1 Timoti

¹PAULU Apọsteli Jesu Klisti tọn kẹdẹdi osén Jiwheyẹwhe Whlẹngan tọ mítọn tọn, po Jesu Klisti Oklunọ tódido mítọn po; ²hlan Timoti, ovi ṣie nugbo to yise mẹ: Ojọmiọn, lẹblanu, po jijọho po, sọn Jiwheyẹwhe Otọ mítọn dẹ, po Jesu Klisti Oklunọ mítọn po de.

³Le yẹn vẹ̀ we dọmọ, na hiẹ ni sinai to Ẹfẹsu, whenuena yẹn yì Makedonia, na hiẹ nido nọ nasẹ mẹdelẹ dọ yé plón oplọ́n devo omẹ blo, ⁴podo yé sọ dotó otàn podọ otàn whẹndo hóhó tọn he madopodo nẹlẹ go blo, ehe nọ fọ́n nukanbiọ dote, hú oplón Jiwheyẹwhe tọn he nọ hẹn omẹ dote, ehe tin to yise mẹ: nọ basi mọ. ⁵Mọ opòdo asẹ lọ tọn wẹ owanyi sọn ayiha wiwe mẹ, sọn homẹdagbe mẹ, podọ sọn yise he madoklọ mẹ: ⁶sọn ehe mẹ mẹdelẹ ko klán dovo, bo sọ lógò do ohógblo didọ mẹ; ⁷bo sọ to mẹplọntọ osén tọn jlo na yín; yé ma tunwun onú he yé to didọ, kavi onú he yé to didọ numakumaku. ⁸Ṣigba mìwlẹ yọnẹn dọ osén yónwhanpẹ, eyín gbẹtọ zán ẹn do ogbè osén tọn ji: ⁹yè sọ yọ́n ehe dọ, yè ma basi osén na dódónọ gba, ṣigba na oglójẹtọ po tólivẹtọ lẹ po wẹ, na gbẹtọ ayìhamawenọ lẹ, po ylandonọ lẹ po, na máwenọ po omẹ gbigble lẹ po, na otọ́hutọ lẹ po onọhutọ lẹ po, podọ na gbẹtọhutọ lẹ, ¹⁰na ogàlọtọ lẹ, na yé he nọ yí sunnusi do hẹn yéde gble lẹ, na gbẹtọfintọ lẹ, na lalodotọ lẹ, na whiwhietọ lalonọ lẹ, eyín onú de sọ tin bo jẹagò do oplón he pégan go; ¹¹kẹdẹdi wẹndagbe gigo Jiwheyẹwhe donanọ tọn tọn, he yè ko yí do alọ mẹ na mi.

¹²Yẹn sọ dopéna Klisti Jesu Oklunọ mítọn, mẹhe gọalọna mi, na yè lẹn mì jẹ na nugbonọ, bo so yí mi do devizọ́n mẹ; ¹³jẹnukọn mẹhe yín nùzàntọ de, homẹkẹndomẹtọ, danuwàtọ; ṣigba yẹn mọ lẹblanu yí, ná yẹn yí mayọnẹn do basi i to mayise mẹ wutu. ¹⁴Ojọmiọn Oklunọ mítọn tọn po yise po po owanyi po, he tin to Klisti Jesu mẹ, sọ sú bo lankan. ¹⁵Nugbonọ wẹ ohó lọ, é sọ jẹ na alọkẹyi popo, dọ Klisti, Jesu wá aihọn he mẹ nado whlẹn ylandonọ; mẹhe mẹ yẹn yín gángánsu te ¹⁶Ṣigba na ehe lọ tọn wutu wẹ yẹn mọ lẹblanu yí dọ to yẹn mẹ di ogán na Jesu Klisti nido yí linsinsinyẹn popo hia jegbonu, na ohia yé he na yí i se to godomẹ na ogbẹ madopodo lẹ tọn de. ¹⁷Be hlan Ahọlu madopodo, makú, mamọ, Jiwheyẹwhe nuyọnẹntọ dopolọ, we yẹyi po gigo po tin na kakadoidoi. Niṣẹ.

