Matiu

¹OWÉ whẹndo Jesu Klisti tọn, ovì Davidi tọn, ovi Ablaham tọn. ²Ablaham ji Isaki; Isaki ji Jakobu; Jakobu ji Juda po mẹmẹsunnu etọn lẹ po; ³Juda ji Falesi po Zala po sọn Tamali de; Falẹsi ji Eslomi; Eslomi ji Alami; ⁴Alami ji Aminadabi; Aminadabi ji Nasoni; Nasoni ji Salmoni; ⁵Salmoni ji Boẹsi sọn Lahabi de; Boẹsi ji Obedì sọn Luti de; Obedi ji Jẹsi; ⁶Jẹse ji Davidi ahọlu; Davidi ji Sọlọmoni sọn mẹhe basi asi Ulia tọn de; ⁷Sọlọmoni ji Lọbọami; Lọbọami ji Abia; Abia ji Asa; ⁸Asa ji Josatati; Josafati ji Jolami; Jolami ji Họsia; ⁹Họsia ji Joatami; Joatami ji Akazi; Akẹzi ji Ẹzẹkia; ¹⁰Ẹzẹkia ji Manasi; Manasi ji Amosi, Amosi ji Josia; ¹¹Josia ji Jẹkọnia po mẹmẹsunnu etọn lẹ po to ojlẹ he mẹ yè bé yé yì Babiloni.

¹²To ehegodo yè bé yé yì Babiloni, Jẹkọnia ji Salatieli; Salatieli ji Zọlọbabeli. ¹³Zelubabẹli ji Abiudi; Abíudi ji Ẹliakimi; Ẹliakimi ji Azoli; ¹⁴Azoli ji Sadoki; Sadoki ji Akimi; Akimi ji Eliudi; ¹⁵Ẹliudi ji Ẹleazali; Ẹleazali ji Matani; Matani ji Jakobu; ¹⁶Jakobu ji Josefu, asú Malia tọn, sọn mẹhe de yè ji Jesu, he yè ylọ Klisti.

¹⁷Mọwẹ whẹndo lẹpo sọn Ablaham kaka jẹ Davidi de yín whendo wiẹnẹ, sọn Davidi de kaka jẹ bibé yì Babiloni whenu yín whẹndo wiẹnẹ; sọn bibé yì Babiloni kaka jẹ Klisti whenu yín whẹndo wiẹnẹ.

¹⁸Le wẹ jiji Jesu Klisti tọn yín: Whenuena yè mọ onọ etọn Malia na Josefu, whẹpo ye nado pli, yè mọ ẹn é mọhò gbọn Gbigbọ Wiwe mẹ. ¹⁹Whenẹnu wẹ Josefu asú etọn he basi gbẹtọ dódónọ ma jlo na do e hia do gbangba gba, é jlo na gbé ẹ dai abọẹ. ²⁰Ṣigba le é to onu helẹ lẹnpọ́n, angẹli Oklunọ tọn sọawuhia ẹ to odlọ mẹ, bo dọmọ, Josefu hiẹ ovi Davidi tọn, a dibú nado plan Malia asi towe blo, na enẹ he to oho etọn mẹ, Gbigbọ Wiwé si wẹ é sọn. ²¹E nasọ ji ovisunnu de, JESU wẹ hiẹ na ylọ oyín etọn, na ewọ wẹ na whlẹn omẹ etọn lẹ gán sọn ylando yetọn lẹ mẹ.

²²Onú helẹ pó sọ jọ, na ehe yè ko dọ sọn Oklunọ de gbọn onú yẹwhegán lọ tọn mẹ nido di, dọ,

²⁴Whenuena Josefu fọ́n sọn amlọn etọn mẹ, é wà dole angẹli Oklunọ tọn degbè nẹ do, é sọ plan asi etọn do ede de: ²⁵é ma yọ̀n ẹn kaka ewọ do ji ovi de: é sọ ylọ oyín etọn dọ JESU.

¹WHENUENA yè ji Jesu to Betlẹhẹm Judé tọn, to ahọlu Helodi whenu, do ayi e go, núyọ́nẹntọ delẹ sọn whèzìzẹ dali wá Jẹlusalem, ²to didọ, dọ̀n, Fie wẹ mẹhe yè ji bọ é yín Ahọlu Ju lẹ tọn te ? na míwlẹ mọ sunwhlẹvu etọn to whèzizẹ dali, mí sọ wá taliai nẹ gbé.

³Whenuena ahọlu Helodi sè onú helẹ, awú etọn ma jai po Jelusalẹm lẹpo po hẹ ẹ. ⁴Whenuena é bẹ́ ogan yẹwhenọ lẹ tọn po wekantọ lẹpo po plidopọ, é kanbiọ yé fie wẹ yè na ji Klisti te.

⁵Yé sọ dọ hlan ẹn, dọ, To Betlẹhẹm Judé tọn mẹ wẹ: mọwẹ yè wlanwe etọn gbọn yẹwhegán mẹ,

⁷Whenẹnu wẹ Helodi, whenuena é ylọ núyọnẹntọ lẹ do nuglọ, é kanbiọ ye dèdẹ ojlẹ he mẹ sunwhlẹvu lọ sọawúhia te . ⁸E sọ do yé hlan Betlẹhẹm, bo dọmọ, Mì yì bo din ovi lọ talala; whenuena mí mọ ẹn, mì hẹn owẹ́n gòwá na mi, na yẹn ni wá litai nẹ̀ ga.

⁹Whenuena yé sè ahọlu tọn, yé tọ́nyì; pọ́n, sunwhlẹvu he yé mọ to whèzizẹ dali sọ jẹnukọn na yé, kaka é wá nọte to aga fie ovi lọ te. ¹⁰Whenuena yé mọ sunwhlẹvu lọ yé yí ayajẹ dahodaho do jaya. ¹¹Yé biọ owhégbè, bo mọ ovi lọ po Malia onọ etọn po; yé jẹklo bo litai nẹ: whe-nuena yé tún adọkunnú yetọn, yè na núnina ẹn, sika, núwhẹnwán, po zuya po. ¹²Le yè kó na yé sọn Jiwheyẹwhe de to odlọ me yé ma sọ lẹgò yì Helodi de gba, yé gbọn ali devo yi oto yetọn mẹ.

¹³Whenuena yé ko tónyì, do ayi e go, angeli Oklunọ tọn sọawúhia Josefu to odlọ mẹ, dọmọ, fọn bo zé ovi lọ po onọ etọn po, bo họ̀nyì Egipti, na hiẹ ni sọ nọ fìne kaka yẹn na do dọhó hlan we; na Helodi na din ovi lọ nado hù i súdo. ¹⁴E sọ fọ́n, bo yí ovi lọ po onọ etọn po to ozán mẹ, bo sọ tọ́nyì Egipti: ¹⁵é sọ tin to finẹ kaka jẹ okú Helodi tọn whenu: na ehe yè ko dọ sọn Oklunọ de gbọn onù yẹwhegán tọn menido di, dọmọ, Egipti wẹ yẹn ko ylọ ovi ṣie tọ́n sọn.

¹⁶Whenẹnu wẹ Helodi, whenuena é mọ dọ é zùn omẹ kiklọ gbọn núyọnẹntọ lẹ dali, é gblehomẹ talala, bo sọ do omẹ hlan bo hù yọpọvú he tin to Betlẹhẹm lẹpo, podoto agbègbè eton lepo mẹ, son ovi owhè awe mẹ tọn jẹ odò, kẹdẹdi ojlẹ he é yí sọwhiwhé do plọ́n sọn núyọnẹntọ lẹ lọ de. ¹⁷Whenẹnu wẹ ehe yè ko dọ gbọn onùyẹwhegan Jẹlẹmia tọn mẹ di, dọ,

¹⁹Ṣigba whenuena Helodi kú, do ayi e go, angẹli Okluno tọn sọawúhia to odlọ mẹ hlan Josefu to Egipti, ²⁰dọmọ, Fọn, bo yí ovi lọ po onọ etọn po, bo yí aigba Islaeli ton ji: na yé mẹhe to ogbẹ̀ ovi lọ tọn din ko kú. ²¹E sọ fọ́n bo yi ovi lọ po onọ etọn po, bo wá aigba Islaeli tọn ji. ²²Ṣigba whenuena é sè dọ Alkẹlausi duahọlu to Judé to otẹn Helodi otọ́ etọn tọn mẹ, é dibú nado yì finẹ: le yè kọ nẹ̀ sọn Jiwheyẹwhe de to odlọ mẹ, é tọ́nyì Galili pawhé: ²³é wá, bo sọ sinai to otò he yè nọ ylọ dọ Nazalẹti mẹ: na ehe yè ko dọ gbọn onù yẹwhegán lẹ tọn mẹ nido di, dọ, Yè na ylọ ẹ Nazalẹnù.

¹TO azán nẹlẹ gbè, Johanu wá, bo to yẹwhehó dọ to zùngbo Judé tọn mẹ, ²dọmọ, Mì lẹnvọjọ: na ahọludu olọn tọn sẹpọ́. ³Na ehe wẹ mẹhe yè dọhó etọn gbọn onú yẹwhegán Isaia tọn mẹ, dọmọ,

⁴Johanu lọsu tindo na avọ̀ etọn ofún kanklosọpóawenọ tọn, bo sọ tindo gbaja ayú tọn to ada etọn mẹ; núdùdù etọn sọ wẹ owèn po owín akú po.

⁵Whenẹnu wẹ mehe tin to Jẹlusalem po Judé po, podọ oto he lẹ́do Jọdani lẹpo tọ́n wá e de; ⁶yè sọ baptizi yé to otò Jọdani mẹ gbọn e de, yé to ogbè ylando yetọn lẹ tọn yí.

⁷Ṣigba whenuena é mọ susu Falẹsi lẹ tọn po Sadusi lẹ tọn ja baptẹm lọ kọ̀n, é dọ hlan yé, dọmọ, Ovi amapoe tọn, mẹnu wẹ kọ́nú na mì nado hòn sọn homẹgble he ja mẹ? ⁸Enẹwutu mì sẹ́n sinsẹ́n he jẹ na lẹnvọjọ : ⁹mì sọ lẹn to mì hòmẹ, dọ, Mí tindo Ablaham na otọ̀ mítọn blo: na yẹn ni dọ na mì, dọ, Jiwheyẹwhe sọgan de ovi sọn zannu helẹ mẹ na Ablaham. ¹⁰Asiọvi lọ mlọnai to adò atin lẹ tọn lọ kòn dinvie: enẹwutu atin depope he ma sẹ́n sinsẹn dagbe, yè san liai, bo sọ dlan do miyọn mẹ. ¹¹Nugbo wẹ yẹn yi osìn do to bibaptizi mi na lẹnvọjọ: ṣigba mẹhe ja to godo ṣie tin huhlọn hú mi, afọpa mẹhe tọn yẹn ma jẹ na zé: ewọ wẹ na yí Gbigbọ Wiwe po miyọn po do baptizi mì: ¹²mẹhe afàfà etọn tin to alọ etọn mẹ, é nasọ za agbà zinhọ etọn tọn wẹ ṣéṣé bo nasọ bẹ́ likun etọn do zinhọ̀ mẹ; ṣigba ogetin wẹ e na yí miyọn maṣimaṣi do mẹ̀.

¹³Whenẹnu wẹ Jesu sọn Galili wá, yì Jọdani to Johanu de ye nido baplizi nẹ̀ gbọn e de. ¹⁴Ṣigba e jlo na ko glọnali nẹ̃, dọmọ, Yẹn wẹ tindo nuwhèdo yè nado baptizi sọn de we, bọ hiẹ sọ wá yẹn de? ¹⁵Jesu sọ gblọn bo dọ hlan ẹn, dọ, Jo e domọ dinvie: na mọwẹ é jẹ do na mí nido hẹn dódó lẹpo di. E sọ dike nẹ. ¹⁶Podọ Jesu, whenuena yè ko bapazi nẹ e tọn je age to afọdoponẹji sọn osin mẹ: bo pon, olọn hùn hlan ẹn, é mọ Gbigbọ Jiwheyẹwhe tọn jẹte di apoe bo jẹ do e ji: ¹⁷bo pọ́n, ogbè de sọn olọn le mẹ, didọmọ, Ehe wẹ Visunnu ṣie; Mẹvive ṣie, mẹhe mẹ hòmẹ ṣie vivi te talala.

¹WHENENU wẹ yè plan Jesu gbọn Gbigbọ mẹ yì zùngbo mẹ nado whle e pọn gbọn lẹgba de, ²Whenuena é blanù okle kande ozán kande, enegodo huvẹ́ to hùhù i. ³Whlepọ́ntọ lọ sọ wa, bo dọ hlan ẹn, dọ, Eyín hiẹ yín Ovi Jiwheyẹwhe tọn, degbena zannu helẹ ni lẹzùn akla. ⁴Ṣigba e gblọn bo dọmọ, Yè ko wlanwe etọn dọ, Gbẹtọ ma to ogbẹ̀ gbọn akla dopokẹdẹ sinmẹ gba, adavo gbọn ohó he tọ́n sọn onù Jiwheyẹwhe tọn mẹ lẹpo dali.

⁵Whenẹnu wẹ lẹgba sọ zé e yìaga yì oto wiwe nẹ mẹ, bo sọ ze e do adadanu ohọta templi tọn lọ ji, ⁶bo so dọ hlan ẹn, dọmọ, Eyín hiẹ yín Ovi Jiwheyẹwhetọn, lón jẹte na dewe: na yè wlanwé etọn dọ,

⁸Lẹgba sọ vọ́ ẹ zé yi osó he yìaga de ji, bo sọ do aholu yigba aihọn tọn lẹpo, po gigo yeton po hia ẹ; ⁹é bo sọ dọ hlan ẹn, dọmọ, Onu helẹ pó wẹ yẹn na na we, eyín hiẹ na jẹklo bo litai na mi. ¹⁰Whenẹnu wẹ Jesu dọ hlan ẹn, dọmo, Tọn sọn ofì, Satani: na yè wlanwé eton dọ, Hiẹ na litaina Oklunọ Jiwheyẹwhe towe, ewọ dopokẹdẹ wẹ hiẹ na no sẹ̀n.

¹¹Whenẹnu wẹ lẹgba jo e dai; bo, do ayi e go, angeli lẹ sọ wa bo to devizónwà hlan ẹn.

¹²Whenuena é sè dọ yè zé Johanu do ogàn mẹ, è tọnyì Galili; ¹³é tọ́n sọn Nazaleti, bo wa nọ Kapẹlnaumi ehe tu to ohùtó to Zebuluni po Naítali pò pawhé. ¹⁴Na ehe yè ko dọ gbọn onu yẹwhegán Isaia tọn mẹ nido di dọ,

¹⁷Sọn whenẹnu wẹ Jesu ko sè yẹwheho dọ, dọmọ, Mì lẹnvọjọ: na ahọludu olọn tọn sẹpọ́.

¹⁸E to zọnlinzin to ohù Galili tọn tó, bo mọ nọvisunnu awe, Simoni he yè nọ ylọ Pita, po Andlé nọvisunnu etọn po, yé to odọ̀ dlẹn do ohù mẹ: na whehutọ we yé. ¹⁹E sọ dọ hlan yé, domọ, Mi họdo mi, yẹn nasọ yí mì do basi whehùtọ gbẹtọ lẹ tọn. ²⁰Yé sọ jo odọ̀ yetọn lẹ dai to tẹndoponeme, bo to hihodo e.

²¹Le e to yìyì sọn finẹ, é mọ nọvisunnu awe devọ Jakobu, ovi Zebedé tọn, po Johanu nọvisunnu etọn po to vatlẹ mẹ po Zebẹde otọ́ yetọn po, to odọ̀ yetọn tò; é sọ ylọ yé. ²²Afọdoponẹji ye sọ jo vatlẹ lọ po otọ́ yetọn po dai, bo sọ to hihodo e.

²³Jesu sọ zinzọnlin lẹdo Galili lẹpo pé, é to omẹ plọn to sìnagogu yetọn lẹ mẹ, bo to yẹwheho wẹndagbe ahọludu tọn dọ, é to azọ̀n hunkọhunkọ po madogán hunkọhunkọ po hẹngbọ to gbẹtọ lẹ ṣẹnṣẹn.

²⁴Linlin eton sọ di lẹ́do Silia lẹpo; yé sọ hẹn azọ̀ntọ lẹpo he do azọ̀n madizọ̀n lẹ wá e de, mẹhe awú do fiẹ lẹ, mẹhe do lẹgba lẹ, podọ yé mẹhe huntadu lẹ, po mẹhe to awúkuzọnjẹ lẹ po; é sọ hẹnazọ̀ngbọna yé. ²⁵Agùndaho susu so hodo e sọn Galili, sọn Dekapolé, sọn Jẹlusalem, sọn Judé, podọ sọn Jọdani godo.

¹WHENUENA é mọ agùndaho lẹ, é hẹ́ osọ́ lọ ji aga: whenuena é sinai, nuplọ́ntọ etọn lẹ wá e de: ²é kẹ̀ onù etọn bo plón yé, domọ,

³Donanọ wẹ wamonọ lẹ to gbigbọ mẹ; na yetọn wẹ ahọludu olọn ton.

⁴Donanọ wẹ yé he to awubla lẹ; na yè na miọnhomẹ na yé.

⁵Donanọ wẹ homẹmimiọnnọ lẹ; na yé na dugu aigba tọn.

⁶Donanọ wẹ ye he hùvẹ́ hùhù bọ ovẹ́ to húhú na dódo wutu lẹ: na yè na gọho na yé.

⁷Donanọ wẹ lẹblanunọ lẹ; na yé na mọ lẹblanu yí.

⁸Donanọ we wiwénọ to ayiha mẹ lẹ; na yé na mọ Jiwheyẹwhe.

⁹Donanọ we jijọhodinto lẹ; na yè na ylọ ye visunnu Jiwheyẹwhe tọn.

¹⁰Donanọ wẹ yé he yè to hòmẹkẹndo na dodó tọn wutu lẹ; na yetọn wẹ ahọludu olọn tọn.

¹¹Donanọ wẹ mìwlẹ, whenuena gbẹtọ lẹ na to vivlẹ mì kò, bo to homekẹndo mì, bo sọ to oylan hunkọhunkọ dọ do mì go to lalo mẹ, na ṣie wutu. ¹²Mì ni jaya, na mì ni sọ to ayajẹ susu; na ale miton wẹ daho to olọn mẹ: na mọkẹdẹ wẹ yé dohomẹkẹn yẹwhegán he ko tin jẹnukọn na mì lẹ.

¹³Mì wẹ, ojẹ̀ aigba tọn: ṣigba eyín ojẹ̀ ko bú otọn etọn, etẹ́ yè na do sọ diọ ẹ zùn ojẹ̀? sọn whenẹnú é ma sọ yín dagbe na núde, adavo nado yín zédlangbe po zindai po to afọ gbẹto lẹ tọn glọ.

¹⁴Mì wẹ hinhọ́n aihọn tọn. Otò he yè doai do osó ji, ma sọgan yín whiwhla gba. ¹⁵Mọwẹ gbẹto lẹ ma nọ tá miyọngbán, bo nọ yí i do ojlẹ́nú glọ gba, adavo do miyọngbántin ji; bọ é nasọ họ́nhinhọn hlan mẹhe to owhé gbè lẹpo. ¹⁶Mọkẹdẹ wẹ mì ni gbọ hinhọ́n mìtọn ni họ́nwun to gbẹtọ lẹ nukọn do, na ye nido mọ azọ́n dagbe mìtọn lẹ bo pagigona Otọ́ mìtọn he tin to olọn mẹ.

¹⁷Mì len dọ yẹn wá nado hẹn osén kavi yẹwhegán lẹ gble blo: yẹn ma wá nado hengble gba, adavo nado hen di ¹⁸Na nugbo wẹ yen do hlan mì, dọ, Kaka olọn po aigba po nado juwáyi, yọwhi dopo kavi jaja dopo ma na juwáyì son osen me, kaka onu lẹpo nado wa jọ. ¹⁹Enẹwutu medepope he na hen pẹvi ṣiunṣiun dopo gble to osẹn helẹ mẹ, bo nasọ plon gbelọ lẹ domọ, ewọ lọ wẹ yè na ylọ ome siunsiun to ahọludu olọn tọn me: ṣigba mẹdepope he na basi yé bo sọ plọn gbẹtọ lẹ domọ, wẹ yè na ylọ mẹkiklo to ahọludu olọn tọn mẹ ²⁰Na yẹn dọ hlan mi, dọmọ, Adavo dódó mìtọn hugan dódó wekantọ lẹ po Falẹsi lẹ po tọn, mì ma na biọ ahọludu olọn tọn mẹ gbọn alọ depope mẹ gba.

²¹Mì ko sè dọ yè dọ hlan omẹ hóhó whenu tọn lẹ, dọ, Hiẹ ma na hùme; medepope he hùmẹ, é na tin to owù whẹ̀dida ton mẹ; ²²ṣigba yẹn dọ hlan mì, dọ, Mẹdepope he gblehomẹ do mẹmẹsunnu eton go, na tin to owù whẹ̀dida ton mẹ; mẹdepope he dọ hlan mẹmẹsunnu etọn, dọ, Laka , é na tin to owù tohodọtọ lẹ tọn mẹ; ṣigba medepope he na dọ, Hiẹ nulunọ, é na tin to owù lọnzo miyọn tọn mẹ. ²³Enẹwutu e; yín hiẹ hẹn nunina towe yì agbà kọn, bo sọ flin to finẹ dọ mẹmẹsunnu towe tindo nude do ogo we: ²⁴jo núnina towe dai to finẹ to agbà nukọn, bo yì, gbọwhẹ hẹ mẹmẹsunnu towe whẹ́; whenẹnu we a ni wa bo na núnina towe. ²⁵Yawu gbọwhẹ hẹ kẹ̀ntọ towe, whenuena hiẹ tin to alihopó e po; kẹ̀ntọ towe nikã yí we do alọ mẹ na whẹdatọ, whẹdatọ na ahọludemẹ, yènasọ ze we dlan ogàn mẹ. ²⁶Nugbo wẹ yẹn dọ hlan we, dọ, Hie ma to na tọ́n sọn finẹ gbon alọ depope mẹ, kaka hiẹ nado sú akuẹ dopo akàn he po.

²⁷Mì ko sè dọ yè dọmọ, Hiẹ ma na deayọ̀: ²⁸sigba yẹn dọ hlan mì, dọ, Eyín mẹdepope pọ́n yọnnusi de nado wà núgbigble hẹ ẹ, é ko deayọ̀ hẹ ẹ to ayiha etọn mẹ dote. ²⁹Eyin nukun towe adusi tọn hen we dahli, sún in sẹ̀, bo sọ dè e sọn ogo we: na é do ale na we na dopo awutugonu towe tọn ni dọ̀n, hú na ye ni zé agbasa towe lepo pete dlan olọnzo mẹ. ³⁰Eyín alọ towe adusi tọn sọ hẹn we dahli, sán ẹn sè, bo de e sọn de we; na é do ale na we na dopo awutugonu towe tọn ni dọ̀n, hú na yè ni zé agbasa towe lẹpo pete dlan olọnzo mẹ.

³¹Yè ko dọ ga, Medepope he gbẹ́ asi etọn dai, gbọ é ni yí owe gbẹdai tọn nẹ. ³²Ṣigba yen dọ hlan mì, Mẹdepope he gbẹ́ asi etọn dai, adavo na ogà wutu, é hẹn ẹn deayọ̀: mẹdepope he sọ wlealọ hẹ mẹhe yè gbẹ́dai, é deayọ̀.

³³Podọ mì ko sọ se dọ yè dọ hlan omẹ hóho whenu tọn lẹ, dọ, Hiẹ ma na whlé to lalo mẹ, adavo hiẹ na hẹn whiwhlé towe lẹ di hlan Oklunọ: ³⁴ṣigba yẹn dọ hlan mì, Mì yí núde do whlé gbọn alọ depope mẹ blo; kavi yíyí olọn do whlé, na ofìn Jiwheyẹwhe tọn wẹ: ³⁵kavi yíyí aigba do whle, na tokloafọligbe, etọn tọn wẹ: kavi yíyí Jẹlusalem do whlé, na otò Ahọlu daho tọn wẹ: ³⁶Mọwẹ hiẹ ma na yí ota towe do whle, na hiẹ ma sọgan hẹn odà dopo zùn wéwé kavi oyù. ³⁷Ṣigba mì gbọ hógbè mìtọn ni yín, Mọwẹ, mọwẹ; Lala, lala: na onú depope he sọ hu ehelẹ, mẹylankan lọ mẹ wẹ é sọn wá.

³⁸Mì ko sè le yè dọ, dọmọ, Nukun na nukun, adú na adú: ³⁹ṣigba yẹn dọ hlan mì, dọ, Mì gbẹ́ oylan lọ blo: ṣigba mẹdepope he hò alaka adusi tọn na we, le amiyọn tọn hlan ẹn ga. ⁴⁰Eyín mẹde jlo nado ylọwhẹ̀ we, bo nado yí awù towe, gbọ e ni yí avọ towe ga. ⁴¹Eyín mẹdepope yí huhlọn do hẹn we yì liu dopo, yì hẹ ẹ jẹ awe. ⁴²Na mẹhe biọnú we, a diọkọ sọn mẹhe jlo na yàn to a si we de blo.

⁴³Mì ko sè dọ yè dọ, dọmọ, Hiẹ ni yíwánna hẹnnumẹ towe, bo gbẹwánna kẹ̀ntọ towe. ⁴⁴Ṣigba yẹn dọ hlan mì, Mì yíwánna kẹ̀ntọ mìton lẹ, bo sọ hodè na mẹhe to vivlẹ mì kò, bo sọ to homẹkẹn do mí lẹ ⁴⁵na mì nido yín ovi Otọ̀ mìtọn he tin to olọn mẹ tọn: na é hen owhè etọn vẹ́ do omẹ ylankan lẹ ji, podọ do omẹ dagbe lẹ ji, bo sọ jikunja do dódonọ lẹ ji, podọ do mawàdódóno lẹ ji. ⁴⁶Na eyín mì yíwánna mẹhe yíwánna mì lẹ, ale tẹ́wẹ mì tindo? tokueṣinyantọ lẹ ma nọ wà mọ ga? ⁴⁷Eyín mì sọ dọnúdo mẹmẹsunnu mìtọn le kẹdẹ, etẹ́wẹ mì wà hú mẹdevo lẹ? kosi lẹ ma nọ wà mọ ga? ⁴⁸Enẹwutu mìwlẹ ni yín mẹpipé, dile Otọ́ mìtọn he tin to olọn mẹ yín mẹpipó do.

