Malku

¹ṢAUNSAUN whenu wẹndagbe Jesu Klisti tọn, Ovi Jiwheyẹwhe tọn;

⁹E sọ wá jọ, to azán nẹlẹ mẹ, wẹ Jesu tọ́n sọn Nazalẹti Galili tọn wá, yè so baptizi i sọn Johanu de to Jọdani mẹ. ¹⁰Afọdoponeji to tintón sọn osìn mẹ ja, é mọ olọn zé doawe, podọ, Gbigbọ di apoe jóte do e ji: ¹¹Ogbè de sọn olọn lẹ mẹ wá dọmọ, Hiẹ wẹ Ovi yiwanna ṣie towe mẹ homẹ ṣie hùn do talala.

¹²Afọdoponẹji Gbigbọ sọ gọkó nẹ̃ jegbonu biọ zùngbo mẹ. ¹³E sọ tin to finẹ to zùngbo me azá kande, yè whle e pọ́n sọn Satani de: é sọ nò hẹ okanlin lẹ; angẹli lẹ sọ to devizónwà hlan en.

¹⁴Dinvie enẹgodo bọ yè dè Johanu jo, Jesu yì Galili bo to yẹwheho wẹndagbe Jiwheyẹwhe tọn tọn dọ, ¹⁵dọmọ, Yè hẹn ojlẹ lọ sò, podọ ahọludu Jiwheyẹwhe tọn sẹpọ́: mí lẹnvọjọ, bo yí wẹndagbe se.

¹⁶Le é to zọnlinzin to ohù Galili tọn tó, é mọ Simoni po Andle nọvisunnu etọn po, to odọ̀ dlan do ohù mẹ: na whehùtọ wẹ ye. ¹⁷Jesu sọ dọ hlan yé, dọmọ, Mì to hihodo mi, yẹn na hẹn mì zùn whehùtọ gbẹtọ lẹ tọn, ¹⁸Afodoponẹji yé jo odò yetọn lẹ dai, bo to hihodo e. ¹⁹Le é zinzọnlin yì nukọn pẹvide, é mọ Jakobu ovisunnu Zẹbedé ton po Johanu nọvisunnu etọn po, yé tin to vàtìẹ lọ mẹ, bo to odò yetọn tò. ²⁰Afọdoponẹji é ylọ yé: yé sọ jo otọ́ yetọn Zẹbedé dai to vàtlẹ lọ mẹ po azónwàtọ lẹ po, bo sọ hodo e.

²¹Ye sọ biọ Kapẹlnaumi; to afọdoponẹji to gbọjẹzángbè é biọ sinagọgu mẹ, bo to omẹ plón. ²²Yé sọ yin awujinọ do núplónmẹ etọn go: na é plón yé di mẹhe tindo asẹ, é ma di wekantọ lẹ gba. ²³To afọdoponẹji dawe de sọ tin to sinagọgu yetọn mẹ, mẹhe tindo gbigbọ mawe de: é dawhá léle, ²⁴dọmọ, Gbọ sọn mí go abọẹ, etẹwẹ mí tindo nado wà po hiẹ po, hiẹ Jesu Nazalẹti tọn? Hiẹ wá nado hù mí súdo wẹ? Yẹn yón we mẹhe hiẹ yín, Omẹ Wiwe Jiwheyẹwhe tọn. ²⁵Jesu wọhẹ ẹ, dọmọ Nabọẹ, bo tón sọn ewọ mẹ. ²⁶Gbigbọ mawe tintlẹn ẹn, bo sọ yí ogbè lelé de do dawhá sọ tón sọn ewọ me. ²⁷Avò sọ vò yé, somọ bọ yé to kinkanbiọ yénọzo dọmọ, Etẹwẹ ehe? Núpinplọ́n yọ́yọ́ té wẹ ehe Na asẹ daho wẹ é yí do degbè yèdọ na gbigbọ mawe lẹ, bọ yé sọ yí i se. ²⁸Linlin etọn di pé otò he lédo Galili; lẹpo mẹ.

²⁹Afọdoponẹji whenuena yé tón sọn sinagogu me, yé wá biọ owhe Simoni po Andle po tọn gbè yé po Jakobu pọ po Johanu po. ³⁰Dinvie onọ asi Simoni tọn tọn mlọnai bo to azọ̀n ova tọn jẹ; afọdoponẹji yé dọhó etọn nẹ̃. ³¹E sọ wá bo hẹn alọ nẹ̃, bo zé e fọ́n; ova jo e do, é sọ to devizónwà hlan yé.

³²To tenudamẹ whenuena owhè yihò, yé hen azọntọ lẹpo po yé he yín aovinọ lẹ po wa e de. ³³Mẹhe to otò daho mẹ lẹpo sọ pli do hòntonu. ³⁴E sọ hẹnazọ̀ngbọna omẹ susu he tindo azọ̀n hunkọhunkọ, bo sọ yàn aovi susu jẹgbonu: é ma sọ dikena aovi lẹ nado dọhò, na yé yọ́n ẹn wutu.

³⁵E sọ fọ́n to afọnnu fliflimẹ whẹpo ai nado hón, bo tọ́njegbonu, yì, bọ sọ fọ́nyì biọ otẹn zunkan de mẹ, bo to dèho to finẹ. ³⁶Simọni po mẹhe tin to e de lẹ po sọ to hihodo e godo. ³⁷Yé mọ ẹn, bo dọ hlan ẹn, dọmọ, Gbẹtọ lepo wẹ to dindin we. ³⁸E sọ dọ hlan yé, dọmọ, Mì gbọ mí ni yì fidevo biọ otò he sẹpọ́ mẹ, na yẹn nido dọ yẹwheho to finẹ ga: na ehe wutu wẹ yẹn tón wá. ³⁹E sọ dọ yẹwheho to sinagogu yetọn lẹ mẹ lédo Galili lẹpo pé, bo sọ yàn aovi lẹ jẹgbonu.

⁴⁰Dawe potọnọ de wá e de to finẹ, é jẹklo nẹ, bo to vẹvẹ nẹ, bo tọ didọ hlan ẹn, dọmọ, Eyín hiẹ jlo, hiẹ sọgan hẹn mi zùn wiwe. ⁴¹Yíyí lẹblanu do whàn ẹn, é odlẹn alọ etọn jẹgbonu bo do e go, bo sọ dọ hlan ẹn, dọmọ, Yẹn jlo, hiẹ ni zùn wiwe. ⁴²Afọdoponeji opò klọnyì sọn e go, é sọ zùn wiwe, ⁴³E sọ yí nukunvinvan do dosẹ́n nẹ̃ afọdoponẹji é do e hlan; ⁴⁴Bo sọ dọ hlan ẹn dọ, Do ayi e gó, dọ hiẹ dọ nude na mẹde blo: ṣigba gbọn ali towe yì, bo do dewe hia hlan yẹwhenọ, bo na nunina na lèwe towe he Móse degbèna lẹ na okunnu de hlan yé. ⁴⁵Ṣigba ẹ tọn bo sọ sẹ̀ didọ ẹ pó, bo sọ to ohó lọ la pe, sọmọ bọ Jesu ma sọ sọgan biọ otò daho mẹ gbangba ba, é sọ nọte to gbonu to otẹn ozùn tọn le mẹ: yé sọ to wiwá e de sọn agbègbè lẹpo ji.

¹WHENUENA e sọ vó Kapẹlnaumi mẹ biọ to azán vude godo; linlinsọ di pé dọ é tin lo owhe gbè. ²Omẹ susu sọ plidopọ, sọmọ bọ ọtẹn ma tin nado yí yé depope, e ma tin sepó hòntonu: é sọ dọ yẹwheho ohó lọ tọn hlan yè, ³Yé sọ wá e de, bo hẹn mẹhe to awukuzọ̀njẹ de wá, mẹhe na gbẹtọ ẹnẹ zé. ⁴Whenuena ye ma sọgan sẹpọ́ ẹ na gbẹtọ susu wutu, yé hùn ozà to fie é te: whenuena yé gbà ẹn, yé zlọn adózan he ji mẹhe to awukuzọ̀njẹ lọ mlọnai do dai. ⁵Jesu mimọ yise yetọn, dọ hlan awukuzọnjẹtọ lọ, dọmọ, Ovisunnu, yè jo ylando towe na we. ⁶Ṣigba omẹ delẹ to wekantọ lẹ mẹ sinai to finẹ, bo to linlẹn to ayiha yetọn mẹ dọ, ⁷Etẹwutu wẹ dawe he to nùzan? mẹnu wẹ sọgan jo ylando na omẹ, adavo Jiwheyẹwhe kẹdẹ? ⁸Afọdoponẹji Jesu mimọhlan to gbigbọ etọn mẹ dọ, yé to onú he len tó ayiha yéde tọn mẹ, é dọ hlan yé, dọ, Etẹwutu wẹ mìwlẹ tọ onú he lẹn to ayiha mìtọn mẹ? ⁹Etẹ wẹ bọawú, nado dọ hlan awukuzọnjẹtọ lọ, dọ, Yè jo ylando towe na we; kavi nado dọ, Fọ́n bo zé adozan towe bo zinzọnlin? ¹⁰Ṣigba na mìwlẹ nido yọnẹn dọ. Ovi gbẹtọ tọn tindo asẹ to aihọn ji nado jo ylando na omẹ, (é dọ hlan awukuzọnjẹtọ lọ, dọ,) ¹¹yẹn dọ hlan we, Fọ́n, zé adózan towe, bo yì owhé towe gbè. ¹²Afọdoponẹji é fọ́n, bo zé adózan etọn, bo sọ tón yì to yé omẹ pó nukunmẹ; sọmọ bọ awuji yé omẹ pó, yé pagigona Jiwheyẹwhe dọ, Mìwlẹ ma mọ onú he hunko gbède.

¹³E sọ vò tón yì ohùtó, gbẹtọ lẹpo sọ wá e de, é sọ plón yé. ¹⁴Le é juwajei, e mọ Levi, ovisunnu Alfe tọn, é sinai tọ denu, é sọ dọ hlan ẹn, dọ, Hodo mi, Ẹ sọ fọ́n bo hodọ e, ¹⁵E sọ wá jọ le ẹ jagla to núdùdù kòn, to owhé etọn gbè, tòkuẹsinyantọ susu po ylandonọ lẹ po jagla to Jesu de po nuplọntọ etọn lẹ po: na yé sù talala, yé sọ hodọ é. ¹⁶Wekantọ lẹ po Falesi lẹ po whenuena yé mọ ẹn tọ nùdù hẹ tòkuẹsinyantọ lẹ pọ ylandọ nọ lẹ po, dọ hlan nuplontọ etọn lẹ, dọ, Nawẹ é yín é do to dùdù bo sọ to nùnù hẹ tòkuẹsinyantọ lẹ po ylandonọ lẹ po? ¹⁷Whenuena Jesu sè, é dọ hlan yé, dọ, Mehe to gángan lẹ ma din bokọnọ gba, adavo mẹhe yín awutuzònnọ lẹ: yẹn ma wá nado ylọ dódónọ lẹ gba, adavo ylandonọ lẹ do vọjọ kòn.

¹⁸Podọ nuplọntọ Johanu tọn lẹ, pó Falẹsi lẹ tọn lẹ po, nọ blanù: yé sọ wá, bo dọ hlan ẹn, dọ, Etẹwutu wẹ nuplọntọ Johanu tọn lẹ, po Falesi lẹ tọn lẹ po pọ to nùbla, ṣigba nuplọntọ towe lẹ ma nọ blanù? ¹⁹Jesu sọ; dọ hlan yé, dọ, Be ovi he to abò asiyọ́yọ́ tọn mẹ lẹ sọgan blanù dẹn sọ le asisunọ tin to yé de? yé ma sọgan blanù whenuena asisunọ tin to yé de gba. ²⁰Ṣigba azán lẹ ja, whenuena yè na yí asisunọ sọn yé de, whenẹnu wẹ yé na blanù to azán nẹlẹ mẹ. ²¹Mẹde ma nọ tọ̀ avọ̀nu yọ́yọ́ do àwù hóhó gọ: enẹ he yè do súvà nẹ̃ nikã dè sọn ẹ go, yọ́yọ́ sọn hóhó mẹ, yè na sọ hẹn tintlẹn de ylanhú. ²²Mẹde ma nọ yí ovẹ́n yọ́yọ́ do ogò hóhó mẹ: ovẹ̃n nikà la ogò lẹ ovẹ́n nasọ dòn, po ogó le po: ṣigba ovẹ̃n yọ́yọ́ wẹ yè nọ yí do ogo yoyó lẹ mẹ.

²³E sọ wá jọ le é juwajéi to oglè gbadó tọn ṣẹnṣẹn to gbọjẹzángbè, wẹ nuplọntọ etọn lẹ sọ ṣẹ̀ gbadófé yà le yé to yìyì. ²⁴Falesi lẹ sọ dọ hlan ẹn, dọ, Pọ́n, etẹwutu wẹ yé to onu he ma jẹ wà to gbọjẹzángbè? ²⁵E sọ dọ hlan yé, do, Be mìwlẹ ma ko hia onú he Davidi wa, whenuena é gbọagba, bọ huvẹ to hùhù i po mẹhe po e po te lẹ po? ²⁶Le é biọ ohò Jiwheyẹwhe tọn mẹ to azán Abiatali, yẹwhenọ daho tọn gbè, bo dù akla sọhia, he ma jẹ nado dù, adavo na yẹwhenọ lẹ, bo so na mẹhe po e po te lẹ ga? ²⁷E sọ dọ hlan ye, dọ, Yè da gbọjezán na gbẹtọ, yè ma da gbẹtọ na gbọjezán gba. ²⁸Mọ dọ Ovi gbẹtọ tọn wẹ Oklunọ yèdọ gbọjózán tọn.

¹E SỌ vó sinagọgu mẹ biọ: dawe de sọ tin to finẹ, he alọ etọn dopo kusẹ. ²Yé sọ to hihó ẹ, eyín é na hẹnazọ̀ngbọ nẹ̃ to gbọjẹzángbè; na yé nido slẹ ẹ. ³E sọ dọ hlan dawe he alọ etọn kusẹ lọ, dọ, Site to ṣẹnṣẹn. ⁴E sọ dọ hlan yé, dọ, Be é jẹ nado wà dagbe to gbọjẹzángbè, kavi nado wà oylan? nado whlẹn ogbè de, kavi nado hù i súdo? Ṣigba yé nabọẹ. ⁵Whenuena é pọ́n yé lédo po adi po yínyín homẹgblenọ na sinsinyẹn ayiha yetọn tọn wutu, é dọ hlan dawe lọ, dọ, Dlẹn alọ towe. E sọ dlẹn ẹn: alọ etọn sọ jẹ gángán di awetọ. ⁶Falesi lẹ sọ tọ́njegbonu to afọdoponẹji nado lẹnnu hẹ Helodianu lẹ do e go, le yé na wà bo nado hù i.

⁷Ṣigba Jesu jagò po nuplọntọ etọn lẹ po yì ohù tó: agùndaho de sọn Galili po Judé po hodo e, ⁸Podọ sọn Jelusalẹm, sọn Idumia, podọ sọn Jọdani godo, podọ mẹhe tin lédo Tile po Sidọni po, agundaho de, sisè onú daho he é wà lẹ wá e de. ⁹E sọ dọhó hlan nuplọntọ etọn lẹ, dọ ohún pẹvi de ni nọte nẹ na agùn gbẹtọ lẹ tọn wutu, na yé niká jántẹn ẹn. ¹⁰Na é hẹnazọ̀ngbọna gbẹtọ susu, sọmọ bọ yé mẹsọha he tindo azònylankan lẹ to yenọzo sisé jẹ e ji na yé nido do alọ e go. ¹¹Gbigbọ mawe lẹ, whedepopenu yé mọ ẹn, nọ jẹklo to nukọn etọn, bo nọ to awhádo dọ, Hiẹ wẹ Ovi Jiwheyẹwhe tọn. ¹²E sọ dosẹ́n na yé talala dọ yé do e hia blo.

¹³E sọ hẹ osó ji, bo to mẹhe é jlo lẹ ylọ dopodopo do ede de: yé sọ wá e de ¹⁴E sọ dè omẹ wiawe, na yé nido nò he ẹ, podọ é nido nọ do ye hlan yì nado dọ yẹwheho ¹⁵Podọ nado tindo ase nado nọ hẹnazòngbọ, podọ nado nọ yàn aovi lẹ jẹgbonu: ¹⁶Simọni mẹhe é dèyínkọ etọn dọ Pita, ¹⁷po Jakobu ovisunnu Zẹbedé tọn po po Johanu nọvisunnu Jakobu tọn po; é sọ dèyínkọ yetọn dọ Boanege, ehe nọ yín Ovisunnu osò tọn lẹ: ¹⁸Andlé, Filipi, Batelemi, Matiu, Tomasi, po Jakobu ovisunnu Alfe tọn po, Tade, po Simọni Kanani tọn po, ¹⁹po Juda Iskaliọti po mẹhe dè e hia.

