Filippinu Lẹ

¹PAULU po Timoti po, mẹmẹglọ Jesu Klisti tọn lẹ, hlan mẹwiwe lẹpo to Klisti Jesu mẹ he tin to Filippi, po nugopóntọ lẹ po, po diakọni lẹ po: ²Ojọmiọn po jijọho po hlan mì, sọn Jiwheyẹwhe Otọ́ mítọn de, podọ sọn Jesu Klisti Oklunọ de.

³Yẹn dopéna Jiwheyẹwhe ṣie to oflin mìtọn lepo mẹ, ⁴whepoponu wẹ yẹn to ayajijẹ yí do to vèvẹ́ to odẹ́ ṣie lẹpo mẹ na mì omẹ pó, ⁵na pọninọ mìtọn to wẹndagbe mẹ sọn azán tintan tọn gbọ̃n kakajẹ dinvie; ⁶le yẹn tindo tugbigbo to ehe lọ mẹ, dọ ewọ he ko só azọ́n dagbe to mì mẹ nasọ dota nẹ̃ kaka jẹ azán Jesu Klisti tọn gbè: ⁷yèdọ dile é jlọ na mi do nado lẹn ehe na mìtọn dali tọn, na le mì do mi to ayiha mìtọn mẹ wutu; dole é sọ yín dọ to ogàn ṣie mẹ, to whinwhlẹn, podọ to afọhẹnai wẹndagbe tọn mẹ, mì omẹ pó wẹ yín máhẹtọ to ojọmiọn mẹ hẹ mi. ⁸Na Jiwheyẹwhe wẹ kunnudetọ ṣie, na le yẹn jlo nado mọ mì mẹpo susu talala to lẹblanu bibò Jesu Klisti tọn mẹ do. ⁹Yẹn sọ to dèho na ehe dọ, na owanyi mìtọn ni to susudeji tọ nuyọnẹn po zìnzìn lẹpo po mẹ ga; ¹⁰na mì nido mọdòna onú he gbọnvò lẹ, na mì nido yín mẹpipé, mawàylando kaka jẹ azán Klisti tọn gbè; ¹¹na le mì gó na sinsẹ́n dódo tọn, he gbọn Jesu Klisti mẹ, hlán gigo po pipa Jiwheyẹwhe tọn po.

¹²Dinvie yen so jlo na mì ni tunwun, mẹmẹsunnu emi, dọ, onú he pla mi le ko JE hlan onukọnyì wendagbe tọn; ¹³sọmọ bọ ogàn ṣie lẹzun awusọhia to Klisti mẹ to awhanvipẹ Sesali tọn lepo ṣẹnṣẹn, podọ to ofi devo lepo; ¹⁴podo mẹmẹsunnu susu to Oklunọ mẹ wẹ do tugbigbo gbọn ogàn ṣie mẹ, yé sọ yí tugbigbo do to ohó lọ dọ talala madibu. ¹⁵Nugbo mẹdelẹ tlẹ yi wiwó nuvẹun po; do to yẹwheho Klisti tọn dọ; mẹdele ga, sọn homẹdagbe mẹ: ¹⁶mẹdelẹ nọ yí wiwó do to yẹwheho Klisti tọn dọ, é ma yín sọn nugbọ mẹ gba, yé sọ to linlẹn nado yí nukunbia dogọ ogàn ṣie: ¹⁷ṣigba omẹ devo lẹ sọn owanyi mẹ, na yé yọnẹn dọ yè ko dè mi donukọn na owhlẹn wẹndagbe tọn. ¹⁸Be etẹwẹ? Kiki dọ to awà popo ji, yín eyín to wahia mẹ kavi to nugbo me, mọwẹ yè to yẹwheho Klisti tọn dọ; yẹn sọ to ayajẹ na enẹwutu, nugbo, yẹn nasọ to ayajẹ. ¹⁹Na yẹn yọnẹn dọ, ehe wẹ lẹzun whlẹngan ṣie gbọn odẹ́ mìtọn mẹ, po dèdogó Gbigbọ Jesus Klisti tọn po. ²⁰Kẹdẹdi nukundo po tódídó ṣie po dọ, winyan ma na hù mi to nudepope mẹ, ṣigba to tugbigbo popo mẹ, di whepoponu tọn, mọkẹdẹ wẹ dinvie ga yè nasọ pagigona Klisti to agbasa ṣie mẹ, yín eyin gbọn ogbẹ́ dali, kavi gbọn oku dali. ²¹Na hlan mi tintin to ogbè ṣie Klisti wẹ, podọ nado kú ale sọ wẹ ²²Ṣigba eyín yẹn tin to ogbẹ̀ to agbasa me ale azón ṣie tọn we ehe: ṣigba ehe yen do dè, yẹn ma yọnẹn. ²³Na yen tin to jinjan de mẹ to awe lẹ ṣẹnṣẹn, yen to jijlo nado yì, podo nado fọnyì bo tin to Klisti de; he bọawu hu: ²⁴ṣigba nado tin to agbasa mẹ yín ale na mì hú. ²⁵Le yẹn do tugbigbo he, yen yọnẹn dọ, yẹn na nọte, bo sọ tin to mì omẹ popo de na onukọnyì mìtọn po ayaje po to yise mẹ; ²⁶na ayajijẹ mìtọn nido zùn susu to Jesu Klisti mẹ na mi gbọn tintin to mì de ṣie mẹ. ²⁷Kiki mì gbọ owalọ mìtọn ni nọ le e jẹ na wẹndagbe Klisti tọn do: dọ, eyín yẹn wá pọn mi, kavi eyín yẹn ma tin to mì de, na yẹn ni nọ sè le mi to onú wà do, dọ mì nọte gligli to gbigbọ dopo mẹ, bo sọ nopọ do to awhànfùn na yise wẹndagbe tọn wutu; ²⁸mì dibuna kèntọ mìtọn lẹ to nudepope mẹ blo, he yin ohia dopo na viva yetọn he yè modona, ṣigba whlengan mìtọn tọn, podọ enẹ sọn Jiwheyẹwhe de wẹ. ²⁹Na hlan mi wẹ yè na Klisti wutu, e ma yin nado yí i se kẹde gba, ṣigba nado jiya na ewọ tọn wutu ga; ³⁰bo tindo avùn dopolọ, ẹhe mì ko mọ to yẹn mẹ, ehe mì sọ se dinvie dọ, é tin to yẹn mẹ.

