1 Zã

Pɔspɔsɩ gõŋɔ tɩ

Azã

gʋlsɛ

Bilgre

Azã gʋlsɛ gõŋɔ wã bɔ la Azezi nẽrba. Põmpɔrŋɔ karẽnsãandõma n daan kẽ Azezi nẽrba la pʋam tara zãsŋɔ n zãarɩ ba la Azezi.

Bɛla tɩ Azã daan gʋlsɛ kã’an ba yetɩ ba ken tara lagɩmtaarɛ la Azezi, la Nawẽnnɛ, da tõnna tõon-be’ero. Nawẽnnɛ de la peelem, la nõŋlʋm dãana, tõma de la a kɔma, bɛla la masɛ mɛ tɩ tɩ vɔa peelem pʋam, dee nõŋɛ taaba.

A kã’an ba yetɩ, põmpɔrŋɔ karẽnsãandõma la n zãsnɩ tɩ Azezi-krisi n de Nawẽnnɛ Dayʋa la ka lebge nẽrsaala la, ba da to’oge ba zãsŋɔ. Tɩ bõn-ẽŋa tã wʋn sã’am ba lagɩmtaarɛ la Nawẽnnɛ mɛ.

Azezi n de yetɔga n bɔ’ɔrɩ vɔm

¹Tõma gʋlsɛ la sɛka n boe halɩ pĩ’iluŋo wakatɛ yelle bɔ’ɔra ya. A de la sɛka tɩ tõma wõm a yetɔga, yẽ ẽ la tɩ nini, bɩsɛ ẽ sõŋa sõŋa, kalʋm ẽ na tɩ nu’usi. Ẽŋa n de yetɔga n bɔ’ɔrɩ vɔm. ²Sɛka n de vɔm na puke a mẽŋa mɛ, tɩ tõma yẽ ẽ. Tɩ tõma tɔgra a yelle, mõola vɔm n ka ba’asrɩ la yelle bɔ’ɔra ya. A daan boe la tɩ Sɔ Nawẽnnɛ zẽ’am, tɩ a puke ẽ pa’alɛ tõma. ³Sɛla tɩ tõma yẽ dee wõm na, tõma tɔgrɩ la ẽŋa bɔ’ɔra yãma, tɩ yãma wʋn lagɩm na tõma, mẽ naagɛ la tõma tara lagɩmtaarɛ la tɩ Sɔ Nawẽnnɛ, la a Dayʋa Azezi-krisi. ⁴Tõma gʋlsɛ ya la wãna tɩ tɩ wʋn tara sũ-yẽlga zozo’e.

Tɩ vɔa pʋpeelem pʋam wʋ Nawẽnnɛ n ãn se’em na

⁵Kõa n wãna tɩ tõma wõm Azezi-krisi zẽ’am, tɔgra ẽ bɔ’ɔra ya: Nawẽnnɛ de la peelem, lika ka boe a zẽ’am baa fẽfẽe. ⁶Tɩ sãn yetɩ tõma tarɩ lagɩmtaarɛ la Nawẽnnɛ, dee ken vɔa lika pʋam tõnna be’em, tɩ parnɩ mɛ, tɩ ka ɩtɩ sɩra. ⁷La tɩ sãn vɔa peelem pʋam wʋ Nawẽnnɛ mẽŋa n boe peelem pʋam na, tɩ tarɩ lagɩmtaarɛ la taaba mɛ, la a Dayʋa Azezi zɩɩm peerɩ tɩ mɛ yɛsra tɩ tõon-be’ero wuu.

⁸La tɩ sãn yetɩ, tõma ka tarɩ tõon-be’ero, tɩ pã’asɛ la tɩ mẽŋa, la sɩra ka boe tɩ zẽ’am. ⁹Tɩ sãn pelge tɩ pʋʋrɛ tɔgɛ tɩ tõon-be’ero, Nawẽnnɛ wʋn basɛ tɩ tõon-be’ero taalɛ mɛ, dee peege to, yese sɛla wuu n ka masɛ, se’ere n soe la, a de la sɩra dãana dee ɩta sɛla n masɛ. ¹⁰Tɩ sãn yetɩ, tõma ka tõm tõon-be’ero, tɩ yetɩ a de la põmpɔrma, la a yetɔga la ka boe la tɩ lɛ.

