõŋa yẽtɩ nã’asgɔ mɛ, la ba wʋn yẽ bʋraanɛ zozo’e Azezi-krisi doosgo pʋam.
Bõn-kãtɛ sɛka tɩ Nawẽnnɛ pa’alɛ tõma
14Mam tarɩ pʋtẽ’erɛ tɩ la kãn yuuge dee tɩ mam wa’am fʋ zẽ’am, la mam gʋlsɛ wãna bɔ’ɔra fɔ, 15tɩ mam sãn yuuge, fʋ tã’agɛ bãŋɛ nẽra n wʋn ãna se’em Nawẽnnɛ nẽrba tẽŋasʋka, nẽr-sɛba n de vɔm dãana Nawẽnnɛ mẽŋa nẽrba n tarɩ Nawẽnnɛ sɩra wʋ zẽerɛ n sõŋrɩ deego se’em na. 16Tɩ wuu mi tɩ Nawẽnnɛ sɩra n daan sʋgɛ tɩ a dɩkɛ pa’alɛ tɔ a doosgo pʋam na, de la bõn-kãtɛ. Bõn-kãtɛ ẽŋa de la:
Krisi n daan lebge nẽrsaala.
Tɩ Nawẽnnɛ Sɩa pa’alɛ tɩ a de la sɩra dãana.
Tɩ malɛkadõma bɩsɛ ẽ.
Tɩ ba mõolɛ a yelle buuri wuu tẽŋasʋka.
Tɩ nẽrba bɔ ẽ sɩra.
Tɩ Nawẽnnɛ zẽkɛ ẽ la na’am pãŋa sẽŋɛ a yire.
4Põmpɔrŋɔ zãsŋɔ yelle
1Nawẽnnɛ Sɩa tɔgɛ mɛ vẽelga vẽelga yetɩ, dũnia ba’asgɔ wakatɛ, nẽrba basɛba wʋn basɛ Nawẽnnɛ sore doosgo, dee dɔla sɛla n de pã’asgɔ, la kʋlkã’arsɩ põmpɔrŋɔ zãsŋɔ. 2Ba de la põmpɔrndõma, la pʋlibsum dõma, tɩ ba zãsna põmpɔrŋɔ dee tɩ ba zuto ka zɛɛra. 3Nẽr-bãma zãsnɩ nẽrba yetɩ, pɔgsɩ da ɛlla sɩrba, tɩ bʋraasɩ mẽ da dita pɔgba, la ba sisra dia basɛba da dita. La de la põmpɔrŋɔ, Nawẽnnɛ nãam bõn-bãma tɩ nẽr-sɛba n sakɛ ẽŋa mina sɩra la pʋ’ʋsra ẽ a yel-sõnnɛ dee dita ba. 4Se’ere n soe la, sɛla woo tɩ Nawẽnnɛ nãam ãn sõŋa mɛ. Sɛla sɛla ka boe n de fʋ zagsɛ, fʋ sãn pʋ’ʋsɛ Nawẽnnɛ a yel-sõnnɛ. 5Nawẽnnɛ yetɔga, la pʋ’ʋsgɔ n basrɩ tɩ sɛla woo ãna sõŋa Nawẽnnɛ zẽ’am.
Azezi tõntõn-sõŋɔ
6Pa’alɛ sɔbiisi la bɛla, tɩ fʋ wʋn dɛna Azezi-krisi tõntõn-sõŋɔ, n to’oge Nawẽnnɛ yetɔga tɩ fʋ bɔ sɩra la, tɩ a pa’asra fʋ pãŋa, dee dɔla zãsŋɔ n de sɩra la sõŋa. 7Zãagɛ fʋ mẽŋa la sɔlma n ka tarɩ võorɛ, dee keŋe fʋ mẽŋa dɔla Nawẽnnɛ sõŋa. 8Nẽra n ɩtɩ se’em wɩsgra a ĩyã la tarɩ yõorɔ la fẽe, la a sãn dɔla Nawẽnnɛ sõŋa, la tarɩ yõorɔ mɛ sɛla woo pʋam, ẽŋa n sõŋrɩ tõma vɔm sɛka tɩ tɩ tarɩ lɛɛlɛ wã pʋam, dee wʋn bɔ tɔ vɔm n ka ba’asrɩ. 9Yetɔg-ẽna de la sɩra, la a masɛ mɛ tɩ nẽra woo to’oge ẽ. 10Bɛla, tõma n tõnnɩ nãmsra mõrgra la, la de la tõma n tarɩ pʋtẽ’erɛ gu’ura vɔm dãana Nawẽnnɛ n de nẽrsaalba wuu Fãagra la ĩyã, la a de la sɛba n bɔ ẽ sɩra la Fãagra gãnna.
