1 Korẽntɩ

Pɔspɔsɩ gõŋɔ tɩ Apolɩ gʋlsɛ bɔ

Korẽntɩ dõma

Bilgre

Apolɩ yʋʋn gʋlsɛ gõŋɔ wã bɔ la Nawẽnnɛ nẽrba n boe Korẽntɩ. Apolɩ yʋʋn pɔsɛ Nawẽnnɛ tõoma la bilam, la a kẽ bilam na yʋʋnɛ la pʋsʋka (Tõoma 18:11).

Korẽntɩ yʋʋn de la tẽn-kãtɛ n boe ko-kãtɛ yʋ’ʋrɛ n de Mediterane nõorʋm, tɩ õornɔ ze’elgo zẽ’esɩ bayi bɔna mĩ, tɩ nẽrba sẽnna mĩ lɛɛbra, tɩ tẽŋa la tara bõntarsõm zozo’e. Nẽrba zozo’e n yʋʋn boe tẽŋa la pʋam n tarɩ mi’ilum, la bãŋrɛ, la sisgo buuri to’oto’ore. La ba ɩtɩ la yalsɩ, la tõon-be’ero buuri zozo’e, tɩ tõon-bãma mẽ loŋe Azezi nẽrba la.

Wakat-ẽŋa, Apolɩ yʋʋn ka le bɔna ba zẽ’am, dee wõm tɩ welgre, la tõon-be’ero n kẽ ba tẽŋasʋka. Bɛla n botɩ a fabla ba yelle, gʋlsɛ gõnnɔ bɔ ba.

A gõnnɔ la tɩ a gʋlsɛ la, bayi n boe Nawẽnnɛ gõŋɔ la pʋam n sõŋrɩ tõma, tɩ toogo sãn paagɛ tɔ, tɩ mẽ bãŋɛ tɩ wʋn ẽŋɛ se’em.

Apolɩ gʋlsɛ ba yetɩ: Nawẽnnɛ yɛm gãnnɩ nẽrsaalba yɛm mɛ, dee kã’an ba yetɩ:

Ba basɛ welgre (sapɩtrɩ 1-4),

la yalsɩ ɩrgɔ, (sapɩtrɩ 5),

la ba da le tara ba yɛla sẽnna nẽr-sɛba n ka dolɩ Nawẽnnɛ na zẽ’am mãala (6:1-11).

Dee pa’alɛ ba tɩ la masɛ mɛ tɩ ba tara ba ĩyã la tõnna bɔ’ɔra Nawẽnnɛ (6:12-20).

A ken lerge ba la sokrɩsɩ tɩ ba soke ẽ:

La de la pɔgdire yelle (sapɩtrɩ 7),

la baga nẽnnɔ yelle (sapɩtrɩ 8-10),

la Azezi kũm tẽerɛ dia yelle (sapɩtrɩ 11),

la Nawẽnnɛ Sɩa bɔ’a yelle (sapɩtrɩ 12-14),

la kũm vo’ore yelle (sapɩtrɩ 15).

Gõŋɔ la ba’asgɔ zẽ’am, a tɔgɛ la ligri tɩ ba lagsrɩ sõŋra Azezi nẽrba yelle, la ẽŋa mẽŋa sore sẽnnɛ yelle, dee pʋ’ʋsɛ ba (sapɩtrɩ 16).

Gõn-ẽna pʋam, Apolɩ pa’alɛ tɩ Nawẽnnɛ bɔ’a la wuu pʋam, nõŋlʋm n gãnnɩ ba wuu (sapɩtrɩ 13).

¹Mam Apolɩ tɩ Nawẽnnɛ wi, botɩ mam dɛna Azezi-krisi Tõntõnna wʋ ẽŋa n boorɩ se’em, la tɩ sɔbia Asostɛnɩ n gʋlsɛ gõŋɔ wã ²bɔ’ɔra yãma sɛba n de Nawẽnnɛ nẽrba n boe Korẽntɩ la. Nawẽnnɛ wi yãma tɩ ya welge la to’ore dɛna a nẽrba Azezi-krisi ĩyã. Gõŋɔ la ken dɛna la sɛba wuu n boe zẽ’a woo pʋ’ʋsra Azezi-krisi n de bãma la tõma Zuudãana la ĩyã.

³Tɩ Sɔ Nawẽnnɛ, la tɩ Zuudãana Azezi-krisi wʋn ẽŋɛ ya yel-sõnnɛ, dee bɔ ya sũ-mã’asʋm.

⁴Mam pʋ’ʋsrɩ Nawẽnnɛ wakatɛ wuu ya ĩyã, ẽn bɔ ya a yel-sõnnɛ Azezi-krisi ĩyã la. ⁵Yãma n lagɩm na Krisi dɛna ayɩla la ĩyã, tɩ Nawẽnnɛ bɔ ya bɔ’a wuu n de mi’ilum buuri wuu, la yetɔga mi’ilum wuu. ⁶Krisi kõ-yẽlga la tɩ ba tɔgɛ bɔ ya la, yãma gʋrɛ ẽ mɛ kãŋkãŋɛ. ⁷Bɛla, yãma ka koŋe bɔ’a baa ayɩla, yãma n gu’uri tɩ tɩ Zuudãana Azezi-krisi wa’am wa puke a mẽŋa la. ⁸Ẽŋa n wʋn basɛ tɩ ya ze’ele kãŋkãŋɛ ka paagɛ dũnia ba’asgɔ. Tɩ ba kãn tã’agɛ dõrɛ ya tɩ ya ẽŋɛ be’em tɩ Zuudãana Azezi-krisi lemŋo daarɛ. ⁹Nawẽnnɛ n wi ya tɩ ya lagɩm na a Dayʋa Azezi-krisi n de tɩ Zuudãana la dɛna ayɩla la, de la sɩra dãana.

Welgre Nawẽnnɛ nẽrba tẽŋasʋka

¹⁰M sɔbiisi, mam sosrɩ ya la tɩ Zuudãana Azezi-krisi yʋ’ʋrɛ tɩ ya wuu sakra taaba nõorɛ, tɩ welgre da bɔna ya tẽŋasʋka. Ẽŋɛ-ya nõorɛ ayɩla, tara pʋtẽ’erɛ ayɩla la taaba. ¹¹M sɔbiisi, se’ere n soe tɩ mam yele bɛla la, Akolowe yir-dõma basɛba n wa’am wa tɔgɛ pa’alɛ mam tɩ ka-wõm-taaba n boe ya tẽŋasʋka. ¹²Mam wõm tɩ yãma nẽrba basɛba yetɩ, bãma dolɩ la Apolɩ, tɩ basɛba yetɩ, bãma dolɩ la Apolɔsɩ, tɩ basɛba yetɩ, bãma dolɩ la Apɩyɛɛrɩ, tɩ basɛba mẽ yetɩ, bãma dolɩ la Krisi. ¹³Yãma tẽ’esɛ tɩ Krisi welse mɛ bɩɩ? Bɩɩ yãma tẽ’esɛ tɩ Apolɩ n daan ki dɔ-puurŋa zuo yãma ĩyã, bɩɩ ba mise yãma ko’om pʋam la Apolɩ yʋ’ʋrɛ?

¹⁴Mam pʋ’ʋsrɩ Nawẽnnɛ, mam n ka mise ya nẽra baa ayɩla ko’om pʋam sãn dagna Akrispusi la Agayusi la. ¹⁵Bɛla, nẽra kãn tã’agɛ yele yetɩ, ba daan mise ẽŋa ko’om pʋam la mam yʋ’ʋrɛ. ¹⁶Ẽhẽe! Mam daan ken mise la Astefanasɩ la a yir-dõma ko’om pʋam. La mam ka le mina mam sãn ken mise nẽr-sɛka. ¹⁷Krisi ka tõm mam tɩ m mise nẽrba ko’om pʋam, a tõm mam tɩ m mõolɛ la Nawẽnnɛ kõ-yẽlga bɔ nẽrba, la, la dagɩ la nẽrsaalba yɛm, tɩ la da basɛ tɩ Krisi n ki kũm dɔ-puurŋa zuo la pãŋa la lebge zãŋa.

Nawẽnnɛ yɛm gãnnɩ dũnia yɛm

¹⁸Krisi n ki kũm dɔ-puurŋa zuo yetɔga la de la yalnɛ bɔ nẽr-sɛba n ka yẽ fãarɛ la. La tõma sɛba n yẽ fãarɛ la mi tɩ la de la Nawẽnnɛ pãŋa. ¹⁹La gʋlsɛ Nawẽnnɛ gõŋɔ pʋam tɩ Nawẽnnɛ yetɩ:

«Mam wʋn sã’am yɛm dõma yɛm,

dee yese bãŋrɩba bãŋrɛ.»

²⁰Yɛm dõma yɛm võorɛ de la bẽm? Gõn-mitba mi’ilum võorɛ de la bẽm? Dũnia wã nõke’en-dõma n wẽ’erɩ nõkɛ’ɛma tɩ bãma mi yɛla zozo’e la võorɛ de la bẽm? Nawẽnnɛ pa’alɛ tɩ dũnia wã yɛm de la yalnɛ.

²¹Nawẽnnɛ n ẽŋɛ sɛla la a yɛm na, nẽrsaalba ka tã’agɛ bãŋɛ ẽ la ba mẽŋa yɛm. Bɛla tɩ Nawẽnnɛ botɩ kõ-yẽlga la mõolgɔ tɩ nẽrsaalba yetɩ la de la yalnɛ la, fãagɛ nẽr-sɛba n bɔ ẽ sɩra la. ²²Zifdõma boorɩ tɩ ba yẽ la bõn-yãlma n pa’alɛ tɩ la de la sɩra, la Grɛkɩdõma eerɩ la yɛm. ²³Tõma nõo mõolɩ la Krisi n ki kũm dɔ-puurŋa zuo la kõ-yẽlga, kõ-yẽlga ẽŋa tɩ Zifdõma dɩkɛ tɩ a dɛna pɔ’ɔrɛ yetɔga, tɩ sɛba n dagɩ Zifdõma la dɩkɛ tɩ la dɛna yalnɛ. ²⁴La Nawẽnnɛ n looge sɛba la, sɛba n de Zifdõma, la sɛba n dagɩ Zifdõma la, mi tɩ Krisi de la pãŋa dãana la yɛm dãana n ze’ele Nawẽnnɛ zẽ’am. ²⁵Bõn-sɛka tɩ Nawẽnnɛ ẽŋɛ, tɩ nẽrsaalba dɩkɛ tɩ a dɛna yalnɛ na, tarɩ yɛm mɛ gãnna nẽrsaalba yɛm. La sɛla tɩ Nawẽnnɛ ẽŋɛ tɩ nẽrsaalba tẽ’esɛ tɩ la ka tarɩ pãŋa la, tarɩ pãŋa mɛ gãnna nẽrsaalba pãŋa.

²⁶M sɔbiisi, lɛɛlɛ wã, tẽ’esɛ-ya bɩsɛ yãma tɩ Nawẽnnɛ wi la n ãn se’em. Nẽr-sɛba n tarɩ dũnia yɛm, la nẽr-sɛba n tarɩ pãŋa, la nẽrzuto ka zo’oge ya pʋam. ²⁷La Nawẽnnɛ looge sɛla tɩ dũnia dõma tẽ’esɛ tɩ la de la yalnɛ, tɩ a ẽŋɛ la yɛm dõma yãnnɛ, la a ken looge la sɛla tɩ dũnia dõma tẽ’esɛ tɩ a ka tarɩ pãŋa la, tɩ a botɩ pãnsɩ dõma n yẽ yãnnɛ. ²⁸La a looge la sɛla tɩ dũnia dõma ka bɩsrɩ, la sɛla tɩ ba nẽ’esrɩ, la sɛla tɩ ba tẽ’esɛ tɩ a de la zãŋa la, tɩ a sã’am sɛla tɩ dũnia dõma tẽ’esɛ tɩ a de la ninmõ’orɛ bõnɔ. ²⁹A ẽŋɛ bɛla tɩ nẽra n da yãŋɛ zẽkɛ a mẽŋa Nawẽnnɛ nẽŋam. ³⁰La Nawẽnnɛ n basɛ tɩ ya lagɩm na Azezi-krisi dɛna ayɩla la, ẽŋa ĩyã tɩ tɩ tara Nawẽnnɛ yɛm, dee masɛ Nawẽnnɛ nẽŋam, welge to’ore lebge a nẽrba n yese tõon-be’ero pʋam. ³¹Bɛla tɩ la gʋlsɛ Nawẽnnɛ gõŋɔ pʋam yetɩ: «Sɛka n boorɩ tɩ a wẽ yõ’ogɔ, a wẽ yõ’ogɔ la sɛla tɩ Zuudãana ẽŋɛ la.»

Apolɩ n mõolɛ Azezi-krisi kõ-yẽlga se’em

¹M sɔbiisi, mam n daan wa’am ya zẽ’am wa mõolɛ Nawẽnnɛ kõ-yẽlga n sʋgɛ bɔ ya la, la dagɩ la yetɔg-mi’ilum, bɩɩ nẽrsaalba yɛm tɩ mam mõolɛ bɔ ya. ²Se’ere n soe la, mam daan looge yɛm tɩ mam kãn mõolɛ sɛla sɛla yelle, sãn dagna Azezi-krisi yelle, ẽŋa n ki dɔ-puurŋa zuo la yelle. ³Mam n daan boe ya zẽ’am na, mam daan ka tarɩ pãŋa, tɩ dabeem daan tara mam, tɩ mam gõgra. ⁴Mam n daan mõolɛ dee zãsʋm kõ-yẽlga la, la daan dagɩ la nẽrsaalba yɛm yetɔga tɩ mam daan tɔgɛ bɔ ya tɩ ya sakɛ, mam daan tɔgɛ mɛ, tɩ Nawẽnnɛ Sɩa pa’alɛ a pãŋa, ⁵tɩ yãma n bɔ Azezi-krisi sɩra la, la dagɩ nẽrsaalba yɛm ĩyã, la de la Nawẽnnɛ pãŋa ĩyã.

Nawẽnnɛ yɛm n ãn se’em

⁶La baa bɛla, tõma tɔgrɩ la yɛm yetɔga bɔ’ɔra sɛba n bɩ Nawẽnnɛ sore la doosgo pʋam. La dagɩ dũnia wã yɛm, la mẽ ka de sɛba n soe dũnia wã yɛm. Bãma wʋn lebge la zãŋa. ⁷Tõma mõolɩ la Nawẽnnɛ yɛm n daan sʋgɛ tɩ nẽrba ka mina. Nawẽnnɛ daan põn looge yel-bãma mɛ lan dẽŋɛ dũnia pĩ’iluŋo tɩ a botɩ tɩ yẽ nã’asgɔ a zẽ’am. ⁸Sɛba n soe dũnia wã baa ayɩla ka mi yɛm ẽna wã. Ba daan sãn mi nɩ ẽ, ba kãn ka nɩ Zuudãana n tarɩ na’am pãŋa wuu la dɔ-puurŋa zuo kʋ. ⁹La de wʋ lan gʋlsɛ Nawẽnnɛ gõŋɔ pʋam se’em yetɩ:

«Bõn-sɛba tɩ Nawẽnnɛ mãasʋm tɩ a bɔ nẽr-sɛba n nõŋɛ ẽ na, gãnnɩ bõn-sɛba wuu tɩ nẽra nãn ka yẽ, bɩɩ wõm, bɩɩ tẽ’esɛ a pʋtẽ’erʋm.»

¹⁰Nawẽnnɛ botɩ a Sɩa la puke bõn-bãma pa’alɛ la tõma. Nawẽnnɛ Sɩa la mi sɛla woo mɛ, baa la Nawẽnnɛ yel-sɛba n sʋgɛ. ¹¹Ãne n mi nẽrsaala pʋtẽ’erɛ? La de la nẽrsaala mẽŋa sɩa mã’a. Bɛla, nẽra mẽ ka mi Nawẽnnɛ pʋtẽ’erɛ, sãn dagna Nawẽnnɛ Sɩa la mã’a. ¹²La sãn dɛna tõma, tõma ka to’oge dũnia wã sɩa, tõma to’oge la Nawẽnnɛ Sɩa n ze’ele a zẽ’am, tɩ tɩ yãŋɛ bãŋɛ bõn-sɛba wuu tɩ a bɔ tɔ.

