Galatianu Lẹ

¹PAULU, apọsteli (é ma yín sọn gbẹtọ lẹ de, kavi gbon omẹ de mẹ gba, ṣigba gbon Jesu Klisti, po Jiwheyẹwhe Òtọ, mẹhe fọ́n ẹn sọn oku po de;) ²po mẹmẹsunnu he tin to dẽ lepo po hlan agùn Galatia tọn lẹ: ³ojọmiọn po jijọho po hlan mì sọn Jiwheyẹwhe Otọ́ de, podọ sọn Jesu Klisti Oklunọ mítọn de, ⁴mẹhe jo ede na ylando mítọn, na ewọ nido whlẹn mí sọn oylan aihọn dinvie tọn mẹ, kẹdẹdi ojlo Jiwheyẹwhe Otọ́ mítọn tọn: ⁵na mehe gigo tin na kaka doidọi. Niṣẹ.

⁶Avò vò mi na yè do yawu dè mì sọn mehe ylọ mì do ojọmiọn Klisti tọn mẹ de do wẹndagbe devo kòn: ⁷ehe ma yín devo; ṣigba mẹdelẹ tin bo to tuklado mì, yé sọ jlo nado hẹn wẹndagbe Klisti tọn gble. ⁸Ṣigba eyín mìwlẹ, kavi angẹli de sọn olọn mẹ, sọ dọ yẹwheho wẹndagbe tọn depope devo hlan mì hú ehe mìwlẹ do dọ yẹwheho hlan mì, yè ni gbọ é ni yín anatema. ⁹Dile mí ko dọ jẹnukọn, mọwẹ yẹn sọ dọ dinvie, dọmọ, Ẹyín mẹde sọ dọ yẹwheho wẹndagbe tọn devo depope hlan mì hú ehe mì ko yí, yè ni gbọ é ni yín anatema. ¹⁰Be dinvie gbẹtọ wẹ yẹn tọ ayiha lé na, kavi Jiwheyẹwhe? Kavi gbẹtọ nukundagbe wẹ yẹn to dindin? Yín eyín dọ gbẹtọ nu kundagbe din wẹ yẹn te, yen ma na sọgan yín mẹmẹglọ Klisti ton gba.

¹¹Ṣigba yẹn dọ hlan mì, mẹmẹsunnu emi, wendagbe he yẹn dọyewheho etọn ma gbọn gbẹtọ tọn dali gba. ¹²Na yẹn ma yí i sọn gbẹtọ de gba, kavi yè ma plón ẹn mi, adavo gbọn osọhia Jesu Klisti tọn mẹ ¹³Na mì ko sè owalọ ṣie, to hóhówhenu tosinsèn Ju le tọn mẹ, le yẹn dohomẹkẹn agùn Jiwheyẹwhe tọn zẹjlẹ go dọ, bo sọ gbà e, do: ¹⁴yẹn; du yeyi to sinsẹ̀n Ju lẹ tọn mẹ hú ogbé ṣie susu to akọta yẹnlosu tọn mẹ, bo sọ yín vivẹnunọ ọtàn hóhó otọ́ ṣie lẹ tọn ton gbahúgbahú. ¹⁵Ṣigba whenuena é jlo Jiwheyẹwhe, mẹhe klán mi sọn ohò onọ ṣie tọn mẹ dovo, bo sọ ylọ mi gbọn ojọmiọn etọn mẹ, ¹⁶nado do Ovi etọn hia to yen mẹ, na yẹn nido dọyewheho etọn to Kosi, le ṣẹnṣẹn; afodoponẹji, yen ma lenhẹ agbasalan po ohùn po gba: ¹⁷mọ yẹn ma hẹji yì Jẹlusalem jè mehe yín Apọsteli jẹnukọnna mi lẹ de gba: ṣigba yẹn yì Alabia, bo sọ lẹgò wá Damasku.