¹⁹Yé sọ wá biọ owhé de gbè. ²⁰Agùndaho lẹ sọ vọ́ wá plidopọ, sọmọ bọ yé ma sọgan dù núdùdù ²¹Whenuena họ́ntọn etọn lẹ sè e, yé tọn yì nado wlé e, na ye ko dọ, dọ, Otamẹ etọn gble. ²²Podọ Wekantọ he jẹte sọn Jelusalẹm wá lẹ dọmọ, E tindo Beẹlzebuli; podọ gbọn ogán aovi lẹ tọn dali wẹ é to aovi lẹ yàn jegbonu te, ²³E sọ ylọ yé do ede de, bo sọ dọ hlan yé to oló me, dọmọ, Nawẹ Satani na sọgan yàn Satani jẹgbonu do? ²⁴Podọ eyín ahọludu de yín kinklan do ede go, ahọludu nẹ ma na sọgan nọte. ²⁵Podọ eyín owhé de yín kinklan do ede go, owhé lọ ma na sọgan nọte. ²⁶Podọ eyín Satani ko fọ́n do ede ji, bo sọ yín kinklan, é ma na sọgan nọte, ṣigba é na pònu. ²⁷Mẹde ma sọgan biọ owhé sunnu adantọ tọn gbè, bo bó agban etọn, adavo é bla sunnu adantọ lọ whé; whenẹnu wẹ é na bé agbàn to owhé etọn gbè. ²⁸Nugbo yẹn dọ hlan mì, Ylando yetọn lẹpo wẹ yè na jona ovi gbẹtọ tọn lẹ, podọ nùzinzan lẹ ehe mẹ yé na nọ zánnù te: ²⁹Ṣigba mẹdepope he zánnù do Gbigbọ Wiwe go, ma na tindo jona gbède, ṣigba e yín whẹylantọ ylando madopodo de tọn: ³⁰Na yé do, E tindo gbigbọ mawe wutu.

³¹Podọ mẹmẹsunnu etọn lẹ po onọ etọn po wá finẹ, bo nọte to gbonu, bo dowẹn hlan ẹn, bo to yiylọ ẹ. ³²Agùndaho de sinai lédo e, yé dọ hlan ẹn, dọ, Pọ́n, onọ towe po mẹmẹsunnu towe lẹ po to dindin we to gbonu. ³³E sọ gblọnna yé, bo dọmọ, Mẹnu wẹ onọ ṣie, podọ mẹmẹsunnu ṣie lẹ? ³⁴Pinpọn lédo yé mẹhe sinai lédo e lẹ, é dọmọ, Pọ́n onọ ṣie po mẹmẹsunnu ṣie lẹ po! ³⁵Na mẹdepope he na wà ojlo Jiwheyẹwhe tọn, dopolọ wẹ mẹmẹsunnu ṣie, podọ mẹmẹyọnnu ṣie, podọ onọ ṣie.

¹B SỌ vó so do mepinplón kòn to ohùto: gbẹtọ susu sọ pli do e de, sọmọ bọ é biọ vàtlẹ de me, bo sinai to ohù mẹ; gbẹtọ lẹ sọ tin do age ji to ohùtó. ²E sọ plọn onú susu ye to oló lẹ mẹ, bo sọ dọ hlan ye to nuplonmẹ etọn mẹ, dọ, ³Mì tùntoai; Pon núdotọ de tón jei núdo gbé ⁴E sọ wá jọ, le é donú, okun dẽlẹ ílẹ jẹ alihotó, ohè aga tọn lẹ wá bo sinyan ẹn dù. ⁵Devo sọ flẹ́ jẹ aigba osé ton ji, fie é ma tindo okó susu te: afọdoponẹji é tónkun, na é ma tindo okó siso wutu: ⁶Podọ whenuena owhè wá aga, e fiọ; na e ma tindo adò wutu, é yó. ⁷Devo so flẹ́ jẹ owùn ṣẹnṣẹn, owùn sọ whén wá aga bo finyọn ẹn hù, é ma sọ sén sinsẹ́n de ⁸Devo lẹ sọ flẹ́ jẹ aigba dagbe ji, bo sén sinsẹ́n he whinwhẹn daga bo sù; é hẹn sinsén jẹgbonu wá, delẹ ogbàn donu ogbàn, delẹ kandeko donu kandeko, delẹ kanweko donu kanweko. ⁹E sọ dọmọ, Mẹhe tindo otọ́ nado se, ni se.

¹⁰Whenuena é pò ewọ ṣokẹdẹ, mẹhe tin lédo e lẹ po omẹ wiawe lẹ po kàn oló lo tọn biọ ẹ. ¹¹E sọ dọ hlan yé, dọ, Mì wẹ yè na hlan nado yón nudabla ahọludu Jiwheyẹwhe tọn, ṣigba hlan mẹhe tin to gbonu le, oló lẹ mẹ wẹ yè to onú lẹpo wà te: ¹²Dọ to mimọ mẹ yé nido mọ, bo ma tunwun; podọ to sisè mẹ yé nido sè, bo ma yọnẹn; na yé nikã diọ, na e nido yín jijona yé ¹³E sọ dọ hlan yé, dọ, Mì ma yón oló he? Nawẹ mìwlẹ na yón olo lẹpo do? ¹⁴Núdotọ do ohó lọ. ¹⁵Ehelẹ wẹ yé he to alihotó fie yè do ohó lọ do; podọ whenuena yé sè, Satani wá afọdoponẹji bo yí ohó he yè do do ayiha yetọn lẹ mẹ lọ sé. ¹⁶Podọ ehelẹ to alọpadopo lọ ji wẹ yé he yè do do osé yigba lẹ ji; mẹhe, whenuena yé sè ohó lọ, afọdoponẹji yí homẹhùnhùn do yí i; ¹⁷Ye ma tindo adò to yéde mẹ, ṣigba sinyẹnlin jẹ whenu vude; whenẹnu, whenuena nukunbibia, kavi homẹkẹn fọ́n na ohó lọ tọn wutu, afọdoponẹji yé dahli. ¹⁸Devo lẹ wẹ yé he yè do do owùn sẹn: ẹn; ehelẹ wẹ yé he ko sè ohó lọ, ¹⁹bọ tuklajẹ osã lọ tọn, po oklọ adọkun tọn po, po wantúntún onú devo lẹ tọn po bibiọ homẹ, finyọn ohó lọ hù, bo é sọ lẹ zùn madosinsénnọ. ²⁰Enẹlẹ wẹ yé he yè do do aigba dagbe ji; mẹhe hunkọ sè ohó lọ bo kẹalọyí i, bo sọ sén sinsẹ́n, delẹ ogbàn donu gbàn, delẹ kandeko donu kandeko, delẹ kanweko donu kanweko.

²¹E sọ dọ hlan yé, dọ, Be yè hẹn miyọngbán wá nado yín yíyí do ojlénu glọ, kavi do adózan glọ? nado yín ma yin yiyi do miyongbántin ji? ²²Na onú de ma whlá adavo dọ e do yín didéhìa; mọ núde ma tin to nuglọ, adavo dọ é do ton jẹ gbmgba. ²³Eyín mẹde tindo otọ́ nado sè, ni sè. ²⁴E sọ dọ hlan yé, dọ, Mì payi onú he mì to sisè go: ojlẹ́nu he mì do jlé, we yè na do jlẹ hlan mì: podọ mì wẹ yè na na húgan. ²⁵Na ewọ ne tindo, ewọ wẹ yè na na hlan: podo ewọ mẹhe ma tindo, sọn e si wẹ yè na yí yèdọ onú he é tindo lọ te.

²⁶E sọ dọmọ Mọ wẹ ahọludu Jiwheyẹwhe tọn te, taidi eyín omẹ de do okún do aigba ji; ²⁷Bo do sọ damlọn, bo fón to ozán po okle po, podọ okún lọ do tónkun, bo whén wá aga, ewọ ma yón nawẹ. ²⁸Na aigba nọ dè sinsẹ́n jo sọn ede mẹ; tintán apa, whenenu ogetin, whenenu ogbadó to ogetin mẹ ²⁹Ṣigba whenuena sinsén lọ yín bibia afọdoponẹji ewọ sọ yí agbogọdọẹ jẹgbonu do e mẹ, na ojijẹ wá wutu.

³⁰E sọ dọmọ, Nawe mí nasọ jlé ahọludu Jiwheyẹwhe tọn do? kavi oló té mẹ wẹ mí na dè e jegbonu te? ³¹E tin taidi okún mutaldi tọn de, ehe, whenuena yè dó e do aigba ji, le é yín whiwhe hú okún he tin do aigba ji lẹpo sọ, ³²Ṣigba whenuena yè dó e, é whén yì aga, bo sọ lezún kiklo hu omá lẹpo, bo sọ kè ala daho jẹgbonu; somọ bọ ohè aga tọn lẹ sọgan nọnò oyè etọn glọ.

³³Oló motọn hunkọ susu we é yí do to hódọ hlan ye, dole yé tin sọgan nado sè e do. ³⁴Podọ ewọ ma nọ dọhó hlan yé adavo to oló me: ṣigba é nọ detana onú lepo to nuglọ hlan nuplọntọ etọn le.

³⁵To gbèdoponẹ, whenuena tenu do, é dọ hlan yé, dọmọ, Mì gbọ mi ni juwayì awà awetọ ji. ³⁶Podọ jijo agùndaho lọ dai, yé yí i do yé de dole é te to vàtlẹ lọ mẹ. Vàtlẹ pẹvi delẹ ga sọ tin to e de. ³⁷Jẹhọn daho de sọ fọ́n, agbowhen sọ to hihò biọ vàtlẹ lọ mẹ, sọmọ bo vàtlẹ to gigọ dinvie. ³⁸Ewọ tin to awà he tò godo vàtlẹ lọ tọn, é to amlọndọ to kodonu ji: yé sọ fọ́n ẹn, bo dọ hlan en, dọ, Mẹplọntọ, hie ma họpọn dọ mí dòn gbn? ³⁹E sọ fọ́n bo wọhẹ jẹhọn, bo sọ dọ hlan ohù, dọ, Danido, nò gun. Jehọn lọ sọ dọalọ te, mimiọn daho de sọ tin fìnẹ; ⁴⁰E sọ dọ hlan yé, dọ, Etẹwutu wé mì yín butọnọ? Mì ma ko tindo yise wẹ? ⁴¹Obu di yé talala, yé sọ to didọ hlan yénọzo, dọ, Bé menu wẹ ehe, he yèdọ jẹhọn po ohù po tónusè nẹ̃?

¹YÉ sọ juwayì awà awetọ ohù tọn ji, to otò Gadalẹni lẹ tọn mẹ. ²Whenuena é tón sọn vatlẹ lọ mẹ jei, to afọdoponeji dawe he te po gbigbọ mawe de po tọ́n sọn oyòwhé lọ me pó e, ³Mẹhe tindo nọtẹn etọn to oyòwhé lẹ mẹ, bọ mẹde ma sọ sọgan bla ẹ, lala, po ogàn de po ma gba ⁴Na dọ whẹwhè wẹ yè nọ yi afọgàn po okògan po do bla ẹ, é nọ glin ogàn do awe, bo sọ nọ wén afọgàn gidigidi: mọ mẹde ma sọgan whiwhẹ nukun nẹ. ⁵To whepoponu to ozán po okle po é tin to oyowhe lẹ pódọ to osé lẹ ji, bo nọ to awhádo, bo so nọ yí zannu do to awugble na ede. ⁶Podọ whenuena é mọ Jesu to aganu, é họnwezun wá, bo litai nẹ, ⁷Podọ yíyí ogbè lelé de do dawha, e dọmọ, Etẹwẹ yẹn tindo nado wa hẹ we, Jesu, hiẹ Ovi Jiwheyẹwhe Gigogan tọn? yẹn do Jiwheyẹwhe we, dọ hiẹ doya na mi blo. ⁸Na é dọhlan en, dọ, Jẹgbonu wá, hiẹ gbigbọ mawe sọn dawe lọ mẹ ⁹E sọ kanbiọ ẹ dọ, Etẹ wẹ oyín towe? Ewọ sọ dọ hlan ẹn dọ, Legioni wẹ oyín ṣie, na mẹsusu wẹ mí. ¹⁰E sọ vè ẹ talala dọ, é yàn yé jegbonu sọn otò lọ mẹ blo. ¹¹Apó daho ohan susu tọn de sọ tin to finẹ, he to núdù sẹpọ́ osó dali. ¹²Yé sọ vò ẹ dọ, Do mí hlan ohàn lẹ mẹ, na mí ni biọ yé mẹ ¹³E sọ dikena yé. Gbigbọ mawe lẹ sọ tọ́njegbonu bo biọ ohàn lẹ mẹ: apó sọ hòzin bo họnwezun gbọn agbadò tó yì ohù mẹ (to osọha mẹ yé yì fò) yè sọ finyọn yé hù to ohù mẹ. ¹⁴Hànyìntọ lẹ sọ hòn yì bo dọ ẹ to otò daho mẹ, podọ to aigba lọ mẹ. Yé sọ tòn yì nado pòn onú he jọ lọ. ¹⁵Yé sọ wá Jesu de, bo mọ aovinọ lọ he ji aovi lẹ hé yèdọ ewọ he tindo Legioni lọ; sinai, bo yí avọ̀ ṣinyọn, ayiha etọn gò: obu di yé. ¹⁶Mẹhe mọ ẹn lẹ sọ dọ hlan yé, le é jọ hlan ewọ go he ji aovi lẹ hé lọ do, podọ gbọn ohàn lẹ tọn dali. ¹⁷Yé sọ sè vivẹ ẹ dọ ni tòn sọn agbègbè yetọn ji. ¹⁸Pòdọle ẹ biọ vàtle lọ mẹ, ewọ he aovi lẹ hé lọ vè ẹ na é ni nò hẹ ẹ. ¹⁹E ma dike nẹ gba, ṣigba é dọ hlan ẹn, dọ, Yì owhé, jẹ họntọn towe lẹ de, bo dọ na yé le Oklunọ wà onú daho lẹ na we do, podọ le é yí lẹblanu hia we do. ²⁰E sọ ton bo sè didọ pé to Dekapolé onú daho he Jesu wà nẹ̃ lẹ: avọ̀ sọ vò gbẹtọ lẹpo.

²¹Whenuena Jesu sọ vọ́ vàtlẹ lọ mẹ gbọn wajei awà awetọ ji, agúndahe de pli do e de: é sọ sẹpọ́ ohù. ²²Dopo to ogán sinagọgu tọn lẹ mẹ he yè nọ ylo dọ Jailu, wá e de finẹ, mimọ ẹn é jẹklo to afọ etọn go, ²³E sọ vè ẹ talala dọ, Oviyọnnu ṣie pẹvi mlọnai to kúdònu: yẹn vè we, wá bo do alọ towe e ji, na yè nido hẹnazòm gbọ nẹ; é nasọ tin to ogbè. ²⁴E sọ jei po e po; agùndaho de sọ hodo e, yé sọ to fìnfinyọn ẹn.

²⁵Podọ nawe de, he tindo zentin ohùn tọn owhè wiawe, ²⁶Bo duya onú susu tọn sọn bokọnọ susu si, bo ko zán onu he é tindo lẹpo, bọ é ma pònte nè, ṣigba bo to yinylan dónukọn janwẹ. ²⁷Whenuena é sè linlin Jesu tọn, é gbọn godo wá to agùn mẹ, bo do alọ awù etọn go. ²⁸Na é dọmọ, Eyín yen gbé sọgan do alọ awù etọn go, yè na hẹn mi jẹ gángán. ²⁹Afọdoponeji asisa ohùn etọn tọn hú, é sọ yọnẹn to agbasa etọn mẹ dọ yè ko hẹnazòngbọ nẹ sọn azọ̀n lọ mẹ. ³⁰To afọdoponẹji Jesu yọnẹn to ede mẹ dọ huhlọn tòn sọn é go, é sọ légodo to agùn lọ mẹ, bo dọmọ, Mẹnu wẹ do alọ awù ṣie go? ³¹Nuplọntọ etọn lẹ sọ dọ hlan ẹn, dọmọ, Híẹ mọ gbẹtọ lẹ to fìnfinyọn we, bo sọ dọmọ, Mẹnu wẹ do alọ ogo e? ³²E sọ pọ́n lédo nado mọ mẹhe wà onú he ³³Ṣigba nawe lọ to obu po sisọsisọ po mẹ, le é yón onú he yè wà to e mẹ, é wá, bo jẹklo to nukon etọn, bo dọ nugbo lẹpo nẹ̃. ³⁴E sọ dọ hlan ẹn, dọ, Oviyọnnu, yise towe hẹn we jẹ gángán, yì jijọho mẹ, bo sọ nọ gángán sọn azọ̀n towe mẹ.

