1 Johanu

¹ENẸ he ko tin sọn whéwhéwhenu, ehe mi ko sè, ehe mí ko yi nukun mítọn do mọ, ehe mí to pinpọn, bọ alọ mítọn hẹn e go, gbọn Ohó ogbè tọn lọ tọn dali. ²(Na ogbè ko sọawúhia, mìwlẹ sọ mọ ẹn, bo dekunnuna, mí sọ la ogbẹ́ madopodo lọ hlan mì, ehe ko tin to Otọ de, bo ko sọawúhia hlan mí.) ³Ene he mìwlẹ ko mọ bọ sọ sè, wẹ mí to lila hlan mi, na mìwlẹ ga nido tindo kọndopọ po mí po: nugbo, kọndopọ mítọn tin po Otọ́ po, po Jesu Klisti Ovi etọn po. ⁴Onu helẹ wẹ mí wlan hlom mì, na ayajẹ mítọn nido gó.

⁵Be ehe wẹ owẹn he mí ko sè sọn e de, ehe mìwlẹ sọ la hlan mì, dọ hinhọ́n wẹ Jiwheyẹwhe; podọ zinvlu depope ma tin to ewọ mẹ lala. ⁶Eyín mìwlẹ dọ dọ mí tindo kọndopọ po e po, bọ mí sọ to zọnlinzin to zinviu mẹ, mí dolalo, mí ma wa nugbo lọ gba: ⁷ṣigba eyín mìwlẹ to zonlinzin to hinhọ́n mẹ, dile ewọ to-hinhón mẹ do, mí tindo kọndopọ po mìnọzo po, ohùn Jesu Klisti Ovi etọn tọn sọ kló mí sọn ylando lẹpo mẹ. ⁸Eyín míwlẹ dọ dọ mí ma tindo ylando, mi klọ mìde, nugbo de ma sọ tin to mí mẹ gba. ⁹Eyín mí yígbe ylando mítọn lẹ tọn, nugbonọ, dódónọ wẹ ewọ nado jo ylando mìtọn lẹ na mí, podọ nado kló mí sọn mawadódó lẹpo mẹ. ¹⁰Eyín mìwlẹ dọ dọ mí ma wàylan, mí yí i do basi lalonọ de, ohó etọn ma sọ tin to mí mẹ.

¹MI yọ̀pọ ṣie lẹ emi, owé onú helẹ tọn wẹ yẹn wlan hlan mì, na mì ma na do wàylan. Eyín mẹdepope wàylan, mí tindo whẹyidọtọ de to, Otọ́ de, Jesu Klisti dódónọ lọ: ²Ewọ sọ wẹ oyẹ́su na ylando mítọn: é ma yín mítọn kẹdẹ, ṣigba na ylando aihọn lẹpo tọn ga. ³Gbọn ehe mẹ wẹ mí yọnẹn dọ mí yón ẹn, eyín mí to osén etọn yìn. ⁴Mẹhe dọ, Yẹn yón ẹn, bo ma yìn osén etọn, lalonọ de wẹ, nugbo lọ ma sọ tin to ewọ mẹ. ⁵Ṣigba mẹdepope he yìn ohó etọn, e go we owanyi Jiwheyẹwhe tọn sọgbè te nugbonugbo: ehe mẹ wẹ mìwlẹ yọnẹn te dọ mí tin to ewọ mẹ. ⁶Mẹhe dọmọ ewọ tin to e mẹ, é jẹ ewọ ga ni nọ zìnzọnlin do mọkẹdẹ dile ewọ to zọnlinzin do.

⁷Mì mẹmẹsunnu emi, yẹn ma wlan osén yọ́yọ́ de hlan mì gba, adavo osén hóhó de he mí ko tindo sọn whéwhéwhenu. Osén hóhó lọ wẹ ohó he mì ko sè sọn whẹ́whẹ́whenu. ⁸Podọ, osẹ́n yọ́yọ́ de wẹ yẹn so wlan hlan mì, onú he yín nugbo to ewọ mẹ podọ to mì mẹ: na zinvlu to ju juwayì, bọ hinhọ́n nugbo sọ to vivẹ́ to dinvie wutu. ⁹Mẹhe dọmọ é tin to hinhọ́n mẹ, bo sọ gbẹwanna mẹmẹsunnu etọn, ewọ tin to zinvlu mẹ kaka jẹ dinvie. ¹⁰Ewọ he yiwanna mẹmẹsunnu etọn, é nọte to hinhọ́n mẹ, ahlidanu de ma sọ tin to e mẹ. ¹¹Ṣigba ewọ he gbẹwanna mẹmẹsunnu etọn ewọ tin to zinvlu mẹ, bo sọ to zọnlinzin to zinvlu mẹ, é ma yọ́n fie é jei, na zinvlu ko tọnnukun nẹ̃.