Krisi n de tõma sõŋra

¹M kɔma, mam gʋlsrɩ ya wãna tɩ ya da tõm na tõon-be’ero. La nẽra sãn tõm be’em, tõma tarɩ la sõŋra n boe tɩ Sɔ Nawẽnnɛ zẽ’am, la de la Azezi-krisi n de pʋpeelem dãana. ²La de la ẽŋa n dɩkɛ a mẽŋa bɔ tɩ la dɛna kãabgɔ, tɩ Nawẽnnɛ basɛ tõma tõon-be’ero taalɛ. La, la dagɩ tõma mã’a tõon-be’ero taalɛ, la de la dũnia nẽrba wuu tõon-be’ero taalɛ.

³Tɩ sãn sakra Nawẽnnɛ nõorɛ, bɛla n pa’alɩ tɩ tɩ sɩrɩ mi ẽ. ⁴Nẽr-sɛka n yetɩ ẽŋa mi ẽ, dee ka sakra a nõorɛ, a de la põmpɔrma, la a ka tarɩ sɩra. ⁵Nẽr-sɛka n sakrɩ Nawẽnnɛ yetɔga la, nẽr-ẽŋa n tarɩ Nawẽnnɛ nõŋlʋm sɩra sɩra. Bɛla n pa’alɩ tɩ tɩ lagɩm na ẽ dɛna ayɩla. ⁶Sɛka n yetɩ ẽŋa lagɩm na Nawẽnnɛ, dẽnɩ tɩ a dãana vɔa wʋ Azezi-krisi n daan vɔa se’em na.

Nawẽnnɛ nõorɛ de la tɩ nõŋɛ taaba

⁷M sɩr-nõŋrɩsɩ, la dagɩ nõor-paalga tɩ mam gʋlsɛ bɔ’ɔra ya, a de la nõor-kɛka tɩ ya tarɩ halɩ pɔspɔsɩ la. Nõor-kɛka ẽŋa de la kõ-sɛka tɩ ya daan wõm na. ⁸La a yɛrɩ dɛna la nõor-paalga tɩ mam gʋlsɛ bɔ’ɔra ya. La de la Azezi-krisi zẽ’am, la yãma zẽ’am tɩ yel-ẽŋa de sɩra, se’ere n soe la, lika la tollɩ mɛ, dee tɩ peelem sɩra sɩra darɛ nẽera.

⁹Nẽr-sɛka n yetɩ ẽŋa boe la peelem pʋam, dee sisra a sɔbia, ken bɔna la lika pʋam. ¹⁰Nẽr-sɛka n nõŋɛ a sɔbia, vɔa la peelem pʋam, bɛla ĩyã sɛla ka boe a zẽ’am n wʋn basɛ tɩ a tuuge. ¹¹La sɛka n sisri a sɔbia, boe la lika pʋam, la a sẽnnɩ na lika pʋam, ka mina ẽn we’esɩ zẽ’a, se’ere n soe la, lika la fɔ a nini mɛ.

¹²Mam gʋlsɛ bɔ’ɔra la yãma, m kɔma, se’ere n soe la, Nawẽnnɛ basɛ ya tõon-be’ero taalɛ mɛ Azezi-krisi yʋ’ʋrɛ ĩyã.

¹³Mam gʋlsɛ bɔ’ɔra la yãma, m sɔdõma, se’ere n soe la, yãma mi sɛka n boe halɩ lan dẽŋɛ dũnia pĩ’iluŋo la mɛ.

Mam gʋlsɛ bɔ’ɔra la yãma, m kɔmbɩ’ɩsɩ, se’ere n soe la, yãma yãŋɛ be’em dãana Asũtãana la mɛ.

¹⁴Mam gʋlsɛ bɔ’ɔra la yãma, m kɔma, se’ere n soe la, yãma mi tɩ Sɔ Nawẽnnɛ mɛ.

