Mika

¹OHÓ OKLUNỌ tọn he wá jẹ Mika Molaṣitmu lọ de to azán Jotami, Ahazi, po Hẹzekia, ahọlu Juda tọn lẹ tọn lẹ mẹ, he é mọ gbọn Samalia po Jelusalẹm po tọn dali. ²Sè, mì, gbẹtọ lẹ, popo mì tọn; Aigba E, tuntóai, po ogigọ́ e mẹ tọn po: bo sọ gbọ OKLUNỌ Jiwheyẹwhe ni yín kunnudetọ to mì ṣẹnṣẹn, OKLUNỌ sọn tẹmpli wiwe etọn mẹ. ³Na, dayi e go, OKLUNỌ jẹgbonu sọn otẹn etọn mẹ ja, bo na jẹte wá, bo na tùnafọ otẹn yìaga aigba tọn lẹ ji. ⁴Podọ osó lẹ na yin kinkọ̀n to ewọ glọ, podọ agbàdo lẹ na sọ yín zizẹ̀, di oda to miyọn nukọn, di osìn lẹ he yè kọ̀n sọn otẹn sọkọdò de mẹ jẹte. ⁵Na sẹ́nmẹjẹ Jakob tọn ehe lẹpo tin na, podọ na ylando owhé Islaeli tọn lọ tọn. Etẹ́ wẹ sẹ́nmẹjẹ Jakob tọn? bé é ma yín Samalia wẹ? podọ etẹ́ otẹn yìaga Juda tọn lẹ yín? bé Jelusalẹm ma wẹ yé? ⁶Enẹwutu yẹn na basi Samalia di okiti dangbo tọn de, podọ di dido vẹ̃ngle de tọn lẹ: podọ yẹn na kọn zannu etọn jẹte biọ agbàdo lọ mẹ, podọ yẹn na sọ hùn odòdonu etọn lẹ dai. ⁷Boṣiọ pipa etọn lẹpo bo na sọ yín tùntùn hanyanhanyan, podọ ale etọn lẹpo wẹ yè na yí miyọn do mẹ́, podọ vodun etọn lẹpo wẹ yẹn na hẹn mlọnai ojẹvọ́: na ale gàlọtọ de tọn mẹ wẹ ewọ ko ṣinyan yé sọn, podọ ale gàlọtọ de tọn kọ̀n wẹ yé na lẹ́gọ̀ jẹ. ⁸Yẹn na doavihàn bo dohukúhíu na ehe, Yẹn na túnavọ̀ bo jẹmé yì: yẹn na basi avihàn de taidi ogbévún lẹ, podọ awubibla de taidi gongo lẹ. ⁹Na alán etọn lẹ yín magbọmagbọ: na yè hẹn ẹn wá yèdọ jẹ Juda; é yi jẹ họ̀ngbo omẹ ṣie lẹ tọn ji, yèdọ jẹ Jelusalẹm. ¹⁰A dọ ẹ to Gati mẹ blo, a sọ viavi lala blo: bli dewe to okọgudu mẹ to Bẹti-le-Afia. ¹¹Mì ju yì, to omẹ́ po owinyan po mẹ, mì tòmẹnuyọnnu Ṣafìli tọn emi: yè ma hẹn tòmẹnuyọnnu Zaanani tọn lẹ jẹgbonu wá gba; avihàn Bẹti-ezeli tọn na yí ofi ṣite do etọn sọn mì si. ¹²Na Tòmẹnuyọnnu Maloti tọn tin yí awuvivi do nọte na dagbe: na yè hẹn oylan jete sọn OKLUNỌ de jẹ họngbo Jelusalẹm tọn ji wutu. ¹³Bla okẹkẹ́ do awhànfunsọ́ awuyatọ lọ go, hiẹ tomenuyọnnu Lakiṣi tọn E: ewọ wẹ oṣisẹ ylando tọn hlan viyọnnu Ziọni tọn; na yè mọ osẹnmẹjẹ Islaeli tọn lẹ to ewọ mẹ. ¹⁴Enẹwutu wẹ hiẹ na na nunina kinklan tọn de hlan Molẹṣẹti-gati; owhé Akzibi tọn lẹ na sọ yín Akzabi hlan ahọlu Islaeli tọn lẹ. ¹⁵Yẹn na hẹn enẹ he na yí we na nutindo wá jẹ de we, hiẹ tòmẹnuyọnnu Malẹṣa tọn È: gigo Islaeli tọn na wá yèdọ jẹ Adulami. ¹⁶Hẹn dewe mọ́ta, bo sọ padana dewe na ovi homẹhùn towe tọn lẹ: hẹn pipata towe klo di aklasú; na yè hẹn yé biọ mẹmẹglọ mẹ yì sọn de we.

