Hagai

¹TO owhè awetọ Daliusi ahọlu lọ tọn mẹ, to osùn ṣidopotọ mẹ, to azán tintan osùn lọ tọn mẹ, ohó OKLUNỌ tọn wá gbọn Hagai yẹwhegán lọ dali hlan Zelubabẹli visunnu Sealtiẹli tọn, otògán Juda tọn, podọ hlan jọsua visunnu Jehohadaki tọn, yẹwhenọ daho lọ, dọmọ, ²Le wẹ OKLUNỌ awhànpa lẹ tọn dọ, dọmọ, Omẹ he lẹ dọmọ, Yè ma hẹn ojlẹ wá na ohò OKLUNỌ tọn gba, ojlẹ na ohò OKLUNỌ tọn nado yín didó. ³Whenẹnu wẹ ohó OKLUNỌ tọn wá gbọn Hagai yẹwhegán lọ dali, dọmọ, ⁴Be é yín ojlẹ de na mìlọsu nado nọnọ̀ ohọ̀ ozànọ mìtọn lẹ mẹ, whenuena ohọ̀ he mlanai gbọ̀gbé? ⁵Enẹwutu dinvie le wẹ OKLUNỌ awhànpa lẹ tọn dọ: Mì zé ayiha mìtọn do aliho mìtọn lẹ go. ⁶Mìwlẹ ko do susu, bo sọ hẹn ovude wá hòmẹ; mì to dùdù, ṣigba mì ma tindo pékọ; mì to nùnù, ṣigba yè ma yí minùnu do gọhona mì gba; mì to avọ̀ ṣinyọn, ṣigba ma yín gbigblọ gba; podọ ewọ he to azónkuẹ yí to azónkuẹ yí nado yí i do apò po nùvo lẹ po dẹ mẹ. ⁷Le wẹ OKLUNỌ awhànpa lẹ tọn dọ: Mì zé ayiha mìtọn do aliho mìtọn lẹ go. ⁸Mì hẹji yì jẹ otò okọta mẹ, bo hẹn atin wá, bọ dó ohọ̀ lọ; yẹn bo na sọ yí homẹhùn to e mẹ, yè bo na sọ pagigona mi, wẹ OKLUNỌ dọ. ⁹Mìwlẹ donukun susu, bo, pọn, é sọ wá jẹ ovú; podọ whenuena mì hẹn ẹn wá whégbè, Yẹn fú i sẹ́. Etẹwutu? wẹ OKLUNỌ awhànpa lẹ tọn dọ. Na ohọ̀ ṣie he mlanai ogbògbé tọn wutu, whenuena mìwlẹ to wezunhọn omẹ dopodopo jẹ ohò etọn titi mẹ. ¹⁰Enẹwutu wẹ yè hẹn olọn dote sọn ahún mẹ to mì ta, bọ yè sọ hẹn aigba dote sọn osinsẹ́n etọn mẹ. ¹¹Yẹn bo sọ ylọ na sinnugbla de to aigba lọ ji, podọ to osé lẹ ji, podọ to ogbadó ji, podọ to ovẹ̃n ji, podọ to amì ji, podọ to enẹ he aigba hẹn jẹgbonu wá ji, podọ to gbẹtọ ji, podọ to whékanlin lẹ ji, podọ to tuklajẹ alọ lẹ tọn lẹpo ji.

