1SIMỌNI Pita, afànumẹ de podọ apọsteli Jesu Klisti tọn, hlan yé he yi yise he họakuẹ sọmọ lọ hẹ mí gbọn dóaó Jiwheyẹwhe tọn po Jesu Klisti Whlẹngantọ mítọn tọn po dali: 2Na ojọmiọn po jijọho po ni to jiji deji hlan mì to oyọnẹn Jiwheyẹwhe tọn mẹ po Jesu Oklunọ mítọn tọn po, 3mimọ dọ yẹwhe huhlọn etọn ko na onú popo má he yín ogbẹ́ po jijọ-di-Jiwheyẹwhe po tọn, gbọn oyọnẹn ewọ he ylọ mí hlan gigo po jijọdagbe po mẹ: 4gbọn ehetọn mẹ yè yí opagbe daho talala akuẹgegenu na mí: na gbọn ehelẹ dali mì nido yín máhẹtọ jọwamọ yẹwhe, le mí to tutlu sọn gbigble he tin to aihọn mẹ mẹ gbọn wantúntún dali. 5Mowẹ podọ na ehe tọn ga, le mì nọ dovivẹnu to onu popo mẹ, mì yí jijọdagbe dogó yise mìtọn; bo yí oyọnẹn dogó jijọdagbe; 6owùnza dogọ́ oyọnẹn; homẹfa dogọ́ owùnza; jijọ-di-Jiwheyẹwhe tọn dogó homẹfa; 7owanyi na mẹmẹsunnu dogó jiji-di-Jiwheyẹwhe tọn; podọ owanyi dogó owanyi na mẹmẹsunnu. 8Na eyín onú helẹ yín mìtọn bo sù, yé ma na hẹn mì zùn adidọno kavi madọsinsẹ́nnọ hlan oyọnẹn Jesu Klisti Oklunọ mítọn tọn gba. 9Ṣigba ewọ he ma tindo onú helẹ, yín nukuntọ́nnọ, é ma sọgan mọnú to aganu, é sọ wọ̀n dọ yè ko lẹ̀ ẹ wé sọn ylando etọn hóhó lẹ mẹ. 10Enẹwutu mẹmẹsunnu emi, mì kúkú gbọ bo nọ dovivẹnu do hẹn oylọ po didè mìtọn po diun: na eyín mìwlẹ to onú helẹ wà, mì ma na jai gbède. 11Na le wẹ yè na deali hlan mì susu biọ ahọludu madopopo Jesu Klisti Oklunọ Whlẹngantọ mítọn tọn mẹ do.
12Enẹwutu yẹn ma to na wòn nado nọ flinnu helẹ mì whepoponu gba, eyín mì tlẹ sọ yón yé, bọ yè sọ hẹn mì lódo to nugbo he tin to mì de mẹ 13Nugbo, yẹn sọ lẹn dọ é jẹ, sọle yẹn tin to gohò he mẹ, nado nọ yí oflin do fọ́n mì daga; 14yinyọnẹn dọ, didè ogohọ̀ ṣie sé tọn to wezun ji ja, yèdọ dile Jesu Klisti Oklunọ mítọn ko sọhia mi do. 15Mowẹ yẹn na dovivẹnu, dọ mìwlẹ nido nọ flin onú helẹ whepoponu to okú ṣie godo. 16Na mìwlẹ ma to otàn vọnu he yè yí nuyọnẹn flinflin do doai hodo gba, whenuena mí to huhlọn po gigowá Jesu Klisti Oklunọ mítọn tọn po hẹn zùn yinyọnẹn hlan mì, ṣigba mìwlẹ yí nukun mítọn titi do mọ gigodaho etọn. 17Na é yí yẹyi po gigo po sọn Jiwheyẹwhe Otọ́ de, whenuena ogbè nẹ hunkọ wá e de sọn gigo daho nẹ mẹ dọ, Ehe wẹ Ovi vivẹ ṣie, mẹhe mẹ homẹ ṣie hùn te talala. 18Podọ ogbè he sọn olọn mẹ wá mìwlẹ sè, whenuena mí tin po e po to osó wiwe lọ ji. 19Mìwlẹ sọ tindo oho dọdai tọn he diun hú enẹ ga; hlan ehetọn mì wà dagbe bọ mì do payi e go, di hlan miyọngbán de he hón to ofì dozín de, kaka oun do kẹ̀n, bọ sunwhlẹvu afọnnu tọn lọ do zẹ́ to ayiha mìtọn lẹ mẹ: 20yinyón ehe whé, dọ dọ dai Owé wiwe tọn de ma yín otadena di ojlo tọn de gba. 21Na dodai ma gbọn ojlo gbẹtọ tọn dali wá to hóhówhenu gba: ṣigba gbẹtọ lẹ dọhó sọn Jiwheyẹwhe de dile yè dòn yé yì do gbọn Gbigbọ Wiwe dali.
