Johanu

¹TO whéwhẹwhenu we Ohó lọ ko tin, Ohó lọ ko tin po Jiwheyẹwhe po, Ohó lọ wẹ Jiwheyẹwliẹ. ²Ewọ lọ wẹ ko tin to whẹwhẹ whenu po Jiwheyẹwhe po. ³Gbọn alọ etọn me wẹ yè dá onú popo, to godo etọn onú de ma tin bọ ye sọ dá to onù he yè dá lepo me. ⁴Ewọ mẹ wẹ ogbè te; ogbè lọ sọ wẹ kinhon gbẹtọ lẹ tọn. ⁵Hinhọ́n lọ sọ hón to zinvlu me; zinviu lọ ma sọ kẹn, ⁶Dawe de wá bọ yè dohlan sọn Jiwheyẹwhe de, oyín mẹheton nọ yin Johanu ⁷Ewọ lọ wẹ wá di kunnudetọ, nado dekunna na hinhọ́n lọ, na gbẹtọ lẹpo nido yise gbọn ewọ dali ⁸Ewọ ma wẹ hinhọ́n lọ gba, ṣigba e wá nado dekunnu na hinhọ́n lọ. ⁹Ehe wẹ hinhọ́n nugbo lọ, yèdọ hinhọ́n he to wunhón na gbẹtọ lẹpo, he wiwá aihọn mẹ. ¹⁰Ẹwọ ko tin to aihon me, gbọn ewọ mẹ wẹ yè dá aihọn, aihọn ma sọ yón ẹn. ¹¹E wá na onú etọn lẹ, ọmẹ etọn lẹ ma sọ yí i. ¹²Ṣigba yé omẹ sọha he yí i lẹ, yé we é na ojlọjẹ nado lẹzùn visunnu Jiwheyẹwhe tọn, yèdọ mẹhe yise to oyín etọn mẹ lẹ: ¹³mehe yè ji, é ma yín gbọn ohùn dali, kavi gbọn ojlo agbasalàn tọn dali, mọ é ma yín gbọn ojlo gbẹtọ tọn dali, adavo sọn Jiwheyẹwhe dali. ¹⁴Yè sọ lẹ Ohó lọ zùn agbasalan, é sọ nò mí ṣẹnṣẹn, mí pọ́n gigo etọn gigo he di Ovi dèton dopo akàn sọn Otọ́ de, mẹhe go na ojọmiọn po nugbo po. ¹⁵Johanu dekunnu nẹ, bo dawhá, dọmọ, Ehe wẹ, ohó mẹhe tọn yẹn dọ, dọmọ, Mẹhe ja to godo ṣie, é húgan mì; na é ko lẹzùn nukọntọ na mi wutu. ¹⁶Na sọn gigọ́ etọn mẹ wẹ mí omẹ pó mọyí te, podọ ojọmiọn na ojọmiọn. ¹⁷Na gbọn Moṣe me wẹ yè na osén omẹ, ṣigba Jesu Klisti mẹ wẹ ojọmiọn po nugbo po gbon wá ¹⁸Mẹde ma mọ Jiwheyẹwhe gbède; Ovi dètón dopo akàn lọ, he ko tin to akọnnu Ọtọ ton, ewọ lọ wẹ do e hia.

¹⁹Ehe wẹ okunnu Johanu tọn, whenuena Ju lẹ do yẹwhenọ lẹ, po Levite lẹ po hlan sọn Jelusalẹm nado kanbiọ ẹ dọ, Menu wẹ hiẹ? ²⁰Ẹwọ sọ yigbè, é ma mónu; ṣigba é yigbè dọ, Yẹn ma wẹ Klisti lọ gba ²¹Yé sọ kanse ẹ dọ, Bé mẹnu wẹ? Bó Eliya wẹ hiẹ? E sọ dọmọ, Yẹn ma yin ewọ gba. Bé hiẹ we yẹwhegán nẹ? Ewọ sọ gblọn dọmọ, Lala. ²²Whenẹnu yé dọ hlan ẹn, dọ, Mẹnu wẹ hiẹ? na mí nido nagbè mẹhe do mí hlan lẹ. Etẹ́wẹ hiẹ dọ gbọn dewe tọn dali? ²³E dọmọ, Yẹn wẹ ogbè mẹhe tọn to awhádo to zùngbo mẹ, Mì basi ali Oklunọ tọn do titegbe, 1 dole yẹwhegán Isaia dọ do. ²⁴Yè sọ do yé hlan sọn ogbé Falesi lẹ tọn mẹ. ²⁵Yé kanbiọ ẹ, bo dọ hlan ẹn, dọ, Etẹwutu wẹ hiẹ to bibaptizi, eyín hiẹ ma yín Klisti lọ, kavi Eliya, kavi yẹwhegán nẹ? ²⁶Johanu sọ gblọnna ye dọ, Yẹn yí osìn do baptizi: dawe de to ote to ṣẹnṣẹn mìtọn, mẹhe mì ma yónẹn; ²⁷mẹhe ja to godo siẹ, afọpakan mẹhetọn yẹn ma jẹ na tún. ²⁸Onú helẹ wẹ yè basi to Betania, to Jọdani godo, to ofi he Johanu to bibaptizi te.

²⁹To azán awetọ gbè, Johanu mọ Jesu ja e de, bo dọmọ, Pọ́n Lengbọvu Jiwheyẹwhe tọn, he zé ylando aihọn tọn yì. ³⁰Ehe we, ohó mẹhe tọn yẹn dọ, dọmo Dawe de ja to godo ṣie, mẹhe húgan mi: na é ko lẹzùn nukọntọ na mi wutu. ³¹Yẹn ma so yón ẹn, ṣigba na ye nido sọ ẹ hia na Islaeli, enẹwutu wẹ yẹn wá, bo yi osìn do to bibaptizi. ³²Johanu sọ dekunnu, bo dọmọ, Yẹn mọ Gbigbọ jete sọn olọn di apoe de, é jẹte do e ji. ³³Yẹn ma sọ yón ẹn, ṣigba mẹhe do mi hlan nado yí osìn do baptizi, ewọ we dọ hlan mi, dọ, Ota mẹhe tọn ji hiẹ mọ, bọ Gbigbọ jẹ do, bọ e nọte to e ji, ewọ lọ wẹ, mẹhe nọ yí Gbigbọ Wiwé do baptizi. ³⁴Yẹn ko mọ ẹn, bo ko dekunnu dọ ehe wẹ Ovi Jiwheyẹwhe tọn.

³⁵Azán awetọ godo Johanu vó site po nuplọntọ etọn awe po; ³⁶e to pinpon Jesu dile é to zọnlinzin do, bo domọ, Pọ́n Lẹngbovú Jiwheyẹwhe tọn ³⁷Nuplọntọ awe le sè whenuenà é dọ, yé sọ hodo Jesu, ³⁸Whenenu wẹ Jesu légodo, bo mo yé to hihodo e, bo sọ dọ hlan yé, dọmọ, Etéwẹ mì to dindin? Yé dọ hlan ẹn, dọ, Labbi, (tadena ehe ton yín, Meplóntọ,) fie wẹ hiẹ nọnọ̀? ³⁹È sọ dọ hlan ye, dọ, Wá, mì nasọ mọ. Yé wá, bo só mọ fie é nọnọ̀, yé sọ nò po e po to gbènẹgbè: na é yì ojle ogàn aotọ tọn mẹ. ⁴⁰Dopo to omẹ awe he sè whenuena Johanu dọhó, bo sọ hodo e lẹ mẹ, we Andlé, nọvisunnu Simọni Pita tòn ⁴¹E din Simoni nọvisunnu etọn lọsu mọ whé, bo sọ dọ hlan ẹn, dọ, Mìwlẹ ko mọ Messiyá lọ, (tadena ehe tọn yín, Klisti). ⁴²E so hẹn ẹn wá Jesu de. Whenuena Jesu pọ́n ẹn, é dọmọ, Hiẹ wẹ Simọni ovisunnu Johànu tọn, Kéfa we yè na nọ ylọwe dọ, (tadena ehe tọn yín, Osé).

⁴³To azán awetọ gbè, é jlo na tọ́njẹgbonu yì Galili, é sọ pọ́n Filipi: Jesu sọ dọ hlan en, dọ, Hòdo mi. ⁴⁴Betsaidatọ we Filipi, otò Andlé po Pita po ton. ⁴⁵Filipi sọ mọ Nátanaeli, bo do hlan ẹn, dọ, Mìwlẹ kó mọ ẹn, mehe Moṣe to osén mẹ, po yewhegán lẹ po kanwé etọn, Jesu Nazalẹti tọn, ovi Josefu ton. ⁴⁶Natanaeli sọ dọ hlan ẹn, dọ, Bé onú dagbe de sọgan tón sọn Nazaleti? Filipi dọ hlan ẹn, dọ, Wá pọ́n. ⁴⁷Jesu mọ Natanaeli ja e de, é dọ gbon etọn dali, dọ, Pọ́n Islaelinu nugbo, mẹhe mẹ oblu ma tin te! ⁴⁸Natanaeli sọ dọ hlan ẹn, dọ, Fie hiẹ yọ́n mi sọn? Jesu gblọn bo dọ hlan ẹn, dọ, Whẹpo Filipi ylọ we, whenuena hiẹ tin to ovotin glọ, yẹn ko mọ we. ⁴⁹Natanaeli gblọn nẹ do, Labbi, hiẹ we Ovi Jiwheyẹwhe tọn; hiẹ wẹ Ahọlu Islaeli tọn. ⁵⁰Jesu gblon, bo dọ hlan en, dọ, Hie yise na yen dọ hlán we, dọ, Yẹn ko mọ we whenuena hiẹ tin to ovotin glọ wutu? hie na mo onú he hú ehele. ⁵¹E sọ dọ, hlan ẹn, dọ, Nugbo, nugbo, wẹ yẹn dọ hlan mi, Mì na mọ olọn hùn do nuvo angẹli Jiwheyẹwhe tọn lẹ na to aga hẹ́ bo to tejẹ do Ovi gbẹtọ tọn ji.

¹TO azán atọ̀ntọ me alọwle do tin to Kana Galili tọn; onọ Jesu tọn so tin to finẹ: ²yè sọ ylọ Jesu po nuplontọ etọn lẹ po do alọwle lọ kòn. ³Whenuena ovẹ̃n gboda, onọ Jesu tọn dọ hlan ẹn, dọ, Yé ma tindo ovẹ̃n gba. ⁴Jesu sọ dọ hlan ẹn, dọ, Nawe, etéwe yẹn do na wà hẹ we? ojlẹ ṣie ma ko wá gba. ⁵Onọ etọn sọ dọ hlan lizọnyítọ lẹ, dọ, Onú depope é dọ hlan mi, mì wà ẹ. ⁶Ozén ozannu tọn ṣidopo delẹ tin bọ yè ko zé tunte to finẹ, dile wàlo lèwé Ju lé tọn te, dopodopo yetọn hẹn otozẹn awe kavi atọ̀n hunkọ. ⁷Jesu sọ dọ hlan yé, dọ, Mì da ósìn go ozẹ́n lẹ. Yé sọ dà osìn gó yé kaka je onù. ⁸E sọ dọ, Mì bà ẹ dinvie, bo zé yì na ogán núdùdù tọn. Yè sọ zé e yì. ⁹Whenuena ogán nudùdù tọn dó osìn he yè diọ zun ọvẹn pon, bo ma yon ofi he é sọn, (ṣigba lizọnyítọ he bà osìn le yọnen;) ogán núdùdù tọn ylọ asisunọ lọ, ¹⁰Bo sọ do hlan en, dọ, Omẹ popo to whéwhéwhenu nọ zé ovẹ̃n dagbe jẹgbonu; whenuena gbẹtọ lẹ ko muahàn dagbedagbe, whenẹnu ehe ylanhu: ṣigba hie to ovẹ̃n dagbé gopayi kaka je dinvie. ¹¹Ehe wẹ ohia tintan he Jesú wà to Kana Galili tọn, bo dè gigo etọn do gbangba; nuplonto etọn le sọyí i sè.

¹²To godo ehe tọn, é jete yì Kapẹlnaumi, ewọ po onọ etọn pọ, pó mẹmẹ sunnú etọn lẹ pó, po: nuplọntọ etọn lẹ pó; yé ma sọ nọte to finẹ hò àzán susu gba.

¹³Juwayì Ju lẹ tọn sepó, Jesu sọ hẹ́ji yì Jelusalẹm ¹⁴E sọ mo to tẹmpli mẹ yé he to oyín po lẹngbọ po, po apoe le po sà, po akuẹdiọtọ le po sinai: ¹⁵whenuena é yí okan tẹ̃le de do: basi oba, é yàn yé omẹ pó jegbonu sọn tẹmpli mẹ, lẹngbọ po oyìn lepo; bó sọ diọ akuẹ akuẹdiọtọ lọ tọn kònyingbe, bo takiti na tafo lẹ; ¹⁶bo dọ hlan yé he to apoe sà lẹ dọ, Mì zé onú helẹ sọn ofi; mì yí ohò Oto ṣie tọn do basi ohò ajọ tọn blo. ¹⁷Nuplontọ etọn lẹ sọ flin dọ yè ko kamwe dọ, Vivenu ohò towe tọn du mi pó ¹⁸Enẹwutu Ju lẹ gblọn, bo dọ hlan ẹn, dọ, Ohia tẹwẹ hiẹ yí hia hlan mi hiẹ mẹhe tó onu helẹ wa? ¹⁹Jesu sọ gblọn bo dọ hlan ye, do, Mì họ́ tẹmpli he liai, to azán atọ̀n me yen nasọ zé e do ote, ²⁰Enẹwutu Ju lẹ do hlan ẹn, dọ, Owhè kandesidopo wẹ yè do gba templi he, bó hiẹ na zé e do ote to azanatọn me? ²¹Ṣigba templi agbasa etọn tọn wẹ éto didọ. ²²Enẹwutu whenuena é fọ́n sọn oku, nuplọntọ etọn lẹ flín dọ é ko dọ ehe; yè sọ yí Owé wiwé sè, po ohó he Jesu dọ po.

²³Whenuena é tin to Jelusalẹm to juwayì kọn, to hùnwhezángbè, omẹ susu yise to oyín etọn mẹ, whenuena: yé mọ ohia he é basi. ²⁴Ṣigba Jesu lọsu ma sisé ede hlan yé gba, na e yon gbẹtọ lepo, ²⁵Podọ é ma yín núwhèdonọ dọ omẹ de na do dekunnu gbọn gbẹtọ tọn dali wutu: hà ewọ lọsu yọn nuhe tin to gbẹtọ homẹ.

¹DAWE de tin to Falẹsi lẹ mẹ, he yè nọ ylọ Nikodemi, ogán Ju lẹ tọn de: ²ewọ lọ wẹ wá Jesu de to ozán mẹ, bo dọ hlan ẹn, dọ, Labbi, mìwlẹ yónẹn dọ, mẹplóntọ sọn Jiwheyẹwhe de wá wẹ hiẹ: na mẹhe sọgan basi ohia he hiẹ to bibasi helẹ de ma tin, adavo Jiwheyẹwhe tin po e po. ³Jesu gblọn bo dọ hlan ẹn, dọ, Nugbo, nugbo, wẹ yen dọ hlán we, Adavo yè vo gbẹtọ ji, ewọ ma sọgan mo aholudu Jiwheyẹwhe tọn. ⁴Nikodemi só dọ hlan en, dọ, Nawe yè sogan ji gbẹtọ do, whenuena é ko whén pó? é sọgan sọ vọ oho ono etọn tọn mẹ biọ whlawetọ bo yín jiji? ⁵Jesu gblọn dọmọ, Nugbo, nugbo, wẹ yen dọ hlan we, Adavo yè yí osìn po Gbigbọ po do ji gbẹtọ ewo ma sogan biọ ahọludu Jiwheyẹwhe tọn mẹ. ⁶Ehe yè ji gbon agbasa dali agbasa wẹ; ehe yè jì gbọn Gbigbo dali gbigbo we. ⁷Avò vo we blo na yen dọ hlan we, dọ, Yè ma sọgan nọ ma vo mì ji wutu. ⁸Jẹhọn to yinyìn ; do ofì he é jlò, hiẹ sẹ̀ sè ogbè etọn, ṣigba hiẹ ma yón ofi he é sọn wà, podọ ofì he é jei: mokedẹ we mẹdepope he yè ji gbọn Gbigbọ dali. ⁹Nikodemi sọ gblọn, bo dọ hlan ẹn, dọ, Nawẹ onu helẹ sọgan wa do yín mọ? ¹⁰Jesu so gblọn bo dọ hlan ẹn domọ, Hiẹ wẹ meplọntọ Islaeli tọn lọ bo mà yọn onú helẹ gba? ¹¹Nugbo, núgbo, wẹ yen dọ hlan we, Mìwlẹ to onu he mí yonẹn lẹ dọ, bo sọ to kunnu onu he, mí mọ lẹ tọn de; mìwlẹ ma sọ yí kunnude mìtọn. ¹²Eyín yẹn dọ onú aihọn he tọn lẹ na mì, bo mì ma yise, nawẹ mì na yise do, eyín yẹn dọ onu olọn tọn na mì? ¹³Mẹde ma hẹ aga yì olọn, adavo mehe jete son olọn, yèdọ Ovi gbẹtọ: tọn lọ ¹⁴Dile Moṣe zé odàn do aga to zùngbo mẹ, mọkẹde wẹ yè ma sọgan nọ ma zé Ovi gbẹtọ tọn do aga: ¹⁵na medepope he yise nido tindo ogbè madopodo to e me;

¹⁶Na Jiwheyẹwhe yíwánna aihọn sọmọ bọ e yí Ovi dètón etọn dopo ákan namẹ, na medepope he yí i sè ma nado dòn, sigba nido tindo ogbè madopodo ¹⁷Na; Jiwheyẹwhe ma do Ovi hlan aihọn mẹ nado dawhèna aihon gba: ṣigba na yè nido gbon ewọ me whlẹn aihọn gán. ¹⁸Mẹdepope he yí i se yè ma dawhẹna gba ewọ he ma yí i sè yè ko dawhè nẹ dai, na é ma yí oyín Ovi dètón dopo akan Jiwheyẹwhe ton lọ sè wutu. ¹⁹Ehe wẹ owhè, dọ hinhọ́n wá aihọn mẹ, bọ gbẹtọ yíwánna zinvlu hú hinhòn, na ylan wẹ azon yetọn lẹ wutu. ²⁰Na medepope he wẹ danu wa nọ gbẹwanna hinhọ́n, é ma sọ nọ wá hinhọ́n nu, yè nikã wọhe azón eton le. ²¹Ṣigba mẹhe wa nugbo we nọ wa hinhọ́n nu, na yè nido do azon etọn lẹ hia, dọ yè basi yé to Jiwheyẹwhe me.

²²To o helẹ godo Jesu po nuplọntọ etọn lẹ, po wá aigba Judé tọn ji; finẹ é nọte hẹ yé te bo baptizi. ²³Johanu ga to bibaptizi to Enonu he sepọ Salimi, na osìn susu tin to fìne: yé wá, yè sọ baptizi yé. ²⁴Na yè ma ko zé Johanu dlẹn ogànhọ mẹ kaka jẹ dinvie. ²⁵Enewutu ohókanbiọ de fọ́n to nuplonto Johanu tọn delẹ, po Ju de po ṣẹnṣẹn gbon olèwé dali. ²⁶Yé wá Johanu de, bo dọ hlan ẹn, dọ, Labbi, mẹhe nọ hẹ we to Jọdani godo, mẹhe hiẹ dekunnuna, do ayi e go, ewọ lọ to bibaptizi, gbẹtọ lepo sọ to wiwá e de. ²⁷Johanu so gblọn bo dọmọ, Mẹde ma sọgan mọ núde yí, adavo yè na ẹn sọn olọn. ²⁸Mìlọsu dekunnuna mi, dọ yẹn dọmọ, Yẹn ma wẹ Klisti lọ gba, ṣigba dọ yẹn wẹ yè dohlan nukọn nẹ̃. ²⁹Ewọ mẹhe tindo asiyọ́yọ́ wẹ asisúnọ: ṣigba họ́ntọn asisúnọ tọn, he site bo to ogbè etọn sè jaya susu na é sè ogbè asisúnọ tọn wutu enẹwutu yè hẹn ayajẹ ṣie he zùn gigọ́. ³⁰Ewọ ma sọgan nọ ma sudeji, ṣigba yen ma sọgan nọ ma depo.

³¹Ewọ mẹhe sọn aga húgan yé omẹ pó: mehe sọn aigba, aigba tọn we, é sọ nọ dọhó aigba tọn, mehe sọn olọn wá húgan yé ome pó. ³²Onú he ewọ mọ bo sọ sè, enẹ wẹ é to kunnude na, mẹde ma sọ yí okunnu etọn ³³Mẹhe yí okunnu etọn to kunnude dọ nugbo we Jiwheyẹwhe. ³⁴Na mẹhe Jiwheyẹwhe dohlan wẹ dọ ohó Jiwheyẹwhe tọn: na é ma na Gbigbọ to ojlénu mẹ gba. ³⁵Otọ́ yíwánna Ovi, bo yí onú lẹpo do alọ etọn mẹ. ³⁶Mẹhe yise to Ovi mẹ tindo ogbè madopodo: mẹhe ma yise to Ovi mẹ ma to na mọ ogbè; ṣigba homẹgble Jiwheyẹwhe tọn nọte to e ji.