³⁵Lé é to didọ to onù me, yé wá sọn owhé ogán sinagọgu tọn gbè, dọmọ, Oviyọnnu towe ko kú, etẹwẹ hiẹ sọ to tuklado Mẹplọntọ na ba? ³⁶Ṣigba Jesu ma whla ohó he yè dọ, dọ hlan ogán sinagọgu tọn lọ dọmọ, A dibu blo, yise sokẹdẹ ³⁷E ma sọ dikena mẹdepope ni hodo e, adavo Pita po Jakobu po, po Johanu nọvisunnu Jakobu tọn po. ³⁸Yé sọ wá jẹ owhé ogán sinagọgu tọn gbè, bo pọ́n zingidi po mehe to ávivi, bo so to awúbla susu lẹ po: ³⁹Whenuena é biọ owhe gbè, é dọ hlan yé, dọ, Etẹwutu wẹ mì to awhádo, bo sọ to avivi? Oviyọnnu lọ ma kú gba, ṣigba amlon wẹ é do. ⁴⁰Yé sọ to vivlẹ ẹ ko Ṣigba ewọ whenuena é yàn ye omẹ pó jẹgbonu, é yí otọ́ po onọ oviyọnnu lọ tọn po, po yé mẹhe to e de lẹ po, bo biọ ofi he oviyọnnu lọ mlọnai te. ⁴¹E sọ hẹn alọ na oviyọnnu lọ, bo dọ hlan ọn, dọ, TALITA KUMI, ehe tadèna yín, Oviyọnnu, yẹn dọ hlan we, fọ́n. ⁴²To afọdoponẹji oviyọnnu lọ sọ fọ́n bo to zọnlinzin; na é yin ovi owhè wiawe tọn. Avò sọ vò yé talala ⁴³E sọ kọ́ na yé to afọdoponẹji dọ mẹdepope yọn ehe blo; é sọ degbè dọ yé ni na onúdùdù i.

¹E SỌ tọ́n yì sọn finẹ, bo wá otò ewlọsu tọn mẹ; nuplọntọ etọn lẹ sọ hodo e. ²Whenuena é jẹ gbọjẹzángbè é sẹ̀ mẹplọ́n to sinagọgu mẹ; avọ̀ sọ vò mẹsusu mẹhe sè le, yé domọ, Fie wẹ dawe he hen onu helẹ sọn? Podọ nuyọnẹn tẹhun kọ wẹ ehe yè na dawe he e, bọ azọ́n gangan he hunkọ do to tintọn sọn alọ eton me? ³Be ehe ma wẹ atinpatọ lọ, ovisunnu Malia ton, nọvisunnu Jakobu, Jose, Juda, po Simọni po tọn? Be mẹmẹyọnnu etọn le ma tin to ofi to mí de? Yè sọ hẹn yé dahli to ewọ mẹ. ⁴Jesu sọ dọ hlan yé, dọ, Yẹwhegán de ma nọ matindo yẹyi, adavo tò oto ewlọsu tọn me, podọ to hẹnnumẹ ewlọsu tọn ṣẹnṣẹn, podọ to owhe ewlọsu tọn gbè. ⁵E ma sọ sogan wazọn huhlọn tọn de to finẹ, hú dọ é zé alọ etọn do azòntọ vude ji, bo hẹnazọ̀ngbọna yé. ⁶Awu sọ ji i na mayise yeton tọn wutu. E sọ yì gbeta he lédo lẹ mẹ, bo to mẹplon.

⁷E sọ ylọ omẹ wiawe lẹ do ede de, bo sè yé dohlan gbonu awe awe; bo na asẹ yé to gbigbọ mawe le ji. ⁸E sọ dosẹ́nna ye dọ yé hẹn onú de na gbejizònlin yetọn blo, adavo opo kẹdẹ; mọ ye yí akla, kavi sakoto kavi akuẹ do apo yeton mẹ blo. ⁹Ṣigba bo to yìyì to yìnyìntọfọpa yetọn mẹ; e sọ dọmọ mi do awù awe blo. ¹⁰E sọ dọ hlan yé, dọmọ, Fidepope he mì biọ owhé de gbè te, finẹ we mì ni nọnọ̀ kaka mì na do fùnyì sọn finẹ ¹¹Podọ tẹnfidepope he ma na yí mì, bọ yé ma sọ sè mìtọn, le mì to tintan sọn finẹ, mì húnhún kọgudu he tin to afọ mìtọn glọ sẹ̀ na kunnu de hlan yé. Nugbo wẹ yẹn dọ hlanmì, E na pọ́nte na Sọdọmi po Gọmola po to whẹdazángbe hú na otò nẹ ¹²Yé sọ tọ́njegbónu yì, bo to yẹwhehodọ dọ gbẹtọ lẹ do lẹnvọjọ ¹³Yé sọ yàn aovi susu jẹgbonu, bo: sọ sá amisisa na susu awutuzọnnọ, bo sọ hẹnazọ̀ngbọna yé. ¹⁴Hẹlọdi ahọlu sọ sè linlin etọn; (na linlin oyín etọn tọn di pé;) é sọ dọmọ, Johanu Baptistitọ lọ fọ́n sọn okú, enẹwutu we huhion helẹ do to azonwà tọ e mẹ. ¹⁵Ṣigba omẹ devo lẹ dọ, Eli wẹ. Podọ omẹ devo, lẹ dọmọ, Yẹwhegán de wẹ, yedọ di dopo to yẹwhegán lẹ mẹ. ¹⁶Ṣigba Hẹlọdi whenuena e sè etọn, é domọ, Johanu, mẹhe yẹn gbota na, ewọ wẹ fọ́n sọn oku. ¹⁷Na Hẹlọdi lọsu ko domẹhlan yì wlé Johanu, bo sín in do ogànhọ mẹ, na Hẹlọdia asi Filippi nọvisunnu etọn tọn wutu; na ewọ ko wlealọhẹ ẹ. ¹⁸Na Johanu dọ hlan Hẹlọdi, dọ, E ma jẹ na hiẹ nado yí asi nọvisunnu towe tọn gba. ¹⁹Enẹwutu Hẹlọdia dohomẹkẹn ẹn, bo so to jijlo na hù i; ṣigba é ma sọgan. ²⁰Na Hẹlọdi dibuna Johanu, yinyọnẹn dọ, gbẹtọ dódónọ de wẹ ewọ, podọ mẹwiwe de; é sọ yí i whlá: whenuena é sè ohó etọn, e wà onú susu, bo sọ yí homẹhùnhùn do sè ohó etọn. ²¹Whenuena azán he jẹ de wá, wẹ Hẹlọdi da nudùdù to jiji-zán etọn gbè hlan ogán etọn lẹ, awhangándaho lẹ, po meho Galili tọn le po; ²²whenuena oviyọnnu Hẹlọdia tọn lọsu biọ owhé gbè bo lo wedu, e hùnhomẹna Hẹlọdi, po mehè jagla po e po lẹ, ahọlu sọ dọ hlan oviyọnnu lọ dọmọ, Biọ onú depope he hiẹ jlo sọn así e, yẹn na yi i na we. ²³E sọ whlé hlan ẹn dọ, Onú depope he hiẹ na biọ sọn así e, yẹn na na we, kaka jẹ dadawe ahọludu ṣie tọn. ²⁴E sọ tọ́njẹgbonu, bo dọ hlan onọ etọn, dọmọ, Etẹwẹ yẹn na biọ? Ewọ sọ dọmọ, Ota Johanu Baptisti tọn. ²⁵E sọ yawu biọ owhé gbè yì ahọlu de to afọdoponẹji, bo biọ, dọmọ, Yẹn jlo na hiẹ ni na ota Johanu Baptistitọ lọ tọn mi to agbánvla de mẹ. ²⁶Ahọlu sọ blawu talala; ṣigba na whiwhlé etọn wutu, podọ yé he jagla to núdùdù kòn lẹ tọn, é ma jlo na gbẹ́ nẹ̃ gba. ²⁷To afọdoponẹji ahọlu do mẹdagun dopo hlan, bo degbè nẹ̃ dọ yè ni yi ota etọn wá, é sọ yì bo gbò ota na Johanu to ogànhọ mẹ, ²⁸Bo sọ hẹn ota etọn wá to agbánvla de mẹ, bo sọ yí i na oviyọnnu lọ: oviyọnnu lọ sọ yí i na onọ etọn. ²⁹Whenuena nuplọntọ etọn lẹ sè, yé wá bo zé osiọ etọn, bo sọ tó ẹ do oyòwhé de mẹ.

³⁰Apọsteli lẹ sọ bé yéde pli do Jesu de, bo sọ dọ onú he yé ko wà lẹpo, podọ onú he yé ko plọnmẹ lẹpo nẹ̃. ³¹E sọ dọ hlan yé, dọ, Mì lọsu ni wá zùngbo mẹ to ola na mí ni gbọjẹ whenu vude; na omẹ susu wẹ tọ gigò bo to yìyì, yé ma mọ otẹn sọmọ nado dùnú. ³²Yé sọ do vàtlẹ lọ yí otẹn zùngbo tọn de mẹ to nuglọ. ³³Gbẹtọ lẹ sọ mọ yé jei, omẹ susu yón ẹn, bo sọ họnwezun gbọn afọ sọn otòdaho lẹpo mẹ yì finẹ, bo yí nukọnna yé. ³⁴Ewọ sọ jẹgbonu wá, bo mọ agùndaho de, ewọ sọ tindo lẹblanu to yé ji, na yé taidi lẹngbọ he ma tindo hihọtọ de wutu; é sọ sè onú susu plón yé. ³⁵Whenuena okle whenu ko juwayì susu, nuplọntọ etọn lẹ wá e de, bo dọmọ, To ofi zùngbomẹ wẹ, whenu sọ fẹ̀ pó, ³⁶do yé hlan na yé nido yì otò he lédo mẹ, po gbeta lẹ po mẹ, na yé nido hò nú-dùdù na yéde: na yé ma tindo onú he yé na dù gba. ³⁷Ṣigba ewọ gblọn, bo dọ hlan yé, dọ, Mì yí núdùdù na yé ni dù. Yé sọ dọ hlan ẹn, dọ, Be mí na yì hò akla abọgan-kuẹ fọdenu tọn bo na na yé nado dù? ³⁸E sọ dọ hlan yé, dọ, Akla nẹmu wẹ mì tindo? mì yì pọ́n. Whenuena yé yọnẹn, yé dọmọ, Atón po whevi awe po. ³⁹E sọ degbè na yé dọ, yé ni hen yé ome pó jagla to hamẹhamẹ to ogbé mú ji. ⁴⁰Yé sọ jagla to hamẹ-hamẹ, kanweko-kanweko, kandeawokandeawo. ⁴¹E sọ yí akla atón lẹ, po whevi awe lẹ po, pinpọ́n aga hlan olọn; e dona, bo sọ kán akla lẹ, é yí na nuplọntọ oton lẹ, nado zé dai to nukọn yetọn: whevi awe le wẹ é sọ má do yé omẹ pó mẹ. ⁴²Ye omẹ pó dù, bo sọ góhò. ⁴³Yé sọ bé oha wiawe gó na dùpò, po whevi awe lẹ tọn po. ⁴⁴Mẹhe dù sọn akla lẹ mẹ vín sunnu degbadefọtón.

⁴⁵To afọdoponẹji é dava nuplọntọ etọn lẹ nado biọ vatlẹ lọ mẹ, podọ nado yì jẹnukọn nẹ̃ jẹ awà awetọ ji jẹ Bẹtsaida, le é do agùndaho lọ hlan gbonu. ⁴⁶Godo he é ko jo yé, é tón yì biọ osó mẹ nado hodè. ⁴⁷Whenuena tenu do, vàtlẹ lọ tin to ohù ṣẹnṣẹn, ewọ sokẹdẹ to age ji. ⁴⁸Mimọ yé to tuklajẹ to húnkùnkùn mẹ, na jẹhọn tin agò hlan yé; to hihó ẹnẹtọ jlẹmẹ to ozán mẹ, é wá yé de, é to zọnlinzin to ohù ji, ewọ do ko zé yé go wá yì. ⁴⁹Ṣigba yéwlẹ whenuena yé mọ ẹn to zọnlinzin to ohù ji, len dọ oblo wẹ, yé sọ dawhá: ⁵⁰na yé omẹ pó wẹ mọ ẹn, bọ obu sọ di yé. Ṣigba to afọdoponẹji é dọhó hẹ yé, bo dọ hlan yé, dọ, Mì dotu: yen wẹ; mì dibu blo. ⁵¹E sọ hé aga biọ vàtlẹ lọ mẹ yì yé de; jẹhọn sọ gbò; avọ̀ sọ vò yé badabada, to yéde ṣẹnṣẹn. ⁵²Na yé ma tunwun gbọn akla lọ tọn dali gba; na ayiha yetọn sinyen wutu.

⁵³Whenuena yé juyì jẹ agé, yé wá aigba Genezalẹtì tọn mẹ, bo yla do agé. ⁵⁴Whenuena yé to tintón sọn vàtlẹ lọ mẹ, to afọdoponẹji gbẹtọ lẹ yọn ẹn, ⁵⁵bo honwezun lédo agbègbè nẹ pete, bo ṣẹ̀ nado to hinhẹn pe to adózan yetọn lẹ ji yé he yín awutunọ lẹ wá fie yé sè dọ é te. ⁵⁶Podọ ofi depopo é biọ, to gbeta lẹ kavi to otòdaho lẹ mẹ kavi to otò mẹ, yé nọ to awutunọ lẹ té do aligboji, yé sọ to vivẹ ẹ dọ, yé nido do alọ e go eyín e tlẹ yín okèyó avọ̀ etọn tọn, yé omẹ sọha he do alọ é go lẹpo wẹ yè hẹn jẹ gángán.

¹WHENẸNU wẹ Falesi lẹ po omẹ delẹ po sọn wekantọ lẹ mẹ, he sọn Jelusalẹm bé yede pli do e de. ²Whenuena yé mọ delẹ to nuplọntọ etọn lẹ mẹ to núdù to mawe mẹ, enẹ wẹ to alọ maklọ maklọ. ³Na Falesi lẹ, po Ju lẹ po, eyín yé ma klọ alọ yetọn talala yé ma nọ dùnú: na yé to otànhohó mẹho lẹ tọn yìn. ⁴Podọ whenuena yé sọ gó sọn ahi me, eyín yé ma lawu yé ma nọ dùnú. Onú susu devo sọ tin ehe yé yí nado nọ payi yé go, di kiklọ kọfo lẹ ton, ozẹ́n lẹ, podọ núzinzán ogànvẹ̃ lẹ tọn, po tafo lẹ tọn po ⁵Whenenu wẹ Falesi lẹ, po wekantọ lẹ po, kanbiọ ẹ dọ, Etẹwutu wẹ nuplọntọ towe lẹ ma zinzọnlin kẹdẹdi otànhóhó mẹho lẹ tọn, ṣigba yé to núdù po alọ fuflu lẹ po? ⁶E sọ gblọn bo dọ hlan yé, dọ, Nugbo wẹ Esaia ko dọdọdai gbọn mì yẹnuwàtọ lẹ tọn dali, dile yè wlan ẹn do, 1

⁸Na mìwlẹ jo osén Jiwheyẹwhe tọn do apadopo, bo hẹn otànhóhó gbẹtọ tọn lẹ go. ⁹E sọ dọ hlan yé, dọ, Nugbo wẹ mìwlẹ gbé osén Jiwheyẹwhe tọn dai, na mì nido yìn otànhóhó mìtọn. ¹⁰Na Moṣe dọ, domọ, Gbògbéna otọ́ towe po onọ towe po, podọ, Mẹdepope he dọhó oylan, otọ́ kavi onọ tọn, mì gbọ ni kù okú eton. ¹¹Ṣigba mìwlẹ dọmọ, Eyín omẹ de na dọ hlan otọ́ etọn, kavi onọ etọn, dọ, mihe hiẹ do ko do yín alenọ gbọn yẹn dali wẹ Kọlbani, enẹ wẹ nado dọ, Nina hlan Jiwheyẹwhe; ¹²mọ mì ma sọ dike é ni wa nudepope na otọ́ etọn, kavi onọ etọn ba; ¹³mì sọ hẹn ohó Jiwheyẹwhe tọn zon núvọ gbọn otànhóhó mìtọn dali he mi ko doai; podọ onú susu mọhunkọ tọn wẹ mì to wiwà. ¹⁴E sọ ylọ agùndaho lọ do e de, bo dọ hlan yé, dọmọ, Mì omẹ pó mì na otọ́ mi, na mì ni sọ dayi e go. ¹⁵Onú depope he sọn gbonu gbeto tọn he biọ é mẹ, ma sọgan hẹn ẹn flu gba; ṣigba onú nẹlẹ he tón sọn é mẹ, wẹ ehe nọ hẹn gbẹtọ flu. ¹⁶Eyín ome de tindo oto nado sè, ni sè. ¹⁷Whenuena é tón sọn agùndaho lọ mẹ biọ owhé gbè, nuplọntọ etọn lẹ kan oló lọ tọn biọ ẹ ¹⁸E sọ dọ hlan yé, dọmọ, Mìwlẹ ga bọ tin to wunvi mẹ sọmo? Be mìwlẹ ma tunwun dọ, onú depope he sọn gbonu biọ gbẹtọ lọ me, ma sọgan hẹn omẹ flu; ¹⁹na é ma biọ ayiha etọn mẹ wutu, ṣigba ohò mẹwẹ é yì, bo sọ tón jẹgbonu yì blebu. Éhe é dọ, wẹ hinhẹn nudùdù lẹpo zun wiwe? ²⁰E sọ dọmọ, Onú he tón sọn gbẹtọ lọ mẹ, enẹ wẹ nọ hẹn gbẹtọ flu. ²¹Na sọn homẹ, sọn ajiha gbẹtọ tọn me, wẹ linlẹn ylankan lẹ nọ tón sọn, ogàlilọ le, ²²ajo, mẹhùhù, ayọdide, nukunkẹn, kanyinylan, oklọ, wantuntun, nukun ylankan, ohó ylankan didọ, sakla, ohlodidi; ²³homẹ wẹ onú ylankan helẹ pó sọn wá, bo sọ nọ hen gbẹtọ flu.