21ṢIGBA yẹwhegán lalonọ lẹ fọ́n to gbẹtọ lẹ mẹ ga, yèdọ dile mẹplọntọ lalonọ lẹ na tin to mì mẹ do, yé he na gbọn nuglọ hẹn aliho plọ́ngiglọ dindọn tọn biọ mì mẹ, yèdọ yé na nọ mọ́n Oklunọ he họ̀ yé, bo na hẹn dindọn yawu wá yede ji. 2Omẹ susu wẹ nasọ nọ domọna wantúntún yetọn; gbọn yé mẹhe tọn dali yè na nọ dọhó ylankan do ali nugbo tọn lọ go. 3Podọ to nukunkẹn mẹ wẹ yé na nọ yí ohó oklọ tọn do yí mì do basi ajọnú; whẹgbledo mẹhetọn dinvie sọn hóhówhenu ma whleawu, dindọn yetọn ma sọ samlọngọ 4Na eyín Jiwheyẹwhe ma gbọ sọn angẹli lẹ go whenuena yé wàylando, ṣigba bọ é sisẹ́ yé dlan olọnzo mẹ, bo jo yé hlan ogòn zinvlu mẹ tọn, nado sọ yé whlá jẹ whẹdazángbè; 5bo ma sọ gbọ sọn aihọn whenẹnu tọn go, ṣigba bo whlẹn Noa po omẹ ṣinawe po, yẹwheho dọtọ dódó tọn, whenuena é túntún osìn kòn do aihọn meylankan lẹ tọn ji; 6bo sọ diọ otòdaho Sọdọmi po Gọmọla po tọn lẹ zùn afín, whenuena é yí gbakija do gblewhẹdo yé, bo sọ yí yé do basi hiadonu hlan yé he na wàylan to godomẹ lẹ; 7bo sọ whlẹn Lọti dódónọ, he homẹ etọn gble na wantúntún owalọ mẹylankan lẹ tọn tọn: 8(na dawe dódónọ nẹ, le é nò yé mẹ, bo to sisè, bo sọ to jijọ ylankan yetọn mọ, ayiha dagbe etọn to gbigble egbésọegbésọ;) 9Oklunọ sọ yọ́n le é na whlẹn ayihawiwenọ lẹ do sọn Whlepọ́n mẹ, bo sọ yí mawàdódónọ lẹ whlá hlan whẹdazángbè nado doya na: 10ṣigba humọ, yé he nọ to zọnlinzin hodo ojlo agbasalan tọn lẹ to wantúntún he kúdu mẹ, bo sọ nọ to vivlẹ ahọludu. Tosinẹntọ, mẹdetọnjlotọ, yé ma nọ sinú nado zannù do mẹgángán lẹ go. 11Whenuena angẹli, he klohú to huhlọn po hlọnhlọn po mẹ, ma hẹn owhẹ́ nùzinzan tọn wá jẹ to Oklunọ nukọn gba. 12Ṣigba ehelẹ, di gbékanlin jọwamọ, he yè da nado nọ wlé bo hù, yé to nùzan do onú he yé ma tunwun go; yé nasọ dọ̀n gbidigbidi to gbigble yetọn titi mẹ; 13bo nasọ duale mawàdódó tọn, di yé he ko hia ẹ na gbẹdudu nado nọ dupaṣa to okle. Apà wẹ yé, nukúdu, whenuena yé to oklọ yetọn titi yí do to gbẹdu, le yé to núdù po mì po: 14mẹhe tindo nukun he gọ́ na ayọ̀dide, bo ma sọgan nọ ylando mawà; yé he to ayiha he yè ma hẹn lódo lẹ klọ: ayiha yè hẹn zinzán nukunkẹn tọn mádona; ovi hodẹ̀do