Lamentações

Jeremias nhogueronhemboaxya rupi ijayvuague

Jeremias nhogueronhemboaxya lamentações [esta palavra em português] rupi ijayvuague

Kova’e kuaxia para re ma Jeremias ipy’a vaia rupi ijayvu Babilônia pygua kuery Jerusalem tetã oitypaague re. Ha’e rami teĩ kuaxia mbyte py ma ojerovia etea rupi ijayvuague avi oĩ:

“Mba’eta Senhor nhanemboaxy ramo ma nanhanemombaai,

mba’eta nhanemboaxya ma opa va’erã e’ỹ.

Opa mba’e py ojeroviapy reiko vy

rexa uka pyau ’rã ko’ẽ nhavõ.

Xejeupe ae aipoa’e: ‘Xevy guarã oĩ va’e ma Senhor ae.

Ha’e nunga rupi arõ tema ’rã hexe’, ha’e.

Senhor opena porã ’rã harõa kuery re,

onhe’ẽ py oeka va’e kuery ae.

Ha’eve nharõ Senhor nhandereraa jepe aguã,

nhakyrirĩ reve” (3.22-26).

Jerusalém tetã ombovaipa ha’e oejapaa ague re ndovy’aaiague

¹ Tetã yma heta riae ikuaiague teĩ aỹ ma oejapaa ma!+ 1:1 “Tetã” he’ia ma Jerusalém re ae ijayvu vy, Babilônia pygua kuery ombovaipa rire (2 Reis 24-25; 2 Crônicas 36; Jeremias 39, 52).

Aỹ ma kunha imeve’ỹ va’e rami opyta,

yvy regua kuery omboeteve va’ekue ri.

Amboae tetã ikuai va’e gui huvixa rajy rami yvateve va’ekue ri

aỹ joupe rive ha’e kuery omomba’eapo nhea’ãa.

² Ojae’o, ojae’o tema okuapy pyávy,

hexay oxyry tema ’rã hetovape rupi.

Ndoikoi imbopy’a porãarã

hembiayvu heta ikuai va’ekue ri.

Hembiayvu ikuai va’ekue ha’e javi ma anhetẽ rupi e’ỹ oguereko,

ha’e hovai guarã rive ju ikuai.

³ Mba’eta Judá kuery ma escravo-rã ogueraapaa,

oguereko axya ha’e omomba’eapoa poyi anho rei.

Yvy regua kuery mbyte rupi ikuaia py

ndojoui opytu’u aguã voi.

Ikuai axy reia py

hakykue monhaa kuery oupitypa ma.

⁴ Sião tetã katy tape oo va’e rupi ojae’oa,

mba’eta ndoikovei ma nhemboaty iky’a e’ỹ va’e katy oo va’e.

Tetã kora rokẽ ha’e javi ombovaipaa.

Ha’e pygua sacerdote kuery ipoaẽ rei,

kunhataĩgue voi iporiaupa okuapy.

Tetã py ojexavaia anho oendu.

⁵ Ha’e rami rã hovaigua kuery ovy’apa rei okuapy,

ija’e’ỹ va’e kuery ikuai porãmba rei,

ha’e pygua kuery anhetẽ rupi e’ỹ riae ikuai ramo

Senhor omoingo axy rã oexa vy.

Ta’y kue’iry voi hovaigua kuery

omondyi heravy escravo-rã.

⁶ Sião pygua kuery gui oaxapa ma

iporãa oĩ va’ekue ha’e javi.

Ha’e py yvatekueve ikuai va’ekue voi

guaxu ho’u va’erã ndojouvei va’e rami ma ikuai,

ikangypa rei vy ho’apa rive ’rã okuapy

imonhaa kuery renonde py teĩ.

⁷ Aỹ mombyry ogueraa ague py ombojexavaia rã

Jerusalém guigua kuery ima’endu’a ’rã okuapy

omba’e rei-rei oguerovy’a va’ekue re,

ymave rupi mba’emo oguereko va’ekue re,

heraa jepearã ndoikoi ramo

ngovaigua kuery po py ho’apaague re guive,

ha’e gui ho’a rã hovaigua kuery oexa vy

ojojai rei okuapyague re.

⁸ Jerusalém pygua kuery ojejavy vaipa ete okuapy.

Ha’e rami vy ae ojeguaru reipy ikuai.

Imboeteare kuery ma nonhemoirũvei okuapy

ipire reia rupi ikuai rã oexa vy.

Ha’e kuery ae voi ipoaẽ reve

ojepe’a ’rã okuapy oxĩmba rei vy.

⁹ Ijao re ojekuaa ha’eve’ỹa,

noexa’ãi guive va’ekue omombaa aguã re.