¹³La tõma n tɔgrɩ yel-bãna wã, la dagɩ nẽrsaalba yɛm yetɔga, tõma tɔgrɩ la yetɔg-sɛba tɩ Nawẽnnɛ Sɩa pa’alɛ tõma, tõma tɔgrɩ la yel-sɛba n ze’ele Nawẽnnɛ Sɩa zẽ’am bɔ’ɔra nẽr-sɛba n tarɩ Nawẽnnɛ Sɩa.

¹⁴La nẽr-sɛka n ka tarɩ Nawẽnnɛ Sɩa la kãn tã’agɛ to’oge sɛla n ze’ele Nawẽnnɛ Sɩa zẽ’am, la de la yalnɛ bɔ ẽ, a kãn tã’agɛ bãŋɛ a võorɛ. Nẽr-sɛka tɩ Nawẽnnɛ Sɩa boe la ẽ lɛ mã’a n mi Nawẽnnɛ Sɩa la yelle. ¹⁵Nẽr-sɛka tɩ Nawẽnnɛ Sɩa boe la ẽ lɛ n tã wʋn bãŋɛ sɛla woo n ãn se’em bɔkɛ. La nẽra ka tã wʋn bãŋɛ ẽŋa dãana yelle bɔkɛ. ¹⁶La de wʋ lan gʋlsɛ Nawẽnnɛ gõŋɔ pʋam se’em yetɩ:

«Ãne n mi Zuudãana pʋtẽ’erɛ?

Ãne n wʋn yãŋɛ kã’an ẽ?»

La sãn dɛna tõma, tõma tarɩ la Krisi pʋtẽ’erɛ.

Sɛba n mõolɩ kõ-yẽlga la tõoma

¹M sɔbiisi, mam daan ka tã’agɛ tɔgɛ ya wʋ nẽrba n tarɩ Nawẽnnɛ Sɩa. Mam daan tɔgɛ ya wʋ nẽrba n vɔa wʋ ba mẽŋa n boorɩ se’em, wʋ ya de la bilɛɛsɩ Krisi doosgo la pʋam. ²Yãma n daan ka tã wʋn to’oge zãsŋɔ ke’eŋo n ãn wʋ di-ke’ene la ĩyã, mam daan tɔgɛ ya wʋ bilɛɛsɩ n mõgrɩ bĩ’isum dee ka paagɛ di-ke’ene dia. La baa lɛɛlɛ wã, ya ken ka paagɛ ya to’oge zãsŋɔ ke’eŋo, ³yãma n ken vɔa wʋ ya mẽŋa n boorɩ se’em na ĩyã. Ya sãn ɩta sũure zɛbra la taaba, bɛla ka pa’alɛ tɩ ya vɔa wʋ ya mẽŋa n boorɩ se’em, dee ɩta wʋ dũnia nẽrba n ɩtɩ se’em na sɩra? ⁴Ya nẽra ayɩla sãn yetɩ: «Mam dolɩ la Apolɩ», tɩ ayɩla yetɩ: «Mam dolɩ la Apolɔsɩ», ya ka ɩtɩ wʋ dũnia nẽrba la?

⁵Apolɔsɩ de la ãne? Apolɩ de la ãne? Tõma wen dɛna la Nawẽnnɛ tõntõnɩba n daan botɩ ya bɔ Azezi-krisi sɩra. Tõma nẽra woo tõnnɩ la tõon-sɛka tɩ Zuudãana la bɔ tɔ tɩ tɩ tõm. ⁶Tõma ãn wʋ kaarba la, mam sele mɛ, tɩ Apolɔsɩ basɛ ko’om. La Nawẽnnɛ n botɩ ba bɩta. ⁷Sɛka n sellɩ, la sɛka n basrɩ ko’om na de la zãŋa. Nawẽnnɛ mã’a n botɩ ba bɩta. ⁸Sɛka n sellɩ, la sɛka n basrɩ ko’om na de la ayɩla. Nawẽnnɛ wʋn yɔ nẽra woo wʋ ẽn tõm se’em na. ⁹Tõma lagɩm taaba tõnna la Nawẽnnɛ tõoma. La yãma ãn wʋ Nawẽnnɛ va’am, la ya ãn wʋ Nawẽnnɛ deego.

¹⁰Nawẽnnɛ n ẽŋɛ mam yel-sõnnɛ na ĩyã, mam tõm wʋ tõnmẽta n mi mẽa sõŋa n ẽebɛ ẽbrɛ, tɩ nẽra ayẽma mẽ dɔglɛ a zuo. La nẽra woo guuse a mẽŋa la ẽn mẽtɩ se’em na. ¹¹Nawẽnnɛ dɩkɛ la Azezi-krisi tɩ a dɛna ẽbrɛ la. Ẽbrɛ ayẽma ka le bɔna tɩ nẽra wʋn ẽebɛ. ¹²Nẽr-sɛba n mẽtɩ dɔgla ẽbrɛ la zuo la, basɛba dɩkrɩ la sãlma, bɩɩ zũuro, bɩɩ kug-sõma ligri n zo’oge mẽta dɔgla ẽbrɛ la zuo. Tɩ basɛba dɩkra dɔɔrɔ, bɩɩ mõorɔ, bɩɩ kẽnkã mẽta dɔgla. ¹³La Azezi-krisi lemŋo daarɛ, nẽra woo n tõm se’em wʋn puke mɛ peelem pʋam. La de la bugum n wʋn makɛ tõoma la, pa’alɛ nẽra woo tõoma n ãn se’em. ¹⁴Bugum na sãn ka di nẽra tõoma, a dãana wʋn to’oge yɔɔrɔ. ¹⁵La bugum na sãn di nẽra tõoma, a dãana wʋn koŋe yɔɔrɔ. La nẽra la mẽŋa wʋn yẽ fãarɛ, la a wʋn ãna wʋ a doose la bugum pʋam põsɛ.

¹⁶Ya ka mi tɩ ya de la Nawẽnnɛ deego tɩ a Sɩa bɔna ya pʋam? ¹⁷Nẽra sãn sã’am Nawẽnnɛ deego la, Nawẽnnɛ wʋn sã’am a dãana. Nawẽnnɛ deego de la a mẽŋa mã’a bõnɔ, la yãma n de a deego la.

¹⁸Nẽra da pã’asɛ a mẽŋa. Nẽra sãn bɔna ya pʋam tẽ’esɛ tɩ ẽŋa tarɩ dũnia wã yɛm, la masɛ mɛ tɩ a lebge gɔɔŋɔ dũnia wã pʋam, bɛla n wʋn basɛ tɩ a lebge yɛm dãana. ¹⁹Sɛla tɩ dũnia dõma tẽ’esɛ tɩ la de la yɛm na, de la yalnɛ Nawẽnnɛ zẽ’am. La de wʋ lan gʋlsɛ Nawẽnnɛ gõŋɔ pʋam se’em yetɩ: «Nawẽnnɛ bẽtɩ yɛm dõma mɛ yõgra ba ba yɛmkẽgsɩga la pʋam.» ²⁰La ken gʋlsɛ yetɩ: «Zuudãana mi yɛm dõma tẽ’esgɔ mɛ, a mi tɩ ba de la zãŋa.» ²¹Bɛla, nẽr-sɛka da wẽ yõ’ogɔ nẽrsaala ĩyã. Sɛla woo de la yãma bõnɔ. ²²Mam Apolɩ, bɩɩ Apolɔsɩ, bɩɩ Apɩyɛɛrɩ, bɩɩ dũnia wã, bɩɩ yõvore, bɩɩ kũm, bɩɩ sɛla n boe lɛɛlɛ wã, bɩɩ sɛla n wʋn wa wa’am, yãma n soe ba wuu. ²³La yãma, Krisi n soe ya, tɩ Nawẽnnɛ sɔna Krisi.

Azezi-krisi tõntõnɩba

¹Bɛla, dẽnɩ tɩ ya bãŋɛ tɩ tõma de la Krisi tõntõnɩba, tɩ Nawẽnnɛ dɩkɛ a yɛla n daan sʋgɛ ẽŋɛ tõma nu’usum tɩ tɩ tɔgɛ bɔ nẽrba. ²Ba sãn dɩkɛ tõonɛ ẽŋɛ nẽra nu’usum tɩ a bɩsra, ba boorɩ tɩ a dɛna la sɩra dãana. ³La sãn dɛna mam, yãma bɩɩ dũnia wã sarɩyaditba sãn tɔgra mam yelle se’em, la ka ɩtɩ mam se’ere. Mam mẽ ka diti m mẽŋa sarɩya. ⁴Mam mi m sũure pʋam tɩ mam ka ẽŋɛ sɛla n ka ãn sõŋa, la, la dagɩ bɛla n pa’alɛ tɩ mam masɛ ya. La de la Zuudãana n diti mam sarɩya. ⁵Bɛla, da dẽŋɛ-ya di nẽra sarɩya dee tɩ Zuudãana la nãn ka leme. A sãn wa leme, a wʋn dɩkɛ sɛla n sʋgɛ lika pʋam yese peelem pʋam, dee botɩ bõn-sɛba wuu tɩ nẽrsaalba tẽ’esrɩ ba sũure pʋam puke. Wakat-ẽŋa, Nawẽnnɛ wʋn pẽgɛ nẽra woo wʋ lan masɛ tɩ a pẽgɛ ẽ se’em.

⁶M sɔbiisi, mam n dɩkɛ m mẽŋa la Apolɔsɩ makɛ bɛla wuu la, la de la yãma ĩyã, tɩ tõma n ẽŋɛ se’em na wʋn dɛna zãsŋɔ bɔ ya. Tɩ ya «da ẽŋɛ yõsɛ lan gʋlsɛ Nawẽnnɛ gõŋɔ pʋam se’em na.» Bɛla, ya nẽra nẽra da zẽkɛ a mẽŋa wẽ’era yõ’ogɔ la nẽra ayɩla dee pɔ’ɔra ayẽma. ⁷Bẽm soe tɩ fõn tẽ’esɛ tɩ fõn gãnnɩ fʋ taaba? Bẽm tɩ fõn tarɩ tɩ la dagna Nawẽnnɛ n bɔ fɔ? La fʋ sãn to’oge, wãne tɩ fʋ pa’ala fʋ mẽŋa wʋ fʋ ka to’oge mɛ na?

⁸Ya tẽ’esɛ tɩ yãma põn tara Nawẽnnɛ bõntarsõm na wuu tɩ la seke mɛ. La yãma lebge la na’adõma dee tɩ tõma ka pa’asɛ. Mam boorɩ nɩ tɩ ya sɩrɩ dɛna la na’adõma, tɩ tõma mẽ po di na’am na. ⁹Mam tẽ’esɛ tɩ Nawẽnnɛ looge tõma sɛba n de a Tõntõnɩba la, tɩ tɩ bɔna la nẽrba la wuu poorʋm, ãna wʋ nẽrba tɩ ba di ba sarɩya yetɩ ba kʋ ba, tɩ dũnia dõma wuu bɩsra dee la’ara, nẽrsaalba, la malɛkadõma wuu. ¹⁰Tõma ãn wʋ zɔllɔ Krisi ĩyã, la yãma tẽ’esɛ tɩ yãma de la yɛm dõma Krisi doosgo pʋam. Ya tẽ’esɛ tɩ tõma ka tarɩ pãŋa, la yãma tarɩ pãŋa. Nẽrba pɔ’ɔrɩ tõma mɛ, la ba nã’asrɩ yãma mɛ. ¹¹Kɔm la koyũuro tarɩ tõma mɛ, tɩ tõma ka tara fu-sõma, tɩ ba nãmsra tõma, tɩ tõma ɛɛra yɛ’ɛna halɩ wa paam wakat-ẽna. ¹²La tõma tõnnɩ la tɩ yõ’ogɔ pãŋa nãmsra yẽta tɩ nõorɛ dia. Ba sãn tʋ tõma, tõma pʋ’ʋsrɩ la Nawẽnnɛ bɔ’ɔra ba. Ba sãn nãmsra tõma, tõma wĩbri mɛ. ¹³Ba sãn tɔgɛ tõma yetɔg-be’ero, tõma lebsrɩ la yetɔg-sõma. Dũnia dõma bɩsrɩ tõma, tɩ tõma ãna wʋ sɔgrɔ la, ka tara võorɛ ba zẽ’am, halɩ wa paam zĩna.

¹⁴Mam ka gʋlsɛ wãna bɔ ya tɩ m botɩ yãnnɛ yõkɛ ya, mam yetɩ m kã’an ya mɛ wʋ m kɔma tɩ m nõŋɛ la. ¹⁵Baa ya sãn tara nẽrba tʋspia tɩ ba bɩsra ya Krisi doosgo la pʋam, ya tarɩ la sɔ ayɩla mã’a. Mam n de ya sɔ Azezi-krisi doosgo la pʋam, mam n wa’am wa mõolɛ kõ-yẽlga la bɔ ya, tɩ ya yẽ vɔm na ĩyã. ¹⁶Bɛla, mam belnɩ ya mɛ tɩ ya ɩta mam n ɩtɩ se’em na. ¹⁷Bɛla tɩ mam tõm Atimõtɩ ya zẽ’am. A de la mam bi-nõŋrɛ n de sɩra dãana Zuudãana doosgo la pʋam. Ẽŋa n wʋn tẽegɛ ya mam n vɔa se’em Krisi doosgo la pʋam, la de la bõn-bãma tɩ mam zãsnɩ Azezi nẽrba n lagsrɩ zẽ’a woo la.

¹⁸Ya nẽrba basɛba tẽ’esrɩ tɩ mam kãn leme wa’am ya zẽ’am, zẽkra ba mẽnsɩ. ¹⁹La Zuudãana la sãn bɔɔra, la kãn yuuge dee tɩ mam wa’am ya zẽ’am, la mam wʋn bãŋɛ sɛla tɩ zẽk-m-mẽŋa dõma la wʋn tã’agɛ ẽŋɛ, tɩ la sãn dagna ba yetɔga la mã’a. ²⁰Se’ere n soe la, Nawẽnnɛ so’olʋm dagɩ nõorɛ yetɔga, la de la pãŋa. ²¹Yãma boorɩ la bẽm? Yãma boorɩ tɩ m wa’am na kafõbga bɩɩ? Bɩɩ m wa’am na nõŋlʋm la sũ-bʋgsʋm?

Krisi nẽra ka masɛ tɩ a ɩta yalsɩ

¹Ba tɔgrɩ tɩ ya ɩtɩ la yalsɩ, halɩ yalsɩ sɛka buuri tɩ baa sɛba n ka dolɩ Nawẽnnɛ ka sakɛ ɩta. Mam wõm tɩ ba yetɩ nẽra ayɩla n boe ya pʋam gã la a sɔ pɔga. ²Dee tɩ yãma zẽkra ya mẽŋa. La de nɩ na yãma sũure sã’am, tɩ ya yese bʋra-sɛka n ẽŋɛ yel-be’e-ẽŋa la ya tẽŋasʋka.

³Baa mam n ka boe yãma zẽ’am, mam pʋtẽ’erɛ boe la ya lɛ mɛ. La mam põn di bʋra-sɛka n ẽŋɛ yel-be’e-ẽŋa la sarɩya mɛ wʋ mam boe la yãma lɛ, ⁴yele la Zuudãana Azezi yʋ’ʋrɛ yetɩ: Yãma n lagsɛ la taaba, tɩ mam pʋtẽ’erɛ bɔna la yãma, tɩ Zuudãana Azezi pãŋa bɔna la ya lɛ la, ⁵ya yese nẽr-ẽŋa ya tẽŋasʋka basɛ Asũtãana nu’usum tɩ a sã’am a ĩyã, dee tɩ a sɩa wʋn yẽ fãarɛ tɩ Zuudãana Azezi lemŋo daarɛ.

