Eksọdusi

¹EHELẸ wẹ oyín ovi Islaeli tọn lẹ tọn, he wá Egipti; omẹ dopodopo po whédo etọn po wá po Jakobu po. ²Lẹubeni, Simeoni, Levi, po Juda po; ³Issakali, Zẹbuluni, po Bẹnjamini po; ⁴Dani po Naftali po, Gadi po Aṣeli po. ⁵Ayiha he tón sọn adaja Jakobu tọn lẹ mẹ yín ayiha kandegbàn: Josefu ko tin to Egipti hóhó.

⁶Josefu sọ kú, po mẹmẹsunnu etọn lẹpo po, po whẹndo nẹ lẹpo po. ⁷Ovi Islaeli ton lẹ yín sinsẹ́nnọ, bo to sisawẹ̃n, bo to jijigbà, tónalùn bo gángán gbahú: yè sọ hẹn aigba lọ gó na yé.

⁸Ahọlu yọ́yọ́ de fọ́n to Egipti ji, he ma yón Josefu. ⁹Ewọ sọ dọ hlan omẹ etọn lẹ, Dayi e go, omẹ ovi Islaeli tọn le tọn to susu bo sọ to huhlọnnọ yín hu mìwlẹ: ¹⁰mì wá, gbọ mí ni yí núyónẹn do zán hẹ yé; yé nikã jigbà, é nasọ wá jọ dọ, whenuena awhàn de wá jai, bọ yówlẹ ga kòn yéde dopọ hlan kẹ̀ntọ mítọn lẹ, bo hòavùn hẹ mí, bo hẹn yé fọ́n sọn aigba lọ ji. ¹¹Enẹwutu wẹ yé dè azóngán lẹ do yé ji nado yí agbàn yetọn lẹ do bianukun na yé. Yé gbá na Falo tòdahodaho agbànhọ tọn lẹ Pitomi po Laamsesi po. ¹²Ṣigba le yé to nukunbia na yé húgán sọ, wẹ yé to jijigbà húgán do, bo sọ to vúnvún péai. Yè sọ yin homegbletọ na ovi Islaeli tọn lẹ tọn wutu. ¹³Egiptinu lẹ hẹn ovi Islaeli tọn lẹ nado yí hlọnhlọn do sẹn: ¹⁴yé sọ yí azón sinsinyẹn do hẹn ogbè yetọn vé to obó po okómímẹ po mẹ, podọ to azón alọpàlọpa lẹpo mẹ to danji, azón yetọn lẹpo ehemẹ yé yí hlọnhlọn do hẹn yé sèn te.

¹⁵Ahọlu Egipti tọn dọhó na ajinọ Heblu tọn lẹ, sọn mẹhe mẹ oyín dopo lọ tọn nọ yín Ẹifla; podọ oyín awetọ tọn Púa: ¹⁶ewọ sọ dọmọ, Whenuena mì to azón ajinọ tọn wà na yọnnu Heblu tọn lẹ, bo mọ yé to vijiján ji; eyín é yín visunnu, mì na hù i; ṣigba eyín é yín viyọnnu, ewọ na nọgbó. ¹⁷Ṣigba ajinọ le dibúna Jiwheyẹwhe bo ma wà dile ahọlu Egipti tọn degbèna yé do gba, ṣigba bo whlen ovisunnu lẹ dogbẹ̀. ¹⁸Aholu Egipti tọn ylọ ajinọ lẹ, bo dọ hlan ye, Etẹwutu wẹ mì do wà onú he, bo ko whlen ovisunnu lẹ dogbẹ? ¹⁹Ajinọ ewlẹ sọ dọ hlan Falo, Na Heblu yọnnu lẹ ma dile Egipti yọnnu lẹ te wutu wẹ: na yé yawu, bo nọ yín vijitọ whẹpo ajinọ nado wà yé de. ²⁰Jiwheyẹwhe sọ zán dagbe hẹ ajinọ lẹ: gbẹtọ le sọ jigbà bo tónalùn bo gángán gbahú. ²¹E sọ wá jọ, na ajinọ lẹ dibúna Jiwheyẹwhe wutu, wẹ é basi ohọ lẹ na yé.

²²Falo sọ degbena ome etọn lẹpo dọmọ, Visunnu depope he ye ji mì na zédlan otò lọ mẹ, podọ viyọnnu lẹpo mì na whlẹn dogbè.

¹DAWE de yì sọn owhé Levi tọn gbe, bo yí viyọnnu Levi tọn lọ hlan asi. ²Yọnnu lọ sọ mọho, bo ji visunnu de: whenuena ewọ mọ ẹn dọ ovi whanpẹnọ wẹ, é whlá ẹ osùn atọ̀n. ³Whenuena ewọ ma sọgan whlá ẹ dẹn ba, ewọ yí aki owoko tọn de, bo yí oko po atinsin po do tlẹ ẹ; é ze ovi lọ do e mẹ, bo zé e tó do ofánkàn mẹ to otò tó. ⁴Nọviyọnnu etọn site to aganu, nado pọ́n onú he yè na wà do e.

⁵Viyọnnu Falo tọn jẹte wá nado lawu to otọ tó; deviyọnnu etọn lẹ sọ to dudlu to otò tó; ewọ sọ mọ aki lọ to owoko lẹ ṣẹnṣẹn, bo do deviyọnnu etọn hlan nado yì zé e wá. ⁶Ewọ sọ hùn in, bo mọ ovi lọ: bo, dayi e go, vianónnu lọ ko viavi. Ewọ sọ tindo lẹblanu do e ji, bo dọmọ, Ovi Heblu lẹ tọn de wẹ ehe.

⁷Whenenu wẹ nọviyọnnu etọn dọ hlan viyọnnu Falo tọn, Yẹn ma na yì bo ylọ vigopóntọ Heblu yọnnu tọn de na we, na ewọ nido na anó ovi lọ na we? ⁸Viyọnnu Falo tọn dọ nẹ, Yì. Yọnnuvu lọ sọ yì bo ylọ onọ ovi lọ tọn. ⁹Viyọnnu Falo tọn dọ hlan ẹn, Zé ovi he sọ yì, bo na anó ẹ na mi, yẹnlọsu nasọ na azónkuẹ towe we. Yọnnu lọ sọ zé ovi lọ, bo na anó ẹ. ¹⁰Ovi lọ whén, ewọ sọ hẹn ẹn wá viyọnnu Falo tọn de, é sọ lezùn ovi etọn. Ewọ ylọ oyín etọn dọ Moṣe, bo dọmọ, Na yẹn dọ̀n ẹn sọn osìn mẹ wutu.

¹¹E sọ wá jọ to azán nẹlẹ mẹ, whenuena Moṣe ko whén, wẹ é tón yì mẹmẹsunnu etọn lẹ de, bo pọ́n agbàn yetọn lẹ: é mọ Egiptinu de to nuli Heblu dopo de to mẹmẹsunnu etọn lẹ mẹ. ¹²Ewọ sọ pọ́n de, pọ́n dọn, whenuena é mọ dọ ome de ma tin to finẹ, é hù Egiptinu lọ bo whlá ẹ do tòkẹn mẹ.

¹³Ewọ sọ tón yì gbonu to aihọngbè, bo, dayi e go, sunnu awe Heblu tọn to nuli yénọzo: ewọ sọ dọ hlan ewọ mehe dinaklọn, Etẹwutu wẹ hiẹ to nuli hatọ towe? ¹⁴Ewọ sọ dọmọ, Mẹnu wẹ yí we do basi ahọvi de po whèdatọ de po do mi ji? hiẹ to linlẹn nado hù mi, dile hiẹ hù Egiptinu lọ do? Moṣe sọ dibú, bo dọmọ, Nugbonugbo onú lo yín yinyónẹn.

¹⁵Whenuena Falo sè onú he, é din nado hù Moṣe. Ṣigba Moṣe họ̀nyì sọn Falo nukunmẹ, bo nò aigba Midiani tọn ji: é sọ sinai to odotò de ji ¹⁶Yẹwhenọ Midiani tọn tindo viyọnnu ṣinawe: yé wá bo dòn osìn, bo gó otò lẹ nado na osìn kanlinpa otọ́ yetọn tọn lẹ. ¹⁷Lẹngbọhọtọ lẹ wá bo yàn yé yì: ṣigba Moṣe site bo gọalona yé, bo na osìn kanlinpa yetọn lẹ. ¹⁸Whenuena yé wá Lueli otọ́ yetọn de, é domọ, Nawẹ é yín bọ mì do yawu gò dọmọ to egbé? ¹⁹Yé sọ dọmọ, Egiptinu de whlen mí sọn alọ lengbọhọtọ lẹ tọn mẹ, humọ e dọn osìn na mí, bo nasìn kanlinpa. ²⁰Ewọ sọ dọ hlan viyọnnu etọn lẹ, Fie ka wẹ é te? etẹwutu wẹ mì jo dawe lọ dai? mì ylọ ẹ, na é nido dù akla.

²¹Awú Moṣe tọn sọ jai nado nọ̀hẹ dawe lọ: é sọ na Zipola viyọnnu etọn Moṣe. ²²Ewọ ji visunnu de, ewọ sọ ylọ oyìn etọn dọ Gelsomi: na ewọ dọmọ, Yẹn ko yín wásinu de to aigba jonọ de ji.

²³E sọ wá jọ to whenu azán susu nẹlẹ tọn mẹ, wẹ ahọlu Egipti tọn kú: ovi Islaeli tọn lẹ wẹ́n gbọn mẹglọnọ lọ tọn dali, yé dawhá, yiylọ yetọn na alọgọ hẹ́ji wá Jiwheyẹwhe de gbọn mẹglọnọ lọ tọn dali. ²⁴Jiwheyẹwhe sè winwón yetọn, Jiwheyẹwhe sọ flin alẹ̀nu etọn hẹ Abla-ham, hẹ Isaki, podọ hẹ Jakobu. ²⁵Jiwheyẹwhe sọ mọ ovi Islaeli tọn lẹ, Jiwheyẹwhe sọ yọnẹn na yé.

¹MOṢE koto kanlinpa Jẹtlo yónwhẹn etọn yẹwhenọ Midiani tọn tọn hó: é sọ plan kanlinpa lọ jẹ godo zùngbo lọ tọn, bo wá osé Jiwheyẹwhe tọn lọ ji, to Holebi. ²Angẹli OKLUNỌ tọn lọ sọ sọawúhia ẹ to ozòlọ miyọn tọn de mẹ sọn ṣẹnṣẹn nukàn lọ tọn: ewọ sọ pọ́n, bo, dayi e go, núkàn lọ yí miyọn do to jiji, yè ma sọ hẹn núkàn lọ fiọ.

³Moṣe sọ dọmọ, Yẹn na lẹ́jẹ apadopo lò, bo pọ́n númimọ daho he, etẹwutu wẹ núkàn lọ ma jizò. ⁴Whenuena OKLUNỌ mọ dọ é léjẹ apadopo nado mọ, Jiwheyẹwhe dlangbewhán hlan ẹn sọn ṣẹnṣẹn nukàn lọ tọn, bo dọmọ, Moṣe, Moṣe. Ewọ sọ dọmọ, Yẹn tin to ofi. ⁵Ewọ sọ dọmọ, A sẹpọ́ fìdali blo: dè afọpa towe sọn afọ towe, na otẹn fietọn ji hiẹ site te aigba wiwé wẹ. ⁶Humọ é dọmọ, Yẹn Jiwheyẹwhe otọ́ towe tọn wẹ, Jiwheyẹwhe Ablaham tọn, Jiwheyẹwhe Isaki tọn, podọ Jiwheyẹwhe Jakobu tọn. Moṣe sọ sọ nukunmẹ etọn whlá; na búdi i nado bònukun do Jiwheyẹwhe go.

⁷OKLUNỌ sọ dọmọ, Nugbonugbo yẹn ko mọ nukunbibia omẹ ṣie he tin to Egipti lẹ tọn, bo ko sọ sè awhá yetọn gbọn azóngán yetọn lẹ tọn dali; na yẹn yon awúfiẹsa yetọn lẹ; ⁸yẹn sọ jẹte wá nado whlẹn yé sọn alọ Egiptinu lẹ tọn mẹ, podọ nado hẹn yé hẹ́aga sọn aigba nẹ ji yí aigba dagbe kiklo de ji, yì aigba he yí anósìn po owín po do to sisá de ji; yì otẹn Kenaninu lẹ tọn, Hitinu lẹ, Amolinu lẹ, Pẹlizinu lẹ, Hivinu lẹ, po Jẹbusinu lẹ po tọn mẹ. ⁹Bé dinvie, dayi e go, awhá ovi Islaeli tọn lẹ tọn wá dẽ: humọ yẹn ko mọ nukunbibia ehetọn Egiptinu lẹ yí do to nukunbiana yé. ¹⁰Enẹwutu wá dinvie, yẹn nasọ do we hlan Falo de, na hiẹ nido hẹn omẹ ṣie lẹ ovi Islaeli tọn lẹ tón sọn Egipti.

¹¹Moṣe sọ dọ hlan Jiwheyẹwhe, dọ, Menu wẹ yẹn, bọ yẹn na do yì Falo de, bọ yẹn nado hẹn ovi Islaeli tọn lẹ tọ́n sọn Egipti?

¹²Ewọ sọ dọmọ. Nugbonugbo yẹn na tin po hiẹ po; ehe wẹ nasọ yín ohia hlan we, dọ yẹn wẹ do we hlan: whenuena hiẹ ko hen gbẹtọ lẹ tón sọn Egipti, míwlẹ na sẹ́n Jiwheyẹwhe to osó he ji.

¹³Moṣe sọ dọ hlan Jiwheyẹwhe, Dayi e go, whenuena yẹn wá ovi Islaeli tọn lẹ de, bo na dọ hlan yé, Jiwheyẹwhe otọ́ mítọn lẹ tọn ko do mi hlan mì; bọ yé na dọ hlan mi, Etẹ wẹ oyín etọn? etẹ wẹ yẹn na dọ hlan yé?

¹⁴Jiwheyẹwhe sọ dọ hlan Moṣe, YẸN WẸ MẸHE TIN NẸ : ewọ sọ dọmọ, Le wẹ hiẹ na dọ hlan ovi Islaeli tọn lẹ, YẸN NA YÍN ko do mi hlan mì de.

¹⁵Jiwheyẹwhe dọ humọ hlan Moṣe, Le wẹ hiẹ na dọ hlan ovi Islaeli tọn lẹ, OKLUNỌ Jiwheyẹwhe otọ́ mítọn lẹ tọn, Jiwheyẹwhe Ablaham tọn, Jiwheyẹwhe Isaki tọn, podọ Jiwheyẹwhe Jakobu tọn, ko do mi hlan mì de: ehe wẹ oyín ṣie kakadoidoi ehe sọ wẹ oflin ṣie hlan whẹndo lẹpo. ¹⁶Yì, bo pli mẹho Islaeli tọn lẹ dopọ, bo dọ hlan yé, OKLUNỌ, Jiwheyẹwhe otọ́ mítọn lẹ tọn, Jiwheyẹwhe Ablaham tọn, Isaki tọn, podọ Jakobu tọn, ko sọawúhia hlan mi, dọmọ, Yẹn ko dla mì pọ́n nugbonugbo, bo ko mọ enẹ he yè wà do mì to Egipti: ¹⁷Yẹn ko sọ dọmọ, Yẹn na hẹn mí hẹ́ji sọn nukunbibia Egipti tọn mẹ wa aigba Kenaninu tọn, po Hitinu tọnpo, po Amolinu tọn po, po Pẹlizinu tọn po, po Hivinu tọn po, po Jẹbusinu tọn po, wá aigba he yí anósìn po owín po do to sisá ji. ¹⁸Yé na nató ogbè towe: hiẹ nasọ wá hiẹ po mẹho Islaeli tọn lẹ po jẹ ahọlu Egipti tọn de, mìwlẹ nasọ dọ hlan ẹn, OKLUNỌ, Jiwheyẹwhe Heblu lẹ tọn, ko pla mí; dinvie gbọ mí ni yì, mí vẹ́ we, azán atọ̀n gbejizọnlin biọ zùngbo mẹ, na míwlẹ nido sánvọ́ hlan OKLUNỌ Jiwheyẹwhe mítọn. ¹⁹Yẹn sọ yónẹn dọ ahọlu Egipti tọn ma na dike mì ni yì, lala, é ma gbọn alọ huhlọnnọ de dali gba. ²⁰Yẹn na dè alọ ṣie jegbonu, bo yí nújawu ṣie lẹ do linu Egipti, ehe yẹn na wà to ṣẹnṣẹn etọn: to enẹgodo é na gbọ mì ni yì. ²¹Yẹn nasọ na nukundagbe omẹ helẹ to nukun Egiptinu lẹ tọn mẹ: é nasọ wá jọ, dọ, whenuena mì jei, mì ma to na yì alọvó gba. ²²Ṣigba yọnnu dopodopo na biọ asọdonú fataka tọnlẹ, po asọdọnú sika tọn po, po asọvò po to kọmẹnu etọn si: bọ mì na yí do ogo na visunnu mítọn lẹ, podọ do ogo na viyọnnu mítọn lẹ; mì nasọ bó onú Egiptinu lẹ tọn.

¹MOṢE sọ gblọn bo dọmọ, Ṣigba, dayi e go, yé ma to na nató ogbè ṣie gba: na yé na dọ, OKLUNỌ ma ko sọawúhia hlan we gba.

²OKLUNỌ sọ dọ hlan ẹn, Etẹwẹ tin to alo towe mẹ ne? Ewọ sọ dọmọ, Opò de. ³Ewọ sọ dọmọ, Zé e dlan aigba. Ewọ sọ ze e dlan aigba, é sọ lẹzùn odàn de; Moṣe sọ họ̀nyì sọn nukọn etọn. ⁴OKLUNỌ lọ so dọ hlan Moṣe, Dè alọ towe jẹgbonu, bo zé e gbọn osi dali: (ewọ sọ dè alọ etọn jegbonu bo té do e go, é sọ lẹzùn opò to alọ etọn me:) ⁵na yé nido yise dọ OKLUNỌ, Jiwheyẹwhe otọ́ yetọn lẹ tọn, Jiwheyẹwhe Ablaham tọn, Jiwheyẹwhe Isaki tọn, podọ Jiwheyẹwhe Jakobu tọn we ko soawúhia we.

⁶OKLUNỌ sọ dọ huganmọ hlan ẹn, Ki alọ towe do yẹndawe avọ̀ towe tọn mẹ lò, Ewọ sọ ki alọ etọn do yẹndawe avọ̀ etọn tọn mẹ; whenuena é sọ dè e jẹgbọnu, dayi e go, alo etọn jẹpò, bo wé di osìngó. ⁷Ewọ dọmo, So vó alọ towe ki do yẹndawe avọ̀ towe tọn mẹ, (E sọ vó alọ etọn ki do yendawe avọ̀ etọn tọn mẹ; whenuena é sọ dè e sọn yendawe avọ̀ etọn tọn mẹ, dayi e go, é sọ vó diọ dile alọ etọn awetọ te,) ⁸e nasọ wá jọ, eyín yé ma na yí we sè, kavi nató ogbe ohia tintan tọn, wẹ yé na yí ogbè ohia godo tọn tọn sè. ⁹E nasọ wá jọ, eyín yé ma na yí yèdọ ohia awe helẹ sè, kavi tuntóai hlan ogbè towe, wẹ hiẹ na bà to osìn otò tọn mẹ, bo kòn ẹn do aigba kló ji: osìn otò tọn he hiẹ bà jẹgbonu na lezùn ohùn to aigba kló ji.

¹⁰Moṣe sọ dọ hlan OKLUNỌ, dọmọ, Lo OKLUNỌ, Yẹn ma didè, é ma yín sọn dinvie, kavi sọn whenuena hiẹ ko dọhó hlan devi towe: na yẹn yín awuwhletọ hódidọ tọn, po awúwhletọ odẹ́ tọn po.

¹¹OKLUNỌ sọ dọ hlan ẹn, dọmọ, Mẹnu wẹ basi onù gbẹtọ tọn? kavi menu wẹ yí gbẹtọ do basi unbọpẹn, kavi tokunọ, kavi númọtọ, kavi nukuntọ́nnọ? é ma yin yẹn OKLUNỌ wẹ? ¹²Dinvie enẹwutu yì, yẹn naso tin po onù towe po, bo plón we onú he hiẹ na dọ.

¹³Ewọ sọ dọmọ, TL OKLUNỌ, domẹhlan, yẹn vẹ́ we, gbọn alọ ewọ he tọn mẹ hiẹ jlo na domẹhlan.

¹⁴Adi OKLUNỌ tọn yè hẹn ji do Moṣe ji, é sọ dọmọ, Nọvisunnu towe Aalon Levinu ma tin finẹ? yẹn yọ́nẹn dọ ewọ sọgan dọhó dagbedagbe. Podọ dayi e go ga, é tón ja pipé we gbè: whenuena ewọ mọ we, ewọ na yín ayanọ to ayiha etọn mẹ. ¹⁵Hiẹ nasọ dọhó hlan ẹn, bo yí ohó lẹ do onù etọn mẹ: yẹn nasọ tin po onù towe po, po onù ewọ tọn po, bo na plọ́n mì onú he mì na wà. ¹⁶Ewọ na yín hódọtọ towe hlan gbẹtọ lẹ: é nasọ wá jọ, bọ ewọ na yín onù de na we, hiẹ nasọ tin nẹ̀ di Jiwheyẹwhe. ¹⁷Hiẹ na zé opo he hẹn to alọ towe mẹ, ehetọn hiẹ na do basi ohia lẹ.

¹⁸Moṣe sọ yì bo gọ̀ do Jetlo yonwhẹn etọn de, bo, dọ hlan ẹn, dọmọ, Gbọ yẹn ni yì, yẹn vẹ́ we, bo gọ́ do mẹmẹsunnu ṣie he tin to Egipti lẹ de, bo pọ́n eyín yé sọ tin to ogbẹ́. Jẹtlo sọ dọ na Moṣe, dọmọ, Yì jijọho mẹ.

¹⁹OKLUNỌ sọ dọ hlan Moṣe to Midiani, dọ, Yì, gọ̀yì Egipti: na mẹhe to ogbẹ́ towe din lẹpo ko zùn osiọ. ²⁰Moṣe sọ yí asi etọn po visunnu etọn lẹ po, bo zé yé do kẹtẹkẹtẹ de ji, ewọ sọ gọ̀yì aigba Egipti tọn ji: Moṣe sọ zé opò Jiwheyẹwhe tọn lọ to alọ etọn mẹ.

²¹OKLUNỌ sọ dọ hlan Moṣe dọmọ, Whenuena hiẹ gọ̀yì Egipti, dayi e go, dọ hiẹ basi to Falo nukọn nújawu he yẹn yí do alọ towe me lẹpo: ṣigba yẹn na hẹn ayiha etọn sinyẹn, ewọ ma na dike gbẹtọ lẹ ni yì gba. ²²Hiẹ nasọ dọ hlan Falo, dọmọ, Le wẹ OKLUNỌ dọ, Islaeli wẹ visunnu ṣie, oplọnji ṣie: ²³yẹn ko sọ dọ hlan we, dọ, Gbọ visunnu ṣie ni yì, na ewọ nido sẹ́n mi; hiẹ ko sọ gbẹ́ nado dike é ni yì: dayi e go, yẹn na hù visunnu towe, oplọnji towe.

²⁴E sọ wá jọ, to aliho ji to ofi ahisi lẹ nọ jẹ, wẹ OKLUNỌ pó e, bo din nado hù i. ²⁵Whenẹnu wẹ Zipola zé okén de, bo sán ayútintan visunnu etọn tọn, bo hẹn ẹn Jẹ afọ etọn go; ewọ sọ dọmọ, Nugbonugbo asisúnọ ohùn tọn de wẹ hiẹ hlan mi. ²⁶Mọwẹ ewọ jo e do abọẹ. Whenẹnu wẹ ewọ dọmọ, Asisúnọ ohùn tọn de wẹ hiẹ, na owhẹgbo lẹ tọn wutu.

²⁷OKLUNỌ sọ dọ hlan Aalon, dọmọ, Yì zùngbo mẹ nado pé Moṣe. Ewọ sọ yì, bo pé e to osé Jiwheyẹwhe tọn ji, bo donùnùgo nẹ̃. ²⁸Moṣe sọ dọ ohó OKLUNỌ tọn lẹpo na Aalon ehetọn é do dọ e hlan, po ohia lẹ lepo po ehetọn é do degbè nẹ.

²⁹Moṣe po Aalon po yì bo pli mẹho ovi Islaeli tọn lẹpo dopọ: ³⁰Aalon dọ ohó lẹpo he OKLUNỌ dọ hlan Moṣe, bo sọ basi ohia lẹ to gbẹtọ lẹ nukunmẹ. ³¹Gbẹtọ lẹ yise: whenuena ye sọ sè dọ OKLUNỌ ko dla ovi Isleali tọn le pọ́n, podọ é ko mọ nukunbibia yetọn, whenẹnu yé dó ota yetọn lẹ bo sọ sẹ̀n.

¹TO godo Moṣe po Aalon po wá, bo dọ hlan Falo, dọmọ, Le wẹ OKLUNỌ Jiwheyẹwhe Islaeli tọn, dọ, Gbọ omẹ ṣie lẹ ni yi, na yé ni wàhùnwhẹ hlan mi zùngbo mẹ.

²Falo sọ domọ, Menu we OKLUNỌ, bọ yẹn na do dotóai hlan ogbè etọn nado gbọ ovi Islaeli tọn lẹ ni yi? Yẹn ma yọ́n OKLUNỌ gba, podọ humọ yẹn ma to na gbọ Islaeli ni yi gba.

³Yé sọ dọmọ, Jiwheyẹwhe Heblu lẹ tọn ko pla mí: gbọ mí ni yì, mí vè wẹ azán atọ̀n gbejizọnlin biọ zùngbo mẹ, bo sánvọ́ hlan OKLUNỌ Jiwheyẹwhe mítọn; ewọ nikã yí azọ̀n do hò mí, kavi yí ohi do hò.

⁴Ahọlu Egipti tọn sọ dọ hlanyé, dọmọ, Etẹwutu wẹ mì, Moṣe po Aalon po, tún gbẹtọ lẹ sọn azón yetọn lẹ kọ́n? mì tónyì agbàn mítọn lẹ kọ̀n. ⁵Falo sọ dọmọ, Dayi e go, gbẹtọ aigba lọ tọn le yín mẹsusu dinvie, mìwlẹ sọ hen yé gbojẹ sọn agbàn yetọn lẹ mẹ. ⁶To azán doponẹ gbè, Falo degbèna azóngán gbẹtọ lẹ lọ tọn lẹ po azọngánpẹvi yetọn lẹ po, dọmọ, ⁷Mì ma to nasọ na ogbé gbẹtọ lẹ nado basi bliki ba gba, dile é te sọndò; gbọ yé ní yì bo dà ogbé na yéde. ⁸Sọha bliki lẹ tọn, he yé ko nọ basi sọndòj wẹ mì na dodoagbàn do yé ji: mì ma na dè núde pò sọn e mẹ: na yé yín adidọnọ; enẹwutu wẹ yé awhádo, dọmọ, Gbọ mí ni yì bo sánvọ́ hlan Jiwheyẹwhe mítọn. ⁹Gbọ azón he pènhú ni yín núdodoagbàn do gbẹtọ ewlẹ ji, na yé nido jiya to e mẹ; mì dike yé hò ohó lalo lẹ pọ́n blo. ¹⁰Azọngán gbẹtọ lẹ tọn sọ tónyì, po azóngánpẹvi yetọn lẹ po, bo dọhó hlan gbẹtọ lẹ, dọmọ, Le wẹ Falo dọ, dọmọ, Yẹn ma to ogbé na na mì gba. ¹¹Mìlọsu yì dà ogbé na mìde fie mì sọgan mọ ẹn te: na onú azón mítọn tọn de ma na yín whiwhe. ¹²Mowẹ gbẹtọ ewle vúnvún pé gbọn aigba Egipti tọn lẹpo ji nado dà zinkán na ogbé. ¹³Azọngán lẹ yín fìfiẹtọ, bo dọmọ, Mì hẹn azón mítọn lẹ pé, gbèdopo-zón mìtọn lẹ, di whenuena ogbé tin. ¹⁴Azóngánpẹvi ovi Islaeli tọn lẹ tọn, he azóngán Falo tọn lẹ dè do yé jí, yè nuli yé, bo to kinkanbiọ yé, dọmọ, Etẹwutu wẹ mì ma hẹn azón mítọn pé to osọ po egbé po, to bliki bibasi mẹ dile é te sọndò?

¹⁵Whenẹnu wẹ azóngánpẹvi ovi Islaeli tọn lẹ tọn wá bo dawhá dọ hlan Falo, dọmọ, Etẹwutu wẹ hiẹ to zinzán he devi towe lẹ dole? ¹⁶Yè ma na ogbé devi towe lẹ, yé sọ dọ na mí, dọ, Mì basi bliki: bo, dayi e go, yè to núli devi towe lẹ; podọ hiẹ na wàylan do omẹ towe go. ¹⁷Ṣigba ewọ dọmọ, Adidọnọ wẹ mì, adidọnọ wẹ mì: enẹwutu wẹ mì do dọmọ, Gbọ mí ni yì bo sánvọ́ hlan OKLUNỌ. ¹⁸Enẹwutu dinvie mì yì, bo wàzón; yè ma to ogbé de na na mì, gãnṣo mì na jo sọha bliki lẹ tọn.

¹⁹Azóngánpẹvi ovi Islaeli tọn lẹ tọn mọ dọ yéwlẹ lọsu tin to owù ylankan mẹ, whenuena yè dọmọ, Mì ma na dè núde pò sọn bliki mìtọn lẹ mẹ, gbèdopo-zón mítọn lẹ. ²⁰Ye sọ pe Moṣe po Aalon po, mehe site to aliho ji, le yé tón son Falo de ja: ²¹yé sọ dọ hlanyé, dọmo, OKLUNỌ ni pọ́n mì bo dawhè; na mìwlẹ hẹn wánvivi mítọn nado yín núgbẹwánna to nukun Falo tọn mẹ, podọ to nukun devi etọn lẹ tọn mẹ, nado yí ohi do alọ yetọn mẹ nado hù mí.

²²Moṣe sọ gò do OKLUNỌ de, bo dọmọ, OKLUNỌ, etẹwutu wẹ hiẹ hẹn oylan pla omẹ helẹ? etẹwutu wẹ hiẹ ko do mi hlan? ²³Na sọn whenu yẹn ko wá Falo de nado dọhó to oyín towe mẹ, wẹ ewọ ko to oylan hẹn pla omẹ hele; mọ hiẹ ma ko sọ whlẹn omẹ towe lẹ lala gba.

¹OKLUNỌ sọ dọ hlan Moṣe dọmọ, Dinvie wẹ hiẹ na mọ onú he yẹn na wá do Falo: na gbọn alọ huhlọnnọ dali wẹ ewọ na gbọ yé ni yì, podọ gbọn alọ huhlọnnọ dali wẹ ewọ na yàn yé tón sọn aigba etọn ji.

²Jiwheyẹwhe sọ dọhó hlan Moṣe, bo dọ hlan ẹn, dọmọ, Yẹn Jehova wẹ: ³yẹn sọawúhia hlan Ablaham, hlan Isaki, podọ hlan Jakobu, di Jiwheyẹwhe Ganhunupo, ṣigba gbọn oyín ṣie Jehova: dali wẹ yen ma yín mẹyinyónẹn hlan yé gba. ⁴Podọ yẹn ko hen alènu ṣie li hẹ yé ga, nado na aigba Kenani tọn yé, aigba wási yetọn tọn lẹ, ehemẹ yé wáwási te. ⁵Podọ humọ yẹn ko sè winwèn ovi Islaeli tọn lẹ tọn, mẹhe Egiptinu lẹ hẹndote do mẹglọnọ mẹ le; yẹn ko sọ flin alènu ṣie. ⁶Enẹwutu dọ hlan ovi Islaeli tọn lẹ, dọ, Yẹn Jehova wẹ, podọ yẹn na hẹn mí tón sọn agbàn Egiptinu lẹ tọn glọ, yẹn nasọ whlẹn mì sọn mẹglọnọ yetọn mẹ, yen na yí awà dindlẹn do fli mì, po whẹ̀dida daho lẹ po: ⁷Podọ yẹn na yí mì hlan dẽ na gbẹtọ de, yẹn nasọ yín Jiwheyẹwhe de hlan mì: mìwlẹ nasọ yónẹn dọ yẹn wẹ Jehova Jiwheyẹwhe mìtọn, he hẹn mì tón sọn agbàn Egiptinu lẹ tọn glọ. ⁸Yẹn nasọ hen mì yì aigba lọ ji, ehetọn dali yẹn zé alọ ṣie daga nado na ẹn hlan Ablaham, hlan Isaki, podọ hlan Jakobu: yẹn nasọ yí i na mì na ogú de. Yẹn Jehova wẹ.

⁹Moṣe sọ dọhó mọ hlan ovi Islaeli tọn lẹ: ṣigba yé ma tùntóai hlan Moṣe gba na awúfiẹsa ayiha tọn podọ na yinylan mẹglọnọ lọ tọn.

¹⁰OKLUNỌ sọ dọhó hlan Moṣe, dọmọ, ¹¹Yi hònmẹ, dọhó hlan Falo ahọlu Egipti tọn, dọ é ni gbọ ovi Islaeli tọn lẹ ni tónyì sọn aigba etọn ji. ¹²Moṣe sọ dọhó to OKLUNỌ nukọn, dọmọ, Dayi e go, ovi Islaeli tọn lẹ ma tùntoai hlan mi; nawẹ ahọlu Egipti tọn na sè ṣie do, mẹhe yín whẹmagbo nùflo le tọn?

¹³OKLUNỌ sọ dọhó hlan Mosẹ podọ hlan Aalon, bo sọ na yé gbèdide de hlan ovi Islaeli tọn lẹ, podọ hlan Falo ahọlu Egipti ton, nado hẹn ovi Islaeli tọn lẹ tón sọn aigba Egipti tọn ji.

¹⁴Ehelẹ wẹ owhénọ owhé otọ́ yetọn lẹ tọn tọn: visunnu Lẹubeni oplọnji Islaeli tọn tọn lẹ; Hanoki po Pali po, Hẹzloni po Kalmi po: ehelẹ wẹ ohẹnnu Lẹubeni tọn lẹ.

¹⁵Ovisunnu Simeoni tọn lẹ, Jẹmueli po Jamini po, Ohadipo Jakini po, Zohali po Ṣauli visunnu yọnnu Kenaninu tọn po: ehelẹ wẹ ohẹnnu Simeoni tọn lẹ.

¹⁶Ehelẹ wẹ oyín ovi Levi tọn lẹ tọn, kẹdẹdi whẹndo yetọn lẹ: Gelsoni po Kohati po, po Mẹlali po: owhè ogbè Levi tọn tọn lẹ wẹ owhè kantọ̀nfọtọ̀nnukunawe. ¹⁷Ovisunnu Gelsoni tọn lẹ; Libni po Simẹi po, kẹdẹdi whédo yetọn lẹ. ¹⁸Ovisunnu Kohati tọn lẹ; Amlami po Izhali po, Hẹbloni po Uzieli po: owhè ogbó Kohati tọn tọn lẹ wẹ owhè kantọ̀nwiatòn. ¹⁹Ovisunnu Mẹlali tọn lẹ; Mahlipo Muṣi po. Ehelẹ wẹ ohẹnnu Levinu lẹ tọn kẹdẹdi whẹndo yetọn lẹ.

²⁰Amlami yí Jokẹbẹdi nọviyonnu otọ́ etọn tọn na asi; ewọ sọ ji Aalon po Moṣe po nẹ: owhè ogbé Amlami tọn tọn lẹ wẹ owhè kantọ̀nfọtọ̀nnukunawe.

²¹Ovisunnu Izhali tọn lẹ; Kolahi po Nẹfegi po, po Zikli po. ²²Ovisunnu Uzieli tọn lẹ; Misaeli po Ẹlzafani po, po Sitli po. ²³Aalon sọ yí Eliṣẹba, viyọnnu Aminadabi tọn nọviyọnnu Nahsoni tọn do do asi; ewọ sọ ji Nadabi po Abihi po, Ẹlẹazali po Itamali po nẹ́. ²⁴Ovisunnu Kolahi tọn lẹ; Àsili po Ẹlkana po, po Abiasafi po; ehelẹ wẹ ohẹnnu Kolahinu lẹ tọn. ²⁵Ẹlẹazali visunnu Aalon tọn yí dopo to viyọnnu Putieli tọn lẹ tọn mẹ do do asi; ewọ sọ ji Finẹhasi nẹ́. Ehelẹ wẹ whénọ owhé otọ́ Levinu tọn lẹ tọn tọn kẹdedi ohẹnnu yetọn lẹ.

²⁶Ehelẹ wẹ Aalon po Moṣe nẹ po, mẹhe OKLUNỌ dọ hlan, dọ, Hẹn ovi Islaeli ton lẹ tón sọn aigba Egipti tọn ji kẹdẹdi awhànpa yetọn lẹ. ²⁷Ehelẹ wẹ yé mẹhe dọhó hlan Falo ahọlu Egipti tọn, nado hẹn ovi Islaeli tọn lẹ tón sọn Egipti: ehelẹ wẹ Moṣe po Aalon nẹ po.

