Isaia

¹NUMIMỌ Isaia tọn, ovi Amọsi tọn he é mọ gbọn Juda po Jelusalẹm po dali, to Ozias, Jotani, Akaz, Ezekias, ahọlu Juda tọn lẹ whenu.

²Sè, mì olọn emì, sọ do ọtó ai, hiẹ aihọn, na OKLUNỌ ko dọhó, yẹn ko yìn bo pọ́n ovi go, ye ko sọ ṣàtẹ hẹ mi. ³Oyín yón klunọ etọn, kẹtẹkẹtẹ sọ yọn adọ́ klunọ etọn tọn, ṣigba Islaeli ma yọ́nẹn, omẹ ṣie lẹ ma sọ lẹnnu. ⁴Jẽ akọta ylankan omẹ he agbàn ylando tọn to pinpẹ́n, ovikun ylanwàtọ lẹ tọn, ovi he basi hẹngble: yé ko jó OKLUNỌ dai, yé ko hẹn homẹgblena Omẹ Wiwe Islaeli tọn, bo sọ jagọ̀ yì godo. ⁵Bé etẹ wẹ yè na zinnúdo mì na bà? mì na to atẹṣi do e ji jànwẹ; ota lẹpo wẹ jẹazọ̀n, ayiha lẹpo wẹ nudikọna. ⁶Sọn afọpàhòmẹ kaka jẹ ota, fivọ́ de ma tin to e mẹ; adavo alán, awúgble po agada yìnyọ̀n po: yé ma ko wlewùn, mọ yè ma ko bla yé, yè ma ko yí amì sá do yé. ⁷Otò mítọn jẹvọ́, yè yí mìyọn do mẹ́ otò mítọn: jonọ já aigba mítọn wla to nukun mítọn mẹ, é sọ jẹvọ́ di ehe jonọ lẹ hùngọ na. ⁸Yè jo viyọnnu Ziọni tọn dai di oflò opá vẹ̃ngle mẹ tọn, di gohọ to ojipa dògbodètọ, tọn mẹ, di otò he yè dosla do okọ̀ ji na. ⁹Yín é mayín le OKLUNỌ, awhànpa lẹ tọn jó pẹvi ṣinunṣinun he; pò dai na mí, míwlẹ na ko taidi Sọdọmi, iní na ko sọ taidi Gomọla.

¹⁰Sè ohó OKLUNỌ tọn, mì ogán Sọdọmi tọn emì, mì na otó osẹ́n Jiwheyẹwhe tọn, mì Gomọla-nu emi. ¹¹Etẹ wẹ avọ́ susu sinsán mítọn yín hlan mi? wẹ OKLUNỌ dọ: yẹn gọ́ na avọ́ nina mimẹ̀ agbò tọn, podọ na ojo kanlin yìnyìn tọn; yẹn ma tindo homẹvivi do ohùn oyìnsú tọn go, kavi do lengbọvu tọn go, kavi do alunkùn tọn, go gbá. ¹²Whenuena mì wá nado sọ awuhia to nukọn ṣie, mẹnu wẹ biọ ehe to mì si, nado zinzọnlin to awá ṣie mẹ? ¹³Mì sọ hẹn nunina vọtọ wá bà blo: nuwhẹnkún zùn nuylanylan hlan mi; osùn yọ́yọ́, azán gbọjẹ tọn, po opli agùn tọn po yẹn ma sọgan lọju yí; ylando wẹ, yèdọ agùn he dosi nẹ. ¹⁴Osùn yọ́yọ́ mítọn, po hùnwhẹ dadai mítọn po ayiha ṣie gbẹwanna: tukla wẹ yé yín hlan mi; nudikọna mi nado yì yé. ¹⁵Whenuena mì dlẹn alọ mítọn, yẹn na yí nukun ṣie whla do mì: nugbo, whenuena mì hodọ̀ susu, yẹn ma na sè: alọ mítọn gọ́ na ohùn. ¹⁶Mì lawú, na mì ni wé, mì dè azón ylankan mítọn sọn nukọn na mi; do alọ oylan wiwà tọn ote ¹⁷Mì plọn dagbe wiwà, mì din whẹ̀dida, mì gọalọna mẹhe yè sinawúna, mì dawhẹ̀ tọsiọvi lẹ tọn, yí owhẹ̀ asusiọsi tọn dọ.

¹⁸OKLUNỌ dọmọ, wá dinvie, na mí ni lẹnnu dopọ́, eyín ylando mítọn bia, yé na wé taidi kẹnsú eyín yé divẹ̃ taidi alali, yé na taidi sékanfún. ¹⁹Eyín mì jlo bo sọ sètonu, mì na dù dagbe aigba lo tọn. ²⁰Ṣigba eyín mì gbẹ bo sọ ṣàtẹ, yè na yí, ohí do hù mì, na onù OKLUNỌ tọn wẹ dọ ẹ.

²¹Na wẹ otò nugbo tọn zùn ogalọtọ dole? é ko gó na whẹ̀dida dai, dódó ko nọ e mẹ dai, ṣigba dinvie, hlọnhùtọ. ²²Fataka towe ko lẹzùn ahaya, ovẹ̃n towe po osìn po ko flusọ. ²³Ahọvi towe lẹ ko zùn atẹsitọ, podọ ogbẹ́ ajotọ lẹ tọn: yé omẹ pó yiwanna nunina, bo sọ to ale din: yé ma sọ dawhẹ́ tọsiọvi tọn, mọ owhó asusiọsi tọn ma wá yé de.

²⁴Enẹ wutu OKLUNỌ, OKLUNỌ awhànpa lẹ tọn, Huhlọntọ Islaeli tọn dọmọ, Jè, yẹn na whèsọ pọ́n kẹ̀ntọ ṣie lẹ, bo na sọ yíahọsu to kẹ̀ntọ ṣie lẹ go. ²⁵Yẹn na lẹ́ alọ ṣie do ogo we, bo na sọ yọ́ ahaya towe sẹ̀ mlẹnmlẹn, bo sọ dè tánglan towe lẹpo sẹ́. ²⁶Yẹn na hẹn whẹ̀datọ towe lẹ gọ̀ di hóhò whenu tọn, podọ tòhódọtọ towe lẹ di whẹwhẹwhenu tọn: enẹgodo yè na nọ ylọ we dọ, otò dódó tọn, otò nugbo tọn. ²⁷Yè na yí whẹ̀dida do fli Ziọni, po mẹhe lẹgọ̀ lẹ po gbọn dódó dali. ²⁸Dindòn mẹylankan lẹ tọn po ylandonọ lẹ po tọn na wá dopọ́, mẹhe sọ jo OKLUNỌ dai lẹ wẹ yè na súdo. ²⁹Na winyan na hù yé na kẹnetin he mì yiwanna, yè na sọ doflu mì na ojipa he mì pónṣinan. ³⁰Na mì na taidi kẹnetin he amà etọn yọ, bo sọ taidi ọjipa he ma tindo osìn. ³¹Adántọ na taidi, tùtù; azón etọn na sọ taidi sisẹ́, yé omẹ awe lẹ na sọ jimìyọn dopọ́, mẹdepope ma na ṣi yé.

¹OHÓ he Isaia ovi Amọsi tọn mọ gbọn Juda po Jelusalẹm po dali. ²To enẹgodo to azán podo gbè, yè na yí yonu owhé OKLUNỌ tọn hẹnai to aga osó daho lẹ tọn ji, yè na sọ ze e yì oji hu i osó pẹvipẹvi lẹ; akọta lẹ na sọ lìn biọ é mẹ. ³Gbẹtọ susu wẹ na yì bo na dọmọ, mì wá na mí ni yì osó OKLUNỌ tọn ji, yì, owhé Jiwheyẹwhe Jakob tọn tọn gbè; ewọ na sọ plọn ali etọn mí, mí na sọ zinzọnlin to omọ́ etọn mẹ, na Ziọni wẹ osẹ́n na tọ́nsọn yì, ohó OKLUNỌ tọn sọn Jelusalẹm. ⁴E na dawhẹ̀ to akọta lẹ ṣẹnṣẹn, é na wọhẹ omẹ susu: yé na sọ yí ohi yetọn do tùn agbogọdọẹ: akọta ma to na zé ohi do akọta ji bà, mọ yé ma to na plọ́n awhànfun bà.

⁵Jakob whégbètọ emì, mì wá, mì gbọ mí ni zinzọnlin to hinhẹn OKLUNỌ tọn mẹ. ⁶Enewutu wẹ hiẹ gbẹ́ ome towe Jakob whégbètọ lẹ dai, na yé gọ̀ sọn whèzizẹ dali, bo sọ basidọdinọ, di Filistini lẹ, yé sọ to onú he yé jlo wà to ovi jonọ lẹ tọn mẹ. ⁷Aigba yetọn sọ gọ́ na Fataka po sika po ga, adọkunnu yetọn ma sọ do ojlẹ; aigba yetọn gọ́ na osọ́, mọ kẹkẹ yetọn ma sọ do hihia. ⁸Aigba yetọn gọ́ na vodun ga; yé sọ to alọnuzọ́n yewlọsu tọn sẹ̀n, ehe alọviyẹyẹ́ yewlọsu tọn ko basi. ⁹Omẹ vọnu sọ litai, omẹ he diyín sọ whiwhẹ ede, enẹwutu a jona yé blo. ¹⁰Biọ awinyan mẹ, bo whla dewe do kọgudu mẹ, na osi OKLUNỌ tọn po gigo yẹyi daho etọn tọn po wutu. ¹¹Yè na whiwhẹ nukun goyítọ lẹ tọn dai, yè na sọ zín sakla gbẹtọ lẹ tọn. OKLUNỌ dopo kẹdẹ wẹ yè na zé daga to azán lọ gbè. ¹²Na azán OKLUNỌ awhànpa lẹ tọn na tin to ota na mẹdepope he yín goyítọ: bo sọ yín saklanọ, podọ to ota na mẹdepope he yè zé daga; ewọ wẹ yè na sọ whiwhẹ dai. ¹³To ota na kẹdletin Liban tọn he dite, he yè zé daga lẹpo, podọ to ota na kini-tin Basan tọn lẹpo. ¹⁴To osó daho lẹpo ji, podọ to osé pẹvipẹvi he yè zé daga lẹpo ji. ¹⁵To atọhọ̀ daho lẹpo ji, podọ to dòkọ lẹpo ji. ¹⁶To ohún Talṣìṣi tọn lẹpo ji, podọ to boṣiọ he jlomẹ lẹpo ji. ¹⁷Yè na sọ zín ota gbẹtọ goyítọ lẹ tọn dai, yè na sọ whiwhẹ sakla gbẹtọ lẹ tọn dai: OKLUNỌ dopo kẹdẹ wẹ yè na zé daga to azán lọ gbè. ¹⁸Vodun lẹ na sọsúdo gbidigbidi. ¹⁹Yé na biọ odò osé tọn lẹ mẹ, podọ oslo aigba tọn mẹ na osí OKLUNỌ tọn wutu, na gigo yẹyi daho etọn tọn wutu, whenuena ewọ fọ́n nado whàn aihon ginanginan. ²⁰To azán lọ gbè gbẹtọ na zé fataka vodun etọn podọ sika vodun etọn he yé basi omẹ dopodopo na ede nado sẹ̀n dlan ajaka po asọpla po. ²¹Nado yì odò osókla tọn mẹ podọ aga osókla zizẹ tọn ji, na osí OKLUNỌ tọn wutu, podọ na gigo yẹyidaho etọn tọn, whenuena ewọ fọ́n nado whàn aihọn ginanginan. ²²Mì jagọ son gbẹtọ de, gbigbọ mẹhe tọn tin to awòntin etọn mẹ: na etẹ mẹ wẹ yè na hia ẹ do?

¹SAPỌN, OKLUNỌ, OKLUNỌ awhànpa lẹ tọn dè hẹndote po opò po sọn Jelusalẹm po Juda po, hẹndote núdùdù lẹpo tọn podọ hẹndote osìn lẹpo tọn. ²Omẹ gángán po awhànfuntọ po, whẹ̀dato po yẹwhegán po, nuyọnentọ, po mẹhó po. ³Awhangan kandeao ton, po gbẹtọ yẹyinọ po, tòhodọtọ, anawàtọ po hóvividọtọ po. ⁴Yọpóvu lẹ wẹ yẹn na yí do basi ahọvi yetọn, ovivu lẹ wẹ na sọ dugán to yé ji. ⁵Yè na sinawúna gbẹtọ, omẹ depope sọn awetọ etọn si, dopodopo sọn komẹnu etọn si; yọpọ́ na nọ yigò do mẹhó go, omẹ vọnu do yẹyinọ go. ⁶Whenuena gbẹtọ na tédo mẹmẹsunnu etọn, owhé otọ́ etọn gbè tọn go, dọmọ, hiẹ tindo avọ̀, yín ogán to mí ji, bo gbọ̀ na hẹngble he ni tin to alọ towe glọ. ⁷Azán lọ gbè wẹ é na donusu dọmọ, yẹn ma na yín jladotọ bà; na to owhé ṣie gbè núdùdù kavi avọ̀ ma tin gba: a yí mi do dogán gbẹtọ lẹ tọn blo. ⁸Na Jelusalẹm kó zùn hẹngble, Juda ko jai; odé yetọn po walọ yetọn po jẹagọ̀ do OKLUNỌ go, nado hẹn gigo nukun etọn lẹ tọn gblehomẹ. ⁹Ohia nukun yetọn tọn to kunnude do yé go; yé to ylando yeton sọhia di Sọdọmi, yé ma whla ẹ. Dindọn wẹ na gbigbọ yetọn! na yé ko yí oylan do suahọ yéde. ¹⁰Mì dọ na dódónọ dọ, é na yón nẹ̃: na yé na dù sinsẹ́n azón yetọn tọn. ¹¹Dindòn wẹ na ome ylankan! é na ylan nẹ na ale alọ etọn mẹ tọn wẹ yè na na ẹn. ¹²Gbọn omẹ ṣie lẹ ton dali, yọpọvu lẹ wẹ awusinẹnnamẹtọ yetọn, yọnnu sọ to gándù to yé ji. Ṣó! Omẹ ṣie emì, yé he to yẹyiwlena we lẹ hẹn we buali, bo sọ hẹn ali omọ́ towe tọn gble. ¹³OKLUNỌ fọ́n nọte nado yiwhẹ̀dọ, é sọ fọ́n nado dawhẹ́na gbẹtọ lẹ. ¹⁴OKLUNỌ na biọ whẹ̀dida mẹ hẹ mẹhó omẹ etọn lẹ tọn, podọ hẹ ahọvi he to é mẹ lẹ; na mì ko dù vẹ̃n nẹ súdo; ogbànna wamọnọ lẹ tọn sọ tin to owhé mítọn gbè. ¹⁵Etẹwẹ mì lẹn bo do gbà omẹ ṣie lẹ kija, bo sọ gbidi nukunmẹ wamọnọ lẹ ton dai? wẹ OKLUNỌ lọ dọ, Jiwheyẹwhe awhanpa lẹ tọn.

¹⁶Humọ, OKLUNỌ dọmọ, Na viyọnnu Ziọni tọn lẹ yín goyítọ, bo sọ to zọnlinzin to okọ̀ dindlẹn mẹ, podọ to nukun nújijlo tọn mẹ, bo to zonlinzin, bo to gigõ whenuena yé to yìyì, bo sọ dikena afọ yetọn ni to nudọ̀di anigle. ¹⁷Enẹwutu OKLUNỌ na yí ohàn agada tọn li ota na viyọnnu Ziọni tọn lẹ, bo na sọ dè omẹ́ yetọn do gbonu ¹⁸To azán lẹ gbè OKLUNỌ na dè gigo anigle yetọn tọn sẹ̀, aṣọdonu yetọn lẹ, po tablanu yetọn po di osùnwhlẹ. ¹⁹Gẹ̀dẹ̀, alọgàn, po nukunmẹnú po, ²⁰gbejè po avọ́ po, tabla, nusisá dagbe, po tómenu po, ²¹alọkẹ po aṣọdonu awọ̀ntin tọn po, ²²avọ̀ dido didiọ po okọ̀do po, owọ̀vi po ogàn sislo po. ²³Mẹpọ́nnu, po alà dagbedagbe po, jẹhẹnú po nukunmẹ tọn po. ²⁴To enẹgodo núlùnwán na nọ̀ otẹn nuwhẹnwán tọn mẹ; nukija na sọ nọ̀ otẹn ogbajá tọn mẹ, ota pipá na sọ nọ̀ otẹ̀n tùnudo tọn mẹ; fifiọ na sọ nò otèn whànpẹ tọn mẹ. ²⁵Sunnu towe lẹ na gbọn alọ ohi tọn dali jai, Omẹ gángán towe lẹ na siawhàn. ²⁶Dòkọ́nu etọn lẹ na viavi, bo na sọ blawú, na ewọ jẹvọ́ wutu, é na sinai to aigba.

¹TO azán lọ gbè yọnnu ṣinawe na tédo sunnu dopo go, dọmọ, Mí na dù núdùdù míde tọn, bo na sọ ṣinyọn avọ̀ míde tọn: ṣigba na yè ni ylọ oyín towe do mí go, nado dè winyan mítọn sẹ̀. ²To azán lọ gbè wẹ alà OKLUNỌ tọn na yín whanpẹnọ podọ gigonọ, sinsẹ́n aigba tọn na sọ yín yẹyinọ bo yọ́n na ye he hòngán to Islaeli lẹ. ³To enẹgodo ewọ hé yè po dai to Ziọni, podọ ewọ hó pò to Jelusalẹm mẹ lẹpo wẹ yè na ylọ dọ wiwe, yedọ oyín mẹdopodopo he yè vlan dogọ yé he to ogbẹ̀ to Jelusalẹm mẹ lẹ tọn: ⁴whenuena OKLUNỌ na klọ odú viyọnnu Ziọni tọn lẹ tọn sẹ̀, bo na sọ kisa ohùn Jelusalẹm tọn sẹ̀ sọn ṣẹnṣẹn etọn gbọn gbigbọ whẹ̀dida tọn dali, podọ gbọn gbigbọ fifiọ tọn dali. ⁵OKLUNỌ na kọ̀n aslọ do aisintẹn osó Ziọni tọn lẹpo ji, podọ do agùn etọn ji, azọ̀flizọ to okle, po hinhọ́n ozòdẹ́ tọn po to ozánmẹ: na alọṣinyọ́nmẹji na tin to gigo lẹpo ji. ⁶Avàja dopo wẹ na tin na oyẹ̀ to okle sọn yózo mẹ, podọ na fibẹ̀tado de, podọ na oṣinyon de sọn yujẹhọn po jikun po si.

¹DINVIE yẹn na jihàn hlan mẹvivẹ́ ṣie, ohàn mẹvivẹ́ ṣie tọn na vẹ̃ngle etọn wutu. Mẹvivẹ́ ṣie tindo vẹ̃ngle to oso he whánji ji. ²E dopá lédo e, bo sọ sinyan zannu sẹ sọn é mẹ, é do ovẹ̃n he yọnwhanpẹ tàla do e mẹ, bo gbá dohọ̀ do ṣẹnṣẹn etọn, é basi ahàndanú do e mẹ ga; bo to pinpọn dọ ni sẹ́n sinsẹ́n, ṣigba sinsẹ́n vivlẹ wẹ e sẹ́n. ³Dinvie, Jelusalẹm—nu po sunnu Juda tọn po emì, mì dawhẹ̀, yẹn vẹ̀ mì, mì dawhẹ̀ to yẹn po vẹ̃ngle ṣie po ṣẹnṣẹn. ⁴Etẹwẹ yè do wa na vẹ̃ngle ṣie bọ yẹn ma basi to e mẹ? Whenuena yẹn to pinpọ́n dọ ni sẹ́n ovẹ̃n, etẹwutu wẹ é sẹ́n sinsẹ́n vivlẹ? ⁵Be mi wá dinvie: yen na dọ na mì onú he yẹn na wà do vẹ̃ngle ṣie: yẹn na bẹ́ opá he lẹ́do e sẹ̀, yè na sọ dù i súdo; yẹn na họ́ dokọ́ etọn liai, yè na sọ zín i dai. ⁶Yẹn na gbà ẹ kija: yè ma na klọ ẹ, kavi yè ma to na kùn in; ṣigba awhànglọn po vẹunvẹun po wẹ na wú to finẹ; yẹn na sọ dosẹ́nna aslọ dọ e ja jikun do e ji blo. ⁷Na vẹ̃ngle OKLUNỌ awhànpa lẹ ton wẹ owhé Islaeli tọn, sunnu Juda tọn lẹ wẹ atin didó he jlo e, é donukun whẹ̀dida, ṣigba dayi e go, yadonamẹ; é donukun dódó, ṣigba do ayi e go, awhá.

⁸Dindòn wẹ na yé he sá owhé dogọ́ owhé, bo sọ dè ogle dogọ́ ogle, kaka tẹnmẹ ma sọ pò bà, na yé ṣó nido nọ̀ ṣẹnṣẹn aihọn tọn. ⁹Do otó ṣie mẹ wẹ OKLUNỌ awhanpa lẹ tọn dọ te dọmọ, Nugbo owhé susu na jèvọ, yèdọ owhé he klo po ehe yọ́nwhanpẹ po, matindo mẹhe na nọ̀ é mẹ. ¹⁰Nugbo, alpente aó vẹ̃ngle tọn na sọ́n ojlẹ bati dopo tọn, ojlẹ homiẹli tọn dopo na sẹ́n éfa dopo.

¹¹Dindọ̀n wẹ na yé he nọ fọ́n to afọ́nnufu na yé nido yànmọna ahàn sinsinyẹn; he nọte to e mẹ kaka jẹ ozánmẹ, kaka ovẹ̃n do hẹn yé hùnmiyọn ¹²Ajalẹn po violi po, kele, ován po vẹ̃nhàn po sọ tin to núdùdù yetọn kọ̀n: ṣigba yé ma hò azán OKLUNỌ tọn pọ́n, mọ yé ma lẹn azón alọ etọn mẹ tọn pọ́n. ¹³Enẹwutu omẹ ṣie lẹ yì kanlinmọgbénu, na yé ma tindo nuyọnẹn: gbẹtọ yẹyinọ yetọn lẹ gblekan, susu yetọn sọ hú na sìnnùgbla. ¹⁴Enẹwutu okútòmẹ ko na otẹn ede, bo sọ kẹ̀ onù etọn zẹ̀ ojlẹ go: gigo yetọn, po susu yetọn po, aṣọ yetọn, po yé he to ayajẹ lẹ po na jẹte do e mẹ. ¹⁵Yè na zín omẹ vọnu lẹ dai, yè na whiwhẹ asuka lẹ dai, yè na sọ whiwhẹ nukun goyítọ tọn dai. ¹⁶Ṣigba OKLUNỌ awhànpa lẹ tọn wẹ yè na zé daga to whẹ̀dida mẹ, podọ Jiwheyẹwhe Omẹ Wiwe Dopo lọ na sọ yín klandowiwe to dódó mẹ. ¹⁷Whenẹnu wẹ lẹngbọvu lẹ na to dùdù kẹdẹdi wàlọ yetọn, podọ to wheto yé he mọawu lẹ tọn mẹ wẹ jonọ lẹ na nọ dù te.

¹⁸Dindọ̀n wẹ na yé he yí núvọ do to jijọ ylankan dọ̀n, podọ yé he taidi yé yí okàn kẹkẹ tọn do to ylando dọ̀n. ¹⁹He dọmọ, Gbọ ni yawu, bo sọ domìzonmìzọnna azọ́n etọn, na mí nido mọ ẹn: gbọ nuyọnẹn Omẹ Wiwe dopo Islaeli tọn ni sẹpọ́ ofi, ni wá na mí ni yón ẹn.

²⁰Dindọ̀n wẹ na yé he to oylan ylọ dọ dagbe lẹ, bo to dagbe ylọ dọ oylan, he yí zinvlu do hinhọ́n tẹnmẹ, bo yí hinhọ́n do zinvlu tẹnmẹ; he yí vivó do vivi tẹnmẹ, bo sọ yí vivi do vivó tẹnmẹ.

²¹Dindòn wẹ na yé he yín nuyọnẹntọ to nukun yéde tọn mẹ, bo sọ yín mẹzìnzìn to nukun yéde tọn mẹ.

²²Dindón wẹ na yé he dohuhlọn nado nù vẹ̃nhàn, podọ huhlọntọ lẹ nado flusọ ahàn sinsinyẹn. ²³Yé he suwhẹna mẹylankanna ale wutu, bo sọ yí dódó nugbonọ tọn sọn é si. ²⁴Enewutu dile mìyọn nọ wlọ núyọ, bọ mìyọnlọ nọ fiọ zìnkán do, Mowẹ adọ́ yetọn na taidi yinyọ̀n: sisẹ́ yetọn na sọ yì aga di afínfín: na yé ko hò osẹ́n OKLUNỌ awhànpa lẹ tọn pla, bo sọ vlẹ ohó Omẹ Wiwe Islaeli tọn tọn.

²⁵Enẹwutu wẹ homẹ OKLUNỌ tọn gble do omẹ etọn lẹ go, é sọ dlẹn alọ etọn do yé ji, bo sọ linú yé: okọta lẹ sọ sisọ, oṣiọ yetọn taidi omí to tòhòmẹ. To ehe lẹpo mẹ, homẹgble etọn ma lẹ́kọ̀, ṣigba alọ etọn dlẹn do gbonu jãnwẹ. ²⁶E na zé asia daga hlan akọta he to aganu lẹ, é na sọ jlẹgbè na yé sọn opòdo aihọn tọn: dayi e go, yé na sọ yawu wá plaun. ²⁷Onú ma na dikọna mẹde mọ ode ma na klẹnafọ to yé mẹ; mẹde ma na samlọngọ́, kavi damlọn, gbaja alinkàn yetọn tọn ma to na tún, mọ afọpàkan yetọn ma to na wẹn. ²⁸Ogá mẹhetọn dá, ogába yetọn lẹpo sọ dẹ́, yè na hia ofẹ̀n osó yetọn tọn na okẹ́n, podọ kẹkẹ yetọn di jẹhọn sinsinyẹn: ²⁹Awhá yetọn na taidi kinnikinni tọn, yé na sọ nọ dawhá taidi ovi kinnikinni tọn lẹ: nugbo, yé na dawhá, bo na sọ hẹn gbélàn lọ go, yé na zé e yì jijọho, mẹde ma na whlẹn ẹn. ³⁰Podọ to azán lọ gbè, yé na fiẹ do yé ji, di zingidi ohù tọn, eyín gbẹtọ sọ pọ́n aigba lọ, dayi e go, zinvlu po nukunbibia po, hinhọ́n sọ lẹzùn zinvlu to aslọ yú etọn mẹ.

¹TO owhè he mẹ Ozia ahọlu kú te, yẹn mọ OKLUNỌ sinai to ofìn he yì aga ji, ehe fón yì oji, aṣọvọ̀ etọn gọ́ tẹmpli mẹ. ²Selafin lẹ nọte to aga etọn, dopodopo tindo awà ṣidopo; é yí awe sinyọ́n nukunmẹ etọn, bo yí awe sinyọ́n afọ̀ etọn, bo sọ yí awe do zinzlọn. ³Odẹ́ dawhá hlan awetọ, dọmọ, Wiwe, wiwe, wiwe wẹ OKLUNỌ awhànpa lẹ tọn: aihọn lẹpo gọ́ na gigo etọn. ⁴Dòtin ohọ̀n tọn whàn na ogbè ewọ he dawhá tọn, ohọ̀ lọ sọ gó na azọ̀. ⁵Whenẹnu wẹ yẹn dọmọ, Dindọ̀n wẹ yẹn na yẹn pòta; na yẹn basi omẹ nùflo mawenọ, yẹn sọ tin to ṣẹnṣẹn omẹ nùflo mawenọ lẹ tọn: na nukun ṣie ko mọ ahọlu, OKLUNỌ awhànpa lẹ tọn. ⁶Whenẹnu wẹ dopo to selafin lẹ mẹ zlọn wá dẽ, é hẹn mìyọnkán to alọ etọn mẹ, he e yí obẹ́ do dè sọn agbà lọ ji. ⁷E yí i do onù ṣie go, bo dọmọ, dayi e go, ehe ko jẹ nùflo towe go; yè bẹ́ ylankan towe sẹ́, yè sọ klọ ylando towe sẹ́. ⁸Yẹn sọ sè ogbè OKLUNỌ tọn ga, dọmọ, Mẹnu wẹ yẹn na dohlan, mẹnu wẹ na yì na mí? Whenẹnu wẹ yẹn dọmọ, yẹn die; do mì hlan. ⁹E sọ dọmọ, yì bo dọ na omẹ helẹ, dọmọ, Mì sisè nugbo, ṣigba mì ma tunwun; mì mimọ nugbo, ṣigba mì ma yọ́nẹn. ¹⁰Hẹn ayiha omẹ helẹ tọn tliji, bo hẹn otó yetọn pẹ́n, sú nukun yetọn na yé nikã yí nukun yetọn do mọ, bo sọ yí otó yetọn do sè, na yé niká yí ayiha yetọn do yónẹn, na yé niká diọ, na yè nikã hẹnazọ̀ngbọna yé. ¹¹Whenẹnu wẹ yẹn dọmọ, OKLUNỌ, na é na dẹ̀n sọ? E sọ gblọn dọ, kaka otòdaho lẹ nado jẹvọ mado omẹ he na nọ̀ e mẹ, owhé lẹ mado gbẹtọ, aigba lọ na jẹ́vọ mlẹnmlẹn, ¹²kaka OKLUNỌ nado bẹ́ gbẹtọ lẹ yì aganu, bọ gbẹ̀dai daho nado tin to aigba lọ ji. ¹³Ṣigba gãnṣo dadao na tin to é mẹ, é na sọ lẹ́gọ́, bo sọ zùn súsúdo di telebin-tin, podọ di kẹnetin otù ehetọn tin to yé mẹ, whenuena amà yetọn jà kọyingbó: mọwẹ okún wiwe lọ na yín otù to yé mẹ.

¹TO enẹgodo to Ahaz ovi Jotanitọn, ovi Ozia ton aholu Juda tọn whenu, bọ Setsín, ahọlu Sylia tọn po Pekali ovi Ṣemalia ahọlu Islaeli tọn po hẹji yì Jelusalẹm nado fùnawhàn hẹ ẹ, ṣigba yé ma sọgan gbà ẹ. ²Yé dọ na owhé Davidi tọn dọmọ, Sylia dogbèpọ hẹ Eflaimi. Ayiha etọn po ayiha omẹ etọn lẹ tọn po sọ whàn dile atin zungbomẹ tọn nọ whan gbọn alọ jẹhọn tọn mẹ do.

³Whenẹnu wẹ OKLUNỌ dọ hlan Isaia dọmọ, Tọ́njẹgbonu dinvie nado yì pé Ahaz, hiẹ po Sealjaṣub ovi towe po to pòdo asisanu otàndo aga tọn dali, to alìhogbó avọyàntọ lẹ tọn ji. ⁴Bo dọ nẹ̃ dọmọ, Mì payi míde go, bo nọ̀ abọẹ; a dibu blo, a savọ̀na osí awe mìyọntin tọn he to azọti helẹ wutu blo, na adi Letsin po Sylia po tọn, po ovi Lemalia tọn pò wutu. ⁵Na Sylia, Eflaimi, po ovi Lemalia tọn po ko Kanyiha ylankan do hiẹ go, dọmọ, ⁶Mì gbọ mí ni hẹji yì Juda, bo hẹn homẹgble nẹ, gbọ mi ni basi odo to é mẹ na míde, na mí ni zé ahọlu dote do ṣẹnṣẹn eton, yèdọ ovi Tabeel tọn. ⁷Le wẹ OKLUNỌ, JIWHEYẸWHE Dọ dọmọ linlẹn lọ ma na note, mọ é ma to na ṣẹ. ⁸Na ota Sylia tọn wẹ Damasku, ota Damasku tọn sọ wẹ Letsin, owhè kandekoatọ́n mẹ yè na gbà Eflaimi, bọ é ma na yín gbẹtọ bà. ⁹Ota Eflaimi tọn sọ wẹ Samalia, ota Samalia tọn sọ wẹ ovi Ṣemalia tọn. Eyín mì ma na yise, nugbo yè ma to na yí afọ mítọn hẹnai.

¹⁰OKLUNỌ sọ vẹ̀ dọ hlan Ahaz, dọmọ, ¹¹Biọ ohia de to OKLUNỌ Jiwheyẹwhe towe si, biọ ẹ, eyín to osẹ́dò mẹ, kavi to aga ¹²Ṣigba Ahaz dọmọ, yẹn ma to na biọ gba, mọ yẹn ma to na whle OKLUNỌ pọ́n. ¹³E sọ dọmọ, mì sè dinvie, mì owhé Davidi tọn; Onú pẹvi wẹ na mì nado hẹn nudikọna gbẹtọ, ṣigbá bé mì na sọ hẹn nudikọna Jiwheyẹwhe ṣie ga? ¹⁴Enẹwutu, OKLUNỌ lọsu na na ohia de mì; dayi e go, awkli de na mọhò, bo na sọ ji visunnu de, bo na ylọ Oyín etọn dọ Emmanuẹl. ¹⁵Oyìnnọ́ po owín po wẹ é na nọ dù, na nido yọ́n le yè nọ gbẹ́ oylando, podọ le yè nọ dè dagbe do. ¹⁶Na whẹpo ovi lọ na yọn le yè nọ gbé oylando podọ le yè nọ dè dágbe do, aigba he hiẹ gbẹwaana, na lẹzùn gbédai sọn ahọlu etọn awe lẹ si; ¹⁷OKLUNỌ na sọ hẹn azán he ma ko tin mọ dai wà ota tọwe, podọ wa ota omẹ towe lẹ tọn, podọ wà owhé otọ́ towe tọn ji, son azán hegbè Eftaimi ko tọn sọn Juda; yedọ ahọlu Àssylia tọn.

¹⁸To enẹgodo to azán lọ gbè, OKLUNỌ na jlẹgbè hlan supọ̀ he tin to podo otò Egypti tọn tọn, podọ hlan owín he tin to aigba Assylia tọn ji. ¹⁹Yé na wá bo sọ jẹ̀ do agbadò he jẹ́vọ mẹ, podọ do odò osó tọn mẹ, do owùn lẹ ji, podọ do ama lẹpo ji.

²⁰To azán doponẹ gbè wẹ OKLUNỌ na yí dàlunhi he yè whé, enẹ wẹ, yé he to otò nẹ godo tọn Ahọlu Assylia tọn, do lùn oda po ofún afọ tọn po: é na sọ hù otán súdo ga;

²¹To enẹgodo to azán lọ gbè, gbẹtọ dopo na yìn oyinvú dopo po lẹngbọ awe po. ²²To enẹgodo, na oyìnnọ́ susu he yè na hen wá wutu, é na nọ dù yìnnọ̀; na oyìnnọ́ po owín po wẹ omẹ he pò to aigba lọ ji na nọ dù.

²³To enẹgodo to azán lọ gbè, ofi lẹpo, na yín fie ovẹ̃n fọtọ́n ko tin te, na ojlẹ fọtọ́n fataka tọn, é na yín na otẹùn po vẹun po. ²⁴Ogá po akatanpó po wẹ gbẹtọ na do wá finẹ; na aigba lẹpo na lẹzùn otẹùn po vẹun po. ²⁵Podọ to osó pẹvipẹvi he yè na yí alín do jlo, osí otẹun po vẹun tọn po ma finẹ na wa: ṣigba é na yín otò he mẹ yé to oyín bẹ́ sọ yì, podọ fie kanlin pẹvipẹvi lẹ na nọ zindai.

¹HUMỌ Oklun sọ dọ hlan mi dọmo yí owe daho dopó, bo yí wekantin gbẹtọ tọn do kanwé do e mẹ, Na Mahẹl-Salal-Has-Baz tọn; ²Yẹn sọ yí kunnudetọ nugbonọ lẹ do dẽ de, nado dekunnu, Ulie yẹwhenọ, po zakalia ovi Belekia tọn po. ³Yẹn sọ biọ ohò mẹ hodo yẹwhegán yọnnu nẹ; ewọ sọ mọho, bo ji visunnu dopo. Whenẹnu wẹ OKLUNỌ dọ hlan mi dọmọ, ylọ oyìn etọn dọ Mahẹl-Salal-Has-Baz. ⁴Na whẹpo ovi lọ ná tindo nuyónẹn nado dawhá dọ, Otọ́ ṣie, onọ ṣie, yè na ko bẹ́ adokun Damasku tọn po ogbànna Samalia tọn po sẹ̀ sọn nukọn ahọlu Assylia tọn.

⁵OKLUNỌ sọ vọ dọ hlan mi ga dọmọ, ⁶Sọle omẹ helẹ gbẹ̀ osìn Ṣiloe tọn he to sisa dẹdẹ dai, bo sọ jaya to Letsin mẹ podọ to ovi Lemalia tọn mẹ. ⁷Enẹwutu dinvie, dayi e go, OKLUNỌ to osìn otò he Binyẹn bo sọ sù tọn dọ̀n wá ota yetọn, yèdọ ahọlu Assylia tọn po gigo etọn lẹ po: ⁸E na sọ jugbọn ṣẹnṣẹn Juda tọn; é na sà ṣinyọn e ji, é na hẹn ẹn jẹ okọ̀, dindlẹn awà etọn tọn na gọ́ dògbo aigba towe tọn, hiẹ, Emmanuẹl.

⁹Mì bẹ́ míde pli, mì gbẹtọ lẹ, yè na sọ gbà mi gbidigbidi; mì dotóai, mì he sọn otò dindẹn mẹ lẹpo; mì bla gbajana míde, yè na sọ gbà mì gbidigbidi. ¹⁰Mì nọpọ́ blanú; é na sọ lẹzùn nuvọ; mì dọhó lọ, é ma na nọte: na Jiwheyẹwhe tin po mí po. ¹¹Na OKLUNỌ dọ le hlan mi, gbọn alọ sìnsinyẹn mẹ; bo sọ plọ́n mi na yẹn ma na do zinzọnlin to aliho omẹ helẹ tọn ji, dọ, ¹²Mì ylọ ehe Àlẹnu he omẹ helẹ ylọ Alẹnu blo; mọ mì dibuna obu yetọn blo, mì sọ savo de blo. ¹³Klan OKLUNỌ awhànpa lẹ tọn lọsu do wiwe, na ewọ ni yín osí mítọn, bo sọ yín avosisa mítọn. ¹⁴Ewọ na sọ tin na ofi wiwe, ṣigba na ozánnu agbali tọn, podọ na owàn ylando tọn, hlan owhé Islaeli tọn awe lẹ, na ogẹ́ po omọ̀ po hlan gbẹtọ Jelusalẹm tọn lẹ. ¹⁵Susu to yé mẹ na klẹnafọ bo jai, yè na gbà yé, yè na domọ̀na yé, bo sọ wle yé.

¹⁶Mì bla alènuhó lọ, yí hiadonu do tlẹ osẹ̀n lọ to ṣẹnṣẹn nuplọntọ ṣie lẹ tọn. ¹⁷Yẹn na sọ nọte pọ́n OKLUNỌ he yí nukun etọn whla sọn owhé Jakob tọn gbè go, yẹn na sọ to nukundo ali nẹ̃. ¹⁸Dayi e go, yẹn po ovi he OKLUNỌ na mi lẹ po tin na ohia, podọ na azọ́n jawu to Islaeli, sọn OKLUNỌ awhànpa lẹ tọn si, he nọnó osó Ziọni tọn ji.

¹⁹Whenuena yé na dọ hlan mì dọmọ, mì din yé he tindo gbigbọ odọ̀di tọn lẹ, po owọ́ntọ he to awhádo, bo sọ to hùnhlun lẹ po: bé é ma jẹ na gbẹtọ ni din Jiwheyẹwhe yetọn hú dọ yé he to ogbẹ̀ lẹ ni to oṣiọ din? ²⁰Na osẹ́n po alènuhó po: eyín yé ma dọ kẹdẹdi ohó he, na hinhọ́n ma tin to yé mẹ wutu wẹ. ²¹Yé na sọ jugbọn ṣẹnṣẹn etọn, to awusinsinyẹn po hùvẹ́ po mẹ: enẹ godo, whenuena hùvè na hù yé, yé na nọ fìẹ, yé na sọ nọ hodẹ̀do ahọlu yetọn po Jiwheyẹwhe yetọn po, bo na sọ to aga pọ́n. ²²Yé na nọ pọ́n aigba: dayi e go, tukla po zinvlu po, wunvì núhiha tọn: yè na sọ yàn yé do zinvlu mẹ.