¹⁸To owhè atọ̀n godo, whenẹnu wẹ yẹn hẹji yì Jelusalẹm nado pọ́n Pita, bo sọ nò e de azán fọtọ̀n. ¹⁹Ṣigba yẹn ma mọ omẹ depope to Apọsteli devo lẹ mẹ, adavo Jakobu nọvisunnu Oklunọ tọn ²⁰Onú he yẹn to owé wlan hlan mì na dinvie, do ayi e go, to Jiwheyẹwhe nukọn yẹn ma to lalodo gba. ²¹To enẹgodo, yẹn wá Silia po Silisia po dali; ²²yẹn sọ yín omẹ yè ma yọnẹn to nukunta na agùn lẹ he tin to Klisti mẹ to Judé: ²³ṣigba linlin kedẹ wẹ yé sè dọ, Mẹhe nọ dphomekẹn mí hóhó dai, to yẹwheho yise lọ tọn dọ dinvie, he ewọ ko to gbigbà súdo dai. ²⁴Yé sọ pagigona Jiwheyẹwhe to yẹn mẹ.

¹TO owhè wiẹnẹ godo, whenẹnu wẹ yẹn sọ hẹji yì Jelusalẹm po Balnaba po, bo sọ hẹn Titu dogó mi ga. ²Yẹn sọ hẹji yì gbọn osọhia mẹ, bo sọ dọhó wẹndagbe lọ tọn hlan yé, ehe yẹn to yẹwheho etọn dọ to Kosi lẹ ṣẹnṣẹn; ṣigba to nuglọ hlan yé he doyìn lẹ, na yẹn nikã dowezun, kavi ko to wezundo yaya. ³Ṣigba é bo sọ yín Titu, mẹhe tin to dẽ, mẹhe yín Gleki, yè ma yí huhlọn do hen ẹn gbowhẹ gba: ⁴na mẹmẹsunnu lalonọ lẹ he yè hẹn wá ajiji lẹ tọn wutu, mẹhewá to nuglọ nado bẹpọn mẹdekannujẹ mítọn, he mí tindo to Klisti Jesu mẹ, na yé nido hen mí wá kanlin mọgbenu: ⁵mẹhe mìwlẹ ma na otẹn, lala, é ma yín to ogàn dopo mẹ; na nugbo wẹndagbe tọn nido tin to mì de. ⁶Ṣigba ehelẹ tọn mẹhe sọawúhia di omẹ sàndeji (nudepope yé yín, é ma pla mi: Jiwheyẹwhe ma hò awúsọhìa mẹdepope tọn pọ́n:) na yé he sọawúhia di omẹ sàndeji to oplìtò ma yín núde hlan mi: ⁷ṣigba na vogbingbọn tọn, whenuena yé mọ dọ yè yí wẹndagbe owhẹmagbo tọn na mi, dile yè yi wẹndagbe owhẹgbo tọn na Pita do; ⁸(na ewọ he wàzón magble to Pita mẹ hlan apọstelizón owhẹgbo tọn, wẹ yín huhlọnnọ to yẹn homẹ hlan Kosi lẹ ga:) ⁹whenuena Jakobu, Kefa, po Johanu po, mẹhe di dòtin, mọ ojọmiọn he yè na mi, yé yí adusilọ kọndopọ tọn hlan yẹn po Balnaba po; na mìwlẹ ni yì Kosi lẹ de, na yéwlẹ ni yì owhẹgbo tọn lẹ de. ¹⁰Ṣigba yé jlo kẹdẹ dọ mí lẹ ni nọ flin wamọnọ lẹ, onú he yẹn ma wọnji e go nado nọ wà ga.

