Zẹfania

¹OHÓ OKLUNỌ tọn he wá jẹ Zẹfania visunnu Kusi tọn lọ de, visunnu Gedalia tọn, visunnu Amaliatọn, visunnu Hẹzekia tọn, to azán Josia visunnu Amọni tọn, ahọlu Juda tọn tọn lẹ mẹ.

²Yẹn na hù onú lẹpo súdo sè sọn nukunmẹ aigba tọn mẹ, wẹ OKLUNỌ dọ. ³Yẹn na hù gbẹtọ po kanlin po súdo; yẹn na và ohó olọn tọn lẹ súdo, po owhèvi ohù tọn lẹ po, podọ zannúagbali lẹ po mẹylankan lẹpo; podọ yẹn na sán gbẹtọ só sọn nukunmẹ aigba lọ tọn mẹ, wẹ OKLUNỌ dọ. ⁴Podọ yẹn na dlẹn alọ ṣie jẹgbonu do Juda ji, podọ do tòmẹnu Jelusalẹm tọn lẹpo ji; yẹn bo na sọ sán i pipòtọ Baali tọn sè sọn oten he mẹ, podọ oyìn Kẹmalimi tọn po yẹwhenọ le po; ⁵Po yé he to awhànpa olọn tọn litaina to ohọ̀ta aga lẹ po; po yé he to taliai lẹ po, he to whiwhle hlan OKLUNỌ bo sọ to whiwhle gbọn ahọlu yetọn dali; ⁶Podọ yé he ye hẹn lé dogodo sọn OKLONỌ hihodo mẹ; pọ enẹlẹ he ma ko din OKLUNỌ po, mọ má sọ kàn ewọ biọ gba.

⁷Bọ̀nù towe do to nukọn OKLUNỌ JIWHEYẸWHE tọn: na azán OKLUNỌ tọn tin to alọ, ji: na OKLUNỌ kó wleawuna avósánnú de, ewọ ko klan dùhẹtọ etọn lẹ dowiwe. ⁸E na sọ wá jọ to azán avọ́sánnú OKLUNỌ tọn tọn lọ me, wẹ yẹn na dlapọ́n to ahọvi lẹ ji, po visunnu ahọlu tọn lẹ po, po yé omẹ hunkọ yè yí avọ̀ ogbéjinu ṣinyọnna lẹ po. ⁹Podọ to azán nẹ mẹ wẹ yẹn na dlapọ́n to enẹlẹ li he to linlọn gbọn họntònu, he yí luhlọnnú po oklọ po do gọ́ owhé mẹmẹnu yetọn tọn. ¹⁰Podọ to azán nẹ gbè, wẹ OKLUNỌ dọ, hùnhlungbè awhá de tọn na tin finẹ sọn owhẹ̀vi họngbo mẹ, po hukùhlu de po sọn Miṣnẹ mẹ, po awhágun gángán de po sọn okọta lẹ mẹ. ¹¹Mì dohukúhlu, mì tòmẹnu Maktẹsi tọn emi, na omẹ ajọtọ Kanani tọn lẹ yín wọwọ́: yé he yè yí fataka do bú lẹpo wẹ yè sán ¹²E nasọ wá jọ to ojlẹ nẹ mẹ, wẹ yẹn na yí miyọngbán lẹ do din Jelusalẹm pé; yẹn bo na sọ dlapọ́n to omẹ he yè hẹn tli to owhè yetọn lẹ ji, he didọ to ayiha yetọn mẹ dọ, OKLUNỌ ma to dagbe na wà, mọ é ma sọ to oylan na wà gba. ¹³Podọ nuyọnnamẹ yetọn na lezùn gblannu de, podọ owhé yetọn lẹ ojẹvọ́ de: mọwẹ, yé na do ohò le, ṣigba ma na nọ̀ yé mẹ gba; podọ yé na do vẹ̃ngle lẹ, ṣigba ma na nù ovẹ̃n etọn gba. ¹⁴Azán daho OKLUNỌ tọn tin sẹ̀pọ, é tin sẹ̀pọ́ bo sọ to unklẹn susu, yèdọ ogbè azán OKLUNỌ tọn lọ tọn; omẹ hlọnhlọnnọ lọ to awhádo finẹ vivẹ́vivẹ́. ¹⁵Azán homẹgble tọn de wẹ azán nẹ, azán tukla po nukunbia po tọn de, azán ohẹngú po ovọ́jẹ po tọn de, azán zinvlu po avivi po tọn de, azán aslọ lẹ po zinvlu titli po tọn de, ¹⁶Azán opẹ̀n po zinhihò po tọn de, do tòdaho dòkọnọ lẹ go, po do atọ̀họ yìaga lọnglọnẹnmẹ tọn lẹ po go. ¹⁷Podọ yẹn na hẹn nukunbia wá yé ji, bọ yé na to zọnlinzin taidi gbẹtọ nukuntọ́nnọ lẹ, na yé ko wàylando do OKLUNỌ go wutu: podọ ohùn yetọn na sọ yín kinkòn tón di kọgudu, podọ agbasalan yetọn di ogbó. ¹⁸Mọ fataka yetọn po sika yetọn po ma na tin sọgan nado whlẹn yé to azán homẹgble OKLUNỌ tọn tọn lọ mẹ gba; ṣigba aigba lọ pete wẹ yè na vàsúdo gbọn miyọn awuwhàn etọn tọn dali: na ewọ na basi opòdo de, mọwẹ, opòdo tejiteji de, yé he nọ nọ̀ aigba lọ mẹ lẹpo tọn.

¹Mì bẹ́ míde pli, mọwẹ, mì bẹ́ míde plidopọ, Mì akọta he ma tindo ojlozògbe de emi; ²Whẹpo aṣẹ hẹn jẹgbonu wá, azán juyì di núyọ́, whẹpo adi zògbe OKLUNỌ tọn wá mì ji, whẹpo azán adi OKLUNỌ tọn tọn wá mì ji. ³Mi din OKLUNỌ, mi homẹmiọnnọ aigba lọ tọn le, he ko basi whẹ̀dida etọn; mì din dódó, mì din homẹmiọn: é sọgan yín mì na yín whiwhla to azán adi OKLUNỌ tọn tọn gbè. ⁴Na Gaza na yín gbigbẹ́dai, podọ Askelọni ovọ́jẹ de: yé na yàn Asdodi jẹgbonu to oklekle, podọ Ẹklọni ni sọ yín adòhọnna. ⁵Dindọn hían tòmẹnu agbègbèji ohù tọn tọn lẹ, akọta Kẹlẹtinu lẹ tọn! Ohó OKLUNỌ tọn tin agò do mì go, Hiẹ Kanani E, aigba Filistini lẹ tọn; yẹn na và we súdo, bọ tòmẹnu de ma na sọ tin. ⁶Podọ ohùtó lọ na yín kanlindùgbo lẹ, podo aigbaslo lẹ na lẹngbọhọ́tọ lẹ, po apó lẹ po na lẹngbopa lẹ. ⁷Podọ ohùtó lọ na tin na pipòtọ owhé Juda tọn tọn lẹ; yé na nọ yìn lẹngbọpa yetọn lẹ to enẹ ji: to ohọ̀ Askelọni tọn lẹ mẹ wẹ yé na mlọnai te to whèjai; na OKLUNỌ Jiwheyẹwhe yetọn na dla yé pọ́n, bo sọ vọ́ mẹmẹglọ yetọn hẹnwá. ⁸Yẹn ko sè ovlẹ Moabi tọn, po avlẹda ovi Amọni tọn le tọn lẹ po, he yé ko do to omẹ ṣie lẹ vlẹ, bo sọ hẹn yéde klo do agbóji yetọn go ⁹Enẹwutu le yẹn togbẹ̀, wẹ OKLUNỌ awhànpa lẹ tọn dọ, Jiwheyẹwhe Islaeli tọn, Nugbonugbo Moabi na tin di Sọdọmi, podọ ovi Amọni tọn lẹ di Gomọla, nutindo azózòmaliagba lẹ tọn, po ojẹdò lẹ po, po ovójẹ whepoponu de po: pipòtọ omẹ ṣie lẹ tọn na gble