Malaki

¹OZÓNJI ohó OKLUNỌ tọn tọn hlan Islaeli gbọn lizọnyitọ ṣie dali.

²Yẹn ko yiwanna mì, wẹ OKLUNỌ dọ, Gãnṣo mìwlẹ to didọmọ, Eté mẹ wẹ hiẹ ko yiwanna mí te? Nọ visunnu Jakob tọn ma wẹ Esau? wẹ OKLUNỌ dọ: gãnṣo yẹn ko yiwanna Jakob; ³ṣigba yẹn gbẹwanna Esau, bo sọ hen osé etọn lẹ zùn ojẹvó de, bo sọ yí ogudùnú etọn jó hlan ogbévún zùngbomẹ tọn lẹ. ⁴Le Edọmi tlẹ dọmọ, Yè hẹn mí jẹhen, gãnṣo mìwlẹ na lẹ́gọ̀ bo sọ do otẹn gbọgbe lẹ; le wẹ OKLUNỌ awhànpa lẹ tọn dọ, Yé na do, ṣigba yẹn na bli liai: gbẹtọ lẹ bo na sọ nọ ylọ yé dọ, Agbègbè kanyinylan tọn, podọ Gbẹtọ mehe go OKLUNỌ tindo homẹgble do kakadoi lẹ. ⁵Podọ nukun mìtọn lẹ na mọ, mìwlẹ na sọ dọmọ, Kiklo wẹ OKLUNỌ to agbègbè Islaeli tọn ji.

⁶Visunnu de nọ gbogbéna otọ́ etọn, podọ devi de mẹmẹnu etọn: whenẹnu eyín yẹn yín otọ́ de, fie wẹ gbégbona ṣie te? podọ eyín yẹn yín mẹmẹnu de, fie wẹ budìsi ṣie te? wẹ OKLUNỌ awhànpa lẹ tọn dọ hlan mì, Mì yẹwhenọ he to oyín ṣie vlẹ lẹ emi Podọ mìwlẹ sọ to didọmọ, Etẹ́ mẹ wẹ míwlẹ ko to oyín towe vlẹ te? ⁷Mìwlẹ to akla sùdego yí do to avọ́ nunina na to agbà ṣie ji Mìwlẹ bo sọ to didọmọ, Etẹ́ mẹ wẹ mìwlẹ to sùdogona we te? To ehe mẹ mìwlẹ dọmọ, Ovlẹnú wẹ tafo OKLUNỌ tọn. ⁸Podọ whenuena míwlẹ yí nukuntọ́nnọ do na avọ́ nunina na avọ́sánnú, é ma yín oylan de podọ whenuena míwlẹ yí sékúnọ po lànmẹzọ̀nnọ po do na avọ́ nunina, é ma yín oylan de Yí i dinvie hlan otògán towe; ewọ na yín homẹhùnnọ to de we? kavi ewọ na kẹalọyí we di gbẹtọ, wẹ OKLUNỌ awhànpa lẹ tọn dọ. ⁹Podọ dinvie, yẹn vẹ́ mì, mì vẹ̀vẹ̀na nukundágbe Jiwheyẹwhe tọn, na ewọ nido yín ojọmiọnnọ hlan mi: ehe ko tin sọn alọ mìtọn mẹ: be ewọ na kẹalọyi depope na mìwlẹ tọn wutu? wẹ OKLUNỌ awhànpa lẹ tọn dọ. ¹⁰Ṣó dọ omẹ de do tin to mì ṣẹnṣẹn finẹ he do sú ohọn lẹ, na mì ma na do hẹn miyọn ji to agbà ṣie ji to ovọ́ mẹ gba Yẹn ma tindo homẹhùn de to mì mẹ gba, wẹ OKLUNỌ awhànpa lẹ tọn dọ, mọ yẹn ma na sọ kẹalọyí avọ́ nunina de to alọ mìtọn mẹ gba. ¹¹Na sọn zizẹtẹn owhè tọn yèdọ jẹ tejijẹ yì dopolọ tọn wẹ oyín ṣie na yín kiklo to Kosi lẹ ṣẹnṣẹn; podọ to otẹn lẹpo mẹ wẹ yè to nuyọnwan po avósánnú wiwe de po do to avọ́ nunina na te: na oyín ṣie na klo to Kosi lọ ṣẹnṣẹn, wẹ OKLUNỌ awhànpa lẹ tọn dọ. ¹²Ṣigba mìwlẹ flu i, to ehe mẹ mì dọmọ, Osùnọ wẹ tafo OKLUNỌ tọn, po osinsẹ́n etọn po, yèdọ núdùdù etọn, ovlẹnú wẹ. ¹³Míwlẹ sọ dọ ga dọ, Dayi e go, agbọ́pénú de tẹ́ é yín mì bo ko sọ yẹnawọnlin do e, wẹ OKLUNỌ awhànpa lẹ tọn dọ; podọ mìwlẹ ko sọ hẹn ene he yè bẹ́ gbọn huhlọnnú dali wá, po sẹ́kúnọ lọ po, po lànmẹzònnọ lọ po; le wẹ míwlẹ hẹn avónúnina lọ wá do: bọ́ yẹn do kẹalọyi ehe son alọ mìtọn mẹ? wẹ OKLUNỌ dọ. ¹⁴Ṣigba dèhodonọ wẹ mẹklọtọ lọ ni yín, he tindo asú de to lẹngbọpa etọn mẹ, bo dopagbè, bo sọ yí onú azọ̀ntọ de do sánvọ hlan OKLUNỌ: na ahọlu daho de wẹ yẹn, wẹ OKLUNỌ awhànpa lẹ tọn dọ, podọ osinọ wẹ oyín ṣie to Kosi lẹ mẹ.