¹⁸Aṣẹ he wẹ yẹn na we, ovi Timoti, kẹdẹdi dọdai he ko jẹnukọn gbọn ogò we nẹlẹ tọn, dọ gbọn yé dali na hiẹ nido fùn awhàn dagbe; ¹⁹nọ hẹn yisè po ayiha dagbe po go; ehe mẹdelẹ ko tùndlan sọn yé de, gbọn yise tọn dali yé dalẹ: ²⁰mẹhe mẹ Himeneu pọ Alẹksandló po tin te; mẹhe yẹn johlan Satani, na yè nido plọ́n yé ma nado zannù ba.

¹ENẸWUTU yẹn jlahomẹdona, tin tan popolẹpo tọn, dọ yè ni vẹvè, yè ni hodẹ, yè ni dèvè, podọ pẹdido ni yín bibasi na gbẹtọ lepo; ²na ahọlu lẹ po mẹhe tin to otẹn daho mẹ lẹpo po; na mìwlẹ nido zìn ogbẹ zọnlin abọẹ-abọẹ to jijọho podọ to jijọ-di-Jiwheyẹwhe tọn lẹpo mẹ, podọ to owalọ wiwe lẹpo mè. ³Ehe wẹ yọ́n bo sọ yín alọkẹyi to Jiwheyẹwhe Whlẹngantọ mítọn nukun mẹ; ⁴mẹhe to jijlo dọ yè ni whlẹn omẹ popo gán, podọ na ye ni wá oyọnẹn nugbo tọn kòn. ⁵Na Jiwheyẹwhe dopọ wẹ tin, whẹgbọtọ dopo ga to Jiwheyẹwhe po gbẹtọ po ṣẹnṣẹn, dawe lọ, Jesu Klisti; ⁶mẹhe yí ede do fli omẹ popo, nado yín kunnude to ojlẹ etọn me. ⁷To ehe mẹ yè dè mi do basi yẹwhehodọtọ, apọsteli, (nugbo wẹ yẹn to didọ to Klisti mẹ, yẹn ma dolalo;) mẹplọntọ Kosi lẹ tọn to yise po nugbo po mẹ.

⁸Enẹwutu yẹn jlo dọ, sunnu lẹ ni nọ to dèho tó ofi popo, na yè ni nọ to alọ wiwe zé daga, matin homẹgble po nuhiha po. ⁹Mọkẹdẹ wẹ, na yọnnu lẹ ni nọ yí avọ̀ jlẹmẹjlẹmẹ do doasọna yédè, po winyan po po húwhẹ po; é ma yín odà bibla, kavi sika, kavi osé dagbedagbe, kavi avọ́ akuẹgegenu sọ dogo tọn gba; ¹⁰ṣigba (ehe jẹ na yọnnu he yigbèna jijọ-di-Jiwheyewhe tọn) gbọn azọ́n dagbe lẹ mẹ. ¹¹Gbọ yọnnu ni yí abọẹninọ po taliai lepo po do plonnú. ¹²Ṣigba yẹn ma dikena yọnnu nado nọ plónmẹ gba, kavi nado nọ degbè di ogán to sunnu ji gba, adavo ni nò abọẹ. ¹³Na Adam whé wẹ yè da, enẹgodo Evi. ¹⁴Yè ma sọ klọ Adam gba, ṣigba yọnnu lọ, whenuena yè klọ ẹ, ewọ wẹ jai do sẹ́nmejẹ me. ¹⁵Ṣigba yè na whlẹn ẹn to vijiji etọn mẹ, eyín yé gbọsi yise owanyi walọwiwe po hùwhẹ po mẹ.