¹²Yẹn wlanwe hlan mì, yọ̀pọ ṣie lẹ emi, na yè jo ylando mìtọn na mì na oyín etọn tọn wutu. ¹³Yẹn wlanwe hlan mì, otọ́ emi, na mìwlẹ ko yọ́n ewọ he ko tin sọn whéwhéwhenu wutu. Yẹn wlanwe hlan mì, dẹpẹ lẹ emi, na mì ko gbawhàn mẹylankan lọ tọn wutu. Yẹn ko wlanwe hlan mì, yọ̀pọ lẹ, na mì yọ́n Otọ́ wutu. ¹⁴Yẹn ko wlanwe hlan mì, otọ́ lẹ, na mìwlẹ ko yọ́n ewọ he tin sọn whẹ́whẹ́whẹ́nu wutu. Yẹn ko wlanwe hlanmì, dẹpẹ lẹ, na mì tindo huhlọn, bọ ohó Jiwheyẹwhe tọn sọ nọte to mì mẹ, bọ mì sọ gbawhàn mẹylankan lọ tọn wutu. ¹⁵Mì yiwanna aihọn blo, kavi onú he tin to aihọn mẹ. Eyín mẹde yiwanna aihọn, owanyi Otọ́ tọn ma tin to ewọ mẹ gba. ¹⁶Na onú he tin to aihọn mẹ lẹpo, wantúntún agbasalan tọn, wantúntún nukun tọn, po gigovọ ogbé tọn po, é ma tin to Otọ́ tọn mẹ gba, ṣigba aihọn tọn wẹ. ¹⁷Aihọn sọ to juju jei po wantúntún etọn po: ṣigba ewọ he to ojlo Jiwheyẹwhe tọn wà wẹ na nọte kakadoi.

¹⁸Mì yọ̀pọ lẹ emi, ojlẹ godomẹ tọn wẹ: le mì ko sè dọ agòjẹdo-Klistigotọ ja, yèdọ dinvie agòjẹdo-Klistigotọ susu wẹ tin; ehe mẹ mìwlẹ yọnẹn te dọ ojlẹ godomẹ tọn lọ wẹ. ¹⁹Yé tọ́n sọn mí de jẹgbọnu, ṣigba yé ma tin to mí mẹ gba; na eyín yé ko tin to mí mẹ, matinnudọn yé do nọte po mi po: ṣigba yé tọ́n yì na yè nido sọ yé hia dọ yé omẹ pó ma sọn mí mẹ gba. ²⁰Ṣigba mì tindo amisisa de sọn Mẹwiwe lọ de, mì sọ yọ́n onú lẹpo. ²¹Yẹn ma ko wlanwe hlan mì na mì ma yọ́n nugbo lọ wutu gba, ṣigba dọ mì yọ́n ẹn wutu, podọ lalo ma só sọn nugbo mẹ wutu. ²²Mẹnu wẹ lalonọ, adavo ewọ he món dọ Jesu wẹ Klisti? Ewọ wẹ agọ̀jẹdo-Klistigotọ, he món Otọ́ po Ovi po. ²³Mẹdepope he mọ́n Ovi, ewọ lọ wẹ ma tindo Otọ́: ṣigba, ewọ he yígbe Ovi tọn, é tindo Otọ́ ga. ²⁴Enẹwutu na enẹ ni nọte to mì mẹ, ehe mì ko sè sọn whẹ́whẹ́whenu. Eyín ehe mì ko sè sọn whẹ́whẹ́whenu nọte to mì mẹ, mìwlẹ ga na nọte to Ovi mẹ, podọ to Otọ́ mẹ. ²⁵Ehe sọ wẹ opagbe lọ he é ko do na mí, yèdọ ogbẹ́ madopodo. ²⁶Onú helẹ wẹ yẹn wlanwe etọn hlan mì gbọn yé he to mì klọ lẹ tọn dali. ²⁷Ṣigba amisisa he mì ko yi to e de nọte to mì mẹ, mì ma sọ din dọ mẹde ni plọ́n mì gba; ṣigba le amisisa lọ to mì plọ́n gbọn onú lẹpo tọn dali, bọ é sọ yín nugbo do, bo ma yín lalo, kẹdẹdile é plọ́n mì do, mìwlẹ ni sọ nọte to e mẹ. ²⁸Podọ dinvie, mì yọ̀pọ emi, mì nọte to ewọ mẹ; na, whenuena é na sọawúhia, mí nido tindo tudido, bo ma nasọ kuwinyan to nukọn etọn to gigòwà etọn whenu. ²⁹Eyín mì yọ́n ẹn dọ ewọ yín dódónọ, mì yọnẹn dọ yè dè mẹhe wà dódó lẹpo tọ́n sọn ewọ mẹ.