¹DINDỌN hlan yé he nọ dowéna oylanwà lẹ bo sọ nọ wàzọ́n oylan to adọzan yetọn lẹ ji! whenuena afọnnu yín hinhọn, yé nọ to pinplọn ẹn, na é tin to huhlọn alọ yetọn tọn mẹ wutu. ²Yé nọ donukunkẹnna ogle lẹ, bo sọ nọ yí yé glo; podọ owhé lẹ, bo sọ nọ bẹ́ yé sọ yì: yé nọ hẹnawusinyẹn omẹ de po owhé etọn po, yèdọ omẹ de po ogú etọn po. ³Enẹwutu le wẹ OKLUNỌ dọ, Dayi e go, yẹn dowé oylan de do whédo he go, ehe mẹ mì ma dè okọ́ mìtọn lẹ sọn, mọ mì ma na sọ zinzọnlin po gòyiyí po gba; na ojlẹ ylanylan de wẹ. ⁴To azán nẹ mẹ wẹ yé na zé oló de daga de mì go, bo na yí avigbè do doavigbè, yè wa ẹ; bo sọ dọmọ, Yè hẹn mí gble patapata: ewọ diọ mimá omẹ ṣie Íẹ tọn lọ: nawẹ ewọ fọ́nyì sọn dẽ do! atẹsitọ lẹ wẹ ewọ má ogle mítọn lẹ hlan. ⁵Enẹwutu hiẹ ma na tindo mẹde he na dlan okàn lọ gbọn vodidè dali to agùn OKLUNỌ tọn lọ mẹ gba. ⁶Mì dọdọdai blo, yé sọ to dọdaidọ tẹgbẹ, wẹ yé dọ. Yé ma na nọ dọdọdai omu helẹ tọn gba; whẹ̀domẹ yetọn lẹ ma doalọte gbède. ⁷Hiẹ he yè ylọyínna owhé Jakob E, Bé yè hẹn gbigbọ OKLUNỌ tọn whetè wẹ? bé wiwà etọn wẹ ehelẹ? Bé ohó ṣie lẹ ma wà dagbe hlan ewọ he zinzọnlin po jlọjlọ po la? ⁸Ṣigba yè hẹn omẹ ṣie lẹ tite daga di okẹntọ de to osọ: mìwlẹ klọ́n otewu lọ sẹ̀ sọn awugbo lọ go sọn yé he yí mahanú do ju wáyi lẹ si di omẹ lẹ́godo sọn awhàn mẹ. ⁹Yọnnu omẹ ṣie lẹ tọn mì zédlan gbonu sọn ohọ̀ whanpẹnọ yetọn lẹ mẹ; mì sọ yí gigo ṣie yì sọn ovi yetọn lẹ de kakadoi. ¹⁰Mì tite, bo fónyì; na ehe ma wẹ gbọjẹ mìtọn gba: na mawé he hùsúdo tọn wutu, yèdọ po vivà vivẹ́ de po. ¹¹Eyín omẹ zọnlinzin to gbigbọ oklọ tọn mẹ de dolalo, dọmọ, Yẹn na dọdọdai ovẹ̃n tọn hlan we, po núnùnù sinsinyẹn tọn po; yèdọ ewọ na yín yèdọ yẹwhegán omẹ he lẹ tọn.