¹ENEWUTU eyín homehùnhùnhó de tin to Klisti me, eyín homẹmimiọn owanyi tọn, eyín kondopọ Gbigbọ tọn, eyín leblanu bibò lẹ po awuvẹmẹ lẹ po, ²mì hen ayajẹ ṣie gó, na mì ni yín homedoponọ, bo tin to owanyi dopo, linlen dopo, podọ to ayiha dopo me. ³Mì yí avùn kavi ogoyi ovó do wà nudepope blo, ṣigba to ayiha whiwhe mẹ dopodopo mìton ni nọ lẹn medevo tọn hú ede tọn. ⁴Na mẹde pọ́n onú he yín etọn kẹdẹ go blo, ṣigba na omẹ popo ni nọ pọn onú he yín medevo tọn go ga. ⁵Mi gbọ ayiha he tin to Klisti Jesu mẹ ni tin to mì me ga. ⁶Mẹhe, tintin to ohia Jiwheyẹwhe tọn mẹ, ma lẹn ẹn na ale nado sọzẹn hẹ Jiwheyẹwhe gba: ⁷ṣigba é klon gigo etọn dai, é yi ojlẹmọ afànumẹ tọn de na ede, yè sọ basi i to apajlẹ gbẹtọ lẹ tọn mẹ: ⁸mimọ ẹn to apajle gbẹtọ de tọn mẹ, é whiwhẹ ede, bo sọ lezun tónusetọ kaka jẹ okú, yèdọ oku satin tọn. ⁹Enewutu Jiwheyẹwhe zé e do oji aga ga, bo sọ na oyín de ewọ he hú oyín lẹpo; ¹⁰dọ to oyín Jesu tọn mẹ kligonu lẹpo nido nọ jẹklo, yé he tin to olọn mẹ lẹ tọn, yé he tin to aigba lẹ tọn, po yé he tin to aigba sabọ le tọn po. ¹¹Podọ na odé lepo ni nọ yigbe dọ, Jesu Klisti we Oklunọ, hlan gigo Jiwheyẹwhe Oto tọn.

