Osọhia

¹OSỌHIA Jesu Klisti tọn, he Jiwheyẹwhe na hlan ẹn nado dohia hlan afànumẹ etọn lẹ, onu he ma na nọ ma wá jọ to zándevie, é sọ domẹhlan bo do yé hia gbọn angẹli etọn dali hlan Johanu, mẹmẹglọ eton: ²mẹhe de kunnuna ohó Jiwheyẹwhe tọn, na okunnu Jesu Klisti tọn, podọ na onú he é mọ lẹpo. ³Donanọ wẹ ewọ he to hihia, podọ ye he to ohó dọdai he tọn sè, bo sọ to onu he yè wlan do e mẹ lẹ yí hẹn: na whenu to sisẹpọ wutu.

⁸Oklunọ dọmọ, Yẹn wẹ Alfa, yẹn wẹ Omẹga, bibẹ po, opòdo, mẹhe tin, bo ko tin, bo sọ ja, Ganhunupo.

⁹Yẹn Johanu, mehe yín mẹmẹsunnu, ogbẹ mìtọn to nukunbibia mẹ, to ahọludu po homẹfa Jesu Klisti tọn po mẹ, tin to lopo he yè nọ ylọ Patimos ji, na oho Jiwheyẹwhe tọn, po okunnuho Jesu Klisti tọn po. ¹⁰Yẹn tin to Gbigbọ mẹ to azán Oklunọ tọn gbè, bo sọ sè ogbè daho de to godo ṣie, di ogbè opèn de tọn, ¹¹He to didọmọ. Yẹn wẹ Alfa, yẹn wẹ Omẹga, nukọntọ, godoto: podọ, Onu he hiẹ mọ, wlan ẹn do owẹ́ de mẹ, bo sọ ẹ dohlan agùn ṣinawe he tin to Asia lẹ; hlan Efesu, hlan Smana, hlan Pagamu, hlan Tiatila, hlan Sadi, hlan Filadẹlfia podo hlan Laodikea ¹²Yẹn sọ lẹgodo nado pọn ogbè he to hódọ hẹ mi. Whenuena yẹn lẹgodo, yẹn mọ zogbantin sika tọn ṣinawe; ¹³to zogbántin ṣinawe lẹ lọ ṣẹnṣẹn, mẹde taidi Ovi gbẹtọ tọn, he yè ṣinyọn avọ he dite jẹ afọkọ na, bo sọ yí gbaja sika tọn do gbàn ano na. ¹⁴Ota eton po odà eton po wé di sekanfún, yé we di kẹnsu; nukun etọn sọ di zodẹ́; ¹⁵afọ etọn di ganvẹ dagbedagbe, di ehe yè kọn; to zohò mẹ; ogbè etọn sọ di ogbè osìn susu tọn. ¹⁶E tindo sunwhlẹvu ṣinawe to adusilọ etọn mẹ: onù etọn mẹ wẹ ohi dida nuawenọ de tọ́n sọn: nukunmẹ etọn so di owhè he yí huhlọn etọn do vivẹ́. ¹⁷Whenuena yẹn mọ ẹn, yẹn jẹklo to afọ etọn go di oṣiọ. E so yí adusilo etọn do oji e, bo to didọ hlan mi, dọ, A savo blọ Yẹn wẹ nukọntọ, godotọ: ¹⁸yẹn we ogbẹ̀nọ lọ, yen sọ lẹzun oṣiọ; do ayi e go, yẹn sọ tin to ogbẹ kakadoi, Niṣẹ; yẹn sọ tindo họ̀nhùngan kútomẹ po okú po tọn. ¹⁹Wlanwe onú he hiẹ mọ lẹ tọn, onú he tin, po onu he na jọ to ehegodo tọn po; ²⁰nudabla sunwhlẹvu ṣinawe lẹ tọn he hie mọ to adusilọ ṣie mẹ, po sika zogbántin ṣinawe le tọn po. Sunwhlẹvu ṣinawe lẹ wẹ angẹli agùn ṣinawe lẹ tọn; podọ zogbántin ṣinawe he hiẹ mọ lẹ wẹ agùn ṣinawe lẹ.

¹HLAN angẹli agùn he tin to Efesu tọn kanwe; Onú helẹ we ewọ he tédò sunwhlẹvu ṣinawe lẹ go to adusilọ etọn mẹ, he to zọnlinzin to sika zogbantm ṣinawe ṣẹnṣẹ́n dọ; ²Yẹn yọn azọn towe, magbọje towe, homẹfa towe, podọ le hiẹ ma sọgan doakọnna mẹylankan lẹ do: bo ko Sọ whle yé he domọ apọsteli wẹ ye lẹ pọn, bọ yé ma so yin mọ, bo sọ yí yé do mọ lalonọ: ³bo ko doakọ́nna, bo sọ fahome, na oyín ṣie tọn wutu, bọ onú ma sọ sikọna we. ⁴Ṣigba yẹn tindo onú de do ogo we, na hiẹ ko jo owanyi towe tintan dai. ⁵Enẹwutu flin fie aijijẹ towe fọn sọn, na hiẹ ni lẹnvọjọ, bo sọ wàzón tintan; yín é ma yín mọ, yẹn na wá de we zàndevie, bo nasọ họ̀n zogbántin towe sẹ̀ sọn otẹn etọn mẹ, adavo hiẹ lẹnvọjọ. ⁶Ṣigba ehe wẹ hiẹ tindo, na hiẹ gbẹwanna owalọ Nikolaitani tọn lẹ he yẹn gbẹwanna ga. ⁷Ewọ he tindo otọ́ ni sè onú he Gbigbọ to didọ hlan agùn lẹ lọ; Ewọ he gbawhàn we yẹn na na atin sinsẹ́n ogbẹ tọn hlan nado dù, ehe tin to paladisi Jiwheyẹwhe tọn mẹ.

⁸Hlan angẹli agùn he tin to Smana tọn kanwe: Onú helẹ wẹ nukonto, godotọ do, mẹhe lẹzun osiọ bo sọ tin to ogbè. ⁹Yẹn yọn azon towe, nukunbibia po óhen towe po (ṣigba adọkunnọ we hiẹ) yẹn sọ yon nùzinzan yé he dọ Ju wẹ yé, bo ma yín mọ, ṣigba sinagọgu Satani tọn wẹ yé. ¹⁰Hiẹ si onú nẹlẹ depope he hiẹ pó yaji na blo: do ayi e go, legba ko pó bibé adade to mì me kòn do ogan me, na yè nido whle mì pọ́n; mì na mọ nukunbibia hò azán ao; yín nugbonọ jẹ okú, yẹn nasọ na ojẹgbakun ogbè tọn lo we. ¹¹Ewọ he tindo otọ́ ni sè onú he Gbigbọ to didọ hlan agùn lẹ lọ: Ewọ he gbawhan ma na gbleawu to okú awetọ mẹ gba.

¹²Hlan angẹli agùn he tin to Pagamu tọn kanwe: Onú helẹ wẹ ewọ he tindo ohi dida nùawenọ lọ dọ; ¹³Yẹn yọ́n azon towe po fìe hiẹ nọnọ̀ po, yèdọ fìe aisintẹn Satani tọn te: bọ hiẹ sọ tẹ́do oyín ṣie go gligli; bo ma sọ món yise ṣie, yèdọ to azán nẹle mẹ he Àntipa do yín kunnudetọ nugbonọ ṣie, mẹhe yè hù to mì ṣẹnṣẹn to fie Satani nọnọ̀, ¹⁴Ṣigba yẹn tindo onú pẹvide do ogo we, na hiẹ tindo yé he tẹ́do oplọ́n Balaami tọn go to finẹ wutu, mẹhe plón Balaki nado hẹn zannuahlidida tọn wá ovi Islaeli tọn lẹ nukọn, nado nọ dù onu he yè do sánvọ́ hlan boṣiọ lẹ, podọ nado nọ lọgà. ¹⁵Mọwẹ hie sọ tindo mẹdelẹ he tẹ́do oplón Nikolaitani lẹ tọn go ga, onú he yẹn gbẹwanna. ¹⁶Lẹnvọjọ: yín é ma yín mọ yẹn na wá zàndevie, bo nasọ yí ohi onù ṣie tọn do hòavùn hẹ yé. ¹⁷Ewọ he tindo otó, gbọ e ni sè onú he Gbigbọ to didọ hlan agùn lẹ lọ; Ewọ he gbawhàn wẹ yẹn na na nado dù sọn mana whiwhlá lọ mẹ, bo nasọ na ozannu wéwé de e, podọ to zannu lọ me oyín yọ́yọ́ he yè wlan de, he mẹde mẹ yọnẹn, adavo ewọ he yí i.

¹⁸Podọ hlan angẹli agùn he tin to Tiatila tọn kanwe; Onú helẹ we Ovi Jiwheyẹwhe tọn dọ, mẹhe tindo nukun etọn di zodé, afọ etọn sọ taidi gánvẹ̃ dagbedagbe; ¹⁹Yẹn yón azọn towe lẹ, po owanyi towe po po yise po po devizọn po po homẹfa po, podọ azọn towe godome tọn lẹ tin sù hugan tintan lọ. ²⁰Ṣigba yẹn tindo ehe do ogo we, na hiẹ dike nawe nẹ Jẹzebẹli, he to ede ylọ dọ yẹwhegán yọnnu de nado nọ plón, podọ nado nọ klọ mẹmẹglo ṣie lẹ nado nọ lọgà, podọ nado nọ dù onú he yè do sánvọ́ hlan bosiọ lẹ. ²¹Yẹn sọ na ojlẹ ewọ nado lẹnvọjọ na gàlilọ eton: é ma sọ lẹnvọjo gba. ²²Do ayi e go, yẹn na dọ̀n ẹn do adọzan de ji, podọ yen na bé yé he to ayòde hẹ ẹ lẹ biọ nukunbibia daho mẹ, adavo yé lẹnvọjọ na owalọ yetọn. ²³Yẹn nasọ yí okú do hù ovi etọn lẹ; agùn lẹpo nasọ yọnẹn dọ, yẹn we èwọ he nọ dla homẹ po ayiha po pọ́n: yẹn nasọ na hlan dopodopo mìtọn dile azọ́n mìtọn te. ²⁴Ṣigba mìwlẹ wẹ yẹn dọ hlan, podọ hlan yé he pò to Tiatila lẹ, yé omẹ sọha he ma yí oplọ́n he, bo ma yọ́n odò Satani tọn, (dile yé to didọ) yen ma to na doagbàn pinpen devo do ota na mì gba. ²⁵Ṣigba ehe mì ko tindo nẹ, mì hẹn e go gligli kaka yẹn na do wá ²⁶Ewọ he gbawhàn, bo sọ yí azón ṣie whlá je podo, wẹ yẹn na na huhlọn to akọta lẹ ji: ²⁷ewọ nasọ yí opo ogàn ton do hen ye sẹ̀n; di, núzinzán zẹnmẹtọ tọn wẹ ye na yido gbà yé hányánhanyan, kededile yen yí huhlọn sọn Ótó ṣie de do. ²⁸Yẹn nasọ yí sunwhlẹvu afọnnu tọn na ẹn ²⁹Ewọ he tindo otó, gbọ é ni ni sè onú he Gbigbọ to didọ hlan agùn lẹ lọ.

¹HLAN angẹli agùn he tin to Sadi mẹ kanwe Onú helẹ wẹ ewọ he tindo Gbigbọ ṣinawe Jiwheyẹwhe tọn lẹ po sunwhlẹvu ṣinawe lẹ po dọ; Yẹn yọ́n azọn towe lẹ, dọ hiẹ tindo oyìn de dọ hiẹ tin to ogbẹ̀, ṣigba oṣiọ wẹ híẹ ²Payi e go, bo sọ na huhlọn onú he po lẹ, he pọ́ kúkú; na yẹn ma mọ azọn towe lẹ de pegan to Jiwheyẹwhe nukọn gba. ³Enewutu flin le hiẹ mọyi, bo sọ sè do, hen e go gligli, bo sọ lẹnvọjọ. Eyín hie ma payi e go gba, yẹn na tọn do oji we di ajotọ, hiẹ ma na yọ́n ojlẹ he mẹ yẹn na tọ́n do oji we te gba. ⁴Hiẹ tindo oyín vude, yédọ to Sadi mẹ, he ma hẹn avọ́ yetọn gble; yé na to zọnlinzin hẹ mi to wẹ́wẹ́ mẹ, na yé jẹ wutu. ⁵Ewọ he gbawhàn wẹ yè na yí avọ̀ wẹ́wẹ́ ṣinyọn na dole; yẹn ma to oyín etọn na gbidi sè sọn owẹ́ ogbẹ tọn mẹ gba ṣigba yen na dekunnuna oyín etọn to Otọ́ ṣie nukọn, podọ to angeli etọn lẹ nukọn. ⁶Ewọ he tindo otọ́, gbọ e ni, ni se onú he Gbigbọ to didọ hlan agùn lẹ lọ.