¹²Jakob E, yẹn bẹ́ towe lẹpo pli nugbonugbo; yẹn na dọ̀n pipòtọ Islaeli tọn dopọ; yẹn na bẹ́ yé pli di lẹngbọ Bozla tọn lẹ: di lẹngbọpa de to gblàgbla kanlindùgbo yetọn tọn mẹ, yè na basi hùnhlun daho na agùndaho gbẹtọ lẹ tọn. ¹³Yè hẹn gbigbàtọ lọ hẹji yì to yé nukọn: yé ko gbà jẹgbonu bo sọ ju yì jẹ họngbo lọ ji, bo sọ yín hinhẹn yì to otẹn nẹ mẹ: podọ yè hẹn ahọlu yetọn ju yì to yé nukọn, podọ OKLUNỌ to ogánji to yé nu.

¹YẸN bo sọ dọmọ, Sè, Yẹn vẹ̀ mì, mì nukọntọ Jakob tọn lẹ, po ogán owhé Islaeli tọn tọn lẹ po: bé é ma tin na mì nado yọ́n whẹ̀dida? ²Mẹhe gbẹwanna dagbe, bo yiwanna oylan; mẹhe dọ̀n ayú yetọn sùn sẹ̀ sọn yé go, podọ agbasalan yetọn sẹ̀ sọn ohú yetọn lẹ go; ³Mẹhe dù agbasalan omẹ ṣie lẹ tọn ga: yé sọ kọ́n ayú yetọn sẹ̀ sọn yé go, bo wén ohú yetọn lẹ: mọwẹ, yé já yé do flinflin, di na ọzẹ́n, podọ di agbasalan to odlazẹ́n homẹ. ⁴Whenẹnu wẹ yé na dawhá hlan OKLUNỌ, ṣigba ewọ ma na gblọnna yé gba: mọwẹ, ewọ na whla nukunmẹ etọn to ojlẹ nẹ mẹ sọn yé de, kedẹdi le yé ko wàzón oylan to wiwà yetọn lẹ mẹ do. ⁵Le wẹ OKLUNỌ dọ gbọn yẹwhegán lẹ lọ tọn dali he hẹn omẹ ṣie lẹ nado buali: he yí adú yetọn lẹ do hẹnadumẹ bo sọ dawhádọ, Blẹo; podọ mẹdepope he ma yí do onù yetọn lẹ mẹ, yèdọ yé nọ klan awhàn dowiwe do e ji: ⁶Enẹwutu é na yín ozán hlan mì, bọ mì ma na tindo numimọ de; podọ é na sọ yín zíndo hlan mì, bọ mì ma na dọdọṣẹ; podọ owhè na jẹte yì to yẹwhegán lẹ lọ ji, azán lọ na sọ yín oyù to yé ta. ⁷Yè na sọ hẹn mimọtọ lẹ mọwinyan, po dọṣẹnọ lẹ po jẹflu: mọwẹ, yé mẹpó wẹ na ṣinyọnnúdo nùflo yetọn lẹ; na gbigblọn de ma tin sọn Jiwheyẹwhe de gba. ⁸Ṣigba nugbo tọn yẹn tin gọ́ na huhlọn yèdọ gbigbọ OKLUNỌ tọn lọ, po whẹ̀dida tọn po, po hlọnhlọn tọn po, nado lá hlan Jakob osẹ́nmẹ̀jẹ etọn, podọ hlan Islaeli ylando etọn: ⁹Mì sè ehe, yẹn vè mì, mì nukọntọ owhé Jakob tọn tọn lẹ, po ogán owhé Islaeli tọn tọn lẹ po, he gbẹ́na whẹ̀dida, bo sọ nọ sọtadòna kunnumahù lẹpo. ¹⁰Yé yí ohùn do do Ziọni daga, podọ Jelusalẹm po oylanwà po. ¹¹Nukọntọ etọn lẹ nọ dawhẹ̀ na ale, podọ yẹwhenọ etọn lẹ to mẹplọ́n na azónkuẹ, podọ yẹwhegán etọn lẹ sọ to dọṣẹdọ na akuẹ: gãnṣo wẹ yé na zẹ̀nmẹ OKLUNỌ, bo dọmọ, Bé OKLUNỌ ma tin to gblagbla mi tọn mẹ la? oylan de ma na wa mí ji gba. ¹²Enẹwutu wẹ Ziọni na mìtọn wutu na yín pipò di ogle de, podọ Jelusalẹm na lẹzùn okiti lẹ, podọ osó ohọ̀ lọ tọn di ofi yìaga zùnkan de tọn lẹ.

