1 Pita

¹PITA, aposteli Jesu Klisti tọn de, hlan mesinsinyan he yín wasinu sọn gbape le me to Pọntu, Galatia, Kapadokia Asia, po Bitinia po mẹ. ²Kẹdẹdi yinyọnendai Jiwheyẹwhe Otọ tọn, gbon lèwé Gbigbọ tọn dali, hlan tónuse po ohùn yìn do omẹ go Jesu Klisti tọn po: Ojọmiọn po jijọho po ni yín sùsù hlan mì.

³Donanọ wẹ Jiwheyẹwhe Otọ́ Jesu Klisti Oklunọ mìton tọn, mẹhe vó mí detón kẹdẹdi lẹblanu etọn gege do todido ogbènọ dẹ mẹ, gbọn finfọ́n Jesu Klisti tọn dali sọn osiọ le me, ⁴hlan ogúdu magble, maflu, he ma nọ kupẹ́, he yè Whlá na mí to olọn mẹ, ⁵mẹhe yè whlá gbọn huhlọn Jiwheyẹwhe tọn dali, gbọn yise mẹ hlan whlẹngan he to yiya nado hẹn sọawúhia to ojlẹ godo tọn mẹ. ⁶Ehẹ mẹ mì to ayajẹ te susu, le é tlẹ te dinvie na whenu de, yín é ma sọgan nọma jọ, mì tin to awúbla mẹ gbọn whlepọ́n susu dali: ⁷dọ whlepón yise mìtọn tọn, he yónwhanpẹ hú sika he nọ sudo, eyín é bo sọ yín miyọn wẹ yè tlẹ yí do to whiwhle e pọ́n, na yè nido mọ ẹn to pipa mẹ to yeyi mẹ, to gigo mẹ to osọhia Jesu Klisti tọn whenu: ⁸mẹhe mì ma ko mọ, bo to wanyinọ; mẹhe mì ma tlẹ mọ dinvie, gãnṣo bo to yíyíse, mì yí aya masọgandọ he gó na gigo do to ayajẹ: ⁹bo sọ to opòdo yise mìtọn tọn yí, whlẹngan alindon mìtọn lẹ tọn. ¹⁰Whlẹngan he tọn yẹwhegán lẹ kanbiọ, bo sọ yí vivẹnu do dindòna talala, yé he dọdọdai ojọmiọn he ja mì de tọn: ¹¹yé to dodinna etẹ, kavi ojlẹ tẹ mẹ tọn hunkọ wẹ Gbigbọ Klisti tọn he tin to ye mẹ to didọhia, whenuena é ṣẹṣẹ dekunnu oya Klisti tọn, po gigo he na bọdo e go gbọn godo tọn po. ¹²Hlan mẹhe yè sọhia lẹ, dọ é ma yín hlan yélọsu gba, ṣigba mílẹ we yẹ to devizón onú helẹ tọn wà hlan, ehe yè to didọ hlan mi to dinvie, gbọn yé he ko to yẹwheho wẹndagbe tọn dọ hlan mì dali, po Gbigbọ Wiwe he yè dohlan sọn olọn mẹ wá po; onú he angẹli lẹ jlo nado doun e mẹ pọ́n.

