Nahumi

¹AGBÀN Nineve tọn. Owé númimọ Nahumi Elkosinu lọ tọn tọn.

²OKLUNỌ Jiwheyẹwhe awuwhànnọ de wẹ, bo sọ nọ yí ahọsu; OKLUNỌ nọ yíahọsu bo sọ tin gọ́ na homẹgble; OKLUNỌ yí ahọsu to meglatọ etọn lẹ go, podọ ewọ sọ pò homẹgble dote na kẹ̀ntọ etọn lẹ. ³Awuwhlenọ wẹ OKLUNỌ nado sadi, bo sọ klo to huhlọn mẹ, bo ma na whlẹn whẹylantọ dai to alọ depope mẹ gba: OKLUNỌ tindo aliho etọn to jẹhọnahizi mẹ podọ tọ jehọnsinsinyẹn mẹ, podọ okọgudu afọ etọn lẹ tọn wẹ aslọ lẹ ⁴E wọhẹ ohù, bo sọ hẹn ẹn hú, bo sọ hẹn otọ̀ lepo zùn húhú: Baṣani wlo, podọ Kalmẹli, ovovó ilẹbalọni tọn yọ́ ⁵Osó lẹ sisọ na ewọ tọn, okọta lẹ sọ yọ́: Yè zé aigba dlanga to nukọn etọn, mọwẹ, aihọn, po ehe nọnọ̀ e mẹ lẹpo po. ⁶Mẹnu wẹ sọgan nọte to homẹgble etọn nukọn? podọ menu wẹ sọ sọgan nọ̀ ozògbe adi etọn tọn mẹ? Yè kọ̀n homẹwlu etọn jẹgbonu taidi miyọn, podọ yè sọ gbà osé lẹ gbọn ewọ dali. ⁷Dagbenọ wẹ OKLUNỌ, figángán de to azán tukla tọn gbè; podọ ewọ sọ yọn yé he yí tudido yetọn do ewọ mẹ lẹ. ⁸Ṣigba sìngigọ gbàgbò de wẹ ewọ na yí do basi opodo otẹn etọn tọn de, bo sọ domọ́na kẹntọ etọn lẹ biọ zinvlu mẹ. ⁹Etẹ́ mìwlẹ pipajlẹ do OKLUNỌ go? ewọ na basi opòdo gigọ́ de: nukunbia ma na fọ́n tite whlawetọ gba. ¹⁰Na le yé tlẹ tin taidi owun kaṣa lẹ sọ, bo sọ yín yínylọn di e yín to nunùnú yetọn mẹ, yé na yín vivàsúdo di núyọ húhú. ¹¹Mẹde jẹgbonu yì sọn hiẹ mẹ finẹ he papajlẹ oylan do OKLUNỌ go, hónamẹtọ mẹylankan de. ¹²Le wẹ OKLUNỌ dọ: Le yé tlẹ tin to huhlọn gigọ mẹ sọ, bo sọ sù domọ, yèdọ mọwẹ yé na yínsinsán liai do, ewọ bo na sọ ju yì. Le yẹn tlẹ ko hẹnnukunbia we sọ, yẹn ma na sọ hẹnnukunbia we ba gba. ¹³Podọ dinvie wẹ yẹn na wẹ́n glepọnú etọn sẹ́ sọn hiẹ mẹ, bo sọ tlu ogàn towe lẹ doawe ¹⁴Podọ OKLUNỌ ko na gbédide gbọn hiẹ tọn dali, dọ de sọn oyín towe mẹ yín dido ba blo: yẹn na sán bosiọ pipa lọ po boṣio kinkòn lọ po sẹ́ sọn ohọ́ yẹwhe towe lẹ tọn mẹ; yẹn na basi yọdò towe; na tapònọ wẹ hiẹ. ¹⁵Pọ́n, afọ ewọ he hẹn owẹ́n dagbe wá tọn to osó lẹ ji, he to jijọho lá! hiẹ Juda E, Yìn hùnwhẹ towe lẹ, yí padido towe lẹ basi: na omẹ ylankan lọ ma na sọ gbọn hiẹ mẹ luntón gbède ba; ewọ yín sinsán sẹ́ gbidigbidi.