¹ṢIGBA to azán godotọn lẹ mẹ é na wá jọ, bọ osó ohọ̀ OKLUNỌ tọn tọn lọ na yín hẹnlódo to ota osó lẹ lọ tọn, podọ é na yín zédaga to okọn lẹ ji; podọ gbẹtọ lẹ na sọ nọ sà jẹ e de. ²Akọta susu bo na sọ yì bo dọmọ, Mi wá, bo sọ gbọ mí ni jẹte yì jẹ osó OKLUNỌ tọn kọ̀n, podọ jẹ ohè Jiwheyẹwhe Jakob tọn tọn lọ kòn; ewọ bo na sọ plén mí sọn aliho etọn lẹ mẹ, míwlẹ bo na sọ nọ zinzọnlin to omé etọn lẹ mẹ: na Ziọni mẹ wẹ osén lọ na jẹgbonu sọn yì, podọ ohó OKLUNỌ tọn sọn Jelusalẹm mẹ. ³Ewọ bo na sọ dawhẹ̀ to gbẹtọ susu ṣẹnṣẹn, bo na sọ dawhè gbọn akọta huhlọnnọ lẹ tọn dali to aganu boboe; yé bo na sọ yí ohi yetọn lẹ do tùn glepònugàn lẹ, podọ owhán yetọn lẹ do ohànvi lẹ mẹ: akọta ma na sọ zé ohi daga do akọta ji, mọ yé ma na sọ plón awhàn gbède ba. ⁴Ṣigba yé na sinai omẹ dopodopo to vẹ̃ntim etọn glọ podọ to ovotin etọn glọ; podọ mẹde ma na sọ hẹn yé savo gba: na onù OKLUNỌ awhànpa lẹ tọn tọn ko dọ ẹ. ⁵Na gbẹtọ lẹpo wẹ zọnlinzin omẹ dopodopo to oyín yẹwhe etọn tọn mọ, míwlẹ bo na sọ nọ zinzọnlin to oyín OKLUNỌ Jiwheyẹwhe mitọn tọn mẹ kakadoi podọ doidoi.

⁶To azán nẹ gbé, OKLUNỌ dọ, wẹ yẹn na bẹ́ ewọ he kúsẹ́ pli, podọ yẹn na sọ ṣinyan ewọ he yè yàn yì, po ewọ he yẹn bianukunna po pli; ⁷Yẹn na sọ hẹn ewọ he kúsẹ́ zùn pipòtọ de, podọ ewọ he yè zédlan aganu boboe akọta huhlọnnọ de: OKLUNỌ bo na sọ dùahọlu to yé ta to osó Ziọni mẹ sọn dinviejei yèdọ kakadoi. ⁸Podọ hiẹ, atọhọ̀ Edẹli tọn È, Ofẹlì viyọnnu Ziọni tọn tọn, hiẹ de é na wá jẹ; mọwẹ, ahọludùtẹn nukọntọn na wá, ahọludu viyọnnu Jelu-salẹm tọn lọ tọn. ⁹Dinvie etẹwutu wẹ hiẹ do dawhá lélé mọ? Ahọlu ma tin to hiẹ mẹ wẹ, yè hù hónamẹtọ towe súdo wẹ, bọ ajlu lẹ ko do hẹn ogo we di yọnnu to ajipamẹ de tọn? ¹⁰Tin awuvẹ́ mẹ, bo sọ jẹtukla nado, hẹn jegbonu wá, hiẹ viyọnnu Ziọni tọn È, taidi yọnnu de to ajipa mẹ; na lò wẹ hiẹ na jẹgbonu yì sọn todaho lọ mẹ, bo na nọ nọ̀ ogle mẹ, bo na sọ wá yèdọ jẹ Babilọni; finẹ wẹ hiẹ na yín whinwhlẹndai te; finẹ wẹ OKLUNỌ na fli we te sọn alọ kentọ towe lẹ tọn mẹ. ¹¹Podọ dinvie yè bẹ́ akọta susu pli do oji we, he didọmọ, Gbọ ewo ni yín fuflu, bo sọ gbọ nukun mítọn ni to Ziọni pọ́n. ¹²Ṣigba yé ma yọ́n linlẹn OKLUNỌ tọn lẹ gba, mọ yé ma sọ tùnwun hónamẹ etọn gba: na ewọ ko bẹ́ yé pli di olìkọ̀ lẹ jẹ nutùngbàji ¹³Tjte bo to tùntùn, hiẹ viyọnnu Ziọni tọn È; na yẹn na hẹn azò towe zùn ogànyu, podọ yẹn na sọ hẹn afọfẹ̀n towe lẹ zùn ogànvẹ̃: hiẹ bo na sọ tùn akọta susu hanyanhanyan: podọ yẹn na sọ dè ale yetọn dola hlan OKLUNỌ, podọ agbàn yetọn hlan OKLUNỌ aigba lọ pete tọn.