²⁸E sọ wá jọ to azán lọ ji whenuena OKLUNỌ dọhó hlan Moṣe to aigba Egipti tọn ji, ²⁹wẹ OKLUNỌ dọhó hlan Moṣe, dọmọ, Yẹn OKLUNỌ wẹ: dọhó he yẹn dọ hlan we lẹpo hlan Falo ahọlu Egipti tọn.

³⁰Moṣe sọ dọ to OKLUNỌ nukọn, dọ, Dayi e go, whẹmagbo nùflo lẹ tọn wẹ yẹn, nawẹ Falo na tùntóai hlan mi do?

¹OKLUNỌ sọ dọ hlan Moṣe, dọ, Pọ́n, yẹn ko yí we do basi yẹwhe de hlan Falo: Aalon nọvisunnu towe na yín yẹwhegan towe. ²Hiẹ na dohó he yẹn degbè etọn na we lẹpo: Aalon nọvisunnu towe na dọhó hlan Falo, dọ é ni gbọ ovi Islaeli tọn lẹ ni tọ́nyì sọn aigba etọn ji. ³Yẹn nasọ hẹn ayiha Falo tọn sinyẹn, bo sọ hẹn azón ohia tọn ṣie lẹ po nújawu ṣie lẹ po zùn susu to aigba Egipti tọn ji. ⁴Ṣigba Falo ma na tuntóai hlan mì gba, yẹn nasọ zé alọ ṣie do Egipti ji, bo hẹn awhànpa ṣie lẹ jẹgbonu, omẹ ṣie ovi Islaeli tọn lẹ, sọn aigba Egipti tọn ji gbọn whẹ̀dida daho lẹ dali. ⁵Egiptinu lẹ nasọ yónẹn dọ yẹn wẹ OKLUNỌ, whenuena yẹn dlẹn alọ ṣie jẹgbonu do Egipti ji, bo hẹn ovi Islaeli tọn lẹ tón sọn ṣẹnṣẹn yetọn.

⁶Moṣe po Aalon po sọ wà mọ; dile OKLUNỌ degbèna yé do, mọwẹ yé wà do. ⁷Moṣe yín owhè kanwe mẹho, Aalon sọ yín owhè kanwenukunatọ̀n mẹho, to whenuena yé dọhó hlan Falo.

⁸OKLUNỌ sọ dọhó hlan Moṣe podọ hlan Aalon, dọmọ, ⁹Whenuena Falo na dọhó hlan mì, dọmọ, Do nújawu de hia na mì: whenẹnu hiẹ na dọ hlan Aalon, Yí opò towe, bo zé e dlẹn aigba to Falo nukọn: é na lẹzùn odàn de. ¹⁰Moṣe po Aalon po biọ hònmẹ yì Falo de, yé wà mọ, dile OKLUNỌ degbèna yé do: Aalon sọ zé opò etọn dlan aigba to Falo nukọn po to devi etọn lẹ po nukọn, é sọ lẹzùn odàn de.

¹¹Whenẹnu Falo ga ylọ gbẹtọ núyónẹntọ lẹ po owọntọ lẹ po: yé ga, nújlẹtọ Egipti tọn lẹ yí nújijlẹ yetọn do wà mọkẹkẹdẹkẹ. ¹²Na dopodopo yetọn zé opò etọn dlẹn aigba, yé sọ lẹzun odàn lẹ: ṣigba opò Aalon tọn zé opò yetọn lẹ mì. ¹³Ayiha Falo tọn sọ zun sinsinyẹn, é ma sọ tùntóai hlan yé; dile OKLUNỌ ko dọhó do.

¹⁴OKLUNỌ sọ dọ hlan Moṣe, dọmọ, Ayiha Falo tọn yín adingbannọ é kó nado gbọ gbẹtọ ewlẹ ni yì, ¹⁵Tónyì Falo de to afọnnu; pọ́n, é tón jei tòpa; hiẹ na site to otọ́ tó, nado pé e; opò he yè diọ zùn odàn wẹ hiẹ na yí hẹn to alọ towe mẹ. ¹⁶Hiẹ nasọ dọ hlan ẹn, dọmọ, OKLUNỌ, Jiwheyẹwhe Heblu lẹ tọn lọ, ko do mi hlan we, dọmọ, Gbọ omẹ ṣie lẹ ni yì, na yé nido sẹ́n mi to zùngbo mẹ: bo, dayi e go, kaka jẹ dinvie hiẹ ma ko nató gba. ¹⁷Le wẹ OKLUNỌ dọ, Ehe mẹ wẹ hiẹ na yónẹn dọ yẹn wẹ OKLUNỌ: dayi e go, yẹn na yí opò he tin to alọ ṣie mẹ li osìn he tin to otọ̀ mẹ ji, yè nasọ diọ yé zùn ohùn ¹⁸Whevi he tin to otọ̀ mẹ na kú, otọ̀ nasọ lunwan; Egiptinu lẹ nasọ gbẹwánna nado nù osìn sọn otọ lọ mẹ.

¹⁹OKLUNỌ sọ dọ hlan Moṣe, dọ, Dọ hlan Aalon, dọ, Yi opò towe, bo dlẹn alọ towe do osìn Egipti tọn lẹ ji, do otọ̀ yetọn lẹ ji, do tòsisá yetọn lẹ ji, podọ do otándo yetọn lẹ ji, podọ do avundoe osìn yetọn lẹpo tọn ji, na yé nido lẹzùn ohùn; bọ ohùn na tin lédo aigba Egipti tọn lẹpo, to núzinzán atin tọn lẹ mẹ, podọ to núzinzán zannu tọn lẹ mẹ.

²⁰Moṣe po Aalon po sọ wà mọ, dile OKLUNỌ degbèna yé do: ewọ sọ zé opò lọ daga bo li osìn he tin to otọ́ lọ mẹ lẹ, to Falo nukunmẹ, podọ to devi etọn lẹ nukunmẹ: osìn he tin to otọ̀ lọ mẹ lẹpo tte yè diọ zùn ohùn. ²¹Whevi he tin to otò lọ mẹ sọ kú: otọ́ lọ sọ to wanlùn, Egiptinu lẹ ma sọ sọgan nù osìn sọn otò lọ mẹ: ohùn lọ sọ tin lẹ́do to aigba Egipti ton lẹpo ji.

²²Nújlẹtọ Egipti tọn lẹ bọ yí nújijlẹ yetọn lẹ do basi mọkẹkẹdẹkẹ: yè bọ hẹn ayiha Falo tọn sinyẹn, é ma sọ tùntóai hlan yé gba; dile OKLUNỌ dọhó do. ²³Falo sọ ló bo yì owhó etọn gbè, yèdọ mọ é ma tlẹ sọ yí do ayiha mẹ lẹnpọ́n. ²⁴Egiptinu lẹpo sọ kundò lédo otò lọ na osìn nado nù: na yé ma sọgan nù sọn osìn otò lọ tọn mẹ gba ²⁵Yè hẹn azán ṣinawe lọ pó, to godo na OKLUNỌ ko linú otọ́ lọ.

¹OKLUNỌ sọ dọ hlan Moṣe, dọ, Yi hònme to Falo de, bo dọ hlan ẹn, dọ, Le wẹ OKLUNỌ dọ, Gbọ omẹ ṣie le ni yì, na yé nido sẹ́n mi. ²Podọ eyín hiẹ gbẹ́ nado gbọ yé ni yì, dayi e go, yẹn na yi obese lẹ do linu agbègbè towe lẹpo: ³Otò lọ nasọ yí obese do sawẹn, he na hẹ́ji bó wá biọ owhé towe gbè, bo biọ adọhó towe mẹ, bo hẹ́ adọzan towe ji, bo biọ owhé devi towe lẹ tọn gbe, bo hẹ́ gbẹtọ towe lẹ ji, bo biọ nuhitẹn towe lẹ mẹ, podọ biọ aklahòpanko towe lẹ mẹ. ⁴Obese lẹ lọ na hẹ́ji wá hiẹ po omẹ towe lẹ po ji, po devi towe lẹpo po ji.

⁵OKLUNỌ sọ dọ hlan Moṣe, dọ, Dọ hlan Aalon, Yí alọ towe do dlẹn opò towe do otọ́ le ji, do asisa lẹ ji, podọ do tándo lẹ ji, bo hẹn obese lẹ nado héaga wá aigba Egipti tọn ji. ⁶Aalon sọ dlẹn alọ etọn tón do osìn Egipti tọn lẹ ji; obese lọ sọ héaga, bo ṣinyọn aigba Egipti tọn ji.

⁷Nújlẹtọ lẹ sọ yí nújijlẹ yetọn lẹ do wà mọkẹkẹdẹkẹ, bo hẹn obese lẹ wá aigba Egipti tọn ji.

⁸Whenẹnu wẹ Falo ylọ Moṣe po Aalon po, bo dọmọ, Yé OKLUNỌ, na é ni dè obese lẹ sọn dẽ, podọ sọn omẹ ṣie lẹ de; yẹn nasọ gbọ gbẹtọ ewlẹ ni yì, na yé nido sánvọ́ hlan OKLUNỌ. ⁹Moṣe sọ dọ hlan Falo, dọ, Hiẹ ni tindo gigo he to oji e: bo dọ ojlẹ tẹ́wẹ yẹn na vẹ́vẹ́ na we na, podọ na devi towe lẹ, podọ na omẹ towe lẹ, na yè nido và obese lẹ sọn de we, podọ sọn owhé towe lẹ gbẹ̀, bo pò to otò mẹ kẹdẹ.

¹⁰Ewọ sọ dọmọ, Naosọ̀. Ewọ sọ dọmọ, E ni yín kẹdẹdi ohó towe: na hiẹ nido yónẹn dọ mẹde ma tin di OKLUNỌ Jiwheyẹwhe mítọn. ¹¹Obese lẹ lọ na yì sọn de we, podọ sọn owhé towe lẹ gbè, podọ sọn devi towe lẹ de, podọ sọn omẹ towe lẹ de; otò mẹ kẹdẹ wẹ yé na pò te.

¹²Moṣe po Aalon po tónyì sọn Falo de. Moṣe sọ javisu OKLUNỌ gbọn obese lẹ lọ tọn sinmẹ, ehe é hẹn wá Falo ji. ¹³OKLUNỌ sọ wà kẹdẹdi ohó Moṣe tọn; obese lẹ sọ kú sọn owhé lẹ gbè, sọn awanu lẹ, podọ sọn danji lẹ. ¹⁴Yé bé yé pli do gọ̀nugọ́nu, aigba lọ sọ lùnwan. ¹⁵Ṣigba whenuena Falo mọ dọ aimẹvo tin, é hẹn ayiha etọn sinyẹn, bo ma sọ tùntóai hlan yé gba; dile OKLUNỌ ko dọhó do.

¹⁶OKLUNỌ sọ dọ hlan Moṣe, dọ, Dọ hlan Aalon, dọ, Dlẹn opò towe tón, bo li kọ́gudu aigba tọn, na é nido lẹzùn ojọ́ lédo aigba Egipti tọn lẹpo. ¹⁷Yé wà mọ; Aalon sọ yi alọ etọn do dlẹn opò etọn tọn, bo li kógudu aigba tọn, ojó lẹ sọ tin to gbẹtọ go, podọ to kanlin go; kógudu aigba tọn lẹpo sọ lẹzùn ojó lẹ lẹ́do aigba Egipti tọn lẹpo.

¹⁸Nújlẹtọ lẹ yí nújijlẹ yetọn lẹ do wà mọ, nado hẹn ojó lẹ jẹgbonu, aigba yé ma sọgan: ojọ́ lẹ sọ tin to gbẹtọ go, podọ to kanlin go. ¹⁹Whenẹnu wẹ nújlẹtọ lẹ dọ hlan Falo, dọ, Alọviyẹyẹ Jiwheyẹwhe tọn wẹ ehe: yè sọ hẹn ayiha Falo tọn sinyẹn, ewọ ma sọ tùntóai hlan yé gba; dile OKLUNỌ ko dọhó do.

²⁰OKLUNỌ sọ dọ hlan Moṣe, dọ, Fọ́n to afọnnufũ, bo site to Falo nukọn; dayi e go, é ja otò tó, bo dọ hlan ẹn, dọ, Le wẹ OKLUNỌ dọ, Gbọ omẹ ṣie lẹ ni yì, na yé nido sẹ̀n mi. ²¹Ṣigba, eyín hiẹ ma na gbọ omẹ ṣie lẹ ni yì gba, dayi e go, yẹn na do sisawẹ́n supọ lọ tọn hlan oji we, podọ hlan devi towe lẹ ji, podọ hlan omẹ towe lẹ ji, podọ biọ owhó towe lẹ gbè: owhó Egiptinu lẹ tọn na sọ yín gigọ́ na sisawón supọ lẹ tọn, podọ aigba ehe ji yé te ga. ²²Yẹn nasọ glọn to azán nẹ gbè aigba Gosẹni tọn ehẹ ji omẹ ṣie lẹ nọnọ̀, dọ sisawẹ̃n supọ lẹ tọn de ma na tin to finẹ: na hiẹ nido yónẹn dọ yẹn wẹ OKLUNỌ to ṣẹnṣẹn aigba tọn. ²³Yẹn nasọ yí kinklán de do ṣẹnṣẹn na omẹ ṣie lẹ po omẹ towe lẹ po: osé wẹ ohia he na jọ.

²⁴OKLUNỌ sọ wà mọ; sisawón supọ lẹ tọn sọ wá biọ owhó Falo tọn gbe, podọ biọ owhé devi etọn lẹ tọn gbè: podọ to aigba Egipti tọn lẹpo ji, yè sọ hẹn aigba lọ gble gbọn sisawón supọ lẹ tọn tọn dali.

²⁵Falo ylọ Moṣe bo sọ ylọ Aalon, bo domọ, Mì yì, sánvọ́ hlan Jiwheyẹwhe mìtọn to otò mẹ. ²⁶Moṣe sọ dọmọ, E ma jẹ do mọ nado wà gba; na míwlẹ na yí osùnú Egiptinu lẹ tọn do sánvọ́ hlan OKLUNỌ Jiwheyẹwhe mítọn: dayi e go, mìwlẹ na yí osùnú Egiptinu lẹ tọn do sánvọ́ to nukun yetọn mẹ, bó yé ma na dlẹn zannu do mí? ²⁷Míwlẹ na yì azán atọ̀n gbejizọnlin biọ zùngbo mẹ, bo sánvọ́ hlan OKLUNỌ Jiwheyẹwhe mítọn, dile é na degbena mí do. ²⁸Falo sọ dọmọ, Yẹn na gbọ mì ni yì, na mì nido sánvọ́ hlan OKLUNỌ Jiwheyẹwhe mìtọn to zùngbo mẹ: mì ma na yì nukọn glanglan blo janwẹ: vóvó na mi. ²⁹Moṣe sọ dọmọ, Dayi e go, yẹn tón sọn de we jei, yẹn na vè OKLUNỌ na sisawón supọ lẹ tọn nido yì sọn Falo de, sọn devi etọn lẹ de, podọ sọn omẹ etọn lẹ de to osò: aigba yè sọ dike Falo zán oklọ ba blo to ma gbọ gbẹtọ ewlẹ ni yì nado sánvọ́ hlan OKLUNỌ mẹ.

³⁰Moṣe sọ tón sọn Falo de, bo vó OKLUNỌ. ³¹OKLUNỌ sọ wà kẹdẹdi ohó Moṣe tọn; é sọ dè sisawón supọ lẹ tọn sọn Falo de, sọn devi etọn lẹ de, podọ sọn omẹ etọn lẹ de; é ma pò dopo. ³²Falo sọ hẹn ayiha etọn sinyẹn to ojlẹ he mẹ ga, é ma sọ gbọ gbẹtọ ewlẹ ni yì gba.

¹WHENẸNU wẹ OKLUNỌ dọ hlan Moṣe, dọ, Biọ hònmẹ yí Falo de, bo dọ né, Le wẹ OKLUNỌ dọ, Jiwheyẹwhe Heblu lẹ tọn, Gbọ omẹ ṣie lẹ ni yi, na yé nido sén mi. ²Na eyín hiẹ gbé nado gbọ yé ni yì, bo na hẹn yé go jànwẹ, ³dayi e go, alọ OKLUNỌ tọn tin to kanlinyìnyìn towe he tin to danji lẹ go, to osó lẹ go, to kẹtẹkẹtẹ lẹ go, to kanklosọpóawenọ lẹ go, to omá lẹ go, to kanlinpa lẹ go: azónylankanylankan de na tin.

⁴OKLUNỌ na glọnali to kanlinyìnyìn Islaeli tọn po kanlinyìnyọ́ìn Egipti tọn po ṣẹnṣẹn: núde ma to na kú sọn ehe yín ovi Islaeli tọn tọn lẹpo mẹ. ⁵OKLUNỌ sọ do ojlẹ didè de, dọmọ, Osọ̀ OKLUNỌ na wà onú he to aigba ji.

⁶OKLUNỌ sọ wà onú nẹ to aihọngbè, kanlinyìnyìn Egipti tọn lẹpo kú: ṣigba sọn kanlinyìnyìn ovi Islaeli tọn lẹ tọn mẹ wẹ ode ma kú te. ⁷Falo sọ domẹhlan, bo, dayi e go, é ma tin sọ dopo sọn kanlinyìnyìn Islaelinu lọ tọn mẹ he yín osiọ. Ṣigba ayiha Falo tọn yín adingbannọ, é ma sọ dike gbẹtọ ewlẹ ni yì gba.

⁸OKLUNỌ sọ dọ hlan Moṣe podọ hlan Aalon, dọ, Ba alọgogọ́ afín tọn hẹn sọn zòhọ̀ mẹ, bo gbọ Moṣe ni fú i hlan olọn to Falo nukunmẹ. ⁹E nasọ lẹzùn kógudu flinflin to aigba Egipti tọn lẹpo ji, é nasọ yín nutitẹ de he na yí lanwiwọ do wusìn to gbẹtọ go, podọ to kanlin go, lẹ́do aigba Egipti tọn lẹpo. ¹⁰Yé sọ yí afin zòhọ tọn, bo ṣite to Falo nukọn; Moṣe sọ fú i daga hlan olọn; é sọ lẹzùn nutitẹ de he yí lanwiwọ do wusìn to gbẹtọ go, podọ to kanlin go. ¹¹Nújlẹtọ lẹ ma sọgan site to Moṣe nukọn gba na nutitẹ lẹ wutu; na nutitẹ lẹ tin to nújlẹtọ lẹ go, podọ to Egiptinu le go. ¹²OKLUNỌ sọ hẹn ayiha Falo tọn sinyẹn, é ma sọ tùntóai hlán yé gba; dile OKLUNỌ ko dọhó hlan Moṣe do.

¹³OKLUNỌ sọ dọ hlan Moṣe, dọ, Fọ́n to afọnnufù, bo site to Falo nukọn, bo dọ hlan ẹn, dọ, Le wẹ OKLUNỌ dọ, Jiwheyẹwhe Heblu lẹ tọn, Gbo omẹ ṣie lẹ ni yi, na yé nido sẹ́n mi. ¹⁴Na yẹn to ojlẹ he mẹ na do azònylankan ṣie lẹpo hlan aigba towe ji, podo hlan devi towe lẹ ji, podọ hlan omẹ towe lẹ ji; na hiẹ nido yónẹn dọ mẹde ma tin di yẹn to aigba lẹpo mẹ. ¹⁵Na dinvie wẹ yẹn ko dè alọ ṣie tọ́n bo yí azònylankan do hò hiẹ po omẹ towe lẹ po, hiẹ ko sọ yín mẹsinsan sẹ̀ sọn aigba mẹ: ¹⁶ṣigba tò zìnzán lọ me na ehe tọn wutu wẹ yẹn hẹn we nado ṣite, nado do huhlọn ṣie hia we, podọ na oyín ṣie nido yín lìla lẹ́do aigba lẹpo ji ¹⁷Jẹ dinviehiẹ gbẹ́ sọ to dewe zé daga do ome ṣie lẹ ji, bọ hie ma na do gbọ yé ni yi? ¹⁸Dayi e go, to osò to ojle he me yẹn na hẹn ẹn nado ja okẹnsu susu di jikun, ehe hunkọ ma ko tin to Egipti sọn whenu yè ko do é ai yèdọ kaka jẹ dinvie. ¹⁹Enẹwutu dinvie, domẹhlan, yawu bo bé kanlin-yìnyìn towe lẹ wá owhé po onú he a tindo to danji lẹpo po; na gbẹtọ po whékanlin depope po he yè mọ to danji, bọ yè ma na hẹn wá whégbè, okẹnsu na jẹte wá yé ji, yé na sọ kú.

²⁰Ewọ he dibúna ohó OKLUNỌ tọn to devi Falo tọn lẹ mẹ hẹn devi etọn lẹpo kanlinyìnyìn etọn lẹ po hòn biọ ohò lẹ mẹ: ²¹ewọ he ma ho ohó OKLUNỌ tọn pọ́n jo devi etọn lẹ po kanlinyìnyìn etọn lẹ po do danji.

²²OKLUNỌ sọ dọ hlan Moṣe, dọ, Dlẹn alọ towe jẹgbonu hlan olọn, na okensu nido tin to aigba Egipti tọn lẹpo ji, to gbẹtọ go, podọ to whékanlin go, podọ to omá danji tọn lẹ go, lẹ́do aigba Egipti tọn.

²³Moṣe sọ dlẹn opò etọn jẹgbonu hlan olọn OKLUNỌ sọ do ósò po kẹnsu po hlan, miyọn sọ hònwezun jete do aigba ji; OKLUNỌ sọ ja okẹnsu di jikun do aigba Egipti tọn ji. ²⁴Mowẹ okensu tin, bọ miyọn flusọ okẹnsu lọ, é sù gbahú, ehe hunkọ ma ko tin to aigba Egipti tọn lẹpo ji sọn whenu é ko lẹzùn akọta de. ²⁵Okẹnsu lọ sọ hò núhe tin to danji lẹpo gbẹtọ po whékanlin po lẹ́do aigba Egipti tọn lẹpo, bo sọ wén atin he to danji lẹpo. ²⁶Aigba Gosẹni tọn ji fie ovi Islaeli tọn lẹ te kẹdẹ, wẹ okẹnsu de ma te.

²⁷Falo sọ domẹhlan, bo ylọ Moṣe po Aalon po, bo dọ hlan yé, dọ, Yẹn ko wàylando to ojlẹ he mẹ: dódónọ wẹ OKLUNỌ, yẹn po omẹ ṣie lẹ po wẹ mẹylankan. ²⁸Vẹ́ OKLUNỌ; na osò po okẹnsu huhlọnnọ helẹ po ko pó; yẹn na sọ gbọ mìwlẹ ni yì, mì ma na sọ nọte dindẹn gba. ²⁹Moṣe sọ dọ hlan ẹn, dọ, Plaun le yẹn tón ja sọn otò mẹ, yẹn na té alọ ṣie lẹ jegbonu hlan OKLUNỌ; osò na doalọte, mo okẹnsu de ma na sọ tin ba; na hie nido yónẹn dọ OKLUNỌ tọn wẹ aigba. ³⁰Ṣigba na hiẹ po devi towe lẹ po, yẹn yónẹn do mì ma to na dibúna OKLUNỌ Jiwheyẹwhe jãnwẹ.

³¹Yè hò sekantin po gbado bale po: na gbado bale tin to oflo mẹ, sekantin sọ yín sẹ́gba. ³²Ṣigba olikún po gbado lie po Wẹ yè mahò: na yé ma ko yín whin whén gba.

³³Moṣe sọ tónyì sọn otò mẹ sọn Falo de, bo tó alọ etọn lẹ jẹgbonu hlan OKLUNỌ, osò lẹ po kẹnsu po doalọte, yè ma sọ kòn jikun do aigba ji ba. ³⁴Whenuena Falo mọ dọ yè hẹn jikun po kẹnsu po, po osò lẹ po dote, é sọ vó ylandowà, bo sọ hẹn ayiha etọn sinyẹn, ewọ po devi etọn lẹ po. ³⁵Yè sọ hẹn ayiha Falo tọn sinyẹn, é ma sọ gbọ ovi Islaeli tọn lẹ ni yì gba; dile OKLUNỌ ko dọhó do gbọn Moṣe dali.

¹OKLUNỌ sọ dọ hlan Moṣe, dọ, Yì họ̀nmẹ to Falo de: na yẹn ko hẹn ayiha etọn sinyẹn, po ayiha devi eton lẹ tọn po, na yẹn nido wà ohia ṣie helẹ to ṣẹnṣẹn yetọn: ²podọ na hiẹ nido dọ to otọ́ visunnu towe tọn lẹ mẹ, podọ to visunnu visunnu towe tọn lẹ tọn mẹ, núhe yẹn wà do Egipti go lẹ , po ohia he yẹn basi to ṣẹnṣẹn yetọn lẹ po; na míwlẹ nido yónẹn dọ yẹn wẹ OKLUNỌ.

³Moṣe po Aalon po sọ biọ họ̀nme yì Falo de, bo dọ hlan ẹn, dọ, Le wẹ OKLUNỌ dọ Jiwheyẹwhe Heblu lẹ tọn, Na é na dẹn sọ bọ hiẹ na do kọ́ nado huwhẹ dewe to nukọn ṣie? gbọ omẹ ṣie lẹ ni yì, na yé nido sẹ́n mi. ⁴E ma yín mọ, eyín hiẹ kọ́ nado gbọ omẹ ṣie lẹ ni yì, dayi e go, osọ̀ wẹ yẹn na hẹn owẹ́n lẹ biọ agbègbè towe mẹ: ⁵yé na ṣinyọn nukun aigba tọn ji, bọ mẹde ma na sọgan nado mọ aigba: yé na dù pipòtọ ehe yè pòdote tọn, ehe pò hlan we sọn okẹnsu de, bo na sọ dù atin depope he wu na we sọn danji: ⁶owhé towe lẹ wẹ yè na gọ́, po owhé devi towe lẹpo tọn lẹ po, po owhé Egiptinu lepo tọn lẹ po: di ehe hunkọ otọ́ towe lẹ kavi otọ́ otọ́ towe lẹ tọn ma ko mọ, sọn whenu yé ko tin to aigba mẹ kaka jẹ azán he gbè. Ewọ sọ lẹ bo tónyì sọn Falo de.

⁷Devi Falo tọn lẹ sọ dọ hlan ẹn, dọ, Na é na dẹn sọ bọ dawe he na do yín omó de hlan mí? gbọ gbẹtọ ewlẹ ni yi, na yé nido sẹ̀n OKLUNỌ Jiwheyẹwhe yetọn: bé hiẹ ma ko yónẹn jẹ dinvie dọ yè và Egipti?

⁸Yè sọ vọ́ Moṣe po Aalon po hen wá Falo de: ewọ sọ dọ hlan yé, dọ, Yì, són OKLUNỌ Jiwheyẹwhe mìtọn: ṣigba mẹnu wẹ yé he na yì? ⁹Moṣe sọ dọmọ, Mí po mẹflinflin mítọn lẹ po po mẹho mítọn lẹ po, po visunnu mítọn lẹ po po viyọnnu mítọn lẹ po, po kanlinpa mítọn le po po ogbọpa mítọn lẹ po, wẹ jei; na míwle mananọmawà de hlan OKLUNỌ gba. ¹⁰Ewọ sọ dọ hlan yé, dọ, Mowẹ OKLUNỌ ni tin po mì po, dile yẹn na gbọ mì ni yì do, po yọ̀pọ flinflin mìtọn lẹ po; mì payi e go; na oylan tin mì nukọn. ¹¹Mọ ma wẹ gba: mì he yín sunnusi lẹ ni yì lè, bo sẹ́n OKLUNỌ; na enẹ wẹ núhe mì jlo. Yè sọ yàn yé tón sọn Fàlo nukọn. ¹²OKLUNỌ dọ hlan Moṣe, dọ, Dlẹn alọ towe tón do aigba Egipti tọn ji na owẹ́n lẹ, na yé nido hẹ́ji wá aigba Egipti tọn ji, bo dù omá aigba tọn, yèdọ ehe kẹnsu: o jodai lẹpo.

¹³Moṣe sọ dlẹn opò etọn tón do aigba Egipti tọnji, OKLUNỌ sọ hẹn jẹhọn whèzẹtẹn tọn wá aigba lẹpo ji to okle nẹ lẹpo, podọ to ozán lọ mẹ; whenuena é yín afọnnu, jẹhọn whèzẹtẹn tọn lọ hẹn owẹ́n lẹ wá. ¹⁴Owẹ́n lẹ sọ hóaga yì aigba Egipti tọn lẹpo ji, bo sọ jẹ́ do agbègbè Egipti tọn lẹ mẹ; susu wẹ yé; jẹnukọn na yé owẹ́n lẹ de ma ko tin di yetọn hunkọ, mọ to yetọn godo mọhunkọ tọn ma na tin. ¹⁵Na yé ṣinyọn nukun aigba tọn lẹpo ji, sọmọ bọ yè hẹn aigba dozinvlu; yé sọ dù omá aigba tọn lẹpo, po sinsẹ̀n atin le tọn lẹpo po he kẹnsu ko jodai le: onu omú de ma sọ pò, atin kavi omá danji tọn, lédo aigba Egipti tọn lẹpo.

¹⁶Whenẹnu wẹ Falo ylọ Moṣe po Aalon po plaun: é sọ dọmọ, Yẹn ko wàylando do OKLUNỌ Jiwheyẹwhe mìtọn, podọ do mìwlẹ. ¹⁷Enẹwutu dinvie, yẹn vẹ́ we, jo ylando ṣie na mi whladopo he kẹdẹ, bo vẹ́ OKLUNỌ Jiwheyẹwhe mìtọn, na é nido zé okú he yì sọn dẽ kẹdẹ.

¹⁸Ewọ sọ tónyì sọn Falo de, bo vẹ́ OKLUNỌ. ¹⁹OKLUNỌ sọ diọ jẹhọn gangan sinsinyẹn whèyihọ tọn, he zé owẹn lẹ yìaga, bo yàn yé biọ Ohù Vẹ mẹ; owẹn dopo ma pò to agbègbè Egipti ton lẹpo mẹ. ²⁰Ṣigba OKLUNỌ hẹn ayiha Falo tọn sinyẹn, é ma sọ gbọ ovi Islaeli tọn lẹ ni yì gba.

²¹OKLUNỌ sọ dọ hlan Moṣe, dọ, Dlẹn alọ towe tón hlan olọn dali, na zinvlu nido tin to aigba Egipti tọn ji, yèdọ zinvlu he yè sọgan tónpón.

²²Moṣe sọ dlẹn alọ etọn tón hlan olọn dali; zinvlu titli de sọ tin to aigba Egipti tọn lẹpo ji azán atọ̀n; ²³yé ma mọ yenọzo, mọ mẹde ma tite sọn otẹn etọn mẹ họ̀ azán atón: ṣigba ovi Islaeli tọn lẹpo tindo hinhọ́n to fininò yetọn lẹ mẹ.

²⁴Falo sọ ylọ Moṣe, bo dọmọ, Mì yì, sẹ́n OKLUNỌ; aigba gbọ kanlinpa mìtọn lẹ po gbọpá mìtọn lẹ po ni yín hẹndote: gbọ yọ̀pọ mìtọn lẹ ni yì hẹ mì ga. ²⁵Moṣe sọ dọmọ, Hiẹ ma sọgan gòn ma na do alọ mítọn mẹ avọ́ lẹ po núnina mimẹ̀ lẹ po, na mí nido sánvọ́ hlan OKLUNỌ Jiwheyẹwhe mítọn. ²⁶Kanlinyìnyìn mítọn lẹ ga na yì po mí po; yè ma na jo ofọ́n dopo do godo; na míwlẹ mananọma yí sọn e mẹ nado són OKLUNỌ Jiwheyẹwhe mítọn; mi ma sọ yón núhe mí mananọma yí do són OKLUNỌ, kaka mí na do jẹ dọn.

²⁷Ṣigba OKLUNỌ hẹn ayiha Falo tọn sinyẹn, ewọ ma sọ jlo na gbọ yé ni yì. ²⁸Falo sọ dọ hlan ẹn dọ, Bó dewe sọn dẽ, yí ayipipa na dewe, a sọ mọ nukunmẹ ṣie ba blo; na azán he mẹ hiẹ sọ mọ nukunmẹ ṣie te wẹ hiẹ na kú, ²⁹Moṣe sọ dọmọ, Hiẹ ko dọhó dagbedagbe; Yẹn ma na sọ vó nukunmẹ towe mọ gbède ba gba.

¹OKLUNỌ sọ dọ hlan Moṣe, dọ, Azònylankan dopo dogó wẹ sọ pò bọ yẹn na hẹn wá Falo ji, po Egipti po ji; enẹgodo ewọ na gbọ mì ni yì sọnfi: whenuena ewọ na gbọ mì ni yì, ewọ na yàn mì jegbonu nugbonugbo sọnfi patapata. ²Dọhó to otọ́ gbẹtọ lẹ tọn lẹ mẹ lo, bo gbọ sunnu dopodopo ni biọ to kọmẹnu etọn si, yọnnu dopodopo to kọmẹnu etọn si, núzinzán fataka tọn lẹ, po núzínzán sika tọn lẹ po.

³OKLUNỌ sọ na nukundagbe gbẹtọ ewlẹ to nukun Egiptinu lẹ tọn mẹ. Humọ dawe lọ Moṣe sọ yín mẹkiklo talala to aigba Egipti tọn ji, to devi Falo tọn lẹ nukunmẹ, podọ to gbẹtọ ewlẹ nukunmẹ.

⁴Moṣe sọ dọmọ, Le wẹ OKLUNỌ dọ, To zánhomẹ jlẹmẹ wẹ yẹn na tónyì biọ ṣẹnṣẹn Egipti tọn: ⁵bọ plọnji lẹpo to aigba Egipti tọn ji na kú, sọn plọnji Falo tọn he sinai to ofìn etọn ji, yèdọ kaka jẹ plọnji deviyọnnu he tin to gilise godo tọn ji; po plọnji kanlinyìnyìn lẹpo tọn po. ⁶Awhá daho na sọ tin lẹ́do aigba Egipti tọn lẹpo, ehe hunkọ de ma ko tin di i, de ma na sọ tin di i gbède ba gba. ⁷Ṣigba do ovi Islaeli tọn lẹ tọn de go wẹ avún de ma na dlẹn odó etọn do, do gbẹtọ go kavi do kanlin go: na mì nido yónẹn dọ OKLUNỌ yí vògbigbọn de do ṣẹnṣẹn Egiptinu lẹ po Islaeli po tọn. ⁸Devi towe he lẹpo na jẹte wá dẽ, bo na dó yéde hlan mi, dọmọ, Tọ́njẹgbonu, po gbẹtọ he hodo we lẹpo po: to enẹgodo yẹn na tónyì. Ewọ sọ tónyì sọn Falo de to adi miyọn-awu mẹ. ⁹OKLUNỌ sọ dọ hlan Moṣe, dọ, Falo ma na tùntóai hlan we gba: na yè nido hẹn nújawu ṣie lẹ sudeji to aigba Egipti tọn ji; ¹⁰Moṣe po Aalon po wà nújawu he lẹpo to Falo nukọn: OKLUNỌ sọ hẹn ayiha Falo tọn sinyẹn, é ma sọ gbọ ovi Islaeli tọn lẹ ni yì sọn aigba etọn ji gba.

¹OKLUNỌ sọ dọhó hlan Moṣe po Aalon po to aigba Egipti tọn ji, dọmọ, ²Osùn he wẹ na yín dòdo osùn lẹ tọn hlan mì: é na yín tintan osùn owhè tọn hlan mi. ³Mì dọhó hlan agùn Islaeli tọn lẹpo, dọ, Azán aotọ osùn he tọn, sunnu dopodopo yetọn na yí lẹngbọvu de, kẹdẹdi owhé otọ́ yetọn lẹ tọn lẹ, lẹngbọvú de na whédò de: ⁴eyín whódò lọ yín pẹvi gbahú na lẹngbọvu de, whenẹnu wẹ ewọ po kọmẹnu etọn he bọdo owhe etọn go po na yí dopo kẹdẹdi sọha gbẹtọ lẹ lọ tọn; kẹdẹdi dùdù omẹ dopodopo tọn wẹ mì na basi sọha mìtọn do na lẹngbọvu lọ. ⁵Lẹngbọvú mìtọn na yín matin apagonanọ, asú owhè dopo mẹho: lẹngbọ lẹ mẹ wẹ mì na yí i sọn, kavi sọn gbọgbọẹ lẹ mẹ: ⁶míwlẹ na sọ whlá ẹ kaka jẹ azán wiẹnẹtọ osùn nẹ tọn gbè: bẹ́dopọ péte agùn Islaeli tọn tọn na hù i to whèjai. ⁷Yé na sọ yí to ohùn etọn mẹ, bo yí do dòtin awe he to adamẹ lẹ go, podọ do whlẹlidemẹ go, podọ do ohọ̀ yetọn hemẹ yé na dù i te go. ⁸Yé na dù olàn etọn to ozán nẹ mẹ, he yè yí miyọn do mẹ́, po akla madotón po; omá vivẹ yé na do dù i. ⁹Mì dù sọn e mẹ to omú blo, mì yí osìn do sọakunsìn etọn lala blo, ṣigba miyọn wẹ mì ni yí do mẹ́ ẹn; ota etọn po asá etọn lẹ po po hòmẹnú ohò etọn mẹ tọn lẹ po. ¹⁰Mìwlẹ ma na gbọ núde etọn ni pò kaka jẹ afọnnu lọ; ṣigba ehe pò sọn e mẹ kaka jẹ afọnnu mì na yí miyọn do fiọ ẹ. ¹¹Le wẹ mì na dù i do; po alinkan mìtọn po bibla, afọpa mìtọn lẹ to afọ mìtọn, po opò mìtọn po to alọ mìtọn mẹ: mìwlẹ na sọ dù i to whlẹndo mẹ: juwáyì OKLUNỌ tọn wẹ. ¹²Na yẹn na dagbọn aigba Egipti tọn ji to ozán nẹ mẹ, bo na ho plọnji lẹpo to aigba Egipti tọn ji, gbẹtọ po kanlin po; podọ to yẹwhe Egipti tọn lẹ go wẹ yẹn na hẹn whẹ̀dida lẹ ṣẹ̀ do: yẹn wẹ OKLUNỌ. ¹³Ohùn lọ na sọ yín na mì ohia de to ohò mìtọn lẹ ji fie mì te: whenuena yẹn mọ ohùn lọ yẹn na dagbọn mì ji wáyì azònylankan de ma to na tin to mi ji nado hù mì súdo gba, whenuena yẹn hò aigba Egipti tọn.