¹³Enewutu mì bla gbaja otùnu mìtọn tọn gligli, mì yín húwhenọ, bo sọ to todo jẹ opodo na ojọmiọn he yè na hẹnwá na mì to osọhia Jesu Klisti tọn whenu; ¹⁴di ovi tónusetọ, to ma yí mìde do dasa di wantúntún hóhó whenu tọn to wunvi mìtọn mẹ: ¹⁵ṣigba le ewọ he ylọ mì yín wiwe do, mọwẹ mì ni yín wiwe do to owalọ alopalọpa popo mẹ; ¹⁶na yè ko wlanwe etọn dọ, Mì na yín wiwe, na wiwe wẹ yẹn. ¹⁷Eyín mì sọ to oyín Otọ́ tọn ylọ, mehe matin mẹhòpọ́n gbẹtọ tọn nọ dawhè kẹdẹdile azọn omẹ dopodopo tọn te, mì nọ zán azán wáṣi whenu mí tọn tọn to ofi tọ ọsi mẹ: ¹⁸sọle mì yọnẹn dọ, yè ma yí nugbigble do fli mì gba, di fataka po sika po, sọn owalọ vọ́ mìtọn mẹ, he mì yí gbọn otànhóhó lẹ dali sọn otọ mìton lẹ de; ¹⁹adavo ohùn Klisti tọn akuẹgegenu, di lẹngbọvu he matin apa go tọn, podọ matin diho. ²⁰Mẹhe ye ko yọnẹndai nugbo jẹnukọn na aihọn dòdó, sigbabọ sọawúhia to opodo ojlẹ helẹ tọn na mì, ²¹mẹhe gbọn ewọ mẹ yin yisẹnọ to jiwheyẹwhe mẹ, he fọn ẹn tite sọn oṣiọ lẹ mẹ, bo sọ na gigo e; na yise po tódido mìtọn po nido tin to Jiwheyẹwhe mẹ. ²²Le mì ko lẹ́ alindọn mìton lẹ wé to tónusise mìtọn mẹ hlan nugbo jẹ owanyi mẹmẹsunnu tọn madoklọ mẹ, mì nọ yiwanna mìnọzọ talala po ayiha wiwe po: ²³le mìwlẹ lẹzun mẹvọjì, é ma yín sọn okún gbigble mẹ gba, ṣigba sọn magble mẹ, gbọn ohó Jiwheyẹwhe tọn dali, ehe to ogbẹ̀, bo nasọ tin to ote kakadoi. ²⁴Na Agbasalan lẹpo tin di ogbé, Gigo gbẹtọ tọn lẹpo sọ di vòvó ogbémẹ tọn. Ogbé nọ yọ́, vòvó etọn sọ nọ ja kọnyinai: ²⁵Ṣigba ohó Oklunọ tọn nọte kakadoi. Ehe wẹ ohó lọ he yè gbọn wẹndagbe dali to yẹwheho etọn dọ hlan mì.

¹ENẸWUTU mì yí homẹkẹn lẹpo do apadopo, po oklọ lẹpo po, yenuwiwà, nuvẹun, po ohó ylankan didọ lẹpo po, ²di ovi yọ́yọ́ to anọnu, mì jlo oyìnnọ ohó lọ tọn he tin matin oklọ, na mì nido whén gbọn e dali jẹ whlẹngan: ³eyín mì ko dọpón dọ dagbenọ wẹ Oklunọ. ⁴Mẹhe mì ja e de di zannu ogbènọ de, he yè gbọn alọ gbẹtọ lẹ tọn mẹ gbẹdai nugbo, ṣigba yè ko dè e to Jiwheyẹwhe de, akuẹgegentu, ⁵mìwlẹ ga, di zannu ogbẹ̀nọ, yè do dó ohò gbigbọnọ, yẹwhenọduta wiwe, nado sán avọ́ gbigbọnọ, he yín alọkẹyi hlan Jiwheyẹwhe gbọn Jesu Klisti mẹ. ⁶Enẹwutu é tin to Owé wiwe mẹ ga dọ,

¹¹Mì mẹyiwanna emi, yẹn sọ vẹ̀ mì, di akọdevo, di wáṣinu, mì joagọ̀ sọn wantúntún agbasalan tọn kọ̀n, ehe to awhànfùn hẹ alindọn: ¹²na owalọ mìtọn ni yín dagbe to Kosi lẹ ṣẹnṣẹn; dọ, le yé tọ hódọ do mì go di ylanwàtọ, gbọn azọ́n dagbe mìtọn dali he yé na to pinpọ́n, na yé nido pagigona Jiwheyẹwhe to azán odlapọ́n tọn gbè.

