Levitiku

¹OKLUNỌ lọ sọ ylọ hlan Moṣe, bo dọhó hlan ẹn sọn ogohò opli lọ tọn lọ mẹ, dọmọ, ²Dọhó hlan ovi Islaeli tọn lẹ, bo dọ hlan yé dọmọ, Whenuena omẹ de mì tọn na avọ́nunina de hlan OKLUNỌ lọ, mì na nọ na avọ́nunina mìíọn lọ sọn kanlinyìnyìn lẹ mẹ, yèdọ sọn kanlinpó lọ mẹ podọ sọn kanlinpá lọ mẹ.

³Eyín avọ́nunina etọn yín avọ́nunina mimẹ̀ kanlinpó lọ tọn de, asú madazòn de é na na: to ohòn ogohò opli tọn lọ tọn kòn é na na te, na ewọ nido yín tẹalọyi to OKLUNỌ lọ nukọn. ⁴E na zé alọ etọn do ota ovónunina mimẹ̀ lọ tọn ji; é nasọ yín alọkẹyi na ẹn nado basi ovẹ̀se nẹ̃. ⁵E bo na hù oyìnsú lọ to OKLUNỌ lọ nukọn: visunnu Aalọn tọn lẹ, yẹwhenọ lẹ lọ, na yí ohùn lọ wá, bo na mì ohùn lọ lédo pó to agbà lọ ji he tin to ohòn ogohò opli tọn lọ tọn kòn. ⁶Ewọ nasọ kọ́nayúna avọ́nunina mimẹ̀ lọ, bo sọ já ẹ do flinflin. ⁷Visunnu Aalọn yẹwhenọ lọ tọn lẹ na yí miyọn do agbà lọ jì, bo do nake do hajihaji to miyọn lọ ji: ⁸visunnu Aalọn tọn lẹ, yẹwhenọ lẹ lọ, na do jija flinflin lẹ lọ, ota lọ, po ojó lọ po do hajihaji to nake he tin to miyọn lọ mẹ ji ehe tin to agbà lọ ji. ⁹Sìgba homẹnú etọn lẹ po asá etọn lẹ po wẹ é na yí osìn do klọ: yẹwhenọ lọ nasọ mẹ́ pete lọ to agbà lọ ji, na avọ́nunina mimẹ̀ de, avọ́nunina de he yè basi gbọn miyọn dali, owán vivi tọn de hlan OKLUNỌ lọ.

¹⁰Podọ eyín avọ́nunina etọn yín kanlinpá lọ mẹ tọn, sọn lẹngbọ lọ lẹ mẹ, kavi sọn gbọgbọẹ lọ lẹ mẹ, na avọ́nunina mimẹ̀ de: asú madazọ̀ngo de é na na. ¹¹E bo nasọ hù i to awà agbà lọ tọn go hlan agewaji dali to OKLUNỌ lọ nukọn: visunnu Aalọn tọn lẹ, yẹwhenọ lẹ lọ, na mì ohùn etọn do agbà lọ ji lédo pé. ¹²E na já ẹ do flinflin etọn mẹ, po ota etọn po po ojó etọn po: yẹwhenọ lọ nasọ do yé do hajihaji do nake lọ ji he tin to miyọn lọ ji he tin to agbà lọ ji: ¹³ṣigba homẹnú lẹ lọ po asá lẹ lọ po wẹ é na yí osìn do klọ: yẹwhenọ lọ na yí pete lọ wá, bo mẹ́ ẹn to agbà lọ ji; avọ́nunina mimẹ̀ de wẹ, avọ́nunina de he yè basi gbọn miyọn dali, owán vivi de tọn hlan OKLUNỌ lọ.

¹⁴Podọ eyín avọ́nunina etọn hlan OKLUNỌ lọ yín avọ́nunina ohó le tọn, whenẹnu owhle lẹ we e na do na avọ́nunina etọn, kavi awhànnẹvu lẹ. ¹⁵Yẹwhenọ lọ na hẹn ẹn wá jẹ agbà lọ kọ̀n, bo sùn ota etọn só bo sọ mó ẹn to agbà lọ ji! podọ ohùn etọn nasọ yín sìnsòn jẹgbonu to awà agbà lọ tọn go; ¹⁶é bo na yí adọngoe etọn só po ofún etọn lẹ po, bo zé e dlẹn adà agbà lọ tọn to whèzetẹn wàji, to otẹn afín lẹ tọn: ¹⁷é bo nasọ tlẹn ẹn gbọn awàfún etọn dali, ṣigba ma na vùn in doawe gba: yẹwhenọ lọ bo na mó ẹn to agbà lọ ji to nake lọ ji he tin to miyọn lọ ji: avọ́nunina mimẹ̀ de wẹ, avọ́nunina yè basi gbọn miyọn dali de, owán vivi tọn de hlan OKLUNỌ lọ.

¹PODỌ whenuena omẹ de na avọ́nunina avọ́nunina jinulili tọn de hlan OKLUNỌ lọ, avọ́nunina etọn na yín olinfín dagbedagbe tọn; é na kọ̀n amì do e ji, bo sọ yí núwhẹnwan do e ji: ²ewọ bo nasọ hẹn en wá visunnu Aalọn tọn lẹ de yẹwhenọ le lọ: é na yí alọgogo etọn dopo sọn olinfín dagbedagbe etọn mẹ, podọ sọn amì etọn mẹ, po nuwhẹnwán etọn lẹpo po; yẹwhenọ lọ nàsọ mẹ́ en di oflinnu etọn lọ to agbà lọ ji, avọ́nunina yè basi gbọn miyọn dali de, owán vivi tọn de hlan OKLUNỌ lọ. ³Enẹ he pò sọn avọ́nunina jinulili lọ tọn mẹ na yín Aalọn tọn po visunnu etọn lẹ tọn: onú wiwe talala de wẹ sọn avọ́nunina OKLUNỌ lọ tọn lẹ mẹ he yè basi gbọn miyọn dali.

⁴Podọ whenuena hiẹ na avọ́nunina avọ́nunina jinulili de tọn de he yè hi to akladò mẹ, é na yín aklahihi madotónnọ olinfín dagbedagbe tọn he yè yí amì do hò, kavi aklawadawada madotónnọ lẹ he yè yí amì do hò. ⁵Podọ eyín avọ́nunina towe yín avọ́nunina jinulili agbánvla lọ tọn de, é na yín olinfín dagbedagbe madotónnọ tọn, he yè yí amì do hò. ⁶Hiẹ na vùn in do flinflin, bo kòn amì do e ji: avọ́nunina jinulili de wẹ. ⁷Podọ eyín avọ́nunina towe yín avọ́nunina jinulili núsọgbán lọ tọn, é na yín bibasi gbọn olinfín dagbedagbe mẹ po amì po. ⁸Hiẹ bo nasọ hen avọ́nunina jinulili lọ wá helẹ basi sọn onu helẹ mẹ hlan OKLUNỌ lọ: é nasọ yín yíyína yẹwhenọ lọ, ewọ bo nasọ hẹn ẹn wá agbà lọ kòn. ⁹Yẹwhenọ lọ na yí sọn avọ́nunina jinulili lọ mẹ oflinnú etọn lọ, bo na mó ẹn to agbà lọ ji: avọ́nunina yè basi gbọn miyọn dali de, owán vivi tọn de hlan OKLUNỌ lọ. ¹⁰Podọ enẹ he pò sọn avọ́nunina jinulili lọ mẹ na yín Aalọn tọn po visunnu etọn lẹ tọn po: Onú wiwe talala de wẹ sọn avọ́nunina OKLUNỌ lọ tọn mẹ he yè basi gbọn miyọn dali. ¹¹Avọ́nunina jinulili lẹpo he yè na hlan OKLUNỌ lọ, ma na yìn bibasi po otọn po gba: na mìwlẹ ma na mè otón de gba, kavi owín depope, di avọ́nunina de he yè basi gbọn miyọn dali hlan OKLUNỌ lọ. ¹²Di avọ́nunina sinsẹ́n tintan tọn lẹ wẹ mì na do na yé hlan OKLUNỌ lọ: ṣigba yé ma ja aga na owán vivi de to agbà lọ ji gba. ¹³Podọ avọ́nunina ovónunina jinulili towe tọn lẹpo wẹ hiẹ na yí OJO do vivi; mọ hiẹ ma na dike ojó alọ́nu Jiwheyẹwhe towe ton lọ tọn nado yín dindén sọn avọ́nunina jinulili towe mẹ gba: avọ́nunina towe lepo wẹ hiẹ na yí ojó do vivi.

¹⁴Podọ eyín hiẹ na avọ́nunina jinulili sinsẹ́n tintan le tọn de hlan OKLUNỌ lọ, hiẹ na na na avọ́nunina avọ́nunina jinulili lọ sọn sinsẹ́n tintan gbado towe lẹ tọn to apà mẹ he yè yí miyọn do sò, gbàdo ginglin apàmú lọ tọn. ¹⁵Hiẹ na yí amì do e ji, bo sọ yi nuwhẹnwán do e ji: avọ́nunina jinulili de wẹ. ¹⁶Yẹwhenọ bo na mó oflinnú é tọn lọ, adade gbàdo ginglin etọn lọ tọn, po adade amì etọn lọ tọn po: avọ́nunina basi gbọn miyọn dali de wẹ hlan OKLUNỌ lọ.

¹PODỌ eyín avọ́nunina etọn yín avósannu avọ́nunina opẹ́dido tọn lẹ; eyín é na sọn kanlinpó lọ mẹ, asú kavi asi, ewọ na yí wá na to OKLUNỌ lọ nukọn madazọ̀ngo. ²Ewọ na zé alọ etọn do ota avọ́nunina etọn lọ tọn ji, do hù i to ohòn ogohò opli tọn lọ tọn kòn: visunnu Aalọn tọn lẹ yẹwhenọ lẹ lọ na mì ohùn lọ do agbà lọ ji lédo pé.ẹ ³Ewọ nasọ na sọn avọ́sannu avọ́nunina jijọho tọn mẹ avọ́nunina de yè basi gbọn miyọn dali de hlan OKLUNỌ lọ; ojó he ṣinyọn homẹnú lẹ lọ ji, po ojó lọ lẹpo po he tin to homẹnú lẹ lọ ji, ⁴po ahún awe lẹ po, po ojó he tin to yé go lọ po, ehe tin to adajamẹ dali, po otlán lọ po to alín lọ ji, po ahún lẹ lọ po wẹ ewọ na zé só. ⁵Visunnu Aalọn tọn lẹ na mó ẹn to agbà lọ go to avọ́nunina: mimẹ̀ lọ ji, he tin to nake lọ ji ehe tin to miyọn lọ go: avọ́nunina yè basi gbọn miyọn dali de, owán vivi tọn de hlan OKLUNỌ lọ.

⁶Podọ eyín avọ́nunina etọn na avọsánnu avọ́nunina jijọho tọn de hlan OKLUNỌ lọ yin sọn kanlinpa lọ mẹ; asú kavi asi ewọ na yí i wá na madazòngo. ⁷Eyín ewọ na lẹngbọvu de na avọ́nunina etọn, whenẹnu wẹ ewọ na yí i na to OKLUNỌ lọ nukọn: ⁸ewọ na yi alọ etọn do ota avọ́nunina etọn tọn ji, bo hù i to ogohò opli tọn lọ nukọn: visunnu Aalọn tọn lẹ na mì ohun etọn do agbà lọ ji lédo pé. ⁹Ewọ nasọ na avọ́nunina jijọho tọn sọn avọ́sánnu lọ mẹ avọ́nunina de he yè basi gbọn miyọn dali hlan OKLUNỌ lọ: ojó etọn lọ, osi efẹn ojónọ lọ pete, é na dè e sọ sópọ nẹgbéhú lọ; po ojó he ṣinyọn hòmenu lẹ lọ ji po, po ojó he tin to homẹnu lẹ lọ ji lẹpo po, ¹⁰po ahún awe lẹ po, po ojó he tin to yé ji po, ehe tin to adajamẹ dali lẹ lọ, po otlán lọ po to alín lọ ji, po ahun lẹ lọ po, wẹ ewọ na zé só ¹¹Yẹwhenọ lọ nasọ mó ẹn to agbà lọ ji: núdùdù avónunina lọ tọn wẹ he yè basi gbọn miyọn dali hlan OKLUNỌ lọ.

¹²Podọ eyín avọ́nunina etọn yín gbọgbọẹ do whenẹnu ewọ na yí i na to OKLUNỌ lọ nukọn: ¹³ewọ na yí alọ etọn do ota e tọn ji, bo hù i to ogohó opli tọn lọ nukọn: visunnu Aalọn tọn lọ nasọ mì ohùn etọn do agbà lọ ji lédo pó. ¹⁴Ewọ nasọ na sọn avọ́nunina etọn mẹ, yèdọ avọ́nunina de he yè basi gbọn miyọn dali hlan OKLUNỌ lọ; ojó he he ṣinyọn hòmẹnú lẹ lọ, po ojó he tin to hòmẹnú lẹ lọ ji lẹpo po, ¹⁵po ahún awe lẹ po, po ojó he tin to yé ji po, ehe tin to adajamẹ dali, po otlán lọ po to alín lọ ji, po ahún lẹ lọ po, wẹ ewọ na zé sẹ̀. ¹⁶Yẹwhenọ lọ bo na mó yé to agbà lọ ji: núdùdù avọ́nunina lọ tọn lọ wẹ hẹ yè basi gbọn miyọn dali na owán vivi de: ojó lọ lẹpo wẹ OKLUNỌ lọ tọn. ¹⁷E na yín oséndoai kakajei de gbọn whẹndo mìtọn lẹpo mẹ to fìninò mìtọn lẹpo mẹ, dọ mì ma na dú ojó kavi ohùn gba.

¹OKLUNỌ lọ sọ dọhó hlan Moṣe, dọmọ, ²Dọhó hlan ovi Islaeli tọn lẹ, dọmọ, Eyín omẹ depope na wàylando gbọn nusiwà mẹ, to onú lẹ lọ depope mẹ he OKLUNỌ lọ ko dosẹ́n ma nado yín wiwà gba, bo na wà dopo yé ton depope: ³eyín yẹwhenọ amìsisánọ lọ na wàylando sọmọ nado hẹn whègbledo wá gbẹtọ lẹ lọ ji; whenẹnu gbọ ewọ ni navọ́nunina na ylando etọn, he é ko do wàylando, oyìnsú winyanwinyan dopo madazòngo hlan OKLUNỌ lọ na avọ́nunina ylando tọn de. ⁴Ewọ na hẹn oyìnsú lọ wá ohòn ogohò opli tọn lọ tọn kòn to OKLUNỌ lọ nukọn; é nasọ zé alọ etọn do ota oyìnsú lọ tọn ji, bo hù oyìnsú lọ to OKLUNỌ Íọ nukọn. ⁵Yẹwhenọ amìsisánọ lọ bo na yí sọn ohùn oyìnsú lọ tọn mẹ, bo hẹn ẹn wá ogohọ̀ pli tọn lọ kòn: ⁶yẹwhenọ lọ bo na ylọ́n alọviyẹyẹ etọn do ohùn lọ mẹ, bo mì sọn shùn lọ mẹ whla ṣinawe to OKLUNỌ lọ nukọn, to avọ̀ajlalanọ fìwiwe lọ tọn lọ nukọn. ⁷Yẹwhenọ lọ nasọ yí sọn ohùn lọ mẹ do azò agbà nuwhenwán vivi tọn lọ tọn ji to OKLUNỌ lọ nukon, he tin to ogohò opli tọn lọ mẹ; ohùn oyìnsú lọ tọn lẹpo wẹ ewọ na kòn jẹgbonu do ozòn agbà avọ́nunina mimẹ tọn lọ tọn kòn, he tin to ohòn ogohò opli tọn lọ tọn kọn. ⁸Ojó oyìnsú avọ́nunina ylando tọn lọ tọn lẹpo wẹ ewọ na yí sè sọn e mẹ; ojó he ṣinyọn hòmẹnú lẹ lọ, po ojó he tin to hòmẹnú lẹ lọ ji lẹpo po, ⁹po ahún awe lẹ po, po ojó he tin to yé ji po, he tin to adajamẹ dali, po otlán lọ po to alín lọ ji, po ahún lẹ lọ po, wẹ hiẹ na zé sọ́, ¹⁰dile é yín zizé sẹ̀ sọn oyín ovọ́sánnu avọ́nunina jijọho tọn lọ tọn lẹ mẹ do: yẹwhenọ lọ nasọ mè yé to agbà avọ́nunina mimẹ̀ tọn lọ ji. ¹¹Ayú oyìnsú lọ tọn, po olàn etọn lẹpo po, po ota etọn po, po asá etọn lẹ po, po hòmẹnú etọn lẹ po, po omí etọn po, ¹²yèdọ oyìnsú lọ pete, wẹ é na hẹn tón jẹgbonu osla lọ tọn jẹ otẹn wiwe de mẹ, fie afín lọ yín kinkòn jẹgbonu te, bọ yè yí miyọn do mè ẹn to nake ji: fie afín yín kinkòn jegbọnu te wẹ é na yín mimẹ̀ te.

¹³Podọ eyín agùn Islaeli tọn pete na buali, bọ onú lọ yín whiwhla sọn nukun agùndido lọ tọn mẹ, bọ yé ko wà ode sọn onú lọ lẹ mẹ he OKLUNỌ lọ ko dosẹ́n ma nado yín wiwà gba, bo yín whẹ̀gbledonọ; ¹⁴whenuena ylando fiemẹ yé ko wàylando te yín yinyọnẹn, whenẹnu agùndido lọ na na oyìnsú winyanwinyan de na avọ́nunina ylando de tọn, bo na hẹn ẹn wà ogohò opli tọn lọ nukọn. ¹⁵Omẹho agùn lọ tọn lẹ na ze alọ yetọn lẹ do ota oyìnsú lọ tọn ji to OKLUNỌ lọ nukọn: oyìnsú lọ bo nasọ yín hùhù to OKLUNỌ lọ nukọn. ¹⁶Yẹwhenọ amìsisánọ lọ na hẹn sọn ohùn oyìnsú lọ tọn mẹ wá ogohò opli tọn lọ mẹ: ¹⁷yẹwhenọ lọ na ylọ́n alọviyẹyẹ etọn do ohùn lọ mẹ, bo mì in whla ṣinawe to OKLUNỌ lọ nukọn, to avọ̀ajlalanọ lọ nukọn. ¹⁸E nasọ yí sọn ohùn lọ mẹ do azò agbà lọ tọn lẹ ji he tin to OKLUNỌ lọ nukọn, he tin to ogohò opli tọn lọ mẹ, podọ ohùn lọ lẹpo wẹ é na kọn jẹgbonu to ozòn agbà avọ́nunina mimẹ̀ tọn kọn, he tin to ohọ̀n ogohọ̀ opli tọn lọ tọn kọn. ¹⁹Podọ ojó etọn lẹpo wẹ é na bẹ́ sè sọn e mẹ, bo mè ẹn to agbà lọ ji. ²⁰Le wẹ é na wà hẹ oyìnsú lọ do; dile é wà hẹ oyìnsú avọ́nunina ylando lọ tọn do, mọwẹ é na wà hẹ ehe do: yẹwhenọ lọ bo nabasi ovẹ̀se na yé, yénasọ yín jijona. ²¹Ewọ naso hẹn oyìnsú lọ tón jẹ osla lọgodo, bo na mè ẹn dile é mè oyìnsú tintan lọ do: avọ́nunina ylando lọ tọn wẹ na agùndido lọ.

²²Whenuena ogán de wàylando, bo wà gbọn nusiwà mẹ ode onú ìẹpo tọn he OKLUNỌ lọ Jiwheyẹwhe etọn ko dosẹ́n ma nado yín wiwà gba, bo yín whẹ̀gbledonọ, ²³eyín ylando etọn, fiemẹ ewọ wàylando te, yín hinhẹn zún yinyọnẹn hlan ẹn, é na hẹn gbọgbọẹ dopo wá na avọ́nunina eton, asú madazòngo de; ²⁴é na yí alọ etọn do ota gbọgbọẹ lọ tọn ji, bo hù i to otẹn lọ mẹ fie yé hù avọ́nunina mimẹ̀ lọ te to OKLUNỌ lọ nukọn: avọ́nunina ylando de tọn wẹ. ²⁵Yẹwhenọ lọ na yí alọviyẹyẹ etọn do yí sọn ohùn avọ́nunina ylando lọ tọn mẹ, bo yí i do azò agbà avọ́nunina mimẹ̀ tọn lọ tọn lẹ ji, podọ ohùn etọn wẹ é na kọ̀n jẹgbonu to ozọ̀n agbà avọ́nunina mimẹ̀ tọn lọ tọn kòn. ²⁶Podọ ojó etọn lẹpo wẹ ewọ na mẹ̀ to agbà lọ ji, di ojó avọ́sánnu avọ́nunina jijọho tọn lọ tọn lẹ: yẹwhenọ lọ bo na basi ovẹ̀se nẹ̃ kẹdẹdi ylando etọn, é nasọ yín jijona.

²⁷Podọ eyín ode sọn gbẹtọ aigba lọ tọn mẹ depope wàylando gbọn nuṣiwà mẹ, to wiwà onú lẹ lọ depope mẹ he OKLUNỌ ko dosẹ́n ma nado yín wiwà gba, bo yin whẹgbledonọ; ²⁸eyín ylando etọn, he ewọ ko do wàylando yín hinhẹn zùn yinyọnẹn hlan ẹn, whenẹnu é na hen gbọgbọe dopo wá na avọ́nunina etọn, asi de madazọngo, na ylando etọn he é ko do wàylando. ²⁹E bo nasọ zé alọ etọn do ota avọ́nunina ylando lọ tọn ji, bo hù avọ́nunina ylando tọn lọ, to otẹn avọ́nunina mimẹ̀ tọn lọ mẹ. ³⁰Yẹwhenọ lọ na yí alọviyeyẹ etọn do yí sọn ọhùn etọn lọ mẹ, bo yí do azò agbà avọ́nunina mimẹ̀ tọn lọ tọn lẹ ji, podọ ohùn etọn lẹpo wẹ é na kòn jegbonu to ozòn agba lọ tọn lọ kọn. ³¹Podọ ojó etọn lẹpo wẹ é na bẹ́ sẹ̀, dile yè bẹ́ ojó sọn avọ́sánnu avọ́nunina jijọho tọn lọ mẹ sè do; yẹwhenọ lọ nasọ mẹ̀ ẹn to agbà lọ ji na owán vivi de hlan OKLUNỌ lọ; yẹwhenọ lọ bo nasọ basi ovẹ̀se nẹ, e bo nasọ yin jijona.

³²Podọ eyín é hẹn lẹngbọvú de wá di avọ́nunina etọn na avọ́nunina ylando de tọn, asi madazọ̀ngo de wẹ é na hẹnwá. ³³E na zé alọ etọn do ota avọ́nunina ylando lọ tọn lọ ji, bo na hù i na avọ́nunina ylando de ton to oten lọ mẹ fie yé hù avọ́nunina mimẹ̀ lọ te. ³⁴Yẹwhenọ lọ nasọ yí alọviyẹyẹ etọn do yí sọn ohùn avọ́nunina ylando lọ tọn mẹ, bo yí i do azò agbà avọ́nunina mimẹ̀ tọn lọ tọn lẹ ji, podọ ohùn etọn lẹpo wẹ ewọ na kòn jẹgbonu to ozòn agbà lọ tọn lọ kòn: ³⁵podọ ojó etọn lepo wẹ ewọ na bé sè, dile yè bé ojó lẹngbọvú lọ tọn sẹ̀ sọn avsánnu avọ́nunina jijọho tọn lọ tọn mẹ do; yewhenọ lọ bo na mè yé to agbà lọ go, kedẹdi owàlọ avọ́nunina OKLUNỌ lọ tọn lọ he yè basi gbọn miyọn dali: yẹwhenọ lọ bo na basi ovẹ̀se nẹ̃ gbọn ylando etọn tọn dali he ewọ ko do wàylando, é bo nasọ yín jijona.

¹PODỌ eyín mẹde depope wàylando, ehe mẹ ewọ sè ogbè padido tọn te, ewọ yínyín kunnudetọ de, eyín ewọ mọ kavi yọnẹn, eyín ewọ ma dọ ẹ tọ́n, whenẹnu ewọ na hẹn ylanwà etọn: ²kavi eyín mẹde depope gàndo onú mawé depope go, eyín é yín osiọ gbékanlin de tọn, kavi osiọ onú linlin mawé tọn lẹ, bọ é yín whiwhla sọn e de, bọ ewọ yín mawé, whenẹnu ewọ na yín whẹ̀gbledonọ: ³kavi eyín ewọ gando omawé gbẹtọ tọn go, nudepope omawé etọn ehemẹ é yín mawé te, bọ é yín whiwhla sọn e de; whenuena ewọ yón ẹn, whenẹnu ewọ na yín whẹ̀gbledonọ: ⁴kavi eyín mẹde yí nùflo etọn lẹ do yawu whle nado wà oylan, kavi nado wà dagbe, núdepope é yín he omẹ de na yawu dọtón po whiwhle de po, bọ é yín whiwhla sọn é de; whenuena ewọ yọn ẹn, whenẹnu ewọ na yín whẹ̀gbledonọ to dopo onu helẹ tọn mẹ: ⁵é bo na yín, whenuena ewọ na yín whẹ̀gbledonọ to dopo onú helẹ tọn mẹ, wẹ é na yígbè enẹ ehemẹ ewọ ko wàylando te tọn: ⁶ewọ bo na hen avọ́nunina whègbledo etọn tọn wá OKLUNỌ lọ de na ylando etọn, ehe ewọ ko do wàylando, Asi de sọn kanlinpá lọ mẹ, lẹngbọvú de kavi gbọgbọẹ de, na avọ́nunina ylando de tọn; yẹwhenọ lọ nasọ basi ovẹ̀se nẹ̀ kẹdedi ylando etọn tọn. ⁷Podọ eyín huhlọn etọn whè na lẹngbọvú dopo, whenẹnu ewọ na hẹn avọ́nunina whẹ̀gbledo tọn etọn wá na enẹ ehemẹ é ko wàylando te, owhle awe, kavi awhànnẹvú awe, jẹ OKLUNỌ lọ de; dopo na avọ́nunina ylando de tọn, podọ awetọ na avọ́nunina mimẹ̀ de. ⁸Ewọ nasọ hẹn yé wá yẹwhenọ lọ de, mehe na yí enẹ he tin na avọ́nunina ylando lọ tọn na whè, bo sùn ota etọn ṣe sọn okò etọn nu, ṣigba bo ma na vùn in doawe gba: ⁹ewọ na mi sọn ohùn avọ́nunina ylando lọ tọn mẹ do awà agbà lọ tọn ji; podọ pipòtọ ohùn lọ tọn na yin sìnsọ̀n jẹgbonu to ozọ̀n agbà lọ tọn kọ̀n: avọ́nunina ylando de tọn wẹ ¹⁰Ewọ nasọ yí awetọ lọ na na avọ́nunina mimẹ̀ de, kẹdẹdi asẹdai lọ: yẹwhenọ lọ nasọ basi ovẹ̀se nẹ̃ kẹdẹdi ylando etọn tọn he é ko do wàylando, é nasọ yín jijona.

¹¹Ṣigba eyín huhlọn etọn whè na owhle awe, kavi awhànnẹvú awe, whenẹnu ewọ na hẹn avọ́nunina etọn wá na enẹ ehemẹ ewọ ko wàylando te, madaotọ ẹfa olinfín dagbedagbe tọn dopo na avọ́nunina ylando de tọn; é ma na yí amì do e ji gba, mọ é ma sọ to na yí nuwhenwán depope do e ji gba: na avọ́nunina ylando de tọn wẹ. ¹²Ewọ na hẹn ẹn wá yẹwhenọ lọ de, yẹwhenọ lọ nasọ yí alọgogo etọn dopo sọn e mẹ di oflinnú etọn, bo mẹ̀ ẹn to agbà lọ go, kẹdẹdi owàlọ avọ́nunina OKLUNỌ lọ tọn lọ he yè basi gbọn miyọn dali: avónunina ylando de tọn wẹ. ¹³Yẹwhenọ lọ na basi ovẹ̀se nẹ̃ kẹdẹdile ylando etọn te he ewọ ko do wàylando to depope onú helẹ tọn mẹ, ewọ bo nasọ yín jijona: pipòtọ lọ nasọ yín yẹwhenọ lọ tọn, di avọ́nunina ojinulili lọ tọn.