11Pa’alɛ ba, dee zãsʋm ba bõn-bãna. 12Da basɛ tɩ nẽra zɛɛn fɔ, fõn de bõnbɩ’a la ĩyã, basɛ tɩ fʋ yetɔga, la fʋ yel-ɩrɛ, la fʋ nõŋlʋm, la fõn bɔ Nawẽnnɛ sɩra se’em, la fʋ pʋpeelem ãna sõŋa, tɩ la pa’alɛ Nawẽnnɛ nẽrba, bãma n wʋn vɔa se’em. 13Mõrgɛ karẽŋra Nawẽnnɛ gõŋɔ pa’ala nẽrba, bɔ’ɔra ba bʋraanɛ, dee zãsna ba halɩ tɩ m wa wa’am. 14Da basɛ bɔ’a la tɩ Nawẽnnɛ bɔ fɔ, tɩ ba daan to’oge Nawẽnnɛ yetɔga tɔgɛ a yelle, tɩ kẽma la daan dɩkɛ nu’usi paglɛ fʋ zuo pʋ’ʋsɛ bɔ fʋ la. 15Tõm tõon-bãna sõŋa, dɩkɛ fʋ mẽŋa bɔ tõoma la, tɩ nẽrba wuu wʋn yẽ fõn sẽnnɩ nẽŋa se’em.
16Guuse fʋ mẽŋa la fʋ vɔm, la fʋ zãsŋɔ la. Mõrgɛ ze’ele kãŋkãŋɛ ɩta bɛla wuu. Fʋ sãn ɩta bɛla, tɩ fʋ wʋn fãagɛ fʋ mẽŋa, la sɛba n selsrɩ fʋ la.
5Fõn wʋn kã’an Nawẽnnɛ nẽrba se’em
1Bʋra-yã’aŋa sãn ẽŋɛ sɛla, da tãsɛ ẽ, kã’an ẽ wʋ fʋ sɔ la. Kã’an kɔmbɩ’ɩsɩ wʋ fʋ sɔbiisi la, 2la fʋ kã’an pɔg-yã’asɩ wʋ fʋ madõma la, dee kã’an pug-sarsɩ wʋ fʋ tãpa la, la pʋpeelem.
Pɔkõpa yelle
3Nanna pɔkõpa sɛba n boe ba yɩla mã’a la, dee sõŋra ba. 4Pɔkõorɛ sãn tara kɔma bɩɩ yɩɩsɩ, bãma n masɛ tɩ ba bɩsra ba mẽŋa yir-dõma yelle, ba bɩsra ba dɔgrɩba la yelle wʋ ba dɔgrɩba la n daan bɩsrɩ ba yelle se’em na, bɛla n ãn Nawẽnnɛ sũure yẽlʋm. 5Pɔkõ-sɛka n boe ayɩla mã’a ka tara nẽra nẽra la, a te’ege la Nawẽnnɛ pʋ’ʋsra sɔsra wʋntɛɛŋa la yʋ’ʋŋɔ. 6La pɔkõorɛ sɛka n eerɩ tõnna a yɛm n boorɩ se’em, ẽŋa põn ki mɛ baa la ẽn ken vɔa la. 7Kã’an ba bɛla, tɩ nẽra da zɛrgɛ ba. 8Nẽra sãn ka bɩsra a yir-dõma yelle, lan gãnnɩ a dee-dõma yelle, ẽŋa dãana zagsɛ sɛla tɩ tɩ bɔ sɩra la mɛ, la a de la tõon-be’ero dãana gãnna sɛka n ka dolɩ Nawẽnnɛ na.
