Luku

¹LE omẹ susu ko yí do alọ mẹ nado wlan otàn onú nẹle tọn dopodopo he yè ko hẹn se to mí ṣẹnṣẹn, ²Yèdọ dile yé he yín kunnudetọ lẹ po divizónwàtọ ohó lọ tọn lẹ po sọn whéwhéwhenu yí yé do alọ mẹ na mi do; ³E jẹ na mi ga, bọ yẹn ko dafọna onú lẹpo gbọn ganjiganji sọn dòdó, nado wlan owé hlan we whinnuwhinnu, hiẹ Teofil gigonọ daho, ⁴Na hiẹ nido yón nugbo gbọn ohó lẹ lọ tọn dali ehè mẹ yè plón we te.

⁵To Hẹlọdi ahọlu Jude ton whenu, yẹwhenọ de tin, oyín etọn wẹ Zakali, to Abia hennu; asi etọn basi dopo to Aalọn viyọnnu lẹ mẹ, oyín etọn sọ nọ yín Elizabẹti. ⁶Yé omẹ awe lẹ sọ yín dódónọ to Jiwheyẹwhe nukọn, yé to zọnlinzin to osén po ali Oklunọ tọn lẹpo po me mablu. ⁷Yé ma ji ovi, na Elizabẹti jọ wènsino, yé omẹ awe le sọ poyọnho. ⁸Dinvie e sọ wá jo whenuena é to yẹwhẹnọzon wà to Jiwheyẹwhe nukọn to hukan etọn mẹ. ⁹Di azon yẹwhenọ lẹ tọn, otẹn etọn wẹ nado biọ fiwiwe Oklunọ tọn mẹ, bo mè nuwhẹnkun. ¹⁰Gbẹtọ he pli lepo sọ to dèho to gbonu to nuwhẹnkun mimẹ̀ whenu. ¹¹Angẹli Oklunọ tọn de sọawúhia hlan en to finẹ, to ote to adusi agbà nuwhẹnkun tọn mẹ. ¹²Whenuena Zakali mo en, é yín tuklanọ, obu sọ jẹ e ji. ¹³Ṣigba angeli lọ dọ hlan ẹn, dọmo, A dibu blo, Zakali: na yè sè odè towe; asi towe Elizabẹti na ji ovisunnu de hlan we, hiẹ nasọ ylọ oyín etọn Johanu. ¹⁴Hiẹ na tindo homẹhùnhùn po ayajijẹ po; omẹ susu na jaya to JIJI etọn mẹ. ¹⁵Na ewọ na klo to Oklunọ nukọn, é ma to na nù ovẹ̃n kavi ahàn sinyensinyen de; é na gọ na Gbigbọ Wiwe, yèdọ sọn ohò onọ etọn tọn mẹ ¹⁶Susu to ovi Islaeli tọn lẹ mẹ wẹ é na lé do Oklunọ Jiwheyẹwhe yetọn de. ¹⁷Gbigbọ po huhlọn Eli tọn po wẹ é na yí do nukọn nẹ̃, nado lé ayiha otọ́ lẹ tọn hlan ovi lẹ de, podọ tólivẹtọ lẹ nado nọ zinzọnlin to nuyọnẹn dódónọ lẹ tọn mẹ, 1 nado wleawu gbẹtọ lẹ de tọn dote dai na Okluno. ¹⁸Zakali sọ dọ hlan angẹli lọ, dọmọ, E tẹwẹ yen na do yón ehe? Na yẹn ko poyọnho, owhè asi ṣie tọn lẹ sọ yì nukọn susu. ¹⁹Angeli lọ sọ gblọn bo dọ hlan ẹn, dọmọ, Yẹn Gabliẹli he nọ site to Jiwheyẹwhe nukọn wẹ; yẹn wẹ yè dohlan nado dọhó hlan we, podọ nado hẹn wẹndagbe helẹ wá de we. ²⁰Do ayi e go, hiẹ na zùn unbọpẹn bo ma na sọgan dọhó, kaka jẹ azán he gbè onú helẹ na jọ, na hiẹ ma yí ohó ṣie se, he na di to ojlẹ yetọn mẹ wutu. ²¹Gbẹtọ lẹ sọ nọtepọ́n Zakali, awu sọ ji yé na é dẹn to fiwiwe lọ mẹ wutu. ²²Whenuena é sọ jẹgbonu wá, é ma sọgan dọhó hlan yé: yé sọ mọhlan dọ é mọ númimọ de to fiwiwe mẹ; na é to alọ yí do to ohia basi hlan yé, bo sọ nọte makẹnu. ²³E sọ wá jọ whenuana azán yẹwhenọzón etọn tọn lẹ pé, é fọ́nyì owhé etọn gbè.

²⁴To azán nẹlẹ godo wẹ Elizabẹti asi eton mọhò, bo sọ yí ede whlá hò osùn atón, bo dọmọ, ²⁵Le wẹ Okluno wà hlan mi, to azán helẹ gbè é hùn nukun pọ́n mi, nado dè ovlẹ ṣie sọn gbẹtọ lẹ ṣẹnṣẹn.

²⁶To osùn sidopotọ mẹ yè sọ do angeli Gablieli lọ hlan sọn Jiwheyẹwhe de yì otò daho Galili tọn de mẹ, he yè nọ ylọ Nazalẹti, ²⁷Hlan awhli he yè mọdahho de hlan dawe de oyín mẹhetọn yín Josẹfu, sọn owhé Davidi tọn gbè; oyín awhli lọ tọn wẹ Malia ²⁸Angẹli lọ sọ wá e de, bo dọmọ, Oyínjla, hiẹ he mọ nukundagbe daho, Oklunọ tin to de we; donano wẹ hiẹ to yọnnu lẹ mẹ. ²⁹Whenuena é mọ ẹn, awú ma jai nẹ̃ na ohó etọn wutu, é sọ lẹn to ayiha etọn mẹ dọ, núdọdomẹ té hunkọ we ehe do yín? ³⁰Angẹli lọ sọ dọ hlan ẹn, dọmọ, A dibu blo, Malia, na hiẹ ko mọ nukundagbe to Jiwheyẹwhe de. ³¹Bo do ayi e go, hiẹ na mọho to ohò towe mẹ, bo nasọ ji ovisunnu de bo sọ ylọ oyín etọn JESU. ³²Ewọ na yín kiklo, Ovi Gigogan tọn wẹ yè na nọ ylọ ẹ: Oklunọ Jiwheyẹwhe nasọ yí ofìn Davidi otọ́ etọn tọn na en. ³³E nasọ duahọlu to owhé Jakobu tọn gbè kaka doi; ahọludu etọn ma na do pòdo. ³⁴Whenẹnu wẹ Malia dọ hlan angeli lọ, dọmọ, Nawẹ ehe na yin, whenuena yẹn ma yón sunnu gbède? ³⁵Angeli lọ sọ gblọn bo dọ hlan ẹn, dọ, Gbigbọ Wiwe na wá oji we, huhlọn Gigogan tọn nasọ ṣinyọn oyé oji we: enẹwutu ga onú wiwe he tin nado yín didètọ́n sọn hiẹ mẹ, Ovi Jiwheyẹwhe tọn yè na nọ ylọ ẹ. ³⁶Do ayi e go, Elizabẹti mẹmẹyọnnu towe ga ko mọhò ovisunnu de tọn to yọnho etọn mẹ: ehe wẹ osùn sidopotọ na ewọ he yín wónsinọ ³⁷Na pe jiwheyẹwhe po onu lẹpo wẹ vi wiwa. ³⁸Malia sọ dọmọ, Pọ́n afànumẹ yọnnu Oklunọ tọn; ni nọ hlan mi kẹdẹdi ohó towe. Angẹli lọ sọ yì sọn é de.

³⁹Malia sọ fọ́n to azán nẹlẹ mẹ, bo yawu yì biọ otò okọta tọn mẹ, to otò daho Judé tọn de mẹ; ⁴⁰Bo sọ biọ owhé Zakali tọn gbè, bo dọnúdo Elizabeti. ⁴¹E sọ wá jọ whenuena Elizabẹti sè núdọdomẹ Malia tọn, ovi whàngo to adọ̀ etọn mẹ; Elizabẹti sọ gó na Gbigbọ Wiwe; ⁴²E sọ zé ogbé etọn daga po awhá lélé de po, bo dọmọ, Donanọ wẹ hiẹ to yọnnv lẹ mẹ, donanọ wẹ sinsẹ́n adò towe mẹ tọn. ⁴³Fie wẹ ehe sọn wá jẹ dẽ, bọ onọ Oklunọ ṣie tọn nado wá yẹn de? ⁴⁴Bo pọn, le ogbè núdọdomẹ towe tọn jẹ otọ́ ṣie lẹ mẹ, ovi whàngo to adò ṣie mẹ na ayajẹ. ⁴⁵Donanọ wẹ ewọ he yise; na didi onú he yè dọ hlan ẹn sọn Oklunọ de lẹ tọn na tin fine wutu. ⁴⁶Malia sọ dọmọ,

⁵⁶Malia sọ nò e de hò osùn atọ̀n nkọ, bo sọ legò yì owhé etọn gbè.

⁵⁷Ojlẹ Elizabẹti tọn sọ pé, bọ é nado jivi; é sọ hẹn ovisunnu de jẹgbonu wá. ⁵⁸Kọmẹnu etọn lẹ, po mẹmẹ etọn lẹ pọ sè dọ Oklunọ ko jlayinna lẹblanu etọn hlan ewọ dali; yé sọ jaya hẹ ẹ. ⁵⁹E sọ wá jọ to azán sinatòntọ gbè, wẹ yé wá nado gbowhẹna ovi lọ; yé do ko sọ ylọ ẹ Zakali, kẹdẹdi oyín otọ́ etọn tọn, ⁶⁰Onọ etọn sọ gblọn bo dọmọ, Mọ ma gba: ṣigba Johanu wẹ yè na ylọ ẹ. ⁶¹Yé sọ dọ hlan ẹn, dọmọ, Mẹmẹ towe de ma yín oyín he hunkọ gbède. ⁶²Yé sọ basi ohia lẹ hlan otọ́ etọn, etẹ wẹ é jlo yè ni ylọ ẹ. ⁶³E sọ kàn wekanu de biọ, bo wlan dọmọ, Johanu wẹ oyín etọn. Awu sọ ji yé omẹ pó. ⁶⁴Yè sọ hùn onù etọn to tẹndoponẹmẹ, odékan etọn sọ tún, é sọ dọhó, bọ sọ dona Jiwheyẹwhe, ⁶⁵Obu sọ di yé he nọnọ̀ yé dali lẹpo: onú helẹ sọ hlun pé otò okọta Judé tọn lepò me. ⁶⁶Mẹhe sè lẹ sọ yí yé hẹn do ayiha yetọn me, dọmọ, Eté wẹ ovi he na yín? Na alọ Oklunọ tọn tin po e po.

⁶⁷Zakali otọ́ etọn sọ gó na Gbigbọ Wiwe, bo dọdọdai, dọmọ, ⁶⁸Donanọ wẹ Oklunọ yín Jiwheyẹwhe Islaeli tọn, Na é ko diapón, bo ko sọ basi ofligọ na omẹ etọn lẹ, ⁶⁹E ko zé azò whlẹngan tọn de daga na mí To owhó devi etọn Davidi tọn gbè; ⁷⁰Dile é dọ gbọn onù yẹwhegán wiwe etọn lẹ tọn mẹ, he ko tin sọn whenu aihọn ko sè: ⁷¹Whlengan sọn kèntọ mìtọn le si, podọ sọn alọ yé he gbẹwanna mí lẹpo tọn mẹ; ⁷²Nado do lẹblanu hia hlan otọ́ mìtọn lẹ dali, Nado flin alènu wiwe etọn; ⁷³Whiwhlé he é whlé hlan otọ́ mìtọn Ablaham, ⁷⁴Nado na mí, dọ whinwhlẹn mí sọn alọ kèntọ mìtọn lẹ tọn mẹ, Nido sẹ́n ẹn matin obudi, ⁷⁵To wiwe po dódó po mẹ to nukọn etọn to azán mìtọn lẹpo me. ⁷⁶Mọwẹ podọ hiẹ, ovi, yẹwhegán Gigogan tọn wẹ yè na nọ ylọ we, Na hiẹ na jẹnukọnna Oklunọ nado jla ali etọn lẹ do: ⁷⁷Nado na oyọnẹn whlẹngan tọn omẹ etọn lẹ, To desé ylando yetọn lẹ tọn mẹ, ⁷⁸Na ayiha lẹblanu Jiwheyẹwhe mìtọn tọn tọn wutu; Ehe mẹ wunkinkẹn sọn oji aga wá dla mí pọ́n, ⁷⁹Nado hón do yé he sinai to zinvlu mẹ, po to oyé oku tọn mẹ lẹ po ji; Nado do afọ mìtọn lẹ do ali jijọho tọn mẹ.

⁸⁰Ovi lọ sọ whẹn, bo lezun huhlọnnọ to gbigbo mẹ, bo sọ tin zùngbo mẹ kaka jẹazán dido e hia Islaeli tọn gbè.

¹DINVIE e sọ wá jọ to azán nẹlẹ mẹ, wẹ asẹ sọn Sesali Àugusti de yì, dọ, yè ni wlan oyín omẹ he to aihọn mẹ lẹpo tọn do owé mẹ. ²(Ehe wẹ winwian tintan he yè basi whenuena Sileniu yín otogan Silìa tọn.) ³Gbetọ lẹpo sọ yì nado wlan oyín yéde tọn do owé mẹ, omẹ dopodopo jẹ otọ́ daho edelọsu tọn mẹ. ⁴Josẹfu ga sọ heji yì sọn Galili, sọn otò daho Nazalẹti tọn mẹ biọ Judé, jẹ otò daho Davidi tọn mẹ he yè nọ ylọ Bẹtlehẹm, (na ewọ yín owhé po hẹnnu Davidi tọn po wutu:) ⁵nado wlan oyín etọn po Malia asi mọdaliho etọn tọn po do owé mẹ, mẹhe ohò whénna. ⁶E sọ wá jọ whenuena yé tin to fine, azán etọn lẹ pó bọ e na do jivi. ⁷E sọ hẹn visunnu plọnji etọn jẹgbonu wá, bo sọ yí ajaken hizi do e go, bo sọ té ẹ do opa kanlin tọn de mẹ; na ohònu ma tin na yé to dohò mẹ wutu.

⁸Lẹngbohọtọ lẹ sọ tin to otò lọ mẹ, yé to odanji to lengbọpa yetọn hó to ozán mẹ. ⁹Angeli Oklunọ tọn sọ site to ye de, gigo Oklunọ tọn sọ hón lédọ yé; obu sọ di ye talala. ¹⁰Angẹli lọ sọ dọ hlan yé, dọmọ, Mì dibu blo: pon, yẹn hẹn wẹndagbe homehùnhùn daho tọn wá na mì, he na tin hlan gbẹtọ lẹpo. ¹¹Na yè ji Whlẹngan tọ de hlan mì to egbé to otò daho Davidi tọn mẹ, he yín Klisti Oklunọ. ¹²Ehe sọ wẹ basi ohia hlan mì; Mì na mọ ovivu de he yè yí ajakẹn hizi do e go, é mlọnai to opa kanlin tọn de mẹ. ¹³Ajiji agùndaho awhanpa olọn tọn de tin to angẹli lọ de, bo tò Jiwheyẹwhe pa, dọmọ,

¹⁵E: sọ wá jọ, whenuena angẹli lẹ lé sọn yé de yì biọ olon mẹ, lẹngbọhọtọ lẹ dọ hlan yénọzọ, dọmọ, Mì gbọ mí ni yì Betlehem dinvie bo yì pọ́n onú he jọ, he Oklunọ ko hẹn zun yinyọnẹn hlan mí. ¹⁶Yé sọ yawu wá po awuyiya po, bo mọ Malia, Josefu, po ovivu lọ po to aimimlọn tó opa kanlin tọn lọ mẹ. ¹⁷Whenuena yé mọ ẹn, yé hlun ohó he yè dọ hlan yé gbọn ovi he lọ tọn dali lédo pé. ¹⁸Podọ mehe sè e lepo wẹ awuji do onú le lọ go, he lẹngbohọtọ lẹ dọ hlan yé. ¹⁹Ṣigba Malia yí onú he lẹpo whlá, bo to yé lẹnpón to ayiha etọn mẹ. ²⁰Lẹngbọhọtọ lẹ sọ lẹgò, bo to gigopana Jiwheyẹwhe, bo sọ to pipa ẹ, na onú he yé ko sè bo sọ mọ lẹ, yèdọ dile yè dọ hlan yé do.

²¹Whenuena azán sinatòn pé nado gbowhena ẹn yé ylọ oyìn etọn dọ JESU, he yè ylọ mọ gbọn angeli lọ dali, whẹpo yè do mọhò etọn to adò mẹ.

²²Whenuena azán lẹ́we etọn tọn lẹ pé kẹdedi osén Moṣe tọn, yé hen en wá Jelusalẹm, nado jo e hlan Oklunọ; ²³(Dile yè wlan to osén Oklunọ tọn mẹ dọ, Ovisunnu depope he hùn adò wẹ yè na ylọ dọ wiwe hlan Oklunọ;) ²⁴podọ nado sanvó kedẹdi enẹ he yè dọ to osén Oklunọ tọn mẹ, Apoe awe, kavi awhannẹvu awe. ²⁵Do ayi e go, dawe de tin to Jelusalẹm, oyín mehetọn no yín Simeọni; dawe he sọ yín dódónọ, hùnséntọ, mẹhe nọtepọ́n homẹmimiọn Islaeli ton, Gbigbọ Wiwe sọ tin to e ji. ²⁶Yè sọhia hlan ẹn gbọn Gbigbọ Wiwe dali, dọ, ewo ma to na mọ okú, whẹpo ewọ do mọ Klisti Oklunọ lọ tọn. ²⁷Ewọ sọ gbọn Gbigbọ mẹ wá tẹmpli me: whenuena mẹjitọ lẹ sọ zé ovi lọ Jesu wá, na yé nido wà gbọn ewọ tọn dali kẹdẹdi owalọ osén tọn. ²⁸Whenẹnu wẹ é yí i do awà etọn mẹ, bo dona Jiwheyẹwhe, bo, sọ dọmọ, ²⁹Oklunọ E, dinvie wẹ a ni jo devi towe do ni yì jijọho, Kẹdẹdi ọhó towe.

⁴⁰Ovi lọ whén, bo lẹzun huhlọnnọ to gbigbọ mẹ, bo sọ gó na nuyọnẹn: ojọmiọn Jiwheyẹwhe tọn sọ tin to e ji.

⁴¹Whèmẹ-whèmẹ wẹ mẹjitọ etọn lẹ nọ yì Jelusalẹm to juwayì hunwhẹ zángbè. ⁴²Whenuena é yín ovi owhè wiawemẹ tọn, yé hẹji yì Jelusalẹm kẹdẹdi owàlọ hunwhẹ tọn. ⁴³Whenuena yé ko pé azán yetọn lẹ, le yé gò ja, ovi lọ Jesu nọte to godo to Jelusalẹm; Josẹfu po onọ etọn po ma sọ yọnẹn. ⁴⁴Ṣigba linlẹn dọ é tin to ogbé lọ mẹ; yé ko zìn azán dopo zọnlin; yé din in pó to hẹnnumẹ yetọn lẹ, po họ́ntọn yetọn lẹ po ṣẹnṣẹn. ⁴⁵Whenuena yé ma mọ ẹn, yé lẹ́gọ̀ yì Jelusalẹm, bo to dindìn in pé. ⁴⁶E sọ wá jọ, to azán atóntọ gbè, yé mọ ẹn to tẹmpli mẹ, é sinai to mẹplọntọ lẹ ṣẹnṣẹn, é to ohó yetọn só, bo sọ to ohó kanbiọ yé. ⁴⁷Avò sọ vò mẹhe sè e lẹ, po do wuntuntun po gbèyíyí etọn lẹ po go. ⁴⁸Whenuena yé sọ mọ ẹn, avọ̀ vò yé: onọ etọn sọ dọ hlan ẹn, dọ, Ovi, etewutu wẹ hiẹ wà mọ hẹ mí? pọ́n, otọ́ towe po yẹn po ko to dindìn we pé po awúbla po. ⁴⁹Ewọ sọ dọ hlan yé, dọ, Etẹwutu wẹ mì to dindin mi pé? Mì ma yọnẹn dọ yẹn ma sọgan nọ ma tin to azón Otọ́ ṣie tọn kòn? ⁵⁰Yé ma sọ tunwun ohó he é dọ hlan yé gba. ⁵¹E sọ jẹte hodo yé yi, bo wá Názalẹti, bo sọ whìwhẹ ede dai hlan yé; podọ onọ etọn yí onú he lẹpo whlá do ayiha etọn mẹ.

⁵²Jesu sọ to nukọnyì tó nuyọnẹn mẹ, podọ to whinwhẹn mẹ, podọ to nukundagbe mẹ to Jiwheyẹwhe po gbẹtọ po de.

¹DINVIE to owhè fọtọ̀n ahọludu Tìbeliu Sesali tọn mẹ he Pontiu Pilati dù otògán to Judé, bọ Hẹlọdi sọ dù otògán to Galili, bọ Filippi nọvisunnu etọn sọ dù otògán Ituléá po Tlakoniti tọn po, bọ Lysania dù otògán to Ábilene, ²To yẹwhenọ gándudu Ánna po Kaifa po tọn mẹ, wẹ ohó Jiwheyẹwhe tọn wá Johanu ovi Zakali tọn de to zùngbo mẹ. ³E sọ wá agbègbè lẹpo ji lédo Jọdani, é to yẹwheho baptẹm lẹnvọjọ tọn dọ, hlan odesé ylando lẹ tọn; ⁴Dile yè wlan ẹn do to owé yẹwhegán Esaia tọn mẹ, 1

⁷Whenẹnu wẹ é dọ hlan agùndaho he tón yì nado yín bibaptizi to e de lẹ, dọ, Mì whẹndo amapoe lẹ tọn, mẹnu we navasè mì nado hòn sọn homẹgble he ja mẹ? ⁸Enẹwutu mì hẹn sinsẹ́n he jẹ na lẹnvọjọ mìtọn jẹgbonu wá, mì sọ sè didọ to mì homẹ, dọ, Mi tindo Ablaham na otọ́ mìtọn blo: na yẹn dọ hlan mì, dọmọ, Jiwheyẹwhe sọgan zé ovi lẹ tite sọn ozannu helẹ mẹ hlan Ablaham. ⁹Podọ yèdọ dinvie, yè ko zé asìọvi hlan adò atin lẹ tọn: enẹwutu atin depope he ma hẹn sinsẹ́n dagbe jẹgbonu wá, yín sinsán liai, bo yín dindòn zindo miyọn mẹ. ¹⁰Agùndaho lẹ lọ sọ kanse e, dọmọ, Be eté mí do na wà? ¹¹E sọ gblọn bo dọ hlan yé, dọmọ, Mẹhe tindo awù awe ni na dopo mẹhe ma tindo de, mẹhe tindo núdùdù ni wà mọ ga. ¹²Tòkuẹsinyantọ lẹ tin to finẹ ga nado yín bibaptizi, yé sọ dọ hlan ẹn dọmọ, Mẹplọntọ, Eté mí do na wà? ¹³E sọ dọ hlan yé, dọmọ, Mì sọ fánsúmẹgo hú ehe yè dèna mì blo. ¹⁴Awhanvipẹ to azón kòn lẹ ga sọ kanse e dọmọ, Eté mí do na wà? E sọ dọ hlan yé, dọmọ, Mì wà huhlọnnu hlan mẹde blo mì sọ slẹ mẹde blo; azónkuẹ mìtọn lẹ ni pé mì.

¹⁵Le gbẹtọ lẹ sọ tin to tódo mẹ bọ omẹ pó sọ to linlẹn to ayiha yetọn lẹ mẹ gbọn Johanu tọn dali, eyín vlavo ewọ wẹ Klisti lọ; ¹⁶Johanu gblọn bo dọ hlan yé omẹ pó, dọmọ, Nugbo yẹn yí osìn do to bibaptizi mì, ṣigba mẹhe húgan yẹn ja, afọpakan mẹhe tọn yẹn ma sù na tún; ewọ wẹ na baptizi mì to Gbigbọ Wiwe po miyọn po mẹ ¹⁷Mẹhe aíatà etọn tin to alọ etọn mẹ, nado zà agbà zinhò etọn tọn wé sésé, bo nasọ bẹ likún do zinhò etọn mẹ: ṣigba ofló wẹ é na yí miyọn maṣimaṣi do mẹ̀.

¹⁸Homèjladohó susu devo ga wẹ é do to yẹwheho wẹndagbe tọn dọ hlan gbẹtọ lẹ. ¹⁹Ṣigba Hẹlọdi otògán, mẹhe é wọhẹ na Helọdia asi Filippi nọvisunnu etọn tọn, podọ na onú ylanylan he Hẹlọdi wà lẹpo, ²⁰e yí ehe do dotana onú lẹpo, é sú Johanu do ogàn mẹ.

²¹Dinvie e sọ wá jọ whenuena yè baptizi gbẹtọ lepo, wẹ yè baptizi Jesu lọsu ga, le é to dèho, yè hùn olọn do nuvo, ²²Gbigbọ Wiwe sọ jẹte, to ojlẹmọ agbasa tọn de mẹ di apoe de, do e ji, ogbè de sọ sọn olọn mẹ wá, dọmọ, Hiẹ wẹ Ovi yiwanna ṣie; hiẹ mẹ yẹn yín homẹhùnnọ talala.

²³Jesu lọsu whenuena é sè nado plọnmẹ, ovi owhè ogbàn nkọ tọn wẹ, é nọ yín (dile yè lẹn do) ovi Josefu tọn he basi ovi Helo tọn, ²⁴he basi ovi Mattati tọn, he basi ovi Levi tọn, he basi ovi Melki tọn, he basi ovi Janna tọn, he basi ovi Josẹfu tọn, ²⁵he basi ovi Mattatiasi tọn, he basi ovi Amosi tọn, he basi ovi Nahumi tọn, he basi ovi Eslì tọn, he basi ovi Nagge tọn, ²⁶he basi ovi Mati tọn, he basi ovi Mattatiasi tọn, he basi ovi Semẹi tọn, he basi ovi Josẹfu tọn, he basi ovi Juda tọn, ²⁷he basi ovi Joana tọn, he basi ovi Lẹsa tọn, he basi ovi Zelababẹli tọn, he basi ovi Salatiẹli tọn, he basi ovi Nẹli tọn, ²⁸he basi ovi Mẹlki tọn, he basi ovi Addi tọn, he basi ovi Kosami tọn, he basi ovi Elmodami tọn, he basi ovi Eli tọn, ²⁹he basi ovi Jose tọn, he basi ovi Eliezela tọn, he basi ovi Jolimi tọn, he basi ovi Mattati tọn, he basi ovi Levi tọn, ³⁰he basi ovi Simeọni tọn, he basi ovi Juda tọn, he basi ovi Josefu tọn, he basi ovi Jonani tọn, he basi ovi Eliakimi tọn, ³¹he basi ovi Melea tọn, he basi ovi Menani tọn, he basi ovi Mattata tọn, he basi ovi Natani tọn, he basi ovi Davidi tọn, ³²he basi ovi Jessi tọn, he basi ovi Obedi tọn, he basi ovi Boozi tọn, he basi ovi Salmọni tọn, he basi ovi Naasọni tọn, ³³he basi ovi Aminadabi tọn, he basi ovi Alami tọn, he basi ovi Eslọmi ton, he basi ovi Falesi ton, he basi ovi Juda tọn, ³⁴he basi ovi Jakobu tọn, he basi ọvi Isaki tọn, he basi ovi Ablaham tọn, he basi ovi Tala tọn, he basi ovi Nahọli tọn, ³⁵he basi ovi Saluki tọn, he basi ovi Lagahu ton, he basi ovi Faleki tọn, he basi ovi Hebẹli tọn, he basi ovi Sala tọn, ³⁶he basi ovi Kainani tọn, he basi ovi Alfaksadi tọn, he basi ovi Semi tọn, he basi ovi Noe tọn, he basi ovi Lamẹki tọn, ³⁷he basi ovi Matusala tọn, he basi ovi Enọku tọn, he basi ovi Jalẹdi tọn, he basi ovi Maleleẹli tọn, he basi ovi Kainani tọn, ³⁸he basi ovi Enọsi tọn, he basi ovi Sẹti tọn, he basi ovi Adam tọn, he basi ovi Jiwheyẹwhe tọn.

