Joẹli

¹OHÓ OKLUNỌ tọn he wá jẹ Joẹli visunnu Pẹtuẹli tọn lọ de.

²Sè ehe, mì omẹ omẹho lẹ emi, bo sọ na otó, mì tòmẹnu aigba lọ tọn lẹpo. Ehe ko tin to azán mìtọn lẹ mẹ la, kavi to azán otọ́ mìtọn lẹ tọn lẹ mẹ? ³Mì dọ sọn e mẹ na ovi mìtọn lẹ, bo sọ gbọ ovi mìtọn lẹ ni dọ na ovi yetọn lẹ, podọ ovi yewlẹ tọn lẹ jẹ whẹndo dẽvo. ⁴Enẹ he ahlí kò jódai wẹ owẹ́n ko dù; podọ enẹ he owẹ̀n ko jódai wọ obọ̀ kò dù; podọ enẹ he obọ̀ ko jódai wẹ agbònọpatin ko dù. ⁵Mì fọ́n, mì núnùmúnọ emi, bo viavi; bo dohukuhlu, mì nùnùtọ ovẹ̃n tọn lẹpo emi, na ovẹ̃n vivi lọ tọn wutu; na yè sán ẹn sẹ̀ sọn onù mìtọn mẹ. ⁶Na yè hẹn akọta de hẹji wá aigba ṣie ji, huhlọnnọ, podọ matin osọha; adú kinnikinni de tọn wẹ adú etọn lẹ, podọ é sọ tindo adúsó kinnikinni daho de tọn lẹ. ⁷Ewọ ko hẹn vẹ̃ntin ṣie và, bo sọ wón ovotin ṣie: ewọ ko hẹn ẹn klònflo mlẹnmlẹn, bo sọ zé e dlanigba; yè so hẹn alà etọn lẹ zùn wéwé. ⁸Doavigbè taidi awhli he yè yí adẹ́vọ̀ do blahomena de na asú ovúwhenu etọn tọn. ⁹Yè sán avọ̀ nunina jinulili tọn po avọ̀ nunina nùnù po sẹ̀ sọn ohọ̀ OKLUNỌ tọn mẹ; yẹwhenọ lẹ, devizònwàtọ OKLUNỌ tọn lẹ, blawu. ¹⁰Yè hẹn ogle gbọ̀gbẹ́, aigba sọ blawu; na yè hẹn ogbadó và, yè hẹn ovẹ̃n yọ̀yọ̀ zùn húhú, amì sọ dùnpò. ¹¹Yè hẹn winyanhù oglesi lẹ, vẹ̃ntinladètọ lẹ hukúhludo, na oli lọ podọ na bali-gbadó lọ; na yè súkún ojijẹ ogle lọ tọn do. ¹²Yè hẹn vẹntin mọwinyan, ovotin lọ sọ dùnpò; atin pomeglanate tọn lọ, odétin lọ ga, po atin apili ton po, yèdọ atin danji tọn lẹpo wẹ yè hen yé: na yè hẹn ayajẹ mọwinyan sọn visunnu gbẹtọ lẹ tọn lẹ mẹ. ¹³Mì yí odẹ́vọ̀ vo blahomẹna míde, bo doavigbè, mi yẹwhenọ lẹ emi; mì dohukùhlu, mì devizònwàtọ agbà lọ tọn lẹ; mì wá, mlọnai to odẹ́vọ̀ mẹ to ozán lọ mẹ, mì devizònwàtọ Jiwheyẹwhe tọn lẹ emi: na yè glọn avọ̀ nunina jinulili tọn po avọ́ nunina nùnù tọn lọ po dai sọn ohọ̀ Jiwheyẹwhe mìtọn tọn mẹ. ¹⁴Klan nùbibla de do wiwe, ylọ obẹ́pli ayidego de, bẹ́ mẹho lẹ pli po tòmẹnu aigba lọ tọn lẹpo po hlan ohọ̀ OKLUNỌ Jiwheyẹwhe mìtọn tọn kòn, bo dawhá hlan OKLUNỌ de. ¹⁵Hà na azán lọ! na azán OKLUNỌ tọn lọ tin to alọji, podọ azán lọ é na wá di vivà sọn. Ganhunupo lọ de. ¹⁶Bé yè ma sán núdùdù sẹ̀ to nukun mítọn lẹ nukọn, mọwẹ, ayajẹ po homẹhùn po sọn ohọ̀ Jiwheyẹwhe mítọn tọn mẹ? ¹⁷Okún lẹ wlo to owhèn yetọn lẹ glọ; yè hẹn ozlin lẹ zùn ojẹvò, yè họ̀ zĩnhọ lẹ liai; na yè hen ogbadó lọ mọwinyan. ¹⁸Nawẹ gbékanlin lẹ to winwẹ̀n sọ! yè hẹn apó kanlinpa tọn lẹ jẹflu, na yé ma sọ tindo kanlindùgbo wutu; mọwẹ, yè sọ hẹn lẹngbọpa lẹngbọ lẹ tọn jiya. ¹⁹OKLUNỌ È, hiẹ wẹ yẹn awhádo hlan: na miyọn lọ ko dù apó zùngbomẹ tọn lẹ súdo, podọ azòlọ lọ ko sọ fìọ atin danji tọn lẹpo. ²⁰Mowẹ, gbékanlin danji tọn lẹ to nùkẹ̀ hlan we: na yè hẹn osìn pẹsẹpẹsẹ lẹ hú, podọ miyọn lọ ko sọ dù apó zùngbomẹ tọn lẹ súdo.