¹DO ayi e go, owanyi he hunkọ Otọ́ kòn do mí ji, dọ yè nido ylọ mí ovi Jiwheyẹwhe tọn lẹ: enẹwutu aihọn ma yọn mí, na é ma yọ́n ewọ wutu. ²Mẹyiwanna emi, dinvie ovi Jiwheyẹwhe tọn wẹ mí, é ma ko sọ sọawúhia le mí na te: sigba mí yọnẹn dọ, whenuena ewọ na sọawúhia, mìwlẹ na di ewọlọsu; na mí na mọ ẹn dole é te. ³Mẹdepope he tindo tódido he to e ji, é klọ́ ede wé dile ewọ wé do. ⁴Mẹdepope he wàylan, jẹ osén mẹ ga; na ylando wẹ osẹ́n mẹ jijẹ. ⁵Mìwlẹ sọ yọnẹn dọ, ewọ ko sọawúhia nado bẹ́ ylando mítọn sẹ̀: podọ ylando de ma tin to ewọ mẹ ⁶Mẹdepope he nọnọ̀ ewọ mẹ ma wàylan: mẹdepope he wàylan ma mọ ẹn, mọ é ma sọ yọ́n ẹn. ⁷Mì yọ̀pọ emi, mì dike mẹde klọ mì blo: ewọ he to dódó wà, wẹ dódónọ, kẹdẹdile ewọ yín dódónọ do. ⁸Ewọ he wàylan, lẹgba de é jọ̀ sọn; na lẹgba ko wàylan sọn whẹ́whẹ́whenu. Na ehe wutu wẹ Ovi Jiwheyẹwhe tọn sọawúhia, na é nido gbà azọn lẹgba tọn súdo. ⁹Mẹdepope he yè dètọ́n sọn Jiwheyẹwhe mẹ ma nọ wàylan, na okún etọn to ninò e mẹ: ewọ ma sọ sọgan wàylan, na Jiwheyẹwhe de wẹ yè dè e tọ́n sọn wutu. ¹⁰Ehe mẹ wẹ yè to ovi Jiwheyẹwhe tọn lẹ sọhia te, po ovi lẹgba tọn lẹ po: mẹdepope he ma wà dódó, é ma jò sọn Jiwheyẹwhe de gba, kavi ewọ he ma yiwanna mẹmẹsunnu etọn. ¹¹Na ehe wẹ owẹn he mì sè sọn whẹ́whẹ́whenu, dọ mí ni yiwanna mìnọzo. ¹²E ma yín taidi Kaini, he jọ̀ sọn mẹylankan lọ de, bo hù nọvisunnu etọn gba. Etẹwutu wẹ é hù i? Na azọ́n etọn lẹ yín oylan wutu, bọ nọvisunnu etọn tọn yín dódó. ¹³Awuji mì blo, mẹmẹsunnu ṣie emi, eyín aihọn gbẹwanna mì. ¹⁴Mìwlẹ yọnẹn dọ mí ko tọ́n sọn okú mẹ biọ ogbẹ̀ mẹ, na mìwlẹ yiwanna mẹmẹsunnu lẹ wutu. Mẹdepope he ma yiwanna mẹmẹsunnu etọn, é tin to okú mẹ. ¹⁵Mẹdepope he gbẹwanna mẹmẹsunnu etọn mẹhùtọ de wẹ; mì sọ yọnẹn dọ ogbẹ̀ madopodo ma na nọhẹ mẹhùtọ gba. ¹⁶Ehe mẹ wẹ mí yọ́n owanyi Jiwheyẹwhe tọn te, na é yí gbigbọ etọn bọdai na mí wutu: é jẹ dọ mìwlẹ ni yí gbigbọ mítọn bọdai na mẹmẹsunnu lẹ ga. ¹⁷Ṣigba mẹhe tindo adọkunnu aihọn he tọn, bo mọ mẹmẹsunnu etọn to ohẹn mẹ, bo sọ glọn lẹblanu homẹ etọn tọn sọn e de, nawẹ owanyi Jiwheyẹwhe tọn na nọhẹ omẹ lọ do? ¹⁸Mì yọ̀pọ ṣie emi, mì dike mí yí onù tata do basi owanyi blo, kavi po odé po blo; adavo to wiwà po nugbo po mẹ. ¹⁹Podọ ehe mẹ wẹ mí yọnẹn te dọ, mìwlẹ jò sọn nugbo lọ de, bo nasọ hẹn ayiha mítọn diun to nukọn etọn. ²⁰Na eyín ayiha mitọn gblewhẹdo mí, Jiwheyẹwhe klo hú ayiha mítọn bo sọ yọ́n onú popo. ²¹Mì mẹyiwanna emi, eyín ayiha mitọn ma gblewhẹdo mí gba, mìwlẹ tindo tudido hlan Jiwheyẹwhe de. ²²Onú depope mí kanbiọ, mí mọyi to e de; na mí yin osén etọn wutu, bo sọ to onú he yín jijlọ to nukọn etọn lẹ wà. ²³Ehe wẹ osén etọn, Dọ mí ni yí oyín Jesu Klisti Ovi etọn tọn se, bo sọ yiwanna mìnọzo yèdọ dile ewọ na osẹ́n mí do. ²⁴Ewọ he yìn osén etọn, to ninọ̀ ewọ mẹ. Ehe mẹ wẹ mí yọnen te dọ, ewọ to ninọ̀ mí mẹ, gbọn Gbigbọ he é na mí dali.