¹JESU, gigòna Gbigbọ Wiwe, lé gò sọn Jọdani, yè sọ plan ẹn to Gbigbọ mẹ yì zùngbọ me je azán kande, ²yè whle e pòn sọn legba de. To azán nele mẹ, é ma dù núde: whenuena yé sọ pé, huvẹ to hùhù i. ³Legba sọ dọ hlan ẹn, dọmọ, Eyín hie yín Ovi Jiwheyẹwhe tọn, degbèna zannu he ni lẹzun akla. ⁴Jesu sọ gblọn bo dọ hlan ẹn, dọmọ, Yè kanwe dọ, Gbẹtọ ma to ogbè gbọn akla dopokedẹ dali gba. ⁵Lẹgba sọ hẹn en yì osé he yì aga de ji, bo yí ahọlu yigba aihọn tọn lẹpo hia ẹ to nukun whiwhe dopo mẹ. ⁶Lẹgba sọ dọ hlan ẹn, dọmọ, Hiẹ wẹ yẹn na yí ase he, po gigo yetọn po na: na enẹ wẹ yè yí do alọ me na mi; mẹdepope yen jlo yen na yí i na. ⁷Enẹwutu eyín hiẹ litai to nukọn ṣie, onú helẹ pó na yín towe. ⁸Jesu sọ gblọn bo dọ hlan ẹn, dọ, Tọ́n sọn godo na mi, Satani; na yè wlanwe dọ, Hiẹ na litaina Okluno Jiwheyẹwhe towe, ewọ dopokẹdẹ we na hie ni nọ sèn. ⁹E sọ hẹn en yi Jelusalẹm, bo zé e do awà tẹmpli tọn ji aga, bo sọ dọ hlan ẹn, dọmọ, Eyín hiẹ yín Ovi Jiwheyẹwhe, tọn, lọ́n sọn ofi yì odò: ¹⁰Na yè wlanwe dọmọ,

¹³Whenuena lẹgba so dotana whlepon lẹpo, e fọ́nyì sọn e de na osã de.

¹⁴Jesu sọ lẹ́gọ̀ to huhlọn Gbigbọ tọn mẹ wá Galili: linlin etọn sọ di pó agbègbè ji lẹpo lédo. ¹⁵E sọ to mẹplón to sinagọgu yetọn lẹ mẹ, yé omẹ pó sọ to gigopa nẹ̃.

¹⁶E sọ wá Nazalẹti, ofi he yè pọ́n e go whén te, dile walọ etọn te, é biọ sinagọgu mẹ to gbọjezángbè, bo sọ fọ́n site nado hiawé. ¹⁷Yèsọyíowé yẹwhegán Esaia tọn na ẹn. Whenuena é hùn owé lọ, é mọ ofi yè wlan dọ

¹⁹Nado lá owhè alọkẹyi Oklunọ tọn. ²⁰E sọ há owé lọ, bo gò ẹ jo na lizọnyítọ lọ, bo sinai. Yé mẹhe tin to sinagọgu me lepo sọ bò nukun do e go. ²¹E sọ sẹ̀ didọ hlan yé, dọ, Egbé wẹ Owé wiwe he di to otọ́ mìtọn mẹ ²²Yé omẹ pó sọ dekunnu nẹ̃, awu sọ to yé ji na ohó ojọmiọn tọn he to tintan sọn onù eton mẹ. Yé sọ dọmọ, Ehe ma wẹ ovi Josẹfu tọn lọ? ²³E sọ dọ hlan yé, dọ, Matinnuha mì na dọ oló he hlan mi, dọ, Bokọnọ, hẹnazọ̀ngbọna dewe; nudepope he mí ko sè yè wà to Kapẹlnaumi, wà ẹ to otò towe mẹ to ofi ga. ²⁴E sọ dọmọ, Nugbo wẹ yen dọ hlan mì, Yẹwhegán de ma yín álokẹyi to otò ewlọsu ton mẹ gba. ²⁵Ṣigba nugbo wẹ yẹn do hlan mì, dọ, Asusiọsi susu we tin to Islaeli to Eli whenu, whenuena yè su olọn owhè atọ̀n po osùn ṣidopo po, whenuena huvẹ daho tón lẹdo to aigba lẹpo ji; ²⁶yè ma do Eli hlan mẹdepope to yé mẹ gba, adavo hlan yọnnu asusiọsi de to Selepta, aigba Sidọni tọn mẹ. ²⁷Opòtọ susu wẹ tin to Islaeli mẹ to Elise yewhegán whenu; mẹhe yè lèwe ma tin to yé mẹ; adavo Naamani Siliatọ: ²⁸Yé mẹhe tin to sinagọgu mẹ lepo, whenuenayé sè onú helẹ, gọ́na homẹgble daho, ²⁹yé sọ fọ́n, bo tùn in jẹgbonu sọn otò daho mẹ, bo sọ dòn ẹn yì osé tónu fie yé do otò daho yetọn do, nado sisẹ ẹ sọtado na. ³⁰Ṣigba é gbọn gblagbla yeton mẹ bo sọ yì.

³¹Ẹ sọ jete wá Kapẹlnaumi, otò daho Galili tọn de, é sọ plọn yé to gbọjezángbè. ³²Avò sọ vò yé do núplónme etọn go: na ohó etọn gó na asè. ³³Dawe de sọ tin to sinagọgu mẹ, mẹhe ko tindo gbigbọ aovi mawe tọn de, é yí ogbè lélé de do dawhá, ³⁴dọmọ, Jo mi do abọe; etẹwẹ mí do nado wà to de we, hiẹ Jesu Nazaleti tọn? hiẹ wá nado hù mi súdo we? yen yón mẹhe hie yín, Omẹ Wiwe Jiwheyẹwhe tọn. ³⁵Jesu sọwọhẹ ẹ, dọmọ, Nabe, bo tón sọn é go. Whenuena aovi sọ li i ai to yé ṣẹnṣẹn, é tón sọn é go, é ma sọ gbleawu nẹ. ³⁶Awu sọ ji yé omẹ pó, yé sọ to didọ to yéde ṣẹnṣẹn, dọ, Ohó té hunkọ wẹ ehe? Na asè po huhlọn po wẹ é do degbèdo gbigbọ mawe lẹ, bọ yé sọ tón. ³⁷Linlin sọ di gbọn ewọ tọn dali pó ofi popo to oto he lédo lẹ mẹ.

³⁸E sọ fọ́n sọn sinagọgu bo biọ owhé Simọni tọn gbè. Ova ko li onọ asi Sìmọni tọn tọn ai, yé sọ vè e na ewọ. ³⁹E sọ nọte do e ji, bo wọhẹ ova lọ; é sọ jo e do: to fidoponẹ é fọ́n bo sọ to devizónwà hlan yé.

⁴⁰Whenuena owhè to ohò yì, yé mẹhe tindo awutunọ he to azọ̀nmadizọ̀n jẹ dele plan yé wá e de, é do alọ ye ji dopodopo, bo sọ hẹn yé jegángán. ⁴¹Aovi lẹ tón sọn omẹ susu go ga, bo to awhádo dọmọ, Hiẹ wẹ Khsti, Ovi Jiwheyẹwhe tọn. E to wiwọhẹ yé, bo ma dikena yé ni dọhó; na yé ko yọnẹn dọ ewọ wẹ Klisti wutu.

⁴²Whenuena ai họ́n, é tón wá, bo sọ yì ofi zùngbo tọn de mẹ: gbẹtọ lẹ sọ to dindìn in pé, bo sọ wá e de, bo hẹn en dote, na é ma nado tón sọn yé de. ⁴³E sọ dọ hlan yé; dọ, E ma jẹ na yẹn ni nọ ma dọ yẹwheho ahọludu Jiwheyẹwhe tọn hlan otò daho devo lẹ ga gba, na enẹwutu wẹ yè do mi hlan.

⁴⁴E sọ dọ yẹwheho to sinagọgu Go lili tọn lẹ mẹ.

¹DINVIE e sọ wá jọ whenuena gbẹtọ lẹ hodo e nado sè ohó Jiwheyẹwhe tọn, é sọ site to otándo Genesalẹti tọn tó, ²e mọ vátlẹ awe nọte to otándo lọ tó: ṣigba whehùtọ lẹ jẹte sọn yé mẹ, bo sọ to odó yetọn klọ. ³E sọ biọ dopo vàtlẹ lẹ tọn mẹ, he Yín Simoni ton, é sọ vé ẹ ni jagò yì godo pẹvide son age go. E sọ sinai, bo to gbẹtọ le plón sọn vàtle lo me. ⁴Whenuena é gbọ oho do, e dọ hlan Simọni, dọmọ, Sise do odo ohù tọn mẹ; na mì ni kòn odò mìtọn na bẹpli ⁵Simọni sọ gblọn bo, dọmọ, Okluno, ozámnẹ oso lepo wẹ mí ko jetukla, bo ma wlé nudepope: ṣigba to ohó towe ji yẹn na kòn odò lo do odo mẹ. ⁶Whenuena yé sọ wà ehe, yé ṣinyọn whevi susu dopọ: odò yẹtọn sọ tlen. ⁷Yé so mìalọ hlan ogbé yetọn he tin to vàtlẹ awetọ mẹ lẹ, na yé nido wá gọalọna ye. Ye sọ wá, bo gó vàtle awe lepo, somọ bọ yé sọ sọ sisiọ. ⁸Whenuena Simọni Pita mọ ẹn, é jeklo to oklo: Jesu tọn kòn, bo dọmọ, Yì sọn dè; na gbẹtọ ylandonọ wẹ yẹn, Oklunọ È. ⁹Na avọ̀ vò e po mehe tin po e po lẹ, na bẹpli whevi: tọn he yé ko bé. ¹⁰Mọ sọ wẹ Jakobu po Johanu po, ye ovi Zebede tọn lẹ, he yin ogbẹ Simọni ton. Jesu so dọ hlan Simọni, dọ, A dìbu blo, sọn dinvie yì, hiẹ na wlé gbẹtọ lẹ. ¹¹Whenuena yé hẹn vàtle yetọn lẹ wá age, ye jo popo dai, bo hodo e.

¹²E sọ wá jọ, whenuena é biọ dopo to oto dahò lẹ tọn mẹ, pọ́n, dawe he opò ṣinyọn de; mẹhe, whenuena é mọ Jesu, é jẹklo to nukọn eton, bo vè e dọ, Oklunọ, eyín hie jlo, hiẹ sọgan hẹn mi zùn Wiwe. ¹³Ẹ sọ dlẹn alo etọn, bo sọ yí alọ do ẹ go, bo dọmọ, Yen jlo: na hiẹ ni zùn wiwe. To afọdoponẹji, opò sọ jo e do. ¹⁴E sọ dosẹ́n nẹ̃ mẹ nado dọ na mẹde: ṣigba yì aliho towe, bo do dewe hia hlan: yewhenọ, bo sọ na nunina na olẹwe towe kedẹdi le Moṣe degbè do na okúnnu de hlan mì. ¹⁵Ṣigba humọ wẹ linlin to yìyì gbọn ewọ tọn dali lédo pé, agùndaho lẹ sọ wá pli dopọ nado sè ohó etọn, podo nado yínhinhenje gángán sọn lanmẹmasinyẹn yetọn lẹ mẹ. ¹⁶E sọ jagò ná ede yì zùngbo mẹ, bo sọ hodẹ̀.

¹⁷E sọ wá jọ to gbedopo, whenuena é to meplón, Falesi lẹ, po osẹ́ngán osén tọn lẹ po sinai to finẹ dali, yé tọn sọn gbeta Galili tọn lẹpo me, podọ sọn Judé, podọ sọn Jelusalẹm: huhlọn Oklunọ tọn sọ tin to finẹ bọ e na do hẹnazọ̀ngbọnamẹ. ¹⁸Do áyi e ko, gbẹtọ lẹ zehẹn to adózan ji, dawe de he to awukuzọnjẹ: yé sọ to òtẹn din nado zé e biọ họmẹ, podọ nado zé e dai to nukọn etọn. ¹⁹Whenuena yé ma mọ aliho he yé na gbọn do zé e biọ họmẹ, na gbẹtọ susu wutu, yé hẹ hòta aga, bo sọ hẹn ẹn jẹte gbọn zanuvomẹ po adọzan etọn po do ṣẹnṣẹn to Jesu nukọn. ²⁰Whenuena é sọ mọ yise yetọn, e dọ hlan en, dọ, Dawe, yè jo ylando towe na we. ²¹Wekantọ lẹ, po Falesi lẹ po sọ sè nulẹn, dọmọ, Mẹnu wẹ ehe to nazinzan dọ he? Mẹnu wẹ sọgan jo: ylando ná ome, adavo Jiwheyẹwhe dopokẹdẹ? ²²Ṣigba whenuena Jesu mọ ayi linlẹn yetọn, é gblon dọ hlan yé, dọmọ, Etẹwẹ mì to linlen to ayiha mìtọn mẹ? ²³Be etẹwe boawú hú, nado dọmọ, Yè jo ylando towe na we: kavi nado dọmọ, Fọn, bo zìnzọnlin? ²⁴Ṣigba na mì nido yọnẹn dọ Ovi gbẹtọ tọn tindọ asè to aihọn ji nado jo ylando na omẹ, (é dọ hlan ewọ he yín awakuzònnọ lọ, dọmọ,) Yẹn dọ hlan we, Fọ́n, bo zé adózan towe, bo yì owhé towe gbè. ²⁵Afọdoponẹji, é so fọ́n to nukon yetọn, bo zé onu he ji é mlonai te, bo so yì, bo wá owhé etọn gbè, bo to gigopana Jiwheyẹwhe ²⁶Avò sọ vò ye omẹ pó, yé sọ to gìgopana Jiwheyẹwhe, obu sọ di yé, yé to didọmọ, Mìwlẹ mọ onú jawu to egbe.

²⁷To onú helẹ godo, é sọ tonjẹgbonu, bo mọ tokuesinyantọ de he yè nọ ylọ oyín etọn Levi, é sinai to denu; é sọ dọ hlan en, dọ, Hodo mi. ²⁸E sọ jo onú lẹpo dai, é fọ́n bo sọ hodo e. ²⁹Levi sọ basi jonọnúdùdù daho de nẹ to owhé etọn gbè: agùndaho tòkuẹsinyantọ le tọn, po ome devo lẹ po sọ tin to finẹ, bo jagla po yẹ po. ³⁰Podọ Falesi lẹ po wekantọ yetọn le-po to hunhlun do nuplọntọ eton lẹ go, dọmọ, Etẹwutu wẹ mìwlẹ to núdù bo sọ to nùnù po tòkuẹsinyantọ lẹpo pó ylandonọ lẹ po? ³¹Jesu sọ gblọn bo dọ hlan yé, dọ, Yé mehe to gángán ma din bokọnọ gba; adavo mehe yín awutunọ le, ³²Yen ma sọ wá nado ylọ dódónọ lẹ gba, adavo ylandanọ lẹ hlan vọjọ kòn. ³³Yé sọ dọ: hlan ẹn, dọ, Etẹwutu wẹ nuplọntọ Johanu tọn le nọ blanù tọ whepoponu, bo sọ nọ basi odè, mọkẹdẹ wẹ nuplọntọ Falesi lẹ tọn ga; ṣigba towe lẹ to dùdù bo sọ to nùnù? ³⁴Ewọ sọ dọ hlan yé, dọ, Be mì sọgan hẹn yọ̀pọ he tin to abò asiyọ́yọ́ tọn mẹ lẹ blanù, whenuena asisunọ tin to yé de? ³⁵Ṣigba azán lẹ ja, whenuena yè na dè asisunọ sọn yé de, whenẹnu wẹ yé na blanù to azán nẹlẹ mẹ. ³⁶E sọ dọ oló de hlan yé ga; dọmọ, Mẹde ma nọ tlẹn avọ̀nu de sọn awu yọ́yọ́ de go bo yí do awu hóhó de go gba; é nikã tlẹn yọ́yọ́ lọ, podọ ga avọ̀nu sọn yọ́yọ́ lọ mẹ ma na sọgbe do hóhó lọ go gba. ³⁷Podọ mẹde ma nọ yí ovẹ̃n yọ́yọ́ do ayugo hóhó le mẹ gba; ovẹ̃n yọ́yọ́ lọ nikã à ayugo lẹ lọ, ewọ lọsu bo na sọ yín sisakọnyingbe, ayugo lẹ lọ bo na sọ dòn. ³⁸Ṣigba ovẹ̃n yọ́yọ́ wẹ do yín yíyí do ovẹn-yugo yọ́yọ́ lẹ mẹ. ³⁹Podọ mẹde ma ko nọ nù ovẹ̃n hóhó bo sọ jlo yọ́yọ́ gba: na ewọ dọmọ, Dagbe wẹ hóhó lọ.

¹DINVIE e sọ wá jọ, to gbọjezán awetọ gbè, to, tintan godo, é jugbọn gbadoglè mẹ; nuplọntọ etọn lẹ sọ yà gbadófé bo sọ yi alọ do to fifle e dù. ²Mẹde to Falesi lẹ mẹ sọ dọ hlan: yé, dọmọ, Etẹwutu wẹ mìwlẹ to onu he ma jẹ wà to gbọjezángbè? ³Jesu sọ gblọn dọ hlan yé, dọmọ, Be mìwlẹ ma hiawe sọ ehe hunkọ, onú he Davidi wà, whenuena huvẹ to ewlọsu hù, po yé he tin to e de lẹ po; ⁴e biọ ohò Jiwheyẹwhe tọn mẹ, bo sọ yí akla sọhia tọn, bo dù, bo sọ na yé he to e de le ga; ehe ma jẹ nẹ nado dù, adavo yewhenọ: lẹ dopokẹdẹ? ⁵E sọ dọ hlan yé, dọ, Ovi gbẹtọ tọn wẹ Oklunọ gbọjezán tọn ga.

⁶E sọ wá jọ to gbọjẹzángbè devo ga, é sọ biọ sinagogu mẹ, bo to meplọn: dawe de tin to finẹ mẹhe adusilọ etọn kusẹ. ⁷Wekantọ lẹ, po Falesi lẹ po sọ to hihó ẹ, eyín é na hẹnazòngbọ to gbọjezángbè; na yé nido mọ owhó de hia do okò nẹ. ⁸Ṣigba é yón linlẹn yetọn, é dọ hlan ewọ he alọ etọn kuse, dọ, Fọ́n, bo site tọ gbonu to ṣẹnṣẹn. E sọ fọ́n, bo site to ṣẹnṣẹn. ⁹Whenẹnu we Jesu sọ dọ hlan yẹ, dọ, Yẹn na kàn onú dopo se mí; Be é jẹ to, gbọjẹzángbè nado wà dagbe, kavi nado wà ylankan? nado whlẹn ogbè gán, kavi nado hù súdo? ¹⁰Whenuena é pọ́n yé omẹ pó lédo, é dọ hlan dawe lọ, dọmọ, Dlẹn alọ towe jẹgbónu. E sọ wà mọ: alọ etọn sọ gòjẹ gángán, kẹdẹdi awetọ. ¹¹Ṣigba homẹ yetọn gó na adi; yé sọ to ohó dọ hẹ yénọzo, dọ etẹwẹ yé do wà do Jesu.

¹²E sọ wá jọ, to azán helẹ gbè, é tón yì osó ji nado hodè, é sọ nọte to ozán lẹpo mẹ to odè mẹ hlan Jiwheyẹwhe. ¹³Whenuena ai hón, é ylọ nuplọntọ etọn lẹ do é de: bọ dè omẹ wiawe to yé mẹ, yé mẹhe é ylọ oyín yetọn ga dọ Apọsteli; ¹⁴Simọni, (mẹhe yè nọ ylọ oyín etọn ga, dọ Pita,) po Andlé nọvisunnu etọn po, Jakobu po Johanu po, Filipi po Batelemi po, ¹⁵Matiu po Tọmasi po, Jakobu, ovisunnu Alfe tọn, po Simọni, he yè nọ ylọ oyín etọn Zeloti po ¹⁶Juda nọvisunnu Jakobu tọn, po Juda Iskaliọti po he yín mẹdehiatọ lọ ¹⁷sọ jẹte po yé po, bo site to ofi sọgbe de, po agùndaho nuplọntọ etọn lẹ tọn po, po osọha omẹ susu tọn po sọn Judé lẹpo, sọn Jelusalẹm, podọ sọn ohù waji Tile tọn, po Sidọni tọn po, he wá nado sè ohó to onù etọn, podọ nado yín azọ̀nhẹngbọna sọn azọ̀n yeton lẹ mẹ. ¹⁸Podọ yé he mọ awufiẹsa gbọn gbigbọ mawe lẹ si: é hẹnazọ̀ngbọna yé. ¹⁹Agùn lẹpo sọ din nado do alọ é go: na huhlọn to tintón sọn e go, é sọ hẹnazóngbọna yé omẹ pó.

²⁰E sọ zé nukun etọn do aga, do nuplọntọ etọn lẹ go, bo dọmọ, Donanọ wẹ mì wamọnọ lẹ; na mìtọn wẹ ahọludu Jiwheyẹwhe tọn. ²¹Donanọ wẹ mì he huvẹ to hùhù to dinvie; na yè na hẹn mì gọhò. Donanọ wẹ mì he to avivi to dinvie; na mì na konú. ²²Donanọ wẹ mì, whenuena gbẹto lẹ na to wangbẹna mì, whenuena ye na to mì klan sọn ogbé yetọn mẹ, bo nasọ to mì vlẹko, bo to oyín mìtọn dè yìngbe di oylan, na Ovi gbẹtọ tọn wutu. ²³Mì ni jaya to azán nẹ gbè, na mi ni lón na homẹhùnhùn: sa pọ́n, ale mitọn wẹ klo to olọn mẹ; na mọkedẹ we otọ́ yetọn lẹ wà do yẹwhegán lẹ. ²⁴Ṣigba dindọn hlan mì he yín adọkunnọ lẹ! na mì lẹ ko mọ homẹmimiọn mìtọn yí vò. ²⁵Dindọn hlan mì he gọho lẹ na huvẹ na hù mì. Dindọn hlan mì he to núkò to dinvie lẹ! na mì na blawú, bo sọ viavi. ²⁶Dmdọn hlan mì, whenuena omẹ pó to onú mìtọn dagbe dọ na mọkẹdẹ wẹ otọ́ yetọn lẹ wà hlan yẹwhegán lalonọ lẹ.

²⁷Ṣigba yẹn dọ hlan mì, he to sisè lẹ, Mì yiwanna kẹ̀ntọ mìtọn lẹ, mì wà dagbe hlan yé he wangbéna mì lẹ, ²⁸mì dona yé he sọ to dẹ̀hodo mì lẹ, mì hodó na mẹhe to mì hẹngble lẹ. ²⁹Na ewọ he ho alaka dopo na we, ló awetọ hlan ẹn ga; mẹhe yí avọ̀ towe, a hẹnẹn dote nado yí awù towe ga blo. ³⁰Na òmẹ dopodopo he biọ onú de we lẹ; podọ sọn ewọ he bé agbàn towe sé si, a sọ gò kan yé biọ blo. ³¹Le mì jlo dọ gbẹtọ lẹ ni wà hlan mì do, mọkẹdẹ wẹ mì ni wà hlan yé do. ³²Podọ eyín mi yiwanna yé he yiwanna mì, opẹ tẹwẹ mí do? na ylandonọ lẹ nọ yiwanna yé he yiwanna yé lẹ ga. ³³Podọ eyín mì sọ wà dagbe hlan yé he wà dagbe hlan mì le, opé tewẹ mì do? na ylandonọ lẹ nọ wà doponẹ ga. ³⁴Podọ eyín mì sọ yàn hlan yé he si mì to nukundo na vó mọ yí te lẹ, opé tẹwẹ mì do? na ylandonọ lẹ nọ yàn hlan ylandonọ lẹ, na yé nido mọ yí sọmọ. ³⁵Ṣigba mì ni yiwanna kẹ̀ntọ mìtọn lẹ, bo nọ wà dagbe na yé, bo nọ yànnamẹ madosisi mede tọn; ale mìtọn na sọ yín daho, podọ mì na sọ yín visunnu Gigogan tọn lẹ: na ewọ yín dagbenọ hlan mayọndagbenọ po mẹylankan po. ³⁶Na mì ni do lẹblanu, kẹdẹdile Oto mìtọn do lẹblanu do. ³⁷Podọ mì dawhé blo, yè ma sọ to owhè na da na mì; mì gblewhẹ̀do omẹ blo, yè ma sọ to na gblewhèdo mì; mì jonamẹ, yè nasọ jona mì. ³⁸Mì na ome, yè nasọ na mì; ojlé dagbedagbe, zindodò, he yè whandopọ, he gọfla, wẹ yè na jlé do akọnnu mìtọn. Na ojlé dopo he mì do jlé, wẹ yè nasọ yí do jlé hlan mì.

³⁹E sọ dọ oló de hlan yé, dọ, Be nukuntọ́nnọ sọgan doalihia nukuntọ́nnọ? Yé omẹ awe lẹ ma na jai do odò mẹ? ⁴⁰Nuplọntọ ma húgan mẹplọntọ etọn gba: ṣigba mẹdepope he sogbè na taidi mẹplọntọ etọn. ⁴¹Etẹwutu wẹ hiẹ to núyọ he tin to nukun mẹmẹsunnu towe tọn mẹ pọ́n, ṣigba a ma tunwun nakepo he tin to nukun hielọsu tọn mẹ? ⁴²Kavi nawẹ hiẹ sọgan dọ hlan mẹmẹsunnu towe do, dọ, Mẹmẹsunnu ṣie, gbọ yẹn ni dè núyọ he tin to nukun towe mẹ sé, whenuena hiẹlọsu ma tunwun nakepo he tin to nukun hiẹlosu tọn mẹ? Hie yẹnuwàtọ, dè nakepo he tin to nukun hiẹlọsu tọn mẹ só whé, whenẹnu wẹ hiẹ na monú gbangba nado dè núyọ he tin to nukun mẹmẹsunnu towe tọn me sè. ⁴³Na atin dagbe ma nọ hẹn sinsẹ́n ylankan jẹgbonu wá gba, mọwẹ atin ylankan ma nọ hẹn sinsẹ́n dagbe jẹgbonu wá gba. ⁴⁴Na atin lẹpo wẹ yè yónẹn gbọn sinsẹ́n ewlọsu tọn dali. Na gbẹtọ ma nọ gbèn ovò sinsén to owùnkan mẹ, mọwẹ yè ma nọ gbón ovẹ̃n sinsẹ́n to vẹwun ji. ⁴⁵Gbẹtọ dagbe sọn adọkunnú dagbe ayiha etọn mẹ tọn wẹ é nọ hẹn enẹ he yín dagbe tón jẹgbonu sọn wá; gbẹtọ ylankan sọn adọkunnu ylankan etọn mẹ tọn wẹ é nọ hẹn enẹ hẹ yín ylankan tọ́njegbonu sọn wá: na sọn onú ayiha gege tọn me we onù nọ dọ.

⁴⁶Etẹwutu wẹ mì to yiylọ mi, Oklunọ, Okluno bọ mì ma wà onú he yẹn dọ lẹ? ⁴⁷Mẹdepope he wá dẽ, bo to ohó ṣie sè, bo so wà yé, yẹn na do mẹhe é di hia mì: ⁴⁸E taidi dawe de he to ohò de do, mẹhe kùndo yì siso, bo sọ dodòdo do osé ji: whenuena ozó gó, asisa zinzin gbakọn do ohò lọ go: é ma sọgan whàn ẹn: na yè ko dó e do osé ji wutu. ⁴⁹Ṣigba ewo he sè, bo ma basi, é taidi dawe de he dó ohò do aigba ji: ehe ma do dodó; ehe gò asisa zinzin gbakọndo, afọdoponeji é hó do homẹ; hihó ohó lọ tọn sọ yín kiklo.

¹GODO é dotana ohó etọn lẹpo to otọ́ gbẹtọ lẹ tọn mẹ, é biọ Kapẹlnaumi mẹ.