¹YÈ hẹn ewọ he nọ hẹngbà hanyanhanyan hẹji wá nukunmẹ towe nukọn: pọ́n awhanfunnú go, to aliho lọ họ́, hẹn adaja towe sinyẹn, yí hlọnhlọn do hẹn huhlọn towe gla. ²Na OKLUNỌ sọ vọ́ gigodaho Jakob tọn hẹnwá, di gigodaho Islaeli tọn: na hẹnjẹvọ́nọ lẹ ko hẹn yé jevọ́ pó, bo sọ gble alà vẹ̃ntin yetọn lẹ tọn. ³Yè hẹn awọyinú omẹ hlọnhlọnnọ etọn lẹ tọn zùn bibia, omẹ tudotọ lẹ tin avọ̀vẹṣẹṣẹ mẹ: kẹkẹ lẹ tin po miyọn gànwiwle tọn po to azán awu wle etọn tọn gbè, podọ atin fili lẹ wẹ yè sọ yí budaho do whan ⁴Kẹkẹ lẹ to adanjẹ to alihogbo lẹ ji, yé to gòho yénọzo to aliho gbigblo lẹ mẹ; awusọhia yétọn tin taidi ozòwhán lẹ, yé to wezundo taidi abi lẹ. ⁵Ewọ flin mẹgángán etọn lẹ; yé to ahlida to ali yetọn ji; yé yawu jẹ adó etọn go, yè sọ wleawuna osòhọ̀ lọ ⁶Yè hùn họngbo otọ̀ lẹ tọn, yè bo sọ hẹn ohònmẹ lọ tún ⁷Podọ yè hẹn ẹn zùn asẹ; omẹ́nọ wẹ ewọ, yè bẹ́ ewọ yì, deviyọnnu etọn lẹ sọ to dido e di po ogbè owhle lẹ tọn po, he to akọ́nhò to ayiha yetọn lẹ ji ⁸Ṣigba Nineve ko tin sọn azán he gbè é ko tin taidi otandò osìn tọn de: gãnṣo yé họ̀nyì; Ṣite, ṣite, wẹ yé didọ; ṣigba mẹde ma hẹn ye nado lẹ́ gba ⁹Mì bẹ́ ogblannú fataka tọn, bẹ́ ogblannú sika tọn: na otèpò agbánhọ̀ tọn de ma tin finẹ gba, gigo sọn aṣọvànú whanpẹnọ lẹpo mẹ ¹⁰Ovọ́tọ wẹ ewọ, bo sọ voto, bo sọ gbọ̀gbé: ayiha bo sọ yọ́, kligonu lẹ sọ to hihò dopọ, podọ apọ́ sọ tin to adaja lẹpo mẹ, podọ yè sọ hẹn nukunmẹ yé mẹpó tọn zùn yinylọn. ¹¹Fie wẹ odò kinnikinni lẹ lọ tọn te, po dùdùtẹn kinnivù lẹ tọn po, fie kinnikinni lọ yèdọ kinnikinni hóhó lọ nọ zinzọnlin te, ovú kinnikinni lọ tọn, bọ mẹde ma hẹn yé savo? ¹²Kinnikinni lọ dọntlẹn pékọ na ovú etọn lẹ, bo sọ slokọnahù na kinnisi etọn lẹ, bo sọ yí amánànú do gọ́ aigbaslo etọn lẹ, podọ odò etọn lẹ po núdùdùsinsinyẹn po. ¹³Dayi e go, yẹn tin agọ̀ do ogo we, wẹ OKLUNỌ awhànpa lẹ tọn dọ, podọ yẹn na mẹ̀ kẹkẹ etọn lẹ to azọ̀ mẹ, podọ ohi na sọ và kinnivú towe lẹ súdo: podọ yẹn na sọ sán amánànú towe sẹ́ son aigba lọ mẹ, podọ yè ma na sọ sè ogbè mẹdagun towe lẹ tọn gbède ba.