¹MÌ payi dọ mì wá dódó mìtọn to gbẹtọ nukọn, nado yín mimo gbọn yé de blo; eyínmọ mìwlẹ ma tindo ale de to Otọ̀ mìtọn he tin to olọn mẹ de gba. ²Enẹwutu whenuena hiẹ wà lẹblanu núnina towe, a kún opèn de to nukon towe blo, dile yẹnuwatọ lẹ nọ wà do to sinagogu mẹ, podọ to alihogbó ji na ye nido do gigo sọn gbẹtọ lẹ de. Nugbo wẹ yen dọ hlan mì, dọ, Yé ko mọyí to gigọ́ me ale yetọn. ³Ṣigba whenuena hiẹ wà lẹblanu núnina, a dike amiyọnlọ towe yon onú he adusilọ towe to wiwà blo: ⁴na lẹblanu nunina towe ni tin nuglọ: Otọ́ towe he mọnú to nuglọ, na suahọ etọn we.

⁵Whenuena hiẹ to dèho, a di yẹnuwàtọ lẹ blo: na yé yíwánna nado site do hodẹ to sinagogu me, podọ to alihoklanji, nado yín mimọ na gbẹtọ lẹ wutu. Nugbo wẹ yẹn dọ hlan mì, Ye ko mọyí to gigọ́ mẹ ale yetọn. ⁶Ṣigba hiẹ, whenuena hie to dẹho, biọ abo towe mẹ, whenuena hiẹ sú ohọ̀n towe, hodẹ̀ hlan Otọ́ towe he mọnu nuglọ, Oto towe he mọnú nuglọ, na suahọ etọn we.

⁷Ṣigba whenuena mì to dẹ̀ho, mì zán dọvọdọ vòtọ di Kosi lẹ blo; na yé lẹn dọ yè na sè yetọn na ohó susu didọ yetọn. ⁸Enewutu mì di yé blo: na Otọ̀ mìton yọn onú he mì tindo núwhèdo na, whẹpo mì do biọ ẹ.

⁹Enẹwutu le wẹ mì ni nọ hodè do: Otọ mìtọn he tin to olọn mẹ, hihiọ we oyín towe. ¹⁰Ahọludu towe ni wá. Ojlo towe ni yín wiwà to aigba ji, dile e te to olọn mẹ. ¹¹Na mi nudùdù egbesọ mìtọn. ¹²Bo jo ahọ mìtọn lẹ na mi, dile mí ko jona ahotọnọ mìtọn lẹ do. ¹³Ádike mí jẹ whlepọ́n mẹ blo, ṣigba whlẹn mí sọn ọylan mẹ Na towe wẹ ahọludu lo huhlọn po gigo po kakadoi, Niṣẹ. si.

¹⁴Na eyín mì jona gbẹtọ le ylando yetọn lẹ, Otọ mìtọn olọn tọn nasọ jona mì ga: ¹⁵ṣigba eyín mì ma jona gbẹtọ lẹ, Oté mìtọn ma na jona ylando mìtọn.

¹⁶Poàọ whenuena mì blanù mì di yẹnuwàtọ lẹ to nukun yínylọn mẹ blo: na yé hẹn nukun yetọn gble, na yé nido sọawúhia gbẹtọ lẹ dọ yé to nùbla. Nugbo wẹ yẹn dọ hlan mì, Yè ko mọyí to gigọ́ mẹ ale yetọn. ¹⁷Ṣigba hiẹ, whenuena hiẹ blanù, yí amisisá sá do ota towe, bo klọ nukunmẹ towe; ¹⁸na hiẹ sọawúhia gbẹtọ lẹ dọ hiẹ to nùbla blo, adavo na Otọ́ towe he tin nuglọ: Otọ́ towe he sọ mọnú nuglọ na suahọ etọn we.

¹⁹Mì bé adokunnúplina mìde to aigba ji blo, fie owán po okó po nọ hẹn en gble te, podọ fie ajotọ lẹ nọ gboado bo fìnnú te: ²⁰ṣigba mì bé adékunnú pli na mìde to olọn mẹ, fie na owán kavi okọ́ ma nọ hen ẹn gble te, podọ fie ajotọ lẹ ma nọ gboadó bo sọ finnú te: ²¹na fié adọkunnú towe tin te, finẹ wẹ ayiha towe na tin te ga. ²²Nukun wẹ miyọngbán agbasa tọn; enẹwutu eyín nukun towe yín dopo , agbasa towe lepo pete na gọ́ na hinhọ́n. ²³Eyín nukun towe ylan , agbasa towe lepo pete na gọ na zinvlu. Enewutu eyín hinhọ́n he tin to hiẹ mẹ yín zinvlu, bé nawẹ zinvlu lọ yín daho sọ ²⁴Mẹde ma sọgan sọ̀n Oklunọ awe gba: adavo é gbẹwánna ode, bo yíwánna awetọ: kavi yín é ma yín mọ, é na joawu na ode, bo gbẹkọ awetọ go. Mìwlẹ ma sọgan sẹn Jiwheyẹwhe po Mamoni po gba.

²⁵Enẹwutu yẹn dọ hlan mì, dọ, Mì yín vivẹnunọ na ogbẹ̀ mìton blo, dọ, etọ́ mì na dù podo etẹ́ mì da nù, kavi na agbasa mìtọn dọ etẹ́ mì na ṣinyọn. Bé ogbẹ̀ ma hú núdùdù, agbasa ma sọ hú avọ̀? ²⁶Mì: pọn ohẹ̀ he to aga lẹ; yé ma doji, mọ yé ma gbẹ̀n, mọ yé ma nọ bẹ́plì do zinhọ̀ lẹ mẹ; ṣigba Otọ́ mìtọn olọn tọn to núdù na yé. Bé mìwlẹ ma pọ́nte hú yé? ²⁷Mẹnu wẹ sọgan yí vivẹnu do yí awàgba dopo dogó whinwhén etọn to mì mẹ? ²⁸Etẹwutu wẹ mì yín vivẹnunọ gbọn avọ̀ tọn sinmẹ? Pọ́n lí danji tọn lẹ, le yé to whinwhén; yé ma wàzón, mọ yé ma nọ sésekan. ²⁹Ṣigba yẹn dọ hlan mì, dọ yè ma doasọ yèdọ na Sọlọmoni to gigo etọn lẹpo mẹ di dopo to ehelẹ mẹ. ³⁰Ṣigba, eyín Jiwheyẹwhe doaṣọna ogbé danji tọn, he tin to egbe, bọ yè sọ ze dlan zokán mẹ to osọ, bé nẹmunẹmu wẹ é ma na ṣinyọ̀navọ̀na mì, mì yisepẹvinọ le do? ³¹Enẹwutu mì yín vivẹnunọ blo, dọ, Eté mí na dù kavi, Etẹ́ mí na nù? kavi, eté na do yín mẹṣinyọnavọna? ³²Na onú helẹ pó wẹ Kosi lẹ to dindin pé: Otọ́ mìtọn olọn tọn sọ yonẹn dọ mì ma sọgan nọ ma tindo onú helẹ pó gba. ³³Ṣigba mì din ahọludu Jiwheyẹwhe tọn, po dodó etọn po whẹ́; onú helẹ pó wẹ yè na dogọ́ hlan mì. ³⁴Enẹwutu mì yín vivẹnunọ na osọ̀ blo: na osọ̀ na yín vivẹnunọ na ede. Nupekọ hlan azán wẹ oylan etọn.

¹MI dawhẹ̀ blo na mì ma yín mẹdawhẹ̀na na blo. ²Na whẹ̀dida he mì yí do dawhẹ̀, wẹ yè na do dawhẹ̀na mì; podọ nújlẹ́nu he mì yí do jlẹ́, wẹ yè na do jlẹ́ hlan mì. ³Etẹwutu wẹ hiẹ to núyọ he tin to nukún mẹmẹsunnu towe tọn mẹ pọ́n, ṣigba hiẹ ma lẹn atinpo he tin to nukun hiẹlọsu tọ́n mẹ tọn pọ́n? ⁴Kavi nawẹ hiẹ na dọ hlan mẹmẹsunnu towe do, dọ, Gbọ yẹn ni dè núyọ sẹ̀ sọn nukun towe mẹ, bo do ayi e go, atinpo tin to nukun hiẹlọsu tọn mẹ? ⁵Hiẹ yẹnuwàtọ, dè atinpo sẹ̀ sọn nukun hiẹlọsu tọn mẹ whẹ́; whenẹnu wẹ hiẹ na mọnu gblegede nado dè núyọ sẹ̀ sọn nukun mẹmẹsunnu towe tọn mẹ.

⁶Mì yí onú he yín wiwé nẹ hlan avún lẹ blo, mì sọ yí nududu he họakuẹ mìtọn lẹ dlan nukọn na ohàn lẹ blo, ye nikà zín yé dai to afọ yetọn glọ, bo nasọ lẹ́ bo tlẹn mì.

⁷Mì biọ, yè na na mì; mì din, mì na mọ, mì húhúhọ̀n, yè nasọ hùn in hlan mì. ⁸Na mẹdepope he biọ, é mọ yí; mẹhe sọ din, é mọ; podọ hlan mẹhe húhúhọ̀n, yè na hùn hlan ẹn. ⁹Kavi gbẹtọ tẹ́ wẹ tin sọn mì mẹ, mẹhe eyín visunnu etọn na biọ akla dopo e, bé ewọ na yí zannu de nẹ? ¹⁰Kavi eyín é na biọ whèvi de, bé ewọ na yí odàn de nẹ? ¹¹Bé eyín mìwlẹ yínyín mẹylankan yọ́n le yè nọ na núnina dagbe ovi mìtọn lẹ do, nẹmunẹmu wẹ Otọ́ mìtọn he tin to olọn mẹ ma na yí onú dagbe na yé mehe biọ ẹ lẹ?

¹²Enẹwutu onú depope mìwlẹ jlo gbẹtọ ni wà hlan mì, mọkẹdẹ wẹ mì ni wà hlan yé: na ehe wẹ osẹ́n po yẹwhegán lẹ po.

¹³Mì gbọn họntonu bibó mẹ biọ whégbè, na gbigblo wẹ họntonu lọ, gblagada sọ wẹ ali lọ, he hẹn omẹ yì dindọn mẹ, susu sọ wẹ yé he to zọnlinzin gbọn finẹ lẹ. ¹⁴Na bibó wẹ họ̀ntonu lọ, jijlọ́ sọ wẹ ali lọ, he hẹn omẹ yì ogbẹ́ mẹ, pẹvide wẹ yé he din in mọ lẹ.

¹⁵Mì payi yẹwhegán lalonọ le go, he to mí de wá lẹ to avọ lẹngbọ lẹ tọn mẹ, ṣigba ohla nuwletọ lẹ wẹ yé to hòmẹ. ¹⁶Mì na yọ́n ye gbon sinsẹn yetọn mẹ. Be gbẹtọ nọ gbẹ̀n vẹn sinsẹn to vewùn ji, kavi ovò sinsẹ́n to tẹwùn mẹ? ¹⁷Mokedẹ wẹ atin dagbe lẹpo nọ hẹn sinsẹn dagbe jẹgbonu; ṣigba atin yinyọn lọ hen Sinsẹn ylanylan jẹgbonu. ¹⁸Atin dagbe ma sọgan hẹn sinsẹ́n ylanylan jẹgbonu gba, mọ àtin ylanylan ma sọ sọgan hẹn sinsẹ́n dagbe jẹgbonu. ¹⁹Atin he ma hẹn sinsẹ́n dagbe jẹgbonu lẹpo, yè na sán ẹn liai, bo sọ dọ̀n ẹn dlan miyon mẹ. ²⁰Enẹwutu gbọn sinsẹ́n yetọn mẹ wẹ mì na yón yé te.

²¹E ma yin medepope he ylọ mi, Okluno, Oklunọ, we na biọ ahọludu olọ̀n tọn mẹ gba; adavo ewọ he wà ojlo Otọ ṣie he tin to olọn me tọn. ²²Ọmẹ susu wẹ na dọ hlan mi to azán nẹ gbè, dọ, Okluno, Oklunọ, bé mìwlẹ ma ko dọdai gbọn oyín towe mẹ? podọ gbọn oyìn towe mẹ mí ko yàn legba le jegbonu? podo oyìn towe mẹ mí wà azọ́n huhlonnọ susu te? ²³Whenẹnu wẹ yen na yigbè hlan yé dọ, Yen ma yọn mì gbède, mì ton sọn dẽ, mì azọ́n ylankan wàtọ.

²⁴Enẹwutu mẹdepope he sè ohó ṣie helẹ, bo sọ basi yé, yè na jlẹ́ ẹ do gbẹtọ núyọ́nẹnto de go, he gbá ohọ etọn do osé ji. ²⁵Whenuena jikunja, bọ asisa lẹ fọ́n, bọ jẹhọn le yìn, bo ho jẹ ohọ̀ lọ ji: é ma jai: na yè do é do osé ji wutu. ²⁶Mẹdepope he sọ sè oho ṣie helẹ, bo ma sọ basi yé, yè na jlẹ́ ẹ do gbẹtọ nuluno de go, he gbá ohọ̀ etọn do tọ̀kẹ́n ji. ²⁷Whenuena jikunja, bọ asisa lẹ gọ, bọ jehọn lẹ yìn, bo họ̀ jẹ ohọ́ lọ ji, é họ́: hihọ́ etọn sọ sù talala.

²⁸E sọ wà jọ, whenuena Jesu dotana ohó helẹ, avọ̀ vò gbẹto lẹ do núplọ́nmẹ etọn go: ²⁹na é to ye plon di mẹhe tindo aṣẹ, é ma di wekantọ lẹ gba.

¹WHENUENA é jẹte sọn osó lọ ji, agùndaho susu to hihodo e.

²Do ayi e go, pòtọnọ de wá e de, bo litai nẹ̃, bo dọmọ, Oklunọ, eyín hiẹ jlo, hiẹ sọgan hẹn mi zùn wiwé.

³E sọ dlẹn alọ etọn, bo do e go, bo domọ, Yen jlo, hie ni zan wiwé. Afọdoponẹji opo etọn sọ wé.

⁴Jesu sọ dọ hían ẹn, domo, Payi a do na mede blo; ṣigba yì bo do dewe hia yewhenọ, bo sọ na núnina he Moṣe degbèna to osén me na kunnu hlan yé.

⁵Whenuena é sọ biọ Kapẹlnaumi mẹ, mẹkanwekowhangán de wá é to vẹvẹ nẹ̃, ⁶bo dọmọ, Oklunọ, devi ṣie mlọnai to whegbè, bo to awúkuzọ̀njẹ, to awufiẹsa mẹ talala. ⁷E sọ dọ hlan ẹn, dọ, Yẹn na wá hẹnazọngbọ nẹ̃.

⁸Mẹkanwekowhangan lọ sọ gblọn, bo dọmọ, Oklunọ, yẹn ma je mẹhe hiẹ na wá ohọ̀ta ṣie glọ gba: ṣigba dọ ohó lọ kẹdẹ, yè nasọ hen azọ̀n devi ṣie tọn gbọ. ⁹Na mẹhe tin to aṣẹ glọ wẹ yẹn ga, yẹn sọ tindo awhànvipẹ lẹ to oglọ ṣie, yẹn dọ hlan ode, dọ, Yì, é nọ yì; podọ hlan awetọ, dọ, Wá, é nọ wá; podọ hlan devi ṣie dọ, Wa ehe, é nọ wà ẹ.

¹⁰Whenuena Jesu sè e, awú ji i, é sọ dọ hlan yé he to hihodo e lẹ, dọmọ, Nugbo wẹ yẹn dọ hlan mì, Yẹn ma mọ yise nẹhunkọ de to mẹde mẹ to Islaeli mẹ gba . ¹¹Yẹn sọ dọ hlan mì, Omẹ susu wẹ na wá sọn whèzizẹ dali po whèyìhọ po dali, bo na jagla hẹ Ablaham, Isaki, po Jakobu po, to ahọludu olọn ton mẹ. ¹²Ṣigba ovisunnu ahọludu tọn lẹ wẹ yè nasọ yàn tonjẹgbonu do zinvlu he to gbonu mẹ: finẹ wẹ avi lọ po adukúnkún lọ po na te ¹³Jesu sọ dọ hlan mẹkanwekowhangán lọ, dọ, Yì; ni yín wiwà hlan we kedẹdile hie yise do. Yè sọ hẹnazọ̀n devi lọ tọn gbọ to ojlẹ nẹ mẹ.

¹⁴Whenuena Jesu biọ owhé Pita tọn gbè, è mọ onọ asi eton tọn to aimimlọn, é to ovazọ̀njẹ. ¹⁵E doalọ alọ eton go, ova sọ jo e do; é sọ fọ́n bo to devízọnwà hlan ẹn.

¹⁶Whenuena é zùn whèjai, yé hẹn susu mẹhe do lẹgba lẹ tọn wá e de: é sọ yí ohó do yàn gbigbọ lẹ jẹgbonu, bo sọ hẹn azòngbọna azọ̀ntọ lẹpo: ¹⁷na ehe yè dọ gbọn onù Isaia yẹwhegán tọn mẹ nido di, dọ, Ewlọsu ko zé madogán mìtọn lẹ, bo sọ hẹn azọ́n mìtọn lẹ.

¹⁸Whenuena Jesu mọ agùndaho pli lẹ́do e, é dọ hlan yé ni tọ́nyi awà awetọ ji.

¹⁹Wekantọ de sọ wá, bo dọ hlan ẹn, dọmọ, Mẹplóntọ, yẹn na hodo we yì fidepope hiẹ jei. ²⁰Jesu sọ dọ hlan ẹn, dọmọ, Wọtupọẹ lẹ tindo odò, ohẹ́ olọn tọn lẹ sọ tindo adó: ṣigba Ovi gbẹtọ tọn ma tindo ofi é na yí ota etọn dai te.

²¹Devi awetọ sọ dọ hlan ẹn, dọ, Oklunọ, gbọ yẹn ni yì bo di oṣiọ otọ́ ṣie tọn whẹ́. ²²Ṣigba Jesu dọ hlan ẹn, dọ, Hodo mi, gbọ oṣiọ lẹ ni di oṣiọ yetọn titi lẹ.

²³Whenuena é sọ biọ vàtlẹ lọ mẹ, nuplóntọ etọn lẹ hodo e. ²⁴Do ayi e go, jẹhọn daho de fọ́n to ohù mẹ, sọmọ bọ agbowhẹn lẹ ṣinyọn vàtlẹ lọ ji: ṣigba ewọ to amlọndọ. ²⁵Yé wá e de, bo fọ́n ẹn, bo dọmọ, Oklunọ, whlẹn mí, mí dòn. ²⁶E sọ dọ hlan yé, dọmọ, Etwutu wẹ mì dibú, mì yisepẹvinọ? Whenẹnu wẹ é fọ́n bo kọ́hona jẹhọn po ohù po; jijọho susu tin. ²⁷Ṣigba avọ̀ vò gbẹtọ lẹ, yé sọ dọmọ, Gbẹtọ tẹ́ hunkọ die, he yèdọ jẹhọn po ohù po yí etọn sè!

²⁸Whenuena é sọ jẹ awà awetọ ji to otò Gadaleni lẹ tọn mẹ, dawe awe he do lẹgba lẹ tọ́n sọn yọ̀do mẹ wá pé e, yé dukan talala, sọmọ bọ mẹdepope ma sọgan ju gbọn aliho nẹ ji. ²⁹Bo pọ́n, yé dawhá dọmọ, Etwẹ wà mí po hiẹ po, Jesu, hiẹ Ovi Jiwheyẹwhe tọn? bẹ́ hiẹ wá to ofi whẹpo ojlẹ́ lọ na wá nado doyana mí wẹ?

³⁰Apó ohàn susu he to núdù pe tọn tin aganu do yé. ³¹Aovi lẹ sọ vé ẹ dọmọ, Eyín hiẹ yàn mí jẹgbonu, do mí hlan yì apó ohàn lẹ tọn lọ mẹ. ³²E sọ dọ hlan yé, dọmọ, Mì yì Yé tọ́njẹgbonu, bo biọ apó lọ mẹ: bo pọ́n, apó lẹpo hòzin bo họ̀nwezun gbọn agbàdo tó yì ohù mẹ, yé sọ dọ̀n to osìn mẹ.

³³Yé he to yé yìn lẹ họ̀n, bo sọ yì otò mẹ, bo dọ onú lẹpo, po onú he yè wà hlan yé he do lẹgba lẹ po. ³⁴Bo pọ́n, gbẹtọ he to otò lọ mẹ lẹpo tọ́n wá pọ́n Jesu: whenuena yé sọ mọ ẹn, yé vẹvẹ nẹ, na ni tọ́n sọn agbègbè yetọn dali.

¹E sọ biọ vàtlẹ de mẹ, é juwayì, bo sọ wá otò ewlọsu tọn mẹ.

²Bo pọ́n, yé zé dawe de awúkuzònjẹtọ wá e de, é mlọnai to adózan ji; le Jesu mọ yise yetọn, é dọ hlan awukuzọnjẹtọ lọ, dọmọ, Ovi, dotu, yè jo ylando towe lẹ na we.

³Do ayi e go, mẹdelẹ to wekantọ lẹ mẹ to didọ to yéde hòmẹ, dọmọ, Dawe he to nùzán.

⁴Jesu sọ yón linlẹn yetọn, é dọmọ, Etẹwutu wẹ mìwlẹ to oylan lẹn to ayiha mìtọn mẹ? ⁵Bé etéwẹ bọawú na dọ, Yè jo ylando towe lẹ na we: kavi na dọ, Fọn, bo zinzọnlin? ⁶Ṣigba na mì nido yón ẹn dọ Ovi gbẹtọ tọn do asẹ to aigba go nado jo ylando lẹ na omẹ—whenẹnu wẹ é dọ hlan awúkuzònjẹtọ lọ, dọ, Fọn, zé adózan towe, bo yì owhé towe gbè.

⁷E sọ fọ́n, bo tọ́nyì owhe etọn gbè. ⁸Ṣigba whenuena agùndaho lẹ mọ ẹn, obú di yé, yé sọ pagigona Jiwheyẹwhe, he na aṣẹ he hunkọ hlan gbẹtọ lẹ.

⁹Le Jesu sọ ju sọn finẹ wá jei, é mọ dawe de, he yè nọ ylọ Matiu, é jagla to odenu: é sọ dọ hlan ẹn, dọ, Hodo mi. E sọ fọ́n, bo hihodo e.

¹⁰E sọ wá jọ, le Jesu jagla to núdù kọ̀n to owhé gbè, pọ́n, tòkuẹsinyantọ susu po ylandonọ lẹ po wá, bo jagla hẹ Jesu, po nuplọntọ etọn lẹ po. ¹¹Whenuena Falesi lẹ mọ ẹn, yé dọ hlan nuplọntọ etọn lẹ, dọmọ, Etẹwutu wẹ Mẹplọntọ mìtọn to núdù hẹ tòkuẹsinyantọ po ylandonọ lẹ po?

¹²Ṣigba whenuena é sè enẹ, é dọ, dọmọ, Yé he to gángán ma tindo núwhèdo na bokọtọnọ gba, adavo yé he to azọnjẹ lẹ. ¹³Ṣigba mì yì, bo plón onú he ehe yín, Yẹn nọ jlo lẹblanu, é ma yín avọ́: na yẹn ma wá nado ylọ dódónọ lẹ gba, adavo ylandonọ lẹ.

¹⁴Whenẹnu wẹ nuplọntọ Johanu tọn lẹ wá e de, dọmọ, Etẹwutu wẹ míwlẹ po Falẹsi lẹ lọ po to nùbla, ṣigba nuplọntọ towe lẹ ma nọ blanù gba? ¹⁵Jesu sọ dọ hlan yé, dọmọ. Be yè sọgan hẹn ovi he tin to abò asiyọ́yọ́ tọn mẹ lẹ blawú, whenuena asisunọ tin to yé de? Ṣigba azàn ja, whenuena yè na yí asisunọ sọn yé de, whenẹnu wẹ yé na blanù. ¹⁶Mẹde ma nọ yí sinsán avówhẹ de tọn do awú hóhó go gba, na didé he to e go tlẹn ede sé sọn awù lọ mẹ, tintlẹn ylanhú de sọ yín bibasi. ¹⁷Mọ gbẹtọ lẹ ma nọ yí vẹn yọyó do ayúgò hóhó lẹ mẹ gba: ayú lẹ nikà là, yè sọ hẹn ovẹ̃n lọ sakọ́nyìngbe, ayúgo lẹ lọ sọ dọ̀n: ṣigba ovẹ̃n yọ́yọ́ wẹ yè nọ yí do ayùgò yọ́yọ́ mẹ, yè bo sọ hla yé awelẹ dai.

¹⁸Le é to onú helẹ dọ hlan yé, pọ́n, ogán de wá, bo litai nẹ̃, dọmọ, Viyọnnu ṣie kú dinvie: ṣigba wá yí alọ towe do e ji, é nasọ tin to ogbẹ́. ¹⁹Jesu sọ fọ́n, bo hodo e, po nuplọntọ etọn lẹ po.

²⁰Bo pọ́n, nawe de he to zẹntin ohùn tọn jẹ to owhè wiawe gbọn godo etọn wá, bo doalọ okẹ̀yẹ̀ awù etọn tọn go. ²¹Na é dọ to ede mẹ, dọmọ, Eyín yẹn gbé sọgan doalọ awù etọn go, yẹn na jẹ gángán. ²²Ṣigba Jesu lé ede pé, whenuena é mọ ẹn, e dọmọ, Viyọnnu, dotu, yise towe ko hẹn we jẹ gángán. Nawe lọ sọ jẹ gángan sọn ojlẹ nẹ mẹ.

²³Whenuena Jesu biọ owhé ogán lọ tọn gbè, bo mọ vánkuntọ lẹ, po gbẹtọ lẹ po to awhádo ²⁴é dọ, Mì natẹn, na viyọnnu lọ ma kú gba, amlọn é dọ. Yé sọ to vivlẹ ẹ ko. ²⁵Ṣigba whenuena yè hẹn gbẹtọ lẹ jẹgbonu, e biọ họ̀mẹ, é hẹn alọ nẹ, viyọnnu lọ sọ tite. ²⁶Linlin he sọ di lẹdo otò nẹlẹ pó mẹ pé.

²⁷Dawe nukuntọnnọ awe to hihodo Jesu whenuena é tọn sọn finẹ, bo to awhádo, dọmọ, Hiẹ visunnu Davidi tọn, wàlẹblanuna mí.