¹⁴OKLUNỌ lọ sọ dọhó hlan Moṣe, dọmọ, ¹⁵eyín omẹ depope wàylan de, bo wàylando gbọn nusiwà mẹ, to onú wiwe OKLUNỌ lọ tọn lẹ mẹ; whenẹnu ewọ na hẹn avọ́nunina whègbledo tọn etọn wá OKLUNỌ lọ de, agbò dopo madazòngo sọn kanlinpó lọ mẹ, kẹdedì ahidona towe to fataka mẹ gbọn ṣẹkle lẹ dali, kẹdẹdi íìwiwe lọ tọn, na avọ́nunina whógbledo de tọn: ¹⁶ewọ nasọ basi ojlado na ene he ewọ ko do wànú yìndo to onú wiwe lọ mẹ, bo na yi dadatóntọ dogó, bo yí i na yẹwhenọ lọ: yẹwhenọ lọ nasọ yi agbò avọ́nunina whégbledo lọ tọn do basi ovẹ̀se na ẹn, ewọ nasọ yín jijona.

¹⁷Podọ eyín omẹ depope wàylando, bo wà onú he OKLUNỌ lọ ko dosẹ́n ma nado yín wiwà lẹ de: eyín é ma tlẹ yón ẹn, gãnṣo whẹ̀gbledonọ wẹ ewọ, bo nasọ zé ylankan etọn hẹn. ¹⁸Ewọ na hẹn agbò dopo madazòngo wá sọn kanlinpó lọ mẹ, kẹdẹdi ahidona towe, na avó-nunina whógbledo tọn de, hlan yẹwhenọ lọ: yẹwhenọ lọ bo na basi ovẹ̀se na ẹn gbọn onú lọ tọn dali ehemẹ ewọ buali te gbọn nusiwà mẹ bo ma sọ yón ẹn gba, ewọ bo nasọ yín jijona. ¹⁹Avọ́nunina whègbledo de tọn wẹ: whógbledonọ nugbonugbo wẹ ewọ to OKLUNỌ lọ nukọn.

¹OKLUNỌ lọ sọ dọhó hlan Moṣe, dọmọ, ²Eyín omẹ depope wàylando, bo wàylan do OKLUNỌ lọ go, bo yí oklọ do zán hẹ kọmẹnu etọn to onú dogbó de tọn mẹ, kavi nusúafa tọn, kavi asúfánmẹgo tọn, kavi ko bianukunna kọmẹnu etọn: ³kavi ko mọ enẹ he bú só, bo sọ yí oklọ do zán to enẹmẹ, bo whle hlan olalo de; to ehelẹ depope mẹ bọ omẹ de wà, ylandowiwa to enẹmẹ: ⁴whenẹnu é na yín, eyín ewọ ko wàylando, bo yín whẹ̀gbledonọ, wẹ ewọ na gò enẹ he ewọ ko yí gbọn asúfinfán dali jo, kavi onú he ewọ ko tindo gbọn nukunbianamẹ dali, kavi nudogbé lọ he yè yi nó, kavi onú búbú he é mọsó, ⁵kavi onú depope ehe tọn ewọ ko yi oklọ do whle; yèdọ ewọ na gò ẹ jó to gigọ́ mẹ, bo nasọ yí madatóntọ dogọ́: ewọ mẹhe tọn é yín wẹ é na yí i na, to azán yínyín whẹ̀gbledonọ eton tọn gbè. ⁶Ewọ nasọ hẹn avọ́nunina whẹ́gbledo etọn tọn wá OKLUNỌ lọ de, agbò dopo madazòngo sọn kanlinpá lọ mẹ, kẹdẹdi ahidona towe, na avọ́nunina whógbledo de tọn, hlan yẹwhenọ lọ: ⁷yẹwhenọ lọ bo na basi ovẹ̀se nẹ̃ to OKLUNỌ lọ nukọn, ewọ nasọ yín jijona; gbọn núdepope ewọ wà tọn dali, mọ nado yín whẹ́gbledonọ gbọn enẹ dali.

⁸OKLUNỌ sọ dọhó hlan Moṣe, dọmọ, ⁹Degbèna Aalọn po visunnu etọn lẹ po, dọmọ, Ehe wẹ osẹ́n avọ́nunina mimẹ̀ lọ tọn: avọ́nunina mimẹ̀ lọ na tin nake etọn go to miyọn mẹ to agbà lọ ji to ozán lẹpo mẹ jẹ afọnnu lọ; podọ miyọn agbà lọ tọn na yín hinhẹn to jiji to enẹ JI. ¹⁰Yẹwhenọ lọ bo na yí awu alavọ̀ tọn etọn dogo, podọ alavọ̀ sokoto etọn wẹ é nasọ yí do agbasalan eton ji; é nasọ zé afín ehe miyọn lọ ko do fìọ avọ́nunina mimẹ̀ lọ to agbà lọ go daga, ewọ nasọ yi yé do adà agbà lọ tọn. ¹¹E nasọ dè awu etọn lẹ sè, bo yí awu devo lẹ do, bo hẹn afín lọ tón jẹ gbonu osla lọ tọn jẹ otẹn wiwe de mẹ. ¹²Miyọn agbà lọ ji tọn na yín hinhẹn to jiji to enẹ ji, é ma na si gba: Yẹwhenọ lọ na nọ mẹ́ nake lọ to e go to afọnnu afọnnu: é na zé avọ́nunina mimẹ̀ lọ do hajihaji to e ji, bo na mẹ́ ojó avọ́nunina jijọho tọn lọ to enẹ ji. ¹³Miyọn na yin hinhẹn to jiji jeijei; é ma na si gba.

¹⁴Podọ ehe wẹ osẹ́n avọ́nunina jìnulili lọ tọn lọ; visunnu Aalọn tọn lẹ na nọ yí i na to OKLUNỌ lọ nukọn, to agbà lọ nukọn. ¹⁵E nasọ zé alọgogo etọn dopo daga sọn enẹmẹ, sọn linfin dagbedagbe avọ́nunina jinulili lọ tọn mẹ, podọ sọn amì etọn lọ mẹ, po nuwhẹnwán lẹpo po he tin to avọ́nunina jinulili lọ tọn ji, bo na mó ẹn to agbà lọ ji na owán vivi de, di oflinnú etọn de, hlan OKLUNỌ lọ. ¹⁶Podọ enẹ he yè pòdaì Aalọn po visunnu etọn lẹ po wẹ na dù: otẹn wiwe de mẹ yè na dù i te matin otọ́n; to akànmahò ogohó opli tọn lọ tọn mẹ yé na dù i te. ¹⁷Yè ma na dù i po otón po gba. Yẹn ko yí i na yé di mimá yetọn sọn avọ́nunina ṣie mẹ he yè basi gbọn miyọn dali; wiwe talala wẹ, di avọ́nunina ylando lọ tọn, podọ di avọ́nunina whẹ́gbledo tọn lọ. ¹⁸Sunnusi to ovi Aalọn tọn lẹ mẹ lẹpo na dù sọn e mẹ, di aṣẹ kakadoi gbọn whẹndo mìlọn lẹ mẹ, sọn avọ́nunina OKLUNỌ lọ tọn lọ mẹ he yè basi gbọn miyọn dali: mẹdepope he gan do yé go na yín wiwe.

¹⁹OKLUNỌ lọ sọ dọhó hlan Moṣe, dọmọ, ²⁰Ehe wẹ avọ́nunina Aalọn po visunnu etọn lẹ tọn po, he yé na nọ yína hlan OKLUNỌ lọ to azán he gbè yè sámìsisána ẹn; madaotọ ẹfa dopo sọn olinfìn dagbedagbe mẹ na avọ́nunina jinulili tọn de jeijei, odá é tọn to afọnnu lọ, podọ odá etọn to whèjai. ²¹To nusọpànu de mẹ yè na yí amì do sò ẹ te; whenuena yè ylón ẹn, hiẹ na hen ẹn wá hòmẹ: hihi etọn lẹ wẹ hiẹ na do na avọ́nunina jinulili lọ tọn na owán vivi de hlan OKLUNỌ lọ. ²²Yẹwhenọ amìsisánọ lọ he na tin to otẹn etọn mẹ sọn visunnu eton lẹ mẹ wẹ na yí i na: gbọn osóndai de dali é na yín mimẹ̀ pete hlan OKLUNỌ lọ. ²³Podọ avọ́nunina jinulili yẹwhenọ lọ tọn lẹpo na yín mimẹ̀ pete: é ma na yín dùdù gba.

²⁴OKLUNỌ lọ sọ dọhó hlan Moṣe, dọmọ, ²⁵Dọhó hlan Aalọn podọ hlan visunnu etọn lẹ, Ehe wẹ osén avọ́nunina ylando lọ tọn: to otẹn fie mẹ avọ́nunina mimẹ̀ lọ yín hùhù te wẹ avọ́nunina ylando lọ tọn na yín hùhù te to OKLUNỌ lọ nukọn: wiwe talala wẹ ²⁶Yẹwhenọ he yí i na na ylando lọ wẹ na dù i: otẹn wiwe de mẹ é na yín dùdù te, to akanmahó ogohò opli tọn lọ tọn mẹ. ²⁷Mẹdepope he na doalọ olàn etọn go na yín wiwe: podọ whenuena yè mì sọn ohùn etọn mẹ finẹ do awu depope ji, hiẹ na klọ enẹ eheji é yín mìmì do to otẹn wiwe de mẹ. ²⁸Ṣigba núzinzán òkò tọn lọ ehemẹ é yín sisọakúsìn te lọ na yín gbigba: podọ eyín é yín sisọakúsìn to núzinzán ogànvẹ̃ tọn de mẹ, é na yín súnsún, bo sọ yín kikisá to osìn mẹ. ²⁹Sunnusi lẹpo to yẹwhenọ lẹ lọ mẹ na dù sọn e mẹ: wiwe talala wẹ. ³⁰Podọ avọ́nunina ylando tọn sọn ohùn fietọn mẹ depope yè hẹnwá biọ ogohò opli tọn lọ mẹ nado basi ovẹ̀se to otẹn wiwe lọ mẹ, ma na yín dùdù gba: miyọn yè ni yí do fiọ ọ.

¹PODỌ ehe wẹ osén avọ́nunina whẹ̀gbledo tọn lọ: wiwe talala wẹ. ²To otẹn fie mẹ yé hù avọ́nunina mimẹ̀ lọ te wẹ yé na hù avọ́nunina whègbledo tọn lọ te: ohùn etọn wẹ é na mì do agbà lọ ji lẹ́do pó. ³E nasọ yína sọn e mẹ ojó etọn lẹpo; osi ojónọ lọ, po ojó he ṣinyọn hòmẹnu lọ lọ ji po, ⁴po ahún awe lẹ po, po ojó he tin yé go po, he tin to adajamẹ, po otlán he tin to alín lọ ji po, po ahún lẹ lọ po, wẹ é na zé sè: ⁵yẹwhenọ lọ na mẹ́ yé to agbà lọ ji na avọ́nunina de he yè basi gbọn miyọn dali hlan OKLUNỌ lọ: avọ́nunina whẹgbledo de tọn wẹ ⁶Sunnusi to yẹwhenọ lẹ lọ mẹ lẹpo na nọ dù sọn e mẹ: otẹn wiwe de mẹ é na yín dùdù te: wiwe talala wẹ ⁷Le avọ́nunina ylando tọn te, mọwẹ avọ́nunina whẹ̀gbledo lọ tọn te: osén dopo wẹ tin na yé: yẹwhenọ he basi ovẹ̀se po enẹ po, ewọ wẹ na tindo e. ⁸Podọ yẹwhenọ lọ he yí avọ́nunina mimẹ̀ omẹ depope tọn na, yèdọ yẹwhenọ lọ na tindo ayú avọ́nunina mimẹ̀ lọ tọn hlan ede ehe é ko yína. ⁹Podọ avọ́nunina jinulili tọn lẹpo he yè hi to aklado mẹ, po ehe yè basi to nusònu pànu lọ mẹ po, podọ to aklahipanu lọ go, na yín yẹwhenọ he yí i na lọ tọn. ¹⁰Podọ avọ́nunina jinulili tọn lẹpo, he yè yí amì do hò, kavi húhú, wẹ visunnu Aalọn tọn lẹpo na tindo, omẹ de di awetọ kẹkẹdẹkẹ.

¹¹Podọ ehe wẹ osén avọ́sinsán avọ́nunina jijọho tọn lọ tọn, he mẹde na yína hlan OKLUNỌ lọ. ¹²Eyín ewọ yí i na na opédido de, whenẹnu ewọ na yí aklahihi madotónnọ he yè yí amì do ho do sánvọ́ opédido tọn lọ, po aklawadawada madotónnọ yè yí amìsisásana lẹ po, po aklahihi po he yè yí amì do hò lẹ, sọn olinfin dagbedagbe yinylọn mẹ. ¹³Aklahihi sọn akla madotónnọ mẹ wẹ ewọ na yí avọ́nunina etọn na te po avọ́sánnu avọ́nunina jijọho etọn tọn lẹ po na opẹ́dido. ¹⁴Podọ sọn e mẹ ewọ na yí dopo sọn avọ́nunina dopodopo mẹ na na avọ́nunina zédlanga tọn hlan OKLUNỌ lọ; é na yín yẹwhenọ he mì ohùn avọ́nunina jijọho tọn lọ tọn. ¹⁵Olán avọ́sánnu avọ́nunina jijọho tọn etọn lọ tọn na opódido na yín dùdù to azán avọ́nunina etọn tọn lọ gbè; é ma na pò depope sọn e mẹ dai kakajẹ afọnnu lọ gba. ¹⁶Ṣigba eyín avọ́sánnu avọ́nunina etọn tọn yín opàdido de, kavi avọ́nunina ojlomẹ tọn de, é na yín dùdù to azán he gbè ewọ yí avọ́sánnu etọn na te: podọ to aihọngbè enẹ he pò sọn e mẹ nasọ yín dùdù: ¹⁷ṣigba enẹ he pò sọn olàn ovósánnu lọ tọn mẹ jẹ azán atọ̀ntọ gbè na yín yíyí miyọn do fiọ. ¹⁸Podọ eyin olàn avọ́sánnu avọ́nunina jijọho tọn lọ tọn depope yín dùdù to azán atọntọ gbè, é ma na yín tealọyi gba, mọ e ma sọ to na yín hihia hlan ewọ he yí i na gba: é na yín osùnú de, podọ alindọn he dù sọn e mẹ na zé ylankan etọn hẹn. ¹⁹Podọ olàn he gàndo onú mawé depope go ma na yín dùdù gba; yè na yi miyọn do fiọ ẹ. Podọ na olán lọ tọn, omẹ depope he yín wiwe na dù sọn e mẹ: ²⁰ṣigba alindọn he dù sọn olàn avọ́sánnu avọ́nunina jijọho tọn lọ tọn lẹ me, he yín OKLUNỌ lọ tọn, tintindo omawé etọn to e ji, alindọn nẹ na yín sinsán sẹ́ sọn gbẹtọ etọn lẹ mẹ. ²¹Podọ whenuena omẹ de na gàndo onú mawé de go, omawé sunnusi tọn lọ, kavi omawé kanlin de tọn, kayi osùnú mawé de, bo sọ dù sọn olàn avọ́sánnu avọ́nunina jijọho tọn lọ tọn lẹ mẹ, he yín OKLUNỌ lọ tọn, alindọn nẹ na yin sinsán só sọn gbẹtọ etọn lẹ mẹ.

²²OKLUNỌ lọ sọ dohó hlan Moṣe, dọmọ, ²³Dọhó hlan ovi Islaeli tọn lẹ, dọmọ, Mìwlẹ manadù ojó depope gba, oyín tọn, kavi lẹngbọ, kavi gbọgbọẹ. ²⁴Po ojó enẹ he kú ededenu tọn po, po ojó enẹ he yín tintlẹn sọn gbékanlin lẹ de po, sọgan yín zinzán na sinsẹ̀n devo de: ṣigba mìlẹ to alọdepope mẹ ma na dù sọn e mẹ gba. ²⁵Na mẹdepope he dù ojó kanlin lọ tọn, ehe tọn gbẹtọ lẹ do na avọ́nunina de he yè basi gbọn miyọn dali hlan OKLUNỌ lọ, yèdọ alindọn lọ he dù i na yín sinsán sẹ́ sọn gbẹtọ etọn lẹ mẹ. ²⁶Míwlẹ ma na dù ohùn alọpa depope, eyín e yín ohẹ́ tọn kavi gbékanlin tọn, to fininò mìtọn lẹ depope mẹ. ²⁷Mẹdepope é yín he dù ohùn depope, alindọn nẹ na yín sinsán sẹ́ sọn gbẹtọ etọn lẹ mẹ.

²⁸OKLUNỌ lọ sọ dọhó hlan Moṣe, dọmọ, ²⁹Dọhó hlan ovi Islaeli tọn lẹ, dọmọ, Ewọ he na avọ́sánnu avọ́nunina jijọho tọn etọn hlan OKLUNỌ lọ na hẹn avọ́nunina etọn wá OKLUNỌ lọ de sọn avọ́sánnu avọ́nunina jijọho tọn etọn lẹ mẹ: ³⁰alọ etọn titi wẹ na hẹn avọ́nunina OKLUNỌ lọ tọn lọ wá he yè basi gbọn miyọn dali, ojó lọ po akón lọ po wẹ é na hẹnwá, na akón lọ nido yín zizéhia na avọ́nunina zéhia tọn de to OKLUNỌ lọ nukọn. ³¹Yẹwhenọ lọ nasọ mẹ́ ojó lọ to agbà lọ ji: aigba akón lọ na yín Aalọn tọn po visunnu etọn lọ tọn po. ³²Podọ abó adusi tọn wẹ mì na yína yẹwhenọ lọ na avọ́nunina zédlanga tọn de sọn avọ́sánnu avọ́nunina jijọho tọn lẹ lọ mẹ. ³³Ewọ to visunnu Aalọn tọn lẹ ṣẹnṣẹn, he na ohùn avọ́nunina jijọho tọn lẹ lọ, po ojó lọ po, wẹ na tindo abọ adusi tọn na mimá de. ³⁴Na akón zéhia lọ po abó zédlanga lọ po wẹ yẹn ko yí sọn ovi Islaeli tọn lẹ si sọn avọ́sánnu avọ́nunina jijọho tọn yetọn lẹ tọn lẹ mẹ, bo ko sọ yí yé na Aalọn yẹwhenọ lọ podọ hlan visunnu etọn lẹ di onújọ de kakadoi sọn ovì Islaeli tọn lẹ mẹ.

³⁵Ehe wẹ mimá Aalọn tọn lọ, po mimá visunnu etọn lẹ tọn po, sọn avọ́nunina OKLUNỌ lọ tọn mẹ he yè basi gbọn miyọn dali, to azán lọ mẹ whenuena ewọ do yé hia nado wàdevizọ́n hlan OKLUNỌ lọ to azọ́nhò yẹwhenọ tọn lọ mẹ; ³⁶ehe OKLUNỌ lọ degbèna nado yín nina yé sọn ovi Islaeli tọn lẹ mẹ to azán he mẹ ewọ sámìsisána yé te. Onújọ de wẹ kakadoi gbọn whẹndo yetọn lẹ mẹ. ³⁷Ehe wẹ osén avọ́nunina mimẹ̀ lọ tọn, avọ́nunina jinulili lọ tọn, po avọ́nunina ylando lọ tọn po, po avọ́nunina whógbledo lọ tọn po, po klandowiwe lọ tọn po, po avọ́sánnu jijọho tọn lọ tọn lẹ po; ³⁸ehe OKLUNỌ lọ degbèna Moṣe to osé Sinai mẹ, to azán he mẹ ewọ degbèna ovi Islaeli tọn lẹ nado nọ na avọ́nunina yetọn lẹ hlan OKLUNỌ lọ, to zùngbo Sinai tọn lọ mẹ.

¹OKLUNỌ lọ sọ dọhó hlan Moṣe, dọmọ, ²Yí Aalọn po visunnu etọn lẹ po po e po, po awu lẹ lọ po, po amì sisá lọ po, po oyìnsú avọ́nunina ylando tọn lọ po, po agbò awe lẹ lọ po, po òha akla madotónnọ tọn lọ po; ³bo pli agún lọ lẹpo do ohòn ogohò opli tọn lọ tọn kòn. ⁴Moṣe sọ wà dile OKLUNỌ lọ degbèna ẹn do; yè sọ pli agùn lọ do ohòn ogohọ̀ opli tọn lọ tọn kón. ⁵Moṣe sọ dọ hlan agùn lọ dọmọ, Ehe wẹ onú lọ he OKLUNỌ lọ ko degbèna nado yín wiwà. ⁶Moṣe sọ hẹn Aalọn wá po visunnu etọn lẹ po, bo yí osìn do lẹ́awuna yé. ⁷E sọ yí odòwu lọ do e ji, bo yí ogbajá lọ do blagbajána ẹn, bo yi otewu lọ do nẹ́ bo yí efọdi lọ do e ji, bo sọ yí hòmẹbla efọdi lọ tọn he yè yí anàwiwà do lọ́n do blagbajána ẹn, bo yí i do bla ẹ do e go. ⁸E sọ yí otùnudo lọ do e ji: é sọ yí Ulimi lọ po Tumimi lọ po do e me. ⁹Ẹ sọ zé asọgbakun lọ do ota nẹ̃; podọ to asọgbakun lọ ji, to nukọn, wẹ é yí sikagban lọ do, ojẹgbákun wiwe lọ; dile OKLUNỌ lọ degbèna Moṣe do ¹⁰Moṣe sọ yí amì sisá lọ, bo sámìsisána gohọ̀túntún lọ po ehe tin to e mẹ lẹpo po, bo hẹn yé zùn wiwe. ¹¹E sọ yí sọn e mẹ mì do agbà lọ ji whla ṣinawe, bo sámìsisána agbà lọ po núzinzán etọn lẹpo po, po ozẹnvlá lọ po po ozòn etọn po, nado hẹn yé zún wiwe. ¹²E sọ kon sọn amì sisá lọ mẹ do ota Aalọn tọn ji, bo samìsisána ẹn, nado hẹn ẹn zùn wiwe. ¹³Moṣe sọ hẹn visunnu Aalọn tọn lẹ wa, bo yí odowu le lọ do na yé, bo sọ yí ogbajá lẹ do blagbajána yé, bo sìn zínvò lẹ do yé jì; dile OKLUNỌ lọ degbèna Moṣe do. ¹⁴E sọ hẹn oyìnsú avọ́nunina ylando lọ tọn wá: Aalọn po visunnu etọn lẹ po sọ zé alọ yetọn lẹ do ota oyìnsú avọ́nunina ylando tọn lọ tọn ji ¹⁵Ewọ sọ hù i; Moṣe sọ yí alọviyẹyẹ etọn do, yí ohùn lọ, bo yí i do azò agbà lọ sọn lẹ ji lédọ pé, bo klan agbà lọ do wiwe, bo kòn ohùn lọ jẹgbonu do ozòn agbà lọ tọn kòn, bo hẹn en zùn wiwe, nado basi ovẹ̀se nẹ̃. ¹⁶E sọ yí ojó he tin to hòmẹnu lọ ji lẹpo, po otlán alín lọ tọn po, po ahún awe lẹ po, po ojó yetọn po, Moṣe sọ mó yé to agbà lọ ji. ¹⁷Ṣigba oyìnsú lọ, po ayú etọn po, po olàn etọn po, po omí etọn po, wẹ é yí miyọn do mẹ́ to gbonu osla lọ tọn; dile OKLUNỌ lọ degbèna Moṣe do. ¹⁸E sọ hẹn agbò avọ́nunina mimẹ̀ tọn lọ wá: Aalọn po visunnu etọn lẹ po sọ zé alọ yetọn lẹ do ota agbò lọ tọn ji. ¹⁹Ewọ sọ hù i: Moṣe sọ mì ohùn lọ do agbà lọ ji lẹ́do pé. ²⁰E sọ já agbò lọ do flinflin etọn; Moṣe sọ mẹ́ ota lọ, po flinflin lẹ lọ po, po ojó lọ po. ²¹E sọ yí osìn do klọ hòmẹnu lẹ lọ po afọ lẹ lọ po; Moṣe bo sọ mẹ́ agbò lọ pete to agbà lọ ji: avọ́nunina mimẹ̀ de wẹ na owán vivi de: avọ́nunina de wẹ he yè basi gbon miyọn dali hlan OKLUNỌ lọ; dile OKLUNỌ lọ degbèna Moṣe do. ²²E sọ hẹn agbò awetọ lọ wá, agbò kinklandowiwe tọn lọ; Aalọn po visunnu etọn lẹ po zé alọ yetọn lẹ do ota agbò lọ tọn ji. ²³Ewọ sọ hù i; Moṣe sọ yí sọn ohùn etọn mẹ, bo yi i do otónu otọ́ adusi Aalọn tọn lọ tọn ji, podọ dọ alọsú alọ adusi etọn tọn ji, podọ do afọsú afọ adusi etọn tọn ji. ²⁴E sọ hẹn visunnu Aalọn tọn lẹ wé, Moṣe sọ yi sọn ohùn lọ mẹ do otónu otọ́ adusi yetọn tọn ji, podọ do alọsú alọ adusi yetọn tọn ji, podọ do afọsú afọ adusi yetọn tọn ji: Moṣe sọ mì ohùn lọ do agbà lọ ji lẹ́do pé. ²⁵E sọ yí ojo lọ, po osi ojónọ lọ po, po ojó he tin to hòmẹnu lẹ lọ ji lẹpo po, po otlán alín lọ tọn lọ po, po ahún awe lẹ po, po ojó yetọn po, po abó adusi lọ po: ²⁶podọ sọn òha akla madotónnọ tọn lọ mẹ, he tin to OKLUNỌ lọ nukọn, é yí aklahihi madotónnọ dopo, po aklahihi akla amìnọ tọn dopo po, po aklawadawada dopo po, bo yí yé do ojó lọ ji, podọ do asá adusi lọ ji. ²⁷E sọ yí pete lọ do alọ Aalọn tọn lẹ ji, podọ do alọ visunnu etọn lẹ tọn lẹ ji, bo sọ zé zé hia na avọ́nunina zèhia de to OKLUNỌ lọ nukọn. ²⁸Moṣe sọ yí yé sẹ́ sọn alọ yetọn lẹ mẹ, bo mé yé to agbà lọ ji to avọ́nunina mimẹ̀ lọ ji: kinklandowiwe de wẹ yé na owán vivi de: avọ́nunina he yè basi gbọn miyọn dali de wẹ hlan OKLUNỌ lọ. ²⁹Moṣe sọ yí akọ́n lọ, bo zé e hia na avọ́nunina zizéhia tọn de to OKLUNỌ lọ nukọn: mimá Moṣe tọn wẹ sọn agbò kinklandowiwe tọn lọ mẹ; dile OKLUNỌ lọ degbèna Moṣe do. ³⁰Moṣe sọ yí sọn amì sisá lọ mẹ, podọ sọn ohùn he tin to agbà lọ ji mẹ, bo mì in do Aalọn ji, do awu etọn lẹ ji, podọ do visunnu etọn lẹ ji, podọ do awu visunnu etọn lẹ tọn lẹ ji po e po; bo klan Aalọn do wiwe, awu etọn lẹ, po visunnu etọn lẹ po, po awu visunnu etọn lẹ tọn lẹ po po e po. ³¹Moṣe sọ dọ hlan Aalọn podọ hlan visunnu etọn lẹ dọmọ, Mì sọakusìn olàn lọ to ohòn ogohò opli tọn lọ tọn kòn, bo dù i finẹ po akla lọ pa he tin to òha kinklandowiwe tọn lọ mẹ dile yè degbèna mi do, dọ Aalọn po visunnu etọn lẹ po wẹ na nọ dù i. ³²Podọ enẹ he pò sọn olàn lọ mẹ podọ sọn akla lọ mẹ wẹ mì na yí miyọn do fiọ. ³³Míwlẹ ma sọ to na tọ́n sọn ohọ̀n ogohọ́ opli tọn lọ tọn mẹ jẹgbonu hó azán ṣinawe, kaka azán ko? hlandowiwe mìtọn tọn yín pipé: na é na klan mì do wiwe azán ṣinawe. ³⁴Le yè ko wà do to egbè, mọwẹ OKLUNỌ lọ ko degbè de nado wà, nado basi ovẹ̀se na mì. ³⁵Podọ to ohòn ogohò opli tọn lọ tọn kòn wẹ mí na nọnọ̀ okle po ozán po azán ṣinawe, bo sọ nọ yìn asẹ OKLUNỌ lọ tọn lọ, na mì kú blo: na mọwẹ yè degbèna mi do. ³⁶Aalọn po visunnu etọn lẹ po wà onú he OKLUNỌ lọ degbèna lẹpo gbọn alọ Moṣe tọn mẹ.