¹DINVIE wẹ hiẹ na bẹ́ dewe pli do gọ̀nugọnu, hiẹ viyọnnu gọ̀nugọ̀nu lẹ tọn È; ewọ ko tẹ́ oglọndo do mí ji: yé na yí opò de do hò whèdatọ Islaeli tọn lọ to aglanka go.

²Ṣigba hiẹ, Bẹti-lehẹm Eflata, he yín pẹvi nado tin to whédo Juda tọn lẹ ṣẹnṣẹn, hiẹ mẹ wẹ mẹde na jẹgbonu sọn wá jẹ dè he tin nado yín ogán to Islaeli mẹ; gbonujẹ yì mẹhetọn lẹ tin sọn hóhó tọn mẹ, sọn azán hóhótọ lẹ mẹ. ³Enẹwutu wẹ ewọ na jó yé do, kakajẹ ojlẹ he ewọ he to zinzẹ̀n ko hẹn jẹgbonu wá: whenẹnu wẹ pipòtọ mẹmẹsunnu etọn lẹ tọn na lẹ́gọ́ po ovi Islaeli tọn lẹ po. ⁴Ewọ bo na sọ ṣite, bo na yìn lẹngbọpa etọn lẹ to huhlọn OKLUNỌ tọn mẹ, to gigodaho oyín OKLUNỌ Jiwheyẹwhe etọn tọn lọ tọn mẹ: yé na sọ nọnọ̀; na dinvie wẹ ewọ na yín kiklo jẹ opòdo aigba tọn lẹ. ⁵Podọ dawe he na yín jijọho mítọn; whenuena Asilianu lọ na wá biọ aigba mítọn mẹ, podọ whenuena ewọ na tùnafọai to ohọ̀nmẹ mítọn lẹ mẹ, whenẹnu wẹ míwlẹ na fọ́n lẹngbọhọ́tọ ṣinawe do ewọ ji, po ahọvi ṣinatọ̀n po to gbẹtọ lẹ ṣẹnṣẹn. ⁶Yé bo na sọ yí ohi do yín lẹngbọhọ́tọ lẹ to aigba Asilia tọn ji, po aigba Nimlọdi tọn po to bibiọ etọn lẹ mẹ: ewọ bo na sọ whlẹn mí sọn Asilianu lọ si, whenuena ewọ wá biọ aigba mítọn mẹ, podọ whenuena ewọ tùnafọai to agboji mítọn homẹ. ⁷Podọ pipòtọ Jakob tọn lẹ na tin to gblagbla gbẹtọ susu tọn mẹ di ahún sọn OKLUNỌ de, di jikunfinfán lẹ to ogbé ji; he ma nọ dọngbàn na gbẹtọ, mọ ma sọ nọ nọtepọn visunnu gbẹtọ lẹ tọn lẹ gba. ⁸Podọ pipòtọ Jakob tọn lẹ na tin to akọta lẹ ṣẹnṣẹn, to gblagbla gbẹtọ susu tọn mẹ, di kinnikinni de to gbékanlin zùnkanmẹ tọn lẹ ṣẹnṣẹn, di kinnikinni ovú de to apó lẹngbọ lẹ tọn ṣẹnṣẹn: mẹhe, eyín é da yì, nọ zíndai, bo sọ nọ dọ̀ntlẹn, podọ mẹde ma tin nado whlẹn. ⁹Gbọ alọ towe ni yín zédaga hute mẹglatọ towe lẹ, bo sọ gbọ kẹ̀ntọ towe lẹpo ni yín sinsán sẹ̀.