²⁸Whenuena é biọ owhé gbè, nukuntọnnọ lẹ wá e de: Jesu sọ dọ hlan yé, dọmọ, Be mìwlẹ yise dọ yẹn sọgan wà ehe? Yé dọ hlan ẹn, dọ, Mọwẹ Oklunọ, a sọgan basi. ²⁹Whenẹnu wẹe doalọ nukun yetọn go, bo dọmọ, Ni yín wiwà hlan mì kẹdẹ di yise mìtọn. ³⁰Nukun yetọn sọ hùn; Jesu sọ kọna yé talala dọmọ, Do ayi e go, pọ́n dọ mẹdepope yón ẹn blo. ³¹Ṣigba whenuena yé tọ́n yì, yé hẹn linlin etọn di pó lẹ́do otò lẹpo mẹ.

³²Le yé tọ́n jei, pọ́n, yè hẹn dawe unbọpẹn de wá e de, he do lẹgba. ³³Whenuena yè yàn lẹgba lọ jẹgbonu, unbọpẹn lọ dọhó: avọ̀ sọ vò agùndaho lọ lẹ, yé dọmọ, Yè ma ko mọ ehe hunkọ to Islaeli mẹ gbède. ³⁴Ṣigba Falẹsi lẹ dọmọ, Huhlọn ogán lẹgba lẹ tọn tọn wẹ é do to lẹgba lẹ yan jegbonu.

³⁵Jesu sọ zinzọnlin yì otò daho po gbeta lẹ pomẹ pé, é to meplọ́n to sinagọgu yetọn lẹ me, bo sọ to yẹwheho wẹndagbe ahọludu tọn dọ, é to awutuzòn lẹpo po okuzọ̀n lẹpo po hẹngbọ to gbẹtọ lẹ ṣẹnṣẹn.

³⁶Ṣigba whenuena é mọ agùndaho lẹ, é wàlẹblanu na yé, na yè hẹn agbọ́pé yé, bo sọ hẹn apọ̀si yé di lẹngbọ he ma tindo lẹngbọhọtọ de. ³⁷Whenẹnu wẹ é dọ hlan nuplọntọ etọn lẹ, dọmọ, Ojijẹ sù nugbo, ṣigba azọ́nwàtọ lẹ ma sù: ³⁸Enẹwutu mì hodẹ́ hlan Oklunọ ojijẹ tọn, na é ni do azọ́nwàtọ lẹ hlan ojijẹ etọn mẹ.

¹E ylọ nuplọntọ etọn wiawe lẹ, bo na aṣẹ yé to gbigbọ mawe lẹ ji, nado yàn yé jẹbonu, podọ nado hẹn okúzọ̀n lẹpo po awutuzòn lẹpo po gbọ.

²Oyín apọsteli wiawe lẹ tọn wẹ ehelẹ; Tintan, Simọni, he yè nọ ylọ dọ Pita, po Andlé nọvisunnu etọn po: Jakobu ovi Zẹbedé tọn, po Johanu nọvisunnu etọn po; ³Filipi, po Batelemi po; Tomasi po Matiu tòkuẹsinyantọ po, Jakobu, ovi Alfe tọn, Tade; ⁴Simọni, Kenaninu , po Juda Iskahọti mẹhe dè e hia po ga.

⁵Omẹ wiawe helẹ wẹ Jesu dohlan gbonu, bo sọ nagbè yé dọ, Mì yì jẹ Kosi lẹ de blo, mì sọ biọ otò Samalìtọ lẹ tọn depope mẹ blo: ⁶Ṣigba mì gbọ bo kúkú yì lẹngbọ owhé Islaeli tọn gbè tọn he bú lẹ de. ⁷Le mì to yìyì, mì ni to yẹwheho dọ, dọmọ, Ahọludu olọn tọn sẹpọ́. ⁸Mì hẹnazọ̀ngbọna azọ̀ntọ lẹ, mì nọ fọ́n oṣìọ lẹ do ogbọ̀, mì sọ hẹn pòtọnọ lẹ zùn wiwé, mì ni nọ yàn aovi lẹ jẹgbonu: vọnu wẹ mì mọyí, vọnu wẹ mì ni na omẹ. ⁹Mì donukun azónnú de, sika, kavi fataka, kavi ogànvẹ̃ to sẹgẹ mìtọn lẹ mẹ blo, ¹⁰Kavi azọpò na whẹntóngbe mìtọn blo, mì hẹn awù awe, kavi afọpa, kavi opò blo: na azọ́nwàtọ jẹ na núdùdù etọn.

¹¹Otò depope kavi gbeta depope mẹ he mì na biọ, mì kanse eyín mẹhe to e mẹ jẹ; finẹ wẹ mì ni nò kaka mì na do tọ́n sọn finẹ. ¹²Whenuena mì sọ biọ owhé de gbè, mì dọnúdo e. ¹³Eyín owhé lọ sọ jẹ, na jijọho mìtọn ni jẹte do e ji: ṣigba eyín é ma jẹ, na jijọho mìtọn ni gòdo mì de. ¹⁴Mẹdepope he ma yí mì, kavi bo ma sè ohó mìtọn, whenuena mì tọ́n sọn owhé ne gbè, kavi sọn otò nẹ mẹ jẹgbonu, mì húnhún kògudu afọ mìtọn tọn dai. ¹⁵Nugbo wẹ yẹn dọ hlan mì, E na pónte na aigba Sọdọmi po Gomọla po tọn to whẹdazángbè hú na otò ne.

¹⁶Mì pọ́n, yẹn do mì hlan di lẹngbọ do ohla ṣẹnṣẹn: enẹwutu na mì ni yọnnuin di odàn, bo sọ do jijọmimiọn di apoe. ¹⁷Ṣigba mì payi gbẹtọ lẹ go; na yé na hẹn mì yì tòhodọtọ lẹ de, yé nasọ hò mì to sinagogu yetọn lẹ mẹ; ¹⁸Yè na hẹn mì yì otògán po ahọlu lẹ po nukọn na yẹn wutu, na okunnude do yé po Kosi lẹ po go.

¹⁹Ṣigba whenuena yé yí mì do alọ yetọn mẹ, mì lẹn dọ, nawẹ kavi eté mì na dọ blo: na yè na na onú he mì na dọ mì to ojlẹ nẹ mẹ. ²⁰Na é ma yín mìwlẹ wẹ to hódọ gba, ṣigba Gbigbọ Otọ́ mìtọn tọn wẹ to hódọ to mì homẹ.

²¹Nọvisunnu na yí nọvisunnu na okú, otọ́ na yí ovi na okú; ovi na fọ́n do mẹjitọ yetọn le ji, yé nasọ hù yé. ²²Yè na gbẹwánna mi gbọn gbẹtọ lẹpo de na oyín ṣie tọn wutu: ṣigba mehe sinyẹnlin kaka jẹ pòdo wẹ yè na whlẹngán.

²³Ṣigba whenuena yé to homẹkẹndo mì to otò he mẹ, mì họ̀n yì awetọ mẹ: nugbo wẹ yẹn dọ hlan mì, Mìwlẹ ma na jugbọn otò Islaeli tọn lẹpo mẹ, whẹpo Ovi gbẹtọ tọn na do wá gba.

²⁴Mẹhe yè to pinplọ́n ma nọ húgan mẹplóntọ etọn gba, mọ afanumẹ ma nọ húgan okluno etọn. ²⁵E sù na mẹhe yè to pinplón ni dile meplóntọ etọn te, podọ na afanumẹ ni di Oklunọ etọn. Eyín yé ylọ whénọ dọ Beẹzẹbuli, be nẹmunẹmu wẹ yé ma na ylọ yé he tin to owhé etọn gbè lẹ?

²⁶Enẹwutu mì dibúsi yé blo: na núde ma tin he ye sunúdo bọ yè ma na dè hia; podọ ehe whlá bọ yè ma na yónẹn. ²⁷Onú he yẹn dọ hlan mí to zinvlu mẹ, wẹ mì ni dọ to hinhọ́n mẹ: onú he mì só do otọ́ wẹ mì ni demìsẽluna to ohọ̀ta lẹ.

²⁸Mì dibúsi yé he nọ hù agbasa, ṣigba bọ yé ma sọgan hù gbigbọ blo: ṣigba mì kúkú dibusi ewọ he sọgan hù agbasa po gbigbọ po súdo to olọnzo mẹ. ²⁹Bé oblẹnọ awe ma wẹ yé nọ sà yín abọgankuẹ pẹvi de? mọ dopo yetọn ma na flẹ́ jẹ aigba to Ọtó mìtọn godo. ³⁰Ṣigba yèdọ odà ota mìtọn tọn lẹpo wẹ yè hia pé. ³¹Enẹwutu mì dibú blo, mìwlẹ doale hú oblẹnọ susu.

³²Enẹwutu mẹdepope he yigbè ṣie to gbẹtọ le nukọn, ewọ wẹ yẹn na yigbè etọn ga to Otọ́ ṣie he tin to olọn mẹ nukon. ³³Ṣigba mẹdepope he món mi to gbẹtọ lẹ nukọn, ewọ wẹ yẹn na mon to Otọ́ ṣie he tin to olọn mẹ nukọn ga.

³⁴Mì lẹn do yen wá nado do jijọho hlan aigba ji blo: yẹn ma wà nado do jijọho hlan gba, adavo ohi. ³⁵Na yẹn wá nado klán ovisunnu dovo do otọ́ etọn ji, oviyọnnu do onọ etọn ji, podọ asi ovi tọn do onọ asú etọn tọn ji. ³⁶Kẹ́ntọ gbẹtọ de tọn wẹ yé he tin to owhé ewlọsu tọn gbè lẹ na yín. ³⁷Mẹhe yíwánna otọ́ kavi onọ hú mi, é ma jẹ na mi: mẹhe sọ yíwánna ovisunnu, kavi oviyonnu hú mi, é ma jẹ na mi. ³⁸Mẹhe ma sọ zé satin etọn, bo hodo mi, é ma jẹ na mi. ³⁹Ewọ he do alindọn etọn ai, na hẹn ẹn bú: podọ ewọ he hẹn alindọn etọn bú, na ṣie tọn wutu, na mọ ẹn sọ́.

⁴⁰Mehe yí mì, é yí mi, mẹhe sọ yí mi, é yí mehe do mi hlan ⁴¹Mẹhe yí yẹwhegán de to oyín yẹwhegán tọn mẹ, é na duale yẹwhegán tọn: mẹhe sọ yí dódónọ de to oyín dódónọ tọn me, é na duale dódonọ tọn. ⁴²Mẹdepope he na yí kọfo osìn mimiọn tọn de ṣokẹdẹ na dopo to yé omẹ flin flin helẹ mẹ to oyín nuplọntọ tọn mẹ, nugbo wẹ yẹn dọ hlan mì, ewo ma na bà ale etọn po to alọ depope mẹ gba.

¹E sọ wá jọ, whenuena Jesu dotana gbèdidena nuplọntọ etọn wiawe lẹ, é tón sọn finẹ nado plónmẹ podọ nado dọyẹwheho to otò yetọn lẹ mẹ.

²Whenuena Johanu, sè to ogànhò mẹ, azón Klisti lọ tọn lẹ é dowẹnhlan gbọn alọ nuplọntọ etọn lẹ tọn me, ³bo dọ hlan ẹn, dọmọ, Be hiẹ wẹ ewọ he ja, kavi mí jẹ na nọtepọ́n medevo?

⁴Jesu sọ gọn bo dọ hlan yé, dọmọ, Mì gọyì, bo dọ onu he mi sè, po ehe mi mọ po hlan Johanu: ⁵nukuntọ́nnọ lẹ to númọ, podọ opotẹn lẹ to zọnlinzìn, yè to potọnọ lẹ lẹ̀we, podọ tokunọ lẹ to núsè, pọdọ yè tọ oṣiọ lẹ fọ́n do ogbẹ̀, podọ hlan wamọnọ le ye tọ yẹwheho wẹndagbe tọn dọ ⁶Podo donano wẹ ewo, mẹdepope he ma na mọ onú ahlidida ton de to yen me.

⁷Le yé yi, Jesu sẹ Kinkanbio gbẹtọ lẹ gbọn Johanu dali dọmọ, Be eté mì tọ́njẹgbonu bio zùngbo mẹ nado pọn? Ofán he towhinwhànna jẹhọn? ⁸Be etẹ́ mì tọ́njẹgbonu nado mọ? Dawe he yè sìnyọn avọ̀ wọdọwọdọ na? Pon, yé he yè sìnyọn avọ̀ wọdọwọdọ na lẹ tin to owhé ahọlu tọn lẹ gbè. ⁹Ṣigba etẹ́wutu mí tọ́nyì? Nado pọn yẹwhegan de? Mọwẹ, yẹn dọ hlan mì, susu mọ húgán yẹwhegán de. ¹⁰Ehe wẹ ewọ mẹhe tọn yè wlanwe dọ,

²⁰Whenẹnu wẹ é ṣẹ̀ whègbledo otò nẹle, fie yè wà gégé azón hlonhlọnnọ etọn nẹlẹ lọ te, na ye ma lẹnvọjọ wutu: ²¹Dindọn hlan hiẹ, Kọlazin! dindọn hlan hiẹ, Betsaida! na eyín azón gángán, he yè wà to mí mẹ, yè ko wa to Tile po Sidoni po mẹ, yé na ko lẹnvọjọ to hóhó to odévò po afín po mẹ. ²²Ṣigba yẹn dọ hlan mì, dọ, E na ponte na Tile po Sidoni po to whẹdazángbè hú na mì lẹ. ²³Podọ hiẹ, Kapẹlnaumi yè na zé hiẹ daga jẹ olọn wẹ? hiẹ na jẹte yì okutòmẹ: na eyín yè do wà azón hlonhlọnnọ lẹ lọ to Sọdọmi mẹ, ehe yè ko wa to hie me, édo ko tinai kaka jẹ azán he gbé ²⁴Ṣigba yẹn dọ hlan mì, do, E na pónte na àigba Sọdomi tọn to whẹda zángbè hu na hiẹ.

²⁵To ojle nẹ mẹ wẹ: Jesu gblọn bo dọmo, Yẹn dopẹ́na we, Otọ́ È, Oklunọ olọn po aigba po tọn, na hiẹ sọ onu helẹ whlá do nuyọ́nẹntọ lẹ, pódọ do zínzínyẹnto le, bo do yé hia na vivú lẹ́. ²⁶Mọwẹ, Oto: na mọkẹdẹ wẹ é yón do to nukun towe mẹ, ²⁷Onú lepo wẹ yè yí na mi sọn Otọ́ ṣie de: mẹde ma sọ tunwun Ovi, adavo Oto mọ mẹde ma sọ tunwun Otọ́, adavo Ovi, podọ medepope he Ovi jlo nado so e hia na. ²⁸Mì wá dẽ, mì he to tuklajẹ, bo yè doagban pinpẹ̀n na le, yen nasọ na gbọjẹ mì. ²⁹Mì yì zògè ṣie do oko mìtọn, na mì ni sọ plon núpinplon ṣie na homẹmimiọnnọ podọ ayiha whiwhẹnọ we yẹn: mì nasọ mọ gbọjẹ hlan alindọn mìtọn lẹ. ³⁰Na zégé ṣie bọawú, agbàn ṣie sọ fua.

¹TO ojlẹ ne mẹ wẹ Jesu jugbọn gbadóglè ṣẹnṣẹn to gbọjẹzángbè; hùvé sọ to nuplọntọ eton le hù, ye so ṣẹ̀ gbadófé yà, bo sọ to dùdù ²Whenuena Falesi lẹ mo ẹn, yè dọ hlan en, dọmọ, Pọ́n, nuplọnto towe le to onú he ma jẹ na wà wà to gbọjẹzángbè.

³Ṣigba é dọ hlan yé, domo, Be mìwlẹ ma hia onú he Davidi wa, whenuena hùvé to ewọ hù po mẹhe tin to e de le po ⁴le é biọ ohò Jiwheyẹwhe tọn me, bọ yé dù akla sọhia tọn, ehe é ma jẹ nẹ̃ na dù, kavi na mehe tin to e de le, adavo na yẹwhenọ lẹ dopokedẹ. ⁵Kavi mìwlẹ ma hia to osén mẹ dọ, to gbọjẹzángbè, yẹwhenọ he to templi me lẹ to azán gbọjẹ tọn hẹn gble, bo sọ yín mawaylannọ? ⁶Ṣigba yẹn dọ hlan mì, dọ, Ode hú templi tin to ofi. ⁷Ṣigba eyín mìwlẹ do yọn onú he ehe yín, Lẹblanu wẹ yẹn jlo, é ma yín avọ́, mìwlẹ ma do gblewhèdo mawàylannọ lẹ gba. ⁸Na Ovi gbẹtọ tọn wẹ Oklunọ gbọjẹzán tọn.

⁹Whenuena é ton son finẹ, é biọ sinagọgu yetọn mẹ: ¹⁰pon, dawe de tin to finẹ, mẹhe alọ etọn dopo kusẹ. Yé sọ kanbiọ ẹ dọmọ, E jẹ na hẹnazọ̀ngbọ na omẹ to gbọjẹzángbè? na yé nido mo otẹn jewhè eton.

¹¹E do hlan yé, domo, Gbẹtọ téwẹ tinto mì ṣẹnṣẹn, he na tindo lengbo dopo, ehe flẹ́ jẹ odò mẹ to gbojẹzángbè, bé ewọ ma na tédo e go, bo zé e jegbonu? ¹²Bé nẹmunẹmu wẹ gbẹtọ do yon hú lẹngbo Enẹwutu é jẹ nado wà dagbe to gbojẹzángbè.

¹³Whenẹnu wẹ é dọ hlan dawe lọ, dọ, Dlen alọ towe. E sọ dlẹn ẹn: é sọ jẹ gángán di awetọ.

¹⁴Whenẹnu wẹ Falẹsi lẹ tónjẹgbonu, bo kanayiha do e go, le yé na hù i súdo do. ¹⁵Ṣigba whenuena Jesu yon en, é jagò sọn finẹ: gbẹtọ susu sọ to hihodo e, é sọ henazòngbona yé omẹ pó; ¹⁶é sọ kóna yé do, yé do e hia blo: ¹⁷na ehe yè dọ gbon onù Isaia yẹwhegán tọn mẹ nido di, dọ, 1

²²Whenenu wẹ yè hen dawe lẹgbanọ, nukuntọnnọ podọ unbọpen de wá e de: é sọ hẹnazòngbọ nẹ, somọ bọ unbọpẹn mọnú bo sọ to hódọ. ²³Yè sọ hẹn avọ̀vò, agùndaho lẹpo lọ, bo sọ domọ, Ehe we visunnu Davidi tọn lọ nugbo?

²⁴Whenuena Falẹsi lẹ sè, yé dọmọ, Dawe he ma yàn legba lẹ jẹgbonu gba, adavo gbọn Beẹzẹbuli ogán aovi lẹ tọn dali.

²⁵Yínyón linlẹn yetọn lẹ, é dọ hlan yé dọmọ, Ahọludu depope he klán do ede ji, yè hen ẹn wá vójẹ; podọ otòdaho depope kavi owhé he so klán do ede ji, ma na nọte gba? ²⁶Eyín Satani yàn Satani jegbonu, é klán do ede ji; bó nawẹ ahọludu etọn na nọte do? ²⁷Eyín yen gbọn Beezebuli dali yàn aovi lẹ jẹgbonu, menu dali wẹ visunnu mìton le ka to yé yàn jẹgbonu gbọn? Enẹwutuwẹ yé na yín whẹdatọ mìtọn lẹ. ²⁸Ṣigba eyín yen to aovi lẹ yàn jẹgbonu to Gbigbọ Jiwheyẹwhe tọn mẹ, bé ahọludu Jiwheyẹwhe ton wá mì ji. ²⁹Kavi nawẹ mede sọgan bio owhé adantọ lọ tọn gbe do, bo gba agbàn etọn lẹ, adavo é bla adantọ lo whé? whenẹnu we é na wla owhé etọn ³⁰Ewo he ma nọ hẹ mi, é jẹago do ogo e; mehe ma sọ bé pli hẹ mi, e vunvúnvúnvún pé ³¹Enẹwutu we yẹn do hlan mì, dọ, Ylando depope po nùzinzan lepo po wẹ yè na jona gbẹtọ : ṣigba nùzinzan do Gbigbọ Wiwé go, yè ma to na jona gba. ³²Mẹdepope he dọhó do Ovi gbeto tọn go, yè na jona ẹn: ṣigba mẹdepope he dọhó do Gbigbọ Wiwé go, yè ma na jona ẹn to aihọn he mẹ, podọ to aihọn he ja mẹ. ³³Kavi hẹn atin yín dagbe, sinsén etọn yín dagbe; kavi hẹn átm yín yinyọn, sinsẹ́n etọn yín ylanylan: na sinsẹ́n atin tọn wẹ yè do nọ yón atin. ³⁴Mì ovi amapoe tọn emi nawẹ mìwlẹ yínyín mẹylankan sọgan dọ onú dagbe lẹ do? na sọn susugégé ayiha me tọn mẹ we onù to didọ. ³⁵Omẹ dagbe lọ sọn adọkunnú dagbe ayiha eton me tọn me we é nọ hẹn onú dagbe jẹgbonu wá: 1 gbẹtọ ylankan sọn adọkunnú ylankan etọn mẹ wẹ e nọ hẹn onú ylankan jẹgbonu wá ³⁶Ṣigba yen dọ hlan mì, dọ, Ohó gblo he gbẹtọ to didọ lẹpo, yé na whè yé dọ to azán whẹ̀dida tọn gbè. ³⁷Na gbọn ohó towe mẹ wẹ yè na sùwhena we, gbọn ohó towe mẹ wẹ yè nasọ gblewhẹdo we.

³⁸Whenenu wẹ dopo to wekantọ po Falẹsi lẹ po mẹ dọ hlan ẹn, dọmọ, Mẹplóntọ, mìwlẹ jlo na mọ ohia de son de we ³⁹Ṣigba é gblọn bo dọ hlan yé, dọmọ, Whẹndo ylankan ayòdetọ to ohia din na mọ; yè ma to ohia de na na ẹn gba, adavo ohia Jona yẹwhegán tọn. ⁴⁰Na dile Jona nò okle atọ̀n ozán atọ̀n to ohò olia tọn mẹ; mowẹ Ovi gbẹtọ tọn na nò okle atón ozán atọ̀n to aigba hòmẹ; ⁴¹Gbẹtọ Ninivẹ tọn lẹ na fọ́n to whẹ̀dida mẹ do whẹndo he ji, bo so gbléwhèdo e: na yé lẹnvọjo na yewhẹhodidọ Jona tọn wutu: bo pon, ode bú Jona tin to ofi ⁴²Ahọsi hùwaji dali tọn na fọ́n to whédida mẹ do whẹndo he ji, bo sọ gbléwhèdo e: na é sọn podo aigba tọn wa nado sè núọnen Sọlọmoni tọn; bo pọ́n, ode hú Solomoni tin to ofi. ⁴³Ṣigba gbigbọ mawe, whenuena yè hẹn ẹn tón sọn gbẹtọ lọ go nọ gbọn ofi matinsìn le, do to gbọjẹ din, bo ma sọ mọ ẹn. ⁴⁴Whenẹnu wẹ é dọmọ, Yẹn na lẹgò yì owhé ṣie gbè fie yẹn tón sọn; whenuena é sọ wá, é mo ẹn jẹvo, yè zà ẹ, bo sọ doasọ nẹ. ⁴⁵Whenẹnu wẹ é yì, bo sọ hẹn gbigbọ ṣinawe devo he ylankan hú ewlọsu, yé sọ biọ ohò etọn mẹ, bo so nọnọ̀ fine: godomẹ dawe lọ tọn sọ ylanhú tintantọn. Mọkẹdẹ wẹ é na nọ hlan whendo ylankan he ga.

⁴⁶Le é to ohó helẹ dọ hlan gbẹtọ lẹ, pọ́n, onọ etọn po mẹmẹsunnu etọn lẹ po site to gbonu, bo dindin ohó na dọ hẹ ẹ. ⁴⁷Whenẹnu wẹ dawe de dọ hlan ẹn, dọ, Pọ́n, onọ towe po mẹmẹsunnu towe lẹ po site to gbonu, yé dindin ohó na dọ hẹ we. ⁴⁸Ṣigba é gblọn bo dọ hlan mehe dọ nè, dọmọ, Mẹnu wẹ onọ ṣie? mẹnu sọ wẹ mẹmẹsunnu ṣie lẹ? ⁴⁹E sọ dlẹn alọ etọn jegbonu hlan nuplọntọ etọn lẹ, bo dọmọ, Mì pọ́n onọ ṣie po mẹmẹsunnu ṣie lẹ po! ⁵⁰Na medepope he wa ojlo Otọ ṣie he tin to olọn mẹ tọn, ewọ wẹ mẹmẹsunnu ṣie, mẹmẹyọnnu ṣie, po onọ ṣie po.

¹TO ozán dopo lọ gbè wẹ Jesu tón son whégbè, bo sinai to ohùtó. ²Agùndaho so plidopọ do e de to finẹ, sọmọ bọ é biọ vàtlẹ de mẹ, bo sinai: agùndaho lepo nọte to ohùtó. ³E sọ dọ onú susu hlan ye to oló lẹ mẹ, dọmo, Pọ́n, núdotọ detón jeì nado donú; ⁴Whenuena é donú, okún delẹ flẹ́ jẹ alitó, ohé lẹ sọ wá, bo sinyan yé dù. ⁵Delẹ sọ flẹ́ jẹ aigba osé tọn ji, fie okó susu ma te, to afodoponẹji yé tónkun, na yé ma do okó siso wutu. ⁶Whenuena owhe wá aga, ye fiọ; na yé ma do adò wutu, yé hú. ⁷Delẹ flé jẹ owùn ṣẹnṣẹn; owùn tónkun bo sọ finyọn yé hù. ⁸Ṣigba delẹ flé jẹ aigba dagbe ji, bo sọ sẹn, delẹ kanweko donu kanweko, delẹ kandeko donu kandeko, delẹ ogbàn donu gbàn. ⁹Mẹhe tindo otọ́ nado sè, ni sè.

¹⁰Nuplọnto lẹ sọ wá e de, bo dọ hlan ẹn dọmọ, Etẹwutu wẹ hiẹ to hódọ hlan yé to oló mẹ? ¹¹E sọ gblon bo do hlan yé, dọmọ, Na mìwlẹ wẹ yè na nado yọn onú jawu ahọludu olọn tọn, ṣigba yè ma nayewlẹgba. ¹²Na mẹdepope he tindo, ewo wẹ yè na na, bọ é nasọ tindo deji susu: ṣigba mẹdepope he ma tindo, e si wẹ ye na yí yèdọ onú he é tindo sọn. ¹³Enewutu wẹ yẹn do to hódọ hlan yé to oló me; na to mimo mẹ, yé ma mọ; to sise me, yé ma se, mọ yé ma sọ tunwun in. ¹⁴Yé go wẹ ohó dọdai Esaia tọn di do, ehe dọmọ, To sisè mẹ, mì na sè, mì ma sọ to na tunwun in;

¹⁶Ṣigba donanọ wẹ nukun mìtọn lẹ, na yé mọ: podo na otọ́ mìtọn lẹ na yé sè ¹⁷Na nugbo wẹ yen sọ dọ hlan mì, Yẹwhegán susu po dodónọ lẹ po ko jlo na mọ onú he mìwlẹ mimọ, yé ma mọ yé: podọ nado sè onú he mìwlẹ sisè, bo ma sọ sè yé.

