1 Tesaloniki

Pɔspɔsɩ gõŋɔ tɩ Apolɩ gʋlsɛ bɔ

Tesaloniki dõma

Bilgre

Tesaloniki yʋʋn de la Masedʋanɩ so’olʋm na-tẽŋa. Apolɩ ze’ele la Filipi sẽŋɛ Tesaloniki ka pɔsɛ Nawẽnnɛ tõoma. Apolɩ ka yuuge Tesaloniki dee fõrgɛ, se’ere n soe la, Zifdõma basɛba n yʋʋn ɩtɩ sũure la ẽ, tɩ a fõrgɛ (Tõoma 17:1-10).

Bɛla poorʋm, Apolɩ sẽŋɛ ka bɔna la Korẽntɩ, tɩ Atimõtɩ n dolɩ la ẽ tõnna Nawẽnnɛ tõoma la, sẽŋɛ a zẽ’am ka yele ẽ Nawẽnnɛ nẽrba n boe Tesaloniki la yelle n ãn se’em. Tɩ Apolɩ gʋlsɛ gõŋɔ wã bɔ ba.

Apolɩ dẽŋɛ pʋ’ʋsɛ la Nawẽnnɛ a yel-sõnnɛ ba ĩyã, ẽn wõm tɩ ba bɔ Azezi sɩra, dee nõŋɛ taaba la ĩyã (sapɩtrɩ 1).

A tẽegɛ ba la ẽŋa n tõm ba zẽ’am se’em, dee yetɩ ẽŋa boorɩ mɛ tɩ a lebe ba zẽ’am ka kaagɛ ba bɩsɛ (sapɩtrɩ 2-3).

A bɔ ba la bʋraanɛ yetɩ ba sẽŋɛ nẽŋa Nawẽnnɛ doosgo la pʋam la pʋpeelem (4:1-12).

Bɛla poorʋm, a lerge ba la sokrɩsɩ tɩ ba soke ẽ kũm vo’ore yelle, la Azezi n wʋn leme la na’am pãŋa la yelle (4:13—5:11).

Gõŋɔ la ba’asgɔ, a kã’an ba mɛ, dee pʋ’ʋsɛ ba (5:12-28).

Gõŋɔ wã sõŋrɩ nẽr-sɛba wuu n fablɩ dũnia ba’asgɔ yelle mɛ. A pa’alɩ tɩ la masɛ mɛ tɩ Azezi nẽrba bɔ Nawẽnnɛ sɩra sẽŋɛ nẽŋa, tõnna la sũ-mã’arɛ gu’ura Azezi lemŋo.

¹Mam Apolɩ, la Asilvẽ, la Atimõtɩ n gʋlsɛ gõŋɔ wã bɔ’ɔra yãma sɛba n de tɩ Sɔ Nawẽnnɛ, la tɩ Zuudãana Azezi-krisi nẽrba n boe Tesaloniki. Nawẽnnɛ wʋn ẽŋɛ ya yel-sõnnɛ, dee bɔ ya sũ-mã’asʋm.

Tesaloniki dõma n bɔ Nawẽnnɛ sɩra se’em

²Tõma pʋ’ʋsrɩ Nawẽnnɛ mɛ wakatɛ wuu a yel-sõnnɛ ya wuu ĩyã, dee tẽra ya yelle tɩ pʋ’ʋsgɔ pʋam ka gɔ’ɔra. ³Tõma tẽrɩ ya yelle tɩ Sɔ Nawẽnnɛ nẽŋam, yãma n bɔ sɩra tõnna se’em, la yãma n tarɩ nõŋlʋm tõnna zozo’e se’em, dee ken tẽra yãma n tarɩ pʋtẽ’erɛ gu’ura sɛla tɩ ya bɔ sɩra, zɛ kãŋkãŋɛ tɩ Zuudãana Azezi-krisi doosgo pʋam ka bigsra la yelle. ⁴Tɩ sɔbiisi, tõma mi tɩ Nawẽnnɛ nõŋɛ ya mɛ looge ya tɩ ya dɛna a nẽrba.