²Afànumẹ mẹkanwekowhangán tọn de, he yín mẹvivẹ hlan ẹn, yín awutunọ, bo sọ wleawu na kú. ³Whenuena é sè gbọn Jesu tọn dali, é do mẹho Ju lẹ tọn hlan en, bo vé ẹ dọ, é nido wá, bo hen azọ̀n afànumẹ etọn tọn gbọ. ⁴Whenuena yé sọ wá Jesu de, yé vé ẹ talala dọ, E jẹ mehe ewọ do wà ehe lọ na. ⁵Na é yiwanna akọta mìtọn, ewọ lọsu sọ dó sinagogu mìtọn dopo na mí. ⁶Whenenu wẹ Jesu sẹ̀ hodo yé jei. Whenuena é ma sọ den do owhé lọ gbè, mẹkanwekowhangan lọ do họ́ntọn lẹ hlan ẹn, dọ Oklunọ, a dotukla dewe blo: na yen ma jẹ bo hiẹ do biọ ohò ṣie glọ gba. ⁷Enewutu yen ma sọ lẹn dọ yẹn losu jẹ nado wá de we gba: ṣigba dọ ohó lọ, yè nasọ hẹnazọ̀ngbọna yọpọsunnu ṣie. ⁸Na mẹhe yè yí do oglọ asè tọn wẹ yẹn ga, yen sọ tindo awhanvipẹ to oglọ ṣie, yẹn dọ hlan ode, dọ, Yì, é nọ yì; hlan awetọ dọ, Wá, é nọ wá; podọ hlan afànumẹ ṣie dọ, Wà ehe, é sọ nọ wà e. ⁹Whenuena Jesu sè onú hele, é jawu do e, é sọ lé pànnukọn mẹhe to hihodo e lẹ, bo dọmọ, Yẹn dọ hlan mì, Yẹn ma mọ yise daho di ehe, lala, é ma yín to Islaeli mẹ. ¹⁰Yé mẹhe é dohlan lẹ, sọ lẹgò yì owhé, bo sọ mọ afanumẹ lọ ko jẹ gángán.

¹¹E sọ wá jọ, to aihọngbè, é biọ otò daho de mẹ, he yè ylọ Naini; nuplọntọ etọn lẹ yì po e po, po agùndaho de po. ¹²Whenuena é sọ dòn sẹpọ́ jẹ họngbo otòdaho lọ tọn, do ayi e go, yè zé mẹkúkú de jẹgbonu ja, visunnu dopo onọ etọn tọn, é sọ basi asusiosi: gbẹtọ susu otodaho lo me tọn sọ tin to e de. ¹³Whenuena Okluno mọ en, lẹblanu etọn wà ẹ, é sọ dọ hlan ẹn, dọmo, A sọ viavi blo. ¹⁴E sọ wá, bo do alọ apotinjan lọ go: mẹhe zé e lẹ sọ site sududu. E sọ domọ, Ovisunnu, yen dọ hlan we, Fon. ¹⁵Mẹhe kú sọ fon sinai, bo sọ sè hódọ. E sọ jo e blan onọ etọn. ¹⁶Obu sọ jẹ ome popo ji: yé sọ to gigopana Jiwheyewhe, dọmọ, Yẹwhegán daho de fọ́n to mí mẹ; podọ, Jiwheyẹwhe ko dla omẹ etọn lẹ pọ́n. ¹⁷Podọ linlin he, gbọn ewọ tọn dali to didi to Judé pete me, po agbegbeji lédólédo lẹpo po.

¹⁸Nuplọnto Johanu tọn lẹ sọ dọ onú helẹ pó ton nẹ ¹⁹Johanu sọ ylọ omẹ awe to nuplọntọ eton lẹ mẹ, bo do yé hlan Jesu de, dọmọ, Be hiẹ wẹ mehe ja. Kavi mí ni to nukundo mẹdevo? ²⁰Whenuena omẹ lẹ lọ wá e de, yé dọmọ, Johanu Báptisti wẹ do mí hlan de we, dọ, Hiẹ wẹ mẹhe ja? Kavi mí ni to nukundo mẹdevo? ²¹To ojlẹ nẹ mẹ é hẹnazọ̀ngbọna omẹ susu sọn awutujẹ lẹ mẹ, podọ sọn gbigbọ ylankan lẹ si, é sọ na nukunnúmimọ nukuntọ́nnọ susu. ²²Whenẹnu wẹ Jesu gblọn dọ hlan yé, dọ, Mì yì, bo dọhó onú he mì mọ, po ehe mì sè po tọn hlan Johanu; nukuntọ́nnọ lẹ to númọ, sékunọ lẹ to zọnlinzin, yè hẹn potọnọ lẹ zùn wiwe, tókunọ lẹ to núsè, yè to osiọ lẹ fọ́n do ogbè, podọ hlan wamọnọ lẹ we yè to wẹndagbe yẹwheho tọn dọ. ²³Podọ donanọ we ewọ mẹdepope he ma na mọ nujijọ ahlida tọn de to yẹn me.

²⁴Whenuena médagun Johanu tọn lẹ fọ́nyì, é sè didọ hlan agùndaho lẹ lọ gbọn Johanu tọn dali, dọmọ, Etẹwẹ mì tón yì zùngbo mẹ yì nado pọ́n? ofán he jẹhọn to whinwhán? ²⁵Yèdọ etẹwẹ mì tón yì nado mọ? Dawe he yè do avọ̀ wọdọwọdọ na? Pọ́n yéheyè ṣinyọn avọ̀ gigo tọn na, bo agbasa miọnna dagbedagbe le tin to owhé ahọlu lẹ tọn gbè. ²⁶Yèdọ etẹwẹ mì tón yì nado mọ? Yẹwhegán? Nugbo yen dọ hlan mì, E húgan yẹwhegán. ²⁷Ehe wẹ mẹhe tọn yè wlanwé, dọmọ,

³⁶Podọ mẹdopo sọn Falesi lẹ mẹ jlo ewọ dọ e ni do dùnú hẹ ẹ. E sọ bio owhé Falesi lọ tọn gbè, bo sọ jagla nado: dùnú. ³⁷Do ayi e go, nawe de he ko tin to otòdaho lọ mẹ, mehe basi ylandonọ, whenuena é yọnẹn dọ Jesu jagla to núdù to owhé Falesi lọ tọn gbè, é hẹn núsisagbán alabasta nuwhẹnkun tọn wá, ³⁸bo sọ site to afọ etọn go, to godo etọn, bo to avivi, bo sọ sè dasìn yí do to afọ etọn kló, bo yí oda he to ota etọn do to súnsúnsúhsún i, bo sọ to onù yí do afọ etọngo, bo sọ yí amisisa sá do yé. ³⁹Dinvie whenuena Falesi, mẹhe ylọ ẹ lọ, mọ ẹn, è dọ to ede homẹ, dọ, Dawe he, eyin ewọ yín yẹwhegán lọ, é do yón mẹhe hunkọ nawe he to alọ do e go yín: dọ ylandonọ de wẹ ewọ. ⁴⁰Jesu sọ gblọn dọ hlan ẹn, dọmọ, Simọni, yẹn do núde na dọ hlan we. E sọ domọ, Mẹplọntọ, to didọ ⁴¹A-kuẹsatọ de tin he tindo ahọdutọ awe: ode duahọ abọgan-kuẹ fowekanweko do e, awetọ sọ dù kandeao hó. ⁴²Whenuena yé ma tindo núde nado suahọ, é jona yé omẹ awe lẹ vọnu. Enẹwutu, dọ, to yé ome awe lẹ mẹ, mẹnu we na yiwan nẹ̃ húgan? ⁴³Simọni sọ gblọn bo dọmọ, Yẹn len dọ ewọ he é jona gbahú wẹ. E sọ dọ hlan ẹn, dọmọ, Hiẹ dọ nugbo. ⁴⁴E sọ lé pànnukọn nawe lọ, bo dọ hlan Simọni dọmọ, Hiẹ mọ nawe he? Yẹn biọ owhé towe gbè, hiẹ ma na osìn mi na afọ ṣie: ṣigba ewọ odasìn wẹ é do to afọ kló na mi, bo sọ yí oda etọn do to yé súnsún sẹ̀. ⁴⁵Hiẹ ma na nùdonùgo mi: ṣigba ewọ ma gbọ nùdonùgonà afọ ṣie gba; ⁴⁶Ota ṣie hiẹ ma yí amì do sá amisisa na: ṣigba ewọ ko yí nuwhẹnkun sá do afọ go na mi. ⁴⁷Enẹwutu wẹ yẹn dọ hlan we, dọ, Ye jo ylando etọn he sù lẹ nẹ, na e yiwanna susu: ṣigba ewọ he yè jo vude na, ewọ lọ wẹ yiwanna vude. ⁴⁸E sọ dọ hlan en, dọ, Yè jo; ylando towe na we. ⁴⁹Yé he jagla to nudùdu kòn po e po lẹ sọ sè didọ to yéde ṣẹnṣẹn, dọmọ, Mẹnu wẹ ehe to ylando jona ome ga? ⁵⁰E sọ dọ hlan nawe lọ domọ, Yise towe ko whlẹn we gán; to yìyì jijọho mẹ.

¹E SỌ wá jọ to enẹgodo wẹ e to yìyì lédo otodaho po gbeta le po pé bo to yẹwheho do, bo sọ to wendagbe áhọludu Jiwheyẹwhe tọn tọn hẹnwá: omẹ wiawe le sọ tin to e de. ²Podọ yọnnusi delẹ he yè ko henazọngbọna sọn gbigbọ ylankan lẹ po madogán lẹ po me, Malia he yè nọ ylọ Magdaleni, mẹhe mẹ aovi ṣinawe ko tọ́njegbonu yì sọn, ³Joana asi Kuza hònkonsi Hẹlọdi tọn tọn, Susana, po omẹ: susu devo po, he to dèvizonwa hlan en sọn onú yetọn lẹ mẹ.

⁴Whenuena agùndaho de wá plidopọ, bo wá e de sọn otòdaho lepo me, é dohó gbọn oló de me: ⁵Nudotọ de tọn jei nado yi do okun etọn: le é to okún do, delẹ flẹ́ jẹ alitó: yè sọ zin i dai, ohè aga tọn lẹ sọ sinyan en dù. ⁶Odelẹ sọ flẹ́ jẹ osé ji: le e tónkun jegbonu, é fiọ, na é ma mọ osìn wutu. ⁷Odelẹ flẹ́ jẹ owùn ṣẹnṣẹn; owun sọ wú po e po daga, bo sọ finyọn ẹn hù. ⁸Odelẹ sọ flẹ́ jẹ aigba dagbe ji, bo sọ wu jegbonu, bo sọ hẹn sinsẹ́n jẹgbonu wá kanweko donu kanweko de. Whenuena é sọ dọ onú helẹ vò, é dawhá dọmọ, Mẹhe tindo otọ́ nado sè, ni sè.

⁹Nuplọntọ etọn lẹ sọ kanbiọ ẹ dọmọ, Etẹwẹ yè na yón oló he na? ¹⁰E sọ dọmọ, Mìwlẹ we yè na hlan nado yón nudabla ahọludu Jiwheyẹwhe tọn tọn: ṣigba hlan pipotọ lẹ: to olo mẹ: na to mimọ mẹ, yé ni nọ ma mọ, na to sisè mẹ, yé ni nọ ma tunwun. ¹¹Dinvie ehe wẹ oló lọ: Ọkún lọ wẹ ohó Jiwheyẹwhe ¹²Yé alihotó tọn lẹ wẹ yé he sè lẹ: whenẹnu wẹ lẹgba wá bo sọ yí ohó lọ sọn ayiha yetọn me, na yé ma nado yise, na yè ma nado whlẹn yé gán. ¹³Yé osé ji tọn lẹ wẹ yé he, whenuena yé sè, yé yí ohó lọ po ayajijẹ po: ehelẹ ma do adò, yé yise whenu vude, to whlepon whenu, yé joagò. ¹⁴Ehe flẹ́ jẹ owùn ṣẹnṣẹn le wẹ yé, whenuena yé sè vò, yé tọ́njegbonu yí, yè sọ yí vivẹnu po adọkun po, po gbẹdudu aihọn he ton lẹ po do finyọn ẹn hù, yé ma sọ sọgan sén biapa. ¹⁵Ṣigba ehe to aigba dagbe ji lẹ wẹ yé, he yí ayiha nugbo po dagbe po do sè ohó lọ, bo yí i hẹn, bo sọ yí homẹmimiọn do hẹn sinsẹ́n jegbonu wá.

¹⁶Mẹde ma tin, whenuena é ko tá zogbán vò, bo na yí ozẹ́n ṣinyọn do e, kavi bọ é na yí i do adózan glọ: adavo ni ze e do zogbántin ji, na ye he to whégbè biọ lẹ nido mo hinhọ́n. ¹⁷Na nude ma tin to nuglọ, he yè ma na dehia; mọwẹ núde ma sọ whlá; bọ yè ma na yọnẹn, bọ é ma na tọ́n jẹ gbangba. ¹⁸Enewutu na mì ni payi lè mì to sisè do go: na mẹdepope hé tindo éwọ wẹ yè na na hlan; mẹdepope he ma tindo si wẹ yè na yí onu he é lẹn dọ é tindo sọn.

¹⁹Whenẹnu wẹ onọ etọn, po mẹmẹsunnu etọn le po wá e de, yé ma sọ sọgan sepó ẹ na tẹnjinjan wutu. ²⁰Omẹ delẹ sọ dọ hlan en, dọ; Onọ towe po mẹmẹsunnu towe le po site to gbonu, yé jlo na mọ we. ²¹E sọ gblọn bo dọ hlan yé, dọ, Onọ ṣie po mẹmẹsunnu ṣie lẹ po wẹ ehelẹ he sè ohó Jiwheyẹwhe tọn, bo sọ yí wà i.

²²Dinvie e sọ wá jọ, to dopo azán nẹlẹ tọn gbè, é biọ vàtlẹ de mẹ po nuplọntọ etọn lẹ po: é sọ dọ hlan yé, dọmọ, Mì gbọ mí ni juyì awà awetọ tándo tọn ji. Yé sọ sunhún do. ²³Ṣigba le yé to yìyì, é damlọn; jẹhọn daho sọ jete, é to yìnyìn to tándo ji; é sọ hen yé gó na osìn, yé sọ tin to owù mẹ. ²⁴Yé sọ wá e de, bo fọ́n en, dọmọ, Mẹplọntọ, Mẹplontọ, mí dòn. Whenenu wẹ é fọ́n, bo sọ wọhẹ jẹhọn po zingidi osìn tọn po: yé sọ huwhé, bo sọ nabọẹ tó ²⁵E sọ dọ hlan yé, dọ, Fie wẹ yise mìtọn te? Yínyín avosatọ e jawu do yé, yé to didọ hlan yénọzo dọ, Be menu wẹ ehe! bọ é degbèdo yèdọ jẹhọn po osìn po, bọ yé sọ yí i se.

²⁶Yé sọ wá óto Gadaleni lẹ tọn mẹ hẹ pànnukọn Galili. ²⁷Whenuena é sọ jẹ age, dawe de pé e to gbonu otòdaho lọ tọn, mẹhe ko do aovi lẹ, bọ é ko dẹn bo ma nọ sìnyọn avọ̀, mọwẹ é ma nọ sinai to owhé de gbè, adavo to oyòwhó lẹ mẹ. ²⁸Whenuena é mo Jesu, é dawhá, bo sọ jẹklo to ewọ nukọn, bo yí ogbe leié do, dọmọ, Etẹ wẹ yẹn tindo nado wa to de we, Jesu, hiẹ Ovi Jiwheyẹwhe Gigogan tọn? Yẹn vẹ we, a doyana mi blo. ²⁹(Na é ko degbẹdo gbigbọ mawe lọ nado tọn jẹgbonu sọn dawe lọ go wutu. Na whepoponu wẹ é nọ jẹ e ji; yè sọ yí ogàn po afọgan po do sín in: winwen ogàn lọ, é nọ yín yinyan gbọn aovi de biọ zùngbo mẹ.) ³⁰Jesu sọ kanse e dọmọ, Etẹwẹ oyín towe? E sọ dọmọ, Legionì: na aovi susu wẹ biọ ewọ mẹ. ³¹Yé sọ vẹ̀ ẹ dọ, é do yé hlan dogbó mẹ blo. ³²Apó ohàn susu tọn sọ tin to finẹ bo to núdù to osé ji; yé sọ vè ẹ ni gbọ yé ni yì biọ yé mẹ. E sọ dikena yé. ³³Whenẹnu wẹ aovi lẹ tọ́n jegbonu sọn dawe lọ go, bo sọ yì biọ ohan lẹ mẹ: ohanpomẹ hozin bo sọ họnwezun gbọn agbadò tó yì biọ tándo mẹ, bo sọ siọ do osìn mẹ ³⁴Whenuena yé he to yé yìn lẹ mọ onú he jọ, yé hòn, bo yì, bo sọ dọ e to otodaho me podọ to aigba lọ ji. ³⁵Whenenu wẹ ye tón yì nado pọ́n onú he jọ, bo sọ wá Jesu de, bo mọ dawe mehe go yè yan aovi lẹ jegbonu sọn sinai to afọ Jesu tọn go, é ṣinyọn avọ̀, ayiha etọn wai: obu sọ di yé ³⁶Yé he sọ mọ ẹn lẹ dọ hlan yé, le é wà do bọ yè do hẹn ewọ he do aovi le je gángán ³⁷Whenẹnu wẹ gbẹtọ Gadalẹni tọn lẹpo sọ vẹ̀ ẹ dọ ni yì sọn yé de; na obu di yé susu; é sọ biọ vàtlẹ de mẹ bo sọ gò do godo. ³⁸Dawe lọ mehe go aovi lẹ tón sọn vẹ̀ ẹ dọ ni nò he ẹ: ṣigba Jesu do e hlan, dọmọ, ³⁹lẹgò yì owhé towe gbè, bo yí onú he Jiwheyẹwhe wà hlan we hia, le é klo sọ. E sọ yì, bo to didọ pé otòdaho lẹpo mẹ, le Jesu wà onú daho do.

⁴⁰Podọ le Jesu lẹgò, agùndaho lọ kẹalọyl i: na yé omẹ pó wẹ to mukundo e. ⁴¹Bo do ayi e go, dawe de he yè nọ ylọ Jailu wá, dopo to ogán sinagọgu tọn lẹ mẹ, è jẹklo to afọ Jesu tọn go, bo vẹ̀ ẹ nado wá biọ owhé etọn gbè: ⁴²na é tindo viyọnnu dopo akan, he yì owhè wiawemẹ, é mlọnai to okú dònu. Ṣigba le é jei, gbẹtọ lẹ to tẹnjan ẹn.

⁴³Nawe he do azọ̀n ozẹntin ohùn tọn de, sọn owhè wiawe gbọn, bo zán Onú he é tindo lẹpo na bokọnọ lẹ, mọwẹ yè ma sọgan hẹnazọ̀ngbọ nẹ̃ gbọn mẹde de. ⁴⁴E gbọn godo etọn wá, bo do alọ okẹ̀yẹ̀ awù etọn tọn go: plaun wẹ asisahùn etọn sọ gbò. ⁴⁵Jesu sọ dọmọ, Mẹnu wẹ do alọ ogo e? Whenuena yé omẹ pó mọnu, Pita po yé he tin to e de lẹpo po dọmọ, Mẹplọntọ, gbẹtọ lẹ to tẹnjan we, bo to agbali we, hiẹ sọ dọmọ, Mẹnu wẹ do alọ ogo e? ⁴⁶Ṣigba Jesu dọmọ, Mẹde do alọ ogo e: na yẹn mọ hlan dọ huhlọn jẹgbonu yì sọn ogo e. ⁴⁷Whenuena nawe lọ mọ dọ ewọ ma yín whiwhla, é wá, bo to sisọsisọ, é jẹklo to nukọn etọn, é sọ dọ to gbẹtọ lẹpo nukunmẹ, na onú he wutu é doalọ e go, podọ le yè hẹnazọ̀ngbọ nẹ̃ to tẹndoponẹmẹ do. ⁴⁸E sọ dọ hlan en, dọ, Oviyọnnu, dotu, yise towe ko whlẹn we gán; to yìyì to jijọho mẹ.

⁴⁹Le é so to didọ, mẹde sọn owhé ogán sinagọgu tọn gbè wá, dọmọ, Oviyọnnu towe ko kú; a dotukla Mẹplọntọ ba blo. ⁵⁰Ṣigba whenuena Jesu sè, é gblọn dọ hlan ẹn, dọ, A dibu blo: sà ko yise kẹdẹ, yè na sọ hẹn ẹn jẹgangan. ⁵¹Whenuena é biọ owhé gbè, é ma sọ dikena mẹde nado biọ họmẹ po e po, adavo Pita po Jakobu po, po Johanu po, podọ otọ oviyọnnu lọ tọn po onọ etọn po kedẹ. ⁵²Omẹ pó to avivi, bo sọ to avihan etọn do, é sọ dọ hlan yé, dọ, Mì viavi ba blo: é ma kú gba, amlọn é dọ. ⁵³Yé sọ vlẹ ẹ ko, yínyọnẹn dọ, é ko kú. ⁵⁴E sọ yàn yé omẹ pó jẹgbonu, é hẹn alọ nẹ, bo dọmọ, Oviyọnnu, tite ⁵⁵Gbigbọ etọn sọ lẹgò, é sọ fọ́n plaun; é sọ degbè dọ yé ni na núdùdù i. ⁵⁶Avò vò mẹjitọ etọn lẹ: ṣigba é dosénna yé dọ, yé dọ onu he jọ na mẹde blo.

¹E ylọ nuplọntọ etọn wiawe lẹ dopọ, bo sọ na huhlọn yé po aṣẹ́ po to aovi lepo ji, podọ nado hẹn awutuzòn lẹ gbọ. ²E sọ do yé hlanyì gbonu nado dọyewheho ahọludu Jiwheyẹwhe tọn, podọ nado hẹn azọ̀n lẹ gbọ. ³E sọ dọ hlan yé, dọ, Mì hẹn núde yì na gbéjizọnlin mìtọn blo, opò, kavi sakoto, kavi akla, kavi akuẹ; mọwẹ dopodopo mìtọn sọ do awù awe blo. ⁴Owhé depope gbè mì biọ, finẹ wẹ mì ni nò, finẹ wẹ mì ni fọ́nyì sọn. ⁵Podọ omẹ sọha he ma yí mì, whenuena mì fọ́njei sọn otòdaho lọ mẹ, na mì ni húnhún kógudu sọn afọ mìtọn go na okunnu de do yé ji. ⁶Yẹ sọ fọ́nyì, bo sọ gbọn gbeta lẹ mẹ to y: yì, bo to yẹwheho wẹndagbe tọn dọ, bo sọ to azọnhengbọna omẹ to ofi popo.

⁷Hẹlọdi otògán sọ sè onú he yè to wiwà lẹpo: é sọ jẹflu talala, na yè to didọ to mẹdẽ lẹ de, dọ Johanu wẹ fọ́n sọn osiọ lẹ mẹ; ⁸podọ to mẹdẹvo lẹ de, dọ Eli sọawúhia; podọ to mẹdevo lẹ de, dọ dopo to yẹwhegán hóhó tọn lẹ mẹ fọ́n. ⁹Hẹlọdi sọ dọmọ, Johanu yẹn ko gbòtana: ṣigba mẹnu wẹ ewọ he yẹn to onú helẹ hunkọ sè gbọn e dali he? E sọ jlo na mọ ẹn.

¹⁰Apọsteli lẹ, whenuena yé lẹgò, yé dọ onú he yé wá lẹpo nẹ̃. E sọ yi yé, bo sọ yì apadopo hlan todahọ dali, he yè nọ ylọ Bẹtsaida. ¹¹Ṣigba agùndaho lẹ lọ mimọ ẹn hlan hodo e; é sọ yí yé, bo sọ dọhó ahọludu Jiwheyẹwhe tọn hlan yé, bo sọ hẹnazọ̀ngbọna yé he jlo azọ̀nhẹngbọna lẹ. ¹²Wbenuena okle sọ ṣẹ̀ vivọ, whenẹnu wẹ mẹwiawe le wá, bo sọ dọ hlan ẹn, dọmọ, Do agùndaho lọ hlan yì, na yé nido yì gbeta, po otò he lédo lẹ lo mẹ, na yé ni yì jẹ, podọ nado din núdùdù; na zùngbo mẹ wẹ mí te to ofi. ¹³Ṣigba é dọ hlan yé, dọ, Mì na yé nado dù. Yé sọ dọmọ, Mìwlẹ ma tindo hú akla atón po wlieyi awe po gba; adavo mìwlẹ yì hó núdùdù na gbẹtọ he lẹ. ¹⁴Na yé yì sunnu degbadefọtọ̀n hunkọ. E sọ dọ hlan nuplọntọ etọn lẹ, dọ, Mì hẹn yé ni jagla kande aokandeao to ogbémẹgbẹmẹ. ¹⁵Yé sọ wà mọ, yé sọ hẹn yé omẹ pó jagla. ¹⁶Whenẹnu wẹ é yí akla atón, po whevi awe lẹ po, pinpọn aga hlan olọn, é dona yé, bo sọ kán, bo yí na nuplọntọ lẹ nado zé do agùndaho lọ nukọn. ¹⁷Yé sọ dù, yé omẹ pó sọ gọhò: yé bé oha wiawe pli na dupò he pò hlan yé.

¹⁸E sọ wá jọ le é pò ewọ dopo to dèho, nuplọntọ lẹ tin to e de: é sọ kanse yé dọmọ, Mẹnu wẹ agùndaho lẹ lọ dọ dọ yẹn yín? ¹⁹Yé sọ gblọn, dọmọ, Johanu Baptisti; ṣigba mẹdelẹ dọ, Eli; medevo sọ dọmọ, dopọ to, yẹwhegán hóhó tọn lẹ mẹ wẹ fọ́n. ²⁰Ẹ sọ dọ hlan yé, dọmọ, Ṣigba mẹnu wẹ mìwlẹ dọ dọ yẹn yín? Pita sọ gblọn dọmọ, Klisti Jiwheyẹwhe tọn. ²¹E só nasé yé bo sọ dosénna ma nado dọ ehé na mẹde; ²²dọmọ, Ovi gbẹtọ tọn ma sọgan nọ ma jiya onú susu tọn, bọ yè nasọ gbé ẹ sọn mẹho lẹ de, po ogán yẹwhenọ lẹ tọn po, po wekantọ lẹ po, bo sọ yín hùhù, to azán atọntọ, yè nasọ fọ́n ẹn do ogbẹ. ²³E sọ dọ hlan yé omẹ pó, dọ, Eyín mẹde na jlo hodo mi, gbọ é; ni món ede, bo sọ zé satin etọn egbesọ, bo hodo mi. ²⁴Na mẹdepope he na jlo whlẹn alindọn etọn gán, na bú i; sigba mẹdepope he na bú alindọn etọn na yẹn wútu, dopolọ wẹ na whlẹn ẹn gán. ²⁵Na etẹwe omẹ de do yín alẹnọ, eyín é duale aihọn pete tón, bo bú, kavi hẹn ede lọsu siai? ²⁶Na mẹdepope he winyan ṣie po ohó ṣie po tọn hù, ewọ wẹ winyan etọn na hù Ovi gbẹtọ tọn, whenuena é ja to gigo ewlọsu tọn mẹ podọ to Otọ́ etọn tọn mẹ, podọ to angẹli wiwe lẹ tọn mẹ. ²⁷Ṣigba yẹn dọ sọn nugbọ de mẹ na mì, Mẹdelẹ site to ofi, he ma na dó okú pon, kaka yé na mọ ahọludu Jiwheyẹwhe tọn.