¹NA ojẹhẹ de ma na tin hlan ewọ he tin to awufìẹsa mẹ gba. To whẹwhẹwhenu é hẹn ovlẹ wá aigba Zabulọni tọn po aigba Nẹftali tọn po ji, ṣigba to godomẹ wẹ é ko hẹn ẹ̀n zùn gigonọ, gbọnaliho ohùtọn lọ dali, Jọdani gododọnt Galili akọta lẹ tọn. ²Yé he to zọnlinzin to zinvlu mẹ mọ hinhọ́n daho: yé he nọnọ̀ aigba oyẹ̀ okú tọn mẹ lẹ ji wẹ hinhọ́n họnwùn do. ³Hiẹ ko hẹn akọta nẹ jideji, bo sọ hẹn ayajijẹ etọn zùn susu nẹ: yé to ayajẹ to nukọn towe di ayajijẹ ojijẹ tọn, dile gbẹtọ nọ to ayajẹ whenuena yé to ogbànna má. ⁴Na hiẹ wẹ́n zẹ̀gẹ̀ agbàn etọn tọn, po opò abọ́ etọn ji tọn po, ogànpò awusinyẹnnamẹtọ etọn tọn di azán Midiani whenu tọn. ⁵Na gbaja awhànfuntọ lẹ tọn to zingidi mẹ, po avọ́ he yè ylón do ohùn mẹ po, ṣigba ehe na tin na mimẹ̀ po akán mìyọn tọn po. ⁶Na yè ji ovi de hlan mí, yè na ovisunnu de hlan mí; ahọludu na sọ tin to abọ́ etọn ji: yè na nọ ylọ oyín etọn dọ Jawu, Hónamẹtọ, Jiwheyẹwhe huhlọnnọ, Otọ madopodo, Ahọvi Jijọho tọn. ⁷Ahọludu etọn po jijọho po ma na ponù, to ofìn Davidi tọn ji, podọ to ahọludu etọn ji, nado nọ pọ́n e go, podọ nado sọ yonu etọn hẹnai, gbọn whẹ̀dida dali; podọ gbọn dódó dali, sọn dinvie, yèdọ kakadoi. Vivẹnu OKLUNỌ awhànpa lẹ tọn tọn na basi ehe.

⁸OKLUNỌ ko do ohó de hlan Jakob, é sọ jẹ do Islaeli ji. ⁹Gbẹtọ lẹpo na sọ yọnẹn, yèdọ Eflaimi po gbẹtọ Samalia tọn lẹ po, he to didọ to sakla po ayiha sinsinyẹn po mẹ, dọmọ. ¹⁰Bliki nẹlẹ ko họ́, aigba míwlẹ na yí zánnu pipà do do e: yè sán atin Sikamọli tọn liai, aigba míwlẹ na yí atin kedle tọn do diọ yé. ¹¹Enẹwutu wẹ OKLUNỌ na zé kẹ̀ntọ Letsin tọn dote do e ji, bo na sọ dọ̀n kẹ̀ntọ lẹ dopọ́; ¹²Syliatọ lẹ to nukọn, Filistìnnu lẹ to godo: yé na sọ yí onù lẹpo do dù Islaeli súdo. To ehe lẹpo mẹ homẹgble etọn ma lẹ́kó, ṣigba alọ etọn dlẹn do gbonu jãnwẹ.

¹³Gbẹtọ lẹ lọ ma lọ́gọ̀ do ewọ he linú yé de, mọ yé ma din OKLUNỌ awhànpa lẹ tọn. ¹⁴Enẹwutu OKLUNỌ na sán ota po osí po, alà po ofán po sọn Islaeli, to azán dopo mẹ. ¹⁵Mẹhóhó yẹyinọ, ewọ wẹ ota; yẹwhegán he to lalo plọnmẹ, ewọ wẹ osí lọ. ¹⁶Na nukọntọ omẹ helẹ tọn hẹn yé buali; yé he yè sọ plọn gbọn alọ yetọn mẹ lẹ wẹ yè hù súdo. ¹⁷Enẹwutu wẹ OKLUNỌ ma to na tindo homẹhùnhùn to dẹpẹ yetọn lẹ mẹ, mọ é ma to na wà lẹblanuna tóṣiọvi po asuṣiọsi yetọn lẹ po: na mẹfuflu wẹ yé omẹ pó, ylanwatọ, onù lẹpo sọ to nululu dọ. To ehe lẹpo mẹ homẹgble etọn ma lẹ́kọ̀, ṣigba alọ etọn dlẹn do gbonu jànwẹ.

¹⁸Na jijọ ylankan to jiji di mìyọn: é na fiọ otẹun po vẹun po, bo na sọ ji to zunkàn zungbo tọn mẹ, yé na sọ yì aga dile azọ̀ nọ yì aga do ¹⁹Gbọn homẹgble OKLUNỌ awhanpa lẹ tọn dali wẹ aigba lọ do dozinvlu, gbẹtọ lẹ na sọ taidi akán mìyọn tọn: mẹdepope ma na whlẹn mẹmẹsunnu etọn do ogbẹ̀. ²⁰E na wúndù to adusi, hùvẹ́ na sọ hù i; é na sọ dù to amìyọn mẹ; é ma to na pékọ̀na yé: omẹ dopodopo na dù olàn awà ede tọn. ²¹Manasse na dù Eflaimi; Eflaimi na sọ dù Manasse: yé omẹ awe lẹ na sọta Juda. To ehe lẹpo mẹ homẹgble etọn ma lẹ́kọ̀, ṣigba alọ etọn dlẹn do gbonu jànwẹ.

¹DINDON wẹ hlan yé he to osẹ́n mawàdódó tọn doai, podọ hlan wékantọ he to owé okà tọn wlan lẹ. ²Nado lẹ́ wamọnọ sọn whẹ̀dida mẹ, podọ nado lé onú dódó tọn sọn wamọnọ omẹ ṣie lẹ tọn de, na asuṣiọsi lẹ nido yín dùdù na yé, podọ na yé nido jajo do tọ́ṣiọvi lẹ ³Bé etẹwẹ mì na basi to azán mẹlapọn tọn gbè, podọ sọn gbigbà he na wá sọn ofi dindẹn tọn? bé mẹnu wẹ mì na họ̀n yì sù na alọgọna? fie wẹ mi na jo gigo mítọn do? ⁴Matin yẹn yé na litai to ogantọ lẹ glọ, yé na sọ j ai to yé he yè hù lẹ glọ. To ehe lẹpo mẹ homẹgble etọn ma lẹkọ, ṣigba alọ etọn dlẹn do gbonu jànwẹ.

⁵Dindòn wẹ na Assylia, ogànpò homẹgble ṣie tọn, podọ opò alọ yetọn mẹ tọn wẹ hòmẹfiọ ṣie. ⁶Yẹn na do e hlan akọta fufìutọ de, podọ hlan omẹ homẹgble ṣie tọn ta wẹ yẹn na dosẹ́n de do nado bẹ́ ogbànnà, podọ nado yí wẹnyànnu, podọ nado zín yé dai di ogbọn aliho tọn. ⁷Ṣigba é ma lẹ̀n mọ, mọ ayiha etọn ma lẹ̀n mọ; ṣigba é tin to ayiha etọn mẹ, nado gbà súdo, podọ nado sán akọta sẹ̀, é ma yín vude. ⁸Na é dọmọ, Be é ma yín ahọlu wẹ ahọvi ṣe lẹ patapata? ⁹Bé Kalnọ ma taidi Kalkemisi? bé Hamati ma sọ taidi Alpadi? bé Samalia ma sọ taidi Damasku? ¹⁰Dile alọ ṣie ko dlen jẹ ahọludu boṣiọ lẹ tọn de, boṣiọ he klohu Jelusalẹm tọn po Samalia po tọn. ¹¹Bé yẹn ma na wà do Samalia po boṣiọ etọn lẹ po di le yẹn wà do Jelusaiẹm po boṣiọ etọn lẹ po do?

¹²Enẹwutu to ehe godo, whenuena OKLUNỌ wàzon etọn lẹpo to osó Ziọni tọn ji, podọ to Jelusalẹm ji, yẹn na wọhẹ sinsẹ́n ayiha sinsìnyẹn ahọlu Àssylia tọn tọn, po gigo goyíyí nukun etọn tọn po, ¹³Na é dọmọ, Gbọn huhlọn alọ ṣie dali tọn wẹ yẹn do basi i, podọ gbọn nuyọnen ṣie dali; na yẹn yónnum, yẹn ko sọ họn dogbotin gbẹtọ lẹ tọn sẹ̀; yẹn ko fìn adọkunnu yetọn, bo sọ zín gbẹtọ lẹ dai di sunnu adántọ. ¹⁴Alọ ṣie ko din adọkun gbẹtọ lẹ tọn mọ di adọ ohẹ tọn; podọ di le omẹ de nọ to azìn he pò bé wẹ yẹn bé aihọn lẹpo pli; ode yetọn ma húnhún awà kavi kẹ onù kavi bo fan. ¹⁵Bé asiọvi sogan yígo do ewọ he yí i do to naké sán go? kavi ayìnyòn sọgan zé ede do ewọ he to húnhún húnhún in ji? taidi na opo ni húnhún yé he zé e do aga ji, kavi taidi na atin ni zé ewọ he ma yín atin daga.

¹⁶Enẹwutu wẹ OKLUNỌ, OKLUNỌ awhànpa lẹ tọn hẹn yé he mọawú to omẹ etọn lẹ mẹ húliwhàn; podọ to gigo etọn glọ, é na kọ̀n jiji de taidi jiji mìyọn tọn.

¹⁷Hinhọn Islaeli tọn na zùn mìyọn, Omẹ Wiwe etọn na zùn ozòlọ; é na ji, bo na wlọ vẹun etọn po otẹun etọn po to azán dopo mẹ. ¹⁸E na sọ hù gigo zùngbo etọn tọn, po aigba susugege etọn tọn po, ayiha po agbasa po súdo: yé na sọ taidi le awhànsìa hẹntọ nọ to na dakú. ¹⁹Atin he pò to zungbo etọn mẹ lẹ na sọ yín pẹvide, na yòpọ nido kanwé yetọn.

²⁰To enẹgodo to azán lọ gbè, na adade Islaeli tọn, po ehe hugan to owhé Jakob tọn gbè lẹ po ma na dotudo yé he zìn yé dai go bà; ṣigba yé na dotudo OKLUNỌ, Omẹ Wiwe Islaeli tọn go, to nugbo mẹ. ²¹Adade na lẹ́gọ́, yèdọ, adade Jakob tọn, wá Jiwheyẹwhe Ganhunupo de. ²²Eyín omẹ towe Islaeli lẹ taidi otọ̀kẹn ohu tọn, gãnṣo adade to yé mẹ na lẹ́gọ̀, aṣẹ hùsúdo tọn na gọ́ flakọnyingbe tó dódó mẹ. ²³Na OKLUNỌ, Jiwheyẹwhe awhànpa lẹ tọn na basi hùsúdo, yèdọ gbèmima to ṣẹnṣẹn aigba lẹpo tọn.

²⁴Enẹwutu le wẹ OKLUNỌ, Jiwheyẹwhe awhànpa lẹ tọn dọ, Mì omẹ ṣie he nọnọ̀ Ziọni lẹ, mì dibuna Asilianu lẹ blo: éna li aglọ̀po we, bo na sọ zé opò etọn do oji we, di Egypti tọn hunkọ. ²⁵Ṣigba to whenu vude, homẹfiọ na vọ̀, po homẹgbigble ṣie po to dindọn yetọn mẹ. ²⁶OKLUNỌ awhànpa lẹ tọn na zé mẹhòbá daga do e ji, di hùhù Midiani tọn to osó Olẹbi tọn ji: podọ di aglọ̀pò etọn do ohù ji, mọ wẹ é na zé e daga di Egypti tọn hunkọ. ²⁷To enẹ godo to azán lọ gbè, yè na zé agbàn etọn sẹ̀ sọn abọ́ towe ji, podọ zẹ̀gẹ etọn sọn okọ́ towe, yè na sọ hẹn zẹ̀gẹ lọ gble na amidèdota lọ wutu.

²⁸Ewọ gọ̀ wá Aijati, é jù wá yì Miglọni; Mikma wẹ é bẹ́ kẹkẹ etọn pli do. ²⁹Yé ko gbò ali lọ pla: yé ko de nọtẹn yetọn to Gueba; Lama dibu; Guibea Sauli tọn họ̀n. ³⁰Yí ogbè towe do dawhá daga, hiẹ viyọnnu Gallimu tọn: basi na yè ni sè e jẹ Laisa, hiẹ Anatoti agbatọnọ. ³¹Yè diọtẹnna Madinena; gbẹtọ Guebini tọn lẹ bẹ́ yéde pli nado họ̀n ³²E na nọte finẹ to Nobi to azán lọ gbè: é na sọ mì alọ etọn do osó viyọnnu Ziọni tọn tọn go, okọta Jelúsalem tọn.

³³Dayi e go, OKLUNỌ, OKLUNỌ awhànpa lẹ tọn na sán atinla to obú mẹ; yè na sọ sán yé he súntate to yé mẹ lẹ sẹ̀, yè na zín goyítọ lẹ dai. ³⁴E na yí ogàn do sán zunkan zùngbomẹ tọn liai, Liban na sọ jai gbọn asuka de dali.

¹OPO de na sọn dòdonu Jese tọn mẹ, Ala de na sọ tónkun sọn adọ́ etọn mẹ: ²gbigọọ OKLUNỌ tọn na jẹ do e ji, gbigbọ wuntunnugo po zìnzìn po tọn, gbigbọ lẹnpọ́n po huhlọn po tọn, gbigbọ nuyọ́nẹn po osí OKLUNỌ tọn po tọn. ³Bo na yí i do basi zìnzìn to osí OKLUNỌ tọn mẹ: é ma to na dawhẹ̀ di le nukunmẹ etọn te, mọ é ma na dawhẹ̀ di sisè otó etọn tọn. ⁴Ṣigba é na yí dódó do dawhẹ̀ wamọnọ lẹ tọn, bo sọ yí nugbo do dawhèna homẹmimiọnnọ aigba lọ tọn lẹ: é na yí aglọpò onù etọn tọn li aigba lọ, bo sọ yí fufu nuflo etọn tọn do hù mẹylankan lẹ. ⁵Dódó na yín ogbaja adà etọn mẹ tọn, nugbo wiwà ogbaja hoto etọn tọn. ⁶Ọhla ga na nọ nọ̀hẹ́ lẹngbọvu dopọ́, kinnikinni ovu na mlọnai hẹ́ gbọbọẹvu; oyìnvú po kinnikinni po, po anlin yìnyìn po na nọnọ̀ pọ́; yọpọvu na sọ hẹn ye dan pe. ⁷Oyín po beali po na dù; ovi yetọn lẹ na sọ mlọnai dopọ́: kinnikinni na sọ dù ama di oyìnsú. ⁸Ovi to anọ́nu na daihún to odò lòpá tọn ji, ovi he yè dè sọn anónu na yí alọ etọn do oslo basilie ton mẹ. ⁹Yé ma na gbleawunamẹ, mọ ye ma to na gbà súdo to osó wiwe ṣie lẹpo ji: na aihọn na gọ́ na nuyọnẹn OKLUNỌ tọn, dile osìn ṣinyọn ohù ji do.

¹⁰To azán nẹ gbe, adọ̀ Jese tọn de na tin ehe na nọte na asia gbẹtọ lẹ tọn; E de wẹ kosi lẹ na din hlan: gbọjẹ etọn na sọ yín gigonọ.

¹¹To enẹgodo to azán lọ gbè wẹ OKLUNỌ na dè alọ etọn whlawetọ nado hẹn pipòtọ omẹ etọn he pò lẹ ton gọ sọn Assylia, sọn Egypti, podọ sọn Patlo, sọn Etiopia, podọ sọn Elami, sọn Ṣinale, sọn Hamati, podọ sọn olopo ohù tọn. ¹²E na do asia de aga, na akọta lẹ, bo bẹ́ gbakija Islaeli tọn lẹ pli, bo na dọ̀n gbapè Juda tọn pli sọn gósu ẹnẹ aihọn tọn lẹ mẹ. ¹³Homẹha Eflaimi tọn na vọ sọn ai; yè na sán kẹ̀ntọ Juda tọn lẹ sẹ̀: Eflaimi ma na hahomẹ do Juda go, Juda ma na sọ hẹn homẹgble na Eflaimi. ¹⁴Ṣigba yé na zlọn do abọ́ Filistinu lẹ tọn hlan whèyìhọ dali: yé na sọ nọpọ́ hẹn gbẹtọ whèzizẹ dali tọn lẹ gble: yé na yí alọ yetọn do Edọmi po Moabi po ji; ovi Ammọni tọn lẹ na sọ sètónuna yé. ¹⁵OKLUNỌ na sọ gbà odẹ́ ohù Egypti tọn súdo gbidigbidi; jẹhọn daho etọn na sọ húnhún alọ etọn do otọ̀ lọ ji, bo sọ linú in to asisa whinnu ṣinawe mẹ, bo sọ basi na gbẹtọ ni gbọn é ji mafànnú. ¹⁶Aligbo dopo wẹ na tin na pipòtọ omẹ etọn lẹ tọn, he na pò sọn Assylia; di le é te na Islaeli to azán he gbè e gbon aga tón sọn aigba Egypti tọn ji.

¹TO azán lọ gbè hiẹ na dọmọ, OKLUNỌ È, yẹn na pa we: eyín hiẹ tlẹ ko gblehomẹ do ogo e, yè ko bli homẹgble towe sẹ̀, hiẹ ko sọ miọnhomẹna mi. ²Dayi e go, Jiwheyẹwhe wẹ whlẹngan ṣie; yẹn na, dotu, yẹn ma to obú na di, na OKLUNỌ JEHOVA wẹ huhlọn ṣie po ohàn ṣie po; ewọ sọ lẹzùn whlengan ṣie ga. ³Enẹwutu ayajijẹ wẹ mì na do dọ̀n osìn sọn odòtọ whlẹngan tọn mẹ. ⁴To azán lọ gbè mì na dọmọ, mì pa OKLUNỌ, mì ylọ oyín etọn, mì do azón etọn hia to gbẹtọ lẹ ṣẹnṣẹn, mì hẹn ẹn wà oflin mẹ dọ, oyín eton wẹ yè zize daga. ⁵Mi jihàn hlan OKLUNỌ, na é ko wà yẹyinu: ehe zùn yinyọnẹn to aihọn lepo mẹ. ⁶Dawhá, bo hopẹ́, hie Ziọni nọtọ́: na omẹ kiklo wẹ Omẹ Wiwe Islaeli tọn to ṣẹnṣẹn towe.

¹AGBAN Babylọni tọn, he Isaia ovi Amọsi tọn mọ. ²Mì zé asia do aga to osé daho lọ ji, mì jlẹgbè hlan yé, mì mì alọ, na yé nido biọ dòkọ asuka lẹ tọn mẹ ³Yẹn ko dosẹ́nna omẹ wiwe ṣie lẹ, yẹn sọ ylọ huhlọntọ ṣie lẹ ga na homẹgble ṣie, yèdọ, yé he to ayajẹ to yẹyi ṣie mẹ lẹ. ⁴Awhá omẹ susugege lẹ tọn to oso ji, di omẹ susu tọn, zingidi ahọludu akọta he yè bẹ́ pli lẹ tọn; OKLUNỌ awhànpa lẹ tọn bẹ́ awhànpa lẹ pli. ⁵Yé sọn aigba dindẹn ji wá, sọn opodo olọn tọn, yèdọ, OKLUNỌ, po awhànfunnu homẹ́fiọ etọn tọn po, nado gbà aigba lẹpo sudo. ⁶Mì wẹnhùn: na azán OKLUNỌ tọn sẹpọ́; é na wá di dindọn sọn Ganhunupo lọ de. ⁷Enẹwutu wẹ alọ lẹpo na kúṣé, ayiha gbẹtọ lẹpo tọn na yọ́. ⁸Yé na dibu: awufìẹ po awubla po na hẹn yé: yé na sọ tin to awusinsinyẹn mẹ di yọnnu he to ajipanu: awú na ji mẹde do mẹde go; nukun yetọn na sọ taidi ozòlọ. ⁹Dayi e go, azán OKLUNỌ tọn ja, okà gbọn homegble po homẹfiọ zozo po dali, nado hẹn aigba jẹvọ́: é na sọ gba mẹylankan lẹ súdo sọn é mẹ. ¹⁰Na sùnwhlẹvu olọn tọn lẹ, podọ mlindopọ yetọn ma to na họ̀n hinhọn yetọn: owhè na dozinvlu to titọnyì etọn mẹ, osùn ma to na hẹn hinhọ́n etọn họ́nun bà. ¹¹Yẹn na sọ sayahẹ́ aihọn na ylankan yetọn wutu, podọ hé omẹ ylankan na ylando yetọn wutu; yẹn na sọ basi na goyíyí goyítọ lẹ tọn ni doalọte, bo sọ hò sakla huhlọntọ lẹ tọn liai. ¹²Yẹn na basi na sunnu dopo ni họakuẹ hú sika, yèdọ sunnu dopo hú sika dagbedagbe Ofìli tọn. ¹³Enẹwutu yẹn na whàn olọn, aihọn na sọ họ̀n sọn otẹn etọn mẹ, to homẹgble OKLUNỌ awhànpa lẹ tọn mẹ, podọ to azán homẹfiọ zòzo etọn tọn gbè. ¹⁴E na taidi agbànlin asi he yè to mọdona, podọ di lẹngbọ he gbẹtọ ma gọ̀kọ̀ na, yé na sọ lẹ́gọ̀ omẹ dopodopo do omẹ etọn de, omẹ dopodopo nado họ̀n yì aigba ede tọn ji. ¹⁵O mẹdepope he yè mọ wẹ yè na sọwhán lùntọ́n; omẹdepope he sọ ho ede hu ye ji na gbọn ohi dali jai. ¹⁶Yè na gbà ovi yetọn lẹ kija to nukun yetọn mẹ; ye na bẹ́ owhé yetọn, yè na sọ hẹn yọnnu yetọn lẹ gble. ¹⁷Dayi é go, yẹn na zé Mede-nu lẹ fọ́n do yé ji, he ma na hò fataka pọ́n; eyín sika tọn sọ wẹ, yé ma na do homẹvivi do e go. ¹⁸Ogába yetọn ga na gbà dẹpẹmẹ yetọn lẹ kija; yé ma na wàlẹblanu na ovi he to ohò me lẹ; nukun yetọn ma na pò yòpọ dote. ¹⁹Babylọni, gigo ahọludu lẹ tọn, owhànpẹ yẹyidaho Kaldeẹni-nu lẹ tọn na taidi whenuena Jiwheyẹwhe sisẹ Sọdọmi po Gomọla po liai. ²⁰E ma to na yín otò gbèdegbède bà, mọ yè ma sọ to na nọ̀ é mẹ bà sọn whẹndo de jẹ whendo de mẹ: mọ Alabi-nu lẹ ma to na gbá ogòhọ to finẹ bà, mọ lẹngbọhọtọ lẹ ma to na doapó yetọn to finẹ bà. ²¹Ṣigba gbékanlin zùngbomẹ tọn lẹ na mlonai to finẹ; ohọ̀ yetọn lẹ na gọ na kanlin he blawu lẹ; ajankusu lẹ wẹ na nọ nọ̀ finẹ, nuvoìelẹ na nọ dúwe to finẹ. ²²Hávú lẹ wẹ na nọ dawhá to owhé yetọn he jevọ́ mẹ, avún fifiẹtọ lẹ to gbàngan dagbedagbe yetọn lẹ mẹ: ojlẹ etọn sẹpọ́, yè ma to na dọ̀n azán etọn dite gba.

¹NA OKLUNỌ na wà lẹblanuna Jakob, bo na vọ́ Islaeli dè, bo na sọ na otẹn yé to aigba yewlọsu tọn ji: jonọ lẹ na lẹzùn dopo po yé po, yé na sọ joawuna owhé Jakob tọn. ²Gbẹtọ lẹ na yí yé, bo na hẹn yé wá otẹn yetọn mẹ: owhé Islaeli tọn na sọ tindo yé to aigba OKLUNỌ tọn ji, na devisunnu podọ na deviyọnnu: yé na yí do wlẹ́ mẹmẹglọ mẹhe yé yín mẹmẹglọ na lẹ; yé na sọ dugán do awusinyẹnnamẹtọ lẹ ji.

³To enẹgodo to azán lọ gbè bọ OKLUNỌ na na gbọjẹ we sọn awubla towe mẹ, podọ sọn avosisa towe mẹ, podọ sọn kanlinmọ gbénu sinsinyẹn he mẹ yè hẹn we sẹ̀n te, ⁴Wẹ hiẹ na yí ahọlu Babylọni tọn do yinanslan he, bo na dọmọ, Na wẹ awusinyẹnnamẹtọ doalọte dolel otò sika tọn doalọte? ⁵OKLUNỌ ko wẹ́n opò mẹylankan tọn, po ogànpo ogandutọ lẹ tọn po. ⁶Mẹhe yí homẹgble dó zinnúdo omẹ madoalọte, mẹhe yí homẹfiọ do dugán do akọta lẹ ji, wẹ yè to homẹkẹndo, mẹdepope ma glọnali. ⁷Aihọn lẹpo gbọjẹ, bo sọ nabọẹ: yé sọ dabobo to hànjiji mẹ. ⁸Nugbo, atin kyple tọn jaya do oji we, kedle-tin Libani tọn, dọmọ, Sọn whenuena hiẹ ko họ́jai atingbotọ de ma wá de we. ⁹Okútomẹ sọn odò whàn na we nado pé we to gigọ̀ towe mẹ: é sọ whàngo na oṣiọ lẹ na we, yèdọ ogán aihọn tọn lẹpo; é ko zé ahọlu akọta lẹpo tọn tite sọn ofìn yetọn ji. ¹⁰Yé omẹ pó na dohó, bo na dọ hlan we, dọmọ, bé hie ko lẹzùn madogánnọ di míwlẹ ga? Bé hiẹ sọ taidi mlwlẹ? ¹¹Yè zlọn aṣọ towe do yọ̀do mẹ; po ogbè viọli we lẹ tọn po: ovón ko dlẹn do oglọ towe, owé sọ ṣinyon we. ¹²Nawẹ hiẹ flẹ́ sọn olọn do, hiẹ Lukifẹli, sùnwhlẹvu afọnnu tọn nawẹ yè sán we liai do, hiẹ he hen akọta lẹ zùn madogánnọ ¹³Na hiẹ ko dọ to ayiha towe mẹ, dọmọ, yẹn na hẹji yì olọn, yẹn na ze ofìn ṣie yì aga hú sùnwhlẹvu Jiwheye he tọn lẹ: yẹn na sinai to aga oplitò gbẹto lẹ tọn ji, to agéwaji dali. ¹⁴Yẹn na hẹji zẹ́ oji yìyì aslọ tọn go; yẹn na taidi Ganhunupo. ¹⁵Ṣigba yè na hẹn we jẹte do okútòmẹ, hlan odògbo wàji. ¹⁶Yé he mọ we lẹ, na pọ́n we tlíntlín, bo na lẹn towe tọn pọ́n, dọmọ, ehe lọ wẹ mẹhe hen aihọn sisọ, bo sọ hẹn ahọludu whàn ginanginan. ¹⁷Mẹhe hen aihọn zùn zùngbo, bo sọ gbà otò etọn súdo; bo ma dè ogàntọ etọn lẹ na yé ni yì owhé? ¹⁸Ahọlu akọta lẹpo tọn, yèdọ yé omẹ pó, mlọnai to gigo mẹ, omẹ dopodopo to owhé ede tọn gbè. ¹⁹Ṣigba hiẹ wẹ yè zé yìngbe sọn oyọwhé towe kọ̀n di alà òsùnú de, di avọ̀ ye he yè hù tọn, yé he yè sohi lùntón, he to tejẹ jei odò osé tọn mẹ; di osiọ he yè zíndai to afọ glọ. ²⁰Yè ma na di we po yé po dopọ́, na hiẹ ko gbà aigba towe súdo, bo sọ hù omẹ towe lẹ: okún mẹylankan lẹ tọn ma na diyín gbèdegbède. ²¹Mì wleawu otẹn hùhù tọn dai na ovi etọn lẹ, na ylankan otọ́ yetọn lẹ tọn wutu; na yé nikã fọ́n, bo tindo aigba lọ, na yé nikã yí otòdaho do gọ́ aihọn nukunmẹ. ²²Na yẹn na fọ́n do yé ji, wẹ OKLUNỌ awhànpa lẹ tọn dọ, bo sọ sán oyín Babylọni tọn sé, pipòtọ, visunnu, po yọnlọnvi po, wẹ OKLUNỌ dọ ²³Yẹn na sọ yí i do basi nudido na ajinján, podọ na tándo osìn tọn: yẹn na yí akiza dindọ̀n tọn do zà ẹ, wẹ OKLUNỌ awhànpa lẹ tọn dọ.

²⁴OKLUNỌ awhànpa lẹ tọn ko whle, dọmọ, Nugbo, dile yẹn lẹn do, mọkẹdẹ wẹ é na yín; podọ dile ayiha ṣie te, mọkẹdẹ wẹ é na nọte do. ²⁵Dọ yen na gbà Assylia-nu lẹ to aigba ṣie ji, podọ to osó ṣie ji, wẹ yẹn na zín i dai to afọ glọ: whenenu wẹ zẹ̀gẹ́ etọn na tón sọn é go, bọ agbàn etọn na sọ tọ́n sọn abọ́ yetọn ²⁶Ehe wẹ ojlo he yè lẹn dai do aihọn lepo go; ehe wẹ alọ he yè dlen do akọta lẹpo ji. ²⁷Na OKLUNỌ awhànpa lẹ tọn ko lẹn, mẹnu wẹ na diọ ẹ zùn ovọ alọ etọn sọ dlẹn do gbonu, mẹnu wẹ na gọ̀ ẹ do godo?

²⁸To azán he gbè ahọlu Ahaz kú wẹ agbàn he wá.

²⁹A jaya blo, mì Filistini lẹpo, na aglọpò he hò wé wẹ́n wutu: na sọn adọ́ odàn tọn mẹ wẹ amàpoe de na tọn sọn, okún etọn na sọ yín mìyọndàn he to zinzlọn. ³⁰Oplọnji wamọnọ lẹ tọn na dù, hẹntọnọ lẹ na sọ mlọnai to jijoho mẹ: yẹn na yí hùvẹ́ do hù adọ towe, bo na sọ hù pipòtọ towe. ³¹Wẹnhùn, hiẹ agbónu; dawhá, hiẹ otò, mì Filistini lẹpo, hiẹ ko zùn yiyọ: na azọ̀ na ti sọn agewaji, mẹde ma na klan ede sọn ogbé eton go. ³²Hógbè tẹwẹ yè na do na mẹdagun akọta lọ tọn? Dọ, OKLUNỌ ko do Ziọni, wamọnọ omẹ etọn lẹ tọn na sọ họ̀n biọ é mẹ.

¹AGBÀN Moab tọn.

¹Na to ozánmẹ wẹ yè gbà Ai Moab tọn kija, yè sọ hẹn ẹn nabọẹ; na to ozánmẹ wẹ yè gbà Kili Moab tọn kija, yè sọ hẹn ẹn nabọẹ: ²Ewọ ko hẹji yì Bajiti, podọ yì Diboni, ofi he fọ́n yì aga nẹlẹ nado viavi: Moab na wẹnhùn do Nebo ji, podọ do Medeba ji: ota yetọn lẹpo na pá, yè na sọ lùn otán lẹpo kọnyingbé. ³To tohòmẹ yé na yí odẹ́vọ̀ ṣinyọn yéde: to ohọ̀ yetọn ta, podọ to tohomẹ yetọn mẹ, mẹdopodopo na wẹnhùn, bo sọ to dasìn kọ̀n ploplo. ⁴Hẹṣbọn na sọ dawhá po Eleale po: yè na sè ogbè yetọn kaka jẹ Jahati: enẹwutu wẹ awhànpa Moab tọn he pànnu lẹ na dawhá yì oji, ogbẹ etọn naylan na ede. ⁵Ayiha ṣie dawhá yì oji na Moab wọwá etọn lẹ họ̀n jẹ Isoali, oyìnsi owhè atọ̀n tọn: to oji Lukiti tọn hihẹ mẹ, avi wẹ yé na do to hihẹ ẹ jei; na aliho Kolonainu tọn, yé na zé awhá dindọ̀n tọn daga. ⁶Na osìn Nimlim tọn lẹ na jẹvọ́: na ogbéma to wiwlo, amà to kúkú, onú mú de ma tin wutu. ⁷Enẹwutu susu he yé ko tindo, po ehe yé ko bẹ́ pli po, wẹ yé na hẹn gbọn otọ̀ sauli lẹ tọn mẹ wá yì. ⁸Na awhá lọ ko lẹ́do odògbo Moab tọn, hùnwinwẹn etọn wá Eflaimi, hùnwinwẹn etọn wá Beẹl-Elimi. ⁹Na otọ̀ Dimọni tọn lẹ na gọ́ na ohùn: na yẹn na hẹn oylan dẽvo wá Dimọni ji, yẹn na hẹn kinnikinni wá ewọ he họngán sọn Moab ji, podọ to pipòtọ he pò to aigba lọ ji tọn.

¹MÌ do lẹngbọvu hlan ogán aigba tọn sọn Ṣela wá zùngbomẹ, hlan osó viyọnnu Ziọni tọn tọn ji. ²E na wá jọ, di ohó danpetọ he yè yàn sọn adọ́ mẹ, mọwẹ viyọnnu Moab tọn lẹ na nò to otọ̀ Alnọni tọn bibiọ mẹ. ³Mì lẹnnu, mì hẹn whẹ̀dida ṣẹ; basi oyẹ́ towe di ozán to owhè dada mẹ; whla omẹ yè gbà kija lẹ; a dè wọwá hia blo. ⁴Moab, gbọ wọwá ṣie lẹ ni nọ̀ de we; na hiẹ ni yín agbó na yé to nukun gblandùtọ tọn mẹ: na alọslonamẹtọ jẹ pòdo, gblandùtọ gbodà, yè hù awusinyẹnnamẹtọ lẹ súdo sọn aigba ji. ⁵To lẹblanu mẹ wẹ yè na yí yonu ofìn tọn hẹnai: é na sọ sinai do e ji to nugbo mẹ to ogòhọ Davidi tọn mẹ, é na nọ dawhẹ̀, bo nọ din whẹ̀dida, bo sọ nọ hẹn dódó dizòn.

⁶Míwlẹ ko sè goyíyí Moab tọn; é yígo talala: yèdọ sakla etọn, goyíyí etọn, po homẹgble etọn po: mọwẹ ṣanwhiwhlẹ etọn ovọ́ wẹ. ⁷Enẹwutu wẹ Moab na wẹnhùn na Moab, yé omẹ dopodopo na wẹnhùn: na to odòdo Kil-Haleseti tọn mẹ wẹ mì na blawu te; nugbo yè linú yé. ⁸Na danji Hẹṣbọni tọn lẹ yọ́, po ovẹ́n Sibma tọn po: yé OKLUNỌ kosi lẹ tọn ko họ́ atin he diyín etọn lẹ liai, yé vùn kaka jẹ Jaezẹli, yé to dindánpé zùngbo mẹ: alà etọn dlẹn jẹgbonu, yé zẹ́ ohù go. ⁹Enẹwutu yẹn na davihan di avi Jaezẹli tọn, ovẹ̃n Sibma tọn: yẹn na yí dasìn ṣie do yọ̀n we, hiẹ Hẹṣbọni po Eleale po: na abobo daho di to sinsẹ́n alúnlùn-tin towe ji, podọ to ojijẹ towe ji. ¹⁰Yè dè homẹvivi sẹ́, podọ ayajijẹ sọn ogle he nọ sẹ́n susugege mẹ; ohàn ma na tin to vẹ̃ngle mẹ bà: mọ abobo ma na tin bà: mẹhe to ahàn finyón lẹ ma na finyón ovẹ̃n to ahàndanu yetọn mẹ bà; yẹn ko hẹn abobo ovẹ̃n sinsẹ́n whenu yetọn tọn doalọte. ¹¹Enẹwutu adọ̀go ṣie na dogbè di ajalẹn na Moab wutu, homẹ ṣie na Kal-Hali wutu. ¹²To enẹgodo, whenuena yè mọ dọ nudikọna Moab to ofì he fọ́n yì aga, wẹ é na wá ofi wiwe etọn mẹ nado hodọ́; aigba é ma na hugán omẹ.

¹³Ehe wẹ ohó he OKLUNỌ ko dọ gbọn Moab tọn dali, sọn whenẹnu wá. ¹⁴Ṣigba dinvie OKLUNỌ dọhó, dọmọ, To owhè atọ̀n ṣẹnṣẹn, di owhè pakanọ tọn, yè na vlẹ gigo Moab tọn, po susugege nẹ po, pipòtọ lẹ na whè, bo ma dogán.

¹AGBÀN Damasku tọn.

¹Dayi e go, yè dè Damasku sẹ́ sọn yínyín otò mẹ, é na sọ lẹzùn okiti. ²Yè gbẹ́ otò Aloẹli tọn lẹ dai: yé na yín lẹngbọpa tọn, he na mlọnai, mẹdepope ma na dobuna yé. ³Figángán ma na sọ tin to Eflaimi ba, aholudu sọn Damasku podọ pipòtọ Sylia tọn: yé na taidi gigo ovi Islaeli tọn lẹ tọn, wẹ OKLUNỌ awhanpa lẹ tọn dọ. ⁴To azán lọ gbè, to enẹ godo, yè na hẹn gigo Jakob tọn dèpò, kiklo agbasa etọn tọn wẹ yè na hẹn húliwhàn. ⁵E na sọ taidi whenuena jizọnwàtọ to gbàdo bẹ́ pli, bo sọ yí awà etọn do to gbàdo yà, é na sọ di whenuena mẹde to gbàdo bẹ́ pli to agbàdo Lefaimi tọn mẹ. ⁶Gãnṣo yè na jó owelu ovẹ̃n sinsẹ́n tọn dai do é mẹ, di whinwhàn atin Oliviẹli tọn, sinsẹ́n pẹvi awe kavi atọ̀n to atinlà he fọ́n ji aga ji, ẹnẹ kavi atọ́n do olà gbonu tọn he tindo sinsẹ́n susu mẹ, wẹ OKLUNỌ Jiwheyẹwhe Islaeli tọn dọ. ⁷To azán lọ gbè gbẹtọ na do nukun Mẹdatọ etọn, nukun etọn na sọ gbọgbé na Omẹ Wiwe Islaeli tọn. ⁸E ma to na pọn agbà lẹ, azọ́n alọ etọn mẹ tọn, mọ é ma to na hò ehe alọvi etọn ko basi pọ́n, kavi vodunzùn, kavi boṣiọ lẹ. ⁹To azán lọ gbè wẹ otò huhlọnnọ etọn lẹ na taidi atinlà he yè gbó dai, podọ alà he tin to aga, he yé jodai na ovi Islaeli tọn lẹ wutu; gbàkija na tin. ¹⁰Na hiẹ ko wónji Jiwheyẹwhe whlẹngán towe go, bo ma sọ hò awinyan huhlọn towe tọn pọ́n, enẹwutu wẹ hiẹ do atin dagbedagbe, bo sọ yí atinlà dẽvo dó do e mẹ. ¹¹To azán lọ gbè wẹ hiẹ na hẹn atin towe whẹ́n, podọ to afọnnu hiẹ na hẹn ojì towe tọ́nkun: ṣigba yè na bẹ́ jijẹ yì to azán nukunbia tọn gbè, awubla vivẹ na sọ tin. ¹²Dindọ̀n wẹ na awhá omẹ susu tọn, he dawhá di awhá ohù tọn: podọ na zingidi akọta lẹ tọn, he to zínzínyẹn di zìnzìn osìn susu tọn. ¹³Akọta lẹ na to zínzínyẹn di zínzín osìn susu tọn: ṣigba Jiwheyẹwhe na wọhẹ yé, yé na sọ họ̀n yì ofi dindẹn, yè na sọ jẹmóna yé di ogbé amà húhú osó ji tọn to jẹhọn nukọn, podọ di kọ́gudu lẹ́pénọ to jẹhọn nukọn. ¹⁴Bo dayi e go, to whèjai damẹ, tukla; whẹpo ai na họ́n ewọ ma tin. Ehe wẹ otẹn yé he hẹn mí gble lẹ tọn, po mimá yé he jajo do mí lẹ tọn po.