Mam gʋlsɛ bɔ’ɔra la yãma, m sɔdõma, se’ere n soe la, yãma mi sɛka n boe halɩ lan dẽŋɛ dũnia pĩ’iluŋo la mɛ.

Mam gʋlsɛ bɔ’ɔra la yãma, m kɔmbɩ’ɩsɩ, se’ere n soe la, yãma tarɩ pãŋa mɛ, Nawẽnnɛ yetɔga la boe ya pʋam mɛ, la yãma yãŋɛ be’em dãana Asũtãana la mɛ.

Da nõŋɛ-ya dũnia

¹⁵Da nõŋɛ-ya dũnia, la bõn-sɛba n boe a pʋam na. Nẽra sãn nõŋɛ dũnia wã, Nawẽnnɛ n de tɩ Sɔ la nõŋlʋm ka boe la a dãana lɛ. ¹⁶Se’ere n soe la, bõn-sɛba n de dũnia wã bõnɔ de la nẽrsaala mẽŋa n boorɩ se’em, la nini n yẽ sɛla bɔɔra n de be’em, la nẽra n pa’alɩ a mẽŋa a bõntarsõm ĩyã. Bãma wuu ka ze’ele tɩ Sɔ Nawẽnnɛ zẽ’am, ba de la dũnia bõnɔ. ¹⁷Dũnia, la bõn-sɛba wuu tɩ nẽrba yɛmleego boorɩ la tollɩ mɛ. La nẽr-sɛka n ɩtɩ Nawẽnnɛ n boorɩ se’em n wʋn bɔna wakatɛ n ka ba’asrɩ.

Krisi sɩ’ɩsrɩba yelle

¹⁸M kɔma, lɛɛlɛ wã la de la dũnia ba’asgɔ wakatɛ. Yãma wõm tɩ ba yetɩ Krisi sɩ’ɩsra n sẽm. La lɛɛlɛ wã, Krisi sɩ’ɩsrɩba zo’oge mɛ bɔna, bɛla tõma mi mɛ tɩ la de la dũnia ba’asgɔ wakatɛ. ¹⁹Nẽr-bãma ze’ele la tõma zẽ’am yese, la ba daan dagɩ tõma nẽrba sɩra sɩra. Ba daan sãn de nɩ tõma nẽrba, ba wʋn weege nɩ bɔna la tõma zẽ’am. La ban basɛ tõma la, dẽnɩ tɩ la ẽŋɛ bɛla tɩ la pa’alɛ vẽelga tɩ ba nẽra baa ayɩla dagɩ tõma nẽra.

²⁰La sãn dɛna yãma, Krisi bɔ ya Nawẽnnɛ Sɩa mɛ, bɛla yãma wuu mi sɩra mɛ. ²¹Mam n gʋlsɛ bɔ ya la, mam ka yetɩ ya ka mi sɩra la, la tõn dɛna la yan mi ẽ na ĩyã, la yãma mi tɩ sɛla n de põmpɔrŋɔ ka ze’etɩ sɩra pʋam.

²²Ãne n de põmpɔrma la? La de la sɛka n sɩ’ɩsrɩ yetɩ Azezi dagɩ Krisi la. Ẽŋa n de Krisi sɩ’ɩsra la. A sɩ’ɩsrɩ la Sɔ Nawẽnnɛ, la a Dayʋa la. ²³Nẽr-sɛka n sɩ’ɩsrɩ Dayʋa la, mẽ ka boe la Sɔ la. La nẽr-sɛka n yetɩ ẽŋa mi Dayʋa la, mẽ boe la Sɔ la mɛ.

²⁴La sãn dɛna yãma, mõrgɛ-ya tara yetɔg-sɛba tɩ ya daan wõm halɩ pɔspɔsɩ la ya sũure pʋam. Ba sãn ken bɔna ya sũure pʋam, yãma mẽ wʋn ken bɔna la Sɔ, la Dayʋa la lɛ. ²⁵Krisi n bĩŋe nõorɛ tɩ a bɔ tɩ sɛla n wãna: La de la vɔm n ka ba’asrɩ.