¹⁰E na sọ wá jọ to azán nẹ mẹ, OKLUNỌ dọ, wẹ yẹn na sán osọ́ towe lẹ sẹ́ sọn gblagbla hiẹ tọn mẹ, bo na sọ và kẹkẹ towe lẹ súdo: ¹¹Yẹn bo na sọ sán tòdaho aigba lọ tọn lẹ sẹ́, bo na gọ sisẹ́ figángán towe lẹpo liai: ¹²Podọ yẹn na sán kẹnunsi lẹ sẹ́ sọn alọ towe mẹ; podọ Hiẹ ma na sọ tindo ohiazántọ lẹ de ba gba: ¹³Podọ yẹn na sọ sán bosiọ pipa towe lẹ sẹ́ po odòtin towe lẹ po sọn gblagbla hiẹ tọn mẹ: podọ hiẹ ma na sọ litaina azọ̀n alọ towe lẹ tọn ba gba. ¹⁴Podọ yẹn na họ̀n vodunzùn towe sọn gblagbla hiẹ tọn mẹ: yẹn bo na sọ và kẹ̀ntọ towe lẹ súdo. ¹⁵Podọ yẹn na hẹn ahọsuyi ṣẹ to adi po homẹwlu po mẹ to akọta lẹ ji ehe hunkọ yé ma ko mọsè.

¹MÌ sè lò núhe OKLUNỌ dọ; Tite, hiẹ ni dọ̀nhó to osó lẹ nukọn, bo sọ gbọ okọta lẹ ni sè ogbè towe. ²Mì sè núdindọn OKLUNỌ tọn, Mì osó lẹ emi, po mì odòdo lilo aigba tọn lẹ po: na OKLUNỌ tindo núdindọn de po ome etọn lẹ po, podọ ewọ na sọ dowhẹ̀gbè po Islaeli po. ³Etẹ́ wẹ yẹn ko wa hlan we, mì omẹ ṣie lẹ emi? podọ etẹ́me wẹ yẹn ko hẹnnugbẹ́do we te? sakunnu do oji e. ⁴Na yẹn hẹn we hẹji sọn aigba Egipti tọn ji wá, bo sọ fli we son ohọ̀ mẹglọnọ tọn mẹ; yẹn bo sọ do Moṣe, Aalọn, po Miliami po hlan nukọn towe. ⁵Mì ni fìm dinvie, mì omẹ ṣie lẹ emi, núhe Balaki ahọlu Moabi tọn dowéna, podọ núhe Balaami visunnu Beoli tọn gblọnna ẹn; flin sọn Ṣitimi jẹ Gilgali, na mì nido yòn owàlọ dódónọ OKLUNỌ tón lẹ. ⁶Etẹpo yẹn po wẹ na wá OKLUNỌ nukọn, bo sọ dẹ́ dẽ to Jiwheyẹwhe yìaga lọ nukọn? Yẹn na wá ewọ nukọn po avọ̀ nunina mimẹ̀ lẹ po, po oyìnvú owhè dopo whinwhẹn tọn lẹ po? ⁷Bé OKLUNỌ na yín homẹhùnnọ po fọtọ̀nfọtón agbò lẹ tọn po, kavi po fọtọ̀n ao otọ̀ amì tọn lẹ po? bé yẹn na jó oplọnji ṣie na oṣénmẹjẹ ṣie la, osinsẹ́n sọn agbasa ṣie mẹ na ylando alindọn ṣie tọn? ⁸Hiẹ dawe, ewọ ko do núhe yín dagbe hia we; podọ etẹ̀ wẹ OKLUNỌ to kinkanbiọ sọn de we, adavo nado nọ yí nugbo do wà, podọ nado yiwanna lẹblanu, podọ nado nọ yí whiwhẹ do zinzọnlin po Jiwheyẹwhe towe po.