¹⁸Enewutu mì sè oló núdotọ tọn. ¹⁹Whenuena mẹde sè ohó ahọludu tọn, bo ma tunwun in, whenẹnu wẹ mẹylankan wá bo sọ yí onu he yè do do ayiha etọn mẹ sè Ehe we mẹhe yí okún to alitó. ²⁰Mẹhe yi okún to aigba osé tọn ji wẹ mehe sè ohó lọ, tọ afọdoponeji é yí homẹhùnhùn do yí i: ²¹Ṣigba é ma do adò to oho ede tọn mẹ, é sọ dẹn to whenu pẹvide: whenuena tukla, kavi homẹkẹn fon na ohó lo tọn wutu, afọdoponẹji é dahli. ²²Mẹhe ga yí okun to owùn ṣẹnṣẹn, wẹ mẹhe sè ohó lọ; bọ magbọjẹ aihọn he tọn, po oklọ adọkun tọn po finyọn ohó lọ hù, mowẹ é sọ Lezun mẹhe ma do sinsẹ́n ²³Ṣigba mẹhe yí okún do aigba dagbe ji, wẹ mẹhe sè ohó lọ, bo tunwun in; ewọ wẹ sen, é sọ sén, delẹ kanweko donu kanweko, delẹ kandeko donu kandeko, delẹ ogbàn donu gbàn.

²⁴Oló devo wẹ é sọ zé do yé nukọn, dọmọ, Ahọludu olọn tọn taidi dawe de, he do okún dagbe do oglè etọn mẹ. ²⁵Ṣigba le gbẹtọ lẹ damlọn, kèntọ etọn wa bo do ogbé ylankan do likún mẹ, bo sọ tọ́n yì. ²⁶Ṣigba whenuena apà etọn ton, bo dè sinsẹ́n jẹgbonu, whenẹnu wẹ ogbe ylankan sọawúhia ga. ²⁷Mọwẹ afanumẹ whénọ lọ tọn lẹ wá bo dọ hlan ẹn dọmọ, Oklunọ, é ma yín okún dagbe wẹ a do do ogle towe me? fie wẹ é hẹn ogbé ylankan sọn? ²⁸E sọ dọ hlan yé, dọmọ, kintọ de wẹ basi ehe. Afanumẹ etọn le Sọ dọ hlan ẹn dọmọ, Be hiẹ na jlo na mí ni yì sinyan yé sè ²⁹E so dọmo Lala; na whenuena mì to ogbe ylankan sinyan, mi nika hon adò na hkún po yé po. ³⁰Mì gbọ awe lẹ ni whén dopọ kaka jẹ jijewhenu: to ojle jijewhenu tọn mẹ yen na dọ hlan gbngbẹnto le, dọ, Mì bé ogbé ylankan pli whé, mi bla ye do kọnùkonù nado yí miyọn do mè ye: ṣigba mì bé likún pli do zinhò ṣie mẹ.

³¹Oló devo we e sọ zé do yé nukon dọmọ, Ahọludu olon tọn tin jijlẹ do okun dopo mutaldi tọn de go, he dawe de yi, bo do do oglè eton mẹ: ³²Ehe whehú okún lẹpo: ṣigba whenuena e whén e yín dahohú to oma lepo mẹ, e sọ lezun atin de, sọmo bọ ohè olọn tọn lẹ wá, bo sọ nọnọ̀ álọ eton lẹ ji.

³³Oló devo wẹ é so do hlan yé, dọmo, Aholudu olọn ton sọ tin jijle do oton go, ehe yọnnusi de yí, bo sọ whlá do ojlé atọ̀n linfin tọn mẹ, kaka popo lẹpo do do otón. ³⁴Onú hele pó wẹ Jesu dọ blan gbeto le to oló mẹ; e ma sọ dọho de hlan yé matin oló de: ³⁵Na ehe yè dọ gbọn yẹwhegán lọ dali nido di, dọmọ,

³⁶Whenẹnu wẹ Jesu do gbẹtọ lẹ hlan, bo sọ biọ owhé gbè: nuplọnto etọn lẹ sọ wá ẹ de, bo dọmọ, Dọ odo oló ogbé ylankan oglè mẹ tọn hlan mí. ³⁷E sọ gblọn bo domọ, Mẹhe do okún dagbe wẹ Ovi gbẹto tọn; ³⁸Oglè wẹ aihon: podọ okún dagbe lẹ, ehelẹ wẹ ovi ahọludu tọn; podọ ogbé ylankan wẹ ovi mẹylankan nẹ tọn: ³⁹Kèntọ he do yé wẹ legba lọ; jije-whenu we podo owhenu tọn; gbingbèntọ lẹ wẹ angeli lẹ. ⁴⁰Enẹwutu dileyè bé ogbé ylankan pli, bọ yè yí miyon do mè yé do; mowẹ e na te to podo owhenu lọ tọn. ⁴¹Ovi gbẹtọ tọn na do angẹli etọn lẹ hlan gbonu, yé bo na bé onú he hẹn ahlida wá lẹpo sọn ahọludu mẹ, po yé he wà ylanwà lẹ po; ⁴²E na ze yé dlan zokán miyọn tọn mẹ: fìne wẹ avi po adukúnkún po na te. ⁴³Whenẹnu wẹ dódonọ lẹ na to sisé jẹgbonu di owhè to ahọludu Otọ́ yetọn tọn mẹ. Mẹhe tindo otọ́ lẹ, gbọ e ni sè.

⁴⁴Podọ, ahọludu olọn tọn sọ tin jijlẹ do adọkunnú he yè sọ whlá do oglè de mẹ go; ehe dawe de mọ, bo sọ whlá, na homẹhùnhùn etọn wutu é yì, bo sà onú he é tindo lẹpo, bo sọ hò aigba lọ.

⁴⁵Podọ, ahọludu olọn tọn sọ tin jijlẹ do dawe ajọwàtọ de go he to pali dagbedagbe din. ⁴⁶Whenuena é mọ pali dopo akuẹ gege ton, é yì, bo sà onú he é tindo lẹpo, bo sọ hò ẹ.

⁴⁷Podọ, ahọludu olọn tọn sọ tin jijlẹ do odò de go, he yè dlọn do ohù mẹ, bọ é dọ̀n onú hunkọhunkọ pli. ⁴⁸Ehe, whenuena yè hẹn ẹn gó, yé dòn en do agé, bo sinai, bo bé ehe yón do oha mẹ, bo bẹ́ ylanylan lẹ kọnyìngbe. ⁴⁹Mọkẹdẹ wẹ é na te to pòdo owhenu tọn: angẹli lẹ na tọ́n wá, bo na klán ome ylanylan lẹ sọn dódónọ lẹ mẹ, ⁵⁰Yé nasọ bé yé dlọn zokán miyọn tọn mẹ: finẹ wẹ avi po adukúnkún po na te. ⁵¹Be mìwlẹ ko tunwun onú helẹ pó? Yé sọ dọ hlan ẹn dọ, Mọwẹ, ⁵²é sọ dọ hlan yè, dọmọ, Enẹwutu wẹ wekantọ dopodopo he yè hen zun nuplọntọ hlan ahọludu olọn tọn do tin jijlẹ do dawe he yín whènọ de go, ehe to onú yọyọ po hóhó po dè sọn adọkunnú etọn mẹ jẹgbonu.

⁵³E sọ wá jọ, whenuena Jesu dotana oló helẹ pó, é tón sọn finẹ. ⁵⁴Wiwá jẹ otò ewlọsu tọn mẹ, é plón yé to sinagọgu yetọn mẹ, sọmọ bọ avọ̀ vo yé, yé sọ dọmọ, Fie wẹ dawe he hẹn nuyọnẹn he po huhlọn helẹ pó sọn? ⁵⁵Be dawe he ma wẹ ovi sunnu atinpatọ tọn? be onọ etọn ma wẹ yè nọ ylọ Malia? podọ nọvisunnu etọn lẹ wẹ Jakobu, Jose, Simọni, po Juda po. ⁵⁶Podọ nọviyọnnu etọn lẹ, bé yé omẹ pó ma tin to mí de? Fie wẹ dawe he tindo onú helẹ sọn lò? ⁵⁷Mowẹ yé hẹnjọ nado dahli to ewọ mẹ. Ṣigba Jesu dọ hlan yé, dọmọ, Yẹwhegán de ma nọ mado yẹyi, adavo to otò ewlọsu tọn mẹ, podọ to owhé ewlọsu tọn gbè. ⁵⁸E ma sọ wàzn hlọnhlọnnọ lẹ to finẹ gba na mayise yetọn tọn wutu. Pa.

¹TO ojlẹ nẹ mẹ wẹ Helodi otògàn sè linlin Jesu tọn, ²Bo sọ dọ hlan devi eton le, domọ, Ehe wẹ Johanu Baptisti, e fọ́n sọn osio mẹ enẹwutu wẹ huhlọn helẹ to azonwa to evyọ mẹ.

³Na Helodi ko wlé Johanu, bo bla ẹ bo yi i do ogàn mẹ na Hẹlọdia asi Filipi nọvisunnu eton tọn wutu. ⁴Na Johanu dọ hlan ẹn, dọmo, E ma jẹ na hiẹ nado tindo e gba. ⁵Whenuena é jlo na hù i, é dibusi gbẹtọ lẹ, na ye yi i di yẹwhegán de. ⁶Ṣigba whenuena jiji-zán Helodi tọn wá, do ayi e go, viyọnnu Helodia tọn to wedu to nukọn yetọn, home Helodi tọn sọ vivi ⁷Eheji é yí whiwhlé do dopagbe; nado na onu depope e na kanbiọ, ẹ. ⁸Podọ ewọ, didè do nukon gbọn onọ eton dali dọmọ, Na mi to ofi, ota Johanu Baptisti tọn to agbánvla de mẹ. ⁹Ahọlu sọ yín adinọ: ṣigba na whiwhle eton tọn wutu, podọ yé he jagla to núdùdù kòn hẹ ẹ lẹ tọn wutu, é degbe yè ni yi nẹ: ¹⁰E do omẹ hlan, bo gbotana Johanu to ogàn mẹ. ¹¹Yè sọ hẹn ota etọn wa to agbanvla de mẹ, yè so sọ na ovivọnnu lọ; e sọ hen ẹn wá jẹ onọ eton de ¹²Nuplonto etọn lẹ sọ wá bo zé osiọ etọn, bo di, bo sọ yi bo dọ na Jesu.

¹³Dinvie whenuena Jesu sè e, é jagọ sọn finẹ, to vatle de mẹ, je zungbo de tẹnmẹ to ola whenuena gbeto lẹ se, yè hodo e gbọn afọ. ¹⁴Ewọ so tọn jẹgbonu wá, bo mo agùndaho de, leblanu yetọn wà ẹ, é sọ henazongbọna azọntọ yetọn lẹ.

¹⁵Whenuena é zùn tenu, nuplontọ etọn lẹ wá e de, dọmo, Zùngbo we ofi, ojlẹ sọ juwayi dinvie; do gbẹtọ lẹ hlan, na yé ni yi gbeta bo yì hò núdùdù na yede. ¹⁶Ṣigba Jesu dọ hlan yé, dọmọ, Yé ma tindo nuwhèdo nado yì gba, mi na yé nado dù. ¹⁷Ye sọ dọ hlan ẹn dọmọ, Akla atọ́n po whevi awe po kẹde wẹ mí tindo to ofi ¹⁸E sọ dọmọ Mi bé ye wá dẽ to ofi. ¹⁹E sọ degbèna agùndaho lọ nado jagla to ogbe ji, é sọ yí akla atón po whevi awe lẹ po, pinpọn aga hlan olọn, é dona, bo kán bo yí akla lẹ lọ na nuplọntọ etọn lẹ nuplọntọ lẹ sọ yí na agùndaho lẹ lọ; ²⁰Yé omẹ pó sọ dù, bo gọhò: yé sọ bé dupo he po pli oha wiawe gó; ²¹Yé he dù lẹ yì gbẹtọ degbadefọtọ́n, mahia yọnnu po yọpovu lẹ po dogo.

²²To afọdoponeji Jesu sọ dava nuplọntọ etọn lẹ nado biọ vatlẹ lọ mẹ, nado jẹnukọn nẹ̃ yì awà awetọ ji, le é do agùndaho lẹ hlan godo. ²³Whenuena é do agùndaho lẹ hlan vọ̀, é hẹji yi biọ osó lọ mẹ jẹla nado hode whenuena tenu sọ do, ewọ dopokẹdẹ wẹ tin finẹ. ²⁴Ṣigba dinvie vàtlẹ lọ tin to ohù ṣẹnṣẹn, ehe agbowhẹn to zize dlan na jẹhọn tin jẹagò. ²⁵To zánhihọ́ ẹnẹtọ mẹ to ozán mẹ, é wá yé de, bo to zọnlinzin to ohù ji. ²⁶Whenuéna nuplọntọ lẹ mọ ẹn to zọnlinzin to ohù ji, yé flu, dọmọ, Oblo de wẹ: yé yí obu do dawhá daga. ²⁷Ṣigba to afọdoponẹji, Jesu dọhó hlan yé, dọmọ, Mì deji: yẹn wẹ; mì yín avosatọ blo. ²⁸Pita sọ gblọn bo, dọmọ, Oklunọ, eyín e yín hiẹ wẹ, degbèna mi wá de we to osìn ji. ²⁹E sọ dọmọ, Wá. Pita sọ jete sọn vatlẹ lọ mẹ, é zinzọnlin to osìn ji bo wá Jesu de. ³⁰Ṣigba whenuena é mọ jẹhọn sinyẹn, obu di i; é sọ sẹ̀ sisiọ, é dawhá, dọmọ, Oklunọ, whlẹn mi. ³¹Afọdoponẹji Jesu dlẹn alọ etọn, bo hẹn é go, bo sọ dọ hlan ẹn dọmọ, Hiẹ yisepevinọ, etẹwutu wẹ hiẹ savo? ³²Whenuena yé sọ biọ vàtlẹ lọ mẹ, jẹhọn doalọte. ³³Yé he tin to vàtlẹ lọ mẹ lẹ wá, bo litai nẹ̃, dọmọ, Nugbo, Ovi Jiwheyẹwhe tọn wẹ hiẹ.

³⁴Whenuena yé sọ jujẹ awà awetọ ji, yé jẹ aigba Genezalẹti tọn ji. ³⁵Whenuena yé omẹ finẹ tọn lẹ yọnẹn dọ ewọ wẹ, ye do omẹ hlan otò he lédo lẹpo mẹ pé, yé sọ hẹn azọ̀ntọ́ lẹpo wá e de. ³⁶Yé vé ẹ na yé ni sà do alọ okéyè avọ̀ etọn tọn go kẹdẹ: yé omẹ sọha he sọ do alọ e go lẹpo wẹ yè hẹn jẹ gángán.

¹WHENẸNU wẹ Falesi lẹ po we kantọ lẹ po sọn Jelusalẹm wá Jesu de, dọmọ, ²Etẹwutu wẹ nuplọntọ towe lẹ to sénmẹjẹna otànhóhó otọ́ lẹ tọn? na ye ma klọ́ alọ yetọn whenuena yé to nudù. ³E gblọn bo dọ hlan yé, dọmọ, Etẹwutu wẹ mìwlẹ ga to otànhóhó mìtọn yí do to sénmẹjẹna osén Jiwheyẹwhe tọn? ⁴Na Jiwheyẹwhe dọmọ, Gbògbéna otọ́ towe po onọ towe po: podọ, Mẹhe dọ oylan otọ́ kavi onọ tọn, mì gbọ ni kú okú etọn. ⁵Ṣigba mìwlẹ dọmọ, Mẹdepope he na dọ hlan otó etọn kavi onọ etọn, dọ, Yè ko jo núhe hiẹ do ko do yín alenọ gbọn yẹn dali hlan Jiwheyẹwhe; ⁶E ma na gbogbéna otọ́ etọn gba. Mìwlẹ bo ko sọ hẹn osẹn Jiwheyẹwhe tọn zùn ovó na otànhohó mìtọn tọn wutu. ⁷Mì yẹnuwàtọ lẹ, dagbe wẹ Isaia dọdọdai na mì tọn, dọmọ, ⁸Omẹ he lẹ yí nùflo yetọn lẹ do to gbégbona mi; Ṣigba ayiha yetọn tin dẹn sọn dẽ. ⁹Ṣigba ovó mẹ wẹ yé to taliaina mi, Bo sọ to ogbèdai gbẹtọ lẹ tọn lẹ plọnmẹ di nuplọnmẹ yetọn lẹ. ¹⁰E sọ ylọ agùndaho lọ, bo dọ hlan yé, dọmọ, Mì sè, na mì ni tunwun: ¹¹E ma yín onú he biọ onù mẹ wẹ hẹn gbẹtọ gble gba; ṣigba onú he tón sọn onù mẹ, ehelẹ wẹ nọ hẹn gbẹtọ gble. ¹²Whenẹnu wẹ nuplọnto etọn lẹ wá, bo dọ hlan ẹn dọmọ, Hiẹ yón ẹn do yè hẹn Falẹsi lẹ dahli whenuena yé sè ohó he? ¹³Ṣigba e gblọn, bo dọmọ, Atin depope he Otọ́ ṣie olọn tọn ma do, yè na họ̀n ẹn sé. ¹⁴Mì jo yé do: alihiamẹtọ nukuntọ́nnọ wẹ yé. Eyín nukuntọ́nnọ do ali hia nukuntọ́nnọ, yé omẹ awe lẹ na jai do odò mẹ. ¹⁵Whenẹnu wẹ Pita gblọn bo dọ hlan ẹn, dọmọ, Dọ odò oló he tọn hlan mí. ¹⁶E sọ dọmọ, Mìwlẹ ga gbé sọ tin to mayọnẹn mẹ kaka jẹ dinvie? ¹⁷Bé mìwlẹ ma tunwun dọ, onú depope he biọ onù mẹ, juyi biọ ohò me, bọ yè sọ yèn ẹn jẹgbonu? ¹⁸Ṣigba onú he tón sọn onù mẹ lẹ, ayiha mẹ wẹ yé tón sọn, yéwlẹ wẹ nọ hẹn gbẹtọ flu. ¹⁹Na ayiha mẹ wẹ linlẹn ylankan lẹ nọ tón sọn, mẹhùhù, ayọdide, ogàlilọ, ajò, lalo kunnudide, ohó ylankan didọ. ²⁰Onú helẹ wẹ hẹn gbẹtọ flu: ṣigba na dùnú po alọ maklọ po ma hẹn gbẹtọ flu gba.

²¹Jesu sọ tón sọn finẹ, bo sọ tón yì Tile po Sidọni po dali. ²²Bo pọ́n, nawe Kenaani tọn de sọn agbègbè nẹlẹ ji wá, bo dawhá, dọmọ, Wálẹblanuna mi, Oklunọ È, hiẹ Ovi Davidi tọn, oviyọnnu ṣie do aovi he yí awufiẹsa susu do to tuklado e. ²³Ṣigba é ma gblọn ohò depope nè. Nuplọntọ etọn lẹ sọ wá, bo vẹvẹ nẹ dọmọ, Do e hlan, na é to awhádo to mí godo. ²⁴Ṣigba é gblọn bo dọmọ, Yè ma do mi hlan adavo hlan lẹngbọ búbú owhé Islaeli gbè tọn lẹ. ²⁵Ṣigba é wá, bo litai nẹ̃, dọmọ, Oklunọ, gọalọna mi. ²⁶E gblọn bo sọ dọmọ, E ma jẹ yè ni yí akla ovi lẹ tọn, bo sọ dlan ẹn hlan avún lẹ gba. ²⁷Ṣigba ewọ sọ dọmọ, Mọwẹ, Oklunọ: na yèdọ avún lẹ nọ dù jajá he flé sọn tafo Oklunọ yetọn lọ tọn ji. ²⁸Whenẹnu wẹ Jesu gblọn bo dọ hlan ẹn, dọmọ, Hiẹ nawe, daho wẹ yisé towe: ni yín wiwà hlan we yèdọ dile a jlo do. Yè sọ hẹnazọ̀ngbọna oviyọnnu etọn sọn ojlẹ doponẹ mẹ ²⁹Jesu sọ tón sọn finẹ, bo wá sẹpọ ohù Galili tọn dali; é sọ hẹji yì biọ osó lọ mẹ, bo sinai to finẹ. ³⁰Agùndaho lẹ sọ wá e de, yé po sẹkunọ lẹ po, nukuntọ́nnọ lẹ, unbọpẹn lẹ, klegbesatọ lẹ, po omẹ susu devo lẹ po, yé zlón yé dai to afọ etọn go; é sọ hẹnazọ̀ngbọna yé: ³¹Sọmọ bọ avọ̀ vò agùndaho lọ, whenuena yé mọ unbọpẹn lẹ to hódọ, klegbesatọ lẹ jẹ gángán, bọ nukuntọ́nnọ lẹ númọ: yé pagigona Jiwheyẹwhe Islaeli tọn.

³²Jesu sọ ylọ nuplọntọ etọn lẹ do ede de, bo dọmọ, Lẹblanu agùndaho lọ tọn wà mi, eyín azán atọ̀n to dinvie bọ yé ko tin to dè, bo ma sọ tindo onú he yé na dù de; yẹn ma sọ jlo na do yé hlan yì to hùvé mẹ gba, na onú ma nado dikọ na yé to aliho ji. ³³Nuplọntọ etọn lẹ sọ dọ hlan ẹn, dọmọ, Fie wẹ mìwlẹ na hẹn akla susu sọmọ sọn to zùngbo mẹ, bọ é na gọhò na agùndaho gbo he nkọ? ³⁴Jesu sọ dọ hlan yé, dọmọ, Aklanẹmu wẹ mì tindo? Yé sọ dọmọ, Sinawe, po whevi pẹvipẹvi vude po. ³⁵E sọ degbè na agùndaho lọ ni jagla to aigba. ³⁶E sọ yí akla ṣinawe lẹ, po whevi lọ po, bo dopé, bo kán, bo yí na nuplọntọ etọn lẹ, nuplọntọ lẹ sọ yí na agùndaho lọ. ³⁷Yé omẹ pó dù, bo sọ gọhò: yé sọ bé dupò he pò pli, oha ṣinawe gó. ³⁸Yé he dù sọ yì sunnu degbade, mahia yọnnu po yọpọvu lẹ po dogó. ³⁹E sọ do agùndaho lẹ lọ hlan gbonu, é biọ vàtlẹ lọ mẹ, bo sọ wá agbègbè Magdala tọn ji.

¹FALESI lẹ po Sadusi lẹ po wá, to whiwhle e pọ́n, kanbiọ ẹ nado do ohia de hia yé sọn olọn mẹ ²Ṣigba é gblọn bo dọ hlan yé, dọmọ, Whenuena é jẹ tenu, mìwlẹ na dọmọ, Osàn na yón; na olọn bia wutu. ³Podọ to afọnnu, Osàn na Yín yinylan to egbé: na olọn yín bibia bo sọ súyu góngón wutu. Mì yẹnuwàtọ, mìwlẹ yón nado fọyẹna nukunmẹ olọn tọn: ṣigba mì ma sọgan fọyẹna ohia ojlẹ helẹ tọn? ⁴Whẹndo ylanylan ayòdetọ de to ohia de din, Ye ma na na ohia depope hlan ẹn gba adavo ohia Jona yẹwhegán tọn. E sọ jo yé dai, bo tón yí. ⁵Nuplọntọ etọn lẹ wá jẹ awà awetọ ji, yé wọnji nado hen akla.

⁶Jesu dọ hlan yé domọ, Mi payi, bo sọ nọ hó mìde do oton Falesi lẹ tọn po Sadusi le tọn po go. ⁷Yé sọ to linlẹn to yede ṣẹnṣẹn, dọmọ, Mìwlẹ ma hen akla wutu wẹ ⁸Podọ Jesu mimọ en hlan dọmọ, Mì yisepẹvinọ, etẹwutu wẹ mì to linlẹn to mìde ṣẹnṣẹn na mì ma hẹn akla wutu? ⁹Mì ma mọhlan kavi mì ma sọ flin akla atón gbẹtọ degbadefọtón tọn, podọ oha nẹmu he mì bé pli? ¹⁰Kavi akla ṣinawe gbẹtọ degbade tọn, oha nẹmu he mì bé pli? ¹¹Etẹwutu wẹ mì ma mọhlan dọ, yẹn ma dọhó na mì na akla tọn wutu, dọ mì ni payi otón Falesi lẹ tọn po Sadusi lẹ tọn po go gba? ¹²Whenẹnu wẹ ye tunwun dọ, é ma dosẹ́n na yé nado payi otón akla tọn go gba, adavo do núplónmẹ Falesi lẹ po Sadusi lẹ tọn po go.