¹¹Ṣigba whenuena Pita jẹ Antioku, yẹn glọnali nẹ, na é yín mẹhe yè do wọhẹ. ¹²Na whẹpo mẹdelẹ sọn Jakobu de wá, ewọ ko to núdù hẹ Kosi lẹ; ṣigba whenuena yé wá, é joagò, bo klán ede dovo, é to budìna yé he yín owhẹgbo tọn lẹ. ¹³Ju devo lẹ sọ wà oblu hẹẹ ga; sọmọ bọ yé yí oblu yetọn dò dòn Balnaba yì ga. ¹⁴Ṣigba whenuena yẹn mọ dọ, yé ma zinzọnlin tìtegbe, kẹdẹdi nugbo wẹndagbe tọn, yẹn dọ hlan Pita to yé omẹ pó nukọn dọ, Eyín hiẹ, he yín Ju, to zọnlinzin to owalọ Kosi lẹ tọn mẹ, bo ma yín dile Ju lẹ nọ wà do gba, etẹwutu wẹ hiẹ to huhlọn yí do to Kosi lẹ hẹn nado zinzọnlin dile Ju lẹ nọ wà do? ¹⁵Mí he yín Ju gbọn jijọ dali bo ma yín ylandonọ sọn Kosi lẹ mẹ, ¹⁶yinyọnẹn dọ, yè ma sùwhẹna mẹde gbọn azón osén tọn mẹ gba, adavo gbọn yise Jesu Klisti tọn mẹ, yèdọ mìwlẹ ko yí Jesu Klisti se, na yè nido sùwhẹna mí gbọn yise Klisti tọn mẹ, é ma yín gbọn azón osén tọn mẹ gba: na gbọn azọn osén tọn mẹ, mẹde ma tin bọ yè na sùwhẹna. ¹⁷Sigba eyín whenuena mìwlẹ to ali din nado yín whesùna gbọn Klisti dali, bọ yè sọ mọ mìlọsu yín ylandonọ, be enẹwutu Klisti yín devizònwàtọ ylando tọn wẹ la? E yín mọ blo. ¹⁸Na eyín yẹn sọ to onú he yẹn ko hó liai zé dote, yẹn hẹn dẽ zùn ylanwàtọ. ¹⁹Na gbọn osén dali yẹn ko kú hlan osén, na yẹn nido tin to ogbè hlan Jiwheyẹwhe. ²⁰Yè ko whè mi do satin go hẹ Klisti, ṣigba yẹn sọ tin to ogbẹ̀, mọwẹ é ma yín yẹn wẹ gba, Klisti he tin to ogbè to yẹn mẹ wẹ: ogbè he yẹn sọ tin te to dinvie to agbasalan mẹ, yẹn tin to ogbè to yise he tin to Ovi Jiwheyẹwhe tọn tọn mẹ, mẹhe yiwanna mi, bo sọ yí ede na mi. ²¹Yẹn ma diọ ojọmiọn Jiwheyẹwhe tọn zùn ovó gba; na eyín dódó wá gbọn osén dali, be ovó wẹ Klisti kú.

