Habbakuk

¹OZỌ́NJI he Habbakuk yẹwhegán lọ mọ.

²OKLUNỌ È, nawẹ yẹn na dawhá dẹn sọ, bọ hiẹ ma na sè? Yẹn dawhá tón hlan we sọn huhlọnnú mẹ, bọ hiẹ ma na whlẹngan gba. ³Etẹwutu wẹ hiẹ do oylanwà hia mi, bo sọ hẹn mi nado pọ́n otasinyẹn? na ohẹngble po huhlọnnú po tin to nukọn ṣie: podọ nukọnwhlẹndomẹ tin finẹ, podọ nuwhlẹndomẹ sọ fọ́n daga. ⁴Enẹwutu wẹ yè hẹn osẹ́n túnbọ̀, podọ whẹ̀dida ma sọ jẹgbonu yì jẹ awhàngba mẹ gba: na mẹ, lankan lẹ léhla dódónọ lẹ; enẹwutu wẹ whẹ̀dida jẹgbonu yì gbigble. ⁵Mì pon akọta lẹ mẹ, bo hòpọ́n, awu ni bo ji mi badabada: na mẹde wà azón de to azán mìtọn lẹ mẹ he mìwlẹ ma na yise le yè tlẹ dọ na mì sọ. ⁶Na, pọ́n, yẹn fọ́n Kaldeanu lẹ daga, akọta vivẹ́ awuyatọ nẹ: he gó gbọn ogblo aigba lọ tọn luntón, nado yí otẹn ninọ̀ lẹ he ma yín yetọn na nutindo. ⁷Ewọ yín kanylantọ bo sọ dobu: whẹ̀dida yetọn po yẹyidaho yetọn po tónsọn yelọsu mẹ. ⁸Osọ yetọn lẹ ga yín awuyatọ hú opọ̀ lẹ, bo sọ yín núsisi hú ohia whèjai tọn lẹ; podọ osọ́nọ yetọn lẹ hẹn yéde po sakla po: mọwẹ, osónọ yetọn lẹ sọn aganu wá; yé to zinzlọn di akùn he to unklẹn nado vasúdo de. ⁹Yé wá popo yé tọn na huhlọnnú; kinklẹn nukunmẹ yetọn lẹ tọn tin pannukọn whèzẹtẹn dali; yé sọ ṣinyan mẹglọnọ lẹ pli di otọ̀kẹn. ¹⁰Podọ yé nọ ṣàn ahọlu lẹ kò, podọ ahọvi lẹ sọ yín avlẹdanú hlan ẹn: é nọ vlẹ figángán lẹpo; na ewọ dọ̀n kọgudu pli, bo sọ bẹ́ ẹ. ¹¹Whenẹnu wẹ ojẹhọn na yìn wáyi ewọ bo na sọ ju wáyi, bo sọ jẹsẹ́nmẹ, bo yín whẹ́ylantọ: yèdọ ewọ hlọnhlọn mẹhetọn yẹwhe etọn yín. ¹²OKLUNỌ Jiwheyẹwhe ṣie È, Mẹwiwe ṣie Dopo, bé hiẹ ma tin sọnmadopodo? mí ma na kú gba. OKLUNỌ E, hiẹ ko do ewọ ai na whẹ̀dida; podọ hiẹ, Osé È, ko hẹn ewọ lódo na mẹplọnlọ. ¹³Hiẹ he yín nukun wiwe tọn húgan nado pọ́n oylan, podọ he ma sọgan pọ́n otasinyẹn, etẹwutu wẹ hiẹ to yé he yí danuwiwà do to zinzán lẹ pọ́n, bọ sọ nọabọẹ whenuena mẹylankan lọ to omẹ lọ he yín dódónọ hú i zé mì; ¹⁴Bo sọ basi gbẹtọ di owhèvi ohù tọn lẹ, di onú he nọ lin lẹ, he ma tindo gándùtọ de to yé ta? ¹⁵Ewọ yí omlẹn do bẹ́ popo yé tọn, é sọ wle yé to odò etọn mẹ, bo sọ bẹ́ yé pli to dòndai etọn mẹ; enẹwutu wẹ ewọ to ayajẹ bo sọ yín homẹhùnnọ. ¹⁶Enẹwutu wẹ ewọ do to avọ́sán hlan odọ etọn, bo sọ to nuyọnwan mè hlan dòndai etọn; na gbọn yé dali wẹ mimá etọn yín jonọ wutu, podọ núdùdù etọn susunọ. ¹⁷Enẹwutu bé ewọ na hẹn odọ̀ etọn jẹvọ́, bo ma na gbó nado nọ hù akọta lẹ to whepoponu?