¹MẸYIWANNA emi, mì yí gbigbọ popo se blo, ṣigba mì nọ tẹ̀n gbigbọ lẹ pọn eyín yé jọ̀ sọn Jiwheyẹwhe de: na yẹwhegán lalonọ susu ko tọ́n yì aihọn mẹ. ²Ehe mẹ wẹ mì ni yọ́n Gbigbọ Jiwheyẹwhe tọn: Gbigbọ he yígbe dọ Jesu Klisti wá to agbasalan mẹ lẹpo, Jiwheyẹwhe de é jọ̀ sọn ³Gbigbọ he ma yígbe dọ Jesu Klisti wá to agbasalan mẹ lẹ, ma jọ sọn Jiwheyẹwhe de gba; ehe wẹ gbigbọ agọ̀jẹdo-Klistigotọ lọ tọn, ehe ton mì ko sè dọ é ja; yèdọ to dinvie e tin to aihọn mẹ. ⁴Jiwheyẹwhe de mì jọ̀ sọn, yọ̀pọ emi, mì ko gbawhàn yétọn: na klohú wẹ ewọ he tin to mì mẹ, hú ewọ he tin to aihọn mẹ. ⁵Aihọn de yé jò sọn, enẹwutu wẹ yé to aihọn mẹ tọn dọ, bọ aihọn sọ to yetọn sè. ⁶Jiwheyẹwhe de mìwlẹ jọ́ sọn: ewọ he yọ́n Jiwheyẹwhe nọ sè mítọn: ewọ he ma jò sọn Jiwheyẹwhe de ma sè mítọn gba. Ehe mẹ wẹ mí yọ́n gbigbọ nugbo tọn lọ, po gbigbọ bubu tọn lọ po.