⁹Ogbè OKLUNỌ tọn dawhá hlan tòdaho lọ, podọ ómẹ nuyọnẹn ton sọ mọ osi towe: mì sè opò lọ, po mẹhe ko dè e po. ¹⁰Bé adọkunnu yinylan tọn lẹ gbẹ́ sọ tin to ohọ̀ mẹylankan tọn mẹ, po ẹfa agbòte he yín osùnú lọ po? ¹¹Bé yẹn na yín wiwe po nujlẹnu ylankan lẹ po la, podọ po apò ojlẹnú oklọnọ de tọn le po? ¹²Na omẹ adọkunnọ etọn lẹ tin gọ̀ na huhlọnnú, podọ tòmẹnu etọn lẹ ko dọho lalo lẹ, podọ ọdẹ́ yetọn to onù yetọn mẹ oklọnọ wẹ. ¹³Enẹwutu wẹ yẹn ga ko yí alán adinọ de do hò we; yẹn ko hẹn we zùn ovọ̀jẹ na ylando towe lẹ tọn wutu ¹⁴Hiẹ na dù, ṣigba ma na yin pékọnọ gba; podọ ovọ̀ towe na tin to gblagbla hiẹ tọn mẹ: podọ hiẹ na diọtẹn, ṣigba ma na bẹ́yì gingán gba; podọ enẹ he hiẹ bẹ̀yì wẹ yẹn na sọ jó hlan ohi. ¹⁵Hiẹ na do, ṣigba a ma na gbẹn gba: hiẹ na li olivieli lẹ, ṣigba ma na yí amì do samisisána we gba; po vẹntin lọ po, ṣigba ma na nù ovẹ̃n lọ gba. ¹⁶Na yè to osẹ́ndoai Omli tọn lẹ yìn, po azón owhé Àhabi tọn tọn lẹpo po, mìwlẹ bo sọ to zọnlinzin to hónamẹ yetọn lẹ mẹ: na yẹn ni do hẹn we zùn awujinú de, podọ tòmẹnu etọn lẹ afudènú de: podọ míwlẹ na sọ hẹn ovlẹ omẹ ṣie lẹ tọn.

¹DINDỌN wẹ yẹnina yẹn tin di whenuena yé ko ṣinyan osinsẹ́n alunlun mẹ tọn lẹ, di vẹnsinsẹ̀n welu lẹ sọn vẹntin lọ mẹ ohin de ma tin nado dù; mọ ovò sinsẹ́ntintan he alindọn ṣie nọ jlo ma tin. ²Yè và homẹdagbenọ lẹ sudo sọn aigba lọ mẹ, podọ mẹde ma tin yín tenọglinọ to gbẹtọ lẹ ṣẹnṣẹn: Yé mẹpó wẹ tọwu na ohùn; yé yí odọ de omẹ dopodopo do to wudona nọvisunnu etọn. ³Alọ awelẹ wẹ yè dè jẹgbonu na oylan Dado wà ẹ po sọwhiwhe po; ahọvi lọ to bibiọ, podọ whèdatọ lọ sọ yín awuwlenọ na ale de; podọ omẹ daho lọ, ewọ to odanú alindọn etọn tọn dọ: le wẹ yé lòn ẹn dopọ do. ⁴Mẹpọ̀ntehugan to yé mẹ tin di owun de: jijlọwhetehugan tin di yè dè e sọn opa owunnọ de mẹ: yè hẹn azán hihọ́tọ towe lẹ tọn, yèdọ odlapón towe, wa; dinvie wẹ oflujijẹ yetọn na yín. ⁵Mì dotu to họntọn de mẹ blo, mì sọ yí tódido do whegbè họntọn de mẹ blo: bọ̀ ohọ̀n onù towe tọn lẹ do sọn ewọ he mlọnai to akọ́n towe mẹ dè. ⁶Na visunnu nọgbémagbòna otọ́, viyọnnu fìnfòn tite do onọ etọn ji, visunnusi dọ asúnọ etọn ji; kẹ̀ntọ gbẹtọ de tọn wẹ omẹ owhé etọn titi tọn lẹ lọ.