⁷Hlan angẹli agùn he tin to Filadẹlfia tọn kanwe; Onú helẹ wẹ ewọ he yín wiwe dọ, ewọ he yín nugbonọ, ewọ he tindo họ̀nhùngàn Davidi tọn, ewọ he hùn, bọ mẹdepope ma sú; podọ he sú bọ mẹdepope ma hùn. ⁸Yẹn yọ́n azọ́n towe lẹ, do ayi ego, yẹn zé ohọ̀n he yè hùn dai do nukọn towe, mẹde ma sọgan sú i: na hiẹ tindo huhlọn pẹvide wutu, bo yi ohó ṣie whlá, bo ma sọ mọ́n oyín ṣie. ⁹Do ayi e go, yẹn na hẹn omẹ sinagogu Satani ton mẹ lẹ, he dọ dọmọ Ju wẹ yewlẹ, bo ma yín, ṣigba lalo yé do;—-do ayi e go, yen na hẹn yé nado wá, nado litai to afọ towe nukọn, podọ nado yọnẹn dọ yẹn yiwanna we. ¹⁰Na hìẹ ko yí ohó homẹfa sìe tọn whlá wutu, yẹn nasọ whlá we to whlepón whenu ga, ehe ja aihọn lẹpo ji, nado whle yé he nọnọ̀ aigba ji lẹ pọn. ¹¹Do ayi e go, yẹn ja zàndevie. Ehe hiẹ tindo nẹ, hen e go gligli na mẹdepope ma na do yí ojẹgbakun towe. ¹²Ewọ he gbawhàn, wẹ yẹn na yí do basi dòtin to tẹmpli Jiwheyẹwhe ṣie tọn mẹ, ewọ ma nasọ tọn jẹgbonu ba: yẹn nasọ wlan oyín Jiwheyẹwhe sìe tọn do e go, po oyín otòdaho Jiwheyẹwhe ṣie tọn po, Jelusalẹm yọ̀yọ̀, he jẹte sọn olọn mẹ ja son Jiwheyẹwhe ṣie de: yẹn nasọ wlan ọyín ṣie yoyọ do e go. ¹³Ewọ he tindo otọ́, gbọ e ni ni sè onu he Gbigbọ to didọ hlan agùn lẹ lọ.

¹⁴Podọ hlan angẹli he tin to Laodikea tọn kanwe; Onú helẹ wẹ Niṣẹ dọ, kunnudetọ: dódónọ, nugbonọ, omẹ tintan to nudida Jiwheyẹwhe tọn lẹ mẹ; ¹⁵Yen yón azón towe, dọ hiẹ ma miọn mọ hiẹ ma hùnzo: yen jlo dọ hiẹ ni gbo bo miọn kavi hiẹ ni hùnzo. ¹⁶Be le hiẹ yín gbigblọ, bo ma miọn bo ma sọ hunzo, yẹn na slú we jẹgbonu ọn onù sìe; mẹ. ¹⁷Na hiẹ domọ, Adọkunnọ wẹ; yẹn, bo sọ tindo adokun susu, bo ma gbòagba núde tọn wutu; bo ma yọnen dọ taponọ wẹ hiẹ, lèlènọ, agbátọnọ, nukuntọ́nnọ, omẹnọ ¹⁸yẹn dewẹhẹ we nado hò sọn dè sika he yè whlepọ́n to miyọn mẹ, na hiẹ nido yín adọkunnọ; podọ avọ̀ wéwé lẹ, na yè nido Ṣinyọnavọ̀na we, podọ na winyan omé towe tọn sọawúhia blo; bo sanú do nukun towe, na hie nido mọnú. ¹⁹Yé ome sọha he yẹn yiwanna, wẹ yen nọ wọ́hẹ, bo sọ nọ họ̀: enẹwutu na hiẹ ni dovivẹnu bo lẹnvọjọ. ²⁰Do ayi e go, yẹn site tọ ohòn go, bo to hònhúliú: eyín mẹdepope sè ogbè ṣie bò hùnhòn, yẹn na biọ whegbò wá e; de, yẹn nasọ nọ dùjlonú hẹ ewọ, podọ ewọ hẹ yẹn. ²¹Ewọ he gbawhàn, wẹ: yẹn na na nado sinai hẹ mi to ofìn ṣie jiy dile yẹn ga gbawhàn, bo sọ sinai hẹ Ọtò ṣie to ofìn etọn ji do ²²Ewọ he tindo otọ́, gbọ e ni sè onú he Gbigbo to didọ hlan agun lẹ lọ.

¹TỌ onú helẹ godo yẹn pọ̀n, do ayi e go ohọ̀n dẹ hẹn to olọn mẹ: ogbè tintan hẹ yẹn sè sọ taidi ogbè opẹ̀n de tọn, he to hódọ hẹ mi; mẹde dọmọ, Hé aga wá ofi, yẹn násọ yí onú he ma na nọma wá jọ to osògodo hia we. ²To afọdoponẹji yẹn tin to Gbigbọ mẹ: do ayi e go, yè zé ofìn de dai to olọn mẹ, mẹde sọ sinai to ofìn lọ ji. ³Ewo he sinai sọ basi mẹhe yè na to pinpọ́n di ozannu jaspali po sadi po tọn: aidowhẹ̀do sọ yìnkàn lédo ofìn lọ pe, pinpon etọn sọ di ozannu emẹlaldi tọn. ⁴Ofìn konukunẹnẹ lẹ́do ofìn lọ pe: podọ to ofìn lẹ lọ ji yẹn mọ mẹho konukunẹnẹ to aisinsin, he yè do ovò wéwé na; yé sọ tindo ojẹgbakun sika tọn lẹ to ota yetọn. ⁵Sọn ofìn lọ kòn wẹ abì, osò, po ogbẹ̀ pọ tọn son: zogbán miyọn tọn ṣinawe sọ to jiji to ofìn lọ nukọn, ehe yín Gbo gbọ Jiwheyẹwhe tọn ṣinawe lẹ. ⁶To ofìn lọ nukọn, ohù mepọnnu tọn de tin, e taidi klistali: to ofìn lọ ṣẹnṣẹn, podọ lẹ́do ofìn lọ pé, wẹ mẹdida ẹnẹ he gọ na nukun to godo nukọn te. ⁷Mẹdida tintan di kinnikinni, medida awetọ sọ di oyìnvu, mẹdida atọ̀ntọ tindo nukun di gbẹtọ tọn, mẹdida enetọ di akùn he to zinzlon. ⁸Mẹdida ẹne lẹ dopodopo tindo awa ṣidopo ṣidopo lédo e pé; yé sọ gò na nukun to homẹ ye ma sọ gbọjẹ to okle po ozan po do didọmọ, Wiwe, Wiwe, Wiwe, Oklunọ Jiwheyẹwhe Ganhunupo; he ko tin, bo sọ tin, bo sọ ja. ⁹Whenuena mẹdida nẹlẹ na gigo, yẹyi po opé po ewọ he sinai to ofìn ji, mehe tin to ogbẹ̀ kakadoi, ¹⁰mẹho konukunẹnẹ nẹlẹ sinyon akọnnuai to nukọn ewọ he sinai to ofìn lọ ji tọn, bo litaina ewọ he to ogbè kakadoi, bo sọ yí ojegbakun yetọn bọdai to ofìn lọ nukọn, bo didọmọ, ¹¹Oklunọ mítọn podọ Jiwheyẹwhe mítọn, hiẹ we jẹ nado yí gigo, yeyi, po huhlọn po: na hiẹ wẹ da onú popo, podọ to ojlo towe mẹ wẹ yé do: tin, bọ yè sọ do da yé.

¹YẸN sọ mọ to adusilọ ewọ he sinai to ofìn lọ ji tọn mẹ, owé he yè wlan to họmẹ po godo po de, he yè yí hiadonú ṣinawe do tlẹ. ²Yẹn sọ mọ angẹli huhlọnnọ de, é yí ogbè lélé do dawhá dọ, Menu wẹ jẹ nado hùn owé lọ, bo sọ hòn hiadọnu etọn sẹ̀? ³Mẹdepope ma tin to ọlon mẹ, kavi to aigba ji, kan to aigba glọ, he sọgan hùn owé lọ, kavi pòn e mẹ. ⁴Yẹn sọ viavi, talala, na yè ma mọ ome he jẹ de nado hùn bo sọ hia owé lọ, kavi nado pón mẹ. ⁵Dopo to mẹhó nẹlẹ mẹ sọ dọ hlan mi, dọmọ, Hiẹ sọ viavi blo: do ayi e go, Kinnikinni lọ he sọn whẹndọ Juda tọn mẹ, Adò Davidi tọn, ko gbawhàn nado hùn owé lọ, podọ nado hòn hiadonu etọn ṣinawe lẹ ⁶Yen sọ pọn, do ayi e go, to ṣẹnṣẹn ofìn lọ po mẹdida ẹnẹ lẹ po tọn, podọ to ṣẹnṣẹn mẹho konukunenẹ lẹ lọ tọn we Lẹngbọvu de site te, é taidi mẹhe yè ko hù, é tindo azò ṣinawe, po nukun ṣinawe po, he yin Gbigbọ ṣinawe Jiwheyẹwhe tọn lẹ he yè dohlan yì aigba lẹpo ji, ⁷E sọ wá, bo yí owé lọ sọn adusilọ ewọ he sinai to ofìn lọ ji tọn mẹ. ⁸Whenuena é yí owé lọ, mẹdida ẹnẹ lẹ, po mẹho konukunẹnẹ lẹ po sọ ṣinyọn akónnuai to nukọn Lẹngbọvu lọ tọn, dopodopo yetọn sọ tindo ajalẹn po sika-gòzẹn po to alọ mẹ, he gó na nuwhẹnwan, he yín odè mẹwiwe lẹ ton. ⁹Yé sọ jihan yọ́yọ̀ de, dọ, Hiẹ wẹ jẹ nado yí owé lọ, podọ nado hùn hiadonu etọn: na yè ko hù we; hiẹ ko sọ yí ohùn towe do fli mi hlan Jiwheyẹwhe sọn akọta lẹpo mẹ, sọn ogbè lẹpo mẹ, sọn gbẹtọ lẹpo mẹ, podọ sọn aigba lẹpo ji; ¹⁰bo sọ yí mí do doahọlu podọ yẹwhenọ hlan Jiwheyẹwhe mítọn: bọ mìwlẹ nasọ to ahọludu to aigba ji. ¹¹Yẹn sọ pọ́n, bo sè ogbè angẹli susu tọn lédo ofìn lọ, podọ lédo mẹdida lẹ lọ, po mẹho lẹ lọ po pó: sọha yetọn sọ yín fọtọ́n ao whla fọtọ́n ao, po fọtọ́n fọtọ́n lẹ tọn po; ¹²yé to didọ to ogbè lélé mẹ, dọmọ, Jijẹ wẹ Lẹngbọvu lọ he yè ko hù, nado yí huhlọn, adọkun, nuyọnẹn, hlọnhlọn, yẹyi, gigo, po dona po. ¹³Nudida dopodopo he tin to olọn mẹ, to aigba ji, podọ to aigba glọ, podọ ehe hunkọ he tin to ohù mẹ, po onú he tin to yé mẹ lẹpo po wẹ yẹn sè to didọmọ, Dona po yẹyi po, gigo po huhlọn po, ni tin hlan ewọ he sinai to ofìn ji, podọ hlan Lẹngbọvu lọ kakadoi. ¹⁴Mẹdida ẹnẹ lẹ sọ dọmọ; Niṣẹ. Mẹho konukunẹnẹ lẹ sọ Sinyọn akónnuai, bo litai.

¹YẸN sọ mọ whenuena Lẹngbọvu lọ hùn dopo to hiadonu lẹ lọ mẹ, yẹn sè di wanyinyẹn osò tọn, dopo to mẹdida ẹnẹ lẹ lọ mẹ sọ dọmọ, Sè wá pọ́n. ²Yẹn sọ mọ, bo pọ́n, osé wéwé de; ewọ he sinai to e ji sọ tindo ogá dopo; yè sọ yí ojẹgbakun de nẹ̃: é sọ tón jẹgbonu to awhàngbigba mẹ, podọ nado gbawhàn.

³Whenuena é sọ hùn hiadonu awetọ, yẹn sè ogbè mẹdida aweto tọn to didọmọ, Sè wá pọ́n. ⁴Osó devo de sọ tón jẹgbonu, he divè: yè sọ yí huhlọn na ewọ he sinai to e ji, nado dè jijọho sọn aigba ji, podọ na yé ni to yénọzo hù: yè sọ yí ohi daho de do alọ mẹ nẹ.