¹Mì kún opẹ̀n lọ to Ziọni mẹ, bo sọ hlun zíninhò de to osé wiwe ṣie mẹ; gbọ tòmẹnu aigba lọ tọn lẹpo ni sisọ; na azán OKLUNỌ tọn lọ ja, na é tin to alọji; ²azán zinvlu tọn de po zíndido po, azán aslọ lẹ tọn de po zinvlu titli po, dile wunkinkẹn dlẹn do osó lẹ ji do; gbẹtọ susu lẹ de po huhlọnnọ de po, mọnkọ ma ko tin gbède, mọ depope ma na sọ tin to yé godo, yèdọ jẹ owhè whẹndo lẹ susu mẹ. ³Miyọn de to dùdùsúdo to yé nukọn; podọ to yé godo ozòlọ de to jiji: aigba lọ tin di ojipa Edẹní tọn to yé nukọn, po zùngbo ovọ́je de po to yé godo; mọwẹ, mẹde ma ko họ̀ngán to yé de gba. ⁴Awusọhia yé tọn tin di awusọhia osọ̀ lẹ tọn; podọ di awhànsọ́ lẹ, mọwẹ yé to wezundo do. ⁵Taidi hùnhlungbè kẹkẹ lẹ tọn to aga osó lẹ tọn ji wẹ yé to linlòn, taidi hùnhlungbè ozòlọ miyọn de tọn ton he dù onúyọ súdo, di gbẹtọ huhlọnnọ lẹ de he yè tò do haji to awhàn mẹ. ⁶Gbẹtọ lẹ tin to awuflẹ mẹ to yé nukọn: nukunmẹ lẹpo wẹ yè sọ hẹn gbì. ⁷Yé dowezun taidi omẹ hlọnhlọnnọ lẹ; yé ylá adó lọ taidi omẹ awhàn tọn lẹ; yé sọ to gigó omẹ dopodopo to aliho etọn lẹ jì, podọ yé ma sọ gbà ohadido yetọn lẹ gba. ⁸Mọ ode ma tùn awetọ; yé to gigọ́ omẹ dopodopo to omọ̀ etọn mẹ: whenuena yé jai tòlẹ́do adanwànú lẹ, yè ma hẹn yé gbleawu gba. ⁹Yé lọ̀n jẹ tòdaho lọ ji; yé dowezun to adó lọ ji; yé hẹji yìaga biọ, ohọ̀ lẹ mẹ; yé biọ họ̀mẹ gbọn ovẹsénu lẹ taidi núfìntọ de. ¹⁰Aigba whàn to yé nukọn; olon lẹ sisọ: yè hẹn owhè po osùn po dozinvlu, sunwhlẹvu lẹ sọ dọ̀n sisẹ́ yetọn dogodo: ¹¹OKLUNỌ sọ do ogbè etọn to awhànfuntọ etọn lẹ nukọn; na daho susu wẹ osla etọn; na huhlọnnọ wẹ ewọ he hẹn ohó etọn sẹ: na daho wẹ azán OKLUNỌ tọn bo dobu susu; podọ mẹnu wẹ sọgan nọtepọ́n ẹn? ¹²Gãnṣo yèdọ dinvie, wẹ OKLUNỌ dọ, mì lẹ́ do dẽ po ayiha mìtọn lẹpo po, po nùbibla pọ, po avi po, podọ po awubibla po: ¹³mì bo sọ tlẹn ayiha mìtọn, awugbó mitọn lẹ ma gba, bo sọ lẹ́ do OKLUNỌ Jiwheyẹwhe mìtọn de: na dagbenọ wẹ ewọ bo sọ gò na awuvẹmẹ, whle nado sadi, podọ susunọ to lẹblanu mẹ, bo sọ diọlinlẹn nẹ̀ sọn oylan lọ mẹ. ¹⁴Mẹnu wẹ yọnẹn eyín ewọ na lẹ́ bo diọlinlẹn, bo jó dona de dai to ewọ godo, yèdọ avọ̀ nunina jinulili tọn de po avọ̀ nunina nùnù de po hlan OKLUNỌ Jiwheyẹwhe mìtọn?

