Gẹnẹsisi

¹TO whéwhẹ́whenu Jiwheyẹwhe dá olọn po aihọn po.

²Aihọn tin gbògbé, bo sọ jẹvọ́; zinvlu sọṣinyọn dògbonukunmẹ: gbigbọ Jiwheyẹwhe tọn sọ pàváva to osìn nukunta ji.

³Jiwheyẹwhe sọ dọmọ, Gbọ hinhọ́n ni tin: hinhọ́n sọ tin. ⁴Jiwheyẹwhe sọ mọ hinhọ́n lọ dọ é yón: Jiwheyẹwhe sọ klán hinhọ́n po zinvlu po doyòvo. ⁵Jiwheyẹwhe sọ ylọ hinhọ́n dọ okle, bo sọ ylọ zinvlu dọ ozán. Whèjai wá, afọnnu sọ wá, azán dopo.

⁶Jiwheyẹwhe sọ dọmọ, Gbọ dovlomẹ ni tin to ṣẹnṣẹn osìn lẹ tọn, gbọ é ni klán osìn sọn osìn go. ⁷Jiwheyẹwhe sọ basi dovlomẹ lọ bo sọ klan osìn he tin to glọ na dovlomẹ lọ sọn osìn he tin to aga dovlomẹ lọ tọn go: é sọ yín mọ. ⁸Jiwheyẹwhe sọ ylọ dovlomẹ lọ dọ olọn. Whèjai wá, afọnnu sọ wá, azán awetọ.

⁹Jiwheyẹwhe sọ dọmọ, Gbọ osìn he to olọn glọ ni hòpli hlan fidopo, bo gbọ aigba kló ni sọawúhia: é so yin mọ. ¹⁰Jiwheyẹwhe sọ ylọ aigba kló dọ Aigba; bo sọ ylọ hòplidopọ osìn tọn dọ Ohù: Jiwheyẹwhe sọ mọ dọ é yón. ¹¹Jiwheyẹwhe sọ dọmọ, Gbọ aigba ni wú ogbé wlọwlọ, omá he nọ sén okún, podọ atin sinsẹ́nnọ he nọ sẹ́n sinsẹ́n kẹdẹdi etọn, okún ehe tọn tin to ewlọsu mẹ, to aigba ji: é sọ yín mọ. ¹²Aigba sọ wú ogbó jẹgbonu, omá he nọ sén okún kẹdẹdi etọn po atin he sọ nọ sén sinsẹ́n po, okún ehe tọn tin to ewlọsu mẹ kẹdẹdi etọn: Jiwheyẹwhe sọ mọ dọ é yon. ¹³Whèjai wá, afọnnu sọ wá, azán atọ̀ntọ.

¹⁴Jiwheyẹwhe sọ dọmọ, Gbọ hinhọ́n le ni tin to dovlomẹ olọn tọn mẹ, nado klán okle sọn ozán go: bo gbọ yé ni tin na ohia lẹ, na osã lẹ, na azán lẹ, podọ na owhè lẹ. ¹⁵Bo gbọ yé ni tin na hinhọ́n lẹ to dovlomẹ olọn tọn mẹ, nado na hinhọ́n to aigba ji: é sọyín mọ. ¹⁶Jiwheyẹwhe sọ dá hinhọ́n daho awe; hinhọ́n he klohú nado dugán to okle, hinhọ́n he whehú nado dugán to ozánmẹ: é sọ dá sunwhlẹvu lẹ ga. ¹⁷Jiwheyẹwhe sọ dotẹnna yé to dovlomẹ olọn tọn mẹ, nado na hinhọ́n to aigba ji, ¹⁸podọ nado dugán to okle ji, podọ to ozan ji, podọ nado klán hinhọ́n po zinvlu po: Jiwheyẹwhe sọ mọ dọ é yón. ¹⁹Whèjai wá, afọnnu sọ wá azán ẹnẹtọ.

²⁰Jiwheyẹwhe sọ dọmọ, Gbọ osìn lẹ ni yí sisawẹ̃n núdidá gbẹ́te lẹ tọn lẹ do to sisawẹ̃n, bo sọ gbọ ohẹ́ lẹ ni nọ to zinzlọn to aigba ta dogodo dovlomẹ olọn tọn lọ. ²¹Jiwheyẹwhe sọ dá núdazì daho lẹ po nútẹgbè he nọ lìn le po, ehe osìn lẹ yí do to sisawẹ̃n kẹdẹdi yetọn, po ohẹ́ awànọ lẹ po kẹdẹdi etọn: Jiwheyẹwhe sọ mọ dọ é yọn. ²²Jiwheyẹwhe sọ dona ye, dọmọ, Mì yín sinsẹ́nnọ bo sọ sudeji bo gó osìn lẹ to ohù mẹ, bo gbọ ohẹ́ ni sudeji to aigba ji. ²³Whèjai wá, afọnnu sọ wá, azán atóntọ.

²⁴Jiwheyẹwhe sọ dọmọ, Gbọ aigba ni ji nútẹgbẹ́ kẹdẹdi etọn lẹ, owhékanlin po onú he nọ lìn po, podọ whékanlin aigba tọn kẹdẹdi etọn: é sọ yín mọ. ²⁵Jiwheyẹwhe sọ dá gbékanlin aigba tọn kẹdẹdi etọn, po whékanlin lẹ po kẹdẹdi yetọn, po onú he nọ lìn to aigba ji lẹpo po kẹdẹdi etọn: Jiwheyẹwhe sọ mọ dọ é yón.

²⁶Jiwheyẹwhe sọ dọmọ, Gbọ mí ni basi gbẹtọ to bosiọ mitọn mẹ, to apajlẹ mítọn mẹ: bo gbọ yé ni duahọlu to owhèvi ohù mẹ tọn ji, podọ to ohẹ́ aga tọn ji, po to whékanlin ji, po to aigba lẹpo ji, po to núlìnlìn he nọ tin to aigba ji lẹ po. ²⁷Mowẹ Jiwheyẹwhe dá gbẹtọ to boṣio etọn titi mẹ, to bosiọ Jiwheyẹwhe tọn mẹ wẹ é dá ẹ do: asú de asi de wẹ é dá yé. ²⁸Jiwheyẹwhe dona yé; Jiwheyẹwhe sọ dọ hlan yé, dọmọ, Mì yín sinsẹ́nnọ, bo sudeji, bo sọ gó aigba ji, bo dugán do e jì: bo duahọlu to owhèvi ohù tọn ji, podọ to ohẹ́ aga tọn ji, po to onú he to ogbẹ́ lẹpo ji he nọ lìn to aigba ji. ²⁹Jiwheyẹwhe sọ dọmọ, Dayi e go, yẹn yí omá okún sinsẹ́nnọ he tin to aigba lẹpo na mì, po atin lẹpo po ehe mẹ sinsẹ̀n atin tọn he nọ sẹ́n nọnọ̀; mì wẹ é na yín na núdùdù: ³⁰podọ hlan okanlin lepo he to aigba ji, po hlan ohẹ̀ lẹpo he tin to aga, po hlan onu lẹpo he nọ lìn to aigba ji, ehe mẹ gbigbọ te wẹ yẹn yí amà omú lẹpo na na núdùdù; é sọ yín mọ.

³¹Jiwheyẹwhe sọ mo onú he edá lẹpo, bo dayi e go é yọ́n talala. Whèjai wá, afọnnu sọ wá, azán sidopotọ.

¹LE wẹ yè dotana olọn po aigba po, po awhànpa yetọn lẹpo po. ²To azán sinawetọ gbè Jiwheyẹwhe dotana azón etọn he é basi; é sọ gbọjẹ to azán ṣinawetọ gbè sọn azọ́n etọn lẹpo mẹ he é ko basi. ³Jiwheyẹwhe sọ dona azán ṣinawetọ bo sọ klán ẹn do wiwé: na é mẹ wẹ é ko gbọje te sọn azọ́n etọn mẹ he Jiwheyẹwhe dá bo basi wutu.

⁴Ehelẹ wẹ owhẹndo olọn tọn po aigba ton po, whenuena yè dá yé, to azán he mẹ OKLUNỌ Jiwheyẹwhe dá aigba po ólọnpo. ⁵Podọ atin dido dangbo tọn de ma tin dinvie to aigba ji, podọ omá dangbo tọn de ma ko tónkùn gba. Na OKLUNỌ Jiwheyẹwhe ma ko hẹn jikun ja do aigba ji gba, podọ sunnu de ma tin nado pọ̀ aigba; ⁶ṣigba avìvì osìnnọ de fọ́n yìaga sọn aigba, bo húsìn nukunmẹ aigba tọn lẹpo.

⁷OKLUNỌ Jiwheyẹwhe do gbẹtọ sọn kógúdu aigba tọn mẹ; bo gbò do awòntinslo etọn lẹ mẹ gbigbọ ogbẹ̀ tọn; gbẹtọ sọ lẹzùn alindọn gbẹ̀tenọ.

⁸OKLUNỌ Jiwheyẹwhe do ójipa dé do whèzẹtẹn dàli to Edẹni me; finẹ wẹ é yí sunnu he é do lọ do. ⁹Podọ son aigba mẹ wẹ OKLUNỌ Jiwheyẹwhe hẹn atin hunkọhunkọ wú jẹgbonu, he yónwhanpẹ na pinpọ̀n, bo sọ yọ́n na núdùdù: atin ogbè tọn lọ ga to ṣẹnṣẹn ojipa lọ tọn podọ atin yinyón dagbe po oylan po ton lọ. ¹⁰Otọ̀ de sọ ton sọn Eaẹni yì nado húsìn ojipa lọ; finẹ wẹ é klán sọn, bo lẹzùn ota ẹnẹ. ¹¹Oyín tintan tọn wẹ Pisoni: enẹ wẹ ewọ he lédo aigba Havila tọn lẹpo péte, fie sika tin te. ¹²Sika aigba lọ tọn yónwhanpẹ: finẹ wẹ bdẹliumi po osé onikisi tọn po te. ¹³Oyín otò awetọ tọn wẹ Gihonì: enẹ wẹ ewọ he lédo aigba Etiopia tọn lepo péte. ¹⁴Oyin otò atọ̀ntọ tọn wẹ Hiddekẹli: enẹ wẹ ehe to sìsá to nukọn Assilia tọn. Ẹnẹtọ wẹ Euflate.

¹⁵OKLUNỌ Jiwheyẹwhe sọ yí sunnu lọ, bo yí i do ojipa Edẹni tọn mẹ, nado nọ pò ẹ, podọ nado nọ pọ́n e go. ¹⁶OKLUNỌ Jiwheyẹwhe sọ degbèna sunnu lọ, dọmọ, atin he tin to ojipa mẹ lẹpo hiẹ sọgan yí ojlo do dù sọn e mẹ. ¹⁷Ṣigba sọn atin yinyón dagbe po oylan po lọ tọn mẹ hiẹ ma na dù: gbẽgbe hiẹ dù ẹnẹtọn mẹ hiẹ na kú dándán.

¹⁸OKLUNỌ Jiwheyẹwhe sọ dọmọ, E ma yọ́n na sunnu lọ ni yín dopokẹdẹ gba, yẹn na hẹn ẹn basi alọgọtọ de he jẹ nẹ̃. ¹⁹Aigba mẹ wẹ OKLUNỌ Jiwheyẹwhe dá kanlin ogbé mẹ tọn lẹpo jẹgbonu sọn, ohọ̀ aga tọn lẹpo; bo sọ hẹn yè wá Sunnu lọ de, nado pọ́n onú he é na ylọ yé: núdepope sunnu lọ ylọ nútegbè lẹ dopodopo, enẹ wẹ oyín he é yím ²⁰Sunnu lọ sọ na oyín owhékanlin lẹpo, po ohẹ̀ he to aga lẹ po, po gbékanlin lepo po; ṣigba na sunnu lọ yè ma mọ alọgotọ de he jẹ nẹ̃ gba.

²¹OKLUNỌ Jiwheyẹwhe sọ hẹn amlọn yìkanmẹ de nado flẹ jẹ sunnu lọ ji, ewọ sọ yí dopo to adajahú etọn lẹ mẹ, bo sọ yí olàn do su otẹn etọn mẹ: ²²adajahú he OKLUNỌ Jiwheyẹwhe yí sọn sunnu lọ go wẹ é yí do basi yọnnu, bo hẹn ẹn wá sunnu lọ de.

²³Sunnu lọ sọ dọmọ, Ehẹ wẹ dinvie ohú sọn ohú ṣie lẹ mẹ, podọ olàn sọn olàn ṣie mẹ: Oyọnhù wẹ yè na nọ ylọ ẹ, na Sunnu go wẹ yè dè e sọn jegbonu wutu.

²⁴Enẹwutu wẹ sunnu na jo otọ́ po onò po do, bo na sẹbọdo asi etọn go: yé nasọ lẹzùn olàn dopo.

²⁵Yé omẹ awelẹ tin to omé, sunnu lọ po asi etọn po, winyan ma sọ hù yé.

¹ODAN sọ yín zìnzìntọ hú kanlin ogbémẹtọn lẹpo he OKLUNỌ Jiwheyẹwhe dá. E sọ dọ hlan yọnnu lo, dọmọ, Oje, Jiwheyẹwhe ko dọmọ Mì ma na dù to atin lẹ mẹ he tin to ojipa mẹ lẹ depope?

²Yọnnu lọ sọ dọ hlan odànlọ, dọmọ, Mí sọgan dù to sinsẹ́n atin he to jipa mẹ tọn lẹ mẹ. ³Ṣigba sọn sinsẹ́n atin he tin to ojipa ṣẹnṣẹn tọn mẹ, Jiwheyẹwhe ko dọmọ, Mì ma na dù sọn e mẹ, mọ mì ma na doalọ e go, mì nikã kú.

⁴Odàn lọ sọ dọ hlan yọnnu lọ, dọmọ, Mí ma na kú dándán gba: ⁵na Jiwheyẹwhe yọ́nẹn dọ azán he gbè mìwlẹ dù to e mẹ te, whenẹnu wẹ yè na hùn nukun mìtọn, bọ mìwlẹ na tin di Jiwheyẹwhe, bo nọ yón onú dagbe po oylan po.

⁶Whenuena yọnnu lọ mọ dọ atin lọ yón na núdùdù, podọ é sọ yọ̀nwhanpe to nukunta, podọ atin he yè na jlo nado hẹn mẹde yọ̀nnuin, é yí sọn sinsẹ́n etọn mẹ, bo dù, bo sọ na asú etọn po e po, ewọ sọ dù.

⁷Nukun yé omẹ awe lẹ tọn hùn, yé sọ yọ́nẹn dọ omé wẹ yé ko te; yé sọ tò amà ovotin tọn dopọ bo basi vantẹ na yéde. ⁸Yé sọ sè ogbè OKLUNỌ Jiwheyẹwhe tọn he to zọnlinzin to ojipa mẹ to whèjai pleplẹ, sunnu lọ po asi etọn po sọ yéde whlá sọn OKLUNỌ Jiwheyẹwhe nukọn, to atin ojipa mẹ tọn lẹ ṣẹnṣẹn.

⁹OKLUNỌ Jiwheyẹwhe sọ dlangbe hlan sunnu lọ, bo dọ hlan en, Fie wẹ hiẹ te?

¹⁰E sọ dọmọ, Yẹn sè ogbè towe to ojipa mẹ, obú sọ di mi, na omé wẹ yẹn ko te wutu; yẹn sọ whlá dẽ.

¹¹E sọ dọmọ, Menu wẹ dọ na we dọ omé wẹ hiẹ ko te? hiẹ ko dù to atin lọ mẹ, ehe tọn yẹn dosẹ́n na we dọ hiẹ dù blo?

¹²Sunnu lọ sọ dọmọ, Yọnnu he hiẹ na nado nọ̀hẹ mi, ewọ wẹ na mi sọn atin lọ me, yẹn sọ dù ¹³OKLUNỌ Jiwheyẹwhe sọ dọ hlan yọnnu lọ, dọmọ, Eté wẹ hiẹ ko basi he? Yọnnu lọ sọ dọmọ, Odàn wẹ blu mi, bọ yẹn sọ dù.

¹⁴OKLUNỌ Jiwheyẹwhe sọ dọ hlan odàn lọ, dọmọ, Na hiẹ ko basi ehe wutu, mẹhodèdo we hiẹ hú whékanlin lẹpo tọn podọ hú gbekanlin lẹpo tọn; ohòto towe ji wẹ hiẹ na nọ gbọnyì, kègudu wẹ hiẹ na nọ dù to azán ogbè towe tọn lẹpo mẹ. ¹⁵Yẹn nasọ yí okẹ́n do hiẹ po yọnnu lọ po ṣẹnṣẹn; podọ do okún towe po okún etọn po ṣẹnṣẹn: ewọ na só ota towe, hiẹ na só afọgbẹn etọn.

¹⁶Hlan yọnnu lọ e dọmọ, Yẹn na hẹn awúfiẹsa towe po hòmimọ towe po zùn susugege, to awúfiẹsa mẹ wẹ hiẹ na nọ jivi te; awúvivi towe na tin to asú towe de, ewọ wẹ nasọ dugán to oji we.

¹⁷E sọ dọ hlan Adam, dọmọ, Na hiẹ ko dotó ogbè asi towe tọn wutu, bo ko sọ dù to atin lọ mẹ, ehe tọn yẹn ko dosẹ́n na we, dọmọ, Hiẹ ma na dù to e mẹ; mẹhodèdo wẹ aigba yín na towe wutu, dẹ́nkúnkún towe mẹ wẹ hiẹ na no dù sọn to gbèzán towe lẹpo mẹ; ¹⁸owùn lẹ ga po vẹwùn po wẹ na nọ wú jẹgbonu hlan we; omá dangbo tọn wẹ hiẹ na nọ dù; ¹⁹tò odén nukun towe mẹ tọn wẹ hiẹ na nọ dùnú, kaka hiẹ nado gọ̀ do aigba de; na e mẹ wẹ yè ko dè we sọn: na kọ̀gudu wẹ hiẹ, hlan kọ̀gudu de wẹ hiẹ na sọ gọ̀ do.

²⁰Adam sọ ylọ oyín asi etọn tọn dọ Evi; na ewọ wẹ onọ omẹ to ogbẹ̀ lẹpo tọn wutu.

²¹Podọ hlan Adam po asi etọn po wẹ OKLUNỌ Jiwheyẹwhe basi awù ayu tọn, bo dona yé.

²²OKLUNỌ Jiwheyẹwhe sọ dọmọ, Dayi e go, sunnu lọ ko lẹzun di dopo to míwle mẹ nado yọ́n dagbe po oylan po: dinvie ewọ mahà dè alọ etọn jẹgbonu bo yí to atin ogbè tọn mẹ ga, bo dù bo sọ nò ogbè kakadoi:— ²³enẹwutu OKLUNỌ Jiwheyẹwhe yàn ẹn jẹgbonu sọn ojipa Edeni tọn mẹ, nado pò aigba he mẹ ye ko dè e sọn. ²⁴Mowẹ é yàn sunnu lọ jẹgbonu; é sọ dè do whèzẹtẹn ojipa Edẹni tọn Kelubimi lọ po jiji ohi de tọn po he to juju pó, nado họ̀ aliho jẹ atin ogbè tọn kọ̀n.

¹ADAM sọ yọ́n Evi, asi etọn é sọ mọhò, bo ji Kaini, bo sọ dọmọ, Yẹn mọ sunnu de yí gbọn alọgọna OKLUNỌ tọn mẹ. ²E sọ ji Abeli nọvisunnu etọn. Abeli sọ yín yìnyìntọ lẹngbọ tọn, Kaini yín pipọ̀tọ aigba tọn.

³To nukọnyìyì ojlẹ tọn mẹ é wá jọ, bọ Kaini yí sọn sinsẹ́n aigba tọn mẹ wá na núnina hlan OKLUNỌ. ⁴Podọ Abẹli, ewọ ga sọ yí plọnji sọn kanlinpa etọn mẹ podọ sọn ojó tẹnmẹ yetọn lẹ mẹ. OKLUNỌ sọ pọ̀nnukundagbe Abẹli po nunina etọn po. ⁵Ṣigba hlan Kaini podọ hlan núnina etọn ewọ ma pènnukundagbe. Hòmẹgble Kaini talala, nukunmẹ etọn kusiọ. ⁶OKLUNỌ sọ dọ hlan Kaini, dọmọ, Etẹwutu wẹ hòmẹgble we? etèwutu nukunmẹ towe kusiọ? ⁷Eyín hiẹ wà dagbe, yè ma na kẹalọyi we? eyín hiẹ ma sọ wà dagbe, ylando pàvà, to hòntonu. Podọ hlan hiẹ de wẹ ojlo etọn na te, hiẹ nasọ dugán to e ji.

⁸Kaini sọ dọ hlan Abẹli nọvisunnu etọn, dọmọ, Gbọ mí ni yi biọ danji. E sọ wá jọ to enẹgodo, whenuena yé tin to danji, bọ Kaini fọ́n do Abẹli nọvisunnu etọn ji bo hù i.

⁹OKLUNỌ sọ dọ hlan Kaini, dọmọ, Fie Abẹli nọvisunnu towe te? E sọ dọmọ, Yẹn ma yọ́nẹn: bé yẹn wẹ nọvisunnu ṣie gopọ̀ntọ? ¹⁰E sọ dọmọ, Eté wẹ hiẹ ko basi? Ogbè ohùn nọvisunnu towe tọn tọn dawhá hlan mi sọn aigba de. ¹¹To dinvie mẹhodèdo wẹ hiẹ sọn aigba de he kènù etọn nado nù ohùn nọvisunnu towe tọn sọn alọ towe mẹ. ¹²Whenuena hie pò aigba, é ma na sọ́n huhlọn etọn hlan we ba; gbéjinu de podo dánpetọ de wẹ hiẹ na yín to aigba mẹ. ¹³Kaini sọ dọ hlan OKLUNỌ, dọmọ, Yadonamẹ ṣie klohú ehe yẹn sọgan doakọnna. ¹⁴Dayi e go, hiẹ ko yàn mi jegbonu to egbé sọn aigba ji; yẹn nasọ yín mẹwhiwhlá sọn nukun towe mẹ; yẹn nasọ yín gbéjinu de podọ dánpétọ de to aigba mẹ: é nasọ wá jọ do mẹdepope he mọ mi nasọ hù mi.

¹⁵OKLUNỌ sọdọ hlan ẹn, dọmọ, Enewutu mẹdepope he hù Kaini yè na yíahọsu to e go whla ṣinawe. OKLUNỌ dè ohia de na Kaini, na mẹdepope mọ ẹn nikã linu i.

¹⁶Kaini sọ tọ́n sọn OKLUNỌ nukọn, bo nọnọ̀ aigba Nodi tọn ji, to whèzẹtẹn Edẹni tọn dali. ¹⁷Kaini yọ́n asi etọn; é so mọhò, bo ji Enọku: é do tòdaho de, bo ylọ oyín tòdaho lọ tọn dọ Enọku, di oyín visunnu etọn Enọku tọn. ¹⁸Hlan Enoku wẹ yè ji Iladi: Iladi sọ ji Mehujaeli: Mẹhujaeli ji Mẹtusaeli: Mẹtusaeli sọ ji Lẹmẹki.

¹⁹Lẹmẹki sọ mọ yọnnu awe: oyín tintan tọn wẹ Ada, oyín awetọ tọn wẹ Zilla. ²⁰Ada sọ ji Jabali: ewọ sọ wẹ oto na yé mẹhe nọnọ̀ ogohò mẹ lẹ, bo tindo whékanlin lẹ. ²¹Oyín nọvisunnu eton tọn wẹ Jubali: ewọ sọ wẹ otọ mẹhe nọ hẹn ajalen po hànjinu okannọ po go lẹpo tọn. ²²Zilla, ewọ ga sọ ji Tubali-Kaini, tùntùntọ asiawànu sinsán sọn gànvẹ po gànyù po mẹ tọn lẹpo: nọviyọnnu Tubali-Kaini tọn wẹ Naama. ²³Lẹmẹki sọ dọ hlan asi etọn lẹ, dọ:

²⁵Adam sọ vẹ́ asi etọn yọ́nẹn: é sọ ji visunnu de, bo ylọ oyín etọn dọ Sẹti: Na, é dọmọ, Jiwheyẹwhe ko dè okún devo na mi do oten Abẹli tọn mẹ; na Kaini ko hù i. ²⁶Podọ hlan Sẹti, ewọ ga wẹ yè sọ ji visunnu de; é sọ ylọ oyín etọn dọ Enọsi: whenẹnu wẹ gbẹtọ lẹ ge nado to avàleyàn oyín OKLUNỌ tọn.

¹EHE wẹ owé whọndo Adam tọn tọn. To azán he gbè Jiwheyẹwhe dá gbẹtọ, to opajlẹ Jiwheyẹwhe tọn mẹ wẹ é dá ẹ, ²Asú po asi po wẹ é dá yé; bo dona yé, bo sọ ylọ oyín yetọn dọ Adam to azán he gbè yè dá yé.

³Adam sọ nọ̀ owhè kantọ̀nao, bo ji vi sunnu de to apajlẹ etọn titi mẹ, to bosiọ ede tọn mẹ; bo sọ ylọ oyín etọn dọ Seti: ⁴azán Adam tọn to godo he é ji ṣeti yín owhè fẹ̀nẹ; é sọ ji visunnu po viyọnnu po: ⁵azán Adam tọn lẹpo sọ yín owhè fẹnẹkantọ̀nao: é sọ kú.

⁶Ṣẹti sọ nò owhè kanwekoatọ́n, bo ji Enọsi: ⁷Ṣẹti sọ nò to godo he é ji Enọsi owhè fẹ̀nẹsinawe, é sọ ji visunnu po viyọnnu po: ⁸azán Ṣẹti tọn lẹpo sọ yín owhè fẹ̀nẹkanwegbànnukunawe: é sọ kú.

⁹Enọsi sọ nọ̀ owhè kanweao, bo ji Kenani: ¹⁰Enọsi sọ nọ̀ to godo he é ji Kenani owhè fẹ̀nẹfọtọ̀n, bo sọ ji visunnu po viyọnnu po: ¹¹azán Enọsi ton lẹpo sọ yín owhè fẹ̀nẹkanwekoatọ́n: é sọ ku.

¹²Kenani sọ nọ̀ owhè kandegbàn, bo sọ ji Mahalaleli: ¹³Kenani sọ nọ to godo he é ji Mahalaleli owhè fẹ́nẹkande, bo sọ ji visunnu po viyọnnu po: ¹⁴azán Kenani tọn lẹpo sọ yín owhe fẹ̀nẹkanwegbàn: é sọ kú.

¹⁵Mahalaleli sọ nọ̀ owhè kandekoatọ́n, bo sọ ji Jalẹdi: ¹⁶Mahalaleli sọ nò to godo he é ji Jalẹdi, owhè fẹ́nẹgbàn, bo sọ ji visunnu po viyọnnu po: ¹⁷azán Mahalaleli tọn lẹpo sọ yín owhè fẹ̀nẹkanwefọtọ́n: é sọ kú.

¹⁸Jalẹdi sọ nò owhè kẹ̀nnẹnukunawe, bo ji Enọku: ¹⁹Jalẹdi sọ nò to godo he é ji Enọku, owhè fẹ̀nẹ, bo ji visunnu po viyọnnu po: ²⁰azán Jalẹdi tọn lẹpo sọ yín owhè fẹ̀nẹkẹ̀nnẹnukunawe: é sọ kù.

²¹Enọku sọ nò owhè kandekoatọ́n, bo ji Mẹtusẹla: ²²Enọku zinzọnlin hẹ Jiwheyẹwhe to godo he é ji Mẹtusẹla họ̀ owhè fọdekanweko, bo sọ ji visunnu po viyọnnu po: ²³azán Enọku tọn sọ yín fọdekẹ̀nnẹatọ́n.

²⁴Enọku zinzọnlin hẹ Jiwheyẹwhe: é ma sọ tin; na Jiwheyẹwhe yí i wutu. ²⁵Mẹtusẹla sọ nò owhè kẹ̀nnẹkoatọ́nnukunawe, bo ji Lẹmẹki: ²⁶Mẹtusẹla sọ nò to godo he é ji Lẹmẹki owhè núọntọ̀nkẹ̀nnẹkonukunawe, bo sọ ji visunnu po viyọnnu po: ²⁷azán Mẹtusẹla tọn lẹpo sọ yín owhè fẹ̀nẹkẹnnesinẹnẹ: é sọ kú.

²⁸Lẹmẹki sọ nọ owhè kènnẹkonukunawe, bo ji visunnu de: ²⁹é sọ ylo oyín etọn dọ Noa, dọmọ, Ehe lọ wẹ na miọnhomẹna mí gbọn azọn mítọn podo na dẹnkúnkun alọ mítọn lẹ tọn he sọn aigba mẹ wá he OKLUNỌ ko hodèdo wutu. ³⁰Lẹmẹki sọ tin to godo he é ji Noa, hò owhè fowekènnẹgbàntọ́n, é sọ ji visunnu po viyọnnu po: ³¹azán Lẹmeki tọn lẹpo sọ yín núọntònkènnẹfọtọ́nnukunawe: é sọ kú.

³²Noa sọ yín owhè fowekanweko mẹho: Noa sọ ji Ṣẹm, Ham, po Jafẹti po.

¹E so wá jọ, whenuena gbẹtọ sè susudeji to aigba ji, bọ yè sọ to viyọnnu ji hlan yé, ²bọ visunnu Jiwheyẹwhe tọn lẹ sọ mọ viyọnnu gbẹtọ ton lẹ dọ yé yọ̀nwhanpẹ; bọ yé sọ mọ asi na yéde sọn enẹ he yé dè lẹpo mẹ.

³OKLUNỌ sọ dọmọ, Gbigbọ ṣie ma na nò gbẹtọ mẹ dli gba, na séngbigbà yetọn wutu agbasalàn wẹ ewọ ga; podọ mọ azán etọn lẹ na yín owhè kantọ̀n.

⁴Nẹfilimi lẹ tin to aihọn mẹ to azán nẹlẹ mẹ; podọ to enẹgodo ga, whenuena visunnu Jiwheyẹwhe tọn lẹ sọ biọ họme yì viyọnnu gbẹtọ tọn lẹ de, bọ yé sọ jivi na yé: ehelẹ wẹ yín megángán he tin to hóhówhenu, sunnu he diyín lẹ.

⁵OKLUNỌ sọ mọ kanyinylan gbẹtọ tọn sugbahú to aigba mẹ, podọ ayilinlẹn ayiha etọn mẹ tọn lẹpo oylan dódo wẹ to whepoponu. ⁶E sọ diọ linlẹn na OKLUNỌ dọ é ko basi gbẹtọ do aigba lọ go, é sọ doadi nẹ̃ to ayiha etọn mẹ. ⁷OKLUNỌ sọ domọ, Yẹn na gbidi gbẹtọ he yẹn ko dá sọn aigba ji; gbẹtọ, po whékanlin po, po onú he to linlin lẹ po, po ohè he to aga lẹ po, na é diọ linlẹn na mi do yẹn ko basi yé. ⁸Ṣigba Noa mọ hukundagbe to nukun Jiwheyẹwhe tọn mẹ.

⁹Ehelẹ wẹ whẹndo Noa tọn: Noa yín dódónọ bo pó to whẹndo etọn le mẹ: Noa sọ zinzọnlin hẹ Jiwheyẹwhe. ¹⁰Noa sọ ji visunnu atọ̀n, Sẹm, Ham, po Jafẹti po. ¹¹Aigba sọ gble to Jiwheyẹwhe nukọn, aihọn sọ gọ̀na adingbàndido. ¹²Jiwheyẹwhe sọ hùn nukun pọ́n aigba, dayi e go, é gble; na nútẹgbè lẹpo ko hẹn aliho yetọn gble to aigba mẹ.

¹³Jiwheyẹwhe sọ dọ hlan Noa, dọmọ, Opòdo nútẹgbè lẹpo tọn ko wá nukọn ṣie; na aigba go na adingbàndido gbon dali yetọn; bo dayi e go, yẹn na gbidi yé po aigba po. ¹⁴Hiẹ ni yí atin gofa tọn do basi aki de, ohònu lẹ wẹ hiẹ na gbò do aki lọ me, bo sọ sá osẹ́n do e to homẹ po gbonu po. ¹⁵Ehe wẹ hunkọ he hiẹ na basi i do: tedidi aki lọ tọn na yín awagba fọdekanwèko, gbigblo etọn awàgba kandeao, podọ jiyìyì etọn awàgba ogbàn. ¹⁶Ohòta wẹ hiẹ na basi do aki lọ go, awàgba dopo wẹ hiẹ: nido dotana yé to aga; adàmẹ wẹ hiẹ na yí ohòn aki lọ tọn do: hẹ odotọn, awetọ, po atontọ aga tọn po wẹ hiẹ na basi i. ¹⁷Podọ yẹn, dayi e go, yẹn hẹn gigọ osìn lẹ tọn lọ ja aigba ji, nado gbidi nutegbè lepo, ehe mẹ gbọfufu ogbè tọn te lẹ sọn olọn glọ; onu he sọ tin to aigba ji lepo wẹ na ku. ¹⁸Ṣigba yẹn na hẹn alènu ṣie lódo to de we; hiẹ nasọ wa biọ aki lọ mẹ, hiẹ po visunnu towe lẹ po, po asi towe po, po asi visunnu towe lẹ tọn lẹ po hẹ we. ¹⁹Podọ sọn onú gbète dopodopo nútẹgbè lẹpo tọn mẹ whékaniin hunkọ doponẹ awe-awe wẹ hiẹ na yí biọ aki lọ mẹ, nado whlẹn yé dgbè hẹ we; asú po asi po wẹ yé ni yín. ²⁰To ohè le mẹ kẹdedi yetọn, to whèkanlin lẹ mẹ kẹdẹdi yetọn, onú he nọ lìn to aigba lẹpo mẹ kẹdẹdi yetọn, awe-awe to yé mẹpo mẹ na wá de we nado whlen yé dogbè. ²¹Hiẹ nasọ yí to nùdúdù yè nọ dù lẹpo mẹ, bo nasọ bé yé pli do de we; é nasọ yin núdùdù na hiẹ po yé po.

²²Mowẹ Noa sọ basi; kẹdẹdi enẹ he Jiwheyẹwhe ko degbèna ẹn lẹpo; mọwẹ é basi do.

¹OKLUNỌ sọ dọ hlan Noa dọmọ, Hiẹ wá biọ aki mẹ po whédo towe lẹpo po, na hiẹ wẹ yẹn mọ yín dódónọ to nukọn ṣie, to whẹndo he mẹ. ²To whékanlin hunkọhunkọ wiwó lẹ mẹ wẹ hiẹ ni yí sinawe-sinawe wá de we, asú po asi etọn po; podọ to whékanlin mawé lẹ mẹ awe-awe, asú po asi etọn po; ³to ohè he to aga lẹ mẹ ga sinawe-sinawe, asú po asi po; nado hla okún dogbè to aigba lẹpo ji. ⁴Na azán ṣinawe dogọ yẹn na jajikun do aigba ji, to okle kande po ozán kande po; po onú he to ogbè lẹpo po he yẹn ko dá lẹ wẹ yẹn na gbidi sọn aigba ji. ⁵Noa sọ wà kẹdẹdi enẹ he OKLUNỌ ko degbè nè lẹpo.

⁶Noa sọ yin owhè núọntòn mẹho whenuena gigọ́ osìn tọn lọ wá aigba ji. ⁷Noa sọ biọ e mẹ, po visunnu etọn lẹ po, po asi etọn po, podo asi visunnu etọn lẹpo tọn lẹ hẹ ẹ ga sọ biọ aki mẹ, na osìn gigọ́ lọ tọn lẹ wutu. ⁸To whékanlin wìwó lẹ mẹ, podọ to whékanlin mawé lẹ mẹ, to ohọ̀ lẹ mẹ, po to onú he nọ lìn to aigba ji lẹpo mẹ, ⁹ehelẹ awe-awe wá Noa de biọ aki mẹ; asú po asi po, dile Jiwheyẹwhe ko degbèna Noa do.

¹⁰E sọ wá jọ to azán ṣinawetọ godo, mọwẹ gigọ́ osìn lọ tọn lẹ sọ wá aigba ji. ¹¹To owhè núọntòntọ mẹ Noa gbwhenu tọn tọn, to osùn awetọ mẹ to azán fọtọ̀nnukunawe osùn lọ tọn mẹ, to azán lọ gbè wẹ owhín sẹ́dò daho lẹ tọn gbà, bọ ovẹsẹ olọn tọn lẹ sọ hùn. ¹²Ojikun sọ ja do aigba ji okle kande po ozán kande po.

¹³To azán lọ mẹ gẽ wẹ Noa biọ aki mẹ, Ṣẹm, po Ham po, po Jafẹti po, visunnu Noa tọn lẹ, po asi Noa tọn po, po asi atọ̀n visunnu Noa tọn lẹ tọn lẹ po hẹ yé: ¹⁴Yé, po gbékanlin kẹdẹdi yetọn lẹpo; po whékanlin kẹdẹdi yetọn lẹpo po, po onú he nọ lìn to aigba ji kẹdẹdi yetọn po, po ohè kẹdẹdi yetọn po, po ohẹ̀ awànọ alọpalọpa lẹpo po. ¹⁵Yé sọ wá biọ aki mẹ yì Noa de, awe-awe to nútẹgbẹ̀ lẹpo mẹ, ehe mẹ gbọfufu ogbẹ́ tọn te. ¹⁶Yé mẹhe biọ e mẹ lẹ, biọ e mẹ asú po asi po to nútẹgbẹ̀ lẹpo mẹ, dile Jiwheyẹwhe ko degbè nẹ̃ do: OKLUNỌ sọ súhòn do e.

¹⁷Gigọ́ osìn tọn sọ nọte họ̀ azán kande to aigba ji; osìn sọ to gigọ́ deji, bo hẹn aki fó yìaga, yè sọ zé e sọn aigba ji. ¹⁸Osìn gbapé aigba ji bo sọ to gigódeji to aigba ji; aki lọ sọ fó yìaga to osìn nukunta. ¹⁹Osìn sọ gó talala pé aigba ji; osé he sọ yì aga to olọn péte glọ lẹpo sọ tlò. ²⁰Awàgba fọtọ́n hlan aga wẹ osìn do ṣinyọnai, osé lẹ sọ tlọ̀.

²¹Nútẹgbè he nọ lìn to aigba ji lẹpo kú, ohó po whékanlin lẹ po, po gbẹkanlin po, po onú sisawẹ̃n he nọ sawẹ̃n to aigba ji lẹpo po gbẹtọ lẹpo po: ²²onú lepo he mẹ gbọfufu ogbó tọn tin to awọntinslo etọn mẹ, to onú he sọ tin to aigba kloji lẹpo mẹ sọ kú. ²³Onú gbẹ́te lẹpo he tin to aigba ji wẹ yè gbidi, gbẹtọ po whékanlin po, po onú he nọ lìn lẹ po, ohó he to aga, yè gbidi yé sọn aigba ji: Noa dopo akàn wẹ pò to ogbẹ̀ po mẹhe tin to aki mẹ hẹ ẹ le po. ²⁴Osìn ṣinyọn aigba ji họ̀ azán kantọ̀ngbàn.

¹JIWHEYẸWHE sọ flin Noa, po onú gbẹte lẹpo po, po whékanlin he gó nẹ̀ to aki mẹ lẹ po: Jiwheyẹwhe sọ hẹn jẹhọn de gbọn aigba ji, bọ osìn lọ sọ jágò; ²é sọ sú owhín osẹdò ton lẹ po vesẹ olọn tọn lẹ, ojikun he sọn olọn sọ doalote, ³Osìn sọ to dindònpo sọn aigba ji egbésọegbésọ: azán kantọ̀ngbàn godo, wẹ osìn lẹ sọ to agòjo. ⁴Aki sọ tàn to osùn sinawetọ mẹ, to azán fọtónnukunawetọ osùn tọn, to osé Alalati tọn lẹ ji. ⁵Osìn sọ to agòjo kaka jẹ osùn aotọ mẹ: to osùn aotọ mẹ to azán tintan osùn tọn mẹ wẹ ota osé daho lẹ tọn sọ tónjẹgbonu ⁶E sọ wá jọ to pòdo azán kandetọ tọn gbè wẹ Noa hùn vesẹ aki tọn he é whè: ⁷é sọ do ohón de hlan gbonu he tọ́njẹgbonu yì bo to yìslọyì kaka osìn do hú sọn aigba ji.

⁸E sọ do apoe de hlan gbonu sọn e de yì ga, nado mọ eyín osìn to dindọnpó sọn aigba ji. ⁹Ṣigba apoe ma mọ ogbọjẹ tẹnmẹ de na afọ etọn, é sọ lẹ́gọ̀ wá e de to aki mẹ, na osìn sọtin to aigba lẹpo ji wutu bo é de alọ etọn jẹgbonu bo yí i, bo sọ dòn ẹn do ede de to aki mẹ. ¹⁰E sọ nọte hò azán ṣinawe devo, bo sọ vó apoe lọ dohlan gbonu sọn aki mẹ yì. ¹¹Apoe lọ gọ̀wá e de to aki mẹ to whèjai; bo pọ́n, amá yọ́yọ́ olivieli kinkén tọn to onú etọn mẹ: mọwẹ Noa sọ yọnẹn dọ osìn to húhú sọn aigba ji.

¹²E sọ dòngbàn azán ṣinawe devo, bo sọ do apoe lọ dohlan gbonu; he ma sọ légówá e de ba. ¹³E sọ wa jọ to owhè nuọntọ̀nnukundopotọ mẹ, to osùn tintan mẹ, to azán tintan osùn lọ tọn mẹ wẹ osìn hú sọn aigba ji: bọ Noa sọ hùn onùsu aki tọn, bo pọ́n, bo dayi e go, nukunme aigba tọn ko hu. ¹⁴To osùn awetọ mẹ, to azán koatọ́nnukunawetọ osùn tọn mẹ wẹ aigba sọ hú. ¹⁵Jiwheyẹwhe sọ dọ hlan Noa, dọmọ, ¹⁶Tọ́njẹgbonu sọn aki mẹ, hiẹ po àsi towe po, po visunnu towe lẹpo po, pò asi visunnu towe tọn lẹpo po hẹ we. ¹⁷Hẹn tónwá gbonu hẹ we onú tẹgbẹ́ lẹpo he tin to de we, sọn nútẹgbẹ́ lẹpo mẹ, ohọ́ po whékanlin po, po onú lìnlìn lẹpo po he nọ lìn to aigba ji lẹ; na yé nido sawẹ̃n to aigba ji, bo yín sinsẹ́nnọ, bo jigbà to aigba ji.

¹⁸Noa sọ tọ́njẹgbonu, po visunnu etọn lẹpo po, po asi etọn po, po asi visunnu etọn lẹ tọn lẹ po hẹ ẹ: ¹⁹gbékanlin lepo, onú lìnlìn lẹpo, po ohó lẹpo po, po núdepope he nọ lìn to aigba ji lẹ po, kẹdẹdi ohẹnnu yetọn lẹ, yé tọ́njẹgbonu sọn aki mẹ.