⁵Tõma n daan tarɩ kõ-yẽlga la wa’am wa mõolɛ bɔ ya la, la ka de yetɔga mã’a, la de la Nawẽnnɛ Sɩa pãŋa. La tõma daan mi tɩ tõma n tɔgɛ se’em na de la sɩra. Yãma mi tõma n daan boe ya zẽ’am na, tõma n vɔa se’em yãma sõŋrɛ ĩyã. ⁶La yãma ɩtɩ la tõma, la tɩ Zuudãana n ɩtɩ se’em na, la baa yãma n to’oge kõ-yẽlga la yẽ nãmsgɔ zozo’e la, ya tarɩ ẽ mɛ la sũ-yẽlga n ze’ele Nawẽnnɛ Sɩa zẽ’am. ⁷Bɛla, yãma de la sɛba tɩ Masedʋanɩ, la Akayi so’olʋm nẽr-sɛba n bɔ Azezi sɩra la wʋn bɩsra, ɩta yãma n ẽŋɛ se’em na. ⁸Zuudãana Azezi kõ-yẽlga la ze’ele la yãma zẽ’am saagɛ Masedʋanɩ, la Akayi, la, la dagɩ bilam mã’a, zẽ’esɩ wuu nẽrba wõm yãma n bɔ Nawẽnnɛ sɩra se’em mɛ, tɩ la põn ka le dɛna tɩ tɔgɛ. ⁹Nẽrba la wuu tɔgrɩ pa’ala yãma n daan to’oge tõma sõŋa se’em, basɛ baga, dee dɔla Nawẽnnɛ tõnna bɔ’ɔra ẽŋa n de vɔm, la sɩra dãana, ¹⁰dee gu’ura a Dayʋa Azezi n wʋn ze’ele Nawẽnnɛ yire wa’am. La de la ẽŋa n daan ki, tɩ Nawẽnnɛ botɩ a vo’oge, ẽŋa n yetɩ a fãagɛ tɔ Nawẽnnɛ sũ-isgre n sẽm na pʋam.

Apolɩ n daan tõm se’em Tesaloniki

¹M sɔbiisi, yãma mẽŋa mi tɩ tõma n daan wa’am ya zẽ’am na, la dagɩ zãŋa. ²La ya ken mina tɩ ba daan nãmsɛ tõma mɛ dee tʋ tõma Filipi tẽŋa, dee tɩ tõma yãŋa wa’am yãma zẽ’am Tesaloniki. La Nawẽnnɛ daan bɔ tõma bʋraanɛ mɛ, tɩ tõma mõolɛ a kõ-yẽlga la bɔ ya, baa nãmsgɔ la n daan zo’oge la.

³Tõma n pa’alɩ pa’alg-sɛba la dagɩ tuure, bɩɩ pʋtẽ’e-be’ero pa’algɔ. La tõma ka ɩtɩ yɛmkẽgsɩga pã’asra nẽrba. ⁴La de la Nawẽnnɛ n bɩsɛ tɩ tõma masɛ tɩ a dɩkɛ a kõ-yẽlga la ẽŋɛ tõma nu’usum. Bɛla, tõma ka mõolɩ tɩ la ẽŋɛ nẽrsaalba sũure yẽlʋm, tõma mõolɩ tɩ la ẽŋɛ la Nawẽnnɛ n vẽesrɩ mina tɩ pʋtẽ’erɛ n ãn se’em na sũure yẽlʋm. ⁵Yãma mi sõŋa tɩ tõma ka dɩkɛ nõ-yẽlʋm pã’asɛ nẽrba, la tõma ka dɩkɛ kõnkomã’asʋm tɔgɛ tɩ tɩ to’oge sɛla, Nawẽnnɛ n de tõma kaset-dãana. ⁶Tõma ka ɛ pẽka nẽrsaalba zẽ’am, tõma ka ɛ yãma zẽ’am, bɩɩ nẽrba basɛba zẽ’am. ⁷La tõma daan tarɩ nõorɛ mɛ, tõma n de Krisi Tõntõnɩba la ĩyã, la tõma daan ka ẽŋɛ bɛla. Tõma daan tarɩ la sũ-bʋgsʋm ya zẽ’am, wʋ pɔka n bɩsrɩ a kɔma yelle sõŋa se’em na. ⁸Tõma n nõŋɛ ya la ĩyã, tɩ tõma daan mõolɛ kõ-yẽlga la n ze’ele Nawẽnnɛ zẽ’am na bɔ ya. La, la dagɩ bɛla mã’a, tõma daan sakɛ mɛ tɩ dɩkɛ tɩ vɔm bɔ ya, tõma nõŋɛ ya mɛ halɩ zozo’e.

