Jakobu

¹JAKOBU afànume Jiwheyẹwhe tọn po Jesu Klisti Oklunọ po tọn, hlan whẹndo wiawe he gbàpé lẹ, ayajẹ.

²Mì mẹmẹsunnu ṣie emi, whenuena mì jẹ whlepón hunkọhunkọ mẹ, mì hia ẹ na ayajijẹ popo; ³na mì ni sọ yón ehe dọ whlepón yise mìtọn tọn wẹ nọ wàzón homẹfa tọn. ⁴Ṣigba mì gbọ homẹfa ni wàzón etọn tla, na mì nido sogbè, na mì nido pégan, núde sọ pò blo.

⁵Eyín mẹde ma tindo nuyọnẹn to mì mẹ, ni kanbiọ to Jiwheyẹwhe de, mẹhe nọ na omẹ susugege, bo ma nọ wóhẹ omẹ, yè na na ẹn. ⁶Ṣigba ni biọ to yise mẹ, to matin ayi awe mẹ. Na ewọ he do ayi awe, é taidi agbowhẹn ohù tọn, he gbọn alọ jẹhọn tọn mẹ to bibli hlan nukọn bibli hlan godo. ⁷Na omẹ lọ len dọ é na mọ núde yí to Oklunọ de blo. ⁸Gbẹtọ ayiha awenọ ma sọgan hẹn ede lódo to ali etọn lẹpo ji gba.

⁹Ṣigba gbọ mẹmẹaunnu whiwhẹnọ ni jaya na yè zé e daga wutu: ¹⁰ṣigba adọ-kunnọ, dọ yè zín in dai wutu: na di vovó ogbé tọn, mọwẹ é na ju yì. ¹¹Na le owhè zẹ po oyózo po, bo nọ hẹn ogbe yọ, bọ vòvó etọn sọ nọ ja kọnyinai, bọ whanpẹ jijọ etọn tọn sọ nọ súdo: mọkẹdẹ ga wẹ adọkunnọ na kupó do to ali etọn lẹ ji.

¹²Donanọ wẹ dawe lọ he doakónna whlepón: na whenuena yè tén ẹn pọn, é na yí ojegbakun ogbè tọn, he Oklunọ ko dopagbe hlan yé he yiwan nẹ lẹ. ¹³Whenuena yè whle mẹde pọ́n, é dọmọ Jiwheyẹwhe de wẹ yè whle e pọ́n sọn blo: na yè ma sọgan yí oylan do whle Jiwheyẹwhe pọ́n gba, mọ é ma sọ nọ whle mẹdepope pọ́n: ¹⁴ṣigba omẹ dopodopo wẹ yè whlepón, whenuena yè gbọn wantúntún etọn titi dali dòn ẹn yì, bọ yè sọ doyèklọ ẹ. ¹⁵Whenẹnu, wantúntún, whenuena é mọhò, é ji ylando: podọ ylando, whenuena yè basi i pó, é ji okú. ¹⁶Mì buali blo, mì mẹmẹsunnu ṣie yiwanna emi. ¹⁷Nunina dagbedagbe po nunina he sogbè lẹpo po, aga wẹ é sọn, bo sọ jete sọn Otọ́ hinhọ́n lẹ tọn de, mehe de didiọ de ma te, kavi oyẹ́ lilẹpe tọn. ¹⁸Sọn ojlo etọn mẹ wẹ é yí ohó nugbo tọn do hẹn mí jẹgbonu wá, na mí nidó yín sinsẹ́n tintan de to nudida etọn lẹ mẹ.