⁶Yãma n zẽkrɩ ya mẽnsɩ la, la ka ãn sõŋa. Yãma ka mi tɩ dãbɩllɛ fẽe n botɩ borborɩ zom wuu ukra? ⁷Yese-ya tõon-be’e-ẽŋa n ãn wʋ dãbɩllɛ la ya tẽŋasʋka, bɛla tɩ ya wʋn ãna sõŋa wʋ zom paalga tɩ ba ka ẽŋɛ dãbɩllɛ ba pʋam. Ya põn ãna sõŋa wʋ borborɩ n ka tarɩ dãbɩllɛ la. Se’ere n soe la, Krisi daan sakɛ mɛ tɩ ba kʋ ẽ tõma ĩyã wʋ Zɔɔg-basɛ kibsa pebila la. ⁸Bɛla, basɛ-ya tɩ tɩ yese pʋtẽ’e-be’ero, la tõon-be’ero wuu tɩ vɔm pʋam, dee dɛna pʋpeelem dõma, la sɩra dõma wʋ ba diti Zɔɔg-basɛ kibsa la borborɩ n ka tarɩ dãbɩllɛ la.

⁹Mam n daan gʋlsɛ gõn-sɛka la, mam daan yele ya tɩ ya da lagɩm na sɛba n ɩtɩ yalsɩ. ¹⁰Mam ka tɔgrɩ nẽr-sɛba wuu n boe dũnia pʋam ɩta yalsɩ, bɩɩ nõŋɛ bõnɔ, bɩɩ dɛna nayigba, bɩɩ bag-kãabrɩba n ka dolɩ Nawẽnnɛ na yelle. Ya sãn yetɩ ya welge ya mẽŋa la bãma, dẽnɩ tɩ ya yese dũnia wã pʋam. ¹¹Mam daan gʋlsɛ bɔ ya yetɩ, ya da dɔla la nẽr-sɛka n yetɩ a mẽŋa tɩ ẽŋa dolɩ la Nawẽnnɛ dee ɩta yalsɩ, bɩɩ nõŋɛ bõnɔ, bɩɩ kãabra baga, bɩɩ tʋʋra nẽrba, bɩɩ yũura dãam bugra, bɩɩ zũura. Da põn lagɩm-ya la nẽr-ẽŋa dãana di.

^12-13La dagɩ mam n wʋn di sɛba n ka dolɩ Nawẽnnɛ na sarɩya, Nawẽnnɛ n wʋn di ba sarɩya. La de la yãma sɛba n boe la taaba la n wʋn di taaba sarɩya, wʋ lan gʋlsɛ Nawẽnnɛ gõŋɔ pʋam yetɩ: «Dige-ya tõon-be’ero dãana la ya pʋam.»

Sarɩyadia yelle

¹Ya nẽra ayɩla sãn tara yelle la a tadãana, bẽm tɩ a tarɩ ẽ wɛ’ɛsa sɛba n ka dolɩ Nawẽnnɛ zẽ’am tɩ ba ka mãalɛ yelle la, dee ka tarɩ ẽ wɛ’ɛsa Nawẽnnɛ nẽrba zẽ’am? ²Yãma ka mi tɩ Nawẽnnɛ nẽrba n wʋn wa di dũnia dõma sarɩya? La yãma sãn wʋn wa di dũnia dõma sarɩya, ya ka tã wʋn di yel-pɩg-bãna wã sarɩya? ³Yãma ka mi tɩ tõma n wʋn wa di malɛkadõma sarɩya? Lan de bɛla la, bẽm tɩ yãma ka tãna wʋn di dũnia wã yɛla sarɩya? ⁴La yãma sãn tara yel-bãna buuri la taaba, yãma tarɩ sẽnna la sɛba n ka mi Nawẽnnɛ sore yɛla la zẽ’am. ⁵Mam yetɩ ya tɩ la de la yãnnɛ bɔ ya. Bɛla, nẽra baa ayɩla ka boe yãma pʋam n tarɩ yɛm, wʋn tã’agɛ mãalɛ yel-sɛba tɩ yãma tarɩ la taaba la? ⁶La ka masɛ tɩ yãma n de sɔbiisi sãn tara yelle la taaba, ya tara taaba sẽnna sarɩyaditba n ka dolɩ Nawẽnnɛ zẽ’am.

⁷Yãma n tarɩ taaba sẽnna sarɩyadia zẽ’am na, la põn pa’alɛ tɩ ya tuuge mɛ zozo’e. Nẽra sãn ẽŋɛ ya be’em, bɩɩ zũ ya, bẽm tɩ yãma ka ɩta sugri, dee tara taaba sẽnna sarɩyadia zẽ’am? ⁸Yãma malɩn ɩta taaba la be’em, zũura taaba, yãma n de sɔbiisi Nawẽnnɛ doosgo pʋam na.

⁹Yãma ka mi tɩ tõon-be’ero dõma kãn yẽ zẽ’a Nawẽnnɛ so’olʋm pʋam? Da pã’asɛ ya mẽŋa. Nẽr-sɛba n ɩtɩ yalsɩ, bɩɩ sɛba n kãabrɩ baga, bɩɩ sɛba n gã la taaba pɔgba la taaba sɩrba, bɩɩ bʋra-sɛba n gã la taaba, ¹⁰bɩɩ nayigba, bɩɩ sɛba n nõŋɛ bõnɔ, bɩɩ sɛba n yũuri dãam bugra, bɩɩ sɛba n tʋʋrɩ nẽrba, bɩɩ fãarba, bãma kãn kẽ Nawẽnnɛ so’olʋm pʋam. ¹¹Yãma nẽrba basɛba daan ãn na bɛla. La Nawẽnnɛ Sɩa peege yãma tõon-be’ero mɛ botɩ ya lebge Nawẽnnɛ nẽrba, masɛ a zẽ’am Zuudãana Azezi-krisi yʋ’ʋrɛ ĩyã.

Dɩkɛ ya ĩyã nã’asɛ Nawẽnnɛ

¹²Yãma nẽrba basɛba yetɩ: «Mam tarɩ sore wʋn ẽŋɛ sɛla woo mɛ.» La mam yetɩ ya tɩ dagɩ sɛla woo n tarɩ yõorɔ. Mam mẽ tarɩ sore wʋn ẽŋɛ sɛla woo mɛ. La mam kãn sakɛ lebge sɛla baa ayɩla yamŋa. ¹³Yãma yetɩ, dia boe la pʋʋrɛ ĩyã, tɩ pʋʋrɛ mẽ bɔna dia ĩyã. La de la sɩra, la Nawẽnnɛ wʋn sã’am bãma bayi la wuu mɛ. La nẽrsaala ĩyã ka boe yalsɩ ĩyã, a boe la Zuudãana ĩyã. Tɩ Zuudãana mẽ sɔna ĩyã la. ¹⁴Nawẽnnɛ n vo’oge tɩ Zuudãana Azezi la, ẽŋa n wʋn ken vo’oge tõma la a pãŋa. ¹⁵Yãma ka mi tɩ ya ĩyã la de la Azezi-krisi ĩyã la zẽ’a ayɩla? Bɛla, la ãn sõŋa tɩ nẽra dɩkɛ Krisi ĩyã zẽ’a ayɩla la sẽŋɛ ka lagɩm na pɔg-yalsɩ dõma mɛ bɩɩ? Ayɛɩ, la põn ka masɛ. ¹⁶Ya ka mi tɩ sɛka n lagɩm a mẽŋa la pɔg-sɛka n ɩtɩ yalsɩ, ẽŋa la pɔka la lebge la ĩyã ayɩla? La gʋlsɛ Nawẽnnɛ gõŋɔ pʋam yetɩ, bʋraaga la pɔka sãn lagɩm taaba, bãma bayi lebge la ayɩla. ¹⁷La sɛka n lagɩm a mẽŋa la Zuudãana la, Nawẽnnɛ Sɩa botɩ a lebge la ayɩla la Zuudãana. ¹⁸Zoe-ya yalsɩ. Tõon-be’e-sɛba wuu tɩ nẽrsaala ɩtɩ la ka boe a ĩyã pʋam. La tõon-be’e-sɛka n de yalsɩ la boe la nẽrsaala ĩyã pʋam. ¹⁹Ya ka mi tɩ ya ĩyã la de la Nawẽnnɛ Sɩa deego? Nawẽnnɛ Sɩa la tɩ a bɔ ya la boe ya pʋam mɛ, ya ka soe ya mẽŋa. ²⁰Nawẽnnɛ da ya la da’aga n de toogo, bɛla, dɩkɛ-ya ya ĩyã, nã’asra Nawẽnnɛ.

Pɔgdire yelle

¹Mam yetɩ m lerge la yãma n daan gʋlsɛ soke mam se’em na: «La ãn sõŋa tɩ bʋraaga da di pɔga.» ²La, lan wʋn ẽŋɛ se’em tɩ ya da ẽŋɛ yalsɩ, bʋraaga woo di a pɔga, tɩ pɔka woo mẽ ele a sɩra. ³La bʋraaga bɔ a pɔga lan masɛ tɩ a bɔ ẽ sɛla la, tɩ pɔka mẽ bɔ a sɩra lan masɛ tɩ a bɔ ẽ sɛla la. ⁴Se’ere n soe la, pɔka ka soe a mẽŋa ĩyã. La de la a sɩra n soe ẽ. La bʋraaga mẽ ka soe a mẽŋa ĩyã. La de la a pɔga n soe ẽ. ⁵Pɔka la a sɩra da zagsɛ tɩ bãma kãn gã la taaba, sãn dagna tɩ ya ẽŋɛ la nõorɛ ayɩla looge wakatɛ fẽe tɩ ya pʋ’ʋsɛ Nawẽnnɛ, bɛla poorʋm ya le lagɩm na taaba tɩ Asũtãana da botɩ ya ẽŋɛ be’em, ya sãn ka tã’agɛ yõkɛ ya mẽŋa. ⁶Mam n yele ya se’em wã, la dagɩ pẽrgrɛ, la de la sore tɩ mam pa’alɛ ya. ⁷La sãn dɛna mam tẽ’esgɔ, nẽra woo sãn dɛna dakõorɛ wʋ mam n ãn se’em wã, la ãn sõŋa. La nẽrsaala woo tarɩ la a bɔ’a tɩ Nawẽnnɛ bɔ ẽ. Ayɩla tarɩ la bɔ’a ayẽma, tɩ ayẽma mẽ tara bɔ’a ayẽma.

⁸Mam yetɩ sɛba n ka tara pɔgba bɩɩ n ka tara sɩrba, la pɔkõpa yetɩ, ba sãn ken bɔna bãma bayɩla mã’a wʋ mam n ãn se’em na, la ãn sõŋa. ⁹La ba sãn ka tãna wʋn yõkɛ ba mẽŋa, ba di pɔgba, bɩɩ ba ele sɩrba. La ãn sõŋa tɩ ya di pɔgba, bɩɩ ya ele sɩrba, sõna yãma n zĩ tɩ a yɛmleego tara ya nãmsra. ¹⁰La sãn dɛna sɛba n tarɩ pɔgba bɩɩ n tarɩ sɩrba la, mam yetɩ ya la wãna: La, la dagɩ mam mẽŋa nõorɛ, la de la Zuudãana Azezi nõorɛ: Pɔka da basɛ a sɩra. ¹¹La a sãn basɛ a sɩra, a zẽa, a da le bɔta bʋraasɩ, bɩɩ ẽŋa la a sɩra la mãalɛ ba yelle la le naagɛ taaba. Bʋraaga mẽ da lebse a pɔga.

¹²La sãn dɛna nẽrba basɛba la, mam yetɩ la wãna: La de la mam mẽŋa n yele, la dagɩ Zuudãana nõorɛ: Bʋraaga n dolɩ Azezi sore sãn tara pɔga n ka dolɩ Azezi sore, dee sakɛ tɩ a bɔna la ẽ, a da lebse ẽ. ¹³La pɔka n dolɩ Azezi sore sãn tara sɩra n ka dolɩ Azezi sore, dee sakɛ tɩ a bɔna la ẽ, a da basɛ ẽ. ¹⁴Sɩra n ka dolɩ Azezi sore ãn sõŋa mɛ, a pɔga n de Nawẽnnɛ nẽra la ĩyã. La pɔka n ka dolɩ Azezi sore ãn sõŋa mɛ, a sɩra n de Nawẽnnɛ nẽra la ĩyã. Bɛla ba kɔma wʋn ãna sõŋa mɛ, sãn dagna bɛla, ba kɔma wʋn ãna wʋ nẽr-sɛba n ka dolɩ Nawẽnnɛ kɔma. ¹⁵La sɛka n ka dolɩ Azezi sore la, sãn bɔɔra tɩ a basɛ sɛka n dolɩ Azezi sore la, a basɛ ẽ tɩ a fõrgɛ. La sãn dɛna bɛla, la ka de pẽrgrɛ tɩ pɔka bɩɩ bʋraaga n dolɩ Azezi sore bɔna la sɛka n ka dolɩ Azezi sore. Nawẽnnɛ wi to tɩ tɩ vɔa la sũ-mã’asʋm la taaba. ¹⁶Pɔka, fõn ẽŋɛ la wãne bãŋɛ fõn sãn wʋn tã’agɛ botɩ fʋ sɩra la yẽ fãarɛ? Bɩɩ bʋraaga, fõn ẽŋɛ la wãne bãŋɛ fõn sãn wʋn tã’agɛ botɩ fʋ pɔga la yẽ fãarɛ?

Sɛla n tarɩ yõorɔ de la Nawẽnnɛ sakrɛ

¹⁷Sɛla n ãn sõŋa de la nẽra woo vɔa wʋ ẽn daan ãn se’em tɩ Nawẽnnɛ wi ẽ na, wʋ Zuudãana n bɔ ẽ tɩ a vɔa se’em na. La de la bɛla tɩ mam pa’alɩ Nawẽnnɛ nẽrba n boe zẽ’esɩ wuu tɩ ba ɩta. ¹⁸Nẽr-sɛka sãn wã, dee tɩ Nawẽnnɛ wi ẽ, a da ɛɛra tɩ a sʋgɛ wãaga la. Nẽr-sɛka n mẽ ka wã, dee tɩ Nawẽnnɛ wi ẽ, a da wã. ¹⁹Sɛka n wã, bɩɩ sɛka n ka wã, ba wuu ka tarɩ yõorɔ. Sɛla n tarɩ yõorɔ de la Nawẽnnɛ nõorɛ sakrɛ. ²⁰Nẽra woo ken ãna wʋ ẽn daan ãn se’em tɩ Nawẽnnɛ wi ẽ na. ²¹Fʋ daan sãn dɛna la yamŋa tɩ Nawẽnnɛ wi fo, da basɛ tɩ fʋ yɛm yɔɔra. La sore sãn wa bɔna tɩ fʋ wʋn to’oge fʋ mẽŋa, fʋ doose bilam to’oge fʋ mẽŋa. ²²La nẽr-sɛka n de yamŋa tɩ Zuudãana la wi ẽ, a de la nẽra tɩ Zuudãana botɩ a to’oge a mẽŋa. Bɛla mẽ, nẽr-sɛka n dagɩ yamŋa tɩ Zuudãana Krisi wi ẽ, a de la Krisi yamŋa. ²³Nawẽnnɛ da ya la toogo, bɛla da lebge-ya nẽrba yamsɩ. ²⁴Bɛla ĩyã, m sɔbiisi, nẽra woo vɔa Nawẽnnɛ nẽŋam wʋ ẽn daan ãn se’em tɩ Nawẽnnɛ wi ẽ na.

Apolɩ le tɔgɛ pɔgdire yelle

²⁵Mam yetɩ m tɔgɛ la sɛba n ka tarɩ sɩrba bɩɩ pɔgba la yelle, mam ka to’oge nõorɛ Zuudãana Azezi zẽ’am. La de la mam mẽŋa pʋtẽ’erɛ, la ya wʋn bɔ mam sɩra Zuudãana la n zoe mam ninbãalga la ĩyã. ²⁶Yel-sɛba n boe lɛɛlɛ wã ĩyã, mam tẽ’esɛ tɩ la ãn sõŋa tɩ nẽra woo ken ãna wʋ ẽn ãn se’em na. ²⁷Fʋ sãn tara pɔga, da ɛɛra tɩ fʋ lebse ẽ. La fʋ sãn ka tara pɔga, da ɛɛra tɩ fʋ di pɔga. ²⁸La fʋ sãn di pɔga, la dagɩ be’em. La pug-sɛka n mẽ ele sɩra, la dagɩ be’em. Nẽr-sɛba n tarɩ pɔgba, bɩɩ sɩrba la wʋn yẽ la sũ-sã’aŋɔ dũnia wã pʋam, bɛla tɩ mam ka bɔɔra tɩ yel-bãma paagɛ ya.