¹E sọ wá jọ to azán ṣinatọ̀ntọ lọ gbè, wẹ Moṣe ylọ Aalọn po visunnu etọn lẹ po, po mẹho Islaeli tọn lẹ po; ²ewọ bo sọ dọ hlan Aalọn dọmọ, Yí ọyinsúvú dopo na avọ́nunina ylando de tọn, po agbò dopo po na avọ́nunina mimẹ̀ de, madazòngo, bo yí ye na to OKLUNỌ lọ nukọn. ³Podọ hlan ovi Islaeli tọn lẹ hiẹ na dọhó, dọmọ, Mì yí alúnkun dopo na avọ́nunina ylando de tọn; po oyìnvú de po po lẹngbọvú de po, awelẹ owhè tintan lọ tọn, madazòngo, na avọ́nunina mime de; ⁴po oyín dopo po po agbò dopo po na avọ́nunina jijọho tọn lẹ, nado sánvọ́ to OKLUNỌ lọ nukọn; po avọ́nunina jinulili tọn de po he yè yí amì do hò: na egbé wẹ OKLUNỌ lọ doawuhia hlan mì. ⁵Yé sọ hẹn ehe Moṣe degbèna wá ogohò opli tọn lọ nukọn: agùn lẹpo sọ dòn sẹ́pọ bo site to OKLUNỌ lọ nukọn. ⁶Moṣe sọ dọmọ, Ehe wẹ onú he OKLUNỌ lọ degbè dọ mì ni nọ wà: gigo OKLUNỌ lọ tọn nasọ doawuhia hlan mì. ⁷Moṣe sọ dọ hlan Aalọn dọmọ, Dòn sépọ jẹ agbà lọ kòn, bo yí avọ́nunina ylando towe tọn na, po avọ́nunina mimẹ̀ towe po, bo basi ovẹ̀se na dewe, podọ na gbẹtọ lẹ: bo sọ yí avọ́nunina gbẹtọ lẹ lọ tọn na, bo basi ovẹ̀se na yé; dile OKLUNỌ lọ degbè do. ⁸Mowẹ Aalọn dọ̀n sẹpọ jẹ agbà lọ kòn, bo hù oyìnvú avọ́nunina ylando tọn lọ, ehe yín na ede tọn. ⁹Visunnu Aalọn tọn lẹ sọ hẹn ohùn lọ wá e de: é sọ ylón alọviyẹyẹ etọn do ohùn lọ mẹ, bo yí i do azò agbà lọ tọn lẹ ji, bo kòn ohùn lọ jẹgbonu do ozẹ́n agbà lọ tọn kòn: ¹⁰ṣigba ojó lọ, po ahún awe lẹ po, podọ otlán lọ sọn alín avọ́nunina ylando lọ tọn mẹ, ewọ mè yé to agbà lọ ji; dile OKLUNỌ lọ degbèna Moṣe do. ¹¹Podọ olàn lọ po ayú lọ po wẹ é yí miyọn do mẹ́ to gbonu osla lọ tọn. ¹²E sọ hù avọ́nunina mimẹ̀ lọ; visunnu Aalọn tọn lẹ sọ jó ohùn lọ hlan ẹn, ewọ sọ mì i do agbà lọ ji lẹ́do é. ¹³Yé sọ jó avọ́nunina mimẹ̀ lọ han ẹn, po mimá etọn po, po ota lọ po: é sọ mó yé to agbà lọ ji. ¹⁴E sọ klọ hòmẹnu lẹ po afọ lẹ po bo mẹ̀ yé to ovónunina mimẹ̀ lọ ji to agbà lọ go. ¹⁵E sọ hẹn avọ́nunina gbẹtọ lẹ tọn lọ wa, bo yí gbọgbọẹ avọ́nunina ylando tọn lọ he yín gbẹtọ lẹ tọn, bo hù i, bo yí i na na ylando, di tintan lọ. ¹⁶E sọ hẹn avọ́nunina mimẹ̀ I? Ewọ́, bo yí i na kẹdẹdi aṣẹdai lọ. ¹⁷E sọ hẹn avọ́nunina jinulili lọ wá, bo sọ bà alọ etọn gigọ́ dopo sọn e mẹ, bo mẹ́ ẹn to agbà lọ ji, po avọ́nunina mimẹ̀ afọnnu tọn lọ po. ¹⁸E sọ hù oyín lọ ga po agbò lọ po, avọsannu avọ́nunina jijọho tọn lọ he yín gbẹtọ lẹ tọn: visunnu Aalọn tọn lẹ sọ hẹn ohùn lọ wá e de, é sọ mì in do agbà lọ ji lédo pe, ¹⁹po òjó oyín lọ tọn po; po agbò lọ tọn po, osi ojónọ lọ, po enẹ he ṣinyọn hòmẹnu lẹ lọ ji po, po ahún lẹ lọ po, po otlán alín lọ tọn po: ²⁰yé sọ yí ojó lọ do akón lẹ lọ ji, ewọ sọ mẹ́ ojó lọ to agbà lọ ji: ²¹akón lẹ lọ po asá adusi tọn lọ po Aalọn zéhia na ovónunina zizéhia de to OKLUNỌ lọ nukọn; dile Moṣe degbè do. ²²Aalọn sọ zé alọ etọn lẹ daga hlan gbẹtọ lẹ lọ dali, bo dona yé; é sọ jẹte wá sọn nina avọ́nunina ylando tọn lọ mẹ, po avọ́nunina mimẹ̀ lọ po, po avọ́nunina jijọho tọn lọ lẹ po. ²³Moṣe po Aalọn po sọ yì ogohò opli tọn lọ mẹ, bo sọ jẹgbonu wá, bo dona gbẹtọ lẹ lọ; gigo OKLUNỌ lọ tọn sọ doawuhia hlan gbẹtọ lọ lẹpo. ²⁴Miyọn sọ tón finẹ sọn OKLUNỌ lọ nukọn, bo fiọ avọ́nunina mimẹ̀ lọ po ojó lọ po to agbà lọ ji: podọ whenuena gbẹtọ lẹpo mọ ẹn, yé dabobo, bo họ́ṣinyọn nukunmẹ yetọn lẹ ji.

¹NADABI po Abihu po visunnu Aalọn tọn lẹ, dopodopo yé tọn yí nuwhẹnwángbán etọn, bo yí miyọn do e mẹ, bo yí nuwhẹnwán do e ji, bo sọ yí miyọn alọpade na to OKLUNỌ lọ nukọn, he ewọ ma ko degbèna yé. ²Miyọn sọ tón wá finẹ sọn OKLUNỌ lọ nukọn, bo sú yé do, yé sọ kú to OKLUNỌ lọ nukọn. ³Whenẹnu Moṣe dọ hlan Aalọn dọmọ, Ehe wẹ ehe OKLUNỌ ko do dọhó, dọmọ, Yẹn na yín kinklandowiwe to yé he tin sẹ́pọ mọ, podọ to nukọn gbẹtọ lẹpo lọ tọn yẹn na yín gigopana. Aalọn bo sọ nabọẹ. ⁴Moṣe sọ ylọ Misaeli po Elzafani po, visunnu Uzieli tọn lọ tavẹ Aalọn tọn lọ, bo dọ hlan yé dọmọ, Mì dòn sẹpọ, bẹ́ mẹmẹsunnu mìtọn lẹ yì sọn fìwiwe lọ nukọn jẹgbonu osla lọ tọn. ⁵Mọwẹ yé dòn sèpọ, bo bẹ́ ye yì to odòwu yetọn lẹ mẹ jẹgbonu osla lọ tọn; dile Moṣe ko dọ do. ⁶Moṣe sọ dọ hlan Aalọn, podọ hlan Eleazali podọ hlan Itamali, visunnu etọn lẹ dọmọ, Mì jo odà ota mìtọn tọn do wẹ̀wẹ́ blo, mọ mì sọ tlẹn avọ̀ mìtọn lẹ blo; na mì ni ma do kú gba, podọ na ewọ ma na yín homẹgblenọ po agùn lọ lẹpo po: ṣigba mì gbọ mẹmẹsunnu lẹ, owhé Islaeli tọn lọ pete ni vi zòjiji lọ he OKLUNỌ lọ ko pla. ⁷Podọ mìwlẹ ma na jẹgbonu yì sọn ohòn ogohọ opli tọn lọ tọn mẹ gba, mì nikã kú: na amì sisá OKLUNỌ lọ tọn tin to mi ji. Ye sọ wà kedẹdi ohó Moṣe tọn lọ.

⁸OKLUNỌ lọ sọ dọhó hlan Aalọn, dọmọ, ⁹A nù ovẹ̃n depope blo kavi núnùnù sinsinẹn, hiẹ, kavi visunnu towe lẹ po hi po, whenuena mì jei ogohọ̀ opli tọn lọ̀ mẹ blo na mì ni ma do ku gba: é na yin osẹ́ndoai de kakadoi gbọn whẹndo mìtọn lẹ mẹ: ¹⁰podọ mì na yí vògbingbọn do wiwe lọ po núvótọ lọ po ṣẹnṣẹn, podọ to wiwe po mawé po ṣẹnṣẹn; ¹¹podọ mì na plọn ovi Islaeli tọn lẹ aṣẹdai lẹ lọ he OKLUNỌ lọ ko do dọhó hlan yé gbọn alọ Moṣe tọn lọ mẹ.

¹²Moṣe sọ dohó hlan Aalọn, podọ hlan Eleazali podọ hlan Itamali, visunnu etọn he yè podai lẹ dọmọ, Yí avọ́nunina jinulili lọ he pò sọn avọ́nunina OKLUNỌ lọ tọn lẹ mẹ he yè basi gbọn miyọn dali, bo dù i matin otọ́n to agbà lọ dali; na wìwe talala wẹ: ¹³mìwlẹ nasọ dù i to otẹn wiwe de mẹ, na onújọ towe wẹ wutu, po visunnu towe lẹ tọn po, sọn avọ́nunina OKLUNỌ lọ tọn lẹ mẹ he yè basi gbọn miyọn dali: na mọwẹ yè degbèna mi do. ¹⁴Podọ akón zizéhia lọ po asá zizédlanga lọ po wẹ mì na nọ dù to otẹn wiwe de mẹ; hiẹ, po visunnu towe lẹ po, po viyọnnu towe lẹ po po hi po: na yè jó ve di onújọ towe, po onújọ visunnu towe lẹ tọn po, sọn avọ́sánnu avọ́nunina jijọho tọn ovi Islaeli tọn lẹ ton mẹ. ¹⁵Asá zizédlanga lọ po akón zizehia lọ po wẹ mì na hẹnwá po avọ́nunina lẹ lọ po he yè basi gbọn miyọn dali sọn ojó lọ mẹ, nado zé e hia na avọ́nunina zizéhia de to OKLUNỌ lọ nukọn: é bo nasọ yín towe, po visunnu towe lẹ tọn po po hi po, di onújọ de kakadoi; dile OKLUNỌ lọ ko degbè do.

¹⁶Moṣe sọ yí sọwhiwhe do din gbọgbọẹ oivónunina ylando tọn lọ mọ, bo, dayi e go, é ko yín mimẹ̀: ewọ sọ yín homẹgblenọ do Eleazali go po Itamali po go, visunnu Aalọn tọn he yè pòdai lẹ, dọmọ, ¹⁷Etẹwutu mì ma dù avọ́nunina ylando lọ tọn to otẹn wiwe fìwiwe lọ tọn mẹ, mimọ é yín wiwe gbahúgbahú, ewọ ko sọ na ẹn mi nado dè ylankan agùn lọ tọn sẹ, nado basi ovẹ̀se na yé to OKLUNỌ lọ nukọn? ¹⁸Dayi e go, ohùn e ton ma ko yín hinhẹn wá biọ fìwiwe lọ hòmẹ gba: mìlẹ nugbonugbo do ko dù i to fìwiwe lọ mẹ, dile yẹn degbè do. ¹⁹Aalọn sọ dọhó hlan Moṣe dọmọ, Dayi e go, egbó wẹ yé na avọ́nunina ylando tọn yetọn po avọ́nunina mimẹ̀ yetọn po to OKLUNỌ lọ nukọn; bọ onu mọnkọ di ehele ko sọ họ́jẹ oji e: podọ eyín yẹn ko dù avọ́nunina ylando tọn lọ to egbé, é do ko yín homẹhùn to nukun OKLUNỌ lọ tọn mẹ dagbedagbe? ²⁰Whenuena Moṣe sè ehe, é yín hòmẹhùn dagbedagbe to nukun etọn mẹ.

¹OKLUNỌ lọ sọ dọhó hlan Moṣe podọ hlan Aalọn, didọ hlan yé dọmọ, ²dohó hlan ovi Islaeli tọn lẹ, dọmọ, Ehelẹ wẹ onú tẹgbé he mi na nọ dù to kanlin he tin to aigba lọ go lẹpo mẹ. ³Núdepope he zẹ́ ofẹ́n lọ, bo yín afọzẹtọ, bo nọ dù odùkọ lọ, to kanlin lẹ mẹ, enẹ mì na nọ dù. ⁴Ṣigba ehelẹ wẹ mì ma na dù gba sọn yé he dù odùkó lẹ lọ mẹ, kavi sọn yé he zé ofẹ́n lẹ lọ mẹ: kanklosọpóawenọ lọ, na é nọ dù odùkó lọ ṣigba bo ma zè ofẹ́n lọ gba wutu, é yín mawé hlan mì. ⁵Azui lọ, na é dù odùkó lọ ṣigba bo ma zé ofẹ́n lọ gba wutu, é yín mawé hlan mì. ⁶Po asìdidọẹ lọ po, na é dù odùkó lọ ṣigba bo ma zé ofọ́n lọ gba wutu, é yín mawé hlan mì. ⁷Po ohàn lọ po, na é zé ofẹn lọ, bo sọ yín afọzẹ́tọ, ṣigba ma dù odùkó lọ gba wutu, é yín mawe hlan mì. ⁸Mì ma na dù sọn olàn yetọn mẹ gba, podọ mì ma naso doalọ osiọ yetọn go gba; mawé wẹ yé yín hlan mì.

⁹Sọn núhe tin to otò me lẹpo mẹ ehelẹ wẹ mì na nọ dù: núdepope he tindo okọ̀ja lẹ po oflo lẹ po to otò lẹ mẹ, to ohù lẹ mẹ, podọ to nọwhe lẹ mẹ, yé wẹ mì na nọ dù. ¹⁰Podọ núhe ma tindo okòja lẹ po ofló lẹ po lẹpo to ohù lẹ mẹ, podọ to nọwhe lẹ mẹ, sọn ehe nọ whàja to otọ́ mẹ lẹpo mẹ, podọ sọn nutẹgbẹ̀ he tin to otọ́ lẹ mẹ lẹpo mẹ, osùnú de wẹ yé yín hlan mì, ¹¹yé na yín osùnú de hlan mì; mìwlẹ ma na dù sọn olàn yetọn mẹ gba, podọ osiọ yetọn mìwlẹ na tindo to osùnú mẹ. ¹²Núdepope he ma tindo akọ̀ja lẹ kavi ofló lẹ to otọ̀ lẹ mẹ, osùnú de wẹ enẹ hlan mì.

¹³Ehelẹ wẹ mì nasọ tindo to osùnú mẹ to ohẹ̀ lẹ mẹ; yé ma na yín dùdù gba, osùnú de wẹ yé: akùn lọ, po ohùn akùn lọ po, po akùn hùmẹ tọn po; ¹⁴po ohùnpẹpẹ lọ po, po ohọ̀napeli lọ po kẹdẹdi hùnkọ etọn; ¹⁵adògbó depope kẹdẹdi hùnkọ etọn; ¹⁶po agọngbo lọ po, po ohùn zánmẹ tọn lọ po, po odókloe hùmẹ tọn lọ po, po ogàngàn lọ po kẹdẹdi hùnkọ etọn; ¹⁷po ajankusupẹvi lọ po, po adù hùmẹ tọn lọ po, po ajankusudaho lọ po; ¹⁸po ajankusu azonọ lọ po, po apofó lọ po, po osú lọ po; ¹⁹po adòwé lọ po, ogbàn lọ kẹdẹdi hùnkọ etọn, po ahlinhán lọ po, po otòké lo po. ²⁰Onú lìnlìn awànọ lẹpo he nọ yì to ẹnẹ lẹpo jì wẹ osùnú de hlan mì. ²¹Gãnṣo ehelẹ mì sọgan dù sọn onú lìnlìn awànọ lẹpo mẹ he nọ yì to ẹnẹ lẹpo ji, he tindo asá lẹ to afọ yetọn lẹ ji, nado nọ yí do lùn to aigba lọ ji; ²²yèdọ sọn ehelẹ mẹ mì sọgan dù; owẹ̀n lọ kẹdẹdi hùnkọ etọn, po owùn gòklo lọ po kẹdẹdi hùnkọ etọn, po ozègé lọ po kẹdẹdi hùnkọ etọn, po agbònọpatin lọ po kẹdẹdi hùnkọ etọn. ²³Ṣigba onú lìnlìn awànọ lẹpo, he tindo afọ ẹnẹ, wẹ osùnú de hlan mì.

²⁴Gbọn ehelẹ dali mì na lẹzùn mawé: mẹdepope doalọ osiọ yé tọn go na yín mawé kakajẹ whèjai lọ: ²⁵podọ mẹdepope he zé núde hẹn sọn osiọ yé tọn mẹ na yàn avọ̀ etọn lẹ, bo sọ yín mawé kakajẹ whèjai lọ. ²⁶Okanlin he zé ofùn lẹpo, bo ma yín afọzẹtọ gba, kavi ma dù odùkù lọ gba, yín mawé hlan mì: mẹdepope doalọ yé go na yín mawé. ²⁷Podọ núdepope he yì to ofin etọn lẹ ji, to okanlin he nọ yì to ẹnẹ lẹ ji lẹpo mẹ, mawé yé yín hlan mì; mẹdepope doalọ osiọ yetọn go na yín mawé kakajẹ whèjai lọ. ²⁸Podọ ewọ he hẹn osiọ yé tọn lọ na yàn avọ̀ etọn lẹ, bo yín mawé kakajẹ whèjai lọ: mawé yé yín hlan mì.

²⁹Podọ ohelẹ wẹ yé he yín mawé hlan mì to onú lìnlìn lẹ mẹ he nọ lìn to aigba lọ ji lẹ; alui lọ, po ajaka lọ po, po ové lọ po kẹdẹdi hùnkọ etọn, ³⁰po patlezé lọ po, po ageló lọ po, po alọtọ lọ po, po owhekẹ́n lọ po, po agànma lọ po. ³¹Ehelẹ wẹ yé he yín mawé hlan mì to ehe nọ to lìnlìn lẹpo mẹ: mẹdepope doalọ yé go, whenuena yé yín osiọ, na yín mawé kakaje whèjai lọ. ³²Podọ núdepope he ji ode yé tọn flẹ́ jẹ, whenuena yé yín osiọ, é na yín mawe; eyín é yín núzinzán atin tọn depope, kavi avọ̀zinzán, kavi ayú, kavi okùn, núzinzán depope é yín, ehe yè do nọ wà azọ̀n depope, é mananọ ma yín yíyí do osìn mẹ gba, é bo na yín mawé kakajẹ whèjai lọ; whenẹnu wẹ é na yín wiwe. ³³Podọ núzinzán okò tọn depope ehemẹ ode yé tọn dé jẹ, núdepope he tin to e mẹ na yín mawé, mì ni bo sọ gbà ẹ. ³⁴Núdùdù emẹ tọn lẹpo he sọgan yín dùdù, enẹ ehe go osìn jẹ, na yín mawé: po núnùnù lẹpo po he sọgan yín nùnù to nuzinzán mọtọnnkọ lẹpo mẹ na yín mawé. ³⁵Podọ onú depope eheji apade osiọ yetọn tọn flẹ́ jẹ na yín mawé; eyín aklahidò, kavi adògbẹ́n, é na yín gbigbà hanyanhanyan, mawé wẹ yé, bo nasọ yín mawé hlan mì. ³⁶Ṣigba tọ̀sisa de kavi avúndoe de ehemẹ plidopọ osìn tọn de te na yín wiwe: ṣigba ewọ mẹhe doalọ osiọ yetọn go na yín mawé. ³⁷Podọ eyín núde sọn oṣiọ yetọn tọn mẹ flẹ́ jẹ okún didó de ji ehe tin nado yín didó, mawé wẹ. ³⁸Ṣigba eyín osìn yín yíyí do okún lọ ji, bọ núde osiọ yetọn tọn flẹ́ jẹ e ji, é yín mawé hlan mì.

³⁹Podọ eyín okanlin depope, sọn ehe mì sọgan dù mẹ, kú; ewọ he doalọ osiọ etọn go na yín mawé kakajẹ whèjai lọ. ⁴⁰Podọ ewọ he dù sọn osiọ e tọn me na yàn avọ̀ etọn lẹ, bo yín mawé kakajẹ whèjai lọ: ewọ ga he zé osiọ e tọn lọ hẹn na yàn avọ̀ etọn lẹ, bo sọ yín mawé kakajẹ whèjai lọ.

⁴¹Podọ onú lìnlìn lẹpo he lìnlìn to aigba lọ ji wẹ osùnú de; é ma na yín dùdù gba. ⁴²Núdepope he to yìyì to adọ̀go lọ ji, po núdepope he to yìyì to ẹnẹ lẹ ji po, kavi núdepope he tindo afọ susu, yèdọ, onú lìnlìn lẹpo he nọ lìn to aigba lọ ji, yé wẹ mì ma na dù gba; na osùnú de wẹ yé. ⁴³Mì ma na yí onú lìnlìn de he lìnlìn do hẹn mìde zùn osùnu gba, mọ mì ma nasọ yí yé do hẹn mìde zùn mawé gba, bọ mì na do yín fuflu gbọn finẹdali ⁴⁴Na yẹn wẹ OKLUNỌ lọ Jiwheyẹwhe mìtọn: enẹwutu mì ni hẹn mìde zùn wiwe, bo sọ yín wiwe; na wiwe wẹ yẹn: mọ mìwlẹ ma na yí onú lìnlìn hùnkọ depope tọn he nọ whàn to aigba lọ ji do flu mìde gba. ⁴⁵Na yẹn wẹ OKLUNỌ lọ he hẹn mì hẹji jẹgbonu sọn aigba Egipti tọn lọ ji wá, nado yín Jiwheyẹwhe mìtọn: enẹwutu mi na yín wiwe, na wiwe we yẹn.

⁴⁶Ehe wẹ osén kanlin lọ tọn lọ, po ohẹ̀ lọ tọn po, po nudida gbẹ̀te lepo po tọn he nọ whàn to otò lẹ me, po nudida lẹpo po tọn he to lìnlìn to aigba lọ ji: ⁴⁷nado basi vògbingbọn de to mawé po wiwe po ṣẹnṣẹn, podọ to onú gbète he sọgan yín dùdù po onú gbẹ̀te he ma sọgan yín dùdù po ṣẹnṣẹn.

¹OKLUNỌ lọ sọ dọhó hlan Moṣe, dọmọ, ²Dọhó hlan ovi Islaeli tọn lẹ dọmọ, Eyín yọnnusi de mọho, bo zé ovi sunnu de hẹn, whenẹnu ewọ na yin mawé họ̀ azán ṣinawe; kẹdedi to azán kinklandola lànmẹzọ̀n etọn tọn mẹ lẹ tọn wẹ ewọ na do yín mawé. ³Podọ to azán ṣian tòntọ lọ mẹ olàn ayútintan ovi sunnu lọ tọn lọ na yín whègbigbòna. ⁴Yọnnu lọ bo na tin to ohùn lilẹwé etọn tọn mẹ họ̀ azán gbànnukunatọ̀n; ewọ ma na doalọ onú hihiọ de go gba, kavi wá fìwiwe lọ mẹ gba, kaka azán lilẹwé etọn tọn lẹ yín hinhẹngọ́. ⁵Ṣigba eyín ovi yọnnu wẹ é zehẹn, whenẹnu ewọ na yín mawé hò osè awe, kẹdẹdi kinklandola etọn mẹ tọn: é bo nasọ tin to ohùn lilẹ̀wé etọn tọn me hò azán kandekoatọ́nnukundopo. ⁶Podọ whenuena azán lilẹ̀wé etọn tọn lẹ yín hinhẹngọ́, na visunnu de kavi na viyọnnu de, ewọ na hẹn lẹngbọvú owhè tintan tọn lọ wá na avọ́nunina mimẹ̀ de, po awhànnẹvú de po, kavi owhle de, na avọ́nunina ylando de tọn, jẹ ohòn ogohò opli tọn lọ tọn kọ̀n, jẹ yẹwhenọ lẹ de: ⁷ewọ nasọ yí i na to OKLUNỌ lọ nukọn, bo sọ basi ovẹ̀se nẹ; é bo nasọ yín kiklọwé sọn asisa ohùn etọn tọn mẹ. Ehe wẹ osén lọ na ewọ he jivi, eyín é yín sunnusi de kavi yọnnusi de. ⁸Podọ eyín huhlọn etọn ma pé na lẹngbọvú dopo gba, whenẹnu ewọ na yí owhle awe, kavi awhannẹvu awe; dopo lọ na avọ́-nunina mimẹ̀ de, podọ awetọ lọ na avọ́núnina ylando de tọn: yẹwhenọ lọ bo na basi ovẹ̀se né, ewọ bo nasọ yín wiwe.

¹OKLUNỌ lọ sọ dọhó hlan Moṣe pòdọ hlan Aalọn, dọmọ, ²Whenuena yunnusi de na tindò jíjí de to ayú olàn etọn tọn mẹ, kavi nuzínzín de, kavi ofi sisẹ de, bọ é sọ lèzùn azọ̀ndèmẹ opò tọn lọ to ayú olàn etọn tọn mẹ, whenẹnu ewọ na yín hinhẹnwá Aalọn yewhenọ lọ de, kavi dopo to visunnu etọn lẹ mẹ yẹwhenọ lẹ lọ de: ³yẹwhenọ lọ bo na pọn azọ̀ndèmẹ lọ to ayu olàn lọ tọn me: eyín ofún to azọ̀ndèmẹ lọ mẹ yín didiọ zùn wéwé, bọ awusọhia azọ̀ndèmẹ lọ tọn yín sisósisó hú ayu olàn etọn tọn lọ, azọ̀ndèmẹ opò tọn wẹ: yewhenọ lọ na pọn ẹn, bo ylọ ẹ mawé. ⁴Podo eyín ofi sisó lọ yín wewé to ayú olàn etọn tọn mẹ, bọ awusọhia etọn yín sisósisó hu ayú lọ, bọ ofún etọn ma yín didiọ zùn wéwé gba, whenẹnu wẹ yẹwhenọ lọ na sú ewọ he tindo azọ̀ndèmẹ lọ do họmẹ họ azán ṣinawe: ⁵yẹwhenọ lọ: bo nasọ pọn ẹn to azán sinawetọ gbè: bo, dayi e go, eyín azọ̀ndèmẹ lọ tin to ote to nukun etọn lẹ mẹ, bọ azọ̀ndèmẹ lọ ma yín gbigbadapó to ayú lọ mẹ gba, whenenu yẹwhenọ lọ nasọ sú i do hòmẹ azán ṣinawe: ⁶yẹwheno lọ nasọ bẹ̀ ẹ pọn to azán sinawetọ lọ gbè: bo, dayi e go, eyín azọ̀ndèmẹ lọ yín mahùnnukunmẹ, bọ azọ̀ndèmẹ lọ ma sọ yín gbigbadapó to ayú lọ mẹ gba, whenẹnu yẹwhenọ lọ na ylọ ẹ wiwe: nuzínzín de wẹ: ewọ nasọ yàn avọ̀ etọn lẹ, bo yín wiwe. ⁷Ṣigba eyín nuzínzín lọ gbadape ayú lọ mẹ, godo he é ko do ede hia hlan yẹwhenọ lọ na lilèwé etọn, é nasọ vó ede dohia hlan yẹwhenọ lọ: ⁸yẹwhenọ lọ nasọ pọ́n, bo, dayi e go, eyín nuzínzín lọ yín gbigbadapé ayú lọ mẹ, whenẹnu yẹwhenọ lọ na ylọ ẹ mawé: opo we.