²⁰Noa sọ tùn agbà hlan Oklunọ; bo yí to whékanlin wiwe lẹpo mẹ, podọ ohẹ̀ wiwé lẹpo mẹ, bo do sánvọ̀ núnina mimẹ̀ tọn to agbà lọ ji. ²¹OKLUNỌ sọ whlẹnwán gbọjẹ nina lọ tọn: OKLUNỌ sọ dọ to ayìha etọn mẹ, dọmọ, Yẹn ma nasọ hodèdo aigba na gbẹtọ tọn wutu ba gba: na dọ ayilinlẹn ayiha gbẹtọ tọn mẹ tọn oylan wẹ sọn ovú etọn; mọ yẹn ma to nasọ vọ̀ onú tẹgbẹ̀ lẹpo depope hò ba, dile yẹn ko wà do. ²²Whenuena aigba tinai, okún po ojijẹ whenu po, avìvọ po byozo po, alúnlún po awéwe po, okle po ozán po ma na gbòdò.

¹JIWHEYẸWHE sọ dona Noa, po visunnu etọn lẹ po, bo sọ dọ hlan yé, dọ, Mì yín sinsẹ́nnọ, bo sugege, bo sọ gò aigba mẹ. ²Osí mítọn po avosisa mítọn po nasọ tin to gbékanlin he to aigba ji lẹpo ji, podọ to ohè he to aga lẹpo ji; to onu he nọ lìn to aigba ji lẹpo, podọ to owhèvi he to ohù mẹ lẹpo ji, alọ mítọn mẹ wẹ yè yí yé do. ³Onú he nọ lìn he to ogbẹ̀ lẹpo na yín núdùdù na mì; di omá omú wẹ yẹn yí onú lẹpo na mì. ⁴Ṣigba olàn po ogbè etọn po, yèdọ ohùn etọn, wẹ mì ma na dù. ⁵Nugbonugbo ohùn mítọn mẹtọnmẹtọn wẹ yẹn na yiahósuna: to alọ gbékanlin dopodopo tọn mẹ wẹ yẹn na yíahòsu nẹ̀ te, podọ to alọ gbẹtọ tọn mẹ, to alọ mẹmẹsunnu mẹdopodopo tọn mẹ wẹ yẹn na yíahọ̀su ogbẹ̀ gbẹtọ tọn te. ⁶Mẹdepope hẹn ohùn gbẹtọ tọn sàkònyìnai, gbọn gbẹtọ dali wẹ yè na hẹn ohùn etọn sàkònyìnai, na obosiọ Jiwheyẹwhe tọn mẹ wẹ ewọ basi gbẹtọ do. ⁷Podọ mìwlẹ, mì ni yín sinsẹ́nnọ bo sawẹ̃n to aigba ji gégé, bo so sudeji to e mẹ.

⁸Jiwheyẹwhe sọ dọ hlan Noa, podọ hlan visunnu etọn lẹ, po e po, dọmọ, ⁹Yẹn, dayi e go, yẹn hẹn alènu ṣie lódo hẹ we podọ hẹ okún towe lẹpo to godo towe; ¹⁰podọ hẹ onú tẹgbè lẹpo he tin hẹ we, ohẹ̀ lẹ, whékanlin lẹ, po gbékanlin he to aigba ji hẹ we lẹ po; núsọha he tọ̀nyì sọn aki lọ mẹ, yèdọ gbékanlin aigba tọn lẹ dopodopo. ¹¹Yẹn na hẹn alẹnu ṣie lódo hẹ we; yè ma nasọ sán nútẹgbè lẹpo sẹ̀ gbọn osìn gigọ tọn dali ba gba, mọwẹ osìn gigọ̀ ma nasọ wá, nado và aigba súdo ba.

¹²Jiwheyẹwhe sọ dọmọ, Ehe wẹ ohia alènu tọn he yẹn basi to yẹn po hiẹ po ṣẹnṣẹn, po nútẹgbè he tin to de we lẹpo po, na owhẹndo doitẹgbẹ̃: ¹³yẹn yí aidowhẹ̀do ṣie do aslọ mẹ, é nasọ yín ohia alènu de tọn to yẹn po aihọn po ṣẹnṣẹn. ¹⁴E nasọ wá jọ whenuena yẹn hẹn aslọ wá aigba ji, bọ yè nasọ mọ aidowhẹ̀do lọ to aslọ mẹ, ¹⁵bọ yẹn na flin alènu ṣie he tin to yẹn po hiẹ po ṣẹnṣẹn, podọ núdidá gbigbọnọ dopodopo nútẹgbè lẹpo tọn; osìn ma to nasọ lẹzun gigòfia nado và nútẹgbè lẹpo súdo ba. ¹⁶Aidowhẹ̀do lọ na tin to aslọ mẹ; yẹn na nọ pòn ẹn, na yẹn nido nọ flin alẹ̀nu madopòdo lọ to Jiwheyẹwhe po núdidá gbigbọnọ dopodopo nútẹgbè lẹpo tọn po ṣẹnṣẹn he tin to aigba ji. ¹⁷Jiwheyẹwhe sọ dọ hlan Noa, domọ, Ehe wẹ ohia alènu lọ tọn, he yen ko hẹn lódo to yẹn po nútẹgbè he tin to aigba ji lẹpo po tọn ṣẹnṣẹn.

¹⁸Visunnu Noa tọn lẹ, he tọ́njẹgbonu sọn aki mẹ, wẹ Ṣẹm, Ham, po Jafẹti po: Ham wẹ otò Kenani tọn. ¹⁹Ehelẹ wẹ visunnu atọ̀n Noa tọn lẹ; yé de wẹ aigba lẹpo vùn sọn.

²⁰Noa glepọ̀tọ lọ sè bo sọ dó vẹ̃ngle de: ²¹ewọ sọ nù sọn ovẹ̃n lọ mẹ, bo sọ yín númúmẹnọ bo so klọnnúsọn ede go to gohò etọn mẹ. ²²Ham otò Kenani tọn sọ mọ omé otò etọn tọn, bo dọ na nọvisunnu etọn awe lẹto gbonu. ²³Ṣẹm po Jafẹti po sọ yí avọ̀kọdo bo sọ li abò yé omẹ awe lẹtọn ji, bo zọn agọ̀agọ̀ bo sinyọn do omẹ̀ otọ̀ yetọn tọn; nukunmẹ yetọn to ola, yé ma mọ omè otò yetọn tọn gba.

²⁴Noa sọ fọ́n sọn ovẹ̃n etọn mẹ, bo yọ̀n onú he visunnu etọn pẹvi lọ ko wà hlan ẹn. ²⁵E sọ dọmọ,

²⁸Noa sọ nò, to osìn gigò godo owhè fọdekantọ̀ngbàn: ²⁹azán Noa tọn lẹpo sọ yín owhè fènẹkantòngbàn: é sọ kú.

¹EHELẸ wẹ owhẹndo visunnu Noa tọn lẹ tọn, Ṣẹm, Ham, po Jafẹti po: podọ hlan yé wẹ yè sọ jivi to osìn gigò godo.

²Visunnu Jafẹti tọn lẹ; Gomẹli, po Magọgu po, po Madai po, po Javani po, po Tubali po, po Mesẹki po, po Tilasi po. ³Visunnu Gomeli tọn lẹ, Askenazi, po Lifati po, po Togalma po. ⁴Visunnu Javani tọn lẹ; Eliṣa, po Talẹisi po, po Kitimi po, po Dodammi po. ⁵Sọn ehelẹ mẹ wẹ olopó Okosi lẹ tọn yín mimá to aigba yetọn lẹ mẹ, omẹ dopodopo kẹdẹdi ogbè etọn; kẹdẹdi ohẹnnu yetọn lẹ, to akọta yetọn lẹ mẹ.

⁶Visunnu Hapi tọn lẹ; Kusi, po Mizlaimi po, po Futi po, po Kẹnani po.

⁷Visunnu Kusi tọn lẹ; Seba, po Havila po, po Sabta po, po Lama po, po Sabteka po: po visunnu Lama tọn lẹ po; Seba, po Dedani po. ⁸Kusi sọ ji Nimlọdi: ewọ wẹ mẹtintan nado lẹzun hlọnhlọnnọ de to aigba ji. ⁹Ewọ wẹ gbeyàntọ asuka to OKLUNỌ nukọn: enẹwutu wẹ yè do dọmọ, Kẹdẹdi Nimlọdi gbéyàntọ asuka to OKLUNỌ nukọn. ¹⁰Odòdó ahọludu etọn tọn wẹ Babẹli, po Elẹki po, po Akkadi po, po Kalne po to aigba Ṣinali tọn ji. ¹¹Aigba ne ji wẹ é tọn sọn yì Assilia, bo do Nineve, po Lehoboti-Ili po, po Kala po, ¹²Lesem to Nineve po Kala po ṣẹnṣẹn (ehe wẹ todaho gbo lọ). ¹³Mizlaimi sọ ji Ludimi, po Ananimi po, po Lehabimu po, po Naftuhímu po, ¹⁴Patlusimu, po Kasluhimu po, (mẹhe de Filistinu lẹ tòn son) po Kaftolimu po.

¹⁵Kenani sọ ji Zidọni oplọnji etọn, po Heti po; ¹⁶Jebusinu lẹ, po Amọlinu lẹ po, po Gaìgasinu lẹ po; ¹⁷Hivitinu lẹ, po Alkinu lẹ po, po Sininu lẹ po; ¹⁸Alvadinu lẹ, po Zemalinu le po, po Hamatinu lẹ po: enẹgodo we ohẹnnu Kenaninu lẹ tọn sọ vùn, pé ¹⁹To dògboji Kenaninu lẹ tọn wẹ Zidọni te dile hiẹ gòja Gelali kaka jẹ Gaza; dile a sọ jei Sọdọmu, Gọmọla, Adina, Zeboimu, kaka jẹ Lasa. ²⁰Ehelẹ wẹ visunnu Ham tọn lẹ, kẹdẹdi ohẹnnu yetọn lẹ, kẹdẹdi ogbè yetọn lẹ, to otò yetọn lẹ mẹ, podọ to akọta yetọn lẹ mẹ.

²¹Hlan Sẹm ga, otò ovi Ebali tọn lẹpo tọn, nọvisunnu daho Jafẹti tọn, ewọ wẹ yè sọ jivi lẹ hlan ga. ²²Visunnu Sẹm tọn lẹ; Elami, po Assuli po, Alpaksadi, po Ludi po, po Alamu po. ²³Visunnu Alamu tọn lẹ; Uzi, po Huli po, po Geteli po, po Masi po. ²⁴Alpaksadi ji Ṣela, Ṣela sọ ji Ebeli ²⁵Hlan Ebeli wẹ yè sọ ji visunnu awe; oyín dopo tọn wẹ Pelẹgi, na azán etọn mẹ wẹ yè má aigba wutu; oyín nọvisunnu etọn tọn sọ wẹ Jọktani. ²⁶Jọktani sọ ji Almodadi, po Ṣelẹfi po, Hazalmavẹti, po Jela po; ²⁷Hadolami, po Uzali po, po Dikla po; ²⁸Obali, po Abimaeli po, po Seba po; ²⁹Ofili, po Havila po, po Jobabi po: ehelẹ pó wẹ visunnu Jọktani tọn. ³⁰Nọten yetọn tin sọn Mesa yì, dile hiẹ sọ jei Sefali osé whèzẹtẹn dali tọn kòn. ³¹Ehelẹ sọ wẹ visunnu Sẹm tọn lẹ, kẹdẹdi ohẹnnu yetọn lẹ, kẹdẹdi ogbè yetọn lẹ; to aigba yetọn lẹ ji, kẹdẹdi akọta yetọn lẹ.

³²Ehelẹ sọ wẹ ohẹnnu visunnu Noa tọn lẹ tọn lẹ, kẹdẹdi owhẹndo yetọn lẹ, to akọta yetọn lẹ mẹ; sọn ehelẹ mẹ wẹ yè má akọta aihọn tọn lẹ to osìn gigò godo.

¹AIHỌN lẹpo sọ yín ogbè doponọ, podọ ohógbè doponọ.

²E sọ wá jọ, le yé sọ jẹgbejizọnlinji sọn whèzẹtẹn dali jei, yé mọ dànfafa de to aigba Sinali tọn ji; yé sọ sinai to finẹ. ³Yé sọ dọ hlan yénọzo, dọ, Mì tónyì, mì gbọ mí ni basi bliki, bo mẹ̀ yé dagbedagbe. Yé sọ tindo bliki na zannu, odòsẹn wẹ yé sọ tindo na wheyinyan. ⁴Yé sọ dọ hlan yénọzo dọmọ, Mì tònyì, mì gbọ mí ni do tòdalo de na mí, po atọhọ de po, ehe ota etọn na sò olọn, bo gbọ mí ni basi oyín de na mí; yè nikã vúnvún mí pó nukunmẹ aigba tọn lẹpo péte.

⁵OKLUNỌ sọ jẹte wá nadomọ tòdaho po atọhọ lọ po, ehe ovi gbẹtọ tọn lẹ ko do. ⁶OKLUNỌ sọ dọmọ, Dayi e go, akọ dopo wẹ gbẹtọ lẹ, ogbè dopo wẹ yé omẹ pó sọ tindo: ehe wẹ núhe yé ṣẹ̀ nado wà: to dinvie yè ma na whlẹn núde do yé gba, he yé ko lẹn nado wà. ⁷Mì tònyì, mì gbọ mí ni jẹte yì, bo wlu ogbè yetọn to finẹ, na yé nido yòn ogbè yénọzo tọn ba blo.

⁸Mowẹ OKLUNỌ vúnvún yé pó sọn finẹ yì nukunmẹ aigba lẹpo tọn: yé sọ jodo nado do otò lọ. ⁹Enẹwutu wẹ yè do ylọ oyín etọn dọ Babẹli: na finẹ OKLUNỌ bó ogbè aigba lẹpo tọn wlu te wutu; podọ sọn finẹ wẹ OKLUNỌ vúnvún yé pé hlan aigba lẹpo ji.

¹⁰Ehelẹ wẹ whẹndo Ṣẹm tọn: Sẹm yín owhè kanweko mẹho, bo sọ ji Alpaksadi, owhè awetọ osìngigò tọn godo: ¹¹Ṣẹm sọ nò owhè fowekanweko to godo he é ji Alpaksadi, bo sọ ji visunnu po viyọnnu po.

¹²Alpaksadi sọ yín owhè gbàntòn meho bo ji Ṣela: ¹³Alpaksadi sọ nò owhè fowenukunatọ̀n bo ji visunnu po viyọnnu po.

¹⁴Ṣela sọ nò owhè ogbàn, bo ji Ebali. ¹⁵Ṣela sọ nọ̀ owhè fowenukunatọ̀n to godo he é ji Ebali, bo sọ ji visunnu po viyọnnu po.

¹⁶Ebẹli sọ nò owhè gbànnukunẹnẹ, bo ji Pelegi: ¹⁷Ebẹli sọ nò to godo he é ji Pelẹgi owhè fowegbàn, bo sọ ji visunnu po viyọnnu po.

¹⁸Pelẹgi sọ nọ̀ owhè ogbàn, bo ji Leu: ¹⁹Pelẹgi sọ nọ̀ to godo he é ji Leu owhè fọdeṣinẹnẹ, bo sọ ji visunnu po viyọnnu po.

²⁰Leu sọ nò owhè gbànnukunawe, bo ji Selugi: ²¹Leu sọ nọ̀ to godo he é ji Selugi owhè fọdesinawe, bo sọ ji visunnu po viyọnnu po.

²²Selugi sọ nò owhè ogbàn, bo ji Nahọli. ²³Selugi sọ nọ̀ to godo he é ji Nahọli owhè fọde, bo sọ ji visunnu po viyọnnu po. ²⁴Nahọli sọ nọ̀ owhè koatònnukunẹnẹ bo ji Tela; ²⁵Nahọli sọ nọ̀ to godo he é ji Tela owhè kanwegbànatọ̀nnukunẹnẹ, bo sọ ji visunnu po viyọnnu po.

²⁶Tela sọ nọ owhè kandegbàn, bo ji Ablam, po Nahọli po, po Halani po.

²⁷Owhẹndo Tela tọn wẹ ehelẹ: Tela ji Ablam, po Nahọli po, po Halani po; Halani sọ ji Loti. ²⁸Halani kú jẹnukọn na Tela otò etọn to aigba he ji é ji i te, to Uli Kaldetọ lẹ tọn. ²⁹Ablam po Nahọli po sọ mọ asi na yéde: oyín asi Ablam tọn tọn wẹ Salai; oyín asi Nahọli tọn tọn wẹ Milka, viyọnnu Halani tọn, otò Milka tọn po otọ̀ Iska tọn po. ³⁰Ṣigba, wẹ̀nsinọ wẹ Salai; é ma tindo ovi de gba.

³¹Tela sọ yí Ablam visunnu etọn, po Loti visunnu Halani tọn, visunnu visunnu etọn tọn, po Salai asi visunnu etọn tọn po, asi Ablam visunnu etọn tọn; yé sọ tòn hẹ yé yì sọn Uli Kaldetọ lẹ tọn mẹ, nado yì aigba Kenani tọn ji; yé wá Halani, bo sọ sinai to finẹ.

³²Azán Tela tọn sọ yín owhè fọdeatọ́n: Tela sọ kú to Halani.

¹OKLUNỌ dọ hlan Ablam, dọmọ, Tọ́n sọn aigba towe ji, sọn hẹnnumẹ towe lẹ mẹ, sọn owhé otò towe tọn gbè, yì aigba he yẹn na dohia we lọ ji: ²yẹn nasọ yí we do basi akọta daho de, yẹn na dona we, bo na hen oyín towe zùn daho; hiẹ ni sọ yín odona de: ³mẹhe dona we wẹ yẹn na dona, ewọ he sọ hodẹ̀do we wẹ yẹn na hodẹ̀do; to hiẹ mẹ wẹ yè na dona hẹnnu aigba tọn lẹpo te.

⁴Mowẹ Ablam tọ́nyi, dile OKLUNỌ ko dọ nẹ̀ do; Loti sọ yì po e po: Ablam sọ yín owhè kandegbànatón mẹho whenuena é tọ́n sọn Halani. ⁵Ablam sọ yí Salai asi eton, po Loti visunnu nọvisunnu etọn tọn, po núbépli he yé ko bépli lẹpo po, po ogbẹtọ he yé ko tindo to Halani lẹpo po; yé sọ tọ́n nado yì aigba Kenani tọn ji; aigba Kenani tọn lọ ji wẹ yé sọ wá.

⁶Ablam sọ dlu gbọn aigba lọ ji yì ofi Sẹkẹmu tọn, yì ozun Mọle tọn mẹ. Kenaninu lẹ tin to aigba lọ ji to whenẹnu. ⁷OKLUNỌ sọ sọawuhia hlan Ablam, bo dọmọ, Hlan okún towe wẹ yẹn na na aigba he: finẹ wẹ é sọ tún agbà de do hlan OKLUNỌ he sọawúhia ẹ.

⁸E sọ fọ́n sọn finẹ yì osé lọ ji to whèzẹtẹn Beteli tọn dali, bo sọ gbá ogohọ etọn, Beteli to whèyihọ dali, Ai tò whèzẹtẹn dali: é sọ tún agbà de do finẹ hlan OKLUNỌ, bo to avàleyàn oyín OKLUNỌ tọn.

⁹Ablam sọ jẹgbèdopozọnlinji, yìyì jei Hùwàji dali.

¹⁰Ohùvé de sọ tọ́n tọ aigba lọ ji: Ablam sọ jẹte yì Egipti nado wáwási to finẹ; na hùvò lọ tòn talala to aigba lọ ji. ¹¹E sọ wá jọ whenuena é pò nado biọ Egipti, é sọ dọ hlan Salai asi etọn, dọmọ, Dayi e go lò, yẹn yọ́nẹn dọ yọnnu whanpẹnọ na pinpòn wẹ hiẹ: ¹²enẹwutu é na wá jọ, whenuena Egiptinu lẹ na mọ we, yé na dọmọ, Ehe wẹ asi etọn: yé nasọ hù mi, ṣigba yé na jo hiẹ do ogbẹ̀. ¹³Yẹn vẹ̀ we, dọ nọviyọnnu ṣie wẹ hiẹ: na é nido bọawu na mi na hiẹ tọn wutu, podọ alindọn ọie nido gán na hiẹ tọn wutu.

¹⁴E sọ wá jọ, whenuena Ablam jẹ Egipti, Egiptinu lẹ pòn yọnnu lọ dọ mẹhe yọ́nwhanpẹ talala wẹ. ¹⁵Ahọvi Falo tọn lẹ sọ mọ ẹn, bo pa ẹ to Falo nukọn: yè sọ hẹn yọnnu lọ yì owhé Falo tọn gbè. ¹⁶E sọ wleyẹyi na Ablam talala na ewọ wutu: ewọ sọ tindo lẹngbọ, po oyìnsu po, po kẹtẹkẹtẹ asú po, devisunnu po devìyọnnu po, kẹtẹkẹtẹ asi po kanklosọpóawenọ lẹ po.

¹⁷OKLUNỌ sọ yí azònylankan lẹ do doazòn Falo po owhé etọn po susu, na Salai asì Ablam ton wutu. ¹⁸Falo sọ ylọ Ablam bo dọmọ, Etẹ́ wẹ hie wà hlan mí he? Etẹwutu wẹ hiẹ ma dọ na mi dọ asi towe wẹ ewọ? ¹⁹Etẹ́wutu wẹ hiẹ dọmọ, Nọviyọnnu ṣie wẹ? mọ bọ yẹn ko yí i nado yín asi ṣie: enẹwutu dinvie dayi asi towe go, yí í, bo yì.

²⁰Falo sọ nasẹ̀ gbẹtọ delẹ gbọn ewọ tọn dali: yé sọ hẹn ẹn wá aliho etọn ji, po asi etọn po, po ehe é tindo lẹpo po.

¹ABLAM sọ hẹ́ji tọ́nsọn Egipti, èwọ, po asi etọn po, po onú he é tindo lẹpo po, po Loti po hẹ ẹ yì Hùwàji. ²Ablam wàdọkun talala to whékanlin mẹ, to fataka mẹ, podọ to sika mẹ. ³E sọ to yìyì to gbèdopozọnlin etọn lẹ mẹ son Hùwàji kaka jẹ Beteli, jẹ ofi lọ fiè ogohò etọn ko te dai to sáunsáunwhenu to Beteli po Ai po ṣẹnṣẹn; ⁴jẹ ofi agbà lọ tọn he é ko tùn jẹnùkọn te: finẹ wẹ Ablam to avàleyàn oyín OKLUNỌ tọn té. ⁵Loti ga, mẹhe yì po Ablam po sọ tindo lẹngbọpa, po kanlinpa po, po ogohò po. ⁶Aigba lọ ma sọ sọgan hen yé, na yé nido nò pọ́: na núbépli yetọn sù, mọ bọ yé ma sogan nò pọ́. ⁷Wiwọ de sọ tin to ṣẹnṣẹn kanlinyintọ Ablam tọn lẹ, po kanlinyintọ Loti tọn lẹ po ṣẹnṣẹn: Kenaninu lẹ, po Pẹlizinu lẹ po sọ tin to aigba lọ ji to whenẹnu.

⁸Ablam sọ dọ hlan Loti, dọmọ, Yẹn vè we, a dike wiwọ de tin to yẹn po hiẹ pò ṣẹnṣẹn blo, podọ to kanlinyintọ ṣie lẹ, pó kanlinyintọ towẹ lẹ pò ṣẹnṣẹn bío, na nọvinọvi wẹ mí wutú. ⁹Bé aigba lẹpo péte ma tin to nukọn towe? Yẹn vẹ̀ we, klán dewe sọn dẽ: eyín hiẹ na yí amiyọnmẹ, bé yẹn na yí adusimẹ; kavi eyín hiẹ sọ yí adusimẹ, bé yẹn na yí amiyọnmẹ.

¹⁰Loti sọ zé nukun etọn daga bo pọ́n Dànfafa Jọdaní tọn lẹpo, dọ é do Osìn to ofi popo, na whẹpo OKLUNỌ do hù Sọdọmi po Gọmọla po súdo, di ojipa OKLUNỌ tọn, di aigba Egipti tọn, le hiẹ jei Zoali mẹ. ¹¹Mowẹ Loti sọ dè Dànfafa Jọdani tọn lẹpo na ede; Loti sọ jẹgbèdopozọnlinjì yì whèzẹtẹn: yé sọ klán yéde mẹde sọn mẹde go. ¹²Ablam sọ sinai tọ Kenani, Loti sọ sínai to tòdaho Dànfafa tọn lẹ mẹ bo gbá ogohọ̀ etọn pànnukọn Sọdọmi ¹³Ṣigba sunnu Sọdọmi tọn lẹ yín mẹylankan ylandonọ gbahú do OKLUNỌ go.

¹⁴OKLUNỌ sọ dọ hlan Ablam, to godo he Loti ko klán sọn e de, dọmọ, Ze nukun towe daga lò, na a ni pọ́n sọn fie a te, hlan agewàji, hùwàji, whèzẹtẹnwàji, podo whèyìhọwàji dali: ¹⁵na aigba he hiẹ mọ nẹlẹ pó, hiẹ wẹ yẹn na na ẹn hlan, podo hlan okún towe kakadoi. ¹⁶Yẹn nasọ basi okún towedi kọ́gudu aigba tọn; sọmọ bọ eyín gbẹtọ de sọgan dọ sọha kọ́gudu tọn, bọ́ yè ma sọgan dọ sọha okún towe lẹ tọn ga. ¹⁷Fọ́n, bo dán gbon aigba lọ ji to ote e tọn mẹ, podọ to ogblo e tọn mẹ, na hiẹ we yẹn na na ẹn hlan.

¹⁸Whenẹnu wẹ Ablam diọtẹnna ogohọ̀ etọn, bo wá bo sinai to ozùn Mamle tọn le mẹ, ehe tin to Hẹbloni, bo sọ tùn agbà de to finẹ hlan OKLUNỌ.

¹E sọ wá jọ, to azán Amlafẹli ahọlu Sinali tọn lẹ mẹ, Alioki ahọlu Ellasali tọn, Kedọliaomẹlì ahọlu Elami tọn, po Tidali ahọlu Goiimi tọn po; ²wẹ ehelẹ funawhàn hẹ Bela ahọlu Sọdọmi tọn, podọ hẹ Bilsa áhọlu Gọmọla tọn, podọ hẹ Ṣinabi ahọlu Adina tọn, podọ he Semebẹli ahọlu Zẹboimi tọn, po ahọlu Bela po tọn (enẹ wẹ Zoali).

³Ehelẹ pó wẹ hòplídopọ to agbàdo Siddimi tọn mẹ (enẹ wẹ ohù ojẹ̀ tọn). ⁴Yé sọ sẹ̀n Kẹdọllaomọli họ̀ owhè wiawe, to owhè wiatọntọ mẹ yé jẹglo.

⁵Podọ to owhè wiẹnẹtọ mẹ wẹ Kẹdọllamẹli wá, po ahọlu hé to e de lẹ po, bo gbà Lafaimi lẹ to Astẹloti-kalnaimi po Zuzimi lẹ po to Hami, po Emimi lẹ po to dànfafa Eiliataimi tọn ji, ⁶po Họlinu lẹ po to òsó yetọn Seili ji, kaka jé Eli-Palani, ehe tin to zùngbomẹ dali. ⁷Yé sọ lé bo wá Eni-mispati, (enẹ wẹ Kadesi) bo sọ gbà otò Amalekinu tọn lẹpo, po Amọlintì lẹ po ga he nọn Hazazọntamali. ⁸Ahọlu Sọdọmi tọn sọ tọ́n, po ahọlu Gọmọla tọn po, ahọlu Adina tọn, po ahọlu Zẹboimi tọn po po ahọlu Bela tọn po (enẹ wẹ Zoali); yé kànwhàn lẹ́do yé to agbàdo Siddimi tọn mẹ; ⁹hẹ Kẹdọllaomẹli ahọlu Elami tọn, podọ hẹ Tidali ahọlu Goiimi tọn, pọ Amlafẹli ahọlu Sinali tọn po, po Alioki ahọlu Ellasali tọn po, ahọlu ẹnẹ lédo aton.

¹⁰Agbàdo Siddimi tọn sọ gọ́ ná osẹ̀ndò lẹ; ahọlu Sọdọmi po Gọmọla po tọn lẹ hònyi, yé so jai to finẹ, yé mẹhe pò lẹ sọ họ̀nyì osó ji aga. ¹¹Yé sọ bẹ́ núbẹ́pli Sọdọmi po Gọmọla po tọn lẹpo, po nudùdù yetọn lẹpo po, bo sọ yì. ¹²Yé sọ wlé Loti, visunnu nọvisunnu Ablam tọn tọn, he sinai to Sọdọmi, po núbépli etọn po, bo yì.

¹³Dopo to omẹ he họ̀ngán lẹ mẹ wà, bo dọ na Ablam Heblu lọ; na ewọ tin to ozùn Mamle Amolinu tọn dali, nọvisunnu Ẹskoli tọn po nọvisunnu Aneli tọn po: ome helẹ tin hatọ mẹ hẹ Ablam. ¹⁴Whenuena Ablam sè dọ yè yí nọvisunnu etọn do wlé mẹglọnọ, é bé devi pinplón etọn lẹ, he yè ji to owhé etọn gbè jẹgbonu, fọdekan wegbànatọ́nnukunatọ̀n, bo domo na yé jẹ Dani. ¹⁵E sọ má ede do yé ji to ozán mẹ, ewọ po devi etọn lẹ po, bo gbà yé do, bo sọ yàn yé kaka jẹ Hoba, ehe tin to amiyọnlọ Damaski tọn ji. ¹⁶E sọ bé núbépli nẹlẹ pó gò, bo sọ hẹn Loti nọvisunnu etọn gó ga, po núbépli etọn lẹ po, po yọnnu lẹ po, po gbẹtọ lẹ po ga.

¹⁷Ahọlu Sọdọmi tọn sọ tọ́nyì pé e, gigò ja sọn huhù Kẹdọllaomẹli tọn po ahọlu he gọ́na ẹn lẹ po tọn godo, to agbàdo Save tọn (enẹ wẹ agbàdo ahọlu tọn).

¹⁸Mẹlkizedeki ahọlu Salẹmu tọn sọ hen akla po ovẹ̃n po jẹgbonu wá, ewọ wẹ yẹwhenọ Jiwheyẹwhe Gigogán tọn. ¹⁹Ewọ sọ dona ẹn, bo dọmọ, Donanọ wẹ Ablam sọn Jiwheyẹwhe Gigogán mẹ, didatọ olọn po okẹ́ po tọn: ²⁰donanọ sọ we Jiwheyẹwhe Gigogán he yi kẹ̀ntọ towe lẹ do àlọ towé mẹ. E sọ jo mádao onú lẹpo tọn nẹ̃.

²¹Ahọlu Sọdọmi tọn sọ dọ hlan Ablam, dọmọ, Jo gbẹtọ lẹ na mi, na hiẹ ni bé núbépli lẹ hlan dewe. ²²Ablam sọ dọ hlan ahọlu Sọdọmi tọn, dọmọ, Yẹn ko zé alọ ṣie daga hlan OKLUNỌ Jiwheyẹwhe Gigogán didatọ olọn po oké po tọn, ²³dọmọ, Yẹn ma na yí sekan kavi afọpakan kavi núde he yín towe, hiẹ niká dọmọ, Yẹn wẹ hẹn Ablam yín adókunnọ. ²⁴Mì dike núde tin na yẹn blo, ádavo enẹ he yọpọsunnú ṣie lẹ ko dù, po mimá sunnu he yì po yẹn po lẹ tọn kedẹ, Anéli, Ẹskoli, po Mamle po; mì gbọ yewlẹ ni bẹ́ mimá yẹtọn.

¹TO godo onú helẹ tọn ohó OKLUNỌ tọn wá Ablam de to númimọ mẹ, dọmọ, A dibú blo, Ablam; yẹn wẹ awòyínú towe, ale towé nasọ yín susu gégé.

²Ablam sọ dọmọ, OKLUNỌ JIWHEYẸWHE, eté hiẹ na na mi, a sà mọ yẹn wẹ to yíyí matinvì, Dammasẹki Eliezeli he nasọ yín whedútọ owhé ṣie tọn. ³Ablam sọ dọmọ, Dayi e go, hiẹ ma na ọkún de hlan yẹn gba, bo sọ pọ́n ovi he yè ji to owhé ṣie gbè wẹ wheduto ṣie.

⁴Bo dayi e go, oho OKLUNỌ tọn wá e de, bo dọmọ, Dawe he ma na yín whedútọ towe gba; ṣigba ehe na tónsọn adọ́ towe lọsu mẹ jẹgbonu, wẹ na yín whedútọ towe. ⁵E sọ hẹn ẹn tónjẹ gbangba, bo dọmọ, Zé nukun pọ́n hlan olọn lò, bo dọ sọha sunwhlẹvu lẹ tọn eyín hiẹ sọgan dọ soha yetọn: é sọ dọ hlan ẹn, dọmọ, Mowẹ okún towe na yín. ⁶Ewọ sọ yise to OKLUNỌ mẹ; é so hia ẹ hlan ẹn na dódó.

⁷E sọ dọ hlan ẹn, dọmo, Yen wẹ OKLUNỌ he hẹn we tónsọn Uli Kaldetọ lẹ ton mẹ jẹgbonu, nado na aigba he we nado dugú etọn.

⁸Ewọ sọ dọmọ, OKLUNỌ JIWHEYẸWHE, nawẹ yẹn na yónẹn do dọ yẹn na dugú etọn?

⁹E sọ dọ hlan ẹn, dọmọ, Yí yìnsiwhe owhè atọ̀n mẹ tọn de wá dè, po gbọgbọẹ asiwhe owhè atọ̀n mẹ ton de po, po agbo owhè atọ̀n mẹ tọn de po, po apoe dopo po, po awhannẹvú dopo po. ¹⁰E sọ yí onu helẹ pó wá e de, é so má yé to ṣẹnṣẹn, bo sọ yí mimá ode do ode ji: ṣigba é ma má ohè lẹ gba. ¹¹Ohọ́n núsá tọn lẹ jẹte jẹ osiọ lẹ ji, Ablam yàn yé sẹ̀.

¹²Whenuena owhè sọ to aijẹ, amlọn yíkanmẹ de jẹ Ablam ji; bo, pọ́n, ahlinhọn zinvlu gọ́ngón tọn de jẹ e ji.

¹³Ewọ sọ dọ: hlan Ablam, dọmọ, Yónẹn dodo dọmọ okún towe na yín wásinu to aigba he ma yín yetọn ji, bo nasọ sèn ye; yé nasọ bianukunna yé hò owhé fòwe; ¹⁴akọta lọ ga he yé na sén, wẹ yẹn nasọ dawhẹ́na: to enẹgodo yé na tón po núbépli susu po. ¹⁵Ṣigba hiẹ nasọ yì otọ́ towe lẹ de to jijọho mẹ; yè nasọ diṣiọ towe to yọ́nhopipò dagbedagbe mẹ. ¹⁶Podọ to whẹndo enetọ mẹ yé na sọ gọ̀wá ofi: na ylando Amolinu lẹ tọn ma ko gọ́ gba. ¹⁷E sọ wá jọ, dọ, whenuena owhè ko yì odò, bọ zinvlu titli sọ do, dayi e go, akladadò azònọ de, po zòwhán jiji de po he gbọn mimá helẹ ṣẹnṣẹn yì.

¹⁸To azán nẹ gbè wẹ OKLUNỌ basi alẹnu de hẹ Ablam, dọmọ, Hlan okún towe wẹ yẹn na aigba he, sọn otò Egipti: tọn ji, kaka jẹ otò daho nẹ ji, otọ̀ Euflate: ¹⁹Keninu lẹ, po Kẹnizzinu lẹ po, Kadinoninu lẹ, ²⁰po Hittinu lẹ po, po Pelizinu lẹ po, po Lẹfaimi lẹ po, ²¹po Amolinu lẹ po, po Kenaninu lẹ po, po Gilgasinu lẹ po, po Jẹbusinu lẹ po.

¹SALAI, asi Ablam tọn ma jivi de nẹ̃: ewọ tindo deviyọnnu de, Egiptinu, mehe oyín etọn yín Hagali ²Salai sọ dọ hlan Ablam, dọmọ, Dayi e go, OKLUNỌ ko hẹn mi dote sọn vijiji mẹ: yẹn vè we, biọ hòmẹ yì viyọnnu ṣie de lò; eya yen na mọ ovi zehẹn gbọn e dali. Ablam sọ yí ogbè Salai tọn sè. ³Salai asi Ablam tọn sọ yí Hagali deviyọnnu etọn Egiptinu lọ, to godo he Ablam ko nẹ̀ aigba Kenani tọn ji hò owhè ao, bo yí i na Ablam asú etọn nado yín asi etọn.

⁴Ewọ sọ biọ hòmẹ yì Hagali de, é sọ mọhò: whenuena é sọ mọ dọ emi mọhò, yọnnumẹmẹnu etọn zùn mẹvivlẹ to nukun etọn me ⁵Salai sọ dọ hlan Ablam, dọmọ, Ylanwàdo mi tin to oji we: yẹn yi deviyọnnu ṣie do akọ́n towe me; whenuena é mo dọmọ emi mohò, yẹn zùn mẹvivlẹ to nukun etọn mẹ: OKLUNỌ ni dawhè to yẹn po hiẹ po ṣẹnṣẹn. ⁶Ṣigba Ablam dọ hlan Salai, dọmọ, Dayi e go, deviyọnnu towe tin to alọ towe mẹ: wà enẹ he jẹto nukun towemẹ hẹ ẹ. Salai sọ zánalọ sinsinyẹn hẹ ẹ, é sọ wọ̀yì sọn nukọn etọn.

⁷Angẹli OKLUNỌ tọn sọ mọ ẹn to asisá otò de tọn tó to zùngbo me, to asisá, kòn to aliho he yì Suli ji. ⁸Ewọ sọ dọmọ, Hagali, deviyọnnu Salai tọn, fie wẹ hiẹ son wá? fie we hiẹ tọ́n jei? Ewọ sọ dọmọ, Wiwò yẹn te sọn Salai yọnnumemẹnu ṣie nukọn.

⁹Angẹli OKLUNỌ tọn lọ sọ dọ hlan ẹn, dọmọ, Gòyi yọnnumẹmẹnu towe de, bo sọ hùwhẹ́ dewe to alọ etọn glọ. ¹⁰Angẹli OKLUNỌ tọn lọ sọ dọ hlan ẹn, domọ, yẹn na hẹn okún towe lẹ jipli gegé, bọ yè ma na sọgan dọ sọha etọn na gégé. ¹¹Angẹli OKLUNỌ tọn lọ sọdọ hlan en dọmọ, Dayi e go, hiẹ tin to ohò, bo na jivi sunnu de, bo na ylọ oyín etọn dọ Iṣmaeli; na OKLUNỌ ko sè nukunbibia towe wutu. ¹²Ewọ na yín gbẹtọ di kẹtẹkẹtẹ ogbé me tọn de; alọ etọn nasọ tin to gbẹtọ lẹpo go, alọ gbẹtọ lẹpo tọn nasọ tin to ewọ go: ewọ nasọ nọnọ̀ nukọn mẹmẹsunnu etọn lẹpo tọn.

¹³Ewọ sọ ylọ oyín OKLUNỌ he dọhó hlan en tọn dọ, Hie wẹ Jiwheyẹwhe de he nọ mọnú: na ewọ dọmọ, Be yẹn yèdọ to ofi gbè sọ to ewọ mẹhe to mimọ mi pọ̀n? ¹⁴Enẹwutu wẹ yè do nọ ylọ odotọ lọ dọ Bẹeli-lahai-loi: dayi e go, é tin to Kadesi po Belẹdi po ṣẹnṣẹn.

¹⁵Hagali sọ ji visunnu de na Ablam: Ablam sọ ylọ oyín ovi he Hagali jl tọn dọ Iṣmaeli. ¹⁶Ablam sọ yín owhè kanwesidopo mẹho whenuena Hagali ji Iṣmaeli hlan Ablam.

¹WHENUENA Ablam sọ yín owhè kanwefọtọ̀nnukunẹnẹ mẹho, OKLUNỌ sọawúhia Ablam, bo dọ hlan ẹn, dọmọ, Yẹn Jiwheyẹwhe Gánhunupo wẹ; zinzọnlin to nukọn ṣie, hiẹ ni sọ yín pipé. ²Yẹn nasọ basi alènu ṣie to yẹn po hiẹ po ṣẹnṣẹn, bo sọ hẹn we jipli susugégé.

³Ablam ṣinyọnnukunmẹai: Jiwheyẹwhe sọ dọhó hẹ ẹ, dọmọ, ⁴Eyín yẹn tọn wẹ, dayi e go, alènu ṣie tin de we, hiẹ nasọ yín otọ́ akọta susu tọn. ⁵Yè ma to oyìn towe na ylọ Ablam ba, ṣigba Ablaham wẹ yè na nọ ylọ oyín towe; na otọ́ agùndaho akọta lẹ tọn wẹ yẹn yí we do basi. ⁶Yẹn na hẹn we yín sinsẹ́nnọ susugégó, akọta susu wẹ yẹn na basi sọn de we, ahọlu lẹ nasọnọ tọ́n sọnogo we. ⁷Yẹn nasọ hẹn alẹ̀nu ṣie lódo to yẹn po hiẹ po ṣẹnṣẹn, po okún towe po to godo towe to whẹndo yetọn mẹ, na alènu madopòdo de, nado yín Jiwheyẹwhe de hlan we podọ hlan okún towe lẹ to godo towe. ⁸Yẹn na na hlan we podọ hlan okún towe to godo towe aigba wási towe tọn lẹ, aigba Kenani tọn lẹpo, na nútindo de kakadoi; yẹn nasọ yín Jiwheyẹwhe yetọn.

⁹Jiwheyẹwhe sọ dọ hlan Ablama dọmọ, Na hiẹ tọn, hiẹ na yìn alènu ṣie, hiẹ po okún towe po to godo towe to whẹndo yetọn lẹ mẹ. ¹⁰Ehe wẹ alènu ṣie, ehe mì na nọ yìn to yẹn po mìwlẹ po ṣẹnṣẹn po okún towe po to godo towe; visunnu dopodopo to mì mẹ wẹ yè na nọ gbowhẹna. ¹¹Yè na nọ gbowhẹna mì to agbasalàn ayùtintan mítọn tọn mẹ; é nasọ yín ohia alènu tọn de to yẹn po mì po ṣẹnṣẹn. ¹²Omẹ he pé azán sinatòn to mì mẹ yé na gbowhẹ nẹ̃, visunnu lẹpo to whẹndo mítọn lẹ mẹ, po mẹhe yè ji to owhé etọn gbè po, kavi he yè yí akuẹ do hò sọn ojonọ si, he ma yín okún towe tọn. ¹³Ewọ he ye ji to owhé towe gbè, po ewọ he yè yí akuẹ towe do hò po yè do na gbowhẹ nẹ̃: bọ alẹ̀nu ṣie nasọ tin to agbasalàn mítọn mẹ na alẹ̀nu madopòdo de. ¹⁴Ovisunnu whẹmagbono he yè ma gbo whẹna to agbasalan ayútintan etọn tọn mẹ, dawe nẹ yè na san sọn ohẹnnu etọn me; é ko gbà alènu ṣie.