Ha’e rami vy oitya rã onhemondyipa rei okuapy,

ha’e avave rei ndoikoi imbopy’a porã jevyarã.

Senhor , exa ke aiko axya,

mba’eta hovaigua kuery ijayvu vaive rive tema okuapy.+ 1:9 Jeremias “Aiko axya” he’i mba’eta ha’e ae voi opyta Judá yvy re Babilônia pygua kuery ndogueraapai va’ekue reve (Jeremias 40.1-6).

¹⁰ Ore kuery mba’e rei-rei roguerovy’ave va’ekue ma

orerovaigua kuery ojopy vy omba’erã ae ogueraapa.

Roexa avi yvy regua kuery oike okuapy rã

rombojeroviaaty iky’a e’ỹ va’e py voi,

“Nda’evei xevygua kuery ijatya py ha’e kuery ikuai avi aguã” aipo’re va’ekue ri.

¹¹ Tetã pygua kuery ha’e javi ipoaẽ ’rã okuapy

tembi’u’i rekaa rupi ikuai vy.

Omba’e rei-rei ha’e kuery oguerovy’ave va’ekue ome’ẽmba ma

tembi’u ho’u va’erã rekovia, imbaraeteve’i ju aguã.

Senhor , exa ke, eikuaa pota guive,

mba’eta xere nda’ija’eavei ma.

¹² Peẽ kuery tape rupi peaxa va’e,

ha’e nunga pexa vy napendui ri ty’y oremboaxya?

Pema’ẽ ha’e peikuaa pota.

Oiko ’rã nda’u haxy va’e xee aendu va’e ramigua,

xe’áry ou va’ekue ramigua ete?

Mba’eta Senhor opoxya oexa ukaa ára xemoingo axy avi.

¹³ Ha’e rami vy yvate gui tata ombou xekãgue ikuai va’e re

ipo’aka ete vy.

Ha’e gui xepy rupi ju kya omoĩ va’e py

xerakykue katy gui xemoatã vy xereity.

Ha’e rami vy xemomba tema heravy,

xemomba’eaxy ko’ẽ nhavõ.

¹⁴ Ajejavyague ma opo py ae ojokua vy

ojapo xe-cangarã rami.

Ha’e vy oipopẽ va’ekue xeaju’y rupi peve ovaẽ.

Ha’e rami py Senhor omomba ma xembaraetea,

xemboaxa guive xegui ipo’akave va’e kuery po py.

¹⁵ Senhor omoaĩmba avi ma ipy’a guaxukueve

xereve ikuai va’ekue.

Ombou reta xerovai ono’õ va’erã,

xea pygua kunumigue omou’ũmba avi aguã.+ 1:15 Apy “Xee” he’ia ma Jerusalém ae ijayvua rami Jeremias ijayvu vy, ojee e’ỹ.

Kunhataĩ’i rami Judá pygua kuery ndojexavai va’ekue ri

Senhor opyrõ ukapa uva omou’ũaty py rami.

¹⁶ Ha’e nunga re ae xee ajae’o,

xerexay gui xerexa ndoexavei.

Xegui ojepe’a ma xembopy’a guaxuarã

xembaraete ombopyau ’rã va’ekue.

Xera’y kuery voi ojexavai reia rupi ikuai,

hovaigua ipo’aka ramo.

¹⁷ Sião pygua kuery opo oupi teĩ

avave rei ndoikoi ipytyvõarã.

Mba’eta Jacó regua kuery re Senhor ijayvu rire

ha’e katy’i rupi ikuai va’e hovaigua ju ikuai.

Ha’e ramo Jerusalém tetã pe ha’e kuery

“Ha’eve’ỹ va’e” he’i okuapy.

¹⁸ Ha’e rami avi Senhor ma heko porã va’e,

ha’e rã xee ma nanhe’ẽ renduxei va’ekue.

Peẽ yvy regua kuery ha’e javive, pendu ke,

pema’ẽ guive haxy aendu va’e re.

Xea pygua kunhataĩgue ha’e kunumigue

ogueraapaa ma escravo-rã.

¹⁹ Xeirũ kuery aenoĩ

teĩ ha’e kuery xembotavy.

Xea pygua sacerdote ha’e nhomongeta va’ety kuery voi

omanomba tetã rupi,

tembi’u rekaa rupi ikuai vy

imbaraetepa’i ju aguã.

²⁰ Ema’ẽ Senhor , mba’eta xee ajexavai.

Xenhe’ẽ py nda’evei ete aikovy,

xekuraxõ py ndaxerekorãvei ma xeryepy rupi,

opa mba’e py noronhe’ẽ rendui rire.