¹³Mì zín mìde dai hlan osẹ́ndoai gbẹtọ tọn lẹpo na Oklunọ tọn wutu: eyín hlan ahọlu wẹ, di yé he hugán onu popo; ¹⁴kavi hlan tògán lẹ, di yé he yè dohlan gbọn e dali nado nọ bianukunna ylanwàtọ lẹ, podọ na pipa yé he wà dagbe lẹ tọn. ¹⁵Na mọ wẹ ojlo Jiwheyẹwhe tọn yín, dọ, to dagbe wiwà mẹ, na mì nido bònudo na owunvi gbẹtọ núlunọ lẹ tọn: ¹⁶di mẹmẹdekannu, bo ma sọ zán mẹdekannujẹ na nukunṣinyọnnu homẹkẹn tọn, ṣigba di afànumẹ Jiwheyẹwhe tọn lẹ. ¹⁷Mì nọ doyẹyi ogo na gbẹtọ lẹpo. Mì yiwanna mẹmẹsunnu lẹ. Mì dibúsi Jiwheyẹwhe Mì doyẹyi ogo na ahọlu.

¹⁸Mì devi lẹ emi, mì yín mẹmẹglọ hlan mẹmẹnu mìtọn lẹ po osi po ga: é ma yín na mẹdagbe po mẹmimiọn lẹ po kẹdẹ gba, ṣigba na fifiẹtọ lẹ ga. ¹⁹Na ehe wẹ alọkẹyi, eyín gbẹtọ na yinyọn Jiwheyẹwhe etọn tọn wutu doakọ̀nna awúbla, bo sọ to yaji tata. ²⁰Na gigo tẹ e yín, eyín, whenuena mì wàylando, bọ yè to nuli mì na ẹn, eyín mì yí homẹfa do yí i? ṣigba eyín, whenuena mì to dagbe wà, eyín mì tò yaji na enẹ wutu, bọ mì sọ yí homẹfa do yí i, ehe wẹ yín alọkẹyi to Jiwheyẹwhe de, ²¹Na ehe mẹ wẹ yè ylọ mì do: na Klisti jiya na mí ga, bo yí ohia dai na mí, na mìwlẹ nido no gbọn afọ etọn ji: ²²mẹhe ma waylando depope, bọ yè ma sọ mọ oklọ de to onù etọn mẹ: ²³omẹ, whenuena yè to vivlẹ ẹ, é ma Vlẹ omẹ; whenuena é sọ jiya, é ma wàdán; ṣigba bo jo ede hlan ewọ he nọ yí dódo do dawhè: ²⁴mẹhe ewọlọsu yí agbasa ede tọn dò hẹn ylando mítọn to atin ji, na mí he ko kú hlan ylando nido tin to ogbẹ̀ hlan dódó: gbọn bápa mẹhetọn dali yè hẹnazọ̀ngbọna mì. ²⁵Na mì ko taidi lẹngbọ he buali, ṣigba dinvie mí to lilégò do lẹngbọhọtọ lọ de, po bisọpu alindọn mìtọn lẹ tọn po.

¹MỌKẸDẸ wẹ mì asi lẹ ni nọ yín mẹmẹglọ hlan asú mìtọn titi lẹ; na, eyín mẹde ma yí ohó lọ se, yè nido dọ̀n yé gbọn owalọ asi lẹ tọn dali, matin ohó lọ; ²whenuena yé to owalọ wiwe mìtọn po osi po pọn. ³Asọ mehetọn yè dike é yin aṣọ agbasago tọn blo, oda bibla tọn, aṣọ sika tọn, kavi avọ̀ ṣinṣinyọn tọn blo; ⁴ṣigba ni yín gbẹtọ he whlá to ayiha mẹ nẹ, ehe mẹ gbigble ma tin te, yèdọ aṣọ gbigbọ homẹmimiọn po dẹ̃dẹ tọn po, ehe họakuẹ susu to Jiwheyẹwhe nukunmẹ ⁵Na lehunkọ wẹ yọnnu wiwe hóhó whenu tọn lẹ te ga, ye he dotudo Jiwheyẹwhe go, bo doasọna yéde, bo nọ yín mẹmẹglọ hlan asú yetọn titi lẹ. ⁶Yèdọ kẹdẹdile Sala setónuna Ablaham, bo nọ ylọ ẹ dọ Oklunọ: viyọnnu mẹhetọn mìwlẹ yín, sọle mìwlẹ to dagbe wà do, bọ mì ma sọ yí avosisa do dibu depope.