¹⁵Jiwheyẹwhe sọ dọ hlan Ablaham, dọmọ, Gbọn Salai asi towe tọn dali, hiẹ ma na ylọ oyín etọn do Salai ba, ṣigba Sala wẹ oyín etọn na nọ yín. ¹⁶Yẹn na dona ẹn, yẹn na na visunnu de we ga sọn e de: nugbonugbo, yẹn na dona ẹn, ewọ nasọ yín onọ akọta lẹ tọn, e de wẹ ahọlu ohẹnnu lẹ ton lẹ na nọ tonsọn.

¹⁷Whenẹnu wẹ Ablaham ṣinyọnnukunmẹai, bo kònu, bo sọ dọ to ayiha etọn mẹ, domọ, Bé yè na sọgan jivi hlan mẹhe ko hò owhè kanweko? Bé Sala mehe ko hò owhè kanweao nasọ sọgan jivi? ¹⁸Ablaham sọ dọ hlan Jiwheyẹwhe, dọmọ, Iṣmaeli do sọgan nọ ogbẹ̀ to nukọn towe!

¹⁹Jiwheyẹwhe sọ dọmo, Lala, ṣigba Sala, asi towe, na ji visunnu de na we dodo; hiẹ nasọ ylọ oyín etọn Isaki : yẹn na hẹn alẹ́nu ṣie lodo he ẹ na alẹ́nu madopodo de na okún etọn to godo etọn. ²⁰Yẹn ko sè odẹ̀ towe na Iṣmaeli; dayi e go, yẹn ko dona ẹn, yẹn nasọ hẹn ẹn zun sinsẹ́nnọ, yẹn nasọ hẹn ẹn jipíigégé; ahọvi wiawe wẹ ewọ na ji, yẹn nasọ yí i do basi akọta daho de ²¹Ṣigba alẹnu ṣie wẹ yẹn na hẹn lódo hẹ Isaki, he Sala na ji na we, to ojlẹ he yè dè he mẹ to owhè he ja mẹ.

²²E sọ gbọ sọn hódidọ hẹ ẹ go, Jiwheyẹwhe sọ yì aga sọn Ablaham de.

²³Ablaham sọ yí Iṣmaeli visunnu etọn po sunnu he yè ji to owhé etọn gbè lẹ po mẹhe yè yí akuẹ etọn do hò lẹ, omẹ dopodopo he yín sunnu to omẹ he to owhé Ablaham tọn gbè lẹ, bo sọ gbowhẹna agbasalàn ayútintan yetọn tọn to azàn doponẹ lọ gbè, dile Jiwheyẹwhe dọ nẹ̃ do. ²⁴Ablaham sọ yín owhè kanwefọtọ̀nnukunẹnẹ mẹho whenuena yè gbowhẹ nẹ̃ to agbasalàn ayútintan etọn tọn mẹ. ²⁵Iṣmaeli visunnu etọn sọ yín owhè wiatòn mẹho whenuena yè gbowhẹ nẹ to agbasalàn ayútintan etọn tọn mẹ.

²⁶Azán doponẹ gbè, wẹ yè gbowhẹna Ablaham po Iṣmaeli visunnu eton po ²⁷Po mẹhe to owhé etọn gbè lepo po he yè ji to owhé etọn gbè po ehe ye yi akuẹ do họ̀ sọn ojonọ lẹ si po wẹ yè sọ gbowhẹna po e po.

¹OKLUNỌ sọ sọawúhia ẹ to ozùn Mamle tọn ji: ewọ sọ sinai to họntonu ogohò tọn to yozò azán lọ tọn mẹ ²Ewọ sọ zé nukun etọn hlan aga bo sọ pọ́n, bo dayi e go, sunnu atọ̀n nọte to e de: whenuena é mọ yé, e họnwezun sọn ogohò hòntonu, nado yì pé yé, bo dé ede hlan aigba, ³bo dọmọ, Mẹdaho, eyín yẹn mọ nukundagbe to nukun towe mẹ, yẹn vẹ̀ we, a juwayì sọn devi towe de blo. ⁴Gbọ yè ni yí osìn pẹvide wá, na mì ni klọ afọ mítọn, na mì ni sọ gbọje to atin sá; ⁵yẹn nasọ yí akla nùdo dopo wá, na mì ni hẹn ayiha mítọn gla: to enẹgodo na mi ni juwáyì: na mì do wá devi mítọn de wutu. Yé sọ dọmọ, Basi dole hiẹ dọ do.

⁶Ablaham sọ gbì yì Sala de to ogoho mẹ, bo dọmọ, yawu bo yí olinfin dagbedagbe ojlẹ atọ̀n, bo fàn en, bo do sọ̀ akla to adò ji. ⁷Ablaham sọ dowezun yì kanlinpa mẹ, bo yí oyìnvu he whẹn bo yónwhanpẹ, bo sọ na lizọnyitọ lọ; ewọ sọ yawu dá ẹ. ⁸E so yí oyìnnọ hiho po yìnnọsin po, po oyìnvu he é dá po, bo zé e dai to nukọn yetọn; ewọ sọ nọte to yé de to atin lọ sá, yé sọ dù i.

⁹Yé sọ kanbiọ ẹ, dọmọ, Fie wẹ Sala asi towe te? E sọ dọmọ, Pọ́n, é tin to ogohò mẹ.

¹⁰E sọ dọmọ, Yẹn nasọ legò wá de we whenuena osã lọ wá; bo dayi e go, Sala asi towe na tindo visunnu de. Sala sọ sè to ogohò hòntonu he tin to godo dawe lọ tọn. ¹¹Mọ Ablaham po Sala po ko whén bo pòyọnho; e ko doalọte nado nọ hẹ Sala dile zinzán yọnnu lẹ tọn te. ¹²Enẹwutu Sala kònu to ede homẹ, dọmọ, To ehegodo yẹn ko whén zùn yọnhonọ wẹ yen na mọ homẹhùn, klunọ ṣie ko sọ poyọnho ga?

¹³OKLUNỌ sọ dọ hlan Ablaham, dọmọ, Etẹwutu wẹ Sala to nuko, domọ, Bé yẹn na jivi dódo, yẹn mẹhe ko poyọnho pó? ¹⁴Bé núde sinyẹnawu na OKLUNỌ wẹ? to ojlẹ he yè dè mẹ yẹn na lẹ́gọ̀ wá de we, whenuena osã lọ wá, Sala na tindo visunnu de.

¹⁵Whenẹnu wẹ Sala món, dọmọ, yẹn ma konu gbà; na budi i. Ewọ sọ dọmọ, Lala; ṣigba hiẹ kònu.

¹⁶Osunnu nẹlẹ sọ fọ́n sọn finẹ, bò pọndo hlan Sọdọmi dali: Ablaham sọ hodo yé yì nado do yé jẹ aliho ji.

¹⁷OKLUNỌ sọ dọmọ, Yẹn ka na sọ ónú he yẹn na wà whlá do Ablaham wẹ; ¹⁸na Ablaham na lẹzun akọtá huhlọnnọ daho, akọta he to aigba mẹ lẹpo wẹ yè nasọ dona to ewọ mẹ? ¹⁹Na yẹn ko yón ewọ, na é ni dosẹ́n na ovi etọn lẹ, podọ na owhédo etọn to gódo etọn, na yé nido nọ dayi aliho OKLUNỌ tọn go, nado nọ wà dódo po whẹ̀dida po: ná OKLUNỌ nido hẹn wá Ablaham ji enẹ he é dọ gbọn e dali.

²⁰OKLUNỌ sọ dọmọ, Awhá gbọn Sọdọmi po Gọmọla po dali nugbonugbo yín kiklo, podọ ylando yetọn nugbonugbo sọ yín adinu gbahú. ²¹Yẹn na jẹte yì lò, bo pọ́n eyín yé ko wà kẹdẹ dile awhá gbọn yé dali dì do he wa dẽ; eyín é ma yín mọ, yẹn nasọ yọ́nẹn.

²²Osunnu nẹle sọ lẹ nukunmẹ yetọn sọn finẹ, bo sọkọ Sọdọmi; ṣigba Ablaham sọ gbẹ́ to ote to OKLUNỌ nukọn.

²³Ablaham sọ sẹpọ́ ẹ, bo dọmọ, Bé hiẹ na và dódónọ sẹ̀ ga po mẹylankan po wẹ? ²⁴Eya dódónọ kandeao tin to otò lọ mẹ: bé hiẹ na zà finẹ lọ sẹ̀ ga, bo ma na jo e do na dódónọ kandeao he tin to e mẹ? ²⁵Enẹ ni dẹn do we nado wà ehe hunkọ, nado hù dódónọ po mẹylankan po: podọ na dódónọ lẹ nido taidi mẹylankan lẹ, enẹ ni dẹn do we: bé whẹdatọ aihọn lẹpo tọn ma na wà whẹdìdajijlọ?

²⁶OKLUNỌ sọ dọmọ, Eyín yẹn mọ to Sọdọmi mẹ dódónọ kandeao to tòdaho lọ homẹ, yẹn na jona finẹ lẹpo na yetọn wutu.

²⁷Ablaham sọ gblọn bo dọmọ, Dayi e go, yẹn ko yí do dè ji lò nado dọhó hlan OKLUNỌ, yẹn he yín kọ́gudu po afìn po: ²⁸eya atọ́n sọgan whè sọn dódónọ kandeao lọ mẹ: bé hiẹ na hù otò pó sudo na atpn wutu? Ewọ dọmọ, Eyín yẹn mọ kandeatén to finẹ, yẹn ma na hù ì súdo gba.

²⁹Ewọ sọ vọ́ hódọ hlan ẹn, bo dọmọ, Eya kande wẹ yè na mọ to finẹ. E sọ dọmọ, Yẹn ma na wà ẹ na kande tọn wutu.

³⁰E sọ dọ, Yè dike OKLUNỌ gblehomẹ blo, yẹn nasọ dọhó: eya yè na mọ ogbàn to finẹ. Ewọ sọ dọmọ, Yẹn má na wà ẹ éyin yẹn mọ ogban to finẹ.

³¹Ewọ sọ dọmọ, Dayi e go lò, yen ko yi do dẽ jì nado dọhó hlan Oklunọ: eya oko wẹ yè na mọ to finẹ. Ewọ sọ dọmọ, Yẹn ma na hù i súdo na oko tọn wutu.

³²E sọ dọmọ, Yè dike OKLUNỌ gblehomẹ bló, yẹn nasọ dọhó whladopo dogọ. Eya ao wẹ yè na mọ to finẹ. Ewọ sọ dọmọ, Yẹn ma na hù i súdo na ao tọn wutu.

³³OKLUNỌ sọ lẹ́, le é jo hódọ hẹ Ablaham do: Ablaham sọ gọ̀yì otẹn etọn mẹ.

¹ANGẸLI awe sọ wá Sọdọmi to whèjai; Loti sọ sinai to hòngbo Sọdọmi tọn ji; Loti mọ yé, bo fọ́n nado pó yé; é sọ dẹ́ ede po nukunmẹ etọn po hlan aigba. ²E sọ dọmọ, Dayi é go dinvie, mì mẹdaho emi, yẹn vẹ mì, mì gò biọ owhé devi mítọn tọn gbè, ná mì ni gbọsi ofi to ozán he mẹ, bo klọ àfọ mítọn, mì nasọ fọ́n to afọnnufù bo gbọn aliho mítọn yì. Yé sọ dọmọ, Lala; ṣigba to alihogboji lẹ wẹ míwlẹ na sin to ozán he mẹ. ³Ewọ sọ davà yé talala; yé sọ gò biọ họmẹ yì e de, bó biọ owhé etọn gbè; é sọ basi núdùdù na yé, bo sọ̀ akla madotọn, yé sọ dù.?

⁴Sigbà whẹpo yé mlọnai, omẹ otò lọ mẹ tọn lẹ, yèdọ sunnu Sọdọmi tọn lẹ, lédo owhé lọ pé, mẹho po yọ̀pọ po, gbẹtọ lẹpo sọn kọmẹkọmẹ: ⁵yé sọ ylọ Loti, bo kanbiọ ẹ dọmọ, Fie wẹ sunnu he wá de we to tenu he lẹ te? hẹn yé jẹgbonu wá mí de, na mí nido yọn yé.

⁶Loti sọ tọ́n jẹ hòngboji yi yé de bo súhọ̀n do ede do gbonu. ⁷E sọ: dọmọ, Mẹmẹsunnu emi, yẹn vẹ mì, mì wàdanu blo. ⁸Dayi e go lò, yẹn tindo viyọnnu awe he ma ko yọ́n sunnu; mì gbọ, yẹn vẹ mì, na yẹn ni hẹn yé jẹgbonu wá mì dè; mì bo wà hlan yé dile é yon do to mì nukunmẹ: ṣigbà sunnu helẹ yen vẹ mì wà núde do blo; na yé do wá yẹtẹn ohòta ṣie tọn glọ wutu.

⁹Yé dọmọ, Jagọ̀. Yé sọ dọmọ, Dawe hen dopo Wá otò mẹ nado wáwási, bọ é na yín whẹdatọ de: lohè wẹ mí na zán gbigble hẹ we húgan, hú hẹ yéwlẹ. Yé sọ yẹ́njẹ dawe lọ ji, yèdọ Loti, bo sẹwa nado gbà ohòn lọ. ¹⁰Ṣigba sunnu ewlẹ dlẹn alọ yetọn, bo dòn Loti do whégbè do yé de, bo súhọ̀n. ¹¹Ye sọ yi nukuntintón ajiji do ho sunnu he tin to họ̀ngboji lẹ, pẹvi po daho po: sọmọ bọ yé hẹn awuku yéde nado din ohun mọ.

¹²Sunnu ewlẹ sọ dọ hlan Loti, dọmọ, Be hiẹ tindo mẹde to ofi dogó ehelẹ? Yónwhẹn towe sunnu, po visunnu towe lẹ po, po viyọnnu towe lẹ po, po núdepope he hiẹ tindo to todaho lọ mẹ po; bẹ́ yé tọ́n sọn ofi lọ: ¹³na míwlẹ na và ofi he súdo, na awhá gbọn dali yetọn gbahú to OKLUNỌ nukọn wutu: OKLUNỌ sọ do mi han nado hù i súdo.

¹⁴Loti sọ tọ́njẹgbonu, bo dọ hlan yónwhẹn etọn sunnu lẹ, he na wlealọhẹ viyọnnu etọn lẹ, dọmọ, Mì fọ́n, bo tọn sọn oto he mẹ; na OKLUNỌ na và otò lọ súdo. Ṣigba é di mẹṣànkotọ to yónwhẹn sunnu etọn lẹ nukunmẹ:

¹⁵Whenuena afọnnu wá, whenẹnu wẹ angẹli lẹ domìzọnmìzọn na Loti, bo dọmọ, Fọ́n, yi asi towe, po viyọnnu towe awe lẹ po, he tin to ofi, yè nikã sú we do to ylankan oto lọ tọn mẹ. ¹⁶Ṣigba é whleawu: sunnu ewlẹ sọ dlẹn alọ bo hẹn alọ etọn, po alọ asi etọn tọn po, po alọ viyọnnu etọn awe lẹ tọn po, gbọn lẹblanu OKLUNỌ tọn hlan ẹn dali: yé hẹn ẹn jẹgbonu, bo dó e jẹ otò lọ godo.

¹⁷E sọ wá jọ, whenuena yé ko dè yé tón jẹ dokọgodo vọ́, wẹ é dọmọ, Hónyìgán na ogbẹ̀ towe, a lẹ́kọ pọ́n godo towe blo; mọ a sọ nọte to Danfafa nẹlẹ depope ji blo; hónyì osé ji, yè nikã sú we do.

¹⁸Loti sọ dọ hlan yé, dọmọ, Ṣó, mọ ma gba, mẹdaho ṣie: ¹⁹dayi e go lò, devisunnu towé ko mọ nukundagbe nukun towe mẹ, hiẹ ko zé dagbewanyi towe yìaga, he hiẹ dohia hlan mi to whinwhlẹn ogbẹ̀ ṣie mẹ; yẹn ma sọgan họ̀nyì osé ji gba, oylan lọ nikã pla mi to finẹ, yẹn bo nasọ kú; ²⁰dayi e go lò, otò he sepó nado hónyì finẹ mẹ; pẹvi sọ wẹ, Ṣó, gbọ ma hónyì finẹ; (bé é ma yín pẹvi wẹ?) ayiha ṣie bo nasọ nọ̀ ogbẹ́.

²¹E sọ dọ hlan ẹn dọmọ, Pọ́n, yẹn ko kẹalọyi we gbọn onú he tọn dali ga, dọ yẹn ma na gbà otò lọ he hiẹ dọhó etọn súdo. ²²Yawu họ̀nyì finẹ, na yẹn ma sọgan wà núde kaka hiẹ nado jẹ finẹ. Enẹwutu wẹ yè do nọ ylọ oyín otò lọ tọn dọ Zoali.

²³Owhè ko vẹ́ do aigba ji whenuena Loti biọ otò Zoa tọn mẹ. ²⁴Whenẹnu wẹ OKLUNỌ jajikun whemí tọn po miyọn tọn po sọn olọn sọn OKLUNỌ de do Sọdọmi po Gọmọla po ji, ²⁵Ewọ sọ gbà otò nẹlẹ súdo, po Danfafa lẹpo po, po tòmẹnu otò lọ tọn lẹpo po, po enẹ he wú to aigba lọ ji po.

²⁶Ṣigba asi etọn lẹ́kò pọ́n godo to godo etọn, é sọ lẹzùn kọ́dòtin ojẹ́ tọn de.

²⁷Ablaham sọ fọ́n to afọnnufù bo yì fie é nọte te to OKLUNỌ nukọn. ²⁸E sọpóndò hlan Sọdọmi po Gomọla po dali, podọ hlan aigba Danfafa tọn lẹpo dali, bo sọ pọ́n ẹn, dayi e go, azọ̀ otò lọ tọn ti yì aga di azọ̀ ozòhọ̀ de tọn.

²⁹E sọ wá jọ, whenuena Jiwheyẹwhe hù otò Danfafa tọn lẹ súdo, we Jiwheyẹwhe flin Ablaham, bo sọ dè Loti jẹgbonu sọn otò gbigbà lọ ṣẹnṣẹn, whenuena é gbà otò lẹ súdo ehe mẹ Loti nọnọ̀;

³⁰Loti sọ hẹji yì sọn Zoali; bo nọnọ̀ osé ji; podọ viyọnnu etọn awe lẹ po e po, na é dibu nado nọ̀ Zoali: é sọ nọnọ̀ aigbaslo de mẹ, ewọ po viyọnnu etọn awe lẹ po.

³¹Oplọnji sọ dọ hlan yọ̀pọ dọmọ, Otọ́ mítọn ko pòyọnho, sunnu de ma sọ tin to aigba mẹ ba he na biọ họmẹ wá mí de, kedẹdi zinzán aigba lẹpo tọn. ³²Wá, gbọ mí ni hẹn otọ́ mítọn nù ovẹ̃n, míwlẹ nasọ mlọnai hẹ ẹ, na mí nido plá okún otọ́ mítọn tọn. ³³Yé sọ hẹn otọ́ yetọn nù ovẹ̃n to ozán nẹ mẹ: oplọnji biọ họmẹ bo mlọnai hẹ otọ́ etọn; ewọ ma sọ yón whenuena é mlọnai, kavi whenuena é fọ́n. ³⁴E sọ wá jọ to aihọngbe bọ oplọnji dọ hlan yọ̀pọ, dọmọ, Dayi e go, yẹn mlọnai hẹ otọ́ ṣie to zánmẹsọ: gbọ mí ni sọ hẹn ẹn nù ovẹ̃n to ozán he mẹ ga; na hiẹ ni biọ họmẹ bo mlọnai hẹ ẹ, na mí nido plá okún otọ́ mítọn tọn. ³⁵Yé sọ hẹn otọ́ yetọn nù ovẹ̃n to ozán nẹ mẹ ga, yọ̀pọ lọ sọ fọ́n, bo mlọnai hẹ ẹ; ewọ ma sọ yón whenuena é mlọnai kavi whenuena é fọ́n. ³⁶Le wẹ viyọnnu Loti tọn awe lẹ mọho na otọ́ yetọn do ³⁷Oplọnji ji visunnu de, bo ylọ oyín etọn dọ Moabu: enẹ wẹ otọ́ Moabunu lẹ tọn kaka jẹ egbó. ³⁸Podọ yọ̀pọ, ewọ ga ji visunnu de, bo sọ ylọ oyín etọn dọ Bẹn-ammi: enẹ wẹ otọ́ ovi Ammoni lẹ tọn kaka jẹ egbó.

¹ABLAHAM sọ yì to dindán etọn lẹmẹ sọn finẹ yì otò he to Hùwàji dali: bo sinai to Kedẹṣi po Suli po ṣẹnṣẹn, bo sọ wáwási to Gẹlali.

²Ablaham sọ dọ gbọn Sala asi etọn tọn dali, dọmo, nọvi: iyọnnu ṣie wẹ: Abimẹlẹki ahọlu Gelali tọn sọ domehlan, bo plan Sala. ³Ṣigba Jiwheyẹwhe wá Abimẹleki de to odlọ ozán tọn de mẹ, bo dọ hlan ẹn dọmọ, Dayi e go, hiẹ ma yín nude hú gbẹtọ oṣiọ na yọnnu he hiẹ ko yí wutu; na asi sunnu de tọn we.

⁴Ṣigba Abimẹlẹki ma ko sẹpọ́ ẹ gba: é sọ dọmọ, OKLUNỌ, hiẹ na hù yèdọ akọta dódónọ wẹ? ⁵Ewọ lọsu ma wẹ dọ hlan mi dọ, Nọviyọnnu ṣie wẹ ewọ? bọ ewọ, yèdọ yọnnu lọsu sọ dọmọ, Nọvisunnu ṣie sọ wẹ ewọ: to wàlọpipé homẹ ṣie tọn mẹ po homẹvó alọ ṣie tọn po mẹ, wẹ yẹn wà ehe.

⁶Jiwheyẹwhe sọ dọ hlan ẹn to odlọ mẹ, dọmọ, Nugbo, yẹn yọnẹn dọ hiẹ wà ehe to wàlọpipé homẹ towe tọn mẹ; yẹn ga sọ glọn we sọn ylanwà do mi mẹ: enẹwutu wẹ yẹn ma dike hiẹ ni gàndo e go gba. ⁷Enẹwutu dinvie yí asi dawe lọ tọn jo, na yẹwhegan de wẹ ewọ, ewọ nasọ hodẹ̀ na we, hiẹ nasọ gán: eyín hie ma jo e gba, hiẹ ni yọnẹn dọ hiẹ na kú dándán, hiẹ po mẹhe yín towe lẹpo po.

⁸Abimẹleki sọ fọ́n to afọnnu, bo ylọ devi etọn lẹpo, bo dọ ehe lẹpo do otọ́ yetọn mẹ: obú sọ di gbẹtọ lẹ talala.

⁹Whenenu wẹ Abimẹlẹki ylọ Ablaham, bo dọ hlan ẹn dọmọ, Etẹ nkọ a wà do mi? Ylankan tẹwẹ yẹn wà do we, bọ hiẹ do hẹn ylando daho de wa oji e, po ahọludu ṣie po ji? hiẹ ko wà do mi onú he yè ma do wà do omẹ. ¹⁰Abimelẹki sọ dọ hlan Ablaham, dọmọ, Etẹwẹ hiẹ mọ bọ hiẹ do wà onú he?

¹¹Ablaham sọ dọmọ, Na yẹn lẹn nugbonugbo, dọ, Osi Jiwheyẹwhe tọn ma tin to otò he mẹ wutu, yé nasọ hù mi na asi ṣie tọn wutu. ¹²Podọ nugbonugbo nọviyọnnu ṣie wẹ ewọ, viyọnnu otọ́ ṣie tọn, ṣigba é ma yín viyọnnu onọ ṣie tọn gba; ewọ sọ lẹzun asi ṣie: ¹³é sọ wá jọ, whenuena Jiwheyẹwhe hẹn mi nado danpé sọn owhé otọ́ ṣie tọn gbè, wẹ yẹn do dọ hlan ẹn, dọmọ, Ehe wẹ dagbewanyi towe he hiẹ na nọ wà hlan mi; to fìdepope he mí na jẹ, nọ dọ gbọn yẹn tọn dali, dọ, Nọvisunnu ṣie wẹ ewọ.

¹⁴Abimelẹki sọ yí lẹngbọ, po oyìnsu po, po devisunnu po, po deviyọnnu po, bo sọ na yé Ablaham, bo sọ jo Sala asi etọn nẹ̃. ¹⁵Abimẹlẹki sọ dọmọ, Dayi e go, aigba ṣie tin to nukọn towe; sinai fidepope he jlo we. ¹⁶Podọ hlan Sala é dọmo, Dayi e go, yẹn ko jlẹ yí fataka wọwọ fọtọ̀n na nọvisunnu towe, dayi e go, é yín oṣinyọn nukun lẹ tọn de na we hlan mẹhe tin to de we lẹpo; podọ to gbẹtọ lẹpo nukọn wẹ yè sùwhéna we.

¹⁷Mowẹ Ablaham sọ hodẹ́ hlan Jiwheyẹwhe: Jiwheyẹwhe sọ hẹnazọ̀ngbọna Abimẹlẹki, po asi etọn po, po deviyọnnu etọn lẹ po; yé sọ jivi. ¹⁸Na OKLUNỌ ko sú adọ̀ mẹhe to owhé Abimelẹki tọn gbè lẹ tọn, na Sala asi Ablaham tọn tọn wutu.

¹OKLUNỌ sọ dla Sala pọ́n dile é ko dọ, OKLUNỌ sọ wà hlan Sala dile é ko dọ do. ²Sala sọ mọhò, bo jivi sunnu dopo na Ablaham to yonho etọn mẹ, to ojlẹ he yè dè he Jiwheyẹwhe ko do nẹ mẹ.

³Ablaham sọ ylo oyín visunnu etọn he yè ji hlan ẹn, mehe Sala ji nẹ̃ tọn dọ Isaki. ⁴Ablaham sọ gbowhẹna Isaki visunnu etọn, whenuena é yí azán sinatòn do whẹ́n, kẹdẹdile Jiwheyẹwhe ko degbè nẹ̃ do. ⁵Ablaham sọ yín owhè kanweko mẹho, whenuena yè ji Isaki visunnu etọn hlan ẹn. ⁶Sala sọ dọmọ, Jiwheyẹwhe ko wleawu núkikò tọn na mi; mẹdepope he sè nasọ kònu hẹ mi. ⁷E sọ dọmọ, Mẹnu wẹ sọgan dọ hlan Ablaham dọmọ, Sala na na anó ovi nó? na yẹn ko ji visunnu de nẹ to yónho etọn mẹ.

⁸Ovi lọ whén, yè sọ dèanọ́ nẹ̃: Ablaham sọ da núdùdù daho to azán lọ gbè he yè dèanó na Isaki. ⁹Sala sọ mọ visunnu Hagali tọn, Egiptinu, he yè ji hlan Ablaham, to aihúnda. ¹⁰Enẹwutu wẹ é dọ hlan Ablaham, dọmọ, Yàn yọnnumẹglọnọ he jẹgbonu po visunnu etọn po; na visunnu yọnnumẹglọnọ he tọn ma na yín whedútọ hẹ visunnu ṣie, yèdọ hẹ Isaki gba.

¹¹Ohó he sọ yín adinu talala to Ablaham nukunmẹ na visunnu etọn wutu. ¹²Jiwheyẹwhe sọ dọ hlan Ablaham, dọmọ, A dike é yín adinu to nukun towe mẹ na visunnu lọ tọn wutu blo, podọ na yọnnumẹglọnọ towe wutu blo; to ehe Sala dọ lẹpo mẹ dotó ogbè etọn; na Isaki mẹ wẹ yè na ylọ okún towe te. ¹³Visunnu yọnnumẹglọnọ tọn lọ mẹ ga wẹ yẹn na basi akọta de sọn, na okún towe wẹ é yín wutu.

¹⁴Ablaham sọ fọ́n to afọnnufu, bo yí akla po osìn ogo dopo po, bo yí i na Hagali, bo zé visunnu lọ do abó etọn ji, bo do e hlan jẹgbonu: ewọ sọ yì bo to dindanpé to ozùngbo Bẹeli-ṣeba tọn mẹ. ¹⁵Osìn lọ vò to ogò mẹ, é sọ ze ovi lọ dlan nukàn de glọ ¹⁶E sọ yi, bo sinai pànnukọn ẹn to aganu bobo, e sò ogá yinyin zọnlin dopo: na é dọmọ, A dike yẹn mọ oku ovi lọ tọn blo E sọ sinai bo pànnukọn ẹn; podọ visunnu lọ sọ zé ogbe etọn yìaga, bo viavi.

¹⁷Jiwheyẹwhe sọ sè ogbè visunnu lọ ton, angẹli Jiwheyẹwhe tọn sọn olọn ylọ Hagali bo dọ hlan ẹn, dọmọ, Etéwẹ wà we, Hagali? a dibú blo, na Jiwheyẹwhe ko sè ogbe visunnu lọ tọn, to fie é te. ¹⁸Fọ́n, zé visunnu lọ, bo zé e hẹn alọ towe mẹ, na yẹn na yí i do basi akọta daho.

¹⁹Jiwheyẹwhe hùn nukun etọn, é sọ mọ odòtọ osìn tọn de, bo so yì, bo yí osìn dogọ́ ogò lọ, bo yí na visunnu lọ nù. ²⁰Jiwheyẹwhe sọ tin hẹ visunnu lọ, é sọ whén bo sinai to zùngbomẹ, podọ le é whẹ́n é lẹzùn gáyìntọ de. ²¹E sọ sinai to zùngbo Palani tọn mẹ: onọ etọn sọ mọ asi nẹ̃ sọn aigba Egipti tọn ji.

²²E sọ wà jọ to ojlẹ nẹ mẹ, wẹ Abimẹlẹki po Fikoli awhàngán etọn po dọ hlan Ablaham, dọmọ, Jiwheyẹwhe tin hẹ we to onú lẹpo he hiẹ to wiwà mẹ: ²³enẹwutu dinvie gbọn Jiwheyẹwhe dali whlé hlan mi to ofi dọ hiẹ ma na zán oklọ hẹ mi, kavi hẹ visunnu ṣie, kavi hẹ visunnu visunnu ṣie tọn: ṣigba kẹdẹdi dagbewanyi he yẹn wà hlan we, mọwẹ hiẹ nasọ wà hlan mi do, podọ hlan aigba he ji hiẹ ko wáwási te.

²⁴Ablaham sọ dọmọ, Yẹn na whlé.

²⁵Ablaham sọ wọhẹ Abimẹlẹki na osìn odotò lọ tọn wutu, ehe devi Abimẹlẹki tọn lẹ ko yí huhlọn do yí.

²⁶Abimẹlẹki sọ dọmọ, Yẹn ma yọ́n mẹhe basi onú he gba: mọwẹ hiẹ ma dọ na mi, mọ yẹn ma sọ sè, adavo egbé he.

²⁷Ablaham sọ yí lẹngbọ po oyìnsu po, bo yí yé na Abimẹlẹki; yé omẹ awe lẹ sọ nùalé dopọ. ²⁸Ablaham sọ klán lẹngbọvú asi ṣinawe to kanlinpa mẹ dovo na yéde. ²⁹Abimẹlẹki sọ dọ hlan Ablaham, dọmọ Etẹ́wẹ lẹngbọvú asi ṣinawe he hiẹ klán do awe na yéde helẹ yín. ³⁰E sọ dọmọ, Lẹngbọvú asi ṣinawe helẹ wẹ hiẹ na yí sọn alọ sie mẹ, na yé nido yín kunnudenu hlan mi, dọ yẹn wẹ kùn odòtọ̀ he. ³¹Enẹwutu wẹ é ylọ finẹ lọ dọ Bẹeliẹeba, na finẹ wẹ yé omẹ awe lẹ whlédopọ te wutu. ³²Mowẹ yé nùalé to Bẹeliseba: whenẹnu wẹ Abimẹleki fọ́n, po Fikoli awhàngán etọn po, yé sọ légọ́ yì aigba Filistinu lẹ tọn ji.

³³Ablaham sọdó atin tamalisiki tọn de to Bẹeli-seba, finẹ wẹ é to avàleyàn oyín OKLUNỌ tọn te Jiwheyẹwhe Madopodo ³⁴Ablaham sọ wáwási to aigba Filislinu lẹ tọn ji hò azán susu.

¹E sọ wá jọ to onú helẹ godo, wẹ Jiwheyẹwhe tẹ́n Ablaham pọ́n, bo dọ hlan ẹn, dọmọ, Ablaham; ewọ sọ dọmọ, Yẹn tin to ofi. ²E sọ dọmọ, Yí visunnu towe lò, yèdọ Isaki, visunnu towe dopo akàn lọ he hiẹ yíwánna, bo yì aigba Molia tọn ji; bo yí i do sànvó núnina mimé tọn de to finẹ to dopo osé lẹ tọn ji fietọn yẹn na dọ na we.

³Ablaham sọ fọ́n to afọnnufú bo blapa na kẹtẹkẹtẹ etọn, bo yí awe to devisunnu etọn lẹ mẹ gọ́na ede, po Isaki visunnu etọn po, bo zé nake na avọ́ núnina mimé lọ, bo sọ fọ́n, bo yì ofi fietọn Jiwheyẹwhe ko dọ nẹ̃. ⁴To azán atọ̀ntọ gbè, Ablaham zé nukun etọn daga, bo mọ ofi lọ to aganu bobo. ⁵Ablaham sọ dọ hlan devisunnu etọn lẹ, dọmọ, Mì nọ̀ ofi po kẹtẹkẹtẹ lọ po; yẹn po ovi he po na yì odọ́n; míwlẹ na sẹ́n, bo sọ lẹ́gò wá mì de. ⁶Ablaham sọ yí nake avọ́ nunina mimé lọ tọn, bo bla ẹ do visunnu etọn Isaki ji; ewọ sọ yí miyọn po ohi po do alọ etọn mẹ, yé omẹ awe lẹ sọ zònpọ to yìyì.

⁷Isaki sọ dọhó hlan Ablaham otọ́ etọn, bo dọmọ, Otọ́ ṣie: ewọ sọ dọmọ, Eté wẹ, visunnu ṣie? È sọ dọmọ, Miyọn po nake po tin to ofi: aigba fie wẹ lẹngbọvú te na avọ núnina mimé de?

⁸Ablaham sọ dọmọ, Visunnu ṣie, Jiwheyẹwhe na wleawuna lẹngbọvú lọ na ede lọsu na avọ́ núnina mimé de: mọwẹ yé omẹ awe lẹ sọ zọ̀npọ to yìyì.

⁹Yé sọ wá ofi fietọn Jiwheyẹwhe ko dọ nẹ̃; Ablaham sọ tùn agbà de to finẹ, bo tò nake dagbedagbe, bo bla Isaki visunnu etọn, bo zé e mlọn agbà lọ ji, do nake lọ ji. ¹⁰Ablaham sọ dlẹn alọ etọn, bo yí ohi lọ nado hù visunnu etọn.

¹¹Angẹli OKLUNỌ tọn sọn olọn ylọ ẹ, bo dọmọ, Ablaham, Ablaham: é sọ dọmọ, Yẹn tin to ofi. ¹²E sọ dọmọ, A zé alọ towe do ovi lọ ji blo, mọ a sọ wà núde do e blo: na dinvie wẹ yẹn yónẹn dọ hiẹ dibúsi Jiwheyẹwhe, na hiẹ ma whlẹn visunnu towe, visunnu towe dopo akàn lọ do mi wutu.

¹³Ablaham sọ zé nukun daga, bopón, dayi e go, to godo etọn agbò de yè wlé gbọn azo etọn lẹ dali to nukàn mẹ; Ablaham sọ yì, bo yi agbò lọ, bo yí i do sànvó nẹ̃ avọ́ núnina mimẹ̀ lọ to otẹn visunnu etọn tọn mẹ.

¹⁴Ablaham sọ ylọ oyín ofi lọ tọn dọ Jihova-jile : dole yè to didọ kaka jẹ egbé, To osé OKLUNỌ tọn mẹ wẹ yè na mọ ẹn te.

¹⁵Angẹli OKLUNỌ tọn sọn olọn sọ ylọ Ablaham whlawetọ, ¹⁶bo dọmọ, Dẽ titi wẹ yẹn do whlé, wẹ OKLUNỌ dọ, na hiẹ ko basi onú he wutu, bọ hiẹ ma whlẹn visunnu towe, visunnu towe dopo akàn lọ: ¹⁷dọ didona mẹ yẹn na dona we, podọ yẹn na hen okún towe jideji susugégé di sunwhlẹvu olọn tọn lẹ, podọ di tọ̀kẹn he tin to ohùtó; okún towe lẹ wẹ nasọ yi hòngbo kẹ̀ntọ yetọn lẹ tọn glodeji: ¹⁸to okún towe mẹ wẹ yè na dona akọta aigba ji tọn lẹpo : na hiẹ yí ogbè ṣie sè wutu.

¹⁹Mowẹ Ablaham gọwá devisunnu etọn lẹ de, yé sọ fọ́n, bo zọ̀npọ yì Bẹeliṣeba; Ablaham sọ nò Bẹeli-ṣeba.

²⁰E sọ wá jọ to onú helẹ godo wẹ yè dọ na Ablaham, dọmọ, Dayi e go, Milka, ewọ ga ko JIYI hlan Naholi, nọvisunnu towe; ²¹Huzi plọnji etọn, po Buzi nọvisunnu etọn po, po Kemueli otọ́ Alamí tọn po; ²²Keṣedi po Hazo po, Pilídasi, po Jidlafì po, po Betueli po. ²³Betueli sọ ji Lebeka: yé omẹ sinatón helẹ wẹ Milka ji hlan Naholi nọvisunnu Ablaham tọn. ²⁴Ogà etọn, oyín mẹhe tọn nọ yín Lehuma, ewọ ga sọ ji Teba po Gahami po, Tahasi, po Maaka po.

¹OGBÈ Sala tọn sọ yín owhè kantọ̀nsinawe: ehelẹ wẹ owhè ogbẹ̀ Sala tọn tọn. ²Sala sọ kú to Kiliati-alba, (enẹ wẹ Hẹblon) to aigba Kenani tọn jì: Ablaham sọ wá nado blawú na Sala podọ nado viavi nẹ̃.

³Ablaham sọ fọ́n sọn oṣiọ etọn nukọn, bo dọhó hlan ovi Heti tọn lẹ, dọmọ, ⁴Ojonọ wásinu wẹ yẹn to mì de; na nútindo ṣíọditẹn tọn mi to mì de, na yẹn nido di osiọ ṣie sọn nukun ṣie mẹ. ⁵Ovi Heti tọn lẹ sọ gblọnhó na Ablaham dọmọ, ⁶OKLUNỌ ṣie, sè mítọn lò: ahọvi huhlọnnọ de wẹ hiẹ to míwlẹ ṣẹnṣẹn; to yọ́whé whanpẹnọ pete mítọn mẹ wẹ a ni di osiọ towe do; mẹdepope to mí mẹ ma na whlẹn yòwhé eton do we gba, na hiẹ ma na do di oṣiọ towe.

⁷Ablaham sọ fọ́n nọte, bo dó ede hlan omẹ he yín aigba lọ tọn lẹ, yèdọ hlan ovi Heti tọn lẹ. ⁸E sọ dọhó hẹ yé, dọmọ, Eyín é sọn ohò mítọn mẹ na yẹn nido di osiọ ṣie sọn nukun ṣie mẹ; mì sè ṣie, bo degbe hlan Ẹfloni, ovi Zohali tọn na mi, ⁹na é nido na aigbaslo Makpela tọn mi, ehe e tindo, ehe tin to oglè etọn dògbojì; akuẹ sọha e họ̀ wẹ ni jo na mi na to mì ṣẹnṣẹn, na nútindo ṣíọditẹn tọn de.

¹⁰Ẹfloni to aisinsin to ovi Heti tọn le ṣẹnṣẹn: Ẹfloni Hittinu sọ gblọnhóna Ablaham to otọ́ ovi Heti tọn lẹpo tọn mẹ, yèdọ to otọ́ mehe to hòngbo otò etọn mẹ biọ lẹpo tọn mẹ dọmọ, ¹¹Lala, klunọ ṣie, sè mi; yẹn na oglè lọ we po aigbaslo he tin to finẹ po, yẹn na we ga: to nukun ovi omẹ ṣie lẹ tọn tọn mẹ wẹ yẹn yí i na we te: di oṣiọ towe.

¹²Ablaham sọ dé ede hlan odò to ome aigba lọ tọn lẹ nukọn. ¹³E sọ dọhó hlan Ẹfloni to otọ́ omẹ aigba lọ tọn lẹ tọn mẹ, dọmọ, Eyín hiẹ gbẹ́—jàle sè mi! yẹn na na akuẹ oglè lọ tọn we, yi i to asi e; yẹn nasọ di osiọ ṣie to finẹ.

¹⁴Ẹfloni sọ gblọnhóna Ablaham dọmọ, ¹⁵OKLUNỌ ṣie, sọ sè mi: aigba lọ hò ṣekẹli jijlẹ fowe fataka tọn, etẹ́ ka wẹ enẹ to yẹn po hiẹ po ṣẹnṣẹn? enẹwutu di oṣiọ towe.

¹⁶Ablaham sọ sè Ẹfloni tọn: Ablaham sọ jlẹ fataka lọ na Ẹfloni ehe é dọ to otọ́ ovi Heti tọn lẹ tọn mẹ, fataka jijlẹ fowe ṣekẹli tọn, ehe yìn akuẹ pipó to ajọtọ lo de. ¹⁷Oglè Ẹfloni tọn, he tin to Makpela, ehe to Mamle nukọn, oglè lọ, po aigbaslo he tin to e mẹ po, po atin he sọ tin to oglè lọ mẹ lẹpo po, ehe tin to dali etọn bo lẹ́do e pé lẹpo wẹ é degbèsọn e ji na Ablaham. ¹⁸To ovi Heti tọn lẹ nukunmẹ, podọ to nukun mẹhe to hòngbo otò etọn mẹ tọn biọ lẹ tọn mẹ.