¹⁵Kùn opẹ̀n lọ to Ziọni mẹ, klan nùbibla de do wiwe, ylọ obẹ́pli ayidego de: ¹⁶ṣinyan gbẹtọ lẹ pli, klan agùn lọ do wiwe, pli omẹho lẹ, bẹ́ yọ̀pọ lẹ pli, po yé he to anọ̀ lẹ nọ̀ lẹ po: gbọ asisúnọ ni jẹgbonu yì sọn abò etọn mẹ, podọ asiyọ́yọ́ tòn sọn nuglọ etọn mẹ. ¹⁷Gbọ yẹwhenọ lẹ, devizònwàtọ OKLUNỌ tọn lẹ, ni viavi to awánu po agbà lọ po ṣẹnṣẹn, bo sọ gbọ yé ni dọ dọmo, OKLUNỌ È, hla omẹ towe lẹ dai, a sọ jó nudodugú towe hlan ovlẹ blo, bọ akọta lẹ na do nọ zán aṣagbèhó to mi ji: etẹwutu wẹ yé na do nọ dọ to akọta lẹ ṣẹnṣẹn dọ, Fie Jiwheyẹwhe yetọn te?

¹⁸Whenẹnu wẹ OKLUNỌ yín awuwhànnọ na aigba etọn, bo sọ tindo awubla to omẹ etọn lẹ ji. ¹⁹OKLUNỌ sọ gblọn bo dọ hlan omẹ etọn lẹ dọmọ, Dayi e go, yẹn na do ogbadó hlan mì, po ovẹ̃n po, po amì po, yè na sọ yí do pékọna mì: bọ yẹn ma na sọ hẹn mì zùn ovlẹ to akọta lẹ ṣẹnṣẹn ba gba: ²⁰ṣigba yẹn na bẹ́ awhànfuntọ agewajitọ lẹ yì dẹn boboe sọn mì de, bo na yán yé biọ aigba ṣiṣa ovọ́jẹ de mẹ po nukọnwaji etọn po hlan ohú whèzẹtẹn tọn dali, po adagodotọn etọn po hlan ohú whèyihọji tọn dali; owán etọn na hẹaga wá, podọ owán ylankan etọn na hẹji wá, na ewọ ko wà onú dahodaho lẹ. ²¹Aigba E, a dibu blo, yín homẹhùnnọ bo sọ jaya; na OKLUNỌ ko wà onú dahodaho lẹ. ²²A yin avosatọ blo, mì gbékanlin danji tọn lẹ; na kanlindùgbo zùngbomẹ tọn lẹ to zìnzìn, na atin lọ to sinsẹ́n etọn sẹ́n, ovotin lọ po ovẹntin lọ po to huhlọn yetọn dèjo ²³Enẹwutu mì ni yín homẹhùnnọ, mì ovi Ziọni tọn lẹ, bo sọ nọ jaya to OKLUNỌ Jiwheyẹwhe mìtọn mẹ: na ewọ na ojikun nukọntọn mì to dódó mẹ, ewọ bo sọ hẹn ojikun nado jẹte wá na mì, ojikun nukọntọn po ojikun agọ̀gbọnẹn po, to osùn tintan ji. ²⁴Podọ agbà lẹ na sọ tin gó na oli, podọ abátá lẹ na yí ovẹ̃n po amì po do gọ̀fla. ²⁵Yẹn bo na sọ gọ̀ owhè he owẹ̀n ko dù jó hlan mì, obọ̀, po agbọnọpatin po, po ahlí po, awhànfuntọ ṣie daho he yẹn dohlan mì ṣẹnṣẹn lẹ. ²⁶Míwlẹ bo na sọ dù to gégó mẹ bo sọ yín pékọnọ, bo sọ pà oyín OKLUNỌ Jiwheyẹwhe mìtọn tọn, he ko zán po awujiji po hẹ mì: yè ma na sọ hẹn omẹ ṣie lẹ mọwinyan gbède ba. ²⁷Míwlẹ bo na sọ yọnẹn dọ yẹn tin to gblagbla Islaeli tọn mẹ, podọ yẹn wẹ OKLUNỌ Jiwheyẹwhe mìtọn, podọ mẹdẽvo de ma tin: podọ yè ma na so hẹn omẹ ṣie lẹ mọwinyan gbède ba.