¹²Enẹwutu mì, mẹyiwanna ṣie emi, dile mìwlẹ ko setónu to whepoponu é ma yín whenu yẹn tin to mì de kẹdẹ, ṣigba humọ dinvie whenu yen ma tin to mì de, mì nọ wàzon whlẹngan mìtọn tọn jẹgbonu to osi po sisọsisọ po mẹ ¹³Na Jiwheyẹwhe wẹ wazọ́n to mì homẹ nado jlo podọ nado wà na homẹdagbe etọn. ¹⁴Mì nọ wà onú popo matin hùnhlun po avùn po ¹⁵Na mì nido yín omẹ mahuwhẹ, omẹ mawàylan, ovi Jiwheyẹwhe tọn lẹ, madowhẹ to okò to akọta jijọ gbingbannọ po bublunọ po ṣẹnṣẹn, mẹhe ṣẹnṣẹn mì to wunhọn te di hinhọ́n to aihọn mẹ lẹ; ¹⁶mì nọ hẹn ohó ogbè tọn go gligli; na yẹn nido jaya to Khsti zángbè dọ, yẹn ma dowezun yaya gba, mọ yẹn ma sọ jẹtukla yaya. ¹⁷Mowẹ, eyín yè tlẹ ké mi do avọ po azọ́n yise mìtọn po ji, yẹn jaya, bo sọ to ayajẹ hẹ mì omẹ popo ga. ¹⁸Na to owalọ dopolọ mẹ ga wẹ mì ni nọ jaya, bo sọ to ayajẹ hẹ mi te.

¹⁹Ṣigba yẹn dotudo Jesu Oklunọ go, nado do Timoti hlan mì to azánvi helẹ mẹ, na homẹ ṣie nido vivi ga, whenuena yẹn sè linlin le mì te do tọn. ²⁰Na yẹn ma tindo gbẹtọ ayihamọnọ de di ewọ, he na yí homẹ etọn lẹpo do jẹtukla to mì ji gba ²¹Na yé omẹ pó wẹ to onú yéde tọn din, e ma yín onú he yín Jesu Klisti tọn gba. ²²Ṣigba mì yón zinzán etọn dọ kẹdẹdi ovi to otọ́ de, mọwẹ ewọ ko to azónwà hẹ mi dopọ to wẹndagbe mẹ ga. ²³Enẹwutu ewọ wẹ yẹn lẹn nado dohlan mì to dinvie, whenuena yẹn mọ le é na yín na mi do. ²⁴Ṣigba yẹn sọ dotudo Jesu Oklunọ go dọ, yenlọsu ga na wá to azánvi helẹ mẹ. ²⁵Yẹn sọ lẹn dọ é bọawú na yẹn ni do Epafloditu, mẹmẹsunnu ṣie hlan mì, ogbé ṣie to azón mẹ, awhàngbé ṣie wẹ ga, podọ wẹndagun mìtọn, he to devizénwà hlan mi to mado ṣie mẹ. ²⁶Na ayiha etọn dòn do mì omẹ popo go, é sọ gọ́ na awúbla, na mìwlẹ sè dọ é ko jẹawutu. ²⁷Nugbo wẹ é ko jẹawutu kaka jẹ kudònu; ṣigba Jiwheyẹwhe ko wàlẹblanu nẹ; é ma sọ yin na ewọ dopokẹdẹ gba, ṣigba na yẹnlọsu ga, na yẹn nikã tindo awúbla do awúbla ji. ²⁸Enẹwutu wẹ yẹn do yí ayajijẹ susu do do e hlan mì dọ, whenuena mì mọ ẹn, na mì nido jaya, podọ na awúbla ṣie nido dèpo vude. ²⁹Enewutu mì yí ayajijẹ susu do yí i to Oklunọ mẹ; na mì ni sọ nọ na yeyi omẹ mọhunkọ tọn lẹ: ³⁰Na azón Klisti tọn wutu wẹ é do dòn sepò kudonu, bo ma sọ hò ogbẹ ede tọn pòn, nado gódo azọ̀n wapò mìtọn go hlan yẹn dali.

