Hosea

¹OHÓ OKLUNỌ tọn he wá jẹ Hoséa visunnu Beẹli tọn lọ de, to azán Uzia, Jotami, Ahazi, po Hẹzekia po, ahọlú Juda tọn lẹ tọn lẹ mẹ, pòdọ tò azán Jeloboàmi Visunnu Joaṣi tọn, ahọlu Islaeli tọn tọn lẹ mẹ.

²Whenuená OKLUNỌ dọhó to ṣaunṣaunwhenu hẹ Hosea, OKLUNỌ dọ hlan Hosea dọmọ, Yì, yí asi de hlan we sọn ogàlọtọ ovi ogàlọtọ lẹ tọn mẹ: na aigba lọ basi ogàlilọ, finfọ́nyì sọn OKLUNỌ de. ³Mọwẹ ewọ yì bo yí Gomẹli viyọnnu Diblaimi tọn; ewọ sọ mọhò, bo ji visunnu de nẹ̀. ⁴OKLUNỌ sọ dọ hlan ẹn dọmọ, Ylọ oyín etọn Jezleẹli; na ojlẹ pẹvi de dogọ́, Yẹn na dla ohùn Jezleẹli tọn pọ́n to owhé Jehu tọn ji, bo na sọ hẹn ahọludu owhé Islaeli tọn tọn lọ nado gbòdò. ⁵E na sọ wá jọ to azán nẹ gbè, wẹ yẹn na wén ogába Islaeli tọn to agbàdo Jezleẹli tọn mẹ. ⁶Ewọ sọ mọhò devo, bo ji viyọnnu de. OKLUNỌ sọ dọ hlan ẹn dọmọ, Ylọ oyín etọn Loluhama: na yẹn ma to na sọ tindo lẹblanu to owhé Islaeli tọn jì ba gba, na yẹn to alọdepope mẹ ma na do jona yé. ⁷Ṣigba yẹn na tindo lẹblanu to owhé Juda tọn ji, bo sọ whlẹn yé gbọn OKLUNỌ Jiwheyẹwhe yetọn dali, bo ma na sọ whlẹn yé gbọn ogába dali gba, kavi gbọn ohi dali gba, kavi gbọn awhànfunfun dali gba, gbọn osò lẹ dali, kavi gbọn osọ̀nọ lẹ dali gba. ⁸Dinvie whenuena ewọ ko dèanọna Lo-luhama, ewọ sọ mọhò, bo ji visunnu de. ⁹OKLUNỌ sọ dọmọ, Ylọ oyín etọn Lo-ami: na mìwlẹ ma sọ yín omẹ ṣie gba, yẹn ma na sọ tin na mì gba.

¹⁰Gãnṣo osọha ovi Islaeli tọn lẹ tọn na tin di otòkén ohù tọn, he yè ma sọgan yíjlẹna mọ yísọhana gba; é na sọ wá jọ dọ, to otẹn enẹ he yè dọ tọn mẹ dọ, Míwlẹ ma yín omẹ ṣie gba, é na yín didọ hlan yé dọ, Visunnu Jiwheyẹwhe ogbènọ tọn lẹ wẹ mì. ¹¹Ovi Juda tọn lẹ po ovi Islaeli tọn lẹ po na yín ṣinyanpli dopọ, yé bo na sọ dè ota dopo na yéde, bo na sọ hẹji yì sọn aigba lọ mẹ: na daho wẹ azán Jezleẹli tọn na yín.