²⁴E sọ fọ́n sọn finẹ bo yì biọ agbègbè Tile po Sidọni po tọn lẹ mẹ. E sọ biọ owhé de gbè, é ma sọ jlo na omẹ depope ni yón ẹn: ṣigba é ma sọgan yín whiwhla. ²⁵Ṣigba to afọdoponeji nawe de, mẹhe oviyọnnu etọn pẹvi do gbigbọ mawe, sise linlin etọn, wá, bo jeklo to afọ etọn go. ²⁶Gleki wẹ nawe lọ, Silofénisiatọ gbọn akọta etọn dali: é sọ vé ẹ na é ni yàn aovi jẹgbonu sọn oviyọnnu etọn mẹ. ²⁷E sọ dọ hlan ẹn, dọmọ, Gbọ yè ni hẹn ovi lẹ gọhò whé; na é ma jẹ nado yí akla ovi lẹ tọn dlẹn avún lẹ gba. ²⁸E sọ gblọn bo dọ hlan ẹn, dọmọ, Mọ wẹ, Oklunọ; ṣigba avún lẹ to tafo glọ nọ dù sọn dupò ovi lẹ ton mẹ. ²⁹E sọ dọ hlan ẹn, dọmọ, Na ohó helẹ, yì na dewe; yè ko hẹn aovi lọ tón yi sọn oviyonnu towe mẹ. ³⁰Ewọ sọ wá owhé etọn gbè, bo mọ yè ko hẹn aovi lọ tọn yì, oviyọnnu etọn sọ mlọnai to adózan ji.

³¹E sọ vó tón yì sọn agbègbè Tile tọn lẹ dali, bo gbọn ohù Sidoni tọn mẹ jẹ ohu Galili tọn, gbọn gblagbla agbègbè Dekapolé tọn lẹ mẹ. ³²Yé sọ hẹn omẹ de wá e de mẹde he yín tókunọ, he sọ jọ unbọpen to odé etọn mẹ; ye vó ẹ nado yí alọ etọn do e ji. ³³E sọ dè e sọn agùndaho lọ mẹ jẹ apadopo, bo yí alọvi etọn lẹ do otọ́ etọn lẹ mẹ, é túntán, bo yí alọ do odó etọn ji; ³⁴Podọ pinpọ́n aga hlan olọn, é wẹnhùn, bo sọ dọ hlan ẹn dọ, EFFATA, enẹ wẹ Yín hùn hùn. ³⁵Otọ́ etọn lẹ sọ yín hùn hùn, podọ okàn odó etọn tọn sọ yín túntún, é sọ dọhó diun. ³⁶E sọ dosénna yé dọ, yé dọ na mẹde blo; ṣigba le é to séndona yé, sọmọ gbahú wẹ yé to didọ ẹ pe do; ³⁷Avò sọ vò yé zẹjlẹgo, dọmọ, E ko wa onú lẹpo dagbe: é hẹn yèdọ tókunọ nado senú, po unbọpẹn po nado dọhó.

¹TO azán nẹlẹ mẹ whenuena agùn daho lẹ sọ vó tin bó yé ma tindo núdùdù, é ylọ nuplọntọ etọn lẹ wá e de, bo dọ hlan yé, dọmọ, ²Lẹblanu agùndaho lọ tọn to wiwà mi, na é yín azán atọ̀n dinvie, bọ yé ko tin to dẽ, bo ma sọ tindo onú he yé na dù wutu: ³eyín yẹn sọ do yé hlan owhé yetọn lẹ gbè to huvẹ, onú na sikọna yé to aliho; na susu yetọn sọn ofi dindẹn wá. ⁴Nuplọntọ etọn lẹ sọ gblọn dọ nẹ̃, dọmọ, Fie wẹ yè na hen akla sọn do pekọna omẹ helẹ to zùngbo mẹ fi? ⁵E sọ kanbìọ yé dọ, Akla nẹmu wẹ mì tindo? Yé dọmọ, Ṣinawe. ⁶E sọ degbèna agùndaho lọ nado jagla do aigba ji: é sọ yí akla ṣinawe lẹ, bo dopé, bo kán, bo yí na nuplọntọ etọn lẹ nado yí do nukọnna yé; yé sọ yí yé do nukọnna agùndaho lọ. ⁷Yé sọ tindo whevi pẹvi de; é dona, bo sọ degbè nado yí yé do yé nukọn ga. ⁸Yé dù, bo sọ gọhò; yé sọ bé dupò he pò lẹ pli, oha ṣinawe gó. ⁹Yé mẹhe dù lẹ sọ yì gbẹtọ degbade; é sọ do yé hlan. ¹⁰To afọdoponẹji é biọ vàtlẹ lọ mẹ po nuplọntọ etọn lẹ po, bo wá Dalmanuta dali.

¹¹Falesi lẹ sọ tón jẹgbonu wá bo sọ sè ọnú kanbiọ ẹ, yé to ohia de din sọn e de sọn olọn, do to whiwhle e pọ́n. ¹²E sọ wènhùn sisosiso to gbigbọ etọn me, bo dọmọ, Etẹwutu we whẹndo he to ohia de din? Nugbo yẹn dọ hlan mì, Ohia de ma na yín nina hlan whẹndo he gba, ¹³E sọ jo yé dai, bo sọ vó vàtlẹ lọ mẹ biọ bo juyì awà awetọ ji.

¹⁴Yé sọ wọnji nado hẹnakla, mọ yé ma tindo to vàtlẹ lọ mẹ to yé de hú akla dopo. ¹⁵E sọ dosénna yé dọ, Mì payi, bo ho mìde do otọ́n Falesi lẹ tọn, po otọ́n Hẹlọdi tọn po go. ¹⁶Yé sọ to linlẹn po yénọzo po dọmọ, Na mìwlẹ ma hẹn akla wutu wẹ ¹⁷Whenuena Jesu mọ ẹn hlan, é dọ hlan yé, dọmọ, Etẹwutu we mì to linlẹn, na mì ma tindo akla wutu? Be mì ma mọ kaka jẹ dinvie, mọ mì ma sọ tunwun gba? Mì sọ tindo ayiha sinsinyẹn kaka jẹ dinvie? ¹⁸Mì tindo nukun, be mì ma mọnú? mì tindo ótó, be mì ma senú? Be mì ma sọ flin gba? ¹⁹Whenuena yẹn kán akla atón na gbẹtọ degbadefọton, oha nẹmu wẹ gọ na dupò he mì bé? Yé dọmọ, Wiawe ²⁰Podọ whenu ṣinawe lọ to gbẹtọ degbade ṣẹnṣẹn, oha nẹmu wẹ gọ na dupò he mì bé? Yé sọ dọmọ, Sinawe. ²¹E sọ dọ hlan yé, dọ, Be mì ma gbé tunwun lo?

²²Yé sọ wá jẹ Bẹtsaida; yé sọ hẹn dawe nukuntọ́nnọ de wá e de, bo vẹvẹ nè nado do alọ e go. ²³E sọ hẹn alọ na nukuntọ́nnọ lọ, bo plan ẹn jẹgbonu sọn otò; me; whenuena é túntán do nukun etọn ji, bo yí alọ etọn do e ji, é kanbiọ ẹ dọ, Hiẹ mọ núde? ²⁴E sọ pọ́n aga, bo dọmọ, Yẹn mọ gẹtọ lẹ; di atin lẹ, yé to zọnlinzin. ²⁵E sọ vó alọ etọn yí do nukun etọn ji, bo sọ hẹn ẹn pọ́n aga; é sọ pọ́n tlintlin, bo sọ jegángán, é sọ mọ onú lẹpo gblegede. ²⁶E sọ do e hlan gbonu yì owhé etọn gbè, dọmọ, A yì otò mẹ blo, mọ a sọ dọ ẹ na mẹde to otò mẹ blo.

²⁷Jesu sọ tọ́njegbonu yì po nuplọntọ etọn lẹ po biọ otò Sesalea Filippi tọn lẹ mẹ; podọ to aliho é kanbiọ nuplọntọ etọn lẹ, é to didọ hlan yé, dọmọ, Mẹnu wẹ gbẹtọ lẹ dọ yen yín? ²⁸Yé sọ gblọn dọmọ, Johanu Baptisti; mẹdelẹ sọ dọ, Eli; ṣigba mẹdevo lẹ dọ, Dopo to yẹwhegán lẹ mẹ wẹ. ²⁹E sọ dọ hlan yé, dọmọ, Ṣigba mẹnu wẹ mìwlẹ dọ yẹn yín? Pita sọ gblọn bo dọ hlan ẹn, dọmọ, Hiẹ wẹ Klisti lọ. ³⁰E sọ dosénna yé dọ, yé dọhó na ewọ tọn na mẹde blo. ³¹E sọ só pinplón yé dọmọ, Ovi gbẹtọ tọn ma sọgan nọ ma jiya na onú susu, bo sọ yín gbigbé dai gbọn mẹho lẹ dali, po ogán yẹwhenọlẹ tọn po, po wekantọ le po bo na yín hùhù bo sọ fọ́n to azán atọ̀n godo. ³²E sọ do ohó lọ do gbangba. Pita sọ hẹn ẹn bo ṣẹ̀ wiwọhẹ ẹ. ³³Ṣigba whenuena é lógodo bo pọ́n nuplọntọ etọn lẹ, é wọhẹ Pita, dọ, Tón sọn godo ṣie, Satani: na hiẹ ma lẹn onú he yín Jiwheyẹwhe tọn gba, adavo onú he yín gbẹtọ lẹ tọn. ³⁴E sọ ylọ agùndaho lọ do e de po nuplọntọ etọn lẹ po, bo dọ hlan yé, dọmọ, Mẹdepope he jlo na hodo mi, ni mọ́n ede, bo sọ zé satin etọn, bo hodo mi. ³⁵Na mẹdepope he jlo na whlẹn alindọn etọn na hẹn ẹn bú; ṣigba mẹdepope he sọ hẹn alindọn etọn bú na yẹn tọn wutu, po wẹndagbe tọn po wutu, na whlẹn ẹn gán. ³⁶Na ale tẹwẹ é do na gbẹtọ de, nado tindo aihọn lẹpo, bo sọ gú alindọn etọn? ³⁷Kavi etẹwẹ gbẹtọ do na to onadiọna mẹ na alindọn etọn? ³⁸Na mẹdepope he yè na hẹn kuwinyan ṣie tọn po óhó ṣie tọn po to whẹndo àyòdetọ podọ ylandonọ he mẹ; ewọ ga wẹ yè na hẹn Ovi gbẹtọ tọn kuwinyan etọn, to whenuena é na wá to gigo Otọ́ etọn tọn mẹ po angẹli wiwe lẹ po.

¹E SỌ dọ hlan yé, dọmọ, Nugbo wẹ yẹn dọ hlan mì, Mẹdelẹ tin to omẹ he tin to ofi lẹ mẹ, he ma na dó okú pọ́n, kaka yé nado mọ ahọludu Jiwheyẹwhe tọn wá to huhlọn mẹ. ²Azán ṣidopo godo, Jesu yí Pita, Jakobu, po Johanu po do e de, bo sọ hen yé wá biọ osó de mẹ to apadopo na yéde: yè sọ diọ ẹ to yé nukọn. ³Avó etọn sọ lẹzun sisémlanmlan, é wé gbahugbahu; sọmọ bọ avọ̀yantọ to aihọn mẹ de ma sọgan hẹn yé wéwé. ⁴Eli po Moṣe po sọ awúhia to yé de; yé sọ to hódọ hẹ Jesu. ⁵Pita sọ gblọn bo dọ hlan Jesu, dọmọ, Mẹplọntọ, é yón na mi ni nò ofi: gbọ mí ni dó gohò atọ̀n; dopo na hiẹ, dopo na Moṣe, podọ dopo na Eli ⁶Na é ma yón ehe é na dọ; na obu di yé talala wutu ⁷Aslọ dè sọ wá bo ṣinyọn yé ji; ogbè de sọ tin sọn aslọ lọ mẹ, bo dọmọ, Ehe wẹ Ovi yiwanna ṣie, mì nọ sè etọn. ⁸Pinpón lédo ajiji, yé ma mọ mẹde ba, adavo Jesu dopokẹdẹ po yólọsu po.

⁹Le yé to tejẹ sọn oso ji, é dosénna yé dọ, yé dọ onú he yé mọ na mẹde blo, kaka Ovi gbẹtọ tọn nado fọ́n sọn osiọ lẹ mẹ. ¹⁰Yé sọ yí ohó lọ whlá to yéde homẹ bo sọ to kinkanbiọ yénọzo dọ, etẹwẹ fọ́nsọnku na yín. ¹¹Yé sọ kanbiọ ẹ dọmọ, Etẹwutu wẹ wekantọ lẹ domọ, Eli whé whé wẹ na wá? ¹²E sọ gblọn bo dọ hlan yé, dọmọ, Eli nugbo whẹwhé wẹ na wá bo na hẹn onu lẹpo gọ do tẹnmẹ; podọ le yè wlan na Ovi gbẹtọ tọn wutu dọ, é ma sọgan nọ ma jiya na onú susu, podọ yè na gbé ẹ dai. ¹³Ṣigba yẹn dọ hlan mì, dọ, Eli ko wá, yé ko sọ wà nudepope he yé jlo do e, dile yè wlan na etọn wutu do.

¹⁴Whenuena é wá nuplontọ etọn lẹ de, é mọ gbẹtọ susu lédo yé, wekantọ lẹ sọ to nukanbiọ yé. ¹⁵Afọdoponẹji whenuena agùndaho lọ lẹpo mọ ẹn, avo vo yé talala, yé sọ dowezun yì e de bo dọnúdo e ¹⁶E sọ kanbiọ yé dọmọ, Etẹwẹ mì to kinkanbiọ yé? ¹⁷Dopo son agùndaho lọ mẹ sọ gblọn nẹ dọmọ, Mẹplọntọ, yen hẹn ovisunnu ṣie he tindo gbigbọ unbọpen de wá de we; ¹⁸fìdepope e ze e te: é nọ dlẹn ẹn; é nọ to fútúfutuyẹn, é nọ to adukunkun dù, bo sọ nọ daku; yen sọ dọ hlan nuplọntọ towe lẹ na yé ni yàn ẹn jẹgbonu; ye ma sọ sọgan. ¹⁹E sọ gblọn na yé, bo dọmọ, Whẹndò mayisenọ, nawẹ yẹn na nò dẹn to mì de sọ? nawẹ yẹn na sinyẹnlin dẹh to mì de sọ? hẹn ẹn wá dẽ. ²⁰Yé sọ hẹn ẹn wá e de; whenuena é mọ ẹn, afọdoponeji gbigbọ lọ dlẹn ẹn panpan; é sọ blijai, bo to bibíi to; aigba, to futúfutùyẹn. ²¹E sọ kánbiọ otọ́ etọn domọ, Nawẹ é dẹn sọ sọn whenuena ehe ko wá nẹ? E sọ dọmọ, Sọn ovu gbọn wẹ. ²²Whẹ̃whẹ̃ wẹ é nọ zé e dlẹn miyọn mẹ, podọ dọ osìn mẹ, nado hù i súdo; ṣigba eyín hiẹ sọgan wà ọnú depope, wàlẹblanuna mí, bo gọalọna mí. ²³Jesu sọ dọ hlan ẹn, dọmọ, Eyín hiẹ sọgan yise, onú lẹpo wẹ wiwà hlan ewo mẹhe yise. ²⁴Afọdoponẹji otọ́ ovi lọ tọn dawhá, bo dọ po dasìn po, dọmọ, Yẹn yise; gọalọna mayise ṣie. ²⁵Whenuena Jesu mọ dọ agùndaho de to wezundo plidopọ, é wọhẹ gbigbọ mawe lọ, bo dọ hlan ẹn, dọmọ, Hiẹ gbigbọ unbọpẹn, tókunọ; yen dọ hlan we, ton sọn é mẹ, a sọ biọ é me ba blo. ²⁶Gbigbọ lọ sọ dawhá, bo dlẹn en, bo tón sọn e mẹ: é sọ taidi mẹhe kú, sọmọ bọ omẹ-susu dọmọ, E kú. ²⁷Ṣigba Jesu hen alọ nẹ, bo zé e daga; é sọ fọ́n. ²⁸Whenuena é wá biọ owhé gbè, nuplọntọ etọn lẹ kanbiọ ẹ to nuglọ dọmọ, Etẹwutu wẹ míwlb ma sọgan yan ẹn jegbonu? ²⁹E sọ dọ hlan yé, dọmọ, Ehe hunkọ ma sọgan tọnjegbonu wá gbọn nudepope mẹ, adavo gbọn odẹ̀ po nùbla po dali.