¹MÍ Galatianu klenọ, mẹnu wẹ klọ mì, bọ mì ma do yí nugbo se, nukun mẹhetọn mẹ yè zé Jesu Klisti mẹwhedosatingo dote te to mì ṣẹnṣẹn. ²Ehe kẹdẹ wẹ yẹn jlo na sè sọn mì de, Gbọn azón osén tọn dali wẹ mì mọ Gbigbọ lọ yí, kavi gbọn sisè yise tọn dali? ³Be mìwlẹ yín klenọ sọmọ? mì he sẹ̀ to Gbigbọ mẹ, be yè ko basi mì sọgbè to agbasalan mẹ wẹ? ⁴Be yaya wẹ mì jiya onú susu nẹlẹ tọn? Eyín yaya wẹ é tlẹ yín. ⁵Enẹwutu ewọ mẹhe na Gbigbọ mì, bo sọ wàzón jawu lẹ to mì ṣẹnṣẹn, gbọn azón osén tọn mẹ wẹ é basi i la, kavi gbọn sisè yise tọn dali? ⁶Kẹdẹdile Ablaham yí Jiwheyẹwhe se, bọ ye sọ hia ẹ hlan ẹn na dúdó. ⁷Enẹwutu mì ni yọnẹn dọ yé he yín yise tọn lẹ, dopolọ lẹ we yín ovi Ablaham tọn. ⁸Owe wiwe, mimọ donukọn dọ, Jiwheyẹwhe na sùwhẹna Kosi lẹ gbọn yise dali; dọyẹwheho wendagbe lọ tọn jẹnukọn hlan Ablaham, domọ, Gbọn de we wẹ akọta lẹpo na mọ dona te. ⁹Mọkẹdẹ we yé: he yín: yise tọn lẹ wẹ mẹhe yín donanọ hẹ Ablaham yisenọ. ¹⁰Na yé omẹ sọha he yin azọn osén tọn tọn lẹ tin to dẹ̀hodo de glọ; na yè wlan ẹn dọ, Mẹhodẹ́do wẹ ome depope he ma nọte to onu nẹlẹ pó mẹ he yè wlan do owé osén tọn mẹ nado nọ basi yé. ¹¹Ṣigba é sọawúhia jẹgbonu dọ, ye ma sùwhẹna ome depope to Jiwheyẹwhe nukọn gbọn azon osén tọn dali gba: na, Dódónọ na nò ogbè gbọn yise dali: 4 ¹²osén ma sọ yín yise tọn gba; ṣigba, Yé he basi yé na nò ogbẹ̀ to yé mẹ.? ¹³Klisti ko fli mí sọn dẹ̀hodo osén tọn mẹ, mẹhe lezun mẹhodèdo de to oten mítọn mẹ, na yè ko wlan ẹn dọ, Mẹhodèdo wẹ omẹ depope he yè sọpla do atin go: ¹⁴na dona Ablaham tọn nido wá Kosi le ji to Jesu Klisti me; na mí nido mọ opagbe Gbigbo tọn yi gbọn yise dali.

¹⁵Mẹmẹsunnu emi, yẹn to hódọ kẹdedi owalọ gbẹtọ lẹ tọn: Yín é bo sọ yín dọ alènu gbẹtọ tọn wẹ, ṣigba eyín yè ko yí i doai, omẹ depope ma sọgan diọ ẹ zùn ovó, kavi sọgan dè dogó ẹ ¹⁶Be hlan Ablaham po okún etọn lọ po wẹ yè dọ opagbe lẹ lọ. Ewọ ma dọmọ, Podọ hlan okún lẹ gba, taidi hlan ome susu; ṣigba taidi hlan dopo, Podọ hlan okún towe, 7 he yín Klisti. ¹⁷Ehe wẹ yẹn to didọ, dọ, Alènu he Jiwheyẹwhe ko yí doai donukọn gbọn Klisti dali, osén he tin to owhè fowẹgban godo ma sọgan diọ ẹ zùn ovó, bọ opagbe lọ nado fé; gba. ¹⁸Na eyín ogú lọ yín osén tọn, be é ma yín opagbe tọn ba gba: ṣigba Jiwheyẹwhe ko yí i na Ablaham gbọn opagbe dali. ¹⁹Be etewẹ osén yín lò? Ye yí dogó ẹ na ylanwà lẹ wutu, kaka okún he yè dopagbe na nido wá; yè sọ dè e gbọn angẹli lẹ dali gbọn alọ whẹgbọtọ de tọn mẹ. ²⁰Ṣigba whẹgbọtọ ma yín whẹgbọtọ omẹ; dopo tọn de gba, ṣigba dopo wẹ Jiwheyẹwhe. ²¹Enẹwutu be osén to aliglọnna opagbe Jiwheyẹwhe tọn we la? E yín mọ blo: na eyín osén de tin bọ yè ko na omẹ, ehe sọgan na ogbẹ gbẹtọ, nùgbo, dódó na ko gbọn osén dali wá ²²Ṣigba Owé wiwe ko glọn yé omẹ po do ylando glọ, na yè nido yí opagbe gbọn yise dali to Jesu Klisti mẹ na omẹ he yise lẹ.