¹DINDỌ̀N wẹ na aigba he tindo oyẹ̀ awàfun awe tọn, he tin to òtọ̀ Etiopia tọn godo. ²Ehe do wẹndagbe hlan ohù liho, yèdọ, to ohún tọ̀oko tọn mẹ, dọmọ, mì yì, mì wẹndagun he yawu emì, yì akọta he yè gbàpé bo zindai lẹ de, omẹ he dobu sọn whẹwhẹwhenu yetọn kaka jẹ dinvie; akọta he do hlọnhlọn, bo sọ zín omẹ dai, aigba mẹhetọn otọ̀ susu ko hẹngble? ³Mì he to aihọn mẹ lẹpo, po mì he nọnò aigba ji lẹ po, mì pọ́n, whenuena é zé asia do aga òsó lẹ tọn; podọ whenuena é kúnván, mì bo sè. ⁴Na mọwẹ OKLUNỌ dọ hlan mi, yẹn na gbọjẹ, yẹn na sọ lẹnnu to nọtẹn ṣie mẹ di yózo whèdada mẹ tọn, podọ di aslọ ahún tọn, to yózo jijẹ tọn me. ⁵Na jẹnukọnna jijẹ, whenuena osẹ́ whẹ́n, bọ ovẹ̃n sinsẹ́n bligò, é na yí agbogọdọẹ do sán alà yọ́yọ́, bo na dè e sẹ̀, bo sọ sán alà lẹ liai. ⁶Yè na sọ jó yé dai na ohẹ́ osó ta tọn lẹpo, na kanlin aigba tọn lẹ: ohẹ́ lẹ na hú owhè to yé ji, kanlin aigba tọn lẹpo na sọ hlẹn avivọ to yé ji. ⁷To ojlẹ lọ mẹ wẹ yè na hẹn nunina wá na OKLUNỌ awhànpa lẹ tọn sọn omẹ he yè gbàpé, bo zindai de, podọ sọn omẹ he dobu sọn whẹwhẹwhenu yetọn kaka jẹ dinvie de; akọta he do huhlọn, bo zín omẹ dai to afọ glọ; aigba mẹhetọn otọ̀ susu hẹngble, jẹ otẹn oyín OKLUNỌ awhànpa lẹ tọn tọn, osé Ziọni tọn.

¹Agbàn Egypti-tọn. Dayi e go, OKLUNỌ hé aslọ he jawu ji, bo na wá Egypti: yè na sọ whàn vodun Egypti tọn lẹ to nukọn etọn, ayiha Egypti tọn na yé to ṣẹnṣẹn etọn. ²Yẹn na sọ zé Egypti fọ́n do Egypti ji: omẹ dopodopo na sọ hoavùn hẹ mẹmẹsunnu etọn, omẹ dopodopo do kọmẹnu etọn ji; otò na fọ́n do otò ji, ahọludu na fọ́n do ahọludu ji. ³Gbigbọ Egypti tọn na gble to ṣẹnṣẹn etọn; yẹn na hẹn oplọn etọn gble: yé na din in hlan vodun lẹ de, hlaan nújlẹtọ lẹ de, hlan yé he tindo gbigbọ dọdi tọn lẹ de, hlan azétọ lẹ de podọ hlan owọ́ntọ lẹ de. ⁴OKLUNỌ awhànpa lẹ tọn dọmọ, Egyptinu lẹ wẹ yẹn na yí do alọ mẹ na klunọ fifiẹtọ de; ahọlu kàndùtọ de na sọ dùgán do yé ji. ⁵Osìn na vọ̀ to ohù mẹ, yè na hẹn otọ̀ gble, é na sọ hú. ⁶Yè na diọkọna otọ̀ lẹ yì ofi dindẹn; yè na hẹn otò whlẹngán tọn lẹ jẹvọ́; ofán po fẹ́nkan po na sọ fiọ. ⁷Ofán pọ̀pọ̀ tọpá tọn to otọ̀ tó, podọ nudepope he yè dó do otọ́t Ó, na wlo, é na kija, bo ma na tin bà. ⁸Whèhùtọ lẹ na blawu ga, yé he to omlẹn dlẹn to otọ̀pá lẹ na viavi, onú na dikọna yé he to odọ̀ dlẹn do osìn mẹ lẹ. ⁹Yé he to azọ́n osékan dagbedagbe tọn wà lẹ, mẹhe to alavọ̀ lọ̀n lẹ na sọ flú. ¹⁰Yè na gbà yé to linlẹn etọn mẹ, yé he basi áliho po tándo po na whevi. ¹¹Nugbo, nulunọ wẹ ahọvi Isoan tọn lẹ, linlẹn honamẹtọ nuyọnẹntọ Falo tọn lẹ ko lẹzun nululu: nawẹ mì dọ na Falo do, dọmọ, Yẹn tindo visunnu nuyọnẹntọ, visunnu ahọlu hóhó—whenu tọn lẹ? ¹²Bé fie wẹ yé te? fie wẹ gbẹtọ nuyọnẹntọ towe lẹ te? gbọ yé ni dọ na we dinvie, gbọ yé ni yọ́n onú he OKLUNỌ awhànpa lẹ tọn lẹn do Egypti go. ¹³Ahọvi Isoan tọn lẹ lẹzùn nulunọ, yè sọ klọ ahọvi Nofi tọn lẹ; yé klọ Egypti ga, yèdọ yé he yín aglosu whẹndo etọn tọn lẹ. ¹⁴OKLUNỌ ko gbọ̀ gbọ̀f ufu tasinyẹn tọn do e mẹ: yé ko hẹn Egvptì búali to azọ́n etọn lẹpo mẹ, dile ahannumunọ nọ to ahlida to oslu etọn mẹ do. ¹⁵Mọ azọ̀n depope ma na tin na Egypti, he ota kavi osí, alà kavi tọ̀woko, sọgan basi.

¹⁶To azán lọ gbè, Egypti na taidi yọnnu: é na dibu, bo sisọ na alọ mìmì OKLUNỌ awhànpa lẹ tọn tọn wutu, he émì do e ji: ¹⁷Aigba Juda tọn na zùn mọsi na Egypti, mẹdepope he sọ flin bo dọhó etọn na dibu to ohò ede tọn mẹ, na linlẹn OKLUNỌ awhànpa lẹ tọn wutu, he é ko magbè etọn do ẹ go.

¹⁸To azán lọ gbè wẹ otò atọ́n to aigba Egypti tọn ji na do ogbè Kanaani tọn, bo na sọ whle hlan OKLUNỌ awhànpa lẹ tọn; yè na nọ ylọ dopo dọ, Otò dindọ̀n tọn.

¹⁹To azán lọ gbè agbà dopo na tin hlan OKLUNỌ to aigba Egypti tọn sọnsẹn, po odotin de po to dali etọn hlan OKLUNỌ. ²⁰E na sọ yín na ohia dopo, podọ na kunnúhó hlan OKLUNỌ awhànpa lẹ tọn to aigba Egypti tọn ji: na yé na dawhà hlan OKLUNỌ na awusinyẹnnamẹtọ lẹ wutu, é na sọ do whlẹngántọ de hlan ẹn, omẹ daho de, ewọ na sọ whlẹn yé. ²¹OKLUNỌ na sọ zùn yinyọnen na Egypti, Egypti-nu lẹ na sọ yọ́n OKLUNỌ to azán lọ gbè, yé na sánvọ́, bo sọ na nunina; nugbo, yé nadopà hlan OKLUNỌ, bo na sọ yi i basi. ²²OKLUNỌ na linú Egypti zindai: bo sọ hẹnazòn etọn gbọ yé na lẹ́gọ̀ do OKLUNỌ de, é na sè óvẹ̀ yetọn, bo sọ hẹn azọn yetọn gbọ.

²³To azán lọ gbè alihogbó dopo wẹ na tin sọn Egypti jẹ Assylia, Assylianu lẹ na wa Egypti, Ẹgypti-nu lẹ na sọ wá Assylia; Egypti-nu lẹ na sẹ́n hẹ́ Assylia-nu lẹ.

²⁴To azán lọ gbè wẹ Islaeli na yín atọ̀ntọ hẹ Egypti podọ hẹ Assylia, yèdọ odona to aigba lọ ṣẹnṣẹn. ²⁵Mẹhe OKLUNỌ awhànpa lẹ tọn ko dona, dọmọ, Donanọ wẹ Egypti omẹ ṣie lẹ, podọ Assylia azọ́n alọ ṣie tọn, po Islaeli aigbagú ṣie po.

¹TO owhè he mẹ Taltan wá Aṣdọdi, whenuena Salgọni ahọlu Assylia tọn do e hlan, bo fùnawhàn hẹ́ Aṣdọdi, bo bẹ́ ẹ; ²To ojlẹ doponẹ mẹ wẹ OKLUNỌ dọ gbọn Isaia ovi Aìnọsi tọn dali, dọmọ, Yì, bo tún odẹ́vọ̀ sọn adaja towe mẹ, bo dè afọpa towe sọn afọ towe, E sọ basi mọ, bo to zọnlinzin to omẹ́, podọ to mado afọpa mẹ. ³OKLUNỌ sọ dọmọ, Dile devi ṣie Isaia zinzọnlin to omẹ́ podọ to mado afọpa mẹ to owhè atọ̀n na ohia, podọ na nudabla to ota Egypti po Etiopia po tọn. ⁴Mọkedẹ wẹ ahọlu Assylia tọn na yí Egypti-nù lẹ do wle kanlin mọ, po Etiopia-nù lẹ po do wlé mẹmẹglọ, yọpó po mẹhó po to omẹ́ podọ to mado afọpa mẹ, yèdọ po yònu yetọn po to nuvò, na winyan Egypti tọn. ⁵Obú na di yé, winyan na sọ hù yé na Etiopia tódido yetọn wutu, podọ na Egypti gigo yetọn wutu ⁶Omẹ he to hùlẹnu lẹ na sọ dọ to azán lọ gbè, dọmọ, Dayi e go, bé ehe hunkọ wẹ tódido mítọn; fie mí họ̀n yì na alọgọna, na yè nido whlẹn omẹ sọn ahọlu Assylia tọn si: podọ mílẹ, nawẹ mí na họ̀ngán do?

¹AGBAN zùngbo ohù tọn tọn. Dile jẹhọn lẹ́pénọ ohù waji tọn nọ jù wáyì do; mọwẹ é sọn zùngbo mẹ wá, sọn aigba he dobu ji. ²Numimọ sinsinyẹn wẹ yè dohia mi; bublutọ to bublu, hẹngbletọ to hinhengble. Hẹ oji yì, hiẹ Elami: dosla, hiẹ Médiá; awubla eton lẹpo wẹ yẹn ko hẹn doalọte ³Enẹwutu adọ̀mẹ ṣie gọ́ na awufiẹsa: nukunbibia hẹn mi, di nukunbibia yọnnu he to ajipanu tọn: yẹn huwhẹ́, whenuena yẹn sè e; yẹn flu, whenuena yẹn mọ ẹn. ⁴Ayiha ṣie to núhà, sisọsisọ dobuna mi: ozán ayajẹ ṣie tọn wẹ é hẹn zùn nusisi na mi. ⁵Wleawu tafo tọn dai, họ́ali to atọ̀họ ji, dù, nù: fón, mì ahọvi lẹ, mì sámìdo sagba mítọn ⁶Na le wẹ OKLUNỌ dọ hlan mi, dọmọ, Yì, dè omẹ dopo ni họali, gbọ ni dọ onú he é mọ. ⁷Ewọ sọ mọ kẹkẹ po osónọ awe-awe po, kẹkẹ kẹtẹkẹtẹ tọn, podọ kẹkẹ kanklosopóawenọ tọn; é sọ whesọ do dotóai. ⁸E sọ dawhá di kinnikinni de: OKLUNỌ È, whepoponu wẹ yẹn nọ nọte to atọ̀họ ji to okle whenu, yè sọ dè mi do hihọ́ ṣie kọ̀n to ozán lẹpo mẹ. ⁹Dayi e go, kẹkẹ dawe de tọn die ja e, po osọnọ awe-awe po: é sọ gblọn bo dọmọ, Babylọni jai, é jai: boṣiọ winwlan vodun etọn lẹ tọn pó wẹ họ́ jẹ aigba. ¹⁰Hiẹ ozinhọ ṣie E, po gbàdogbò ṣie po: ehe yẹn sè sọn OKLUNỌ awhànpa lẹ tọn si, Jiwheyẹwhe Islaeli tọn wẹ yẹn dohia we.

¹¹Agbàn Duma tọn. E sọ dawhá hlan mi sọn Seili, Nuhótọ, nawẹ ozán te? ¹²Nuhọ́tọ lọ sọ dọmọ, ai to hinhọn ja, ozán sọ to kúkú ga: eyín mì na kanbiọ, mì bo kanbiọ; mì lẹ́gọ̀, mì wá.

¹³Agbàn Alabia tọn.

¹³Ozùnkan Alabia tọn mẹ wẹ mì na jẹ, mì ogbẹ́ Dedani tọn he jei lẹ. ¹⁴Mehe to, aigba Tema tọn ji lẹ hẹn osìn Wá na ewọ he ovẹ́ to húhú, yé sọ hẹn núdùdù yetọn jẹnukọnna mẹhe họnjei lẹ. ¹⁵Na yé họ̀n na ohi, na ohi odọnsún, na ogá titá, podọ na nukunbibia awhàn tọn ¹⁶Na le wẹ OKLUNỌ dọ hlan mi, domọ, Whẹpo owhè dopo na pé di owhè pakanọ tọn gigo Kedali tọn lẹpo na jài. ¹⁷Pipòtọ to gáyìntọ lẹ mẹ, asuka ovi Kedali tọn lẹ, na dèpò: na OKLUNỌ Jiwheyẹwhe Islaeli tọn ko dọ ẹ.

¹AGBÀN agbàdo númimọ tọn.

¹Etẹ wẹ wà we dinvie, bọ hiẹ do hẹji yì họ̀ta patapata. ²Hiẹ mehe gọ́ na zìngidi, otò magbọjẹ nọ, otò homẹvìvi tọn: yè ma yí ohi do hù sunnu towe lẹ, mọ yé ma si to awhàn. ³Ogán towe lẹ ko zọ̀npó họ̀n yì, gayìntọ lẹ ko bla ye do gòkànmẹ: mẹhe yè mọ to ohò towe mẹ lẹpo wẹ yè bla pli, he họ̀n sọn aganu wá. ⁴Enẹwutu wẹ yẹn domọ, dè nukun sẹ́ sọn ogo e, yẹn na viavi vivẹ́, a jẹtukla nado miọnhomẹna mi blo, na hẹngble viyọnnu omẹ ṣie lẹ tọn tọn wutu. ⁵Na azán tukla tọn wẹ, zindai tọn, po magbọjẹ po tọn, gbọn OKLUNỌ Jiwheyẹwhe awhànpa lẹ tọn si to agbàdò númimọ tọn mẹ, é to odokọ lẹ họ́ liai, bo sọ to awhádo hlan osó lẹ. ⁶Elami hẹn ogò po kẹkẹ gbẹtọ tọn po, po osọ́nọ tọn po, Kili sọ hùn sagba dai. ⁷To enẹ godo, agbadò towe he yónwhanpẹ lẹ na gọ́ na kẹkẹ, osọ́nọ lẹ na sọ tẹ́ awhàn dai to dokọnu họ́ngbó ji, ⁸Ewọ mọ nùsú Juda tọn, hiẹ sọ pọn to azán lọ gbè ogbaja owhé zùngbo mẹ tọn. ⁹Mì ko sọ mọ núvọ́ otò Davidi tọn tọn ga, dọ yé sù: mìwlẹ sọ dọ̀n osìn tándo mẹ ton he to odò pli. ¹⁰Mì ko hia owhé Jelusalẹm tọn ga, owhé ewẹlẹ wẹ mì họ zindai nado hẹn odòkọ sinyẹn. ¹¹Mì ko sọ kùn odòkodò to odokọ awe ṣẹnṣẹn na osìn tándo hóhó tọn: ṣigba mì ma pọ́n ewọ mẹhe wàzọn etọn, mọ mì ma ho mẹhe basi i to hóhówhenu pọ́n. ¹²To azán lọ gbè wẹ OKLUNỌ, Jiwheyẹwhe awhànpa lẹ tọn na ylọ nado viavi, nado blawu, podọ nado lùn odà, podọ nado bla odẹ́vọ̀ do ogo: ¹³bo dayi e go, homẹhùnhùn po ayajijẹ po, hùhù oyìnsú tọn, po hùhù lẹngbọ tọn po, dùdù olàn tọn, po nùnù vẹ̃nhàn tọn po: mì gbọ mi ni to dùdù, bo sọ to nùnù, na, osọ̀ wẹ mí na kú. ¹⁴OKLUNỌ awhànpa lẹ tọn dọ do otó ṣie mẹ, dọ, Nugbo, yè ma to na klọ ylando he sẹ́ sọn mì go kaka mì nado kú, wẹ OKLUNỌ awhànpa lẹ tọn dọ.

¹⁵Le wẹ OKLUNỌ Jiwheyẹwhe awhànpa lẹ tọn dọ, dọmọ, Yì, tọn yì nugopọntó he de, yèdọ jẹ Sebna de, he yín owhétọ, ¹⁶bo dọmọ, etẹ wẹ a tindo to ofi? podọ mẹnu wẹ hiẹ tindo to ofi, bọ hiẹ do kùn yọ̀whé de do ofi, di mẹhe kùn yọ̀whé na ede to aga, bọ a sọ kùn nọtẹn na dewe to awinyan mẹ? ¹⁷Dayi e go, OKLUNỌ na yí mẹglọnọ sinsinyẹn do dida we sọ yì, é na sọ Ṣinyọnnúdo we. ¹⁸Nugbo é na lẹ́ bo sọ yí we do yinwhán di onú mimlin do otò daho de mẹ; finẹ hiẹ na kú te, podọ finẹ wẹ kẹkẹ gigo towe tọn na yín winyan owhé OKLUNỌ towe gbè tọn. ¹⁹Yẹn na yàn we sọn otẹn towe mẹ, é na sọ dọ̀n we liai sọn nọten towe mẹ. ²⁰To enẹgodo to azán lọ gbè wẹ yẹn na ylọ devi ṣie Eliakimi ovi Hilkia tọn: ²¹yẹn na sọ yí avọ̀ towe ṣinyọnna ẹn, bo na yí gbaja towe bla nẹ, yẹn na yí ahọludu towe do alọ etọn mẹ: é na sọ yín otọ́ na Jelusalẹm-nu lẹ, podọ na owhé Juda tọn ²²Yẹn na sọ yí họ̀nhùngàn owhé Davidi tọn tọn do abọ́ etọn ji; é na hùn, mẹde ma na sú; é na sú, mẹde ma na hùn. ²³Yẹn na sọ whè e di húngàn do otẹn gángán mẹ; é na sọ tin na ofìn gigo tọn, na owhé otọ́ etọn tọn. ²⁴Yé na yí gigo owhé otọ́ etọn tọn lẹpo pla okọ̀ nẹ̃, ovi po vikún po, núzinzán lẹpo, sọn núzinzán kọfo tọn, kaka jẹ núzinzán tánglan tọn lẹpo ji. ²⁵OKLUNỌ awhànpa lẹ tọn dọmọ, tó azán lọ gbè wẹ yè na họ̀n húngàn he yè whè to otẹn gángán mẹ sẹ̀, yè na sán ẹn liai, é na sọ jai, agbàn he tin to é ji wẹ yè na sọ sán sẹ́: na OKLUNỌ ko dọ ẹ.

¹AGBAN Tyle tọn. Mì wẹnhùn, mì ohún Talṣiṣi tọn emì; yè gbà ẹ kija sọmọ bọ owhé de ma tin, ofi bibiọ de ma sọ tin: yè sọhia na yé sọn aigba Kittimi tọn ji. ²Mì nabọe, mì mẹhe to olopo ji lẹ; hiẹ mẹhe ajọtọ́ Sidoni tọn, he jugbọn ohù ji, ko gọ́. ³Sọn aliho osìn daho tọn, nọkún Siholi tọn, ojijẹ otọ̀ tọn wẹ whèkuẹ etọn; ewọ sọ wẹ ahi akọta lẹ tọn. ⁴Winyan ni hù we, hiẹ, Sidoni: na ohù dọhó, yèdọ huhlọn ohù tọn, dọmọ, yẹn ma tin ajipanu, mọ yẹn ma ji ovi, mọ yen ma yìn visunnu, mọ yẹn ma pọ́n awhli go. ⁵Di owẹ́n gbọn Egypti dali, mọkẹdẹ wẹ awú na sinyẹn yé gbọn owẹ́n Tyle tọn dali. ⁶Mì juyi Talṣiṣi; mì wẹnhùn, mì mẹhe to olopo ji lẹ. ⁷Bé ehe wẹ otò homẹvivi tọn mítọn, he ko tin sọn whẹwhẹwhenu, sọn hóhó whenu? afọ ewlọsu tọn na zé e yì ofì dindẹn nado yín owọwá. ⁸Mẹnu wẹ lẹn ehelẹ do Tyle go, otò ojẹgbakun tọn ajọtọ́ mẹhetọn yín ahọvi, nújlatọ mẹhetọn yín yẹyinọ aihọn tọn? ⁹OKLUNỌ awhànpa lẹ tọn ko lẹn ẹn, nado hẹn sakla gigo tọn lẹpo gble, nado hẹn yẹyinọ aihọn mẹ tọn lẹpo zùn ovlẹ ¹⁰Jù gbọn ṣẹnṣẹn aigba towe tọn ji, di otọ̀, hiẹ viyọnnu Talṣiṣi tọn: huhlọn de ma sọ tin bà. ¹¹Ewọ ko dlẹn alọ etọn do ohù ji, é ko whàn ahọludu lẹ: OKLUNỌ ko na osẹ́n gbọn otò ajọtọ lọ tọn dali, nado gbà ofi gángán etọn súdo. ¹²Ewọ sọ dọmọ, Hiẹ ma ha jaya bà, hiẹ awhli he yè to yàdona, viyọnnu Sidọni tọn: fọ́n, jùyi Kittimi; to finẹ hiẹ ma sọ to na gbọjẹ ga. ¹³Pọ́n aigba Kaldẹa-nu lẹ tọn; omẹ helẹ ma ko tin dai, kaka Àssylia-nu lẹ dó e na yé he nọnọ̀ zùngbo mẹ lẹ: yé ko zé atọ̀họ etọn dote, yé ko gbá awanu etọn; ewọ sọ họ́ ẹ liai. ¹⁴Mì wẹnhùn, mì ohún Talṣiṣi tọn emì; na yè gbà huhlọn mítọn kija. ¹⁵To enẹgodo to azán lọ gbè, yè na wònjì Tyle go họ́ owhè kandegban, Kẹdẹdi azán ahọlu dopo tọn: to opòdo owhè kandegbàn tọn godo, Tyle na jihàn di yọnnu ayọ̀detọ. ¹⁶Yí ajalẹn dopo, dán gbọn otò mẹ, hiẹ yọnnu ayọ̀detọ he yè wònji é go, ké ohàn vivi, ji ohàn susu, na yè nido flin we. ¹⁷To enẹgodo to opòdo owhè kandegbàn tọn godo wẹ OKLUNỌ na dla Tyle pọn, e na sọ lẹ́gọ̀ na azọnkuẹ ẹtọn, bo na lọgà hẹ ahọludu aihọn mẹ ton lepo, he tin to aigba ji. ¹⁸Ajọ́nú etọn po azọ́nkuẹ etọn po na sọ yín wiwe hlan OKLUNỌ: yè ma to na bẹ́ ẹ pli, mọ yè ma to na to e pli; na ajọ́nú etọn na yín yé he nọnọ̀ OKLUNỌ nukọn lẹ tọn, nado dù dùpékọ̀, podọ na avọ̀ dagbedagbe.

¹DAYI e go, OKLUNỌ hẹn aihọn jẹvọ́, bo sọ gbà ẹ kija, é sọtadò nẹ̃, bo sọ vunvún mẹhe to e mẹ lẹ pé ²E na wá jọ, le yè wà do gbẹtọ, mọwẹ é na te na yẹwhenọ; le é te na devi, mọkẹdẹ wẹ na klunọ etọn: le é te na deviyọnnu, mọwẹ na klunọ yọnnu etọn; le é te na hihọ̀tọ, mọwẹ na sisatọ: le é te na whenamẹtọ, mọwẹ na akuẹhọtọ. ³Aihọn na jẹvọ́ gbidigbidi, yè na sọ hẹn ẹn gble gbidigbidi: na OKLUNỌ ko dọ ohó he. ⁴Aihọn to awubla, bo sọ to pẹ́kú, aihọn to kàngble, bo sọ to pẹ́kú, goyítọ aihọn mẹ tọn lẹ to lùnlùnpò. ⁵Yè sọ hẹn aihọn gble to omẹ he to e mẹ lẹ glọ; na yé ko jẹ osẹ́n lẹ lọ mẹ, yé diọ alẹnuhó, yé hẹn alẹnu madopodo gble. ⁶Enẹwutu wẹ odẹhodo ko hù aihọn súdo, mẹhe nọnọ̀ e mẹ lẹ sọ jẹvọ́ enẹwutu wẹ omẹ he to aihọn mẹ lẹ jizò, omẹ pẹvide wẹ po. ⁷Vẹ̃nhàn yọ́yọ́ to awubla, ovẹ̃n to kàngble, yé he to ayajẹ lẹpo to hùnwẹn. ⁸Ayajẹ tablẹti tọn gbò, awhá yé he to ayajẹ lẹ tọn nọte, homẹvivi ajalẹn tọn doalọte. ⁹Yé ma na; nù vẹ̃nhàn po ohàn po; ahàn sinsinyẹn na vé na yé he to nùnù in lẹ. ¹⁰Ye họ̀ otò zingidi tọn jẹdò: yè sọ glọn owhé lẹpo, na gbẹtọ ma nado sọgan biọ é me bà. ¹¹Awhá na vẹ̃nhàn tin to aligbo ji; ayajẹ lẹpo dozinvlu, awuvivi aigba lọ tọn ko yì. ¹²Gbàkija wẹ pò to ai to otò mẹ, yè sọ yí dindọ̀n do linú dòkọ́nu. ¹³Whenuena é na yín le to ṣẹnṣẹn aigba lọ ton, to ṣẹnṣẹn omẹ ewẹlẹ tọn, di whinwhàn atin olivieli tọn, di ovẹ̃n sinsẹ́n welu tọn whenuena oji jẹ ovẹ̃n tọn jẹ. ¹⁴Yé na zé ogbe yetọn do aga, ye na jihàn na gigodaho OKLUNỌ tọn wutu, ye na sọ dawha sọn ohù mẹ. ¹⁵Enẹwutu pàgigona OKLUNỌ to aigba hinhọn tọn, yèdọ oyín OKLUNỌ Jiwheyẹwhe Islaeli tọn tọn to olopo ohu tọn ji.

¹⁶Sọn aihon podo wẹ mí sè ohàn, yèdọ gigo hlan dódónọ lẹ. Ṣigba yẹn dọmọ, Hùsúdo ṣie, hùsúdo ṣie, dindọn wẹ na mi! alẹdatọ lẹ ko dalẹ; nugbo, alẹdatọ lẹ ko dalẹ zẹjlẹ go. ¹⁷Obú po odò po, po ogẹ po tin to ota towe, hiẹ aihọnmẹnu. ¹⁸To enẹgodo, ewọ mẹhe họ̀n sọn awha avosisa tọn mẹ na jai jẹ odo mẹ; mẹhe sọ tón sọn odo mẹ wẹ ye na yí ogẹ́ do wle: na vẹsẹnuvo sọn aga hùn do nuvo, odòdo aihọn tọn sọ whan. ¹⁹Yè gbà aihọn jedò gbidigbidi, aihọn zùn yiyó kọnyingbe gbidigbidi, aigba whàn ginanginan. ²⁰Aihọn na mùsà bo dahli di ahànnumunọ, yè na sọ bẹ́ ẹ sè di oflo; ylando etọn na sọ pẹnagbàn ẹn, é na jai, é ma to na fọ́n bà.

²¹To enegodo to azán lọ gbè, OKLUNỌ na sáyana awhàn goyítọ lẹ tọn he tin to aga, po ahọlu aihọn me tọn lẹ po to aihọn mẹ. ²²Yè na sọ bẹ́ ye pli di le yè nọ bẹ́ ogàntọ lẹ pli do odo mẹ do, yè na sú yé do gànhọ̀ mẹ, to azán susu godo yè na sọ dla ye pọ́n. ²³Whenẹnu wẹ yè na doflu osùn, winyan na sọ hù owhè, whenuena OKLUNỌ awhànpa lẹ tọn na dugán to osó Ziọni tọn ji, podọ to Jelusalẹm, gigo na sọ tin to omẹ hóhó etọn lẹ nukọn.

¹OKLUNỌ È, hiẹ wẹ Jiwheyẹwhe ṣie; yẹn na zé we daga, yẹn na pa oyín towe; na hiẹ ko basi onú jawu; linlẹn towe hóhó whenu tọn dódó po nugbo po wẹ. ²Na hiẹ ko hẹn otò de zùn okiti; hiẹ ko hù otò he do odòkọ súdo: awánu ojonọ lẹ tọn ma yín oto bà: yè ma to na zé e dote bà, ³Enẹwutu wẹ omẹ huhlọntọ lẹ na pàgigona we, ótò okọta he dobu lẹ tọn na sọ dibuna we. ⁴Na hiẹ ko yín huhlọn na wamọnọ, huhlọn na agbatọnọ to tukla etọn mẹ fibẹ̀tado sọn jẹhọn nù, yẹtẹn sọn oyózo mẹ, whenuena jẹhọn sihsinyẹn yé mẹhe dobu lẹ tọn taidi jẹhọn to adó go. ⁵Hiẹ na zín awhá ojonọ lẹ tọn dai di oyózo to ofi húhú; yèdọ oyózo po oyẹ́ aslọ tọn po: yè na sọ zín alà mẹhe dobu lẹ tọn dai. ⁶Podọ to osó he ji wẹ OKLUNỌ awhànpa lẹ tọn na dù núdùdù onú dojo tọn te na akọta lẹpo, núdùdù vẹ̃nhàn tọn to owhà ji, onú dojo he gọ́ na ojo tọn, vẹ̃nhàn he dó to owhà ji. ⁷Ewọ na sọ hẹn nukunmẹnu he yè ṣinyọn nukun na gbẹtọ lẹpo gble to osó he ji, nukunmẹnu he yè dlẹn ṣinyọn akọta lẹpo ji. ⁸Ewọ na zé okú mì to awhàngbigba mẹ; OKLUNỌ JIWHEYẸWHE na sọ súnsún dasìn sọn nukun lẹpo mẹ; é na sọ dè vlẹko omẹ ẹtọn lẹ tọn sọn aihọn lẹpo mẹ: na OKLUNỌ ko dọ ẹ.

⁹Yè na sọ dọ ẹ to azán lọ gbè, dọmọ, Pọ́n ẹn, ehe wẹ Jiwheyẹwhe mítọn; míwlẹ ko nọtepọ́n ẹn, é na sọ whlẹn mí: OKLUNỌ wẹ ehe: míwlẹ ko nọte pọ́n ẹn, mí na to ayajẹ, homẹ mítọn na sọ to hùnhùn to whlẹngán etọn mẹ ¹⁰Na osó he ji wẹ alọ OKLUNỌ tọn na te, é na sọ zín Moab to oglọ etọn yèdọ dile yè nọ zín ogbé dai do na ogbó. ¹¹E na dè alọ etọn tọ́n to ṣẹnṣẹn yetọn dile sìnlintọ nọ dè alọ etọn jẹgbonu do nado linsin; é na sọ zín sakla yetọn dai dogọ́ ogbànna alọ yetọn mẹ tọn ¹²Ofigángán atọ̀họ daho odòkọ towe tọn wẹ é hòliaiy é na zín in do odò, é na hẹn ẹn wá aigba, yèdọ do kógudu mẹ.

¹TO azán lọ gbè wẹ yè na ji ohàn he to aigba Juda tọn ji, Míwlẹ do otò huhlọn tọn de; whlẹngán wẹ Jiwheyẹwhe na dè na odòkọ podọ na ofigángán. ²Mì hùn họngbo kẹ́ na akọta dódónọ he to nugbo go pọ́n nido; biọ whégbè. ³Hiẹ na yí i whla to jijọho pipé mẹ, ayiha mẹhetọn nọte do ogo we: na é dotudo ogo we wutu. ⁴Mì dotudo OKLUNỌ go kakadoi: na OKLUNỌ JEHOVA mẹ wẹ huhlọn madopodo te; ⁵na é zín yé he nọnọ̀ osó ji aga lẹ dai; otò goyítọ, é họ́ ẹ jẹdò; é họ̀ ẹ jẹdò; yèdọ do aigba, é hẹn ẹn wá kọ́gudu mẹ. ⁶Afọ na zín i dai, yèdọ afọ wamọnọ lẹ tọn, po afọdidè agbatọnọ lẹ tọn po. ⁷Aliho nugbonọ lẹ tọn wẹ dódó: hiẹ he yín nugbonọ ko jlọ omọ́ dódó tọn ⁸Nugbo, to aliho whẹ̀dida towe tọn ji, OKLUNỌ, míwlẹ ko nọtepọ́n we; ojlo gbigbọ mítọn tọn sọ tin na oyín towe, podọ na oflin towe. ⁹Ayiha ṣie wẹ yen do jlo we to ozán mẹ, nugbo, gbigbọ ṣie to ohò ṣie mẹ wẹ yẹn na do din we to afọnnu fu: na whenuena whẹ̀dida towe tin to aibon mẹ, omẹ he to aihọn mẹ lẹ nà plón dódó ¹⁰Eyín yè do nukundágbe hia omẹ ylankan, é ma to na plón dódó: tò aigba dódó tọn ji, é na jò jijọ mawàdódó tọn, é ma to na mọ yẹyidaho OKLUNỌ tọn.

¹¹OKLUNỌ, whenuena yè zé alọ towe daga, yé ma to na mọ: ṣigba yé na mọ, winyan na sọ hù yé na wangbẹnamẹ yetọn do omẹ go wutu; nugbo ozò kẹ̀ntọ towe lẹ tọn na hù yé súdo ¹²OKLUNỌ, hiẹ na dè jijọho na mí: na hiẹ wẹ ko wà azón mítọn lẹpo to ohò mítọn mẹ. ¹³OKLUNỌ Jiwheyẹwhe mítọn, OKLUNỌ dẽvo dogọ́ we dugán do mí ji: ṣigba gbọn towe dopo dali wẹ mí na dọhó oyín towe tọn te. ¹⁴Ọsiọ lẹ, yé ma to na nọ̀ ogbẹ́; yé he tin to oyọ̀ mẹ lẹ, yé ma to na fọ́n: enẹwutu wẹ hiẹ dla yé pọ́n, bo so hù yé súdo, bo sọ hẹn oflin yetọn lẹpo súdo. ¹⁵Hiẹ ko hẹn akọta lẹ sudeji OKLUNỌ, hiẹ ko hẹn akọta lẹpo sudeji hiẹ ko zùn gigonọ: hiẹ ko sẹ́ dogbó lẹpo yì nukọn.

¹⁶OKLUNỌ, to tukla mẹ wẹ yé din we te, yé hodẹ, whenuena wiwọ towe tin to yé go. ¹⁷Dile yọnnu hohónọ he sẹpọ́ ojlẹ jiji etọn tọn nọ tin to awufìẹ mẹ do, bo nọ dawhá to awufiẹsa etọn mẹ; mọwẹ míwlẹ te to nukun towe mẹ, OKLUNỌ E ¹⁸Míwlẹ ko mọhò, mí ko tin to awufifìẹ mẹ é sọ taidimẹ mí ko ji jẹhọn; mí ma basi whlẹngan depope to aihọn mẹ; mọ omẹ aihọn mẹ tọn lẹ de ma jai ¹⁹Oṣiọ towe lẹ na nọ̀ ogbẹ́, gọ́na oṣiọ ṣie lẹ yé na fọ́n. Mì fọ́n, na mì ni jihàn, mì mehe tin to kọ́gudu mẹ lẹ: na ahún towe taidi ahún omá tọn, aigba na sọ họ̀n oṣiọ lẹ jẹgbonu.

²⁰Wá, omẹ ṣie emì, biọ abò towe mẹ, bo sú ohòn do dewe: whla dewe di to nukunwhiwhe pẹvide mẹ, kaka homẹgble lọna do jùwayì. ²¹Enẹwutu, dayi e go OKLUNỌ: tón sọn otẹn etọn mẹ nado sáyahẹ omẹ aihọn mẹ tọn lẹ na ylando yetọn wutu; aihọn ga na sọ yí ohùn etọn hia, é ma to na sukún oṣiọ etọn lẹ tọn do bà.

¹TO azán lọ gbè wẹ OKLUNỌ na yí ohi dida etọn he klo, bo sọ pèn do wọhẹ leviatani, odàn gbingbán nẹ; é na sọ hù dlagọni he tin to ohù mẹ.

²To azán lọ gbè mi jihàn hlan ẹ, Vẹ̃ngle vẹ̃nhàn bibia tọn. ³Yẹn OKLUNỌ to hihọ́ ẹ; yẹn na husìn nẹ̃ to whepoponu: na mẹdepope ma nado hẹn ẹn gble, yẹn na họ́ ẹ to ozán po okle po. ⁴Homẹgble ma tin to ohò ṣie mẹ: mẹnu wẹ sọgan zé otẹun po vẹun po pànnukọn mi to awhàn funfun mẹ? yẹn do jugbọn yé ṣẹnṣẹn, yẹn do mẹ̀ yé dopọ́. ⁵Kavi gbọ ni hẹn huhlọn ṣie go, na é nido gbọwhẹ hẹ mi; é na sọ gbọwhè hẹ mi. ⁶E na basi na mẹhe sọn Jakob lẹ ni hẹnadọai: Islaeli na gbasẹ́, bo tọ́nkùn bo sọ yí sinsẹ́n do gọ́ nukun aihọn tọn lẹpo.

⁷Bé ewọ linù in, dile é to núli mẹhe to núli i lẹ do? kavi é hù i di hùhù mẹhe ewọ hù lẹ tọn? ⁸To jlẹmẹ jlẹmẹ, whenuena é tọ́nkùn jegbonu, hiẹ na wọhẹ ẹ: ewọ ko yí jẹhọn hazahaza do diọtẹn nẹ̃ to azán jẹhọn whèzizẹ-waji tọn gbè. ⁹Enẹwutu gbọn ehe dali wẹ yè na ṣinyọnnúdo ylando Jakob tọn te, ehe sọ wẹ sinsẹ́n lẹpo nado dè ylankan etọn sẹ̀, whenuena ewọ basi zánnu agbà tọn lẹpo di zánnu owhé tọn he yè gbà do flinflin, ozùn po bosiọ lẹ po ma to na fọ́n nọte. ¹⁰Na otò dokọnọ na jẹvọ́, yé na sọ gbẹ́ owhé dai, yè na jodai di zùngbo: finẹ wẹ oyìnvú na nọ dù te, finẹ wẹ é na mlọnai te, bo na sọ dù alà etọn sudo. ¹¹Whenuena alà etọn to fifiọ, yè na fẹ́n ẹn sẹ̀: yọnnu lẹ wá, bo sọ domìyọn yé: na omẹ he ma tindo nuyọnẹn wẹ yé: enẹwutu mẹhe dá yé ma to lẹblanu na wà na yé, ewọ he do yé ma to na do nukundágbe hia yé.

¹²To enẹgodo to azán lọ gbè, OKLUNỌ na dè sinsẹ́n etọn sọn gigọ́ otọ́ lọ tọn mẹ hlan otándò Egypti tọn mẹ, yè na sọ bẹ́ mì pli dopodopo, mi ovi Islaeli tọn emì.

¹³To enẹgodo to azán lọ gbè, yè na kùn opẹ́n daho de, yé he ko wleawu nado dọ̀n to aigba Assylia tọn ji lẹ, po mẹhe yè gbà kija to aigba Egypti tọn ji lọ po, na litai hlan OKLUNỌ to osó wiwe ji to Jelusalẹm.

¹DINDON wẹ na ojẹgbakun sakla tọn, na ahànnùmónọ Eflaimi tọn lẹ, podọ na gigosọ vòvó wiwló tọn he tin to ota agbàdo ojo tọn mẹ, yé he yè yí vẹ̃nhàn do wle lẹ tọn. ²Dayi e go, OKLUNỌ tindo omẹ gángán po huhlọnnọ po, ehe taidi jẹhọn sinsinyẹn, okẹnsu, podọ jẹhọn gbàsúdo tọn, di otọ̀ sisa daho he gọ́ bo fla, é na yí alọ do sisẹ́ zín do aigba ji. ³Ojẹgbakun sakla tọn, ahànnumunọ Eflaimi tọn, yè na zín i dai to afọ glọ. ⁴Whànpẹ gigo tọn he tin to ota agbàdo ojo tọn mẹ na zùn vòvó he wló, di sinsén he yawu jẹnukọnna alúnlùn; ehe whenuena ewọ he to pinpọ́n mọ, whenuena é tin to alọ etọn mẹ, é zé e mì. ⁵To azán lọ gbè wẹ OKLUNỌ awhànpa lẹ tọn na yín ojẹgbakun gigo tọn de, podọ ojẹgbakun whànpẹ tọn de hlan pipòtọ omẹ etọn lẹ tọn, ⁶podọ gbigbọ whẹ̀dida tọn de hlan ewọ he sinai to whẹ̀dida mẹ, podọ huhlọn hlan yé he yànawhàn do godo jẹ dòkọ ji lẹ. ⁷Ṣigba yewlọsu ko buali ga gbọn vẹ̃nhàn dali, podọ gbọn ahàn sinsinyẹn dali, yé ko dánbu sọn aliho; yẹwhenọ po yẹwhegán po ko búali gbọn ahàn sinsinyẹn dali, yè zé yé mì gbọn vẹ̃nhàn dali, yé zùn dánpétọ gbọn ahàn sinsinyẹn dali, yé sọ buali to numimọ mẹ, yé klẹnafọ to whẹ̀dida mẹ. ⁸Na tafo lẹpo wẹ gọ́ na oslu po núwànwan po, sọmọ bọ ofi wiwe de ma tin. ⁹Mẹnu wẹ ewọ na plọ́n nuyọnẹn? mẹnu wẹ ewọ na hẹn tunwun oplọ́n? yé he yè dè sọn yìnnọ́nu, bọ yè dọ̀n sọn anọ́nu. ¹⁰Na osẹ́n do osẹ́n ji, osén do osén ji, okàn do okàn ji, okàn do okàn ji; pẹvide to ofi, pẹvide to odọ̀n. ¹¹Na gbọn nuflo dẹ́kúkú tọn dali, podọ gbọn ogbè dẽvo dali, wẹ ewọ na dọhó hẹ gbẹtọ he lẹ. ¹²Na mẹhe é dọ hlan dọmọ, ehe gbọjẹ, míwlẹ do hẹn nudikọnanọ gbọjẹ, ehe sọ wẹ awumiọn: gãnṣo yé ma to na sè. ¹³Enẹwutu ohó OKLUNỌ tọn yín osẹ́n do osẹ́n ji, osẹ́n do osẹn ji: okàn do okàn ji; pẹvide to ofi pẹvide to odọ̀n: na yé nido yì, na yé ni jai gbọn godo, na yé ni wẹ́n, na yè ni họ́ yé, na yè ni wle yé.