²⁹M sɔbiisi, mam n yetɩ ya se’em n wãna: Wakat-sɛka tɩ Nawẽnnɛ bɔ tɔ la ka le zo’oge. Lan pɔsɛ lɛɛlɛ wã, la ãn sõŋa tɩ sɛba n tarɩ pɔgba la, ãna wʋ ba ka tarɩ pɔgba, ³⁰tɩ sɛba n kellɩ, ãna wʋ ba ka kellɩ, tɩ sɛba n ɩtɩ sũ-yẽlga, ãna wʋ ba ka ɩtɩ sũ-yẽlga, tɩ sɛba n da’arɩ, ãna wʋ ba ka tarɩ sɛla tɩ ba da’arɩ la. ³¹Tɩ sɛba n yẽtɩ dũnia bõntarsõm, ãna wʋ ba ka yẽtɩ bõntarsõm. Se’ere n soe la, dũnia wã n ãn se’em wã tollɩ mɛ.

³²Mam ka boorɩ tɩ ya yɛm yɔɔra la sɛla sɛla. Sɛka n ka tarɩ pɔga dɩkrɩ a pʋtẽ’erɛ wuu tõnna la Zuudãana la tõoma, a eerɩ la ẽŋa n wʋn ẽŋɛ se’em tɩ la ãna Zuudãana la sũure yẽlʋm. ³³La sɛka n di pɔga, dũnia yɛla n pakɛ ẽ, a eerɩ la ẽŋa n wʋn ẽŋɛ se’em tɩ la ãna a pɔga sũure yẽlʋm. ³⁴Bɛla, a pʋtẽ’erɛ n boorɩ se’em na pʋɩ mɛ. La pɔka bɩɩ pugla n mẽ ka tarɩ sɩra dɩkrɩ a pʋtẽ’erɛ wuu tõnna la Zuudãana la tõoma, a eerɩ la ẽŋa n wʋn ẽŋɛ se’em, tɩ a ĩyã, la a sɩa wʋn wa dɛna Nawẽnnɛ bõnɔ. La sɛka n tarɩ sɩra, dũnia yɛla n pakɛ ẽ, a eerɩ la ẽŋa n wʋn ẽŋɛ se’em, tɩ la ãna a sɩra sũure yẽlʋm. ³⁵La de la yãma sõŋrɛ ĩyã tɩ mam yele bɛla. Mam ka boorɩ tɩ m mõrgɛ ya dɩkɛ yelle dɔglɛ ya zuto. Mam boorɩ tɩ ya tõm na sɛla n ãn sõŋa, la ya dɩkɛ ya mẽŋa wuu bɔ Zuudãana la, tõnna a tõoma.

³⁶La sãn dɛna sɛba n lɛgrɩ pugunto tɩ ba di la, sɛka sãn tẽ’esɛ tɩ ẽŋa sãn basɛ a zɛba la ka di ẽ, ẽŋa ẽŋɛ ẽ na be’em, dee tɩ a yɛmleego tara ẽ, a di ẽ wʋ ẽn tẽ’esɛ se’em na, tɩ la dagɩ be’em. ³⁷La nẽr-sɛka sãn tẽ’esɛ a pʋtẽ’erʋm sõŋa sõŋa tɩ ẽŋa kãn di ẽ, tɩ pẽrgrɛ ka bɔna mĩ, a sãn wʋn tã’agɛ yõkɛ a mẽŋa, a ẽŋɛ wʋ ẽn tẽ’esɛ se’em na, tɩ la ãn sõŋa. ³⁸Bɛla, nẽr-sɛka n di pɔga, a ẽŋɛ sõŋa. La nẽr-sɛka n mẽ ka di pɔga, a ẽŋɛ sõŋa gãnna.

³⁹Pɔg-sɛka n ele, dẽnɩ tɩ a bɔna la a sɩra lɛ, ẽn ken vɔa wakatɛ la. La a sɩra la sãn ki, sore boe mɛ tɩ a le ele nẽr-sɛka tɩ a boorɩ, la dẽnɩ tɩ a dɛna nẽra n dolɩ Zuudãana Azezi sore. ⁴⁰La mam tẽ’esɛ tɩ a sãn ka le ele sɩra, a sũure wʋn ãna yẽlʋm gãnna ẽn ele. Mam tẽ’esɛ tɩ mam tarɩ la Nawẽnnɛ Sɩa pa’ala ya.

Baga nẽnnɔ yelle

¹La sãn dɛna bõn-sɛba tɩ ba dɩkɛ kãabɛ bɔ baga la nẽnnɔ yelle, tɩ mi tɩ tɩ wuu tarɩ bãŋrɛ mɛ, wʋ yãma n yele se’em na. La bãŋrɛ botɩ nẽra zẽkra la a mẽŋa. La nõŋlʋm sõŋrɩ nẽrba mɛ. ²Nẽr-sɛka sãn tẽ’esɛ tɩ ẽŋa mi sɛla, a ken ka mina wʋ lan masɛ tɩ a mina se’em. ³La nẽra sãn nõŋɛ Nawẽnnɛ, Nawẽnnɛ mi ẽ mɛ.

⁴Bɛla, la sãn dɛna baga nẽnnɔ na yelle, tɩ mi tɩ baga de la sɛla n de zãŋa dũnia wã zuo, dee ken mina tɩ Nawẽnnɛ ayɩla mã’a n boe. ⁵Bõndõma n boe saazuum bɩɩ tẽŋa zuo, tɩ nẽrsaalba wi’iri tɩ wẽna. Asɩra, bõndõma zozo’e n boe tɩ nẽrsaalba wi’iri tɩ wẽna, bɩɩ zuudãandõma. ⁶La tõma mi tɩ Nawẽnnɛ ayɩla n boe dɛna tɩ Sɔ n nãam sɛla woo, la ẽŋa ĩyã tɩ tɩ vɔa. La tõma ken mina tɩ Zuudãana ayɩla mã’a n boe, a de la Azezi-krisi, la doose la ẽŋa tɩ sɛla woo bɔna, la ken doose la ẽŋa tɩ tɩ tara vɔm.

⁷La, la dagɩ nẽra woo n mi wãna. Nẽrba basɛba malʋm baga mɛ, tɩ halɩ la zĩna ba sãn obe baga nẽnnɔ, ba ken tẽ’esra a yelle mɛ tɩ la sɩrɩ de la baga dia. La ban ka mi Nawẽnnɛ sore yɛla sõŋa la, ba tẽ’esrɩ ba sũure pʋam tɩ ba ẽŋɛ la be’em. ⁸La dagɩ dia n wʋn botɩ tɩ lɛm Nawẽnnɛ. Tɩ sãn ka di, sɛla ka pɔ’ɔrɩ tɔ, la tɩ sãn di, a ka pa’asrɩ tɩ sɛla.

⁹La guuse ya mẽŋa, tɩ yan tarɩ nõorɛ dita sɛla woo la, da basɛ tɩ nẽr-sɛba n ka tarɩ pãŋa Nawẽnnɛ sore doosgo pʋam na tõm tõon-be’ero. ¹⁰Nẽr-sɛka n ka mi Nawẽnnɛ sore yɛla sõŋa la, sãn yẽ fõn tarɩ bãŋrɛ la n zĩ baga kãabgɔ zẽ’am ɔbra nẽnnɔ, la wʋn pã’asɛ ẽ tɩ a mẽ obe la baga nẽnnɔ. ¹¹Bɛla, fõn bãŋrɛ la wʋn basɛ tɩ nẽr-ẽŋa n ka tarɩ pãŋa Nawẽnnɛ sore doosgo pʋam na sã’am mɛ, a de la fʋ sɔbia tɩ Krisi ki a ĩyã. ¹²Fʋ sãn tõm tõon-be’e-ẽna sã’am fʋ sɔbia n ka mi Nawẽnnɛ sore yɛla sõŋa pʋtẽ’erɛ, fʋ ẽŋɛ la Krisi be’em. ¹³Bɛla, la sãn dɛna dia n wʋn basɛ tɩ mam sɔbia tõm tõon-be’ero, mam kãn le malɩn di ẽ, tɩ m da basɛ tɩ m sɔbia tõm tõon-be’ero.

Apolɩ basɛ ẽn tarɩ sore wʋn ẽŋɛ sɛla

¹Mam ka soe m mẽŋa tãna wʋn ẽŋɛ mam n boorɩ se’em mɛ bɩɩ? Mam dagɩ la Krisi Tõntõnna bɩɩ? Mam daan ka yẽ tɩ Zuudãana Azezi mɛ bɩɩ? La dagɩ tõon-sɛba tɩ mam tõnnɩ bɔ’ɔra Zuudãana la n basɛ tɩ yãma bɔ ẽ sɩra? ²Baa nẽrba basɛba sãn ka sakɛ tɩ mam de Krisi Tõntõnna, yãma masɛ mɛ tɩ ya sakɛ. Yãma n dolɩ Krisi sore la, n de sɛla n pa’alɛ tɩ mam de Krisi Tõntõnna. ³Sɛba n zɛrgrɩ mam na, mam tɔgrɩ la wãna lɛrgra ba. ⁴Tõma ka tarɩ sore tɩ ba bɔ tɩ dia la ko’om tɩ tõoma la ĩyã? ⁵Tõma ka tarɩ sore wʋn di pɔgba n dolɩ Nawẽnnɛ sore tɩ ba dɔla tɩ ɛɛra wʋ tɩ Tõntõn-taaba, la Zuudãana yɩbsɩ, la Apɩyɛɛrɩ n ɩtɩ se’em na bɩɩ? ⁶Yãma tẽ’esɛ tɩ mam na Abarnabasɩ mã’a n de tɩ tõnna tɩ mẽŋa dita bɩɩ? ⁷Ãne n de sʋdaaga dee bɩsra a mẽŋa dia yelle? Ãne n sele tɩɩsɩ dee ka dita ba biɛ? La ãne n gu’uri dũnsi dee ka dita ba ɩɩlʋm?

⁸Mam ka yele bɛla la nẽrsaala pʋtẽ’erɛ mã’a. Nawẽnnɛ lɔɔ la mẽ yele la bɛla. ⁹La gʋlsɛ lɔɔ tɩ Nawẽnnɛ yʋʋn bɔ Amoyisi gõnnɔ la pʋam yetɩ: «Da ẽŋɛ-ya naafɔ n kɔɔrɩ nõorɛ yʋka.» La de la niigi yelle mã’a tɩ Nawẽnnɛ yʋʋn tɔgɛ bɩɩ? ¹⁰Ayɛɩ, la de la tõma yelle tɩ la gʋlsɛ bɛla. Bɛla nẽr-sɛka n kɔɔrɩ tarɩ pʋtẽ’erɛ tɩ a wʋn yẽ mɛ, tɩ sɛka n wẽ’erɩ bõnkɔɔla mẽ tarɩ pʋtẽ’erɛ tɩ a wʋn yẽ, dẽnɩ tɩ ba wuu yẽ ba pʋrɛ. ¹¹Tõma n mõolɛ Nawẽnnɛ yetɔga la bɔ ya la, la ãn wʋ bõnbuuri tɩ tõma bʋrɛ. Bɛla, la masɛ mɛ tɩ ya looge ya bõntarsõm na sõŋɛ tõma wʋ bõnkɔɔla pʋrɛ tɩ ya bɔ tõma. ¹²Nẽrba basɛba sãn tara nõorɛ tɩ ba to’oge yãma bõntarsõm, tõma n tarɩ nõorɛ tɩ tɩ to’oge yãma bõntarsõm gãnna. La tõma ka to’oge ya sɛla wʋ tõma n tarɩ nõorɛ se’em na, tõma sakɛ nãmsgɔ mɛ sɛla woo pʋam, tõma ka boorɩ tɩ tɩ gu Krisi kõ-yẽlga la mõolgɔ.

¹³Yãma ka mi tɩ sɛba n tõnnɩ Wẽnde-kãtɛ la pʋam, diti la bilam? La tɩ sɛba n kãabrɩ bɔ’ɔra Nawẽnnɛ na, to’orɩ ba pʋrɛ la kãabgɔ zẽ’a na? ¹⁴Bɛla, Zuudãana la bɔ nõorɛ mɛ tɩ sɛba n mõolɩ kõ-yẽlga la, mẽ tɔ’ɔra ba dia bilam.

¹⁵La mam ka to’oge ya sɛla baa ayɩla wʋ mam n tarɩ nõorɛ se’em na. La mam ka gʋlsɛ bɛla mẽ yetɩ ya bɔ mam sɛla. Baa mam sãn wʋn ki sõɩ, tɩ nẽra da wa basɛ tɩ mam ka tara yẽsõm. ¹⁶Mam n mõolɩ Nawẽnnɛ kõ-yẽlga la, mam ka tã wʋn wẽ m yõ’ogɔ a ĩyã. La de la pẽrgrɛ tɩ mam mõolɛ. Mam sãn ka mõolɛ kõ-yẽlga la, mam wʋn yẽ la toogo. ¹⁷La sãn de nɩ la mam mẽŋa n looge yɛm mõola kõ-yẽlga la, mam wʋn to’oge nɩ la yɔɔrɔ. La, lan de pẽrgrɛ tɩ mam mõolɛ la, la de la tõonɛ tɩ Nawẽnnɛ dɩkɛ dɔglɛ mam zuo. ¹⁸Bɛla, bẽm n de mam yɔɔrɔ? La de la mam n mõolɩ kõ-yẽlga la bɔ’ɔra nẽrba zãŋa, dee ka tɔ’ɔra ba sɛla wʋ mam tarɩ nõorɛ se’em na.

¹⁹Mam soe m mẽŋa mɛ, mam dagɩ nẽra yamŋa. La baa bɛla, mam dɩkɛ m mẽŋa lebge la nẽrba wuu yamŋa, tɩ m tã’agɛ botɩ ba nẽrba zozo’e dɔla Krisi. ²⁰Mam sãn bɔna Zifdõma zẽ’am, mam vɔa wʋ Zifdõma la, tɩ m tã’agɛ botɩ ba doose Azezi. Amoyisi lɔɔ la ka le tara nõorɛ la mam, la mam sãn bɔna la nẽr-bãma n dolɩ lɔɔ la, mam sakrɩ lɔɔ wʋ bãma la, tɩ m botɩ sɛba n dolɩ lɔɔ la doose Azezi. ²¹La mam sãn bɔna nẽr-sɛba n ka dolɩ lɔɔ la zẽ’am, mam vɔa wʋ nẽr-sɛba n ka dolɩ lɔɔ la, tɩ m botɩ ba doose Azezi. La bɛla ka pa’alɛ tɩ mam ka dolɩ Nawẽnnɛ lɔɔ la. Mam dolɩ la Krisi lɔɔ. ²²Mam sãn bɔna la nẽr-sɛba n ka tarɩ pãŋa Nawẽnnɛ sore doosgo pʋam, mam vɔa wʋ bãma, tɩ m sõŋɛ ba tɩ ba da basɛ Nawẽnnɛ sore. Mam ɩtɩ sɛla woo la bɛla bɔ’ɔra nẽrba buuri wuu, ɩta mam wʋn ẽŋɛ se’em tɩ m tã’agɛ fãagɛ ba nẽrba basɛba. ²³Nawẽnnɛ kõ-yẽlga la ĩyã tɩ mam ɩta bɛla wuu tɩ m wa po to’oge a pʋrɛ.

²⁴Yãma mi tɩ zʋa pʋam, zɔtba la wuu lagɩm zɔta mɛ, la ba nẽra ayɩla mã’a n wʋn zoe yãŋɛ to’oge bɔ’a. Bɛla, mõrgɛ-ya wʋ zɔtba n zotɩ se’em na, tɩ ya yãŋɛ to’oge bɔ’a Nawẽnnɛ zẽ’am. ²⁵Zɔtba wuu yõkrɩ ba mẽŋa mɛ sɛla woo pʋam tɩ ba to’oge bɔ’a n kãn yuuge dee sã’am. La tõma yõkrɩ tɩ mẽŋa tɩ tɩ wa to’oge la bɔ’a n kãn malɩn sã’am. ²⁶Bɛla n soe tɩ mam ka zɔta yoo yoo, la mam ka zɛbrɩ yoo yoo wʋ nẽra n wẽ’erɩ kʋsebgo. ²⁷Mam mõrgrɩ m ĩyã mɛ tara m mẽŋa sõŋa sõŋa. Se’ere n soe la, mam ka boorɩ tɩ mam n mõolɩ kõ-yẽlga la bɔ’ɔra nẽrba la, mam mẽŋa wa koŋe yɔɔrɔ Nawẽnnɛ zẽ’am.