²³Ṣigba whẹpo yise do wá, yè ko whlá mí do osén glọ, yè sọ glọn mi dai nọtepọ́n yise he yè na sọhia gbọn godo. ²⁴Enẹwutu osén wẹ meplọnto nado hen mí wá Klisti de, na ye nido sùwhena mí gbọn yise dali. ²⁵Ṣigba dinvie na yise ko wá, mìwlẹ ma sò tin to meplọntọ glọ ba gba. ²⁶Na ovi Jiwheyẹwhe tọn wẹ mì omẹ pó, gbọn yise mẹ, to Klisti Jesu mẹ. ²⁷Na mì omẹ sọha he yè ko baptizi to Klisti mẹ lẹ, ko zé Klisti do ogo. ²⁸Mẹde ma tin bo yín Ju kavi Gleki, mẹde ma tin bo yín mẹmẹglọ kavi mẹmẹdekannu, mẹde ma tin bo yín sunnu, kavi yọnnu, na omẹ dopo we mì mẹpo to Klisti Jesu mẹ. ²⁹Podo eyín mìwlẹ yín Klisti tọn be mì we okún Ablaham tọn, whédutọ kedẹdi opagbe tọn.

¹ṢIGBA yẹn dọmọ, Whédutọ lọ, dèn sọ lẹ ewọ tin to yọ̀pọ, é ma gbọnvò na mẹmẹglọ gba, eyín ewọ bo sọ yín Oklunọ onú lẹpo tọn. ²Ṣigba é tin to oglọ mẹgopọntọ lẹ po ohòkònsi lẹ po tọn kaka jẹ ojlẹ he otọ́ ko dèdai. ³Mọkẹdẹ wẹ mìwlẹ ga, whenuena mí tin to yọ̀pọ, yè hẹn mí to mẹglọnọ ojọgbè aihọn tọn glọ: ⁴ṣigba whenuena ojlẹ gigọ́ lọ wá, Jiwheyẹwhe do Ovi etọn hlan, mẹhe yè ji sọn yọnnusi de, he yè ji to osẹn glọ, ⁵na é nido fli yé he tin to osén glọ lẹ, na mìwlẹ nido mọyi sọdodovi ovi lẹ tọn. ⁶Le mì yín ovi, Jiwheyẹwhe ko do Gbigbọ Ovi etọn tọn jegbonu wá ayiha mítọn mẹ, he to awhádo dọ, Abba, Otọ ⁷Enẹ tọn wutu hiẹ ma sọ yin afànumẹ de ba gba, ṣigba ovi de; eyín hiẹ sọ yín ovi, be whédutọ de gbọn Jiwheyẹwhe mẹ.

⁸Ṣigba whenuena mì ma ko yón Jiwheyẹwhe dai, mì to sinsẹ̀n basi hlan yé he; ma yín yẹwhe gbọn jijọ dali. ⁹Ṣigba dinvie, he mì wá nado yọn Jiwheyẹwhe, kavi nado, yín yinyọnẹn sọn Jiwheyẹwhe de, nawẹ mì ka gbọn do vó légọ do madogán ohẹnje ojọgbè mẹ, fìe mì sọ jlo nado gò wá kanlinmọgbenu te? ¹⁰Mì nọ do ayi azán, osùn, ojlẹ, po owhè po go. ¹¹Avò nọ vò mi na mì tọn, nikã yín dọ yáya wẹ yẹn to tuklajẹ to mì ji.