¹MÌ dọ hlan Ammi, mẹmẹsunnu mìtọn lẹ; podọ hlan Luhama, mẹmẹyọnnu mìtọn lẹ. ²Dowhẹ̀gbè hẹ onọ mìtọn, dowhẹ̀gbè; na ewọ ma yín asi ṣie gba, mọ yẹn ma sọ yín asú etọn gba: bo sọ gbọ ewọ ni dè ogàlilọ etọn lẹ sẹ̀ sọn nukunmẹ etọn mẹ, po ayọdide etọn lẹ po sọn anọ́ etọn lẹ ṣẹnṣẹn; ³yẹn nikã klọn ewọ domè, bo sọ zé ewọ do di azán he mẹ yè ji i te, bo sọ basi ewọ dì zùngbo de, bo sọ zé e do taidi aigba húhú de, bo sọ yí onùgbla doihù i; ⁴mọwẹ, to ovi etọn lẹ ji wẹ yẹn ma to na sọ tindo lẹblanu; na ovi ogàlọtọ tọn wẹ yé. ⁵Na onọ yetọn ko wà ogàlọnú lọ: ewọ he mọhò yé tọn ko yí owinyan do wà: na ewọ dọmọ, Yẹn na hodo owanyinọ ṣie lẹ yì, he na akla ṣie mi po osìn ṣie po, lẹngbọfún ṣie po sékanfún ṣie po, amì ṣie po núnùnù ṣie lẹ po. ⁶Enẹwutu, dayi ego, yẹn na yí owun lẹ do dopáglọn aliho towe, yẹn na sọ basi opá de do e ji, na ewọ ma na do mọ omò etọn lẹ. ⁷Ewọ na sọ hodo owanyinọ etọn lẹ to godo, ṣìgba ewọ ma na pla yé gba; ewọ na din yé ṣigba ma na mọ yé gba: whenẹnu wẹ ewọ na dọmọ, Yẹn na yì bo lẹ̀gọ do asú ṣie tintan de; na é yín pọnte to yẹn de whenẹnu hú dinvie. ⁸Na ewọ ma yọnẹn dọ yẹn na ogbadó lọ ẹ gba, po ovẹ̃n po, po amì po, bo sọ hẹn fataka po sika po jideji hlan ẹn, he yé basi do bosiọ Baali tọn mẹ. ⁹Enẹwutu wẹ yẹn na lẹ́gọ̀ bo sọ bẹ́ ogbadó ṣie to ojlẹ etọn mẹ yì, podọ ovẹ̃n ṣie to osã etọn mẹ, bo na sọ sùn lẹngbọfún ṣie sẹ̀ po sékanfún ṣie po he do ko ṣinyọn omẹ́jẹ etọn. ¹⁰Podọ dinvie wẹ yẹn na dè omé etọn do nuvò to nukun wanyitọ etọn lẹ tọn mẹ, mẹde ma na sọ whlẹn ẹn sọn alọ ṣie mẹ. ¹¹Yẹn na hẹn ajogidi etọn lẹpo ga nado doalọte, ohùnwhẹ etọn lẹ, osùn yọ́yọ́ etọn lẹ, po gbọjẹzán etọn lẹ po, po ohùnwhẹ didè etọn lẹpo po. ¹²Yẹn na sọ hò ovẹ̃n etọn lẹ po ovotin etọn lẹ po, ehetọn ewọ ko dọmọ, Ehelẹ wẹ núfọnú ṣiẹ he owanyitọ ṣie lẹ ko na mi: yẹn na sọ hẹn yé zùn ozùnkan, gbékanlin danji tọn lẹ na sọ dù yé. ¹³Yẹn na sọ dla azán Baalimi tọn lẹ pòn tó ewọ ji, ehemẹ ewọ mẹ̀ nuyọnwan hlan yé te lẹ; whenuena ewọ yí otómẹnu etọn lẹ do và ede po asọdonu etọn lẹ po, bo sọ yì hodo wanyitọ etọn lẹ, bo sọ wọn mi, wẹ OKLUNỌ dọ. ¹⁴Enẹwutu, dayi e go, Yẹn na doklọ ewọ, bo hẹn ẹn wá biọ zùngbo mẹ, bo sọ yí homẹmiọn do dọhó hlan ẹn. ¹⁵Yẹn na sọ yí vẹ̃ngle etọn nẹ sọn finẹ, po agbàdo Akọli tọn po na ohòn tódido tọn de: ewọ na sọ jihàn to finẹ, dile é te to azán ovúwhenu etọn tọn lẹ mẹ, podọ dile é te to azán lọ mẹ whenuena ewọ hẹji sọn aigba Egipti tọn mẹ wá. ¹⁶E na sọ yín to azán nẹ gbè, wẹ OKLUNỌ dọ, dọ hiẹ na ylọ mi Iṣi; bo ma na sọ ylọ mi Baali ba gba. ¹⁷Na yẹn na dè oyín Baalimi tọn lẹ sọn onù etọn mẹ, yè ma na sọ flin yé gbọn oyín yetọn dali ba gba. ¹⁸Podọ azán nẹ mẹ wẹ yẹn na basi alẹ́nù de na yé hẹ gbékanlin danji tọn lẹ, podọ hẹ ọhẹ̀ olọn tọn lẹ, podọ hẹ onú he nọ lin aigba tọn lẹ: Yẹn bo na sọ wẹ́n ogába po ohi po po awhànfunfun po sọn aigba lọ mẹ, bo na sọ hẹn yé nado mlọnai blẹo. ¹⁹Yẹn na sọ dà we hlan dẽ kadadoi: mọwẹ, yẹn na dà we hlan dè to dódó mẹ, podọ to whẹ̀dida mẹ, podọ to dagbewanyi mẹ, podọ to lẹblanu lẹ mẹ ²⁰Yẹn bo na sọ dà we hlan dẽ nugbowà mẹ: hiẹ bo na sọ yọ́n OKLUNỌ. ²¹E na sọ wá jọ to azán nẹ mẹ, yẹn na gblọn, wẹ OKLUNỌ dọ, yẹn na gblọnna olọn lẹ, yéwlẹ bo na sọ gblọnna aigba lọ; ²²aigba na sọ gblọnna ogbadó, ovẹ̃n, po amì po; yéwlẹ bo na sọ gblonna Jezleẹli. ²³Yẹn na sọ do ewọ hlan dẽ to aigba lọ mẹ; yẹn bo na sọ tindo to Lo-luhama ji he ma ko mọ lẹblanu yí; yẹn bo na sọ dọ hlan Lo-ammi he ma yín omẹ ṣie lẹ dọ, Omẹ ṣie lẹ wẹ hiẹ; yéwlẹ na sọ dọ, Jiwheyẹwhe mítọn wẹ hiẹ.

¹OKLUNỌ sọ dọ hlan mi dọ, Sọ vọ̀ yì, yiwanna yọnnu mẹyiwanna, de sọn asú etọn de, gãnṣo yọnnuayọdetọ de, yèdọ dile OKLUNỌ yiwanna ovi Islaeli tọn lẹ do, le yé tlẹ lẹ́ do yẹwhe devo lẹ de sọ, podọ yé he yiwanna aklahihi vẹ̃nhúhú lẹ tọn lẹ. ²Mọwe yẹn họ̀ ewọ hlan dẽ na wọ̀wọ̀ fọtọ̀n fataka tọn, po homẹli dopo bale tọn po, po odá homẹli tọn dopo po: ³yẹn sọ dọ hlan ẹn dọ, Hiẹ na dọ̀ngbàn na mi azán susu; hiẹ ma na lọgà gba, podọ hiẹ ma na sọ yín asi mẹdepope tọn gba: mọwẹ yẹn ga na yín hlan hiẹ dali ga. ⁴Na ovi Islaeli tọn lẹ na dọ̀ngbàn azán susu matin ahọlu, podọ matin ahọvi, podọ matin avọ̀sánnu, podọ matin odotin, podọ matin efọdi kavi tẹlafimi: ⁵enẹgodo wẹ ovi Islaeli tọn lẹ na lẹ́gọ̀, bo na din OKLUNỌ Jiwheyẹwhe yetọn, po Davidi ahọlu yetọn po; bo na sọ wá po osi po jẹ OKLUNỌ de podọ jẹ dagbewanyi etọn mẹ to azán agọ̀gbọnẹn lẹ lọ mẹ.