Ɩsrayɛlɩ dõma mãmsgɔ

¹M sɔbiisi, mam boorɩ tɩ ya tẽ’esɛ la tɩ yaabdõma n yʋʋn dolɩ Amoyisi la yelle. Ba wuu yʋʋn boe la sawatɛ la tẽŋa, la ba wuu yʋʋn doose la ko-kãtɛ la pʋam tole. ²La ãn wʋ Nawẽnnɛ yʋʋn mise ba mɛ sawatɛ la pʋam, la ko-kãtɛ la pʋam tɩ ba dɛna ayɩla la Amoyisi. ³Ba wuu yʋʋn di la dia ayɩla, dee yũ ko’om ayɩla n ze’ele Nawẽnnɛ zẽ’am. ⁴Ba yʋʋn yũ la ko’om n yesrɩ tãmpĩa tɩ Nawẽnnɛ bɔ ba pʋam. Tãmpĩ-ẽŋa yʋʋn de la Krisi n dolɩ ba. ⁵La baa bɛla, ba nẽrba zozo’e yʋʋn ka ɩtɩ sɛla n masɛ Nawẽnnɛ yɛm, tɩ a basɛ tɩ ba ki weego la pʋam. ⁶Bõn-bãna wuu ẽŋɛ tɩ la pa’alɛ la tõma, tɩ tɩ da bɔɔra tɩ ẽŋɛ be’em wʋ bãma la. ⁷Da dɔla-ya baga wʋ bãma basɛba n yʋʋn ẽŋɛ se’em na. La gʋlsɛ Nawẽnnɛ gõŋɔ pʋam yetɩ: «Nẽrba la zĩ’ire mɛ di dee yũ, dee isge dɛ’ɛna.» ⁸Tɩ da ɩta yalsɩ wʋ bãma basɛba n yʋʋn ẽŋɛ se’em, tɩ ba nẽrba tʋspisyi la atã ki daarɛ ayɩla la. ⁹Tɩ da makɛ-ya tɩ Zuudãana la bɩsɛ wʋ bãma basɛba n yʋʋn ẽŋɛ se’em, tɩ bõnsɛ’ɛdõma kʋ ba la. ¹⁰Tɩ da yõnna-ya la Nawẽnnɛ wʋ bãma basɛba n yʋʋn yõm se’em, tɩ kũm malɛka kʋ ba la.

¹¹Bõn-bãma wuu yʋʋn ẽŋɛ tɩ yaabdõma tɩ la dɛna la mãmsgɔ bɔ nẽrba basɛba. La ba gʋlsɛ bɛla, tɩ la dɛna la zãsŋɔ bɔ tõma sɛba n boe wakat-ẽna tɩ dũnia lɛm ba’asgɔ wã. ¹²Bɛla, nẽr-sɛka n tẽ’esɛ tɩ ẽŋa ɩtɩ sõŋa dee zɛ sõŋa, a guuse da lui. ¹³Yel-sɛba n paarɩ ya la, la de la yel-bãma n mẽ paarɩ nẽrba basɛba. La Nawẽnnɛ de la sɩra dãana, a kãn basɛ tɩ yel-sɛka n gãnnɩ ya pãŋa paagɛ ya. La yelle pʋam, a wʋn bɔ ya pãŋa tɩ ya wĩbe, dee ẽŋɛ sore tɩ ya yese.

Baga dia, la Zuudãana kũm tẽerɛ dia yelle

¹⁴Bɛla m sɔbiisi, yese-ya ya mẽŋa baga kãabgɔ pʋam. ¹⁵Mam tɔgrɩ bɔ’ɔra ya wʋ ya de la nẽr-sɛba n tarɩ yɛm. Ya mẽŋa tẽ’esɛ mam n yetɩ ya sɛla la võorɛ. ¹⁶Bõn-yũula la tɩ tõma ẽn dɩkɛ pʋ’ʋsɛ Nawẽnnɛ dee yũ la, pa’alɛ tɩ tõma lagɩm na Krisi dɛna ayɩla, a zɩɩm n yese bɔ tõma la ĩyã. La borborɩ la tɩ tõma ẽn fiise pʋɩ taaba obe la, pa’alɛ tɩ tõma lagɩm na Krisi dɛna ĩyã ayɩla. ¹⁷Borborɩ la n de ayɩla la, tõma mẽ de la ĩyã ayɩla, baa tõma n zo’oge la. Se’ere n soe la, tɩ wuu lagɩm ɔbra la borbor-ẽŋa ayɩla.

¹⁸Tẽ’esɛ-ya Ɩsrayɛlɩ dõma yelle. Sɛba n diti di-sɛba tɩ ba dɩkɛ kãabɛ Nawẽnnɛ kãabgɔ bĩmbĩnne zuo la, ba lagɩm na Nawẽnnɛ. ¹⁹Bẽm tɩ mam yɛta wãna? Yãma tẽ’esɛ tɩ mam yetɩ bagrɛ, bɩɩ di-sɛba tɩ ba kãabɛ bɔ bagrɛ la, de la sɛla bɩɩ? Ayɛɩ. ²⁰Mam yetɩ ya mɛ tɩ ya bãŋɛ tɩ sɛla tɩ bag-kãabrɩba kãabrɩ la, ba kãabrɩ bɔ’ɔra la kʋlkã’arsɩ, dagɩ Nawẽnnɛ. Mam ka boorɩ tɩ ya lagɩm na kʋlkã’arsɩ. ²¹Ya ka tã wʋn yũ Zuudãana Azezi bõn-yũula, dee le yũ kʋlkã’arsɩ bõn-yũula, ya ken ka tãna wʋn di Zuudãana kũm tẽerɛ dia, dee le di kʋlkã’arsɩ dia. ²²Tɩ sãn ɩta bɛla, tɩ wʋn botɩ Zuudãana sũure n isge. Yãma tẽ’esɛ tɩ tõma tarɩ pãŋa gãnna ẽ mɛ bɩɩ?

Nã’asra-ya Nawẽnnɛ sɛla woo pʋam

²³Yãma nẽrba basɛba yetɩ: «Sore boe mɛ tɩ tɩ ẽŋɛ sɛla woo.» Asɩra, la, la dagɩ sɛla woo n tarɩ yõorɔ. Ba yetɩ: «Sore boe mɛ tɩ tɩ ẽŋɛ sɛla woo.» La, la dagɩ sɛla woo n sõŋrɩ. ²⁴Nẽra nẽra da ɛɛra a mẽŋa sõŋrɛ mã’a, ɛɛra-ya taaba sõŋrɛ.

²⁵Ya tarɩ sore tɩ ya da nẽn-sɛba wuu tɩ ba koosrɩ da’asɩ pʋam obe mɛ. Da basɛ-ya tɩ la nãmsra ya pʋtẽ’era tɩ ya soke nẽnnɔ na n ze’ele zẽ’a. ²⁶La gʋlsɛ Nawẽnnɛ gõŋɔ pʋam yetɩ: «Dũnia, la bõn-sɛba wuu n boe a pʋam de la Zuudãana Nawẽnnɛ bõnɔ.»

²⁷Nẽra n ka bɔ Azezi sɩra sãn wi ya tɩ ya wa’am a yire wa di, tɩ ya sakɛ sẽŋɛ, di-ya di-sɛba wuu tɩ a tarɩ wa bɔ ya la, da basɛ-ya tɩ la nãmsra ya pʋtẽ’era, tɩ ya soke nẽnnɔ na n ze’ele zẽ’a. ²⁸La nẽra sãn yele ya yetɩ: «Di-bãna wã de la bagrɛ dia», da di-ya, sɛka n yele ya bɛla la ĩyã, tɩ la da nãmsɛ a pʋtẽ’erɛ. ²⁹La dagɩ yãma mẽŋa pʋtẽ’era yelle tɩ mam yele, la de la nẽr-sɛka n yele ya la pʋtẽ’erɛ.

La yãma mẽ tã soke mam yetɩ: «Bẽm soe tɩ nẽra ayẽma pʋtẽ’erɛ wʋn gu mam, tɩ mam kãn di sɛla tɩ mam tarɩ nõorɛ tɩ m di? ³⁰Mam sãn pʋ’ʋsɛ Nawẽnnɛ dia ĩyã dee di, bẽm tɩ nẽra wʋn zɛrgɛ mam la bõn-sɛka tɩ mam pʋ’ʋsɛ Nawẽnnɛ a ĩyã?»

³¹Lan de se’em na, ya sãn dita mɛ, bɩɩ ya yũuri mɛ, bɩɩ sɛla woo tɩ ya ɩtɩ, ɩta-ya ba wuu nã’asra Nawẽnnɛ. ³²Da ẽŋɛ-ya sɛla Zifdõma, bɩɩ sɛba n dagɩ Zifdõma, bɩɩ Nawẽnnɛ nẽrba zẽ’am tɩ la gu ba Nawẽnnɛ sore doosgo. ³³Ɩta-ya wʋ mam n ɩtɩ se’em na. Mam mõrgrɩ mɛ tɩ m ẽŋɛ sɛla n ãn nẽra woo sũure yẽlʋm sɛla woo pʋam, mam ka eerɩ m mẽŋa sõŋrɛ, mam eerɩ la nẽrba zozo’e sõŋrɛ, tɩ ba tã’agɛ yẽ fãarɛ.

¹Ɩta-ya mam n ɩtɩ se’em na, wʋ mam mẽ n ɩtɩ wʋ Krisi n ɩtɩ se’em na.

Bʋraaga la pɔka n wʋn ãna se’em Wẽndeto pʋam

²Mam pẽgrɩ ya, yãma n tẽrɩ mam yelle sɛla woo pʋam, dee dɔla bõn-sɛba wuu tɩ mam pa’alɛ ya la. ³La mam boorɩ tɩ ya bãŋɛ tɩ Krisi de la nẽra woo zuudãana, tɩ sɩra mẽ dɛna a pɔga zuudãana, tɩ Nawẽnnɛ dɛna Krisi zuudãana. ⁴Bɛla, bʋra-sɛka n pʋ’ʋsrɩ Nawẽnnɛ, bɩɩ n to’oge Nawẽnnɛ yetɔga tɔgra bɔ’ɔra nẽrba, dee vuge a zuugo, a pɔ’ɔrɩ la a zuudãana. ⁵La pɔg-sɛka n pʋ’ʋsrɩ Nawẽnnɛ, bɩɩ n to’oge Nawẽnnɛ yetɔga tɔgra bɔ’ɔra nẽrba, dee ka vuge a zuugo, a pɔ’ɔrɩ la a zuudãana. La ãn wʋ ẽn põn a zuugo la. ⁶Pɔka sãn ka bɔɔra tɩ a vuge a zuugo, a yi sɛ a zomto. La tɩ mi tɩ la de la yãnnɛ bɔ pɔka tɩ a põn a zuugo, bɩɩ a sɛ a zomto. Bɛla, dẽnɩ tɩ a vuge a zuugo. ⁷Bʋraaga ka de a vuge a zuugo, se’ere n soe la, Nawẽnnɛ nãam ẽ tɩ a wõna la a mẽŋa, dɛna nã’asgɔ bɔ ẽ. La pɔka de la nã’asgɔ bɔ bʋraaga. ⁸Nawẽnnɛ ka dɩkɛ pɔka kõbrɛ nãam bʋraaga, a daan dɩkɛ la bʋraaga kõbrɛ nãam pɔka. ⁹La Nawẽnnɛ ka nãam bʋraaga pɔka ĩyã, la a nãam pɔka la bʋraaga ĩyã. ¹⁰Bɛla ĩyã, la malɛkadõma ĩyã, la masɛ tɩ pɔka vugra a zuugo tɩ la pa’alɛ tɩ a tarɩ nõorɛ. ¹¹La Zuudãana doosgo la pʋam, pɔka boe la bʋraaga nu’usum, tɩ bʋraaga mẽ bɔna pɔka nu’usum. ¹²Nawẽnnɛ daan dɩkɛ la bʋraaga nãam pɔka. Tɩ pɔgsɩ mẽ dɔgra bʋraasɩ. Bɛla wuu ze’ele la Nawẽnnɛ zẽ’am.

¹³Tẽ’esɛ-ya ya mẽŋa bɩsɛ. La masɛ tɩ pɔka pʋ’ʋsra Nawẽnnɛ nẽr-kʋʋŋɔ pʋam dee ka vuge a zuugo? ¹⁴Nẽrba wuu mi mɛ tɩ bʋraaga sãn basɛ a zomto tɩ ba wɔgɛ, la de la yãnnɛ. ¹⁵La pɔka sãn basɛ a zomto tɩ ba wɔgɛ, la de la pẽka bɔ ẽ. A zomto la n wɔgɛ la, de la sɛla bɔ ẽ tɩ a dɩkɛ vuge a zuugo. ¹⁶La nẽr-sɛka sãn bɔɔra tɩ a wẽ nõke’ene bõn-ẽna wã yelle, dẽnɩ tɩ a bãŋɛ tɩ tõma, la Nawẽnnɛ nẽrba n boe zẽ’esɩ wuu la, ka tarɩ ɩrgɔ ayẽma.

Zuudãana kũm tẽerɛ dia

(Amatie 26:26-29, Amarkɩ 14:22-25, Aluki 22:14-20)

¹⁷Mam n yetɩ m yele ya se’em wã, mam ka yetɩ m pẽgɛ ya, bẽm ĩyã, ya ẽn lagsɛ taaba la, ya ka ɩtɩ sõŋa, ya ɩtɩ la be’em. ¹⁸Pɔspɔsɩ, mam wõm tɩ ya sãn ẽn lagsɛ taaba tɩ ya pʋ’ʋsɛ Nawẽnnɛ, welgre n boe ya tẽŋasʋka. La mam sakɛ tɩ yel-sɛba tɩ ba yele la, basɛba de la sɩra. ¹⁹Dẽnɩ tɩ welgre bɔna ya tẽŋasʋka, tɩ ba bãŋɛ sɛba n sɩrɩ dolɩ Nawẽnnɛ bɔkɛ. ²⁰Yãma ẽn lagsɛ taaba la, ya tẽ’esɛ tɩ ya diti la Zuudãana dia, la dagɩ bɛla. ²¹Se’ere n soe la, ya sãn lagsɛ, nẽra woo dẽŋɛ ka dita la a mẽŋa dia. Tɩ sɛba kɔm dõnna, dee tɩ basɛba yũ buge. ²²La sãn dɛna bɛla, yãma ka tarɩ yiɛ wʋn di dee yũ bilam? Bɩɩ yãma ka nannɩ la Nawẽnnɛ nẽrba la, dee ɩta nasdõma yãnnɛ? Mam wʋn yele ya tɩ bo? M pẽgɛ ya bɛla ĩyã bɩɩ? Ayɛɩ, mam kãn pẽgɛ ya.

²³Zãsŋɔ sɛka tɩ mam daan zãsʋm ya la, mam to’oge ẽ na Zuudãana la zẽ’am. La de la wãna: Yʋ’ʋŋ-sɛka tɩ ba wʋn yõkɛ tɩ Zuudãana Azezi la, a dɩkɛ la borborɩ, ²⁴pʋ’ʋsɛ Nawẽnnɛ a yel-sõnnɛ dee fiise bɔ ba yetɩ: «Ẽna de la mam ĩyã, tɩ mam bɔ’ɔrɩ ya. Ɩta-ya wãna tẽra mam yelle.» ²⁵Ban daan di dia kɩ’ɩlɩm na, a dɩkɛ la bõn-yũula yetɩ: «Bõn-yũul-bãna pa’alɩ tɩ Nawẽnnɛ bĩŋe la nõor-paalga la nẽrsaalba mam zɩɩm n wʋn yese la ĩyã. Wakat-sɛka tɩ ya ẽn yetɩ ya yũ ba, ɩta-ya wãna tẽra mam yelle.» ²⁶Wakat-sɛka woo tɩ ya obrɩ borborɩ wã, dee yũura bõn-yũula wã, ya pa’alɩ la Zuudãana la kũm yelle, halɩ tɩ a wʋn wa leme wa’am.