²⁸E sọ wá jọ azán sinatòn nkọ to ohó helẹ godo, é yí Pita, po Johanu po, po Jakobu po, bo sọ hé aga biọ osó lọ mẹ, nado hodè. ²⁹Le é to dèho, nukunmẹ etọn diọ, avọ̀ etọn wé pẹn, bo sọ to sisó mlanmlan. ³⁰Do ayi e go, sunnusi awe to hódọ hẹ ẹ, he yín Moṣe po Eli po: ³¹Mẹde sọawúhia to gigo mẹ, yé sọ to ohó oku etọn tọn dọ, ehe ewọ na dotana to Jelusalẹm. ³²Ṣigba nukun Pita po yé he tin to e de lẹ po tọn pọ́n na amlọn: whenuena yé sọ fọ́n, yé mọ gigo etọn, po sunnusi awe he site to é de lẹ po. ³³E sọ wá jọ, le yé klan sọn e de, Pita dọ hlan Jesu, dọ, Oklunọ, é yọn na mìwlẹ nado tin to ofi: bo sọ gbọ mí ni basi avaja atón; dopo na hiẹ, dopo na Moṣe, dopo na Eli; ma yón onú he é to didọ. ³⁴Le é to onú helẹ dọ, aslọ de wá, bo sọ ṣinyọn oyè yé ji: obu sọ di yé whenuena yé to aslọ lọ mẹ biọ jei ³⁵Ogbè de sọn aslọ lọ mẹ, dọmọ, Ehe wẹ Ovi yiwanna ṣie; mì nọ sè etọn. ³⁶Whenuena ogbè lọ sọ juwayì, Jesu dopo akan wẹ yé mọ. Yé sọ whlá ẹ, yé ma sọ dọ onú he yé mọ depope na mẹde to azán nẹlẹ mẹ.

³⁷E sọ wá jọ, to aihọn gbè, whenuena yé tejẹ sọn osó lọ ji ja agùndaho de pé e. ³⁸Do ayi e go, dawe de sọn agùndaho lọ mẹ dawhá, dọmọ, Mẹplọntọ, yẹn vé we, nado pọ́n ovi ṣie; na ovi ṣie dopo akan lọ wẹ. ³⁹Bo do ayi e go, gbigbọ de nọ hẹn ẹn, é sọ nọ dawhá ajiji; é nọ dlẹn ẹn, bọ é nọ yén fútúfutu, é nọ gbleawu nẹ, é ma nọ jo é apla gba. ⁴⁰Yẹn sọ vé nuplọntọ towe lẹ nado yàn ẹn tón; yé ma sọ sọgan gba. ⁴¹Jesu sọ gblọn dọmọ, Whendo mayisenọ, gblewanọ, na yẹn na nò hẹ mì dẹn sọ? Hẹn ovi towe wá ofi le. ⁴²Le é sọ ja, aovi lọ zé e liai, bo sọ dlẹn ẹn, Jesu sọ wọhẹ gbigbọ mawe lọ, é hẹnazọ̀ngbọna ovi lọ, bo sọ dòn en na oto etọn. ⁴³Awu sọ ji yé omẹ pó do gigodaho Jiwheyẹwhe tọn go. Ṣigba whenuena yé omẹ pó sọ to avọ̀sa do onú he é wà lepo go, é dọ hlan nuplọntọ etọn lẹ, dọ, ⁴⁴mì gbo ohó helẹ ni siọ biọ otọ́ mìtọn me: na yè na jo Ovi gbẹtọ tọn do alọ gbẹtọ le tọn mẹ. ⁴⁵Ṣigba yé ma yón ohó lọ, é sọ buwun do yé, na yé ma tunwun in; obu sọ to yé di nado kàn ohó lọ biọ e.

⁴⁶Whenẹnu wẹ linlẹn fọ́n to yé mẹ, menu wẹ na yín mẹhe klohú to yé mẹ. ⁴⁷Whenuena Jesu mọ linlẹn ayiha yetọn me tọn, é yí ovivu dopo, bo zé e sinai to é de, ⁴⁸bo dọ hlan yé, dọ, Mẹdepope he na yí ovivu helẹ to oyín ṣie mẹ, é yí mí: mẹdepope he sọ yí mi, é yí ewọ he do mi hlan: na ewọ he whehú to mì omẹ pó mẹ, dopolọ wẹ yín kiklo.

⁴⁹Johanu sọ gblon bo dọmọ, Mẹplọntọ, mìwlẹ mọ mede yí oyín towe do to aovi lẹ yàn; mí sọ ko nẹ, na é ma hodo we hẹ mí wutu. ⁵⁰Jesu sọ dọ, hlan ẹn, dọ, A kó nẹ ba blo: na ewọ he ma jagò do mì go, mìtọn wẹ.

⁵¹E sọ wá jọ; whenuena ojle yíyí i do aga whenu sọ, é zé nukun etọn whete do Jelusalẹm yìyì ji, ⁵²e sọ do médagun hlan nukọn etọn: yé sọ yì, bo biọ gbeta Samalitọ lẹ tọn de mẹ, nado wleawu dai nẹ̃. ⁵³Yé ma sọ yí i, na nukun eton tin dimẹ é jei Jelusalẹm wutu. ⁵⁴Whenuena nuplọntọ etọn le Jakobu po Johanu po mọ ehe, yé dọmọ, Oklunọ, hiẹ na jlo mí ni ylọ miyọn sọn aga, na é ni fiọ ye, dilè Eli wà do? ⁵⁵Ṣigba e lé, bo wọhẹ yé, bo sọ domọ, Mì ma yón gbigbọ he hunkọ mì tindo gba ⁵⁶Na Ovi gbẹtọ tọn ma wá nado hù ogbè gbẹtọ tọn súdo; adavo nado whlẹn yé gán. Yé sọ yì gbeta devo.

⁵⁷Le yé jei to aliho, dawe de dọ hlan ẹn, dọ, Oklunọ, yẹn na hodo we gbọn fidepope he hiẹ jei, ⁵⁸Jesu sọ dọ hlan ẹn, dọmọ, Wọtupọẹ lẹ tindo odò, ohẹ oji aga tọn lẹ sọ do adó, ṣigba Ovi gbẹtọ tọn ma tindo ófì de na do ota etọn ai te gba. ⁵⁹E sọ dọ hlan mẹdevo, dọmọ, To hihọdo mi. Ṣigba ewọ dọ hlan en, dọmọ, Oklunọ, gbọ yen ni yì, bo disiọ otọ́ ṣie tọn whé. ⁶⁰Ṣigba ewọ dọ hlan ẹn, dọmọ, Gbọ osiọ lẹ ni disiọ yéde tọn; ṣigba hiẹ ni yì, bo dọ yẹwheho ahọludu Jiwheyẹwhe ton tón. ⁶¹Mẹdevo ga sọ dọ hlan ẹn, do, Oklunọ yen na hodo we; ṣigba gbọ yen ni yì, bo biogbè yé he to owhe ṣie gbè lẹ whé. ⁶²Jesu sọ dọ hlan ẹn, dọ, Mẹde ma tin he ko yí alo etọn do oglepònu go, bo pọ́n gódo, tin jẹ na ahọludu Jiwheyẹwhe tọn gba.

¹TO onú helẹ godo, Oklunọ sọ dè omẹ kandegbàn devo ga, bo so do yé hlan; awe awe jẹnukọn nẹ yì otodaho po ofi he ewlọsu na jẹ lẹ po mẹ. ²Enẹwutu, é dọ hlan yé, dọ, Ojijẹ lọ yín susunọ, ṣigba àzónwàtọ le wẹ vude; enẹwutu mì hodè hlan Okluno ojijẹ tọn, na é ni do azónwàtọ hlan ójije etọn me. ³Mì yì: pon, yen do mì hlan di lẹngbọvu do ohia ṣẹnṣẹn. ⁴Mì hẹn sẹgẹ, kavi sakoto, kavi afọpá, blo: mì sọ dọnúdo medepope to aliho blo ⁵Owhé depope gbè mìbiọ, mì whéwhé ni dọ, Jijoho hlan owhé he. ⁶Eyín ovi jijọho tọn tin to finẹ, jijọhó mìtọn na jẹte do e ji: eyín é ma tin, é na legò wá mì de. ⁷Owhé lọ gbè wẹ mì ni dù, bo sọ nù onú depope yè na mì: na azọ́nwàtọ jẹhẹ azónkuẹ etọn. Mì tón sọn owhé de gbè biọ owhé de gbè blo. ⁸Otòdaho depope mẹ mì biọ, bọ yé yí mì, mì nọ dù onú he yé zé do nukọn na mì. ⁹Bo nọ hẹnazọ̀ngbọna awutunọ he tin to e mẹ lẹ, bó sọ nọ dọ hlan yé, dọ, Ahọludu Jiwhèyèwhe tọn to sisẹpó jẹ mì dè. ¹⁰Ṣigba otòdaho depope me mì biọ, bọ yé ma yí mì, mì ni tón biọ alihogbo otòdaho lọ tọn lẹ́ mẹ bo dọmọ, ¹¹yèdo kógudu sọn otodaho mìtọn mẹ, he lédo afọ mìtọn go, mí súnsún sè do mì ji: sogàn mì ni yón ehe dọ, ahọludu Jiwheyẹwhe tọn wá sẹpọ́ mì. ¹²Ṣigba yẹn sọ dọ hlan mì, dọ, E ná pónte na Sọdọm to azán nẹ gbè hú na otòdaho nẹ. ¹³Dìndọn hlan hiẹ, Kolazin! dindọn hlan hiẹ, Betsaida! nà eyín huhlọn lẹ he yè basi to mì mẹ yè ko basi tó Tile po Sidọni po mẹ, yé na ko vọjọ hóhó sinsinai to odévọ po afín po mẹ. ¹⁴Ṣogãn é na pónte na Tile po Sidọni po to whẹ̀dida mẹ hú na mì. ¹⁵Podọ hiẹ Kapẹlnaumi, he yè zé daga jẹ olọn, híẹ wẹ yè nasọ zíndai do olọnzo mẹ. ¹⁶Mẹhe Sè mìtọn, é sè ṣie; mehe sọ vlẹ mì, é vle mi; mẹhè sọ vlẹ mi, é vlẹ ewọ hé do mi hlan.

¹⁷Yé omẹ kandegbàn lẹ sọ lẹgò po ayajijẹ po, dọmọ, Oklunọ, yèdọ aovi lẹ yín meglọnọ hlan mí to oyín towe mẹ. ¹⁸E sọ dọ hlan yé, dọ, Yẹn mọ Satani di abì, flé sọn olọn jeai. ¹⁹Do ayi e go, yẹn na aṣẹ́ mì, nado tunafọ odan po aklekle po ji, podọ to huhlọn kẹ̀ntọ! tọn lẹpo ji: nudepope ma na gbleawuna mì gba. ²⁰Sògàn mì jaya to ehe mẹ blo, dọ gbigbọ lẹ yín meglọnọ hlan mì, ṣigba mì ni jaya dọ yè wlan oyín mìtọn to olọn mẹ.

²¹To ojlẹ doponelọ mẹ wẹ Jesu sọ jaya gbọn Gbigbọ Wiwe dali, bo dọmọ, Yẹn dòpéna we, Otọ́, Oklunọ olọn po aihọn po tọn, na hiẹ ko yí onú helẹ whlá sọn nuyọnẹntọ lẹ, po zìnzìntọ lẹ po de, bò sọ do yé hia hlan ovivu le: mọwẹ, Otọ́: dọ mọ wẹ é yín nuhùnhomẹmẹ do to nukun towe mẹ. ²²Onú lẹpo wẹ yè jo hlan mi sọn Otọ́ ṣie de: mẹde ma sọ yón mẹhe Ovi yín, adavo Otọ́; podọ mẹhe Otọ́ yín, adavo Ovi, podọ mẹhe jlo é, é yí i hia Han. ²³Lilé pànnukọn nuplọntọ étọn lẹ, é dọ to nuglọ, dọ, Donanọ wẹ nukun he to onú he mì to mimọ hẹlẹ mọ: ²⁴Na yẹn dọ hlàn mì, yẹwhegán lẹ po ahọlu lẹ po jlo na mọ onu he mì to mimọ, yé ma sọ mọ yé: podọ nado sè onú he mì to sisè, bo ma sọ sè yé.

²⁵Do ayi e go, osẹ́nno de sọ fọ́n site, bo whiwhlé e pọ́n, dọmọ, Mẹplọntọ, etẹwẹ yẹn na wà nado dugú ogbẹ madopodo tọn? ²⁶E sọ dọ hlan ẹn dọ, Etẹwẹ yè wlan do osén me? Nawẹ hiẹ hia do? ²⁷E sọ gblọn dọmọ, Hiẹ na yiwanna Oklunọ Jiwheyẹwhe towe sọn ayiha towe lẹpo mẹ, podọ sọn alindọn towe lẹpo mẹ, podọ sọn huhlọn towe lẹpo mẹ, podọ sọn otu towe lepo mẹ; pódọ kọmẹnu towe di dewe. ²⁸E sọ dọ hlan ẹn, dọ, Hiẹ gblọn doganji: wà éhe, hiẹ nasọ gán ²⁹Ṣigba ewọ jijlo nado pa ede, dọ hlan Jesu, dọmọ, Mẹnu ka wẹ komẹnu ṣie? ³⁰Jesu sọ gblọn bo dọmọ, Dawe de jẹte sọn Jelusalẹm, jei Jẹliko, bo sọ jẹ alọ ajotọ lẹ tọn mẹ, he yí avọ̀ etọn sọn e go, bo sọ húnu in, bo sọ hòn jo e do yí bedèbedè. ³¹Gbon okosọ dali wẹ yẹwhenọ de jẹte gbọn finẹ dali jei; whenuena é mọ ẹn, é lé gbọn awà awetọ ji yì. ³²Mọkẹdẹ wẹ Levite de ga, whenuena é jẹ ofi lọ bo mọ ẹn, é lé gbọn awà awetọ ji. ³³Ṣigba Samalitọ de, le é gbéjizọnlinji jeì jẹ ofi he é te: whenuena é mọ ẹn, lẹblanu wá ẹ ³⁴E yì e de, bo bla alán nẹ, bo kòn amì po ovẹ̃n po do e mẹ, bo sọ zé e do kanlin ewlọsu tọn ji, bo hen ẹn wá dòhò me, bo to e go pọ́n. ³⁵Podọ to aihọngbe, whenuena è jei, é yí abọgankuẹ awe, bo sọ na dohogán, bo sọ dọ hlan ẹn, dọ, Pọ́n e go: onú depope hiẹ sọ zán lánhu, whenuena yẹn lẹgò, yẹn na sú we. ³⁶Mẹnu to yé omẹ atọ̀n helẹ mẹ, wẹ hiẹ lẹn do kọmẹnu hia hlan mẹhe jẹ alọ ajotọ lẹ tọn mẹ? ³⁷E sọ dọmọ, Ewọ he do lẹblanu hia to e ji. Whenẹnu wẹ Jesu dọ hlánẹn, dọ, Yì, bo no wà mọkẹdẹ.

³⁸Dinvie, le yé yìyì to aliho yetọn ji, é biọ gbeta de mẹ: nawe he yè nọ ylọ Malta yí i do owhé etọn gbè. ³⁹E sọ tindo nọvi yọnnu de, he yè nọ ylọ Malia, mẹhe ga sinai to afọ Jesu tọn go, bo to ohó etọn sè. ⁴⁰Ṣigba Malta to jajaji na sinsẹ̀n susu; é sọhẹji, wá e de, bo dọmọ, Oklunọ, hiẹ ma hòpón dọ nọvi yọnnu ṣie jo yẹn dopo do nado to sinsènbasi? èhẹwutu dègbèdo é dọ é ni gọàlọ na mi. ⁴¹Jesu sọ gblọn bo dọ hlan ẹn, dọ, Malta, Malta, hiẹ yín magbojẹnọ podọ tuklanọ na onu susu tọn: ⁴²Ṣigba onú pẹvide wẹ yín núwhedo: Malia ko dè omọ̀n dagbe lọ, he yè ma sọgan yí sọn e de.

¹E SỌ wá jọ, le é to dẹho to ofi de, wẹ whenuena é nabọẹ, dopo to núplọntọ etọn lẹ mẹ dọ hlan ẹn, dọ, Oklunọ, plón mí nado nọ hodè, dilé Johanu yèdọ ga plọ́n nuplọntọ etọn lẹ do. ²E sọ dọ hlan yé, dọmọ, Whenuena mìwlẹ to dèho, mì nọ dọmọ, Otọ́ mìtọn he tin to olọn mẹ, Oyín towe ni yín hihiọ. Ahọludu towe ni wá. Ojlo towe ni yín wiwà, di to olọn mẹ mọwe to aigba go. ³Na mí gbèdopo gbèdopo núdùdù egbesọ tọn mí. ⁴Jo ylando mìtọn na mí; na mìlọsu ga nọ jona omẹ popo he yín ahọtọnọ hlan mí lẹ. A sọ hẹn mí wá biọ whlepón mẹ blo; ṣigba whlẹn mí sọn oylan mẹ.

⁵E sọ dọ hlan yé, dọ, Mẹnu wẹ to mì mẹ, bo na tindo họ́ntọn de, bọ é na yì e de to ozánhomẹ, bò na dọ hlan, dọ, Hóntọn, yàn akla atọ̀n na mi; ⁶Na họ́ntọn ṣie de gò sọn gbéjizọnlin de mẹ wá dè, yẹn ma sọ tindo núde na zé dó nukọn nẹ̃? ⁷Bọ ewọ sọn họmẹ na gblọn, bo dọ, A do tukla mi blo: ohòn ko sú to dinvie, yọ̀pọ sìe lẹ so tin to dẽ to adózan ji, yẹn ma sọgan tọn bo yí na we gba. ⁸Yẹn sọ dọ hlan mì, dọ, Eyín ewọ ma tlẹ na fọ́n bo yí nẹ, na é yín họ́ntọn etọn wutu, gãnṣo na lilidido etọn tọn wutu, é na fọ́n, bo yí nẹ sù sọ le é jlo do. ⁹Yẹn sọ dọ hlan mì, Mì biọ, yè nasọ yí na mì; mì din, mì nasọ mọ; mì húhúhòn, yè nasọ hùndai hlan mì. ¹⁰Na mẹdepope he biọ, mọ yí; mẹhe sọ din, mọ; podọ hlan mẹhe sọ húhúhòn yè na sọ hùndai nẹ. ¹¹Eyín ovi biọ akla to mẹdepope mìtọn he yín otò de, be é na yí ozannu nẹ? kavi eyín é biọ whevi, be to whevi tẹnmẹ, é na yí odàn nẹ? ¹²Kavi eyín é biọ azìn, be é na dike yí aklekle nẹ? ¹³Enẹwutu, eyín mìwlẹ he yín omẹ ylankan yòn le yè nọ na nunina dagbe hlan ovi mìtọn lẹ do, nẹmunẹmu wẹ Otò mìtọn olọn tọn na na Gbigbọ Wiwe hlan yé he biọ to e de lẹ.

¹⁴E sọ to aovi de yàn jẹgbonu he yín unbọpẹn. E sọ wá jọ, whenuena aovi lọ tọ́njẹgbonu yì, unbọpẹn dọhó; avọ̀ sọ vò agùndaho lẹ lọ. ¹⁵Ṣigba mẹdelẹ to yé mẹ dọmọ, Gbọn huhlọn Beẹlzebuli, ogán aovi lẹ tọn dali, wẹ ewọ do to aovi lẹ yàn jẹgbonu. ¹⁶Mẹdevo lẹ whiwhle e pòn, to ohia de din sọn e de sọn olọn mẹ. ¹⁷Ṣigba ewọ yinyọn linlẹn yetọn, é dọ hlan yé, dọ, Ahọlu yigba depope he klán do ede ji, yè hẹn ẹn wá ovọjẹ mẹ: owhé he sọ klán do ede ji, é jai. ¹⁸Eyín Satani ga sọ yín kin klan do ede ji, nawẹ ahọludu etọn na nọte do? Na mì dọ huhlọn Beẹlzebuli tọn mẹ wẹ yẹn to aovi lẹ yàn jẹgbonu te wutu. ¹⁹Eyín yẹn to huhlọn Beẹlzebuli tọn mẹ to aovi lẹ yàn jẹgbonu, be huhlọn mẹnu tọn mẹ wẹ ovi mìtọn lẹ to yé yàn jẹgbonu te? enẹwutu wẹ yé na yín whẹdatọ mìtọn. ²⁰Ṣigba eyín yẹn gbọn alọviyẹyẹ Jiwheyẹwhe tọn mẹ to aovi lẹ yàn jẹgbonu, bó ahọludu Jiwheyẹwhe tọn wá mì ji. ²¹Whenuena sunnu huhlọnnọ he pannu to awánu etọn họ, agbàn etọn lẹ na tin to jijọho. ²²Ṣigba whenuena sunnu huhlọnnọ hú i de na wá e ji, bo glo é, é yí gbaja etọn he go é dotudo lẹpo sọn e si, bo sọ má ogblán etọn lẹ. ²³Mẹhe ma tin po yẹn po, é jẹagò do ogo e, mẹhe ma sọ bẹpli hẹ mi, é to vúnvúnvúnvún pé. ²⁴Whenuena gbigbọ mawe tòn sọn gbẹtọ go, é nọ to dindan pé to ofi húhú, bo nọ to gbọjẹ din; mamọ de, é dọmọ, Yẹn na lẹgọ yì owhé ṣie gbè, fie yẹn tón sọn. ²⁵Whenuena é wá, é mọ ẹn, yè ko zà ẹ, bo sọ doasọ nẹ̃. ²⁶Whenẹnu wẹ é yì, bo sọ yi do é de gbigbọ ṣinawe devo he ylankan hú ewlọsu: yé sọ biọ họmẹ, bo sọ nò finẹ: godomẹ dawe lọ tọn ylanhú tintan tọn.

²⁷E sọ wá jọ, le é dọ onú helẹ, nawe de to agùndaho lọ mẹ zé ogbè etọn daga bo dọ hlan ẹn, dọ, Donanọ wẹ adò he ji we, po anọ he hiẹ nò lẹ po. ²⁸Ṣigba é dọmọ, Nugbo yè ni kúkú dọmọ, donanọ wẹ yé he sè ohó Jiwheyẹwhe tọn, bo sọ yí i whlá.

²⁹Whenuena agùndaho lẹ lọ pli do e de, é sọ sè didọmọ, Whẹndo ylankan wẹ ehe: yé to ohia din; ohia de ma tin bọ yè na na ẹn, adavo ohia Jona yẹwhegán tọn. ³⁰Na le Jona lẹzun ohia de hlan Ninivitọ lẹ do, mọkẹdẹ wẹ Ovi gbẹtọ tọn na yín hlan whẹndo he ga. ³¹Ahọsi hùwaji tọn na fọ́n to whẹdazángbè po omẹ whẹndo he tọn lẹ po bo na gblewhẹdo yé: na é sọn aihọn pòdo dali wá nado sè nuyọnẹn Sọlomọni tọn: do ayi e go, mẹhe klohú Sọlomọni tin to ofi. ³²Mẹhe to Ninívi lẹ na fọ́n to whẹ̀dida mẹ hẹ whẹndo he, bo nasọ gbléwhẹdo e: na yé vọjọ to yẹwhehodidọ Jona tọn ji: do ayi e go, mẹhe klohú Jona de tin to ofi.

³³Mẹde ma tin whenuena é tá zogbán vò, bọ é na zé e do nuglọ, kavi do ojlénu glọ adavo do zagbántin ji, na yé he biọ họmẹ lẹ nido mọ hinhọn. ³⁴Miyọngbán agbasa towe tọn wẹ nukun towe: whenuena nukun towe yín dopoganna, agbasa towe lẹpo nasọ gò na hinhọ́n; ṣigba whenuena e yín oylan, agbasa towẹ lẹpo nasọ gò na zinvlu. ³⁵Enẹwutu hiẹ ni nọ do ayi e go, na hinhọ́n he tin hiẹ mẹ yín zinvlu blo. ³⁶Enẹwutu eyín agbasa towe lẹpogòna hinhọ́n, bọ apade ma do zinvlu gba, agbasa towe lẹpo nasọ tin di whenuena hinhọ́n zogbán tọn na hinhọ́n we.

³⁷Dinvie le é to didọ, Falesi de vò ẹ nado dùnú hẹ ẹ: é sọ biọ họmẹ, bo jagla nado dùnú. ³⁸Whenuena Falesi lọ mọ ẹn, avọ̀ vò e, na é ma lawu whẹpo do jagla to núdùdù kòn. ³⁹Oklunọ sọ dọ hlan ẹn, dọmọ, Dinvie mì Falesi lẹ nọ kló godo kọfo tọn po agbán tọn po: ṣigba homẹ mìtọn gò na alọslonamẹ po ylanwiwà po. ⁴⁰Mì nulunọ lẹ, be ewọ he basi onú he tin to gbonu, ma bisi ehe to home ga? ⁴¹Ṣogãn mì ni kuku nọ na nunina lẹblanu tọn sọn onú depope mì tindo mẹ, bo pọn, onu lẹpo na lẹzun wiwe hlan mì.

⁴²Ṣigba dindọn hlan mì, Falesi lẹ na mì nọ sú dadao mẹnti tọn, po lue tọn po, po omá wunmẹwunmẹ lẹ tọn po, bo sọ gbẹkọ whẹ̀dida po owanyi Jiwheyẹwhe tọn po go. Onu helẹ wẹ jẹ mìwlẹ ni wa, bo ma do jo awetọ dai mawà. ⁴³Dindọn hlan mì, Falesi lẹ na mì jlo otẹn daho tọ sinagọgu me, po nùdonùme po to ahi me ⁴⁴Dindọn hlan mì, wekantọ lẹ, po mi Falesi lẹ po, yẹnuwatọ! na mì tin di oyọwhe lẹ he ma sọawúhia, ye he sọ to zọnlinzin to yé ji le ma yọnẹn.

⁴⁵Whenenu wẹ dopo to osénnọ lẹ mẹ gblọn, bo dọ hlan ẹn, dọ, Meplọntọ, to didọ mẹ, hiẹ to mìwlẹ vlẹ ga. ⁴⁶E sọ dọmọ, Dindọn hlan mì, osénnọ lẹ ga na mì do agban he pèn nado yín hinhẹn do gbẹtọ ji, podọ mìlosu ma yí alọviyeyẹ mìtọn dopo do agban lẹ go. ⁴⁷Dindọn hlan mì! na mì do oyọwhé yewhegán lẹ tọn, oto mìtọn lẹ wẹ hu ye ⁴⁸Nugbo wẹ mi dekunnu dọ, mì do alọ to azọn oto mìtọn lẹ tọn mẹ: na ye hù yé, mìwlẹ sọ dó oyowhe yetọn lẹ. ⁴⁹Enẹwutu ga wẹ nuyọnen Jiwheyẹwhe tọn dọ, dọmọ, Yẹn na do yewhegan lẹ, po apọsíeli lẹ po hlan ye, medelẹ to yé mẹ ye na hù, bo nasọ dohomẹkẹn: ⁵⁰na yè nido kàn ohùn yẹwhegán lepo tọn se, he yè ko kọn dai sọn dodó aihọn tọn to whendo he si; ⁵¹sọn ohùn Ábẹli tọn, kaka jẹ ohùn Zakali tọn, mehe don to agbà po tẹmpli po ṣẹnṣẹn; nugbo yẹn dọ hlan mì, dọmọ, Yè na kàn ẹn se to whẹndo he si. ⁵²Dindọn hlan mì, osẹnnọ lẹ Na mìwlẹ ko yí honhùngan nuyọnẹn tọn: miwlọsu ma biọ họmẹ, yé he sọ to na biọ họme le, mi ginglọn.

⁵³Whenuena é tón jegbonu sọn finẹ wekantọ le, po Falesi lẹ po sẹ azinyan sọ ẹ susu bo sọ to homẹhẹngble nè, nado dọ onú susu sùhu: ⁵⁴ye tọwù nẹ̃, nado mọ núde hẹn to onù etọn mẹ, na ye nido slẹ ẹ.