¹⁹Enẹwutu, mì mẹmẹsunnu yiwanna ṣie emi, omẹ dopodopo ni nọ yawu nado sè, ni whleawu nado gblọn, bo sọ whleawu nado gblehomẹ: ²⁰na homẹgble gbẹtọ tọn ma nọ wàzón dódó Jiwheyẹwhe tọn gba. ²¹Enẹwutu mì yí diho po oylan wàzlẹjẹgo lẹpo po do apadopo, bo sọ yí wàlọmimiọn do yí ohó yè do do mì homẹ lọ, ehe sọgan whlẹn ayiha mìtọn gán. ²²Ṣigba mì ni yín basitọ ohó lọ tọn, mì yín sisètọ kẹdẹ blo, to mìde kiklọ mẹ. ²³Na eyín mẹde yín sisètọ ohó lọ tọn, bọ é ma yín basitọ gba, é taidi dawe de he tọ nukunmẹ etọn yè ji po e po pọ́n to mẹpónnu me: ²⁴na whenuena é pọ́n ede pó, bo tón yì, to afọdoponẹji é wọn omẹ he hunkọ ewọ yín. ²⁵Ṣigba mẹdepope he donu osén mẹdekannujẹ tọn he sọgbè lọ mẹ pọ́n, bo sọ nọte to e mẹ, bọ ewọ ma yín sisètọ nuwọntọ, ṣigba azón lọ basitọ, omẹ lọ wẹ yè na dona to bibasi etọn mẹ. ²⁶Eyín mẹde to mì mẹ sọawúhia nado yín sinsẹ̀ntọ, bo ma dogàn odẹ́ etọn, ṣigba bo to ayiha ede tọn klọ, sinsẹ̀n omẹ he tọn ovọ́ wẹ. ²⁷Sinsẹ̀n wiwe magble to Jiwheyẹwhe Otọ nukọn wẹ ehe, Nado nọ dla tọsiọvi po asuṣiọsi lẹ po pọ́n to nukunbibia yetọn mẹ, podọ nado whlá ede madodiho sọn aihọn de.

¹MẸMẸSUNNU ṣie lẹ emi, mì yí mẹhọ̀pọ́n gbẹtọ tọn do tindo yise Jesu Klisti Oklunọ mítọn, Oklunọ gigo tọn, blo. ²Na eyín mẹde wá plito mìtọn po sika lọkẹ́ po, po avọ̀ dagbedagbe po, bọ wamọnọ de sọ wá to avọ̀ dùdú mẹ; ³bọ mì gbògbéna ewọ he ṣinyọn avọ̀ dagbedagbe, bo sọ dọ hlan ẹn, dọ, Hiẹ sinai to ofi to otẹn dagbe mẹ; bo sọ dọ hlan wamọnọ lọ, dọ, Hiẹ nọte finẹ, kavi dọ, Wá sinai to tokloafọlìgbe ṣie glọ: ⁴be mìwlẹ ma zùn nudèdẹtọ to mìde mẹ mọ, bo sọ lẹzun whẹdatọ línlẹn ylankan tọn? ⁵Mì dotóai, mì mẹmẹsunnu yiwanna ṣie lẹ emi, Be Jiwheyẹwhe ma ko dè wamọnọ aihọn he tọn lẹ do basi adọkunnọ yise tọn, podọ whédutọ ahọludu lọ tọn he é dopagbe etọn hlan yé he yiwan nẹ̃ lẹ? ⁶Ṣigba mìwlẹ to wamọnọ dèpò. E ma yín adọkunnọ lẹ wẹ nọ bianukunna mì, bo sọ nọ dọn mì yì whẹdajan nukọn? ⁷Be yé ma nọ zannù do oyín yẹyinọ lọ go, ehe yè do nọ ylọ mì? ⁸Eyín mìwlẹ yìn tado osén tọn lọ dile Owé wiwe te, Hiẹ na yiwanna kọmẹnu towe di dewe, mì wà dagbe: ⁹ṣigba eyín mì tindo mẹhòpọ́n gbẹtọ tọn, oylan wẹ mì wà, yè sọ hẹn mì hùwhẹ gbọn osẹ́n dali di sẹ́nmẹjẹtọ. ¹⁰Na mẹdepope he yìn osẹ́n lẹpo, bo sọ wàylan to awà de ji, é ylanwhẹ popo tọn. ¹¹Na ewọ he dọmọ, A deayò blo, wẹ sọ dọ ga, dọ, À hùmẹ blo. Be eyín hiẹ ma deayò, ṣigba eyín hiẹ hùmẹ, hiẹ lẹzun sẹ́nmejẹtọ. ¹²Mì to mọ dọ, bo sọ to mọ wà, di omẹ he tin nado yín whèdana gbọn osẹ́n mẹdekannujẹ tọn de dali. ¹³Na whẹ̀dida tin matin lẹblanu hlan ewọ he ma ko do lẹblanu hia: lẹblanu sọ to awàgundo to whẹ̀dida ji.