¹SÈ ohó OKLUNỌ tọn, mì ovi Islaeli tọn emi: na OKLUNỌ tindo núdindọn de hẹ tomẹnu aigba lọ tọn lẹ, na nugbo de ma tin wutu, kavi lẹblanu, kavi oyonẹn Jiwheyẹwhe tọn to aigba lọ mẹ. ²Núde ma tin finẹ adavo whiwhle po gbigbà yise po, po mẹhùhù po, po ajojìjẹ po, po ayọdide po; yé gbà jẹgbonu, ohùn sọ jẹ ohùn go. ³Enẹwutu wẹ aigba lọ na blawu; podọ omẹ he nọ nọ̀ finẹmẹ lẹpo na vọ̀gán, po gbékanlin danji tọn lẹ po po ohẹ̀ olọn tọn lẹ po; mọwẹ, owhevi ohù tọn ga na yín bibẹ́ yì. ⁴Gãnṣo a dike mẹde wọ̀ blo, mọ a sọ dike mẹdepope dowhẹ̀mẹ blo; na omẹ towe lẹ tin di yé he nọ wọ́ hẹ yẹwhenọ. ⁵Hiẹ na dahli to azán lọ mẹ, yẹwhegán lọ ga na dahli po hiẹ po to ozán lọ mẹ; yẹn bo na sọ và onọ towe. ⁶Yè và omẹ ṣie lẹ na agbágbọ oyọnẹn tọn: na hiẹ ko gbẹ́ oyọnẹn dai wutu, yẹn ga gbẹ we dai, dọ hiẹ ma na sọ yín yẹwhenọ de hlan mi gba: mimọ hiẹ ko wọn osẹ́n Jiwheyẹwhe towe tọn, yẹn ga na wọn ovi towe lẹ. ⁷Le yè hẹn yé jideji do, mọwẹ yé wàylando hlan mi do: Yẹn na diọ gigo yetọn do owinyan mẹ. ⁸Yé dù to ylando omẹ ṣie lẹ tọn mẹ, bo sọ zé ayiha yetọn do oylanwà yetọn go. ⁹E na sọ yín, gbẹtọ mọnkọ lẹ, yẹwhenọ mọnkọ lẹ: Yẹn bo na sayahẹ yé na aliho yetọn-lẹ, bo sọ nale yé na wiwà yetọn lẹ. ¹⁰Yé na dù, bo ma na tindo pékọ́; yé na lọgà, bo ma na sudeji gba: na yé ko jó nado nọ payi hlan OKLUNỌ de dai wutu ¹¹Ogàlilọ po ovẹ̃n po po ovẹ̃n yọ́yọ́ po dè ayiha yì. ¹²Omẹ ṣie lẹ kàn hónamẹ biọ to atinpo yetọn si, opò yetọn sọ to lilá hlan yé: na gbigbọ ogàlilọ tọn ko hẹn yé nado buali, yé ko sọ lọgà de yì sọn Jiwheyẹwhe yetọn glọ. ¹³Yé sánvọ to aga osé: lẹ lọ tọn ji, bo sọ mẹ̀ nuwhẹnwan to okọta lẹ ji, to oaki po poplali lẹ po po tẹlẹbinti lẹ po glọ, na dagbe wẹ oyẹtẹn etọn wutu: enẹwutu wẹ viyọnnu mìtọn lẹ do lọgà, podọ asidadaliho mitọn lẹ sọ deayọ. ¹⁴Yẹn ma na sayahẹ viyọnnu mìtọn lẹ whenuena yé lọgà gba, kavi asidadaliho mìtọn lọ whenuena yé deayọ gba; na yé lọsu yì apadopo po gàlọtọ lẹ po, podọ yé sọ sánvẹ́ po ogàlọtọ lẹ po: podọ omẹ he ma tùnwun na yín zizédlan. ¹⁵Yín hiẹ, Islaeli, tlẹ lọgà, gà, nso a dike Juda lẹzùn whẹylannọ blo; podọ mìwlẹ sọ wá jẹ Gilgali blo, mọ mì sọ hẹji yì jẹ Bẹti-aveni blo, kavi whle dọ, Le OKLUNỌ togbẹ, blo. ¹⁶Na Islaeli ko yí otasinyẹn do zán na ede, taidi oyìnsiwhẹ otasinyẹntọ de: dinvie wẹ OKLUNỌ na yìn yé di lẹngbọvú de to otẹn daho de mẹ. ¹⁷Yè hẹn Eflaimi kọndopọ hlan ovodun lẹ; gbọ é ni nọ. ¹⁸Núnùnù yetọn tin lẹzùn ovẹ́sìn: yé to gàlọ tẹgbẹtẹgbẹ; yè jó yé do hlan wanyina: ogán etọn lẹ yín winyannọ. ¹⁹Ojẹhọn ko hizi i do avọtónu etọn lẹ mẹ, agbà yetọn lẹ na yín hinhẹn mọwinyan na avọ̀sánnu yetọn lẹ tọn wutu.

¹SÈ ehe, mì yẹwhenọ lẹ emi, bo tuntóai, mì owhé Islaeli tọn lẹ, emì, bo sọ na otó hiẹ owhe ahọlu tọn E, na mìwlẹ go wẹ whẹ̀dida lọ te; na mìwlẹ ko yín omọ̀ de to Mizpa, podọ odọ̀ yè dlẹn de to Taboli ji. ²Podọ yè hẹn atesitọ lẹ yì siso to gbigble mẹ, ṣigba yẹn na yín wọhẹtọ yé mẹpó tọn. ³Yẹn yón Eflaimi, Islaeli ma sọ yín mẹwhiwhla sọn dẽ gba: na dinvie, Eflaimi È, hiẹ ko lọgà, yè sọ flu Islaeli. ⁴Wiwà yetọn lẹ ma na dikẽna yé nado lé do Jiwheyẹwhe yetọn de gba: na gbigbọ ogàlilọ tọn tin to gblagbla yé tọn mẹ, yé ma sọ yọ́n OKLUNỌ gba. ⁵Podọ osakla Islaeli tọn dekunnu do nukun etọn mẹ: enẹwutu Islaeli po Eflaimi po na dahli to oylanwà yetọn mẹ; Juda ga na dahli po yé po. ⁶Yé na yì po lẹngbọpa yetọn lẹ po, po kanlinpa yetọn lẹ po nado din OKLUNỌ; ṣigba yé ma na mọ ẹn gba: ewọ ko dọ̀n ede dogodo sọn yé mẹ. ⁷Yé ko yí odanuwà do zán do OKLUNỌ go; na yé ko dè ovi jonọ lẹ tọn: dinvie wẹ osùn dopo na dù yé và po mimá yetọn lẹ po.

⁸Mì kùn afinván lọ to Gibea mẹ, podọ opẹ̀n lọ to Lama mẹ: hlun zinhihò de to Bẹti-avẹni; to godo towe, hiẹ Bẹnjamini. ⁹Eflaimi na lẹzùn ojẹvọ de to azán owọhẹ tọn lọ mẹ: to whẹndo Islaeli tọn lẹ ṣẹnṣẹn wẹ yẹn ko hẹn enẹ he na tin nugbonugbo zùn yinyọnẹn te. ¹⁰Ahọvi Juda tọn lẹ tin taidi yé he nọ sètẹnna aigbadògbojihia: yẹn na kòn homegble ṣie jẹgbonu do yé ji taidi osìn. ¹¹Yè bianukunna Eflaimi, yè pẹ́tẹ ẹ to whẹ̀dida mẹ; na ewọ tin opekọ nado to zọnlinzin hodo gbèdide lọ wutu. ¹²Yẹn sọ tin hlan Eflaimi di odè de, podọ hlan owhé Juda tọn di oyìnyọn. ¹³Whenuena Eflaimi mọ awutuzọn etọn, bọ Juda sọ mọ alán etọn, whenẹnu wẹ Eflaimi yì Asllia, bo domẹhlan ahọlu Jalẹbi: ṣigba ewọ ma tin sọgan nado hẹnazèngbọna we gba, mọ ewọ ma na pọ̀n alán mìtọn gbọ na mì gba. ¹⁴Na yẹn na tin hlan Eflaimi di kinnikinni de, podọ di kinni winyanwinyan de hlan owhé Juda tọn: Yẹn, yèdọ yẹn, na tlẹn bo sọ yì; yẹn na bẹ́ yì, bọ mẹde ma na tin finẹ nado whlẹngan. ¹⁵Yẹn na yì bo sọ lẹ́gọ̀ do oten ṣie mẹ, kaka yé ko do hẹn owhẹ̀ylan yetọn bo sọ din nukunmẹ ṣie: to nukunbia yetọn mẹ yé na yí vivẹnu do din mi.