¹NUGBO wẹ ohó lọ, Eyín mẹde jlo otẹn bisọpu tọn, azọ́n dagbe de wẹ é jlo. ²Enẹwutu bisọpu do na tin matin ovlẹ, asisunọ yọnnu dopo tọn, mẹdehótọ, hùwhẹnọ, owalọ dagbenọ, ojohẹmẹtọ, mẹplọntọ, vivẹnunọ; ³e ma yín ahannùmúnọ, é ma yín nulimẹtọ, é ma yín adọwhénnọ na ale wutu, adavo homẹmiọnnọ, é ma yín jlẹwátọ, é ma yín nukunkẹnnọ gba; ⁴mẹhe pé owhé etọn ji talala, bo sọ hen ovi eton lẹ litai to owalọ mẹho tọn lẹpo mẹ; ⁵(na eyín gbẹtọ ma yọ́n nawẹ nado pé owhé ewlọsu tọn ji, nawẹ ewọ na pọ́n agùn Jiwheyẹwhe tọn go do?) ⁶Agblinọ de ma gba, to kikla mẹ é nikã jai do whẹgbledo lẹgba tọn mẹ. ⁷Humọ é do na do oyín dagbe to yé he tin to gbonu lẹ de; na é nikã jẹ ovlẹ po omò lẹgba tọn po mẹ. ⁸Mọkẹdẹ wẹ diakọni lẹ do na yín omẹ abọeabọẹ, é ma yín dégbèawenọ, é ma yín mehe jo yéde hlan ovẹ̃n susu, é ma yín adọwhénnọ na ale wutu gba; ⁹mẹhe nọ hẹn nudabla yise tọn go to ayiha wiwe mẹ. ¹⁰Gbọ yè ni mọdòna ehelẹ ga whé; whenenu wẹ yè ni gbọ yé ni dugán diakọni tọn eyín yé ma tin whẹgbledo. ¹¹Podọ yọnnu lẹ do na yín omẹ abọẹabọẹ, é ma yín kunnubutọ, adavo hùwhẹnọ, nugbonọ to onú popo mẹ. ¹²Na diakọni lẹ ni yín asisunọ yọnnu dopo tọn, bo nọ pọ́n ovi yetọn lẹ go, podọ owhé yé lọsu tọn gbè go dagbedagbe. ¹³Na mẹhe nọ zán diakọni-gán yẹtọn dagbedagbe, hò tenmẹ dagbedagbe de hlan yéde, po tugbigbo daho po to yise lọ mẹ he tin to Klisti Jesu mẹ.

¹⁴Onú helẹ wẹ yẹn kanwe etọn hlan we, yẹn sọ to nukundo nado wá de we to azánvi hẹlẹ mẹ: ¹⁵ṣigba eyín yẹn nọte dẹn, na hiẹ nido yón le hiẹ na nọ basi dewe do to ohò Jiwheyẹwhe ton mẹ, ehe yín agùn Jiwheyẹwhe ogbènọ tọn, odotin afọdotẹn nugbo tọn. ¹⁶Podọ matin núdindọn, daho wẹ nudabla jijọdi-Jiwheyẹwhe tọn: yè yí Jiwheyẹwhe hia to agbasa mẹ, bo sọ sùwhẹ nẹ̃ to Gbigbọ mẹ, yè mọ ẹn to angeli lẹ de, yè dọyẹwheho etọn hlan Kosi lẹ, yè yí i se to aihọn mẹ, yè sọ yí i daga do gigo mẹ.

¹MỌ Gbigbọ ko dọ dódo dọ, to ojlẹ godo tọn lẹ mẹ mẹdelẹ na jai sọn yise mẹ, bo nasọ na otọ́ gbigbọ oklọ, po oplón aovi tọn po; ²yé na nọ dolalo to yẹnuwiwà mẹ; mẹhe yè yí ogàn miyọnawu do si ayiha na; ³yé na nọ ké dọ mẹde ma na wlealọ; yé na nọ dosẹn dọ yè ni sù olàn, ehe Jiwheyẹwhe da nado yí opé do yi to yé he yise bo sọ yón nugbo lẹ dali. ⁴Na nudida Jiwheyẹwhe tọn lẹpo wẹ yén, ode ma sọ tin bọ yè dó gbé, eyín yè yí opé dó yí i: ⁵na yè lẹ ẹ wé gbọn ohó Jiwheyẹwhe tọn pọ odẹ̀ po mẹ.