⁹M sɔbiisi, yãma tẽrɩ tõma n daan tõm nãmsɛ se’em, tõma n daan mõolɩ Nawẽnnɛ kõ-yẽlga la bɔ ya la. Tõma daan tõm na wʋntɛɛŋa la yʋ’ʋŋɔ, tõma daan ka boorɩ tɩ tõma dia yelle dɛna nãmsgɔ bɔ ya nẽra baa ayɩla. ¹⁰Yãma mi tõma n daan boe yãma sɛba n bɔ sɩra zẽ’am na, tõma yel-ɩrɛ n ãn se’em, la Nawẽnnɛ mẽ mi mɛ. Tõma yel-ɩrɛ daan ãn na sõŋa sõŋa, masɛ tɩ dõrga kana. ¹¹Yãma mi tɩ tõma daan ãn wʋ sɔ n ãn se’em la a kɔma la, yãma nẽra woo ĩyã. ¹²Tõma keŋe ya sũure mɛ, bɔ ya bʋraanɛ, pa’alɛ ya yetɩ ya dɔla so-sɛka n masɛ Nawẽnnɛ yɛm, ẽŋa n wi ya tɩ ya kẽ a so’olʋm pʋam po dita na’am.

¹³Tõma n daan mõolɛ Nawẽnnɛ kõ-yẽlga la bɔ ya la, ya daan to’oge ẽ, sakɛ tɩ la de la kõ-yẽlga n ze’ele Nawẽnnɛ zẽ’am, a ka ze’ele nẽrsaalba zẽ’am. Asɩra, la de la Nawẽnnɛ yetɔga n boe yãma sɛba n bɔ sɩra la sũure pʋam tõnna. Bɛla tɩ tõma pʋ’ʋsra Nawẽnnɛ wakatɛ wuu bõn-ẽŋa ĩyã. ¹⁴M sɔbiisi, Nawẽnnɛ nẽr-kʋʋŋɔ n dolɩ Azezi-krisi n boe Zude tẽnsɩ pʋam n yẽ nãmsgɔ sɛba la, yãma mẽ yẽ la nãmsgɔ bãma. Yãma buuri la n nãmsrɩ yãma se’em na, Zifdõma mẽ nãmsɛ ba nẽr-sɛba n dolɩ Azezi-krisi la bɛla. ¹⁵Bãma n daan kʋ Zuudãana Azezi, la Nawẽnnɛ nõtɔ’ɔsrɩba, dee mẽ nãmsɛ tõma. Ba ɩtɩ la sɛla n ka ãn Nawẽnnɛ sũure yẽlʋm, ba de la nẽrba wuu bɛ’ɛba. ¹⁶Ba gu’uri tõma mɛ tɩ tɩ da mõolɛ kõ-yẽlga la bɔ bu-zãŋsɩ tɩ ba yẽ fãarɛ. Bɛla tɩ ba tõnna tõon-be’ero pa’asra wakatɛ wuu. La ba’asgɔ, Nawẽnnɛ sũ-isgre boe ba zuo.