¹²Mẹmẹsunnu emi, yẹn mì, mì nọ le yẹn te; na yẹn to le mì te. Mì ma wà onú gbigble de do mi gba. ¹³Mìwlẹ yónẹn dọ na madogán agbasa tọn de wutu wẹ yen dọyẹwheho wẹndagbe tọn hlan mì to whéwhéwhenu. ¹⁴Whlepón ṣie he tin to agbasalan ṣie mẹ, mì ma vle, mọ mì ma sọ gbé, ṣigba mì yí mi di angẹli Jiwheyẹwhe tọn de, yèdọ di Klisti Jesu, ¹⁵Be fìe wẹ dona mì lọsu tọn te? na yẹn dekunnuna mì, dọ, eyín é tin wiwá, mìwlẹ sọgan dè nukun mìtọn lọsu jẹgbonu bo yí yé na mi. ¹⁶Enẹwutu bé kèntọ mìtọn wẹ yẹn lẹzun na yẹn dọ nugbo na mì wutu? ¹⁷Yé yí vivẹnu do tó-mì dòn, ṣigba é ma yọ́n gba: nugbo, yé jlo nado glọn mì do gbonu, na mì nido dòn yé. ¹⁸Ṣigba é yọ́n nado yí vivẹnu do dòn omẹ whepoponu to onú dagbe mẹ, é ma yín whenuena yẹn tin to mì de kẹdẹ gba. ¹⁹Mì yọ̀pọ ṣie emi, mehe tọn wutu yẹn to ajipanu whlawetọ, kaka yè na do Klisti to mì mẹ, ²⁰yẹn jlo nado wá nò mì de to dinvie, bo nado diọ ogbè ṣie; na yẹn to ayiawe ji na mì tọn wutu.

²¹Mì dọ na mi, mì he jlo nado nò osén glọ lẹ, mì ma sọ sè ohó osén tọn? ²²Na yè ko wlan dọ, Ablaham tindo visunnu awe, ode gbọn yọnnu mẹmẹglọ daliv Awetọ gbọn asivó dali. ²³Ṣigba yè ji ehe yín yọnnu mẹmẹglọ tọn gbọn agbasalan tọn mẹ; ṣigba ehe yín yọnnu asivó tọn wẹ yè ji gbọn opagbe dali; ²⁴Onú hè lẹ sọ tin ohia de mẹ; na yonnu helẹ wẹ alènu awe lẹ; ode sọn osọ́ Sinai mẹ, jiji òvi hlan mẹglọnọ, he yín Hega. ²⁵Dinvie Hega he wẹ osọ́ Sinai tò Alabia mẹ, bo sọ taidi Jelusalẹm he tin to dinvie; na é tin to méglọnọ mẹ po ovi etọn lẹ po. ²⁶Ṣigba Jelusalẹm he tin to aga, é to edekannu, he yín onọ mìtọn. ²⁷Na yè ko wlan dọ, To ayajẹ, hiẹ wènsinọ he ma ji gbède; Bẹavi bo sọ dawhá jẹgbonu, hiẹ he ma zẹn gbéde; Na matinhuwhehometọnọ tindo ovi susu hú ewọ he to asúwhé. ²⁸Ṣigba mìwlẹ mẹmẹsunnu emi, dile Isaki tẹ, mìwlẹ wẹ ovi opagbe tọn lẹ ²⁹Ṣigba whenẹnu dile ewọ he yè ji gbọn agbasalan mẹ dohomẹkẹn ehe yè ji gbọn Gbigbọ mẹ, mọwẹ é te to dinvie. ³⁰Ṣigba etẹwẹ Owé wiwe dọ? Yàn yọnnu mẹmẹglọ lọ po ovi etọn po jẹgbonu; na ovi yọnnu mẹmẹglọ tọn ma na dugú hẹ ovi yọnnu asivó tọn gba. ³¹Enẹwutu, mẹmẹsunnu emi, mìwlẹ ma yín ovisunnu mẹmẹglọ tọn de gba, ṣigba yọnnu asivó tọn.

¹Enẹwutu mì nọte gligli to mẹdekannujẹ lọ mẹ, gbọn ehe mẹ Klisti hẹn mí vọnu jẹ mẹdekannu, na mì sọ yí okò do zẹ́gó kanlinmọgbenu tọn mẹ ba blo.