¹⁴Mẹmẹsunnu ṣie emi, ale tẹwẹ, eyín mẹde dọmọ, ewọ tindo yise, bo ma tindo azọ̀n? be yise nẹ sọgan whlẹn ẹn gán? ¹⁵Eyín mẹmẹsunnu kavi memeyọnnu dẹ yẹmé, bo ma tindo nudùdù gbèdopo tọn, ¹⁶bọ dopọto mímẹ dọ hlan yé, dọ, Mì yì jijọho, awutu mìtọn ni hunmiyọn, na mì nigọhò; bo ma yí onú he agbasa yetọn ma tindo lẹ na yé gba; ale tẹwẹ enẹ? ¹⁷Mọkẹdẹ wẹ yise, eyín é ma tindo azẹ́n, yín oṣiọ to ede mẹ. ¹⁸Mẹde sọgan dọmọ, Hiẹ tindo yise, yẹn sọ tindo azọ́n: yí yise towe hia mi matin azón towe, yẹn nasọ yí yise ṣie hia we gbọn azún, ṣie dali. ¹⁹Hiẹ yise dọ, Jiwheyẹwhe dopo wẹ tin; hiẹ basi dagbe: aovi lẹ yise ga, bo sọ sisọ. ²⁰Ṣigba hiẹ, omẹ vọnu, jlo na yọnẹn dọ, yise matin azón é kú? ²¹Gbọn azọn dali ma wẹ yè sùwhẹna Ablaham otọ́ mítọn, whenuena é yí ovi ètọn sunnú Isaki do sánvọ́ to agbà lọ ji? ²²Hiẹ mọ le yise nọ yi po azọ́n etọn lẹ po do, podọ gbọn azon dali wẹ yè hẹn yise sọgbè? ²³Yè sọ hẹn Owé wiwe di he dọmọ, Ablaham yí Jiwheyẹwhe se, yè sọ hia ẹ hlan ẹn na dódó: yè sọ ylọ ẹ dọ Hóntọn Jiwheyẹwhe tọn. ²⁴Mì mọ le yè gbọn azọ̀n dali sùwhẹna gbẹtọ-do, bọ é ma yín gbọn yise dopokẹdẹ dali. ²⁵E ma yín mọkẹdẹ wẹ yè sùwhẹna Lahabu galọtọ gbọn ázón dali ga, whenuena é yí mẹdagun lẹ, bo do yé gbọn ali devo jẹgbonu yì? ²⁶Na; le agbasa matin gbigbọ yín osiọ, mọkẹdẹ wẹ yise matimazọn yín osiọ ga.