Apolɩ boorɩ tɩ a sẽŋɛ ka kaagɛ Tesaloniki dõma

¹⁷M sɔbiisi, lan daan pẽrgɛ tɩ tõma ze’ele ya zẽ’am fõrgɛ wakatɛ fẽe la, tɩ ka le yẽta taaba la nini, la tõma pʋtẽ’era ken bɔna la ya lɛ mɛ, tɩ yãma sɩa tara tõma, tɩ tõma mõrgra bɔɔra tɩ tɩ le yẽ ya. ¹⁸Bɛla tɩ tõma daan bɔɔra tɩ tɩ leme ya zẽ’am. La mam mẽŋa Apolɩ mõrgɛ mɛ nõorɛ faa tɩ m leme ya zẽ’am, tɩ Asũtãana gu tõma. ¹⁹La de la yãma tɩ tõma tarɩ pʋtẽ’erɛ gu’ura, yãma n wʋn bɔ tõma sũ-yẽlga, la de la yãma n wʋn botɩ tõma yẽ nã’asgɔ tõma Zuudãana Azezi nẽŋam a lemŋo daarɛ. ²⁰La de la bɛla, yãma ĩyã tɩ tõma wʋn yẽ nã’asgɔ la sũ-yẽlga.

¹Bɛla tɩ tõma ka le tãna wʋn zĩ’ire, tɩ tõma tẽ’esɛ tɩ la ãn sõŋa tɩ tõma mã’a bɔna Atɛnɩ tẽŋa, ²dee tõm tɩ sɔbia Atimõtɩ n de Nawẽnnɛ tõntõnna n lagɩm na tõma mõola Krisi kõ-yẽlga la, tɩ a wa’am wa bɔ ya bʋraanɛ, tɩ ya ze’ele kãŋkãŋɛ Azezi doosgo la pʋam. ³Tɩ nãmsgɔ sɛka n nãmsrɩ ya la da basɛ tɩ ya nẽra baa ayɩla bʋraanɛ bo’oge Nawẽnnɛ sore la doosgo pʋam. Yãma mẽŋa mi tɩ la de la pẽrgrɛ tɩ tɩ nãmsɛ. ⁴Tõma n daan boe la yãma la, tõma daan dẽŋɛ yele ya yetɩ, tɩ wuu wʋn yẽ nãmsgɔ mɛ. La ya mi tɩ la de la bõn-ẽŋa n bɛla n wa’am. ⁵Bɛla tɩ mam ka tãna wʋn zĩ’ire, tɩ mam tõm Atimõtɩ tɩ a wa’am wa bãŋɛ yãma n ãn se’em Azezi sore doosgo la pʋam, mam zotɩ mɛ tɩ Asũtãana wʋn pã’asɛ ya tɩ tɩ tõoma la lebge zãŋa.

⁶La lɛɛlɛ wã tɩ Atimõtɩ ze’ele ya zẽ’am leme wa’am, a tarɩ la kõ-yẽlga wa bɔ tõma, a pa’alɛ tõma la yãma n bɔ sɩra se’em, la yãma n tarɩ nõŋlʋm se’em, dee yetɩ ya ken tẽ’esra tõma yelle mɛ sõŋa sõŋa bɔɔra tɩ ya yẽ tõma, wʋ tõma n boorɩ tɩ tɩ yẽ yãma se’em na. ⁷Bɛla m sɔbiisi, yãma n bɔ sɩra se’em na keŋe tõma sũure mɛ tõma toogo, la tõma nãmsgɔ la pʋam. ⁸Lɛɛlɛ wã, tõma le vɔa la sũ-yẽlga, yãma n ze kãŋkãŋɛ Zuudãana doosgo la pʋam na. ⁹Tõma ka mi pʋ’ʋsgɔ sɛka tɩ tõma wʋn pʋ’ʋsɛ Nawẽnnɛ ya ĩyã, sũ-yẽlga sɛka tɩ yãma bɔ tõma a nẽŋam na ĩyã. ¹⁰Tõma sosrɩ Nawẽnnɛ mɛ la tɩ sũure wuu, yʋ’ʋŋɔ la wʋntɛɛŋa, tɩ tɩ tã’agɛ le yẽ ya, sõŋɛ ya la sɛla n pɔ’ɔgɛ ya Azezi doosgo la pʋam pa’asɛ.