¹TO ojlẹ de mẹ, whenuena gbẹtọ gegé madohihia agùndahọ lọ tọn plidopọ, sọmọ bọ yé to yénọzo ji hẹ, é sẹ̀ didọ hlan nuplọntọ eton lẹ nukọnjẹ na popo, domọ, Mì payi otọn Falesi lẹ tọn go, he yin yenuwiwà. ²Na nude ma tin he ye ṣinyọn nudo, bọ ye ma na dè hia; kavi ehe whlá, bọ yè ma na yọn ẹn. ³Enewutu nudepope mì dọ to zinvlu me, yè na sè to hinhọn mẹ; podọ onu he mì sọ do do otọ́ me to abò mẹ wẹ yè na dawhá do dọ tó ohọta. ⁴Yẹn sọ dọ hlan mì hontọn ṣie lẹ, Mì dibu blo na yé he nọ hù agbasa, to enegodo, ye ma sọ do nude bo sọ sogan wà ba. ⁵Ṣigba yẹn na navàse mí mẹhe mìwlẹ na dibusi: Mì dibusi ewọ, whenu é hù vò sọ tindo aṣẹ̀ nado dọn dlẹn olonzo mẹ: mọwe yẹn dọ hlan mì, Mì nọ dibusi i. ⁶Be oblenọ atọn ma wẹ yè nọ sa yín abọgan-kuẹ flínflín awe, ode to yé mẹ ma yín winwọn to Jiwheyẹwhe nukọn gba? ⁷Ṣigba yèdọ odà he tin to ota mìtọn lẹpo wẹ yè hia. Enewutu mì dibu blo: mì doale hú oblenọ susu ⁸Yẹn sọ dọ hlan mì ga, Mẹdepope he na yigbè ṣie to gbẹtọ lẹ nukọn, Ovi gbeto tọn na yigbè etọn to angẹli Jiwheyẹwhe tọn lẹ nukọn: ⁹Ṣigba mẹhe mọn mi to gbẹtọ lẹ nukọn, ye nasọ mọn ẹn to angẹli Jiwheyẹwhe ton lẹ nukọn. ¹⁰Mẹdepope he na dọhó de do Ovi gbẹtọ tọn go, yè na jona ẹn. Ṣigba hlan ewọ he zannù do Gbigbo Wiwe go, yè ma to na jo e nẹ gba. ¹¹Whenuena ye hẹn mì wá sinagọgú lẹ po ogán lẹ po, po asẹnọ lẹ po nukọn, mì yín whlẹndono blo dọ, nawẹ, kavi onú tẹwẹ mì na gblọn, kavi etẹwẹ mì na dọ blo: ¹²Na Gbigbọ Wiwe na plọ́n onú he mì na dọ mì to ojlẹ lọ me.

¹³Dopo to agùndaho he pli lọ mẹ sọ dọ hlan ẹn, dọmọ, Meplọntọ, degbèdo nọvisunnu ṣie ni má ogu lọ hẹ mi. ¹⁴E sọ dọ hlan ẹn, dọ, Dawe, mẹnu wẹ yí mi do basi whedatọ de, kavi numatọ de do mì ji? ¹⁵E sọ dọ hlan yé, dọmọ, Mì ho mìde, bo sọ payi do nukunkẹn: to ogégé gbẹtọ tọn de mẹ ma wẹ ogbè etọn nọte te sọn onú he ewọ tindo le mẹ gba. ¹⁶E sọ dọ oló de hlan ye, dọmọ, Aigba dawe adọkunno de tọn hẹn sinsẹ́n susu jẹgbonu: ¹⁷E sọ lẹn to ede home dọ, Etẹ yẹn na wà, na yẹn ma tindo otẹn ofi he yen na be sinsẹ́n ṣie pli do? ¹⁸E sọ dọmọ, Ehe wẹ yẹn na wà; yẹn na họ̀ zinhọ ṣie liai, bo dó klohu; finẹ yẹn na bẹ sinsẹ́n ṣie lẹ, po adọkun ṣie lẹ po pli do. ¹⁹Yen nasọ dọ hlan ayiha ṣie, do, Ayiha, hiẹ tindo agbàn susu he yè bépli na owhè susu: yí awúbọ towe, to dùdù, to nùnù, bo to ayajẹ. ²⁰Ṣigba Jiwheyẹwhe dọ hlan ẹn, dọmọ, Hiẹ nulunọ, ozán he mẹ yè na kàn ogbè towe biọ sọn de we: be mẹnutọn wẹ onú hẹ hie wleawu etọn dai hele na yín? ²¹Mọkẹdẹ wẹ ewọ he bé adọkunnu pli na ede, bo ma yin adọkunnọ gbọn Jiwheyẹwhe dali.

²²E sọ dọ hlan nuplontọ etọn lẹ, dọmọ, Enẹwutu wẹ yẹn to didọ hlan mì, dọmọ, Mì yín whlẹndonọna ogbè mìtọn blo, dọ, Etẹ mì na dù: kavi na awutu mìtọn, etẹ mì na ṣinyọn. ²³Ogbè hú núdùdù, agbasa sọ hú avọ. ²⁴Mì lẹn ohón le tọn pọ́n: yé ma nọ do bo ma sọ nọ gbẹn; yé ma do agbanhọ, kavi zĩnhọ̀: Jiwheyẹwhe sọ to yé yìn; be nẹmunẹmu wẹ mìwlẹ yín nuhọakuẹ hú ohè lẹ? ²⁵Podọ mẹnu wẹ to mì mẹ gbọn yínyín whlẹndọnọ sọgan yí awagba dopo dogó ogbèzan etọn? ²⁶Enẹwutu eyín mì ma sọgan basi onú he yín pevi gbahú, be etẹwutu wẹ mì yín whlẹndọnọ na gbọn pipotọ tọn dali? ²⁷Mì sọ lẹn li lẹ ton pọ́n, le yé to whinwhẹn: yé ma nọ wàzón, yé ma nọ gbensekan; gãnṣo yẹn dọ hlan mì, yè ma doasona Sọlomọni to gigo etọn lepo mẹ di dopo to ehelẹ mẹ gba. ²⁸Sọmọ, eyín Jiwheyẹwhe doasọna ogbé he tin tò odanji to egbé, to osọ bọ yè sọ zé dlọn ozokán mẹ: be nẹmunẹmu wẹ é na doasọna mì, mì yisepẹvinọ? ²⁹Mì din etẹ mì na dù, kavi etẹ mì na nù blo, mì sọ yín nuhatọ ayiha tọn blo. ³⁰Na onú helẹ pó wẹ akọta aihọnmẹ tọn lẹ to dindin pé: Otọ́ mìtọn sọ yọnẹn dọ mìwlẹ ma sọgan nọ ma tindo onú helẹ gba. ³¹Ṣogán mì din ahọludu Jiwheyẹwhe tọn; onú helẹ pó wẹ yè na yí dogó na mì. ³²Mì dibu blo, lẹngbọpa pevi; na homẹvivi Otọ mìton tọn wẹ nado yí ahọludu na mì. ³³Mì sa onú he mì tindo, bo na nunina lẹblanu tọn: mì basi apo he ma nọ dohó dai na mìde, adọkunnu de to olọn lẹ mẹ, ehe ma nọ gbodò, fie ajotọ ma sogan sẹpọ́, podọ ofi owán ma nọ dùsudo te. ³⁴Na fie adọkunnu nútọn te, finẹ ayiha mìtọn na tin te ga.

³⁵Mì bla gbaja mìtọn, na miyon mìtọn ni sọ to jiji; ³⁶Na mìwlọsu ni tin jijlẹ do yé he to nukundo Oklunọ yetọn go le, whenuena é na lẹgò sọn alọwle hùnwhẹ kọn; dọ whenuena e wá, bo huhúhọn, na yé nido hùn in nẹ to afọdoponeji. ³⁷Donanọ wẹ afanume nẹlẹ, mehe klunọ, whenuena e wa, mọ to alihó nugbo yẹn dọ hlan mì, dọ é na bla gbaja na ede, bo nasọ hen yé jagla nado dùnú, bo nasọ wá bo to yé sèn. ³⁸Podọ eyín é wá to zanhiho awetọ me, podọ eyín é yín to atọntọ mẹ bo mọ ye domọ, donanọ wẹ devi nẹlẹ yín. ³⁹Ṣigba ehe wẹ mì yọnẹn dọ, eyín owhénọ yón ojle he mẹ ajotọ ja, é na ko hóali, é ma do dikena yè ni kùn adó etọn luntọn gba. ⁴⁰Enẹwutu na mì ni wleawu ga: na Ovi gbẹtọ tọn ja to ojlẹ he mẹ whenuena mì ma donukun in.

⁴¹Whenẹnu wẹ Pita dọmọ, Oklunọ, be hie dọ oló he hlan mìwlẹ kẹdẹ, kavi hlan ome popo? ⁴²Oklunọ sọ dọmọ, Mẹnu wẹ honkọnsi nugbonọ, nuyọnẹntọ lọ, mẹhe Oklunọ etọn na do basi ogán do owhé etọn ji, nado na nudùdù sọha yetọn ye to ojle etọn mẹ? ⁴³Donanọ wẹ afanumẹ lọ, mẹhe Oklunọ etọn, whenuena é wá, é na mọ to mọ wà. ⁴⁴Nugbo wẹ yẹn dọ hlan mì, dọ, é na yí i do basi ogán do onú he é tindo lẹpo ji. ⁴⁵Ṣigba eyín afanumẹ lọ dọ to ayiha etọn mẹ, dọmọ, Oklunọ ṣie hẹn gigọ etọn dote; bo sọ to nuli devi sunnu po devi yọnnu lẹ po, bo sọ sè dùdù, bo to nùnù; podọ nado yín nunùmúnọ; ⁴⁶Oklunọ afànume lọ tọn na wá to azán he gbè é ma donukun in te podọ to ojlẹ whenuena é ma yọnẹn mẹ, bo nasọ saya nẹ, bo sọ dè tẹnmẹ etọn nẹ̃ po mawànugbonọ lẹ po. ⁴⁷Afànumẹ lọ he yón ojlo klunọ etọn tọn, bo ma wleawu, bo ma wà kẹdẹdi ojlo etọn wẹ yè na yí obá susu do hò. ⁴⁸Ṣigba ewọ he ma yọnẹn, bo sọ wà onú he jẹ na hihò, wẹ yè na yí obá pẹvide do hò. Na mẹdepope he yè na susu, é si wẹ yè na kàn susu biọ te. Mẹhe gbẹtọ yí susu na, ẹ si we yé na kàn susu biọ te.

⁴⁹Yẹn wá nado fiọ miyọn do aihọn ji; be etẹ yẹn to jijlo, eyín yè ko fiọ ẹ dote? ⁵⁰Ṣigba yẹn do baptẹm de he yè na do baptizi mi, nawẹ awusinyẹn mi sọ kaka é na do klita! ⁵¹Be mì lẹn dọ jijọho wẹ yẹn hẹn wá do aihọn mẹ? Yẹn dọ hlan mì, dọ, Lala; sigbayè ni gbọ bo dọ kinklan: ⁵²Na sọn dinvie gbẹtọ atón na tin to owhé dopo gbè yè na klán atọ̀n do awe ji, awe do aton ji. ⁵³Otọ́ na klán do ovi etọn sunnu ji, ovisunnu do otọ́ ji; onọ do ovi etọn yọnnu ji, oviyọnnu do onọ eton ji; asunọ do asi ovi etọn tọn ji, podo ovisi do asúnọ eton ji.

⁵⁴E sọ do hlan gbẹtọ lẹ ga, dọmọ, Whenuena mìwlẹ mọ aslọ de, bọ é suyu to wheyìho dali, mi no dọ to afọdoponeji, dọmọ, Jikun katakata ja; é sọ nọ yín mọ. ⁵⁵Whenuena mì sọ mọ jehon hùwaji tọn to yìnyìn, mì nọ dọmọ, Oyózo na tin; é sọ no di ⁵⁶Mì yẹnuwàtọ, mì sọgan dọtadena jinukunmẹ po aigba tọn po; ṣigba nawẹ mì ma yon ojlẹ helẹ do? ⁵⁷Kavi etewùtu we mìlọsu ma dawhè yèdọ na mìde onú he jlo tọn? ⁵⁸Whenuena hie to yìyì po mẹglatọ towè po jei whẹdatọ de, le hiẹ to aliho, wleawu na yè nido whlen we sọn e si: vlavo é nikã yí we jo na whẹdatọ, whẹdatọ ma nado yí we jo na ahọludemẹ, ewọ bo nasọ yí we do ogànhọ mẹ. ⁵⁹Yẹn ni dọ na we, dọmo, Hiẹ ma to na tọ́n sọn fine, kaka hiẹ na do suahọ abọgan-kuẹ dopo he po tọn.

¹MẸDELẸ tin to finẹ to ojlẹ lọ mẹ, he dọ Galilitọ le tọn nẹ, ohùn mehetọn Pilati flusọ po avọ́ yetọn po. ²Jesu sọ gblọn, bo dọ hlan ye, do, Be mìwlẹ lẹn dọ Galilitọ helẹ yín ylandonọ hú Galilitọ lẹpo wẹ, dọ yé duya onú he hunkọ tọn wutu. ³Yẹn dọ hlan mì, dọ, Lala: ṣigba, adavo mìwlẹ vọjọ, mì omẹ pó wẹ na dòn do mọkedẹ ga. ⁴Kavi omẹ fọtọ̀nnukunatọ̀n he ji atọhọ Siloami tọn hó jẹ lẹ, bo sọ hù yé, bẹ mì lẹ lẹn dọ yé yín ylandono hú gbẹtọ he; tin to Jelusalẹm lẹpo wẹ? ⁵Yẹn dọ na mì, dọmọ, Lala; ṣigba, adavo mìwlẹ vọjo, mì omẹ pó wẹ na don do mọkẹdẹ.

⁶E sọ dọ oló he dọmọ, Dawe de tindo ovotin de he é do do vẹ̃ngle etọn mẹ; é sọ wá, bo din sinsẹ́n to e ji, é ma sọ mọ núde. ⁷Whenenu wẹ e dọ hlan vẹnglehọtọ lọ, dọmọ. Pọ́n, sọn owhè atọ̀n helẹ mẹ wẹ yẹn to sasahò, do to sinsẹ́n din to ovotin he ji bo ma mọ núde: sán ẹn liai; etẹwutu wẹ é tẹnjan aigba? ⁸E sọ gblọn, bo dọ hlan ẹn, do, Oklunọ, jo e do to owhè he mẹ ga, kaka yen na do jlodò lédo e, bo nasọ hen ogbó do afọkọ nẹ̃. ⁹Eyín é hẹn sinsẹ́n sọnwhenẹnu, dagbedagbe: ṣigba eyín mọ ma gba, hiẹ na sán ẹn liai.

¹⁰E so to mẹplon to sinagọgu: de mẹ to gbọjezángbè. ¹¹Do ayi e go, nawe de tin, he tindo gbigbọ awuku tọn owhè fọtọ̀nnukunatọ̀n gbọn, bo ma sọgan zé ede daga gbọn alọ depope me ¹²Whenuena Jesu mọ ẹn, e ylọ ẹ, bo dọ hlan ẹn do, Nawe, yè tún we dai son awuku towe mẹ ¹³E sọ do alọ etọn e ji; plaun yè hẹn ẹn zùn jijlọ, é sọ to gigopana Jiwheyẹwhe. ¹⁴Ogán sinagọgu tọn yíyí homẹgble do gblọn, na Jesu hẹnazọ̀ngbọ to gbojezángbe wutu, dọ hlan gbẹtọ lẹ, dọ, Azán ṣidopo we tin he mẹ gbeto jẹ ni wàzon te: enẹwutu, enele mẹ wẹ mì ni wá na yè ni henazọ̀ngbọna mì te, eyín to gbọjezángbè blo. ¹⁵Sigbá Oklunọ gblọn, bo dọ hlán ẹn, dọ, Hiẹ yenuwàtọ, dopodopo mìtọn ma nọ tún oyín kavi kẹtẹkẹtẹ etọn sọn apó mẹ, bo so nọ dọn ẹn yì nù osìn to gbọjẹzángbè? ¹⁶Be é ma jẹ na nawe he, he yín viyọnnu Ablaham tọn, mẹhe Satani ko bla, pọ́n, sọn owhè fọtọ̀nnukunatọ̀n helẹ mẹ, nado tún in sọn ogàn he mẹ to azán gbọjẹ tọn gbè? ¹⁷Le e dọ onú helẹ, winyan hù megiatọ etọn lepo; gbẹtọ lẹpo sọ jaya na onú gigọ́ tọn he jọ gbon alọ etọn me lẹpo.

¹⁸Whenenu wẹ e dọmọ, Be ete go wẹ ahọludu Jiwheyẹwhe tọn tin jijlẹ do? Etẹ go wẹ yẹn na jle ẹ do? ¹⁹E tin jijlẹ do okún mutaldi tọn de go, he dawe de yí, bo sọ dlẹn ojipa etọn mẹ; bọ é sọ wú, bo lezun atin daho, bọ ohè aga tọn lẹ sọ nọ nò ala etọn lẹ me. ²⁰E sọ vo domọ, Be etẹ go yẹn nasọ jlẹ ahọludu Jiwheyẹwhe tọn do? ²¹E tin jijlẹ do otón go, he nawe de yí, bo sọ whlá do ojlẹ atọ̀n linfín tọn me, kaka popo lepo zùn otọ́n.

²²E jugbọn otòdaho po gbeta lẹ po me, bo to mẹplón, bo sọ zinzọnlin jẹ Jelusalẹm. ²³Omẹ de sọ dọ hlan ẹn, dọ, Oklunọ, be vude wẹ ehe yè na whlengan? E sọ dọ hlan yé, dọmo, ²⁴Mì sinyenlin nado gbọn hòntonu bibó mẹ biọ họmẹ: na yẹn dọ hlan mì, omẹ susu na din nado biọ é me bo ma na sọgan biọ é mẹ. ²⁵Sọn whenu klunọ owhe tọn fọ́n, bo so sú ohòn, bọ mì nasọ sẹ̀ tesi to gbonu, bo na to ohòn húhú, dọmọ, Oklunọ, Oklunọ, hùn hlan mí; ewọ bo nasọ gblọn, bo dọ hlan mì, dọmọ, Yẹn ma yón fie mì sọn gba: ²⁶Whenẹnu wẹ mì na sẹ́ didọ, dọmọ, Mìwlẹ ko dù; bo sọ nù to nukọn towe, hiẹ ko plọ́nmẹ to alihogbo mìtọn lẹ mẹ. ²⁷Ewọ nasọ dọmọ Yẹn dọ hlan mì, Yẹn ma yón fie mì sọn gba, mì tón sọn dè, mì azónylankan wàtọ lẹpo. ²⁸Avi po adukúnkún po nasọ tin to fìne, whenuena mì na mọ Ablaham, po Isaki po, po Jakobu po, po yẹwhegán le po to ahọludu Jiwheyẹwhe tọn mẹ, bọ yè na yàn mì lẹ jẹgbonu. ²⁹Yé na sọn whezizẹ dali wá, sọn wheyìhọ dali, sọn agéwaji dali, podọ sọn hùwaji dali, bo na jagla to ahọludu Jiwheyẹwhe tọn me. ³⁰Bo do ayi e go, godotọ delẹ na yin nukọntọ, podọ nukọntọ delẹ nasọ yín godolo.

³¹To ojlẹ doponemẹ wẹ mẹde sọn Falesi lẹ mẹ wá bo dọ hlan ẹn dọmọ, Tónjegbonu, bo ton sọn ofi: na Hẹlọdi jlo na hù we. ³²E sọ dọ hlan yé, domọ, Mì yì, bo dọ hlan wọtupọẹ nẹ, dọmọ, Pọ́n, yẹn to aovi lẹ yàn jẹgbonu, yẹn sọ to azònhẹngbọ to egbe po osò po, to azán atọ̀ntọ gbè, yẹn na wavọ. ³³Ṣogãn yẹn ma na nọma zinzọnlin to egbe po osò po, po azán atọ̀ngbè po: na é ma sọgan yin mọ dọ yẹwhegán ni dòn to gbonu Jelusalẹm tọn gba. ³⁴Jelusalẹm, Jelusalẹm È, hiẹ he hù yewhegán lẹ, bo sọ dlẹn zannu do yé be yè dohlan we lẹ: whla nẹmu wẹ yẹn ko jlo na bé ovi tọwe lẹ plidopọ, dile koklosi nọ bẹ̀ ovi etọn lẹ pli do awà etọn glọ do, bọ mì ma sọ jlo! ³⁵Pọ́n, yè jo owhé mìtọn do hlan mì jevó: nugbo wẹ yẹn do hlan mì, dọmọ, Mì ma to na mọ mi, kaka mì na do dọmọ, Donanọ wẹ ewọ he ja to oyín Oklunọ tọn mẹ.

¹E SỌ wá jọ, whenuena é biọ owhé ogán Falesi lẹ tọn de tọn gbè, nado dùnú to gbọjẹzángbè, yé to hihó ẹ. ²Do ayi e go, dawe de tin to nukọn etọn he to jijizòn jẹ. ³Jesu gblọn, bo dọ hlan osénnọ lẹ, po Falesi lẹ po, dọmọ, Be é jẹ na henazọ̀ngbọ to gbọjẹzángbè? ⁴Yé sọ nabọẹ, é sọ yi i, bo henazọ̀ngbọ nẹ, bo sọ jo e do yì. ⁵E sọ gblọn dọ hlan yé dọmọ, Mẹnu wẹ to mì mẹ bo na tindo kẹtẹketẹ de, kavi oyín, he flẹ́ jẹ odòtọ mẹ bo ma na dòn en tón to afọdoponẹji to gbọjẹzángbè? ⁶Yé ma sọ sọgan gblọn do onu helẹ go. ⁷E sọ dọ oló de hlan yé he yè ylọ wá núdù kòn lẹ, whenuena é pọ́n le yé to otẹn daho dè do; bo dọ hlan ye, dọmọ, ⁸Whenuena yè gbọn alọ mede tọn me ylo we wá alọwle hùnwhẹ kòn mi jagla to otẹn daho gbahú me blo; vlavo yè nikã ko ylọ omẹ he klohú hiẹ de; ⁹whenuena ewọ he ylọ we po ewọ pó na wá bo dọ hlan we, domọ, Na oten dawe he; hie naso yí winyan do ṣè oten godo ton yí. ¹⁰Ṣigba whenuena yè ylọ we, yì, bo jagla to oten godo tọn mẹ, na whenuena ewọ he ylọ we wá, é nido dọ hlan we, dọmọ, Hóntọn, yì aga: whenenu we hiẹ na do gigo to omẹ he jagla to núdùdù kọn hẹ we le de. ¹¹Na medepope he zé ede daga, na yín zíndai; podọ ewọ he sọ zín ede dai, na yín zizé daga.

¹²E so dọ hlan ewọ he ylọ ẹ wá ga, dọ, Whenuena hie da núdùdù owhè mẹ tọn, kavi tenu tọn, a ylo hohton towe lẹ, kavi mẹmẹsunnu towe lẹ, kavi hẹnnumẹ towe le, kavi kọmenu adọkunnọ lẹ blo; vlavo yé ga nikã ylọ we do suahọsu we. ¹³Ṣigba whenuena hiẹ da nudùdù de, ylọ wamọnọ le, potennọ lẹ, sékunọ le, nukuntọ́nnọ lẹ ¹⁴Hiẹ nasọ yín donanọ; na yé ma sọgan suahọ etọn we gba: yè nasọ suahọ etọn we to fọ́nsọnku nugbonọ lẹ ton gbè.

¹⁵Whenuena dopo to yé he jagla to núdùdù kòn hẹ ẹ lẹ sè onu helẹ, é dọ hlan en, dọmọ, Donanọ wẹ ewọ he na dùnú to ahọludu Jiwheyẹwhe tọn mẹ. ¹⁶Ṣigba é dọ hlan ẹn, dọmọ, Dawe de da núdùdù tenu tọn daho de, bo sọ ylọ gbẹtọ susu: ¹⁷e sọ do afànume etọn jẹgbonu hlan to ojlẹ tenu núdùdù tọn mẹ, nado dọ hlan yé he yè ylọ dai lẹ, dọmọ, Mì wá, na onú lẹpo wleawu dinvie. ¹⁸Ye omẹ pó sọ dogbepó, bo sè hopladọ. Tintan dọ hlan ẹn, dọmọ, Yẹn họ aigba pẹvide, yẹn ma sọgan nọ ma yì pọ́n ẹn, yẹn vè we na a ni jotẹnna mi. ¹⁹Awetọ sọ dọmọ, Yẹn hò oglepònu atọ́n oyín tọn, yẹn so jei whiwhle ye pọ́n gbé yẹn vè we na a ni jotẹnna mi. ²⁰Mẹdevo sọ dọmọ, Yẹn wlealohẹ asi de, enẹwutu yẹn ma sọgan wá gba. ²¹Afànumẹ lọ sọ wá, bo dọ onu helẹ na kluno etọn. Whenẹnu klunọ owhé lọ ton yín yín adinọ dọ hlan afànumẹ etọn, dọmọ, Yl alihogbo lẹ ji, po aliklan tòdaho tọn lẹ po, bo hẹn biọ ofi wá wamọnọ po potènnọ lẹ po po nukuntọ́nnọ lẹ po po sékunọ le po. ²²Afànume lọ sọ dọmọ, Oklunọ, yè ko basi dile hiẹ dọ do, gãnṣo otẹn sọ tin ai. ²³Oklunọ sọ dọ hlan afanumẹ lọ, dọmọ Tọn yì otò ligbójí, po mọji lẹ po, bo vẹvéna yé nado wá, na owhé ṣie gbè ni gó. ²⁴Na yen dọ hlan mì, dọmọ, Mẹdepope to yé he yè ko ylọ lẹ mẹ, ma na dọpon to tenu núdùdù ṣie mẹ.

²⁵Agùndaho lẹ lọ sọ to yìyì po e po: é sọ lé, bo dọ hlan yé, dọmọ, ²⁶Eyín mẹde wá dẽ, bo ma gbewanna otọ́ ẹtọn titi, onọ, asì, ovi, mẹmẹsunnu, mẹmẹyọnnu, mọwẹ po gbigbo ewlosu tọn po ga, é ma sọgan yín nuplọntọ ṣie gba. ²⁷Mẹdepope he ma sọ zé satin etọn, bo hodo mi é ma sọgan yín nuplọntọ ṣie gba. ²⁸Na mẹnu wẹ to mì mẹ, he to linlẹn nado dó atòhọ de, bọ é ma na sinai whé, bo lẹn akuẹ etọn, eyín é tindo ehe pé nado dota nẹ? ²⁹Vlavo whénuena é ko zé dòdó dai, bo ma sọ sọgan dota nẹ ba, yé omẹ he mọ ẹn lepo nikã sè vivlẹ ẹ, ³⁰dọmọ, Dawe he sè do ohò kòn, é ma sọ sọgan dota nẹ̃. ³¹Kavi ahọlu tẹwẹ le é jei nado péhẹ ahọlu devo to awhan mẹ, bọ e ma na sinai whé, bo so lẹn, eyín ewọ sọgan yi degbaweafò do pehe ewọ he hẹn degbatón ja pipéhẹ ẹ gbe? ³²Kavi whenu ome dóntọn to aganu, ni do wẹndagun hlan, dọ, Whẹgbigbọ jijoho tọn yen jlo. ³³Enẹwutu mọkẹdẹ we medepope he é yín to mì mẹ he ma gbé onú he é tindo lepo dai, é ma sọgan yin nuplontọ ṣie gba. ³⁴Enẹwutu ojẹ yọ́n: ṣigba eyín ojẹ hẹn otón etọn bú, be onú tẹ yè na do diọ ẹ zùn ojẹ? ³⁵E ma sọ je na aigba, kavi na ogbóji; gbẹtọ zé e dlẹn gbonu. Ewọ he tindo otọ́ nado sè, ni sè.

¹DINVIE tòkuẹsinyantọ lẹ po ylandonọ lẹ po to dindọn sepọ e de nado sè ohó etọn. ²Falesi po wekantọ lẹ po to hunhlun, dọmọ, Dawe he to ylandonọ lẹ yí, bo sọ to núdù hẹ yé.

³E sọ dọ oló he hlan yé, dọmọ, ⁴Dawe tẹwẹ to mì me, he tindo lẹngbọ kanweko, eyín é hẹn dopo bú to yé mẹ, bọ e ma na jo kanwefọtọ̀nnukunẹnẹ he pò dai to zùngbo mẹ, bo dafona ehe bú, kaka é na do mọ ẹn. ⁵Whenuena é sọ mọ ẹn, é zé e do abọ́ etọn ji, é to ayajẹ. ⁶Whenuena e sọ biọ whègbè, é ylọ họntọn etọn lẹ, po kọmenu etọn le po plidopọ, bo dọ hlan yé, dọmọ, Mì jaya hẹ mi; na yẹn ko mọ lẹngbọ ṣie he bú. ⁷Yẹn dọ hlan mì, mọkẹdẹ wẹ ayajije na tin to olọn mẹ to ylandonọ dopo he vọjọ ji, hú to dódónọ kanwefọtọ̀nnukunẹnẹ he ma do vọjọ ji.

