Titu

¹PAULU, afànumẹ Jiwheyẹwhe tọn de, podọ apọsteli Jesu Klisti ton de, kẹdedi yise mẹsinsinyan Jiwheyẹwhe tọn tọn lẹ, po oyọnẹn nugbo tọn po he gbọn jijọ-di-Jiwheyẹwhe tọn dali, ²to tódido mẹ na ogbè madopodo, he Jiwheyẹwhe, he ma nọ dolalo, ko dopagbe etọn whẹpo aihọn do sè; ³ṣigba to ojlẹ he sò mẹ é sọ ohó eton hia gbon oyẹwheho mẹ, he yè yí na mi kẹdẹdi osén Jiwheyẹwhe Whlẹngantọ mítọn tọn; ⁴hlan Titu, ovi ṣie titi kẹdẹdi yisè hẹ peai de. Ojomion, lẹblanu, po jijọho po sọn Jiwheyẹwhe Ótó de, podọ sọn Jesu Klisti Oklunọ Whlẹngantọ mítọn de.

⁵Na ehe wutu wẹ yẹn jo we dai do Klete, na hiẹ nido tò onú he pò yè ma ko basi lẹ do tẹnmẹtẹnmẹ, bo sọ dè meho lẹ do dogan to otodaho dopodopo me, dile yẹn degbèna we do: ⁶eyín mede yín madovlẹnọ, asú yọnnu dopo tọn, he tindo ovi he yise he yè ma jẹwhè etọn gbọn gblewà kavi òtasinyẹn dali. ⁷Na é jẹ dọ bisọpu ni yín madovlẹnọ, di họnkọnsi Jiwheyẹwhe ton; memayiwanna ede só, omẹ ma no yawu gblehomẹ, omẹ ma yín sinnùmúnọ, ome ma yín nuliniẹto, omẹ ma yín adọwhénnọ ale tọn; ⁸Adavo wanyitọ awujọme tọn, wanyitọ dagbe ton, hùwhẹnọ, dodonọ, wiwenọ, owunzanọ; ⁹he hẹn ohó nugbo go gligli, dile ye plon ẹn do, gbọn oplón he pégan dali, na ewọ nido nọ yí do jlahomẹdona omẹ, bo sọ do sọgan gọkòna yé he nọ dọnuyindò lẹ.

¹⁰Na tasinyẹntọ, ohó vó dọtọ, po mẹklọtọ susu po wẹ tin, humọ yé he yín owhẹgbo tọn lẹ: ¹¹onù mẹhetọn ye ma sọgan nọ ma hẹn dote, omẹ he sọtadona owhè, lẹpo, bo nọ to onú he ma je lẹ plọnmẹ, na adọwhén tọn wutu ¹²Dopo to yelọsu mẹ, yẹwhegán sọn yetọn titi mẹ, dọmo, Lalonọ wẹ Kleteto lẹ to whepoponu okanlin ylankan, homẹ pinpẹnnọ. ¹³Okunnude he nugbo wẹ. Enewutu nọ wọ́he yé doteji, na yé nido pegan to yise mẹ, ¹⁴hiẹ dayi otan ovọ́ Ju le tọn, po osen gbẹtọ tọn po go blo, he nọ díọmẹ sọn nugbo mẹ ¹⁵Na homẹwewénọ lẹ, wéwé wẹ onú lẹpo: ṣigba hlan yé he yín gbigbletọ lẹ po mayisenọ lẹ po wẹ nude ma yín wéwé; ṣigba yèdọ ayiha yetọn po nuyọnẹn po ko zùn gbigble. ¹⁶Yé yígbe dọ yé yón Jiwheyẹwhe: ṣigba to azón lẹ me yé món ẹn, yínvín osùnú, tólivẹtọ, podọ na azón dagbedagbe lẹpo mẹgbigbé.