⁶Eyín hiẹ nọ flin onú helẹ mẹmẹsunnu lẹ, hiẹ na yín devizọnwàfọ dagbẹ Jesu Klisti tọn de, he yè plón to ohó yise tọn mẹ, podọ sọn oplón dagbe lẹ mẹ, ehe hiẹ ko to hihodo kaka jẹ dinvie. ⁷Ṣigba gbé otàn hógblo yọ́nhonọ lẹ tọn dai, na hiẹ ni nọ zán dewe tọ jijọdi-Jiwheyẹwhe ton mẹ. ⁸Na zinzán agbasa tọn yín alenọ na pẹvidé: ṣigba jijọ-di-Jiwheyẹwheyín alẹnọ na onú lepo, é tindo opagbe aihọn he tin to dinvie tọn, po aihọn he ja tọn po. ⁹Nugbo wẹ ohó lọ, é sọ jẹ na alọkẹyi lẹpo. ¹⁰Be enẹwutu we mìwlẹ to tuklajẹ, bo sọ to oya mẹkiko tọn ji, na mìwlẹ dotu do Jiwheyẹwhe ogbẹnọ go, mẹhe yín Whlẹngantọ omẹ popo tọn, humọ yé he yise lẹ tọn. ¹¹Onú helẹ wẹ hie ni nọ degbèna, bo sọ nọ plọ́nmẹ. ¹²A dike mẹde vlẹ ovu towe blo: ṣigba hiẹ ni yín ohia de hlan yisenọ lẹ, to ohó mẹ, to owalọ mẹ, to owanyi mẹ, to gbigbọ mẹ, to yise mẹ, to wiwe mẹ. ¹³Kaka yẹn na do wá, nọ tunnukun owẹ́ hihia, homejladohó po oplọ́n po go. ¹⁴A gbekọ nunina he tin to ohò towe mẹ go blo, ehe yè na we gbọn dọdai dali, pọ alodomẹji mẹho lẹ tọn po. ¹⁵Nọ do ayi onú helẹ go, jo dewe hlan yé petepete; na whinwhẹn towe nido diun jẹgbonu to omẹ popo de. ¹⁶Payi dewe po mẹpinplọn towe po go; nọ nọte to ye mẹ; na ehe wiwà mẹ hiẹ na whlẹn dewe, po ye he to ohó towe se lẹ po.

¹AWỌHẸ mẹho de blo, ṣigba nọ jlahòmẹdo nẹ di otọ́ de: dẹpẹmẹ lẹ di mẹmẹsunnu: ²yọnnu mẹho lẹ di ònọ, yọ̀pọ yọnnu lẹ di nọviyọnnu, po owalọ wiwe lẹpo po ³Gbogbena asusiọsi he yin asusiọsi nugbonugbo lẹ. ⁴Ṣigba eyín asusiọsi de tindo ovi, kavi ovívi de, gbọ yé ni plón nado do azón ovi tọn hia to owhé yetọn gbè whé, na yé ni sọ nọ sudagbehọ mejitọ yetọn lẹ: na enẹ wẹ yọn, bo sọ yin alọkẹyi to Jiwheyẹwhe nukọn. ⁵Be ewọ he yín asusiọsi nugbonugbo, bo yin ewọ dopo, na dotu do Jiwheyẹwhe go, bo na sọ nọte to ovè po odẹ̀ po mẹ̀ to okle po ozán po ⁶Ṣigba ewọ he tin to ogbèdudu mẹ é kú whenuena e gbẹ tin to ogbẹ̀. ⁷Onú helẹ wẹ hiẹ ni nọ degbèna, na yé nido tin matin ovlẹ. ⁸Ṣigba eyín mẹde ma wleawu dai na etọn titi lẹ, humọ na owhédo etọn lọsu lẹ, é mon yise lọ, é sọ ylan hú mayisenọ. ⁹A dike ye yí asusiọsi de do ogbé lọ mẹ blo, ada o é pé omẹ owhè kandekovi, bo sọ yín yọnnu asú doponọ dai, ¹⁰mẹhe yè dọhó etọn to azọ́n dagbe mẹ; eyín é ko pọ́n ovi lẹ go, eyín e ko yí jonọ do whégbe, eyín é ko kló afo mẹwiwe lẹ tọn, eyín é ko gọalọna nukunbibianọ lẹ, yín é yín dọ e ko yí sọwhiwhe do domọna azọ́n dagbe lẹpo. ¹¹Ṣigba gbé asusiọsi yọ̀pọ yonnu lẹ: na whenuena yé sẹ agòjo sọn Khsti tọn mẹ, yé na jlo alọ na wle; ¹²ye ylanwhẹ, na yé ko zé yise yetọn tintan dlẹn wutu. ¹³Humọ ye plọn gbọn enẹ me ga nado yín adidọnọ, bo nọ to dindanpe whegbèwhegbè; e ma yín adidọ kẹdẹ, ṣigba hofusadọtọ, ajanmánọ, yé sọ no to onú he ma jẹ dọ. ¹⁴Enẹwutu yen jlo dọ yọpọ yọnnu lẹ ni wlealọ, na ye ni jivi, na yé ni nọ pé owhé ji, yé na otẹn kẹ̀ntọ lẹ nado dọ ohó gblo blo. ¹⁵Na medelẹ ko joagò hodo Satani dinvie ¹⁶Eyín sunnu kavi yọnnu he yise de tindo asusiọsi, yé ni nọ gọalọna yé, yè dike é jo yé do okò ji na agùn blo: na yè nido mọtẹn gọalọna yé he yín asusiọsi nugbonugbo lẹ.