¹MÌ wá, bo gbọ mí ni lẹ̀gọ̀ do OKLUNỌ de: na ewọ ko tlẹn, ewọ na sọ hẹnazọ̀ngbọna mí; ewọ ko hò, ewọ na sọ vọ̀ mí dònbla. ²Azán awe godo wẹ ewọ na hẹn mí hinhónun: to azán atọ̀ntọ gbè ewọ na fọ́n mí tite, mí bo na sọ nọgbẹ̀ to ewọ nukọn. ³Mi bo sọ gbọ mí ni yọnẹn, mì sọ gbọ mí ni to hihodo zònmi nado yón OKLUNỌ; gbonu jẹ yì etọn tin yọnẹnnugbo di afọnnu: ewọ na sọ wá jẹ mí de di ojikun, di ojikun agọ̀gbọnẹn he húsìnna aigba.

⁴Etfaimi È, etẹ́ yẹn na wà hlan we? Juda È, eté yẹn na wà hlan we? na homẹdagbe mìtọn tin di aslọ afọnnu tọn de, podọ di ahún he kẹ̀nyì to fliflimẹ. ⁵Enẹwutu wẹ yẹn sán yé gbọn yẹwhegán lẹ dali; yẹn ko sọ hù yé gbọn ohó onù ṣie tọn lẹ dali: whẹ̀dida ṣie sọ jẹgbonu yì di hinhọ́n. ⁶Na homẹdagbe wẹ yẹn jlo, avọ̀sánnu ma gba; podọ oyọnẹn Jiwheyẹwhe tọn hugán avọ̀ nunina mimẹ̀ lẹ. ⁷Ṣigba yéwlẹ taidi Adam ko jẹsẹ́nmẹna alẹ̀nù lọ: finẹ wẹ yé ko yí odanuwiwà do zán do ogo e te. ⁸Tòdaho yé he nọ wà oylanwà lẹ tọn de wẹ Gileadi, yè yí ohùn blu nẹ̃. ⁹Podọ dile ajotọ lẹ nọ mlọnai do to ovàmẹ, mọwẹ ogbé yewhenọ lẹ tọn to mẹhù do to aliho hlan Ṣekẹmi dali; mọwẹ, yé ko wà wantúnnú. ¹⁰Yẹn ko mọ onú dobu de to owhé Islaeli tọn gbè: finẹ yè mọ gàlilọ te to Eflaimi mẹ, yè sọ flu Islaeli. ¹¹Ga, Juda È, ojijẹ de yín didè na we, whenuena yẹn vọ̀ mẹmẹglọ omẹ ṣie lẹ tọn hẹnwá.

¹Whenuena yẹn do hẹnazọngbọna Islaeli, whenẹnu wẹ yè dè oylanwà Eflaimi tọn hia, po yinylan Samalia tọn po; na yé wà oyẹnú: nuíìntọ lọ sọ biọ họmẹ, podọ ogbẹ́ ajotọ lẹ tọn sọ basi oglọndo do. ²Yé ma sọ lẹn to ayiha yetọn lẹ mẹ dọ yẹn flin yinylan yétọn lẹpo, gba: dinvie wẹ wiwà yetọn titi lẹ to lẹ̀do yé pé; yé tin to nukunmẹ ṣie nukọn. ³Yẹn yí yinylan yetọn do hẹnhomẹhùn ahọlu lọ, podọ ahọvi lẹ po olalo yetọn lẹ po ⁴Ayọdetọ wẹ yé mẹpó; di aklahitẹn he yè hẹn hùnmiọn gbọn aklahitọ de dali de wẹ yé: ewọ doalọte nado sẹ̀ miyọn do, sọn hihò olinfin lọ tọn mẹ kaka é do yín otọ́nnọ. ⁵To azán ahọlu mítọn tọn ji ahọvi lẹ yí oyózo ovẹ̃n tọn do hẹn yéde jẹawutu; ewọ dlẹn alọ etọn jẹgbonu hẹ mẹvlẹtọ lẹ. ⁶Na yé ko hẹn ayiha yetọn wá sẹpọ́ taidi aklahitẹn de, whenuena yé mlọnai to ovàmẹ: adi yetọn damlọn to ozánmẹ lẹpo; to afọnnu é to jiji di ozòlọ miyọn tọn de. ⁷Yé mẹpó tin hùnmiọn di aklahitẹn de, bo sọ va whẹ̀datọ yetọn lẹ súdo; yè hen ahọlu yetọn lẹpo jai: mẹde ma tin yé ṣẹnṣẹn fine he dawháylọ hlan mi. ⁸Eflaimi, ewọ flusọ ede to gbẹtọ lẹ ṣẹnṣẹn; aklahihi maléadana de wẹ Eflaimi. ⁹Ojonọ lẹ ko dù huhlọn etọn và, ewọ ma sọ yọ́n ẹn gba: mọwẹ, yè mì owhà lẹ do ogo nẹ, ewọ ma sọ yọ́n ẹn. ¹⁰Podọ gigodaho Islaeli tọn sọ to kunnude do nukunmẹ etọn: gãnṣo yé ma ko lẹ́gọ̀ do OKLUNỌ Jiwheyẹwhe yetọn de gba, kavi din in, na ehe lẹpo gba. ¹¹Podọ Eflaimi tin taidi owhle klenọ de, matin ayiha: yé to gbèjlẹ hlan Egipti, bo sọ yì jẹ Asilia. ¹²Whenuena yé na to yìyì, yẹn na dlẹn odọ̀ ṣie do yé ji; yẹn na hẹn yé jẹte wá di ohẹ̀ olọn tọn lẹ: yẹn na hò yé whenuena hẹnwádọ lọ wá jẹ agùn yetọn de. ¹³Dindọn hlan yé! na yé ko danyì sọn dẽ; vivà hlan yé na yé ko jẹsénmẹ do ogo e: le yẹn tlẹ fli yé, gãnṣo ye ko dọhó olalo lẹ do ọgo e. ¹⁴Yé ma ko sọ yi ayiha yetọn lepo do dawháylọ hlan mi gba, ṣigba yé to hukuhludo to adọzan yetọn lẹ ji: yé bó yéde pli na ogbadó, po ovẹ̃n po, yé ṣiatẹ do ogo e. ¹⁵Le yẹn tlẹ ko hò yé bo nahuhlọn awà yétọn lẹ, gãnṣo yé to odanú lẹn do ogo e. ¹⁶Yé lẹ́gọ̀, ṣigba do ewọ he tin yìaga de ma gba; yé tin taidi ogába oklọnọ de: ahọvi yeton lẹ na jai gbọn ohi lọ dali na adidù odẹ́ yetọn tọn: ehe na yín avlẹda yetọn to aigba Egipti tọn mẹ.