Oka rupi xera’y kuery ojukapaa kyxe py,

ha’e rã opy rupi ma mano anho oiko.

²¹ Xepoaẽa onhendu

teĩ avave rei ndoikoi xepytyvõarã.

Mba’emo vai aendua xere ija’e’ỹ va’e kuery oikuaa vy

ovy’a reipa okuapy, ndee xemoingo axy ramo.

Ha’e rami avi ára ndeayvuague ovaẽ ramo

xee aiko axya rami avi ha’e kuery voi ikuai axy ’rã.

²² Tove ha’e kuery ojejavyague tojekuaapa nerenonde.

Ereko ha’e kuery voi xere rejapoague rami,

xee anhetẽ rupi e’ỹ aikoa py.

Mba’eta xepoaẽ vaipa ete,

xekuraxõ opa rai’i ma.

“ Senhor gui ae ou Sião pygua ikuai axy aguã”, he’iague

¹ Arai rami Senhor ojao’i Sião pygua kuery opoxya py.

Yva gui oity Israel kuery po’akaa yvy py,

Opoxya oexa ukaa ára ovaẽ ramo

na’ima’endu’avei ipy renda oĩ va’ekue re.+ 2:1 “Ipy renda” he’ia ma Jerusalém py templo oĩ va’ekue re ijayvu vy (Salmo 132.7).

² Ha’e rami vy Senhor omboaxy e’ỹ re

ombovaipa Jacó regua kuery rekoa ha’e javi.

Opoxya rupi oity

Judá kuery ro ikorapa va’ekue.

Yvy rupi oitypa, nombovarevei ae

yvatekueve ha’e openaague.

³ Opoxya py omomba Israel kuery po’akaa ha’e javi.

Hovaigua kuery ou teĩ omboapu’a ju oiporu kuaa regua.

Ha’e vy Jacó kuery rovai imoendyarã ombou

tata rendy vuku ijyvýry rupi oapypa va’erã.

⁴ Ha’e kuery re oipira guapa hovaigua rami.

Hovaigua rami ete onhemomburu oiporu kuaa regua re.

Ha’e vy omokanhymba iporã va’ekue ha’e javi.

Tata rami opoxya omonhemboja Sião tekoa áry.

⁵ Hovaigua rami Senhor oiko vy

omokanhymba Israel kuery.

Ombovaipa huvixa kuery ro ha’e javi,

oo ikorapa va’ekue oitypa.

Ha’e vy Judá kuery ikuaia py omboetave tema

ojae’o ha’e ipy’a vai va’e.

⁶ Ojeupegua templo voi ombovaipa vyvoi

mba’emo rogue’i onhotỹ mbyre rami rive.

Ombovaipa ojeupegua kuery ombojeroviaaty.

Senhor ojapo orerexaraipa aguã rami

Sião py ngaru rojapo ha’e sábado ára romboeteague re.

Opoxya rupi omboyke avi

huvixa ha’e sacerdote ikuai va’ekue.

⁷ Senhor ndoipotavei ojeupegua altar,

ojeupegua oo iky’a e’ỹ va’e ndojou porãvei vy.

Hovaigua kuery po py omboaxa

oo tuvixakueve kora.

Ha’e ramo Senhor pegua opy rupi ha’e kuery ojapukai okuapy

ngaru oikoa ára py rami.

⁸ Senhor ojee omoĩ avi

Sião tetã kora ombovaipa uka aguã.

Ha’e rami vy omoatã uka ixã mba’emo a’ãarã,

ndoipe’ai guive opo ombovaipa e’ỹa ja.

Ojapo kora ha’e imbotya opurupa rei aguã rami,

ha’e nunga ha’e javi ikangypave ovy.

⁹ Kora rokẽ voi oitypa yvy rupi.

Okẽ jokoa voi omopẽ, omboa’ypa ete.

Ha’e pygua huvixa ha’e yvatekueve reve ma

yvy regua ikuaia rupi rive ikuai,

lei oikuaa e’ỹ va’e ikuaia rupi,

ha’e profeta kuery pe ma Senhor ndoexa ukavei mba’eve.

¹⁰ Sião pygua nhomongeta va’ety kuery ma

okyrirĩmba reve oguapy okuapy yvy py.

Oakã re omoĩ okuapy yvy ku’i,

ajukue vaikue py rive onhemonde reve.

Jerusalém pygua kunhataĩgue voi

oakã oity okuapy yvy peve.

¹¹ Xerexay py rive xerexa nda’evevei ma,

xenhe’ẽ py ndaxerekorãvei aikovy,

xekuraxõ voi ojero’a oiny aiko axy ramo,

xevygua kuery omombaa ague re xepy’a vaia py.