⁹Whenuena azọ̀ndèmẹ opò tọn tin to omẹ de mẹ, whenẹnu ewọ na yín hinhẹn wá jẹ yẹwhenọ lọ de; ¹⁰yewhenọ lọ nasọ pọ́n, bo, dayi e go, eyín jíjí wéwé de tin to ayú lọ mẹ, bọ é ko diọ ofún lọ zùn wéwé, bo apà tin to jíjí lọ mẹ finẹ, ¹¹opò hóhó de wẹ to ayú olàn etọn tọn mẹ, yẹwhenọ lọ nasọ ylọ ẹ mawé: ewọ ma na sú i do hòmẹ gba; na mawé wẹ ewọ. ¹²Podọ eyín opò lọ gbà jẹgbonu pé to ayú lọ mẹ, bọ opò lọ ṣinyọn ayú ewọ he tindo azọ̀ndèmẹ lọ tọn lẹpo ji sọn ota etọn yèdọ jẹ afọ etọn lẹ, sọle é sọawúhia hlan yẹwhenọ lọ yì jẹ do; ¹³whenẹnu yẹwhenọ lọ na pọ́n; bo, dayi e go, eyín opò lọ ko ṣinyọn olàn etọn lẹpo ji, ewọ na ylọ ewọ he tindo azọ̀ndèmẹ lọ dọ wiwe: yè ko diọ popo zùn wéwé: ewọ yín wiwe. ¹⁴Ṣigba whedepopenu apà sọawúhia to ewọ mẹ, ewọ na yín mawé. ¹⁵Yẹwhenọ lọ nasọ pọ́n apà lọ, bo ylọ ewọ mawé: apà lọ mawé wẹ: opò wẹ. ¹⁶Kavi eyín apà lọ sọ vó diọ, bo yín didiọ zùn wéwé, whenẹnu ewọ na wá yẹwhenọ lọ de, ¹⁷yẹwhenọ lọ nasọ pọ́n ẹn: bo, dayi e go, eyín azọ̀ndèmẹ lọ sọ yín didiọ do wéwé mẹ, whenẹnu yẹwhenọ lọ na ylọ ewọ he tindo azóndèmẹ lọ dọ wiwe: wiwe wẹ ewọ.

¹⁸Podọ whenuena olàn lọ tindo nutitẹ de to ayú etọn lọ mẹ, bọ é sọ yín hinhẹnazòngbọna, ¹⁹bọ to otẹn nutitẹ lọ tọn mẹ jíjí wéwé de tin to finẹ, kavi ofi sisó de, wéwé he yón, whenẹnu é na yín didohia hlan yẹwhenọ lọ; ²⁰yẹwhenọ lọ bo nasọ pọ́n, bo, dayi e go, eyín awusọhia etọn lọ yíjidòyìyì hú ayú lọ, bọ ofún etọn lọ yín didiọ zùn wéwé, whenẹnu yẹwhenọ lọ na ylọ ewọ mawé: azọ̀ndèmẹ opò tọn lọ wẹ, é ko gbà jẹgbonu to nutitẹ lọ mẹ. ²¹Ṣigba eyín yẹwhenọ lọ pọ́n ẹn, bo, dayi e go, bọ ofún wéwé de ma tin e mẹ finẹ gba, bọ é ma yín dòyìyì hú ayú lọ gba, ṣigba yín mahùnnukunmẹ, whenẹnu yẹwhenọ lọ na sú i do hòmẹ họ́ azán ṣinawe: ²²podọ eyín é gbadapó to ayú lọ mẹ, whenẹnu yẹwhenọ lọ na ylọ ewọ mawé: azọ̀ndèmẹ de wẹ. ²³Ṣigba eyín ofi sisó I? to ote to otẹn etọn mẹ, bo ma yín gbigbadapé gba, apà nutitẹ lọ tọn wẹ; yẹwhenọ lọ nasọ ylọ ẹ wiwe.

²⁴Kavi whenuena olán lọ tindo mimẹ̀ gbọn miyọn dali de to ayú etọn lọ mẹ, bọ fìvivé mimẹ̀ lọ tọn lẹzùn ofi sisẹ́ de, wéwé he yọ́n, kavi wéwé; ²⁵whenẹnu yẹwhenọ lọ na pọ́n ẹn: bo, dayi e go, eyín ofún he tin to ofi sisó lọ mẹ yín didiọ zún wéwé, bọ awusọhia etọn yín sisósisó hú ayú lọ; opò wẹ, é ko gbà jẹgbonu to mimẹ̀ lọ mẹ; yẹwhenọ lọ nasọ ylọ ẹ mawé: azọ̀ndèmẹ opò tọn wẹ. ²⁶Ṣigba eyín yẹwhenọ lọ pọ́n ẹn, bo, aayí e go, bọ ofun wéwé de ma tin finẹ to ofi sisó lọ mẹ gba, bọ é ma sọ yín sisósisó hú ayú lọ gba, ṣigba yín mahùnnukunmẹ; whenẹnu yẹwhenọ lọ na sú i do họ́mẹ họ̀ azán ṣinawe: ²⁷Yẹwhenọ lọ nasọ pọ́n ẹn to azán sinawetọ lọ mẹ: eyín é gbadapó to ayú lọ mẹ, whenẹnu yẹwhenọ lọ na ylọ ẹ mawé: azọ̀ndèmẹ opò tọn wẹ. ²⁸Podọ eyín ofi sisó to oté to otẹn etọn mẹ, bo ma yín gbigbadapé to ayú lọ mẹ gba, ṣigba yín mahùnnukunmẹ; jíjí mimẹ̀ lọ tọn wẹ, yẹwhenọ lọ nasọ ylọ ẹ wiwe: na apà mimẹ̀ lọ tọn wẹ.

²⁹Podọ whenuena sunnu de kavi yọnnu tindo azọ̀ndèmẹ de to ota kavi to agbakò, ³⁰whenẹnu yẹwhenọ lọ na pọ́n azọ̀ndèmẹ lọ: bo, dayi e go, eyín awusọhia etọn yín sisósisó hú ayú lọ, bọ ofún gblénlón bibia tin finẹ to e mẹ, whenẹnu yẹwhenọ lọ na ylọ ẹ mawé: ozá de wẹ, opò ota lọ tọn wẹ kavi agbakò lọ tọn. ³¹Podọ eyín yẹwhenọ lọ pọ́n azọ̀ndèmẹ ozá lọ tọn, bọ, dayi e go, awusọhia etọn ma yín sìsósisó hú ayú lọ gba, bọ ofún oyú de ma tin to e mẹ finẹ gba, whenẹnu yẹwhenọ lọ na sú ewọ he tindo azọ̀ndèmẹ ozá tọn lọ do hómẹ hò azán ṣinawe: ³²to azán sinawetọ gbè yẹwhenọ lọ na pọ́n azọ̀ndèmẹ lọ: bo, dayi e go, eyín ozá lọ ma yín gbigbadapé gba, bọ ofún gblónlén bibia de ma tin to e mẹ gba, podọ awusọhia ozá lọ tọn ma yín sisósisò hú ayú lọ gba, ³³whenẹnu é na yín dalùnna, ṣigba ozá lọ wẹ ewọ ma na lùn gba: yẹwhenọ lọ nasọ sú ewọ he tindo ozá lọ do hòmẹ hó azán ṣinawe dogó. ³⁴Podọ to azán sinawetọ mẹ yẹwhenọ lọ na pọ́n ozá lọ: bo, dayi e go, eyín ozá lọ ma yín gbigbadapé to ayú lọ mẹ gba, bọ awusọhia etọn ma yín sisósisó hú ayú lọ gba; whenẹnu yẹwhenọ lọ na ylọ ẹ wiwe: ewọ nasọ yàn aviù etọn lẹ, bo yín wiwe. ³⁵Ṣigba eyín ozá lọ gbadapé to ayú lọ mẹ to liléwé etọn godo; ³⁶whenẹnu yẹwhenọ lọ na pọ́n ẹn: bo, dayi e go, eyín ozá lọ yín gbigbadapé to ayú lọ mẹ, yẹwhenọ lọ din ofún bibia lọ mọ blo, mawé wẹ ewọ. ³⁷Ṣigba eyín ozá lọ to nukun etọn lẹ mẹ tin to ote, bọ ofún oyù yín wuwu daga to e mẹ; ozá lọ yín hin-hẹnazòngbọna, wiwe wẹ ewọ: yẹwhenọ lọ na ylọ ẹ wiwe.

³⁸Podọ whenuena sunnu de kavi yọnnu de tindo ofi sisé lẹ to ayú olàn yetọn tọn mẹ yèdọ ofi sisẹ́ wéwé lẹ; ³⁹whenẹnu yẹwhenọ lọ na pọ́n: bo, dayi e go, eyín ofi sisó lọ to ayú olàn yetọn tọn mẹ yín wéwé flèflè de: ogùn de wẹ, é ko gbà jẹgbonu to ayú lọ mẹ; wiwe wẹ ewọ.

⁴⁰Podọ eyín odà sunnusi de tọn yín mimẹ̀ sẹ́ sọn ota etọn, Tapipanọ wẹ ewọ; gãnṣo wiwe wẹ ewọ: ⁴¹eyin odà etọn yín mimẹ̀ gbọn nukọn ota etọn tọn, ewọ yín nukọn tapipanọ; gãnṣo wiwe we ewọ.

⁴²Ṣigba eyín azọ̀ndèmẹ wéwé he yón de tin to tapipa lọ mẹ, kavi to nukọn pipa lọ mẹ; opò wẹ gbigbà jẹgbonu to tapipa etọn mẹ, kavi nukọn pipa etọn. ⁴³Whenẹnu yewhẹnọ lọ na pọ́n ẹn: bo, dayi e go, eyín jíjí azọ̀ndèmẹ lọ tọn yín wéwé he yón to ota pipa etọn mẹ, kavi to nukọn pipa etọn mẹ, di awusọhia opò tọn lọ to ayú olàn lọ tọn mẹ: ⁴⁴gbẹtọ potónọ de wẹ ewọ, mawé wẹ ewọ: yẹwhenọ lọ nugbonugbo na ylọ ẹ mawé; azọ̀ndèmẹ etọn tin to ota etọn mẹ.

⁴⁵Pòtónọ lọ mẹhe mẹ azọ̀ndèmẹ lọ te, avọ́ etọn lẹ na yín tintlẹn, odà ota etọn tọn na jó do wèwé, é nasọ ṣinyọnnu nùflo etọn aga tọn ji, bo na dawhá dọ, Mawé, mawé. ⁴⁶Azán he mẹ azọ̀ndèmẹ lọ tin to ewọ mẹ lẹpo ewọ na yín mawé; mawé wẹ ewọ: é na nọnọ̀ vokada; osla lọ godo wẹ fininò etọn na te.

⁴⁷Awu lọ ga he mẹ azọ̀ndèmẹ opò tọn lọ te, eyín é yín awu ofúnnọ de, kavi awu alàvọ̀nọ de; ⁴⁸eyín é tin to opọ̀n mẹ, kavi osoki; alàvọ́ tọn, kavi ofúnnọ tọn, eyín to ayú de mẹ kavi onú basi sọn ayú mẹ depope; ⁴⁹eyín azọ̀ndèmẹ lọ yín jùjù kavi bibia, to awu lọ mẹ, kavi to ayú lọ mẹ, kavi to opón lọ mẹ, kavi to osoki lọ mẹ, kavi to onú ayú tọn depope mẹ; azọ̀ndèmẹ opò tọn lọ wẹ, bo nasọ yín didohia hlan yẹwhenọ lọ: ⁵⁰yẹwhenọ lọ nasọ pọ́n azọ̀ndèmẹ lọ, bo sọ sú ewọ he tindo azọ̀ndèmẹ lọ do họ̀mẹ họ̀ azán ṣinawe: ⁵¹é nasọ pọ́n azọ̀ndèmẹ lọ to azán sinawetọ gbè: eyín azọ̀ndèmẹ lọ yín gbigbadapé to awu lọ mẹ, eyín to opọ̀n lọ mẹ, kavi to osoki lọ mẹ, kavi to ayú lọ mẹ, sinsán depope ayú lọ yín zinzán na; opò vinvlọ́n de wẹ azọ̀ndèmẹ lọ; mawé wẹ. ⁵²Ewọ na mó awu lọ, eyín opọ̀n lọ kavi osoki lọ, to ofúnnọ mẹ kavi alàvò mẹ, kavi onú ayú tọn depope, ehemẹ azọ̀ndèmẹ lọ te: na opò vinvlòn de wẹ; é na yín mimẹ̀ to miyọn mẹ ⁵³Podọ eyín yẹwhenọ lọ na pọ́n, bo, dayi e go, azọndèmẹ lọ ma yín gbigbadapé to awu lọ mẹ gba, kavi to opón lọ mẹ, kavi to osoki lọ mẹ, kavi to onú ayú tọn depope mẹ; ⁵⁴whenẹnu yẹwhenọ lọ na degbè dọ yé ni klọ onú lọ ehemẹ azọ̀ndèmẹ lọ te, ewọ nasọ sú i do họ̀mẹ họ̀ azán ṣinawe dogọ́: ⁵⁵yẹwhenọ lọ nasọ pọ́n, to godo he azọ̀ndèmẹ lọ yín kiklọ: bo, dayi e go, eyín azọ̀ndèmẹ lọ ma ko diọ unmẹ etọn gba, bọ azọ̀ndèmẹ lọ ma sọ yín gbigbadapé gba, mawé wẹ; hiẹ na mó ẹn to miyọn mẹ: vinvlọ́n de wẹ, eyín é yín pipa to ota etọn mẹ, kavi to nukọn pipa etọn mẹ. ⁵⁶Podọ eyín yẹwhenọ lọ pọ́n, bo, dayi e go, azọ̀ndèmẹ lọ yín mahùnnukunmẹ to kiklọ etọn lọ godo, whenẹnu ewọ na tlẹn ẹn sọn awu lọ mẹ, kavi sọn ayú lọ mẹ, kavi sọn opọ̀n lọ mẹ, kavi sọn osoki lọ mẹ; ⁵⁷podọ eyín é sọawúhia to awu lọ mẹ jãnwẹ, kavi to opón lọ mẹ, kavi to osoki lọ mẹ, kavi to onú ayú tọn depope mẹ, gbigbà jẹgbonu wẹ é te: hiẹ na yí miyọn do mẹ́ enẹ hemẹ azọ̀ndèmẹ lọ te. ⁵⁸Podọ awu lọ, eyín opọ̀n lọ, kavi osoki lọ, kavi ayú onú depope tọn é yín, he hiẹ na klọ, eyín azọ̀ndèmẹ lọ fọ́nyì sọn yé mẹ, whenẹnu é nasọ yín kiklọ whla awetọ, bo na yín wiwe. ⁵⁹Ehe wẹ osén azọ̀ndèmẹ opò tọn lọ to awu ofúnnọ tọn de mẹ kavi alàvò, kavi to opọ̀n lọ mẹ, kavi osoki lọ, kavi onú ayú tọn depope, nado ylọ ẹ wiwe, kavi nado ylọ ẹ mawé.

¹OKLUNỌ lọ sọ dọhó hlan Moṣe, dọmọ, ²Ehe na yín osẹ́n opòtó lọ tọn to azán lilẹ́wé etọn lọ tọn mẹ: é na yín hinhẹnwá yẹwhenọ lọ de: ³yẹwhenọ lọ nasọ jẹgbonu yì gbonu osla lọ tọn: yẹwhenọ lọ na pọn, bo, dayi e go, eyín azọ̀ndèmẹ opò tọn lọ yín hinhẹngbọ to opòtó lọ mẹ; ⁴whenẹnu yẹwhenọ lọ na degbè nado yí ohẹ́ gbóte wiwe awe na ewọ he tin nado yín lilwé, po atin kedali po, po avọ̀vẹ̃ṣẹsẹ po, po hisọpu po: ⁵yẹwhenọ lọ na degbè nado hù dopo ohẹ́ le lọ ton to núzinzán okò tọn de mẹ to otọ́ sisà ji: ⁶na ohẹ́ gbóte lọ tọn, ewọ na yí i, po atin kedali lọ po, po avọ̀vẹ̃ṣẹsẹ lọ po, po hisọpu lọ po, bo na ylón yé po ohẹ́ gbóte lọ po do ohùn ohẹ́ he yè hù to otọ́ sisa ji: ⁷ewọ nasọ mì do ewọ he tin nado yín lilówé sọn opò etọn mẹ go whla ṣinawe, bo nasọ ylọ ẹ wiwe, bo na jó ohẹ́ gbẹ̀te lọ do yí dangbo lọ ji. ⁸Ewọ he tin nado yín lilẹ́wé na yàn avọ́ etọn lẹ, bo lùn odà etọn lẹpo só, bo do ede osìn mẹ, é bo nasọ yín wiwe: godo enẹ tọn ewọ na wá osla lọ mẹ, ṣigba bo na nò ogohọ̀ etọn godo họ̀ azán ṣinawe. ⁹Azán ṣinawetọ gbè é na yín bọ ewọ na lùn odà etọn lẹpo sè sọn ota etọn po ogbì etọn po, po nukundama etọn lẹ po, yèdọ odà etọn lẹpo é na lùn sẹ́: é bo nasọ yàn avọ̀ etọn lẹ, é bo nasọ do agbasa etọn osìn mẹ, ewọ nasọ yín wiwe. ¹⁰To azán sinatòntọ gbè ewọ na yí lẹngbọvú asú awe madazọ̀ngo, po lẹngbọvú asi dopo po owhè dopo tọn madazọ̀ngo, po madaotọ atọ̀n efa linfìn dagbedagbe tọn lọ tọn po na avọ́nunina jinulili de tọn, he yèyí amì do hò, po ojlẹ lọgi amì tọn dopo po. ¹¹Yẹwhenọ he lẹẹ wé lọ na yí omẹ he tin nado yín liléwé lọ, po onù nẹlẹ po, do OKLUNỌ lọ nukọn, to ohọ̀n ogohọ̀ opli tọn lọ tọn kọ̀n: ¹²yẹwhenọ lọ na yí dopo lẹngbọvú asú lẹ lọ tọn, bo yí i na na avọ́nunina whégbledo tọn de, po ojlẹ lọgi amì tọn lọ po, bo zé yé hia na avọ́nunina zizéhia tọn de to OKLUNỌ lọ nukọn: ¹³ewọ bo na hù lẹngbọvu asú lọ to otẹn lọ mẹ fìe yé hù avọ́nunina ylando tọn lọ te, po avọ́nunina mimẹ̀ lọ po, to otẹn fìwiwe lọ tọn mẹ: na le avọ́nunina ylando tọn lọ yín yẹwhenọ lọ tọn do, mọwẹ avọ́nunina whẹgbledo tọn lọ te: wiwe talala wẹ: ¹⁴yẹwhenọ lọ nasọ yí sọn ohùn avọ́nunina whẹgbledo lọ tọn mẹ, yẹwhenọ lọ na yí í do otónu otọ́ adusi ewọ he tin nado yín lilèwé lọ tọn lọ tọn ji, podọ to alọsú alọ adusi etọn tọn ji, podọ to afọsú afọ adusi etọn tọn ji: ¹⁵yẹwhenọ lọ nasọ yí sọn ojlẹ lọgi amì tọn lọ mẹ, bo kọ̀n ẹn do alọpahòmẹ alọ amiọn etọn titi tọn mẹ: ¹⁶yẹwhenọ lọ na ylọn alọviyẹyẹ adusi etọn tọn do amì lọ mẹ he tin to alọ amiọn etọn mẹ, bo na yí alọviyẹyẹ etọn do mì sọn amì lọ mẹ whla ṣinawe to OKLUNỌ lọ nukọn: ¹⁷podọ sọn pìpòtọ amì he tin to alọ etọn mẹ tọn mẹ wẹ yẹwhenọ lọ na dá do otónu otọ́ adusi ewọ he tin nado yín lilẹ́wé lọ tọn tọn ji, podọ do alọsú alọ adusi etọn lọ tọn ji, podọ do afọsú afọ adusi etọn lọ tọn ji, to ohùn avọ́nunina whẹ́gbledo tọn lọ tọn ji: ¹⁸podọ pipòtọ amì lọ tọn Le tin to alọ yẹwhenọ lọ tọn mẹ ewọ na yí do ota ewọ he tin nado yín lilẹ́wé lọ tọn ji: yẹwhenọ lọ nasọ basi ovẹ̀se nẹ̃ to OKLUNỌ lọ nukọn. ¹⁹Yẹwhenọ lọ na na avọ́nunina ylando tọn lọ, bo sọ basi ovẹ̀se na ewọ he tin nado yín lilẹ́wé lọ na mawé etọn tọn wutu; podọ to enẹgodo é na hù avọ́nunina mimẹ̀ lọ: ²⁰yẹwhenọ lọ nasọ na avọ́nunina mimẹ̀ lọ po avọ́nunina jinulili lọ tọn po to agbà lọ ji: yẹwhenọ lọ nasọ basi ovẹ̀se nẹ, ewọ nasọ yín wiwé.

²¹Podọ eyín ewọ yín wamọnọ, bo ma sọgan tindo sù sọmọ, whenẹnu ewọ na yí lẹngbọvú asú dopo na avọ́nunina whẹ́gbledo de tọn nado yín zizéhia, nado basi ovẹ̀se nẹ, po madaotọ efa linfìn dagbedagbe tọn dopo po he yè yí amì do hò na avọ́nunina jinúlili tọn de, po ojlẹ lọgi amì tọn dopo po: ²²po owhle awe po, kavi awhànnẹvú awe, ehe hunkọ é tin sọgan nado tindo; dopo lọ na yín avọ́nunina ylando de tọn, podọ awetọ lọ avọ́nunina mimẹ̀ de. ²³To az án sinatòntọ gbè é na hẹn yé wá yẹwhenọ lọ de na olèwé etọn jẹ ohọ̀n ogohọ̀ opli tọn lọ tọn kọ̀n, to OKLUNỌ lọ nukọn. ²⁴Yẹwhenọ lọ nasọ yí lẹngbọvú avọ́nunina whègbledo lọ tọn, po ojlẹ lọgi amì tọn lọ po, yẹwhenọ lọ bo na zé yé hia na avọ́nunina zizéhia de to OKLUNỌ lọ nukọn: ²⁵Ewọ na hù lẹngbọvú avọ́nunina whẹ̀gbledo lọ tọn, yẹwhenọ lọ nasọ yí sọn ohùn avọ́nunina whègbledo lọ tọn mẹ, bo yí i do otónu otọ́ adusi ewọ he tin nado yín lilèwé lọ tọn tọn ji, podọ do alọsú alọ adusi etọn tọn ji, podọ do afọsú afọ adusi etọn tọn ji: ²⁶yẹwhenọ lọ bo nasọ kòn sọn amì lọ mẹ do alọpahòmẹ alọ amiọn etọn titi tọn mẹ: ²⁷yẹwhenọ lọ nasọ yí alọviyẹyẹ etọn adusi tọn do mì vude sọn amì he tin to alọ etọn amiọn tọn mẹ whla ṣinawe to OKLUNỌ lọ nukọn: ²⁸yẹwhenọ lọ bo na yí sọn amì he tin to alọ etọn mẹ do otónu oto adusi ewọ he tin nado yín lilẹ̀wé lọ tọn tọn ji, podọ do alọsù alọ adusi ètọn tọn ji, podọ do afọsú afọ adusi etọn tọn ji, to otẹn ohùn avọ́nunina whẹ̀gbledo tọn lọ tọn mẹ: ²⁹podọ pipòtọ amì lọ tọn he tin to alọ yẹwhenọ lọ tọn mẹ ewọ na yí do ota ewọ he tin nado yín lilẹ́wé lọ tọn ji nado basi ovẹ̀se nẹ to OKLUNỌ lọ nukọn. ³⁰E bo nasọ yí dopo owhle lọ lẹ tọn na, kavi awhànnẹvu lẹ lọ tọn, ehe hunkọ ewọ tin sọgan nado tindo; ³¹yèdọ ehe hunkọ ewọ tin sọgan nado tindo, dopo lọ na avọ́nunina: ylando de tọn, podọ awetọ lọ na avọ́nunina mimẹ̀ de, po avọ́nunina jinúlili lọ tọn po: yẹwhenọ lọ bo nasọ basi ovẹ̀se na ewọ he tin nado yín lilẹwẹ́ lọ to OKLUNỌ lọ nukon. ³²Ehe wẹ osén ewọ mẹhe mẹ azọndème opo tọn lọ te, mẹhe ma tin sogan nado tindo enẹ he dù olẹ́wé etọn.

³³OKLUNỌ lọ sọ dọhó hlan Moṣe podọ hlan Aalọn, domọ, ³⁴Whenuena mì yín hinhẹnwá biọ aigba Kananì tọn lọ mẹ, he yẹn na mì na nútindo de, bọ yẹn yí azọ̀ndèmẹ opò tọn lọ do owhé aigba nútindo mìtọn lọ tọn de mẹ; ³⁵whenẹnu ewọ he tindo owhẹ́ lọ na wa bo dọ na yẹwhenọ lọ, dọmọ, E sọawuhia hlan mi nado yín di azọndème de tin to owhé ṣie gbè: ³⁶yẹwhenọ lọ nasọ degbè dọ ye ni bẹ́ onú sọn owhé lọ gbè, whẹ́po yewhenọ lọ na do biọ e mẹ nado pọ́n azọ̀ndèmẹ lọ, na yé he tin to owhe lọ gbè lẹpo yín hinhẹn zùn mawé blo: podọ to enẹgodo yẹwhenọ lọ na yì họmẹ nado pọ́n owhé lọ: ³⁷ewọ na pọ́n azọ̀ndèmẹ lọ, bo, dayi e go, eyín azọ̀ndèmẹ lo tin to adó owhé lọ ton lẹ mẹ po ohù bibó lẹ po, jùjù kavi bibia, bọ awusọhia etọn yín sisósisó hú adó lọ; ³⁸whenẹnu yẹwhenọ lọ na jẹgbonu yì sọn owhó lọ gbè jẹ ohọ̀n owhé; lọ tọn kòn, bo sú ohọ̀n owhé lọ tọn hò azán ṣinawe: ³⁹yẹwhenọ lọ nasọ vó wá to azán sinawetọ gbè, bo na pọ́n: bo, dayi e go, eyín azọ̀ndèmẹ lọ yín gbigbadapé to adó owhé lọ tọn lẹ mẹ; ⁴⁰whenẹnu yẹwhenọ lọ na degbè dọ ye ni dè zannu he mẹ azọ̀ndèmẹ lọ te lẹ jẹgbonu, bo fò yé dlan otẹn mawé de mẹ to tòdaho lọ godo; ⁴¹é bo na hẹn owhé lọ nado yín whiwhlẹ to hòmẹ lédo pe, yé nasọ kọ̀n òbọ́ he yé whlẹ só lọ jẹgbonu jẹ tòdaho lọ godo biọ otẹn mawé de mẹ: ⁴²yé nasọ yí zannu devo lẹ, bo yí yé do otẹn zannu nẹlẹ tọn mẹ; é nasọ yí òbó devo, bo na tlẹ owhé lọ. ⁴³Podọ eyín azọ̀ndèmẹ lọ sọ vọ́ wá, bo gba jẹgbonu to owhé lọ gbè, godo he é ko dè zannu lẹ lọ jẹgbonu, podọ godo he é ko whlẹ owhé lọ, podọ godo he é ko yín titlẹ; ⁴⁴whenẹnu yẹwhenọ lọ na sọ wá hómẹ bo pọn, bo, dayi e go, eyín azọ̀ndèmẹ lọ yín gbigbadapéowhé lọ mẹ, opò vinvlón de wẹ to owhe lọ gbè, mawe wẹ. ⁴⁵Ewọ nasọ gbà owhé lọ liai, zannu etọn lẹ, po atinlidemẹ etọn lọ po, po òbó owhé lọ tọn lẹpo po; é nasọ bé yé tón jẹgbonu sọn todaho lọ mẹ biọ otẹn mawé de mẹ. ⁴⁶Humọ ewọ he biọ owhe lọ gbè to ojlẹ he mẹ é yín súsú lẹpo na yín mawe kakajẹ whèjai. ⁴⁷Podọ ewọ he mlọnai to owhé lọ gbè na yàn avọ́ eton le: podọ ewọ he sọ dùnú to owhé lọ gbè na yàn avọ̀ etọn lẹ ⁴⁸Pọdọ eyín yẹwhenọ lọ na wá owhé gbè, bo pọ́n, bo, dayi e go, azọ̀ndèmẹ lọ mẹ ko gbadapé owhé lọ gbè gba, godo he yè ko tlé owhé lọ; whenẹnu yẹwhenọ lọ na ylọ owhé lọ wiwé, na yè hẹn azọ̀ndèmẹ lọ gbọ wutu. ⁴⁹Ewọ nasọ yí ohé awe, po atin kedali po, po avọ̀vẹ̃ṣẹsẹ po, po hisọpu po nado lẹ́ owhẹ́ lọ wẹ́: ⁵⁰ewọ nasọ hù dopo sọn ohẹ́ le lọ mẹ to núzinzán okò tọn de mẹ to otọ́ sisa ji: ⁵¹ewọ na yí atin kedali lọ, po hisọpu lọ po, po avọ̀vẹ̃sẹsẹ lọ po, po ohẹ gbète lọ po, bo ylọn yé do ohùn ohẹ́ hùhù lọ tọn me, podọ do otọ̀ sisa lọ mẹ, bo mì do owhẹ́ lọ whla ṣinawe ⁵²E nasọ yí ohùn ohẹ́ lọ tọn lọ do lẹ́ owhé lọ wé, po otò sisa lọ po, po ohẹ́ gbẹ́te lọ po, po atin kedali tọn lọ po, po hisọpu lọ po, po avọ̀vẹ̃ṣẹsẹ lọ po: ⁵³ṣigba é na jó ohó gbóte lọ do jẹgbonu sọn tòdaho lọ mẹ yì biọ dangboji de mẹ: mọwẹ ewọ na basi ovẹ̀se na owhé lọ do: é bo nasọ yín wiwé. ⁵⁴Ehe wẹ osén lọ na hunkọ azọ̀ndèmẹ opò tọn lẹpo, podọ na ozá de; ⁵⁵podọ na opò awu de tọn, podọ na owhó de; ⁵⁶podọ na jíjí de, podọ na nuzínzan de, podọ na ofi sisé de: ⁵⁷nado plọn whenuena é yín mawé, po whenuena é yín wiwé po: ehe wẹ osén opò tọn lọ.