lẹ: 15yé he gbé ali jijlọ dai, bo buali, bo to áli Balaami ovisunnu Beolu tọn hodo, mẹhe yiwanna ale mawàdódó tọn; 16ṣigba yè wọ̀hẹ ẹ na sénmẹjẹ etọn titi: kẹtẹkẹtẹ unbọpẹn yí ogbè gbẹtọ tọn do dọhó, bo sọ gòkọna adingbàn yẹwhegán lọ tọn. 17Ehelẹ wẹ dòtọ he ma tindo osìn, aslọ he jẹhọn to hinhẹn danpé; yé mẹhe yè sọ yùdidi zinvlu tọn whlá hlan kakadoi. 18Na whenuena yé to hógblo zingidi daho tọn dọ, gbọn ojlo agbasalan po wantúntún tọn po dali, bo sọ nọ klọ yé he ko tlú nugbonugbo sọn yé he tin to alibubu mẹ lẹ mẹ 19Whenuena yé to pagbe mẹdekannujẹ tọn do na yé, afànumẹ gbigble tọn wẹ yélọsu: na mẹhe de yè gbọn gbawhàn omẹ tọn, gbọn omẹ lọ de wẹ yè sọ hẹn ẹn wá biọ mẹglọ mẹ. 20Na eyín ehegodo yé ko họ̀ngan sọn diho aihọn tọn mẹ, gbọn oyọnẹn Jesu Klisti Oklunọ Whlẹngantọ tọn dali, eyín yé sọ vó yéde zepla do e mẹ, bọ yè sọ gbawhàn yetọn, godomẹ yetọn ylan to yé de hú nukọn tọn. 21Na é pónte na yé dọ, yé ma tlẹ yọn ali dódó tọn lala hú ehegodo yé yón ẹn vò, na yé ni diọ sọn ósẹ́n wiwé he yè yí na yé mẹ. 22E ko jọ hlan yé kẹdẹdi ohó whinwhẹ́n nugbo nẹ, Avún sọ gọ̀ do oslù etọn titi kọ̀n; podọ ohànsi he ko lawu sọ gọ̀ do gbọ́nbublu etọn mẹ to ababa mẹ.
31MÌ mẹyiwanna emi, episteli awetọ he wẹ yẹn wlan hlan mì dinvie; to awe lẹ mé yẹn tọ homẹ wiwe mìtọn fọ́n daga gbọn óflin tọn dali: 2na mì nido nọ flin ohó he yè dọ sọn onù yẹwhegán wiwe lẹ tọn mẹ jẹnukọn, podọ osén mí he yín Apọsteli Oklunọ Whlẹngantọ tọn tọn lẹ: 3na mì ni sọ yọn ehe whẹ́, dọ, mẹvlẹtọ lẹ ná wá po ovlẹ po to azán godo tọn mẹ, bo na to zọnlinzin to ojlo yéde tọn mẹ, 4bo ná to didọmọ, Fie wẹ opagbe gigọ̀wá etọn tọn te? na sọn whenuena otọ́ mítọn lẹ ko damlọn, doponẹ wẹ onú popo te sọn whẹwhẹ́whenu nudida tọn gbọ̃n. 5Na ehe wẹ yé yí ojlo do wòn, dọ gbọn ohó Jiwheyẹwhe tọn dali wẹ olọn lẹ do tin to hóhówhenu, bọ aigba dó mlindopọ sọn osìn mẹ, bó sọ nọte to osìn mẹ. 6Gbọn ehétọn dali aihọn he tin to whenẹnu, le yè yí osìn do gó ẹ, é súdo: 7ṣigba olọn he tin to dinvie lẹ, po aigba lọ po, gbọn ohó dopo lọ dali yè sọ whlá hlan miyọn, bo sọ hla yé dai hlan whẹdazángbè po dindọn mẹylankan lẹ tọn po.