¹⁷Mẹho he pọn onú go dagbe wẹ yè ni lẹn jẹ na yẹyi whla awe, humọ mẹ he to tukla ohó po oplón po tọn jẹ lẹ. ¹⁸Na Owe wuwe dọmọ, Hiẹ ma na bla onù na oyín he to gbadó li. Podọ, Azónwàtọ jẹ na ale etọn. ¹⁹Eyín yè jẹwhó mẹho de tọn, hiẹ yí blo, adavo to kunnudetọ awe kavi atọn nukunmẹ. ²⁰Wóhẹ mẹhe wà oylan lẹ to omẹ popo nukọn, na mẹhe po lẹ nido sinú. ²¹Yẹn degbèna we to Jiwheyẹwhe nukọn, to Jesu Klisti Oklunọ po angẹli mẹsinsinyan lẹ po nukọn, dọ hiẹ ni nọ donukun onú helẹ go, mẹ kuwinyan na ode hú awetọ blo, hiẹ yí guwhẹ do wà onú depope blo. ²²Hiẹ yawu zé alọ do mẹdepope ji blo, hiẹ sọ yín mimáto to ylando omẹ devo lẹ tọn me blo. Whlá dewe to owalọ wiwe mẹ ²³Hiẹ sọ yín nùnùtọ osìn tọn ba blo, ṣigba nọ nù ovẹ̃n pẹpẹ na homẹ towe ton wutu, podọ awutuṣẹ́nṣẹ́n towe whepoponu tọn. ²⁴Ylando mẹdelẹ tọn nọ do ede hia daijẹnukọn, bo jẹnukọn yì whẹ̀dida mẹ; mẹdelẹ tọn sọ nọ hodo yé to godo. ²⁵Mọkẹdẹ wẹ, azọ́n dagbe mẹdelẹ tọn nọ do ede hia jenukọn ga, mẹhe ma sọ to mọ lẹ ma sọgan yí awú whlá.

¹NA yé omẹ sọha he yín afànumẹ bo to sinsẹ̀n glọ lẹ ni nọ lẹn mẹmẹnu yetọn lẹ jẹ na pipa popo, na oyín Jiwheyẹwhe tọn po oplọn etọn po ma na do yin nùzandogona. ²Podọ mẹhe tindo mẹmẹnu yisenọ lẹ, yé vlẹ yé blo, na mẹmẹsunnu wẹ yé wutu; ṣigba yé ni gbọ bo kúkú nọ sèn yé, na yisenọ, mẹyiwanna wẹ ye, máhẹtọ azọ́n dagbe lọ tọn. Onú helẹ wẹ hiẹ ni nọ plónmẹ, bo sọ do nọ jlahomẹdona omẹ.