¹⁴Enẹwutu, mi sé ohó OKLUNỌ tọn, mì mẹvlẹtọ emì, he dùgán do omẹ he tin to Jelusalẹm helẹ ji. ¹⁵Na míwlẹ dọmọ, Mí ko basi alẹnu de hẹ okú, mí ko magbè hẹ okútòmẹ; whenuena obá ga na gbọn é ji wá yì, é ma to na jẹ mí de; na mí ko yí lalo do basi fibẹ̀tado mítọn, podọ to lalo glọ wẹ mí ko whla míde do. ¹⁶Enẹwutu, le wẹ OKLUNỌ JIWHEYẸWHE dọ, Dayi e go, yẹn zé awinyan dopo tùnte to Ziọni mẹ na odòdo, awinyan he yè whlepón, awinyan he họakuẹ họ̀lọnglọnẹn tọn, odòdo gángáa: mẹhe yise ma to na klẹnnu. ¹⁷Yẹn na yí whẹ̀dida do okàn ji ga, dódó do ojlẹ ji s kẹnsu na zà fibẹ̀tado lalo tọn sẹ̀, osìn na sọ gọ́ ṣinyọn bẹtẹn ji. ¹⁸Alẹnu mítọn hẹ okú na lẹzún ovọ́, gbèmimá mítọn hẹ okútòmẹ ma na nọte: whenuena obá gà na juwayi; whenenu wẹ ewọ na zín mì dai. ¹⁹Ojlẹ he mẹ é tón te wẹ é na wle mì: na afọnnu afọnnu wẹ é na juwayi, to okle po ozán po: nado sè linlin etọn sọkẹdẹ na zùn núhanúha. ²⁰Na adọzàn whète hú ehe gbẹtọ sọgan dlẹn ede do e ji: avọ̀ ṣinṣinyọn sọ whè hú ehe é sọgan yí hizi do ede. ²¹Na OKLUNỌ na tọ́n di osó Pelatsini tọn hunkọ, é na sọ gblehomẹ di agbàdo Gabani tọn hunkọ, na é nido wà azón etọn, azón jawu etọn. ²²Bé enẹwutu mì sọ yín mẹvlẹtọ blo, na yè nikã hẹn ogàn mítọn sinyẹn: na yẹn ko sè gbigble sọn OKLUNỌ Jiwheyẹwhe awhànpa lẹ tọn de, yèdọ gbèmima do ayiha lẹpo ji.

²³Mì dotóai, bo sè ogbè ṣie, mì tùntóai bo sè hógbè ṣie. ²⁴Bé gbèpògbè wẹ glesi nọ to glelẹ nado donú? bé é nọ jlò, bo sọ nọ jlò, bo sọ nọ kùn aigba etọn la? ²⁵Whenuena é hẹn nukun etọn tọ́, bé é ma to okún niẹlle tọn húnhún, bo sọ vúnvún okún kumini tọn pé, bo sọ do olikun whanpẹnọ do tẹnmẹ-tẹnmẹ: po olge he yè dè po, po epeautli po do otẹn etọn mẹ? ²⁶Na Jiwheyẹwhe etọn plọ́n ẹn nado tindo nuyọnẹn, é tlẹ plọ́n ẹn. ²⁷Na yè ma nọ yí núzinzán do yà nlẹlli ozĩnhọ tọn, mọ yè ma nọ dọ̀n kẹkẹ pó to kumini ji, ṣigba opò wẹ yè do nọ tùn niẹlli, opògẹ̃ wẹ yè nọ yí do li kumini. ²⁸Akla gbadò tọn wẹ yè li; na ewọ ma sọgan to yiyà ẹ kaka doi, mọ é ma yí kẹkẹ agbàn tọn do gbà ẹ, mọ é ma nọ yí osọ́nọ etọn lẹ do zín in. ²⁹Ehe sọn OKLUNỌ awhànpa lẹ tọn de ga, mẹhe jawu to yínyọnẹn mẹ, bo hugán to owàlọ mẹ.

¹DINDỌN hlan Alieli, na Alieli, otò he mẹ Davidi nọnọ̀ mì dè owhè dogó owhè; gbọ yé ni hú ogbọ́ do sánvọ́. ²Ṣigba yẹnna bianukunna Allẹli, awubla po nùbibla po na tin: é na sọ taidi Aliẹli hlan mì. ³Yẹn na dosìa lédo we, bo na sọ kùn dòkọ do dọ̀nji na we, yẹn na do dòkọ heyì aga do, dọ́nji nawe. ⁴Yè na zín we dai, hiẹ na sọ dọhó jẹgbonu sọn aigba, ohó towe na yì olí mẹ sọn kọ́gudu mẹ, ogbè towe na sọ taidi omẹ he do gbigbọ dọdi tọn sọn aigba jẹgbonu, ohó towe na sọ dọnu sọn kọ́gudu mẹ. ⁵Susugege kẹ̀ntọ towe lẹ tọn ga na taidi afínfín mimlẹn, susugege awusinyennamẹtọ towe lẹ tọn na taidi nuyọ́ he zlọn yì: nugbo, éna yín mọ to nukun whiwhe dopo mẹ to ajiji. ⁶Yè na yí osò, aigba whinwhàn po ogbè daho po, oyú po jẹhọn po, po ozò mẹsúdo tọn po do dla we pọ́n sọn OKLUNỌ awhànpa lẹ tọn si. ⁷Susugege akọta lẹpo tọn he to avùnho hẹ Allẹli, èdọ yé he to avùnho hẹ ẹ, po dòkọ huhlọn etọn tọn po, bọ yé to awusinyẹn nẹ̃, na taidi odlọ de, numimọ ozán mẹ tọn de. ⁸E na taidi whenuena gbẹtọ hùvẹ́tọnọ to dlọkú, pọ́n ẹn, é to núdù; aigba é fọ́n, ayiha etọn jẹvọ́: kavi taidi whenuena gbẹtọ he nugbla to hùhù to dlọkú, bo pọ́n ẹn, é to osìn nù; ṣigba é fọ́n, bo pọ́n ẹn, é dakú, nugbla sọ to ayiha etọn hù: mọkẹdẹ wẹ susugege akọta lẹpo tọn na te, he to avùnho hẹ oso Ziọni tọn.

⁹Mì hẹn míde do ote abọẹ, na awú ni ji mì, mì dawhá do aga, mì dawhá: yé nuahànmú, aigba é ma yín gbọn ahàn dali gba: yé to ahlida, ṣigba é ma yín gbọn ahàn sinsinyẹn dali gba. ¹⁰Na OKLUNỌ kọ̀n gbigbọ amlọn yìkanmẹ tọn do mì ji, bo sú nukun mítọn: yewhegán lẹ, po ogán mítọn lẹ po, po numọtọ mítọn lẹ po wẹ é sunukunna. ¹¹Numimọ lẹpo sọ taidi ohó owé de tọn he yè tlẹ, he yè yí na omẹ zìnzìntọ de, dọmọ, yẹn vẹ̀ we, hia ehe; é sọ dọmọ, Yẹn ma sọgan; na yè tlẹ ẹ. ¹²Yè sọ yí owé lọ na ewọ he ma zìn de, dọmọ, yẹn vẹ́ we, hia ehe; é sọ dọmọ, yẹn ma yọ́n owé gba.

¹³Enẹwutu OKLUNỌ dọmọ, Le omẹ helẹ yí onù yetọn do sẹpọ́ mi, bo sọ to nuflo yetọn yí do to gbégbo na mi, aigba bọ ayiha yetọn dẹ́n domi, bọ yé sọ dibuna mi gbọn alenuhó gbẹtọ tọn he yè plọn yé dali. ¹⁴Enẹwutu dayi e go, yẹn na to azọ́n jawu wà zònmí to ṣẹnṣẹn omẹ helẹ tọn, yèdọ azón jawu po ohia pò: na nuyọnẹn nuyọnẹntọ yetọn lẹ tọn na dọ̀n, wuntunnugo zìnzìntọ yetọn lẹ tọn na sọ bẹ́.

¹⁵Dindòn wẹ na yé he to dindin nado sọ linlẹn yetọn whla gbidigbidi do OKLUNỌ, bọ azọ́n yetọn sọ tin to zinvlu mẹ, bọ yé sọ dọmọ, Mẹnu we mọ mí? mẹnu wẹ sọ yọ́n mí? ¹⁶Ṣó tasọdòna onú mítọn! yè sọgan hia zéndotọ di okò: azọ́n na dọ mẹhe basi i tọn dọ, Ewọ ma basi mi gba? bé onú he yè do sọgan dọ na mẹhe do e dọ, Ewọ ma yọnnuin? ¹⁷Bé é ma yín whenu vude sẹnun dogọ́, yè nadiọ Libani zùn ojipa sinsẹ́n susu tọn de, ojipa sinsẹ́nnọ wẹ yè na sọ hia di ozùnkan. ¹⁸Podọ to azán lọ gbè tókúnọ lẹ na sè ohó owé nẹ tọn, nukun nukuntọ́nnọ lẹ tọn na sọ mọnu sọn avivi mẹ, podọ sọn zinvlu mẹ. ¹⁹Aya homẹmimiọnnọ lẹ tọn na sọ jideji to OKLUNỌ mẹ, hòmẹ wamọnọ lẹ tọn to ṣẹnṣẹn gbẹtọ lẹ tọn na hùn to Omẹ Wiwe Islaeli tọn mẹ. ²⁰Na yè hẹn awusinyẹnnamẹtọ lọ zùn ovó, yè hù mẹvlẹtọ lọ súdo, yè sọ sán yé he to ohó ylankan họ́ lẹ Sẹ̀: ²¹Mẹhe gblewhódo ylanwàtọ na ohó de wutu, bọ yé do omọ̀ dai na mẹhe wọhẹmẹ to dòkọnu, bọ yé sọ sisẹ́ nugbonọ do apadopo, na nuvọ́dewutu. ²²Enewutu le wẹ OKLUNỌ, mẹhe fli Ablaham dọ, dọmọ, na Jakob tọn, Winyan ma na hù Jakob bà, mọ nukun etọn ma to na kúji ²³Ṣigba whenuena ewọ to ovi etọn lẹ mọ, azọ́n alọ ṣie tọn, to ṣẹnṣẹn etọn, yé na klan oyín ṣie do wiwe, yé na sọ klan Omẹ Wiwe Jakob tọn do wiwe, bo na sọ si Jiwheyẹwhe Islaeli tọn. ²⁴Yé he ko buali to gbigbọ mẹ lẹ ga na wá nado tunwun, podọ yé he to numlánmlán dọ lẹ na sọ plọ́n nuyọnẹn.

¹OKLUNỌ dọmọ, dindọ̀n wẹ na ovi atẹsito he yí nuyọnẹn, ṣigba bọ é ma yín sọn dẽ; bọ yé nualẹ, ṣigba é ma yín sọn gbigbọ ṣie si, na yé nido yí ylando dogọ́ ylando. ²He to zọnlinzin jei Egypti, ṣigba bọ yé ma kanbiọ to onù ṣie mẹ; nado hẹn yéde ló to huhlọn Falo ton mẹ, podọ nado dotudo oyẹ̀ Egypti tọn go. ³Enẹwutu wẹ huhlọn Falo tọn na yín winyan mítọn, tudido do oyẹ́ Egypti tọn go, na yín oflu mítọn. ⁴Na ahọvi etọn lẹ tin to Zoani, mẹdagun etọn lẹ sọ jẹ Hane. ⁵Winyan gbẹtọ he ma doale na yé tọn tlẹ hù yé, he ma sọgan basi alọgọ kavi ale adavo winyan po ovlẹ de po.

⁶Agbàn kanlin hùwaji dali tọn. Hlan aigba tukla po núhiha po tọn, fie kinnikinni asú po asi po sọn, amapoe po odan mìyọn tọn he to zinzlọn po, yé na zé adọkun yetọn do abọ́ kẹtẹkẹtẹvu tọn ji, podọ adọkun whiwhla yetọn do opó kanklosọ-póawenọ lẹ tọn ji, yì omẹ he ma doale dẽlẹ de ⁷Egypti-nu lẹ na gọalọ yáya: é ma sọ dota: enẹwutu wẹ yẹn do dawhá ylọ ẹ dọ Lahabi he sinai abọẹ. ⁸Dinvie, yì, wlan ẹn to nukọn yetọn do wekanzannu de mẹ, bo kan ẹn do owé de mẹ, na é nido tin na sọ́godo kakadoidoi. ⁹Dọ atẹṣitọ wẹ omẹ he lẹ, ovi lalonọ, ovi he ma jlo na sè osẹ́n OKLUNỌ tọn. ¹⁰He dọ hlan numọtọ lẹ, dọmọ, A mọ blo; podọ hlan yẹwhegán lọ dọmọ, mì dọ dọdai onú he jlọ tọn na mi blo, mì dọ onú vivi, na mì ni dọ dọdai oklọ tọn. ¹¹Tọ́n sọn aliho, lẹ́ jẹ apadopo sọn aliho, na mì ni hẹn Omẹ Wiwe Islaeli tọn lẹ́ sọn nukọn mítọn. ¹²Enẹwutu, le wẹ Òmẹ Wiwe Islaeli tọn dọ, Na mi vlẹ ohó helẹ, bo sọ dotudo awusinsinyẹn po kinklẹn po go, bo sọ nọte do e ji. ¹³Enẹwutu ylankan helẹ na tin hlan mì di adó zizẹ he wleawu aijijẹ tọn, ehe yàn yì gbonu to adó he yì aga mẹ, ehe hihọ́ etọn wá ajiji, to nukunwhiwhe dopo mẹ. ¹⁴E na sọ gbà ẹ di gbigbà núzinzán okò tọn he yè gbà hanyanhanyan; bọ yè ma pòdai: sọmọ bọ yè ma sọgan mọ to aklá gbigbà etọn mẹ, nado dèmìyọn sọn adò mẹ, kavi nado bà osìn sọn avúndoe mẹ. ¹⁵Na le wẹ OKLUNỌ JIWHEYẸWHE dọ, Omẹ Wiwe Islaeli tọn; To lilẹ́gó po gbigbọjẹ po mẹ wẹ yè na whlẹn mì gán te; to abọẹninọ po tudido po mẹ wẹ huhlọn mítọn te. ¹⁶Ṣigba míwlẹ dọmọ, Lala; na osọ́ wẹ mí na yí do họ́n; enẹwutu wẹ mì na họ̀n: podọ, Míwlẹ na hẹ́ ehe sọgan dowezun; enẹwutu yé he na jẹmọna mì lẹ na dowezun. ¹⁷Fọtón na họ̀n na wiwọhẹ omẹ dopo tọn; to wiwọhẹ omẹ atọ́n tọn mẹ wẹ mì na họ̀n: kaka bọ mì na pò di hiadonu to aga osó tọn ji, podọ di asia to oji aga. ¹⁸Enẹwutu wẹ OKLUNỌ na nọte, na é nido wà dagbe na mì, podọ enẹwutu wẹ é na do yín zizé do aga, na é nido wàlẹblanuna mì: na OKLUNỌ wẹ Jiwheyẹwhe whẹ̀dida tọn; donanọ wẹ yé omẹ pó he nọtepọ́n ẹn lẹ.

¹⁹Na gbẹtọ Ziọni tọn lẹ na nọ̀ Jelusalẹm, hiẹ ma na viavi bà: ewọ na wà dagbe na we talala, whenuena hiẹ to awhádo: whenuena ewọ sè e, é na siọ we. ²⁰Eyín OKLUNỌ tlẹ yí núdùdù tukla tọn, po osìn nukunbibia tọn po na mì, ṣigba mẹplóntọ towe lẹ ma to na họ̀n yì onuglọ bà, aigba nukun towe na mọ mẹplọntọ towe lẹ. ²¹Otọ́ towe na sè ohó de to godo towe dọmọ, Ehe wẹ aliho, mì zinzọnlin to e mẹ, whenuena mì lẹ́ do adusi, podọ whenuena mì lẹ́ do amíyọn. ²²Míwlẹ na sọ hẹn awudonu boṣiọ wiwlan fataka tọn towe zùn mawé, podọ aṣọ́ boṣiọ kinkọ̀n sika tọn towe nẹlẹ: hiẹ na zé yé dlangbe di onú mawé; hiẹ na sọ dọ nẹ̃ dọmọ, Tón sọn ofile. ²³Whenẹnu wẹ é na na jikun nọkún towe tọn bọ hiẹ na do pọ̀ ogle etọn, po núdùdù jideji aigba tọn po; e na tindo ojo bo sọ sù: to azán lọ gbè wẹ kanlin towe lẹ na to dùdù to odàn fáfá ji. ²⁴Oyín lẹ ga po kẹtẹkẹtẹvu he to aigbajlo lọ po na dù amà vivi, he yè ko yí ajà po agbajẹ po do fú. ²⁵Podọ to osó he yì aga lẹpo ji, podọ to okọta he yì aga lẹpo ji wẹ otò po asisa osìn tọn po na te to azán hùhù daho tọn gbè, whenuena atọ̀họ nẹlẹ họ́ jai. ²⁶Hinhọ́n osùn tọn na sọ taidi hinhọ́n owhè tọn, hinhọ́n owhè tọn na sọ họ́n whla ṣinawe ṣinawe, di hinhọ́n azán ṣinawe tọn, to azán he gbè whenuena OKLUNỌ dó tintlẹn omẹ etọn lẹ tọn, bo sọ hẹn alánpa he yè do ogo na yé gbọ̀.

²⁷Dayi e go, oyín OKLUNỌ tọn ja sọn ofi dindẹn, homegble etọn to jiji, agbàn etọn sọ pọ́n: nuflo etọn sọ gọ́ na homẹfiọ, odẹ́ etọn di ozò husúdo tọn. ²⁸Gbọfufu etọn, di otò sisa na jẹ dadawe okú tọn, nado yí ajà do jàn akọta lẹ: ogàn na tin to alaka omẹ etọn lẹ tọn mẹ, nado hẹn, yé buali. ²⁹Míwlẹ na tindo ohàn dopo di whenuena yè to opli wiwe basi to ozán mẹ; po ayajẹ ayiha tọn po, di whenuena omẹ de kúnván jei nado wá osó daho OKLUNỌ tọn ji, to Omẹ gángán Islaeli tọn do. ³⁰OKLUNỌ na basi na yè ni sè ogbè gigo etọn tọn, bo na sọ do tejijẹ awà etọn tọn hia, homẹfiọ homẹgble etọn tọn, po ozòdẹ́ mìyọn hùsúdo tọn po, po gbàpé po, oyújẹhọn po kẹnjikun po. ³¹Na gbọn ogbè OKLUNỌ tọn mẹ wẹ yè na zinnudo Assylia-nu lọ, he é zìn opò do. ³²Podọ otẹn depope he mẹ opò he yè dè na jugbọn, he OKLUNỌ na yí do e ji, é na tin po tablẹti po, po ajalẹn po: é na sọ yí zingidi awhàn tọn do hoavùn hẹ ẹ. ³³Na yè ko do Tofẹti ai to hóhó whenu; ahọlu wẹ yè ko wleawu etọn na: é ko basi i siso, bo sọ gblo; okiti etọn wẹ ozò po nake susu po; gbọfufu OKLUNỌ tọn, di asisa owhemí tọn to mìyọn dè si i.

¹DINDỌ̀N wẹ na yé he jẹte yí Egypti lẹ na alọgona; bo sọ dotudo osọ go, bo sọ dotudo kekẹ go, na ye sù wutu; podọ do osọ́nọ lẹ go: na ye do huhlọn gbahu wutu ṣigba bọ yé ma pọ́n Omẹ Wiwe Islaeli tọn, yé ma sọ din OKLUNỌ. ²Ṣigba ewọ yọnnuin ga, bo ma lẹ́ ohó etọn do godo; é sọ fọ́n do owhé omẹ ylankan lẹ tọn ji, podọ do alọgọna yé he to azón ylankan wà lẹ tọn ji. ³Na gbẹtọ wẹ Egypti-nu lẹ, yé ma yín Jiwheyẹwhe gba; olàn wẹ osọ́ yetọn lẹ, yé ma yín gbigbọ. Whenuena OKLUNỌ na dlẹn alọ etọn jẹgbonu, mẹhe to alọgọnamẹ lẹ na dahli, ewọ he yè sọ to alọgọna na họ́ jai, yé omẹ pó na sọ dọ́n dopọ́. ⁴Na le wẹ OKLUNỌ dọ hlan mi, dọmọ, Dile kinnikinni po kinnikinni ovu po nọ to lìlì do nuyànwẹnna ji, whenuena yè to lẹngbọyìntọ susugege ylọ jẹgbonu do e ji, bọ ewọ ma dìbuna ogbè yetọn, bo ma sọ hùwhẹ́ ede dai na awhá yetọn wutu: mọkẹdẹ wẹ OKLUNỌ awhànpa lẹ tọn na jẹte wá nado hoavùn to osó Ziọni tọn ji, podọ to okọta etọn lẹ ji. ⁵Dile ohẹ́ nọ to zinzlọn, mọkẹdẹ wẹ OKLUNỌ awhànpa lẹ tọn na ṣinyọn alọ Jelusalẹm ji do; to alọṣinyọn e ji mẹ, é na whlẹn ẹn dai; to jujuwayi mẹ, ewọ na pò e dote. ⁶Mì lẹgọ́ do ewọ he mì ko to atẹsi hẹ de, mì ovi Islaeli tọn emì. ⁷Na to azán lọ gbè wẹ omẹ dopodopo na yí fataka vodun etọn po sika vodun etọn he pò po dlangbé, he alọ mítọn ko basi na mì na ylando. ⁸Whenẹnu wẹ Assylianu na jai gbọn ohi nu, he ma yín omẹ gángán tọn; podọ ohi he ma yín gbẹtọ tọn na dù i súdo: ṣigba ewọ na họ́n sọn ohi nukọn, dẹpẹmẹ etọn lẹ na sọ to sẹ́njọ. ⁹Ewọ na sọ juwayi ofi gángán etọn na obu wutu, ahọvi etọn lẹ na dibuna asia lọ, wẹ OKLUNỌ dọ, mẹhe mìyọn etọn tin to Ziọni, bọ zòhọ etọn tin to Jelusalẹm.

¹DAYI e go, ahọlu de na dù to dódó mẹ, ahọvi lẹ na dùgán to whẹ̀dida mẹ. ²Gbẹtọ dopo na taidi otẹn whiwhla tọn sọn jẹhọn nu, bẹtẹn sọn yujẹhọn nu; di otọ́ osìn tọn to ofi húhú, di oyẹ́ awinyan daho tọn to aigba húhú ji. ³Nukun yé he mọnu lọ tọn ma to na súyu, otó yé he to sisè lẹ tọn na kẹ́ dote. ⁴Ayiha omẹ juajua lẹ tọn na tunwun nuyọnẹn, odẹ́ dẹ́kúnọ lẹ tọn na wleawu nado dọhó diun. ⁵Yè ma to na ylọ mẹvọnu dọ dagbewàtọ ba, mọ yè ma to na ylọ fifiẹtọ dọ homẹdagbenọ bà. ⁶Na mẹvọnu na to onú ylanylan dọ, ayiha eton na sọ to azón ylankan wà, nado wàzọ́n bublu tọn, podọ nado dọhó yìndò do OKLUNỌ go, nado hẹn ayiha hùvẹ́tọnọ tọn jẹvọ́, podọ nado hẹn onú nùnù yé he nugbla to hùhù lẹ tọn gbòda. ⁷Oylan wẹ núzinzán fifiẹtọ tọn yín ga: é lẹn oklọ ylankan nado yí ohó lalo tọn do hù wamọnọ súdo, yèdọ eyín wamọnọ tlẹ yọ́n ohó nugbo. ⁸Ṣigba núnamẹtọ nọ lẹn onú núnamẹtọ tọn; gbọn onú núnamẹtọ tọn dali wẹ é na nọte.

⁹Mì fọ́n, mì yọnnu he tin to awubibọ́ mẹ lẹ; mì sè ogbè ṣie, mì yọnnu adidọnọ emi; mì dotó hógbè ṣie go. ¹⁰Azán po owhè susu po wẹ yè na do dotukla mì, mì yọnnu adidọnọ lẹ: na jijẹ ovẹ̃n tọn na gbòda, bépli ma sọ to na wá. ¹¹Mì sisọ, mì yọnnu he tin to awubibọ̀ mẹ lẹ, tukla ni pla mì, mì adidọnọ lẹ, na mì ni nọ omẹ́, bo bla gbaja odẹ́vọ̀ tọn do alinkan mítọn. ¹²Yé na blawuna anọ́, na odàn fáfá whanpẹnọ lẹ, na ovẹ̃n he tindo sinsẹ́n susu. ¹³Vẹun po otẹun po na wá aigba omẹ ṣie lẹ tọn ji; nugbo, do owhé ayajẹ tọn ji to otò homẹvivi tọn mẹ: ¹⁴na yè na gbẹ́ awánu nẹlẹ dai; yè na jó otò susu dai, ofi gángán po atọhò po na sọ zùn odò kakadoi, ayajẹ na kẹtẹkẹtẹ ogbé tọn, odàn fáfá na kanlinpa; ¹⁵kaka yè na do kọ̀n gbigbọ do mí ji sọn aga, zùngbo na sọ zùn odàn fáfá sinsẹ́n susu tọn, yè na sọ hia odàn fáfá sinsẹ́n susu tọn di zùnkan. ¹⁶Whenẹnu wẹ whẹ̀dida na nọnọ̀ zùngbo mẹ, bọ dódó na sọ nọte to odàn fáfá sinsẹ́n susu tọn ji. ¹⁷Azọ́n dódó tọn na zùn jijọho; alọnuzọ́n dódó tọn na sọ zùn gbọjẹ po bẹtẹn po kakadoi. ¹⁸Omẹ ṣie lẹ na sọ nọnọ̀ owhé jijọho tọn gbè, podọ to aisintẹn gángán mẹ, podọ to gbọjẹtẹn he nabọẹ mẹ. ¹⁹E na ja kẹ́njikun whenuena zìnkán to hihọ́ jai; podọ to whiwhẹ mẹ yè na whiwhẹ otò lọ dai. ²⁰Donanọ wẹ mì he to jidó sẹpọ́ osìn lẹpo, he to afọ oyín tọn po kẹtẹkẹtẹ tọn po dohlan yì finẹ.

¹DINDÒN wẹ na hiẹ mẹhẹngbletọ, bọ yè ma hẹn we gble; bọ a to bublu basi, bọ yè ma wà bublu hẹ we whenuena hiẹ na dealọ nado hẹngble, yè na hẹn we gble; whenuena hiẹ dotana wàlọ bublu, tọn, yè na wà bublu hẹ we. ²OKLUNỌ È, wàlẹblanuna mí; míwlẹ ko nọtepọ́n we: hiẹ ni yín awà yetọn to afọnnu lẹpo mẹ, podọ whlẹngán mítọn ga to tukla whenu. ³To zínzínyinyẹn awhá tọn mẹ wẹ gbẹtọ lẹ hón te; to zizé dewe do aga mẹ wẹ yè gbà akọta lẹ kija te. ⁴Yè na sọ bẹ́ ogbànna mítọn pli, di bẹ́pli agbònọpatin tọn: di wezùndo yìgodo doyìnukọn owèn lẹ tọn wẹ ewọ na họ̀nwezun do yé ji. ⁵Zizédaga wẹ OKLUNỌ; na ewọ nọnọ̀ ofí he yì oji: é ko yí whẹ̀dida po dódó po do gọ́ Ziọni. ⁶Yinyọn po nuyọnẹn po na yín otetun ojlẹ towe tọn, po huhlọn whlẹngan tọn po: osí OKLUNỌ tọn wẹ adọkunnu whiwhla etọn.

⁷Dayi e go, adántọ yetọn lọ na dawhá to ogbonu: mẹdagun jijọho tọn lẹ na sọ viavi vivẹ́. ⁸Alihogbó nẹlẹ jẹvọ́, ahisi lẹ gbòda: é ko hẹn alẹnu gble, é ko vlẹ otò nẹlẹ, é ma sọ hò mẹde pọ́n. ⁹Aihọn to awubla bo sọ gblekan: winyan to Liban hù, é sọ yọ́: Baṣani po Kalmẹli po sọ húnhún sinsẹ́n yétọn kọnyinai. ¹⁰OKLUNỌ dọmọ, Dinvie wẹ yẹn na fọ́n, dinvie wẹ yè na zé mi daga; dinvie wẹ yẹn na zé dẽ daga. ¹¹Míwlẹ na mọhò onúyọ tọn, bo sọ ji ozinkán: gbọfufu mítọn di mìyọn na hù mì súdo. ¹²Gbẹtọ lẹ na sọ taidi mimẹ̀ adisìn tọn: di owùn he yè sán, yé na ji to mìyọn mẹ.

¹³Mì sè, mì he tin to ofi dindẹn lẹ, onú he yẹn basi; podọ mì mẹhe sẹpọ, mì yìgbè huhlọn ṣie tọn. ¹⁴Obu di omẹ ylankan lẹ to Ziọni: obu hẹn awùji ylanwàtọ lẹ. Mẹnu wẹ to mí mẹ he nọ̀ sọgan nò zòjiji madopodo mẹ? ¹⁵Ewọ he to zọnlinzin to dódó mẹ, bo nọ dọho titegbè; mẹhe gbẹwanna ale awusinyẹnnamẹ tọn, mẹhe húnhún alọ etọn sọn núbibla mẹ, mẹhe dè oto etọn sọn sisè ohùn tọn mẹ, bo sọ míọn nukun etọn sọn oylan mimọ mẹ. ¹⁶Ewọ lọsu na nọ ofi he yì oji: awinyan tẹnmẹ na yín ofi gángán etọn: yè na na núdùdù ì; osìn etọn na tin dódo. ¹⁷Nukun towe na mọ ahọlu to whànpẹ etọn mẹ: yé na to aigba he dẹn boboe pọ́n. ¹⁸Ayiha towe na lẹn obu daho pọ́n. Fie wẹ ewọ he wékan te? fie wẹ ewọ he to nújlẹ te? fie wẹ ewọ he to atọhọ̀ nẹlẹ hia te? ¹⁹Hiẹ ma na mọ omẹ hunzò lẹ, omẹ he hógbè yetọn siso hú ehe hiẹ sọgan yọnẹn, he odé yetọn jọ titẹ́, he hiẹ ma sọgan tunwun. ²⁰Pọn Ziọni, otò hùnwhẹ́ mítọn tọn: nukun towe na mọ Jelusalẹm aisintẹn abọẹ tọn, gòhọ he yè ma na já jẹdò: dopo to osó etọn lẹ mẹ ma na diọtẹn gbède, mọ dopo to okàn etọn lẹ mẹ ma to na wẹ́n. ²¹Ṣigba finẹ wẹ OKLUNỌ na tin po mí po to gigodaho mẹ, nọtẹn otọ̀ po tọ̀sisa po tọn; fie ohún he do azẹ̀ ma na jugbọn, mọ ohún daho gédégédé ma na jugbọn finẹ ²²Na OKLUNỌ wẹ whẹ̀datọ mitọn, OKLUNỌ wẹ osẹ́nnọ mítọn, OKLUNỌ wẹ ahọlu mítọn; ewọ na whlẹn mí gán. ²³Okàn ohún towe tọn tún; yé ma sọgan hẹn alatin yetọn dote dagbedagbe bà, yé ma sọgan kẹ́ala: whenẹnu wẹ yé má gbánna daho; pòtẹn dù gbànna, ²⁴Finẹnu lẹ ma to na dọmọ, yẹn to azọ̀njẹ: yè na jo ylankan mẹhe nọnọ̀ finẹ lẹ tọn na yé.

¹Mìsẹ̀wá, mì akọta lẹ, nado sè, mì dotóai, mì gbẹtọ lẹ: gbọ̀ aihọn ni sè, po ehe tin to é mẹ lẹ po; aigba po onú he tón sọn é mẹ lẹ po. ²Na homẹfiọ OKLUNỌ tọn tin to akọta lẹpo ji, homẹgble etọn to awhàn yetọn lẹpo ji: é ko hù yé súdo gbidigbidi, é ko jó yé hlan hùhù. ³Yè na zé mẹhe yè hù to yé mẹ lẹ dlọn, owàn yetọn na tón sọn oṣiọ yetọn mẹ wá aga, osó lẹ na yọ́ po ohùn yetọn po. ⁴Awhàn olọn tọn lẹpo na yọ́ kọnyìngbé, yè na sọ há olọn lẹ dopọ́ di wéma: awhàn yetọn lẹpo na sọ jai, dile amà nọ flẹ́ sọn ovẹ̃n go do, podọ di fìflé sinsẹ́n tọn to ovotin ji. ⁵Na ohi ṣie ko nù hògigọ́ etọn to olọn mẹ: dayi e go, é na jẹte do Edọmi ji, podọ do mẹhodẹ́do ṣie ji, na whẹ̀dida. ⁶Ohi OKLUNỌ tọn gọ́ na ohùn, yè hẹn ẹn klo na ojo podọ na ohùn agbò tọn: na OKLUNỌ do avọ́sinsán de to Botsla, po hudlan daho de po to aigba Ẹdọmi tọn ji. ⁷Afìnankún lẹ na jete hẹ yé wá, oyín winyan winyan lẹ, po oyìnsú lẹ po; aigba yetọn wẹ yè na yí ohùn do yọn, yè na yí ojo do hẹn Kọ́gudu yetọn zùn núdojó. ⁸Na ahọsuyí zàngbè OKLUNỌ tọn wẹ, podọ owhè ahọsuyí tọn na whẹ̀gbè Ziọni tọn. ⁹Yè na hẹn otò etọn zùn osèn, podọ kọ́gudu etọn zùn owhèmí, aigba etọn na sọ lẹzùn osẹ̀n he to mìyọnji. ¹⁰Yè ma na ṣi i to ozán kavi to okle; azọ̀ etọn na yì aga kakadoi; sọn whẹndo, de kaka jẹ whẹndo de mẹ; é na jẹvọ́; mẹdepope ma na jugbọn ṣẹnṣẹn etọn gbèdegbède. ¹¹Ṣigba apofo po aklású po wẹ na tindo e, ajankusu po ohón po wẹ na nọ é mẹ, ewọ na sọ dlẹn okàn hùsúdo tọn do e ji, po zánnu ovọ́ tọn po. ¹²Yé na ylọ adọkunnọ eton lẹ wá aholudu kọ̀n, ṣigba mẹdepope ma na tin to finẹ, ahọvi etọn lẹpo na sọ zùn nuvọ́. ¹³Owùn na wú wá aga to awánu etọn nẹlẹ mẹ, owùn lonke tọn to figángán etọn mẹ: é na sọ yín aisintẹn dlagọni lẹ tọn, podọ awágbó de na ajankusu lẹ. ¹⁴Kanlin zùngbo mẹ tọn lẹ na pé kanlin olopo ji tọn lẹ, satile de na to gbejlẹ na awetọ etọn, núvole na gbọjẹ to finẹ, bo sọ mọ nọtẹn gbọjẹ tọn na ede. ¹⁵Ajankusu daho na da adó etọn to finẹ ga, é na doazìn, bo flé, bo na bẹ́ do oyẹ̀ eton glọ: finẹ wẹ osú lẹ na pli do ga, mẹdopodopo po ogbẹ́ etọn po. ¹⁶Mì din in to owé OKLUNỌ tọn mẹ, bo sọ hia ẹ: dopo to ehelẹ mẹ ma to na fẹ́, mẹde ma to na ba ogbẹ́ etọn pò: na onù ṣie ewọ wẹ degbè, gbigbọ etọn ewọ wẹ bẹ́ yé pli. ¹⁷Ewọ ko blavọ̀ na yé, alọ etọn ko yí okàn dindlẹn do má ẹn na yé; yé na sọ do e kakadoi, sọn whẹndo de kaka jẹ whẹndo de mẹ wẹ yé na nọnọ̀ e mẹ.

¹ZUNGBO po aigba he to atò po na jaya na yé; ozùn na jaya, bo sọ gbàsẹ́ di võvo lĩ. ²E na gbàsẹ́ susu, bo sọ jaya, yèdọ ayajijẹ po ohàn po: yè na sọ yí gigo Libani tọn na ẹn, yẹyi Kalmiẹli po Saloni po tọn; yé na mọ gigo OKLUNỌ tọn, po yẹyi Jiwheyẹwhe mítọn tọn po.

³Mì hẹn alọ madogánnọ sinyẹn, bo sọ hẹn ọkligonu he ma sinyẹn dote ⁴Mì dọ hlan yé he ayiha yetọn gọ́ na obu lẹ, dọ, mì wlekli, dọmọ, mì dibu blo: pọ́n, Jiwheyẹwhe mitọn na wá po ahọsuyí po; ewọ na wá bo na sọ whlẹn mì. ⁵Whenẹnu wẹ nukun nukuntọ́nnọ lẹ tọn na hùn, otó tókunọ lẹ tọn na sọ hùn. ⁶Whenẹnu wẹ pòtẹn na lon di agbanlin, odẹ́ unbọpẹn tọn na sọ jihàn: na osìn na yí sọn zùngbo mẹ jẹgbonu, po asisa po to ozùn mẹ. ⁷Aigba húhú na lẹzùn tándò, aigba nugblanọ na zùn otọ̀ sisa: to aisintẹn dlagọni lẹ tọn mẹ, fie mẹdopodopo mlọnai te, wẹ ogbé na te dogọ́ ofan po owóko po. ⁸Àligbó dopo wẹ na tin to finẹ po aliho dopo po, yè na sọ nọ ylọ ẹ dọ aliho wàlowiwe tọn; mawénọ de ma to na jugbọn finẹ; na ewọ na tin hẹ yé: ahisi ali lọ ton, eyín yé tlẹ yín wunvinọ, yé ma to na buali etọn. ⁹Kinnikinni ma to na tin to finẹ; mọ kanlin mẹhùdùtọ de ma to na hẹ́ e ji, yè ma to na mọ ẹ to finẹ; ṣigba mẹfligọ̀ lẹ wẹ na nọ zinzọnlin to finẹ. ¹⁰Mẹfligọ̀ OKLUNỌ tọn lẹ na lẹ́gọ̀, bo na wá Ziọni yé po ohàn po, ayajijẹ madopodo na sọ tin to ota yetọn: yé na mọ ayajijẹ po homẹhùnhùn po yí, nukunbibia po awubla po na họ̀n yì.