⁵Whenuena é hùn hiadonu atọ̀ntọ, yen sè ogbè mẹdida atọ̀ntọ tọn to didọmo, Sè wá pọ́n. Yẹn sọ pọ́n, do ayi e go, oso yú de; ewọ he sinai to e ji tindo ojlẹnu òwhẹ awenọ to alọ etọn mẹ. ⁶Yẹn sọ sè ogbè de to ṣẹnṣẹn mẹdida ẹnẹ lẹ lọ tọn to didọmọ, Ojlẹ̀ dopo olikun tọn na abọgankuẹ dopo, podọ ojlé balle gbado ton atọ̀n na abọgankuẹ dopo; bo pọ́n, hiẹ gblẹalọdo ami po ovẹ̃n po go blo.

⁷Whenuena e so hùn hiadonu enẹtọ, yen sè ogbè medida ẹnẹtọ tọn to didọmọ, Ṣẹ̀ wá pọ́n. ⁸Yẹn sọ pọn, do ayi e go, osọ́ avajé de; oyín ewọ he sinai to e ji ton wẹ Okú, Kutòmẹ hihodo e to godo. Yè sọ na huhlọn yé do dadẹnẹtọ aigba tọn ji, nado yí ohi, huvẹ, okú po kanlin he tin to aigba ji lẹ po do hù omẹ.

⁹Whenuena é hùn hiadonu atọ̀ntọ, yẹn sọ mọ to agbà glọ, ayiha yé he yè hù na ohó Jiwheyẹwhe tọn, podọ na okunnuhó he go yé hẹn: ¹⁰ye sọ to awhádo ogbè lélé, dọmọ, Nawẹ é na dẹn do, Oklunọ E, wiwenọ podọ nugbonọ, hie ma na dawhẹ̀, bo sọ yíahọsu ohùn mítọn tọn to yé he tin to aigba ji lẹ go ba? ¹¹Yè sọ yí aṣọ́vọ̀ wéwé hlan yé omẹ dopodopo; yè sọ dọ hlan yé, dọ, yé ni gbọjẹ to ojlẹ vude mẹ whé, kaka devi hatọ yetọn lẹ, po mẹmẹsunnu yetọn lẹ po, he yè na hù dile yè hù yewlẹ do na do sọgbè.

¹²Yẹn sọ mọ whenuena é hùn hiadonu ṣidopotọ, do ayi e go, whinwhàn daho de whàn; owhè sọ diyù di odévò ofún tọn, osùn sọ di ohùn; ¹³sunwhlẹvu olọn tọn lẹ sọ flẹ́ jẹ aigba, kẹdẹdile votin nọ jà sinsẹ́n etọn he ma whén kọnyinai do, whenuena yè gbọn alọ jẹhọn daho tọn mẹ whàn ẹn. ¹⁴Yè sọ há olọn sẹ̀ di hihá owẹ́ tọn whenuena yè há ẹ dopo; osé daho lẹ dopodopo po olopo dopodopo po wẹ yè hùngona sọn otẹn yetọn mẹ. ¹⁵Ahọlu aigba tọn lẹ, mẹgbògbo lẹ, adọkunnọ lẹ, awhangán lẹ, mẹgángán lẹ, mẹmẹglọ lẹ dopodopo, podọ mẹmẹkannu lẹ dopodopo, sọ yí yéde whlá do odò slo mẹ, podọ to osé slo mẹ to osé daho lẹ ji; ¹⁶yé sọ to didọ hlan osé daho lẹ, po osé lẹ po, dọ, Hó jẹ mí ji, bo yí mí whlá sọn nukun ewọ he sinai to ofìn ji lọ tọn mẹ, podọ sọn homẹgble Lẹngbọvu lọ tọn mẹ; ¹⁷na azán daho homẹgble etọn tọn ko wá; mẹnu wẹ tin sọgan nado nọte?

¹TO ehe godo, yẹn sọ mọ angeli ẹnẹ site to gosu ẹnẹ aigba tọn le ji, yé sọ hẹn jẹhọn ẹnẹ aigba tọn lẹ go na jẹhọn nikã yìn do aigba go, kavi do ohù mẹ, kavi do atin depope go. ²Yẹn sọ mọ angẹli devo de tọ́n sọn whèzizẹ dali ja, é tindo hiadonu Jiwheyẹwhe ogbènọ lọ tọn to alọ mẹ: é sọ dawhá to ogbè lélé mẹ hlan angẹli ẹnẹ lẹ, he yè na nado gbleawuna aigba lọ po ohù po, ³dọmọ, Hiẹ gbleawuna aigba, kavi ohù, kavi atin lẹ blo, kaka mi nado yi hiadọnu do dohia ogo na mẹmẹglọ Jiwheyẹwhe mítọn tọn lẹ to nukọn yẹtọn ⁴Yen sọ sè sọha yé he yè yí hiadonu do dohia ogo na lẹ tọn: yé he yè dohia ogo na lẹ yín fọtọ́n kantọ́nkonukunẹnẹ sọn whẹndo ovi Islaeli tọn lẹpo mẹ.

¹WHENUENA é sọ hùn hiadonu sinawetọ, dadó to olọn mẹ jẹ dadawe ogàn dopo tọn jlẹmẹ. ²Yẹn sọ mọ angẹli ṣinawe he site to Jiwheyẹwhe nukọn lẹ; yè yí opèn ṣinawe na yé.

³Angẹli devo de sọ wá, bo site to agbà kọn: é tindo agbán sika tọn de, yè sọ yí nuwhẹnwan susu nẹ̃, na é ni yí i dogọ̀ odè mẹwiwe lẹ tọn to agbà sika tọn lọ ji he tin to ofìn lọ nukọn. ⁴Azò nuwhẹnwan lọ tọn, po odè mẹwiwe lẹ tọn po sọ hẹji yì Jiwheyẹwhe nukọn sọn alọ angẹli lọ tọn mẹ. ⁵Angeli lọ sọ yí agbán lọ, bo dè miyọn agbà lọ ji tọn gọ̀ e mẹ, bo sọ zé e dlẹn aigba ji: ogbè, osò, abì, po aigba whinwhàn po sọ tin.

⁶Angẹli ṣinawe lẹ lọ he tindo opèn ṣinawe lẹ wleawu na yéde nado kún.

⁷Angẹli tintan kún, okẹnsu po miyọn po he flusọ ohùn tọ́n jẹgbonu, yè sọ zé yé dlẹn aigba ji: dadatòntọ aigba tọn fiọ, amà mú lẹpo sọ fiọ.

⁸Angẹli awetọ sọ kún, yè sọ dòn osé daho he to zoji de dlẹn ohù mẹ: dadatòntọ ohù tọn sọ diọ zùn ohùn. ⁹Dadatọ̀ntọ nudida he tin to ohù mẹ, yèdọ yé he tindo gbigbọ lẹ kú; dadatòntọ ohún lẹ tọn sọ gble.

¹⁰Angẹli atọ̀ntọ kún, sunwhlẹvu daho de sọ flẹ́ sọn olọn mẹ, bo to jiji di zogbán, bo hó jẹ dadatòntọ otọ́ daho lẹ tọn ji, podọ jẹ asisa otò lẹ tọn ji: ¹¹yè sọ nọ ylọ oyín sunwhlẹvu lọ tọn dọ, Vivé; dadatòntọ osìn tọn sọ diọ zùn vivé; omẹ susu sọ kú gbọn alọ osìn lẹ lọ tọn mẹ na yè diọ yé zùn vivó wutu.

¹²Angẹli ẹnẹtọ kún, yè sọ linú dadatòntọ owhè tọn, dadatòntọ osùn tọn, po dadatòntọ sunwhlẹvu lẹ po tọn; na dadatòntọ yetọn nido dozinvlu, okle ma sọ yí dadatòntọ etọn do họnun, mọwẹ ozán ga.

¹³Yẹn mọ, bo sọ sè angẹli de to zinzlọn gbọn ṣẹnṣẹn olọn tọn jei, bo to didọ to ogbè lélé mẹ, dọ, Dindọn, dindọn, dindọn, na yé he tin to aigba go lẹ, na ogbè opón angẹli atọ̀n he pò bo to na kùn dogó tọn wutu!

¹ANGẸLI atóntọ kún, yẹn sọ mọ sunwhlẹvu de flẹ́ sọn olọn mẹ wá aigba: ewọ wẹ yè yí hònhùngàn odò mapote tọn lọ hlan. ²E sọ hùn odò mapote lọ; azò sọ tì jegbonu sọn odò lọ mẹ, di azò miyọn daho tọn; owhè po jiwhenukunmẹ po sọ dozinvlu na azọ̀ odò lọ mẹ tọn wutu. ³Owẹn sọ tón jẹgbonu sọn azò lọ mẹ wá aigba ji: yé wẹ yè yí huhlọn hlan, dile aklekle aigba tọn lẹ tindo huhlọn do. ⁴Yè sọ dọ hlan yé dọ, yé gbleawuna ogbé aigba tọn blo, kavi onu he to omú de, kavi atin depope blo; adavo yé he ma tindo ohia hiadonu Jiwheyẹwhe tọn to nukọn yetọn lẹ kẹdẹ. ⁵Yéwlẹ wẹ yè sọ yí hlan dọ, yé hù yé blo; adavo dọ yè ni bianukunna yé hò osùn atọn; adimèmẹ yetọn sọ taidi adímómẹ aklekle tọn whenuena é mẹ gbẹtọ. ⁶To azán nẹlẹ gbè wẹ gbẹtọ lẹ na din okú, yé ma to na mọ ẹn; yé nasọ jlo nado kú, okú nasọ hòn sọn yé de. ⁷Owẹn ewlẹ sọ tin jijlẹ do osọ́ he yè ko wleawuna vò hlan awhàn go; to ota yetọn é tin jijlẹ do ojẹgbakun sika tọn lẹ go, nukun yetọn sọ taidi nukun gbẹtọ tọn. ⁸Yé tindo odà di odà yọnnu lẹ tọn, adú yetọn sọ di adú kinnikinni lẹ tọn. ⁹Yé tindo tùnudo lẹ, di tùnudo ogàn tọn lẹ; nudidọ awàfun yetọn tọn sọ di nudidọ kẹkẹ osọ́ susu tọn, he to wezundo jei awhàn. ¹⁰Yé sọ tindo osi di aklekle tọn, adi sọ tin to osí yetọn go: podọ osí yetọn lẹ mẹ wẹ huhlọn yetọn te nado gbleawuna gbẹtọ lẹ hò osùn atón. ¹¹Yé sọ tindo ahọlu de to yé ji, he yín angeli odò mapote tọn, oyín mẹhetọn nọ yín Abadọni, to ogbè Heblu tọn mẹ, ṣigba to ogbè Gleki tọn mẹ, oyín etọn nọ yín Apoliọni.

¹²Dindọn dopo juwayì; do ayi e go, Dindọn awe dogó sọ ja to ehegodo.

¹³Angeli sidopotọ sọ kún, yẹn sè ogbè de sọn azò ẹnẹ agbà sika tọn lẹ lọ mẹ, he tin to Jiwheyẹwhe nukọn, ¹⁴tó didọ hlan angẹli sidopotọ he tindo opẹ̀n lọ, dọmọ, Tún angẹli ẹnẹ lẹ dai, he yè sín do otò daho Eufiati mẹ. ¹⁵Yè sọ tún angẹli ẹnẹ ewlẹ dai, yé he yè ko wleawu etọn dai, na ojlẹ dopo, osùn dopo, owhè dopo, nado hù dadatòntọ gbẹtọ lẹ tọn. ¹⁶Osọha awhàn osónọ lẹ tọn tọn sọ yín fọtọ́n ao whla fọtọ́n ao: yẹn sọ sè sọha yetọn. ¹⁷Le wẹ yẹn mọ osọ́ lẹ lọ to numimọ mẹ, po yé he hẹ́ yé lẹ po, yé tindo tùnudo di miyọn tọn lẹ, jasinti tọn, po whèmí po tọn; ota osọ́ ewlẹ tọn sọ taidi ota kinnikinni lẹ tọn; podọ onù yetọn mẹ wẹ miyọn, po azò po, po whèmí po to tintón sọn jẹgbonu. ¹⁸Gbọn azònylankan atọ̀n helẹ dali wẹ yè hù dadatòntọ gbẹtọ lẹ tọn, gbọn miyọn po azò po dali, podọ gbọn whèmí he to tintọn sọn onù yetọn mẹ dali. ¹⁹Na huhlọn yetọn tin to onù yetọn mẹ, podọ to osí yetọn mẹ: osí yetọn tin jijlẹ do odàn lẹ go, bo sọ tindo ota, ehelẹ wẹ yé do nọ gbleawuna ome. ²⁰Gbẹtọ he pò lẹ, he yè ma hù gbọn azònylankan helẹ dali, ma sọ lẹnvọjọ na alọnuzọn yetọn, dọ yé ma to nasọ sèn lẹgba lẹ ba, podọ bosiọ sika tọn, fataka tọn, ogànvẹ̃ tọn, osé tọn, po atin tọn po ba: ehe ma sọgan mọnukunnu, bo ma sọgan sènú, kavi he ma sọgan zinzọnlin: ²¹mọ yé ma lẹnvọjọ na hlọnhùhù yetọn, kavi na owón yetọn lẹ, kavi na gàlilọ yetọn, kavi na ajò yetọn.