¹⁴Azán he na yín hlan mì na ofin de, mì na sọ wà ẹ na hùnwhẹ de hlan OKLUNỌ: lẹ́do whẹndó mìtọn lẹ mì na wà ẹ na hùnwhẹ de gbọn oséndoai dali kakadoi. ¹⁵Azán ṣinawe wẹ mì na dù akla madotón họ̀; yèdọ to azán tintan gbè mì na dè otọ́n sọn owhé mìtọn lẹ gbè: na mẹdepope he dù akla otọ́nnọ sọn azán tintan gbè kaka jẹ azán sinawetọ gbè, dawe nẹ yè na sán sẹ́ sọn Islaeli. ¹⁶To azán tintan mẹ opli wiwó de na tin na mì podọ to azán sinawetọ mẹ opli wiwé de; yè ma na wà azọ́n alọpa de to yé mẹ gba, adavo dọ ehe omẹ dopodopo na dù, enẹ kẹdẹ wẹ yè na wà to mì me. ¹⁷Mìwlẹ na sọ payi hùnwhẹ akla madotọ́n tọn lọ go; na azán doponẹ he gbè gẽ wẹ yẹn hẹn awhànpa mìtọn lẹ tón sọn aigba Egipti tọn ji: enẹwutu wẹ mì na nọ payi azán he go gbọn whẹndo mìtọn lẹpo mẹ gbọn osẹ́ndoai de dali kakadoi.

¹⁸To osùn tintan mẹ, to azán wiẹnẹtọ osùn lọ tọn ji to whèjai, mìwlẹ na dù akla madotón kaka jẹ azán konukundopotọ osùn lọ tọn to whèjai. ¹⁹Azán ṣinawe yè ma na mọ otọ́n de to owhé towe lẹ gbè: na mẹdepope he dù onú otọnnọ de, dawe nẹ yè na sán sẹ́ sọn agùn Islaeli tọn mẹ, eyín é yín wásinu kavi ode he yè ji to aigba lọ ji. ²⁰Mì ma na dù onú otọ́nnọ de; to fininò mìtọn lẹpo mẹ wẹ mi na dù akla madotọn te.

²¹Whenẹnu wẹ Moṣe ylọ meho Islaeli tọn lẹpo, bo dọ hlan yé dọmọ, Sẹwá gbonu, bo yí lẹngbọvú lẹ na mìde kẹdẹdi whédò mìtọn lẹ, bo hù juwáyì lọ. ²²Mìwlẹ nasọ yi adì hisọpu tọn de, bo ylọn ẹn do ohùn he tin to siklẹ lo mẹ mẹ, bo yí ohùn he tin to siklẹ lo mẹ mì do whlẹlidemẹ lọ go podọ do dotin awe he to adamẹ lẹ go; depope mìtọn ma na ton jẹ gbonu hòngbo owhé mìtọn tọn godo kaka jẹ afọnnu lọ gba ²³Na OKLUNỌ na dawáyì nado hò Egiptinu lẹ; whenuena ewọ sọ mọ ohùn lọ to whlẹlidemẹ lọ go, podọ to dòtin awe he to adamẹ lẹ go, OKLUNỌ na dagbọn ohọ̀n lọ ji wáyì, bo ma na dikena mẹvatọ nado sẹ́pó owhé mìtọn lẹ nado hò mì gba. ²⁴Mìwlẹ na sọ nọ payi onú he go na osẹ́ndoai de hlan we podọ hlan visunnu towe lẹ kakadoi. ²⁵E na sọ wá jọ, whenuena yè hẹn mì wá aigba lọ ji ehe OKLUNỌ na na mì, kẹdẹdi le é ko dopagbe do, dọ míwlẹ na payi sinsẹ̀n he go. ²⁶E na sọ wá jọ, whenu-ena visunnu mìtọn lẹ na dọ hlan mì, dọ, Eté wẹ mì lẹ̀n gbọn sinsẹ̀n he dali? ²⁷Wẹ mì na dọ, dọ, Avọ́ juwáyì OKLUNỌ tọn tọn wẹ, mẹhe dagbọn owhé ovi Islaeli tọn lẹ tọn ji wáyì to Egipti, whenuena é hò Egiptinu lẹ, bo whlẹn owhé mítọn lẹ. Gbẹtọ lẹ sọ dó ota odò bo sèn ²⁸Ovi Islaeli tọn lẹ yì bo wá mọ; dile OKLUNỌ ko degbèna Moṣe po Aalon po do, mọwẹ yé wà do.

²⁹E sọ wá jọ to zánhomẹ, wẹ OKLUNỌ hò plọnji lẹpo to aigba Egipti tọn ji, sọn plọnji Falo tọn he sinai to ofìn etọn jì jẹ plọnji mẹmẹglọ tọn he ko tin to gànhọmẹ; po plọnji whékanlin tọn lẹpo po.

³⁰Falo sọ fọ́n site to ozán mẹ, ewọ po devi etọn lẹ po, po Egiptinu lẹpo po; awhá daho de sọ tin to Egipti; na owhé de ma tin fie omẹ dopo ma yín osiọ te.

³¹Ewọ sọ ylọ Moṣe po Aalọn po to ozán mẹ, bo dọmọ, Fọ́n ṣite, mì tónyì sọn gbẹtọ ṣie lẹ mẹ, mìwlẹ po ovi Islaeli tọn lẹ po; bo yì, sẹ́n OKLUNỌ, dile mì ko dọ do. ³²Mì yí kanlinpa mìtọn lẹ, po kanlinpó mìtọn lẹ po, dile mì ko dọ do, bo yì; bo dona mi ga.

³³Egiptinu lẹ sọ yín vivenunọ to gbẹtọ ewlẹ ji nado yàn yé ton sọn aigba lọ ji do plaun; na yé dọmọ, Mi omẹ pó yín gbẹtọ osiọ. ³⁴Gbẹtọ ewlẹ sọ yi linfinhihò yetọn, whẹpo yè do dotón ẹn, linfinhihopanko yetọn yín bibla do avọ̀ yetọn lẹ mẹ to abó yetọn lẹ ji. ³⁵Ovi Islaeli tọn lẹ wà kededi ohó Moṣe tọn; yé sọ biọ sọn Egiptinu lẹ si núzinzán fataka tọn lẹ, po núzinzán sika tọn lẹ po, po avọ̀ po: ³⁶OKLUNỌ sọ na nukundagbe gbẹtọ ewlẹ to nukun Egiptinu lẹ tọn me, sọmọ bọ yé gbẹ yé ni tindo núhe yé biọ lẹ. Yé sọ yí Egiptinu lẹ do dugbànna.

³⁷Ovi Islaeli tọn lẹ sọ jẹgbèdopozọnlinji gbọn afọ sọn Laamsesi jẹ Sukkoti, sunnusi fọtónfọtón donu núọntòn nkọ, mahia yọ̀pọ lẹ. ³⁸Mẹsusu flusọ hẹ́ji yì hẹ yé ga; kanlinpa lẹ po kanlinpó lẹ po, yèdọ kanlinyìnyìn susugégé. ³⁹Yé só linfinhiho madotón zoplọplọ mẹ tọn he yé hẹn tón sọn Egipti, na ye ma ko dotón ẹn gba; na yè yàn yé tón sọn Egipti wutu wẹ, bo ma sọgan sọ dọngban, mọ yé ma ko wleawu na núdùdù de na yéde.

⁴⁰Wiwási ovi Islaeli tọn lẹ tọn, he yé wáwási to Egipti, wẹ owhè fòwegbàn. ⁴¹E sọ wá jọ to opodo owhè fòwegbàn tọn, yódọ to azán doponẹ lọ gbè, é wá jọ, bọ awhànpa OKLUNỌ tọn lẹpo tónyì sọn aigba Egipti tọn ji.

⁴²Ozán de wẹ nado yín ayipadego hlan OKLUNỌ na hinhẹn yé tón sọn aigba Egipti tọn ji: ehe ozán OKLUNỌ tọn nẹ, nado yín ayipadego talala to ovi Islaeli tọn lẹpo tọn de lédo whẹndo yetọn lẹ.

⁴³OKLUNỌ sọ dọ hlan Moṣe po Aalon po, dọ, Ehe wẹ oséndoai juwáyì lọ tọn: akòdevo de ma na dù to e me: ⁴⁴ṣigba devi omẹ dopodopo tọn he yè yí akuẹ do họ̀, whenuena hiẹ ko gbòwhẹ nè, whenẹnu wẹ̀ é na dù to e mẹ. ⁴⁵Wásinu de po devi pakanọ po ma na dù to e me. ⁴⁶Owhé dopo gbè wẹ yè na dù i te; hiẹ ma na hen olan etọn depope tọn je gbonu sọn owhé lọ gbè; mọ mì ma na gbà ohú de to e mẹ. ⁴⁷Agùn Islaeli tọn lepo wẹ na payi e go . ⁴⁸Whenuena wásinu de na wáwási hẹ mì, bo na payi juwáyì, lọ go hlan OKLUNỌ, gbọ yè ni gbowhẹna sunnusi etọn lẹpo, whenẹnu gbọ é ni sewá bo payi e go: ewọ na sọ tin di mẹhe yè ji to aigba lọ ji: ṣigba omẹ magbòwhẹnọ ma na dù to e mẹ. ⁴⁹Osén dopo wẹ na tin hlan ewọ he yín jidòwhó podọ hlan ojonọ lọ he wáwási to mì ṣẹnṣẹn.

⁵⁰Le wẹ ovi Islaeli tọn lẹpo wà; dile OKLUNỌ degbèna Moṣe po Aalon po do, mọwẹ yé wà do.

⁵¹E sọ wá jọ to azán doponẹ lọ gbè, wẹ OKLUNỌ hen ovi Islaeli tọn lẹ tọn sọn aigba Egipti tọn ji kẹdẹdi awhànpa yetọn lẹ.

¹OKLUNỌ sọ dọhó hlan Moṣe, dọmọ, ²Klán plọnji lẹpo do wiwé hlan mi, núdepope he hùn adò to ovi Islaeli tọn lẹ ṣẹnṣẹn, gbẹtọ tọn po kanlin tọn po: ṣie wẹ.

³Moṣe sọ dọ hlan gbẹtọ lẹ, dọ, Flin azán he, ehe mẹ mì tón sọn Egipti te, sọn owhé mẹglọnọ tọn gbè; na gbọn huhlọn alọ ton dali wẹ OKLUNỌ hẹn mì tẹ́n sọn aigba he ji: yè ma na dù akla otónnọ de. ⁴Azán he gbè wẹ mì tọ́nyì to osùn Ábibi mẹ.

⁵E na sọ yín whenuena OKLUNỌ na hẹn mì biọ aigba Kenaninu tọn, Hitinu tọn, po Amolinu tọn po, po Hivinu tọn po, po Jẹbusinu tọn po ji, ehe é whlé hlan otọ́ mìtọn lẹ nado na we, aigba de he yí anọsìn po owín po do to sisá, dọ hiẹ na nọ pọ́n sinsẹ́n he go to osùn he mẹ. ⁶Azán ṣinawe mì na do dù akla madotọn, azán sinawetọ gbè na yín hùnwhẹ de hlan OKLUNỌ. ⁷Akla madotón wẹ yè na dù hò azán ṣinawe lọ; yè ma na mọ akla otónnọ de to de we, mọ yè ma na mọ otọ́n de to de we to agbègbè towe lẹpo mẹ. ⁸Hiẹ na sọ dọ na visunnu towe to azán nẹ gbè, dọ, Na enẹ tọn he OKLUNỌ wà na mi whenuena yen tón wá yì sọn Egipti wutu we. ⁹E na sọ yín na ohia de hlan we to alọ towe go, podọ na oflin de to nukun towe lẹ ṣẹnṣẹn, dọ osén OKLUNỌ tọn nido tin to onù towe mẹ; na alọ huhlọnnọ we OKLUNỌ do hẹn we tón sọn Egipti. ¹⁰Enẹwutu hiẹ na nọ payi oséndoai he go to owhè etọn nù to whèmẹ whème.

¹¹E na sọ yín whenuena OKLUNỌ na hen we hó aigba Kenaninu tọn ji dile e whlé hlan we do podọ hlan otọ́ towe lẹ, bo na na ẹn we, ¹²dọ hiẹ na dè do ola hlan OKLUNỌ ehe hùn adò lẹpo, po plọnji lepo po he hiẹ tindo he sọn kanlin de me wá; asú lẹ na yín OKLUNỌ ton ¹³Plonji kẹtẹkẹte tọn lẹpo hiẹ na yí lengbọvú dopo do fli; eyín hiẹ ma na fli i, whenẹnu hiẹ na wén okò etọn: plọnji gbẹtọ tọn lẹpo to visunnu towe lẹ ṣẹnṣẹn we hie na fli.

¹⁴E na sọ yín whenuena visunnu towe kanbiọ we to ojle he ja mẹ, dọ, Eté wẹ ehe? wẹ hiẹ na dọ hlan ẹn, dọ, Gbọn huhlọn alọ tọn dali wẹ OKLUNỌ do hẹn mí tón sọn Egipti, sọn owhé mẹglọnọ tọn gbè: ¹⁵é sọ wá jọ, whenuena é ma bọawu na Falo nado gbọ mí ni yì, wẹ OKLUNỌ hù plọnji lẹpo to aigba Egipti tọn ji, plọnji gbẹtọ tọn po plọnji kanlin tọn po: enẹwutu wẹ yẹn yí do sánvọ́ hlan OKLUNỌ ehe hùn adò lẹpo, bo yín asu; ṣigba plọnji visunnu ṣie lẹ tọn lẹpo wẹ yẹn fli. ¹⁶E na sọ yín na ohia de to alọ towe go, podọ na nukunmẹblanú lẹ de to nukun towe lẹ ṣẹnṣẹn: na gbon huhlọn alọ tọn dali wẹ OKLUNỌ do hẹn mí tón sọn Egipti.

¹⁷E sọ wá jọ, whenuena Falo ko gbọ gbẹtọ ewlẹ yì, wẹ Jiwheyẹwhe ma plan yé gbọn aliho aigba Filistinu lẹ tọn tọn ji gba, na le é sẹpọ́ sọ; na Jiwheyẹwhe dọmọ, Eya gbẹtọ ewlẹ nikã diọ whenuena yé mọ awhàn, bo lẹ́gọ̀ do Egipti: ¹⁸ṣigba Jiwheyẹwhe plan yè pé gbọn aliho zùngbo tọn dali gbọn Ohù Vẹ̃ mẹ: ovi Islaeli tọn lẹ hẹ́ji yì sọn aigba Egipti tọn ji to gbaja mẹ.

¹⁹Moṣe sọ zé ohú Josefu tọn lẹ hẹn yì po e po: na é ko hẹn ovi Islaeli tọn lẹ whlé titegbe, dọ, Jiwheyẹwhe na dla mì pọ́n nugbonugbo; míwlẹ na sọ hẹn ohú ṣie lẹ hẹ́ji sọnfi yì po mì po.

²⁰Yé sọ yí gbedopozọnlin yeton sọn Sukkoti, bo whesla do Etami, to agbègbè zùngbo tọn. ²¹OKLUNỌ sọ to ylyì to nukọn na yé to okle to dòtin aslọ tọn de mẹ, nado do aliho hia yé; podo to ozan mẹ to dòtin miyọn ton de me, nado na hinhọ́n yé; na yé nido to yìyì to okle po ozán po; ²²Dòtin aslọ tọn to okle, dòtin miyọn ton to ozán mẹ, ma yì sọn nukọn gbẹtọ ewlẹ tọn gba.

¹OKLUNỌ sọ dohó hlan Moṣe, dọmọ, ²Dọhó hlan ovi Islaeli tọn lẹ, dọ yé ni lẹ́ bo whesla do Pi-hahiloti, nukọn, to Migdoli po ohù po ṣẹnṣẹn, to Baali-Zefọni nukọn: titegbe nẹ wẹ mì na whesla do to ohù tó. ³Falo nasọ dọ na ovi Islaeli ton lẹ tọn, dọ, Yè hen yé jan to aigba lọ ji, zùngbo ko glon yé do e mẹ. ⁴Yẹn nasọ hẹn ayiha Falo tọn sinyẹn, ewọ nasọ domọna yé; yen nasọ tindo gbegbò na dẽ to Falo ji, podọ to awhànpa etọn lẹpo ji; Egiptinu lẹ nasọ yónẹn dọ yẹn wẹ OKLUNỌ. Yé sọ wá mo.

⁵Yè sọ dọ na ahọlu Egipti tọn, dọ, Gbẹtọ ewlẹ wòyì; ayiha Falo tọn po devi etọn lẹ tọn po sọ yín didiọ do gbẹtọ ewlẹ go, yé sọ dọmọ, Ete wẹ mìwlẹ wà he, bo mi ko do gbọ Islaeli yì sọn mí sinsẹ́n mẹ? ⁶E sọ jla kẹkẹ eton lọ do, bo yí omẹ etọn lẹ po e po. ⁷E sọ yí kekẹ didè lẹ núọntòn, po kẹkẹ Egipti tọn lẹpo po, po awhàngandaho lẹ po do popo yé tọn ji. ⁸OKLUNỌ sọ hẹn ayiha Falo ahọlu Egipti tọn sinyẹn, ewọ sọ yànmona ovi Islaeli tọn lẹ: na ovi Islaeli tọn le tónyì po alọ jiyìyì tọn de po. ⁹Egiptinu lẹ sọ yànmọna yé, osé lẹ po keke Falo tọn lẹpo po, osónọ etọn lẹ, po awhàngbé etọn lẹ po, bo pla yé to slawhiwhe mẹ to ohù tó, to Pihahiloti go, to Baali-Zefoni nukọn.

¹⁰Whenuena Falo dọ̀n sẹpọ́, ovi, Islaeli tọn lẹ zé nukun yetọn lẹ daga, bo, dayi e go, Egiptinu lẹ to ja to gódo yetọn; obú so dí yé gbahúgbahú: ovi Islaeli tọn lẹ sọ dawhá ylọ OKLUNỌ. ¹¹Yé sọ dọ hlan Moṣe, dọ, Yọdò lẹ de ma tin to Egipti wutu wẹ hie bẹ́ mí tọn nado kú to zùngbo mẹ? etẹwutu wẹ hiẹ zán dole hẹ mí, nado hẹn mí tón sọn Egipti? ¹²E ma yín ehe wẹ zọn he mí dọ hlan we to Egipti, dọmọ, Gbọ sọn mí go, na mí nido sèn Egiptinu lẹ? Na e pónte na mí nido sẹ̀n Egiptinu lẹ hú na mi nido kú to zùngbo mẹ.

¹³Moṣe so dọ hlan gbẹtọ ewlẹ, dọ, Mìwlẹ-dibú blo, ṣite gũ, bo mọ whléngan OKLUNỌ tọn, he ewọ na basi na mì to egbé; na Egiptinu lẹ mẹhe mì mọ to egbé mì ma na sọ vó yé mọ gbèdegbède ba kakadoi. ¹⁴OKLUNỌ na hòavùn na mì, mìwlẹ nasọ bò onù mìtọn do.

¹⁵OKLUNỌ sọ dọ hlan Moṣe, dọ, Etẹwutu wẹ hie to awhádo ylọ mi? dọhó hlan ovi Islaeli tọn lẹ dọ yé ni to nukọn yì. ¹⁶Hiẹ bo jlọ opò towe daga bo dlẹn alọ towe titegbe do ohù ji, bo má ẹn: ovi Islaeli tọn lẹ nasọ biọ ṣẹnṣẹn ohù tọn gbọn aigba kló ji. ¹⁷Podọ yẹn, dayi e go, yen na hẹn ayiha Egiptinu lẹ tọn sinyẹn, yé nasọ biọ e mẹ do domọna yé: yẹn nasọ tindo gbégbò na dẽ to Falo ji, podọ to awhànpa etọn lẹpo ji, to kẹkẹ etọn le ji, podọ to osónọ etọn le ji. ¹⁸Egiptinu lẹ nasọ yónẹn dọ yẹn wẹ OKLUNỌ, whenuena yen ko tindo gbégbò na dẽ to Falo ji, to kekẹ etọn lẹ ji, podọ to osọ́nọ etọn le ji.

¹⁹Àngeli Jiwheyẹwhe tọn he yìyì nukọn na osla Islaeli tọn, diọtẹn bo yì godo yetọn; dotin aslọ tọn lọ diọtẹn sọn nukọn yetọn bo site to godo yeton: ²⁰E sọ wá osla Egipti tọn po osla Islaeli tọn po ṣẹnṣẹn; aslọ lọ po zinvlu lọ po te, gãnṣo é to hinhọ́n na to ozánmẹ: ode ma tlin sẹpọ́ awetọ to ozán lọ mẹ.

²¹Moṣe sọ dlẹn alọ ẹtọn do titegbe do ohù ji; OKLUNỌ sọ hẹn ohù jagò yì godo gbọn jẹhọn sinsinyẹn whèzẹtẹn tọn dali to ozán lẹpo mẹ, bo hẹn ohù zùn aigba kló, osìn lẹ sọ má. ²²Ovi Islaeli tọn lẹ sọ biọ ṣẹnṣẹn ohù tọn mẹ gbọn aigba kló ji: osìn lẹ sọ yín adó hlan yé to adusi yetọn me podọ to amiyọn yetọn mẹ. ²³Egiptinu lẹ sọ domọna yé, bo biọ e mẹ hodo yé yì ṣẹnṣẹn ohù tọn, osọ́ Falo tọn lẹpo, kẹkẹ etọn lẹ, po osónọ etọn lẹ po.

²⁴E sọ wá jọ to hihó afọnnu tọn whenu, wẹ OKLUNỌ pọ́n hlan awhànpa Egiptinu lẹ tọn gbọn dòtin miyọn po aslọ tọn po mẹ bo wlu awhànpa Egiptinu lẹ tọn ²⁵E sọ fẹ́ kẹkẹfọ yetọn lẹ bọ yé to yé dọ̀n gbọn aigba na pinpẹn: sọmọ bọ Egiptinu lẹ dọmọ, Gbọ mí ni hónyì sọn nukun Islaeli tọn mẹ; na OKLUNỌ to avùnhò na yé hẹ Egiptinu lẹ.

²⁶OKLUNỌ sọ dọ hlan Moṣe, dọ, Dlẹn alọ towe tón titegbe do ohù ji, na osìn lẹ nido gọwá Egiptinu lẹ ji, to kẹke yetọn lẹ ji, podọ to osọ́nọ yetọn le ji.

²⁷Moṣe sọ dlẹn alọ etọn tón titegbe do ohù ji, ohù sọ gò do huhlọn etọn ji whenuena afọnnu sọawúhia; Egiptinu lẹ sọ hòn sọta ẹ, OKLUNỌ sọ takiti na Egiptinu lẹ to ṣẹnṣẹn ohù lọ tọn. ²⁸Osìn lẹ sọ gò, bo ṣinyọn kẹkẹ lẹ ji, po osónọ lọ po, yèdọ awhànpa Falo tọn lepo he domọna yé biọ ohù lọ mẹ; é ma pò sù sọ dopo yé tọn. ²⁹Ṣigba ovi Islaeli tọn le zinzọníin gbọn aigba kló ji to ṣẹnṣẹn ohù tọn; osìn le so yín adó de hlan ye to adusi yetọn me podọ to amiyọn yetọn mẹ.

³⁰Le wẹ OKLUNỌ whlẹn Islaeli do to azán nẹ gbè sọn alọ Egigtinu lẹ ton mẹ; Islaeli sọ mọ osiọ Egiptinu le tọn to ohù tó. ³¹Islaeli sọ mọ azón daho he OKLUNỌ wà to Fgiptinu lẹ go, gbẹtọ ewlẹ sọ dibúna OKLUNỌ: yé sọ yise to OKLUNỌ mẹ, podọ to devi etọn Moṣe mẹ.

¹WHENẸNU wẹ Moṣe po ovi Islaeli tọn lẹ po ji o àn he hlan OKLUNỌ, bo dọhó, dọmọ,

¹⁹Na osé Falo tọn lẹ biọ humẹ po kẹkẹ etọn lẹ po po osónọ etọn lẹ po yì ohù mẹ, OKLUNỌ sọ VỌ osìn ohù tọn lẹ hẹn wá yé ji; ṣigba ovi Islaeli tọn lẹ to zọnlinzin to aigba kló ji to ṣẹnṣẹn ohù tọn.

²⁰Miliam yẹwhegan, nọviyọnnu Aalọn tọn zé akòhún de do alọ me: yọnnu lẹpo sọ tọn hodo e po akòhún lẹ po po owè po. ²¹Miliam sọ gblọnna yé dọ,

²²Moṣe so plan Islaeli yi nukọn sọn Ohù Vẹ̃ tó, yé sọ tón yì biọ zùngbo Suli tọn mẹ; yé to yìyì azán atọ̀n to zùngbo mẹ, bo ma mọ osìn de. ²³Whenuena ye wá Mala, yé ma sọgan nù sọn osìn Mala tọn mẹ gba, na é yín vivẹ: enẹwutu wẹ yè do ylọ oyín etón dọ Mala. ²⁴Gbetọ lẹ sọ to hunhlun do Moṣe go, domọ, Eté wẹ mí na nù? ²⁵Ewọ sọ dawhá hlan OKLUNỌ; OKLUNỌ sọ do atin de hia ẹ, ewọ sọ zé e dlẹn osìn lẹ mẹ, yè sọ hẹn osìn lẹ vivi. Finẹ wẹ é basi sẹndai de po aṣẹdai de po na yé te, fine we é sọ whlé ye pọ́n te; ²⁶Ewọ sọ dọmọ, Eyín hiẹ na yí sọwhiwhe do tùntóai hlan ogbè OKLUNỌ Jiwheyẹwhe towe tọn, bo na wà enẹ he jlọ to nukun etọn lẹ mẹ, bo na na otọ́ hlan gbèdide etọn lẹ, bo payi séndai etọn lẹpo go, yẹn ma na yí depope azón lẹ tọn do ogo we gba, ehe yẹn ko yí do Egiptinu lẹ go: na yẹn OKLUNỌ he hẹnazọ̀ngbọna we wẹ.

²⁷Yé sọ wa Elim, fie asisa wiawe osìn tọn lẹ ko te, po odetin kandegbàn po: yé sọ whesla do finẹ to osìn lẹ tó.

¹YE sọ jẹgbèdopozọnlinji sọn Elim, agùn ovi Islaeli tọn lẹ tọn lẹpo wá zùngbo Sini tọn mẹ, ehe tin to Elim po Sinai po ṣẹnṣẹn, to azán fọtọ̀ntọ osun awetọ tọn, to tint-ónyì yetọn godo sọn aigba Egipti tọn ji. ²Agùn ovi Islaeli tọn lẹ tọn pete to hunhlun do Moṣe go podọ do Aalon go to zùngbo mẹ. ³Ovi Islaeli tọn lẹ dọ hlan yé dọ, E pónte dọ mí ko kú gbọn alọ OKLUNỌ tọn dali to aigba Egipti tọn ji, whenuena mí sinai to olànzén lẹ kòn, whenuena mí to núdù góhò; na mìwlẹ ko hẹn mí tón biọ zùngbo he mẹ, nado yí hùvẹ́ do hù agùn he pete.

⁴Whenẹnu wẹ OKLUNỌ dọ hlan Moṣe dọ, Dayi e go, yẹn na ja akla jikun sọn olọn na mì; gbẹtọ lẹ na sọ tón yì bo sọ nọ ṣinyan mimá azán dopo tọn egbésọ egbesọ, na yẹn nido whlé yé pọ́n, eyín yé na zinzọnlin to osẹ́n ṣie mẹ kavi lala ⁵E na sọ wa jọ, to azán sidopotọ gbè, wẹ yé na wleawu enẹ he yé hẹn wá whégè ton, é na sọ yín susu do donuawe ji di ehe ye nọ sinyan egbésọegbésọ.

⁶Moṣe po Aalon po sọ dọ hlan ovi Islaeli tọn lẹpo, dọ, To whèjai, whenẹnu we mìwlẹ na yónen dọ OKLUNỌ ko hẹn mì tọn sọn aigba Egipti tọn ji: ⁷podọ to afọnnu, miwlẹ na mọ gigo OKLUNỌ tọn; na e sè hunhlun mìtọn lẹ do OKLUNỌ go: etẹ́ ka míwlẹ yìn, bọ mì do to hunhlun do mí go? ⁸Moṣe sọ dọmọ, Ehe na yín, whenuena OKLUNỌ na na mì olàn to whèjai nado dù, po lọ to afọnnu akla na dùgọ̀hò; na OKLUNỌ sè hunhlun mìtọn lẹ he mì hlun do e go: etẹ ka míwlẹ yín? hunhlun mìtọn lẹ ma yín do mílẹ go gba, ṣigba do OKLUNỌ go wẹ.

⁹Moṣe sọ dọ hlan Aalon, dọ, Dọ hlan agùn ovi Islaeli tọn tọn lẹpo, dọ, Wá sẹpọ́ nukọn OKLUNỌ tọn: na e ko sè hunhlun mìtọn lẹ.

¹⁰E sọ wá jọ, le Aalon dọhó hlan agùn ovi Islaeli tọn tọn pete, wẹ yé pọn hlan zùngbo dali, bo, dayi e go, gigo OKLUNỌ tọn sọawúhia to aslọ mẹ. ¹¹OKLUNỌ sọ dọhó hlan Moṣe, dọmọ, ¹²Yẹn ko sè hunhunlun ovi Islaeli tọn tọn lẹ: dọhó hlan yè, dọmọ, To whèjai mìwlẹ na dù olàn, podọ to afọnnu mìwlẹ na yín omẹ yè yí akla do gọho na; mìwlẹ na sọ yónẹn dọ yẹn wẹ OKLUNỌ Jiwheyẹwhe mìton.

¹³E sọ wá jọ to whèjai, wẹ asọkle lẹ wá aga, bo ṣinyọn oslahọ̀ ji: podọ to afọnnu ahún ṣinyọnai lẹ́do oslahò pé. ¹⁴Whenuena yè hẹn ahún he ṣinyọnai yì aga dayi e go, to nukunmẹ zungbo ji onú pẹvi loboto de, pẹvi di ahúngó wewe to aigba. ¹⁵Whenuena ovi Islaeli tọn lẹ mọ ẹn yé dọ hlan yénọzo, dọ, Etẹ́ é yín? na yé ma yón eté é yín. Moṣe sọ dọ hlan yé, dọ, Akla he OKLUNỌ na mì nado dù wẹ. ¹⁶Ehe wẹ onú he OKLUNỌ degbèna mì, Mì bẹ́pli sọn e mẹ omẹ dopodopo kẹdẹdi dùdú etọn; nújlẹnu omẹli tọn dopo na omẹ dopo, kẹdẹdi sọha gbẹtọ mìtọn lẹ tọn, wẹ mì na do yí i, omẹ dopodopo na yé he tin to gòhọ etọn mẹ lẹ. ¹⁷Ovi Islaeli tọn lẹ wà mọ, mẹdelẹ bẹ́plì húgan, mẹdelẹ whèhú. ¹⁸Whenuena yé yí ọmẹli do jlẹ ẹ, ewọ he bépli gége ma tindo núde lánai, podọ ewọ he bé pẹvide pli ma tindo núwhèdo; yé bépli omẹ dopodopo kẹdẹdi dùdù etọn. ¹⁹Moṣe sọ dọ hlan yé, dọ, Mì dike mẹde pòdai sọn e mẹ kaka jẹ afọnnu blo ²⁰Gãnṣo yé ma tùntóai hlan Moṣe gba; ṣigba delẹ to yé mẹ podai sọn e mẹ kaka jẹ afọnnu, é sọ jì owé bo lunwan, yè sọ hẹn Moṣe gblehòmẹ do yè go. ²¹Yé sọ nọ bé ẹ pli to afọnnu afọnnu, omẹ dopodopo kẹdẹdi dùdù etọn: whenuena owhè vé, é na yé. ²²E sọ wá jọ, do to azán ṣidopotọ gbè yé nọ bẹ́ donuawe pli sù sọ akla mọ nkọ, omeli awe na omẹ dopo: ogán agún tọn lepo lẹ wá bo dọ na Moṣe. ²³Ewọ sọ dọ hlan yé, dọ, Ehe wẹ enẹ he OKLUNỌ ko dọ, Osò wẹ gbọjẹ wiwé de, gbọjẹ zángbè wiwé hlan OKLUNỌ: hì ehe mì na hì, bo sọakunsin ehe mì na sọakunsìn; podọ ehe lán to e ji lepo mì bẹ́ dai na mì na yè ni do bẹ whlá kakajẹ afọnnu. ²⁴Yé sọ bé ẹ dai jẹ afọnnu, dile Moṣe degbè do: é ma sọ lunwan gba, mọ owé de ma tin to e mẹ. ²⁵Moṣe sọ dọmọ, Dù enẹ egbé; na egbé gbọjẹ de hlan OKLUNỌ: egbé mì ma to na mọ ẹn to danji gba. ²⁶Azán ṣidopo wẹ mì na do bé ẹ pli; ṣigba azán sinawetọ gbè wẹ gbọjẹzángbè, to e mẹ ode ma na tin. ²⁷È sọ jọ to azán sinawetọ gbè, wẹ mẹdelẹ sọn gbẹtọ lẹ mẹ tónyì na nado bépli, yé ma sọ mọ de. ²⁸OKLUNỌ sọ dọ hlan Moṣe dọ, Nawẹ mìwlẹ kó nado yìn aṣẹ ṣie po osẹ́n ṣie lẹ po dẹn sọ? ²⁹Mọ, na ehe OKLUNỌ ko na ogbọjẹ lọ mì, enẹwutu wẹ é na mì to azán sidopotọ gbè akla azán awe tọn; dopodopo mìtọn ni nò otẹn etọn mẹ, dike mẹde ton yì sọn otẹn etọn mẹ, to azán sinawetọ gbè blo. ³⁰Mowẹ gbẹtọ lẹ gbọjẹ to azán sinawetọ gbè. ³¹Owhé Islaeli tọn sọ ylọ oyín etọn dọ Mana; é taidi okún koliandeli tọn, wéwé; é vivi to onù mẹ di aklawadawada he yè yí owín do basi lẹ. ³²Moṣe sọ dọmọ, Ehe wẹ onú he OKLUNỌ ko degbena, Gbọ yè ni whla omeli-gigó de na whẹndo mìtọn lẹ; na yé nido mọ akla he yẹn yí do yìn mì to zungbo mẹ, whenuena yẹn hẹn mì tón sọn aigbá Egipti tọn ji ³³Moṣe sọ dọ hlan Aalọn dọ, Yi ozẹ́n de, bo yí omeli-gigó mana tọn de do e mẹ, bo? 4 e dai to OKLUNỌ nukọn, nado yín yíwhla na whẹndo miton lẹ. ³⁴Dile OKLUNỌ degbena Moṣe do, mọwẹ Aalọn zé e dai do to Alènu lọ nukọn, nado yín yiwhla. ³⁵Ovi Islaeli tọn lẹ sọ dù mana lọ hò owhè kande, kaka ye do wa aigba fininò de ji; yé dù mana lọ kaka yé do wá tòtògo aigba Kanani tọn tọn lẹ ji. ³⁶Dinvie omeh dopo yín madao efa dopo tọn.