⁷Mẹyiwanna emi, mì gbọ mí ni yi wanna mìnọzo: na owanyi jò sọn Jiwheyẹwhe de; mehe yiwanna omẹ, yè dè e tọ́n sọn Jiwheyẹwhe mẹ, é sọ yọ́n Jiwheyẹwhe. ⁸Ewọ he ma yiwanna omẹ, ma yọ́n Jiwheyẹwhe gba; na Jiwheyẹwhe wẹ owanyi. ⁹Ehe mẹ wẹ yè do owanyi Jiwheyẹwhe tọn hia hlan mí te, na Jiwheyẹwhe do Ovi dètọ́n etọn dopo akàn lọ hlan aihọn he mẹ, na mí nido nọgbẹ̀ gbon ewọ mẹ. ¹⁰Ehe mẹ wẹ owanyi te, é ma yín dọ míle yiwanna Jiwheyẹwhe gba, ṣigba dọ ewọ yiwanna mí bo sọ do Ovi etọn hlan nado yín oyẹ̀su na ylando mìtọn. ¹¹Mẹyiwanna emi, eyín Jiwheyẹwhe yiwanna mí sọmọ é jẹ dọ mí ni sọ yiwanna mìnọzo ga. ¹²Mẹdepope ma mọ Jiwheyẹwhe whedepopenu gbède. Eyín mí yiwanna mí nọzo, be Jiwheyẹwhe to ninò mí me yè sọ hẹn owanyi etọn sọgbè to mi mẹ. ¹³Ehe me wẹ mí yọnẹn te dọ, mí to ninò e mẹ, ewọ to mí mẹ, na é ko na mí to Gbigbọ etọn mẹ wutu. ¹⁴Mí ko mọ bo sọ dekunnu dọ Otọ́ do Ovi etọn hlan nado yín Whlẹngantọ aihọn tọn. ¹⁵Mẹdepope he na yígbe dọ Óvi Jiwheyẹwhe tọn wẹ Jesu, Jiwheyẹwhe to ninọ̀ e mẹ, podọ ewọ to Jiwheyẹwhe mẹ. ¹⁶Mí yọnẹn bo sọ yí owanyi Jiwheyẹwhe tọn lọ hlan mí se. Jiwheyẹwhe wẹ owanyi; ewọ he to ninò owanyi mẹ, tọ ninò Jiwheyẹwhe mẹ, Jiwheyẹwhe sọ to ewọ mẹ. ¹⁷Ehe mẹ wẹ yè hẹn owanyi mítọn sọgbè te, na mí nido tindo tugbigbo to whẹdazángbè, na le ewọ te, yèdọ mọ wẹ mìwlẹ te to aihọn he mẹ. ¹⁸Obu ma tin to owanyi mẹ gba; ṣigba owanyi he sọgbè yàn obu jegbonu; na obu tindo oya wutu. Podọ ewọ he dibu ma pé to owanyi mẹ gba. ¹⁹Mí yiwan nẹ, na ewọ whẹ́whẹ́ wẹ yiwanna mí wutu ²⁰Eyín mẹdẹ dọ, Yẹn yiwanna Jiwheyẹwhe, bo gbẹwanna mẹmẹsunnu etọn, lalonọ wẹ ewọ: na ewọ he má yiwanna mẹmẹsunnu etọn he é mọ, nawẹ é na yiwanna Jiwheyẹwhe mẹhe é ma mọ do? ²¹Osẹ́n he wẹ mí mọyi sọn e de, dọ ewọ he yiwanna Jiwheyẹwhe, yiwan na mẹmẹsunnu etọn ga.