¹¹Tõma Sɔ Nawẽnnɛ mẽŋa, la tɩ Zuudãana Azezi-krisi wʋn bɔ tɔ sore tɩ tɩ wa’am ya zẽ’am. ¹²Tɩ Zuudãana wʋn basɛ tɩ ya nõŋlʋm taaba ĩyã, la ya nõŋlʋm nẽrba wuu ĩyã pa’asra zozo’e wʋ tõma n nõŋɛ ya se’em na. ¹³A wʋn bɔ ya bʋraanɛ tɩ ya ze’ele kãŋkãŋɛ a sore la zuo la pʋpeelem, ka tara dõrga tɩ Sɔ Nawẽnnɛ nẽŋam, wakat-sɛka tɩ tɩ Zuudãana Azezi wʋn leme wa’am la a nẽrba wuu la.

Tɩn wʋn ɩta se’em tɩ la paagɛ Nawẽnnɛ yɛm

¹Sɛla n pa’asɛ, m sɔbiisi, yãma zãsʋm tõma zẽ’am mɛ yãma n wʋn ɩta se’em paagɛ Nawẽnnɛ yɛm. Yãma põn ɩta la bɛla. La tõma kã’anɩ ya mɛ, dee bɛlna ya la tɩ Zuudãana Azezi yʋ’ʋrɛ tɩ ya malɩn ẽŋɛ gãŋɛ bɛla. ²Yãma mi bõn-sɛba tɩ tõma daan to’oge tɩ Zuudãana Azezi zẽ’am pa’alɛ ya tɩ ya ɩta la. ³Nawẽnnɛ n boorɩ tɩ ya ãna se’em n wãna: Welge-ya to’ore dɛna pʋpeelem dõma, dee yõkɛ ya mẽŋa da tõnna yalsɩ tõoma. ⁴La ya nẽra woo bãŋɛ ẽŋa n wʋn tara a ĩyã se’em la pʋpeelem tɩ la ãna sõŋa. ⁵Da basɛ-ya tɩ yalsɩ tõoma yɛmleego tara ya, wʋ sɛba n ka dolɩ Nawẽnnɛ n ɩtɩ se’em na. ⁶Yel-ẽna pʋam, nẽra da kãn tõm a tadãana sɛla n ka ãn sõŋa, bɩɩ fã sɛla n de a bõnɔ. Tɩ daan põn dẽŋɛ yele ya, dee kã’an ya mɛ, tɩ Zuudãana wʋn sɩbgɛ sɛba n tõnnɩ tõon-be’ero bãma mɛ. ⁷Nawẽnnɛ ka looge to tɩ tɩ tõnna tõon-dẽgrɔ, a looge to tɩ tɩ welge la to’ore tara pʋpeelem. ⁸Bɛla, nẽr-sɛka n zagsɛ pa’algɔ ẽna, a ka zagsɛ nẽrsaala, a zagsɛ la Nawẽnnɛ n bɔ tɔ a Sɩa la.

⁹La sãn dɛna yãma n wʋn nõŋɛ sɔbiisi se’em yelle, la ka le dɛna tɩ gʋlsɛ bɔ ya. Nawẽnnɛ põn zãsʋm yãma ya wʋn nõŋɛ taaba se’em mɛ. ¹⁰La yãma sɩrɩ nõŋɛ ya sɔbiisi wuu n boe Masedʋanɩ so’olʋm wuu la bɛla. La tõma kã’anɩ ya mɛ tɩ ya malɩn ẽŋɛ gãŋɛ bɛla pa’asɛ. ¹¹Mõrgɛ ya mẽŋa vɔa la sũ-mã’asʋm, la ya bɩsra ya mẽŋa tõoma yelle, tõnna-ya la ya mẽŋa nu’usi dita, wʋ tõma n daan yele ya se’em na. ¹²Ɩta-ya bɛla, tɩ ya yel-ɩrɛ la basɛ tɩ ya yẽ nã’asgɔ nẽr-sɛba n ka dolɩ Nawẽnnɛ na zẽ’am. La ya da zɛ gu’ura tɩ nẽra bɔ ya sɛla.