¹YẸN sọ mọ angẹli huhlọnnọ devo de jẹte sọn olọn aga, yè yí aslọ do ṣinyọn avọ̀ nẹ; aidowhẹ̀do de sọ tin to ota etọn, nukunmẹ etọn di owhè, afọ etọn sọ di dòtin miyọn tọn: ²é tindo owé hùnhùn pẹvi de to alọ etọn mẹ: é sọ yí adusifọ etọn do ohù ji, bo sọ yí amiyọnfọ etọn do aigba húhú ji, ³bo to awhádo ogbè lélé, di whenuena kinnikinni to gbigbo gángán; whenuena é dawhá mọ vọ̀, osò ṣinawe yí ogbè yetọn do yénwan. ⁴Whenuena osò ṣinawe lẹ yí ogbè yetọn do yénwan, wẹ yẹn pé winwlan: yẹn sọ sè ogbè de sọn olọn mẹ to didọ hlan mi, dọmọ, Yí hiadonu do tlẹ onú he osò ṣinawe lẹ yí wanyinyẹn do dọ, a sọ wlanwe yetọn blo. ⁵Angẹli he yẹn mọ bọ é site to ohù ji podọ to aigba húhú ji zé alọ etọn daga hlan olọn, ⁶bo sọ yí ewọ he tin to ogbé kakadoi do whlé, mẹhe da olọn, po onú he tin to e mẹ lẹ po, aigba, po onú he tin to e ji lẹ po, ohù, po onú he tin to e mẹ lẹ po, dọ, ojle ma tin ba: ⁷ṣigba to azán ogbè angẹli sinawetọ tọn gbè, whenuena é na sẹ do kúnkún ji, yè na dotana nudabla Jiwheyẹwhe tọn lọ, dile yè dọ hlan devi etọn yẹwhegán lẹ do. ⁸Ogbè he, yẹn sè sọn olọn mẹ sọ vó dọ hlan mi, dọmọ, Yì yí owé pẹvi he hùn dai to alọ angẹli he site to ohù ji podọ to aigba húhú: ji tọn mẹ. ⁹Yẹn sọ yì angẹli lọ de, bo dọ hlan ẹn, dọ, Yí owé pẹvi lọ na mi. E sọ dọ hlan mi, dọ Yí i, bo dù i; é na hẹn homẹ towe vé, ṣigba é na vivi to onù towe mẹ di owín. ¹⁰Yẹn sọ yí owẹ́ pẹvi lọ sọn alọ angẹli lọ tọn mẹ, bo dù i; é sọ vivi to onù ṣie mẹ di owín: le yẹn sọ dù i vò, homẹ ṣie vé. ¹¹E sẹ̀ dọ hlan mi, dọ, Hiẹ ma na nọma vọ́ dọdai to gbẹtọ susu nukọn gba, podọ to ahọlu susu nukọn.

¹YÈ yí ofánpò de na mi di nujlẹpò de: angẹli lọ sọ site, bo to didọmọ, Fọ́n, bo jlé tẹmpli Jiwheyẹwhe tọn lọ, po agbà lọ po, po yé he to sinsén to e mẹ lẹ po. ²Ṣigba jo awágbó he tin to gbonu tẹmpli lọ tọn dali do, a jlé ẹ blo; na Kosi lẹ wẹ yè yí na: otòdaho wiwe lọ wẹ yé na yí afọ do zíndai hò osùn kande e lán awe. ³Yẹn nasọ na huhlọn kunnudetọ ṣie awe lẹ, yé na dọdai hò azán fọṣidopo e lán kandeko, to odévò mẹ. ⁴Ehelẹ wẹ atinaminọ awe lẹ, po zogbántin awe lẹ po, he to ote to Jiwheyẹwhe aihọn tọn nukọn. ⁵Eyín mẹdepope jlo nado gbleawuna yé, miyọn nọ tón sọn onù yetọn mẹ jẹgbonu, bo fiọ kéntọ yetọn lẹ: eyín mẹdepope jlo nado gbleawuna yé, yè mananọma hù i dole tọnnkọ. ⁶Ehelẹ tindo huhlọn nado sú olọn na jikun ja to dọdai zángbè yetọn mẹ blo; yé sọ tindo huhlọn to osìn ji nado diọ ẹ zùn ohùn, podọ nado yí azònylankan lẹpo do hò aigba, to whedepopenu he yé jlo. ⁷Whenuena yé na ko dotana okunnu yetọn vò, kanlin he tọ́n sọn odò mapote mẹ jegbonu lọ na fùnawhàn hẹ yé, bo na gbawhàn yetọn, bo nasọ hù yé. ⁸Osiọ yetọn na mlọnai to hòntonu otò daho lọ tọn mẹ, he yè nọ yí gbigbọ do ylọ dọ Sọdọmi po Egipti po, fie ga yè whè Oklunọ mítọn do satin go te. ⁹Podọ sọn gbẹtọ lẹ mẹ, hẹnnu lẹ mẹ, ogbè lẹ mẹ, podọ to akọta lẹ mẹ, na to osiọ yéde tọn mọ hò azán atọn po oda po; yé ma na dike yè ni zé osiọ yetọn di do oyọwhé de mẹ. ¹⁰Yé he tin to aigba ji lẹ nasọ jaya do yé ji, homẹ yetọn na vivi, yé nasọ nanú yénọzo; na yẹwhegán awe helẹ ko saya na yé he tin to aigba ji lẹ wutu. ¹¹To azán atọ́n po oda po godo, Gbigbọ ogbé tọn sọn Jiwheyẹwhe de biọ yé mẹ, yé sọ fọ́n site to afọ yetọn ji: obu daho sọ jẹ yé he pọ́n yé lẹ ji. ¹²Yé sọ sè ogbè daho de sọn olọn mẹ wá to didọ hlan yé, dọmọ, Mì hẹji wá ofi. Yé sọ hẹji yì olọn to aslọ mẹ; kéntọ yetọn lẹ sọ to yé pọ́n. ¹³To ojlẹ dopolọ mẹ aigba whinwhàn daho de whàn, dadaotọ otò daho lọ tọn họliai, to aigba whinwhàn lọ mẹ gbẹtọ fọtọ́n ṣinawe wẹ yè hù: obu sọ di yé he pò lẹ, yé sọ pagigona Jiwheyẹwhe olọn tọn.

¹⁴Dindọn awetọ juwayì; pọ́n, Dindọn atọ̀ntọ sọ ja yiyáyiyá.

¹⁵Angẹli sinawetọ sọ kún; yè sọ sè ogbè daho lẹ sọn olọn mẹ wá to didọmọ, Ahọludu aihọn tọn lẹzún ahọludu Oklunọ mítọn tọn, po Klisti etọn po tọn; ewọ nasọ to ahọludu kakadoidoi. ¹⁶Meho konukúnẹnẹ he sinai to Jiwheyẹwhe nukọn to aisintẹn yetọn mẹ lẹ lọ, jẹklo ṣinyọn nukunmẹ yetọn ai bo litaina Jiwheyẹwhe, ¹⁷dọmọ, Mi dopéna we, Oklunọ È Jiwheyẹwhe Ganhunupo, hiẹ mẹhe tin, bo ko tin, bo sọ ja; na hiẹ ko yí huhlọn daho towe, bo ko sọ to aholudu. ¹⁸Homẹ gble akọta lẹ, homẹgble towe sọ wá, po ojlẹ osiọ lẹ tọn po, na yè nido dawhèna yé, na hiẹ ni sọ do yi nunina hlan devi yewhegán towe lẹ, hlan mẹwiwe lẹ, podọ hlan yé he dibusi oyín towe lẹ, pẹvi po daho po: bo nado hùsúdo yé he to aihon hùsúdo lẹ.

¹⁹Yè hùn tẹmpli Jiwheyẹwhe tọn dai to olọn mẹ, yè sọ mọ apotin alẹ́nu etọn tọn to templi mẹ: abì sọ tin, ogbè, wanyinyẹn, aigba whinwhàn po kẹnsu daho po.

¹OHIA daho de sọ yín mimọ to olọn mẹ; yọnnusi he yè yí owhè do doasọna de, osùn sọ tin to afọ etọn glọ, ojẹgbakun sunwhlẹvu tọn wiawe sọ tin to ota etọn: ²le é mọhò, é dawhá, ajlù ovi tọn hẹn ẹn, é sọ tin to awufiẹsa me nado jivi ³Ohia devo sọ yín mimọ to olọn mẹ; pọ́n, dlagọni vẹ̃ daho de, he tindo ota ṣinawe, azò ao, bọ ojẹgbakun ṣinawe sọ tin to ota etọn. ⁴Osí etọn to dadatòntọ sunwhlẹvu olọn tọn lẹ dòn, bo sọ to yé dòn dlẹn aigba ji: dlagọni lọ sọ site to nukọn yọnnusi he wleawu bo to ovi na ji lọ tọn, nado hù ovi etọn sunnu dù le yè ji i. ⁵E sọ ji ovisunnu de, mehe na nọ yí ogánpò do hẹn akọta lẹpo sèn: yè sọ wlé ovi etọn yì Jiwheyẹwhe de, podọ do ofìn etọn kòn. ⁶Yọnnusi lọ sọ hòn yì zùngbo mẹ, fie yè ko wleawu otẹn tọn dai nẹ̃ te sọn Jiwheyẹwhe de, na yè ni to núdùdù na ẹn to finẹ họ̀ azán fọṣidopo e lán kandeko.

⁷Awhàn de sọ tin to olọn mẹ: Mikaẹli po angẹli etọn lẹ po to avùnhò hẹ dlagọni lọ; dlagọni lọ so to avùnhò po angẹli etọn lẹ po, ⁸yé ma sọ gbawhàn; mọ otẹn ma sọ tin na yé to olọn mẹ ba. ⁹Yé sọ yàn dlagọni daho lọ jẹgbonu, odàn hóhó lọ, he yè nọ ylọ Lẹgba, podọ Satani, he nọ to aihọn lẹpo klọ: yè yàn ẹn dlẹn aigba ji, bo sọ yàn angẹli etọn lẹ jẹgbonu po e po ¹⁰Yẹn sọ sè ogbè lélé de to olọn mẹ, to didọmọ, Dinvie wẹ whlẹngan, huhlọn, ahọludu Jiwheyẹwhe mítọn tọn, po huhlọn Klisti etọn tọn po wá: na yè ko yàn mẹslẹtọ mẹmẹsunnu mítọn lẹ tọn dlẹn odò, he nọ to owhè yetọn jẹ to Jiwheyẹwhe mítọn nukọn to okle po ozán po. ¹¹Yé sọ gbawhàn etọn na ohùn Lẹngbọvu lọ tọn wutu, podọ na ohó okunnu yetọn tọn wutu; yé ma sọ yiwanna gbigbọ yetọn kaka jẹ okú gba. ¹²Enẹwutu mì to ayajẹ, mì olọn lẹ emi, po mì he nonò yé mẹ lẹ po Dindọn hlan aihọnmẹnu lẹ, podọ hlan yé he tin to ohù me le, na Lẹgba lọ ko jẹte wá mì de, po homegble daho po wutu, na é yọnẹn dọ whenu gli de wẹ e tindo.

¹³Whenuena dlagọni lọ mọ dọ yè yàn ẹn hlan aigba, é dohomẹkẹn yọnnusi he jivi sunnu lọ. ¹⁴Yè sọ na awà awe akùn daho de tọn yọnnusi lọ, na ewọ ni zlọn yì zùngbo mẹ, yì otẹn etọn mẹ, ofì he yè to núdùdù nẹ̃ te, na ojlẹ de, podọ ojlẹ lẹ, po oda ojlẹ de tọn po, sọn nukun odàn lọ tọn mẹ. ¹⁵Odàn lọ sọ tún osìn jẹgbonu sọn onù etọn mẹ to godo yọnnusi lọ tọn di otò daho de, na é nido yí otò lọ do zé yọnnusi lọ yì. ¹⁶Aigba sọ gọalọna yọnnusi lọ, aigba kẹnù etọn, bo sọ zé otò lọ nù, ehe dlagọni lọ tún jẹgbonu son onù eton mẹ. ¹⁷Dlagọni lọ gblehomẹ talala do yọnnusi lọ go, bo sọ tọ́n yì fùnawhàn hẹ ovi etọn he pò lẹ, ehe to osén Jiwheyẹwhe tọn yìn, bo sọ hẹn okunnu Klisti tọn go gligli lẹ.