²⁸E na sọ wá jọ to enẹgodo, wẹ yẹn na kòn gbigbọ ṣie jẹgbonu do agbasalaa lẹpo ji, bọ visunnu mìtọn lẹ po viyọnnu mìtọn lẹ po na to dọdaidọ, omẹ hóhó mìtọn lẹ na to odlọ lẹ kú, omẹ winyanwinyan mìton lẹ na sọ to númimọ lẹ mọ ²⁹podọ to azán nẹlẹ mẹ ga wẹ yẹn na kọ̀n gbigbọ ṣie jẹgbonu do devisunnu lẹ ji podọ do deviyọnnu lẹ ji. ³⁰Yẹn bo na sọ do nujawu lẹ hia to olọn lẹ mẹ podọ to aihọn mẹ, ohùn, po miyọn po, po odòtin azọ̀ tọn lẹ po. ³¹Yè na lẹ́ owhè biọ zinvlu mẹ, podọ osùn biọ ohùn mẹ, whẹpo azán daho bo sọ dobu OKLUNỌ tọnlọnadowá. ³²E nasọ wájọ, dọmẹdepope he dawhá ylọ oyín OKLUNỌ tọn wẹ yè na whlẹngan: na to osọ́ Ziọni mẹ podọ to Jelusalẹm mẹ finẹ wẹ enẹlẹ he hòngán lẹ na te, dile OKLUNỌ ko dọ do, podọ to pipòtọ mẹhe OKLUNỌ na ylọ lẹ mẹ.

¹Na, dayi e go, to azán nẹlẹ mẹ, podọ to ojlẹ nẹ mẹ, whenuena yẹn na sọ vọ̀ mẹmẹglọ Juda po Jelusalẹm po tọn hẹnwá, ²Yẹn na bẹ́ akọta lẹpo pli, bo sọ hẹn yé jete wá biọ agbàdo Jehọṣafati tọn mẹ; yẹn bo na sọ dowhẹ̀gbè po yé po to finẹ na omẹ ṣie lẹ podọ na Islaeli núdodùgú ṣie, mẹhe yé ko vúnvún do akọta lẹ ṣẹnṣẹn, bo sọ má aigba ṣie. ³Yé ko sọ dlẹn ovò lẹ na omẹ ṣie lẹ: bo ko sọ jó yọpọsunnu de na ogàlọtọ de, bo sọ sà yọpọyọnnu de na ovẹ̃n, na yé nido nọ nù. ⁴Mọwẹ, etẹ́ mìwlẹ sọ yín hlan yẹn, Tile, po Zidoni po emi, po agbègbè Filistia tọn lẹpo po? Míwlẹ na gọ̀ahọ̀suna núwiwà de sọn ṣie mẹ? podọ eyín mìwlẹ nahọ̀su mi, yiyayiya podọ tejiteji wẹ yẹn na lẹ́ núwiwà mìtọn gọ̀ do otà mìtọn lọsu ji. ⁵Sùsọ le mìwlẹ ko bẹ́ fataka ṣie po sika ṣie po, bo ko hẹn onú ṣie dagbedagbe whànpẹnú lẹ yì biọ tẹmpli mìton lẹ mẹ; ⁶ovi Juda tọn lẹ ga po ovi Jelusalẹm tọn lẹ po wẹ mì ko sà hlan visunnu Glẹkinu lẹ tọn lẹ, na míwlẹ nido diọtẹnna yé yì dẹn sọn agbó yetọn ji: ⁷dayi e go, yẹn na fọ́nadán yé daga tọ́n sọn otẹn lọ mẹ fiedali mì ko sà yé do, bo na sọ lẹ́ núwiwà mìtọn gọ́ do ota mìtọn lọsu ji; ⁸Yẹn bo na sọ sà visunnu mìtọn lẹ po viyọnnu mìtọn lẹ po do alọ ovi Juda tọn le tọn mẹ, yéwlẹ bo na sọ sà yé hlan omẹ Seba tọn le, hlan akọta de to aganu boboe: na OKLUNỌ ko dọ ẹ.