yé, podọ pipotọ omẹ ṣie lẹ tọn na sọ yi yé do dugú. ¹⁰Ehe wẹ yé na tindo na sakla yetọn, na yé ko vle bo sọ jlayinna yede to omẹ OKLUNỌ awhànpa lẹ tọn tọn ji wutu. ¹¹OKLUNỌ na yín osinọ hlan yé: na ewọ na hẹn vodun aigba lọ tọn lẹpo kúhùvẹ́; gbẹtọ lẹ na sọ nọ litaina ewọ, omẹ dopodopo sọn otẹn etọn mẹ, yèdọ ohùtóigba akọta lẹ tọn lẹpo. ¹²Mì Étiopianu lẹ ga, mì na yín hùhù gbọn ohi ṣie dali. ¹³Podo ewọ na dlẹn alọ etọn jẹgbonu do agéwaji go, bo sọ và Asilia súdo; bo na sọ hẹn Nineve zùn ovọ́jẹ de, bo sọ hú taidi zùngbomẹ lọ. ¹⁴Lẹngbọ lẹ bo na sọ mlọnai to gblagbla ewọ tọn mẹ, kanlin hùnkọ lẹpo tọn lẹpo: apófọ po ajinján po na nọ nọ̀ opòtin etọn lẹ mẹ: ogbè yetọn na to hànji to vẹ́sẹ́nuvo lẹ mẹ; sìnnùgbla na tin to họntònu lẹ mẹ: na ewọ ko hẹn azọ́n kedali tọn lọ gbọgbé. ¹⁵Ehe wẹ tòdaho ayánọ he yí matintuklajẹ do nọ̀, he dọ to ayiha etọn mẹ dọ, Yẹn tin, podọ mẹdẽvo de ma tin fine adavo yẹn: nawẹ ewọ tin lẹzun ovọ́jẹ de do le, otẹn de na kanlin lẹ nado nọ mlọnai to e mẹ omẹ dopodopo he ju gbọn e dali lẹ na dèpiṣlọ bo sọ mì alọ etọn.

¹DINDỌN hlan ewọ he yín atẹ̀nọ podọ gbigbletọ, hlan tòdaho nukunbianọ lọ ²Ewọ ma sètónuna ogbè lọ gba; ewọ ma yí oplọ́n lọ gba; ewọ ma dotu to OKLUNỌ mẹ gba; ewọ ma dọ̀n sẹpọ̀ jẹ Jiwheyẹwhe etọn de gba.

³Kinnikinni he nọ li lẹ wẹ ahọvi etọn lẹ to gblagbla e tọn mẹ; ohia whèjai tọn lẹ wẹ whẹ̀datọ etọn lẹ; yé ma nọ kiklọ ohú lẹ du to afọnnu gba. ⁴Gbẹtọ whiwha danunọ wẹ yẹwhegán etọn lẹ: yẹwheno eton lẹ ko flu fiwiwe lọ, yé ko wà huhlọnnu hlan osẹ́n lọ. ⁵Dódónọ wẹ OKLUNỌ to gblagbla e tọn mẹ; ewọ ma na wà oylanwà gba; afọnnu afọnnu we ewọ nọ hẹn whẹ̀dida etọn wa jẹ hinhọn mẹ, ewọ ma gbòpò gba; ṣigba mawanugbonọ ma yọn winyan de gba ⁶Yẹn ko sán akọta lẹ sẹ̀, atọ̀họ lọnglonẹnmẹ yeton lẹ sọ yín ovọjẹ: Yẹn ko hẹn alihogbo yetọn lẹ gbọgbé, bọ mẹde ma sọ jugbọn e mẹ: yè và tòdaho yetọn lẹ súdo, sọmọ bọ omẹ de ma sọ tin, bọ tomẹnu de ma sọ tin finẹ. ⁷Yẹn dọmọ, Hiẹ na dibusi mi nugbonugbo, hiẹ na yí oplọ́n; mọ yè ma na do san ninọ̀ etọn sẹ̀ gba, kẹdẹdi ehe yẹn ko de gbọn ewọ tọn dali lẹpo: ṣigba yé fọ́n afonnufú bo gble wiwà yetọn lẹpo. ⁸Enewutu mì nọtepọ́n mi wẹ OKLUNỌ dọ, kakajẹ azán he gbè yẹn fọ́n tite jẹ amánà