¹²Whenẹnu wẹ Zelubabẹli visunnu Sealtiẹli tọn lọ, po Jọsua visunnu Jehozadaki tọn lọ po, yẹwhenọ daho lọ, po pipòtọ gbẹtọ lẹ tọn lẹpo po, sètónuna ogbè OKLUNỌ Jiwheyẹwhe yetọn tọn, po ohó Hagai yẹwhegán lọ tọn lẹ po, dile OKLUNỌ Jiwheyẹwhe yetọn ko do ewọ hlan do; gbẹtọ lẹ bo sọ sinú to OKLUNỌ nukọn. ¹³Whenẹnu wẹ Hagai mẹdagun OKLUNỌ tọn dọhó to wẹndido OKLUNỌ tọn mẹ hlan gbẹtọ lẹ, dọmọ, Yẹn tin po mì po, wẹ OKLUNỌ dọ. ¹⁴OKLUNỌ bo sọ fọ́nadan gbigbọ Zelubabẹli visunnu Sealtiẹli tọn otògán Juda tọn lọ, po gbigbọ Jọṣua visunnu Jehozadaki yẹwhenọ daho lọ tọn tọn po, po gbigbọ pipòtọ gbẹtọ lẹ tọn lẹpo po; yé bo sọ wa bo wà azọn to ohọ OKLUNỌ awhànpa lẹ tọn tọn mẹ, Jiwheyẹwhe yetọn, ¹⁵To azán kònukunẹnẹtọ osùn lọ tọn mẹ, to osùn ṣidopotọ mẹ, tọ owhè awetọ Daliusi ahọlu lọ tọn mẹ.

¹TO osùn sinawetọ mẹ, to azán kònukundopotọ osùn lọ tọn mẹ, oho OKLUNỌ tọn wá gbọn Hagai yẹwhegán lọ dali, dọmọ, ²Dọhó dinvie hlan Zelubabẹli visunnu Sealtiẹli lọ tọn, otogán Juda tọn, podọ hlan Jọsua visunnu Jehozadaki tọn lọ, yẹwhenọ daho lọ, podọ hlan pipòtọ gbẹtọ lẹ tọn, dọmọ, ³Mẹnu wẹ yè pòdai to mì ṣẹnṣẹn, he mọ ohò he to gigo nukọntọn etọn mẹ? podọ nawẹ mìwlẹ mọ ẹn do dinvie? bé é ma tin mì nukun lẹ mẹ di nútata? ⁴Gãnṣo yín huhlọnnọ dinvie, Hiẹ Zelubabẹli E, wẹ OKLUNỌ dọ; bo sọ yín huhlọnnọ, hiẹ Jọsua, visunnu Jehozadaki tọn, yẹwhenọ daho lọ; bo sọ yín huhlọnnọ, mì gbẹtọ aigba lọ tọn lẹpo emi, wẹ OKLUNỌ dọ, bo wàzón: na yẹn tin po mì po, wẹ OKLUNỌ awhanpa lẹ tọn dọ, ⁵Mì flin ohó he yẹn nùalẹna po mì po whenuena mì jẹgbonu sọn aigba Egipti tọn mẹ wá, bọ gbigbọ ṣie tin mì ṣẹnṣẹn: mi dibu blo. ⁶Na le wẹ OKLUNỌ awhànpa lẹ tọn dọ: Gãnṣo whladopo, whenu vude é yín, yẹn bo na whàn olọn lẹ, po aigba lọ po, po ohù po, po aigba klo po; ⁷Podọ yẹn na sọ whàn akọta lẹ, podọ ojlo akọta lepo tọn na sọ wá, yẹn bo na sọ yí gigo do gọ́ ohọ̀ he, wẹ OKLUNỌ awhànpa lẹ tọn dọ. ⁸Sie wẹ fataka, podọ ṣie wẹ sika wẹ OKLUNỌ awhànpa lẹ tọn dọ. ⁹Gigo godotọn ohò he tọn na yín daho hú nukọntọn, wẹ OKLUNỌ awhànpa lẹ tọn dọ podọ otẹn he mẹ wẹ yẹn na na jijọho te, wẹ OKLUNỌ awhànpa lẹ tọn dọ.