Mba’eta kyrĩgue okambu’i va’e voi omanomba

tetã rupi tape ikuai va’e rupi.

¹² Oxy kuery pe kyrĩgue aipoe’i:

“Mamo nda’u jajou ’rã mbojape ha’e vinho?”

he’i okuapy teĩ tetã rupi tape ikuai va’e rupi,

ha’e rami teĩ kyxe gui rami ho’apa okuapy,

ha’e rami e’ỹ vy oxy kuery jyva áry oĩ reve

onhe’ẽ oeja ovy.

¹³ Ndee Jerusalém pygua, marã rami tu xee rombovai ta?

Ndee Sião pygua, mba’e nunga re tu rombojoja ’rã,

mava’e re tu romboje’a ’rã rombopy’a porã aguã?

Mba’eta nemombaarã ou va’e ma ye’ẽ rami tuvixa.

Mava’e tu nepytyvõ ’rã?

¹⁴ Ndea pygua profeta kuery ma ndevy pe omombe’u

oexa ra’u va’ekue ramigua mba’eve ovare’ỹ va’e.

Ha’e rã ndereko vaia re ma ha’e kuery nda’ijayvui

nemoingo porã ju aguã.

Ha’e rami ’rãgue py oexa ra’u va’ekue ramigua rive omombe’u vy

ojapo escravo-rã ndereraa aguã rami.

¹⁵ Ha’e nunga rupi tape rupi oaxa va’e kuery ma

ojepopete ha’e oakã ombovava reve oje’oi

Jerusalém pygua kuery ojojai rei vy.

“Peva’e tetã pe teve ‘Pavẽ gui iporãve va’e,

yvy jave regua oguerovy’a va’e’, ’ea va’ekue?” he’i oje’oivy.

¹⁶ Ndere ija’e’ỹ va’e kuery

ojuru oipe’a ’rã nderovai,

ndejojai rei reve haĩ jekyty rei ’rã okuapy.

Ha’e vy aipoe’i ’rã: “Nhamondoropa ke.

Anhetẽ ete, kova’e ára ae nharõague.

Ojeupity rã jaexa ma”, he’i okuapy.

¹⁷ Mba’eta Senhor ae ojapo onhembopy’aague.

Yma guive nderovai ijayvuague

ojapo ojeupitypa aguã rami.

Ha’e rami vy nemboaxy e’ỹ re ndereity.

Ojapo nderovaigua kuery ndere ovy’apa rei aguã rami,

ha’e kuery ombopo’akapave vy.

¹⁸ Jerusalém pygua kuery okuraxõ py ojapukai okuapy Senhor pe.

Ndee Sião tetã kora,

nderexay toxyry yakã’i rami,

ara py ha’e pyávy.

Epytu’u eme, nderexa topytu’u eme ojae’oa gui.

¹⁹ Epu’ã ke, ejapukai pyávy

pytũ ypy’i ramove.

Senhor renonde enhoẽ yy rami ndepy’a re oĩ va’e.

Ixupe eupi ndepo ndera’y ha’e nderajy kue’iry rekove re.

Mba’eta ha’e kuery ma karuai gui rive ho’apa okuapy

tape ikuai va’e ha’e javi rupi.

²⁰ Ema’ẽ Senhor , ha’e eikuaa pota

marã ramigua kuery ha’e rami ete remoingoa re!

Mba’eta kunhague ho’u ’rã teve oikuavã va’ekue ae,

omemby kuery oayvua’i rupi oguereko va’ekue?+ 2:20 Ha’e nunga ae oiko tetã ojokopaa rã. Tembi’u oata rã ixy kuery ho’u omemby kuery ae (Jeremias 19.9; Levítico 26.29).

Ha’e rami e’ỹ vy Senhor pegua oo iky’a e’ỹ va’e py

ojukapaa ’rã teve sacerdote ha’e profeta kuery?

²¹ Mba’eta kunumigue ha’e tujakue’i re’õgue

yvy rupi ikuai tape ikuai va’e rupi.

Xea pygua kunhataĩgue ha’e kunumigue

ojukapaa kyxe py.

Ndee ae ma rejuka uka ndepoxya ára py.

Remboaxy e’ỹ re rejuka uka.

²² Opa rupi gui rembou xemongyjearã,

ndevygua nhemboaty oikoa py rami.

Senhor opoxya oexa ukaa ára ma

ndoikoi oo jepe va’e neĩ opyta va’erã.

Mba’eta hovaigua kuery omomba ma

xee ayvua’i rupi amongakuaa va’ekue.