⁷Mọdopolọ wẹ mì asú lẹ ga, ni nọ yí nuyọnẹn do nọhẹ yé, mì nọ wleyẹyi hlan yọnnu lẹ, di hlan núzinzán madogánnọ, podọ di whédutọgbé ojọmiọn ogbẹ̀ tọn, na odẹ̀ mìtọn ma na do pòali.

⁸To popolẹpo mẹ, mì omẹ pó ni yín homẹdoponọ, na mì ni nọ kọnhomedai na mìnọzo, mì yiwanna omẹ di mẹmẹsunnu, mì yín awuvẹmẹtọ, bo sọ yín dagbewàtọ: ⁹mì yí oylan do sú oylan họ blo; kavi ozùn yí do sú ozún họ: ṣigba kakatimọ mì yí dona do sú; na mì ni sọ yọnẹn dọ ehe kọ̀n wẹ yè ylọ mì do, na mì nido dugú dona tọn. ¹⁰Na

¹³Mẹnu wẹ na wàylan do mì, eyín mìwlẹ yín mẹhe to onú he yín dagbe hodo? ¹⁴Ṣigba eyín mì tle jiya na dódó wutu, donanọ wẹ mì: mì dibu na osi yeton blo, tuwhẹ sọ li mì blo; ¹⁵ṣigba mí ni nọ klán Oklunọ Jiwheyẹwhe do wiwe to ayiha mìtọn mẹ: mì sọ nọ wleawu whepoponu nado yigbèna omẹ popo to wàlọmimiọn po osi po me, he to dòdinna linlẹn tódido tọn he tin to mì mẹ lẹ: ¹⁶tintindo ayiha dagbe de: dọ, le yé to ohó mìtọn dọ do ylankan di yé he to ylanwà, winyan ni hù yé he to lalo yí do to ohó ylankan dọ do owalọ dagbe mìtọn go to Klisti mẹ. ¹⁷E sọ bọawú eyín ojlo Jiwheyẹwhe tọn yín mọ, dọ mìwlẹ ni jiya na dagbe wiwà, hu na oylan wiwà. ¹⁸Na Klisti lọsu ga jiya whladopo na ylando wutu, dodonọ na mawàdódónọ, na é nido hẹn mi wá Jiwheyẹwhe de, mẹhe yè hù to agbasalan mẹ, ṣigba bọ yè hẹn wá ogbè to gbigbọ mẹ: ¹⁹gbọn ehe dali ga é yì, bo dọyẹwheho hlan gbigbọ he tin to gànhọ mẹ lẹ; ²⁰yé he ko yín tólivẹtọ to ojlẹ de mẹ, whenuena linsinsinyẹn Jiwheyẹwhe tọn nọte dẹn kaka to Noa whenu, whenuena yè to ohún (aki) whè to alọnu, ehe mẹ omẹ pẹvide, enẹ wẹ, ayiha sinatòn gán te, gbọn osìn dali. ²¹Ohia mọtọnhunkọ hlan ehe baptẹm do to mí whlẹn dinvie ga, (é ma yín diho agbasalan tọn didèsè gba, ṣigba ogbèyí ayiha dagbe de tọn hlan Jiwheyẹwhe,) gbọn fọ́nsọnku Jesu Klisti tọn mẹ: ²²mẹhe yì biọ olọn mẹ bo sọ tin to adusilọ Jiwheyẹwhe tọn mẹ; angẹli lẹ, mẹgbògbo lẹ, po huhlọn lẹ po wẹ yè hẹn yín mẹmẹglọ hlan ẹn.