²⁷Bɛla, nẽr-sɛka woo n obrɩ borborɩ wã, dee yũura bõn-yũula wã, dee ka masɛ tɩ a obe dee yũ, a tõnnɩ la tõon-be’ero pɔ’ɔra Zuudãana ĩyã, la a zɩɩm na. ²⁸Bɛla, nẽra woo tẽ’esɛ bɩsɛ a sãn masɛ, deege obe borborɩ la, dee yũ bõn-yũula la. ²⁹Nẽr-sɛka n ka nannɩ Zuudãana la ĩyã, dee obe borborɩ la, dee yũ bõn-yũula la, a eerɩ la sɩbgrɛ bɔ’ɔra a mẽŋa. ³⁰Bɛla n soe tɩ ya pʋam, nẽrba zozo’e dɛna bã’adõma, tɩ sɛba ka tara pãŋa, tɩ basɛba ki. ³¹Tɩ sãn tẽ’esɛ tɩ mẽŋa bɩsɛ tɩ sãn masɛ, Nawẽnnɛ kãn sɩbgɛ tɔ. ³²La Zuudãana la sãn sɩbgra tɔ, a pa’alɩ tɩ mɛ tɩ tɩ ɩta sõŋa, tɩ a da wa lagɩm tɩ la dũnia nẽrba di tɩ sarɩya sɩbgɛ tɔ.

³³Bɛla, m sɔbiisi, ya sãn lagsɛ taaba tɩ ya di Zuudãana kũm tẽerɛ dia la, ya gu’ura taaba. ³⁴Nẽra kɔm sãn dõnna, a di a yire dee wa’am, tɩ ya da kãn lagsɛ taaba ɛ sɩbgrɛ bɔ ya mẽŋa. La yel-sɛba n weege la, mam sãn wa wa’am, mam wʋn mãalɛ.

Nawẽnnɛ Sɩa bɔ’a yelle

¹Lɛɛlɛ wã, mam yetɩ m tɔgɛ ya la Nawẽnnɛ Sɩa bɔ’a yelle. M sɔbiisi, mam boorɩ tɩ ya bãŋɛ la bõn-ẽŋa yelle sõŋa. ²Ya mi tɩ yan daan nãn ka bɔ Azezi sɩra la, ya daan taagɛ la baga n de mugro la poore dɔla, ka tãna wʋn basɛ. ³Bɛla tɩ mam bɔɔra tɩ ya bãŋɛ tɩ Nawẽnnɛ Sɩa la sãn bɔna la nẽra, a ka tã wʋn tɔgɛ Azezi yelle be’em. La nẽra mẽ ka tã wʋn yetɩ, Azezi de la Zuudãana, tɩ la sãn dagna Nawẽnnɛ Sɩa n botɩ a yele.

⁴Nawẽnnɛ Sɩa bɔ’a la de la to’oto’ore, la, la de la Sɩa ayɩla mẽŋa n bɔ’ɔrɩ. ⁵Tõoma la de la to’oto’ore, la, la de la Zuudãana ayɩla tɩ tɩ tõnnɩ bɔ’ɔra. ⁶Tõoma la n tõnnɩ se’em na de la to’oto’ore, la, la de la Nawẽnnɛ ayɩla n tõnnɩ ba wuu nẽrba wuu pʋam. ⁷Nawẽnnɛ Sɩa la bɔ’ɔrɩ nẽra woo la bɔ’a nẽrba la wuu sõŋrɛ ĩyã. ⁸Sɩa la bɔ’ɔrɩ nẽra ayɩla la bɔ’a tɩ a tɔgra yɛm yetɔga, la Sɩa ẽŋa ayɩla n bɔ’ɔrɩ nẽra ayẽma bɔ’a tɩ a tɔgra bãŋrɛ yetɔga. ⁹La Sɩa ẽŋa mẽŋa n bɔ’ɔrɩ nẽra ayɩla bɔ’a tɩ a bɔ’ɔra Nawẽnnɛ sɩra zozo’e, dee bɔ’ɔra ayẽma pãŋa tɩ a botɩ bã’adõma yẽta ĩmã’asʋm. ¹⁰Sɩa la n bɔ’ɔrɩ nẽra ayɩla pãŋa tɩ a tãna tõnna tõon-yãlma, dee bɔ’ɔra ayẽma bɔ’a tɩ a tɔ’ɔsra Nawẽnnɛ yetɔga tɔgra bɔ’ɔra nẽrba, ẽŋa n bɔ’ɔrɩ nẽra ayɩla yɛm tɩ a tãna wʋn bãŋɛ sɛla n ze’ele Nawẽnnɛ Sɩa zẽ’a, la sɛla n ka ze’ele Nawẽnnɛ Sɩa zẽ’a bɔkɛ. Sɩa ẽŋa n bɔ’ɔrɩ nẽra ayɩla bɔ’a tɩ a tãna tɔgra yetɔg-zãŋsɩ, dee bɔ’ɔra ayẽma bɔ’a tɩ a tãna pa’ala yetɔg-zãŋsɩ la võorɛ. ¹¹La de la Sɩa ẽŋa ayɩla n ɩtɩ bɛla wuu. Sɩa la bɔ’ɔrɩ nẽra woo la bɔ’a to’oto’ore wʋ ẽŋa n boorɩ se’em.

Azezi-krisi nẽrba ãn wʋ nẽra ayɩla ĩyã la

¹²Azezi-krisi nẽrba ãn wʋ ĩyã ayɩla n tarɩ zẽ’esɩ to’oto’ore. La baa la zẽ’esɩ la n de to’oto’ore la, ba wuu de la ĩyã ayɩla. ¹³Tõma Zifdõma, la sɛba n dagɩ Zifdõma, la sɛba n de yamsɩ, la sɛba n dagɩ yamsɩ, tõma wuu n daan mise ko’om pʋam na, Nawẽnnɛ Sɩa botɩ tɩ lebge la ĩyã ayɩla. Nawẽnnɛ tõm na Sɩa ayɩla bɔ tɩ wuu.

¹⁴Nẽra ĩyã ka tarɩ zẽ’a ayɩla mã’a. A tarɩ la zẽ’esɩ to’oto’ore. ¹⁵Nã’arɛ sãn yetɩ, ẽŋa n dagɩ nu’ugo la, ẽŋa ka po dɛna ĩyã la zẽ’a ayɩla, bɛla kãn tã’agɛ basɛ tɩ a kãn dɛna ĩyã la zẽ’a ayɩla. ¹⁶La tʋbrɛ mẽ sãn yetɩ, ẽŋa n ka de nifo la, ẽŋa ka po dɛna ĩyã la zẽ’a ayɩla, bɛla kãn tã’agɛ basɛ tɩ a kãn dɛna ĩyã la zẽ’a ayɩla. ¹⁷Tɩ ĩyã la wuu sãn de nɩ nifo, a yetɩ a ẽŋɛ la wãne wõm yetɔga? La a wuu sãn de nɩ tʋbrɛ, a yetɩ a ẽŋɛ la wãne wõm yũuŋo? ¹⁸Bɛla tɩ Nawẽnnɛ ẽŋɛ ĩyã zẽ’a woo wʋ ẽn boorɩ se’em, lagɩm ba taaba. ¹⁹Ba wuu sãn de nɩ la zẽ’a ayɩla mã’a, ĩyã kãn boe nɩ. ²⁰Bɛla tɩ zẽ’esɩ to’oto’ore bɔna, la ba de la ĩyã ayɩla.

²¹Bɛla nifo ka tã wʋn yele nu’ugo yetɩ, ẽŋa ka boorɩ a sõŋrɛ. La zuugo mẽ ka tã wʋn yele nãma yetɩ, ẽŋa ka boorɩ ba sõŋrɛ. ²²Lan pa’asɛ, ĩyã la zẽ’e-sɛba n ãn wʋ ba ka tarɩ pãŋa la, tarɩ yõorɔ mɛ. ²³Zẽ’e-sɛba tɩ tõma bɩsɛ tɩ ba ka tarɩ yõorɔ zo’oge la, tɩ bɩsrɩ la bãma yelle sõŋa sõŋa. La zẽ’e-sɛba tɩ tɩ tẽ’esɛ tɩ ba ka masɛ tɩ nẽrba yẽ ba la, bãma tɩ tɩ malgrɩ sõŋa gãnna. ²⁴La ka de tɩ dɩkɛ sɛla pĩ zẽ’e-sõma la. Nawẽnnɛ mẽŋa n ẽŋɛ tɩ ĩyã la, basɛ tɩ tɩ bɩsra zẽ’e-sɛba tɩ tɩ tẽ’esɛ tɩ ba ka tarɩ yõorɔ zo’oge la yelle sõŋa sõŋa, ²⁵tɩ welgre da bɔna ĩyã la pʋam. La tɩ ĩyã la zẽ’esɩ to’oto’ore la wʋn sõŋra taaba. ²⁶Bɛla, zẽ’a ayɩla sãn nãmsra, zẽ’esɩ la wuu mẽ nãmsrɩ mɛ. Zẽ’a ayɩla sãn yẽ nã’asgɔ, zẽ’esɩ la wuu tarɩ la sũ-yẽlga.

²⁷Ya wuu de la Krisi ĩyã la. La nẽra woo de la ĩyã la zẽ’a ayɩla. ²⁸Bɛla tɩ Nawẽnnɛ ẽŋɛ nẽra woo a zẽ’am a nẽr-kʋʋŋɔ la pʋam. Pɔspɔsɩ de la sɛba tɩ Azezi mẽŋa daan looge tõm ba la. Bʋyi dãana de la Nawẽnnɛ nõtɔ’ɔsrɩba. Bʋtã de la karẽnsãandõma, la sɛba n tõnnɩ tõon-yãlma, la sɛba tɩ a bɔ ba pãŋa tɩ ba botɩ bã’adõma yẽta ĩmã’asʋm, la sɛba tɩ a looge tɩ ba sõŋra nẽrba, la sɛba n wʋn bɔna nẽrba nẽŋa, la sɛba n tɔgrɩ yetɔg-zãŋsɩ. ²⁹La dagɩ tɩ wuu n de sɛba tɩ Azezi mẽŋa daan looge tõm na, dagɩ tɩ wuu n de nõtɔ’ɔsrɩba, dagɩ tɩ wuu n de karẽnsãandõma. La dagɩ tɩ wuu n tarɩ pãŋa tõnna tõon-yãlma, ³⁰la dagɩ tɩ wuu n botɩ bã’adõma yẽta ĩmã’asʋm, dagɩ tɩ wuu n tɔgrɩ yetɔg-zãŋsɩ, dagɩ tɩ wuu n tã wʋn pa’alɛ yetɔg-zãŋsɩ la võorɛ. ³¹Ɛɛra-ya bɔ’a sɛba n gãnnɩ wuu.

La mam wʋn pa’alɛ ya so-sɛka n gãnnɩ ba wuu.

Nõŋlʋm yelle

¹Mam sãn tɔgra nẽrsaalba buuri wuu yetɔga, la malɛkadõma yetɔga, dee ka tara nõŋlʋm, mam ãn wʋ dẽnlɔŋɔ bɩɩ pɩrga n wẽ’erɩ zãŋa. ²La mam sãn tara bɔ’a tɔ’ɔsra Nawẽnnɛ yetɔga tɔgra bɔ’ɔra nẽrba, dee tãna wʋn bãŋɛ yɛla n sʋgɛ wuu võorɛ, dee tara mi’ilum wuu, la mam sãn bɔ Nawẽnnɛ sɩra tãna wʋn botɩ tãŋa vurge, dee ka tara nõŋlʋm, mam de la zãŋa. ³La mam sãn dɩkɛ mam n tarɩ sɛla wuu pʋɩ nasdõma, la baa mam sãn sakɛ tɩ ba yõ mam ĩyã bugum, dee ka tara nõŋlʋm, bɛla ka tarɩ yõorɔ bɔ mam.

⁴Nẽr-sɛka n tarɩ nõŋlʋm mã’arɩ la a mẽŋa, dee sõŋra nẽrba, a ka ɩtɩ sũure, a ka wẽ’erɩ yõ’ogɔ, la a ka zẽkrɩ a mẽŋa. ⁵Sɛka n tarɩ nõŋlʋm ka ɩtɩ sɛla n ka masɛ, a ka eerɩ a mẽŋa sõŋrɛ mã’a, a sũure ka isgri, nẽra sãn ẽŋɛ ẽ be’em, a ka tẽrɩ ẽ a sũure pʋam. ⁶Sɛka n tarɩ nõŋlʋm ka ɩtɩ sũ-yẽlga la tõon-be’ero, a ɩtɩ sũ-yẽlga la sɩra. ⁷Sɛka n tarɩ nõŋlʋm ɩtɩ sugri mɛ sɛla woo pʋam. A bɔ sɩra mɛ sɛla woo pʋam, a tarɩ pʋtẽ’erɛ mɛ gu’ura sɛla woo tɩ a bɔ sɩra la, a tã wĩbra mɛ sɛla woo pʋam.

⁸Nõŋlʋm ka malɩn ba’asra. Nawẽnnɛ yetɔga tɩ tɩ to’osrɩ tɔgra bɔ’ɔra nẽrba, la yetɔg-zãŋsɩ, la mi’ilum wʋn tole. ⁹Tõma n mi se’em, la tõma n to’osrɩ Nawẽnnɛ yetɔga tɔgra bɔ’ɔra nẽrba la, de la fẽe. ¹⁰La wakatɛ sãn wa paagɛ tɩ Nawẽnnɛ malgɛ sɛla woo tɩ la masɛ sõŋa sõŋa, sɛla fẽe tɩ tõma mi la wʋn tole.

¹¹Mam n daan de bia la, mam daan tɔgrɩ wʋ bia la, mam daan tẽ’esra wʋ bia la, la mam daan wõnnɩ yɛla võorɛ wʋ bia la. La mam yãŋa n bɩ la, mam basɛ biyã’atɛ mɛ. ¹²Tõma n mi sɛla lɛɛlɛ wã, ãn wʋ tõma bɩsrɩ la bɩsga n ka yẽtɩ sõŋa pʋam. La wakat-ẽŋa tɩ wʋn yẽ sɛla woo sõŋa. Mam n mi sɛla la, nãn de la fẽe. La mam wʋn wa bãŋɛ ẽ sõŋa sõŋa wʋ Nawẽnnɛ n mi mam sõŋa se’em na. ¹³Bɛla, bõn-bãna batã n boe wakatɛ wuu: La de la bɔ sɩra, la tɩ tara pʋtẽ’erɛ gu’ura sɛla tɩ tɩ bɔ sɩra la, la nõŋlʋm. La bõn-bãna batã pʋam, nõŋlʋm n gãnnɩ ba wuu.

Tɩ wʋn ẽŋɛ se’em tɩ Nawẽnnɛ Sɩa bɔ’a la sõŋɛ nẽrba

¹Ɛ-ya nõŋlʋm, la ya ken ɛɛra Nawẽnnɛ Sɩa bɔ’a la, lan gãnnɩ, bɔ’a sɛka tɩ ya wʋn to’oge Nawẽnnɛ yetɔga tɔgɛ bɔ nẽrba. ²Sɛka n tɔgrɩ yetɔg-zãŋsɩ ka tɔgrɩ bɔ’ɔra nẽrba, a tɔgrɩ bɔ’ɔra la Nawẽnnɛ. Se’ere n soe la, nẽra ka wõnnɩ a yetɔga la võorɛ, Nawẽnnɛ Sɩa botɩ a tɔgra la yɛla n sʋgɛ. ³La sɛka n to’osrɩ Nawẽnnɛ yetɔga tɔgra bɔ’ɔra nẽrba, ẽŋa tɔgrɩ sõŋra la nẽrba, botɩ ba sẽnna nẽŋa Nawẽnnɛ sore doosgo la pʋam, dee kã’ana ba, bɔ’ɔra ba bʋraanɛ. ⁴Sɛka n tɔgrɩ yetɔg-zãŋsɩ sõŋrɩ la a mẽŋa. La sɛka n to’osrɩ Nawẽnnɛ yetɔga tɔgra bɔ’ɔra nẽrba sõŋrɩ la Nawẽnnɛ nẽrba. ⁵Mam boorɩ nɩ tɩ ya wuu tɔgra la yetɔg-zãŋsɩ, la mam boorɩ tɩ ya tɔ’ɔsra la Nawẽnnɛ yetɔga tɔgra bɔ’ɔra nẽrba gãnna. Nẽra sãn tɔgɛ yetɔg-zãŋsɩ tɩ nẽra ka bɔna wʋn to’oge yetɔga la tɔgɛ a võorɛ pa’alɛ nẽrba la tɩ la sõŋɛ ba, sɛka n to’osrɩ Nawẽnnɛ yetɔga tɔgra bɔ’ɔra nẽrba la n gãnnɩ.