³⁰Yé sọ tọn sọn finẹ, bo jugbọn Galili ṣẹnṣẹn; é ma sọ jío na mẹde ni yón ẹn. ³¹Na é plón nuplọntọ etọn lẹ, bo sọ dọ hlan yé, dọmọ, Yè yí Ovi gbẹtọ tọn do alọ gbẹtọ lẹ tọn mẹ, yé nasọ hù i; podọ whenuena yè hù i, é na fọ́n to azán atọ̀ntọ gbè ³²Ṣigba yé ma tunwun ohó lọ, yé sọ dìbu nado kanbiọ ẹ.

³³Ye sọ wá Kapẹlnaumi; whenuena é tin to owhó gbè, é kanbiọ yé dọmọ, Etewẹ mì to nudòn na to mìde ṣẹnṣẹn to aliho? ³⁴Ṣigba yé nabọẹ: na whenuena yé to zọnlinzin ja to aliho, ye ko to nudòn to yéde ṣẹnṣẹn dọ, Menu wẹ yín kiklo gbahú. ³⁵E aọ sinai, bo ylọ omẹ wiawe lẹ, bo dọ hlan yé, dọmọ, Eyín mẹdepope jlo na yín nukọntọ, ewọ lọ wẹ na yín godotọ yé omẹ pó ton, bo sọ yín lizonyítọ yé ome pó tọn. ³⁶E sọ yi ovi pevi de, bo zé e do yé ṣẹnṣẹn, whenuena e ze e do awà etọn mẹ, é dọ hlan ye, dọmọ, ³⁷Mẹdepope he yí ovi pẹvi he hunkọ tọn dopo to oyín ṣie mẹ, é yí mi: mẹdepope he sọ yí mi, yen ma wẹ é yi gba, adavo ewọ he do mi hlan.

³⁸Johanu sọ dọ hlan ẹn, dọmọ, Mẹplontọ, mìwlẹ mọ mẹde to oyín towe yí do to aovi lẹ yàn jẹgbonu, ewọ ma hodo mí: mí sọ kó nẹ̃, na é ma hodo mi wutu. ³⁹Ṣigba Jesu dọmọ, Mì sọ kó nẹ blo: na mẹde ma tin he na wàzón jawu de to oyín ṣie mẹ, bo na sọgan yawu dọ oylan do ogo e. ⁴⁰Na mẹhe ma jeàgò do mí go, mìtọn wẹ. ⁴¹Na mẹdẹpope he na osin kọfo dopo mì nù to oyín: ṣie me, na mì yín Klisti tọn wutu, nugbo yẹn dọ hlan mì, ale etọn ma na gú i gba. ⁴²Mẹdepope he na hẹn dopo to pẹvipẹvi he yi mi sè helẹ de mẹ dahli, é bòawú nẹ̃ na yè ni bla osé do okò etọn, bo siọ ẹ do ohù mẹ. ⁴³Podọ eyín alọ towe hẹn wé nado dahli, sán ẹn sọ; é bọawú na we na yín alosánpònọ biọ ogbè mẹ, hú na a ni tindo alọ awe yì biọ olọnzo mẹ, to miyọn he ma nọ si gbède mẹ: ⁴⁴Fie owán yetọn ma no kú te, miyọn lọ ma sọ to na si. ⁴⁵Eyín afọ towe sọ hẹn we nado dahli, sán ẹn sẹ; é bọawú na we na yín afọsánpònọ biọ ogbè mẹ, hú na a ni tindo afọ; awe na yè ni zé we dlẹn olọnzo mẹ, do miyọn he ma nọ ṣi gbède mẹ: ⁴⁶Fie owán yetọn ma nọ kú te, miyọn lọ ma sọ to na si. ⁴⁷Podọ eyín nukun towe sọ hẹn we nado dahli, sún in sè: é bọawú na we na yín nukundoponọ biọ ahọludu Jiwheyẹwhe tọn mẹ, hú na a ni tindo nukun awe, na yè ni zé we dlẹn miyọn olọnzo tọn mẹ: ⁴⁸Fie owán yetọn ma nọ kú te, miyọn lọ ma sọ to na si. ⁴⁹Na omẹ pó wẹ yè na yí miyọn do hẹn ojẹ pé, avọ́ lẹpo wẹ yè nasọ hẹn ojẹ pé ⁵⁰Dagbe wẹ ojẹ: ṣigba eyín ojẹ hẹn otọ́n etọn bú, etẹwẹ mì na do hẹn ẹn dotọ́n. Mì do ojẹ to mìlọsu homẹ, na mì ni sọ nọnọ̀ jijọhọ hẹ minọzo.

¹E SỌ fọ́n sọn finẹ bo wá Judé dali to Jọdani godo; agùndaho lẹ sọ vó wá plidopọ do e de; le walọ etọn te, é sọ to yé plón. ²Falesi lẹ sọ wá e de to finẹ, bo to whiwhle e pọ́n, bo kanbiọ ẹ dọmọ, Be é jẹ na sunnu de nado jo asi etọn dai? ³E sọ gblọn bo dọ hlan yé, dọmọ, Etẹ Moṣe degbèna mì? ⁴Yé dọmọ, Moṣe dike nado wlan owé gbédai tọn nẹ̃, bo sọ gbé ẹ dai. ⁵Jesu sọ gblọn bo dọ hlan yé, dọmọ, Na sinsinyẹn ayiha mìtọn tọn wutu wẹ é wlan osén he na mì. ⁶Ṣigba sọn whéwhéwhenu dida tọn asú po asi po wẹ é basi yé. ⁷Na ehe wutu wẹ sunnu na jo otọ́ etọn po onọ po dai, bo nasọ sẹbọ do asi etọn de; 2 ⁸yé awe lẹ na sọ yín agbasalan dopo; enẹwutu yé ma sọ yín awe ba gba, adavo agbasalan dopo. ⁹Enẹwutu onú he Jiwheyẹwhe síndopọ mì dike gbẹtọ klán ẹn blo. ¹⁰Nuplọntọ etọn lẹ sọ vó onú doponẹ kanbiọ ẹ to owhé gbè. ¹¹E sọ dọ hlan yé, dọmọ, Mẹdepope he na gbé asi etọn dai bo wlealọhẹ devo, é deayò hẹ ẹ. ¹²Eyín yọnnu de sọ gbé asú etọn dai, bo sọ wlealọhẹ mẹdevo, é deayò.

¹³Yé sọ hẹn yọpọvu lẹ wá e de na é nido doalọ yé ji: nuplọntọ etọn lẹ sọ wọhẹ yé mehe hẹn yé wá lẹ. ¹⁴Ṣigba whenuena Jesu mọ ẹn, homẹ etọn gble talala, é sọ dọ hlan yé, dọmọ, Mì gbọ yọpọvu lẹ ni wá dẽ, mì sọ kóna, yé blo: na yé omẹ mọhunkọ lẹ tọn wẹ ahọludu Jiwheyẹwhe tọn. ¹⁵Nugbo wẹ yẹn dọ hlan mì, Mẹdepope he ma yí ahọludu Jiwheyẹwhe tọn di yọpovu, é ma to na biọ é mẹ. ¹⁶E so ze ye daga to awà etọn lẹmẹ, bo yí alọ etọn le do yé ji, bo dona yé.

¹⁷Le é tọn je to aliho etọn ji, mẹde dowezun wá e de, bo sọ jẹklo nè, bo kanbiọ ẹ dọ, Mẹplọntọ dagbe, etẹwẹ yẹn na wà, bọ yẹn nado dugu ogbé madopodo tọn? ¹⁸Jesu sọ dọ hlan ẹn, dọmọ, Etẹwutu hiẹ ylọ mi mẹdagbe? mẹdagbe de ma tin, adavo omẹ dopo, enẹ wẹ Jiwheyẹwhe. ¹⁹Hiẹ yón osén lẹ, A deayò blo; À hùmẹ blo; A fìnnúyi blo; A dekunnu lalo tọn blo; A klọ omẹ blo; Gbògbéna otọ́ towe po onọ towe po. ²⁰E sọ dọ hlan ẹn dọ, Mẹplọntọ, onú he lẹpo go wẹ yẹn ko tunnukun sọn ovu ṣie. ²¹Whenẹnu wẹ Jesu pọn ẹn, bo yiwan nè, bo dọ hlan ẹn, dọmọ, Onú dopo wẹ pò na we; yì, bo sà onú depope he hiẹ tindo, bo yí na wamọnọ lẹ, hiẹ nasọ tindo adọkunnú to olọn mẹ: bo wá, zé satin, bo hodo mi. ²²Nukunmẹ etọn gble na ohó nẹ wutu, é sọ tọ́njegbonu to awúbla mẹ; na ewọ yín mẹde he tindo adọkun susu wutu.

²³Jesu sọ pọ́n lédo, bo dọ hlan nuplọntọ etọn lẹ, dọ, Na wẹ é na sinyenawú na mẹhe tindo adọkun lẹ do nado biọ ahọludu Jiwheyẹwhe tọn mẹ ²⁴Avò sọ vò nuplọntọ lẹ na ohó etọn wutu. Ṣigba Jesu sọ vó gblọn bo dọ hlan yé, dọ, Mì ovi emi, nawẹ é na sinyẹnawú do na mẹhe dotu to adọkun mẹ lẹ do nado biọ ahọludu Jiwheyẹwhe tọn mẹ ²⁵E bọawú na kanklosọ-pòawenọ de nado gbọn nuvo yẹnvi tọn mẹ lùntón, hú na adọkunnọ nado biọ ahọludu Jiwheyẹwhe tọn mẹ. ²⁶Awu sọ ji yé gbahúgbahú, yé sọ to didọ hẹ yénọzo, dọmọ, Be menu wẹ sọgan yín whinwhlengan? ²⁷Jesu sọ pọn yé, bo dọmọ, Gbẹtọ de wẹ ehe glo te, ṣigba é ma yín to Jiwheyẹwhe de gba: na onú lẹpo wẹ wiwà na Jiwheyẹwhe. ²⁸Whenẹnu wẹ Pita ṣẹ̀ didọ hlan ẹn, dọ, Pọn, mìwlẹ ko gbé onú lẹpo dai, bo to hihodo we. ²⁹Jesu sọ dọmọ, Nugbo wẹ yẹn dọ hlan mì, Mẹde ma tin ehe jo owhé kavi mẹmẹsunnu lẹ, kavi mẹmẹyọnnu lẹ, kavi otọ́, kavi onọ, kavi asi, kavi ovi lẹ, kavi aigba lẹ dai, na yẹn tọn wutu, podọ na wẹndagbe tọn wutu, ³⁰ṣigba é na mọ yí to dinvie to ojlẹ he mẹ, kanweko donu kanweko owhé lẹ, mẹmẹsunnu lẹ, mẹmẹyọnnu lẹ onọ lẹ, ovi lẹ, po aigba lẹ po po homẹkẹn lẹpo, podọ to aihọn he ja mẹ ogbẹ̀ madopodo. ³¹Ṣigba omẹ susu he yín tintan na yín godotọ; podọ godotọ lẹ nasọ yín tintan.

³²Yé sọ tin to aliho jei Jelusalẹm; Jesu kọ jenukọn na ye jei; avọ̀ sọ vò yé; le yé to hihodo e, obu di yé. E sọ vọ yí omẹ wiawe lẹ, bo sọ sẹ̀ didọ na yé onú he tin na jọ do é go le. ³³Dọmọ, Pon, mìwlẹ hẹji jei Jelusalẹm, ye nasọ jo Ovi gbẹtọ tọn do alọ ogán yẹwhenọ le tọn tọn me, po wekantọ lẹ po; ye nasọ gblewhé oku tọn do e, bo nasọ jo e do alọ Kosi lẹ tọn mẹ; ³⁴yé na vle ẹ ko, bo túntán do e go, bo hò e bo naso hù i; podọ azán atọ̀ntọ gbè é na fọ́n.

³⁵Jakobu po Johanu po ovisunnu Zẹbedé tọn lẹ sọ wá e de to finẹ, dọmọ, Mẹplọntọ, mìwlẹ jlo na hiẹ ni nọ wà onú depope he mìwlẹ na biọ we na mí ³⁶E sọ dọ hlan yé, dọ, Etẹwẹ mì jlo na yẹn ni wà na mì? ³⁷Yé sọ dọ hlan ẹn, dọmọ, Na mí, na mìwlẹ ni sinaì, dopo to adusilọ towe mẹ, awetọ to amiyọnlo towe me to gigo towe mẹ. ³⁸Ṣigba Jesu dọ hlan yé, dọmọ, Mì ma yón onú he mì to bibiọ gba: be mìwlẹ tin sọgan nado nù kọfo he yẹn nù? kavi nado yín yíyí baptisin he yè do baptizi mi do baptizi mì? ³⁹Yé sọ dọ hlan ẹn, dọ, Mí tin sọgan. Jesu sọ dọ hlan yé, dọ, Kọfo he yẹn nù wẹ mì na nù, podọ baptisin he yè do baptizi mi wẹ yè na do baptizi mì, ⁴⁰ṣigba nado sinai to adusilọ ṣie mẹ, podọ to amiyọnlo ṣie mẹ ma yín ṣie nado na omẹ gba; ṣigba mẹhe yè wleawu etọn dai na lẹ wẹ yè na na. ⁴¹Whenuena omẹ ao lẹ sè, yé sè homẹgble do Jakobu po Johanu po go talala. ⁴²Ṣigba Jesu ylọ yé do ede de, bo dọ hlan yé, dọ, Mìwlẹ yọnẹn dọ mẹhe yè do basi ogán do Kosi lẹ ji, nọ dùklunọ to yé ji; podọ mẹho yetọn lẹ nọ zán asẹ to yé ji. ⁴³Ṣigba é ma yín mọ to mì ṣẹnṣẹn gba: ṣigba mẹdepope he jlo na klo to mì me, na yín lizọnyítọ mìtọn: ⁴⁴Depope mìtọn he jlo na yín tintan ni yín afànumẹ mì omẹ pó tọn. ⁴⁵Na nugbo Ovi gbẹtọ tọn ma wá nado yín mẹyilizọnna gba, ṣigba nado yílizọnna omẹ, podọ nado jo ogbé etọn na ofligò na omẹ susu.

⁴⁶Yé sọ wá Jẹliko: le é tón sọn Jẹliko po nuplọntọ etọn lẹ po, po agùndaho de po, ovisunnu Timé tọn Batimé, nukuntọ́nnọ nuwhetọ de sinai to alihotó. ⁴⁷Whenuena é sè dọ Jesu Nazaleti tọn wẹ, é só awhádo ogbè lélé, bo dọmọ, Jesu, hiẹ Ovi Davidi tọn, wàlẹblanu na mi. ⁴⁸Gbẹtọ lẹ sọ wọhẹ ẹ na é nido nabọẹ; ṣigba é sọ dawhá humọ susu dọ, Hiẹ Ovi Davidi tọn, wàlẹblanu na mi. ⁴⁹Jesu sọ site, bo dọmọ mì ylọ ẹ. Yé sọ ylọ dawe nukuntọ́nnọ lọ, bo dọ hlan ẹn, dọ, Dotu, fọ́n, é to yiylọ we ⁵⁰E sọ dè awù etọn dlẹn, bo fọ́n, bo wá Jesu de. ⁵¹Jesu sọ gblọn bo dọmọ, Etẹwẹ hiẹ jlo na yẹn ni wà hlan we? Dawe nukuntọ́nnọ lọ dọ hlan ẹn, dọ, Laboni, na yẹn ni sọgan mọnú, ⁵²Jesu sọ dọ hlan ẹn, dọ, Yl; yise towe whlen we gán. To afọdoponẹji e mọnukunnu, bo sọ to hihodo e to aliho.

