Jona

¹DINVIE ohó OKLUNỌ tọn wá jẹ Jona visunnu Amitai tọn lọ de, dọmọ, ²Tite, yì jẹ Nineve, todaho gbó nẹ, bo dawhá do oji nẹ̃; na ye hen yinylan yetọn hẹji wá nukọn ṣie. ³Ṣigba Jona fọ́n tite nado họ̀nyì jẹ Talṣiṣi sọn nukọn OKLUNỌ tọn; é sọ jẹte yì jẹ Jọpa, bo sọ mọ ohun de jei Talṣaiṣi mọwẹ ewọ na hundokuẹ etọn, bo jẹte yì biọ e mẹ, nado yì po yé po jẹ Talsisi sọn nukọn OKLUNỌ tọn. ⁴Ṣigba OKLUNỌ dọ̀n ojẹhọn daho tón biọ ohù lọ mẹ, jẹhọndaho hlọnhlọnnọ de sọ tin finẹ to ohù lọ mẹ, mọwe ohun lọ tin taidi nado yín gbigbà. ⁵Whenẹnu wẹ hùmẹnù lẹ yín avosatọ, bo to awhádo omẹ dopodopo hlan yẹwhe etọn; podọ yé sọ bẹ ajọnú he tin to ohun mẹ lẹ dlan jẹgbonu biọ ohù mẹ, nado hẹn ẹn whapò hlan yé. Ṣigba yè ko hẹn Jona jẹte biọ adà homẹnukọnnukọn ohún lọ tọn lẹ mẹ yì; podọ ewọ mlonai, bo sọ tin damlọn yìtóji. ⁶Mọwẹ ohúntọ lọ wá jẹ e de, bo dọ hlan ẹn dọ, Etẹ́ hiẹ lo, hiẹ amlọnnọ E? tite, dawhá ylọ Jiwheyẹwhe towe, eyín mọ tin wẹ Jiwheyẹwhe na lẹn mi tọn mẹ pọ́n, na mí ma na do dọ̀n gba. ⁷Podọ yé sọ to didọ omẹ dopodopo hlan hatọ etọn dọ, Wá, gbọ mí ni dlẹn ovò lẹ, na mí nido yọn owhẹhó mẹnutọn wẹ oylan he wa mi ji na. Mowẹ yé dlẹn ovò lẹ, ovò lọ sọ flẹ do Jona ji. ⁸Whenenu wẹ yé dọ hlan ẹn dọ, Mí vẹ̀ we, dọ na mí, owhẹ̀hó mẹnutọn wẹ oylan he tin mí ji na, etẹ́ wẹ núwiwà towe? podọ fie wẹ hiẹ sọn wá? etẹ́ otò towe yín? podọ gbẹtọ tẹ́ lẹ tọn hiẹ yín? ⁹Ewọ sọ dọ hlan yé dọ, Heblu de wẹ yen; podọ yen dibusi OKLUNỌ, Jiwheyẹwhe olọn tọn, he ko basi ohù po aigba klo po. ¹⁰Whenẹnu wẹ omẹ ewlẹ yín avosatọ badabada, bo sọ dọ hlan ẹn dọ, Etẹ́ ehe hiẹ ko wá he yín? Na omẹ ewlẹ yọnẹn dọ ewọ sí sọn nukọn Jiwheyẹwhe tọn, na ewọ dọ na yé wutu. ¹¹Whenenu wẹ yé dọ hlan ẹn dọ, Etẹ mí na wa hlan we, na ohù lọ nido yín whiwhẹnọ hlan mlwlẹ? na ohù lọ yí jẹhòndaho do to yinylan dejideji jànwẹ ¹²E sọ dọ hlan yé dọ, Mì zé mi daga, bo zé mi dlẹn biọ ohù lọ mẹ; mọwẹ ohù lọ na yín whiwhẹnọ hlan mìwlẹ, na yẹn yọnẹn dọ ṣie tọn wutu wẹ jehondaho gbó he do tin to mì ji. ¹³Sogan gbẹtọ ewlẹ kùnazẹ̀ sinyẹnsinyẹn nado hẹn yé gò jẹ agé; ṣigba yé ma sọgan gba: na ohù lọ yí jẹhọndaho do to yinylan dejideji do yé ji jànwẹ. ¹⁴Enẹwutu wẹ yé dawhá hlan OKLUNỌ, bo dọmọ, Mí vẹ̀ we, OKLUNỌ E, mí vẹ̀ we, a dike mí dọ̀n na ogbẹ dawe he tọn blo, podọ a sọ zé ohùn homẹvọnọ do mí ji blo: na, OKLUNỌ E, hiẹ ko wà dile é hẹnhomẹhùn we do. ¹⁵Mọwẹ yé zé Jona daga, bo zé e dlan jẹgbonu biọ ohù lọ mẹ: ohù lọ bo sọ doalọte sọn adanjijẹ etọn mẹ. ¹⁶Whenenu wẹ omẹ ewlẹ dibuna OKLUNỌ badabada; yé sọ na avọ̀sánnu de hlan OKLUNỌ, bo sọ dopà lẹ. ¹⁷OKLUNỌ bo sọ wleawuna owhèvi daho de nado zé Jona mì; Jona bo sọ tin to adọgo owhèvi lọ tọn mẹ okle atọ̀n po ozán atọ̀n po.