¹OKLUNỌ lọ sọ dọhó hlan Moṣe podọ hlan Aalọn, dọmọ, ²Dọhó hlan ovi Islaeli tọn lẹ, bo dọ hlan yé dọmọ, Whenuena omẹ de tindo sisà de sọn olàn etọn mẹ jẹgbonu, na sisà etọn tọn wutu mawé wẹ ewọ. ³Ehe wẹ na yín mawé etọn to sisà etọn mẹ: eyín olàn etọn to tintón po sisà etọn po, kavi olàn etọn yín hinhẹn dote sọn sisà etọn mẹ, mawé eton wẹ ⁴Adọzàn he ewọ he tindo sisà lọ mlọn lẹpo na yín mawé: podọ onú depope he ji ewọ sín lẹpo na yín mawé. ⁵Podọ mẹdepope he doalọ adọzàn etọn go na yàn avọ́ etọn do osìn mẹ, bo sọ yín máwẹ́ kakajẹ whèjai lọ. ⁶Podọ ewọ he sín onú depope he ji ewọ he tindo sisà lọ sín na j yàn avọ́ etọn le, bo do ede osìn mẹ, bo sọ yín mawé kakajẹ whèjai lọ. ⁷Podọ ewọ he doalọ olàn ewọ he tindo sisà lọ tọn go na yàn avọ́ etọn lẹ, bo do ede osìn mẹ, bo sọ yín mawé kakajẹ whèjai lọ. ⁸Podọ eyín ewọ he tindo sisà lọ túntán do ewọ he yín wiwé go; whenẹnu ewọ na yàn avò etọn lẹ, bo do ede osìn mẹ, bo sọ yin mawé kakajẹ whèjai lọ. ⁹Podọ agbànkẹkẹ́ depope he ji ewọ he tindo sisà lọ hè na yín mawé. ¹⁰Podọ mẹdepope he doalọ onú he tin to oglọ ewọ tọn go na yín mawé kakajẹ whèjai lọ: podọ ewọ he zé onú nẹlẹ hẹn na yàn avọ̀ etọn lẹ, bo do ede osìn mẹ, bo sọ yín mawé kakajẹ whèjai lọ. ¹¹Podọ mẹdepope he go ewọ he tindo sisà lọ doalọ ma ko kisá alọ etọn to osìn mẹ, é na yàn avọ̀ etọn lẹ, bo do ede osìn mẹ, bo sọ yín mawé kakajẹ whèjai lọ. ¹²Podọ nuzinzàn okò tọn lọ, he go ewọ he tindo sisà lọ doalọ, na yín gbigbà: podọ núzinzán atin tọn lẹpo na yín kikisá to osìn mẹ. ¹³Podọ whenuena ewọ he tindo sisà de yín lilèwé sọn sisà etọn mẹ, whenẹnu é na hia azán ṣinawe na ede na liléwé etọn, bo yàn avọ̀ etọn lẹ; é na do olàn etọn osìn sisa mẹ, bo na yín wiwé. ¹⁴To azán sinatòntọ gbè é na yí owhle awe na ede, kavi awhànnẹvú awe, bo wá OKLUNỌ lọ nukọn jẹ ohọ̀n ogohè opli tọn lọ tọn kọ̀n, bo bẹ́ yé na yẹwhenọ lọ: ¹⁵yẹwhenọ lọ nasọ yí yé na, dopo lọ na avọ́nunina ylando de tọn, podọ awetọ lọ na avọ́nunina mimẹ̀ de; yẹwhenọ lọ bo nasọ basi ovẹ̀se nè to OKLUNỌ lọ nukọn na sisà etọn.

¹⁶Podọ eyín okún sunnusi depope tọn sọn kòndopọhẹ mẹ jẹgbonu yì sọn ewọ mẹ, whenẹnu ewọ na do olàn etọn lẹpo osìn mẹ, bo sọ yín mawé kakajẹ whèjai lọ. ¹⁷Podọ awu depope, po ayú depope po, ehe ji okún kòndopọhẹ tọn lọ te, na yín yíyí osìn do klọ, bo sọ yín mawé kakajẹ whèjai lọ. ¹⁸Podọ yọnnusi lọ ga mẹhe sunnusi de na yí okun kọ̀ndopọhẹ tọn do zándopọhẹ, yé omẹ awe lẹ na do yóde osìn mẹ, bo sọ yín mawé kakajẹ whèjai lọ.

¹⁹Podọ eyín yọnnusi de tindo sisà de, bọ sisà etọn olàn etọn mẹ tọn yín ohùn, ewọ na tin kinklandola etọn mẹ azán ṣinawe: podọ mẹdepope he sọ doalọ e go na yín mawé kakajẹ whèjai lọ. ²⁰Podọ núdepope he ji é mlọn to kinklandola etọn mẹ na yín mawó: núdepope he ji é sọ sín ga na yin mawó. ²¹Mẹdepope he sọ doalọ adọzán etọn go na yàn avọ́ etọn lẹ, bo do ede osìn mẹ, bo sọ yín mawé kakajẹ whèjai lọ. ²²Podọ mẹdepope he doalọ onú depope he ewọ sinai do e ji go na yàn avọ̀ etọn lẹ, bo do ede osìn mẹ, bo sọ yín mawẹ́ kakajẹ whèjai lọ. ²³Podọ eyín é tin to adọzán lọ go, kavi to onú he ji é sín depope go, whe-nuena ewọ doalọ e go, é na yin mawe kakajẹ whèjai lọ. ²⁴Podọ eyín sunnusi depope zán hẹ ẹ, bọ fuílu etọn tin to e ji, ewọ na yín mawó hò azán ṣinawe; podọ adọzán depope ji ewọ mlọn na yin mawé.

²⁵Podọ eyín yọnnusi de tindo sisà ohùn etọn tọn họ̀ azán susu ma yín to ojlẹ fuflu etọn tọn mẹ, kavi eyín ewọ tindo sisà de jẹnukọnna ojlẹ fuflu etọn tọn lọ; azán sisà mawé etọn tọn lẹpo mẹ ewọ na tin di to azán fuílu etọn tọn lẹ mẹ: mawó wẹ ewọ. ²⁶Adọzàn he ji é mlọn lẹpo to azán sisà etọn tọn lẹpo mẹ na tin hlan ẹn di adọzàn fuílu etọn tọn: podọ onú depope he ji é sín na yín mawé, di mawé fuflu etọn tọn lọ. ²⁷Mẹdepope he doalọ onú nẹlẹ go na yín mawé, bo na yàn avọ̀ etọn lẹ, bo do ede osìn mẹ, bo sọ yín mawó kakaje whèjai lọ. ²⁸Ṣigba eyín ewọ yín liléwé sọn sisà etọn mẹ, whenẹnu ewọ na hia azán ṣinawe hlan ede, to enẹgodo ewọ na yín wiwé. ²⁹Podọ to azán ṣinatọ̀ntọ gbè ewọ na yí owhle awe na ede, kavi awhànnẹvu awe, bo hẹn yé wá yẹwhenọ lọ de, jẹ ohòn ogohọ̀ opli tọn lọ tọn kọ̀n. ³⁰Yẹwhenọ lọ na yí dopo lọ na na avọ́nunina ylando de tọn, podọ awetọ lọ na avọ́nunina mimẹ̀ de; yẹwhenọ lọ bo nasọ basi ovẹ̀se nẹ̃ to OKLUNỌ lọ nukọn na sisà mawé etọn tọn.

³¹Le wẹ mì na nọ klan ovi Islaeli tọn lẹ dola do sọn mawó yetọn mẹ; na yé ma do kú to mawé yótọn mẹ blo, whenuena yé flu gohọ̀túntún ṣie he tin to gblagbla yé tọn mẹ.

³²Ehe wẹ osèn ewọ he tindo sisà de tọn lọ, po ewọ tọn po okún kòndopọhẹ tọn mẹhetọn yi sọn e mẹ, sọmọ bọ ewọ yín mawé gbọn e dali; ³³podọ ewọ he yín awutunọ po fuflu etọn tọn po tọn, po ewọ he tindo sisà de tọn po, sunnu lọ tọn, po yọnnu lọ tọn po, po ewọ he zánhẹ ewọ he yín mawé tọn po.

¹OKLUNỌ lọ sọ dọhó hlan Moṣe, to okú visunnu Aalọn tọn awe lẹ tọn godo, whenuena yé dọ̃n sẹpọ OKLUNỌ lọ nukọn, bo kú; ²OKLUNỌ lọ sọ dọ hlan Moṣe dọmọ, Dọhó hlan Aalọn nọvisunnu towe, dọ ewo nọ wá otẹn wiwe lọ mẹ biọ avọ̀ajlalanọ lọ lọ̀mẹ to ojlẹ lẹpo mẹ blo, to aisintẹn lẹblanu tọn lọ nukọn he tin to alki lọ ji; na ewọ ma do ku blo: na yẹn na doawuhia to aslo lo mẹ to aisintẹn lẹblanu tọn lọ ji. ³Po ehe po wẹ Aalọn na do nọ biọ otẹn wiwe lọ mẹ wá: po oyìnsú winyanwinyan dopo po na avọ́nunina ylando de tọn, po agbò dopo po na avọ́nunina ínimè de. ⁴Ewọ na nọ yí odowu alavọ̀ tọn wiwe lọ do ogo, é nasọ nọ tindo ṣokoto alavọ̀ tọn lọ to olàn etọn ji, bo sọ yín yíyí ogbaja alavọ̀ tọn lọ do blagbajana, bo nasọ yín yíyí asọgbakun alavọ̀ tọn lọ do doasọna: awu wiwe lẹ lọ wẹ yé; ewọ nasọ do ede osìn mẹ, bo zé yé do ogo. ⁵Ewọ nasọ yí alunkun awe sọn agùn ovi Islaeli tọn lẹ tọn si na avọ́nunina ylando de tọn, po agbò dopo po na avọ́nunina mimẹ̀ de ⁶Aalọn bo na yí oyìnvú avọ́nunina ylando tọn lọ hia, ehe tin na ewlọsu, bo basi ovẹ̀se na ede, podọ na owhé etọn. ⁷Ewọ nasọ yí gbọgbọẹ awe lẹ, bo tò yé do OKLUNỌ lọ nukọn to ohòn ogohò opli tọn lọ tọn kòn. ⁸Aalọn na de oyò do gbọgbọẹ awe lẹ ji; ovò dopo lọ na OKLUNỌ lọ, podọ ovò awetọ lọ na Azazeli. ⁹Aalọn na do gbọgbọẹ lọ hia ehe ji ovò lọ flẹjẹ na OKLUNỌ lọ, bo yí i na na avọ́nunina ylando tọn de. ¹⁰Ṣigba gbọgbọẹ lọ, ehe ji ovò lọ flẹjẹ na Azazeli, na yin zizó do OKLUNỌ lọ nukọn gbète, nado basi ovẹ̀se do e ta, nado do e hlan yì na Azazeli biọ zùngbo lọ mẹ. ¹¹Aalọn nasọ do oyìnsú ovónunina ylando tọn lọ hia, ehe tin na ewlọsu, bo na basi ovẹ̀se na ede, podọ na owhé etọn, bo nasọ hù oyìnsú avọ́nunina ylando tọn lọ ehe tin na ewlọsu: ¹²ewọ bo nasọ yí nuwhénwángbán de gọ́na akán miyọn tọn lẹ sọn agbà lọ ji to OKLUNỌ lọ nukọn, po alọ etọn lẹ po gọ́na nuyónwán tùntùn pọdọpọdọ, bo sọ hẹn ẹn biọ hòmẹ avọ̀ajlalanọ lọ tọn mẹ wá: ¹³é na yí nuyónwán lọ do miyọn lọ ji to OKLUNỌ lọ nukọn, na aslọ nuyónwán lọ tọn nido ṣinyọn aisintẹn lẹblanu tọn lọ ji he tin to okunnuhó lọ ji, na ewọ ma do kú blo: ¹⁴é nasọ yí sọn ohùn oyìnvú lọ tọn mẹ, bo yí alọviyẹyẹ etọn do mì i do aisintẹn lẹblanu tọn lọ ji to whèzètẹn lọ waji; podọ to aisintẹn lẹblanu tọn lọ nukọn wẹ é na yí alọviyẹyẹ etọn do mì sọn ohùn lọ mẹ whla ṣinawe. ¹⁵Whenẹnu wẹ é na hù gbọgbọẹ avọ́nunina ylando tọn lọ, he tin na gbẹtọ lẹ lọ, bo hẹn ohùn etọn biọ hòmẹ avóajlalanọ tọn lọ mẹ wá, bo yi ohùn etọn do wà dile é yí ohùn oyìnvú lọ tọn do wà do, bo sọ mì i do aisinten lẹblanu tọn lọ ji, podọ do aisintẹn lẹblanu tọn lọ nukọn. ¹⁶E nasọ basi ovẹ̀se na otẹn wiwe lọ, na mawé ovi Islaeli tọn lẹ tọn wutu, podọ na ylankan yetọn lẹ tọn wutu, yèdọ ylando yetọn lẹpo: podọ mọwẹ é na basi na ogohò opli tọn lọ, he nọnọ̀ yé de to gblagbla mawé yetọn lẹ tọn mẹ ¹⁷Omẹ de ma na tin to ogohò opli tọn mẹ gba whenuena ewọ jei hòmẹ nado basi ovẹ̀se to otẹn wiwe lọ mẹ, kaka ewọ do jẹgbonu, bo ko basi ovẹ̀se na ede, podọ na owhédo etọn, podọ na agùnpipli Islaeli tọn lepo. ¹⁸E nasọ jẹgbonu yì jẹ agbà lọ kọ́n he tin to OKLUNỌ lọ nukọn, bo sọ basi ovẹ̀se nè; bo nasọ yí sọn ohùn oyìnvú lọ tọn mẹ, podọ sọn ohùn gbọgbọẹ lọ tọn mẹ, bo yí i do azò agbà lọ tọn lẹ ji lẹ́do pé. ¹⁹E nasọ yí alọviyẹyẹ etọn do mì sọn ohùn lọ mẹ do e ji whla ṣinawe, bo lè ẹ we, bo hiọ ẹ sọn mawé ovi Islaeli tọn lẹ tọn mẹ. ²⁰Podọ whenuena ewọ ko basi opòdo ovẹ̀se bibasi na otẹn wiwe lọ, po ogohò opli tọn lọ po, po agbà lọ po, é na hẹn gbọgbọẹ gbẹte lọ wá: ²¹Aalọn nasọ bó alọ etọn awe lẹ do ota gbọgbọẹ gbẹte lọ tọn ji, bo yigbè oylanwà ovi Islaeli tọn tọn lẹpo do e ta, po oylankan yetọn lẹpo po, yèdọ ylando yetọn lẹpo; é na bé yé do ota gbọgbọẹ lọ tọn, bo na do e hlan gbọn alọ omẹ didè de tọn mẹ yì biọ zùngbo lọ mẹ: ²²gbọgbọẹ lọ bo na zé oylanwà yetọn lẹpo hẹn to e ji jẹ aigba gbọgbọẹ de ji: é bo nasọ jó gbọgbọẹ lọ do yì zùngbo lọ mẹ. ²³Aalọn nasọ biọ ogohò opli tọn lọ mẹ wa, bo na dè awu alavó tọn lẹ lọ sè sọn ogo, he é zé do ogo lẹ whenuena é biọ otẹn wiwe lọ mẹ yí, bo na jó yé do finẹ: ²⁴é nasọ do olàn etọn osìn mẹ to otẹn wiwe de mẹ, bo bó awu etọn lẹ do ogo, bo tón wá, bo na avọ́nunina mimẹ̀ etọn, po avọ́nunina mimẹ̀ gbẹtọ lẹ lọ tọn po, bo basi ovẹ̀se na ede podọ na gbẹtọ lẹ lọ. ²⁵Ojó avọ́nunina ylando tọn lọ wẹ ewọ na mè to agbà lọ ji. ²⁶Ewọ he sọ jó gbọgbọẹ lọ yì na Ázazeli na yàn avọ̀ etọn lẹ, bo do olàn etọn osìn mẹ, podọ to enẹgodo é na biọ osla lọ mẹ wá. ²⁷Podọ oyìnsú avọ́nunina ylando tọn lọ, po gbọgbọe ylando tọn lọ po, ohùn mẹhetọn ko yín hinhẹnwá hòmẹ nado basi ovẹ̀se to otẹn wiwe lọ mẹ, na yín hinhẹn tón jẹ osla lọ godo; yé na mè ayú yetọn lẹ to miyọn mẹ, po olàn yetọn po, po oml yetọn po. ²⁸Podọ ewọ he mè yé na yàn avọ̀ etọn lẹ, bo do olàn etọn osìn mẹ, podọ to enẹgodo é na biọ osla lọ mẹ wá.

²⁹E bo na yín asẹdai de kakadoi hlan mì: to osùn sinawetọ lọ; mẹ, to azán aotọ osùn lọ tọn gbè, mìwlẹ na bianukunna alindọn mìtọn lẹ, bo ma na wà azón hunkọ depope tọn, owhévi kavi ojonọ he wáwási to mì ṣẹnṣẹn: ³⁰na azán he gbè wẹ ovẹ̀se na yín bibasi na mì, nado lẹ̀ mì wé; sọn ylando mìtọn lẹpo mẹ mìwlẹ na yín wiwe to OKLUNỌ lọ nukọn. ³¹Gbọjẹzán ogbọjẹ ayidego tọn de wẹ hlan mì, mìwlẹ bo nasọ bianukunna alindọn mìtọn lẹ; asẹdai kakadoi de wẹ. ³²Podọ yẹwhenọ lọ, mẹhe yè na sámìsisana podọ mẹhe yè na klandowiwe nado yín yẹwhenọ to otẹn otọ́ etọn tọn mẹ, wẹ na basi ovẹ̀se lọ, bo na yí awu alavọ̀ tọn lẹ lọ do ogo, yèdọ awu wiwe lẹ lọ. ³³Ewọ na basi ovẹ̀se na fìwiwe lọ, é bo nasọ basi ovẹ̀se na ogohò opli tọn lọ podọ na agbà lọ; ewọ nasọ basi ovẹ̀se na yẹwhenọ lẹ lọ podọ na gbẹtọ agùnpipli lọ tọn lẹpo. ³⁴Ehe na yín asẹdai madopodo de hlan mì, nado nọ basi ovẹ̀se na ovi Islaeli tọn lẹ na ylando yetọn lẹpo tọn wutu whladapo to owhè lọ mẹ. Ewọ sọ wà dile OKLUNỌ lọ degbèna Moṣe do.

¹OKLUNỌ lọ sọ dọhó hlan Moṣe, dọmọ, ²Dọhó hlan Aalọn, podọ hlan visunnu etọn lẹ, podọ hlan ovi Islaeli tọn lẹpo, bo dọ hlan yé dọmọ; Ehe wẹ onú lọ he OKLUNỌ lọ ko degbèna, dọmọ, ³Omẹ depope é yín to finẹ sọn owhó Islaeli tọn lọ mẹ, he hù oyín de, kavi lẹngbọvu, kavi gbọgbọẹ, to osla lọ mẹ, ⁴bo ma ko hẹn ẹn wá jẹ ogohò opli tọn lọ kòn, nado yí i na di avọ́nunina de hlan OKLUNỌ lọ to gohọ̀túntún OKLUNỌ lọ tọn nukọn gba: ohùn na yín hihia hlan odawe lọ; é ko kèn ohùn dai; odawe nẹ na yín sinsán sè sọn omẹ etọn lẹ mẹ: ⁵hlan opòdo lọ na ovi Islaeli tọn lẹ nido nọ hẹn avọ́sánnu yetọn lẹ wá, he yè do sánvọ́ to odán gbágbá lọ ji, yèdọ na yé nido nọ hẹn yé wá jẹ OKLUNỌ lọ de, jẹ ohòn ogoho opli tọn lọ tọn kòn, jẹ yẹwhenọ lọ de, bo yí yé do sánvọ́ na avọ́sánnu avọ́nunina jijọho tọn lẹ hlan OKLUNỌ lọ. ⁶Yẹwhenọ lọ nasọ mì ohùn lọ do agbà OKLUNỌ lọ tọn ji to ohón ogohò opli tọn lọ tọn kòn, bo sọ mè ojó lọ na owán vivi de hlan OKLUNỌ lọ. ⁷Yé ma nasọ sánvọ́ avọ́sánnu yetọn lẹ hlan alunkun lẹ ba gba, mẹhe yé hihodo yì ayọgbó de. Ehe na yín asẹdai de hlan yé kakadoi gbọn whẹndo yetọn lẹpo mẹ.

⁸Hiẹ bo na dọ hlan yé dọ, Mẹdepope é yín finẹ sọn owhé Islaeli tọn lọ gbè, kavi sọn ojonọ lẹ lọ mẹ he wáwási to é ṣẹnṣẹn, he na avọ́nunina mimẹ̀ de kavi sánvọ́, ⁹bo ma hẹn ẹn wá jẹ ohòn ogohò opli tọn lọ tọn kón nado yí i do sánvọ́ hlan OKLUNỌ lọ gba; yédọ odawe nẹ na yín sinsán sè sọn omẹ etọn lẹ mẹ.

¹⁰Podọ mẹdepope é yín finẹ sọn owhé Islaeli tọn lọ mẹ, kavi ojonọ lẹ lọ mẹ he wáwási to yé ṣẹnṣẹn, he dù ohùn hunkọ de tọn; yẹn na zé nukunmẹ ṣie do alindọn nẹ ji he dù ohùn, bo nasọ sán ẹn sè sọn omẹ etọn lẹ ṣẹnṣẹn. ¹¹Na alindọn olàn lọ tọn tin tó ohùn lọ mẹ: yẹn ko na ẹn mì to agbà lọ ji nado basi ovẹ̀se na alindọn mìtọn lẹ: na ohùn wẹ ewọ he to ovẹ̀se basi gbọn owhèhó alindọn lọ tọn dali. ¹²Enẹwutu yẹn dọ hlan ovì Islaeli tọn lẹ lọ dọ, Alindọn sọn mì mẹ de ma na dù ohùn gba, mọ ojonọ depope he wáwási to mì ṣẹnṣẹn ma na dù ohùn gba.

¹³Podọ mẹdepope é yín finẹ sọn ovi Islaeli tọn lẹ mẹ, kavi sọn ojonọ lẹ lọ mẹ he wáwási to yé mẹ, he wlé to gbéyinyan mẹ kanlin depope kavi ohè he sọgan yín dùdù; ewọ na kòn ohùn etọn yìngbé, bo yi okógudu do ṣinyọn ẹn. ¹⁴Na ogbẹ̀ olàn lẹpo tọn, dopo wẹ ohùn etọn lẹpo yín po ogbè etọn po: enẹwutu yẹn dọ hlan ovi Islaeli tọn lẹ lọ dọ, Mì ma na dù ohùn hunkọ olàn tọn depope gba: na ogbè olàn lẹpo tọn wẹ ohùn etọn lọ: mẹdepope he dù i na yín sinsán sè. ¹⁵Podọ alindọn depope he dù núkúkú de, kavi enẹ he yín dòntlẹn sọn kanlin lẹ si, eyín é yín owhévi kavi ojonọ de, ewọ na yàn avọ́ etọn lẹ, bo do ede osìn mẹ, bo yín mawé kakajẹ whèjai lọ: whenẹnu wẹ ewọ na yín wiwe. ¹⁶Ṣigba eyín ewọ ma yàn yé gba, kavi do olàn etọn osìn mẹ gba, whenẹnu ewọ na zé oylanwà etọn hẹn.

¹OKLUNỌ lo sọ dọhó hlan Moṣe, dọmọ, ²Dọhó hlan ovi Islaeli tọn lẹ lọ, bo dọ hlan yé dọmọ, Yẹn wẹ OKLUNỌ lọ Jiwheyẹwhe mìtọn. ³Míwlẹ ma na wà di wiwà aigba Egipti tọn lọ tọn lẹ gba ehemẹ míwlẹ nò: podọ míwlẹ ma na wà di wiwà aigba Kanani tọn lọ tọn lẹ gba, fie yẹn hẹn mì wá: mọ mìwlẹ ma na zinzọnlin to asẹdai yetọn lẹ mẹ gba. ⁴Whèdida ṣie lẹ wẹ mì na basi, podọ asẹdai ṣie lẹ wẹ mí na yìn, nado nọ zinzọnlin to e mẹ: yẹn wẹ OKLUNỌ lọ Jiwheyẹwhe mìtọn. ⁵Enẹwutu míwlẹ na nọ yìn asẹdai ṣie lẹ, po whẹ̀dida ṣie ẹ po: ehe eyín omẹ de basi, é na gán gbọn yé dali: yẹn wẹ OKLUNỌ lọ.

⁶Ode sọn mì me ma na sèpọ jẹ mẹdepope de he tin sẹpọ hẹnnu tọn hlan ẹn, nado hùn omé yetọn gba: yẹn wẹ OKLUNỌ lọ ⁷Omotọ́ towe tọn lọ, yèdọ omé onọ towe tọn lọ, wẹ hiẹ ma na hùn gba: onọ towe wẹ ewọ: hiẹ ma na hùn omé etọn gba. ⁸Omé asi otọ́ towe tọn tọn wẹ hiẹ ma na hùn gba: omẹ́ otọ́ towe tọn wẹ. ⁹Omé nọviyọnnu towe tọn, viyọnnu otọ́ towe tọn lọ, kavi viyọnnu onọ towe tọn lọ, eyín yè ji to whégbè, kavi ji to gbonu, yèdọ omé yetọn hiẹ ma na hùn gba. ¹⁰Omé vivọnnu visunnu towe tọn lọ, kavi viyọnnu viyọnnu towe tọn lọ tọn, yèdọ omé yetọn hiẹ ma na hùn gba: na yetọn wẹ omé towe lọsu. ¹¹Omé viyọnnu asi otọ́ towe tọn lọ tọn lọ tọn, yè dètọn sọn otọ́ towe mẹ, nọviyọnnu towe wẹ ewọ, hiẹ ma na hùn omé etọn gba. ¹²Hiẹ ma na hùn omẹ́ nọviyọnnu otọ́ towe tọn gba: hẹnnumẹ yọnnu sẹ́pọ otọ́ towe tọn wẹ ewọ. ¹³Hiẹ ma na hùn omẹ́ nọviyọnnu onọ towe tọn lọ tọn: na hẹnnumẹ yọnnu sẹ́pọ onọ towe tọn wẹ ewọ. ¹⁴Hiẹ ma na hùn omẹ́ nọvisunnu otọ́ towe tọn tọn lọ, hiẹ ma na dònjópọ asi etọn de gba: tanlin towe wẹ ewọ. ¹⁵Hiẹ ma na hùn omẹ́ yónwhẹn yọnnusi towe lọ tọn: asi visunnu towe tọn wẹ ewọ; hiẹ ma na hùn omẹ́ etọn gba. ¹⁶Hiẹ ma na hùn omẹ́ asi nọvisunnu towe tọn tọn gba: omé nọvisunnu towe tọn wẹ. ¹⁷Hie ma na hùn omé yọnnu de tọn po viyọnnu etọn tọn po gba; hiẹ ma na yí viyọnnu visunnu etọn tọn gba, kavi viyọnnu viyọnnu etọn tọn, nado hùn omẹ́ etọn gba; hẹnnumẹ yọnnusi sẹ́pọ wẹ yé: oylankan wẹ. ¹⁸Hie ma na yí yọnnu de hlan nọviyọnnu etọn de, nado vín nuwhlenhẹmẹtọ de hlan en, nado hùn omẹ́ etọn, dogó awetọ lọ to ogbé whenu etọn mẹ. ¹⁹Hiẹ ma na dònsẹ́pọ jẹ yọnnu de de nado hùn omé etọn gba, dẹn sọ le ewọ yín kinklandola na mawé etọn. ²⁰Podọ hiẹ ma na zán kẹdẹdi agbasalan tọn hẹ asi kọmenu towe tọn gba, nado hẹn dewe gble po e po. ²¹Hiẹ ma na dè okún towe depope do apadopo hlan Moleki gba, mọ hiẹ ma na hẹn oyín Jiwheyẹwhe towe tọn gble gba: yen wẹ OKLUNỌ lọ. ²²Hiẹ ma na zánhẹ sunnuwunmẹ de, di hẹ yọnnuwunmẹ de gba: osùnú we. ²³Hiẹ ma na zanhẹ kanlin depope gba nado hẹn dewe gble gbọn finẹdali: mọ yọnnusi de ma na site to kanlin de nukọn nado mlọnai to é de: oflusọ wẹ.