¹WHENUENA yé dòn sẹpọ́ Jelusalẹm, jẹ Berfagi po Bẹtani po dali, to osó Olivie tọn go, é do omẹ awe to nuplọntọ etọn lẹ mẹ hlan, ²bo dọ hlan yé, dọmọ, Mì yì gbeta he pànnukọn mì mẹ, to afọdoponẹji le mì to bibiọ e mẹ, mì na mọ osọvu de he yè sín, ehe ji mẹde ma hẹ gbède; mì tún in, bo dòn ẹn wá ³Eyín mẹde dọ hlan mì, dọ, Etẹwutu wẹ mì to ehe wà? mì domọ, Oklunọ do onú na yí i do wà; afọdoponẹji e nasọ do e hlan ofi. ⁴Ye sọ yi, bo mọ osóvu de to sínsín to hòngbo ji to gbonu, to fie aliho awe pli te; yé sọ tún in. ⁵Mẹdelẹ to mẹhe nọte to finẹ lẹ mẹ dọ hlan yé, dọ Etẹwe mì to wiwà, bọ mì do to osóvu lọ tún? ⁶Yé sọ dọ hlan yé kededile Jesu ko dọ do; yé sọ jo yé do. ⁷Yé sọ dòn osóvu lọ wá Jesu de, bo té avọ̀ yeton do e ji; é sọ sinai do e ji. ⁸Ome susu sọ té avọ yetọn lẹ do aliho ji: omẹ devo lẹ sọ sán ala atin tọn lẹ bo vúnvún yé do aliho ji. ⁹Yé mẹhe to yìyì to nukọn po mẹhe ja to godo lẹ po to awhádo dọ, Hosanna! Donanọ wẹ ewọ he ja to oyín Oklunọ tọn mẹ: 1 ¹⁰Donanọ wẹ ahọludu Davidi otọ́ mìtọn tọn, he ja to oyín Oklunọ tọn mẹ: Hosanna to oji aga.

¹¹E sọ biọ Jelusalẹm yì tẹmpli mẹ; whenuena é pọ́n onú lẹpo lédo, le tenu to dido é tọ́njegbonu yì Bẹtani po omẹ wiawe lẹ po.

¹²To azán awetọ gbè, whenuena yé sọn Bẹtani ja, huvẹ to hùhù i: ¹³e sọ mọ ovotin de to aganu ehe tindo amà lẹ, é wá vlavo é sọgan mọ onú de to e ji: whenuena é wá e kọn, é ma mọ onú de, adavo amà lẹ na whenu ovo sinsẹ́n tọn ma ko sò, ¹⁴E sọ gblọn, bo dọ hlan ẹn, dọ, Mẹde ma so dù sinsẹ́n sọn hiẹ mẹ gbede sọn ẹgbé kaka doi blo. Nuplọntọ etọn le sọ sè e.

¹⁵Ye sọ wá, Jelusalẹm; ewọ sọ biọ templi mẹ bo sè mehe to sisà po mẹhe to hiho lẹ pó yan jegbonu sọn tẹmpli mẹ, bo so takitina tafo akuẹdiọtọ lẹ tọn, po aisintẹn mẹhe to apoe sà le ton po liai. ¹⁶E ma sọ dikena mẹde ni zé núzinzán depope gbọn tẹmpli ṣẹnṣẹn. ¹⁷E sọ to mẹplon, bo to didọ hlan yé, dọ, Be yè ma ko kanwe dọ, Owhé odẹ̀ tọn de na akota lẹpo wẹ yè na nọ ylọ owhé ṣie dọ? ṣigba mi ko hẹn en zùn odo ajoto lẹ ton ¹⁸Wekantọ lẹ po ogán yewheno lẹ tọn pọ sè e, yé sọ to dindin gbọn alọ depope mẹ nado hù i súdo; na yé dibu nẹ̃ wutu, na awuji gbẹtọ lẹpo do núplonmẹ etọn go.

¹⁹Whenuena tenu do, é tón sọn otòdaho lọ mẹ.

²⁰Le yé juwajei to afọnnu, yé mọ ovotin lọ fiọ sọn adò lẹ. ²¹Pita sọ flin bo dọ hlan ẹn, dọ Mẹplọntọ, ovotin he hiẹ hodèdo lọ ko fiọ. ²²Jesu sọ gblon bo dọ hlan yé, dọ, Mì do yise to Jiwheyẹwhe mẹ. ²³Nugbo wẹ yẹn dọ hlan mì, Medepope he na dọ hlan osó he, dọ, Hiẹ ni yin zizé daga bo dlẹn do ohù mẹ; bo ma na hanu to ayiha etọn mẹ; ṣigba bo na yise dọ onú he é dọ na yin mo, é na tindo onú depope he é dọ, ²⁴Enẹwutu yẹn dọ hlan mì, Nudepope he mì bio, whenuena mì hodè, mì ni yise do mì mọ yé yi, mì nasọ tindo yé. ²⁵Whenuena mì sọ note to dèhò, mì nọ jonamẹ, eyín mì do núde do medepope go: na Otọ́ mìtọn he tin to olọn me nido jo ylando mìtọn lẹ na mì ga ²⁶Ṣigba eyín mì ma jonamẹ, Oto mìtọn he tin to olọn me ma to na jo ylando mìtọn lẹ na mì.

²⁷Yé sọ yé gọ̀yì Jelusalẹm; le é to zọnlinzin to templi mẹ, ogán yẹwhenọ le tọn, po wekantọ le po, po mẹho lẹ po, wá e de, ²⁸Bo dọ hlan ẹn, dọ, Asẹ té dali wẹ hiẹ to onú helẹ wà gbọn? kavi menu we na asẹ he hie nado wà onú helẹ? ²⁹Jesu sọ gblọn bo dọ hlan yé, dọ, Yẹn na kàn ohó dopo biọ mì ga, na mì ni gblọnna mi, yẹn nasọ dọ asẹ he me yẹn to onu helẹ wà gbọn na mì. ³⁰Baplẹm Johanu tọn ọlon mẹ wẹ é sọn, kavi sọn gbẹtọ de? Mì gblọnna mi. ³¹Yé sọ to linlẹn hẹ yénọzo dọ, Eyín mí na dọ, Son olọn mẹ; é na domo, Be etewutu we mì ma yí i se? ³²Ṣigba be mí na dọ, Son gbẹtọ de; yé dibuna gbẹtọ le: na gbeto lepo hia Johanu na yẹwhegán de nugbo. ³³Yé sọ gblọnna Jesu, dọ, Mí ma yọnẹn gba Jesu sọ dọ hlan yé, dọmọ, Mọwẹ yen ma sọ to na dọ asẹ he mẹ yẹn to onú hele wà gbọn na mì.

¹E SỌ sè hódọ hlan yé to oló lẹ mẹ, dọ, Dawe de do vẹ̃ngle de, bo dopa lédo e, é kùn vẹ̃nhandò, bo dó dohò, bo sọ haya ẹ na glesi lẹ, bo tónwhen yì otò dindẹn de mẹ ²To ojlẹ lo me, é do afànume de hlan glesi le, na é nido moyi sọn glesi lẹ si sinsẹn vẹ̃ngle ton. ³Yé sọ wlé e, bo linu i, bo do e hlan alọvọ ⁴E so vó afànume devo dohlan yé; ewọ we yé so dlẹn zannu do, bo húnuin son ota, yé sọ yí winyan do yàn en jegbonu. ⁵E sọ vó devo de dohlan, yé sọ hù i, po medevo susu po: yé húnu medelẹ, bo hù medeìe. ⁶Ewọ tindo ovisunnu dopo, visunnu yiwanna de, é do e hlan yé gbọn godo, dọmọ, Yé na gbògbena ovisunnu ṣie. ⁷Ṣigba oglesi nele dọ to yéde ṣẹnṣẹn, dọ, Ehe wẹ whédutọ lọ; mì wá, mì gbọ mí ni hù i, na ogú eton ni yín mìtọn. ⁸Yé sọ wlé e, bo hù i, bo zé e dlẹn sọn vẹ̃ngle mẹ. ⁹Enẹwutu be etẹwe Oklunọ vẹ̃ngle tọn na wà? E na wá, bo na hù glesi lẹ lọ súdo, bo nasọ yí vẹ̃ngle na mẹdevo lẹ. ¹⁰Be mì ma ko hia Owé wiwe he,

¹³Yé sọ do omẹ delẹ hlan ẹn sọn Falesi lẹ de, podo sọn Hẹlọdinu lẹ de, nado wlé e to ohó etọn me. ¹⁴Whenuena yé wá, yé dọ hlan ẹn, do, Mẹplọntọ, mìwlẹ yonẹn dọ nugbonọ we hiẹ, mọwẹ hiẹ ma sọ dibuna mẹde; na hie ma hò nukunta mẹde tọn pọn, ṣigba hie to ali Jiwheyẹwhe tọn plónme to nugbo mẹ Be é jẹ na na tòkuẹ Sesali kavi lalá? ¹⁵Mí ni na, kavi mí na blo? Ṣigba ewọ, yinyọn yẹnuwiwà yetọn, é dọ hlan yé, dọmọ, Etẹwutu wẹ mì to whiwhle mi pọn? mì hẹn abọgan-kuẹ dopo wá na mi, na yen ni pọ́n en ¹⁶Yé sọ hẹn ẹn wá. E kanbiọ ye dọmọ, Mẹnu tọn wẹ bosiọ he po winwlan po? Yé sọ dọ hlan ẹn, dọ, Sesali tọn. ¹⁷Jesu sọ dọ hlan yé, dọ, Mì yí onú he yín Sesali tọn hlan Sesali, podọ onú he yín Jiwheyẹwhe tọn hlan Jiwheyẹwhe. Awu sọ ji yé talala do e go.

¹⁸Whenẹnu wẹ Sadusi lẹ wá e de, yé mẹhe dọ fọ́nsọnku ma tin; yé kanbiọ ẹ dọ, ¹⁹mèplọntọ, Moṣe kanwe hlan mí, dọ, Eyín nọvisunnu mẹde tọn kú, bo jo asi etọn dai, bo ma jọ ovi dai, na novisunnu eton nì yí asi etọn, bo jivi do nov isunnu eton tẹnmẹ. ²⁰Be nọvisunnu ṣinawe delẹ ko tin, tintan plan asi de, bo kú ma jo ovi dai. ²¹Awetọ yí i, bo ku, mọwẹ é ma so jo ovi dai: mọkẹdẹ wẹ atònto ga. ²²Ye omẹ ṣinawe lẹpo wẹ mọ en, bo ma sọ jo ovi dai; to yé omẹ pó godo yọnnu lọ kú ga. ²³Be to fọ́n sọnku mẹ, whenuena yé na fọ́n, asi menu tọn wẹ é na yín? na yé omẹ ṣinawe lẹ wẹ yí i do mọasi. ²⁴Jesu sọ gblọn bo dọ hlan yé, dọ, Be é ma yin ehe wutu wẹ mì buali, na mì ma yón Owe wiwe, mì ma sọ yón huhlọn Jiwheyẹwhe ton? ²⁵Na whenuena ye na fọ́n sọn osiọ lẹ mẹ, yé ma na wlealọ, mọwẹ yè ma sọ no na wlealọhẹ; ṣigba yé taidi angẹli he tin to olọn mẹ lẹ ²⁶Ṣigba gbọn osiọ lẹ tọn dali, dọ yé fọ́n; be mìwlẹ ma ko hia to owé Moṣe tọn mẹ, le Jiwheyẹwhe dọ nẹ̃ to ozùn mẹ, domo, Yen wẹ Jiwheyẹwhe Ablaham tọn, Jiwheyẹwhe Isaki tọn, podọ Jiwheyẹwhe Jakobu tọn? ²⁷Ewọ ma yín Jiwheyẹwhe osiọ le tọn gba, adavọ̀ Jiwheyẹwhe ogbónọ lẹ tọn: mìwlẹ; buali talala.

²⁸Dopo to wekantọ lẹ mẹ sọ wá, bo sè yé to nukanbiọ yénọzo podọ mimọ dọ é gblọnna yé dagbe, é kanbiọ ẹ dọ, Be etẹ wẹ tintan to osén lẹpo mẹ? ²⁹Jesu sọ gblọn dọ hlan ẹn, dọ, Tintan osén lẹpo tọn we, Sè, hiẹ Islaeli È, Oklunọ Jiwheyẹwhe mìtọn, Oklunọ dopo wẹ: ³⁰podọ hiẹ na yiwanna Oklunọ Jiwheyẹwhe towe sọn ayiha towe lẹpo mẹ, podọi sọn alindọn towe lẹpo me, podọ sọn niiyònen towe lẹpo mẹ, podọ sọn huhlọn towe lẹpo mẹ. ³¹Awétọ sọ wẹ ehe, Hiẹ na yiwanna komẹnu towe di dewe. Osén he klohú ehele de ma tin. ³²Wekantọ lọ sọ dọ hlan ẹn, dọ, Mẹplọntọ, é yón, hiẹ dọ nugbo; na Jiwheyẹwhe dopo we tin; devo de ma tin, adavo ewọ: ³³Podọ nado yí ayiha lẹpo, po nuyọnen lẹpo po, po gbigbo lẹpo po, po huhlọn lẹpo po, do yiwan nẹ, bo yiwanna kọmẹnu etọn di ede, é hú nunina mimẹ̀ lẹ po avọ́ lẹpo po. ³⁴Whenuena Jesu mọ dọ é dọhó di nuyọnẹnto, édọ? hlan ẹn, dọ, Hiẹ ma dẹn do aholudu Jiwheyẹwhe tọn gba. Enẹgodo mẹde ma so ha kan onú de biọ ẹ ba.

³⁵Le Jesu to meplón to témpli mẹ, é gblọn bo dọmọ, Be etẹwutu wẹ wekantọ lẹ to didọ dọ ovi Davidi tọn wẹ Klisti? ³⁶Na Davidi lọsu dọ to Gbigbọ Wiwe mẹ,

³⁸E sọ dọ hlan ye to núplọnmẹ etọn mẹ, dọ, Mì payi wekantọ lẹ go, he nọ jlo na zinzọnlin to avọ̀ tedona mẹ, bo sọ yiwanna núdọdomẹ to ahi mẹ, ³⁹podọ aisintẹn daho lẹ to sinagogu lẹ mẹ, podọ oten daho le to nududù tẹnmẹ le: ⁴⁰Yé mẹhe dù owhé asusiọsi lẹ tọn súdo, bo sọ nọ hodè dindẹn na goyíyí: ehelẹ nasọ mọ whegbledo daho yí.

⁴¹Jesu sọ sinai sẹpọ́ adọkunnú potin, bo to pinpọ́n le gbẹtọ lẹ to akuẹ dlẹn do adọkunnú potin mẹ do; omẹ susu he yín adọkunnọ lẹ sọ yí susu do e me. ⁴²Asusiọsi wamọnọ de sọ wá fìnẹ, bo yí abọgan-kuẹ pẹvipẹvi awe dlẹn e me, ehe basi dadao abogan-kuẹ fíínflín dopo tọn. ⁴³E sọ ylọ nuplọntọ etọn lẹ do e de, bo dọ hlan ye, dọ, Nugbo wẹ yẹn dọ hlan mì, Asusiọsi wamọnọ he sọ susu dlẹn e mẹ hú omẹ popo he to dindlan do adọkunnú potin mẹ lẹpo: ⁴⁴Na yé omẹ pó wẹ dlẹn do e mẹ sọn adọkun susu yetọn mẹ; ṣigba ewọ sọn matindo etọn me, é yí onú he e tindo lẹpo dlẹn e mẹ, yèdọ gbómẹnu etọn lẹpo.

¹LE é tanjẹgbonu jei sọn tẹmpli mẹ, dopo to nuplọntọ etọn lẹ mẹ dọ hlan ẹn, do, Mẹplọntọ, pon zannu hunkọ po didó he hunkọ po tin to ofi lẹ ²Jesu sọ dọ hlan ẹn, dọ, Hiẹ mọ didó daho helẹ? Zannu dopo ma to na pò bọ yè na jodai do awetọ jibọ yè ma na họ́ liai.