¹DINVIE to enẹgodo to owhè wiẹnẹtọ ahọlu Hẹzekia tọn, Sẹnakelibi ahọlu Assylia tọn hẹji wá bo dosla do dòkọ́ Juda tọn lẹ ji, bo sọ bẹ́ yé. ²Ahọlu Assylia tọn sọ do Labseke sọn Lakis hlan Jelusalẹm po awhàn daho po yì ahọlu Hezekia de. E sọ nọte to alitó osìn tándò tọn kọ̀n to aga, to aligbo danfáfá avọ̀yàntọ tọn ji. ³Whenẹnu wẹ Eliakimi ovi Hilkija tọn, he tin to ohọ̀ kọ̀n, tón wá e de, ewọ po Ṣẹbna wékantọ po, po Joaki ovi Asafi tọn po, wékantọ núnaflin tọn. ⁴Labseke sọ dọ hlan yé, dọmọ, Mì dọ na Hẹzekia, dọmọ, Le wẹ ahọlu daho, ahọlu Assylia tọn dọ, dọmọ, Etẹ wẹ nudotudoego he go hiẹ dotudo helẹ. ⁵Yẹn dọmọ, hiẹ dọ (aigba ohó vọtọ wẹ ye) yẹn tindo nuyọnẹn po huhlọn po na awhàn funfun: bé dinvie mẹnu go wẹ hiẹ dotudo, bọ hiẹ do to atẹṣi hẹ mi? ⁶Pọ́n, hiẹ dotudo ogetin ofán gbigbà he go, do Egypti go; mẹhe go eyín mẹde zẹnmẹ é na biọ alọ etọn mẹ, bo na sọ ẹ: mọwẹ Falo ahọlu Egypti tọn te na mẹdepope he dotudo e go lẹpo. ⁷Ṣigba eyín hiẹ dọ na mi, dọmọ, Míwlẹ dotudo OKLUNỌ Jiwheyẹwhe mítọn go: bé é ma yín ewọ wẹ mẹhe Hẹzekia bẹ́ ofi yìaga etọn po agbà po sẹ̀, bo sọ dọ hlan Juda po Jelusalẹm po, dọmọ, Míwlẹ na litai to agbà he nukòn? ⁸Dinvie enẹwutu yẹn vè we, na súgbonu OKLUNỌ ṣie, ahọlu Assylia tọn, yẹn bo na na osọ́ fọtọ́n awe we, eyín hiẹ to awà towe ji sọgan mọs Ọ́hẹtọ do yé ji. ⁹Bé nawẹ hiẹ na hẹn nukun awhàngán pẹvi dopo he whèhu to devi OKLUNỌ ṣie tọn lẹ mẹ lẹ́godo do, bọ hiẹ do yí tudido towe do Egypti go na kẹkẹ po osọ́nọ po? ¹⁰Bé yẹn hẹji wá aigba he ji dinvie to OKLUNỌ godo nado hù i súdo wẹ? OKLUNỌ dọ hlan mi, dọmọ, Hẹji yì aigba he ji, bo hù i súdo. ¹¹Whenẹnu wẹ Eliakimi, Ṣẹbna po Joaki po dọ na Labseke, dọmọ Dọhó, yẹn vẹ́ we, hlan devi towe lẹ to ogbè Sylia tọn mẹ; na mí sè: a dọhó hlan mí to ogbè Ju lẹ tọn mẹ, do otọ́ omẹ he tin to odòkọ ji lẹ tọn mẹ blo. ¹²Ṣigba Labseke dọmọ, Bé OKLUNỌ ṣie do mi hlan OKLUNỌ towe nado dọhó helẹ? bé ewọ ma do mì hlan gbẹtọ he sinai to odòkọ ji lẹ, na yé nido dù omí yéde tọn, bo sọ nù adọ́ yéde tọn po mì po? ¹³Whenẹnu wẹ Labseke site, bo dawhá ogbè lélé to ogbè Ju lẹ tọn mẹ, bo dọmọ, Mì sè ohó ahọlu daho, ahọlu Assylia tọn. ¹⁴Le wẹ ahọlu lọ dọ, dọmọ, Mì dike Hẹzekia klọ mì blo: na ewọ ma na sọgan whlẹn mì gba. ¹⁵Mì dike Hẹzekia hẹn mì dotudo OKLUNỌ go blo, dọmọ, Na whlẹngán tọn, OKLUNỌ na whlẹn mí, yè ma to na yí otò he do alọ mẹ na ahọlu Assylia tọn gba. ¹⁶Mì sè Hẹzekia tọn blo: na le wẹ ahọlu Assylia tọn dọ, dọmọ, mì yí nunina do jihóntọn hẹ mi, bo tọ́n wá dẽ: na dopodopo mitọn ni dù ovẹ̃n etọn, dopodopo mitọn ni nù osìn sọn amù ede tọn mẹ; ¹⁷kaka yẹn na do wá bẹ́ mì yi aigba he taidi aigba mlwlọsu tọn ji, aigba gbàdo po ovẹ̃n po tọn, aigba núdùdù po vẹ̃ngle po tọn. ¹⁸Mì payi, na Hẹzekia nikã lẹ́ ayiha mitọn, dọmọ, OKLUNỌ na whlẹn mí, Bé vodun akọta lẹ tọn de ko whlẹn aigba etọn sọn alọ ahọlu Assylia tọn mẹ gbède? ¹⁹Fie wẹ vodun Hamati po Alpadi po tọn lẹ te, fie wẹ vodun Sefalvaimi lẹ tọn te? bé yé whlẹn Samalia sọn alọ ṣie mẹ? ²⁰Bé menu wẹ to vodun aigba helẹ tọn mẹ he ko whlẹn aigba yetọn sọn alọ ṣie mẹ, bọ OKLUNỌ na do whlẹn Jelusalẹm sọn alọ ṣie mẹ. ²¹Ṣigba yé nabọẹ, yé ma sọ gblọnhó de nẹ̃; na aṣẹ ahọlu tọn wẹ dọ, Mì gblọn ohó de nẹ̀ blo. ²²Whenẹnu wẹ Eliakimi, ovi Hilkija tọn, he tin to ohọ́ kón, po Ṣẹbna wékantọ po, po Joaki ovi Asafi tọn po, po wékantọ nunaflin tọn po wá Hẹzekia de, yé po avọ̀ yetọn po to titlẹn, bo sọ dọ ohó Labseke tọn nẹ̃.

¹TO enẹgodo, whenuena ahọlu Hẹzekia, sè, é hẹn avọ́ etọn tlẹn, bo yí odẹ́vò ṣinyọn, bo biọ ohọ́ OKLUNỌ tọn mẹ. ²É sọ do Eliakimi he tin to ohọ̀ etọn kọ̀n, Ṣẹbna wékantọ, po mẹhó yẹwhenọ lẹ tọn po he yí odẹ́vọ́ ṣinyọn hlan, yì Isaia yẹwhegán ovi Amọsi tọn de. ³Yé sọ dọ nẹ̃ dọmọ, Le wẹ Hẹzekia dọ, dọmọ, Egbé azán tukla tọn gbè wẹ, wiwọ tọn, po ovlẹ po tọn: na ovi lẹ jẹ ajipanu, huhlọn ma sọ tin nado ji. ⁴Eya OKLUNỌ Jiwhéyewhe towe na sè ohó Labseke tọn, mẹhe OKLUNỌ etọn, ahọlu Assylia tọn dohlan nado dọnú yìndò do Jiwheyẹwhe ogbẹ́nọ go, bo na wọhẹ ohó he OKLUNỌ Jiwheyẹwhe towe sè: enẹwutu zé odẹ̀ towe do aga na pipotọ he pò lẹ wutu. ⁵Mowẹ devi ahọlu Hẹzekia tọn lẹ wá Isaia de. ⁶Isaia sọ dọ na yé, dọmọ, Le wẹ mì ni dọ na OKLUNỌ mitọn, dọmọ, Le wẹ OKLUNỌ dọ, dọmọ, A dibuna ohó he a sè blo, gbọn ehe tọn devi ahọlu Assylia tọn lẹ do dọhó ylankan do ogo e. ⁷Pọ́n, yẹn na yí gbọfufu de do ohò etọn mẹ, é na sè linlin de, bo sọ lẹ́gò yì aigba ewlọsu tọn ji; yẹn na sọ hẹn ẹn jai gbọn ohi nu to aigba ewlọsu tọn ji.

⁸Mowẹ Labseke légó, bo mọ ahọlu Assylia tọn to awhànfun hẹ Libna: na é sè dọ é ko yì sọn Lakiṣ. ⁹Ewọ sọ sè yè to didọ gbọn Tilhaka, ahọlu Etiopia tọn dali, dọmọ, E tón ja awhànfun hẹ we gbé. Whenuena é sè, é do mẹdagun lẹ hlan Hẹzekia de, dọmọ, ¹⁰Le wẹ mì ni dọ na Hẹzekia, ahọlu Juda tọn, dọmọ, A dikena Jiwheyẹwhe towe, he go hiẹ dotudo klọ we blo, dọmọ, yè ma to na yí Jelusalẹm do alọ ahọlu Assylia tọn mẹ. ¹¹Dayi e go, hiẹ ko sè onú he ahọlu Assylia tọn lọ wà hẹ otò lẹ, le yé hù ye súdo gbidigbidi do: bé yè na whlẹn hiẹ wẹ? ¹²Bé vodun akọta lẹ tọn ko whlẹn yé he otọ́ ṣie lẹ hùsúdo la, di Gozani, di Kalani, po Letsefi po, po ovi Edẹni tọn he tin to Telasali lẹ po? ¹³Fie wẹ ahọlu Hamati tọn te, po ahọlu Alpadi tọn po, ahọlu otò Sefalvaimi tọn, Hena po Iwa po tọn te? ¹⁴Hẹzekia sọ yi owé lọ sọn alọ mẹdagun lẹ tọn mẹ, bo hia ẹ: Hẹzekia sọ hẹji yì ohọ̀ OKLUNỌ tọn mẹ, bo tẹ́ ẹ do OKLUNỌ nukọn. ¹⁵Hẹzekia sọ hodẹ́ hlan OKLUNỌ, dọmọ, ¹⁶OKLUNỌ awhànpa lẹ tọn E, Jiwheyẹwhe Islaeli tọn, he nọnọ̀ ṣẹnṣẹn kelubin lẹ tọn, hiẹ wẹ Jiwheyẹwhe, yèdọ, hi dopo, to ahọludu aihọn tọn mẹ: hiẹ wẹ da olọn po aigba po. ¹⁷Dotó towe ai, OKLUNỌ E, bo sè; hùn nukun towe, OKLUNỌ È, bo pọ́n: bo sè ohó Sẹnakelibi tọn lẹ, he é dowèn nado dọnúyíndò do Jiwheyẹwhe gbónọ go. ¹⁸Nugbo, OKLUNỌ, ahọlu Assylia tọn lọ ko gbà akọta lẹpo kija po aigba yetọn po. ¹⁹Bo sọ dọ̀n vodun yetọn lẹ dlan mìyọn mẹ: na yé ma yín yẹwhe wutu, aigba azọ́n alọ gbẹtọ tọn wẹ, atin po osé po: enẹwutu yé hù yé súdo. ²⁰Enẹwutu OKLUNỌ È Jiwheyẹwhe mitọn, whlẹn mí dinvie sọn alọ etọn mẹ, na ahọludu aigba tọn lẹpo ni yọnẹn dọ hiẹ wẹ OKLUNỌ, yèdọ hiẹ dopokẹdẹ.

²¹Whenẹnu wẹ Isaia ovi Amọsi tọn dowẹ́n hlan Hẹzekia, dọmọ, Le wẹ OKLUNỌ Jiwheyẹwhe Islaeli tọn dọ, Sole hiẹ hodẹ́ klan mi do Sẹnakelibi ahọlu Assylia tọn ji. ²²Ehe wẹ ohó he OKLUNỌ dọ gbọn etọn dali; Awhli viyọnnu Ziọni tọn, ko vlẹ ede, bo sọ vlẹ we kò; viyọnnu Jelusalẹm tọn ko mìmi ota etọn do oji we. ²³Mẹnu wẹ hiẹ vlẹ, bo sọ dọhó ylankan do ogo na? mẹnu ji wẹ hiẹ zé ogbè towe do aga do, bo sọ zé nukun towe do aga gànnana? yèdọ do Omẹ Wiwe Islaeli tọn ji wẹ? ²⁴Gbọn devi towe lẹ dali wẹ hiẹ vlẹ OKLUNỌ, bo sọ dọmọ Gbọn susugege kẹkẹ ṣie tọn dali wẹ yẹn hẹ ji wá aga osó lẹ tọn ji, wá Libani pawhé yẹn na sọ sán atin kedle etọn he yì aga liai, podọ atin kyplesi etọn he yónwhànpẹ liai: yẹn na sọ biọ ofi yìaga to dali eton, po Kalmẹli zùnkan etọn po mẹ ²⁵Yẹn ko kùn odòtọ́, bo sọ nù osìn; afọpahòmẹ ṣie wẹ yẹn do hẹn otọ̀ he to ofi yiaga lẹpo hú. ²⁶Bé hiẹ ma ko sè to hóhó whenu, dọ yẹn wẹ basi i; podọ yẹn do e sọn hóhó whenu? dinvie yẹn ko hẹn ẹn di, na hiẹ nido gbà otò daho dòkọnọ kija zùn okiti hihọ́. ²⁷Enẹwutu wẹ omẹ he tin to yé mẹ lẹ ma tindo huhlọn, obu di yé, yé sọ flu: yé taidi ogbé danji tọn, podọ di omá mú, di ogbé to họ̀ta aga, podọ di le gbàdo nọ hú whẹpo é do whẹn wá aga. ²⁸Ṣigba yẹn yọ́n nọtẹn towe, gbonujijẹ towe, whégbè bibiọ towe, po homẹgble towe po do ogo e. ²⁹Na homegble towe do ogo e, po zingidi towe po ko hẹji wá otó ṣie mẹ, enẹwutu yẹn na yi omlẹn ṣie do awọ̀ntin towe mẹ, podọ ogàn ṣie do nuflo towe mẹ, bo na sọ gọ́ we do godo gbọn aliho he ji hiẹ gbon wá. ³⁰Ehe na sọ yín ohia lọ na we, Míwlẹ na dù to owhè he mẹ onú he hunkọ wú na ede; podọ to owhè awetọ mẹ ehe wú jẹgbonu sọn dopolọ mẹ: podọ to owhè atọ̀ntọ mẹ mì ni donú, bo sọ gbẹ̀n, mì do ovẹ̃n, bo sọ dù sinsẹ́n etọn. ³¹Pipòtọ he họngán sọn owhé Juda tọn gbè na vọ́ adọ̀ hẹnai jẹdò, bo sọ sẹ́n sinsẹ́n hlan aga: ³²Na sọn Jelusalẹm wẹ pipòtọ na tọ́n sọn yì, podọ yé he họngán sọn osó Ziọni tọn ji lẹ: vivẹnu OKLUNỌ awhànpa lẹ tọn na basi ehe. ³³Enẹwutu le wẹ OKLUNỌ dọ gbọn ahọlu Assylia tọn dali, dọmọ, Ewọ ma na wá otò he mẹ, mọ é ma na sẹ́ ogá do finẹ, é ma to na hẹn sagbà wá nukọn etọn, mọ é ma na kùn dòkọ do e go. ³⁴Aliho he é gbọn wá, doponẹ wẹ é na gbọn yì, é ma na wá otò he me gba, we OKLUNỌ dọ. ³⁵Na yen na yíwhẹ́ do otò he ji nado whlẹn ẹn, na yẹnlọsu tọn wutu, podọ devi ṣie Davidi tọn wutu.

³⁶Whenẹnu wẹ angẹli OKLUNỌ tọn tọ́n, bo hù gbẹtọ fọtọ́n kẹnnẹkoatọ́n to osla Assylia-nu lẹ tọn mẹ; whenuena yé fọ́n to afọnnufú, dayi e go, omẹ popo zùn oṣiọ. ³⁷Mowẹ Sẹnakelibi, ahọlu Assylia tọn wleali etọn, bo yì, bo sọ lẹ́, bo nọ̀ otò Nineve tọn mẹ ³⁸To enẹgodo, le e taliai to ohọ̀ Nisloki vodun etọn tọn mẹ, wẹ Adlammeleki po Salẹtseli po, ovi etọn lẹ yí ohi do hù i; yé sọ họ́n wá aigba Almenie tọn ji; Esalhaddọn ovi etọn sọ dùahọlu to otẹn etọn mẹ.

¹TO azán nẹlẹ gbè, Hẹzekia jẹazọ̀n kaka jẹ okú dònu, Isaia yẹwhegán ovi Amọsi tọn sọ wá ede, bo dọ nẹ̃ dọmọ, Le wẹ OKLUNỌ dọ, Sẹ́núdo to owhé towe gbè; na hiẹ na kú, bo ma na gán gba. ²Whenẹnu wẹ Hẹ́zekia lẹ́ pannukòn adó, bo hodẹ́ hlan OKLUNỌ. ³Bo dọmọ, Flin dinvie, OKLUNỌ Ẹ, yẹn vó wẹ, le yẹn zinzọnlin to nukọn towe do, to nugbo mẹ podọ to ayiha pipé mẹ, bo sọ wà onú he yón to nukọn towe. Hezekia sọ viavi ṣlẹṣlẹ. ⁴Whenẹnu wẹ ohó OKLUNỌ tọn wá Isaia de, dọmọ, ⁵Yì, bo dọ na Hẹzekia, dọmọ, Le wẹ OKLUNỌ Jiwheyẹwhe Davidi otọ́ towe tọn dọ, Yẹn ko sè odò towe, yẹn mọ dasìn towe, dayi e go, yẹn na yí owhè fọtọ̀n dogó azán towe. ⁶Yẹn na sọ whlẹn we po otò he po sọn alọ ahọlu Assylia tọn me: yẹn na whlẹn otò he. ⁷Ehe na yín ohia lọ na we son OKLUNỌ de, dọ, OKLUNỌ na basi onú he ewọ ko dọ; ⁸Dayi e go, yẹn na hẹn ojlẹ oyè tọn he ko jẹte to owhè-gàn Ahazi tọn go, gò do godo whla ao Mọwẹ owhè gò do godo whla ao na ojlẹ sọha he é do jete.

⁹Owékinkan Hezekia ahọlu Juda tọn tọn, whenuena é jẹazọ̀n, bo sọ gán sọn azọn etọn mẹ. ¹⁰Yẹn ko dọ to sinsán azán ṣie tọn mẹ, yẹn na yì họ̀ngbo kútòmẹ tọn mẹ: Yè yí pipòtọ owhè ṣie tọn sọn alọ ṣie mẹ. ¹¹Yẹn dọmọ, yẹn ma to na mọ. OKLUNỌ lọ, yèdọ OKLUNỌ lọ to aigba ogbẹ̀nọ tọn ji bà: Yẹn ma to na mọ gbẹtọ bà, to yé he tin to aihọn mẹ lẹ mẹ. ¹²Ogbézán ṣie yì, yè sọ dè e sọn dè di gòhọ lẹngbọhọ́tọ tọn de: yẹn ko sán ogbẹ̀ ṣie sẹ̀ di avọ̀lọntọ E na sán mi sé di sékan tẹ̃lẹ: Sọn okle, yèdọ kaka jẹ ozán mẹ wẹ hiẹ na hẹn mi jẹ pòdo ṣie. ¹³Yẹn lẹn kaka jẹ afọnnu, dọ, di kinnikinni, mọkẹde wẹ é na gbà ohú ṣie lẹpo: Sọn okle, yèdọ kaka jẹ ozán mẹ wẹ hiẹ na hẹn mi jẹ podo ṣie. ¹⁴Di adọ́gbó kavi agadawhle, mọwẹ yẹn awhádo: yẹn blawu di apoe; Nuṣikọna nukun ṣie na aga pinpọ́n: OKLUNỌ È, awu do mi sinyẹn; yín alọyítọ ṣie. ¹⁵Bé etẹ wẹ yẹn na dọ? Ewọ ko dọ hlan mi, ewlọsu ko sọ basi i: Yẹn na to yìyì dẹdẹ to owhè ṣie lẹpo mẹ to vivó ayiha ṣie tọn mẹ. ¹⁶OKLUNỌ E, gbọn onú helẹ dali wẹ gbẹtọ nọ tin te, To onú helẹ pó mẹ wẹ ogbẹ́ gbigbọ ṣie tọn: Mọ hiẹ na hẹnazọ̀ngbọna mi, bo sọ hẹn mi nọ́ ogbẹ́. ¹⁷Dayi e go, to jijọho tẹnmẹ yẹn tindo vivẹ́ daho: Ṣigba hiẹ ko whlẹn ayiha ṣie to wanyi mẹ sọn odògbó gbigble tọn mẹ: Na hiẹ ko zé ylando ṣie lẹpo dlan godo towe. ¹⁸Na kútòmẹ ma sọgan pa we, okú ma sọgan pagigona we: Yé he teje yì odògbó lẹ mẹ ma sọgan do tódido na nugbo towe. ¹⁹Ogbẹ́nọ, ogbénọ, ewọ wẹ na pa we, dile yẹn to bibasi do to egbé he: Otọ́ na yí nugbo towe hia ovi lẹ. ²⁰OKLUNỌ ko wleawu nado whlẹn: Enẹwutu mìwlẹ na ji ohàn ṣie to hànjinu okànnọ lẹ go, To azán mítọn lẹpo gbè to ohó OKLUNỌ tọn mẹ.

²¹Na Isaia ko dọmọ, Yé ni yí mimlin ovò sinsẹ́n tọn, bo yí i tlẹ na nútitẹ lọ, é na sọ jẹgángán. ²²Hẹzekia sọ dọ ga, dọmọ, Etẹwẹ ohia lọ dọ yẹn na hẹji yì ohọ́ OKLUNỌ tọn mẹ?

¹TO ojlẹ nẹ mẹ wẹ Mẹloadaki-Baladani ovi Baladani tọn, ahọlu Babylọni tọn, do owé po nunina po hlan Hẹzekia: na é sè dọ é ko jẹazọ̀n, bo sọ jẹ gángán. ²Hẹzekia sọ jaya na yé wutu, bo sọ yí ohọ̀ yẹyinu etọn tọn hia yé, fataka, po sika po, po nuwhẹnkun po, po nusisá akuẹgegenu tọn po, ohọ̀ ogbaja etọn tọn lẹpo, po onú he yè mọ to adọkunnu etọn mẹ lẹ po: onú de ma tin to owhé etọn gbè, kavi to ahọludu etọn lẹpo mẹ, he Hẹzekia ma yí hia yé. ³Whenẹnu wẹ Isaia yẹwhegán wá ahọlu Hẹzekia de, bo dọ nọ̀ dọmọ, Etẹ wẹ dawe helẹ dọ? fie wẹ yé sọn wá de we? Hẹzekia sọ dọmọ, otò dindẹn mẹ wẹ yé sọn wá dẽ, yèdọ sọn Babyloni. ⁴Whenẹnu wẹ é dọmọ, Etẹ wẹ yé mọ to owhé towe gbè? Hẹzekia sọ gblọn, dọmọ, Onú he tin to owhó ṣie gbè lẹpo wẹ yé mọ: núde ma sọ tin to adọkunnu ṣie lẹpo mẹ he yẹn ma yí hia yé. ⁵Whenẹnu wẹ Isaia dọ na Hẹzekia, dọmọ, Sè ohó OKLUNỌ awhànpa lẹ tọn. ⁶Dayi e go, azán lọ wá, dọ onú he tin to owhé towe gbè lẹpo, podọ onú he otọ́ towe lẹ ko bẹ́pli kaka jẹ egbó, wẹ yè na hẹn yì Babyìọni: onú de ma na pò, wẹ OKLUNỌ dọ, ⁷Podọ sọn ovisunnu he na tón sọn ohò towe mẹ lẹ he hiẹ na ji, wẹ yé na bẹ́ yì; yé na sọ yín ọjọ to awánu ahọlu Babylọni tọn mẹ ⁸Whenẹnu wẹ Hẹzekia dọ na Isaia, dọmọ, Dagbe wẹ ohó OKLUNỌ tọn he hiẹ dọ E sọ dọ ga, dọmọ, Jijọho po nugbo po na tin to owhè ṣie nu.

¹MÌ miọnhomẹna omẹ ṣie lẹ, mì miọnhomẹna yé, wẹ Jiwheyẹwhe mitọn dọ. ²Mì dọ ohó homẹmiọn tọn hlan Jelusalẹm, bo dawhá hlan ẹn, dọ awhànfunfun etọn vọ̀, yè sọ jó ylando etọn nẹ̃ na é ko mọyí do ogbẹ́awejì sọn alọ OKLUNỌ tọn mẹ na ylando etọn lẹpo.

³Ogbè mẹde tọn he to awhádo to zùngbo mẹ, dọ, Mì jla aliho OKLUNỌ tọn do, mì basi aligbó jijlọ to ozùnmẹ na Jiwheyẹwhe mítọn. ⁴Tándò lẹpo wẹ yè na zé doaga, osó po okọta lẹ po wẹ yè na zín do odò: gbingbán wẹ yè na hẹn jlọ, ofi he jẹ pódedòde wẹ yè na hẹn zùn tité. ⁵Yè na do gigo OKLUNỌ tọn hia, agbasa lẹpo wẹ na mọ ẹn dopọ: na onù OKLUNỌ tọn wẹ dọ ẹ. ⁶Ogbè lọ dọmọ, Dawhá. Ewọ sọ dọmọ, Awhá tẹwẹ yẹn na do? Agbasa lẹpo wẹ ogbé gigo etọn lẹpo sọ taidi vòvó danji tọn. ⁷Ogbé nọ yọ, vòvó nọ kupẹ́: na gbigbọ OKLUNỌ tọn ko yìn do e go wutu, nugbonugbo ogbé wẹ gbẹtọ ⁸Ogbé nọ yọ́, vòvó sọ nọ kupé: ṣigba ohó Jiwheyẹwhe mítọn tọn na to ote kakadoi.

⁹Hiẹ wẹ̀ndagbenọ Ziọni tọn, hẹ́ osó daho ji aga yì; hiẹ wèndagbenọ Jelusalẹm tọn, zé ogbè towe doaga po huhlọn po: zé e doaga, a dibu blo; dọ hlan otò Juda tọn dọ, Mì pọ́n Jiwheyẹwhe mitọn. ¹⁰Dayi e go, OKLUNỌ Jiwheyẹwhe na wá po alọ sinsinyẹn po, awà etọn na dugán nẹ̃: dayi e go, ale etọn tin to e si, ahọsuyí etọn tin to nukọn etọn. ¹¹Ewọ na yìn kanlinpa etọn di lẹngbọhọtọ de: é na sọ yi awà etọn do bẹ́ lẹngbọvu lẹ pli, bo zé yé do akọ́n etọn nu, bo sọ wà dẹ̃dẹ do plan ehe mọhò lẹ jegbonu.

¹²Mẹnu wẹ ko jlẹ osìn to alọpàhòmẹ etọn mẹ, bo yí alọ do jlẹ olọn, bo bẹ́ kọ́gudu aigba tọn pli do jlẹnu mẹ, bo jlẹ osó lẹ to nujlẹgàn ji; podọ okọta lẹ to nujlẹnu mẹ? ¹³Mẹnu wẹ ko hìali gbigbọ OKLUNỌ tọn, kavi bo yín hónamẹtọ etọn, bo plọn ẹn? ¹⁴Mẹnu wẹ é nọ lẹnnu hẹ, mẹnu wẹ plọnnu in, bo plọ́n ẹn to aliho whẹ̀dida tọn mẹ, bo plọ́n ẹn nuyọnẹn, bo sọ yí ali zìnzìn tọn hia ẹ? ¹⁵Dayi e go, akọta lẹpo taidi kùnkùn osìn tọn dopọ to osìn tòzẹ́n mẹ tọn mẹ, yè sọ hia yé di kọ́gudu vude to nujlẹnu mẹ; dayi e go, ewọ sọ to olopo lẹ zé di onú pẹvide. ¹⁶Libani ma sù mimẹ̀, mọ kanlin etọn lẹ ma sọ sù nado yí do sánvọ́ mimẹ̀. ¹⁷Akọta lẹpo wẹ di nuvọ́ to nukọn etọn; yè sọ hia hlan ẹn whèhu onú he ma tin, nuvọtọ. ¹⁸Mẹnu go wẹ mì na jlẹ Jiwheyẹwhe do? Kavi apajlẹ tẹwẹ mì na do jlẹte hẹ ẹ? ¹⁹Anawàtọ pà boṣiọ, ayáwàtọ sika tọn kọ̀n sika ṣinyọn e ji, bo sọ slo fataka gẹdẹ. ²⁰Mẹhe yín wamọnọ sọmọ bọ é ma tindo núnina, dè atin he ma na yọ̀n; é to anawàtọ nuyọnẹntọ din na ede nado pà boṣiọ pipa he yè ma na diọtẹn na. ²¹Míwlẹ ma ko yọnẹn? míwlẹ ma ko sè? yè ma ko dọ na mì sọn whẹwhẹwhenu? bé mì ma ko tunwun sọn dòdo aihọn tọn gbọ̃n? ²²Ewọ wẹ mẹhe sinai to lòboto aigba tọn ji, yé omẹ he tin to é me lẹ taidi agànma; mẹhe tá olọn di onú tita, bo sọ dlẹn yé di ogòhọ na nọnọ̀ a mẹ; ²³Mẹhe hẹn ahọvi lẹ zùn nuvọ́, é basi whẹ̀datọ aihọn mẹ tọn lẹ di nutata. ²⁴Nugbo, yè ma na do yé; nugbo, yè ma na húnhún yé: nugbo, atin yetọn ma na hẹn adóai: é na yìn do yé go, ye na fìọ, aliizi na sọ bẹ́ yé yì di nuyọ. ²⁵Bé mẹnu go wẹ mì na jlẹ mi do, kavi mẹnu wẹ yẹn na sọzẹn hẹ́? wẹ Omẹ Wiwe lọ dọ. ²⁶Zé nukun mitọn doaga, bo pọn, mẹnu wẹ da onú helẹ, bo so hẹn awhàn sọhasọha yetọn jẹgbonu: e nọ ylọ oyín yetọn dopodopo gbọn kiklo huhlọn etọn tọn dali, na ewọ sinyẹn to huhlọn mẹ; depope ma pò.

²⁷Etẹwutu wẹ hiẹ to didọ, Hiẹ Jakob, bọ hiẹ sọ to didọ, Hiẹ Islaeli, dọ, Aliho ṣie whla sọn OKLUNỌ de, whẹ̀dida ṣie sọ jù sọn Jiwheyẹwhe ṣie de? ²⁸Hie ma ko yónẹn? Hiẹ ma ko sè, dọ Jiwheyẹwhe madopodo, OKLUNỌ, Nudatọ aigba pòdo lẹpo tọn mọ nọ yọ́n nudikọ mọ onú ma nọ dikọ nẹ̃? dòmọna zìnzìn etọn tọn ma tin. ²⁹E to huhlọn na mẹhe núsikọna lẹ; bo sọ do huhlọn é ji na ewọ he ma do huhlọn lẹ. ³⁰Yèdọ onú na sikọna depẹ lẹ, yọ̀pọ sunnu lẹ na jai gbidigbidi. ³¹Ṣigba mẹhe nọtepọ́n OKLUNỌ lẹ na vọ́ huhlọn yetọn jlado; yé na yí awà do hẹ́ aga di akùn; yé na dowezun, onú ma na dikọna yé; yé na zinzọnlin, bo ma na yón nudikọ.

¹MÌ nabọẹ to nukọn ṣie, mì olòpo emi; bo sọ gbọ gbẹtọ lẹ ni vọ́ huhlọn yetọn jlado: gbọ yé ni sẹ́wá, whenẹnu wẹ ye ni dọhó: gbọ mí ni nọpó sẹwá na whẹ̀dida. ²Mẹnu wẹ zé gbẹtọ dódónọ fọ́n sọn owhezizẹ dali wá, bo ylọ ẹ do afọ etọn go, bo yí akọta lẹ na ẹn to nukọn etọn, bo sọ yí do dugán do ahọlu lẹ ji? é jó yé na ohí etọn di kọ́gudu podọ di nuyọ he yè fú hlan ogá etọn. ³E jẹmọna yé, bo juyì jijọho; yèdọ gbọn aliho he ewọ ma ko yí afọ etọn tùnai te gbède. ⁴Mẹnu wẹ da ẹ bo sọ basi i, bo to whẹndo lẹ ylọ sọn whẹwhẹwhenu gbọn? Yẹn OKLUNỌ wẹ; omẹ tintan, podọ gọ́na godotọ, yẹn lọ wẹ. ⁵Olòpo lẹ mọ ẹn, bo dibu; adozinnúdo opòdo aigba tọn lẹ; yé sẹ̀pọ́, bo sọ wá. ⁶Mẹdopodopo gọalọna kọmẹnu etọn: mẹdopodopo dido hlan nọvisunnu etọn, dọmọ, Mì wlekli. ⁷Mowẹ atinpatọ to tùdohomẹna sika yawàtọ, mẹhe yí ogọ̀mẹ do to jijla ẹ do, to tùdohomẹna mẹhe to núli dòzún ji; dọmọ, E wleawu na titlẹ, é sọ yí húngàn do whè e, na é ma na do sẹ́tẹn.

⁸Ṣigba hiẹ Islaeli, devi ṣie; Jakob mẹhe yẹn ko dè, okún Ablaham, họntọn ṣie tọn ⁹Mẹhe yẹn hẹn sọn opòdo aigba tọn, bọ yẹn sọ ylọ we sọn omẹ gángán finẹ lẹ tọn de, bo sọ dọ hlan we, dọmọ, Hiẹ wẹ devi ṣie; yẹn ko dè we, yẹn ma zé we dlangbé gba. ¹⁰A dibu blo; na yẹn tin po hi po: adòyanú wẹ blo: na yẹn wẹ Jiwheyẹwhe towe: yẹn na na huhlọn we; yẹn na gọalọna we; nugbo, yẹn na yí adusilọ ṣie dódó tọn do zé we daga. ¹¹Dayi e go, mẹhe gblehomẹ do ogo wẹ lẹpo na mọwinyan: yé na sọ flu; yé na taidi onú he ma tin; mẹhe to avùnho hẹ we lẹ na dọ̀n. ¹²A na din yé, a ma yé na mọ, yedọ yé he wọhẹ we lẹ: mẹhe to awhànfun hẹ we lẹ na taidi onú he ma tin, podọ di nuvọtọ. ¹³Na yẹn OKLUNỌ Jiwheyẹwhe towe, na hẹn adusilọ towe go, bo na dọ hlan we dọ, A dibu blo; yẹn na gọalọna we. ¹⁴A dibu blo, hiẹ Jakob owán, podọ mì gbẹtọ Islaeli tọn lẹ; yẹn na gọalọna we, mọwẹ OKLUNỌ, Omẹflitọ towe dọ, Omẹ Wiwe Islaeli tọn lọ. ¹⁵Dayi e go, yẹn ko yí we do basi núzinzán dida yọ́yọ́ ozĩnhọ̀ tọn he do adú, hiẹ na zín osó lẹ, bo lì yé, bo sọ lẹ́ okota lẹ zùn ofló. ¹⁶Hiẹ na fú yé, jẹhọn na sọ zé yé yì, ahizi na vúnvún yé pé: hiẹ na sọ jaya to OKLUNỌ mẹ, bo sọ do gigo to Omẹ Wiwe Islaeli tọn lọ mẹ. ¹⁷Whenuena wamọnọ po agbatọnọ lẹ po to osìn din, bọ é ma tin, bọ odẹ́ yetọn hú na nugbla, yẹn OKLUNỌ na sè yetọn, yẹn Jiwheyẹwhe Islaeli tọn ma na gbẹ́ yé dai. ¹⁸Yẹn na hùn otọ̀ to ofi yìaga, podọ asisa to ṣẹnṣẹn agbàdo lẹ tọn; yẹn na diọ zùngbo zùn tándo osìn tọn, podọ aigba húhú zùn odò tòsisa tọn. ¹⁹Yẹn na do atin kedle tọn do zùngbo mẹ, atin akakia tọn, atin mylte tọn, po atin oliviẹli tọn po; yẹn na do atin kiple tọn, po atin olme tọn po, po atin buisi tọn po dopọ́ to ozùn mẹ. ²⁰Na yé nido mọ, bo yónẹn, bo lẹnnu, bo tunwun dopọ́, dọ alọ OKLUNỌ tọn wẹ basi ehe, podọ Omẹ Wiwe Islaeli tọn lọ wẹ da ẹ.

²¹Mì hẹn owhẹ́ mitọn jẹgbonu, wẹ OKLUNỌ dọ, mì hẹn linlẹn sinsinyẹn mitọn jẹgbonu wá, wẹ Ahọlu Jakob tọn dọ. ²²Gbọ yé ni hẹn yé jẹgbonu, bo yi onú he na jọ hia: gbọ yé ni yí onú hóhó tọn lẹ hia, onú he yé yín, na mí ni lẹn yé pọ́n, bo yọ́n pòdo yetọn; kavi na yé ni dọ onú hẹ ja lẹ hlan mí, ²³Do onú he ja to ehelẹ godo hia, na mí nido yónẹn dọ yẹwhe wẹ mì nugbo; mì wàdagbe, kavi mì wà ylanylan, na obú nido di mí, na mí ni mọ ẹn dopọ́. ²⁴Dayi e go, nuvọ́ mẹ tọn wẹ mi azọ́n mitọn sọ yín nuvọ́ mẹ tọn: osùnú de wẹ mẹhe dè mì.

²⁵Yẹn ko zé omẹ dopo doaga sọn agéwaji, ewọ na sọ wá: sọn whezizẹ wẹ ewọ na dawhá ylọ oyín ṣie: é na sọ wá Ahọvi lẹ Ji di do kóyìnyan ji, podọ dile zẹnmẹtọ nọ yàn okò do. ²⁶Mẹnu wẹ ko dohia sọn whẹwhẹwhenu, na mí nido yọ́nẹn? podọ sọn hóhó whenu, na mí nido dọ dọmọ, Dódónọ wẹ ewọ? nugbo, mẹhe sọhia de ma tin, nugbo, mẹhe dọ ẹ de ma tin, nugbo, mẹhe sè ohó mitọn lẹ de ma tim ²⁷Tintan yẹn na dọ hlan Ziọni dọmọ, Pọ́n, pọ́n yé; podọ yẹn na na Jelusalẹm omẹ dopo de he hẹn wẹndagbe wá. ²⁸Na yẹn pọ́n, mẹde ma tin; yèdọ to ṣẹnṣẹn yetọn, hónamẹtọ de ma tin, whenuena yẹn kanbiọ, mẹhe sọgan yigbè ohó de tọn ma tin. ²⁹Dayi e go, onú yaya tata wẹ yé omẹ po; nuvọ́ wẹ azọ́n yetọn: jẹhọn po onú wluwlu po wẹ boṣiọ yetọn lọ.

¹PON devi ṣie, mẹhe yẹn gọalọna, mẹvivẹ ṣie, mẹhe go homẹ ṣie hún do; yẹn ko yí gbigbọ ṣie do e ji: ewọ na sọ hẹn whẹ̀dida jẹgbonu wá na Kosi lẹ. ²Ewọ ma na dawhá, mọ é ma na zé ogbè yìaga, mọ é ma na dike yè ni sè ogbè etọn to tòhòmẹ. ³Ofán gbigbà wẹ ewọ ma na wẹ́n, osékan he to azọ̀ti wẹ ewọ ma na ṣi: é na sọ hẹn whẹ̀dida wá to nugbo mẹ. ⁴Onú ma to na dikọ nẹ̃, mọ ewọ ma to na fiọhomẹ, kaka é na do zé whẹ̀dida dai to aihọn mẹ: olopo lẹ na sọ nọtepọ́n osẹ́n etọn. ⁵Le wẹ OKLUNỌ dọ, ewọ mẹhe da olọn, bo sọ dlẹn yé jẹgbonu; ewọ mẹhe tẹ́ aigba po onú he sọn é mẹ wá lẹ po; ewọ mẹhe na gbọfufu mẹhe tin to e ji lẹ, podọ gbigbọ hlan mẹhe to zọnlinzin to e mẹ lẹ. ⁶Yẹn OKLUNỌ wẹ ylọ we to dódó mẹ, yẹn na sọ hẹn alọ towe go, bo na yí we whla, bo yí we do basi alẹnu gbẹtọ lẹ tọn, hinhọ́n kosi lẹ tọn de; ⁷nado hùn nukunna nukuntọ́nnọ lẹ, nado hẹn ogàntọ lẹ tón sọn gànwhé, po mẹhe sinai to zinvlu mẹ lẹ po sọn gànhọ́ mẹ. ⁸Yẹn wẹ OKLUNỌ; ehe wẹ oyín ṣie: gigo ṣie wẹ yẹn ma na jó na mẹdẽvo, mọ yẹn ma na jó pipa ṣie na boṣiọ pipa lẹ. ⁹Dayi go onú hóhó tọn lẹ ṣẹ, onú yọ́yọ́ to didọ; whẹpo yé na jẹgbonu yẹn ko dọhó yetọn na mi.

¹⁰Mì jihàn yọ́yọ́ man OKLUNỌ, pipa etọn sọn pòdo aigba tọn, mi mẹhe to tejẹ jei ohù mẹ lẹ, po onú he tin to é mẹ lẹ po: olopo po mẹhe to é mẹ lẹ po. ¹¹Gbọ zúngbo po otòdaho etọn lọ po ni ze ogbè yetọn doaga, ogbéta he mẹ Kedali nọnọ̀: gbọ mẹhe to osó mẹ lẹ ni jihàn, gbọ yé ni jaya sọn osó ji aga. ¹²Gbọ yé ni na gigo OKLUNỌ, bo do pipa etọn hia to olopo lẹ mẹ. ¹³OKLUNỌ na tón di gbẹtọ asuka de, é na fọ́n awúwhinwhan doaga di awhànfuntọ de: é na dawhá, yèdọ é na li; é na gbawhàn kẹ̀ntọ etọn lẹ tọn. ¹⁴Hóhó wẹ yẹn ko donù abọẹ; yẹn nọte abọẹ, bo wúnkada na dẽ: dinvie yẹn na dawhá di yọnnu he to ajipanu, yẹn na hùsúdo, bo sọ bẹ́ dù whladopo. ¹⁵Yẹn na gbà osó po okọta po kija, bo sọ hẹn omú yetọn lẹpo hú; yẹn na hẹn otọ̀ zùn aigba húhú, bo sọ hẹn avúndoe lẹpo hú. ¹⁶Yẹn na hẹn nukuntọ́nnọ lẹ gbọn aliho he yé ma yónẹn ji; yẹn na plan yé gbọn omọ́ he yé ma ko yónẹn dai ji; yẹn na hẹn zinvlu zùn hinhọ́n to nukọn yetọn; podọ onú gbingbán zùn jijlọ. Onú helẹ wẹ yẹn na basi na yé, yẹn ma na gbẹ́ yé dai. ¹⁷Yè na gọ̀ mẹhe dotudo boṣiọ pipa go lẹ do godo, yè na dowinyan yé talala, yé mẹhe to didọ na boṣio kinkọ́n dọ, Míwlẹ wẹ yẹwhe mítọn.