¹WHENẸNU wẹ Jona hodẹ̀ hlan OKLUNỌ Jiwheyẹwhe etọn sọn adọ̀go owhèvi lọ tọn mẹ. ²E sọ dọmọ,

¹⁰OKLUNỌ sọ dọhó hlan owhèvi lọ, é bo sọ kọ́ Jona jẹgbonu do aigba klo ji.

¹OHÓ OKLUNỌ tọn sọ wá jẹ Jona de whlawetọ, dọmọ. ²Tite, yì jẹ Nineve, tòdaho gbó nẹ, bo dawhá dọ yẹwhehó he yẹn degbèna we jẹ e kòn. ³Mọwẹ Jona tite, bo yì jẹ Nineve, kẹdẹdi ohó OKLUNỌ tọn. Dinvie tòdaho gbó gedegede de hlan Jiwheyẹwhe wẹ Nineve, gbéjizọnlin azán atọ̀n tọn. ⁴Jona bo sọ sè nado biọ tòdaho lọ mẹ gbéjizònlin azán dopo tọn, ewọ bo sọ dawhá, bo to didọmọ, Azán kande mọ gbè, Nineve na yín akititana. ⁵Omẹ Nineve tọn lẹ bo sọ yí Jiwheyẹwhe sè; yé bo sọ dèmisẽluna nùbibla de, bo sọ yí odẹ́vọ̀ do ogo, sọn mẹhó yé tọn lẹ ji yèdọ jẹ mẹpẹvi yé tọn lẹ ji. ⁶Na ohó wá jẹ ahọlu Nineve tọn de, ewọ sọ tite sọn ofìn etọn ji, bo dè otewu etọn sọn e de, bo yí odẹ́vọ̀ ṣinyọn ede, bo sọ sín afín mẹ. ⁷Podọ ewọ sọ dèmisẽlu bo dọ gbọn asẹ ahọlu po mẹgbõgbo etọn lẹ po tọn dali gbọn Nineve mẹ lédo, dọmọ, Mì dike gbẹtọ kavi kanlin, kanlinpó, kavi lẹngbọpa, dù onú depope pọn blo: mì dike yé dùnú blo, mọ sọ nù osìn blo: ⁸Ṣigba mì gbọ yè ni yí odẹ́vọ̀ ṣinyọn yé, gbẹtọ po kanlin po, bo sọ gbọ ye ni dawhá hlan Jiwheyẹwhe po hlọnhlọn po: mọwẹ, gbọ ye ni lẹ́ omẹ dopodopo sọn aliho ylanylan etọn mẹ, podọ sọn huhlọnnú lọ mẹ he tin to alọ yetọn le mẹ. ⁹Mẹnu wẹ yọnen eyín Jiwheyẹwhe ma na lẹ́ bo diọlinlẹn, bo sọ lẹ́ yì sọn adi zogbe etọn mẹ, na mí súdo blo? ¹⁰Jiwheyẹwhe bo mọ azọ́n yetọn lẹ, dọ yé lẹ́ sọn aliho ylanylan yetọn mẹ; Jiwheyẹwhe bo sọ diọlinlẹn oylan lọ tọn, he é dọ é do wà hlan yé; podọ ewọ ma sọ wà ẹ gba.