¹AGUN ovi Islaeli tọn tọn lẹpo lẹ jẹgbejizonlinji sọn zungbo Sini tọn mẹ, gbọn gbejizọnlin yetọn lẹ dali, kedẹdi asẹ OKLUNỌ tọn, bo whesla do Lefidimi; osìn de ma sọ tin finẹ na gbẹtọ lẹ nado nù. ²Enẹwutu gbẹtọ lẹ wlewhè hẹ Moṣe, bo dọmọ, Na osìn mí na míwlẹ nido nù. Moṣe sọ dọ hlan yé dọ, Etẹwutu mìwlẹ to whwọ hẹ mi? etẹwutu wẹ mìwlẹ to OKLUNỌ whlepòn? ³Vẹhú gbẹtọ lẹ to finẹ na osìn; gbẹtọ lẹ sọ hunlun do Moṣe go, bo dọmọ, Etẹwutu wẹ hiẹ hen mí tón sọn Egipti, nado yí hùvẹ do hù mí po ovi mítọn le po po kanlinyìnyìn mìtọn lẹ po? ⁴Moṣe sọ dawhá hlan OKLUNỌ, dọmọ, Etẹ we yẹn na wà na gbẹtọ he? yé bla yín mẹwleawu nado yìnzannu mi. ⁵OKLUNỌ sọ dọ hlan Moṣe dọ, Jù yì to gbẹtọ lẹ nukọn bo yí dogọ dewe sọn mẹho Islaeli tọn lẹ mẹ; po opò towe po, ehe a yí do hò otọ̀, hẹn to alọ towe me, bo yì. ⁶Dayi e go, Yẹn na site nukọn towe to finẹ to osé lọ ji to Holẹbi; hiẹ na linu osé lọ, osìn na sọ tón wá sọn e mẹ, na gbẹtọ lẹ nido nù. Moṣe sọ wà mọ to nukun meho Islaeli tọn lẹ tọn mẹ. ⁷Ewọ sọ ylọ oyín finẹ lọ tọn dọ Masa, po Meliba po, na whwlehẹ ovi Islaeli tọn lẹ tọn wutu, podọ yé whle OKLUNỌ pọ́n wutu, dọmọ, Be OKLUNỌ to mí ṣẹnṣẹn, kavi lala?

⁸Whenẹnu wẹ Amalẹkì wá, bo hoavùn hẹ Islaeli to Lefidimi. ⁹Moṣe sọ dọ hlan Jọsua dọ, Dè omẹ to mí mẹ, bo tón yì, hoavùn hẹ Amalẹki: to osọ̀ yẹn na ṣite to aga okọta tọn jì po opò Jiwheyẹwhe tọn po to alọ ṣie mẹ. ¹⁰Mowẹ Jọsua wà do dile Moṣe ko dọ na ẹn do, bo hoavùn hẹ Amalẹki: Moṣe, Aalọn, po Huli po tọn yì aga okọta lọ tọn ji. ¹¹E sọ wá jọ, whenuena Moṣe hẹn alọ etọn daga, wẹ Islaeli nọ yànwhàn: whenuena é gọ́ alọ etọn do odò Amalẹki nọ yànwhàn. ¹²Ṣigba alọ Moṣe tọn lẹ yín pinpẹ́n; yé sọ zé zannu de, bo yí do oglọ nẹ̀, ewọ sọ sinai do e ji; Aalọn po Huli po hẹn alọ etọn lẹ daga, ode to awà dopo ji, awetọ to awà devo ji; alọ etọn lẹ sọ jlọwhetekakajẹ doyìyì owhè tọn. ¹³Jọsua sọ yí onù ohi tọn do yàn Amalẹki po omẹ etọn lẹ po. ¹⁴Oelunọ sọ dọ hlan Moṣe dọ, Wlan ehe na oflin de do owé de me, bo nọ hia ẹ to otọ́ Jọsua tọn lẹ mẹ: dọ yẹn na gbidi oflin Amalẹki tọn sẹ̀ sọn olọn glọ. ¹⁵Moṣe sọ do agbà de, bo ylọ oyín etọn dọ Jehova-nisi : ¹⁶ewo sọ dọmọ, OKLUNỌ ko whle: OKLUNỌ na tindo awhàn po Amalẹki po sọn whẹndo jẹ whẹndo.

¹DINVIE Jẹtlo, yewhenọ Midiani tọn, yónwhẹn Moṣe tọn, sè ehe Jiwheyẹwhe ko wà na Moṣe lẹpo tọn, podọ na Islaeli omẹ etọn lẹ, le OKLUNỌ ko hen Islaeli tón sọn Egipti do. ²Jẹtlo, yọnwhẹn Moṣe tọn, yí Zipola asi Moṣe tọn, ehẹ godo e ko dó e hlan yì, ³po visunnu etọn awe lẹ po; ehe tọn oyín ode tọn nọ yín Gelsomi; na é domọ, Yẹn ko yín wásinu to aigba j onọ de ji: ⁴oyín omẹ awetọ tọn nọ yín Eliezẹli; na é dọmo, Jiwheyẹwhe otọ́ ṣie tọn wẹ alọgọ ṣie, bo whlẹn mi sọn ohi Falo tọn si: ⁵Jẹtlo, yọ́nwhẹn Moṣe tọn wa Moṣe de po visunnu etọn lẹ po po asi etọn po biọ zungbo mẹ fie yè hẹn ẹn whesla do, to osó Jiwheyẹwhe tọn kòn. ⁶Ewọ sọ dọ hlan Moṣe dọ, Yẹn yónwhẹn towe Jẹtlo wá hiẹ de, po asi towe po po visunnu etọn awe he to e de lẹ po. ⁷Moṣe sọ tọn yì nado pé yọnwhẹn etọn, bo donúdo, bo donùnùgo nẹ; yé kan jijọho yenọzo tọn biọ; bo sọ wá gohọ mẹ. ⁸Moṣe dọ na yónwhẹn etọn ehe OKLUNỌ wà hian Falo podọ hlan Egiptinu lẹ na Islaeli tọn wutu, po tukla lẹpo po he pla yé to aliho, po le OKLUNỌ whlẹn yewlẹ do po. ⁹Jẹtlo sọ jaya na dagbewanyi lẹpo he OKLUNỌ ko wà hlan Islaeli, to enẹ mẹ he é whlẹn yé sọn alọ Egiptinu le tọn mẹ. ¹⁰Jẹtlo sọ dọmọ, Donanọ OKLUNỌ ni yín, mẹhe ko whlẹn mì sọn alọ Egiptinu lẹ tọn mẹ, podọ sọn alọ Falo tọn mẹ; mẹhe ko whlẹn gbẹtọ lẹ sọn oglọ alọ Egiptinu lẹ tọn tọn mẹ. ¹¹Dinvie yẹn yónẹn dọ OKLUNỌ klo hugan yẹwhe lẹpo: nugbo, to onú he mẹ yé yí sakla do zán hẹ mì te lẹ. ¹²Jẹtlo, yónwhen Moṣe tọn, yí nunina mimẹ̀ de po avọ́ lẹ po na Jiwheyẹwhe: Aalọn sọ wá, po mẹho Islaeli tọn lepo po, nado dù akla hẹ yónwhẹn Moṣe tọn to Jiwheyẹwhe nukon ¹³E sọ wá jọ to aihọngbe, wẹ Moṣe sinai nado dawhẹna gbẹtọ lẹ: bọ gbẹtọ le site lédo Moṣe sọn afọnnu kakajẹ whèjai. ¹⁴Whenuena yónwhẹn Moṣe tọn mọ ehe ewọ wà hlan gbẹtọ lẹpo, é dọmọ, Etẹ wẹ onú hiẹ wà hlan gbẹtọ lẹ he? etẹwutu we hiẹ sinai hiẹlọsu dopokẹdẹ, bọ gbẹtọ le site lédo we sọn afọnnu jẹ whejai? ¹⁵Moṣe sọ do hlan yónwhẹn etọn dọ, Na gbẹtọ lẹ wá dẽ nado kanbiọ sọn Jiwheyẹwhe si wutu wẹ; ¹⁶whenuena yé tindo owhẹhó yé nọ wá dẽ; yẹn sọ nọ dawhẹ to omẹ de po kọmẹnu etọn po ṣẹnṣẹn, yen sọ nọ hẹn yé yón osóndai Jiwheyẹwhe tọn lẹ, po osén etọn lẹ po. ¹⁷Yọnwhẹn Moṣe tọn sọ dọ hlan ẹn dọ, Onú he hiẹ wiwà ma yín dagbe gba. ¹⁸Onú na yawu sikọ na we nugbonugbo, na hiẹ po gbẹtọ he tin to de we he lẹ po: na onú lọ pèn gbahu na we; hiẹ ma na yín mẹsọgan nado basi i hiẹlọsu dopokẹdẹ gba. ¹⁹Tùntóai hlan ogbè ṣie dinvie, yẹn na na hònamẹ we, Jiwheyẹwhe ni tin hẹ we: hiẹ ni tin na gbẹtọ lẹ hlan Jiwheyẹwhe-dali, hie ni nọ hẹn owhe lẹ wá Jiwheyẹwhe de: ²⁰hiẹ na sọ nọ plọn osendai lẹ po osén lẹ po yé, bo na nọ dohia yé aliho fietọn yé mananọma nọ zinzọnlin gbọn, po azón he yé mananọma wà po. ²¹Humọ hiẹ na pọnsinyan sọn gbẹtọ lẹ mẹ omẹ sùdodego, omẹ mọtọnnkọ he dibuna Jiwheyẹwhe, gbẹtọ nugbo tọn, he gbẹwanna ale he ma yín dodo; bo yí omẹ mọtọnnkọ do ye nu, nado yín ogán omẹ fọtónfọtón lẹ tọn lẹ, ogán omẹ kanwekokanweko lẹ tọn lẹ, ogan omẹ kandeaokandeao lẹ tọn lẹ, podọ ogan omẹ aoao lẹ tọn lẹ: ²²bo gbọ yé ni nọ dawhẹ na gbẹtọ lẹ to owhè popo nu: e na sọ yín, dọ owhẹho daho wẹ yé na nọ hẹn wá de we, ṣigba owhẹho pẹvipẹvi lẹ yelọsu na nọ da: mọwẹ é na yín nubọauhu na hiẹlọsu, yé na sọ nọ hẹn tuklàgban lọ hẹ we. ²³Eyín hiẹ na wà onú he, bọ Jiwheyẹwhe degbèna we do mọ, whenẹnu hiẹ na yín omẹ sọgan nado nọtedẹn, omẹ he lẹpo ga na yì otẹn yetọn mẹ jijọho. ²⁴Mowẹ Moṣe tùntóai hlan ogbè yónwhẹn etọn tọn, bo sọ wà ehe é dọ lẹpo. ²⁵Moṣe sọ sinyan omẹ sùdodego sọn Islaeli lẹpo mẹ, bo yí yé do dogán do gbẹtọ lẹ ji, ogán fọtónfọtón le tọn lẹ, ogán kanwekokanweko lẹ tọn lẹ, ogán kandeaokandeao lẹ tọn lẹ, po ogán aoao lẹ tọn lẹ po. ²⁶Ye sọ nọ dawhẹna gbẹtọ lẹ to whepoponu: owhẹ̀ sinsinyẹn lẹ yé nọ hẹn wá Moṣe de, ṣigba owhèho pẹvipẹvi lẹ yelọsu wẹ nọ da. ²⁷Moṣe sọ gbọ yónwhẹn eton ni íónyì; ewọ sọ gbọn aliho etọn yì aigba etọn titì ji.

¹TO osùn atọ̀ntọ mẹ ehe godo ovi Islaeli tọn lẹ ko tọ́n yì sọn aigba Egipti tọn ji, azán doponẹ gbè wẹ yé wá biọ zungbo Sinai tọn mẹ. ²Whenuena yè hẹn yé fọ́nyì sọn Lẹfidimi, bo hẹn yé wá zungbo Sinai tọn mẹ, yé whesla do zungbo lọ mẹ; finẹ wẹ Islaeli dosla do to osé lọ nukọn. ³Moṣe sọ hẹji yì Jiwheyẹwhe de, OKLUNỌ sọ ylọ hlan ẹn sọn osé lọ ji, dọmọ, Le wẹ hiẹ na dọ hlan owhé Jakobu tọn, bo dọ na ovi Islaeli tọn lẹ dọ; ⁴mìwlẹ ko mọ núhe yẹn wà hlan Egiptinu lẹ, podọ le yẹn zé mì bẹn awà akùn tọn lẹ ji do, bo hẹn mì wá dè de do. ⁵Enẹwutu dinvie, eyín mìwlẹ na yí ogbè ṣie se nugbonugbo, bo yìn alẹ̀nu ṣie, whenẹnu wẹ mìwlẹ na yín adọkunnu vivẹ de hlan mi sọn ṣẹnṣẹn gbẹtọ lẹpo tọn: na aigba lẹpo wẹ ṣie: ⁶míwlẹ na sọ yín ahọludu yẹwhenọ lẹ tọn de, podọ akọta wiwe de hlan mi. Ehelẹ wẹ ohó he hiẹ na dọ hlan ovi Islaeli tọn lẹ. ⁷Moṣe sọ wá bo ylọ mẹho gbẹtọ ewlẹ tọn lẹ, bo yí do nukọn yetọn ohó helẹ pó he OKLUNỌ degbè etọn nẹ̃ lẹ. ⁸Gbẹtọ lẹpo yígbe dopọ, bo dọmọ, Ehe OKLUNỌ ko dọ lẹpo wẹ mí na wà. Moṣe sọ dọ ohó gbẹtọ ewlẹ tọn lẹ hlan OKLUNỌ ⁹OKLUNỌ sọ dọ hlan Moṣe dọ, Dayi e go, yẹn ja de we to aslọ titli de mẹ, na gbẹtọ lẹ lọ nido sè whenuena yẹn to hódọ hẹ we, podọ na yé nido yi we se ga kakadoi. Moṣe sọ dọ ohó gbẹtọ ewlẹ tọn lẹ hlan OKLUNỌ. ¹⁰OKLUNỌ sọ dọ hlan Moṣe dọ, Yi gbẹtọ ewlẹ de, bo klan yé do wiwe to egbe po osò po, bo gbọ yé ni yàn avọ̀ yetọn lẹ, ¹¹bo yín mẹwleawu na azán otòntọ: na azán atọ̀ntọ gbè OKLUNỌ na wá odò to nukun gbẹtọ lẹpo tọn mẹ to osé Sinai ji. ¹²Hiẹ na sọ yí agbó lẹ dai hlan gbẹtọ lẹ lọ lẹ́do pó, dọmọ, Mì yí awuhihọ hlan mìde, dọ mì yì aga biọ osé lọ ji blo, kavi dalọ tòtògo e tọn go blo: mẹdepope he dalọ osé lọ go, yè na hù i nugbonugbo: ¹³alọ de ma na jẹ e go, ṣigba zannu wẹ yè na yìn do e nugbonugbo, kavi sọnú in luntón: eyín é yín kanlin kavi gbẹtọ, é ma na nogbẹ̀ gba: whenuena opẹn dọnu dẹn, yé na wá aga to osé lọ jì. ¹⁴Moṣe sọ jẹte sọn osé lọ ji yì gbẹtọ ewlẹ de, bo klan gbẹtọ ewlẹ do wiwe; yé sọ yàn avọ̀ yetọn le. ¹⁵Ewọ sọ dọ hlan gbẹtọ ewlẹ dọ, Yín mẹwleawudote na azán atọ̀ntọ gbè: mì sẹpọ yonnu de blo. ¹⁶E sọ wá jọ to azán atontọ gbè, whenuena é yín afọnnu, wẹ oso lẹ po abì lẹ po tin, po aslọ titli de po to osé lọ ji, po ogbè opẹ̀n de tọn po he zingbè talala: gbẹtọ he tin to osla mẹ lẹpo sọ sisọ. ¹⁷Moṣe sọ hẹn gbẹtọ lẹ tọ́n sọn osla mẹ nado pé Jiwheyẹwhe: yé sọ site to odò osé lọ tọn dali. ¹⁸Osó Sinai patapata tin to azọ̀titi mẹ, na OKLUNỌ jẹte do e ji to miyọn mẹ wutu: azọ̀ etọn yìaga di azọ̀ ozohọ́ de tọn, osé lọ pete sọ whàn talala. ¹⁹Whenuena ogbè opẹ̀n lọ tọn dọnu gángán gángán, Moṣe dọho, Jiwheyẹwhe sọ yígbè nẹ̃ gbọn ogbède dali. ²⁰OKLUNỌ sọ jẹte wá osé Sinai tọn ji, to adada osé ọ tọn ji: OKLUNỌ ylọ Moṣe yì adada osé lọ tọn ji; Moṣe sọ yì aga ²¹OKLUNỌ sọ dọ hlan Moṣe do, Yì odò, nasẹ gbẹtọ lẹ, yé nikã lunagbo tòn wá OKLUNỌ de nado bẹ́pon, mesusu yetọn bo na dọ̀n. ²²Bo gbọ yẹwhenọ lẹ ga, he sẹpọ OKLUNỌ de lẹ, klan yéde do wiwe, OKLUNỌ nikã hó jẹ yé ji. ²³Moṣe sọ dọ hlan OKLUNỌ dọ, Gbẹtọ lẹ lọ ma sọgan hẹaga wá jẹ osé Sinai ji gba: na hiẹ nasẹ mí, dọmọ, Yí agbó lẹ dai ledo osé lo, bo Klan ẹn do wiwe. ²⁴OKLUNỌ sọ dọ hlan ẹn dọ, Yì, jẹte yì odò; hiẹ na sọ heaga wá, hiẹ, po Aalọn po gọ́na we: ṣigba a dike yẹwhenọ lẹ po gbẹtọ lẹ po lunagbó tón nado hẹ aga wá OKLUNỌ de blo, ewọ nikã hó jẹ yé ji. ²⁵Moṣe jẹte yì gbẹtọ lẹ de, bo dọ na yé.

¹JIWHEYẸWHE dọ ohó he lẹpo, dọmọ.

²Yẹn wẹ OKLUNỌ Jiwheyẹwhe towe, he hẹn we tọ́n sọn aigba Egipti tọn ji wá, tón sọn owhé afànumẹ tọn gbè.

³Hiẹ ma na tindo yẹwhe devo de to nukọn ṣie.

⁴Hiẹ ma na basi boṣiọ pipa de hlan dewe, kavi apajlẹ ojlẹmọ depope tọn he tin to olọn mẹ aga, kavi he tin to aigba mẹ todò, kavi he tin to otọ̀ mẹ to aigba glọ: ⁵hiẹ ma na dẹ́ dewe dodò hlan yé, kavi sẹ́n yé gba: na yẹn OKLUNỌ Jiwheyẹwhe towe Jiwheyẹwhe awuwhàntọ de wẹ, he nọ dla ylanwà otọ́ le tọn pọn to ovi lẹ ji to whẹndo atọ̀ntọ ji podọ to enẹtọ ji yé he gbẹwanna mi lẹ tọn; ⁶bo sọ nọ do lẹblanu hia hlan whẹndo fọtọ́n lẹ de, yé he yiwanna mi lẹ tọn bo sọ nọ yìn gbèdide ṣie lẹ. ⁷Hiẹ ma na yí oyín OKLUNỌ Jiwheyẹwhe towe tọn to ovó mẹ; na OKLUNỌ lọ ma na hẹn ewọ he yí oyín etọn to ovó mẹ matinwhẹ́gbledo. ⁸Flin gbọjẹzán lọ, nado yìn i wiwe. ⁹Azán ṣidopo hiẹ na jẹtukla họ̀, bo sọ wà azọ́n towe lẹpo: ¹⁰ṣigba azán sinawetọ wẹ gbọjẹzán OKLUNỌ Jiwheyẹwhe towe lọ tọn de: to e mẹ hiẹ ma na wà azọ́n depope, hiẹ, kavi visunnu towe, kavi viyọnnu towe, devisunnu towe, kavi deviyọnnu towe, kavi whékanlin towe lẹ, kavi ojonọ towe he tin to hòngbo towe lẹ mẹ: ¹¹na azán ṣidopo mẹ wẹ OKLUNỌ lọ basi olọn po aigba po, ohù lọ, po ehe tin to e mẹ lẹpo po, bo sọ gbọjẹ to azán sinawetọ lọ gbè: enẹwutu OKLUNỌ lọ dona gbọjẹzán lọ, bo sọ hiọ ẹ.

¹²Gbogbéna otọ́ po onọ towe po: na azán towe lẹ nido yín ogà to aigba lọ ji he OKLUNỌ Jiwheyẹwhe towe na we.

¹³Hiẹ ma na yọngbẹtọku de.

¹⁴Hiẹ ma na deayọ.

¹⁵Hiẹ ma na finnuyí.

¹⁶Hiẹ ma na hẹn kunnude lalo tọn do kómẹnu towe go.

¹⁷Hiẹ ma na donukunkẹn do owhé kómẹnu towe tọn go, hiẹ ma na donukunkẹn do asi kómẹnu towe tọn go, kavi devisunnu etọn, kavi deviyọnnu etọn, kavi oyín etọn, kavi kẹtẹkẹtẹ etọn, kavi onú depope he yín kọmẹnu towe tọn.

¹⁸Gbẹtọ lẹpo sọ mọ sòwanyinyẹn lẹ lọ, po abidide lẹ lọ po, po ogbè opẹ́n lọ tọn po, po osé lọ po to azọtí: podọ whenuena gbẹtọ lẹ lọ mọ ẹn, Yé sisọ bo site aganu to olá. ¹⁹Yé sọ dọ hlan Moṣe dọmọ, Hiẹ ni dọhó hẹ mí, míwlẹ bo nasọ sè; ṣigba a dike Jiwheyẹwhe dọhó hẹ mí blo, mí nikã kó. ²⁰Moṣe sọ dọ hlan gbẹtọ lẹ lọ dọmọ, Mì dibu blo: na Jiwheyẹwhe wá nado tẹ́n mì pọn, podọ na osi etọn nido tin to mì nukọn, dọ mì wàylando blo. ²¹Gbẹtọ lẹ lọ sọ site aganu to olá Moṣe sọ dòn sẹpọ jẹ zinvlu titli lọ kọ̀n fie Jiwheyẹwhe te.

²²OKLUNỌ lọ sọ dọ hlan Moṣe dọmọ, Le wẹ hiẹ na dọ hlan ovi Islaeli tọn lẹ dọ, Mì lọsu ko mọ dọ yẹn ko dọhó hẹ mì sọn olọn mẹ. ²³Mìwlẹ ma na basi yẹwhe devo lẹ dogó mi gba; yẹwhe fataka tọn lẹ, kavi yẹwhe Sika tọn lẹ, mì ma na basi hlan mì de gba. ²⁴Agbà okó tọn de wẹ hiẹ na basi hlan mi, bo nasọ sanvó to e ji avọ́nunina mimẹ̀ towe, po avọ́nunina jijọho tọn towe lẹ po, lẹngbọ towe lẹ, po oyín towe le po: to otẹn fie yẹn hen oyín ṣie yín flinflin te lẹpo yen na wá de we bo sọ dona we. ²⁵Podọ eyín hie basi agbà zannu tọn de na mi, hiẹ ma na do e sọn zannu pipa le mẹ gba: na eyín hiẹ zé azónwànu daga do e ji, hiẹ ko flu i. ²⁶Mọ hiẹ ma na hẹ́ji yì jẹ agbà ṣie ji gbọn afọdidè lẹ dali gba, na omó towe yín mimọ to e ji blo.

¹DINVIE ehelẹ wẹ whèdìda lẹ lọ he hiẹ na zedo yé nukọn. ²Eyín hiẹ họ̀ Heblu afànumẹ de, owhè ṣidopo é na sẹ́n hò: podọ to sinawetọ lọ mẹ ewọ na jẹgbonu yì tata ma na núde. ³Eyín é wá whégbè na ede, é nasọ jẹgbonu yì na ede: eyín é yín alọwletọ, whenẹnu asi etọn na jegbonu yì po e po. ⁴Eyín mẹmẹnu etọn na asi de e, bọ ewọ ji visunnu lẹ po viyọnnu lẹ po nẹ́: asi lọ po ovi etọn lẹ po na yín mẹmẹnu etọn tọn, ewọ bo na jẹgbonu yì na ede.

⁵Ṣigba eyín devi lọ na dọ gbangba dọmọ, Yẹn yiwanna mẹmẹnu ṣie, asi ṣie, po ovi ṣie lẹ po; yẹn ma na jẹgbonu yì vónu gba: ⁶whenẹnu mẹmẹnu etọn na hẹn ẹn wá jẹ whẹ̀datọ lẹ de, bo sọ hẹn ẹn wá jẹ ohọ̀n lọ kòn, kavi jẹ ohọ̀n lọ dòtin kọ̀n; mẹmẹnu etọn bo na yí nútọnnu de do tón otó etọn luntón; ewọ bo nasọ nọ sèn ẹn kakadoi.

⁷Podọ eyín omẹ de sà viyọnnu etọn nado yín afànumẹ de, ewọ ma na jẹgbonu yì dile devisunnu lẹ wà do gba. ⁸Eyín ewọ ma hẹnhomẹhùn mẹmẹnu etọn gba, sọmọ bọ é ma dà asi etọn, whenẹnu ewọ na gbọ é ni yín fifli: ewọ ma na tindo huhlọn de nado sà ẹ hlan akọta ojonọ de gba, mimọ ewọ ko zan bublu hẹ ẹ. ⁹Podọ eyín ewọ ko dà asi etọn hlan visunnu etọn, ewọ na zán hẹ ẹ kẹdẹdi viyọnnu lẹ tọn. ¹⁰Eyín é yi asi devo nẹ̃; núdùdù etọn, avọ̀ etọn, podọ azónyíwà alọwle etọn tọn, é ma na dèpo. ¹¹Podọ eyín ewọ ma wà onú atọ̀n helẹ hlan ẹn, whenẹnu ewọ na jẹgbonu yi tata, matin akuẹ.

¹²Ewọ he linú omẹ de sọmọ bọ é kú, na yín hùhù dandan. ¹³Podọ eyín omẹ de ma tọ̀wu dai, ṣigba Jiwheyẹwhe jó e do alọ etọn mẹ: whenẹnu yẹn na dè otẹn de fie ewọ na hónyigán te. ¹⁴Podọ eyín omẹ de yí linlẹn do wá kọmẹnu etọn ji, nado yí owunblunamẹ do hù i; hiẹ na yí i sọn agbà ṣie kọ̀n, na ewọ nido kú.

¹⁵Podọ ewọ he linú otọ́ etọn, kavi onọ etọn, na yín hùhù dandan.

¹⁶Podọ ewọ he fìn omẹ de, bo sọ sà ẹ, kavi eyín é yín mimọ to alọ etọn mẹ, ewọ na yín hùhù dandan.

¹⁷Podọ ewọ he vlẹ otọ́ etọn, kavi onọ etọn, na yín hùhù dandan.

¹⁸Podọ eyín sunnusi lẹ to avùnhò, bọ ode yí zannu li awetọ, kavi yí akotokún etọn li i, bọ ewo ma kú gba, ṣigba nò azònzàn etọn ji: ¹⁹eyín ewọ sọ fọ́n, bo zinzọnlin pó to alọnupò etọn ji, whenẹnu wẹ ewọ he linú i na yín jijodo: kìki ewọ na suahọ́ na ojlẹ hẹnbu etọn, bo sọ hẹn ẹn nado yín azọ̀nhẹngbọna mlẹnmlẹn.

²⁰Podọ eyín omẹ de li opò de afànumẹsunnu etọn, kavi afànumẹyọnnu etọn, bọ é kú to alọ etọn glọ: yè na sayahẹ ẹ dandan. ²¹Gãnṣo, eyín ewọ nọ̀temọ azán de kavi awe, yè ma na sayahẹ ẹ gba: na akuẹ etọn wẹ ewọ.

²²Podọ eyín sunnusi lẹ to avùnhò dopọ, bo gbleawuna yọnnu hòhónọ de, sọmọ bọ sinsẹ́n etọn tónyì, gãnṣo bọ oylan de ma hodo: yè na sawhẹ́hẹ ẹ dandan, kẹdẹdile asú yọnnu lọ tọn na dè na ẹn do; ewọ bo na sọ sú dile whèdatọ lẹ lọ na mágbè do ²³Ṣigba eyín oylan depope hodo, whenẹnu hiẹ na yi gbigbọ na gbigbọ. ²⁴Nukun na nukun, adú na adú, alọ na alọ, afọ na afọ, ²⁵mimẹ̀ na mimẹ̀, alán na alán, hihò na hihò.

²⁶Podọ eyín omẹ de linú nukun devisunnu etọn tọn, kavi nukun deviyọnnu etọn tọn, bo và ẹ; é na gbọ é ni yì tata na nukun etọn tọn wutu. ²⁷Podọ eyín é linú adú devisunnu etọn ton kavi adú deviyọnnu etọn tọn bọ é sun; é na gbọ é ni yì tata na adú eton tọn wutu.

²⁸Podọ eyín oyín de sọazò sunnusi de kavi yọnnusi de, bọ yé kú, oyín lọ na yín zannudlando, podọ olàn etọn ma na yín dùdù gba; ṣigba klunọ oyín lọ tọn na yín jijódo. ²⁹Ṣigba eyín oyín lọ ko nọ jlo nado sọazòme daidai, bọ yè ko sọ dekunnu etọn hlan klunọ etọn, bọ ewọ ma glọn ẹn do owhé gbè gba, ṣigba bọ é hù sunnusi de kavi yọnnusi de; oyín lọ na yín dindlanzannudo, podo klunọ etọn ga na yín hùhù dandan. ³⁰Eyín ofligò de yín zizé do e ji, whenẹnu é na na ofligò ogbè etọn tọn lọ núdepope yè zé do e ji. ³¹Eyín é ko sọazò visunnu de, kavi ko sọazò viyonnu de, é na yín wiwà hlan ẹn kẹdẹdi whẹ̀dida he. ³²Eyín oyín lọ ko sọazò devisunnu de, kavi deviyọnnu de; ewo na na ṣẹkle ogbàn fataka tọn hlan mẹmẹnu yetọn, podọ oyín lọ nasọ yín dindlanzannudo.

³³Podọ eyín omẹ de hùn odò de donùvo, kavi eyín omẹ de na kùn odò de bo ma súnúdo e gba, bọ oyin de kavi kẹtẹkẹtẹ de flẹ́ jẹ e mẹ, ³⁴klunọ odò lọ tọn na nahọsú nẹ́; é na na akuẹ hlan klunọ yetọn, kanlin kúkú lọ bo na yín eton.

³⁵Podọ eyín oyín omẹ de tọn gbleawuna mẹdevo tọn, bọ é kú; whenẹnu yé na sà oyín gbète lo, bo má akue etọn; podọ yé nasọ má kúkú lọ ga. ³⁶Kavi eyín é ko yín yinyọnẹn daidai dọ oyín lo ko nọ jlo nado sọazòmẹ, bọ klunọ etọn ma glọn ẹn do owhé gbè gba; ewọ na na oyín na oyín, kanlin kúkú lọ bó na yín etọn titi.

¹EYÍN omẹ de na fìn oyín de, kavi lẹngbọ de, bo hù i, kavi sà ẹ; é na na oyín atón na oyín dopo, podọ lẹngbọ ẹnẹ na lengbọ dopo. ²Eyín yè mo ajotọ lọ to dòkùn biọwhégbè, bọ yè linú i bọ é kú, ohùn ma na tin nẹ́ gba. ³Eyín owhè yín zizè do e ji, whègbledohùntọn na tin nẹ̃: é na basi ogòjo, eyín é ma tindo núde, whenẹnu é na yín sisà na ajò etọn. ⁴Eyín ajò lọ yín mimọ to alọ etọn mẹ togbẹ̀, eyín é yín oyín, kavi kẹtẹkẹtẹ, kavi lẹngbọ; ewọ na gòjó dawejì.

⁵Eyín omọ de na hẹn ogle de kavi ovẹ̃npa nado yín dùdù, bo na dike kanlin etọn ni jẹte, bo sọ dù to ogle mẹdevo tọn mẹ, sọn ogle dagbe etọn titi mẹ, podọ sọn ovẹ̃npa dagbe etọn titi mẹ, é na basi ogòjó.

⁶Eyín miyọn jẹnú, bo wlenú to owun mẹ, sọmọ bọ ozĩnhọ gbàdo tọn, kavi gbadò mayamaya, kavi ogle lọ yín súsúdo; ewọ he pla miyọn lọ na basi ogòjo dandan.

⁷Eyín omẹ de na yí akuẹ kavi núzinzán na kọmẹnu etọn nado sọwhla, bọ é yín finfìn to owhé omẹ lọ tọn gbè; eyín ajọtọ lọ yín mimọ, é na nahọsú daweji. ⁸Eyín ajotọ lọ ma yín mimọ gba, whenẹnu mẹmẹnu owhé lọ tọn na wá sẹ́pọ jẹ whẹ̀datọ lẹ de, eyín ewọ ma ko yí alọ etọn hlan agbàn kọmẹnu etọn tọn. ⁹Na owhẹ́hó ylanwà tọn lẹpo, eyín é yín na oyín, na kẹtẹkẹtẹ, na lẹngbọ, na avọ̀, kavi na onú búbú hunkọ depope tọn, ehetọn omẹ de dọmọ, Ehe wẹ etọn, owhẹ́hó omẹ awe lẹ tọn na wá whẹ̀datọ lẹ lọ nukọn; ewọ mẹhe whèdatọ lẹ lọ na gblewhèdo na nahọsú hlan kọmẹnu etọn daweji.

¹⁰Eyín omẹ de yí kẹtẹketẹ de, kavi oyín de, kavi lẹngbọ de, kavi kanlin depope, jó hlan kọmẹnu etọn nado sọwhla; bọ é kú, kavi yín awugblena, kavi yàndogbé, bọ mẹde ma mọ ẹn: ¹¹whiwhle OKLUNỌ tọn lọ na tin to yé omẹ awe lẹ ṣẹnṣẹn, eyín ewọ ma ko yí alọ etọn hlan agbàn kọmẹnu etọn tọn; klunọ etọn nasọ kẹalọyi i, ewọ ma sọ to na basi ogójó gba, ¹²ṣigba eyín e yín fìnfìn sọn e si, ewọ na basi ogòjó hlan klunọ etọn. ¹³Eyín é yín tintíẹn do flinflin, gbọ é ni hẹn ẹn wá na kunnude: ewọ ma na nahọsúna enẹ he yín tintlẹn gba.

¹⁴Podọ eyín omẹ de whé núde sọn komẹnu etọn si, bọ é yín awugblena, kavi kú, ma tin klunọ etọn to e de, ewọ na basi ogòjó dandan. ¹⁵Eyín klunọ etọn tin to e de, ewọ ma na súahọ nẹ̃ gba; eyín é yín onú súafa, é wá biọ afà etọn mẹ.

¹⁶Podọ eyín sunnu de klọ awhlivu de he yè ma ko biọ, bo mlọn e de, ewọ na na yọnnugbàn de nẹ̃ dandan nado yín asi etọn, ¹⁷eyín otọ́ etọn gbé godogodo nado yí i nẹ́, ewọ na na akuẹ kẹdẹdi yọnnugbàn awhlivu lẹ tọn.

¹⁸Hiẹ ma na dike owóntọyọnnu de ni nọ́gbẹ́.

¹⁹Mẹdepope he mlọn okanlin de de na yín hùhù dandan.

²⁰Ewọ he sánvọ́ hlan yẹwhe depope adavo hlan OKLUNỌ lọ kẹdẹ, na yín súsúdo gbidigbidi. ²¹Podọ hiẹ ma na wàgò do ojonọ de, mọ hiẹ ma na bianuku nẹ̃: na míwlẹ ko yín ojonọ to aigba Egipti tọn ji. ²²Mìwlẹ ma na miannukunna asúsiọsi depope, kavi ovi tọ́ṣiọvi. ²³Eyín hiẹ miannukunna yé to núdepope mẹ, bọ yé gbẹ́ dawhá hlan mi, yẹn na se awhá yetọn dandan: ²⁴podọ homegble ṣie na hezò, Yẹn bo nasọ yí ohi do hù mì; asi mìtọn lẹ bo na yín asúsiọsi, podọ ovi mìtọn lẹ tósiọvi.

²⁵Eyín hiẹ yàn akuẹ hlan depope omẹ ṣie lẹ tọn to de we he yín wamọnọ, hiẹ ma na tin hlan ẹn di akuẹnọ de gba; mọ mìwlẹ ma na zé akuẹvi do e ji gba. ²⁶Eyín hiẹ ko yí awu kómẹnu towe tọn to afànu, hie na gọ̀jó hlan ẹn to owhèjai damẹ: ²⁷na enẹ wẹ sinṣinyọn etọn dopoakan, avọ̀ etọn na ayú etọn wẹ: Etẹmẹ é na dọ? é bo nasọ wá jó, whenuna é dawhá hlan mi, wẹ yẹn na sè; na dagbenọ wẹ yẹn.

²⁸Hiẹ ma na vlẹ whèdato lẹ lọ gba, kavi hòdèdo ogán omẹ towe lẹ tọn de. ²⁹Hiẹ ma na dòngbàn nado navọ́nunina sọn ogegé sinsén towe lẹ tọn mẹ gba, podọ sọn ahàn towe lẹ mẹ. Plónji visunnu towe lẹ tọn wẹ hiẹ na na hlan mi. ³⁰Mọdopokẹdẹ wẹ hiẹ na wà hẹ oyín towe lẹ, podọ hẹ lẹngbọ towe lẹ: azán ṣinawe é na nò onọ etọn de hò; to azán sinatòntọ gbè hiẹ na yí i na mi. ³¹Míwlẹ bo nasọ yín omẹ wiwe hlan mi: enẹwutu míwlẹ ma na dù olàn depope he yín tintlẹn sọn kanlin danji tọn lẹ si; avún lẹ mì na zé e dlẹn hlan.