³Eyín mẹdepope sọ plọn omẹ gbọnvò, bọ é ma sọ yí nuyọnẹn do ohó he pégan go, yèdọ ohó Jesu Klisti Oklunọ mítọn tọn, podọ do oplón go, ho di jijọdi-Jiwheyẹwhe tọn; ⁴saklanọ wẹ ewọ, é ma sọ yọn onú de, adavo nado dosẹ́n hókanbiọ po avùn ohó tọn po, ehe mẹ nuvẹun, avùn, nùzinzan, azinyan ylankan nọ gbọn tón jegbonu, ⁵nudindọn dọdo gbẹtọ ayiha dùdunọ lẹ tọn, he ma do nugbo, he lẹn dọ ale wẹ jijọ-di-Jiwheyẹwhe tọn: dè dewe sọn omẹ mọhunkọ tọn lẹ de. ⁶Ṣigba jijọ-di-Jiwheyẹwhe po opékọ po ale daho wẹ. ⁷Na mìwlẹ ma hẹn onú de wá biọ aihọn mẹ, mọ mìwlẹ ma sọ sọgan hẹn onú de tón jẹgbonu yì. ⁸Eyín mí tindo núdùdù po avọ po, enẹ ni pekòna mí. ⁹Ṣigba mẹhe jlo nado yín adokunnọ lẹ jai biọ whlepón de mẹ, po omọ de po, po onulu wantúntún susu he nọ gbléawuname po, ehe hunkọ nọ siọ omẹ do vivà po dindọn po mẹ. ¹⁰Na owanyi akuẹ tọn wẹ adò owalọ oylan lepo tọn de: ehe whenuena gbẹtọ yí nukunken do to dindin pé, yé buali sọn yise me, bo sọ yí homẹgble susu do sọwhán yede.

¹¹Ṣigba hiẹ, Jiwheyẹwhe gbẹtọ, hòn na onú helẹ; bo sọ nọ hodo dódó, jijọ-di Jiwheyẹwhe, yise, owanyi, homẹfa, wàlọmimiọn. ¹²Nọ hòavùn dagbe yise tọn, yí alọ do ogbẹ́ madopodo ji, ehe kòn yè ylọ we do ga, bọ hiẹ ko sọ yígbe dagbe to kunnudetọ susu nukọn. ¹³Yẹn nasẹ we to Jiwheyẹwhe he nọ fọ́n ọnú popo do ogbè nukọn, podọ to Jesu Klisti nukon, mẹhe dekunnu gbèyíyí dagbe tọn to Pọntiu Pilati nukọn; ¹⁴dọ hiẹ ni yìn osén lọ matin diho, matin ovlẹ, kaka jẹ awúsọhia Jesu Klisti Oklunọ mítọn tọn whenu: ¹⁵ehe to whenu etọn lọsu mẹ é na yí hia, mẹhe yín Huhlọnnọ donanọ dopo lọ, Ahọlu yé he dugán di ahọlu lẹ tọn, podọ Oklunọlyé he dugán di Oklunọ lẹ tọn; ¹⁶mẹhe ewọ dopokẹdẹ wẹ tindo makú, bo nọnọ̀ hinhọ́n mẹ, he mẹde ma sọgan sẹpọ́; mẹhe mẹde ma ko mọ gbède, bọ yè ma sọ sọgan mọ; mehe tọn yẹyi po huhlọn po yín kakadoi. Niṣẹ.

¹⁷Nasẹ mẹhe yin adọkunnọ to aihọn he me lẹ, dọ yé yígo blo, dọ yé sọ dotu do adọkun he ma nọte go bló, adavo do Jiwheyẹwhe ogbènọ go, mehe na onú popo mí susugege nado dugbẹ́ yetọn; ¹⁸dọ yé ni nọ wà dagbe, yé ni nọ sù to azọ́n dagbe lẹ mẹ, yé ni nọ wleawu nado mánamẹ, bo sọ jlo nado nọ kọndopọ; ¹⁹Na yé ni bépli do agbànhọ me na yéde odòdó dagbe de pọn ojlẹ he ja, na yé nido hen ogbẹ̀ lọ go ehe yín ogbẹ́ nugbonugbo.

²⁰Timoti E, pọ́n enẹ he yè na hlan we go, nọ dapana ohó ovó po ohógblo po, po núdindọn ohó nuyọnẹn tọn po, he yè yí lalo do ylọ dọ mọ: ²¹ehe mẹdele yíyígbèna ko buali gbọn yise tọn dali Ojọmiọn ni tin to de we. Niṣẹ.