Ojexavaia re ijayvuague

¹ Xee ma ava jexavai aendu va’ekue

Nhanderuete opoxya rupi yvyra po’i’i ombou rã.

² Mba’eta xereraa vy ojapo karamboae pytũ rupi aiko aguã,

hexakãa rupi e’ỹ.

³ Mbovykue rei e’ỹ xerovai omoĩ opo,

ára pukukue re.

⁴ Omoxorĩmba xero’o, xepire voi.

Xekãgue omopẽmba guive.

⁵ Xerovai omopu’ã xejokoarã kuery.

Veneno ha’e haxy va’e py ae xejoko.

⁶ Ojapo pytũa py xerekoa aguã rami,

raka’e rã peve guarã omano va’ekue rami.

⁷ Kora py xejoko rã nda’evevei ma aẽ aguã.

Corrente overa va’e guigua py xejokua.

⁸ Ajerure ha’e ajapukai teĩ

noendui anhembo’ea.

⁹ Ita guaxu omoatyrõ mbyre py ojopia xerape,

omokarẽ rei guive.

¹⁰ Xerarõ oiny urso oma’ẽ mbegue va’e rami,

ha’e xivi onhemi oiny va’e rami avi.

¹¹ Ha’e rami vy xerape gui xepe’a xapy’a vy xemboa’ypa.

Ombovaipa pyre rami xereja inony.

¹² Guapa oipira vy

xemoĩ guembiarã.

¹³ Xekuraxõ re oipyxo

ngu’y hyru guigua py.

¹⁴ Xeapo xeretarã kuery ha’e javi xejojai aguã rami.

Ára pukukue re xembojaru rei okuapy.

¹⁵ Jexavaia re anho xemongaru,

xevy ho’u uka reta haxy va’e.

¹⁶ Xeapo ita ra’y re xeraĩ amopẽmba aguã rami.

Xeao’i tanhimbu py rive.

¹⁷ Xenhe’ẽ gui oipe’a aiko porã aguã va’ekue.

Ha’e ramo xerexarai iporã va’e aexaague re.

¹⁸ Ha’e rami vy “Opa ma xeporãague,

Senhor aarõague voi”, ha’e.

¹⁹ Nema’endu’a nho ajexavaia ha’e ajae’o aikovya re,

haxy va’e ha’e veneno ay’u va’e re guive.

²⁰ Xee ma ha’e nunga re xema’endu’a riae aikovy xenhe’ẽ py.

Ha’e ramo xeryepy rupi xenhe’ẽ nda’evei ju.

²¹ Ha’e rami teĩ xema’endu’axe ju

pova’e nunga arõ aikovy va’e re.

Nhanderuete omboaxya rupi oipytyvõ aguã re ojerureague

²² Mba’eta Senhor nhanemboaxy ramo nanhanemombaai,

mba’eta nhanemboaxya ma opa va’erã e’ỹ.

²³ Opa mba’e py ojeroviapy reiko vy

rexa uka pyau ’rã ko’ẽ nhavõ.

²⁴ Xejeupe ae aipoa’e: “Xevy guarã oĩ va’e ma Senhor ae.

Ha’e nunga rupi arõ tema ’rã hexe”, ha’e.

²⁵ Senhor opena porã ’rã harõa kuery re,

onhe’ẽ py oeka va’e kuery ae.

²⁶ Ha’eve nharõ Senhor nhandereraa jepe aguã,

nhakyrirĩ reve.

²⁷ Nhandevy pe ha’eve

nhanekunumi teri reve canga jexavaia regua jaropo’aka kuaa.

²⁸ Ha’e rami vy tajaguapy nhande ae’ia py, tanhakyrirĩ nhainy,

mba’eta ha’e va’e canga ae nhandere Nhanderuete omoĩ va’e.

²⁹ Tajajero’a nhanderova yvy ku’i re omovaẽ peve.

Xapy’a rei ma oiko nho ’rã nharõ jaikovy va’ekue.

³⁰ Tanhaunga uka nhanderova nhaneungaxe va’e pe.

Tanhaendu rive opa marã nhandejojai reia teĩ.

³¹ Mba’eta Senhor ma

nanhandereja riaei ’rã.

³² Xapy’a rei nhanemomboriau ranhe teĩ

nhomboaxy ete va’e vy oexa uka nho ’rã nhanemboaxya.

³³ Mba’eta nhomoingo axyxe reia py e’ỹ

ombojexavai avakue ra’y kuery.