¹⁰To azán kònukunẹnẹtọ osùn, ṣinẹnẹtọ lọ tọn mẹ, to owhè awetọ Daliusi tọn mẹ ohó OKLUNỌ tọn wá gbọn Hagai yẹwhegán lọ dali, dọmọ, ¹¹Le wẹ OKLUNỌ awhànpa Iẹ tọn dọ: Kansè yẹwhenọ lẹ dinvie gbọn osẹ́n lọ tọn dali, dọmọ. ¹²Eyín mẹde hẹn olàn wiwe to avọtónu awugbo etọn tọn mẹ, podọ po avọtónu etọn po gàndó akla go, kavi osálu, kavi ovẹ̃n, kavi amì, kavi olàn depope, be é na lẹzùn, wiwé? Yẹwhenọ lẹ lọ sọ gblọn bo dọmọ, Lala. ¹³Whenẹnu wẹ Hagai dọmọ, Eyín omẹ he yín mawé gbọn agbasa osiọ de dali gàndo ehelẹ depope go, bé é na yín mawé? Yẹwhenọ le bo sọ gblọn bo dọmọ, E na yín mawé. ¹⁴Whenẹnu wẹ Hagai gblọn bo dọmọ, Mọ omẹ he lẹ te, podọ mọ akọta he te to nukọn ṣie, wẹ OKLUNỌ dọ; podọ mọ wẹ azọ́n alọ yetọn lẹ tọn dopodopo te; podọ enẹ he yé dosánvọ́ finẹ yín mawé. ¹⁵Podọ dinvie, yẹn vẹ́ mì, mì ni lẹn sọn azán he mẹ podọ hlannukọn, sọn whẹpo yè do zé zannu de do zannu de ji to tẹmpli OKLUNỌ tọn mẹ: ¹⁶Whẹpo azán nẹlẹ do tin, whenuena mẹde wá jẹ okiti ojlẹ oko tọn de, ao kẹdẹ wẹ tin finẹ; whenuena mẹde sọ wá jẹ ovẹ̃njó kọ̀n na nado dọ̀n gogò kandeao jẹgbonu, oko kẹdẹ wẹ tin finẹ ¹⁷Yẹn yi hokọnyingbe do hò mì podọ po vájijẹ po podọ po jikunago po to azón alọ mìtọn lẹ tọn lẹpo mẹ; gãnṣo mìwlẹ ma lé hlan yẹn dẽ, wẹ OKLUNỌ dọ. ¹⁸Mì lẹn, yẹn vẹ́ mì, sọn azán he gbè podọ hlannukọn, sọn azán kònukunẹnẹtọ osùn ṣinẹnẹtọ lọ tọn mẹ, sọn azán he gbè yè do dòdonu tẹmpli OKLUNỌ tọn tọn, mì lẹn ẹn. ¹⁹Bé okún gbẹ́ sọ tin to ozínhọ́ mẹ? mọwẹ, ovẹ̃ntin lọ, po ovòtin lọ po, po pomeglanate lọ po, podọ atin olivieli ma ko hẹn jẹgbonu wá gba; sọn azán he gbè wẹ yen na dona mì.

²⁰Ohó OKLUNỌ tọn sọ wá whlawetọ jẹ Hagai de to azán kònukunẹnẹtọ osùn lọ tọn mẹ, dọmọ, ²¹Dọhó hlan Zelubabẹli, otògán Juda tọn, dọmọ, Yẹn na whàn olọn lẹ po aigba lọ po: ²²Podọ yẹn na sọ takitina ofìn ahọludu lẹ tọn, podọ yẹn na sọ và huhlọn ahọludu akọta lẹ tọn tọn súdo: yẹn na sọ takitina kẹkẹ lẹ, po enẹlẹ he hé yé mẹ lẹ po; podọ osé po hihótọ yetọn lẹ po na jẹte wá, omẹ dopodopo gbọn ohi nọvisunnu etọn tọn dali. ²³To azán nẹ gbè, OKLUNỌ awhànpa lẹ tọn dọ, wẹ yẹn na yí we, Hiẹ Zelubabẹli, devi ṣie, visunnu Ṣealtiẹli tọn lọ, wẹ OKLUNỌ dọ, bo na so basi we di hiadonu de: na yẹn ko dè hiẹ, wẹ OKLUNỌ awhànpa lẹ tọn dọ.