¹Yẹn sọ site to tòkẹn hùtó tọn ji. Bo mọ kanlin de tón sọn ohù mẹ jegbonu, é tindo ota ṣinawe, azò ao, to azò etọn lẹ ji ojẹgbakun ao, podọ to ota etọn lẹ ji wẹ oyín nùzinzan tọn lẹ te. ²Kanlin he yẹn mọ lọ taidi opò, afọ etọn sọ di afọ beali tọn, onù etọn taidi onù kinnikinni tọn; dlagọni lọ sọ na huhlọn etọn ẹn, po aisinnu etọn po po asẹ daho po. ³Yẹn sọ mọ dopo to ota etọn lẹ mẹ di yè húnu hlan okú: alán etọn hlan okú ko kuata; aihọn lẹpo sọ to hèlikè hodo kanlin lọ to godo. ⁴Yé sọ litaìna dlagọni he yí huhlọn hlan kanlin lọ: yé sọ litaina kanlin lọ, bo dọmọ, Mẹnu wẹ di kanlin he? Mẹnu wẹ sọ sọgan fùnawhàn hẹ ẹ? ⁵Yè na onù in, é to onú daho po nùzinzan po dọ; yè sọ yí huhlọn na ẹn nado nọtemọ hò osùn kande e lán awe. ⁶E sọ kẹ́ onù etọn do nùzinzan mẹ do Jiwheyẹwhe go, nado to nùzan do oyín etọn go, do gohò etọn go, podọ do yé he nọnọ̀ olọn mẹ lẹ go. ⁷Yè sọ na ẹn nado fùnawhan hẹ mẹwiwe lẹ, podọ nado gbawhàn yetọn: yè sọ yí huhlọn na ẹn to hẹnnu lẹpo ji, to ogbè po akọta lẹpo po ji. ⁸Podọ yé he tin to aigba go lẹpo na nọ sèn ẹn, oyín mẹhetọn yè ma wlan do ogbè owé Lẹngbọvu lọ ton mẹ lẹ, he ye ko hù sọn whenu aihọn ko jọ. ⁹Eyín medepope tindo otọ́, gbọ e ni sè. ¹⁰Eyín mẹde tin na kanlinmọgbenu, kanlinmọgbenu mẹ é jei; eyín mẹde sọ yí ohi do hùmẹ, yè ma na nọma yí ohi do hù i. Ofi we homẹfa po yise mẹwiwe lẹ tọn po te.

¹¹Yẹn sọ mo kanlin devo de tọ́n sọn aigba glọ; é tindo azo awe taidi lẹngbovu de tọn, bo sọ to hódọ di dlagọni de. ¹²E sọ to huhlọn kanlin tintan tọn lẹpo zan to nukun etọn mẹ, bo sọ hẹn aigba po yé he tin to e me lẹpo po litaina kanlin tintan, he alán etọn hlan oku ko kuata. ¹³E sọ basi ohia daho lẹ, somọ bọ é hẹn miyọn sọn olọn me wá aigba ji to nukun gbẹtọ le tọn mẹ. ¹⁴E to yé he tin to aigba ji lẹ klọ gbọn ohia hele mẹ he yè na ẹn nado basi to kanlin lọ nukun mẹ; bo sọ dọ hlan yé he tin to aigba ji lẹ dọ yé ni basi bosiọ hlan kanlin lọ, he ko yí alán ohi tọn do ogo, bo sọ to ogbè. ¹⁵Ye sọ na ẹn nado yí gbigbọ hlan bosiọ kanlin lọ tọn, na bosiọ kanlin lọ tọn ni to hódọ, bo sọ basi na yè nido hù yé omẹ sọha he ma na litaina bosiọ kanlin lọ tọn lẹ. ¹⁶E sọ basi yé omẹ pó, pẹvi po daho po, adọkunnọ po wamọnọ po, mẹmẹdekannu po mẹmẹglọ po, nado yí ohia de do adusilọ yetọn mẹ, kavi do nukọn yetọn: ¹⁷podọ mẹdepope ma na do tin sọgan nado hò, kavi bo sà, adavo ewọ he tindo ohia lọ kavi oyín kanlin lọ ton, kavi sọha oyín yetọn tọn. ¹⁸Ofì wẹ nuyọnẹn te. Gbọ ewọ he tindo nuyọnẹn ni hia sọha kanlin lọ tọn: na sọha gbẹtọ de tọn wẹ: soha etọn sọ basi Nuòntòn kandekòatọ́n e lán dopo.

¹YẸN sọ pọ́n, do ayi e go, Lẹngbọvu de site to oso Ziọni ji, po gbẹtọ fotón kantọ̀nkonukunẹnẹ po e po, yé sọ tindo oyín Otọ eton tọn he yè wlan do nukọn yetọn. ²Yen sè ogbè de sọn olọn mẹ taidi ogbè otò susu tọn, podọ di wanyinyẹn daho osò tọn: yẹn sọ sè ogbè ajalẹnhotọ lẹ tọn, yé to ajalẹn yetọn lẹ ho: ³yé sọ to hanji di ohàn yọ́yọ́ de to ofìn lọ nukọn, to mẹdida ẹnẹ lẹ lọ po mẹho lẹ lọ po nukọn; mẹde ma sọ sọgan plón ohàn lọ, adavo gbẹtọ fọtọn kantònkonukunẹne le, he yè fligò sọn aigba ji. ⁴Ehelẹ wẹ yé he yè ma ko yí yọnnu do flu; na awhli wẹ yé. Ehelẹ wẹ nọ hodo Lẹngbọvu lọ to godo yì fidepope é jei. Ehelẹ wẹ yè fligọ sọn gbẹtọ lẹ mẹ, nado yín sinsén tintan hlan Jiwheyẹwhe podọ hlan Lẹngbọvu lo ⁵Yè ma sọ mọ bublu de to onù yetọn mẹ: na yé tin to mawàylan me to orìn Jiwheyẹwhe tọn nukọn.

⁶Yẹn sọ mọ angẹli devo de to zinzlọn to olọn ṣẹnṣẹn, bo tindo wendagbe madopodo de to alọ me, nado doyẹwheho hlan yé he tin to aigba ji le, hlan akọta lẹpo, hlan hẹnnu lẹpo, hlan ogbè lẹpo, hlan gbẹtọ lẹpo, ⁷bo to didọ to ogbè lélé me, dọmọ, Mì dibúsi Jiwheyẹwhe bo sọ na gigo e; na whẹ̀dida whenu etọn wá; mì sọ litaina ewọ he da olọn, aigba, ohù, po asisa otò tọn lẹ po.

⁸Angeli devo de sọ hodo e, bo to didọmọ, Babilọni họ, é hó, oto daho ne, na é ko hẹn akota lepo nù to ovẹ̃n homẹgble ayòdide etọn tọn mẹ.

⁹Angẹli atọ̀ntọ sọ hodo yé, bo to didọ to ogbè lélé mẹ, dọmọ, Eyín mẹdepope litaina kanlin lọ po bosiọ etọn po, bo sọ yí ohia etọn do nukọn etọn, kavi do alọ etọn me, ¹⁰ewọ lọ wẹ na nù to ovẹ̃n homẹgble Jiwheyẹwhe tọn mẹ, he yè kòn jẹgbonu matin flusọ do kọfo homẹfiọ etọn tọn mẹ: yè nasọ yí miyọn po whemí po do bianukun nẹ to angẹli wiwe lẹ po Lẹngbọvu lọ po nukọn: ¹¹azò nukunbibia yetọn tọn sọ to tìtì yì aga kakadoidoi: gbọjẹ ma sọ tin to okle, po ozán po, yé he to taliaina kanlin lọ, pò bosiọ etọn po, podo mẹdepope he yí ohia oyín etọn tọn. ¹²Ofi wẹ homẹfa mẹwiwe lẹ tọn te: yé he to osén Jiwheyẹwhe tọn po yise Jesu tọn po yìn le.

¹³Yẹn sọ sè ogbè de sọn olọn mẹ to didọ hlan mi, domọ, Wlanwe, Donanọ we osiọ he kó to Oklunọ mẹ lẹ sọn dinvie yi: mọwẹ, Gbigbọ dọ, na yé nido gbọjẹ son tukla yetọn lẹ mẹ; azọ̀n yetọn sọ to hihodo yé.

¹⁴Yẹn sọ pọ́n, do ayi e go, aslọ wéwé de, to aslọ lọ ji mẹde sinai di Ovi gbẹtọ tọn, é tindo ojegbakun sika tọn de to ota eton, po agbogọdọẹ dida de po to alọ etọn mẹ ¹⁵Angẹli devo de so ton sọn tẹmpli lọ mẹ, bo to awhádo ogbè lélé hlan ewọ he sinai to aslọ lọ ji dọmọ, Zín agbogọdọẹ towe do e mẹ, bo to gbingbẹn: na ojlẹ ko wá na we nado gbèn: na ojì aigba tọn ko biapa pó. ¹⁶Ewọ he sinai to aslọ lọ ji sọ dlẹn agbogọdoẹ etọn do aigba ji; bọ yè sọ gbèn aigba.

¹⁷Angẹli devo de sọ tọ́n sọn tẹmpli lọ me he tin to olọn mẹ ewọ ga sọ tindo agboaọdọẹ dida de. ¹⁸Angeli devo de sọ ton son fiẹ agbà lọ te, ehe tindo huhlọn to miyọn ji; bo dawha ogbè lele hlan ewọ he tindo agbogọdọẹ dida lọ, dọmo, Zín agbogọdọẹ dida towe do e mẹ, bo; bé ohín blebu ovẹ̃n aigba tọn lẹ plidopo, na sinsẹ́n etọn ko bia. ¹⁹Angẹli lọ sọ dlẹn agbogọdọẹ etọn do aigba mẹ, bo bé ovẹ̃n sinsẹ́n hẹ to aigba lẹ pli, bo sọ bé ẹ yì do ahàndanu daho homẹgble Jiwheyẹwhe tọn tọn mẹ. ²⁰Yè sọ zín ahàndanu lọ to otò daho lọ godo, ohùn sọ doyla sọn ahàndanu lọ mẹ jẹgbonu, yèdọ, hlan ogànkan osọ́ tọn go, é dẹn sọ ojlẹ stade fọṣinatọ̀n.

¹YẸN sọ mọ ohia devo de to olọn mẹ, é klo bo sọ jawu, angẹli ṣinawe he tindo azònylankan godomẹ tọn ṣinawe lẹ; na yé homẹ wẹ yè hẹn homẹgble Jiwheyẹwhe tọn vò te.

²Yẹn sọ mọ di ohù mẹpónnu tọn de he flusọ po miyọn po; podọ yé he gò to awhàngba mẹ sọn kanlin lọ de, sọn bosiọ etọn de, podọ sọn sọha oyín etọn tọn de, site to ohù mẹpónnu lọ tọn ji, yé tindo ajalẹn Jiwheyẹwhe tọn lẹ. ³Yé sọ to ohàn Moṣe devi Jiwheyẹwhe tọn tọn ji, po ohàn Lẹngbọvu lọ tọn po, dọmọ, Kiklo po nujawu po wẹ azọ́n towe, Oklunọ È Jiwheyẹwhe Ganhunupo; dódó po nugbo po wẹ ali towe, hiẹ Ahọlu mẹwiwe lẹ tọn. ⁴Mẹnu wẹ ma na dibusi we, Oklunọ È, bo ma na pagigona oyín towe? na hiẹ dopokẹdẹ wẹ wiwe; na akọta lẹpo wẹ na wá bo litai to nukọn towe; na yè ko do whẹ̀dida towe lẹ hia.

⁵Enẹgodo yẹn sọ pọ́n, do ayi e go, yè hùn tẹmpli gohọtúntún okunnuhó lọ tọn lọ do nùvò to olọn mẹ: ⁶angẹli ṣinawe lẹ sọ tọn sọn tẹmpli mẹ, yé po azọ̀nylankan ṣinawe lẹ po, he yè ṣinyọn alavọ̀ wéwé tété na, bo sọ yí gbaja sika tọn do gbàn akónnu na yé. ⁷Dopo to mẹdida ẹnẹ lẹ mẹ sọ yí ogò sika tọn ṣinawe na angẹli ṣinawe lẹ lọ, he gó na homẹgble Jiwheyẹwhe mẹhe tin to ogbẹ̀ kakadoi tọn. ⁸Ohò tẹmpli lọ tọn mẹ sọ gọ́ na azọ́ sọn gigo Jiwheyẹwhe tọn mẹ, podọ sọn huhlọn etọn mẹ; mẹde ma sọ sọgan biọ tẹmpli lọ mẹ, kaka yè na do hẹn azònylankan ṣinawe angẹli ṣinawe lẹ lọ tọn vò.

¹YẸN sọ sè ogbè lélé de son tẹmpli lọ me, to didọ hlan angẹli ṣinawe lẹ, dọmọ, Mì yì, bo túntún ogo homẹgble Jiwheyẹwhe tọn tọn lẹ do aigba mẹ.