9Pɔkõ-sɛka tɩ ba tã wʋn gʋlsɛ a yʋ’ʋrɛ pa’asɛ pɔkõpa gõŋɔ pʋam de la pɔkõ-sɛka n paagɛ yʋʋma pisyoobɩ, dee ele sɩra ayɩla mã’a. 10La dẽnɩ tɩ nẽrba mina tɩ a de la tõon-sõma dãana, la a uge kɔma sõŋa, la a de la nẽra n ẽŋɛ nẽrba sãanɔ, la a peege Nawẽnnɛ nẽrba nãma, la a sõŋɛ nẽr-sɛba n nãmsɛ, dee dɛna nẽra n tõm tõon-sõma buuri wuu.
11La sãn dɛna pɔkõ-sɛba n ka kʋrgɛ la, da gʋlsɛ ba yʋ’ʋra pɔkõpa la pʋam, se’ere n soe la, ba yɛm sãn wa bɔna bʋraasɩ pʋam, ba wʋn basɛ Krisi tõoma mɛ, dee bɔɔra tɩ ba ele. 12La bɛla wʋn dɛna la tuure bɔ ba, ban sã’am ba nõorɛ la tɩ ba dẽŋɛ bĩŋe la ĩyã. 13Sɛla n pa’asɛ, ba sãn gʋlsɛ ba, ba wʋn lebge la zẽyãgsɩ ɛɛra kaara yiɛ, la, la dagɩ bɛla mã’a, ba wʋn lebge la yetɔg-tɔgsrɩba kẽ’era nẽrba yɛla pʋam, dee tɔgra yetɔg-sɛba n ka narɩ ba tɔgɛ. 14Bɛla, mam boorɩ tɩ pɔkõ-sɛba n ka kʋrgɛ la le ele dɔgɛ kɔma, bɩsra ba yir-dõma yelle, da basɛ tɩ bɛ’ɛba yẽ folle tɔgɛ tɩ be’em. 15Se’ere n soe la, pɔkõpa basɛba põn wẽrgɛ mɛ basɛ Nawẽnnɛ sore dee dɔla Asũtãana.
16Nẽra n bɔ Azezi sɩra sãn tara pɔkõpa a yire, a bɩsra ba yelle, a da dɩkɛ ba yelle basɛ Nawẽnnɛ nẽrba zuo, tɩ Nawẽnnɛ nẽrba la tã’agɛ sõŋɛ pɔkõ-sɛba n ka tarɩ nẽra nẽra la.
Nawẽnnɛ nẽrba kẽma yelle
17Wẽndeego nẽrba kẽma sãn bɩsrɩ nẽrba la yelle sõŋa, lan gãnnɩ wuu, sɛba n mõrgrɩ mõola dee zãsna Nawẽnnɛ yetɔga la, ba wʋn yẽ la nã’asgɔ bʋyi. 18La gʋlsɛ Nawẽnnɛ gõŋɔ pʋam yetɩ: «Da ẽŋɛ lɔlga n tõnnɩ si pʋam nõorɛ yʋka», dee ken yetɩ: «La masɛ tɩ tõntõnna to’oge a yɔɔrɔ.»
19Nẽra sãn dõrɛ kẽma yetɩ a tõm na tõon-be’ero, da selse ẽ, sãn dagna nẽrba bayi bɩɩ batã n de kaset-dõma. 20La kẽma sãn tõm tõon-be’ero, fʋ kã’an ẽ Wẽndeego la pʋam nẽrba wuu nẽŋam, tɩ nẽrba basɛba la zoe dabeem. 21Mam yetɩ fʋ la Nawẽnnɛ, la Azezi-krisi, la malɛkadõma nẽŋam yetɩ, fʋ doose pa’algɔ bãna wã la sɩra, da bɔkra nẽrba.