¹³Dinvie whenuena Jesu wá jẹ Sesalea Filippi tọn dali, é kanse nuplọntọ etọn lẹ dọmọ, Mẹnu wẹ gbẹtọ lẹ dọ yẹn, Ovi gbẹtọ ton, yin? ¹⁴Yé sọ domọ, Mẹdelẹ dọ, Johanu Baptisti: mẹdelẹ dọmọ, Eli; mẹdele dọ, Jẹlemia, kavi, dopo to yẹwhegán lẹ mẹ. ¹⁵E so do hlan yé, dọmọ, Ṣigba mẹnu wẹ mìlẹ do yẹn yín? ¹⁶Simoni Pita gblọn bo dọmọ, Hiẹ wẹ Klisti lọ, Ovi Jiwheyẹwhe ogbènọ tọn ¹⁷Jesu sọ gblọn bọ dọ hlan ẹn dọ, Donanọ wẹ hiẹ Simọni Bal-jona: na agbasalan po ohùn po ma wẹ ko dè e hia hlan wẹ gba, adavo Oto ṣie he tin to olọn me. ¹⁸Podọ yẹn so dọ hlan we ga, dọ, Hiẹ wẹ Pita, podọ ose he ji yẹn na do agùn ṣie do; huhlọn hongbo Kútòmẹ tọn lẹpo ma na pé e go gba. ¹⁹Yẹn na sọ na savi ahọludu olọn tọn le tọn we: podọ nudepope hiẹ na tún to aigba ji, na yín túntún to olọn mẹ. ²⁰Whenẹnu wẹ é kóna nuplontọ lẹ lọ dọ yé dọ na mẹde dọ ewọ wẹ Klisti lọ blo. ²¹Sọn ojlẹ nẹ mẹ wẹ Jesu sè nado didohia hlan nuplọntọ etọn lẹ, le dọ ewọ mananoma yì jẹ Jelusalẹm do, bo jiya onú susu tọn sọn mẹho lẹ po ogan yẹwhenọ lẹ tọn po po wekantọ le po si, bo yín hùhù, podọ to azán atọ̀ntọ gbè yín zize daga. ²²Pita sọ yí i, bo sè nado wiwóhẹ ẹ dọmọ Jiwheyẹwhe ní walẹblanu to oji we, Oklunọ: ehe ma na tin hlan we gba. ²³Ṣigba é lẹ́godo bo sọ dọ hlan Pita, dọmọ, Tón sọn godo ṣie, Satani: zannuagbali wẹ hiẹ hlan mi: na hiẹ ma hà onú he yín Jiwheyẹwhe tọn gba, adavo onú gbẹtọ tọn lẹ. ²⁴Whenẹnu wẹ Jesu dọ hlan nuplọntọ etọn lẹ, dọmọ, Eyín mẹdepope jlo na hodo mi gbọ e ni mon ede, bo sọ zé satin etọn, bo hodo mi. ²⁵Na mẹdepope he jlo na whlẹn alindọn etọn gan, na hẹn ẹn bu: podọ mẹdepope he na hẹn alindọn etọn bú na yẹn tọn wutu, nasọ mọ ẹn. ²⁶Na eté we gbẹtọ de na do yin alenọ, eyín é duale aihọn pete tọn, bo hẹn alindọn eton siai? kavi etẹwẹ gbẹtọ na na to nadiona mẹ na alindọn etọn? ²⁷Na Ovi gbẹtọ tọn na wá to gigo Otọ́ etọn tọn mẹ, po angẹli etọn lẹ po; whenẹnu we é na suahọ omẹ dopodopo dile azón etọn te. ²⁸Nugbo wẹ yẹn dọ hlan mì, Mẹdelẹ tin to yé mẹhe nọte to ofi lẹ mẹ, he ma na dọ okú pọn to alọdepope mẹ, kaka yé na do mọ Ovi gbẹtọ tọn ja to ahọludu etọn mẹ.

¹TO azán ṣidopo godo, Jesu yí Pita, Jakobu po Johanu nọvisunnu etọn po gọ́na ẹn bo hẹn yé hẹji wá biọ osó de mẹ tola, ²Agbasa etọn sọ diọun to yé nukọn: nukunmẹ etọn to sisé di owhè, avọ̀ etọn sọ lẹzun wewé taidi hinhọ́n. ³Bo do ayi e go, Moṣe po Eli po sọ awúhia yé, yé to hódọ hẹ ẹ. ⁴Pita gblọn, bo dọ hlan Jesu, dọmo, Oklunọ, é yón na mí ni nò ofi: eyín hiẹ sọ jlo, yẹn na basi avàja atọ̀n do ofi; dopo na hiẹ, dopo na Moṣe, dopo na Eli. ⁵Le é gbé to hódọ, do ayi e go, aslọ sisémlanmlan de ṣinyọn yé: bo pọ́n, ogbè de sọn aslọ mẹ, to didọmọ, Ehe wẹ Ovi yiwanna ṣie, mehe mẹ yẹn yín homẹhùnnọ te talala; mì nọ sè etọn. ⁶Whenuena nuplọntọ etọn lẹ sè, yé flẹ jẹ nukunme yetọn ji, bo yín avosatọ. ⁷Jesu sọ wá bo do alọ yé ji, bo dọmọ, Mì fọ́n, mì yín avosatọ blo. ⁸Zizé nukun yetọn lẹ daga, yé ma sọ mọ mẹde, adavo Jesu dopokẹdẹ.

⁹Podọ le yé jete sọn osó ji ja, Jesu kó na yé, dọ, Mì dọ númimọ lọ hlan mẹde blo, kaka Ovi gbẹtọ tọn na do fọ́n sọn osiọ me. ¹⁰Nuplọntọ etọn lẹ sọ kanse e dọmọ, Etẹwutu ka wẹ wekantọ lẹ dọmọ, Eli whéwhé wẹ na wá? ¹¹Ewọ sọ gblọn bo, domọ, Eli nugbo whé wẹ na wá, bo nasọ hẹn onú lẹpo gò do tẹnmẹ. ¹²Ṣigba yẹn dọ hlan mì, dọ, Eli lọ ko wá, yé ma sọ yón ẹn, ṣigba bo wà onú depope he yé jlo do e. Yèdọ mọkẹdẹ ga wẹ Ovi gbẹtọ tọn na jiya susu sọn yé de. ¹³Whenẹnu wẹ nuplọntọ lẹ tunwun dọ Johanu Baptisti tọn dọ hlan yé wẹ é te.

¹⁴Whenuena yé wá agùndaho lọ de, dawe de wá e de to finẹ, bo jẹklo nẹ̃, bo dọmọ, ¹⁵Oklunọ, wàlẹblanu to ovi ṣie ji: na adigbenọ wẹ ewọ, bo to awusinyẹn mọ susu: na whẹwhẹ wẹ é nọ jai do miyọn mẹ, whedẽlẹnu do osìn mẹ. ¹⁶Yẹn sọ hẹn ẹn wá nuplọntọ towe lẹ de, ye ma sọ sọgan hẹnazòngbọ nẹ gba. ¹⁷Jesu sọ gblọn, bo dọmọ, Whẹndo mayisenọ, gblewanọ, na yẹn na nò hẹ mì dẹn sọ? Na yẹn na sinyẹnlin hẹ mì dẹn do? hẹn ẹn wá jẹ dè to ofi. ¹⁸Jesu wọhẹ ẹ; aovi lọ sọ tọ́n sọn e go: yè sọ hena? òngbona yọpọsunnu lọ sọn ojlẹ nẹ mẹ. ¹⁹Whenẹnu wẹ nuplọntọ lẹ wá Jesu de, tòla, bo dọmọ, Etẹwutu wẹ mìwlẹ ma sọgan yàn ẹn jẹgbonu? ²⁰Ewọ sọ dọ hlan yé, dọmọ, Yise whiwhe mìtọn tọn wutu wẹ: na nugbo wẹ yẹn dọ hlan mì, Eyín mìwlẹ tindo yise di okún mutaldi tọn dopo, mìwlẹ na dọ hlan osé he, dọmọ, Sẹtẹn sọn ofi yì odọn nẹ: é nasọ sẹtẹn; podọ onú depope ma nasọ glo mì gba ²¹Ṣigba ehe hunkọ ma nọ jegbonu yì, adavo gbọn odẹ̀ po nùbibla po dali.

²²Whenuena yé to yede bẹpli dopọ tọ Galili, Jesu dọ hlan ye, dọmọ, Yè na yí Ovi gbẹtọ tọn do alọ gbẹtọ lẹ ton lẹ mẹ: ²³Yé nasọ hù i, to azán atọ̀ntọ gbè yè nasọ fọ́n ẹn daga. Yé sọ yín awublanọ susu.

²⁴Whenuena yé wá jẹ Kapẹlnaumi, yé he nọ yí odá ṣẹkle tọn lẹ wá Pita de, bo dọmọ, Mẹplọntọ mìtọn ma nọ na odá sekle tọn lọ. ²⁵E sọ dọmọ, Mọwẹ Whenuena é wá whegbè, Jesu whẹwhẹ dọhó hlan ẹn dọmọ, Simoni, etẹ wẹ hiẹ lẹn? Mẹnu si wẹ ahọlu aihọn mẹ tọn lẹ nọ yí odè kavi otokuẹ te? sọn ovi yewlọsu tọn lẹ si, kavi sọn jonọ lẹ si? ²⁶Whenuena ewọ dọmọ, Sọn jonọ lẹ si wẹ. Jesu sọ dọ hlan ẹn, dọmọ, Be whenẹnu ovi lẹ gán. ²⁷Ṣigba, na mìwlẹ nikã hẹn yé dahli, hiẹ ni yì ohù mẹ, bo dlẹn omlẹ̀n de do otò mẹ, bo zé whevi tintan hẹ wá aga; whenuena hiẹ kẹ̀ onù etọn, hiẹ na mọ ṣẹkle de; enẹ hiẹ ni yína yé na yẹn po hiẹ po tọn.

¹TO ojlẹ doponẹ mẹ wẹ nuplọntọ lẹ wá Jesu de, dọmọ, Mẹnu wẹ klo húgan to ahọludu olọn tọn mẹ lò? ²Ewọ sọ ylọ yọpọvu de do ede de, bo sọ ẹ dote to ṣẹnṣẹn. ³Bo dọmọ Nugbo wẹ yẹn dọ hlan mì, Adavo mìwlẹ diọ bo taidì yọpọvu lẹ, mìwlẹ ma na biọ ahọludu olọn tọn mẹ gbon alọdepope mẹ gba. ⁴Enẹwutu mẹdepope he na whiwhẹ ede dai di yopọvu, dopolọ wẹ klo húgan to ahọludu olọn tọn mẹ ⁵Mẹdepope he na yí yọpọvu mọ hunkọ dopo to oyín ṣie mẹ, é yí mi. ⁶Ṣigba mẹdepope he na hẹn dopo to yọpọvu he yí mi sè helẹ de mẹ dahli, é yín alenọ nẹ̃ na yè ni bla ogilise daho de do okò nẹ̃, bo siọ ẹ do odogbó ohù tọn me. ⁷Dindon hlan aihọn na nujijọ ahlida tọn lẹ wutu! yè ma sọgan basi bọ nujijọ ma na wá; ṣigba dindọn hlan dawe lọ mẹhe mẹ nujijọ lọ gbọn wá ⁸Podọ eyín alọ towe kavi afọ towe hẹn we dahli, sán ẹn sè, bo dè e sọn ogo: e yín dagbe na we na a ni yín klegbesátọ kavi opotẹn nado biọ ogbè me, hú tintindo alọ awe kavi afọ awe nado yín zizedlan biọ miyọn madopodo mẹ. ⁹Podọ eyín nukun towe sọ hẹn we nado dahli, dè e sè, bo sọ dè e sọn ogo; é yín dagbe na we na a ni yín nukun doponọ biọ ogbè mẹ, hú tintindo nukun awe, nado yín zize dlan miyọn olọnzo tọn mẹ. ¹⁰Mì payi, dọ mì vlẹ dopo to pẹvi helẹ de mẹ blo: na yẹn dọ hlan mì, dọ, To olọn mẹ, whepoponu wẹ angẹli yetọn lẹ nọ pọ́n nukun mẹ Otọ́ ṣie he tin to olọn mẹ tọn. ¹¹Na Ovi gbẹtọ tọn wá nado whlẹn yé he yè ko hẹn bú lẹ. ¹²Nawẹ mìwlẹ lẹn do? eyín omẹ de tindo lẹngbọ kanweko, bọ dopo danbú to yé mẹ, be é ma na jo kanwefọtọ̀nnukunẹnẹ he pò dai, bo na yì osé lẹ ji, bo yì din ehe danbú mọ? ¹³Podọ eyín é sọ din in mọ, nugbo wẹ yẹn dọ hlan mì, é jaya to lẹngbọ lọ ji, hú to kanwefọtọ̀nnukunẹnẹ he ma danbú yì lẹ ji. ¹⁴Yèdọ mọkẹdẹ wẹ é ma yín onú jijlo de to Otọ́ mìtọn he tin to olọn mẹ nukọn, dọ dopo to pẹvi helẹ de mẹ ni dọ̃n.

¹⁵Podọ eyín mẹmẹsunnu towe wàylan do ogo we, yì, do oylan etọn hia ẹ to hiẹ po ewọ po awe ṣẹnṣẹn kẹdẹ: eyín é sètowe, hiẹ duale mẹmẹsunnu towe tọn ¹⁶Ṣigba eyín é ma sè towe, hiẹ ni yí omẹ dopo kavi awe devo dogọ́ dewe, dọ to onù kunnudetọ awe kavi atọn tọn mẹ, yè ni do yí ohó lẹpo hẹnai. ¹⁷Podọ eyín é gbé na sè yetọn, dọ e hlan agùn: podọ eyín é sọ gbé na sè agùn tọn ga, gbọ ni tin hlan we di Kosi lẹ, po tòkuẹsinyantọ lẹ po. ¹⁸Nugbo wẹ yẹn dọ hlanmì, Onúlẹ depope he mì na bla to aihọn mẹ, na yín bibla to olọn mẹ: podọ onú depope he mì nasọ tún to aihon mẹ, na sọ yín túntún to olọn mẹ. ¹⁹Yẹn sọ dọ hlan mì, dọmọ, Eyín omẹ awe sọn mì mẹ na dogbèpe to aihọn mẹ gbọn nudepope he yé na kanbiọ tọn dali, e na yín wiwà na yé sọn Otọ́ ṣie he tin to olọn mẹ de. ²⁰Na ofi he omẹ awe kavi atọ̀n bé yede pli dopọ to oyín ṣie mẹ te, yẹn tin to gblagbla yé tọn me to finẹ.

²¹Whenẹnu wẹ Pita wá, bo dọ hlan ẹn dọmọ, Oklunọ, whla nẹmu wẹ mẹmẹsunnu ṣie na waylan do ogo e, bọ yẹn na jona ẹn? kaka jẹ whla ṣinawe? ²²Jesu sọ dọ hlan ẹn, dọmọ, Yẹn ma dọ hlan we, dọ, Kaka je whla ṣinawe gba: adavo kaka je whla kandegbàn donu ṣinawe. ²³Enewutu wẹ ahọludu olọn tọn do yín jijlẹ do ahọlu de go he jlo na yí linlẹn to afanumẹ etọn lẹ si. ²⁴Whenuena é nado tọ linlẹn, yè hẹn mẹde wá e de, ehe dù talẹnti degbaweafõ hó do e. ²⁵Ṣigba sọ le é ma tindo onú de nado suahọ, Oklunọ etọn degbè e nado yín sisa, asi etọn, ovi etọn le, po onú he é tindo lẹpo po, na ahosusu nado yín bibasi. ²⁶Enẹwutu afanumẹ lọ jeklo, bo litaina ẹn, dọmọ, Oklunọ, fahome to dè, yẹn nasọ suahọ lẹpo we ²⁷Podọ Oklunọ afanumẹ ne tọn yè yí lẹblanu do whan, tún in dai, bo sọ jo akueyinyán lọ nẹ. ²⁸Ṣigba afanumẹ nẹ tonjẹgbonu yì bo sọ mọ dopo to devi ohatọ etọn lẹ me, he dù abọgankuẹ kanweko họ do e, e hẹn e go, bo sọ finyọn ové nẹ, dọmọ, Suahọ he hiẹ dù do mi. ²⁹Devi ohatọ etọn lọ sọ jẹklo to afọ etọn go, bo sọ vevẹ nẹ, dọmọ, Fahomẹ to dẽ, yẹn na suahọ lepo we. ³⁰E ma sọ jlo, ṣigba é yì bo zé e dlan ogànho mẹ, kaka é na sú enẹ he yín dùdù. ³¹Mowe whenuena devi ohatọ etọn lẹ mọ enẹ he yè wà, yé yín awublanọ susu, yé sọ wá bo dọ onú he yè wà lẹpo hlan Oklunọ yetọn. ³²Whenẹnu wẹ Oklunọ etọn ylọ ẹ do e de, bo dọ hlan ẹn, dọmọ, Hiẹ afanumẹ ylankan, yẹn jo ahó nelẹ pó na we, na hiẹ vevẹ na mi wutu: ³³Be hiẹ ga ma do sọ tindo lẹblanu to devi ohatọ towe ji yèdọ dile yẹn tindo leblanu to hiẹ ji do? ³⁴Oklunọ eton sọ yín homegblenọ, bo jo e hlan yasahẹmẹtọ le, kaka é na do sú ehe yín dùdù lẹpo. ³⁵Mokẹde ga wẹ Otọ ṣie olọn tọn na wà hlan mì do, eyín dopodopo mìtọn sọn ayiha mìtọn mẹ ma jona mẹmẹsunnu etọn lẹ.

¹E sọ wá jọ, whenuena Jesu dotana ohó helẹ vò, é fọ́nyì sọn Galili, bo wá Judé dali, to Jọdani godo. ²Agùn daho gbẹtọ le tọn hodo e: é sọ hẹnazọ̀ngbọna yé to finẹ.

³Falesi lẹ ga sọ wá e de finẹ, yé to whiwhle e pọ́n, bo, domọ, Be é jẹ na sunnu de nado gbé asi etọn dai na owhèhó lẹpo? ⁴E sọ gblọn bo dọmọ Be mìwlẹ ma ko hia, dọ mẹhe da ye to whéwhéwhenu, da yé asú po asi po? ⁵E sọ dọmọ, 1 Na ehe tọn wẹ sunnu na jo otọ po onọ etọn po dai, bo na sẹbọ do asi etọn de: yé omẹ awe lẹ nasọ lezun agbasalan dopo. ⁶Sọmọ yé ma sọ yín omẹ awe ba gba, adavo agbasalan dopo. Enẹwutu, onú he Jiwheyẹwhe kòndopọ mì dìke gbẹtọ klán ẹn blo. ⁷Yé sọ do hlan ẹn, dọmọ, Etẹwutu wẹ Moṣe degbè nado nọ na owé gbédai tọn de, bó sọ jo e dai? ⁸Ẹ sọ dọ hlan yé, dọmọ, Sinsinyẹn ayiha mìtọn tọn wutu wẹ Moṣe do dikena mì nado jo asi mìtọn lẹ dai, ṣigba sọn whéwhéwhenu é ma to mọ gba. ⁹Podọ Yẹn sọ dọ hlan, mì, 2 Mẹdepope he na jo asi etọn dai, adavo na owhèhó ogalilọ tọn, bo sọ wlealọ hẹ devo, é dẹayò: podọ ewọ he wlealọ hẹ ẹ whenuena yè gbẹ́ ẹ dai, é deayò. ¹⁰Nuplọntọ lẹ sọ dọ hlan en dọmọ, Eyín owhẹ̀ sunnu lọ tọn yín mọ po asi etọn po, è ma jẹ nado wlealọ gba. ¹¹Ṣigba é dọ hlan ye, dọmọ, Omẹ popo ma sọgan yí didọ he gba, adavo mẹhe e yin nina hlan lẹ. ¹²Na ojọ delẹ tin he yè ji do mọ sọn adò onọ yeton ton mẹ; ojọ dele sọ tin he yè hẹn Zùn ojọ gbọn alọ gbẹtọ tọn mẹ: ojọ delẹ sọ tin he hẹn yede Zùn ojọ na ahọludu olọn tọn wutu. Mẹhe tin sọgan nado yí i, gbọ e ni yí i.

¹³Whenẹnu wẹ yè hẹn yọpọvu lẹ wá e de to finẹ na e nido yí alọ etọn do yé ji, bo hodè: nuplọntọ lẹ sọ wọhẹ yé. ¹⁴Ṣigba Jesu dọmọ, Mì jo yọpọvu lẹ do, mì sọ glọnali na yé nado wá dẽ blo, na omẹ mọ hunkọ lẹ tọn wẹ ahọludu olọn tọn. ¹⁵E sọ yí alọ etọn do yé ji, bo fọ́nyì sọn finẹ.

¹⁶Do ayi e go, omẹ de wá e de, bo sọ dọmọ. Mẹplọntọ dagbe, onú dagbe tẹwẹ yẹn na basi, na yẹn nido tindo ogbẹ́ madopodo? ¹⁷E sọ dọ hlan ẹn, dọmọ, Etẹwutu wẹ hiẹ ylọ mi dagbe? Mẹdagbe de ma tin, adavo omẹ dopo, enẹ wẹ Jiwheyẹwhe: ṣigba eyín hiẹ jlo na biọ ogbẹ̀ mẹ, yìn osén lẹ. ¹⁸E sọ dọ hlan ẹn, dọmọ, Etẹwẹ? Jesu sọ dọmọ, 1 Hiẹ ma na hùmẹ, Hiẹ ma na deayò, Hiẹ ma na fìnnúyí, Hiẹ ma na dè lalo kunnu. ¹⁹Gbogbéna otọ́ towe po onọ towe po: podọ, Hiẹ na yiwanna kọmọnu towe di dewe. ²⁰Dẹpẹmẹ lọ sọ dọ hlan ẹn dọmọ, Onú helẹ pó wẹ yẹn ko payi e go: etẹwẹ sọ whèdo mi? ²¹Jesu sọ dọ hlan ẹn dọmọ, Eyín hiẹ jlo na yín pipé, yì, sà onu he hiẹ tindo, bo yína wamọnọ lẹ, hiẹ nasọ tindo adọkunnú to olọn mẹ: bo wá bo to hihodo mi. ²²Ṣigba whenuena dẹpẹmẹ lọ sè didọ lọ pó, é tọ́njẹgbonu po awúbla po; na é yín mẹde he tindo nutindo susu.

²³H Jesu sọ dọ hlan nuplọntọ etọn lẹ, dọmọ, Nugbo wẹ yẹn dọ hlan mì, E sinyẹnawú na adọkunno nado biọ ahọludu olọn tọn mẹ. ²⁴Yẹn sọ vò dọ hlan mì, E bọawú na kanklosọ-póawenọ de nado gbọn nuvo yẹnvi tọn mẹyì, hú na adọkunnọ nado biọ ahọludu Jiwheyẹwhe tọn mẹ. ²⁵Whenuena nuplọntọ lẹ sè e avọ̀ vò yé talala, yé dọmọ, Be mẹnu wẹ sọgan yín whinwhlẹn gán? ²⁶Jesu pinpọ́n yé, dọ hlan ye, dọmọ, Gbẹto de wẹ ehe yín giglo, ṣigba to Jiwheyẹwhe de onú lẹpo wẹ wiwà. ²⁷Whenẹnu wẹ Pita gblọn bo dọ hlan ẹn, dọmọ, Pọ́n, mìwlẹ ko jo onú lẹpo dai bo sọ to hidodo we; be etẹwẹ mí na tindo? ²⁸Jesu sọ dọ hlan yé, dọmọ, Nugbo wẹ yẹn dọ hlan mì, dọ, Mì mẹhe ko hodo mi to vọji mẹ, whenuena Ovi gbẹtọ tọn na sinai to ofìn gigo etọn tọn ji, mìwlẹ ga na sinai to ofìn wiawe ji, bo to whèdana whẹndo wiawe Islaeli tọn lẹ. ²⁹Mẹdepope he ko sọ jo owhé dai, kavi mẹmẹsunnu, kavi mẹmẹyọnnu, kavi otọ́, kavi onọ, kavi asi, kavi ovi, kavi aigba, na oyín ṣie tọn wutu, na mọyí do gbesusuji, yé na sọ dugú ogbẹ̀ madopodo tọn. ³⁰Ṣigba omẹ susu he yín nukọn tọ na yín godotọ podọ godotọ lẹ wẹ tintan.

¹NA ahọludu olọn tọn sọ tin jijlẹ do dawe he yín whénọ de go, he tọ́n to afọnnufù nado dà pakanọ lẹ do vẹ̃ngle etọn mẹ. ²Whenuena é whleahi hẹ pakanọ lẹ na abọgan-kuẹ dopo egbesọ, é do yé hlan vẹ̃ngle etọn mẹ. ³E sọ tọn to ojlẹ ogàn atọ̀ntọ tọn mẹ, bo mọ adidọnọ devo lẹ site to ahi mẹ. ⁴E dọ hlan yé, dọmọ, Mì yì vẹ̃ngle mẹ ga, onú depope he jẹ yẹn na na mì. Yé sọ yì. ⁵E sọ vọ tọ́n to ogàn sidopotọ po sinẹnẹlọ po mẹ, bo sọ basi mọ. ⁶To ojlẹ ogan widopotọ mẹ, é sọ tón bo mọ devo lẹ site, e sọ dọ hlan yé, dọmọ, Etẹwutu wẹ mìwlẹ site to ofi sọn gbẹnnegbọ̃n azonmawa? ⁷Ye sọ dọ hlan ẹn, dọmọ, Na mẹde ma dapa mi wutu wẹ. E sọ dọ hlan ye, dọmọ, Mì yì vẹ̃ngle mẹ ga: ⁸Whenuena tenu do, Oklunọ vẹ̃ngle tọn dọ hlan honkọnsi etọn, dọmọ, Ylọ pakanọ lẹ bo na azọn kuẹ yetọn yé, hẹn ẹn sọn mẹhe gbọn godo ji, yì mẹtintan ji. ⁹Whenuena mehe yè dapa to ogàn widopotọ mẹ lẹ wa, dopo dopo yetọn mọ abọgan-kuẹ dopodopo yí. ¹⁰Ṣigba whenuena omẹ nukọntọn lẹ wá, yé lẹn dọ yé na mọ yí hú mọ; dopodopo yetọn sọ mọ abọgan-kuẹ dopo dopo yí. ¹¹Whenuena yé yí i, ye to hunhlun do whenọ lo go. ¹²Dọmọ, omẹ godotọn helẹ wazọn ojlẹ dopo kẹdẹ, hie sọ hẹn yé sọzẹn hẹ mi mẹhe hẹn agban po yózo azán tọn po. ¹³Ṣigba é gblọn bo dọ hlan dopo to yé mẹ, dọmọ, Họnton, yẹn ma wàylan do we gba: e ma yín abọgan-kuẹ dopo wẹ hiẹ magbè hẹ mi do? ¹⁴Yí onú he yín towe bo tọn yì: ojlo ṣie wẹ nado na godotọ he dile yẹn na hiẹ do. ¹⁵Be é ma jẹ na yẹn ni yí onú he yín ṣie do wà onú he jlo mi? nukun towe ylàn na yẹn yín mẹdagbe wutu? ¹⁶Mọwẹ yé mẹhe yín godotọ lẹ na lẹzun nukọntọ, yé mẹhe sọ yín nukọntọ le na lẹzun godotọ: na omẹ susu wẹ yè ylọ, pevide wẹ yè na mọ sinyan.

¹⁷Podọ le Jesu sọ hẹji jei Jelusalẹm, é yí nuplọntọ etọn wiawe lẹ do apadopo to aliho, bo dọ hlan yé, dọmọ, ¹⁸Pọ́n, míwle hẹji jei Jelusalẹm; yè nasọ yí Ovi gbẹtọ tọn do alọ mẹ na ogán yẹwhenọ lẹ tọn, pó wekantọ lẹ po, yé nasọ gblewhè okú tọn do e, ¹⁹Bo nasọ jo e do alọ mẹ na Kosi lẹ nado vlẹ ẹ, nado hò e, podọ nado whè e do satin go: podo to azán atọntọ gbè, é nasọ fọ́n.