¹HIẸ ma na yí hóhẹnwádọ de gba: a kòn alọ towe dopọ po mẹylankan po nado yín mawàdódónọ de blo. ²Hiẹ ma na hodo agùndaho de nado wà oylan gba; mọ hiẹ ma na dọhó to owhóhó de mẹ nado diọ jẹapodopo hodo agùndaho de nado gada whẹ̀dida gba: ³mọ hiẹ ma na basinukundagbena omẹ wamọnọ de to owhẹ́hó etọn mẹ.

⁴Eyín hiẹ pó oyín kẹ̀ntọ towe tọn kavi kẹtẹkẹtẹ etọn to búbú jei, hiẹ nasọ hẹn ẹn gò wá e de dandan. ⁵Eyín hiẹ mọ kẹtẹkẹtẹ ewọ he gbẹwanna we tọn lọ mlọnai to agbàn etọn glọ, bo dóngbàn nado gọalọ nẹ̃, hiẹ na gọalọ do e go hẹ ẹ dandan.

⁶Hiẹ ma na gada whẹ̀dida wamọnọ towe tọn to owhẹ́hó etọn mẹ gba. ⁷Whla dewe dẹn sọn owhẹ̀hó olalo tọn de mẹ; podọ hiẹ hù homẹvọnọ po dódónọ po blo: na yẹn ma na sùwhẹ̀na mẹylankan lọ gba. ⁸Podọ hiẹ ma na yí nunina de gba: na núnina de nọ tónnukunna yé he tindo nukunnumọ lẹ, bo sọ nọ hẹn owhẹ́hó dódónọ lẹ tọn gble. ⁹Podọ hiẹ ma na miannukunna ojonọ de: na mìwlẹ yọn ayiha ojonọ de tọn lọ, mimọ mìwlẹ ko yín ojonọ to aigba Egipti tọn ji.

¹⁰Podọ owhè ṣidopo hiẹ na donú do aigba towe ji hò, bo sọ bé jideji etọn pli do whégbè: ¹¹ṣigba owhè sinawetọ lọ hiẹ na gbọ é ni gbọjẹ bo mlọnai gbọ̀gbé; na wamọnọ omẹ towe lẹ tọn nido dù: podọ núhe yé jódai kanlin danji tọn lẹ na dù. Mọkẹdẹ wẹ hiẹ na wà po ovẹ̃npa towe po, po olivielipa towe po. ¹²Azàn ṣidopo hiẹ na wà azọ́n towe họ̀, podọ to azán sinawetọ gbè hiẹ na gbọjẹ: na oyín towe po kẹtẹkẹtẹ towe po nido tindo gbọjẹ, podọ visunnu deviyọnnu towe tọn, po ojonọ lọ po, nido yín awumiọnnọ. ¹³Podọ na mì ni payi to onú he ndọ hlan mì lẹpo mẹ: mì sọ dọhóylọ oyín yẹwhe de tọn blo, mì sọ dike é yín sisè sọn onù mìtọn mẹ blo.

¹⁴Whlatòn hiẹ na payi hùnwhẹ de go hlan mi to owhè lọ mẹ. ¹⁵Hùnwhẹ akla madotón tọn hiẹ na nọ payi e go: azán ṣinawe hiẹ na dù akla madotón hò, dile yẹn degbèna we do, to ojlẹ didè lọ mẹ to osùn Abibi mẹ, (na é mẹ wẹ hiẹ jẹgbonu sọn Egipti wá); podọ mẹde ma na sọawúhia to nukọn ṣie asigbalọgba: ¹⁶po hùnwhẹ ojijẹ tọn po, sinséntintan tuklajẹ towe lẹ tọn, he hie do to ogle towe mẹ: po hùnwhẹ jigbowhé tọn po, to opodo owhè lọ tọn, whenuena hiẹ bẹ́ tuklajẹ towe pli sọn ogle mẹ wá whégbè. ¹⁷Whlatòn to owhè lọ mẹ wẹ sunnusi towe lẹ na nọ sọawúhia to OKLUNỌ Jiwheyẹwhe lọ nukọn.

¹⁸Hiẹ ma na na avọ́nunina avọ́ tọn ṣie po akla madotón tọn po gba; mọ ojó hùnwhẹ ṣie tọn ma na nòai to ozán lẹpo mẹ jẹ afọnnu gba. ¹⁹Tintan sọn sinsẹ́ntintan aigba towe tọn lẹ mẹ wẹ hiẹ na nọ hẹnwá biọ ohọ̀ OKLUNỌ Jiwheyẹwhe towe lọ tọn mẹ. Hiẹ ma na sọakusìn gbọgbọẹvu de to anọsìn onọ etọn tọn mẹ.

²⁰Dayi e go, yẹn do angẹli de hlan nukọn towe, nado pọ́n ogo we to aliho, bo sọ hẹn we wá biọ otẹn lọ mẹ he yẹn ko wleawuna. ²¹Mì ni payi e go, bo sọ tùntóai hlan ogbè etọn; mì yín tólivẹtọ do e go blo: na ewọ ma na jona ylanwiwà mìtọn gba; na oyín ṣie tin to ewọ mẹ. ²²Ṣigba eyín hiẹ na tùntóai hlan ogbè etọn nugbonugbo, bo sọ wà ehe yẹn dọ na we lẹpo; whenẹnu yen na yín kẹ̀ntọ kẹ̀ntọ towe lẹ tọn de, podọ mẹglatọ mẹglatọ towe lẹ tọn de ²³Na angẹli ṣie na to yìyì to nukọn towe, bo hẹn we wá jẹ Amolinu lẹ de, po Hitinu lẹ po, po Pẹlizinu lẹ po, po Kananinu lẹ po, Hivinu lẹ, po Jẹbusinu lẹ po: Yẹn bo nasọ sán yé sẹ́. ²⁴Hiẹ ma na dẹ́ hlan yẹwhe yetọn lẹ, kavi sẹ́n yé, kavi wà hodo azón yetọn lẹ gba: ṣigba dọ hiẹ na tùn ye dlẹn gbidigbidi, bo sọ wén odòtin yetọn lẹ gidigidi. ²⁵Mìwlẹ bo na to OKLUNỌ Jiwheyẹwhe mìtọn lẹ́ són, ewọ bo nasọ nọ dona núdùdù towe, po osìn towe po; Yẹn bo nasọ dè awutuzòn só sọn gblagbla towe mẹ. ²⁶Yọnnu de ma na kònhò, kavi yín wensinọ to aigba towe ji gba: yẹn na hẹn osọha azán towe lẹ tọn pẹ́. ²⁷Yẹn na do osi ṣie hlan nukọn towe, bo na gbà akọta he de hiẹ na wá lẹpo do, Yẹn bo nasọ hẹn kẹ̀ntọ towe lẹpo lẹ́ godo yetọn hlan we ²⁸Podọ yẹn nasọ do ogbón lọ hlan nukọn towe, he na yàn Hivinu lẹ, Kananinu lẹ, po Hitinu lẹ po jẹgbonu sọn nukọn towe. ²⁹Yẹn ma na yàn yé sọn nukọn towe to owhè dopo mẹ gba; aigba lọ nikã lẹzùn ojẹvọ, bọ kanlin danji tọn lẹ jigbà do oji we. ³⁰Pẹpẹ wẹ yẹn na yàn yé jẹgbonu sọn nukọn towe, kaka hiẹ na do yín súsúdeji, bo dùgú aigba lọ tọn. ³¹Yẹn bo nasọ do agboji towe ai sọn Ohù Vó lọ kòn yèdọ jẹ ohù Filistini lẹ tọn kòn, podọ sọn zùngbo lọ mẹ jẹ Otọ́ lọ kón: na yẹn na jó tòmẹnu aigba lọ tọn lẹ do alọ mìtọn mẹ; hiẹ bo nasọ yàn yé jẹgbonu to nukọn towe. ³²Hiẹ basi alónu de po yé po blo, kavi po yẹwhe yetọn lẹ po. ³³Yé ma na nò aigba towe ji, yé nikã hẹn we wàylando do ogo e: na eyín hiẹ són yẹwhe yetọn lọ, é na yín omò de hlan we dandan.

¹EWỌ sọ dọ hlan Moṣe dọmọ, Hẹ̀ ojí wá jẹ OKLUNỌ lọ de, hiẹ, po Aalọn po, po Nadabì po, po Abihu po, po meho kandegbàn ovi Islaeli tọn lẹ tọn po; mì ni bo sẹ̀n to aganu dón: ²podọ Moṣe sokẹdẹ wẹ na wá sẹ́pọ OKLUNỌ lọ de; ṣigba yé ma na wá sẹpọ gba; mọ gbẹtọ lẹ lọ ma na hẹji yì aga po e po gba. ³Moṣe bo sọ wá bo dọ oho OKLUNỌ tọn lọ lẹpo na gbẹtọ lẹ, po whẹ̀dida lẹpo lẹ lọ po: gbẹtọ lẹpo sọ yí ogbè dopo do gblọn, bo dọmọ, Ohó he OKLUNỌ lọ ko dọ lẹpo wẹ mí na wà. ⁴Moṣe sọ wlan ohó OKLUNỌ tọn lẹpo, bo tite to afọnnu fliflimẹ, bo do agbà de to osé lọ glọ, po odòtin wiawe po, kẹdẹdi whẹndo wiawe Islaeli tọn lẹ. ⁵E sọ do yọpọsunnu lẹ hlan sọn ovi Islaeli tọn lẹ mẹ, he nọ na avọ́nunina avọ́ mimẹ̀ lẹ tọn, bo sọ sanvó avọ́nunina jijọho tọn sọn oyín lẹ mẹ hlan OKLUNỌ lọ. ⁶Moṣe sọ yí dadawe sọn ohùn lọ mẹ, bo yi i do siklẹ lẹ me; e sọ mì dadawe ohùn lọ tọn do agbà lọ go. ⁷E sọ yí owe alẹnu lọ tọn, bo hia to sisè gbẹtọ lẹ lọ tọn me: ye sọ dọmọ, Ehe OKLUNỌ lọ ko dọ lẹpo wẹ mí na wà, bo sọ yín tónusètọ. ⁸Moṣe sọ yí ohùn lọ, bo mì i do gbẹtọ lẹ lọ go, bo dọmọ, Mì payi ohùn alènu lọ tọn lọ go, he OKLUNỌ lọ ko basi hẹ mì to nuyígona helẹpo ji. ⁹Whenẹnu wẹ Moṣe hẹji yi aga, po Aalọn po, Nadabi, po Abihu po, po mẹho kandegbàn ovi Islaeli tọn le tọn po: ¹⁰yé sọ mọ Jiwheyẹwhe Islaeli tọn lọ; é sọ taidi zannu safili tọn tité tin finẹ to afọ etọn glọ, podọ é sọ taidi olọn lọsulọsu na hinkongblegede etọn. ¹¹E ma zé alọ etọn do yeyinọ ovi Islaeli tọn lẹ tọn ji gba: ye bo sọ to Jiwheyẹwhe pọ́n, bo dù bo sọ nù.

¹²OKLUNỌ lọ sọ dọ hlan Moṣe, dọmọ, Hẹji wá dẽ biọ osé lọ mẹ, bo tin finẹ: Yẹn nasọ na tafo zannu tọn lẹ we, po osén lọ po po gbèdide lọ po, he yẹn ko wlan, na hiẹ nido plón yé. ¹³Moṣe sọ tite, po Jọsua devizónwàtọ etọn po: Moṣe sọ hẹji yì aga biọ osé Jiwheyẹwhe tọn mẹ. ¹⁴E sọ dọ hlan mẹho lẹ lọ dọmọ, Mì dòngbàn tofi pọ́n mí, kaka mí na do lẹ́ gò wá mì de: podọ dayi e go, Aalọn po Huli po tin to mì de: mẹdepope he tindo owhẹ́hó de, gbọ é ni wá sẹpọ jẹ yé de. ¹⁵Moṣe sọ hẹji yì biọ osé lọ mẹ, aslọ lọ sọ ṣinyọn osé lọ. ¹⁶Gigo OKLUNỌ lọ tọn sọ nò osé Sinai ji, aslọ lọ sọ ṣinyọn e ji hó azán ṣidopo: to azán ẹinawetọ lọ gbè, é ylọ hlan Moṣe sọn gblagbla aslọ lo ton mẹ. ¹⁷Awusọhu gigo OKLUNỌ lọ tọn tọn tin di miyọn mẹvàsúdo de to aga osé lọ tọn ji to nukun ovi Islaeli tọn lẹ tọn mẹ ¹⁸Moṣe sọ yì biọ gblagbla aslo lọ tọn mẹ, bo hẹji yì bip osé lọ me. Moṣe bo so tin to osé lọ mẹ okle kande po ozán kande po.

¹OKLUNỌ lọ sọ dọhó hlan Moṣe, dọmọ, ²Dọhó hlan ovi Islaeli tọn lẹ dọ yé ni yí avọ́nunina zédlanga tọn de na mi: sọn omẹ dopodopo de ayiha mehetọn hen ẹn yín ojlonọ si wẹ mì na yi ovọnunina zédlanga tọn ṣie te. ³Ehe wẹ avọ́nunina zédlanga tọn lọ he mì na yí sọn yé si; sika, po fataka po, po ogànvẹ̃ po; ⁴po avọ̀ ahóvẹ̃ po, po avọ̀ gèfunwunmẹ po, po avọ̀vẹṣẹṣẹ po, po sékanfun po, po ofún gbọgbọẹ tọn po; ⁵po ayú agbò tọn po he yè da bia, po oklopán lẹ po, po atin akasia tọn po; ⁶amì na hinhọ́n, núyónwán na amì sisá, podọ na núdèwán vivi lọ; ⁷zannu ọniksi lẹ, po zannu nado yín titò lẹ po, na efọdi lọ, podọ na tùnudó lọ. ⁸Bo sọ gbọ yé ni basi fiwiwe de na mi; na yẹn nido nọnó ṣẹnṣẹn yetọn. ⁹Kẹdẹdi ehe ndohia we lẹpo, ojlẹmọ gohọ̀túntún lọ tọn, po ojlẹmọ núzinzán etọn lẹpo po tọn, yèdọ mọkẹdẹ wẹ mì na basi i do.

¹⁰Yé nasọ basi alki akasia tọn de: awàgba awe po odá po wẹ ote etọn na yín, podọ awàgba dopo po odá po ogblo etọn, podọ awàgba dopo po odá po ojiyìyì etọn. ¹¹Hiẹ nasọ yí sika akú do bú i, hiẹ na bú i hòmẹ po gbonu po, bọ nasọ basi otónugbá sika tọn de do e ji lẹ́dolẹ́do. ¹²Hiẹ na sọ kòn alọkẹ ẹnẹ sika tọn nẹ, bo sọ yí i do afọ etọn ẹnẹ lẹ mẹ; alọkẹ awe na tin to adà e tọn ode go, podọ alọkẹ awe to adà e tọn awetọ go. ¹³Hiẹ naso basi opo atin akasia tọn, bo sọ yí sika do bú yé. ¹⁴Hiẹ nasọ yí opò lẹ lọ do alọke lẹ lọ mẹ to adà alki lo tọn go, nado nọ yí do zé alki lọ hẹn. ¹⁵Opò lẹ lọ na tin to alokẹ alki lọ tọn lẹ mẹ: ye ma na yín didè sẹ́ sọn e mẹ gba. ¹⁶Hiẹ nasọ yí okunnuhó he yẹn na na we lọ dọ alki lọ mẹ. ¹⁷Podọ hiẹ nasọ basi oṣinyọn sika tọn de: awàgba awe po odá po wẹ ote etọn na yín, podọ awàgba dopo pọ odá po ogblo etọn. ¹⁸Hiẹ na basi kẹlubimi sika tọn awe; azón tùntùn mẹ hiẹ na basi yé sọn, do opodo awe oṣinyọn lọ tọn lẹ dali. ¹⁹Bo basi kẹlubi dopo do opodo ode dali, podọ kẹlubi dopo do opodo awetọ lọ dali: sọn aisintẹn-lẹblanu tọn lọ mẹ wẹ mì na basi kẹlubimi lẹ lọ do opodo etọn awe lẹ go. ²⁰Kẹlubimi lẹ lọ na dlẹn awà yetọn lẹ jẹgbonu do aga, yíyí awà yetọn lẹ ṣinyọn aisintẹn-lẹblanu tọn lọ ji, po nukunmẹ yetọn lẹ po ode hlan awetọ; hlan aisintẹn-lẹblanu tọn lọ dali wẹ nukunmẹ kẹlubimi lẹ lọ tọn lẹ na te. ²¹Hiẹ nasọ yí aisintẹnleblanu tọn lọ do aga alki lọ tọn ji; podọ to alki lọ mẹ wẹ hiẹ na yí okunnuho he yẹn na na we lọ do ²²Finẹ yẹn na nọ pli hẹ we te, yen bo nasọ nọ dọho hẹ we son aga aisintẹn-lẹblanu tọn lọ mẹ, sọn ṣẹnṣẹn kẹlubimi lẹ lọ tọn he tin to alki okunnuhó lọ tọn mẹ, sọn onú he yẹn na na we to gbèdide mẹ hlan ovi Islaeli tọn lẹ.

²³Hiẹ na sọ basi tafo atin akasia tọn: awàgba awe wẹ na yín ote etọn, podọ ogblo etọn awàgba dopo, podọ awàgba dopo po odá po jiyìyì etọn. ²⁴Hiẹ na yí sika akú do bú i, bo sọ basi otonugbá sikà tọn de lédo e finẹ. ²⁵Podọ hiẹ na basi otónu alọpahomẹ-gbigblo de tọn de hlan ẹn lédo pé, hiẹ nasọ basi otónugbá sikanọ de hlan otónu etọn lẹ́do pé ²⁶Hiẹ nasọ basi alọkẹ sika tọn ẹnẹ hlan ẹn, bo sọ yí alọkẹ lẹ lọ do olọnglọnẹn ẹnẹ he tin to afọ etọn ẹnẹ lẹ go. ²⁷Alọkẹ lẹ lọ na tin sẹ̀pọ otónu lọ, na otẹnmẹ lẹ na opo lẹ lọ nado nọ ze tafo lọ hẹn. ²⁸Hiẹ nasọ basi opo atin akasia tọn lẹ, bo yí sika do bú yé, na yè nido nọ yí yé do zé tafo lọ hen. ²⁹Hiẹ nasọ basi núsọ̀nugbán etọn lẹ, po sivi etọn lẹ po, po ogò etọn le po, po otò etọn lẹ po, nado nọ yí do kòn: hiẹ na basi yé sọn sika akú mẹ. ³⁰Hiẹ nasọ nọ zé aklasọhia tọn do tafo lọ ji to nukọn ṣie whepoponu.

³¹Hiẹ nasọ basi miyọngbántin sika akú tọn de: miyọngbántin lọ na yín bibasi sọn azón tùntùn mẹ, yèdọ opòtin etọn, po kèyè etọn po; kọfo etọn lẹ, sédido etọn lẹ, po ovovo etọn lẹ po, na tin topó po e po: ³²podọ alà ṣidopo na tin he tọn jẹgbonu jei sọn adà etọn lẹ lọ mẹ; alà atọ̀n miyongbántin lọ lẹ tọn jẹgbonu sọn adà etọn dopo mẹ, podọ alà atọ́n miyọngbántin lọ lẹ tọn jẹgbonu sọn adà etọn awetọ mẹ: ³³kọfo atọ̀n yè basi di ovòvo almondi tọn lẹ to alá dopo mẹ, sédido de po ovòvo de po: mowẹna alà ṣidopo lẹ he jẹgbonu jei sọn miyọngbántin lẹ lọ mẹ: ³⁴podọ to miyọngbántin lọ mẹ kọfo ẹnẹ yè basi di ovòvo almondi tọn lẹ, sédido etọn lẹ, po ovòvo etọn lẹ po: ³⁵podọ sédido de to alà awe lẹ glọ topọ́ po e po, podọ sédido de to alà awe lẹ glọ topó po e po, po sédido de po to alà awe lẹ glọ topo po e po, na alà ṣidopo lẹ he jẹgbonu jei sọn miyọngbántin lọ lẹ mẹ. ³⁶Sédido yetọn lẹ po alà yetọn lẹ po na tin topọ́ po e po: pete é tọn azón tùntùn sika akú tọn. ³⁷Podọ hiẹ nasọ basi miyọngbán etọn lẹ, ṣinawe: yé nasọ nọ zé miyongbán etọn le daga, nado nọ na hinhọ́n to aga pànnukọn ẹn. ³⁸Podọ obé etọn lẹ, po agbán miyọngbánkàn eton tọn lẹ po, na yín sika akú tọn, ³⁹talẹntì dopo sika akú tọn mẹ é na yín bibasi sọn, po núzinzán helẹpo po. ⁴⁰Bo sọ mọ dọ hiẹ basi kẹdẹdi owunmẹ yetọn, he yè ko dohia we to osé lọ mẹ.

¹HUMỌ avọ̀dido ao hiẹ na do basi ogohọ̀túntún lọ; sọn alàvò sislo dagbedagbe mẹ, po avọ ahóvẹ̃ po, po ovọ̀gefunwunmẹ po, po ovọ̀vẹ̃sẹsẹ po, gọ́na kẹlubimi lẹ azon anà azónwàtọ tọn lọ hiẹ na do basi yé. ²Ote avọ̀dido dopodopo tọn na yín awàgba koatọ́nnukunatọ̀n, podọ ogblo avọ̀dido dopodopo tọn awàgba ẹnẹ: avọ̀dido lẹpo na tindo ojlẹ dopo. ³Avọ̀dido atón na yín sìnsìnpla ode do awétọ go; podọ avọ̀dido atón awetọ nasọ yín sìnsìnpla ode do awetọ go. ⁴Hiẹ bo nasọ basi ogbla avọ̀ahóvẹ̃ tọn lẹ do otónu avọ̀dido dopo tọn ji sọn tónuyinyén lọ mẹ to sìnsìnpla lọ mẹ; mọkẹdẹ hiẹ nasọ basi to otónu avọ̀dido lọ tọn mẹ he tin gbonupatapata to sìnsìnpla awetọ lọ mẹ. ⁵Ogbla kandeao wẹ hiẹ na basi do avọ̀dido lọ dopo mẹ, podọ ogbla kandeao wẹ hiẹ na basi do otónu avọ̀dido lọ tọn he tin to sìnsìnpla awetọ lọ mẹ; sìnsìnpla lẹ lọ na tin pànnukọn énọzo. ⁶Hiẹ nasọ basi opla sika ton kandeao, bo yí opla lẹ lọ do sìn ávòdidò lẹ lọ ode do ode go: gohọ̀túntún lọ bo na yín dopo. ⁷Hiẹ nasọ basi avọ̀dido gbọgbọẹfún tọn na ogohò de to gohọ̀túntún lẹ ta: hiẹ na basi yé avọ̀dido widopo. ⁸Ote avọ̀dido dopodopo tọn na awàgba ogbàn, podọ ogblo avọ̀dido dopodopo tọn awàgba ẹnẹ; avọ̀dido widopo lẹ lọ na tindo ojlẹ dopo. ⁹Hiẹ nasọ sìn; a-sòdido atọ́n pla na yénọzọ, podọ avọ̀dido ṣidopo na yénọzo, bo na yón avọ̀dido ṣidopo lẹ lọ doawe to nukọn ogohó lọ tọn. ¹⁰Podọ hie nasọ basi ogbla kandeao to otónu avọ̀dido dopo lọ tọn go he tin to gbonupatapata to sìnsìnpla awetọ lọ mẹ ¹¹Podọ hiẹ nasọ basi opla kandeao ogànvẹ̃ tọn, bo sọ yí opla lẹ lọ do ogbla lẹ lọ mẹ, bo sọ sìn ogohò lọ pla dopọ́, na é nido yín dopo. ¹²Podọ yénpla godo tọn he pò son avọ̀dido ogohò lọ tọn mẹ, odá avọ̀dido lọ tọn hẹ pò, na pla taga to godo ogohọ̀túntún lọ tọn. ¹³Podọ awàgba lọ to awà ode ji, podọ awàgba lọ to awà awetọ ji, sọn enẹ he pò to ote avọ̀dido ogohò lọ tọn tọn mẹ, na pla to aga to awà gohọtúntún lọ tọn go to awà he ji podọ to awà nẹ ji, nado ṣinyọn ẹn. ¹⁴Podọ hiẹ nasọ basi oṣinyọn agbòyú lẹ tọn de he yè yí ayúdànuvẹ̃ do dà na ogohò lọ, po oṣinyọn ọklòyú tọn lẹ dé; po to aga.

¹⁵Podọ hiẹ nasọ basi owhlẹ atin akasia tọn lẹ na gohọ̀túntún lọ, to ote. ¹⁶Awàgba ao wẹ ote owhlẹ dopo tọn na yín, podọ, ogblo owhlẹ dopodopo tọn awàgba dopo po odá po. ¹⁷Nuvò awe na tin to owhlẹ dopodopo mẹ, ode biọ ode mẹ: le wẹ hiẹ na basi na owhlẹ gohọ̀túntún lọ tọn lẹpo do. ¹⁸Podọ hiẹ na basi owhlẹ lẹ na gohọ̀túntún lọ, owhlẹ oko na hùwaji hlan hùwaji dali. ¹⁹Hiẹ nasọ basi oslò fataka tọn kande to owhlẹ oko lẹ glọ; oslò awe to owhlẹ dopo glọ na nuvò etọn awe lẹ, podọ oslò awe to owhlẹ awetọ glọ na nuvò etọn awe lẹ: ²⁰Podọ na awà awetọ gohọ̀túntún lọ tọn, to awa agewaji, owhlẹ oko: ²¹po oslò yetọn kande fataka tọn lẹ po; oslò awe to owhlẹ ode glọ, podọ oslò awe to owhlẹ awetọ glọ. ²²Podọ na godowaji gohọ̀túntún lọ tọn hlan wheyihọ dali hiẹ na basi owhlẹ ṣidopo ²³Podọ owhlẹ awe hiẹ na basi na lọnglọnẹn gohọ̀túntún lọ tọn to godowaji. ²⁴Yé nasọ yín yẹ́ndawe toglọ, podọ to hunkọ mọnkọ tọn mẹ kẹdẹ yé na yín blebu hlan aga, etọn hlan alọkẹ dopo: le wẹ é na yín na yé mẹawe lẹ; yé na tin na lọnglọnẹn awe lẹ. ²⁵Owhlẹ sinatòn wẹ na tin to finẹ, podọ oslò yetọn fataka tọn lẹ, oslò fọtọ̀nnukundopo; oslò awe to owhlẹ dopo glọ, podọ oslò awe to owhlẹ awetọ glọ. ²⁶Hiẹ na basi okòpla atin akasia tọn lẹ; atọ́n na owhlẹ awà dopo gohọ̀túntún lọ tọn tọn lẹ, ²⁷podọ okòpla atọ̀n na owhlẹ awà awetọ gohọ̀túntún lọ tọn tọn lẹ, podọ okòpla atón na owhlẹ awà gohọ̀túntún tọn lọ tọn lẹ, na awàgodo tọn hlan whèyihọ dali. ²⁸Podọ okòpla ṣẹnṣẹn tọn to gblagbla owhlẹ lẹ lọ tọn mẹ na luntọn sọn opodo jẹ opodo. ²⁹Hiẹ bo nasọ yí sika do bú owhlẹ lẹ lọ, bo sọ basi alọkẹ yetọn sika tọn na otẹnmẹ lẹ na okòpla lẹ lọ: hiẹ nasọ yí sika do bú okòpla lẹ lọ. ³⁰Hiẹ nasọ jlọ gohọ̀túntún lọ daga kẹdẹdi ohunkọ etọn he yè ko dohia we to osé lọ ji.

³¹Hiẹ nasọ basi avọ̀ajlalanọ avọ̀ ahóvẹ̃ tọn de, po avọ̀ gefunwunmẹ po, po ovọ̀vẹ̃sẹsẹ po, po alavọ̀ dagbedagbe sisló po: dogó kẹlubimi lẹ azọ́n azónwàtọ ananọ lọ tọn yè ni do basi i. ³²Hiẹ nasọ zé e pla do odòtin ẹnẹ atin akasia tọn lẹ go he yè yí sika do bú, osé yetọn lẹ na yín sika tọn, to oslo fataka tọn ẹnẹ ji. ³³Hiẹ nasọ zé avọ̀ajlalanọ lọ pla opla lẹ glọ, bo na hẹn alki okunnuhó tọn lọ wá biọ finẹ to avọ̀ajlalanọ lọ homẹ: avọ̀ajlalanọ lọ nasọ má otẹn wiwe lọ po wiwe gbahúgbahú po hlan mì ṣẹnṣẹn. ³⁴Hiẹ bo na yí aisintẹn-lẹblanu tọn lọ do alki okunnuhó lọ tọn mẹ to otẹn wiwe gbahúgbahú lọ mẹ. ³⁵Hiẹ bo nasọ zé tafo lọ do gbonu avọ̀ajlalanọ lọ tọn, po miyọngbántin lọ po taga pànnukọn tafo lọ to awà gohọtúntún lọ tọn go hlan huwaji dali: hiẹ nasọ yí tafo lọ do awà agewaji tọn go. ³⁶Hiẹ nasọ basi basẹ de na ohòn Ogohò lọ tọn, avọ̀ ahóvẹ̃ tọn, po avọ̀ gefunwunmẹ po, po avọ̀vẹ̃sẹsẹ po, po alavọ̀ dagbedagbe sisló po, azón yẹnvinàwàtọ lọ tọn. ³⁷Hiẹ nasọ basi odọ̀tin atọ́n akasia tọn na basẹ lọ, bo yí si-ka do bú yé; osé yetọn lẹ na yín sika tọn; hiẹ nasọ kọ̀n oslò ogànvẹ̃ tọn atọ́n na yé.

¹HIẸ na basi agbà atin akasia tọn tọn lọ, awàgba atón dite, podọ awàgba atón gblo; agba lọ na yín adaẹnẹsọzén: podọ ojiyìyì etọn na yín awàgba atọ̀n. ²Hiẹ na basi azò e tọn lẹ do lọnglọnẹn etọn ẹnẹ lẹ yi: azò etọn lẹ na yín blebu dopo po e po: hiẹ nasọ yí ogànvẹ̃ do bú i. ³Hiẹ nasọ basi ozẹ́n etọn lẹ nado yí afín etọn sẹ̀, po fẹli etọn lẹ po, po ṣiklẹ etọn lọ po, po opla olàn tọn etọn lẹ po, po ogànzẹn etọn lẹ po: núzinzán etọn lẹpo hiẹ na basi sọn ogànvẹ̃ mẹ. ⁴Hiẹ nasọ basi owẹn odọ̀zọ́n tọn sọn ogànve mẹ; podọ to odò lọ ji hiẹ na basi alọkẹ gànvẹnọ ẹnẹ do opodo etọn ẹnẹ le mẹ. ⁵Hiẹ na yi i do opẹpẹ lọ glọ lédo agbà lọ toglọ, na odò lọ nido jẹ dagla mẹ agbà lọ tọn. ⁶Hiẹ nasọ basi opò le na agbà lọ, opò atin akasia tọn lẹ, bo yí ogànvẹ̃ do bú yé. ⁷Yè nasọ yí opò etọn lẹ do awà awe agbà lọ tọn ji, to zizó e hẹn me. ⁸Owhlẹ po odò po wẹ hiẹ na basi i: dile yè ko do e hia we do to osò lọ mẹ, mọwẹ hiẹ na basi i do.

⁹Hiẹ nasọ basi akànmahò gohọ̀túntún lọ tọn: na ohùwaji hlan hùwaji dali ovdido lẹ na akànmahò lọ sọn alavọ̀ dagbedagbe sislo mẹ awàgba kanweko dite na tin finẹ na awà dopo: ¹⁰podọ odòtin etọn lẹ na yín oko, oslò yetọn lẹ oko ogànvè tọn; osé odòtin lẹ lọ tọn le, podọ otaṣinyọn yetọn lẹ na yín fataka tọn. ¹¹Podọ mọkẹdẹ na awà agewaji tọn to ote mẹ avọ̀dido lẹ na tin finẹ awàgba kanweko dite, podọ odòtin etọn lẹ oko, podọ oslò yetọn lẹ oko, ogànvẹ̃ tọn; osé odòtin lẹ lọ tọn lẹ po otaṣinyọn yetọn lẹ po fataka tọn. ¹²Podọ na ogblo akanmahó lọ tọn to awà whèyìhò tọn ji avọ̀dido awàgba kandeao tọn na te; odòtin yetọn lẹ ao, podọ osé yetọn lẹ ao. ¹³Podọ ogblo akanmahó lọ tọn to awà whèyìhò tọn ji hlan whèyìhò dali wẹ awàgba kandeao na te. ¹⁴Avọ̀dido lẹ lọ na awà dopo hòngbo lọ tọn na yín awàgba kandeao: odòtin yetọn lẹ atọ̀n, osé yetọn lẹ atọ̀n. ¹⁵Podọ na awà awetọ avọ̀dido lẹ lọ tọn wẹ awàgba fọtọ̀n na te: odòtin yetọn lẹ atọ̀n, po osé yetọn lẹ po atọ̀n. ¹⁶Podọ obasẹ awàgba oko tọn de na tin na ohòngbo akanmahó lọ tọn, avọ̀ahóvẹ̃ tọn, po avọ̀ gefunwunmẹ po, po avọ̀vẹ̃sẹsẹ po, po alavọ̀ dagbadagbe sislo po, azọ́n yénvinàwàtọ lọ tọn: odòtin yetọn lẹ ẹnẹ, podọ oslò yetọn lẹ ẹnẹ. ¹⁷Odòtin akanmahó lọ tọn lẹpo lédo pó na yín yíyí fataka do ṣinyọntana: osé yetọn fataka tọn, podọ oslò yetọn ogànvẹ̃ tọn. ¹⁸Ote akanmahó lọ tọn na yín awàgba kanweko, podọ ogblo to ofi popo awàgba kandeao, podọ ojiyìyì awàgba atón, alavọ̀ dagbedagbe sislo tọn, podọ oslò yetọn lẹ ogànvè tọn. ¹⁹Núzinzán gohọ̀túntún lọ tọn lẹpo to sinsẹ̀n etọn lẹpo mẹ, po osé etọn lẹpo po, po osé akanmahó lọ tọn lẹpo po, na yín ogànvó tọn.

²⁰Hiẹ nasọ degbèna ovi Islaeli tọn lẹ, na yé ni hẹn amì akú olivieli tùntùn tọn wá na we na hinhọ́n, nado hẹn miyọngbán de nado to jiji whepoponu. ²¹To ogohò opli tọn lọ mẹ, to gbonu avọ̀ajlalanọ he tin to okunnuhó lọ nukọn, Aalọn po visunnu etọn lẹ po wẹ na nọ pọ́n e go sọn whèjai jẹ afọnnu to OKLUNỌ nukọn: é na yín séndoai de kakadoi gbọn whẹndo yetọn lẹpo mẹ na ovi Islaeli tọn lẹ tọn wutu.

¹BO hẹn Aalọn nọvisunnu towe wá sẹ́pọ jẹ de we, podọ visunnu etọn lẹ po e po, sọn ovi Islaeli tọn lẹ ṣẹnṣẹn, na é nido wàdevizọ́n hlan mi to azọ́nhò yẹwhenọ lọ tọn mẹ, yèdọ Aalọn, Nadabi po Abihu po, Eleazaíi po Itamali po, visunnu Aalọn tọn lẹ. ²Hiẹ nasọ basi awu wiwe lẹ na Aalọn nọvisunnu towe, na gigo podọ na owhanpẹ. ³Hiẹ nasọ dọhó hlan yé he yín ayiha nuyọnẹnnọ lẹpo, mẹhe yẹn ko yí gbigbọ nuyọnẹn tọn do gó lẹ, na yé ni basi awu Aalọn tọn lẹ nado klan ẹn do wiwe, na é nido wàdevizọ́n hlanmito azónhó yẹwhenọ tọn lọ mẹ. ⁴Ehelẹ sọ wẹ awu he yé na basi lẹ lọ; otùnudo de, po efọdi de po, po otewu de po, po odòwu azón ohiado tọn de po, yẹwhenọgbakun de, po homẹblá de po: yé na basi awu wiwe lẹ na Aalọn nọvisunnu towe, po visunnu etọn lẹ po, na é nido nọ wàdevizọ́n hlan mi to azónhó yẹwhenọ tọn lọ mẹ. ⁵Yé nasọ yí sika lọ, po avọ̀ahóvẹ́ lọ po, po avọ̀ gefunwunmẹ lọ po, po avọ̀vẹ̃sẹsẹ lọ po, po alavọ̀ dagbedagbe lọ po.