²⁴Mì hẹn mìde gble to onú helẹ depope mẹ blo: na ehe lepo me yè hẹn akọta lẹ lọ gble te he yen yàn jẹgbonu sọn mì nukọn: ²⁵yè bo sọ hẹn aigba lọ gble: enẹwutu we yen dla oylanwà etọn pọ́n to e ji, aigba lọ bo sọ slú tòmẹnu etọn lẹ lọ jẹgbonu. ²⁶Enẹwutu miwlẹ na yìn asẹdai ṣie lẹ po whẹ̀dida ṣie lẹ po; bo ma na wà depope osùnú helẹ tọn gba; kavi owhévi lọ kavi ojonọ lọ he wáwási to mi ṣẹnṣẹn: ²⁷(na osùnú hele pó wẹ gbẹtọ aigba lọ ji tọn lẹ wà, he ko tin to mì nukọn, bọ aigba lọ yín hinhẹngble;) ²⁸dọ aigba lọ slú miwlẹ jẹgbonu ga blo, whenuena míwlẹ hẹn ẹn gble, dile é slú akọta he ko tin mì nukọn lẹ lọ jẹgbonu do. ²⁹Na mẹdepope he na wà depope osùnú helẹ tọn, yèdọ alindon he wà yé lẹ na yín sinsán sẹ́ sọn omẹ yetọn lẹ mẹ. ³⁰Enẹwutu wẹ mì na nọ yìn asẹ ṣie, dọ mìwlẹ wà depope owàlọ osù tọn helẹ blo, he yè ko wa to mì nukọn lẹ, podọ na mì hẹn mìde gble to ehe mẹ blo: yẹn wẹ OKLUNỌ lọ Jiwheyẹwhe mìtọn.

¹OKLUNỌ lọ sọ dọhó hlan Moṣe, dọmọ, ²Dọhó hlan agùn ovi Islaeli tọn lẹ tọn, bo dọ hlan yé dọmọ, Míwlẹ na yín wiwe: na yẹn OKLUNỌ lọ Jiwheyẹwhe mìtọn wiwe wẹ. ³Mì omẹ dopodopo na nọ dibusi onọ etọn, po otọ́ etọn po, míwlẹ nasọ nọ yìn gbọjẹzán ṣie lẹ: yẹn wẹ OKLUNỌ lọ Jiwheyẹwhe mìtọn. ⁴Mìwlẹ lé do bosiọ lẹ de blo, mọ mì sọ basi vòdún kinkọ̀n lẹ hlan mìde blo: yẹn wẹ OKLUNỌ lọ Jiwheyẹwhe mìtọn. ⁵Podọ whenuena míwlẹ yí avọ́sánnu avọ́nunina jijọho tọn de na hlan OKLUNỌ lọ, míwlẹ na yí i na na mì nido yín mẹkẹalọyí. ⁶Azán dopo he gbè mì yí i na te lọ wẹ é na yín dùdù, podọ to aihọngbè: podọ eyín núde pò kakajẹ azán atọ̀ntọ gbè, é na yín yíyí miyọn do mẹ́. ⁷Podọ eyín é yín dùdù to azán atọ̀ntọ lọ gbè janwẹ, osùnú de wẹ é yín; é ma na yín alọkẹyi gba: ⁸ṣigba omẹ he dù i lẹ dopodopo na zé oylanwà etọn hẹn, na é ko flu onú wiwe OKLUNỌ lọ tọn wutu: alindọn nẹ bo nasọ yín sinsán sẹ̀ sọn omẹ etọn lẹ mẹ.

⁹Podọ whenuena míwlẹ gbọ̃n ojijẹ aigba mìtọn tọn lọ, hiẹ ma na gbèn olọnglọnẹn ogle towe tọn lẹ pete gba, mọ hiẹ ma na bẹ́ owólu ojijẹ towe tọn pli gba. ¹⁰Hiẹ ma na wewelu vingle towe tọn gba, mọ hiẹ ma na bẹ́ sinsẹ́n jija vẹ̃ngle towe tọn pli gba; hiẹ na jó yé dai na wamọnọ lẹ podọ na ojonọ lẹ lọ: yẹn wẹ OKLUNỌ lọ Jiwheyẹwhe mìtọn. ¹¹Mìwlẹ ma na finnuyí; mọ míwlẹ ma na yí oblu do zán, kavi dolalo na mínọzo gba. ¹²Míwlẹ ma na whle gbọn oyín ṣie lọ dali po oblu po gba, sọmọ bọ hiẹ do flu oyín Jiwheyẹwhe towe tọn lọ: yẹn wẹ OKLUNỌ lọ. ¹³Hiẹ ma na bianukunna kọmẹnu towe kavi jẹajodo e gba: azọ́nkuẹ ogbanumnẹ de tọn ma na nò de we ozán lọ mẹ kakajẹ afọnnu gba. ¹⁴Hiẹ ma na hodẹ̀do tókunọ lọ, kavi yí agbalinu de do nukọnna nukuntọ́nnọ lọ gba, ṣigba hiẹ na dibusi Jiwheyẹwhe towe: yẹn wẹ OKLUNỌ lọ. ¹⁵Miwlẹ ma na wà mawàdódó de to whẹ̀dida mẹ gba: hiẹ ma na hò nukunta wamọnọ lọ tọn pọ́n gba, kavi gbogbóna nukunta hlọnhlọnnọ lọ tọn gba: ṣigba hiẹ na dawhẹ̀ kọmẹnu towe tọn to dódó mẹ. ¹⁶Hiẹ ma na to aga yì bo to odò yì di ajandotọ de to omẹ towe lẹ ṣẹnṣẹn gba: mọ hiẹ ma na nọte do ohùn kọmẹnu towe tọn jì: yẹn wẹ OKLUNỌ lọ. ¹⁷Hiẹ ma na gbẹwanna nọvisunnu towe to ayiha towe mẹ gba: hiẹ na wọ́ nugbonugbo hẹ kọmẹnu towe, bo ma zé ylando hẹn na ewọ tọn wutu. ¹⁸Hiẹ ma na yí ahọsu gba, kavi zé okẹ̀n depope hẹn do ovi omẹ towe lẹ tọn lẹ go gba, ṣigba hiẹ na yiwanna kọmẹnu towe di dewe: yẹn wẹ OKLUNỌ lọ. ¹⁹Miwlẹ na yìn aṣẹdai ṣie lẹ. Hiẹ ma na dike kanlinyìnyìn ni yla hẹ hunkọ devo de gba: hiẹ ma na yí okún unmẹ awe do do ogle towe gba: mọ awu avọ̀ hunkọ awe tọn de he yè flusọ dopọ ma na wá ogo we gba. ²⁰Podọ medepope he zánhẹ yọnnu de kẹdẹdi agbasalan tọn, he yín afànumẹ de, he yè biọ na asú de, bo ma ko yín fifli gba, bọ yè ma ko na mẹdekannujẹ ẹ gba; afọdona na tin finẹ; yè ma na hù yé gba, na ewọ ma jẹ ede kannu wutu. ²¹Ewọ bo na hẹn avọ́nunina whẹ̀gbledo etọn tọn wá OKLUNỌ lọ de, jẹ ohọ̀n ogohọ̀ opli tọn lọ tọn kòn, yèdọ agbò dopo na avọ́nunina whẹ̀gbledo tọn de. ²²Yẹwhenọ lọ bo na yí agbò avọ́nunina whẹ́gbledo tọn lọ to OKLUNỌ lọ nukọn do basi ovẹ̀se nẹ́ na ylando etọn ehe é ko do wàylando: ewọ nasọ yín jijona na ylando etọn ehe é ko do wàylando. ²³Podọ whenuena mìwlẹ na biọ aigba lọ mẹ wá, bo na ko do atin hunkọ lẹpo tọn na núdùdù, whenẹnu mì na hia sinsẹ̀n etọn lọ di whẹ̀magbo yetọn: yé na tin di whẹ̀magbonọ hlan mì hò owhè atọ̀n; é ma na yín dùdù gba. ²⁴Ṣigba to owhè ẹnẹtọ mẹ sinsẹ́n etọn lẹpo na yín wiwe, na nina opẹ́ hlan OKLUNỌ lọ. ²⁵Podọ to owhè atọ̀ntọ mẹ wẹ mì na dù sọn sinsẹ́n etọn mẹ, na é nido na ojideji etọn hlan mì: yẹn wẹ OKLUNỌ lọ Jiwheyẹwhe mìtọn. ²⁶Mìwlẹ ma na dù onú depope po ohùn lọ po gba: mọ mì ma nasọ zán ofìnọn lẹ gba, kavi plón apajlẹnu gba. ²⁷Miwlẹ ma na dèdà lọnglọnẹn ota mìtọn lẹ tọn lẹ gba, mọ hie ma na hẹn lọnglọnẹn otán towe tọn lẹ ylanwhanpẹ gba. ²⁸Miwlẹ ma na basi gbigbò depope to olàn mìtọn mẹ na oṣiọ lọ gba, kavi gbò owhẹ́ lẹ depope do mìde go gba: yẹn wẹ OKLUNỌ lọ. ²⁹Hiẹ hẹn viyọnnu towe flu blo, nado hẹn ẹn zùn ogàlọtọ de; aigba lọ nikã lézun ogàlọtọ, podọ aigba lọ lẹ́zun gigọ́na ylankan blo. ³⁰Míwlẹ na yìn gbọjẹzán ṣie lẹ, bo sọ doyẹyigona fìwiwe ṣie: yẹn wẹ OKLUNỌ lọ. ³¹Mì lé jẹ yé he tindo gbigbọ aovi tọn lẹ de blo, kavi jẹ azétọ lẹ de blo; mì din yé mọ blo, nado yín hinhẹngble gbọn yé dali: yẹn wẹ OKLUNỌ lọ Jiwheyẹwhe mìtọn. ³²Hiẹ na fọ́n ṣite to ota owhànọ lọ nukọn, bo gbògbéna nukunmẹ omẹ yọ́nhonọ lọ tọn, hiẹ nasọ nọ, dibusi Jiwheyẹwhe towe: yẹn wẹ OKLUNỌ lọ. ³³Eyín ojonọ de wáwási to de we to aigba mìtọn ji, míwlẹ ma na wà agọ do e gba. ³⁴Ojonọ he wáwasi to mì de lọ na tin hlan mì di owhévi lọ to mì ṣẹnṣẹn, hiẹ nasọ yiwanna ẹn di dewe; na mìwlẹ ko yín ojonọ to aigba Egipti tọn lọ mẹ: yen wẹ OKLUNỌ lọ Jiwheyẹwhe mìtọn. ³⁵Mìwlẹ ma na wà mawadódó de to whẹ̀dida mẹ gba, to avọjlepo mẹ, to ojlẹgàn mẹ, kavi to nujlẹnu mẹ. ³⁶Ojlẹnu dódó tọn lẹ, ojlẹgàn dódó tọn lẹ, efa dódó tọn de, po hinni dódó tọn de po, wẹ mì na tindo: yẹn wẹ OKLUNỌ lọ Jiwheyẹwhe mìton, he hẹn mì jẹgbonu sọn aigba Egipti tọn lọ mẹ. ³⁷Mìwlẹ nasọ nọ payi aṣẹdai ṣie lẹpo go, po whẹ̀dida ṣie lẹpo po, bo basi yé: yẹn wẹ OKLUNỌ lọ.

¹OKLUNỌ lọ sọ dọhó hlan Moṣe, dọmọ, ²Humọ, hiẹ nasọ dọ hlan ovi Islaeli tọn lẹ dọmọ, Mẹdepope ewọ yín sọn ovi Islaeli tọn lẹ mẹ, kavi sọn ojonọ lẹ lọ mẹ he wáwási to Islaeli mẹ, he na sọn okún etọn mẹ hlan Molẹki: é na yín hùhù dandan: omẹ aigba lọ tọn le na yí zannu lẹ do dlanzannu do e. ³Yẹn ga na ze nukunmẹ ṣie do omẹ nẹ go, bo na sán ẹn sé sọn omẹ etọn lẹ ṣẹnṣẹn: na é ko na sọn okun etọn mẹ hlan Molekiwutu, nado hẹn fìwiwe ṣie gble, podo nado flu oyín wiwe ṣie. ⁴Podọ eyín omẹ aigba lọ tọn lẹ wà gbọn aliho lẹ depope whla nukun yetọn lẹ sọn omẹ nẹ go, whenuena é na sọn okún etọn mẹ hlan Molẹki, bo ma sọ hù i gba: ⁵whenẹnu yẹn na zé nukunmẹ ṣie do omẹ nẹ go, podọ do whédo etọn go, bo na sán ẹn sẹ̀, po yé he hodo e yi gàlìlọ de mẹ lẹpo po, nado zán ogàhlọ hẹ Molẹki, sọn omẹ yetọn lẹ ṣẹnṣẹn. ⁶Podọ alindọn lọ he lẹ́ hlan yé he tindo gbigbọ aovi tọn lẹ de, podọ hlan azetọ le de, nado hodo yé yì ogàlilọ de, yèdọ yen na zé nukunmẹ ṣie do alindọn nẹ go, bo na sán ẹn sè sọn omẹ etọn lẹ ṣẹnṣẹn. ⁷Enẹwutu mì klan mìde do wiwe, mì ni bo yín wiwe: na yen wẹ OKLUNỌ lọ Jiwheyẹwhe mìtọn. ⁸Mìwlẹ nasọ yìn asẹdai ṣie le, bo basi yé: yen wẹ OKLUNỌ lọ he klan mì do wiwe. ⁹Nà omẹ depope he ho íèdo otọ́ etọn kavi ono etọn na yìn hùhù dandan: é ko hodẹ̀do otọ́ etọn kavi onọ etọn: ohùn etọn na tin to e ji. ¹⁰Podọ odawe lọ he dèayọ hẹ asi sunnu devo tọn, yedọ ewọ he dèayọ hẹ asi kọmẹnu etọn tọn, sunnu ayọdètọ lọ po yọnnu ayọdètọ lọ po na yín hùhù dandan. ¹¹Podọ sunnu lọ he zánhẹ asi otọ́ etọn tọn ko hùn omé otọ́ etọn tọn: yé omẹ awe lẹ na yín hùhù dandan; ohùn yetọn na tin to yé ji. ¹²Podọ eyín sunnu de zánhe asi visunnu etọn tọn, yé omẹ awe lẹ na yín hùhù dandan: yé ko basi oflusọ; ohùn yetọn na tin to yé ji ¹³Podọ eyín sunnusi de zánhẹ sunnusi de, di hẹ yọnnusi de, yé omẹ awe lẹ ko wà osùnú: yé na yín hùhù dandan; ohùn yetọn na tin to yé ji. ¹⁴Podọ eyín sunnusi de yí asi de po onọ etọn po oylankan wẹ: yé na yín yíyí miyọn do mó, ewọ po yé po; na oylankan de do tin to mì ṣẹnṣẹn blo. ¹⁵Podọ eyín sunnusi de zánhẹ kanlin de, ewọ na yín hùhù dandan: mìlẹ bo nasọ hù kanlin lọ ¹⁶Podọ eyín yọnnusi de dònsópọ jẹ kanlin de de, bo mlọnai to e de, hiẹ na hù yọnnu lọ po kanlin lọ po: yé na yin hùhù dandan; ohùn yetọn na tin to yé ji. ¹⁷Podọ eyín sunnusi de yi nọviyọnnu etọn, viyọnnu otọ́ etọn tọn, kavi viyọnnu onọ etọn tọn, bo mọ omé etọn, bọ ewọ sọ mọ omó ewọ tọn; owinyannu de wẹ; yé na yín sinsán sè to nukun ovi omẹ yetọn lẹ tọn lọ tọn mẹ: ewọ ko hùn omé nọviyọnnu etọn tọn; ewọ na zé ylanwà eton hẹn. ¹⁸Podọ eyín sunnusi de na zánhẹ yọnnusi de tintindo lanmẹzòn etọn, bo na hùn omó etọn; é ko hen asisa etọn jẹmẹ́, ewọ bo ko sọ hùn asisa ohùn etọn tọn lọ: yé ome awe lẹ na yin sinsán sè sọn omẹ yetọn lẹ ṣẹnṣẹn. ¹⁹Podọ hie ma na hùn omé nọviyọnnu onọ towe tọn tọn gba, kavi nọviyọnnu otọ́ towe tọn: na é ko hẹn hẹnnumẹ sópọ etọn jẹmẹ́: yé na zé ylanwà yetọn hẹn. ²⁰Podọ eyín sunnusi de na zánhẹ asi tavó etọn tọn, é ko hùn omé tavó etọn tọn: yé na zé ylanwà yetọn hẹn; yé na kú matinvi ²¹Podọ eyín sunnusi de na yi ai nọvisunnu etọn tọn, fuflu wẹ: ewọ ko hún omé nọvisunnu etọn tọn; yé na tin matinvi.

²²Enẹwutu mì na yìn aṣẹdai ṣie lẹpo, po whẹ̀dida ṣie lepo po, bo nọ basi yé: na aigba lọ, fiedali yẹn hẹn mì wá nado nọ nọ e me slú mì jẹgbonu blo. ²³Mìwìẹ ma na zinzọnlin to wiwà akota lọ tọn le me gba, he yẹn yàn jẹgbonu to mì nukọn: na yé wà onú helẹ pó, enẹwutu yẹn bo gbẹwanna yé ²⁴Ṣigba yẹn ko dọ hlan mì dọ, Mì na yí aigba yetọn na nútindo, yẹn nasọ yí i na hlan mì nado tindo e, aigba yí anósìn po owín po do to sisà de: yẹn wẹ OKLUNỌ lọ Jiwheyẹwhe mìtọn, he ko klan mì sọn akọta lẹ lọ mẹ. ²⁵Enẹwutu mì na yí vògbingbọn do kanlin wiwe lọ po mawé lọ po ṣẹnṣẹn, podọ do ohó mawé lọ po wiwe lọ po ṣẹnṣẹn: podọ míwlẹ ma na hẹn alindọn mìtọn lẹ zùn osùnọ gbọn kanlin dali gba, kavi gbọn ohó dali gba, kavi onú depope dali he aigba lọ yí do to linlin, ehe yẹn ko klandovo sọn mì de di mawó. ²⁶Mìwlẹ nasọ yín wiwe hlan mi: na yẹn OKLUNỌ lọ wiwe wẹ, bo ko sọ klan mì dovo sọn akọta lẹ lọ mẹ, na mì ni do yín ṣie. ²⁷Sunnusi de ga kavi yọnnusi de he tindo gbigbọ aovi tọn de, kavi he yín azétọ de, na yín hùhù dandan: yé na yí zannu lẹ do dlanzannudo yé: ohùn yetọn na tin to yé ji.

¹OKLUNỌ lọ sọ dọ hlan Moṣe dọmọ, Dọhó hlan yewhenọ lẹ ọvisunnu Aalọn tọn lẹ lọ, bo dọ hlan yé dọmọ, Mẹde ma na hen ede flu finẹ na osiọ lọ to omẹ etọn lẹ ṣẹnṣẹn gba; ²adavo na hẹnnumẹ etọn, he tin sèpọ hlan e de, na onọ etọn, podọ na otọ́ etọn, podọ na visunnu etọn, podọ na viyọnnu etọn, podọ na nọvisunnu etọn; ³podọ na nọviyọnnu etọn awhlivu de, he tin sópẹ́ hlan e de, he ma ko tindo asú gba, ewọ wẹ é sọgan hẹn ede flu na. ⁴Ewọ ma na hẹn ede flu di asú de to omẹ etọn lẹ mẹ, nado flu ede gba. ⁵Yé ma na basi tapipa to ota yetọn ji gba, mọ yé ma na lùn lọnglọnẹn otá yetọn tọn sẹ́ gba, kavi basi gbigbo depope to olàn yetọn mẹ gba. ⁶Ye na yín wiwe hlan Jiwheyẹwhe yetọn, bo ma na flu oyín Jiwheyẹwhe yetọn tọn gba: na avọ́nunina OKLUNỌ lọ tọn le yè basi gbọn miyọn dali, akla Jiwheyẹwhe yetọn tọn, wẹ yé yíyí na: enẹwutu yé na yín wiwe. ⁷Yé ma na yí yọnnu de he yín ogàlọtọ de gba, kavi gbigbletọ de; mọ yé ma na yí yọnnu de he yè dè sọn asú etọn de gba: na wiwe wẹ ewọ hlan Jiwheyẹwhe etọn. ⁸Enẹwutu hiẹ na klan ẹn do wiwe; na ewọ to akla Jiwheyẹwhe towe tọn yína: ewọ na yín wiwe hlan we: na yẹn OKLUNỌ lọ, he klan mì do wiwe, wiwe wẹ. ⁹Podọ viyọnnu yẹwhenọ depope tọn, eyín é flu ede gbọn gàlilọ lọ dali, ewọ flu otọ́ etọn; yè na yí miyọn do mẹ́ ẹn. ¹⁰Podọ ewọ he yin yẹwhenọ daho lọ to mẹmẹsunnu etọn lẹ ṣẹnṣẹn, ota mẹhetọn yè kòn amì sisá lọ do, podọ he yè hẹnzùnwiwe nado yí awu lẹ lọ do ogo, ma na dike odà ota etọn tọn ni jẹ wòwó gba, kavi tlẹn avọ̀ etọn lẹ gba; ¹¹mọ é ma na yì họ̀mẹ jẹ osiọ depope de, kavi hẹn ede flu na otọ́ etọn gba, kavi na onọ etọn gba; ¹²mọ é ma na jẹgbonu sọn fìwiwe lọ mẹ gba, kavi flu fìwiwe Jiwheyẹwhe etọn tọn lọ gba; na hinhẹnzùnwiwe Jiwheyẹwhe etọn tọn tin to é ji: yẹn wẹ OKLUNỌ lọ. ¹³Asi to awhlivu etọn mẹ de wẹ é na yí. ¹⁴Asúṣiọsi de, kavi asigbẹ́dai de, kavi yọnnu gbigbletọ de, ogàlọtọ de, ehe lẹ wẹ e ma na yí gba: adavo awhlivu de sọn omẹ etọn lọsu lẹ mẹ wẹ é na yí na asi. ¹⁵Podọ ewọ ma na flu okún etọn to omẹ etọn lẹ ṣẹnṣẹn gba: na yẹn wẹ OKLUNỌ lọ he klan mì do wiwe.

¹⁶OKLUNỌ lọ sọ dọhó hlan Moṣe, dọmọ, ¹⁷Dọhó hlan Aalọn, dọmọ, Mẹdepope ewọ yín sọn okún towe mẹ gbọn whẹndo yetọn lẹ mẹ he tindo azọn de, a dike é dònsẹ́po nado yí akla Jiwheyẹwhe etọn tọn na blo. ¹⁸Na mẹdepope ewọ yín he tindo azọ̀n de, é ma na dọ̀nsẹ́pọ gba: nukuntọ́nnọ de, kavi sẹ́kunọ de, kavi ewọ he tindo awọntin pétẹ de, kavi onú depope he lánkan, ¹⁹kavi sunnusi he yín afọsánpònọ de, kavi alọsánpònọ, ²⁰kavi opótónọ, kavi gbẹtọ kẹ́tẹ de, Kavi he tindo azọ̀n de to nukun etọn mẹ, kavi yín aklìnọ, kavi oflónọ, kavi he okún etọn lẹ gbà; ²¹sunnusi de sọn okún Aalọn yẹwhenọ lọ tọn lẹ mẹ, he tindo azọ́n de, ma na sèpọ wá nado na avọ́nunina OKLUNỌ lọ tọn lẹ lọ he yè basi gbọn miyọn dali gba: ewọ tindo azọ̀n de; é ma na wá sẹ́pọ nado yí akla Jiwheyẹwhe etọn tọn lọ na gba. ²²Ewọ na dù akla Jiwheyẹwhe etọn tọn lọ, wiwe gbahúgbahú lọ tọn, po wiwe lọ tọn po. ²³Kiki é ma na biọ avọ̀ajlalanọ lọ mẹ yì gba, kavi sèpọ wá agbà lọ kòn gba, na ewọ tindo azọ̀n de wutu: dọ ewọ flu fìwiwe ṣie lẹ blo: na yẹn wẹ OKLUNỌ lọ he klan mì do wiwe. ²⁴Mọwẹ Moṣe dọhó hlan Aalọn do, podọ hlan visunnu etọn lẹ, podọ hlan ovi Islaeli tọn lẹpo lọ.

¹OKLUNỌ lọ sọ dọhó hlan Moṣe, dọmọ, ²Dọhó hlan Aalọn podọ hlan visunnu etọn lẹ, dọ yé ni klan yéde sọn onú wiwe ovi Islaeli tọn lẹ tọn lẹ mẹ, he ye hiọ hlan mi, podọ na yé flu oyín wiwe ṣie blo: yen wẹ OKLUNỌ lọ. ³Dọ hlan yé dọmọ, Mẹdepope ewo yín sọn okún mítọn lepo me gbọn whẹndo mìtọn lẹ mẹ, he dònsẹ̀pọ jẹ onú wiwe lọ kọ̀n, he ovi Islaeli tọn lẹ ko hiọ hlan OKLUNỌ lọ, tintindo mawé etọn to e ji, alindọn nẹ na yín sinsán sẹ sọn nukọn ṣie: yẹn wẹ OKLUNỌ lọ. ⁴Omẹ depope sọn okún Aalọn tọn mẹ yín opòtọ de, kavi tindo sisà de; é ma na dù sọn onú wiwe lẹ lọ mẹ gba, kaka ewọ do yín wiwe. Podọ medepope he doalọ onú he yín mawé gbọn osiọ dali depope go, kavi sunnusi de okún mẹhetọn yì sọn e mẹ; ⁵kavi medepope doalọ onú he linlin depope go, ehe dali é sọgan yín hinhẹn zún mawé te, kavi sunnusi de sọn mẹhe mẹ é sọgan yí mawé te, mawé depope é tindo; ⁶alindọn lọ he doalọ onú mọnkọ depope go na yín mawé kakajẹ whèjai lọ, bo ma nasọ dù sọn onú wiwé lẹ lọ mẹ, adavo é do olàn eton osìn mẹ. ⁷Podọ whenuena owhè tin odò, ewọ na yín wiwe; to enẹgodo ewọ na dù sọn onú wiwe lẹ lọ mẹ, na akla etọn wẹ wutu. ⁸Enẹ he kú ededenu; kavi he yín dòntlẹn sọn kanlin lẹ de, ewọ ma na dù nado yí do flu ede gba: yẹn wẹ OKLUNỌ lọ ⁹Enẹwutu yé na yìn asẹ, ṣie yé nikã zé ylando hẹn nẹ, bo kú to e mẹ, eyín yé hẹn en flu: yen wẹ OKLUNỌ lọ he klan yé do wiwe ¹⁰Ojónọ de finẹ ma na dù sọn onú wiwe lọ mẹ gba: wáṣinu de sọn yẹwhenọ lọ tọn mẹ, kavi ogbònumẹ de ma na dù sọn onú wiwe lọ mẹ gba. ¹¹Ṣigba eyín yẹwhenọ de hó nlindọn de, hihò akuẹ etọn tọn, ewọ na du sọn e mẹ; podọ mọnkotọn he yè ji to owhẹ́ etọn gbè, yé na dù sọn akla etọn mẹ. ¹²Podọ eyín viyọnnu yẹwhenọ de tọn yín alọwlena hlan ojónọ de, ewọ ma na dù sọn avọ́nunina zédlanga onú wiwe lẹ lọ tọn mẹ gba ¹³Ṣigba eyín viyọnnu yẹwhenọ de tọn yín asúsiọsi de, kavi yọnnugbédai, bo ma tindo ovi de gba, bo sọ lẹ́gọ̀ do owhé otọ̀ etọn ton gbè, di to ovúwhenu etọn mẹ, é na dù sọn akla otọ etọn tọn mẹ: ṣigba ojónọ de ma na dù sọn e mẹ gba. ¹⁴Podọ eyin omẹ de dù sọn onú wiwe lọ mẹ whenẹnu ewọ na yí madatóntọ etọn do gó ẹ, bo na yí onú wiwe lọ na hlan yẹwhenọ lọ. ¹⁵Yé ma nasọ flu onú wiwe ovi Islaeli tọn lẹ tọn lẹ gba, he yé yína hlan OKLUNỌ lọ; ¹⁶mọ bo do hen yé nado zé oylankan lọ hẹn he hẹn whẹ̀gbledo wá, whenuena yé dù onú wiwe yetọn lẹ: na yẹn wẹ OKLUNỌ lọ he klan yé do wiwe.