²⁰Whenẹnu wẹ onọ ovi Zebẹdé tọn lẹ po ovi etọn le po wá e de, bo vevẹ nẹ, bo sọ to onú de biọ to e si. ²¹E sọ dọ hlan ẹn dọmọ, Etewẹ hiẹ jlo? Ewọ sọ dọ hlan ẹn, dọmọ, Degbè dọ ovi sunnu ṣie awe helẹ ni do sinai, dopo to adusilọ towe mẹ, awetọ to amivọnlọ towe mẹ to ahọludu towe mẹ. ²²Ṣigba Jesu gblọn bo dọmọ, Mìwlẹ ma yon onú he mì bibiọ gba. Be mìwlẹ tin sọgan nado nù kọfo lọ he yẹn wleawu nado nù? Yé sọ dọ hlan ẹn, dọmọ, Mìwlẹ tin sọgan. ²³E sọ dọ hlan yé, dọmo, Nugbo we mìwlẹ na nù kọfo ṣie; ṣigba nado sinai to adusilọ ṣie mẹ podọ to amiyọnlọ ṣie mẹ, ma yín ṣie nado na omẹ gba, adavo mehe yè ko wleawu etọn dai na lẹ sọn Otọ́ ṣie de. ²⁴Whenuena omẹ aó lẹ sè e, yé gblehomẹ do mẹmẹsunnu awe lẹ go. ²⁵Ṣigba Jesu ylọ ye do ede de, bo dọmọ, Mìwlẹ yónen dọ gándutọ Kosi lẹ tọn nọ dùklunọ to yé ji, podo megángan yetọn lẹ nọ zán huhlọn to yé ji. ²⁶E ma to na yín mọ to mì mẹ gba ṣigba mẹdepope he jlo na lezun kiklo to mì mẹ na yín devi mìtọn; ²⁷Medepope he sọ jlo na yín nukọntọ to mì mẹ na yín afànumẹ mìtọn: ²⁸Yèdọ Dile Ovi gbẹtọ ton ma wá nado yilizọn na, adavo nado yilizọn na ome, podọ nado yí ogbẹ̀ etọn do basi ofligò na omẹ susu.

²⁹Le yé to tintón sọn Jeliko, agùndaho de hodo e. ³⁰Bo do ayi e go, dawe nukuntọ́nnọ awe sinai to alihotó, whenuena yé sè dọ Jesu ju jei, dawhá daga dọmọ, Wàleblanu na mí, Oklunọ, hiẹ ovi sunnu Davidi tọn. ³¹Agùndaho lọ sọ wọhẹ yé dọ, yé ni naboẹ: ṣigba yé sọ dawhá daga humọ, dọmọ, Wàlẹblanuna mí, Oklunọ, hiẹ ovi sunnu Davidi tọn. ³²Jesu sọ site, bo ylọ yé, bo dọmọ, Etẹwẹ mì jlo na yẹn ni basi na mì? ³³Yé sọ dọ hlan ẹn, dọmọ, Oklunọ, na nukun mìtọn nido hùn. ³⁴Podọ Jesu yíyí lẹblanu do whàn, yí alọ do nukun yetọn go: to afọdoponẹji nukun yetọn mọnú, yé sọ hodo e.

¹Podọ whenuena yé dòn sẹpọ́ Jelusalẹm, bo wá jẹ Bẹtfagi, jẹ osó olivie tọn ji, whenenu wẹ Jesu do nuplọntọ awe hlan, ²Bo dọ hlan yé, dọmọ, Mì yì biọ otò pẹvi he pànnukon mì mẹ, to afọdoponẹji mì na mọ kẹtẹkẹtẹ de to sínsín, po ovi etọn po: mì tún yé, na mí ni hẹn yé wá dẽ. ³Eyín mede sọ dọ nude hlan mì, mì na dọmọ, Oklunọ do onú na yí yé do wà; afọdoponẹji é nasọ do yé hlan. ⁴Dinvie ehe lẹpo sọ jọ, na ehe yè dọ gbọn yẹwhegán lọ mẹ nido di, dọmọ,

¹²Jesu sọ biọ tẹmpli me, bo yàn yé mẹhe to sisà, bo sọ to hihò to templi mẹ lẹ jẹgbonu, bo sọ takitina tafo akuẹdiọtọ lẹ tọn, po aìsintẹn apoesatọ lẹ tọn po zíndai; ¹³E bo so dọ hlan yé, dọmọ, Yè kanwe dọ, Ohò odè tọn de wẹ yè na nọ ylọ ohò ṣie; ṣigba mìwlẹ ko lẹ́ ẹ do basi odò ajotọ lẹ tọn. ¹⁴Podọ nukuntọ́nnọ lẹ, po sẹkunọ lẹ po wá e de to tẹmpli mẹ; é sọ hẹnazọ̀ngbọna yé. ¹⁵Ṣigba whenuena ogán yẹwhenọ lẹ tọn, po wekantọ lẹ po mọ onú jawu lẹ he é basi, bọ Yọpọvu lẹ to awhádo to; tẹmpli mẹ dọ Hosana hlan ovi sunnu Davidi tọn; é gblehomẹ na yé susu, ¹⁶Yé sọ dọ hlan ẹn, dọmọ, Hiẹ sè onú he ome helẹ to didọ? Jesu sọ dọ hlan yé, dọmọ, Mọwẹ: mìwlẹ ma ko hia gbède, dọ, 1 Sọn onù yọpọvu lẹ tọn mẹ, podọ sọn ovi he to anónu le tọn mẹ wẹ hiẹ ko hẹn pipa sọgbè te? ¹⁷E sọ jo yé dai, bo tón jẹgbonu sọn otò lọ mẹ yì Bẹtani; bo sọ nò finẹ.

¹⁸Dinvie to afọnnu, le é lẹ́gọ̀ ja otò daho mẹ, huvẹ to hùhù i. ¹⁹Podọ mimọ ovotin dopoakan de to aliho, é wá e kòn, é ma sọ mọ nude to e ji, adavo amà dodo, é sọ dọ hlan ẹn dọ, Sọn dinvie kaka doidoi a dike sinsẹ́n sọ sén to oji we gbèdegbède blo. Tẹndoponẹmẹ ovotin lọ sọ fiọ. ²⁰Whenuena nuplọntọ lẹ sọ mọ ẹn, avọ̀ vò yé, yé sọ dọmọ, Nawẹ ovotin he yawu fiọ dole ²¹Jesu sọ gblọn bo dọ hlan yé, dọmọ, Nugbo wẹ yẹn dọ hlan mì, Eyín mìwlẹ tindo yise, bo ma do ayi awe, mìwlẹ ma to na basi onú he yè wà do ovotin lọ go kẹdẹ gba, ṣigba yèdọ eyín mì na dọ hlan osó he, dọ, Yè ni zé hiẹ daga bo zédlan biọ ohù mẹ; è na yín wiwà. ²²Onú depope he mì na kanbiọ to odẹ̀ mẹ, bo yise, mì na mọ yí.

²³Whenuena é sọ wá biọ tẹmpli mẹ, ogán yẹwhenọ lẹ tọn, po mẹho gbẹtọ lẹ tọn lẹ po wá e de, le é to gbẹtọ lẹ plọ́n, bo dọmọ, Asẹ tẹwẹ hiẹ do to onú helẹ wà? Podọ mẹnu wẹ na asẹ helẹ hiẹ? ²⁴Jesu sọ gblọn bo dọ hìan yé, dọmọ, Yẹn ga nasọ kàn onú dopo biọ mì, eyín mi dọ na mi, yẹn ga nasọ dọ na mì asẹ he yẹn do to onú helẹ basi. ²⁵Baptẹm Johanu tọn, fie wẹ é sọn? Sọn olón mẹ, kavi sọn gbẹtọ de? Yé sọ to linlẹn hẹ yé nọzo dọmọ, Eyín mí na dọmọ, Sọn olọn mẹ, e na dọmọ, Be etẹwutu wẹ mì ma yí i se? ²⁶Ṣigba eyín mìwlẹ na sọ dọmọ, Sọn gbẹtọ de; mí dibu na agùndaho lẹ lọ; na omẹpo wẹ yí Johanu di yẹwhegán de, ²⁷Yé sọ gblọnna Jesu, dọmọ, Mìwlẹ ma yọnẹn gba Ewọ ga sọ dọ hlan yé, dọmọ, Be yẹn ma sọ to na dọ asẹ he yẹn do to onú helẹ basi na mì gba. ²⁸Ṣigba etẹwẹ mí lẹn? Dawe de tindo ovisunnu awe; é wá tintan de, bo dọmọ, Ovi, yì wàzón to vẹ̃ngle mẹ to egbé. ²⁹E sọ gblọn bo dọmọ, Yẹn ma jlo gba: ṣigba to godo mẹ, é diọlinlẹnna ede, bo sọ yì. ³⁰E sọ wá awetọ de, bo dọ mọ doponẹ. Ewọ sọ gblọn bo dọmọ, Baba, yẹn na yì: é ma sọ yì. ³¹Be mẹnu to yé omẹ awe lẹ mẹ wẹ basi ojlo Otọ́ etọn tọn? Yé dọmọ Tintan. Jesu sọ dọ hlan yé, dọmọ, Nugbo wẹ yẹn dọ hlan mì, Tòkuẹsinyantọ lẹ, po ogàlọtọ lẹ po biọ ahọludu Jiwheyẹwhe tọn mẹ yi jẹnukọn na mì. ³²Na Johanu gbọn aliho dódó tọn ji wá mì de, mì ma yí i se: ṣigba tòkuẹsinyantọ lẹ, po ogàlọtọ lẹpo yí i se: podọ mìwlẹ, whenuena mì mọ ẹn, mì ma diọlinlẹnna mìde to godo mẹ gba na mì nido yi i se.

³³Mì sè oló devo: Whenọ de tin, he do vẹ̃ngle de, bo sọ dopá lédo e, bo kùn ahandatẹn do e mẹ, bo sọ dó atọhò de, bo sọ ẹ haya na glesi lẹ, bo biọ otò devo mẹ. ³⁴Whenuena ojlẹ sinsẹ́n tọn dòn sẹpọ́, é do afanumẹ etọn lẹ hlan glesi lẹ, na yé ni mó sinsẹ́n e tọn yí ³⁵Glesi lẹ sọ wlé afànumẹ etọn lẹ, bo hò ode, bo hù awetọ, bo sọ dlẹn zannu do devo. ³⁶E sọ vó do afànumẹ devo hlan hú tintan tọn: yé sọ wà do ye mọkẹdẹ. ³⁷Ṣigba to godo, é do ovi sunnu etọn hlan yé, dọmọ, Yé na gbògbéna ovi sunnu ṣie. ³⁸Ṣigba whenuena glesi lẹ mọ ovi sunnu lọ, yé dọ to yéde ṣẹnṣẹn, dọmọ, Ehe wẹ whédutọ lọ; mì wá, mì gbọ mi ni hù i, bo bé ogú etọn. ³⁹Yé sọ wlé e, bo zé e dlẹn sọn vẹ̃ngle mẹ, bo sọ hù i. ⁴⁰Enẹwutu whenuena klunọ vẹ̃ngle tọn na wá, etẹwẹ é na wà hlan glesi nẹlẹ? ⁴¹Yé dọ hlan ẹn, dọmọ, E na yí oya do hù omẹ oyanọ nẹlẹ súdo, bo nasọ haya vẹ̃ngle etọn na glesi devo lẹ, ehe na na sinsẹ́n ẹn to ojlẹ yetọn mẹ. ⁴²Jesu sọ dọ hlan yé, dọmọ, Be mìwlẹ ma ko hia to Owé wiwe lẹ mẹ gbède, dọ,

¹JESU sọ gblọn bo sọ vó hódọ to oló lẹ mẹ hlan ye, dọmọ, ²Ahọludu olọn tọn sọ tin jijlẹ do ahọlu de go, he basi alọwle hùnwhẹ de na ovisunnu etọn, ³Bo do afànumẹ etọn lẹ hlan nado ylọ ye mẹhe yè ko ylọ do alọwle hùnwhẹ kòn dai lẹ: yé ma sọ jlo na wá. ⁴E sọ vó do afànumẹ devo lẹ hlan, dọmọ, Mì dọ na yé mehe yè ylọ lẹ, dọ, Pọ́n, yẹn ko wleawu núdùdù ṣie tọn pó: ye ko hù oyìnsu ṣie lẹ, po kanlin wínyánwínyán ṣie lẹ po, podọ yè ko wà onú lẹpo vò, mì wá alọwle hùnwhẹ kòn. ⁵Ṣigba yé ma hò e pọ́n, yé tọn, ode yì oglè eton titi mẹ, awetọ jì ajó etọn gbé. ⁶Omẹ he po lẹ sọ hẹn afànumẹ etọn lẹ go, bo saya hẹ yé, bo hù ye. ⁷Ṣigba homegble ahọlu lọ: é sọ do awhan etọn hlan gbonu, bo sọ hù hlọnhùto nẹlẹ sudo, bo sọ mẹ̀ oto daho yetọn. ⁸Whenẹnu wẹ é sọ dọ hlan afànumẹ etọn lẹ, dọ, Yè ko da núdùdù asi yọ́yọ́ tọn vò, ṣigba ye mẹhe yè ylọ dai lẹ ma jẹ. ⁹Enewutu mì yì je kinklan alihogbó lẹ tọn ji, omẹ sọha he mì mọ, mì ylọ ye wa alọwle hùnwhẹ kòn. ¹⁰Afànumẹ nẹlẹ tọn yì alihogbó ji, bo sọ be omẹ sọha he yé mọ lẹpo plidopọ, ylanylan po dagbe po: asi yọ́yọ́ núdùdù tẹnmẹ sọ gó na Ojonọ. ¹¹Ṣigba whenuena ahọlu biọ họmẹ wá nado pọn ojonọ lẹ, é mọ dawe de to finẹ, he ma tindo avọ asi yọyó tẹnmẹ tọn de. ¹²E sọ dọ hlan ẹn dọmọ, Hóntọn, nawẹ hiẹ biọ ofi wá do matindo avọ asi yọ́yọ́ tẹnme tọn de? é ma sọ sọgan kẹnu. ¹³Whenẹnu wẹ ahọlu dọ hlan devizónwatọ etọn le, dọmọ, Mì bla ẹ alọ po afọ po, bo ze e dlan zinvlu gbonu tọn mẹ; finẹ wẹ avi po adukúnkun po na te. ¹⁴Na omẹ susu wẹ yè ylọ, ṣigba pẹvide wẹ yè na mọ dè.

¹⁵Whenẹnu wẹ Falesi lẹ yì, yé kanayiha le yé na wà do domna en to ohó etọn mẹ ¹⁶le sọ do nuplọnto yetọn lẹ hlan, po Helodinu le po dọmọ, Mẹplọntọ, mìwlẹ yọn ẹn dọ nugbonọ wẹ hiẹ, hiẹ sọ nọ plón aliho Jiwheyẹwhe tọn omẹ to nugbo mẹ, bo ma nọ pọ́n mẹdepope nukunta: na hiẹ ma nọ hò gbẹto tọn pọ́n gba. ¹⁷Enẹwutu dọ na mí, Etẹwẹ hiẹ lẹn? Be é biọsénmẹ nado na otòkuẹ Sesali, kavi lala? ¹⁸Ṣigba Jesu mọ yinylan yetọn hlan. Bo, dọmọ, Etẹwutu wẹ mìwlẹ to whiwhle mi pọ́n, mì yẹnuwàtọ lẹ? ¹⁹Mì yí otòkuẹ lọ hia mi. Yé sọ yí abọgan-kuẹ dopo wá e de. ²⁰E sọ dọ hlan yé, dọmọ, Mẹnutọn wẹ bosiọ po winwlan he po? ²¹Yé dọ hlan ẹn, dọmọ, Sesali tọn. Whenenu wẹ é dọ hlan yé, dọmọ, Enẹwutu mi yí onú he yin Sesali tọn lẹ hlan Sesali, podọ onú he sọ yín Jiwheyẹwhe tọn lẹ hlan Jiwheyẹwhe. ²²Whenuena yé sè e, awuji ye, yé jo e do, bo sọ tón yì.

²³To azán ne gbè, wẹ Sadusi lẹ he dọ do fonsonku de ma tin wá e de, ye kanbiọ ẹ, ²⁴Dọmọ, Meplọnto, Moṣe dọmo, Eyín sunnu de kú matindo, ovi, nọvisunnu etọn ni són asi eton, bo jivi do novisunnu eton tẹnmẹ. ²⁵Dinvie nọvisunnu ṣinawe dele ko tin to mí de: podọ tintan, wlealọ bo ku, le é ma jivi, e jo asi eton dai hlan nọvisunnu etọn ²⁶Mọkẹdẹ wẹ aweto ga po atọ̀ntọ po, kaka jẹ sinawetọ ji. ²⁷To yé omẹ pó godo, yọnnu lọ kú ga. ²⁸Enẹwutu, to fọ́nsọnku mẹ, be asi mẹnutọn wẹ é na yín to yé omẹ ṣinawe lẹ me? na yé ome pó wẹ sọ tindo e? ²⁹Ṣigba Jesu gblọn bo dọ hlan ye, dọmọ, Mìwlẹ buali ma yón Owé wiwe lẹ, kavi huhlọn Jiwheyẹwhe tọn. ³⁰Na to fọ́nsọnku mẹ, yé ma nọ wlealọ, mọwẹ yè ma so nọ na wlealọ hẹ, ṣigba yé tindi angẹli Jiwheyẹwhe tọn lẹ to olọn me. ³¹Ṣigba gbọn fọ́nsọnku osiọ lẹ tọn dali, mìwlẹ ma hia enẹ he yè do hlan mì gbọn Jiwheyẹwhe dali, dọmọ, ³²Yen wẹ Jiwheyẹwhe Ablaham tọn, Jiwheyẹwhe Isaki tọn, podọ Jiwheyẹwhe Jakobu tọn? Jiwheyẹwhe ma yín Jiwheyẹwhe osiọlẹ tọn gba, adavo ogbènọ lẹ tọn. ³³Podọ Whenuena agundaho lẹ lọ sè ye yín awujinọ do nuplónmẹ etọn go.

³⁴Ṣigba whenuena Falesi lẹ sè dọ é ko bọnu Sadusi lẹ tọn do, bé yede plidopọ, ³⁵Bọ dopo to yé me, osénno de, to whiwhle e pọ́n, kàn nukanbiọ de se e, dọmọ, ³⁶Mẹplọntọ, ete wẹ ase daho to osén mẹ? ³⁷Ewọ sọ dọ hlan ẹn, dọmọ, Hiẹ na yí ayiha towe lẹpo, po dọ alindọn towe lẹpo po nuyonẹn towe lepo po do yiwanna Oklunọ Jiwheyẹwhe towe. ³⁸Ehe wẹ osén daho tintan lọ. ³⁹Podọ awetọ sọ di i, Hiẹ, na yiwanna kọmẹnu towe di dewe. ⁴⁰Osén awe helẹ go wẹ osén lọ pete, pla do po yẹwhegán lẹ po.

⁴¹Dinvie le Falesi lẹ bé yede plidopọ, Jesu kan nukanbiọ de se ye. ⁴²Dọmọ, Na wẹ mì lẹn Klisti tọn do? ovi mẹnutọn wẹ ewọ yín? Yé sọ dọ hlan ẹn dọ, Ovi Davidi tọn. ⁴³E sọ dọ hlan yé, dọmọ, Be etẹwutu wẹ Davidi to gbigbọ mẹ to yiylọ ẹ, Oklunọ, dọmọ

⁴⁵Be whenẹnu eyín Davidi ylọ ẹ Oklunọ, nawẹ ewọ yín ovi etọn do? ⁴⁶Mẹde ma sọ tin sọgan nado gblọn ohó de nẹ̃, mọwẹ mẹde ma sọ ha kàn nukanbiọ de se e ba sọn azán nẹ gbè.

¹WHENẸNU wẹ Jesu dọhó hlan agùndaho lẹ lọ, podọ hlan nuplọntọ etọn lẹ, ²Dọmọ, Wekantọ lẹ, po Falesi lẹ po sinai to aisintẹn Moṣe tọn mẹ: ³Enẹwutu onú depope yé degbèna mì, ehelẹ mí ni nọ tùnayi e go, bo sọ nọ basi; ṣigba mì basi di azón yetọn blo: na yé nọ dọ, yé ma nọ wà gba. ⁴Mọwẹ yé do agbàn pinpẹn he sinyẹnawú hinhẹn, bo zé e do abó gbẹtọ lẹ tọn ji: ṣigba yewlọsu ma na yí alọvi yetọn dopo do sẹtẹnna yé gba. ⁵Ṣigba azón yetọn lẹpo wẹ yé nọ wà na nado yín mimọ to gbẹtọ lẹ de: yé hẹn ayúja owétọn zùn gbigblo, bo sọ hẹn okèyè avọ̀ yetọn tọn zùn gbigblo. ⁶Yé yiwanna tẹnmẹ daho to núdùdù kòn, po aisintẹn daho po to sinagọgu mẹ, ⁷Po núdọdomẹ po to ahi mẹ, podọ nado yín yiylọ to gbẹtọ lẹ de dọ, Labbi, Labbi. ⁸Ṣigba mìwlẹ yín yiylọ dọ Labbi blo: na omẹ dopo wẹ Mẹplọntọ mìtọn podọ mẹmẹsunnu wẹ mì omẹ pó. ⁹Mì sọ ylọ mẹde otọ́ mìtọn to aihọn mẹ blo: na omẹ dopo wẹ Otọ́ mìtọn olọn tọn. ¹⁰Mọ yè sọ ylọ mì dọ mẹplọntọ blo; na omẹ dopo wẹ Mẹplọntọ mìtọn, yèdọ Klisti lọ. ¹¹Ṣigba ewọ mẹhe klo húgan to mì ṣẹnṣẹn, wẹ na yín devizónwàtọ mìtọn. ¹²Podọ Mẹdepope he na zé ede do aga, na yín zínzín dai: mẹdepope he na sọ zín ede dai, na yín zizédaga.

¹³Ṣigba dindọn hlan mì, wekantọ lẹ, po Falesi lẹ po, yẹnuwàtọ I na mìwlẹ sú ahọludu olọn tọn to gbẹtọ lẹ nukọn wutu: mìlọsu ma biọ e mẹ, mọwẹ mì ma sọ dike mẹhe to na biọ e mẹ lẹ ni biọ e mẹ. ¹⁴Dindọn hlan mì, wekantọ lẹ, po Falesi lẹ po, yẹnuwàtọ na mìwlẹ dù owhé asuṣiọsi lẹ tọn súdo, yèdọ whenuena mì to odè dindẹn basi na goyíyí de: enẹwutu mìwlẹ na mọ whẹgbledo yí húgan.

¹⁵Dindọn hlan mì, wekantọ lẹ, po Falesi lẹ po, yẹnuwàtọ na mì lédo ohù po age po pé nado hẹn omẹ dopo zùn hùnsi, whenuena ewọ sọ zùn mọ, mìwlẹ sọ hẹn en zùn ovi olọnzo tọn whla awe hú mìlọsu.

¹⁶Dindọn hlan mì, mì alihiamẹtọ nukuntọ́nnọ lẹ, he dọmọ, Mẹdepope he na yí fiwiwe do whlé, é ma yín nude: ṣigba mẹdepope he na yí sika fiwiwe tọn do whlé é zùn ahótọnọ de! ¹⁷Mì nulunọ, nukuntọ́nnọ: etẹwẹ klohú, sika, kavi fiwiwe he ko lè sika zùn wiwe? ¹⁸Podọ, mẹdepope he na yí agbà do whlé, é ma yín nude: ṣigba mẹdepope he na yí nunina he tin to e ji do whlé, é zùn ahótọnọ de. ¹⁹Mì, nukuntọ́nnọ: etẹwẹ klohú, nunina, kavi agbà he to nunina lẹ̀ zun wiwe? ²⁰Enẹwutu mẹdepope he yi agbà do whlé, é yí i do whlé, podọ po onú he tin to e ji lẹpo. ²¹Podọ Mẹdepope he sọ yí fiwiwe do whlé yí i do whlé podọ po mẹhe nọnọ̀ e mẹ po. ²²Podọ ewọ he sọ yí olọn do whlé é yí ofìn Jiwheyẹwhe tọn do whlé, po mẹhe sinai to e ji po.

²³Dindọn hlan mì, wekantọ lẹ, po Falesi lẹ po, yẹnuwàto na mì to madao mẹntetọn aneti tọn, pokumini tọn po na, bo sọ gbé onú pónzin osén tọn dai, whẹ̀dida, lẹblanu, po yise po: ṣigba ehelẹ wẹ jẹ mìwlẹ do basi, mì ma do jo devo dai mawà gba. ²⁴Mì nukuntọ́nnọ alihiamẹtọ, he nọ to kànvan do nuvó kòn, bo nọ zé kanklosọpóawenọ mì.

²⁵Dindọn hlan mì, wekantọ lẹ, po Falesi lẹ po, yẹnuwàtọ! na mìwlẹ kló gbonu kọfo tọn po agbánvla tọn po wé, ṣigba to homẹ yé tin gó sọn alọslọnamẹ po linlankan po mẹ. ²⁶Hiẹ Falesi nukuntọ́nnọ, kló homẹ kọfo tọn, po agbánvla tọn po whẹ, na gbonu yetọn nido lẹzun wiwe ga. ²⁷Dindọn hlan mì, wekantọ lẹ, po Falesi lẹ po, yenuwàtọ I na mì tin jijlẹ do olidò wéwé go, he sọawúhia whanpẹnọ to gbonu, ṣigba to homẹ tin gó na ohú omẹ kuku lẹ tọn podọ na mawé lẹpo. ²⁸Yèdọ mọ wẹ mìwlẹ ga sọ awúhia to gbonu hlan gbẹtọ lẹ di dódónọ, ṣigba to homẹ mì tin gọ na yẹnuwiwà po ylanwà po.