¹ZE opèn lọ do onù towe Ewọ wá di akùn de do ohò OKLUNỌ tọn go: na yé ko jẹsẹnmẹna alẹ́nù ṣie wutu, bo sọ jẹsénme do osẹ́n ṣie go. ²Yé na dawháylọ hlan mi dọ, Jiwheyẹwhe ṣie, mí Islaeli lẹ yón we. ³Islaeli ko zé enẹ he yín dagbe dlangbé: kẹ̀ntọ lọ na domọna ẹn. ⁴Yé ko zé ahọlu lẹ daga, ṣigba gbọn yẹn dali ma gba; yé ko dè yé sẹ́, bọ yẹn ma yọ́n ẹn gba: fataka yetọn po sika yetọn po mẹ wẹ yé ko basi vodun lẹ sọn, na yé nido yín sinsán sẹ́. ⁵Ewọ ko zé oyìnvú towe dlangbé, hiẹ Samalia; yè hẹn adi ṣie jimiọn do yé ji: dẹn sọ nawẹ é na yín whẹpo yé na jẹ otẹn homẹvọ́ tọn mẹ? ⁶Na yèdọ Islaeli mẹ wẹ ehe tin sọn; azọ́nwàtọ basi i, é má yín Jiwheyẹwhe gba: mọwẹ, oyìnvú Samalia tọn lọ na yín gbigbà hanyanhanyan. ⁷Na yé do ojẹhọn, yé na sọ yà yujẹhọn: é ma tin ozìnkán de; apà lọ ma na dè núdùdù de jó gba; eyín é yín dọ é dèjó, ojonọ lẹ wẹ na zé e mì. ⁸Yè zé Islaeli mì: dinvie wẹ yé tin to akọta lẹ ṣẹnṣẹn di núzinzán de ehemẹ homẹhùn de ma te. ⁹Na yè hẹn yé hẹji yì jẹ Asilia, taidi kẹtẹkẹtẹ gbémẹ tọn de soganna na ede: Eflaimi ko dapà owanyi lẹ. ¹⁰Mọwẹ, le yé tlẹ dapà to akọta lẹ ṣẹnṣẹn, dinvie wẹ yẹn na ṣinyan yé; podọ na ojlẹ vude wẹ yé na blawu gbọn agbàn aholu po ahọvi lẹ po tọn lọ tọn dali. ¹¹Na Eflaimi ko hẹn agbà lẹ jideji nado wàylando, agbà lẹ ko tin hlan ẹn nado wàylando. ¹²Yẹn wlan onú fọtọ́n ao na ẹn sọn osẹ́n ṣie mẹ, ṣigba yè hia yé di onú jonọ de. ¹³Na avọ̀sánnu avọ́ nunina ṣie lẹ tọn lẹ tọn, yé yí olàn lẹ do sánvọ́ bo sọ to dùdù i; ṣigba OKLUNỌ ma kẹalọyi yé gba: dinvie wẹ ewọ na flin oylanwà yetọn, bo sọ dla ylando yetọn lẹ pọ́n; yé na lẹ́gọ̀ do Egipti. ¹⁴Na Islaeli ko wòn Obasitọ etọn, bo sọ do templi lẹ; podọ Juda ko sọ hẹn tòdaho odokọnọ lẹ jideji: ṣigba yẹn na do miyọn de hlan tòdaho etọn lẹ ji, é bo na sọ dù ohònmẹ etọn lẹ lọ và.

¹A jaya blo, hiẹ Islaeli, hlan zizé daga taidi akọta lẹ; na hiẹ ko lọgà de yì sọn Jiwheyẹwhe towe de, hiẹ ko yiwanna padidà to gbadógba lẹpo ji. ²Ogbadógba lọ po vẹ̃nfinọnnú lọ po ma na yìn yé gba, podọ ovẹ̃n yọ́yọ́ na dẹ́n ewọ. ³Yé ma na nò aigba OKLUNỌ tọn lọ mẹ gba; ṣigba Éflaimi na lẹ́gọ̀ do Egipti, yé na sọ dù núdùdù mawé to Asilia mẹ. ⁴Yé ma na kòn avọ́ nunina ovẹ̃n tọn lẹ jẹgbonu hlan OKLUNỌ gba, mọ avọ̀sánnu yetọn lẹ ma na yín homẹhùnnú hlan ẹn gba: akla yetọn na tin hlan yé di akla awublanọ lẹ tọn; yé mẹhe dù sọn e mẹ lẹ na yín fuflu; na akla yetọn na tin na nugbòtọ́n yetọn; é ma na wá biọ ohọ̀ OKLUNỌ tọn mẹ gba. ⁵Eté mìwlẹ na wà to azán obẹ́pli ayidego tọn lọ mẹ, to azán ohùnwhẹ OKLUNỌ tọn tọn lọ mẹ? ⁶Na, pọ́n, yè hẹn yé yì sọn Vivà mẹ, gãnṣo Egipti na ṣinyan yé pli, Mẹmfìsi na di yé onú dagbe yetọn fataka tọn lẹ, atinunnọ lẹ na yí ye na nutindo: oun lẹ na tin to gohọ̀ yeton lẹ mẹ. ⁷Yè hẹn azán odlapón tọn lẹ wá, yè hẹn azán ahọsu tọn lẹ wá, Islaeli na yọ́n ẹn: OKLUNỌ de wẹ yẹwhegán lọ, nulunọ wẹ dawe lọ he tindo gbigbọ lọ, na ogégé oylanwà towe tọn, podọ na daho wẹ okẹ̀n lọ wutu. ⁸Eflaimi họ́nú to núhọtọ de ji hẹ Jiwheyẹwhe; na yẹwhegán lọ tọn, omọ̀ hẹ̀hùtọ de tọn tin to aliho etọn lẹpo mẹ, po okẹ̀n po to ohọ̀ Jiwheyẹwhe etọn tọn mẹ. ⁹Yé kó gble yéde susususu, di to azán Gibea tọn lẹ mẹ: ewọ naflin oylanwà yetọn, ewọ na sọ dla ylando yetọn lẹ pọ́n. ¹⁰Yẹn mọ Islaeli taidi ovẹnsìnsẹ́n lẹ to zùngbo mẹ; yẹn sọ mọ otọ́ mìtọn lẹ di bìbiatintan to ovotin lọ mẹ to osã etọn tintan mẹ: ṣigba yé wá jẹ Baali-peọli, bo klan yéde dovo hlan owinyan, bo sọ lẹzùn osùnú taidi enẹ hé yé yiwanna. ¹¹Na Eflaimi tọn; gigo yetọn na zlọn yì taidi ohẹ̀ de: sọn oho dido whenu, podọ sọn oho mẹ, kaka jẹ jiji whenu etọ́n. ¹²Yín yé tlẹ pọ́n ovi yetọn lẹ whẹ́n gãnṣo yẹn na fọ̀ yé, na yè ma na pò omẹ dẽ dai finẹ gba: mọwẹ, dindọn hlan yé ga whenuena yẹn fọ́nyì sọn yé de! ¹³Yè do Eflaimi to otẹn dagbedagbe de mẹ, taidi le yẹn ko mọ Tile do: ṣigba Eflaimi na hẹn ovi etọn lẹ jẹgbonu wá jẹ hùhùtọ lọ de. ¹⁴Na yé, OKLUNỌ E: etẹ́ hiẹ na na? na adọ̀ hòkìnkòn tọn de yé po anọ́ húhú lẹ po. ¹⁵Yinylan yetọn lẹpo tin to Gilgali mẹ; na finẹ wẹ yẹn gbẹwanna yé te: na yinylan wiwà yetọn lẹ tọn tọn wutu yẹn na yàn yé sọn ohọ̀ ṣie mẹ: yẹn ma na yiwanna yé ba gba; atẹsitọ wẹ ahọvi yetọn lẹpo. ¹⁶Yè hò Eflaimi, yè hẹn adọ̀ yetọn hú, yé ma na hẹn sinsẹ́n de gba: mọwẹ, yín yé tlẹ jẹgbonu wá, gãnṣo yẹn na hù sinsẹ́n yiwanna adọ̀ yetọn tọn lọ. ¹⁷Jiwheyẹwhe ṣie na zé yé dlangbé, na yé ma tuntóai hlan ẹn wutu; Yé na sọ yín dindanpétọ to akọta lẹ ṣẹnṣẹn.