¹ENẸWUTU whenuena Oklunọ yónẹn do Falesi lẹ ko sè dọ Jesu to bibasi, bo sọ to bibaptizi nuplọntọ susu hú Johanu, ²(ṣigba Jesu lọsu ma baptizi gba, adavo nuplọntọ etọn lẹ,) ³é jo Judé do bo sọ gọ̀yì Galili. ⁴Ewọ ma sọgan nọ ma jugbọn Samalia ṣẹnṣẹn wá yì gba. ⁵Mọwẹ é wá otò Samalia tọn de mẹ, he yè nọ ylo Sikali, ehe sẹpo aigba loboto he Jakobu na Josefu òvi etọn. ⁶Odòtò Jakobu tọn tin to finẹ. Enẹwutu le nudikọna Jesu, na zọnlin etọn wutu, é sinai dole to odòtò lọ ji: é yì ojlẹ sido potọ okle tọn. ⁷Yọnnu Samalia tọn de wá nado dòn osìn: Jesu sọ dọ hlan en, dọ, Na mi ma nù ⁸(Na nuplọntọ etọn lẹ ko yì otò mẹ nado hò núdùdù.) ⁹Enẹwutu yọnnu Samalia tọn lọ do hlan ẹn, dọ, Na é yín do bọ hiẹ mẹhe yín Ju to onúnùnù kanbiọ mi, yẹn mẹhe yín yọnnu Samalia tọn? na Ju lẹ ma nọ wànúdopọ hẹ Samaliatọ le gba. ¹⁰Jesu gblọn, bo dọ hlan en, dọ, Eyín hiẹ yón núnina Jiwheyẹwhe tọn, po mẹhe dọ hlan wẹ, dọ, Na mi ma nù po; hiẹ do sọ kanbiọ sọn e si, ewọ do ko sọ na osìn ogbénọ we. ¹¹Nawe lọ sọ dọ hlan ẹn, dọ, Mẹdaho, hiẹ ma tindo onú he hiẹ na yí do dòn, mọ odoto lo sọ siso: fiẹ ka wẹ hie tindo osin ogbẹnọ lo sọn? ¹²Bé hie klohú Jakobu otọ́ mìtọn, mẹhe na odòtò lọ mí, bọ ewọ lọsu nù sọn e mẹ, ovi eton lẹ, po okanlin etọn lẹ po ga? ¹³Jesu gblọn bo dọ hlan ẹn, dọ, Mẹdepope he nù sọn osìn he mẹ ové nasọ vó ẹ hú. ¹⁴Ṣigba mẹdepope he nù osìn he yẹn na na ẹn ové ma na hú i gbède; ṣigba osìn he yẹn na na ẹn, na lẹzùn odotò osìn tọn de to ohò etọn mẹ, he na to sisa hlan jẹ ogbè madopodo. ¹⁵Nawe lọ sọ dọ hlan ẹn, dọ, Mẹdaho, na osìn he mi, bọ ové ma nasọ hú mi na yẹn ma na sọ do wá ofi nado dọn ba. ¹⁶Jesu sọ dọ hlan ẹn, dọ, Yì, ylọ asú towe, na hiẹ ni wá ofì. ¹⁷Nawe lọ sọ dọ hlan en, dọmọ, Yẹn ma tindo asú de. Jesu dọ hlan ẹn, dọ, Hie dọ dagbe dọ yẹn ma tindo asú de: ¹⁸na hiẹ ko tindo asú atọn dai; podọ mẹhe hiẹ tindo dinvie ma yín asú towe gba: nugbo wẹ ehe hiẹ dọ. ¹⁹Nawe lọ sọ dọ hlan ẹn, dọ, Mẹdaho, yẹn mọ dọ yewhegán de wẹ hiẹ. ²⁰Otọ́ mìtọn lẹ sẹn to osé he ji; bọ mìwlẹ dọmọ, Jelusalẹm mẹ wẹ otẹn ofì he je gbẹtọ lẹ nado nọ sèn te ²¹Jesu sọ dọ hlan ẹn, dọ, Nawe, yí mi sè, ojlẹ lọ ja, whenuena é ma na yín osé he ji, kavi Jelusalẹm mẹ wẹ mi nasọ nọ sèn Otọ́ gba. ²²Mì to enẹ he mì ma yónen sén: mìwlẹ to enẹ he mìwlẹ yónẹn sèn: na Ju lẹ de wẹ whlẹngan sọn. ²³Ṣigba ojlẹ lo ja, dinvie sọ we, whenuena sinsèntọ nugbonọ lẹ na sèn Otọ́ to Gbigbọ po nugbo po mẹ: na nugbo memọnkọ wẹ Otọ́ to dindin nado yín sinsèntọ etọn lẹ. ²⁴Gbigbọ we Jiwheyẹwhe: é jẹ yé he to sinsẹn ẹn lẹ ni nọ sèn en to gbigbọ mẹ podọ to nugbo mẹ. ²⁵Nawe lọ sọ do hlan en, do, Yẹn yónẹn dọ Mẹssia ja, mẹhe yè nọ ylọ Klisti: whenuena é wá, é na lá onú lẹpo hlan mí. ²⁶Jesu dọ hlan ẹn, dọ, Yẹn mẹhe to hódọ he we wẹ ewọ lọ.

²⁷To ehe mẹ wẹ nuplontọ etọn lẹ gò, avọ̀ sọ vò yé, na é to hódọ he yọnnusi de: ṣigba mẹde ma dọ, Etẹwẹ hiẹ to dindin? kavi, Etẹwutu wẹ hiẹ to hódọ hẹ ẹ? ²⁸Whenẹnu nawe lọ jo otòzén etọn dai, bo yì otò mẹ, bo dọ hlan gbẹto lẹ, dọ, ²⁹Mì wá pọ́n dawe de, mẹhe dọ onú he yẹn ko nọ wà lẹpo na mi: bó Klisti lọ ma die? ³⁰Yé tọ́njegbonu sọn otò mẹ, bo wá e de. ³¹To osã vude nuplọntọ etọn lọ to vẹvẹ nẹ̃ dọmọ, Mẹplọntọ, dùnú. ³²Ṣigba é dọ hlan yé, dọ, Yẹn tindo núdùdù de na dù, ehe mìwlẹ ma yọnẹn. ³³Enẹwutu nuplọntọ lẹ to didọ hlan yénọzo, dọ, Mẹde ko hẹn núde wá nẹ na dù wẹ? ³⁴Jesu sọ dọ hlan yé, dọ, Núdùdù ṣie wẹ nado wà ojlo mẹhe do mi hlan tọn podọ nado dotana azọ̀n etọn ³⁵Bé mìwlẹ ma nọ dọ, E pò osùn ẹnẹ dogọ, whenẹnu wẹ gbingbèn whenu? pọ́n, yẹn dọ hlan mì, Mì zé nukun mìtọn do aga, bo pòn odanjì; na yé ko whén na gbingbèn. ³⁶Ewọ he doji ko mọ azònkuẹ yí, bo sọ bé sinsẹ́n pli hlan ogbè madopodo: na ewọ he doji po ewọ he gbẹn po, nido jaya dopọ dinvie. ³⁷Na didọ he yín nugbo to fime, Omede doji, medevo gbèn. ³⁸Yẹn do mìwlẹ hlan nado gbẹ́n onú nẹ heji mìwlẹ ma ko jẹtukla do: mẹdevo lẹ ko jẹtukla, yè sọ hẹn mì biọ tuklajẹ yetọn mẹ.

³⁹Susu Samaliatọ he tin to otò lọ mẹ tọn sọ yí i sè na ọhó nawe lọ tọn wutu, mẹhe dọmọ, E dọ onú he yẹn ko nọ wà lẹpo na mi. ⁴⁰Mọwẹ whenuena Samaliatọ lẹ wá e de, yé vè ẹ nado nọnọ̀ yé de: é sọ nò finẹ azán awe. ⁴¹Ome susu dogọ yise na ohó ewlọsu ton wutu; ⁴²yé sọ dọ hlan nawe lọ, dọmọ, Mí yise dinvie, é ma yín na ohó towe wutu gba; na míwlọsu sè ohó etọn na mìde, bo sọ yònẹn dọ, ehe wẹ Whlẹngan tọ aibọn tọn lọ nugbo.

⁴³To azán awe le godo, é tónyì sọn finẹ biọ Galili mẹ. ⁴⁴Na Jesu lọsu ko dekunnu dọ, Yẹwhegán ma tindo yẹyi to otò ewlọsu tọn mẹ gba. ⁴⁵Enewutu whenuena é wá Galili, Galilitọ lẹ yí i do, na yé ko mọ onú he é wà to hùnwhẹ whenu to Jelusalẹm lẹpo: na yéwlọsu yì hùnwhẹ lọ ga.

⁴⁶Mọwẹ é sọ vò gò wá Kana Galili tọn, to ofì he é diọ osìn zùn ovẹ̃n te. Ogán de tin to finẹ, mẹhe ovi etọn sunnu jẹazòn to Kapẹlnaumi. ⁴⁷Whenuena é sè dọ Jesu ko tòn sọn Judé wá Galili, é wá e de, bo vò ẹ, na é ni jẹte wa nado hẹnazọ̀ngbọna ovi etọn, na é tin to okú dònu. ⁴⁸Whenẹnu Jesu dọ hlan ẹn, dọ, Eyín mìwlẹ ma mọ ohia po azọ̀n jawu po, mìwlẹ ma na yise gbọn alọ depope mẹ. ⁴⁹Ogán lọ sọ dọ hlan ẹn, dọmọ, Medaho, jẹte wá whẹpo ovi ṣie nido kú. ⁵⁰Jesu dọ hlan ẹn dọ, Yì, ovi towe gán. Dawe lọ sọ yí ohó he Jesu dọ hlan ẹn sè, bo sọ yì. ⁵¹Le é jẹte jei, afànumẹ etọn lẹ wá pé e, bo dọ hlan ẹn, dọ, Ovi towe gán. ⁵²Mọwẹ é kanbiọ ojlẹ té mẹ wẹ é ẸSẸ gbigbọ nẹ te Enẹwutu yé dọ hlan ẹn, dọ, Osọ to ogàn ṣinawe mẹ wẹ avivọ lọ jo e do. ⁵³Mowẹ otọ lọ yònẹn dọ to ojlẹ doponẹ me we, ehe mẹ Jesu dọ hlan ẹn, dọ, Ovi towe gán: ewlosu sọ yise po whédo etọn lẹpo po. ⁵⁴Ehe sọ wẹ ohia awetọ lọ he Jesu basi, é tintọn sọn Judé mẹ biọ Galili mẹ.

¹TO ehegodo hùnwhẹ Ju lẹ tọn de tin; Jesu sọ hẹ́ji yì Jelusalẹm. ²Otando de tin to Jelusalẹm, to hòngbo lẹngbo tọn dali, he yè nọ ylọ Bẹtsata to ogoe Heblu ton mẹ, ehe tindo họnnuwá aton. ³To ehelẹ mẹ wẹ susu potẹn lẹ tọn, nukuntọ́nnọ lẹ, sẹkunọ le, po agbasakukunọ lẹ po mlọnai do, (yé to tenopón whinwhàn osìn tọn. ⁴Na to ojlẹ de mẹ angẹli de nọ jẹte yì otándo lọ mẹ, bo nọ wlu osìn: enẹwutu mẹdepope he whéwhé doafọ e mẹ, to godo whenu yè ko wlu osìn lọ, yè hẹn ẹn jẹ gángán sọn azọ̀n depope he é tindo mẹ.) ⁵Dawe de tin to finẹ, mehe do lanmẹmalo sọn owhè gbàntonnukunatọ̀n gbòn. ⁶Whenuena Jesu mọ ẹn to aimimlọn, bo sọ yònẹn dọ dinvie é ko tin to omọ é dẹn, é dọ hlan ẹn, dọ, Hiẹ jlo yè ni hẹn azọ̀n towe gbọ na we? ⁷Dawe azọ́ntọ lọ gblọn, bo dọ hlan ẹn, dọ, Oklunọ, yẹn ma tindo mẹde whenuena yè wlu osin nado zé mi do otándo mẹ: ṣigba whenuena yẹn ja, mẹdevo jẹte doafọ e mẹ jẹnukọnna mi. ⁸Jesu sọ dọ hlan ẹn, dọ, Fọ́n, zé adòzan towe, bo zinzọnlin. ⁹Plaun yè hẹnazọ̀ngbọna dawe lọ, é zé adòzan etọn, bo zinzọnlìn: E sọ yín gbọjẹzángbè to azán doponẹ gbè. ¹⁰Enẹwutu Ju lẹ dọ hlan dawe lọ mẹhe yè hẹnazọ̀ngbọna, dọmọ, Gbọjezángbè wẹ egbe: é ma jẹ na we nado zé adọzan towe gba. ¹¹Ṣigba é sọ gblọn dọ hlan yé, domọ, Mẹhe hẹnazònguọna mi, dopolọ wẹ dọ hlan mi, dọ, Zé adòzan towe, bo zinzọniin. ¹²Yé kanbiọ ẹ dọ, Mẹnu wẹ gbẹtọ he dọ hlan we, dọ, Zé adózan towe, bo zinzọnlin? ¹³Ṣigba mẹhe yè hẹnazọ̀ngbọna lọ ma yón mẹhe é yín: na Jesu ko tón sọn fine, na agùndaho tin to finẹ wutu. ¹⁴Jesu wá mọ ẹn to tẹmpli mẹ to godo, bo dọ hlan ẹn, dọ, Do ayi e gó, yè hẹnazọ̀ngbọna we: a sọ wàylan ba blo, onú he ylanhú ehe nikã jọ do ogo we. ¹⁵Dawe lọ tònyì, bo dọ hlan Ju lẹ, dọ, Jesu wẹ mẹhe hẹnazòngbọ nẹ̃. ¹⁶Enẹwutu wẹ Ju lẹ dohomẹkẹn Jesu, na é wà onú helẹ to gbọjẹzángbè wutu. ¹⁷Ṣigba e gblọn dọ hlan yé, dọmọ, Otọ́ ṣie wàzón kaka jẹ dinvie, yẹn sọ wàzon. ¹⁸Enẹwutu Ju lẹ sọ din susu nado hu i, e ma yin e hẹn gbọjezán gble tọn kẹdẹ wutu gba, ṣigba é dọ ga, dọ Jiwheyẹwhe wẹ Otọ etọn, é basi ede sọzẹn he Jiwheyẹwhe.

¹⁹Enẹwutu Jesu gblọn, bo dọ hlan yé, dọmọ, Nugbo, nugbo, vẹ yẹn dọ hlan mì, Ovi ma sọgan wa núde ededenu, adavo onú he é mọ Oto wà: na nudepope he é wà, ehelẹ wẹ Ovi to wiwà mọ ga ²⁰Na Otọ́ yíwánna Ovi, bo sọ yí onú he ewlọsu to wiwà lẹpo hia ẹ: ewọ nasọ do azón he klohú ehelẹ hia ẹ, na awu nido ji mì. ²¹Na dile Otọ́ to osio fọ́n, bo sọ to yé hẹn do ogbé; mọkẹdẹ wẹ Ovi sọ nọ hẹn mẹhe é jlo le do ogbè ga. ²²Na Otọ́ ma nọ dawhè mẹdepope tọn, ṣigba é ko yí whẹ̀dida lẹpo na Ovi: ²³na omẹ pó nido na yẹyi Ovi, kededile yé to yẹyi na Otọ́ do. Mẹdepope he ma na yẹyi Ovi, é ma na yẹyi Oto mẹhe do e hlan. ²⁴Nugbo, nugbo, wẹ yẹn dọhlan mì, Mẹdepope he se ohó ṣie, bo sọ yí mẹhe do mi hlan sè, é tindo ogbè madopodo, é ma na bio whẹ̀dida mẹ gba; ṣigba é tón son oku mẹ biọ ogbè mẹ. ²⁵Nugbo, nugbo, wẹ yẹn dọ hlan mì, Ojlẹ lọ ja, dinvie sọ wẹ, whenuena osiọ lẹ na sè ogbè Ovi Jiwheyẹwhe tọn tọn: mẹhe sọ sè lẹ na tin to ogbẹ, ²⁶Na dile Otọ́ tindo ogbè to ede mẹ; mọkẹdẹ wẹ é yí na Ovi ga nado tindo ógbẹ to èdè mẹ; ²⁷bo sọ na huhlọn ẹn nado dawhè ga, na é yín Ovi gbẹtọ tọn wutu. ²⁸Avò vò mì na ehe wutu blo: na ojlẹ lọ ja, to ehe mẹ omẹ he tin to yòdo mẹ lẹpo na sè ogbè etọn, ²⁹bo na tọ́njegbonu; mẹhe wà dagbe lẹ hlan fọ́nsọnku ogbè tọn; mehe wà oylan lẹ hlan fọ́nsọnku whẹ̀dida tọn.

³⁰Yẹn ma sọgan wà onú depope dedẽnu gba; le yẹn sè, we yẹn to whẹ̀da do: dódó wẹ whẹ̀dida ṣie: na yẹn ma to ojlo ṣie lọsu din gba, adavo ojlo mẹhe do mi hlan tòn. ³¹Eyín yẹn to kunnudena dẽ, okunnu ṣie ma yín nugbo gba. ³²Mẹdevo tin, mẹhe to kunnudena mi; yẹn sọ yónẹn dọ nugbo wẹ okunnu he é to dide na mi. ³³Mìwlẹ dowẹn hlan Johanu de, ewọ ko sọ dekunnu hlan nugbo. ³⁴Ṣigba yẹn ma yí okunnu sọn gbẹtọ de gba; ṣigba onú helẹ wẹ yen to didọ, na yè nido whlẹn mì gán. ³⁵Miyóngbán lọ he to jiji bo to sìsẹ ko wẹ ewọ, mìwlẹ ko sọ jlo to ojle de mẹ nado jaya to hinhọ́n etọn mẹ. ³⁶Ṣigba yẹn tindo okunnude he klohú Johanu tọn, na azón he Otọ́ ṣie ko na mi nado dotana lẹ, azón lọsu lẹ he yen wà, tó kunnudena mi dọ, Otọ́ wẹ do mi hlan. ³⁷Otọ́ mẹhe do mì hlan, é ko dekunnuna mi. Mìwlẹ ma ko sè ogbè etọn gbède, mọwẹ mì ma mọ ohia etọn gbède. ³⁸Mì ma sọ tindo ohó etọn ninọ̀ tó mi hòmẹ gba: na mẹhe é dohlan, ewọ wẹ mì ma yise ³⁹Mì owé wiwe lẹ dinmọ, na mì lẹn dọ yé mẹ mì tindo ogbè madopodo te wutu; podọ ehelẹ sọ wẹ ye he to kunnudena mi. ⁴⁰Mì ma sọ jlo na wá dẽ, na mì nido tindo ogbẹ. ⁴¹Yẹn má yí gigo sọn gbẹtọ si gba. ⁴²Ṣigba yẹn yón mì dọ, mì ma tindo owányí Jiwheyẹwhe tọn to mì hòmẹ gba. ⁴³Yẹn wá to oyín Otọ́ ṣie tòn mẹ, mì hia sọ yí mi: eyín mẹdevo wá to oyín ede tọn mẹ, ewọ wẹ mì na yí. ⁴⁴Nawe mì sọgan yise do, mì mẹhe to yẹyi yí sọn mìnọzọ de, bo ma din yẹyi he sọn Jiwheyẹwhe ṣokẹdẹ de? ⁴⁵Mì lẹn dọ yẹn na slẹ mì hlan Otọ́ blo: mẹde tin mẹhe to mì slẹ, yèdọ Moṣe, mehe go mì dotudo. ⁴⁶Na eyín mì ko yí Moṣe sè, mi dó ko yí mi sè: na owé ṣie wẹ ewọ kàn wutu. ⁴⁷Ṣigba eyín mìwlẹ ma yí owé etọn se, nawẹmì na yí ohó ṣie sè do?

¹TO onú helẹ godo, Jesu sọ juwáyì ohù Galili tọn godo, he yín ohù Tibéliade tọn. ²Gbẹtọ susu hodo e na ye mọ ohia etọn he é basi do yé he jẹazọngo lẹ wutu. ³Jesu sọ hẹ́ji yì osó lọ ji, finẹ wẹ é sinai te po nuplọntọ etọn lẹ po. ⁴Juwayi, hùnwhẹ Ju lẹ tọn, sẹpọ. ⁵Enẹwutu whenuena Jesu zé nukun etọn do aga, bo mọ agùndaho de wá e de, é dọ hlan, Filipi, dọ, Fiẹ wẹ mí na hò akla te na omẹ helẹ nido dù? ⁶E dọ ehe nado whle e pọ́n; na ewọlọsu yón onú he é do wà. ⁷Filipi gblọn dọ hlan ẹn, dọ, Akla abọgan-kuẹ fọde tọn ma pé mẹhe lẹ, ma mẹdopodopo yetọn nido yí pẹ̃pẹ. ⁸Dopo to nuplọntọ etọn lẹ mẹ, Andlé, novisunnu Simọni Pita tọn, dọ hlan ẹn, dọ, ⁹Yọ: pọsunnu de tin to ofi he tindo akla bále tọn atón, po whèvi pẹvipẹvi awe po: ṣigba etéwẹ enẹlẹ yín to omẹ plànplan helẹ ṣẹnṣẹn? ¹⁰Jesu sọ dọmọ, Mì hẹn gbẹtọ lẹ jagla. Ogbé susu sọ tin to finẹ. Enẹwutu sunnu lẹ jagla, na hihià yé yi degbadefọtón. ¹¹Jesu yí akla lẹ: whenuena é dopé, é má yé na mẹhe jagla le; mọkẹdẹ wẹwhèvi sọha he yé jlo, ¹²Whenuena yé ko gohò, é do hlan nuplọntọ etọn lẹ, dọ Mì bé dùpò he pò pli, yè hẹn núde gú blo. ¹³Enẹwutu ye bé yé plidopọ, ye gó oha wiawe sọn dùpo he poai bo sọ sùhúgan na yé omẹ he dú sọn akla aton bale tọn mẹ lẹ. ¹⁴Mowẹ whenuena gbeto lẹ mọ ohia he é basi, yé dọmọ, Nugbo, ehe wẹ yẹwhegán he ja aihọn mẹ lọ.

¹⁵Enewutu whenuena Jesu tunwun dọ ye po yíyí huhlọn do hẹn ẹn do basi aholu, e sọ vó gọ̀yì osó de ji ewọ dopokẹde.