¹⁸Mì sè, mì tókúnọ lẹ, bo sọ pọ́n, mì nukuntọ́nnọ lẹ, na mì nido mọ. ¹⁹Mẹnu wẹ nukuntọ́nnọ, adavo devi ṣie, kavi tókúnọ di mẹdagun ṣie he yẹn dohlan? mẹnu wẹ nukuntọ́nnọ di ewọ he yín pipé? bo sọ tónnukun di devi OKLUNỌ tọn. ²⁰To onú susu mimọ mẹ, ṣigba hiẹ ma dayi e go; to otó húnhún mẹ, ṣigba ewọ ma sè. ²¹Homẹ OKLUNỌ tọn vivi talala na dódó etọn wutu; ewọ na zé osẹ́n daga, bo sọ hẹn ẹn zùn yẹyinọ. ²²Ṣigba mẹhe yè jẹajo do, bo sọ bẹ́ agbàn etọn wẹ ehe: yé omẹ pó wẹ yè yí omọ do wle to odò mẹ, yè sọ yí yé whla do ogànhọ̀ mẹ: yè jó yé na nuyanwẹnna, mẹde ma sọ whlẹn yé; yè jó yé na ogbànna, mẹde ma sọ dọmọ, Hẹn ẹn gọ̀ ²³Mẹnu wẹ tin mì ṣẹnṣẹn he na na otó hlan ehe? he na tùntóai bo sọ sè na ojlẹ lọ he ja? ²⁴Mẹnu wẹ jó Jakob na ogbànna, bò sọ jó Islaeli na ajotọ lẹ? bé é ma yín OKLUNỌ wẹ, mẹhe go mí wà ylankan do? na yé ma jlo na zinzọnlin to aliho etọn ji, yé ma sọ yín tónusètọ hlan osẹ́n etọn. ²⁵Enẹwutu wẹ é do kọ̀n adi homẹgble etọn tọn do e ji, po huhlọn awhàn tọn po: é ko dozò e lẹ́do, ṣigba ewọ ma yónẹn; é mọ́ ẹ, aigba ewọ ma yí i do ayiha mẹ.

¹ṢIGBA dinvie lẹ wẹ OKLUNỌ dọ, mẹhe da we hiẹ Jakob, podọ ewọ mẹhe do we hiẹ Islaeli dọmọ, A dibu blo: na yẹn ko fli we gọ̀, yẹn ko yí oyín towe do ylọ we. ²Whenuena hiẹ gbọn osìn mẹ jei, yẹn na tin hẹ we, to otọ̀ lẹ ṣẹnṣẹn yé ma to na ṣinyọn oji we: whenuena hiẹ to zọnlinzin to ṣẹnṣẹn mìyọn tọn, hiẹ ma na fiọ; mọ mìyọnlọ ma na gbó do ogo we. ³Na yẹn wẹ OKLUNỌ Jiwheyẹwhe towe, Omẹ Wiwe Islaeli tọn lọ Whlẹngantọ towe: yẹn ko yí Egypti do basi fligọ̀ towe, bo sọ jó Etiopia po Saba po na we. ⁴Sọle hiẹ họ̀akuẹ to nukun ṣie mẹ, bo yín yẹyinọ, yẹn na yiwanna we, enẹwutu yẹn na dè gbẹtọ do otẹn towe mẹ, podọ gbẹtọ do ogbẹ́ towe tẹnmẹ. ⁵A dibu blo: na yẹn tin hẹ we: yẹn na hẹn okún towe sọn whèzizẹ, bo sọ dọ̀n we pli sọn whèyihọ̀. ⁶Yẹn na dọ hlan agéwaji dọmọ, Kọ̀n dai, podọ hlan hùwaji dọ a hẹn dote blo: hẹn ovi sunnu ṣie lẹ son aganu, podọ ovi yọnnu ṣie lẹ sọn podo aigba tọn. ⁷Yèdọ mẹdepope he yè ylọ gbọn oyín ṣie dali: na yẹn ko da ẹ na gigo ṣie wutu, yẹn ko do e; nugbo, yẹn ko basi i. ⁸Hẹn nukuntọ́nnọ he do nukun lẹ jẹgbonu, po tókúnọ he do otó lẹ po. ⁹Gbọ akọta lẹpo ni ṣinyan yéde plidopọ, na gbẹtọ lẹ ni pli: mẹnu wẹ to yé mẹ he sọgan dọ ehe, bo sọ yí onú hóhó tọn hia mi? gbọ yé ni hẹn kunnudetọ yetọn lẹ jẹgbonu, na yè nido suwhẹna yé: yé na sè, bo na sọ dọmọ, Nugbo wẹ. ¹⁰Mìwlẹ wẹ kunnudetọ ṣie, wẹ OKLUNỌ dọ, devi ṣie he yẹn ko dè: na mì nido yọnẹn, bo sọ yí mi sè, na mì nido tunwun dọ yẹn wẹ, yè ma yón Jiwheyẹwhe de jẹnukọnna mi, mọ ode ma na tin to godo ṣie. ¹¹Yẹn, yèdọ yẹn wẹ OKLUNỌ; podọ dogọ́ yẹn, Whlẹngantọ de ma tin. ¹²Yẹn ko dọ, bo sọ whlẹngan, yẹn ko sọhia, whenuena vodun dahiọ de ma ko tin to ṣẹnṣẹn mitọn: enẹwutu mì wẹ kunnudetọ ṣie, wẹ OKLUNỌ dọ, dọ yẹn wẹ Jiwheyẹwhe. ¹³Nugbo, whẹpo azán na do tin, yẹn lọ die; mẹde ma tin he sọgan whlẹn omẹ sọn alọ ṣie mẹ; yẹn na wàzọ́n, mẹnu wẹ sọgan diọ ẹ?

¹⁴Le wẹ OKLUNỌ Omẹflitọ mitọn, Omẹ Wiwe Islaeli tọn dọ: na mì wutu wẹ yẹn do omẹ hlan Babylọni, bo sọ dọ̀n adọkunnọ yetọn lẹpo wá odò, po Kaldean-nu lẹ po, awhá mẹhetọn tin to ohùn mẹ. ¹⁵Yẹn wẹ OKLUNỌ, Omẹ Wiwe mitọn, Nudatọ Islaeli tọn, Ahọlu mìtọn ¹⁶Le wẹ OKLUNỌ dọ, mẹhe basi aliho to ohù mẹ, podọ mọji to osìn daho lẹ mẹ; ¹⁷mẹhe hẹn kẹkẹ po osọ́ po jẹgbonu, awhàn po huhlọn po: yé na mlọnai dopọ, yé ma na fọ́n: yé súdo, yè ṣi yé di mìyọngbán-kàn. ¹⁸Mì flin onú hóhó tọn bà blo, mì sọ lẹn onú hóhó whenu tọn pọ́n blo. ¹⁹Dayi e go, yẹn na basi onú yọ́yọ́ de; dinvie é na tónkun jẹgbonu: bé mì ma na yónẹn? yẹn na dè aliho de to zùngbo mẹ, bo dè otọ́ to ozùn mẹ. ²⁰Kanlin zùnmẹ tọn lẹ na gbogbéna mi, dlagọni lẹ, po ajankusu lẹ po: na yẹn na osìn omẹ to zùngbo mẹ, podọ otọ̀ lẹ to zùnmẹ, nado na núnùnù omẹ ṣie lẹ, omẹ vivé ṣie lẹ. ²¹Omẹ helẹ wẹ yẹn do na dẽ; yé na do pipa ṣie hia ²²Ṣigba a ma dawhá ylọ mi gba, hiẹ Jakob; ṣigba núsikọna we na yẹn wutu, hiẹ Islaeli. ²³Hiẹ ma hẹn kanlin pẹvi nunina mimẹ̀ towe tọn wá na mi; mọ hiẹ ma yí avọ́ towe do gbogbéna mi, yẹn ma yí nunina do hẹn we sèn, mọ yẹn ma yí nuwhẹnkun do do magbọjẹ na we ²⁴Hiẹ ma yí akue do họ̀ ofánpo owandagbenọ na mi, mọ hiẹ ma yí ojo avọ́ towe tọn do gọhò na mi; ṣigba hiẹ yí ylando towe do hẹn mi jẹtukla, hiẹ sọ yí ylankan towe do do magbọjẹ na mi. ²⁵Yẹn, yèdọ yẹn, wẹ mẹhe gbidi ylando towe sẹ̀ na dẽ tọn wutu, yẹn ma na flinnujẹ ylando towe lẹ go. ²⁶Flinnu mi: na mí ni do dọ ẹ dopọ: hiẹ lẹn, na yè nido súwhẹna we. ²⁷Otọ́ towe tintan ko wàylan, mẹplọ́ntọ towe lẹ ko klan sọn dẽ. ²⁸Enẹwutu yẹn ko hẹn ahọvi fiwiwe lọ tọn zùn mawé, bo sọ jó Jakob hlan dẹ́hodo, podọ Islaeli hlan ovlẹ.

¹ṢIGBA dinvie, sè, hiẹ Jakob, devi ṣie, po Islaeli, mẹhe yẹn dè po: ²le wẹ OKLUNỌ dọ, mẹhe da we, bo sọ do we sọn ohò mẹ, he na gọalọna we; A dibu blo, Jakob devi ṣie; po hiẹ Jeṣuluni mẹhe yẹn dè po. ³Na yẹn na kọ̀n osìn do mẹhe nugbla to hùhù ji, podọ otọ̀-sisa do aigba húhú ji: yẹn na sọ kọ̀n gbigbọ ṣie do okún towe ji, podọ dona ṣie do ovi towe lẹ ji. ⁴Yé na tọ́nkun jẹgbonu to ṣẹnṣẹn ogbéma tọn, di atin saule tọn to osìn mọnji. ⁵Ode na dọ, dọmọ, yẹn wẹ OKLUNỌ tọn; awetọ na sọ ylọ ede gbọn oyín Jakob tọn dali, mẹdevo na yí alọ etọn do wlan dọ hlan OKLUNỌ, bo ylọ yínkọ ede tọn gbọn oyin Islaeli tọn dali.

⁶Le wẹ OKLUNỌ dọ, Ahọlu Islaeli tọn, podọ Omẹflitọ etọn OKLUNỌ awhànpa lẹ tọn; yẹn wẹ omẹ tintan, yẹn wẹ omẹ godotọ; Jiwheyẹwhe de ma tin to godo ṣie. ⁷Mẹnu wẹ na ylọ di yẹn, bo na sọ do e hia, bo na tò e do hajihaji na mi, sọn whenuena yẹn ko dè omẹ hóhó lẹ? onu he ja, bo na wá, na yé ni yí hia na yé. ⁸Mì dibu blo, adò sọ yànu mì blo: bé yẹn ma ko dọ hlan mì sọn ojlẹ nẹ mẹ, bo sọ do e hia? Míwlẹ wẹ kunnudetọ ṣie. Bé Jiwheyẹwhe de tin dogó mì? nugbo, Jiwheyẹwhe de ma tin; yẹn ma yọ́n ode. ⁹Nuvọ́ wẹ mẹhe to bosiọ pà lẹpo; onú dagbedagbe yetọn lẹ ma na doale; yewlọsu wẹ kunnudetọ yéde tọn; yé ma mọnu, mọ yé ma sọ yọ́nẹn; na winyan nido hù yé. ¹⁰Mẹnu wẹ na pà vodun, kavi bo na kọ̀n boṣio he ma doale na nudepope. ¹¹Dayi e go, winyan na hù ogbé etọn lẹpo: azọ́nwàtọ lẹ, gbẹtọ wẹ yé: gbọ yé omẹ pó ni bẹ́ yéde plidopọ, gbọ yé ni fọ́n nọte; yé na dibu, winyan na sọ hù yé dopọ. ¹²Ayawàtọ tùn asiọvi dopo to akán mẹ, bo yí ogọ̀mẹ do tùn in, bo sọ yí hlọnhlọn awà etọn tọn do basi i: nugbo, hùvẹ́ hù i, huhlọn etọn sọ vọ́: é ma nù osìn onú sọ ṣikọ nẹ̃. ¹³Atinpatọ dlẹn okàn etọn; é yí okàn do dohia ẹ; é yí atinwhlẹnú do whlẹ ẹ, bo sọ yí kọmpasi do dojlẹ etọn, bo yí i do papajlẹ sunnu tọn kẹdẹdi whànpẹ gbẹtọ tọn; na nido nọnó whégbe. ¹⁴E sọ sán atin kedle tọn zindai na ede, bo sọ yí atin kyple tọn po atin kene tọn po, bo sọ hẹn ẹn do huhlọn na ede to ṣẹnṣẹn zùnkan lẹ tọn mẹ; é do atin flene tọn, jikun sọ hẹn ẹ whẹ́n. ¹⁵Whenẹnu wẹ é na yín mìyọn flọnú na gbẹtọ; na é na yí sọn yé mẹ, bo yí do hú mìyọn na ede; nugbo, é basi vodun na ede, bo sọ to sinsẹ́n ẹn; é yí i do pà hoṣiọ, bo sọ to taliai nẹ̃. ¹⁶Adade etọn wẹ é do flọmìyọn, adade etọn wẹ é yí do dù olàn; é mẹ́ mimẹ̀, é sọ pékọ nẹ̃: nugbo, è húmìyọn, bo sọ dọmọ, Ẹnhẹ̃n, agbasa ṣie hùmìyọn, yẹn ko mọ mìyọn. ¹⁷Pipòtọ etọn wẹ é do basi vodun, yèdọ boṣio pipa etọn, é litai nẹ̀, é donùdò nẹ̃, é hodẹ́ hlan ẹn, bo dọmọ, Whlẹn mi; na hiẹ wẹ yẹwhe ṣie. ¹⁸Yé ma yọnẹn, nuyọnẹn ma sọ pé yé: na ewọ ko sú nukun yetọn, na yé ma na do sọgan tunwun. ¹⁹Mẹde ma sọ lẹnpón to ayiha etọn mẹ, mọ nuyọnẹn kavi wuntuntun ma tin nado dọmọ, Yẹn ko mè adade etọn to mìyon mẹ; nugbo, yẹn ko sọ̀ akla to akán etọn ji; yẹn ko mẹ́ olàn, bo sọ dù i: bé yẹn na yí pipòtọ etọn do basi osùnú de? bé yẹn na jẹklo na otù atin tọn? ²⁰E yí afín ṣinyọn ede: ayiha oklọ tọn ko lé ẹ do apadopo, na é ma sọgan whlẹn ayiha etọn gán; mọ é ma sọ sọgan dọmọ, Bé lalo ma tin to adusilọ ṣie mẹ?

²¹Flin onú helẹ, hiẹ Jakob po Islaeli po; na hiẹ wẹ devi ṣie: yẹn ko do we; hiẹ wẹ devi ṣie: Islaeli, hiẹ ma na zùn mẹwinwọn to dẽ gba. ²²Yẹn ko gbìdi ylankan towe sẹ́ di aslọ he súyu, podọ ylando towe di avìvì: lẹgọ̀ do dẽ; na yẹn ko fli we gọ̀. ²³Mì jihàn, mì olọn lẹ: na OKLUNỌ ko basi i: mì jaya, mì ofi yì odò aigba tọn lẹ: na mì ni ké ohàn, mì osó zùnkan tọn, po atin he tin to é mẹ lẹ po; na OKLUNỌ ko fli Jakob gọ̀, bo sọ pàgigona ede to Islaeli mẹ.

²⁴Le wẹ OKLUNỌ, Omẹflitọ towe, podọ mẹhe do we sọn ohò mẹ, dọ, dọmọ, yẹn wẹ OKLUNỌ mẹhe basi onú lẹpo: omẹ dopo he dlẹn olọn; bo sọ tẹ́ aigba na dẽ. ²⁵Mẹhe diọ ohia lalonọ lẹ tọn zùn nuvọ́, bo sọ hẹn tamẹgble na núdawàtọ lẹ; mẹhe lẹ́ nuyọnẹntọ lẹ hlan godo, bo sọ hẹn nuyọnẹn yetọn zùn nululu. ²⁶Mẹhe hẹn ohó devi etọn tọn dote, bo sọ hẹn linlẹn mẹdagun etọn lẹ tọn ṣẹ; mẹhe dọ hlan Jelusalẹm dọmọ, yè na yí i do do otò; podọ hlan otò Juda tọn lẹ dọmọ, Yè na zé mì dote, yẹn na sọ zé ofi etọn he yè dọ̀ngble lẹ yìaga. ²⁷Mẹhe dọ hlan osẹ́dò, dọmọ, Hú, yẹn na sọ hẹn otọ̀ towe lẹ hú. ²⁸Mẹhe dọ na Kylu tọn, dọmọ, lẹngbọhọtọ ṣie wẹ, é na hẹn ojlo ṣie lẹpo di: bo dọ na Jelusalẹm tọn, dọmọ, Yè na zé we dote: podọ na tẹmpli tọn dọmọ, yè na yí odòdo towe hẹnai.

¹LE wẹ OKLUNỌ dọ hlan amidèdotananọ etọn, hlan Kylo, adusilọ mẹhe tọn yẹn ko hẹn, nado gbawhan akọta lẹ tọn to nukọn etọn; yẹn na tún homẹbla ahọlu lẹ tọn nado hùn họ́ngbó awe lẹ to nukọn etọn, yè ma na sú họ̀ngbó lọ. ²Yẹn na yì jẹnukọnna we, bó sọ hẹn ofi gbingbán lẹ zùn jijlọ: yẹn na gbà họ̀ngbó gànvẹ̃ tọn lẹ kija, bo sọ sán gànpatin lẹ do awe ³Yẹn na yí adọkunnu zinvlu tọn na we, po adọkun he whla do nuglọ lẹpo po, na hiẹ nido yọnẹn dọ yẹn OKLUNỌ, he yi oyín towe do ylọ we wẹ Jiwheyẹwhe Islaeli tọn. ⁴Na Jakob devi ṣie po Islaeli mẹvivẹ ṣie po wutu, yẹn yí oyín towe do ylọ we, eyín hiẹ ma tlẹ ko yọ́n mi. ⁵Yẹn wẹ OKLUNỌ, mẹdevo ma tin, Jiwheyẹwhe de ma tin gọ́na mi: yẹn ko bla gbajana we, eyín hiẹ ma tlẹ ko yón mi: ⁶Na yé nido yọ́nen sọn whèzizẹ podọ sọn whèyihọ, dọ mẹdevo ma tin gọ́na mi; yẹn wẹ OKLUNỌ, mẹdevo de ma tin. ⁷Yẹn wẹ da hinhọ́n, bo sọ da zinvlu: yẹn wẹ basi jijọho, bo sọ da oylan: yẹn, OKLUNỌ wẹ basi onú he lẹpo.

⁸Mì kùn do aigba, sọn aga, mì olọn lẹ, sọ gbọ̀ jiwhé ni kọ̀n dódó doai: gbọ́ aigba ni kẹ̀, bo hẹn whlẹngan jẹgbonu, gbọ̀ dódó ni tọ́nkun hẹ ẹ dopọ; yẹn OKLUNỌ wẹ da ẹ.

⁹Dindọ̀n wẹ na mẹhe to wiwọhẹ Obasitọ etọn! Aklá sọn aklá aigba tọn mẹ: Bé okò na dọ na mẹhe dó e dọmọ, Etẹ wẹ hiẹ to bibasi? Kavi azón towe, dọmọ, Ewọ ma tindo alọ? ¹⁰Dindọ́n wẹ na mẹhe dọ na otọ́ etọn, dọmọ, Etẹ wẹ hiẹ ji? Kavi na yọnnu nẹ dọmọ, Etẹ wẹ hiẹ ji? ¹¹Le wẹ OKLUNỌ, Omẹ Wiwe Islaeli tọn, Obasitọ etọn dọ, Mì kàn onú he na jọ biọ mi, gbọn visunnu ṣie lẹ tọn dali, podọ gbọn azọ́n alọ ṣie mẹ tọn dali mì pasẹna mi. ¹²Yẹn wẹ da aigba, bo sọ da gbẹtọ do e ji: yẹn, yèdọ alọ ṣie wẹ dlẹn olọn lẹ, yẹn ko paṣẹna awhàn yetọn lẹpo. ¹³Yẹn ko zé e doaga do dódó mẹ, yẹn na sọ pọ́n aliho etọn lẹpo go: é na zé otò ṣie dote, é na jó gàntọ ṣie lẹ daá yì, é ma yín na akuẹ, kavi na ale, wẹ OKLUNỌ awhànpa lẹ tọn dọ.

¹⁴Le wẹ OKLUNỌ dọ, Tuklajijẹ Egypti tọn po ajọ́nu Etiopia tọn po, po Sabeannu lẹ tọn po, po gbẹtọ he tọ́nalùn lẹ po na juwá de we, yé na yín towe: yé na hòdo we; ogàn mẹ wẹ yé na sọn wá, yé na jẹklo na we, yé na vẹ̀vẹ̀ na we, dọmọ, Nugbo, Jiwheyẹwhe tin to ohò towe mẹ: mẹdevo ma tin, Jiwheyẹwhe devo ma tin. ¹⁵Nugbo, hiẹ wẹ Jiwheyẹwhe he yí dewe whla, Jiwheyẹwhe Islaeli tọn, Whlẹngántọ. ¹⁶Winyan na hù yé, yé omẹ pó wẹ na flu, yé he to vodun basi lẹ na nọpọ yì oflu mẹ. ¹⁷Ṣigba yè na yí whlẹngan madopodo do whlẹn Islaeli to OKLUNỌ mẹ: mì ma na mọ winyan, mọ mì ma na flu, aihọn madopodo.

¹⁸Na le wẹ OKLUNỌ he da olọn lẹ lọ dọ, Jiwheyẹwhe lọsu he da aihọn, bo sọ basi i; é ko hẹn ẹn nọte, é ma da ẹ tata gba, é do e na mí nido nọnọ̀ e mẹ, yẹn wẹ OKLUNỌ; mẹdevo ma tin. ¹⁹Yẹn ma dọhó to nuglọ, to ofi zinvlu aihọn tọn te: yen ma dọ hlan okún Jakob tọn, dọmọ, Mì din mi yaya, yẹn OKLUNỌ wẹ to dódó dọ, yẹn do onú he pé hia. ²⁰Mì bẹ́ míde pli bo wá; mì sẹ́wá, mì mẹhe họngán sọn akọta lẹ mẹ: yé he zé atin boṣio pipa yetọn tọn dote ma do nuyọnẹn, yé sọ to dẹ̀ho hlan vodun he ma sọgan whlẹn yé ²¹Mì dọ na mì, bo sọ hẹn yé sẹ́wá; nugbo, yé ni lẹn dopọ; mẹnu wẹ do ehe hia sọn hóhó whenu? mẹnu wẹ ko dọ ẹ sọn ojlẹ lọ mẹ gbọn? bé é ma yín yẹn OKLUNỌ wẹ? Jiwheyẹwhe devo ma tin gọ́na mi: Jiwheyẹwhe dódónọ podọ Whlẹngántọ de; mẹdevo ma tin gọ́na mi. ²²Mì pannukọn mi, na yè ni whlẹn mì, mì pòdo aigba tọn lẹpo: na yẹn wẹ Jiwheyẹwhe, mẹdevo ma tin. ²³Yẹn kò yí dẽ do whle, ohó lọ ko tọ́n sọn onù ṣie dódó tọn mẹ; é ma na lẹ́, dọ kligonu lẹpo na dẹ́ hlan mi, odẹ́ lẹpo na whle. ²⁴Nugbo, yé na dọmọ, To OKLUNỌ mẹ wẹ yẹn do dódó po huhlọn po te: e de wẹ gbẹtọ lẹpo na wá; winyan na sọ hù mẹhe to homẹgble do e go lẹ. ²⁵To OKLUNỌ mẹ wẹ yè na sùwhẹna okún Islaeli tọn lẹpo te, yé na sọ dogigo.

¹BEL dẹ́ dodò, Nebo fẹ́, vodun yetọn lẹ tin to kanlin lẹ ji, podọ to kanlinyìnyìn lẹ ji: yè doagbàn pinpẹn do kẹkẹ mitọn ji, agbàn na kanlin he onù ko dikọna. ²Yé fẹ̀, yé dẹ́ dodò dopọ́; yé ma sọgan zlọn agbàn lọ dai, aigba yé lọsu yì kanlinmọ gbénu.

³Dotóai, hiẹ owhé Jakob tọn, po pipòtọ owhé Islaeli tọn lẹpo po, mẹhe yẹn hẹn sọn adọ̀ ṣie mẹ, mehe yẹn hẹn sọn ohò mẹ. ⁴Yèdọ kaka jẹ yónhó mitọn mẹ yẹn lọ wẹ; yèdọ kaka jẹ owhà mẹ wẹ yẹn na zé mì: yẹn ko basi i, yẹn na sinyẹnlinj nugbo, yẹn na zé, bo na sọ whlẹngán. ⁵Mẹnu go wẹ mì na jlẹ mi do, bo na hen mi sọzẹn hẹ, bo na yí mi jlẹte hẹ, na mi nido sọzẹn? ⁶Yé kọ̀n sika sọn adọpò mẹ; bo sọ jlẹ fataka to jlẹgàn mẹ, yé dà sikayawàtọ, é sọ yí do basi vodun: yé jẹklo, nugbo, yé donùdò nẹ̃. ⁷Yé zé e do abọ́ ji, yé hẹn ẹn, bo sọ yí i dote to otẹn etọn mẹ, é ṣite; á ma, sẹ ẹn sọn otẹn etọn mẹ: nugbo, mẹde na dawhá ylọ ẹ, ṣigba é ma na sọgan gblọn, mọ é ma na whlẹn ẹn sọn tukla etọn mẹ.

⁸Mì flin ehe, mì sọ do míde hia di sunnu: mì yí i do ayiha mẹ, mì sẹ́nmẹjẹtọ lẹ. ⁹Mì flin onú hóhó whenu tọn: na yẹn wẹ Jiwheyẹwhe, mẹdevo ma tin; yẹn wẹ Jiwheyẹwhe; yẹn hunkọ de ma tin: ¹⁰he dọhó pòdo tọn sọn whẹwhẹwhenu, podọ sọn hóhówhenu onú he ma ko jọ jẹ dinvie, dọmọ, Linlẹn ṣie na nọte, yẹn na sọ wà ojlo ṣie lẹpo: ¹¹mẹhe nọ ylọ ohẹ́ núsátọ de sọn whezizẹ, dawe lọ he hẹn linlẹn ṣie di sọn aigba dindẹn ji: nugbo, yẹn ko dọ ẹ, yẹn na sọ hẹn ẹn di ga, yẹn ko lẹn ẹ dai, yẹn na sọ basi i ga. ¹²Mì dotóai hlan mi, mì ayiha sinsinyẹnnọ, he dẹn do dódó lẹ. ¹³Yẹn hẹn dódó ṣie sẹ́pọ́; é ma na dẹn boboe, whlẹngán ṣie ma na nọte; yẹn na sọ yí whlẹngán do Ziọni na Islaeli gigo ṣie.

¹JẸTE, bo sinai kógudu mẹ, hiẹ awhli viyọnnu Babylọni tọn, sinai to aigba: ofìn de ma tin, hiẹ viyọnnu Kaldeani tọn: na ye ma na ylọ we omẹ abẹ̃abẹ podọ omẹ yiwanna asọ bà. ²Zé osé, bo li linfín: hùn nukún súnú towe só, há avọ̀ sọn afọkò, há avọ̀ sọn asapada ji, gbọn otọ̀ lẹ mẹ yì. ³Yè na dè omẹ́ towe do gbangba, nugbo, yè na mọ winyan towe: yẹn na yí ahọsu, yẹn ma na pé we di sunnu gba. ⁴Òmẹflitọ mítọn, OKLUNỌ awhànpa lẹ tọn wẹ oyín etọn, Omẹ Wiwe Islaeli tọn lọ. ⁵Sinai abọẹ, biọ zinvlu mẹ, hiẹ viyọnnu Káldeani tọn: na yè ma na ylọ we dọ yọnnu aglosú ahọludu lẹ tọn bà. ⁶Yẹn ko gblehomẹ do omẹ ṣie lẹ go, yẹn ko hẹn ogú ṣie gble, bo sọ yi yé do alọ towe mẹ: lẹblanu yetọn ma wà we; hiẹ zé zẹgẹ pinpẹn do huhlọntọ lẹ ji. ⁷Hiẹ sọ dọmọ, yẹn na nọ yín yọnnu aglosú kakadoi: mọ hiẹ ma yí onú helẹ do ayiha towe mẹ, mọ hiẹ ma flin godomẹ etọn.

⁸Enẹwutu sè ehe, hiẹ omẹ he yiwanna gbẹ̀dùdù, mẹhe sinai mahònúdepọ́n, mẹhe dọ to ayiha towe mẹ, dọmọ, Yẹn wẹ, mẹdevo ma tin gọ́na mi; yẹn ma na sinai di asuṣiọsi, mọ yẹn ma na yọ́n ajọ́gumẹ ovi tọn: ⁹ṣigba onú awe helẹ na jọ do ògo we ajiji, to azán dopo mẹ, ajọ́gu ovi tọn po asuṣiọsiyín po: yé na wá oji we to pipó yetọn mẹ, na susugege azé towe tọn wutu, podọ na susugege nujijlẹ towe tọn wutu. ¹⁰Na hiẹ dotudo ylankan towe go: hiẹ dọ, dọmọ, mẹde ma mọ mi. Nuyinyọnẹn towe po zìnzìn towe po, ko hẹn we gble; hiẹ sọ dọ to ayiha towe mẹ, dọ, Yẹn wẹ, mẹdevo ma tin gọ́na mi. ¹¹Enẹwutu oylan na wá oji we; hiẹ ma na yọ́n fie é fọ́n sọn: ylankan na sọ flẹjẹ oji we; he hiẹ ma na sọgan klọ́n sẹ́: vọ́jijẹ na wá oji we ajiji, hiẹ ma na sọ yọnẹn. ¹²Nọte dinvie po nujijlẹ towe po, po susugege azé towe tọn po, ehe hiẹ ko yi do to azọ́nwà sọn ovuwhenu towe; eyín é yín mọ é na yín ale na we, eyín e yín mọ hiẹ na sọgan gbawhàn. ¹³Onú dikọna we to susugege linlẹn towe tọn mẹ, Gbọ jìwhéhomẹyọnẹntọ lẹ, sùnwhlẹvuyọnẹntọ lẹ, Súnwhlẹvuyído-dọdọdainọ lẹ, ni fọ́n nọte dinvie, bo whlẹn we sọn onú he to na jọ do ogo we si. ¹⁴Dayi e go, yé na taidi onúyọ; mìyọn na fiọ yé; yé ma na whlẹn yéde sọn huhlọn mìyọn tọn mẹ; mìyọnkán dopo ma na tin nado hú, kavi mìyọn nado sinai nukọn etọn. ¹⁵Le wẹ mẹhe hiẹ ko wàzọ́n hẹ́ lẹ na nọ̀ na we, yèdọ ajọtọ towe lẹ, sọn ovuwhenu towe: yé na dánpe, mẹdopodopo yì awà etọn ji; mẹde ma na whlẹn we.

¹MI sè ehe, hiẹ owhé Jakob tọn, he yè yí oyín Islaeli tọn do to yiylọ, bo sọ tón sọn osìn Juda tọn lẹ mẹ wá, he to oyín yí do to whiwhle, bo sọ to oyín Jiwheyẹwhe Islaeli tọn ylọ, ṣigba é ma yín to nugbo mẹ, kavi to dódó mẹ gba. ²Na yé to yéde ylọ oto wiwe nẹ tọn, yé sọ zé yéde do Jiwheyẹwhe Islaeli tọn ji; OKLUNỌ awhànpa lẹ tọn wẹ oyín etọn ³Yẹn ko dọ onú hóhó tọn lẹ sọn whẹwhẹwhenu; yé ko tón sọn onù ṣie mẹ, yẹn ko do yé hia; yẹn ko basi yé ajiji, yé ko jọ. ⁴Na yẹn yọnẹn dọ tasinyẹntọ wẹ hiẹ, okọ́ towe sọ yín okàn ogàn tọn, gànvẹ̃ wẹ nukọn towe; ⁵sọn whẹwhẹwhenu wẹ yẹn ko dọ hlan we; whẹpo é na do jọ wẹ yẹn ko yí i hia we: na hiẹ nikã dọmọ, Vodun ṣie wẹ basi yé, podọ bosiọ pipa ṣie, po boṣiọ kinkọ̀n ṣie po wẹ paṣẹna yé. ⁶Hiẹ ko sè, pọ́n ehe lẹpo; be mì ma na do e hia? yẹn ko yí onú yọ́yọ́ hia we sọn ojlẹ he mẹ, yèdọ, onú he yè sọ whla, hiẹ ma sọ yón yé. ⁷Dinvie wẹ yè da yé, é ma yín sọn whẹwhẹwhenu gba; yèdọ jẹnukọnna azán whenuena hiẹ ma ko se yé; na hiẹ nikã dọ, dọmọ, Dayi e go, yẹn ko yón yé. ⁸Nugbo, hiẹ ma sè: nugbo, hiẹ me yọnẹn; nugbo sọn ojlẹ lọ mẹ he otó towe ma hùn: na yẹn yọnẹn dọ hiẹ na wà bublu talala, yè na sọ ylọ we dọ ylanwàtọ sọn ohò mẹ. ⁹Na oyín ṣie wutu yẹn na hẹn homẹgble dote, podọ na pipa ṣie wutu yẹn na jagọ́ na hiẹ wutu, na yẹn nikã sán we sẹ́. ¹⁰Pọn, yẹn ko kọ̀n we, ṣigba é ma yín di fataka gba; yẹn ko dè we to zokán nukunbibia tọn mẹ. ¹¹Na yewlọsu tọn wutu, yèdọ, na yewlọsu tọn wutu, wẹ yẹn na basi i: bé nawẹ yè na hẹn oyín ṣie gble do, yẹn ma na jó gigo ṣie hlan mẹdevo gba.

¹²Dotóai, hiẹ Jakob po Islaeli po, mẹyiylọ ṣie; yẹn lọ wẹ; yẹn wẹ omẹ tintan, yẹn wẹ omẹ godo tọn ga. ¹³Alọ ṣie ga wẹ yí odòdo aigba tọn doai, adusilọ ṣie wẹ dlẹn olọn lẹ: whenuena yẹn ylọ yé, yé fọ́n nọte dopọ́. ¹⁴Mì omẹ pó, mí pli dopọ́, Bo sè; mẹnu wẹ to yé mẹ he ko dọ onú helẹ? OKLUNỌ yiwan nẹ̃; é na sọ wà ojlo etọn to Babylọni go, alọ etọn na sọ tin to Kaldeaninu lẹ go. ¹⁵Yẹn, yèdọ yẹn ko dọ ẹ; nugbo, yẹn ko ylọ ẹ: yẹn ko hẹn ẹn wá, ewọ na sọ hẹn aliho etọn doale. ¹⁶Mì sẹ̀pọ́ mi, mì sè ehe; yẹn ma ko dọhó to nuglọ sọn whẹwhẹwhenu; sọn ojlẹ he mẹ é ko tin, finẹ wẹ yẹn te; dinvie, OKLUNỌ Jiwheyẹwhe, po Gbigbọ etọn po wẹ do mi hlan. ¹⁷Le wẹ OKLUNỌ Omẹflitọ, Omẹ Wiwe Islaeli tọn dọ; yẹn wẹ OKLUNỌ Jiwheyẹwhe towe, he plọn we na ale, he plan we gbọn aliho he ji hiẹ na gbón. ¹⁸Eyíndọ hiẹ ko dotóai hlan osẹ́n ṣie Ị whenẹnu wẹ jijọho towe do ko taidi otọ̀, dódó towe di agbowhẹn ohù tọn. ¹⁹Okún towe ga na ko taidi tọkẹ́n, ovi ohò towe mẹ tọn lẹ di kọ́gudu etọn; yè ma do sán oyín etọn sẹ́ gba, mọ yè ma do gbà ẹ súdo sọn nukọn ṣie gba.

²⁰Mì tón sọn Babyloni; mì họ̀n sọn Kaldeani-nu lẹ mẹ, mì yí ogbè ohàn tọn do do e hia, mì dọ ehe, mì dọ ẹ kaka jẹ pòdo aigba tọn: mì dọ, dọmọ, OKLUNỌ ko fli devi etọn Jakob gọ́ ²¹Nugbla ma hù yé whenuena ewọ plan yé gbọn zùngbo mẹ; na é hẹn osìn sà sọn osé mẹ na yé wutu: é sọ zé awinyan ga, osìn sọ túntún jẹgbonu. ²²Jijọho ma tin na omẹ ylankan lẹ, wẹ OKLUNỌ dọ.

¹MI se ṣie, mì olopo lẹ; bo dotóai, mì gbẹtọ sọn ofi dindẹn; OKLUNỌ ko ylọ mi sọn ohò mẹ wá; sọn ohò onọ ṣie tọn mẹ wẹ é ko ylọ oyín ṣie. ²Ewọ ko basi onù ṣie di ohi dida; oyẹ́ alọ etọn tọn mẹ wẹ é whla mi do, bo sọ hẹn mi zùn ogá sisẹ́; ogọ́ etọn mẹ wẹ é whla mi do; ³e sọ dọ hlan mi dọmọ, Hiẹ wẹ devi ṣie, Islaeli, mẹhe mẹ yè na pagigona mì te. ⁴Whenẹnu wẹ yẹn dọ, dọmọ, Yẹn ko jẹtukla yaya, yẹn ko zán huhlọn ṣie na nuvọ́ tata: nugbo, whẹ̀dida ṣie tin to OKLUNỌ de, podọ azọ́n ṣie to Jiwheyẹwhe ṣie de. ⁵Podọ dinvie wẹ OKLUNỌ dọ, mẹhe do mi sọn ohò mẹ nado yín devi etọn, nado hẹn Jakob gọ́ do e de, nado ṣinyan Islaeli pli, na yẹn nido yín gigonọ to nukun OKLUNỌ tọn mẹ, Jiwheyẹwhe ṣie na sọ yín huhlọn ṣie. ⁶E sọ dọ dọmọ, E yín onú pẹvi na hiẹ ni yín devi ṣie, nado zé ohẹnnu Jakob tọn lẹ doaga, podọ nado lẹ́ omẹ whiwhla Islaeli tọn gọ́: yẹn na sọ yí we do basi hinhọ́n Kosi lẹ tọn, na hiẹ nido yín whlẹngán ṣie kaka jẹ pòdo aigba tọn. ⁷Le wẹ OKLUNỌ Omẹflitọ Islaeli tọn, podọ Omẹ Wiwe etọn dọ, na mẹhe gbẹtọ to vivlẹ, na mẹhe akọta gbẹwanna, na devi ogán lẹ tọn, ahọlu lẹ na mọ bo sọ fọ́n, ahọvi lẹ ga na litaina OKLUNỌ he yín nugbonọ, Omẹ Wiwe Islaeli tọn, mẹhe ko dè we. ⁸Le wẹ OKLUNỌ dọ, To alọkẹyi whenu, wẹ yẹn ko sè towe, podọ to azán whlẹngán tọn gbè, yẹn ko gọalọna we: yẹn na yi we whla, bo sọ yí we na alẹnu gbẹtọ lẹ tọn de, nado hẹn aihọn dote, nado basi, nado hẹn yé dùgu aigba he jẹvọ́ lẹ tọn. ⁹Na hiẹ nido dọ hlan ogàntọ lẹ, dọmọ, Mì tón yì; na mẹhe to zinvlu mẹ lẹ dọ Mi yí míde hia, Yé na dù to aliho nẹlẹ ji, dànji yetọn na sọ tin to ofi he yì aga lẹpo. ¹⁰Hùvẹ́ ma na hù yé, mọ nugbla ma na hù yé; oyózo ma na há yé, mọ owhè ma na hù yé: na mẹhe ko wàlẹblanuna yé na plan yé, yèdọ, tọ̀sisa osìn tọn mẹ wẹ é na hẹn yé gbọn. ¹¹Yẹn na sọ hẹn osó daho ṣie lẹpo zùn aliho, yè na sọ zé aligbó ṣie lẹ doaga. ¹²Dayi e go, ehelẹ na sọn aliho dindẹn wá: Sọ pọ́n, ehelẹ sọn agéwaji podọ sọn whèyihò, ehelẹ sọn aigba Sinimi tọn ji wá. ¹³Mì jihàn, mì olọn lẹ; bo jaya, hiẹ aihọn; mì ké ohàn gángán, mì osó daho lẹ: na OKLUNỌ ko miọnhomẹna omẹ etọn lẹ, bo sọ wàlẹblanuna omẹ etọn he nukunbia lẹ.