³Le é sọ sinai to osó olivie tọn ji pànnukọn tẹmpli, Pita po Jakobu po, po Johanu po, po Andlé po kanbiọ ẹ to nuglọ dọmọ, ⁴Dọ na mí, whetẹnu wẹ onú helẹ na jọ? Etẹ wẹ na yín ohia whenuena onú helẹ pó tin nado yín hinhen di? ⁵Jesu sọ sè nado to didọ hlan yé, dọmọ, Mì payi, na mẹde klọ mì blo: ⁶Na gbẹtọ susu na wá to oyín ṣie mẹ bo dọ, Yẹn wẹ Klisti; bo nasọ klọ ome susu. ⁷Whenuena mì na sè awhàn linlin podọ zinzin awhàn tọn, obu di mì blo; na onú he hunkọ ma sọgan nọ ma jọ; ṣigba opòdo ma yin dinvie gba. ⁸Na akọta na fọ́n do akọta ji, ahọludu do ahọludu ji: aigba whinwhàn lẹ na tin to ofi delẹ, huvẹ lẹ po magbojẹ lẹ po nasọ tin; ehelẹ wẹ dòdo nukunbia lọ tọn.

⁹Ṣigba mì payi mìde go: na yé na yí mì do alọ tohodọtọ lẹ tọn mẹ; yè na lìnu mì to sinagọgu lẹ mẹ: tògán lẹ po ahọlu lẹ po nukọn wẹ mì na nọte te na yẹn tọn wutu, na okunnu de do yé go. ¹⁰Yè ma sọgan nọ ma dọhó wẹndagbe tọn pó akọta lẹpo ṣẹnṣẹn whé. ¹¹Podọ whenuena yé plan mì jẹ whẹ̀dida mẹ, bo jo mì, mì yín wénhatọ jẹnukọn na núhe mì na dọ tọn blo: ṣigba nudepope yè na na mì to ojlẹ nẹ mẹ, enẹ mì ni dọ: na é ma yín mìwlẹ wẹ to hódọ, adavo Gbigbọ Wiwe. ¹²Nọvisunnu na dè nọvisunnu hia na hùhù, otọ na dè ovi hia; ovi na fọ́n do mẹjitọ yetọn lẹ ji, bo nasọ basi na yè ni hù yé. ¹³Yè na gbẹwanna mì sọn gbẹtọ lẹpo de na oyín ṣie tọn wutu; ṣigba mẹhe sinyẹnlin kaka jẹ opòdo wẹ yè na whlẹngan.

¹⁴Ṣigba whenuena mì mọ osùnú ovọ̀je tọn ṣite to ofi he ewọ ma jẹ (gbọ ewọ he hia ni tunwun), whenẹnu gbọ yé he tin to Judé lẹ ni họ̀nyì osó lẹ kòn ¹⁵Bo sọ gbọ ewọ he tin to hòta jẹte yì ohò mẹ blo, é biọ é mẹ nado yí onú depope sọn ohò etọn mẹ blo. ¹⁶Mẹhe sọ tin to oglè mẹ gòwá nado yí avọ̀ etọn blo. ¹⁷Ṣigba dindọn hlan mẹhe mọhò lẹ, podọ hlan mẹhe to anọ na ovi lẹ to azán nẹlẹ mẹ ¹⁸Na mì ni hodè, dọ e yín avivọ whenu blo ¹⁹Na nukunbibia na tin to azán nẹlẹ gbè, ehe hunkẹ ma ko tin sọn whéwhwhenu aihọn dida tọn, he Jiwheyẹwhe ko da, kaka jẹ ojlẹ he mẹ, hunkọ etọn ma nasọ tin. ²⁰Podọ adavo le Oklunọ sán azán nẹlẹ do ogli, yè ma do whlẹn agbasalan de gán gba; ṣigba na mẹsinsinyan he é dè lẹ tọn wutu, é ko sán azán nẹlẹ do ogli. ²¹Podọ whenẹnu eyín mẹde dọ hlan mì, dọ, Pọ́n, Klisti tin to ofi; kavi, Pọ́n, é tin to finẹ; mì yi i se blo; ²²na Klisti lalonọ lẹ, po yẹwhegán lalonọ lẹ po na fọ́n, bo na yí ohia lẹ po onú jawu po hia, sọmọ eyín é sọgan yín wiwà, nado klọ mẹsinsinyan lẹ lọsu ²³Ṣigba na mì ni payi e go: pọ́n, yẹn ko dọ onú lẹpo na mì dai.

²⁴Ṣigba to azán nẹlẹ mẹ, to nukunbi bia nẹlẹ godo, owhè na dozinvlu, osun ma nasọ na hinhọ́n etọn, ²⁵sunwhlẹvu lẹ na flẹ́, yè nasọ whàn huhlọn he tin to olọn lẹ mẹ. ²⁶Whenẹnu wẹ ye na mọ Ovi gbẹtọ tọn to aslọ lẹ mẹ ja to huhlọn po gigo daho po mẹ. ²⁷Whenẹnu wẹ é na do angẹli etọn lẹ hlan, bo na bé mẹṣinyanṣinyan etọn lẹ sọn jẹhọn enẹ lẹ me dopọ, sọn opòdo aihọn tọn kaka jẹ opodo olọn tọn.

²⁸Dinvie mì plọ́n oló sọn ovotin de, Whenuena alà etọn tin to yòyó, bo sọ dè amà etọn lẹ jegbonu, mì yọnẹn dọ alúnlún whenu sẹpọ́. ²⁹Mọkẹdẹ wẹ mì, whenuena mì na mọ onú hele to jijọ, na mì ni yọnen dọ é sẹpọ́, yèdọ to hòntonu. ³⁰Nugbo wẹ yẹn dọ hlan mì, whẹndo he ma to na juwayì, kaka yè nado hẹn onú lẹpo di. ³¹Olọn po aihọn po na juwayì; ṣigba ohó ṣie ma na juwayì gba. ³²Ṣigba na azán nẹ tọn, kavi ojlẹ nẹ, mẹde ma yọnẹn, lala, yèdọ é ma yín angẹli he tin to olọn mẹ lẹ, kavi Ovi, adavo Otọ́ ³³Mì payi, na mì ni sọ nọ hó mìde, na mì ni sọ nọ hodè: na mì ma yón whenuena ojlẹ lọ yín ³⁴Na é tin taidi whenuena dawe de jẹgbéjizònlin ji jei otò dindẹn de me, bo jo owhé eton dai, bo sọ na asẹ afànumẹ etọn lẹ, bo dè azọ̀n mẹdopodopo tọn nẹ̃, bo sọ na osén alihótọ nado to alihọ̀. ³⁵Enewutu mì ni to alihò; na mì ma yọ́n whenuena owhénọ lọ na wá, eyín tenu wẹ, kavi to zánhòme, kavi koklolise, kavi to afonnu. ³⁶Gigò ajiji é nikã mo mì to amlọndọ ³⁷Onú he yẹn dọ hiàn mì, yẹn dọ hlan omẹ popo, Mì to alihó.

¹TO azán awe godo, hunwhẹ juwayì lọ tọn tin po akla madotón po; ogán yẹwhenọ lẹ tọn po wekantọ lẹ po tò dindin le ye na yí oyè do wlé e do, na yé nido hù i. ²Ṣigba yé dọ, To azán hunwhẹ tọn gbè ma gba, na zingidi nikã tin vlavo to gbẹtọ lẹ mẹ.

³Whenuena e tin to Bẹtani, to owhé Simọni potọnọ tọn gbè, le é jagla to núdùdù kòn, nawe he tindo adingbán alabasta nusisa nadi akuẹgegenu tọn de, wá finẹ, bo sọ gba adingbán lọ, bo sọ to kinkòn ẹn do ota nẹ̃. ⁴Mẹdelẹ sọ tin to ye me bọ homẹ yeton wlu to yéde homẹ, yé sọ dọmọ, Etẹwutu wẹ yè to nusisa he hẹngu? ⁵Na yè do ko sà nusisa he hú abọgan-kuẹ fọdekanweko, bo do nanú wamono lẹ. Yé sọ to hunhlun do é go. ⁶Ṣigba Jesu dọmọ, Mì gbọ sọn e go, etẹwutu wẹ mì to tukla do e? azọ́n dagbe de wẹ e wà do oji e. ⁷Na mi tindo wamọnọ lẹ whepoponu to mì de, whedepopenu mi jlo mì sọgan wà dagbe na ye, ṣigba mì ma tindo yẹn whepoponu gba. ⁸E wá onú he é sọgan; é ko sá misisana na agbasa ṣie jẹnukọnna osiọ didi lọ. ⁹Nugbo wẹ yẹn dọ hlan mì, To fidepope yè na dọyẹwheho wẹndagbe he tọn te to aihọn lẹpo mẹ, yè na dọhó ehe nawe he wà tọn to finẹ ga, na oflin etọn de.

¹⁰Juda Iskaliọti, dopo to omẹ wiawe lẹ mẹ, yì ogán yẹwhenọ lẹ tọn de, nado dè e hia yé. ¹¹Whenuena yé sè, homẹ yetọn hùn, yé sọ dopagbè nado na akuẹ ẹ. E sọ to dindin le é na dè e hia do.

¹²To azán tintan akla madotón tọn gbè, whenuena yé to juwayì hù, nuplọntọ etọn le dọ hlan ẹn, dọ, Fie wẹ hiẹ jlo na mi ni wleawu dai na we do, na hiẹ nido dù juwayì lọ? ¹³E sọ do omẹ awe to nuplọntọ etọn lẹ mẹ hlan, bo dọ hlan yé, dọ, Mì yi otò daho mẹ, dawẹ he hẹn ozẹ́n osìn tọn de na pé mì; mì hodo e. ¹⁴Fidepope é biọ, na mì ni dọ hlan owhenọ lọ, dọ, Mẹplọntọ dọmọ, Fie wẹ abò núdùdù tọn lọ te, fie yẹn na dù juwayì te po nuplọntọ ṣie lẹ po? ¹⁵E nasọ do àbo daho de hia mì to aga, he yè jlado, he yè wleawu etọn dai: finẹ wẹ mi ni wleawu dai na mí do. ¹⁶Nuplọntọ etọn lẹ sọ tọn jẹgbonu yì, bo wá oto daho mẹ, bo sọ mọ kẹdẹdile é dọ na yé do; yé sọ wleawu juwayì tọn dai.

¹⁷To tenu, é wá po omẹ wiawe lẹ po. ¹⁸Le yé jagla, bo to núdu, Jesu domọ, Nugbo wẹ yẹn dọ hlan mì, Dopo to mì mẹhe to núdù hẹ mi lẹ me na dè mi hia ¹⁹Ye sọ sẹ́ awúbla talala, bo sọ ṣẹ̀ nado to didọ hian ẹn dopodopo dọ, Yẹn wẹ la? awetọ sọ dọmọ, Yẹn wẹ la? ²⁰E sọ gblọn bo dọ hlan yé, dọ, Dopo to omẹ wiawe lẹ mẹ he to alọ do agbán mẹ hẹ mi we. ²¹Ovi gbẹtọ tọn jei nugbo dile yè kanwe gbọn etọn dali do; ṣigba dindọn hlan dawe nẹ alọ mẹhe tọn mẹ yè dè Ovi gbẹtọ tọn hia gbọn! é do pónte na dawe lọ, eyín yè ma ji i.

²²Le yé to núdù, Jesu yí akla, bo dona, bo sọ kán ẹn, bo yí na yé, bo dọmọ, Mì yí, na mì ni dù: ehe wẹ agbasa ṣie. ²³E sọ yí kọfo de, whenuena é dopé, é yí na yé; ye omẹ pó sọ nù sọn é mẹ. ²⁴E dọ hlan yé, dọ, Ehe wẹ ohùn ṣie alẹ́nu yoyó tọn, he yè kòn dai na omẹ susu. ²⁵Nugbo wẹ yẹn dọ hlan mì, Yẹn ma nasọ nù sọn sinsẹ́n ovẹ̃n tọn mẹ ba, kaka jẹ azán lọ gbè whenuena yẹn na nù in yọ́yọ́ to ahọludu Jiwheyẹwhe tọn mẹ.

²⁶Whenuena yé ji ohàn dopo, yé tómegbonu yì osó olivie tọn ji.

²⁷Jesu sọ do hlan yé, dọmọ, Mì omẹ pó wẹ yè na hẹn dahli to ogo e to ozán he mẹ: na yè kanwe dọ, Yẹn na linu lẹngbọhọtọ, yè nasọ gbà lẹngbọ lẹ kija ²⁸Ṣigba godo whenuena yẹn fọ́n, yẹn na jẹnukọnna mì biọ Galili. ²⁹Ṣigba Pita dọ hlan ẹn dọmọ, Le yè na hẹn mẹpo dahli, gãnṣo ma wẹ yẹn gba. ³⁰Jesu sọ dọ hlan ẹn, dọ, Nugbo wẹ yẹn dọ hlan we, To egbé, yèdọ to ozán he mẹ, whẹpo koklo na dose whlawe, hiẹ na món mi whlatòn. ³¹Ṣigba é do vivẹvivẹ talala, dọ, Eyin yẹn ma nanọma kú hẹ we, yẹn ma na món we gba. Mọkẹdẹ wẹ yé omẹ pó dọ ga.

³²Yé sọ wá ofi he yè nọ ylọ Gẹtsemani; é sọ dọ hlan nuplọntọ etọn lẹ, dọ, Mì sinai to ofi whenuena yẹn to dèho. ³³E sọ yí Pita, po Jakobu po, po Johanu po do e de, awu so sè jiji i talala, bo sọ to tuklaje badabada: ³⁴e sọ dọ, hlan yé, dọ, Alindọn ṣie to awúbla talala kaka jẹ okú: mì nọte to ofi, na mì ni to alihó ³⁵E sọ sẹ̀ yì nukọn pẹvide, bo jẹklo do aigba ji, bo hodẹ́ dọ, eyín é yín wiwà, ojlẹ lọ do juwayì sọn dè. ³⁶E sọ dọmọ, Abba, Otọ́, onú lẹpo wẹ wiwà na we: dè kọfo he sọn oji e: ṣigba é ma yín ehe yẹn jlo gba, adavo ehe hiẹ jlo. ³⁷E wá, bo mọ yé to amlọndọ, é sọ dọ hlan Pita, dọmọ, Simọni, hiẹ to amlọndọ? Be hiẹ ma sọgan hóali hẹ mi to ojlẹ dopo mẹ gba? ³⁸MÌ nọ hóali, na mì ni sọ nọ hodè na mì ma nado biọ whlepón mẹ. Nugbo wẹ gbigbọ yín ojlonọ, ṣigba agbása yín madogannọ ³⁹E sọ vó yì, bo sọ hodè, bo to ohó dopo lọ dọ ⁴⁰Whenuena é sọ gò wá, é sọ mọ yé to amlọndọ, (na nukun yetọn pèn) mọwẹ yé ma sọ yón ogbè he yé na gblọn nẹ. ⁴¹E sọ wá whlatòntọ, bo dọ hlan yé, dọ, Mì damlọn zọnmí lò, na mì ni sọ gbọjẹ; é jẹ e do, ojlẹ lọ wá; pọ́n, yè dè Ovi gbẹtọ tọn hia do alọ ylandonọ lẹ tọn mẹ. ⁴²Mì fọ́n, mì gbọ mí ni to yìyì; pọ́n, mẹhe dè mi hia sẹpọ́ fi.

⁴³To afọdoponẹji le é to hódọ, Juda, dopo to ome wiawe lẹ mẹ, wá, po agúndaho de po to e de po ohi lẹ po, po aglọpo lẹ po sọn ogán yẹwhenọ lẹ tọn, po wekantọ lẹ po, po mẹho lẹ po de. ⁴⁴Dinvie mẹhe sọ dè e hia ko na ohia yé, dọ, Mẹdepope yẹn na donùnùgona, enẹ wẹ ewọ: mì ni wlé e, bo dòn ẹn yì blẹo. ⁴⁵Whenuena é wá, é yì e de to afọdoponẹji, bo dọmọ, Mẹplọntọ, Mẹplọ́ntọ, bo donùnùgo nẹ̃. ⁴⁶Yé sọ do alọ é go, bo wlé e ⁴⁷Ṣigba omẹ dopo de to mẹhe nọte to finẹ lẹ mẹ sún ohi etọn, bo li afànumẹ yẹwhenọ daho tọn de, bo sán otọ́ etọn dlangbe. ⁴⁸Jesu sọ gblọn bo dọ hlan yé, dọ, Be mìwlẹ tón wá di do ajotọ de ji, po ohi lẹ po, po aglọpo lẹ po nado wlé mi? ⁴⁹Egbésọ wẹ yẹn ko tin to tẹmpli mẹ po mì po, bo nọ to mì plón, mì ma wlé mi gba: ṣigba yè ma sọgan nọ ma hẹn Owé wiwe di gba. ⁵⁰Yé omẹ pó sọ jo e dai, bo hòn yì.