²Tintan yì, bo túntún ogò etọn do aigba mẹ; agada yinyọn ylanylan sọ kọnyìn gbẹtọ he tindo ohia kanlin lọ tọn lẹ go, po yé he to taliaina bosiọ etọn lẹ po.

³Angẹli awetọ sọ túntún ogo etọn do ohù mẹ; é sọ di ohùn omẹ kúkú de tọn: ayiha yé he to ogbè lẹ tọn sọ kú to ohù mẹ.

⁴Angẹli atọ̀ntọ sọ túntún ogò etọn do tòsisa daho podọ do asisadò mẹ, yé sọ lẹzun ohùn. ⁵Yẹn sọ sè angẹli osìn lẹ lọ tọn dọmọ, Dódónọ wẹ hie, Dopo, hetin, bo ko tin, hiẹ Mẹwiwe lọ, na hiẹ dawhè dole wutu. ⁶Na yé ko sọ̀n ohùn mẹwiwe po yewhegán lẹ po tọn dai, hie ko sọ na ohùn yé nù; yé tin jẹ. ⁷Yẹn sọ sè angẹli devo tón sọn fie agbà lọ te dali to didọmọ, Mowẹ Oklunọ È, Jiwheyẹwhe Ganhunupo, nugbo po dódó po wẹ whẹ̀dida towe lẹ.

⁸Angẹli ẹnẹtọ sọ túntún ogò etọn do owhè ji; yè sọ yí huhlọn hlan ẹn nado yí miyọn do fiọ gbẹtọ. ⁹Yè yí yózo daho do hẹn awutu gbẹtọ tọn fiọ, yé sọ to nùzan do oyín Jiwheyẹwhe tọn go, he tindo huhlọn to azònylankan helẹ ji: yé ma sọ lẹnvọjọ nado na gigo e gba.

¹⁰Angẹli atóntọ sọ túntún ogò etọn jẹgbonu do ofìn kanlin lọ tọn lọ ji; ahọludu etọn sọ dozinvlu; yé to odé yetọn kándù na awufiẹsa, ¹¹bo sọ to nùzan do Jiwheyẹwhe olọn tọn go, na awufiẹsa yetọn po agada yetọn po tọn wutu, yé ma sọ lẹnvọjọ na owalọ yetọn gba.

¹²Angẹli sidopotọ sọ túntún ogò etọn do Euflati otò daho lọ mẹ; osìn etọn sọ hú, na yè nido jla aliho do na ahọlu he sọn whèzẹtẹn ja lẹ. ¹³Yẹn sọ mọ gbigbọ mawe atọ̀n, yé taidi bésé, bo tón sọn onù dlagọni lọ tọn mẹ jẹgbonu, podọ sọn onù kanlin lọ tọn mẹ, po sọn onù yẹwhegán lalonọ lọ po tọn mẹ jẹgbonu. ¹⁴Na yé lẹ wẹ gbigbọ aovi lẹ tọn, he to azón jawu wà, he nọ yì ahọlu aigba pọ aihọn lẹpo po tọn lẹ de, nado bẹ́ yé pli hlan awhàn azán daho Jiwheyẹwhe Ganhunupo tọn lọ gbè. ¹⁵Do ayi e go, yẹn na wá di ajotọ. Donanọ wẹ ewọ he to alihó, bo sọ sè avọ́ etọn do, na é nikã zinzọnlin to omẹ́, yè bo nasọ mọ winyan etọn. ¹⁶E sọ bé yé pli do ofì yè nọ ylọ Amagẹdọni to ogbè Heblu tọn mẹ.

¹⁷Angeli sinawetọ sọ túntún ogo etọn jegbonu do ojiwhehomẹ; ogbè daho de sọ tún sọn templi olọn tọn mẹ, sọn fìe ofìn lọ te, dọmọ, E vọ̀. ¹⁸Ogbè lẹ sọ tin, po osò po, po abì po; aigba whinwhàn daho sọ whan; ehe hunkọ ma jọ gbède whenuena gbẹtọ ko, tin to aigba ji, aigba whinwhàn gangán mọhunkọ de, he klo sọmọ. ¹⁹Otòdaho lọ sọ tlen do tenmẹ atọ̀n, otò daho akọta lẹ lọ tọn lẹ sọ gbà: Babilọni daho sọ yín fìnflin to Jiwheyẹwhe nukọn, nado yí kọfo ovẹ̃n homẹgblẹ́ etọn tọn he hùnzo na ẹn. ²⁰Lopo lẹpo sọ hòn yì, yè ma sọ mọ osó daho lẹ ba. ²¹Kẹnsu daho flẹ́ sọn olọn mẹ jẹ gbẹtọ lẹ ji, kẹnsu dopodopo di ojlé talẹnti dopo tọn na pinpẹ̀n: gbẹtọ lẹ sọ to nùzan do Jiwheyẹwhe go na tukla kensu lọ tọn tọn wutu: na tukla etọn lọ sù gbahugbahú.

¹DOPO to angẹli ṣinawe lẹ lọ me he tindo ogo ṣinawe lẹ lọ wá bo to hódọ hẹ mi, bo sọ dọ hlan mi, dọmọ, Sè wá fi; yẹn na yí whẹ̀dida ayòdetọ daho lọ tọn hia we, he sinai to osìn susu ji: ²mẹhe ahọlu aigba tọn lè to ayòde he, mẹhe yè yí ovẹ̃n ayọdide etọn tọn do hẹn aihọnmẹnu lẹ nù nùgọhò. ³Mowẹ é hẹn mi to gbigbọ mẹ yì zùngbo mẹ: yẹn sọ mọ yọnnusi de, é sinai to kanlin wlanwlan vẹ̃ de ji, he gó na oyín nùzinzan tọn lẹ, é tindo ota ṣinawe, azo ao. ⁴Yè sọ yí ogefunwunmẹ po avọ̀ vẹ whẹkan wlanwlan do doasọna yọnnusi lọ, bo sọ yí sika po zannu akuegegenu po, po pali po do doasọ nẹ, é tindo kọfo sika tọn de to alọ etọn mẹ, he gú na osùnú lẹ, podọ na ofẹ́n ayòdide etọn tọn. ⁵Yè sọ wlan oyín de do nukọn etọn, dọ, NUDABLA DE, BABILỌNI DAHO, ONỌ YONNÍJ AYODETO LẸ TỌN, PO OSUNÚ AIHỌN TỌN LẸ PO. ⁶Yẹn sọ mọ yọnnusi lọ nù ohùn mewiwe lẹ tọn mú, po ohùn kunnudetọ Jesu tọn lẹ tọn po: whenuena yẹn mọ ẹn, avọ̀ daho vọ mi. ⁷Angẹli lọ sọ dọ hlan mi, dọ, Etẹwutu wẹ avọ̀vò we? yẹn na dọhó nudabla yọnnu lọ tọn na we, po kanlin he zé e jei tọn po, he tindo ota ṣinawe, azò ao, ⁸Kanlin he hiẹ mọ, é ko tin, é ma sọ tin ba; é nasọ tún sọn odò mapote mẹ jẹgbonu, bo yì biọ dindọn mẹ: avọ̀ nasọ vò yé he tin to aigba ji lẹ, oyín mẹhetọn yè ma ko wlan do owẹ́ ogbẹtọn mẹ sọn whenu aihọn ko jọ, whenuena yé to pinpọn kanlin he ko tin, bo ma sọ tin ba, bo na so wá. ⁹Podo ofi wẹ ayiha he tindo nuyọnẹn te. Ota ṣinawe lẹ, osọ́ daho ṣinawe wẹ, ehe ji yọnnu lọ sinai do. ¹⁰Ahọlu ṣinawe wẹ yé: atọ́n ko jai, dopo tin, dopo he pò ma ko wá gba; whenuena é wá, é ma na nọma nọte dẹn hú whenu gli de. ¹¹Kanlin he ko tin, bo ma sọ tin ba, yèdọ ewọ wẹ sinatọ̀ntọ, é sọ tin to omẹ ṣinawe lẹ mẹ, bo sọ jẹì dindọn me. ¹²Azò ao he hiẹ mọ le ahọlu ao wẹ, yé he ma ko tindo ahọludu de kaka jẹ dinvie; ṣigba yé tindo huhlọn di ahọlu to ogàn dopo mẹ po kanlin lọ po. ¹³Ehelẹ tindo ayi dopo, bo nasọ yí huhlọn po hlọnhlọn yetọn po hlan kanlin lọ. ¹⁴Ehelẹ wẹ na to awhànfùn hẹ Lẹngbọvu lọ, Lẹngbọvu lọ nasọ gbawhàn yetọn: na ewọ we Oklunọ Oklunọ lẹ tọn, Ahọlu ahọlu lẹ tọn: podọ yé ga na gbawhan he tin to e de lẹ, mẹyiylọ, mẹsinsinyan, nugbonọ. ¹⁵E sọ dọ hlan mi, dọ, Osìn he hiẹ mọ lẹ, to fie ayòdetọ lọ sinai te, wẹ gbẹtọ lẹ, agùn pipli lẹ akọta lẹ, po ogbè le po. ¹⁶Azò ao he hiẹ mọ to ota na kanlin lọ, ehelẹ wẹ na gbẹwanna ayòdetọ lọ, bo na basi i matinhuwhẹhomẹtọnọ, bo sọ hẹn ẹn jemé, yé na dù olàn etọn, bo nasọ yí miyọn do fiọ ẹ gbidigbidi. ¹⁷Na Jiwheyẹwhe ko yí do ayiha yetọn mẹ nado hẹn ojlọ eton di, nado dogbèpó, podọ nado yí ahọludu yetọn na kanlin lọ, kaka ohó Jiwheyẹwhe tọn nado di. ¹⁸Yọnnusi hẹ hie sọ mo lọ, wẹ otò daho lọ, he to ahọludu to ahọlu aihọn mẹ tọn lẹ ji.

¹TO onú helẹ godo yẹn sọ mọ angẹli devo de jẹte sọn olọn mẹ ja, é tindo huhlọn daho; aigba sọ hón gbọn gigo etọn dali. ²E sọ yí huhlon do dawhá ogbé lélé dọmọ, Babilọni daho họ́, é họ́, é sọ diọ zùn fininò aovi lẹ tọn de, podọ oganhọ gbigbọ mawe lẹ tọn, podọ ogànhọ ohè gbẹwanna mawe dopodopo tọn. ³Na akọta lẹpo ko nù to ovẹ̃n homẹgble ayòdide etọn tọn mẹ, ahọlu aigba tọn lẹ sọ; to gàlọ hẹ ẹ, ajọwàtọ aigba tọn lẹ lẹzun adọkunnọ gbọn huhlọn ogbẹ̀dudu etọn tọn dali.