¹TO popolẹpo mẹ, mẹmẹsunnu ṣie emi, mì nọ to ayajẹ to Oklunọ mẹ. E ma yín budonu na mi nado wlanwe onú dopolọ lẹ tọn hlan mì gba, ṣigba jijọho wẹ é yín na mìwlẹ. ²Mì nọ payi do avún lẹ, mì nọ payi do azón ylankan wàtọ lẹ, mì sọ nọ payi do owhẹnọ lẹ go. ³Na mìwlẹ wẹ owhegbo he to Jiwheyẹwhe sèn to gbigbọ mẹ, bo sọ to ayajẹ to Klisti. Jesu mẹ, mí ma sọ tindo tudido de to agbasalan mẹ gba. ⁴Humọ yẹn do tindo tudido to agbasalan mẹ ga. Eyím mẹdepope lẹn dọ é tindo fie é na dotu to agbasalan mẹ te, ṣie wẹ hú: ⁵mẹhe yè gbowhẹna to azán sinatòntọ gbè, sọn adò Islaeli tọn mẹ, sọn whẹndo Bẹnjamini tọn mẹ, Heblu sọn Heblu lẹ me, gbọn osén tọn dali, Falesi wẹ yẹn. ⁶Gbọn vivẹnu tọn dali, yẹn dohomẹkẹn agùn; gbọn dódó he tin to osẹ́n mẹ tọn dali, matinwhègbledo. ⁷Ṣigba onú he yín alẹ hlan mi lẹ, ehelẹ wẹ yẹn ko hia do nugúgú mẹ na Klisti. ⁸Mowẹ nugbo, yẹn ko lẹn onú lẹpo do nugúgú na whanpẹ oyọnẹn Klisti Jesu Oklunọ ṣie tọn; na mehe yẹn to oya gúgú onú lepo tọn ji, yen sọ hia yé di omí, na yẹn nido duale Klisti tọn, ⁹na yè nido mọ mi to ewọ mẹ, to mado dódó yenlọsu ton de mẹ, he yín osén tọn, adavo ehe gbọn yise Klisti tọn mẹ, dódó he yín Jiwheyẹwhe tọn gbọn yise dali: ¹⁰na yẹn nido yón ẹn po huhlọn fọ́nsọnku etọn tọn po, podọ kọndopọ oya etọn tọn, whenuena yẹn kọnawu dopọ do okú etọn mẹ; ¹¹eyín gbọn alọ depope mẹ yẹn nido jẹ fọ́nsọnku mẹhe kú lẹ tọn mẹ. ¹²E ma yíndọ yẹn tlẹ ko jẹ finẹ wẹ gba, kavi ko pégan gba: ṣigba yẹn to modo nẹ ja to godo; eyín alọ ṣie sọgan jẹ ehe wutu yè hẹn ogo e gbọn Klisti Jesu dali ga. ¹³Mẹmẹsunnu emi, yen ma hia dè di mẹhe alọ etọn ka jẹ e go gba: ṣigba onú dopo he wẹ yẹn to wiwà, yẹn to jiwọn onú hẹ tin to godo lẹ go, bo so to alọ dlẹn do onú he tin to nukọn lẹ, ¹⁴yẹn to whinwhlẹndo nado jẹ fie ohia lọ te hlan ale oylọ daho Jiwheyẹwhe tọn to Klisti Jesu me. ¹⁵Enẹwutu, mí omẹ sọha he basi mẹhe pegan lẹ, mì gbọ mí ni nọ tunnukun e go do mọ; eyín mìwlẹ sọ gbọn ali devo ji do to nukuntun onú depope go, Jiwheyẹwhe na dè ehe lọ hia mì ga. ¹⁶Ṣigba fie mí ko jẹ he, mì gbọ mí ni to zọnlinzin gbọn ojlé dopolọ mẹ, mì gbọ mí ni nọ tunnukun onú dopolọ go.

¹⁷Mẹmẹsunnu emi, mì yín mehodotọ ṣie, bo sọ nọ do ayi yé he to zonlinzin do mọ lẹ go ga, yèdọ dile mìwlẹ yín ohia dè na mì do. ¹⁸(Na omẹ susu wẹ to zọnlinzin, gbọn mehetọn dali yẹn ko nọ dọ na mì whẹ̃whẹ̀, yèdọ bọ yẹn sọ to avivi le yẹn to didọ na mì to dinvie, dọ kèntọ satin Klisti tọn tọn wẹ yé. ¹⁹Godomẹ mẹhetọn yín viva, hoto mehetọn yín yẹwhe yetọn, gigo mẹhetọn tin to winyan yetọn mẹ, mẹhe nọ to nukuntun onú aihọn mẹ tọn lẹ go.) ²⁰Na owalọ mítọn tin to olọn mẹ, sọn fie mìwlẹ ga to nukundo Whlẹngantọ, Jesu Klisti Oklunọ: ²¹mẹhe na do agbasa huwhẹ mítọn tọn doyòyò, na yè nido basi i di agbasa gigo etọn tọn, kẹdẹdi huhlọnzọ́n he é do tin sọgan yèdọ nado gbawhàn onú lẹpo tọn hlan ede.

¹ENẸWUTU mì mẹmẹsunnu ṣie yiwanna, he yè to dindin nádo mọ talala, ayajijẹ ṣie po ojegbakun ṣie po, mì nọte gligli to Oklunọ mẹ, mì mẹyiwanna ṣie emi.