¹⁴Ṣigba Ziọni dọmọ, OKLUNỌ ko gbẹ́ mi dai, OKLUNỌ ṣie ko wònji ogo e. ¹⁵Bé yọnnu sọgan wòn ovi etọn he tin anónu, bọ é ma na do wàlẹblanu na ovi ohò etọn mẹ tọn? Nugbo yé sọgan wọ̀n, aigba yẹn ma na wònji ogo we gba. ¹⁶Dayi e go, yẹn ko wlan we do alọpàhòmẹ ṣie; odòkọ towe lẹ sọ tin to nukọn ṣie whepoponu ¹⁷Ovi towe lẹ yáwu; mẹhùtọ towe lẹ, po mẹhe gbà we kija lẹ po na tón sọn de we. ¹⁸Zé nukun towe doaga lẹ́do, bo dayi e go, yé omẹ helẹ pó bé yéde pli dopọ́, bo sọ wá de we. OKLUNỌ dọmọ, Le yẹn tin to ogbẹ̀, hiẹ na yí yé omẹ pó ṣinyọn di aṣọdonú, nugbo, hiẹ na bla yé do ogo, dile asiyọ́yọ́ nọ basi do. ¹⁹Na ofi towe he yè gbà kija, ofi jẹvó, po aigba sukúndo towe po na finyòn gbahu dinvie na mẹhe to é mẹ lẹ, mẹhe zé we mì lẹ na sọ dẹn boboe. ²⁰Ovi towe he ko bú lẹ, na dọ do otó towe mẹ, dọmọ, Otẹn finyọ̀n gbahu na mí: na otẹn mi na yẹn ni nọnọ̀. ²¹Whenẹnu wẹ hiẹ na dọ to ayiha towe mẹ, dọ Mẹnu wẹ ji ehelẹ na mi, yẹn sà ko yín ovisiọnọ, bo sọ yín wẹnsinọ, mẹmẹglọ, podọ bo to dindán yìgodo yìnukọn? mẹnu wẹ pọ́n ehelẹ go? Dayi e go, yè ko jó yẹn dopo dai; bé ehelẹ, fie wẹ yé ko te?

²²Le wẹ OKLUNỌ Jiwheyẹwhe dọ, Dayi e go, yẹn na zé alọ ṣie doaga hlan Kosi lẹ, bo na sọ zé asia ṣie dote hlan gbẹtọ lẹ: yé na hẹn ovi sunnu towe lẹ to awà yetọn mẹ, yé na zé ovi yọnnu towe lẹ do abọ yetọn lọ ji. ²³Ahọlu lẹ na yín otọ́ mẹgopọntọ towe, podọ ahọsi yetọn lẹ onọ mẹgopọntọ towe: nukunmesinyọ̀ndò mẹ wẹ yé na litaina we, bo sọ didó afinfin afọ towe tọn; hiẹ na sọ yọnẹn dọ yẹn wẹ OKLUNỌ: na winyan ma na hu mẹhe nọte pọ́n mi lẹ gba. ²⁴Bé yè sọgan bẹ́ ogbanna sọn huhlọntọ si, kavi yè sọgan yí gànto sọn mẹhe yé jẹ hẹ si. ²⁵Ṣigba le wẹ ỌKLUNỌ dọ, yèdọ, yè na yí gàntọ lẹ sọn huhlọntọ lẹ si, yè na bẹ́ ogbànna sọn mẹhe dobu lẹ si; na yẹn na wọhẹ mẹhe to wiwọ hẹ we, yẹn na sọ whlẹn ovi towe lẹ gán. ²⁶Yé he to awusinyẹnna we lẹ wẹ yẹn nayí agbasalan yewlọsu tọn do na núdùdù: yé na nù ohùn yéde tọn mú di vẹ̃nhàn he vivi: gbẹtọ lẹpo na sọ yónẹn dọ yẹn OKLUNỌ wẹ Whlẹngántọ towe, Omẹflitọ towe, Omẹ huhlọntọ Jakob tọn.

¹LE wẹ OKLUNỌ dọ, Bé fie wẹ owé gbẹ́dai onọ mitọn tọn te, mẹhe yẹn ko gbẹ́dai, kavi mẹnu wẹ to ahọtọnọ ṣie lẹ mẹ he yẹn ko sàmìna? Dayi e go, na ylankan mitọn wutu, wẹ mì ko sà míde, podọ na ylando mitọn wutu wẹ yè gbẹ́ onọ mitọn dai. ²Etẹwutu wẹ yẹn wá, mẹde ma tin? whenuena yẹn ylọ mẹde ma tin na gblọn? Bé alọ ṣie whète sọmọ bọ é ma sọgan fligọ̀? Kavi yẹn ma do huhlọn nado whlẹngán? dayi e go, gbọn wọhẹ ṣie mẹ yẹn hú ohù, yẹn sọ hẹn otọ̀ zùn zùngbo: whevi yetọn to wánlùn na osìn ma tin wutu, yé sọ kú na nugbla. ³Yẹn yí onú dìyu do ṣinyọn avọ̀na olọn, yẹn sọ yí odẹ́vọ do basi awúdonu yetọn.

⁴OKLUNỌ Jiwheyẹwhe ko yí odẹ́ nuyọnẹntọ tọn na mi, na yẹn nido yọ́n le yè nọ dọhó do to ojlẹmẹ hlan mẹhe pusikọna: é to fìnfọ́n to afọnnu-afọnnu, é hùn otọ́ ṣie, nado sè di nuyọnẹntọ tọn. ⁵OKLUNỌ Jiwheyẹwhe ko hùn otọ́ ṣie, yẹn ma sọ vẹtóli, mọ yẹn ma légodo. ⁶Yẹn jó nẹgbé ṣie na nuhmẹtọ lẹ, alaka ṣie na fúnsùntọ le: yẹn ma yí nukun ṣie whla sọn winyan tántúndogona tọn si. ⁷Na OKLUNỌ Jiwheyẹwhe na gọalọna mi: enẹwutu yẹn ma na flu: enẹwutu wẹ yẹn zé nukun ṣie dote di okón, yẹn sọ yónẹn dọ winyan ma na hù mi. ⁸Mẹhe sùwhẹ̀na mi sèpọ: mẹnu wẹ wọhẹ mi? gbọ̀ mí ni nọte dopọ́: mẹnu wẹ whénọ ṣie? gbọ̀ ni sẹ̀pọ́ mi. ⁹Dayi e go, OKLUNỌ Jiwheyẹwhe na gọalọna mi; mẹnu wẹ gbléwhèdo mi? Pọn, yé omẹ pó wẹ na dọhó di awu; owán na dù yé súdo.

¹⁰Mẹnu wẹ to mì mẹ he dibuna OKLUNỌ, he yí oghè devi etọn tọn sè, he to zọnlinzin to zinvlu mẹ, bo ma do hinhọn? Gbọ́ ni dotudo oyín OKLUNỌ tọn go, bo sọ zónmẹ Jiwheyẹwhe etọn. ¹¹Dayi e go, mì omẹ pó, he flọmìyọn, bo yí sìsọ́ lédo míde: mì to zọnlinzin to hinhọ́n mìyọn mitọn tọn mẹ, to sisẹ́ mìyọn he mì flọ́ tọn mẹ. Ehe wẹ mì na tindo sọn alọ ṣie mẹ; mì na mlọnai to awubla mẹ.

¹MI dotóaìna mi, mì mẹhe to dódó hodo lẹ, mì mẹhe to OKLUNỌ din lẹ: mì pọ́n awinyan nẹ he mẹ yè kùn mi sọn, podọ nuvò odògbo tọn he mẹ yè kùn mì sọn. ²Mì pọn Ablaham otọ́ mitọn, po Sala he ji mì po: na ewọ dopo wẹ yẹn ylọ, bo dona, bo sọ hẹn ẹn jideji. ³Na OKLUNỌ na miọnhomẹna Zioni: ewọ na miọnhomẹna ofi etọn he yè gbà kija lepo; ewọ na basi zùngbo etọn di Edẹni, podọ ozùn etọn di ojipa OKLUNỌ tọn; ayajijẹ po homẹhùnhùn po wẹ yè na sọ do e mẹ, opẹ́ po ogbè ohàn tọn po.

⁴Dotóaina mi, mì omẹ ṣie emì; bo sọ na otó mi, hiẹ akọta ṣie: na osẹ́n de na tọ́n sọn dẹ yì, yẹn na sọ ze whẹ̀dida ṣie dote na hinhọ́n gbẹtọ lẹ tọn. ⁵Dódó ṣie tin to yakẹ; whlẹngán ṣie ko tọ́n jẹgbonu, alọ ṣie na dawhẹ̀ gbẹtọ lẹ tọn; olopo na nọtepọ́n mi, yé na sọ dotudo awà ṣie go. ⁶Mì ze nukun mitọn doaga hlan olọn lẹ, na mì ni pọn aigba to odò: na olọn lẹ na fú yì di azò, aigba na sọ dohó di awu, yé he to é mẹ lẹ na kú mọkẹdẹ: ṣigba whlẹngan ṣie na tin kakadoi, dódó ṣie ma na gbìdi sè.

⁷Mì dotóaina mi, mì he yọ́n dódó lẹ, gbẹtọ ayiha mẹhetọn mẹ osẹ́n ṣie te; mì dibuna ovlẹ gbẹtọ le tọn blo, mì sọ hò aslan agbàgba yetọn pọ́n blo. ⁸Na owán na dù yé di awu, owé na sọ dù yé di lẹngbọfún: ṣigba dódó ṣie na tin kakadoi, whlẹngán ṣie sọn whẹndo jẹ whẹndo mẹ.

⁹Fọ́n, fọ́n, zé huhlọn do, hiẹ awà OKLUNỌ tọn; fọ́n, di hóhó whenu tọn, to whẹndo hóhó mẹ. Bé e ma yín hiẹ wẹ ewọ he sán Lahabi, bo sọ húnú dlagọni? ¹⁰Bé e ma yín hiẹ wẹ ewọ he hú ohù, osìn odògbo daho mẹ tọn lọ: he hẹn odògbo ohù tọn zùn aliho na omẹfligọ lẹ nado gbọn wáyì. ¹¹Enẹwutu omẹfligọ OKLUNỌ tọn lẹ na lẹ́gọ́, bo sọ wá Ziọni po ohàn po; ayajẹ madopodo na sọ tin to ota yetọn: yé na mọ omẹhùnhùn po ayajijẹ po yí; nukunbia po awubla po na sọ hòn yí.

¹²Yẹn, yèdọ yẹn wẹ ewọ he to homẹmiọnna mì: mẹnu wẹ hiẹ, bọ hiẹ na do dibuna gbẹtọ he na kú, podọ na ovi gbẹtọ tọn he yè basi di ogbé. ¹³Bọ hiẹ do wònji OKLUNỌ Obasitọ towe go he ko dlẹn olọn lẹ, bo sọ yí odòdo aigba tọn hẹnai; bọ hiẹ do to budi to whepoponu egbesọ-egbesọ na homegble awusinyẹnnamètọ nẹ tọn, taidi ewọ ko wleawu nado hùsúdo? fie ka wẹ homẹgble awusinyẹnnamẹtọ nẹ tọn te? ¹⁴Ogàntọ he yè yáwu diọtẹnna, na yè nido mọtẹn tún ìn dai, podọ na é ma na do kú do odò mẹ, kavi na núdùdù etọn ma na do vọ̀. ¹⁵Ṣigba yẹn, OKLUNỌ Jiwheyẹwhe towe, he má ohù do awe, agbowhẹn ehe ton to fifiẹ: OKLUNỌ awhànpa lẹ tọn wẹ oyín etọn. ¹⁶Yẹn ko yí ohó ṣie do onù towe mẹ, yẹn ko ṣinyọnnúdo we to oyẹ́ alọ ṣie tọn mẹ, na yẹn nido do olọn lẹ, na yẹn nido yí odòdo aigba tọn hẹnai, podọ na yẹn nido dọ hlan Ziọni dọmọ, Hiẹ wẹ omẹ ṣie.

¹⁷Fọn, fọ́n, ṣite, hiẹ, Jelusalẹm he ko nù sọn alọ OKLUNỌ tọn mẹ kọfo homẹgble etọn tọn; hiẹ ko nù owhà kọfo sisọsisọ tọn, bo sọ tún yé kònyingbé. ¹⁸Mẹde ma tin to ovi sunnu etọn he é ji lẹ de mẹ bo na plón ẹ; mọ mede ma tin bo dọ̀n alọ etọn to ovi sunnu he é pọ́n e go whẹ́n lẹ de mẹ ¹⁹Onú awe helẹ wẹ wá oji we; mẹnu wẹ na blawuna we? Ovọ́jijẹ po dindọ̀n po, hùvẹ́ po ohi po: gbọn mẹnu de wẹ yẹn na miọnhomẹna we? ²⁰Ovi sunnu towe lẹ ko dakú, yé sọ mlọnai to alihota di gbéyìn to odò mẹ: yé gó na homẹgble OKLUNỌ tọn, wọhẹ Jiwheyẹwhe towe tọn. ²¹Enẹwutu sè ehe dinvie, hiẹ, mẹhe yè bianukunna, bo sọ nuahàn gọ́hò, ṣigba é ma yín gbọn vẹ̃nhàn dali gba. ²²Le wẹ OKLUNỌ towe OKLUNỌ lọ, podọ Jiwheyẹwhe towe he to whẹ́yí do omẹ etọn lẹ ji, dọ, dayi e go, yẹn ko yí kọfo sisọsisọ tọn sọn alọ towe mẹ, yèdọ owhà kọfo homẹgble ṣie tọn; hiẹ ma na nù in bà. ²³Ṣigba yẹn na yí i do alọ yé he to nukunbia na we lẹ tọn mẹ; he ko dọ na ayiha towe, dọ, Fẹ̀, na mí ni juwayi: hiẹ ko sọ tẹ́ agbasa towe dai di aigba, podọ di alihota na yé he juwajei lẹ.

¹FỌN, fọ́n; zé huhlọn towe do, hiẹ Ziọni; zé avọ́ gigo towe tọn do, hiẹ Jelusalẹm otò wiwe: na sọn dinvie whẹmagbonọ po mawénọ po ma na biọ ohò towe mẹ bà. ²Húnhún dewe sọn kọ́gudu mẹ; fọ́n, bo sinai, hiẹ Jelusalẹm: tún ajá okọ̀ towe tọn sẹ̀, hiẹ ogàntọ ovi yọnnu Ziọni tọn.

³Na le wẹ OKLUNỌ dọ, Yè ko sà mì vọnu; yè na sọ fli mì manakuẹ. ⁴Na le wẹ OKLUNỌ Jiwheyẹwhe dọ, Omẹ ṣie lẹ jẹte yì Egypti to hóhó whenu nado wáwási finẹ; Assylia-nu lẹ sọ doyàna yé yaya. ⁵Enẹwutu dinvie, etẹwẹ yẹn to wiwà to ofi, wẹ OKLUNỌ dọ, bọ yè bẹ́ omẹ ṣie lẹ yì vọnu? yé he dugán do yé ji lẹ hẹn yé wẹnhùn, wẹ OKLUNỌ dọ; whepoponu egbesọ-egbesọ wẹ yè to ohó ylankan dọ do oyín ṣie go. ⁶Enẹwutu omẹ ṣie lẹ na yọ́n oyín ṣie to azán lọ gbe na yẹn wẹ mẹhe to hódọ: dayi e go, yẹn wẹ.

⁷Na afọ ewọ he hẹn wẹndagbe wá tọn yín whànpẹnọ to osó ji do le, he to owẹ́n jijọho tọn dọ, he to wẹndagbe nudagbe tọn hẹn wá, he to whlẹngán tọn dọ; he dọ hlan Ziọni dọ, Jiwheyẹwhe towe duahọlu. ⁸Nuhọ́tọ towe lẹ na zé ogbè doaga; yé na nọpọ́ yi ogbè do jihàn: na yé na yí nukun do mọ, whenuena OKLUNỌ lẹ́gọ̀ do Ziọni. ⁹Mì ké to ayajijẹ mẹ, mí jihàn dopọ́, Mi ofi jẹvọ Jelusalẹm tọn lẹ, na OKLUNỌ ko miọnhomẹna omẹ etọn lẹ, é ko fli Jelusalẹm gọ́. ¹⁰OKLUNỌ ko do awà wiwe etọn hia to nukọn akọta lẹpo tọn; aihọn lẹpo na sọ mọ whlẹngán Jiwheyẹwhe mitọn tọn. ¹¹Mì jagọ́, mi jagọ̀, mì tón sọn ṣẹnṣẹn etọn, mí doalọ onú mawé de go blo; mì tọn sọn ṣẹnṣẹn etọn, mì yín wiwe, mí he hẹn núzinzán OKLUNỌ tọn lẹ. ¹²Na mì ma na hòsu do tón, mọ mì ma na dowezun do yì: na OKLUNỌ na jẹnukọnna mì; Jiwheyẹwhe Islaeli tọn na sọ tin to godo mìtọn.

¹³Dayi e go, devi ṣie na yi nuyọnẹn do zọ́nhẹ omẹ; yè na zé e doaga, yè na jlayín nẹ̀, é na sọ yi oji susu. ¹⁴Le awú towe ji omẹ susu, yé hẹn nukunmẹ etọn gble hú mẹdepope tọn, awutu etọn hú gbẹtọ lẹ tọn. ¹⁵Mọ wẹ é na husìn akọta susu; ahọlu lẹ na sọ do onù yetọn abọẹ do e go: na onú he yè ma ko dọ hlan yé wẹ yé na mọ; onú he yé ma ko sè wẹ yé na lẹ̀n.

¹MẸNU wẹ ko yi ohó mítọn sè mẹnu wẹ yè ko do awà OKLUNỌ tọn hia na? ²Na é na whẹ́n daga to nukọn etọn di atin nùfẹ́, podọ di adọ̀ sọn aigba húhú mẹ; awutu-hia etọn ma yón, mọ é ma féawu; whenuena yè mọ ẹn, é ma tin awufẹ́ he é do do jlo mí. ³Yè vlẹ ẹ, yè sọ gbẹ́ ẹ to gbẹtọ lẹ de, gbẹtọ awublanọ, he yọ́n awubla: é sọ taidi mí hẹn nukun mítọn whla sọn e go; yè vlẹ ẹ, mí ma sọ ho e pọ́n.

⁴Nugbo, ewọ ko hẹn awubla mítọn, é ko zé nukunbia mítọn yì: gãnṣo mí hlẹ ẹ di omẹ hihò, di omẹ yè linu to Jiwheyẹwhe de, bọ yè sọ bianukunna. ⁵Ṣigba yè húnú in na ylando mítọn, yè sọ gbleawu nẹ̃ na ylankan mitọn, hihò jijọho mítọn tọn tin to e ji: podọ hihò etọn wẹ yè yí do hẹnazọ̀n mítọn gbọ̀. ⁶Mí omẹ pó wẹ dánbu di lẹngbọ; omẹ dopodopo mítọn lẹ́ do aliho ede tọn ji: OKLUNỌ sọ hẹn ylankan mítọn lẹpo pliafọ to e go.

⁷Yè doyà nẹ̃, yè sọ bianukun nẹ̃, gãnṣo ewọ ma kẹ́ onù etọn: yè hẹn ẹn wá di lẹngbọvu de jẹ hùhùtọ de podọ di lẹngbọ unbọpẹn to fúnpatọ etọn nukọn, mọwẹ é ma kẹ́ onù etọn. ⁸Yè dè e sọn ofi hihla bo hù i do kunnuji: mẹnu wẹ na dọhó whẹndo etọn tọn? na yè sán ẹn sọn aigba ogbẹnọ lọ tọn ji: ylando omẹ ṣie lẹ tọn, wẹ yè linu in na. ⁹E basi yọ́do etọn hẹ mẹylankan lẹ, podọ hẹ́ adọkunnọ lẹ to okú etọn mẹ; na é ma wà huhlọnnu de, mọ oklọ de ma tin to onù etọn mọ.

¹⁰Gãnṣo é jlo OKLUNỌ nado gbleawu nẹ́, é yí i do awubla mẹ: whenuena hiẹ na yí gbigbọ etọn do sánvọ́ na ylando, é na mọ okún etọn, é na hẹn azán etọn dite, ojlo OKLUNỌ tọn na sọ di to alọ etọn mẹ. ¹¹E na mọ sinsẹ́n tukla ayiha etọn mẹ tọn, é na sọ pékọ nẹ̃: gbọn nuyọnẹn etọn dali wẹ devi ṣie dódónọ na sùwhẹ́na omẹ susu, na ewọ na hẹn ylando yetọn lẹ. ¹²Enẹwutu wẹ yẹn na má adade nẹ́ po omẹ gángán lẹ po, ewọ na sọ má ogbànna hẹ huhlọntọ lẹ; na é ko kọ́n gbigbọ etọn jẹgbonu hlan okú: yè hia ẹ dogọ́ ylanwàtọ lẹ: é sọ hẹn ylando omẹ susu tọn, bo sọ to avùngbọ̀ basi na ylanwàtọ lẹ.

¹JIHÀN, hiẹ wẹnsinọ, hiẹ he ma ji gbède; na ovi vọjẹnọ lẹ tọn sù hú ovi yé he yè wlealọhẹ lọ tọn, wẹ OKLUNỌ dọ. ²Hẹn tẹnmẹ gòhọ towe tọn gblo, bo gbó yé ni vlọn avọdido aisintẹn towe ton jẹgbonu: a hla dai blo, dlẹn okàn towe dite, bo hẹn osó towe sinyẹn. ³Na hiẹ na zé do adusi pawhé podọ do amiyọnpawhe: okún towe wẹ na dúgu Kosi lẹ tọn, bo sọ hẹn otò he jẹvọ́ lẹzùn ofi nọnọ̀. ⁴A dibu blo; na hiẹ ma na mọ winyan: mọ a flu blo; na yè ma na dowinyan we: na hiẹ na wọ̀n winyan yọ́pọ́ whenu towe tọn, a ma na sọ flin ovlẹ họ́jijẹ towe tọn bà. ⁵Obasitọ towe wẹ asú towe; OKLUNỌ awhànpa lẹ tọn wẹ oyín etọn; Omẹflitọ towe Omẹ Wiwe Islaeli tọn: Jiwheyẹwhe aihọn lẹpo tọn wẹ yè na nọ ylọ ẹ. ⁶Na OKLUNỌ ko ylọ we di yọnnu he yè gbẹ́dai, he yè hẹn homẹgblena to gbigbọ mẹ, podọ di asi YỌ́PỌ́ whenu tọn whenuena yè gbẹ́ we, wẹ OKLUNỌ towe dọ. ⁷Nukun whiwhe pẹvide mẹ wẹ yẹn gbẹ́ we dai; ṣigba lẹblanu daho mẹ wẹ yẹn na dọ̀n we pli. ⁸Homẹgble pẹvi de mẹ wẹ yẹn ko whla nukun ṣie sọn ogo we to nukun whiwhe dopo mẹ: ṣigba homẹdagbe madopodo wẹ yẹn na do wàlẹblanuna we, wẹ OKLUNỌ Omẹflitọ towe dọ. ⁹Na taidi osìn Noa tọn wẹ ehe te na mi: na le yẹn ko sànusu dọ osìn Noa tọn ma na ṣinyọn aigba ji bà; mọwẹ yẹn ko sọ sànusu dọ yẹn ma na gblehomẹ do ogo we, mọ yẹn ma na wọhẹ we ¹⁰Na osó daho lẹ na fọ́n yì, yè na sọ họ̀n okọta lẹ sẹ̀; ṣigba homẹdagbe ṣie ma na yì sọn de we, mọ yẹn ma na dè alẹnu jijọho ṣie tọn sẹ̀, wẹ OKLUNỌ he wàlẹblanuna we dọ.

¹¹Hiẹ mẹhe yè to nukunbiana, he yè yí oyú do to zizé danpé, bọ yè ma miọnhomẹ na, pọ́n, yẹn na yi tilõ do tẹ́ zánnu towe, bo sọ yí safili do do odòdo towe ai. ¹²Yẹn na yí lubi do basi vẹsẹnuvo towe, bo na yí kabankli do basi họ̀ntonu towe, bo sọ yí zánnu whanpẹnọ do basi tónu towe lẹpo. ¹³Ovi towe lẹpo na sọ yín pinplọ́n sọn OKLUNỌ de, jijọho ovi towe lẹ tọn na sù ¹⁴To dódó mẹ wẹ yè na hẹn we dote: hiẹ na sọ dẹn do oyà, podọ do núhiha; na é ma to na sẹ́pọ̀ we. ¹⁵Dayi e go, yé na bẹ́ yéde plidopọ́ nugbonugbo, ṣigba é ma yín gbọn dali ṣie gba: mẹdepope he bẹ yéde plidopọ do oji we na jai na hiẹ wutu. ¹⁶Dayi e go, yẹn wẹ da ayawàtọ he to akán mìyọn tọn flọ, bo sọ hẹn núzinzán azọ̀n tọn jẹgbonu na azọ́n, yẹn wẹ da mẹhùsúdonú nado hùsúdo. ¹⁷Avùnhònú depope he yè jlẹ do ogo we ma na wà núde; odẹ̀ he fọ́n do oji we to whẹ̀dida mẹ lẹpo wẹ hiẹ na gblewhẹdo: Ehe wẹ ogú devi OKLUNỌ tọn lẹ tọn, dẽ wẹ dódó yetọn sọn, wẹ OKLUNỌ dọ.

¹MI omẹ he nugbla to hùhù lẹpo mì wá ofi he osìn te, mẹhe ma tindo akuẹ; mì wá, mì họ̀, bo dù; nugbo, mì họ̀ vẹ̃n po yìnnọ̀ po mado akuẹ, madahina. ²Etẹwutu wẹ mì to akuẹzán na ehe ma yín núdùdù? podọ tuklajijẹ mitọn na ehe ma pékọnamẹ? mì dotóai dẹdẹ na mi, bo dù ehe yọ̀n bo gbọ̀ ayiha mitọn ni vivi to ojó mẹ. ³Mì tẹ́ otó mitọn dai, bo wá dẽ: mì sè, ayiha mitọn na sọ tin to ogbẹ̀: yẹn na basi alẹnu madopodo de hẹ mì, yèdọ lẹblanu Davidi tọn he diun ⁴Dayi e gó, yẹn ko yi ewọ na gbẹtọ lẹ na kunnudetọ nukọ̀ntọ, otògán na gbẹtọ lẹ. ⁵Dayi e go, hiẹ na ylọ akọta he hiẹ ma yọnẹn, akọta he hiẹ ma sọ yọ́nẹn lẹ na dowezun wá de we, na OKLUNỌ Jiwheyẹwhe towe, Omẹ Wiwe Islaeli tọn wutu; na ewọ ko pàgigona we. ⁶Mì din OKLUNỌ, whenu yè sọgan mọ ẹn do, mì ylọ ẹ, whenuena é tin to yakẹ. ⁷Omẹ ylankan ni gbọ̀ aliho etọn dai, mawàdódónọ linlẹn etọn: bo gbẹ́ é ni gọ̀ do OKLUNỌ de, ewọ na sọ wàlẹblanu nẹ̀, podọ do Jiwheyẹwhe mítọn de, é na sọ jona susugege. ⁸Na linlẹn ṣie ma yín linlẹn mitọn, mọ aliho mitọn ma yín aliho ṣie, wẹ OKLUNỌ dọ. ⁹Na le olọn yì oji hú aigba do, mọkẹdẹ wẹ aliho ṣie yì oji hú aliho mitọn, linlẹn ṣie hú linlẹn mitọn. ¹⁰Na le jikun po okẹ́n-jikun po nọ sọn olọn mẹ wá, bo ma sọ nọ lẹ́gọ̀ do finẹ, ṣigba bọ é nọ hẹn aigba yọ̀n, bo sọ nọ hẹn onú wú jẹgbonu, bo sọ nọ bligò, na é nido na nọkún jidotọ́, podọ núdùdù na núdùtọ. ¹¹Mọkẹdẹ wẹ ohó ṣie he tọ́n sọn onù ṣie na te: é ma na lẹ̀gọ̀ wá dẽ agbá, aigba é na dotana onú he yẹn jlo, é na wàdagbe to onú he mọ yẹn do e hlan te. ¹²Na ayajẹ wẹ mì na do tòn, jijọho wẹ yè na do plan mì jẹgbonu: osó lẹ, po okọta lẹ po na ké to ohàn mẹ to nukọn mitọn, atin danji tọn lẹpo na sọ hopẹ́. ¹³Atin Kiple tọn na wú to owun tẹnmẹ, atin mytlẹ tọn to tẹun tẹnmẹ: é na sọ yín oyín de hlan OKLUNỌ, na ohia madopodo de he yè ma na sán ṣẹ́.

¹LE wẹ OKLUNỌ dọ, Mì yí whẹ̀dida whla, bo basi nugbo: na whlẹngàn ṣie ko pọ̀ wiwá, dódó ṣie nado sọhia. ²Donanọ wẹ dawe lọ he basi ehe, podọ ovi sunnu gbẹtọ tọn lọ he tẹ́ do é go; he yìn gbọjẹzán, bo ma hẹn ẹn gble, bo sọ yí alọ etọn whla sọn oylan wiwà mẹ. ³Bo ma sọ dike ojonọ he kòn ede dopọ̀ hẹ OKLUNỌ ni dọ, dọmọ, OKLUNỌ ko klan mi gbidigbidi sọn omẹ etọn lẹ mẹ; mọ é ma dike ojọ ni dọ, dọmọ Pọ́n, atin húhú wẹ yẹn. ⁴Na le wẹ OKLUNỌ dọ hlan ojọ he yìn gbọjẹzán ṣie, bo dè onú he jlo mi, bo sọ hẹn alẹnu ṣie go; ⁵dọ, yẹn na na otẹn de yé to ohọ̀ ṣie mẹ, podọ to odòkọ ṣie mẹ, podọ oyín he yọ̀n hú ovi sunnu po ovi yọnnu lẹ po tọn: yẹn na na oyín madopodo de yé, he yè ma na sán sẹ̀. ⁶Ovi ojonọ tọn lẹ ga, he kọ̀n yéde dopọ hẹ OKLUNỌ nado sẹn ẹn, podọ nado yiwanna oyín OKLUNỌ tọn, nado yín devi etọn, mẹdepope he yín gbọjẹzán bo ma hẹn ẹn gble, bo sọ hẹn alẹnu ṣie go. ⁷Yé wẹ yẹn na hẹn wá osó wiwe ṣie ji, bo sọ hẹn yé jaya to ohọ́ odè tọn ṣie mẹ: avọ́ mimẹ yetọn po avọ yetọn lẹ po na yín tẹalọyí to agbà ṣie ji; na ohọ̀ odẹ̀ tọn wẹ yè na nọ ylọ ohọ̀ ṣie dọ na gbẹtọ lẹpo. ⁸OKLUNỌ Jiwheyẹwhe he bẹ́ gbàkija Islaeli tọn lẹ pli dọmọ, yẹn na bẹ́ mẹdevo lẹ pli do de we, dogọ́ yé he yè bẹ́pli do e de lẹ.

⁹Mì gbekanlin lẹpo, mì wá nado hùdù, yèdọ mì kanlin he to zùnkan mẹ lẹpo. ¹⁰Nukuntọ́nnọ wẹ nuhótọ etọn lẹpo: yé omẹ pó wẹ wunvinọ, avún unbọpẹn wẹ yé omẹ pó, yé ma sọgan gbó, yé to amlọndọ, yé to aimlọn, yé jlo na to amlọngósa. ¹¹Nugbo avún wónkútọ wẹ yé, he ma sọgan góho, yé sọ yín lẹngbọhọtọ he ma sọgan tunwun: yé omẹ pó wẹ to aliho yéde tọn pọ́n, omẹ dopodopo to ale etọn go pọ́n sọn agbègbè etọn ji wá. ¹²Mì wá, wẹ yé dọ, Yẹn na hẹn vẹ̃nhàn wá, mí na sọ nù ahàn sinsinyẹn gọhò; osọ́ na taidi egbé, é na sọ sù gégé.

¹DÓDÓNỌ dọ̀n, mẹde ma hòpọ́n, s yè dè lẹblanunọ lẹ sẹ́, mẹde ma sọ lẹn dọ dè wẹ yè dè dódónọ sẹ́ sọn oylan he ja mẹ. ²Ewọ biọ jijọho mẹ: yé gbọjẹ to adọzan yetọn ji, mẹdopodopo to zọnlinzin to dódó etọn mẹ.

³Ṣigba mì sẹ́pọ ofi, mì ovi yọnnu wọntọ lẹ tọn lẹ, okún ayọdetọ po ogalọtọ po tọn. ⁴Mẹnu wẹ míwlẹ to vivlẹ? mẹnu ji wẹ míwlẹ to hẹlikẹ́ do, bo sọ dè odẹ́ jẹgbonu, é ma yín ovi ylando tọn wẹ mì, okún lalo tọn? ⁵He ji vodun to hihẹ to atin mú lẹ glọ, bọ mì to ovi lẹ hù to agbàdo lẹ mẹ, to osé slo lẹ glọ? ⁶Ṣẹnṣẹn ozánnu mapamapa agbàdo tọn lẹ mẹ wẹ mimá towe te: yé, yé wẹ mimá towe: yèdọ yé wẹ hiẹ kọ́n avọ́ nùnù hlan, hiẹ sọ sánvọ́ dùdù tọn. Bé yẹn sọgan yí homẹmimiọn to ehelẹ mẹ? ⁷To osé he yìaga talala, bo dite ji wẹ hiẹ zé adọzan towe do: yèdọ finẹ wẹ hiẹ yì nado sánvọ́. ⁸To ohòn godo podọ to dòtin godo wẹ hiẹ zé oflin towe doaga: na hiẹ ko do dewe hia mẹdèvo hú mi, bo sọ hẹji; hiẹ hẹn adọzan towe zùn daho, bo sọ nualẹ hẹ yé; hiẹ yiwanna adọzan yetọn to fie hiẹ mọ ẹn te. ⁹Hiẹ ko yì ahọlu de po nuwhẹnkún po, hiẹ hẹn owán nusisa towe tọn zùn susu, hiẹ ko do mẹdagun towe lẹ hlan aganu, bo sọ zin dewe dai, yèdọ do olọn zòdo mẹ ¹⁰Nudikọna we to dindẹn aliho towe tọn mẹ; hiẹ ma sọ dọmọ, tódido ma tin, hiẹ ko mọ ogbẹ́ alọ towe tọn; enẹwutu wẹ homẹ towe ma gble. ¹¹Òbu mẹnu tọn wẹ to didi we, kavi to avọ̀sa na, bọ hiẹ sọ to lalodo, bọ hiẹ ma flin mi, kavi ma hò e pọ́n to ayiha towe mẹ? bé yẹn ma ko nabọẹ, yèdọ sọn hóhó whenu gbọn, hiẹ ma sọ dibuna mi? ¹²Yẹn na do dódó towe po azọ́n towe po hia; yé ma na doalena we. ¹³Whenuena hiẹ dawhá, gbọ̀ ogbé towe lẹ ni whlẹn we; ṣigba jẹhọn wẹ na plọ yé omẹ pó yì; gbọfufu na dè yé sẹ́: ṣigba ewọ he yí tudido etọn do ogo e wẹ na tindo aigba lọ, bo sọ dugú osó wiwe ṣie tọn. ¹⁴Ewọ na sọ dọmọ, Mì plọ okọ́ pli, mì plọ okọ́ pli, mì vọ́ aliho jlado, mì dè agbalinu sọn aliho na omẹ ṣie lẹ.

¹⁵Na le wẹ Omẹ gángán Yẹyinọ dọ, he nọnó madopodo, oyín mẹhetọn yín Wiwe, yẹn wẹ nọnọ̀ ofi he ylaga bo wé, hẹ ewọ ga he tindo gbigbọ ovọjọ po whiwhẹ po tọn, nado hẹn gbigbọ whiwhẹnọ lẹ tọn zọ́ta, podọ nado hẹn ayiha vọjọnọ lẹ tọn zéta. ¹⁶Na yẹn ma na hoavùn kakadoi, mọ yẹn ma na gblehomẹ to whepoponu: na gbigbọ do zùn madogan to nukọn ṣie, po gbọfufu he yẹn ko da po. ¹⁷Yẹn ko gblehomẹ na ylankan nukunkẹn etọn tọn wutu, bo sọ linú in: yẹn whla dẽ, bo sọ gblehomẹ, ewọ sọ to yìyì to bubu aliho ayiha etọn tọn mẹ. ¹⁸Yẹn ko mọ aliho etọn, yẹn na sọ hẹn azọ̀ngbọ nẹ̃: yẹn na deana ẹn ga, bo sọ hẹn homẹmimiọn gọ́wa e de, podọ do awublatọ etọn lẹ de. ¹⁹Yẹn wẹ da sinsẹ̀n nuflo tọn: Jijọho, jijọho hlan ewọ mẹhe to aganu, podọ hlan ewọ he tin to yakẹ, wẹ OKLUNỌ dọ; yẹn na sọ hẹnazọ́ngbọ nẹ̃. ²⁰Ṣigba mẹylankan lẹ taidi ohù wuwlu, whenuena é ma sọgan gbọjẹ, ehe osìn etọn to ogbọ̀n po diho po tún jẹgbonu. ²¹Jijọho ma tin, wẹ Jiwheyẹwhe ṣie dọ hlan mẹylankan lẹ.

¹DAWHÁ lélé, a hladote blo, zé ogbè towe doaga di opẹn de, bo do ylankan omẹ ṣie lẹ tọn hia yé, podọ ylando owhé Jakob gbè tọn na yé. ²Gãnṣo yé to dindin mi egbesọ-egbesọ bo sọ jlo na yón aliho ṣie, di akọta he to dódó basi, bo ma gbẹ́ sẹ́nliho Jiwheyẹwhe yetọn tọn dai: yé to whẹ̀whìnwhẹn dódó tọn kanbiọ mi; yé nọ basi homẹhùn nado sẹ̀pọ Jiwheyẹwhe. ³Etẹwutu wẹ míwle to nùbla, wẹ yé dọ, bọ hiẹ ma mọ? Etẹwutu wẹ míwlẹ bianukunna ayiha mítọn, bọ hiẹ ma sọ yọnẹn? Dayi e go, azán nùbla mitọn tọn gbè, mì to gbèdù, bo sọ to huhlọn yí do hẹn omẹ wàzọ́n mìton lẹ. ⁴Dayi e go, mìwlẹ to nùbla na avùn po nudindọ̀n po, podọ nado yí akòtokún ylankan tọn li omẹ: mì blanù di egbé tọn he blo, na yè nido hẹn ogbè mitọn zùn sisè to aga. ⁵Bé nùbla he hunkọ wẹ yẹn dè? azán na gbẹtọ na do bianukunna ayiha etọn? nado li ota etọn ai di woko, podọ nado tẹ́ odẹ́vọ po afin po to glọ etọn? bé hiẹ na ylọ ehe nùbla, podọ azán tẹalọyì de hlan OKLUNỌ? ⁶Bé é ma yín ehe wẹ nùbla he yẹn dè? nado tún ajá ylankan tọn, nado tún agbàn pinpẹn lẹ, nado jó mesinyẹnawuna do ni yì, podọ nado wẹ́n zẹ̀gẹ̀ lẹpo? ⁷Bé e ma yín nado na núdùdù towe hùvétọnọ lẹ, podọ na hiẹ ni hẹn wamọnọ he yè yàn jẹgbonu lẹ wá owhé towe gbè? whenuena hiẹ mọ oménọ, na hiẹ ni ṣinyọn ẹn; dọ hiẹ sọ yí dewe whla sọn agbasa hiẹ lọsu tọn go blo? ⁸Whenẹnu wẹ hinhọ́n towe na lọ́n jẹgbonu di afọnnu, lanmẹlilo towe na yawu wú jẹgbonu; dódó towe nasọ yì jẹ nukọnna we; gigo OKLUNỌ tọn na dọn we pli: ⁹whenẹnu wẹ hiẹ na ylọ, OKLUNỌ na sọ siọ; hie na dawhá, é na sọ dọmọ, Yẹn die. Eyín hiẹ yí zẹ̀gẹ̀ alọvi yẹyẹ dindlẹn, po ohó vọ didọ po sẹ̀ sọn ṣẹnṣẹn towe; ¹⁰eyín hiẹ dòn ayiha towe jẹgbonu hlan hùvẹ́tọnọ de, bo sọ pékọna ayiha he yè bianukunna; whenẹnu wẹ hinhọ́n towe na họn to zinvlu mẹ, zinvlu towe na sọ taidi owhè ṣadádá ¹¹OKLUNỌ na nọ dèana we to whepoponu, bo sọ pékọna ayiha towe to ofi húhú, bo sọ hẹn ohú towe do ojó: hiẹ na sọ taidi ojipa he yè husìn na, podọ di odòtọ sisa he osìn etọn ma nọ vò. ¹²Yé he na yín towe lẹ na gbá ofi hóhó he yè ko gbà kija lẹ; hiẹ na zé odòdo whẹndo susu tọn doaga, yè na sọ nọ ylọ we dọ jladotọ onú tintlẹn tọn, nuhẹngọ̀dotẹntọ aliho lẹ tọn nado nọ̀ é mẹ. ¹³Eyín hiẹ lẹ́ afọ towe sọn gbọjẹzán mẹ, nado nọ wà ojlo towe to azán wiwe ṣie gbè; bo sọ ylọ gbọjẹ zángbè dọ homẹhun, azán wiwe OKLUNỌ tọn, nugbògbéna; bo na gbogbé nẹ̀, bo ma gbọn aliho dewe tọn, bo ma sọ hodo gbẹ́dùdù dewe tọn, bo ma dọhó dewe tọn. ¹⁴Whenẹnu wẹ hiẹ na hẹn homẹ towe hùn to OKLUNỌ mẹ; yẹn na sọ hẹn we hẹ́ ofi yìaga aihọn tọn ji, bo sọ yí ogú Jakob otọ́ towe tọn do yìn we: na onù OKLUNỌ tọn wẹ dọ ẹ.