⁴Yẹn sọ sè ogbè devo de sọn olọn mẹ to didọmọ, Mì tọ́n sọn e mẹ, mì ome ṣie emi, dọ mì yín máhetọ to ylando eton mẹ blo, dọ mì yí to azònylankan eton mẹ blo. ⁵Na yèdọ ylando etọn ko hopli hlan olon, Jiwheyẹwhe ko sọ flin oylan etọn ⁶Mì suahọ eton hlan en yèdọ dile é suahọ etọn mì do, na mì ni sọ yén do awe hlan ẹn di azón etọn: to kọfo he mẹ é ba gó te, we yè ni sọ gó hlan ẹn te do gbéaweji. ⁷Nemunemu we é to gigopana ede, bo sọ nonò ogbèdùdù mẹ, awufiẹsa po homegble mọtọnhunkọ po wẹ mì ni na ẹn: na é ko dọ to ayiha ede tọn mẹ, dọ, Ai ahọsi tọn wẹ yẹn sín, yẹn ma yín asusiọsi gba, yẹn ma to awublanu na mọ. ⁸Enẹwutu we azòn-ylankan eton na wá gbèdopo, okú, awúblanú, po huvé po; yè na yí mìyon do fiọ ẹ mlẹnmlẹn: na huhlọnnọ we Jiwheyẹwhe Oklunọ he to owhè etọn da. ⁹Aholu aigba tọn lẹ, he tó ayòde hẹ e, bo sọ tin to ogbedudu mẹ hẹ ẹ lẹ, na doavihan nẹ, bo nasọ viavi nẹ whenuena yé na mọ azò fifiọ etọn tọn, ¹⁰yé na site to aganu boboe na awujiji awufiẹsa etọn tọn, dọmọ, Só, Só, otodaho huhlọnnọ lọ! na ogàn dopo ji wẹ whẹ̀dida towe wá. ¹¹Ajọwàtọ aigba tọn lẹ na viavi, bo nasọ to awúbla nè, na mẹde ma hò ajónu yetọn ba: ¹²ajónu sika tọn, fataka tọn, ozannu akuẹgegenu tọn, pali, alavọ̀ dagbedagbe, ogefunwunmẹ tọn, séda amamú tọn, avọ̀ vẹ̃ tọn, atin he vivi tọn, núzinzán hunkọhunkọ ajlakudu tọn lẹpo, núzinzán alọpalọpa atin akuẹgegenu lẹ tọn, ogànvẹ̃ tọn, ogànyù tọn, podọ ozannu mabli tọn, ¹³podọ kinamọni tọn, nuwhẹnwan gblingblin tọn, amisisa tọn, nuwhẹnkun tọn, ovẹ̃n tọn, amì tọn, linfín dagbedagbe tọn, likún tọn, kanlin tọn, lẹngbọ tọn, osó tọn, kẹkẹ tọn, agbasa lẹ tọn, po ogbè gbẹtọ tọn lẹ po. ¹⁴Podọ sinsẹ́n he ayiha towe túnwan hodo lẹ, yé yì sọn de we, onú he vivi bo sọ yónwhanpẹ lẹ, yé súdo sọn de we, hiẹ ma sọ to na mọ yé gbède ba. ¹⁵Ajówàtọ onú helẹ tọn, he yè hẹn zùn adọkunnọ gbọn alọ eton mẹ lẹ, na site to aganu boboe na awujiji awufiẹsa etọn tọn, bo na to avivi bo to awubla, ¹⁶dọmọ, ṣọ̀, só, otò daho lọ, he yè ṣinyọn alavọ̀ dagbedagbe na, po ogefunwunmẹ tọn po, avọ̀ vẹ, po ehe yè yí sika do doasọna po, ozannu akuẹgegenu tọn po pali po ¹⁷na ogàn dopo mẹ wẹ adọkun daho mọhunkọ zùn ovó. Ohúntọ lẹ dopodopo, ogbé ohún mẹ tọn lẹ, húnkùntọ lẹ, po mesọha he to ajówa gbọn ohù ji le po so site to aganu boboe, ¹⁸bo to awhádo whenuena ye mọ azò fifiọ etọn ton, dọmo, Oto daho tewe di oto daho he! ¹⁹Yé so húnhún kogudu do ota yetọn, bo to awhádo, bo to avivi, bo to avihando, domọ, Só, so, oto daho lọ, èhe mẹ yè hẹn, vé omẹ he tindo ohún to ohù me lepo zùn adọkunnọ gbọn onú akuẹgegenu etọn le tọn dali na ogàn dopo mẹ yè hen ẹn jẹvọ. ²⁰Jaya do ota nẹ, hiẹ olon, mì aposteli wiwe lẹ, po yewhegán lẹ po; na Jiwheyẹwhe ko yíabosu mìtọn to e go.

²¹Angẹli huhlọnnọ de so zé ozannu de daga taidi gìlisé daho, bo ze e dlẹn ohù mẹ, bo to didọmo, Le we yè na yí huhlọn do dòn Babiloni oto daho lọ dlẹn odò do, yè ma sọ to na mọ en gbèdegbède ba. ²²Ogbè ajalenhotọ lẹ tọn, hanjitọ lẹ tọn, vánkúntọ le tọn, opènkúntọ lẹ tọn, yè ma to na se to e mẹ gbède ba; asiawatọ le, anawatọ onú depope tọn he é yín, yè ma na mọ to hiẹ mẹ gbède ba; yè ma sọ to ogbè gilisé tọn na sè to hie mẹ gbède ba. ²³Hinhọ́n zogban tọn yè ma to na tá to hiẹ mẹ́ gbède ba; ogbè asisunọ po asiyóyọ po tọn yè ma to na sè to hiẹ mẹ gbède ba: na ajówàtọ towe lẹ wẹ omẹ gbògbo aigba tọn lẹ; na owọn towe wẹ yè yi do klọ akọta lẹpo. ²⁴Na ohò etọn mẹ wẹ yè mọ ohùn yẹwhegán lẹ tọn, mẹwiwe lẹ tọn, po omẹ yè hù to aigba ji lẹ po tọn te.

¹TO onú hele godo, yẹn sè ogbè daho gbẹtọ susu tọn de to olọn mẹ, to didọmọ, Halleluia; Whlẹngan, po gigo po, yẹyi po huhlọn po, hlan Oklunọ Jiwheyẹwhe mítọn: ²na nugbo po dódó po wẹ whẹ̀dida etọn lẹ: na é ko da whẹ̀na ayòdetọ daho lọ, he yí ayòdide etọn do hẹn aigba gble, bo sọ yíahosu ohùn devi etọn lẹ tọn to alọ etọn mẹ. ³Yé sọ vó dọ, dọmọ, Halleluia. Azò etọn sọ hẹji kakadoi. ⁴Mẹho konukunẹnẹ lẹ lọ, po mẹdida ẹnẹ lẹ lọ po sọ jeklo, bo litaina Jiwheyẹwhe he sinai to ofìn ji, bo dọmọ, Niṣẹ; Halleluia. ⁵Ogbè de sọ tón sọn ofìn lọ dali, dọmo, Mì pa Jiwheyẹwhe mítọn, mì devi etọn lẹ, po mì he dibusi i lẹ po, pẹvi po daho po. ⁶Yẹn sọ sè taidi ogbè gbẹtọ susu tọn, podọ di ogbè osìn susu tọn, podọ di ogbè wanyinyẹn daho osò tọn, dọmọ, Halleluia: na Oklunọ Jiwheyẹwhe Ganhunupo duahọlu. ⁷Etomẹ mítọn ni hùn, mí ni jaya, bo na yeyi i: na alọwle Lẹngbọvu lọ tọn whenu wá, asi etọn ko sọ sónu do ogo. ⁸Ewọ wẹ yè na dọ yè ni yí alavọ̀ dagbedagbe, wéwó he ma kudu do doasọna: na alavọ̀ dagbedagbe lọ wẹ dódó mẹwiwe lẹ tọn. ⁹E sọ dọ hlan mi, dọ, Wlanwe, Donanọ wẹ yé he yè ylọ do núdùdù alọwle Lẹngbọvu lọ tọn kòn lẹ. E sọ dọ hlan mi, dọmọ, Ehele wẹ ohó nugbo Jiwheyẹwhe tọn. ¹⁰Yẹn sọ jẹklo to afọ etọn go nado litai nẹ̃. E sọ dọ hlan mi, dọmọ, Pọ́n, hiẹ basi mọ blo: devi hatọ de wẹ yẹn po hiẹ po, po mẹmẹsunnu towe lẹ po, he hẹn okunnuhó Jesu tọn go: litaina Jiwheyẹwhe: na okunnuhó Jesu tọn wẹ gbigbọ dodai tọn.

¹¹Yẹn sọ mọ olọn hùn do nùvò, pọ́n osọ́ wéwe de: mẹhe hé e ji wẹ yè nọ ylọ Nugbonọ, Dódónọ, dódó mẹ wẹ é sọ to whẹ̀da te, bo sọ to awhànfùn te. ¹²Nukun etọn taidi zode, to ota etọn wẹ ojẹgbakun susu tin te; é sọ tindo oyín he yè wlan de, he mẹde ma yọnẹn, adavo ewlọsu. ¹³Yè sọ doavọ̀ he yè ylón do ohùn mẹ de nọ̀; bo sọ nọ ylọ oyín etọn dọ Ohó Jiwheyẹwhe tọn. ¹⁴Awhànpa he tin to olọn mẹ lẹ sọ to hihodo e to godo to osé wéwé lẹ ji, he yè do alavọ̀ dagbedagbe na, wéwó madodu. ¹⁵Sọn onù etọn mẹ wẹ ohi dida de tón sọn jẹgbonu, dọ ewu wẹ é na yí do hò akọta lẹ: bo nasọ yí opò ogàn tọn de do hẹn yé sèn: é sọ zin ahàndanu homẹgble Jiwheyẹwhe Ganhunupo tọn tọn he hùnzo. ¹⁶E sọ tindo to avọ̀ etọn go podọ to asapada etọn ji oyín he yè wlan de; AHỌLU AHỌLU LẸ TỌN, Oklunọ Oklunọ LẸ TỌN.

¹⁷Yẹn sọ mọ angẹli dopo to ote to owhè homẹ; é yi ogbè lélé do dawhá bo to didọ hlan ohè he to zinzlọn to jiwhe nukunmẹ lẹpo, dọmọ, Mì wá, mi bé mìde plidopọ do núdùdù daho Jiwheyẹwhe tọn kòn; ¹⁸na mì nido dù agbasalan ahọlu lẹ tọn, agbasalan awhangán lẹ tọn, agbasalan mẹgángán lẹ tọn, agbasalan osé lẹ tọn, po yé he sinai to ye ji lẹ po tọn, agbasalan gbẹtọ lẹpo tọn, mẹmẹdekannu po mẹmẹglọ lẹ po tọn, pẹvi po daho lẹ po tọn.

¹⁹Yẹn sọ mọ kanlin lọ, ahọlu aigba tọn lẹ, po awhànpa yetọn lẹ po, plidopọ nado fùnawhàn hẹ ewọ he sinai to osọ́ ji po awhànpa etọn po. ²⁰Yè sọ wlé kanlin lọ, po yẹwhegán lalonọ ẹtọn po ga, he nọ to ohia basi to nukọn etọn, he é do nọ klọ yé he yí ohia kanlin lọ tọn lẹ, po ye he nọ litaina bosiọ etọn lẹ po. Omẹ awe helẹ wẹ yè dọn gbẹte dlẹn miyon hihla mẹ, he nọ yi whèmi do ji. ²¹Ome he pò lẹ wẹ yè yí ohi ewọ he sinai to osọ́ ji tọn do hù, ohi he tón sọn onù etọn mẹ jẹgbonu: ohọ̀ lẹpo sọ gọhò to agbasalan yetọn dùdù mẹ.

¹YẸN sọ mọ angẹli de jẹte sọn olọn mẹ ja odò, é tindo hónhùngàn odò mapote lọ tọn, kògàn daho de sọ tin to alọ etọn mẹ. ²È sọ dè alọ bo hẹn dlagọni lọ, odàn hóhó lọ, he yín Lẹgba, Satani, bo dogàn ẹn hò owhè fọtọ́n, ³bo sọ dòn ẹn dlẹn odò mapote lọ mẹ, bo súnúdo e, bo yí hiadonu do tlé ẹ, na é klọ akọta lẹ ba blo, kaka owhè fọtọ́n na do pé: to enẹgodo yè nasọ jo e dote whenu gli de.

⁴Yẹn sọ mọ ofìn lẹ, yé sinai to yé ji, yè sọ na whẹ̀dida hlan yé: yẹn sọ mọ alindọn yé he yè gbòtana na okunnuhó Jesu tọn, po ohó Jiwheyẹwhe tọn po tọn wutu, podọ yé he ma ko litaina kanlin lọ, podọ na bosiọ etọn, kavi yé he ma ko yí ohia etọn do nukọn yetọn, kavi to alọ yetọn mẹ; yé tin to ogbè, bo sọ to ahọludu hẹ Klisti hò owhè fọtọ́n. ⁵Ṣigba osiọ he po lẹ ma tin to ogbẹ́ ba kaka owhè fọtọ́n lọ na do pẹ́. Ehe wẹ fọ́nsọnku tintan. ⁶Donanọ, mẹwiwe wẹ ewọ he tindo tẹnme to fọ́nsọnku tintan lọ me: mẹmọtọnnkọ ji wẹ okú awetọ ma tindo huhlọn de te, ṣigba yé na yín yẹwhenọ Jiwheyẹwhe tọn lẹ po Klisti tọn po, bo nasọ duahọlu hẹ ẹ hò owhè fọtọ́n.

⁷Whenuena owhè fọtọ́n na pé vò, yè na tún Satani dote sọn gànhọ etọn mẹ jẹgbonu, ⁸e nasọ tón yì nado klọ akọta he tin to ada ẹnẹ aigba tọn le mẹ, Gọgi po Magọgi po, nado bé yé plidopọ hlan awhàn: sọha yé mẹhe tọn taidi tòkẹ́n ohù tọn. ⁹Yé sọ hẹji gbọn gbigblo aigba tọn mẹ yì, bo sọ lédo osla mẹwiwe lẹ tọn pó, po otò daho yiwanna lọ po: miyọn sọ fló sọn Jiwheyẹwhe de sọn olọn mẹ bo hù yé súdo. ¹⁰Yè sọ dọn Lẹgba hẹ klọ yé sọ yì dlẹn miyọn hihla po whèmí tọn po mẹ, fie kanlin lọ po yẹwhegán lalonọ lọ po te, yé nasọ to nukunbia mẹ to okle po ozán po kakadoi.