¹ṢIGBA é gblehomẹna Jona bada bada, ewọ bo sọ yín adinọ. ²Ewọ bo sọ họdẹ̀ hlan OKLUNỌ, bo dọmọ, OKLUNỌ E, Yẹn vẹ̀ we, ehe ma wẹ didọ ṣie, whenuena yẹn gbẹ́ sọ tin to otò ṣie mẹ? Enẹwutu wẹ yẹn tin to sisi mẹ jẹ Talṣiṣi: na yẹn yọnẹn dọ Jiwheyẹwhe dagbenọ de wẹ hiẹ, bo sọ gọ́ naawuvẹmẹ, whleawu nado sadi, podọ susunọ to lẹblanu mẹ, bo sọ diọlinlẹnna we sọn oylan lọ mẹ. ³Enẹwutu dinvie, OKLUNỌ È, yẹn vẹ̀ we, yí ogbẹ̀ ṣie sọn dẽ; na é tin pọte na mi nado kú hú nado nọgbè. ⁴OKLUNỌ bo sọ dọmọ, Hiẹ yín mẹadinọ dahodaho wẹ? ⁵Whenẹnu wẹ Jona tón yì sọn tòdaho lọ mẹ, bo sọ sinai to adà whèzẹtẹn tòdaho lọ tọn ji, bo sọ basi avàja de to finẹ bo sín e glọ to oyẹ̀ lọ mẹ, kaka ewọ na do mọ núhe na gbọn godo tòdaho lọ tọn. ⁶OKLUNỌ Jiwheyẹwhe bo sọ wleawuna atinkan de, bo sọ hẹn ẹn nado hẹaga wá Jona ji, na é nido yín oyẹhẹ́ de to ota etọn, nado whlẹn ẹn sọn otẹn yinylan etọn mẹ. Mọwẹ Jona yín homẹhùnnọ badabada na atinkan lọ tọn wutu. ⁷Ṣigba Jiwheyẹwhe sọ wleawuna owán de whenuena afọnnu wáji to azán awetọ gbè, é bo sọ hò atinkan lọ, bọ é yọ́. ⁸E sọ wá jọ, whenuena owhè wága, wẹ Jiwheyẹwhe sọ wleawuna jẹhọn hihla whèzẹtẹn ji tọn de; owhè bo sọ jẹ ota Jona tọn ji, bọ ewọ kusiọ, bo biọ na ede na ewọ nido kú, bo dọmọ, E tin pọ́nte na mi nado kú hú nado nọgbẹ́. ⁹Jiwheyẹwhe bo sọ dọ hlan Jona dọ, Bé hiẹ wà dagbe nado yín mẹadinọ na atinkan lọ? Ewọ sọ dọmọ, Yẹn wà dagbe nado yín mẹadinọ yèdọ do jẹ okú. ¹⁰OKLUNỌ sọ dọmọ, Hiẹ ko tindo awubla to atinkan lọ ji, he hiẹ ma ko jẹtukla na lọ, mọ ma hẹn ẹn wú; he hẹji wá to ozán de mẹ, bo sọ súdo to ozán de mẹ: ¹¹Bé yẹn ma do sọ tindo awubla to Nineve ji, todaho gbó nẹ; ehe mẹ gbẹtọ hú fọtọ́n kantọ̀n te he ma sọgan yóndesọndemẹ to alọ yetọn adusi po alọ yetọn amiọn po ṣẹnṣẹn; po kanlinyìnyín susu po ga?