¹⁹To ehegodo Ablaham di Sala asi etọn to aigbaslo oglè Makpela tọn mẹ, to Mamle nukọn (enẹ wẹ Hẹblon) to aigba Kenani tọn ji.

²⁰Oglè lọ, po aigbaslo ne to finẹ po, wẹ yè degbèsọn e ji na Ablaham, na nútindo ṣiọditẹn tọn de gbọn, ovi Heti tọn lẹ dali.

¹ABLAHAM sọ whén, bo pòyònho to gbèzán etọn mẹ: OKLUNỌ ko dona Ablanam to onú lẹpo mẹ. ²Ablaham sọ dọ hlan devi mẹhopete whèdò etọn ton, mẹhe dugán do onú he é tindo lepo ji, dọmọ, Yẹn vò we, yi alọ towe do asapada ṣie glọ: ³yẹn nasọ hẹn we whlé gbọn OKLUNỌ, Jiwheyẹwhe olọn po aihọn po tọn dali, dọ hiẹ ma na mọ asi na visunnu síe to viyọnnu Kenani tọn lẹ mẹ, to yé mẹhe ṣẹnṣẹn yẹn to ninò lẹ mẹ gba. ⁴Ṣigba hiẹ na yi otò ṣie mẹ, podọ to hẹnnumẹ ṣie lẹ de, bo mọ asi na Isaki visunnu ṣie.

⁵Devi lọ sọ dọ hlan ẹn, dọmọ, Eya yọnnu lọ ma yín ojlonọ nado hodo mi jẹ aigba he ji, bé yẹn do na hẹn visunnu towe gọ̀yì aigba he ji hiẹ tónsọn wá?

⁶Ablaham sọ dọ hlan ẹn, dọmọ, Hiẹ ni payi, na hiẹ hẹn visunnu ṣie gọ̀yì finẹ blo. ⁷OKLUNỌ Jiwheyẹwhe olọn tọn, he ko dè mi sọn owhé otọ ṣie tọn gbè, sọn aigba ajitẹn ṣie tọn ji, bo sọ dọ hlan mi, bo ko sọ whlé hlan mi, dọmọ, Yẹn na aigba he okún towe; ewọ nasọ do angẹli etọn hlan nukọn towe, hiẹ na mọ asi sọn finẹ na visunnu ṣie.

⁸Eyín yọnnu lọ ma yín ojlonọ nado hodo we, bé whenẹnu hiẹ na gán sọn whiwhlé ṣie he mẹ: ṣigba hiẹ ma na hẹn visunnu ṣie gọ̀yì finẹ gba.

⁹Devi lọ sọ yí alọ etọn do asapada Ablaham klunọ etọn tọn glọ, bo sọ whlé nẹ na ohó helẹ tọn wutu.

¹⁰Devi lọ sọ yí kanklosọpoawenọ ao, sọn kanklosọpoawenọ klunọ etọn tọn mẹ, bo yì; na alọ etọn mẹ wẹ agbàn klunọ etọn tọn lẹpo te: é sọ fọ́n, bo yì Mesopotamia, to otò Naholi tọn mẹ. ¹¹E sọ hẹn kanklosọpoawenọ etọn lẹ jẹklo to otò lọ godo to odòtò de dali to ojlẹ whèjai tọn mẹ, to ojlẹ he mẹ yọnnu lẹ nọ tòn te nado dà osìn.

¹²Ẹ sọ dọmọ, OKLUNỌ, Jiwheyẹwhe Ablaham otò ṣie tọn, yẹn vẹ̀ we, hùn ali dagbe na mi egbé, bo sọ wà dagbe hlan Ablaham klunọ ṣie. ¹³Dayi e go, yẹn to ote to ofi to asisá osìn tọn kọ̀n; viyọnnu otò lọ tọn lẹ to tintọ̀njẹgbonu ja osìn dà gbe; ¹⁴bo gbọ é ni jọ dọ, awhli he yẹn na dọ hlan, dọmọ, Yẹn vè we, zlọn tọ̀zén towe dai, na yẹn ni nù; bọ ewọ nasọ dọmọ, Nù, yẹn nasọ dà na kanklosọpoawenọ towe lẹ nù ga; ewọ lọ we ni yín asi lọ he hiẹ ko dè na devi towe, Isaki; gbọn ehe mẹ yẹn na yọnẹn dọ hiẹ do dagbe hia hlan OKLUNỌ ṣie.

¹⁵E wá jọ, whẹpo ewọ na dó dọhó lọ vọ̀, wẹ dayi e go, Lebeka tọ́njẹgbonu, mehe yè ji hlan Bẹtueli, visunnu Milka ton, asi Naholi tọn, nọvisunnu Ablaham ton, otọ̀zén etọn tin to abọ́ etọn jí. ¹⁶Áwhli lọ yọ̀nwhanpẹ talala na pinpọ́n, awhli de, sunnu he ko yòn ẹn de ma tin: é sọ jẹte yì tòsisá mẹ, bo gò otọ̀zẹ́n etọn, bo sọ gòwá yìaga.

¹⁷Devi lọ sọ dowezun nado yì pé e, bo dọmọ, gbọ yẹn ni nù, yẹn vẹ̀ we, osìn vude sọn tòzén towe mẹ. ¹⁸Ewọ sọ dọmọ, Nù, klunọ ṣie; é sọ yawu zlọn otòzén etọn do alọ mẹ, bo na ẹn nù, ¹⁹Whenuena é sọ na ẹn nù vò, é dọmọ, Yẹn na dà na kanklosọpoawenọ towe lẹ ga kaka yé nado nù vò. ²⁰E sọ yawu, bo kọ̀n tọ̀zẹ́n etọn do odla lọ mẹ, bo sọ lẹ̀ po wezun po yì odòtòpa nado dòn osìn, bo sọ dà na kanklosọpoawenọ etọn lẹpo. ²¹Dawe lọ to pínpòn ẹn, bo sọ bọnukun do e go to pìnpòn nado yònẹn eyín OKLUNỌ hẹn gbejizọnlin etọn yín yínyòn, kavi devo.

²²E sọ wá jọ, le kanklosọpoawenọ lẹ ko nù osin vọ̀, dawe lọ yí sika tómẹnu dadawe ṣekẹli jijlẹ tọn, po àlọgàn awe sika tọn po na alọ etọn he jlẹ ṣekẹli ao; ²³bo sọ dọmọ, Viyọnnu mẹnu tọn wẹ hiẹ? Yen vẹ́ we, dọ na mi. Otẹn sọ tin to owhé otọ̀ towe tọn gbè bọ mí na jẹ e mẹ?

²⁴E sọ dọ hlan ẹn, dọ, Oviyọnnu Bẹtueli tọn, viyọnnu Milka tọn, he é ji na Naholi, wẹ yẹn. ²⁵E sọ dọ hlan ẹn dogọ́, dọmọ, Míwlẹ tindo zìnkán po kanlinmahúhú susu po, po otẹn po na jẹ e mẹ.

²⁶Dawe lọ sọ dẹ́ ota etọn bo sẹ̀n OKLUNỌ. ²⁷E sọ dọmọ, Donanọ wẹ OKLUNỌ Jiwheyẹwhe Ablaham klunọ síe tọn, he ma gbọ̀ dagbewanyi etọn po nugbo etọn po hlan klunọ ṣie dali: na yẹn tọn wẹ, OKLUNỌ ko do mi to aliho ji hlan owhé mẹmẹsunnu klunọ ṣie lọ tọn gbè.

²⁸Awhli lọ sọ dowezun, bo yì dọ onú helẹ na whégbènu onọ etọn tọn lẹ. ²⁹Lebeka tindo nọvisunnu de, oyín etọn nọ yín Labani: Labani sọ dowezun jẹgbonu yì dawe lo de je tòsisá lọ kòn. ³⁰E sọ wá jọ, whenuena é mọ tómẹnu po alọgàn po to alọ nọviyọnnu etọn tọn mẹ, bọ é sọ sè ohó Lebeka nọviyọnnu etọn tọn dọ, Lewẹ dawe lọ dọ hlan mi; wẹ é wá dawe lọ de; bo dayi e go, é tote to kanklosọpoawenọ etọn lẹ de to tòsisá lọ tó. ³¹Ewọ sọ dọmọ, Biọ whégbè, hiẹ donanọ sọn OKLUNỌ de; etéwutu wẹ hie nọte to gbonu? yẹn ko sènúdo to whégbè podọ tẹnmẹ na kanklosọpoawenọ lẹ. ³²Dawe lọ sọ biọ owhé lọ gbè: bo tún kanklosọpoawenọ lẹ, bo na zinkan po kanlinmahúhú po kanklosọpoawenọ le, po osìn po nado klọ afọ etọn, po afọ mẹhe gò nẹ̃ lẹ tọn po ga.

³³E sọ zé núdùdù do nukọn nẹ̃ nado dù, ṣigba ewọ dọmọ, Yẹn ma to onú na dù kaka yẹn nado dowẹn ṣie pó. E sọ dọmọ, To hódọ.

³⁴Ewọ sọ dọmọ, Devi Ablaham tọn wẹ yẹn. ³⁵OKLUNỌ sọ dona klunọ ṣie talala; ewọ sọ lẹzun mekiklo: é na lẹngbọ ẹ, po oyín po, po fataka po, po sika po, po devisunnu po, po deviyọnnu po, po kanklosọpoawenọ po, po kẹtẹkẹtẹ po. ³⁶Sala asi OKLUNỌ ṣie tọn sọ ji visunnu de hlan OKLUNỌ ṣie whenuena ewọ ko poyònho vò; ewọ wẹ é yí onú he é tindo lẹpo na. ³⁷OKLUNỌ ṣie sọ hẹn mi whlé dọmọ, Hiẹ ma na mọ asi na visunnu ṣie sọn viyọnnu Kenani tọn lẹ mẹ gba, aigba mẹhe tọn ji yẹn te: ³⁸ṣigba hiẹ ni yì owhé otò ṣie tọn gbè, podọ hẹnnu ṣie lẹ de, na a ni mọ asi na visunnu ṣie. ³⁹Yẹn sọ dọ hlan OKLUNỌ ṣie, dọmọ, Eya yọnnu lọ ma na hodo mi. ⁴⁰E sọ dọ hlan mi, dọmọ, OKLUNỌ, mẹhe nukọn yẹn to sọnlinzin te, na do angẹli etọn hlan hẹ we, bo nasọ jla aliho towe do; hiẹ nasọ mọ asi na visunnu ṣie sọn hẹnnumẹ ṣie lẹ de, podọ sọn owhé otọ́ ṣie ton gbè: ⁴¹whenẹnu wẹ hiẹ na gán sọn whiwhlé ṣie he mẹ, whenuena hiẹ wá hẹnnumẹ ṣie lẹ de; eyín yé ma yí mẹde na we, hiẹ gán sọn whiwhlé ṣie he mẹ. ⁴²Yẹn wá tòsisá kọ̀n to egbé, bo dọmọ, OKLUNỌ, Jiwheyẹwhe Ablaham klunọ ṣie tọn, eyín hiẹ hẹn aliho he yẹn gbọn dinvie he yọ̀n: ⁴³dayi e go, yẹn to tote to odòtòpa; bo gbọ é ni jọ, dọ awhli he tọ́njẹgbonu wá nado dà osìn, mẹhe yẹn na dọhlan, dọmọ, Na mi, yẹn vè we, osìn vude sọn otòzén towe mẹ nado nù; ⁴⁴bọ é na dọ hlan mi, dọmọ, Hiẹ ni nù, yẹn nasọ dà na kanklosọpoawenọ towe lẹ ga: gbọ é ni yín asi he OKLUNỌ ko dè na visunnu OKLUNỌ ṣie tọn. ⁴⁵Whẹpo yẹn ko gbọ hódọ to ayiha ṣie mẹ, dayi e go, Lebeka tònjẹgbonu wá, podọ otòzén etọn tin to abò etọn ji; ewọ sọ jẹte yì o tòsisá mẹ, bo dà osìn: yẹn sọ dọ hlan ẹn, dọmọ, Gbọ yẹn ni nusìn, yẹn vẹ̀ we. ⁴⁶E sọ yawu, bo zlọn otòzén etọn sọn abò etọn ji, bo dọmọ, Nù, yẹn nasọ dà na kanklosọpoawenọ towe lẹ nù ga. ⁴⁷Yẹn sọ kanbiọ ẹ, dọmọ Viyọnnu mẹnu tọn wẹ hiẹ? E sọ dọmọ, Viyọnnu Bẹtueli tọn, visunnu Naholi tọn, he Milka ji hlan ẹn: yẹn sọ yí tómẹnu lọ do awọntin mẹ nẹ̀, po alọgàn lẹ po do alọ etọn mẹ. ⁴⁸Yẹn sọ dẹ́ ota ṣie, bo sẹ̀n OKLUNỌ, yẹn sọ dona OKLUNỌ Jiwheyẹwhe Ablaham OKLUNỌ ṣie tọn, he hẹn mi gbọn ali jíjlọ ji nado yí viyọnnu nọvisunnu OKLUNỌ ṣie tọn na visunnu etọn. ⁴⁹Bé dinvie, eyín mìwlẹ na basi dagbewanyi po nugbo po hlan OKLUNỌ ṣie, mì dọ na mi; eyín é ma sọ yín mọ, mì dọ na mi: na yẹn ni gò do adusi pawhe kavi do amiyọn.

⁵⁰Whenẹnu wẹ Labani po Bẹtueli po gblọn, bo dọmọ, OKLUNỌ de wẹ onú lọ sọn wá: míwlẹ ma sọgan dọhó dagbe kavi ylankan hlan we gba. ⁵¹Dayi e go, Lebeka tin to nukọn towé, yí i bo yì, na ewọ ni yín asi visunnu OKLUNỌ towe tọndile OKLUNỌ ko dọhó do.

⁵²E sọ wá jọ dọ whenuena devi Ablaham tọn sè ohó yetọn, é dẹ́ ede do aigba hlan OKLUNỌ. ⁵³Devi lọ sọ de núzinzán fataka tọn, po núzinzán sika tọn po jegbonu, po avọ̀ po jẹgbonu, bo yí yé na Lebeka: é sọ yí núnina akuẹgegenu tọn ga na nọvisunnu etọn po onọetọn po.

⁵⁴Yé sọ dù bo nù, ewọ pó mẹhe tin to e de lẹ po, yé sọ jẹ finẹ to ozán lọ mẹ; yé sọ fọ́n to afọnnu, é bo sọ dọmọ, Mì do mi hlan OKLUNỌ ṣie de. ⁵⁵Nọvisunnu etọn po onọ etọn po sọ dọmọ, Gbọ awhli lọ ni nòhẹ mí azán vude, hò azán ao mọ: enẹgodo é na yì. ⁵⁶Ewọ sọ dọ hlan yé, dọmọ, Mì hẹn mi dote blo; na OKLUNỌ ko hẹn ali ṣie yòn dagbedagbe wutu; mì de mi tón, na yẹn ni yì OKLUNỌ ṣie de. ⁵⁷Yé sọ dọmọ, Mí na ylọ awhli lọ, bo kanbiọ sọn onù etọn. ⁵⁸Yé sọ ylọ Lebeka, bo dọ hlan ẹn, dọ, Hiẹ na yì hẹ dawe he? é sọ dọmọ, Yẹn na yì.

⁵⁹Yé sọ do Lebeka viyọnnu yetọn hlan po anénọ etọn po, po devi Ablaham tọn po, po omẹ etọn lẹ po. ⁶⁰Yé sọ dona Lebeka, bo dọ hlan ẹn, dọ, Viyọnnu mítọn, yín onọ fọtọ́nfọtọ́n donu fọtọ́nfọtọ́n ao tọn, bo gbọ okún towe ni tindo hòngbo mẹhe gbẹwanna yé lẹ tọn.

⁶¹Lebeka sọ fọ́n po awhli etọn lẹ po, yé hẹ́ kanklosọpoawenọ lẹ ji, bo hodo dawe lọ: devi lọ sọ yí Lebeka bo yì.

⁶²Isaki ko wá jugbọn zùngbo Bẹeli-la-hai-loi tọn mẹ; na aigba Hùwàji tọn dali wẹ ewọ nọnọ̀. ⁶³Isaki sọ jẹgbonu nado yì, lẹnayihamẹpèn to dangbo to whèjai: é sọ zé nukun etọn daga bo mọ, dayi e go, kanklosọpoawenọ lẹ ja. ⁶⁴Lebeka sọ zé nukun etọn daga, whenuena é mọ Isaki, é jẹte sọn kanklosọpoawenọ ji. ⁶⁵E sọ dọ hlan devi lọ, dọmọ, Dawe tẹwẹ ehe to zọnlinzin to danji nado pé mí? devi lọ sọ dọmọ, OKLUNỌ ṣie wẹ: ewọ sọ yí nukunmẹ ṣinyọnvọ etọn, bo ṣinyọn ede.

⁶⁶Devi lọ sọ dọ onú he é ko wà lẹpo na Isaki. ⁶⁷Isaki sọ hẹn ẹ wá ogohò Sala onọ etọn tọn mẹ, bo sọ yí Lebeka, bọ ewọ sọ lẹzùn asi etọn: é yíwán nẹ; Isaki sọ zùn mẹmiọnhomẹna to okú onọ etọn tọn godo.

¹ABLAHAM sọ yí asi devo, oyín etọn nọ yín Kẹtula ²E ji Zimlani nẹ̃, Joksani, po Mẹdani po, po Midiani po, po Iṣbaki po, po Sua po. ³Jọksani sọ ji Ṣẹba, po Dẹdani po. Visunnu Dẹdani tọn lẹ wẹ Asulimi, po Lẹtusimi po, po Lẹumimi po. ⁴Visunnu Midiani tọn lẹ wẹ Efẹli po Hanoku po, po Abida po, po Ẹldaa po. Ehelẹ po wẹ ovi Kẹtula tọn.

⁵Ablaham sọ yí onú he é tindo lẹpo na Isaki. ⁶Ṣigba hlan visunnu yọnnubẹtu tọn lẹ tọn he Ablaham tindo lẹ, Ablaham na núnina, bo sọ dè yé tọn sọn Isaki visunnu etọn de, to whenuena é tin to ogbè, hlan whèzetẹn dali, hlan otò whèzẹtẹn tọn dali.

⁷Ehelẹ wẹ azán owhè ogbè Ablaham tọn tọn he é hò; owhè kẹ̀nnẹfọtọ̀n. ⁸Ablaham sọ jo gbigbọ do, bo sọ kú to yọnhomẹ, mẹhóhó he gọ̀ na owhè susu, yè sọ hò e pli hlan omẹ etọn lẹ. ⁹Visunnu etọn lẹ, Isaki po Iṣmaeli po sọ di i to aigbaslo Makpela tọn mẹ, to odàn Ẹfloni tọn ji, visunnu Zohali Hittinu tọn, he tin to Mamle nukọn; ¹⁰danji he Ablaham hò to ovi Heti tọn lẹ si, finẹ wẹ yè di Ablaham do, po Sala asi etọn po.

¹¹E sọ wá jọ to okú Ablaham tọn godo, wẹ Jiwheyẹwhe dona Isaki visunnu etọn; Isaki sọ nọnè Bẹeli-lahai-loi dali.

¹²Ehelẹ wẹ whẹndo Iṣmaeli visunnu Ablaham tọn tọn, ehe Hagali, Egiptinu, deviyọnnu Sala tọn ji hlan Ablaham, ¹³ehelẹ sọ wẹ oyín visunnu Iṣmaeli tọn lẹ tọn, gbọn oyín yetọn dali kẹdẹdi whẹndo yetọn lẹ: plọnji Iṣmaeli tọn, Nẹbajotu; po Kedali po, po Adbẹeli po, po Mibsami po, ¹⁴po Miṣma po, po Duma po, po Massa po; ¹⁵po Hadadi po, po Tema po, Jẹtọli, Nafìsi, po Kedema po: ¹⁶ehelẹ wẹ visunnu Iṣmaeli tọn, ehelẹ sọ wẹ oyín yetọn, gbọn otòta yetọn lẹ dali, podọ gbọn oslahò yetọn lẹ dali; ahọvi wiawe kẹdẹdi akọta yetọn lẹ.

¹⁷Ehe sọ wẹ owhè ogbè Iṣmaeli tọn tọn, owhè kantọ̀nfọtọ̀nnukunawe: é sọ jo gbigbọ do bo kú; yè sọ hò é pli hlan omẹ etọn lẹ. ¹⁸Yé sọ nọnọ̀ sọn Havila kaka jẹ ṣuli, ehe tin to Egipti nukọn, dile hiẹ sọkọ Assìlia jei, é sọ gbọsi nukọn mẹmẹsunnu etọn lẹpo tọn.

¹⁹Ehelẹ sọ wẹ whẹndo Isaki tọn, visunnu Ablaham tọn tọn: Ablaham ji Isaki. ²⁰Isaki sọ yín owhè kande mẹho whenuena é yí Lebeka viyọnnu Bẹtueli Silianu Padan-alami tọn, nọviyọnnu Labani Silianu tọn nado yín asi etọn.

²¹Isaki sọ vè OKLUNỌ na asi etọn, na wènsinọ wẹ ewọ yín wutu: OKLUNỌ sè ovè etọn, Lebeka asi etọn sọ mọhò. ²²Ovi lẹ to sislo dopọ to ohò etọn mẹ; é sọ dọmọ, Eyin é yín mọ, etẹwutu wẹ yẹn to ogbè? é sọ yì nado dindona to OKLUNỌ de. ²³OKLUNỌ sọ dọ hlan ẹn, dọmọ,

²⁴Whenuena azán etọn nado jivi pé, dayi e go, ahoho de wẹ tin to adọ̀ etọn mẹ ²⁵Tintan tọ̀njẹgbonu vẹyãn, awutu etọn lẹpo di avọ̀ ofúnnọ; yé sọ ylọ oyín etọn dọ Esau. ²⁶To godo ẹnẹtọn wẹ nọvisunnu etọn sọ tọ̀n jẹgbonu alọ etọn hinhẹn afọgbẹ̀n Esau tọn go; yè sọ ylọ oyín etọn dọ Jakobu. Isaki sọ yín ọwhè kandeko mẹho whenuena é ji yé.

²⁷Yọpọsunnu lẹ sọ whén: Esau sọ yín gbéyàntọ zìnzìntọ, gbẹtọ danji tọn; Jakobu sọ yín gbẹtọ agbasa minẹnọ, bo nọnọ̀ ogohò mẹ. ²⁸Isaki yiwánna Esau, na é nọ dù sọn ogbélàn etọn mẹ wutu: Lebeka sọ yiwánna Jakobu.

²⁹Jakobu sọ dà yìnnó; Esau gò sọn danji, ẹ́ kuṣiọ, ³⁰Esau sọ dọ hlan Jakobu, dọmọ, Yí yìnnọdidà vẹyãn nẹ nado yìn mi, yẹn vẹ̀ we, na yẹn kusiọ: enẹwutu wẹ yè do nọ ylọ oyín etọn dọ Ẹdomi. ³¹Jakobu sọ dọmọ, Sè, jijihuhlọn towe hẹ mi whẹ́. ³²Esau sọ dọmọ, Dayi e go, yẹn tin to kúdònu; ale tẹwẹ jijihublọn wà hlan mi? ³³Jakobu sọ dọmọ, Yí onú de do whlé hlan mi tọ egbó, é sọ whlé hlan ẹn: bo sọ na jijihuhlọn etọn hlan Jakobu, ³⁴Jakobu sọ na akla po yìnnọdidà lẹntile tọn po Esau: é dù, bo nù, bo sọ fọ́n, bo yì: mọ Esau vlẹ jijihuhlọn etọn do.

¹OHÙVẸ do tin tọ aigba lọ ji, dogọ́ hùvẹ̀ he tin to azán Ablaham tọn lẹ mẹ. Isaki sọ yì Abimẹlẹki ahọlu Bilistinu lẹ tọn de to Gẹlali.

²Okluwọ sọ sọawúhia ẹ, bo dọmọ, A jẹte yì Egipti blo; nò aigba he tọn yẹn na dọ na we ji; ³wáwási to aigba he ji, yẹn nasọ tin hẹ we, bo nasọ dona we; na hlan hiẹ, podọ hlan okún towe wẹ yẹn na na aigba he lẹpo; yẹn nasọ hẹn whiwhlé he yẹn whlé hlan Ablaham otọ́ towe lódo; ⁴Yẹn nasọ hẹn okún towe jipligégé di sunwhlẹvu olọn tọn lẹ, yẹn nasọ na aigba helẹ hlan okún towe; na to okún towe mẹ wẹ akọta aihọn tọn lẹpo na yín donanọ te: ⁵na Ablaham yí ogbè ṣie sè wutu, bo sọ yìn asẹ ṣie, gbèdide ṣie, osẹ́ndai ṣie, po osẹ́n ṣie lẹ po wutù.

⁶Isaki sọ nọ̀ Gẹlali. ⁷Omẹ finẹ tọn lẹ sọ kàn asi etọn tọn biọ: é sọ dọmọ, Nọviyọnnu ṣie wẹ; na é dibú nado dọmọ, Asi ṣie; é dọ, Omẹ finẹ tọn lẹ nikã hù mi na Lebeka wutu; na é yónwhanpẹ na pinpọ́n wutu.

⁸E sọ wá jọ, whenuena é ko tin to finẹ na ojiẹ dindẹn, wẹ Abimẹlẹki ahọlu Fìlistinu lẹ tọn pọ́n gbonu, to vẹsẹnu, bo mọ, bo dayi e go, Isaki to aihúnda hẹ Lebeka asi etọn. ⁹Abimẹlẹki ylọ Isaki, bo dọmọ, Dayi e go, nugbo nugbo asi towe wẹ ewọ: na hiẹ dọmọ, Nọviyọnnu ṣie wẹ ewọ do? Isaki sọ dọ hlan ẹn, dọmọ; Na yẹn dọmọ, Yẹn nikã kú na ewọ wutu. ¹⁰Abimẹlẹki sọ domọ, Etẹwẹ hiẹ wà do mí he? dopo to gbẹtọ lẹ mẹ do ko zánhẹ asi towe mahòpón, hiẹ bo nasọ hẹn whẹgbledo wá míwle ji. ¹¹Abimẹlẹki sọ dosẹ́n na gbẹtọ lẹpo dọmọ Mẹdepope hẹ sọ doalọ dawe he, kavi asi etọn go, yè na hù i dándán.

¹²Whenẹnu wẹ Isaki dónu do aigba lọ ji, bo sọ mọ to owhè nẹ mẹ, kanweko donu sọha mọ: OKLUNỌ sọ dona ẹn. ¹³Dawe lọ sọ zùn mẹkiklo, bo to susu yì nukọn kaka é do lẹzùn mẹkiklo talala. ¹⁴E tindo adọkun lẹngbọ lẹ tọn, po adọkun kanlin tọn po, po whédo daho po; ònú etọn sọ vẹun na Filistinu lẹ. ¹⁵Odòtó he devi otọ́ etọn tọn lẹ ko kùn to Ablaham otọ́ eton whenu lẹpo, wẹ Filistinu lẹ hẹn dote, bo yí okó do sú yé.

¹⁶Abimẹlẹki sọ dọ hlan Isaki, dọmọ, Yì sọn mí de; na hiẹ yín huhlọnnọ hú míwlẹ. ¹⁷Isaki sọ tón sọn finẹ, bo whesla do agbàdo Gẹlali tọn mẹ, bo-sọ nọnọ̀ finẹ.

¹⁸Isaki sọ vó odòtó osìn tọn lẹ kùn, he yé ko kùn to Ablaham otọ́ etọn whenu, na Filistinu lẹ ko hẹn yé dote to okú Ablaham tọn godo: é sọ ylọ oyín yetọn kẹdẹdi oyín he otọ́ etọn ko do na yé.

¹⁹Devi Isaki tọn lẹ sọ kùndò to agbàdo lọ mẹ, bo mọ odòtò aaisa tọn de to finẹ. ²⁰Kanlinyintọ Gẹlali tọn lẹ núwhlẹn hẹ kanlinyintọ Isaki tọn lẹ, dọmọ, Mítọn wẹ osìn lọ: é sọ ylọ oyín odòtó lọ tọn dọ Esẹki ; na yé hòavùn hẹ ẹ wutu. ²¹Yé vó odòtò devo kùn, yé sọ whlẹn enẹ ga; é sọ ylọ oyín etọn dọ Sitna. ²²E sọ tón sọn finẹ, bo sọ kùn odòtó devo; enẹ wẹ yè ma whlẹn hẹ ẹ gba: é sọ ylọ oyín etọn dọ Lehoboti : é sọ dọmọ, Na dinvie wẹ OKLUNỌ basi otẹnmẹ na mí die, mìwlẹ nasọ yín sinsẹ́nnọ to aigba lọ ji.

²³E sọ hẹji sọn finẹ yì Bẹeli-ṣeba. ²⁴OKLUNỌ sọ sọawúhia ẹ to ozán nẹ mẹ, bo dọmọ, Yẹn Jiwheyẹwhe Ablaham otọ́ towe tọn wẹ: a dibú blo, na yẹn tin to de we, bo na dona we, bo na hẹn okún towe jipligégé na Ablaham devi ṣie wutu. ²⁵Ewọ sọ tùn agbà de to finẹ, bo yànavàle oyín OKLUNỌ tọn, bo sọ pẹ́n gohọ̀ etọn do finẹ, devi Isaki tọn lẹ sọ kùn odòtọ̀ de do finẹ.

²⁶Whenẹnu wọ Abimẹlẹki yi e de sọn Gẹlali, po Ahuzati po, họ́ntọn etọn, po Fikoli awhàngán daho etọn po. ²⁷Isaki sọ dọ hlan yé, dọmọ, Etẹwutu wẹ mi wá dè, na mi gbẹwanna mi, bo sọ yàn mi sọn mi de?

²⁸Yé sọ dọmọ, Míwlẹ mọ gbangba dọ OKLUNỌ tin hẹ we: mí sọ dọmọ, Dinvie gbọ whiwhlé ni tin to mí ṣẹnṣẹn, yèdọ to mí po hiẹ po ṣẹnṣẹn, na mí ni sọ nùalẹ́ de hẹ we; ²⁹dọ hiẹ ma na wàylan de do mí, dile míwlẹ ma doalọ go we, podọ dile míwlẹ ma ko wà núde do we, adavo dagbe, bo ko sọ dè we hlan gbonu jijọho: donanọ sọn OKLUNỌ de wẹ hiẹ dinvie.

³⁰E hẹjó yé, yé sọ dù, bo nù. ³¹Yé fọ́n to afọnnufú, bo sọ whlé hlan yénọzo: Isaki do yé hlan, yé sọ yi sọn e de jijọho.

³²E sọ wá jọ to gbèdoponẹ, wẹ devi Isaki tọn lẹ wá, bo dọ nẹ̀ gbọn odòtò he yé kùn tọn dali, dọmọ, Míwlẹ ko mọ osìn. ³³E sọ ylọ oyín etọn dọ Ẹiba: enẹwutu wẹ oyín otò lọ tọn do nọ yín Bẹeli-ṣeba kaka jẹ egbẹ́.

³⁴Whenuena Esau yín owhè kande mẹho, é yí na asi Juditi viyọnnu Bẹeli tọn Hittànu po Basemati po viyọnnu Elọni tọn Hittinu: ³⁵yé sọ yín adinọ ayiha tọn hlan Isaki po hlan Lebeka.

¹E sọ wá jọ, dọ whenuena Isaki whén, bọ nukun etọn súzin sọmọ bọ é ma to númọ, é ylọ Esau visunnu plọnji etọn, bo dọ hlan ẹn, dọmọ, Visunnu ṣie: ewọ sọ dọ hlan ẹn, dọmọ, Yẹn tin to ofi. ²E sọ dọmọ, Dayi ego dinvie, yẹn pòyónho, yẹn ma yọ́n azán okú ṣie tọn. ³Enẹwutu dinvie, Yẹn vẹ́ wẹ, yí gbéyannu towe lẹ, ogába towe, po ogágọ towe po, na a ni yi danji, bo yí gbélàn wá na mi: ⁴Bo dà olàn vivi na mi, ehe hunkọ yẹn yiwánna, bo zé wá na mi, na yẹn ni dù: na yen nido dona we whẹpo yẹn na do kú.

⁵Lebeka sè whenuena Isaki dọhó hlan Esau, visunnu etọn Esau. Esau sọ yì danji nado yànwẹn na ogbélàn. ⁶Lebeka sọ dọhó hlan Jakobu, visunnu etọn, dọmọ, Dayi e go, yẹn sè otọ́ towe dọhó hlan Esau nọvisunnu towe, dọmọ, ⁷Yí ogbélàn wá na mi, na a ni dà olàn vivi na mi, na yẹn nido dù, bo dona we to OKLUNỌ nukọn jẹnukọn na okú ṣie. ⁸Enẹwutu dinvie, visunnu ṣie, sè ogbè ṣie kẹdẹdi enẹ he yẹn na aṣẹ we na. ⁹Yì ogbọpa mẹ lò, bo yí gbọgbọẹ dagbedagbe ovú awe wá na mi sọn finẹ; yẹn na yí yé do dà olàn vivi na otọ́ towe di ehe hunkọ é nọ yiwánna: ¹⁰hiẹ nasọ zé e yì otọ́ towe de, na é nido dù bọ é na do dona we jẹnukọn na okú etọn.

¹¹Jakobu sọ dọ hlan Lebeka onọ etọn, dọmọ, Dayi e go, agbasafúnnọ wẹ Esau nọvisunnu ṣie, agbasa mimẹnọ wẹ yẹn. ¹²Eya otọ́ ṣie na doalọ ogo e pọ́n, yẹn bo nasọ di mẹklọtọ de hlan ẹn; yen nasọ dọn dẹhodo wá dẽ ji, é ma na yín dona gba.

¹³Onọ etọn dọ hlan ẹn, dọmọ, Ota ṣie wẹ dẹ́hodo towe ni nó, visunnu ṣie: yí ogbè ṣie sè ṣõkẹdẹ, bo yì, yí yé wá na mi.

¹⁴Ewọ yì, bo yí, bo hẹn yé wá onọ etọn de: onọ etọn sọ dá olàn vivi, ehe hunkọ otọ́ etọn yiwánna. ¹⁵Lebeka sọ yí avọ̀ dagbedagbe Esau visunnu etọn plọnji tọn, ehe tin to e de to họmẹ, bo yí yé do na Jakobu, visunnu etọn pẹvi. ¹⁶Ewọ sọ yí ayú gbọgbọẹ ovú lẹ tọn do alọ etọn lẹ go, podọ do okò mimẹ etọn go. ¹⁷E sọ yí olàn vivi lọ, po akla he é dà po do alọ Jakobu visunnu etọn tọn mẹ.

¹⁸Ewọ sọ wá otọ́ etọn de, bo dọmọ, Otọ́ ṣie: ewọ sọ dọmọ, Yẹn tin to ofi, hiẹ mẹnu wẹ, visunnu ṣie? ¹⁹Jakobu sọ dọ hlan otọ́ etọn, dọmọ, Yẹn Esau oplọnji towe wẹ, yẹn ko basi kẹdẹdile hiẹ dọ hlan mi do: fọ́n yẹn vé we, sinai bo dù sọn ogbọ́làn ṣie mẹ, na ayiha towe nido dona mi.

²⁰Isaki sọ dọ hlan visunnu etọn, dọmọ, Nawẹ é yín bọ hiẹ ko yawu gọ ẹn plaun domọ visunnu ṣie? Ewọ sọ dọmọ, OKLUNỌ Jiwheyẹwhe towe wẹ yawu hẹn gbékuna mì wutu wẹ.

²¹Isaki sọ dọ hlan Jakobu dọmọ, Sẹpó mi, yẹn vó we, na yẹn ni doalọgo we pọ́n, visunnu ṣie, eyín hiẹ visunnu ṣie Esau lọ wẹ, kavi lala. ²²Jakobu sọ sẹpọ́ Isaki otọ́ etọn: é sọ doalọ e go pọ́n, bo dọmọ, Ogbè Jakobu tọn wẹ ogbè, ṣigba alọ Esau tọn lẹ wẹ alọ lẹ. ²³Ewọ ma sọ yónẹn, na alọ yín ofúnnọ di alọ Esau nọvisunnu etọn tọn lẹ wutu: mọwẹ ewọ dona nẹ̃.

²⁴E sọ dọmọ, Bé hiẹ Esau visunnu ṣie lọ wẹ? E sọ dọmọ, Yẹn wẹ.

²⁵E sọ dọmọ, Zé e sẹpọ́ dẽ, yẹn nasọ dù sọn gbélàn visunnu ṣie tọn mẹ, na yẹn nido dona we. E zé e sẹpọ́ ẹ, é sọ dù; é zé ovẹ̃n nẹ̃, ewọ sọ nù.

²⁶Otọ́ etọn Isaki sọ dọ hlan ẹn, dọmọ, Sẹwá lò visunnu ṣie, bo donùnùgona mi. ²⁷E sọ sẹpọ́, bo donùnùgo nẹ: Ewọ sọ sè owán avọ́ etọn tọn, bo dona ẹn, bo dọmọ,

³⁰E sọ wá jọ, le Isaki ko dotana didona Jakobu vò, Jakobu bla nọ ma ko tón sọn Isaki otọ́ etọn nukọn, wẹ Esau, nọvisunnu etọn, biọ whégbè sọn gbéyàngbé. ³¹Ewọ ga sọ dà olàn vivi, bo hẹn wá otọ́ etọn de, bo dọ hlan otọ́ etọn, dọmọ, Gbọ otọ́ ṣie ni fọ́n bo dù sọn gbélàn visunnu etọn tọn mẹ, na hiẹ nido dona na mi.

³²Isaki otọ́ etọn sọ dọ hlan ẹn, dọmọ, Hie, mẹnu wẹ? E sọ dọmọ, Yẹn Esau plọnji towe wẹ.

³³Sisọsisọ sọ jẹ Isaki ji gbahúgbahú, é sọ dọmọ, Mẹnu ka wẹ ewọ he yí ogbélàn, bo hẹn ẹn wá dẽ, bọ yẹn ko dù sọn popo mẹ whẹpo hiẹ do wá, bo ko sọ dona ẹn? mọwẹ, donanọ wẹ é na yín.

³⁴Whenuena Esau sè ohó otọ́ etọn tọn lẹ, é yi awhá daho talala vivẹ do dawhá, bo sọ dọ hlan otọ́ etọn, dọmọ. Dona mi, yèdọ yẹn ga, otọ́ ṣie.

³⁵Ewọ sọ dọmọ. Nọvisunnu towe wá to bublu mẹ, bo ko yí odona towe yì.

³⁶E sọ dọmọ, Bé na yè ko ylọ ẹ oyín Jakobu wutu? dọ é ko gbòmọ na mi whlawe domọ? é yí jijibuhlon ṣie; bo, sọ dayi e go, dinvie é sọ yí dona ṣie. E sọ dọmọ, Bé hiẹ ma whlá dona de dai na mi?

³⁷Isaki sọ gblọn bo dọ hlan Esau, dọmọ, Dayi e go, yẹn ko yí ewọ do basi klunọ towe, podọ mẹmẹsunnu etọn lepo wẹ yẹn do basi devi etọn, ogbado po ovẹ̃n po wẹ yẹn yí do hẹn ẹn lódo, etewẹ yẹn nasọ wà na hiẹ lò, visunnu ṣie?

³⁸Esau sọ dọ hlan otọ́ etọn, dọmọ, Be dona nẹ dona dopo akan he hiẹ tindo wẹ, otọ́ ṣie? Esau sọ zé ogbè yìaga, bo viavi.

³⁹Isaki otọ́ etọn sọ gblọn hlan ẹn bo dọ, dọmọ,

⁴¹Esau sọ gbẹwanna Jakobu na dona he otọ́ etọn yí do dona ẹn wutu, Esau sọ dọ to ayiha etọn mẹ, domọ, Azán ohòninọ na otọ́ ṣie tọn sẹpọ́; whenẹnu wẹ yẹn na hù Jakobu nọvisunnu ṣie.

⁴²Yè sọ dọ ohó Esau visunnu plọnji etọn tọn lẹ na Lebeka: é sọ dowẹn bo ylọ Jakobu visunnu eton pẹvi, bo dọ hlan ẹn, dọmọ, Dayi e go, Esau, nọvisunnu towe, na towe tọn dali ko miọnhomẹ na ede na linlẹn nado hù we. ⁴³Enewutu dinvie, visunnu ṣie, yí ogbè siẹ sè; bo fọ́n, họ̀nyì Labani nọvisunnu ṣie de, to Halani; ⁴⁴bo nọ̀ e de azán vude, kaka adanjijẹ zogbe nọvisunnu towe tọn na do diọkọ; ⁴⁵kaka homẹgble nọvisunnu towe tọn nado diọkọ sọn de we, bọ é na do wọ̀n onú nẹ he hiẹ wà do e: whenẹnu yẹn na do omẹ hlan bo plan we sọn finẹ: etẹwutu we yè na do hẹn mì omẹ awe lẹ pó bú do mi gbèdopo?

⁴⁶Lebeka sọ dọ hlan Isaki, dọmọ, Onú ogbè ṣie tọn dikọna mi, na viyọnnu Heti tọn lẹ wutu: eyín Jakobu yí asi to viyọnnu Heti tọn lẹ me, di ehelẹ hunkọ sọn viyonnu aigba lọ tọn lẹ mẹ, dagbe tẹwẹ ogbè ṣie na wà na mi?

¹ISAKI sọ ylọ Jakobu, bo dona ẹn, bo na aṣẹ ẹ, bo dọ hlan ẹn, dọmọ, Hiẹ ma na yí asi to viyọnnu Kenani tọn lẹ mẹ gba. ²Fọ́n, yì Padan-alami, to owhé Bẹtueli tọn gbè, otọ́ onọ towe tọn, bo yí asi de sọn finẹ wá to viyọnnu Labani nọvisunnu onọ towe tọn lẹ mẹ. ³Jiwheyẹwhe Ganhunupo ni sọ dona we; bo hẹn we yín sinsẹ́nnọ, bo hẹn we jipligégé, na hiẹ nido yín agùn akọta lẹ tọn de tọn. ⁴Bo na dona Ablaham tọn hlan we, podọ hlan okún towe po hiẹ po ga: na hiẹ ni dugú aigba wási towe tọn lẹ, he Jiwheyẹwhe na hlan Ablaham.

⁵Isaki sọ do Jakobu hlan; ewọ sọ yì Padan-alami to Labani de, yisunnu Bẹtueli Silianu tọn, nọvisunnu Lebeka tọn, onọ Jakobu po Esau po tọn.