¹DINDỌN hlan tòdaho ohùnnọ lẹ lé tin gó na lalo lẹ po huhlọnnú po; amánànú ma fọ́nyì gba. ²Hùnhlungbè mẹhòbatọn, po hùnhlungbè nudidọ kẹkẹfọ tọn tọn po: po osọ́ wèdútọ lẹ po, po kẹkẹ linlọ́ntọ lẹ po; ³Osọ́nọ he aṣẹna, po ohi abidètọ lọ po, po owhán sisẹ́ lọ po; po agùndaho alántọsiọ lẹ tọn de po, po okiti oṣiọ lẹ tọn daho de po: podọ opòdo de ma tin finẹ na mẹkúkú lẹ; yé to ahlida jẹ mẹkúkú yetọn lẹ ji: ⁴na ogégé ogàlilọ gàlọtọ mẹdèunjọ dagbedagbe lọ tọn lẹ tọn tọn wutu, yọnnudaho kẹnunsi lẹ tọn, he sà akọta lẹ gbọn ogàlilọ etọn lẹ mẹ, po whédo lẹ po gbọn kẹnunsinú etọn lẹ mẹ. ⁵Dayi e go, Yẹn tin agọ́ do ogo we wẹ OKLUNỌ awhànpa lẹ tọn dọ, podọ yẹn na sọ hùn odowu towe lẹ to nukunmẹ towe nukọn; Yẹn bo na sọ do omẹ́ towe hia akọta lẹ, podọ owinyan towe hlan ahọludu lẹ. ⁶Podọ yẹn na dlan osùnú odiho do hiẹ ji, bo sọ hẹn we flu, bo sọ zé we do di avlẹdanú de. ⁷E na sọ wá jọ, dọ yé he to pinpọn we lẹpo na họ̀nyì sọn de we, bo to didọmọ, Yè hẹn Nineve zùn ogbọ̀gbe: mẹnu wẹ na doavihànna we? fie yẹn na din homẹmiọnnamẹtọ sọn na we? ⁸Bé hiẹ tin pọntehu No-amọni wẹ, he yè dotẹnna to otọ̀ lẹ ṣẹnṣẹn, he tindo osìn lọ lédo e pó; osòhọ̀ mẹhetọn ohù yìn, podọ adó etọn tin sọn osìn lẹ mẹ? ⁹Huhlọn etọn lẹ wẹ Etiopia po Egipti po, podọ madodògbó wẹ; Puti po Lubimi po wẹ alọgọtọ towe lẹ. ¹⁰Gánso wẹ yè bẹ́ ewọ yì, ewọ yì biọ mẹmẹglọ mẹ: ovi yọ̀pọ ewọ tọn lẹ ga wẹ yè hẹngbà hanyanhanyan to aga alihogbo lẹpo tọn ji: yé sọ dlan ovò lẹ na omẹ yẹyinọ etọn, podọ omẹ gbògbo etọn lẹpo wẹ yè sín do ogàn mẹ. ¹¹Hiẹ ga na yín núnùmúnọ, yè na whla wẹ; hiẹ na din gingántẹn do figángán go na kẹ̀ntọ lọ tọn wutu. ¹²Figángán towe lẹpo na tin taidi ovotin lẹ po sinsẹ́ntintan ovò tọn lẹ po: eyín yé yín whinwhàn, yé flẹ biọ onù dùdùtọ tọn mẹ. ¹³Dayi e go, omẹ towe lẹ to gblagbla hiẹ tọn mẹ yọnnusi lẹ wẹ; họngbo aigba towe tọn lẹ yín hùnhùn kẹ hlan kẹ̀ntọ lẹ; miyọn ko và patin towe lẹ sudo. ¹⁴Híẹ ni dọ̀n osìn dotepọ́n oglọndo lọ, nahuhlọn figángán towe lẹ: yì biọ okò mẹ, bo yàn obọ́, hẹn blikidonú go. ¹⁵Finẹ wẹ miyọn na và we súdo te; ohi lọ na sọ sán we sẹ́, é na và we súdo taidi obọ̀: hẹn dewe zùn susu di owẹ̀n. ¹⁶Hiẹ ko hẹn ajọtọ towe lẹ jideji hugan sunwhlẹvu olọn tọn lẹ: obọ̀ lọ dlẹn ede, bo zlọn yì. ¹⁷Ojẹgbakunnọ towe lẹ tin di owẹ́n lẹ, podọ wékantọ towe lẹ di sìsawẹ́n agbonọpatin lẹ tọn, he dosla to adó lẹ mẹ to avivọzángbè, ṣigba whenuena owhè tite yé họ̀nyì, podọ yé ma sọ yón otẹn, yetọn fie yé te. ¹⁸Hiẹ ahọlu Asilia tọn E, lẹngbọhótọ towe lẹ to amlọngọsa: mẹgángán towe lẹ tin to blẹo: yè vúnvún ome towe lẹ to osé lẹ ji, bọ mẹde ma tin nado ṣinyan yé. ¹⁹Unbọ̀do ma tin to awugble towe mẹ; yinylan wẹ alán towe: yé he sè linlin towe lẹ hòpẹ́ do ta na we; na mẹnu ji wẹ yinylan towe ma ko ju gbọn to whepoponu.