¹⁷OKLUNỌ lọ sọ dohó hlan Moṣe, domọ, ¹⁸Dọhó hlan Aalọn, podọ hlan visunnu etọn lẹ, podọ hlan ovi Islaeli tọn lẹ, bo dọ hlan yé dọmọ, Mẹdepope ewọ yín sọn owhé Islaeli tọn mẹ, kavi ojónọ Islaeli mẹ tọn lọ lẹ, he yí avọ́nunina etọn na, eyín é yín sọn opadido yetọn lẹ depope mẹ, kavi sọn avọ́nunina, ojlometọn yetọn lẹ depope mẹ, he yé yína hlan OKLUNỌ lọ na avọ́nunina mimẹ̀ de; ¹⁹dọ mì nido yín tealọyí, asú dopo madazòngo we mì na yína, sọn kanlinyìnyìn lẹ lọ mẹ, sọn lẹngbọ lẹ lọ mẹ, kavi sọn gbọgbọẹ lẹ lọ mẹ. ²⁰Ṣigba núdepope he tindo azọ̀n de, wẹ mì ma na yína gba: na é ma na yín tealọyí na mì gba. ²¹Podọ mẹdepope he yí avọsánnu avọ́nunina jijọho tọn le de na hlan OKLUNỌ lọ, nado basi opadido alọpa de, kavi na avọ́nunina ojlometon de, sọn kanlinpó lọ mẹ kavi sọn kanlinpá lọ mẹ, é na yín pipó nado yín tẹalọyí; azọ̀n de ma na tin to e mẹ finẹ gba. ²²Nukuntónnọ, kavi afọwinwẹtìnọ, kavi sékúnọ, kavi tindo apà le, kavi aklinọ, kavi oflónọ, mì ma na yí ehelẹ na hlan OKLUNỌ lọ gba, kavi basi avọ́nunina de gbọn miyọn dali sọn yé mẹ to agbà OKLUNỌ lọ tọn lọ ji blo. ²³Kavi oyìnsú de kavi lẹngbọvú de he tindo onú linlánkàn depope kavi whiwhe to dali etọn, hiẹ sọgan yí enẹ na na avọ́nunina ojlomẹtọn de; ṣigba na opadido de é ma na yin tẹalọyí gba. ²⁴Enẹ he ko kinkón okún etọn lẹ, kavi tlu, kavi gbà, kavi sán, mì ma na yína hlan OKLUNỌ lọ gba; mọ mì ma na yí yé do sánvọ́ gba. ²⁵Mọ sọn alọ gbéjinu de tọn me mìwlẹ ma na yí akla Jiwheyẹwhe mìtọn tọn na sọn onú helẹ depope mẹ gba; na gbigble yetọn tin to yé mẹ wutu, azọ̀n de tin to yé mẹ: yé ma na yín tẹalọyí na mì gba.

²⁶OKLUNỌ lọ sọ dọhó hlan Moṣe, dọmọ, ²⁷Whenuena oyìnsú de kavi lẹngbọ de, kavi gbọgbọe de yín hinhẹn tón, whenẹnu é na tin to onọ etọn glọ hò azán ṣinawe; podọ sọn azán ṣinatọ̀ntọ gbé podọ sọnfinẹyì é na yín tẹalọyi na avọ́nunina avọ́nunina yè basi gbọn miyọn dali de tọn hlan OKLUNỌ lọ. ²⁸Podọ eyín é yín oyìnsi kavi lẹngbọsi, mì ma na hù i po ovi etọn po to azán dopo lọ mẹ gba. ²⁹Podọ whenuena mìwlẹ sán avọ opé tọn de hlan OKLUNỌ lọ, mìwlẹ na sán ẹn na mì nido yín téalọyí. ³⁰Azán dopo nẹ gbè wẹ é na yín dùdù; mì ma na jó de sọn e mẹ do kakajẹ afọnnu lọ gba: yẹn we OKLUNỌ lọ. ³¹Enẹwutu wẹ mì na payi gbèdide ṣie lọ go, bo nọ basì yé: yẹn wẹ OKLUNỌ lọ. ³²Podọ mìwlẹ ma na flu oyín wiwe ṣie gba: ṣigba yẹn na yín hihiọ to ovi Islaeli tọn le ṣẹnṣẹn: yẹn wẹ OKLUNỌ lọ he fli mí, ³³he hẹn mí jẹgbonu sọn aigba Egipti tọn lọ ji, nado yín Jiwheyẹwhe mìtọn: yẹn wẹ Okluno lọ.

¹OKLUNỌ lọ so dọhó hlan Moṣe, dọmọ, ²Dọhó hlan ovi Islaeli tọn lẹ, bo dọ hlan yé dọmọ, Osà didè OKLUNỌ lọ tọn le lọ, he mìwlẹ na lá nado yín opli wiwe lẹ, yèdọ ehelẹ wẹ hùnwhẹ dido ṣie le. ³Azán ṣidopo azọ́n na yín wiwà hò: ṣigba sinaw etọ wẹ gbọjẹzán ogbọjẹ ayidego tọn de, opli wiwe de; mìlẹ ma na wà azón hunkọ de tọn gba: gbọjezán de hlan OKLUNỌ lọ wẹ to fininò mìtọn lẹpo me. ⁴Ehelẹ wẹ hùnwhè dido OKLUNỌ lọ tọn lẹ, yèdo opli wiwe lẹ, he mìlẹ na nọ lá to osã dìdè yetọn me. ⁵To osùn tintan lọ mẹ, to azán wienẹtọ osùn lọ tọn mẹ to whèjai awe le ṣẹnṣẹn, wẹ juwayi OKLUNỌ tọn lọ. ⁶Podọ to azán fọtọntọ osùn dopolọ tọn gbé wẹ hùnwhè akla madotónnọ tọn lọ hlan OKLUNỌ lọ: azán ṣinawe mìlẹ na dù akla madotónnọ hò ⁷To azán tintan lọ mẹ mìlẹ na tindo opli wiwe de: mìlẹ ma na wà azọn ohẹ́kúkú tọn de gba. ⁸Ṣigba mìlẹ na yí avọ́nunina yè basi gbọn miyọn dali de na hlan OKLUNỌ lọ họ̀ azán ṣinawe: azán sinawetọ wẹ opli wiwe de te; mìlẹ ma na wà azón ohẹ́kúkú tọn de gba.

⁹OKLUNỌ lo sọ dọhó hlan Moṣe, dọmo, ¹⁰Dọhó hlan ovì Islaeli tọn lẹ lọ, bo dọ hlan yé dọmọ, Whenuena mìlẹ yín hinhẹnwa biọ aigba lọ me he yẹn na hlan mì, bo na gbẽn ojijẹ etọn, whenẹnu wẹ milẹ na hẹn okò sinséntìntan lọ tọn lẹ sọn ojijẹ mìtọn mẹ wá yẹwhenọ lọ de: ¹¹ewọ bo na zé okò lọ hia to OKLUNỌ lọ nukọn, nado yín tẹalọyí na mì: to aihọngbe to gbọjẹzán lọ godo wẹ yẹwhenọ lọ na zé e hia. ¹²To azán he mẹ mì zé okò lọ hia te, wẹ mì na yí lẹngbọsú madazòngo dopo owhè tintan lọ tọn mẹ na avọ́nunina mimẹ̀ de hlan OKLUNỌ lọ ¹³Podọ avọ́nunina jinulili eton tọn lọ na yin madaotọ efa olinfín dagbedagbe tọn de he yè yi amì do hò, avọ́nunina de yè basi gbọn miyọn dali hlan OKLUNỌ lọ na owán vivi de: podọ avọ́nunina nùnù eton na yín ovẹ̃n tọn, madoẹnẹtọ hinni dopo tọn. ¹⁴Podọ mìlẹ ma na dù akla de, kavi gbadó sisọ, kavi gbadófẹ́ kakajẹ azán dopo he lọ gbè, kaka mìlẹ ko do hẹn avọ́nunina Jiwheyẹwhe mìtọn tọn lọ wá: aṣẹdai de wẹ kakadoi gbọn whẹndo mìtọn lẹ mẹ to fininọ̀ mìtọn lẹpo mẹ.

¹⁵Mìlẹ bo nasọ ma hlan mì sọn osò lọ to gbọjẹzán lọ godo, sọn azán he gbè mì hẹn okò avọ́nunina zehia tọn lọ wá; gbọjẹzán ṣinawe na yin vivò finẹ: ¹⁶yèdọ jẹ osò to gbọjezán sinawetọ lọ godo wẹ mìlẹ na yísọhana azán kandeao; mì bo nasọ yí avọ́nunina jinulili yọ́yọ́ de tọn na hlan OKLUNỌ lọ. ¹⁷Mìwlẹ na hẹn aklamimlin awe zéhia tọn jẹgbonu sọn onọtẹn mìtọn lẹ mẹ wá sọn madaotọ awe efa dopo lọ tọn mẹ; yé na yín sọn olinfin dagbedagbe mẹ, yè na yí otón do só yé, na sinséntintan lẹ hlan OKLUNỌ lọ, ¹⁸podọ mì na na lẹngbọvú ṣinawe madazọ̀ngo owhè tintan lọ tọn po akla lọ po, po oyìnsúvu dopo po, po agbo awe po: yé na yín avọ́nunina mimẹ̀ de hlan OKLUNỌ lọ, po avọ́nunina jinulili yetọn po, po avọ́nunina nùnù yetọn lẹ po, yèdọ avọ́nunina yè basi gbọn miyọn dali de, owan vivi de tọn hlan OKLUNỌ lọ. ¹⁹Mìwlẹ nasọ yí alunkùn dopo na na avọ́nunina ylando de tọn, po agbòvú owhè tintan tọn awe po na avọ́sánnu avọ́nunina jijọho ton lẹ. ²⁰Yẹwhenọ lọ nasọ zé yé hia po akla sinséntintan lẹ lọ tọn po na avọ́nunina zizéhia de to OKLUNỌ lọ nukon po lẹngbọvú awe po: yé na yín wiwe hlan OKLUNỌ lọ na yẹwhenọ lọ. ²¹Mìwlẹ nasọ basi hlá to azán doponẹ lọ gbè; opli wiwe de na tin finẹ hlan mì: mìlẹ ma na wà azọ́n ohékúkú tọn de: aṣẹdai de wẹ kakadoi to fininọ̀ mìtọn lẹpo mẹ gbọn whẹndo mìtọn lẹ mẹ.

²²Whenuena mì gbẹ̀n ojijẹ aigba mìtọn tọn, hiẹ ma na gbọn olọnglọnẹn ogle towe tọn lẹ pete, mọ hiẹ ma na bẹ́ owelu ojijẹ towe tọn pli gba: hiẹ na jó yé do na wamọnọ lọ, podọ na ojónọ lọ: yẹn wẹ OKLUNỌ lọ Jiwheyẹwhe mìtọn.

²³OKLUNỌ lọ sọ dohó hlan Moṣe, dọmọ, ²⁴Dọhó hlan ovi Islaeli tọn lẹ lọ, dọmọ, To osùn sinawetọ lọ mẹ, to azán tintan osùn lọ tọn mẹ, na yín ogbọjẹ ayidego de hlan mì, oflinnú kúnkún opèn lẹ tọn de, opli wiwe de. ²⁵Mìwlẹ ma na wà azón ohékúkú tọn de: mìwlẹ nasọ yí avọ́nunina de yè basi gbọn miyọn dali na hlan OKLUNỌ lọ.

²⁶OKLUNỌ lọ sọ dọho hlan Moṣe, dọmọ, ²⁷Gãnṣo to azán aotọ osùn sinawetọ he tọn gbè wẹ azán ovẹ̀se tọn: é na yín opli wiwe de hlan mì, mìwlẹ nasọ bianukunna alindọn mìtọn lẹ; mí nasọ yí avọ́nunina yè basi gbọn miyọn dali de na hlan OKLUNỌ lọ. ²⁸Mìwlẹ ma na wà azón hunkọ de tọn to azán doponẹ lọ gbè gba: na azán ovẹ̀se tọn de wẹ, nado basi ovẹ̀se na mì to OKLUNỌ lọ Jiwheyẹwhe mìtọn nukọn. ²⁹Na alindọn depope é yín he ma na yín nukunbiana to azán doponẹ gbè gba, é na yin sinsán sẹ́ sọn omẹ etọn lẹ ṣẹnṣẹn. ³⁰Podọ alindọn é yín he wà azón hunkọ de tọn to azán doponẹ gbè, alindọn nẹ wẹ yẹn na súdo sọn omẹ etọn lẹ ṣẹnṣẹn. ³¹Mìwlẹ ma na wà azọn hunkọ de tọn gba: asẹdai kakadoi de wẹ gbọn whẹndo mìtọn lẹ me to fininò mìtọn lẹpo mẹ. ³²E na yín gbọjẹzán ayidego tọn de hlan mì, mì bo nasọ bianukunna alindọn mìtọn lẹ: to azán sinẹnnẹtọ osùn lọ tọn mẹ to whèjai sọn whèjai jẹ whèjai, wẹ mì na nọ payi gbọjẹzán mìtọn go.

³³OKLUNỌ lọ sọ dọhó hlan Moṣe, dọmọ, ³⁴Dọhó hlan ovi Islaeli tọn lẹ lọ, dọmọ, To azán fọtọ̀ntọ osùn sinawetọ he tọn wẹ hùnwhẹ́ oflò lẹ tọn gbè na azán ṣinawe hlan OKLUNỌ lọ. ³⁵Azán tintan lọ gbè na yín opli wiwe de: mìlẹ ma na wà azọ́n ohékúkú tọn de gba. ³⁶Azán ṣinawe mì na yí avọ́nunina yè basi gbọn miyọn dali de na hlan OKLUNỌ lọ: azán ṣinatóntọ na yín opli wiwe de gbè hlan mì; mìlẹ bo nasọ yí avọ́nunina yè basi gbọn miyọn dali de na hlan OKLUNỌ lọ: hùnwhẹ́ titlọ de wẹ; mìwlẹ ma na wà azọn ohékúkú tọn de gba.

³⁷Ehelẹ wẹ hùnwhẹ́ dido OKLUNỌ lọ tọn lẹ, he mìlẹ na lá nado yín opli wiwe lẹ, nado yí avọ́nunina yè basi gbọn miyọn dali de na hlan OKLUNỌ lọ, avọ́nunina mimẹ̀ de, po avọ́nunina jinulili tọn de po, avọ́sánnu de, avọ́nunina nùnù lẹ, dopodopo to azán etọn lọsu gbè: ³⁸dogó gbọjezán OKLUNỌ lọ tọn lẹ, podọ dogọ nunina mìtọn lẹ, podọ dogó opadido mìtọn lẹ lọ lẹpo, podọ dogọ́ avọ́nunina ojlomẹtọn mìtọn lẹ lọ lẹpo, he mì na hlan OKLUNỌ lọ.

³⁹Gãnṣo to azán fọtọ̀ntọ osùn sinawetọ lọ tọn gbè, whenuena mì ko bẹ́ sinsẹ̀n aigba mìtọn tọn lẹ pli wá whégbè, mì na payi hùnwhẹ́ OKLUNỌ lọ tọn go hò azán ṣinawe: azán tintan na yín ogbọjẹ ayidego de tọn gbè, podọ azán sinatòntọ nasọ yín ogbọjẹ ayidego de tọn gbè. ⁴⁰Podọ míwlẹ na yí na mìde to azán tintan lọ gbè sinsẹ̀n atin dagbedagbe lẹ lọ tọn òdepá òdetin lẹ tọn lẹ, po alà atin titli tọn lẹ po, po ofán otọ̀pa tọn lẹ po: miwlẹ naso jaya to OKLUNỌ lọ Jiwheyẹwhe mìtọn nukọn hò azán ṣinawe. ⁴¹Mìlẹ nasọ payi e go na hùnwhẹ́ de hlan OKLUNỌ lọ hò azán ṣinawe to owhè lọ mẹ: asẹdai de wẹ kakadoi to whẹndo mìtọn lẹ mẹ: osùn sinawetọ mẹ wẹ mì na nọ payi e go. ⁴²Oflo lẹ mẹ mì na nò azán ṣinawe; yé he yín owhevi to Islaeli mẹ lẹpo na nò oflò lẹ mẹ: ⁴³dọ whẹndo mìtọn lẹ nido yọnẹn dọ yẹn hẹn ovi Islaeli tọn lẹ nado nọnó oflò lẹ mẹ, whenuena yẹn hẹn yé jẹgbonu sọn aigba Egipti tọn lọ mẹ wá: yen wẹ OKLUNỌ lọ jiwheyẹwhe mìtọn. ⁴⁴Moṣe sọ dọ hùnwhẹ́ dido OKLUNỌ lọ tọn lẹ lọ hlan ovi Islaeli tọn lẹ.

¹OKLUNỌ lọ sọ dọhó hlan Moṣe, dọmọ, ²Degbèna ovi Islaeli tọn lẹ lọ dọ, Yé ni hẹn amì wiwe olivieli tọn he yè tùn wá de we na hinhọ́n lọ, nado hẹn miyọngbán de to jiji zònmí. ³To gbonu avọ̀ajlalanọ okunnuhó lọ tọn, to ogohò opli tọn lọ mẹ, wẹ Aalọn na zé e do sọn whèjai jẹ afọnnu to OKLUNỌ lọ nukọn zónmi: é na yín asẹdai de kakadoi gbọn whẹndo mìtọn lẹ mẹ. ⁴E na zé miyọngbán lẹ lọ do miyọngbántin wiwe lọ ji to OKLUNỌ lọ nukọn zónmí.

⁵Hiẹ nasọ yí olinfin dagbedagbe, bo sò aklahihi wiawe sọn e mẹ: madaotọ awe efa dopo tọn na tin to aklahihi dopo mẹ ⁶Hiẹ na tò yé do okiti awe mẹ, ṣidopo to okiti dopo ji, to tafo wiwe lọ ji to OKLUNỌ lọ nukọn ⁷Hiẹ na yí nuwhẹnkún wiwe do okiti dopodopo ji, na é nido tin hlan akla lọ na oflinnú de, yèdọ avọ́nunina de yè basi gbọn miyọn dali hlan OKLUNỌ lọ. ⁸Gbọjẹzán lẹpo mẹ wẹ ewọ na nọ tò e do hajihaji to OKLUNỌ lọ nukọn te zònmí; ovi Islaeli tọn lẹ tọn wutu wẹ, alènu madopodo de. ⁹E nasọ tin na Aalọn po visunnu etọn lẹ po; yé na nọ dù i to otẹn wiwe de mẹ: na wiwe talala wẹ hlan ẹn sọn avọ́nunina OKLUNỌ lọ tọn lẹ mẹ he yè basi gbọn miyọn dali gbọn asẹdai jeijei de dali.

¹⁰Podọ visunnu jọnnu Islaelinu de tọn, otọ́ mẹhetọn yín Egiptinu de, jẹgbonu yì ovi Islaeli tọn lẹ ṣẹnṣẹn: visunnu yọnnu Islaelinu lọ tọn lọ po dawe Islaeli tọn de po plahi, dopọ to osla lọ mẹ, ¹¹visunnu yọnnu Islaelinu lọ tọn lọ zánnuna Oyín lọ, bo sọ hodẹdo; yé bo hẹn ẹn wá Moṣe de. Oyín onọ etọn tọn wẹ Selomiti, viyọnnu Dibli tọn, sọn whẹndo Dani ton mẹ. ¹²Yé sọ yí i do hihó mẹ, na e nido yín didọ hlan yé sọn onù OKLUNỌ lọ tọn mẹ.

¹³OKLUNỌ lọ sọ dọho hlan Moṣe dọmọ, ¹⁴Hẹn ewọ he ko hodèdo to osla lọ godo jẹgbonu wá; bo gbọ yé he ko sè e lẹpo ni zé alọ yetọn lẹ do ota etọn, bo gbọ agùn lepo ni dlan zannu in. ¹⁵Hiẹ nasọ dohó hlan ovi Islaeli ton lẹ lọ, dọmọ, Mẹdepope he hodẹ́do Jiwheyẹwhe etọn na ze ylando etọn hẹn ¹⁶Podọ ewọ he zánnuna oyín OKLUNỌ lọ tọn lọ, ewọ na yín hùhù dandan, agùn lẹpo na dlẹn zannu in nugbonugbo: ojónọ lọ di owhevi lọ, whenuena é zánnuna oyín OKLUNỌ lọ tọn lọ, na yín hùhù. ¹⁷Podọ ewọ he linú omẹ depope hù na yín hùhù dandan; ¹⁸podọ ewọ he linú kanlin de hù na nahọsú nẹ̃: ogbè na ogbẹ́. ¹⁹Podọ eyín omẹ de hẹn azọ̀n de jò to kọmenu etọn mẹ; le ewọ ko wà do, mọ wẹ é na yín wiwà hlan ẹn do; ²⁰otẹnklẹ na otẹnklẹ, nukun na nukun, adú na adú: le ewọ ko hẹn azọ̀n de jọ̀ to omẹ de mẹ do, mọ wẹ é na yín yíyíwà hlan ẹn do ²¹Podọ ewọ he hù kanlin de na nahọsú nẹ̃: podọ ewọ he hù omẹ de na yín hùhù. ²²Osẹ́n hunkọ dopo tọn wẹ mì na tindo, na ojónọ lọ di na owhévi lọ: na yẹn wẹ OKLUNỌ lọ Jiwheyẹwhe mìtọn. ²³Moṣe sọ dohó hlan ovi Islaeli tọn lẹ lọ, yé sọ hẹn ewọ he ko hodẹ́do tón jẹgbonu wá sọn osla lọ mẹ, bo yí zannu lẹ do dlanzannu in. Ovi Islaeli tọn lẹ lọ sọ wà dile OKLUNỌ lọ degbena Moṣe do.

¹OKLUNỌ lọ sọ doho hlan Moṣe to osé Sinai mẹ, dọmọ, ²Dọhó hlan ovi Islaeli tọn lẹ lọ, bo dọ hlan ye dọ, Whenuena mì wá aigba he yẹn na mì lọ mẹ, whenẹnu wẹ aigba lọ na payi gbọjẹzán de go hlan OKLUNỌ lọ. ³Owhè ṣidopo hiẹ na do ogle towe họ̀, podọ owhè ṣidopo hiẹ na dèalana ovẹ̃npa towe họ̀, bo sọ bẹ́ sinsẹ́n etọn lẹ pli do whegbè; ⁴ṣigba owhè sinawetọ mẹ gbọjẹzán ogboje ayidego tọn de na tin to e mẹ na aigba lọ, gbọjẹzán de hlan OKLUNỌ lọ: hiẹ ma na do ogle towe, kavi dèalana ovẹ̃npa towe gba. ⁵Enẹ he wú sọn ede mẹ sọn ojijẹ towe mẹ hiẹ ma na gbẹ́n gba, podọ vẹnsinsén sọn vẹntin madèalọna towe lẹ me hiẹ ma na bépli gba: é na yín owhè ogbọje ayidego tọn de na aigba lọ. ⁶Podọ gbọjẹzán aigba lọ tọn lọ na yín na núdùdù na mì; na we, podọ na devisunnu towe podọ na deviyọnnu towe, podọ na ogbànumẹ towe podọ na ojónọ towe he wáwási to de we; ⁷podọ na kanlinyìnyìn towe, podọ na kanlin lẹ lọ he tin to aigba towe ji, wẹ ojideji etọn lẹpo na yín núdùdù na.

⁸Hiẹ na hia gbọjẹzán ṣinawe sọn owhè lẹ mẹ hlan dewe, owhè ṣinawe donu ṣinawe; podọ azán gbọjẹzán ṣinawe tọn sọn owhè le me nasọ tin fìne hlan we, yèdọ owhè kandesinẹnnẹ. ⁹Whenẹnu wẹ hiẹ na do ogbè lélé opèn lọ tọn hlan gbonu to azán aotọ osùn sinawetọ tọn gbè; to azán ovẹ̀se tọn lọ mẹ wẹ hiẹ na do opèn lọ hlan gbonu gbọn whẹndo mìtọn lẹpo mẹ. ¹⁰Mìwlẹ bo nasọ hiọ owhè fọtọ̀ntọ lọ, bo sọ lá mẹdekanjẹ gbon aigba lọ ji jẹ tòmẹnù etọn lẹpo de: é na yín jubile de hlan mì; mìlẹ bo nasọ lẹ́gọ̀ ome dopodopo hlan nutindo etọn kòn, podọ mì nasọ lẹ́gọ̀ ome dopodopo hlan whédo etọn dé. ¹¹Jubile de wẹ owhè kandeaotọ nẹ na yín hlan mì: mìlẹ ma na dó, mọ mì ma na gbèn enẹ he wú sọn ede mẹ tó e mẹ, kavi bé ovónsinsén lẹ pli to e mẹ sọn ovẹ̃ntin madèalọna lẹ lọ mẹ ¹²Na jubile de wẹ; é na yín wiwe hlan mì: mì na dù ojideji etọn sọn ogle lọ mẹ. ¹³To owhè jubile tọn he mẹ wẹ mì omẹ dopodopo na lẹ́gọ̀ hlan nútindo etọn kọn. ¹⁴Podọ eyín hie sà onúde hlan komẹnu towe, kavi hò sọn alọ komenu towe tọn mẹ, mìwlẹ ma na wàgo do minozo gba. ¹⁵Kẹdẹdi osọha owhè lẹ ton to jubile lọ godo wẹ hiẹ na do hò son komẹnu towe si, podọ kẹdẹdi osọha owhè ojije lẹ tọn lọ tọn ewọ na do sà hlan we. ¹⁶Kẹdẹdi ogégé owhè lẹ lọ tọn wẹ hiẹ na do hẹn akuẹta etọn sudẹji podọ kedẹdi whiwhe owhè lẹ tọn wẹ hiẹ na do hẹn akuẹta etọn dèpo; na osọha ojijẹ lẹ tọn we ewọ do sà hlan we. ¹⁷Mìwlẹ ma na wàgò do mínọzo gba; ṣigba hiẹ na dibusi Jiwheyẹwhe towe: na yẹn wẹ OKLUNỌ lọ Jiwheyẹwhe towe. ¹⁸Enẹwutu mìwlẹ na payi asẹdai ṣie lẹ go, bo sọ payi whẹ̀dida ṣie lẹ go bo basi yé: mìlẹ bo nasọ nọ aigba lọ ji mahanu. ¹⁹Aigba lọ nasọ nọ jó sinsen eton, mìwlẹ nasọ dù dùgóhò mìtọn, bo sọ nọ nò e me mahanu. ²⁰Podọ eyín mìwlẹ na dọmọ, Etẹ wẹ mí na dù to owhè sinawetọ lọ mẹ, dayi e go, mìwlẹ ma na do, kavi be jideji mítọn pli do whegbè gba: ²¹whenenu yen na degbèna odona ṣie to mì ji to owhè sidopotọ lọ mẹ, é bo na hẹn einsén tón wá na owhè atọ̀n lẹ lọ. ²²Mìwlẹ bo nasọ do to owhè sinatòntọ lọ mẹ, bo sọ to dùdù sọn sinsẹ́n lẹ lọ mẹ, ózínhò hóhó lọ; kakajẹ owhè ṣinẹnnẹtọ lọ mẹ, kaka sinsẹ́n etọn lẹ wá whégbè, ozínhò hóhó wẹ mì na to dùdù. ²³Aigba lọ ma na yín sisà do madopodo mẹ gba; na ṣie wẹ aigba lọ: na ojónọ wẹ mìwlẹ podọ wásinu to dẽ ²⁴Podọ to aigba nútindo mìtọn tọn lọ mẹ mì na nọ jó ofligọ̀ de na aigba lọ.

²⁵Eyín mẹmẹsunnu towe yín hinhẹn lẹzun wamọnọ, bo sà adade sọn nútindo etọn mẹ, whenẹnu wẹ: hẹnnumẹ etọn he tin sèpọ hlan e de na wá, bo na fli enẹ he mẹmẹsunnu etọn ko sà. ²⁶Podọ eyín omẹ de ma tindo mẹde nado fli i gba, bọ ewọ yín hinhẹn lẹzun adọkunnọ bo sọ mọ sùpé nado fli i; ²⁷whenẹnu gbọ é ni hia owhè sisà etọn tọn lẹ lọ, bo gọ̀ linlán lọ jó hlan omẹ he é sà ẹ hlan lọ; ewọ bo nasọ lẹ́gọ̀ do nútindo etọn kọ̀n. ²⁸Ṣigba eyín ewọ ma tin sọgan nado hẹn en gọ̀ na ede gba, whenẹnu enẹ he ewọ ko sà na gbọsi alọ ewọ he ko hò ẹ tọn mẹ kakajẹ owhè jubile tọn lọ me: podọ to jubile lọ mẹ é na jẹgbonu yì, ewọ bó na lẹ́gọ̀ do nútindo etọn kọ̀n.