⁶Esau sọ mọ dọ Isaki ko dona Jakobu bo sọ do e hlan Padan-alami, nado yí asi sọn finẹ; podọ le é dona ẹn é na asẹ ẹ dọ, Hiẹ ma na yí asi to viyọnnu Kenani tọn lẹ mẹ gba; ⁷podọ Jakobu yí ogbè otọ́ etọn tọn po onọ etọn po tọn se, bo ko yì Padan-alami. ⁸Whenuena Esau sọ mọ dọ viyọnnu Kenani tọn lẹ ma jlo Isaki otọ́ etọn gba; ⁹Esau yì Iṣmaeli de, bo yí Mahalati, viyọnnu Iṣmaeli tọn, visunnu Ablaham tọn, nọviyọnnu Nẹbajoti tọn nado yín asi ẹtọn gọna ehe é tindo lẹ.

¹⁰Jakobu sọ tón sọn Bẹeli-seba bo yì Halani dali. ¹¹E sọ jẹ ofi lọ, bo nọte to finẹ to ozán lọ mẹ, na owhè ko biọ wutu; é yí dopo to osé he to ofi lọ lẹ mẹ do dokọ̀, bo mlọnai to finẹ nado damlọn. ¹²E sọ kudlọ, bo dayi e go, ayila de yè zé dote to aigba bọ aga etọn sú olọn: bo dayi e go, angẹli Jiwheyẹwhe tọn lẹ to jihẹ́, bo sọ to tejẹ to e ji. ¹³Bo dayi e go, OKLUNỌ site to aga etọn, bo dọmọ, Yẹn OKLUNỌ wẹ, Jiwheyẹwhe Ablaham otọ́ towe tọn, podọ Jiwheyẹwhe Isaki tọn: aigba he ji hiẹ mlọn nẹ, hiẹ wẹ yẹn na na ẹn hlan, podọ hlan okún towe; ¹⁴okún towe nasọ taidi kógudu aigba tọn; hiẹ nasọ vún hlan whèyìhọ dali, podọ hlan whèzẹtẹn dali, hlan agewàji dali, podọ hlan hùwàjì dali: to hiẹ mẹ podọ to okún towe mẹ wẹ yè na dona hẹnnu he to aigba ji lẹpo te. ¹⁵Bo dayi e go, yẹn tin hẹ we, bo na pọ́n ogo we to fie hiẹ yìyì lẹpo, bo nasọ hẹn we gọ̀wá aigba he ji: na yẹn ma na jo we do, kaka yẹn nado wà enẹ he yẹn ko dọ hlan we tọn dali.

¹⁶Jakobu sọ fọ́n sọn amlọn etọn mẹ, é bo sọ dọmọ, Nugbonugbo OKLUNỌ tin to ofi he; yẹn ma yónẹn. ¹⁷Obú di i, é sọ dọmọ, Ofi ka dobú ján! ehe ma yín ofi devo de, adavo ohọ̀ Jiwheyẹwhe tọn, ehe sọ wẹ hòngbo olọn tọn.

¹⁸Jakobu sọ fọ́n to afọnnufù, bo yí osé he é do dokò, bo yí i dote na kódòtin, bo kọ̀n amì do aga etọn ji. ¹⁹E sọ ylọ oyín ofi nẹ tọn dọ Beteli : aigba oyín tòdaho lọ tọn daì wẹ Luzi. ²⁰Jakobu sọ dopa de, dọmọ, Eyín Jiwheyẹwhe na tin hẹ mi, bo na pọ́n ogo e to aliho he yẹn gbọn jei he mẹ, bo na na dùdù mi nado dù, po avọ́ po nado ṣinyọn, ²¹bọ yẹn sọ lẹ́gọ̀ wá owhé otọ́ ṣie tọn gbè jijọto mẹ; bé OKLUNỌ na yín jiwheyẹwhe ṣie, ²²podọ osé he, he yẹn ko zé dote na kódòtin na yín ohò Jiwheyẹwhe tọn: podọ sọn enẹ he hiẹ na na mi lẹpo mẹ, yẹn na nọ na madao etọn hlan we dándán.

¹WHENẸNU wẹ Jakobu to yìyì to gbejizọnlin etọn ji, bo wá aigba ovi whèzẹtẹn lẹ tọn ji. ²E pọ́n, bo dayi e go odòtò de tin to danji; sọ dayi e go, kanlinpa lẹngbọ tọn mlọnai to e dali; na sọn odòtó lọ mẹ wẹ yé nọ na osìn kanlinpa lẹ: osé he tin to odòtó lọ nù sọ yín daho. ³Finẹ wẹ kanlinpa lẹpo nọ plidopọ do: yé sọ bli osé lọ sọn dòtọ́nù, bo na osìn lẹngbọ lẹ, bo sọ gò osé do dòtọ́nù lọ ji do otẹn etọn mẹ.

⁴Jakobu sọ dọ hlan yé, dọmọ, Mẹmẹsunnu ṣie emi, fie wẹ mìwlẹ sọn? Yé sọ dọmọ, Halani tọn wẹ mí sọn. ⁵E sọ dọ hlan yé, dọmọ, Mí yón Labani, visunnu Naholi tọn? Yé sọ dọmọ, Mí yón ẹn. ⁶E sọ dọ hlan yé, dọmọ, Onú to jijọho po e po? Yé sọ dọmọ, E to jijọho: bo dayi e go, Laheli, viyọnnu etọn ja po lẹngbọ lẹ po ⁷Ewọ sọ dọmọ, Payi e go, azán gbẹ pò to ote, mọ ojlẹ ma ko só bọ yè nado hò kanlin lẹ plidopọ; mì na osìn lẹngbọ lẹ, bo yì bo na núdùdù yé. ⁸Yé sọ dọmọ, Mí ma sọgan gba, kaka yè nado hò lẹngbọpa lẹ plidopọ, bọ yè bli osé sọn dòtònù whenẹnu wẹ mí nọ na osìn lẹngbọ lẹ.

⁹Whenu é to hódọ hẹ yé Laheli wá po lẹngbọ otọ́ etọn tọn lẹ po: na ewọ wẹ lẹngbọhọtọ. ¹⁰E sọ wá jọ, whenuena Jakobu mọ Laheli viyọnnu Labani nọvisunnu onọ etọn tọn po lẹngbọ Labani nọvisunnu onọ etọn tọn po, wẹ Jakobu sẹpọ́ odọ́n, bo bli osé sọn dotọ̀lọ ji, bo na osìn lẹngbọpa Labani nọvisunnu onọ etọn tọn. ¹¹Jakobu donùnùgona Laheli, bo sọ zé ogbè etọn daga, bo viavi ¹²Jakobu sọ dọ hlan Laheli, dọ, Nọvisunnu otọ́ etọn tọn wẹ emi, podọ visunnu Lebeka tọn wẹ emi: ewọ sọ họnwezun bo yì dọ na otọ́ etọn.

¹³E sọ wá jọ, whenuena Labani sè owẹ́n Jakobu visunnu nọviyọnnu etọn tọn, wẹ é họnwezun yì pé e, bo dón ẹn do ogo, bo donùnùgo né, bo sọ hẹn ẹn wá owhé etọn gbè. E sọ dọ onú helẹ pó na Labani. ¹⁴Labani sọ dọ hlan ẹn, dọmọ, Nugbonugbo ohú ṣie po agbasalàn ṣie po wẹ hiẹ. Bosọ sín e de hò osùn dopo.

¹⁵Labani sọ dọ hlan Jakobu, dọmọ, Nugbo hiẹ yín nọvisunnu ṣie, enẹwutu wẹ hiẹ na do sẹ́n mi vọnu la? etẹwẹ azónkuẹ towe na yín, dọ na mi?

¹⁶Labani tindo viyọnnu awe: oyin mẹho tọn nọ yín Lea, oyín pẹvi tọn sọ nọ yín Laheli ¹⁷Nukun Lea tọn bọ; ṣigba Laheli yín whanpẹnọ bo sọ yín dagbenọ. ¹⁸Jakobu yiwánna Laheli; é sọ dọmọ, Yẹn na sẹ̀n we hò owhè ṣinawe na Laheli viyọnnu towe pẹvi.

¹⁹Labani sọ dọmọ, E pónte dọ yẹn yí i na we hú dọ yẹn yí í na omẹ devo de.

²⁰Jakobu sọ sẹ́n hò owhè ṣinawe na Laheli; yé sọ taidi azán pẹvide to nukun etọn mẹ na owán he é yí nẹ̃ wutu. ²¹Jakobu sọ dọ hlan Labani, dọmọ, Yí asi ṣie na mi, na ázán ṣie ko pé wutu, na yẹn nido biọ họmẹ yì e de. ²²Labani sọ ylọ omẹ he to finẹ lẹpo pli, bo hẹjo. ²³E sọ wá jọ to otenu, é yí Lea viyọnnu etọn bo plan ẹn wá e de; ewọ sọ biọ họmẹ yì e de. ²⁴Labani sọ yí Zilpa lizọnyítọ etọn na Lea viyọnnu etọn, na lizọnyítọ de. ²⁵E sọ wá jọ to afọnnu etọn, dayi e go. Lea wẹ: é sọ dọ hlan Labani, dọ, Etẹwẹ hiẹ wà hẹ mi he? é ma yín Laheli wẹ yen sẹ́n we na, enẹwutu etẹwutu hiẹ do klọ mi?

²⁶Labani sọ dọmọ, Yè ma nọ wà mọ to otò mítọn mẹ fi gba nado na nọvi pẹvi jẹnukọn na plọnji. ²⁷Hẹn osènjọ ehe tọn pé, mi nasọ yi awetọ na we dogọ́ ga na sinsẹ́n he hiẹ nasọ sẹ́n mi na owhè ṣinawe devo. ²⁸Jakobu basi mọ, bo sọ hẹn osènjọ etọn pé: ewọ sọ yí Laheli viyọnnu etọn na ẹn na asi ga. ²⁹Labani sọ yí Bilha lizọnyítọ etọn na Laheli viyọnnu etọn, na lizọnyítọ etọn ³⁰Ewọ sọ biọ họmẹ yì Laheli de ga, é sọ yiwánna Laheli ga hú Lea, bo sọ sẹ̀n hẹ ẹ hò owhè ṣinawe devo ga.

³¹OKLUNỌ mọ dọ yè gbẹwanna Lea, é sọ hùn adò etọn: ṣigba Laheli yín Wẹ́nsinọ. ³²Lea mọhò, bo sọ jivi sunnu de, é sọ ylọ oyín etọn dọ Lẹubenì: na é dọmọ OKLUNỌ pọ́n nukunbibia ṣie nugbonugbo wutu; na dinvie wẹ asú ṣie na yiwánna mi.

³³E sọ mọhò devo, bo sọ ji visunnu de; bo dọmọ, Na OKLUNỌ ko sè dọmọ yè gbẹwanna mi wutu, enẹwutu wẹ é do na visunnu he mi ga: é sọ ylọ oyín etọn dọ Ṣimeoni.

³⁴E sọ mọhò devo, bo sọ jivi sunnu de; bo dọmọ, Dinvie he wẹ asú ṣie na dòn mi do ogo, na yẹn jivi sunnu atọ̀n tọ́ wutu: enẹwutu wẹ yè do ylọ oyín etọn dọ Levi.

³⁵E sọ mọhò devo, bo sọ jivi sunnu de: bo dọmọ, Ojlẹ he mẹ wẹ yẹn na pa OKLUNỌ: enẹwutu wẹ é do ylọ oyín etọn dọ Juda ; é sọ gbọ sọn vijiji go.

¹WHENUENA Laheli mọ dọ é ma jivi de na Jakobu, Laheli onú nọviyọnnu etọn tọn vẹun nẹ̃; é dọ hlan Jakobu, dọmọ, Na ovi mi, kavi é ma yín mọ yẹn na kú.

²Adi Jakobu tọn fọ́n do Laheli ji, é dọmọ, Otẹn Jiwheyẹwhe tọn mẹ wẹ yẹn te, mẹhe glọn sinsẹ̀n adó lọ mẹ tọn sọn de we?

³Ewọ sọ dọmọ, Dayi Bilha deviyọnnu ṣie go, biọ họmẹ yì e de: na ewẹ ni ji do akòn na mì, yẹn ga sọgan mọ ovi zéhẹn gbọn e dali. ⁴E sọ yí Bilha deviyọnnu etọn nẹ̃ na asi: Jakobu sọ biọ họmẹ yì e de.

⁵Bilha mọhò, bo ji visunnu de na Jakobu. ⁶Laheli sọ dọmọ, Jiwheyẹwhe ko dawhẹ̀ ṣie, bo ko sọ sè ogbè sié, bo yí visunnu do na mi ga: enẹwutu wẹ e do ylọ oyín etọn dọ Dani.

⁷Bilha deviyọnnu Laheli tọn sọ mọhò, bo sọ ji visunnu awetọ ná Jakobu. ⁸Laheli sọ dọmọ, Ahi daho wẹ yẹn di hẹ nọviyọnnu ṣie, yẹn sọ zìn in dai: é sọ ylọ oyín etọn dọ Naftali.

⁹Whenuena Lea mọ dọ, ewọ ko gbọ sọn vijiji go, é yí Zilpa deviyọnnu etọn bo yi i na Jakobu na asi. ¹⁰Zilpa deviyọnnu Lea tọn, sọ ji yisunnu de na Jakobu. ¹¹Lea sọ dọmọ, Tadagbe: é sọ ylọ oyín etọn dọ Gai.

¹²Zilpa deviyọnnu Lea tọn sọ ji visunnu awetọ na Jakobu. ¹³Lea sọ dọmọ, Jijọhonọ we yẹn! na yiyọnnu lẹ na nọ ylọ mi dọ jijọhonọ : é sọ ylọ oyín etọn dọ Aṣeli.

¹⁴Lẹubeni sọ tọ́nyì to olikún gbingbẹ̀n whenu, bo mọ mandlaki sinsẹ́n to danji, bo hẹn yé wà na Lea onọ etọn. Whenẹnu wẹ Laheli sọ dọ na Lea, dọmọ, Yen vẹ̀ we, na mi sọn mandlaki visunnu towe tọn lẹ mẹ. ¹⁵Ewọ sọ dọ hlan ẹn, dọmọ, Bé whẹhó pẹvi de wẹ dọ hiẹ yí asú ṣie sọ yì? hiẹ sọ na yí mandlaki visunnu ṣie tọn sọ yì ga? Laheli sọ dọmọ, Enẹwutu é na mlọnai hẹ we to ozán he mẹ na mandlaki visunnu towe tọn. ¹⁶Jakobu sọ gò sọn danji to otenu, Lea sọ tọnyì pé e, bo dọmọ, Hiẹ mananọma biọ họmẹ wá dẽ; na yẹn ko yí mandlaki visunnu ṣie tọn do da we. Ewọ sọ mlọnai hẹ ẹ to ozán nẹ mẹ. ¹⁷Jiwheyẹwhe sọ túntóai hlan Lea, é sọ mọhò, bo sọ ji visunnu atọntọ na Jakobu. ¹⁸Lea sọ dọmọ, Jiwheyẹwhe ko na azọ́nkue ṣie mi, na yẹn na deviyọnnu ṣie hlan asú ṣie wutu: é sọ ylọ oyín etọn dọ Issakali.

¹⁹Lea sọ mọhò, bo sọ ji visunnu sidopotọ na Jakobu. ²⁰Lea sọ dọmọ, Jiwheyẹwhe ko yí asúbiọnú dagbedagbe do nanú mi; lo wẹ asú ṣie na gbògbé na mi, na yẹn ji visunnu ṣidopo nẹ wutu: é sọ ylọ oyìn etọn dọ Zẹbuluni.

²¹To godo ehe tọn é ji viyọnnu de, bo ylọ oyín etọn dọ Dina.

²²Jiwheyẹwhe sọ flin Laheli, Jiwheyẹwhe sọ túntòai hlan ẹn bo hùn adọ̀ etọn, ²³Ewọ mọhò, bo ji visunnu de, bo dọmọ, Jiwheyẹwhe ko dè vlẹko ṣie sẹ̀. ²⁴E ylọ oyín etọn dọ Josefu; dọmọ, OKLUNỌ dè visunnu dopo dogọ́ na mì ga.

²⁵E sọ wá jọ whenu Laheli ji Josefu wẹ Jakobu dọ hlan Labani, dọmọ, Dè mi tọ́n, na yẹn ni yì otẹn ṣie tití mẹ, podọ otò ṣie mẹ. ²⁶Na asi ṣie lẹ mi, po ovi ṣie lẹ po, mẹhe yẹn sẹ̀n we na lẹ, na a ni gbọ yẹn ni yì; na hiẹ yọ́n sinsẹ̀n he yẹn sẹ̀n we.

²⁷Labani sọ dọ hlan ẹn, dọmọ, Yẹn vẹ̀ we, eyindọ yẹn mọ homẹdagbe to nukun towe mẹ,—yẹn ko mọnú dọ, OKLUNỌ dona mi na hiẹ wutu. ²⁸E sọ dọmọ, Dọ azọ́nkuẹ tọwẹ na mi, yẹn nasọ na we.

²⁹Ewọ sọ dọ hlan ẹn, domọ, Hiẹ yọ́n le yen sẹ̀n we do, podọ le whékanlin towe dẹn dẽ do. ³⁰Na vude wẹ hiẹ tindo whẹpo yẹn do wá, é ko sọ sudeji hlan susugégé de; OKLUNỌ ko dona we to fidepope yẹn lẹ́hlan: dinvie whetẹnu wẹ yẹn na wleawu dai na owhédo ṣie lọsu ga?

³¹E sọ dọmọ, Etẹwẹ yẹn ni na we? Jakobu sọ dọmọ, A na núde mi blo: eyín hiẹ na basi ehe na mi, yen na nọ yìn kanlinpa towe bo sọ nọ hò ẹ. ³²Yen na gbọn kanlinpa towe lẹpo mẹ egbé, bo diọtẹnna kanlin wlanwlan po owhẹnọ lẹ po sọn finẹ, podọ kanlin oyũ to lẹngbọ lẹ mẹ, podọ owhẹnọ po wlanwlan po to gbogbọẹ lẹ mẹ; enẹ lẹ nkọ na yín azọ́nkuẹ ṣie, ³³Mowẹ dódó ṣie na dekunnu na mi to sọgodo, whenuena hiẹ na wá gbọn azọ́nkuẹ ṣie tọn dali he tin to nukọn towe: ehe ma yín wlanwlan owhẹnọ to gbọgbọẹ lẹ ṣẹnṣẹn, podọ oyu to lẹngbọ lẹ ṣẹnṣẹn enẹ depope, eyín yè mọ to dẽ, yè na hia ẹ na finrìn.

³⁴Labani sọ dọmọ, Dayi e go, yẹn jlo ni nọ kẹdẹdi ohó towe. ³⁵E sọ diọtẹnna to gbenẹgbé alunkun alánọ flinflin po owhẹnọ lẹ po, po ogbọsì hẹ yín wlanwlan podọ owhẹnọ lẹ, po ehe tindo wéwé to awutu lẹ po, po oyú lẹpo po to lẹngbọ lẹ mẹ, bo yí yé do alọ mẹ na visunnu etọn lẹ; ³⁶é sọ yí azán atọ̀n gbejizọnlin tọn do ede po Jakobu po ṣẹnṣẹn: Jakobu sọ to kanlinpa Labani tọn he pò lẹ yìn.

³⁷Jakobu sọ yí opò lẹ sọn atinmu poplali tọn mẹ, sọn almondi tọn mẹ, podọ sọn atin didi tọn mẹ, bọ wlan whẹkan wéwé do yé me, bo hẹn wéwé he tin to opò lẹ go sọawúhia. ³⁸E sọ zé opò he é fleflona lẹ daga pànnukọn kanlinpa lẹ to dówhin lẹ mẹ, to sìnnutò lẹ mẹ fie kanlinpa lẹ nọ wá nado nùsìn te; yé sọ mọhò whenuena yé wá nado nùsìn. ³⁹Kanlinpa lẹ sọ mọhò to opò nẹlẹ nukọn, bọ ji kanlin alánọ lẹ, wlanwlan, owhẹnọ lẹ. ⁴⁰Jakobu sọ klán lẹngbọvú lẹ, bo lẹ́ nukunmẹ kanlinpa lẹ tọn hlan alánọ lẹ, po oyú lẹpo po to kanlinpa Labani tọn mẹ; é sọ bẹ́ hòpli etọn titi lẹ do apadopo, bo ma yí yé do kanlinpa Labani tọn lẹ mẹ gba. ⁴¹E sọ wá jọ whedepopenu kanlinpa hlọnhlọnnọ lẹ sọn kanlinpa mẹ mọhò, wẹ Jakobu nọ yí opò lẹ do aigba to nukọn na kanlinpa lọ to dówhin lẹ mẹ na yé nido mọhò to opò lẹ ṣẹnṣẹn; ⁴²ṣigba whenuena kanlinpa lọ yín madogán, ewọ ma nọ yí i do gba: mọwẹ madogán lẹ yín Labani tọn, ehe hlọnhlọnnọ lẹ sọ yín Jakobu tọn. ⁴³Dawe lọ sọ sudeji pligégé, bo sọ tindo kanlinpa susu, deviyọnnu, po devisunnu po, po kanklosọpoawenọ po, po kẹtẹkẹtẹ lẹ po.

¹E sọ sè ohó visunnu Labani tọn lẹ tọn he yé to didọ, dọmọ, Jakobu ko bẹ́ onú he yín otọ́ mítọn tọn lẹpo, podọ sọn enẹ mẹ he yín otọ́ mítọn tọn lẹ wẹ é tindo gigọ he lẹ. ²Jakobu sọ pọ́n nukunme Labani tọn, bo dayi e go, é ma sọ to le é te hlan dali etọn dai gba.

³OKLUNỌ sọ dọ hlan Jakobu, dọmọ, Légọ̀ yì aigba otọ́ towe tọn ji, yì hẹnnumẹ towe lẹ de; yẹn nasọ tin to de we.

⁴Jakobu sọ dowẹn bo ylọ Laheli po Lea po yì danji to fie kanlinpa etọn te, ⁵bo dọ hlan yé, dọmọ, Yẹn pọ́n nukun otọ́ mítọn tọn mẹ, é ma sọ to le é te hlan dali ṣie daidai gba; ṣigba Jiwheyẹwhe otọ́ ṣie tọn tin hẹ mi. ⁶Mìwlẹ sọ yọ́nẹn dọ huhlọn ṣie lẹpo wẹ yẹn yí do sẹ̀n otọ́ mítọn. ⁷Otọ́ mítọn sọ blu mi, bo diọ azọ́nkuẹ ṣie whla ao; ṣigba Jiwheyẹwhe ma dike é ni gble alọ do ogo e gba. ⁸Eyín é dọ le, dọ, Ehe alánọ lẹ wẹ na yín azónkuẹ towe, kanlin lẹpo nasọ ji alánọ: eyín é sọ dọ le, dọ, Ehe owhẹnọ lẹ na yín azọnkuẹ towe; whenẹnu wẹ kanlinpa lẹpo ji owhẹnọ. ⁹Le wẹ Jiwheyẹwhe yí kanlin otọ́ mítọn tọn lẹ, bo yí yé na mi. ¹⁰E sọ wá jọ to ojlẹ he mẹ kanlin lẹ mọhò te, bọ yẹn zé nukun ṣie daga, bo mọ to odlọ mẹ, bo, dayi e go, alúnkun he to kanlin lẹ yla lẹ yín owhẹnọ, alánọ, hianọ. ¹¹Angẹli Jiwheyẹwhe tọn sọ dọ hlan mi to odlọ mẹ, dọ, Jakobu: yẹn sọ dọmọ, Yẹn tin to ofi. ¹²E dọmọ, Zé nukun towe daga lò, bo pọ́n, alúnkun he to kanlin lẹ yla lẹ owhẹnọ, alánọ, po hianọ po wẹ; na yẹn ko mọ onú he Labani to wiwà do we lẹpo. ¹³Yen Jiwheyẹwhe Bet-eli tọn wẹ, fie hiẹ kòn amì do kòdòtin ji te, fie hiẹ dopana mi te: fọ́n dinvie, tónyì sọn aigba he ji, bo légó yì aigba hẹnnumẹ towe lẹ tọn ji.

¹⁴Laheli po Lea po sọ gblọn bo dọ hlan ẹn, dọmọ, Bé númimá po ogú de po so pò na mí to owhé otọ́ mítọn tọn gbè ba. ¹⁵Bé é ma yín ojonọ wẹ ewọ hia míwlẹ do dinvie? na é ko sá mí; bo ko sọ dù akuẹ he yè do suahọ mí tọn gbidigbidi. ¹⁶Na adọkun he Jiwheyẹwhe ko yí sọn otọ́ mítọn si, enẹ wẹ mítọn po ovi mítọn lẹpo po tọn: dinvie núdepope he Jiwheyẹwhe ko dọ hlan we wẹ a ni wà.

¹⁷Whenẹnu wẹ Jakobu sọ fọ́n, bo zé visunnu etọn lẹ, po asi etọn lẹ po hé kanklosọpoawenọ lẹ ji. ¹⁸E sọ bé kanlin etọn lẹpo yì, podọ núbépli etọn he é bépli lẹ, po kanlin he é tindo na ede lẹ po, he é ko bẹ́pli to Padan-alami, nado yì Isaki otọ́ etọn de to aigba Kenani ton ji. ¹⁹Labani ko yì nado pafún lẹngbọ etọn lẹ tọn: Lahẹli sọ fìn asanyin he yín otọ́ etọn tọn lẹ. ²⁰Jakobu sọ blu Labani Silianu na é ma dọ bo do họ̀nyì tọn wutu. ²¹Mowẹ è họ̀nyì po onú he é tindo lẹpo po: é sọ fọ́n, bo yì otọ̀ lọ godo, bo sọkọ osé Gilẹadi tọn dali.

²²Yè sọ dọ na Labani to azán atọ̀ntọ gbè dọ Jakobu ko họ̀nyì. ²³E sọ yí mẹmẹsunnu etọn lẹ dogọ́ ede, bo jẹmọ nẹ̃ hò azán ṣinawe gbejizọnlin; bo pla ẹ to osé Gilẹadi tọn ji.

²⁴Jiwheyẹwhe wá Labani Silianu de to odlọ mẹ to ozán mẹ, bo dọ hlan ẹn, dọmọ, Payido dewe, dọ hiẹ dọ dagbe kavi yìankan hlan Jakobu blo.

²⁵Labani sọ pla Jakobu. Jakobu ko pọ́n ogohọ̀ etọn do osé lọ ji: Labani po mẹmẹsunnu etọn po sọ whesla do osé Gilẹadi tọn ji. ²⁶Labani sọ dọ hlan Jakobu, dọmọ, Etẹ hiẹ wà he, bọ hiẹ ko blu mi bo bẹ́ viyọnnu ṣie lẹ yì di mẹmẹ glọ ohi tọn lẹ? ²⁷Etẹwutu wẹ hiẹ do bẹ́ họnyì, bọ hiẹ do blu mi; bọ hiẹ ma dọ na mi, na yẹn nido yí ayajijẹ po ohàn po, akòhún po ajalẹn po do do we yì; ²⁸bọ hiẹ ma sọ dike na yẹn ni donùnùgona visunnu po viyọnnu ṣie lẹ po? dinvie hiẹ gú na ehe hiẹ wà he. ²⁹Na yẹn tindo huhlọn to alọ ṣie mẹ nado wà oylan do mì: ṣigba Jiwheyẹwhe otọ́ mítọn tọn ko dọhó hẹ mi to zánmẹsọ, dọmọ, Payido dewe, dọ hiẹ dọ dagbe kavi ylankan hlan Jakobu blo. ³⁰Dinvie hiẹ ma sọgan nọma yì, na ayiha towe ko dón talala do owhé otọ́ towe tọn go wutu; ṣigba etẹwutu wẹ hiẹ fìn asanyìn ṣie lẹ sọ yi?

³¹Jakobu sọ gblọn bo dọ hlan Labani, dọmọ, Na yẹn dibú wutu wẹ: na yẹn sọ dọmọ, Eya hiẹ sọgan yí huhlọn do bẹ́ viyọnnu towe lẹ sọn asi e. ³²To alọ mẹdepope he tọn mẹ hiẹ mọ asanyìn towe lẹ te, ewọ sọ nọ ogbẹ̀ blo: to nukun mẹmẹsunnu mítọn helẹ tọn mẹ pọ́n onú he yín towe lẹ to dè, bo sọ yi i do dewe Je. Na Jakobu ma yónẹn dọmọ Laheli wẹ fìn yé gba.

³³Labani sọ biọ gohọ̀ Jakobu tọn mẹ, po gohọ̀ Lea tọn po mẹ, po gohọ̀ viyọnnu awe lẹ tọn po mẹ; ṣigba é ma mọ yé. Whenẹnu wẹ é tón sọn gohò Lea tọn mẹ, bo biọ gohò Laheli tọn mẹ. ³⁴Laheli wẹ ko yi asanyìn lẹ, bo sọ bẹ́ yé do aisinnú kanklosọpoawenọ tọn mẹ, bo sinai to yé ji. Labani sọ din ogohò lẹpo mẹ, ṣigba é ma mọ yé. ³⁵E sọ dọ hlan otọ́ etọn, dọmọ, Dike klunọ ṣie yín adinọ blo bọ yẹn ma sọgan tite to nukọn towe; na zinzán yọnnu lẹ tọn tin to ogo e. E sọ din ogohò mẹ pó, ṣigba é ma mọ asanyìn lẹ.

³⁶Jakobu sọ gblehomẹ, bo wọhẹ Labani: Jakobu sọ gblọn hlan Labani, dọmọ, Etẹwẹ tasinsẹn ṣie? etẹ sọ wẹ ylando ṣie bọ hiẹ do yí adán do domọna mi? ³⁷Bó le hiẹ gbà onú ṣie lẹpo pọ́n, etẹ wẹ hiẹ mọ to onú he tin to owhó towe gbè lẹpo mẹ? yí i dai to ofi to mẹmẹsunnu ṣie po mẹmẹsunnu towe lẹpo po nukọn, na yé ni dawhó to mí omẹ awe lẹ ṣẹnṣẹn. ³⁸Owhè oko dinvie wẹ yẹn tin to de we; lẹngbọ towe po gbọgbọẹ towe po ma kọ̀nhò, mọ yẹn ma hù alúnkun kanlinpa towe mẹ tọn lẹ dù. ³⁹Ehe okanlin lẹ hẹn tlẹn yẹn ma hẹn ẹn wá de we; yẹn ma wẹ yí gúgú e tọn; sọn alọ ṣie mẹ wẹ hiẹ biọ ẹ te, eyín yè fìn to okle kavi yè fìn to ozán mẹ. ⁴⁰Le wẹ yẹn te; ovẹ́ hùhù mi to okle, avivọ to hùhù mi to ozánmẹ; amlọn sọ họ̀nyì sọn nukun ṣie ji. ⁴¹Owhè oko dinvie wẹ yẹn ko tin to owhé towe gbè; yẹn sẹ́n we owhè wiẹnẹ na viyonnu towe awe lẹ, owhè ṣidopo na kanlin towe lẹ, hiẹ sọ diọ azọ́nkuẹ ṣie whla ao. ⁴²Adavo le Jiwheyẹwhe otọ́ ṣie ton, Jiwheyẹwhe Ablaham tọn, po Isaki tọn po ko tin hẹ mi, nugbonugbo alọ̀vọ́ wẹ hie do tùn mì hlan gbonu yì. Jiwheyẹwhe sọ mọ nakunbibia ṣie, po tukla alọ ṣie mẹ tọn po, bo do wọhẹ we to zánmẹsọ.

⁴³Labani sọ gblọn bo dọ hlan Jakobu, dọmọ, Viyọnnu ṣie lẹ wẹ viyọnnu lẹ, ovi ṣie lẹ wẹ ovi lẹ, okanlinpa ṣie wẹ okanlinpa lẹ, po enẹ he hiẹ mọ lẹpo po ṣie wẹ: etẹwẹ yẹn sọgan wà hlan viyọnnu ṣie helẹ to egbé, kavi hlan ovi yetọn he yé ji lẹ? ⁴⁴Dinvie wá, bo gbọ mí ni nùalẹ hẹ mínọzo, yẹn po hiẹ po; na é ni yín okunnu to yẹn po hiẹ po ṣẹnṣẹn.

⁴⁵Jakobu sọ yí osé de, bo zé e dote do basi kòdòtin. ⁴⁶Jakobu sọ dọ hlan mẹmẹsunnu etọn lẹ, dọmọ, Mì bẹ́ osé plidopọ; yé sọ yiosé, bo fli okiti; yé sọ dùnú to okiti lọ ji. ⁴⁷Labani sọ ylọ oyín etọn dọ Jẹgali—Sahaduta ; ṣigba Jakobu ylọ oyín etọn dọ Galẹedi. ⁴⁸Labani sọ dọmọ, Okiti he we kunnudetọ to yẹn po hiẹ po ṣẹnṣẹn to egbé. Enẹwutu wẹ yè do nọ ylọ oyín etọn dọ Galẹedi: ⁴⁹podọ Mizpa ; na é dọmọ, OKLUNỌ ni hó yẹn po hiẹ po, to whenuena mí na klán sọn mínọzo de. ⁵⁰Eyíndọ hiẹ bianukunna viyọnnu ṣie lẹ, kavi eyín hiẹ mọ asi devo dogó viyọnnu ṣie lẹ, omẹ de ma tin gọ́na mí; pọ́n, Jiwheyẹwhe wẹ kunnudetọ to yẹn po hiẹ po ṣẹnṣẹn. ⁵¹Labani sọ dọ hlan Jakobu, dọmọ, Dayi okiti he go, bo sọ dayi kòdòtin he go, ehe yẹn zé dote to yẹn po hiẹ po ṣẹnṣẹn. ⁵²Okiti he yín kunnudetọ, kòdòtin lọ sọ yín kunnudetọ, dọ yẹn ma na dasa okiti he do wá de we, podọ hiẹ ma na dasa okiti he, po kòdòtin he po wá dè, na danu. ⁵³Jiwheyẹwhe Ablaham tọn, Jiwheyẹwhe Naholi tọn, Jiwheyẹwhe otọ́ yetọn tọn, ni yín whẹ̀datọ to ṣẹnṣẹn mítọn. Jakobu sọ whló gbọn osi Isaki otọ́ etọn tọn dali.

⁵⁴Jakobu sọ na avọ́ núnina de to osé lọ ji, bo ylọ mẹmẹsunnu etọn lẹ nado dùnú: yé sọ dùnú, bo gbọsiai to ozán lọ mẹ to osé ji. ⁵⁵To afọnnufù, Labani fọ́n, bo donùnùgona visunnu etọn lẹ, po viyọnnu etọn lẹ po, bo dona yé: Labani sọ klán, bo lógó do otẹn etọn mẹ.

¹JAKOBU sọ gbọn aliho etọn jei, angẹli Jiwheyẹwhe tọn lẹ sọ pé e. ²Whenuena Jakobu mọ yé, é dọmọ, Awhànpa Jiwheyẹwhe tọn wẹ ehe: é sọ ylọ oyín finẹ tọn dọ, Mahanaimi.

³Jakobu sọ do wẹndagun jẹnukọn nẹ hlan Esau novisunnu etọn to aigba Seili tọn ji, to Ẹdomi danji. ⁴E sọ nagbè yé dọmọ, Le mí ni dọ hlan Esau, klunọ ṣie; Le wẹ devi towe Jakobu dọ, Yẹn ko yín wásinu to Labani de, yẹn ko sọ nò finẹ kaka jẹ dinvie. ⁵Yẹn sọ tindo oyín, po kẹtẹkẹtẹ po, po kanlinpa po, po devisunnu po, po deviyọnnu po: yẹn sọ do omẹ hlan nado dọ na klunọ ṣie, na yẹn nido mọ nukundagbe to nukun towẹ mẹ.

⁶Wẹndagun lẹ sọ lẹ́gọ̀ wá Jakobu de, dọmọ, Mìwlẹ jẹ Esau nọvisunnu towe de, é ja pipé we gbe ga, sunnusi fowe gọ́na ẹn.

⁷Whenẹnu wẹ búdi Jakobu talala, awutu etọn ma sọ jai: é sọ má mẹhe to e de lẹ, lẹngbọpa lẹ, po kanlinpa le po do awhànpa awe. ⁸Bo dọmọ, Eyín Esau jẹ awhànpa dopo de, bo gbà ẹ, bó awhànpa awetọ he pò na gán.

⁹Jakobu sọ dọmọ, Jiwheyẹwhe Ablaham otọ́ ṣie tọn, Jiwheyẹwhe Isaki otọ́ ṣie tọn, OKLUNỌ, he dọ hlan mi, dọmo, Légò yí aigba towe ji, yì hẹnnu towe lẹ de, yẹn nasọ wàdagbe na we: ¹⁰yẹn ma jẹ: na sinunsìnun sọn dagbewányí lẹpo mẹ, podọ sọn nugbo lẹpo tọn me, he hiẹ ko yihia hlan devi towe; na opò ṣie kẹdẹ wẹ yẹn hẹn do dasa Jọdani he, dinvie yẹn lẹzùn awhànpa awe.

¹¹Yẹn vẹ́ we, whlẹn mi sọn alọ nọvisunnu ṣie tọn mẹ, sọn alọ Esau tọn mẹ: na yẹn dibú nẹ̃, é nikã wá bo gbà mi, onọ po ovi lẹ po. ¹²Hiẹ dọmọ, Nugbonugbo yẹn na wàdagbe na we, yẹn nasọ basi okún towe di tọ̀kẹn ohù tọn, he yè ma sọgan hia na susugégé.

¹³E sọ gbọṣiai finẹ to ozán nẹ mẹ; bo sọ yí onú he tin to alọ etọn mẹ do basi núnina hlan Esau novisunnu etọn. ¹⁴Ogbọsi fọde, po alúnkun oko po, lẹngbọ fọde, po agbò oko po, ¹⁵kanklosọ asi poawenọ ogbàn, po ovi yetọn lẹ po, oyìnsi kande po oyìnsú ao po, ketẹkẹtẹ asi oko, po kẹtẹkẹtẹvu ao po. ¹⁶Bo yí yé do alọ mẹ na devi etọn lẹ, hòpli dopodopo do hajihaji; bo dọ hlan devi etọn lẹ, dọmọ, Mìwlẹ jẹnukọn na mi, bo pò tẹnmẹ do ṣẹnṣẹn na hòpli awelẹ. ¹⁷E sọ degbèna ehe jẹnukọn, dọmọ, Whenuena Esau nọvisunnu ṣie pé we, bo kanbiọ we dọmọ, Omẹ mẹnu tọn wẹ hiẹ? fie wẹ hiẹ sọ jei? podo mẹnu tọn wẹ ehe to nukọn towe lẹ? ¹⁸Whenẹnu wẹ hiẹ na dọmọ, Jakobu, devi towe tọn wẹ, núnina he é dohlan Esau, klunọ ṣie wẹ: bo dayi e go, ewlọsu tin to godo mítọn ga ¹⁹Mọwẹ é sọ degbèna awetọ, po atọ̀ntọ po, po mẹhe hodo ogbẹ́ nẹlẹ po, domọ, Le wẹ mì na dọhó hlan Esau do whenuena mì mọ en; ²⁰mì nasọ dọ humọ, dọmọ, Dayi e go, Jakobu devi towe tin to godo mítọn. Na é dọmọ, Yen na yí núnina he jẹnukọn na mi do vẹ, enẹgodo yẹn na wá mọ nukun etọn mẹ; eya é na kẹalọyí mi. ²¹Mọwẹ núnina lọ yì jẹnukọn nẹ: ewlọsu sọ gbọsiai finẹ to ozán nẹ mẹ to awhànpa lẹ mẹ.

²²E sọ fọ́n to ozán nẹ mẹ, bo yí asi etọn awe lẹ, po deviyọnnu etọn awe lẹpo, po visunnu etọn widopo lẹ po, bo dasa tòpesẹ Jabọku tọn. ²³Podọ é yí yé, bo do yé hlan tọ̀pẹsẹ lọ godo, bo sọ do onú he é tindo lẹ hlan tọ̀pẹsẹ godo.

²⁴E sọ pò Jakobu dopo akàn. Omẹ de so to ahidi hẹ ẹ to finẹ kaka jẹ afọnnufú ²⁵Whenuena é mọ dọ ewọ ma sọgan zín in dai, é doalọ dọnklan etọnmẹ; dọnklanmẹ Jakobu tọn sọ klán to pipetẹn, le é to ahidi hẹ ẹ. ²⁶E sọ dọmọ, Gbọ yẹn ni yì, na ai ko họ́n. E sọ dọmọ, yẹn ma na gbọ a ni yì gba, adavo hiẹ dona mi.

²⁷E sọ dọ hlan ẹn, dọmọ, Etẹwẹ oyín towe? E sọ dọmọ, Jakobu.

²⁸È dọmọ, Yè ma to oyín towe na ylọ Jakobu ba gba, adavo Islaeli : na hiẹ ko diahi hẹ Jiwheyẹwhe po gbẹtọ po, bo sọ zín in dai.

²⁹Jakobu sọ kanbiọ ẹ, bo dọmọ, Yẹn vè we, dọ oyín towe na mi. Ewọ sọ dọmọ, Etẹwutu wẹ hiẹ to oyín ṣie kanbiọ? é sọ dona ẹn to finẹ.

³⁰Jakobu sọ ylọ oyín finẹ lọ tọn dọ Pẹnieli : na yẹn mọ Jiwheyẹwhe nukun na nukun, yè sọ hla ogbẹ̀ ṣie dai.

³¹Le é zè Pẹnueli go, owhè yé do é ji, dọnklanmẹ etọn sọ kusẹ. Enẹwutu wẹ ovi Islaeli tọn lẹ ma do nọ dù okàn he hápó mẹ, he tin to dọnklanmẹ ji, kaka jẹ egbó: na é doalọ dọnklanmẹ na Jakobu to okàn he hápó mẹ wutu.

¹JAKOBU so zé nukun etọn daga, bo pòn, dayi e go, Esau wá, ewọ po sunnu fowe po. E sọ má ovi lẹ hlan Lea, podọ hlan Laheli, podo hlan deviyọnnu etọn awe lẹ. ²E sọ dè deviyọnnu lẹ po ovi yetọn lẹ po do nukọn, Lea po ovi etọn lẹ po hodo yé, Laheli po Josefu po do godo patapata. ³Ewọ lọsu yi nukọn na yé, bo jẹklo whla ṣinawe kaka é do sọ wá nọvisunnu etọn de.

⁴Esau sọ dowezun yì pé e, bo dòn ẹn dogo, bo tédo kògo nẹ̃, bo donùnùgo nẹ̃: yé sọ viavi. ⁵E sọ zé nukun etọn daga, bo mọ yọnnu lẹ po ovi lẹ po: bo kanbiọ ẹ dọmọ, Mẹnu wẹ mẹhe gọ́na we helẹ? Ewọ sọ dọmọ, Ovi he Jiwheyẹwhe yi nukundagbe etọn do na devi towe wẹ.