⁶Yé nasọ basi efọdi sika tọn lọ, avọ̀ahóvẹ̃ tọn, po avọ̀ gefunwunmẹ po, avọ̀vẹ̃sẹsẹ, po alavọ̀ sislo dagbedagbe po, azón azónwátọ anànọ lọ tọn. ⁷E na tindo abójivó awe yè sìndopọ do opodo etọn awe lẹ go; na é nido yín sìnsìndopọ. ⁸Podọ homẹbla yè yí anà do lọn lọ, he tin to e ji, nado yí i do gbànhomẹ, na tin di azón etọn podọ po dopo lọ po tọn; sika tọn, avọ̀ahóvẹ̃ tọn, po avọ̀ gefunwunmẹ po, po avọ̀vẹ̃sẹsẹ po, po alavó dagbedagbe sislo po. ⁹Podọ Lẹ nasọ yí zannu oniksi tọn awe, bo wlan oyín ovi Islaeli tọn lẹ tọn lẹ do yé go: ¹⁰ṣidopo oyín yetọn lẹ tọn to zannu dopo go, podọ oyín ṣidopo he pò lẹ tọn to zannu awetọ go, kẹdẹdi jiji yetọn. ¹¹Hiẹ na yí azón nuwlantọ do zannu mẹ de tọn do wlan zannu awe lẹ, di winwlan hiadonu de tọn, kẹdẹdi oyín ovi Islaeli tọn lẹ tọn: hiẹ na hẹn yé nado yín nubúdo to oslò sika tọn mẹ. ¹²Hiẹ nasọ yí zannu awe lẹ do abọjivò efọdi tọn lọ ji, nado yín zannu oflín tọn na ovi Islaeli tọn lẹ: Aalọn bo nasọ zé oyín yetọn lẹ hẹn to OKLUNỌ nukọn to abó etọn awe lẹ ji na oflín de.

¹³Hiẹ nasọ basi oslò sika tọn lẹ: ¹⁴Po ogèdẹ sika tọn awe po; hie na basi yé di kànsisló lẹ, azón núsisló tọn: hiẹ nasọ yí ogèdẹ sisló lẹ lọ do oslò lẹ lọ mẹ. ¹⁵Hiẹ nasọ basi otùnudo whẹ̀dida tọn de, azọ́n azónwàtọ lọ tọn; hiẹ na basi i di azọn efọdi lọ tọn; sika tọn, avọ̀ahóvẹ̃ tọn, po avọ̀gefunwunmẹ po, po avọ̀vẹ̃sẹsẹ po, po alavọ̀ dagbedagbe sislo po, hiẹ na do basi i. ¹⁶Àdàẹnẹsọzén é na yín, bo yéndawe; alọkikẹ dopo ote etọn na yín, podọ ogblo etọn lọ alọkikẹ dopo. ¹⁷Hiẹ nasọ tò do e mẹ titò zannu lẹ tọn, oha ẹnẹ zannu lẹ tọn: oha sadusi, topazi, po emelaldi po tọn de na yín oha tintan lọ; ¹⁸podọ oha awetọ lọ kalbunkli de, safìle de, po saldọniki de po; ¹⁹podọ oha atọ̀ntọ lọ ambeli de, agate de, po ametisti de po; ²⁰podọ oha ẹnẹtọ lọ kalsidoni de, po bilili de po, po jaspeli de po: yé na yín núbúdo to sika mẹ to titò yetọn lẹ mẹ. ²¹Zannu lọ lẹ na tin kẹdẹdi oyín ovi Islaeli tọn lẹ tọn wiawe, kededi oyín yetọn lẹ; taidi winwlan hiadonu de tọn lẹ lọ, omẹ dopodopo kẹdẹdi oyín etọn, yé na tin na whẹndo wiawe lẹ lọ. ²²Hiẹ nasọ basi do otùnudo lọ ji ogẹ̀dẹ taidi kànsisló lẹ, sọn azón sisló sika akú tọn mẹ. ²³Hiẹ bo nasọ basi alọkẹ sika tọn awe do otùnudo lọ ji, bo na yí alọkẹ awe lẹ lọ do opodo awe otùnudo lọ tọn go. ²⁴Hiẹ bo nasọ yí ogèdẹ sisló sika tọn awe lẹ do alọkẹ awe lẹ go to opodo otùnudo lọ lẹ tọn. ²⁵Podọ opodo awetọ awe ogẹ̀dẹ sisló awe lẹ tọn lẹ hiẹ na yí do oslò awe lẹ go, bo sọ yí yé do abójivò efọdi lọ tọn go, to nukọn etọn. ²⁶Hiẹ nasọ basi alọkẹ sika tọn awe, hiẹ nasọ yí yé do opodo awe otùnudo lọ tọn lẹ ji, do otónu etọn ji, he tin to awà efọdi lọ tọn dali hlan homẹdali. ²⁷Hiẹ nasọ basi alọkẹ sika tọn awe, bo yí yé do abójivò efọdi lọ tọn go toglọ, to nukọn etọn, sẹpọ sìnsìnpla etọn, to homẹbla efọdi lọ tọn yè yí anà do lòn ji. ²⁸Yé nasọ yí ylọnkòndu avọ̀ahóvẹ̃ tọn de do sìn otùnudo lọ gbọn alọkẹ etọn lẹ dali jẹ alọkẹ efọdi lọ tọn go, na é nido tin to homẹbla efọdi lọ tọn he yè yí anà do lòn tọn lọ ji, podọ otùnudo lọ yín túntún sọn efọdi lọ mẹ blo. ²⁹Aalọn bo na hẹn oyìn ovi Islaeli tọn lẹ tọn to otùnudo whẹ̀dida tọn lọ mẹ to ayiha etọn ji, whenuena é biọ họmẹ yì jẹ otẹn wiwe lọ me, na oflin de to OKLUNỌ nukọn jeijei. ³⁰Hiẹ nasọ yí Ulimi lọ po Tumimi lọ po do otùnudo whẹ̀dida tọn lọ mẹ; yé nasọ tin to ayiha Aalọn tọn ji, whenuena é biọ hòme yì OKLUNỌ lọ nukọn: Aalọn bo nasọ hẹn whẹ̀dida ovi Islaeli tọn lẹ tọn to ayiha etọn ji to OKLUNỌ lọ nukọn jeijei.

³¹Hiẹ nasọ basi otewu efọdi tọn lọ avọahóvẹ tọn dodo ³²Odò de na tin to aga etọn na ota to gblagbla etọn mẹ: é na tindo sìnsìn azón linlòn tọn de lédo odò e tọn di é yin odò odòwu awhànwu tọn de, na é ma na do tlẹn. ³³Podọ to tónuyínyón é tọn ji hiẹ na basi pomeglanate avọ̀ahóvẹ̃ tọn lẹ, po avogefunwunmẹ tọnpo, pọ avọ̀vẹ̃sẹsẹ tọn po, lédo otónuyinyén etọn pé; po azà sika tọn lẹ po to yé ṣẹnṣẹn lédo pó. ³⁴Azà sikanọ de po pomeglanate de po, azà sikanọ de po pomeglanate de po, to tọnuyinyón otẹwu lọ tọn lẹ ji lédo pe. ³⁵E bo nasọ tin to Aalọn ji nado nọ wàdevizọ́n: podọ nudidọ etọn na yín sisè whenuena ewọ biọ otẹn wiwe lọ mẹ jei to OKLUNỌ lọ nukọn, po whenuena ewọ jẹgbonu wá po, na ewọ ma na do kú gba.

³⁶Hiẹ na basi agbán sika akú tọn de, bo wlan do e ji, di winwlan hiadonu de tọn lẹ, WIWE HLAN OKLUNỌ LỌ. ³⁷Hiẹ na yí i do ylọnkòndu avóahóvẹ̃ tọn de go, é nasọ tin to asọgbakun lọ ji; to nukọn asọgbakun lọ tọn ji wẹ é na te. ³⁸E nasọ tin to nukọn Aalọn tọn ji, Aalọn nasọ nọ zé oylanwà onú wiwe lẹ lọ tọn hẹn, he ovi Islaeli tọn lẹ na hiọ to núnina yetọn lẹpo mẹ; é bo nasọ tin to nukọn etọn ji whepoponu, na yé nido yín alọkẹyi to OKLUNỌ lọ nukọn. ³⁹Hiẹ nasọ lọn odòwu séda tọn lọ to azón hiado tọn lọ mẹ, hiẹ nasọ basi yẹwhenọgbakun séda tọn de, hiẹ nasọ basi ogbaja azón yénvinàwàtọ lọ tọn de. ⁴⁰Podọ visunnu Aalọn tọn le hiẹ nasọ basi odòwu lẹ na, hiẹ nasọ basi ogbaja na yé, hiẹ nasọ basi zínvọ̀ lẹ na yé, na gigo podọ na whanpẹ. ⁴¹Hiẹ bo na zé yé do Aalọn nọvisunnu towe ji, podọ do viẹúnnu etọn lẹ ji po e po; bo na sámisisana yé, bo gó alọ yetọn, bo klan yé do wiwe, na yé nido nọ wàdevizọ́n hlan mi to azọ́nhò yewhenọ tọn lọ mẹ. ⁴²Hiẹ nasọ basi sokoto alavọ̀ tọn lẹ na yé nado ṣinyọn olan omé yetọn tọn; sọn alinkàn yèdọ jẹ asapada wẹ yé na jẹ: ⁴³yé na tin to Aalọn ji, podọ to visunnu etọn lẹ jì, whenuena yé biọ họ̀mẹ yì jẹ ogohò opli tọn lọ mẹ, kavi whenuena yé wá sèpọ jẹ agbà lọ kòn nado wàdevizọ́n to otẹn wiwe lọ mẹ; na yé ma na do zé oylanwà hẹn, bo kú gba: é na yín séndoai de kakadoi hlan ẹn podọ hlan okún etọn to godo etọn.

¹EHE wẹ onú he hiẹ na wà hlan yé nado hiọ yé, nado nọ wàdevizọ́n hlan mi to azọ́nhò yẹwhenọ tọn lọ mẹ: yí oyìnsú winyanwinyan dopo po agbò awe po matin azọn de, ²po akla madotón po, po aklahihi lẹ po madotónnọ he yè yi amì do hò, po aklawadawada lẹ po madotónnọ he yè yí amìsísasána: hiẹ na basi yé sọn olinfín ohkún dagbedagbe mẹ. ³Hiẹ nasọ yí yé do òha dopo me, bo hẹn yé wá to òha lọ mẹ, po oyìnsú winyanwinyan lọ po po agbò awe lẹ lọ po. ⁴Hiẹ bo nasọ hẹn Aalọn po visunnu etọn lẹ po wá jẹ ohòn ogohò opli tọn lọ tọn kòn, bo na yí osìn do léawuna yé. ⁵Hiẹ nasọ zé awu lẹ lọ, bo yí odòwu lọ do Aalọn ji, po otewu efọdi lọ tọn lọ po, po efọdi lọ po, po otùnudo lọ po, bo yí homẹbla linlòn efọdi lọ tọn anà tọn lọ do blagbajana ẹn. ⁶Hiẹ nasọ yí yẹwhenọgbakun lọ do ota nẹ, bo sọ yí ojegbakun wiwe lọ do yẹwhenọgbakun lọ ji. ⁷Whenẹnu wẹ hiẹ na yí amì sisá lọ, bo kòn ẹn do ota etọn ji, bo samìsisana ẹn. ⁸Hiẹ nasọ hẹn visunnu etọn lẹ wá, bo sọ yí odòwu lẹ dò yé ji. ⁹Hiẹ na yí homẹbla lẹ do blagbajana yé, Aalọn po visunnu etọn lẹ po, bo sìn zĩnvọ̀ lẹ do yé ji: yé bo nasọ tindo yẹwhenọduta lọ gbọn séndoai magbòdo de dali: hiẹ bo nasọ klan Aalọn po visunnu etọn lẹ po do wiwe, ¹⁰Hiẹ na hẹn oyìnsú winyanwinyan lọ wá ogohọ̀ oli tọn lọ nukọn: Aalọn po visunnu ètọn lẹ po na zé alọ yetọn lẹ do ota oyìnsú winyanwinyan lọ tọn. ¹¹Hiẹ nasọ hù oyìnsú winyanwinyan lọ to OKLUNỌ lọ nukọn, to ohòn ogohò opli tọn lọ tọn nukọn. ¹²Hiẹ na yí sọn ohùn oyìnsú winyanwinyan lọ tọn mẹ, bo yi alọviyeyẹ towe do jd i do azò agbà lọ tọn lo ji; hiẹ bo nasọ kòn ohùn lẹpo jẹgbonu to ozòn agbà lọ tọn lọ kòn. ¹³Hiẹ nasọ yí ojo he ṣinyọn homẹnu lọ le ji lẹpo, po otlán he to alín ji po, po ahun awe lẹ po, po ojó he tin to yé ji po, bo mó yé to agbà lọ ji. ¹⁴Ṣigba olàn oyìnsú winyanwinyan lọ tọn, po ayú etọn po, po omí etọn po, wẹ hiẹ na yí miyọn do mó to gbonu osla lọ tọn: avọ́nunina ylando de tọn wẹ. ¹⁵Hiẹ nàsọ yí agbo dopo lọ ga; Aalọn po visunnu etọn lẹ po na zé alọ yetọn le do ota agbo lọ tọn ji. ¹⁶Hiẹ nasọ hù ogbò lọ, hiẹ bo nasọ yí ohùn eton, bo mì in lédo agbà lọ ji pé. ¹⁷Hiẹ bo na já agbò lọ do fiinflin etọn mẹ, bo klọ homẹnu etọn lẹ, po asá etọn lẹ po, bo yí yé do flinfíin etọn lẹ ji, podọ do ota etọn ji. ¹⁸Hiẹ nasọ mè agbò lọ pete to agbà lọ jí: avọ́nunina mimẹ̀ de wẹ hlan OKLUNỌ lọ: owán vivinọ de wẹ, avonunina yè basi gbọn miyọn dali de hlan OKLUNỌ lọ. ¹⁹Hiẹ nasọ yi agbò awetọ lọ; Aalọn po visunnu etọn lẹ po na zé alọ yetọn lẹ do ota agbò lọ tọn ji. ²⁰Whenẹnu hiẹ na hù agbò lọ, bo yí sọn ohùn etọn mẹ, bo yí i do tónu otọ́ adusi Aalọn tọn lọ tọn ji, podọ do tónu otọ́ adusi visunnu etọn lẹ tọn ji, podọ do alọsú alọ adusi yetọn tọn ji, podọ do afọsú afọ adusi yetọn tọn ji, bo sọ mì ohùn lọ do agbà lọ ji lédo pé. ²¹Hiẹ nasọ yí sọn ohùn he tin to agbà lọ ji mẹ, podọ sọn amì sisá lọ mẹ, bó mì in do Aalọn ji, podọ do awu etọn lẹ ji, podọ do visunnu etọn lẹ ji, podọ do awu visunnu etọn lẹ tọn lẹ ji po e po; ewọ bo nasọ yín hihiọ, po awu etọn lẹ po, po visunnu etọn lẹ po, po awu visunnu etọn lẹ tọn lẹ po po e po. ²²Hiẹ na yí sọn agbò lọ mẹ ga ojó lọ, po ojó osi tọn lọ po, po ojó he ṣinyọn họmẹnu lẹ lọ ji po, po otlán alín lọ tọn po, po ahún awe lẹ lọ po, po ojó he tin to yé ji lọ po, po abọ́ adusi tọn lọ po; na agbò kinklandowiwe tọn de wẹ: ²³podọ akla blebu dopo, po aklahihi akla amì tọn dopo po, po aklawadawada dopo po, sọn òha akla madotón tọn lọ mẹ he tin to OKLUNỌ lọ nukọn: ²⁴hiẹ na ze pete lọ do alọ Aalọn tọn lẹ ji, podọ do alọ visunnu etọn lẹ tọn le ji: bo na zé yé hia na avọ́nunina zehia de to OKLUNỌ lọ nukọn. ²⁵Hiẹ nasọ yi ye sọn alọ yetọn lẹ mẹ, bo mẹ̀ yé to egbà avọ́nunina mimẹ̀ tọn lọ ji, na owan vivinọ de to OKLUNỌ lọ nukọn: avọ́nunina yè basi gbọn miyọn dali de hlan OKLUNỌ lọ wẹ. ²⁶Hiẹ bo nasọ yí akọ́n agbò kinklandowiwe Aalọn tọn lọ tọn, bo na zé e hia na avọ́nunina zéhia de to OKLUNỌ lọ nukọn: é bo nasọ yín mimá towe. ²⁷Hiẹ nasọ klan akọ́n avọ́nunina zehia tọn lọ do wiwe, po abọ́ avọ́nunina zédlanga tọn lọ po, ehe yè zéhia, po ehe yè zédlanga po, sọn agbò kinklandowiwe lọ mẹ, yèdọ sọn enẹ he tin na Aalọn mẹ, podọ sọn enẹ he tin na visunnu etọn lẹ mẹ: ²⁸é nasọ tin na Aalọn po visunnu etọn lẹ po di onújọ de sọn ovi Islaeli tọn lẹ de kakadoi: na ai ọnunina zédlanga de wẹ: é bo nasọ yín avọ́nunina zédlanga de sọn ovi Islaeli tọn lẹ de sọn avọ́ avọ́nunina jijọho tọn yetọn lẹ lọ mẹ, yèdọ avọ́nunina zédlanga yetọn hlan OKLUNỌ lọ. ²⁹Podọ awu wiwe Aalọn tọn lẹ lọ na tin na visunnu etọn lẹ to godo etọn, nado nọ yín mẹsámìsisána to yé mẹ, podọ nado yín mẹklandowiwe to yé mẹ. ³⁰Azán ṣinawe visunnu he yín yẹwhenọ to otẹn etọn mẹ lọ na do yé ogo hò, whenuena é wá ogohò opli tọn lọ mẹ nado wàdevizọ́n to oten wiwe lọ mẹ. ³¹Hiẹ nasọ yí agbò kinklandowiwe tọn lọ, bo sọakusìn olàn etọn to otẹn wiwe de mẹ. ³²Aalọn po visunnu etọn lẹ po nasọ dù olàn agbò lọ tọn, po akla he tin to òha lọ mẹ lọ po, to ohòn ogohò opli tọn lọ tọn kòn. ³³Yé nasọ dù onú nẹlẹ he yè yí do basi ovẹ̀se, nado klandowiwe podọ nado hẹn yé zùn wiwe: ṣigba ojonọ de ma na dù sọn e mẹ, na yé yín wiwe wutu. ³⁴Podọ eyín núde sọn olàn kinklandowiwe lọ tọn, kavi akla lọ tọn pò jẹ afọnnu lọ, whenẹnu hiẹ na yí miyọn do mó pipòtọ lọ, é ma na yín dùdù gba, na wiwe wẹ wutu. ³⁵Le wẹ hiẹ na wà hlan Aalọn do, podọ hlan visunnu etọn lẹ, kẹdẹdi enẹ he yẹn degbèna we lẹpo: azán ṣidopo hiẹ na klan yé do wiwe hó. ³⁶Podọ egbésọ wẹ hiẹ na nọ na oyìnsú winyanwinyeji lọ na avọ́nunina ylando tọn na ovẹ̀se: hiẹ bo nasọ yìn agba lọ, gbọn ovẹ̀se bibasi dali; hiẹ na samìsisana ẹn, nado hẹn ẹn zùn wiwe. ³⁷Azán ṣinawe hiẹ na basi ovẹ̀se na agbo, lọ hò, bo hẹn en zùn wiwe: agbà lọ bo nasọ yín wiwe gbahúgbahú; medepope he liagba agba lọ na yín wiwe.

³⁸Dinvie ehe wẹ enẹ he hiẹ na do na avọ́nunina to agba lọ ji; lẹngbọvu awe owhè tintan lọ tọn egbésọegbésọ jeijei. ³⁹Lẹngbọvú dopo lọ hiẹ na do na avọ́nunina to afonnu lọ; podọ lẹngbọvú awetọ lọ hiẹ na do na avọ́nunina to whèjai awe lẹ ṣẹnṣẹn: ⁴⁰podo po lengbovu dopo lọ po madaotọ ẹfa linfín dagbedagbe tọn yè yí madẹnẹtọ hinni amì tùntùn tọn de flusọ; po madẹnẹtọ hinni ovẹ̃n tọn de po na avọ́nunina nùnù de. ⁴¹Podọ lẹngbọvú awetọ hie na do na avọ́nunina to whèjai awe lẹ ṣẹnṣẹn, bo nasọ basi hlanfinẹlọ kẹdẹdi avọ́nunina jinulili afọnnu lọ tọn, podọ kẹdẹdi avọ́nunina nùnù etọn, na owan vivi de, avọ́nunina yè basi gbọn miyọn dali de hlan OKLUNỌ LỌ ⁴²E na yín avọ́nunina mimẹ̀ de jeijei gbọn whẹndo mìtọn lẹ mẹ to ohòn ogohò opli tọn lọ tọn kòn to OKLUNỌ lọ nukọn: fie yẹn na pli hẹ mì te, nado dohó to finẹ hlan we. ⁴³Podọ finẹ wẹ yẹn na pli hẹ ovi Islaeli tọn lẹ lọ te; Ogohò lọ nasọ yín hinhẹnzùnwiwe gbọn gigo ṣie dali. ⁴⁴Yẹn bo nasọ hẹn ogohò opli tọn lọ zùn wiwe, po agbà lọ po: Yẹn nasọ hẹn Aalọn po visunnu etọn lẹ po zùn wiwe ga, nado nọ wàdevizọ́n hlan mi to azọ́nhò yẹwhenọ tọn lọ mẹ. ⁴⁵Yẹn nasọ nọnọ̀ ṣẹnṣẹn ovi Islaeli tọn lẹ tọn, bo sọ yín Jiwheyẹwhe yetọn. ⁴⁶Yé nasọ yọnẹn dọ yẹn wẹ OKLUNỌ Jiwheyẹwhe yetọn, he hẹn yé sọn aigba Egipti tọn ji jẹgbonu, na yẹn nido nọnọ̀ ṣẹnṣẹn yetọn: yẹn wẹ OKLUNỌ lọ Jiwheyẹwhe yetọn.

¹HIẸ nasọ basi agbà de nado nọ mẹ núwhẹnkún to e ji: atin akasia tọn hiẹ na do basi i ²Awàgba dopo ote etọn na yín; adaẹnẹsọzén wẹ é na yín: podọ awàgba awe wẹ jiyìyì etọn na yín: azò etọn lẹ na yín dopo po e po. ³Hiẹ na yí sika akú do bú i, aga etọn, po adó etọn lẹ po lódo pó, po azò etọn lẹ po; hiẹ nasọ basi otónu sika tọn de lédo e pó. ⁴Podọ alọkẹ awe sika tọn hiẹ na basi nẹ̃ to otónu etọn lọ glọ, to adà etọn awe lẹ ji, to awà etọn awe le ji we hiẹ na basi yé do, yé nasọ tin na oten le na opò lẹ nado nọ yí do ze e ⁵Hie nasọ basi opò atin akasia tọn lẹ, bo yí sika do bú yé. ⁶Hiẹ nasọ yí i do avọ̀ajlalanọ lọ nukọn he tin to alki kunnuhó lo ton dali, to aisintẹn-lẹblanu tọn nukọn he tin to kunnuhó lọ ta, fie yẹn na nọ pli hẹ we te. ⁷Aalọn na nọ mó núwhẹnkún atinkẹn vivi tọn: to afọnnu-afọnnu, whenuena é já lẹngbọvú lọ, é na mó ẹn. ⁸Whenuena Aalọn tá miyọngbán lẹ lọ to whèjai awe lẹ ṣẹnṣẹn, é na mè ẹn, nuwhẹnkún de whepoponu to OKLUNỌ lọ nukọn gbọn whẹndo mìtọn lẹ me. ⁹Mìwlẹ ma na na na avọ́nunina nuwhẹnkún alọpade to e ji, kavi avọ́nunina mimẹ̀, kavi avọ́nunina jinuhli tọn; mìwlẹ ma nasọ kòn avọ́nunina nùnù do e ji gba. ¹⁰Aalọn nasọ basi ovẹ̀se na azò e tọn lẹ lọ whladopo to owhè lọ mẹ: po ohùn ovẹ̀se avọ́nunina ylando tọn lọ tọn po, whladopo to owhè lọ mẹ wẹ é na nọ basi ovẹ̀se to e ji gbọn whẹndo mìtọn lọ mẹ: wiwe gbahúgbahú wẹ hlan OKLUNỌ LỌ.

¹¹OKLUNỌ lọ sọ dọhó hlan Moṣe, dọmọ, ¹²Whenuena hiẹ yí osọha ovi Islaeli tọn lẹ tọn, kedẹdi yé he yè yísọha yé tọn lẹ, whenẹnu wẹ yé na na omẹ dopodopo ofligò de na alindọn etọn hlan OKLUNỌ lọ, whenuena hie yísọhana yé. ¹³Ehe wẹ yé na na, omẹ dopodopo he juyì aga jẹ yé he yè yísọhana lẹ de, (odá ṣekẹli tọn dopo kẹdẹdi ṣekẹli fiwiwe lọ tọn:) odá ṣekẹli tọn dopo na avọ́nunina de hlan OKLUNỌ lọ. ¹⁴Omẹ dopodopo he juyì aga jẹ yé he yè yísọhana lẹ de, sọn owhè oko mẹho yìaga, na nọ na avọ́nunina lọ hlan OKLUNỌ lọ. ¹⁵Adọkunnọ lọ ma na na sùhú, podọ wamọnọ lọ ma na na whehú, odá ṣekẹli lọ tọn, whenuena yé na avọ́nunina OKLUNỌ lọ tọn lọ, nado basi ovẹ̀se na alindọn mìtọn lẹ. ¹⁶Hie nasọ yí akuẹ ovẹ̀se tọn lọ sọn ovi Islaeli tọn lẹ si, bo nasọ dè e na sinsẹ̀n ogohò opli tọn lọ tọn; na é nido yín oflinnú de na ovi Islaeli tọn lẹ to OKLUNỌ lọ nukọn, nado nọ basi ovẹ̀se na alindọn mìtọn lẹ.

¹⁷OKLUNỌ lọ sọ dohó hlan Moṣe, dọmọ, ¹⁸Hiẹ na basi ozẹ́nvla ogànvẹ̃ tọn de ga, podọ ozòn etọn lọ ogànvẹ̃ tọn, nado nọ yí do lẹawu: hiẹ na yí i do ogohó opli tọn lọ po agbà lọ po ṣẹnṣẹn, hiẹ naso yí osìn do e mẹ. ¹⁹Aalọn po visunnu etọn lẹ po bo na nọ kló yetọn lẹ po afọ yetọn lẹ po to finẹ: ²⁰whenuena ye jei ogohọ opli tọn lọ mẹ, yé na yí osìn do lẹawu, na yé ma na do kú gba; kavi whenuena yé wá sèpọ jẹ agbà lọ kòn nado wàdevizọ́n, nado mó avọ́nunina de he yè basi gbọn miyọn dali hlan OKLUNỌ lọ: ²¹Mọ yé na kló a-ló yetọn lẹ po afọ yetọn lẹ po, na yé ma na do kú gba: é bo na yín sóndoai de kakadoi hlan yé, yèdọ hlan ewọ po okún etọn po gbọn whẹndo mìton lẹ mẹ.

²²Humọ OKLUNỌ lọ sọ dọhó hlan Moṣe, dọmọ, ²³Hie ni yí hlan de we ga nuwhénwán dagbedagbe lọ, ozúya sisà tọn ṣekẹli íowekànweko, podọ odá sùsomọ kinamọni vivi tọn, yèdọ fọdekandeao, po kalamusi vivi tọn po, fọdekandeao, ²⁴po kassia vivi tọn po, kẹdẹdi ṣekẹli ofìwiwe lọ tọn, po amì olivieli tọn po hini dopo: ²⁵hiẹ na yí i do basi amì sisá wiwe de, onúsisa yè flusọ de kẹdẹdi anà nusisábasitọ lọ tọn: é na yín amì sisá wiwe de. ²⁶Hiẹ na yí do sámìsisána ogohò opli tọn lọ, po agbà okunnuhó lọ tọn po, ²⁷Po tafo lo po po núzinzán etọn lẹpo po, po miyọngbántin lọ po po núzinzán etọn lepo po, po agbà nuyọnwán tọn lọ po, ²⁸Po agbà avọ́nunina mimẹ̀ tọn lọ po po núzinzán etọn lẹpo po, po ozẹ́nvla lọ po po ozòn eton lọ po. ²⁹Hiẹ bo nasọ klan yé do wiwe, na yé nido yín wiwe gbahúgbahú: medepope he liagba yé na yín wiwe. ³⁰Hiẹ nasọ sámìsisana Aalọn po visunnu etọn lẹ po, bo hẹn yé zùn wiwe, na yé nido wàdevizọ́n hlan mi to azónhó yẹwhenọ tọn lọ mẹ. ³¹Hiẹ bo na dọhó hlan ovi Islaeli tọn lẹ, dọmọ, Ehe na yín amì sisá wiwe de hlan mi gbọn whẹndo mìtọn mẹ. ³²E ma na yín kinkọn do olàn gbẹtọ tọn lọ ji gba, mọ mìwlẹ ma nasọ basi hunkọ etọn depope, kẹdẹdi oflusọ etọn lọ: wiwe wẹ, é bo nasọ yín wiwe hlan mì. ³³Omẹ depope he basi flusọ hunkọ etọn depope, kavi mẹdepope he yí depope etọn do ojonọ de ji, na yín sinsán só sọn omẹ etọn lẹ mẹ.

³⁴OKLUNỌ lọ sọ dọ hlan Moṣe dọmọ, Yí nuwhẹnwán vivi do de we, stakte, po onika po, po galbanumi po: nuwhẹnwán vivi po atinkẹn akú po: ojló hunkọ dopo wẹ dopodopo yé tọn na yín; ³⁵hiẹ bo nasọ basi nuyọnwán sọn e mẹ, onusisá de kẹdẹdi anà nusisábasitọ lo ton, yè yí ojó do yàn dopọ, akú bo sọ wé: ³⁶hiẹ na tùn pẹde e ton mépọdọpodo, bọ yí sọn é mẹ do okunnuhó lọ nukọn to ogohò opli tọn lọ mẹ, fie yẹn na nọ pli hẹ we te: é na yín wiwe gbahúgbahú hlan mí. ³⁷Podọ nuyọnwán he hiẹ na basi lọ, kẹdẹdi oflusọ etọn mìwlẹ ma na basi na mìde gba: é na yín hlan we wiwe na OKLUNỌ lọ. ³⁸Mẹdepope he basi hunkọ enẹ tọn, nado nọ sèwán e tọn, na yín sinsán só sọn omẹ etọn lẹ mẹ.

¹OKLUNỌ lọ sọ dọhó hlan Moṣe, dọmọ, ²Pọ́n, yẹn ko ylọ Bezaleli visunnu Úli tọn lọ, visunnu Huli tọn lọ, sọn whẹndo Juda tọn mẹ gbọn oyín dali: ³yẹn ko sọ yí gbigbọ jiwheyẹwhe tọn do gọ́ ẹ, to nuyọnẹn mẹ, podọ to wuntùntùn mẹ, podọ to oyọnẹn mẹ, podọ to hunkọhunkọ anàzón lẹpo tọn mẹ, ⁴nado sè azọn wunmẹwunmẹ lẹ dai, nado wàzón to sika mẹ, podọ to fataka mẹ, podọ tó ogànvẹ̃ mẹ, ⁵Podọ to sinsán zannu lẹ tọn mẹ na titò, podọ to pipà atin tọn mẹ, nado wàzón to anàzón hunkọhunkọ lẹpo tọn mẹ. ⁶Podọ Yẹn, dayi e go, Yẹn ko dè Oholiabi, visunnu Ahisamakì tọn lọ, sọn whẹndo Dani tọn mẹ, do gó ẹ; podọ yẹn ko yí nuyọnẹn do ayiha yé he yín núyọnẹntọ ayìhanọ lẹpo tọn mẹ, na yé nido basi ehe yẹn ko degbèna we lẹpo: ⁷Ogohò opli tọn lọ, po alki okunnuhó lọ tọn po, po aisintẹn-lẹblanu tọn lọ po he tin e ji, po asọvànu Ogohò lọ tọn lẹpo po; ⁸po tafo lọ po po núzinzán etọn lẹpo po, po miyọngbántin wiwe lọ po po núzinzán etọn lẹpo po, po agbà nuwhẹnwán tọn lọ po; ⁹po agbà avọ́nunina mimẹ̀ tọn lọ po po núzinzán etọn lẹpo po, po ozẹ́nvla lọ po po ozòn etọn po; ¹⁰po awu sinsẹn tọn lẹ lọ po, po awu wiwe lẹ lọ po na Aalọn yẹwhenọ lọ, po awu visunnu etọn lẹ tọn lẹ po, nado nọ wàdevizọ́n to azọ́nhò yẹwhenọ tọn lọ mẹ; ¹¹po amì sisá lọ po, po nuwhẹnwán nuyọnwán vivi tọn lọ po na otẹn wiwe lọ: kẹdẹdi ehe yẹn ko degbèna we lẹpo wẹ yè na wà do.

¹²OKLUNỌ lọ sọ dọhó hlan Moṣe, dọmọ, ¹³Dọhó ga hlan ovi Islaeli tọn le, dọmọ, Nugbo wẹ mìwlẹ na payi gbọjẹzán ṣie lẹ go: na ohia de wẹ to yẹn po mì po ṣẹnṣẹn gbọn whẹndo mìtọn lẹ mẹ; ¹⁴enẹwutu mìwlẹ na nọ payi gbọjẹzán ṣie go; na wiwe wẹ hlan mì: znẹaepope he flu i na yín hùhù dandan: na mẹdepope wà azón depope to e me, alindọn nẹ na yín sinsán só sọn omẹ etọn le ṣẹnṣẹn. ¹⁵Azán ṣidopo azon na yín wiwà hò; ṣigba azán sinawetọ gbè wẹ ogbọjẹzán ogbọjẹ ayidego tọn de, wiwe hlan OKLUNỌ lọ: mẹdepope wà azón depope to ogbọjezán lọ mẹ, è na yín hùhù dandan. ¹⁶Enẹwutu ovi Islaeli ton lẹ lọ na nọ payi ogbọjẹzánlọ go, nado nọ dayi ogbọjezán lọ go gbọn whẹndo yetọn lẹ mẹ, na alònu kakadoi de. ¹⁷Ohia de wẹ to yen po ovi Islaeli tọn le po ṣẹnṣẹn kakadoi: na azán ṣidopo OKLUNỌ basi olọn po aigba po, podọ to azán sinawetọ gbè é gbọjẹ, bo sọ yín awumiọnnọ. ¹⁸E bo sọ yína Moṣe whenuena é doalọ hódidọ hẹ ẹ tọn te to osé Sinai ji, tafo awe okunnuhó lọ tọn lẹ, tafo zannu tọn lẹ, he yè yí alọviyẹyẹ Jiwheyẹwhe tọn lọ do wlan.

¹WHENUENA gbẹtọ lẹ lọ mọ dọ Moṣe dẹn nado jẹte wá sọn osé lọ ji, gbẹtọ lẹ lọ bó yede plidopọ do Aalọn de, bo dọ hlan ẹn dọ, Tite, basi ovòdún de na mí he na to yìyì to mí nukọn; na eyín Moṣe he tọn, dawe he hẹn mí kẹjí jẹgbonu sọn aigba Egipti tọn ji, mìwlẹ ma yón núhe wà e gba. ²Aalọn bo sọ dọ hlan yé dọ, Mì wén alọkẹ sika tọn lọ lẹ, he tin to otọ́ asi mìtọn lẹ tọn lẹ mẹ, visunnu mìtọn lẹ tọn, po viyọnnu mìtọn lẹ tọn po, bo hen yé wá dẽ. ³Gbẹtọ lọ lẹpo sọ wén alọkẹ sika tọn lẹ lọ he tin to otọ́ yetọn lẹ mẹ, bo hẹn yé wá Aalọn de. ⁴Ewọ sọ yí i sọn alọ yetọn mẹ, bo yí anàwànú núwinwlan tọn de do do e, bo yí i do basi oyìnvú kinkòn de: yé sọ dọmọ, Ehe wẹ yẹwhe towe, hiẹ Islaeli, he hẹn we hẹji jẹgbonu sọn aigba Egipti tọn lọ ji. ⁵Whenuena Aalọn mọ ehe, é do agbà de do nukọn nẹ̃; Aalọn bo sọ dèmìsẽlu, bo dọmọ, Hùnwhẹ de na tin to osò hlan OKLUNỌ lọ ⁶Yé sọ fọ́n tite to afọnnu fliflimẹ to aihóagbè lọ, bo na avọ́nunina avónunina mimẹ̀ lẹ, bo sọ hẹn avọ́nunina jijọho tọn lẹ wá; gbẹtọ lẹ lọ bo sinai nado dù podọ nado nù, bo fọ́n tite nado daihún.