²⁶La de la nẽr-sɛba n zɩgrɩ tɩ ba pã’asɛ ya tɩ ya tuuge la yelle tɩ mam gʋlsɛ wãna bɔ’ɔra ya. ²⁷La sãn dɛna yãma, Nawẽnnɛ Sɩa la tɩ ya to’oge Krisi zẽ’am na, boe la ya lɛ mɛ, yãma ka le ɛɛra tɩ ba zãsʋm ya. Nawẽnnɛ Sɩa la n boe la ya lɛ la, zãsnɩ ya sɛla woo mɛ, la de la sɩra, a ka parnɩ. Bɔna-ya la Krisi wʋ ẽn zãsnɩ ya se’em na.

²⁸Ẽe, m kɔma, bɔna-ya la ẽ lɛ, tɩ a sãn wa puke daarɛ tɩ tɩ tara sũ-ke’eŋo, tɩ yãnnɛ da yõkɛ tɔ a nẽŋam a lemŋo la daarɛ. ²⁹Yãma mi tɩ Krisi de la sɛka n masɛ, bɛla, bãŋɛ-ya tɩ nẽr-sɛka n mẽ ɩtɩ sɛla n masɛ de la Nawẽnnɛ bia.

Nawẽnnɛ kɔma

¹Bɩsɛ-ya Nawẽnnɛ n de Sɔ la n nõŋɛ tɩ se’em. A nõŋlʋm na zo’oge gãŋɛ mɛ, tɩ a wi’ira tõma tɩ a kɔma. La tõma sɩrɩ de la a kɔma. Wãna n soe tɩ dũnia dõma ka mina tõma: La de la ban ka mi Nawẽnnɛ na ĩyã. ²M sɩr-nõŋrɩsɩ, lɛɛlɛ wã tɩ de la Nawẽnnɛ kɔma. La tɩn wʋn wa ãna se’em na nãn ka puke. La tɩ mi tɩ Krisi sãn wa puke, tɩ wʋn ãna wʋ ẽŋa n ãn se’em na, tɩn wʋn wa yẽ ẽŋa n ãn se’em na ĩyã. ³Nẽr-sɛka woo n tarɩ pʋtẽ’erɛ gu’ura bõn-ẽŋa Krisi ĩyã, malgrɩ a mẽŋa mɛ dɛna pʋpeelem dãana, wʋ Azezi-krisi mẽŋa n de pʋpeelem dãana se’em na.

⁴Nẽr-sɛka woo n tõnnɩ tõon-be’ero, a sɩ’ɩsrɩ la Nawẽnnɛ nõorɛ. Se’ere n soe la, tõon-be’ero de la Nawẽnnɛ nõorɛ sɩ’ɩsgɔ. ⁵La yãma mi tɩ Azezi-krisi wa’am tɩ a yese la nẽrba tõon-be’ero basɛ, la a mẽŋa ka tarɩ tõon-be’ero. ⁶Nẽr-sɛka n lagɩm na Krisi bɔna ka tõnnɩ tõon-be’ero. La sɛka n tõnnɩ tõon-be’ero ka yẽ ẽ, la a ka bãŋɛ ẽ.

⁷M kɔma, da basɛ-ya tɩ nẽra pã’asɛ ya. Sɛka n ɩtɩ sɛla n masɛ, de la nẽra n masɛ, wʋ Azezi mẽŋa n masɛ se’em na. ⁸Sɛka n tõnnɩ tõon-be’ero de la Asũtãana nẽra, se’ere n soe la, Asũtãana tõnnɩ tõon-be’ero la halɩ pĩ’iluŋo. Tɩ Nawẽnnɛ Dayʋa la wa’am tɩ a sã’am Asũtãana tõoma.

⁹Sɛka n de Nawẽnnɛ bia ka le tõnna tõon-be’ero, se’ere n soe la, Nawẽnnɛ pãŋa n bɔ’ɔrɩ vɔm n boe a pʋam, a ka le tãna wʋn tõnna tõon-be’ero, Nawẽnnɛ n de a Sɔ la ĩyã. ¹⁰Bɛla n pa’alɩ tɩ ba bãŋra Nawẽnnɛ kɔma, la sɛba n de Asũtãana kɔma bɔkra. Sɛka n ka ɩtɩ sɛla n masɛ, bɩɩ sɛka n ka nõŋɛ a sɔbia dagɩ Nawẽnnɛ bia.