¹PODỌ dinvie, Mì yẹwhenọ emi, Mì wẹ gbèdide he tin na. ²Eyín mìwlẹ ma na sè, podọ eyín mìwlẹ ma na sọ ze e do ayiha mẹ, nado nọ na gigo hlan oyín ṣie, wẹ OKLUNỌ awhànpa lẹ tọn dọ, whenẹnu wẹ yẹn na do dẹ́hodo lọ hlan mì ji, podọ yẹn na sọ hodẹ́do dona mìtọn lẹ: mọwẹ, yẹn ko hodẹdo yé dote na mìwlẹ ma zé e do ayiha mẹ wutu. ³Dayi e go, Yẹn na dowhẹ́ awa mìtọn, bo sọ dlan omí do nukunmẹ mìtọn lẹ ji, yèdọ omí hùnwhẹ́ mìtọn lẹ tọn; yè na sọ bẹ́ mì yì jẹ e de. ⁴Mìwlẹ bo na sọ yọnẹn dọ yẹn ko do gbedide he hlan mì, na alẹ̀nù ṣie nido tin to Levi de, wẹ OKLUNỌ awhànpa lẹ tọn dọ ⁵Alẹ̀nù ṣie sọn ogbẹ́ po jijọho po mẹ tin to e de; podọ yẹn jó yé hlan ẹn na ewọ nido nọ dibusi, podọ ewọ sọ nọ dibusi mi, bo nọte to osi oyín ṣie tọn mẹ. ⁶Osẹ́n nugbo tọn tin to onù etọn mẹ, podọ yè ma mọ mawàdódó de to nùflo etọn lẹ mẹ gba: ewọ to zọnlinzin hẹ mi to jijọho po tenọgli po mẹ, bo sọ diọ mẹsusu sẹ́ sọn oylanwà mẹ. ⁷Na nùflo yẹwhenọ tọn lẹ do nọ yìn oyọnẹn, podọ yé do sọ nọ din osén yì to onù etọn mẹ: na lizọnyítọ OKLUNỌ awhànpa lẹ tọn wẹ ewọ. ⁸Ṣigba yè lẹ́ mìwlẹ doapadopo sọn aliho lọ mẹ; míwlẹ ko hẹn mẹsusu nado to sàmù to osẹ́n lọ mẹ; mì ko hẹn alẹ̀nù Levi tọn gble, wẹ OKLUNỌ awhànpa lẹ tọn dọ ⁹Enẹwutu wẹ yẹn ga ko do hẹn mì zùn ovlẹnú podọ mẹvọ́nu to gbẹtọ lẹpo nukọn, kẹdẹdi le mìwlẹ ma ko yin aliho ṣie lẹ do, ṣigba ko tindo hihopọn gbẹtọ lẹ tọn to osẹ́n lọ mẹ.