¹DAYI e go, alọ OKLUNỌ tọn ma whète, bọ é mado sọgan whlẹnmẹ; mọ otó etọn ma pẹ́n, bọ é ma na do sọgan sè: ²ṣigba ylankan mitọn wẹ klán mì sọn Jiwheyẹwhe mitọn go, podọ ylando mitọn wẹ yí nukun etọn whla sọn mì de, bọ ewọ ma na do sè. ³Na alọ mitọn zùn mawé na ohùn, podọ alọvi mitọn na ylankan; nuflo mitọn to lalodo, odẹ́ mitọn sọ to onú gbigble dọ. ⁴Mẹde ma din whówhinwhẹn, mọ mẹde ma to owhẹ̀ nugbo da: yé dotudo nuvọ́ go, yé to lalodo; yé mọhò okà tọn, bo ji ylando. ⁵Yé fle azìn lopá tọn, bo lọ̀n okàn tọ́gboyẹyẹ tọn: ewọ he dù to azìn yetọn mẹ na kú, podọ ehe yè finyọ́n tlú amapoe jẹgbonu. ⁶Okàn yetọn ma na lẹzùn avọ̀, mọ yé ma na yí azọ́n yetọn sinyón yéde: azọ́n yetọn wẹ azọ́n okà tọn, nudakàndakan sọ tin to alọ yetọn mẹ. ⁷Afọ yetọn họ̀nwezun hlan oylan, yé sọ nọ yawu nado kọ̀n ohùn homẹvọnọ tọn dai: linlẹn yetọn linlẹn ylankan wẹ, gbàkija po hẹngble po tin to aliho yetọn ji. ⁸Áliho jijọho tọn wẹ yé ma yónẹn; whẹ̀dida ma sọ tin to yìyì yetọn mẹ: yé ko basi ali gbìngbán na yẹ́de: medepope he gbọn é ji ma na yọ́n jijọho. ⁹Enẹwutu wẹ whẹ̀dida dẹn do mí, mọ dódó ma sọ pla mí: mí nọtepọ́n hinhọ́n, ṣigba dayi e go, avìvì; mí nọtepọ́n hinhọn, ṣigba mí to zọnlìnzin to zinvlu mẹ. ¹⁰Mí to alọdla adó go dí nukuntọ́nnọ, mí sọ to alọdla di mẹhe ma tindo nukun: mí to ahlida to owhè sádádá mẹ di to ozán mẹ; mí tin to ofi jẹvó di oṣiọ. ¹¹Mí omẹ pó to lìlì di beali, bo sọ to awubla di apoe: mí donukun whẹ̀dida, ṣigba é ma tin; na whlẹngán, ṣigba é dẹn do mí. ¹²Na sẹ́nmẹjijẹ mítọn to susu deji to nukọn towe, ylando mítọn sọ dekunnu do mí go: na sẹ́nmẹjijẹ mítọn tin to mí de: eyín ylankan mítọn tọn, mí yọ́n yé. ¹³To sẹ́nmejijẹ po lalodido po do OKLUNỌ go mẹ, tìntón sọn Jiwheyẹwhe mítọn de, didọhó awufinyẹnnamẹ tọn po atẹṣiṣi po, hómimón po ohó lalo-didọ po sọn ayiha mẹ jẹgbonu. ¹⁴Yè lẹ́ whẹ̀dida do godo, whẹwhinwhẹn sọ nọte to aganu: nugbo jai to tòhomẹ, nugbowà ma sọgan biọ whégbè. ¹⁵Nugbo vọ́, ewọ he sọ tón sọn oylan mẹ yí ede do basi ogbànna: OKLUNỌ mọ ẹn, é sọ gblehomẹ nẹ na whẹ̀dida ma tin wutu. ¹⁶E mọ dọ omẹ de ma tin, é sọ jawu do e dọ vẹ̀vẹ̀tọ ma tin: enẹwutu alọ etọn hẹn whlẹngán wá nẹ́, dódó etọn, é gọalọ nẹ. ¹⁷E zé dódó dogo di akọ́nnupánko, bo yí ogàn-gbakun whlẹngán tọn ṣinyọn ota etọn ji; é zé awu ahọsuyí tọn do di avọ́, yè sọ zé vivẹnu do nẹ̃ di otèwu. ¹⁸Kẹdẹdi owàlọ yetọn, mọkẹdẹ wẹ é na suahọ do, homẹgble hlan kẹ̀ntọ etọn lẹ, ahọsu hlan kẹ̀ntọ etọn lẹ; na jlopo lẹ é na yí ahọsu. ¹⁹Yé na sọ dibuna oyín OKLUNỌ tọn sọn whèyìhọ, gigo etọn sọn whèzizẹ. Whenuena kẹ̀ntọ na wá di otò gigọ́, Gbigbọ OKLUNỌ tọn na zé asia doaga do e ji. ²⁰Omẹflitọ de na wá Ziọni, podọ hlan yé he lẹ́ sọn sẹ́nmẹjijẹ mẹ to Jakob mẹ lẹ, wẹ OKLUNỌ dọ. ²¹Na yẹn tọn, ehe wẹ alẹnu ṣie hẹ́ yé, wẹ OKLUNỌ dọ; Gbigbọ ṣie he tin to hiẹ go, po ohó ṣie he yẹn yí do onù towe mẹ po, ma na tón sọn onù towe mẹ, kavi sọn onù okún towe tọn mẹ, kavi sọn onù okún okún towe tọn mẹ, wẹ OKLUNỌ dọ sọn dinvie kakadoi.

¹FON, họ́nun; na hinhọ́n towe wá, gigo OKLUNỌ tọn to ogo we. ²Na dayi e go, zinvlu ṣinyọn aigba ji, zinvlu gọ́ngọ́n? ṣinyọn gbẹtọ lẹ: ṣigba OKLUNỌ na fọ́n to oji we, yè na sọ mọ gigo etọn to ogo we. ³Kosi lẹ na wá hinhọ́n kọ̀n, podọ ahọlu lẹ do hinhọ́n zizẹ́ towe kòn. ⁴Zé nukun towe doaga lẹ́do, bo pọ́n, yé omẹ pó bẹ́ yéde plidopọ, yé wá de we; visunnu towe lẹ na sọn ofi dindẹn wá, yè na sọ pọ́n ovi yọnnu towe lẹ go to adaja towe mẹ. ⁵Whenẹnu wẹ hiẹ na mọ, bo sọ sàplidopọ, ayiha towe na dibu, bo sọ zùn daho; na yè na diọkọna adọkun susu ohù tọn hlan we, huhlọn Kosi lẹ tọn na wá de we. ⁶Susugege kanklosọ-póawenọ lẹ na ṣinyọn oji we, kanklosọ-pódoponọ Madiani po Efa po tọn; yé omẹ pó na sọn Seba wá: yé na hẹn sika po nuwhẹnkun po wá; yé na do pipa OKLUNỌ tọn hia do gbonu. ⁷Yè na bẹ́ lẹngbọpa Kedali tọn lẹpo plidopọ do de we, agbò Nebajọti tọn lẹ na dù mẹdagun na we: yé na hẹ́ agba, ṣie ji wá po alọkẹyi po, yẹn na sọ pàgigona ohò gigo ṣie tọn. ⁸Mẹnu wẹ ehe to zìnzlọn di aslọ helẹ, podọ di awhànnẹ do họ̀nu yetọn mẹ. ⁹Nugbo olopo lẹ na nọtepọ́n mi, ohún Talsisi tọn lẹ whẹ, nado hẹn ovi towe lẹ sọn aganu wá, fataka yetọn podọ sika yetọn po yé po, na oyín OKLUNỌ Jiwheyẹwhe towe tọn, podọ na Omẹ Wiwe Islaeli tọn, na ewọ ko pagigona we wutu. ¹⁰Ovi jonọ lẹ tọn na dó odòkọ towe yì aga; ahọlu yetọn lẹ na to lizọnyí na we: na homẹgble ṣie mẹ wẹ yẹn linú we, aigba to ojọmiọn ṣie mẹ wẹ yẹn wàlẹblanuna we. ¹¹Enẹwutu hòngbo towe na tin to hùnhùn to whepoponu: yè ma na sú yé to okle kavi to ozán mẹ; na gbẹtọ lẹ nido hẹn huhlọn Kosi lẹ tọn wá de we, podọ na yè nido hẹn ahọlu yetọn lẹ wá. ¹²Na akọta po ahọludu po he ma na sẹ́n we na dọ̀n; nugbo, akọta nẹlẹ yè na gbà yé kija gbidigbidi. ¹³Gigo Libani tọn na wá de we, atin kyple tọn, atin olme tọn, po buisi tọn po dopọ nado doasọna otẹn ofiwiwe ṣie; yẹn na sọ hẹn otẹn afọ ṣie tọn zùn gigonọ. ¹⁴Ovi sunnu yé he bianukunna we lẹ tọn ga na wá de we to taliai mẹ; yé he ko to vivlẹ we lẹpo wẹ na litaina we to afọpáhomẹ towe go; yé na ylọ we, dọ Otò OKLUNỌ tọn, Ziọni Omẹ Wiwe Islaeli tọn tọn. ¹⁵Ṣigba le yè gbẹ́ we dai, bọ yè sọ gbẹ́wanna we, sọmọ bọ mẹdepope ma ju gbọn ṣẹnṣẹn towe, yẹn na hẹn we zùn yẹyi madopodo de, ayajẹ whẹndo susu tọn de. ¹⁶Hiẹ na nù yìnnọ́ Kosi lẹ tọn, bo sọ nọ́ anọ́ ahọlu lẹ tọn: hiẹ na sọ yọnẹn dọ yẹn OKLUNỌ wẹ Whlẹngántọ towe, Omẹ asuka Jakob tọn lọ. ¹⁷To otẹn gànvẹ tọn mẹ yẹn na hẹn sika wá, to otẹn ogànyú tọn mẹ, yẹn na hẹn fataka wá, to otẹn atin tọn mẹ, ogànvẹ̃, to otẹn osé tọn mẹ, ogànyú: yẹn na basi ogán towe lẹ na jijọho, podọ azọ́ngán towe lẹ na dódó. ¹⁸Yè ma na sè owàlọ yinylan to aigba towe ji bà, gbàkija kavi dindọ̀n to dali towe: aigba hiẹ na ylọ odòkọ towe dọ, Whlẹngán, podọ ohọ̀ngbo towe dọ, Pipa. ¹⁹Owhè ma na yín hinhọ́n towe to okle bà, mọ osùn ma na yí hinhọ́n etọn hia we bà: aigba OKLUNỌ na yín hinhọ́n madopodo towe de, Jiwheyẹwhe towe gigo towe. ²⁰Owhè towe ma na biọ bà: mọ osùn towe ma na yì zinvlu mẹ bà, na OKLUNỌ na yín hinhọ́n madopodo towe, azán awubla towe tọn lẹ na jẹ pòdo. ²¹Omẹ towe lẹpo na yín dódónọ: yé na dugú aigba lọ tọn kakadoi, alà núdido ṣie tọn, azọ́n alọ ṣie tọn, na yè nido pàgigona mi. ²²Ómẹ vude na lẹzùn fọtọ́n, omẹ pẹvi dopo akọta huhlọnnọ: yẹn OKLUNỌ na basi i do gànji to ojlẹ etọn mẹ.

¹GBIGBỌ Oklunọ JIWHEYẸWHE tọn tin to oji e; na OKLUNỌ ko yí amisisá do dè mi nado dọyẹwhehó wẹndagbe tọn hlan homẹmimiọnnọ lẹ; é ko do mi hlan nado basi pọ́ngbọ ayiha awublanọ lẹ tọn, nado lá mẹdekannujẹ hlan mẹmẹglọ lẹ, podọ hùnhùn ogànhọ̀ tọn na ogàntọ lẹ. ²Nado lá owhè alọkẹyí OKLUNỌ tọn, podọ azán ahọsuyí Jiwheyẹwhe mítọn tọn; nado miọnhomẹna mẹhe to awubla lẹpo. ³Nado dè na yé he to awubla to Ziọni lẹ, nado na aṣọdonu yé do afín tẹnmẹ, amì ayajijẹ tọn do awubla tẹnmẹ, avọ̀ pipa tọn do gbigbọ nukunbibia tọn tẹnmẹ; na yè nido ylọ yé dọ, atin dódó tọn, núdido OKLUNỌ tọn, dọ yè nido pàgigo nẹ̀. ⁴Yé na gbá ofi hóhó he jẹvọ́ lẹ, yé na zé ofi hóhó he gbà lẹ dote, yé na sọ vọ́ otò gbàkija lẹ jlado, ofi jẹvọ́ whẹndo susu tọn. ⁵Jonọ lẹ na nọte, bo yìn lẹngbọpa mitọn lẹ, ovi jonọ lẹ tọn na yín aigbajlotọ mitọn podọ vẹnla sántọ mitọn lẹ. ⁶Ṣigba yè na nọ yíọ mì dọ yẹwhenọ OKLUNỌ tọn lẹ: gbẹtọ lẹ na sọ ylọ mì dọ wẹndagun Jiwheyẹwhe mítọn tọn: mì na dù adọkun Kosi lẹ tọn, podọ gigo yetọn mẹ wẹ mi na nọ yí gigo te. ⁷Na winyan mitọn mì na do awepó; podọ na oflu yé na jaya to mimá yetọn mẹ: enẹwutu yé na do awepọ́ to aigba yetọn ji: ayajijẹ madopodo na sọyín yetọn. ⁸Na yẹn OKLUNỌ yiwanna whẹ̀dida, yẹn gbẹwanna ajojẹ to mawàdódó mẹ: yẹn na yí azọ́n yetọn na yé to nugbo mẹ, yẹn na sọ basi alẹnu madopodo de hẹ yé. ⁹Yè na yọ́n okún yetọn to ṣẹnṣẹn Kosi lẹ tọn, podọ ovi yetọn lẹ to ṣẹnṣẹn gbẹtọ lẹ tọn: mẹhe mọ yé na yọ́n yé, dọ okún he OKLUNỌ dona wẹ yé.

¹⁰Yẹn na jaya susu to OKLUNỌ mẹ, gbigbọ ṣie na sọ yín ayajẹtọ to Jiwheyẹwhe ṣie mẹ; na é ko yí awù whlẹngán tọn do na mi, é ko yí avọ̀ dódó tọn ṣinyọnna mi, dile asisunọ nọ yí aṣọvọ̀ do doasọna ede, podọ dile asiyọ́yọ́ nọ yi aṣọdonu etọn do doasọna ede do. ¹¹Na dile aigba nọ hẹn okẹ̀n etọn tónkun, podọ dile ojipa nọ hẹn onú he yè do do e mẹ wú jẹgbonu, mọ wẹ OKLUNỌ JIWHEYẸWHE na hẹn dódó po pipa po wú jẹgbonu to akọta lẹpo nukọn do.

¹NA Ziọni wutu yẹn ma na nabọẹ, podọ na Jelusalẹm wutu yẹn ma na gbọjẹ, kaka dódó etọn na tọ́n di hinhọ́n, podọ whlẹngán etọn di zogbán he to jiji de. ²Podọ Kosi lẹ na mọ dódó towe, ahọlu lẹpo na sọ mọ gigo towe: yè na sọ ylọ we oyín yọ́yọ́ de, he onù OKLUNỌ tọn na ylọ. ³Hiẹ ga na yín ojẹgbakun gigo tọn de to alọ OKLUNỌ tọn mẹ, podọ otabla ahọlu tọn de to alọ Jiwheyẹwhe towe tọn mẹ. ⁴Yè ma na ylọ we dọ, Gbẹ́dai bà; ṣigba yè na nọ ylọ we dọ, Hẹfzibah, podọ aigba towe dọ Beulah: na hòmọ OKLUNỌ tọn hùn do ogo we, yè na sọ wlealọhẹ aigba towe. ⁵Dile odẹpẹ nọ wlealọhẹ awhli, mọ ovi sunnu towe lẹ na wlealọhẹ we do; podọ dile asisúnọ nọ jaya do asiyọ́yọ́ ji, mọ Jiwheyẹwhe towe na jaya do oji we do.

⁶Yẹn ko dè nuhọ́tọ lẹ do odòkọ towe ji, hiẹ Jelusalẹm, he ma na do onù yetọn abọẹ gbèdegbède to okle kavi to ozán mẹ: mì he to oflin OKLUNỌ tọn basi lẹ, mì do onù abọẹ blo. ⁷Mì na gbọjẹ ẹ blo, kaka ewọ na do yí Jelusalẹm yọnu họnai, bo sọ yí i do basi pipa to aihọn mẹ. ⁸OKLUNỌ ko yí adusilọ etọn po alọ huhlọn etọn po tọn do whle, Nugbo, yẹn ma na yí ogbàdo towe do na núdùdù kẹ̀ntọ towe lọ bà; ovi sunnu jonọ lẹ tọn ma na nù vẹ̃nhàn towe he hiẹ jẹtukla na: ⁹ṣigba yé he bẹ́ ẹ pli lẹ wẹ na dù i, bo sọ pa OKLUNỌ; yé he dọ̀n ẹn plidopọ́ lẹ wẹ na nù in to awá wiwe ṣie mẹ.

¹⁰Mì gbọn ṣẹnṣẹn, mì gbọn ṣẹnṣẹn họngbọ lẹ tọn; mì jla aliho gbẹtọ lẹ tọn do, mì bẹ́ pli, mì bẹ́ alihogbo lẹ pli; mì ṣinyan zánnu sẹ̀; mì zé asia doaga na gbẹtọ lẹ. ¹¹Dayi e go, OKLUNỌ ko lá kaka jẹ pòdo aigba tọn, Mì dọ hlan viyọnnu Ziọni tọn, dọ, Pọ́n, whlẹngán towe wá; pọ́n, ale etọn tin to e de, po ahọsuyí etọn po to nukọn etọn. ¹²Yè na sọ nọ ylọ yé, dọ, Omẹ Wiwe, Omẹ fligọ OKLUNỌ tọn: yè na sọ ylọ we dọ, Mẹdinmọ, otò magbẹ́dai.

¹MẸNU wẹ ehe sọn Edọmi wá he, po avọ̀ ahóvẹ̃ po sọn Botsla? ehe dogigo to aṣọvọ́ etọn mẹ, he gigọ́ jei to kiklo huhlọn etọn tọn mẹ? Yẹn he to hódọ dódó mẹ, dohuhlọn nado whlẹngan. ²Etẹwutu wẹ avọ̀ towe bia, bọ avọ̀ towe lẹ do taidi ewọ he to núzinzán vẹ̃nhàn tọn zín. ³Yẹn dopo wẹ zín núzinzán vẹ̃nhàn lọ tọn; to gbẹtọ lẹ mẹ, mẹde ma tin gọ́na mi: na yẹn na zín yé to homẹgble ṣie mẹ, bo sọ yé do odò to homẹfiọ ṣie mẹ; ohùn yetọn mì do avọ́ ṣie go, ón yẹ́ọ hẹn whanpẹ ṣie lẹpo gble. ⁴Na azán ahọsuyí tọn tin to ayiha ṣie mẹ, owhè Omẹfligọ ṣie lẹ tọn wá. ⁵Yẹn pọ́n, alọgọnamẹtọ de ma sọ tin; awú sọ ji mi dọ zẹ́dotetọ de ma tin; enẹwutu awà yẹnlọsu tọn hẹn whlẹngán wá dẽ; homẹfiọ ṣie, ewu lọ wẹ zé mi dote. ⁶Yẹn sọ zín gbẹtọ lẹ dai to homẹgble ṣie mẹ, bo hẹn yé nù nùmú to homẹfiọ ṣie mẹ, yẹn sọ hẹn huhlọn yetọn jẹte do aigba.

⁷Yẹn na dọhó homẹdagbe OKLUNỌ tọn tọn, po pipa OKLUNỌ tọn po kẹdẹdi ehe OKLUNỌ ko yí na mí lẹpo, podọ dagbe daho do owhé Islaeli tọn go, he ewọ ko yí na yé, kẹdẹdi lẹblanu etọn, podọ kẹdẹdi susugege homẹdagbe etọn tọn. ⁸Na ewọ ko dọ dọmọ, Nugbo, omẹ ṣie wẹ yé, ovi he ma nọ dolalo; ewọ sọ zùn Whlẹngántọ yetọn. ⁹To nukunbibia yetọn lẹpo mẹ, yè bianukun nẹ̃, angẹli nukọn etọn tọn sọ whlẹn yé: to owanyi etọn mẹ podọ to lẹblanu etọn mẹ ewọ ko fli yé gọ́: é zé yé, bo sọ hẹn yé to azán hóhó whenu tọn lẹpo mẹ. ¹⁰Ṣigba yé ṣatẹ, bo sọ hẹnhomẹwluna Gbigbọ Wiwe etọn: enẹwutu wẹ ewọ lẹzùn kẹ̀ntọ yetọn, é sọ hoavùn hẹ yé. ¹¹Whenẹnu wẹ é flin azán hóhó, Moṣe, po omẹ etọn lẹ po, dọmọ, fie wẹ ewọ he hẹn yé hẹji sọn ohù mẹ te, ewọ po lẹngbọhọtọ lẹngbọpa etọn tọn po, Fie wẹ ewọ he yí Gbigbọ Wiwe etọn do gblagbla yetọn mẹ te? ¹²He yí adusilọ Moṣe tọn do dèana yé, po awà etọn he do gigo po, he to osìn má do awe to nukọn yetọn, nado basi oyín madopodo de na ede. ¹³He hẹn yé gbọn ṣẹnṣẹn odògbo tọn mẹ, di osọ́ de to zúngbo mẹ, na yé ma na do dahli, ¹⁴Dile kanlin nọ jọte yì agbàdo mẹ, mọwẹ Gbigbọ OKLUNỌ tọn hẹn ẹn gbọjẹ do: mọwẹ hiẹ dèana omẹ towe lẹ, nado basi oyín gigonọ de na dewe. ¹⁵Pọ́n odò sọn olọn, bo pọ́n sọn aisintẹn wàlọwiwe towe tọn, po gigo towe tọn po; fie wẹ vivẹnu towe po huhlọn towe po, nujawu towe susu, po lẹblanu towe po do ogo e te? yè hẹn yé dote wẹ? ¹⁶Nugbo, hiẹ wẹ otọ́ mítọn, eyín Ablaham ma tlẹ yón mí, bọ Islaeli ma yígbè mítọn, hiẹ, OKLUNỌ wẹ otọ́ mítọn, Omẹflitọ mítọn. ¹⁷OKLUNỌ, etẹwutu wẹ hiẹ hẹn mí buali sọn aliho towe ji, bo sọ hẹn ayiha mítọn sinyẹn sọn osi towe mẹ? Lẹ́gọ̀ na devi towe lẹ tọn wutu, hẹnnumẹ guigba towe tọn lẹ. ¹⁸Omẹ Wiwe towe lẹ wẹ tindo e to ojlẹ vude mẹ wẹ: kẹ̀ntọ mítọn lẹ ko zín fiwiwe towe dai. ¹⁹Towe wẹ mí; hiẹ ma ko dugán do yé ji gbède: yè ma sọ ylọ oyín towe do yé go.

¹ṢÓ hiẹ do tlẹn olọn lẹ, na hiẹ ni jẹte wá, na osó lẹ nido yé jẹdò to nukọn towe. ²Kẹdẹdi le mìyọn zòhọ tọn nọ to jiji, dile mìyọn nọ hẹn osìn fiẹ, nado hẹn oyín towe zùn yínyọnẹn na kẹ̀ntọ towe lẹ, na akọta lọ nido sisọ to nukọn towe. ³Whenuena hiẹ wà onú he dobu he míwlẹ ma donukun, hiẹ jẹte, osó lẹ yé kọnyingbé to nukọn towe. ⁴Na sọn whẹwhẹwhenu aihọn tọn, gbẹtọ ma ko sè, mọ otó ma ko gbla ẹ, mọ nukun ma ko mọ, Jiwheyẹwhe de to godotowe, he ko wleawu dai na yé he nọtepọ́n ẹn lẹ. ⁵Hiẹ pó ewọ he to ayajẹ bo to azọ́n dódó tọn wà, he flin we to aliho towe lẹ ji: dayi e go, hiẹ gblehomẹ, na míwlẹ wàylan wutu: mí sọ dẹn to enẹlẹ mẹ, yè na sọ whlẹn mí? ⁶Ṣigba mí omẹ pó wẹ taidi onú mawé, dódó mítọn lẹpo sọ taidi nukija he hiyọawu, mí omẹ pó sọ jà kọnyinai di amà; ylando mitọn bẹ́ mí sẹ́ di jẹhọn. ⁷Mẹde ma tin he to oyín towe ylọ, bo zé ede doaga nado hẹn ogo we: na hiẹ yí nukun towe whla sọn mí de, bo sọ sú mí do, na ylando mítọn wutu. ⁸Ṣigba dinvie, OKLUNỌ È, hiẹ wẹ otọ́ mítọn, okò wẹ míwlẹ, hiẹ wẹ zẹndotọ; alọnuzọ́n towe wẹ mí omẹ pó. ⁹À gblehomẹ dli blo, OKLUNỌ E, a sọ flin ylankan mítọn kakadoi blo: dayi e go, pọ́n, mí vẹ́ we, omẹ towe wẹ mí omẹ pó. ¹⁰Otò wiwe towe lẹzùn zùngbo de, Ziọni lẹzùn zùngbo de, Jelusalẹm sọ jẹvọ́. ¹¹Ohọ̀ wiwe mítọn gigonọ, fie otọ́ mítọn lẹ nọ pa we te, wẹ yè yí mìyọn do mẹ̀: ohọ́ whànpẹnọ mítọn lẹpo wẹ yè gbà kija. ¹²OKLUNỌ È, hiẹ na hẹn dewe dote na onú helẹ? hiẹ na do onù towe abọẹ, bo bianukunna mí dli wẹ?

¹YÈ din mì gbọn yé he ma kàn mi biọ lẹ de; yè sọ mọ mi to yé he ma din mi lẹ de: yẹn dọ hlan akọta he yè ma ylọ gbọn oyín ṣie dali dọ. Pọ́n mi, pọ́n mi. ²To azán lẹpo mẹ wẹ yẹn dlẹn alọ ṣie hlan gbẹtọ atẹnọ, he to zọnlinzin to aliho he ma yọ́n ji, to linlẹn yéde tọn mẹ. ³Gbẹtọ he to adìdohòmẹna mi to whepoponu; he to avọ́san to ojipa mẹ, bọ yé sọ to nuwhẹnkun mẹ̀ to agbà bliki tọn ji. ⁴Ehe sọ pò to ṣẹnṣẹn yọ̀do tọn, bo sọ nọnọ̀ atọ̀họ mẹ, he nọ dù olàn ohàn tọn, jaja onú osùnú lẹ sọ tin to núzinzán yetọn lẹ mẹ. ⁵He dọmọ, Nọte na dewe, a sẹ̀pọ́ mi blo; na yẹn yín wiwe hú hiẹ. Azọ̀ to awọ̀ntin ṣie mẹ wẹ ehelẹ, mìyọn he to jiji to azán lẹpo gbè. ⁶Dayi e go, yè ko wlan to nukọn ṣie; yẹn ma na do onù abọẹ, ṣigba yẹn na yí ahọsu, yèdọ ahọsu to akón yetọn nu. ⁷Ylankan mitọn, po ylankan otọ́ mitọn lẹ tọn po dopọ́, wẹ OKLUNỌ dọ, yé he mẹ̀ nuwhẹnkun to osó lẹ ji, bo to yẹyi ṣie dèpò to okọta lẹ ji: enẹwutu wẹ yẹn na jlẹ azọ́n hóhó yetọn do akọ́n yetọn nu.

⁸Le wẹ OKLUNỌ dọ, dile yè nọ mọ vẹ̃nhàn yọ́yọ́ to ohín mẹ, bọ yè sọ nọ dọmọ, a hẹn ẹn gble blo; na dona tin to e mẹ, mọwẹ yẹn na basi do na devi ṣie lẹ wutu, na yẹn ma na do hù yé omẹ pó súdo. ⁹Yẹn na hẹn okún de jẹgbonu sọn Jakob mẹ, podọ whédutọ osó ṣie tọn de sọn Juda: mẹvivẹ́ ṣie na dugú etọn, devi ṣie lẹ wẹ na sọ nọnọ̀ finẹ. ¹⁰Ṣalọni na lẹzùn adọ́tẹn lẹngbọ lẹ tọn, agbàdo Akoli tọn ofi de na kanlinpa lẹ nado nọ mlọnai do é mẹ, na omẹ ṣie he din mi lẹ. ¹¹Ṣigba mì he gbẹ́ OKLUNỌ dai lẹ, he wònji osó wiwe ṣie go, he wleawu tafo de tọn dai na Gadi, bo sọ yí nunina nùnù na Meni. ¹²Enẹwutu wẹ yẹn na hia mì hlan ohi, mì omẹ pó na sọ dẹ́ hlan hùhù: na whenuena yẹn ylọ, mì ma siọ; whenuena yẹn dọhó, mì ma sè; ṣigba mì wàylan to nukọn ṣie, bo sọ dè onú he go home ṣie ma hùn do.

¹³Enẹwutu le wẹ OKLUNỌ JIWHEYẸWHE dọ, dayi e go, devi ṣie lẹ na dùnú, ṣigba hùvé na hù míwlẹ: dayi e go, devi ṣie lẹ na nù, ṣigba nugbla na hù míwlẹ: dayi e go, devi ṣie lẹ na jaya, ṣigba winyan na hù mìwlẹ. ¹⁴Dayi e go, devi ṣie lẹ na jihàn na homẹvivi ayiha tọn, ṣigba mìwlẹ na dawhá na awubla ayiha tọn, bo sọ wẹnhùn na awubla gbigbọ tọn. ¹⁵Mì na jo oyín mitọn dai hlan dẹhodo de na mẹdidè ṣie lẹ: na OKLUNỌ Jiwheyẹwhe na hù we, bo sọ ylọ devi etọn lẹ gbọn oyín dẽvo mẹ. ¹⁶Na mẹhe dona ede tó aihọn mẹ, na dona ede to Jiwheyẹwhe nugbo tọn mẹ; mẹhe sọ to whiwhle to aihọn mẹ na whle gbọn Jiwheyẹwhe nugbo tọn dali; na yè wọ̀nji tukla hóhó tọn lẹ go, podọ yè yí yé whla sọn nukun ṣie mẹ ¹⁷Sa pọ́n yẹn na da olọn yọ́yọ́ lẹ po aigba de po: yè ma na flin hóhó tọn, mọ yé ma na wá linlẹn mẹ. ¹⁸Ṣigba homẹ mitọn ni hùn, na mì ni sọ to ayajẹ̀ kakadoi to enẹ he yẹn da mẹ: na dayi e go, yẹn da Jelusalẹm homẹvivi de, podọ gbẹtọ etọn lẹ ayajijẹ de. ¹⁹Yẹn na jaya to Jelusalẹm mẹ, yẹn na sọ jaya to omẹ ṣie lẹ mẹ: yè ma na sọ sè ogbè avi tọn to e mẹ ba, kavi ogbè awhá tọn. ²⁰Yọ̀pọ he azán etọn ma na dẹn de ma na tin to e mẹ, mẹho he azán etọn ma gọ́ de: na yọ̀pọ na kú to whenuena é sọ̀ owhè kanweko-mẹho; ṣigba ylandonọ owhè kànwekonọ na zùn dẹ̀hòdonọ. ²¹Yé na gbá ohọ̀, bo sọ nọnọ̀ yé mẹ, yé na do vẹ̃ngle, bo sọ dù sinsén yetọn ²²Yé ma na gbá ohọ̀ bọ mẹdẹ̃vo na nọ̀ e mẹ; yé ma na do bọ mẹdẹ̃vo na dù: na dile azán atin tọn te wẹ azán omẹ ṣie lẹ tọn na te, omẹ ṣie lẹ na dugbẹ̀ azọ́n alọ yetọn mẹ tọn dẹn. ²³Yé ma na wàza nyáyá, yé ma na jivi na tukla; na yé wẹ okún donanọ OKLUNỌ tọn, podọ ovi yetọn po yé po. ²⁴E na sọ wá jọ, na whẹpo yé na ylọ, yẹn na siọ, podọ le yé to hódọ to alọnu, yẹn na sè. ²⁵Ohia po lẹngbọvu po na dùnú dopọ́, kinnikinni na dù amà di oyín asú, kọ́gudu na yín nùdùdù odàn tọn. Yé ma na gbleawuna omẹ, kavi hùsúdo to osó wiwe ṣie lẹpo ji, wẹ OKLUNỌ dọ.

¹LE wẹ OKLUNỌ dọ, olọn wẹ ofìn ṣie, aigba wẹ tokloafọligbé ṣie tọn: fie wẹ ohọ̀ he mì gbá na mi te? fie wẹ otẹn gbọjẹ ṣie tọn te. ²Na alọ ṣie wẹ basi onú helẹpó, onú helẹpó ko tin to ai, wẹ OKLUNỌ dọ: ṣigba ehe wẹ yẹn na pọ́n, yèdọ agbatọnọ po gbigbọ whiwhẹnọ po, he to sisọsisọ na ohó ṣie. ³Ewọ he hù oyìnsú, tin dile ewọ he hù gbẹtọ de te; ewọ he yí lẹngbọvu de do sánvọ́, tin dile ewọ he wẹ́n okọ̀ avún de tọn te, ewọ he sánvọ avọ́ nunina tọn de, tin dile ewọ heyí ohùn ohàn tọn do sánvọ te; ewọ he mè nuwhẹnkun, tin dile ewọ he dona vodun te. Nugbo yé ko dè aliho yéde tọn, ayiha yetọn sọ vivi to osùnú yetọn lẹ mẹ. ⁴Yẹn ga na dè oklọ yetọn, bo sọ hẹn ehe yé dibuna wá yé ji; na whenuena yẹn ylọ, mẹde ma siọ; whenuena yẹn dọhó, yé ma sè; ṣigba yé wà ylankan to nukọn ṣie, bo sọ dè onú he go homẹ ṣie ma hùn do.

⁵Mi sè ohó OKLUNỌ tọn, mi he to sisọsisọ na ohó etọn; mẹmẹsunnu mitọn he gbẹwanna mi lọ, he tùn mi hlan na oyín ṣie wutu lọ, ko dọmọ, Mì gbọ yè ni pagigona OKLUNỌ: ṣigba ewọ na sọ awuhia na ayajijẹ mitọn, winyan na sọ hù yéwlẹ. ⁶Ogbè awhá tọn sọn otò mẹ, ogbè sọn tẹmpli mẹ, ogbè OKLUNỌ tọn he yiahọsu to kẹ̀ntọ etọn lẹ go. ⁷Whẹpo é jẹ ajipanu, é ko jivi; whẹpo awufiẹsa etọn wá, é ko ji ovisunnu de. ⁸Mẹnu wẹ sè onú he hunkọ? mẹnu wẹ mọ onú he hunkọ? Bé yè na hẹn aigba wú onú jẹgbonu to azán dopo mẹ? Kavi yè sọgan ji akọta to whladopo? na le Ziọni jẹ ajipanu gẽ wẹ é ji ovi etọn lẹ. ⁹Bé yẹn na hẹn wá ajipanu, bo ma hẹn jivi gba? wẹ OKLUNỌ dọ: bé yẹn na hẹn omẹ jivi, bo sọ sú adọ̀? wẹ Jiwheyẹwhe towe dọ.

¹⁰Mì jaya hẹ Jelusalẹm, homẹ mitọn ni vivi hẹ ẹ, mì he yiwan nẹ̃ lẹpo, mi jaya na homẹhùnhùn hẹ ẹ, mì omẹ he to awubla na etọn wutu lọ. ¹¹Na mì nido nọ́ anọ́, na yè ni yi anọ́ homọjlado etọn tọn do pékọna mì; na mì ni fìnyọn yìnnó, na homẹ mitọn nido hùn to sudeji gigo etọn tọn mẹ. ¹²Na le wẹ OKLUNỌ dọ, Dayi e go, yẹn na dlẹn jijọho hlan ẹn di otọ̀, podọ gigo Kosi lẹ tọn di tọ̀sìsa: whenẹnu wẹ mì na nọ́ anó, yè na yàn mi do adà etọn mẹ, yè na zé mì dowèna to oklo etọn ji. ¹³Di mẹhe onọ etọn to homẹmiọnna de, mọkẹdẹ wẹ yẹn na miọnhomẹna mì do; yè na sọ miọnhomẹna mì to Jelusalẹm mẹ. ¹⁴Whenuena míwlẹ mọ ehe, ayiha mitọn na jaya, ohú mitọn na sọ wú jẹgbonu di omá: yè na sọ yón alọ OKLUNỌ tọn to devi etọn lẹ go, podọ homẹgble etọn to kẹ̀ntọ etọn lẹ go. ¹⁵Na dayi e go, OKLUNỌ na wá po mìyọn po, podọ kẹkẹ etọn lẹ di ahizi, nado yí adi etọn do suahọ na homẹfiọ po wọhẹ etọn po to alọ miyọn tọn mẹ. ¹⁶Na OKLUNỌ na yí mìyọn po ohi po do dawhẹ́ agbasalan lẹpo tọn: osiọ OKLUNỌ tọn lẹ na yín susu. ¹⁷Yé he hẹn yéde zùn wiwe lẹ, bo sọ hẹn yéde zùn wiwe nado yì ojipa lẹ mẹ to atin dopo godo to ṣẹnṣẹn, bo to olàn ohàn tọn dù po osùnú lọ po, po ajaka po, wẹ yè na súdo dopọ́, wẹ OKLUNỌ dọ. ¹⁸Na yẹn yọ́n azọ́n yetọn po linlẹn yetọn po: ojlẹ lọ na wá nado bẹ́ akọta po odẹ́ lẹpo po pli; yé na wá bo sọ mọ gigo ṣie ¹⁹Yẹn na yi ohia de do ṣẹnṣẹn yetọn yẹn na sọ do yé he họ̀ngán to yé mẹ lẹ hlan akọta lẹ hlan Talṣisi, Tuli po Ludi po, he to ogá dọ́n lẹ, hlan Tubali, po Javani po, hlan olopo he dẹn boboe, e ma ko sè lìnlìn ṣie, kavi ma ko mọ gigo ṣie; yé na dọhó gigo ṣie tọn to ṣẹnṣẹn Kosi lẹ tọn. ²⁰Yé na hẹn mẹmẹsunnu mitọn lẹpo sọn akọta lẹpo mẹ wá na avọ́ de hlan OKLUNỌ, to osọ́ lẹ ji, to kẹkẹ lẹ mẹ, to owhlẹ lẹ ji, to otlò lẹ ji, to kanlin yawu lẹ ji, wá osó wiwe ṣie Jelusalẹm kọ̀n, wẹ OKLUNỌ dọ, kẹdẹdile ovi Islaeli tọn lẹ nọ hẹn nunina to nazinzán wiwe mẹ wá ohọ̀ OKLUNỌ tọn mẹ do. ²¹Yé mẹ wẹ yẹn na dè te na yẹwhenọ lẹ podọ na Leviti lẹ ga, wẹ OKLUNỌ dọ. ²²Na dile olọn yọ́yọ́ po aihọn yọ́yọ́ he yẹn na basi lẹ po na nọte to nukọn ṣie, mọwẹ okún towe po oyín towe po na nọte do, wẹ OKLUNỌ dọ. ²³E na sọ wá jọ, agbasalan lẹpo wẹ na wá litai to nukọn ṣie, sọn osùn yọ́yọ́ de mẹ kaka jẹ dẽvo mẹ, podọ sọn azán gbọjẹ tọn de mẹ kaka jẹ dẽvo mẹ, wẹ OKLUNỌ dọ. ²⁴Yé na tọ́n jẹgbonu, bo pọ́n osiọ gbẹtọ he ko ṣatẹ do ogo e lẹ tọn; na owé yetọn ma na kú, mọ mìyọn yetọn ma na ṣi; yé na sọ yín núgbẹ́wanna de hlan agbasalan lẹpo.