⁶M sɔbiisi, mam sãn wa’am ya zẽ’am wa tɔgra yetɔg-zãŋsɩ, mam wʋn ẽŋɛ la wãne sõŋɛ ya? A ka tarɩ võorɛ bɔ ya. Sɛla n wʋn sõŋɛ ya, de la mam sãn pa’alɛ ya sɛla tɩ Nawẽnnɛ Sɩa puke pa’alɛ mam, bɩɩ m botɩ ya bãŋɛ sɛla, bɩɩ m to’oge Nawẽnnɛ yetɔga tɔgɛ bɔ ya, bɩɩ m zãsʋm ya. ⁷La ãn wʋ de’eŋo lɔgrɔ la: Wɩa sãn pɛɛbra bʋra bʋra, bɩɩ kõlŋɔ sãn wẽ’era bʋra bʋra, fʋ wʋn ẽŋɛ la wãne bãŋɛ wɩa la peebgo võorɛ, bɩɩ kõlŋɔ la wẽ’a võorɛ? ⁸Benkonne sãn peebe bʋra bʋra, ka peebe zɛbrɛ peebgo, ãne n wʋn mãasʋm yese zɛbrɛ? ⁹Bɛla mẽ, ya sãn tɔgra yetɔg-zãŋka tɩ nẽra ka wõnnɩ a võorɛ, nẽra wʋn ẽŋɛ la wãne bãŋɛ yãma n boorɩ tɩ ya yele se’em? Ya yetɔga la de la zãŋa. ¹⁰Yetɔga buuri zozo’e n boe dũnia zuo, la ayɩla ka boe ka tara võorɛ. ¹¹La mam sãn ka wõnna yetɔga, mam na sɛka n tɔgrɩ la de la sãama la taaba. ¹²Bɛla, yãma n mõrgɛ ɛɛra Nawẽnnɛ Sɩa bɔ’a la, ɛɛra-ya bɔ’a sɛba n wʋn sõŋɛ Nawẽnnɛ nẽrba tɩ ba sẽŋɛ nẽŋa Nawẽnnɛ doosgo pʋam.

¹³Bɛla ĩyã, sɛka n tɔgrɩ yetɔg-zãŋka, a sose Nawẽnnɛ tɩ a botɩ a yãŋɛ tɔgɛ a võorɛ. ¹⁴Mam sãn pʋ’ʋsra Nawẽnnɛ la yetɔg-zãŋka, mam sɩa n pʋ’ʋsrɩ, la mam ka wõnnɩ a võorɛ la m mẽŋa yɛm. ¹⁵Bɛla, mam wʋn ẽŋɛ la wãne? Mam wʋn pʋ’ʋsra la m sɩa, dee ken pʋ’ʋsra la m yɛm, la m yõona la m sɩa, dee ken yõona la m yɛm. ¹⁶Fʋ sãn pʋ’ʋsra Nawẽnnɛ a yel-sõnnɛ la yetɔg-zãŋka, nẽra wʋn ẽŋɛ la wãne ze’ele nẽrba la n lagsɛ la pʋam yetɩ: «Amina», dee ka wõm fõn yele se’em na võorɛ? ¹⁷Baa fõn pʋ’ʋsrɩ Nawẽnnɛ se’em na sãn ãna sõŋa, la ka tarɩ sõŋrɛ bɔ nẽr-ẽŋa. ¹⁸Mam pʋ’ʋsrɩ Nawẽnnɛ a yel-sõnnɛ, mam n tɔgrɩ yetɔg-zãŋsɩ gãnna yãma wuu la. ¹⁹La Nawẽnnɛ nẽrba lagsgɔ zẽ’am, mam boorɩ tɩ m tɔgɛ la yetɔga banuu la m yɛm tɩ nẽrba wõm ba võorɛ tɩ la zãsʋm ba, sõna mam wʋn tɔgɛ yetɔg-zãŋsɩ tʋspia.

²⁰M sɔbiisi, da ãna-ya wʋ kɔma n tẽ’esrɩ se’em na. La, la sãn dɛna be’em ɩrgɔ yelle, ãna-ya wʋ kɔm-pɩgsɩ n ka ɩtɩ be’em na. La ya tẽ’esgɔ pʋam, ãna-ya wʋ bõnkɛgsɩ la. ²¹La gʋlsɛ Nawẽnnɛ gõŋɔ pʋam tɩ Zuudãana Nawẽnnɛ yetɩ: «Mam wʋn basɛ tɩ sãama n tɔgrɩ yetɔg-zãŋsɩ mõolɛ m kõ-yẽlga bɔ m nẽrba. Baa la wãna wuu, ba kãn selse mam.» ²²Bɛla ĩyã, yetɔg-zãŋsɩ de la sɛla n pa’alɩ sɛba n ka bɔ sɩra Nawẽnnɛ pãŋa, la dagɩ sɛba n bɔ sɩra la ĩyã. La nẽra n to’oge Nawẽnnɛ yetɔga tɔgɛ bɔ nẽrba la, n de sɛla n pa’alɩ sɛba n bɔ sɩra Nawẽnnɛ pãŋa, la dagɩ sɛba n ka bɔ sɩra la ĩyã.

²³Sɛba n bɔ sɩra la sãn lagsɛ taaba zẽ’a ayɩla, tɩ nẽra woo tɔgra la yetɔg-zãŋsɩ, tɩ sɛba n ka mi, dee ka bɔ Nawẽnnɛ sɩra kẽ, ba kãn yetɩ ya zallɩ mɛ? ²⁴La sɛba n bɔ sɩra la sãn lagsɛ taaba, tɩ nẽra woo tɔ’ɔsra Nawẽnnɛ yetɔga tɔgra bɔ’ɔra nẽrba, tɩ nẽra n ka mi, dee ka bɔ Nawẽnnɛ sɩra kẽ, ẽn wõm sɛla woo la, wʋn basɛ tɩ a bãŋɛ a tõon-be’ero, dee pa’alɛ ẽ a tuure. ²⁵Yel-sɛba n sʋgɛ a sũure pʋam wʋn puke mɛ peelem pʋam, tɩ a wʋn ka dũma dɩkɛ a nẽŋa võglɛ tẽŋa nã’asɛ Nawẽnnɛ, dee yetɩ: «Nawẽnnɛ sɩrɩ boe la ya lɛ.»

Ɩta-ya sɛla woo tɩ ba dɔla sore

²⁶Bɛla, m sɔbiisi, tɩ wʋn ẽŋɛ la wãne? Ya sãn lagsɛ taaba tɩ ya pʋ’ʋsɛ Nawẽnnɛ, ya nẽra ayɩla tã wʋn pʋrɛ yõonɛ, tɩ ayẽma zãsʋm, tɩ ayẽma pa’alɛ bõn-sɛka tɩ Nawẽnnɛ puke pa’alɛ ẽ, tɩ ayẽma tɔgɛ yetɔg-zãŋka, tɩ ayẽma tɔgɛ yetɔg-zãŋka la võorɛ pa’alɛ nẽrba. Ɩta-ya bɛla wuu tɩ la sõŋɛ Nawẽnnɛ nẽrba tɩ ba sẽŋɛ nẽŋa Nawẽnnɛ doosgo pʋam. ²⁷La sãn dɛna yetɔg-zãŋsɩ tɩ ya yetɩ ya tɔgɛ, nẽrba bayi bɩɩ nẽrba batã mã’a tɔgɛ ayɩla ayɩla, tɩ nẽra ayɩla tɔgɛ ba võorɛ pa’alɛ. ²⁸La nẽra sãn ka bɔna wʋn tã’agɛ tɔgɛ yetɔg-zãŋsɩ la võorɛ pa’alɛ, sɛba n yetɩ ba tɔgɛ yetɔg-zãŋsɩ la sĩna da tɔgɛ. Ba tɔgɛ ba sũure pʋam bɔ ba mẽŋa, la Nawẽnnɛ. ²⁹Sɛba n de Nawẽnnɛ nõtɔ’ɔsrɩba la, bayi bɩɩ batã tɔgɛ. Tɩ sɛba n weege la bɩsɛ ba yetɔga la sãn masɛ bɩɩ ka masɛ. ³⁰La nẽra ayɩla sãn tɔgra, tɩ Nawẽnnɛ Sɩa puke sɛla pa’alɛ nẽrba lagsgɔ la zẽ’am, nẽr-sɛka n dẽŋɛ tɔgra la go’oge. ³¹Ya wuu tã wʋn to’oge Nawẽnnɛ yetɔga tɔgɛ bɔ nẽrba mɛ, la ya tɔgra ayɩla ayɩla, tɩ la wʋn zãsʋm nẽrba wuu, dee bɔ ba bʋraanɛ. ³²Nẽr-sɛba n tarɩ Nawẽnnɛ Sɩa tɔ’ɔsra yetɔga bɔ’ɔra nẽrba la tã wʋn yõkɛ ba mẽŋa mɛ. ³³Se’ere n soe la, Nawẽnnɛ boorɩ tɩ sɛla woo dɔla la sore la sũ-mã’asʋm, a ka boorɩ tɩ tɩ tõnna yooro yooro.

³⁴Pɔgsɩ sĩna Nawẽnnɛ nẽrba lagsgɔ zẽ’am, wʋ ba ɩtɩ se’em zẽ’esɩ wuu la. Sore ka boe tɩ ba darɛ tɔgra Nawẽnnɛ nẽrba lagsgɔ zẽ’am. La ba sakra nõorɛ wʋ Zifdõma lɔɔ n yele se’em na. ³⁵Sɛla sãn bɔna tɩ ba bɔɔra tɩ ba bãŋɛ, ba soke ba sɩrba ba yiɛ. La ka narɩ tɩ pɔgsɩ tɔgra Nawẽnnɛ nẽrba lagsgɔ zẽ’am.

³⁶Yãma tẽ’esɛ tɩ la de la yãma zẽ’am tɩ Nawẽnnɛ kõ-yẽlga la pɔsɛ bɩɩ? Bɩɩ yãma mã’a n to’oge yetɔga la? ³⁷Sɛka n tẽ’esɛ tɩ ẽŋa de la Nawẽnnɛ nõtɔ’ɔsa, bɩɩ ẽŋa de la sɛka tɩ Nawẽnnɛ Sɩa boe la ẽ lɛ, a sakɛ tɩ sɛla tɩ mam gʋlsɛ bɔ’ɔra ya wã de la Zuudãana la nõorɛ tɩ a bɔ. ³⁸La nẽra sãn ka selse yel-ẽna, yãma mẽ da selse ẽ.

³⁹Bɛla, m sɔbiisi, mõrgɛ-ya tɔ’ɔsra Nawẽnnɛ yetɔga tɔgra bɔ’ɔra nẽrba, dee da gu-ya nẽrba tɩ ba da tɔgɛ yetɔg-zãŋsɩ. ⁴⁰La ɩta-ya sɛla woo tɩ la ãna sõŋa, dee dɔla sore.

Azezi-krisi vo’ore

¹M sɔbiisi, lɛɛlɛ wã mam boorɩ tɩ m tẽegɛ ya la kõ-yẽlga la tɩ mam daan mõolɛ bɔ ya tɩ ya bɔ sɩra zɛ kãŋkãŋɛ la yelle. ²Ya sãn gʋrɛ ẽ kãŋkãŋɛ wʋ mam n mõolɛ ya se’em na, ya wʋn yẽ fãarɛ. La sãn dagna bɛla, yan bɔ sɩra la de la zãŋa.

³Zãsŋɔ sɛka n gãnnɩ tɩ mam daan to’oge n bɛla tɩ mam dẽŋɛ zãsʋm ya:

Krisi ki la tõma tõon-be’ero ĩyã,

wʋ lan gʋlsɛ Nawẽnnɛ gõŋɔ pʋam se’em na.

⁴Tɩ ba daan laagɛ ẽ,

tɩ Nawẽnnɛ botɩ a vo’oge dabsa atã daarɛ,

wʋ lan gʋlsɛ Nawẽnnɛ gõŋɔ pʋam se’em na.

⁵La a daan dẽŋɛ dɩkɛ a mẽŋa pa’alɛ la Apɩyɛɛrɩ, dee yãŋa dɩkɛ a mẽŋa pa’alɛ karẽnbiisi pia la ayi la. ⁶Bɛla poorʋm tɩ a dɩkɛ a mẽŋa pa’alɛ a karẽnbiisi n gãnnɩ kɔbsnuu wakatɛ ayɩla. Ba nẽrba basɛba zozo’e ken vɔa mɛ, la basɛba ki mɛ. ⁷Bɛla poorʋm tɩ a dɩkɛ a mẽŋa pa’alɛ Azakɩ, dee yãŋa dɩkɛ a mẽŋa pa’alɛ Tõntõnɩba la wuu.

⁸Bɛla wuu poorʋm, a dɩkɛ a mẽŋa pa’alɛ la mam n ãn wʋ bia tɩ ba dɔgɛ tɩ a wakatɛ ka paagɛ la. ⁹Mam de la pɩka Tõntõnɩba la wuu zẽ’am, dee ka nara tɩ ba wi’ira mam tɩ Tõntõnna, mam n daan nãmsɛ Nawẽnnɛ nẽrba la ĩyã. ¹⁰La Nawẽnnɛ yel-sõnnɛ ĩyã tɩ mam dɛna mam n de se’em lɛɛlɛ wã. Yel-sõnnɛ na tɩ Nawẽnnɛ bɔ mam na dagɩ zãŋa. Mam tõm gãnna Tõntõnɩba basɛba la wuu mɛ. La, la dagɩ mam mẽŋa n tõnnɩ bɛla, Nawẽnnɛ yel-sõnnɛ na ĩyã tɩ mam yãŋɛ tõnna bɛla. ¹¹Bɛla, la sãn dɛna la mam n mõolɛ kõ-yẽlga la, bɩɩ bãma, tɩ wuu mõolɛ la kõ-yẽlga sɛka tɩ mam tẽegɛ ya a yelle la, sɛka tɩ ya daan sakɛ la.

Kũm vo’ore

¹²Tõma n mõolɩ tɩ Krisi ki mɛ dee vo’oge la, wãne tɩ ya nẽrba basɛba yetɩ, sɛba n ki la kãn vo’oge? ¹³La sãn dɛna sɩra tɩ nẽr-sɛba n ki la kãn vo’oge, bɛla Krisi yi ka vo’oge. ¹⁴La Krisi sãn ka vo’oge, kõ-yẽlga la tɩ tõma mõolɩ la de la zãŋa, tɩ yãma bɔ sɩra la mẽ dɛna zãŋa. ¹⁵La sãn dɛna bɛla, tõma yi parnɩ mɛ bɔ’ɔra Nawẽnnɛ, tõma n yetɩ, Nawẽnnɛ botɩ Krisi vo’oge mɛ, dee tɩ kũm kãn vo’oge la ĩyã. ¹⁶Sɛba n ki la sãn kãn vo’oge, bɛla, Krisi yi ka vo’oge. ¹⁷La Krisi sãn ka vo’oge, yan bɔ sɩra la de la zãŋa, la ya tõon-be’ero taalɛ ken bɔna la ya zuto. ¹⁸La sɛba n bɔ Krisi sɩra dee ki la mẽ yi bɔɩ mɛ. ¹⁹Tõma n tarɩ pʋtẽ’erɛ la Krisi la sãn dɛna la tõma n vɔa dũnia wã zuo mã’a ĩyã, tõma n yi de ninbãal-dõma gãnna nẽrsaalba wuu.