¹⁰Otọ́ dopo ma wẹ mí mẹpo tindo Jiwheyẹwhe dopo ma wẹ ko dá mí? etẹwutu wẹ mìwlẹ yí odanú do to zinzán omẹ dopodopo to nọvisunnu etọn ji, hinhẹn alẹ̀nù otọ́ mítọn lẹ tọn flu? ¹¹Juda ko yí odanú do zán, podọ yè sọ wà osùnú de to Islaeli mẹ podọ to Jelusalẹm mẹ; na Juda ko flu fiwiwe OKLUNỌ tọn lọ he é yiwanna, bo ko sọ wlealọhẹ viyọnnu yẹwhe jonọ de tọn lọ. ¹²OKLUNỌ na sán ewọ he fọ́n po ewọ he gblọn po sẹ́ jẹ dawe he wà ehe ji sọn gohọ̀ Jakob tọn lẹ mẹ, po ewọ hẹ na avọ̀ nunina de hlan OKLUNỌ awhànpa lẹ tọn po. ¹³Podọ ehe wẹ mì sọ wà whlawetọ; mìwlẹ yi odasìn lẹ do ṣinyọn agbà OKLUNỌ tọn, po ayi po, podọ po hùnwinwẹn po, sọmọ bọ ewọ ma sọ hò avọ́ nunina lọ pọ́n ba, mọ ma sọ yi ojlo dagbe do yí i to alọ mìtọn mẹ gba. ¹⁴Gãnṣo míwlẹ dọmọ, Etẹwutu wẹ? Na OKLUNỌ ko yin kunnudetọ to hiẹ po asi vúwhenu towe tọn po ṣẹnṣẹn wutu, mẹhe go hiẹ ko yi odanú do zán do, le ewọ tlẹ yín ogbẹ́ towe sọ, podọ asi alẹ̀nù towe tọn. ¹⁵Bé ewọ ma basi dopo, le ewọ tlẹ tindo pipòtọ gbigbọ lọ tọn sọ. Podọ etẹwutu wẹ dopo? Ewọ to okún di Jiwheyẹwhe tọn de dinyì. Enẹwutu mì yi ayipa hlan gbigbọ mìtọn, bo sọ dike mẹde yí odanú do zán do asi vúwhenu etọn tọn go blo. ¹⁶Na ewọ gbẹwanna gbigbẹ́dai, wẹ OKLUNỌ dọ, Jiwheyẹwhe Islaeli tọn, po ewọ he yi huhlọnnú do ṣinyọn awugbo etọn po, wẹ OKLUNỌ awhànpa lẹ tọn dọ: enẹwutu mì yí ayipa hlan gbigbọ mìtọn, dọ mì yí odanú do zán blo.

¹⁷Mìwlẹ ko yí ohó mìtọn lẹ do hẹnagbọpé OKLUNỌ. Gãnṣo mìwlẹ dọmọ Eté mẹ wẹ mìwlẹ hẹnagbọpé e te? To ehe mẹ mìwlẹ dọmọ, Omẹ he wà oylan lẹ dopodopo dagbe wẹ to nukun OKLUNỌ tọn mẹ, podọ ewọ sọ yín homẹvivinọ to yé mẹ; kavi fie wẹ Jiwheyẹwhe whẹ̀dida tọn lọ te?