³⁴ Xapy’a rei amongue opyrõ imoiny ’rã

nhuã py ikuai va’e re,

³⁵ ha’e rami e’ỹ vy Yvate ete va’e renonde teĩ

ha’eve’ỹa rami oikuaa pota ’rã joe,

³⁶ ha’e rami e’ỹ vy avakue ojerure rã oendu rive ’rã,

teĩ Senhor ndoexai ’rã teve ha’e rami oikoa?

³⁷ Mava’e ayvu rupi rive tu mba’emo oiko ’rã,

Senhor omoingo e’ỹ rã?

³⁸ Yvate ete va’e gui nda’u ndoikoi ’rã ri

mba’emo vai ha’e iporã va’e?

³⁹ Mba’e re tu ha’vy avakue imarã va’e ndojou porãia rupi ijayvu,

ojejavyague re ombopaga rã?

⁴⁰ Jaikuaa pota ke jaikoa re ae.

Ha’e gui jaikuaa porã ma vy jajevy ke Senhor pe.

⁴¹ Nhandepo jaupi reve ke nhanekuraxõ voi jaupi

Nhanderuete yva re oĩ va’e pe. Ha’e vy aipo ja’e:

⁴² “Rojejavy, noronhe’ẽ rendui guive ramo

ndee ma ndoreperdoai teri.

⁴³ Ndee ma ndepoxya py oreao’i reve orerakykue monha.

Oremboaxy e’ỹ re oremokanhymba.

⁴⁴ Arai py renhemi

ndea py peve ronhembo’ea onhendu e’ỹ aguã.

⁴⁵ Yty omombo pyrã rami rive oremoingo

yvy regua kuery ikuaia rupi.

⁴⁶ Orerovai orerovaigua kuery ha’e javi

oipe’a okuapy ojuru.

⁴⁷ Ore’áry ou ndorerekorãvei aguã ha’e yvykua py orembo’aarã,

orereityarã ha’e oremokanhymbaarã.”

⁴⁸ Xeretarã kuery omokanhymbaa rã

xerexay oxyry atã ete.

⁴⁹ Xerexa ojae’o tema.

Ndopo’oi, ndopytu’ui ’rã guive

⁵⁰ Senhor opena e’ỹa ja,

ha’e yva gui oexa pota peve.

⁵¹ Mba’emo aexa va’e gui xeporiau xenhe’ẽ py,

kunhague xeretã rupi ikuai va’e re mba’emo oiko va’ekue káuxa.

⁵² Mba’e re’ỹ xerovaigua kuery

xejukaxe okuapy guyra’i rami rive.

⁵³ Xemombaxe vy xemombo yvykua py,

ha’e ita py xeapipa.

⁵⁴ Xeakã áry rupi yy oxyry atã ouvy.

Ha’e ramo “Akanhy ta ma!” ha’e.

⁵⁵ Ha’e gui ma Senhor , yvykua pukuvea py aĩa gui

ajapukai nderery rupi.

⁵⁶ Ha’e ramo ndee rendu xeayvua.

Emboty eme ndeapyxa ajae’oa ha’e ajapukaia gui.

⁵⁷ Ndevy pe ajapukaia ára ndee ae renhemboja xere.

Ha’e rami vy xevy pe “Ekyje eme” ’re.

⁵⁸ Senhor , xerekove re reikuaa pota vy

xereraa jepe va’ekue aikove aguã rami.

⁵⁹ Senhor , rexa reiny ha’eve’ỹa rami xerereko okuapyague.

Eikuaa pota ’rãgue xere!

⁶⁰ Rexapa xeapo vai okuapya

ha’e xerovai onhembopy’aa ha’e javi.

⁶¹ Senhor , rendu xere ijayvu rei okuapy rã,

xerovai onhembopy’aa nhavõ,

⁶² xerovaigua kuery xerekokue ramigua rive omombe’u rã,

ha’e ára pukukue re xere ijayvu mbegue rei okuapy rã.

⁶³ Exa pota tema ha’e kuery re, oguapy ha’e opu’ã ju ramo.

Mba’eta xembojaru rei rive okuapy.

⁶⁴ Senhor , ndee rembopaga ’rã

opo py mba’emo ojapoague re.

⁶⁵ Remopytũmba ’rã ha’e kuery py’a,

ha’e kuery re rembou ’rã ayvu vai.

⁶⁶ Ndepoxya py remonha ’rã heravy.

Ha’e rami vy remokanhymba ’rã ndevygua yva guy gui.

Tetã ojokopaa jave ikuai axya re ijayvuague

¹ Mba’exa vy nda’u ouro oĩ va’ekue huũmba?

Mba’exa vy tu ouro ombovera pyre ndoveravei?

Ha’e rami ae avi oo iky’a e’ỹ va’e re ita ikuai va’ekue

omoaĩmbaa tape joaxa-axaa ha’e javi rupi!