⁷OKLUNỌ lọ bo dọhó hlan Moṣe dọ, Yì, jẹte yì odòj na gbẹtọ towe lẹ, he hiẹ hẹn hẹji jẹgbonu sọn aigba Egipti tọn ji, ko hẹn yéde gble. ⁸Yé ko léjẹ adàji plaun sọn aliho he yẹn degbèna yé lọ ji: yé ko basi oyìnvú kinkòn de na yéde, bo ko sọ litaina ẹn, bo ko sọ sanvó hlan ẹn, bo dọmọ Ehelẹ wẹ ovòdún towe lẹ, hiẹ Islaeli, he hẹn we hẹji jọgbon sọn aigba Egipti tọn lọ ji. ⁹OKLUNỌ lọ sọ dọ hlan Moṣe, dọ, Yẹn ko mọ gbẹtọ he lẹ, bo, dayi e go, gbẹtọ kọsínsinyẹnnọ de wẹ: ¹⁰enẹwutu gbọ sọn ogo e, na homẹgble ṣie ni hẹ̀zo do yé ji, podọ na yẹn nido và yé: Yẹn bo nasọ basi akọta daho de sọn hiẹ mẹ. ¹¹Moṣe bo sọ vó OKLUNỌ jiwheyẹwhe etọn lọ, bo dọmọ, OKLUNỌ, etẹwutu homẹgble towe hèzo do gbẹtọ towe lẹ ji, he hiẹ ko hẹn tón jẹgbonu sọn aigba Egipti tọn lọ ji po huhlọn daho po podọ po alọ huhlọnnọ de po? ¹²Etẹwutu Egiptinu lẹ lọ do dọhó, dọmọ, Oylan wẹ é hẹn yé jẹgbonu na nado hù yé to osé lẹ lọ mẹ, podọ nado và yé sọn nukunmẹ aigba lọ tọn? Lé sọn homẹgble zògbe towe mẹ, bo diọlinlẹn oylan he tọn do gbẹtọ towe lẹ go. ¹³Flin Ablaham, Isaki, po Islaeli po, devi towe lẹ, mẹhe hiẹ whle hlan gbọn dewe lọsu dali, bo dọ hlan yé dọmọ, Yẹn na hẹn okún towe sùdeji di suwhíẹvu olọn tọn lẹ, podọ aigba he lẹpo he yẹn ko dọhó etọn wẹ yẹn na na hlan okún mìtọn, yé bo nasọ yídodùgú kakadoi. ¹⁴OKLUNỌ lọ sọ diọlinlẹn oylan lọ tọn he é dọ é do wà hlan gbẹtọ etọn lẹ.

¹⁵Moṣe sọ ló, bo jẹte yì sọn osé lọ mẹ, po tafo awe okunnuhó lọ tọn lẹ lọ po to alọ etọn mẹ; tafo he yè wlan to awà yetọn awe lẹ go; to awà ode go podọ to awetọ go wẹ yè wlan yé do. ¹⁶Podọ tafo lẹ lọ azón Jiwheyẹwhe tọn wẹ yé, podọ wékinkan lọ wókinkan Jiwheyẹwhe tọn he yè wlan do tafo lẹ lọ ji wẹ. ¹⁷Podọ whenuena Jọsua sè hunhlun gbẹtọ lẹ lọ tọn le yé dabobo, é dọ hlan Moṣe dọ, Hunhlun awhàn tọn de tin to osla lọ mẹ. ¹⁸Ewọ sọ dọmọ, E ma yín ogbè yé he to abobodo na awhàngbigba gba, mọ é ma sọ yín ogbè yé he to awhádo na yínyín gbigbàdo tọn gba: aigba hunhlun yé he to hànji lẹ tọn wẹ nto sisè. ¹⁹E sọ wá jọ, le é wá sópọ jẹ osla lọ kòn, wẹ é mọ oyìnvú lọ po wèdúdú lọ po: homẹgble Moṣe tọn sọ hèzò, é sọ zé tafo lẹ lọ dlanai sọn alọ etọn mẹ, bo gbà yé to osé lọ glọ. ²⁰E sọ yí oyìnvú he yé ko basi lọ, bo yí miyọn do mó ẹn, bo li i pọdọpọdọ, bo húnhún in do osìn lọ ji, bo sọ hẹn ovi Islaeli tọn lẹ lọ nù sọn e mẹ. ²¹Moṣe sọ dọ hlan Aalọn dọ, Etẹ gbẹtọ he lẹ wà do we, bọ hiẹ ko do hẹn ylando daho de wá yé ji? ²²Aalọn sọ dọmọ, A dike adì klunọ ṣie tọn hózò blo: hiẹ yón gbẹtọ lẹ lọ, dọ yè hẹn yé dó do oylan ji. ²³Na yé dọ hlan mi dọmọ, Basi ovòdùn lẹ na mí, he na to yìyì to mí nukọn: na eyín Moṣe tọn, dawe lọ he hẹn mí hẹji jẹgbonu sọn aigba Egipti tọn lọ ji, míwlẹ ma yón núhe wà ẹ gba. ²⁴Yẹn bo sọ dọ hlan yé dọmọ, Mẹdepope tindo sika depope, gbọ yé ni wén ẹn sè; mọ wẹ yé yí i na mi: yẹn bo zé e dlẹn miyọn lọ mẹ, finẹ oyìnvú he tónsọn wá. ²⁵Whenuena Moṣe mọ dọ yè hẹn gbẹtọ lẹ lọ jẹwòwó; na Aalọn ko hẹn yé jẹwòwó na pádidè de to kẹ̀ntọ yetọn lẹ ṣẹnṣẹn: ²⁶whenẹnu wẹ Moṣe site to hòngbo osla lọ tọn lọ mẹ, bo dọmọ, Mẹdepope he tin to awà OKLUNỌ lọ tọn ji, gbọ é ni wá dẽ. Visunnu Levi tọn lẹpo sọ bó yéde plidopọ do e de. ²⁷E sọ dọ hlan yé dọmọ, Le wẹ OKLUNỌ lọ dọ, Jiwheyẹwhe Islaeli tọn lọ, Mì omẹ dopodopo ni yí ohi etọn do asá etọn ji, bo yì godo po nukọn po sọn hóngbo ji jẹ hòngbo ji gbọn osla lọ mẹ, omẹ dopodopo ni hù nọvisunnu etọn, podọ omẹ dopodopo ogbó etọn, podọ omẹ dopodopo kọmẹnu etọn. ²⁸Visunnu Levi tọn lẹ sọ basi kẹdẹdi ohó Moṣe tọn lẹ lọ: gbẹtọ fọtọ́n atọ̀n nkọ sọ jai tò finẹ to gbènẹgbe sọn gbẹtọ lẹ lọ mẹ. ²⁹Moṣe sọ dọmọ, Mì klan mìde do wiwe to egbó hlan OKLUNỌ lọ, na omẹ dopodopo ko tin agò do visunnu etọn go podọ do nọvisunnu etọn go; na ewọ nido kòn odona de do mì ji to egbé. ³⁰E sọ wá jọ to aihón gbè lọ, wẹ Moṣe dọ hlan gbẹtọ lẹ lọ dọ, Mì ko wàylando oylando daho de; podọ dinvie yẹn na hẹji yì OKLUNỌ lọ de; eyá yẹn na basi ovẹ̀se na oylando mìtọn. ³¹Moṣe sọ lẹ́gọ̀ do OKLUNỌ lọ de, bo dọmọ, Omẹ he lẹ ko wàylando oylando daho de lo, bo ko basi ovòdún sika tọn lẹ na yéde. ³²Gãnṣo dinvie, eyín hiẹ na jona oylando yetọn—; podọ eyín lala, súnsún mi, yẹn vó we, sọn owó towe hiẹ ko wlan mẹ. ³³OKLUNỌ lọ sọ dọ hlan Moṣe dọmọ, Mẹdepope he ko wàylando do mi, ewọ wẹ yẹn na súnsún sọn ovó siemẹ. ³⁴Bo yì dinvie, bo plan gbẹtọ le lọ jẹ otẹn lọ mẹ ehe tọn yẹn ko dọ hlan we: dayi e go, angẹli ṣie na to yìyì to nukọn towe: gãnṣo azán he mẹ yẹn na dlapọ́n te, Yen na dla oylando yetọn pọ́n to ye ji. ³⁵OKLUNỌ lo sọ hò gbẹtọ lẹ lọ, na yé basi oyinvu lọ wutu, he Aalọn basi.

¹OKLUNỌ lọ sọ dọhó hlan Moṣe dọ, Fọ́nyì, yì sọnfi, hiẹ po gbẹtọ lẹ lọ po he hiẹ ko hen hẹji jẹgbonu son aigba Egipti tọn lọ ji, jẹ aigba lọ kòn ehe ton yẹn whle hlan Ablaham, hlan Isaki, podọ hlan Jakob, dọmọ, Okún towe wẹ yen na yi i na: ²podọ yẹn na do angeli de hlan nukọn towe; yẹn bo nasọ yan Ivananmu lọ, Amolinu lọ, po Hitinu lo po, po Jẹbusinu lọ po jẹgbonu: ³jẹ aigba de ji he yí oyìnnọ́ po owín po do to sisà: na yẹn ma na hẹji yí to gblagbla towe mẹ gba; na gbẹtọ kọsínsínennọ de we hiẹ: yẹn nikã va we to aliho lo ji. ⁴Whenuena gbẹtọ lẹ lọ sè owẹ̀n ylanylan helẹ, yé blawu: omẹ de ma yí asodonú etọn lẹ do ogo gba. ⁵OKLUNỌ lo sọ dọ hlan Moṣe dọ, Dọ hlan ovi Islaeli tọn le dọ, Gbẹtọ kọsínsínennọ de wẹ milẹ: eyín yẹn heji yí to gblagbla towe me na jlẹvude dopo yẹn na và we: enẹwutu dinvie yí asọdonu towe lẹ sè sọn ogo we, na yẹn nido yón núhe yẹn na wà do we. ⁶Ovi Islaeli tọn lẹ lọ sọ klọn asọdonu yetọn lẹ sọn yéde go sọn osé Holẹbi kòn zònmi.

⁷Dinvie Moṣe nọ yí ogohò lọ bo nọ pẹn ẹn do gbonu na osla lọ, dẹn talala sọn osla lọ kòn; ewọ sọ ylọ ẹ dọ, Ogohò opli tọn lọ. E sọ wá jọ, wẹ omẹ depope he to OKLUNỌ lọ din nọ jegbonu yì ogohò opli tọn lọ kòn, he tin to gbonu na osla lọ. ⁸E sọ wá jo, whenuena Mosẹ jegbonu yì Ogohò lọ kọn, wẹ gbẹtọ lẹpo tite, bo site, omẹ dopodopo to ohòn ogohò eton tọn ji, bo to godo pon na Moṣe, kaka yè do hẹn ẹn yì biọ Ogohò lọ mẹ. ⁹E sọ wá jọ, whenuena Moṣe biọ Ogohò lọ mẹ, odòtin aslọ tọn lọ jẹte, bo site to obòn Ogohò lọ tọn ji: Òkluiiọ lọ sọ dọhó hẹ Moṣe. ¹⁰Gbẹtọ lẹpo lọ mọ odòtin aslọ tọn lọ site to ohòn Ògohò lọ tọn ji: gbẹtọ lẹpo sọ fọ́n tite bo litai, omẹ dopodopo to ohòn ogohò etọn tọn ji. ¹¹OKLUNỌ lọ sọ dọhó hlan Moṣe wédódé, dile omẹ de nọ dọhó hlan họntọn etọn do. Ewọ sọ lé biọ osla lọ mẹ: ṣigba devizónwàtọ etọn Jọsua, visunnu Nuni tọn, omẹ winyanwinyan de, ma fọ́nyì sọn Ogohò lọ mẹ gba.

¹²Moṣe sọ dọ hlan OKLUNỌ lọ dọ, Pọ́n, hiẹ dọ hlan mi do, Hen gbẹtọ he lẹ hẹji wá: hiẹ ma ko sọ dike yen ni yon ewo mẹhe hie na dohlan dogo mi gba. Gãnṣo hie ko domọ, Yen yón we gbọn oyín dali, podọ hiẹ ko mọ ojọmiọh to nukun ṣie me ga. ¹³Enewutu dinvie, Yẹn vò we, eyín yen ko mọ ojọmiọn to nukun towe mẹ, bo do aliho towe le hia mi dinvie, na yẹn nido yón we, hlan opodo lọ dọ yẹn nido mọ ojọmiọn to nukun towe mẹ: bo sọ dounemepón dọ gbẹtọ towe lẹ wẹ akọta he. ¹⁴Ewọ sọ dọmo, Nukun ṣie na to yìyì po hiẹ po, yẹn nasọ na ogbọjẹ we. ¹⁵E so dọ hlan ẹn dọmọ, Eyín nukun towe ma na yìyì po yen po gba, a plan mí heji yì sọnfi blo ¹⁶Na etẹme dinvie wẹ é na yín yinyọnẹn te dọ yẹn ko mọ ojọmion to nukun towe mẹ, yẹn po gbẹtọ towe le po? é ma yín to ene mẹ dọ hiẹ to yìyì po mí po, sọmọ bọ mí yín kinklan, Yen po gbẹtọ towe lẹ lọ po, sọn gbẹtọ lọ lepo mẹ he tin to nukunme aigba lọ tọn ji?

¹⁷OKLUNỌ lọ so dọ hlan Moṣe dọmọ, Yẹn na wà onú he ga he hie ko dọ: na hiẹ ko mọ ojọmiọn to nukun ṣie mẹ, yẹn sọ yón we gbọn oyín dali. ¹⁸Ewọ sọ dọmọ, Do gigo towe hia mi, yẹn vẹ̃ we. ¹⁹Ewọ sọ dọmọ, Yẹn na hẹn dagbewà ṣie lẹpo gbọn nukọn towe, bo nasọ lá oyín OKLUNỌ lọ tọn lọ to nukọn towe; podọ yẹn na yín dagbewanyinọ hlan mẹhe yẹn na yín dagbewanyinọ, bo nasọ do leblanu hia to mehe go yẹn na do lẹblanu hia te. ²⁰E sọ domọ, Hie ma sogan mọ nukunme ṣie gba: na gbẹtọ mọ mi ma na nọgbó gba. ²¹OKLUNỌ lọ sọ dọmọ, Dayi e go, otẹn de tin to dali ṣie, hiẹ naso site to osé lọ ji: ²²é nasọ wá jọ, whenuena gigọ́ ṣie jùwájei, wẹ yen na yí we do oslo osé lọ ton de mẹ, bo na yí alọ ṣie ṣinyọn we kaka yẹn na do juwáyì: ²³yen naso ze alọ sè, hiẹ bo nasọ mọ go lo ṣie: ṣigba nukunme ṣie ma na yín mimọ gba.

¹OKLUNỌ lọ sọ dọ hlan Moṣe dọmọ, Pà tafo zannu tọn lẹ awẹ jijlẹ do tintan lọ go: Yẹn nasọ wlan do tafo lẹ lọ ji ohó lẹ lọ he tin to tafo tintan lẹ lọ go, ho hie hengba lẹ. ²Bo wleawu to afọnnu damẹ, bo hẹji wá to afọnnu lọ jẹ osé Sinai kòn, bo do dowe hia to finẹ hlan mi, to aga osé lọ tọn. ³Omẹ de ma na hẹji wá po hiẹ po gba, mọ a sọ dike omẹ de yín mimọ gbọn osé lọ dali lẹpo lédo blo; mọ a sọ dike lẹngbọpa kavi kanlinpa lẹ de dù to osé nẹ nukọn blo. ⁴E sọ pà tafo zannu tọn awe lẹ jijlẹ do tintan lọ go; Moṣe sọ fọ́n tite to afọnnu fliflimẹ, bo hẹji yi osé Sinai kòn, dile OKLUNỌ lọ ko degbèna ẹn do, bo yí tafo zannu tọn awe lẹ hẹn to alọ etọn mẹ. ⁵OKLUNỌ lọ sọ jẹte to aslọ lọ mẹ, ewọ sọ site to finẹ po e pò, bo ylọ Jehova gbọn oyín dali. ⁶OKLUNỌ lọ sọ jugbọn nukọn etọn, bo to lila dọ, OKLUNỌ lọ, OKLUNỌ lọ, Jiwheyẹwhe he gọ́na akóndonanú podọ dagbewanyinọ, awuwhletọ nado sadi, podọ sùsùnọ to lẹblanu po nugbo po mẹ; ⁷he nọ yí lẹblanu whlá na fọtónfọtón lẹ, he nọ jona oylankan po oylan wiwá po po oylando po: podọ he ma na dike whẹgbledonọ to alọdepope mẹ ni yì majiya; he nọ dla oylankan otọ́ le tọn pọ́n to ovi lẹ ji, to whẹndo atọ̀ntọ lọ po ẹnẹtọ lọ po ji. ⁸Moṣe sọ yawu, bo dé ota etọn hlan aigba dali, bo litai. ⁹E sọ dọmọ, Eyín yẹn ko mọ ojọmiọn dinvie to nukun towe mẹ, OKLUNỌ È, gbọ OKLUNỌ lọ, Yẹn vó we, ni to yìyì to gblagbla mí tọn mẹ; na gbẹtọ kọsínsínennọ de wẹ; bo jona oylankan mítọn po oylando mítọn po, bo sọ yí mí na ogú towe. ¹⁰E sọ dọmọ, Dayi e go, Yẹn basi alónu de: to gbẹtọ towe lẹpo nukọn yẹn na wà nujawu lẹ, hunkọ he yè ma ko dá to aigba lọ mẹ, kavi to akọta depope mẹ: podọ gbẹtọ lẹpo ṣẹnṣẹn ehe tọn hiẹ te na mọ azón OKLUNỌ lọ tọn lọ, na onú dobu de wẹ ehe yẹn wà do we. ¹¹Payi enẹ he yẹn degbèna we to egbé go: dayi e go, yẹn yẹn Àmọlinu lọ, po Kananinu lọ po, po Hitinu lọ po, po Pẹlizinu lọ po, po Hiviiiu lọ po, po Jẹbusinu lọ po jẹgbonu tọ nukọn towe. ¹²Payi dewe go, hiẹ nikã basi alẹnu de hẹ tòmẹnu aigba lọ tọn lẹ fìe hiẹ jei, é nikã yín omọ de to gblagbla towe mẹ: ¹³ṣigba mìwlẹ na gbà agba yetọn lẹ liai, bo sọ gidi odòtin yetọn, mìwlẹ nasọ sán bọsiọvòdún yetọn lẹ liai: ¹⁴na hiẹ ma na lìtaina ovòdún de, na OKLUNỌ lọ, oyín mẹhetọn nọ yin Awuwhàntọ, Jiwheyẹwhe awuwhàntọ de wẹ. ¹⁵Hiẹ nikã basi alẹ́nu de hẹ tòmẹnu aigba lọ tọn lẹ, bọ yé na do to gàlò hodo ovòdún yetọn lẹ yì, bo sọ nọ basi avọ́sinsán hlan ovòdún yetọn lẹ, bọ ode na do ylọ we bọ hiẹ na dù sọn avọ́ etọn mẹ; ¹⁶bọ hiẹ yí sọn viyọnnu yetọn lẹ mẹ na visunnu towe lẹ, bọ viyọnnu yetọn lẹ na do to gàlò hodo ovòdún yetọn lẹ yì, bo sọ hẹn visunnu towe lẹ to gàlò hodo ovòdún yetọn lẹ yì. ¹⁷Hiẹ ma na basi ovòdún kìnkón lẹ de na dewe. ¹⁸Hiẹ na nọ payi hùnwhẹ akla madotón tọn go, azán ṣinawe hiẹ na dù akla madotón hò, dile yẹn degbèna we do, to ojlẹ didè lọ ji to osùn Abibi mẹ: na osùn Abibi mẹ hiẹ jẹgbonu sọn Egipti mẹ wá te. ¹⁹Ehe hùn adọ lọ lẹpo wẹ ṣie; podọ kanlinyìnyìn towe lẹpo he yín asú, plọnji oyín po lẹngbọ po tọn. ²⁰Podọ oplọnji kẹtẹkẹtẹ de tọn hiẹ na yí lẹngbọvú de do fli i, whenẹnu hiẹ na wén okò etọn. Oplọnji visunnu towe tọn lẹpo hiẹ na fli, Mẹde ma ná sọawúhia to nukọn ṣie alọgbá. ²¹Azán ṣidopo hiẹ na wàzọ́n hò, ṣigba azán sinawetọ gbè hiẹ na gbọjẹ: to glepipò whenu podọ to ojijẹ whenu hiẹ na gbọjẹ. ²²Hiẹ nasọ nọ payi hùnwhẹ osé ton lo le go, yèdọ sinséntintan ojijẹ olikún tọn lọ tọn, po hùnwhẹ jibówáwhégbè tọn po to opodo owhè lọ tọn ji. ²³Whlatòn to owhè lọ mẹ wẹ sunnusi towe lẹpo na nọ sọawúhia to OKLUNỌ Jiwheyẹwhe lọ nukọn, Jiwheyẹwhe Islaeli tọn lọ. ²⁴Na yẹn na yàn akọta lẹ jẹgbonu to nukọn towe, bo sọ hẹn agboji towe lẹ klo: mọ omẹ depope ma na jlo aigba towe gba, whenuena hiẹ hẹji jei nado sọawúhia to OKLUNỌ Jiwheyẹwhe towe lọ nukọn whlafòn to owhè lọ mẹ. ²⁵Hie ma na na ohùn avọ́sinsán ṣie tọn po akla madotón po gba; mọ avọ́sinsán hùnwhẹ juwayi lọ tọn tọn ma na yín jijodai jẹ afọnnu lọ gba. ²⁶Tintan sinséntintan aigba towe tọn lọ tọn hiẹ na nọ hẹnwá ohò OKLUNỌ Jiwheyẹwhe towe lọ tọn mẹ. Hiẹ ma na sọakusìn gbọgbọẹvu to anósìn onọ etọn tọn mẹ gba. ²⁷OKLUNỌ lọ sọ dọ hlan Moṣe dọmọ, Hiẹ ni wlan ohó helẹ: na kẹdẹdi yinyọnẹn ohó helẹ lọ tọn yẹn ko do basi alẹ̀nu de hẹ we podọ hẹ Islaeli. ²⁸Ewọ sọ tin to finẹ to OKLUNỌ lọ de okle kande po ozán kande po; é ma dù, mọ é ma nù osìn. Ewọ bo sọ wlan ohó alónu lọ tọn lẹ do tafo lẹ lọ ji, gbèdide ao lẹ.

²⁹E sọ wá jọ, whenuena Moṣe jẹte sọn osé Sinai ji wá po tafo awe okunnuhó lọ tọn po to alọ Moṣe tọn mẹ, whenuena é jẹte sọn osé lọ ji wá, wẹ Moṣe ma yọnẹn dọ ayú nukunmẹ etọn tọn to hinhónlọ dè jẹgbonu gba whenuena é to hódọ hẹ ẹ. ³⁰Whenuena Aalọn po ovi Islaeli tọn lẹpo po mọ Mọse, dayi e go, ayú nukunmẹ eton tọn to sisó; avọ̀ sọ vò yé nado wá sèpọ ẹ. ³¹Moṣe sọ ylọ hlan yé de; Aalọn po ogán agùn lọ tọn lẹpo po sọ lógó do e de: Moṣe sọ dọhó hìan yé. ³²To enẹ godo ovi Islaeli tọn lẹpo wá sèpọ; ewọ sọ yína yé to gbèdide mẹ ehe OKLUNỌ lọ ko dọ hẹ ẹ to osé Sinai mẹ lẹpo. ³³Podọ whenuena Moṣe ko dotana hódidọ hẹ yé, é yí avọ̀ajlalanọ de do nukunmẹ etọn ji. ³⁴Ṣigba whenuena Moṣe yì hòmẹ to OKLUNỌ lọ nukọn nado dọhó hẹ ẹ, é nọ dè avọ̀ajlalanọ lọ sé, kaka é do nọ jẹgbonu; ewọ bo sọ jẹgbonu wá bo dọhó hlan ovi Islaeli tọn lẹ enẹ he yè degbèna ẹn; ³⁵ovi Islaeli tọn lẹ sọ mo nukunmẹ Moṣe tọn, dọ ayú nukunme Moṣe tọn tọn lo sisé: Moṣe bo sọ gò avọ̀ajlalanọ lọ do nukunmẹ etọn ji, kaka ewọ do yì hòmẹ nado dọhó hẹ ẹ.

¹MOSE sọ pli agùn ovi Islaeli tọn lẹ tọn lẹpo, bo dọ hlan yé dọ, Ehelẹ wẹ ohó OKLUNỌ lọ ko degbèna dọ mì ni nọ basi yé ²Aán ṣidopo azọn na yín wiwà hò, ṣigba to azán sinawetọ gbè azán wiwe de na tin hlan mì, gbọjẹzán ogbọjẹ ayidego tọn de hlan OKLUNỌ lọ; mẹdepope he wà azón depope to e mẹ na yín hùliù. ³Mì ma na plá miyọn de gbọn fininò mìtọn lẹ mẹ to gbọjẹzán ji gba.

⁴Moṣe sọ dọhó hlan agùn ovi Islaeli tọn lọ tọn lẹpo, dọmọ, Ehe wẹ onú lọ he OKLUNỌ lọ degbèna, dọmọ, ⁵Mì yí avọ́nunina de sọn mì ṣẹnṣẹn hlan OKLUNỌ lọ: mẹdepope he yín ojlonọ ayiha tọn de gbọ é ni hẹn ẹn wá, avọ́nunina OKLUNỌ lọ tọn; sika, po fataka po, po ogànvẹ̃ po; ⁶po avọ̀ahóvẹ̃ po, po avọ̀gefunwunmẹ po, po avọ́vẹ̃sẹsẹ po, po alavọ̀ dagbedagbe po, po ofún gbọgbọẹ lẹ tọn po; ⁷po ofun agbò lẹ tọn po he yè yí ayúdanúvẹ̃ do da, po ayú seali tọn lẹ po, po atin akasia tọn po; ⁸po amì po na hinhọ́n lọ, po nuwhẹnwán po na amì onusisá tọn lọ, podọ na nuyọnwán vivi lọ; ⁹po zannu oniksi lẹ po, po zannu lẹ po nado yín titò, na efọdi lọ, podọ na otunudo lọ. ¹⁰Bo sọ gbọ omẹ ayiha nuyọnẹnnọ to mì ṣẹnṣẹn lẹpo ni wá, bo basi ehe OKLUNỌ lọ ko degbèna lẹpo; ¹¹gohotúntún lọ, ogohọ etọn, po oṣinyọn etọn po, oplá etọn lẹ, po owhlẹ etọn lẹ po, ékòplá etọn lọ, odotin etọn, po oslò etọn lo po; ¹²alki lọ, po opo etọn lẹ po, aisintẹn-lẹblanu tọn lo, po avọ̀ajlalanọ obasẹ lọ ton po; ¹³tafo lọ, po opo etọn lẹ po, podọ po núzinzán etọn lepo po, po akla-adlọ lọ po; ¹⁴miyọngbántin lọ ga na hinhọ́n lọ, po nuzinzán etọn lẹ po, po miyọngbán eton lẹ po, po amì lọ po na hinhọn lọ; ¹⁵po agbà nuwhẹnwán tọn lọ po, po opo etọn le po, po amì sisá lọ po, po nuwhenwan vivi lọ po, po obasẹ lọ po na ohòn lọ, to ohòn gohọtúntún lọ tọn ji; ¹⁶agbà avọ́nunina mimẹ̀ tọn lọ, po owén etọn ogànvẹ̃ tọn po, opò etọn lẹ, po núzinzán eton lẹpo po, ozẹ́nvla lọ po ozòn etọn po; ¹⁷avọ̀dido akanmahó lọ tọn lẹ lọ, odòtin etọn lẹ, po oslo yetọn lẹ po, po obasẹ lọ po na hòngbo akanmahó lọ tọn lọ, ¹⁸osé gohọ̀túntún lọ tọn lẹ, po osé akànmahò lọ tọn lẹ lọ po, po okànsisìo yetọn lẹ po. ¹⁹Awu sinsẹ̀n tọn lẹ lọ, na devizónwiwà to otẹn wiwe lọ mẹ, awu wiwe lẹ lọ na Aalọn yẹwhenọ lọ, po awu visunnu etọn lẹ tọn lẹ po, nado nọ wàdevizọ́n to azọ́nhò yẹwhenọ tọn lọ mẹ.

²⁰Agùn ovi Islaeli tọn lẹ tọn lẹpo sọ fọ́nyì sọn nukọn Moṣe tọn. ²¹Yé sọ wa, ome dopodopo ayiha mẹhetọn fọ́n ẹn daga, podọ omẹ depope mẹhe gbigbọ etọn hẹn yín ojlonọ, bo hẹn avọ́nunina OKLUNỌ tọn lọ wá, na azón ogohò opli tọn lọ tọn, podọ na sinsòn etọn lọ lẹpo, podọ na awu wiwe lẹ lọ. ²²Yé sọ wá, sunnu lẹ po yọnnu lẹ po, mẹsọha he yín ayiha ojlonọ lẹ, bo hẹn awukòhennú lẹ wá, po otómẹnú lẹ po, po alọkẹ ohia tọn lẹ po, po awàgàn lẹ po, asọdonú sika tọn lẹpo; yedọ omẹ dopodopo he na avọ́nunina sika ton dẹ hlan OKLUNỌ lọ. ²³Podọ omẹ dopodopo, mẹhe de yè mọ avọ̀ahóvẹ̃ te, po avọ̀gefunwunmẹ po, po avọ̀vẹ̃sẹsẹ po, po alavọ̀ dagbedagbe po, po ayú gbọgbọẹ lẹ tọn po, po ayú agbo tọn po he yè yí ayúdanuvẹ̃ do da, po ayú seali tọn lẹ po, hẹn yé wá. ²⁴Ome dopodopo he na avọ́nunina fataka tọn de po ogànvẹ̃ po hẹn avọ́nunina OKLUNỌ lọ tọn wá: podọ omẹ dopodopo, mẹhe de atin akasia yín mimọ te na azọn sinsẹ́n lọ tọn depope, hẹn ẹn wá. ²⁵Yọnnu he yín ayiha nuyọnẹnnọ lẹpo yí alọ yetọn do gbènsékan, bo sọ hẹn enẹ he yé gbén wá, avọ̀ahóvó lọ, avọgefunwunmẹ lọ, avọ̀vẹ̃sẹsẹ lọ, po alavọ̀ dagbedagbe lọ po. ²⁶Podọ yọnnusi lẹpo ayiha mẹhetọn fọ́n ye daga to nuyọnẹn me lẹ gbèn ofún gbọgbọele tọn. ²⁷Podọ ogán lẹ lọ hẹn zannu oniksi lẹ wá, po zannu lẹ lọ po nado yín titò, na efodi lọ, podọ na otùnudo lọ; ²⁸po nuyọnwán lọ po, po amì lọ po; na hinhọ́n lọ, podọ na amì sisá lọ, podọ na nuwhẹnwán vivi lọ. ²⁹Ovì Islaeli tọn lẹ hẹn avọ́nunina jlomẹtọn de wá OKLUNỌ lọ de; sunnu lẹ dopodopo po yọnnu lẹ po, ayiha mẹhetọn hẹn yé yín ojlonọ lẹ nado hẹnwá na azọ́n lọ lẹpo, he OKLUNỌ ko degbèna nado yín bibasi gbọn alọ Moṣe tọn mẹ.

³⁰Moṣe sọ dọ hlan ovi Islaeli tọn lẹ lọ dọmọ, Pọ́n, OKLUNỌ lọ ko ylọ gbọn oyín dali Bezaleli visunnu Uli tọn lọ, visunnu Huli ton lọ, sọn whẹndo Juda tọn lọ mẹ; ³¹é ko sọ yí gbigbọ Jiwheyẹwhe tọn lọ do gó ẹ, to nuyọnẹn mẹ, to wuntùntùn mẹ, podọ to oyọnẹn mẹ, podọ to hunkọhunkọ anàzón lẹpo tọn mẹ; ³²podọ nado sè azón wunmẹwunmẹ lẹ dai, nado wàzón to sika mẹ, podọ to fataka mẹ, podọ to ogànvẹ̃ mẹ, ³³podọ to sinsán zannu lẹ tọn mẹ na titò, podọ to pipà atin tọn mẹ, nado wàzón to anàzọn hunkọhunkọ lẹpo tọn mẹ. ³⁴E ko sọ yí do ayiha etọn mẹ enẹ he é sọgan plónmẹ, ewọ, po Oholiabi po, visunnu Ahisamaki tọn lọ, sọn whẹndo Dani tọn lọ mẹ. ³⁵Yé wẹ é ko yí nuyọnẹn ayiha tọn do gó, nado wàzón hunkọhunkọ anàzón tọn lẹpo, nuwlantọ lọ tọn, po anàzón anàwàtọ lọ tọn po, po yénvinàwàtọ lọ tọn po, to avọ̀ahóvẹ̃ mẹ, podọ to avọ̀gefunwunmẹ mẹ, to avọ̀vósẹse mẹ, podọ to alavọ̀ dagbedagbe mẹ, po avọ̀lòntọ lọ tọn po, yèdọ yé he nọ wà anàzón depope tọn, po enẹlẹ he nọ ṣẹ̀ azón anà tọn lẹ dai po.

¹BEZALELI po Oholiabi po na wàzón po omẹ ayiha nuyọnẹnnọ lẹpo po, mẹhe mẹ OKLUNỌ lọ ko yí nuyọnẹn po wuntùntùn po do nado yón na nado wàzón azón lọ lẹpo tọn do na sinsán ófiwiwe lọ tọn, kẹdẹdi ehe OKLUNỌ lọ ko degbèna lẹpo.

²Moṣe sọ ylọ Bezaleli po Oholiabi po, po omẹ ayiha nuyọnẹnnọ lẹ dopodopo po, ayiha mẹhetọn mẹ OKLUNỌ lọ ko yí nuyọnen do, yèdọ omẹ dopodopo ayiha mẹhetọn fọ́n ẹn daga nado wá azón lọ kòn nado wà ẹ: ³yé sọ yí avọ́nunina lọ lẹpo sọn Moṣe si, he ovì Islaeli tọn lẹ lọ hẹnwá na azón sinsẹ̀n fìwiwe lọ tọn tọn, nado yí do basi i. Yé sọ nọ hẹn avọ́nunina jlomẹtọn lẹ dogó wá e de afọnnu-afọnnu. ⁴Gbẹto núyọnẹntọ lẹpo lọ, he wà azón fìwiwe lọ tọn lẹpo, omẹ dopodopo sọn azón eton he yé nọ wà kòn wá; ⁵yé sọ dohó hlan Moṣe, dọmọ, Gbẹtọ lẹ lọ hẹnwá sùgbahu na sinsẹ̀n azón lọ tọn, he OKLUNỌ lọ degbèna nado basi. ⁶Moṣe sọ na gbèdide, Yé sọ hẹn ẹn nado yín lila gbọn osla lọ mẹ petó, dọmọ, Yè sọ dike sunnu kaù yọnnu basi azón depope na avọ́nunina fìwiwe lọ tọn dogó blo. Mowẹ yè glọn gbeto lẹ lọ sọn hinhẹnwá mẹ do. ⁷Na nuwànú yé ko tindo lọ pó na azón lọ lẹpo nado basi i, bo sọ gbahu.

⁸Podọ omẹ núyọnẹntọ ayihanọ dopopopo to yé he và azón lọ lẹ ṣẹnṣẹn yí avọ̀dido ao do basi gohọ̀túntún Íọ; alavọ̀ sislo dagbedagbe tọn, po avọ̀ ahóvẹ̃ po, po avọ̀gefunwunmẹ po, po avọ̀vẽsẹsẹ po, po kelubimi po azón azónwàtọ ananọ tọn lọ é do basi yé. ⁹Ote avọ̀dido dopodopo tọn yín awàgba koatọ́nnukunatọ̀n, podọ ogblo avọ̀dido lọ dopodopo tọn awàgba ẹnẹ: avọ̀dido lepo tindo ojlẹ dopo. ¹⁰E sọ sìn avọ̀dido atón ode pla do ode go: podọ avọ̀dido atón awetọ wẹ é sọ sìnpla ode do ode go. ¹¹E sọ basi ogbla avọ̀ahóvẹ̃ tọn lẹ do otónu avọ̀dido dopo lọ tọn ji sọn otónuyinyẹn lọ mẹ to ogbla lọ mẹ: mọkẹdẹ wẹ é basi to otónu avọ̀dido lọ tọn mẹ he tin to gbonupatapata to ogbla awetọ lọ me ¹²Ogbla kandeao é basi do avọ̀dido dopo lọ mẹ, podọ ogbla kandeao é sọ basi do otónu avọ̀dido lọ tọn mẹ he tin to ogbla awetọ lọ mẹ: ogbla lẹ lọ sọ pànnukọn yénọzo. ¹³E sọ basi opla kandeao sika tọn lẹ, bo yí opla lẹ lọ do sìn avọ̀dido lẹ lọ pla ode do ode go: mọ bọ gohọ̀túntún lọ yín dopo. ¹⁴E sọ basi avọ̀dido gbọgbọẹfun tọn lẹ na ogohò de to gohọ̀túntún lọ ta: avọ̀dido widopo é basi yé. ¹⁵Ote avọ̀dido dopodopo tọn yín awàgba ogbàn, podọ awàgba ẹnẹ ogblo avọ̀didọ dopodopo tọn: avọ̀dido widopo lẹ lọ tindo ojlẹ dopo. ¹⁶E sọ sìn avọ̀dido atón lẹ pla na yénọzo podọ avọ̀dido ṣidopo na yénọzo. ¹⁷E sọ basi ogbla kandeao to otónu avọ̀dido lọ tọn go he tin to gbonupatapata to sìnsìnpla lọ mẹ, podọ ogbla kandeao é sọ basi do otónu avọ̀dido lọ tọn ji he tin gbonupatapata to sìnsìnpla awetọ lọ mẹ. ¹⁸E bo sọ basi opla ogànvẹ̃ tọn kandeao le nado sìn ogohọ́ lọ pla dopọ, na é nido yín dopo. ¹⁹E so basi oṣinyọn agboyú he yè yí ayúdanuvẹ̃ do da tọn le de na ogohò lọ, po oṣinyọn sealiyú tọn lẹ de po taga.