⁶Whenẹnu wẹ deviyọnnu lẹ sẹpò e de, yé po ovi yetọn lẹ po, yé sọ dẹ́ yéde. ⁷Lea ga ewọ po ovi eton lẹpo sẹpò e de, bo sọ dé yéde; enẹgodo wẹ Josefu po Laheli po sẹpò e de, ye sọ dé yéde.

⁸E sọ dọmọ, Etẹwẹ hiẹ lẹn gbọn awhànpa he yẹn pé nẹlẹpó tọn dali? Ewọ sọ dọmọ. Nado mọ nukundagbe to klunọ ṣie nukọn.

⁹Esau sọ dọmọ, Yẹn tindo pékò, nọvisunnu ṣie; yi ehe a tindo whlá na dewe.

¹⁰Jakobu sọ dọmọ, Lala, yẹn vẹ we, eyíndọ yẹn mọ nukundagbe to nukọn towe lò, bo yi núnina ṣie to alọ ṣie mẹ: sọle yẹn mọ nukun towe mẹ taidi omẹ he mọ Jiwheyẹwhe nukunmẹ, bọ homẹ towe sọ hùn do ogo e. ¹¹Yẹn vẹ̀ we, yi núnina ṣie he yè hẹn wá de we; na Jiwheyẹwhe ko yí nukundagbe do basi na mi wutu, podọ yẹn tindo pékọ̀ wutu. Ewọ dava ẹ, é sọ yi i.

¹²E dọmọ, Gbọ mí ni jẹ ali mítọn ji, na mí ni yì, yẹn na jenukọn na we.

¹³Ewọ sọ dọ hlan ẹn, dọmọ, Klunọ ṣie yònẹn dọ yọpọvu lẹ madogán, lẹngbọpa po oyín lẹ po he to anọná lẹ hẹn mi jẹtukla: eyín yè sọ yàn ye do wèzunji gbahú to gbèdopo, kanlinpa lẹpo wẹ na kú. ¹⁴Yẹn vẹ̀ we, gbọ klunọ síe ni jẹnukọn na devi etọn yì: yẹn ná plan yé dẹdẹ kẹdẹdi tẹnmẹ kanlin lẹ tọn he tin to nukọn na mi, podọ kẹdẹdi tẹnmẹ ovi lẹ tọn, kaka yẹn nado jẹ klunọ ṣie de to Seili.

¹⁵Esau sọ dọmọ, Bo gbọ ma kán gbẹtọ pẹvide dai gòna we sọn mẹhe tin to dẽ lẹ mẹ: ewọ sọ dọmọ, Etẹwútu? yẹn ni sá ko mọ nukundagbe to klunọ ṣie nukun mẹ.

¹⁶Mowẹ Esau gọ̀ gbọn ali etọn ji to azán nẹ̃ gbè yì Seili. ¹⁷Jakobu sọ zinzọnlin yì Sukkoti bo gbá ohọ̀ na ede, bo basi kanlin-họ̀ na kanlin etọn lẹ; enẹwutu wẹ yè nọ ylọ oyín ofi lọ tọn dọ Sukkoti.

¹⁸Jakobu sọ wá Ṣẹkẹmi jijọhọ mẹ, ehe tin to aigba Kenani tọn ji, whenuena é tòn sọn Padan-alami; bo pọ́n ogohò etọn do ótò lọ nukọn. ¹⁹E sọ hò aigba loboto de, to fie é pọ́n ogohò etọn do, to ovi Hamọli tọn lẹ si, otò Sẹkẹmi tọn, na fatakakuẹ kanweko. ²⁰E sọ tùn agbà de do finẹ, bo ylọ oyín etọn dọ El-Elohe-Islaeli .

¹DINA viyọnnu Lea tọn, he é ji hlan Jakobu sọ tònyì nado pọ́n viyọnnu otò lọ tọn lẹ. ²Sẹkemi, ovi Hamọli tọn Hivinu, ahọvi oto lọ tọn, sọ mọ ẹn; é yí i, bo zánhẹ ẹ, bo huwhẹ ẹ. ³Ayiha etọn sọ dòn do Dina viyọnnu Jakobu tọn go, é yiwánna awhli lọ, bo sọ dọhó dagbe hlan awhli lọ. ⁴Ṣẹkẹmi sọ dọ hlan Hamọli otọ̀ etọn, dọmọ, Mọ awhli he na mi nado da asi. ⁵Jakobu ko sè dọ é ko hẹn Dina viyọnnu etọn gble; bọ visunnu etọn lẹ tin po okanlin po to danji: Jakobu sọ nọabọẹ kaka yé do gọ̀.

⁶Hamọli otò Sẹkẹmi tọn sọ tòn yì Jakobu de, nado dọhó hẹ ẹ. ⁷Visunnu Jakobu tọn lẹ sọ gò sọn danji whenuena yé sè; homẹ omẹ ewlẹ tọn gble, adido yé talala, na é basi onú gbigble to Islaeli to zinzánhẹ viyọnnu Jakobu tọn mẹ wutu: onú he ma jẹ yè nado wà. ⁸Hamọli sọ dọhó hẹ yé, dọmọ, Ayiha Sẹkẹmi visunnu ṣie tọn yiwánna viyọnnu mítọn: yẹn sọ vẹ̀ mì, mì yi i na ẹn hlan asi. ⁹Mì ni nọ wlealọ hẹ mí; mì nọ yí viyọnnu mítọn lẹ na mí; bo sọ nọ yí oviyọnnu mítọn lẹ hlan mì. ¹⁰Míwlẹ nasọ nọnọ̀ hẹ mí: aigba lọ na tin to mì nukọn; mì nọnọ̀ e mẹ bo nọ wàjó to e mẹ, bo sọ tindo nútindo to e mẹ. ¹¹Ṣẹkẹmi sọ dọ hlan otò awhli lọ tọn podọ hlan mẹmẹsunnu etọn lẹ, dọmọ, Mì gbọ yẹn ni mọ nukundagbe to mì nukunmẹ, onú mì na dọ hlan mi yẹn na na. ¹²Mì biọ asimọnú po núnina sugégé po to alọ ṣie mẹ, yẹn na yí na mì kẹdẹdile mì na dọ hlan mi do: ṣigba mì sá ko yí awhli lọ na mi na asi.

¹³Visunnu Jakobo tọn lẹ sọ yí oklọ do gblọnhóna Ṣẹkẹmi po Hamọli otọ́ etọn po, bo dọmọ, na é ko hẹn Dina nọviyọnnu yetọn gble wutu, ¹⁴bo dọ hlan ye, dọmọ, Míwlẹ ma sọgan wà onú he gba, nado na nọviyọnnu mítọn whẹmagbonọ; na ovlẹ́ wẹ é yín hlan míwlẹ: ¹⁵ehe kẹdẹ ji wẹ míwlẹ na ylgbè hlan mì te: eyín mì na nọ̀ le míwle te, dọ yè ni gbowhẹna sunnu mítọn lẹ dopodopo; ¹⁶whenẹnu wẹ míwlẹ na yí viyọnnu mítọn lẹ na mì, bọ míwlẹ nasọ yí viyọnnu mítọn lẹ hlan mi de, bọ míwlẹ nasọ nọnọ̀ hẹ mì, bọ mí nasọ lẹzùn omẹ dopo. ¹⁷Ṣigba eyín míwlẹ ma tuntóai hlan mí na yè nado gbowhẹna; míwlẹ na yí viyọnnu mítọn, míwlẹ nasọ yì.

¹⁸Ohó yetọn sọ vivi na Hamọli, po Ṣẹkẹmi visunnu Hamọli tọn po. ¹⁹Ovi dẹpẹ lọ ma sọ hẹndote dẹn nado wà onú lọ gba, na é yiwánna viyọnnu Jakobu tọn wutu: na é yín yẹyinọ hú mẹhe to owhé otọ́ etọn lẹpo tọn gbè.

²⁰Hamọli po Ṣẹkẹmi visunnu etọn po wá hòngbo otò yetọn tọn ji, yé sọ dọhó hẹ gbẹtọ otò yetọn mẹ tọn lẹ, bo dọmọ, ²¹Omẹ helẹ yín jijọhonọ hẹ mí: enẹwutu mì gbọ yé ni nò aigba he ji, bo wàjọ́ to finẹ, na, dayi e go, aigba lọ klo sù na yé; mì gbọ mí ni nọ yí viyọnnu yetọn lẹ do do asi, na mí ni sọ nọ yí viyọnnu mítọn lẹ na yé ga. ²²To ehe kẹdẹ ji wẹ sunnu ewlẹ na yigbè hlan mí nado nọ̀hẹ mí, nado lẹzùn omẹ dopo, eyín yè gbowhẹna sunnu mítọn lẹpo kẹdẹdile yè gbowhẹna yéwlẹ do. ²³Bé mítọn ma wẹ kanlin yetọn, agbàn yetọn, whékanlin yetọn lẹpo na yín? gbọ míwlẹ ni sá ko yígbè na yé, yé nasọ nọnọ̀ hẹ mí.

²⁴Mẹhe tón sọn hòngbọ otò etọn tọn mẹ jẹgbonu lẹpo sọ dotóai hlan Hamọli po Sẹkẹmi visunnu etọn po; yè sọ gbowhẹna sunnu lẹpo, yé omẹ he tón sọn hòngbo otò etọn tọn mẹ jẹgbonu lẹpo. ²⁵E sọ wá jọ to azán atọ̀ntọ gbè, whenuena alán to yé go, visunnu Jakobu tọn awe, Simeoni po Levi po, nọvisunnu Dina tọn, dopodopo yetọn yí ohi etọn, bo wá otò lọ ji ajiji, bo hù sunnu lẹpo. ²⁶Yé sọ hù Hamọli po Ṣẹkẹmi visunnu etọn po to ohinu, bo dè Dina jẹgbonu sọn owhé Sẹkẹmi tọn gbè, bo tón yì. ²⁷Visunnu Jakobu tọn lẹ wá mẹhe yé hù lẹ de, bo hẹn otò lọ gble, na yé ko hẹn nọviyọnnu yetọn gble wutu. ²⁸Yé bẹ́ lẹngbọ yetọn, po oyín yetọn po, po kẹtẹkẹtẹ yetọn po, po onú he tin to otò mẹ lẹ po, po ehe tin to danji lẹ po; ²⁹po adọkun yetọn lẹpo po, po omẹ flinflin yetọn lẹ po, po asi yetọn lẹ po wẹ yé do yí mẹmẹglọ po ogbànna po, yèdọ onú he tin to owhé gbè lẹpo.

³⁰Jakobu sọ dọ hlan Simeoni po Levi po, dọmọ, Mì do magbọjẹ na mi nado hẹn mi nado lùnwán to mẹhe yín aigbanọ lẹ ṣẹnṣẹn to Kenaninu lẹ, po Pẹlizinu lẹ po ṣẹnṣẹn: yẹn pevide to sọha mẹ, yé na bé yéde plidopọ do oji e, bo sọ jẹ oji e: yẹn nasọ yín hùsúdo, yẹn po owhé ṣie po. ³¹Yé sọ dọmọ, Bó ewọ ni zán hẹ nọviyọnnu mítọn di hẹ gàlọtọ de wẹ?

¹JIWHEYẸWHE sọ dọ hlan Jakobu, dọmọ, Fọ́n bo hẹ́ji yì Beteli bo nọnọ̀ finẹ, bo tùn agbà de to finẹ hlan Jiwheyẹwhe mẹhe sọawúhia we whenuena hiẹ hòn sọn Esau nọvisunnu towe nukọn.

²Whenẹnu wẹ Jakobu dọ hlan owhédo etọn lẹ, po hlan mẹhe tin to e de lepo po, domọ, Mì bé vodun ojonọ he tin to ṣẹnṣẹn mítọn lẹ só, bo le mìde wó, bo diọ avọ̀ mítọn: ³bo gbọ mí ni fọ́n, bo hẹ́ji yí Beteli; yẹn nasọ tùn agbà de do finẹ hlan Jiwheyẹwhe, he siọ mi to nukúnbibia ṣie zángbè, bo sọ tin hẹ mi to aliho he yẹn gbọn yì mẹ. ⁴Yé sọ yí vodun ojonọ he tin to alọ yetọn mẹ hlan Jakobu, po tómẹnu he tin to otọ́ yetọn mẹ lẹpo po; Jakobu sọ yí yé whlá do ozùn glọ, he tin to Sẹkẹmi dali.

⁵Yé sọ jẹgbejizọnlìnji: obú sọn Jiwheyẹwhe de sọ jẹ otò he lédo yé pó lẹpo ji. Yé ma sọ domọna ovi Jakobu tọn lẹ gba.

⁶Mọwẹ Jakobu wá Luzi he tin to aigba Kenani tọn ji (enẹ wẹ Beteli), ewọ po mẹhe tin to e de lẹpo po. ⁷E sọ tùn agbà de do finẹ, bo ylọ oyín etọn dọ El-Beteli : na finẹ wẹ Jiwheyẹwhe hẹn ede sọawúhia ẹ te, whenuena é hón sọn nọvisunnu etọn nukọn.

⁸Dẹbola anónọ Lebeka tọn sọ kú, é sọ di i do agbàdo Beteli tọn mẹ to ókù lọ glọ: oyín etọn yè nọ ylọ dọ Allọnibakuti .

⁹Jiwheyẹwhe sọ sọawúhia hlan Jakobu whenuena é gò sọn Padan-alami, bo dona ẹn. ¹⁰Jiwheyẹwhe sọ dọ hlan ẹn dọmọ, Jakobu wẹ oyín towe: yè ma sọ to oyín towe na ylọ dọ Jakobu ba gba, ṣigba Islaeli wẹ oyín towe na nọ yín: é sọ ylọ oyín etọn dọ Islaeli. ¹¹Jiwheyẹwhe sọ dọ hlan ẹn, dọmọ, Yẹn Jiwheyẹwhe Ganhunupo wẹ: yín sinsẹ́nnọ, bo jipligégé; akọta, po awhànpa akọta tọn po wẹ na sọn de we, ahọlu lẹ nasọ tọ́n sọn adà towe mẹ. ¹²Aigba he yẹn ko na hlan Ablaham po Isaki po, hiẹ wẹ yẹn na yí na, podọ hlan okún towe to godo towe wẹ yẹn na yí aigba lọ na.

¹³Jiwheyẹwhe sọ lé yi aga sọn e de to fie é dọhó hẹ ẹ te. ¹⁴Jakobu sọ do kòdòtin de ai to fie e dọhó hẹ ẹ te, kòdòtin osé tọn, bo sọ kòn núnina nùnù do e ji, bo kòn amì do e ji. ¹⁵Jakobu sọ ylọ oyín fie Jiwheyẹwhe dọhó hẹ ẹ te dọ Bet-eli.

¹⁶Ye sọ jẹgbejizọnlinji sọn Bet-eli; é sọ pò pẹvide nado jẹ Ẹflati ajlu sẹ̀ Laheli; é sọ tin to ajipanu. ¹⁷E sọ wá jọ, whenuena é tin to ajipanu, wẹ ajinọ dọ hlan ẹn, dọ, A dibú blo: na dinvie hiẹ na tindo visunnu devo. ¹⁸E sọ wá jọ, le gbigbọ etọn to yìyì mẹ, (na e kú) wẹ é ylọ oyín etọn dọ Bẹn-oni : ṣigba otọ etọn ylọ oyín etọn Bẹnjamini . ¹⁹Laheli kú, yè sọ di i to aliho Ẹflati tọn ji, he yín Betlẹhẹm. ²⁰Jakobu sọ do kòdòtin de ai do yòdọ̀ etọn ji? enẹ wẹ kọ̀dòtin yọ̀do Laheli tọn kaka jẹ egbé.

²¹Islaeli sọ jẹgbejizọnlinji, bo dlẹn gohọ̀ etọn zẹ Edẹli go ²²E sọ wá jọ, whenuena Islaeli nọ̀ aigba lọ ji, Lẹubeni biọ họmẹ bo zánhẹ Bilha, ayọ̀ otọ etọn tọn: Islaeli sọ sè. Wiawe wẹ visunnu Jakobu tọn lẹ. ²³Visunnu Lea tọn lẹ: Lẹubeni plọnji Jakobu tọn, po Simeoni po, po Levi po, po Juda po, po Issakali po, po Zẹbuluni po: ²⁴visunnu Laheli tọn lẹ; Josefu po Bẹnjamini po: ²⁵visunnu Bilha, deviyọnnu Laheli tọn tọn lẹ: Dani po Naftali po: ²⁶visunnu Zilpa, deviyọnnu Lea tọn tọn lẹ; Gadi, po Aṣeli po. Ehelẹ wẹ visunnu Jakobu tọn lẹ, ehe yè ji hlan ẹn to Padan-alami.

²⁷Jakobu sọ wá Isaki otọ etọn de, to Mamle, to Kiliati-alba, he yín Hẹblon, to fie Ablaham po Isaki po yín wáẹinu te.

²⁸Azán Isaki tọn sọ yín owhè kẹ̀nnẹko ²⁹Isaki sọ jo gbigbọ do, bo kú, yè sọ bẹ́ ẹ pli hlan omẹ etọn lẹ de, é sọ whẹ́n, bo tindo azán susu: Esau po Jakobu po visunnu etọn lẹ sọ di i.

¹EHELẸ wẹ whẹndo Esau tọn, (enẹ wẹ Ẹdomi) ²Esau sọ mọ asi etọn lẹ sọn viyọnnu Kenani tọn lẹ mẹ; Ada, viyọnnu Eloni tọn, Hittinu, po Aholibama po, viyọnnu Ana tọn, viyọnnu Zebẹoni tọn, Hivinu. ³Basẹmati, viyọnnu Iṣmaeli tọn, viyọnnu Nẹbajoti tọn. ⁴Ada sọ ji Ẹlifazi hlan Esau; Basẹmati sọ ji Lẹueli. ⁵Aholibama ji Jẹusi, po Jalami po, po Kola po: ehelẹ wẹ visunnu Esau tọn he yè ji hlan ẹn to aigba Kenani tọn ji.

⁶Esau sọ yí asi etọn lẹ, po visunnu etọn lẹ po, po viyọnnu etọn lẹ po, po mẹhe tin to owhé etọn gbè lẹ po, kanlin etọn, po whékanlin etọn lẹ po, po onú he é bẹ́pli to aigba Kenani tọn ji lẹ pọ, bo yì aigba de ji sọn nukun Jakobu nọvisunnu etọn tọn mẹ. ⁷Na núbépli yetọn gbahú na yé nado nọ̀pọ; podọ aigba wásinu yetọn tọn lẹ ma sọ sọgan hẹn yé, na whékanlin yetọn lẹ wutu. ⁸Esau sọ nọ̀ osé Seili tọn ji: Esau wẹ Ẹdomi.

⁹Ehelẹ wẹ whẹndo Esau tọn, otọ́ Ẹdominu lẹ tọn, to osé Seili tọn ji, ¹⁰ehelẹ wẹ oyín visunnu Esau tọn tọn lẹ: Ẹlifazi, visunnu Ada tọn, asi Esau tọn, Lẹueli visunnu Basẹmati, asi Esau tọn tọn.

¹¹Visunnu Ẹlifazi tọn lẹ wẹ Temani, Omali, Zẹfo, Gatami, po Kẹnazi po. ¹²Timna wẹ yọnnudida Ẹlifazi tọn, visunnu Esau tọn; ewọ sọ ji Amalẹki hlan Ẹlifazi: ehelẹ sọ wẹ visunnu Ada, asi Esau tọn tọn.

¹³Ehelẹ wẹ visunnu Lẹueli tọn; Nahati, po Zẹla po, Ẹamma, po Mizza po: ehelẹ wẹ visunnu Basẹmati, asi Esau tọn tọn.

¹⁴Ehelẹ wẹ visunnu Aholibama tọn, viyọnnu Ana tọn, viyọnnu Zibẹoni tọn, asi Esau tọn: ewọ sọ ji Jẹusi hlan Esau, Jalami po Kola po.

¹⁵Ehelẹ so wẹ ogán daho to visunnu Esau tọn lẹ mẹ: visunnu Ẹlifazi tọn lẹ, plọnji Esau tọn, Temani ogán daho, Omali ogán daho, Zẹfo ogán daho, Kẹnázi ogán daho, ¹⁶Kola ogán daho, Gatami ogán daho, Amalẹki ogán daho: ehelẹ wẹ ogán daho lẹ he wá yì sọn Ẹlifazi mẹ to aigba Ẹdomi tọn ji; ehelẹ wẹ visunnu Ada tọn. ¹⁷Ehelẹ sọ wẹ visunnu Lẹueli tọn, visunnu Esau tọn; Nahati ogán daho, Zẹla ogán daho, Samma ogán daho, Mizza ogán daho: ehelẹ wẹ ogán daho lẹ he tón sọn Lẹueli mẹ to aigba Ẹdomi tọn ji; ehelẹ wẹ visunnu Basẹmati, asi Esau tọn tọn ¹⁸Ehelẹ so wẹ visunnu Aholibama tọn asi Esau tọn. Jẹusi ogán daho, Jalami ogán daho, Kola ogán daho: ehelẹ wẹ ogán daho lẹ he wá sọn Aholibama mẹ asi Esau tọn, viyọnnu Àna tọn. ¹⁹Ehelẹ wẹ visunnu Esau tọn, ehele sọ wẹ ogán daho lẹ: doponẹ sọ wẹ Ẹdomi.

²⁰Ehelẹ wẹ visunnu Seili Holinu tọn, mẹhe tin to aigba lọ ji lẹ; Lotani po Sobalí po, po Zibẹoni po, po Ana po, ²¹po Diṣoni po, po Ezẹli po, po Disani po: ehelẹ wẹ ogán daho Holinu lẹ tọn, visunnu Seili tọn to aigba Ẹdomi tọn ji. ²²Visunnu Lotani tọn lẹ wẹ Holi po Hemami po; nọviyọnnu Lotani tọn wẹ Timna. ²³Visunnu Ẹobali tọn wẹ ehelẹ; Alvam, po Manahati po, po Ebali po, Sefo, po Onami po, ²⁴Ehelẹ sọ wẹ visunnu Zibẹoni tọn; Aia po Ana po: ehe wẹ Ana lo mẹhe mọ tòsisá miyọnawú to zùngbo mẹ, le é to kẹtẹkẹtẹ Zibẹoni otọ́ etọn tọn lọ yìn. ²⁵Visunnu Ana tọn wẹ ehelẹ; Diṣoni po Aholibama viyọnnu Ana tọn po. ²⁶Ehelẹ sọ wẹ visunnu Diṣoni tọn, Hẹmdani, po Ẹṣbani po, po Itlani po, po Kẹlani po. ²⁷Visunnu Ezẹli tọn wẹ ehelẹ; Bilhaní, Zaavani po: Akani po ²⁸Visunnu Diṣani tọn wẹ ehelẹ; Uzi, po Alani pa ²⁹Ehelẹ sọ wẹ ogán daho lẹ he tẹ́n sọn Holinu lẹ mẹ; Lotani ogán daho, Ẹobak ogán daho, Zibẹoni ogán daho, Ana ogán daho. ³⁰Diṣoni ogán daho, Ezẹli ogán daho, Disani ogán daho: ehelẹ wẹ ogán daho he tọ́n sọn Holinu lẹ mẹ, kẹdẹdi ogán daho yetọn lẹ to aigba Seili tọn ji.

³¹Ehelẹ sọ wẹ ahọlu mẹhe dugán to aigba Ẹdomi tọn ji lẹ, whẹpo ahọlu de do dù do ovi Islaeli tọn lẹ ji ³²Bẹla, visunnu Bẹoli tọn duaholu to Ẹdomi; oyín otò etọn tọn nọ yín Dinhaba. ³³Bela kú, Jobabu visunnu Zẹla tọn, sọn Bozla mẹ, sọ duahọlu to oten etọn mẹ. ³⁴Jobabu sọ kú, Husami, he to aigba Temani ji tọn, sọ duahọlu to oten etọn mẹ. ³⁵Husami kú, Hadadi visunnu Bẹdadi tọn, mẹhe gbá Midiani to danji Moabu tọn sọ duahọlu to otẹn etọn me: oyín otò etọn tọn wẹ Aviti. ³⁶Hadadi kú, Samla, sọn Masleka mẹ, sọ duahọlu to otẹn etọn mẹ. ³⁷Samla kú, Saulu, sọn Lẹhoboti he tin to otò nẹ tó mẹ, sọ duahọiu to otẹn etọn mẹ. ³⁸Saulu kú, Baal-hanani, visunnu Akboli tọn, sọ duahọlu to otẹn eton mẹ. ³⁹Baal-hanani, visunnu Akboli tọn kú, Hadali sọ duahọlu to otẹn etọn mẹ: oyín otò etọn tọn wẹ Pau; oyín asi etọn tọn wẹ Mẹhetabeli, viyọnnu Matledi tọn, viyọnnu Me-zahabi tọn.

⁴⁰Ehelẹ sọ wẹ oyín ogán daho he tọn sọn Esau mẹ lẹ tọn; kẹdẹdi whódo yetọn, di otẹn yetọn, gbọn oyín yetọn mẹ; Timna ogán daho, Alva ogán daho, Jẹteti ogán daho; ⁴¹Aholibama ogán daho, Ela ogán daho, Pinoni ogán daho; ⁴²Kenazi ogán daho, Temani ogán daho; Mibzali ogán daho; ⁴³ogán daho Magdieli, ogán daho Ilami: ehelẹ yín ogán daho Ẹdomi tọn lẹ kẹdẹdi ninọ̀tẹn yetọn lẹ to aigba nútindo yetọn tọn. Ehe wẹ Esau otọ Ẹdominu lẹ tọn.

¹JAKOBU sọ nọ̀ aigba wáwási otọ́ etọn tọn ji to aigba Kenani tọn ji.

²Ehelẹ so wẹ whẹndo Jakobu tọn. Whenuena Josefu yín owhè fọtọ̀nnukunawe mẹho, é to kanlinpa hó hẹ mẹmẹsunnu etọn le, ewọ sọ yín yọ̀pọ to ovi Bilha tọn lẹ de podọ to ovi Zilpa tọn lẹ de asi otọ́ etọn tọn lẹ: Josefu nọ hẹn whẹjijẹ oylan gbọn yé dali wá otọ́ yetọn de. ³Islaeli yiwánna Josefu hú visunnu etọn lẹpo, na ewọ yín visunnu yọ́nho mẹ etẹn tọn wutu: é sọ basi awù tedona he tindo wunmẹ susu lẹ de nẹ̃ ⁴Nọvisunnu etọn lẹ sọ mọ dọ otọ́ yetọn yiwánna ewọ hú nọvisunnu etọn lẹpo; yé gbẹ́wan nẹ̃, bo ma sọ sọgan yí jijọho do dọhó hlan ẹn ba.

⁵Josefu sọ kudlọ de, bo dọ ẹ hlan nọvisunnu etọn lẹ, yé sọ vọ́ wangbẹ́ nẹ̃ deji. ⁶E dọ hlan yé, dọmọ, Yẹn vẹ́ mì, mi sè odlọ he yẹn ku. ⁷Na, dayi e go, míwlẹ to zinkán bla to danji ṣẹnṣẹn, bo, pọ́n, zinkan ṣie fọ́n, bo nọte titegbe gẽ: bo, dayi e go, zinkan mítọn tò lẹ́do, bo dẹ́ yéde hlan zinkán ṣie.

⁸Nọvisunnu etọn lẹ sọ dọ hlan ẹn, dọmọ, Bé hiẹ na dugán nugbonugbo do míwlẹ ji wẹ? kavi hiẹ na dohuhlọn nugbonugbo to mí ji wẹ? Yé sọ vọ́ wangbé nẹ̃ deji na odlọ etọn lẹ wutu, podọ na ohó etọn lẹ wutu.

⁹E sọ kudlọ devo dogọ́, bo sọ dọ ẹ hlan nọvisunnu etọn lẹ; bo dọmọ, Dayi e go, owhè po osùn po, pa sunwhlẹvu widopo po to yéde dé hlan mi.

¹⁰E sọ dọ ẹ hlan otọ́ etọn, podo hlan nọvisunnu etọn lẹ: otọ́ etọn sọ wọhẹ ẹ, bo dọ hlan ẹn, dọ, Etẹwẹ odlọ he hiẹ ku he? Bé yẹn po onọ towe po, po nọvisunnu towe lepo po nugbonugbo na wá nado dé míde hlan we hlan aigba we? ¹¹Onú etọn sọ vẹun na nọvisunnu etọn lẹ; ṣigba otọ́ etọn sọ ohó lọ whlá to ayiha mẹ.

¹²Nọvisunnu etọn lẹ sọ yì nado yìn kanlinpa otọ́ yetọn tọn to Sẹkẹmi ¹³Islaeli sọ dọ hlan Josefu, domọ, Ṣẹkẹmi ma wẹ nọvisunnu towe lẹ to kanlinpa yìn te? wá, yẹn na do we hlan yé de. Ewọ sọ dọ hlan ẹn, dọmọ, Yẹn tin to ofi. ¹⁴E sọ dọ hlan ẹn, dọmọ, Yẹn vẹ̀ we, yì pọ́n jijọho nọvisunnu towe lẹ tọn, po jijọho kanlinpa lẹ tọn po; bo hẹn owẹ̀n gò wá na mi. Mowẹ é do e hlan sọn agbàdo Hẹblon tọn mẹ yì, ewọ sọ jẹ Sẹkẹmi.

¹⁵Dawe de sọ mọ ẹn, dayi e go, é to dindanpé to danji: dawe lọ sọ kanbiọ ẹdọmọ, Etẹ din wẹ hiẹ te? ¹⁶Ewọ sọ dọmọ, Yẹn to nọvisunnu ṣie lẹ din: yẹn vẹ́ we, dọ fie yé to kanlinpa yetọn lẹ yìn te na mi. ¹⁷Dawe lọ sọ dọmọ, Yé ko yì sọn ofi; na yẹn sè yé to didọmọ, Mì gbọ mí ni yì Dotani. Josefu yì nọvisunnu etọn lẹ godo, bo mọ yé to Dotani.

¹⁸Yé mọ ẹn to aganu ja, whẹpo é na do sẹpé yé de, yé blanú do e go, nado hù i. ¹⁹Yé dọ hlan yénọzo, domọ, Dayi e go, odlọnọ lọ ja. ²⁰Enẹwutu mì wá dinvie, bo gbọ mí ni hù Í, bo dọ̀n ẹn dlan odò helẹ de mẹ, mí na dọmọ, Kanlin ylankan ko hù i dù: mí naso pọ́n onú he na gbọn godo odlọ etọn lẹ tọn.

²¹Lẹubẹni sè e, bo sọ whlẹn ẹn sọn alọ yetọn mẹ; bo dọmọ, Mì dike mí yi gbigbọ etọn blo. ²²Lẹubeni sẹ̀ dọ blan yé, dọmọ, Mì kọ̀n ohùn de dai blo, ṣigba mì zé e dlan odò he mẹ he tin to ozùngbo mẹ, ṣigba mì doalọ e go blo; na é nido whlẹn ẹn sọn alọ yetọn mẹ, nado hẹn ẹn wá otọ́ etọn de.

²³E sọ wá jọ, whenuena Josẹfu wá jẹ nọvisunnu etọn lẹ de, yé de awù Josẹfu tọn, awù tedona he tindọ wunmẹ susu lẹ he tin to e go. ²⁴Yé sọ zé e, bọ dlẹn ẹn do odò mẹ: odò lọ ko hú, ọsìn de ma to e mẹ gba.

²⁵Ye sọ sinai nado dùnú: yé sọ zé nukun yeton daga bo pọn, bo, dayi e go, ogbẹ́ ahisi Ismaelinu lẹ tọn gọ̀ sọn Gilẹadi, yé po kanklosọpoawenọ lẹ po, yé hẹn nuyọnwan po núsisa po, po zuya po jei Egipti. ²⁶Juda sọ dọ hlan nọvisunnu etọn lẹ, dọmọ, Ale tẹwẹ é na yín eyín mí hù nọvisunnu mítọn bo whlá ohùn etọn? ²⁷Mì wá, bo gbọ mí ni sà ẹ na Iṣmaelinu lẹ, mì dike alọ mítọn tin tọ e gọ blo; na nọvisunnu mítọn wẹ, agbasalàn mítọn. Nọvisunnu etọn lẹ sọ yí etọn se.

²⁸Midianu, ajọ́tọ lẹ, juwájei, yé sọ dọ́n ẹn, bo dè Josefu jẹgbonu sọn odò lọ mẹ, bo sà Josefu do Iṣmaelinu lẹ na fatakakue oko. Yé sọ hẹn Jọsefu yì Egipti.

²⁹Lẹubeni sọ gọ̀yì odò mẹ, bo, dayi e go, Josefu ma sọ tin to odò lọ mẹ; é sọ hẹn avọ̀ etọn tlẹn. ³⁰E sọ gọ̀wá nọvisunnu etọn lẹ de, bo dọmọ, Ovi lọ ma tin; finẹ, fie yẹn na gbọn?

³¹Yé sọ yí awù Jọsefu tọn, bo hù alúnkun dopo, bo ylọn awù lọ dọ ohùn lọ mẹ. ³²Yé sọ yí awù tedona he tindo wunmẹ susu lẹ dohlan; yé hẹn ẹn wá otọ́ yetọn de; bo dọmọ, Ehe wẹ míwlẹ mọ: pọ́n eyín awù visunnu towẹ tọn wẹ lò, kavi lala. ³³Ewọ yon ẹn, bọ sọ dọmọ, Awù visunnu ṣie tọn wẹ; kanlin ylankan ko hù i dù; nugbonugbo yè ko hẹn Josefu tlẹn do võvo. ³⁴Jakobu sọ hẹn avọ̀ etọn tlẹn, bo yí odẹ́vọ́ do adà etọn go, bo blawú na visunnu etọn azán susu. ³⁵Visunnu etọn lẹpo po viyọnnu etọn lẹpo po sọ fén nado mionbomẹ nẹ̃; ṣigba é gbẹ́ nado yín mẹmiọnhomẹna; é dọmọ, Na awúbla mẹ wẹ yẹn na zòn yì oyòdo mẹ yì visunnu ṣie de. Otẹ́ etọn sọ viavi nẹ.

³⁶Midianinu lẹ sà Josefu do Egipti hlan Potifali, dopo to ogán Falo tọn lẹ mẹ, awhàngan agbohọtọ tọn .

¹E sọ wá jọ to ojlẹ nẹ mẹ, wẹ Juda jẹte sọn nọvisunnu etọn lẹ de, bo zẹ̀ Adulaminu de de, oyín mẹhe tọn nọ yín Hila ²Juda sọ mọ viyọnnu Kenaninu de tọn to finẹ, oyín mẹhe tọn nọ yín Ṣua; é sọ yí i, bo biọ họmẹ yì e de. ³E sọ mọhò, bo jivi de: é sọ ylọ oyín etọn dọ Elì. ⁴E sọ mọhò devo, bo sọ jivi de; é sọ ylọ oyín etọn dọ Onani. ⁵E sọ mọhò devo, bo sọ jivi de; é sọ ylọ oyín etọn dọ Ṣela: é sọ tin to Kọzibi, whenuena é ji i.

⁶Juda sọ mọ asi na Eli plọnji etọn, oyín mẹhe tọn nọ yín Tamali. ⁷Eli plọnji juda tọn sọ yín mẹylankan to nukun OKLUNỌ tọn mẹ: OKLUNỌ so hù i. ⁸Juda sọ dọ hlan Onani, dọmọ, Biọ họmẹ yì asi nọvisunnu towe tọn de, bo wà azọn asú nọvisunnu tọn de hlan ẹn, bo fọ́n okún daga hlan nọvisunnu towe. ⁹Onani sọ yònẹn dọ okún lọ ma na yín etọn gba; é sọ wá jọ, whedepopenu é biọ họmẹ yì asi nọvisunnu etọn tọn de, é nọ kòn ẹn do aigba, é nikã na okún hlan nọvisunnu etọn. ¹⁰Onú he é wà sọ yín oylan to nukun OKLUNỌ tọn mẹ: é sọ hu i ga. ¹¹Whenẹnu wẹ juda sọ dọ hlan Tamali asi visunnu etọn tọn, dọmọ, Nọ̀ asúṣiosìlọ-ji to owhé otọ̀ towe tọn gbè kaka Ṣela visunnu ṣie nado whẹ́n: na é dọmọ, Ewọ nikã sọ kú ga di nọvisunnu etọn lẹ. Tamali sọ yi, bo nọ̀ owhé otọ̀ etọn tọn gbè.

¹²To ojlẹ dindẹn mẹ viyọnnu Ṣua tọn, asi Juda tọn sọ kú; whenuena yè sọ miọnhomẹna Juda, é yì lẹngbọfunpatọ etọn lẹ de to Timnati, ewọ po Hila hòntòn etọn, Adulaminu po.

¹³Yè sọ dọ hlan Tamali, dọmọ, Dayi e go, otò asú towe tọn jei Timnati nado pafunna lẹngbọ etọn lẹ. ¹⁴E sọ dè avọ̀ asúsiọsi etọn tọn sọn ogo, bo yí avọ̀ ajlalanọ do ṣinyọn nukunmẹ, bo gblavọ̀ etọn, bo sọ sinai to hòngbo Enaimi tọn ji, he tin to aliho Timnati tọn; na é mọ dọmọ Ṣela ko whén, bọ yè ma sọ yí i nẹ̃ na asi gba. ¹⁵Whenuena Juda mọ ẹn, é lẹn ẹn nado yín ayòdetọ de; na é ṣinyọnnu nukunmẹ wutu. ¹⁶E sọ zẹ̀ yì e de to alihotó, bo dọmọ, Yẹn vè wẹ, yì dọn, gbọ yẹn ni wá de we to họmẹ; na ewọ ma yọ́nẹn dọ asi visunnu etọn tọn wẹ gba. Ewọ sọ dọmọ, Etẹwẹ hiẹ na na mi, na hiẹ nido wá dẽ to họmẹ? ¹⁷E sọ dọmọ, Yẹn na do gbọgbọẹ ovu de hlan we sọn kanlinpa mẹ. Ewọ sọ dọmọ, Bé hiẹ na na gòdènú mi kaka hiẹ nado yí i dohlan. ¹⁸E sọ dọmọ, Etẹwẹ yẹn ni yí do dègò na we? E sọ dọmọ, Hiadonú towe, awàgàn towe, po opò towe he tin to alọ towe mẹ po. E sọ yí yé nẹ̀, bo wá e de to họmẹ, ewọ sọ mọhò gbọn e dali.

¹⁹E sọ fòn bo tònyì, bo dè avọ̀ ajlalanọ etọn sọn ogo, bo sọ yí avọ̀ asúṣiọsi etọn tọn gbla do ogo.

²⁰Juda sọ yí gbọgbọẹ ovu lọ dohlan ẹn gbọn alọ Adulaminu hòntòn etọn tọn mẹ, nado mọ gòdènú lọ yí sọn yọnnu lọ si: ṣigba ewọ ma mọ ẹn. ²¹Whenẹnu we é kanbio omẹ he tin to finẹ lẹ, dọmọ, Fie wẹ gàlọtọ nẹ te, he tin to Enaimi to alihotó? Yé sọ dọmọ, Gàlòtọ de ma ko tin to ofi gba. ²²E sọ lẹ́gọ̀ yì Juda de, bo dọmọ, Yẹn ma mọ ẹn gba; omẹ finẹ tọn lẹ ga sọ dọmọ. Gàlòtọ de ma tin to ofi gba. ²³Juda sọ dọmọ, Gbọ é ni yí i na ede, yè nikã dowinyan mí; dayi e go, yẹn do gbọgbọẹ ovu he hlan, hiẹ ma sọ mọ ẹn.

²⁴E sọ wá jọ to osùn atọ̀n nkọ godo wẹ ye dọ na Juda, dọ, Tamali asi visunnu towe tọn lọga; humọ dayi e go, é tin to ohò gbọn gàlilọ dali. Juda sọ dọmọ, Hẹn ẹn jẹgbonu wá, bo gbọ yè ni mò ẹn. ²⁵Whenuena yè hẹn ẹn jẹgbonu, é dowẹn dohlan otọ́ asu etọn tọn, dọmọ, Osunnu he tindo onú helẹ wẹ yẹn mọhò na: é sọ dọmọ, Yẹn vẹ̀ we hie, yòn ẹn, mẹnu tọn wẹ onú helẹ, hiadonú, awàgàn lẹ po opò po. ²⁶Juda sọ yígbè bo dọmọ, Ewọ ko yín dódónọ hú yẹn; sọle yẹn ma yí i na Ṣela ovi ṣie wutu. Ewọ ma sọ yòn ẹn dogọ̀ gbède ba.

²⁷E sọ wá jọ to ojlẹ he mẹ é tin to ajipanu, dayi e go, ahoho wẹ tin to adò etọn mẹ. ²⁸E sọ wá jọ whenuena é zọ̀n, wẹ dopo dè alọ de jẹgbonu: ajinọ yí sekan vè bo sìn do alọ nẹ́, dọmọ, Ehe whẹ̀whẹ̀ wẹ tòn. ²⁹E sọ wá jọ, le é dòn alọ etọn do godo, wẹ, dayi e go, nọvisunnu etọn tọ̀n jẹgbonu: é sọ dọmọ, Etẹwutu wẹ hiẹ do basi wiwọ na dewe? enẹwutu wẹ yè do ylọ oyín etọn dọ Pelezi. ³⁰To enẹgodo wẹ nọvisunnu etọn tònjẹgbonu, he tindo sekan vẹ to alọ etọn go: yè sọ ylọ oyín etọn dọ Zela.

¹YE ko hẹn Josefu jẹte wá Egipti: Potifali, ogán Palo tọn de, ogán agbohọtọ tọn, Egipitinu, họ̀ ẹ to Iṣmaelinu lẹ si, he hẹn ẹn jẹte wá finẹ. ²OKLUNỌ sọ tin hẹ Josefu, é sọ yín omẹ núyònna; é tin te owhé OKLUNỌ etọn Egiptinu lọ tọn gbè. ³Na iltunọ etọn sọ mọ dọ OKLUNỌ tin hẹ ẹ, podọ OKLUNỌ hẹn onú he é wiwà lẹpo yọ̀nwhanpẹ to alọ etọn mẹ. ⁴Josefu sọ mọ nukundagbe to nukun etọn mẹ, é sọ to sinsẹ́n ẹn: é sọ yí i do dogán do owhé etọn ji, onú he é tindo lẹpo wẹ é yí do alọ etọn mẹ. ⁵E sọ wá jọ sọn ojlẹ he mẹ é ko yí Josefu do dogán do owhé etọn ji, podọ do onú he é tindo lẹ ji, wẹ OKLUNỌ dona owhé Egiptinu lọ tọn na Josefu tọn wutu; dona OKLUNỌ tọn sọ tin to onú he é tindo to owhé gbè podọ to glegbo tọn lẹpo ji. ⁶E sọ jo onú é tindo lẹpo do alọ Josefu tọn me; é ma tlẹ sọ yòn onú é tindo lẹ de hú núdùdù he é nọ dù. Josefu sọ yín omẹ dagbe, bo sọ jọmẹ talala.