² Mba’eta Sião pygua yvatekueve ma

ouro oiky’a’o pyre rami ikuai va’ekue ri

aỹ ma ha’e kuery pe “Yapo guigua rive” ’ea,

nhae’ũ re omba’eapo va’e rembiapo ramigua!

³ Jagua-tuvy nhe’ẽ minha omokambu ’rã gua’y kue’iry.

Ha’e rã xeretarã kuery ma porayvu ve’ỹ ma ikuai

guyra-nhandu tekoa e’ỹa rupigua rami.+ 4:3 Guyra-nhandu ma ombo’a ma vy ngupi’a oeja rive ’rã (Jó 39.13-18).

⁴ Ha’e ramo kyrĩgue okambu va’e apekũ ipirupa ma,

ijy’uvei gui oja ijuru re.

Kyrĩgue mbojape re ojerurea rupi ikuai

teĩ avave rei nome’ẽai ’rã.

⁵ Tembi’u porã re okaru va’ekue ma

ho’apa ’rã okuapy tape rupi.

Onhemonde porãa rupi ikuai va’ekue ma

yty rupi rive ikuai.

⁶ Sodoma tetã minha xapy’a’i py omokanhymbaa raka’e

avave po py e’ỹ.

Ha’e rami teĩ Sodoma pygua kuery ojejavyague gui voi

xeretarã kuery ojejavyve va’e ikuai.

⁷ Mba’eta yvatekueve ma yro’y ha’e kamby gui xiĩve va’ekue,

ita coral va’e gui ipire pytãve va’ekue,

ha’e ita safira rami iporã va’ekue ri

⁸ aỹ ma hova tapyĩ gui ete huũve va’e.

Tape rupi ooa rupi avave rei ndoexa kuaavei.

Ipire ma ojapa ikãgue re,

yvyra rakã rami ipirupa va’e vy.

⁹ Mba’eta karuai gui omano va’e kuery gui

ovy’ave kyxe py ojukapy.

Mba’eta ndokarui va’e ma mbeguei’i opa oje’oivy.

Ho’u va’erã mba’ety rupi ndoikovei ramo omano tema ’rã oje’oivy.

¹⁰ Kunhague ymave rupi porayvu va’ekue ri

aỹ ma opo py ae omomimoĩ ’rã omemby kuery.

Ha’e kue’iry re ae ’rã okaru

xeretarã kuery omokanhymbaa ramo.

¹¹ Senhor opoxya rupi oiko vy

ombou opoxya nhomoendyarã.

Sião re tata omonhemboja vy

ijyta peve oapypa.

¹² Yvy regua ruvixa kuery ha’e yvy re ikuai va’e ha’e javi

ndogueroviai okuapy omombe’ua rã

Jerusalém rokẽ rupi hovaigua kuery oikepa maague.

¹³ Ha’e va’e oiko ha’e pygua profeta kuery ojejavyague re,

sacerdote kuery ojapo vaiague re guive,

mba’eta tetã mbyte rupi

omoẽ okuapy heko porã va’e ruguy.

¹⁴ Ha’e kuery ma ára revegua e’ỹ rami oguata rei tape rupi,

tuguy omoẽ va’ekue py iky’apa va’e ikuai,

ha’e ijao re ma voi avave rei ndovyxeai.

¹⁵ Ha’e kuery pe ojapukaia: “Ha’eve’ỹ va’e kuery, pejepe’a ke!

Pejepe’a ke, pexyry ke, pepoko eme orere!” ’ea.

Ha’e ramo ojava oje’oivy, ha’e ovaẽa py rei

ha’e kuery pe yvy regua kuery

“Apy ma nda’evei ae pendekuai aguã.”

¹⁶ Mba’eta Senhor ae omoaĩ imondovy opoxya rupi.

Ha’e rami vy nopenavei ma ha’e kuery re.

Hovaigua kuery katuve ma nomboetei ’rã sacerdote kuery,

ha’e nhomboaxya rupi e’ỹ ’rã oguereko nhomongeta va’ety kuery.

¹⁷ Ha’e gui ma ore kuery rexa ikangypa ma

orepytyvõarã ou va’erã re roma’ena vy teĩ.

Roikuaa potaaty py roarõ reve roma’ẽ tema

peteĩ regua orereraa jepe va’erã re teĩ ndoui ae.

¹⁸ Orerovaigua kuery ma orekuaia rupi oma’ẽ mbegue okuapy ramo

oreretã mbyte rupi orekuai aguã voi nda’evevei.

Ropa aguã ovaẽ rai’i ma,

ore’ára ojeupity ma,

aỹ ovaẽ ma ropa aguã ára.