¹O VẸNTIN gégénọ de wẹ Islaeli, he dè osinsẹ́n etọn jẹgbonu: kẹdẹdi susugégé osinsẹ́n etọn tọn é ko hẹn agbà etọn lẹ jideji; kẹdẹdi oyọ́nna aigba etọn tọn yé ko basi odòtin dagbedagbe lẹ. ²Ewọ ko má ayiha yetọn; dinvie wẹ yè na mọ yé whẹ̀ylannọ: é na hò agbà yetọn lẹ, ewọ na hẹn odòtin lẹ gble. ³Yé na nọ dọ dinvie nugbonugbo dọ, Míwlẹ ma tindo ahọlu de gba: na míwlẹ ma budisi OKLUNỌ gba; podọ ahọlu lọ, etẹ́ ewọ sọgan wà na mí? ⁴Yé to ohó ovọ́ lẹ dọ, yé yí olalo do to whiwhle to alẹ̀nù lẹ bibasi mẹ: enẹwutu wẹ whẹ̀dida na túntún daga di atìnahlanọ to whẹndọvlọ ogle tọn lẹ mẹ. ⁵Tòmẹnu Samalia tọn lẹ na tin to obudaho mẹ na oyìnvú Bẹti-avẹni tọn lẹ: na gbẹtọ etọn lẹ na blawu to e ji, podọ vodunnọ etọn he to ayajẹ to e jì lẹ, na gigo etọn, na yè hẹn ẹn fọ́nyì sọn e de wutu. ⁶E na yín bibẹ́yì jẹ Asilia ga na nunina de hlan ahọlu Jalẹbi: Eflaimi na mọ winyan yí, yè na sọ hẹn Islaeli mọwinyan hónamẹ etọn lọsu tọn. ⁷Yè sán Samalia sẹ po ahọlu etọn po, di fútúfutu to osìn ta. ⁸Otẹn fiyìaga Avẹni tọn lẹ ga, ylando Islaeli tọn, na yín vivà: oun po ovẹun po nà hẹaga wá agbà yetọn lẹ ji; yé na sọ dọ hlan osó lẹ dọ Ṣinyọn mí ji; podọ hlan okọta lẹ dọ, Hẹ́ jẹ mí jì. ⁹Islaeli È, hiẹ ko wàylando hú to azán Gibea tọn lẹ mẹ: finẹ yé ko tẹ́ṣi do; bé awhàn to ovi oylanwà tọn lẹ ji ma na pla yé to Gibea mẹ? ¹⁰Whenuena é yín ojló ṣie, yẹn na hò yé; yè na sọ bẹ́ akọta lẹ pli do yé jì, whenuena yè bla yé do osẹ́nmẹjẹ yetọn awe lẹ go. ¹¹Oyìnsiwhe he yè plọn de wẹ Eflaimi, he yiwanna nado nọ tùn ogbadó; ṣigba yẹn ko juyì to okọ́ whanpẹnọ etọn ji: yẹn na zé hìhẹ́tọ de do Eflaimi ji; Juda ná jlòaigba, Jakob na gbà okọ́gó etọn lẹ. ¹²MÍ donú hlan míde to dódó mẹ, mì sọ gbọ̃n kẹdẹdi lẹblanu tọn; mì jlò aigba gbọgbé mìtọn: na é sọ ojlẹ nado din OKLUNỌ, kaka ewọ na do wá bo na plọ́n dódó mì. ¹³Mìwlẹ ko jlòaigbana yinylan, mì ko sọ gbẹn oylanwà; mìwlẹ ko dù osinsẹ́n matinnugbo tọn: na hiẹ dotu to aliho towe mẹ, to gégé omẹ hlọnhlọnnọ towe lẹ mẹ ¹⁴Enẹwutu wẹ zingidi de na tite do akọta towe lẹ ji, bọ zùnkan towe lẹpò na yín hinhẹn gble, dile Salmanì hẹn Bẹti-albẹli gble to azán awhàn lọ tọn mẹ do: yè gbà onọ lọ hanyanhanyan po ovi etọn lẹ po. ¹⁵Mọwẹ é na yín wiwà hlan mì do to Bẹti-eli, na yinylan daho mìtọn tọn wutu: to afọnnufú ahọlu Islaeli tọn na yín sinsán sẹ̀ gbidigbidi.