²⁹Dindọn hlan mì, wekantọ lẹ, po Falesi lẹ po, yẹnuwàtọ! na mìwlẹ dó olidò yẹwhegán lẹ tọn lẹ, bo sọ doasọna oyòwhé dódónọ lẹ tọn, ³⁰Bo sọ dọmọ, Eyín mìwlẹ ko tin to otọ́ mìtọn lẹ whenu, mìwlẹ ma do ko yín mìmátọ hẹ yé to ohùn yẹwhegán lẹ tọn mẹ gba. ³¹Enẹwutu mìwlẹ dekunnu hlan mìde, dọ, mì wẹ ovi yé he hù yẹwhegán lẹ tọn lẹ. ³²Enẹwutu mì gbọ bo gó ojlénu otọ́ mìtọn le tọn. ³³Mì odàn lẹ, mì ovikún amapoe lẹ tọn, nawẹ mì na họngán na whẹ̀dida olọnzo tọn do? ³⁴Enẹwutu, mì do ayi e go, yẹn do yẹwhegán lẹ hlan mì, po gbẹtọ nuyọnẹntọ lẹ po, po wekantọ lẹ po: mẹdelẹ to yé mẹ mì na hù, bo nasọ whè do satin go: podọ mẹdelẹ to yé mẹ mì nasọ hò to sinagọgu mìtọn lẹ mẹ, bo nasọ dohomẹkẹn sọn otò daho de mẹ jẹ otò daho de mẹ. ³⁵Na ọhùn dódónọ lẹpo tọn he yè ko kòn dai to aihọn mẹ nido tin to mì ji, sọn ohùn Ábẹli dódónọ tọn ji jẹ ohùn Zakali ovi Balaki tọn ji, mẹhe mì hù to fiwiwe lọ po agbà lọ po ṣẹnṣẹn. ³⁶Nugbo wẹ yẹn dọ hlan mì, onú helẹ pó wẹ na wá whẹndo he ji.

³⁷Jelusalẹm E, Jelusalẹm, hiẹ mẹhe hù yẹwhegán lẹ, bo sọ dlọn zannu do mẹhe yè dohlan we lẹ, whla nẹmu wẹ yẹn do ko bé ovi towe lẹ pli, dile koklosi de nọ bé ovi etọn lẹ do awà etọn glọ do, bọ mìwlẹ ma jlo ³⁸Pọ́n, yè jo owhé mìtọn dai hlan mì ovó. ³⁹Na yẹn sọ dọ hlan mì, Sọn dinvie yì mì ma to na mọ mi ba, kaka mì na dọmọ, Donanọ wẹ ewọ he ja to oyín Oklunọ tọn mẹ.

¹JESU sọ tónjẹgbònu yì sọn tẹmpli mẹ: nuplọntọ etọn lẹ sọ wá e de nado do didó tẹmpli tọn lẹ hia ẹ. ²Ṣigba ewọ gblọn bo dọ hlan yé, dọmọ, Mì ma mọ onú halẹ pó? Nugbo wẹ yẹn dọ hlan mì, Yè ma to na jo zannu dopo dai to awetọ ji, ehe yè ma na hó liai.

³Podọ le é sinai to osó olivie tọn ji, nuplọntọ lẹ wá e de to nuglọ, dọmọ, Dọ na mí, whenuena onú helẹ na jọ? etẹwẹ na yín ohia wìwá towe tọn, po opòdo aihọn tọn po tọn? ⁴Jesu sọ gblọn, bo dọ hlan yé, dọmọ, Mì payi, na mẹde hẹn mì bu blo. ⁵Na omẹ susu na wá to oyín ṣie mẹ, dọmọ, Yẹn wẹ Klisti lọ; bo nasọ hẹn omẹ susu bu. ⁶Mì nasọ sè awhàn linlin po awhàn zingidi po: mì do ayi e go, na mì hanú blo: na onú helẹ pó ma sọgan nọ ma wá jọ gba, ṣigba opòdo ma yín dinvie. ⁷Na akọta na fọ́n do akọta ji, ahọludu do ahọludu ji; huvẹ po azọ̀n ylankan po, po aigba sisọsisọ po na tin to ofi súsu. ⁸Onú helẹ pó wẹ dòdó nukunbibia tọn. ⁹Whenẹnu wẹ yé na jo mì hlan nukunbibia, yé nasọ hù mì: yè nasọ gbẹwanna mì to akọta lẹpo mẹ na oyín ṣie tọn wutu. ¹⁰Whenẹnu wẹ omẹ susu na dahli, bo nasọ nọ dè yénọzo jo, bo nasọ gbẹwanna yénọzo. ¹¹Yẹwhegán lalonọ susu na fọ́n, bo nasọ hẹn omẹ susu bu. ¹²Podọ na ylanwà na sudeji wutu, owanyi omẹ susu tọn na lẹzun mimiọn. ¹³Ṣigba mẹhe dakónna kaka jẹ opòdo, mẹdopolọ wẹ yè na whlẹn gán ¹⁴Podọ yè nasọ dọ yẹwheho wẹndagbe ahọludu tọn he lẹ to aigba fìninọ lepo mẹ na okunnu de hlan akọta lẹpo; whenẹnu wẹ opòdo na wá.

¹⁵Enẹwutu, whenuena mì mọ osùnú awuhiọ hẹngble tọn he yè ko dọ gbọn Duniẹli yẹwhegán mẹ tesisi to ofi wiwe mẹ (mẹdepope he hia ẹ gbọ ni tunwun in:) ¹⁶Whenẹnu wẹ mẹhe tin to Judé lẹ ni hòn yì osó lẹ mẹ. ¹⁷Na mẹhe tin to ohòta jẹte wá nado bé onú he tin to ohò etọn mẹ jẹgbonu blo. ¹⁸Na mẹhe tin to dangbo lẹgò wá godo nado yí avọ̀ sinṣinyọn etọn blo. ¹⁹Dindọn hlan yé mẹhe mọhò lẹ, podọ hlan yé mẹhe to anó do na ovi to azán nẹlẹ gbè í ²⁰Podọ mì ni hodẹ dọ wìwọ mìtọn yín avivọ whenu blo, kavi yín gbọjẹzán de gbè blo: ²¹Na whenẹnu wẹ mukunbibia daho na tin, ehe hunkọ ma ko tin sọn whéwhéwhenu aihọn tọn kaka jẹ dinvie, lala, mọtọn hunkọ ma to na tin gbède. ²²Adavo le yè ko sán azán nẹlẹ do oglì, mẹhe na sọgan lùn in tón de ma tin: ṣigba na mẹsìnyansinyan lẹ tọn wutu wẹ yè na sán azán nẹlẹ do ogli. ²³Whenẹnu eyín mẹdepope na dọ hlan mì, dọ, Pọ́n, Klisti tin to ofi, kavi to finẹ; mì yí i se blo. ²⁴Na Klisti lalonọ lẹ po yẹwhegán lalonọ lẹ po na fọ́n, bo na yí ohia daho po azón dabla lẹ po hia; sọmọ nado hẹnmẹbu, eyín é sọgán yin wiwà, yèdọ mẹsinyansinyan lẹ. ²⁵Pọ́n, yẹn ko dọ na mì jẹnukọn. ²⁶Enẹwutu, eyín yé na dọ hlan mì, dọ, Pọ́n, é tin to zùngbo mẹ; mì jẹgbonu yì blo; pọ́n, é tin to abò hò mẹ; mì yí yé se blọ. ²⁷Na le abì nọ jẹgbonu sọn whezizẹ dali wá, bo sọ nọ yín mimọ yèdọ je wheyìhọ dali, mọkẹdẹ wẹ wiwá Ovi gbẹtọ tọn na nọ. ²⁸Fidẹpope he osiọ te, finẹ wẹ osú lẹ nọ pli dopọ te.

²⁹Ṣigba to afọdoponẹji, to azán nukunbibia nẹlẹ tọn godo, yè na hẹn owhè dozinvlu, osùn ma to na yí hinhọ́n etọn hia, sunwhlẹvu lẹ nasọ flé sọn olọn, huhlọn olọn lẹ tọn lẹ wẹ yè nasọ whan. ³⁰Whenẹnu wẹ ohia Ovi gbẹtọ tọn na sọ awúhia to olọn mẹ; whenẹnu wẹ whẹndo he tin to aihọn mẹ lẹpo na blawú, yé nasọ mọ Ovi gbẹtọ tọn sọn aslọ olọn tọn lẹ go ja, po huhlọn po, po gigo daho po. ³¹E nasọ do angẹli etọn lẹ hlan gbonu po opẹ́n daho de po, yé nasọ bé mẹsinyansìnyan etọn lẹ plidopọ sọn jẹhọn ẹnẹ lẹ mẹ, sọn opòdo dopo olọn tọn jẹ awetọ.

³²Dinvie mì plọ́n oló ovotin tọn; Whenuena ala etọn sẹsẹ tón, bo sọ kọamà, mìwlẹ yọ́n ẹn do ojle alúnlún tọn sẹpọ́: ³³Yèdọ mọkẹdẹ wẹ mìwlẹ ga, whenuena mìwlẹ mọ onú helẹ pó, mì ni yọnẹn dọ é sẹpọ́, yèdọ to ohọn ji. ³⁴Nugbo wẹ yẹn dọ hlan mì, Whẹndo he ma to na juwayì, kaka yè nado hẹn onú helẹ pó sẹ. ³⁵Olọn po aihọn po na juwayì, ṣigba ohó ṣie lẹ ma to na juwayì. ³⁶Ṣigba azán nẹ po ojlẹ po tọn, mẹde ma yọnẹn, lala, é ma yín angẹli olọn tọn lẹ, adavo Otọ́ ṣie dopo akàn. ³⁷Ṣigba le azán Noe tọn te, mọkẹde wẹ wiwá Ovi gbẹtọ tọn na nọ. ³⁸Na di to azán nẹlẹ mẹ he tin to osìngigọ lo nukọn yé to dùdù, bo to nùnù, bo to alọwle, bo sọ to nina to alọwiwle mẹ, kaka jẹ azán he gbè Noe biọ ohún mẹ, ³⁹Yé ma sọ yọnẹn kaka osìngigodo wá, bo pló yé omẹ pó yì; mọkẹdẹ wẹ wiwá Ovi gbẹtọ tọn na nọ ga. ⁴⁰Whenẹnu wẹ omẹ awe na tin to oglè mẹ, yè na yí dopo, bo jo awetọ dai. ⁴¹Yọnnu awe na to séli to osé kòn; yè na yí dopo, bo jo awetọ dai. ⁴²Enẹwutu mi nọ hó mìde na mì ma yón azán he gbè Oklunọ mìtọn ja. ⁴³Ṣigba ọ́n ehe dọ, eyín mẹmẹnu owhé lọ tọn o yọ́n ojlẹ he mẹ ajotọ ja te, é na ko họali, é ma do ko dike yè ni kùndo biọ owhé etọn gbè gba. ⁴⁴Enẹwutu mì ni wleawu dai: na ojlẹ he mẹ mì ma lẹn do wẹ Ovi gbẹtọ tọn ja. ⁴⁵Enẹwutu mẹnu wẹ afànumẹ nugbonọ, nuyọnẹntọ, mẹhe klunọ etọn do basi ogán whédo etọn tọn, nado na núdùdù yetọn yé to osã sisọ mẹ? ⁴⁶Donanọ wẹ afànumẹ nẹ, whenuena klunọ etọn wá, mẹhe é na mọ to mọ wà. ⁴⁷Nugbo wẹ yẹn dọ hlan mì dọ. Ewọ na yí i do basi ogán onú he é tindo lẹpo tọn. ⁴⁸Ṣigba eyín afànumẹ ylankan ne dọ to ayiha etọn mẹ, dọ, Klunọ ṣie dọ̀n gigò etọn do godo; ⁴⁹Bo sẹ̀ nuli devi ohatọ etọn lẹ, bo sọ to dùdù, bo to ahannumu; ⁵⁰Klunọ afànumẹ nẹ tọn na wá to azán de mẹ whenuena é ma donukun in, podọ to ojlẹ he é ma yọnen de mẹ, ⁵¹Bo nasọ hò e susu, é na dè tẹnme etọn to yẹnuwàtọ lẹ de; finẹ wẹ avi po adukúnkún po na te.

¹WHENẸNU wẹ ahọludu olọn tọn na yín jijlẹ do awhli ao go, he yi ozòwhán yetọn lẹ, bo tọ́n jei asisunọ pé gbé. ²Atón to yé mẹ yín nulunọ, atọn sọ yín nuyọnẹntọ. ³Na nulunọ lẹ, whenuena yé yí ozòwhán yetọn lẹ ma yí amì po yé po gba: ⁴Ṣigba nuyọnẹntọ lẹ hẹn amì to ogò yetọn mẹ pọ ozowhán yetọn lẹ po. ⁵Le asisunọ dẹn, ye omẹ pó samlọngọ́, bo damlọn. ⁶To zángbodawe mẹ, awhá di, dọmọ, Pọ́n, asisunọ ja; mì tẹ́n yì pó e. ⁷Whenẹnu wẹ awhli nẹlẹ pó fọ́n, bo jlá ozòwhán yetọn lẹ do. ⁸Nulunọ lẹ sọ dọ hlan nuyọnẹntọ lẹ, dọmọ, Mì na mí sọn amì mìtọn mẹ; na ozowhán mìtọn lẹ to sisi. ⁹Ṣigba nuyọnẹntọ lẹ gblọn dọmọ, Eya, na é ma nado whè do mí po mìwlẹ po; ṣigba mì gbọ bo yì mẹhe nọ sà lẹ de, bo họ na mìde. ¹⁰Podọ le yé jei hihò gbé, asisunọ wá: yé mẹhe wleawu lẹ biọ họmẹ hẹ ẹ yì alọwle hùnwhẹ kòn; yè sọ sú ohòn. ¹¹To godo wẹ awhli devo he pò lẹ wá, yé dọmo, Oklunọ, Oklunọ, hùnhòn na mí. ¹²Ṣigba é gblọn bo dọmọ, Nugbo wẹ yẹn dọ hlan mì, Yẹn ma yọ́n mì gba. ¹³Enẹwutu mì nọ họ́ mìde, na mì ma yón azán lọ kavi ojlẹ lọ gba.

¹⁴Na e tin di whenuena omẹ de jei otò dindẹn mẹ, bo ylọ afànume etọn lẹ, bo bé agbàn etọn lẹ jo na yé. ¹⁵E yí talẹnti atọ̀n na mẹde, bo yí awe na omẹ awetọ, bo sọ yí dopo na omẹ atọ̀ntọ; é na dopodopo yetọn le huhlọn etọn te: é sọ tọ́n yì gbéjizọnlin etọn ji. ¹⁶Afọdoponẹji mẹhe mọ talẹnti atón yi, yì bo yí etọn do wàjọ, é sọ duale talẹnti atọ́n devo dogọ́. ¹⁷Mọkẹdẹ wẹ mẹhe mọ awe yí, ewọ ga sọ duale awe devo tọn. ¹⁸Ṣigba mẹhe mọ dopo lọ yí, yì bo kùndo, bo yí akuẹ klunọ etọn tọn whlá. ¹⁹To ojlẹ dindẹn de godo, klunọ afànumẹ nẹlẹ tọn gò, bo basi linlẹn po yé po. ²⁰Mẹhe mọ talẹnti atọ̀n yí wá, bo sọ hẹn talẹnti atón devo wá, bo dọmọ, Oklunọ, hiẹ yí talẹnti atọ́n na mi: pọ́n, yẹn duale talẹnti atón devo dogọ́ yé. ²¹Okluno etọn sọ dọ hlan ẹn, dọmọ, Enẹ yì dagbe, hiẹ afànumẹ dagbe nugbonọ: hiẹ yín nugbonọ to onú vude mẹ, yẹn na yí we do dogan onú susu ton: hiẹ biọ ayaje klunọ towe tọn mẹ. ²²Ewọ ga he sọ mo talẹnti awe yí sọ wá bo dọmọ, Oklunọ, hiẹ yí talẹnti awe na mi: pọ́n, yẹn sọ duale talẹnti awe devo. ²³Oklunọ etọn sọ dọ hlan ẹn, dọmọ, Enẹ yì dagbe, hiẹ afànume dagbe nugbonọ; hiẹ yín nugbonọ to onú vude mẹ, yẹn na yí we do dogán onú susu tọn: hiẹ biọ ayajẹ klunọ towe tọn mẹ. ²⁴Ewọ ga he mọ talẹnti dopo yí sọ wá, bo dọmọ, Oklunọ, yẹn yọn hiẹ dọ gbẹtọ fifiẹtọ wẹ hiẹ, hiẹ nọ gbèn to fie hiẹ ma dó do, bo sọ nọ bé pli to fie hiẹ ma vúnvún dó; ²⁵Yẹn sọ yín avosatọ bo yì, bo yí talẹnti towe whlá do okó mẹ: pọ́n, hiẹ tindo towe titi lọ. ²⁶Ṣigba Oklunọ etọn gblọn, bo dọ hlan ẹn, dọmọ, Hiẹ afànumẹ ylankan adidọnọ, hiẹ yọnẹn dọ yẹn nọ gbẹn to fie yẹn ma dó do, bo sọ nọ bé pli to fie yẹn ma vúnvún do. ²⁷Enẹwutu hiẹ jẹ nado ko yí akuẹ ṣie hlan akuẹdiọtọ lẹ, whenuena yẹn gò na yẹn nido mọ onú ṣie yí po linlan po. ²⁸Enẹwutu mi yí talẹnti lọ sọn e si, na mì ni yí na mẹhe tindo talẹnti ao. ²⁹Na mẹdepope he tindo wẹ yè na na, bọ é nasọ tindo sugege: ṣigba sọn mẹhe ma tindo si wẹ yè na yí yèdọ ehe é tindo te. ³⁰Mì sọ zé afànume madoalenọ lọ dlọn zinvlu mẹ to gbonu, finẹ wẹ avi po adukúnkún po na te.

³¹Ṣigba whenuena Ovi gbẹtọ tọn na wá to gigo etọn mẹ, po angẹli lẹpo po e po, whenẹnu we é na sinai to ofìn gigo etọn tọn ji. ³²Nukọn etọn wẹ yè na bé akọta lẹpo pli do: é nasọ klán yé dovo sọn yénọzo go, dile lẹngbọhọtọ nọ klán lẹngbọ etọn lẹ sọn gbọgbọẹ lẹ go do. ³³E nasọ yí lẹngbọ lẹ do adusilọ etọn mẹ, ṣigba gbọgbọẹ lẹ do amiyọn mẹ. ³⁴Whenẹnu wẹ Ahọlu na dọ hlan yé mẹhe to adusilọ etọn mẹ lẹ, dọmọ, Mì wá, mì donanọ Otọ́ ṣie tọn, mì dugú aholudu he yè ko wleawu etọn dai na mì sọn dòdó aihọn tọn wá. ³⁵Na huvẹ to hùhù mì, mì na núdùdù mi: nugbla to hùhù mi, mì na núnùnù mi: yẹn yín jonọ, mì yí mi do whégbè: ³⁶Yẹn to omé, mì ṣinyọ̀navọ̀na mi: yẹn jẹazòn, mì sọ pọ́n ogo e: yẹn tin to gànwhé, mì sọ wá dẽ. ³⁷Whenẹnu wẹ dódónọ lẹ na gblọnna ẹn, dọmọ, Okluno, whetẹnu wẹ mìwlẹ mọ bọ huvẹ to hùhù we, bo na núdùdù we? Kavi bọ nugbla to hùhù we, bo na núnùnù we? ³⁸Whetẹnu wẹ mìwlẹ mọ hiẹ yín jonọ, bo yí we do whégbè? kavi bọ hiẹ to ome, bo ṣinyọ̀navọ̀na we. ³⁹Kavi whetẹnu wẹ mìwlẹ mọ hiẹ to azónjẹ kavi to gánwhé, bo wá de we? ⁴⁰Ahọlu na sọ gblọn, bo dọ hlan yé, dọmọ, Nugbo wẹ yẹn dọ hlan mì, Le mìwlẹ basi i hlan dopo to mẹmẹsunnu ṣie helẹ mẹ, yèdọ pẹvipete helẹ yẹn wẹ mì basi i hlan. ⁴¹Whenẹnu wẹ é na dọ ga hlan mẹhe to amiyọnlọ mẹ lẹ dọmọ, Mì fọ́nyì sọn dẽ to dẹhodo de glọ, biọ ozò madopodo mẹ, he yè ko wleawu etọn dai na aovi po angẹli etọn lẹ po. ⁴²Na huve to hùhù mi, mì ma na núdùdù mi: nugbla to hùhù mi, mì ma na núnùnù mi. ⁴³Yẹn yín jonọ, mì mẹ yí mi do whégbè: yẹn jẹ omé, mì ma ṣinyọ̀navọ̀na mi; yẹn jẹazón, podọ to ganwhe, mì ma sọ pọn ogo e. ⁴⁴Whenenu wẹ yewlẹ ga nasọ gblọn, dọmọ, Oklunọ, whetẹnu wẹ mìwlẹ mọ bọ huvẹ to hùhù we, kavi bọ nugbla to hùhù we, kavi bọ hiẹ yín jonọ, kavi bọ hiẹ to omé, kavi jẹazòn, kavi to gànwhé, bo ma yílizọn hlan we? ⁴⁵Whenẹnu wẹ é na gblọnna yé, dọmọ, Nugbo wẹ yẹn dọ hlan mì, Le mìwlẹ ma ko basi i hlan omẹ pẹvi pete helẹ, yẹn wẹ mì ma wà ẹ hlan. ⁴⁶Podọ ehelẹ wẹ na juyì oya madopodo mẹ; ṣigba dódónọ lẹ biọ ogbẹ madopodo mẹ.

¹E sọ wá jọ whenuena Jesu dota na ohó helẹ pó, é dọ hlan nuplọntọ etọn lẹ, dọmọ, ²Mìwlẹ yọnẹn dọ to azán awe godo azán hunwhẹ juwayì tọn ja, yè nasọ dè Ovi gbẹtọ tọn hia omẹ nado whè e do satin go. ³Whenẹnu wẹ ogán yẹwhenọ lẹ tọn, po wekantọ lẹ po, po mẹho gbẹtọ lẹ tọn lẹ po, pli to awànu yẹwhenọ daho tọn mẹ, mẹhe yè nọ ylọ dọ Kaifa, ⁴Yé sọ lẹnayiha dopọ na yé nido yí oyé do wlé Jesu, bo nado hù i. ⁵Ṣigba yé dọmọ, Lala, é ma yín tọ azán hunwhẹ tọn gbè gba, na zingidi niká fọ́n to gbẹtọ lẹ ṣẹnṣẹn.

⁶Dinvie Whenuena Jesu tin to Bẹtani to owhé Simoni pòtọnọ tọn gbè, ⁷Finẹ wẹ nawe de wá e de te he tindo agbán alabasta núsisa akuẹ gegenu tọn de, bo kòn ẹn do ota etọn ji, le é jagla to núdùdù kón. ⁸Ṣigba whenuena nuplọntọ lẹ mọ ẹn yé tindo homẹgble dòmọ, Etẹwẹ yè to onu he hẹn gú na? ⁹Na yè do ko sà núsisa he yín akuẹ susu, bo do nanu wamọnọ lẹ. ¹⁰Ṣigba Jesu mimọ ẹn hlan do hlan ye, dọmọ, Etẹwutu wẹ mì to tuklado nawe lo? naazón dagbe dewẹéwàdoogo e. ¹¹Na mìwlẹ tindo wamọnọ lẹ to mì de to whepoponu; ṣigba mìwlẹ ma tindo mi to whepoponu gba. ¹²Na ehe é kon núsisa do agbasa ṣie ji, é basi i na siọdidi ṣie. ¹³Nugbo we yẹn dọ hlan mì, Fidepope yè na dọ yẹwheho wẹndagbe he tọn te to aihọn lẹpo mẹ, finẹ ga wẹ yè na dọhó onú he nawe he basi tọn te na òfìin etọn de.

¹⁴Whenẹnu wẹ dopọ́ to omẹ wiawe lẹ mẹ, he yè nọ ylọ dọ Juda Iskaliọti, yì ogán yẹwhenọ tọn lẹ de, ¹⁵Bo dọ hlan ye, dọmọ, Etẹwẹ mìwlẹ to jijlo na na mi, yẹn nasọ yí i do alọ me na mì? Yé sọ jlẹ fataka-kuẹ ogbàn hlan ẹn. ¹⁶Son ojlẹ nẹ mẹ wẹ é ko to tẹnmẹ din nado dè e hia.

¹⁷To azán tintan hùnwhe akla madoton tọn gbè, nuplọntọ lẹ wá Jesu de, dọmọ, Fie we hie jlo na mí ni wleawu do na we nado dù juwayì? ¹⁸E sọ dọmọ, Mì biọ oto daho mẹ yì dawe dele de, bo dọ hlan ẹn dọmọ, Mẹplọntọ dọmọ, Ojlẹ ṣie sẹpọ́; yẹn naso basi juwayì to owhé towe gbè po nuplontọ ṣie lẹ po. ¹⁹Nuplọntọ lẹ sọ basi dile Jesu degbèna yé do; yé sọ wleawu juwayì tọn dai. ²⁰Dinvie whenuena tenu do, é jagla po omẹ wiawe lẹ po. ²¹Le yé to nudù, é dọmọ, Nugbo wẹ yẹn dọ hlan mì dọ, dopo to mì mẹ na dè mi hia ²²Yé sẹ̀ blawú susu, bo sọ só didọ hlan ẹn omẹ dopodopo dọ, Oklunọ, yẹn wẹ la? ²³E sọ gblon bo dọmọ, Mẹhe do alọ etọn agbán mẹ hẹ mi, doponẹlọ wẹ na dè mi hia. ²⁴Ovi gbẹtọ tọn jei yèdọ dile yè wlanwe ewọ tọn do; ṣigba dindọn hlan dawe lọ mẹhe mẹ yè dè Ovi gbẹtọ tọn hia gbọn. Dagbe e yín na dawe nẹ eyín yè ma ko ji i. ²⁵Podọ Juda, mẹhe dè e hia, gblọn bo dọmọ, Mẹplọntọ, yẹn wẹ la? E sọ dọ hlan ẹn, dọmọji Hiẹ ko dọ. ²⁶Le yé to núdù, Jesu yí akla bo dona, bo sọ kán ẹn, bo yí na nuplọntọ etọn le, bo dọmo, Yí, dù; ehe wẹ agbasa ṣie. ²⁷E sọ yí kofo de, bo dopé, bo sọ yí na yé, bo dòmọ, Mì omẹ pó ni nù to e mẹ ²⁸Na ehe wẹ ohùn ṣie alènu yọ́yọ́ lọ tọn, he yè kòn dai na omẹ susu hlan odèsè ylando tọn. ²⁹Ṣigba yẹn dọ hlan mí, Sọn dinvie yì, yẹn ma na nù to sinsẹ́n vẹn tọn he mẹ ba, kaka jẹ azán nẹ gbè, whenuena yẹn na nù i hẹ mì to yọ́yọ́ mẹ to ahọludu Otọ́ ṣie tọn mẹ.

³⁰Whenuena yé ko sọ ji ohàn dopo, yé tónjẹgbonu yì osó olivie tọn kòn.