⁷E sọ wá jọ to onú helẹ godo, wẹ asi klunọ etọn tọn zé nukun etọn do Josefu go; bo sọ dọmọ, Mlọnai hẹ mi. ⁸Ṣigba ewọ kò, bo dọ hlan asi klunọ etọn tọn, dọmọ, Dayi e go, klunọ ṣie ma tlẹ yòn onú he tin to alọ ṣie mẹ to owhégbè, é ko yí onú he é tindo lẹpo do alọ ṣie mẹ; ⁹mẹhe sọ klo to owhe he gbè hú mi de ma tin; mọ é ma sọ yí núde whlá do mi, adavo hiẹ, na asi etọn wẹ hiẹ wutu: bé na yẹn sọgan wà oylan daho he do, bo wàylan do Jiwheyẹwhe? ¹⁰E sọ wá jọ, le é to didọ na Josefu egbésọegbésọ, bọ ewọ ma nató é nado mlọnai to e dali kavi nado nọ hẹ ẹ.

¹¹E sọ wá jọ to ojlẹ he mẹ, ewọ biọ họmẹ nado wàzòn etọn; bọ sunnu he to owhégbè lẹ de ma tin to họmẹ. ¹²Ewọ tẹ̀do avọ̀ Josefu tọn go, bo dọmọ, Mlọnai hẹ mi: ewọ sọ jo avọ̀ etọn do alọ etọn mẹ, bo họ̀n bo jẹgbonu. ¹³E sọ wá jọ, whenuena é mọ dọ Josefu jo avọ̀ etọn do alọ etọn mẹ, bo sọ họ̀n jẹgbonu, ¹⁴wẹ é ylọ hlan sunnu he to owhé etọn gbè lẹ, bo dọhó hlan yé, dọmọ, Pòn, é ko hẹn Heblu de wá owhégbè do mí de nado vlẹ mí: é biọ họmẹ wá dẽ nado mlọnai hẹ mi, yen sọ yí ogbè lélé do dawhá: ¹⁵é sọ wá jọ, whenuena é sè dọ yẹn zé ogbè ṣie daga bo dawhá, é jo avọ̀ do dè; bo hòn, bo tònjẹgbonu.

¹⁶E sọ yí avọ̀ Josẹfu tọn bòdai do e de kaka klunọ etọn do gòwá owhégbè. ¹⁷E sọ dọhó hlan ẹn kẹdẹdi ohó helẹ, dọmọ, Heblu devi he hiẹ hẹn wá mí de, biọ họmẹ wá dẽ nado vlẹ mi: ¹⁸é sọ wá jọ, le yẹn zé ogbè ṣie daga bo dawhá, é jo avọ̀ etọn do dẽ bo hòn jẹgbonu.

¹⁹E sọ wá jọ, whenuena klunọ etọn sè ohó asi etọn tọn lẹ, ehe é dọ hlan ẹn lẹ, dọmọ, Le wẹ devi towe wà hlan mi; homẹgble etọn fòngu. ²⁰OKLUNỌ Josefu tọn sọ yí i, bo yí i do ogànhò mẹ fie ogàntọ ahọlu tọn lẹ to ogàn mẹ te: é sọ tin to finẹ to agànhomẹ.

²¹Ṣigba OKLUNỌ tin hẹ Josefu, bo sọ wà dagbewányí nẹ̃, bo na nukundagbe e to ogànkọnnọtọ nukun mẹ. ²²Ogànkọnnọtọ sọ yí ogàntọ he tin to ogàn họmẹ lẹpo do alọ Josefu tọn mẹ; núdepope yé wà to finẹ, ewọ wẹ sọ yín wiwàtọ etọn. ²³Ogànkọnnọtọ ma pòn núdepope he tin to alọ etọn mẹ; na OKLUNỌ tin hẹ ẹ wutu, podọ onú he é to wiwà OKLUNỌ nọ hẹn ẹn yọ̀nwhanpẹ.

¹E sọ wá jọ to onú helẹ godo wẹ ahànkọ̀nnọtọ ahọlu Egipti tọn tọn, po núdàtọ etọn po do wàylan do OKLUNỌ yetọn ahọlu Egipti tọn go. ²Falo gblehomẹ do ogán etọn awe lẹ go, do ogán ahànkònnọtọlẹ tọn, podọ do ogán núdàtọ lẹ tọn go. ³E sọ yí yé do mẹlọmẹ to owhé ogán mẹhọtọ lẹ tọn gbè, do ogàn họmẹ to ofi he yè dogàn Josefu do. ⁴Ogán mẹhọtọ tọn lẹ sọ degbèna Josefu to yé ji, é sọ to lizọnyí na yé: yé sọ dẹn na whenu de to mẹlọmẹ.

⁵Yé omẹ awe lẹ sọ kudlọ de, odlọ mẹtọnmẹtọn to ozán doponẹ mẹ, omẹ dopodopo kẹdẹdi otadena odlọ etọn tọn, ahànkònnọtọ po núdàtọ ahọlu Egipti tọn tọn po, he yè dogàn do ogànhò mẹ. ⁶Josefu sọ wá yé de to afọnnu bo mọ yé, dayi e go yé to awúbla. ⁷E sọ kanbiọ ogán Falo tọn he tin hẹ ẹ to mẹlọmẹ to owhé klunọ etọn tọn gbè lẹ dọmọ. Etẹwutu wẹ nukun mítọn lẹ to nupòn sù mọ to egbé? ⁸Yé sọ dọ hlan ẹn, dọmo Mí kudlọ, omẹ de ma tin bo na deta etọn na mí. Josefu sọ dọ hlan yé, dọmọ, E ma yín Jiwheyẹwhe tọn wẹ otadena? Yẹn vẹ̀ mì, mì dọ na mi.

⁹Ogán ahànkònnọtọ le tọn dọ odlọ etọn na Josefu, bó dọ nẹ̃, dọmọ, To odlọ ṣie mẹ, dayi e go, ovẹntin de tin to nukọn ṣie, ¹⁰to ovéntin lọ mẹ wẹ ala atọ̀n te: é sọ taidi e tónkùn, osẹ́ etọn sọ tónjẹgbonu; ohín eton sọ sén sinsẹ́n ovẹ̃n bibia; ¹¹kọfo Falo tọn sọ tin to alọ ṣie mẹ: yẹn sọ yí ovẹ̃n sinsén lọ, bo fìnyọn ẹn do kọfo Falo tọn mẹ: yen sọ yí kọfo lo do alọ Falo tọn mẹ ¹²Josefu sọ dọ hlan ẹn, dọmọ, ehe wẹ otadena etọn: ala atọ̀n lẹ azan atọ̀n wẹ; ¹³whẹpo azán atọ̀n na pe Falo na zé ota towe daga, bo na gọ̀ we do azọ́nhọ̀ towe mẹ: hiẹ naso yí kofo Falo tọn do alọ etọn mẹ, kedẹdi walọ nukọn tọn whenuena hie yín ahànkònnọtọ etọn. ¹⁴Ṣigba flin mi whenuena e na yọn na we, bo do dagbewányí hia mi yẹn vẹ̀ we, bo dọhó ṣie hlan Falo, na a ni yí mi sọn owhé he gbè. ¹⁵Na nugbonugbo yè fìn mi sọn aigba Heblu lẹ tọn ji: podọ to ofi ga yẹn ma wà núde bọ yè sọ yí mi do ogànhò me.

¹⁶Whenuena ogán núdatọ lẹ tọn mọ dọ otadena lọ yọn, é sọ dọ hlan Josefu, dọmọ. Yẹn ga tin to odlọ ṣie mẹ, bo dayi e go, oha akla wéwé atọ̀n tọn to Ota ṣie, ¹⁷To oha aga tọn mẹ wẹ núdùdù hihi alọpálọpa tin te na Falo; ohẹ̀ lẹ sọ to dùdù i sọn oha he to ota na mi lọ mẹ.

¹⁸Josefu sọ gblọn bo dọmọ, Ehe we otadena etọn: oha atọ̀n lẹ azán átòn wẹ; ¹⁹whẹpo azán atọ̀n na pé Falo na zé ota towe sọn ogo we, bo nasọ yí we pla dọ atin de go, ohẹ lẹ nasọ dù olàn towe sọn ogo we.

²⁰E sọ wá jọ to azán atònto gbè he yín jijízán Falo tọn, wẹ é dà núdùdù hlan devi etọn lẹpo: é sọ, zẹ ota ogán ahànkònnọtọ lẹ tọn po ogán núdàtọ lẹ tọn po daga to devi etọn lẹ ṣẹnṣẹn. ²¹E sọ gò ogán ahànkònnọtọ lẹ tọn do otẹn ahànkònnọtọ tọn etọn mẹ, é sọ to kọfo yí dalọmẹ na Falo: ²²ṣigba é do ogán núdàtọ lẹ tọn agònnu: dile Josefu ko detana hlan ye do. ²³Gãnṣo ogán ahànkònnọtọ lẹ tọn ma flin Josefu gba, ṣigba è wòn ẹn.

¹E so wá jọ to podo owhè awe gigọ́ tọn mẹ, wẹ Falo kudlọ: dayi e go, e to ote to otọ̀ tó. ²Bo, dayi e go, oyìn asi ṣinawe he yọnwhanpẹ bọ ojò pé tón sọn otọ́ lọ mẹ; yé sọ to dùdù to fánkàn mẹ. ³Bo, dayi e go, oyín asi ṣinawe devo he ylanwhanpẹ, bo sọ gblekan, tón to godo yé tọn jẹage sọn otọ̀ lọ mẹ; Yé so site to oyìn asi nẹlẹ de to otọ̀ lọ tónu ⁴Oyín asi he ylanwhanpẹ bo sọ gblekan le dù oyín asi ṣinawe he yọ̀nwhanpẹ bọ ojò pé. Mọwẹ Falo fọ́n.

⁵E sọ damlọn bo sọ kudlọ whlawetọ bo, dayi e go, ohín ṣinawe ogbado tọn wá ogetin dopo ji, to haji bo sọ yọ̀nwhanpẹ. ⁶Bo, dayi e go, ohín ṣinawe, otófo yè yi jehọn whèzẹtẹnwàji tọn do hẹn yé, tonkùn jẹgbonu to godo yé tọn. ⁷Ohín tófo lẹ sọ zé ṣinawe he tò bo sọ gó le mì. Falo sọ fọ́n, bo, dayi e go, odlọ de wẹ.

⁸E sọ wá jọ to afọnnu bọ ayiha etọn ma mọ gbọjẹ; é dewẹn bo ylọ nújlẹtọ Egipti tọn lẹ, po núyọnẹntọ etọn lẹ po; Falo sọ dọ odlọ etọn; ṣigba omẹ de ma tin he sọgan detana yé hlan Falo.

⁹Whenẹnu wẹ ogán ahànkònnọtọ lẹ tọn dọ hlan Falo, dọmọ, Yẹn flin owhẹylan ṣie to egbé: ¹⁰Falo ko yín homẹgbletọ do devi etọn lẹ go, bo yí mi do mẹlọmẹ to owhe ogán mẹhọtọ lẹ tọn gbè yẹn po ogán núdàtọ lẹ tọn po: ¹¹míwlẹ sọ kudlọ to ozán doponẹ mẹ, yẹn po ewọ po; mí kudlọ omẹ dopodopo kẹdẹdi tadena odlọ etọn tọn. ¹²Yọposunnu de sọ tin to finẹ to mí de, Heblu de, devi ogán mẹhọtọ; lẹ tọn; mìwlẹ dọ nẹ̃, é sọ detana odlọ mítọn lẹ hlan mí; hlan omẹ dopodopo kẹdẹdile odlọ etọn te wẹ é detana do ¹³E sọ wá jọ, le é detana hlan mí do, mọwẹ é sọ yín; yẹn wẹ yè gòdo azọ́nhò ṣie mẹ, ewọ wẹ yè sọ doagònnu. ¹⁴Whenẹnu wẹ Falo do omẹ hlan bo ylọ Josefu, yé sọ hẹn ẹn wá plaun sọn gàhhọmẹ: é lùnda etọn, bo diọ awù etọn, bo bio họmẹ wá Falo de. ¹⁵Falo sọ dọ hlan Josefu, dọmọ, Yẹn kudlọ de, omẹ de ma sọ tin he sọgan deta e tọn: yẹn ko sọ sè gbọn dali towe, dọ whenuena hiẹ sè odlọ de hiẹ sọgan deta etọn.

¹⁶Josefu sọ gblọnna Falo, dọmọ, E ma tin to yẹn mẹ gba: Jiwheyẹwhe na na ogbègblọn jijọho tọn Falo.

¹⁷Falo sọ dọhó hlan Josefu, dọmọ, To odlọ ṣie mẹ, dayi e go, Yẹn site to otọ̀ tó: ¹⁸Bo, dayi e go, oyín asi ṣinawe de tọn sọn otọ̀ mẹ jẹage-he ojò pé, bo sọ yọ̀nwhanpẹ; yé to dùdù to ofánkàn mẹ: ¹⁹bo, dayi e go, oyín asi ṣinawe devo he ylanwhanpẹ talala bo gblekan, hunkọ he yẹn ma mọ gbede to aigba Egipti tọn lẹpo ji na yinylan, tọn to godo yé tọn jẹage; ²⁰oyìn asi he gblekan bo sọ ylanwhanpẹ lẹ dù oyín asi ṣinawe tintan he ojò pó lẹ: ²¹whenuena yé dù yé yè ma sọgan yónẹn dọ yé ko dù yé gba; ṣigba yé gbẹ́ sọ gblekan jãnwẹ, kẹdẹdile yé te whẹ́whẹwhenu Mọwẹ yen sọ fọ́n. ²²Yẹn sọ mọ to odlọsie mẹ, bo dayi e go, ohín ṣinawe wa ogetin dopo ji he gọ́ bo yọ́n: ²³bo, dayi e go, ohín ṣinawe lẹ, yé, tófo, he yè yí jẹhọn whèzẹtẹnwàji tọn do hẹn yé, sọ tọnkùn wá, aga to godo yé tọn: ²⁴ohín tófo lẹ ze ohín dagbe ṣinawe lẹ mì: yẹn sọ dọ ẹ hlan nujlẹtọ lẹ; ṣigba omẹ de ma tin he sọgan dọ ẹ hlan mi gba.

²⁵Josefu sọ dọ hlan Falo, dọmọ, Odlọ Falo tọn dopo wẹ: onú he Jiwheyẹwhe to pipọ na wà wẹ é dọ hlan Falo. ²⁶Oyín asi dagbedagbe ṣinawe lẹ, owhè ṣinawe wẹ, podọ ohín dagbedagbe ṣinawe lẹ owhè ṣinawe wẹ: doponẹ wẹ odlọ lọ ²⁷Oyín asi ṣinawe lẹ, he gblekan bo sọ ylanwhanpẹ lẹ, he tọ́njẹgbonu to godo yé tọn owhè ṣinawe wẹ; podọ ohín tófo ṣinawe lẹ ga he jẹhọn whèzetenwàji tọn hen yọ lẹ, yé na yín owhè ṣinawe huvẹ tọn. ²⁸Enẹ wẹ onú he yẹn dọ hlan Falo: núhe Jiwheyẹwhe to pipọ na wa é ko dohia hlan Falo. ²⁹Dayi e go, owhè ṣinawe nupọ̀ tọn daho ja aigba Egipti tọn lẹpo ji lẹ́do: ³⁰to godo yé tọn owhè ṣinawe huvẹ tọn na fọ́n; nupọ̀ lẹpo wẹ yè nasọ wọ̀nji e go to aigba Egipti tọn ji; huvẹ nasọ và aigba lọ; ³¹yè ma to nupọ̀ lọ na yónẹn to aigba lọ ji gba gbọn huvẹ he na hodo tọn dali; na é na yín yinylan gbahúgbahú. ³²Podọ na enẹ he yè yi odlọ lọ basi do awejì hlan Falo, é yín na dọ yè hẹn onú lọ lódo gbọn Jiwheyẹwhe dali wutu wẹ, Jiwheyẹwhe nasọ hẹnṣè to yọ́yọ́vie. ³³Enẹwutu dinvie gbọ Falo ni pọ́n gbẹtọ zinzìntọ núyónẹntọ de bo dè e do aigba Egipti tọn nù. ³⁴Gbọ Falo ni basi ehe, bo gbọ é ni dè ogán lẹ do aigba lọ nù, bo yi madatón aigba Egipti tọn tọn to owhè ṣinawe nupó lọ tọn lọ mẹ. ³⁵Bo gbọ yé ni bẹ́ nudùdù owhè dagbe he wá helẹ tọn pli, bo bó ogbado ph to alọ Falo tọn glọ na núdùdù to tòdaho lẹ mẹ, bo gbọ yé ni whlá ẹ. ³⁶Núdùdù lo nasọ tin na agbànhò de hlan aigba lọ do ote pọn owhè ṣinawe huve tọn lẹ, he na tin to aigba Egipti tọn ji: aigba lọ nikã dọ̀n gbọn huvẹ lọ dali.

³⁷Onu lọ sọ yón to nukun Falo tọn mẹ, podọ to nukun devi etọn lẹ tọn tọn mẹ. ³⁸Falo sọ dọ hlan devi etọn lẹ, dọmọ, Mí sọgan mọ mẹde di ehe hunkọ, omẹ he mẹ gbigbọ Jiwheyẹwhe tọn tin te? ³⁹Falo sọ dọ hlan Josefu, dọmọ, Sọle he Jiwheyẹwhe ko hẹn onú he lẹpo zùn yinyọnẹn na we, omẹ zìnzìntọ núyọnẹntọ de ma sọ tin sọ hiẹ gba: ⁴⁰hiẹ na tin to owhé ṣie ji, podọ dile ohó towe te wẹ yè na dogán do omẹ ṣie lẹ ji do: kiki to ofìn ji kẹdẹ wẹ yẹn na yín kiklohú we.

⁴¹Falo sọ dọ hlan Josefu, dọmọ, Pọn, yẹn ko dè we do aigba Egipti tọn lẹpo nù. ⁴²Falo sọ dè alọké ohia tọn sọn alọ etọn mẹ, bo yí do alọ Josefu tọn mẹ, bo vàṣọ nẹ̃ to awù alàvò dagbedagbe tọn lẹ mẹ, bo yí sika gẹ̀dẹ do okò etọn; ⁴³é sọ hẹn ẹn hẹ́ kẹkẹ awetọ he é tindo mẹ; yé sọ to awhádo to nukọn etọn, Jẹklo : é sọ dè e do aigba Egipti tọn lẹpo nù. ⁴⁴Falo sọ dọ hlan Josefu, dọmọ, Yẹn wẹ Falo, matin hiẹ omẹ de ma na zé alọ etọn kavi afọ etọn daga to aigba Egipti tọn lẹpo ji. ⁴⁵Falo sọ ylọ oyín Josefu tọn dọ Zafẹnat-panea; é sọ yí Asẹnati viyọnnu Poti-fẹla yẹwhenọ Oni tọn tọn nọ̀ na asi. Josefu sọn tón yì aigba Egipti tọn lẹpo ji. ⁴⁶Josefu sọ yín owhè ogbàn whenuena é site to Falo ahọlu Egipti tọn nukọn. Josefu sọ tón sọn Falo nukọn, do dlu gbọn aigba Egipti tọn lẹpo ji.

⁴⁷To owhè ṣinawe nupò tọn lẹ mẹ, aigba jẹ́ji gbọn gigó-gigó me. ⁴⁸E sọ bé núdùdù owhè ṣinawe lẹ tọn lẹpo pli he tin to aigba Egipti tọn ji, bo bó núdùdù whlá do tòdaho lẹ mẹ; núdùdù danji tọn, he tin to tòdaho dopodopo mẹ lẹ́do wẹ é bé pli do doponẹ lọ mẹ. ⁴⁹Josefu sọ bẹ́ ogbado pli di otòkén ohu tọn, gbahúgbahú, kaka é do gbọ sọhahiana; na é yín matin osọha.

⁵⁰Ovisunnu awe wẹ yè ji hlan Josefu whẹpo owhè huvẹ tọn lọ do wá, ehe Asẹnati viyọnnu Poti-fẹla yẹwhenọ Oni tọn tọn ji hlan ẹn. ⁵¹Josefu sọ ylọ oyín oplọnji tọn dọ Manassẹ; Na, é dọ, Jiwheyẹwhe ko hẹn mi wọ̀n oya ṣie lẹpo, po owhè otọ́ ṣie tọn lẹpo po. ⁵²E sọ ylọ oyín awetọ tọn dọ Eflaimi : Na Jiwheyẹwhe ko hẹn mi yín sinsẹ́nno to aigba nukunbibia ṣie tọn ji.

⁵³Owhè ṣinawe nupò tọn lẹ he tin to aigba Egipti tọn ji wá opòdo. ⁵⁴Owhè ṣinawe huvẹ tọn lẹ ṣẹ̀ nado wá, kẹdẹdile Josefu ko dọ do: huvẹ sọ tin to aigba lẹpo ji; ṣigba to aigba Egipti tọn lẹpo ji núdùdíi tin. ⁵⁵Whenuena yè hẹn huvẹ hù aigba Egipti tọn lẹpo, gbẹtọ lẹpo dawhá hlan Falo de na núdùdù: Falo sọ dọ hlan Egiptinu lẹ, dọ, Mì yì Josefu de; núhe é dọ hlan mì, mì basi. ⁵⁶Huvẹ lọ sọ tin to nukunmẹ aigba tọn lẹpo tọn ji: Josefu sọ hùn agbànhó lẹpo, bo sà ogbado hlan Egiptinu lẹ; huvẹ lọ sọ sinyẹn to aigba Egipti tọn ji. ⁵⁷Otò lẹpo sọ to Egipti wá to Josefu de na nado hò ogbado; na huvẹ lọ yín sinsinyẹn to aigba lẹpo mẹ wutu.

¹JAKOBU mọ dọ ogbado tin to Egipti, Jakobu sọ dọ hlan visunnu etọn lẹ, dọmọ, Etẹwutu wẹ mì to mínọzo pọ́n? ²E sọ dọmọ, Dayi e go, yẹn sè dọ ogbado tin to Egipti: mì jẹte yì odọn na mì ni hò sọn finẹ wá na mí; na mí nido nọgbó bo ma kú.

³Mẹmẹsunnu Josefu tọn ao lẹ sọ jẹte yì nado hò ogbado sọn Egipti. ⁴Ṣigba Bẹnjamini, nọvisunnu Josefu tọn, Jakobu ma dohlan po mẹmẹsunnu etọn lẹ po gba: na é dọmọ, Eya oylan de nikã jọ do e go.

⁵Visunnu Islaeli tọn lẹ wá nado hò ogbado to yé mẹhe wá lẹ mẹ: na huvẹ tin to aigba Kenani tọn ji. ⁶Josefu sọ wẹ otògán to aigba lọ ji; ewọ wẹ mẹhe to sisà hlan gbẹtọ lẹpo sọn aigba lọ ji: mẹmẹsunnu Josefu tọn lẹ sọ wá, bo dé yéde hlan ẹn po nukunmẹ yetọn po hlan aigba.

⁷Josefu sọ mọ mẹmẹsunnu etọn lẹ, é sọ yón yé, ṣigba basi ede ojonọ hlan yé, bo sọ dọhó hẹ yé po adán po; bo dọ hlan yé, dọmọ, Fie wẹ mì sọn? Yé sọ dọmọ, Sọn aigba Kenani tọn ji nado hò núdùdù.

⁸Josefu yón mẹmẹsunnu etọn lẹ, ṣigba yówlẹ ma yón ewọ gba. ⁹Josefu sọ flin odlọ he é ku gbọn yé dali lẹ, bo sọ dọ hlan yé, dọmọ, Amé wẹ mìwlẹ; nado mọ omé aigba lọ tọn wẹ mì do wá.

¹⁰Yé sọ dọ hlan ẹn, dọ, Lala, klunọ ṣie, adavo nado hò núdùdù wẹ devi towe lẹ do wá. ¹¹Visunnu sunnu dopo tọn wẹ mí omẹ pó; gbẹtọ nugbonọ wẹ míwlẹ, devi towe lẹ ma yín amé gba.

¹²E sọ dọ hlan yé, dọ, Lala, ṣigba nado mọ omé aigba lọ tọn wẹ mì do wá.

¹³Yé sọ dọmọ, Mí devi towe lẹ mẹmẹsunnu wiawe wẹ mí, visunnu sunnu dopo tọn to aigba Kenani tọn ji; bo, dayi e go, agọ̀gbọnẹn tin to egbó he to otọ́ mítọn de, dopo wẹ ma sọ tin to ogbé.

¹⁴Josefu sọ dọ hlan yé, dọ, Enẹ wẹ ehe yẹn dọ hlan mì, dọmọ, Amé wẹ mì: ¹⁵ehedali wẹ yè na mòdòna mì te: gbọn ogbé Falo tọn dali, mì ma na yì sọnfi, adavo agọ̀gbọnẹn nọvisunnu mítọn wá ofi. ¹⁶Mì do dopo mítọn hlan, bo gbọ é ni hẹn nọvisunnu mítọn wá, yè na sọ fọ̀ mì do ogànmẹ, na yè nido mòdòna ohó mítọn lẹ eyín nugbo tin to mì mẹ: kavi eyín é ma yín mọ, gbọn ogbẹ Fálo tọn dali, bó amó wẹ mì nugbonugbo.

¹⁷E sọ bó yé omẹ pó dopọ do ogànmẹ hò azàn atọ̀n. ¹⁸Josefu sọ dọ hlan yé to azán atọ̀ntọ gbè, dọ, Mì basi ehe, bo nọgbó; na yẹn dibúna Jiwheyẹwhe: ¹⁹eyín mì yín gbẹtọ nugbonọ, mì bo gbọ yè ni sín dopo mẹmẹsunnu mítọn lẹ tọn do ogànhò mítọn mẹ; ṣigba míwlẹ ni yì, bo hẹn ogbado yì na huvẹ owhó mítọn lẹ tọn: ²⁰bo hẹn agọ̀gbọnẹn nọvisunnu mítọn wá dẽ; mọwẹ yè na hẹn ohó mítọn lẹ yín nugbo, bọ mì ma nado kú. Yé sọ basi mọ.

²¹Yé sọ to didọ hlan yénọzo, dọ, Nugbonugbo mí yín whéylantọ gbọn nọvisunnu mítọn tọn dali, na mí mọ nukunbia ayiha etọn tọn, whenuena é vó mí, bọ mí ma jlo na sè; enẹwutu wẹ nukunbia he do pla mi.

²²Lẹubeni sọ gblọnna yé, dọmọ, Yẹn ma dọhó hlan mì, dọmọ, Mì wàylando do ovi lọ go blo; bọ mì ma sọ sè? enẹwutu ga, dayi e go, yè to ohùn etọn biọ.

²³Yé ma yónẹn dọ Josefu sè ogbè yetọn gba; na gbèsetọ lọ tin to yé ṣẹnṣẹn. ²⁴E sọ lé ede sọn yé de, bo viavi; é sọ légó wá yé de, bo dọhó hlan yé, bo dè Simeoni sọn yé ṣẹnṣẹn, bo bla ọ to yé nukunmẹ.

²⁵Whenẹnu wẹ Josefu degbè nado yí ogbado do gó apò yetọn lẹ, podọ nado gò akuẹ omẹ dopodopo ton jo do apò etọn mẹ, podọ nado na núdùdù yé na aliho: le wẹ yè wà hlan yé do. ²⁶Yé sọ yí ogbado do doagbàn do kẹtẹkẹtẹ yetọn lẹ ji, bo tònyì sọn finẹ.

²⁷Le dopo yetọn kẹ̀ apò etọn nado na kanlinmahúhú kẹtẹkẹtẹ etọn to adọtẹn, é mọ akuẹ etọn; bo, dayi e go, é tin to onù apò etọn tọn. ²⁸E sọ dọ hlan mẹmẹsunnu etọn lẹ, dọ, Yè gò akuẹ ṣie jo, bo, pòn, yèdọ é tin to apò ṣie mẹ: ayiha yetọn sì yé, ye sisọsisọ bo lò pànnukọn yénọzo, bo didọmọ, Etẹ wẹ ehe Jiwheyẹwhe wà hlan mí he?

²⁹Yé sọ wá Jakobu otò yetọn de to aigba Kenani tọn ji, bo dọ ehe jọ do yé go lẹpo nẹ̃; dọmọ, ³⁰Dawe he yín OKLUNỌ aigba lọ tọn dọhó hẹ mí po adán po, bo yí mí do do amé otò lọ tọn. ³¹Mí sọ dọ hlan ẹn, dọ, Gbẹtọ nugbonọ wẹ mí: mí ma yín amé gba: ³²mẹmẹsunnu wiawe wẹ mí yín, visunnu otò mítọn tọn; dopo ma tin to ogbè, agọ̀gbọnẹn sọ tin to egbé he to otò mítọn de to aigba Kenani tọn ji. ³³Dawe lọ, klunọ aigba lọ tọn, sọ dọ hlan mí, dọmọ, Gbọn ehedali wẹ yẹn na yònẹn dọ gbẹtọ nugbonọ wẹ mì; mi jo dopo mẹmẹsunnu mítọn lẹ tọn dai do dẽ, bo hẹn ogbado yí na huvẹ owhé mítọn lẹ tọn, bo yì: ³⁴bo hẹn agọ̀gbọnẹn nọvisunnu mítọn wá dẽ; whenẹnu wẹ yẹn na yọ́nẹn dọ mì ma yín amé gba, ṣigba dọ gbẹtọ nugbonọ wẹ mì: mọwẹ yẹn nasọ dè nọvisunnu mítọn jo na mi, mì nasọ wàjò to aigba lọ ji,

³⁵E sọ wá jọ, le yé to apò yetọn lẹ diọ, wẹ, dayi e go, bibla akuẹ omẹ dopodopo tọn tin to apò etọn mẹ: whẹnuena yé po otò yetọn po mọ bibla akuẹ yetọn lẹ tọn, búdi yé.

³⁶Jakobu otò yetọn dọ hlan yé, dọmọ, Yẹn wẹ mì hẹn ovi ṣie lẹ bú do: Josefu ma tin, Simeoni ma sọ tin, mì nasọ yí Bẹnjamini sọ yì: onú helẹ pó yẹn go wẹ yé te.

³⁷Lẹubeni sọ dọhó hlan otò etọn, dọmọ, Hù visunnu ṣie awe lẹ, eyín yẹn ma hẹn ẹn gòwá de we: jo e do alọ ṣie mẹ, yẹn nasọ hẹn ẹn gòwá de we.

³⁸Ewọ sọ dọmọ, Visunnu ṣie ma na jẹte yì hẹ mì gba; na nọvisunnu etọn ko kú, ewọ dopokẹdẹ wẹ pò: eyín danu jọ do e go to aliho he mì gbọn jei dali, bé mì na hẹn odà wéwé ṣie lẹ po awúbla po yì oyọ̀ mẹ.

¹HÙVẸ̀ lọ sọ sinyẹn to aigba lọ ji. ²E sọ wá jọ, whenuena yé ko dù ogbado he yé hẹn gò sọn Egipti pó, otò yetọn dọ hlan yé, dọmọ, Mì vò yì, hò núdùdù vude na mí.

³Juda sọ dọhó hlan ẹn, dọmọ, Dawe lọ kò vivẹvivẹ hlan mí, dọmọ, Mì ma to nukunmẹ ṣie na mọ, adavo nọvisunnu mítọn tin gòna mì. ⁴Eyín hiẹ na do nọvisunnu mítọn hlan po mí po, mí na jẹte yì bo hò núdùdù na we: ⁵ṣigba eyín hiẹ ma na do e hlan, mívdẹ ma na jẹte yì gba: na dawe lọ dọ hlan mí, dọ, Míwlẹ ma na mọ nukunmẹ ṣie adavo nọvisunnu mítọn tin gòna mì.

⁶Islaeli sọ dọmọ, Etòwutu wẹ mì do zán oylan sọmọ hẹ mi, na nado dọ na dawe lọ eyín mì gbò tindo nọvisunnu de? ⁷Yé sọ dọmọ, Dawe lọ kanbiọ jlọjlọ gbọn mílọsu dali, podọ gbọn hennu mítọn tọn dali, dọmọ, Otò mítọn gbé sọ tin to ogbẹ? mì tindo nọvisunnu devo? mí sọ dọ nẹ kẹdẹdi ohó helẹ nkọ tọn: na mí sọgan yọ́nẹn do dọ ewọ na dọmọ, Hẹn nọvisunnu mítọn wá?

⁸Juda sọ dọ hlan Islaeli otò etọn, dọ, Do visunnu lọ hlan po yẹn po, mí na fọ́n bo yì; na mí nido nọgbò, bo ma kú, míwlẹ po hiẹ po, po mẹflinfiin mítọn lẹ po ga. ⁹Yẹn na yín alọyítọ nò; yẹn sí wẹ hiẹ na biọ ẹ te: eyín yẹn ma hẹn ẹn wá de we, bo sọ ẹ do nukọn towe gba, bé gbọ yẹn ni hẹn whòyinylan lọ kakadoi : ¹⁰na adavo le mí to awúwhle do he, nugbo mí na ko lògò whlawetọ.

¹¹Islaeli otò yetọn sọ dọ hlan yé, dọmọ, Eyín é yín mọ lò, mì bo basi ehe; mì yi sọn sinsẹ́n dagbedagbe aigba lọ tọn lẹ mẹ do núzinzán mítọn lẹ mẹ, bo hẹn núnina de sọ yì na dawe lọ, núsisá vude, po owín vude po, núwhẹnwan po zuya po, sinsẹ́n bibia lẹ, po almọndi lẹ po: ¹²bo sọ yí akuẹ dònuawe hẹn to alọ mítọn mẹ; po akuẹ he yè gòjo to onù apò mítọn lẹ tọn mẹ po mì ni sọ vò yíhẹn to alọ mítọn mẹ; eya ojiwinwọn wẹ: ¹³mì yí nọvisunnu mítọn ga, bo fọ́n, bo sọ gọ̀yì dawe lọ de: ¹⁴jiwheyẹwhe Gánhunupo ni na lẹblanu mì to dawe lọ nukọn, na é nido dè nọvisunnu mítọn awetọ po Bẹnjamini po jo na mì. Eyín yè sọ fò ovi ṣie lẹ yì sọn así ṣie, bó yè fòyì sọn así e.

¹⁵Omẹ ewlẹ sọ yí núnina nẹ, yé sọ yí akuẹ dònuawe to alọ yetọn mẹ po Bẹnjamini po; bo fọ́n, bo jẹte yì Egipti, bo site to Josefu nukọn.

¹⁶Whenuena Josefu mọ Bẹnjamini po yé po, é dọ hlan họ̀nkọ̀nsi owhó etọn tọn, dọ, Hẹn omẹ ewlẹ biọ whógbè, bo hù, bo wleawu dai; na omẹ ewlẹ na dùnú hẹ mi to whèmẹ. ¹⁷Dawe lọ sọ basi dile Josefu degbèna do; dawe lọ sọ hẹn omẹ ewlẹ biọ owhó Josefu tọn gbè.

¹⁸Obú sọ di omẹ ewlẹ, na yè hẹn yé biọ owhó Josefu tọn gbè wutu; yé sọ dọmọ, Na akuẹ he yè gòjo to apò mítọn lẹ mẹ to tintan whenu tọn wutu wẹ yè dó hẹn mí biọ họmẹ; na é nido din aklọn to mí nù, bo jẹ mí ji, bo yí mí na mẹglọnọ lẹ, po kẹtẹkẹtẹ mítọn lẹ po. ¹⁹Yé sọ sẹpọ́ hònkònsi owhó Josefu tọn tọn, yé sọ dọhó hlan ẹn Mto ohòn owhé lọ tọn ji, ²⁰bo dọmọ, A klunọ ṣie, nugbo míwlẹ jẹte wá to tintan whenu nado hò núdùdù: ²¹é sọ wá jọ, whenuena mí wá jẹ adọtẹn, bọ mí opò mítọn lẹ, bo, dayi e go, akuẹ omẹ dopodopo tọn tin to onù apò etón tọn, akuẹ mítọn to ojlẹ gigọ́ mẹ: mí sọ hẹn ẹn wá to alọ mítọn mẹ. ²²Mí sọ hẹn akuẹ devo jẹte wá to alọ mítọn mẹ nado hò núdùdù: mí ma yón mẹhe yí akuẹ mítọn do apò mítọn lẹ mẹ gba.

²³Ewọ sọ dọmọ, Jijọho tin hlan mì, mì dibú blo: Jiwheyẹwhe mítọn, podọ Jiwheyẹwhe otọ́ mítọn tọn, ko na adọkun mì to apò mítọn lẹ mẹ: yẹn tindo akuẹ mítọn. E sọ hẹn Simeoni tón wá yé de.

²⁴Dawe lọ sọ hẹn omẹ ewlẹ wá owhó Josefu tọn gbè, bo na osìn yé, yé sọ klọ afọ yetọn lẹ; é sọ na kanlinmahúhú kẹtẹkẹtẹ yetọn lẹ. ²⁵Yé sọ wleawu núnina tọn dai pọ́n wiwá Josefu tọn to whèmẹ: na yé sè dọ yé na dùnú to finẹ. ²⁶Whenuena Josefu wá whégbè, yé hẹn núnina lọ he tin to alọ yetọn mẹ biọ whógbè wá nẹ̃, yé sọ dé yéde hlan ẹn hlan aigba. ²⁷E sọ kàn jijọho yetọn tọn sè yé, bo dọmọ, Otọ́ mítọn tin to jijọho, dawe yónhonọ lọ ohó mẹhe tọn mì dọ? E gbó sọ tin to ogbè?

²⁸Yé sọ dọmọ, Devi towe otọ́ mítọn tin jijọho, é gbó sọ tin to ogbè. Yé sọ àó ota, bo sọ basi ogbégbo.

²⁹E sọ zé nukun etọn lẹ daga, bo mọ Bẹnjamini nọvisunnu etọn, visunnu onọ etọn tọn, bo dọmọ, Nọvisunnu mítọn agọ̀gbọnẹn wẹ ehe, ohó mehe tọn mì dọ hlan mi? E sọ dọmọ, Jiwheyẹwhe ni yín dagbenọ hlan we, visunnu ṣie.

³⁰Josefu sọ deawú; na hòmẹ etọn blawu to nọvisunnu etọn ji: é sọ din fie é na viavi te yi; é sọ biọ abò etọn mẹ, bo viavi to finẹ. ³¹E klọ nukunmẹ etọn, bo sọ tón wá; é sọ wún ede do ogo, bo dọmọ, Zé núdùdù dai. ³²Yé sọ zédai nẹ̃ do ede dali, podọ na yé to yélọsu dali, podọ na Egiptinu lẹ, he nọ dùnú hẹ ẹ le, to yélọsu dali: na Egiptinu lẹ ma na sọgan dùnú hẹ Heblu lẹ wutu; na enẹ wẹ osùnú de hlan Egiptinu lẹ. ³³Yé sọ sinai to nukọn etọn, plọnji kẹdẹdi jijihuhlọn etọn, podọ agọ̀gbọnẹn kẹdẹdi ovu etọn: omẹ ewlẹ sọ kẹhẹli dó zénọzo. ³⁴E sọ yí bo do mimá núdùdù tọn lẹ hlan yé sọn nukọn etọn: ṣigba mimá núdùdù Bẹnjamini tọn tọn yín gégé susu whlatón di depope yéwlẹ tọn tọn. Yé sọ nù, bo yín ayanọ po e po.

¹E sọ degbèna hònkònsi owhó etọn tọn, dọmọ, Yí núdùdù do gó apò omẹ ewlẹ tọn lẹ, su sọle yé sọgan hẹn do, bo sọ yí akuẹ omẹ dopodopo tọn do onù apò etọn tọn. ²Bo yí kọfo ṣie, kọfo fataka tọn, do onù apo agọ̀gbọnẹn lọ tọn tọn po akuẹ ogbado etọn tọn po Ewọ sọ basi kẹdẹdile ohó he Josefu ko dọ nẹ̃ te.

³Le ai ko hón, yè do omẹ ewlẹ hlan, yé po kẹtẹkẹtẹ yetọn lẹ po. ⁴Whenuena yé tónyì sọn tòdaho lọ mẹ, bo ma ko jẹ ofi dindẹn, Josefu dọ hlan hònkònsi etọn, dọ, Eón, jẹmọ na omẹ ewlẹ; whenuena hiẹ pla yé, dọ hlan yé dọ, Etẹ wutu we mì do yí oylan do suahọ dagbe tọn? ⁵E ma yín ehe wẹ ehe mẹ klunọ ṣie nọ nù te, podọ ehetọn dali é do nọ mọnu nugbonugbo? mì ko wà oylan to mọ wiwá mẹ.

⁶Ewọ sọ pla yé, é sọ dọ ohó helẹ hlan yé. ⁷Yé sọ dọ hlan ẹn dọ, Etẹwutu wẹ klunọ ṣie dọ ohó helẹ hunkọ? Jiwheyẹwhe ni pa dọ devi towe lẹ nado wà onú mọ hunkọ de. ⁸Dayi e go, akuẹ lọ, he mí mọ to onù apò mítọn lẹ tọn lẹ mẹ, mí sọ hẹn gòwá de we sọn aigba Kenani tọn ji: nawẹ mí na wà do fìn fataka kavi sika sọn owhó klunọ towe tọn gbè? ⁹Ome depope sọn devi towe lẹ de de yè mọ ẹn te, gbọ é ni kú, míwlẹ ga na sọ yín mẹmẹglọ klunọ ṣie tọn lẹ.

¹⁰Ewọ sọ dọmọ, Dinvie ga gbọ é ni yín kẹdẹdile ohó mítọn lẹ te: ewọ mẹhe de yè mọ ẹn te na yín mẹmẹglọ ṣie; mìwlẹ na sọ yín kunnunọ.

¹¹Whenẹnu yé yawu, bo zlọ́n dai omẹ dopodopo apò etọn do aigba, bo kè omẹ dopodopo apò etọn. ¹²E to dindinpèn, bo hẹn sọn mẹho lọ ji, wá jodo agọ̀gbọnẹn ji: yè sọ mọ kọfo lọ to apò Bẹnjamini tọn mẹ.

¹³Whenẹnu wẹ yé dòn avọ́ yetọn lẹ tlen, omẹ dopodopo sọ doagbànna kẹtẹkẹtẹ etọn, bo lógèwá tòdaho lọ mẹ.

¹⁴Juda po mẹmẹsunnu etọn lẹ po wá owhé Josefu tọn gbè; ewọ gbó sọ tin to finẹ: yé sọ dlẹn to nukọn etọn to aigba. ¹⁵Josefu sọ dọ hlan yé, dọ, Owàlọ tẹwẹ ehe mì ko wá he yín? mì ma yènẹn dọ omẹ di yẹn hunkọ sọgan mọnú?