¹MÌ mẹmẹsunnu ṣie emi, mì yín mẹplọntọ susu blo, na mì ni yọnẹn dọ mìwlẹ wẹ yè na gblewhẹdo gbahú. ²Na onú susu mẹ wẹ mí omẹ popo to ylanwà te. Eyín mẹde ma wàylan to ohó mẹ, ewọ lọ wẹ sọgbè, ewọ we sọgan dọgànnuna agbasa lẹpo ga. ³Do ayi e go, mìwlẹ nọ yí ogàn do onù na osọ́, na yé nido sè mítọn: mí sọ nọ lẹ́ agbasa yetọn pẹ́. ⁴Do ayi ohún lẹ go ga, le yé klo sọ, bo nọ gbọn jẹhọn sinsinyẹn dali jupẹ́, mọ húndonu wádawáda nẹ wẹ yè do nọ diọkọ nẹ̃ pé, hlan ofi depope húntọ jlo. ⁵Mọkẹdẹ wẹ odẹ́ yín awutugonu pẹvi de, bo sọ nọ sinadan onú he klo tọn. Do ayi onú daho he miyọn pẹvi nọ hẹn fiọ go ⁶Odẹ́ miyọn de wẹ, aihọn oylanwà tọn to awutugonu mítọn lẹ mẹ, bo nọ hẹn agbasa lẹpo gble, bo nọ simiyọn gbèzọnlin jọwamọ tọn, bọ yè sọ simiyọn ẹn gbọn olọnzo dali. ⁷Na kanlin alọpalọpa, ohè alọpalọpa? pa, odàn alọpalọpa, po onú he tin to ohù mẹ alọpalọpa po, we yè nọ whiwhẹ nukun na, mọ gbẹtọ dali wẹ yè gbọn do whiwhẹ nukunna yé: ⁸ṣigba odẹ́ wẹ gbẹtọ depope ma sọgan whiwhẹ nukun na; onu ylankan tólivẹtọ wẹ, é gọna adí okú tọn. ⁹Ewọ wẹ mí do nọpa Jiwheyẹwhe, yèdọ Otọ́; ewọ lọ wẹ mí sọ do nọ zùn gbẹtọ, he yè da to apajlẹ Jiwheyẹwhe tọn mẹ. ¹⁰Sọn onù dopo lọ mẹ wẹ pipa po ozùn po to tintọ́n sọn. Mì mẹmẹsunnu ṣie emi, onú helẹ ma jẹ ni yín mọ gba. ¹¹Be otòsisà sọn nuvo dopolo mẹ nọ ví osìn mimiọn po vivlẹ́ po jẹgbonu? ¹²mì mẹmẹsùnnu ṣie emi, be votin sọgan sẹ́n amitmsinsẹ́n? kavi ovẹ̃n sọgan sẹ́n votin? mọwẹ asisa nuvo de ma sọgan ví jẹsìn po osìn mimiọn po gba.

¹³Mẹnu wẹ nuyọnẹnto zìnzìnto to mì me? Mì gbọ ni yí azón etọn hia po walọmimion nuyọnẹn tọn po gbọn owalọ dagbe dali. ¹⁴Ṣigba eyín mì tindo awuwhàn vivẹ, po avùn po to ayiha mìtọn mẹ, mì doawagun blo, mì sọ dolalo do nugbo kò blo. ¹⁵Nuyọnẹn he ma jẹte sọn aga gbá, sigba aigbanù wẹ, gbẹtọ tọn wẹ, aovi tọn wẹ. ¹⁶Na fie awuwhàn po avùn po te, finẹ wẹ bẹ́wlu po azọ́n ylankan lẹpo po te ga. ¹⁷Ṣigba nuyọnẹn he sọn aga wẹ wé, whenẹnu wẹ é yín jijọho, bo sọ nọ wà dẹdẹ, é ma sinyẹnawú nado vẹvẹ na, é gọ́ na lẹblanu po sinsẹ́n dagbe po, matin odiọ, matin yẹnuwiwà, ¹⁸Osinsẹ̀n dódó tọn wẹ yè to didó to jijọho mẹ gbọn yé he to jijọho basi lẹ dali.