22Da kãblɛ dɩkɛ fʋ nu’usi paglɛ nẽra zuo tɩ a tõm Nawẽnnɛ tõoma, da naagɛ la nẽra a tõon-be’ero pʋam, dɛna pʋpeelem dãana.
23Da le yũura ko’om mã’a, yũura vẽ fẽe fʋ pʋʋr-dõoma, la fʋ ĩyã n ka tarɩ pãŋa la ĩyã.
24Nẽrba basɛba tõon-be’ero puke mɛ lan dẽŋɛ ba wʋn di ba sarɩya. La nẽrba basɛba tõon-be’ero nãn ka puke, dee wʋn wa puke mɛ. 25Bɛla mẽ, tõon-sõma basɛba puke mɛ, la sɛba n sʋgɛ la ka tã wʋn sʋgɛ ka puke.
6La masɛ mɛ tɩ sakɛ zuudãandõma
1Nẽr-sɛba n de yamsɩ la, dẽnɩ tɩ ba nanna ba zuudãandõma sõŋa, tɩ nẽra da pɔ’ɔgɛ Nawẽnnɛ yʋ’ʋrɛ, la tɩ zãsŋɔ la. 2La yam-sɛba zuudãandõma n bɔ Azezi sɩra la, la ka masɛ tɩ ba ka nanna ba yetɩ bãma de la sɔbiisi. La de la ba tõn malɩn tõnna bɔ’ɔra ba gãnna bɛla, se’ere n soe la, sɛba tɩ ya tõnnɩ bɔ’ɔra la, de la nẽrba n bɔ Azezi sɩra dee tɩ Nawẽnnɛ nõŋɛ ba.
Põmpɔrŋɔ zãsŋɔ, la ligri nõŋlʋm
La de la bõn-bãna tɩ fʋ wʋn zãsʋm ba, dee kã’an ba tɩ ba ɩta. 3Nẽra sãn zãsʋm zãsŋɔ ayẽma ka dɔla tõma Zuudãana Azezi-krisi sɩra yetɔga, bɩɩ ka dɔla zãsŋɔ sɛka n pa’alɩ tɩ wʋn ãna se’em Nawẽnnɛ sore doosgo pʋam na, 4a tarɩ la pa’al-m-mẽŋa zo’oge dee ka mina sɛla sɛla, la a nõŋɛ la yetɔg-yaalsɩ la nõke’ene wẽ’a. Bõn-bãma n sẽm na ɩta sũure la tadãana bõnɔ, la a ka wõm taaba, la yʋ’ʋr-sã’aŋɔ, la tẽ’esɛ be’em bɔ’ɔra nẽrba, 5tɩ ba wẽ’era nõke’ene n ka ba’asrɩ la taaba, ban tarɩ yɛm be’ero dee ka tara yel-sɩra, dee tẽ’esra tɩ Nawẽnnɛ sore doosgo la de la sɛla n wʋn basɛ tɩ ba yẽ bõntarsõm na ĩyã.
6La de la sɩra tɩ nẽra n dolɩ Nawẽnnɛ sore sãn tara sũ-yẽlʋm la sɛla tɩ a tarɩ la, a yẽtɩ yõorɔ zozo’e mɛ. 7Tɩ ka tarɩ sɛla sɛla wa’am dũnia zuo, la tɩ mẽ kãn tã’agɛ tarɩ sɛla sɛla dũnia wã zuo fõrgɛ. 8Bɛla, tɩ sãn tara dia la futo, la seke mɛ. 9La sɛba n boorɩ tɩ ba yẽ bõntarsõm na kẽ’erɩ la yɛla pʋam, luta Asũtãana bẽrgɔ pʋam. Ba boorɩ la bõnɔ zozo’e n de yalnɛ la be’em, bõn-bãma n kẽ’esrɩ nẽrsaalba wõŋrɛ la sã’aŋɔ pʋam. 10Se’ere n soe la, ligri nõŋlʋm de la tõon-be’ero wuu yẽgrɛ. Nẽrba basɛba nõŋɛ la ligri bʋrgɛ dee basɛ Nawẽnnɛ sore, nãmsɛ ba mẽŋa la toogo buuri zozo’e.