Tɩ nõŋɛ taaba

¹¹Kõ-yẽlga tɩ ya wõm halɩ pɔspɔsɩ la de la tɩ nõŋɛ-ya taaba. ¹²La ka de tɩ ãna wʋ Akãɩ la, ẽŋa de la Asũtãana nẽra, yʋʋn kʋ a yɩbga. La bẽm n soe tɩ a yʋʋn kʋ ẽ? La de la a tõoma n yʋʋn de tõon-be’ero, dee tɩ a yɩbga tõoma masɛ la ĩyã.

¹³Bɛla m sɔbiisi, dũnia nẽrba sãn sisra ya, da kãn basɛ-ya tɩ la dɛna sɛla n di’ige ya. ¹⁴Tõma mi mɛ tɩ tõma ze’ele la kũm pʋam yese bɔna vɔm pʋam, tõma n nõŋɛ tɩ sɔbiisi la ĩyã. Nẽr-sɛka n ka nõŋɛ a sɔbia ken bɔna la kũm pʋam. ¹⁵Nẽr-sɛka woo n sisri a sɔbia de la nẽr-kʋʋra. La ya mi tɩ nẽr-kʋʋra ka tarɩ vɔm n ka ba’asrɩ. ¹⁶La de la bõn-ẽna wã n botɩ tõma bãŋɛ nõŋlʋm n ãn se’em: Azezi ki mɛ bɔ tõma, bɛla, tõma mẽ de la tɩ dɩkɛ tɩ vɔm bɔ tɩ sɔbiisi ĩyã. ¹⁷Nẽra sãn tara dũnia wã bõntarsõm, dee yẽ a sɔbia n boorɩ sõŋrɛ, ka zoe a ninbãalga sõŋɛ ẽ, ẽŋa dãana ka tarɩ Nawẽnnɛ nõŋlʋm. ¹⁸M kɔma, da basɛ-ya tɩ tɩ nõŋlʋm dɛna yetɔga, la nõ-yẽlʋm mã’a, tɩ basɛ tɩ la dɛna nõŋlʋm sɩra sɩra n lagɩm na tõoma.

¹⁹Bɛla n wʋn basɛ tɩ tɩ bãŋɛ tɩ tõma de la sɩra dõma, la tɩ sũure wʋn ãna ke’eŋo Nawẽnnɛ nẽŋam. ²⁰Baa tɩ sũure sãn ka bɔ tɩ bʋʋrɔ, tɩ bãŋɛ tɩ Nawẽnnɛ gãnnɩ tɩ sũure mɛ, la a mi sɛla woo bɔkɛ mɛ. ²¹M kɔm-nõŋrɩsɩ, tɩ sũure sãn bɔ tɩ bʋʋrɔ, tɩ tarɩ sũ-ke’eŋo Nawẽnnɛ nẽŋam mɛ, ²²la bõn-sɛka wuu tɩ tɩ sosrɩ ẽ, a bɔ’ɔrɩ tɩ mɛ, tõma n sakrɩ a nõorɛ, dee ɩta sɛla n paarɩ a yɛm na ĩyã. ²³Ẽŋa n bɔ a nõorɛ se’em n wãna: La de la tɩ bɔ a Dayʋa Azezi-krisi sɩra, dee nõŋɛ taaba wʋ ẽŋa n bɔ tɩ a nõorɛ se’em na. ²⁴Nẽr-sɛka n sakrɩ Nawẽnnɛ nõorɛ la, a boe la Nawẽnnɛ lɛ, tɩ Nawẽnnɛ mẽ bɔna la ẽ. Bõn-sɛka n basɛ tɩ tõma mina tɩ Nawẽnnɛ boe la tõma lɛ n wãna: La de la a Sɩa tɩ a bɔ tõma la.