¹⁶Juda sọ dọmọ, Etẹ́wẹ mí na dọ hlan klunọ ṣie? ohó tẹ́wẹ mí na dọ? kavi nawẹ mí na whlẹn míde gbọn? Jiwheyẹwhe ko din ylankan devi towe lẹ tọn mọ: dayi e go, míwlẹ yín mẹmẹglọ klunọ ṣie tọn lẹ, míwlẹ, po ewọ ga alọ mẹhe tọn mẹ yè mọ kọfo te po.

¹⁷Ewọ sọ dọmọ, Jiwheyẹwhe ni pa bọ yẹn na do wà mọ: omẹ lọ alọ mẹhe tọn mẹ yè mọ kọfo lọ te, ewọ wẹ na yín mẹmẹglọ ṣie; ṣigba na mìwlẹ tọn mì hẹ́ji jijọho mẹ yì otọ́ mítọn de.

¹⁸Whenẹnu wẹ Juda sẹwá e de, bo dọmọ, À klunọ ṣie, gbọ devi towe, yẹn vè we, ni dọ ohó dopo to otọ́ klunọ ṣie tọn lẹ mẹ, a sọ dike adi towe jimiyọn do devi towe ji blo: na hiẹ tin yèdọ taidi Falo. ¹⁹Klunọ ṣie kanbiọ devi etọn lẹ, dọmọ, Mì tindo otọ́ de, kavi nọvisunnu de? ²⁰Míwlẹ sọ dọ hlan klunọ ṣie, dọ, Mí tindo otọ́, gbẹtọ yọ́nhonọ de, po ovi yọ́nhomẹ etọn tọn de po, yọ̀pọ de; podọ nọvisunnu etọn ko kú, ewọ dopo akàn wẹ pò sọn onọ etọn tọn mẹ, otọ etọn sọ yíwán nẹ̃. ²¹Hiẹ sọ dọ hlan devi towe lẹ dọ, Mì hẹn ẹn jẹte wá dẽ, na yẹn nido zé nukun ṣie lẹ do e ji. ²²Míwlẹ sọ dọ hlan klunọ ṣie, dọ, yọpọsunnu lọ ma sọgan jo otọ́ etọn do gba: na eyín ewọ nado jo otọ́ etọn do, otọ́ etọn na kú. ²³Hie sọ dọ hlan devi towe lẹ, dọ, Adavo agọ̀gbọnẹn nọvisunnu mítọn jẹte wá po mì po, mì ma sọ to nukunmẹ ṣie na mọ ba. ²⁴E sọ wá jọ whenuena mí hẹ́ji yì devi towe otọ́ ṣie de, mi dọ ohó klunọ ṣie tọn lẹ nẹ. ²⁵Otọ́ mítọn sọ domọ, Mì sọ vẹ̀ yì, hò núdùdù vude na mí. ²⁶Míwlẹ sọ dọmọ, Míwlẹ ma sọgan jẹte yì gba: eyín agọ̀gbọnẹn nọvisunnu mítọn tin po mí po, whenẹnu wẹ míwlẹ na jẹte yì: na mí ma na sọgan mọ nukunmẹ dawe lọ tọn gba, adavo agọ̀gbọnẹn nọvisunnu mítọn tin po mí po. ²⁷Devi towe otọ́ ṣie, dọ hlan mí, dọ, Míwlẹ yọ́nẹn dọ asi ṣie ji visunnu awe na mi: ²⁸dopo lọ yì sọn de, yẹn sọ dọmọ, nugbonugbo yè ko tlẹn ẹn do flinflin: yẹn ma ko mọ ẹn sọn whenu nẹ gbọ̃n: ²⁹eyín mì sọ yí dopo he ga sọn así e, bọ danu jọ do e go, míwlẹ na hẹn oda wéwé ṣie jẹte po awúbla po yì oyọ̀do. ³⁰Enẹwutu dinvie whenuena yẹn wá devi towe otọ́ ṣie de, bọ yọpọsunnu lọ ma tin po míwlẹ po gba; na yè sìn ogbè etọn ogbè yọpọsunnu lọ tọn mẹ; ³¹é na sọ wá jọ, whenuena é mọ dọ yọpọsunnu lọ ma tin po mí po gba, bọ ewọ na kú: devi towe lẹ na sọ hẹn oda wéwé devi towe otè mítọn tọn lẹ jẹte po awúbla po yì oyọ̀do mẹ. ³²Na devi towe lẹzùn alọyítọ na yọpọsunnu lọ hlan otè ṣie, dọmọ, Eyín yẹn ma sọ hẹn ẹn wá de we gba, whenẹnu yẹn na hẹn whèyinylan hlan otẹ́ ṣie kadadoi. ³³Enẹwutu dinvie, gbọ devi towe, yẹn vè we, ni nòayí mẹmẹglọ de hlan klunọ ṣie to otẹn yọpọsunnu lọ tọh mẹ: bo gbọ yọpọsunnu lọ ni hẹ́ji yì po mẹmẹsunnu etọn lẹ po ³⁴Na nawẹ yẹn na hẹ́ji yì otọ ṣie de do, bọ yọpọsunnu lọ ma tin po yẹn po? yẹn nikã mọ oylan he na wá otẹ́ ṣie ji.

¹WHENẸNU Josefu ma sọ sọgan wún ede do ogo to omẹ he site to dali etọn lẹpo nukọn; é sọ dawhá, Hẹn omẹ dopodopo nado tẹ́nyì sọn dè. Omẹ depope ma sọ site po e po, whenuena Josefu hẹn ede zùn yínyènẹn hlan mẹmẹsunnu etọn lẹ. ²E sọ viavi hẽhe: Egiptinu lẹ sè, owhó Falo tọn sọ sè. ³Josefu sọ dọ hlan mẹmẹsunnu etọn lẹ, dọ, Yen Josefu wẹ; bó otè ṣie gbè sọ tin to ogbè? Mẹmẹsunnu etọn lọ ma sọ sọgan gblọn nẹ̃; na yè hẹn búdi yé to nukọn etọn.

⁴Josefu sọ dọ hlan mẹmẹsunnu etọn lẹ, dọ, Mì sẹpọ́ mi, yẹn vẹ̀ mì. Yé sọ sẹwá, Ewọ sọ dọmọ, Yẹn Josefu mẹmẹsunnu mítọn wẹ, mẹhe mi sà do Egipti. ⁵Dinyie mì yín adinọ blo, kavi hòmẹgblenọ do mínọzo go bló, dọ mìwlẹ sà mi do ofi; na Jiwheyẹwhe wẹ do mi hlan mì nukọn nado hla ogbè do. ⁶Na owhè awe helẹ wẹ hùvó ko tin to aigba lọ ji: owhè atón gbó sọ tin, ehe mẹ oglepipọ kavi ojijẹ ma na tin te. ⁷Jiwheyẹwhe sọ do mi hlan mì nukọn nado hladona mì pipòtọ de to aigba lọ mẹ, podọ nado whlẹn mì do ogbó gbọn whlẹngan daho de dali. ⁸Mọ dinvie é ma yín mìwlẹ wẹ do mi hlan ofi gba, adavo Jiwheyẹwhe: é ko sọ hẹn mi do basi otọ́ de hlan Falo, podọ klunọ owhé etọn lẹpo tọn tọn, podọ ogàn to aigba Egipti tọn lẹpo ji. ⁹Mì yawu, bo hẹ́ji yì otọ́ ṣie de, bo dọ hlan ẹn, dọ, Le wẹ visunnu towe Josefu, dọ, Jiwheyẹwhe ko hẹn mi do basi klunọ Egipti lẹpo tọn, jẹte wá dẽ, a gbọsiai blo: ¹⁰hiẹ na nọnọ̀ aigba Gosẹni tọn ji, hiẹ na sọ tin to dali ṣie, hiẹ po ovi towe lẹ po, po visunnu visunnu towe lẹ tọn lẹ po, po kanlinpa towe lẹ po, po oyìnpó towe lẹ po, po enẹ he hiẹ tindo lẹpo po: ¹¹finẹ wẹ yẹn na nọ yìn we te; na owhè atón hùvé tọn gbé sọ tin; hiẹ nikã wá tukla mẹ, hiẹ, po whégbetọ towe lẹ po, po ehe hiẹ tindo lẹpo po. ¹²Bo, dayi e go, nukun mítọn lẹ mọ, po nukun nọvisunnu ṣie Bẹnjamini tọn lẹ po, dọ onù ṣie wẹ ehe to hódọ hlan mi. ¹³Mì na sọ dọ gigo ṣie to Egipti tọn lẹpo na otọ́ ṣie, podọ enẹ he mì ko mọ lẹpo tọn; mìwlẹ na sọ yawu bo hẹn otọ́ ṣie jẹte wá file.

¹⁴Ewọ sọ slo do okò Bẹnjamini nọvisunnu etọn tọn go, bo viavi; Bẹnjamini sọ viavi to okò etọn ji. ¹⁵E sọ donùnùgona mẹmẹsunnu etọn lẹpo, bo viavi do yé ji: to enẹgodo wẹ mẹmẹsunnu etọn lẹ dọhó hẹ ẹ.

¹⁶Yè sọ sè linlin etọn to owhé Falo tọn gbè, dọmọ, Mẹmẹsunnu Josefu tọn lẹ wá: é sọ hẹn hòmẹhùnna Falo dagbedagbe, po devi etọn lẹ po. ¹⁷Falo sọ dọ hlan Josẹfu dọmọ, Dọ hlan mẹmẹsunnu towe lẹ dọ. Ehe wẹ mì ni wà; mì doagbànna kanlin mítọn lẹ, bo yì, mì yì aigba Kenani tọn ji; ¹⁸bo yí otọ́ mítọn po whégbetọ mítọn lẹ po, bo wá dẽ: yẹn na sọ na onú dagbe aigba Egipti tọn tọn lẹ mì, mìwlẹ na sọ nọ dù ojó aigba lọ tọn. ¹⁹Dinvie yè degbèna we, mì wà ehe; mì ylagbànkẹkẹ lẹ sọn aigba Egipti tọn ji na omẹ flinfíin mítọn lẹ, podọ na asi mítọn lẹ, bo hẹn otọ́ mítọn wá, bo wá. ²⁰Mì sọ yín vivẹnunọ gbọn núzinzán mítọn dali ga blo; na onú dagbe aigba Egipti tọn tọn lẹpo lẹ mítọn wẹ.

²¹Visunnu Islaeli tọn lẹ sọ wà mọ: Josefu sọ na agbànkẹkẹ le yé kẹdẹdi asẹ Falo tọn, bo sọ na núdùdù yé na aliho. ²²Hlan yé mẹpo é na didiọ avọ tọn lẹ omẹ dopodopo; ṣigba hlan Bẹnjamini we é na wòwó fataka tọn fọdekanweko, po didiọ avọ̀ tọn lẹ atón po. ²³Mọkẹdẹ wẹ hlan otọ́ etọn é dohlan; yè yí onú dagbe Egipti tọn lẹ do doagbànna kẹtẹkẹtẹ ao, bo sọ yí ogbado po akla po, po núdùdù po, do doagbànna kẹtẹkẹtẹ asi ao na otọ etọn to aliho ji. ²⁴Mowẹ é do mẹmẹsunnu etọn lẹ hlan, yé sọ fọ́nyì: é sọ dọ hlan yé, dọ, Pọ́n mì hòavùn to aliho ji blo.

²⁵Yé sọ tónyì sọn Egipti, bo wá Jakobu otọ́ yetọn de to aigba Kenani tọn ji. ²⁶Yé sọ dọ nó, dọmọ, Josefu gbé sọ tin to ogbẹ̀, ewọ sọ wẹ ogán to aigba Egipti tọn lẹpo ji. Ayiha etọn sọ kusiọ, na é ma yí yé sè gba. ²⁷Yé sọ dọ ohó Josefu tọn lẹpo nẹ̃, he é ko dọ hlan yé lẹ: whenuena é mọ agbànkẹkẹ lẹ he Josefu ko dohlan nado hẹn ẹn wá, ayiha Jakobu otọ́ yetọn tọn fọ́ndogbó: ²⁸Islaeli sọ dọmọ, Dado; Josefu visunnu ṣie gbé sọ tin to ogbó: yẹn na yì bo mọ ẹn whẹpo yẹn ni kú.

¹ISLAELI sọ jẹgbèdopozọnlinji po enẹ he é tindo lẹpo po, bo wá Bẹeli-seba, bo sán avọ́ lẹ hlan Jiwheyẹwhe Isaki otọ́ etọn tọn. ²Jiwheyẹwhe sọ dọhó hlan Islaeli to númimọ lẹ mẹ to ozán mẹ, bo dọmọ, Jakobu, íakobu. Ewọ sọ dọmọ, Yẹn tin to ofi. ³E sọ dọmọ, Yẹn Jiwheyẹwhe wẹ, Jiwheyẹwhe otọ́ towe tọn: a dibú nado jẹte yì Egipti blo; na yẹn na basi akọta daho de sọn hiẹ mẹ to finẹ: ⁴yẹn na jẹte yì Egipti hẹ we, yẹn na sọ vẹ́ we hẹn hẹ́ji wá nugbonugbo ga: Josefu na sọ yí alọ etọn do nukun towe lẹ ji.

⁵Jakobu sọ tite sọn Bẹeli-seba: visunnu Islaeli tọn lẹ zé Jakobu otọ́ yetọn yì, po omẹ flinflin yetọn lẹ po, po asi yetọn lẹ po to agbànkẹkẹ he Falo dohlan nado zé yè wá lẹ mẹ. ⁶Yé sọ bé kanlin yetọn le, po núbépli yetọn lẹ po, he-ye ko bépli to aigba Kenani tọn ji, bo wá Egipti, Jakobu, po okún etọn lẹpo po gọ́na ẹn: ⁷visunnu etọn lẹ, po visunnu visunnu etọn lẹ tọn lẹ po gọ́na ẹn, viyọnnu etọn lẹ, podọ viyọnnu visunnu etọn lẹ tọn lẹ, po okún lẹpo po wẹ é hẹn gọ́ nẹ̃ wá Egipti.

⁸Ehelẹ wẹ oyín ovi Islaeli tọn lẹ tọn, he wá Egipti, Jakobu po visunnu etọn lẹ po: Lẹubeni, plọnji Jakobu tọn. ⁹Po visunnu, Lẹubeni tọn lẹ po; Hanoki, po Pali po, Hẹzloni po Kaími po. ¹⁰Po visunnu Simeoni tọn lẹ po; Jẹmueli, po Jamini po, Ohadi po Jakini po, Zohali po Sauli visunnu yọnnu Kenaninu de tọn po. ¹¹Po visunnu Levi tọn lẹ po; Gelsoni, po Kohati po, po Mẹlali po. ¹²Po visunnu Juda tọn lẹ po; Eli, po Onani po, Ṣela po Pẹlẹzi po, po Zelahi po: ṣigba Eli po Onani po kú to aigba Kenani tọn ji. Visunnu Pẹlẹzi tọn lẹ wẹ Hẹzloni po Hamuli po. ¹³Po visunnu Issakali tọn lẹ po; Tola, po Puva po, Iobi po Simloni po. ¹⁴Po visunnu Zẹbuluni tọn lẹ po; Sẹlẹdi, po Eloni po, po Jahlẹeli po.

¹⁵Ehelẹ wẹ visunnu Lea tọn lẹ he é ji hlan Jakobu to Padan-alami, po viyọnnu etọn Dina po: visunnu etọn lẹ po viyọnnu ẹtọn lẹ po yín dawe ogbànnukunatọ̀n. ¹⁶Po visunnu Gadi tọn lẹ po; Zifiọni, po Haggi po, Ṣuni po Ẹzboni po, Eli, po Alodi po, po Aleli po. ¹⁷Po visunnu Aṣeli tọn lẹ po; Imna po Isva po, Isvi po Bẹlia po, po Sẹlahi nọviyọnnu yetọn po: po visunnu Bẹlia tọn lẹ po; Hẹbẹli po Malkieli po. ¹⁸Ehelẹ wẹ visunnu Zilpa tọn lẹ, he Labani na hlan Lea viyọnnu etọn, ehelẹ wẹ e sọ ji hlan Jakobu, yèdọ dawe fọtọ̀nukundopo.

¹⁹Visunnu Laheli asi Jakobu tọn tọn lẹ; Josefu po Bẹnjamini po. ²⁰Podọ hlan Josefu to aigba Egipti tọn ji wẹ yè ji Manasse po Ẹflaimi po, he Asẹnati viyonnu Potifẹla yẹwhenọ Oni tọn tọn ji hían ẹn. ²¹Po visunnu Bẹnjamini tọn lẹ po; Bela po Bẹkẹli po, Asobeli, Gela, po Naamani po, Ehi po Loṣi po, Mupimi po Hupimi po, po Aldi po. ²²Ehelẹ wẹ visunnu Laheli tọn lẹ, he yè ji hlan Jakobu: dawe lẹpo yín wiẹnẹ.

²³Po visunnu Dani tọn lẹ po; Husimi. ²⁴Po visunnu Naftali tọn lẹ po; Jahzẹeli po Guni oo, Jẹzẹli po Ṣilemi po. ²⁵Ehelẹ wẹ visunnu Bilha tọn, he Labani na hlan Laheli viyọnnu etọn, ehelẹ wẹ é sọ ji hlan Jakobu: dawe lẹpo yín ṣinawe.

²⁶Dawẹ he wá Egipti po Jakobu po, he tọ́n sọn adà etọn lẹ mẹ, dogọ́ visunnu asi visunnu Jakobu tọn lẹ tọn tọn, dawe lẹpo yín kandekoatúnnnukundopo: ²⁷po visunnu Josefu tọn lẹ po, he yè ji hlan ẹn to Egipti yín dawe awe: dawe owhé Jakobu tọn tọn lẹpo, he wá Egipti yín kanbegbàn.

²⁸E sọ do Juda hlan nukọn nẹ̃ yi Josefu de, nado do aliho hia to nukọn etọn yì jẹ Gosẹni; yé sọ wá aigba Gosẹni tọn ji. ²⁹Josefu sọ và kẹkẹ etọn, bo hẹ́ji yì nado pó Islaeli otọ́ etọn to Gosẹni; é sọ do ede hia ẹ, bo slo do okò etọn go, bo viavi do okò go na osã dindẹn de. ³⁰Islaeli sọ dọ hlan Josefu, dọmọ, Dinvie gbọ ma kú, le yẹn ko mọ nukunmẹ towe, dọ hiẹ gbó sọ tin to ogbè.

³¹Josefu sọ dọ hlan mẹmẹsunnu etọn lẹ, podọ hlan owhé otẹ́ etọn tọn, dọ, Yẹn na hẹ́ji yì, bo dọ na Falo, bo na dọ hlan ẹn, dọ, Mẹmẹsunnu ṣie lẹ, po owhé otọ́ ṣie tọn po, he tin to aigba Kenani tọn ji lẹ, wá dẽ; ³²lẹngbọyìntọ wẹ omẹ ewlẹ, na yé ko yín yìnyìntọ kanlin tọn lẹ; yé ko sọ hẹn kanlinpa yetọn lẹ wá, po oyìnpó yetọn lẹ po, po enẹ he yé tindo lẹpo po. ³³E na sọ wá jọ, whenuena Falo na ylọ mi, bo na dọ, ³⁴Eté wẹ azẹ́n mítọn? wẹ mì na dọ, yìnyìntọ kanlin tọn lẹ wẹ devi towe lẹ ko yín sọn vúwhenu mítọn yèdọ kaka jẹ dinvie, míwlẹ, po otẹ́ mítọn lẹ po: na mì nido nọnọ̀ aigba Gosẹni tọn ji; na osunu de wẹ lẹngbọyìntọ lẹpo yín hlan Egiptinu lẹ.

¹WHENẸNU wẹ Josefu yì hònmẹ bo dọ na Falo, bo dọmọ, Otẹ́ ṣie po mẹmẹsunnu ṣie lẹ po, po kanlinpa yetọn lẹ po, po oyìnpó yetọn lẹ po, po enẹ he yé tindo lẹpo po, sọn aigba Kenani tọn ji wá; bo, dayi e no, yé tin to aigba Goṣẹni tọn ji. ²Podọ sọn mẹmẹsunnu etọn lẹ ṣẹnṣẹn é yí omẹ atọ́n bo do yé hia hlan Falo. ³Falo sọ dọ hlan mẹmẹsunnu etọn lẹ, dọ; Etẹ́ wẹ azọ́n mítọn? Yé sọ dọ hlan Falo, dọ Lẹngbọyìntọ lẹ wẹ devi towe lẹ, míwlẹ, po otọ́ mítọn lẹ po. ⁴Yé sọ dọ hlan Falo, dọ, Nado wáwási to aigba lọ ji wẹ mí do wá; na kanlinma de ma tin na kanlinpa devi towe lẹ tọn lẹ gba; na hùvẹ́ lọ sinyẹn to aigba Kenani tọn ji: enẹwutu dinvie, mí vó we, gbọ devi towe lẹ ni nọnó aigba Gosẹni tọn ji.

⁵Falo sọ dọhó hlan Josefu, dọmọ, Otọ́ towe po mẹmẹsunnu towe lẹ po wá de we: ⁶aigba Egipti tọn tin to nukọn towe; to whanpẹnọ gbahúgbahú aigba lọ tọn mẹ wẹ a ni hẹn otọ́ towe po mẹmẹsunnu towe lẹ po nado nọnọ̀; to aigba Gosẹni tọn mẹ a ni gbọ yé ni nọnọ̀: eyín hiẹ sọ yón vivẹnunọ de to yé ṣẹnṣẹn, yí yé do basi ogán to kanlin ṣie lẹ ji.

⁷Josefu sọ hẹn Jakobu otọ́ etọn biọ hònmẹ, bo sọ ẹ do Falo nukọn: Jakobu sọ dona Falo. ⁸Falo sọ dọ hian Jakobu, dọmo, Nẹmu wẹ azán owhè ogbó towe tọn lẹ tọn?

⁹Jakobu sọ dọ hlan Falo, dọ, Azán owhè tòwiwehisizọnlin ṣie tọn lẹ kantọ̀nao wẹ: vude po oylan po wẹ azán owhè ogbè ṣie tọn lẹ ko yín, yé ma ko pla azán owhè ogbè otọ́ ṣie lẹ tọn tọn to azán tòwiwehisizọnlin yetọn tọn lẹ mẹ. ¹⁰Jakobu sọ dona Falo, bo sọ tónyì sọn nukọn Falo tọn.

¹¹Josẹfu sọ dotẹnna otọ́ etọn po mẹ, mẹsunnu etọn lẹ po, bo na nútindo de yé to aigba Egipti tọn mẹ, to whanpẹnọ gbahúgbahú aigba lọ tọn mẹ, to aigba Lamẹsesi tọn mẹ, dile Falo ko degbè do. ¹²Josefu sọ yí núdùdù do yìn otọ́ etọn, po mẹmẹsunnu etọn lẹ po, po whégbètọ otọ́ etọn tọn lẹpo po kẹdẹdi whédo yetọn lẹ.

¹³Núdùdù, de ma sọ tin to aigba lẹpo ji, na hùvélọ sinyẹn talala, sọmọ bọ aigba Egipti tọn po aigba Kenani tọn po kusiọ na hùv-é lọ wutu. ¹⁴Josefu sọ bé akuẹ he yè mọ to aigba Egipti tọn ji lẹpọ plidopọ, podọ to aigba Kenani tọn ji, na ogbàdo he yé hò lẹ: Josefu sọ hen akuẹ lọ wá ohó Falo tọn mẹ.

¹⁵Whenuena yè ko whle akuẹ lẹpo to aigba Egipti tọn jipó, podọ to aigba Kenani tọn ji, Egiptinu lẹpo wá Josefu de, bo dọmọ, Na núdùdù mí: na etéwútu wẹ mí na do kú to nukọn towe? na akuẹ mítọn gbòdà. ¹⁶Josefu sọ dọmọ, Mì yí kanlin mítọn lẹ wá; yẹn na sọ na mì na kanlin mítọn lẹ, eyín akuẹ mítọn gbòdà. ¹⁷Yé sọ hẹn kanlin yetọn lẹ wá Josefu de: Josefu sọ na núdùdù yé to odiọ mẹ na osé lẹ, podọ na kanlinpa lẹ, po oyìnpó lẹ po, podọ na kẹtẹkẹtẹ lẹ: é sọ yí núdùdù do yìn yé to odiọ mẹ na kanlin yetọn lẹpo na owhè nẹ̃,

¹⁸Whenuena owhè nẹ vọ̀, yé sọ wá e de to owhè awetọ mẹ, bo dọ hlan ẹn, dọ, Míwle ma na sọwhlá sọn klunọ ṣie de, le yè whle akuẹ mítọn lẹpo vó do; oyìnpó kanlin tọn lẹ sọ yín klunọ ṣie tọn; yè ma sọ pò núde dai to nukun klunọ ṣie tọn mẹ gba, adavo agbasa mítọn lẹ, po aigba mítọn lẹ po: ¹⁹enẹwutu mí na do kú to nukọn nukun towe lẹ tọn mẹ, míwiẹ po aigba mítọn po? hó mí po aigba mítọn po na núdùdù, mí po aigba mítọn po na sọ yín devi lẹ hlan Falo: bo na okún mí, na mí nido nọgbó, bo ma kú, podọ aigba lọ sọ yín oklogbo blo.

²⁰Mowẹ Josefu hò aigbà Egipti tọn lẹpo na Falo; na Egiptinu lẹ Omẹ dopodopo sà oglè etọn, na hùvó lọ sinyẹn do yé ji wutu: aigba lọ sọ lẹzùn Falo tọn. ²¹Na gbẹtọ lẹ tọn, é diọtẹnna yé hían tòdaho lẹ mẹ sọn opòdo agbègbè Egipti tọn tọn de yèdọ jẹ opòdo etọn awetọ ji. ²²Aigba yẹwhenọ lẹ tọn jãnwẹ é ma hò; na yẹwhenọ lẹ tindo mimá de sọn Faìo si, bo sọ nọ dù mimá yetọn he Falo na yé; enẹwutu yówlẹma sà aigba yetọn gba.

²³Whenẹnu Josefu dọ hlan gbẹtọ lẹ, dọ, Dayi e go, yẹn ko hò mì to egbó po aigba mítọn po na Falo: pọ́n, okún tin to ofi na mì, mì na sọ dó aigba lọ. ²⁴E na sọ wá jọ to zĩnhọdido lẹ whenu, wẹ mì na nọ na dadatón de hlan Falo, vlọndẹnẹ lẹ na yín mítọn titi, na okún danji tọn, podọ na núdùdù mítọn, podọ na yé whégbètọ mítọn lẹ tọn, podọ na núdùdù na omẹ flinflin mítọn lẹ.

²⁵Yé sọ dọmọ, Hiẹ ko whlẹn ogbó mítọn lẹ do ogbè: gbọ mí ni mọ nukundagbe to nukọn klunọ ṣie tọn mẹ, míwlẹ na sọ yín devi Falo tọn lẹ.

²⁶Josefu sọ basi i na oséndoái de gbọn aigba Egipti tọn dali jẹ egbé he, na Falo na do nọ tindo madatón; aigba yẹwhenọ lẹ tọn kẹdẹ jãnwẹ ma lẹzùn Falo tọn gba.

²⁷Islaeli sọ nọnọ̀ aigba Egipti tọn ji, to aigba Gosẹni tọn ji; yé sọ tindo nútindo lẹ to e mẹ, bo yín sinsónnọ lẹ, bo sọ sudeji gégé.

²⁸Jakobu sọ nò aigba Egipti tọn ji hó owhè fọtọ̀nnukunawe: mọwẹ azán Jakobu tọn lẹ, owhè ogbó etọn le, yín owhè kantọ̀nkoatọ́nnùkunawe.

²⁹Ojlẹ sọ sẹpọ́ bọ Islaeli mananọma kú: é sọ ylọ visunnu etọn Josefu, bo dọ hlan ẹn, dọ, Eyín yẹn ko mọ nukundagbe to nukọn towe lo, yí, yẹn vẹ̀ we, alọ towe do asapada ṣie glọ, bo yí homẹhùnhùn po nugbo po do zan hẹ mi; a diṣiọ ṣie, yen vẹ̀ we, to Egipti mẹ blọ: ³⁰ṣigba, whenuena yẹn damlọn hẹ otọ́ ṣie lẹ, hiẹ na zé mi ton sọn Egipti, bo disio ṣie to ṣiọditẹn yetọn mẹ. Ewọ sọ domọ, Yẹn na wà dile hiẹ ko dọ do. ³¹Ewọ sọ dọmọ, Whle hlan mi: ewọ sọ whlé hlan ẹn. Islaeli sọ dó ede do ota adzan tọn ji.

¹E sọ jo to onú helẹ godo, wẹ omẹ de dọ hlan Josèfu, dọ, Dayi e go, otú towe tin awutujẹ: é sọ yí po e po visunnu etọn awe lẹ Manasse po Ẹflaimi po. ²Omẹ de sọ dọ na Jakobu, bo dọmọ, Dayi e go, visunnu towe Josefu wá de we: Islaeli sọ dogánna ede bo sinai to adzan ji.

³Jakobu sọ dọ hlan Josefu, dọ, Jiwheyẹwhe Gánhunupo sọawúhia hlan mi to Luzi to aigba Kenani tọn ji, bo dona mi, ⁴bo dọ hlan mi, dọ, Dayi e go, yẹn na hẹn we zùn sinsẹnnọ, bo hẹn wẹ jigba, yẹn na hẹn we zùn ogbẹ̀ gbẹtọ gégé tọn; yẹn na na aigba he hlan okún towe to godo towe na nútindo madópòdo de. ⁵Dinvie visunnu towe awe lẹ, he yè ji hlan we to aigba Egipti tọn ji whẹpo yẹn do wá de we to Egipti, ṣie wẹ; Eflaimi po Manasse po, yèdọ dile Lẹubeni po Simeoni po te, wẹ yé na yín ṣie. ⁶Ovi towe, he hiẹ ji to godo yé tọn, wẹ na yín towe; yè na nọ ylọ yé di oyín mẹmẹsunnu yetọn lẹ tọn to ogú yetọn mẹ. ⁷Na yẹn tọn, whenuena yẹn sọn Padani jẹ, Laheli kú to dẽ to aigba Kenani tọn ji to aliho ji, whenuena é gbó sọ pò zọnlin vude nado wá Ẹflati: yẹn sọ disiọ etọn to finẹ to aliho ji hlan Ẹflati (enẹ wẹ Betlẹhẹm).

⁸Islaeli sọ dayi visunnu Josefu tọn lẹ go, bo dọmọ, Mẹnu wẹ ehelẹ? ⁹Josefu sọ dọ hlan otọ́ etọn, dọ, Visunnu ṣie le wẹ yé, he Jiwheyẹwhe na mi to ofi. E sọ dọmọ, Hẹn ye wá dẽ, yẹn vẹ̀ we, yẹn na sọ dona yé. ¹⁰Nukun Islaeli tọn lẹ ko súzin na whinwhén, sọmọ bọ é ma do sọgan mọnú. E sọ hẹn yé wá e de; é sọ donùnùgọna yé, bo dòn yé do akọ́n. ¹¹Islaeli sọ dọ hlan Josefu, dọmọ, Yẹn ma ko lẹn nado sọ mọ nukunme towe gba: bo, pọ́n, Jiwheyẹwhe ko gbọ ma mọ okún towe ga.

¹²Josefu sọ hẹn yé tẹ́n sọn kligonu etọn lẹ ṣẹnṣẹn; é sọ dẹ́ ede po nukunmẹ etọn po hlan aigba. ¹³Josefu sọ yí ye omẹ owe lẹ, Ẹflaimi to alọ etọn adusi mẹ hlan alọ amiyọn Islaeli tọn tọn dali, podọ Manasse to alọ etọn amiyọn mẹ hlan alọ adusi Islaeli tọn tọn dali, bo hẹn yé sẹpo e de. ¹⁴Islaeli sọ dlẹn alọ etọn adusi tón, bo zé e do ota Ẹflaimi tọn, mehe yín yọ̀pọ, podọ alọ eton amiyọn do ota Manasse tọn, é yọ́nẹn do do alọ etọn lẹ mọ; na Manasse wẹ plọnji.

¹⁵E sọ dona Josefu bo dọmọ, Jiwheyẹwhe mẹhe nukọn otọ́ ṣie le Ablaham po Isaki po zinzọnlin te, Jiwheyẹwhe he yin mi to ogbè whenu ṣie lepo mẹ je egbé he, ¹⁶angẹli he fli mi sọn oylan lẹpo me, ni dona yọpọsunnu ewlẹ, bo gbọ yè ni nọ ylọ oyín ṣie do yé go, podọ oyín otọ ṣie le Ablaham po Isaki po tọn: bo gbọ yé ni whén zùn mẹsusugégé to aigba ṣẹnṣẹn.

¹⁷Whenuena Josefu mọ dọ oto etọn zé alọ etọn adusi do ota Ẹflaimi tọn, é ma hẹn hòmẹhùn nẹ̃ gba: é sọ zé alọ otọ́ etọn tọn daga, nado diọ ẹ sọn ọta Eflaimi tọn do ota Manasse tọn. ¹⁸Josefu sọ dọ hlan otọ́ etọn, dọ, Mọ ma gba, oto ṣie: na ehe wẹ plọnji; yí alọ towe adusi do ota etọn. ¹⁹Otọ́ etọn sọ kó, bo domọ, Yẹn yón ẹn, visunnu ṣie, yẹn yẹ́n ẹn ewọ ga na lẹzùn akọta de, ewọ ga na sọ yín kiklo: ṣigba nẹgbetọ etọn nọvisunnu na yín kiklo hú ewọ, okun etọn na lẹzùn akọta mẹsusugégé de tọn lẹ. ²⁰E sọ dona yé to azán nẹ gbè, dọmọ, Hiẹ mẹ wẹ Islaeli na no dona te, dọ, Jiwheyẹwhe ni basi wẹ di Ẹflaimi po Manasse po: é sọ zé Eflaimi do Manasse nukọn.

²¹Islaeli sọ dọ hlan Josefu, dọ, Dayi e go, Yẹn kú: ṣigba Jiwheyẹwhe na tin hẹ mì, bo sọ hẹn mì gọ́ do aigba otọ́ mítọn le tọn ji. ²²Humọ yẹn ko na mimá dopo hlan we húgan mẹmẹsunnu towe le, he yen yí ohi ṣie po oga ṣie po do yí sọn alọ Amolinu si.

¹JAKOBU sọ ylọ hlan visunnu etọn lẹ, bo dọmọ. Mì bé mìde plidopọ, na yẹn nido dọ na mì enẹ he na jọ dọ mì go to azán godotọn lẹ mẹ.

⁶A alindọn ṣie, a biọ linlẹn yetọn mẹ wá blo;

²³Gásẹtọ lẹ ko hẹnhòmẹgble nẹ badabada,

²⁷Ohla he nọ dọ̀ntlẹn de wẹ Bẹnjamini:

²⁸Ehe lẹpo wẹ whẹndo wiawe Islaeli tọn lẹ: ehe sọ wẹ enẹ he otọ́ yetọn dọ hlan yé bo sọ dona yé; omẹ dopodopo kẹdẹdile odona etọn te wẹ é dona yé. ²⁹E sọ nasẹ yé, bo dọ hlan yé, dọ, Yẹn pó bépli hlan hẹnnumẹ ṣie lẹ de: mì disiọ ṣie dogọ́ otọ́ ṣie lẹ to aigbaslo he tin to danji Ẹfloni Hittinu tọn tọn mẹ, ³⁰to aigbaslo he tin to danji Makpela tọn mẹ, he tin Mamle nukọn, to aigba Kenani tọn ji, he Ablaham hò dogó danji sọn Ẹfloni Hittinu si na nútindo ṣiọditẹn tọn de: ³¹finẹ yé disiọ Ablaham tọn po Sala asi etọn tọn po do; finẹ yé disiọ Isaki tọn po Lebeka asi etọn tọn po do; finẹ yẹn sọ disiọ Lea tọn do: ³²danji lọ po aigbaslo lọ he tin to e mọ po, he yè hó sọn ovi Heti tọn lẹ si.

³³Whenuena Jakobu donùna aṣẹnina visunnu etọn lẹ pó, é dòn afọ etọn daga biọ aimlọnnú mẹ, bo jo gbigbọ do, yè sọ bó ẹ pli hlan hẹnnumẹ etọn lẹ de.

¹JOSEFU sọ sìnyọnai to nukunmẹ otọ́ etọn tọn ji, bo viavi to e ji, bo sọ donùnùgo nẹ̃. ²Josefu sọ degbèna devi etọn bokọtọnọ lẹ nado sabódo otọ́ etọn; bokọtọnọ lẹ sọ sabódo Islaeli. ³Azán kande sọ pó nẹ: na mọwẹ yè nọ hẹn azán bósadomẹ tọn lẹ pé do: Egiptinu lẹ sọ viavi nẹ̃ hó azán kandegbàn. ⁴Whenuena azán avivivi nẹ tọn juwáyì, Josefu dọhó hlan whégbètọ Falo tọn lẹ, dọ, Eyín yẹn ko mọ nukundagbe to nukun mítọn lẹ mẹ lò, mì bo dọho, yẹn vé mì, do otọ́ Falo tọn lẹ mẹ, dọmọ, ⁵Otọ́ ṣie hẹn mi whlé, dọmọ, Pọ́n, yẹn kú: to yòdo ṣie mẹ he yẹn kùn na mi to aigba Kenani tọn ji, finẹ wẹ hiẹ na disiọ ṣie do. Enẹwutu dinvie gbọ yẹn ni hẹ́ji yì, yẹn vó we, bo disiọ otọ́ ṣie tọn, yẹn na sọ légó wá.

⁶Falo sọ dọmọ, Héji yì, bo diṣiọ otọ́ towe tọn, kẹdẹdile é hẹn we whlé do.

⁷Josefu sọ hẹ́ji yì nado diṣiọ otọ́ etọn tọn: devi Falo tọn lẹpo sọ hẹ́ji yì hẹ ẹ, mẹho owhé etọn gbè tọn lẹ, po mẹho aigba Egipti tọn tọn lẹpo po, ⁸po owhé Josefu tọn lẹpo po, po mẹmẹsunnu etọn lẹ po, po owhé otọ́ etọn tọn po: omẹ flinflin yetọn lẹ, po kanlinpa, yetọn lẹ po, po oyìnpó yetọn lẹ po sokẹdẹ wẹ yé pòdoai to aigba Gosẹni tọn ji. ⁹Kẹkẹ po osónọ lẹ po sọ hóji yì hẹ ẹ: ogbé daho talala de wẹ é sọ yín. ¹⁰Yé sọ wá kúndenú-gbà Atadi tọn kón, be tin to Jọdani godo, finẹ wẹ yé yi avi daho sinsinyẹn talala de do blawú te: é sọ basi hóninọ de na otọ́ etọn hò azán ṣinawe. ¹¹Whenuena tòmẹnu aigba lọ tọn lẹ, Kenaninu lẹ mọ họ̀ninọ lọ to agbà Atadi tọn ji, vé dọmọ, Họ̀ninọ hòmẹgblenọ de wẹ ehe hlan Egiptinu lẹ: enẹwutu wẹ yè do nọ ylọ ẹ dọ Abel-mizlaimi, he tìn to Jọdani godo. ¹²Visunnu etọn lẹ sọ wà hlan ẹn kẹdẹdile é degbèna yé do: ¹³na visunnu etọn lẹ zé e sọ yì aigba Kenani tọn ji, bo disiọ etọn to aigbaslo danji Makpela tọn tọn mẹ, he Ablaham hò dogó danji lọ, na nútindo siọditẹn tọn de, sọn Ẹfloni Hittinu si, to Mamle nukọn.

¹⁴Josefu sọ lẹ́gọ́ wá Egipti, ewọ, po mẹmẹsunnu etọn lẹ po, po yé omẹ he hẹ́ji yì hẹ ẹ nado disiọ otọ́ etọn tọn lẹpo po, to ehegodo é ko disiọ otọ́ etọn tọn.

¹⁵Whenuena mẹmẹsunnu Josefu tọn lẹ mọ dọ otọ́ yetọn ko kú, yé dọmọ, E sọgan yín dọ Josefu na gbẹwánna mí, bo na yíahọsu gigọ́ oylan he mi wà do e tọn to mí go. ¹⁶Yé sọ do mẹdagun de hlan Josefu, dọmọ, Oto towe ko degbè whẹpo é do kú, dọmọ, ¹⁷Mọwẹ mì na dọ hlan Josefu, dọ, Jona lo, yẹn vè we, oylanwà mẹmẹsunnu towe lẹ tọn, po ylando yetọn po, na ehe yé do wà oylan hlan we; bé dinvie, mí vẹ́ wẹ, jona oylanwà devi Jiwheyẹwhe otọ́ towe tọn lẹ tọn tọn. Josefu sọ viavi whenuena yé dọhó hlan ẹn. ¹⁸Mẹmẹsunnu etọn lẹ ga sọ yì bo dlẹn to nukọn etọn; yé sọ dọmọ, Dayi e go, devi towe wẹ mí yín.

¹⁹Josefu sọ dọ hlan yé, dọ, Mì hanu blo: bé yen tin to otẹn Jiwheyẹwhe tọn mẹ wẹ? ²⁰Na mì tọn, oylan wẹ míwlẹ lẹn do ogo e; ṣigba Jiwheyẹwhe hia ẹ na dagbe, nado hẹn wá jọ, dile é te to egbé he, nado whlẹn omẹ susu dogbé. ²¹Enẹ wutu dinvie mì hànu blo: yẹn na yìn mì, po omẹ flinflin mìton le po. E sọ miọnhòmẹna yé, bo dọhó dagbe hlan yé.

²²Josefu sọ sín Egipti, ewọ, po owhe otọ́ etọn ton po; Josefu sọ nọgbè hò owhè kanwegban. ²³Josefu sọ mọ whendo atontọ ovi Ẹflaimi tọn lẹ tọn: ovi Makil tọn lẹ ga visunnu Manasse tọn kligonu Josefu tọn lẹ ji yè ji yé do.

²⁴Josefu sọ dọ hlan mẹmẹsunnu etọn lẹ, dọ, Yẹn kú: ṣigba Jiwheyẹwhe na dla mì pọ́n dándán, bo na hẹn mì hẹ́ji sọn aigba he ji hlan aigba he é whlé hlan Ablaham, hlan Isaki, podọ hlan Jakobu. ²⁵Josofu sọ yi whiwhle de sọn ovi Islaeli lon lẹ si, dọmọ, Jiwheyẹwhe na dla mì pọn dándán, bọ mìwlẹ na sọ hẹn ohú ṣie le hẹ́ji yì sọnfi ²⁶Mowẹ Josefu kú do, é yín owhè kanwegbàn mẹho: yé sabódo e, yè sọ yí i do ẹiọpotin de mẹ to Egipti.