¹DAYI e go, Yẹn do liznyítọ ṣie hlan, ewọ bo na sọ wleawuna aliho lọ to nukọn ṣie: podọ OKLUNỌ, mẹhe mì to dindinyì, na wá jẹ tẹmpli etọn mẹ ajiji; yèdọ wẹzangun alẹ́nù tọn lọ, mẹhe mẹ họmẹvivi mì te, dayi e go, é ja, wẹ OKLUNỌ awhànpa lẹ tọn dọ. ²Ṣigba mẹnu wẹ sọgan nọtepọ́n azán wiwá etọn tọn? podọ mẹnu wẹ na nọte whenuena é sọawuhia? na ewọ tin taidi miyọn gànkọ̀ntọ de tọn, podọ taidi adi avọ̀yàntọ tọn: ³podọ ewọ na sinai di gànkòntọ de po kiklọtọ fataka tọn po, ewọ bo na sọ klọ visunnu Levi tọn lẹ, bo sọ klọ yé wé di sika po fataka po; yé bo na sọ nọ na avọ nunina lẹ hlan OKLUNỌ to dódó mẹ. ⁴Whenẹnu wẹ avọ́ nunina Juda po Jelusalẹm po tọn na yín whànpẹnọ hlan OKLUNỌ, di to azán hóhó tọn lẹ mẹ, podọ di owhè hóhótọn lẹ mẹ. ⁵Podọ yẹn na wá sẹpọ̀ mì jẹ whẹ̀dida kọ̀n; podọ yẹn na yín kunnudetọ awuyanọ de to owọntọ lẹ ji, podọ to ayọdetọ lẹ ji, podọ to whiwhletọ lalanọ lẹ ji; podọ to enẹlẹ he nọ bianukunna gbànumẹ to azónkuẹ etọn lẹ mẹ, asusiọsi, po tòṣiọvi po, podọ he lẹ́ ojonọ jẹpadopo sọn aliho jlọjẹ etọn mẹ, bo ma dibusi mi gba, wẹ OKLUNỌ awhànpa lẹ tọn dọ. ⁶Na yẹn OKLUNỌ lọ ma diọ; enẹwutu wẹ yè ma hù mì súdo gba, Mì visunnu Jakob tọn emi.

⁷Sọn azán otọ̀ mìtọn lẹ tọn lẹ mẹ wẹ mì ko lẹ́ jẹpadopo sọn gbèdai ṣie lẹ mẹ, bo ma ko yìn yé gba. Mì lẹ́gọ̀ do dẽ, yẹn na sọ lẹ́gọ̀ do mì de, wẹ OKLUNỌ awhànpa lẹ tọn dọ. Ṣigba mìwlẹ dọmọ, Etẹ́ mẹ míwlẹ na lẹ́gọ̀ te? ⁸Bé gbẹtọ de na jẹajodo Jiwheyẹwhe wẹ? gãnṣo mìwlẹ jẹajodo mi. Ṣigba mìto didọmọ, Etẹ́ mẹ wẹ míwlẹ ko jẹajodo we te? To madaotọ lẹ mẹ po avọ́ nunina zédlanga tọn lẹ po. ⁹Yè yí odẹ̀hodo do hodẹ̀do mì; na mìwlẹ jẹajodo mi, yèdọ akọta he pete. ¹⁰Mì hẹn madaotọ lọ pete wá biọ agbànhọ̀ lọ mẹ, na núdùdù nido tin finẹ to ohọ̀ ṣie mẹ, bo yí do tẹ́n mi pọn dinvie, wẹ OKLUNỌ awhànpa lẹ tọn dọ, eyín yẹn ma na hùn ovẹ́sẹ olọn tọn lẹ na mì, bo sọ kọ̀n dona de jẹgbonu na mì, he otẹn ma na tin finẹ sù nado hẹn ẹn. ¹¹Podọ yẹn na sọ dowhẹ̀ jawlanọ lọ na mìtọn wutu, ewọ ma to na sọ và osinsẹ́n aigba mìtọn tọn lẹ súdo gba; mọ ovẹntin mìtọn ma sọ to osinsẹ́n etọn na jà kọ̀nyingbé jẹnukọnna ojlẹ to ogle mẹ gba, wẹ OKLUNỌ awhànpa lẹ tọn dọ. ¹²Akọta lẹpo na sọ nọ ylọ mì jijọhonọ: na mìwlẹ na yín aigba homẹhùnnọdaho de, wẹ OKLUNỌ awhànpa lẹ tọn dọ.