Zuudãana Azezi lemŋo

¹³M sɔbiisi, tõma boorɩ tɩ ya bãŋɛ la sɩra nẽr-sɛba n ki la yelle, tɩ ya sũure da sã’am wʋ nẽr-sɛba n ka tarɩ pʋtẽ’erɛ gu’ura sɛla la. ¹⁴Tõma n bɔ sɩra tɩ Azezi ki mɛ, dee vo’oge la, bɛla tõma ken bɔ sɩra mɛ tɩ sɛba n dolɩ Azezi dee ki la, Nawẽnnɛ wʋn botɩ ba bɔna la Azezi.

¹⁵Zuudãana zãsŋɔ n wãna tɩ tõma yetɩ tɩ pa’alɩ ya: Wakat-sɛka tɩ Zuudãana la lemnɩ la, tõma sɛba n ken vɔa Zuudãana lemŋo daarɛ la kãn dẽŋɛ sɛba n ki la Zuudãana zẽ’am. ¹⁶Se’ere n soe la, nõorɛ n wʋn bɔ, tɩ malɛkadõma naba tɔgɛ ke’enke’em, tɩ Nawẽnnɛ benkonne peebe, tɩ Zuudãana mẽŋa ze’ele Nawẽnnɛ yire sige, tɩ sɛba n dolɩ Azezi dee ki la dẽŋɛ vo’oge. ¹⁷Tɩ Nawẽnnɛ lagɩm bãma, la tõma sɛba n ken vɔa la zẽkɛ sawara pʋam tɩ tɩ tʋ’ʋsɛ Zuudãana la saazuum, tɩ tɩ bɔna la Zuudãana la lɛ wakatɛ wuu. ¹⁸Bɛla, kɛŋra-ya taaba sũure la yetɔg-bãna.

¹M sɔbiisi, la ka le dɛna tɩ gʋlsɛ ya pa’alɛ wakatɛ, la dabs-sɛba tɩ bõn-bãma wʋn ẽŋɛ. ²Yãma mẽŋa põn mina sõŋa mɛ tɩ Zuudãana lemŋo la daarɛ wʋn ãna wʋ nayiga n ẽn wa’am yʋ’ʋŋɔ la. ³Nẽrba sãn wa yɛta tɩ: «Laafɛ la sũ-mã’asʋm boe», wakat-ẽŋa tɩ toogo wʋn wa’am di’ige ba wʋ pɔka virgre toogo la, la ba kãn yãŋɛ põsɛ.

⁴La yãma, m sɔbiisi, yãma dagɩ nẽrba n boe lika pʋam tɩ Zuudãana la daarɛ wʋn wa di’ige ya wʋ nayiga la. ⁵Yãma wuu de la peelem nẽrba, yãma tõoma tõnnɩ la wʋntɛɛŋa. Tõma tõoma ka tõnnɩ yʋ’ʋŋɔ, tõma dagɩ lika nẽrba. ⁶Bɛla, tɩ da gĩsra-ya wʋ nẽrba basɛba la, tɩ nẽegɛ-ya mãasʋm tara tɩ mẽŋa sõŋa. ⁷Sɛba n gĩsri, gĩsri la yʋ’ʋŋɔ, tɩ sɛba n yũuri dãam bugra, bugra yʋ’ʋŋɔ. ⁸La tõma n de wʋntɛɛŋa nẽrba la, tɩ tara tɩ mẽŋa sõŋa. La tɩ bɔ Azezi sɩra, dee tara nõŋlʋm wʋ kuto fuugo tɩ sʋdaaga dɩkɛ pĩ a yõ’ogɔ tɩ la gu’ura ẽ zɛbrɛ pʋam na. Dee basɛ tɩ fãarɛ la tɩ ya tarɩ pʋtẽ’erɛ gu’ura la, ãna wʋ kuto zuu-wannɛ gu’ura ya.