⁷Ṣigba na yẹn tọn, yẹn na nọ pọ̀n hlan OKLUNỌ de; yẹn na nọtepọ́n Jiwheyẹwhe whlẹngan ṣie tọn lọ: Jiwheyẹwhe ṣie na sọ sè mi. ⁸Hiẹ kẹ̀ntọ ṣie, E a jẹaglin to oji e blo: whenuena yẹn jai, yẹn na sọ tite; whenuena yẹn sinai to zinvlu mẹ, OKLUNỌ na yín hinhọ́n de hlan mi. ⁹Yẹn na hẹn homẹgble OKLUNỌ tọn, na yẹn ko wàylando do ewọ go wutu; kaka ewọ do dowhẹ̀gbèna whẹ́hó ṣie, bo sọ hẹn whẹ̀dida ṣẹ̀ na mi: ewọ na hen mi jẹgbonu wá jẹ hinhọ́n lọ kòn, yẹn bo na sọ nọ dayi dódó etọn go. ¹⁰Whenẹnu kẹ̀ntọ ṣie na mọ ẹn, owinyan bo na sọ ṣinyọn ẹn; he dọ hlan mi dọ, Fiẹ wẹ OKLUNỌ Jiwheyẹwhe towe tè? Nukun ṣie lẹ na mọ ẹn; dinvie wẹ ewọ na yín zínzindai di ogbọ̀n aligboji le tọn ¹¹Azán he gbè adó towe lẹ tin nado yin dido! azán nẹ mẹ wẹ dogbọji lọ na yín sisẹtẹnna yìdẹn. ¹²Azán nẹ gbè wẹ yé na wá jẹ dẽ, sọn Asilia mẹ po tòdaho Mazoli tọn lẹ po, podọ sọn Mazoli mẹ yèdọ jẹ Otọ̀ lọ kòn, podọ sọn ohù mẹ jẹ ohù de, podọ sọn oso mẹ je osó de ¹³Gãnṣo wẹ aigba lọ na yín ovọ́jẹ na yé he nọ nọ̀ e mẹ lẹ tọn wutu, na osinṣẹn wiwà yetọn le tọn.

¹⁴Yí opo towe do dùganna ome towe lẹ lẹngbopa ogu towe tọn, he to ninọ̀ vokada, to zùnkan mẹ to gblagbla Kalmẹli tọn mẹ: gbọ yé ni to dùdù to Baṣani po Gileadi po mẹ, di to azán hóhó tọn lẹ mẹ. ¹⁵Di to azán gbonu jẹ yì towe tọn lẹ mẹ sọn aigba Egipti tọn mẹ wẹ yẹn na do onú awujinọ lẹ hia hlan ẹn. ¹⁶Akọta lẹ na mọ bo sọ yín mẹmọwinyan hlọnhlọn yetọn lẹpo tọn: Yé na zé alọ yetọn do onù yetọn go, otó yetọn na yín kúkú. ¹⁷Yé na didọ́ kọgudu taidi odàn de; yé na to sisọsisọ tọ́n ja sọn otẹn hihla yetọn lẹ mẹ taidi onú saklegbó aigba tọn lẹ: yé na wá po obu po jẹ OKLUNỌ Jiwheyẹwhe mítọn de, bo na sọ yín avosatọ na hiẹ tọn wutu. ¹⁸Mẹnu wẹ Jiwheyẹwhe de jijlẹ do hiẹ go, he nọ jona oylanwà, bo sọ nọ dasa osẹ́nmẹjẹ pipòtọ ogú etọn tọn lọ tọn? ewọ ma hẹn adi etọn dote kakadoi gba, na ewọ hùnhomẹ to leblanu me wutu. ¹⁹Ewọ na sọ lẹ́ bo tindo awubla to mí ji; ewọ na zín oylanwà mítọn lẹ to afọ glọ: podọ hiẹ na sọ zé ylando yetọn lẹpo dlan biọ osẹ́dò ohù tọn mẹ. ²⁰Hiẹ na na nugbowà towe jẹ Jakob de, podọ lẹblanu jẹ Ablaham de, he hiẹ ko whle hlan otọ́ mítọn lẹ sọn azán hóhó tọn lẹ mẹ.