¹⁶Whenuena ozán ku, nuplontọ etọn lẹ jéte yi ohù me, ¹⁷yé sọ biọ vàtle de me, bo gbò óhu pla yi Kapẹlnaumi dali. Zinvlu sọ do dinvie, Jesu ma ko jẹ yé de gbá. ¹⁸Ohù sọ to wuwlu na jẹhọn daho he fọ́n wutu. ¹⁹Enẹwutu whenuena yé kùnhun yì o jlẹ stade koatọ́n, kavi ogban hunkọ, yé mọ Jesu to zọnlinzin to ohù ji, bo sọ sẹpọ vàtlẹ lọ: obú sọ di yé. ²⁰Ṣigba é dọ hlan ye, dọ, Yẹn we; mì dibú blo. ²¹Enẹwutu yé yín jijlo nado yí i do vatlẹ lọ mẹ: adonu vàtlẹ lọ jẹ age ofi he ye jei tọn ji.

²²To azán awetọ gbè agùndaho he site to awà awetọ ohù tọn ji mọ dọ vàtlẹ pevi devo de ma tin to finẹ, adavo dopo, podọ Jesu ma zọn hẹ nuplontọ etọn lẹ biọ vàtlẹ lọ mẹ gba, ṣigba dọ nuplọntọ etọn lẹ kedẹ wẹ yì; ²³ṣigba vatlẹ pẹvi dele sọn Tibeliade wá, bo sẹpọ́ ofi he yé dù akla lọ te, to godo na Oklunọ ko dopé; ²⁴enẹwutu whenuena agùndaho lọ mọ dọ Jesu ma tin to finẹ, kavi nuplọntọ eton lẹ, yé wlọsu yí vàtlẹ pẹvi lẹ bo wá Kapẹlnaumi, bo to Jesu din. ²⁵Whenuena yé mọ ẹn to awa awetọ ohù tọn, yé dọ hlan ẹn, dọ, Labbi, wheténu wẹ hiẹ wá ofi? ²⁶Jesu gblọnna yé bo dọmọ, Nugbo, nugbo, wẹ yẹn dọ hlan mì, mì to dìndin mi, é ma yín mi mọ ohia wutu gba, ṣigba na mì dù akla nẹlẹ bo góhò wutu wẹ. ²⁷Mì jẹtukla na núdùdù he na gble blo, ṣigba na núdùdù nẹ ehe nọ nọte kaka jẹ ogbè madopodo, ehe Ovi gbẹtọ tọn na na mì: na ewọ lọ wẹ Jiwheyẹwhe Otọ́ ko tlẹhiadonuna. ²⁸Enẹwutu yé dọ hlan ẹn, dọ, Etéwẹ mí ni basi, bọ mí nado sọgan wà azón Jiwheyẹwhe tọn? ²⁹Jesu gblọn bo dọ hlan yé, dọ, Ehe wẹ azọ́n Jiwhe yẹwhe tọn, dọ mì ni yise to mẹhe é dohlan mẹ. ³⁰Enẹwutu yé dọ hlan ẹn, dọ, Etẹ wẹ hie basi na ohia, na mí ni mọ, bo nado yi we sè? Azọ́n tẹ́wẹ hiẹ wa? ³¹Otọ mìton lẹ dù manna to zùngbo mẹ; kedẹdile yè wlanwe dọ, E hẹn akla sọn olọn wá na yé dù ³²Whenẹnu Jesu dọ hlan yé, dọ, Nugbo, nugbo, wẹ yẹn dọ hlan mì, Moṣe ma we ko na akla ne mì sọn olọn gba; ṣigba Oto ṣie wẹ yí akla nugoo nẹ na mì sọn olọn. ³³Na akla Jiwheyẹwhe tọn wẹ enẹ he jete sọn olọn, bo sọ yí ogbe na aihon. ³⁴Enewutu ye do hlan ẹn, dọ, Oklunọ, nọ na akla he mí tẹgbẹ̃. ³⁵Jesu dọ hlan yé, dọ, Yen wẹ akla ogbẹ tọn: mẹdepope he wa dẽ hùvé ma na hù i, mẹhe sọ yi mi se, ovẹ ma na hu i gbede ³⁶Ṣigba yẹn dọ hlan mì, dọ, Mìwlẹ ko mọ mi ga, mì ma sọ yise ³⁷Onú he Otò ṣie yí na mi lẹpo na wá dè, podọ mẹhe so wá dẽ yẹn ma na yàn ẹn jegbonu, gbọn alọ depope mẹ. ³⁸Na yẹn jẹte son olọn, é ma yín nado wà ojlo ṣie lọsu gba, adavo ojlo ewọ he do mi hlan tọn. ³⁹Ehe we ojlo mẹhe do mi hlan tọn, dọ to onú he é ko na mi lẹ mẹ yẹn hẹn depópe bú to yé mẹ blo, ṣigba na yẹn ni fọ́n ẹn do ote to azán podo gbè ⁴⁰Na ehe wè ojlo Otò ṣie tọn, dọ mẹdepope he mo Ovi, bo sọ yí i sè, nido tindo ogbè madopodo: yẹn nasọ fọ́n ẹn do ote to azán podo gbè.

⁴¹Enẹwutu Ju lẹ hlun do ota nẹ̃, na é dọ, Yẹn wẹ akla he jẹte sọn olọn wá wutu. ⁴²Ye sọ dọmo, E ma yín ehe wẹ Jesu, ovi Joseíu tọn, mẹhe mí yọn otò etọn po onọ etọn po? etẹwutu wẹ e dọ dinvie, Yẹn jẹte sọn olon wá? ⁴³Jesu gblọn, bo dọ hlan yé, dọmọ, Mì hlun to mìde ṣẹnṣẹn blo. ⁴⁴Mẹdepope ma sọgan wá dè, adavo Otò he do mi hlan dòn ẹn: yẹn nasọ fọ́n ẹn do ote to azán pòdo gbè. ⁴⁵Yè sọ wlan to owé yẹwhegán lẹ tọn mẹ dọ, Yè na plòn yé omẹ pó gbon Jiwheyẹwhe de.? Enẹwutu mẹdepope he sè, bọ yè sọ plón gbọn Otò de, ewọ wẹ to dẽ wá. ⁴⁶E ma yín mẹdepope ko mọ Otò gbède gba, adavo mẹhe yín Jiwheyẹwhe tọn, ewọ wẹ ko mọ Otọ́ lọ. ⁴⁷Nugbo, nugbo, wẹ yẹn dọ hlan mì, Mẹhe yí mi se tindo ogbè madopodo. ⁴⁸Yẹn we akla ogbè tọn lọ ⁴⁹Otò mìton lẹ dù manna to zùngbo mẹ, bo sọ kú. ⁵⁰Ehe wẹ akla he jẹte sọn olọn wá, na gbẹtọ nido dù to e mẹ, bo ma kú. ⁵¹Yẹn wẹ akla ogbènọ lọ, ehe jẹte sọn olọn wa; eyín mẹdepope dù to akla he mẹ, e na tin to ogbẹ̀ kaka doi: mowẹ akla he yẹn na na lọ wẹ olan ṣie, ehe yẹn na na na ogbẹ̀ aihọn tọn.

⁵²Enẹwutu Ju lẹ to nudòn to yéde ṣẹnṣẹn dọ, Nawẹ dawe he sọgan yí olan etọn na mí nado dù do? ⁵³Enẹwutu Jesu dọ hlan yé, dọ, Nugbo, nugbo, wẹ yẹn dọ hlan mì, Adavo mi dù olan Ovi gbẹtọ ton tọn, bo sọ nù ohùn etọn, mì ma tindo ogbè to mì mẹ gba. ⁵⁴Mẹdepope he dù olan ṣie, bo sọ nù ohùn ṣie, é tindo ogbẹ́ madopodo; yẹn nasọ fọ́n ẹn do ote to ozán podo gbè. ⁵⁵Na olan ṣie wẹ akla nugbo, ohùn ṣie sọ wẹ núnùnù nugbo. ⁵⁶Mehe dù olan ṣie, bo sọ nù ohùn ṣie, ewọ to nìnò yen me, yen sọ to ninọ ewọ mẹ. ⁵⁷Kẹdẹdile Otọ́ ogbèhọ, ko do mì hlan, bọ yen sọ tin to ogbè gbọn Otọ́ dali; mọkedẹ wẹ mẹhe dù mi, yèdọ ewo na tin to ogbè gbọn yẹn dali ga. ⁵⁸Ehe wẹ akla he jẹte sọn olọn wá lọ; é ma dile otọ́ mìtọn lẹ dù manna, bọ yé sọ kú gba: mẹhe dù akla he na tin to ogbè kakadoi. ⁵⁹Onú helẹ wẹ é dọ to sinagọgu mẹ, le é to meplón to Kapẹlnaumi.

⁶⁰Enẹwutu susu to nuplọntọ etọn lẹ mẹ, whenuena yé sè ehe, yé dọmọ, Ohó he sinyẹnawú talala wẹ ehe; mẹnu wẹ sogan sè e? ⁶¹Ṣigba Jesu yinyonẹn to ede homẹ, dọ nuplọntọ etọn lẹ to hunhlun do ehe go, dọ hlan yé, dọ, Ehe hẹn mì nado dahli we? ⁶²Be etẹwẹ eyín mì mọ bọ Ovi gbẹtọ tọn hẹji jei ofì he é sọn wá? ⁶³Gbigbọ wẹ nagbẹme; agbasa ma doale de: ohó he yẹn dọ hlan mì nẹlẹ, gbigbọ wẹ yé, ogbẹ̀ wẹ yé. ⁶⁴Ṣigba medelẹ tin to mì me, he ma yise. Na Jesu yonẹn sọn whéwhéwhenu mehe hunkọ yé yín he ma yise lẹ, podọ mẹnu wẹ mẹhe na dè e hia yín. ⁶⁵E sọ dọmọ, Enewutu wẹ yẹn do do hlan mì, dọ, Mẹde ma sogan wá dẽ, adavo yè na ẹn sọn Otọ́ ṣie de.

⁶⁶Ehe ji wẹ susu to nuplọntọ etọn lẹ me gò do godo, bo ma sọ zòn hẹ ẹ ba. ⁶⁷Enewutu Jesu dọ hlan ome wiawe lẹ, dọ, Mìwlẹ jlo na yì ga? ⁶⁸Simoni Pita gblọn nẹ̃, dọ, Oklunọ, mẹnu de mìwlẹ na yì? hiẹ wẹ tindo ohó ogbè madopodo tọn. ⁶⁹Mìwlẹ ko sọ yise, bo sọ yọnẹn dọ, hiẹ wẹ Klisti lọ, Ovi Jiwheyẹwhe ogbènọ tọn. ⁷⁰Jesu sọ gblọnna yé, dọmọ, Mì omẹ wiawe ma wẹ yẹn dè, bọ dopo mìtọn yín lẹgba de? ⁷¹Juda Iskaliọti, ovisunnu Simoni tọn wẹ e to didọ: na ewọ wẹ mẹhe na dè e hia, mẹhe yín dopo to omẹ wiawe lẹ mẹ.

¹TO onú helẹ godo, Jesu zinzọnlin to Galili: na é ma jlo na zinzọnlin to Judé gba, na Ju lẹ to dindìn nado hù i wutu. ²Hùnwhẹ Ju lẹ tọn, hùnwhẹ gohọtúntún lẹ tọn sẹpọ́ dinvie. ³Enẹwutu nọvisunnu etọn lẹ dọ hlan ẹn, dọ, Tón sọn ofì, bo yì Judé, na nuplọntọ towe lẹ ga nido mọ azọ́n he hiẹ to wiwa. ⁴Na mede ma tin he nọ wa nude to nuglọ, ewlọsu nọ din yè ni yọ́n ẹn wedédé. Eyín hiẹ to onú hele wà, do dewe hia hlan aihọn. ⁵Na nọvisunnu etọn lẹ lọsu ma yí i se. ⁶Enẹwutu Jesu dọ hlan yé, dọ, Ojlẹ ṣie ma ko wá gba; ṣigba ojlẹ mìtọn wẹ nọ wleawu to whepoponu. ⁷Aihọn ma sọgan gbẹwanna mì gba; ṣigba yẹn wẹ é gbẹwanna, na yẹn dekunnu do e go, dọ oylan wẹ azọ́n etọn wutu. ⁸Mì heji yì hùnwhẹ he yẹn ma ko to na hẹji yì hùnwhẹ he gba: na ojle ṣie ma ko wá. ⁹Le é dọhó helẹ hlan ye, ewọ nọte to Galili.

¹⁰Ṣigba whenuena novisunnu etọn lẹ ko hẹji yì hùnwhẹ lọ kòn, whenẹnu wẹ ewlọsu heji yì ga, é ma yín to gbangba, ṣigba taidi to nuglọ. ¹¹Enẹwutu Ju lẹ din in to hùnwhẹ lọ kòn, bo dọmọ, Fie wẹ e te? ¹²Hunhlun susu sọ tin to agùndaho le lọ ṣẹnṣẹn gbọn ewọ tọn dali: na omẹ delẹ dọ Omẹ dagbe de we: omẹ devo lẹ dọ, Lala, ṣigba é to agundaho lẹ lọ planhẹn danbu wẹ. ¹³Ṣigba mẹde ma dọhó etọn gbangba, na osi Ju lẹ tọn wutu.

¹⁴Ṣigba whenuena e jẹ ṣẹnsẹn hunwhẹ lọ tọn, Jesu hẹji yì tẹmpli mẹ, bo to meplón. ¹⁵Enẹwutu Ju lẹ vivó, dọmọ, Nawe dawe he wà yọn owé, mẹhe ma plọn núde gbède? ¹⁶Enẹwutu Jesu sọ gblọnna yé, bo dọmọ, Núplọ́nme ṣie ma yín ṣie gba, ṣigba mẹhe do mi hlan tọn wẹ. ¹⁷Eyín mẹde jlo na wà ojlo etọn, ewọ na yọ́n núplọnmẹ lọ, eyín Jiwheyẹwhe tọn wẹ é yín, kavi eyín yẹn to ohó dẽ tọn dọ wẹ. ¹⁸Mẹhe to ọhó ede tọn dọ to gigo ede tọn din; ṣigba mẹhe din gigo mẹhe do e hlan tọn, dopolọ wẹ nugbo, mawàdódó de ma tin to ewọ mẹ. ¹⁹Be Moṣe ma na osén mì, gãnṣo bo mẹde ma yìn osén lọ to mì mẹ? Etẹwutu wẹ mì to dindin nado hù mi? ²⁰Agùndaho lọ sọ gblọn, dọmọ, Hiẹ tindo aovi de: mẹnu wẹ to dindìn nado hù we? ²¹Jesu sọ gblọn bo dọ hlan yé, dọ, Azón dopo wẹ yẹn wa, bọ mì omẹ pó vivó na ehe tọn. ²²Na ehe wutu wẹ Moṣe na whegbigbo mì; (é ma yín Moṣe tọn gba, ṣigba otọ lẹ tọn;) podọ mì nọ gbowhẹna gbẹtọ to gbọjẹ-zángbè. ²³Eyín gbẹtọ yí whẹgbigbo to gbọjẹzángbè, na yè ma na do hẹn osén Moṣe tọn gble gba; be adi to mì do do ogo e, na yẹn hẹn mẹde jẹgángán hézéhézó to gbọjezángbè wutu? ²⁴Mì dawhè kẹdedile nusọawuhia do blo, ṣigba mì ni nọ dawhè whẹ̀dida dódónọ.

²⁵Enẹwutu omẹ delẹ he yìn Jelusalẹm tọn lẹ dọmọ, Ewọ he ma wẹ mẹhe yé dindin nado hù lọ? ²⁶Bo pọ́n, ewọ to hódọ gbangba, yé ma sọ dọ onú de hlan ẹn. Be é sọgan yín dọ ogán lẹ yọnẹn nugbo dọ ehe wẹ Klisti lọ? ²⁷Ṣigba mìwlẹ yón dawe he sọn ofi he é te: ṣigba whenuena Klisti wá, mẹde ma yonẹn sọn ofi he é te. ²⁸Enẹwutu wẹ Jesu dawhá to tẹmpli mẹ le é to mẹplon, domọ, Mì yón mi, bo sọ yón ofi he yẹn sọn: podọ yẹn ma wá na dẽ gba, ṣigba nugbo wẹ mẹhe do mi hlan, mẹhe mì ma yọnẹn. ²⁹Ṣigba yẹn yón en: na e de wẹ yẹn sọn, ewọ wẹ so do mi hlan. ³⁰Enewutu wẹ yé to dindin nado wlé e; ṣigba mẹde ma zé alọ do e ji, na ojle etọn ma ko wá wutu. ³¹Ṣigba son agùndaho lọ mẹ susu yí i se, yé dọmọ, be whenuena Klisti lọ na wá é na basi ohia hú ehe dawe he ko basi le? ³²Falesi lẹ sè dọ agùndaho lọ to hunhlun na onú helẹ gbọn ewọ tọn dali; Falesi lẹ, po ogán yẹwhenọ tọn lẹ po do awhangán lẹ hlan nado wlé e. ³³Enẹwutu wẹ Jesu dọ hlan yé, dọmọ, Whenu vude dogó wẹ yẹn tin to mì de, yẹn bo na yì mẹhe do mi hlan de. ³⁴Mì na din mi, mì ma nasọ mọ mi: podọ ofi he yẹn te, finẹ mì ma na sogan wá. ³⁵Enẹwutu wẹ Ju lẹ to didọ to yéde ṣẹnṣẹn, dọ, Fie é na yì, bọ mìwlẹ ma na mọ èn? be ewọ jei mẹhe gbapé to Kosi lẹ ṣẹnṣẹn de, bo sọ to Kosi lẹ plọn wẹ? ³⁶Ohó tẹ hunkọ wẹ ehe é dọ, dọmọ, Mì na din mi, mì ma nasọ mọ mi; podọ ofì he yen te, finẹ mì ma na sọgan wá?

³⁷Azán pòdo gbè, azán daho hunwhe lo tọn, Jesu site bo dawhá, dọ, Eyín ové hú mẹdepope, mì gbọ é ni wá dẽ, bo nù. ³⁸Mẹdepope he yí mi se, dile Owó wiwe dọ, sọn ohò etọn mẹ otọ osìn ogbẹ̀ ton na nọ sà sọn. ³⁹(Ṣigba é dọ ehe na Gbigbọ tọn, ehe mehe yí i se lẹ na mọyí: na yè ma ko na Gbigbọ Wiwe omẹ gba; na yè ma ko pagigona Jesu wutu.) ⁴⁰Mẹdelẹ enẹwutu sọn agùndaho lọ mẹ, whenuena ye sè ohó he, yé dọmọ, Sọn nugbo de mẹ ehe wẹ Yẹwhegan lọ. ⁴¹Mẹdele dọmọ, Ehe we Klisti lọ. Ṣigba mẹdelẹ dọmọ, Eté, Galili wẹ Klisti tẹ́n sọn wá? ⁴²Be Owe wiwe ma ko dọmọ, Klisti na sọn okún Davidi tọn mẹ wá, podọ sọn oto Bẹtlehem ton me, ofì he Davidi ko te? ⁴³Mọwẹ kinklan fọ́n to agùndaho lọ ṣẹnṣẹn na ewo tọn wutu. ⁴⁴Mẹdelẹ to yé mẹ jlo na wlé e; ṣigba mẹde ma zé alọ do e ji.

⁴⁵Enẹwutu awhangan le wá ogan yẹwhenọ lẹ tọn de, po Falesi lẹ po; yé dọ hlan yé, dọ, Etẹwutu mì ma hẹn en wá? ⁴⁶Awhangán lẹ sọ gblon bo dọmọ, Omẹ de ma dọhó domọ gbède. ⁴⁷Enewutu wẹ Falesi lẹ gblọnna ye, domọ, Be yè hẹn mìwlẹ danbu ga we? ⁴⁸Be mẹde p i se to ogán lẹ me, kavi to Falesi lẹ me? ⁴⁹Ṣigba agùndaho he ma yón osen lọ wẹ yè hodódo ⁵⁰Nikodemi dọ hlan yé, (ewọ he wá é de dai yín dopo to yé mẹ,) ⁵¹dọ, Bé osén mìtọn nọ dawhèna mẹde whẹpo se sọn ewlosu de, bo so yón onú he é wà? ⁵²Yé gblọn bo sọ dọ hlan ẹn dọmọ, Galili tọn wẹ hiẹ ga? Din, bo pọ́n: dọ yẹwhegán de ma fọ́n sọn Galili gba. ⁵³Ome dopodopo sọ fọ́n yì jẹ owhé etọn O gbè.

¹Ṣigba Jesu yì osó olivie tọn ji. ²To afọnnu é legò wá templi mẹ, gbẹtọ lẹpo so wá e de; e so sinai, bo to yé plọn. ³Wekantọ le, po Falesi lẹ po sọ hen nawe de wá e de, mehe yé wlé to ayodide mẹ; whenu yé zé e do ṣẹnṣẹn, ⁴yé dọ hlan en, dọ, Mẹplontọ, yè wlé nawe he to ayòdide me, to bibasi mẹ. ⁵Dinvie to osén mẹ Moṣe ko degbèna mí nado nọ dlẹn zannu do omẹ mọhunkọ; ṣigba nawẹ hiẹ dọ? ⁶Yé do ehe do whle e pọ́n, na yé nido tindo núde nado sle ẹ. Ṣigba Jesu fè, bo yí alọviyẹyẹ etọn do to wekan to aigba. ⁷Ṣigba whenuena yé ma gbọ kinkanbiọ ẹ, é zé ede daga, bo dọ hlan yé, dọ, Mehe tin matin ylando to mì ṣẹnṣẹn, gbọ ewọ whé ni dlẹn zannu do e. ⁸E sọ vó fè, bo to wekan to aigba ⁹Podọ yé, wẹ̃henuena yé sè e tọ́njegbonu yí dopodopo, hẹn sọn mẹho ji kaka jẹ godotọ ji: é sọ pò Jesu dopokẹdẹ, po nawe lo po to ote to ṣẹnṣẹn. ¹⁰Jesu sọ zé ede daga, bo dọ hlan en, dọ, Nawe, fie wẹ yé te? mẹde ma gblewhedo we? ¹¹Ewọ sọ dọmọ, Mẹde ma, Oklunọ. Jesu sọ dọmọ, Mowẹ yẹn ma sọ gblewhẹdo we: yi, sọndinvieyì a sọ wàylan ba blo.