²⁹Podọ eyín omẹ de sà ohọ̀ adó tọn de to tòdaho dòkọnọ de mẹ, whenẹnu é sọgan fli i to owhè dopo pete mẹ he godo é ko yín sisà; na owhè dopo gigọ́ wẹ é na tindo ojlojẹ ofligọ̀ tọn lọ te. ³⁰Podọ eyín é ma yín fifii to ojlẹ owhè dopo gigọ́ lọ tọn mẹ gba, whenẹnu ohó he tin to tòdaho dòkọnọ lọ mẹ lọ na yín hinhẹn tin to madopodo mẹ hlan ewọ he họ́ ẹ, gbọn whẹndo etọn lẹ mẹ: é ma na jẹgbonu yì to jubile lọ mẹ gba. ³¹Ṣigba ohò tòpẹvipẹvi he ma tindo adó lẹ́do yé lẹ tọn lẹ na yín linlẹn dogọ́ oglè otò lọ tọn lẹ: yé sọgan yín Mi, yé bo nasọ jẹgbonu yì to jubile lọ mẹ. ³²Adavo tòdáhò Levinu lẹ tọn lẹ, ohò tòdaho nútindo yetọn tọn le, Levinu lẹ sọgan fli to ojlẹ depope mẹ. ³³Podọ eyín omẹ de fli sọn Levinu lẹ si, whenẹnu ohọ̀ he yè sà lọ, po tòdaho nutindo etọn tọn lọ po, na jẹgbonu yì to jubile lọ mẹ: na ohọ̀ todaho Levinu lẹ tọn tọn lẹ wẹ nútindo yetọn to ovi Islaeli tọn lẹ lọ ṣẹnṣẹn. ³⁴Ṣigba oglè whépakẹ tòdaho yetọn lẹ tọn lọ ma sọgan yín sisà gba; na nútindo yetọn madopodo wẹ.

³⁵Podọ eyín mẹmẹsunnu towe yín hinhẹn lẹzun wamọnọ bọ alọ etọn yìdò to de we; whenẹnu hiẹ na jlọ ẹ dote: di ojónọ de podọ di wásinu de wẹ é na do nò de we. ³⁶A yí alemasénmẹ sọn ewọ si blo kavi ojideji; ṣigba dibusi Jiwheyẹwhe towe: na mẹmẹsunnu towe nido nọ̀ de we. ³⁷Hiẹ ma na yi akuẹ towe nẹ́ to alemasénmẹ ji, kavi yí núdúdù towe nẹ́ na ojideji gba. ³⁸Yen wẹ OKLUNỌ lọ Jiwheyẹwhe mìtọn, he hẹn mì tón jẹgbonu sọn aigba Egipti tọn lọ ji wá, nado na aigba Kananinu tọn lọ mì, nado yín Jiwheyẹwhe mìtọn.

³⁹Podọ eyín mẹmẹsunnu towe yín hinhẹn lẹzun wamọnọ to de we, bo sà ede hlan we; hiẹ ma na hẹn ẹn nado sẹ́n di afànumẹ sunnu de gba ⁴⁰di gbanumẹ de, podọ di wásinu de, ewọ na do tin to de we; é na sèn to de we jẹ owhè jubile lọ tọn: ⁴¹whenẹnu wẹ é na jẹgbonu yì sọn de we, ewọ po ovi etọn lẹ po po e po, bo na lẹ́gọ̀ do whẹ́do etọn titi de, podọ do nútindo otọ́ etọn lẹ-tòn kọ́n wẹ ewọ na légọ́ do. ⁴²Na devi ṣie wẹ yé, he yẹn hẹn tón jẹgbonu sọn aigba Egipti tọn lọ ji wá: yé ma na yín sisà di afànumẹ lẹ gba. ⁴³Hiẹ ma na dùgán do e ji po kàndùdù po gba; ṣigba bo na dibusi Jiwheyẹwhe towe. ⁴⁴Podọ na afànumẹ sunnu towe lẹ tọn, po afànumẹ yọnnu towe lẹ po, he hiẹ tindo; sọn akọta he tin lẹ́do mì lẹ mẹ, yé mẹ wẹ míwlẹ na nọ hò afànumẹ sunnu lẹ po afanumẹ yọnnu lẹ po sọn ⁴⁵Humọ sọn ovi ojónọ lẹ ton lẹ mẹ he wáwási to mì ṣẹnṣẹn, ye mẹ mì na hò sọn, podọ sọn whédo yetọn lẹ mẹ he tin to mì de, he yé ko dètọ́n to aigba mìtọn ji: yé nasọ yín nútindo mìtọn ⁴⁶Mìwlẹ nasọ hẹn yé zùn ogú de na ovi mìtọn lẹ to godo mìtọn, nado yíhẹn na nútindo de; yé mẹ wẹ mì na nọ yí afànume sunnu mìtọn lẹ sọn kakadoi: ṣigba mẹmẹsunnu mìtọn ovi Islaeli tọn lẹ ji wẹ mì ma na dùgan do, ode do awetọ ji po kándùdù po gba.

⁴⁷Podọ eyín ojónọ de kavi wáṣinu to de we yín hinhẹn lẹzun adọkunnọ, bọ mẹmẹsunnu towe yín hinhẹn lẹzun wamọnọ to e dali, bo sọ sà ede hlan ojónọ lọ kavi wáṣinu to de we, kavi hlan otógbó whédo ojónọ lọ tọn tọn: ⁴⁸godo he yè ko sà ẹ é sọgan yín fifli; dopo sọn mẹmẹsunnu etọn lẹ mẹ sọgan fli i: ⁴⁹kavi otavé etọn, kavi visunnu otavó etọn tọn, sọgan fli i, kavi mẹdepope he yín osẹpọ hẹnnumẹ tọn hlan ẹn sọn whédo etọn mẹ sọgan fli i; kavi eyín ewọ yín hinhẹn lezun adọkunnọ, ewọ sọgan fli ede. ⁵⁰Ewọ nasọ lẹn hẹ ewọ he họ́ ẹ sọn owhè lọ mẹ he ewọ sà ede hlan ẹn te jẹ owhè jubile tọn lọ mẹ: podọ akuẹta sisà etọn tọn na yín kẹdedi osọha owhè lẹ tọn lọ; kẹdẹdi ojlẹ gbanumẹ de tọn wẹ ewọ na do tin to e de. ⁵¹Eyín owhè susu gbé sọ tin to finẹ, kẹdẹdi yé wẹ é na gò akuẹta ofligò etọn tọn jó sọn akuẹ he yè do hò ẹ lọ mẹ. ⁵²Podọ eyín owhè pẹde wẹ pò finẹ jẹ owhè jubile tọn lọ, whenẹnu ewọ na lẹ̀n po e po; kẹdẹdi owhè etọn lẹ wẹ ewọ na gọ̀ akuẹta ofligò etọn tọn jó. ⁵³Di gbanumẹ whèmẹwhèmẹ ewọ na do tin to e de: ewọ ma na dùgán to e ji po kàndùdù po to nukun towe mẹ gba. ⁵⁴Eyín ewọ ma yin fifli to owhè helẹ mẹ gba, whenẹnu ewọ na jẹgbonu yi to owhè jubile lọ tọn mẹ, ewọ po ovi etọn lẹ po po e po. ⁵⁵Na ovi Islaeli tọn lẹ devi wẹ yé hlan mi; devi ṣie wẹ yé mẹhe yẹn hẹn jẹgbonu sọn aigba Egipti tọn lọ ji wá: yẹn wẹ OKLUNỌ lọ Jiwheyẹwhe mìtọn.

¹MIWLẸ ma na basi ovòdún lẹ de gba, mọ mì ma na zé boṣio pipa de dote, kavi odòtin de, mọ mì ma na dotẹnna zannu winwlan depope to aigba mìtọn mẹ gba, nado nọ dó hlan ẹn: na yẹn wẹ OKLUNỌ lọ Jiwheyẹwhe mìtọn. ²Míwlẹ na payi gbọjezán ṣie lẹ go, bo sọ nọ gbògbena fiwiwe ṣie: yẹn wẹ OKLUNỌ lọ.

³Eyín mìwlẹ zinzọnlin to aṣedai ṣie lẹ mẹ, bo sọ payi gbèdide ṣie lẹ go, bo nọ basi yé: ⁴whenẹnu yẹn na na ojikun mìtọn lẹ to osã yetọn mẹ, aigba lọ nasọ na ojideji etọn, atin oglè mẹ tọn lẹ nasọ na ṣinṣán yetọn. ⁵Podọ ovẹ̃ngbà mìtọn na jẹ ojijẹ ovẹ̃n tọn lọ kọ̀n, podọ ojije lọ nasọ jẹ ojlẹ dido tọn mẹ: mìwlẹ nasọ dù akla mìtọn jẹ hogigọ, bo sọ nọ nọ aigba mìtọn ji mahẹnu. ⁶Yẹn bo nasọ na jijọho to aigba lọ me, mìwlẹ na mlọn ai, mẹde ma na hẹn mì savo po lọ yẹn na hẹn okanlin ylankan nado gbodo sọn aigba lọ ji, mọ ohi lọ ma na gbọn aigba mìtọn mẹ luntón gba. ⁷Podọ mìwlẹ na domọna kentọ mìtọn le, ye bo na jai gbọn ohi lọ dali to mì nukọn. ⁸Atón sọn mì me na domọna kanweko de, podọ kanweko de sọn mì mẹ na domọna fọtọ́n ao: kẹ̀ntọ mìtọn lẹ bo nasọ jai gbon ohi lọ dali to mì nukọn. ⁹Yẹn bo nasọ tindo yẹyiwlenamẹ hlan mì bo sọ hẹn mi yín sinsẹ́nnọ, bo hẹn mì sudeji; bo na hẹn alènu ṣie lódo to mì de. ¹⁰Mìwlẹ na nọ dù ozínhò hóhó he yè sẹdo azán dindẹn, mìwlẹ nasọ nọ hẹn hóho; lọ jẹgbonu wá sọn yoyó lọ nukọn. ¹¹Yẹn bo na zé gohọtúntún ṣie do mì ṣẹnṣẹn: alindọn ṣie ma sọ to na gbẹwanna mì gba. ¹²Yẹn bo nasọ nọ zinzọnlin to mì ṣẹnṣẹn, bo yín Jiwheyẹwhe mìtọn, mìwlẹ bo nasọ yín omẹ ṣie lẹ. ¹³Yẹn wẹ OKLUNỌ lọ Jiwheyẹwhe mìtọn, he hẹn mì tón jẹgbonu wá sọn aigba Egipti tọn lọ-ji, na mì ma na do yín afànumẹ yetọn lẹ gba, yẹn bo ko sọ wén opatin oglèpọnu mìtọn tọn lẹ, bo hẹn mì to yìyì jijlọ.

¹⁴Ṣigba eyín míwlẹ ma na tùntóai hlan mi, bo ma na basi gbèdide ṣie he lẹpo gba; ¹⁵podọ eyín mìwlẹ na gbẹ́ asẹdai ṣie lẹ dai, podọ eyín alindọn mìtọn gbẹwanna whẹ̀dida ṣie lẹ, sọmọ bọ mìwlẹ ma na basi gbèdide ṣie lẹpo gba, ṣigba gbà alẹ̀nu ṣie; ¹⁶yẹn ga na wà ehe hlan mì; yẹn na dè obudaho do mì ji, yèdọ azónjẹmẹji po avivọha po, he na và nukun lẹ, bo sọ hẹn alindọn lọ nado gbadó: miwlẹ na do okún mìtọn lẹ to ovọ́ mẹ, nu kontọ mìtọn lẹ wẹ na dù i. ¹⁷Yẹn na zé nukunmẹ ṣie do mi ji, míwlẹ nasọ yín hihò to kẹ̀ntọ mìtọn lẹ nukọn: yé he gbẹwanna mì lẹ na dùgán to mì ji, mìwlẹ nasọ to hinhọnyì whenuena mẹde ma to mọdona mì. ¹⁸Pọdọ eyin mìwlẹ to onú helẹ me ma na tùntóai hlan mi jãnwẹ, whenẹnu yẹn na doyana mì whla ṣinawe dogó na ylando mìtọn lẹ ¹⁹Yẹn na wẹ́n sakla huhlọn mìtọn tọn; Yẹn bo na hẹn olọn mìtọn zùn ogànyu, podọ aigba mìtọn zùn ogànvẹ̃: ²⁰podọ huhlọn mìtọn nasọ yín zinzán to ovọ́ mẹ na aigba mìtọn ma na jó ojideji etọn, mọ atin aigba lọ tọn lẹ ma na jó sinsẹ̀n yetọn gba. ²¹Podọ eyín mìlẹ zinzọnlin jagọ̀ hlan mi, bo ma na tùntóai hlan mi gba; yẹn na hẹn azóndème whla ṣinawe dogọ́ wá mì ji gbọn ylando mìtọn lẹ dali. ²²Yẹn na do kanlin danji tọn lẹ hlan mì ṣẹnṣẹn, he na nọ bé ovi mìtọn lẹ bo sọ nọ và kanlinyìnyìn mìtọn lẹ, bo sọ hẹn mì yín vude to osọha mẹ; ali mìtọn lẹ nasọ yín ovọ́jẹ. ²³Podọ eyín gbon onú helẹ dali miwlẹ ma na yidiọdo gbọn dali ṣie gba, ṣigba bo na nọ zinzọnlin jagò hlan mi; ²⁴whenẹnu wẹ yen ga na zinzọnlin jagò hlan mì; yen bo nasọ họ̀ mì, yèdọ yẹn, whla ṣinawe na ylando mìtọn lẹ ²⁵Yẹn bo nasọ hẹn ohi de wá mì ji, he na yí ahọsu alènu lọ tọn; mìwlẹ nasọ yín bibépli dopọ do tòdaho mìtọn lẹ mẹ: yẹn bo nasọ do azònylankan lọ hlan mì ṣẹnṣẹn; mì bo nasọ yín jijó do alọ kèntọ lọ tọn mẹ. ²⁶Whenuena yẹn wẹ́n opò akla mìtọn tọn, yọnnusi ao na sọ̀ akla mìtọn to aklasọdò dopo mẹ, yé na sọ nọ gọ̀ akla mìtọn jó gbọn ojlẹnú dali: mìwlẹ na dù, bo ma na dopékọ̀ gba.

²⁷Podọ eyín mìlẹ na onú helẹ pó ma na tùntóai hlan mi gba, ṣigba zinzọnlin jagò hlan mi; ²⁸whenẹnu yẹn nasọ zinzọnlin jagò hlan mì to adánjijẹ mẹ; podọ yẹn ga na doyana mì whla ṣinawe na ylando mìtọn lẹ. ²⁹Mìwlẹ bo nasọ dù olàn visunnu mìtọn lẹ tọn, podọ olàn viyọnnu mìtọn lẹ tọn wẹ mìwlẹ na nọ dù. ³⁰Podọ yẹn na và ofi yìji mìtọn lẹ, bo sọ sán whèbosiọ mìtọn lẹ liai, bo zé oṣiọ mìtọn lẹ li oṣiọ boṣiọ yetọn lẹ tọn ji; alindọn ṣie nasọ gbẹwanna mì. ³¹Yẹn nasọ hẹn tòdaho mìtọn lẹ zùn gbògbé de, bo hẹn fìwiwe mìtọn lẹ wá ovọ́jẹ mẹ, yẹn ma nasọ whlẹ́n owán vivi owán mìtọn lẹ tọn pọ́n gba. ³²Yẹn bo nasọ hẹn aigba lọ wá ovọ́jẹ mẹ: podọ kẹ̀ntọ mìtọn he nọ̀ nó e mẹ lẹ na yín osíjọtọ nẹ̃. ³³Mì wẹ yẹn nasọ vúnvún do akọta lẹ lọ ṣẹnṣẹn, yẹn bo nasọ dòn ohi lọ jẹgbonu to mì godo: aigba mìtọn bo nasọ yin ovójẹ de, tòdaho mìtọn lẹ nasọ yín gbògbé de. ³⁴Whenẹnu wẹ aigba lọ na dùgbẹ̀ gbọjẹzán etọn lẹ tọn, sọle é mlọnai dẹn to ovọ́jẹ mẹ do, bọ mìlẹ sọ tin to alọ kẹ̀ntọ mìtọn lẹ tọn mẹ; yédọ whenẹnu wẹ aigba lọ na gbọjẹ, bo dùgbẹ̀ gbọjẹzán etọn lẹ tọn. ³⁵Sọle é mlọnai dẹn to ovọ́jẹ do wẹ é na tindo ogbọjẹ do; yèdọ ogbọjẹ he e ma ko tindo to gbọjẹzán mìtọn lẹ mẹ, whenuena mìwlẹ to ninò e ji ³⁶Podọ na yé he yè jodai sọn mì mẹ lẹ tọn, yẹn na do awu kúkú de hlan ayiha yetọn mẹ to aigba kèntọ yetọn lẹ tọn lẹ mẹ: ogbè whinwhàn amà tọn de na domọna yé; yé nasọ họ̀nyì, dile mẹde nọ họ̀nyì sọn ohi nu do; yé bo nasọ jai whenuena mẹde ma to mọyanna yé gba. ³⁷Yé na dahli ode jẹ awetọ ji, di to ohi lọ nukọn wẹ, whenuena mẹde ma to mọyanna gba: mìwlẹ ma nasọ tindo huhlọn de nado ṣite to kẹ̀ntọ mìtọn lẹ nukọn gba. ³⁸Mìwlẹ nasọ dọ̀n tò akọta lẹ lọ ṣẹnṣẹn, aigba kèntọ mìtọn lẹ tọn lọ bo nasọ zé mì dù. ³⁹Podọ yé he yè jódai sọn mì mẹ lẹ na lùnpò to ylankan yetọn lẹ mẹ to aigba kẹ̀ntọ yetọn lẹ tọn lẹ mẹ; podọ to ylankan otọ́ yetọn lẹ tọn le mẹ wẹ yé na lùnpò po yé po te. ⁴⁰Yé nasọ yígbè ylankan yetọn tọn, po ylankan otọ́ yetọn lẹ tọn po, to ylanwà yetọn he mẹ ye ko wàylan do mi te, podọ ga na yé ko zinzọnlin jagò hlan mi wutu, ⁴¹yẹn ga zinzọnlin jagò hlan yé, bo hẹn yé biọ aigba kẹ̀ntọ yetọn lẹ tọn mẹ wá: whenẹnu eyín ayiha magbowhẹnọ yetọn yín huwhẹnọ, bọ yé sọ kẹalọyi whenẹnu sọn oyà ylankan yetọn tọn lọ mẹ; ⁴²whenẹnu wẹ yẹn na flin alẹ̀nu ṣie hẹ Jákobu; podọ, alẹ̀nu ṣie ga hẹ Isaki, podọ alẹ̀nu ṣie ga hẹ Ablaham wẹ yẹn na flin; yẹn bo nasọ, flin aigba lọ. ⁴³Aigba lọ ga na yín jijódai sọn yé mẹ, bo nasọ dùgbẹ̀ gbọjẹzán etọn lẹ tọn, whenuena é mlọnai ovọ́jẹ matin yé; yé bo nasọ kẹalọyí sọn oyà yetọn le tọn mẹ: na, yèdọ na yé gbẹ̀ whẹ̀dida ṣie lẹ dai wutu, bọ alindọn yetọn gbẹwanna asẹdai ṣie lẹ. ⁴⁴Podọ gãnṣo na enẹ lẹpo, whenuena yé tin to aigba kẹ̀ntọ yetọn lẹ tọn lẹ ji, yẹn ma na gbẹ̀ yé dai gba, mọ yẹn ma na gbẹwanna yé, nado sú yé do gbidigbidì, podọ nado gbà alẹ̀nu ṣie po yé po gba: na yẹn wẹ OKLUNỌ lọ Jiwheyẹwhe yetọn: ⁴⁵ṣigba na yétọn wutu yẹn na flin alẹ̀nu Otogbó yetọn lẹ tọn lọ, mẹhe yẹn hẹn tón jẹgbonu sọn aigba Egipti tọn lọ ji wá to nukun akọta lẹ lọ tọn mẹ, na yẹn nido yín Jiwheyẹwhe yetọn: yẹn wẹ OKLUNỌ lọ.

⁴⁶Ehelẹ wẹ asẹdai lẹ lọ po whẹ̀dida lẹ po po osén lẹ po, he OKLUNỌ lọ basi to ṣẹnṣẹn ewọ po ovi Islaeli tọn lẹ po tọn to osé Sinai mẹ gbọn alọ Moṣe tọn lọ mẹ.

¹OKLUNỌ lọ sọ dọhó hlan Moṣe, dọmọ, ²Dọhó hlan ovi Islaeli tọn lẹ lọ, bo dọ hlan yé dọmọ, Whenuena omẹ de na basi opadido talala de, kẹdẹdi ahidona towe sọn gbẹtọ lẹ de hlan OKLUNỌ lọ, whenẹnu ahidona towe na tin na OKLUNỌ lọ gbọn ahidona towe dali. ³Ahididona towe na yín sunnusi lọ tọn sọn owhè oko mẹho yèdọ jẹ owhè kandeko mẹho, yèdọ ahididona towe na yín ṣekẹli kandeao fataka tọn, kẹdẹdi ṣekẹli fìwiwe lọ tọn. ⁴Podọ eyín é yín yọnnusi de, whenẹnu ahididona towe na yín ṣekẹli ogbàn. ⁵Podọ eyín é yín sọn owhè atón mẹbọ mẹ yèdọ jẹ owhè òko mẹhọ mẹ, whenẹnu ahididona towe na yín sunnusi lọ tọn ṣekẹli òko, podọ na yọnnusi lọ ṣekẹli ao. ⁶Podọ eyín é yín sọn osùn dopo mẹho mẹ yèdọ jẹ owhè atón mẹho mẹ, whenẹnu ahididona towe na yín sunnusi lọ tọn ṣekẹli atón fataka tọn, podọ na yọnnusi lọ ahididona towe na yín ṣekẹli atọ̀n fataka tọn. ⁷Podọ eyín é yín sọn owhè kandeko mẹho mẹ podọ humọ; eyín é yín sunnusi de, whenẹnu ahididona towe na yín ṣekẹli kandeao, podọ na yọnnusi lọ ṣekẹli ao. ⁸Ṣigba eyín ewọ yín wamọnọ hugán ahididona towe, whenẹnu ewọ na yín zìzé do yẹwhenọ lọ nukọn, yẹwhenọ lọ nasọ doahina ẹn; kẹdẹdi huhlọn ewọ he dopa tọn lọ wẹ yẹwhenọ lọ na do doahina ẹn.

⁹Podọ eyín é yín kanlin de, ehetọn gbẹtọ lẹ yí avọ́nunina de na hlan OKLUNỌ Lọ, ehè omẹ de na sọn onú nẹnkọ lẹpo mẹ hlan OKLUNỌ lọ na yín wiwe. ¹⁰Ewọ ma na lé ẹ do gba, kavi diọ ẹ gba, dagbe de na gbigble de, kavi gbigble de na dagbe gba: podọ eyín éwọ diọ kanlin na kanlin jànwẹ, whenẹnu awe lẹ ewọ po ehe é yín didiọ na po na yín wiwe. ¹¹Podọ eyín é yín kanlin mawé depope, ehe tọn yé ma yí avọ́nunina dé na hlan OKLUNỌ lọ gba, whenẹnu ewọ na zé kanlin lọ do yẹwhenọ lọ nukọn: ¹²yẹwhenọ lọ nasọ doahina ẹn, eyín é yin dagbe kavi gbigble: le hiẹ yẹwhenọ doahina ẹn do, mọ wẹ é na yín. ¹³Ṣigba eyín ewọ na fli i dodo, whenẹnu ewọ na yi madatóntọ etọn dogọ́ ahididona towe.

¹⁴Podọ whenuena omẹ de na klan ohò etọn do wiwe hlan OKLUNỌ lọ, whenẹnu yẹwhenọ lọ na doahina ẹn, eyín é yín dagbe kavi gbigble: le yẹwhenọ lọ doahìna ẹn do mọ wẹ é na nọte do. ¹⁵Podọ eyín ewọ he klan ẹn do wiwe na fli ohò etọn, whenẹnu ewọ nayí madatóntọ akuẹ ahidona towe tọn lọ tọn dogọ́ ẹ, é bo nasọ yín etọn.

¹⁶Podọ eyín omẹ de na klan adade sọn oglè nutindo etọn tọn mẹ do wiwe hlan OKLUNỌ lọ, whenẹnu ahididona towe na yín kẹdẹdi okun dido etọn: dido homeli bali dopo tọn na yín ahidona do ṣekẹli kandeao fataka tọn ji. ¹⁷Eyín é klan oglè etọn do wiwe to owhè jubile tọn lọ mẹ, é na nọte kẹdẹdi ahididona towe. ¹⁸Ṣigba eyín é klan oglè etọn do wiwe to jubile lọ godo, whenẹnu wẹ yẹwhenọ lọ na lẹn akuẹ lọ hlan ẹn kẹdẹdi owhè he pò jẹ owhè jubile tọn lọ lẹ, podọ odèpò de na yín bibasi sọn ahididona towe mẹ ¹⁹Podọ eyín ewọ he klan oglè lọ do wiwe na fli i nugbonugbo, whenẹnu ewọ na yí mada tóntọ akuẹ ahididona towe tọn lọ tọn dogọ́ ẹ, é bo nasọ yín etọn. ²⁰Podọ eyín ewọ ma na fli oglè lọ gba, kavi eyín ewọ ko sà oglè lọ do omẹ devo, é ma na yín Mi ba gba: ²¹ṣigba oglè lọ, whenuena é jẹgbonu yì to jubile lọ mẹ, na yín wiwe hlan OKLUNỌ lọ, di oglè kinklandovo de; nútindo etọn lọ nasọ yín yẹwhenọ lọ tọn. ²²Podọ eyín é klan oglè he ewọ ko họ̀ de do wiwe hlan OKLUNỌ lọ, he ma yín oglè nútindo etọn mẹ tọn lọ; ²³whenẹnu yẹwhenọ lọ na lẹn osọha ahididona towe tọn lọ hlan ẹn jẹ owhè jubile tọn lọ: ewọ bo nasọ na ahididona towe to azán nẹ gbè, di onú wiwe de hlan OKLUNỌ lọ. ²⁴To owhè jubile tọn lọ mẹ oglè lọ na légó do ewọ mẹhe si yè hò ẹ te de, yèdọ do ewọ mẹhe tọn nútindo lọ yín de. ²⁵Podọ ahididona towe lẹpo na yín kẹdẹdi ṣekẹli ofìwiwe lọ tọn: gela òko wẹ na yín Sekẹli lọ.

²⁶Oplọnji to kanlin lẹ ṣẹnṣẹn, he yè do basi oplọnji hlan OKLUNỌ lọ, kẹdẹ wẹ omẹ de ma na klandowiwe gba; eyín e yín oyín kavi lenbo, OKLUNỌ lọ tọn wẹ. ²⁷Podọ eyín e yín sọn kanlin mawé dẹ me, whenẹnu ewọ na na oflikuẹ nẹ kẹdẹdi ahididona towe bo na yí madatọntọ etọn dogó ẹ: kavi eyín e ma yín fifli gba, whenẹnu é na yín sisà kẹdẹdi ahididona towe.

²⁸Gãnṣo, onú klandovo de, he omẹ de na klandovo hlan OKLUNỌ lọ sọn ehe é tindo lẹpo mẹ, eyín sọn gbétọ mẹ kavi kanlin, kavi sọn oglè nutindo etọn tọn lọ mẹ, ma na yín sisà kavi fifli gba: onú klandovo lẹpo wẹ wiwe hlan OKLUNỌ lọ. ²⁹Meklandovo de, he na yín kinklandovo sọn gbẹtọ lẹ mẹ, ma na yín mẹfifli gba; hùhù wẹ é na yin dandan.

³⁰Podọ madao aigba lọ ton lẹpo, eyín sọn okun aigba lo tọn mẹ, kavi son sinsẹ́n atin lọ ton me, OKLUNỌ lọ ton wẹ: wiwe we hlan OKLUNỌ lọ. ³¹Podọ eyín omẹ de na fli núde sọn madao eton mẹ, ewọ na yí madoatọ́nto etọn dogọ́ e. ³²Podọ madao kanlinpó lo tọn lẹpo kavi kanlinpá lọ, núhe gbọn opo lo glọ wáyì depope, aoto lo na yín wiwe hlan OKLUNỌ lọ. ³³Ewọ ma na blẹpọ́n eyín é yín dagbe kavi gbigble gba, mọ ewọ ma na diọ ẹ gba: podọ eyín ewọ diọ ẹ jãnwẹ, whenẹnu awe lẹ ewọ po ehe é yín didiọ na po na yín wiwe; é ma na yin fifli gba.

³⁴Ehele wẹ gbèdide lẹ lọ, he OKLUNỌ lọ degbèna Moṣe na ovi Islaeli tọn lẹ lọ to oso Sinai mẹ.