²Do ayi e go, yẹn Paulu dọ hlan mì, dọmọ, Eyín yè gbowhẹna mì; Klisti ma to ale de na yín na mì to nudepope mẹ. ³Na yẹn sọ vọ́ kunnudena yé he gbowhẹ lẹ dopodopo dọmọ, é zùn ahódutọ nado yìn osén lẹpo. ⁴Yè klan mì sọn Klisti mẹ, mi mẹhe yè to whẹsùna gbọn azọ́n osén tọn dali lẹ; na mì kò jai sọn ojọmiọn mẹ. ⁵Na mìwlẹ gbọn Gbigbọ mẹ nọte na tódido dódó tọn gbọn yise dali. ⁶Na to Jesu Klisti mẹ, owhẹgbo ma yín nudepope, kavi owhẹmagbo; adavo yise he to azọnwà gbọn owanyi mẹ. ⁷Mì ko dowezun talala nugbo; mẹnu ka wẹ glọnalina mì ni ma do yí nugbo se? ⁸Ogọdogodo ayiha tọn he; ma sọn ewọ he ylọ mì de gba. ⁹Otón pẹvide wẹ nọ hẹn linfín lẹpo ji. ¹⁰Yẹn ko dotu do mì go gbọn Oklunọ dali dọmọ, mì ma na tunnukun nudevo depope go; ṣigba ewọ he to tuklado mì na hẹn whẹgbledo etọn, mẹdepope he é yìn. ¹¹Podọ yẹn, mẹmẹsunnu emi, eyín yẹn to yẹwheho owhẹgbo tọn dọ kakajẹ dinvie, etẹwutu ka wẹ yẹn jiya homẹkẹn tọn? Be enẹwutu ahlidanu satin tọn pònu. ¹²Yẹn jlo dọ yè ni sán omẹ he to tuklado mì lẹ sè.

¹³Na mẹmẹsunnu emi, yè ko ylọ mì do medekannujẹ mẹ, kiki mì sọ zán vivi mẹdekannujẹ tọn hlan agbasalan blò, ṣigba gbọn owanyi mẹ mì nọ yín mẹmẹglọ hlan mìnọzo. ¹⁴Na yè hẹn ósén lẹpo di to ohó dopo mẹ, yèdọ to èhe mẹ, dọ; Hiẹ na yiwanna kọmẹnu: tówe di dewe. ¹⁵Ṣigba eyín mìwlẹ to adúhẹn mìnọzo, bo sọ to mìnọzo hù, mì payi mìde go, na mì nikã zùn husúdo sọn-mìnọzọ de.

¹⁶Be yẹn dọ ehe Mì nọ zinzọnlin to Gbigbọ me, mì ma so to na hen wantúntún agbasalan tọn di gba. ¹⁷Na agbasalan nọ túnwan jẹagò do Gbigbọ go, Gbigbọ sọ nọ túnwan jẹagò do agbasalan go; ehelẹ sọ nọ gbonvò do yenọzo go; sọmọ bọ mì ma sọ sọgan wà onú he mì to jijlo ¹⁸Ṣigba eyin yè hiali mì gbọn Gbigbọ de, be mì ma sọ tin to osẹn glọ gba. ¹⁹Azọ́n agbasalan ton lẹ sọawúhia dinvie, he yín ehelẹ; Ayọdide, ogàlilọ, mawé, wantúntún, ²⁰bosiọsinsèn, owón, okèn, avún, awuwhan lẹ, homẹgble, wìwó, atè, plongiglo, ²¹nuvẹun, ahannùmu, gbeduzejlego po onú mọhunkọ lẹ po: onú he yen ko nọ dọ na mì dai, dile yen ko dọ na mì to ojlẹ he kọ wá yì lẹ me, dọmọ, Yé he nọ wà onú nelẹ nkọ ma to ogu aholudu Jiwheyẹwhe tọn na du. ²²Ṣigba sinsén Gbigbọ tọn wẹ, owanyi, ayajẹ, jijọho, linsinven, homedagbe, dagbewà, nugbowà, ²³wàlọmimiọn, mawàzẹjlẹgo: osén depope ma tin to ehelẹ nkọ ji. ²⁴Yé he yín Klisti tọn lẹ ko whè agbasalan do satin go po ojlo ayiha tọn po, po wantúntún agbasalan tọn: lẹ po.