¹²Enẹwutu Jesu sọ vó hódọ hlan yé, dọ, Yen wẹ hinhọ́n aihọn tọn; mẹhe hodo mi ma na zinzonlin zinvlu mẹ, ṣigba é na tindo hinhọ́n ogbẹ́ tọn. ¹³Enẹwutu Falesi lẹ dọ hlan ẹn, dọ, Hiẹ to kunnude na dewe; okunnu towe ma yín nugbo. ¹⁴Jesu sọ gblọn bo do hlan yé, dọ, Eyín yẹn dekunnu na dè, nugbo wẹ okunnu ṣie; na yẹn yón ofì he yẹn sọn wá, po ofì he yẹn jei po; ṣigba mìwlẹ ma sọgan dọ ofì he yẹn sọn wá, po ofi he yẹn jei po. ¹⁵Mìwlẹ nọ dawhè gbọn agbasalan dali, yẹn ma dawhèna mede. ¹⁶Mọwẹ eyín yẹn dawhé, nugbo wẹ whẹ̀dida ṣie: na yẹn ma tin to dopo, ṣigba yẹn po Otọ́ he do mi hlan po. ¹⁷Mowẹ yè wlan en ga to osén mìtọn mẹ dọ, nugbo wẹ okunnude omẹ awe tọn. ¹⁸Yen wẹ mehe to kunnude na dẽ, Otọ́ he do mì hlan sọ Lo kunnude na mi ga. ¹⁹Enẹwutu wẹ yé dọ hlan ẹn, dọ, Fie wẹ Otọ́ towe te? Jesu gblọn dọmọ, Mì ma yón mi, mì ma sọ yón Otọ́ ṣie: eyín mì ko yón mi, mì na ko yón Otọ́ ṣie ga. ²⁰Ohó hele we é dọ to adọkunnu tẹnmẹ le é to mẹplón to tẹmpli mẹ: mẹde ma sọ zé alọ do e ji; na ojlẹ etọn ma ko wá wutu.

²¹Enẹwutu é sọ vó dọ hlan yé, dọ, Yẹn jei, mìwlẹ na din mi, bo nasọ kú to ylando mìtọn me: fie yẹn jei, mìwlẹ ma sọgan wá. ²²Enẹwutu Ju le dọ, Ewọ to na hù ede wẹ? na é dọmọ, Fie yẹn jei, mìwlẹ ma sogan wá. ²³E sọ do hlan yé, dọ, Odò wẹ mìwlẹ tin sọn; aga wẹ yẹn tin sọn: aihọn he tọn wẹ mìwlẹ; yẹn ma yín aihọn he tọn gba. ²⁴Enẹwutu wẹ yẹn dọ hlan mì, dọ, Mì na kú to ylando mìtọn mẹ: na eyín mì ma yise dọ yen lọ wẹ, mì na kú to ylando mìtọn mẹ. ²⁵Enẹwutu yé dọ hlan ẹn, dọ, Menu wẹ hiẹ? Jesu sọ dọ hlan yé, dọ, Yèdo enẹ he yẹn ko dọ hlan mì sọn whéwhéwhenu lọ wẹ. ²⁶Yen tindo onú susu na dọ, bo nado dawhèna mì: ṣigba nugbo wẹ mẹhe do mi hlan; yẹn sọ dọ hlan aihọn onú he yẹn sè sọn e de lẹ. ²⁷Yé ma mọhlan dọ Otọ́ tọn wẹ é to didọ hlan yé gba. ²⁸Enẹwufu Jesu dọmọ, Whenuena mì ko zé Ovi gbẹtọ tọn daga, whenẹnu wẹ mì na yọnẹn dọ yẹn wẹ ewọ lọ, na yẹn ma wà núde na dẽ; ṣigba le Otọ́ sié plón mi do, wẹ yẹn to onu helẹ dọ. ²⁹Ewọ mẹhe do mi hlan tin to dẽ: Otọ́ lọ ma jo yẹn dopo do gba; na yẹn to onú he yín homẹhun hlan ẹn lẹ wà to whepoponu. ³⁰Le é to ohó helẹ dọ, omẹ susu yí i se.

³¹Enẹwutu wẹ Jesu dọ hlan Ju he yise nẹlẹ, dọ, Eyín mìwlẹ nọte to ohó ṣie me, whenẹnu mìwlẹ yin nuplọntọ ṣie nugbo; ³²mìwlẹ nasọ yón nugbo, nugbo lọ nasọ hẹn mì jẹ mẹdekannu. ³³Yé sọ gblọn hlan ẹn, dọmọ, Okún Ablaham tọn wẹ mìwlẹ, mí ma ko tin to mẹglọnọ mẹ hlan mede gbède: nawẹ hiẹ dọ do, Mìwlẹ na yin hinhẹn jẹ medekannu? ³⁴Jesu sọ gblọnna yé, dọ, Nugbo, nugbo, we yẹn dọ hlan mì, Mẹdepope he wàylando wẹ afànumẹ ylando tọn, ³⁵Afànumẹ ma nọnọ̀ owhé gbè kaka doi: sìgba Ovi wẹ nọnọ̀ kaka doi. ³⁶Enẹwutu eyín Ovi na hẹn mì jẹ mẹdekannu, mìwlẹ na jẹ mẹdekannu nugbo. ³⁷Yẹn yọnẹn dọ okún Ablaham tọn wẹ mì; gànso mì tọ dindin nado hù mi, na ohó ṣie ma tindo otẹn to mì mẹ wutu ³⁸Yẹn to onú he yẹn mọ to Otọ́ ṣie de dọ; mìwlẹ sọ to onú he mì mọ to otọ́ mìtọn de wà. ³⁹Yé gblọn bo dọ hlan ẹn, dọ, Otọ́ mìtọn wẹ Ablaham. Jesu dọ hlan yé, dọ, Eyín ovi Ablaham tọn wẹ mì mìwlẹ do wà azón Ablaham tọn. ⁴⁰Ṣigba dinvie mì to dindin na hù mi, mẹhe dọ nugbo na mì, he yẹn sè sọn Jiwheyẹwhe de: Ablaham ma wà ehe gba. ⁴¹Mìwlẹ to azọn otọ́ mìtọn tọn wà. Yé sọ dọ hlan ẹn, dọ, Yè ma ji mí sọn ogalilọ mẹ gba; mìwlẹ tindo Otọ́ dopo, enẹ we Jiwheyẹwhe. ⁴²Jesu sọ dọ hlan yé, do, Eyín Jiwheyẹwhe wẹ Otọ́ mìtọn, mì do yiwanna mi: na yen tọ́njegbonu bo sọ sọn Jiwheyẹwhe de wá; yẹn ma wá na dẽ gba, ṣigba ewọ wẹ do mi hlan. ⁴³Etẹwutu wẹ mì ma yón ohógbè ṣie? Yèdọ na mì ma sọgan sè ohó ṣie wutu. ⁴⁴Otọ́ mìtọn lẹgba tọn wẹ mì, wantúntún otọ́ mìtọn tọn ojlo mìtọn wẹ nado wà. Hlọnhùtọ de wẹ ewọ sọn whéwhéwhenu, é ma nọ nọte to nugbo mẹ gbède, na nugbo ma tin to ewọ mẹ wutu. Whenuena é dọ lalo de, é dọhó etọn titi tọn: na lalonọ de wẹ ewọ, podọ otọ́ etọn. ⁴⁵Ṣigba na yẹn dọ nugbo wutu, mì ma yí mi se gba. ⁴⁶Be mẹnu wẹ yí ylando tón mi to mì mẹ? Eyín yẹn do nugbo, be etewutu wẹ mì ma yí mi se? ⁴⁷Mehe yín Jiwheyẹwhe tọn nọ sè ohó Jiwheyẹwhe tọn lẹ; ehe tọn wutu wẹ mìwlẹ ma sè, na mì ma yín Jiwheyẹwhe tọn wutu. ⁴⁸Yé Ju lẹ gblọn bo dọ hlan ẹn, dọ, Be mìwlẹ ma dọ dọ Samalito wẹ hiẹ nugbo, bo sọ tindo aovi de? ⁴⁹Jesu sọ gblon dọmọ, Yẹn ma tindo aovi de gba; ṣigba yẹn to gbégbòna Otọ́ ṣie, mìwlẹ ma sọ gbògbéna mi. ⁵⁰Yẹn ma din gigo dè tọn gba: medopo tin he to dindin bo sọ to whẹ̀da. ⁵¹Nugbo, nugbo, wẹ yẹn dọ hlan mì, Eyín mẹde yí ohó ṣie hẹn, é ma na mọ okú gbède. ⁵²Ju le dọ hlan en, dọmọ, Dinvie wẹ mìwlẹ yọnẹn dọ hiẹ tindo aovi de. Ablaham kú po yẹwhegán lẹ po; hiẹ sọ dọmọ, Eyín mede yí ohó ṣie hen, é ma na dọ okú pọ́n gbède. ⁵³Hiẹ klohú otọ́ mìtọn Ablaham, mẹhe kú? yẹwhegán lẹ sọ kú: mẹnu wẹ hiẹ yí dewe do basi? ⁵⁴Jesu sọ gblọn dọmọ, Eyín yẹn pagigona dè, gigo ṣie ma yín nude: Otọ́ ṣie wẹ mehe gigopana mi; mehe mì dọ, ewọ wẹ Jiwheyẹwhe mìtọn. ⁵⁵Mìwlẹ ma yọ́n ẹn; ṣigba yẹn yọn ẹn: eyín yẹn dọ, Yẹn ma yón ẹn, yen na tin jijlẹ do mìwlẹ go, lalonọ de: ṣigba yẹn yọn en, bo sọ yí ohó etọn hẹn. ⁵⁶Ablaham otọ́ mìtọn jaya dọ ewọ ni do mọ azán ṣie: bo sọ yín homẹhùnnọ. ⁵⁷Enẹwutu Ju lẹ dọ hlan ẹn, dọ, Owhè towe ma yì kandeao, hiẹ ko sọ mọ Ablaham? ⁵⁸Jesu sọ do hlan yé, dọ, Nugbo, nugbo, wẹ yẹn dọ hlan mì, Whẹpo yè ji Ablaham, yẹn tin. ⁵⁹Enẹwutu yé zé ozannu nado dían do e: aigba Jesu whlá ede, bo tón Sọn tẹmpli mẹ, é jugbọn yé ṣẹnṣẹn yìyì, mọwẹ é sọ juyì.

¹LE Jesu juwajei, é mọ dawe nu kuntọnnọ de sọn ajimẹ etọn. ²Nuplọntọ etọn lẹ kanbiọ ẹ dọ, Meplọntọ, menu wẹ wà oylan, dawe he kavi mejitọ etọn lẹ, bọ ewọ do yín jiji nukuntọ́nnọ? ³Jesu sọ gblọn dọ, E na yín dawe he wà oylan, kavi mẹjitọ etọn lẹ gba: ṣigba dọ yè nido hẹn azon Jiwheyẹwhe tọn soawuhia to e go. ⁴Mí ma sọgan nọ ma wà azon ewo he do mi hlan ton, whenuena é yín okle: ozán ja whenuena mẹde ma sọ sọgan wàzón. ⁵Whenuena yẹn tin to wẹkẹ mẹ, yẹn wẹ hinhọ́n wẹkẹ tọn. ⁶Whenuena é dọ le, é túntán do aigba bò yí do yankọ̀, bo yí okó lo do sá amisisána nukun eton. ⁷Bo do hlan en, dọ, Yì, lawu to otándo Sìloámi tọn mẹ, (ehe tadena etọn yín, Dohlan.) Enẹwutu e gbọn aliho etọn ji yì, é lawu, é wá, bo sọ to númọ. ⁸Enẹwutu komẹnu lẹ, po mẹhe ko mọ en dai dọ nubiọtọ de ko wẹ ewọ dọmọ, Ehe ma we ewọ he nọ sinai bo biọnu lọ? ⁹Mẹdele dọ, Ewọ we: medelẹ do, Lala, ewọ tin jijlẹ do e go wẹ: ṣigba ewọ dọmọ, Yẹn we ewọ lọ. ¹⁰Enẹwutu yé dọ hlan ẹn, dọ, Nawẹ nukun towe lẹ yín hùnhùh do? ¹¹E sọ gblọn, do, Dawe lọ he yè nọ ylo Jesu basi okó, bo yí sá do nukun nà mi, bo dọ hlan mi, dọ, Yì otándo Siloami tọh me, bo lawu: yen yì, bo lawu, bo sọ monú ¹²Yé sọ do hlan ẹn, dọ, Fie wẹ ewọ te? E dọmọ, Yẹn ma yọnẹn.

¹³Yé hen mẹhe yín nukuntọ́nnọ dai lọ wá Falesi lẹ de. ¹⁴Dinvie gbọjẹzángbè wẹ whenuena Jesu basi okó lọ, bo sọ hùn nukun etọn. ¹⁵Enewutu Falesi le ga vọ̀ kanbiọ ẹ, nawe ewọ mọ nukunnumọ etọn yí do. E sọ dọ hlan yé, dọ, E yí okọ́ sá do nukun ṣie, yẹn lawu, bo sọ mọnú. ¹⁶Enẹwutu medelẹ to Falesi lẹ mẹ dọmọ, Dawe he ma tin sọn Jiwheyẹwhe dé gba, na é ma yìn azán gbọje tọn wutu. Ṣigba mẹdevo lẹ dọmo, Nawe mehe yín ylandonọ dè sogan wà ohia helẹ hunkọ do? Kinklan sọ tin to yé ṣẹnṣẹn. ¹⁷Enẹwutu yé sọ vó dọ hlan dawe nukuntónno lọ, dọ, Be etewẹ hiẹ dọ na ewọ tọn, to ehe mẹ ewọ hùn nukun towe? E dọmọ, Yẹwhegán de wẹ ewọ. ¹⁸Enẹ-wutu Ju lẹ ma yise gbon ewọ tọn dali gba, dọ, ewọ ko yín nukuntọ́nnọ, bo sọ mọ nukunnumọ etọn yí kaka yé do ylọ mẹjitọ ewo he mọ nukunnumọ etọn yí lọ tọn lẹ. ¹⁹Bo kanbiọ yé dọ, Visunnu mìtọn wẹ ehe, mẹhe mì dọ yè ji i nukuntọ́nnọ? Nawẹ é gbọn do to númo dinvie? ²⁰Mẹjitọ etọn lẹ gblon bo dọmọ, Mìwlẹ yọnen dọ visunnu mìtọn we ehe, podọ yè ji i nukuntónno: ²¹ṣigba le é to numọ do dinvie, mìwlẹ ma yọnẹn; kavi mẹhe hùn nukun etọn mí ma yọnen: nuyọnentọ wẹ ewo, mì kanbiọ ẹ: é na dọ na ede. ²²Ohó helẹ wẹ mejìto etọn lẹ dọ, na yé dibuna Ju lẹ wutu; na Ju le ko dogbèpó dote, dọ eyín medepope yigbè dọ Klisti wẹ ewọ, yè ni dè ẹ sọn sinagọgu ²³Enẹwutu wẹ mẹjitọ etọn lẹ dọ, Nuyọnẹntọ wẹ ewọ; mì kanbiọ ẹ. ²⁴Mọwẹ yé sọ vó dawe he yín nukuntọ́nnọ lọ ylọ, bo dọ hlan en dọ, Na gigo Jiwheyẹwhe; mìwlẹ yọnẹn do ylandonọ de wẹ dawe he. ²⁵Enewutu ewọ sọ gblọn bo dọmọ Eyín ewọ yín ylandonọ de, yẹn ma yọnen: onú dopo wẹ yẹn yọnẹn, dọ sole yẹn ko yín nukuntọ́nnọ, yẹn to númọ dinvie. ²⁶Enẹwutu yé sọ dọ hlan ẹn, dọ, Etẹwẹ é wá hlan we? nawẹ é hùn nukun towe do? ²⁷E sọ gblon dọ hlan yé, dọ, Yẹn ko dọ na mì yedọ dinvie, mì ma sọ sè: etẹwutu we mì sọ jlo nado vọ́ sè? mì jlo na lẹzun nuplọntọ etọn ga wẹ? ²⁸Yé sọ vlẹ ẹ ko, bo dọmọ, Hiẹ wẹ nuplọntọ eton; ṣigba nuplọntọ Moṣe tọn we mìwlẹ. ²⁹Mìwlẹ yọnẹn dọ Jiwheyẹwhe dọhó hlan Moṣe, ṣigba na dawe he tọn, mìwlẹ ma yón ofì he é sọn wá. ³⁰Dawe lọ sọ gblọn bo dọ hlan yé, dọ, Etẹwutu, ehemẹ wẹ nujawu te, na mìwlẹ ma yón ofì he ewọ son wá, ṣigba ewọ ko hùn nukun ṣie. ³¹Mìwlẹ yọnẹn dọ Jiwheyẹwhe ma nọ sè ylandonọ tọn: ṣigba eyín mẹde yín sinsèntọ Jiwheyẹwhe tọn, bo sọ wa ojlo etọn, ewọ wẹ é nọ sè etọn. ³²Sọn dòdó aihọn tọn yè ma ko sè dọ, mede hùn nukun mehe yè ji nukuntọ́nnọ de tọn gbede. ³³Eyín dawe he ma tin sọn Jiwheyẹwhe de gba, é ma sọgan wà nudepope. ³⁴Yé sọ gblọn bo do hlan ẹn, dọ, Hiẹ he yè ji patapata to ylando mẹ, hiẹ to mìwlẹ plón? Yé sọ yàn ẹn jeghonu.

³⁵Jesu sọ sè dọ yé yàn ẹn jẹgbonu; podọ mimọ ẹn, é dọmọ, Hiẹ yí Ovi Jiwheyẹwhe tọn se? ³⁶E sọ gblọn bo dọmọ, Menu we ewọ, Okluno, na yẹn nido yí i se? ³⁷Jesu dọ hlan ẹn, dọ, Hiẹ ko mọ ẹn, ewo sọ we mẹhe to hódọ hẹ we. ³⁸E sọ dọmọ, Yẹn yise, Oklunọ. E so litai nẹ. ³⁹Jesu sọ dọmọ, Whèdida wẹ yẹn wá aihọn he mẹ na, na mẹhe ma mọnú dai lẹ nido mọnú; podọ mẹhe mọnú lẹ nido lẹzun nukuntọ́nnọ. ⁴⁰Enẹlẹ he sọn Falesi lẹ mẹ he tin to e de sè ohó helẹ, bo dọ hlan ẹn, dọ, Mìwlẹ yín nukuntọ́nnọ ga? ⁴¹Jesu sọ dọ hlan yé, dọ, Eyín mìwlẹ yín nukuntọ́nnọ, mi ma do tindo ylando gba: ṣigba dinvie mì dọ, Mìwlẹ mọnú; enẹwutu ylando mìtọn to ote.

¹NUGBO, nugbo, wẹ yẹn dọ hlan mì, Mẹdepope he ma biọ apó lẹngbọ tọn mẹ gbọn hòngbo ji, ṣigba hẹji gbọn aliho devo, ajotọ de wẹ ewọ podọ whébétọ. ²Ṣigba mẹhe biọ e mẹ gbọn hòngbo ji, ewọ wẹ lengbọhotọ lẹngbọ lẹ tọn de. ³Ewọ lọ wẹ hònjidetọ hùnhòn na; lẹngbọ lẹ sọ sè ogbe eton: ewọ sọ ylọ oyín lẹngbọ etọn lẹ tọn, bo so plan ye jegbonu. ⁴Whenuena é hẹn etọn titi lẹ jegbonu, é yí nukọn na ye, lẹngbọ lẹ sọ hodo e: na yé yón ogbè etọn wutu. ⁵Jonọ wẹ yé ma nọ hodo ṣigba bo na hònyi sọn e de: na yé ma yón ogbe ojono lẹ tọn wutu. ⁶Oló he wẹ Jesu dọ hlan yé: ṣigba yé ma tunwun etẹwẹ onú he é dọ hlan yé nẹle yín.

⁷Enẹwutu Jesu vọ dọ hlan yé, dọ, Nugbo, nugbo, wẹ yẹn dọ hlan mì, Yẹn wẹ ohon lengbọ ton. ⁸Ajotọ po whébétọ po wẹ omẹ he ko wá jẹnukọn na mi lẹpo: ṣigba lengbọ lẹ ma sè yetọn gba. ⁹Yen we ohòn lọ: eyín mẹde biọ họmẹ gbọn dẽ, ewọ lọ wẹ yè na whlẹngan, ewọ nasọ biọ họmẹ bo nasọ tọ́njegbonu, bo nasọ mọ kanlindugbo. ¹⁰Ajotọ ma wá, adavo dọ e nido fìnnú bo hù, bo vasúdo: yẹn wá na yé nido tindo ogbè, yèdo na yé nido tindo sugege. ¹¹Yen wẹ lẹngbọhọtọ dagbe lọ: lẹngbọhọtọ dagbe zé ogbè etọn dai na lẹngbọ lẹ ¹²Ewọ he yín pakanọ de, he ma yín lẹngbọhọtọ de, mẹhetọn titi lengbọ lẹ ma yín, é mo ohia ja, bo sọ jo lẹngbọ lẹ dai, bo hòn yì: ohia sọ wle yé, bo sọ vúnvún lẹngbọ lẹ pé. ¹³E hònyi, na pakanọ de wẹ ewọ wutu, é ma sọ hòpọnna lẹngbọ lẹ gba. ¹⁴Yẹn wẹ lengbọhotọ dagbe lọ, yẹn sọ yón lẹngbọ ṣie titi lẹ, ṣie titi lẹ sọ yón mi. ¹⁵Yèdọ dile Otọ́ yón mi do, bọ yẹn sọ yón Otọ́: yẹn zé ogbé ṣie liai na lẹngbọ le. ¹⁶Podọ yen sọ tindo lẹngbọ devo he ma yín apó he mẹ tọn: ye wẹ yẹn ma sọgan nọ ma hẹn wá ga, yé nasọ sè ogbè ṣie; apó dopo wẹ é na yín, lẹngbọhọtọ dopo. ¹⁷Enẹwutu wẹ Otọ́ yiwanna mi, na yẹn ze ogbẹ ṣie liai wutu, na yẹn nido vó ẹ yí. ¹⁸Mẹde ma yí i sọn dẽ gba, ṣigba yẹn zé e liai dedẽsi. Yẹn tindo ojlọjẹ nado zé e liai, bo sọ tindo ojlọjẹ nado vó ẹ yí. Osén he wẹ yẹn ko mọyi sọn Otọ ṣie de.