⁸Kavi yọnnu tẹwẹ he tindo fatakakuẹ ao, eyín é hẹn dopo bú, bọ é ma na tá zogbán, bo zà whégbè, bo sọ din in talala kaka é na do mọ ẹn? ⁹Whenuena é sọ mọ ẹn, é ylọ họ́ntọn etọn lẹ, po kọmẹnu etọn le po plidopọ, bo dọmọ, Mì jaya hẹ mi; na yẹn ko mọ akuẹ he yẹn hẹn bú. ¹⁰Yẹn do hlan mì, mọkẹdẹ we ayajijẹ tin to angẹli Jiwheyẹwhe tọn lẹ nukọn to ylandonọ dopo he vọjọ ji.

¹¹E sọ dọmọ, Dawe de tindo ovisunnu awe: ¹²yọ̀pọ he to yé mẹ dọ hlan otọ́ etọn, dọmọ, Otọ́, na osọha agbàn he tọnnù ṣie mi. E sọ má onú he é tindo lẹ hlan ye, ¹³Azán vude godo, ovisunnu yọ̀pọ lọ bé onú he é tindo lẹpo plidopọ, bo yí gbéjizọnlin etọn biọ otò dindẹn de mẹ, finẹ, wẹ é zán agbàn etọn gbọn ogbẹ gbigble zinzán mẹ. ¹⁴Whenuena é zán onú lepo vò, huvẹ daho fọ́n to otò lọ mẹ, é sọ sè hẹnjẹ. ¹⁵E yì, bo sọ kòn ede dopo hẹ otòvi otò lọ mẹ tọn de: é sọ do e hlan oglè etọn mẹ nado to ohàn lẹ yìn. ¹⁶Homebùnhùn wẹ é na do dù floflo he ohàn le to dùdù gọhò; mẹdepope ma sọ na en. ¹⁷Whenuena e mọ ede, é dọmọ, Be nemunemu wẹ azọ́ntọ otọ́ ṣie tọn lẹ he tindo núdùdù he sù dùdù bo so pò to ai, bọ yen to kúkú na huvẹ ¹⁸Yẹn na fọ́n, bo yì otọ́ ṣie de, bo na dọ hlan ẹn, dọmọ, Otọ́, yẹn ko wà oylan do olọn go, podọ to nukon towe, ¹⁹yẹn ma jẹ mẹhe yè na ylọ ovisunnu towe ba gba; yí mi do basi dopo to azọ́ntọ towe lẹ mẹ. ²⁰E sọ fọ́n bo yì otọ́ etọn de. Ṣigba vhenuena é tin to aganu, otọ́ etọn mọ en, lẹblanuwà ẹ, é sọ dowezun bo plalọ okò etọn, bo sọ donùnùgo nẹ̃. ²¹Ovi lọ sọ dọ hlan ẹn, dọmọ, Otọ́, yẹn ko wà oylan do olọn go, podo to nukọn towe, yẹn ma sọ jẹ mẹhe yè na ylo ovisunnu towe ba gba ²²Ṣigba otọ dọ hlan afànumẹ etọn lẹ, dọ, Mì hẹn otewu dagbedagbe jẹgbonu wá, bo zé do nẹ̃; mì yí alọké do alọ etọn mẹ, podọ afọpa do afọ etọn: ²³mì sọ yí oyìnsu wínyánwínyán wá, bọ sọ hù i; bo gbọ mí ni tọ dùdù bo to ayajẹ: ²⁴na ovi ṣie he ko yín osiọ, é sọ tọgbè; é ko yín búbú, yè sọ mọ: ẹn. Yé sọ sè ayaje. ²⁵Ṣigba ovi etọn mẹho ko tin to oglègbo: le é ja, bó dòn sepó owhé, é sè ogbè ohàn po owè po tọn. ²⁶E sọ ylọ dopo to devi lẹ mẹ, bo kanse dọ, Etẹ yè yọ́n onú helẹ na? ²⁷Ewọ sọ dọ hlan ẹn, dọ, Nọvisunnu towe gò, otọ́ towe sọ hu oyìnsu wínyánwínyán na é mọ ẹn yí gò jijọho, podo to agbasa mẹ wutu. ²⁸Ewọ sọ yín homẹgblenọ, bo gbé whégbè bio: otọ́ eton jegbonu yi, bo vẹvẹ nẹ̃. ²⁹Ṣigba é gblọn bo dọ hlan otọ́ etọn, dọmọ, Do ayi e go, sọn owhé nẹmu die gbọn yẹn ko to sinsẹ́n we, yen ma jẹsénmẹna gbèdide towe de gbede: gãnṣo hiẹ ma na gbọgbọẹvu dopo mi na yẹn nido jaya po họ́ntọn ṣie lẹ po gba: ³⁰ṣigba le ovi towe he gò, he yí ogàlilọ do hẹn onú he hiẹ tindo lẹpo gble, hiẹ ko hù oyìnsu wínyánwínyán nẹ. ³¹Ewọ sọ dọ hlan ẹn, dọmọ, Ovi, hie tin to dẽ whepoponu, onú he yín ṣie lepo wẹ towe. ³²Ṣigba e je mí ni jaya, bo sọ yín homẹhùnnọ; na nọvisunnu towe he ko yín osiọ, é sọ vó togbé; bo ko yín búbú, yè bo sọ mọ ẹn.

¹E SỌ do hlan nuplọntọ etọn lẹ ga, dọ, Dawe adọkunnọ de ko tin, he do hònkọnsi de: dopolọ wẹ yè jewhè etọn hlan ẹn dọ é to agbàn etọn hen gú. ²E sọ ylọ ẹ, bo dọ hlan ẹn, dọ, Etẹ wẹ Onu he yẹn sè do ogo we he? Jo linlen hònkọnsi tọn towe; na hie ma sọgan sọ yín hònkọnsi dẹn ba gba ³Whenenu wẹ hònkọnsi lọ dọ to ede homẹ, dọmọ, Be etẹ yẹn na wà? na Oklunọ ṣie yí azón hònkọnsi tọn sọn dè wutu yen ma tindo huhlọn nado kùnkó; na biọnupé é hù winyanna mi. ⁴Yen yón onu he yén na wà, na whenuena yè yàn mi sọn hònkọnsizọn ṣie kọn, na yé nido yí mi do owhé yetọn gbè. ⁵E ylọ ahótọnọ klunọ etọn tọn lẹ dopodopo, bo dọ hlan tintan, dọ, Akuẹ nẹmu wẹ hie dù do klunọ ṣie? ⁶E sọ dọmọ, Ojlẹ kanweko amì tọn. E so dọ hlan ẹn, dọmọ, Yí owé towe bo yawu sinai, bo wlanwe kandeao tọn. ⁷Whenẹnu wẹ é sọ dọ hlan òmẹ devo, dọ, Nemu wẹ hiẹ dù? E sọ dọmọ, Ojlẹ kanweko likun tọn. E sọ dọ hlan ẹn, dọmọ, Yí owé towe, bo wlanwe kanwe tọn. ⁸Oklunọ sọ pa hònkọnsi mawànugbonọ lọ, na é yí nuyọnẹn do wà ẹ wutu: na ovi whenu he tọn lẹ yín nuyọnẹntọ na whẹndo yetọn titi hú ovi hinhọ́n tọn iẹ ⁹Yẹn sọ dọ hlan mì, dọmọ, Mì ni yí mamọni mawàdódó tọn do basi họntọn sọn mìde de; dọ, whenuena é fé, yé nido mọ mì yí do gohọtúntún madopodo lẹ lọ mẹ. ¹⁰Ewọ he yín nugbonọ to onú pẹvi talala de mẹ, é yín nugbonọ to onú susu mẹ ga: podọ ewọ he yín mawàdódónọ to onú pẹvi talala de mẹ, sọ yín mawàdódónọ to onú susu mẹ ga. ¹¹Enẹwutu, eyín mìwlẹ ma yín nugbonọ to mamoni mawàdódónọ mẹ, mẹnu ka wẹ na yí adọkun nugbo lọ na mì? ¹²Eyín mìwlẹ ma sọ yín nugbonọ to onú he yín mẹdevo tọn mẹ, mẹnu ka wẹ na na onú he yín mìwlọsu tọn mì? ¹³Devi de ma sọgan sén klunọ awe; adavo é gbẹwanna ode, bo yiwanna awetọ; kavi yín é ma yín mọ, é na joawu na ode, bo gbẹkọ awetọ go. Mìwlẹ ma sọgan sèn Jiwheyẹwhe po mamọni po gba.

¹⁴Falesi lẹ ga, he yín wanyinọ akuẹ tọn sè onú helẹ pó: yé yẹnawọnlin do e. ¹⁵E sọ dọ hlan yé, domọ, Mìwlẹ wẹ mẹhe nọ sùwhẹna mìde to gbẹtọ lẹ nukọn; ṣigba Jiwheyẹwhe yón ayiha mìtọn: na onú he yè zé daga to gbẹtọ lẹ; ṣẹnṣẹn, osùnú de wẹ to Jiwheyẹwhe nukon. ¹⁶Osén po yẹwhegán lẹ po tin kaka jẹ Johanu whenu; sọn ojlẹ nẹ mẹ gbọn wẹ yè to yewheho ahọludu Jiwheyẹwhe tọn tọn dọ, omẹ dopodopo sọ yí vivẹnu do to e mẹ biọ. ¹⁷Ṣigba é bọawú na olọn po aihọn po nado juwayì, hú na yọwhi dopo osén tọn nado fé. ¹⁸Mẹdepope he gbé asi etọn dai, bo wlealọhẹ devo de, deayò; mẹdepope he sọ wlealọhẹ mẹhe yè gbẹdai sọn asú de, é deayò.

¹⁹Dinvie dawe adọkunnò de tin, he nọ ṣinyọn avọ̀ ogefunwunme, po ala dagbedágbe po, bo sọ tin to ajogidi po osàngùn po mẹ egbésọ-egbésọ: ²⁰nubiọdùtọ de sọ tin, he yè nọ ylọ Lazalọsi, he yè nọ zé do họngbo etọn ji, he gó na agada, ²¹bo to jijlo yè ni yí jaja; he flẹ́ sọn tafo adọkunnọ tọn ji nẹ̃ dù; mọwẹ, yèdọ avun le sọ wá, bo didó agada etọn ²²E sọ wá jọ, nubiọdùtọ kú, yè sọ zé e yì akónnu Ablaham tọn gbọn alọ angẹli le tọn me: adọkunnọ sọ kú ga, yè sọ di i; ²³to osiọtòmẹ wẹ é zé nukun etọn daga, tintin to awufiẹsa mẹ, bo mọ Ablaham to aganu, po Lazalọsi po to akónnu eton mẹ. ²⁴E dawhá bo dọmọ, Otọ́ Ablaham, wàlẹblanuna mi, bo do Lazalọsi hlan, na ewọ nido ylọn obénu alọviyẹyẹ etọn tọn osìn mẹ bo do miọn odé na mi; na yen tin to awufiẹsa mẹ to miyọn he mẹ. ²⁵Ṣigba Ablaham, dọmọ, Ovi, flin dọ, to gbéwhenu towe me, hiẹ ko mọ onú dagbe towe yí, podọ Lazalọsi di mọkẹdẹ onú ylanylan lẹ: ṣigba to ofi dinvie, agbasa miọn ewọ, hiẹ sọ tin to awufiẹsa mẹ. ²⁶Podọ to onú helẹ pó mẹ, odògbó de wẹ yè do gbò mí po mì po to ṣẹnṣẹn; sọmọ bọ mẹhe jlo ma sọgan sọn ofi wá mì de, mọ mẹhe sọjlo ma sọgan sọn finẹ wá mí de. ²⁷E sọ dọmọ, Be enẹwutu yẹn vẹ we, oto, na hie ni do e hlan òwhe otọ́ ṣie tọn gbè; ²⁸na yẹn tindo nọvisunnu atọn, na é nido dekunnu hlan yé, yewlẹ ga nikã wá biọ otẹn awufiẹsa ton he mẹ. ²⁹Ṣigba Ablaham, dọmọ, Yé tindo Moṣe po yẹ-whegán le po: ṣigba ye ni sè yé. ³⁰Ewọ sọ, dọmọ, Lala, otọ́ Ablaham; ṣigba eyín mẹde sọn osiọ lẹ mẹ yì yé de, yé na lẹnvọjọ. ³¹Ewọ sọ dọ hlan ẹn, dọmọ, Eyín ye ma sè Moṣe po yẹwhegán lẹ po, ye ma to na diọ ayiha, eyín mẹde tlẹ fọ́n sọn osiọ lẹ mẹ.

¹E SỌ dọ hlan nuplọntọ etọn lẹ, dọmọ, E glo dọ nujọ ablida tọn lẹ ma na do wá: ṣigba dindon hlan ewọ he de é gbọn wá. ²E yín dagbedagbe nẹ, eyín ye sìn osé de do okọ go nẹ bọ ewọ yin zizé dlẹn ohù mẹ, hú dọ ewọ ni hẹn dopo to flínflín helẹ mẹ nado dahli. ³Mì payi mìde go; eyín mẹmẹsunnu towe wàylando, Wọhẹ ẹ; eyín é lẹnvọjọ, jona ẹn. ⁴Eyín e wàylan do we whla sinawè to azán dopo mẹ, bo sọ gò do de we whla ṣinawe to azán dopo mẹ, dọmọ, Yẹn lẹnvojọ; bo jona en.

⁵Apọsteli lẹ sọ dọ hlan Oklunọ, dọmọ, Deji na yisé: mìtọn. ⁶Oklunọ sọ dọmọ, Eyín mìwlẹ tindo yise di okún mutaldi tọn dopo, mì do dọ hlan atin sikomoli tọn he, dọ, Yè ni dòn we sùn po odọ po, bo yín didó do ohù mẹ; e na sè mìtọn. ⁷Mẹnu wẹ to mi mẹ, he tindo afanumẹ de he to aigbajlo, kavi he to lẹngbọ yìn, he na dọ hlan ẹn, whenuena é sọn oglè mẹ wá whegbe, dọmọ, Wá jagla nado dùnú to afọdoponẹji? ⁸bọ é ma na kúkú dọ hlan ẹn, dọmọ, Wleawu onú he yẹn na dù tọn, bo blàgó, bo sẹn mi, kaka yẹn na do dù bo nù: enẹgodo hiẹ na sọ dù bo sọ nù? ⁹Be ewọ dopéna afànumẹ lọ, na é wà onú he yè degbè nẹ̃ wutu? yẹn ma lẹn mọ gba. ¹⁰Yèdọ mọ wẹ mìwle ga, whenuena mi ko wà onú he yè degbèna mìvò, mì dọmọ, Afànumẹ madoalenọ wẹ mí: onú he yín azón wiwà mìton wẹ mí wà.

¹¹Ẹ sọ wá jọ, whenuena é jei Jelusalẹm, wẹ é jugbọn Samalia po Galili po ṣẹnṣẹn. ¹²Le é biọ gbeta de mẹ, sunnusi ao he yin pòtọnọ pé e finẹ, he site to aganu. ¹³Yé sọ zé ogbè yetọn daga dọmọ, Jesu, Oklunọ, wàlẹblanu na mí. ¹⁴Whenuena é mọ ye, é dọ hlan yé, dọmọ, Mì yi, bo do mìde hia yẹwhenọ lẹ. E sọ wá jọ le yé to yìyì, ye we. ¹⁵Dopo to ye mẹ, whenuena é mo dọ ewọ wé, é lé do godo, bo yí ogbè lelé de do gigo: pana Jiwheyẹwhe, ¹⁶e sọ họ́ do nukunmẹ etọn ji to afọ etọn go, bo to pédo nẹ; Samaliatọ wẹ ewọ. ¹⁷Jesu sọ gblọn dọmọ, Pòtọnọ ao ma wẹ yè lèwé? fie wẹ sinenẹ lẹ lọ te? ¹⁸Yè ma mọ mẹhe lẹgò nado pagigona Jiwheyẹwhe gba, adavo jonọ he. ¹⁹E sọ dọ hlan ẹn, dọ, Fọn, bo yì; yise towe ko whlẹn we gán.

²⁰Podọ le Falesi lẹ kanbiọ ọ dọ, whetẹnu wẹ ahọludu Jiwheyẹwhe tọn ja, e gblọnna yé, bo dọmọ, Ahọludu Jiwheyẹwhe tọn ma ja po ohia po gba: ²¹mọwẹ yé ma to na dọmọ, Pọn to ofi! kavi, pọn to odọn Na, pọn, ahọludu Jiwheyẹwhe tọn tin to gblagbla mì tọn me.

²²E sọ dọ hlan nuplọntọ lẹ, dọmọ, Azán le ja, whenuena mìwlẹ na jlo na mọ dopo to azán Ovi gbẹtọ tọn lẹ tọn mẹ, bọ mì ma to na mọ ẹn. ²³Yé nasọ dọ hlan mì, dọmọ, Pọ́n to ofi, kavi, pọ́n tó odon mì yì blo, mì sọ hodo yé blo. ²⁴Na di abì, whenuena e gbòdlan sọn awà dopo ji to olọn glọ, bo nọ họ́nwun je awà awetọ ji to olọn glọ; mọkẹdẹ wẹ ovi gbẹtọ tọn na nọ to azán etọn gbe. ²⁵Ṣigba é ma sọgan nọ ma duya onú susu tọn whẹ, na yè ni sọ gbé ẹ dai sọn alọ whendo he tọn mẹ gba. ²⁶Podọ le e wá jọ do to azán Noe tọn lẹ mẹ, Yedọ mọkẹdẹ wẹ é na tẹ ga to azán ovi gbẹtọ tọn lẹ tọn mẹ. ²⁷Yé tò dùdu, yé to nùnù, yé to alọwle, yè sọ to nina to alọwle mẹ kaka jẹ azán he gbè Noe biọ ohún mẹ, bọ osìngigọ́ wá, bo hù yé òmẹ pó súdo. ²⁸Mọkẹdẹ ga yèdọ dileó wá jọ do to azán Lọti tọn lẹ mẹ; yé to dùdù, yé to nùnù, yé to hihọ, ye to sisà, yé to dido, yé to ohòdó; ²⁹ṣigba to azán he gbè Lọti tọ́n sọn Sọdọmi é jajikun miyọn po whemi po sọn olọn me, bo sọ hù yé omẹ pó súdo ³⁰Mọkẹdẹ we é na te to azán ne gbè, he yè do Ọvi gbẹtọ tọn hia. ³¹To azán nẹ gbè, mẹhe tin to ohọta bọ agbàn etọn tin to owhé gbè, mì dike e jẹte yì nado zé e sẹ̀ blo; mì dike mẹhe sọ tin to ọglègbo, mọkẹdẹ lẹgò wá godo blo. ³²Mì flin asi Lọti tọn. ³³Mẹdepope he na din nado whlẹn alindọn etọn gán na hẹn ẹn bú; mẹdepope he nabu alindọn etọn na whlen ẹn gan. ³⁴Yẹn dọ hlan mì, dọmo, To ozán ne me, goẹtọ awẹ na tin to adózan dopo ji, yè na yí dopo, bo jo awetọ dai. ³⁵Yọnnusi awe na to osé li dopọ; yè na yí dopo, bo jo awetọ dai. ³⁶Gbẹtọ awe na tin to oglègbo; yè na yí dopo, bo jo awetọ dai ³⁷Yé gbingblọn dọ hlan ẹn dọ, To fie, Oklunọ? Ewọ sọ dọ hlan yé, do, Fie osiọ te, finẹ ga wẹ aklasu lẹ nọ plidopọ do.

¹E SỌ dọ oló de hlan yé, na onú helẹ wutu, dọ é jẹ yé do nọ hodẹ to whepoponu, bo ma nado gbọje gba; ²dọmọ, Whẹdatọ de tin to oto de me he ma dibusi Jiwheyẹwhe, bo ma sọ ho mẹde pọ́n. ³Asusiọsi de sọ tin to otò daho nẹ mẹ; é nọ wá e de whẹwhẹ, dọmọ, Wà dódó na mi son mẹglatọ ṣie de. ⁴E ma so jlo na ojle de; ṣigba to godo, é dọ to ede homẹ, dọ, Eyín yen ma tlẹ dibusi Jiwheyẹwhe, bo ma sọ hò gbẹtọ pọ́n: ⁵gãnṣo na asusiọsi he tuklado mi wutu, yẹn na yiahọsu nẹ̃, ewọ nikã hẹn agbopé mi gbọn osahiho etọn whẹ̃whẹ dali. ⁶Oklunọ sọ domọ, Mì sè onu he whẹdatọ mawadódo ton dọ. ⁷Be Jiwheyẹwhe ma na yiahọsuna mesinyansinyan etọn lẹ, he to awhádo hlan ẹn to okle po ozán po, bọ ewọ so yín linsinẹníọ to yé ji? ⁸Yen sọ dọ hlan mì, dọmọ, E na wà dódó na yé plaun. Ṣogãn whenuena Ovi gbẹtọ tọn wá, be é na mọ yise to aihọn mẹ?

⁹E sọ dọ oló he ga hlan mẹdelẹ he dotu do yéde go dọ dódónọ wẹ yé, bo sọ to medevo lẹ vlẹ, dọ: ¹⁰Omẹ awe heji yì templi mẹ nado hodẹ, ode yín Falesi, awetọ sọ yín tòkuesinyantọ de. ¹¹Falesi sọ site bo dóho to ede de dole, dọmọ, Jiwheyẹwhe, yẹn dopéna we, na yẹn ma tin di pipòtọ gbẹto lẹ tọn gba, alọslonamẹtọ lẹ, mawànugbonọ, ayọdetọ, kavi yèdọ di tòkuẹsinyantọ he gba. ¹²Yẹn nọ blanù whlawe to azán ṣinawe mẹ, yẹn sọ nọ na madao onú he yẹn tindo lẹpo tọn. ¹³Ṣigba tòkuẹsinyantọ lọ site to aganu ma tlẹ sogan zé nukun etọn daga hlan olọn, ṣigba zìnnudo akọnnu etọn, dọmọ, Jiwheyẹwhe, yín nukundagbenọ hlan mi, ylandonọ lọ. ¹⁴Yẹn sọ dọ hlan mì, dọmọ, Dawe he jẹte yì owhé etọn gbè whẹsuna hú awetọ; na mẹdepope he zé ede daga na yin zindai, mẹhe sọ zín ede dai, na yín zizedaga.

¹⁵Yé sọ zé yọpọvu lẹ wá e de ga, na é nido doalọ yé go: ṣigba whenuena nu-plọntọ lẹ mọ ẹn, yé wọhẹ ye ¹⁶Ṣigba Jesu ylọ yé do é de, bo dọmọ, Mì gbọ yọpọvu lẹ ni wá dẹ̃, mì sọ kóna yé blo: na yé omẹ mọhunkọ lẹ tọn wẹ ahọludu Jiwheyẹwhe tọn. ¹⁷Nugbo wẹ yẹn dọ hlan mì, Mẹdepope he ma yí ahọludu Jiwheyẹwhe tọn di yọpọvu de ma to na biọ finẹ, eyín é bo sọ to depope.

¹⁸Ogán de sọ kanbiọ ẹ dọmọ, Mẹplontọ dagbe, etẹ yen na wà do dugú ogbó madopodo tọn? ¹⁹Jesu sọ dọ hlan ẹn, dọmọ, Etẹwutu wẹ hiẹ ylọ mi dagbe? Mẹde ma yin dagbe, adavo omẹ dopo, enẹ wẹ Jiwheyẹwhe. ²⁰Hiẹ yón osén nẹlẹ, A deayọ blo, A hùmẹ blo, A dekunnu lalo tọn blo, Gbògbéna otọ́ towe po onọ towe po. ²¹E sọ dọmọ, Ehelẹ pó we yen ko payi e go sọn ovú ṣie gọbn ²²Whenuena Jesu sè onú helẹ, é dọ hlan ẹn, domọ, Onú dopo wẹ whèdo we: yì sà onú he hiẹ tindo lẹpo, bo má hlan wamọnọ lẹ, hiẹ nasọ tindo adọkunnú to olọn mẹ: bo wá, hodo mi. ²³Ṣigba whenuena é sè onú helẹ é lẹzun awublanọ susu: na é yín adọkunnọ susu wutu. ²⁴Podọ Jesu mimọ ẹn dọmọ, Nawẹ é na sinyẹn do na mẹhe tindo adọkun nado biọ ahọludu Jiwheyẹwhe tọnmẹ! ²⁵Na é bọawú na kanklosọpóawenọ de nado biọ nuvo yẹnvi tọn mẹ, hú na adọkunnọ de nado biọ ahọludu Jiwheyẹwhe tọn mẹ. ²⁶Yé mẹhe sọ sè é lẹ, dọmọ, Be mẹnu ka wẹ sọgan gán? ²⁷Ṣigba é dọmo, Ònú he yín giglo to gbẹtọ de, ma glo Jiwheyẹwhe de gba. ²⁸Pita sọ domọ, Pọ́n, mìwlẹ ko jo owhe mìtọn lọsu lẹ dai, bo sọ hodo we. ²⁹E sọ dọ hlan ye, dọmọ, Nugbo wẹ yẹn dọ hlan mì, Mẹde ma tin, he jo owhé, kavi asi, kavi mẹmẹsunnu, kavi mẹjitọ lẹ, kavi ovi dai, na ahọludu Jiwheyẹwhe tọn wutu, ³⁰ehe ma na mọ donususu hú yí to ojlẹ he mẹ, podọ to aihọn he ja mẹ ogbẹ madopodo.

³¹E sọ yí omẹ wiawe lẹ do é de, bo dọ hlan yé, dọmọ, Pọ́n, mìwlẹ jei Jelusalẹm, onú he yè wlan gbọn yẹwhegán lẹ me na yín hinhen di hlan Ovi gbẹtọ tọn. ³²Na yè na jo e hlan Kosi le, yè nasọ yí i do vlẹwọn, yè nasọ yí owinyan do sayá hẹ ẹ, yè nasọ túntán do ogo nẹ̃: ³³yè na hò e, bo nasọ hù i: azán atọntọ gbè, é nasọ fọ́n. ³⁴Yé ma sọ tunwun onú helẹ depope: ohó hele sọ whlá do yé, mọwẹ yé ma sọ mọ onú he yè dọ lẹ.

³⁵E sọ wá jọ, lẹ é dòn sẹpọ́ Jẹliko, dawe nukuntọ́nnọ de sinai to alihota to nubiọ. ³⁶Sisè agùndaho dó to jujuwajei, é kanse dọ, etẹ yè yọn ehe na. ³⁷Yé sọ dọ nẹ, dọmo, Jesu Nazalẹti tọn wẹ juwajei. ³⁸E sọ dawhá dọmọ, Jesu, hie ovi Davidi tọn, wàlẹblanuna mi. ³⁹Yé mẹhe to yìyì to nukọn lẹ sọ to wiwọhe ẹ na èwọ ni nabẹ: ṣigba é sọ dawhá daga humọ, dọ, Hiẹ ovi Davidi tọn, wàlẹblanuna mi. ⁴⁰Jesu site, bo sọ dègbe é nado yín hinhẹn wá é de; whenuena yè sọ hẹn ẹn wá sepó, é kanse e, ⁴¹domọ, Etẹ hiẹ jlo dọ yẹn ni wà hlan we? E sọ dọmọ, Okluno, na yẹn ni mọ nukunnumọ ṣie yí. ⁴²Jesu sọ dọ hlan en, dọmọ, Mọ nukunnumọ towe yí; yise towe ko whlẹn we gán. ⁴³Tẹndoponẹmẹ, é mọ nukunnumọ etọn yí, bo sọ to hihodó e, bo to gigopana Jiwheyẹwhe: podọ gbẹtọ lẹpo whenuena yé mọ ẹn, yé na pipa hlan Jiwheyẹwhe.