¹BE sọle Klisti jiya na mí to agbasalan mẹ, mì yí nuyọnẹn dopolọ do blagbajana mìde: na ewọ he jiya to agbasalan mẹ ko doalọte sọn ylando mẹ; ²dọ ewọ sọ yí ogbẹ̀ whenu etọn he pò do nọ̀ agbasalan mẹ ba blo, hlan wantúntún gbẹtọ tọn, adavo hlan ojlo Jiwheyẹwhe tọn. ³Na ogbè whenu mítọn he ko juwayì nido pekòna mí, nado ko wàzon ojlo Kosi lẹ tọn, whenuena mìwlẹ to zọnlinzin to wantúntún mẹ, nújijlo ylankan, ovẹnnù zẹjlego, pasadudu, ahangbédido, podọ to bosiọsinsèn he ylanhú mẹ. ⁴Ehe mẹ yé lẹn di nudabla dọ mì ma dowezun gbọn aliylankan ogbẹ̀ tọn ji po yé po, bo sọ to ohó oylan tọn dọ do mì go: ⁵yé he na whèdọ hlan ewọ he ko wleawu nado dawhè mẹhe to ogbẹ́ po oṣiọ lẹ po tọn. ⁶Na ehe wutu wẹ yè do dọyẹwheho wẹndagbe tọn hlan osiọ lẹ ga, na yè nido dawhèna yé kẹdẹdi gbẹtọ to agbasalan mẹ, ṣigba na yé nido nọ ogbè hlan Jiwheyẹwhe to gbigbọ mẹ.

⁷Ṣigba opò doonú popo tọn to sisẹpọ́; enẹwutu mì yín hùwhẹnọ, bo sọ nọ hó mìde hlan odè. ⁸Hú onú lẹpo, mì ni tindo owanyi he hùnzo to mìde ṣẹnṣẹn; na owanyi nọ sìnyọnnúdo ylando susu. ⁹Mì nọ hẹjo mìnọzo to mahlun mẹ. ¹⁰Le omẹ dopodopo mọ nunina yí do, mọwẹ mì ni nọ basi ode hlan awetọ, di hònkọnsi dagbe to ojọmiọn alọpalọpa Jiwheyẹwhe tọn mẹ. ¹¹Eyín mẹde to hódọ, ni nọ dọ di ohó Jiwheyẹwhe tọn; eyín mẹde sọ to devizónwà, ni basi i di huhlọn he Jiwheyẹwhe na ẹn: na yè nido pagigona Jiwheyẹwhe to onú popo mẹ gbọn Jesu Klisti mẹ, mẹhe pipa po huhlọn po tin na kakadoi. Niṣẹ.

¹²Mẹyiwanna emi, mì lẹn di nudabla de blo gbọn whlepọ́n miyọnawu he ja mì whlepọ́n gbé, kẹdẹdi onú dabla de wẹ jọ hlan mì de: ¹³ṣigba mì ni jaya, sọle mì yín máhẹtọ to yajiji Klisti tọn mẹ do; na whenuena yè dè gigo etọn hia, mì nido jaya to homẹhùnhùn susu mẹ. ¹⁴Eyín yè to mì vlẹ na oyín Klisti tọn wutu, donanọ wẹ mì: na gbigbọ gigo tọn po Jiwheyẹwhe tọn po jẹ do mì ji; gbọn yewlẹ dali yè to nùzan do e go, ṣigba gbọn mìwlẹ dali yè tọ gigopa nẹ. ¹⁵Ṣigba mì dike mẹdepope to mì mẹ jiya di hlọnhutọ blo, kavi di ajotọ, kavi di ylanwàtọ, kavi di ajannọ to ohó mẹdevo tọn mẹ blo. ¹⁶Ṣigba eyín mẹde jiya di Klistiani, winyan hù i blo, ṣigba ni kúkú gbọ bo pagigona Jiwheyẹwhe na ehe wutu. ¹⁷Na ojlẹ lọ wá, bọ whẹ̀dida na sè sọn owhẹ́ Jiwheyẹwhe tọn gbè jànwẹ; eyín mìwlẹ whéwhé de wẹ è só sọn, etẹwẹ opòdo yé he ma setónuna wẹndagbe Jiwheyẹwhe tọn na yín? ¹⁸Yín é sọ yín, huhlọn talala wẹ dódónọ lẹ nado gán, fìe wẹ mẹylankan po ylandonọ lẹ po na gbọn? ¹⁹Enẹwutu mì gbọ yé he to yaji kẹdẹdi ojlo Jiwheyẹwhe tọn lẹ, ni yí ayiha yetọn do dagbe wiwà mẹ, hlan Mẹdatọ nugbonọ de.