¹⁹Kinklan de sọ vọ tin to Ju lẹ ṣẹnṣẹn na ohó helẹ wutu. ²⁰Ome susu to yé mẹ sọ dọmọ, Ewọ tindo aovi de, nulunọ sọ wẹ; etẹwutu wẹ mì to ohó etọn se? ²¹Mẹdevo lẹ dọmọ, Ehelẹ ma yín ohó mẹhe tindo aovi de tọn gba. Be aovi de sọgan hùn nukun nukuntọ́nnọ lẹ tọn?

²²E sọ yín dọ to Jelusalẹm wẹ hunwhẹ awuyìnyì tọn te, é sọ yín ojlẹ avivọ tọn. ²³Jesu sọ to zonlimzin to templi mẹ, to hònnuwá Sọlomọni tọn me. ²⁴Enẹwutu Ju le wa ledo e pe, bo dọ hlan en, dọ, Navẹ hie na hẹn mi to númamọjẹnugo me dẹn sọ? Eyín hie wẹ Klisti lọ dọ na mí gbangba. ²⁵Jesu sọ gblọnna yé, dọ, Yẹn ko do na mì, mì ma yise: azon he yẹn to wiwa to oyín Oto ṣie tọn me, ehelẹ to kunnude na mi ²⁶Ṣigba mì ma yise; na mì ma yín lẹngbọ ṣie le me tọn wutu, kedẹdile yen dọ na mì. ²⁷Lẹngbọ ṣie le se ogbè ṣie, yen sọ yón ye, ye sọ nọ hodo mi: ²⁸yẹn sọ na ogbè madopodo hlan ye, yé ma na dòn gbede, mede ma so to na dọn ye sún son alọ ṣie mẹ. ²⁹Otọ́ ṣie, mẹhe na yé hlan mi, klohu yi ome pó; mede ma tin he sọgan don nude sún sọn alọ Otọ́ lọ tọn me ³⁰Dopo wẹ yẹn po Otọ́ po. ³¹Ju lẹ so vo ze ozannu daga nado dlẹn do e. ³²Jesu gblọnna yé do, Azón dagbe susu wẹ yen yí hia mì sọn Otọ́ de; ete to azon nele mẹ we mì to zannu dlẹn do mi na? ³³Ju le sọ gblọn nẹ, dọ, Mìwlẹ ma to zannu dlẹn do we na azọ́n dagbe de gba; ṣigba na nuzinzan; podo hie he yín gbẹtọ yí dewe do basi Jiwheyẹwhe wutu. ³⁴Jesu sọ gblonna yé, dọ, Be yè ma wlan to osẹn mìtọn medọ, Yẹn dọ, Yẹwhe we mì? ³⁵Eyín é ylo yé mẹhe de ohó Jiwheyẹwhe tọn wá le dọ Yẹwhe (podo owé wiwe lọ ma sọgan yín hinhẹn gbà gba), ³⁶be mì sọ dọ na ewọ ton mehe Otọ́ klandowiwe, bo sọ dohlan aihọn mẹ, dọ, Hie to nùzan; na yen do, Ovi Jiwheyẹwhe tọn wẹ yen wutu? ³⁷Eyín yẹn ma wà azón Otọ́ ṣie tọn lẹ, mì yí mi se blo. ³⁸Ṣigba eyín yẹn basi yé, eyín mì ma yí mi se, mì bo yí azón lẹ se: na mì nido yọnẹn, bo sọ tunwun dọ, Otọ́ tin to yẹn mẹ, podọ yẹn to Otọ́ mẹ. ³⁹Yé sọ vó din nado wlé e: ewọ sọ jẹgbonu yì sọn alọ yetọn mẹ.

⁴⁰E sọ vó gọyì Jọdani godo fie Johanu to bibaptizi te to whéwhéwhenu; fine wẹ é nọnọ̀. ⁴¹Mesusu sọ wá e de; yé dọmọ, Johanu nugbonugbo ma basi ohia de gba: ṣigba núhe Johanu dọ na dawe he tọn lẹpo wẹ nugbo ⁴²Omẹ susu sọ yí i se to finẹ.

¹DAWE de yín awutuzònnọ dinvie Lazalọsi, Bẹtani tọn, sọn otò Malia po nọviyọnnu etọn Malta po tọn mẹ. ²(E sọ yín Malia ne he yí nuwhẹnkun do sá amisisana Oklunọ, bo sọ yí odà etọn do súnsún afọ etọn, Lazalọsi nọvisunnu mehetọn yín awutuzònnọ.) ³Enẹwutu nọviyọnnu etọn lẹ do omẹ hlan ẹn dọ, Oklunọ, pọ́n, mehe hiẹ yiwanna yín awutuzònnọ. ⁴Ṣigba whenuena Jesu só e, é dọ, Awutuzòn he ma yín hlan okú gba, ṣigba na gigo Jiwheyẹwhe tọn, na yè nido pagigona Ovi Jiwheyẹwhe tọn gbọn e dali. ⁵Dinvie Jesu sọ yiwanna Malta, po nọviyonnu etọn po, po Lazalọsi po. ⁶Enewutu whenuena é sè dọ ewo yin awutuzònnọ, é nọte to ojlẹ ne mẹ azán awe to fìdopo he é ko tin te. ⁷Whenenu to ehegodo é dọ hlan nuplọntọ lẹ, dọ, Mì gbọ mí ni sọ vó gọyì biọ Judé mẹ. ⁸Nuplọntọ lẹ sọ dọ hlan ẹn, dọ, Mẹplọntọ, dinvie Ju lẹ to dindin nado dlẹn zannu do we; hie sọ gò jei finẹ? ⁹Jesu gblọn dọmọ, E ma yín ojlẹ wiawe wẹ tin to okle dopo mẹ? Eyín mẹde zinzọnlin to okle, ewọ ma na dahli, na é mọ hinhọ́n aihọn he mẹ tọn wutu. ¹⁰Ṣigba eyín mẹde zinzọnlin to ozan mẹ, é na dahli, na hinhọ́n de ma tin toe mẹ wutu. ¹¹Onú helẹ wẹ é dọ: podọ to ehegodo é dọ hlan yé, dọ, Hóntọn mítọn Lazalọsi mlọnai damlọn; ṣigba yẹn jei, na yẹn nido fọ́n ẹn sọn amlọn mẹ. ¹²Enẹwutu nuplọntọ lẹ dọ hlan ẹn, dọ, Oklunọ, eyín é mlonai damlọn we é na jẹgangán. ¹³Ṣigba Jesu dohó okú etọn tọn, ṣigba yé lẹn dọ é to ohó gboje yíyí to amlọn mẹ tọn dọ wẹ. ¹⁴Whenẹnu Jesu dọ hlan yé gbangba lò, do, Lazalọsi kú. ¹⁵Yensọ yin homehunnọ na mì tọn wutu, bọ yen ma tin to finẹ, na mì nido yise; gãnṣo mì gbọ mí ni yì e de. ¹⁶Enẹwutu Tọmasi mehe yè nọ ylọ Didimu, dọ hlan nuplontọ ogbé eton lẹ, dọ, Mì gbọ mi ni yì ga, na mí nido kú hẹ ẹ.

¹⁷Mowẹ Jesu wá, é mọ dọ yè ko té ẹ do oyòwhé lọ mẹ azán enẹ. ¹⁸Dinvie Bẹtani dòn sẹpọ́ Jelusalẹm yì stade fọtọ̀n; ¹⁹mẹsusu sọn Ju lẹ me wá Malta po Malia po de, nado whiwhẹ tùna yé, gbọn nọvisunnu yetọn tọn dali ²⁰Enewutu whenuena Malta sè dọ Jesu ja, é yì bo pe e: ṣigba Malia sinai to owhe gbè. ²¹Enẹwutu Malta dọ hlan Jesu, dọ, Oklunọ, eyín hie ko tin to ofi, nọvisunnu ṣie ma do kú gba. ²²Podọ yèdọ dinvie yẹn yọnẹn dọ, onú depope hiẹ kanbiọ sọn Jiwheyẹwhe de, Jiwheyẹwhe na na we. ²³Jesu dọ hlan ẹn, dọ, Nọvisunnu towe nasọ fọ́n. ²⁴Malta dọ hlan ẹn, dọ, Yẹn yọnẹn dọ é nasọ fọ́n to fọ́nsọnku mẹ to azán pòdo gbè. ²⁵Jesu dọ hlan ẹn dọ, Yẹn wẹ fọnsọnku po ogbé po; mẹhe yí mi se, eyín é kú, é nasọ tin to ogbè: ²⁶mẹhe sọ tin to ogbè, bo sọ yí mi se, ma na kú gbède. Hieyí ehe se? ²⁷E sọ dọ hlan ẹn dọ, Mọwẹ, Oklunọ; yen ko yise dọ, hiẹ wẹ Klisti lọ, Ovi Jiwheyẹwhe tọn, mẹhe ja aihon mẹ. ²⁸Whenuena é ko dọ le, é yì, bo ylọ Malia nọviyọnnu etọn, bo pade dọmọ, Mẹplọntọ tin tófì bo to yiylo we. ²⁹Podọ ewọ, le é sè e, fọ́n plaun bo yì e de. ³⁰Dinvie Jesu ma ko biọ oto mẹ, ṣigba é tin to ofi dopo he Malta pé e te. ³¹Whenenu Ju he tin to owhé gbè hẹ ẹ, bo to whiwhẹho e lẹ, whẹnuena yé mọ dọ Malia fọ́n plaun bo tọ́njegbonu yì, hodo e, linlẹn dọ ewọ jei oyòwhé lọ kòn nado doavihan to finẹ. ³²Enẹwutu whenuena Malia wá ofi he Jesu te, bo mọ ẹn, hó jai to afọ etọn go, bo dọ hlan ẹn dọ, Oklunọ, eyín hiẹ ko tin to ofì, nọvisunnu ṣie ma do kú gba. ³³Enẹwutu whenuena Jesu mọ ẹn to avihàndo, podo Ju he wá po e po lẹ ga to avihàndo, yè yí homẹgble do whàn ẹn tọ gbigbọ me, yè sọ hẹn ewlọsu jẹtukla. ³⁴Bo sọ dọmo, Fie wẹ mì ko tó ẹ do? Yé dọ hlan ẹn, dọ, Oklunọ, wá pọ́n. ³⁵Jesu viavi. ³⁶Enẹwutu Ju lẹ dọmọ, Mì pọ́n le é yiwan nẹ̃ do! ³⁷Mẹdelẹ to yé me dọmọ, Be dawe he, he hùn nukun nukuntọ́nnọ tọn, ma sọgan ko hẹnjọ bọ dawe he ma do kú ga blo? ³⁸Enẹwutu Jesu yíyí homẹgble do sọ vọ ẹ whàn to ede mẹ yì oyòwhe lọ kòn. Dinvie oslò de wẹ, yè sọ zé ozannu de do e nu. ³⁹Jesu dọmọ Mì zé ozannu lọ sè. Malta, nọviyọnnu ewọ he kú tọn, dọ hlan en, dọ, Oklunọ, ewọ ko to wánlun dinvie: na é yín azán ẹnẹ he é ko kú. ⁴⁰Jesu dọ hlan ẹn, dọ, Yẹn ma kọ dọ hlan we, dọ, Eyín hiẹ yise, hiẹ na mọ gigo Jiwheyẹwhe tọn? ⁴¹Mowẹ yé zé ozannu lọ sè. Jesu sọ zé nukun etọn daga bo dọmọ, Otọ́, yẹn dopéna we, na hiẹ nọ sè ṣie. ⁴²Yen sọ yọnẹn dọ hie nọ sè ṣie whepoponu; ṣigba na agùndaho he site lédo lọ ton wutu wẹ yen dọ ẹ, na yé nidò yise dọ, hiẹ we do mi hlan. ⁴³Podọ whenuena é ko dọhó dole, é yí ogbè lélé de do dawhá dọ, Lazalosi, jegbonu wá ⁴⁴Ewọ he yín osiọ lọ sọ jegbonu wá, he yè yí avọ̀ osiọ tọn do bla alọ po afọ po na: bo sọ yí ozùnkèn de do bla nukunmẹ na. Jesu dọ hlan yé, dọ, Mì tùn in, bo gbọ é ni yì.

⁴⁵Enẹwutu mẹsusu sọn Ju le mẹ he wá Malia de, bo sọ mọ onú he Jesu wà le, yí i se. ⁴⁶Ṣigba mẹdelẹ to yé me yì Falesi lẹ de, bo dọ onú he Jesu wà lẹ na yé.

⁴⁷Enẹwutu ogán yẹwhenọ le ton, po Falesi lẹ po, ylọpli, bo domọ, Ete wà wẹ mí te? na dawe he to ohia susu basi. ⁴⁸Eyín mí jo e do, omẹ pó wẹ na yí i se: Lomutọ lẹ nasọ wá yí otẹn po akọta mìtọn po ga. ⁴⁹Dopo to yé me, mẹhe yè ylọ Kaifa, he yín yẹwhenọ daho to owhè lọ mẹ, dọ hlan yé, dọ, Mìwlẹ ma yón onú depope, ⁵⁰mì ma sọ lẹn do, é jẹ na mí dọ omẹ dopo ni kú na gbeto lẹ, na akọta pete ma na do dọ̀n. ⁵¹E dọ ehe, é ma yín na ede gba: ṣigba le é yín yẹwhenọ daho to owhè lọ mẹ, é dọdọdai dọ Jesu na kú na akota lọ; ⁵²E ma yín na akọta lọ kẹdẹ, ṣigba dọ é nido bé ovi Jiwheyẹwhe tọn lẹ pli do dopo, he yè vúnvún pé lẹ. ⁵³Mowẹ sọn azán lọ gbè we yé ko yí hónamẹ na yé nido hu i.

⁵⁴Enẹwutu Jesu ma sọ zinzọnlin to gbangba to Ju lẹ mẹ ba; ṣigba é fonyì sọn finẹ biọ otò he sepó zùngbo dali, yì otòdaho de mẹ, he yè nọ ylọ Eflaimi, finẹ wẹ é nò po nuplọntọ le po. ⁵⁵Dinvie Juwayì Ju lẹ tọn tin to oyakẹ: omẹ susu sọ tón sọn otò lọ mẹ, bo hẹji yì Jelusalẹm jenukọnna juwayì lọ, nado klán yéde do wiwe ⁵⁶Enewutu yé to dindin Jesu, bo to didọ to yede ṣẹnṣẹn le yé site to tẹmpli mẹ, dọmọ, Etẹwẹ mì lẹn? dọ ewọ ma to na wá hunwhẹ lọ kòn wẹ? ⁵⁷Dinvie ogán yẹwhenọ lẹ tọn, po Falesi lẹ po ko na gbèdide dọ, eyín mẹdepope yón ofi he é te, é ni do e hia, na yé nido wlé e.

¹ENẸWUTU azán ṣidopo jẹnukọnna juwayì lọ Jesu wá Bẹtani, fie Lazalọsi te, mẹhe Jesu fọ́n sọn osiọ lẹ mẹ. ²Mọwẹ yé basi núdùdù tenu ton de to finẹ: Malta sọ to lizọnyí: ṣigba Lazalọsi yín dopo to mẹhe jagla to tafo ji po e po lẹ mẹ. ³Enewutu Malia yí ojleka nusisá nadi tọn de, akuegegenu, bo to sisá do afọ Jésu tọn, bo yí oda etọn do to afọ etọn sunsun: oho lọ sọ gó na Owán nusisá lọ tọn. ⁴Ṣigba dopo to nuplọntọ etọnlẹ me, Juda Iskaliọtii; ovisunnu Simọni tọn, mẹhe na de e hia, dọmọ, ⁵Etẹwutu we yè ma sà nusisá he yín fatakakuẹ fodekanweko, bo yín nina hlan wamonọ le? ⁶E dọ ehe dinvie, é ma yín dọ é hò wamọnọ lẹ pọn wutu gba; ṣigba do ewọ yín ajotọ de wutu, podọ tintindo apò lọ, nọ bé onú yè bé do e mẹ lẹ yì. ⁷Enẹwutu Jesu domọ, Mì jo e do: ewọ whlá ehe dai na azán didi ṣie tọn. ⁸Na whepoponu wẹ mì tindo wamọno le to mì de; ṣigba mì ma tindo mi to whepoponu gba.

⁹Enẹwutu omẹvọtọ lẹ sọn Ju lẹ mẹ yọnẹn dọ é tin to fìne: yé wá, é ma yín Jesu tọn wutu kẹdẹ gba, ṣigba na yé nido mọ Lazalosl ga, mẹhe ewọ fọ́n sọn osiọ lẹ mẹ. ¹⁰Ṣigba ogán yewhenọ lẹ tọn, yí hónamẹ na yé nido hù Lazalosi ga; ¹¹na ewọ tọn wutu wẹ Ju susu do yì, bo sọ yí Jesu se. ¹²To azán awetọ gbè, agùndaho de he wá hunwhẹ lọ kòn, whenuena yé sè dọ Jesu ja Jelusalẹm, ¹³yí odéma, bo tọ́njegbonu yì nado pé e, bo to awhádo dọ, Hosanna! donanọ wẹ ewọ he ja to oyín Oklunọ tọn mẹ, yèdọ ahọlu Islaeli tọn lọ. ¹⁴Poṣọ Jesu, mimọ kẹteketevu de, é sinai do e ji; dile yè wlan dọ, ¹⁵A dibu blo, oviyọnnu Zioni tọn: pọ́n, Aholu towe ja, é sinai do ketẹketẹvu de ji. ¹⁶Nuplọntọ etọn lẹ ma tunwun onú hele to whéwhéwhenu: ṣigba whenuena yè pagigona Jesu, whenenu wẹ yé flin dọ, yè ko wlan onú helẹ na ewọ tọn, podọ yé ko basi onu helẹ hlan en.

¹⁷Enẹwutu agùndaho he tin to e de lọ, whenuena é ylọ Lazalọsi sọn oyòwhé lọ me, bo fọ́n ẹn sọn osiọ lẹ mẹ, dekunnu. ¹⁸Na ehe lọ tọn wutu ga wẹ agùndaho lọ yì pé e, na yé sè dọ é ko basi ohia he. ¹⁹Enẹwutu Falesi lẹ dọ to yéde ṣẹnṣẹn, dọ, Mì mo le mì ma sọgan húgan to onú depope mẹ do? pọ́n aihọn lẹpo wẹ toyìyì hódo e.