¹ṢIGBA hiẹ ni nọ dọhó onú he jẹ hẹ oplón he pó tọn: ²na sunnu meho lẹ ni yín hùwhẹnọ, mẹabọeabọẹ, owùnzanọ, bo zìn to yise mẹ, to owanyi mẹ, to homẹfa mẹ. ³Mọkẹdẹ wẹ yọnnu mẹho le ga, dọ yé ni tin to jijọ he jẹ hẹ wiwe mẹ, ma yín whejetọ lalonọ, ma yín sìnnùmúnọ, mẹplọntọ onú dagbe lẹ tọn; ⁴na yé nido plón yọ̀pọ yọnnu lẹ nado yín hùwhẹnọ, nado nọ yiwanna asú yẹtọn lẹ, nado nọ yiwanna ovi yetọn lẹ, ⁵nado yín nuyọnentọ, wéwénọ, nado yín owhẹ́ gbè nọtọ, mẹdagbe, he litaina asú yetọn titi lẹ, na ohó Jiwheyẹwhe tọn ma na do yín nùzandogona. ⁶Nọ yi ohó do jlahomedona yọ̀pọ sunnu lẹ ga, nado yín hùwhẹnọ ayiha mẹ tọn. ⁷To onú lẹpo mẹ nọ yí dewe do basi ohia azọ́n dagbe lẹ tọn: to oplón mẹ nọ do magble, zìnzìn, po owalọ pipé po hia, ⁸ohogbe he zìn, he yè ma sọgan gblewhẹdo; na winyan nido hù yé he jẹglo, to ma mọ onú gbigble de dọ do mí go mẹ. ⁹Nọ yí ohó do jlahomẹdona afanumẹ lẹ nado tin taliai mẹ hlan mẹmẹnu yetọn titi le, podọ nado nọ hẹn homẹ yetọn vivi dagbedagbe to onú lẹpo mẹ; bo sọ nọ dagbèdogbèmẹ blo; ¹⁰he ma nọ do dódó dagbe lẹpo hia; na yé nido doasọna oplón Jiwheyẹwhe Whlẹngantọ mítọn tọn to onú popo mẹ. ¹¹Na ojọmiọn Jiwheyẹwhe tọn he hẹn whlẹngan wá ko sọawúhia omẹ, pọpo, ¹²bo sọ to mí plon dọ, to mimọn jijọ-ma-di-Jiwheyẹwhe tọn po ojlogbigble aihọn tọn po mẹ, mí ni nọgbó to hùwhẹ mẹ, to dódó mẹ, podọ to jijọ-di-Jiwheyẹwhe tọn mẹ, to aihọn dinvie tọn mẹ; ¹³bo to nukundo tódido donanọ lọ, podọ awúsọhia gigo Jiwheyẹwhe mítọn daho tọn, po Jesu Klisti Whlẹngantọ mítọn tọn po; ¹⁴mẹhe jo ede na mí wutu, na é nido fli mí sọn ylando lẹpo mẹ, bo sọ dó kló mí wé zùn omẹvò hlan ede, vivẹnudotọ azọ́n dagbe lẹ tọn. ¹⁵Onú helẹ wẹ hiẹ ni nọ dọ, bo do nọ jlahomẹdonamẹ, bo sọ nọ yí asẹ lẹpo do wóhẹmẹ. A dike mẹdepope vlẹ we blo.

¹NỌ flinnu yé nado nọ tin to taliai mẹ hlan ogán po huhlọn lẹ po, nado nọ setónuna otògán lẹ, nado nọ wleawu dai pọ́n azọ́n dagbe lẹpo, ²ma nado dọhó gbigble do mẹde go, ma nado yin jlẹ̀wàtọ, adavo mẹdẹ̃dẹ, he na nọ do wàlọmimiọn hia omẹ popo. ³Na mìlọsu ga ko yín klenọ to ojlẹ delẹ mẹ, tólivẹtọ, mẹkiklọ, he nọ to ojlogbigble po gbèdudu hunkọhunkọ po sèn, bo sọ tin to homẹha po nuvẹun po mẹ, omẹ yè gbẹwanna bo sọ nọ to wangbẹna mẹnọzo. ⁴Ṣigba ehegodo homẹdagbe po owanyi Jiwheyẹwhe Whlẹngantọ mítọn tọn po sọawúhia hlan gbẹtọ, ⁵é ma yín gbọn azón dódó tọn he mí ko wà dali gba, ṣigba dile lẹblanu etọn te, é whlẹn mí, gbọn lèwé ovọji tọn po hẹnzunyóyó Gbigbọ Wiwe tọn po dali; ⁶he é kòn do mí ji tò opógege gbọn Jesu Klisti Whlẹngantọ mítọn mẹ; ⁷dọ yínyín whèsùna gbọn ojọmiọn dali, na yè nido yí mí do basi ogúdutọ dile tódido ogbẹ madopodo tọn te. ⁸Nugbo wẹ ohó he, onú helẹ wẹ yẹn sọ jlo dọ hiẹ ni nọ to didọ nùmakumaku, na yé he ko yí Jiwheyẹwhe se lẹ nido nọ wleawu nado hẹn azọ́n dagbe lẹ go. Dagbe po nudoale po na gbẹtọ wẹ onú hele. ⁹Ṣigba dapana okanbiọ nulu tọn, otàn tọn, núdindọn tọn, podọ avùnhihó gbọn osén tọn dali; na madoale po ovó po wẹ yé. ¹⁰Omẹ he yín oplóngiglọnọ to hokónamẹ tintan po awetọ po godò, gbé ẹ dai; ¹¹na hiẹ ni yọnẹn dọ omẹ he tin to mọ de lépe, bo wàylando, bo sọ gblewhẹdo ede.

¹²Whenuena yẹn na do Altema hlan we, kavi Tikiku, dovivẹnu nàdo wá dẽ to Nikopoli; na yẹn ko magbè etọn nado hlẹnàvivọ to finẹ. ¹³Hẹn Zena osénnọ po Apọlo po wá dẹdẹ to gbejizọnlin yetọn ji, yé sọ gbòagba núde tọn blo. ¹⁴Gbọ omẹ mítọn lẹ ga ni plón le yè họ hẹn azọ́n dagbe lẹ gò do na zinzán he jẹ, na yé yín madosinsẹnnọ blo.

¹⁵Omẹ he to dẽ lẹpo dọnúdo we. Dọnúdo yé he yiwanna mí to yise mẹ lẹpo. Ojọmiọn ni tin to mì omẹ pó de. Niṣẹ.