¹WHENUENA Islaeli yín oyọpọ de, whenẹnu yẹn yiwanna ẹn, bo sọ ylọ visunnu ṣie jẹgbonu sọn Egipti. ²Le yé ylọ yé, mọwẹ yé yì sọn yé mẹ: yé sánvọ́ hlan Baalimi, bo sọ mẹ̀ nuyọnwan hlan bosiọ pipà lẹ. ³Gãnṣo yẹn plón Eflaimi nado yì; ewọ zé yé to awà etọn lẹ ji; ṣigba yé ma yọnẹn dọ yẹn ko hẹnazọ̀ngbọna yé gba. ⁴Yẹn yí okàn gbẹtọ de tọn lẹ do dọ̀n yé, po okọ̀gàn owanyi tọn lẹ po; yẹn bo sọ tin hlan yé di yé he dè oglepọ̀nu sẹ̀ sọn aglan yetọn lẹ mẹ, yẹn bo sọ zé núdùdù do yé nukọn. ⁵Ewọ ma na lẹ́gọ̀ biọ Egipti mẹ gba; ṣigba Asilianu lọ na yín ahọlu etọn, na yé kọ́ nado lẹ́gọ̀ wutu. ⁶Podọ ohi lọ na jẹadán do tòdaho etọn lẹ ji, bo na sukúndona opatin etọn lẹ, bo và yé súdo, na hónamẹ yetọn titi le tọn wutu. ⁷Gbẹtọ ṣie lẹ bo sọ yín didé hlan agọ́jodogodo sọn yẹn de: Yín yé tlẹ ylọ yé jẹ ewọ he tin to agayi ji de, mẹdepope ma na zé ede yìaga. ⁸Nawẹ yẹn na jó we do do, Eflaimi? nawẹ yẹn na whlẹn we do, Islaeli? nawẹ yẹn na basi we di Adina do? nawẹ yen na zé we dote di Zeboimi do, yè hẹn ayiha ṣie lẹ́ to ohò ṣie mẹ, yè hẹn homẹyón ṣie Íẹ jimiọn dopọ. ⁹Yẹn ma na hẹn nudobu adi ṣie tọn sẹ́ gba, yẹn ma na lẹ́gọ̀ nado và Eflaimi gba: na Jiwheyẹwhe wẹ yẹn, gbẹtọ ma gba; Omẹ Wiwe lọ to gblagbla hiẹ tọn mẹ: podọ yẹn ma to na wá biọ tòdaho lọ mẹ to homẹgble mẹ gba. ¹⁰Yé na nọ zinzọnlin hodo OKLUNỌ, mẹhe na nọ li di kinnikinni de: na ewọ na li, ovi lẹ na sọ to sisọsisọ sọn whèyihọ ji ja. ¹¹Yé na to sisọsisọ ja di ohẹ́ de tọn sọn Egipti, podọ di owhle de tón sọn aigba Asilia tọn mẹ: Yẹn bo na sọ hẹn yé nado nọ nọ̀ ohò yeton lẹ mẹ, wẹ OKLUNỌ dọ.

¹²Eflaimi yí olalo do lẹhla mi pó, podọ owhé Islaeli tọn po oklọ po: podọ Juda gbẹ́ sọ yín manọteglinọ to Jiwheyẹwhe de, podọ to Omẹ Wiwe mẹhe yín nugbonọ lọ de.

¹EFLAIMI to ojẹhọn dù, bo sọ to ojẹhọn whèzẹtẹn ji tọn hodo godo: ewọ to olalo lẹ po ovọ́jẹ po hẹn jideji whepoponu; yé sọ basi alẹ̀nù de hẹ Asilia, yè sọ bẹ́ amì yì biọ Egipti mẹ. ²OKLUNỌ tindo nudindọn de hẹ Juda ga, bo na sọ dlapọn to Jakob ji kẹdẹdi aliho etọn lẹ; kẹdẹdi wiwà etọn lẹ wẹ ewọ na nahọsu i do. ³Ewọ hẹn afọgbẹn nọvisunnu etọn tọn go to adọ̀ mẹ, podọ to huhlọn etọn mẹ é diahì hẹ Jiwheyẹwhe: ⁴mọwẹ, ewọ tindo huhlọn to angẹlì lọ ji, bo sọ glonú: ewọ viavi, bo sọ basi ovẹ̀vẹ̀ hlan e de: é mọ ẹn to Bẹti-eli, podọ finẹ wẹ ewọ dọhó hẹ mi te; ⁵na Jiwheyẹwhe awhànpa lẹ tọn wẹ OKLUNỌ; OKLUNỌ wẹ oflinnú etọn. ⁶Enẹwutu hiẹ ni lẹ́ do Jiwheyẹwhe towe de: yìn lẹblanu po whẹ̀dida po, bo nọtepọ́n Jiwheyẹwhe towe to whepoponu.

⁷Na Kanani tọn, Kanani lọ, ojlẹgàn oklọ tọn lẹ tin to alọ etọn mẹ: ewọ yiwanna nado hòmẹdù. ⁸Eflaimi bo sọ dọmọ, Nugbonugbo yẹn tin lẹzùn adọkunnọ, yẹn ko din adọkunnu mọ na dẽ: to tuklajẹ ṣie lẹpo mẹ yé ma na mọ oylanwà de he yín ylando to yẹn mẹ gba. ⁹Ṣigba yẹn wẹ OKLUNỌ Jiwheyẹwhe towe sọn aigba Egipti tọn mẹ; Yẹn na gbẹ́ sọ vẹ̀ we hẹn nado nọ̀ gohọ̀ lẹ mẹ, di to azán ohùnwhẹ ayidego tọn tọn lẹ mẹ. ¹⁰Yẹn ko dọhó hlan yẹwhegán lẹ ga, yẹn bo ko sọ hẹn numimọ lẹ jideji; podọ yẹn ko sọ gbọn alọ yẹwhegán lẹ tọn dali zán apajlẹ lẹ. ¹¹Oylanwà wẹ Gileadi la? ovọ́ wẹ yé patapata; yé yí oyìnsú lẹ do sánvọ́ to Gilgali mẹ: mọwẹ, agbà yetọn lẹ na yín okiti lẹ to whóndọvlọ ogle tọn lẹ mẹ. ¹²Podọ Jakob hónyì biọ ogle Alami tọn mẹ, Islaeli sọ sẹ̀n na asi de, podọ na asi de ewọ yìn lẹngbọ lẹ. ¹³Podọ OKLUNỌ hẹn Islaeli hẹji tọ́n sọn Egipti wá gbọn yẹwhegán de dali, podọ yẹwhegán de dali wẹ yè whla ẹ gbọn. ¹⁴Eflaimi ko hẹnhomẹgblemẹ hlan adi vivẹvivẹ dahodaho: enẹwutu wẹ ohùn etọn na yín jijódai to e ji, podọ ovlẹ etọn wẹ OKLUNỌ na sọ lẹ́gọ̀ do e de.