²⁰Dinvie Gleki dele tin to yé ṣẹnṣẹn mẹhe hẹji yì nado litai to hunwhẹ lọ kòn. ²¹Enẹwutu ehelẹ wá Filipi de, ehe tin sọn Betsaida Galili tọn, bo to kinkanbiọ e dọ, Mẹdaho, mí jlo Jesu na mọ ²²Filipi sọ wa, bo dọ na Andle; Andlé wá, po Filipi po yé so dọ na Jesu. ²³Jesu sọ gblọnna yé dọ, Ojle lọ wá, na yè nido pagigona Ovi Gbètọ tọn. ²⁴Nugbo, nugbo, we yẹn dọ hlan mì, adavo olìkún dopo fiẹ biọ aigba mẹ bo sọ kú, e nọte na ede dopokede; ṣigba eyín é kú, é hẹn sinsẹ́n susu. ²⁵Mehe yiwanna alindọn etọn na hẹn ẹn bú; mẹhe so gbewanna alindọn etọn to aihọn he mẹ na whlá ẹ hlan ogbè madopodo. ²⁶Eyín mẹde to sinsẹn mi, gbo e ni hodo mi; ofi he yẹn te, finẹ devi ṣie na te ga eyín mẹdepope to sinsẹ̀n mi, ewọ lọ wẹ Oto ṣie na gbogbena. ²⁷Dinvie wẹ yè to tuklado alindọn ṣie: be etẹwe yẹn na dọ? Otọ́, whlẹn mi gán son ojlẹ he mẹ: ṣigba na ehe lọ tọn wutu wẹ yẹn wá jẹ ojlẹ he ²⁸Otọ́, pagigona oyín towe. Enẹwutu ogbè de sọn olọn mẹ wá, dọmọ, Yẹn ko pagigona ẹn, bo na sọ vó gigopána ẹn. ²⁹Enewutu agùndaho lọ he site to finẹ, bo sè e lẹ, dọ osò yénwan: mẹdelẹ dọ, Angeli de ko dọhó hlan ẹn. ³⁰Jesu so gblọn bo dọmọ, Ogbè he ma wá na yẹn wutu gba, ṣigba na mìwlẹ wutu wẹ. ³¹Dinvie wẹ whẹ̀dida aihọn he tọn de wá: dinvie we yè na yàn ahọvi aihon he tọn jẹgbonu. ³²Podọ yẹn, eyín ye zé mi daga son aigba, na dòn gbẹtọ lẹpo hlan dẽ. ³³Ṣigba ehe wẹ ewọ dọ dojlẹ gbọn okú he hunko ewọ na kú tọn dali. ³⁴Enẹwutu agùndaho lọ gblọn nẹ dọ, Mi ko sè sọn osén mẹ dọ Klisti na nò kakadoi: nawe hiẹ dọ do dọ Yè ma sọgan nọ ma zé Ovi gbẹtọ tọn daga? Menu wẹ Ovi gbẹtọ tọn he? ³⁵Enẹwutu Jesu dọ hlan yé, dọ, Ojle vude dogo wẹ hinhọ́n tin to mì me Mì zinzọnlin whenuena mì tindo hinhọ́n, na zinvlu ma na do pla mì: na mẹhe to zọnlinzin to zinvlu mẹ ma yon ofi he é jei. ³⁶Whenuena mì tindo hinhọ́n, mì ni yí hinhọ́n sè, na mì nido yín ovi hinhọ́n tọn lẹ. Onú helẹ wẹ Jesu dọ, bo fọ́nyì, bo sọ ede whlá sọn yé de. ³⁷Ṣigba le é basi ohia susu mọ to yé nukon, yé ma yí i se gba: ³⁸na yè nido hen ohó Isaia yewhegan tọn di, ehe e dọ, dọmọ,

⁴⁴Jesu sọ dawhá bo dọmọ, Ewọ he yí mì se, yẹn ma wẹ é yise gba, adavo ewọ he do mi hlan. ⁴⁵Mẹhe sọ mo mi, mọ mẹhe do mi hlan. ⁴⁶Yẹn wa hinhọ́n de biọ aihọn mẹ, na mẹdepope he yí mi se ma nido nò zinvlu mẹ gba. ⁴⁷Podọ eyín mẹdepope sè ohó ṣie lẹ bo ma yìn yé, yẹn ma dawhẹna en gba: na yẹn ma wá nado dawhẹna aihọn gba, adavo nado whlẹn aihọn gán. ⁴⁸Ewo he gbé mi, bo ma sọ yí ohó ṣie lẹ, tindo mẹhe to owhẹ̀ etọn da de: ohó he yen dọ lọ, dopolọ wẹ nasọ dawhèna ẹn to azán pòdo gbè. ⁴⁹Na yẹn ma dọhó sọn dẽ de gbà; ṣigba Otọ́ he do mi hlan, ewọ ko na gbèdide de mi, onú he yẹn na nọ dọ, po ohó he yẹn na nọ gblọn po. ⁵⁰Podọ yẹn sọ yọnẹn dọ gbèdide etọn wẹ ogbè madopodo: enẹwutu onú he yẹn to didọ lẹ depope, yèdọ dile Otọ́ dọ hlan mi do, mọwẹ yẹn to didọ do.

¹DINVIE jẹnukọnna hunwhẹ juwayì tọn lọ, whenuena Jesu yọnẹn dọ ojle etọn wá, bọ ewọ na do yì sọn aihọn he mẹ yì Otọ́ de, le é yiwanna omẹ etọn titi he tin to aihọn mẹ lẹ do, é yiwanna yé jẹ pòdo. ²Podọ to núdùdù tenu tọn whenu, lẹgba ko yí i do ayiha Juda Iskaliọti, ovi Simọni tọn tọn mẹ, nado dè e hia; ³le Jesu yọnẹn dọ Otọ́ ko yí onú popo do alọ etọn mẹ, podọ Jiwheyẹwhe de wẹ é jẹgbonu sọn wá, bo sọ jei Jiwheyẹwhe de; ⁴e fọ́n sọn núdùdù tenu tọn kọ̀n, bo dè awù etọn do apadopo; é sọ yí duku de do blagbajana ede. ⁵Whenẹnu é kòn osin do ṣiklẹ mẹ bo sè nado to afọ nuplọntọ etọn lẹ tọn klọ́, podọ nado to duku he é do blagbaja yí do to súnsúnsunsun yé. ⁶Mowẹ é wá Simọni Pita de. Pita sọ do hlan ẹn, do, Hie to afọ ṣie klo wẹ, Oklunọ? ⁷Jesu sọ gblọn bo dọ hlan ẹn, dọ, Onú he yẹn to wiwà hiẹ ma yọnẹn dinvie gba, ṣigba hiẹ na yọnẹn to godo. ⁸Pita sọ dọ hlan ẹn, dọ, Hiẹ ma na kló afo ṣie gbède. Jesu sọ gblọnna ẹn, dọ, Eyín yẹn ma klọ́ we, hiẹ ma tindo tenmẹ de to dẽ ⁹Simọni Pita sọ dọ hlan ẹn, dọ, E ma yin afọ ṣie kẹdẹ gba, Oklunọ, sigba alọ ṣie po ota ṣie po ga. ¹⁰Jesu sọ dọ hlan ẹn, dọ, Mehe yè klọ ma din hú dọ ye ni klọ́ afo etọn, ṣigba é we to ofi popo mìwlẹ we, ṣigba é ma yín mì omẹ po gba. ¹¹Na é ko yón mẹhe na dò e hia; enẹwutu we é dọmọ, Mì ome pó ma wẹ we gba. ¹²Mọwẹ whenuena é ko klọ́ afọ yeton lẹ, bo sọ yí awu etọn bo jagla, é dọ hlan yé, dọ, Be mì yón onú he yen wà hlan mì? ¹³Mìwlẹ to yiylọ mi dọ Mẹplọntọ, bo to yiylọ mi dọ Oklunọ; mì dọ dagbe; na mọwe yẹn yín. ¹⁴Enẹwutu eyín yen mẹhe yín Oklunọ mìtọn, bo sọ yín Mẹplọntọ mìtọn kló afọ mìtọn; é sọ jẹ na mìwlẹ ni sọ kló afọ mìnọzo ton ga. ¹⁵Na yẹn kọ na ohia mì, na mì nido nọ wà dile yẹn wà hlan mì do. ¹⁶Nugbo, nugbo, we yẹn dọ hlan mì, Afànume ma klohú Oklunọ etọn gba; podọ omẹdohlan ma klohú mẹhe do e hlan gba ¹⁷Eyín mì yọn onú helẹ, donanọ wẹ mì eyín mì basi yé. ¹⁸Yẹn mí dọ mì omẹ po ton gba; yẹn yón ome he yen dè lẹ; ṣigba na yè nido hẹn Owe wiwe di, Mẹhe to núdù hẹ mi ko zé afọgbẹn etọn daga do oji e. ¹⁹Dinvie yẹn dọ hlan mì whẹpo é na jọ, dọ, whenuena é ko jọ, na mì nido yise dọ yẹn lọ wẹ. ²⁰Nugbo, nugbo, wẹ yẹn do hlan mì, Mehe yí omẹ depope he yẹn dohlan, é yí mi; mẹhe sọ yí mi, é yí mẹhe do mi hlan.

²¹Whenuena Jesu ko dọ le vò, yè hẹn ẹn jẹtukla to gbigbo mẹ, é so dekunnu, bo domọ, Nugbo, nugbo, we yẹn dọ hlan mì, dọ dopo mì ton na dè mi hia. ²²Nuplọntọ lẹ to yénọzo pọ́n, bo to ohó mẹhe tọn é dọ hà. ²³Mẹde jagla to akónnu Jesu tọn, dopo to nuplọntọ etọn lẹ mẹ, mehe Jesu yiwanna. ²⁴Enewutu Simọni Pita mìalo hlan ẹn, DO do hlan ẹn dọ, Dọ oho mehe tọn e to didọ na mí. ²⁵Ewọ didé hlan godo dole ewọ ko te, to akọnnu Jesu tọn dọ hlan ẹn dọ, Oklunọ, mẹnu é yín? ²⁶Enẹwutu Jesu sọ gblọn dọmọ, Mẹhẹ yẹn yi nùdo na; whenuena yen yí do siọnu, ewọ lọ wẹ. Mọwẹ whenuena é yi i do siọnu, é yi bo na hlan Juda Iskalioti, ovisunnu Simọni tọn. ²⁷To nùdo lọ godo whenẹnu wẹ Satani biọ oho etọn me. Enẹwutu wẹ Jesu dọ hlan ẹn, dọ, Ehe hiẹ to bibasi, basi plaun. ²⁸Dinvie mẹdepope to tafo ji ma yọn onu he tọn wutu e dọ ehe hlan en. ²⁹Na mẹdelẹ to yé mẹ len dọ, Juda tindo apo wutu wẹ Jesu dọ hlan ẹn, dọ, Hò onú he mí ma sọgan nọ matindo lẹ na hunwhe lo; kavi dọ é ni na nude wamọnọ lẹ. ³⁰Whenenu le ewo yí nudó lo, é tọ́njẹgbonu yì to afọdoponẹji; ozanmẹ sọ wẹ.

³¹Enẹwutu whenuena é tonjegbonu yì, Jesu dọmọ, Dinvie wẹ yè pagigona Ovi gbẹtọ tọn, ye sọ pagigona Jiwheyẹwhe to ewọ mẹ. ³²Jiwheyẹwhe na pagigona ewọ to edelọsu me, bo nasọ pagigo nẹ̃ to afọdoponeji. ³³Mì yọ̀pọ emi, ojlẹ vude mẹ dogọ wẹ yen tin to mìde. Mì na din mi: dile yẹn dọ hlan Ju lẹ, dọ, Fie yẹn jei, mì ma sọgan wá; mọwẹ yen dọ hlan mì to dinvie. ³⁴Osẹn yoyó de wẹ yẹn na hlan mì, Dọ mì ni yiwanna mìzọzo: dile yen yiwanna mì, na mìwlẹ ga ni yiwanna mìnọzọ. ³⁵Gbọn ehe dali wẹ gbẹtọ lẹpo na yọnen dọ nuplọntọ ṣie wẹ mì, eyín mìwlẹ tindo owanyi hlan minọzo.

³⁶Simọni Pita dọ hlan ẹn, dọ, Fie wẹ hiẹ jei, Oklunọ? Jesu sọ gblọn dọmọ, Fie yẹn jei, hie ma sọgan hodo mi to dinvie gba; ṣigba hiẹ na hodo to godo. ³⁷Pita dọ hlan ẹn, dọ, Etẹwutu yen ma sọgan hodo we yèdọ to dinvie, Oklunọ? Yẹn sọgan yí gbigbọ ṣie liai na hie. ³⁸Jesu sọ gblon, dọ, Hiẹ na yí gbigbọ towe liai na yén? Nugbo, nugbo, we yẹn dọ hlan we, Koklo ma na dose, whẹpo hiẹ nado mọ́n mi whlatòn.

¹Mì dike ayiha mìtọn yín tuklanọ blo: mì yise to Jiwheyẹwhe mẹ, mì yise to yẹn mẹ ga. ²To owhé Otọ́ ṣie tọn gbè ofi ninò susu wẹ tin: eyín é ma yín mọ, yẹn do kò dọ hlan mì. Yẹn jei nado wleawu otẹn de tọn dai na mì. ³Eyín yẹn yì bo wleawu otẹn de tọn dai na mì, yẹn nasọ lẹgò, bo hẹn mì yì dè de; na ofi he yẹn te finẹ wẹ mì na nọ ga. ⁴Podọ ofi he yen jei mì yọnẹn, mì sọ yón aliho lọ ga. ⁵Tọmasi dọ hlan ẹn, dọ, Oklunọ, mìwlẹ ma yón ofi he hiẹ jei; nawẹ mí na yón aliho lọ do? ⁶Jesu dọ hlan ẹn, dọ, Yẹn wẹ aliho lọ, nugbo, po ogbẹ̀ po; mẹde ma sọgan wá Otọ́ de, adavo gbọn yen dali ⁷Eyín mìwlẹ ko yón mi, mì do ko yón Oto ṣie ga: podọ sọn dinvie yì, mìwlẹ ko yọn ẹn, bo ko sọ mọ ẹn. ⁸Filipi dọ hlan ẹn, dọ, Do Otọ́ lọ hia mí, Oklunọ, é sọ sù na mí. ⁹Jesu dọ hlan ẹn, dọ, Be le yẹn ko tin to mì de dẹn do, hiẹ ma ko yon mi gba, Filipi? ewọ he ko mọ mì ko mọ Oto; nawẹ hiẹ dọ do dọ, Do Otọ lọ hia mí? ¹⁰Be hiẹ ma yise dọ yẹn tin to Otọ mẹ, podọ Otọ tin to yẹn mẹ? Ohó he yẹn dọ hlan mì lẹ, yẹn ma dọ sọn dẽ de gba; ṣigba Otọ́ he nọnọ̀ yẹn mẹ wẹ wà azón lẹ lọ. ¹¹Mì yise dọ yen tin to Otọ me, podọ Otọ́ tin to yẹn me: kavi eyín e ma yín mọ, mì bo yi mi se na azọn lọsu lẹ tọn wutu. ¹²Nugbo, nugbo, wẹ yẹn dọ hlan mì, Mẹhe yi mi se, azón he yẹn wà, wẹ ewọ na wa ga; azọn he sọ klohu ehelẹ wẹ é na wà; na yẹn yì Otọ́ ṣie de wutu. ¹³Podọ onú depope he mì na kanbiọ to oyín ṣie mẹ, enẹ wẹ yẹn na wà, na yè nido pagigona Otọ́ to Ovi mẹ. ¹⁴Eyín mì kàn nudepope biọ to oyín ṣie mẹ, yẹn na basi i. ¹⁵Eyín mì yiwanna mi, mì bo yìn osẹn ṣie lẹ. ¹⁶Yẹn nasọ hodè hlan Otọ́, ewọ nasọ na Homẹjladoto devo mì, na dọ ewọ nido tin to mì de kaka doi; ¹⁷yèdọ Gbigbọ nugbo tọn; mẹhe aihọn ma sọgan yí, na é ma mọ ẹn, mọ é ma yón ẹn; ṣigba mìwlẹ yón ẹn; na ewọ nọnọ̀ mì de, bo nasọ tin to mì mẹ. ¹⁸Yẹn ma na jo mì do mẹdesọnajinọkòn gba: yẹn sọ ja mì de. ¹⁹To whenu vude, aihọn ma na mọ mi ba; ṣigba mìwlẹ mọ mi: na yẹn tin to ogbè wutu, mì na tin to ogbè. ²⁰To azán lọ gbè mì na yọnẹn dọ yẹn tin to Otọ́ ṣie mẹ, podọ mìwlẹ to yẹn mẹ, podọ yẹn to mì mẹ. ²¹Ewọ he tindo ósén ṣie lẹ, bo sọ yìn yé, ewọ lọ wẹ mẹhe yiwanna mi: mẹhe sọ yiwanna mì, yè na yiwan nẹ sọn Otọ́ ṣie de, yẹn nasọ yiwan nẹ bo nasọ do dè hia hlan ẹn. ²²Juda dọ hlan ẹn, e ma yin Iskaliọti gba, dọ Oklunọ, etẹ wẹ ja jijọ gbé bọ hie na do dewe hia hlan mí, bọ é ma na yín hlan aihon? ²³Jesu gblọn bo dọ hlan en, dọ, Eyín mẹde yiwanna mi, é na yin ohó ṣie lẹ: Otọ́ ṣie nasọ yiwan nẹ, mi nabọ wá e de, bo nasọ basi nọtẹn mìton to e de. ²⁴Mẹhè ma yiwanna mi, e ma se ohó ṣie: na ohó he mì sè lọ ma yin ṣie, ṣigba Otọ́ he do mi hlan tọn wẹ.

²⁵Onu helẹ wẹ yẹn ko dọ hlan mì, whenuena yẹn to ninò hẹ mì. ²⁶Ṣigba Whẹ̀yídotọ lọ, he yín Gbigbọ Wiwe, mẹhe Otọ́ na dohlan to oyín ṣie mẹ, ewọ na plon onu lepo mì, bo nasọ hen onú he yen dọ hlan mi lepo wá oflin mìton me. ²⁷Jijọho wẹ yẹn jo do mì de, jijoho ṣie wẹ yen na hlan mì: é ma yín le aihọn ko namẹ do wẹ yen na hlan mì do gba. Midike ayiha mìton yín tuklanọ blo, mì sọ dike é yín obunọ blo. ²⁸Mì sè le yẹn dọ hlan mì, dọ, Yẹn jei, bo sọ vó gọja mì de. Eyín mì yiwanna mi, mì do ko jaya, na yẹn jei Oto de wutu: na Oto yín kiklo hú mi. ²⁹Yẹn ko dọ hlan mì dinvie whẹpo é na jọ, dọ whenuena é jọ na mì nido yise. ³⁰Yẹn ma na dọhó susu hẹ mì ba gba: na ahọvi aihọn tọn lọ wá, ewọ ma sọ tindo núde to yen mẹ. ³¹Ṣigba na aihọn nido yọnẹn dọ yẹn yiwanna Otọ; podọ dile Otọ́ na osén mi do, yèdọ mọwẹ yẹn wà do. Mì fọ́n, mì gbọ mí ni yì sọn ofi.

¹YẸN we ovẹntin nugbo lọ, Otọ́ ṣie wẹ oglesi. ²Alà depope to yẹn mẹ, he ma hẹn sinsẹ́n, ewọ dè e sè: podọ alà depope he hẹn sinsẹ́n, ewọ lè ẹ wé, na é nido hẹn sinsẹ́n húmọ. ³Mìwlẹ wé to dinvie gbọn ohó he yẹn dọ hlan mì dali. ⁴Mì nọnọ̀ yẹn mẹ, podọ yẹn to mìwlẹ mẹ. Dile alà ma sọgan hẹn sinsẹ́n ededenu, adavó é nọnọ̀ ovẹntin mẹ; mokẹdẹ wẹ mìwlẹ ma sọgan, adavo mì nọnọ̀ yẹn mẹ. ⁵Yẹn wẹ ovẹntin lọ, mìwlẹ wẹ alà lẹ: ewọ he nọnọ̀ yẹn me, podọ yẹn to ewo me, dopolọ wẹ hẹn sinsẹ́n susu: na jijẹla sọn dè mìwlẹ ma sọgan wà núde ⁶Eyín mede ma nọnọ̀ yen me, yé dè e dlangbe kẹdẹdi alà de, é sọ yé; yè sọ bé ye pli, bo zé yé dlẹn miyon mẹ, bo sọ fiọ yé. ⁷Eyín mì nọnọ yẹn mẹ, bọ ohó ṣie lẹ sọ nọnọ̀ mìwlẹ mẹ, mì na kàn onú he mì jlo biọ, é bo na sọ yín wiwà hlan mì. ⁸To ehe mẹ wẹ yè pagigona Otọ́ ṣie te dọ, mì ni hen sinsẹn susu; mowe miwlẹ nasọ yín nuplontọ ṣie. ⁹Yedọ le Oto yiwanna mi do, wẹ yẹn yiwanna mìwlẹ do ga: mì nọnọ̀ owanyi ṣie mẹ. ¹⁰Eyín mì yin osén ṣie lẹ, mì na nonò owanyi ṣie mẹ; yèdọ dile yen yin osén Oto ṣie tọn, bo sọ nọno owanyi etọn mẹ do ¹¹Onú helẹ wẹ yen ko dọ hlan mì, na ayajẹ ṣie nido tin to mì me, podo na ayajẹ mìtọn nido yín hinhẹnpé. ¹²Ehe wẹ osén ṣie, Dọ mì ni yiwanna, mìnozo, yèdọ dile yẹn yiwanna mì do. ¹³Mede ma tindo owanyi he klo hú ehe, dọ mẹde zé ogbè eton liai na hontọn etọn lẹ ¹⁴Hónton ṣie wẹ mìwlẹ, eyín mì wa onú he yẹn degbèna mì lẹ. ¹⁵Sọn dinvie yẹn ma ylọ mi afanumẹ lẹ ba; na afanumẹ ma yon onu he Oklunọ etọn to wiwà: ṣigba yen ylọ mì họ́ntọn, na onu he yẹn ko sè sọn Otọ́ ṣie de lẹpo, yẹn ko hẹn zùn yinyọnẹn hlan mì. ¹⁶Mìwlẹ ma wẹ dèmi gba, ṣigba yẹn wẹ dè mì, bo sọ nasẹ mì dọ mi ni yì bo hẹn sinsẹ́n, podọ na sinsẹ́n mìtọn nido nọte: na onú depope mì na biọ sọn Otọ́ de to oyín ṣie mẹ, é nido na ẹn mì. ¹⁷Onú helẹ wẹ yen degbena mì dọ, mì ni yiwanna mìnọzo. ¹⁸Eyín aihọn gbẹwanna mì, mì yọnẹn dọ, é ko gbẹwanna mi, whẹpo é do gbẹwanna mì. ¹⁹Eyín mìwlẹ ko yín aihọn tọn, aihọn na yiwanna etọn titi; ṣigba na mì ma yín aihọn tọn wutu, ṣigba yẹn ko dè mì sọn aihọn mẹ, enẹwutu wẹ aihọn gbẹwanna mì. ²⁰Mì ni flin ohó he yẹn ko dọ hlan mì dọ, Afànumẹ ma klohú Oklunọ etọn. Eyín yé dohomẹken mi, yé nasọ dohomẹkẹn mìwlẹ ga; eyín yé ko yí ohó ṣie hẹn, yé na yí mìtọn hẹn ga. ²¹Ṣigba onú helẹ pó wẹ yé na wà do mì na oyín ṣie tọn wutu, na yé ma yón ewọ he do mi hlan wutu. ²²Eyín yẹn ma ko wá bo ko dọhó hlan yé, yé ma do tindo ylando: ṣigba dinvie yé ma tindo vèvènu de na ylando yetọn. ²³Ewọ he gbẹwanna mi, gbẹwanna Otọ́ ṣie ga. ²⁴Eyín yẹn ma ko wà to yé ṣẹnṣẹn azón he mẹde ma wà, yé ma do tindo ylando gba; ṣigba dinvie yé ko mọ, bo sọ gbẹwanna mi po Oto ṣie po. ²⁵Ṣigba ehe jọ, na ohó he yè wlan to osén yetọn mẹ aido di, Yé gbẹwanna mi matin owhèhó de. ²⁶Ṣigba whenuena Whèyídọtọ lọ wá mẹhe yẹn na dohlan mì sọn Otọ de, yèdọ Gbigbọ nugbo tọn, mehe tón sọn Otọ de, ewọ na dekunnuna mi: ²⁷mìwlẹ na dekunnuna mi ga, na mì ko tin to dé sọn whéwhéwhenu wutu.