¹¹Yẹn sọ mọ ofìn wéwẹ́ daho de, po ewọ he sinai to e ji po, nukọn mẹhetọn aigba po olọn po hòn yì te; yè ma sọ mọ tẹnmẹ de na yè ba. ¹²Yẹn sọ mọ osiọ lẹ, pẹvi po daho po, yé site to Jiwheyẹwhe nukọn; yè hùn owó lẹ dai; yè sọ hùn owẹ́ devo de dai, he yín owẹ́ ogbé tọn; yè sọ dawhèna osiọ lẹ sọn onú he yè wlan do owẹ lẹ lọ mẹ lẹ mẹ, kẹdẹdi azón yetọn lẹ. ¹³Ohù hẹn osiọ he to e mẹ lẹ jẹage; okú po kutòmẹ po sọ hẹn osiọ he tin to yé mẹ lẹ jẹage: yè sọ dawhèna yé dopodopo kẹdẹdi azón yetọn lẹ. ¹⁴Okú po kutòmẹ po wẹ yè sọ dòn yì dlẹn miyọn hihla mẹ. Ehe wẹ okú awetọ. ¹⁵Mẹdepope he yè ma mọ yín winwlan do owé ogbẹ́ tọn mẹ, yè dòn ẹn yì dlẹn miyọn hihla mẹ.

¹YẸN sọ mọ olọn yọ́yọ́ de, po aigba yọ́yọ́ de po: na olọn tintan po aigba tintan po ko juwayì; ohù ma sọ tin ba. ²Yen Johanu sọ mọ otò wiwe lọ, Jelusalẹm yọ́yọ́, to tejẹ sọn olọn mẹ ja sọn Jiwheyẹwhe de, he yè wleawúna di asiyọ́yọ́ de he yè doasọna na asú etọn. ³Yẹn sọ sè ogbè daho de Sọn olọn mẹ to didọmọ, Do ayi e go, gohò Jiwheyẹwhe tọn tin to gbẹtọ lẹ de, ewọ nasọ nọhẹ yé, yé na yín ome etọn, Jiwheyẹwhe lọsu nasọ nọhẹ yé, bo nasọ yín Jiwheyẹwhe yetọn ⁴Jiwheyẹwhe nasọ súnsún dasìn lepo sè sọn nukun yetọn mẹ; okú ma naso tin ba, kavi awúbla, kavi avi, mọ awufìesa ma na tinba: na onú tintan lẹ ko juwayì. ⁵Ewọ he sọ sinai tò ofin lọ ji dọmọ, Pọn, yẹn diọ onú lẹpo zùn yọyó. E sọ dọ hlan mi, dọmọ, Wlanwe: ohó helẹ dódó po nugbo po wẹ. ⁶E sọ dọ hlan mi, dọ, E vọ. Yẹn wẹ Alfa, yẹn wẹ Omẹga, odòdó, opòdo. Yẹn nasọ na ewọ he nugblahu nù sọn asisa osìn ogbè tọn mẹ vọnu. ⁷Ewọ he gbawhàn wẹ na dugú Onú popo tọn; yẹn nasọ yín Jiwheyẹwhe etọn; ewọ nasọ yín ovi ṣie. ⁸Ṣigba obutọnọ lẹ, po mayisenọ lẹ po, gbigbletọ lẹ, po hlọnhutọ lẹ po, po ayòdetọ lẹ po, owọntọ lẹ, bosiọsóntọ lẹ, po lalonọ lẹpo po na tindo tẹnmẹ yetọn to ofi hihla he to miyọn ji po whèmí po tọn mẹ, ehe wẹ okú awetọ.

⁹Dopo to angẹli ṣinawe lẹ mẹ, he tindo ogò ṣinawe lẹ, he gó na azònylankan godomẹ tọn ṣinawe lẹ, wá dẽ, ewọ sọ dọhó hẹ mi, dọmọ, Wá fi, yẹn na do asiyóyọ, ási Lẹngbọvu lọ tọn, hia we. ¹⁰E sọ hẹn mi to gbigbọ mẹ yì osó daho he yìaga de ji, bo do otò daho lọ hia mi, Jelusalẹm wiwe, to tejẹ sọn olọn mẹ ja sọn Jiwheyẹwhe de, ¹¹he tindo gigo Jiwheyẹwhe tọn: sisó etọn taidi osé akuẹgegenu tọn, yèdọ taidi osé jaspali tọn, é wó di klistali; ¹²e sọ tindo dòkọ daho he yìji, bo sọ tindo hòngbo wiawe, to hòngbo lẹ ji angẹli wiawe, yè sọ wlan oyín do yé go, he yín oyín whẹndo wiawe ovi Islaeli tọn lẹ tọn. ¹³To whèzẹtẹn dali, hòngbo atọ̀n; to agéwaji, hòngbo atọ̀n; to ohùwaji, hóngbo atọ̀n; to whèyihọ, hòngbo atọ̀n. ¹⁴Dòkọ otòdaho lọ tọn sọ tindo dòdó wiawe; to yé mẹ wẹ oyín Apọsteli wiawe Lẹngbọvu lọ tọn lẹ te. ¹⁵Ewọ he to hódọ hẹ mi tindo ofánpò sika tọn de to alọ mẹ nado jlé otòdaho lọ, po hòngbò etọn lẹ po, po dòkọ etọn po. ¹⁶Otodaho lọ sọ mlọnai sọzẹn to ada ẹnẹ lẹ mẹ, ote etọn sọ klo di gbigblo etọn: é sọ yí fánpò do jlé otòdaho lọ, è yín awàgba fọtọ́n wiawe jijlẹ. Ote po ogblo po, po jiyiyi etọn po yín dopolọ ¹⁷E jlẹ́ dòkọ etọn ga, é yín awàgba kantọ̀nko e lán ẹnẹ, kẹdẹdi jijlẹ gbẹtọ tọn, enẹ wẹ, angẹli lọ tọn. ¹⁸Didó dòkọ eton tọn yín jaspali: otòdaho lọ sọ yín sika dagbedagbe dodo, taidi mẹpónnu he mọnukunnu gblegede. ¹⁹Yè sọ yí osé hunkọhunkọ akuẹgegenu tọn do doaṣọna dodó nu otòdaho; lọ tọn. Dòdó nu tintan yín jaspali; awetọ, safili: atọ̀ntọ, kalkedoni; ẹnẹtọ, emẹlaldi; ²⁰atọ̀ntọ, sadoniki ṣidopotọ, saldita; ṣinawetọ, klisọlite; ṣinatọ̀ntọ, belili; ṣinẹnetọ, topazi; aotọ, klisoplasu; widopoto, jakintu; wiawetọ, amẹtistu. ²¹Họ̀ngbo wiawe; lẹ sọ yín angẹli wiawe, họ̀ngbo dopodopo yín angẹli dopo: tòhomẹliho otòdaho lọ tọn sọ yín sika dagbedagbe dodo, taidi mẹpọ́nnu he hùnnukunmẹ. ²²Yẹn ma mọ: tẹmpli de to e mẹ; na Oklunọ Jiwheyẹwhe Ganhunupo, po Lẹngbọvu lọ po wẹ tẹmpli etọn. ²³Otòdaho lọ ma sọ jlo owhè, kavi osùn, nado nọ họ́n hinhọ́n do e mẹ: na gigo Jiwheyẹwhe tọn wẹ to hinhọ́n họ́n do e mẹ, Lẹngbọvu lọ sọ wẹ hinhọ́n etọn. ²⁴Akọta lẹ na to zọnlinzin to hinhọ́n etọn mẹ: ahọlu aigba tọn lẹ sọ to gigo yetọn po yẹyi po hẹn wá e mẹ ²⁵Yè ma na su họ̀ngbo etọn lẹ to ozán whenu: na ozánku ma tin to finẹ. ²⁶Yé na hẹn gigo po yẹyi akọta lẹ tọn po wá e mẹ. ²⁷Eyín é bo sọ to depope, onú he nọ hẹn mẹflu ma to na biọ e mẹ, kavi ewọ he nọ basi osùnú de, kavi he to lalodo: adavo yé he yè wlanwe yetọn do ogbẹ̀ owó Lẹngbọvu lọ tọn mẹ lẹ.

¹E sọ do otò osìn ogbẹ́ tọn de hia mi, ehe we sesẹ́ di klistali, he to tinton sọn fie ofìn Jiwheyẹwhe tọn, po Lẹngbovu lọ tọn po te. ²To ṣẹnṣẹn tohomẹ-liho etọn tọn, podọ to ada awe otò lọ tọn mẹ, wẹ atin ogbè tọn lọ te, he nọ sén sinsẹ́n hunkọhunkọ wiawe, bo sọ nọ to sinsẹ́n etọn sẹn to sùnmẹ sùnmẹ: amà atin lọ tọn tin na azònhẹngbọ akọta le tọn. ³Onú hodèdo de ma na tin ba: ofìn Jiwheyẹwhe tọn po Lẹngbọvu lọ po tọn wẹ na tin to finẹ; devi etọn lẹ nasọ to sinsẹ̀n ẹn: ⁴yé na mọ nukun etọn mẹ; oyín etọn nasọ tin to nukọn yetọn. ⁵Ozánku ma na tin to finẹ; ye ma to zogbán na din, kavi hinhọn owhè tọn; na Oklunọ Jiwheyẹwhe wẹ to hinhọ́n na yé; yé nasọ to ahọludu kakadoi.

⁶E sọ dọ hlan mi, dọ, Dodó po nugbo po wẹ ohó helẹ: Oklunọ Jiwheyẹwhe yẹwhegán wiwe lẹ tọn wẹ do angẹli etọn hlan nado do onú he to na wá jọ dinvie hia hlan devi etọn lẹ ⁷Do ayi e go, yẹn ja yiyayiyá; donanọ wẹ ewọ he to ohó dọdai tọn he tin to owẹ́ he mẹ lẹ tọn yìn.

⁸Podọ yẹn Johanu wẹ ewọ he sè bo sọ mọ onú nelẹ. Whenuena yẹn sè bo mọ, yẹn jẹklo nado litai to afọ angẹli lọ tọn nukọn, he do onú helẹ hia mi. ⁹Whenẹnu wẹ é dọ hlan mi, dọ, Pọn, hiẹ wà mọ blo: devi hatọ de wẹ yẹn po hiẹ po, po yẹwhegán mẹmẹsunnu towe lẹ po, po ye he to ohó he tin to owe he mẹ tọn yìn lẹ po: litaina Jiwheyẹwhe.

¹⁰E sọ dọ hlan mi, dọ, Hie yí hiadonu do tlé ohó dọdai tọn he tin to owe he mẹ lẹ blo: na ojlẹ lọ to sisepó. ¹¹Ewọ he yín mawadoaónọ gbọ é ni to mawadodo wà zọnmì: podọ ewọ he yín dihono, gbọ é ni to dihonọ yín zọ̀nmĩ: podọ ewọ he yín dódónọ, gbọ é ni to dodó wà zọ̀nmĩ: podọ ewọ he yín wiwe, gbọ é ni to wiwe yín zọ̀nmĩ. ¹²Bo do ayi e go, yẹn ja yiyáyiyá; ale ṣie sọ tin to dẽ, nado na mẹdopodopo kẹdẹdile azón etọn lẹ na te. ¹³Yẹn wẹ Alfa, yẹn wẹ Omẹga, odòdo po opodo po, nukọntọ, godotọ. ¹⁴Donanọ wẹ yé he yan awugbo yetọn lẹ, na yé nido tindo ojlọjẹ nado wá atin ogbẹ̀ tọn lọ kòn, bo do sọgan gbọn hòngbo lẹ ji biọ otodaho lọ mẹ. ¹⁵Gbonu wẹ avun lẹ te, owọntọ lẹ, ayọdetọ lẹ, hlọnhutọ lẹ, bosiọsẹntọ lẹ, podọ omẹ depope he yiwanna lalo bo sọ to lalo de basi lẹ.

¹⁶Yẹn Jesu ko do angeli ṣie hlan nado dekunnu onú helẹ tọn hlan mì to agún lẹ mẹ. Yẹn wẹ adọ ovi Davidi tọn, podọ sunwhlẹvu hinhọn afọnnu lọ tọn.

¹⁷Gbigbọ po asiyọyọ po dọmọ, Wá. Ewọ he to sisè ni dọmọ, Wá. Podọ mẹhe nugblahu gbọ é ni wa. Ewọ he jlo, gbọ é ni yí osìn ogbẹ̀ tọn lọ vọnu.

¹⁸Na yen sakunnu hlan yé he to ohó dọdai tọn he tin to owé he me sè lẹ domọ, Eyín mẹdepope na dé dogó onú helẹ, Jiwheyẹwhe na de azònylankan he yè wlan do owé he me dogọ hlan ẹn: ¹⁹eyín mẹdepope na depo sọn ohó he tin to owé dọdai tọn he mẹ, Jiwheyẹwhe na dè oten etọn sọn owé ogbè tọn mẹ, sọn otòdaho wiwe lọ me, podọ sọn onú he yè wlan do owé he mẹ lẹ me.

²⁰Ewọ he sakunnu onu helẹ tọn dọmọ, Mọwẹ, yẹn ja yiyáyiya. Niṣẹ. Wá, Jesu Òkíunọ.

²¹Ojọmiọn Jesu Klisti Oklunọ mítọn tọn ni tin po mẹwiwe lẹ po. Niṣẹ.