¹JESU sọ biọ otò mẹ, bo sọ jugbọn Jẹliko ṣẹnṣẹn. ²Bo dayi e go, dawe de tin, he yè nọ ylọ Zasé, mẹhe yín ogánde to tòkuẹsinyantọ lẹ mẹ, ewọ sọ yín adọkunnọ. ³E sọ din nado mọ Jesu mẹhe é yín; bo ma sọ sọgan mọ ẹn na tẹnjinjan watu, podọ é yín omẹ gli wutu. ⁴E sọ dowezun yì nukọn, bo hé atin sikomoli de ji nado mọ ẹn, na é na jugbọn finẹ. ⁵Whenuena Jesu jẹ ofi lọ, é zé nukun do aga, bo dọ hlan ẹn, dọmọ, Zasé yawu, bo jẹte wá, na yẹn na jẹ owhé towe gbè to egbé. ⁶E sọ yawu, bo jẹte bo sọ yí, i po homẹhùnhùn po. ⁷Whenuena yé mọ ẹn, yé omẹ pó to hunhlun, dọ, E yì le owhé omẹ he yín ylandonọ tọn gbè. ⁸Zasé sọ fọ́n site, bo dọ hlan Oklunọ, dọmọ, Pọ́n, Oklunọ, odá onú he yẹn tindo lẹpo tọn yẹn jo hlan wamọnọ lẹ; eyín yẹn sọ yí agòjijẹ do yí nude sọn mẹdepope de, yẹn gò jo dó donu ẹnẹ ji. ⁹Jesu sọ dọ hlan ẹn, dọmọ, Egbé wẹ whlẹngan biọ owhé he gbè, sọle ga ewọ yín ovi Ablaham ton de. ¹⁰Na Ovi gbẹtọ tọn wa nado din, podọ nado whlẹn enẹ he yin bubu gan.

¹¹Whenuena ye to onú helẹ sè, é sọ yí ohó dogó, bo sọ dọ olo de, na é tin sẹpọ́ Jelusalẹm wutu, podọ yé to linlẹn dọ ahọludu Jiwheyẹwhe tọn na sọawúhia to afọdoponẹji wutu. ¹²Enẹwutu é dọmọ, Dawe aglosu de yí biọ oto dindẹn de mẹ, nado yí ahọludu de na ede, podọ nado lẹ́gọ̀. ¹³E sọ ylo afànumẹ etọn ao bo na mina ao yé, bo dọ hlan yé, dọmọ, Mì yí ehe do wà, jo, kaka yẹn na do gò. ¹⁴Ṣigba otòvi etọn lẹ gbewan nẹ, bo do mẹdagun de hlan to godo etọn, dọmọ, Mìwlẹ ma jlo na dawe he ni duahọlu do mí ji gba. ¹⁵E sọ wá jọ, whenuena é yí ahọludu bo lẹgò, we e degbe ye ni ylọ afànume nẹlẹ wá, ye mehe e-ko na mina, na é nido yón ale nẹmu medopodopo dù gbon ajọwiwà dali. ¹⁶Mẹtintan wá nukọn etọn, dọmo, Okluno mina towe basi mina ao dogo ¹⁷E sọ dọ hlan ẹn, dọmo, Yè wa dagbe, hie afanumẹ dagbe; na ye mọ hiẹ yín nugbonọ to onú pẹvi siun me wutu, tindo asè do oto daho ao ji, ¹⁸Awetọ sọ wá dọmọ, Oklunọ, mina towe ko basi mina atọn. ¹⁹Ẹ sọ dọ hlan ẹn ga, dọmo, Hie ga ni tin to otò daho atọn ji ²⁰Devo so wá, dọmọ, Okluno, pọ́n mina towe tin to ofì, he yẹn sọ whla do duku de mẹ: ²¹na yẹn nọ dibuna we, na hie yín gbẹtọ fifietọ wutu; hie nọ yí onú he hiẹ ma sọ dai, bo sọ nọ gbọ̃n onú he hie ma do. ²²E sọ dọ hlan ẹn, dọmo, Son onù hiẹlọsu tọn mẹ wẹ yẹn na dawhena we, hie afànumẹ ylan-kan. Hie yonen dọ gbẹtọ fifiẹtọ de wẹ yẹn, yẹn nọ yi onu he yẹn ma sọ dai, bo sọ nọ gbọ̃n onú he yen ma do: ²³be etẹwutu hiẹ ma ka yí ahue ṣie do akuehọtẹn, bọ yen to gigò ṣie mẹ nido ko kàn ẹn biọ po ale po? ²⁴E so dọ hlan mẹhe site to finẹ lẹ, domo Mì yí mina; lọ sọn e si, bo yí i na mehe tindo mina ao. ²⁵(Yé sọ dọ hlan en, dọmọ, Oklunọ, e tindo mina ao.) ²⁶Yẹn dọ hlan mì, Mẹdepope he tindo we yè na na; podọ sọn ewo he ma tindo si, we ye na yí yèdọ onu he é tindo sọn. ²⁷Ṣigba kèntọ ṣie nẹlẹ, he ma jlò dọ yẹn ni dugán to yé ji lẹ, mi hẹn yé wá ofi, bo hù yé to nukọn ṣie.

²⁸Whenuena é dọ le vò, é to yìyì nukon heji jei Jelusalẹm.

²⁹E sọ wá jọ, whenuena é dọn sẹpọ́ Bettagi po Bẹtani po, to osó he yè nọ ylọ Olivie ji, é do ome awe son nuplontọ lẹ me hlan, ³⁰dọmọ, Mì yi gbeta he pannukọn mì me; ehe me le mì to bibiọ, mì na mo kẹteketevu de to sínsín, ehe ji gbẹtọ de ma sinai te gbède: mì tún in, bo hẹn en wá. ³¹Eyín mẹde sọ kanbiọ mì domo, Etẹwutu wẹ mì to túntún in? le wẹ mi na do, dọmọ, Oklunọ do onú na yi i do wà ³²Yé he yè dohlan lẹ sọ yì, bo mọ kẹdẹ dile é dọ hlan yé do. ³³Le ye sọ to kẹteketevu lọ tún, Oklunọ eton lẹ do hlan yé, domọ, Etẹwutu wẹ mì to kẹteketevu lọ tún? ³⁴Yé so dọmọ, Okluno do onú na yí i do wà. ³⁵Ye sọ hen ẹn wá Jesu de: yé sọ zé avọ̀ yetọn le dlẹn ketekẹtevu lọ ji, bo zé Jesu do e ji ³⁶Podo le e to yiyi, ye dlọn avọ̀ yetọn lẹ do aliho ji. ³⁷Le é to dindọn sepo dinvie, yèdọ ofi he dokòdo osó olivie tọn dali, agùndaho nuplọntọ lẹ tọn lepo sè ayaje, bo sọ yí ogbè lélé de do to Jiwheyẹwhe pa na azón daho he yé mọ lepo, ³⁸dọmọ, Donanọ wẹ Ahọlu he ja to oyín Oklunọ tọn mẹ: Jijoho to olọn mẹ, po gigo po to agapetepete. ³⁹Mẹdelẹ to Falesi lẹ mẹ to agùndaho lọ mẹ, dọ hlan ẹn, dọmọ, Mẹplọntọ, wọhe nuplọntọ towe lẹ. ⁴⁰E sọ gblọn bo dọmọ, Yẹn dọ na mì, dọ, Eyín ehelẹ na nabọẹ, ozannu lẹ na dawhá jẹgbonu.

⁴¹Whenuena é sọ dọ́n sẹpọ́, é mọ otodaho lọ, bo viavi do e ji, ⁴²dọmọ, Eyín hie ko yọnẹn, to azán he gbè yèdọ hiẹlọ, onú he yín jijọho towe tọn! ṣigba dinvie, yè whlá yé sọn nukun towe mẹ. ⁴³Na azán na wá oji we, whenuena kènto towe lẹ na kùn doko lédo we, bo nasọ lédo we pó, bo nasọ glọn we do whégbè to awà popo ji, ⁴⁴bo nasọ hó we do odo jẹ aigba, po ovi towe lẹ po to ohò towe mẹ; yé ma to na jo ozannu dopo dai to awetọ ji; na hiẹ ma yọ́n ojlẹ dlapọ́n towe tọn wutu.

⁴⁵E sọ biọ tẹmpli mẹ, bo sẹ̀ yé he to núsà to e me, po yé he to hihò lẹ po yàn jegbonu; ⁴⁶bo didọ hlan yé, dọmọ, Yè wlanwe do, Ohọ̀ odẹ̀ tọn de wẹ ohọ̀ sie, e na yín; ṣigba mìwlẹ ko yí i do basi odò ajotọ lẹ tọn de.

⁴⁷E sọ to meplón to tẹmpli mẹ egbesọegbeso Ṣigba ogán yewhenọ lẹ ton po wekantọ lẹ po, po omẹ gangan gbeto lẹ ton lẹ po sọ to dindìn na hù i sudo. ⁴⁸Ye ma sọ sọgan mọ onú he ye dọ wa na gbẹtọ lẹpo wẹ pla do e go, to hósè.

¹E SỌ wá jọ, to gbèdopo to dopo azán nẹle tọn mẹ, le é to gbẹtọ lẹ plón to tẹmpli mẹ, bo sọ to yẹwheho wẹndagbe tọn dọ, ogán yẹwhenọ tọn lẹ, po wekantọ lẹ po, po mẹho le po wa e ji, ²yé sọ dọhó, dọ hlan en, dọmọ, Dọ na mí, gbon asè té dali wẹ hiẹ do to onú helẹ wà? Kavi mẹnu wẹ ewo he na asẹ́ he we? ³E sọ gblọn bo dọ hlan yé, dọmọ, Yẹn ga na kan ohó dopọ biọ mì: mì dọ na mi: ⁴Baptem Johanu tọn, olọn mẹ wẹ é tin sọn, kavi sọn gbẹtọ lẹ de? ⁵Yé sọ to hojlẹ he yéde, dọmọ, Eyín mí na dọmọ, Sọn olọn mẹ: é na dọmo, Etẹwutu wẹ mì ma yí i se? ⁶Ṣigba eyín mí na sọ dọmọ, Sọn gbẹtọ lẹ de; gbẹtọ lẹpo wẹ na dlọn zannu do mí: na yé omẹ pó wẹ yè lé ayiha na dọ, yẹwhegán de wẹ Johanu. ⁷Yé sọ gblọn dọmọ, yé ma yọn fie é tin sọn gba ⁸Jesu sọ dọ hlan yé, dọmọ, Mọwe yẹn ma na sọ dọ asẹ́ he dali yẹn to onú hẹlẹ wà gbọn na mì.

⁹E sọ sè oló he dọ hlan gbẹtọ lẹ, dọmọ; Dawe de do vẹ̃ngle de, bo yí i hayana glesi lẹ, bo sọ yì otò devo mẹ na ojle dindẹn de. ¹⁰To osã lọ ji é do afànumẹ de hlan glesi lẹ, na yé nido na ẹn sọn sinsẹ́n vẹ̃ngle tọn mẹ: ṣigba glesi lẹ linu in, bo sọ do e hlan yì agbá. ¹¹E sọ do afànumẹ devo hlan: yé sọ linu in ga, bo saya nẹ̃ susu, bo sọ do e hlan yì agbá. ¹²E sọ vó atọ̀ntọ de dohlan: ye sọ húnu in ga, bo yàn ẹn jegbonu. ¹³Klunọ vẹ̃ngle ton sọ dọmọ, Etẹwẹ yẹn na wà? yẹn na do ovi sunnu ṣie yiwanna hlan: é sọgan yín yé na wleyẹyina ewọ. ¹⁴Ṣigba whenuena glesi lẹ mọ ẹn, yé hójlẹ hẹ yénọzo dọmọ, Ehe wẹ whedutọ lọ: mì gbọ mí ni hù i, na ogú etọn nido yín mìtọn. ¹⁵Yé bo sọ yàn ẹn tọ́n sọn vẹ̃ngle mẹ, bo hù i. Be enẹwutu etẹwẹ Oklunọ vẹ̃ngle tọn lọ na wa do yé? ¹⁶Ewọ na wá, bo hù glesi nẹlẹ súdo, bo nasọ jo vẹ̃ngle etọn hlan mẹdevo. Whenuena yé sè e, yé dọmọ, E yín mọ blo. ¹⁷Ṣigba é pọ́n yé, bo dọmọ, Be etẹwẹ ehe yè wlanwe do,

¹⁹Ogan yewhenọ tọn le, po wekanto lẹ po sọ to dindin to ojlẹ ne mẹ nado wlé e; ye sọ to budina gbẹto lẹ na ye mohlan dọ ye go wẹ é dọ olo he do. ²⁰Ye sọ to hiho e, bo sọ do amẹ hlan jẹgbonu, he domevotọ yede nado yín dodónọ, na yé nido wle e hen to ohógbe etọn mẹ, mọ nado dè e jo hlan ahọludu lọ podo hlan asẹ otogan lọ tọn. ²¹Ye sọ kanbiọ ẹ dọmo, Mẹplọntọ, mìwlẹ yonẹn dọ hie nọ dọ, bo sọ nọ plonme titegbe, bo ma sọ hò mẹdepope pọ́n, ṣigba son nugbo de me no plọn aliho Jiwheyẹwhe tọn omẹ. ²²Be e yín osén tọn na mìwlẹ nado nọ na tokuẹ Sesali, kavi lala? ²³Ṣigba é mọ yedomẹ yetọn hlan, bo-sọ dọ hlan yé, dọmọ, ²⁴Mì do abọgan-kuẹ dopo hia mì. Bosiọ po winwlan po menutọn we e tindo? Yé sọ, dọmọ, Sesali tọn. ²⁵E sọ dọ hlan ye, dọmọ, Bé mì yí onú he yín Sesali tọn lẹ hlan Sesali, bo sọ yí onú he yín Jiwheyẹwhe tọn lẹ hlan Jiwheyẹwhe. ²⁶Yé ma sọ tin sọgan nado wle ohó lọ hẹn to gbẹtọ le nukọn gba: awu sọ ji yé do gbegbingblon etọn go, yé so nabọẹ.

²⁷Whenẹnu wẹ mẹdele to Sadusi lẹ mẹ wá e de, he to núdọn dọ fọ́nsọnku ma tin; yé sọ kanse e, ²⁸dọmọ, Meplọntọ, Moṣe wlanwe hlan mí, dọmọ, Eyín nọvisunnu mẹdepope tọn tindo asi de bọ ewọ yín wẹnsino nọvisunnu etọn ni sọn asi eton, bo zé okun daga hlan nọvisunnu etọn. ²⁹Enẹwutu nọvisunnu ṣinawe delẹ ko tin: tintan yí asi de, bo kú matin ovi. ³⁰Awetọ sọ sọn ẹn, ewọ ku matin ovi. ³¹Atòntọ sọ són ẹn; mọkẹdẹ wẹ omẹ ṣinawe le ga: yé ma sọ do ovi ai, bo kú. ³²To godo, yọnnu lọ ku ga. ³³Enewutu tofọ́nsọnku mẹ, asi menutọn wẹ éwọ na yin to yé mẹ? na yé omẹ ṣinawe lẹ wẹ yí i na asi. ³⁴Jesu sọ dọ hlan yé, dọmọ, Ovi whenu he tọn lẹ nọ wlealọ yè sọ nọ na to alọwle mẹ: ³⁵ṣigba yé he yè hia jẹ nado jẹ owhenu nẹ tọn mẹ gbọn vivẹnu dali, po fọ́nsọnku sọn osiọ lẹ mẹ po, ye ma nọ wlẹalọ gba, yè ma sọ nọ na tọ alọwle mẹ: ³⁶na yé ma sogan kú gbede ba: na yé sọzen do angẹli le go; ovi Jiwheyẹwhe ton so wẹ ye, yínyín ovi fọnsonku tọn lẹ. ³⁷Ṣigba dọ yè fọ́n osiọ, yedọ Moṣe dohia gbọn Ozunkan lọ tọn dali, whenuena e ylọ Oklunọ dọ Jiwheyẹwhe Ablaham ton, Jiwheyẹwhe Isaki tọn, podọ Jiwheyẹwhe Jakobu ton. ³⁸Dinvie e ma yín Jiwheyẹwhe osiọ lẹ tọn gba, adavo mẹhe to ogbè le tọn: na gbeto lẹpo wẹ tin to ogbè hlan ẹn. ³⁹Mede to wekantọ lẹ mẹ sọ gblọn bo dọmọ, Meplọntọ, hiẹ dọ dagbe. ⁴⁰Sọn enegodo, yé ma sọ ha kan onú depope biọ e ba gba.

⁴¹E sọ dọ hlan ye, dọmọ, Nawẹ yé to dido do dọ ovi Davidi tọn wẹ Klisti? ⁴²Na Davidi lọsu dọ to owe Psalm lẹ tọn mẹ, dọmo,

⁴⁵Podo to sisẹ gbẹtọ lẹpo tọn me, é dọ hlan nuplọntọ etọn lẹ, dọmọ, ⁴⁶Mì payi wekantọ le go, he nọ jlo nado zinzọnlin to avọ tedona me, bo sọ yiwanna nudọdomẹ lẹ to; ahi mẹ, podọ aisintẹn daho to sinagọgu mẹ, podọ otẹn daho to hùnwhẹ lẹ kọn ⁴⁷He dù owhe asusiọsi lẹ tọn súdo, bo sọ nọ basi odẹ̀ dindẹn na ogoyíyí de: ehelẹ wẹ na mọ whẹgbledo daho gbahú yí.

¹É pọ́n aga bo sọ mọ omẹ adọkunnọ lẹ he to nunina yetọn le dlọn do adọkunnu lọ mẹ. ²E sọ mo asusiọsi wamọnọ de, é to abọgan-kuẹ flínflín awe dlọn do e mẹ. ³E dọmọ, Sọn nugbo de mẹ yẹn dọ hlan mì, asusiọsi wamọnọ he dlọn do e mẹ hú yé omẹ pó: ⁴na ehe lẹpo sọn susugbọpọ yetọn mẹ dlan do nunina lọ mẹ ṣigba ewọ sọn matindo etọn mẹ dlọn do é mẹ dùdù he é tindo lẹpo.

⁵Le mẹdelẹ to ohó tẹmpli tọn dọ, le yé yí ozannu dagbe po nunina po do doaso nẹ do, é dọmọ, ⁶Na onú he mìwlẹ to mimọ helẹ, azán ja, to ehe mẹ yè ma to na jo ozannu dopo dai to awétọ ji, he yè ma na hó liai ⁷Yé sọ kanbiọ ẹ dọmọ, Meplọnto, whetenu we onu helẹ na yin mọ? ohia tewẹ na tin whenuena onú helẹ na jọ? ⁸E sọ dọmọ, Mì payi mìde go, na ye klọ mì blo: na gbẹtọ susu na wá to oyín ṣie mẹ, domọ, Yẹn we ewọ; podọ, ojle lọ sepọ enẹwutu mì yì hodo yé blo. ⁹Ṣigba whenuena mìwlẹ na sè awhán linlin po zingidi po, mì dibu blo; na onú helẹ ma sọgan nọ ma jọ whẹ gba; sigba opòdo ma yin to afọdoponẹji gba.

¹⁰Whenẹnu wẹ é dọ hlan yé, dọmọ, Akọta de na fon do akọta de ji, aholudu de do ahọludu do ji: ¹¹aigba whinwhan daho na tin to oten hunkọhunkọ me, huvẹ po azọ̀n ylankan po; avosisa, po ohia daho po na tin sọn olọn me ¹²Ṣigba jẹnukonna onú hele, ye na dè alọ yetọn wle mì, bo na dohomeken mì, bo dè mì jo hlan sinagogu le, po ogànhọ po, yè na hen mì yì ahọlu lẹ, po ogán lẹ po nukon na oyín ṣie tọn wutu. ¹³E nasọ lé hlan ye na okunnude de, ¹⁴Enẹwutu mì dotana ẹn to ayiha mìtọn mẹ, nado dowe daidote, onú he mì na gblọn tọn blo: ¹⁵na yẹn na na onù de po nuyọnẹn po mì, ehe mẹglatọ mìtọn lepo ma na sọgan sọtadona, kavi lé avùnnukọn sọ ¹⁶Yè na dè mi hia gbọn alọ mẹjitọ mìtọn lẹ tọn mẹ, podọ gbọn alọ mẹmẹsunnu le tọn mẹ, podọ gbọn alọ hẹnnumẹ lẹ tọn mẹ, podọ gbọn alọ họntọn lẹ ton mẹ; yé nasọ basi yè ni hù delẹ to mì mẹ. ¹⁷Yè na gbẹwunna mì sọn gbẹtọ lepo de, na oyín ṣie tọn wútu. ¹⁸Ṣigba oda ota mìton ton dopo ma na dòn. ¹⁹To homẹfa mìtọn mẹ, mì na yí ayiha mìtọn whlá.

²⁰Ṣigba whenuena mìwlẹ mọ yè yí awhàn lédo Jelusalẹm, whenẹnu mì ni yọnẹn dọ ovọje etọn sẹpè ²¹Whenẹnu mì gbọ mẹhe tin to Judé lẹ ni hòn yì osó lẹ ji; bo sọ gbọ ye he tin to gblagbla etọn mẹ le ni fọ́n ton yì; mì sọ dike yé he sọ tin to topevi mẹ lẹ biọ é mẹ blo. ²²Na azán ahọsu tọn wẹ ehelẹ, na onú he yè wlan lẹpo nido yin hinhendi. ²³Ṣigba dindọn hlan yé he mọhò lẹ, podọ hlan yé he to anọ do na ovi to ozán nẹlẹ mẹ Na nukunbibia daho na tin to aigba ji, podọ homégble hlan gbẹtọ helẹ. ²⁴Yé na gbọn onu ohi tọn me jai, ye nasọ hẹn yé mẹglọnọ yì biọ akọta lepo me. Jelusalẹm na zùn zinzíndai sọn Kosi lẹ de, kaka ojlẹ Kosi lẹ tọn nado sọ. ²⁵Óhia na tin to owhè po osùn po mẹ, podọ to sunwhlẹvu lẹ mẹ; podọ to aihọn me nukunbia akọta lẹ ton, to flujijẹ mẹ na gbigbó ohù tọn po agbowhẹn po. ²⁶Gbetọ na to didaku na obú, podọ na nukundo onú nele he ja aihọn ji tọn; na yè na whan huhlọn olọn tọn lẹ ²⁷Whenenu wẹ yé na mọ Ovi gbẹtọ tọn ja to aslọ de mẹ po huhlọn po po gigo daho po. ²⁸Whenuena onú helẹ na sè jijọ, mì ni pọ́n aga, bo sọ zé ota mìtọn do aga; na ofligò mìtọn to dindòn sẹpè wutu.

²⁹E sọ dọ olo de hlan yé, dọmọ, Mì pon ovotin po atin lẹpo po; ³⁰whenuena ye tọ́nkun, mìwlẹ mọ bo sọ yọnẹn na mìde dọ ojlẹ alúnlún tọn tin sẹpè to dinvie. ³¹Yèdo mọwe mìwlẹ ga, whenuena mì mọ onu helẹ to jijọ, mì ni yọnẹn dọ ahọludu Jiwheyẹwhe tọn tin sẹpọ. ³²Nugbo wẹ yẹn dọ hlan mì, Whẹndo he ma to na juwayì kaka yè nado hẹn onú lẹpo di. ³³Olọn po aihọn po na juwayì; ṣigba ohó ṣie ma to na juwayì.

³⁴Ṣigba mì ni payi mìde go, vlavo ayiha mìtọn nikã yín yíyí gigófla do doagbanna, po núnùmú ogbè tọn po, bọ azán lọ nado wá mì ji ajiji di omò de. ³⁵Na mọwe é na wá yé mẹpo ji do he nọ nò nukunmẹ aigba tọn ji lepo. ³⁶Ṣigba mì nọ hó mìde to osã lẹpo, bo nọ basi ovẹvivẹ, na mì nido yínuglo nado họngansọn onú helẹ pó mẹ he to na wá jọ, podọ nado site to Ovi gbẹtọ tọn nukọn.

³⁷To okle lẹpo é nọ to mẹplón to tẹmpli mẹ; to ozán lẹpo mẹ é nọ tọ́njẹgbonu yi bo nọnọ̀ oso he yè nọ ylọ osó olivie tọn mẹ. ³⁸Gbẹtọ lẹpo sọ wá e de to tẹmpli mẹ to afọnnu fliflimẹ, nado sè ohó etọn.

¹DINVIE hunwhẹ akla madotòn tọn dòn sẹpọ, he yè nọ ylọ juwayì. ²Ogán yewhenọ tọn lẹ, po wekantọ lẹ po sọ din le yé na hù i do; na yé to budina gbẹtọ lẹ wutu.

³Satani sọ biọ ohò Juda he yè nọ ylọ Iskaliọti tọn mẹ, he yín dopo to yé omẹ wiawe lẹ mẹ. ⁴E sọ tọ́n yí, bo dọhó hẹ ogán yẹwhenọ ton lẹ, po awhangán lẹ po, na le ewọ na dè e hia yé do. ⁵Yé sọ jaya, bo magbè nado na akuẹ ẹ. ⁶E yigbè bo sọ to tẹnmẹ din nado jo e hlan yé matin zingidi.

⁷Azán akla madotòn tọn pé, whenuena yè na sánvọ juwayì tọn. ⁸E sọ do Pita po Johanu po hlan, dọmọ, Mì yì, bo wleawu juwayì tọn na mí, na mí nido dù. ⁹Yé sọ dọ hlan en, dọ, Fie wẹ hiẹ jlo dọ mi ni wleawu dai do? ¹⁰E dọ hlan ye, domọ Pọ́n, whenuena mìwlẹ biọ oto me, dawe he hen ozẹ́n osìn tọn de na pe mì; mi hodo ẹ yi owhé he gbe e bio, ¹¹Mi na do hlan whénọ dagbe owhé lọ tọn, dọmọ, Mẹplọntọ dọ hlan we, dọmọ, Fie wẹ abo nudùdù ton lọ fie yẹn na dù juwayì po nuplọntọ ṣie lẹ po te? ¹²Ewọ nasọ yí abò daho de to aga hia mì ehe yè jlado: fine wẹ mi ni wleawu dai do, ¹³Yé sọ yì, bo mo kededile é dọ hlan yé do; yé sọ wleawu juwayì tọn.

¹⁴Whenuena ojle lọ wa, é jagla, po apọsteli wiawe lẹ po po e po. ¹⁵E sọ dọ hlan yé, dọmọ, Hómẹhùnhùn yẹn jlo nado dù juwayì he he mì, whẹpo yen na do jiya: ¹⁶na yẹn do hlan mì, Yen ma to na dù to e me ba, kaka yè na do dota nẹ to ahọludu Jiwheyẹwhe tọn mẹ. ¹⁷E yí kọfo de whenuena e ko dopé e dọmọ, Mi yí ehe, bo má ẹ to mide ṣẹnṣẹn: ¹⁸na yẹn dọ hlan mì, Yẹn ma to na nù to sinsẹ́n ovẹ̃n tọn me ba, kaka ahọludu Jiwheyẹwhe ton na do wá. ¹⁹E sọ yí akla, whenuena e ko dope, e wén ẹn, bo sọ yí na yé, domọ. Ehe wẹ agbasa ṣie he ye na mì mi nọ basi ehe to oflin ṣie me. ²⁰Podọ kọfo ga to owàlọ monkọ mẹ, tò tenu nudùdù godo, é dọmọ, Kọfo he wẹ àlẹnu yọ́yọ́ to ohùn ṣie me, yedọ enẹ he yè kọn na mi. ²¹Ṣigba mi do ayi e go, alọ mẹhe dè mi hia tọn tin to dẽ to tafo ji. ²²Ovi gbẹtọ tọn jei nugbo, dile yè ko magbena do: ṣigba dindọn hlan dawe lọ mẹhe de yè dè e hia gbọn ²³Ye sọ sè kinkanbiọ to yéde ṣẹnṣẹn, mẹhe é yin to yé mẹ, he na wa onu he.