¹ONU helẹ we yen ko dọ hlan mì, na yè ma na do hen mi dahli. ²Ye na dè mì sọn sinagogu lẹ me: mọwẹ ojlẹ lọ ja, whenuena mẹdepope he hù mì, na lẹn dọ é to sinsẹ̀n basi hlan Jiwheyẹwhe ³Onu hélẹ pó wẹ ye na wa, na ye ma yon Oto, yé ma sọ yọn mi wutu. ⁴Ṣigba onu hele wẹ yen dọ hlan mì, na whenuena ojle yetọn wá, mì nido flin yé le yen ko dọ na mì Yen ma dọ onu helẹ hlan mì son whéwhéwhenu gba, na yen tin to mì de wutu. ⁵Ṣigba dinvie yẹn jei ewọ he do mi hlan de; medepope ma sọ kanbio mi to mì me dọ, Fie we hie jei? ⁶Ṣigba na yen dọ onu helẹ hlan mì wutu, awubla go ayiha mìtọn mẹ. ⁷Gãnṣo nugbo yen dọ hlan mì; E tin jẹ na mi do yẹn ni yì na eyín yen ma yí, Wlẹyidolo lọ ma na wá mì de gba: ṣigba eyín yẹn yì, yen na do e hlan mì. ⁸Podọ ewọ, whenuena é wá, é na gblẹwhẹdo aihọn to agòjijẹ ylando tọn mẹ, dodó tọn, po owhẹda tọn po: ⁹ylando tọn, na yé ma yí mi se wutu; ¹⁰dodó tọn, na yẹn jei Otò ṣie de, bọ mì ma na mọ mi ba wutu; ¹¹owhẹda tọn, na yè ko dawhèna ahọvi aihọn he tọn wutu. ¹²Yẹn gbé sọ tindo onú susu nado dọ hlan mì, ṣigba mìwlẹ ma sọgan hẹn yé to dinvie gba. ¹³Ṣigba whenuena ewọ, Gbigbọ nugbọ tọn wá, ewọ na plan mì biọ nugbo lẹpo mẹ: na ewọ ma na dọhó sọn ede mẹ gba, ṣigba onu depope he é na sè, ehelẹ wẹ é na dọ: é nasọ lá onú he ja jijo gbé lepo hlan mì. ¹⁴Ewọ na pagigona mi; na e na de son ṣie mẹ, bo na la ẹ hlan mì. ¹⁵Onu he Otò tindo lepo depope ṣie wẹ: enẹwutu wẹ yẹn dọ, ewọ na dè sọn ṣie mẹ, bo na lá ẹ hlan mì. ¹⁶Whenu vude, mìwlẹ ma na mọ mi ba: podo whenu vude, mi naso mọ mi, na yẹn jei Otò de wutu. ¹⁷Enẹwutu omẹ delẹ to nuplọntọ etọn lẹ mẹ dọ to yéde ṣẹnṣẹn, dọ, Etẹwẹ ehe é dọ hlan mí he, Whenu vude, mì ma na mọ mi ba; podọ, whenu vude, mì naso mọ mi: podọ, Yẹn jei Otò de wutu? ¹⁸Enẹwutu yé dọmọ, Etẹwe ehe é dọ he, Whenu vude? mìwlẹ ma yon onú he é dọ gba. ¹⁹Jesu mọhlan dọ yé yín ojlonọ nado kanbiọ ẹ, é dọ hlan yé, dọ, Mì to kinkanbiọ to mìde ṣẹnṣẹn gbọn ehe tọn dali, Yen dọ, dọmọ, Whenu vude, mìwlẹ ma na mọ mi ba; podo, whenu vude, mì nasọ mọ mi? ²⁰Nugbo, nugbo, wẹ yen dọ hlan mì, dọ, Mì na viavi bo sọ doavigbè, ṣigba aihọn na to ayajẹ; mì na yín awublanọ, ṣigba yè na hen awubla mìton zùn ayajijẹ. ²¹Yọnnu de whenuena é tin to ajipanu, tindo awubla, na ojlẹ etọn wá wutu: ṣigba whenuena é jivi, ewọ ma sọ flin awuvivẹ ba, na ayajẹ lo dọ, yè ji gbẹtọ de do aihon me. ²²Enẹwutu mìwlẹ tindo awubla to dinvie; ṣigba yẹn nasọ vò mì mọ, ayiha mìtọn naso jaya, mede ma naso de ayaje mìtọn son mì de. ²³To azán nẹ gbè, mì ma na kan onú depope se mi ba Nugbo, nugbo, wẹ yen dọ hlan mì, eyín mì na kan onú depope bio to Otò de, ewọ na yí na mì to oyín ṣie mẹ. ²⁴Kaka jẹ dinvie mìwlẹ ma ko kan onú de biọ to oyín ṣie me gba; mì kanbiọ, mì nasọ mọyí, na ayajijẹ mìtọn nido gọ.

²⁵Onú helẹ we yen ko nọ dọ hlan mì to oló le mẹ: ṣigba ojlẹ lọ wá, whenuena yen ma na dohó to oló mẹ hlan mì ba, ṣigba yen na dọ Otọ́ tọn na mì gbangba ²⁶To azán nẹ gbè mi na kanbiọ to oyín ṣie mẹ: yẹn ma dọ hlan mí, úo, Yen na vè Otò na mì gba: ²⁷na Otò lọsu yiwanna mì, na mìwlẹ yiwanna mi wutu, bo ko sọ yise do Jiwheyẹwhe de we yẹn sọn wa. ²⁸Yen tọ́njegbonu sọn Oto de wá, bo wá aihọn mẹ: yẹn sọ jo aihọn do, bo sọ jei Otò de. ²⁹Nuplọnto eton lẹ domọ, Dinvie wẹ hiẹ dọhó gbangba, bo ma dọ olo de gba. ³⁰Dinvie wẹ mí yọnen dọ hie yòn onú popo, bo ma sọ tinnúwhèdo dọ mẹde ni kàn onú de biọ we: gbon ehe mẹ wẹ mìwlẹ yise dọ Jiwheyẹwhe de we hiẹ sọn wá. ³¹Jesu sọ gblọnna yé, dọ, Be mìwlẹ yise to dinvie? ³²Do ayi e go, ojlẹ lọ ja, mọwẹ é wá to dinvie, dọ yè na vúnvún mì pé, dopodopo mìtọn do onú ede tọn kòn, bo nasọ jo yen dopo dai: gãnṣo é ma yín yen dopo gba, na Otò tin to dẽ wutu. ³³Onú helẹ wẹ yẹn ko nọ dọ hlan mì, na mì nido tindo jijọho to yẹn mẹ. To aihọn mẹ mì na tindo tukla: ṣigba mì dèji; yẹn ko gbawhàn aihọn tọn.

¹ONÚ helẹ wẹ Jesu dọ, zizé nukun etọn daga hlan olọn, é dọmọ, Otò, ojlẹ lọ wá; pagigona Ovi towe; na Ovi lọ nido pagigona we: ²yèdọ dile hiẹ na asè ẹ to agbasalan lẹpo ji dọ nudepope hiẹ na ẹn ewọ ni na ogbè madopodo yé. ³Podọ ehe wẹ ogbè madopodo, dọ ye ni ylihiẹ sokede Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti. ⁴Yẹn ko pagigona we to aihọn mẹ; yẹn ko dotana azọn he hiẹ na mi nado wà lọ. ⁵Dinvie, Otọ́ È, yí dewe titi do pagigona mi po gigo lọ po he yẹn ko tindo to de we whẹpo aihọn do jọ. ⁶Yẹn ko do oyín towe hia omẹ he hie na mi sọn aihọn mẹ lẹ: towe we yé, hiẹ sọ yí yé na mi; yé ko sọ yín ohó towe. ⁷Yé ko yọnẹn dinvie dọ, nudepope he hiẹ ko na mi de we wẹ é sọn. ⁸Ná ohó he hiẹ na mi lẹpo wẹ yẹn ko na hlan yé; yé ko yí yé, bo sọ yọnẹn hézéhezé do, de we we yẹn sọn wá, yé ko sọ yise dọ hiẹ wẹ do mi hlan ⁹Yen hodè na yé; yen ma hodè na aihọn gba, ṣigba na mẹhe hie yí na mi lẹ; na towe we yé. ¹⁰Podọ towe wẹ onú he yín ṣie lepo, towe lẹpo sọ wẹ ṣie; yè sọ to gigopana mi to yé mẹ. ¹¹Dinvie yẹn ma sọ tin to aihọn mẹ ba, ṣigba ehelẹ tin to aihọn mẹ, yen sọ ja de we. Oto Wiwe, whlá yé he hiẹ na mi lẹ to oyín dewe tọn mẹ, na yé ni yín dopo, yèdọ dile mìwlẹ te. ¹²Whenuena yẹn tin to ye de, yẹn whla yé he hiẹ na mi to oyín towe mẹ: yen sọ hò yé, dopo sọn yé mẹ ma dòn, adavo visunnu vivà tọn; na owé wiwe lọ nido yín didi. ¹³Dinvie yẹn ja de we; onú hele wẹ yẹn dọ to aihọn mẹ, na yé nido tindo ayajijẹ ṣie to gigọ́ mẹ to yéde mẹ. ¹⁴Yẹn ko na ohó towe yé; aihọn sọ gbẹwanna yé, na yé ma yín aihọn tọn wutu, yèdọ dile yẹn ma yín aihọn tọn. ¹⁵Yẹn ma basi okanbiọ dọ, hiẹ nido fò yé sọn aihọn mẹ gba, ṣigba dọ hiẹ ni whlá yé sọn oylan mẹ. ¹⁶Ye ma yin aihọn tọn, yèdọ dile yẹn ma yín aihọn tọn do. ¹⁷Lè yé wé to nugbo towe mẹ: ohó towe wẹ nugbo. ¹⁸Dile hiẹ do mi hlan aihọn mẹ; yèdọ mọwẹ yẹn do yé hlan aihọn mẹ. ¹⁹Na yé tọn wutu wẹ yẹn lè dẽ wé, na yé lọsu ga nido yín lilẹwé to nugbo lọ mẹ. ²⁰Yẹn ma sọ hodè na ehelẹ kẹdẹ gba, ṣigba na yé ga he na yí mi se gbọn ohó yetọn mẹ lẹ; ²¹na yé omẹ pó nido yin dopo; yèdọ dile hiẹ, Otọ́, te to yẹn mẹ, bo yẹn tọ hie mẹ, na yewle ga nido yín dopo to mìwlẹ mẹ: na aihọn nido yise dọ hiẹ wẹ do mi hlan. ²²Podọ gigo he hiẹ na mi, yẹn ko na hlan yé; na yé nido yín dopo, yèdo dile mìwlẹ yín dopo do. ²³Yen to yé mẹ, podọ hie to yen mẹ; na yè nido hẹn ye yín pipe to dopo mẹ; na aihọn nido yọnen dọ hie we do mi hlan, bo sọ yìwanna yé, yedo dile hiẹ yiwanna mi do. ²⁴Otọ́, Enẹlẹ he hiẹ na mi lẹ yẹn jlo dọ ofì he yen te yéwle ga ni tin to dẽ; na yé nido to gigo ṣie he hiẹ ko na mi pọ́n: na hie yiwanna mi jẹnukọnna jijo aihon tọn. ²⁵Otọ́ dodónọ È, aihọn ma yon we: ṣigba yẹn yón we, ehelẹ sọ yonen do hiẹ wẹ do mi hlan. ²⁶Yẹn sọ hen oyín towe zùn yinyonẹn hlan yé, bo nasọ hẹn ẹn zun yinyonẹn: na owanyi ehe hiẹ do yiwanna mi, nido tin to yé mẹ, podọ yẹn to yé mẹ.

¹WHENUENA Jesu ko dọ ohó helẹ, é tọ́njegbonu yì po nuplọntọ etọn le po yì otò Kédlon tọn godo, ofì he ojipa de tin te, ehe me e biọ, po nuplọntọ etọn lẹ po. ²Juda, mehe dè e hia, yón ofi lọ ga; na whepoponu wẹ Jesu nọ yì finẹ po nuplọntọ etọn lẹ po. ³Whenẹnu Juda, whenuena é yí awhanpa dopo po awhangán lẹ po sọn ogan yẹwhenọ lẹ tọn, po Falesi lẹ po de, wá finẹ, ye po miyongbán po, po zòwhán po, po adanwànú lẹ po. ⁴Enẹwutu whenuena Jesu yọn onú he ja e ji, é tọ́njegbonu yì, bo dọ hlan yé, dọ, Mẹnu wẹ mìwlẹ to dindin? ⁵Yé sọ gblọn nẹ̃ do, Jesú Nazaleti tọn. Jesu sọ dọ hlan yé, dọ, Yen we ewọ. Juda ga, mẹhe dè e hia, tin to ote to ye de. ⁶Enewutu whenuena Jesu dọ hlan yé dọ, Yẹn wẹ ewọ, yé jagò yì godo, bo jai. ⁷Enẹwutu é sọ vọ́ kanbiọ yé dọ, Menu wẹ mìwlẹ to dindin? Yé sọ dọmo, Jesu Nazalẹti tọn. ⁸Jesu sọ gblọn dọmọ, Yẹn ko dọ na mì dọ, yen wẹ ewọ: ẹnẹwutu eyín yẹn wẹ mìwlẹ to dindin, mì gbọ ehelẹ ni yì: ⁹na yè nido hẹn ohó lọ di, ehe ewọ ko dọ dọ, Sọn enẹlẹ he hiẹ na mi mẹ, yẹn ma bu de gba. ¹⁰Enẹwutu Simọni Pita, mehe tindo ohi, don ẹn sún, bo hú afànume yẹwheno daho tọn de, bo sán otọ́ etọn adusi tọn dlanai. Oyín afànumẹ lo tọn we Malkọs ¹¹Enẹwutu Jesu dọ hlan Pita, do, Yí óhi towe do apa mẹ: kọfo he Otọ ṣie na mi, be yẹn ma na nù in wẹ?

¹²Mọwẹ awhanpa lọ po awhangándaho po, po awhangán Ju tọn lẹ po, wlé Jesu, bo bla ẹ, ¹³bo plan ẹn yì Anna whéwhẹ de, na ewọ wẹ yònwhẹn Kaifa ton, mẹhe yín yẹwhenọ daho to owhè nẹ mẹ. ¹⁴Kaifa lọ we mẹhe na hónamẹ Ju lẹ, dọ é tin je do omẹ dopo do kú na gbẹtọ lẹ.

¹⁵Simọni Pita hodo Jesu, mọkẹdẹ we nuplọntọ devo de wà: omẹ yinyonẹn yẹwhenọ daho tọn wẹ nuplonto lọ, é sọ biọ họmẹ he Jesu yí ohòn yewhenọ daho tọn mẹ. ¹⁶Ṣigba Pita site to họngbo go to gbonu. Whenẹnu nuplọntọ devo lọ, he yín omẹ yinyọnẹn yẹwhenọ daho tọn, tọ́njegbonu yi, bo dọhó hlan ewo he to họnji ho, bo hẹn Pita biọ họmẹ. ¹⁷Enẹwutu oviyọnnu he to hònji hó, dọ hlan Pita, dọ, Be hiẹ ma yín dopo to nuplọntọ dawe he tọn lẹ me? E sọ domọ, Yen ma yín ode gba. ¹⁸Dinvie afanume le, po ogán lẹ po site to finẹ, yé mẹhe flọmiyọn akan tọn; na é basi avivọ mẹ: ye to miyonhú: Pita? site to yé de bo to miyọnhú ga.

¹⁹Enẹwutu yewhenọ daho kanbio Jesu na nuplọntọ etọn lẹ tọn po núplonmẹ etọn po tọn. ²⁰Jesu sọ glona ọ en, dọ, Yen doho gbangba hlan aihọn; whepoponu wẹ yẹn nọ plónmẹ to sinẹgogu mẹ, podọ to tẹmpli mẹ, ofi he Ju lẹ nọ yì to whepoponu; yẹn ma dọ onú de to nuglọ. ²¹Etẹwutu wẹ hiẹ to kinkanbiọ mi? Kanbiọ mẹhe se oho ṣie le, onú he yẹn dọ hlan yé: do ayi e go, ehele yón owẹndagbe he yen dọ. ²²Whenuena é ko dọ ehe, dopo to ogán he site to finẹ lẹ tọn mẹ yí alọhomẹ etọn do doasifẹn Jesu, dọmọ, Yẹwhenọ daho wẹ hiẹ to hógblọnna do mọ? ²³Jẹsu sọ gblọnna ẹn, dọ, Eyín oylan wẹ yẹn ko dọ hẹn kunnude oylan lọ tọn: ṣigba eyín dagbe wẹ yen dọ, be etẹwutu wẹ hiẹ linu mi? ²⁴Enewutu Anna do e hlan bibla yì jẹ Kaifa yẹwhenọ daho de.

²⁵Dinvie Simọni Pita site bo to miọnhú. Enewutu yé dọ hian ẹn, dọ, Be hiẹ ma yín dopọ to nuplọntọ etọn lẹ mẹ? E mọ́n bo sọ dọmọ, Yẹn ma vin ode gba. ²⁶Dopo tọ afànumẹ yẹwhenọ daho tọn lẹ mẹ, mẹhe yín hẹnnumẹ mẹhe Pita sán otọ́ na tọ dọmọ, Be yẹn ma mo we po e potoojipamẹ? ²⁷Enewutu Pita sọ vó mọn, afọdoponẹji koklo dose.

²⁸Enewutu yé plan Jesu sọn Kaifa de yì gbàngan mẹ fie yè nọ dawhè te: afọnnufìifhmẹ wẹ; yé losu ma biọ gbangan ọwhẹda tọn lọ mẹ gba, na yé ma na do flu; ṣigba na yé nido dù juwayì. ²⁹Enẹwutu Pilati tọ́njẹgbonu yì yé de, bo dọmọ, Owhẹ̀jẹhó tẹwẹ mì hẹn wá dawe he go? ³⁰Yé gblọn bo dọ hlan ẹn, do Eyín dawe he ma yín oylanwato de, mìwlẹ ma do jo e hlan we gba. ³¹Enẹwutu Pilati dọ hlan ye, dọ, Milọsu yí i, bo dawhèna ẹn kededi osen mìtọn. Ju le dọ hlan en, dọmọ, E ma jẹ na mi gbon osén dali nado hù mẹde gba. ³²Na ohó Jesu tọn nido di, ehe é dọ do DO oku he hunkọ é na kú hia.

³³Enewutu Pilati sọ vọ gbàngan owhèda ton mẹ biọ, bo ylọ Jesu, bo dọ hlan en, dọ, Be Ahọlu Ju lẹ tọn we mẹ? ³⁴Jesu sọ gblọn dọmo, Hiẹ dọ ehe na dewe, kavi mede dọ ẹ na we gbon yen ton dali? ³⁵Pilati sọ gblọn dọmọ, Ju de we yẹn? Akọta towe titi, po ogán yẹwheno lẹ tọn po we jo we hlan mi: etẹwẹ hiẹ wà? ³⁶Jesu sọ gblọn dọmọ, Ahọludu ṣie ma yín aihọn he tọn gba: eyín ahọludu ṣie ko yín aihọn he tọn, be awhàngán ṣie le do hoavùn, na yè ma na do jo mi hlan Ju le: ṣigba dinvie ahọludu ṣie ma yin son ofi gba. ³⁷Enewutu wẹ Pilati sọ dọ hlan en, dọ, Be ahọlu de wẹ hiẹ? Jesu so gblọn dọmọ, Hiẹ dọ dọ ahọlu de wé yẹn. Hlan opodo he wẹ yè ko do ji mi, podo hlan opodo he wẹ yẹn do wá aihọn mẹ, na yẹn nido dekunnu hlan nugbo lọ. Mẹdepope Le yín nugbo tọn sè ogbè ṣie ³⁸Pilati sọ dọ hlan ẹn, dọ, Ete wẹ nugbó? Podọ whenuena é dọ ehe, é sọ: vó tónjẹgbónu yì Ju lẹ de, bo dọ hlan yé, dọ, Yen ma mọ oylan depope to ewọ mẹ gba. ³⁹Ṣigba mì tindo owàlọ de do; yen ni nọ dè ome dopo dai hlan mì to juwayì mẹ: enẹwutu mìwlẹ jlo na yen ni dè Ahọlu Ju lẹ tọn dai hlan mì? ⁴⁰Enẹwutu yé ome pó sọ vó awhádo dọ, Dawe he ma gba, adavo Balabas. Dinvie whébétọ de wẹ Balabas.