¹YẸN na nọte to hihọ́tẹn ṣie ji, bo sọ zé dẽ do figángán lọ ji, bo na pọ́n gbonu nado mọ núhe ewọ na dọ gbọn yẹn dali, podọ núhe yẹn na gblọn gbọn kuefinfan ṣie tọn dali. ²OKLUNỌ sọ gblọnna mi, bo dọmọ, Wlan numimọ lọ, bo sọ hẹn ẹn diun to tafo lẹ ji, na ewọ he hia ẹ nido hònwezun. ³Na numimọ lọ gbó sọ tin na ojlẹ didè lọ, podọ é to unklẹn hlan opòdo lọ dali, bo ma na dolalo: yín é tlẹ dọ̀ngbàn, notẹpón ẹn; na é ma na nọma wá wutu, é ma na gọ̀n gba. ⁴Dayi e go, yè hẹn alindọn etọn zédaga, é ma tin titegbe to ewọ mẹ gba: ṣigba nugbonọ na nọgbẹ̀ to nugbowà etọn mẹ ⁵Podọ ga na ovẹ̃n etọn yín ajọtọ oklọnọ de wutu, omẹ saklanọ de wẹ ewọ, podọ he ma nọ nọ́ whégbè; mẹhe hẹn ojlo etọn klo di kútòmẹ, podọ ewọ tin di okú, bo ma sọgan yín pekọnọ, ṣigba ṣinyan akọta lẹpo pli jẹ ede, bo sọ dọ̀n gbẹtọ lẹpo hlan e de. ⁶Bé ehe lẹpo ma na zé oló de daga do e ji, po ojlu hóvivẹ́nọ de po do e ji, bo dọmọ, Dindọn hlan ewọ he hẹn enẹ he ma yín etọn sudeji! dọ̀n sọ na? podọ he yí ogòdènu lẹ do doagbànna ede ⁷Bé yé he na gbì akuẹvi yí sọn hiẹ si lẹ ma na tite ajiji, bo sọ fọ́n he na mìmí we hlangodo podọ hlannukọn, bo na sọ tin na ogblannú lẹ hlan yé? ⁸Na hiẹ ko gble akọta susu wutu, pipòtọ gbẹtọ lẹ tọn na sọ gble we; na ohùn gbẹtọ lẹ tọn tọn wutu, podọ na huhlọnnú yè wà hlan aigba lọ, hlan tòdaho lọ podọ hlan yé he nọ nò e mẹ lẹpo.

⁹Dindọn hlan ewọ he tindo ale ylanylan de na owhé etọn, na ewọ nido zé ádó etọn do fìyìaga ji, dọ ewọ nido yín whinwhlẹn sọn alọ oylan tọn mẹ! ¹⁰Hiẹ ko dowéna owinyan hlan owhé towe, gbọn gbẹtọ susu sinsán sè dali, bo ko sọ wàylando do alindọn towe go. ¹¹Na zannu na dawhá sọn adó lọ mẹ, podọ whlẹthtli sọn whlẹlidemẹ mẹ na sọ gblọn nẹ ¹²Dindọn hlan ewọ he yí ohùn do do atọhò de, bo sọ hẹn tòdaho de lòdo gbọn oylanwà dali ¹³Dayi e go, bé é ma tin sọn OKLUNỌ awhànpa lẹ tọn de dọ gbẹtọ lẹ ni jẹtukla na miyọn, podọ gbẹtọ lẹ ni hẹn agbópé yéde na oylanwà? ¹⁴Na yè na yí oyọnẹn gigo OKLUNỌ tọn tọn do gó aigba lọ, dile osìn lẹ ṣinyọn ohù do.

¹⁵Dindọn hlan ewọ he na núnùnù kọmẹnu etọn, he kọ̀n homẹwlu towe jẹ enẹ ji, bo sọ hẹn ewọ nùmú ga, na hiẹ nido pọ́n omẹ́ yetọn ¹⁶Yè yí owinyan do gọ́ we na gigo; hiẹ ga ni nù, bo sọ gbọ ayutintan towe ni jẹmẹ́: yè na lẹ́ kọfo alọ adusi OKLUNỌ tọn tọn hlan we, winyan dihónọ na sọ tin to gigo towe ji. ¹⁷Na huhlọnnú yè wà hlan Lẹbanọni na ṣinyọn we, podọ vivà kanlin lẹ tọn, na hẹn we savo; na ohùn gbẹtọ lẹ tọn tọn wutu, podọ na huhlọnnú yè wà hlan aigba lọ, hlan tòdaho lọ podọ hlan yé he nọ nọ́ e mẹ lepo.

¹⁸Etẹ boṣiọ pipa doalena, bọ bibasitọ etọn ko do pà ẹ: boṣiọ kinkòn, po mẹplọntọ lalo lẹ tọn po, bọ basitọ azón etọn tọn do dotu to e mẹ, nado basi vodun unbọpẹn lẹ? ¹⁹Dindọn hlan ewọ he dọ hlan atin lọ dọ, Fọ́n; hlan zannu unbọpẹn lọ, dọ, Tite Bé ehe na plọ́nmẹ wẹ? Dayi e go, yè yí sika po fataka po do bú i, podọ gbọfufu de ma tinto gblagbla e tọn mẹ finẹ lala. ²⁰Ṣigba OKLUNỌ tin to tẹmpli wiwe etọn mẹ: yín abọẹnọ to nukọn etọn, mì aigba lẹpo.