¹⁹ Oremonhaa kuery ma

guyra yvate rupi oveve va’e gui inhakuãve va’e.

Yvyty ikuai va’e áry rupi ete oremonha,

tekoa e’ỹa rupi voi nhuã omoĩ okuapy orembo’a aguã.

²⁰ Ha’e gui oreruvixave orerekombo’earã Senhor omoĩ va’ekue ae

ombo’a ma okuapy nhuã py.

Ixupe ma ore kuery “Nekuaray’ã py ’rã orekuai

yvy regua kuery mbyte rupi teĩ”, ro’e va’ekue ri.

²¹ Peẽ Edom pygua kuery Uz yvy re pendekuai va’e,

orejojai tema, pevy’a rei tema ’rã orere.

Ha’e rami avi pendea py voi ’rã omboaxaa kova’e karo.

Ha’e ramo peka’upa vy pendepire reipa ’rã peikovy.

²² Ha’e rã peẽ Sião pygua kuery, opa ma pendeko vaiague re penembopagaague.

Senhor napendereraa ukavei ma ’rã escravo-rã.

Ha’e rã peẽ Edom pygua kuery, araka’eve rã ojekuaapa ’rã

pendeko vaia ha’e pejejavyague.

“Oremboaxy ke” he’iague

¹ Senhor , nema’endu’a ke mba’emo vai orere oiko va’ekue re.

Eikuaa pota ha’e ema’ẽ roiko axya re.

² Oreyvyrã reme’ẽ va’ekue oaxapa ma amboae regua kuery pe,

orerogue voi amboae yvy guigua kuery pe ju oaxa.

³ Ore kuery ma tyre’ỹ tuu ve’ỹ va’e rami orekuai.

Ha’e rã orexy kuery ma imeve’ỹ va’e ikuai.

⁴ Yy roy’u va’erã ma peráta re rive ’rã rojogua,

yxakã voi peráta re anho ’rã rojou.

⁵ Orerakykue monhaa kuery ma oreaju’y re ma ikuai.

Orekane’õ ma teĩ ropytu’u aguã voi noĩ.

⁶ Egito ha’e Assíria pygua kuery pe rojejopy uka

ro’u va’erã rojou aguã teĩ.

⁷ Oreru kuery ma ojejavypa rire jipovei ma.

Ha’e gui ore kuery ju ’rã roiko axy ha’e kuery ojapo vaiague re.

⁸ Escravo kuery rive ’rã ipo’aka orere.

Ndoikoi avave rei ha’e kuery po gui orereraa jepe va’erã.

⁹ Rojeayvu e’ỹkue py ’rã rojou ro’u va’erã,

kyxe tekoa e’ỹa rupi oguereko va’e gui.

¹⁰ Karuai roendu vaipa ramo

orepire ma tata kua rami hakupa rei.

¹¹ Sião py oguero’apaa kunhague ikuai va’e,

kunhataĩgue guive, Judá tetã ikuai va’e rupi.

¹² Hovaigua kuery ojyryvipypa yvatekueve va’ekue,

tujakue’i voi ojou vy ombojaru rei okuapy.

¹³ Ha’e rã kunumigue ma ogueraa ’rã mba’emo mongu’ia py omba’eapo aguã,

avakue’i voi yxakã re ombovoyi rã onhepyxanga rive oje’oivy.

¹⁴ Ha’e ramo nhomongetaa rupi ikuai va’ekue ma ndoguapyvei ma tetã kora rokẽ py,

kunumigue ndoporaeivei ma guive.

¹⁵ Rovy’aague okanhymba ma orekuraxõ gui.

Rojeroky ’rãgue py mboriau anho rei roendu.

¹⁶ Oreakã gui ho’a ma akã regua oĩ va’ekue.

Nda’evei ete orevy, rojejavy rire!

¹⁷ Ha’e nunga rupi ae orekuraxõ py oremba’eaxy,

ndorerexa pyxoveipa guive.

¹⁸ Sião yvyty ombovaipaa rire

mbyku anho ikuai ha’e rupi.

¹⁹ Ha’e rã ndee Senhor , ndepo’aka riae ’rã.

Tenda repenaaty oĩ ’rã raka’e rã peve guarã.

²⁰ Mba’e re tu riae ta ri nderexarai orere?

Mba’e re tu remboare orepytyvõ aguã?

²¹ Senhor , orereko rerova ju ke ndejeupe guarã.

Ha’e ramo ’rãe rojeko rerova.

Embopyau ju ore’ára yma guare rami.

²² Mba’e re tu orerejapa ete ri?

Mba’e re tu ndepoxy anho ta ore kuery rovai?