¹WHENUENA Eflaimi dọhó po sisọsọsi po; ewọ zé ede daga to Islaeli mẹ: ṣigba whenuena ewọ lẹzùn whẹ́ylannọ to Baali mẹ, é kú. ²Podọ dinvie yé to ylandowà alọmakúmakú, bo ko sọ basi bosiọ kinkọ̀n lẹ sọn fataka yetọn mẹ, yèdọ vodun lẹ kẹdẹdi wun-tùntùn yétọn titi, popo yé tọn azón anawàtọ lẹ tọn: yé nọ dọ na yé tọn dọ, Gbọ avósántọ lẹ sọn gbẹtọ mẹ ni donùnùgona oyìnvú lẹ lọ ³Enẹwutu yé na tin di aslọ afọnnu tọn, podọ di ahún he ju yì to afọnnufliflimẹ, di oyọ̀ he yè ví jẹhọnahizi do fú tón sọn nuligbàji, podọ di azọ̀ tón sọn azómóji. ⁴Gãnṣo yẹn wẹ OKLUNỌ Jiwheyẹwhe towe sọn aigba Egipti tọn mẹ; podọ hiẹ ma yọn yẹwhe de adavo yẹn, podọ whlẹngántọ de ma tin gọ́na mi ⁵Yen yón we to zùngbo mẹ, to aigba akúdido daho tọn mẹ ⁶Kẹdẹdi kanlindùgbo yetọn, mọwẹ yè góhòna yé do; yè gọhona yé, ayiha yetọn sọ yín zédaga: enẹwutu wẹ yé ko do wọn mi. ⁷Enẹwutu wẹ yẹn tin hlan yé di kinnikinni de: di opọ̀ de wẹ yẹn na to núhọ́ to aliho tó: ⁸Yẹn na pé yé di bẹali de he yè fọ̀ ovi lẹ sọn e si, bo na tlẹn otlan ayiha yetọn tọn: podọ finẹ wẹ yẹn na và yé súdo te di kinnikinni de; kanlin gbémẹ tọn na sọ tlẹn yé. ⁹Islaeli È, hiẹ yín hùhùsúdo; na hiẹ tin agọ̀ do ogo e, do alọgọ towe go. ¹⁰Fie ahọlu towe te dinvie, na ewọ nido whlẹn we to tòdaho towe lẹpo mẹ? podọ whẹ̀datọ towe lẹ, na mẹhe tọn hiẹ dọmọ, Na ahọlu de mi po ahọvi lẹ po? ¹¹Yẹn ko na ahọlu de we to adi ṣie mẹ, bo ko sọ dè e sọ́ to homẹgble ṣie mẹ. ¹²Yè dòn oylanwà Eflaimi tọn bla; yè tò ylando etọn do agbànhọ́ mẹ. ¹³Awubla yọnnu ajipamẹ de tọn lẹ na wá e ji: visunnu mayọnnuinnọ de wẹ ewọ; whenuena é yín ojlẹ, ewọ ma nọte to otẹn gbigbà jẹgbonu ọvi lẹ tọn tọn lọ mẹ gba. ¹⁴Yẹn na fli yé sọn alọ kútòmẹ tọn mẹ; yẹn na fli yé sọn okú mẹ: Okú E, fie wẹ azònylankan towe lẹ te? Kútòmẹ È, fie wẹ vivà towe te? lẹnvọjọ na yín whiwhla sọn nukun ṣie lẹ mẹ. ¹⁵Yín ewọ tlẹ yín sinsẹ́nnọ to mẹmẹsunnu etọn lẹ ṣẹnṣẹn, ojẹhọn whèzẹtẹn ji tọn de na wá, gbọfufu OKLUNỌ tọn hẹaga sọn zùngbo mẹ ja, podọ asisawhin etọn na lezùn húhú, yè na sọ hẹn asisa etọn yín húhú; é na hẹn adọkunnu núzinzán whanpẹnọ lẹpo tọn gble. ¹⁶Samalia na lẹzùn ojẹvọ́; na ewọ ko ṣatẹ do Jiwheyẹwhe etọn go: Yé na jai gbọn ohi lọ dali; ovivu yetọn lẹ na yín gbigbà hanyanhanyan, podọ yọnnu yetọn lẹ po ohò po na yín kikẹ́.

¹ISLAELI È, lẹ́gọ̀ do OKLUNỌ Jiwheyẹwhe towe de; na hiẹ ko jai gbọn oylanwà towe dali. ²Yí ohó lẹ do dè we, bo lẹ́gọ̀ do OKLUNỌ de: dọ hlan ẹn dọ, Dè oylanwà lẹpo sè, bo kẹaloyi enẹ he yín dagbe: mọwẹ míwlẹ na gọ̀ avọ́ nunina nùflo mítọn lẹ tọn jó. ³Asuli ma na whlẹn mí gba; míwlẹ ma na hẹ́ ósọ lẹ ji gba; mọ mí ma na sọ dọ hlan azon alọ mítọn lẹ tọn gbède ba dọ, Míwlẹ wẹ yẹwhe mítọn lẹ gba: na hiẹ mẹ wẹ tọsiọvi mọ lẹblanu te. ⁴Yẹn na hẹnazọ̀ngbọna agọ̀jodogodo yetọn, yẹn na yiwanna yé vonu: na yè lẹ́ adi ṣie yì sọn yé mẹ. ⁵Yẹn na tin di ahún: hlan Islaeli: ewọ na gbàsẹ́ di lili, bọ sọ yìn adọ̀ eton lẹ jẹgbonu di Lẹbanọni. ⁶Alà etọn lẹ na dlẹn, podọ owhànpẹ etọn na tin di atin olivieli, podọ wándide etọn di Lẹbanọni. ⁷Yé he nọ nọ́ oyẹ̀ etọn glọ lẹ na sọ lẹ́gọ̀; yé na sọ hinhọ́nun di ogbadó, bo sọ gbàsẹ́ di vẹntin: oflinnú etọn na sọ, tin di ovẹ̃n Lẹbanọni tọn. ⁸Eflaimi È, etẹ́ yẹn tindo nado wà po vodun lẹ po gbède ba? Yẹn ko gblọn, bo na sọ hò e pọ́n: Yẹn tin taidi atin fili omu de; yẹn mẹ wẹ yè mọ sinsẹ́n towe sọn. ⁹Mẹnu wẹ nuyọnẹntọ, ewọ bo na sọ túnwun onú helẹ? Zìnzìntọ, ewọ bo na sọ yọ́n yé? na ojlọjẹ wẹ aliho OKLUNỌ tọn, podọ dódónọ na zinzọnlin to yé mẹ; ṣigba sẹ́nmẹjẹtọ lẹ na jai finẹmẹ.