Tɩ bãŋɛ-ya Nawẽnnɛ Sɩa, la be’em dãana sɩa bɔkɛ

¹M sɩr-nõŋrɩsɩ, da bɔ-ya nẽr-sɛba wuu n yetɩ bãma tarɩ la Nawẽnnɛ Sɩa la sɩra, magɛ-ya ba bɩsɛ la sãn dɛna Nawẽnnɛ Sɩa. Se’ere n soe la, põmpɔrŋɔ nõtɔ’ɔsrɩba zozo’e n boe dũnia wã zuo. ²Bõn-sɛka n wʋn basɛ tɩ ya bãŋɛ Sɩa sɛka n de Nawẽnnɛ Sɩa n wãna: Nẽr-sɛka woo n yetɩ Azezi-krisi n wa’am dũnia zuo, la a tarɩ la nẽrsaala ĩyã, ẽŋa n tarɩ Nawẽnnɛ Sɩa. ³La sɛka n ka tɔgrɩ Azezi yelle bɛla, ka tarɩ Nawẽnnɛ Sɩa, a tarɩ la Krisi sɩ’ɩsra la sɩa. Sɩ’ɩsra ẽŋa tɩ ya daan wõm tɩ a sẽm na, la lɛɛlɛ wã, a darɛ bɔna dũnia zuo mɛ.

⁴La yãma, m kɔma, yãma de la Nawẽnnɛ nẽrba, la yãma yãŋɛ põmpɔrŋɔ nõtɔ’ɔsrɩba la mɛ. Se’ere n soe la, Nawẽnnɛ Sɩa n boe la yãma lɛ la, tarɩ pãŋa gãnna sɩ’ɩsra la sɩa n boe la dũnia dõma la mɛ. ⁵Põmpɔrŋɔ nõtɔ’ɔsrɩba la de la dũnia wã bõnɔ, bɛla n soe tɩ ba tɔgra dũnia yɛla, tɩ dũnia dõma sɛlsra ba. ⁶La sãn dɛna tõma, tõma de la Nawẽnnɛ nẽrba. Bɛla, nẽr-sɛka n mi Nawẽnnɛ selsrɩ tõma mɛ. La sɛka n dagɩ Nawẽnnɛ nẽra ka selsrɩ tõma. La de la bɛla tɩ tõma wʋn bãŋɛ sɩra Sɩa, la põmpɔrŋɔ sɩa la bɔkɛ.

Nawẽnnɛ de la nõŋlʋm dãana

⁷M sɩr-nõŋrɩsɩ, tɩ nõŋɛ-ya taaba, se’ere n soe la, nõŋlʋm ze’ele la Nawẽnnɛ zẽ’am. Nẽr-sɛka n tarɩ nõŋlʋm de la Nawẽnnɛ bia, la a mi Nawẽnnɛ mɛ. ⁸La nẽr-sɛka n ka tarɩ nõŋlʋm ka mi Nawẽnnɛ, se’ere n soe la, Nawẽnnɛ de la nõŋlʋm dãana. ⁹Nawẽnnɛ n pa’alɛ ẽŋa n nõŋɛ tõma se’em n wãna: A tõm na a Dayɔ-yẽŋa dũnia zuo, tɩ tɩ tara vɔm ẽŋa ĩyã. ¹⁰Nõŋlʋm na n doose se’em n wãna: La dagɩ tõma n dẽŋɛ nõŋɛ Nawẽnnɛ. La de la Nawẽnnɛ n nõŋɛ tõma, tõm a Dayʋa, tɩ a dɛna kãabgɔ tõma tõon-be’ero taalɛ basga ĩyã.

¹¹M sɩr-nõŋrɩsɩ, Nawẽnnɛ n nõŋɛ tɩ bɛla la, dẽnɩ tɩ tõma mẽ nõŋɛ taaba. ¹²Nẽra nẽra nãn ka yẽ Nawẽnnɛ. Tɩ sãn nõŋɛ taaba, Nawẽnnɛ boe la tɩ lɛ mɛ, la a nõŋlʋm n boe la tɩ lɛ la, de la nõŋlʋm zõnzõnnɔ.