11La fõn de Nawẽnnɛ nẽra la, zãagɛ fʋ mẽŋa la bõn-bãma, dee ɛ sɛla n masɛ, la Nawẽnnɛ sakrɛ, ken bɔ ẽ sɩra, ɛ nõŋlʋm, la sũ-mã’arɛ, la sũ-bʋgsʋm. 12Mõrgɛ mẽ mẽerɛ sõŋa Nawẽnnɛ sore doosgo la pʋam yẽ vɔm n ka ba’asrɩ, tɩ la de la bɛla ĩyã tɩ Nawẽnnɛ looge fo, tɩ fʋ daan tɔgɛ yetɔg-sõŋɔ yetɩ fõn bɔ Azezi sɩra nẽrba zozo’e nẽŋam na.
13Mam yetɩ fo Nawẽnnɛ n bɔ’ɔrɩ sɛla woo vɔm nẽŋam, la Azezi-krisi n daan tɔgɛ sɩra kaseto Apõnsɩ-pilatɩ nẽŋam na, 14yetɩ fʋ sakɛ pa’algɔ tɩ fʋ to’oge la, gʋrɛ ba sõŋa la pʋpeelem, tɩ dõrga kana, halɩ ka paagɛ tɩ Zuudãana Azezi-krisi lemŋo.
15Nawẽnnɛ wʋn botɩ a leme wa’am na wakat-sɛka tɩ a looge la. Sũ-yẽlga dãana Nawẽnnɛ ayɩla mã’a n de na-kãtɛ, a de la na’adõma Naba, la zuudãandõma Zuudãana. 16Ẽŋa mã’a n vɔa wakatɛ wuu, a boe la peelem n nẽegɛ gãŋɛ pʋam tɩ nẽra ka tãna wʋn paagɛ mĩ, nẽra baa ayɩla ken ka yẽ ẽ, la nẽra nãn ka yẽtɩ ẽ. Ẽŋa n soe nã’asgɔ, la pãŋa n ka ba’asrɩ. Amina.
17Kã’an nẽr-sɛba n tarɩ dũnia wã bõntarsõm na yetɩ, ba da zẽkra ba mẽŋa, la ba da dɩkɛ ba te’ere te’ege bõntarsõm tɩ ba ka mĩ ban wʋn ãna se’em, ba te’ege Nawẽnnɛ, tɩ ẽŋa n bɔ’ɔrɩ tɔ sɛla woo tɩ la sɛkra sõŋa sõŋa tɩ tɩ ɩta sũ-yẽlga. 18Kã’an ba yetɩ, ba ɩta sõŋa, ba dɛna nẽrba n tõnnɩ tõon-sõma zozo’e, la ba dɛna nẽrba n bɔ’ɔrɩ, dee pʋta sɛla tɩ ba tarɩ bɔ’ɔra nẽrba la sũ-yẽlga. 19Bɛla tɩ ba wʋn lagsɛ bõntarsõm n ãn sõŋa kãn sã’am wakatɛ n sẽm na ĩyã, tɩ ba wʋn yẽ vɔm mẽŋa mẽŋa.
20Fõn Atimõtɩ, bɩsra sɛla tɩ Nawẽnnɛ dɩkɛ gu’ule fo la, mõrgɛ zãagɛ fʋ mẽŋa la yetɔg-yooro n ka dolɩ Nawẽnnɛ sore, zãagɛ fʋ mẽŋa la nõke’ene wẽ’a tɩ nẽrba tẽ’esrɩ tɩ la de la bãŋrɛ dee tɩ la dagna bɛla la. 21La nẽrba basɛba tarɩ la bõn-bãma tẽ’esɛ tɩ bãma tarɩ la bãŋrɛ, bʋrgɛ dee basɛ Nawẽnnɛ sore.
Nawẽnnɛ wʋn ẽŋɛ ya a yel-sõnnɛ.