²⁵Eyín mìwlẹ tin to ogbè to Gbigbọ mẹ, mì bo gbọ mí ni to zonlinzin, to Gbigbọ mẹ ga. ²⁶Mì dike mi sọ tọ gigo ovọ jlo blo, to homehengblena mìnọzo mẹ, to mìnọzo nuvivẹun mẹ.

¹MẸMẸSUNNU emi, yèdọ eyín yè wle mẹde to ylando depope mẹ, mì mẹhe yín gbigbọnọ lẹ ni hen omẹ mọhunkọ gò do otẹn etọn mẹ to gbigbọ wàlọmimiọn tọn mẹ; bo payi dewe go, na yè nikã whle hiẹlọsu pọ́n ga. ²Mì nọ hen agbán mìnọzo tọn, na mì nido hẹn osén Klisti tọn di. ³Na eyín mẹde sọ to ede lẹn nado yín núde, whenuena é ma yín núde, é klọ ede. ⁴Ṣigba gbọ omẹ dopodopo mìtọn ni mọdòna azọ́n ede tọn whé, whenenu wẹ é na tindo ayajẹ to ede homẹ kẹdẹ, é ma na yín mẹdevo tọn gba. ⁵Na omẹ dopodopo wẹ na hẹn agbàn ede ton.

⁶Gbọ mehe yè to pinplón to ohó lọ me, ni nọ to mimá hlan yé he to mẹplọ́n to onu dagbe lepo mẹ. ⁷Yè klọ mì blo; Jiwheyẹwhe ma yín mẹvivlẹ gba; na nudepope gbẹtọ do, enẹ we é na gbèn ga ⁸Na mẹhe do hlan agbasalan etọn, gbọn agbasalan mẹ é na gbẹ́n gbigble; ṣigba mehe do hlan Gbigbọ, gbọn Gbigbọ me e nasọ gbèn ogbè madopodo ⁹Mì dike nusikọna mí to dagbe wiwà mẹ blo: na mìwlẹ na gbèn to whenuena ojlẹ sé, eyín mi ma wàdidọ. ¹⁰Be enẹwutu le mìwlẹ mọtẹn do, mì gbọ mí ni nọ wa dagbe hlan omẹ popo, humọ hlan yé he yín yise whédo tọn lẹ.

¹¹Mi mọ le yẹn yí alọ ṣie titi do wlanwe daho he hlan mì ¹²Yé omẹ sọha he jlo nado sọawúhia to agbasalan mẹ lẹ, yé to dindọn mì na yè ni gbowhena; na yé nikã jiya homekẹn tọn na satin Klisti tọn wutu kẹdẹ wẹ. ¹³Na yé he yè tlẹ gbowhẹna lẹ lọsu ma yìn osén; ṣigba yé jlo nado hen mì gbowhẹ, na yé nido dogigo to agbasalan mìtọn ji ¹⁴Ṣigba é ni dẹ̀n do mi nado to gigo yí, adavo to satin Jesu Klisti Oklunọ mítọn tọn mẹ, gbọn mẹhe mẹ yè whè aihọn do satin go hlan mi, podọ yẹn hlan aihọn. ¹⁵Na to Klisti Jesu mẹ owhẹgbo ma yín nudepope, kavi owhẹmagbo, adavo nudida yọ́yọ́. ¹⁶Na yé omẹ sọha heto zọnlinzin dole osén he te, jijoho tin to yé ji, po lẹblanu po, podọ to Islaeli Jiwheyẹwhe tọn lọ ji ga.

¹⁷Sọn dinvie, mẹdepope sọ dotukla mi ba blo: na yẹn to ohia Jesu Oklunọ tọn hẹn pé to agbasa ṣie mẹ.

¹⁸Mẹmẹsunnu emi, ojọmiọn Jesu Klisti Oklunọ mítọn tọn ni nọ̀ hẹ gbigbọ mìtọn. Niṣẹ.