¹ENẸWUTU whenenu we Pilati yí Jesu, bo hò e. ²Awhanvipẹ le sọ lòn ojegbakun owun tọn de, bo yí ṣinyọn ota nẹ, bo sọ yí awù ogefunwunmẹ tọn do nẹ̃, ³bo dọmọ, Oyínjla, Ahọlu Ju le tọn! ye sọ yí alọhomẹ yetọn do doasífén en. ⁴Enẹwutu Pilati sọ vó tọ́njegbonu yì, bo dọ hlan yè, dọ, Mì pon, yẹn sọ hẹn en jẹgbonu wá mì de, na mì nido yọnẹn dọ, yẹn ma mọ ylando de to ewọ mẹ gba ⁵Enẹwutu Jesu tonjẹgbonu wá, yè sinyon ojegbakun owun tọn nẹ̃ bo sọ do awù ogefunwunmẹ tọn nẹ̃. Pilati sọ dọ hlan yé, dọmọ, Mì pọ́n dawe lọ! ⁶Enẹ wutu whenuena ogán yẹwhenọ lẹ tọn, po ogán lẹ po mọ ẹn, yé dawhá daga dọ, Whè e do satin go! whè e do satin go! Pilati sọ dọ hlan yé, dọ, Mìlọsu yí i, bo whè e do satin go: na yẹn ma mọ ylando de to ewọ mẹ gba. ⁷Ju lẹ sọ gblọnna ẹn, dọ, Mìwlẹ tindo osén de, podọ gbọn osén nẹ dali é jẹ nado kú, na ewọ yí ede do basi Ovi Jiwheyẹwhe tọn wutu. ⁸Enẹwutu whenuena Pilati sè ohó he, obu di i humọ talala; ⁹é sọ vó gbàngan owhẹda tọn mẹ biọ, bo dọ hlan Jesu, dọ, Fie wẹ hiẹ sọn? Ṣigba Jesu ma na gbègbingblọn de e. ¹⁰Enẹwutu Pilati dọ hlan ẹn, dọ, Hiẹ ma dọhó hlan mi? be hiẹ ma yọnẹn dọ yẹn tindo asè nado whè we do satin go, bo sọ tindo aẹó nado dè we do ote? ¹¹Jesu sọ gblọn nẹ̃ dọmọ, Hiẹ ma do ko tindo asé de to oji e gba, adavo yè nawe sọn aga: enẹwutu ewọ he jo mi hlan we wẹ tindo ylandó klohú. ¹²Ehe ji wẹ Pilati din nado dè e do ote: ṣigba Ju lẹ dawhá lélé dọ, Eyin hiẹ jo dawe he dai, be hiẹ ma yín họ́ntọn Sesali tọn gba: mẹdepope he yí ede do basi ahọlu de, jagò do Sesali. ¹³Enẹwutu whenuena Pilati sè ohó helẹ, é hẹn Jesu jẹgbonu wá, bo sọ sinai do ofìn owhẹda tọn ji, to ofi he yè nọ ylọ dọ, Zannutité, ṣigba to ogbè Heblu tọn mẹ, Gabbata. ¹⁴E sọ yín awuwle juwayì tọn gbè, to ogàn sidopotọ jlẹmẹ: é sọ dọ hlan Ju lẹ, dọ, Mi pọ́n ahọlu mìtọn ¹⁵Enẹwutu yé dawhá lélé dọ, Dè e sè, dè e sè, 1 whè e do satin go. Pilati sọ dọ hlan yé, dọ, Be yẹn na whè Ahọlu mìtọn do satin go? Ogán yẹwhenọ lẹ tọn dọmọ, Mìwlẹ ma tindo ahọlu de, adavọ Sesali. ¹⁶Enẹwutu whenẹnu wẹ é jo e hlan yé, nado yín whiwhe do satin go. Enẹwutu yé yí Jesu; ¹⁷ewọ sọ yì gbonu hìnhẹn satin ede tọn jẹ ofi otaka de tọn lọ, he yè nọ ylọ to Heblu mẹ Golgọta: ¹⁸ofi he yé whè e do satin go te podọ omẹ awe devo po e po, ode to awà he ji, awetọ to awà awetọ ji, Jesu tin to ṣẹnṣẹn. ¹⁹Pilati sọ wlan owó de bo yí i do satin ji. Owé winwlan lọ we, JESU NAZALẸTI TỌN, AHỌLU JU LẸ TON. ²⁰Enẹwutu susu Ju lẹ tọn wẹ hia owé kinkan he; na ofi he yè whè Jesu do satin go te sepó otòdaho lọ: yè sọ kàn ẹn to ogbè Heblu tọn mẹ, tò Gleki tọn mẹ, podọ to Latini tọn mẹ. ²¹Enẹwutu yẹwhenọ daho Ju lẹ tọn dọ hlan Pilati, dọ, A wlan dọ, Ahọlu Ju lẹ tọn blo; ṣigba dọ ewọ dọmọ, Yẹn wẹ Ahọlu Ju lẹ tọn. ²²Pilati sọ gblọn dọmọ, Onu he yẹn ko wlan, yẹn ko wlan.

²³Enẹwutu awhanvipẹ lẹ, whenuena yé whè Jesu do satin go, yí avọ̀ etọn, bo má ẹn do donù ẹnẹ, dopo hlan awhanvipẹ dopodopo; podọ awù etọn ga: awù lọ ma tindo titọtẹn, yè lón ẹn sọn aga kaka yìdo. ²⁴Enẹwutu yé dọ to yede ṣẹnṣẹn j dọ, Mì dike mí tlẹn ẹn blo, ṣigba mí ni do ovò e ji, mẹhe tọn é na yín: na yè nido hẹn Owé wiwe di, ehe dọmọ, Yé má avọ̀ ṣie to yéde ṣẹnṣẹn, Bo sọ do ovò áwù ṣie ji. Enẹwutu onú helẹ wẹ awhanvipẹ lẹ wà. ²⁵Omẹ delẹ site to ofi he satin Jesu tọn te, onọ etọn po nọviyọnnu onọ etọn tọn po, Malia asi Kleopasi tọn, po Malia Magdaleni po. ²⁶Enẹwutu whenuena Jesu mọ onọ etọn po nuplọntọ lọ po, mẹhe Jesu yiwanna site to finẹ, é dọ hlan onọ etọn, dọ, Yọnnu, pọ́n ovisunnu towe. ²⁷Whenẹnu wẹ é sọ dọ hlan nuplọntọ lọ, dọ, Pọ́n onọ towe. Sọn ojlẹ nẹ mẹ wẹ nuplọntọ lọ ko plan ẹn yì owhé ede tọn gbè.

²⁸To ehegodo, Jesu yinyọnẹn dọ yè ko dotana onú lẹpo to dinvie, na yè nido hẹn Owé wiwe di, é dọmọ, Ové hú mi. ²⁹Yè zé núzinzán de do ote to finẹ, ehe gó na ovẹ̃n vivé; mọwẹ yé sọ ylón tekan de do ovẹ̃n vivé mẹ, do atin hisọpe tọn ji, bo hẹn ẹn wá onù etọn. ³⁰Enẹwutu whenuena Jesu yí ovẹ̃n vivé lọ, é dọmọ, E vò: é sọ dé ota etọn, bo jo gbigbọ etọn do.

³¹Enẹwutu Ju lẹ, na é yín awuwlegbè wutu, dọ osiọ ma na do tin to satin gò to azán gbọjẹ tọn gbè, (na azán daho de wẹ azán gbọjẹ tọn nẹ) biọ to Pilati si dọ yè ni wén asapadahu yetọn, podọ na yé nido yín zizé sè. ³²Enewutu awhanvipẹ lẹ wá, bo wén asapadahú omẹ tintan tọn, po omẹ awetọ tọn po, he yè whè do satin go po e po lẹ: ³³ṣigba whenuena yé wá Jesu de, bo mọ dọ é ko ku, yé ma wén asapadahú etọn gba. ³⁴Ṣigba dopo to awhanvipẹ lẹ mẹ yí owhán, bo só adaja mẹ nẹ̃, afọdoponẹji ohùn po osìn po sà jẹgbonu. ³⁵Podọ ewọ he mọ ẹn dékunnu, nugbo sọ wẹ okunnu etọn: é sọ yọnẹn dọ nugbo wẹ é dọ, na mìwlẹ ga nido yise. ³⁶Na yè wà onú helẹ, na yè nido hẹn Owé wiwe di, Ohú etọn de ma na yín gbigbà. ³⁷Owé wiwe devo ga, sọ dọmọ, Yé na to pinpọ́n mẹhe yè sọ whán.

³⁸To onú helẹ godo we Josẹfu Alimate tọn, mẹhe yín nuplọntọ Jesu tọn de, ṣigba é ma yín to gbangba, na osi Ju lẹ ton wutu, biọ to Pilati de na é nido zé osiọ Jesu tọn sè: Pilati sọ degbè nẹ̃. Enẹwutu é wá, bo zé ọsiọ etọn yì. ³⁹Nikódemi sọ wá finẹ ga, mẹhe wá é de dai to ozán mẹ, é hẹn oflusọ zuya pò aloe po tọn wá, é yì ojlé kanweko hunkọ. ⁴⁰Mọwẹ yé zé osiọ Jesu tọn, bo yí alà do bla ẹ po nuwhẹnkún po, kẹdẹdile owàlọ Ju lẹ tọn yín to osiọ didi yetọn mẹ. ⁴¹Ojipa de tin to ofi he yè whè e do satin go te; oyèwhé yóyè de tin to ojipa lọ mẹ, ehe mẹ yè ma tó omẹ depope do gbède. ⁴²Finẹ wẹ yé tó Jesu do, na awuwlezán Ju lẹ tọn wutu; na oyòwhó lọ sẹpọ́ talala.

¹TO azọ́n Tin Tan ọsè tọn to afọnnufliflimẹ, whenuena zinvlu pò to ai, wẹ Malia Magdaleni wá oyòwhé lọ kòn, bo sọ mọ dọ yè ko zé ozannu sè sọn oyòwhó lọ ji. ²Enẹwutu ewọ dowezun, bo wá Simọni Pita de, po nuplọntọ devo lọ po de, mẹhe Jesu yiwanyina, bo dọ hlan yé dọ, Yé ko zé Oklunọ sè sọnoyòwhé lọ mẹ, mí ma sọ yón ofie yé ko té ẹ do gba. ³Enẹwutu Pita tọn jẹgbonu yì po nuplọntọ devo lọ po to yìyì jlọdo oyòwhé lọ ji. ⁴Mọwẹ yé omẹ awe lẹ họnwezun dopọ: nuplọntọ devo lọ họnwezun jẹnukọnna Pita, bo wá oyòwhó lọ kòn. ⁵E fè, bo pọ́n e mẹ, bo mọ alà lọ to ai; ṣigba ewo ma biọ e mẹ ⁶Whenẹnu Simọni Pita, he hodo e, wá, bo biọ oyòwhé lọ mẹ, bo mọ alà to ai. ⁷Podọ dukù, he tin to ota etọn dali, ma to opó po alà lọ po gba, ṣigba yè há ẹ dopọ do apadopo na ede. ⁸Enẹwutu whenẹnu nuplọntọ devo lọ, mẹhe whéwhé wá oyòwhé lọ kòn, biọ e mẹ ga, é mọ, bo sọ yise. ⁹Na kakajẹ dinvie yé ma ko yón Owé wiwe lọ, dọ ewọ ma sogan nọ ma fọ́n sọn okú. ¹⁰Mowẹ nuplọntọ lẹ lọ yì owhé yetọn titi gbè.

¹¹Ṣigba Malia site to oyòwhé lọ kòn to gbonu, bo to avivi: mọwẹ le é to ávivij é fẹ, bo pọ́n oyòwhé lọ mẹ, ¹²bo mọ angẹli awe avọ̀ wówónọ sinai, ode to ota dali, awetọ to afọ dali, to ofi he osiọ Jesu tọn mlọnai te. ¹³Yé sọ dọ hlan en, dọ, Nawe, etẹwutu hiẹ to avivi? Ewọ sọ dọ hlan yé, dọ, Na ye ko zé Oklunọ ṣie sè, yẹn ma sọ yón ofi he yé tó ẹ do wutu. ¹⁴Whenuena é ko dọ le, é lé ede pọ́n godo, bo mọ Jesu to ote, é ma yọnẹn dọ Jesu wẹ gba. ¹⁵Jesu sọ dọ hlan ẹn, dọ, Nawe, etẹwutu hiẹ to avivi? Menu wẹ hiẹ to dindin? E lẹn dọ opahọtọ lọ wẹ, é sọ dọ hlan ẹn, dọ, Mẹdaho, eyín hiẹ ko zé e sọn ofi, dọ ofi he hiẹ té ẹ do na mi, yen nasọ zé e sè. ¹⁶Jesu dọ hlan ẹn, dọ, Malia. Ewọ sọ lé ede, bo dọ hlan ẹn, dọ, Labboni; ehe yín, Meplọntọ. ¹⁷Jesu sọ dọ hlan ẹn, dọ, A do alọ ogo e blo; na yẹn ma ko hẹji yì Oto ṣie de gba: ṣigba yì mẹmẹsunnu ṣie lẹ de, bo dọ hlan yé, dọ, Yẹn hẹji jei Oto ṣie po Otò mìtọn po de; podọ Jiwheyẹwhe ṣie po Jiwheyẹwhe mìtọn po de. ¹⁸Malia Magdaleni wá, bo dọ hlan nuplọntọ lẹ dọ, Yẹn ko mọ Oklunọ, podọ le ewọ ko dọ onú helẹ hlan ẹn do.

¹⁹Enẹwutu whenuena é yín whèjai azán doponẹ tọn, azán tintan osè tọn, whenuena yè ko sú ohòn lẹ, to ofì he nuplọntọ lẹ pli do, ná osi Ju lẹ tọn wutu, Jesu wá, bo ṣite to yé ṣẹnṣẹn, bo dọ hlan yé, dọ, Jijọho ni tin hlan mì. ²⁰Whenuena é ko dọ ehe, é do alọ etọn po adaja etọn po hia hlan yé. Enẹwutunuplọntọ lẹ yín homẹhunnọ, whenuena yé mọ Oklunọ. ²¹Enẹwutu Jesu sọ vò dọ hlan ye, dọ, Jijọho ni tin hlan mì: le Otọ́ do mi hlán, yèdọ mọ wẹ yẹn do mì hlan do. ²²Podọ whenuena é dọ ehe, é gbò do yé ji, bo dọ hlan yé, dọ, Mì yí Gbigbọ Wiwe: ²³ylando mẹdepepe tọn lẹ mì joná yé yín jijona hlan yé; ylando mẹdepepe tọn lẹ mì hèndote, yé yín hinhèndote.

²⁴Ṣigba Tọmasi, dopo to omẹ wiawe lẹ mẹ, he yè nọ ylọ Didimu má tin to yé de whenuena Jesu wá gba. ²⁵Enẹwutu nuplọntọ he pò lẹ dọ hlan ẹn, dọ, Mìwlẹ ko mọ Oklunọ. Ṣigba ewọ dọ hlan yé, dọ, Adavo yẹn mọ apà ohúngan tọn to alọ etọn mẹ bo sọ yí alọviyẹyẹ ṣie do apà ohúngan lẹ lọ tọn mẹ, bo sọ yí alọ ṣie do adaja etọn mẹ, yẹn ma na yise.

²⁶To azán sinatòn godo, nuplọntọ etọn lẹ sọ vó tin to họmẹ, Tọmasi tin to yé de: Jesu wá, le ohòn lẹ to súsu, bo site to ṣẹnṣẹn, bo domọ, Jijọho ni tin hlan mì. ²⁷Whenẹnu wẹ é dọ hlan Tọmasi, dọ, Yí alọviyẹye towe wá ofi, bo pọ́n alọ ṣie bo sọ yí alọ towe wá ofi, bo yí i do adaja ṣie me: hiẹ yín mayisenọ blo, ṣigba yisenọ ²⁸Tọmasi sọ gblọn bo dọ hlan en, do, Oklunọ ṣie, Jiwheyẹwhe ṣie. ²⁹Jesu sọ dọ hlan ẹn, dọ, Tọmasi, na hiẹ mọ mi wutu wẹ hiẹ yise; donanọ wẹ yé he ma mọ bo yise lẹ.

³⁰Enẹwutu ohia susu devo lẹ wẹ Jesu basi, to nuplọntọ lẹ nukọn, ehe yè ma wlan do owé he me: ³¹ṣigba ehelẹ wẹ yè wlan, na mì nido yise dọ, Jesu wẹ Klisti, Ovi Jiwheyẹwhe ton; dọ to yiyise mẹ mì nido tindo ogbè to oyín etọn mẹ.

¹TO onú helẹ godo, Jesu sọ vò ede dohia hlan nuplọntọ lẹ to ohùtó Tibéliade tọn; le wẹ é do ede hia gbọn. ²Simoni Pita po Tọmasi po, mehe yè nọ ylọ Didimu, po Natanaẹli Kana Galili mẹ tọn po, po ovisunnu Zẹbedé tọn lẹ po, podọ awe devo sọn nuplọntọ etọn lẹ mẹ, tin to opó. ³Simoni Pita dọ hlan yé, dọ, Yẹn jei whevi hù gbé Ye sọ dọ hlan ẹn, dọ, Mí na yì hẹ we ga. Yé tọ́njẹgbonu yì bo biọ vàtlẹ lọ mẹ to afọdoponẹji; to ozán ne mẹ yé ma wlé nudepope. ⁴Ṣigba whenuena ai to hìnhọn, Jesu site to ohùtó: ṣigba nuplontọ le ma yọnen dọ Jesu we gba. ⁵Enewutu Jesu dọ hlan yé, do, Yọpọ emi, mì tindo núde nado dù? Yé sọ gblọnna en, dọ, Lala. ⁶E sọ dọ hlan yé dọ, Mì dlẹn odò do adusiwaji vàtlẹ lọ tọn, mì nasọ mọ. Enẹwutu yé dlẹn, yé ma sọgan dòn en na ogégé whevi tọn. ⁷Enewutu nuplontọ nẹ mehe Jesu yiwanna dọ hlan Pita, dọ, Oklunọ we. Whenuena Simoni Pita sè dọ Oklunọ wẹ, é sìn whehùtowu etọn do ogo, (na omẹ wẹ é te,) é so lọn je ohù mẹ. ⁸Nuplọntọ devo lẹ sọ zọn vátlẹ pevi de mẹ wá: (na yé ma den do age, ṣigba é sò awàgba fọde,) bo to odò lọ dòn po whevi lẹ po ⁹Mowẹ whenuena yé wá age, yé mọ miyọnkán to fìne, yè té whevi de do e ji, po akla de po ¹⁰Jesu sọ do hlan yé, dọ, Mì yí vude to whevi he mì hù dinvie le mẹ wá. ¹¹Enewutu Simọni Pita heji yì aga bo dòn odò jẹ age, é gó na whevi gbògbo, kennẹ é whe sinanwe: le yé sù sò, odọ lọ ma tlẹn. ¹²Jesu sọ dọ hlan yé, dọ, Mì wá dùnú. Mẹdepope to nuplọntọ lẹ mẹ ma ha nado kanbio ẹ dọ, Mẹnu wẹ hiẹ? na ye yọnẹn dọ Oklunọ wẹ. ¹³Jesu sọ wá, bo yí akla bo yí na yé, mọkẹdẹ wẹ whevi ga. ¹⁴Ehe dinvie wẹ whlatòntọ bo Jesu do ede hia hlan nuplọntọ lẹ, to godo he é fọ́n sọn osiọ lẹ mẹ.

¹⁵Mọwẹ whenuena yé ko dùnu, Jesu dọ hlan Simọni Pita, dọ, Simọni, ovisunnu Jona tọn, hiẹ yiwanna mi hú ehelẹ? E sọ dọ hlan ẹn, dọ, Mọwẹ, Oklunọ; hiẹ yọnẹn dọ yẹn yiwanna we. E sọ dọ hlan ẹn, dọ, Yìn lẹngbọvu ṣie lẹ. ¹⁶E sọ vó dọ hlan ẹn whlaweto, do, Simọni, ovisunnu Jona tọn, hiẹ yiwanna mi? E sọ dọ hlan en, dọ, Mọwẹ, Oklunọ; hie yọnen dọ yẹn yiwanna we. E sọ dọ hlan en, dọ, Yìn lẹngbọ ṣie lẹ. ¹⁷E sọ dọ hlan ẹn whlatòntọ, dọ, Simọni, ovisunnu Jona tọn, hiẹ yiwanna mi? Pita gblehomẹ na e dọ hlan ẹn whlatòntọ, dọ, Hie yiwanna mi wutu? E sọ do hlan ẹn, dọ, Hiẹ yón onú popo, Okluno; hiẹ yonẹn dọ yẹn yiwanna we. Jesu dọ hlan ẹn, dọ, Yìn lẹngbọ ṣie lẹ. ¹⁸Nugbo, nugbo, wẹ yẹn dọ bian we, whenuena hiẹ tin afìanme, hiẹ nọ blagbajana dewe, bo nọ zinzọnlin yì ofi he hiẹ jlo: ṣigba whenuena hiẹ na poyọnhó, hiẹ na dlẹn alọ towe lẹ jegbonu, medevo na blagbajana we, bo sọ dòn we yì ofi he hiẹ ma jlo. ¹⁹E dọ ehe dinvie, do dohia okú he mẹ e na pagigona Jiwheyẹwhe gbọn. Podọ whenuena é ko dọ ehe, e dọ hlan ẹn, dọ, Hodo mi ²⁰Pita lilégodo, mọ nuplọntọ lọ, mẹhe Jesu yiwanna, ja to godo; mẹhe dẹ hlangodo to akónnu etọn, to núdùdù tenu tọn kòn, bo domọ, Okluno, mẹnu wẹ ewọ he na dè we hia? ²¹Enẹwutu Pita mimọ ẹn dọ hlan Jesu, dọmọ, Oklunọ, etẹ wẹ dawe he na wà? ²²Jesu dọ hlan en, dọ, Eyín yen jlo dọ ewọ ni nọte kaka yen na do wa, etẹ we enẹ yin hlan hie? hiẹ to hihodo mi. ²³Enẹwutu ohó he gbapé mẹmẹsunnu lẹ ṣẹnṣẹn, dọ nuplọntọ ne ma na kú gba: gãnṣo Jesu mẹ dọ hlan ẹn, dọ, Ewọ ma na kú gba; ṣigba. Eyín yẹn jlo dọ ewọ ni nọte kaka yẹn na do wá, etẹ wẹ ene yín hlan hiẹ?

²⁴Ehe wẹ nuplontọ lọ he dekunnu onú hele tọn, bo sọ wlanwe onú helẹ tọn mìwlẹ sọ yonen dọ nugbo wẹ okunnude etọn.

²⁵Onú susu devo le tin ga he Jesu wà, ehe, eyín yè na wlanwe ye ome pó tọn dopodopo, yen lẹnpon dọ aihọn lọsu ma na hẹn owé he yè do wlan lẹ gba. Niṣẹ.