¹MẸDEPOPE he yise dọ Jesu wẹ Klisti, yè dè e tọn sọn Jiwheyẹwhe de: mẹdepope he sọ yiwanna mẹjitọ, é yiwanna ewọ he yè dètọ́n sọn e mẹ ga. ²Ehe mẹ wẹ mí yọnẹn te dọ mí yiwanna ovi Jiwheyẹwhe tọn lẹ, whenuena mí yiwanna Jiwheyẹwhe, bo sọ yìn osẹ́n etọn. ³Na ehe wẹ owanyi Jiwheyẹwhe tọn, dọ mi ni yìn osẹ́n etọn: osẹ́n etọn ma sọ yín nupẹ̀nagbanmẹ gba. ⁴Na mẹdepope he yè dètọ́n sọn Jiwheyẹwhe de, gbawhàn aihọn tọn: ehe sọ wẹ awhàngba he gbawhàn aihọn tọn, yèdọ yise mítọn. ⁵Mẹnu wẹ ewọ he gbawhàn aihọn tọn, adavo ewọ he yise dọ Jesu wẹ Ovi Jiwheyẹwhe tọn? ⁶Ehe we ewọ he wá gbọn osìn po ohùn po dali, yèdọ Jesu Klisti; é ma yín gbọn osìn kẹdẹ dali gba, ṣigba gbọn osìn po ohùn po dali. Gbigbọ wẹ sọ to kunnude, na nugbo wẹ Gbigbọ lọ wutu. ⁷Na omẹ atọn wẹ to kunnude to olọn mẹ, Otọ́, Ohó, po Gbigbọ Wiwe po: omẹ atọ̀n helẹ sọ basi dopo. ⁸Yé omẹ atọ̀n wẹ sọ to kunnude to aihọn mẹ, gbigbọ, osìn po ohùn po: yé omẹ atọ̀n hele sọ basi dopo. ⁹Eyín mì yí kunnudide gbẹtọ tọn, kunnudide Jiwheyẹwhe tọn sùhú: na ehe wẹ kunnudide Jiwheyẹwhe tọn he é do dekunnuna Ovi etọn. ¹⁰Mẹhe yí Ovi Jiwheyẹwhe tọn se, tindo kunnudide to ede homẹ: ewọ he ma yí Jiwheyẹwhe se, ko yí i do basi lalonọ; na é ma yí kunnudide he Jiwheyẹwhe de gbọn Ovi etọn dali se wutu ¹¹Ehe sọ wẹ kunnudide, dọ Jiwheyẹwhe na ogbè madopodo hlan mí, ogbè he tin to Ovi etọn mẹ. ¹²Ewọ he tindo Ovi tindo ogbè; ewọ he ma sọ tindo Ovi Jiwheyẹwhe tọn ma tindo? gbè gba.

¹³Onú hele wẹ yẹn wlanwe etọn hlan mì he yí oyín Ovi Jiwheyẹwhe tọn tọn se lẹ; na mì nido yọnẹn dọ mì tindo ogbè madopodo, podọ na mì nido yí oyín Ovi Jiwheyẹwhe tọn tọn se ga. ¹⁴Ehè sọ wẹ tudido he mí tindo to ewọ mẹ; dọ, eyín mí biọ nudepope kẹdẹdi ojlo etọn, é sè mítọn: ¹⁵eyín mí yọnẹn dọ é sè mítọn, nudepope mí biọ, mí yọnẹn dọ mí tindo kanbiọ he mi to bibiọ to e de. ¹⁶Eyín omẹ de mọ mẹmẹsunnu etọn wà ylando de he ma yín hlan okú gba, é na biọ, ewọ nasọ yí ogbẹ̀ nẹ̃ na yé he ma wàylando hlan okú lẹ. Ylando de tin hlan okú: yẹn ma dọ ewọ do hodè nẹ̃ gba. ¹⁷Dódómawà lẹpo wẹ ylando: ylando de tin bo ma yín hlan okú.

¹⁸Mìwlẹ yọnẹn dọ mẹdepope he yè dètón sọn Jiwheyẹwhe de ma nọ wàylan; ṣigba ewọ he yè dètón sọn Jiwheyẹwhe mẹ nọ yí ede whlá, mẹylankan lọ ma sọ gàn do e go. ¹⁹Mìwlẹ sọ yọnẹn dọ Jiwheyẹwhe de mí jò sọn, aihọn, lepo sọ mlọnai to omẹ ylankan lọ mẹ. ²⁰Mí sọ yọnẹn dọ Ovi Jiwheyẹwhe tọn wá, bo sọ na wuntùntùn mí, na mí nido yón ewọ he yín nugbo, mìwlẹ sọ tin to ewọ he yin nugbo mẹ, yèdọ to Jesu Klisti Ovi etọn mẹ. Ehe wẹ Jiwheyẹwhe nugbo lọ po ogbè madopodo po. ²¹Yọpọ ṣie lẹ emi, mì joagọ̀ sọn bosiọ lẹ kòn. Niṣẹ.