²⁰E sọ basi owhlẹ atin akasia tọn lẹ na gohọ̀túntún lọ, tote. ²¹Awàgba ao we ote owhlẹ dopo tọn, podọ awàgba dopo po odá po ogblo owhle dopodopo tọn. ²²Owhlẹ dopodopo tindo nuvò awe, ode biọ ode mẹ: le we é basi owhlẹ gohọ̀túntún lọ tọn do. ²³E sọ basi owhlẹ lẹ lọ na gohọ̀túntún lọ: owhlẹ oko na huwaji lọ hlan huwaji dali: ²⁴é sọ basi oslò fataka tọn kande do owhlẹ oko le glọ: oslò awe to owhlẹ dopo glọ na nuvò eton awe lẹ, podọ oslò awe to glọ owhlẹ awetọ tọn na nuvò etọn awe lẹ. ²⁵Podọ na awà awetọ gohọ̀túntún lọ tọn, to agewaji go, é basi owhlẹ oko, ²⁶po oslò yetọn fataka tọn po; oslò awe to owhle dopo glọ, podọ oslo awe to owhlẹ awetọ glọ. ²⁷Podọ na adà gohọ̀túntún lọ tọn godoton hlan wl èyihò dali é basi owhlẹ ṣidopo. ²⁸Owhlẹ awe é sọ basi na íọnglọnẹn gohọtúntún lọ tọn to adà godotọn lọ mẹ. ²⁹Yé sọ yín awepọ toglọ, podọ to hunkọmọ mẹ yé yín blebu jẹ aga etọn lọ jẹ alọkẹ tintan lọ kòn: le wẹ e wá hlan awe le do to lọnglọnẹn awe lẹ mẹ. ³⁰Owhlẹ sinatọ̀n tin finẹ, po oslo yetọn fataka tọn lẹ po, oslò fọtọ̀nnukundopo; to owhlẹ dopodopo glọ oslo aweawe. ³¹E sọ basi okòpla atin akasia tọn; atón na owhlẹ awà dopo gohọ̀túntún lọ tọn tọn. ³²Podọ okòpla atọ́n na owhlẹ awà awetọ gohọtúntún lọ tọn tọn, po okòpla atón po na owhle gohọ̀túntún lọ tọn na adà godotọn lọ hlan whèyihọ dali. ³³E sọ basi oklòpla ṣẹnṣẹn tọn lọ nado gbọn gblagbla owhlẹ Íọ le tọn me luntón sọn opodo ode jẹ awetọ kòn. ³⁴E sọ yí sika do bú owhlẹ lẹ lọ, bó sọ basi alọkẹ yetọn sika tọn na otẹn lẹ na okòpla lọ lẹ, bo sọ yí sika do bu okòpla lẹ lọ.

³⁵E sọ basi avọ̀ajlalanọ ovọ̀ahóvẹ̃ tọn lọ, po avọ̀gefunwunmẹ po, po avọ̀vẹ̃sẹsẹ po, po alavọ̀ sislo dagbadagbe po: dogọ́ kelubimi lẹ azọ́n azọ́nwàtọ ananọ lọ tọn é do basi i. ³⁶E sọ basi odòtin akasia tọn ẹnẹ hlanfinẹ, bo yí sika do bú ye: ahlà yetọn lẹ yín sika tọn; é sọ kọn oslò fataka tọn ẹnẹ na yé. ³⁷E sọ basi obasẹ de na ohòn Ogohò lọ tọn, avọ̀ahóvẹ̃ tọn, po avọ̀gefunwunmẹ po, po avọ̀vẹ̃sẹsẹ po, po alavọ̀ sislo dagbe dagbe po, azọ́n yénvinàwàtọ lọ tọn; ³⁸podọ odòtin e tọn atón lẹ po ahlà yetọn le po: é sọ yi sika do bú ota yétọn lẹ po oso yetọn le po: podọ oslò yetọn atón lẹ sọ yín ogànvẹ̃ tọn.

¹BEZALELI sọ basi alki atin akasia tọn lọ, awàgba awe po odá po wẹ ote é tọn, podọ awàgba dopo po odá po ogblo é tọn, podọ awàgba dopo po odá po jiyìyì é tọn: ²E sọ yí sika akú do bú i hòmẹ po gbonu po, bo sọ basi otónugbá sika tọn de do e ji lédo pé. ³E sọ kòn alokẹ enẹ sika ton na; ẹn to afọ etọn ẹnẹ lẹ mẹ: yèdo alokẹ awe to awà etọn dopo go, podọ alọke awe to awà é tọn awetọ go. ⁴E sọ basi opo atin akasia tọn lẹ, bo yí sika do bú yé. ⁵E sọ yí opò lẹ lọ do alọkẹ awà alki lọ tọn lẹ go, nado nọ zé alki lọ hẹn. ⁶E sọ basi oṣinyọn sika aku tọn de; awàgba awe po odá po wẹ ote etọn, podọ awàgba dopo po odá po ogblo etọn, ⁷E sọ basi kẹlubimi sika tọn awe; azon tùntùn tọn é do basi yé, do opodo awe aisintẹn-lẹblanu lọ tọn lẹ lọ go; ⁸Kẹlubi dopo to opodo dopo go, podo kẹlubi dopo to opodo awetọ go: blebu dopo wẹ é yí kẹlubimi lẹ lọ do basi po aisintẹn-lẹblanu tọn lọ po to opodò etọn awe lẹ lọ go. ⁹Kelubimi lẹ lọ dlen awà yetọn lẹ jẹgbonu hlan aga, yíyí awà yetọn lẹ ṣinyọn aisinten-lẹblanu lọ tọn ji, po nukunmẹ yetọn lẹ po ode hlan awetọ; hlan aisintẹn lẹblanu lọ tọn dali wẹ nukunmẹ kẹlubimi lọ le tọn te.

¹⁰E sọ basi tafo atin akasia tọn lọ: awàgba awe wẹ ote etọn, podọ awagba dopo ogblo etọn, podọ awàgba dopo po odá po jiyìyì, etọn: ¹¹é sọ yí sika akú do bú i, bo sọ basi otónugbá sika tọn de dofìnẹ lédo pé, ¹²E sọ basi nugonú alọpahomegbigblo dopo ton de lédo pé, bo sọ basi tonugbá sikanọ de do nugonú etọn lọ go lédò pé. ¹³E sọ kòn alọkẹ sika tọn ẹnẹ nẹ, bo so yí alọkẹ lẹ lọ do lọnglọnẹn ẹnẹ lẹ mẹ he tin tò afọ etọn ẹnẹ lẹ go. ¹⁴Alọkẹ lẹ lọ na tin sèpọ núgonú lọ, otẹnmẹ lẹ lọ na opò lọ lẹ nado nọ zé tafo lọ hẹn ¹⁵E sọ basi opò atin akasia tọn ẹ be sọ yí sika do bú yé, nado nọ zé tafo lọ. ¹⁶E basi núzinzán he tin to tafo lọ ji lẹ, nusónugbán sika tọn etọn lẹ lọ, po sivi etọn lẹ po, po otò etọn lẹ po, po ogò etọn lẹ po, nado nọ yí do kòn.

¹⁷E sọ basi miyọngbántin sika akú tọn lọ: azón tùntùn tọn wẹ é do basi miyọngbántin lọ, yèdọ ozòn etọn, po okẹyẹ etọn po; kọfo etọn lẹ, sédido etọn lẹ, po ovòvo etọn lẹ po, yín blebu dopo po e po: ¹⁸Alà ṣidopo tofinẹ jẹgbonu yì sọn awà etọn lọ mẹ; alà atọ̀n miyọngbántin lọ tọn jẹgbonu sọn awà etọn dopo mẹ, podọ alà atọ̀n miyọngbántin lọ tọn sọ jẹgbonu sọn awà etọn awetọ mẹ: ¹⁹Kọfo atọ̀n yè basi taidi ovòvo almondi tọn lẹ to alà dopo mẹ, sédido de po ovòvo de po; podọ kọfo atọ̀n yè basi taidi ovòvo almondi tọn lẹ to alà awetọ mẹ, sédido de po ovòvo de po: mọwẹ na alà ṣidopo lẹ lọ he jẹgbonu sọn miyọngbántin lọ mẹ. ²⁰Podọ to miyọngbántin lọ mẹ wẹ kọfo ẹnẹ yè basi taidi ovòvo almondi tọn lẹ te, sédido etọn lẹ, po ovòvo etọn lẹ po: ²¹po sédido dopo po to alà awe blebu dopo tọn glọ po e po, podọ sédido dopo to alà awe blebu dopo tọn glọ po e po, po sédido dopo po to alà awe blebu dopo tọn glọ po e po, na alà ṣidopo lẹ lọ he tón jẹgbonu sọn e mẹ. ²²Sédido yetọn lẹ po alà yetọn lẹ po yín blebu dopo tọn po e po: pete é tọn yín azón tùntùn sika akù tọn. ²³E sọ basi miyọngbán etọn lẹ lọ, ṣinawe, po obé etọn lẹ po, po agbán etọn lẹ lọ po, sika akú tọn. ²⁴Talẹnti sika akú tọn de wẹ é do basi i, po núzinzán etọn lẹpo po.

²⁵E sọ yí atin akasia tọn do basi agbà nuwhẹnwán tọn lọ: awàgba dopo wẹ ote etọn lọ, podọ awàgba dopo ogblo etọn, adáẹnẹsọzẹn; podọ awàgba awe wẹ jiyìyì etọn lọ; azò etọn lẹ lọ yín blebu dopo po e po. ²⁶E sọ yí sika akú do bú i, aga etọn lọ, po awà etọn lẹ po lédo pé, po azò etọn lẹ po: é sọ basi otónugbá sika tọn de nẹ̃ lódo pé. ²⁷E sọ basi alọkẹ sikanọ awe nẹ̃ to otónugbá etọn awe lẹ glọ, to adà etọn awe lẹ ji, to awà etọn awe lẹ ji, na otẹnmẹ lẹ na opò lẹ nado nọ yí do zé e. ²⁸E sọ basi opò atin akasia tọn lẹ, bo yí sika do bú yé. ²⁹E sọ basi amì sisá wiwe lẹ, po nuwhẹnwán akú nuyọnwán vivi tọn lẹ lọ po, kẹdẹdi anà nusisábasitọ lọ tọn.

¹E sọ yí atin akasia tọn do basi agbà avọ́nunina mimẹ̀ tọn lọ: awàgba atón wẹ ote etọn lọ, podọ awàgba atón ogblo etọn, adáẹnẹsọzẹn; podọ awàgba atọ̀n jiyìyl etọn. ²E sọ basi azò etọn lẹ lọ do lọnglọnẹn é tọn ẹnẹ lẹ ji; azò etọn lẹ lọ yín blebu dopo po e po: é sọ yí ogànvẹ̃ do bú L ³E sọ basi núzinzán agbà lọ tọn lẹpo, ozẹ́n lẹ lọ, po fẹli lẹ po, po ẹiklẹ lẹ po, opla olàn tọn lẹ, po ogànzén lẹ po: nuzinzán etọn lẹpo é do basi ogànvẹ̃ tọn. ⁴E sọ basi na agbà lọ owén odòzón ogànvẹ̃ tọn de, to opẹpẹ lọ glọ lédo e pó todò, he jẹ odá etọn taga. ⁵E sọ kòn alọkẹ ẹnẹ na opodo ẹnẹ owón ogànvó tọn lọ tọn, nado yín otenmẹ lẹ na opò lẹ lọ. ⁶E sọ yí atin akasia tọn do basi opò lẹ lọ, bo yí ogànvẹ̃ do bú yé. ⁷E sọ yí opò lẹ lọ do alọkẹ lẹ lọ mẹ to awá agbà lọ tọn lẹ go, nado nọ yí do zè e hẹn; é yi owhlẹ lẹ do basi ì sódò.

⁸E sọ basi ozẹ́nvla ogànvó tọn lẹ, podọ ozòn etọn ogànvó tọn, mẹpónnu yọnnusi he nọ plidopọ nado wàdevizọ́n to ohòn ogohò opli tọn lọ tọn ji lẹ tọn.

⁹E SỌ basi akànmahò lọ: na awà hùwaji tọn hlan hùwaji dali avọ̀dido akànmahò lọ tọn lẹ yín alavó sislo dagbedagbe tọn, awàgba kanweko: ¹⁰odòtin yetọn lẹ yín oko, oslò yetọn lẹ oko, ogànvẹ̃ tọn; ahlà odòtin lẹ lọ tọn po osé yetọn lẹ po yín fataka tọn. ¹¹Podọ na awà agewaji tọn awàgba kanweko, odòtin yetọn lẹ oko, po oslò yetọn lẹ po oko, ogànvẹ̃ tọn: ahlà odòtin lẹ lọ tọn po osé yetọn lẹ po fataka tọn ¹²Podọ na awà whèyihọ tọn wẹ avọ̀dido awàgba kandeao tọn te, odòtin yetọn lẹ ao, po oslò yetọn lẹ po ao; ahlà odòtin lọ tọn lẹ po osé yetọn lẹ po fataka tọn. ¹³Podọ na awà whèzẹtẹn tọn hlan whezòtẹn dali awàgba kandeao. ¹⁴Avọ̀dido lẹ na awà dopo hòngbo lọ tọn yín awàgba fọtọ̀n; odòtin yetọn lẹ atón, po oslò yetọn lẹ po atọ̀n; ¹⁵podọ mọ sọ wẹ na awà awetọ lọ: to alọ he go podọ to alọ nẹ go to hòngbo akànmahò lọ tọn dali wẹ avọ̀dido awàgba fọtọ́n tọn te; odòtin yetọn lẹ atọ̀n, po oslò yetọn lẹ po atón. ¹⁶Avọ̀dido akànmahò lọ tọn lẹpo lẹ́do pé yín alavọ̀ sislo dagbedagbe tọn. ¹⁷Podọ oslò lẹ lọ na odòtin lọ lẹ yín ogànvẹ̃ tọn; ahlà odòtin lẹ lọ tọn lẹ po osé yetọn lẹ po fataka tọn; podọ dido otado yetọn lẹ tọn fataka tọn; podọ odòtin akànmahò lọ tọn lẹpo yín yíyí fataka do whèsóna. ¹⁸Podọ obasẹ lọ na ohòngbo akànmahò lọ tọn yín azọ́n yénvinàwàtọ lọ tọn, avọ̀ahọ́vẹ̃ tọn, po avọ̀gefunwunmẹ po, po avọ̀vẹ̃sẹsẹ po, po alavọ̀ sisló dagbedagbe po: awàgba oko wẹ ote lọ, podọ jiyìyì to ogblo mẹ yín awàgba atọ́n, sọgbèhẹ avọ̀dido akànmahó lọ tọn lẹ. ¹⁹Ẹnẹ wẹ odòtin yetọn lẹ, po oslò yetọn lẹ po ẹnẹ, ogànvẹ̃ tọn; ahlà yetọn lẹ fataka tọn, po dido otado yetọn lẹ tọn po po osé yetọn fataka tọn lẹ po. ²⁰Po osé gohọ̀túntún lọ tọn lẹpo po, po akànmahó lọ tọn po lédo pé, yín ogànvẹ̃ tọn.

²¹Ehe wẹ osọha onú lọ lẹ tọn na gohọ̀túntún lọ, yèdọ gohọtúntún okunnuhó lọ tọn, dile yé yín linlẹn do, kẹdẹdi gbèdide Moṣe tọn lọ, na sinsán Levinu lẹ lọ tọn, gbọn alọ Itama tọn lọ dali, visunnu Aalọn yẹwhenọ lọ tọn. ²²Bezaleli visunnu Uli tọn lọ, visunnu Huli tọn, sọn whẹndo Juda tọn mẹ, basi ehe OKLUNỌ lọ degbèna Moṣe lẹpo. ²³Podọ Oholiabi, visunnu Ahisamaki tọn lọ, sọn whẹndo Dani tọn mẹ, ayáwàtọ de, podọ azọ́nwàtọ anànọ de, podọ yénvinàwàtọ de to avọ̀ahóvẹ̃ mẹ, podọ to avọ̀gefunwunmẹ mẹ, podọ to avọ̀vẹ̃sẹsẹ mẹ, po alavọ̀ dagbedagbe po.

²⁴Sika lẹpo he yè zán na azọ̀n to azón fìwiwe lọ tọn mẹ lẹpo, yèdọ avọ́nunina lọ tọn lọ, yín talẹnti koatonnukunẹnẹ, po ṣẹkle nuọntọ̀nkantọ̀nao po, kẹdẹdi ṣẹkle fiwiwe lọ tọn. ²⁵Podọ fataka yé he yè yísọhana lẹ tọn sọn agùn lọ mẹ yín talẹnti kanweko, po ṣẹkle fọsinatọ̀nkẹnnẹnfọtọ̀n po, kẹdẹdi ṣẹkle fìwiwe lọ tọn: ²⁶bẹka dopo ota dopo, enẹ wẹ, odá ṣẹkle dopo tọn, kẹdẹdi ṣẹkle fìwiwe lọ tọn, na omẹ dopodopo he juyi gododọ̃n jẹ yé he yè yísọhana lẹ de, sọn owhè ọko mẹho podọ humọ, na sunnusi fọtọ̀n nuọntọ̀nnukunatọ̀n é lán fowekantọ̀ngbàn. ²⁷Talẹnti kanweko fataka tọn lẹ lọ wẹ na kinkòn oslò fìwiwe lọ tọn lẹ, oslò avọ̀ajlalanọ lọ tọn lẹ po; oslò nweko na talẹnti kanweko lọ, talẹnti dopo na oslò dopo. ²⁸Sọn ṣẹkle nuọntọ̀nkẹnnẹnfọtọ̀n lọ mẹ é basi ahlà lẹ na odòtin lẹ lọ, bo búnudo otado yetọn lẹ, bo sọ basi osé lẹ na yé. ²⁹Podọ ogànvẹ̃ avọ́nunina lọ tọn yín talẹnti kandegbàn, po ṣẹkle fófòwe po. ³⁰Enẹ wẹ é yí do basi oslò lẹ hlan ohòn ogohò opli tọn lọ tọn, po agbà ogànvẹ̃ tọn lọ po, po owén ogànvẹ̃ tọn lọ po nẹ̃, po nuzinzán agbà lọ tọn lẹpo po, ³¹po òslò akànmahò lọ tọn lẹ po lédo pé, po oslò ohòngbo akànmahò lọ tọn lẹ tọn po, po osé akànmahò lọ tọn lẹpo po lẹdo pó.

¹PODỌ sọn avọ̀ahóvẹ̃ lọ mẹ, po avọ̀gefunwunmẹ po, po avọ̀vẹ̃sẹsẹ po, yé basi awu titọ dagbedagbe lẹ, na devizọ́nwiwà to otẹn wiwe lọ mẹ, bo sọ basi awu wiwe lẹ lọ na Aalọn; dile OKLUNỌ lọ degbèna Moṣe do.

²E sọ basi efọdi sika tọn lọ, avọ̀ahóvẹ̃, po avọ̀gefunwunmẹ po, po avọ̀vẹ̃sẹsẹ po, po alavọ̀ sislo dagbedagbe po. ³Yé sọ tùn sika lọ ádáádá, bo sọ zè ẹ do tínlintínlin nado yí do wàzón to avọ̀ahóvẹ̃ lọ me, podọ to avọ̀gefunwunmẹ lọ mẹ, podọ to avọ̀vẹ̃sẹsẹ lọ mẹ, podọ to alavọ̀ sislo dagbedagbe lọ me, azọ́n azọ́nwàtọ anànọ lọ tọn lọ. ⁴Ye basi abọjivò lẹ nẹ, he yè sìndopọ: do opodo awe lẹ go wẹ yè sìn i do. ⁵Po homẹbla yè yí anà do lòn lọ po, he tin to e ji, nado yí i do gbànhòmẹ yín blebu dopolọ tọn podọ taidi azọ́n eton lọ; sika tọn, avọ̀ahóvẹ̃ tọn, po avọ̀gefunwunmẹ po, po avọ̀vẹ̃sẹsẹ po, po alavọ̀ sislo dagbedagbe po; dile OKLUNỌ lọ degbèna Moṣe dọ.

⁶Yé sọ wàzọ́n zannu oniksi lọ lẹ tọn, he yè bú do oslò sika tọn lẹ me, he yè yí winwlan hiadonu de tọn le do wlan, kẹdẹdi oyín ovi Islaeli tọn lẹ ton. ⁷E sọ yí yé do abòjivò efọdi lọ tọn ji, nado yín zannu oflinnu tọn lẹ na ovi Islaeli tọn lẹ; dile OKLUNỌ lọ degbèna Moṣe do.

⁸E sọ basi otùnudo lọ azọ́n azọ́nwàtọ anànọ lọ tọn, jijlẹ do azọ́n efọdi lọ tọn go; sika tọn, avọ̀ ahóvẹ̃ tọn, po avọ̀getunwunmẹ po, po avọ̀vẹ̃ṣẹṣẹ po, po alavọ̀ dagbedagbe po. ⁹Ádàẹnẹsọzén wẹ; yé basi otùnudo lọ awepọ: alọkikẹ dopo ogblo etọn, yínyín awepọ ¹⁰Yé sọ tò ohá ẹnẹ zannu lẹ tọn do e mẹ: ohá saldinsi tọn de, tapazi, po kalbunkli po wẹ ohá tintan lọ. ¹¹Podọ ohá awetọ lọ, emelaldi de, safile de, po diamọndi de po. ¹²Ohá atọ̀ntọ lọ, jasinti de, agate de, po ametisti de po. ¹³Podọ ohá ẹnẹtọ lọ, belili dẹ, oniksi de, po jaspeli de po: yè bú yé do oslò sika tọn lẹ mẹ to titò yetọn lẹ mẹ. ¹⁴Zannu lẹ lọ sọ tin kẹdẹdi oyín ovi Islaeli tọn lẹ tọn wiawe, kẹdẹdi oyín yetọn lẹ; jijlẹ do winwlan hiadonu de tọn lọ go, omẹ dopodopo kẹdedi oyín etọn, na whẹndo wiawe le lọ. ¹⁵Yé sọ basi ogòdẹ di kànsisló lẹ do otùnudo lọ ji, azọ̀n nusislo tọn sọn sika mẹ. ¹⁶Yé sọ basi oslò awe sika tọn lẹ, po alọkẹ sika tọn awe po; bo sọ yí alọkẹ awe lẹ do opodo otùnudo lọ tọn awe lẹ go. ¹⁷Yé sọ yí ogèdẹ sislo sika tọn awe lẹ do alọkẹ awe lẹ lọ go to opodo otùnudo lọ tọn go. ¹⁸Podọ opodo awe awetọ ogòdẹ sislo awe lẹ lọ tọn yé yí do oslò awe lẹ lọ go, bo yí yé do abójivò efọdi lọ tọn go, to nukọn etọn. ¹⁹Yé sọ basi alọkẹ awé sika tọn, bo yí yé do opodo awe otùnudo lọ tọn ji, do otónu etọn ji, he tin to awà efọdi lọ tọn dali hlanhòmẹdali ²⁰Yé sọ basi alọkẹ awe sika tọn bo yí yé do abòjivò awe efọdi lọ tọn go toglọ, to nukọn etọn, sèpọ sìnsìnpla etọn to ota homẹbla efọdi lọ tọn he yè yí ànà do lòn lọ. ²¹Yé sọ yi ylọnkọndu avọ̀a, hóvẹ̃ tọn de do sìn otùnudo lọ gbọn alọkẹ etọn lẹ dali hlan alọkẹ efọdi lọ tọn lẹ, na é nido tin to homẹbla efọdi tọn he yè yí anà do lòn lọ ji, podọ na otùnudo lọ nido yín túntún sọn efọdi lọ go blo; dile OKLUNỌ lọ degbèna Moṣe do.

²²E sọ basi otewu efọdi lọ tọn sọn azọ̀n linlọ̀n mẹ, popolẹpo avọ̀ ahóvẹ̃ tọn; ²³podọ odò otewu lọ tọn to gblagbla etọn mẹ, di odò odòwu awhánwu tọn de tọn, po sìnsìn de po lédo odò etọn lọ, na é ma na do yín tintlẹn. ²⁴Yé sọ basi do tónuyinyẹn otewu lọ tọn lẹ ji pomeglanate avọ̀ahóvẹ̃ ton lẹ, po avọ̀gefunwunmẹ po, po avọ̀vẹ̃sẹsẹ po, po alavọ̀ sislo po. ²⁵Yé sọ basi azà sika akú tọn lẹ, bo sọ yí azà lẹ lọ do ṣẹnṣẹn pomeglanate lẹ tọn to tónuyinyẹn otewu lọ tọn lẹ ji lẹ́do pé, to pomeglanate lẹ lọ ṣẹnṣẹn. ²⁶Azà dopo pomeglanate dopo, azà dopo pomeglanate dopo, to tónuyinyẹn otewu lọ tọn ji lòdo pé, nado nọ wàdevizọn to e mẹ; dile OKLUNỌ lọ degbèna Moṣe do.

²⁷Yé sọ basi odòwu azon linlọ̀n alavọ̀ dagbedagbe tọn lẹ na Aalọn po visunnu etọn lẹ po, ²⁸po yẹwhenọgbákun alavọ̀ dagbedagbe tọn lọ po, po zínvò whànpẹnọ alavọ̀ dagbedagbe tọn po, po sokoto alavọ̀ dagbedagbe sislo tọn lẹ po, ²⁹po ogbaja alavọ̀ dagbedagbe sislo tọn lẹ lọ po, po avọ̀ahóvẹ̃ po, po avọ̀gefunwunmẹ po, po avọ̀vẹ̃sẹsẹ po, azọ̀n yẹnvinàwàto lọ tọn; dile OKLUNỌ lọ degbèna Moṣe do.

³⁰Yé sọ basi agbàn jẹgbakun wiwe lọ tọn sọn sika akú mẹ, bo wlan hówinwlan de do e jì jijlẹ do winwlan hiadonu de tọn go, Wiwe hlan OKLUNỌ lọ. ³¹Yè sọ sìn avọ̀ylọnkòndu avọ̀ahóvẹ̃ tọn de do e go, nado dòn ẹn bò do yẹwhenọgbákun lọ go taga; dile OKLUNỌ lọ degbèna Moṣe do.

³²Le wẹ yè vọ̀ azọ̀n gohọ̀túntún ogohọ̀ opli tọn lọ tọn do; Ovi Islaeli tọn lẹ basi kẹdẹdi ehe OKLUNỌ lọ degbèna Moṣe lẹpo, mọwẹ yé wà do.

³³Yé bo sọ hẹn gohọ̀túntún lọ wá Moṣe de, Ogohọ̀ lọ, po asọvànú etọn lẹpo po, opla etọn lẹ, owhlẹ etọn lẹ, okọ̀pla etọn lẹ, po odòtin etọn lẹ po, po oslò etọn lẹ po; ³⁴po oṣinyọn agbòyù yè yí ayúdànuvò do dà tọn po, po oṣinyọn sealiyú tọn po, po avọ̀ajlalanọ obasẹ lọ tọn lọ po; ³⁵alki okunnuhó Íọ tọn, po opò etọn lẹ po, po aisintẹn-lẹblanu tọn lọ po; ³⁶tafo lọ, núzinzán etọn lọ lẹpo, po aklaadlọ lọ po; ³⁷miyọngbántin wiwe lọ, miyọngbán etọn lẹ, yèdọ miyọngbán lẹ lọ nado yín titò do hajihaji, po núzinzán etọn lọ lẹpo po, po amì lọ po na hinnọn lọ. ³⁸Po agbà sikanọ lọ po, po amì sisá lọ po, po nuwhẹnwán vivi lọ po, po obasẹ lọ po na ọhòn Ogohọ̀ lọ tọn; ³⁹agbà ogànvẹ̃nọ lọ, po owẹn etọn ogànvẹ̃ tọn po, po opò etọn lẹ po, po nuzinzán etọn lẹpo po, ozẹ́nvla lọ po ozòn etọn po; ⁴⁰avọ̀dido akànmahò lọ tọn lẹ, odòtin etọn le, po oslò eton lẹ po, po obasẹ lọ po na họ̀ngbo akànmahò lọ tọn, okànsislo etọn lẹ, po osé etọn lẹ po, po núzinzán sinsẹ̀n gohọ̀túntún lọ tọn lọ tọn lẹpo po, na ogohọ̀ opli tọn lọ; ⁴¹awu linlòn dagbedagbe le lọ na devizònwiwà to ofi; wiwe lọ mẹ, po awu wiwe lẹ lọ po na Aalọn yẹwhenọ lọ, po awu visunnu etọn lẹ tọn lẹ po, nado nọ wàdevizọ́n to azọ́nhò yẹwhenọ tọn lọ mẹ. ⁴²Kẹdẹdi ehe OKLUNỌ lọ degbèna Moṣe lẹpo, mọwẹ ovi Islaeli tọn lẹ wà azọ̀n lọ do. ⁴³Moṣe sọ mọ azón lọ lẹpo, bo, dayi e go, yé ko wà ẹ; dile OKLUNỌ lọ ko degbèna do, yèdọ mọwẹ yé ko wà ẹ do: Moṣe bo sọ dona yé.

¹OKLUNỌ sọ dọ hlan Moṣe, dọmọ, ²To azán tintan osùn tintan lọ tọn gbè wẹ hiẹ na gla gohọ̀túntún ogohò opli tọn lọ tọn dote. ³Hiẹ bo nasọ yí alki okunnuhó lọ tọn lọ do e mẹ, hiẹ bo nasọ yí avọ̀ajlalanọ do dobasọna alki lọ. ⁴Hiẹ bo nasọ hẹn tafo lọ wá họmẹ, bo tò onú he tin to e ji lẹpo do hajihaji; hiẹ bo nasọ hẹn miyọngbántin lọ wá hòmẹ, bo zé miyọngbàn etọn lẹ dote. ⁵Hiẹ nasọ zé agbà sikanọ lọ dote na nuwhẹnwán to nukọn alki okunnuhó lọ tọn, bo yi obasẹ ohòn lọ tọn lọ do gohọ̀túntún lọ nu. ⁶Hiẹ nasọ zé agbà avọ́nunina mimẹ̀ tọn lọ dote to ohòn gohọ̀túntún ogohò opli tọn lọ tọn nukọn. ⁷Hiẹ na zé ozẹ́nvla lọ do ogohò opli tọn po agbà lọ po ṣẹnṣẹn, bo na yí osìn do e mẹ. ⁸Hiẹ na zé akànmahò lọ dote lédo pó, bo sọ zé obasẹ hòngbo akànmahò lọ tọn lọ pla dote. ⁹Hiẹ bo na yí amì sisá lọ, bo sámìsisána gohọ̀túntún lọ, po ehe tin to e mẹ lẹpo po, bo nasọ hiọ ẹ, po asọvànu etọn lẹpo po: é bo nasọ yín wiwe. ¹⁰Hiẹ nasọ sámìsisana agbà avọ́nunina mimẹ̀ tọn lọ, po núzinzán etọn lẹpo po, bo hen agbà lọ zùn wiwe: agbà bo nasọ yín wiwe gbahugbahu. ¹¹Hiẹ nasọ sámìsisana ozẹ́nvla lọ po ozòn etọn po, bo hẹn ẹn zùn wiwe. ¹²Hie na hẹn Aalọn po visunnu etọn lẹ po wá ohọn ogohò opli tọn lọ tọn kòn, bo yí osìn do lèawuna yé. ¹³Hiẹ na yí awu wiwe lẹ lọ do Aalọn ji; hiẹ bo na sámìsisána ẹn, bo hẹn ẹn zùn wiwe, na é nido wàdevizọn hlan mi to azọ́nhò yẹwhenọ tọn lọ mẹ. ¹⁴Hiẹ nasọ hẹn visunnu etọn lẹ wá, bo yí odòwu lẹ do yé ji: ¹⁵hiẹ bo nasọ sámìsisána yé, dile hiẹ sámìsisána otọ́ yetọn do, na yé nido wàdivizón hlan mi to azónhó yẹwhenọ tọn lọ mẹ; podọ amìsisá yetọn na tin hlan yé na yẹwhenọdùta madopodo de gbọn whẹndo yetọn lẹpo mẹ. ¹⁶Le wẹ Moṣe wà do: kẹdẹdi ehe OKLUNỌ lọ degbèna ẹn lẹpo, mọwẹ é wà do.

¹⁷E sọ wá jọ to osùn tintan mẹ to owhè awetọ lọ mẹ, to azán tintan osùn lọ tọn gbè, wẹ gohọ̀túntún lọ yín gigla daga. ¹⁸Moṣe gla gohọ̀túntún lọ, bo do oslò etọn lẹ, bo tò owhíẹ etọn lẹ, bo yí okòpla etọn lẹ do e mẹ, bo sọ zé odòtin etọn lẹ dote. ¹⁹E sọ dlẹn ogohò lọ do gohọ̀túntún lọ ji, bo yí oẹinyọn ogohò lọ tọn daga nè; dile OKLUNỌ lọ degbèna Moṣe do. ²⁰E bo sọ zé bo yí okunnuhó lọ do alki lọ mọ, bo tò opò lẹ lọ do alki lọ go, bo sọ yí aisintẹn-lẹblanu lọ tọn daga do alki lọ ji: ²¹é sọ hẹn alki lọ wá biọ gohọ̀túntún lọ mẹ, bo zé avọ̀ajlalanọ obasẹ lọ tọn lọ dote, bo dobasẹna alki okunnuhó lọ tọn; dile OKLUNỌ lo degbèna Moṣe do. ²²E yí tafo lọ do ogohò opli tọn lọ mẹ, do awà gohọ̀túntún lọ tọn ji hlan agewaji dali, to avọ̀ajlalanọ lọ godo. ²³E sọ tò akla lọ do haji haji do e ji to OKLUNỌ lọ nukọn; dile OKLUNỌ lọ degbèna Moṣe do. ²⁴E yi miyọngbántin lọ do ogohò opli tọn lọ mẹ, taga pànnukọn tafo lọ, to awà gohọ̀túntún lọ tọn go hlan hùwaji dali. ²⁵E sọ tá miyọngbán lẹ lọ to OKLUNỌ lọ nukọn; dile OKLUNỌ lọ degbèna Moṣe do. ²⁶E yi agbà sikanọ lọ do ogohò opli tọn lọ mẹ to avọ̀ajlalanọ lọ nukọn. ²⁷E bo sọ mò nuwhẹnwán nuyọnwán vivi tọn lẹ to e ji; dile OKLUNỌ lọ degbèna Moṣe do. ²⁸E bo sọ yí obasẹ ohòn lọ tọn do gohọ̀túntún lọ nu. ²⁹E sọ zé agbà avọ́nunina mimẹ̀ tọn lọ do ohòn gohọ̀túntún ogohò opli tọn lọ tọn kòn, bo na avọ́nunina mimẹ̀ lọ to e ji, po avọ́nunina jinulìli lọ po; dile OKLUNỌ lọ degbèna Moṣe do. ³⁰E sọ zé ozẹ́nvla lọ do ogohò opli tọn lọ po agbà lọ po ṣẹnṣẹn, bo yí osìn do e mẹ, nado nọ yí do lèawu. ³¹Moṣe po Aalọn po po visunnu etọn lẹ po sọ klọ alọ yetọn lẹ po afọ yetọn lẹ po tofinẹ; ³²whenuena yé yì biọ ogohò opli tọn lọ mẹ, podọ whenuena yé wá sèpọ jẹ agbà lọ kòn, yé nọ léawu: dile OKLUNỌ lọ degbèna Moṣe do. ³³E sọ gla akánmahó lọ dote lédo gohọ̀túntún lọ pó po agbà lọ po, bo zé obasẹ ohòngbo akànmahò lọ tọn tọn lọ dote. Mowẹ Moṣe vò azón lọ do.

³⁴Whenẹnu wẹ aslọ lọ ṣinyọn ogohò opli tọn lọ ji, gigo OKLUNỌ lọ tọn sọ gó gohọ̀túntúnlọmẹ. ³⁵Moṣe ma sọ sọgan nado biọ ogohò opli tọn lọ mẹ gba, na aslọ lọ to ninò finẹji wutu, bọ gigo OKLUNỌ lọ tọn sọ gó gohọ̀túntún lọ mẹ. ³⁶Whenuena yè zé aslọ lọ daga sọn gohọ̀túntún lọ ta, ovi Islaeli tọn lẹ nọ dèdonukòn jei, gbọn gbójizọnlin yetọn lẹpo mẹ: ³⁷ṣigba eyín yè ma zé aslọ lọ daga, whenẹnu yé ma nọ jẹ gbéjizọnlinji kaka jẹ azán he gbè yè zé e daga. ³⁸Na aslọ OKLUNỌ lọ tọn lọ nọ tin to gohọ̀túntún lọ ji to okle, miyọn bo sọ nọ tin to e mẹ finẹ to ozánmẹ, to nukun owhó Islaeli tọn lẹpo tọn mẹ, gbọn gbéjizọnlin yetọn lẹpo mẹ.