¹FIE wẹ awhàn lẹ sọn wá podọ fie wẹ avùn sọn wá mì mẹ? é ma yín sọn ofì wẹ, yèdọ sọn nújijlo mìtọn lẹ mẹ, he to awhànfùn to awutugonu mìtọn lẹ mẹ? ²Mì to nújlo, mì ma sọ tindo: mì to hùhù, mì sọ to nukunkẹndó, mì ma sọgan mọyi: mì to avùnhò, mì sọ to awhànfùn, mọ mì ma sọ tindo, na mì ma kanbiọ wutu. ³Mì kanbiọ, mì ma mọyi, na mì kanbiọ jẹagò wutu, na mì nido zán ẹn nújijlo mìtọn le mẹ. ⁴Mì yọnnu ayòdetọ lẹ, be mìwlẹ má yọnẹn dọ họ́ntọnji hẹ aihọn, okẹ̀n wẹ é yín to Jiwheyẹwhe dẽ? na mẹdepope he na yín họ́ntọn aihọn tọn, kẹ̀ntọ Jiwheyẹwhe tọn wẹ. ⁵Be mì lẹn dọ Owé wiwe dọ yaya, dọ, Gbigbọ he tin to mì mẹ tọ nújlo hlan nuvẹun? ⁶Ṣigba é to ojọmiọn na omẹ deji. Enẹwutu é dọmọ, Jiwheyẹwhe ko diọnukunsọ goyitọ lẹ, ṣigba é yí ọjọmion na ayiha whiwhẹnọ lẹ. ⁷Enẹwutu mì lìta mìtọn ai hlan Jiwheyẹwhe. Mì diọnukunsọ legba; é nasọ hòn sọn mì de. ⁸Mì sẹpó Jiwheyẹwhe, ewọ nasọ sẹpọ́ mì. Mì kló alọ mìtọn, mì ylandonọ emi; mì sọ kló ayiha mìtọn, mì ayiawenọ lẹ. ⁹Na homẹ mìtọn ni gble, na mì ni so blawú, bo viavi; mì gbọ núkiko mìtọn ni lẹzun awubla, na ayajije mìtọn ni sọ lẹzun awúsinyẹn. ¹⁰Mi whiwhẹ mìde to Oklunọ nukọn, ewọ nasọ zé mì daga.

¹¹Mẹmẹsunnu emi, mì dọhó ylankan de do mìnọzọ go blo. Ewọ he dọhó ylankan do mẹmẹsunnu etọn go, bo sọ to owhẹ́ mẹmẹsunnu etọn tọn da, é to ohó ylankan dọ do osẹn go bo sọ to owhẹ̀ osén tọn da: ṣigba eyín hiẹ to whẹdana osẹn, hiẹ ma yín wiwàtọ osén tọn gba, adavo whẹdatọ. ¹²Sénnamẹtọ dopo wẹ tin, mẹhe sọgan whlẹn omẹ, bo sọ sọgan husúdo; hiẹ mẹnu wẹ to owhẹ́ kọmenu towe tọn da?

¹³Mì wá dinvie, mì he to didọmọ, Egbé kavi osò, mí na yì otòdaho he mẹ, mí na nò finẹ hò owhè dopo, mí na to ajọwà, bo na to ale dù: ¹⁴whenuena mìwlẹ ma yón onú he na jò to osò. Na etẹ wẹ gbigbọ mìtọn? Ávivi wẹ, he sọawúhia to whenu vude, bo sọ kẹ́n wáyì. ¹⁵Ehe wẹ jẹ mì ni nọ dọ, dọmọ, Eyín Oklunọ jlo, mí na tin, bo wà ehe kavi enẹ. ¹⁶Ṣigba dinvie mì to awagundo to goyíyí mìtọn mẹ, awagundido mọtọn hunkọ lẹpo wẹ oylan. ¹⁷Enẹwutu ewọ he yọ́n dagbe dọ wiwà wẹ, bo ma basi i, ylando wẹ é yín hlan ẹn.

¹MÌ yì dinvie, mì adọkunnọ emi, mì ni to avivi, bo sọ to awhádo na oya mìtọn he ja mì ji. ²Adọkun mìtọn gble, avọ̀ mìtọn lẹzun dùdù na odó ³Sika mìtọn po fataka po ko jẹkò: okò yetọn wẹ na yin kunnudènu de do mì ji, bo nasọ dù agbasalan mìtọn di miyọn. Mì ko bé adọkunnu pli dai na azán godo tọn lẹ. ⁴Mì dayi e go, azọnkuẹ azọ́ntọ he ko hòglèmẹnu mìtọn lẹ té tọn, he mì glọn dai gbọn bublu dali, to awhádo; podọ awhá yé he hòtẹ lẹ tọn biọ otó Oklunọ awhànpa lẹ tọn tọn mẹ. ⁵Mìwlẹ to vivi dù to aihọn mẹ, mì ko tin to ogbèdudu mẹ, bo sọ to ayiha mìtọn yìn, taidi to hùhù zángbè. ⁶Mì ko gblewhẹdo, bo sọ hù dódónọ: ewọ ma sọ diọnukunsọ mì.