²⁰La, la dagɩ bɛla, Krisi ki dee vo’oge mɛ, ẽŋa n de pɔspɔsɩ dãana n vo’oge, pa’alɛ tɩ nẽrba basɛba n ki la mẽ wʋn vo’oge. ²¹La de la nẽra ayɩla ĩyã tɩ nẽrba kiira, bɛla, la mẽ de la nẽra ayɩla ĩyã tɩ kũm wʋn vo’oge. ²²Nẽrsaalba wuu de la Adam yɩɩsɩ, bɛla tɩ ba kiira. Bɛla tɩ nẽr-sɛba wuu n mẽ de Krisi nẽrba wʋn vo’oge. ²³La nẽra woo tarɩ la a wakatɛ, pɔspɔsɩ de la Krisi n vo’oge, la a lemŋo daarɛ, sɛba n de a nẽrba la wʋn vo’oge mɛ. ²⁴Bɛla poorʋm, Krisi wʋn sã’am sɛba wuu n soe ke’eŋo, la na’am, la pãŋa wuu, dee yãŋa dɩkɛ so’olʋm na lebse bɔ a Sɔ Nawẽnnɛ, dee tɩ sɛla woo ba’asɛ. ²⁵Bɛla, dẽnɩ tɩ Krisi di na’am halɩ ka paagɛ wakat-sɛka tɩ Nawẽnnɛ wʋn botɩ a bɛ’ɛba wuu bɔna a nãma tẽŋa. ²⁶Kũm n de bɛ-sɛka tɩ a wʋn wa sã’am poorʋm. ²⁷La gʋlsɛ Nawẽnnɛ gõŋɔ pʋam yetɩ: «Nawẽnnɛ dɩkɛ sɛla woo ẽŋɛ la a nãma tẽŋa.» Lan yetɩ Krisi n soe sɛla woo la, la ka tã tɩ a sɔna Nawẽnnɛ mẽŋa n botɩ a sɔna sɛla woo la. ²⁸La Nawẽnnɛ sãn dɩkɛ sɛla woo ẽŋɛ Krisi nu’usum, ẽŋa n de Nawẽnnɛ Dayʋa la mẽ wʋn dɩkɛ a mẽŋa ẽŋɛ Nawẽnnɛ nu’usum. Tɩ Nawẽnnɛ dɛna nẽŋadãana sɔna sɛla woo.

²⁹Sɛba n ki la sãn kãn malɩn vo’oge, nẽr-sɛba n botɩ ba misra ba ko’om pʋam sɛba n ki ĩyã la, wʋn ẽŋɛ la wãne? Kũm sãn kãn malɩn vo’oge, bẽm tɩ ba ɩta bɛla? ³⁰La bẽm tɩ tõma põsra tɩ yõorɛ wakatɛ wuu? ³¹M sɔbiisi, mam põsrɩ m yõorɛ mɛ daarɛ woo, mam n yetɩ ya se’em na de la sɩra. La de la sɩra wʋ mam n ɩtɩ sũ-yẽlga ya yelle yãma n dolɩ Zuudãana Azezi-krisi ĩyã se’em na. ³²La sãn dɛna la dũnia zuo vɔm mã’a ĩyã, mam n daan yẽ yɛla Efɛɛzɩ tẽŋa wʋ mam zɛbrɩ la we-dũnsi la, a yõorɔ de la bẽm? La sãn dɛna tɩ kũm kãn vo’oge, tɩ wʋn yele nɩ wʋ nẽrba basɛba n yetɩ se’em na: «Basɛ-ya tɩ tɩ dita dee yũura, tɩ beere tɩ wʋn ki mɛ.»

³³Da pã’asɛ-ya ya mẽŋa. Fʋ sãn dɔla nẽr-be’ego, fʋ wʋn lebge la nẽr-be’ego. ³⁴Basɛ-ya tẽ’esɛ yooro, dee da le tõnna tõon-be’ero. Mam yetɩ ya tɩ la de la yãnnɛ bɔ ya: Ya nẽrba basɛba ka mi Nawẽnnɛ.

Sɛba n wʋn vo’oge la ĩyã n wʋn ãna se’em

³⁵La nẽr-sɛka wʋn soke yetɩ: «Sɛba n ki la wʋn vo’oge la wãne wãne? Ba wʋn wa tara la ĩyã bẽm buuri?» ³⁶Sokre ẽna de la gɔɔn-sokre! Fõn ka mi tɩ fʋ sãn bʋrɛ sɛla biire, a yɛm n wʋn bule yese vɔa, dee tɩ a pɔkɔ põ’ogɛ? ³⁷La sãn dɛna la ke-biire bɩɩ sɛla ayẽma biire tɩ fʋ dɩkɛ bʋrɛ, a de la biire mã’a. La a sãn yese, a ka le ãna wʋ sɛka tɩ fʋ bʋrɛ la. ³⁸Nawẽnnɛ botɩ bõnbuuri la yɛsra ãna wʋ ẽŋa n boorɩ tɩ ba ãna se’em na. Bõnbuuri woo n yesrɩ ãna se’em de la to’oto’ore.

³⁹Bõn-vɔɔsɩ mẽ ka tarɩ ĩyã ayɩla. Nẽrsaalba ĩyã de la to’ore, dũnsi ĩyã de la to’ore, niinto ĩyã de la to’ore, tɩ zũma ĩyã mẽ dɛna to’ore. ⁴⁰Bõn-sɛba n boe saazuum tarɩ la ba ĩyã, tɩ sɛba n boe tẽŋa zuo mẽ tara ba ĩyã, la ba sõŋa dagɩ ayɩla. ⁴¹Wẽntulle peelem boe la a to’ore, tɩ wõrga peelem bɔna a to’ore, tɩ wõrbiɛ peelem mẽ bɔna ba to’ore. La wõrbiɛ la peelem mẽ le bɔna la to’oto’ore.

⁴²Kũm vo’ore la mẽ wʋn wa ãna la bɛla. Nẽra sãn ki tɩ ba laagɛ ẽ, a ĩyã põ’orɩ mɛ. La Nawẽnnɛ sãn wa vo’oge ẽ, a kãn le põ’ogɛ. ⁴³Ba sãn laagɛ kũm, a lɔrɛ mɛ dee dɛna gille. La a sãn vo’oge, a ãn na sõŋa, dee tara pãŋa. ⁴⁴Ban laagɛ ẽ na, a tarɩ la dũnia zuo ĩyã. La Nawẽnnɛ sãn wa vo’oge ẽ, a tarɩ la ĩyã tɩ Nawẽnnɛ Sɩa bɔ ẽ. Dũnia zuo ĩyã boe mɛ, la ĩyã tɩ Nawẽnnɛ Sɩa bɔ’ɔrɩ mẽ boe mɛ. ⁴⁵La gʋlsɛ Nawẽnnɛ gõŋɔ pʋam yetɩ: «Adam n de pɔspɔsɩ nẽra la, Nawẽnnɛ n bɔ ẽ vɔm.» La Krisi tɩ ba wi’iri tɩ poorʋm Adam na, tarɩ la Sɩa n bɔ’ɔrɩ vɔm. ⁴⁶La dagɩ ĩyã tɩ Nawẽnnɛ Sɩa bɔ’ɔrɩ la tɩ tɩ to’orɩ yiɛn. Tɩ to’orɩ la dũnia wã ĩyã yiɛn, dee yãŋa wʋn to’oge ĩyã tɩ Nawẽnnɛ Sɩa bɔ’ɔrɩ. ⁴⁷Nawẽnnɛ yʋʋn dɩkɛ la tẽŋa tẽntõnnɔ nãam pɔspɔsɩ nẽra la. La poorʋm nẽra la ze’ele la Nawẽnnɛ yire wa’am. ⁴⁸Dũnia nẽrba wuu ãn wʋ nẽr-sɛka tɩ Nawẽnnɛ yʋʋn dɩkɛ tẽŋa tẽntõnnɔ nãam na. Tɩ Nawẽnnɛ yire nẽrba mẽ ãna wʋ nẽr-sɛka n ze’ele Nawẽnnɛ yire wa’am na. ⁴⁹Bɛla, tõma n ãn wʋ nẽr-sɛka tɩ Nawẽnnɛ dɩkɛ tẽntõnnɔ nãam na, tɩ mẽ wʋn wa ãna wʋ nẽr-sɛka n ze’ele Nawẽnnɛ yire wa’am na.

⁵⁰M sɔbiisi, bɛla tɩ mam gʋlsɛ yele ya tɩ, nẽrsaala ĩyã wã kãn tã’agɛ kẽ Nawẽnnɛ so’olʋm pʋam. Ĩyã wã n põ’orɩ la kãn tã’agɛ yẽ vɔm n ka ba’asrɩ.

⁵¹Selse-ya tɩ m yele ya yelle n sʋgɛ. Tõma nẽrsaalba wuu kãn ki dee tɩ dũnia ba’asɛ, la tɩ wuu ĩisi wʋn teege mɛ. ⁵²Dũnia ba’asgɔ daarɛ, benkonne n wʋn peebe, tɩ tɩ wuu teege tɔtɔ nini kãbsɩgɔ pʋam. Benkonne na sãn peebe, sɛba n ki la wʋn vo’oge la ĩyã n kãn malɩn ki, la Nawẽnnɛ wʋn teege tõma ĩyã mɛ. ⁵³Dẽnɩ tɩ nẽrsaala ĩyã wã n põ’orɩ la, lebge ĩyã n ka põ’orɩ, tɩ ĩyã n kiiri la, lebge ĩyã n ka kiiri. ⁵⁴La ĩyã n põ’orɩ la sãn lebge ĩyã n ka põ’orɩ, tɩ ĩyã n kiiri la lebge ĩyã n ka kiiri, wakat-ẽŋa tɩ Nawẽnnɛ gõŋɔ n gʋlsɛ se’em na wʋn ẽŋɛ. La gʋlsɛ yetɩ:

«Nawẽnnɛ yãŋɛ kũm,

tɩ kũm ka le bɔna.

⁵⁵Kũm, fʋ pãŋa boe la bɛ?

Fʋ toogo boe la bɛ?»

⁵⁶La de la tõon-be’ero n botɩ kũm tara pãŋa kʋʋra nẽrba. Tɩ lɔɔ botɩ tõon-be’ero yẽta pãŋa. ⁵⁷Tɩ pʋ’ʋsɛ Nawẽnnɛ a yel-sõnnɛ, ẽŋa n botɩ tõma yãŋɛ tõon-be’ero, la kũm, Zuudãana Azezi-krisi ĩyã la.

⁵⁸Bɛla, m sɔbi-nõŋrɩsɩ, mõrgɛ-ya ze’ele kãŋkãŋɛ. Tõnna-ya Zuudãana tõoma la wakatɛ wuu da basɛ, yãma n mi tɩ nãmsgɔ sɛka tɩ ya nãmsrɩ Zuudãana la ĩyã dagɩ zãŋa la.

Ba lagsɛ ligri tɩ ba sõŋɛ Nawẽnnɛ nẽrba n boe Zerizalɛm

¹Lɛɛlɛ wã, mam boorɩ tɩ m tɔgɛ la ligri la tɩ ya lagsrɩ tɩ ya sõŋɛ Nawẽnnɛ nẽrba la yelle. Doose-ya pa’alg-sɛka tɩ mam pa’alɛ Nawẽnnɛ nẽrba la n boe Galatɩ so’olʋm na. ²Lasrɩ daarɛ woo, nẽra woo looge lig-sɛba tɩ a yetɩ a bɔ la bĩŋe, da zɛ-ya gu’ura tɩ mam sãn wa paam, tɩ ya yãŋa lagsɛ. ³Tɩ mam sãn wa paam, mam wʋn gʋlsɛ la gõŋɔ tõm nẽr-sɛba tɩ ya mẽŋa wʋn looge la, tɩ ba tarɩ bɔ’a la sẽŋɛ Zerizalɛm. ⁴La, la sãn le nara tɩ mam mẽŋa sẽŋɛ, bãma wʋn doose la mam tɩ tɩ sẽŋɛ.

Apolɩ tɔgrɩ a sore sẽnnɛ yelle

⁵Mam wʋn wa’am ya zẽ’am, la mam wʋn doose la Masedʋanɩ so’olʋm wa’am. ⁶La mam sãn wa’am, mam wʋn yuuge ya zẽ’am fẽe, bɩɩ tã tɩ mam wʋn bɔna la ya tɩ ɔɔrɔ wakatɛ wa tole, tɩ ya sõŋɛ ma tɩ m sẽŋɛ zẽ’e-sɛka tɩ mam wʋn sẽŋɛ la. ⁷Mam ka boorɩ tɩ m wen doose bɩsɛ ya dee tole, mam tarɩ pʋtẽ’erɛ tɩ mam wʋn bɔna ya zẽ’am yuuge, Zuudãana la sãn bɔ mam sore. ⁸La mam wʋn weege bɔna la Efɛɛzɩ tẽŋa wã halɩ ka paagɛ Pãntekɔtɩ kibsa daarɛ. ⁹Se’ere n soe la, Nawẽnnɛ yo’oge la sore bɔ mam tɩ m tõm a tõoma zozo’e, baa bɛ’ɛba n zo’oge la.

¹⁰Atimõtɩ sãn wa’am ya zẽ’am, ya to’oge ẽ sõŋa, dee ẽŋɛ-ya yan wʋn ẽŋɛ se’em tɩ a bʋraanɛ da bo’oge. Se’ere n soe la, a tõnnɩ Zuudãana tõoma la wʋ mam n tõnnɩ se’em na. ¹¹Nẽra nẽra da pɔ’ɔgɛ ẽ, sõŋɛ-ya ẽ tɩ a leme wa’am mam zẽ’am la sũ-mã’asʋm. Mam, la sɔbiisi la gu’uri ẽ mɛ.

¹²La sãn dɛna tɩ sɔbia Apolɔsɩ, mam yele ẽ mɛ nõorɛ faa tɩ a doose la sɔbiisi basɛba la wa’am wa bɩsɛ ya. La a ka boorɩ tɩ a wa’am lɛɛlɛ wã. A sãn wa yẽ nẽŋa, a wʋn wa’am.

Ba’asgɔ yetɔga, la pʋ’ʋsgɔ

¹³Guuse-ya ya mẽŋa zɛ kãŋkãŋɛ Nawẽnnɛ sore doosgo la pʋam. Keŋe ya mẽŋa, tara-ya bʋraanɛ. ¹⁴Ɩta-ya sɛla woo la nõŋlʋm.

¹⁵M sɔbiisi, ya mi Astefanasɩ la a yir-dõma yelle, bãma n dẽŋɛ bɔ Nawẽnnɛ sɩra Akayi so’olʋm pʋam. Ba tõm mɛ bɔ Nawẽnnɛ nẽrba. Mam belnɩ ya mɛ ¹⁶tɩ ya nanna nẽr-bãma, la nẽr-sɛba wuu n tõnnɩ Nawẽnnɛ tõoma wʋ bãma la.

¹⁷Mam tarɩ sũ-yẽlga mɛ Astefanasɩ la Afɔrtunatusi la Akayikusi n wa’am na. Se’ere n soe la, ba sõŋɛ mam wʋ yãma boe nɩ la mam zẽ’am na. ¹⁸Ba keŋe mam, la yãma sũure mɛ. Pẽgra-ya nẽr-bãma buuri.

¹⁹Nawẽnnɛ nẽrba n boe Azi so’olʋm pʋ’ʋsrɩ ya. Akila, la Aprisili, la Nawẽnnɛ nẽr-sɛba n lagsrɩ ba yire la pʋ’ʋsrɩ ya sõŋa Zuudãana Azezi doosgo pʋam. ²⁰Sɔbiisi la wuu pʋ’ʋsrɩ ya. Pʋ’ʋsɛ-ya taaba la nõŋlʋm.

²¹Mam Apolɩ n gʋlsɛ pʋ’ʋsgɔ wã la m mẽŋa nu’ugo, mam pʋ’ʋsrɩ ya.

²²Nẽr-sɛka n ka nõŋɛ Zuudãana la, kã’a-be’ego wʋn bɔna a dãana zuo. Maranata.

²³Tɩ Zuudãana Azezi yel-sõnnɛ wʋn bɔna la ya.

²⁴Mam nõŋɛ ya wuu mɛ Azezi-krisi doosgo pʋam.