¹³Bõn-sɛka n basɛ tɩ tõma bãŋɛ tɩ tõma boe la Nawẽnnɛ lɛ, tɩ Nawẽnnɛ mẽ bɔna la tõma lɛ n wãna: La de la a Sɩa tɩ a bɔ tõma la. ¹⁴La tõma yẽ mɛ, tɩ tõma tɔgra yetɩ, Nawẽnnɛ n de Sɔ la tõm na a Dayʋa, tɩ a dɛna dũnia Fãagra. ¹⁵Nẽr-sɛka n sakɛ yetɩ Azezi de la Nawẽnnɛ Dayʋa, Nawẽnnɛ boe la ẽ lɛ mɛ, tɩ a mẽ bɔna la Nawẽnnɛ. ¹⁶La tõma mi mɛ, dee bɔ sɩra tɩ Nawẽnnɛ nõŋɛ tõma mɛ. Nawẽnnɛ de la nõŋlʋm dãana. Nẽr-sɛka n tarɩ Nawẽnnɛ nõŋlʋm boe la Nawẽnnɛ lɛ, tɩ Nawẽnnɛ mẽ bɔna la ẽ. ¹⁷Tõma sãn tara Nawẽnnɛ nõŋlʋm zõnzõnnɔ, tɩ wʋn ãna wʋ Azezi n ãn se’em na dũnia wã zuo. Bɛla tɩ wʋn tara sũ-ke’eŋo sarɩyadia daarɛ. ¹⁸Sɛka n tarɩ nõŋlʋm ka zotɩ dabeem, nõŋlʋm zõnzõnnɔ yesrɩ la dabeem, se’ere n soe la, dabeem zʋa pa’alɩ mɛ tɩ sɩbgrɛ n boe. Sɛka n zotɩ dabeem na ka tarɩ nõŋlʋm zõnzõnnɔ.

¹⁹La sãn dɛna tõma, tõma tarɩ nõŋlʋm mɛ, se’ere n soe la, Nawẽnnɛ dẽŋɛ nõŋɛ tõma mɛ. ²⁰Nẽr-sɛka sãn yetɩ, ẽŋa nõŋɛ Nawẽnnɛ, dee sise a sɔbia, a de la põmpɔrma. Se’ere n soe la, a sãn ka nõŋɛ a sɔbia tɩ a yẽtɩ la, a ka tã wʋn nõŋɛ Nawẽnnɛ tɩ a ka yẽtɩ la. ²¹Nõorɛ sɛka tɩ Krisi bɔ tõma la n wãna: Nẽr-sɛka n nõŋɛ Nawẽnnɛ, dẽnɩ tɩ a mẽ nõŋɛ a sɔbia.

Tɩ bɔ Nawẽnnɛ Dayʋa la sɩra

¹Nẽr-sɛka woo n bɔ sɩra tɩ Azezi de la Krisi tɩ Nawẽnnɛ tõm na, de la Nawẽnnɛ bia. Nẽr-sɛka n nõŋɛ sɔ, mẽ nõŋɛ a kɔma mɛ. ²Sɛla n basɛ tɩ tõma mina tɩ tõma nõŋɛ Nawẽnnɛ kɔma n wãna: La de la tõma n nõŋɛ Nawẽnnɛ, dee sakra a nõorɛ wuu la. ³Se’ere n soe la, Nawẽnnɛ nõŋlʋm de la tɩ sakra a nõorɛ. A nõorɛ la tɩ a bɔ tɩ la ka tɔɩ. ⁴Nẽr-sɛka woo n de Nawẽnnɛ bia n yãŋrɩ dũnia be’em. Tõma n yãŋɛ dũnia be’em na, de la tõma n bɔ Azezi-krisi sɩra la. ⁵Ãne n tã wʋn yãŋɛ dũnia? La de la nẽr-sɛka n bɔ sɩra tɩ Azezi de la Nawẽnnɛ Dayʋa la mã’a.