lọ kọn: na whẹ̀dida ṣie wẹ nado sinyan akota lẹ, na yẹn nido pli ahọludu lẹ dopọ, nado kọn homegble ṣie do yé ji, yedọ adi zogbe ṣie lẹpo; na aigba lẹpo we ye na yi miyon awuwhàn ṣie tọn do vasudo. ⁹Na whenenu wẹ yẹn na lé nùflo wiwe de hlan gbẹtọ lẹ, na yé mẹpó nido no dawhá ylọ oyín OKLUNỌ tọn, nado nọ sẹn ẹn po abó dopo po. ¹⁰Godo otọ Etiopia tọn lẹ wẹ yé na hẹn vẹvẹtọ ṣie lẹ sọn wá, yẹ́dọ viyọnnu mẹgbàdo ṣie tọn, na avọ́ nunina de hlan mi. ¹¹To azán nẹ mẹ wẹ hiẹ ma na yín memọwinyan na wiwà towe lẹpo gba, ehemẹ hiẹ ko jẹsẹ́nmẹ do ogo e te: na whenẹnu wẹ yẹn na dè yé he to aglinjẹ to gigodaho towe mẹ lẹ sọn gblagbla hiẹ tọn mẹ, podọ hiẹ ma na yín ṣandùtọ to osé wiwe ṣie mẹ ba gba. ¹²Ṣigba yẹn na jó gbẹtọ wamọnọ nukunbianọ lẹ de dai to gblagbla hiẹ tọn mẹ, yé bo na sọ nọ dotu to oyín OKLUNỌ tọn mẹ. ¹³Pipòtọ Islaeli tọn lẹ ma na wà oylanwà, mọ sọ dọ lalo lẹ gba; mọ odẹ́ oklọnọ de ma na yín mimọ to onù yetọn mẹ gba: na yé dù bo sọ mlọnai, bọ mẹde ma nahẹn yé savo gba. ¹⁴Jihàn, hiẹ viyonnu Zioni tọn È; dabobo, hiẹ Islaeli E; yí ayiha lẹpo do yín homẹhùnnọ bo sọ jaya, hiẹ viyọnnu Jelusalẹm tọn È. ¹⁵OKLUNỌ ko zé whẹ̀dida towe lẹ yì, é ko dlan kẹ̀ntọ towe do gbonu: ahọlu Islaeli tọn, yèdọ OKLUNỌ, tin to gblagbla hiẹ tọn mẹ: hiẹ ma na sọ mọ oylan depope ba gba. ¹⁶To azán nẹ gbè é na yín didọ hlan Jelusalẹm dọ, Hiẹ dibu blo: podọ hlan Ziọni dọ, a dike alọ towe lẹ yín jijẹ̀ blo. ¹⁷OKLUNỌ Jiwheyẹwhe towe tin to gblagbla hiẹ tọn mẹ, hlọnhlọnnọ dopo de mẹhe na whlẹnmẹ: ewọ na yí ayajẹ do jaya to oji we, ewọ na yín abọẹnọ to owanyi etọn mẹ; ewọ na yí hànjiji do jaya to oji we. ¹⁸Yé ko yín awublanọ na obẹ́pli ayìdego lọ he yẹn dè yì sọn hiẹ mẹ, na zizé daga ovlẹ tọn to ewọ go: he ko hẹn agbàn ovlẹ tọn. ¹⁹Dayi e go, to ojlẹ nẹ mẹ yẹn na zán hẹ mẹhe bianukunna we lẹpo: yẹn bo na sọ whlẹn ewọ he pozọn, bo sọ bẹ́ ewọ he yè yàn yì pli; yẹn bo na sọ hẹn yé zùn pipà po oyín de po, owinyan mẹhetọn ko tin to aigba lẹpo mẹ. ²⁰Ojlẹ nẹ mẹ wẹ yẹn na hẹn mì wá họmẹ, podọ ojlẹ nẹ mẹ wẹ yẹn na ṣinyan mì: na yẹn na basi oyín de na mì po pipà de po to gbẹtọ aigba lọ tọn lepo ṣẹnṣẹn, whenuena yẹn sọ vọ̀ mẹmẹglọ mìtọn hẹnwá to nukun mìtọn lẹ nukọn, wẹ OKLUNỌ dọ.