⁹Nawẽnnɛ ka looge to tɩ a sũ-isgre sã’am tɔ, a looge to tɩ tɩ yẽ la fãarɛ tɩ Zuudãana Azezi-krisi ĩyã. ¹⁰Ẽŋa n ki tɩ ĩyã, tɩ a lemŋo daarɛ, tɩ sãn vɔa mɛ bɩɩ tɩ sãn ki mɛ, tɩ wʋn bɔna la ẽ lɛ.

¹¹Bɛla, bɔ’ɔra-ya taaba bʋraanɛ, sõŋra taaba ze’ele kãŋkãŋɛ Azezi doosgo la pʋam, wʋ yãma n põn ɩta se’em na.

Kã’aŋɔ, la ba’asgɔ yetɔga

¹²M sɔbiisi, tõma sosrɩ ya mɛ tɩ ya nanna sɛba n tõnnɩ ya tẽŋasʋka la, sɛba tɩ Zuudãana looge tɩ ba bɔna ya nẽŋa pa’ala ya Azezi sore la pʋam, dee kã’ana ya la. ¹³Ẽŋɛ-ya sɛla n pa’alɩ tɩ yãma nannɩ ba mɛ, nõŋɛ ba zozo’e ba tõoma la ĩyã. Tara-ya sũ-mã’asʋm la taaba.

¹⁴M sɔbiisi, tõma sosrɩ ya mɛ tɩ ya kã’ana sɛba n ka boorɩ tɩ ba tõm na, dee bɔ’ɔra sɛba n ka tarɩ bʋraanɛ la bʋraanɛ, dee sõŋra sɛba n ka tarɩ pãŋa la, la ya mã’ara ya sũure la nẽra woo. ¹⁵Guuse-ya tɩ nẽra da lebse a tadãana be’em, be’em ĩyã, mõrgɛ-ya ɩta taaba sõŋa, la nẽrba wuu sõŋa wakatɛ wuu.

¹⁶Tara-ya sũ-yẽlga daarɛ woo. ¹⁷Pʋ’ʋsra-ya Nawẽnnɛ wakatɛ wuu da basɛ. ¹⁸Sɛla woo pʋam pʋ’ʋsra-ya Nawẽnnɛ a yel-sõnnɛ. Nawẽnnɛ boorɩ tɩ ya ɩta la bɛla Azezi-krisi doosgo pʋam. ¹⁹Da gu’ura-ya Nawẽnnɛ Sɩa tõoma. ²⁰Da pɔ’ɔra-ya yetɔg-sɛba tɩ nẽra to’oge Nawẽnnɛ zẽ’am tɔgra bɔ’ɔra ya. ²¹Magra-ya sɛla woo bɩsra la ãn se’em, to’oge sɛla n ãn sõŋa. ²²Dee lɔkra-ya yel-sɛba wuu n de be’em.

²³Nawẽnnɛ n de sũ-mã’asʋm dãana la mẽŋa wʋn basɛ tɩ ya dɛna ẽŋa mã’a nẽrba tara pʋpeelem. A wʋn gu ya ĩyã, la ya sɩa, la ya yɛm wuu tɩ ya kãn tara dõrga tɩ Zuudãana Azezi-krisi lemŋo daarɛ. ²⁴Nawẽnnɛ n looge ya la de la sɩra dãana, a wʋn ẽŋɛ bɛla.

²⁵M sɔbiisi, pʋ’ʋsra-ya Nawẽnnɛ bɔ’ɔra tɔ. ²⁶Pʋ’ʋsɛ-ya tɩ sɔbiisi la wuu la nõŋlʋm. ²⁷Mam sosrɩ ya la Zuudãana yʋ’ʋrɛ tɩ ya karẽŋɛ gõŋɔ ẽna wã tɩ sɔbiisi la wuu wõm.

²⁸Tɩ Zuudãana Azezi-krisi yel-sõnnɛ wʋn bɔna la ya.