¹ENẸWUTU mẹho he tin to mì mẹ lẹ wẹ yẹn jlahomẹdona, yẹn mẹhe yín mẹho de ga, kunnudetọ oya Klisti tọn tọn de, podọ máhẹtọ to gigo he yè na sọhia mẹ: ²Mì nọ yìn lẹngbọpa Jiwheyẹwhe tọn he tin mì ṣẹnṣẹn, bo nọ donukun e go, é gbọn mananọmawà dali blo, adavo po ojlo po; é ma yin adọwhẹn tọn gba, adavo ojlo zogbe tọn; ³mì sọ yí mìde do basi ogán do ogú Jiwheyẹwhe tọn ji blo, adavo dọ mì ni yín ohia hlan lẹngbọpa lọ. ⁴Whenuena ogán lẹngbọhọtọ tọn na sọawúhia, mì na yí ojẹgbakun gigo tọn lọ he ma nọ kupé, ⁵Mọwẹ mì dẹpẹ lẹ ga, mì yín mẹmẹglọ hlan mẹho lẹ. Nugbo, mì omẹ pó ni nọ yín mẹmẹglọ hlan mìnọzo, na yè ni sọ yí whiwhẹ do ṣinyọ̀navọ̀na mì: na Jiwheyẹwhe ko diọnukunsọ goyitọ lẹ, bo sọ na ojọmiọn ayihawhiwhẹnọ lẹ. ⁶Enẹwutu mì whiwhẹ mìde to alọ gángán Jiwheyẹwhe tọn glọ, na ewọ nido zé mì daga to ojlẹ etọn mẹ: ⁷mì bẹ́ magbọjẹ mìtọn lẹpo do alọ etọn mẹ; na ewọ to tukla mìtọn jẹ wutu. ⁸Mì yín hùwhẹnọ bo sọ nọ hó mìde: na lẹgba, mẹglatọ mìtọn, di kinnikinni he to lìlì, é to zọnlinzin pé, bo to mehe é na tlendù din. ⁹Mẹhe mì ni diọnukunsọ gligli to yise mẹ, na mì ni sọ yọnẹn dọ nukunbibia dopolo ko sè sọn mẹmẹsunnu mìtọn he ko tin to aihọn mẹ lẹ ji. ¹⁰Ṣigba Jiwheyẹwhe ojọmiọn lẹpo tọn, mẹhe ylọ mí do gigo etọn madopodo mẹ gbọn Klisti Jesu dali, whenuena mì jiya to whenu vude, ni basi mì sọgbè, ni hẹn mì lódo, bo na huhlọn mì, bo sọ dintẹnna mì. ¹¹Ewọ wẹ gigo po huhlọn po tin hlan kakadoi. Niṣẹ.

¹²Gbọn Silvanu dali, hlan mì, mẹmẹsunnu nugbọnọ, le yẹn len do, yẹn wlanwe pẹvi he, bo do to homẹjladona mì, bo sọ to kunnude, dọ, ehe wẹ nugbo ojọmiọn Jiwheyẹwhe tọn he mẹ mì nọte te. ¹³Agùn he tin to Babiloni, he yè dè dopọ dogó dọnúdo mì: po Malku ovi ṣie po. ¹⁴Nùdonùgo owanyi tọn wẹ mì ni yí do dọnúdo mìnọzọ. Na jijọhò he tin to Klisti Jesu mẹ ni tin jẹ mì omẹ pó de. Niṣẹ.