⁷Enẹwutu, mẹmẹsunnu emi, mì sinyẹnlin kaka jẹ gigòwá-Oklunọ tọn whenu. Mì dayi e go, oglesi nọ nọtepọ́n sinsẹ́n họkuẹ aigba tọn, bo sọ nọ tindo linsinsinyẹn nẹ̃ dẹn, kaka é na do mọ ojikun tintan po godomẹ tọn po yí ⁸Mì sinyẹnlin ga; bo hẹn ayiha mìtọn lódo; na gigòwá whenu Oklunọ tọn to sisẹpó. ⁹Mì hlún do mìnọzo go blo, mẹmẹsunnu emi, na yè nikã gblewhẹdo mì: pọ́n, whẹdatọ site to ohòn lẹ nukọn. ¹⁰Mẹmesunnu ṣie emi, mì yí yẹwhegán he to hódọ to oyín Oklunọ tọn mẹ lẹ dò basi ohia oyaji tọn, po linsinsinyẹn tọn po. ¹¹Do ayi e go, mìwlẹ nọ hia yé he doakónna lẹ di donanọ. Mì ko sè homẹfa Jobu tọn, bo sọ mọ opòdo Oklunọ tọn; dọ awuvẹmẹtọ wẹ Oklunọ, lẹblanu etọn sọ bọ.

¹²Ṣigba hú onú popo, mẹmẹsunnu ṣie emi, mì yí núde do whlé blo, kavi yíyí olọn do whlé, kavi aigba yí do whlé, kavi whiwhlé devo depope; ṣigba mì gbọ mọwẹ mìtọn ni yín mọwẹ; lala mìtọn ni yín lala, na mì nikã jẹ whẹgbledo mẹ.

¹³Be mẹde to oyaji to mì mẹ? mì gbọ é ni hodè. Homẹ mẹde tọn vivi? mì gbọ é ni jihan wiwe. ¹⁴Mẹdepope jẹazòn to mì mẹ? mì gbọ ni ylọ mẹho agùn tọn lẹ, na yé ni hodẹ́ do e ji, bo kọn amisisa do ota nẹ to oyín Oklunọ tọn mẹ: ¹⁵podọ odẹ́ yise tọn na whlẹn azòntọ gán, Oklunọ nasọ zé e tite; eyín é ko sọ wàylan de, yè na jo nẹ. ¹⁶Mì yigbè ylando mìtọn tọn hlan mìnọzo, bo sọ nọ hodẹ na mìnọzo, na yè nido hẹn azọ̀n mìtọn gbọ. Odè zogbezogbe dódónọ de tọn magbọvọ nọ wàzọ̀n susu. ¹⁷Gbẹtọ owalọ di mítọn hunkọnọ Wẹ Eli, é hodẹ́ talala dọ jikun ja blo: é ma sọ jajikun do aigba owhè atọ̀n po osùn ṣidopo po. ¹⁸E sọ vọ́ dẹho, olọn sọ jajikun, aigba sọ hẹn sinsẹ́n etọn jẹgbonu wá.

¹⁹Mẹmẹsunnu emi, eyín mẹdepope buali sọn nugbo me to mì mẹ, bọ mẹde sọ hẹn ẹn gọ́; ²⁰gbọ ewọ ni yọnen dọ, ewọ he hen ylandono de gò sọn alibubu etọn mẹ, na whlẹn alindọn dopo sọn okú mẹ, bo nasọ whlá ylando susu.