8Ṣigba mẹyiwanna emi, mì yín madọnanọ onú dopo akàn he tọn blo, dọ azán dopo to Oklunọ de taidi owhè fọtọ́n, owhè fọtọ́n sọ taidi azán dopo. 9Oklunọ ma gbòawupò gbọn opagbe etọn dali gba, dile mẹdelẹ lẹn awugbòpò do; ṣigba é yín lìnsinyẹntọ hlan mí dali, na é ma jlo dọ mẹdepope ni dòn, adavo dọ omẹ popo ni wá lẹnvọjọ kòn. 10Ṣigba azán Oklunọ tọn ja di ajotọ to ozán mẹ, ehe mẹ olọn lẹ na yí lìlì gángán do juwayì, bọ nugonu lẹ nasọ gbọn yózo sinyẹnsinyẹn mẹ yọ́, aigba po azọ́n he tin to e mẹ lẹ po nasọ fiọ gbidigbidi. 11Le onú helẹ pó na yọ́ kọnyingbe nẹ, omẹ na hunkọ wẹ mìwlẹ lo yín to owalọ wiwe lẹpo mẹ, to jìjọ-di Jiwheyẹwhe tọn mẹ, 12na mì ni to nukundo, bo sọ to mìzọmìzọnji hlan wiwá azán Jiwheyẹwhe tọn tọn, ehe mẹ olọn lẹ na yímiyọn, bo sọ yọ, nugonu etòn lẹ nasọ gbọn yózo sinsinyẹn mẹyọ́? 13Ṣigba, di opagbe etọn, mìwlẹ to nukundo olọn yọ́yọ́ lẹ, po aigba yóyọ́ de po, ofì he dódó nọnọ̀.
14Enẹwutu, meyiwanna emi, le mìwlẹ to nukundo onú helẹ hunkọ, mì yín vivẹnunọ, na yè nido mọ mì to e de to jijọho mẹ, to matin apà podọ to madowango mẹ. 15Na mì ni sọ lẹn ẹn dọ, linsinsinyẹn Oklunọ mìtọn tọn whlẹngan wẹ: yèdọ dile Paulu, mẹyiwanna mẹmẹsunnu mítọn, wlanwe hlan mì do ga, kẹdẹdi nuyọnẹn he yè na ẹn. 16Podọ to episteli etọn lẹpo mẹ, é to ohó onú helẹ tọn dọ; ehe mẹ onú he sinyẹnawú nado yọnẹn delẹ te, ehe wunvinọ po lẹjẹlẹjẹnọ lẹpo po to sislo, dile; ye nọ wà na Owé wiwe devo lẹ do, hlan dindọn yéde tọn. 17Enẹwutu, mì mẹyiwanna emi, le mìwlẹ ko yón onú helẹ dai, mì nọ payi mìde go na yè nikã yí alibubu mẹylankan lẹ tọn do dòn mì, na mì nikã jai sọn tenọgligli mìtọn mẹ 18Ṣigba mì ni to whinwhẹn to ojọmiọn mẹ, podọ to oyọnẹn Jesu Klisti Oklunọ Whlẹngantọ mítọn tọn me. Na ewọ wẹ gigo tin hlan sọn dinvie kaka doi. Niṣẹ.