⁵¹Ovidẹpemẹ de sọ to hihodo e, he yí alavọ̀ do ṣinyọn omé agbasa etọn tọn; yé hẹn é go; ⁵²e sọ jo alavọ̀ lọ dai, bo hón yì sọn yé de omémẹ.

⁵³Yé sọ hẹn Jesu yì yẹwhenọ daho de; ogán yẹwhenọ tọn lẹpo, po mẹho lẹ po, po wekantọ lẹ po sọ pli do e de ⁵⁴Pita sọ to hihodo e to aganu, yèdọ yì awánu yẹwhenọ daho tọn: bo sọ sinai to lizọnyítọ lẹ de, bo to miyọnhú ⁵⁵Ogán yewhenọ lẹ tọn, po tohodotọ lẹpo po sọ to kunnude din do Jesu go nado hù i; yé ma sọ mọ de gba. ⁵⁶Na omẹ susu wẹ dekunnu lalo do e go, ṣigba kunnude yetọn ma plidopọ gba. ⁵⁷Omẹ delẹ fọ́n, bo to kunnu lalo dè do e go, dọmọ, ⁵⁸Mìwlẹ sè, é dọmọ, Yẹn na họ́ fiwiwe he yè yí alọ do basi liai, to azán atọ̀n mẹ yẹn nasọ dó devo he yè ma yí alọ do basi. ⁵⁹To ehe lọ mẹ ga, ogbè yetọn ma nọdopo. ⁶⁰Yẹwhenọ daho sọ fọ́n site to ṣẹnṣẹn, bo kanbiọ Jesu domọ, Hiẹ ma gblọn núde? Etẹwẹ ehe mehe lẹ do to kunnude do go we he? ⁶¹Ṣigba é nabọe, é ma sọ gblọn núde. Yẹwhenọ daho sọ vó kanse e, bo dọ hlan ẹn, do, Be hiẹ wẹ Klisti lọ, Ovi Donanọ lọ tọn? ⁶²Jesu sọ dọmọ, Yẹn wẹ: mì nasọ mọ Ovi gbẹtọ tọn sinai to adusilọ huhlọn tọn ji, podọ ja po aslọ olọn tọn lẹ po. ⁶³Whenẹnu wẹ yẹwhenọ daho tlẹn avọ̀ etọn lẹ, bo sọ dọmọ, Kunnudetọ tẹwẹ mì sọ to dindin ba? ⁶⁴Mì ko sè nùzinzan lọ: etẹwẹ mì lẹn? Yé omẹ pó sọ gblewhẹdo e nado yín mẹhe jẹ na okú. ⁶⁵Omẹ delẹ sọ sẹ̀ tántún do ogo nẹ̃, bo sọ bla nukunmẹ etọn, bo to akotokún li i, bo sọ to didọ hlan ẹn, dọ, Dọdọdai: lizọnyítọ lẹ sọ to alọpahomẹ yeton yí do to tómẹhò nẹ̃.

⁶⁶Le Pita sọ tin tó odò to awánu, dopo to awhli yẹwhenọ daho tọn lẹ mẹ wá finẹ: ⁶⁷mimọ Pita to miyọnhú, é pọ́n ẹn, bo sọ dọmọ, Hiẹ ga ko tin to Jesu Nazalẹti tọn de ⁶⁸Ṣigba é món, dọmọ, Etẹ dọ hiẹ te, yẹn ma tunwun onú he hiẹ to didọ gba. E sọ tón jẹ hònnuwá mẹ; koklo sọ dose. ⁶⁹Awhli de sọ vó mọ ẹn, bo sẹ̀ didọ hlan mẹhe nọte to finẹ lẹ, dọ, Dopo to yé mẹ wẹ ehe. ⁷⁰E sọ vó món. E sọ dẹn vude, yé mẹhe nọte to finẹ lẹ dọ hlan Pita, dọ, Nugbo dopo to yé mẹ wẹ hiẹ: na Galilitọ wẹ hiẹ, ogbè towe di mọ. ⁷¹Ṣigba é ṣẹ̀ nado to dẹ̀hodo, bo sọ sẹ̀ whìwhlé, dọ, Yẹn ma yón dawe he mì to didọ gba ⁷²Koklo sọ dose whlawetọ. Pita sọ flin ohó he Jesu dọ hlan ẹn, dọ, Whẹpo koklo na dose whlawe hiẹ na món mi whlatòn. Whenuena é lẹn ẹn é sè avivi.

¹TO afọdoponẹji to afọnnu, ogán yewhenọ tọn lẹ po mẹho le po po wekantọ lẹ po, po tohodọtọ lẹpopete po, kana; yiha de, bo bla Jesu, bo hen ẹn tónyì, bo jo é hlan Pilati. ²Pilati sọ kanbiọ ẹ dọ, Be hiẹ we Ahọlu Ju lẹ tọn? E sọ gblọn bo dọ hlan ẹn, dọ, Hiẹ dọ. ³Ogán yẹwhenọ tọn lẹ sọ slẹ ẹ to onú susu mẹ. ⁴Pilati sọ vó kanbiọ ẹ dọ, Hiẹ ma gblọn núde? Pọ́n onú susu he yé sislẹ We na lẹ. ⁵Ṣigba Jesu ma sọ gblọn nudepope ba: sọmọ bọ awuji Pilati.

⁶To hunwhẹ lo me, é nọ jo ogántọ dopo dai na ye, medepope he yé biọ. ⁷Mẹde sọ tin he yè nọ ylọ dọ Balabas, mẹhe yè ko yi do ogàn me po mẹhe ṣiatẹ po e po lẹ po, yé mehe hùme to ate lọ mẹ lẹ. ⁸Gbẹtọ le sọ sè awhádo ogbè lelé, ye to bibio ni wa na yé dile é ko nọ wà na yé do dai ⁹Ṣigba Pilati gblọnna yé dọ, Mi jlo dọ yẹn ni jo Ahọlu Ju lẹ tọn dai na mì? ¹⁰Na é mọhlan dọ na nuvẹun We ogán yẹwhenọ lẹ tọn ko do jo e ¹¹Ṣigba ogán yẹwhenọ tón le ko fọnadan agùndaho lọ dọ, é ni kúku jo Balabas dai na yé. ¹²Pilati so gblọn bo vó dọ hlan yé, dọmọ, Be etẹwẹ mì jlo yẹn ni wà lò do mẹhe mì ylọ Ahọlu Ju lẹ tọn? ¹³Yé sọ vó awhádo dọ, Whè e do satin go. ¹⁴Whenẹnu wẹ Pilati dọ hlan yé, domọ, Etẹwutu wẹ, oylan tẹwẹ é wà? Té sọ dawhá humọ talala, dọmọ, Whè e do satin go. ¹⁵Pilati sọ jlo nado napekọ agùndaho lọ, é jo Balabas dai na yé, whenuena é ko hò Jesu, é jo e nado yín whiwhe do satin go.

¹⁶Awhanvipẹ lẹ sọ dòn ẹn jẹgbonu yì gbángan he yè nọ ylọ Pletọlia mẹ; yé sọ ylọ awhanpa lepo plidopọ. ¹⁷Yé yí avọ̀ ogefunwunmẹ ṣinyọn nẹ̃, bo lòn ojẹgbakun owùn tọn, bo yí ṣinyọn ota nẹ, ¹⁸yé sọ sè nudọdo e, dọ, Oyínjla, Ahọlu Ju lẹ ton ¹⁹Yé sọ yí ofán li ota nẹ, bo túntán do ogo nẹ, bo sọ jẹklo bo to taliai nẹ, ²⁰Whenuena yé vlẹ ẹ ko, yé dè avọ̀ ogefunwunmẹ lọ sọn e go, bo sọ yí avọ̀ etọn do nẹ̃, bo dòn ẹn jẹgbonu nado whè e do satin go.

²¹Yé sọ yi huhlọn do wlé dawe de, Simọni Silene tọn, mẹhe gò sọn gbeta bo juwá jei, otọ́ Alẹksandlé po Lufu po tọn, nado hẹn satin etọn. ²²Yé sọ hen ẹn wá ofi he yè nọ ylọ Gọlgọta, tadena ehe tọn yin, Otẹn otaka tọn. ²³Ye sọ yi vẹnhan he yè flusọ po zuya po na ẹn nù: ṣigba é ma yí i gba. ²⁴Whenuena yé whè e do satin go, yé má avọ̀ etọn, bo sọ devò do yé ji, na ehe omẹ dopodopo na yí. ²⁵To ogàn atọ̀ntọ okle tọn mẹ wẹ, yé whè e do satin go. ²⁶Yè sọ wlan winwlan meslehó etọn tọn do aga, AHỌLU JU LẸ TỌN. ²⁷Yé sọ whè ajotọ awe do satin go po e po, dopo to adusi mẹ, awetọ to amiyọn mẹ. ²⁸Owé wiwe sọ di, ehe domo, Yè hia ẹ dogó ylandonọ lẹ. ²⁹Mehe to jujujei lẹ sọ to vivlẹ ẹ ko, bo sọ to ota yetọn mìmi, dọmọ, So Hiẹ mẹhe hó fiwiwe lọ, bo sọ dó e to azán atọ̀n mẹ, ³⁰whlẹn dewè gán, bo jẹte wá sọn satin go. ³¹Mọkẹdẹ wẹ ogán yẹwhenọ tọn lẹ to vivlẹ ẹ ko to yéde ṣẹnṣẹn ga, po wekantọ lẹ po, dọmọ, E whlẹn mẹdevo le gán, é ma sọgan whlèn ede gán. ³²Gbọ Klisti Ahọlu Islaeli tọn ni jete sọn satin go wá dinvie, na mí nido mọ bo yise Mẹhe yè whè do satin go po e po lẹ sọ to vivlẹ ẹ ko.

³³Whenuena é zùn ogàn sidopotọ mẹ, zinvlu do ṣinyọn aigba lẹpo ji, kaka jẹ ogàn sinẹnẹtọ me. ³⁴To ogàn sinẹnẹtọ mẹ, Jesu yí ogbè lélé do dawhá dọ, Enoi, ELOI, LAMA SABAKTANI? ehe tadena etọn yín, Jiwheyẹwhe ṣie, Jiwheyẹwhe ṣie, etẹwutu hiẹ gbé mi dai? ³⁵Omẹ delẹ to mehe site to finẹ lẹ mẹ, whenuena yé sè ehe, yé dọmọ, Pọ́n, é to Eli ylọ. ³⁶Omẹ dopo sọ họnwezun, bo yí ovẹ̃nvẹsìn do gó hùmẹtekan de, bo yí i do ófán ji, bo yi na ẹn nù, bo dọmọ, Mì gbọ sọn é go; na mí ni pọ́n, eyín Eli na wá nado hen ẹn jẹte. ³⁷Jesu sọ do ogbè lélé de, bo sọ jo gbigbọ etọn do. ³⁸Avò yè do gbòabò to fiwiwe lọ me tlẹn do awe sọn aga jẹ odò. ³⁹Whenuena mẹkanwekowhangán he site pànnukọn ẹn mọ bọ é dawhá dole, bo sọ jo gbigbọ etọn dọ, é dọmọ, Nugbo, Ovi Jiwheyẹwhe tọn wẹ dawe he. ⁴⁰Yọnnu delẹ ga sọ to nupón to aganu: yé mẹhe mẹ Malia Magdaleni, po Malia onọ Jakobu pẹvi tọn po po Jose po tọn, po Salomi po te; ⁴¹(mẹhe ga, whenuena é tin to Galili hodo e, bo to lizọnyí nẹ̃;) podọ yọnnu susu devo he hẹji po e po yì Jelusalẹm lẹ.

⁴²Dinvie whenuena tenu do, na é yín azán awuwle tọn wutu, ene wẹ azán he jẹnukọnna azán gbọjẹ tọn, ⁴³Josẹfu Alimate tọn, tòhodọtọ yeyinọ de, mẹhe to nukundo ahọludu Jiwheyẹwhe tọn, wá, bo biọ owhé gbè yì Pilati de madibu, bo biọ osiọ Jesu tọn. ⁴⁴Áwu sọ ji Pilati gbahúgbahú, eyín é ko kú wẹ: é sọ ylọ mẹkanwekowhangán bo kanse e, eyín é ko kú to whenu dindẹn. ⁴⁵Whenuena é yọnẹn sọn mẹkanwekowhangán de, é jo osiọ lọ na Josẹfu. ⁴⁶E sọ hò alà dagbedagbe, bo zé e jẹte, bo yí alà do bla ẹ, bo sọ tó ẹ do oyòwhó he yè kùn do osé glọ mẹ, bo sọ bli zannu de yì ohòn oyòwhé lọ tọn ji. ⁴⁷Malia Magdaleni, po Malia onọ Jose tọn po sọ mọ ofi he yè tẹ́ ẹ do.

¹WHENUENA azán gbọjẹ tọn juwayì, Malia Magdaleni, po Malia onọ Jakobu tọn po, po Salomi po, hò nuwhẹnkun vivi na yé nido wá do samisisa nẹ́. ²To afọnnu fliflimẹ azán tintan awlẹn tọn gbè, yé wá oyòwhé kòn, whenuena owhè sẹ́ zizẹ̀. ³Yé sọ to didọ to yéde ṣẹnṣẹn, dọmọ, Mẹnu wẹ na bli zannu sọn ohòn oyòwhé tọn go sẹ́ na mí? ⁴Whenuena yé sọ pọ́n, yé mọ yè ko bli zannu lọ sé: na é klo gbahú wutu. ⁵Whenuena yé biọ oyọwhé lọ mẹ, yé mọ ovisunnu de sinai to adusi mẹ, he yè ṣinyọn avọ̀ tedona wéwé de na, obu sọ di yé: ⁶é sọ dọ hlan yé, dọ, Mì dibu blo: mì to Jesu Nazaleti tọn he yè whè do satin go din: é ko fọ́n; é ma tin to ofi gba; mì pọ́n ofi he yé tó ẹ do ⁷Ṣigba mì yì, bo dọ hlan nuplọntọ etọn lẹ, po Pita po, dọ é jẹnukọnna mi jei Galili: finẹ wẹ mì na mọ ẹn te, dole é dọ na mì do. ⁸Yé sọ yawu tónjẹgbonu yi, bo họ̀nyì sọn oyòwhé lọ kòn: na sisọsisọ, po awujiji po wá yé ji: mọwẹ yé ma dọ onú de na mẹdepope: na obu di yé.

⁹Whenuena Jesu fọ́n to afọnnufù to azán tintán awlen tọn gbè, é jenukọn sọawúhia Malia Magdaleni, mehe me é yàn aovi ṣinawe jẹgbonu sọn. ¹⁰E yì bo dọ na mẹhe tin to e de le, le yé to awúbla bo sọ to avivi. ¹¹Whenuena yé sè dọ é tin to ogbẹ̀, podọ yè ko mọ ẹn to e de, yé ma yise gba.

¹²To onú hele godo é sọawúhia awe devo to yé mẹ to ohia devo mẹ, le yé to zọnlinzin jei gbeta. ¹³Yé sọ yì bo dọ ẹ hlan omẹ he pò lẹ, mọwẹ ye ma sọ yí yé se ga.

¹⁴To enegodo é sọ sọawúhia omẹ widopo lẹ, le yé jagla to núdùdù kọ̀n, é sọ wọhẹ yé na mayìse yetọn, po sinsinyẹn ayiha yetọn tọn po wutu, na yé ma yí mẹhe mọ en to ehegodo é fọ́n le se wutu. ¹⁵E sọ dọ hlan yé, dọmọ Mì yì aihọn lẹpo me, mì ni to yẹwheho wendagbe tọn dọ hlan gbẹtọ lepo. ¹⁶Mẹhe yise bọ yè baptizi i, yè na whlẹn ẹn gán; ṣigba mẹhe ma yise wẹ yè na gblewhẹdo. ¹⁷Ohia helẹ wẹ na sọ nọ hodo mẹhe yise lẹ: To oyín ṣie me yé na nọ yàn aovi lẹ jegbonu; yé na nọ yí ogbè yọ́yọ́ lẹ do dọhó; ¹⁸yé na zé odàn lẹ do alọ me; eyín yé sọ nù onú he doadi de, é ma na gbleawu na yé; yé na zé alọ do azòntọ ji, yé nasọ je gángán.

¹⁹Mọwẹ whenuena Oklunọ Jesu dọhó hẹ yé godo, yè yí i sọ yì aga biọ olon mẹ, é sọ sinai to adusilọ Jiwheyẹwhe tọn mẹ; ²⁰Yé sọ tọ́njegbonu yì, bo to yẹwheho dọ to ofi popo, Oklunọ sọ to àzónwà hẹ yé, bo sọ to ohó lọ hẹn lódo ga gbọn ohia he to hihodo lẹ dali. Nlẹẹ.