⁹Mì lá ehe to akota lẹ ṣẹnṣẹn; klan awhàn do wiwe: fọ́nadán omẹ hlọnhlọnnọ lẹ; gbọ omẹ awhàn tọn lẹpo ni dọ̀n sẹpọ́, gbọ yé ni hẹji wá ¹⁰Mì yí glepọ̀nugàn mìton lẹ do tùn ohi lẹ, podọ ohànvi mìtọn lẹ do tùn owhán lẹ; gbọ madogánnọ ni dọmọ, Huhlọnnọ wẹ yẹn. ¹¹Mì bẹ́ míde pli, bo wá, mì akọta lẹpo lédo pé, bo sọ bé míde plidopọ: finẹ, OKLUNỌ E, wẹ a ni hẹn omẹ hlọnhlọnnọ towe lẹ jẹte wá. ¹²Gbọ akọta lẹ ni fọ́nadán yéde, bo hẹji wá jẹ agbàdo Jehọṣafati tọn me: na finẹ wẹ yẹn sín nado dawhèna akọta lẹpo lédo pé. ¹³Mì yí agbògọ́dọẹ do e mẹ, na ovẹntin tin bibia: mì wá, mì jẹte: na ovẹndo yín gigọ, abátá lẹ gọ́fla; na daho wẹ yinylan yetọn. ¹⁴Agùndaho lẹ, agùndaho lẹ to agbàdo owhẹ̀da tọn mẹ! na azán OKLUNỌ tọn lọ tin sẹpọ́ to agbàdo owhẹ̀da tọn lọ mẹ. ¹⁵Yè hẹn owhè po osùn po dozinvlu, podọ sunwhlẹvu lẹ dọ̀n sisẹ́ yetọn dogodo. ¹⁶Podọ OKLUNỌ na li sọn Ziọni mẹ, bo sọ do ogbè etọn sọn Jelusalẹm mẹ; podọ olọn lẹ po aigba po na whàn: ṣigba OKLUNỌ na yín fibẹ̀tado de hlan omẹ etọn lẹ, podọ figángán de hlan ovi Islaeli tọn lẹ. ¹⁷Mọwẹ míwlẹ na sọ yọnẹn dọ yẹn wẹ OKLUNỌ Jiwheyẹwhe mìtọn, he nọnọ̀ Ziọni osó wiwe ṣie mẹ: whenẹnu wẹ Jelusalẹm na yín wiwe, podọ finẹ wẹ ojonọ lẹ de ma na sọ gbọn ewọ mẹ luntón gbède ba. ¹⁸E na sọ wá jọ to azán nẹ mẹ, wẹ osó lẹ na to ovẹ̃n vivi kùn dai, podọ okọta lẹ na sọ yí oyìnnọ́ do to sisa, podọ tòpẹsẹ Juda tọn lẹpo na sọ yí osìn lẹ do to sisa; podọ tọ̀sisa de na sọ jẹgbonu sọn ohọ̀ OKLUNỌ tọn mẹ wá, bo na sọ húsìnna agbàdo Ṣitimi tọn. ¹⁹Egipti na yín ojẹvọ́ de, podọ Edọmi na yín zùngbo ovọ́jẹ de, na huhlọnnú yè wà hlan ovi Juda tọn lẹ, na yé ko kọ̀n ohùn homẹvọ́nọ to aigba yetọn mẹ wutu ²⁰Ṣigba Juda mẹ na yín ninọ̀, kakadoi, podọ Jelusalẹm sọn vhẹndo mẹ jẹ whẹndo mẹ. ²¹Podọ yẹn na sọ hẹn di homẹvọnọ ohùn yetọn he yẹn ma ko klọwé go: na OKLUNỌ nọnọ̀ Ziọni mẹ.