²Yẹn to vẹ́vẹ́ na Euodia, yẹn sọ to vèvè na Sintiki, na yé ni tin to homẹ dopolọ mẹ to Oklunọ mẹ ³Yẹn sọ to vèvè na we ga, azọnwàhẹmẹtọ ṣie nugbonọ, gọalọna yọnnu he to azọ̀n wà hẹ mi dopọ to wẹndagbe mẹ lẹ, po Klementipo, po azònwàhẹmẹtọ devo lẹ po, oyín mẹhetọn tin to owé ogbẹ tọn mẹ.

⁴Mì nọ jaya to Oklunọ mẹ whepoponu: yẹn sọ vò dọ, Mì jaya. ⁵Mì gbọ homẹmimiọn mìtọn ni zùn yinyọnẹn hlan omẹ popo. Oklunọ to sisẹpó. ⁶Mì jẹtukla nudepope tọn blo; ṣigba to odè mẹ to ovè mẹ po pẹdido po mẹ, mì nọ yí kanbiọ mìton hia Jiwheyẹwhe to onú popo mẹ. ⁷Jijọho Jiwheyẹwhe tọn he hú nuyọnen lẹpo na whlá ayiha mìtọn po linlẹn mìtọn lẹ po Klisti Jesu mẹ.

⁸To popolẹpo mẹ, mì mẹmẹsunnu emi nudepopo he yín nugbo, nudepope he yín yẹyi, nudepope he yín jijlọ, nudepope he yín wiwé, nudepope he yín owanyi, nudepope he do wẹndagbe; eyín jijọdagbe de tin, eyín pipa de tin, mì nọ yi onú helẹ lẹnpọn. ⁹Onú he mì ko plọn, bo ko sọ yí, ehe mì ko sè, bo ko sọ mọ to dẽ, mì nọ basi yé: Jiwheyẹwhe jijọho tọn na nò hẹ mì.

¹⁰Ṣigba yẹn sọ jaya talala to Oklunọ mẹ, dọ, to dinvie mìwlẹ ko fọ́n linlẹn na mi; ehe mẹ mì dowe te nugbonugbonu, ṣigba whenu fé do mì. ¹¹E ma yín dọ yẹn to didọ to ohẹn tọn mẹ gba: na yẹn ko plón dọ oten depope mẹ yẹn te, ma gbọjẹ to e mẹ. ¹²Yẹn yón le yè nọ zín mededaì do, yẹn sọ yon le yè nọ sudeji do: to ofi popo, podọ to onú popo me wẹ yè plòn mi nado dù gọhò, podọ nado nọnọ huve, nado sudeji, podọ nado jiya ohen jijẹ tọn. ¹³Yẹn sọgan wà onú popo gbọn Klisti he to huhlọnna mi me ¹⁴Ṣigba mì wànu talala dọ mì basi máhetọ he mi to nukunbibia ṣie mẹ. ¹⁵Be mì Filippinu lẹ ni yọnẹn ga dọ, to whẹ́whẹ́whenu wẹndagbe tọn, whenuena yẹn yì sọn Makedonia, agùn he basi máhẹtọ hẹ mi gbon nina po yíyí po dali de ma tin, adavo mìwlẹ kẹde. ¹⁶Na mìwlẹ do omẹ hlan mi yèdọ to Tẹsalonika whladopo, podọ to whlawetọ ga hlan matindo ṣie. ¹⁷Ẹ ma yín do yẹn jlo nunina wẹ gba; ṣigba yẹn jlo sinsẹn he sọgan lẹzun susu hlan jijọho mìtọn ¹⁸Ṣigba yẹn ko yí popo, bo sọ sude ji: alọ ṣie sọ gó, yen ko sọ yí onú he yè dohlan mi sọn mì de le sọn Epaflodi tu de, nunina he dèwan gblingblin, avọ̀ alọkẹyi, he basi homẹvivi hlan Jiwheyẹwhe talala. ¹⁹Ṣigba Jiwheyẹwhe ṣie na na onú matindo mìtọn lepo, jẹ adọkun etọn to gigo mẹ to Klisti Jesu me. ²⁰Jiwheyẹwhe Otọ́ mítọn tọn wẹ gigo ni yín kaka doidoi. Niṣẹ.

²¹Mì dọnúdo mẹwiwe lẹ dopodopo to Klisti Jesu mẹ. Mẹmẹsunnu he tin to dè lẹ dọnúdo mì. ²²Mẹwiwe lẹpo dọnúdo mì, humọ mẹhe basi Sesali whédo tọn lẹ.

²³Ojọmiọn Jesu Klisti Oklunọ mìtọn tọn ni nò hẹ mì mẹpopo, Niṣẹ.