²⁴Wiwọ de sọ tite ga tó yé mẹ, mẹhe yè na lẹn do kiklohu to yé mẹ. ²⁵E sọ dọ hlan ye, dọmọ, Ahọlu Kosi lẹ tọn nọ tindo gándudu do yé ji; yé sọ ylọ mẹhe do asè to yé ji lẹ dọ dagbewàtọ lẹ, ²⁶Ṣigba mìwlẹ ma to na yín mọ gba: ṣigba mẹhe klohú to mì mẹ, mì gbọ e ni lẹzun di yopọ; mehe so yín ogan, ewọ di ewọ he to lizọnyí. ²⁷Be mẹnu wẹ klohú, méhe jagla to núdùdù kòn, kavi mẹhe to lizọnyí? Be é ma yín mehe jagla to núdùdù kọ̀n wẹ? Ṣigba yen to mí mẹ di mẹhe to lizọnyí. ²⁸Miw ẹ wè mẹhe ko nọte he mi to whlepón sìé le mẹ. ²⁹Yen sọ dèahọludu de hlan mì, dile Otọ́ ṣie dè hlan mi do; ³⁰na mìwlẹ nidọ dù, bo sọ nù to tafo ṣie ji, to ahọludu ṣie mẹ, na mi nido sinai to ofìn lẹ ji, bo to whòdana whẹndo wiawe Islaeli tọn lẹ. ³¹Simọni, Simọni, pọn, Satani gbọn bibiọ dali tindo we, na é nido jàn we di likun: ³²ṣigba yen basi ovẹvivẹ na we, dọ yise towe fé blo: hiẹ ni sọ basi whenuena hiẹ ko lé hadópo, hen mẹmẹsunnu towe lẹ lódo ³³E sọ dọ hlan ẹn, dọmọ, Oklunọ, yẹn wleawu pó nado yì hẹ we jẹ oganhọ mẹ, podo jẹ oku. ³⁴E sọ dọmọ, Yẹn dọ hlan we, Pita, koklo ma to na dose to egbé, whẹpo hiẹ na mọ́n whla atọ̀n do hie ma yọ́n mi.

³⁵E sọ dọ hlan yé, dọmọ, Whenuena yẹn do mì hlan matin sẹge, azọpo, po afọpa po, mì jehẹn núde tọn? Yé sọ dọmọ, Lala. ³⁶Ewọ sọ dọ hlan yé dọmọ, Ṣigba dinvie, mẹhe tindo sẹgẹ de, gbọ é ni yí i, podọ sakoto de mọkẹdẹ: podo ewọ he ma tindo ode, gbọ é ni sà avọ̀ etọn bo ho ohi de. ³⁷Na yẹn dọ hlan mi, do, ehe yè wlan ma sọgan nọ ma di to mì go gba, Yè sọ hlẹ ẹ dogó ylanwàtọ lẹ: na onú nẹlẹ na yẹn tọn wutu tindo pòdo. ³⁸Yé sọ dọmọ, Oklunọ, pon, ohi awe tin to ofi. E sọ dọ hlan ye, dọmọ, E sù.

³⁹E sọ jegbonu yì, bo to yìyì di walọ etọn yì osó olivie tọn ji; nuplọntọ etọn lẹ hodo e ga. ⁴⁰Whenuena é tin to finẹ, é dọ hlanyé, dọmọ, Mì to dẹho, na mì ma na do biọ whlepón me. ⁴¹E sọklán sọn ye de, sọ owhán dindlan dopo, bo sọ jẹklo, bo hodè, ⁴²dọmọ, Otọ́, eyín hiẹ yin ojlonọ, dè kọfo he sọn dè: ṣigba ojlo ṣie ma wẹ gba, adavo towe, yín wiwà. ⁴³Angeli de sọ sọawúhia hlan ẹn sọn olọn bo to huhlọnna ẹn. ⁴⁴Tintin to oyankọ me, é hodè vivẹvivẹ: oden etọn sọ taidi kùnkùn daho ohùn tọn, é to kùnkùn do aigba. ⁴⁵Whenuena é fọ́n sọn odẹ̀ etọn me, é wá nuplọntọ lẹ de, bo mọ yé to amlọndọ na awúbla. ⁴⁶E sọ dọ hlan yé, dọmọ, Etẹwutu wẹ mìwlẹ to amlọn dọ? Mì fọ́n, bo dẹho, na mì ma na do biọ whlepọ́n mẹ.

⁴⁷Le é to hódọ, pọ́n, agùndaho de po ewọ he yè nọ ylọ Juda po, dopo to omẹ wiawe lẹ mẹ, jẹnukon na yé jei, é so dòn sẹpọ Jesu de nado donùnùgo nẹ. ⁴⁸Ṣigba Jesu dọ hlan ẹn, dọmọ, Juda, hiẹ yí nùdonùgo de do dè Ovi gbẹtọ tọn hia? ⁴⁹Whenuena yé he lédo e pó mọ onù he na hodo, yé dọ hlan ẹn, dọmọ, Oklunọ, mì ni li ohi yé? ⁵⁰Dopo to yé mẹ sọ lihi afànumẹ yẹwhenọ daho tọn, bo sán otọ́ etọn adusi tọn dlangbe. ⁵¹Ṣigba Jesu gblọn bo dọmọ, Mì nọte mọ whé E sọ do alọ otọ́ etọn go, bo sọ hẹn alán gbọ nẹ̃. ⁵²Jesu sọ̀ dọ hlan ogán yẹwhenọ lẹ tọn po awhàngán tẹmpli tọn lẹ po, po ínẹho he wá e ji lẹ po, dọmọ, Mìwlẹ tón wá di do ajotọ ji, po ohi po, po aglọpo po? ⁵³Whenuena yẹn tin egbésọ po mì po to tẹmpli mẹ, mìwlẹ ma dlẹn alọ nado wlé mi gba: ṣigba ojlẹ mìtọn wẹ ehe, podọ huhlọn zinvlu tọn.

⁵⁴Yé sọ fán ẹn, bo plan ẹn yì, bo sọ hẹn ẹn wá biọ owhé yewhenọ daho tọn gbè. Pita sọ hodo to aganu. ⁵⁵Whenuena yéflọ miyọn de to gblagbla gbàngan lọ tọn mẹ, bo sọ sinai dopọ, Pita sinai to yé ṣẹnṣẹn. ⁵⁶Oviyọnnu de mimọ ẹn, le é sinai to miyọn kòn, bo sọ pọ́n ẹn tlintlin, é dọmọ, Dawe he tin po e po ga. ⁵⁷E sọ món, dọmọ, Nawe, yẹn ma yón ẹn gba. ⁵⁸To ojlẹ pẹvi de godo, mẹdevo sọ mọ ẹn, bo dọmọ, Hiẹ ga tin to yé mẹ. Pita sọ dọmọ, Dawe, yẹn ma wẹ gba. ⁵⁹Podọ to ogàn dopo nkọ tọn godo, mẹdevo sọ yí tugbigbo do dọmọ, Nugbo, dawe he ga tin po e po: na Galilitọ wẹ ewọ. ⁶⁰Pita sọ dọmọ, Dawe, yẹn ma yon onú he hiẹ to didọ gba To afọdoponẹji, le é to hódọ, koklo dose. ⁶¹Oklunọ sọ légodo bo pọ́n Pita. Pita sọ flin ohó Oklunọ tọn, le é dọ hlan ẹn do, dọ, Whẹpo koklo na dose, hiẹ na món mi whla atọ̀n. ⁶²Pita sọ tónjẹgbonu yì, bo viavi vivẹ.

⁶³Omẹ he wlé e lẹ sọ o vivlẹ ẹ ko, bo to nuli i. ⁶⁴Yé sọ bla nukunmẹ nẹ̃, bo hò nukunmẹ nẹ, bo sọ kanse e dọmọ, Dọdọdai, mẹnu wẹ ewọ he to onú li we? ⁶⁵Onú susu devo wẹ yé sọ yí ohó gbigble do dọ do e go. ⁶⁶Le okle wá, mẹho gbẹtọ lẹ tọn, po ogán yẹwhenọ tọn lẹ po, po wekantọ lẹ po sọ plidopọ, bo plan ẹn yì biọ plito yetọn mẹ, dọmọ, ⁶⁷Eyín hiẹ wẹ Klisti lọ, dọ na mí. Ṣigba é dọ hlan yé, dọmọ, Eyín yẹn dọ na mì, mìwlẹ ma na yise: ⁶⁸eyín yẹn sọ kanbiọ mì ga, mìwlẹ ma na gblọn. ⁶⁹Ṣigba sọn dinvie yì wẹ Ovi gbẹtọ tọn na sinai to adusilọ huhlọn Jiwheyẹwhe tọn tọn mẹ. ⁷⁰Yé omẹ pó sọ dọmọ, Be Ovi Jiwheyẹwhe tọn wẹ hiẹ? E bọ dọ hlan yé, dọmọ, Mìwlẹ dọ dọmọ, yẹn wẹ. ⁷¹Yé sọ dọmọ, Kunnuditọ tẹwẹ mìwlẹ sọ to dindìn? na mìlọsu ko se sọn onù ewlọsu tọn mẹ.

¹OGBẸ́ yé mẹpo tọn pete sọ fọ́n, bo hẹn ẹn wá Pilati de. ²Yé sọ sọ sislẹ ẹ, dọmọ, Mìwlẹ mọ dawe he to akọta mìtọn hẹngble, bó sọ to kikó nado na otòkuẹ hlan Sesali, bo sọ to didọmọ Ahọlu yíamisisádode de wẹ ewlọsu. ³Pilati sọ kanbiọ ẹ dọmọ, Ahọlu Ju lẹ tọn wẹ hie? E sọ gblọn bo dọmọ, Hiẹ dọ ẹ. ⁴Whenẹnu wẹ Pilati dọ hlan ogán yẹwhenọ lẹ tọn, po agùndaho lẹ lọ po, dọmọ, Yẹn ma mọ oylan de to dawe he go gba. ⁵Ṣigba yé sọ yín klinklọnennọ humọ, dọmọ, Ewọ to gbẹtọ lẹ wlu daga, bo sẹ̀ to mẹplọn lédo Jude lẹpo pé; é sè sọn Galili kaka wá je ofì. ⁶Ṣigba whenuena Pilati sè oyín Galili tọn, é kanbiọ, eyín dawe lọ yín Galilinu, ⁷Podọ whenuena é yọnẹn dọ aigba Hẹlọdi tọn ji tọn wẹ ewọ, é do e hlan Hẹlọdi de, mehe ewlọsu ko tin ga to Jelusalẹm to ojlẹ nẹ mẹ.

⁸Whenuena Hẹlọdi mọ Jesu, é jaya susu; na é ko jlo na naọ ẹn to whenu he dẹn mẹ, na é ko sè onú susu gbon ewọ tọn dali; é sọ tódọ na mọ ohia de gbọn é dali ⁹E sọ kannubiọ ẹ to ohó susu mẹ; ṣigba é ma gblọn onú dẹpope. ¹⁰Ogan yẹwhenọ lẹ tọn, po wekantọ lẹ po sọ nọte bo sọ to sislẹ ẹ susu ¹¹Họlọdi po awhanvipẹ etọn lẹ po to sinsan ẹn ko, bo sọ to vivlẹ ẹ, bo sọ yí avọ̀ gigo tọn do nẹ̃, bo sọ do e hlan Pilati de. ¹²Hẹlọdi po Pilati po lẹzun họntọn po yénọzo po to gbèdoponẹ: na daidai yé ko tin to okẹ́n to yenọzọ; ṣẹnṣẹn.

¹³Pilati, whenuena é ylọ ogán yẹwhenọ lẹ tọn, po nukọntọ lẹ po, po gbẹtọ lẹ po plidopọ, ¹⁴é dọ hlan yé, dọmọ, Mìwlẹ hẹn dawe he wá dẽ, di mẹhe to gbẹtọ lẹ hẹngble; bo pọ́n, yẹn ko dindòna ẹn to mì nukọn, yẹn ma sọ mọ oylan de to dawe he go to onú he mẹ mì jẹwhé etọn lẹ te gba: ¹⁵lala, kavi Hẹlọdi; na ewọ ko do é hlan mí; bo pọ́n, onú he jẹ na okú yè ma wà gbọn é de gba. ¹⁶Enẹwutu yẹn na hò e, bo jo e do. ¹⁷(Dinvie ewọ do na dè ogàntọ dopo dai hlan yé to hunwhẹ gbè.) ¹⁸Ṣigba yé sọ dawhá gbèpli dọmọ, Zé dawe he só, bo dè Balabas dai hlan mí: ¹⁹(mẹhe, na atẹ de yè basi to otòdaho mẹ, podọ na hlọnhùhù, yè ko yí do ogànhọ mẹ.) ²⁰Pilati sọ vó hódọ hlan yé, jijlo nado dè Jesu dai. ²¹Ṣigba yé sọ dabobo, dọmọ, Whè e do satin go Whè e do satin go ²²E sọ dọ hlan yé whla atọ̀ntọ, dọmọ Etẹwutu wẹ, oylan té é wà? Yẹn ma mọ owhé okú tọn to e go: enẹwutu yẹn na hò e, bo jo e do. ²³Ṣigba yé yín klinklọnẹnnọ po ogbè lélé lẹ po, bibiọ dọ ewọ nidọ yín whiwhè do satin go. Ogbè yétọn sọ ṣinyọnmẹji. ²⁴Pilati sọ na whódahó dọ núhe yé biọ ni yín wiwà. ²⁵E sọ dè dai ewọ he na atẹ yè basi po hlọnhùhù po yè ko yí do ogànhọ mẹ, mẹhe yé biọ; ṣigba Jesu wẹ é dèjó hlan ojlo yéton.

²⁶Whenuena yé plan ẹn yì, yé wlé dawe de, Sìmọni Silenetọ de, he gò sọn gbeta ja, yé sọ zé satin do e ji, na é nido to hinhẹn ẹn to godo Jesu tọn. ²⁷Agùndaho gbẹtọ lẹ tọn sọ hodo e, po yọnnusi lẹ po, he to avìhando, bo sọ to avigbèdo nẹ le. ²⁸Ṣigba Jesu liìó hlan yé, dọmọ, Mì oviyọnnu Jelusalẹm tọn, mì viavi na mi blo, ṣigba mi viavi na mìde, podọ na ovi mìtọn lẹ. ²⁹Na, pọ́n, azán lẹ ja, ehe mẹ yè na dọmọ, Donanọ wẹ wónsinọ lẹ, podọ adò he ma jivi gbède, podọ anọ he yè ma nó gbède. ³⁰Whenẹnu wẹ yé na sè didọ hlan osó lẹ dọmọ, Mì hó jẹ mí ji, podọ hlan okọta lẹ dọ, Mì ṣinyọn mí ji. ³¹Na eyín yé wà onú helẹ to atin mú mẹ etẹwẹ yè na wà to húhú mẹ?

³²Yé sọ wlé Omẹ awe devo sẹnmẹjẹtọ, bo plan po e po nado yín hùhù.

³³Whenuena yé jẹ ọfi he yè nọ ylọ dọ Kalvali, finẹ wẹ yé whè e do satin go te, po sẹnmẹjẹtọ lẹ lọ po, ode to adusilọ mẹ, awetọ to amiyọnlọ mẹ. ³⁴Jesu sọ dọmọ, Otọ́, jona yé; na yé ma yón onú he yé to wiwà gba. Yé sọ má avọ̀ etọn, bo sọ devò. ³⁵Gbẹtọ lẹ sọ site to nupón. Nukọntọ lẹ ga sọ to vivlẹ ẹ, dọmọ, E whlẹn mẹdevo gán, gbọ é ni whlẹn edẹ, yín ehe wẹ Klisti Jiwheyẹwhe tọn lọ mẹdidè etọn. ³⁶Awhanvipẹ lẹ ga sọ to vivlẹ ẹ ko, yé wá e de, bo yí ovẹ̃n he vẹsin na ẹn, ³⁷bo dọmọ, Eyín Ahọlu Ju lẹ tọn wẹ hiẹ, whlẹn dewe. ³⁸Yè sọ wlanwe wìnwlán de ga do taligbé etọn, to ogbè Gleki tọn, Latini tọn, po Heblu tọn po mẹ, dọmọ, EHE WẸ AHỌLU JU LẸ TỌN.

³⁹Dopo to sẹnmẹjẹtọ lẹ lọ mẹ he yè zépla, to zùnde do e go, dọ, Hiẹ ma wẹ Klisti lọ, whlẹn dewe po mí po. ⁴⁰Ṣigba awetọ gblọn bo wọhẹ ẹ, dọmọ, Be hiẹ ma dibuna Jiwheyẹwhe, mimọ hiẹ tin to whẹgbledo dopolọ mẹ? ⁴¹Mìwlẹ, nugbonugbo po dódó po, ale azón mìtọn tọn dù wẹ mí te: ṣigba dawe he ma wà ọnú jẹagò de gba. ⁴²E sọ dọmọ Jesu, flin mi, whenuena hiẹ jẹ ahọludu towe mẹ. ⁴³Jesu sọ dọ hían ẹn, dọmọ, Nugbo wẹ yẹn dọ hlan we, Egbé wẹ hiẹ na nò hẹ mì to paladisi.

⁴⁴E sọ yì ogàn sidopotọ mẹ, zinvlu sọ do ṣinyọn aigba lẹpo ji kaka jẹ ogàn sinẹnẹtọ mẹ. ⁴⁵Ówhè sọ dozinvlu, avọ̀ yè do gbòabò fiwiwe lọ tọn sọ tlẹn sọn ṣẹnṣẹn. ⁴⁶Whenuena Jesu ko yí ogbè lélé de do dawhá, é dọmọ, Otọ́, alọ towe mẹ wẹ yẹn jó gbigbọ ṣie do: le é dọ ehe, é jó gbigbọ etọn do. ⁴⁷Whenuena mẹkanwekowhangán mọ onú he jọ, é to gigopana Jiwheyẹwhe, dọmọ, Nugbo, dódónọ wẹ dawe he. ⁴⁸Agùndaho lẹ lọ he wá plidopọ to núpinpón lọ kòn, whenuena yé to onú he to jijọ pọ́n, linu akọnnu yetọn, bo légodọ. ⁴⁹Hóntọn etọn lẹ, po yọnnu he hodo e sọn Galili lẹ po site to aganu, bo to onú helẹ pọn.

⁵⁰Bo pọ́n, dawe de tin, he yè nọ ylọ Jọsẹfu, mẹhe yín tòhodọtọ de; gbẹtọ dagbe de, dódónọ de. ⁵¹(Ewọ ma yígbè hlan hónamẹ po wiwà yetọn po gba;) Alimaténu wẹ ewọ, otò Ju lẹ tọn: mẹhe ewlọsu ga ko to tenọpọn ahọludu Jiwheyẹwhe tọn. ⁵²Dawe he yì Pilati de, bo kàn osiọ Jesu tọn biọ. ⁵³E sọ zé e jẹte, bo bla ẹ do alavọ̀ mẹ, bo sọ té ẹ do oyòwhé de mẹ he yè kùn to osé mẹ, fie yè ma té mẹdepope do gbède. ⁵⁴Azán lọ sọ yín awuwlezángbè, gbọjẹzán to dindòn sẹpó. ⁵⁵Yọnnu lẹ ga he zòn hẹ ẹ sọn Galili wá, bo to hihodo e godo lẹ, yé mọ oyòwhé lọ po le, yè té osiọ etọn do po. ⁵⁶Yé lẹ́gọ̀, bo wleawu nuwhẹnwán po núsisa po tọn; Bo sọ gbọjẹ to gbọjẹzángbè gbọn ogbè osén tọn ji.

¹ṢIGBA to azán tintan osé lọ tọn, to afọnnu fliflimẹ, yé wá oyòwhé lọ kòn, bo hẹn nuwhẹnwán he yé ko wleawu etọn lọ wá. ²Yé sọ mọ yè ko bli ozannu sọn oyòwhé go. ³Yé sọ biọ e mẹ, yé ma sọ mọ osiọ Oklunọ Jesu tọn. ⁴E sọ wá jọ, le yé jẹflu talala na onú he wutu, pọ́n, dawe awe site to yé de to awu sisé mẹ: ⁵le obu to yé di, bọ yé sọ ṣinyọn nukunmẹ yetọn do do aigba, yé dọ hlan yé dọmọ, Etẹwutu wẹ mìwlẹ to mẹhe to ogbẹ din to osiọ lẹ mẹ? ⁶E ma tin to ofi gba, ṣigba é ko fọ́n; mí ni flin le é dọhó hlan mì do whenuena é tin to Galili, ⁷dọmọ, Yè ma sọgan nọ ma dè Ovi gbẹtọ tọn jo do alọ gbẹtọ ylandonọ lẹ tọn mẹ gba, yé nasọ whè e do satin go, to azán atọ̀ntọ gbè, é nasọ fọ́n. ⁸Yé sọ flin ohó etọn lẹ, ⁹ye sọ le sọn oyòwhé lọ kòn, bo sọ dọ onú he lẹpo hlan omẹ widopo lẹ, podo hlan mẹdevo he pò lẹpo. ¹⁰Malia Magdaleni, po Jóana po, po Malia onọ Jakobu tọn po, po yọnnu devo lẹ po po yé po, dọ onú helẹ hlan apọsteli le ¹¹Oho yetọn lẹ sọ sọawúhia di ohó fusa, yé ma sọ yí yé se. ¹²Ṣigba Pita tite, bo dowezun yì oyòwhé lọ kòn; fifẹ po pinpọ́n e mẹ po, é mọ ala vò lẹ lọ to àigba to ola na yéde, é sọ fọ́nyì, awuji ewlọsu do onú he jọ go.

¹³Bo pọ́n, omẹ awe to yé me jei gbeta to gbèdoponẹ, he yè nọ ylọ Emausi he yì stade kandeko sọn Jelusalẹm. ¹⁴Yé sọ to didọ hẹ yénọzo gbọn onú he jọ helẹ tọn dali. ¹⁵E sọ wá jọ, le yé to hódọ hẹ yénọzo, bo sọ to onú lẹnpọn, wẹ Jesu lọsu dòn sẹpọ́, bo sọ to yìyì po yé po. ¹⁶Ṣigba yè hẹn nukun yetọn lẹ go, dọ yé ma na do yón ẹn. ¹⁷E sọ dọ hlan ye, dọmọ, Ohó té hunkọ wẹ mìwlẹ to didọ hẹ mìnọzo, le mì to zọnlinzin. Yé sọ nọte abọẹ, bo to nupọn sù? ¹⁸Dopo to ye mẹ, mẹhe oyín etọn yín Kleopasi, gblọn dọ hlan ẹn, dọmọ, Hiẹ wáwási to Jelusalẹm mẹ kẹdẹwẹ, bo ma yón onú he jọ to finẹ to azán helẹ mẹ? ¹⁹E sọ dọ hlan yé, dọmọ, Onú tewẹ? Yé sọ dọ hlan ẹn, dọmọ, Gbọn Jesu Nazalẹti tọn dali, he yín yẹwhegán huhlọnnọ de to azón mẹ, podọ to ohó mẹ, to Jiwheyẹwhe nukọn, podọ to gbẹtọ lẹpo nukọn: ²⁰le ogán yẹwhenọ lẹ tọn, po nukọntọ mìtọn lẹ po ko yí i bo gblewhè okú tọn do e do, bo sọ whè e do satin go. ²¹Ṣigba mìwlẹ dotódido dọ ewọ wẹ mẹhe na fli Islaeli: mọwẹ dogó ehe lẹpo, egbé wẹ azán atọ̀ntọ sọn whenuena onú helẹ ko jọ. ²²Nugbo, yọnnu delẹ ga sọn ogbé mìtọn lẹ mẹ, he yì oyòwhé lọ kòn to afọnnu fliflimẹ hẹn mí savọ̀; ²³whenuena yé ma mọ osiọ etọn, yé wá, dọmọ, yé mọ númimọ angẹli lẹ tọn ga, he dọ hlan ye, dọ é tin to ogbè. ²⁴Yé mẹhe tin to mí de delẹ so yì oyòwhé lọ kòn, bo sọ mọ ẹn kẹdẹdile yọnnu lẹ dọ do: ṣigba ewlọsu wẹ yé ma mọ. ²⁵E sọ dọ hlan yé dọmọ, Gbẹtọ gugutọ lẹ, podọ awuwhletọ ayiha tọn nado yíse to núhe yẹwhegán lẹ ko do mẹ ²⁶Be é ma jẹ dọ Klisti ni jiya onú helẹ tọn, podọ nado biọ gigo etọn mẹ? ²⁷E sọ hen ẹn sọn Moṣe, po yẹwhegán lẹpo po ji, é sọ detana onú he yè dọ gbọn ewlọsu tọn dali lẹ hlan yé to Owé wiwe lẹpo mẹ. ²⁸Yé sọ dọn sẹpọ́ gbeta fie je jei: é sọ basi di é jlo na yì nukọn. ²⁹Yé sọ dava ẹ dọmọ, Nò mí de; na tenu to dido, azán sọ vò. E sọ biọ whégbè nado nò hẹ yé. ³⁰E sọ wá jọ, whenuena é jagla to núdùdù kòn po yé po, é yí akla, bo dona ẹn, bo sọ kán ẹn, bo yí na yé. ³¹Nukun yeton sọ hùn, yé sọ yon en; é sọ bú sọn nukun yeton me. ³²Yé sọ to didọ hlan yenọzo, dọmọ, Be ayiha mìtọn ma hunzo to oho mìtọn mẹ, whenuena é to hódọ hẹ mí to aliho, podọ whenuena é hùn Owé wiwe hlan mí? ³³Yé sọ fọ́n to ojlẹ doponẹmẹ, bo sọ lẹ́gọ̀ do Jelusalẹm, bo sọ mọ omẹ widopo lẹ plidopọ, po mehe tin to yé de lẹ po, ³⁴dọmo, Oklunọ fọ́n nugbo, bo sọawúhìa Simọni ³⁵Yé sọ dọ onú he jọ to aliho na yé, podọ le ewọ zùn yinyọnẹn to yé de do to kinkán akla lọ tọn mẹ.

³⁶Le yé sọ to onú hele dọ, Jesu lọsu site to ye ṣẹnṣẹn, boso dọ hlan yé, dọmọ, jijọho hlan mì. ³⁷Ṣigba yé dibu, bo sọ to sisọsisọ, bo lẹn dọ yé mọ obló. ³⁸E sọ dọ hlan yé, domọ, Etẹwutu awú ma jai na mì? Etẹwutu linlẹn fon to ayiha mìtọn mẹ? ³⁹Mi pọ́n alọ ṣie, po afọ ṣie po, dọ yẹn lọsu wẹ; mì do alo ogo e, na mì ni mọ; na obló ma tindo olàn po ohu po, dile mìwlẹ mọ yẹn tindo do gba. ⁴⁰Whenuena é dọ le, é yí alọ etọn po afọ etọn po hia. ⁴¹Le yé ma yise na ayajijẹ, bọ avọ̀ to yé sa, é dọ hlan yé, dọmọ, Mì tindo núdùdù depope to ofi ⁴²Yé sọ yí whevi hihi kinkán, pò owinja pẹvide po nẹ. ⁴³E sọ yí Ì, bo dù i to nukun yetọn me.

⁴⁴E sọ dọ hlan yé, dọmọ, Ehele we ohó he yẹn ko nọ dọ hlan mì, whenuena yẹn tin mì de, na onú lẹpo ma sọgan nọ ma di gba, heyè kò wlan to osẹ́n Moṣe tọn mẹ podọ to yẹwhegán lẹ mẹ podọ to Psalm lẹ mẹ na yon tọn wutu. ⁴⁵Whenẹnu wẹ é hùn ayi yeton, na yé nido tunwun Owé wiwe. ⁴⁶E sọ dọ hlan ye dọmọ, Le wẹ yè wlanwe eton, mọwẹ é sọ jẹ do dọ Klisti ni jiya, bo so fon sọn okú to azán atọ̀ntọ gbè. ⁴⁷Podọ na yẹwheho ovọjọ po odèsè ylando le tọn po ni yín didọ to oyìn etọn me hlan akọta lẹpo, hinhẹn sọn Jelusalẹm. ⁴⁸Mìwlẹ wẹ kunnudetọ onu helẹ tọn. ⁴⁹Bo do ayi e go, yẹn do pagbe Otọ́ ṣie tọn hlan mì ji: ṣigba mì ni dòngbàn to tòdaho lọ me, kaka yè na do yí huhlọn sọn aga do ṣinyọn mì.

⁵⁰E sọ plan yé jẹgbonu kaka yé do je Bẹtani titegbe, é sọ zé alọ etọn lẹ daga, bo dona yé. ⁵¹E sọ wá jọ le é to didona yé, yè klán en sọn ye de, bo sọ zé e yì olọn aga. ⁵²Yé sọ litai nẹ̃, bo lẹ́gọ̀ do Jelusalẹm po ayajijẹ daho po. ⁵³Bo sọ tin to whepoponu to tẹmpli me, to didona Jiwheyẹwhe. Niṣẹ.