¹³Ohó mìtọn lẹ ko yín sinsinyẹn do ogo e, wẹ OKLUNỌ dọ. Gãnṣo mìwlẹ dọmọ, Etẹ́ mẹ wẹ mìwlẹ ko dọhó do ogo we te? ¹⁴Mìwlẹ ko dọmọ, Ovò wẹ é yín nado nọ sẹ̀n Jiwheyẹwhe: podọ alẹ tẹ́ é yín dọ míwlẹ ko yìn aṣẹ etọn, podọ na mìwlẹ ko zinzọnlin to avọ̀ awubla tọn mẹ to OKLUNỌ awhànpa lẹ tọn nukọn? ¹⁵Podọ dinvie mìwlẹ ylọ osaklanọ dọ jijọhonọ; mọwẹ, yè to yé he to azọ́n kanyinylan tọn wà lẹ do daga; mọwẹ, yé to Jiwheyẹwhe whlepón, yè bo sọ to yé whlẹn. ¹⁶Whenẹnu wẹ yé he dibusi OKLUNỌ lẹ to hódọ ode po awetọ po: OKLUNỌ sọ tuntóai, bo sè, podọ yè sọ wlan owé oflin tọn de to ewọ nukọn, na yé he dibusi OKLUNỌ lẹ, podọ he to oyín etọn tọn lẹnpọ̀n lẹ. ¹⁷Yé na sọ yín ṣie, wẹ OKLUNỌ awhànpa lẹ tọn dọ, to azán lọ mẹ ehe mẹ yẹn basi adọkunnu alọpade he te; yẹn na hla yé dai, dile omẹ de nọ hla visunnu etọn titi he to sinsẹ́n ẹn dai do. ¹⁸Whenẹnu wẹ mìwlẹ na lẹ́gọ̀ bo sọ yọ́nvògbingbọn to dódónọ po mẹylankan po ṣẹnṣẹn, to ewọ he to Jiwheyẹwhe sẹ̀n po ewọ he ma to sinsẹ́n ẹn po ṣẹnṣẹn.

¹NA, dayi e go, azán lọ wá, é to jiji di ozohò de; bọ osaklanọ lepo, po yé he nọ wàzọ́n kanyinylan tọn lẹpo po, na yín osamùtọ: podọ azán he wá lọ na fiọ yé, wẹ OKLUNỌ awhànpa lẹ tọn dọ, bọ é ma na jó adọ̀ kavi alà dai na yé gba. ²Ṣigba hlan mì he dibusi oyín ṣie lẹ wẹ owhè dódó tọn na zẹ́ po azọnhẹngbọ po to awà etọn lẹ mẹ; mìwlẹ bo na sọ jẹgbonu yì, bo sọ to sàjlo di oyìnọ apó me tọn le. ³Míwlẹ na sọ zín mẹylankan lẹ lọ dodò; na yé na yín afín to oglọ afọpáhomẹ afọ mìtọn lẹ tọn to azán he mẹ yẹn na basi ehe, wẹ OKLUNỌ awhànpa lẹ tọn dọ.

⁴Mì nọ flin osẹ́n Moṣe devi ṣie tọn, he yẹn degbèna hlan en to Holebi mẹ na Islaeli lẹpo, yèdọ osẹ́ndoai lẹ po whẹ̀dida lẹ po. ⁵Dayi e go, Yẹn na do Elija yẹwhegán lọ hlan mì whẹpo azán daho osinọ OKLUNỌ tọn lọ na do wá. ⁶Mìwlẹ bo na sọ nọ lẹ́ ayiha otọ́ lẹ ton do ovi lẹ de, podọ ayiha ovi lẹ tọn do otọ yeton lẹ de; yen nikã wá bo yí oyàsọhẹ de do ho aigba lọ.