³¹Whenẹnu wẹ Jesu dọ hlan ye, dọmọ, Mì omẹ pó wẹ Yè na hẹn dahli to yẹn mẹ to ozán he mẹ: na yè wlanwe dọ, 1 Yen na linu lẹngbọhọtọ, lẹngbọ lẹngbọpa tọn lẹ nasọ gbapé ³²Ṣigba to ehegodo yen fón, yẹn na jẹnukọn na mì yì Galili. ³³Ṣigba pita gblọn, bo dọ hlan ẹn, dọmọ, Ẹyin yè na hẹn mẹpopo dahli to hiẹ me, yè ma tọ na hẹn yẹn dahli gbède. ³⁴Jesu sọ dọ hlan ẹn dọmọ, Nugbo wẹ yẹn dọ hlan we dọ, To ozán he me, whẹpo koklo na dose, hiẹ na món mi whla atọ̀n. ³⁵Pita sọ dọ hlan ẹn, dọmọ, Yèdọ eyín yẹn mananọma kú po hiẹ po, yẹn ma na món we gbède. Mọkẹdẹ wẹ nuplọntọ lẹpo dọ ga.

³⁶Whenẹnu wẹ Jesu po yé po wá ofi de he yè nọ ylọ dọ Gẹtsemani, bo sọ dọ hlan nuplọntọ etọn lẹ, dọmọ, Mi sinai to ofi, whenuena yen yì dèho gbé to odon ³⁷E sọ yí Pita po ovisunnu awe Zebedé tọn lẹ po e po, bo sọ sẹ nado yín awúblanọ, podọ tuklanọ badabada. ³⁸Whenẹnu wẹ é dọ hlan yé, dọmọ, Alindọn ṣie yín awublanọ susu, yèdọ kaka jẹ okú mì nọte to ofi, na mì ni to alihó hẹ mi. ³⁹E sọ yì nukọn pẹvide, bo hó jẹ nukunmẹ etọn ji, bo hodẹ, dọmọ, Otọ́ ṣie E, eyin é sọgan yín wiwà, gbọ kọfo he ni juwayì sọn oji e: é ma yín le yẹn jlo do gba, adavo le hiẹ jlo do. ⁴⁰E sọ wá nuplọntọ lẹ de, bo mọ yé to amlọndọ, é sọ dọ hlan Pita, dọmọ, Etẹ, mìwlẹ ma sọgan hóali hẹ mi to ojlẹ dopo mẹ gba. ⁴¹Mì nọ hóali, bo sọ nọ hodẹ, na mì ma na do biọ whlepón mẹ: nugbo wẹ gbigbọ to jijlo, ṣigba agbasa yín madogánnọ. ⁴²E sọ vó gò yì whla, awetọ, bo sọ to dẹho, dọmọ, Otọ́ ṣie È, eyín ehe ma sọgan juwayì, adavo yẹn nù i, ojlo towe ni yín wiwà. ⁴³E sọ vó wá, bo sọ mọ yé to amlọndọ: na nukun yetọn lẹ yín pinpẹn na amlọn. ⁴⁴E sọ jo yé dai, bo sọ vó gò yì, é sọ hodè whla atọ̀ntọ, bo to ohó daponẹ lẹ dọ. ⁴⁵Whenẹnu wẹ é wá nuplọntọ lẹ de, bo dọ hlan ye, dọmọ, Mì to amlọndọ, bo sọ gbọjẹ zọnmi lò: pọ́n, ojlẹ sẹpọ́ yè bo dè Ovi gbẹtọ tọn hia do alọ ylandonọ lẹ tọn lẹ mẹ. ⁴⁶Mì tite, mì gbọ mí ni to yìyì: pọ́n, ewọ he dè mi hia sẹpọ́.

⁴⁷Le é to hódọ, pọ́n, Juda, dopo to omẹ wiawe lẹ mẹ, wá, podọ to e de agundaho de, po ohi lẹ po, po aglọpo lẹ po, sọn ogán yẹwhenọ lẹ tọn de, po mẹho gbẹtọ lẹ tọn po de. ⁴⁸Dinvie ewọ mẹhe dè e hia, ko na ohia de ye, dọmọ, Mẹdepope yẹn na donùnùgona, enẹ wẹ ewọ: mì wlé ⁴⁹Afodoponẹji é wá Jesu de, bo sọ dọmọ, Oyínjla, Meplọntọ; bo sọ donùnùgo nẹ. ⁵⁰Jesu sọ dọ hlan ẹn, dọmọ, Hóntọn, wà enẹ he yè hẹn we wá na? Whenẹnu wẹ yé wá, bo zé alọ do Jesu go, bo sọ wlé e. ⁵¹Pọ́n, dopo to mẹhe tin to Jesu de le mẹ dlen alọ etọn, bo dòn ohi etọn, bo linu afànumẹ yẹwhenọ daho tọn de, bo sọ sán otọ́ etọn dlangbé. ⁵²Whenẹnu wẹ Jesu dọ hlan ẹn, dọmọ, Yí ohi towe dó otẹn etọn mẹ; na mẹhe zé ohi lẹ pó wẹ na dòn po ohi po. ⁵³Kavi hie lẹn dọ yẹn ma sọgan vè Otọ́ ṣie, bọ é na do hú awhanpa angẹli le tọn wiawe yèdọ hlan mi? ⁵⁴Whenẹnu nawẹ Owe wiwe lẹ na di do, dọ le wẹ é mananọma yín? ⁵⁵Tó ojle nẹ mẹ we Jesu dọ hlan agùndaho lẹ lọ lẹ, dọmọ, Mìwlẹ tón ja wiwlé mi gbé di ajotọ, po ohi lẹ po, po aglopo le po? egbesọ wẹ yẹn nọ sinai hẹ mì to tẹmpli, mẹ, do to meplọn, mì ma sọ wlé mi gbède. ⁵⁶Ṣigba onú helẹ pó jọ, na yè nido hẹn Owé wiwe yewhegán lẹ tọn di. Whenẹnu wẹ nuplọntọ lẹpo jo e dai, bo hòn yì.

⁵⁷Ye mẹhe wlé Jesu lẹ́, dòn ẹn yì owhé Kaifa yẹwhenọ daho tọn gbè, fie wekantọ lẹ, po mẹho lẹ po pli do. ⁵⁸Ṣigba Pita hodo e to aganu jẹ awánu yẹwhenọ daho tọn mẹ, bo sọ biọ họmẹ, bo sinai hẹ lizọnyítọ lẹ nado mọ opòdo etọn. ⁵⁹Dinvie ogán yẹwhenọ le tọn, po mẹho lẹ po, po tòhódọtọ lẹpo po to kunnudetọ lalonọ din do Jesu go na yé nido hù i; ⁶⁰Yé ma mọ ẹn, le kunnudetọ lalonọ susu wá sọ. Ṣigba togodomẹ awe wá, ⁶¹Bo dọmọ, Dawe he dọmọ, Yen tin sọgan nado và fiwiwe Jiwheyẹwhe tọn súdo, podọ nado dó e to azán atọ̀n mẹ. ⁶²Yẹwhenọ daho sọ fọ́n ṣite, bo dọ hlan ẹn, dọmọ, Hiẹ ma gblọn nudepope? Etẹwẹ ehe omẹ helẹ to kunnude do ogo we he? ⁶³Ṣigba Jesu nabọe Yẹwhenọ daho sọ dọ hlan ẹn dọmọ, Yẹn do Jiwheyẹwhe ogbẹ̀nọ we, dọ hiẹ ni dọ na mí, eyín hiẹ wẹ Klisti lọ, Ovi Jiwheyẹwhe tọn. ⁶⁴Jesu sọ dọ hlan ẹn, dọmọ, Hiẹ ko dọ: ṣógan yẹn sọ dọ hlan mì, Sọndinvie mìwlẹ na mọ Ovi gbẹtọ tọn sinai to adusilọ huhlọn, tọn mẹ, bo sọ ja to aslọ olọn tọn lẹ ji. ⁶⁵Whenẹnu wẹ yẹwheno daho tlẹn awugbó etọn lẹ, bo dọmọ, E zannù: eté mí sọ to kunnudetọ lẹ din na dinvie? pọ́n, mìwlẹ ko sè nùzinzan etọn ⁶⁶Be etẹwẹ mì lẹn? Yé gblọn domọ, Ewọ jẹ na okú. ⁶⁷Whenẹnu wẹ ye túntán do nukunme nẹ, bo tùnakotokún in: ome devo lẹ sọ yí alọhòmẹ yetọn do hotóme nè, ⁶⁸Dọmọ, Dọdodai hlan mí, hiẹ Klisti, Mẹnu wẹ ewọ he linu we?

⁶⁹Dinvie Pita sinai to gbonu to awánu: awhli de sọ wá e de, bo domọ, Hiẹ ga tin to Jesu Galili tọn de. ⁷⁰Ṣigba é món to yé omẹ pó nukọn, dọmọ, Yẹn ma yọ́n onú he hiẹ to didọ gba. ⁷¹Podọ whenuena é sọ tón jẹ togunmẹ, awhli devo sọ mọ en, bo dọ hlan yé mẹhe tin to finẹ lẹ, dọmọ, Dave he tin to Jesu Nazaìẹti tọn de ga. ⁷²E sọ yí whiwhle de do vó món, dọmo, Yẹn ma yón dawe lọ gba. ⁷³To whenu vude godo, mehe nọte to fine lẹ sọ wá, bo dọ hlan Pita, dọ, Sọn nugbo de mẹ, dopo to yé mẹ we hie ga; na hogbè towe dè we hia. ⁷⁴Whenẹnu wẹ é sè dẹhodo bo sọ to whiwhle, Yẹn ma yón dawe lọ gba. To afọdoponeji koklo dose. ⁷⁵Pita sọ flin ohó he Jesu ko do, Whẹpo koklo na dose, hiẹ na más mi whla atón. E sọ tónjẹgbonu, bo viavi badabada.

¹DINVIE whenuena é zùn afọnnu, ogán yẹwhenọ tọn le, po mẹhe gbẹtọ lẹ tọn lẹ po le kanayiha do Jesu go nado hù i. ²Yé sọ bla ẹ, bo plan ẹn yì, bo sọ jo e na Pọntiu Pilati ọtògán lo.

³Whenẹnu wẹ Júda, mehe dè e hia, whenuena é mọ dọ yè gblewhẹdo e, diọlinlen na ede, bo sọ henfataka-kuẹ ogbàn lẹ gò wá ogán yẹwhenọ lẹ ton, po mẹho lẹ po de, ⁴Domọ, Yẹn ko wàylan to ehe mẹ yẹn dè ohùn dódónọ hia te. Sigbá yéwlẹ dọmo, Etẹwẹ enẹ hlan mìwlẹ? hiẹ ni payiha enẹ: gó. ⁵E sọ bé fatakakuẹ lẹ lọ kòn do aigba to fiwiwe lọ me, bo sọ tón yì, bo dokankò na ede. ⁶Ogán yẹwheno tọn lẹ sọ yí fàtaka kuẹ lẹ lọ, bo dọmọ, E ma jẹ yè ni bé yé do adọkun potin me gba, le e yín akue ohùn tọn lẹ. ⁷Yé sọ kanayiha, bo yí do hò aigba zẹnmẹtọ tọn, nado nọ di osiọ onọ lẹ tọn do e mẹ. ⁸Enẹwutu wẹ yè do nọ ylọ aigba lọ dọ, Aigba ohùn tọn kaka jẹ egbé. ⁹Whenẹnu we ehe yè dọ gbọn Jẹlemia yẹwhegán mẹ do di, dọmọ, 1 Yé yí fataka-kuẹ ogbàn, akuẹ mẹhe yè doahina tọn, mẹhe ovi Islaeli tọn dẽlẹ doahina; ¹⁰Yé sọ jo yé na oglegbo zẹnmẹtọ tọn, dile Oklunọ dè na mi do.

¹¹Dinvie Jesu sọ nọte to tògán nukọn: togán sọ kanbiọ ẹ dọmọ, Be hiẹ wẹ Ahọlu Ju lẹ tọn? Jesu sọ dọ hlan ẹn, dọmọ, Hiẹ dọ. ¹²Whenuena yè sọ to stslẹ ẹ gbọn ogàn yẹwhenọ lẹ tọn, po mẹho lẹ po de, é ma gblọn núde hlan ẹn. ¹³Whenẹnu wẹ Pilati dọ hlan ẹn, dọmọ, Be hiẹ ma sè onú susu he yé do to kunnude do okò na we? ¹⁴E ma sọ na ogblọndo de e yèdọ jẹ ohó dopo: sọmọ bọ awuji tògán talala. ¹⁵Dinvie to hunwhẹ de me tògán do walọ nado dè gantọ dopo dai hlan yé, mẹhe yé jlo. ¹⁶Whenẹnu yé tindo gántọ he diyín de, he yè nọ ylọ dọ Balabas. ¹⁷Enẹwutu, whenuena yé pli dopọ, Pìlati dọ hlan yé, dọmọ, Mẹnu wẹ mìwlẹ jlo dọ yẹn ni dè dai hlan mì? Balabas, kavi Jesu he yè nọ ylọ dọ Klisti? ¹⁸Na é yọnẹn dọ núvẹun wẹ yé yí i do alọ mẹ nó na. ¹⁹Whenuena é sinai to ofìn whẹ̀da tọn ji, asi etọn dowẹn hlan ẹn dọmọ, A yí gbẹtẹ dódónọ nẹ do wà núde blo: na yẹn ko duya na onú susu to egbé to odlọ mẹ na ewọ tọn wutu. ²⁰Dinvie ogán yẹwhenọ lẹ tọn, po mẹho lẹ po do agùndaho lẹ lọ na yé nido biọ Balabas, bo và Jesu súdo. ²¹Ṣigba otògán gblọn, bo dọ hlan yé, dọmọ, To yé omẹ awe lẹ mẹ, mẹnu wẹ mìwlẹ jlo na yẹn ni dè dai hlan mì? Yé sọ dọmọ, Balabas. ²²Pilati sọ dọ hlan yé dọmọ, Etẹwẹ yẹn na wà do Jesu mẹhe yè nọ ylọ dọ Klisti? Yé omẹ pó sọ dọmọ, Gbọ ewọ ni yín whiwhe do satin go. ²³Ewọ sọ dọmọ, Etẹwutu, oylan tẹwẹ é wà? Ṣigba yé sọ dawhá húmọ dọmọ, Gbọ ewọ ni yín whiwhe do satin go. ²⁴Mọwẹ whenuena Pilati mọ dọ é ma sọgan yíta to nudepope mẹ, ṣigba dọ finfọn jànwẹ zingidi de te, é yí osìn, bo kló alọ etọn to agùndaho lọ nukọn, bo dọmọ, Yẹn yín homẹvọnọ to ohùn dawe dódónọ he tọn mẹ; mì payi e go. ²⁵Gbẹtọ lẹpo gblọn, bo dọmọ, Ohùn etọn ni tin to mí ji, podọ to ovi mìtọn lẹ ji. ²⁶Whenẹnu wẹ é dè Balabas dai hlan yé: ṣigba é hò Jesu, bo jo e nado yín whiwhe do satin go.

²⁷Whenẹnu wẹ awhanvipẹ otògàn tọn lẹ hẹn Jesu biọ gbàngan whẹ̀da tọn mẹ, bo bé awhanpa lẹpo pli do e de. ²⁸Yé sọ dè avọ̀ sọn e go, bo do awù vẹ̀ nẹ̃. ²⁹Yé sọ lòn ojẹgbakun owùn tọn de, bo yí i ṣinyọn ota nẹ̃, po ofánpo de po do adusilọ etọn mẹ; yé sọ jẹklo to nukọn etọn, bo to vivlẹ ẹ ko, dọmọ, Oyínjla, Ahọlu Ju lẹ tọn! ³⁰Yé sọ túntán do e go, bo yí ofánpo lọ, bo sọ li ota nẹ̃. ³¹Whenuena yé ko vlẹ ẹ vó, yé dè awù lọ sọn é go, bo sọ yí avọ́ etọn do nẹ, bo sọ hẹn ẹn jẹgbonu nado whè e do satin go.

³²Le yé tón wá, yé mọ dawe Silene tọn de, he yè nọ ylọ dọ Simoni: ewọ wẹ yé yí huhlọn do hẹn nado yì po yé po, na ewọ nido hẹn satin etọn. ³³Whenuena yé jẹ ofi he yè nọ ylọ dọ Gọlgọta, enẹ wẹ taka tẹnmẹ, ³⁴yé na ovẹ̃n ewọ nado nù, he yè kọndopọ po vivẹ po: whenuena é dó ẹ pọ́n, é ma jlo na nù. ³⁵Yé sọ whè e do satin go, bo má avọ̀ etọn, vòdidè lẹ mẹ: na ehe yè dọ gbọn yẹwhegán mẹ nido di, dọ, Yé má avọ̀ ṣie to yé ṣẹnṣẹn to vòdidè lẹ mẹ. ³⁶Ye sọ sinai, bo to hihó ẹ to finẹ: ³⁷Yé sọ yí do ota etọn ji meslehó eton winwlan, EHE WẸ JESU AHỌLU JÚ LẸ TỌN. ³⁸Whenẹnu wẹ yé whè ajotọ awe do satin go po e po, dopo to adusilọ mẹ, awetọ to amiyọnlọ mẹ. ³⁹Mẹhe sọ to jujuwayì lẹ sọ to vivlẹ ẹ ko, bo to ota yetọn mimí, ⁴⁰dọmọ, Hiẹ mẹhe hó fiwiwe lọ bo sọ dó e to azán atọ̀n mẹ, whlẹn dewe. Eyín hiẹ yín Ovi Jiwheyẹwhe tọn, jẹte sọn satin go. ⁴¹Mọkẹdẹ wẹ ogán yẹwhenọ lẹ tọn ga to vivlẹ ẹ ko, po wekantọ lẹ po, po mẹho lẹ po, dọmọ, ⁴²E nọ whlẹn omẹ devo lẹ; é ma sọgan whlẹn ede. Eyín ewọ yín Ahọlu Islaeli tọn, ni jẹte sọn satin go dinvie, mìwlẹ nasọ yí i se. ⁴³E dotu to Jiwheyẹwhe mẹ: gbọ e ni whlẹn ẹn gán dinvie eyín é yiwan nẹ̃: na é dọmọ, Ovi Jiwheyẹwhe tọn wẹ yẹn. ⁴⁴Podọ ajotọ lẹ ga, he yè whè do satin go po e po, to vivlẹ ẹ ko to ohó dopolọ mẹ.

⁴⁵Dinvie sọn ogàn sidopotọ mẹ, wẹ zinvlu de do ṣinyọn aigba lẹpo ji, kaka jẹ ogàn sinẹnẹtọ mẹ. ⁴⁶To ogàn sinẹnẹtọ mẹ Jesu yí ogbè léló de do dawhá dọmọ, ELI, ELI, LAMA SABAKTANI? enẹ wẹ, Jiwheyẹwhe ṣie, Jiwheyẹwhe ṣie, etẹwutu wẹ hiẹ gbé mi dai? ⁴⁷Mẹdẽlẹ to mẹhe site to finẹ lẹ mẹ, whenuena yé sè ehe j e dọmọ, Dawe he to Eli ylọ. ⁴⁸To afọdoponẹji dopo to yé mẹ họnwezun, bo yí hùmẹtekan de, bo yi ovẹ̃n he vẹsìn do gó ẹ, bo sọ yí i do ofánpo ji, bo yí na ẹn nù. ⁴⁹Omẹ pipòtọ lẹ sọ dọmọ, Mì jo e do, na mí ni pọ́n, eyín Eli na wá whlẹn en. ⁵⁰Jesu sọ vọ́ yí ogbè lélé de do dawha, bo jo gbigbọ etọn do ⁵¹Bo pọ́n, avọ̀ yè do gbòabò fiwiwe lọ tọn sọ tlẹn do awe sọn aga jẹ odò; aigba whan gigi, osé lẹ sọ zẹ̀; ⁵²oyòwhé lẹ sọ hùn do nuvo: osiọ susu omẹ wiwe he ko damlọn le tọn fọ́n, ⁵³bo tón sọn olido lẹ mẹ jegbonu to fọ́nsọnku etọn godo, bo so biọ otò daho wiwe lọ mẹ, bo sọ awuhia omẹ susu. ⁵⁴Dinvie whenuena mekanwekowhangán, po yé he tin to e de bo to Jesu hó lẹ po, mọ aigba whinwhàn lọ, po onú he jọ nẹlẹ po, obu diye talala, ye dọmọ, Nugbo, Ovi Jiwheyẹwhe tọn wẹ ehe. ⁵⁵Yọnnúsi susu wẹ tin to finẹ, bo to nupón to aganu yé mehe hodo Jesu sọn Galili, bo to lizọnvi nẹ lẹ: ⁵⁶Yé mehe mẹ Malia Magdaleni tin te, podọ Malia onọ Jakobu po Josesi po tọn, po onọ ovi Zẹbede tọn lẹ po.

⁵⁷Whenuena tenu sọ do, dawe adọkunno de sọn Alimaté wá, he yè no ylọ dọ Josẹfu, mẹhe, ewlọsu ga ko yin nuplọntọ Jesu tọn: ⁵⁸Dawe he yì Pilati de, bo biọ osiọ Jesu tọn. Whenenu wẹ Pilati nasẹ e nado yín jijo. ⁵⁹Josefu so zé osiọ lọ, bo bla ẹ do alavọ wiwe de mẹ. ⁶⁰Bo sọ té e do oyọ̀whé yọ́yọ́ ewlọsú tọn mẹ, ehe yè kùn to osó mẹ; é sọ bli osé daho do ohòn oyọ̀whé lọ tọn ji, bo sọ tọ́n yì. ⁶¹Malia Magdaleni tin to finẹ, po Malia awetọ po, yé sinai sẹpọ olidò lọ.

⁶²To azán awetọ gbè, ehe hodo azán awuwle tọn, ogán yẹwhenọ lẹ tọn, pó Falesi lẹ po wá plidopọ do Pilati de, ⁶³Dọmọ, Baba, mìwlẹ flin dọ mẹklọtọ nẹ dọ whenuena é tin to ogbè, dọmọ, To azán atọ̀n godo yẹn na fọ́n. ⁶⁴Enẹwutu degbèna yè ni payi olidò lọ go dagbedagbe kaka jẹ azán atọ̀ntọ gbè, nuplọntọ etọn lẹ tika wá to ozán mẹ bo fìn in sọ yì, bo na dọ hlan gbẹtọ lẹ, dọmọ, E fọ́n sọn osiọ lẹ mẹ: bubu godometọn bo na ylan hú nukọntọn. ⁶⁵Pilati sọ dọ hlan yé, dọmọ, Mì tindo hihọtọ: mì yì, na mì ni basi dagbedagbe dile mì sọgan do. ⁶⁶Mọwẹ yé yì, bo sọ hẹn olidò lọ diun, bo dohia osé lọ go, bo sọ dè hihọtọ do e kọ̀n.

¹DINVIE to opòdo gbọjezángbè tọn, le ai azán tintan awlen tọn sẹ hinhọ́n, Malia Magdaleni po Malia awetọ po wá nado pọ́n olidò lọ. ²Bo pọ́n, aigba whinwhàn daho de tin: na angẹli Oklunọ tọn de jẹte sọn olon mẹ, bo wá bo bli osé lọ sọn hòntonu, bo sinai do e ji. ³Awusọhia etọn tin di abì, podọ avọ̀ etọn wéwó di osìn-ago: ⁴Podọ na òsi etọn tọn, hihọtọ lẹ whàn, bo sọ taidi osiọ. ⁵Angeli lọ sọ gblọn, bo dọ hlan yọnnu lẹ, domọ, Mì dibu blo: na yẹn yọnen dọ mì to Jesu din, he yè whè do satin go. ⁶Ewọ ma tin to ofi gba; na é fọ́n, yedọ dile é dọ do, mì wá pọ́n fie Oklunọ mlọnai te. ⁷Mì bo yawu yì dọ na nuplọnto etọn lẹ, dọ, E fọ́n sọn osiọ lẹ me, bo pọ́n, é jenukon na mì jei Galili finẹ wẹ mì na mọ en te mì pọ́n, yẹn ko dọ na mì ⁸Yé sọ yí obu po homehùnhùn daho po do yawu tón sọn oyówhé kòn; bo sọ họnwezun nado hẹn ohó wá nuplọntọ etọn le de. ⁹Bo, do ayi e go, Jesu pé yé, bo dọmọ, Oyínjla. Yé sọ wá, bo hẹn afọ etọn go, bo litai nẹ̃. ¹⁰Whenẹnu wẹ Jesu dọ hlan yé, dọmọ, Mì dibu blo: mì yì dọ na mẹmẹsunnu ṣie lẹ, na yé ni fọ́n yì biọ Galili, podọ finẹ wẹ yé na mo mi te.

¹¹Dinvie Whenuena yé jei, do ayi e go, mẹdelẹ to hihọtọ lẹ mẹ wá otò daho mẹ, bo yí onú he jọ helẹ pó dọ hlan ogán yẹwhenọ lẹ tọn. ¹²Whenuena yé plidopọ po mẹho lọ po, bo sọ lẹnayiha, yé na akuẹ susu hlan awhanvipẹ lẹ, ¹³Dọmọ, Mì dọ, Nuplọntọ etọn lẹ wá to ozán mẹ, bo fìn in zé yì whenuena mí damlọn. ¹⁴Eyín ehe jẹ sisè de mẹ to otògán lọ nukọn, mìwlẹ na doalọtún in, bo whlẹn mì sọn tuklajẹ mẹ. ¹⁵Mọwẹ yé yí akuẹ lọ, bo sọ basi kẹdedile yè plón yé do: podọ ohó he sọ dipé Ju lẹ mẹ kaka jẹ egbé.

¹⁶Ṣigba nuplọntọ widopo lẹ tón yibiọ Galili, jẹ osó he Jesu dọ na yé kọ̀n. ¹⁷Whenuena yé mọ ẹn, yé litai nẹ̃: ṣigba mẹdelẹ tin to ayi awe mẹ. ¹⁸Jesu sọ wá yé de, bo dọ hlan yé, dọmọ, Aṣẹ lẹpo wẹ yè ko jo hlan mi to olọn mẹ podọ to aigba ji. ¹⁹Enewutu mì yi, bo hẹn akọta lẹpo zùn nuplọntọ, bo sọ nọ baptizi yé to oyín Otọ tọn, po Ovi tọn po, po Gbigbọ Wiwe tọn po mẹ ²⁰Na mì sọ nọ plón ye na do nọ doayi onu lẹpo go, nudepopẹ he ẹn degbena mi; bọ pọn yẹn to mi to whẹpoponu, kaka jẹ opodo aihọn tọn. Niṣẹ.