⁶Azezi-krisi n wa’am dũnia zuo la, la doose la ko’om, la zɩɩm. La dagɩ ko’om misga la mã’a, la ken dɛna la ẽn ki tɩ a zɩɩm yese la. La de la Nawẽnnɛ Sɩa n bɔ’ɔrɩ a kaseto, Nawẽnnɛ Sɩa n de sɩra dãana la ĩyã. ⁷La de la bõn-bãna batã n bɔ’ɔrɩ kaseto. ⁸La de la Nawẽnnɛ Sɩa, la ko’om, la zɩɩm. La bãma batã kaseto de la bʋyɩla. ⁹Tõma n sakrɩ nẽrsaalba kaseto tɩ ba bɔ’ɔrɩ la, Nawẽnnɛ kaseto tarɩ pãŋa gãnna bɛla mɛ. La de la Nawẽnnɛ mẽŋa n bɔ a Dayʋa la kaseto. ¹⁰Bɛla, nẽr-sɛka n bɔ Nawẽnnɛ Dayʋa la sɩra, tarɩ kaseto ẽŋa mɛ a sũure pʋam. La nẽr-sɛka n ka bɔ Nawẽnnɛ sɩra, basɛ tɩ a ãna wʋ põmpɔrma la, ẽŋa n ka sakɛ Nawẽnnɛ n bɔ a Dayʋa la kaseto la ĩyã. ¹¹Nawẽnnɛ n bɔ kaseto la se’em n wãna: A bɔ tɩ la vɔm n ka ba’asrɩ, la vɔm ẽŋa de la a Dayʋa la ĩyã. ¹²Nẽr-sɛka tɩ a Dayʋa boe la ẽ na, tarɩ vɔm na mɛ. La nẽr-sɛka tɩ a Dayʋa ka boe la ẽ na, ka tarɩ vɔm.

Vɔm n ka ba’asrɩ

¹³Mam gʋlsɛ wãna bɔ’ɔra ya tɩ ya bãŋɛ tɩ yãma sɛba n bɔ Nawẽnnɛ Dayʋa sɩra la, tarɩ la vɔm n ka ba’asrɩ. ¹⁴Tõma sũure ãn ke’eŋo mɛ la Nawẽnnɛ, tɩ tõma mina tɩ tõma sãn sose sɛla tɩ la masɛ wʋ ẽn boorɩ se’em, a selsrɩ tõma mɛ. ¹⁵La tõma n mi tɩ a selsrɩ tõma n sosrɩ ẽ sɛla la, tõma mi tɩ a bɔ’ɔrɩ tɩ sɛla tɩ tɩ sosrɩ la mɛ.

¹⁶Nẽr-sɛka sãn yẽ a sɔbia n tõnnɩ tõon-be’ego n ka sẽm na kũm, a pʋ’ʋsɛ Nawẽnnɛ bɔ ẽ, tɩ Nawẽnnɛ wʋn bɔ ẽ vɔm. La de la tõon-be’ego sɛka n ka sẽm na kũm tɩ mam yetɩ. Tõon-be’ego n boe n sẽm na nẽra kũm, la dagɩ tõon-be’ego ẽŋa yelle tɩ mam yetɩ ya pʋ’ʋsɛ a ĩyã. ¹⁷Sɛla n ka masɛ wuu de la tõon-be’ero. La, la dagɩ tõon-be’ego woo n sẽm na kũm.

¹⁸Tõma mi tɩ nẽr-sɛka woo n de Nawẽnnɛ bia ka le tõnna tõon-be’ero. La Nawẽnnɛ Dayʋa la gu’uri ẽ mɛ, tɩ be’em dãana Asũtãana ka tãna wʋn ẽŋɛ ẽ sɛla.

¹⁹Tõma mi tɩ tõma de la Nawẽnnɛ nẽrba. La dũnia dõma wuu boe la be’em dãana Asũtãana nu’usum. ²⁰Tõma mi tɩ Nawẽnnɛ Dayʋa n wa’am wa bɔ tɩ yɛm, tɩ tɩ bãŋɛ Nawẽnnɛ n de sɩra dãana la. Tõma lagɩm na sɛka n de sɩra dãana la dɛna ayɩla, a Dayʋa Azezi-krisi ĩyã. Ẽŋa n de Nawẽnnɛ sɩra sɩra, n bɔ’ɔrɩ vɔm n ka ba’asrɩ.

²¹M kɔma, guuse-ya ya mẽŋa la baga.